Chos drug gi zhal gdams sprul sku rin chen blo gros kyis mdzad pa

Resource ID	TRL1
Title	chos drug gi zhal gdams sprul sku rin chen blo gros kyis mdzad pa
Topics	Six doctrines of Niguma
Sub-Topics	Instructions
Author	Rinchen Lodrö
Link	BDRC W3CN18508 (p.402)
Notes	This text is linked to ni gu chos drug gi zhal shes kyi lhan thabs

༄༅། །ཆོས་དྲུག་གི་ཞལ་གདམས་སྤྲུལ་སྐུ་རིན་ཆེན་བློ་གྲོས་ཀྱི་མཛད་པ།།

སྔོན་འགྲོ་སྟོང་ར་གསུམ་གྱི་ཁྱད་པར།
སྡིག་སྒྲིབ་ལ་དམིགས་པ་ཆོས་འབྱུང་ཕྱི་ནང་གཉིས་ཀ་དཀར་བ། ནད་ལ་ཕྱི་དཀར་ལ་ནང་དམར་བ། རླུང་ལ་རང་གི་འོག་ཏུ་དམར་ནག་གི་མཚོ། ཁ་ཆུང་ལ་གཏིང་རིང་བ་རེག་བྱ་ཚ་བ། རླངས་དང་བཅས་པའི་ནང་ན། མིག་མན་ཆད་ནུབ་པ་ལ། ཨའི་བདུད་རྩི་ཞུན་མར་གྱི་རྣམ་པར་བྱུང་ནས་རླུང་གི་ནད་ཐམས་ཅད་ཞི་བར་བསམ། ཚད་པ་ལ་བདུད་རྩི་དཀར་ལ་རེག་བྱ་བསིལ་བ། གྲང་བ་ལ་བདུད་རྩི་དམར་ལ་རེག་བྱ་ཚ་བ། གདོན་ལ་དམིགས་ན་ཨ་ལས་ངོ་བོ་བདུད་རྩི་ལ་རྣམ་པ་ཁྲོ་ཆུང་མང་པོ་བྱུང་སྟེ། གདོན་ཐམས་ཅད་སྲོག་ཆགས་ཀྱི་གཟུགས་ཆེན་པོ་ལ། ནང་སྡིག་པ་དང་སྦལ་པ་ལ་པོགས་པས་གང་བ། ལུང་པར་མི་གཤོམ་པ་ཙམ་དོན་པས་ལུས་ཁྲུ་མ་ཕུས་བཏབ་པ་ལྟར་དག་པར་བསམ། རམ་རི་བོང་གི་རིལ་མ་ཙམ་ཡིན་གསུང་ངོ་།
།དབང་པོ་རབ་བླ་མའི་མོས་གུས་ལ།
ཡེ་ཤེས་གསལ་བ་སྒྲོན་མེའི་ལས། མཚན་དང་དཔེ་བྱད་ལྡན་པའི་ལྷ། །བསྐལ་པ་སྟོང་དུ་བསྒོམ་པ་བས། །བླ་མ་དྲན་པ་བསོད་ནམས་ཆེ། །ལྷ་སྐུ་མ་སྒོམ་བླ་མ་བསྒོམས། །ལྷ་སྐུ་བྱེ་བ་སྟོང་བསྒོམ་པས། །བླ་མ་དྲན་པ་བསོད་ནམས་ཆེ། །ཅེས་དང་། དེའི་རྒྱུད་ཕྱི་མ་ལས། གང་གིས་བསྐལ་པ་བརྒྱད་ཁྲི་བཞི་སྟོང་དུ་སྦྱིན་པ་བཏང་། ཚུལ་ཁྲིམས་བསྲུང་བ་ལ་སོགས་པ། ཕ་རོལ་དུ་ཕྱིན་པ་དྲུག་སྤྱད་པ་བས། ལྷའི་སྐུ་སྐད་ཅིག་མ་གཅིག་དྲན་པ་བསོད་ནམས་ཆེས་ཁྱད་པར་དུ་འཕགས་སོ། །ལྷའི་སྐུ་བསྐལ་པ་བརྒྱད་ཁྲི་བཞི་སྟོང་དུ་བསྒོམ་པ་བས། བླ་མ་སྐད་ཅིག་མ་ཅིག་དྲན་པ་བསོད་ནམས་ཆེས་ཁྱད་པར་དུ་འགསས་སོ། །ཅེས་གསུངས་སོ།
