Difference between revisions of "Dpal ldan shangs pa bka' brgyud kyi chos 'byung gser chos zhing gi sa bon - part 2"

From Shangpa Resource Center
Line 720: Line 720:
 
ཉེ་བའི་ཆར་རྒྱ་ཡིག་གི་དཔྱད་གཞི་འགར་ཤངས་པ་བཀའ་བརྒྱུད་པའི་ཁུངས་བཙན་གྱི་བླ་རབས་རྣམ་ཐར་ནང་འཁོད་པའི་བླ་མ་བརྒྱུད་པ་རྣམས་ལ་བརྒྱུད་པ་རྙིང་མ་དང་། ཤངས་སྟོན་སངས་རྒྱས་དཔལ་ལས་བརྒྱུད་པར་བརྒྱུད་པ་གསར་མ་ཞེས་པའི་ཐ་སྙད་སྤྱད་འདུག་པ་འདི་རིགས་ནི་བོད་ཡིག་གི་ཁུངས་བཙན་དཔྱད་གཞི་རྣམས་སུ་ཅི་ཡང་མི་གསལ་བས། ཡིད་གཉིས་སུ་འགྲོ་བའི་རྒྱུ་ཁོ་ནར་མཐོང་། དེ་མིན་ཤངས་སྟོན་སངས་རྒྱས་དཔལ་གྱི་མཛད་རྣམ་སོགས་སུ་བླ་རབས་སོ་དྲུག་ཅེས་པར། རིན་ཆེན་བདུན་བརྒྱུད་སྔ་མ་བདུན་དང་། དེ་ནས་རིམ་བཞིན་མཁས་གྲུབ་གཙང་མ་ཤངས་སྟོན། མཁས་བཙུན་གཞོན་ནུ་གྲུབ། འཇག་ཆེན་རྒྱལ་མཚན་འབུམ། ཁྱུང་པོ་གཉིས་པ་ཚུལ་ཁྲིམས་མགོན་པོ། རས་ཆེན་སངས་རྒྱས་སེང་གེ ཤངས་དཀར་རིན་ཆེན་རྒྱལ་མཚན། མཉམ་མེད་སངས་རྒྱས་དཔལ་བཟང་། གྲུབ་ཆེན་ནམ་མཁའ་རྒྱལ་མཚན། རྒྱ་སྒོམ་ལེགས་པ་རྒྱལ་མཚན། རྗེ་བཙུན་ཀུན་དགའ་གྲོལ་མཆོག །ཆོས་སྐུ་ལྷ་དབང་གྲགས་པ། རྗེ་བཙུན་སྒྲོལ་བའི་མགོན་པོ། རྗེ་བཙུན་ཡེ་ཤེས་རྒྱ་མཚོ། བྱམས་པ་ཡོན་ཏན་མགོན་པོ། མགོན་པོ་དཔལ་འབྱོར། མགོན་པོ་གྲགས་པ། ཁྱབ་བདག་མགོན་པོ་རྣམ་རྒྱལ། རིག་འཛིན་ཚེ་དབང་ནོར་བུ། བཀའ་བརྒྱུད་འཕྲིན་ལས་ཤིང་རྟ། དགེ་ལེགས་དཔལ་འབར། ཀུན་དགའ་ལྷུན་གྲུབ་རྒྱ་མཚོ། བློ་གྲོས་རིག་མཚོ། ཀརྨ་ལྷག་མཐོང་། ཀརྨ་གཞན་ཕན་འོད་ཟེར། འཇམ་མགོན་བློ་གྲོས་མཐའ་ཡས། ཀུན་དགའ་འགྱུར་མེད་ཆོས་ཀྱི་དབང་ཕྱུག །ཀུན་དགའ་འཇམ་དབྱངས་མཁྱེན་བརྩེ། བདེ་བའི་རྡོ་རྗེ། ཤངས་སྟོན་སྐྱབས་མགོན་སངས་རྒྱས་དཔལ་བཅས་རིམ་གྱིས་དྲངས་འདུག །དེར་ཅུང་ཞིག་དཔྱད་པ་ལ། ནི་གུའི་བརྒྱུད་འདེབས་བྱིན་རླབས་སྤྲིན་ཕུང་དང་། ཐང་ལུགས་གནས་སྦྱར་མ་སོགས་བོད་ཡིག་གི་དཔྱད་གཞི་ཁུངས་བཙན་རྣམས་ལྟར་ན། འཇམ་མགོན་ཀོང་སྤྲུལ་ཤངས་ཆོས་ཇོ་ནང་ལུགས་ཀྱི་བརྒྱུད་རབས་སུམ་ཅུ་པ་དང་། ཐང་སྟོང་ལུགས་ཀྱི་བརྒྱུད་རབས་ཉེར་དགུ་པར་བརྩི་ཆོག་ཀྱང་། འགྲོ་མགོན་སངས་རྒྱས་སྟོན་པ་ནས་མཁས་གྲུབ་ཤངས་སྟོན་ལ་བརྒྱུད་པའི་འཇག་པའི་བརྒྱུད་པ་དང་། སངས་རྒྱས་སྟོན་པ་ཉིད་ནས་མཁས་བཙུན་གཞོན་ནུ་གྲུབ་ལ་བརྒྱུད་པའི་བསམ་སྡིངས་ཀྱི་བརྒྱུད་པ་མི་འདྲ་བ་ཁག་གཉིས་སུ་སོང་བས། གོང་གི་བརྒྱུད་རབས་འདིར་མཁས་གྲུབ་ཤངས་སྟོན་ནས་བསམ་སྡིངས་པ་གཞོན་ནུ་གྲུབ། དེས་མཁས་བཙུན་རྒྱལ་མཚན་འབུམ། དེས་ཁྱུང་པོ་གཉིས་པ་ཚུལ་ཁྲིམས་མགོན་པོ་ཞེས་འཇག་བསམ་གཉིས་བརྒྱུད་པ་གཅིག་ཏུ་བསྲེས་ནས་དྲངས་པ་དེར། འགྲོ་མགོན་སངས་རྒྱས་སྟོན་པའི་སློབ་མ་མཁས་གྲུབ་ཤངས་སྟོན་དང་བསམ་སྡིངས་པ་གཉིས་བླ་སློབ་ཀྱི་ཚུལ་དུ་བཞག་པ་དང་། ཡང་མཁས་གྲུབ་ཤངས་སྟོན་གྱི་སློབ་མ་འཇག་པ་རྒྱལ་མཚན་འབུམ་དང་ཁྱུང་པོ་ཚུལ་ཁྲིམས་མགོན་གཉིས་ཀྱང་བླ་སློབ་ཀྱི་འབྲེལ་བ་ལྡན་པ་ལྟ་བུར་བཀོད་འདུག་པས་བརྒྱུད་ཕྲེང་གཉིས་མང་དུ་ཕྱིན་པ་ལོ་རྒྱུས་ཀྱི་དོན་དངོས་དང་ཡོངས་སུ་འགལ། དེ་མིན་གོང་གི་བརྒྱུད་རབས་ཉེར་དགུ་པར་བློ་གྲོས་རིག་མཚོ་ཞེས་པ་ཞིག་བོད་ཡིག་གི་བླ་བརྒྱུད་དུ་གསལ་བའི་བཀའ་བརྒྱུད་བསྟན་འཛིན་གྱི་སྐབས་སུ་བཀོད་འདུག་པ་མིག་སྔར་རྙེད་སོན་བྱུང་བའི་བོད་ཡིག་གི་བླ་བརྒྱུད་གསོལ་འདེབས་སོགས་གང་དུའང་མི་གསལ་བས་དང་། དེ་མིན་ཤངས་སྟོན་སྐྱབས་མགོན་ཉིད་ལ་ཤངས་པའི་བླ་མ་འཁྲུལ་མེད་རྣམས་ལས་གདམས་ངག་རིམ་པར་བརྒྱུད་པའི་རིང་བརྒྱུད་དང་། དག་སྣང་ཉེ་བརྒྱུད་གང་རུང་མངའ་སྲིད་ཀྱང་། ད་ལྟའི་ཆར་ཤངས་པ་བཀའ་བརྒྱུད་པའི་ཡོངས་གྲགས་ཀྱི་བླ་རབས་གཅིག་པུ་ལྟ་བུར་བརྩིས་ཏེ་བརྒྱུད་རབས་སོ་དྲུག་པ་ཞེས་བརྗོད་ན་འཚམ་མིན་སོགས་ཀྱི་སྐོར་བློ་ལྡན་རྣམས་ཀྱིས་དཔྱད་པར་འཚལ།<br />
 
ཉེ་བའི་ཆར་རྒྱ་ཡིག་གི་དཔྱད་གཞི་འགར་ཤངས་པ་བཀའ་བརྒྱུད་པའི་ཁུངས་བཙན་གྱི་བླ་རབས་རྣམ་ཐར་ནང་འཁོད་པའི་བླ་མ་བརྒྱུད་པ་རྣམས་ལ་བརྒྱུད་པ་རྙིང་མ་དང་། ཤངས་སྟོན་སངས་རྒྱས་དཔལ་ལས་བརྒྱུད་པར་བརྒྱུད་པ་གསར་མ་ཞེས་པའི་ཐ་སྙད་སྤྱད་འདུག་པ་འདི་རིགས་ནི་བོད་ཡིག་གི་ཁུངས་བཙན་དཔྱད་གཞི་རྣམས་སུ་ཅི་ཡང་མི་གསལ་བས། ཡིད་གཉིས་སུ་འགྲོ་བའི་རྒྱུ་ཁོ་ནར་མཐོང་། དེ་མིན་ཤངས་སྟོན་སངས་རྒྱས་དཔལ་གྱི་མཛད་རྣམ་སོགས་སུ་བླ་རབས་སོ་དྲུག་ཅེས་པར། རིན་ཆེན་བདུན་བརྒྱུད་སྔ་མ་བདུན་དང་། དེ་ནས་རིམ་བཞིན་མཁས་གྲུབ་གཙང་མ་ཤངས་སྟོན། མཁས་བཙུན་གཞོན་ནུ་གྲུབ། འཇག་ཆེན་རྒྱལ་མཚན་འབུམ། ཁྱུང་པོ་གཉིས་པ་ཚུལ་ཁྲིམས་མགོན་པོ། རས་ཆེན་སངས་རྒྱས་སེང་གེ ཤངས་དཀར་རིན་ཆེན་རྒྱལ་མཚན། མཉམ་མེད་སངས་རྒྱས་དཔལ་བཟང་། གྲུབ་ཆེན་ནམ་མཁའ་རྒྱལ་མཚན། རྒྱ་སྒོམ་ལེགས་པ་རྒྱལ་མཚན། རྗེ་བཙུན་ཀུན་དགའ་གྲོལ་མཆོག །ཆོས་སྐུ་ལྷ་དབང་གྲགས་པ། རྗེ་བཙུན་སྒྲོལ་བའི་མགོན་པོ། རྗེ་བཙུན་ཡེ་ཤེས་རྒྱ་མཚོ། བྱམས་པ་ཡོན་ཏན་མགོན་པོ། མགོན་པོ་དཔལ་འབྱོར། མགོན་པོ་གྲགས་པ། ཁྱབ་བདག་མགོན་པོ་རྣམ་རྒྱལ། རིག་འཛིན་ཚེ་དབང་ནོར་བུ། བཀའ་བརྒྱུད་འཕྲིན་ལས་ཤིང་རྟ། དགེ་ལེགས་དཔལ་འབར། ཀུན་དགའ་ལྷུན་གྲུབ་རྒྱ་མཚོ། བློ་གྲོས་རིག་མཚོ། ཀརྨ་ལྷག་མཐོང་། ཀརྨ་གཞན་ཕན་འོད་ཟེར། འཇམ་མགོན་བློ་གྲོས་མཐའ་ཡས། ཀུན་དགའ་འགྱུར་མེད་ཆོས་ཀྱི་དབང་ཕྱུག །ཀུན་དགའ་འཇམ་དབྱངས་མཁྱེན་བརྩེ། བདེ་བའི་རྡོ་རྗེ། ཤངས་སྟོན་སྐྱབས་མགོན་སངས་རྒྱས་དཔལ་བཅས་རིམ་གྱིས་དྲངས་འདུག །དེར་ཅུང་ཞིག་དཔྱད་པ་ལ། ནི་གུའི་བརྒྱུད་འདེབས་བྱིན་རླབས་སྤྲིན་ཕུང་དང་། ཐང་ལུགས་གནས་སྦྱར་མ་སོགས་བོད་ཡིག་གི་དཔྱད་གཞི་ཁུངས་བཙན་རྣམས་ལྟར་ན། འཇམ་མགོན་ཀོང་སྤྲུལ་ཤངས་ཆོས་ཇོ་ནང་ལུགས་ཀྱི་བརྒྱུད་རབས་སུམ་ཅུ་པ་དང་། ཐང་སྟོང་ལུགས་ཀྱི་བརྒྱུད་རབས་ཉེར་དགུ་པར་བརྩི་ཆོག་ཀྱང་། འགྲོ་མགོན་སངས་རྒྱས་སྟོན་པ་ནས་མཁས་གྲུབ་ཤངས་སྟོན་ལ་བརྒྱུད་པའི་འཇག་པའི་བརྒྱུད་པ་དང་། སངས་རྒྱས་སྟོན་པ་ཉིད་ནས་མཁས་བཙུན་གཞོན་ནུ་གྲུབ་ལ་བརྒྱུད་པའི་བསམ་སྡིངས་ཀྱི་བརྒྱུད་པ་མི་འདྲ་བ་ཁག་གཉིས་སུ་སོང་བས། གོང་གི་བརྒྱུད་རབས་འདིར་མཁས་གྲུབ་ཤངས་སྟོན་ནས་བསམ་སྡིངས་པ་གཞོན་ནུ་གྲུབ། དེས་མཁས་བཙུན་རྒྱལ་མཚན་འབུམ། དེས་ཁྱུང་པོ་གཉིས་པ་ཚུལ་ཁྲིམས་མགོན་པོ་ཞེས་འཇག་བསམ་གཉིས་བརྒྱུད་པ་གཅིག་ཏུ་བསྲེས་ནས་དྲངས་པ་དེར། འགྲོ་མགོན་སངས་རྒྱས་སྟོན་པའི་སློབ་མ་མཁས་གྲུབ་ཤངས་སྟོན་དང་བསམ་སྡིངས་པ་གཉིས་བླ་སློབ་ཀྱི་ཚུལ་དུ་བཞག་པ་དང་། ཡང་མཁས་གྲུབ་ཤངས་སྟོན་གྱི་སློབ་མ་འཇག་པ་རྒྱལ་མཚན་འབུམ་དང་ཁྱུང་པོ་ཚུལ་ཁྲིམས་མགོན་གཉིས་ཀྱང་བླ་སློབ་ཀྱི་འབྲེལ་བ་ལྡན་པ་ལྟ་བུར་བཀོད་འདུག་པས་བརྒྱུད་ཕྲེང་གཉིས་མང་དུ་ཕྱིན་པ་ལོ་རྒྱུས་ཀྱི་དོན་དངོས་དང་ཡོངས་སུ་འགལ། དེ་མིན་གོང་གི་བརྒྱུད་རབས་ཉེར་དགུ་པར་བློ་གྲོས་རིག་མཚོ་ཞེས་པ་ཞིག་བོད་ཡིག་གི་བླ་བརྒྱུད་དུ་གསལ་བའི་བཀའ་བརྒྱུད་བསྟན་འཛིན་གྱི་སྐབས་སུ་བཀོད་འདུག་པ་མིག་སྔར་རྙེད་སོན་བྱུང་བའི་བོད་ཡིག་གི་བླ་བརྒྱུད་གསོལ་འདེབས་སོགས་གང་དུའང་མི་གསལ་བས་དང་། དེ་མིན་ཤངས་སྟོན་སྐྱབས་མགོན་ཉིད་ལ་ཤངས་པའི་བླ་མ་འཁྲུལ་མེད་རྣམས་ལས་གདམས་ངག་རིམ་པར་བརྒྱུད་པའི་རིང་བརྒྱུད་དང་། དག་སྣང་ཉེ་བརྒྱུད་གང་རུང་མངའ་སྲིད་ཀྱང་། ད་ལྟའི་ཆར་ཤངས་པ་བཀའ་བརྒྱུད་པའི་ཡོངས་གྲགས་ཀྱི་བླ་རབས་གཅིག་པུ་ལྟ་བུར་བརྩིས་ཏེ་བརྒྱུད་རབས་སོ་དྲུག་པ་ཞེས་བརྗོད་ན་འཚམ་མིན་སོགས་ཀྱི་སྐོར་བློ་ལྡན་རྣམས་ཀྱིས་དཔྱད་པར་འཚལ།<br />
 
