Bde mchog lha lnga'i mngon rtogs mnyam med pas mdzad pa

Resource ID	SP4
Title	bde mchog lha lnga'i mngon rtogs mnyam med pas mdzad pa
Topics	Chakrasamvara
Sub-Topics	Canonical description
Author	Sangyé Pelsang
Link	BDRC W3CN18508 (p.332) BDRC W8LS32725 (p.57)

༄༅། །བདེ་མཆོག་ལྷ་ལྔའི་མངོན་རྟོགས་མཉམ་མེད་པས་མཛད་པ་བཞུགས་སོ།།

ན་མོ་གུ་རུ།
བདེ་ཆེན་ལྷན་ཅིག་སྐྱེས་པའི་སྐུ། །སྟོང་ཉིད་ཡུམ་དང་གཉིས་མེད་པ། །བླ་མ་བདེ་མཆོག་ལ་བཏུད་ནས། །དེ་ཡི་སྒྲུབ་ཐབས་བྲི་བར་བྱ། །དད་བརྩོན་སྙིང་རྗེ་ཤེས་རབ་ལྡན། །དབང་བཞི་བྱིན་རླབས་བཀའ་རྣམས་ཐོབ། །རྒྱུད་ཐོས་མན་ངག་ཁོང་དུ་ཆུད། །སྙིང་སྟོབས་ལྡན་པའི་རྣལ་འབྱོར་པས། །གནས་གྲོགས་ཡོ་བྱད་འཐུན་རྐྱེན་ཀུན། །ཚང་ནས་སྒྲུབ་ལ་འཇུག་པར་བྱ།
དེ་ལ་སྔོན་འགྲོ། དངོས་གཞི། མཇུག་གསུམ་ལས།
སྔོན་འགྲོ་ལ་བསྲུང་བའི་འཁོར་ལོ་བསྒོམ་པ། སྐྱབས་འགྲོ་སེམས་བསྐྱེད་བྱ་བ། ཚོགས་གཉིས་བསག་པའོ།
།དང་པོ་བསྲུང་བའི་འཁོར་ལོ་ལ་གཉིས་ལས།
བདག་བསྲུང་པ་ནི། རང་གི་ཐུགས་ཀའི་ཧཱུྃ་ལས་འོད་འཕྲོས་པས། མདུན་གྱི་ནམ་མཁར་རིགས་ལྔའི་ལྷ་ཚོགས་སྤྱན་དྲངས། བདག་གི་སྡིག་སྒྲིབ་སྦྱང་དུ་གསོལ། ཞེས་གསོལ་བ་བཏབ་པས།
རིགས་ལྔའི་ཐུགས་ཀ་ནས་ལྷ་མོ་བདུད་རྩིའི་བུམ་ཆུ་ཐོགས་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ། ཞེས་དབང་བཞིའི་ཁྲུས་བྱས་པ་དང་། རང་གི་སྡིག་སྒྲིབ་ཐམས་ཅད་དག་ནས། ལུས་ཤེལ་སྒོང་ལྟར་དྲི་མ་མེད་པར་གྱུར། ལུས་བསྲུངས་པའོ། །དེ་ནས་བདུད་རྩི་རིལ་བུ་ལྕེ་ཐོག་ཏུ་བཞག་ནས། ཨོཾ་ཨ་མྲྀ་ཏ་ཝཱཀ་རཀྵ་རཀྵ་ཧཱུྃ་ཕཊ། ཞེས་བརྗོད་དེ། ངག་བསྲུང་པའོ། །སེམས་རིག་སྟོང་འཛིན་མེད་དུ་གནས་པར་གྱུར། སེམས་བསྲུང་པའོ།
།གཉིས་པ་གནས་བསྲུང་པ་ནི། རང་སྐད་ཅིག་གིས་གཙོ་བོ་ཡབ་ཡུམ་གྱི་ཐུགས་ཁར་པད་ཉིའི་སྟེང་དུ་ཧཱུྃ་བསམས་ནས། རྡོ་རྗེ་ཐོད་སྦྱོར་གྱི་ཕྱག་རྒྱ་དང་། ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཞེས་བརྗོད་པས། ཐུགས་ཀའི་ཧཱུྃ་ལས་རཾ་གཅིག་དབུ་མ་ནས་མདུན་དུ་ཆད་པ་ལས། ཉི་མའི་དཀྱིལ་འཁོར་སྟོང་གཉིས་ཙམ་དུ་གྱུར། དེའི་སྟེང་དུ་ཧཱུྃ་གཅིག་༼ཉི་མའི་སྟེང་དུ་༽ཆད་པ་ལས་རྡོ་རྗེ་རྒྱ་གྲམ་གྱི་ལྟེ་བ་མཐིང་ག ༼ལྷའི་བུའི་བདུད་བཅོམ་༽།ཤར་གྱི་རྭ་གསུམ་དཀར། ༼ཕུང་པོའི་བདུད་བཅོམ་༽ལྷོའི་རྭ་གསུམ་སེར། ༼ཉོན་མོངས་པའི་བདུད་བཅོམ་༽ནུབ་གྱི་རྭ་གསུམ་དམར། ༼འཆི་བདག་གི་བདུད་བཅོམ་༽བྱང་གི་རྭ་གསུམ་ལྗང་གུའོ། །དེ་ཉིད་རྒྱ་ཆེ་བས་ས་གཞི། དཔངས་མཐོ་བས་བརྩིག་པ། རྡོ་རྗེའི་རྭ་རྣམས་སྟེང་དུ་འདུས་པ་ལས་བླ་རེའོ། །དེ་ནས་སྣ་ཚོགས་ཀྱི་རྡོ་རྗེའི་སྟེང་དང་ཕྱོགས་བཞི་ནས་ཧཱུྃ་ཁ་དོག་ལྔ་འཕྲོས་པས། རྡོ་རྗེ་རྩེ་དགུ་པ། བདུན་པ། ལྔ་པ། གསུམ་པ། གཅིག་པ་སྲན་མ་ཙམ་དང་ནས་ཙམ་ཡད་ཆད་ཀྱིས་རྡོ་རྗེའི་བར་རྣམས་གཏམས་པ་དང་། འོག་གི་ཉི་མ་ལས་མེ་འབར་བ་ལས། ཕྱིའི་རྡོ་རྗེའི་རྭ་རྣམས་ཁྲོ་ཆུ་ལྟར་ཞུ་ནས། སྲིད་པའི་རླུང་གིས་ཀྱང་མི་ཐར་བའི་བསྲུང་འཁོར་སྟོང་གསུམ་ཙམ་དུ་གྱུར།