།དུས་ཀྱི་འཁོར་ལོ་ལ་སོགས་པ་ནས། སྐྱ་བ་འཛིན་པ་མེད་པར་ནི། །གྲུ་ཡིས་ཕ་རོལ་ཕྱིན་མི་ནུས། །ཡོན་ཏན་ཐམས་ཅད་རབ་རྫོགས་ཀྱང༌། །བླ་མ་མེད་པར་སྲིད་མཐར་མིན། ཅེས་གསུངས་སོ།
།ནོར་བཟང་གི་ཞུས་པ་ལས་དགེ་སློང་རྒྱ་མཚོའི་དབྱངས་ལ། དགེ་སློང་ཁྱོད་ཀྱིས་བྱང་ཆུབ་སེམས་དཔའི་སྤྱོད་པ་འདི་ལྟ་བུ་མངོན་དུ་གྱུར་པ་ནི། གང་ལས་བྱུང་ཞུས་པས། སྔོན་དགེ་བའི་བཤེས་གཉེན་བསྟེན་པར་བྱས། བསྙེན་པར་བྱས། རིམ་གྲོ་དང་ཕུ་དུད་དུ་བྱས་པ་ལས་བྱུང་ངོ་། །ཅེས་གསུངས།
རྟག་གཉིས་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟེན་པ་དང་། །བདག་གི་བསོད་ནམས་ལས་ཤེས་བྱ། ཅེས་གསུངས་སོ།
།མདོ་ལས། བླ་མ་མཁས་པ་དག་ལ་རྟག་ཏུ་བསྟེན་པར་བྱ། །ཅི་ཕྱིར་ཞེས་ན་མཁས་པའི་ཡོན་ཏན་དེ་ལས་འབྱུང་། ཅེས་གསུངས་སོ།
།དེ་རྣམས་བླ་མ་ཤངས་པའི་གསུང་སྒྲོས་སོ། །བླ་མ་གཉན་གྱི་གསུང་ཐོར་བུ་ལ། བླ་མ་གཙང་པ་ལ། འབྲུག་གི་དགོན་པ་འདེབས་པའི་དུས་སུ་བྱོན་ནས་མཇལ་བའི་ལོ་རྒྱུས། བླ་མ་རྗ་བཙུན་ཆེན་པོས་འགྲོ་ཆོས་སུ་མོས་གུས་ཀྱི་ཞལ་གདམས་གསུངས། རྗེ་བཙུན་མི་ལ་དང་། རས་ཆུང་པ་ཕ་བོང་དཀར་ལེབ་དུ་བྱོན་པའི་ལམ་དུ་མུན་སྲོས་ནས་མ་ཐར་ཏེ། རྗེ་བཙུན་གྱི་ཞབས་འོག་ཏུ་རྡོ་ལེབ་གཅིག་བཙུད་ནས་བཞག་པས། ནང་པར་དེ་ལ་དབུ་གཏད་ནས་བཞུག་འདུག །དེ་ལྷུང་གི་དོགས་པའི་ཞབས་བརྟེན་ལགས་ཏེ་ཞུས་པས། སྤྲིན་མ་གིའི་འོག་ན་མར་རྔོག་གི་གདན་པ་ཡོད་པས་དེ་ལ་འཕོངས་གཏོད་མི་ནུས་གསུང་།
ཡང་། བླ་མ་རིན་པོ་ཆེ་འབྲི་ཁུང་པ་དང་མཇལ་བའི་ལོ་རྒྱུས། བླ་མ་ཞང་རིན་པོ་ཆེ་དང་མཇལ་བའི་ལོ་རྒྱུས། བླ་མ་ཐམས་ཅད་མོས་གུས་ཀྱི་ས་ལམ་བགྲོད་པར་མཐུན་པར་འདུག་གསུང་ངོ་། །དབང་པོ་འབྲིང་ཚིག་གཞན་གྱི་བར་མ་ཆོད་པ་ལ།
ཁྱེའུ་རབ་སྣང་གི་ཞུས་པའི་མདོ་ལས། ཕ་མས་རབ་ཏུ་བྱུང་དུ་མ་སྟེར་བ་ལས་ཡང་དག་པ་རྫོགས་པའི་སངས་རྒྱས་ལ། བདག་རབ་ཏུ་འབྱུང་བ་ལ་དད་པས། ཕ་མའི་སྡིག་རྐྱེན་དུ་གྱུར་བར་འདུག་པས། འདོད་པའི་ཡོན་ཏན་དང་བཅས་ཏེ་ཁྱིམ་ན་གནས་བཞིན་དུ་སངས་རྒྱས་པའི་གདམས་པ་ཞིག་ཞུ། ཅེས་གསོལ་པ་དང་བཀའ་སྩལ་པ།