II.6.5.2 <br />'''གཉིས། ཤངས་པ་བཀའ་བརྒྱུད་ཀྱི་རྒྱལ་ཕྱིའི་གནས་བབས།'''<br />
 
II.6.5.2 <br />'''གཉིས། ཤངས་པ་བཀའ་བརྒྱུད་ཀྱི་རྒྱལ་ཕྱིའི་གནས་བབས།'''<br />
<br /><br />II.6.6 - <br />'''དྲུག་པ། ཤངས་པ་བཀའ་བརྒྱུད་ཀྱི་མ་འོངས་འཕེལ་ཕྱོགས་སྐོར།'''<br />
+
དཔལ་ལྡན་ཤངས་པ་བཀའ་བརྒྱུད་འདི་ཡང་མཁས་གྲུབ་ཁྱུང་པོ་རྣལ་འབྱོར་གྱིས་འཕགས་ཡུལ་མཁས་གྲུབ་དུ་མའི་ཁྱད་འཕགས་ཀྱི་གདམས་པ་རྣམས་རྫོགས་པར་བཞེས་རྗེས་ཤངས་སུ་ཞོང་ཞོང་སོགས་ཀྱི་དགོན་གནས་བཏབ་པ་ནས་བཟུང་། ཕྱི་རབས་ཀྱི་བླ་མ་རབ་དང་རིམ་པས་བོད་ཡུལ་འདིར་བརྒྱུད་འཛིན་དང་དར་སྤེལ་གང་ལེགས་གནང་ཡོད། དེ་ཡང་འགྲོ་མགོན་ཆོས་རྗེ་སྟོན་པས་'''ངའི་ཆོས་འདིས་ད་ལྟ་འཛམ་བུའི་གླིང་གླིང་གཡོག་དང་བཅས་པར་ཁྱབ་ཅིང་། སྦས་པའི་རྣལ་འབྱོར་བརྒྱ་རྩ་བརྒྱད་དེའི་ནང་སྐྱེ་བ་འདིར་གཞན་དོན་ནུས་པ་ཉི་ཤུ་རྩ་གཅིག་ལ་སོགས་པས་སྐྱེ་བ་འདི་ཕྱི་ཀུན་དུ་དར་བར་བྱེད་'''ཅེས་ལུང་བསྟན་པ་བཞིན་ཤངས་པའི་ཐུན་མིན་གྱི་གདམས་པ་དེ་དག་འཛམ་གླིང་རྒྱལ་ཁབ་དང་མི་རིགས་ཁག་དབར་སྲིད་འབྱོར་རིག་གསུམ་གྱི་འགྲོ་འོང་ཉིན་རེ་བཞིན་ཤུགས་ཇེ་ཆེར་འགྲོ་བའི་གོམ་འགྲོས་དང་བསྟུན་ནས་རི་བོ་ཧི་མ་ལ་ཡའི་རི་བརྒྱུད་བརྒལ་ཏེ་ཕྱི་གླིང་གི་ཡུལ་དུ་དར་འགོ་ཚུགས་པ་སྟེ། སྤྱི་ལོའི་དུས་རབས་བཅུ་དགུ་པའི་དུས་དཀྱིལ་དུ་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱིས་ཤངས་ཆོས་སྐོར་གྱི་ཡིག་ཆ་མང་དག་ཅིག་བསྡུ་སྒྲིག་དང་གསབ་སྣོན་གནང་ནས་ཤངས་ཆོས་འདི་ཉིད་རང་རྐྱ་ཕེར་བའི་ཆོས་བརྒྱུད་གཅིག་ཏུ་སླར་གསོ་མཛད། དེ་རྗེས་སྤྱི་ལོའི་དུས་རབས་ཉི་ཤུ་པའི་དུས་འགོར་གྲུབ་མཆོག་རང་བྱུང་ཀུན་ཁྱབ་སུ་འབོད་པས་འཇམ་མགོན་ཀོང་སྤྲུལ་གྱི་ཕྱག་ལས་དེའི་རྒྱུན་བསྐྱངས་ཏེ་དཔལ་སྤུངས་ཀྱི་ཙཱ་འདྲ་རིན་ཆེན་བྲག་སོགས་སུ་ཤངས་པའི་བསྟན་པ་སྤེལ་བ་དང་། དགོན་གནས་འགའ་ཞིག་ཉམས་གསོ་གནང་ཞིང་། ལྷག་པར་ཤངས་པའི་གདམས་ངག་གི་མེ་ཟླུམ་འཛམ་བུའི་གླིང་ཐམས་ཅད་དུ་ཁྱབ་པར་མཛད་པ་ཀརྨ་རང་བྱུང་ཀུན་ཁྱབ་ཀྱིས་མཛད་རྣམ་སྐབས་སུའང་བཤད་ཟིན། <br />
<br />II.6.6.1 <br />'''གཅིག དབང་ལུང་ཁྲིད་གསུམ་གྱི་རྒྱུན་ལྷག་མ་མ་ཉམས་པ་བྱ་རྒྱུ།'''<br />
+
དེ་ཡང་ཀརྨ་རང་བྱུང་ཀུན་ཁྱབ་ཀྱིས་སྤྱི་ལོ་1971ལོ་ནས་སྤྱི་ལོ1979ལོ་བར་ཨ་རི་དང་། ཀ་ན་ཊ། ཡོ་རོབ་རྒྱལ་ཁབ་ཁག །ལྷོ་ཤར་ཨེ་ཤི་ཡའི་རྒྱལ་ཁབ་ཁག་ཏུ་སྔ་ཕྱི་ཁྱོན་བསྡོམས་ལན་ལྔ་ཙམ་ཕེབས་ནས་གདུལ་བྱ་རྣམས་ལ་ཐོག་མར་བསྟན་པ་ལ་འཇུག་པའི་སྒོ་སྐྱབས་འགྲོ་ནས་བཟུང་ཐེག་པ་ཆེ་ཆུང་གི་ཆོས་སྤྱི་དང་། བྱེ་བྲག་རྡོ་རྗེ་ཐེག་པའི་སྨིན་གྲོལ་རྗེས་གནང་སོགས་མཐའ་ཡས་པ་བསྩལ་ཏེ་གདུལ་བློའི་རྨོངས་མུན་སེལ་བར་མཛད། སྔ་རྗེས་སུ་ཡུལ་གྲུ་དེ་དག་ལ་ཆོས་ཚོགས་བདུན་ཅུ་ལྷག་ཙམ་དང་། སྒྲུབ་སྡེ་ཉི་ཤུ། མཆོད་རྟེན་ཉི་ཤུ་སྐོར་བཅས་གསར་བཞེངས་དང་དབུ་ཁྲིད་གནང་བ་སོགས་ཀྱིས་སྒྲུབ་བརྒྱུད་བསྟན་པ་སྤྱི་དང་། ཁྱད་པར་དཔལ་ལྡན་ཤངས་པའི་ལུགས་བཟང་འདི་ཉིད་འཛམ་གླིང་གི་ཡུལ་ལུང་དུ་མར་དར་སྤེལ་ཆེས་ཆེར་མཛད། ཆོས་ཚོགས་དེ་རྣམས་ལ་ཆོས་ཀྱི་སློབ་སྟོན་མཛད་མཁན་ལོ་གསུམ་ཕྱོགས་གསུམ་མཐར་ཕྱིན་པའི་ཞལ་སློབ་བླ་མ་དགེ་བའི་བཤེས་གཉེན་སུམ་ཅུ་ལྷག་ཙམ་བསྐོ་བཞག་གནང་། མིག་སྔར་ཨི་ཤི་ཡའི་ཁུལ་དུ་འཇམ་མགོན་ཀོང་སྤྲུལ་དོར་རྒྱུ་བློ་གྲོས་ཆོས་ཀྱི་སེང་གེས་བཏབ་པའི་ལྭ་བ་སྒྲུབ་སྡེ་ངེས་དོན་ཕྱག་ཆེན་གླིང་དང༌། བན་ཆེན་བསྟན་དགའ་རིན་པོ་ཆེས་ཡང་ལེ་ཤོད་དུ་བཏབ་པའི་ཤངས་པའི་སྒྲུབ་སྡེ་ སོགས། གཞན་ཡང་ཀརྨ་རང་བྱུང་ཀུན་ཁྱབ་ཀྱི་གདན་ས་བསམ་གྲུབ་དར་རྒྱས་གླིང་གི་ཤངས་པའི་སྒྲུབ་སྡེ། ཀརྨ་ངེས་དོན་ཆོས་ཀྱི་བློ་གྲོས་ཀྱི་གདན་ས་མི་རིགས་དགོན་གྱི་ཤངས་པའི་སྒྲུབ་སྡེ། སྤྱི་ལོ1972ལོར་བཙུགས་པའི་ཀ་ན་ཊའི་ཡན་བྱོན་གླིང་ཕྲན་གྱི་ཆོས་ཚོགས་དང་བཀའ་བརྒྱུད་ཀུན་ཁྱབ་ཆོས་གླིང་གཉིས། ཨ་རིའི་KDK་ལྟེ་གནས། སི་ཕིན་དུ་སྤྱི་ལོ1984ལོར་བཙུགས་པའི་དྭགས་ཤངས་བཀའ་བརྒྱུད་ཅེས་པ། སྤྱི་ལོ་1987ལོར་ཧྥ་རན་སིའི་བཀའ་བརྒྱུད་གླིང་དང་། ཀརྨ་གླིང་གཉིས་ཀྱི་སྒྲུབ་གྲྭ་བ་རྣམས་ལའང་ཀརྨ་རང་བྱུང་ཀུན་ཁྱབ་ཀྱིས་ཤངས་ཆོས་ཡོངས་རྫོགས་ཀྱི་སྨིན་གྲོལ་རྒྱབ་རྟེན་དང་བཅས་པའི་བཀའ་དྲིན་སྩོལ་མྱོང་བ་སོགས་དཔལ་ལྡན་ཤངས་པའི་གདམས་ངག་ཉམས་བཞེས་ཀྱི་སྲོལ་བཟང་སྐྱོང་བཞིན་པའི་དགོན་གནས་དང་སྒྲུབ་སྡེ་མང་དུ་མཆིས་སོ།<br />
<br />II.6.6.2 <br />'''གཉིས། ཤངས་ཆོས་འཛིན་པའི་བརྒྱུད་པ་ཚད་ལྡན་དུ་གཏོང་རྒྱུ།'''<br />
+
།ཤངས་ཆོས་ཀྱི་སྒྲུབ་སྡེ་དེ་དག་ཏུ་སྒྲུབ་པར་ཞུགས་མཁན་གྱི་ལས་དང་པོ་བ་ཚོ་ཤངས་ཆོས་འདོན་གོམས་ཀྱི་ལག་ལེན་མེད་པ་དང་། ཆོ་གའི་དཀྲུགས་སྡེབ་མང་བས་རྟོགས་དཀའ་བ་སོགས་ཀྱི་གནད་དོན་ལ་གཞིགས་ཏེ་འཇམ་མགོན་བློ་གྲོས་མཐའ་ཡས་ནས་བརྒྱུད་པའི་ཕྱག་བཞེས་རྣམས་ཉམས་སུ་ལེན་བདེ་བའི་སླད། ཀརྨ་རང་བྱུང་ཀུན་ཁྱབ་ཀྱི་ཞལ་ཁྲིད་ཕྱག་སྲོལ་བཞིན་ཀརྨ་ངེས་དོན་ཆོས་ཀྱི་བློ་གྲོས་ཀྱིས་མཐོང་བརྒྱུད་ཕྱག་ལེན་ཞིབ་ཆ་ཁ་གསལ་བར་ཕྱོགས་གཅིག་ཏུ་བསྒྲིགས་པ་'''དཔལ་ལྡན་ཤངས་པ་བཀའ་བརྒྱུད་ཀྱི་ཆོས་སྐོར་ནི་གུ་ཆོས་དྲུག་གཙོས་གསེར་ཆོས་རྣམ་ལྔ་སོགས་ལོ་གསུམ་ཕྱོགས་གསུམ་གྱི་སྒྲུབ་ཁང་ནང་ཉམས་ལེན་ཁག་གི་ཟིན་དེབ་ཁྱབ་བདག་བླ་མའི་ཞལ་ལུང་མོས་ལྡན་སྙིང་གི་སྒྲོན་མེ་'''དང་། '''ཤངས་ལུགས་རྩ་གསུམ་སྒྲུབ་སྐོར་གྱི་འདོན་ཟིན་ལག་དེབ་མཐོང་བས་ཁོང་ཆུད་'''ལྟར་ཉམས་སུ་ལེན་པ་དང༌། སྒྲུབ་པ་སྡོམ་པའི་དུས་ཀྱང་སྤྱིར་རྒྱལ་བའི་དུས་ཆེན་ཁག་དང་། ཁྱད་པར་མཁས་གྲུབ་ཁྱུང་པོ་རྣལ་འབྱོར་ཆོས་སྐུ་མཁའ་ཁྱབ་ཆེན་པོར་མངོན་པར་བྱང་ཆུབ་པའི་དུས་ཏེ་ཧོར་ཟླ་བཅུ་པའི་ཚེས་བཅུ་བཞི་ལྟ་བུར་ཆེས་ལེགས་པར་གསུངས་པ་བཞིན་བྱེད། སྒྲུབ་སྡེ་དེ་དག་ཏུ་བསྙེན་སྒྲུབ་ལས་གསུམ་གྱི་སྐོར་དང༌། སྒྲུབ་མཆོད་རྒྱས་པའི་སྐབས་རྡུལ་ཚོན་དཀྱིལ་འཁོར་ལ་བརྟེན་པའི་ཚེས་ཆོག་གི་སྐོར་སོགས་ཞིབ་པ་གཞུང་འདི་གཉིས་སོགས་ལས་ཤེས་པར་བྱའོ།<br />
 +
།དེ་ཡང་ཆོས་རྗེ་རྨོག་ལྕོག་པས་དབོན་སྟོན་སྐྱེར་སྒང་པར་'''ད་ལྟ་བླ་མ་ཤངས་པའི་གདམས་ངག་འདི་མཁའ་འགྲོ་དངོས་སུ་འདུ་བ་ཡིན་པས། འདི་མ་འོངས་པའི་དུས་སུ་སོང་ཙ་ན། ཡང་ན་བཀའ་ཆད། ཡང་ན་ཚོང་འདུས་ཀྱི་འོ་མར་འགྲོ་བ་འདུག་'''ཅེས་གསུངས་པ་ལྟར་ཤངས་པའི་གདམས་པ་དེ་དག་བརྒྱུད་འཛིན་བྱེད་པའི་བགྲོད་ལམ་སྟེང་འཆི་གསོན་དང་ཀྱག་ཀྱོག་གི་ཁུག་པ་མང་པོ་ཞིག་བརྒྱུད་དགོས་བྱུང་བས་གདམས་པ་སྐོར་ཅིག་ལ་ཚོང་འདུས་ཀྱི་འོ་མ་བཞིན་བསྲེ་ལྷད་འོང་བར་གསུངས་པ་དང་། མཐར་'''གསེར་ཆོས་རྩ་བ་རྣམས་ནི་རྐང་ཚུགས་པའི་ལུགས་འཛིན་དེང་སང་ཤིན་ཏུ་དཀོན་པར་སྣང་'''ཞེས་འཁོད་པ་བཞིན་ཤངས་ཆོས་གདམས་པའི་མཆོག་འགྱུར་གསེར་ཆོས་ཀྱི་རྩ་བ་དེ་རྣམས་ཡོངས་སུ་ཁུངས་ཕེར་བའི་སྒོ་ནས་བརྒྱུད་པ་འཛིན་པ་དཀོན་པའི་སྡོམ་ཚིག་བཀོད་པ་བདེན་ཡང་། '''གྲུབ་མཐའ་'''ཞེས་པའི་ནང་'''མཁས་གྲུབ་ཁྱུང་པོ་རྣལ་འབྱོར་པ་དགོངས་པ་གཞན་དོན་དུ་གཤེགས་རྗེས་ལོ་སུམ་བརྒྱ་ཙམ་རིང་གྲུབ་ཐོབ་མང་དུ་བྱུང་སྟེ། ཤངས་པའི་ལུགས་སྲོལ་རྒྱས་པར་མཛད་ཀྱང་། དེང་སང་ནི་ས་དགེ་ཕྱག་གསུམ་གྱི་ནང་དུ་སིམ་པ་ལྟར་གྱུར་ཏེ་ཆོས་བརྒྱུད་སྒེར་དུ་འཛིན་པ་མི་སྣང་'''ཞེས་འཁོད་ཡོད། མ་གཞི་ཤངས་པའི་ཆོས་བརྒྱུད་འདི་ཉིད་ས་དགེ་བཀའ་རྙིང་གི་ཆོས་བརྒྱུད་རྣམས་དང་འདྲ་བར་ས་ཁྱབ་རྡོ་ཁྱབ་ཏུ་མ་དར་ཡང༌། དེང་མདོ་དབུས་ཁམས་གསུམ་གྱི་བོད་ཁུལ་གཙོ་བོར་བྱས་ཐོག །ནང་ས་དང་རྒྱལ་ཕྱིའི་ཡུལ་ལུང་དུ་མར་ཤངས་པའི་ཆོས་བརྒྱུད་འཛིན་པའི་དགོན་གནས་དང་སྒྲུབ་སྡེ་དེ་དག་ཏུ་སྒྲུབ་པ་མཐར་ཕྱིན་པ་དང་སྒྲུབ་ལ་གཞོལ་མུས་ཀྱི་སྐྱེས་བུ་ད་དུང་ཟམ་མ་ཆད་པར་བཞུགས་ཡོད་པ་མིག་མཐོང་ལག་ཟིན་ཡིན་པས། ཆོས་བརྒྱུད་སྒེར་དུ་འཛིན་པ་མི་སྣང་ཞེས་ཁ་ཚོན་བཅད་ན་ཐལ་ཆ་ཆེ་དྲགས་པ་དང་། ལྷག་པར་དུ་'''བོད་བརྒྱུད་ནང་བསྟན་གྱི་གྲུབ་མཐའི་བྱེ་བྲག་ཤངས་པ་བཀའ་བརྒྱུད་ཀྱི་སྐོར་མདོ་ཙམ་ཞིང་བ་'''ཞེས་པའི་རྩོམ་ཡིག་གི་མཇུག་ཏུ་ཤངས་པ་བཀའ་བརྒྱུད་དེ་'''ལོ་རྒྱུས་ཀྱི་བཞུར་རྒྱུན་ཁྲོད་དུ་རིམ་བཞིན་ཉམས་རྒུད་སོང་བ་མ་ཟད། མཐར་ས་རྡུལ་གྱི་ཕུང་པོ་བཞིན་མེད་པར་གྱུར་ཏོ་'''ཞེས་ཤངས་པའི་ཆོས་བརྒྱུད་ཀྱི་སྲོག་རྩ་ཡོངས་སུ་ཆད་ཟིན་པ་ལྟ་བུའི་སྡོམ་ཚིག་བཙན་པོ་གནམ་ལྕགས་དང་འདྲ་བ་འདི་འདྲ་བཀོད་པའང་ཤིན་ཏུ་མི་འོས་སོ།<br /><br />
 +
II.6.6 - <br />'''།དྲུག་པ། ཤངས་པ་བཀའ་བརྒྱུད་ཀྱི་མ་འོངས་འཕེལ་ཕྱོགས་སྐོར།'''<br />
 +
དེ་ཡང་སློབ་དཔོན་ཀླུ་སྒྲུབ་ཀྱིས་'''ད་ནི་ཐུབ་པའི་བསྟན་པ་ཡང་། ཅུང་ཟད་ཙམ་ཞིག་ལུས་པར་ཟད། །ཐུབ་པའི་བསྟན་པ་གངས་ཆེན་མཚོ། རིང་པོར་མ་ཐོགས་སྐམ་པར་འགྱུར་'''ཞེས་གསུངས་པ་དང་། དམ་པ་སངས་རྒྱས་ཀྱི་ཞལ་གདམས་སུ་'''དམ་པ་སངས་རྒྱས་དེ་རེ་ཞིག་བཤུམ་གྱིན་གདའ་སྐད། ཀུན་དགས་དམ་པ་ཅི་ལ་བཤུམ་པ་ཡིན་ཞུས་པས། ཐུབ་པའི་བསྟན་པའི་ནུབ་ལ་ཁད་ལ་ངུ་། ནམ་ནུབ་ལགས་ཞུས་པས། ད་ལོ་མང་པོ་ཙམ་མེད་གསུངས་'''ཞེས་སོགས་འཁོད་པ་བཞིན་རྒྱལ་བའི་བསྟན་པ་སྤྱི་རིམ་བཞིན་ཉམས་ལ་ཁད་པའི་མི་ཐུབ་ལྔ་ལྡན་ གྱི་ཁུག་པ་འདིར་དམ་ཆོས་སྒྲུབ་པའི་སྣོད་ལྡན་གྱི་གང་ཟག་དང་། མན་ངག་འཛོམས་པའི་ཚད་ལྡན་གྱི་བླ་མ་དཀོན་པའི་དབང་གིས་གདུལ་བྱའི་ཆུ་སྣོད་མེད་ན་འདུལ་བྱེད་ཀྱི་ཟླ་གཟུགས་ཀྱང་མི་སྣང་བ་བཞིན་བོད་དར་ནང་བསྟན་གྱི་ཆོས་བརྒྱུད་ཁག་ལས་གསང་ཆེན་སྔགས་ཀྱི་གདམས་པའི་བརྒྱུད་འཛིན་གྱི་ཉག་ཐག་ཇེ་ཕྲར་འགྲོ་བ་ནི་སྐྱེ་འགྲོ་ཀུན་གྱི་མཐོང་ཆོས་སུ་འགྱུར་བ་ཡིན། ལྷག་པར་ཆོས་ལྡན་ཞིང་དུ་ལྟེ་ཁྲག་འཕོས་ཕྱིན་ཆད་ལ་དམ་ཆོས་བྱེད་པའི་མཐུན་རྐྱེན་རང་བཞིན་གྱིས་འཛོམས་ཟེར་ཡང་། མི་ཁོམ་གནས་བརྒྱད་ཀྱི་གཡང་སར་ལྷུང་བའི་དུས་ངན་གྱི་མི་ཁོ་བོ་འདྲ་བ་ཕལ་ཆེར་ནི་ཆོས་ལ་ཐན་དུ་མཐོང་། དགེ་བ་མཚང་དུ་མཐོང་། སྤྱོད་པ་ཁྱི་ལས་ཐུ། ལས་སུ་སྡིག་པ་དགའ། ཁ་ཟས་ལ་དགའ། ལུས་ཉལ་ལ་དགའ་བས། དཀའ་སྤྱད་སྡུག་བསྲན་གྱི་སྙིང་རུས་དང་བྲལ་ཞིང་དོན་མེད་ཀྱི་བྲེལ་ཟིང་ཁོ་ནས་དལ་འབྱོར་གྱི་མི་ལུས་རིན་པོ་ཆེ་ཆུད་ཟོས་སུ་གཏོང་། དེར་བརྟེན་སྒྲུབ་པ་ལྷུར་བཞེས་ཁོ་ན་གཙོ་བོར་མཛད་པའི་ཤངས་པ་བཀའ་བརྒྱུད་ལྟ་བུར་མཚོན་ནའང་། ཉམས་སུ་ལེན་མཁན་གྱི་མི་ཉུང་དུ་འགྲོ་བ་ནི་ཨ་ཅང་བརྗོད་མེད་རེད། <br />
 +
ཡང་འཁོར་འདས་བརྟན་གཡོའི་ཆོས་ཐམས་ཅད་སྐྱེས་མཐའ་འཆི་བ། འདུས་མཐའ་བྲལ་བ། བསགས་མཐའ་འཛད་པ། མཐོ་མཐའ་ལྷུང་བ་བཅས་ཀྱི་མཐའ་བཞིའི་འཆིང་བ་ལས་འདས་པར་མ་གྱུར་པས། དཔལ་ལྡན་ཤངས་པའི་རིང་ལུགས་འདི་ཉིད་ལ་ཐོག་མར་སློབ་དཔོན་གྱི་ངག་དག་པ། སློབ་མའི་རྒྱུད་དག་པ། བཤད་བྱའི་ཆོས་དག་པ་བཅས་དག་པ་གསུམ་གྱིས་སྒོ་ནས་གདམས་ངག་སྤེལ་བའི་ཁར། མ་མཁའ་འགྲོའི་བྱིན་རླབས་དང་། ཕ་བླ་མའི་ཐུགས་རྗེ། ཡི་དམ་གྱི་དངོས་གྲུབ། ཆོས་སྐྱོང་གི་འཕྲིན་ལས་སོགས་ལ་བརྟེན་པས་བསྟན་པའི་ཉིན་བྱེད་རྒྱས་པར་མཛད་ཡོད་ལ། གདམས་ངག་དེ་དག་ལ་བརྟེན་ནས་སྐལ་ལྡན་གྱི་སྐྱེས་བུ་ཇི་སྙེད་ཅིག་ཟུང་འཇུག་གི་རྒྱལ་སར་གཤེགས་པ་ལོ་རྒྱུས་ཀྱི་དོན་དངོས་ཡིན་པས། ལུང་རིག་རྣམ་དཔྱོད་དང་ལྡན་པའི་སྐྱེ་བོ་རྣམས་ཡིད་གཉིས་ཀྱི་གནས་སུ་ལྷུང་ག་ལ་སྲིད། འོན་ཀྱང་མཚར་སྡུག་འོད་སྟོང་འབར་བའི་ཁ་སང་གི་ལོ་རྒྱུས་དེ་དག་ངེད་ཅག་གི་དྲན་པའི་ཁྲོད་དུ་ཡལ་ལ་ཉེ་བས། སླར་མི་ཡུལ་ཁམས་སུ་འདས་ལོག་བྱེད་པའི་སྐལ་པ་ནི་རུས་སྦལ་གྱི་སྤུ་ལྟར་ཡིན། <br />
 +
ང་ཚོས་ཤངས་པ་བཀའ་བརྒྱུད་ཀྱི་ཆགས་གནས་འཇིག་སྟོང་གི་ལས་དབང་ལ་བསམ་གཞིགས་ཤིག་བྱེད་སྐབས། བྱིན་རླབས་ཀྱི་མཚན་ཁ་འབར་བའི་གདམས་ངག་གི་རིན་ཐང་ཚོར་ཐུབ་ལ། ཐོས་ཚད་ཉམས་ལེན་གྱི་མཐིལ་དུ་བཟུང་བའི་ཆོས་བརྒྱུད་གཅིག་གི་གསོན་ཤུགས་རྟོགས་ཐུབ། འོན་ཀྱང་ཚོགས་པའི་མཐར་ཐུག་ཁྲི་ཚོ་བརྒྱད་ཀྱི་ཉམས་སྣང་དང་། གདན་སའི་གཙོ་བོ་ཞོང་ཞོང་དགེ་འདུན་བཅུ་ལ་ཐུག་པའི་ཡ་ང་བའི་གནས་བབས་དབར་གནམ་ས་ལྟ་བུའི་ཧེ་བག་ཆོད་པས། གལ་ཏེ་མཁས་གྲུབ་ཁྱུང་པོ་སླར་མི་ཡུལ་དུ་བྱོན་ཚེ་འདས་ཟིན་གྱི་གྲུབ་པའི་རྣམ་ཐར་ལ་སྔར་བཞིན་ཉམས་དགའ་བའི་བསྟོད་མགུར་གྱེར་སྲིད་ཀྱང་། ད་ལྟའི་འཆི་གསོན་གྱི་ལས་དབང་གཟིགས་ཚེ་སྤྱན་ཆབ་ཀྱི་རྒྱ་མཚོ་འཁྱིལ་ཡང་སྲིད། དེས་ན་ལོ་རྒྱུས་ཀྱི་མཚར་སྡུག་ཁོ་ནར་ཡིད་སེམས་ཀྱི་དབང་པོ་ཕྱོགས་པའི་ཁོ་བོ་ལྟ་བུར་ཆ་མཚོན་ན། ངོ་མཚར་གྱི་རིག་གནས་དེ་དག་ལས་ཁྱད་པར་དུ་མཁའ་འགྲོ་ནི་གུའི་གདམས་ངག་དང༌། སུ་ཁ་སིདྡྷིའི་ཐུགས་རྗེ། རྡོ་རྗེ་གདན་པའི་འདུལ་ཁྲིམས། མངའ་བདག་མེ་ཏྲིའི་ལྟ་བ། མཁས་གྲུབ་ཁྱུང་པོའི་དཀའ་སྤྱད་སོགས་ནི་དེ་བས་ཀྱང་ཡལ་བར་མི་སྤྲོ་བས། ཕྱག་ཆེན་པ་ཚོའི་ཆོས་སྐད་དུ་'''མ་འོངས་པའི་སྔོན་མི་བསུ་'''ཞེས་གསུངས་ཀྱང༌། ཁོ་བོས་ནི་ཤངས་པ་བཀའ་བརྒྱུད་ཀྱི་མ་འོངས་པའི་བདེ་དྲོད་འབར་བའི་ལམ་བུ་ཞིག་འཚོལ་ཕྱིར་རང་ཉིད་ཀྱི་བསམ་གཞིག་ཕྲན་ཙམ་ཞིག་ཞིང་བར་བྱ་རྒྱུ་སྟེ།<br />
 +
II.6.6.1 <br />'''གཅིག །དབང་ལུང་ཁྲིད་གསུམ་གྱི་རྒྱུན་ལྷག་མ་མ་ཉམས་པ་བྱ་རྒྱུ།'''<br />
 +
སྙན་བརྒྱུད་ཀྱི་གདམས་པ་གཙོ་བོར་བྱེད་པའི་ཆོས་བརྒྱུད་གཅིག་གི་གདམས་ངག་ཕལ་མོ་ཆེ་བླ་མ་ཡི་དམ་གྱི་བཀའ་རྒྱའི་སྒྲོག་གིས་བཅིངས་པས། དེ་དག་ཉམས་སུ་ལེན་མཁན་ལ་དབང་ལུང་ཁྲིད་གསུམ་གྱི་རིམ་པ་ངེས་པར་ཚང་དགོས་པ་ཡིན་ཏེ། ཟབ་གསང་གི་གདམས་པ་དེ་དག་མི་ངན་གྱི་ལག་ཏུ་ཤོར་ན་ཁམས་གསུམ་ཐམས་ཅད་ཕུང་བར་བྱེད་པས། ཤངས་པ་བཀའ་བརྒྱུད་ཀྱི་དགོན་གནས་དང་སྒྲུབ་སྡེའི་བླ་སློབ་རྣམས་ཀྱིས་གཙོ་བོར་མཛད་པའི་བརྒྱུད་འཛིན་རྣམས་ཀྱིས་རང་རྐང་ཚུགས་པའི་གདམས་པ་རྣམས་དང་། ཤངས་པའི་ལོ་རྒྱུས་རིག་གནས་སོགས་ལའང་ཐོས་བསམ་སློབ་གཉེར་འབད་པས་གནང་སྟེ་དེ་དག་གི་ཚིག་རིས་ཙམ་མ་ཟད། ལྷག་པར་དོན་གྱི་སྙིང་པོ་སྒྲུབ་པའི་ལག་ལེན་ཐོག་ཏུ་ཅུང་ཟད་སྐྱེལ་བར་ནུས་ན། ད་གཟོད་སྙིང་པོ་དོན་གྱི་བརྒྱུད་པའི་གདམས་ངག་ལྷག་མ་དེ་རྣམས་ཀྱི་ཚེ་བསྲིང་ཐུབ་ལ། གདམས་ངག་ཅིག་གི་མཐར་ཐུག་རིན་ཐང་སྟེ་འགྲོ་བ་མིའི་ནང་སེམས་ཀྱི་མྱོང་རྟོགས་གོང་འཕེལ་དང་བསམ་སྤྱོད་ཡར་ཐོན་ལ་སྨན་པའི་གསོས་སུ་འགྱུར་སྲིད། དེས་ན་ཤངས་ཆོས་བརྒྱུད་འཛིན་གྱི་ཁུར་བཞེས་པའི་བླ་སློབ་ཀུན་གྱིས་རང་ཉིད་ལ་ཐོབ་པའི་གདམས་ངག་ཕྲ་མོ་ཡན་ཆད་ལ་ཡང་ལུས་ཀྱི་སྙིང་ཁ་དང་མིག་གི་འབྲས་བུ་ཇི་བཞིན་གཅེས་སྦྲས་མཛད་དེ། ཁ་ཐོར་དུ་གནས་པའི་གདམས་ངག་རྣམས་ཀྱི་དཔྱད་ཡིག་ཁུངས་བཙན་རྣམས་དབང་ལུང་ཁྲིད་དང་བཅས་པ་གསན་བཞེས་དང་སླར་གསོ་གནང་རྒྱུ་ནི། ཇི་སྐད་དུ། སྡོམ་གསུམ་རབ་དབྱེ་ལས་'''གཏེར་ནས་བྱུང་བའི་སྒྲིགས་བམ་དང་། །གཞན་ནས་བརྐུས་པའི་ཆོས་ལུགས་དང་། །བརྩམས་ཆོས་དང་ནི་རྨི་ལམ་ཆོས། །བློ་བཟུང་མ་ཡི་ཆོས་ལུགས་ལ། །རྡོ་རྗེ་འཆང་ལ་བརྒྱུད་པ་སྙེག །དེ་ལའང་གཞན་དག་ལུང་ལེན་པ་'''སོགས་ཀྱི་རིགས་མཐའ་གཅིག་ཏུ་བཀག་སྡོམ་བྱས་ཏེ་ཤངས་པ་བཀའ་བརྒྱུད་ཀྱི་བསྟན་པ་རིན་པོ་ཆེ་བསྲེ་བསླད་ཀྱི་དྲི་མས་མ་སྦགས་པར་མུ་མཐུད་གནས་ཐུབ་མིན་གྱི་གནད་འགག་གལ་ཆེན་ཞིག་ཡིན།<br />
 +
II.6.6.2 <br />'''གཉིས། ཤངས་ཆོས་འཛིན་པའི་བརྒྱུད་པ་ཚད་ལྡན་དུ་གཏོང་རྒྱུ།'''<br />
 +
མིག་སྔར་ཤངས་པ་བཀའ་བརྒྱུད་ཀྱི་ཆོས་བརྒྱུད་དར་སྤེལ་གཏོང་རྒྱུའི་ལོ་རྒྱུས་ཀྱི་འགན་ཁྲི་འདི་མི་ཉུང་ཤས་ཁོ་ནའི་ཕྲག་པར་བབས་ཤིང་། བརྒྱུད་པའི་ལུང་གིས་བྱིན་གྱིས་བརླབས་པའི་ཚད་ལྡན་གྱི་གདམས་པའི་བདག་པོ་སྟེ་ནང་སེམས་སུ་རྟོགས་པའི་ཉི་མ་ཤར། མ་རིག་པའི་མུན་པ་སངས། གཟུང་འཛིན་གྱི་སྒྲོག་གྲོལ། བྱམས་དང་སྙིང་རྗེའི་མཐུ་རྒྱས་པའི་སློབ་དཔོན་རྣམས་ཀྱིས་ཐོག་མར་ངུར་སྨྲིག་རྒྱལ་མཚན་འཛིན་པའི་ཚུལ་སྤྱོད་ཀྱིས་ལྟ་སྒོམ་གྱི་དོན་ཕྱིན་ཅི་མ་ལོག་པར་ཉམས་སུ་བཞེས་པ་དང་། བརྒྱུད་པའི་རྣམ་ཐར་གཙང་མས་དཔལ་ལྡན་ཤངས་པ་བཀའ་བརྒྱུད་ཀྱི་དུས་རབས་ཉེར་གཅིག་པའི་ངོ་མཚར་གྱི་གཟུགས་བརྙན་གཏོད་དེ། ཤུལ་དུ་ལུས་པའི་གདམས་ངག་ཡོད་དོ་ཅོག་སྐལ་ལྡན་གྱི་གདུལ་བྱ་རྣམས་ལ་སྐབས་བསྟུན་བརྒྱུད་སྤེལ་གནང་བ་ལས། མཁས་གྲུབ་ཁྱུང་པོའི་སྐུ་སྲོག་དང་བརྗེས་པའི་གདམས་པ་དེ་དག་གསེར་དངུལ་ལོངས་སྤྱོད་ཁོ་ནའི་དོན་དུ་བཙོངས་ཚེ། མི་ལ་ལས་ཆེས་མཆོག་འགྱུར་གྱི་གདམས་ངག་དེ་དག་ལ་ཐོན་རྫས་ལྟ་བུའི་འདུ་ཤེས་འཛིན་སྲིད་ཅིང་། མཐར་བསྟན་པ་རིན་པོ་ཆེ་དཀྲུག་པར་འགྱུར་བ་སྟེ། མཛོད་རྩ་བ་ལས། སྟོན་པ་འཇིག་རྟེན་མིག་ནི་ཟུམ་གྱུར་ཅིང་། །དབང་གྱུར་སྐྱེ་བོ་ཕ་ལ་ཆེར་ཟད་པ་ན། །དེ་ཉིད་མ་མཐོང་རང་དགར་གྱུར་པ་ཡི། །ངན་རྟོགས་རྣམས་ཀྱིས་བསྟན་པ་འདི་དཀྲུགས་སོ། ཞེས་འཁོད་པ་ལྟར་རོ། །དཔེར་ན་ཉེ་བའི་ཆར་ཤངས་ཆོས་གདོང་ལྤགས་སུ་གྱོན་པའི་བླ་མ་རིག་འཛིན་དབང་རྒྱལ་ཏེ་མིང་ངོ་མར་ཇོ་ཧུང་ཧྲན་ཞེས་འབོད་པའི་བྱོལ་སོང་ཞིག་གིས་རང་ཉིད་ཤངས་པ་བཀའ་བརྒྱུད་ཀྱི་བླ་རབས་སོ་བདུན་པ་ཡིན་ཚུལ་དང་། མཐུ་དང་ནུས་པ་ངོ་མཚར་ཅན་ཡོད་ཚུལ་སོགས་ཀྱི་ཟབ་རྫུ་གྲངས་མེད་སྨྲས་ནས་སི་ཁྲོན་དང་། ཧུ་ནན། ཀོང་ཏུང་སོགས་ཀྱི་ས་ཆ་འགའ་ཤས་སུ་མི་མང་པོའི་དངོས་རྫས་བསླུ་ཁྲིད་བྱེད་པ། ལྷག་པར་དུ་མཁའ་འགྲོ་མ་ཉེར་བཞི་འཚོལ་དགོས་པ་སོགས་ལ་ཁ་གཡར་ནས་སྔགས་བླ་མེད་ཀྱི་ཉམས་ལེན་བྱིས་པའི་རྩེད་ཆས་ལྟ་བུ་ཞིག་ཏུ་བརྩིས་ཏེ་རང་འདོད་སྒྲུབ་ཕྱིར་ཆོས་དང་འཇིག་རྟེན་གཉིས་ཀ་ལས་འགལ་བའི་ལས་ངན་མང་དུ་སྤེལ་སྟབས། ཁྲམ་པ་ཡི་དམ་ལྷ་བཞིན་མཆོད་མཁན་གྱི་རྨོངས་པ་འགའི་དྲོ་སྐྱིད་ལྡན་པའི་ཁྱིམ་ཚང་ཡང་ཁ་ཐོར་བཏང་འདུག་པ་དེ་ནི་ཆོས་ཀྱིས་ངན་སོང་སྒྲུབ་པའི་ཕུང་འདྲེའི་ལས་ཁོ་ན་ཡིན། དེར་བརྟེན་ཆོས་རྗེ་ས་པཎ་གྱིས་'''བླ་མ་ངན་ལ་དད་པ་དང༌། ཆོས་ངན་པ་ལ་མོས་པ་དང་། བསྒོམ་ངན་པ་ལ་དགའ་བ་ནི། །མ་དག་པ་ཡི་དད་པ་ཡིན་'''ཞེས་གསུངས་པ་བཞིན་ཤེས་པ་བྱས་ཏེ་སླན་ཆད་ཀྱང་སྙན་བརྒྱུད་བཞི་དང་ལྡན་པ་སྟེ་ཆོས་ལུང་དང་ལྡན་པ། ལུང་མན་ངག་དང་ལྡན་པ། མན་ངག་བརྒྱུད་པ་དང་ལྡན་པ། བརྒྱུད་པ་བྱིན་རླབས་དང་ལྡན་པ་བཅས་དགོས་ངེས་ཡིན་པ་ལས། བཤད་བྱའི་ཆོས་མ་ཤེས་པ་དང་མན་ངག་མེད་པ། བླ་མའི་གསུང་དང་ལུང་མེད་པ། བཤད་ཆོས་ཀྱི་སྐྱོན་བརྗོད་པ། རྙེད་བཀུར་ཆེད་དུ་བཤད་པ་སོགས་ཆོས་འཆད་སྐབས་ཀྱི་སྐྱོན་ལྔ་དང་ལྡན་པའི་བླ་མ་བསྟེན་མི་རུང་བ་དང་། བླ་མ་ལ་བརྟག་དཔྱད་མ་བྱས་ན་དུག་འཐུང་བ་འདྲ་བས་བཤེས་གཉེན་བསྟེན་ཚུལ་ཚུལ་བཞིན་དུ་བསླབ་དགོས། དེ་རྗེས་བླ་མ་གང་རུང་གིས་བསྟན་པའི་ཆོས་རྣམས་ཀྱང་'''དེས་ན་རྨི་ལམ་ཆོས་ལུགས་དང༌། །ཞལ་གཟིགས་པ་ཡི་ཡི་དམ་དང་། །ལུང་བསྟན་མཛད་པའི་སངས་རྒྱས་དང་། །བླ་མའི་གསུང་སྒྲོས་ལ་སོགས་པ། །མ་དཔྱད་པར་ནི་གཏམ་ཆོལ་དུ། ཚད་མ་ཡིན་ཞེས་གཟུང་མི་བྱ། །འདི་འདྲ་བདུད་ཀྱི་བྱིན་རླབས་ལས། འབྱུང་བ་སྲིད་པར་རྒྱལ་བས་གསུངས་'''ཞེས་པའི་ཞལ་གདམས་སྙིང་དབུས་སུ་བཅངས་ནས་དུས་གཏན་དུ་གོང་གི་སྐྱོ་གར་འདི་རིགས་ལ་དོགས་ཟོན་དང་ཐུན་མོང་ཐོག་ངོ་རྒོལ་གྱིས་ཤིག<br />
 +
།སྒྲུབ་བརྒྱུད་ཀྱི་གདམས་པ་ཉམས་སུ་ལེན་མཁན་གྱི་སློབ་མ་རྣམས་ཀྱིས་ཀྱང༌། '''རང་ཉིད་བླ་མའི་མིང་ཞིག་ཐོགས་དགོས་སྙམ་པ་དང་། དེ་ཐོགས་ན་དཀོར་ཟས་ཕོངས་མེད་ཅིག་འབྱུང་སྙམ་པ་དང་། གྲོགས་མཆེད་གཞན་རྣམས་ལས་ལྷག་པའམ། བླ་མ་གཞན་དང་འདྲ་བ་ཞིག་བྱེད་དགོས་སྙམ་པ་སོགས་གཉེར་སེམས་ལོག་པ་གཏན་ནས་མི་བྱ་'''ཞེས་གསུངས་པ་ལྟར་འདུན་སེམས་ཀྱི་སྤང་བླང་ལོག་ན་འདི་ཕྱིའི་འདུན་མ་གཏན་ཉེས་སུ་འགྲོ་བས་དེ་ལྟར་རྩ་བ་ནས་མི་བྱ་བ་གལ་ཆེ། ཡང་འབྲི་གུང་སྐྱོབ་པ་རིན་པོ་ཆེས་'''ཆོས་དངོས་གཞི་ལས་ཀྱང་སྔོན་འགྲོ་ཟབ་'''ཅེས་པ་གསུངས་པ་ལྟར། ཐོག་མར་མདོ་ལུགས་ཀྱི་སློབ་གཉེར་དང་བྱང་སེམས་ཀྱི་བློ་སྦྱོང་སོགས་ངེས་པར་སྔོན་དུ་འགྲོ་དགོས་པ་ལས། མི་ཡིན་ཚད་དང་ནོར་ཡོད་ཚད་ཟབ་མོ་རྡོ་རྗེ་ཐེག་པའི་སྣོད་ལྡན་དུ་འགྱུར་ག་ལ་སྲིད། དེས་ན་ཕྱིས་འབྱུང་གི་ལམ་བུར་ཤངས་པའི་བརྒྱུད་པ་འཛིན་སྐྱོང་སྤེལ་གནང་རྒྱུ་ཡང་གྲངས་འབོར་ཁོ་ན་མ་ཡིན་པར་བླ་སློབ་ཀྱི་སྤུས་ཚད་གོང་མཐོར་གཏོང་ཐུབ་ན། འགྲོ་བ་མིའི་སྤྱི་ཚོགས་འཆམ་མཐུན་དང་ནང་སེམས་ཀྱི་གོ་རྟོགས་གོང་དུ་འཕོ་བར་མཁོ་བའི་ཤངས་པ་བཀའ་བརྒྱུད་པའི་རིག་གནས་ཀྱི་སྙིང་བཅུད་རྣམས་འཛམ་གླིང་རིག་གནས་ཀྱི་གར་སྟེགས་ཐོག་མུ་མཐུད་གནས་སྲིད་སྙམ། <br />
 +
'''མདོར་ན།''' སྒྲིབ་གཉིས་ཀྱི་མུན་པས་ཡོངས་སུ་འཐིབ་པའི་རྨོངས་བརྟུལ་ཁོ་བོར་མངོན་ཤེས་ཀྱི་ཡོན་ཏན་དྲི་མ་ཙམ་ཡང་མི་ལྡན་རུང་། དུ་བ་ལས་མེ་རྟོགས་པའི་རྗེས་དཔག་གི་རིག་པར་བརྟེན་ནས་ཤངས་པ་བཀའ་བརྒྱུད་པའི་སྔ་རབས་ཀྱི་ལོ་རྒྱུས་ཞིང་ཞོར། ཕྱིས་འབྱུང་གི་འཕེལ་ཕྱོགས་ལ་བསམ་གཞིག་བྱ་ཁུལ་གྱིས་ཤངས་པའི་ངོ་མཚར་གྱི་རིག་གནས་རྣམས་ངེད་རྗེས་རབས་པ་ཚོའི་ལོངས་སུ་སྤྱོད་ཡུལ་དུ་གྱུར་ན་ཅི་མ་རུང་སྙམ་པའི་ཀུན་སློང་གིས་ལེགས་པར་བསྐུལ་ཏེ། ཤ་ཚ་བའི་གཏམ་འགའ་ཞིག་བརྗོད་པར་ཐལ་སོང་བས། སངས་རྒྱས་ལ་ཀ་ཁའི་དཔེ་དང་བརྟག་དཔྱད་མ་བྱས་པའི་བབ་ཅོལ་དུ་སོང་ཚེ་སྙིམ་པ་སྤྱི་བོར་བཀོད་དེ་འཆགས་སོ། <br />
 +
'''།སྨྲས་པ།''' སྒྲུབ་པ་ལྷུར་བཞེས་རྣམ་ཐར་གཙོར་མཛད་འཆད་ཉན་སྲོག་གི་དབང་པོ་ཕྲ། །ཟབ་གསང་གདམས་ངག་བཀའ་རྒྱས་བཏབ་པས་བརྒྱུད་པའི་ཉག་ཐག་ཆད་ཉེ་ཡང་། །བློ་གྲོས་མཐའ་ཡས་རྒྱ་མཚོའི་སྡེ་ཡིས་བསྟན་པའི་མེ་རོ་སྨད་ནས་གསོས། །གསེར་ཆོས་རྣམ་ལྔའི་ཉིན་བྱེད་དབང་པོ་སླར་ཡང་ན་བུན་རུམ་ལས་བཞེངས། །ཞེས་བར་སྐབས་ཀྱི་ངལ་གསོའི་ཚིགས་སུ་བཅད་པའོ།<br /><br />
 +
'''།མཇུག་བྱང་།''' <br />
 +
མི་རྟག་རླུང་ཤུགས་བཙན་པོས་དགུང་སྔོན་དབྱིངས་སུ་འཕངས་པའི་དུས་ཀྱི་མདའ་མོ་དེས་ཡུད་ཙམ་ཞིག་ལ་བགྲང་བྱ་བཞི་ལྷག་སྣང་མེད་དུ་བསྒྱུར་ཟིན། དེ་ཡང་ཐོག་མར་ཤངས་གཞུང་རྣམ་རྒྱལ་གླིང་དུ་ལྟེ་ཁྲག་འཕོས་པ་ཙམ་ལས། ཤངས་པའི་ངོ་མཚར་གྱི་ཆོས་ལུགས་དང་ལོ་རྒྱུས་རིག་གནས་སོགས་གང་ས་ཅི་ཐད་ལ་ཆ་རྒྱུས་ཟེར་བ་ནི་ཇི་ལྟར་ཉིན་སྐར་གྱི་རྗེས་སུ་འགྲོ་བ་བཞིན་ཏིལ་འབྲུ་ཙམ་ཡང་མེད་རུང་། ཆུང་སྦར་མོ་གང་ནས་ཤངས་ཆུ་སྔོན་མོས་ཚེ་སྲོག་གི་བཞུར་རྒྱུན་གྱི་འཕར་རྩ་དང་། ལང་ཚོའི་དྲོད་ཁོལ་གྱི་ཟུངས་ཁྲག་བསྩལ་བ་སྙིང་ཁའི་ཕོ་བྲང་དུ་བཅངས་ཏེ། ཆོས་མེད་ཀྱི་བླུན་པོ་དང་། ནོར་མེད་ཀྱི་སྤྲང་རྒན་ཁོ་བོ་ལྟ་བུས་དེ་ལྟའི་ཆོས་ཀྱི་བྱུང་བ་ཞིག་འབྲི་བར་བརྩམ་པ་ཡང་བཞད་གད་ཀྱི་རྒྱུ་ཁོ་ནར་ངེས། འོན་ཏེ་ཕ་མེས་དམ་པའི་རྔུལ་ཆུ་འབུམ་ཕྲག་ལས་བསྐྲུན་པའི་ཟབ་ཡངས་ཤེས་རིག་གི་དགའ་ཚལ་འདིར། སེམས་རྒྱུད་འདུལ་བར་སྨན་པའི་རྩི་བཅུད་ཅུང་ཙམ་ཞིག་ལེན་ཕྱིར། ཤངས་ཆུའི་ཕང་བ་རུ་འཚར་སྐྱེས་ཀྱི་ལང་ཚོ་བཞད་རྐྱེན། ཤངས་པ་བཀའ་བརྒྱུད་ཀྱི་བྱུང་འཕེལ་ལོ་རྒྱུས་བརྗོད་སྙིང་དུ་བྱས་ཏེ་ཆོས་འབྱུང་ལྡིགས་བམ་ཞིག་གི་གསོལ་སྟོན་བཤམས།<br />
 +
།དེ་ཡང་ཆོས་འབྱུང་འདིར་གངས་ཅན་གྲུབ་པའི་དབང་ཕྱུག་མཁས་གྲུབ་ཁྱུང་པོ་རྣལ་འབྱོར་གྱིས་སྐུ་ཚེ་གང་པོར་རིན་ཆེན་གསེར་གྱི་ཁུར་པོ་དང་ལུས་སྲོག་བསྡོས་པའི་དཀའ་སྤྱད་ཀྱིས། ལམ་བགྲོད་པར་དཀའ་བའི་འཕགས་བལ་གྱི་ཡུལ་གྲུར་ལན་གྲངས་བདུན་གྱི་བར་ཕེབས་ནས་འཕགས་ཡུལ་གྱི་མཁས་གྲུབ་བརྒྱ་དང་ལྔ་བཅུ་བསྟེན་པ་དང༌། ལྷག་པར་དུ་ཁྱད་འཕགས་ཀྱི་མཁའ་འགྲོ་ནི་དྷི་རྣམ་གཉིས་ལས་གསེར་ཆོས་སྣ་ལྔས་ཐོག་དྲངས་པའི་མདོ་སྔགས་ཆོས་ཀྱི་གདམས་པ་རི་བོའི་གཏོས་དང་མཉམ་པ་ཐུགས་ཀྱི་བུམ་བཟང་དུ་བསྐྱིལ་བ། ཞེ་བཅད་དྲག་པོས་གསན་བཞེས་དང་ཉམས་ལེན་དཔྱིས་ཕྱིན་མཛད་མཐར་མང་དུ་ཐོས་པ་ལུང་གི་ཡོན་ཏན་དང་། ཚུལ་བཞིན་སྒྲུབ་པ་རྟོགས་པའི་ཡོན་ཏན་གྱི་རྩལ་ཆེན་ཡོངས་སུ་རྫོགས་ནས་ཐོགས་པ་མེད་པའི་མངོན་ཤེས་དང་། འགྱུར་བ་མེད་པའི་རྟོགས་པ། གཡེལ་བ་མེད་པའི་ཐུགས་རྗེ། དོན་དང་ལྡན་པའི་འཕྲིན་ལས། དྲི་མ་མེད་པའི་རྣམ་ཐར་ཁྱད་པར་ཅན་དང་ལྡན་པའི་སྒོ་ནས་སྒྲུབ་བརྒྱུད་ཤིང་རྟ་བརྒྱད་ཀྱི་ལྔ་པར་བགྲངས་པའི་དཔལ་ལྡན་ཤངས་པ་བཀའ་བརྒྱུད་ཅེས་ས་གསུམ་ཁྱོན་ལ་ཡོངས་སུ་གྲགས་པའི་བོད་དར་ནང་བསྟན་ཆོས་ལུགས་ཀྱི་བཀའ་སྲོལ་ཐུན་མོང་མ་ཡིན་པ་ཞིག་གསར་དུ་ཕྱེས། དེས་བོད་བརྒྱུད་ནང་བསྟན་གྱི་མདོ་སྔགས་རིག་གཞུང་སྤྱི་དང་། ཡང་སྒོས་བསྟན་པ་ཕྱི་དར་གྱི་དུས་སུ་གསང་སྔགས་ཀྱི་གཞུང་ལུགས་སྔར་བས་འཐུས་ཚང་དང་ཚུལ་མིན་ལྟ་སྤྱོད་དག་ཐེར་མཛད་པ་མ་ཟད། སངས་རྒྱས་ཀྱི་བསྟན་པ་རྟགས་ཙམ་འཛིན་པའི་རྩོད་ལྡན་སྙིགས་མ་ལྔ་བདོའི་དུས་འདིར་སྒྲུབ་བརྒྱུད་བསྟན་པའི་བ་དན་དགུང་སྔོན་གྱི་དབྱིངས་སུ་མཐོན་པོར་བསྒྲེངས་བ་ལ་སྐྱེས་མཆོག་མར་པ་ལོ་ཙཱ་བ་སོགས་དང་འདྲ་བར་གཞན་དྲིང་མི་འཇོག་པའི་ཕྱག་རྗེས་འཇོག་གནང་མཛད་ཡོད་པ་ནི་གཟུར་གནས་སྐྱེ་བོ་ཀུན་གྱིས་མགྲིན་གཅིག་ཏུ་ཞལ་གྱིས་བཞེས་པ་ལགས་སོ། <br />
 +
།དེ་ནས་མཁས་གྲུབ་ཁྱུང་པོའི་རྗེས་རབས་ཤངས་པའི་རིན་ཆེན་བདུན་བརྒྱུད་སྔ་ཕྱི་གཉིས་དང་། མཁས་གྲུབ་རྣམ་གསུམ་སོགས་ཤངས་པ་བཀའ་བརྒྱུད་ཀྱི་བསྟན་པ་སྐྱོང་བར་མཛད་པ་བླ་ལྷག་ཏུ་ཆེ་བའི་གྲུབ་ཐོབ་བྱང་སེམས་ས་ཆེན་པོའི་རྡུལ་དང་མཉམ་པ་བྱོན་ནས། ཉན་ཐོས་ཀྱི་ངེས་འབྱུང་དང་། ཐེག་ཆེན་གྱི་སེམས་བསྐྱེད། གསང་སྔགས་ཀྱི་དམ་ཚིག་རྣམས་གཞིར་བཞག་ཅིང་། སྐལ་ལྡན་གྱི་གདུལ་བྱ་རྣམས་གདམས་ངག་གི་བདུད་རྩིས་ཚིམས་པར་མཛད། ལྷག་པར་སྒྲུབ་བརྒྱུད་བསྟན་པ་འཛིན་པའི་ཆོས་བརྒྱུད་ཅིག་གིས་ངོས་ནས། ཁོང་རྣམ་པས་རང་ཉིད་ཀྱི་རྟོགས་པའི་བྲེ་ཁ་ཁེངས། ཡོན་ཏན་གྱི་རྩལ་ཤུགས་རྫོགས། འཕྲིན་ལས་ཀྱི་རྒྱ་མཚོ་བརྡོལ་ཏེ་དང་པོར་ཡི་དམ་ལྷ་ཡི་ཞལ་གཟིགས་པ་དང་། བར་དུ་མཁའ་འགྲོའི་ལུང་བསྟན་ཐོབ་པ། ཐ་མར་གནོད་སྦྱིན་བྲན་དུ་འཁོལ་ནུས་པ་སོགས་ཀྱི་མཛད་པ་སྟོང་གསུམ་གྱི་སྟོང་ཆེན་པོར་མི་ཤོང་ཡང་། རྒུད་པ་ཀུན་གྱི་གཙོ་བོར་གྱུར་པའི་བདག་འཛིན་གྱི་དྲི་མས་རང་སེམས་སྐད་ཅིག་ཙམ་ཡང་མ་བསླད་པར། བོད་ཡུལ་མཐའ་གྲུ་ཀུན་ཏུ་ཉོན་མོངས་དུག་གསུམ་གྱི་ནད་བརྒྱས་མནར་བའི་ཉམ་ཐག་གི་གདུལ་བྱ་ཁྲི་ཕྲག་དུ་མར་དམ་པའི་ཆོས་ཀྱི་གནང་སྦྱིན་དཔེ་མཁྱུད་མེད་པར་བསྩལ་ནས་ཐར་པའི་ས་ལ་འགོད་པ་དང་། ཆོས་ཉིད་བདེན་པའི་དོན་བསྟན་ནས་བགྲང་བྱ་དུ་མའི་རིང་མི་རིགས་ཀྱི་བསམ་པའི་དཔལ་ཡོན་བླ་ནས་བླར་མཐོར་འདེགས་གཏོང་བའི་ཁྱད་འཕགས་མཛད་འཕྲིན་འབའ་ཞིག་བསྐྱངས་སྟབས། མཁས་གྲུབ་ཁྱུང་པོ་སྐུ་འདས་རྗེས་ཀྱི་ལོ་ངོ་སུམ་བརྒྱ་ལྷག་ཙམ་གྱི་རིང་ལའང་ཤངས་ཆོས་ཀྱི་ལང་ཚོ་ཤིན་ཏུ་དར། <br />
 +
འོན་ཏེ་སྤྱི་ལོའི་དུས་རབས་བཅུ་བཞི་པའི་སྨད་ཙམ་ནས་བཟུང་ཤངས་པའི་ཆོས་བརྒྱུད་འདི་ལ་ཕྱི་ནང་གི་འཇིགས་པ་སྣ་ཚོགས་བྱུང་བས། བར་སྐབས་ཤིག་རིང་བོད་ཀྱི་ནང་བསྟན་ཆོས་ལུགས་སྤྱི་དང་འདྲ་བར་ཉམས་རྒུད་ཅུང་ཟད་དུ་སོང་ཡང་། འོད་སྟོང་འབར་བའི་ཤངས་པའི་རིག་གནས་ཡོད་ཚད་ཀྱི་སྲོག་གི་དབང་པོ་ཡེ་ནས་དགག་པ་མེད་པར་གནས་མུས་ཡིན་པའི་བདེན་དཔང་ཙམ་དུ་གྱུར་ཆེད། དུས་ངན་གྱི་རླུང་འཚུབ་ཇི་ལྟར་ཤུགས་ཆེ་ཡང་གསེར་འོད་འཕྲོ་བའི་ཤངས་པ་བཀའ་བརྒྱུད་ཀྱི་རིག་གནས་འདི་བཞིན་ནམ་ཡང་རྩ་སྟོངས་སུ་སོང་ན་མཁས་གྲུབ་ཁྱུང་པོ་སོགས་ལས་བརྒྱུད་པའི་ཤངས་པའི་སྐྱེས་ཆེན་རིམ་བྱོན་གྱི་སྐུ་ཁྲག་དང་རྔུལ་ཆུ་ལས་གྲུབ་པའི་ལྷག་བསམ་དག་ཀྱང་ཆུད་ཟོས་སུ་འགྲོ་བར་དོགས་ཏེ། ཁོ་བོས་རང་ནུས་ཅི་ལྕོགས་ཀྱིས་ཁུངས་བཙན་དཔྱད་ཡིག་མི་ཉུང་བ་ཞིག་རྒྱབ་རྟེན་དུ་བཅོལ་ནས་གཞུང་འདིའི་ལོ་རྒྱུས་ཀྱི་རིན་ཐང་དང་། དཔྱད་གཞིའི་རིན་ཐང་སོགས་ཅུང་ཟད་ལྷིང་ཁུལ་བྱས་ཐོག །གོམ་གང་མདུན་སྤོས་ཀྱིས་ཤངས་པ་བཀའ་བརྒྱུད་པའི་རིང་ལུགས་འདི་ཉིད་དུས་ད་ལྟའི་ཚེ་ནའང་སྲོག་རྒྱུན་མ་ཆད་པར་གནས་མུས་ཡིན་པ་དངོས་ར་སྤྲོད་སླད་དུ་དམིགས་པ་ནི་ཁོ་བོའི་དཔེ་དེབ་འདི་རྩོམ་འབྲི་བྱེད་པའི་སྔ་བར་ཕྱི་གསུམ་གྱི་འདུན་པ་ཡིན་ལ། མཐར་ཐུག་གི་དམིགས་རེ་ཡང་དེ་ལས་མ་འདས་སོ། <br />
 +
།ལར་འཇིག་རྟེན་ཁ་རྒྱུན་དུ་གཟར་པོའི་བྲག་ལ་མ་འཛེགས་ན། བདེ་མོའི་ཐང་དུ་སླེབས་མི་སྲིད་ཅེས་པའི་དཔེ་ལྟར་དཀའ་བ་རྣམ་བརྒྱད་ཀྱིས་རབ་ཏུ་ཟིན་པའི་སྙིགས་མའི་དུས་འདིར་མཁས་གྲུབ་ཁྱུང་པོ་སོགས་ཤངས་པ་བཀའ་བརྒྱུད་པའི་ཟབ་མོའི་ཆོས་སྐོར་རམ་ཁྱད་དུ་འཕགས་པའི་རིག་གནས་དར་སྤེལ་མཛད་མཁན་གྱི་ངེས་པ་དོན་དང་ལྡན་པའི་སྐྱེས་མཆོག་རྣམ་པས་ཆོས་ལུགས་རིག་གནས་ཀྱི་བློས་བསླངས་ཤིག་བཞེངས་ཡོད་པ་དེ་ནི། ཁྲག་དང་རྔུལ་ཆུའི་ཐིགས་པ་ཁོ་ནས་གྲུབ་པ་འབའ་ཞིག་ཡིན་པ་ལས། ལྷན་སྐྱེས་ཀྱི་རྫུ་འཕྲུལ་མཐུ་ཡིས་བཞེངས་པ་ནི་ག་ལ་ཡིན། དེས་ན་ཁོ་བོས་བགྲང་བྱ་དུ་མར་མིག་ཆུའི་དོག་པ་དང་འདྲེས་ནས་མདོ་དབུས་ཁམས་གསུམ་གྱི་དགོན་གནས་རི་ཁྲོད་དུ་མར་སྐྱེས་མཆོག་ཚོའི་ཞབས་རྗེས་ཀྱི་ཤུལ་དུ་བསྙེགས་ནས་ཚེ་སྲོག་གི་འཁོར་མཚམས་ཆད་མེད་པའི་ཤངས་ཆོས་ཀྱི་ལས་དབང་མདོ་ཙམ་འབྲི་ཁུལ་བགྱིས་པ་འདིས་གང་དང་སུ་ཞིག་ལ་ཕན་པའི་གསོས་སུ་གྱུར་མི་སྲིད་ཀྱང་། ཤངས་པའི་རིག་གནས་ཀྱིས་ཁོ་བོའི་སེམས་ཀྱི་ཞིང་སར་བྱི་དོར་མཛད་པ་ལས་བྱུང་བའི་གསེར་ཆོས་ཞིང་གི་ས་བོན་ཙམ་ཞིག་ལགས་པ་འདིས་ཀྱང་རྒྱལ་བའི་བསྟན་པ་རིན་པོ་ཆེ་སྤྱི་དང་། བྱེ་བྲག་དཔལ་ལྡན་ཤངས་པ་བཀའ་བརྒྱུད་ཀྱི་བསྟན་པའི་ལྗོན་བཟང་ཡུལ་དུས་གནས་སྐབས་ཐམས་ཅད་དུ་རྒྱས་ཤིང་། ཡུན་ནས་ཡུན་དུ་གནས་པའི་ཉེར་ལེན་དུ་གྱུར་ཅིག་གུ <br /><br />
 +
'''།སྨྲས་པ།''' རྡོ་རྗེ་འཆང་ཆེན་མཁའ་འགྲོ་ཟུང་གིས་གདམས་ངག་བྱེ་བའི་གཏེར་ཁ་གཏད། །གྲུབ་ཐོབ་བྱང་སེམས་རིན་ཆེན་ཕྲེང་བས་ཟུང་འཇུག་ལམ་གྱི་དེད་དཔོན་མཛད། །སྙིགས་དུས་སྐྱེ་འགྲོའི་ཡིད་སེམས་སྨིན་པའི་རིན་བྲལ་གདམས་པའི་སྨན་མཆོག་འདི། །མི་ཡུལ་སྲིད་པའི་ཀློང་ཡངས་འདི་ལས་ནམ་ཡང་མི་ནུབ་རྟག་བརྟན་ཤོག།<br />
 +
།སྲོག་དང་དོ་བསྡོས་གདམས་ངག་ལྷག་མ་མཁའ་སྤྱོད་གནས་སུ་མ་གྱུར་ཕྱིར། །གཞུང་ལུགས་སྟོང་གི་ཉིང་བཅུད་བཏུས་ཏེ་ཡི་གེའི་ལམ་དུ་དྲངས་པའི་དགེས། །རྒྱལ་བསྟན་སྤྱི་དང་ཤངས་པའི་ལུགས་བཟང་ངོ་མཚར་འདབ་སྟོང་བཞད་པ་འདི། །བདེན་པའི་མཐུ་ཡི་གྲུ་ཆར་འཇོ་བས་ཡུལ་དུས་ཀུན་ཏུ་རྒྱས་གྱུར་ཅིག །ཅེས་པའི་སྨོན་ལམ་དྲི་མ་མེད་པས་མཚམས་སྦྱར་ཏེ་'''དཔལ་ལྡན་ཤངས་པ་བཀའ་བརྒྱུད་ཀྱི་ཆོས་འབྱུང་གསེར་ཆོས་ཞིང་གི་ས་བོན་'''ཞེས་བྱ་བ་འདི་ནི་དགེ་མིང་ཙམ་འཛིན་པ་རྡོ་རྗེ་ཚེ་དབང་དུ་འབོད་པས་སྤྱི་ལོ་2013ལོའི་ཆུ་སྟོད་ཟླ་བའི་དཀར་ཕྱོགས་སྟོང་པ་དང་པོར་སྔོན་མཉམ་མེད་ཤཱཀྱའི་རྒྱལ་པོས་བཀའ་དང་པོ་བདེན་བཞིའི་ཆོས་འཁོར་བསྐོར་བའི་བཀྲ་ཤིས་དགེ་བའི་ཉིན་མྱང་སྨད་ས་ཡི་ལྟེ་བ་གཞིས་རྩེ་མཐོ་རིམ་སློབ་འབྲིང་དང་པོའི་རང་ཤག་རིག་པའི་དགའ་ཚལ་དུ་མཇུག་རྫོགས་པར་བྲིས་པ་དགེའོ། །མངྒལཾ་བྷ་ཝནྟུ།།
 +
 
 
</span>
 
</span>

Revision as of 13:08, 14 October 2022








Resource ID DT2
Title dpal ldan shangs pa bka' brgyud kyi chos 'byung gser chos zhing gi sa bon
Author Dorjé Tsewang
Link BDRC W1KG26279
Notes Published with the author's agreement.

II -
།ཝཾ། དཔལ་ལྡན་ཤངས་པ་བཀའ་བརྒྱུད་ཀྱི་བར་གྱི་འཕེལ་རིམ་དང་མཐའ་མའི་དར་རྒུད་སྐོར།

II.1 - The origin of the doctrine of the Dashang Kagyü
ལེའུ་དང་པོ། དྭགས་ཤངས་བསྟན་པའི་བྱུང་ཚུལ་སོགས་ཀྱི་སྐོར།
དེ་ཡང་བོད་དར་ནང་བསྟན་གྱི་གྲུབ་མཐའི་བྱེ་བྲག་སྒྲུབ་བརྒྱུད་ཀྱི་ཤིང་རྟ་འཛིན་པའི་བཀའ་བརྒྱུད་པ་ནི། བཀའ་བབས་ཀྱི་གདམས་པའི་བརྒྱུད་འཛིན་པས་མཚན་དེ་ལྟར་དུ་ཐོགས། དེ་ལ་རྗེ་མར་པའི་བརྒྱུད་འཛིན་དང་མཁས་གྲུབ་ཁྱུང་པོའི་བརྒྱུད་འཛིན་གཉིས་བྱུང་བ་ལས། རྒྱལ་བ་རྡོ་རྗེ་འཆང་ནས་ཏེ་ལོ་ནཱ་རོའི་བར་དུ་བྱོན་པའི་བཀའ་བབས་ཀྱི་གདམས་པ་རྣམས་རྗེ་མར་པ་ལ་མངའ་བས། དེའི་ཆོས་བརྒྱུད་འཛིན་པ་རྣམས་ལ་མར་པ་བཀའ་བརྒྱུད་ཅེས་ཟེར་ཞིང་། བཀའ་བབས་ཀྱི་གདམས་པ་རྣམས་བྱོན་ཚུལ་ནི། ཏི་ལོ་པ་ལ་བཀའ་བབས་བཞིའི་གདམས་པ་མངའ་སྟེ། རྒྱལ་བ་རྡོ་རྗེ་འཆང་། རྒྱལ་པོ་ཨིནྡྲ་བྷུ་ཏི། ཀླུ་ལས་གྱུར་པའི་རྣལ་འབྱོར་མ། ས་བདག་བྷི་སུ་ཀཝ། ས་ར་ཧ། ཀླུ་སྒྲུབ་ཞབས། ཏི་ལོ་པ་སྟེ་གསང་འདུས་དང་། གདན་བཞི། ཆོས་དྲུག་གི་སྒྱུ་ལུས། འཕོ་བའི་བཀའ་བབས་རྣམས་དང༌། རྒྱལ་བ་རྡོ་རྗེ་འཆང་། ཡེ་ཤེས་ཀྱི་མཁའ་འགྲོ་མ། ཀུ་ཀུ་རི་པ། ཙརྱ་པ། ཏེ་ལོ་པ་སྟེ་སྒྱུ་མ་ཆེན་པོ་དང་ཆོས་དྲུག་གི་རྨི་ལམ་གྱི་བཀའ་བབས། རྒྱལ་བ་རྡོ་རྗེ་འཆང་། ཕྱག་ན་རྡོ་རྗེ། ཌོམྦི་ཧེ་རུ་ཀ། བྷི་ན་བཛྲ། ལྭ་བ་པ། ཏེ་ལོ་པ་སྟེ་བདེ་མཆོག་སོགས་མ་རྒྱུད་མཐའ་དག་དང་ཆོས་དྲུག་འོད་གསལ་གྱི་བཀའ་བབས། རྒྱལ་བ་རྡོ་རྗེ་འཆང་། ཕྱག་ན་རྡོ་རྗེ། ཡན་ལག་མེད་པའི་རྡོ་རྗེ། པདྨ་བཛྲ། ཌཱ་ཀི་མ་སྐལ་པ་བཟང་མོ། ཏི་ལོ་པ་སྟེ་དགྱེས་པ་རྡོ་རྗེ་དང་ཆོས་དྲུག་གཏུམ་མོའི་བཀའ་བབས་རྣམས་སོ། །བཀའ་བབས་བཞིའི་ངོས་འཛིན་དང་གོ་རིམ་ཅུང་ཟད་མི་འདྲ་བ་འགའ་རེ་ཡང་སྣང༌།
མཁས་གྲུབ་ཁྱུང་པོ་ལ་ཡང་། རྒྱལ་བ་རྡོ་རྗེ་འཆང་ནས་ཡེ་ཤེས་ཀྱི་མཁའ་འགྲོ་ནི་གུ་མ་ལ་བཀའ་བབས་པའི་གདམས་པ་སོགས་མངའ་བས། དེའི་བརྒྱུད་འཛིན་པ་རྣམས་ལ་ཤངས་པ་བཀའ་བརྒྱུད་པར་འབོད་དོ།