གཉིས་པ་སྐྱབས་འགྲོ་སེམས་བསྐྱེད་བྱ་བ་ནི། རང་གི་ཐུགས་ཁའི་ཧཱུྃ་གི་འོད་ཟེར་གྱིས། བླ་མ་ཡི་དམ་དྲ་གུར་གྱི་ནང་དུ་སྐྱབས་འགྲོའི་ཡུལ་དུ་སྤྱན་དྲངས་ནས་བཞུགས་པར་གྱུར། བདག་སོགས་སེམས་ཅན་ཐམས་ཅད་དུས་འདི་ནས་བཟུང་སྟེ། ཇི་སྲིད་སྙིང་པོ་བྱང་ཆུབ་ལ་མཆིས་ཀྱི་བར་དུ། དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་བཅོམ་ལྡན་འདས་རྣམས་ལ༴ །དམ་པའི་ཆོས་རྣམས་ལ༴ །འཕགས་པའི་དགེ་འདུན་རྣམས་ལ༴ མཁའ་འགྲོ་ཆོས་སྐྱོང་བསྲུངས་མ་ཡེ་ཤེས་ཀྱི་སྤྱན་དང་ལྡན་པ་རྣམས་ལ་སྐྱབས་སུ་མཆིའོ། །ཞེས་ལན་གསུམ་ལ་སོགས་པས་སྐྱབས་འགྲོ་བྱ། སེམས་ཅན་ཐམས་ཅད་བདེ་བ་དང་ཕྲད་པར་འདོད་པའི་བྱམས་པ་དང་། སྡུག་བསྔལ་༼ཐམས་ཅད་༽ལས་སྐྱོབ་པའི་སྙིང་རྗེས། ཧེ་རུ་ཀའི་གོ་འཕངས་ལ་འགོད་པར་བྱ། སེམས་བསྐྱེད་པའོ།
།གསུམ་པ་ཚོགས་བསགས་པ་ལ། བསོད་ནམས་དང་ཡེ་ཤེས་ཀྱི་ཚོགས་གཉིས་ཀྱི་དང་པོ་ལ་གཉིས་ལས།
ཡུལ་མཚོག་ལ་བརྟེན་པ་ནི། བཅོམ་ལྡན་འདས་ཐུགས་རྗེའི་དབང་གིས་བདག་གི་མདུན་དུ་བྱོན། དེའི་འོད་ཟེར་བདག་གི་ལུས་ལ་ཕོག་པས། ཕུང་པོ་ཁམས་དང་སྐྱེ་མཆེད་ནད་གདོན་སྡིག་སྒྲིབ་ཐམས་ཅད་དག་ནས། མེ་ལོང་གསལ་བའི་གཟུགས་བརྙན་ཤར་བ་ལྟར། མདུན་གྱི་ལྷ་དང་། རང་ཉིད་དབྱེར་མེད་པའི་བདེ་མཆོག་གི་སྐུར་གྱུར། གཞིའི་ཧེ་རུ་ཀ་གསལ་གདབ་པའོ།
།རང་ཧེ་རུ་ཀར་གསལ་བའི་ཐུགས་ཀའི་ཧཱུྃ་ལས་འོད་ཟེར་འཕྲོས། འོག་མིན་ནས་ལྷ་ལྔའི་དཀྱིལ་འཁོར་གྱི་གཙོ་བོའི་རིགས་བདག་ཏུ་བླ་མ་བཞུགས་པ་ལ། སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་བསྐོར་བ་སྤྱན་དྲངས་པ་ནི་ཚོགས་རྟེན་ནོ། །རང་གི་གནས་གསུམ་དུ་ཐལ་མོ་སྦྱར་ཏེ། ཕྱག་འཚལ་བར་བསམ་ལ། ཨོཾ་ན་མ་ཏེ་ཧཱུྃ། ཨོཾ་ན་མ་མེ་ཧཱུྃ། ཨོཾ་ན་མ་ན་མོ་ཧཱུྃ། ཕྲད་དོ་ཅོག་གི་ཕྱག་གོ
།དེ་ནས་ཐུགས་ཀའི་ཧཱུྃ་ལས་སྤྲུལ་པ་ཡི། ཡོན་ཆབ་མ་དཀར་མོ། མེ་ཏོག་མ་སྔོན་མོ། བདུག་སྤོས་མ་སེར་མོ། མར་མེ་མ་དམར། ཞལ་ཟས་མ་དཀར་སེར་ནམ་མཁའ་གང་བས་མཆོད། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། ཨོཾ་ཨརྒྷཾ་པྲ་ཏི་ཙྪ་ཡེ་སྭཱཧཱ། པ་དྱཾ་པྲ་ཏི་ཙྪ་ཡེ་སྭཱཧཱ། ཨོཾ་བཛྲ་པུཥྤེ་ཨཱཿཧཱུྃ་སྭཱཧཱ། ཨོཾ་བཛྲ་དྷཱུ་པེ་ཨཱཿཧཱུྃ། ཨོཾ་བཛྲ་ཨ་ལོ་ཀེ་ཨཱཿཧཱུྃ། །ཨོཾ་བཛྲ་གནྡྷེ་ཨཱཿཧཱུྃ། །ཨོཾ་བཛྲ་ནཻ་བེ་དྱེ་ཨཱཿཧཱུྃ། །ཨོཾ་བཛྲ་ཤཔྟ་ཨཱཿཧཱུྃ། ཞེས་བརྗོད་དེ། ཕྱི་མཆོད་དོ།
།མཁའ་འགྲོ་ལཱ་མ་དུམ་སྐྱེས་མ། །གཟུགས་ཅན་མ་དང་མཁའ་འགྲོ་བཞིས། །ཤ་ལྔ་བདུད་རྩི་ཐོགས་ནས་ནི། །དཀྱིལ་འཁོར་ལྷ་ཚོགས་རྣམས་ལ་མཆོད། །ཨོཾ་སརྦ་ཏ་ཐཱ་ག་ཏ་ག་ཎ་ཙཀྲ་བཛྲ་པཱུ་ཛ་མེ་གྷ་ས་མུ་ཏྲ་སྥ་ར་ན་ས་མ་ཡེ་ཧཱུྃ། ཞེས་དབུལ་ཏེ། ནང་མཆོད་དོ།
༼ས་བོན་༽།ཧཱུྃ་བདེ་བའི་རང་བཞིན་ལྷ་མོ་བཞི། །ལང་ཚོ་བཅུ་དྲུག་ལྟ་བུར་མཛེས། །གཉིས་སུ་མེད་པའི་མཆོད་པ་ཡི། །ཟག་མེད་བདེ་བས་གཙོ་ལ་མཆོད། །ཨོཾ་སརྦ་ཏ་ཐཱ་ག་ཏ་མ་ཧཱ་པཱུ་ཙ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཧཱུྃ། །ཞེས་ལྷ་མོ་བཞི་ཡུམ་ལ་སྟིམ་ནས་སྙོམས་འཇུག་གི་མཆོད་པ་སྟེ། གསང་མཆོད་དོ།
།མཆོད་བྱ་མཆོད་བྱེད་མཆོད་པ་ཐམས་ཅད་རང་བཞིན་སྟོང་པ་ཉིད་དུ་གྱུར། དེ་ཁོ་ན་ཉིད་ཀྱི་མཆོད་པའོ། ༼དབང་བཞིའི་མཆོད་པའོ།༽
།དེ་ནས་དོན་ཡིད་ལ་བསམས་ཏེ། ༼སངས་རྒྱས་གཙོ་བོ་ཡབ་ཡུམ། ཆོས་གྲགས་སྔགས་གྲགས་སྟོང་། དགེ་འདུན་ལྷ་མོ་བཞི་ལ་སྐྱབས་སུ་འགྲོ་་་་།༽ དཀོན་མཆོག་གསུམ་ལ་བདག་སྐྱབས་མཆི། སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ལ་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བྱང་ཆུབ་སེམས་སུ་འདི་བགྱི་སྟེ། །བདག་དང་གཞན་དོན་རབ་སྒྲུབ་ཕྱིར། །བདག་གི་བྱང་ཆུབ་སེམས་མཆོག་བསྐྱེད། །ཨེ་མ་ཧོ་སེམས་ཅན་དོན་ཀུན་གཉེར། །བྱང་ཆུབ་སྤྱོད་མཆོག་མཛད་བཞིན་སྤྱད། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །རྒྱུན་བཤགས་སོ།
