'dra ba drug gi glu chung mos ldan snying gi gdung sel

From Shangpa Resource Center
Revision as of 09:16, 1 March 2019 by Sengue (talk | contribs)








Resource ID Bok3
Title 'dra ba drug gi glu chung mos ldan snying gi gdung sel
Topics Chant
Author Bokar Rinpoché

༈ །།འདྲ་བ་དྲུག་གི་གླུ་ཆུང་མོས་ལྡན་སྙིང་གི་གདུང་སེལ་ཞེས་བྱ་བ་བཞུགས་སོ།

།ཁྱེད་སྐལ་སྡན་ལས་ཅན་ཕོ་མོ་རྣམས། །དལ་འབྱོར་གྱི་མི་ལུས་རིན་ཆེན་ཐོབ། །ཚད་ལྡན་བླ་མ་རྗེ་དང་མཇལ། །ཟབ་རྒྱས་སྨིན་གྲོལ་གདམས་པ་ཐོབ། །ད་ཉམས་ལེན་འབད་འབུངས།འདོན་པར་འཚལ། །བླ་མ་འདི་ནམ་མཁའི་ཉི་མ་དང་འདྲ་འདུག །ཐེ་ཚོམ་ལོག་རྟོགས་ཀྱིས་མ་སྒྲིབ་ན། །ཐུགས་རྗེའི་འོད་ཟེར་རྒྱུན་ཆད་མེད། །དད་མོས་གདུང་བས་གསོལ་བ་ཐོབ། །དག་སྣང་འདི་མིག་གི་འབྲས་བུ་དང་འདྲ་འདུག །ང་རྒྱལ་སྐྱོན་རྟོག་གིས་མ་སྒྲིབ་ན། །འགྲོ་ཀུན་ཡོན་ཏན་འབྱུང་གནས་ཡིན། །ཕྱོགས་མེད་ཀྱི་དག་སྣང་འབྱོང་བར་འཚལ། །སེམས་བསྐྱེད་འདི་དཀར་པོའི་ས་བོན་དང་འདྲ་འདུག །རང་དོན་ཡིད་བྱེད་ཀྱིས་མ་བསླད་ན། །རྫོགས་པའི་བྱང་ཆུབ་འདི་ལས་འབྱུང་། བྱང་ཆུབ་སེམས་གཉིས་རྟག་ཏུ་སྒོམ། །བདག་འཛིན་འདི་མ་མཐོང་དགྲ་བོ་དང་འདྲ་འདུག །དྲན་ཤེས་གཉེན་པོ་མ་བསྟེན་ན། །སྡུག་བསྔལ་གནས་ལས་ཐར་དུས་མེད། །དེ་ཕྱིར་རང་རྒྱུད་འདུལ་བར་མཛོད། །སེམས་ཉིད་འདི་མཐའ་ཡས་རྒྱ་མཚོ་དང་འདྲ་འདུག །མཚན་འཛིན་རྦ་རླབས་མ་གཡོས་ན། །ཆོས་ཉིད་ངོ་བོ་རོ་གཅིག་ཡིན། །སྤང་བླང་དགག་སྒྲུབ་མེད་པར་འཚལ། །རང་སེམས་འདི་ཡིད་བཞིན་གྱི་ནོར་བུ་དང་འདྲ་འདུག །འཁྲུལ་པའི་དྲི་མས་མ་བསླད་ན། །དགོས་འདོད་ཐམས་ཅད་འདི་ལས་འབྱུང་། །རྟག་ཏུ་ཕྱག་རྒྱ་ཆེན་པོ་སྒོམ། །འདི་ཕྱི་བར་དོ་ཐམས་ཅད་དུ། །བླ་མའི་ཐུགས་དང་རང་གི་སེམས། །ཐ་དད་མ་ཡིན་རང་རིག་འདི། །མ་ཡེངས་མི་འཛིན་རང་བབ་ངང་། །གདོད་མའི་ཆོས་སྐུ་མངོན་གྱུར་ཤོག
།ཅེས་འདྲ་བ་དྲུག་གི་གླུ་ཆུང་མོས་ལྡན་སྙིང་གི་གདུང་སེལ་ཞེས་བྱ་བ་འདི་ཕ་རན་སི་ནི་གུ་གླིང་གི་སྒྲུབ་སྡེ་མ་རྣམས་ཀྱི་ཐུགས་འདོད་ལྟར་འབོ་དཀར་སྤྲུལ་མིང་ཀརྨ་ངེས་དོན་ཆོས་ཀྱི་བློ་གྲོས་ཀྱིས་སོ།