II.1.1 - The Dagpo Kagyü
།དང་པོ། དྭགས་པོ་བཀའ་བརྒྱུད་ཀྱི་སྐོར།
དྭགས་པོ་བཀའ་བརྒྱུད་ཀྱི་འགོ་ཁུངས་ནི་མར་པ་ལོ་ཙཱ་བ་ཆོས་ཀྱི་བློ་གྲོས་ལ་གཏུགས་ཤིང་། ཁོང་ནི་སྤྱི་ལོ་1012(འཁྲུངས་འདས་ལོ་ཚིགས་དེབ་སྔོན་ལྟར་བཀོད་)ལོར་ལྷོ་བྲག་རྫོང་ཆུས་ཁྱེར་ཕུར་ཡབ་མར་པ་དབང་ཕྱུག་འོད་ཟེར་དང་ཡུམ་རྒྱལ་མོ་འོད་ཟེར་གཉིས་ཀྱི་སྲས་མིང་སྲིང་བཞིའི་གཉིས་པར་སྐུ་འཁྲུངས། དགུང་ལོ་བཅོ་ལྔ་པ་ནས་འབྲོག་མི་ལོ་ཙཱ་བ་ཤཱཀྱ་ཡེ་ཤེས་ཀྱི་དྲུང་དུ་ལོ་ཙཱ་སློབ་སྦྱོང་གནང་། དེ་རྗེས་དཀའ་བ་ཁྲི་ཕྲག་ཁྱད་དུ་བསད་དེ་རྒྱ་གར་ལ་ལན་གསུམ་དང་བལ་པོར་ལན་བཞི་བྱོན། པཎ་ཆེན་ནཱ་རོ་པ་དང་། མངའ་བདག་མཻ་ཏྲི་པ། སློབ་དཔོན་ཡེ་ཤེས་སྙིང་པོ། གྲུབ་ཆེན་ཞི་བ་བཟང་པོ་ལ་སོགས་པའི་བླ་མ་བརྒྱ་རྩ་བརྒྱད་ཀྱི་ཞབས་ལ་གཏུགས། རྒྱུད་ཀྱི་རྒྱལ་པོ་ཕ་རྒྱུད་གསང་བ་འདུས་པ་དང་། མ་རྒྱུད་འཁོར་ལོ་བདེ་མཆོག་ལ་སོགས་པའི་རྣལ་འབྱོར་ཕ་མའི་རྒྱུད་ཀྱི་གདམས་ངག་ལག་ལེན་དང་བཅས་པ་ཞིབ་ཏུ་སྦྱངས། མཻ་ཏྲི་པ་ལ་བརྟེན་ནས་ཆོས་ཉིད་ཕྱག་རྒྱ་ཆེན་པོའི་རྟོགས་པ་མངོན་དུ་གྱུར། བོད་དུ་བྱོན་ནས་སློབ་མ་མང་དུ་བསྐྱངས་པ་ལས། གཙོ་བོ་ཀ་ཆེན་བཞིར་གྲགས་པ་ནི། གཞུང་གི་རྔོག་སྟོན་ཆོས་རྡོར། དོལ་གྱི་མཚུར་སྟོན་དབང་ངེ་། གཙང་རོང་གི་མེས་སྟོན་ཚོན་པོ། གུང་ཐང་གི་མི་ལ་རས་པ་རྣམས་སོ། དགུང་གྲངས་གྱ་དྲུག་ལ་ཕེབས་པ་སྤྱི་ལོ་1097ལོར་སྐུ་གཤེགས།
སློབ་མ་ཀ་ཆེན་བཞི་པོ་དེ་དག་ལས་མེས་རྔོག་མཚུར་གསུམ་ལ་བཤད་རྒྱུན་གྱི་བཀའ་བབས་པས། སློབ་བརྒྱུད་རིམ་པར་བྱོན་པ་རྣམས་ཀྱིས་བདེ་དགྱེས་གསང་གསུམ་དང༌། གདན་བཞི། མ་ཧཱ་མཱ་ཡཱ་སོགས་ཀྱི་དབང་དང་རྒྱུད་ཀྱི་བཤད་པ་རྒྱ་ཆེར་སྤེལ་ཞིང་། མཚུར་སྟོན་དབང་གི་རྡོ་རྗེ་ལས་བརྒྱུད་པའི་གསང་བ་འདུས་པའི་དབང་དང་རྒྱུད་བཤད་བུ་སྟོན་ཐམས་ཅད་མཁྱེན་པ་དང་རྒྱལ་བ་ཙོང་ཁ་པ་ཆེན་པོ་སོགས་ལ་བྱོན།
སློབ་མ་ཀ་ཆེན་བཞི་ལས་སྒྲུབ་པའི་བཀའ་བབས་བྱང་གི་ཀ་ཆེན་རྗེ་བཙུན་མི་ལ་རས་པ་ནི། གངས་ཅན་པ་རྣམས་ཀྱི་རྣ་བའི་རྒྱན་གཉིས་སུ་གྲགས་པའི་ཡ་གྱལ་ཡིན་ལ། རྗེ་འདི་ཉིད་རབ་བྱུང་དང་པོའི་ལྕགས་འབྲུག་སྤྱི་ལོ་1040ལོར་ཡབ་མི་ལ་ཤེས་རབ་རྒྱལ་མཚན་དང་ཡུམ་མྱང་ཚ་དཀར་རྒྱན་གཉིས་ཀྱི་སྲས་སུ་གུང་ཐང་སྐྱ་རྔ་རྩ་ར་སྐུ་འཁྲུངས། སྐུ་ན་ཆུང་ངུའི་དུས་ནས་ཡབ་གཤེགས་ཏེ་ཨ་ཁུ་དང་ཨ་ནེས་སྡུག་པོ་ཚད་མེད་བཏང༌། དེ་རྗེས་ཡུམ་གྱི་བཀའ་བཞིན་མཐུ་བསླབས་ནས་མི་ཕྱུགས་མང་པོ་བསད། སླར་འགྱོད་དེ་སྤྱི་ལོ་1078ལོར་ལྷོ་བྲག་ཏུ་རྗེ་མར་པའི་དྲུང་དུ་ཕེབས། བླ་མ་མར་པའི་དྲུང་དུ་ལོ་དྲུག་དང་ཟླ་བ་བརྒྱད་ཙམ་བཞུགས་ནས་སྔ་ཕྱིར་ཡིད་ཆད་ཆེན་པོ་བདུན་གྱིས་སྒྲིབ་པ་སྦྱངས་པ་དང་། ཆོས་ཕྱིར་དཀའ་བ་ཚད་མེད་སྤྱད་མཐར་དབང་དང་གདམས་ངག་རྫོགས་པར་གནང་། ཁོང་གིས་འཇིག་རྟེན་བློས་བཏང་གི་ཞེ་བཅད་དང་དཀའ་སྤྱད་སྡུག་སྲན་གྱི་སྙིང་རུས་དྲག་པོས་སྒྲུབ་པའི་རྒྱལ་མཚན་རི་རབ་ཀྱི་རྩེ་མོར་བསྒྲེངས་ནས་སྐུ་ཚེ་གཅིག་ལ་མཆོག་གི་དངོས་གྲུབ་བརྙེས་ཤིང་། སྒྲུབ་བརྒྱུད་བསྟན་པའི་སྲོལ་ཁ་བཙུགས། མཐར་རང་ཉིད་ཀྱི་ཐུགས་སྲས་རྗེ་སྒམ་པོ་བ་ལ་བསྟན་པ་གཏད་དེ་དགུང་གྲངས་གྱ་བཞི་པ་སྤྱི་ལོ་1123ལོར་སྐུ་གཤེགས། སློབ་མ་རས་པ་མཆེད་བརྒྱད་དང་། སྟོན་པ་དྲུག །རས་མ་བཅུ་གཉིས། གྲུབ་ཐོབ་མ་དྲུག་སོགས་བགྲངས་ཀྱིས་མི་ལང་བ་བྱོན་པ་ལས་གཙོ་བོར་གྱུར་པ་ནི། ཉི་མ་ལྟ་བུ་དྭགས་པོ་ལྷ་རྗེ་དང་། ཟླ་བ་ལྟ་བུ་རས་ཆུང་བ་གཉིས་སོ།
རས་ཆུང་རྡོ་རྗེ་གྲགས་ནི་སྤྱི་ལོ་1084ལོར་ལ་སྟོད་གུང་ཐང་དུ་སྐུ་འཁྲུངས། དགུང་ལོ་བཅུ་གཅིག་ལ་ཕེབས་སྐབས་རྗེ་བཙུན་མི་ལ་བསྟེན་ནས་དམ་ཆོས་ལ་སློབ་གཉེར་མཛད། འཕགས་ཡུལ་དུ་ལན་གཉིས་བྱོན་པའི་སྔ་མ་ལ་བླ་མ་ཝ་ལ་ཙནྡྲ་ལས་ཕྱག་རྡོར་གཏུམ་པོ་ཁྱུང་གཤམ་ཅན་གྱི་གདམས་པ་གསན། དེ་རྗེས་རྗེ་བཙུན་མི་ལས་ལུས་མེད་མཁའ་འགྲོའི་ཆོས་སྐོར་དགུ་ཡོད་པ་ལས་ལྔ་རྗེ་མར་པས་གདན་དྲངས། ད་དུང་བཞི་ཡོད་པ་ཁྱོད་སོང་ལ་ལོངས་ཤིག་གསུངས་པས། སླར་རྒྱ་གར་དུ་ཕེབས་ཏེ་མཻ་ཏྲི་པ་དང་ནཱ་རོ་པ་གཉིས་ཀའི་དངོས་སློབ་ཏི་ཕུ་བ་ལ་ཆོས་སྐོར་དེ་རྣམས་རྫོགས་པར་ཞུས་པ། བོད་དུ་ཕེབས་རྗེས་བླ་མ་མི་ལར་ཕུལ། མི་ལས་ངམ་རྫོང་སྟོན་པ་ལ་གནང་བས། དེས་ཡིག་སྣ་ཡང་བརྩམས། དེ་ནས་མཆེད་པ་ལ་བདེ་མཆོག་སྙན་བརྒྱུད་དང་། རས་ཆུང་བ་ཉིད་ནས་གཞན་ལ་མཆེད་པ་ལ་རས་ཆུང་སྙན་བརྒྱུད་དུ་གྲགས།
རྗེ་བཙུན་མི་ལའི་སློབ་མ་ཉི་མ་ལྟ་བུ་དྭགས་པོ་ལྷ་རྗེ་བསོད་ནམས་རིན་ཆེན་ནི། ཡབ་སྙི་བ་ལྷ་རྗེ་དང་ཡུམ་ཤོ་མོ་བཟའ་གཉིས་ལ་སྲས་གསུམ་འཁྲུངས་པའི་བར་པར། རབ་བྱུང་དང་པོའི་ས་ལུག་སྤྱི་ལོ་1079ལོར་སྐུ་འཁྲུངས། ཁོང་ནི་བཅོམ་ལྡན་འདས་ལ་ཏིང་ངེ་འཛིན་རྒྱལ་པོ་ཞུ་མཁན་གྱི་ཟླ་འོད་གཞོན་ནུ་ཡིན་པར་གསུངས། སྐུ་ན་ཆུང་ངུའི་དུས་ནས་སྨན་བསླབས་ཏེ་མཁས་པར་གྱུར་པས་ལྷ་རྗེར་གྲགས། ཇོ་མོ་ཞིག་ཁབ་ཏུ་བཞེས་པ་འདས་པས་ཐུགས་སྐྱོ་སྟེ་བཀའ་གདམས་པའི་དགེ་བཤེས་ཤ་བ་གླིང་པ་ལས་བསྙེན་པར་རྫོགས། དགེ་བཤེས་བྱ་ཡུལ་བ། སྙུག་རུམ་པ། ལྕགས་རི་གོང་ཁ་བ་རྣམས་ལ་བཀའ་གདམས་ཀྱི་ཆོས་མང་དུ་གསན། རྗེ་བཙུན་མི་ལའི་སྙན་པ་གསན་པས་མཇལ་དུ་ཕེབས། དགྱེས་བཞིན་དུ་རྗེས་སུ་བཟུང་སྟེ་གདམས་ངག་ཐམས་ཅད་རྫོགས་པར་གནང་། སྒོམ་སྒྲུབ་མཛད་པས་ཉམས་རྟོགས་ཁྱད་པར་ཅན་འཁྲུངས། དེ་ཡང་དྭགས་ལྷ་སྒམ་པོའི་གནས་སུ་བྱོན་པའི་ཚེ། །བླ་མའི་གསུང་བཞིན་སྒྲུབ་པ་ཐུགས་ལ་དགོངས། །མཁའ་འགྲོས་ལུང་བསྟན་གཞན་དོན་གྱིས་ཤིག་གསུངས་ཞེས་འཁོད་པ་ལྟར་བླ་མ་མཁའ་འགྲོས་གཞན་དོན་སྐྱོང་རྒྱུའི་ལུང་བསྟན་གནང་བ་བཞིན་རབ་བྱུང་གཉིས་པའི་ལྕགས་གླང་སྤྱི་ལོ་1121ལོར་དྭགས་ལྷ་སྒམ་པོའི་དགོན་གནས་ཕྱག་བཏབ་ཅིང་། ཇོ་བོ་བཀའ་གདམས་པའི་ལམ་རིམ་དང་རྗེ་བཙུན་མི་ལའི་ཕྱག་ཆེན་གཉིས་གཅིག་ཏུ་དྲིལ་ནས་ལམ་རིམ་ཐར་པ་རིན་པོ་ཆེའི་རྒྱན་མཛད་པས་བཀའ་ཕྱག་ཆུ་བོ་གཉིས་འདྲེས་སུ་གྱུར། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་བྱ་བའི་ཁྲིད་རིམ་གྱིས་སློབ་མ་བཀྲི་བར་མཛད། དེ་ལས་དར་སྤེལ་བྱུང་བའི་ཆོས་བརྒྱུད་ལ་དྭགས་པོ་བཀའ་བརྒྱུད་ཅེས་ཡོངས་སུ་གྲགས།