།གཉིས་པ། ཡུལ་དམན་པ་ལ་བརྟེན་ནས་ཚོགས་བསགས་པ་ནི། སེམས་ཅན་ཐམས་ཅད་བདེ་བ་དང་ཕྲད་པར་འདོད་པའི་བྱམས་པ། སྡུག་བསྔལ་༼ཐམས་ཅད་ལས་༽སྐྱོབ་༼པར་འདོད་༽པའི་སྙིང་རྗེ། །བདེ་བ་དམ་པ་དང་མི་འབྲལ་བ་ལ་སྤྲོ་བའི་དགའ་བ། ཀུན་ལ་སེམས་སྙོམས་པའི་བཏང་སྙོམས་སུ་སེམས་༼གནས་༽པར་གྱུར་ཏོ།
།གཉིས་པ། ཡེ་ཤེས་ཀྱི་ཚོགས་བསག་པ་ནི། ཨོཾ་སྭ་བྷཱ་ཝ་ཤུདྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། །ཕྱི་བཟུང་བའི་ཡུལ་ལམ། ཆོས་ཐམས་ཅད་སྒྱུ་མ་ལྟར་དུ་གྱུར། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ནང་འཛིན་བྱེད་ཀྱི་སེམས་སམ་ཆོས་ཐམས་ཅད་སྟོང་པ་ཉིད་དུ་གྱུར།

གཉིས་པ། དངོས་གཞི་ལ་གཉིས་ལས།
རྟེན་བསྐྱེད་པ་ནི། ཡཾ་ལས་རླུང་གི་དཀྱིལ་འཁོར་ཟླ་གམ་སྔོན་པོ། རཾ་ལས་མེའི་དཀྱིལ་འཁོར་གྲུ་གསུམ་དམར་པོ། བཾ་ལས་ཆུའི་དཀྱིལ་འཁོར་ཟླུམ་པོ་དཀར་པོ། ལཾ་ལས་སའི་དཀྱིལ་འཁོར་གྲུ་བཞི་སེར་པོ། སུཾ་ལས་རི་ཡི་རྒྱལ་པོ་རི་རབ། ཤར་ཤེལ། ལྷོ་བཻཌཱུརྻ། ནུབ་པདྨ་རྭ་ག །བྱང་གསེར་ལས་གྲུབ་པ། ཅོག་བརྒྱད་ཀྱིས་རྣམ་པར་མཛེས་པ་རྣམས་རིམ་པས་རྩེགས་པའོ།
།གཉིས་པ། རྟེན་པ་ལྷ་བསྐྱེད་པ་ལ། བསྐྱེད་རྫོགས་གཉིས་ལས།
དང་པོ་བསྐྱེད་པའི་རིམ་པ་ལ། ལྷ་བསྐྱེད་པ་དང་། དེ་ལ་མཆོད་པ་གཉིས་ལས།
ལྷ་བསྐྱེད་པ་ལ་བཞི་ཡོད་པའི་དང་པོ་དམ་ཚིག་པ་བསྐྱེད་པ་ནི། རི་རབ་དེའི་སྟེང་དུ་ཧཱུྃ་ལས་བྱུང་པའི་སྣ་ཚོགས་རྡོ་རྗེའི་སྟེང་དུ་པཾ་ལས་སྣ་ཚོགས་པད་མ་འདབ་མ་བརྒྱད་ལྟེ་བ་གེ་སར་དང་ལྡན་པ། དེའི་དབུས་སུ་པཾ་ལས་པད་མ། རཾ་ལས་ཉི་མ། འཇིགས་བྱེད་དུས་མཚན་ནོ། །དེའི་སྟེང་དུ་རང་སེམས་ཧཱུྃ་དུ་གྱུར་པ་ལས། འོད་ཟེར་༼སྣ་ཚོགས་༽ཕྱོགས་བཅུར་འཕྲོས་པས། འཕགས་པ་མཆོད། སྣོད་བཅུད་ཐམས་ཅད་ཀྱི་དྲི་མ་སྦྱངས། ཡེ་ཤེས་ཀྱི་གཞལ་ཡས་ཁང་དང་བདེ་མཆོག་གི་ལྷ་ཚོགས་སུ་གྱུར། འོད་ཟེར་ཧཱུྃ་ལ་འདུས་པ་ལས། བདག་ཉིད་དཔལ་ཧེ་རུ་ཀར་གྱུར་པ་ནི། སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་རྡོ་རྗེ་དང་། གཡོན་དྲིལ་བུ་འཛིན་པས་ཡུམ་ལ་འཁྱུད་པ། སྟག་གི་ལྤགས་པའི་ཤམ་ཐབས་ཅན། ཞབས་གཡས་བརྐྱང་པས་བཞུགས་པའོ། །དེའི་པང་དུ་ཡུམ་རྗེ་བཙུན་མ་སྐུ་མདོག་དམར་བ། ཞལ་གཅིག་ཕྱག་གཉིས་མ། གཡས་གྲི་གུག་འཕྱར་བ། གཡོན་ཐོད་ཁྲག་ཡབ་ལ་སྟོབ་པ། ལང་ཚོ་མཛེས་ཤིང་སྒེག་པ། བདེ་བའི་ཉམས་དང་ལྡན་པས་ཡབ་ལ་འཁྲིལ་བའོ། །དེ་ལྟར་ཡབ་ཡུམ་གཉིས་སྤྱན་གསུམ་པ་མཆེ་བ་གཙིགས་པ། ཐོར་ཚུགས་ལ་ཉི་ཟླས་མཛེས་པའོ། །ཐོད་པ་སྐམ་པོ་ལྔའི་དབུ་བརྒྱན་པ། འཁོར་ལོ་དང་། རྣ་ཆ་དང་། མགུལ་བརྒྱན་ནམ། སེ་མོ་དོ་དང་། དཔུང་རྒྱན་དང་། ཕྱག་གདུབ་དང་། ཞབས་གདུབ་དང་། དོ་ཤལ་དང་། སྐེ་རགས་ཏེ་ཡབ་ལ་ཕྱག་རྒྱ་དྲུག་དང་། ཡུམ་ལ་ལྔས་རྒྱན་པ། མི་མགོ་རློན་པ་ལྔ་བཅུས་ཡབ་དང་། སྐམ་པོ་ལྔ་བཅུས་ཡུམ་ལ་དོ་ཤལ་བྱས་པ། མཚན་དཔེས་བརྒྱན་པ། གར་གྱི་ཉམས་དགུ་དང་ལྡན་ཞིང་། འོད་དང་འོད་ཟེར་གྱི་རང་བཞིན་ཅན། མེ་དཔུང་གི་ཀློང་ན་བཞུགས་པའོ། །ཤར་གྱི་པད་འདབ་ལ་མཁའ་འགྲོ་མ་མཐིང་ཁ། བྱང་དུ་ལཱ་མ་ལྗང་གུ། ནུབ་ཏུ་དུམ་སྐྱེས་མ་དམར་མོ། ལྷོ་རུ་གཟུགས་ཅན་མ་སེར་མོ། དེ་རྣམས་ཀྱང་ཞལ་གཅིག་ཕྱག་གཉིས། སྤྱན་གསུམ་པ། སྐྲ་གྲོལ་བ། མཆེ་བ་གཙིགས་པ། གཡས་གྲི་གུག །གཡོན་ཐོད་པ་དང་ཁ་ཊྭཱཾ་ག་བསྣམས་པ། གཅེར་བུ། མི་མགོ་སྐལ་པོ་ལྔའི་དབུན་དང་། ལྔ་བཅུའི་དོ་ཤལ་བྱས་པ། ཕྱག་རྒྱ་ལྔས་བརྒྱན་པ། རོའི་སྟེང་ན་ཞབས་གཡས་བརྐྱང་པས་བཞུགས་པའོ།