ཆོས་རྣམས་རྨི་ལམ་སྒྱུ་མ་ཞེས། །གང་གིས་ཚིག་བརྗོད་དྲན་གྱུར་པ། །སྲིད་པའི་འཆིང་བ་ལས་གྲོལ་ཏེ། །ཚེ་འདི་ཉིད་དུ་མངོན་སངས་རྒྱ། ཞེས་གསུངས་སོ།
།ལས་རྒྱ་མཚོའི་རྒྱུད་ལས་ཀྱང་། འགྲོ་ཀུན་སྐྱེས་པ་བུད་མེད་སྣ་ཚོགས་པ། །དེ་དག་རང་གི་སེམས་དང་ཐ་དད་མེད། །ཐམས་ཅད་སྒྱུ་མའི་སྣང་བར་རབ་ཤེས་ནས། །དེ་ཚེ་སངས་རྒྱས་ལག་པའི་མཐིལ་གཏོད་འགྱུར། ཞེས་གསུངས་སོ།
ལང་ཀར་གཤེགས་པ་ལས། ཕྱི་རོལ་གཟུགས་ནི་ཡོད་མིན་ཏེ། །རང་གི་སེམས་ནི་ཕྱི་རོལ་སྣང་། ཞེས་དང་། ཀྱཻ་རྒྱལ་བའི་སྲས་དག་ཁམས་གསུམ་པོ་འདི་ནི་སེམས་ཙམ་མོ། ཞེས་གསུངས་པས།
རང་ལུས་ལྷ་སྐུར་བསྒོམ་པ་ལ་སོགས་པ་སྣང་སྲིད་འཁོར་འདས་ཀྱི་ཆོས་ཐམས་ཅད་རང་གི་སེམས། སེམས་བདེན་མེད་སྒྱུ་མ་རྨི་ལམ་ཡིན་ལ། བསམ་ཞིང་ཚིག་གཞན་གྱིས་བར་མ་ཆོད་པར་བརྗོད་པས་ཉིན་བར་གྱི་དུས་འདའ། མཚན་མོའི་དུས་སུ་རང་གི་དགོན་པ་དང་། བླ་མ། གྲོགས་མཆེད་ལ་སོགས་པ་ཡིད་ལ་བཅག་པའི་བག་ཆགས་རྣམ་རྟོག་འགྱུ་བས། དེ་བཀག་པས་མི་ཁེགས། སྤངས་པས་མི་སྤོངས། བཞག་པར་མི་སྡོད་པས། གང་སྐྱེས་སྔོན་པའི་ཁྱིས་རི་དགས་དེད་པ་བཞིན་དུ་ཉམས་སུ་བླངས། བླ་མ་རྨོག་ལྕོག་པའི་གསུང་ངོ་།
།ལྷའི་བུ་པདྨ་རྣམ་པར་རོལ་པས་ཞུས་པའི་མདོ་ལས། ལྷའི་བུས་འཕགས་པ་འཇམ་དཔལ་ལ་གསོལ་པ། འཕགས་པ། སྣང་བ་འདི་ཇི་ལྟར་བལྟ་བར་བགྱི། ཅེས་ཞུས་པས། བཀའ་སྩལ་པ། ལྷའི་བུ་དག་སྣང་བ་འདི་མ་ངེས་པ་དང་། བརྫུན་པ་དང་། སྒྱུ་མ་ལྟ་བུ་དང་། རྨི་ལམ་ལྟ་བུར་བལྟ་བར་བྱའོ། །ཞེས་གསུངས་པ་དང་།
གསོལ་པ། ཅིའི་ཕྱིར་མ་ངེས་པར་ལྟར་གྱི་ཞུས་པ་དང་། བཀའ་སྩལ་པ། ལྷའི་བུ་དག །ས་ལ་པར་ངེས་པ་ཡོད་དོ། །ས་ལ་ཆུར། ས་ལ་མེར། ས་ལ་རླུང་། ས་ལ་ནམ་མཁར་མཐོང་བ་ཡོད་དོ། །དེའི་ཕྱིར་མ་ངེས་སོ།
།དེས་ན་སྣང་ན་ཕྱི་རོལ་གྱི་དོན་དུ་མ་གྲུབ་པས་ངེས་མེད་སྣ་ཚོགས་སུ་སྣང་། སྣ་ཚོགས་སུ་སྣང་བ་རང་གི་སེམས་ཡིན་ཏེ། ཆུ་ལྟ་བུ་གཅིག་ལ། ལྷ་ལ་བདུད་རྩི། ལྷ་མིན་ལ་གོ་མཚོན། མི་ལ་ཆུ། དུད་འགྲོ་བྱིངས་ན་གནས་པ་ལ་ཤ་ཁྲག །ཡི་དགས་ལ་རྣག་ཁྲག །དམྱལ་བ་ལ་ཁྲོ་ཆུ་ཁོལ་མར་སྣང་། སངས་རྒྱས་བྱང་ཆུབ་སེམས་དཔའ་ལ་ཆུ་ལ་མཱ་མ་ཀིའོ།
།སྲོག་ཆགས་སྣལ་པ་ལ། ས་ལ་ནམ་མཁའི་འདུ་ཤེས་ཡོད་པས་ཁོ་ས་འོག་ལ་རྒྱུག་པ་ལ་རྟས་མི་ཟིན་པ་ཡོད་གསུང་། རྒྱ་ཡུལ་ན་རྡོ་སོལ་གྱི་ཕུང་པོ་ལ་ཆར་བབ་པས་མེར་འབར་བའི་ནང་ན་མེ་བྱི་ཡོད་པས་མེ་ལ་ཟས་གོས་ཀྱིས་སྣང་བ་ཤར་ནས། མེ་ཆེ་ན་ཁོའི་ལུས་ཉམས་དང་ལྡན་ལ་ལུག་ཙམ་འོང་། ཆུང་ན་མདངས་མེད་པ་བྱི་ལ་ཙམ་དུ་འགྲོ་བ་ཡོད་ཟེར། ནམ་མཁའ་སྟོང་པ་ལ་སར་འདུ་ཤེས་པ་ཡོད་དེ། སློབ་དཔོན་སངས་རྒྱས་ཡེ་ཤེས་ཞབས་ཀྱིས་ལྷོ་ཕྱོགས་ཀམ་ཀ་ནར་བྱོན་པས། ལོ་ཐོག་དང་རྩི་ཤིང་ནགས་ཚལ་ཐམས་ཅད་ནམ་མཁའ་ལ་སྐྱེས་པ་འདུག་ནས། ངེད་ཀྱི་ཡུལ་ན། ས་ལ་སྐྱེ་བྱེས་པས་བློར་མ་གཤོམ་པ་ལྟ་བུའོ། །གཞན་ཡང་། བྱ་རོག་དང་མིའི་ཉིན་པར་ལ། སྲིན་བྱ་དང་འུག་པའི་མཚན་མོ་དང་། ཁོའི་ཉིན་མོ་ལ་མི་དང་བྱ་རོག་གི་མཚན་མོར་འདུ་ཤེས་པས། དེའི་ཕྱིར་ཡང་སྣང་བ་མ་ངེས་པའོ། །ཞེས་གསུངས་པ་དང་།
ལྷའི་བུས་གསོལ་པ། སྣང་བ་མི་བདེན་རྫུན་པ་ཡིན་ན། ཅིའི་ཕྱིར་ས་རྡོ་རི་བྲག་ལ་སོགས་པ་བསྲ་ཞིང་འཐས་སར་སྣང་། །ཞེས་གསོལ་པ་དང་།
བཀའ་སྩལ་པ། ལྷའི་བུ་དག །དྲང་སྲོང་མེ་བྱིན་གྱིས་སྟག་ཏུ་བསྒོམ་པས། སྟག་ཏུ་སོང་ནས་མི་མང་པོ་ཟོས་པ་དང་། ཡང་། དགེ་སློང་གཅིག་ལ་ཀླུ་སྲིན་མོ་གནོད་པ་ལ། ཀེང་རུས་སུ་བསྒོམས་པས་དེའི་བག་ཆགས་བལྟས་ནས་ང་ལ་མ་རེག །གཅིག་འཇིག་པར་འགྱུར་རོ་ཞེས། བག་ཆག་ཡུན་ཐུངས་པས་ཀྱང་དེ་ལྟར་ཨ་འཐས་སུ་འགྱུར་ན། ཐོག་པ་མེད་པའི་བག་ཆགས་ངན་པ་ཡུན་རིང་དུ་གོམས་པས། ཅིའི་ཕྱིར་བདེན་པར་མི་འཛིན་ཏེ་ཨ་འཐས་སུ་ཞེན་པའོ། །ལྷའི་བུ་དེའི་ཕྱིར་མི་བདེན་པར་རྟོགས་པར་བྱའོ།
།གསོལ་པ། ཇི་ལྟར་སྒྱུ་མ་ལྟ་བུར་བལྟ་བར་བགྱི། བཀའ་སྩལ་པ། རྒྱ་གར་གྱི་ཕྱོགས་གཅིག་ན་རྒྱལ་པོ་དཔའ་བ། ཕྱུག་ཅིང་ལོ་ལེགས་པ་ཞིག་ལ་རྟ་སྲེད་བྱུང་ནས། རྒྱལ་སྲིད་ཉམས་ནས་འགྲོ་བ་བྱུང་པ་ལ། བཙུན་མོས་སྒྱུ་མ་མཁན་དཔོན་གཡོག་གསུམ་སྒོ་དྲུང་དུ་བོས་ནས། གྱོ་མོ། རྡེའུ། རས་སྐུད་ལ་སོགས་པ་ལ་སྔགས་བཏབ་ནས། རྟ་བཟང་པ། ཚུགས་ཆེ་བ། སྒ་སྲབ་དང་བཅས་པ་གཅིག་སྤྲུལ་ནས། རྒྱལ་པོ་ཕོ་བྲང་ན་རིན་པོ་ཆེའི་ཁྲིའི་སྟེང་ན། དུ་གུ་ལའི་རས་དང་། མོན་དར་ལ་སོགས་པ་གྱོན་ནས་གཉིད་དུ་སོང་ཡོད་པ་ཐབས་ཀྱིས་བསླང་ནས། རྒྱལ་པོ་ཆེན་པོ་རྟ་ཁྱད་པར་དུ་འཕགས་པ་གཅིག་འཚོང་གིན་འདུག་པ་མི་ཉོ་འམ་བྱས་པ་དང་། རྒྱལ་པོས་སྒོ་དྲུང་དུ་འོངས་ནས་གཟིགས་པ་དང་། སྒྱུ་མ་མཁན་བཟང་པོའི་གཟུགས་སུ་ཡོད་པ་ཀུན་ལ། རྟ་འདི་ལ་ཇི་ཙམ་འདོད་ཟེར་བ་དང་། གཅིག་ན་རེ་ཁྱོད་རང་གི་རྒྱལ་སྲིད་ཐམས་ཅད་མཇལ་ན་ཚོང་ཟེར། གཅིག་ན་རེ། འདི་ང་དབང་པས་རྒྱལ་སྲིད་དང་བཙུན་མོ་མཇལ་ན་འཚོང་ཟེར་བ་དང་། གཅིག་ན་རེ། ཁོང་གཉིས་ངའི་གྲོགས་ཡིན། རྒྱལ་སྲིད་བཙུན་མོ་སྲས་ཚོའི་ཁྱེད་འཇལ་ན་འཚོང་ཟེར་བ་དང་། རྟ་ལ་བལྟས་ནས་འཇལ་བར་ཁས་བླངས་ནས། རྒྱལ་པོས་རྟ་ལ་ཞོན་ནས་བལྟས་པས། རྟས་ཁྱེར་ནས་མི་མེད་ཀྱི་ས་ཆུ་མེད་པ་རྩྭ་མེད་པ་གཅན་ཟན་དུག་པ་ཅན་མང་པོས་གང་བ་གཅིག་དུ་བསྐྱུར་བ་དང་། རྒྱལ་པོ་མྱ་ངན་དུ་གྱུར་ཏེ། ཕྱོག་གཅིག་ན་ཕར་སོང་བ་དང་། དུད་པའི་དྲི་ཚོར་ནས། ད་ནི་རིང་པོར་མི་ཐོགས་པར་མི་དང་འཕྲད་པར་འགྱུར་གོར་མ་ཆག་གོ་སྙམ་པ་དང་། ཁང་ཆུང་གཅིག་ན་རྒན་རྒོན་གཉིས། བུ་ལྐུགས་པ་གཅིག །བུ་མོ་གཞོན་ནུ་མ་གཅིག་དང་བཞི་འདུག་པའི་རྒན་པོ་ན་རེ། རྒྱལ་པོ་ཆེན་པོ་ཁྱོད། བསོད་ནམས་དང་ལྡན་པ་ཡིན་ཀྱང་། ཁྱེད་རང་གི་ཁ་ཟས་རོ་བརྒྱ་དང་ལྡན་པ་ད་མི་མྱོང་བས། འདི་ཟོ་ཟེར་ནས་ཟོས། ཁྱེད་རང་གི་རིན་པོ་ཆེའི་མཁར་དུ་ད་མི་ཕྱིན་པས་ཟེར་ནས་ཁང་པ་བརྩིགས། བཙུན་མོ་དམ་པ་དང་ཕྲད་པའི་སྐབས་མེད་པས་ཟེར་ཏེ། བུ་མོ་དེ་བཙུན་མོར་བྱིན་པས། བུ་ཚ་མིང་སྲིད་བདུན་བྱུང་ནས། དེ་རྣམས་ནར་སོན་པ་དང་། རྒྱལ་པོ་ཆེན་པོ་ཁྱེད་བསོད་ནམས་དང་ལྡན་པ་ཡིན་གྱིས། ངའི་བུ་ལྐུགས་པ་འདི་ལ་བྱམས་པར་བགྱིས་ཟེར་ནས། རྒད་པོ་ཤི་བར་གྱུར། དེ་ནས་ཁོང་དེ་རྣམས་ཐམས་ཅད་དེ་སྐད་ཟེར་ཞིང་རིམ་པ་བཞིན་དུ་ཤི་བ་དང་། རྒྱལ་པོ་མྱ་ངན་དང་ལྡན་པར་གྱུར། ལོ་རྩིས་པས་བདུན་བརྒྱ་ཙམ་སོང་ཡོད་པ་ན། བཙུན་མོ་ན་རེ། ད་ནི་སྒྱུ་མ་བཤིག་ཅིག །རྒྱལ་པོ་ལ་ཐུགས་རླུང་འཇུག་གོ་ཟེར་བ་དང་། སྒྱུ་མ་མཁན་གྱི་སྒྱུ་མ་བཤིག་པས། རྒྱལ་པོ་ཉི་གྲིབ་མཚམས་ན་ཡོད་པ་ལ། གྲིབ་མ་སོར་གཉིས་སོང་འདུག་པ་མཐོང་ནས། ད་ནི་བདག་གི་རྒྱལ་སྲིད་བཙུན་མོ་དང་བཅས་པ་ཐམས་ཅད་སྔར་གྱི་སྒྱུ་མ་དང་ཁྱད་པར་མི་འདུག་སྙམ་ནས། སངས་རྒྱས་ཀྱི་དྲུང་དུ་རབ་ཏུ་བྱུང་། ནས་བསྒྲུབས་པས། དགྲ་བཅོམ་པའི་འབྲས་བུ་ཐོབ་པར་གྱུར་ཏེ། ལྷའི་བུ་དག་སྒྱུ་མ་ནི་དེ་ལྟ་བུའོ། ཞེས་གསུངས་སོ།
ཡང་གསོལ་པ། འཕགས་པ་རྨི་ལམ་ཇི་ལྟ་བུར་བལྟ་བར་བགྱི། བཀའ་སྩལ་པ། རྒྱ་གར་གྱི་ལྷོ་ཕྱོགས་ན། རྒྱལ་པོ་ཟླ་བ་ཞེས་བྱ་བ་ཞིག་ཡོད་པར་གྱུར་ཏོ། དེ་ལ་བུ་མོ་གཟུགས་མཛེས་པ་ལྟ་ན་སྡུག་པ་རིན་པོ་ཆེའི་རྒྱན་རང་ཆས་སུ་ཡོད་པ་ལོ་བཅུ་དྲུག་ལོན་པ་གཅིག་ཡོད་པར་གྱུར་པ་དེ། མྱ་ངན་གྱི་ཁང་པར་ཞུགས་པ་དང་། མངག་ཤུགས་མ་སུམ་ཅུའི་དྲག་ཤོས་སུ་གྱུར་པ་ན་རེ། ལྷ་འདི་ལྟ་བུའི་ཕུན་སུམ་ཚོགས་པའི་དུས་སུ། ཅིའི་ཕྱིར་མྱ་ངན་བྱེད། ཅེས་དྲིས་སོ།
།ལྷ་ན་རེ། འདི་ལྟར་འབྱོར་པ་ཉིད་ཀྱིས་མྱ་ངན་དུ་གྱུར་ཏེ། བདག་གི་ཁྱིམ་ཟླར་འོས་པ་ཇི་སྙེད་ཡོད་ཟེར་བ་དང་། ལུང་པའི་ཕུ་ན་འོ་སྐོལ་རང་གི་འགྲན་ཟླར་གྱུར་པའི་རྒྱལ་པོ་དེ་ལ་རྒྱལ་བུ་མཛེས་ཤིང་ལྟ་ན་སྡུག་པ་གཅིག་ཡོད་པར་འདུག་པས། དེ་དང་གཉེན་བྱའོ་བྱས་པ་དང་། རུང་ཟེར་ནས་རིན་པོ་ཆེའི་རྒྱན་ཁལ་བྱེ་བ་རི་བ་གཅིག་བསྐུར་ནས་རྒྱལ་པོའི་རྩར་ཕྱིན་པས། འོ་སྐོལ་གཉེན་མ་སྦྲེལ་ན་གཡུལ་ལན་རེ་ལ་མི་དང་གླང་པོ་ལ་སོགས་པ་མང་པོ་འཆི་བར་འདུག་བྱས་པས། རྒྱལ་བུ་ན་རེ་འཐད། ཁྱེད་ཀྱི་ལྷ་དེ་ཇི་ལྟ་བུ་ཟེར་བ་དང་། རྒྱལ་བུས་ནག་གསེབ་ཀྱི་སྤྲ་རྒད་པོ་མཐོང་ངམ། ཐོས་སམ་བྱས་པས། མཐོང་ཟེར། དེ་དང་རྒྱལ་བུ་གཉིས་འགྲན་ན་བྱས་པས། བརྒྱ་སྟོང་གི་ཆར་ཡང་ཉེ་བར་མི་འགྲོ་ཟེར། ངེད་ཀྱི་ལྷ་དང་རྒྱལ་བུ་འགྲན་ནའང་དེ་བཞིན་ནོ། །བྱས་པས། གང་གི་ཡིད་ཆེས་ཟེར་བ་དང་། རིན་པོ་ཆེའི་རྒྱན་ཁལ་བྱེ་བ་རི་བ་བསྐུར་རོ་བྱས་པས་ཤིན་ཏུ་དགའ་སྟེ། རྒྱལ་བུས་ཀྱང་དེ་བས་ཆེས་ཁྱད་པར་དུ་འཕགས་པ་གཅིག་བསྐུར་ནས། ལྷའི་དྲུང་དུ་ལོག་པ་དང་། ལྷ་ན་རེ། གཉེན་བྱུང་ངམ་ཟེར་རོ། །བྱུང་བྱས་པས། རྒྱལ་བུ་དེ་ཇི་ལྟ་བུ་ཟེར། ལྷས་ནགས་སེབ་ཀྱི་སྤྲ་མོ་ཞར་མ་མཐོང་བྱས་པས་མཐོང་ཟེར། དེ་དང་ལྷ་ཉིད་འགྲན་ན་བྱས་པས། དེས་ངའི་ཚ་ཙམ་དུ་ཡང་མི་ཕོད་ཟེར། རྒྱལ་བུ་དང་ལྷ་གཅིག་འགྲན་ན་ཡང་དེ་བཞིན་ནོ་བྱས་པས། དགྱེས་ཏེ་ཅིའི་ཕྱིར་ཡིད་ཆེས་ཟེར། ལྷ་ཉིད་ཀྱི་དེ་བས་ཀྱང་ཁྱད་པར་དུ་འཕགས་པའི་རྒྱན་འདི་བསྐུར་རོ་བྱས་པས། དགྱེས་ཏེ་མྱ་ངན་གྱི་ཁང་པ་ནས་ཐོན་པར་གྱུར་ཏོ། ལྷའི་རྨི་ལམ་དུ་རྒྱལ་བུ་མཛེས་པ་དེ་དང་འགྲོགས་པས་བུ་ཡིད་དུ་འོང་བ་གཅིག་བཙས་པས་དགའ། དེ་ནས་བུ་ཤི་བས་མྱ་ངན་དུ་གྱུར་པ་དང་གཉིད་པད་ནས། རྒྱལ་བུ་དང་འགྲོགས་པ། བུ་སྐྱེས་པ། ཤི་བ་གང་དུ་ཡང་མི་བདེན་པར་མི་འདུག་ནས། ད་རྒྱལ་བུ་དེ་ལ་དངོས་སུ་ཕྱིན་པ་ལ་སོགས་པའང་དེ་དང་ཁྱད་པར་མི་འདུག་སྙམ་པ་དང་། སྒོ་དྲུང་ན་ཡར་སངས་རྒྱས་བླ་མ་ཞེས་བྱ་བ་བསོད་སྙོམས་ལ་བྱོན་ནས། ཛ་ཡ་སིདྡྷི་བཀྲིས་པར་གྱུར་ཅིག་བྱས་པ་དང་། མོའི་རྣ་བར། ཇི་ལྟར་བུ་མོ་གཞོན་ནུའི་རྨི་ལམ་ན། བུ་ཕོ་སྐྱེས་ནས་ཤི་བ་དེ་མཐོང་ནས། བྱུང་ན་དགའ་ཞིང་ཤི་ན་མི་དགའ་ལྟར། ཆོས་རྣམས་ཐམས་ཅད་དེ་བཞིན་ཤེས་པར་གྱིས། བྱ་བར་གོ་ནས། སངས་རྒྱས་ཀྱི་དྲུང་དུ་རབ་ཏུ་བྱུང་པས་དགྲ་བཅོམ་པའི་འབྲས་བུ་ཐོབ་བོ། །ལྷའི་བུ་དག་རྨི་ལམ་ནི་དེ་ལྟ་བུའོ།
།ཡང་། བླ་མ་སྟོན་པའི་ཞལ་ནས། རྒྱུད་སྡེ་བཞིའི་དོན་ཧྲིལ་གྱིས་དྲིལ་ན། ཆོས་རྣམ་པ་དྲུག །དེའི་བརྗོད་བྱ་མཐར་ཐུག་འོད་གསལ། དེ་མངོན་དུ་གྱུར་པ་ལ་རྨི་ལམ་འབྱོང་དགོས། དེ་ཉིན་པར་སྒྱུ་ལུས་བསྒོམ་པའི་སྟོབས་ལས་འབྱུང་། དེ་ལ་བླ་མའི་མོས་གུས་དགོས་བླ་མ་སངས་རྒྱས་སུ་མཐོང་པ་ལ་ཚེ་བློས་ཐོངས་དགོས། འཆི་བ་མ་དྲན་ན་ཚེ་འདི་བློས་མི་ཐོངས་པས། འཆི་བ་རྒྱུད་ལ་མ་སྐྱེས་པའི་ཆོས་པ་ནི། འཁྱགས་ཐོག་ཏུ་མཁར་བརྩིགས་པ་དང་འདྲ་སྟེ།
རྐྱེན་མི་ཐུབ། འཁོར་ལོས་བསྒྱུར་བའི་ཚིག་གི་འགྲུབ། ལྷ་རྣམས་ཀུན་གྱིས་བསམ་པས་འགྲུབ། རྣལ་འབྱོར་པས་ཏིང་ངེ་འཛིན་གྱིས་འགྲུབ། ཅེས་གསུངས་སོ།
།འཁོར་ལོས་བསྒྱུར་བའི་བྱ་བ་ཐམས་ཅད་ཚིག་ཙལ་གྱིས་འགྲུབ་ཀྱང་འཆི་བའི་དུས་སུ་འཕྲོ་ལ་འཆི་ན། འོ་སྐོལ་རྣམས་ཀྱིས་དོན་མེད་བྱ་བ་ལ་ཟིན་པ་མེད་པས། འཕྲལ་དུ་བློ་སྣ་བཏུང་དགོས་ཏེ།
