'khor lo'i sgo nas dgra bgegs bsad pa'i las sbyor mgon po mdos kyi zhangs pa lo tsA ba gnang ba

From Shangpa Resource Center
Revision as of 18:07, 25 February 2019 by Sengue (talk | contribs)








Resource ID SCv11p906
Title 'khor lo'i sgo nas dgra bgegs bsad pa'i las sbyor mgon po dngos kyis shangs pa lo tsA ba la gnang ba
Topics Chadrupa
Sub-Topics Various
Author Khyungpo Neljor
Link BDRC W23922

༈ འཁོར་ལོའི་སྒོ་ནས་དགྲ་བགེགས་བསད་པའི་ལས་སྦྱོར་མགོན་པོ་དངོས་ཀྱིས་ཤངས་པ་ལོ་ཙཱ་བ་ལ་གནང་བ་བཞུགས་སོ།།
༈ ༼ཧེ༽ ན་མོ་མ་ཧཱ་ཀཱ་ལ་ཡ།
འཁོར་ལོའི་སྒོ་ནས་དགྲ་བགེགས་བསད་པའི་ལས་ནི། འཁོར་ལོ་རྩིབས་བརྒྱད་ལྟེ་བ་མུ་ཁྱུད་དང་བཅས་པ། དུག་ཁྲག་གི་རོ་རས་ལ་སོགས་པ་ལ་བྲིས་པ་གཉིས་བྱས་པའི་ལྟེ་བར། ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣན་བཱི་ན་ཡ་ཀ་ཧཱུྃ་ཧཱུྃ་ཆྒཻེ་མོ་མཱ་ར་ཡ་ཕཊ། ཅེས་པ་བྲི། རྩིབས་བརྒྱད་ལ་མདུན་ནས་བརྩམས་ཏེ་རིམ་པ་བཞིན་དུ་གཡོན་བསྐོར་དུ། ཁ་ཁ་ཆྒཻེ་མོ་མཱ་ར་ཡ་ཧཱུྃ་ཕཊ། ཅེས་པ་ནས། དེ་བ་མི་ཀི་ཆཾོ་མཱ་ར་ཡ་ཧཱུྃ་ཕཊ། ཅེས་པའི་བར་སྔགས་ཆེན་བརྒྱད་བྲི་བར་བྱ་སྟེ། ཧ་ན་ཧ་ན་བོར་བའོ། །མུ་ཁྱུད་ལའང་བསད་པ་བརྒྱད་པོ་དེ་ཉིད་བྲི་བར་བྱ་སྟེ། རྩིབས་ལ། ཁ་ཁ་ཅེས་པ་བྲིས་པའི་ཐད་ཀྱི་མུ་ཁྱུད་ལའང་། ཁ་ཁ་སོགས་དང་རྩིབས་ལ་དེ་ན་མེ་ཀི་ནི་སོགས་བྲིས་པའི་ཐད་ཀྱི་མུ་ཁྱུད་ལའང་དེ་ཉིད་བྲི་བ་ལ་སོགས་པའོ། དེའི་ཕྱི་རོལ་དུ་གྲི་གུག་རྩེ་མོ་ནང་དུ་བསྟན་པ་མཚོན་ཆའི་འཁོར་ལོ་བྲི་བར་བྱ་ཞིང་། དེའི་ཕྱི་རོལ་དུ་མེ་རི་གཡོན་བསྐོར་དུ་བྲི་བར་བྱའོ། །འགོ་འཁོར་ནི་གཞན་རྣམས་སྔར་དང་འདྲ་བ་ལ། རྩིབས་བརྒྱད་ལ་སྔགས་ཆེན་བརྒྱད་ནི་གཡས་བསྐོར་དུ་བྲི་ཞིང་དེ་དང་རྗེས་སུ་མཐུན་པར་མུ་ཁྱུད་ལའང་སྔགས་གཡས་བསྐོར་དང་། མེ་རི་གཡོན་བསྐོར་དུ་བྲི་བར་བྱའོ། །འཁོར་ལོ་དེ་ཉིད་ཀྱི་བར་དུ་བཞུག་པར་བྱ་བའི་ལིངྒ་ནི། གཅེར་བུ་རིད་ཅིང་སྐྲ་གཟིངས་པའི་རྣམ་པ་ཅན་གྱི་དཔྲལ་བར་རུས་དང་མིང་། སྙིང་གར་དགྲ་ལ་ཎྲྀ་དང་བགེགས་ལ་ཏྲི་བྲིས་པའི་མཐར་ཡི་གེ་རྣམས་མགོ་ནང་དུ་བསྟན་ཅིང་ཁ་ཕྱིར་བསྟན་ཏེ། ཨོཾ་གྱི་ཀླད་སྐོར་ཎྲྀའི་ཏྲིའི་གི་གུ་མནན་པ་ལྷུར་བྱས་སྲོག་སྔགས་སྤེལ་ཚིག་དང་བཅས་པ་གཡོན་སྐོར་གྱིས་བྲི་བར་བྱའོ། །དེ་ནས་འཁོར་ལོ་གཉིས་ཀ་སྦྱོར་བའི་ལྟེ་བའི་བར་དུ་ལིངྒ་བཅུག་ཅིང་མདུན་དུ་བཞག མཆོད་གཏོར་བཤམས། རང་ཡི་དམ་གྱི་ང་རྒྱལ་ལ་གནས་པའི་མདུན་དུ་མགོན་པོ་འཁོར་བཅས་བསྐྱེད་ཅིང་ཡེ་ཤེས་པ་སྤྱན་དྲངས་ནས་བསྟིམ་པ་ལ་མཆོད་གཏོར་འབུལ་བ་དང་བཟླས་པ་ཅུང་ཟད་ཙམ་བྱས་ནས་འཁོར་ལོ་སྟོང་པར་སྦྱངས་ལ། བྷྲཱུཾ་ལས་གནམ་ལྕགས་ཀྱི་འཁོར་ལོ་མེ་རབ་ཏུ་འབར་བར་བསྐྱེད་པ་ལ་མདུན་གྱི་མགོན་པོའི་ཐུགས་ཀ་ནས་ཧཱུྃ་ལས་བསྒོམ་པ་འདྲ་བའི་འཁོར་ལོ་ཁ་སྦྱོར་སྤྲོས་ཏེ་མདུན་གྱི་བྲིས་པའི་འཁོར་ལོ་ལ་ཐིམ་པར་བསམ་པའི་རབ་ཏུ་གནས་པར་བྱའོ། །དེ་ནས་སྒྲུབ་པའི་དཀྱིལ་འཁོར་ཡོད་ན་དེའི་མདུན་དང་། མེད་ནའང་གཏོར་མའི་མདུན་དུ་འབྲུབ་ཁུང་གྲུ་གསུམ་བསྐོར་བའི་སླངས་པའམ་བྲིས་པ་གང་ཡང་རུང་བའི་དབུས་སུ་འཁོར་ལོ་ཁ་སྦྱོར་གྱི་བར་དུ་ལིངྒ་དང་བཅས་པ་ཤི་སྐྲའི་སྐུད་པས་རྒྱ་གྲམ་དུ་བཅིངས་ཏེ་སྟེང་འོག་མ་ནོར་བ་དང་། ལིངྒ་མགོ་ཕར་བསྟན་ཏེ་གན་རྐྱལ་དུ་འོང་ན་བྱས་ཏེ། ལིངྒ་དེ་ཉིད་སྙིང་ཁ་ཡི། །སྲོག་གི་ཡི་གེ་གྱུར་པ་ལ། །བསྒྲུབ་བྱ་གང་ཡིན་དངོས་པོ་བསྒོམ། །རང་གི་ལྷག་པའི་ལྷར་གསལ་བའི། །ང་རྒྱལ་ལྕགས་ཀྱུའི་ཕྱག་རྒྱ་ཡི། །དེ་ཡི་ལུས་ངག་ཡིད་གསུམ་འགུག །རང་དང་མགོན་པོའི་ཐུགས་ཀ་ཡི། །ས་བོན་ལས་སྤྲོས་ཁྲོ་བོའི་ཚོགས། །ལྕགས་ཀྱུ་ཞགས་པ་འཛིན་རྣམས་ཀྱི། །དམིགས་པའི་སྒྲུབ་བྱའི་སྙིང་ག་ནས། །ལྕགས་ཀྱུའི་བཟུང་ཞིང་ཞགས་པས་བཅིངས། །ཐོ་བས་རྒྱབ་ནས་བརྡུངས་པ་དང་། །ལས་ཀྱི་རླུང་གི་ཕུལ་ནས་དགུག ཆྒཻེ་ཨ་ཀཪྵ་ཡ་ཛཿ ཞེས་བརྗོད་དམིགས་པ་བརྟན་པར་བྱ། །མགོན་པོའི་མངགས་པའི་ཕོ་ཉ་དྲག །ཊཀྐི་ར་ཛས་གཡས་ནས་ཆུམས། །ཚོགས་བདག་གླང་སྣས་གཡོན་ནས་ཆུམས། །གཞན་ཡང་ཕོ་ཉའི་ཚོགས་རྣམས་ཀྱིས། །བཀུག་ནས་བསྐྱེད་པ་དེ་ལ་བསྟིམ། །དེ་ནས་རྣམ་ཤེས་དྲངས་པ་ནི། །སླར་ཡང་འོད་ཀྱི་ལྕགས་ཀྱུ་དང་། །ཕོ་ཉའི་ཚོགས་ཀྱིས་སྒྲུབ་བྱ་དེ། བཀུག་ནས་མདུན་ན་གནས་པ་ཡི། །གནོད་བྱེད་དེ་ཡི་ལྟེ་བ་རུ། །ཡཾ་ལས་རླུང་གི་དཀྱིལ་འཁོར་བསྒོམ། །སྙིང་གར་རྣམ་ཤེས་མར་མེ་ལྟར། །འབར་བའི་ཨ་ཐུང་བསམ་པར་བྱ། རང་གི་སྣ་བུག་གཡས་པ་ནས། །རླུང་བྱུང་དེ་ཡི་གཡས་པར་ཕོགས། །ལྟེ་བ་རླུང་དང་འདྲེས་པ་ཡིས། །རྣམ་ཤེས་དལ་གྱིས་ཕུལ་ནས་ནི། །གཡོན་གྱི་སྣ་བུག་ནས་ཐོན་ཏེ། །ལིངྒ་བསྐྱེད་པའི་གཡོན་པ་ཞུགས། །སྙིང་གར་གནས་པར་རྣམ་པར་བསམ། །དེ་ནས་རང་གི་ཐུགས་ཀ་ཡི། །ས་བོན་འོད་ཀྱིས་མགོན་པོ་བསྐུལ། །མགོན་པོ་འཁོར་དང་བཅས་པ་ཡི། སྐུ་དང་ཐུགས་ཀའི་ས་བོན་ལས། །འོད་ཟེར་དྲག་ཅིང་རྩུབ་པ་ནི། །ཤུགས་ལྡན་འཕྲོས་པས་འཁོར་ལོ་ལ། །ཕོག་པས་འཁོར་ལོ་རབ་བསྐུལ་ཏེ། །སྟེང་འོག་འཁོར་ལོ་གཡས་གཡོན་དུ། །དྲག་ཅིང་འགྱོགས་པར་འཁོར་བ་ཡིས། །བསྒྲུབ་བྱའི་ལུས་ནི་རྣམ་པར་བཅོམ། །མར་མེ་རླུང་གིས་བསད་པ་ལྟར། །རྣམ་ཤེས་ཐུམ་གྱིས་བཏང་བྱ་སྟེ། །ཤ་ཁྲག་རུས་པ་མ་ལུས་པ། །མགོན་པོ་ཕོ་ཉའི་ཚོགས་བཅས་པས། །ཟོས་ཤིང་འཐུང་བའི་ལྷག་མ་རྣམས། །འཁོར་ལོ་ལས་འཕྲོས་མེ་འོད་ཀྱི། །ཐལ་བ་ཙམ་ཡང་མ་ལུས་པར། །བསྲེགས་ཤིང་དེ་ལྟར་ཚར་བཅད་པའི། །དམིགས་པ་གསལ་བར་བསྟན་བྱས་ལ། །ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣན་བི་ནཱ་ཡ་ཀ་ཧཱུྃ་ཧཱུྃ་ཨ་མུ་ཀ་ཁ་ཁ་ཁཱ་ཧི་ཁཱ་ཧི། མ་རཱ་མ་རཱ། གྲྀཧྣ་གྲྀཧྣ། བྷནྡྷ་བྷནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ ཨོཾ་ཀི་ན་ཨ་མུ་ཀ་མཱ་ར་ཡ། མཱ་ར་ཡ་ཕཊ་ཕཊ། དེ་ལྟར་དྲག་པོའི་སྔགས་བཟླས་པས། །ཉིན་དང་མཚན་དུ་གཡེངས་མེད་པར། ཞག་གྲངས་ཉི་ཤུ་རྩ་གཅིག་གམ། །དགུའམ་བདུན་ལ་སོགས་པ་ཡི། །ཇི་སྲིད་མཚན་མ་མཐོང་གི་བར། །རབ་ཏུ་འབད་དེ་བསྐུལ་བར་བྱ། །མཚན་མ་གསལ་བ་མཐོང་ན་ནི། །ལིངྒ་བསྒྲུབ་བྱར་བསམ་པ་དེ། །མཚན་གྱི་བསྟུན་ལ་གཏོར་མར་བཏང་། །ཡང་ན་སླར་ཡང་ལིངྒ་ལ། །དགུག་གཞུག་བསྐྱེད་པ་སྔར་ལྟར་བྱ། །སྦྱིན་བསྲེག་དག་ཏུ་འབུལ་བར་བྱ། མནན་པའི་འཁོར་ལོ་བྱ་བ་ནི། །འཁོར་ལོ་ལིངྒ་བཅས་པ་ལ། །བྲིས་ཚུལ་གཞན་དག་སྔར་དང་མཚུངས། །འོན་ཀྱང་སྔགས་ཀྱི་སྤེལ་ཚིག་ནི། །མ་རཱ་ཡ་ཡི་གོ་ས་རུ། །སྟཾ་བྷ་ཡ་ལཾ་ཅེས་གཞུག །ཁྲག་ཆེན་དུག་དང་བཅས་པ་ལ། །ལྡོང་རུས་བསྲེས་པའི་ཁུ་བས་བྲིས། །རང་ལྷའི་ང་རྒྱལ་ལྡན་པ་ཡི། །མདུན་དུ་བསྐྱེད་སོགས་གོང་དང་མཚུངས། །ལིངྒ་བསྒྲུབ་བྱར་བཅས་པ་ལ། །ཛཿཡིས་བཀུག་ལ་ཧཱུྃ་གིས་སྟིམས། །བཾ་གྱིས་བཅིངས་ལ་ཧོཿཡིས་མྱོས། །འཁོར་ལོ་ལིངྒ་བཅས་པ་དེ། །དྲིལ་ལ་ཁར་ནག་ཐག་པས་བསྐྱིགས། །རབ་ཆད་མི་ཡི་ཐོད་པའམ། །ཁྱི་ཐོད་ནང་དུ་གཞུག་པར་བྱ། །སླར་ཡང་ཚོན་སྐུད་སྣ་ལྔ་ཡི། །རྒྱ་གྲམ་དག་ཏུ་བཅིངས་པར་བྱ། །ཐིམ་པའི་འོག་གམ་བསྣོལ་བའི་ལམ། །མཆོད་རྟེན་འོག་ཏུ་འབྲུབ་ཁུང་ནི། །གྲུ་གསུམ་རྩེ་མོ་ཕྱིར་བསྟན་བྲུ། །དེ་ནང་དུར་ཁྲོད་རོ་གཡམ་གཏིང་། །དེའི་སྟེང་དུ་འཁོར་ལོའི་སྣོད། །ཐོད་པའི་གདོང་དང་ལིངྒའི་མགོ། །གྲུ་གསུམ་རྩེ་མོ་བསྟན་ཏེ་བཞག གཏོར་མ་རྙིང་པས་ནུས་པར་དགང་། །སྟེང་དུ་རོ་གཡམ་གྲུ་གསུམ་གྱི། །དབུས་སུ་སྣ་ཚོགས་རྡོ་རྗེ་ཡི། །ལྟེ་བར་ཧཱུྃ་དང་ཟུར་གསུམ་ལ། །ལཾ་ཡིག་བྲིས་པས་གནན་པར་བྱ། །དེ་སྟེང་ས་ཡིས་གཡོགས་པ་ལ། །རང་ཉིད་ལྷ་ཡིས་ང་རྒྱལ་གྱིས། །རྐང་པས་ལྕགས་ཅིང་འཐལ་བར་བརྡུངས། །མགོན་པོ་འཁོར་དང་བཅས་པ་ཡིས། །བདག་ལ་གནོད་པའི་སྒྲུབ་བྱ་འདི། སངས་རྒྱས་བསྟན་པ་གནས་ཀྱི་བར། །མ་བཏང་ཤིག་ཅེས་བཅོལ་ཞིང་གཏད། །སྔགས་བརྗོད་དྲག་ཏུ་བསྐུལ་བར་བྱ། །ཁྱད་པར་དུ་ཡང་ལྷ་མོ་བསྐུལ། །བླ་མ་ཤངས་པ་ལོ་ཙཱ་ལ། །ལས་འདི་མགོན་པོ་རང་གིས་སྨྲས། །སྟོན་པའི་བསྟན་པ་བསྲུང་གྱུར་ཅིག
གུ་ཧྱ་ས་མ་ཡ།