།གཉིས་པ་ཡེ་ཤེས་པ་གཞུག་པ་ནི། འབར་བའི་ཕྱག་རྒྱ་བྱས་ཏེ་དཔྲལ་བའི་དབྱིངས་སུ་བསྐོར། རྐང་པ་གཡོན་པའི་མཐེ་བོང་གཡས་པས་མནན། ཕེཾ་གྱི་སྒྲ་དང་ཧཱུྃ་གི་འོད་ཟེར་གྱིས། འོག་མིན་ནས་ཡེ་ཤེས་པ་ལྷ་ལྔའི་དཀྱིལ་འཁོར་མདུན་གྱི་ནམ་མཁར་སྤྱན་དྲངས། ཨརྒྷཾ་ལ་སོགས་པས་མཆོད། ཛཿཧཱུྃ་བཾ་ཧོཿ དམ་ཚིག་པ་ལ་དབྱེར་མེད་དུ་ཐིམ་པར་གྱུར།
གསུམ་པ་སྐུ་གསུང་ཐུགས་བྱིན་གྱིས་བརླབ་པ་ནི། ལྷ་རྣམས་ཀྱི་དཔྲལ་བར་པད་ཟླའི་སྟེང་དུ་ཨོཾ་དཀར་པོ། མགྲིན་པར་པད་ཟླའི་སྟེང་དུ་ཨཱཿདམར་པོ། སྙིང་ཁར་པད་ཉིའི་སྟེང་དུ་ཧཱུྃ་སྔོན་པོ་གསལ་བར་གྱུར།
བཞི་པ། དབང་བསྐུར་བ་ནི། ཐུགས་ཁའི་ཧཱུྃ་ལས་འོད་ཟེར་འཕྲོས། ཕེཾ་གྱི་སྒྲས་མདུན་གྱི་ནམ་མཁར་རིགས་ལྔ་སྤྱན་དྲངས། ཨརྒྷཾ་སོགས་ཀྱིས་མཆོད། བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོད་ཅིང་གསོལ་བ་ལྟར། །བདག་ཀྱང་རབ་ཏུ་སྐྱབ་པའི་ཕྱིར། །ནམ་མཁའི་རྡོ་རྗེས་དེང་བདག་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། རིགས་ལྔའི་ཐུགས་ཁ་ནས། ཡུམ་ལྔས་བདུད་རྩིའི་བུམ་པ་ཐོགས་ནས།
ཧཱུྃ། ཇི་ལྟར་བསྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡི། །དེ་བཞིན་བདག་གིས་སྐུ་ཁྲུས་གསོལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་པས་དབང་བསྐུར་བས་ལུས་ངག་ཡིད་གསུམ་གྱི་སྡིག་པ་དག་ཏེ། དབང་བཞི་ཐོབ་ནས་ཆུ་ལྷག་མ་ཡར་འཁྱིལ་བ་ལས་མི་བསྐྱོད་པས་དབུ་བརྒྱན་པར་གྱུར།
གཉིས་པ། ལྷ་དེ་ལ་མཆོད་པ་ནི། ནང་མཆོད་གཏོར་མ་ལྟར་བྱིན་གྱིས་བརླབས་པའམ། ཡང་ན་ཨོཾ་སུཾ་བྷ་ནི་སུཾ་བྷ་ཧཱུྃ། གྲྀཧྣ་གྲྀཧྣ་ཧཱུྃ། གྲྀཧྣ་པ་ཡ་གྲྀཧྣ་པ་ཡ་ཧཱུྃ། ཨཱ་ན་ཡ་ཧོཿབྷ་ག་ཝན་བིརྻ་རཱ་ཛ་ཧཱུྃ་ཕཊ། ཅེས་པས་བསངས། སྭོ་བྷཱ་ཝས་སྦྱངས། སྟོང་པའི་ངང་ལས་ཨ་ལ་ཐོད་པའི་ནང་དུ། པད་མ་འདབ་བཞི་དང་། ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ཞུ་བ་ལས། དཔལ་ཧེ་རུ་ཀ་སྐུ་མདོག་སྔོན་པོ་སོགས་ནས་གཡས་བརྐྱང་གི་སྟབས་ཀྱིས་བཞུགས་པའི་༼ལྷ་ལྔ་རྫོགས་བར་བསྐྱེད་དེ་༽བར་སྔར་བཞིན་བསྐྱེད་ལ། ཡི་གེ་བདུན་པ་བཟླས་པས། ཡབ་ཡུམ་གྱི་སྦྱོར་འཚམས་ནས་བདུད་རྩི་བབས་པས། ཐོད་པ་ཁེངས་ནས་ཡབ་ཡུམ་གཉིས་ཀྱང་བདུད་རྩིར་ཞུ་བར་གྱུར། དྲིན་ཅན་རྩ་བའི་བླ་མ་ལ་ཨོཾ་ཨཱཿཧཱུྃ། སངས་རྒྱས་རྡོ་རྗེ་འཆང་ཆེན་པོ་ལ་ཨོཾ་ཨཱཿཧཱུྃ། སོགས་རྒྱུད་པའི་བླ་མ་རྣམས་ཀྱི་མཚན་དང་། ལྷ་ཚོགས་རྣམས་ཀྱི་སྙིང་པོ་ལ་ཨོཾ་ཨཱཿཧཱུྃ་བཏགས་པས་མཆོད། རང་གིས་མྱངས་པས་བདེ་སྟོང་གཉིས་སུ་༼མེད་པར་ཉམས་སུ་༽མྱོང་པར་བསྒོམ་མོ།
གཉིས་པ་རྫོགས་པའི་རིམ་པ་ནི། ལུས་གནད་རྩོག་སུ་བྱས། ལག་པ་པུས་འཁྱུད་བསྡམ། སྒལ་ཚིགས་བསྲང་། མགྲིན་པ་ཅུང་ཟད་བཀུག་ལ་ལུས་དྲང་པོར་བསྲང་ངོ་། །རང་གི་ལུས་ཡི་དམ་གྱི་ལྷར་གསལ་བའི་ལུས་ཀྱི་དབུས་སུ། རྩ་དབུ་མ་ཕྱི་དཀར་ལ་ནང་དམར་བ། ཡར་རྩེ་ཚངས་བུག །མར་སྣ་གསང་གནས། རྩ་རོ་རྐྱང་གཉིས་ཡར་རྩེ་སྣ་སྒོ་གཉིས་མར་སྣ་ལྟེ་འོག་སོར་བཞིར་ཟུག་པའོ། །དེ་ཡང་སྤྱི་བོ་བདེ་ཆེན་གྱི་འཁོར་ལོའི་འདབ་མ་སུམ་ཅུ་རྩ་གཉིས་ཀྱི་ལྟེ་བ་ལ་ཧཾ་དཀར་པོ། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་གི་ལྟེ་བ་ལ་ཨོཾ་སེར་པོ། སྙིང་ཁ་ཆོས་ཀྱི་འཁོར་ལོ་རྩ་འདབ་བརྒྱད་ཀྱི་ལྟེ་བ་ལ་ཧཱུྃ་སྔོན་པོ། ལྟེ་བ་སྤྲུལ་པའི་འཁོར་ལོ་རྩ་མདབ་དྲུག་ཅུ་རྩ་བཞིའི་ལྟེ་བ་ལ་ཨ་དཀར་པོ། དེ་ནས་རྩ་དབུ་མའི་ནང་ལྟེ་འོག་སོར་བཞིར་ཨ་དམར་པོ་མཚལ་ཤད་ལྟ་བུ་རྣམས་བསྒོམས་ལ། སྲོག་རྩོལ་གྱི་སྦྱོར་བས་རླུང་གཉིས་ཁ་སྦྱར་ལ། ཨ་ལས་ཡེ་ཤེས་ཀྱི་མེ་འབར་ཏེ། དབུ་མ་ན་ཡར་སོང་པས། ལྟེ་བ་ལ་སོགས་པའི་ཡི་གེ་རྣམས་རིམ་གྱིས་བསྲེགས་ཏེ། སྤྱི་བོའི་ཧཾ་ལ་ཕོག་པས། བདུད་རྩི་བབས་ནས། སྤྱི་བོ། མགྲིན་པ། སྙིང་ག །ལྟེ་བའི་རྩ་འདབ་རྣམས་ཁེངས་པས་ཡི་གེ་རྣམས་གསོས་ནས། དྲོད། བདེ་བ། གསལ་བ། མི་རྟོག་པ། གསུམ་འཆར་བར་འགྱུར་རོ། །དེ་ལྟར་ཡར་མེ་འབར། མར་བདུད་རྩི་འཛགས་པའི་འབར་འཛག་ལ་རྩེ་གཅིག་ཏུ་འབད་པས། དུ་བ་ལ་སོགས་པའི་རྟགས་ལྔ་རྙེད་ནས། སྤྲིན་མེད་པའི་ནམ་མཁའ་ལྟ་བུའི་ཆོས་ཉིད་མངོན་དུ་འགྱུར་རོ། །དེ་ཡང་ཡས་འབབ་པའི་དགའ་བ་བཞི་གསོ་བ། མས་བསྟན་པའི་དགའ་བ་བཞི་བརྟན་པར་བྱེད་པའོ།

གསུམ་པ་མཇུག་གི་བྱ་བ་ལ། བཟླས་པ་དང་། གཏོར་མ་དང་། སྤྱོད་ལམ་གྱི་རྣལ་འབྱོར་གསུམ་ལས།
རྡོ་རྗེའི་ཟླས་པ་ནི། ༼འཇུག་གནས་་་་་་གསུམ་གྱི་རང་གདངས། ཨོཾ་ཨཱཿཧཱུྃ་གསུམ་དུ་གཞི་ནས་གནས་པ་ལྟར་ངོས་མ་ཟིན་པས་དོན་མེད་དུ་སོང་བས་ན། ད་ནི་སྔགས་བླ་མེད་ཀྱི་གདམས་ངག་ཁྱད་པར་ཅན་ལ་བརྟེན་ནས་ངོས་ཟིན་པར་བྱས་ལ་འབྲུ་གསུམ་གྱི་རང་གདངས་ལ་སེམས་རྩེ་གཅིག་ཏུ་གཟུངས་སོ།༽རླུང་ཕྱིར་འགྲོ་བ་རྣམས་༼ཧཱུྃ་མང་པོའམ་ཐུགས་རྡོ་རྗེ་དཔག་ཏུ་མེད་པར་གྱུར་ནས་སེམས་ཅན་གྱི་དོན་བྱས་པ་ནི་ཐུགས་ཀྱི་གསང་པའོ།༽ཧཱུྃ་ཐུགས་རྡོ་རྗེ། ནང་དུ་འཇུག་པ་༼ཨོཾ་མང་པོའམ་སྐུ་རྡོ་རྗེ་དཔག་ཏུ་མེད་པར་གྱུར་ནས་སེམས་ཅན་གྱི་དོན་བྱས་པ་ནི་སྐུའི་གསང་པའོ།༽ཨོཾ་སྐུ་རྡོ་རྗེ། ནང་དུ་གནས་པ་༼ཨཱཿམང་པོའམ་གསུང་རྡོ་རྗེ་དཔག་ཏུ་མེད་པར་གྱུར་ནས་སེམས་ཅན་གྱི་དོན་བྱས་པ་ནི་གསུང་གི་གསང་པ་བསམ་གྱིས་མི་ཁྱབ་པའོ།༽ཨཱཿགསུང་རྡོ་རྗེར་དམིགས་ཏེ་བགྲང་པའམ། ཨཱཿགསལ་ལ་རྟོག་མེད་བདེ་བ་ཆེན་པོ་ལ་རྩེ་གཅིག་ཏུ་གནས་པར་བྱ་༼མ་ཡེངས་་་་་་་་་་་་་ཀྱི་ཕྱག་རྒྱ་ཆེན་པོ་འགྲུབ་བོ།༽ཏེ། རྡོ་རྗེའི་བཟླས་པའོ།
།གཙོ་བོའི་ཐུགས་ཁར་པད་ཉིའི་སྟེང་དུ་ཧཱུྃ་ལ་ཡི་གེ་བདུན་པས་བསྐོར་བ་དང་། ཡུམ་གྱི་ཐུགས་ཀར་༼པད་ཉིའི་སྟེང་དུ་༽བཾ་ལས་བཻ་རོ་ཙ་ནས་བསྐོར་བ་ལ། བགྲང་བའི་ཚུལ་གྱིས་༼ཡིད་ཀྱི་༽བཟླས་པས། ཡིག་འབྲུའི་འོད་ཀྱིས་ཁོང་པའི་ནང་ཁེང་པས། སྡིག་སྒྲིབ་དག་པ་ནི་བསམ་བཏན་གྱི་བཟླས་པའོ།
།ཡང་དེ་ལྟར་ཡིད་གཏད་དེ་ངག་ཏུ་བཟླས་པ་བྱས་པས། ཡབ་ཀྱི་ཐུགས་ཀའི་སྔགས་དབུ་མར་བརྒྱུད། རྡོ་རྗེ་ནས་ཡུམ་གྱི་པད་མ་དང་དབུ་མ་ན་ཡར་སོང་། ཡུམ་གྱི་ཐུགས་ཀའི་སྔགས་དང་བཅས་ཏེ། ཞལ་ནས་ཞལ་དང་། གསང་གནས་ནས་གསང་གནས་སུ་འཁོར་བའི་འོད་ཟེར་རྣམས་བདེ་བའི་རང་བཞིན་དུ་བསམས་ལ། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ་ཌཱ་ཀི་ནཱི་ཛྭ་ལ་སཾ་ཝ་རེ་སྭཱཧཱ། སྙིང་པོའོ། །ཨོཾ་ཧྲཱི་ཧ་ཧ་ཧཱུྃ་ཧཱུྃ་ཕཊ། ཉེ་སྙིང་ངོ་། །ཨོཾ་བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཕཊ་སྭཱ་ཧཱ། ཉེ་སྙིང་ངོ་། །ཨོཾ་སརྦ་བུདྷ་ཌཱ་ཀི་ནི་ཡེ་བཛྲ་ཝརྞ་ནི་ཡེ་ཧཱུྃ་ཧཱུྃ་ཕཊ་སྭཱཧཱ། སྙིང་པོའོ། ཨོཾ་ཌཱ་ཀི་ནཱི་ཡེ་ཧཱུྃ་ཧཱུྃ་ཕཊ། །ཨོཾ་ལཱ་མ་ཡེ་ཧཱུྃ་ཧཱུྃ་ཕཊ། །ཨོཾ་ཁཎྜ་རོ་ཧི་ཧཱུྃ་ཧཱུྃ་ཕཊ། ཨོཾ་རཱུ་པི་ནི་ཡེ་ཧཱུྃ་ཧཱུྃ་ཕཊ། ལྷ་མོ་བཞིའོ། གཞན་དོན་ལས་བཞིའི་བཟླས་པ་ལ་སོགས་པ་ནི་ལོགས་སུ་ཤེས་པར་བྱའོ།