II.1.2 - Four primary branches and Eight Secondary branches of the Dagpo Kagyü
གཉིས་པ། བཀའ་བརྒྱུད་ཆེ་བཞི་ཆུང་བརྒྱད་ཀྱི་སྐོར།
དེ་ཡང་བཀའ་བརྒྱུད་ཆེ་བཞི་ཆུང་བརྒྱད་ཀྱི་གསོལ་འདེབས་གདུང་བའི་ཕོ་ཉར་འབའ་རོམ་ཕག་གྲུ་ཀམ་ཚང་ཚལ་པ་བཞི། །འབྲི་སྟག་ཁྲོ་གླིང་སྨར་གཡེལ་གཡའ་ཤུག་བརྒྱད་ཅེས་འཁོད་པ་ལྟར་དྭགས་པོ་བཀའ་བརྒྱུད་ལ་དབྱེ་ན་ཆེ་བཞི་ཆུང་བརྒྱད་དམ་ཟུང་བཞི་ཡ་བརྒྱད་ཡོད་པ་ལས། ཆེ་བ་བཞི་ནི།
II.1.2.1 Karma Kamtsang Kagyü
གཅིག །ཀརྨ་བཀའ་བརྒྱུད།
ཀརྨ་བཀའ་བརྒྱུད་ནི། མཉམ་མེད་དྭགས་པོ་ལྷ་རྗེའི་སློབ་མ་ཀརྨ་དུས་གསུམ་མཁྱེན་པའམ་ཁམས་པ་དབུ་སེ་ཞེས་གྲགས་པ་ལས་བརྒྱུད་པ་ལ་ཟེར་ཞིང་། མཚན་གཞན་མཚུར་ཕུ་བཀའ་བརྒྱུད་ཅེས་ཀྱང་འབོད་སྲོལ་འདུག །རྗེ་དུས་གསུམ་མཁྱེན་པ་ནི་རབ་བྱུང་གཉིས་པའི་ལྕགས་སྟག་སྤྱི་ལོ་1110ལོར་མདོ་ཁམས་ཏྲེ་ཤོད་གངས་ཀྱི་རྭ་བའི་མངའ་ཁོངས་དེང་དཀར་མཛེས་རྫོང་གསེར་མཁར་ཡུལ་ཤོག་འབོ་མཆོག་གྲོང་ཚོར་སྐུ་འཁྲུངས། དགུང་ལོ་བཅུ་དྲུག་པ་ལ་ཆོས་འཁོར་ཀ་བྲག་ཏུ་རྔོག་ལོའི་སློབ་མ་མཆོག་གི་བླ་མས་མཁན་པོ་དང་། ཆག་སེང་གེ་གྲགས་ཀྱིས་སློབ་དཔོན་མཛད་དེ་རབ་ཏུ་བྱུང་། ཁོང་གཉིས་ཀྱི་དྲུང་ནས་འདུལ་བ་དང་བཀའ་གདམས་ཀྱི་ཆོས་སྐོར་འགའ་ཞིག་གསན། དགུང་ལོ་བཅུ་དགུ་པ་ལ་དབུས་སུ་བྱོན་ནས་སྟོད་ལུང་རྒྱ་དམར་བ་དང་། ཕྱྭ་པ་ཆོས་ཀྱི་སེང་གེ་ལ་བྱམས་ཆོས་དང་དབུ་ཚད་གསན་ནས་མཁས་པར་མཁྱེན། ཤ་ར་བ་ལས་བཀའ་གདམས་ལམ་རིམ་དང་། པ་ཚབ་ལོ་ཙཱ་བ་ལས་དབུ་མ་གསན། མལ་འདུལ་བ་འཛིན་པའི་དྲུང་དུ་བསྙེན་པར་རྫོགས་ཤིང་འདུལ་བ་བསླབས། དགུང་ལོ་སུམ་ཅུ་པ་(འགར་སོ་གསུམ་ཞེས་འཁོད་)ལ་དྭགས་པོ་ལྷ་རྗེ་དང་མཇལ་ནས་གསང་སྔགས་ཐབས་ལམ་གྱི་སྐོར་གསན་ཞིང་ལོ་གསུམ་གྱི་བར་སྒོམ་སྒྲུབ་ལ་འབད་པས་སྙིང་པོའི་དོན་ལ་སྒྲོ་འདོགས་ཆོད། རྗེ་རས་ཆུང་པ་ལས་རྗེ་བཙུན་མི་ལ་ནས་བརྒྱུད་པའི་ཆོས་དྲུག་སོགས་ནཱ་རོ་མི་ཏྲིའི་གདམས་ངག་ཇི་སྙེད་པ་གསན། གཞན་ཡང་བླ་མ་མང་པོ་ལས་གདམས་པ་རྒྱ་ཆེན་མནོས་ཤིང་། དབེན་གནས་མང་པོར་སྒྲུབ་པ་མཛད་པས་གྲུབ་པའི་གོ་འཕང་མཐོན་པོར་གཤེགས། ཕྱིས་ཁམས་སུ་ཀརྨ་དགོན་བཏབ་པས་ཀརྨ་པ་ཞེས་ཐོགས་ཤིང་། སྤྱི་ལོ་1189ལོར་སྟོད་ལུང་མཚུར་ཕུའི་དགོན་གནས་དངོས་སུ་བཏབ། དགུང་གྲངས་བརྒྱད་ཅུ་གྱ་བཞིར་ཕེབས་པ་སྤྱི་ལོ་1193ལོར་མཚུར་ཕུའི་གདན་ས་དེ་རང་དུ་དགོངས་པ་རྫོགས། སློབ་མ་སངས་རྒྱས་རས་ཆེན་དང་། དེའི་སློབ་མ་སྤོམ་བྲག་པ་སོགས་རིམ་པར་བྱུང༌། རྗེ་དུས་གསུམ་མཁྱེན་པས་དབུ་ཞྭ་ནག་པོ་གསོལ་བས་ཞྭ་ནག་ཅན་དུ་གྲགས་ཟེར་ཡང་། ཀརྨ་པཀྵི་ལ་ཧོར་རྒྱལ་པོས་ལས་ཞྭ་ནག་པོ་ཞིག་ཕུལ་བས་དེ་ཕྱིན་གྱི་སྐྱེ་བརྒྱུད་རྣམས་ལ་ཞྭ་ནག་ཅན་དུ་གྲགས་པར་ངེས། འོན་ཏེ་ཀརྨ་ཀམ་ཚང་གི་བརྒྱུད་འཛིན་པ་ཚོས་ཞྭ་ནག་འདི་རྗེ་དུས་གསུམ་མཁྱེན་པ་ལ་མཁའ་འགྲོ་མ་བྱེ་བ་འབུམ་གྱི་དབུ་སྐྲ་ལས་བྱས་ནས་ཕུལ་བ་ཡིན་ཟེར་གྱི་ཡོད། དེ་བཞིན་དུ་རྟོགས་ལྡན་གྲགས་སེང་ལ་ལས་ཞྭ་དམར་པོ་བྱུང་བས་དེའི་བརྒྱུད་པ་ལ་ཞྭ་དམར་བ་ཟེར་བར་མངོན།
སྤོམ་བྲག་པའི་སློབ་མ་ཀརྨ་པཀྴི་སྟེ། ལ་ལས་དུས་གསུམ་མཁྱེན་པའི་སྐུ་སྐྱེ་ཡིན་ཟེར་ཡང་ས་ར་ཧའི་རྣམ་འཕྲུལ་དུ་གྲགས་པ་ལས་རྗེ་དུས་གསུམ་མཁྱེན་པའི་སྐུ་སྐྱེ་ཡིན་པ་ལོ་རྒྱུས་ཁུངས་མ་རྣམས་སུ་མི་སྣང་ཡང་དེང་ཡོངས་གྲགས་སུ་ཀརྨ་པའི་རབས་གཉིས་པར་འདྲེན། པཀྴི་ཞེས་པ་སོག་སྐད་དུ་སློབ་དཔོན་ལ་གོ ཁོང་ནི་རབ་བྱུང་གསུམ་པའི་ཤིང་བྱི་སྤྱི་ལོ་1204ལོར་མདོ་ཁམས་དམ་པ་ཆོས་ཕྱུག་གི་ཡུལ་དུ་ཡབ་རྒྱ་དབང་ཚུར་ཚ་དང་། ཡུམ་སེང་བཟའ་ཨ་སྐྱིད་ཀྱི་སྲས་སུ་སྐུ་འཁྲུངས། དགུང་ལོ་ལྔ་ནས་བཅུའི་བར་འབྲི་ཀློག་སྦྱངས། དགུང་ལོ་བཅུ་གཅིག་པར་རབ་ཏུ་བྱུང་བའི་མཚན་ཆོས་ཀྱི་བླ་མར་གསོལ། ཀཿཐོག་བྱམས་པ་འབུམ་ལས་དགེ་སློང་གི་སྡོམ་པ་བཞེས། སྐུ་འདའ་ཁར་གྲུབ་ཐོབ་ཨོ་རྒྱན་པ་ལས་གདན་ས་གཏད་ཅིང་། ཉི་མ་ལ་སྟོད་ཕྱོགས་ནས་ཞྭ་ནག་པོའི་བརྒྱུད་པ་འཛིན་པ་ཞིག་འོང་། དེའི་བར་དུ་རྒྱལ་ཚབ་མཛོད་ཅེས་ཞྭ་ནག་གསེར་མདངས་ཅན་ཨོ་རྒྱན་པའི་དབུ་ལ་བསྐོན། དེ་ནས་མི་རིང་བར་རབ་བྱུང་ལྔ་པའི་ཆུ་ལུག་སྤྱི་ལོ་1283ལོར་སྐུ་མྱ་ངན་ལས་འདས་ཏེ་སྐུའི་སྐྱེ་བ་ལ་སྟོད་མི་ལའི་འཁྲུངས་ཡུལ་དུ་བྱོན་པ་ནི་སྤྲུལ་སྐུ་རང་བྱུང་རྡོ་རྗེའོ། རྗེ་འདིས་ཟབ་མོ་ནང་དོན་དང་། རྩིས་ཀུན་ལས་བཏུས་པ། ཆོས་དབྱིངས་བསྟོད་པའི་འགྲེལ་པ། རྒྱུད་བླ་མའི་ས་བཅད། དོན་འགྲེལ་སོགས་བསྟན་བཅོས་མང་དུ་བརྩམས། ཀརྨ་སྙིང་ཐིག་ཅེས་པའི་དགོངས་གཏེར་ཡང་འབྱུང་། ནང་བརྟག་རྒྱུད་གསུམ་རྩལ་དུ་བཏོན་ནས་འཆད་པའི་སྲོལ་གཏོད། འཇམ་དབྱངས་གོང་མ་ཆེན་པོའི་དབུའི་མཆོད་གནས་སུ་ཕེབས་པ་སོགས་མཛད་རྗེས་ཤིན་ཏུ་ཆེ། འདི་ནི་བོད་ཡུལ་དུ་བླ་མ་གོང་མའི་སྐུ་སྐྱེ་ངོས་འཛིན་བྱེད་པའི་ཐོག་མ་ཡིན། དེ་ནས་སྤྲུལ་སྐུ་རིམ་པར་བྱོན་པ་སྟེ། བཞི་པ་རོལ་པའི་རྡོ་རྗེ། ལྔ་པ་དེ་བཞིན་གཤེགས་པ། དྲུག་པ་མཐོང་བ་དོན་ལྡན། བདུན་པ་ཆོས་གྲགས་རྒྱ་མཚོ། བརྒྱད་པ་མི་བསྐྱོད་རྡོ་རྗེ། དགུ་པ་དབང་ཕྱུག་རྡོ་རྗེ། བཅུ་པ་ཆོས་དབྱིངས་རྡོ་རྗེ། བཅུ་གཅིག་པ་ཡེ་ཤེས་རྡོ་རྗེ། བཅུ་གཉིས་པ་བྱང་ཆུབ་རྡོ་རྗེ། བཅུ་གསུམ་པ་བདུད་འདུལ་རྡོ་རྗེ། བཅུ་བཞི་པ་ཐེག་མཆོག་རྡོ་རྗེ། བཅོ་ལྔ་པ་མཁའ་ཁྱབ་རྡོ་རྗེ། བཅུ་དྲུག་པ་རང་བྱུང་རིག་པའི་རྡོ་རྗེ། བཅུ་བདུན་པ་ཨོ་རྒྱན་འགྲོ་འདུལ་འཕྲིན་ལས་རྡོ་རྗེ་རྣམས་རིམ་པར་ཙམ།
ཞྭ་དམར་གྱི་བརྒྱུད་པ་ནི། རྗེ་བཙུན་ཏིལླི་པའི་སློབ་མ་ཁོལ་པོ་དགའ་ཞེས་པ་ཚེ་འཕོས་ནས། ནཱ་རོ་པའི་སློབ་མ་ཛ་ལནྡྷ་རར་སྐྱེས་པ་བྲམ་ཟེ་ཀུན་རིག་བྱ་བ་ཞིག་བོད་དུ་འོངས་ནས་རྗེ་བཙུན་མི་ལ་དང་མཇལ། བལ་བོད་མཚམས་སུ་དཀའ་ཐུབ་ལ་གནས་པ་སླར་ཚེ་འཕོས་ཏེ། ཚུལ་ཁྲིམས་དཔལ་ཞེས་གྲགས། མཉམ་མེད་དྭགས་པོ་ལྷ་རྗེ་དང་རས་ཆུང་བའི་སློབ་མར་གྱུར། དེའི་སྐུ་སྐྱེ་དགེ་སློང་ནམ་མཁའ་རྗེ་དུས་གསུམ་མཁྱེན་པའི་སློབ་མ་ཡིན། དེའི་སྐུ་སྐྱེ་བཀྲ་ཤིས་གྲགས་ཀརྨ་པཀྵིའི་སློབ་མར་གྱུར། དེའི་སྐུ་སྐྱེ་རྟོགས་ལྡན་གྲགས་པ་སེང་གེའམ་འབྲང་དགུ་རས་པ་སྟེ། རྗེ་རང་བྱུང་རྡོ་རྗེའི་ཐུགས་སྲས་ཀྱི་གཙོ་བོར་གྱུར། མདོ་སྔགས་ཀྱི་གཞུང་དང་གདམས་པ་རྒྱ་ཆེན་གསན་ཞིང་། ལུང་རྟོགས་ཀྱི་ཡོན་ཏན་མཐའ་ཡས་པ་མངའ། ཁོང་ལ་སློབ་མ་གཡག་སྡེ་པཎ་ཆེན་སོགས་མང་དུ་བྱུང་། ཞྭ་དམར་པ་ཞེས་པ་ནི། རྟོགས་ལྡན་གྲགས་པ་སེང་གེ་ལ་ཀརྨ་པ་རང་བྱུང་རྡོ་རྗེས་རང་ཉིད་ཀྱི་དབུ་ཞྭ་དང་དབྱིབས་འདྲ་ལ་མདོག་དམར་པོ་ཞིག་བསྩལ་བས་དེ་ལྟར་ཐོགས། ཀརྨ་པཀྵིའི་ལུང་དུ་ཞྭ་དམར་སྐུ་ཕྲེང་ཉི་ཤུ་རྩ་གཅིག་བར་བྱོན་པ་གསལ། ད་བར་ཁྱོན་སྐུ་ཕྲེང་བཅུ་གཉིས་བྱོན་པ་ལས། སྐུ་ཕྲེང་བཅུ་གཅིག་པར་ཞྭ་དམར་གྱི་མཚན་གནས་ཐོབ་མེད། རྟོགས་ལྡན་གྲགས་པ་སེང་གེ་ནས་རིམ་པར། སྐུ་ཕྲེང་གཉིས་པ་མཁའ་སྤྱོད་དབང་པོ། གསུམ་པ་ཆོས་དཔལ་ཡེ་ཤེས། བཞི་པ་ཆོས་གྲགས་ཡེ་ཤེས། ལྔ་པ་དཀོན་མཆོག་ཡན་ལག །དྲུག་པ་ཆོས་ཀྱི་དབང་ཕྱུག །བདུན་པ་དཔལ་ལྡན་ཡེ་ཤེས་སྙིང་པོ། བརྒྱད་པ་ཆོས་ཀྱི་དོན་གྲུབ། དགུ་པ་དཀོན་མཆོག་དགེ་བའི་འབྱུང་གནས། བཅུ་པ་མི་ཕམ་ཆོས་གྲུབ་རྒྱ་མཚོ། བཅུ་གཅིག་པ་འཇམ་དབྱངས་རིན་པོ་ཆེ། བཅུ་གཉིས་པ་མི་ཕམ་ཆོས་ཀྱི་བློ་གྲོས་བཅས་ཁྱོན་སྐུ་ཕྲེང་བཅུ་གཉིས་བྱུང་བ་རྣམས་རྒྱལ་དབང་ཀརྨ་པའི་ཕྲིན་ལས་ཀྱི་བྱེད་པོ་སངས་རྒྱས་འོད་དཔག་མེད་པའི་རྣམ་སྤྲུལ་དུ་ངོས་འཛིན་གནང་སྲོལ་ཡོད།
དེ་དག་གི་སྟེང་དུ། ༡ ཕྱག་ན་རྡོ་རྗེའི་རྣམ་སྤྲུལ་རྒྱལ་ཚབ་གོ་ཤྲི་དཔལ་འབྱོར་དོན་གྲུབ་ཀྱིས་སྤྱི་ལོ་1453ལོར་ཀརྨ་སྐུ་ཕྲེང་དྲུག་པ་མཐོང་བ་དོན་ལྡན་སྐུ་གཤེགས་རྗེས་ཀརྨ་པའི་སྒར་ཆེན་འཛམ་གླིང་རྒྱན་གྱི་དབུས་སུ་ཀརྨ་པའི་རྒྱལ་ཚབ་ཏུ་བཞུགས་ནས་སྒར་གྱི་འཛིན་སྐྱོང་གནང་བས་མཚུར་ཕུ་རྒྱལ་ཚབ་ཅེས་པའི་མཚན་ཐོགས། གོ་ཤྲི་དཔལ་འབྱོར་དོན་གྲུབ་ནས་ད་ལྟའི་རྒྱལ་ཚབ་གྲགས་པ་བསྟན་པ་ཡར་འཕེལ་བར་གོ་ཤྲཱི་སྐུ་ཕྲེང་བཅུ་གཉིས་བྱོན་པ་སྟེ། སྐུ་ཕྲེང་དང་པོ་གོ་ཤྲཱི་དཔལ་འབྱོར་དོན་གྲུབ། གཉིས་པ་བཀྲ་ཤིས་རྣམ་རྒྱལ། གསུམ་པ་གྲགས་པ་དཔལ་འབྱོར། བཞི་པ་གྲགས་པ་དོན་གྲུབ། ལྔ་པ་གྲགས་པ་མཆོག་དབྱངས། དྲུག་པ་ནོར་བུ་བཟང་པོ། བདུན་པ་དཀོན་མཆོག་འོད་ཟེར། བརྒྱད་པ་ཆོས་དཔལ་བཟང་པོ། དགུ་པ་གྲགས་པ་ཡེ་ཤེས། བཅུ་པ་འཇམ་དཔལ་བཟང་པོ། བཅུ་གཅིག་པ་གྲགས་པ་རྒྱ་མཚོ། བཅུ་གཉིས་པ་གྲགས་པ་བསྟན་པ་ཡར་འཕེལ་བཅས་དང་།
༢ རྒྱལ་བ་བྱམས་པའི་རྣམ་སྤྲུལ་སི་ཏུ་རིན་པོ་ཆེ་ནི། ཀརྨ་དེ་བཞིན་གཤེགས་པ་སྤྱི་ལོ་1407ལོར་རྒྱ་ནག་ཏཱ་མིང་གཡུང་ལོ་རྒྱལ་པོས་གདན་ཞུས་ལྟར་པེ་ཅིན་དུ་ཕེབས་སྐབས་སྒར་ཆེན་ནས་སྐུ་འཁོར་ཧྲག་བསྡུས་ཤིག་ཕེབས་པའི་གྲལ་དུ་སི་ཏུ་ཆོས་ཀྱི་རྒྱལ་མཚན་ཡང་ཕེབས་པར་རྒྱ་ནག་པས་ཀྭན་ཏིང་ཏཱ་སི་ཏུ་ཞེས་པའི་མཚན་གསོལ། སི་ཏུ་ཆོས་ཀྱི་རྒྱལ་མཚན་ནས་ད་བར་ཆོས་ཀྱི་སྤྱན་ཅན་དྲུག་དང་པདྨའི་ལྗགས་ལྡན་དྲུག་བཅས་ཁྱོན་སྐུ་ཕྲེང་བཅུ་གཉིས་བྱོན་པ་སྟེ། སྐུ་ཕྲེང་དང་པོ་ཆོས་ཀྱི་རྒྱལ་མཚན། གཉིས་པ་བཀྲ་ཤིས་རྣམ་རྒྱལ། གསུམ་པ་བཀྲ་ཤིས་དཔལ་འབྱོར། བཞི་པ་མི་འཁྲུགས་ཆོས་ཀྱི་གོ་ཆ། ལྔ་པ་དགེ་ལེགས་དཔལ་བཟང་། དྲུག་པ་མི་ཕམ་འཕྲིན་ལས་རབ་བརྟན། བདུན་པ་ལེགས་བཤད་སྨྲ་བའི་ཉི་མ། བརྒྱད་པ་ཆོས་ཀྱི་འབྱུང་གནས། དགུ་པ་པདྨ་ཉིན་བྱེད། བཅུ་པ་པདྨ་ཀུན་བཟང་། བཅུ་གཅིག་པ་པདྨ་དབང་མཆོག་རྒྱལ་པོ། བཅུ་གཉིས་པ་པདྨ་དོན་ཡོད་བཅས་པ།
༣ རྒྱལ་བ་ཀརྨ་པའི་འཕྲིན་ལས་འཛིན་པ་གནས་ནང་དཔའ་བོ་སྐུ་ཕྲེང་རིམ་བྱོན་ཏེ། སྐུ་ཕྲེང་དང་པོ་ཆོས་དབང་ལྷུན་གྲུབ། གཉིས་པ་གཙུག་ལག་ཕྲེང་བ། གསུམ་པ་གཙུག་ལག་རྒྱ་མཚོ། བཞི་པ་གཙུག་ལག་ཀུན་ཏུ་བཟང་པོ། ལྔ་པ་ཕྲིན་ལས་རྒྱ་མཚོ། དྲུག་པ་གཙུག་ལག་དོན་གྲུབ། བདུན་པ་གཙུག་ལག་དགའ་བའི་དབང་པོ། བརྒྱད་པ་གཙུག་ལག་ཆོས་ཀྱི་རྒྱལ་པོ། དགུ་པ་གཙུག་ལག་ཉིན་བྱེད་དབང་པོ། བཅུ་པ་གཙུག་ལག་སྨྲ་བའི་དབང་ཕྱུག །བཅུ་གཅིག་པ་གཙུག་ལག་སྨྲ་བའི་སྒྲ་དབྱངས་བཅས་ད་བར་སྐུ་ཕྲེང་བཅུ་གཅིག་བྱོན་པ་རྣམས།
༤ ཀརྨ་པའི་ཞབས་དྲུང་ཏྲེ་ཧོ་རིན་པོ་ཆེ་ན་རིམ་ལ་ཏྲེ་ཧོ་ཞེས་ཐོགས་དོན་ནི། མཚུར་ཕུ་དགོན་དུ་ཁམས་ཏྲེ་ཧོའི་ལས་ཚན་ཞིག་ཡོད་པ་དེར་རྒྱུན་བཞུགས་མཛད་པས་སམ། སྐུ་ཕྲེང་དང་པོ་ཁམས་ཟླ་རྒྱུད་དུ་འཁྲུངས་པ་ཏྲེ་ཧོའི་ཁོངས་སུ་གཏོགས་པས་སོ། ཏྲེ་ཧོ་སྐུ་ཕྲེང་དང་པོ་མཁས་གྲུབ་ཆོས་ཀྱི་རྒྱ་མཚོ་ནས་རིམ་པར། སྐུ་ཕྲེང་གཉིས་པ་དཔག་བསམ་དབང་པོ། གསུམ་པ་ཀརྨ་བསྟན་འཛིན་དར་རྒྱས། བཞི་པ་བྱང་ཆུབ་ཆོས་ཀྱི་སྙིང་པོ། ལྔ་པ་ཆོས་ཀྱི་དབང་པོ། དྲུག་པ་ཆོས་ཀྱི་ནོར་བུ། བདུན་པ་ཆོས་ཀྱི་སྣང་བ། བརྒྱད་པ་ཕྲིན་ལས་དབང་པོ། དགུ་པ་ཀརྨ་ངེས་དོན་ཆོས་ཀྱི་སེང་གེ་བཅུ་པ་བསྟན་འཛིན་འཇིགས་མེད་ཆོས་དབྱིངས་བཅས་སྐུ་ཕྲེང་བཅུ་བྱོན། དེ་ལྟར་ཡབ་སྲས་རྣམ་པ་ལྔ་སྟེ་ཀརྨ་ཞྭ་དམར་ནག་གཉིས་ཀྱི་སྐུ་ཕྲེང་རིམ་བྱོན། མཚུར་ཕུ་རྒྱལ་ཚབ་སྐུ་ཕྲེང་རིམ་བྱོན། སི་ཏུ་སྐུ་ཕྲེང་རིམ་བྱོན། ཀོང་སྤྲུལ་སྐུ་ཕྲེང་རིམ་བྱོན་བཅས་ནི་ཨོ་རྒྱན་ཆེན་པོའི་གཏེར་ལུང་དུ་མ་ནས་ལུང་གིས་ཟིན་པ་ཙམ་དུ་མ་ཟད། མཐོང་ཐོས་དྲན་རེག་ཐམས་ཅད་ཕྱིར་མི་ལྡོག་པའི་ས་ལ་སྦྱོར་བའི་བསྟོད་བསྔགས་ཆེ་བརྗོད་མང་དུ་མཛད།
དེ་དག་ལས་ཀརྨ་དེ་བཞིན་གཤེགས་པའི་དངོས་སློབ་མཁའ་འགྲོ་སྙིང་ཏིག་ལ་གྲུབ་པ་ཐོབ་པ་རྨ་སེ་བློ་གྲོས་རིན་ཆེན་ལ་བདེ་མཆོག་མཁའ་འགྲོ་སྙན་བརྒྱུད་ནོར་བུ་སྐོར་གསུམ་གྱི་བཀའ་བབས། ཁོང་ཉིད་སངས་རྒྱས་ཞིག་ཆེན་གྱི་ཡེ་ཤེས་ཀྱི་སྐུས་རྗེས་སུ་བཟུང་ནས་ཚོགས་གར་ཆེན་པོའི་སྲོལ་གཏོད། ཟུར་མང་གི་གདན་ས་བཏབ་ནས་ཟུར་མང་བཀའ་བརྒྱུད་དང་། རྗེ་དགུ་པའི་ཐུགས་སྲས་ཞྭ་དམར་དྲུག་པ་གར་དབང་ཆོས་ཀྱི་དབང་ཕྱུག་གི་སློབ་མ་ཀརྨ་ཆགས་མེད་དེ་ཉིད་གསར་རྙིང་དཀྱིལ་འཁོར་རབ་འབྱམས་ཀྱི་བསྙེན་སྒྲུབ་རྣམ་ཐར་བཞི་མཐར་ཕྱིན། གཏེར་ཆེན་མང་པོའི་ཆོས་བདག་ཏུ་མངའ་གསོལ་བའི་མཛད་པ་མང་དུ་མཆིས། དམ་ཆོས་ཀྱི་འཕྲིན་ལས་གྲུབ་མཐའ་ཡོངས་ལ་ཁྱབ་པ་དེའི་ཆོས་བརྒྱུད་ལ་གདན་སའི་མཚན་ལས་གནས་མདོ་བཀའ་བརྒྱུད་དུ་གྲགས་ཏེ། དེ་གཉིས་ནི་ཀརྨ་ཀཾ་ཚང་གི་ཡན་ལག་བཀའ་རྙིང་ཆུ་བོ་གཅིག་འདྲེས་ཀྱི་གྲུབ་མཐའ་ད་ལྟའང་རང་རྐང་ཚུགས་པར་བཞུགས་ཤིང་། གཞན་ཡང་ཡབ་སྲས་དེ་དག་གི་སློབ་མ་མཚུར་ཕུ་འཇམ་དབྱངས་ཆེན་པོ། འགོས་ལོ་གཞོན་ནུ་དཔལ། འཇམ་མགོན་བློ་གྲོས་མཐའ་ཡས། བེ་རུ་མཁྱེན་བརྩེ་རིན་པོ་ཆེ་སོགས་བཤད་པ་གཙོ་བོར་མཛད་པའི་མཁས་གྲུབ་རྣམས་དང་། གཉན་རས་དགེ་འདུན་འབུམ། ཡང་རིའི་རྟོགས་ལྡན་བརྒྱད་ཅུ། ཙཱ་རི་རྟོགས་ལྡན་སོགས་མཁས་དང་གྲུབ་པའི་ཚོགས་དེང་གི་བར་རྒྱུན་མ་ཆད་པས་བསྟན་འགྲོའི་དོན་མཛད་པའི་གདན་ས་ནི་སྟོད་ལུང་མཚུར་ཕུ། ཀརྨ་རི་གླིང་། ཀཾ་པོ་གནས་ནང་སྟེ་སྐུ་གསུང་ཐུགས་ཀྱི་འཁོར་ལོ་གསུམ། ཤར་ཕྱོགས་སྤུངས་རི་དང་། ཏྲེ་ཀཾ་ཁྱིམ་ཡོན་ཏན་གྱི་གནས། འཕར་ར་དང་གྲྭ་མ་གྲུ་བཞི་འཕྲིན་ལས་ཀྱི་གནས་ཏེ། དེ་ལས་གྱེས་པའི་དགོན་གནས་དང་གཙུག་ལག་ས་ཆ་མང་པོར་ཁྱབ་ཅིང་། བཤད་སྒྲུབ་ཀྱི་འཕྲིན་ལས་དར་ཞིང་རྒྱས་སོ།
།འོན་ཀྱང་ཀརྨ་མི་བསྐྱོད་རྡོ་རྗེ་དང་། དཔའ་བོ་གཙུག་ལག་ཕྲེང་བ། འབྲུག་པ་པདྨ་དཀར་པོ་སོགས་ཀྱི་དུས་ལ་རིག་གཞུང་འཆད་ཉན་རྒྱ་ཆེར་མཛད་པར་བརྟེན། ཕྱིས་ཐ་སྙད་ཀྱི་སྤྲོས་པ་ལ་དབུ་འཁོར་ནས་སྔོན་གྱི་སྒྲུབ་ཚིགས་བཟང་པོ་དེ་ཅུང་ཟད་ཉམས་པ་ཐུའུ་བཀྭན་རིན་པོ་ཆེས་གསུངས་པ་དང་། ལྷག་དོན་བཀའ་དགེའི་ཆོས་བརྒྱུད་གཉིས་ཀྱི་དབར་འཇིག་རྟེན་སྲིད་ལུགས་ཀྱི་གོ་བབས་ལ་འཁྲུག་པའི་ལོ་རྒྱུས་ཀྱི་སྐྱོ་གར་དང་། ཞྭ་དམར་ཆོས་གྲུབ་རྒྱ་མཚོས་གོར་དམག་དང་ངན་འབྲེལ་གྱིས་བཀྲ་ཤིས་ལྷུན་པོ་དགོན་གྱི་ནང་རྟེན་མང་དག་ཅིག་བརྐུ་འཁྱེར་བྱས་པས་ཞྭ་དམར་བའི་ཕྱིས་ཀྱི་ཡང་སྲིད་ངོས་འཛིན་བྱེད་མི་ཆོག་པ་དང་། ཡངས་ཅན་དགོན་པ་དགེ་ལུགས་སུ་བསྒྱུར་བ་སོགས་ཀྱིས་རྐྱེན་པས་ཆོས་བརྒྱུད་འདིར་ཡང་གྱོང་གུན་ཚབས་ཆེན་ཕོག །ད་ལྟའི་ཆར་ཀུན་མཁྱེན་ཆོས་ཀྱི་འབྱུང་གནས་སྐུ་ཕྲེང་རིམ་བྱོན་རྣམས་དང་། འཇམ་མགོན་བློ་གྲོས་མཐའ་ཡས་སྐུ་ཕྲེང་རིམ་བྱོན་སོགས་ཀྱི་བཀའ་དྲིན་ལ་བརྟེན་ནས་བསྟན་པའི་མེ་རོ་མདོ་ཁམས་སྨད་ནས་གསོས་ཤིང་། ཤར་དཔལ་སྤུངས་ཐུབ་བསྟན་ཆོས་འཁོར་གླིང་གསར་བསྐྲུན་གནང་སྟེ་བཤད་སྒྲུབ་གཉིས་ཀའི་རྒྱུན་སླར་གསོ་འབྱུང་བཞིན་ཡོད་དོ།
II.1.2.2 Phagdru Kagyü
།གཉིས། ཕག་གྲུ་བཀའ་བརྒྱུད།
ཕག་གྲུ་བཀའ་བརྒྱུད་ནི། མཉམ་མེད་དྭགས་པོ་ལྷ་རྗེའི་སྲས་ཀྱི་ཐུ་བོ་བཀའ་བརྒྱུད་ཀྱི་བདག་པོར་དབང་བསྐུར་བ་རྒྱལ་བ་ཕག་མོ་གྲུ་པ་ལས་བརྒྱུད་པ་སྟེ། དེ་ནི་མདོ་ཁམས་སྡེ་དགེའི་སའི་ཆ་རྨེ་ཤོད་རྟག་ངོས་སབ་ཁང་སྟེ་དེང་སྡེ་དགེ་རྫོང་དཔེ་ཝར་ཡུལ་ཤོག་སྦས་མོ་གྲོང་ཚོའི་ཁོངས་སུ་ཡབ་ཝ་ནེ་ཨ་ཐར་དང་། ཡུམ་བཙུན་ནེ་གཉིས་ཀྱི་སྲས་སུ་རབ་བྱུང་གཉིས་པའི་ལྕགས་སྟག་སྤྱི་ལོ་1110ལོར་སྐུ་འཁྲུངས། དགུང་ལོ་དགུ་པར་བྱ་ཁྱི་ལྷ་ཁང་གི་མཁན་པོ་ལྷིང་ངེ་བ་ཚུལ་ཁྲིམས་འབར་དང་། སློབ་དཔོན་འོད་ཟེར་རྒྱལ་མཚན་ལས་རབ་ཏུ་བྱུང་། མཚན་རྡོ་རྗེ་རྒྱལ་པོར་གསོལ། ཡི་གེ་དང་ལྷ་བྲིས་མ་བསླབས་པར་མཁྱེན། མདོ་ཁམས་སུ་ལོ་ཉི་ཤུ་ལྷག་ཙམ་བཞུགས་རིང་སློབ་དཔོན་བཅུ་དྲུག་ཙམ་བསྟེན་ནས་མདོ་སྔགས་ཀྱི་ཆོས་ལ་གསན་བསམ་ལེགས་པར་མཛད། སྤྱོད་འཇུག་ལ་བཤད་པ་འགའ་རེ་ཡང་མཛད། དགུང་ལོ་ཉེར་གཉིས་པར་དབུས་སུ་བྱོན། སྟོད་ལུང་དུ་དགེ་བཤེས་རྒྱ་དམར་བ་དང་། ཕུ་པ་ཆོས་ཀྱི་སེང་གེ་གཉིས་ལ་ཆོས་གསན། དགུང་ལོ་ཉི་ཤུ་རྩ་ལྔ་པ་ལ་ཟུལ་ཕུར་བྱ་འདུལ་འཛིན་པས་མཁན་པོ། རྒྱ་དམར་བས་ལས་སློབ། ཨར་གྱིས་གསང་སྟོན་མཛད་ནས་བསྙེན་པར་རྫོགས། མཁན་སློབ་ལས་འདུལ་བ། གསང་སྟོན་ལས་ཕར་ཕྱིན། མྱང་བྲན་ལ་སྤྱོད་འཇུག་སོགས་གསན་པས་མཁས་པའི་རྩེ་མོར་སོན། གཞན་ཡང་དམར་ཆོས་རྒྱལ་དང་། དཔལ་ཆེན་རྒ་ལོ། ས་ཆེན་ཀུན་དགའ་སྙིང་པོ། འཛིམས་ལོ་ཙཱ་བ། བྱང་སེམས་ཟླ་བ་རྒྱལ་མཚན་སོགས་བསྟེན་ནས་མདོ་སྔགས་ཀྱི་གདམས་པ་མང་དུ་གསན་ཞིང་མཁས་པར་གྱུར་པས་དགེ་བཤེས་ཁམས་པ་ཞེས་སྙན་གྲགས་ཇེ་ཆེར་རྒྱས། དགུང་ལོ་ཞེ་གཅིག་པ་སྤྱི་ལོ་1151ལོར་བླ་མ་ཞང་དང་མཉམ་དུ་སྒམ་པོར་བྱོན་ནས་མཉམ་མེད་དྭགས་པོའི་དྲུང་དུ་གདམས་ངག་གསན་པས་ཕྱག་རྒྱ་ཆེན་པོའི་རྟོགས་པ་མཆོག་ཏུ་གྱུར། ད་རྗེས་དཔལ་ལྡན་ཕག་མོ་གྲུ་ཡི་ནགས་ཁྲོད་དུ། །སྐལ་ལྡན་གདུལ་བྱ་མང་པོ་སྨིན་མཛད་ཅིང་ཞེས་གསུངས་པ་ལྟར་དགུང་ལོ་ཞེ་དགུར་ཕེབས་པ་རབ་བྱུང་གསུམ་པའི་ས་སྟག་སྤྱི་ལོ་1158ལོར་ཕག་གྲུའི་གདན་ས་མཐིལ་བཏབ་སྟེ་མཉམ་མེད་དྭགས་པོ་ལྷ་རྗེའི་གདམས་པ་གཙོ་བོར་གྱུར་བའི་མདོ་སྔགས་ཀྱི་འཆད་ཉན་རྒྱ་ཆེར་སྤེལ་བའི་རིང་ལུགས་ཐུན་མོང་མ་ཡིན་པ་དེ་ལ་ཕག་གྲུ་བཀའ་བརྒྱུད་ཅེས་པའི་མཚན་ཐོགས། གདན་ས་དེར་ལོ་བཅུ་གསུམ་བཞུགས་རིང་གྲུབ་པ་ཐོབ་པའི་སློབ་མ་སྐྱེས་མཆོག་དུ་མ་དམ་པའི་ཆོས་ཀྱིས་ཚིམས་པར་མཛད་ནས། གྲྭ་པ་བརྒྱད་བརྒྱ་ལ་གདུགས་ཐོགས་པ་ལྔ་བརྒྱ་ཞེས་སུ་གྲགས་པ་ལྟར་སློབ་མ་གྲངས་ལས་འདས་པ་བྱུང་། ལྗགས་རྩོམ་ལ་གསུང་འབུམ་པོད་བཞི་ཡོད། དགུང་ལོ་རེ་གཅིག་པ་རབ་བྱུང་གསུམ་པའི་ལྕགས་སྟག་སྤྱི་ལོ་1170ལོར་སྐུ་གཤེགས།
སློབ་མ་རྣམས་ལས་ཁྱད་པར་དུ་འཕགས་པའི་བུ་ཆེན་ནི། མོས་གུས་མཐར་ཐུག་སྟག་ལུང་ཐང་པ་བཀྲ་ཤིས་དཔལ། རྟོགས་པའི་མཐར་ཐུག་སྣ་ཕུ་བ་གླིང་རས་པདྨ་རྡོ་རྗེ། ཤེས་རབ་མཐར་ཐུག་སྤར་ཕུ་བ་བློ་གྲོས་སེང་གེ ནུས་པའི་མཐར་ཐུག་མཆན་བུ་རྒྱ་རས་རྣམས་ལ་མཐར་ཐུག་གི་བུ་བཞི་ཟེར། ཟ་ར་བ་སྐལ་ལྡན་ཡེ་ཤེས་སེང་གེ རྟོགས་ལྡན་མི་ཉག་སྒོམ་རིང་། གྲུབ་ཐོབ་ཉག་རེ་སེ་བོ། ཀུན་ལྡན་གཙང་པ་རས་ཆུང་རྣམས་ལ་གདམས་པའི་བུ་བཞི་ཟེར། འབྲི་གུང་འཇིག་རྟེན་མགོན་པོ། བནྡྷ་ཕུག་པ། ཆོས་རྗེ་ལྡུམ། ཆོས་རྗེ་གཏུམ་རྣམས་ལ་རོ་གཅིག་རྟོགས་པ་ཕྱེད་དང་བཞི་ཟེར། གཤེན་དགོན་དཀར་བ། གྱང་ཤན་གྲོང་བ། རྔོག་སེང་གེ་ཁ་པ། རྩི་ལུང་པ་རྣམས་ལ་ཐུགས་ཀྱི་སྲས་བཞི་ཟེར། རིན་པོ་ཆེ་ཤུགས་ཚར་བ། ལྷ་ས་བ་དགེ་འདུན་སྐྱབས། གྲུ་གུ་སྟོན་པ་བློ་གྲོས་སེང་གེ རྒྱན་ཐང་པ་རྣམས་ལ་ཡི་གེ་མའི་བུ་བཞི་ཟེར། བླ་མ་སྨར་པ། ཡེལ་ཕུག་པ། དགྱེར་སྒོམ་པ། དགེ་བའི་བཤེས་གཉེན་སེང་གེ་དཔལ་རྣམས་ལ་ཉེ་བའི་སྲས་བཞི་ཟེར་བ་སོགས་ཀྱི་གྲུབ་པའི་སྐྱེས་བུ་མང་དུ་བྱུང་།
ཕག་གྲུའི་དགོན་གནས་ཀུན་གྱི་གཙོ་བོ་གདན་ས་མཐིལ་དེ་འགྲོ་མགོན་གྱི་རྗེས་སུ་སྐྱུ་ར་རིན་པོ་ཆེས་ཅུང་ཟད་བསྐྱངས། དེ་རྗེས་རླངས་ལྷ་གཟིགས་ཀྱི་གདུང་ལས་འཁྲུངས་པ་སྤྱན་སྔ་གྲགས་པ་འབྱུང་གནས། དེ་ནས་རིམ་བཞིན་རིས་སྔ་ཐོག་བརྡུགས་པ། བཅུ་གཉིས་པ་རིན་ཆེན་རྡོ་རྗེ། རིན་པོ་ཆེ་གྲགས་པ་ཡེ་ཤེས། གཉིས་མཆོད་པ་གྲགས་པ་རིན་ཆེན། ཚེས་བཞི་རྙིང་མ་བ་གྲགས་པ་རྒྱལ་མཚན། བཅུ་གཉིས་གསར་མ་བ་གྲགས་པ་ཤེས་རབ། འདིའི་གཅེན་སི་ཏུ་བྱང་ཆུབ་རྒྱལ་མཚན་གྱིས་དབུས་གཙང་གི་བདག་པོ་བྱས། ཚེས་བཞི་གསར་མ་བ་གྲགས་པ་བྱང་ཆུབ། འདི་ཉིད་ཀྱི་རྟོགས་བརྗོད་རྒྱལ་བ་ཙོང་ཁ་པས་མཛད་པ་གསུང་ཐོར་བུ་ན་ཡོད། དེ་རྗེས་ཆོས་རྗེ་བསོད་ནམས་རྒྱལ་མཚན། སྤྱན་སྔ་དཔལ་ལྡན་བཟང་པོ། ཉེར་གཉིས་རིན་པོ་ཆེ་སོགས་རིམ་པར་བྱོན། དེ་ལྟར་འབྲི་གུང་སྒོམ་པ་ཤཱཀ་རིན་གྱིས་གདན་ས་དཔལ་གྱི་ཕག་གྲུ་དེ། །ཆུ་མིག་བརྒྱ་རྩའི་མགོ་བོ་ཡིན་ཞེས་གསུངས་པ་ལྟར་ཕག་གྲུའི་གདན་ས་འདི་ལས་བཀའ་བརྒྱུད་པའི་སྡེ་དགོན་དང་། བཀའ་བརྒྱུད་ཆེ་བཞི་ཆུང་བརྒྱད་ལས་ཆུང་བ་བརྒྱད་རྣམས་མཆེད་པ་འོག་ཏུ་འཆད་དོ།
II.1.2.3 Tshalpa Kagyü
།གསུམ། ཚལ་པ་བཀའ་བརྒྱུད།
ཞང་ཚལ་པ་ནི། ཞང་འགྲོ་བའི་མགོན་པོ་གཡུ་བྲག་པ་ལས་བརྒྱུད་པ་སྟེ། བླ་མ་ཞང་ནི་སྐྱི་ཤོད་ཀྱི་ངམ་ཤོད་ཚ་གྲུར་ཞང་གི་རིགས་ལས་བྱུང་བའི་ཡབ་སྔགས་འཆང་རྡོ་རྗེ་སེམས་དཔའ་དང་། ཡུམ་མང་སྐྱིད་གཉིས་ཀྱི་སྲས་སུ་བོད་རབ་བྱུང་གཉིས་པའི་ཆུ་སྟག་སྤྱི་ལོ་1122ལོར་སྐུ་བལྟམས། མཚན་དར་མ་ཞེས་གསོལ། དགུང་ལོ་བདུན་ལ་སོན་སྐབས་ཡི་གེ་བསླབས་པས་མྱུར་བར་མཁྱེན། དགུང་ལོ་དགུ་ནས་བཅོ་བརྒྱད་ཀྱི་བར་ལ་མདོ་སྔགས་གཞུང་ལུགས་མང་དུ་གསན་ནས་མཁས་པར་གྱུར། དགུང་ལོ་ཉེར་དྲུག་པ་ལ་བསྙེན་པར་རྫོགས་ཏེ་མཚན་བརྩོན་འགྲུས་གྲགས་པར་བཏགས། དཔལ་ཆེན་རྒ་ལོའི་དྲུང་དུ་ལྷན་ཅིག་སྐྱེས་སྦྱོར་སོགས་ཀྱི་གདམས་ངག་མང་དུ་གསན། དྭགས་པོའི་སློབ་མ་སྒམ་པོ་བ་ཚུལ་ཁྲིམས་སྙིང་པོ་དང་མཇལ་ཏེ་ཕྱག་རྒྱ་ཆེན་པོ་གསན་པས་བཀའ་བརྒྱུད་ཀྱི་བྱིན་རླབས་ཞུགས། ལོ་མང་རིང་རི་ཁྲོད་ངེས་མེད་དུ་སྒོམ་སྒྲུབ་མཛད་པས་སེམས་ཀྱི་ངོ་བོ་རྗེན་པར་གཟིགས། སྐྱི་ཤོད་གུང་ཐང་དུ་གཙུག་ལག་ཁང་ལྷ་ཆེན་དང་བཅས་པ་བཞེངས། སྐུ་ཚེའི་དཀྱིལ་ནས་སྐུ་ཚེའི་སྨད་དུ་མ་སླེབས་བར་ལྷོ་ཁ་དང་འབྲི་གུང༌། འོལ་ཁ་ས་ཁུལ་གྱི་སྒེར་བཙན་དཔོན་རིགས་མང་པོར་དམག་དྲངས་ཏེ་ཁོ་ཚོའི་མི་སྡེ་རྣམས་དབང་འོག་ཏུ་བསྡུས། སྐུ་ཚེའི་སྨད་དུ་ཀརྨ་དུས་གསུམ་མཁྱེན་པས་རེ་འདུན་ཞུས་པ་ལྟར་སྐུ་ཚེ་མ་རྫོགས་བར་དུ་དམག་མཚམས་འཇོག་པ་གནང་། གནས་བདུན་དུ་སྐུའི་འགྱུར་བ་བདུན་བསྟན་ནས་མཚན་བདུན་དུ་ཐོགས། རབ་བྱུང་གསུམ་པའི་མེ་ལུག་སྤྱི་ལོ་1175ལོར་ཚལ་ཡང་དགོན་དང་། དེ་ནས་ལོ་བཅུ་གསུམ་སོང་བ་སྟེ་སྤྱི་ལོ་1187ལོར་གུང་ཐང་གི་དགོན་པ་བཏབ་ནས་ལྷ་ཆེན་དཔལ་འབར་བཞེངས། ཆོས་སྐྱོང་བྱ་རོག་གིས་ཅི་བསྒོ་སྒྲུབ། སྒོམ་པ་ཚུལ་ཁྲིམས་སྙིང་པོའི་བཀའ་བཞིན་ར་ས་འཕྲུལ་སྣང་གཙུག་ལག་ཁང་ཉམས་གསོ་བདག་གཅེས། དུས་ཀྱི་མཆོད་པ་བླ་ན་མེད་པ་སྤྲོས་ཏེ་ཞབས་ཏོག་རྒྱ་ཆེན་པོ་མཛད། ཚལ་དང་། གུང་ཐང་གཉིས་ཀའི་བདག་སྐྱོང་དང་འཆད་ཉན་མི་ཉམས་པར་མཛད། ཁོང་ལ་སྤྱིར་ཆོས་འབྲེལ་ཐོབ་པའི་བླ་མ་བཞི་བཅུ་རྩ་བཞི་དང་། གཙོ་བོའི་བླ་མ་དྲུག་སྟེ། ཙ་མི་སངས་རྒྱས་གྲགས་པ། དཔལ་ཆེན་རྒ་ལོ། གླིང་ཁ་བའི་སློབ་མ་མལ་ཡེར་པ། བྱང་སེམས་འོལ་ཁ་བ། དྭགས་པོ་སྒོམ་པ་ཚུལ་ཁྲིམས་སྙིང་པོ། གྲུབ་ཐོབ་བཻ་རོ་ཙ་ན་སྟེ་དེ་དག་གི་ཡོན་ཏན་བུམ་པ་གང་བྱོའི་ཚུལ་དུ་གསན། རྣམ་པར་དཀར་བའི་འཕྲིན་ལས་མཐའ་ཡས་ཤིང་དགུང་ལོ་དོན་གཉིས་པ་སྟེ་སྤྱི་ལོ་1193ལོར་མྱ་ངན་ལས་འདས། སློབ་མ་མང་དུ་བྱུང་བའི་གཙོ་བོ་ནི་ནམ་མཁའ་འོད་དང་། ཁ་རག་པ་འདུལ་བ་འོད། ལྷ་ཕྱུག་པ་ཉི་ཟླ་འོད། འབྲི་ར་བ་ཤཱཀྱ་འོད་བཅས་ཡིན་ལ། དེ་བཞི་ཀས་དགོན་པ་བཏབ་པས། དེའི་དབོན་པོའི་རིང་ལ་གྲྭ་པ་ཁྲི་ཙམ་ཚོགས་ཟེར། གདན་ས་དངོས་མཉམ་མེད་ཤཱཀྱ་ཡེ་ཤེས་དང་། དེ་ནས་སློབ་དཔོན་བྱང་ཡེས། ལྷ་ཕྱུག་པ་ཉི་ཟླ་འོད། སངས་རྒྱས་འབུམ། སངས་རྒྱས་སྙིང་པོ། སངས་རྒྱས་རས་པ། གསེར་ཁང་སྟེང་པ་སོགས་ཀྱིས་བསྐྱངས། གཞན་ཡང་མར་པ་འོད་སོགས་བསྟན་པ་ལ་བྱ་བ་བྱེད་ནུས་པའི་སྐྱེས་བུ་རིམ་པར་བྱོན་པས་ཚལ་པ་བཀའ་བརྒྱུད་ཅེས་གྲགས་སོ།
།དཔོན་ཆེན་དར་མ་གཞོན་ནུ་དང་། སངས་རྒྱས་དངོས་གྲུབ་སོགས་ཚལ་པའི་དཔོན་ཆེན་རིམ་པས་སྲིད་སྐྱོང་སྐབས་བསྟན་པའང་མ་ཉམས་པར་གནས་ཀྱང་། ཕྱིས་སུ་ཚལ་པའི་སྲིད་ཉམས་ཤིང་གཙུག་ལག་ཁང་རྣམས་ལ་མེ་སྐྱོན་བྱུང་། ད་ལྟ་ནི་སྐུ་གསུང་ཐུགས་ཀྱི་རྟེན་དང་། མགོན་ཁང་སོགས་ཡོད་པ་ཙམ་མོ།
II.1.2.4 Barom Kagyü
།བཞི། འབའ་རོམ་བཀའ་བརྒྱུད།
འབའ་རོམ་བཀའ་བརྒྱུད་ནི། རྗེ་མཉམ་མེད་དྭགས་པོ་ལྷ་རྗེའི་སློབ་མ། གྲུབ་པའི་དབང་ཕྱུག་བརྟུལ་ཞུགས་སྤྱོད་པ་ནག་པོ་བའི་སྐྱེ་བར་གྲགས་པ་འབའ་རོམ་པ་དར་མ་དབང་ཕྱུག་ལས་བྱུང་བ་ཡིན། རྗེ་དར་མ་དབང་ཕྱུག་ནི། ཆོས་བློན་བྲན་ཁ་དཔལ་ཡོན་གྱི་རྒྱུད་དུ་འཕན་ཡུལ་གྱི་ཀ་བ་ཡུལ་སྣར་ཡབ་སྟོན་པ་འབྱུང་གནས་བློ་གྲོས་དང་། ཡུམ་ཇོ་མོ་ལོ་ཆུང་མ་གཉིས་ལ། མེ་མོ་ལུག་སྟེ་སྤྱི་ལོ་1127ལོར་སྐུ་བལྟམས། སྲས་གསུམ་ཡོད་པའི་འབྲིང་པོ་ཡིན། དགུང་ལོ་བརྒྱད་པ་ལ་མཁན་པོ་ཀ་བ་དར་མ་སེང་གེ་དང་། སློབ་དཔོན་དབང་ཕྱུག་གཞོན་ནུ་གཉིས་ལས་རབ་ཏུ་བྱུང་། མཚན་དར་མ་དབང་ཕྱུག་ཏུ་གསོལ། དགེ་བཤེས་བྱ་ཡུལ་བ་དང་། པོ་ཏོ་བའི་བུ་ཆེན་གྲུ་བུ་ལུང་པ་ལ་བཀའ་གདམས་ཀྱི་ཆོས་སྐོར་གསན། དགུང་ལོ་ཉི་ཤུ་རྩ་གཅིག་གི་སྟེང་དུ་རྗེ་དྭགས་པོ་རིན་པོ་ཆེ་དང་མཇལ་ནས་བཀའ་བརྒྱུད་ཀྱི་ཆོས་རྣམས་བུམ་པ་གང་བྱོའི་ཚུལ་དུ་གསན། དཀའ་ཚེགས་མེད་པར་རྟོགས་པ་ཅིག་ཅར་དུ་འཁྲུངས། རྗེ་བཙུན་མི་ལ་སོགས་གཟིགས་སྣང་ཁྱད་པར་ཅན་མང་དུ་གཟིགས། མཉམ་མེད་དྭགས་པོ་རིན་པོ་ཆེས་ཁོང་ལ་ལྷོ་བྲག་མར་པས་བྱིན་གྱིས་བརླབས་པའི་གནས་ཡིན་པས། འབའ་རོམ་དུ་སོང་ལ་སྒྲུབ་པ་གྱིས་གསུངས། གསེར་དང་ཕྱག་དཔེ་སོགས་མང་དུ་སྦྱིན་ནས་དགོན་གནས་འདེབ་པའི་ལུང་བསྟན་གནང་། དྭགས་པོ་རིན་པོ་ཆེ་དགོངས་པ་རྫོགས་རྗེས་སྐུ་འབུམ་མ་ཚར་བར་ཐུགས་ཚིམས་པའི་ཞབས་ཏོག་མཛད། དགུང་ལོ་ཉེར་བརྒྱད་ལ་འབའ་རོམ་དུ་ཕེབས་ནས་ལོ་བདུན་གྱི་བར་སྒྲུབ་པར་ཞུགས། ཡང་ཁམས་སུ་ལན་གསུམ་བྱོན་ནས་ཀོ་མཚོ་དང་ལོ་སྡེའི་དགོན་པ་བཏབ། གདུལ་བྱ་དཔག་མེད་བསྐྱངས། དེ་རྗེས་འབའ་རོམ་དུ་བྱོན་ནས་བྲག་དམར་གྱི་ལོགས་ལ་གཙུག་ལག་ཁང་དང་དགོན་པ་བཏབ། བདེ་སྟོང་ཕྱག་རྒྱ་ཆེན་པོ་ལ་བསྲེ་འཕོ་དང་། གནས་ལུགས་ཕྱག་རྒྱ་ཆེན་པོ་ལ་གསེབ་ལམ་རིག་པ་རྐྱང་འདེད་ཀྱིས་མཚན་གསོལ་བས་སློབ་མ་མང་དུ་འདུས་པ་ལ་ཁྲིད་བཏབ། མཐར་དགུང་ལོ་བདུན་ཅུ་རྩ་གསུམ་ལ་ཕེབས་པ་རབ་བྱུང་གསུམ་པའི་ས་ལུག་སྤྱི་ལོ་1199ལོར་ཞི་བར་གཤེགས། དེ་ལ་བུ་སློབ་ངོ་མཚར་ཅན་མང་དུ་བྱུང་བ་ལས། བུ་ཆེན་བཞི་ནི། རྩེ་འབྲོམ་དབང་ཕྱུག་སེང་གེ་དང་། བྲག་ཀ་ཇོ་བཙུན། བླ་མ་ཆེན་པོ་ལྷོ་པ། སྟོན་པ་རིན་ཆེན་བླ་མ་བཅས་དང་། དེ་དང་ཉེ་བ་བཞི་ནི། བྲག་ཀ་ལྷ་སྟོན། སྒོམ་པ་གཞོན་ནུ་བུ་གྲགས། ཁྱི་མཉེས་ཨཱརྱ་དེ་ཝ། ལྷ་རྗེ་བློ་གྲོས་བཅས། བརྒྱུད་པ་འཛིན་པའི་སྲས་བཞི་ནི། ཏི་ཤྲཱི་རས་པ། བླ་མ་ཉིན་དགོན་པ། བླ་མ་དཔལ་རྒྱལ། སེང་གེ་རྒྱལ་མཚན། དབོན་པོ་ཤེས་རབ་བྱང་ཆུབ་དང་ལྔའོ།
།དེའི་གདན་ས་ལ་གཅུང་ཇོ་བཙུན་ནམ་མཁའ་རྒྱལ་མཚན་བཞུགས་ནས་བླ་མའི་ནང་རྟེན་ལ་གདུང་རྟེན་ཆེན་མོ། སྐུ་ལྡེར་གསུང་བྱོན་མ། མཆོད་ཁང་རྙིང་མ་རྣམས་བཞེངས། གདན་ས་ལོ་བཅུ་མཛད་ནས་ཆུ་ཕོ་འབྲུག་ལ་གཤེགས། དེ་ནས་དབང་ཕྱུག་རྒྱལ་མཚན། ཤེས་རབ་དབང་ཕྱུག །དབང་ཕྱུག་རྒྱལ་པོ། གཞོན་ནུ་ཤེས་རབ་སོགས་དབོན་རྒྱུད་རྣམས་ཀྱིས་གདན་ས་རིམ་པར་མཛད་པ་ཡིན་ལ། བརྒྱུད་འཛིན་དེ་རྣམས་ཀྱི་ནང་ནས་ཁྱད་དུ་འཕགས་པ་ནི་འགྲོ་མགོན་ཏི་ཤྲཱི་རས་པ་ཡིན། འབའ་རོམ་བཀའ་བརྒྱུད་པའི་གདན་ས་ལ་བྱང་འབའ་རོམ་མཚོ་དང་འབའ་རོམ་ལའི་ཉེ་འདབས་སུ་ཡོད་པའི་འབའ་རོམ་སྒོམ་སྡེ་བཅོ་བརྒྱད་རྣམས་ཡོད་ལ། དེ་དག་ཏུ་རང་ལུགས་ཀྱི་ཁྲིད་སྲོལ་ཆོས་བརྒྱུད་མ་ཆད་པར་བཞུགས་ཡོད་པར་གྲགས་སོ།
II.1.2.5 Drikung Kagyü
།ལྔ། འབྲི་གུང་བཀའ་བརྒྱུད།
འབྲི་གུང་པ་ནི། རྗེ་ཕག་མོ་གྲུ་པའི་སློབ་མ། འཕགས་པ་ཀླུ་སྒྲུབ་ཀྱི་རྣམ་སྤྲུལ། མདོ་ཁམས་སྐྱུ་རའི་གདུང་རྒྱུད། རྟེན་འབྲེལ་མཐར་ཕྱིན་སྐྱོབ་པ་འཇིག་རྟེན་མགོན་པོ་ལས་བརྒྱུད་པ་སྟེ། ཁོང་ནི་འཁྲུངས་ཡུལ་འདན་མ། གདུང་རུས་སྐྱུ་ར། རབ་བྱུང་གཉིས་པའི་ཆུ་མོ་ཕག་གི་ལོ་སྟེ་སྤྱི་ལོ་1143ལོར་སྐུ་བལྟམས། གཞོན་ནུའི་དུས་ནས་འགྲོ་མགོན་ཕག་མོ་གྲུ་པའི་དྲུང་དུ་བྱོན། མཚན་རིན་ཆེན་དཔལ་དུ་བཏགས། གདམས་པ་གསན་པས་ཆོས་ཐམས་ཅད་ཀྱི་དེ་ཁོ་ན་ཉིད་མངོན་སུམ་དུ་གཟིགས་པའི་ཡེ་ཤེས་ཆེན་པོ་ཐུགས་ལ་འཁྲུངས། མཛེ་ནད་ཀྱིས་བསྙུངས་པ་ལ་སྙིང་རྗེ་ཆེན་པོ་བསྒོམས་པས་ཀླུ་གདོན་དེ་ཡང་འཁོར་དང་བཅས་པ་སྐུ་ལུས་ལས་ཐོན་ནས་སོང་བ་གཟིགས་ཤིང་། དེ་མ་ཐག་ཏུ་ནད་ཀྱང་དྲག །དགུང་ལོ་ཉི་ཤུ་རྩ་ལྔ་ལ་སུམ་ཐོག་པས་མཁན་པོ་མཛད་དེ་བསྙེན་པར་རྫོགས། སུམ་ཅུ་རྩ་བདུན་ལ་ཕེབས་པ་རབ་བྱུང་གསུམ་པའི་ས་ཕག་སྤྱི་ལོ་1179ལོར་འབྲི་གུང་མཐིལ་འོག་མིན་བྱང་ཆུབ་གླིང་ཕྱག་བཏབ། རིམ་གྱིས་ཇེ་རྒྱས་སུ་གྱུར་ཏེ་དགེ་འདུན་མཐའ་ཡས་པ་འདུས། གཉོས་རྒྱལ་བ་ལྷ་ནང་པས་ཆོས་སྟོན་དྲངས་པའི་དུས་སུ་འཁོར་ལྔ་ཁྲི་ལྔ་སྟོང་ལྔ་བརྒྱ་ཉི་ཤུ་རྩ་ལྔ་འདུས། དུས་གཅིག་ལ་དགེ་སློང་འབུམ་ཕྲག་གིས་ཚུལ་ཤིང་ལེན་པ་བྱུང་ཞེས་གྲགས་ལ། སྙན་གྲགས་ཀྱི་བ་དན་འཛམ་གླིང་ཁྱོན་ལ་ཁྱབ། དགུང་ལོ་བདུན་ཅུ་རྩ་ལྔ་ལ་ཕེབས་པ་རབ་བྱུང་བཞི་པའི་མེ་གླང་སྤྱི་ལོ་1217ལོར་སྐུ་གཤེགས་པའི་ཚུལ་བསྟན། ཕྱག་རྒྱ་ཆེན་པོ་ལྔ་ལྡན་གྱིས་གཙོས་པའི་གདམས་པས་བསྐྱངས་པའི་སློབ་མ་ཡང་སྤྱན་སྔ་བཞི། གཉོས་འགར་ཆོས་གསུམ། དཔལ་ཆེན་བཅུ་གཉིས་སོགས་མཐའ་ཡས་ཀྱང་། གདན་ས་སྐྱོང་བ་ནི། རྗེ་སྤྱན་སྔ་རིན་པོ་ཆེ། དབོན་རིན་པོ་ཆེ། གཅུང་རིན་པོ་ཆེ། གཉོས་རྒྱལ་བ་ལྷ་ནང་པ། མགར་དམ་པ་ཆོས་སྡིངས་པ། དཔལ་ཆེན་ཆོས་ཡེ། དབོན་ཤེར་འབྱུང་སོགས་སོ།
།ཐུགས་སྲས་སྤྱན་སྔ་གྲགས་པ་འབྱུང་གནས་ནི། །རླངས་ཀྱི་གདུང་རྒྱུད་དུ་རབ་བྱུང་གསུམ་པའི་ཤིང་ལུག་སྤྱི་ལོ་1175ལོར་སྐུ་འཁྲུངས་ཤིང་། རབ་བྱུང་བཞི་པའི་ཤིང་ཡོས་སྤྱི་ལོ་1255ལོར་འདས། རྗེ་འདིས་གདན་ས་མཐིལ་དང་འབྲི་གུང་གཉིས་ཀ་བསྐྱངས། རྗེ་འདིའི་རིང་ལ་འདུས་པ་ཁྲི་ཚོ་བཅོ་བརྒྱད་བྱུང་། དབོན་ཤེར་འབྱུང་ནི་སྐྱོབ་པའི་རུས་དབོན། བླ་མའི་ཞབས་ཏོག་དང་། མཁྱེན་པ་ལ་མཐའ་མེད། སྐྱོབ་པའི་བཞེད་པ་ཁྱད་ཆོས་བརྒྱ་དང་དགུ་བཅུ་པ་དགོངས་གཅིག་ཏུ་གྲགས་པ་ཡི་གེར་བཏབ། དེ་ནས་གདན་རབས་སུམ་ཅུ་ལྷག་གི་རིང་ལ། ནང་བརྟག་རྒྱུད་གསུམ་དང་། བདེ་དགྱེས་གསང་གསུམ་སོགས་ཀྱི་འཆད་ཉན་སྒོམ་སྒྲུབ་དར་ཞིང་རྒྱས་པ་དང་། མཁས་དང་གྲུབ་པའི་སྐྱེས་བུ་མང་དུ་བྱུང་བས། ཕྱག་རྒྱ་ཆེན་པོ་ལྔ་ལྡན་དང་། དམ་ཆོས་དགོངས་པ་གཅིག་པ་སོགས་རང་ལུགས་ཀྱི་ཡིག་ཆ་མང་དུ་བརྩམས། ཕྱིས་མལ་གྲོའི་ཉི་མ་ལྕང་ར་ལ་གཞུང་ཆེན་མོའི་འཆད་ཉན་ཚུགས་པ་དང་། ཕྱག་ཆེན། ཆོས་དྲུག་སོགས་རང་ལུགས་ཀྱི་ཁྲིད་སྲོལ་རྒྱུན་མ་ཆད་པར་བཞུགས་ཡོད་ལ། ད་ལྟའང་དགོན་ལག་དང་ཆོས་བརྒྱུད་ཀྱང་མ་ཉུང་བ་ཙམ་གནས་ཡོད། ཡང་འབྲི་གུང་གདན་རབས་བཅུ་དྲུག་པ་རྒྱལ་བ་རིན་ཆེན་ཕུན་ཚོགས་དང་། ཆོས་ཀྱི་གྲགས་པ་གཉིས་རྙིང་མའི་སྔགས་འཆང་ཆེན་པོར་གྱུར་པས་བཀའ་རྙིང་ཆུ་བོ་གཅིག་འདྲེས་སུ་གྱུར།
II.1.2.6 Drukpa Kagyü
དྲུག །འབྲུག་པ་བཀའ་བརྒྱུད།
འབྲུག་པ་བཀའ་བརྒྱུད་ནི། དཔལ་ལྡན་ཕག་མོ་གྲུ་པའི་སློབ་མ་གླིང་རས་པདྨ་རྡོ་རྗེ་དང་། ཆོས་རྗེ་གཙང་པ་རྒྱ་རས་པ་ལས་བརྒྱུད་པ་སྟེ། གྲུབ་ཐོབ་གླིང་རས་པ་ནི། ཉང་སྟོད་གླིང་སྨད་དུ་ཡབ་སྐྱབ་བེ་དང་ཡུམ་གཟུས་མོ་དར་ཆུང་གཉིས་ཀྱི་སྲས་སུ་རབ་བྱུང་གཉིས་པའི་ས་སྤྲེལ་སྤྱི་ལོ1128ལོར་སྐུ་འཁྲུངས། མཚན་པདྨ་རྡོ་རྗེ་ཞེས་གསོལ། དགུང་ལོ་དགུ་པ་ལ་ཀློག་བསླབས་ནས་འབྲི་ཀློག་ལེགས་པར་མཁྱེན། དགུང་ལོ་བཅུ་བདུན་ལོན་པའི་ཚེ་སློབ་དཔོན་གླིང་ལས་དགེ་བསྙེན་མཛད། དགུང་ལོ་སུམ་ཅུ་རྩ་བརྒྱད་པ་ལ་ཕག་མོ་གྲུ་པ་དང་མཇལ། ཁྲིད་གསན་ཏེ་བསྒོམས་པས་རྟོགས་པ་ཁྱད་པར་ཅན་འཁྲུངས། རྟོགས་པ་ཕུལ་བས་འགྲོ་བའི་མགོན་པོ་ཡང་ཐུགས་དགྱེས། སྤྱིར་རྒྱུད་ཀྱི་རྣམ་བཤད་དང་། སེམས་ཀྱི་རྡོ་རྗེའི་བསྟོད་པ། རྣལ་འབྱོར་འཇུག་པ། བདེ་མཆོག་གི་དཀྱིལ་འཁོར་གྱི་ཆོ་ག་ལ་སོགས་པ་བརྩམས་ཤིང་། བླ་མ་སྒྲུབ་པའི་ཕྱག་བཞེས་ཀྱང་རྗེ་བཙུན་གླིང་ནས་བྱུང་བ་ཡིན། ཕྱིས་སྣ་ཕུ་ཆོས་ལུང་གི་དགོན་པ་རུ། གྲུབ་ཆེན་གླིང་རས་པ་ལ་གསོལ་བ་འདེབས་ཞེས་འཁོད་པ་ལྟར་སྣ་ཕུར་ཆོས་ལུང་དགོན་པའི་གཞི་བཟུང་ནས་འགྲོ་བའི་དོན་རྒྱ་ཆེར་མཛད། དགུང་ལོ་དྲུག་ཅུ་རྩ་གཅིག་པ་སྟེ་རབ་བྱུང་གསུམ་པའི་ས་སྤྲེལ་སྤྱི་ལོ་1188ལོར་དགོངས་པ་རྫོགས།
དེའི་སློབ་མ་གཙོ་བོ་ནི། དཔལ་ནཱ་རོ་པའི་སྤྲུལ་པ་ཆོས་རྗེ་གཙང་པ་རྒྱ་རས་ཡེ་ཤེས་རྡོ་རྗེ་ནི། ཉང་སྟོད་ཁུ་ལེའི་ས་ཆར་རབ་བྱུང་གསུམ་པའི་ལྕགས་སྦྲུལ་སྤྱི་ལོ་1161ལོར་སྐུ་འཁྲུངས། མཚན་གཡུང་དྲུང་དཔལ་དུ་གསོལ། དགུང་ལོ་བཅུ་གཉིས་པ་ལ་གཅེན་པོ་སྐལ་ལྡན་གྱི་དྲུང་དུ་འབྲི་ཀློག་མཁས་པར་བསླབས། བཅུ་གསུམ་པ་ལ་སློབ་དཔོན་རྟ་ཐང་པའི་མདུན་ནས་མངོན་པ་དང་། ཡོ་ག །ཞི་བྱེད་པའི་གདམས་པ་སོགས་ཞུས། བཅོ་ལྔ་པ་ནས་བཟུང་སློབ་དཔོན་མཁར་ལུང་པ་ལོ་བརྒྱད་བསྟེན་ནས་རྫོགས་ཆེན་དང་ཚད་མ་ལ་སོགས་པ་གསན་ཞིང་སྦྱངས་པ་མཐར་ཕྱིན། གྲྭ་བསྐོར་ཡང་མཛད། སློབ་དཔོན་མཉེས་ནས་མཚན་ཤེས་རབ་བདུད་རྩི་འཁོར་ལོ་ཞེས་གསོལ། སྔ་རྗེས་སུ་སློབ་དཔོན་མང་པོ་བསྟེན་ནས་རྫོགས་ཆེན་དང་སྒྱུ་འཕྲུལ། ཐུགས་རྗེ་ཆེན་པོའི་སྐོར་སྤྱོད་དྲུག་སོགས་གསན། ཉེར་གཉིས་པ་ལ་རྗེ་བཙུན་གླིང་རས་པ་ར་ལུང་ན་བཞུགས་པ་དང་མཇལ་ཞིང་དབང་རྒྱུད་གདམས་ངག་མང་དུ་ཞུས། སྣ་ཕུར་སླར་ཡང་གླིང་རས་པ་དང་མཇལ་ནས་ཆོས་དྲུག་དང་། ལྷན་ཅིག་སྐྱེས་སྦྱོར་ལ་སོགས་པའི་གདམས་པ་གསན་པས་ཞག་བདུན་ནས་རས་ཐུབ་པ་བྱུང་། དགུན་འདག་སྦྱར་མཛད་དེ་བསྒོམས་པས་རླུང་ཕྱི་ནང་བསྲེ་ནུས་པ་དང༌། རྩིག་པ་ལ་ཐོགས་པ་མེད་པ་དང་། ཏིང་ངེ་འཛིན་གསལ་སྟོང་ནམ་མཁའ་དང་མཉམ་པ་འཁྲུངས་པ་བླ་མ་ལ་ཞུས་པས། རྗེ་བཙུན་མི་ལར་ཡང་འདི་ལྟར་བྱུང༌། ངོ་མཚར་ཆེ་གསུངས། བླ་མ་ཞང་གིས་མཁན་པོ་མཛད་དེ་ཚིག་རྫོགས་བསྒྲུབས། མཚན་ཡེ་ཤེས་རྡོ་རྗེ་ཞེས་གསོལ། རྗེ་བཙུན་རས་ཆུང་པས་གཏེར་དུ་སྦས་པའི་རོ་སྙོམས་སྐོར་དྲུག་བཏོན། བླ་མ་ཞང་གིས་ལུང་བསྟན་པ་ལྟར་ཀློང་རྡོལ་གྱི་དགོན་པ་བཏབ། ཡང་འབྲུག་ར་ལུང་གཉིས་ཀྱི་དགོན་པ་རུ། འགྲོ་མགོན་གཙང་པ་རྒྱ་རས་ལ་གསོལ་བ་འདེབས་ཞེས་འཁོད་པ་ལྟར་དུ། ཐོག་མར་ཡི་དམ་གྱི་ལུང་བསྟན་ལྟར་རྒྱལ་རྩེ་རྫོང་ལུང་དམར་ཡུལ་ཤོག་ཁོངས་སུ་ར་ལུང་དགོན་ཕྱག་བཏབ། དེ་རྗེས་གླིང་རས་པའི་ལུང་བསྟན་ལྟར་རབ་བྱུང་གསུམ་པའི་ཆུ་གླང་སྤྱི་ལོ་1193ལོར་ཆུ་ཤུར་གྱི་གནམ་ཕུར་འབྲུག་དགོན་པ་བཏབ། དགོན་འདི་གསར་དུ་འདེབས་སྐབས་འབྲུག་སྒྲ་དྲག་པོ་ཐེངས་འགའ་གྲགས་པས་དགོན་པའི་མིང་ལ་འབྲུག་ཅེས་བཏགས་ཤིང་། དེའི་བརྒྱུད་འཛིན་རྣམས་ལ་འབྲུག་པ་ཞེས་ཐོགས། ཁོང་སྐུ་འཚོ་བཞུགས་སྐབས་སློབ་མ་ཁྲི་ཚོ་ལྔ་ཙམ་འཚོགས་ཟེར། དེའི་སློབ་བརྒྱུད་ཀྱིས་བྱ་རྒོད་པོའི་ཉིན་ལམ་བཅོ་བརྒྱད་དུ་ཁྱབ་པ་བྱུང་སྟེ། མི་ཕྱེད་འབྲུག་པ། འབྲུག་ཕྱེད་སྤྲང་པོ། སྤང་ཕྱེད་གྲུབ་ཐོབ་ཅེས་ཀུན་ལ་རླུང་ལྟར་གྲགས། མཐར་དགུང་གྲངས་ལྔ་བཅུ་ང་གཅིག་པ་སྤྱི་ལོ་1211ལོར་དགོངས་པ་གཞན་དོན་དུ་གཤེགས།