༈ །སྐྱབས་གནས་ཀུན་འདུས་སངས་རྒྱས་ཀརྨ་པ། །རིག་པའི་རྡོ་རྗེ་ཞབས་ལ་གསོལ་བ་འདེབས། །བདག་སོགས་འགྲོ་བའི་བློ་སྣ་ཆོས་ལ་བསྒྱུར། །ཐར་པའི་ལམ་སྣ་ཟིན་པར་བྱིན་གྱིས་རློབས།
།དལ་འབྱོར་རྙེད་དཀའ་འཆི་བ་མི་རྟག་དང་། །ལས་འབྲས་བསླུ་མེད་འཁོར་བའི་ཉེས་དམིགས་བཅས། །ཡང་ཡང་བསྒོམས་པས་ཞེན་ལོག་ངེས་འབྱུང་གིས། །ལོང་མེད་བློ་སྣ་ཐུང་བར་བྱིན་གྱིས་རློབས།
།དཀོན་མཆོག་སྐྱབས་འགྲོ་ཐེག་ཆེན་བྱང་ཆུབ་སེམས། །སྒྲིབ་སྦྱོང་རྡོར་སེམས་ཚོགས་གསོག་མཎྜལ་དང་། །ཟབ་ལམ་མོས་གུས་བླ་མའི་རྣལ་འབྱོར་ལ། །བརྩོན་པས་ཕྱག་ཆེན་རྟོགས་པར་བྱིན་གྱིས་རློབས།
།ཡོན་ཏན་ཀུན་གཞི་ཚུལ་ཁྲིམས་རིན་པོ་ཆེ། །སྙིགས་དུས་ཉེས་སྤྱོད་དྲི་མས་མ་བག་པར། །བསྟན་དང་སྟོན་པ་གཉིས་ལྡན་བསླབ་པ་ལ། །གུས་པ་ལྷུར་ལེན་མིག།འབྲས་ལྟར་སྲུང་ཤོག
།ཉམ་ཐག་འགྲོ་ལ་སྙིང་ནས་བརྩེ་བ་ཡིས། །མཐོང་ཐོས་དྲན་རེག་འབྲེལ་བའི་སེམས་ཅན་ཀུན། །སྡུག་བསྔལ་ཀུན་བྲལ་ཐར་པའི་སར་འགོད་པའ། །སྨོན་འཇུག་བྱང་ཆུབ་སེམས་མཆོག་སྐྱེ་བར་ཤོག
།ཐ་མལ་སྣང་གྲགས་རྟོག་པའི་ཆོས་རྣམས་ཀུན། །གདོད་ནས་རྣམ་དག་ལྷ་སྔགས་ཡེ་ཤེས་ཀྱི། །རོལ་པར་ཤེས་པས་འཁྲུལ་པ་ཀུན་ཟད་དེ། །རིམ་གཉིས་དབང་དོན་ཡེ་ཤེས་བརྙེས་པར་ཤོག
།དུས་གསུམ་རྒྱལ་བའི་དགོངས་པ་རང་གི་སེམས། །ཐ་མལ་ཤེས་པ་རྗེན་པའི་རང་ངོ་ལ། །མ་ཡེངས་མི་སྒོམ་ལྷུག་པའི་ཉམས་ལེན་གྱིས། །ཚེ་འདིར་གཉུག་མའི་བཙན་ས་ཟིན་པར་ཤོག
།མདོར་ན་འདི་ནས་བྱང་ཆུབ་སྙིང་པོའི་བར། །རྣམ་དག་ལྟ་བ་སྤྲོས་པ་ཀུན་བྲལ་ཞིང་། །ཡེ་ཤེས་རང་གསལ་སྒོམ་པ་མཐའ་རུ་ཕྱིན། །ལས་འབྲས་ལྷུར་ལེན་རྒྱལ་སྲས་སྤྱོད་པ་ཡིས། །སྐུ་གཉིས་འབྲས་བུ་ཐོབ་པར་བྱིན་གྱིས་རློབས།
།ཞེས་ཧོང་ཀོང་ཆོས་ཚོགས་བླ་བསྐོས་བླ་མ་སྐལ་བཟང་ནས་བསྐུལ་བཞིན་གང་དྲན་གསོལ་འདེབས་གྱི་ཚུལ་དུ་འབོ་སྤྲུལ་པས་བྲིས་པའོ།།

༈ །།འོད་གསལ་རང་བཞིན་འཁོར་འདས་ཀུན་ལ་ཁྱབ། །འོད་གསལ་གནས་ལུགས་བླ་མ་དམ་པས་སྟོན། །འོད་གསལ་ཕྱག་ཆེན་སྒོམ་པའི་སྐལ་ལྡན་རྣམས། །འོད་གསལ་བྱང་ཆུབ་སྙིང་པོར་འཚང་རྒྱ་ཤོག
།རྒྱལ་བས་གདུལ་བྱའི་མོས་ཁམས་དང་མཚུངས་པའི། །མདོ་སྔགས་ཆོས་ཚུལ་རྣམ་གྲངས་དཔག་མེད་ཀྱང་། །གཅིག་བཞག་གཉིས་སྒྲུབ་གཏད་སོ་གཅིག་ཀྱང་མེད། །དེ་བས་ཉམས་ལེན་གཅིག་ལ་འབད་ན་ལེགས།
།ཚིག་སྙན་དོན་ཟབ་ལྟ་བ་མཐོན་པོའི་ཆོས། །ཐོབ་འདོད་རྩོལ་བས་ལུས་སེམས་མི་དུབ་པར། །རང་བློར་འཚམས་པའི་གང་ཐོབ་དམ་ཆོས་ལ། །ངེས་ཤེས་ཉམས་ལེན་བགྱིས་དང་སེམས་ལ་ཕན།
ཞེས་པའང་འབོ་དཀར་སྤྲུལ་མིང་ཀརྨ་ངེས་དོན་ཆོས་ཀྱི་བློ་གྲོས་ཀྱིས་སོ།།