།གཉིས་པ། གཏོར་མའི་རྣལ་འབྱོར་ནི། གཏོར་མ་ལྔའམ། གསུམ་མམ། གཉིས་ལ་སོགས་པ་ཅི་འབྱོར་པ་བཤམས་ལ། གཏོར་མ་དང་པོ། སུཾ་བྷ་ནིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་སྔོན་པོའི་སྟེང་དུ། རཾ་ལས་མེའི་དཀྱིལ་འཁོར་དམར་པོ། ཀཾ་ཀཾ་ཀཾ་ལས་མི་མགོའི་སྒྱེད་པོ་གསུམ་གྱི་སྟེང་དུ། ཨ་ལས་ཐོད་པ་ཕྱི་དཀར་ལ་ནང་དམར་བ། སྟོང་གསུམ་ཙམ་གྱི་ནང་དུ། པད་མ་འདབ་མ་བརྒྱད་པའི་དབུས་དང་ཕྱོགས་བཞིར། ན། གོ། ཀུ། ད། ཧ་རྣམས་ལས་མིའི་ཤ། བ་གླང་གི་ཤ། ཁྱིའི་ཤ། རྟའི་ཤ། གླང་པོ་ཆེའི་ཤ་སྟེ་ཤ་ལྔ་རི་རབ་ཙམ་མོ། །དབུས་དང་ཕྱོགས་བཞིར། བི། མུ། ཤུ། ར། མ་ལས། དྲི་ཆེན། དྲི་ཆུ། བྱང་སེམས། རཀྟ། ཤ་ཆེན་ཏེ། བདུད་རྩི་ལྔ་རྒྱ་མཚོ་ཙམ། ཨོཾ་ཧཱུྃ་ཏྲཾ་ཧྲིཿཨཱཿསྟེ་རིགས་ལྔའི་ས་བོན། དེའི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་ཨོཾ་དཀར་པོ། ཨཱཿདམར་པོ། ཧཱུྃ་སྔོན་པོ་སྟེང་ནས་སྟེང་དུ་བརྩེགས་པ། དེའི་སྟེང་དུ་ཧཱུྃ་ལས་བྱུང་པའི་ཁ་ཊྭཱཾ་ག་དཀར་པོ་མགོ་བོ་ཐུར་དུ་བསྟན་པ་བདུད་རྩིའི་རང་བཞིན་ཅན་ཧཱུྃ་གིས་མཚན་པར་གྱུར། དེ་ནས་ཡཾ་ལས་རླུང་གཡོས་པས་རཾ་ལས་མེ་འབར་ཏེ། རྫས་རྣམས་ཁོལ། ཨོཾ་ཨཱཿཧཱུྃ་བརྗོད་པས། ཧཱུྃ་གིས་སྦྱངས། ཨ་དག་པར་བྱས། ཨོཾ་གྱིས་སྤེལ་ནས། ཁ་ཊྭཱཾ་གའི་ཧཱུྃ་གི་འོད་ཟེར་གྱིས། ཡེ་ཤེས་ཀྱི་བདུད་རྩི་དཀུག་ནས། ཁ་ཊྭཱཾ་ག་ལ་ཐིམ་པ་དང་། དེ་ཉིད་ཀྱིས་བཀྲུགས་པས། ཟླ་བ་དང་བཅས་པ་ཞུ་ནས་གཉིས་སུ་མེད་པར་གྱུར། གཏོར་མ་བྱིན་གྱིས་བརླབ་པའོ། །དེ་ནས་མདུན་གྱིས་བྲིས་སྐུ་ལ་སོགས་པ་རྟེན་ནམ། མདུན་གྱི་ནམ་མཁར། ཐུགས་ཁའི་ཧཱུྃ་ལས་རཾ་གཅིག་དབུ་མ་ནས་མདུན་དུ་ཆད་པ་ལས། ཉི་མའི་དཀྱིལ་འཁོར་སྟོང་གཉིས་ཙམ་དུ་གྱུར། ཅེས་པ་དང་། བསྲུང་འཁོར་སྟོང་གསུམ་ཙམ་དུ་གྱུར་གྱི་བར་གསལ་གདབ། དེའི་ནང་དུ་ཡཾ་ལས་རླུང་གི་དཀྱིལ་འཁོར་ཟླ་གམ་ཅེས་པ་ནས། མི་བསྐྱོད་པས་དབུ་རྒྱན་པར་གྱུར་གྱི་བར་བདག་བསྐྱེད་ལྟར་གསལ་གདབ། འོན་ཀྱང་བདག་ཉིད་ཅེས་པ་མི་དགོས་སོ། དེ་ནས་མཆོད་ཕྲེང་ལྟར་རྒྱས་པར་མཆོད་པའམ། བསྡུ་ན། སྐད་གཅིག་གིས་མདུན་གྱི་ནམ་མཁར་བདེ་མཆོག་གི་དཀྱིལ་འཁོར་སྤྱན་དྲངས་པར་བསམས་ལ༼་་་་་་༽། རྐང་པ་གཡས་ཀྱི་མཐེ་བོང་གིས། གཡོན་གྱི་མཐེ་བོན་མནན་པའི་རྐང་སྟབས་འབར་བའི་ཕྱག་རྒྱ་དང་བཅས་པ་བཅའ། ཕེཾ། བཛྲ་ཨ་ར་ལི་ཧོ། ཛཿཧཱུྃ་བཾ་ཧོ། བཛྲ་ཌཱ་ཀི་ནཱི་ས་མ་ཡ་ཏྭཾ། དྲྀ་ཤ་ཧོ། ཞེས་པས་སྤྱན་དྲངས། ཨརྒྷཾ་ནས་ཤཔྡའི་བར་གྱིས་མཆོད། ལྷ་ཚོགས་རྣམས་ཀྱི་ལྗགས་རྡོ་རྗེའི་བུ་གུ་ཅན། གཏོར་མ་ལ་ཟུག་ནས་གསོལ་བར་འགྱུར། རྡོ་རྗེ་ཐལ་མོ་ཁ་༼གྱེན་དུ་༽ཕྱེ་ལ། ཨོཾ་བཛྲ་ཌཱ་ཀི་ནཱི་ཨི་དཾ་བ་ལིཾ་གྲྀཧྣ་གྲྀཧྣ་ཧཱུྃ་ཧཱུྃ་ཕཊ། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། ཨོཾ་བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཕཊ་སྭཱཧཱ། ཨོཾ་ཌཱ་ཀི་ནི་ཡེ་ཧཱུྃ་ཧཱུྃ་ཕཊ། ཨོཾ་ལཱ་མ་ཡེ་ཧཱུྃ་ཧཱུྃ་ཕཊ། ཨོཾ་ཁཎྜ་རོ་ཧེ་ཧཱུྃ་ཧཱུྃ་ཕཊ། ཨོཾ་རཱུ་པི་ནཱི་ཡེ་ཧཱུྃ་ཧཱུྃ་ཕཊ། ཨི་དཾ་བྷ་ལིཾ་ཏ། ཁ་ཁ། ཁཱ་ཧི་ཁཱ་ཧི། ཞེས་གསུམ་མམ། ལྔས་འཇིག་རྟེན་ལས་འདས་པའི་འགྲོན་ལ་དབུལ། གཏོར་མ་གཉིས་ཡོད་དམ་མེད་ནའང་དེ་ཉིད་ལ་ལག་པ་གཡོན་པ་བསྟན་ཏེ། ཨོཾ་ཞེས་བརྗོད་པས་སྟོང་པ་ཉིད་དུ་གྱུར། ༼ལག་པ་༽གཡས་པ་བསྟན་ཏེ། ཨཱ་ཞེས་བརྗོད་པས་སྣོད་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ། གཉིས་ཀ་བསྟན་ཏེ་ཧཱུྃ་ཞེས་བརྗོད་པས། ཤ་ལྔ་བདུད་རྩི་༼ལྔ་༽ལ་སོགས་པ་དམ་ཚིག་གི་བདུད་རྩིར་གྱུར། བྱང་ཁྱུང་གི་ཕྱག་རྒྱ་བསྟན་ཏེ། ཧོཿཞེས་པས་ཡེ་ཤེས་ཀྱི་བདུད་རྩིར་གྱུར། སྔར་གྱི་ཕྱག་རྒྱ་དང་། ཕེཾ་ཞེས་པ་དང་། ཨོཾ་ཁ་ཁ། ཁཱ་ཧི་ཁཱ་ཧི། སརྦ་ཡཀྵ། རཀྵ། བྷཱུ་ཏ། པྲེ་ཏ། པི་ཤཱ་ཙ། ཨུན་མཱ་ད། ཨ་པ་སྨཱ་ར། ཌཱ་ཀ །ཌཱ་ཀི་ནྱ་ད་ཡཿ ཨི་མཾ་བ་ལིཾ་གྲྀཧྞ་ཏུ། ས་མ་ཡ་རཀྵན་ཏུ་མ་མ་སརྦ་སིད་དྷིམྨེ་པྲ་ཡ་ཙྪནྟུ། ཡ་ཐེ་བཾ། ཡ་ཐཥྚཾ། བྷུན་ཛ་ཐ། པི་པ་ཐ། ཛི་གྷྲ་ཐ། མཱ་ཏི་ཀྲ་མ་ཐཱ། མ་མ་སརྦཱ་ཀ་ར་ཏ་ཡ། སད་སུ་ཁ། བི་ཤུད་དྷ་ཡ། ས་ཧ་ཡི་ཀ་བྷ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱཧཱ། ༼ཨོཾ་ཟོ་ཟོ། ཟོ་ཅིག་ཟོ་ཅིག །ཐམས་ཅད་གནོད་སྦྱིན། སྲིན་པོ། འབྱུང་པོ། ཡི་དྭགས། ཤ་ཟ། སྨྱོ་བྱེད། བརྗེད་བྱེད། མཁའ་འགྲོ། མཁའ་འགྲོ་མ་ལ་སོགས་པ། འདི་གཏོར་མ་བཞེས་སུ་གསོལ། དམ་ཚིག་གཟུང་དུ་གསོལ། དངོས་གྲུབ་ཐམས་ཅད་བདག་ལ་སྩལ་དུ་གསོལ། ཇི་ལྟ་བ་བཞིན། ཇི་ལྟར་འདོད་པ། གསོལ་ཅིག །འཐུང་ཅིག །དགོངས་ཅིག །མ་འདའ་བར། བདག་གི་དགོས་པ་ཐམས་ཅད་དང་། བདེ་ལེགས་ཐམས་ཅད། རྣམ་པར་དག་པ་ཡི། གྲོགས་མཛད་དུ་གསོལ།༽ ཞེས་ཕུལ་བས་དགྱེས་པར་གྱུར། ཨརྒྷཾ་ལ་སོགས་པས་མཆོད།
བཅོམ་ལྡན་མགོན་པོ་དཔའ་བོའི་དབང་ཕྱུག་ནི། །སྐལ་པའི་མེ་དཔུང་ལྟ་བུར་རབ་ཏུ་འབར། །རལ་པའི་ཅོད་པན་བུ་ནི་རྒྱན་དུ་བྱས། །མཆེ་བ་རབ་རྩིགས་དྲག་ཤུལ་འཇིགས་པའི་ཞལ། །སྐུ་ལ་གཟི་བརྗིད་ཕྱག་སྟོང་ལྡན་པ་པོ། །དགྲ་སྟ་ཞགས་པ་ཁ་ཊྭཾ་མདུང་བསྣམས་ཤིང་། །རབ་འཇིགས་སྟག་གི་ལྤགས་པ་སྐུ་ལ་གསོལ། །སྐུ་ཆེན་དུད་ཁ་བགེགས་འདུལ་མཛད་ལ་འདུད།
།བཅོམ་ལྡན་རྣམ་ཀུན་རྡོ་རྗེ་ཕག་མོ་ནི། །འཇིག་རྟེན་གསུམ་སོགས་ཕྱོགས་གཞན་རྒོལ་བས་མི་ཐུབ་ཅིང་། །འབྱུང་པོའི་འཇིགས་པ་མ་ལུས་རྡོ་རྗེ་ཆེན་པོ་རབ་ཏུ་འཇོམས། །རྡོ་རྗེ་གདན་བཞུགས་ཚངས་སོགས་དབང་བྱེད་ལས་རྒྱལ་ཞིང་། །རྡོ་རྗེ་ཕག་མོ་ཁྲོ་མོའི་གཟུགས་ཅན་དྲག་སྙེམས་མ། །རྨུགས་བྱེད་རྨོངས་བྱེད་རེངས་བྱེད་ལས་ནི་རྣམ་རྒྱལ་ཞིང་། །བདུད་ཀྱི་འཇིགས་པ་མ་ལུས་སྐེམས་ཤིང་ཕམ་པར་མཛད་པ་མོ། །རྣལ་འབྱོར་ཆེན་མོ་འདོད་པའི་ཁམས་ཀྱི་དབང་ཕྱུག་མ་ལ་འདུད། ཅེས་བསྟོད་ལ།
།བཅོམ་ལྡན་བདེ་མཆོག་འཁོར་དང་བཅས། །ཁྱེད་ལ་མཆོད་ཅིང་བསྟོད་པ་ཡི། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་བསྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་བསྲུངས། །དངོས་གྲུབ་ཀུན་གྱི་སྟོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་དང་ཆོས་རྣམས་འཕེལ་བར་ཤོག །བདེ་ལེགས་ཐམས་ཅད་འབྱུང་པ་དང་། །ཡིད་ལ་འདོད་པ་ཀུན་གྲུབ་ཤོག ༼།ཅེས་བརྗོད།༽
གཏོར་མ་ལྔ་ཡོད་ན་དང་པོ་ཡི་དམ། གཉིས་པ་ཆོས་སྐྱོང་། གསུམ་པ་མཁའ་འགྲོ་སྤྱི་གཏོར། བཞི་པ་གཞི་བདག །ལྔ་པ་བགེགས་ལ་སྦྱིན་ནོ། །གཏོར་མའོ།
།གསུམ་པ་སྤྱོད་ལམ་གྱི་རྣལ་འབྱོར་ནི། ཁྲུས་ཀྱི་རྣལ་འབྱོར་ནི། དབང་གི་ཆོ་གས་གོས། ཟས་ཀྱི་རྣལ་འབྱོར་ནི། ཟས་གཏོར་མ་ལྟར་བྱིན་གྱིས་བརླབས་ལ། རང་ཡི་དམ་དུ་གསལ་བས། ལྷ་མཆོད་པའི་བསམ་པས་ཚིམ་པར་ལོངས་སྤྱོད་ལ། ལྷག་མ། ཨོཾ་ཁ་ཁ། ཁཱ་ཧི་ཁཱ་ཧི། ཨུ་ཙིཥྚ་བ་ལིཾ་བྷཀྵ་བྷཀྵ་སི་སྭཱཧཱ། ཞེས་ལྷག་མ་ལ་དབང་པའི་འབྱུང་པོ་ལ་སྦྱིན་ནོ།