རྗེ་འདི་ཉིད་ལ་སྤྱིར་བུ་སློབ་ངོ་མཚར་ཅན་ཉིས་སྟོང་བརྒྱ་བྱོན་པའི་ནང་ནས། སྣང་སེམས་རང་དབང་ཐོབ་པ་བཅུ་གསུམ། གཞན་ཕན་འགྲོ་དོན་བྱེད་པ་བརྒྱ་ཕྲག་གཅིག་བྱོན། དེ་དག་གི་ནང་ནས་དང་པོར་ཆེ་བ་སྤ་རྐྱང་གཉིས། བར་དུ་ཆེ་བ་རྒྱ་འབྲས་གཉིས། ཐ་མར་ཆེ་བ་ལོ་རྒོད་གཉིས། གཞན་ཡང་རས་པ་གསུམ། རྣལ་འབྱོར་གསུམ། ཞིག་པོ་གསུམ་སོགས་མང་དུ་བྱུང་། གདན་ས་ར་ལུང་དུ་དབོན་རས་དར་མ་སེང་གེ་བཞུགས་ཤིང་། དེ་ནས་དབོན་བརྒྱུད་རིམ་པར་བྱོན་པ་ལས་འཕྲིན་ལས་ཆེ་བ་ནི་རྒྱལ་དབང་རྗེ་ངག་དབང་ཆོས་རྒྱལ་ཡིན་ལ། དེའི་སློབ་མ་ལྷ་རྩེ་བ་ངག་དབང་བཟང་པོ་དང་། དེ་ནས་སྙན་ངག་མཁན་སངས་རྒྱས་རྡོ་རྗེ། བོད་མཁས་པ་སོགས་སློབ་བརྒྱུད་བཟང་པོ་མང་དུ་འཕེལ། ཁྱད་པར་དུ་འབྲུག་པ་ཀུན་མཁྱེན་པདྨ་དཀར་པོས་བསྟན་བཅོས་མང་དུ་བརྩམས། དེའི་སྐྱེ་བ་དཔག་བསམ་དབང་པོ་སོགས་བྱོན། གཞན་ཡང་གཙང་སྨྱོན། དབུས་སྨྱོན་དུ་གྲགས་པ་གཉིས་དང་། འབྲུག་སྨྱོན་ཀུན་ལེགས་སོགས་གྲུབ་ཐོབ་ཡ་མཚན་ཅན་ཡང་འགའ་བྱུང་སྟེ། དེ་རྣམས་ལ་བར་འབྲུག་ཅེས་གྲགས།
ཆོས་རྗེ་གཙང་པ་རྒྱ་རས་ཀྱི་སློབ་མ་ཁྱད་འཕགས་རྒོད་ཚང་བ་མགོན་པོ་རྡོ་རྗེ་ནི། རབ་བྱུང་གསུམ་པའི་ས་བྱ་སྤྱི་ལོ་1189ལོར་འཁྲུངས་ཤིང་། རབ་བྱུང་བཞི་པའི་ས་རྟ་སྤྱི་ལོ་1258ལོར་སྐུ་གཤེགས། ཐོག་མའི་མཚན་ལ་དོན་གྲུབ་སེང་གེ་དང་། གཙང་པ་རྒྱ་རས་ལས་རབ་ཏུ་བྱུང་བས་མགོན་པོ་རྡོ་རྗེར་གསོལ། ཐུགས་དམ་བཅུ་གཉིས། གོ་ཆ་བཅུ་གསུམ། སྐུ་གསུང་ཐུགས་ཀྱི་དམ་བཅའ་གསུམ། འཕྲལ་གྱི་དམ་བཅའ་བདུན། ཁྱད་འཕགས་ཀྱི་དམ་བཅའ་ལྔ་ལ་སོགས་པའི་རྣམ་ཐར་བསམ་གྱིས་མི་ཁྱབ་པ་མངའ་ཞིང་། སློབ་མ་གཙོ་བོ་བཞི་སྟེ་རྒྱལ་བ་ཡང་དགོན་པ། གྲུབ་ཐོབ་ཨོ་རྒྱན་པ། སྤྱིལ་དཀར་བ། ནེ་རིངས་པ་བཅས་མང་དུ་བྱུང་། རྒྱལ་བ་ཡང་དགོན་པའི་སློབ་མ་སྤྱན་སྔ་རིན་ལྡན། དེའི་སློབ་མ་ཟུར་ཕུག་པ་རིན་ཆེན་དཔལ་བཟང་། དེའི་སློབ་མ་འབའ་ར་བ་རྒྱལ་མཚན་དཔལ་བཟང་སྟེ། འདིས་ཐ་གྲུ་སྐོར་གསུམ་སོགས་བསྟན་བཅོས་མང་པོ་མཛད་ལ། སློབ་མ་ཡང་མང་དུ་བྱོན། དེ་དག་ལ་སྟོད་འབྲུག་ཅེས་སུ་གྲགས་ཤིང༌། སྟོད་ལ་དྭགས། བལ་ཡུལ། སྐྱིད་རོང༌། གཉའ་ནང་། མངའ་རིས་ཀྱི་ས་གནས་སོགས་སུ་ཁྱབ་པ་ད་ལྟའི་བར་དུ་ཁྲིད་སྲོལ་མ་ཉམས་པ་ཡོད།
རྒྱལ་བ་ལོ་རས་པ་དར་མ་དབང་ཕྱུག་ནི། ཡབ་རྣལ་འབྱོར་དང་ཡུམ་མེ་བཟའ་སྐྱིད་གཉིས་ཀྱི་སྲས་སུ་རབ་བྱུང་གསུམ་པའི་མེ་ལུག་སྤྱི་ལོ་1187ལོར་སྐུ་འཁྲུངས་ཤིང་། སྤྱི་ལོ་1250ལོར་འདས། སྐྱོར་མོ་ལུང་དུ་མཁན་པོ་སྦལ་ཏི་ལས་རབ་ཏུ་བྱུང་ཞིང་མཚན་དབང་ཕྱུག་བརྩོན་འགྲུས་ཞེས་གསོལ། ཁོང་ལ་དམ་བཅའ་ཆེན་པོ་དྲུག་ཞར་བྱུང་གི་དམ་བཅའ་དྲུག །ཁྱད་པར་གྱི་དམ་བཅའ་གཅིག་སྟེ་བཅུ་གསུམ་གྱི་རྣམ་ཐར་ངོ་མཚར་ཅན་མང་དུ་མངའ་ལ། ཐུབ་པ་ལྔ་ལྡན་གྱི་གདམས་ངག་ལ་རྩལ་འདོན་དུ་མཛད། དེ་ལ་དབོན་བརྒྱུད་པ་སློབ་མ་འཇམ་དབྱངས་མགོན་པོ་སོགས་མཁས་པ་གསུམ། ཙཱ་རི་རས་ཆེན་སོགས་རས་པ་གསུམ། ཨཱ་ལོ་ཤཱཀྱ་གསུམ་སྟེ་རྣལ་འབྱོར་བ་གསུམ་སོགས་མཐའ་ཡས་པ་ལས། འཇམ་དབྱངས་མགོན་པོས་གཅོད་ཀྱི་གདམས་པ་ཟབ་དོན་ཐུགས་སྙིང་དང་སྒོ་འབྱེད་བཅུ་སྤེལ་བ་དར་རྒྱས་ཆེ། ཙཱ་རི་རས་པས་འཕྲིན་ལས་རྒྱ་ཆེར་བསྐྱངས་པས་སློབ་མ་ཡང་མང་དུ་བྱུང༌། དེ་ལ་སྨད་འབྲུག་ཅེས་གྲགས། དེ་དག་གིས་མདོ་ཁམས་སྡེ་དགེའི་ཁུལ་གླིང་ཚང༌། རྫ་རྒྱུད། མགོ་ལོག །ཡུན་ནན་གྱི་འཇང་ཡུལ་སོགས་སུ་ཁྱབ།
དེ་ལྟར་ཆོས་རྗེ་རྒོད་ཚང་བ་དཔོན་སློབ་ནས་བརྒྱུད་པ་ལ་སྟོད་འབྲུག་དང་། རྒྱལ་བ་ལོ་རས་པ་དར་མ་དབང་ཕྱུག་ནས་བརྒྱུད་པ་ལ་སྨད་འབྲུག་ཟེར་ཞིང་། ཁ་རྒྱུན་དུ་སྟོད་འབྲུག་གནམ་གྱི་སྐར་མ། སྨད་འབྲུག་སའི་རྩེ་ཤིང་ཞེས་མང་བའི་ཚད་དུ་གྲགས། གདན་ས་གཙོ་ཆེ་བ་ཡང་ར་ལུང་དང་། འབྲུག་བདེ་ཆེན་ཆོས་འཁོར། ཀུན་མཁྱེན་པདྨ་དཀར་པོའི་སྐྱེ་སྤྲུལ་འབྲུག་ཆེན་རིམ་བྱོན་གྱི་བྱར་གསང་སྔགས་ཆོས་གླིང་དགོན། ཟངས་ཡག་བྲག །བསམ་གླིང་དགོན། མདོ་ཁམས་ཀྱི་སྒ་ཉག་ཁམས་པ་དགོན་སོགས་མང་ཙམ་ཡོད་ལ། དེ་དག་ལས་འབྲུག་པ་སྟོད་སྨད་བར་གསུམ་སོགས་ད་ལྟའི་དུས་སུ་ཡང་དར་རྒྱས་ཅུང་ཆེ་ཞིང་། བཤད་སྒྲུབ་གཉིས་ཀར་རང་རྐང་ཕེར་ངེས་ཀྱི་རྒྱུན་བཞུགས་པའོ།
II.1.2.7 Trophu Kagyü
།བདུན། ཁྲོ་ཕུ་བཀའ་བརྒྱུད།
ཁྲོ་ཕུ་བཀའ་བརྒྱུད་ནི་རྗེ་ཕག་མོ་གྲུ་པའི་དངོས་སློབ་རྒྱལ་ཚ་ཀུན་དགའ་ཤེས་རབ་དང་། དབོན་ཀུན་ལྡན་རས་པ་སྐུ་མཆེད་གཉིས་ལས་བརྒྱུད་པ་ཡིན། རྒྱལ་ཚ་རིན་པོ་ཆེ་ནི་རབ་བྱུང་གཉིས་པའི་ས་ཁྱི་སྤྱི་ལོ་1118ལོར། ཤབ་སྨད་དུ་སྣུབས་ནམ་མཁའི་སྙིང་པོའི་གདུང་རྒྱུད་དུ་འཁྲུངས། དགུང་ལོ་ལྔར་ཕེབས་སྐབས་ཡིག་རྩིས་ལ་སྦྱངས་པ་མཛད། གཞོན་ནུའི་དུས་ནས་ཆོས་ལ་དོན་གཉེར་ཆེ་ཞིང་། གནུར་ཉི་མ་དང་ཟུར་ཆུང་པའི་སྲས་རྗེ་སྒྲོ་ཕུག་པ་སོགས་བླ་མ་དུ་མའི་ཞབས་ལ་གཏུགས་ནས་ཆོས་མང་དུ་གསན། དགུང་ལོ་བཅུ་དགུ་པ་ལ་ཡུལ་དབུས་སུ་བྱོན། པུ་རངས་ལོ་ཙཱ་བའི་དངོས་སློབ་དམར་ཆོས་ཀྱི་རྒྱལ་པོ་དང་། ལོ་ཙཱ་བ་ཆོས་ཀྱི་བཟང་པོ། མེས་སྟོན་ཀུན་དགའ་སྙིང་པོ། རྔོག་མདོ་སྡེ་སོགས་མཇལ་ཏེ་ཆོས་མང་དུ་གསན་ནས་རབ་ཏུ་བྱུང་། བླ་མ་དམར་གྱི་ཞལ་བཀོད་ལྟར་ཕག་གྲུར་ཕེབས། ཕག་གྲུ་རྡོ་རྗེ་རྒྱལ་པོ་དང་མཇལ་ནས་ཆོས་དང་གདམས་ངག་རྒྱ་ཆེར་གསན། ཕྱག་རྒྱ་ཆེན་པོའི་རྟོགས་པ་ཁྱད་པར་ཅན་འཁྲུངས། དྭགས་པོ་སྒོམ་ཚུལ་དང༌། རྒྱ་རས་སོགས་བླ་མ་མང་པོ་བསྟེན་པས་ཟབ་ཁྱད་ཅན་གྱི་གདམས་ངག་བརྒྱ་དང་སུམ་ཅུ་སོ་དྲུག་བཞུགས། དགུང་གྲངས་ལྔ་བཅུ་ང་གསུམ་པ་རབ་བྱུང་གསུམ་པའི་ལྕགས་ཡོས་སྤྱི་ལོ་1179ལོར་ཁྲོ་ཕུ་དགོན་པ་ཐོག་མར་བཏབ་སྟེ་ཁྲོ་ཕུ་བཀའ་བརྒྱུད་པའི་སྲོལ་གཏོད། དགུང་ལོ་ལྔ་བཅུ་རྩ་བཞི་པར་མཁན་པོ་ཞང་ཞི་མཛེས་ལས་བསྙེན་པར་རྫོགས། དེ་རྗེས་དབུས་སུ་ཕེབས་ནས་མ་གཅིག་ལབ་སྒྲོན་གྱི་སྲས་པོ་ཐོད་སྨྱོན་བསམ་གྲུབ་ཀྱི་དྲུང་ནས་གཅོད་ཞུས། དགུང་ལོ་དོན་བརྒྱད་ལ་ཕེབས་པ་རབ་བྱུང་གསུམ་པའི་ཤིང་ཡོས་སྤྱི་ལོ་1195ལོར་དགོངས་པ་བདེ་བར་གཤེགས།
གཅུང་ཀུན་ལྡན་རས་པ་ཞི་བ་ཚུལ་ཁྲིམས་ནི། རབ་བྱུང་གསུམ་པའི་ས་འབྲུག་སྤྱི་ལོ་1148ལོར་སྐུ་འཁྲུངས། དབུས་སུ་རང་གི་ཕུ་བོ་མཇལ་བར་ཕེབས་སྐབས། དཔལ་ཕག་མོ་གྲུ་པའི་ཆོས་རར་བཞུགས་པ་དང་མཇལ། རྗེ་ཕག་མོ་གྲུ་པ་རྗེ་བཙུན་མི་ལའི་རྣམ་ཐར་གསུང་བཞིན་འདུག་པས་ངོ་མཚར་ཆེན་པོ་སྐྱེས། ངས་ཀྱང་དེ་ལྟ་བུ་ཞིག་བྱ་སྙམ་པའི་དམ་བཅའ་མཛད། རྗེ་ཕག་མོ་གྲུ་པས་སྣོད་ལྡན་གྱིས་སློབ་མ་ཡིན་པར་མཁྱེན་ཏེ། དགྱེས་བཞིན་རྗེས་སུ་བཟུང་ནས་གདམས་ངག་མང་དུ་གནང༌། ཁམས་སུ་ཕྱིན་ན་གདུལ་བྱ་ཆེ་བར་ལུང་བསྟན་ཡང་ཁྲོ་ཕུར་བྱོན་ནས་སྒྲུབ་པ་མཛད་པས་སྤངས་རྟོགས་ཀྱི་ཡོན་ཏན་དཔག་མེད་སྐྱེས། བླ་མའི་གདན་ས་ཕག་གྲུར་བྱོན་ནས་གཙུག་ལག་ཁང་ཆེན་པོ་བརྩིགས་པ་སོགས་ཀྱི་འགན་ཁུར་མཛད། སྒྲུབ་ཁང་ནས་གང་དུའང་མ་བྱོན་པར་རྒྱ་གར་གྱི་ཤིང་ཏོག་རིགས་མི་གཅིག་པ་སྣ་ཚོགས་ལག་ཏུ་འོང་བ་དང་། ཡུལ་དུ་མུ་གེ་བྱུང་སྐབས་ཀྱང་འབུའི་ཆར་ཕབ་པ་སོགས་གྲུབ་པའི་རྟགས་མང་པོ་བཏོན། དགུང་ལོ་བདུན་ཅུ་སྟེ་རབ་བྱུང་གསུམ་པའི་མེ་གླང་སྤྱི་ལོ་1217ལོར་འཇད་ཀྱི་ཤར་ཕྱོགས་བྱང་ཕུག་སྟེ་དེང་བཞད་མཐོང་སྨོན་རྫོང་ཆབ་ཁ་གྲོང་བརྡལ་བྱང་ཕུག་གྲོང་ཚོར་ཞི་བར་གཤེགས།
རྒྱལ་ཚ་སྐུ་མཆེད་གཉིས་ཀྱི་ཚ་བོ་ཁྲོ་ཕུ་ལོ་ཙཱ་བ་བྱམས་པ་དཔལ་ནི། རབ་བྱུང་གསུམ་པའི་ཆུ་སྦྲུལ་སྤྱི་ལོ་1173ལོར་ཡབ་ཇོ་འཕན་དང་། ཡུམ་བསྲེགས་མ་གསལ་བྱེད་གཉིས་ཀྱི་སྲས་སུ་འཁྲུངས། དགུང་ལོ་དྲུག་ལ་ཡི་གེ་འབྲི་ཀློག་བསླབས། དགུང་ལོ་བརྒྱད་ལ་ཕེབས་སྐབས་རྒྱལ་ཚ་རིན་པོ་ཆེ་དང་། ཀུན་ལྡན་གྱིས་མཁན་པོ་མཛད་ནས་དགེ་ཚུལ་བསྒྲུབས། བྱམས་པ་དཔལ་ཞེས་པའི་མཚན་གསོལ། དགུང་ལོ་བཅུ་གཅིག་ནས་བཅུ་དྲུག་བར་དུ་དགེ་བཤེས་གཙང་དཀར་བ་ལས་ཚད་མ་རྣམ་ངེས་དང་དབུ་མ། བྱམས་ཆོས་སོགས་མདོ་སྔགས་ཀྱི་ཆོས་མང་དུ་གསན། དགུང་ལོ་བཅུ་བདུན་པར་བླ་མ་རྩེ་སྟོན་ཀུན་བཟང་ཁྲོ་ཕུར་སྤྱན་དྲངས་ནས། རྡོར་དབྱིངས་ལ་སོགས་པའི་དཀྱིལ་འཁོར་ལྔ་བརྒྱ་ཕྲག་གཅིག་གི་ཕྱག་ལེན་མན་ངག་གསན། དགུང་ལོ་བཅུ་དགུ་པར་བསྙེན་པར་རྫོགས། རྒྱལ་ཚ་དང་ཀུན་ལྡན་མཆེད་ལ་གདམས་ངག་ལུགས་མི་འདྲ་བ་བརྒྱ་དང་སུམ་ཅུ་རྩ་དྲུག་ཡོད་པ་མཐའ་དག་གསན། དགུང་ལོ་ཉེར་བཞིར་ཕེབས་སྐབས་རྒྱལ་ཚ་རིན་པོ་ཆེ་སྐུ་གཤེགས་ནས་གདམས་པའི་བདག་པོར་བསྐོས། ལོ་དེར་བལ་ཡུལ་དུ་ཕེབས་ཏེ་པཎ་ཆེན་བུདྡྷ་ཤྲཱིའི་དྲུང་ནས་རྒྱ་གར་གྱི་སྐད་ཡིག་སོགས་བསླབས་པས་ལོ་ཙཱ་མཁས་པར་གྱུར། རབ་བྱུང་གསུམ་པའི་ས་རྟ་སྤྱི་ལོ་1198ལོར་གྲུབ་ཆེན་མི་ཏྲ་ཛོ་ཀི་བོད་དུ་སྤྱན་དྲངས་ནས་བདེ་ཆེན་རལ་གཅིག་གི་སྐོར་སོགས་བསྒྱུར་བ་དང་། སློབ་དཔོན་དེའི་དྲུང་ནས་དབང་དང་གདམས་པ་དཔག་མེད་ཞུས། ཡང་པཎ་ཆེན་བུདྡྷ་ཤྲཱི་བོད་དུ་གདན་དྲངས་ནས་ཐུགས་རྗེ་ཆེན་མོའི་སྒྲུབ་ཐབས་བརྒྱ་རྩ་ལ་སོགས་པ་བསྒྱུར། རབ་བྱུང་གསུམ་པའི་ཤིང་བྱི་སྤྱི་ལོ་1204ལོར་ཁ་ཆེ་པཎ་ཆེན་ཤཱཀྱ་ཤྲཱི་སྤྱན་དྲངས་ཏེ་གཞི་ཐམས་ཅད་ཡོད་པར་སྨྲ་བའི་མཁན་བརྒྱུད་དྲི་མ་མེད་པ་ཁ་ཆེའི་སྡོམ་རྒྱུན་ཞེས་པ་དེ་བོད་དུ་སྤེལ་ནས། བོད་ཀྱི་འདུལ་འཛིན་མཁས་གྲུབ་མང་པོས་སྡོམ་རྒྱུན་འདི་བཞེས་པས། ངུར་སྨྲིག་རྒྱལ་མཚན་འཆང་བས་གངས་ཅན་གྱི་ས་ཆེན་པོ་ཁྱབ་པར་མཛད། ཁྲོ་ཕུ་དགའ་ལྡན་གྱི་གཙུག་ལག་ཁང་ཆེན་པོ་བཏབ། རྗེ་འབྲི་གུང་པའི་དྲུང་ནས་མར་པ་བཀའ་བརྒྱུད་ཀྱི་དབང་ཁྲིད་གདམས་ངག་དུ་མ་གསན། དེ་རྗེས་ཁམས་རི་བོ་ཆེ་སོགས་སུ་ཕེབས་ནས་ཁྲོ་ཕུའི་རུ་དགོན་ཐེག་ཆེན་དར་རྒྱས་གླིང་ཕྱག་བཏབ། ཁྲོ་ཕུའི་གདན་ས་སྟོད་སྨད་གཉིས་ཞེས་གྲགས་པ་འདི་ནས་བྱུང་། ཁྲོ་ཕུ་དགོན་པར་ཁྱད་འཕགས་བཅུ་གསུམ་དང་ལྡན་པའི་གསེར་ཟངས་ཀྱི་བྱམས་ཆེན་ཁྲུ་བརྒྱད་ཅུ་པ་རྟེན་དང་བརྟེན་པ་སོགས་ལེགས་པར་བཞེངས། པཎ་ཆེན་ཤཱཀྱ་ཤྲཱིས་གཙོས་པའི་པཎ་ཆེན་དང་། ལོ་ཙཱ་བ་མང་པོས་རབ་གནས་ཀྱི་ཆོ་ག་རྒྱས་པར་མཛད། ཕྱིས་གཙང་གི་ཁྲོ་ཕུའི་བྱམས་ཆེན་ཞེས་མཚན་སྙན་ཤིན་ཏུ་ཆེ། སྤྱིར་ཕྱག་ཆེན་དོན་དགུ་མ་དང༌། མན་ངག་བརྒྱ་རྩ་ལ་སོགས་པས་གཙོ་མཛད་དེ་བུ་སློབ་ཀྱི་འཁོར་མང་དུ་བསྐྱངས། མཐར་དགུང་གྲངས་ལྔ་བཅུ་ང་གཉིས་པ་རབ་བྱུང་བཞི་པའི་ཤིང་བྱ་སྤྱི་ལོ་1225ལོར་དགོངས་པ་ཆོས་དབྱིངས་སུ་གཤེགས།
སློབ་མ་ཤིན་ཏུ་མང་པོ་བྱུང་བ་ལས། མཁན་ཆེན་བྱང་ཆུབ་དཔལ་བ། མཁན་ཆེན་བསོད་ནམས་སེང་གེ སངས་རྒྱས་ཞིག་ཆེན་ཏེ་བླ་ཆེན་གསུམ་དང་། བྱམས་པ་སྒྲུབ་བརྒྱུད་བསྟན་འཛིན། ཡང་རྩེ་རིན་ཆེན་སེང་གེ རོང་པ་རྒ་ལོ། བུ་སྟོན་རིན་ཆེན་གྲུབ་སོགས་མང་དུ་བྱོན་ནས་དྭགས་པོ་བཀའ་བརྒྱུད་ཀྱི་ལྟ་བ་ཕྱག་རྒྱ་ཆེན་པོ། སྒོམ་པ་ནཱ་རོ་ཆོས་དྲུག་གི་གདམས་པ་ཉམས་སུ་ལེན་པའི་ཁྲོ་ཕུའི་བརྒྱུད་འཛིན་དར་སྤེལ་གནང་། འོན་ཀྱང་ད་ལྟའི་ཆར་ཁྲོ་ཕུའི་གདན་ས་སྟོད་འབྲུག་པ་དང་། སྨད་ཀརྨ་ཀམ་ཚང་གི་ལུགས་འཛིན་པའོ།
II.1.2.8 Taklung Kagyü
།བརྒྱད། སྟག་ལུང་བཀའ་བརྒྱུད།
སྟག་ལུང་བཀའ་བརྒྱུད་ནི་སྟག་ལུང་ཐང་པ་བཀྲ་ཤིས་དཔལ་ལས་བརྒྱུད་པ་ཞིག་ཡིན། ཁོང་ནི་ཡབ་བློན་འབར་པོ་དང་ཡུམ་བྲབ་ཤི་བཟའ་དགེ་གསུམ་ཁྲོ་མོའི་སྲས་སུ་རབ་བྱུང་གཉིས་པའི་ཆུ་ཁྱི་སྤྱི་ལོ་1142ལོར་གཡང་ཤོད་བོང་ར་སྟེང་དུ་སྐུ་འཁྲུངས། དགུང་ལོ་བཅོ་བརྒྱད་ལ་ཕེབས་སྐབས་མལ་གྲོའི་ཐང་སྐྱ་དགོན་དུ་མཁན་པོ་ག་སྟོན་བླ་གང་བ་ཤེས་རབ་རྡོ་རྗེ་དང་། སློབ་དཔོན་ཚར་སྟོན་སྒོ་མང་བ་གཉིས་ལས་རབ་ཏུ་བྱུང་། མཚན་བཀྲ་ཤིས་དཔལ་ཞེས་གསོལ། དགེ་བཤེས་བྲག་དགོན་པ་ལས་ཤེར་ཕྱིན་འགྲེལ་ཆུང་། སྤྱོད་འཇུག །བསླབ་བཏུས། ལམ་སྒྲོན། དོ་ཧ་ལ་སོགས་པ་གསན། རྒྱ་གར་དུ་ཆོས་ཞུ་བར་ཕེབས་བཞེད་ཀྱང་གཞན་གྱིས་བཀག་ནས་མ་བཏང་། དགུང་ལོ་ཉེར་བཞི་པར་ཕག་གྲུ་རྡོ་རྗེ་རྒྱལ་པོའི་སྙན་པ་གསན་ནས་མཇལ་བར་ཕེབས་པ། དགྱེས་བཞིན་དུ་རྗེས་སུ་བཟུང་ནས་སྲས་ཀྱི་ཐུ་བོར་དབང་བསྐུར། བླ་མ་ཕག་གྲུའི་དྲུང་དུ་ལོ་དྲུག་བཞུགས། གདམས་ངག་མཐའ་དག་བུམ་པ་གང་བྱོའི་ཚུལ་དུ་གསན་པས་ཕྱག་རྒྱ་ཆེན་པོ་སྒོམ་མེད་ཀྱི་རྣལ་འབྱོར་ཐུགས་ལ་འཁྲུངས། བླ་མ་ཕག་གྲུ་སྐུ་གཤེགས་རྗེས་མལ་གྲོར་བྱོན། འཆད་ཁ་པ་ལས་བཀའ་གདམས་གསན། འཕན་ཡུལ་ཤོ་མ་རར་ཞང་ཤ་ར་བ་ལས་བསྙེན་པར་རྫོགས། དགུང་ལོ་སོ་དགུ་པ་ལ་དར་སྦས་རོང་གསུམ་དང་ཕོད་མདོ་བས་སྟག་ལུང་དུ་སྤྱན་དྲངས། འགྲོ་མགོན་གྱིས་ལུང་བསྟན་པ་ལྟར་རབ་བྱུང་གསུམ་པའི་ལྕགས་བྱི་སྤྱི་ལོ་1180ལོར་སྟག་ལུང་དགོན་པ་ཕྱག་བཏབ་པས། སྟག་ལུང་ཐང་པ་ཞེས་པའི་མཚན་ཐོགས། རབ་ཏུ་བྱུང་རྗེས་ཁྱིམ་པའི་ཁང་པར་མ་བྱོན། ཤ་ཆང་གསོལ་མ་མྱོང་། ཤ་ཆང་གི་མགྲོན་མི་བྱེད། གླིང་གསེབ་ཏུ་བུད་མེད་མི་གཏོང་བ་སོགས་འདུལ་བའི་ཕྱག་ལེན་ཞིབ་པར་མཛད། སྐུ་གདའ་ཁར་གྲྭ་སློབ་སུམ་སྟོང་ལྷག་ཙམ་འདུས་ནས་སྟག་ལུང་བཀའ་བརྒྱུད་ཀྱི་བསྟན་པ་སྤེལ། དགུང་ལོ་དྲུག་ཅུ་རེ་དགུ་པ་སྟེ་རབ་བྱུང་བཞི་པའི་ལྕགས་རྟ་སྤྱི་ལོ་1210ལོར་དགོངས་པ་ཆོས་དབྱིངས་སུ་གཤེགས།
དེ་ནས་དབོན་རིན་ཆེན་མགོན་པོས་གདན་ས་བཟུང་ནས་མཆོད་ཁང་ཆེན་མོ་བཞེངས། དེའི་རྗེས་སུ་སངས་རྒྱས་ཡར་བྱོན་གདན་སར་བཞུགས། དེ་ལ་གདན་ས་ཕེར་བའི་དབོན་བཀྲ་ཤིས་བླ་མ་དང་སངས་རྒྱས་དཔོན་གཉིས་བྱུང་བ་ལས། སངས་རྒྱས་དབོན་གྲགས་པ་དཔལ་འོད་ཟེར་དབང་པོ་ཁམས་སུ་བྱོན་ནས་སྤྱི་ལོ་1276ལོར་དེང་ཆབ་མདོ་ས་གནས་རི་བོ་ཆེ་རྫོང་ཁོངས་སུ་རི་བོ་ཆེ་དགོན་བཏབ། དེ་ནས་བཟུང་སྟག་ལུང་དགོན་དེའང་ཡར་ཐང་མར་ཐང་གཉིས་སུ་གྱེས། གཉིས་ཀར་གྲྭ་པ་སུམ་སྟོང་བརྒྱད་བརྒྱ་རེ་ཙམ་འཚོགས། དེ་ནས་དབུས་གཙང་མདོ་ཁམས་སོགས་སུ་སྟག་ལུང་བཀའ་བརྒྱུད་པའི་གྲྭ་ས་དང་སློབ་རྒྱུན་མང་དུ་འཕེལ། དབོན་བརྒྱུད་དང་སྤྲུལ་བརྒྱུད་རིམ་པར་བྱོན་པ་ལས། དབུས་གཙང་ཀུན་ཏུ་སྙན་པའི་གྲགས་པས་ཁྱབ་པ་སྟག་ལུང་ངག་དབང་གྲགས་པ་ཞེས་པས་སྟག་ལུང་སྡོམ་གསུམ་སོགས་རང་རང་ལུགས་ཀྱི་བསྟན་བཅོས་བརྩམས། འབྲི་སྟག་གི་ཆོས་རྒྱུན་ཉམས་པ་སླར་གསོ་དང་། མ་ཉམས་གོང་འཕེལ་གཏོང་བར་འཕྲིན་ལས་ཆེ།
ལྷག་པར་དུ་མ་ཐང་རི་བོ་ཆེར་བསྟན་པའི་གཙོ་འཛིན་སྐྱབས་མགོན་རྣམ་གསུམ་གྱིས་བསྟན་པའི་རྒྱུན་སྐྱོང་བ་ལས། མཁར་དྲུང་མཚོ་སྐྱེས་རྡོ་རྗེའི་སྐུ་རིང་ནས། བཀའ་དགོངས་ཕུར་གསུམ་དང་། རཏྣ་གླིང་པའི་གཏེར་ཆོས་སྐོར་སོགས་རྙིང་མ་བཀའ་གཏེར་གྱི་རྒྱུན་ཡང་བཙུགས་པས། བཀའ་རྙིང་ཟུང་འབྲེལ་གྱི་ལུགས་སུ་གྱུར། དུས་ཕྱིས་སྐྱབས་མགོན་རྣམ་གསུམ་གྱིས་བཀའ་བརྒྱུད་སྤྱིའི་ལུགས་ཀྱི་སྒྲུབ་གྲྭ་སྔར་ཡོད་ཁར། མདོ་སྔགས་རིག་གནས་དང་བཅས་པའི་གཞུང་ཆེན་པོ་ཁག་ལ་འཆད་ཉན་བྱེད་པའི་བཤད་གྲྭ་གསར་བཙུགས་གནང་། བཀའ་བརྒྱུད་པའི་འཆད་སྲོལ་གཞིར་བཞག །དེའི་ཁར་ཆོས་ཀྱི་རྒྱལ་པོ་ཤར་ཀཿཐོག་པའི་བཤད་སྲོལ་དང་། འཇམ་མགོན་མི་ཕམ་པའི་ཡིག་ཆས་ཁ་སྐོང་ཟུར་རྒྱན་མཛད་ནས་བཤད་པའི་སྲོལ་ཚུགས་པ་དང་། སློབ་མ་མང་དུ་འཕེལ་བ་བཅས་བཤད་སྒྲུབ་གཉིས་ཀའི་ཐད་ནས་མདོ་ཁམས་སྟོད་ཀྱི་ཆོས་སྡེ་ཆེན་པོ་ཞིག་ཏུ་གྱུར་ཏོ།
II.1.2.9 Martsang Kagyü
དགུ། སྨར་པ་བཀའ་བརྒྱུད།
སྨར་པ་བཀའ་བརྒྱུད་ནི་སྨར་ཚང་ཤེས་རབ་སེང་གེ་ལས་བརྒྱུད་པ་ཞིག་ཡིན། ཁོང་ནི་མདོ་ཁམས་འབྲི་ཤོད་ཀྱི་ཆ་ལག་ཏུ་གཏོགས་པ་སྨར་ཤོད་དགེ་རྒྱལ་བྱེ་མའི་ཀླུང་བྱ་བར། རབ་བྱུང་གཉིས་པའི་ཤིང་ཡོས་སྤྱི་ལོ་1135ལོར་སྐུ་འཁྲུངས་པར་འདོད། སྐུ་ན་ཆུང་ངུའི་དུས་ནས་ཆོས་ལ་མོས་པས། དཔལ་རྒ་ལོ་ཡུལ་དེར་ཕེབས་པ་དང་མཇལ་ཏེ་སྐྱབས་འགྲོ་སེམས་བསྐྱེད་བཟླས་ལུང་བྱིན་རླབས་དང་བཅས་པ་གསན། དགུང་ལོ་བཅོ་ལྔར་ཕེབས་སྐབས་བླ་མ་འབོམ་རྒྱལ་བྱ་བའི་དྲུང་ནས་མདོ་སྔགས་ཀྱི་བཀའ་བསྟན་གཞུང་ལུགས་མང་པོ་གསན། ལྷག་པར་དུ་བླ་མ་དཔལ་ཆེན་པོ་དང་། བླ་མ་ཨ་སེང་། བླ་མ་བུར་སྒོམ་བཅས་ཀྱི་ཞབས་ལ་གཏུགས་ནས་བདེ་མཆོག་ལ་སོགས་པའི་ཆོས་སྐོར་དུ་མ་གསན། དགུང་ལོ་ཉི་ཤུ་པར་རབ་ཏུ་བྱུང་། མཚན་ཤེས་རབ་ཡེ་ཤེས་ཞེས་གསོལ། དེ་རྗེས་དགེ་བཤེས་དར་མ་འབུམ་དང་ལྷན་དུ་དབུས་སུ་བྱོན། བྱ་འདུལ་གྱིས་མཁན་པོ་དང་། ཆ་པས་སློབ་དཔོན། གཙང་ནག་པས་གསང་སྟོན་མཛད་ནས་བསྙེན་པར་རྫོགས། གསང་ཕུར་ལོ་ལྔ་བཞུགས་ཏེ་མཁས་པར་གྱུར། དེ་ནས་ལྷ་སར་རྗེ་སྒོམ་ཚུལ་ལས་ཕྱག་ཆེན་ལ་སོགས་པའི་གདམས་པ་གསན། བཀའ་གདམས་པའི་དགེ་བཤེས་ལུང་མོ་བ་སོགས་ལས་བློ་སྦྱོང་སོགས་བཀའ་དང་གདམས་ངག་རྒྱ་ཆེན་གསན། འགྲོ་མགོན་ཕག་མོ་གྲུ་པའི་དྲུང་དུ་ཐོག་མར་ཚོགས་ཆོས་ཐུན་བཞི་ཙམ་དང་། ཕྱིས་སླར་བྱོན་ནས་ལོ་ལྔའི་རིང་བཀའ་བརྒྱུད་གོང་མ་རྣམས་ཀྱི་རྣམ་ཐར་དང་། བཀའ་གདམས་མན་ངག་མང་དུ་གསན། དེ་རྗེས་བླ་མའི་བཀའ་བཞིན་ཁམས་སུ་བྱོན། རབ་བྱུང་གསུམ་པའི་མེ་ཕག་སྤྱི་ལོ་1167ལོར་རང་ཡུལ་དུ་ཕེབས་ཤིང་། སྨར་ཁམས་སྒང་གི་གདམ་སྟེང་སྟེ་དེང་བོད་རང་སྐྱོང་ལྗོངས་ཆབ་མདོ་ས་གནས་བྲག་གཡབ་རྫོང་གི་ཁོངས་སུ་བྱོན་ནས་ཤཱ་དགོན་པ་བཏབ། དགེ་འདུན་ཉིས་སྟོང་ཙམ་རྒྱུན་དུ་འདུས། དེའི་སློབ་མའི་གཙོ་བོ་ཡང་དགོན་པ་ཡེ་ཤེས་རྒྱལ་མཚན་གྱིས་འདམ་སྟེང་ཡང་དགོན་དུ་སྒྲུབ་པ་མཛད་ཅིང་། ཡང་དགོན་གྱི་གདན་ས་བསྐྱངས། གཞན་ཡང་རྨོག་སྤྱན་སྔ་རིན་པོ་ཆེ། ཤྭ་དབུ་རྩེ་པ། རིན་ཆེན་གླིང་པ། སྤང་མཁན་ཆེན་འོད་ཟེར་བླ་མ། འགྲོ་མགོན་ཤིང་མགོ་རས་པ་སོགས་མང་དུ་བྱོན་ནས་སྨར་ཚང་བཀའ་བརྒྱུད་པའི་སློབ་རྒྱུན་མང་དུ་སྤེལ། ཕྱིས་སྟག་བླ་རྣམས་ཀྱིས་ཆོས་བརྒྱུད་བཟུང་བ་དཔལ་ཡུལ་བ་ལ་བྱིན་བརྒྱུད་འདྲེས་པའོ།
II.1.2.10 Yelpa Kagyü
།བཅུ། ཡེལ་པ་བཀའ་བརྒྱུད།
ཡེལ་པ་བཀའ་བརྒྱུད་ཀྱི་སྲོལ་གཏོད་པ་ཡེལ་པ་གྲུབ་ཐོབ་ཡེ་ཤེས་བརྩེགས་པ་ནི། ཡབ་སྒོམ་པ་ཨ་འབར་དང་། ཡུམ་དགོངས་པ་བཟའ་བཙུན་མ་སྒྲོན་ལྕམ་གཉིས་ཀྱི་སྲས་བཞིའི་དང་པོར། རབ་བྱུང་གཉིས་པའི་ཤིང་སྟག་སྤྱི་ལོ་1134ལོར་མདོ་ཁམས་ཀྱི་ཟླ་སིང་ལུང་དང་སར་སྐུ་འཁྲུངས། དཔལ་རྒ་ལོ་དང་མཇལ་ནས་ལུང་བསྟན་མཛད་ཅིང་ཆོས་ཀྱང་མང་དུ་གནང་། དགུང་ལོ་བཅུ་དགུར་མཁན་པོ་འབྲོམ་ལས་རབ་ཏུ་བྱུང་། མཚན་ལ་ཡེ་ཤེས་བརྩེགས་པ་ཞེས་གསོལ། དགུང་ལོ་ཉི་ཤུར་མཁན་པོ་དེ་རང་གི་དྲུང་དུ་བསྙེན་པར་རྫོགས། དགུང་ལོ་ཉེར་གསུམ་པར་དབུས་སུ་བྱོན། བླ་མ་ཆ་པའི་དྲུང་དུ་དབུ་མ་དང་སྡེ་སྣོད་གསན་སྦྱོང་མཛད། བླ་མ་རྔོག་ལས་རྔོག་པའི་ཆོས་སྐོར་དབང་རྒྱུད་མན་ངག་དང་བཅས་པ་རྫོགས་པར་གསན། དགུང་ལོ་ཉེར་དགུ་པ་སྟེ་རབ་བྱུང་གསུམ་པའི་ཆུ་རྟ་སྤྱི་ལོ་1162ལོར་ཕག་གྲུ་རྡོ་རྗེ་རྒྱལ་པོའི་ཞབས་ལ་གཏུགས། ཆོས་ཁྲིད་གསན་ཞིང་བསྒོམས་པས་དབུ་མའི་ལྟ་བ་ཐུགས་ལ་འཁྲུངས། ཁམས་པ་སྟོན་པའི་དགེ་སྦྱོར་ལུགས་བཟང་གསུངས་ནས་བླ་མ་ཡང་ཐུགས་ཤིན་ཏུ་དགྱེས། སྤྱིར་སངས་རྒྱས་ཡེལ་པས་འགྲོ་མགོན་ཕག་མོ་གྲུ་པའི་དྲུང་དུ་ལོ་བདུན་བཞུགས་ནས་བཀའ་བརྒྱུད་སྤྱི་དང་། ཁྱད་པར་དུ་ཕག་གྲུ་བཀའ་བརྒྱུད་པའི་བཀའ་གདམས་མན་ངག་མ་ལུས་པ་གསན་ནས་མཁས་པའི་དབང་པོར་གྱུར། དགེ་བཤེས་ཕག་མོ་གྲུ་པས་ལུང་བསྟན་པ་བཞིན་ཁམས་སུ་ཕེབས། དགུང་ལོ་སོ་བརྒྱད་པ་སྟེ་རབ་བྱུང་གསུམ་པའི་ལྕགས་ཡོས་སྤྱི་ལོ་1171ལོར་ཁམས་སུ་ཡེལ་ཕུག་དགོན་པ་ཕྱག་བཏབ། དངུལ་སྐུ་རྣམ་གཉིས་སོགས་ནང་རྟེན་གང་ལེགས་བཞེངས་ཏེ་བཀའ་བརྒྱུད་པའི་བསྟན་པ་རྒྱ་ཆེར་སྤེལ། སངས་རྒྱས་ཡེལ་པས་ལོ་བཅོ་བརྒྱད་རིང་ཡེལ་ཕུག་ཏུ་བཞུགས་ནས་བསྟན་པའི་བདག་པོ་མཛད། དགེ་འདུན་གྱི་སྡེ་བཙུགས། ཐུན་མོང་མ་ཡིན་པའི་རང་ལུགས་ཡེལ་པ་བཀའ་བརྒྱུད་པའི་སྲོལ་གཏོད། དེ་ནས་དགུང་ལོ་ལྔ་བཅུ་ང་ལྔར་ཕེབས་པ་རབ་བྱུང་གསུམ་པའི་ས་སྤྲེལ་སྤྱི་ལོ་1188ལོར་རྟ་རྣ་དགོན་པ་ཕྱག་བཏབ། དགུང་ལོ་ང་དགུར་ཕེབས་པ་རབ་བྱུང་གསུམ་པའི་ཆུ་བྱི་སྤྱི་ལོ་1192ལོར་ལྷོ་སྟོད་འཇང་གི་དགོན་པ་ཕྱག་བཏབ། སངས་རྒྱས་ཡེལ་ཕུག་པས་ཡེལ་ཕུག་དགོན་དང་། རྟ་རྣ་དགོན། ལྷོ་སྟོད་འཇང་གི་དགོན་པ་བཅས་གདན་ས་གསུམ་ལ་ལོ་ཉེར་བཞི་བཞུགས་པའི་རིང་རྣམ་མགུར་གསོལ་འདེབས་སོགས་ཀྱི་བསྟན་བཅོས་མང་དུ་བརྩམས། སློབ་མ་རྟོགས་ལྡན་གྱི་སྐྱེས་བུ་མང་དུ་བྱོན་པའི་ནང་ཁྱད་དུ་འཕགས་པ་ནི་མཁན་ཆེན་ཕུ་པ་དང་། བླ་འོད་གསལ་བ། ཁ་ཐར་ཡང་དགོན་པ། ལྡོང་འཇོང་བ་རྩེ་མོ། གསོལ་ཇ་བ་སྤང་ཁྱིམ་ལ་སོགས་པ་མང་དུ་བྱོན། དགུང་ལོ་དྲུག་ཅུ་རེ་གཅིག་ཏུ་ཕེབས་པ་རབ་བྱུང་གསུམ་པའི་ཤིང་སྟག་སྤྱི་ལོ་1194ལོར་དགོངས་པ་མྱ་ངན་ལས་འདས། སྐུ་གདུང་རྟ་རྣར་སྤྱན་དྲངས་ཏེ་སྐུ་འབུམ་བརྩིགས། དེ་རྗེས་ཡེལ་ཕུག་གི་གདན་ས་ལ་འབག་རྩེ་མོ་བཞུགས། སངས་རྒྱས་ཡེལ་ཕུག་པ་སྐུ་འདས་རྗེས་མཁན་ཆེན་ཕུ་པས་ཡེལ་ཕུག་དགོན་དང་། རྟ་རྣ་དགོན། ལྷོ་སྟོད་འཇང་གི་དགོན་པ་བཅས་གདན་ས་གསུམ་ཕྱོགས་རིས་མེད་པར་ལེགས་པར་བསྐྱངས། དེང་བྱང་རྟ་རྣ་དགོན་ཀཾ་ཚང་ལུགས་སུ་བསྒྱུར་ཟིན། མཁན་ཆེན་འདི་ཉིད་སྐུ་གཤེགས་རྗེས། སློབ་མ་ཡོན་བཙུན་དབོན་ས་དང་། བླ་མ་གྲགས་པ་འོད་ཟེར་སོགས་མང་དུ་བྱུང་ནས་ཡེལ་པ་བཀའ་བརྒྱུད་པའི་ཆོས་རྒྱུན་དང་སློབ་རྒྱུད་རྒྱས་པར་སྤེལ་ལོ།
II.1.2.11 Shuksep Kagyü
།བཅུ་གཅིག །ཤུག་གསེབ་བཀའ་བརྒྱུད།
ཤུག་གསེབ་བཀའ་བརྒྱུད་ནི། དགྱེར་སྒོམ་པ་ཚུལ་ཁྲིམས་སེང་གེའམ་དགྱེར་སྒོམ་ཆོས་ཀྱི་སེང་གེས་སྲོལ་གཏོད་པ་ཞིག་ཡིན་ཞིང་། ཁོང་ནི་ཡར་ལུང་ཤོང་ང་རྫོང་དུ་ཡབ་དམག་དཔོན་དཀོན་མཆོག་སྐྱབས་དང་། ཡུམ་རྒྱལ་ཚ་མ་མདོ་སྡེ་རྒྱན་གཉིས་ཀྱི་སྲས་སུ་རབ་བྱུང་གཉིས་པའི་ཤིང་བྱི་སྤྱི་ལོ་1144ལོར་སྐུ་འཁྲུངས། ཐོག་མའི་མཚན་ཆོས་ཀྱི་སེང་གེ་དང་། དགུང་ལོ་བཅུ་གཅིག་ལ་རབ་ཏུ་བྱུང་སྟེ། མཚན་ཚུལ་ཁྲིམས་སེང་གེ་ཞེས་གསོལ། ཁྲ་འབྲུག་གི་དཔོན་གཉེར་ཡང་མཛད། དགེ་བཤེས་ཧོར་གྱི་དྲུང་ནས་གསང་འདུས་ཀྱི་དབང་ཞུས་པས་གསང་མཚན་རྡོ་རྗེ་རྒྱལ་པོ་ཞེས་གསོལ། དེར་གསང་འདུས་ཀྱི་རྩ་འགྲེལ་ལ་སོགས་པ་གསན། དགུང་ལོ་བཅུ་དགུ་པ་རབ་བྱུང་གསུམ་པའི་ཆུ་རྟ་སྤྱི་ལོ་1162ལོར་འགྲོ་མགོན་ཕག་མོ་གྲུ་པ་རྡོ་རྗེ་རྒྱལ་པོའི་ཞབས་ལ་གཏུགས་ནས་ཐབས་ལམ་ཆོས་དྲུག་ལ་སོགས་པའི་གདམས་ངག་མ་ལུས་རྫོགས་པར་གསན། དེ་ནས་ཡུལ་དུ་རྒྱགས་ལེན་པར་ཕེབས་པའི་སྐབས་ཡབ་དགྲས་བཟུང་ནས་རྩོད་པ་ཆེན་པོ་ལངས་པ་དང༌། བླ་མ་འགྲོ་མགོན་ཡང་སྐུ་གཤེགས་པས་སྐྱོ་སྣང་རབ་ཏུ་སྐྱེས་ཏེ་མལ་ཀ་བ་ཅན་པ་མཇལ་བར་ཕེབས། ཟླ་བ་གཅིག་རིང་དབུ་སྔས་སྦྲེལ་ནས་བཀའ་བསྟན་གདམས་ངག་མང་དུ་གསན། དེ་རྗེས་འོལ་ཁར་ཕེབས་ནས་དྭགས་པོའི་སློབ་མ་རྣལ་འབྱོར་ཆེན་པོ་ཆོས་གཡུང་ལས་བཀའ་བརྒྱུད་ཆོས་དྲུག་ལ་སོགས་པའི་དོན་བརྒྱུད་ཀྱི་དབང་ཁྲིད་མ་ལུས་རྫོགས་པར་གསན་ཞིང་། སྒྲུབ་པ་རྩེ་གཅིག་ཏུ་མཛད་པས་གྲུབ་པ་ཐོབ། དགུང་ལོ་སོ་བརྒྱད་པ་རབ་བྱུང་གསུམ་པའི་ལྕགས་གླང་སྤྱི་ལོ་1181ལོར་སྙེ་ཕུར་ཤུག་གསེབ་དགོན་པ་བཏབ་ནས་འགྲོ་དོན་རྒྱ་ཆེར་སྤེལ། ཤུག་གསེབ་བཀའ་བརྒྱུད་ཅེས་པའི་ཐུན་མོང་མ་ཡིན་པའི་ལུགས་དེ་དར་ཁྱབ་ཏུ་ཕྱིན། དེ་ནས་གདན་ས་ཤུག་གསེབ་དགོན་དུ་ལོ་ཉི་ཤུ་རྩ་བཞི་བཞུགས་ཏེ་གདུལ་བྱ་འགྲོ་བའི་དོན་གང་ཟབ་མཛད་པ་དང་། སྟོད་ནས་རྒྱ་དང་། དམར་མཛོད་མ་བ། མཛོད་གསུམ། སྨད་ནས་རྟོགས་ལྡན་མི་གསུམ་སོགས་བྱུང་བ་སོགས་ཀྱི་སློབ་མ་རྣམས་ལ་རང་ལུགས་མན་ངག་མཐའ་དག་གི་སློབ་རྒྱུན་སྤེལ་བས་གདན་ས་དར་རྒྱས་གང་ལེགས་བྱུང་། མཐར་དགུང་གྲངས་རེ་གཅིག་ལ་ཕེབས་པ་རབ་བྱུང་གསུམ་པའི་ཤིང་བྱི་སྤྱི་ལོ་1204ལོར་དགོངས་པ་གཞན་དོན་དུ་གཤེགས།
དེ་ནས་དཔལ་རྒྱ་མཁར་པ་དང་། སངས་རྒྱས་དབོན། བྲག་འབུར་བ། ཤུག་གསེབ་རི་པ་གཞོན་ནུ་རྡོ་རྗེ། འབའ་ར་བ་རྒྱལ་མཚན་དཔལ་སོགས་ཀྱིས་གདན་ས་རིམ་པར་བསྐྱངས། དེ་རྗེས་ཀུན་མཁྱེན་ཀློང་ཆེན་རབ་འབྱམས་པ་དགུང་ལོ་སོ་གཅིག་ལ་ཕེབས་པ་སྤྱི་ལོ་1339ལོར་གངས་རི་ཐོད་དཀར་ཨོ་རྒྱན་རྫོང་གི་སྙེ་ཕུ་ཤུག་གསེབ་ཏུ་ཕེབས་ཤིང༌། ལོ་མང་རིང་སྒྲུབ་ཕུག་རྣམ་ལྔ་སོགས་སུ་དཀའ་སྤྱད་ཚད་མེད་ཀྱི་སྒྲུབ་པའི་རྒྱལ་མཚན་བཙུགས། དུས་དེ་ནས་བཟུང་དགོན་འདི་ཉིད་གསང་ཆེན་སྔ་འགྱུར་གྱི་བསྟན་པ་འཛིན་པའི་གདན་ས་ཁྱད་པར་ཅན་ཞིག་ཏུ་གྱུར། དེ་རྗེས་རྗེ་བཙུན་མ་ཆོས་ཉིད་བཟང་མོས་ཤུག་གསེབ་དགོན་དུ་རྒྱུན་བཞུགས་ཀྱིས་སློབ་མ་སུམ་བརྒྱ་ནས་མཐར་སྟོང་ཕྲག་ལྷག་བརྒལ་བ་བསྐྱངས་ཤིང༌། རི་ཁྲོད་ཁག་གི་སྒྲུབ་པ་དང་ལོ་གསུམ་མཚམས་པ་སོགས་དང་བཅས་པའི་བུ་སློབ་རྣམས་ལ་མན་ངག་སྙན་བརྒྱུད་ཀྱི་བཀའ་ཁྲིད་རྒྱ་ཆེར་བསྩལ། དུས་དེ་ཙམ་ནས་གངས་རི་ཐོད་དཀར་མ་གཏོགས་ཤུག་གསེབ་དགོན་འདི་བཙུན་མའི་དགོན་དུ་གྱུར་རོ།
II.1.2.12 Yazang Kagyü
།བཅུ་གཉིས། གཡའ་བཟང་བཀའ་བརྒྱུད།
གཡའ་བཟང་བཀའ་བརྒྱུད་ནི། ཟྭ་ར་བ་སྐལ་ལྡན་ཡེ་ཤེས་དང་། དེའི་སློབ་མ་གཡའ་བཟང་ཆོས་རྗེ་ཆོས་ཀྱི་སྨོན་ལམ་རྣམ་གཉིས་ཀྱིས་སྲོལ་གཏོད། དེ་གཉིས་ལས་ཟྭ་ར་བ་སྐལ་ལྡན་ཡེ་ཤེས་སེང་གེ་ནི། རབ་བྱུང་གཉིས་པའི་མཇུག་མཚམས་སུ་མོན་འགར་(འགར་མོང་མཁར་ཞེས་ཀྱང་འཁོད་)ཏེ་དེང་ལྷོ་ཁ་ས་ཁུལ་གྲ་ནང་རྫོང་རྣམ་སྲས་གླིང་ཡུལ་ཤོག་ཁོངས་སུ་སྐུ་འཁྲུངས། སྐུ་ན་ཆུང་ངུའི་དུས་ལུག་རྫི་གནང་སྟེ་བཞུགས་སྐབས་རི་ཁ་ནས་ཕག་མོ་གྲུ་པའི་དགོན་པའི་རི་མཐོང་བ་ཙམ་གྱི་སྒོམ་རང་བྱུང་དུ་ཤར། འགྲོ་མགོན་ཕག་མོ་གྲུ་པ་མཇལ་ཏེ་སྔར་སྒོམ་ཆེན་བཟང་པོ་ཞིག་ཡིན་ཚུལ་གསུངས། བླ་མ་ཕག་གྲུས་ངོ་སྤྲོད་གཅིག་བཏབ་པས་རྟོགས་པ་ཁྱད་པར་ཅན་རྒྱུད་ལ་སྐྱེས་ཤིང་། མཚན་སྐལ་ལྡན་ཡེ་ཤེས་སེང་གེ་ཞེས་གསོལ། འགྲོ་མགོན་ཕག་མོ་གྲུ་པའི་བུ་ཆེན་བཞིའི་ཡ་གྱལ་དུ་གྱུར། རབ་བྱུང་གསུམ་པའི་ས་སྟག་སྤྱི་ལོ་1158ལོར་གྲ་རབ་ཀྱི་ཞྭ་ར་དགོན་པ་བཏབ་པས། བླ་མ་འདི་ཉིད་ཀྱི་མཚན་དུའང་ཐ་ར་བ་ཞེས་འབོད། སློབ་མའི་གཙོ་བོ་གཡའ་བཟང་ཆོས་རྗེ་སོགས་མང་དུ་བྱུང་། མཐར་རབ་བྱུང་བཞི་པའི་མེ་ཡོས་སྤྱི་ལོ་1207ལོར་དགོངས་པ་གཞན་དོན་དུ་གཤེགས། དེའི་སློབ་མའི་གཙོ་བོར་གྱུར་པ། གཡའ་བཟང་ཆོས་རྗེ་ཆོས་ཀྱི་སྨོན་ལམ་ནི། ཡབ་མགོན་ནེ་དང་། ཡུམ་ཞང་ལྕམ་འབུམ་སྐྱིད་གཉིས་ཀྱི་སྲས་སུ་རབ་བྱུང་གསུམ་པའི་ས་གླང་སྤྱི་ལོ་1169ལོར་ཡར་སྟོན་གཙང་ཞལ་གྱི་དམར་མོར་སྐུ་བལྟམས། གདུང་རུས་གནུབས་ཡིན། དེ་ནས་འཆད་དཀར་དུ་སློབ་དཔོན་རྣམས་ལས་འདུལ་བ་དང་བཀའ་གདམས་མང་དུ་གསན། དགུང་ལོ་བཅོ་བརྒྱད་པར་རྒྱ་གར་དགོན་པར་ཕེབས་ཏེ་མཁན་པོ་ཀླུབས་དཀར་དང་། སློབ་དཔོན་གོང་གད་པ་གཉལ་དར་མ་གཟི་བརྗིད། གསང་སྟེ་སྟོན་པ་སློབ་དཔོན་མེ་ཆར་གྱིས་མཛད་དེ་བསྙེན་པར་རྫོགས། འདུལ་བའི་བཤད་པ་དང་། ལག་ལེན་གཙོ་བོར་བཟུང་བས་གནུབས་འདུལ་འཛིན་པར་གྲགས། དགུང་ལོ་སུམ་ཅུ་པ་ལ་འབུམ་ཞིང་དུ་འཇིག་རྟེན་བྱ་བ་མཐའ་དག་བཏང་ནས་སྒྲུབ་པ་མཛད། དེ་ནས་བསྟན་པའི་སྙིང་པོ་སྒྲུབ་པ་ཡིན་པར་གཟིགས་ཏེ་ཞྭ་ར་བ་སྐལ་ལྡན་ཡེ་ཤེས་སེང་གེའི་ཞབས་ལ་གཏུགས་ནས་ཕྱག་རྒྱ་ཆེན་པོའི་ཆོས་སྐོར་བུམ་པ་གང་བྱོའི་ཚུལ་དང༌། སྤྱན་རས་གཟིགས་དཔལ་མོ་ལུགས་ཆ་ལག་དང་བཅས་པའི་གདམས་པ་མ་ལུས་པ་གནང་། དེ་ནས་སྐལ་ལྡན་བྱང་ཡེ་ལས་ཞི་བྱེད་སོ་ལུགས་དང་། མ་གཅིག་གི་སྲས་ཁམས་བུ་ཡ་མེའི་དྲུང་ནས་གཅོད་ཡུལ་སྐོར་རྣམས་གསན་ནས་ཐུགས་ཉམས་སུ་བཞེས་པས་གཡའ་བཟང་པའི་ཁྲིད་ཆེན་བཞིར་ཡང་གྲགས། དེ་ནས་འབུམ་ཞིང་དང་། མདའ་དགོན། ལྷ་ཡུལ་ཤར་ཁང་ལ་སོགས་པར་ལོ་མང་སྒྲུབ་པ་མཛད་པས་ཉམས་རྟོགས་ཆེན་པོ་འཁྲུངས། དགུང་ལོ་སོ་བརྒྱད་པ་རབ་བྱུང་གསུམ་པའི་མེ་སྟག་སྤྱི་ལོ་1206ལོར་ཡར་ཀླུང་གཡའ་བཟང་དགོན་པ་བཏབ་སྟེ། དགོན་དེ་ཉིད་དུ་རྒྱུན་བཞུགས་མཛད། བླ་མ་ཟླ་ར་བ་དང༌། སྐལ་ལྡན་ཡེ་ཤེས། གཡའ་བཟང་ཆོས་རྗེ་ཆོས་ཀྱི་སྨོན་ལམ་རྣམས་ཀྱིས་གཡའ་བཟང་བཀའ་བརྒྱུད་ཀྱི་ཐུན་མོང་མ་ཡིན་པའི་སྲོལ་ཁ་གཏོད། དགེ་འདུན་གྱི་སྡེ་བཙུགས། བཀའ་བརྒྱུད་བཀའ་བཞིའི་འགྲོ་དོན་ལོ་ཉི་ཤུ་རྩ་བཞི་བར་དུ་བསྐྱངས། དུས་དེར་དྲང་སྲོང་རཱ་ཧུ་ལ་དངོས་སུ་མཇལ་དུ་ཕེབས་ནས་གཟའ་སྲུང་གི་མན་ངག་ཁྱད་པར་ཅན་ཕུལ། དེ་རྗེས་ཡོན་བདག་སོ་སོས་གདན་དྲངས་པ་ལྟར་གཉལ་སྟོད་སྨད་དང་། མཚོ་སྣ། ལྷོ་བྲག །ཡར་ཀླུང༌། ཨེ་སོགས་ཡུལ་གྲུ་མང་པོར་ཞབས་བཅགས་ནས་གདུལ་བྱ་འགྲོ་བའི་དོན་རྒྱ་ཆེར་བསྐྱངས། མཐར་དགུང་ལོ་དྲུག་ཅུ་རེ་ལྔ་པ་རབ་བྱུང་བཞི་པའི་ཆུ་སྦྲུལ་སྤྱི་ལོ་1233ལོར་དགོངས་པ་ཆོས་དབྱིངས་སུ་གཤེགས། དེའི་རྗེས་སུ་ཉེ་གནས་རིན་ཆེན་ཇོ་སྲས་དང་། དབོན་རིན་པོ་ཆེའམ་རྟོགས་ལྡན་རྒྱལ་པོ་དགེ་མཛེས་འོད། མཁར་ཆུ་པ་བསམ་གཏན་འོད། ཟ་ར་བ། གདོང་རྒྱུད་པ་ལ་སོགས་ཀྱིས་གདན་ས་བསྐྱངས། སློབ་མ་བུ་ཆེན་བཞིའམ་སྒོམ་ཆེན་བཞིར་གྲགས་པ་སྟེ། གཉལ་སྨད་དཔལ་རི་བ་སངས་རྒྱས་བྱ་སྒོམ་དང་། གོ་ར་གདོང་པ་སངས་རྒྱས་ལྟ་སྒོམ། གསེར་ལྟེ་བ་སངས་རྒྱས་སེ་སྒོམ། དགོན་གསར་བ་སངས་རྒྱས་རྒྱ་སྒོམ་སོགས་ཀྱིས་གཡའ་བཟང་པའི་སློབ་རྒྱུན་ཡུན་དུ་སྤེལ་བ་བཅས་སོ།
།མདོར་ན། བཀའ་བརྒྱུད་ཆེ་བཞི་ཆུང་བརྒྱད་རྣམས་རྩ་བའི་སྡོང་པོ་གཅིག་ལ་ཡན་ལག་གི་ཡལ་ག་སོ་སོར་དབྱེ་ནས་རང་རང་ལུགས་ཀྱི་བླ་མ་གོང་མ་ཚོས་གདུལ་བྱ་སྐྱོང་བའི་ཐབས་ལམ་གྱི་ཁྱད་ཆོས་ཙམ་ཡིན་པ་ཡང་། སྟག་ལུང་ངག་དབང་རྣམ་རྒྱལ་གྱི་ཆོས་འབྱུང་ངོ་མཚར་རྒྱ་མཚོར་མདོར་ན་ཉན་ཐོས་ཀྱི་ངེས་འབྱུང༌། ཐེག་ཆེན་གྱི་སེམས་བསྐྱེད། གསང་སྔགས་ཀྱི་དམ་ཚིག་རྣམ་པར་དག་པ་རྣམས་གཞིར་བཞག་པའི་སྟེང་དུ་བཀའ་བརྒྱུད་རིན་པོ་ཆེའི་ཁྱད་ཆོས་མར་རྔོག་གི་རྒྱུད་བཤད། མི་ལའི་སྙིང་རུས་དང་གདམས་ངག །སྒོམ་པ་བའི་ངོ་བོ་གད་དར། ཀརྨ་པའི་རླུང་སེམས་དབྱེར་མེད། ཞང་གི་ལམ་མཆོག་མཐར་ཐུག །འབའ་རོམ་པའི་བསྲེ་འཕོ་གསེབ་ལམ། ཕག་གྲུའི་གསང་སྔགས། སྟག་ལུང་པའི་རྣམ་ཐར་སོ་དགུ། འབྲི་གུང་པའི་སྡོམ་གསུམ་གནད་གཅིག །གཙང་པ་རྒྱ་རས་ཀྱི་རྟེན་འབྲེལ་དང་རོ་སྙོམས། ལོ་རྒོད་ཀྱི་མོས་གུས་དང་ཞེན་ལོག་རྣམས་ནི་ཆ་མཐུན་ཁྱད་འཕགས་ཞེས་རེ་རེ་ལ་ཡང་ཐམས་ཅད་ཚང་བར་ཡོད་མོད་ཀྱི། གང་ལ་རྩལ་དུ་བཏོན་ནས་སློབ་མ་འཁྲིད་ཅིང་སྐྱོང་བར་མཛད་པའི་ཕྱིར་ཁྱད་པར་གྱི་འབྱེད་ཆོས་སུ་བཞག་ཏུ་རུང་ཞེས་གསུངས་པ་ལྟར། བཀའ་བརྒྱུད་པའི་ནང་གསེས་བླ་མ་དམ་པ་སོ་སོའི་གདམས་པ་ཉམས་ལེན་གྱི་ཁྱད་ཆོས་ཅུང་མི་འདྲ་ཡང་། ཡོངས་རྫོགས་ལ་བཀའ་བརྒྱུད་རིན་པོ་ཆེའི་བསྟན་པ་ཞེས་འཇིག་རྟེན་གསུམ་ན་སྙན་པར་གྲགས་སོ།
།དེ་མིན་ཡང་མན་ངག་སྙེ་མ་ཆུང་བ་ལས་སློབ་དཔོན་སློབ་མའི་བསམ་ཤེས་ནས། །ཅི་རིགས་པ་ནི་ངེས་སྦྱོར་བ་ཞེས་འཁོད་པ་བཞིན་ཆོས་བརྒྱུད་སོ་སོའི་བླ་མ་གོང་མ་ཚོས་རང་རང་གི་སློབ་མའི་ཁམས་དང་མོས་པ་ཅི་རིགས་ལ་གཞིགས་ཏེ་ཕྲ་ཞིང་ཟབ་པའི་མཐར་ཐུག་གི་གནད་དོན་དེ་དག་སློབ་མར་ངེས་སྦྱོར་གནང་བའི་སྐབས་མཚོན་བྱེད་ཀྱི་ཚིག་རིས་དང་ཐབས་ལམ་མི་འདྲ་བ་ཡིན། དེས་ན་ཤངས་པ་བཀའ་བརྒྱུད་ཀྱི་ཕྱག་ཆེན་གའུ་མ་དང་དྭགས་པོའི་ལྷན་ཅིག་སྐྱེས་སྦྱོར། རྙིང་མའི་མན་ངག་རྫོགས་ཆེན། ས་སྐྱའི་གསལ་སྟོང་འཛིན་མེད། ཞི་བྱེད་ཀྱི་གཅོད། དགེ་ལྡན་པའི་དབུ་མའི་ལྟ་བ་ལ་སོགས་པ་དེ་དག་གི་མཐར་ཐུག་གི་ངེས་དོན་ལ་ཡང་གཅིག་ཏུ་བབས་ལ། དེ་དག་ཀུན་ཐར་པའི་རྒྱུར་གྲུབ་པ་ཡང་། འཇམ་དཔལ་མཚན་བརྗོད་དུ་གྲུབ་པའི་མཐའ་ནི་དེ་དག་ཀུན། གང་ཡིན་ཐར་བའི་རྒྱུར་གསུངས་པ་ཞེས་འཁོད་པ་དང་འདྲ་བ་ཡིན། མཐར་ཐུག་ནས་བརྗོད་ན་ཆོས་ལུགས་གང་ཞིག་གི་གྲུབ་མཐའ་ཅི་རིགས་པ་ཐམས་ཅད་ཀྱང་བདེན་གྲུབ་ཀྱིས་སྟོངས་པས་སྒྱུ་མ་རྨི་ལམ་ལྟ་བུ་ཞིག་ཡིན་པ་ཡང་། སྒྱུ་ལུས་འཛིན་པ་རང་གྲོལ་དུ་ཕྱི་རོལ་པ་དང་། དབུ་མ། རྫོགས་ཆེན། ཕྱག་རྒྱ་ཆེན་པོ་ལ་སོགས་པའི་གྲུབ་མཐའ་ཐམས་ཅད་ཀྱང་སྒྱུ་མ་རྨི་ལམ། དེ་བས་ལྷག་པའི་གྲུབ་མཐའ་གཅིག་ཡོད་ཀྱང་སྒྱུ་མ་རྨི་ལམ་ཡིན་པས། སྒྱུ་མ་ལས་ལོགས་སུ་གྲུབ་པའི་ཆོས་གང་ཡང་མེད་ཅིང་། སྒྱུ་མ་ལས་མཐོ་བ་གང་ཡང་མེད་དོ་ཞེས་གསུངས་པ་ལྟར་དང་། ཡང་རྗེ་བཙུན་ཀུན་དགའ་གྲོལ་མཆོག་གིས་ཀྱང་བྱིས་པའི་སྐྱེ་བོ་དག་སྣ་བསྡུར་བ་བཞིན་དུ་ཁྱོད་ཀྱི་འདི་དང་ངའི་འདི་ཞེས་སོ་སོར་འཛིན་སྟངས་ཕྱེ་སྟེ། རྙིང་མ་བ་དང་། བཀའ་གདམས་པ། ཞི་བྱེད་པ། ས་སྐྱ་པ། བུ་སྟོན། ཇོ་ནང་པ། དགེ་ལྡན་པ། བོ་དོང་པ་ཞེས་ཐ་དད་ཀྱི་ཞལ་བཞེས་དང་། བཤགས་འདེབས་རང་རང་གི་མོས་བློ་ཕྱོགས་ཅི་རིགས་སུ་བཅད་ནས་ཁོ་ཅག་འདི་དང་འདི་མཐུན། འདི་དང་ཕྱེད་མཐུན་འདི་དང་གཏན་མི་མཐུན་ཞེས་མང་དུ་ཞིང་བ་དག་མཐོང་མོད། བདག་ནི་གྲུབ་མཐའ་སྨྲ་བ་མཐའ་དག་དང་ཕྱིན་ཅི་ལོག་འབའ་ཞིག་ཏུ་འཆར་བའི་བློ་རིགས་འདི་ལྟ་བུར་སྣང་སྟེ། དེ་ཡང་ཞིབ་ཏུ་སྙད་ན། གྲུབ་པའི་མཐའ་ཞེས་འདབ་འདི་ནི་ཡི་གེ་ཡིན་ཏེ། དབུ་ཅན་དུ་བྲིས་ན་དབུ་ཅན་དུ་འོང་ལ། དབུ་མེད་དུ་བྲིས་ན་དབུ་མེད་དུ་འོང་བ་ཡིན་ནོ་ཞེས་གསུངས་པ་དེ་ནི་ཚད་མའི་གཏམ་ཁོ་ནར་སྣང་ངོ༌།

II.1.3 - The Dagpo Kagyü
།གསུམ་པ། དྭགས་པོ་བཀའ་བརྒྱུད་པའི་ལྟ་སྒོམ་རྣམ་གཞག་སྐོར།
སྒྲུབ་བརྒྱུད་རིན་པོ་ཆེ་འདི་ཉིད་ཀྱིས་རྒྱུ་ཕར་ཕྱིན་ཐེག་པའི་ལྟ་བ་གཏན་ལ་འབེབས་ཚུལ་གྱི་རྣམ་གྲངས་མཐའ་ཡས་པ་བརྗོད་ཀྱིས་མི་ལངས་ཀྱང་། གཙོ་ཆེར་མཐའ་བཞི་སྐྱེ་འགོག་གི་རིགས་པ་དང་། རྡོ་རྗེ་ཟེགས་མའི་གཏན་ཚིགས་ཉིད་ཀྱིས་ཐོག་མར་དཔྱད་སྒོམ་ཁོ་ན། བར་དུ་དཔྱད་འཇོག་ཟུང་འབྲེལ། མཐའ་མར་འཇོག་སྒོམ་ཁོ་ན་སོགས་ཀྱིས་སྒོམ་ཚུལ་དུ་མའི་སྒོ་ནས་མཐའ་བྲལ་དབུ་མ་ཆེན་པོའམ་ཆོས་ཉིད་ཕྱག་རྒྱ་ཆེན་པོའི་ལྟ་བ་སྟེ་ཆོས་ཀྱི་བདག་མེད་གཏན་ལ་འབེབས་པ་ནང་བསྟན་གྱི་གྲུབ་མཐའ་གཞན་རྣམས་དང་འདྲ་ཡང༌། སྐབས་འདིར་འབྲས་བུ་རྡོ་རྗེ་ཐེག་པའི་ཐབས་གྲོལ་གྱི་གདམས་པ་ཐུན་མོང་མ་ཡིན་པ་ཕྱག་རྒྱ་ཆེན་པོ་དང་ནཱ་རོ་ཆོས་དྲུག་གི་སྐོར་ཅུང་ཙམ་འཆད་པ་ལ།
II.1.3.1 Mahamudra, the path of liberation
གཅིག །གྲོལ་ལམ་ཕྱག་རྒྱ་ཆེན་པོའི་སྐོར།
དེ་ཡང་རྗེ་མར་པས་ལྟ་བའི་ཡང་རྩེ་ཕྱག་རྒྱ་ཆེ། །སེམས་གནད་དུ་བསྣུན་པའི་བརྡ་དོན་ཞིག་ཅེས་གསུངས་པ་ལྟར་དྭགས་པོ་བཀའ་བརྒྱུད་ཅེས་ཡོངས་སུ་གྲགས་པའི་སྒྲུབ་བརྒྱུད་རིན་པོ་ཆེ་འདི་ཉིད་ཀྱི་སེམས་གནད་དུ་བསྣུན་པའི་ལྟ་བའི་ཡང་རྩེ་ཕྱག་རྒྱ་ཆེན་པོའི་སྐོར་བརྗོད་པ་ལ།
༡ ངོ་བོ་དང་སྒྲ་དོན་བསྟན་པ།
ཕྱག་རྒྱ་ཆེན་པོ་ཞེས་བྱ་བ་འདི་ཉིད་ཀྱི་ཚིག་གི་ཐ་སྙད་ནི་སྤྱིར་སྔགས་ཁོ་ནར་གསུངས་ཤིང༌། སྒྲ་དོན་ནི་ཟུང་དུ་འཇུག་པ་ལ་ཕྱག་རྒྱ་དེའི་རང་བཞིན་གྱིས་ཆོས་ཐམས་ཅད་ལ་ཁྱབ་པས་ཆེན་པོ་སྟེ། ཆོས་ཐམས་ཅད་དེ་ལས་མི་འདའ་བ་དང་། ལེགས་སྦྱར་སྐད་དུ། མ་ཧཱ་མུ་དྲ་སྟེ། དེ་ལ་མུ་དྲ་ཞེས་པ་མི་འདའ་བའམ། མི་ཕྱེད་པའམ། མི་རྟིང་པའམ། འདུ་བྲལ་མེད་པ་ལ་འཇུག་སྟེ། དེས་ན་སྣང་སྲིད་འཁོར་འདས་ཀྱི་ཆོས་ཐམས་ཅད་རང་ས་རང་ས་ནས་སོ་མ་ཉམས། མདོག་མ་བསྒྱུར། དུས་གསུམ་དུས་མེད་དུ། རང་བྱུང་ལྷན་ཅིག་སྐྱེས་པའི་ཡེ་ཤེས་ལས་མི་འདའ་བས་ཕྱག་རྒྱ་མ་ཧཱ་ཞེས་པ། དེའི་གོང་ན་གཞན་མེད་པས་ཆེན་པོའོ་ཞེས་དང་། རྗེ་སྒམ་པོ་བས་སྣང་སྲིད་འཁོར་འདས་རྣམས་ཆོས་ཉིད་སྐྱེ་བ་མེད་པའི་ངང་ལས་མི་འདའ་བར་རྟོགས་པ་ནི་ཕྱག་གོ ཅིར་སྣང་ཅི་སྲིད་ཐམས་ཅད་གཉུག་མའི་དོན་ལས་མི་འདའ་བས་རྒྱའོ། ཆོས་ཉིད་རང་གྲོལ་དུ་རྟོགས་པས་ན་ཆེན་པོའོ་ཞེས་སོགས་གསུངས་པ་བཞིན། སངས་རྒྱས་བསྟན་པའི་གཞི་སོ་སོར་ཐར་པ་ནས་དཔལ་གསང་བ་འདུས་པའི་བར་གྱི་ལྟ་སྒོམ་ཐམས་ཅད་མི་འདའ་བར་བྱེད་པའི་རྒྱ་དང་། དེའི་གོང་རོལ་ན་གཞན་མེད་པས་ཆེན་པོ་ཡིན། ཕྱག་ཅེས་པའི་སྒྲ་ནི་འཁྲུལ་གཞི་བསལ་བའི་ཕྱིར་ལོ་ཙཱ་བ་རྣམས་ཀྱིས་བླ་དྭགས་སུ་བསྣན་ནས་ཕྱག་རྒྱ་ཞེས་སུ་བསྒྱུར་བ་འགོས་ལོ་སོགས་ཀྱིས་བཞེད་ཀྱང་། གོང་དུ་རྗེ་སྒམ་པོ་བས་སྣང་སྲིད་འཁོར་འདས་ཀུན་སྐྱེ་མེད་དུ་རྟོགས་པར་གསུངས་པ་དང་། ཀརྨ་རང་བྱུང་ཀུན་ཁྱབ་ཀྱིས་ཕྱག་ནི་ལག་པའི་ཞེ་ཚིག་སྟེ། སྟོང་པའི་རང་བཞིན་གྱི་རྟགས་ཐམ་དང་འབྲེལ་བ་དང་། སྣང་ཚུལ་ཐམས་ཅད་བདེན་གྲུབ་ཀྱིས་སྟོངས་ཞེས་པའི་དོན་ཡིན་པར་གསུངས། དེ་ལྟར་སློབ་དཔོན་ལྷན་ཅིག་སྐྱེས་པའི་རྡོ་རྗེས་མཛད་པའི་དེ་ཁོ་ན་ཉིད་བཅུ་པའི་འགྲེལ་པར་ཡང་། ངོ་བོ་ཤེས་རབ་ཀྱི་ཕ་རོལ་དུ་ཕྱིན་པ། སྔགས་དང་རྗེས་སུ་མཐུན་པ། མིང་ཕྱག་རྒྱ་ཆེན་པོ་ཞེས་སུ་གྲགས་པའི་ཁྱད་པར་གསུམ་དང་ལྡན་པའི་གདམས་པ་མཆོག་འགྱུར་འདི་ཉིད་ནི་ཚིག་གི་བརྒྱུད་པ་ཙམ་མ་ཡིན་པར་དོན་གྱི་བརྒྱུད་པ་མཐར་ཐུག་སྟེ་ཕྱག་རྒྱ་ཆེན་པོ་དྲི་མ་མེད་པ་རྟོགས་པའི་བརྒྱུད་པ་བར་མ་ཆད་པ་བཀའ་བརྒྱུད་ཆེ་བཞི་ཆུང་བརྒྱད་སྤྱིའི་གདམས་ངག་གི་གནད་གལ་ཆེན་ཞིག་ཡིན་པས། བཀའ་བརྒྱུད་པའི་ཆོས་བརྒྱུད་འཛིན་པ་སྤྱི་ལ་གདམས་པའི་མིང་ནས་བཏགས་ཏེ་ཕྱག་ཆེན་པ་ཞེས་སུའང་འབོད།
༢ དབྱེ་བ་དང་ཉམས་ལེན་རགས་བཤད།
ཕྱག་རྒྱ་ཆེན་པོ་ལ་དབྱེ་ན། གཞི་ལམ་འབྲས་གསུམ་སྟེ། ཆོས་ཐམས་ཅད་ཀྱི་ཆོས་ཉིད་གདོད་མ་ནས་སྤྲོས་པ་ཐམས་ཅད་དང་བྲལ་བ་རང་བཞིན་གྱིས་འོད་གསལ་བའི་སྟོང་པ་ཉིད་འཁོར་འདས་ཀུན་གྱི་ཁྱབ་བདག་ཏུ་གྱུར་པ་དང་། བྱེ་བྲག་ཏུ་གསལ་ཞིང་དྭངས་ལ་ངོས་གཟུང་རྒྱུ་མེད་པའི་རང་སེམས་ཀྱི་གཤིས་གདོད་མའི་གནས་ལུགས་བསམ་བརྗོད་ཀྱི་ཡུལ་ལས་འདས་པ་སྟེ། ཕྱག་ཆེན་གངྒ་མར་དེ་ལྟར་སེམས་ཀྱི་རང་བཞིན་གདོད་ནས་ནམ་མཁའ་འདྲ་ཞེས་དང་། སེམས་ཀྱི་རང་བཞིན་ཁོ་ནར་མ་ཧཱ་མུ་དྲ་ཞེས་སུ་བརྗོད་དེ། མ་ཧཱ་མུ་དྲའམ་ཕྱག་རྒྱ་ཆེན་པོའི་དོན་ནི་གང་ཡང་དེའི་ཕྱི་རོལ་ཏུ་མི་གནས་པས་སོ་ཞེས་གསུངས་པ་ལྟར། སེམས་ཀྱི་རང་བཞིན་ཁོ་ནར་ཕྱག་རྒྱ་ཆེན་པོ་ཞེས་སུ་འབོད་པ་གཞི་ཕྱག་རྒྱ་ཆེན་པོ་དང་། ཐོས་བསམ་སྒོམ་གསུམ་སོགས་ཀྱི་ལམ་ལ་བརྟེན་ནས་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གདོད་མ་ནས་སྐྱེ་འགག་གནས་གསུམ་གྱི་རང་བཞིན་མེད་པ་འོད་གསལ་སྟོང་པ་ཉིད་དུ་གཏན་ལ་ཕབ་ནས་རྟོགས་ཤིང་། མྱོང་ཐོག་ཏུ་རང་ངོ་ཤེས་པའི་ལྟ་སྒོམ་ཁྱད་པར་ཅན་ནི་ལམ་གྱི་ཕྱག་ཆེན། དེ་ལྟ་བུའི་གཞིའི་ཕྱག་ཆེན་དེ་ཉིད་ལམ་ཕྱག་ཆེན་གྱིས་གོམས་པར་བྱས་པ་ལས་ནམ་མཁའ་གཡའ་དག་པ་ལྟར་གཉིས་སྣང་ཕྲ་ཞིང་ཕྲ་བའང་དག་ནས་སྒྲིབ་བྲལ་དག་པ་གཉིས་ལྡན་གྱི་ཡེ་ཤེས་འབའ་ཞིག་ཏུ་གྱུར་པ་ནི་འབྲས་བུའི་ཕྱག་ཆེན་ནོ།
།ཡང་ཕྱག་རྒྱ་ཆེན་པོ་ལ་མདོ་སྔགས་གཉིས་སུ་ཕྱེ་བ་ནི། རྗེ་སྒམ་པོ་བས་ཏིང་ངེ་འཛིན་རྒྱལ་པོའི་ནང་གི་ཆོས་རྣམས་ཀུན་གྱི་རང་བཞིན་ཕྱག་རྒྱ་ཆེ་ཞེས་པ་སོགས་ཀྱི་མདོ་ལུང་མང་དུ་དྲངས་ནས་ཕྱག་རྒྱ་ཆེན་པོར་ཕར་ཕྱིན་ཐེག་པའི་ལུགས་དང་སྔགས་ཀྱི་ལུགས་གཉིས་སུ་ཕྱེ་བས། ཕྱིས་པཎ་ཆེན་བློ་བཟང་ཆོས་རྒྱལ་གྱིས་ཀྱང་དངོས་གཞི་ཕྱག་རྒྱ་ཆེན་པོ་ལ། །བཞེད་ཚུལ་མང་དུ་འདུག་ན་ཡང༌། །མདོ་སྔགས་དབྱེ་བས་གཉིས་སུ་ཡོད་ཅེས་གསུངས་པ་ཡིན། དེ་ལས་དང་པོ་མདོ་ལུགས་ཀྱི་ཕྱག་ཆེན་ནི། ཐོག་མར་སྒོམ་པ་སྐྱེ་བར་བྱེད་པ་སྔོན་འགྲོ་བཞི་སྦྱོར། སྐྱེས་པ་ལམ་དུ་བྱེད་པ་ངོ་སྤྲོད་རྣམ་གསུམ་བཅས་ཀྱི་ཏིང་ངེ་འཛིན་དང་། གོལ་ཤོར་གྱི་འཕྲང་བཅད། རྣལ་འབྱོར་བཞི་སོགས་རིམ་གྱིས་ཉམས་སུ་ལེན་པ་སྟེ། སེམས་ཀྱི་ངོ་བོའི་སྟེང་དུ་རྩེ་གཅིག་ཏུ་འཇོག་པའི་མི་རྟོག་པ་བསྒོམས་ཏེ་གནས་པ་བསྒྲུབས། དེ་ལྟར་བསྒྲུབས་པའི་དམིགས་པ་ལ་གནས་པའི་སེམས་གསལ་རིག་དེ་ལུས་ཀྱི་ཕྱི་ནང་གང་དུ་ཡོད་མིན་སེམས་འཚོལ་རྒྱབ་པས་སེམས་ཀྱི་ངོ་བོ་གཅིག་ཀྱང་མ་རྙེད་པའི་བདེན་མེད་དུ་ངེས་པའི་ཚེ། བདེན་མེད་དེས་ཁྱད་པར་དུ་བྱས་པའི་སེམས་ཀྱི་ངོ་བོའི་སྟེང་དུ་རྩེ་གཅིག་ཏུ་འཇོག་པ་སྟོང་ཉིད་མ་ཡིན་འགག་གི་ཚུལ་དུ་སྒོམ་པ་ཡིན་པར་བཞེད། གཉིས་པ་སྔགས་ལུགས་ཀྱི་ཕྱག་རྒྱ་ཆེན་པོ་ནི། རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་བདེ་ཆེན་གྱི་འོད་གསལ་ལ་བཞེད་ཅིང་། དེ་ནི་གྲུབ་པ་སྡེ་བདུན་དང་། སྙིང་པོ་སྐོར་གསུམ་དུ་གྲགས་པའི་བརྗོད་བྱའི་གཙོ་བོ་རྣལ་འབྱོར་བླ་མེད་ཀྱི་རྒྱུད་སྡེ་མཐའ་དག་གི་སྙིང་པོའི་དོན་སྟོང་པ་ཉིད་དོ། དེ་སྒོམ་པ་ལ་ཐོག་མར་གཉུག་སེམས་མངོན་དུ་བྱ་དགོས་ཤིང་། དེ་ལ་རླུང་དབུ་མར་ཞུགས་གནས་ཐིམ་གསུམ་དགོས་པས། གཉུག་སེམས་ཀྱི་ངོ་བོ་གཏན་ལ་ཕབ་སྟེ་དེའི་སྟེང་དུ་རྩེ་གཅིག་ཏུ་བཞག་པས་རླུང་དབུ་མར་ཞུགས་གནས་ཐིམ་གསུམ་འབྱུང་། དེའི་སྟོབས་ཀྱིས་ལྟེ་གསང་གི་གཏུམ་མོ་འབར་བ་ལ་བརྟེན་ནས་ཞུ་བ་དེས་དྲངས་པའི་དགའ་བཞི་སྐྱེས་ཏེ་གཉུག་སེམས་བདེ་བ་ཆེན་པོའི་ངོ་བོར་སྐྱེ། དེ་ཡུལ་སྟོང་པ་ཉིད་དང་དབྱེར་མེད་དུ་གྱུར་པའི་བདེ་སྟོང་གི་ཡེ་ཤེས་ལ་རྩེ་གཅིག་ཏུ་བཞག་པས་རྣལ་འབྱོར་བཞི་རིམ་གྱིས་བགྲོད་དེ་མཆོག་འགྲུབ་པར་འགྱུར་ལ། དེ་ལྟ་བུའི་བདེ་བ་དང་སྟོང་པ་ཐབས་ཤེས་ཟུང་དུ་འབྲེལ་ནས་ཕྱག་རྒྱ་ཆེན་པོ་བསྒོམ་པ་ལ་དཀར་པོ་ཆིག་ཐུབ་ཅེས་པའི་ཐ་སྙད་ཀྱང་མཛད།
ཕྱག་རྒྱ་ཆེན་པོ་ཉམས་སུ་ལེན་པའི་གང་ཟག་ལ་དབང་པོ་རྣོ་བརྟུལ་གཉིས་ལས། རླུང་དབུ་མར་སྡུད་པའི་ལམ་བསྒོམ་མི་ནུས་པའི་དབང་བརྟུལ་གྱིས་རེ་ཞིག་ཕ་རོལ་ཏུ་ཕྱིན་པའི་ལུགས་ཀྱི་ཕྱག་ཆེན་སྒོམ་པར་བྱེད་པ་ཡིན་ལ། དབང་རྣོན་ལའང་གཉིས་ཏེ། ཚེ་སྔོན་མའམ་ཚེ་སྟོད་ཡན་ལ་ལམ་སྔ་མ་སྔ་མ་ལ་སྦྱངས་ནས་རླུང་དབུ་མར་འཇུག་པར་བྱང་བ་ཞིག་ཡིན་ན། ལམ་ཐུན་མོང་བ་དང་། དབང་དང་། བསྐྱེད་རྫོགས་སོགས་སྔོན་དུ་འགྲོ་དགོས་ཤིང་། དེ་ལྟ་བུ་ལ་གང་ཟག་རིམ་གྱེས་པའི་ཐ་སྙད་མཛད་དེ། ཆོས་དྲུག་ཀ་དཔེ་མ་ལས་སེམས་ཅན་དང་པོའི་ལས་ཅན་ལ། །རིམ་གྱེས་པར་ནི་བསྟན་པར་བྱ་ཞེས་དང་། ཡང་དང་པོ་ཉིད་ནས་སེམས་ཀྱི་ངོ་བོའི་སྟེང་དུ་རྩེ་གཅིག་ཏུ་བཞག་སྟེ་བསྒོམས་པ་ཉིད་ཀྱིས་རླུང་དབུ་མར་ཞུགས་གནས་ཐིམ་བྱས་པས་གཉུག་སེམས་མངོན་སུམ་དུ་ཉམས་སུ་མྱོང་བར་འགྱུར་བ་ལ་གང་ཟག་ཅིག་ཅར་བའི་ཐ་སྙད་མཛད་དེ། ཆོས་དྲུག་ཀ་དཔེ་ཉིད་ལས་དེས་ན་སྦྱངས་པའི་འཕྲོ་ཅན་ལ། །ཅིག་ཅར་བ་ནི་སྟོན་པར་མཛད་ཅེས་ཕྱག་རྒྱ་ཆེན་པོ་དེ་ཉིད་ཉམས་སུ་ལེན་སྐབས་མདོ་སྔགས་ཀྱི་ལུགས་གཉིས་ལས་ངོ་མཚར་བའི་སྙིང་པོའི་ལུགས་ཞེས་ཟབ་མོའི་སྙིང་པོ་བཙན་ཐབས་སུ་རྟོགས་པའི་ལམ་ཞིག་ཡིན་པ་སྟེ། རྟོགས་ལྡན་གྱི་བླ་མས་སྐལ་ལྡན་གྱི་སློབ་མ་ཆེས་དབང་རྣོན་དུ་གྱུར་པ་ལ་རྡོ་རྗེ་ཡེ་ཤེས་ཀྱི་དབང་གི་བྱིན་རླབས་འབེབས་པ་ཙམ་གྱིས། ཐ་མལ་ཤེས་པ་སྙིང་དབུས་སུ་སད་ནས་རྟོགས་གྲོལ་དུས་མཉམ་དུ་འགྱུར་བས་སྤྲོས་བཅས་ཀྱི་ཐབས་དང་སྦྱངས་པའི་རྩོལ་བ་མ་ལྟོས་པར་དབང་པོ་རབ་སྨིན་གྲོལ་དུས་གཅིག་ཏུ་སྐྱེ་བའི་ལམ་མཆོག་བླ་ན་མེད་པ་ཞིག་ཡིན་པ་སོགས་ལ་དམིགས་ནས། རྗེ་མར་པས་ཀྱང་ཕྱག་རྒྱ་ཆེན་པོ་ངོ་མཚར་ཆེ། །གཅིག་ཆོད་ཀྱི་གདམས་པ་བློ་རེ་བདེ་ཞེས་གསུངས་པའོ།
༣ །ཕྱག་ཆེན་བོད་དུ་བསྒྱུར་བའི་བརྒྱུད་པ།
དེ་ཡང་ཆོས་རྗེ་རྒོད་ཚང་བའི་ཞལ་ནས་རྒྱལ་བ་ཤཱཀྱ་ཐུབ་པའི་བསྟན་པ་འདི་ལ་ཕྱག་རྒྱ་ཆེན་མོ་ཞེས་ལམ་ཕུལ་དུ་བྱུང་བར་མགོ་འདོན་མཁན་བྲམ་ཟེ་ཆེན་པོ་ས་ར་ཧར་གདའ་བ་བུ། དེའི་ལུགས་འཛིན་པ་རྒྱ་གར་ན་རྗེ་རི་ཁྲོད་ཞབས་ཡབ་སྲས་ཡིན་ཞེས་གསུངས་པ་ལྟར། ཡབ་རི་ཁྲོད་ཞབས་ཀྱི་ལུགས་སྲས་མི་སྲིད་པས་བཟུང་ནས་སློབ་མ་རྣམས་ལ་ཕྱག་རྒྱ་ཆེན་པོའི་མན་ངག་སྟོན་པས་འཛམ་བུའི་གླིང་ཐམས་ཅད་དུ་ཁྱབ། ཕྱག་རྒྱ་ཆེན་པོ་སྟོད་ལུགས་པ་ཚོས་ཇོ་བོ་མཻ་ཏྲི་པ་འི་སློབ་མ་རྣམས་ལས་ཕྱག་རྒྱ་ཆེན་པོ་བོད་དུ་འགྱུར་བ་ལ་སྔ་ཕྱི་བར་གསུམ་བཤད་དེ། སྔ་མ་སྐོར་ནི་རུ་པ་ལས་བརྒྱུད་པ་སྟེ། མངའ་བདག་མཻ་ཏྲི་པ་ས་རྗེ་བཙུན་ཀ་རོ་པ། དེས་སྐོར་ནི་རུ་པ་ལ་བརྒྱུད་པ་ཡིན། བར་པ་ལ་སྟོད་སྨད་གཉིས་ལས། སྟོད་འགྱུར་ནི་རྒྱ་གར་ཕྱག་ན་བོད་དུ་འབྲོག་ཇོ་སྲས་ཀྱིས་སྤྱན་དྲངས་ཏེ་གཙང་གི་ཆུ་སྒོར་བཞུགས་ནས་ལྷ་རྗེ་གཙང་ཤོད་པ། ཤེ་སྟོན་བྱང་འབར། སྤུ་ཧྲངས་ནག་པོ་ཤེར་དད། ནག་ཚོ་ཚུལ་ཁྲིམས་རྒྱལ་བ། རྨ་བན་ཆོས་འབར་སོགས་བོད་སྟོན་ཆེན་པོ་སུམ་ཅུ་ལ་གྲུབ་སྙིང་ཕྲ་མོ་དང་བཅས་པའི་གཞུང་དང་། བྲུལ་ཚོ་དགུ་གསུམ་ཉི་ཤུ་རྩ་བདུན་ཕྱག་རྒྱ་བཞིས་བཅིངས་པ་སོགས་གནང་། སྨད་འགྱུར་ཨ་སུ་སྟེ་བལ་པོ་སྐྱེ་མེད་དུ་གྲགས་པས་དབུས་སུ་ཚེ་ཕྱིད་པར་མཛད་ནས་སློབ་མ་སྒོམ་ཀ་བ་བཞི། གདུང་དྲུག །ཡོར་པོ་བའི་བུ་གསུམ། དམག་པ་སྒང་པ་ལ་སོགས་པར་གསུངས་པ་རྣམས་སོ། །ཕྱི་འགྱུར་ནི་མངའ་རིས་པ་ནག་པོ་ཤེར་དད་ཀྱིས་རྒྱ་གར་དུ་བྱོན་ནས་ཕྱག་རྒྱ་སྐུ་བགྲེས་ཁ་དང་མཇལ། ཕྱིས་བོད་དུ་བྱོན་ནས་ཕྱག་རྒྱ་ཆེན་པོའི་ཆོས་བཅུ་སོགས་གསུངས་པ་རྣམས་དང་། རྗེ་མར་པ་ལ་བྱུང་བར་ཟུར་འགྱུར་ཞེས་སུ་གྲགས་ཀྱང་། དེབ་སྔོན་དུ་དུས་སྔ་ཕྱིའི་གོ་རིམ་བཞིན་བརྒྱུད་པ་རིམ་པ་དང་པོ་ནི་ཇོ་བོ་རྗེས་མཻ་ཏྲི་པ་ལས་ཐེག་པ་ཆེན་པོ་རྒྱུད་བླ་མའི་རྩ་འགྲེལ་དང་དོ་ཧ་ལ་སོགས་པའི་སྐོར་གསན་པ་དེ་དག་ལས་ཇོ་བོས་དོ་ཧ་དང་གྲུབ་སྙིང་གི་སྐོར། ཀུན་ཏུ་བཟང་པོའི་སྤྱོད་པ་བྱེད་ཚུལ་རྣམས་བསམ་ཡས་མཆིམས་ཕུར་དགེ་བཤེས་སྟོན་པ་ལ་གསུངས་པ་དང་། རིམ་པ་གཉིས་པ་ནི་མངའ་བདག་མེ་ཏྲི་པ་ལས་རྗེ་མར་པས་གསན་ནས་བོད་དུ་སྤེལ་བ་རྣམས། རིམ་པ་གསུམ་པ་ནི་པཎྜི་ཏ་བཻ་རོ་ཙ་ན་རཀྴི་ཏ་བོད་དུ་ལན་ལྔ་བྱོན་ནས་གསུངས་པ་རྣམས། རིམ་པ་བཞི་པ་ནི་སྐོར་ནི་རུ་པ་ལས་བརྒྱུད་པ་རྣམས། རིམ་པ་ལྔ་པ་ནི་སྟོད་ལུགས་སྨད་ལུགས། རིམ་པ་དྲུག་པ་ནི་རྗེ་རས་ཆུང་པ་ལས་བརྒྱུད་པ་རྣམས། རིམ་པ་བདུན་པ་ནི་ནག་པོ་ཤེར་དད་ཀྱིས་གསུངས་པ་བཅས་ཁྱོན་རིམ་པ་བདུན་དུ་ཕྱེ་ནས་གསུངས། འདིའི་རིམ་པ་ལ་འགལ་འཛོལ་ཅུང་ཞིག་ཡོད་པར་སྣང་སྟེ། ཇོ་བོས་དགེ་བཤེས་འབྲོམ་སྟོན་པ་ལ་མ་གསུངས་པའི་སྔོན་དུ་བཻ་རོ་ཙ་ན་རཀྵི་ཏ་དང་སྐོར་ནི་རུ་པ་སོགས་བོད་དུ་ཕེབས་ནས་ཕྱག་ཆེན་གྱི་གདམས་པ་སྤེལ་ཟིན་པ་ཡིན་པས་དེའི་སྐོར་མུ་མཐུད་དཔྱད་པར་འཚལ།
༤ ཕྱག་ཆེན་སྐོར་གྱི་དོགས་དཔྱོད།
མཉམ་མེད་དྭགས་པོ་རིན་པོ་ཆེས་དཔལ་ཕག་མོ་གྲུ་པ་ལ། འོ་སྐོལ་གྱི་ཕྱག་རྒྱ་ཆེན་པོ་འདིའི་གཞུང་ནི་བཅོམ་ལྡན་འདས་བྱམས་པས་མཛད་པའི་ཐེག་པ་ཆེན་པོ་རྒྱུད་བླ་མའི་བསྟན་བཅོས་ཡིན་ཞེས་གསུངས་པ་བཞིན། དཔལ་ཕག་གྲུ་ཡབ་སྲས་དང་། རྗེ་འབྲི་གུང་དཔོན་སློབ། ཆོས་རྗེ་རང་བྱུང་རྡོ་རྗེ། འཇམ་མགོན་བློ་གྲོས་མཐའ་ཡས་ལ་སོགས་པས་ཐེག་པ་ཆེན་པོ་རྒྱུད་བླ་མའི་བཤད་པའམ་མདོ་ལུགས་ཀྱི་ཕྱག་རྒྱ་ཆེན་པོའི་ཁྲིད་སྲོལ་བརྒྱུད་འཛིན་གནང་བ་ཡིན། དགའ་ལྡན་ཆོས་འབྱུང་དུ་རྗེ་རིན་པོ་ཆེའི་གསུང་དྲངས་པར་ཕྱག་རྫོགས་དབུ་གསུམ་ལྟ་བ་བོད་འདིར་གྲགས། །དབུ་མ་ཀླུ་སྒྲུབ་ཡབ་སྲས་བཞེད་པའི་རྩེ། །གཞུང་ལུགས་སྦྱངས་པའི་མཁས་མིན་རྟོགས་པ་དཀའ། དེང་དུས་ཕྱག་རྒྱ་ཆེ་ཞེས་སེམས་གནས་ཀྱི། །ལྟ་བ་ཡིན་གྱི་ཕྱག་ཆེན་དངོས་མ་ཡིན་ཞེས་རྗེ་ཙོང་ཁ་པས་ཕྱག་རྫོགས་དབུ་གསུམ་གྱི་ལྟ་བ་ལས། ཀླུ་སྒྲུབ་ཡབ་སྲས་ཀྱིས་བཞེད་པའི་དབུ་མའི་ལྟ་བ་དེ་ཁྱད་དུ་འཕགས་པ་ཡང་གཞུང་ལུགས་ལ་སྦྱངས་པ་མཛད་པའི་མཁས་པ་མིན་པར་རྟོགས་དཀའ་ལ། ཁོང་གི་སྐུ་དུས་ཀྱི་ཕྱག་ཆེན་ཞེས་ཟེར་བ་དེ་སེམས་གནས་ཀྱི་ལྟ་བ་ཡིན་པ་ལས་ཕྱག་རྒྱ་ཆེན་པོ་དངོས་མ་ཡིན་ཞེས་ཁོང་དང་དུས་མཉམ་པའི་ཕྱག་ཆེན་གྱི་ཉམས་ལེན་པ་འགའི་ལྟ་ཚུལ་བཀག་པ་ཡིན། དེའི་རྒྱུ་མཚན་ནི་དགའ་ལྡན་ཆོས་འབྱུང་དུ་ལྟ་བ་ཕྱག་རྒྱ་ཆེན་པོ་ནི་སྤྱིར་གྲུབ་མཐའ་རིས་མེད་ཀྱི་ཆོས་སྐད་ཡིན་ལ། བཀའ་བརྒྱུད་པའི་ཕྱག་རྒྱ་ཆེན་པོ་ཡང་མི་ལ་ཡན་དུ་སྨད་པར་མི་རིགས་མོད་ཅེས་པ་དང་། ཡང་དེ་དང་ཕྱོགས་འདྲ་བར། དུང་དཀར་བློ་བཟང་འཕྲིན་ལས་ཀྱིས་མཁས་གྲུབ་རྗེ་དང་ས་སྐྱ་པཎ་ཆེན་གྱིས་དགག་པ་སྐྱོན་པ་དེ་ཡང་བཀའ་བརྒྱུད་ཀྱི་བླ་མ་གོང་མ་ཚོའི་ལྟ་བ་ལ་དགག་པ་སྐྱོན་པ་མ་ཡིན་པར་ཕྱིས་སུ་སློབ་མ་འགའ་ཤས་ཀྱིས་བྲིས་པའི་ཕྱག་རྒྱ་ཆེན་པོའི་དཔེ་ཆ་དེ་དག་ལ་དགག་པ་སྐྱོན་པ་ཞིག་རེད་ཅེས་གསུངས་པ་ལྟར། ཕྱག་རྒྱ་ཆེན་པོའི་ལྟ་བ་དེ་ཉིད་མདོ་ལས་གསུངས་པས་ཡང་དག་འཁྲུལ་མེད་ཡིན་པ་ཐེ་ཚོམ་མེད་ལ། དེ་ཉིད་ཉམས་སུ་ལེན་མཁན་གྱི་སྔ་རབས་ཀྱི་བླ་མ་གོང་མ་ཚོར་སྨད་པར་མི་རིགས་ཀྱང་། ཕྱིས་གང་ཟག་ཐ་མལ་པ་འགའ་ཤས་ཀྱིས་ཕྱག་རྒྱ་ཆེན་པོ་ཁ་རུ་བཏོན་ནས་ལྟ་སྤྱོད་རྣམ་དག་གིས་ཐོག་ནས་ཉམས་ལེན་མི་བྱེད་པར་ལྟ་ཁུངས་གཙང་མ་དེ་རིམ་གྱིས་སྦགས་བཙོག་གིས་སྒྲིབ་པའི་ལོ་རྒྱུས་ཀྱི་བརྒྱུད་རིམ་མཚོན། དེས་ན་མཁས་གྲུབ་ཁྱུང་པོའི་ཕྱག་ཆེན་གའུ་མའི་ལྟ་བ་མཐར་ཐུག་ཀྱང་རྒྱལ་སྲས་མཻ་ཏྲི་པ་རང་ལ་ཁུངས་གཏུགས་པ་དང་། རྩོད་མེད་ཀྱི་བླ་མ་དུ་མས་ངོ་སྤྲོད་དང་གསལ་སྟོན་མཛད་པ། མཁས་གྲུབ་ཁྱུང་པོས་གནད་མ་འཕྱུག་པར་ཉམས་སུ་བཞེས་ནས་གདམས་པ་འདི་ཉིད་ཡང་དག་ཡིན་པའི་བདེན་དཔང་མཛད། འོན་ཀྱང་ཕྱིས་ཀྱི་འཕེལ་རིམ་ཁྲོད་བླ་མ་འགའ་ཞིག་ལ་རྗེ་མར་པ་ལྟ་བུའི་ཡོན་ཏན་དང་ཐུགས་རྗེ་མེད་པ། སློབ་མ་འགའ་ཞིག་ལ་རྗེ་མི་ལ་ལྟ་བུའི་དད་པ་དང་སྙིང་རུས་མེད་པ་སོགས་ཀྱིས་རྐྱེན་པས་ཕྱག་ཆེན་གའུ་མའི་གདམས་པ་རྣམ་དག་དེ་ལ་ཡང་གོང་དང་འདྲ་བར་ཉམས་ལེན་གནད་དུ་མ་ཕིགས་པའི་དུག་རླངས་ཅུང་ཞིག་ཕོག་ཡོད་ཀྱང་། གདམས་པ་རང་ཉིད་ནི་སྔ་བར་ཕྱི་གསུམ་དུ་ཡང་དག་དང་འཁྲུལ་མེད་ཁོ་ན་ཡིན། དེ་ལྟར་ཕྱག་རྒྱ་ཆེན་པོ་གའུ་མའི་ཆོས་ཚུལ་ཡང་དག་ཕྱིན་ཅི་མ་ལོག་པར་ཤེས་ནས་གདམས་པ་འདི་ཉིད་ཉམས་སུ་ལེན་པ་ཆེས་ལེགས་པ་ཡང་། ཀ་8ཐོག་རིག་འཛིན་ཆེན་མོས་མདོ་སྔགས་ཐོས་བསམ་ཐར་པའི་རིགས་རྒྱུད་ཙམ། །ཚུལ་བཞིན་བསྒོམས་ན་མཐར་འབྲས་མྱུར་དུ་འགྲུབ། །གཞན་གླུ་སྒྲ་ཚད་རྟོག་གེའི་རིག་པ་དང་། །ཁེ་གྲགས་ཀྱིས་སླད་ཐོས་རྒྱས་ཅི་ཞིག་བྱ། །དེང་སང་སྙིགས་དུས་ཚེ་ཐུང་མྱུར་དུ་འཆི། ཕྱག་ཆེན་སྒོམ་མཛོད་ཁོ་བོས་གྲོས་ཆེན་གདབ་ཅེས་གདམས་ངག་མཆོག་འགྱུར་འདི་ཉིད་ཚུལ་བཞིན་དུ་ཉམས་སུ་བླངས་ན། ཡུད་ཙམ་པ་ཡི་ཚེ་འདི་ལ་གནས་སྐབས་དང་མཐར་ཐུག་གི་འབྲས་བུ་ཐམས་ཅད་མངོན་དུ་འགྱུར་ཐུབ་ངེས་སོ།
II.1.3.2 The Six Yogas of Naropa, path of skillful means
།གཉིས། ཐབས་ལམ་ནཱ་རོ་ཆོས་དྲུག་གི་སྐོར།
སྤྱིར་ལམ་ལ་སྨིན་གྲོལ་གཉིས་དང་། གྲོལ་ལམ་ལ་བསྐྱེད་རྫོགས་གཉིས། རྫོགས་རིམ་ལ་མཚན་བཅས་མཚན་མེད་གཉིས་སམ་ཐབས་གྲོལ་གཉིས་ལ་སོགས་པ་ཡོད་པ་ལས། རྫོགས་རིམ་ཐབས་གྲོལ་གྱི་ཁོངས་སུ་གཏོགས་པ་ཐབས་ལམ་ནཱ་རོ་ཆོས་དྲུག་ནི་རྒྱ་གར་པཎ་ཆེན་ནཱ་རོ་ཏ་པ་ཡེ་ཤེས་དངོས་གྲུབ་ནས་བརྒྱུད་པའི་གདམས་ངག་སྟེ། ༡ མ་རྒྱུད་ཀྱི་རྡོར་དང་བདེ་མཆོག་ནས་བཤད་པའི་གཏུམ་མོ། ༢ ཕ་རྒྱུད་གསང་བ་འདུས་པ་ནས་བཤད་པའི་སྒྱུ་ལུས། ༣ དེ་ནས་བཤད་པའི་འོད་གསལ་སྟེ་རྩ་བ་གསུམ། ༤ མ་རྒྱུད་གདན་བཞི་ནས་བཤད་པའི་འཕོ་བ། ༥ དེ་ནས་བཤད་པའི་གྲོང་འཇུག ༦ བར་དོའི་གདམས་ངག་སྟེ་ཡན་ལག་གསུམ་བཅས་སོ། དེ་དག་རྒྱུད་སྡེ་ལ་བརྟེན་པའི་རྫོགས་རིམ་ཡིན་ཏེ། གདམས་པ་འདི་དག་ནི་ཕ་རྒྱུད་གསང་བ་འདུས་པ། མ་རྒྱུད་མ་ཧཱ་མ་ཡཱ། སྙིང་པོ་ཀྱི་རྡོ་རྗེ། ཡང་སྙིང་བདེ་མཆོག་འཁོར་ལོ། བཀའ་སྲུང་ཅན་གྱི་གདན་བཞི་རྣམས་ཏེ་ཁྱད་པར་ཅན་གྱི་རྒྱུད་སྡེ་ཆེན་པོ་ལྔ་རྩ་བཤད་ཆ་མཐུན་གྱི་རྒྱུད་ཡན་ལག་དང་བཅས་པར་བརྟེན་པ་ཡིན་ལ། དེ་དག་གི་སྒྲ་དོན་དང་དབྱེ་བ་རགས་ཙམ་བརྗོད་པ་ལ།
༡ གཏུམ་མོ།
ལམ་གྱི་གཞུང་ཤིང་གཏུམ་མོ་ནི། གང་ལ་གནད་དུ་བསྣུན་པའི་ཕུང་ཁམས་མ་དག་པ་རྣམས་སྲེག་ཅིང་ཉོན་མོངས་རྣམ་རྟོག་ཐམས་ཅད་རྩད་ནས་གཅོད་པའི་དོན་གྱིས་ན་གཏུམ་ཞེས་བྱ་སྟེ། རྡོ་རྗེ་སྙིང་འགྲེལ་ལས། སྲེག་བྱེད་ཕྱིར་ན་གཏུམ་མོར་བཤད། །ཅེས་དང་། བདེ་སྟོང་ལྷན་ཅིག་སྐྱེས་པའི་ཡེ་ཤེས་མྱུར་དུ་སྐྱེད་པར་བྱེད་པས་མོ་ཞེས་བྱ། དེ་ལ་ཉོན་མོངས་འཇོམས་པའི་བྱེད་ལས་ཨ་གཏུམ་དང་། སྐྱེ་བའི་མེད་པའི་རང་བཞིན་ཨ་ཐུང་། དབྱིབས་ཨ་ཤད་གསུམ་དང་། ཡང་རྗེ་མཁའ་སྤྱོད་དབང་པོས་ལྟ་བའི་སྤྲོས་པ་གཅོད་པ་ཕྱིའི་གཏུམ་མོ་དང་། བསྒོམ་དོན་ཉམས་སུ་ལེན་པ་ནང་གི་གཏུམ་མོ། མཆོག་ཏུ་མི་འགྱུར་བའི་བདེ་བ་ཆེན་པོའི་གོ་འཕང་ལ་སྦྱོར་བ་གསང་བའི་གཏུམ་མོ་བཅས་སུ་བཞེད་པ་སོགས་ཀྱི་དབྱེ་བ་མང་།
གང་ལ་གནད་དུ་བསྣུན་པའི་ཡུལ་ནི། དེའང་སྤྱིར་ལམ་འདི་དག་རྩ་རླུང་ཐིག་ལེའི་རྣལ་འབྱོར་ལ་བརྟེན་ནས་བདེ་སྟོང་ལྷན་ཅིག་སྐྱེས་པའི་ཡེ་ཤེས་མངོན་དུ་བྱས་ཏེ་ཟུང་འཇུག་རྡོ་རྗེ་འཆང་གི་གོ་འཕང་སྒྲུབ་བྱེད་ཡིན་ཏེ། ཆོས་དྲུག་དྲིལ་བ་རྡོ་རྗེའི་མགུར་ལས་ཕྱི་ནི་སྒྱུ་མ་ལྷ་ཡི་སྐུ། །ནང་ན་རྩ་གསུམ་འཁོར་ལོ་བཞི་ཞེས་གསལ་བ་ལྟར་མིའི་ལུས་ལ་ཁྱོན་རྩ་སྟོང་ཕྲག་བདུན་ཅུ་རྩ་གཉིས་ཡོད་པ་ལས་རྣལ་འབྱོར་དུ་བྱེད་པ་ན་རྩ་གསུམ་འཁོར་ལོ་བཞི་ལ་གནད་དུ་བསྣུན་པར་བྱ་བ་ཡིན། ཇི་ལྟར་གནད་དུ་བསྣུན་ཐབས་ནི། རྗེ་མར་པས་སྦྱོར་བ་བཞི་ལྡན་མ་ཤེས་ན། །ཡོན་ཏན་སྐྱོན་དུ་འགྱུར་བའི་ཉེན་ཞེས་གསུངས་པས་ཐོག་མར་སྦྱོར་བ་བཞི་དང་གནད་ལྔ་ལ་བརྟེན་ནས་སྟེང་འོག་གི་རླུང་ལྟེ་བར་ཁ་སྦྱར་བའི་བུམ་པ་ཅན་ལ་གཙོ་བོར་བྱེད་པ་དང་། ཐིག་ལེ་རྣལ་འབྱོར་དུ་བྱེད་པ་ན། གཙོ་བོར་བྱང་སེམས་དཀར་དམར་ཞུ་བདེའི་ཐིག་ལེ་གཉིས་འབར་འཛག་གི་འཕྲུལ་གྱིས་ཁ་སྦྱོར་བ་ལ་བརྟེན་ནས་འཕོ་བའི་ཀུན་རྟོག་འཛད་མེད་དུ་འཆིངས་ཏེ་བདེ་སྟོང་ལྷན་ཅིག་སྐྱེས་པའི་ཡེ་ཤེས་བསྒོམས་པ། འགྱུར་མེད་ཀྱི་བདེ་བ་སྒྲུབ་བྱེད་ཐུན་མོང་མ་ཡིན་པ་ནང་གི་གཏུམ་མོའི་རྣལ་འབྱོར་བསྒོམས་པ་བཅས་རླུང་ནི་གཏུམ་མོ་འབར་བྱེད་ཀྱི་རྐྱེན་དང་། རྩ་ནི་དེའི་གནས་སམ་རྟེན། སྔགས་ནི་གཏུམ་མོ་བྱིན་གྱིས་རློབ་བྱེད་དོ། །དེ་ལྟར་ལུས་ལ་གནད་དུ་བསྣུན་ནས་གཏུམ་མོ་བསྒོམས་པའི་ཕན་ཡོན་གནས་སྐབས་སུ་རྟགས་བཅུ་གཉིས་དང་། ཡོན་ཏན་བརྒྱད་སོགས་འབྱུང་བ་དང་། མཐར་ཐུག་ལུས་འཇའ་ལུས་སྣང་སྟོང་དབྱེར་མེད་ལོངས་སྤྱོད་རྫོགས་པའི་སྐུ་དང་། སེམས་འོད་གསལ་བདེ་སྟོང་དབྱེར་མེད་ཆོས་ཀྱི་སྐུའི་དགོངས་པ་མངོན་དུ་གྱུར་ཏེ་འཚང་རྒྱ་བའོ།
༢ །སྒྱུ་ལུས།
ལམ་གྱི་བོགས་འདོན་སྒྱུ་ལུས་ནི། ཡུལ་ཅན་བདེ་བ་ཆེན་པོ་ཉིད་ཡུལ་སྒྱུ་མ་ལྟར་འཆར་བའི་སྒོ་ནས་བོགས་འདོན་པར་བྱེད་པའི་ཕྱིར་ལམ་གྱི་བོགས་འདོན་སྒྱུ་ལུས་ཏེ། རྣམ་པ་མེད་ཀྱང་རྣམ་པ་སྣ་ཚོགས་འཛིན་པའམ། སྣང་ཡང་རང་བཞིན་མ་གྲུབ་པའི་ཕྱིར་སྒྱུ་མའི་ལུས་ཞེས་བྱ། སྒྱུ་ལུས་ལ་སྤྱིར་དཔེའི་སྒྱུ་མ། སྣང་བ་སྒྱུ་མ། རྨི་ལམ་སྒྱུ་མ། བར་དོ་སྒྱུ་མ། འོད་གསལ་སྒྱུ་མ། སྤྲུལ་པ་སྒྱུ་མ། ཡེ་ཤེས་སྒྱུ་མ་སྟེ་བདུན་དང༌། དེ་མིན་མ་དག་པའི་སྒྱུ་ལུས། དག་པའི་སྒྱུ་ལུས། རྣམ་དག་སྒྱུ་ལུས་བཅས་གསུམ་དུ་དབྱེ། གཞན་ཡང་ཉམས་ལེན་བྱ་ཚུལ་གྱི་སྒོ་ནས་དབྱེ་ན། མཉམ་བཞག་སྒྱུ་ལུས་དང་རྗེས་ཐོབ་སྒྱུ་ལུས་གཉིས་ལས། དང་པོ་མཉམ་བཞག་སྒྱུ་ལུས་ནི། ངག་དབེན་དང་། ལུས་དབེན། སེམས་དབེན་གསུམ་སྔོན་དུ་སོང་ནས། སྟོང་པའམ་བདེ་བ་ལས་བྱུང་བའི་སྒྱུ་ལུས་ཀྱི་རིམ་པ་ཤུགས་ཀྱིས་སྐྱེ་ཞིང་། མཚན་མེད་ལ་གནས་ཁྱད་པར་ཅན་དང་འབྲེལ་བས་སྒོ་གསུམ་མི་གཡོ་བར་བཞག་པ་དང་། མཚན་བཅས་ལ་ལུས་གནད་བྱེད་བཅིངས། ངག་བུམ་པ་ཅན་གྱི་རྡོར་བཟླས། སེམས་ཀྱི་བྱུང་ཚོར་ཞུ་བདེའི་ངང་དུ་ནུབ་པ་དང་། རྗེས་ཐོབ་སྒྱུ་ལུས་ནི། དེ་ལྟར་མཉམ་བཞག་ཏུ་སྒྱུ་མའི་སྐུ་ལ་གསལ་སྣང་སྐྱེས་ནས་རྗེས་ཐོབ་ཏུ་ཐ་མལ་གྱི་སྣང་བ་ཐམས་ཅད་དང་། རྨི་ལམ་བར་དོ་བཅས་སྒྱུ་མ་ལྟ་བུའི་ཏིང་འཛིན་གྱིས་ལམ་དུ་འཁྱེར་བའོ།
༣ །རྨི་ལམ།
ལམ་གྱི་ཚོད་འཛིན་རྨི་ལམ་ནི། སྒྱུ་མ་གསུམ་བརྒྱུད་ཀྱི་ལམ་རྣམས་ཀྱི་དྲོད་ཚད་རྨི་ལམ་དུ་མྱོང་བ་བརྟན་མི་བརྟན་གྱིས་འཛིན་པར་བྱེད་པས་རྨི་ལམ་གྱི་རྣལ་འབྱོར་ཏེ། བག་ཆགས་ཀྱི་རང་གཟུགས་འཆར་བས་སམ་ཡུལ་གྱི་སྲོག་གཟུགས་འཛིན་པའི་ཕྱིར་རྨི་ལམ་ཞེས་བྱ་ཞིང་། དེ་ལ་དབྱེ་ན། རྗེ་མར་པས་རྨི་ལམ་ལ་ཡང་རྣམ་ལྔ་སྟེ། །དྲན་དང་སྒྱུ་མར་ཤེས་པ་དང༌། སྦྱངས་དང་གོམས་པ་འདྲིས་པ་དང་། །གོང་དུ་འཕོ་བ་ཞེས་པར་བྱ་ཞེས་རྣམ་པ་ལྔར་ཕྱེ་བ་དང་། ཡང་དཔེའི་རྨི་ལམ་དེ་ཉིད་དངོས། དོན་གྱི་རྨི་ལམ་ཉིན་སྣང་། དུས་མཐའི་རྨི་ལམ་བར་དོ་གསུམ། ངོ་བོའི་སྒོ་ནས་ལས་དང་པོ་བ། རྣལ་འབྱོར་པ། འཕགས་པའི་རྨི་ལམ་གསུམ་སོགས་སུ་དབྱེ་བ་མང་། རྨི་ལམ་ཉམས་ལེན་བྱེད་པ་ལ་ཐོག་མར་ཉིན་མོ་དྲན་པ་རྒྱུན་ཆགས་དང་། མཚན་མོ་མན་ངག་བཙན་ཐབས་ཀྱི་གནད་གཉིས་བཟུང་། མ་ཟིན་པའི་གེགས་སྟོང་འབྱམས་གཏུགས་འབྱམས་སད་འབྱམས་དྲེད་འབྱམས་བཞི། གཉེན་པོའི་མན་ངག་གིས་བསལ་བས་རྨི་ལམ་ལ་དེ་ཉིད་དུ་ངོ་ཤེས་པ་ནི་རྨི་ལམ་ཟིན་པ་ཡིན་ལ། དེའང་རྨི་ལམ་ལྟར་ཆོས་ཐམས་ཅད་ངོ་བོས་སྟོང་ཞིང་ཅིར་ཡང་སྣང་བས་བདེན་གཉིས་ཟུང་དུ་འབྲེལ། ཆོས་ཅན་ཆོས་ཉིད་ཡ་མ་བྲལ་བ་རྟེན་འབྲེལ་གྱི་གཟུགས་བརྙན་ངོ་མཚར་ཆེ། རྨི་ལམ་ཟིན་ནས་ལྷ་དང་འབྱུང་བཞི་སོགས་ལ་སྤྲུལ་སྒྱུར་སྦྱོང་བ། བདེན་མེད་དུ་ཤེས་པའི་ཐོག་བརྫིས་སྒྱུ་མར་སྦྱོང་བ། འཇིག་རྟེན་དང་འཇིག་རྟེན་ལས་འདས་པའི་རྣམ་ཐར་ལ་སྦྱོང་བའི་ཏིང་ངེ་འཛིན་ཀློང་དུ་གྱུར་ནས། མཐར་རྨི་ལམ་དང་འོད་གསལ་གཉིས་བསྲེ་ཞིང་འཕོ་བ་སོགས་སོ།
༤ །འོད་གསལ།
ལམ་གྱི་སྙིང་པོ་འོད་གསལ་ནི། ཆོས་ཐམས་ཅད་ཀྱི་གནས་ལུགས་རང་བཞིན་གྱིས་འོད་གསལ་བར་རྟོགས་པ་ཉིད་ཉམས་ལེན་གྱི་རྩ་བ་ཡིན་པས་ལམ་གྱི་སྙིང་པོར་གྱུར་པ་འོད་གསལ་གྱི་རྣལ་འབྱོར་ཏེ། དེའི་སྒྲ་དོན་ནི། གནས་ལུགས་ཀྱི་རང་འོད་འགག་མེད་དུ་གསལ་བའམ་རང་བཞིན་མེད་ཀྱང་ལྷུན་གྲུབ་ཏུ་སྣང་བའི་ཕྱིར་འོད་གསལ་ཞེས་བྱ། དེ་ལ་དབྱེ་ན། དཔེ་དོན་དང་། ཉམས་རྟོགས། ཉིན་མཚན། སྲབ་མཐུག །མ་བུ་འོད་གསལ་གཉིས་སོགས་གྲགས་ཆེ་ཞིང་། དེ་དག་ལས་དོན་གྱི་འོད་གསལ་ནི། དོན་གྱི་འོད་གསལ་ཁྱད་པར་ཅན་ཞིག་མངོན་དུ་བྱེད་པ་ཡིན་ལ། དེའང་སྒྱུ་ལུས་དངོས་སམ་རྗེས་མཐུན་པ་ཞིག་བསམ་གཏན་གཉིས་ཀྱིས་བསྡུས་ནས་འོད་གསལ་བ་མངོན་དུ་བྱེད་པ་ནི་སློབ་མི་སློབ་ཀྱི་འོད་གསལ་ཏེ་ཆེས་མཆོག་ཏུ་གྱུར་བའོ། སྒོམ་དོན་ལམ་གྱི་བྱེ་བྲག་ལ། གཞི་དུས། ལམ་དུས། འབྲས་དུས་བཅས་ཡོད་པ་ལས། དང༌པོ་གཞི་དུས་ནི། སེམས་ཅན་ཐམས་ཅད་ཀྱི་སེམས་རང་བཞིན་གྱིས་འོད་གསལ་བ་ཆོས་ཐམས་ཅད་ཀྱི་ཁྱབ་བདག་དེ་ལ་གཞི་གདོད་མའི་འོད་གསལ་ཞེས་བྱ། དེ་ལ་མདོ་སེམས་གཉིས་ཀྱི་ངོས་འཛིན་མི་འདྲ་བ་ཡོད་ཀྱང་། འདིར་དབུ་མ་པ་ལྟར་ཀུན་གཞི་བསྒྲིབས་ལུང་མ་བསྟན་དུ་འདོད། གཉིས་པ་ལམ་དུས་ནི། ལུས་བསམ་གཏན་གྱི་ཆོས་བདུན་དང་ལྡན་པས་ཤེས་པ་རྟེན་མེད་དུ་མ་བཅོས་པར་གློད་ནས་བཞག་པས་སྟོང་པ་ཉིད་འཁྲུལ་མེད་རྣལ་འབྱོར་པའི་མངོན་སུམ་དུ་བྱེད་པ་འདི་ནི་རྒྱུད་སྡེ་ཟབ་མོ་རྣམས་ལས་འབྱུང་བའི་རྫོགས་རིམ་མཐར་ཐུག་པའི་མན་ངག་སྟེ། རྟེན་རྡོ་རྗེའི་ལུས་ཀྱི་གནད་བཅིངས་ནས་ཡིད་མིག་རླུང་གསུམ་རྣམ་པར་མི་རྟོག་པའི་ངང་ལ་བཞག་པ་ན་ལུས་སེམས་རྟེན་འབྲེལ་ཁྱད་པར་ཅན་གྱིས་རོ་རྐྱང་གི་རྒྱུ་བ་འགགས་པ་དབུ་མར་རེངས་པས་རྣམ་པ་དང་བཅས་པའི་སྟོང་ཉིད་ཕྱག་རྒྱ་ཆེན་པོ་མངོན་སུམ་དུ་ཉམས་སུ་མྱོང་བ་ཡིན། གསུམ་པ་འབྲས་དུས་ནི། གཞི་གདོད་མའི་འོད་གསལ་ཆོས་ཉིད་རང་གི་རྒྱུད་ལ་ཇི་ལྟར་གནས་པ་དེ་ཉིད་བླ་མས་ངོ་སྤྲད་དེ་ཉིན་མཚན་འོད་གསལ་གྱིས་ལམ་དུ་བྱས་པས། དོན་འབྲས་གནས་ལུགས་ཀྱི་རྟོགས་པ་མཐར་ཕྱིན་པ་འབྲས་བུའི་འོད་གསལ་ལོ།
༥ །བར་དོ།
ལམ་གྱི་བློ་ཆོད་བར་དོ་ནི། སྲིད་པ་བར་དོར་འོད་གསལ་དང་སྒྱུ་ལུས་ཀྱིས་བློ་གཅིག་ཆོད་བྱས་པས་ཟུང་འཇུག་མངོན་དུ་བྱེད་པས་ལམ་གྱི་བློ་ཆོད་ཀྱི་རྣལ་འབྱོར་དང་། ཕྱོགས་གཉིས་སུ་མ་ལྷུང་བས་སམ་སྔོན་རྗེས་གཉིས་ཀྱི་བར་ན་གནས་པའི་ཕྱིར་བར་དོ་ཞེས་བྱ། འདིའི་དབྱེ་བར་རྗེ་བཙུན་མི་ལ་དང་རྗེ་རས་ཆུང་པ་སོགས་བཀའ་བརྒྱུད་པའི་བླ་མ་གོང་མ་རྣམས་ཀྱི་བཞེད་ཚུལ་མི་མཐུན་པ་མང་དུ་ཡོད་མོད། རྗེ་མར་པས་ནི་སྣང་བ་སྐྱེ་ཤིའི་བར་དོ། རྨི་ལམ་གཉིད་ཀྱི་བར་དོ། ཐ་མ་སྲིད་པ་བར་དོ་ཞེས་གསུམ་དུ་དབྱེ་བ་ཁོ་ན་གྲགས་ཆེ། དེ་ལས་སྔ་མ་གཉིས་ནི་རྩ་བའི་ཆོས་བཞིས་ལམ་དུ་བྱེད་པ་ཡིན་པས། སྐབས་འདིར་བར་དོའི་དབྱེ་བ་རྣམས་ལས་བློ་ཆོད་ཀྱི་བར་དོ་ནི་སྲིད་པ་བར་དོར་སྦྱོར་བ་ཡིན།
བར་དོ་ལམ་དུ་འཁྱེར་བ་འཆི་ཀ་མའི་དུས་སུ་སློབ་པ་ནི། འབྱུང་བ་རིམ་གྱིས་ཐིམ་པ་ཤེས་པར་བྱ་ལ། རང་གི་སེམས་ལ་བལྟ་ཞིང་བར་དོ་ལ་བར་དོར་ཤེས་པར་བྱའོ་སྙམ་པའི་འདུ་ཤེས་དྲག་ཏུ་བྱ་ཞིང་། བར་དོ་དེ་ཉིད་ཀྱང་སྒྱུ་མར་ཤེས་པར་བྱ་ལ། དེ་ཁོ་ན་ཉིད་བསྒོམ་སྟེ། སྐྱེ་བའི་རྐྱེན་དུ་འགྱུར་བའི་ཕ་མ་ལ་ཆགས་སྡང་སྐྱེ་བ་ཡིན་པས་དེ་བཟློག་ཅིང་འོད་གསལ་དུ་མོས་པ་བྱ། དེ་ཉིད་སྦྱོང་བྱེད་ཀྱི་རྣལ་འབྱོར་ལ། རབ་རྣམས་ཀྱིས་བར་དོ་དང་པོའི་འོད་གསལ་ངོས་བཟུང་། འབྲིང་གིས་བར་དོ་གཉིས་པར་སྒྱུ་ལུས་ལ་རྩལ་སྦྱོང་། ཐ་མས་བར་དོ་གསུམ་པ་ལ་མངལ་གྱི་སྒོ་དགག་ཅིང་གདམ་པར་བྱའོ། དེ་ལས་དང་པོ་དབང་པོ་རབ་རྣམས་ནི། འཆི་ཁར་འབྱུང་བ་བཞི་དང་ཕྲ་རགས་ཀྱི་རྣམ་རྟོག་ཐམས་ཅད་ཐིམ་ཞིང་སྟོང་པ་བཞི་ཕྱི་ནང་གི་རྟགས་སྣང་དང་བཅས་འཆར་བའི་ཚེ། སྔར་འོད་གསལ་འཛིན་དུས་ཀྱིས་རིལ་འཛིན་རྗེས་གཞིག་གི་མངོན་པར་རྟོགས་པ་ལྟ་བུ་སོགས་ཀྱི་དགེ་སྦྱོར་དང་བསྲེ། ཁྱད་པར་སྣང་གསུམ་དང་འོད་གསལ་འཆར་དུས་བླ་མས་ངོ་སྤྲད་པའི་ལྟ་ཐོག་ཏུ་འཇོག །འཆི་བ་འོད་གསལ་གྱི་དུས་རླུང་སེམས་སྙིང་གའི་དབུ་མར་ཐིམ་པ་ན་གཉིས་སྣང་གི་སྤྲོས་པ་ཉེ་བར་ཞི་བ་ནམ་མཁའ་སྤྲིན་མེད་པ་ལྟ་བུ་ཞིག་འཆར་མོད། དེའི་ཚེ་སྔོན་གོམས་ཀྱི་མྱོང་བ་མཆོག་དང་ལྡན་པ་ལ་སྔར་འདྲིས་ཀྱི་མི་དང་ཕྲད་པའམ། མགྲོན་པོ་རང་ཡུལ་དུ་ཕྱིན་པ་ལྟ་བུ་འབྱུང་ལ། དེ་ངོས་ཟིན་ནས་མཉམ་པར་འཇོག་ཐུབ་ཀྱང་སྔོན་སྒྲོ་འདོགས་ཆོད་པའི་ལྟ་ཐོག་ཏུ་བཞག་ནས་སྐྱོང་རྒྱུ་མེད་ན་གནས་ལུགས་རྟོགས་པར་མི་འགྲོ་བས། ཚེ་འདིར་སྟོང་ཉིད་ཀྱི་ལྟ་བ་གཏན་ལ་ཕེབས་པ་དེ་ཉིད་བདེ་ཆེན་དང་ཟུང་འབྲེལ་དུ་བསྒོམ་པའི་ལམ་གྱི་འོད་གསལ་ལ་འབད་པར་བྱས་པས། འཆི་བའི་མཐར་བར་དོ་ལས་འབྱུང་བའི་དོན་དུ་དེ་ཉིད་ལ་སྒྱུ་ལུས་ལོངས་སྐུ་འགྲུབ་སྟེ་རྟེན་ལ་འཚང་རྒྱ་བར་གསུངས། གཉིས་པ་དབང་པོ་འབྲིང་གིས་ནི། བར་དོ་དང་པོའི་འོད་གསལ་དེ་ཉིད་ཁམས་དྲུག་ལྡན་གྱི་སེམས་ཅན་ཐམས་ཅད་ལ་འཆི་བའི་ཚེ་འབྱུང་ཡང་། མན་ངག་གི་གནད་ལ་གོམས་པ་ཆུང་བས་ངོ་མ་ཤེས་པ་དང་། ཤེས་ཀྱང་གནས་མ་ནུས་པའི་རྐྱེན་གྱིས་དྭངས་མ་ལྔ་འདུས་ཀྱི་ཚོགས་པ་སོ་སོར་གྱེས་ཤིང་ཡལ་ནས་རྣམ་ཤེས་སྲོག་རླུང་གི་བཞོན་པ་དང་བཅས་པ་སྒོ་དགུ་གང་རུང་ནས་ཐོན་ཏེ་བེམ་རིག་བྲལ་མ་ཐག་བར་དོའི་ཡིད་ལུས་སུ་སྐྱེ་བ་ནི་སྲིད་པ་བར་དོའི་མཚན་གཞི་དངོས་ཡིན་ལ། སྐབས་དེར་སེམས་ཅན་ཕལ་ཆེ་བ་ལ་འཇིགས་པའི་སྒྲ་བཞི། །ཡ་ངའི་གཡང་ས་གསུམ་ལ་སོགས་པ་སྡིག་སེམས་བག་ཆགས་ཀྱི་རང་གཟུགས་ལས་བྱུང་བའི་འཁྲུལ་སྣང་འཇིགས་སྐྲག་གི་ཉེར་འཚེ་བརྗོད་ཀྱིས་མ་ལངས་པས་ཉམ་ཐག་པར་འགྱུར་ལ། བསོད་ནམས་བྱས་པའི་སྐྱེ་བོ་ལ་ནི་སྣང་ལོག་དེ་རྣམས་མི་འཆར་བར་ལྷས་བསུ་ཞིང་བཀུར་བསྟིས་མཆོད་པ་སོགས་དག་པའི་སྣང་བ་དང་བཅས་ཏེ་བདེ་ནས་བདེ་བར་འགྲོའོ། དེ་ཉིད་ལམ་དུ་བྱེད་པ་ལ། ལས་ཀྱི་རྫུ་འཕྲུལ་དང་ལྡན་པ་སོགས་ངེས་པའི་རྟགས་དྲུག་གི་སྒོ་ནས་ངོ་ཤེས་པར་བྱས་ལ་བཟང་ངན་གྱི་སྣང་བ་གང་ཤར་ཡང་ཐེག་ཆེན་གྱི་སེམས་བསྐྱེད་སོགས་རང་གང་ལ་གོམས་པའི་དགེ་སྦྱོར་ལ་འཇོག་སྟེ། དེ་ཉིད་དྲན་པ་ཙམ་གྱིས་འཇིགས་པ་ལས་སྐྱོབ་ཅིང་འཚེ་བ་རྣམས་རང་གྲོལ་དུ་འགྱུར། དེས་ན་འཁྲུལ་སྣང་རང་ག་མའི་རྗེས་སུ་སྐད་ཅིག་ཙམ་ཡང་མ་ཤོར་བར་རིག་པ་སེམས་ཀྱི་རང་སོ་བཟུང་བས་རྣམ་ཤེས་སྟོབས་སུ་གྱུར་ཏེ་རླུང་ལ་དབང་ཐོབ། དེའི་ཚེ་འཁྲུལ་སྣང་རབ་རིབ་ཤར་ཡང་དེ་ཉིད་ལམ་དུ་ལྷོངས་འགྲོའོ། གསུམ་པ་དབང་པོ་ཐ་མས་ནི། བར་དོ་གཉིས་པ་ལ་མ་གྲོལ་བ་རྣམས་རིང་མཐའ་བདུན་ཕྲག་བདུན་དང་། ཐུང་བ་བདུན་ཕྲག་གཅིག་ཕན་ཆད་དུ་འཁྱམས་ཤིང༌། དེའང་བར་སྲིད་དེ་ལུས་མེད་པས་ཤིན་ཏུ་སྐྱོ་ནས་མིང་གཞི་འཁྱམས་པོ་རྣམ་ཤེས་རླུང་དང་བག་ཆགས་ཀྱིས་བདས་པས་རང་དབང་མེད་པར་སྐྱེ་གནས་འཚོལ་ཞིང་དྲི་ཟ། མངལ་སྒོ་ཉུལ་བ་ལས་རླུང་ལྔ་རྒྱུ་ཞིང་དུག་ལྔ་འདུས་པའི་སྣང་སེམས་ཀྱི་རྟེན་འབྲེལ་ལས། རྣམ་བྱང་འོད་ཀྱི་ལམ་ལྔ་དང༌། རིགས་དྲུག་གི་མངལ་བཟང་ངན་དང་སྐྱེ་གནས་བཞིའི་སྣང་བ་འཆར་བ་ན། གང་ལ་གོམས་པའི་དགེ་སྦྱོར་གནད་དུ་བསྣུན་ཏེ་རྒྱུ་རྣམ་བྱང་འོད་ཀྱི་ལམ་ལ་དབང་མེད་དུ་འཇུག་པ་དང་། རྐྱེན་མཚམས་སྦྱོར་གྱིས་སྐྱེ་བ་འཛིན་པ་ལ་འཇུག་ཡུལ་དང་འཇུག་མཁན་དགག་པའི་ཏིང་འཛིན་ཡིད་ལ་བྱ། ཅིས་ཀྱང་མ་ཁེགས་ན་མངལ་སྒོ་གདམ་པ་ལ་འབད་དོ།
༦ །འཕོ་བ།
ལམ་གྱི་སྐྱེལ་མ་འཕོ་བ་ནི། དབང་པོ་རབ་འབྲིང་ཐ་མའི་ལམ་གྱི་ལས་འཕྲོ་སྒྲུབ་པའི་རྟེན་བཟུང་བའི་གེགས་ལས་སྒྲོལ་བས་ལམ་གྱི་སྐྱེལ་མར་གྱུར་པ་དང་། གོ་འཕང་གཞན་དུ་བགྲོད་པས་སམ་རང་བཞིན་མེད་ཀྱང་ཀུན་ཏུ་འཇུག་པའི་ཕྱིར་ཆད་མཐུད་འཕོ་བ་ཞེས་བྱ་བ་ལ། དེའི་དབྱེ་བར་ཀ་དཔེ་ཕྱི་མ་ལས་སྦྱངས་ཏེ་འཕོ་བ་སོགས་རྣམ་དབྱེ་བཅུ་གཅིག་ཙམ་གསུངས་པ་དང་། ཡང་འགའ་ཞིག་གིས་ཆོས་སྐུ། ལོངས་སྐུ། སྤྲུལ་སྐུའི་འཕོ་བ་གསུམ་དུ་མཛད་པ། དེ་མིན་སྦྱངས་ཏེ་འཕོ་བ། ལུས་བཅོས་ཏེ་འཕོ་བ། བཙན་ཐབས་སུ་འཕོ་བ་སོགས་རྣམ་གྲངས་དབྱེ་ཚུལ་ཤིན་ཏུ་མང་། གདམས་པ་འདི་ལ་བརྟེན་ནས་སྐྱེ་བ་འདིར་སྡིག་ལས་སྟོབས་པོ་ཆེ་ཅི་ཙམ་སྤྱད་རུང་སླར་དབང་བསྐུར་མནོས་ཤིང་དམ་ཚིག་ཚུལ་བཞིན་དུ་སྲུང་བ་དང་། བསྐྱེད་རིམ་སྔོན་དུ་སོང་བའི་རྫོགས་རིམ་རྩ་རླུང་གི་སྦྱོར་བ་ཁྱད་པར་ཅན་དང་ལྡན་པ་ཞིག་གིས་འགྲུབ་པ་ཡིན་ལ། སྡིག་ཅན་རང་ག་བ་རླུང་སྦྱོར་དང་འཕོ་དམིགས་ཅུང་ཙམ་སྦྱངས་པས་ནི་དམིགས་པའི་བྱིན་རླབས་ཀྱིས་ཕན་ཡོན་ཅུང་ཟད་རེ་འབྱུང་ཡང་ཚུལ་བཞིན་དུ་འགྲུབ་པ་མ་ཡིན། ལྷག་པར་དུས་ལ་མ་བབས་པར་འཕོ་བ་གང་དགར་བྱར་མི་རུང་བ་སྟེ། འཆི་རྟགས་ངེས་ན་འཕོ་བྱས་ཏེ། །འཆི་རྟགས་མེད་ན་སངས་རྒྱས་གསོད་ཅེས་གསུངས་པ་ལྟར་སྡིག་ལྟུང་ཤིན་ཏུ་ལྕི།
སྒོམ་དོན་བྱེ་བྲག་ཏུ་སྨོས་པ་ལ། རབ་འོད་གསལ། འབྲིང་སྒྱུ་ལུས། ཐ་མ་བསྐྱེད་རིམ་ལ་འཕོ་བ་དང་གསུམ་དུ་མཛད་པའི་དང་པོ་ནི། གནས་ལུགས་ཀྱི་དོན་ཇི་ལྟ་བ་བཞིན་རྟོགས་པའི་ཤེས་རབ་དང་དེའི་ངང་ལ་རྩེ་གཅིག་ཏུ་གནས་པའི་ཏིང་ངེ་འཛིན་ཟུང་འབྲེལ་གྱིས་གནད་ཟབ་མོ་ལ་གོམས་པར་བྱས་པ་ན། ནམ་འཆི་བ་ལ་མངོན་དུ་ཕྱོགས་ཏེ་འབྱུང་བ་ཐིམ་སྡུད་ཀྱི་རྟགས་རྣམས་ཤར་བའི་ཚེ་འཕོ་བྱ་འཕོ་བྱེད་སོགས་ཀྱི་འཁོར་གསུམ་མ་དམིགས་པ་དེ་ཁོ་ན་ཉིད་ཀྱི་ལྟ་བ་འཁྲུལ་མེད་ཀྱི་སྟེང་དུ་གཞག་བྱ་འཇོག་བྱེད་རྩོལ་བ་མེད་པར་བཞག་པས་གཞིའི་འོད་གསལ་དང་ཆུ་ལ་ཆུ་བཞག་པ་ལྟར་དབྱེར་མེད་དུ་འདྲེས་ཏེ་བར་དོ་དང་པོར་བཏགས་པ་འཆི་བ་ཆོས་ཀྱི་སྐུར་འཚང་རྒྱ་བའོ། །གཉིས་པ་ནི། དབང་པོ་འབྲིང་དུ་གྱུར་པས་འཆི་སྲིད་ཐིམ་རིམ་དང་སྣང་གསུམ་མཐའི་འོད་གསལ་ངོས་མི་ཟིན་ཅིང༌། ཟིན་ཀྱང་གནས་པར་མ་ཐུབ་ན། སྒྱུ་ལུས་ལོངས་སྐུར་ལྡང་བར་བྱའོ་སྙམ་པའི་སྔོན་གྱི་འཕེན་པས་གསོས་བཏབ་སྟེ་སྣང་གསུམ་ལུགས་ཟློག་གི་མཐར་སྒྱུ་ལུས་ལྷ་སྐུར་ལྡངས་ཤིང་། དེ་ཉིད་ཀྱང་འོད་གསལ་དོན་དམ་པའི་རིམ་པས་སྦྱངས་ཏེ་འཁོར་བའི་བར་སྲིད་ལས་ཤིན་ཏུ་འདས་པའི་ཟུང་འཇུག་སྒྱུ་མའི་སྐུ་ཆུ་ལས་ཉ་འཕར་བ་ལྟར་བཞེངས་ནས་བར་དོ་ལོངས་སྐུར་འཚང་རྒྱ་བར་བྱ། གསུམ་པ་དབང་པོ་ཐ་མ་བསྐྱེད་རིམ་གྱིས་འཕོ་བ་ལ་གསུམ་སྟེ། ༡ སེམས་སྦྱངས་ཏེ་འཕོ་བ་ནི། ཕྱི་ནང་གི་སྟོང་ར་དང་རླུང་རྡུབ་བཟུང་འཕང་གསུམ་གྱི་སྦྱོར་བས་སེམས་ཀྱི་ཡིག་འབྲུ་བསྐུལ་ནས་འཇུག་ལྡོག་ལ་དབང་ཐོབ་པར་སྦྱངས་ཏེ་རྟགས་ཀྱིས་ཉམས་སད་ཅིང་། དུས་སུ་བབས་པའི་ཚེ་ལས་ལ་སྦྱར་བ་དང་། ༢ བཙན་ཐབས་སུ་འཕོ་བ་ནི། སྦྱངས་པ་ཚགས་སུ་མ་ཚུད་པར་གློ་བུར་དུ་འཆི་བས་གཏུགས་ན་རྟེན་བྱིན་རླབས་ཅན་གྱི་སྤྱན་སྔར་མོས་གུས་སེམས་བསྐྱེད་ཀྱིས་མཚམས་སྦྱར་ལ། དེ་བཞིན་གཤེགས་པ་མྱ་ངན་ལས་འདས་པའི་བཞུགས་སྟངས་དང་། སྐྱེ་མེད་ཀྱི་ཡིག་འབྲུའི་སྦྱོར་བས་དག་པའི་ཞིང་དུ་འཇུག་པར་བྱ་སྟེ། ཐ་མལ་པ་དང་དུད་འགྲོ་རྣམས་ལ་ཕན་པ་རྒྱ་ཆེར་འབྱུང་བའི་གདམས་ངག་ཟབ་མོར་གསུངས། ༣ གྲོང་འཇུག་གི་འཕོ་བ་སྟེ། སྔོན་ལས་ངན་པའི་གཤེད་མས་གསོད་པར་ངེས་པ་སོགས་ལ་ལུས་ཀྱི་གནད་འཁྲུལ་འཁོར། སེམས་ཀྱི་གནད་དགུ་གསུམ་ལས་འདས་པ། ངག་གི་གནད་དབྱངས་གསལ་ཕྱེད་དང་གསུམ་པའི་སྦྱོར་བས། རང་གི་ཕུང་པོ་དོར་བྱས་ནས། །བསོད་ནམས་ཅན་གྱི་ལུས་སླངས་ཏེ། སེམས་ཅན་དོན་ནི་མ་ལུས་བྱ་ཞེས་པ་བཞིན་སྐད་ཅིག་ལ་རྣམ་ཤེས་རང་ལུས་ཀྱི་གྲོང་ལས་འཕོས་ནས་གཞན་ཤི་བའི་ལུས་མ་ཉམས་པའི་གྲོང་དུ་འཇུག་ཅིང་འགྲོ་བ་སེམས་ཅན་གྱི་དོན་མ་ལུས་བྱ་བའི་ཕྱིར་སྔགས་སྤྱོད་ཀྱི་རྟེན་ཁྱད་པར་ཅན་འཛིན་པའོ།
།གདམས་ངག་འདི་དག་ལས་བླ་མ་རྔོག་པ་རྣམས་ཆོས་དྲུག་གི་སྙིང་པོ་བསྲེ་འཕོ་གཉིས་སུ་བསྡུ་བར་མཛད་དེ། ནཱ་རོའི་ཚིགས་བཅད་བརྒྱད་མར་སྐྱེ་ཤི་རྨི་ལམ་བར་དོ་དང་། །སྲིད་པ་བར་དོ་གསུམ་དུ་གནས། །ཉམས་ལེན་བསྲེ་འཕོ་གཉིས་སུ་འདུས། བསྲེ་བ་བསྒོམས་པས་སངས་རྒྱས་དང༌། །འཕོ་བ་མ་བསྒོམས་སངས་རྒྱས་སོ་ཞེས་པ་ལྟར་སྒྱུ་མ་གསུམ་བརྒྱུད་ཀྱི་གདམས་ངག་ཅེས་སམ་བསྲེ་འཕོའི་གདམས་པ་གཉིས་སུ་མཛད་ལ། རྗེ་བཙུན་མི་ལས་བར་དོ་བརྒྱད་ཀྱི་ངོ་སྤྲོད་ཅེས་དང༌། ཏི་ཕུ་པས་གཏུམ་མོ་ལས་རྒྱ་གཉིས། རྨི་ལམ་བར་དོ་གཉིས། འོད་གསལ་ཟུང་འཇུག་གཉིས། འཕོ་བ་གྲོང་འཇུག་གཉིས་བཅས་ཟུང་བཞི་ཡ་བརྒྱད་དུ་མཛད། རྗེ་རས་ཆུང་པས་བསྲེ་བ་སྐོར་གསུམ་མམ་བསྲེ་འཕོ་དགུ་སྐོར་ཞེས་སུ་བཞེད་དེ། འདོད་ཆགས་བདེ་ཆེན་དང་བསྲེ་བ་གཏུམ་མོ། ཞེ་སྡང་བདེན་མེད་དང་བསྲེ་བ་སྒྱུ་ལུས། གཏི་མུག་མི་རྟོག་པ་དང་བསྲེ་བ་འོད་གསལ། གཏུམ་མོ་དང་སྒྱུ་ལུས་བསྲེས་ལ་ཉིན་མོ་སྒོམ། རྨི་ལམ་དང་འོད་གསལ་བསྲེས་ལ་མཚན་མོ་སྒོམ། བར་དོ་དང་འཕོ་བ་བསྲེས་ལ་འཆི་ཁར་སྒོམ། གང་ཟག་བརྩོན་འགྲུས་ཅན་ལ་གཏུམ་མོ། ལེ་ལོ་ཅན་ལ་རྨི་ལམ། ཚེ་ཐུང་འཕོ་བ་དང་བསྲེ་བ་སྟེ་དགའོ། རྗེ་སྒམ་པོ་བས། བསྒོམས་པས་འཚང་རྒྱ་བ་གཏུམ་མོ། སྒྱུ་མ་ལམ་དུ་བྱེད་པས་འཚང་རྒྱ་བ་རྨི་ལམ། གཉིད་མཐུག་ལམ་དུ་བྱེད་པས་འཚང་རྒྱ་བ་འོད་གསལ། མ་བསྒོམས་པར་འཚང་རྒྱ་བ་འཕོ་བ། གྲོང་འཇུག་འཕོ་བའི་ཆ་ལག་དང་། རྨི་ལམ་སྒྱུ་ལུས་གཅིག་ཏུ་བསྡུ་ཞིང་བར་དོ་ཡང་དེའི་ཡན་ལག་ཏུ་བྱས་ནས་ཆོས་དྲུག་གམ་ཡང་ན་རྩ་བའི་ཆོས་བཞིར་བསྡུས་པར་མཛད།
དེ་ལྟར་ཐབས་ལམ་ཆོས་དྲུག་འདི་དག་ཉམས་སུ་བླངས་པས་འབྲས་བུ་མངོན་དུ་བྱེད་ཚུལ་ནི། ཟབ་མོའི་ལམ་མཐར་ཕྱིན་པའི་འབྲས་རྟགས་བཅུ། ཡོན་ཏན་བརྒྱད། གྲུབ་པ་བརྒྱད། འཕྲིན་ལས་བཞི་སོགས་ཐུན་མོང་གི་དངོས་གྲུབ་རྣམས་དང་། ཡན་ལག་བདུན། དབང་ཕྱུག་བརྒྱད། སྐུ་བཞི་ཡེ་ཤེས་ལྔ་སོགས་མཆོག་གི་དངོས་གྲུབ་མཐར་ཕྱིན་པ་ཐོབ་ཅིང་། ཁྱད་པར་བདེ་སྟོང་ཟུང་འཇུག་འགྱུར་བ་མེད་པ། འཇའ་ལུས་སྒྲིབ་བྲལ་སྒྱུ་མའི་ཚུལ་ཅན། སྣང་སྟོང་རང་ཤར་སོ་སོར་རྟོགས་པ། ཆོས་སྐུ་ཀློང་འབྱམས་ཡེ་ཤེས་ཆེན་པོ། ངེས་པ་ལྔ་ལྡན་ལོངས་སྤྱོད་རྫོགས་པ། གང་དུའང་འཕོ་མེད་མཁའ་སྤྱོད་ཆེན་པོ་སྟེ་མཐར་ཐུག་གི་ཆོས་དྲུག་མངོན་དུ་འགྱུར་བ་ཡིན་ནོ།
II.1.3.3
།གསུམ། བཀའ་བརྒྱུད་པའི་ནང་གསེས་བྱེ་བྲག་པ་འགའི་ཁྱད་ཆོས་སྐོར།
དྭགས་པོ་བཀའ་བརྒྱུད་ཀྱི་གྲུབ་ཐོབ་རེ་རེའི་ཆོས་སྒོ་རབ་འབྱམས་རྒྱ་མཚོར་འཇལ་བའི་ཚད་དང་མཐའ་གཟུང་བར་མི་ནུས་ཀྱང་། རྗེ་བཙུན་མི་ལའི་གདམས་ངག་མཐའ་དག་རྒྱུད་དང་འབྲེལ་བའི་ཐབས་ལམ་དང་། བྱིན་རླབས་དང་འབྲེལ་བ་སྙན་བརྒྱུད་གཉིས་སུ་འདུ་བར་གསུངས་ཤིང་། དེ་དག་ཀུན་གྱི་རྩ་བ་ནི་ཕྱག་རྒྱ་ཆེན་པོ་དང་ནཱ་རོ་ཆོས་དྲུག་གཉིས་ཡིན་ཀྱང་། གདམས་པ་དངོས་ཀྱིས་སློབ་མ་བཀྲི་བའི་སྐབས་རང་རང་གི་ཐབས་ལམ་དང་། ཆོས་སྐད་ཅུང་ཟད་མི་འདྲ་བ་ཡོད་པ་སྟེ།
རྗེ་སྒམ་པོ་བའི་ལྷན་ཅིག་སྐྱེས་སྦྱོར་ནི། མོས་གུས་དང་ཞེན་ལོག་གཙོ་བོར་བྱས་པའི་ངོས་ནས་སྔོན་འགྲོ་སྦྱོར་བ་བཞི་ལྡན། དངོས་གཞི་ངོ་སྤྲོད་རྣམ་གཉིས། རྗེས་ཉམས་མྱོང་སྣང་ཐོག་ཏུ་སྐྱོང་བ་གསུམ་གྱིས་འཆད་པའི་སྔོན་འགྲོ་ནི་སྤྱི་དང་མཚུངས་ཤིང་། དངོས་གཞི་གཉིས་ནི་ཞི་ལྷག་ལ་ངོ་སྤྲོད་པ་ཡིན། གདམས་པ་འདི་ནི་ཇོ་བོ་རྗེའི་ཕྱག་ཆེན་ལྷན་ཅིག་སྐྱེས་སྦྱོར་གོ་ཆ་གཉིས་པའི་མན་ངག་ལས་བྱུང་བ་ཞིག་ཡིན།
རྗེ་བཙུན་མི་ལའི་ཐུགས་སྲས་ཟླ་བ་ལྟ་བུ་རས་ཆུང་རྡོ་རྗེ་གྲགས་པ་དང་། ངན་རྫོང་སྟོན་པ་གཉིས་ཀྱིས་ཡིད་བཞིན་ནོར་བུ་སྐོར་གསུམ་གྱི་མཛོད་ནས་བྱོན་པའི་བདེ་མཆོག་མཁའ་འགྲོ་སྙན་བརྒྱུད་ཀྱི་བཀའ་སྲོལ་འཛིན་པ་སྟེ། དེའང་འཁོར་ལོ་སྡོམ་པ་ཡབ་ཀྱི་དཀྱིལ་འཁོར་དུ་དབང་བསྐུར་ནས་དབང་དང་འབྲེལ་བ་རྒྱུད་ཀྱི་གདམས་པ་ཞེས་རྩ་བཤད་ཀྱི་རྒྱུད་རྣམས་དང་། སིནྡྷཱར་ཡེ་ཤེས་ཀྱི་དཀྱིལ་འཁོར་དུ་ཡུལ་གྱི་བྱིན་རླབས་དབང་བཞི་ལ་བརྟེན་པ་བྱིན་རླབས་དང་འབྲེལ་བ་སྙན་བརྒྱུད་ཀྱི་གདམས་པ་ཞེས་ནོར་བུ་རྣམ་གསུམ་གྱི་མན་ངག་རྣམས་དང་། ལུས་མེད་མཁའ་འགྲོའི་བརྡ་དབང་ལ་བརྟེན་ནས་བརྡ་དང་འབྲེལ་བ་ངོ་སྤྲོད་ཀྱི་གདམས་པ་ཞེས་ལུས་མེད་མཁའ་འགྲོའི་ཆོས་སྐོར་གསུམ་བཞུགས་ཤིང་། བཀའ་སྲོལ་དེ་གཉིས་ནི་ཡོངས་སུ་གྲགས་པའི་དབང་དུ་བྱས་ཀྱི་རྗེ་བཙུན་མི་ལས་ཐུགས་སྲས་བརྒྱད་ལ་སྙན་བརྒྱུད་ཀྱི་གདམས་པ་ཆ་རེ་བྱིན་པར་བཤད་པ་དང་། ཁྱད་པར་ཟུར་མང་བཀའ་བརྒྱུད་ལ་བཀའ་བབས་པའི་དྭགས་པོ་སྙན་བརྒྱུད་ཀྱི་སྨིན་གྲོལ་གདམས་པ་ཟབ་ལ་རྒྱ་ཆེ་བ་ད་ལྟའི་བར་རྒྱུན་མ་ཆད་པར་བཞུགས།
ཀརྨ་བཀའ་བརྒྱུད་པའི་ཕྱོགས་ལ་ཕྱག་ཆེན་གྱི་ཉམས་ལེན་བཀའ་བརྒྱུད་པ་གཞན་རྣམས་དང་མཚུངས་ཀྱང་། ཀརྨ་པ་རང་བྱུང་རོལ་པའི་རྡོ་རྗེས་སྐུ་གསུང་ཐུགས་གནད་བཞི་ཆོས་ཉིད་ཀྱི་འཁོར་ལོ་ཕྱོགས་མེད་དུ་བསྐོར་ནས་གྲུབ་པའི་ཆོ་འཕྲུལ་ཞིང་ཁམས་ཀུན་ཏུ་ཁྱབ་པ་དུས་གསུམ་རྒྱུན་ཆད་མེད་པར་སྟོན་པའི་ཆོས་སྒོ་ཐམས་ཅད་ཀྱི་རྩ་བ་ནི། གང་ཟག་བློ་དམན་པ་རྣམས་སྔོན་དུ་འགྲོ་བའི་ཆོས་བཞིས་རྒྱུད་སྦྱོང་བ་དང་། དབང་པོ་འབྲིང་རྣམས་ལ་བཅའ་བ་ལུས་ཀྱི་གནད། སྲོག་རྩོལ་རླུང་གི་གནད། དམིགས་པ་སེམས་ཀྱི་གནད། ལུས་སྦྱོང་འཁྲུལ་འཁོར་གནད་བཞི་དང་། བཞི་ཀའི་རྩ་བ་བདེ་དྲོད་གཏུམ་མོའི་རྣལ་འབྱོར་བཅས་སྟོན་ཅིང་། དབང་པོ་རབ་ཏུ་གྱུར་པ་རྣམས་ལ་སྐུ་གསུམ་ངོ་སྤྲོད་ཕྱག་རྒྱ་ཆེན་པོ་ཅིག་ཅར་བའི་ལམ་ལ་ཡང་དག་པར་འཁྲིད་པར་མཛད་པ་ལའང་། ཀུན་རྫོབ་བྱང་སེམས་དང་འབྲེལ་བ་སྤྲུལ་སྐུའི་ངོ་སྤྲོད། སྲོག་རྩོལ་དང་འབྲེལ་བ་ལོངས་སྐུའི་ངོ་སྤྲོད། གཉུག་མ་རང་བཞག་གི་གནད་དང་འབྲེལ་བ་ཆོས་སྐུ་ངོ་སྤྲོད་པའི་ཕྱག་རྒྱ་ཆེན་པོ་རྟོགས་པ་རབ་འབྱམས་རང་བྱུང་ཡེ་ཤེས་ཉམས་སུ་བླངས་པའི་རིམ་པ་འདི་ཉིད་འཆི་ཁར་ཞག་བདུན་ཙམ་བསྒོམས་པས་ཀྱང་གདོན་མི་ཟ་བར་རྡོ་རྗེ་འཆང་གི་ས་བརྙེས་པར་གསུངས་སོ།
།འབྲི་གུང་པའི་ཕྱག་རྒྱ་ཆེན་པོ་ལྔ་ལྡན་ཞེས་པ་ནི། བདེ་གཤེགས་འཁོར་བ་འཇིག་དངོས་འགྲོ་མགོན་ཕག་མོ་གྲུ་པས་སྡེ་སྣོད་གསུམ་དང་རྒྱུད་སྡེའི་དོན་རྣམས་ཉམས་སུ་ལེན་ལུགས་ལྔ་རུ་བསྡུས་ནས་དགེ་འདུན་སྟོང་ཕྲག་ལྔ་ལ་ཚོགས་སུ་གསུངས་པ་སུས་ཀྱང་ཟབ་མོའི་དོན་དེའི་ངེས་པ་མ་རྙེད་པ་ལ། འཇིག་རྟེན་མགོན་པོ་འབྲི་གུང་པས་བུམ་པ་གང་བྱོའི་ཚུལ་དུ་ཐུགས་སུ་ཆུབ་ནས་ཉམས་སུ་བཞེས་པས་རེ་རེས་ཀྱང་གནས་སྐབས་དང་མཐར་ཐུག་གི་ནད་དང་བར་ཆད་ཞི་བ་དང་། ཆོག་དང་ཐུན་མོང་གི་ཡོན་ཏན་ཐམས་ཅད་ཐོགས་པ་མེད་པར་ཐོབ་པར་མཁྱེན་ནས་ཟབ་པ་དང་རྒྱ་ཆེའི་བཀའ་སྩལ་ཇི་སྙེད་པ་ཐམས་ཅད་ཀྱང་འདིའི་དོན་དུ་སྟོན་ཅིང་། བཅུ་ཆོས་དང་གསུམ་ཆོས་ཞེས་པ་ཡང་འདིའི་གནད་སྟོན་པ་ཡིན་ཏེ་དེ་བཞིན་གཤེགས་པ་རྣམས་ཀྱི་གསུང་གི་མཛོད་ཆེན་པོ་ཡིན། དེའི་ཚུལ་ནི། སེམས་བསྐྱེད། མོས་གུས། བསྐྱེད་རིམ། རྫོགས་རིམ། བསྔོ་བ་ལྔ་སྟེ། དང་པོ་དང་ཐ་མ་གཉིས་ཐེག་པ་ཐུན་མོང་བ་ཡིན་ལ། བར་པ་གསུམ་ནི་གསང་སྔགས་ཐུན་མོང་མ་ཡིན་པའི་ཉམས་ལེན་ཡིན། དེས་ན། ཕྱག་རྒྱ་ཆེན་པོ་སེང་གེ་འདྲ། །ལྔ་ལྡན་མེད་ན་མིག་མེད་ཡིན་ཅེས་གསུངས་ཏེ། གཞི་ཉོན་མོངས་པ་ལྔ་ལ་གནད་དུ་འགྲོ། ལམ་དུས་ཁྱད་པར་ཅན་གྱི་ལག་རྗེས་ལྔ་ཐོན། གདོན་རིགས་ལྔ་ཞི་ཞིང་འགྲོ་བ་ལྔ་གདུལ་བྱར་འགྱུར། འབྲས་བུའི་སྐབས་སྐུ་ལྔ་ཡེ་ཤེས་འཆར་བའོ། དེ་དག་ལ་བརྟན་པ་ཐོབ་ན་ཐམས་ཅད་ཕྱག་རྒྱ་ཆེན་པོར་འགྱུར་ཏེ། དམིགས་པ་མེད་པ་བྱང་ཆུབ་ཀྱི་སེམས། སྣང་སྟོང་དབྱེར་མེད་ཀྱི་ལྷ་སྐུ། འཁོར་འདས་བླ་མའི་རོལ་པ། རིག་སྟོང་དབྱེར་མེད་ཀྱི་ཕྱག་ཆེན། འཁོར་གསུམ་ཡང་དག་གི་བསྔོ་བ་སོགས་ལ་རིམ་པ་བཞིན་བྱང་སེམས་ཕྱག་ཆེན། ལྷ་སྐུ་ཕྱག་ཆེན། མོས་གུས་ཕྱག་ཆེན། གནས་ལུགས་ཕྱག་ཆེན། བསྔོ་བ་ཕྱག་ཆེན་ཞེས་སོགས་བརྗོད་དུ་རུང་ཞིང་དོན་ལའང་གནས་པས་ཕྱག་རྒྱ་ཆེན་པོ་ལྔ་ལྡན་ཞེས་ཡོངས་སུ་གྲགས། གཞན་ཡང་འབྲི་གུང་རས་པའི་ནཱ་རོ་པའི་ཆོས་བཅུར་གྲགས་པ་ནི། ཐོག་མར་སྨིན་ལམ་དབང་། གྲོལ་ལམ་རིམ་གྱིས་པའི་བསྐྱེད་རིམ། གཏུམ་མོ་ལམ་གྱི་དངོས་གཞི། ཅིག་ཅར་བས་འོད་གསལ། རང་རིག་ལྷག་པར་གནས་པ་གྲོང་འཇུག །འཕོ་བ། རྨི་ལམ། བར་དོ་རྣམས་ཆ་ལག་སྟེ། དེ་རྣམས་བསྒོམས་པས་གནས་སྐབས་ཀྱི་འབྲས་བུ་རྟགས་ལྔ་སོགས་ཐུན་མོང་གི་དངོས་གྲུབ། རང་དོན་ཆོས་སྐུ་དང་། གཞན་དོན་གཟུགས་སྐུ་གཉིས་འགྲུབ་པ་མཐར་ཐུག་གི་འབྲས་བུ་བཅས་སོ།
།དཔལ་ལྡན་འབྲུག་པ་བཀའ་བརྒྱུད་ལ་ཤིན་ཏུ་གྲགས་ཆེ་བ་སྟོད་འབྲུག་རྣམས་ཀྱི་ཁྲིད་ཆེན་བརྒྱད་དུ་གྲགས་པ་སྟེ། ལམ་ཟབ་མོས་གུས་ཀྱི་ཁྲིད། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་གྱི་ཁྲིད། ཐབས་ལམ་ཁྱད་པར་ཅན་གྱི་ཁྲིད། གསང་སྤྱོད་ལྡོག་སྒོམ་གྱི་ཁྲིད། དག་སྣང་ཞིང་སྦྱོང་གི་ཁྲིད། ཆོས་བརྒྱད་འགོ་སྙོམས་ཀྱི་ཁྲིད། བྱམས་སྙིང་རྗེའི་ཁྲིད། རྒྱུ་འབྲས་རྟེན་འབྲེལ་གྱི་ཁྲིད་བཅས་དང་། ཁྲིད་ཆུང་བརྒྱད་དུ་གྲགས་པ། གཞན་ཡང་སྨད་འབྲུག་རྣམས་ཀྱི་ཐུབ་པ་ལྔ་ལྡན་ཏེ། ཕྱག་རྒྱ་ཆེན་པོ་འཆི་ཐུབ། གཏུམ་མོ་རས་ཐུབ། གསང་སྤྱོད་རི་ཐུབ། ནད་གདོན་འཁྲུགས་ཐུབ། གཉེན་པོ་རྐྱེན་ཐུབ་ཀྱི་ཁྲིད་བཅས་དང་། རྩ་བའི་བཀའ་བརྒྱུད་རྣམས་ཀྱི་སྐོར་དྲུག་ལ་སོགས་པ་རྩལ་དུ་བཏོན་ནས་འཆད་པར་མཛད་ཅིང་། ཆོས་རྗེ་གཙང་པ་རྒྱ་རས་པས་ཕྱག་ཆེན་ལ་བཤད་པ་ཚིག་གི་སྐོར། གདམས་ངག་ཉམས་ལེན་གྱི་སྐོར། རྟོགས་པ་བྱིན་རླབས་ཀྱི་སྐོར་བཅས་གསུམ། ཆོས་དྲུག་ལ་བསྲེ་འཕོ་གནད་ཀྱི་སྐོར། བྲུལ་ཚོ་བློ་རྡེག་གི་སྐོར། འཇུག་ལྡོག་སྤྱི་ཁྱབ་ཀྱི་སྐོར། མངོན་པར་རྟོགས་པའི་སྐོར། ཞལ་གདམས་གནད་ཀྱི་སྐོར། རྟོག་པ་ལམ་ཁྱེར་ནད་འདོན་སྐོར་ཏེ་ཐབས་ལམ་གནད་ཀྱི་སྐོར་དྲུག །རོ་སྙོམས་ལ་གཏེར་མཛོད་བཀའ་རྒྱ་ཅན། ཡང་མཛོད་ཐུགས་ཀྱི་མེ་ལོང་། གསང་མཛོད་སྦས་པ་མིག་འབྱེད་བཅས་གསུམ། རོ་སྙོམས་སྐོར་དྲུག་ལ། རྣམ་རྟོག་ལམ་ཁྱེར། ཉོན་མོངས་ལམ་ཁྱེར། ན་ཚ་ལམ་ཁྱེར། ལྷ་འདྲེ་ལམ་ཁྱེར། སྡུག་བསྔལ་ལམ་ཁྱེར། འཆི་བ་ལམ་ཁྱེར་རོ། དེ་དག་ལས་དང་པོ་ལྔ་ནི་ཕྱག་རྒྱ་ཆེན་པོ་དང་བྱང་ཆུབ་སེམས་ཀྱི་ལམ་ཁྱེར་ཡིན་ལ། འཆི་བ་ལམ་ཁྱེར་ཞེས་པ་ཆོས་དྲུག་གི་བར་དོའི་གདམས་པ་ལས་འཕྲོས་པའོ། ཡང་རྟེན་འབྲེལ་ཁོ་བོ་ལུགས། ལམ་ཟབ་མོས་གུས་ཆེན་པོ་རྣམས་ཀྱིས་ཤིང་རྟའི་སྲོལ་ཕྱེ་ནས་འཆད་པར་མཛད་ཅིང༌། སྟོད་འབྲུག་བསྟན་པའི་རྩ་ལག་གཉིས་པ་རྒྱལ་བ་ཡང་དགོན་པས་རི་ཆོས་སྐོར་གསུམ་དུ་བསྟན་ཏེ། དེའང་སྒྲུབ་པ་ཉམས་ལེན་གྱི་ཆོས་ཐམས་ཅད་ཚང་བར་སྟོན་པ་དགོས་པ་ཀུན་འབྱུང་གི་སྐོར། རྡོ་རྗེ་ལུས་ཀྱི་གནས་ལུགས་གསལ་བར་སྟོན་པ་སྦས་བཤད་ཀྱི་སྐོར། འཆི་བ་ལམ་དུ་བྱེད་པ་བར་དོ་འཕྲང་སྒྲོལ་གྱི་སྐོར་གསུམ། དང་པོ་ལ་རྩ་བ་ལུས་ལྟ་བུའི་ཆོས་གསུམ། གྱེས་པ་ཡན་ལག་ལྟ་བུའི་ཆོས་དགུ། །ཟབ་པ་དོན་སྙིང་ལྟ་བུའི་ཆོས་དྲུག །གཅེས་པ་སྲོག་ལྟ་བུའི་ཆོས་དྲུག །དམར་ཁྲིད་དབང་པོའི་སྒོ་ལྔ་སོགས་བཞུགས་ཤིང་། འབའ་ར་བ་རྒྱལ་མཚན་དཔལ་བཟང་གི་ཆོས་དྲུག་གི་ཡིག་ཆུང་ལ་འཇམ་དབྱངས་ཆོས་ཀྱི་གྲགས་པས་རྒྱས་པར་མཛད་པ་བདེ་ཆེན་སྐོར་གསུམ་གྱི་གདམས་ངག་ཅིག་ཅར་བ་དང་རིམ་གྱིས་པའི་ལམ་གཉིས་སུ་བཞུགས། རྗེ་འབའ་ར་བ་སོགས་ཀྱི་རི་ཆོས་ནི་ཟབ་ཆོས་རྒྱན་བཞི་སྐོར་གསུམ་ཞལ་གདམས་ཀྱིས་བརྒྱན་པ་ཞེས་བཤད་པས། རྒྱན་བཞི་ནི། རི་ཆོས་ཡོན་ཏན་ཀུན་འབྱུང་དང་། གསང་བ་དབང་གི་གྲུ་བོ་ཆེ། རྡོ་རྗེ་ལུས་ཀྱི་སྦས་བཤད། བར་དོའི་ཁྲིད་དང་བཞིའོ། དེ་དག་ཡོན་ཏན་ཀུན་འབྱུང་ནི། བརྗོད་བྱའི་དངོས་གཞི་སྐྱེས་སྦྱོར་དང་ཆོས་དྲུག་གི་རྒྱབ་ཆོས་ཡིན་ཞིང་། གང་དུ་སྒོམ་པའི་གནས་ཀྱི་མཚན་ཉིད་དང་རིམ་གཉིས་ཀྱི་སྔོན་འགྲོ་སྡོམ་པ་གསུམ་གྱི་རྣམ་གཞག་རྣམས་དང༌། དབང་གྲུ་ནི། བདེ་མཆོག་ནག་པོ་བ་གཙོ་བོར་སྟོན་པའི་དཀྱིལ་ཆོག་དང་། གཞན་ཡང་སྐྱེས་སྦྱོར་དང་ཆོས་དྲུག་ལ་མཁོ་བའི་དམིགས་སྐོར་མང་དུ་ཡོད། སྦས་བཤད་ཀྱི་གཞི་དངོས་པོའི་གནས་ཚུལ་གཏན་ལ་འབེབས་པ་སོགས་སོ།
།ཁྲོ་ཕུ་བཀའ་བརྒྱུད་པ་ལ་ཁྲོ་ཕུ་ལོ་ཙཱ་བས་ཕྱག་ཆེན་གྱི་ལྟ་བ་གཞིར་བཟུང་ནས་གསུངས་པའི་མན་ངག་འབྲུ་དགུ་དང་། སྙིང་གཏམ་བཞི་གསུམ་བཅུ་གཉིས། ཕྱག་རྒྱ་ཆེན་པོ་དོན་དགུ་མ། ཁྲོ་ཕུའི་མན་ངག་བརྒྱ་རྩ་སོགས་ཀྱི་བཀའ་སྲོལ་ཐུན་མོང་མ་ཡིན་པ་འགའ་ཞིག་ཐོས་རྒྱུ་འདུག་ཀྱང་ཞིབ་ཕྲའི་ལྟ་གནད་རྟོགས་པར་དཀའ་བ་བཅས་སོ།

II.1.4 - A brief history of the Shangpa Kagyü
།བཞི་པ། ཤངས་པ་བཀའ་བརྒྱུད་ཀྱི་བྱུང་ཚུལ་མདོ་ཙམ་བརྗོད་པ། དེ་ཡང་དུང་དཀར་བློ་བཟང་འཕྲིན་ལས་ཀྱིས་ཆོས་ལུགས་ཤིག་ལ་ཆ་མཚོན་ན། དང་པོ་བྱུང་བའི་མཚམས་གང་ནས་འཛིན་དགོས་པའི་སྐོར་ལ་བཤད་ཚུལ་མི་འདྲ་བ་གཉིས་ཡོད་དེ། ༡ ཆོས་ལུགས་དང་སྲོལ་གཏོད་མཁན་བླ་མ་དེས་སློབ་མ་ལ་ཆོས་བཤད་ནས་ཆོས་བརྒྱུད་འཛིན་པའི་སློབ་མ་དང་པོར་བྱུང་བ་ནས་ངོས་འཛིན་པ་གཅིག་དང་། ༢ བླ་མ་དེའམ་དེའི་ཆོས་བརྒྱུད་འཛིན་པའི་སློབ་མས་དགོན་པ་སོགས་ཀྱི་གནས་གཞི་དང་པོར་བཟུང་བ་ནས་ཆོས་ལུགས་དེ་བྱུང་བར་འདོད་པའི་བཤད་ཚུལ་གཉིས་ཡོད་པས། སྐབས་རེ་དང་པོའི་དབང་དུ་བྱས་ནས་བཤད་དགོས་པ་དང་། སྐབས་རེ་གཉིས་པའི་དབང་དུ་བྱས་ནས་བཤད་དགོས་པ་ཡང་འདུག་ཅེས་གསུངས་པ་བཞིན། ཤངས་པ་བཀའ་བརྒྱུད་ཀྱི་ཆོས་བརྒྱུད་དངོས་སུ་བྱུང་མཚམས་ཀྱང་གཉིས་པའི་དབང་དུ་བྱས་ནས་བཤད་ན་ཅུང་ཟད་འཚམ་པ་སྟེ། དཔལ་ལྡན་ཤངས་པའི་ཆོས་སྐོར་གྱི་འབྱུང་ཁུངས་ཡིད་ཀྱི་མུན་སེལ་ལས་བསྟན་པའི་གཞི་འཕན་ཡུལ་འཆད་ཀར་བྱུང་མོད་ཀྱང་། བླ་མ་ཡི་དམ་གྱི་ལུང་བསྟན་པའི་གནས་ཤངས་ཡིན་པ་དང་། མཐར་ཐུག་ལྔ་པོ་རྫོགས་ས་ཡང་ཤངས་ཞོང་ཞོང་ཡིན་པས་ཤངས་པ་ཞེས་པ་དང་། རྡོ་རྗེ་འཆང་ནས་རྩ་བའི་བླ་མའི་བར་ཞལ་ནས་སྙན་དུའམ། བཀའ་ནས་བཀར་བརྒྱུད་པས་བཀའ་བརྒྱུད་དོ། དེས་ན་དཔལ་ལྡན་ཤངས་པ་བཀའ་བརྒྱུད་ཅེས་གྲགས་སོ་ཞེས་འཁོད་པ་ལྟར། སྤྱིར་མཁས་གྲུབ་ཁྱུང་པོ་རྣལ་འབྱོར་ཤངས་སུ་མ་ཕེབས་གོང་འཕན་ཡུལ་དུ་འཆད་ཁ་དགོན་བཏབ་ནས་ཚོགས་པ་བསྐྱངས་པའི་ལོ་རྒྱུས་ཡོད་པས། བུ་སློབ་དེ་དག་མཁས་གྲུབ་ཁྱུང་པོའི་བརྒྱུད་པ་འཛིན་པ་བསྙོན་མེད་ཡིན་པ་མ་ཟད། ལྷག་པར་དུ་འཕན་ཡུལ་ནས་ཤངས་སུ་ཐོག་མར་ཕེབས་སྐབས་དཔོན་སློབ་སུམ་སྟོང་ཡོད་པ་རྣམས་ནི་ཕྱིས་སུ་ཤངས་པ་བཀའ་བརྒྱུད་ཀྱི་ཐོག་མའི་བརྒྱུད་འཛིན་པའང་ཡིན། དེར་བརྟེན་ཤངས་པའི་ཆོས་བརྒྱུད་ཀྱི་ས་བོན་ཐོག་མར་འཕན་ཡུལ་དུ་བྱུང་ཡང་། ལོ་ཏོག་རྒྱས་པ་དང་འབྲས་བཟང་སྨིན་པའི་ཡུལ་ནི་ཤངས་རང་དུ་ངེས་པ་སྟེ། ཤངས་པ་བཀའ་བརྒྱུད་ཅེས་ཡོངས་སུ་གྲགས་པའི་སྒྲ་བོ་ཆེ་དེ་ཡང་སྤྱི་ལོ་1121ལོར་ཤངས་ཁུལ་དུ་ཞོང་ཞོང་དགོན་སོགས་ཕྱག་བཏབ་པ་ནས་བྱུང་བ་ཡིན་པ་ཤེས་རྟོགས་ཐུབ། མཁས་གྲུབ་ཁྱུང་པོ་ཤངས་སུ་ཕེབས་རྗེས་སུ་ཁུལ་དེར་བཏབ་པའི་ཤངས་པ་བཀའ་བརྒྱུད་ཀྱི་དགོན་གནས་གཙོ་བོ་རྣམས་ཀྱི་སྐོར་སྔར་བཤད་ཟིན་པས་དེར་གཟིགས་པར་འཚལ།