ཇོ་བོའི་ཞལ་ནས། དི་རིང་འདི་བྱ་སང་ནི་འདི་བྱ་ཞེས། བསམ་མནོའ་ལྡན་པ་དེ་ནི་འཆི་བདག་དབང་དུ་འགྲོ། ཅེས་གསུངས་སོ།
།ཆེད་དུ་བརྗོད་པའི་ཚོམས་ལས། འཆི་བའི་རྐྱེན་དུ་མ་གྱུར་པའི། །དངོས་དེ་གང་ནའང་ཡོད་མ་ཡིན། ཞེས་དང་།
གང་དུ་ཕྱིན་ན་འཆི་བར་མི་འགྱུར་བའི། ས་ཕྱོགས་དེ་ནི་གང་ནའང་ཡོད་མིན་ཏེ། །རི་བོ་ལ་མེད་རྒྱ་མཚོའི་གཏིང་ནའང་མེད། །ནམ་མཁའི་མཐོངས་སུ་ཕྱིན་ཀྱང་རྙེད་མི་འགྱུར། ཞེས་གསུངས།
མཚན་བཟང་གི་མདོ་ལས། སང་ཙམ་འཆིའམ་སུས་ཤེས་ཀྱིས། །དེ་རིང་ཉིད་དུ་བསྟུན་ཏེ་བྱ། །འཆི་བདག་འདེ་ཆེན་དེ་དང་ནི། །རྟག་ཏུ་གནས་པ་མ་ཡིན་ནོ། ཅེས་གསུངས་སོ།
།སློབ་དཔོན་ཀླུ་སྒྲུབས་ཀྱིས། འཆི་བའི་རྐྱེན་ནི་མང་བ་སྟེ། །གསོན་པའི་རྐྱེན་ནི་ཉུང་ཟད་དེ། ཞེས་གསུངས་པས།
ཚེ་ལའང་ངེས་པ་མེད་པས། དི་རིང་འདི་བྱ། སང་ནི་འདི་བྱ་ལ་མི་བཞག་པར། འཕྲལ་དུ་བློ་སྣ་བཏུངས་ནས་ཉམས་སུ་ལེན་པ། ལོ་ཙ་བ་རིན་ཆེན་བཟང་པོ་ལྟ་བུའམ། དགེ་བཤེས་སྟོན་པ། ཁམ་པ་མཛེ་སངས་རྒྱས་རྣལ་འབྱོར་པ། དགེ་བཤེས་པོ་ཏོ་བ། ཁ་རག་སྒོམ་ཆུང་པ། དེའི་སློབ་མ་ལྷོ་པ་ལྟ་བུ་ཡིན་གསུང་།
དེ་ཡང་དང་པོ་ནས་ངང་གིས་མི་སྐྱེ་བས། གཉེན་པོ་བསྟེན་ལ་བཅོས་ཤིང་ཡང་བསྒོམ་དགོས་ཏེ། འབན་གུང་རྒྱལ་ལྟ་བུའོ།
།དེས་ན་འཆི་བ་མི་རྟག་པ་འདི་རྒྱུད་ལ་སྐྱེས་ན། ཚེ་འདི་ལ་བློ་ལྡོག །མི་ཆོས་དགོས་མེད་དུ་འབོར། ཐར་ལམ་ལ་བརྩོན་པར་འཇུག ཅི་བྱས་ཆོས་སུ་འགྱུར་བ་ལ་སོགས་པ་ཕན་ཡོན་དཔག་ཏུ་མེད་པར་གསུངས་ལ། ལུས་ངག་ཡིད་གསུམ་ཐ་མལ་དུ་མི་ལུས་པར་དགེ་སྦྱོར་ལ་ངང་གིས་འཇུག་པས། དེས་ན་དགེ་སྦྱོང་ལ་འཆུན་ཆེ་དགོས་པ་ཡིན་གསུངས། ཡང་སྒྱུ་མ་རྨི་ལམ་རྒྱུད་ལ་སྐྱེས་པ་རྣལ་འབྱོར་ཆོས་དབྱུང་གི་ལོ་རྒྱུས་ལྟ་བུ་དང་། ངམ་ཤོད་ཀྱི་སློབ་དཔོན་རོ་ཟན་ནག་པོའི་ལོ་རྒྱུས་ཀྱང་གསུངས།
རབ་སྣང་གི་མདོ་ལས། རྨི་ལམ་སྣ་ཚོགས་རྨིས་པའི་དཔེས། སྣང་བ་སེམས་སུ་གཏན་ལ་ཕོབ། ཅེས་སོ།
།སྤྲུལ་སྐུ་རིན་ཆེན་བློ་གྲོས་མཛད་པའོ། །མངྒ་ལཾ། བྷ་ཝནྟུ།