༼།དེ་ནས་མདུན་བསྐྱེད་དང་གཏོར་མགྲོན་སྤྱན་དྲངས་པ་ལ་གང་ཡང་བདག་རྨོངས་བློ་ཡིས་ནི་སོགས་བཟོད་པར་གསོལ། ཨོཾ་ཁྱེད་ཀྱིས། ཨོཾ་བཛྲ་མུཿ ཡེ་ཤེས་པ་གཞེགས། བསྔོ་སྨོན་ལམ་བཀྲ་ཤིས་བྱའོ།༽
།གོས་དང་རྒྱན་ལ་སོགས་པ༼འི་རྣལ་འབྱོར་༽ནི། ཧཱུྃ་ལས་སྟག་ལྤགས་ཀྱི་ཤམ་ཐབས་དང་། མི་ལྤགས་ཀྱི་སྟོད་གཡོགས་དང་། རུས་པའི་རྒྱན་ལ་སོགས་པ་གང་འོས་སུ་བྱིན་གྱིས་བརླབས་ལ་ལོངས་སྤྱོད། གཞན་ཡང་སྣང་པ་ཐམས་ཅད་ལྷ། གྲགས་པ་ཐམས་ཅད་སྔགས། སེམས་ཀྱི་ཆོ་འཕྲུལ་ཐམས་ཅད་ཡེ་ཤེས་སུ་ཤེས་པར་བྱས་ལ། དག་པའི་སྣང་བས་དུས་འདའ་བར་བྱའོ། །ཉལ་བའི་ཚེ་ནི་སྣོད་བཅུད་གཞལ་ཡས་ཁང་ལྷ་དང་བཅས་པ་ཐུགས་ཀའི་ཧཱུྃ་ལས་བསྡུས་ལ། འོད་གསལ་གྱི་ངང་ལ་ཉལ་ལོ། །ལྡང་བའི་ཚེ། ནམ་མཁར་བཞུགས་པའི་དཔའ་བོ་དང་རྣལ་འབྱོར་མ་རྣམས་ཀྱིས། ཌ་མ་རུའི་སྒྲས་འོད་གསལ་ལས་བླང་སྟེ་ལྷའི་སྐུར་གསལ་བས། སྔར་བཞིན་རིམ་པ་གཉིས་ཀྱི་རྣལ་འབྱོར་ཡན་ལག་དང་བཅས་པ་ལ་ལོངས་སྤྱད་པས། གནས་སྐབས་སུ་གྲུབ་པ་ཆེན་པོ་བརྒྱད་དང་། མཐར་ཐུག་འཁོར་ལོ་སྡོམ་པའི་གོ་འཕངས་ཐོབ་པར་འགྱུར་རོ།

།མ་རྒྱུད་སྙིང་པོ་བདེ་མཆོག་གི །སྒྲུབ་ཐབས་ཁྱུང་པོའི་མན་ངག་བཞིན། །ཉམས་སུ་བླངས་བདེར་ལྐུགས་ལུང་གི །གཙུག་ལག་ཁང་དུ་དད་ལྡན་ངོར། །སངས་རྒྱས་དཔལ་གྱིས་བྲིས་པ་ཡིན། །ནོངས་གང་མཁའ་འགྲོས་བཟོད་པར་མཛོད། །དགེ་བས་སྲིད་གསུམ་མ་ལུས་ཀུན། །བདེ་བའི་མཆོག་ཏུ་གྲུབ་གྱུར་ཅིག ༼།སེར་མ་རྣམས་ཀྱི་དོན་བསམ་ཞིང་། །བསྒོམ་ཚེ་ངག་ཏུ་མི་བརྗོད་དོ།༽ མཆོག་ཏུ་དགོའོ།

W3CN18508: །ཞི་རྒྱས་དབང་དྲག་གི་བཟླས་པའི་བྱེ་བྲག་ནི། ཞི་བ་ལ་སྔགས་ཕྲེང་། ལྷ་སྐུ། འོད་ཟེར་གྱི་སྤྲོ་བསྡུ་རྣམས་དཀར་པོར་བྱ། སྔགས་ཀྱི་ཤམ་བུ་ཤིནྟཾ་ཀུ་རུ་ཡེ་སྭཱ་ཧཱ་གདགས། སྒྲ་ལ་ནད་གདོན་ཐམས་ཅད་ཞི་བར་གྱུར་ཅིག་པའོ།
།རྒྱས་པ་ལ་སྔགས་ཕྲེང་། ལྷ་སྐུ། འོད་ཟེར་གྱི་སྤྲོ་བསྡུ་ཐམས་ཅད་སེར་པོ། པུཥྚིཾ་ཀུ་རུ་ཨོཾ་གདགས། སྒྲ་ལ་མི་ནོར་ཐམས་ཅད་རྒྱས་པར་གྱུར་ཅིག་པའོ།
།དབང་ལ་སྔགས་ཕྲེང་། ལྷ་སྐུ། འོད་ཟེར་གྱི་སྤྲོ་བསྡུ་ཐམས་ཅད་དམར་པོ། སྔགས་ལ་ཨཱ་ཀརྵ་ཡ་ཛ་ཛ། སྒྲ་ལ་སྲིད་གསུམ་ཁམས་གསུམ་ཐམས་ཅད་དབང་དུ་བསྡུས་ཅིག་པའོ།
།དྲག་པོ་ལ་སྔགས་ཕྲེང་། ལྷ་སྐུ། འོད་ཟེར་གྱི་སྤྲོ་བསྡུ་ཐམས་ཅད་མཐིང་ནག་དུ་བྱའོ། སྔགས་ལ་མཱ་ར་ཡ་ཧཱུྃ་ཕཊ་ཅེས་གདགས་སོ། སྒྲ་ལ་དགྲ་བགེགས་ཐམས་ཅད་རྔུལ་དུ་རློག་ཅིག་པའོ།
།དེ་ལྟར་ཕྲིན་ལས་བཞི་ཀ་དུས་ཚོད་དང་འདུག་སྟངས། ཁའི་ལྟ་ཕྱོགས། དབྱིབས། ཁ་དོག །བསམ་པ། རླུང་སྦྱོར་ཕྲེང་བ། སོར་མོའི་བརྡའ། ལྟ་སྟངས། ལྷ་མོ་བཞི་པོ་རྣམས་ཞིབ་པར་ཤེས་པར་བྱའོ།
།ཡིད་བཞིན་ནོར་བུའི་གཏོར་མ་ནི། གཏོར་མ་ཟུར་བརྒྱད་པའི་མཐའ་མ། ཟན་རིལ་གསུམ་རྩེགས་ཀྱིས་བསྐོར་ལ། དེ་མགོན་པོར་བསྐྱེད་ལ་ཡེ་ཤེས་པ་བསྟིམཔ་སོགས་བྱའོ། །རྗེས་གནང་གི་དམིགས་པ་ཐོན་པ་དང༌། གཏོར་མ་སློབ་མའི་མགོ་བཞག །བླ་མ་མགོན་པོ་དབྱེར་མེད་སློབ་མའི་མགོ་ཐོག་བྱོན་ཅིང༌། ཆེམ་ཆེམ། འུར་འུར་འདུག་པ་དང་། སྣང་སྲིད་ཐམས་ཅད་དབང་དུ་འདུས་པར་བསམ་མོ། །མཎྜལ་ནི། ཆོས་འབྱུང་དཀར་པོ། མེ་རི་དམར་པོ། ཁྱམས་ཕྱོགས་མདོག །དཀྱིལ་གྱི་ཧཱུྃ་དམར་པོ། མགོ་བོ་ཆོས་འབྱུང་གི་གདེངས་ཀ་ལ་བསྟན་པ་བྲི། དེའི་སྟེང་དུ་མཉྫིའི་སྟེང་གཏོར་མ་བཞག་ལ། མཆོད་གཏོར་གྱི་བསྐོར་རོ། ཞལ་ཤེས་སོ། མངྒལཾ། ཤུ་བྷཾ།