II.1.5 -
ལྔ་པ། ཤངས་ཆོས་དང་བོད་དར་ནང་བསྟན་ཆོས་བརྒྱུད་གཞན་གྱི་བརྒྱུད་འཛིན་པའི་དབར་གྱི་འབྲེལ་བ།
དེ་ཡང་བོད་རིག་པ་མཁས་ཅན་མད་ཐེའུ་ཁེབ་སི་ཐིན་(Mathew Kapstein)གྱིས་ཤངས་པའི་ཆོས་བརྒྱུད་འདི་ཉིད་རང་རྐང་ཚུགས་པར་གནས་མི་ཐུབ་ཀྱང་ནགས་ཚལ་སྤྱི་ལ་རྒྱན་སྤྲོས་ནུས་པའི་རྒུན་ཤིང་དང་འདྲ་བས། དེ་ནི་བོད་བརྒྱུད་ནང་བསྟན་གྱི་གལ་ཆེའི་གྲུབ་ཆ་ཞིག་ཡིན་ཞེས་གསུངས་པ་བཞིན། ལོ་རྒྱུས་ཀྱི་བཤུལ་ལམ་རིང་མོའི་སྟེང་ཕྱི་ནང་གི་དཀའ་དུབ་ཅི་རིགས་ཀྱིས་བཙེས་པའི་ཤངས་པའི་ཆོས་བརྒྱུད་འདི་ཉིད་དེང་གི་ཆར་བརྒྱུད་གཙང་ཉམས་མེད་དུ་གནས་པའི་སྐལ་པ་ཕྲ་ཡང༌། འཕགས་བོད་མཁས་གྲུབ་དུ་མའི་ཐུགས་བཅུད་ལས་འཁྲུངས་པའི་ཆོས་བརྒྱུད་འདིའི་ཟབ་མོའི་གདམས་པ་དང་ཆོས་སྒོ་འགའ་ཞིག་བོད་བརྒྱུད་གྲུབ་མཐའ་གཞན་གྱི་ཁྲོད་དུ་གནས་དང་གནས་མུས་ཡིན་པ་ཡེ་ཤེས་མགོན་པོའི་ཆོས་སྐོར་སོགས་ཀྱིས་མཚོན། ཆོས་བརྒྱུད་གཞན་གྱི་ལུང་རིག་རྣམ་དཔྱོད་ཀྱི་སྤྱན་དང་ལྡན་པའི་བརྒྱུད་འཛིན་པ་ཚོས་ཤངས་པའི་གདམས་པ་ཉམས་ལེན་བྱེད་པ་དེ་ཤངས་པ་བཀའ་བརྒྱུད་འདི་ཉིད་ད་ལྟའི་བར་མི་ནུབ་པར་གནས་པའི་གལ་ཆེའི་ཐབས་ལམ་ཞིག་ཡིན་པ་དང་། ཤངས་པའི་བརྒྱུད་འཛིན་པ་ཚོས་ཀྱང་ཆོས་བརྒྱུད་གཞན་གྱི་ལེགས་ཆ་སྙིང་བསྡུས་ཀྱིས་ཤངས་པའི་རིག་གཞུང་གི་མ་ལག་འཐུས་ཚང་དུ་བཏང་ཡོད། དེས་ན་ལོ་རྒྱུས་ཀྱི་དལ་འབབ་རིང་མོའི་ཁྲོད་ཤངས་པའི་ཆོས་བརྒྱུད་འཛིན་པ་རྣམས་དང་བོད་ཀྱི་ནང་བསྟན་ཆོས་བརྒྱུད་གཞན་གྱི་བརྒྱུད་འཛིན་པའི་དབར་གཅིག་ལ་གཅིག་བརྟེན་གྱི་འབྲེལ་བ་དམ་ཟབ་ཆགས་ཡོད།
II.1.5.1 Da-Shang lineages holders
གཅིག །དྭགས་ཤངས་གཉིས་ཀྱི་བརྒྱུད་འཛིན་པའི་སྐོར།
དེ་ཡང་དྭགས་ཤངས་ཆུ་བོ་གཉིས་འདུས་ཞེས་ཡོངས་སུ་གྲགས་པའི་བཀའ་བརྒྱུད་ཀྱི་རིང་ལུགས་ཆེན་པོ་འདི་གཉིས་ནི་བོད་དར་ནང་བསྟན་གྱི་བཀའ་བརྒྱུད་པའི་རྩ་བའི་སྡེ་པ་གཉིས་ཡིན་ལ། ཤངས་པ་བཀའ་བརྒྱུད་ལ་མཁས་གྲུབ་ཁྱུང་པོས་མཁའ་འགྲོ་ནི་དྷི་རྣམ་གཉིས་དང་། རྩ་བའི་བླ་མ་རྣམ་བཞིས་གཙོས་པའི་བླ་མ་བརྒྱ་དང་ལྔ་བཅུའི་ཐུགས་བཅུད་དང་། དྭགས་པོ་བཀའ་བརྒྱུད་ལ་ཡང་མར་པ་ལོ་ཙཱ་བས་རྗེ་ནཱ་རོ་ཆེན་པོས་སྣ་དྲངས་པའི་གྲུབ་ཐོབ་ཀྱི་བླ་མ་ལྔས་གཙོས་པའི་པཎ་གྲུབ་རྣམས་ཀྱི་ཐུགས་བཅུད་ལེགས་པར་བཞེས་ཡོད། དེ་ལྟར་དེ་གཉིས་པོའི་གསང་སྔགས་ཀྱི་གདམས་པ་འགའ་རེ་དང་། ཉམས་ལེན་གྱི་ཐབས་ལམ་སོགས་མི་འདྲ་བ་ཡོད་ཀྱང་གདམས་ངག་ལ་ཟབ་ཁྱད་མེད་པ་ཡང་། དཔལ་ལྡན་ཀུན་དགའ་གྲོལ་མཆོག་གི་ནི་གུའི་རྒྱབ་ཆོས་གླུའི་ཕྲེང་བ་ལས་རྗེ་བཀའ་བརྒྱུད་ཀྱི་དགུང་གནམ་མཐོན་པོ་ལ། །ཕ་གྲུབ་ཐོབ་ཀྱི་བླ་མ་རྒྱུ་སྐར་ཙམ། །དབྱིངས་དགག་མེད་ཀྱི་ཉི་ཟླ་འོད་པོ་ཆེ། །དེ་ནཱ་རོ་དང་ནི་གུ་མ་ལགས་སམ། །ཁོང་ལྕམ་སྲིང་གི་སྒྲུབ་བརྒྱུད་ཆུ་བོའི་རྒྱུན། །དུས་ད་ལྟའི་སྐལ་ལྡན་ཡོངས་ཀྱི་སྒོམ། ཡིད་ཚིམ་པར་སྟེར་བའི་སྨན་ཆབ་དེ། །ཆོས་ན་རོ་དང་ནི་གུ་མ་ལགས་སམ། ལུགས་རྣམ་གཉིས་ཀྱི་བཀའ་སྲོལ་སྐྱོང་བའི་རྗེས། །དཔལ་འགྲན་ཟླ་བྲལ་བ་སྤྲུལ་པའི་སྐུ། ངེད་རྟོགས་ལྡན་མང་པོའི་གཙུག་རྒྱན་གཅིག །མགོན་དྭགས་ཤངས་ཀྱི་བཀའ་བརྒྱུད་རྣམ་གཉིས་ལགས་ཞེས་གསུངས་པ་ལྟར་རོ། །དེ་གཉིས་པོའི་གདམས་པའི་བཀའ་བབས་དང་ཉམས་ལེན་གྱི་གནད་འདྲ་བས་གཉིས་ཀར་བཀའ་བརྒྱུད་པ་ཞེས་ཐོགས་ཀྱང་ཐོག་མའི་སྲོལ་འབྱེད་པ་གཉིས་ལ་ལུས་རྟེན་གྱི་ཁྱད་པར་ཡོད་དེ་མར་པ་ལོ་ཙཱ་བ་ནི་སྔགས་པ་དང་། མཁས་གྲུབ་ཁྱུང་པོ་རྣལ་འབྱོར་ནི་དགེ་སློང་ཡིན། དེས་ན་ཆོས་ལུགས་ཀྱི་རྒྱུན་སྤྱོད་ཤེས་བྱ་ཞེས་པའི་ནང་དྭགས་ཤངས་བཀའ་བརྒྱུད་ཀྱི་གྲུབ་མཐའ་རིམ་པར་སྨོས་ཟིན་པའི་མཇུག་ཏུ་དེ་གཉིས་ཀར་གོ་རུང་བའི་སྡོམ་ཚིག་སྔོན་བརྒྱུད་འཛིན་གཙོ་བོ་སྔགས་པ་ཡིན་ཀྱང་། རིམ་པས་གཙོ་བོར་རབ་བྱུང་པ་ཤ་སྟག་ཡིན་ཞེས་འཁོད་པ་དེ་ཡང་དྭགས་པོ་ཁོ་ན་ལས་ཤངས་པ་ལ་མི་འཐད་པ་ཡིན།
སྔར་གྱི་ལོ་རྒྱུས་ཐོག་ཤངས་པའི་ཆོས་བརྒྱུད་འཛིན་པ་མང་པོས་དྭགས་པོ་བཀའ་བརྒྱུད་ལས་གྱེས་པའི་བཀའ་བརྒྱུད་པ་གཞན་གྱི་གདམས་པ་མང་དག་ཅིག་གསན་བཞེས་དང་ཉམས་ལེན་གནང་ཡོད་པ་དཔེར་ན་རྨོག་ལྕོག་པ་ནི་ཁྱུང་པོ་རྣལ་འབྱོར་གྱི་བརྒྱུད་འཛིན་ཡིན་ཀྱང་། ཕྱག་རྒྱ་ཆེན་པོའི་རྟོགས་པ་ཁྱད་པར་ཅན་རྗེ་སྒམ་པོ་བ་ཉིད་ལས་འཁྲུངས་པས་ཉིན་རེ་བཞིན་བྱ་རོག་ཏུ་སྤྲུལ་ནས་སྒམ་པོའི་གཙུག་ལག་ཁང་ལ་སྐོར་བ་མཛད་པ་དང་། བརྒྱུད་པ་འདིའི་ལུགས་ཀྱི་ཡང་གྲུབ་ཐོབ་ཡིན་ནོ་ཞེས་འཁོད་པ་བཞིན། དྭགས་པོ་བཀའ་བརྒྱུད་ཀྱི་གདམས་པའི་མངའ་བདག་དྭགས་པོ་ལྷ་རྗེས་ཤངས་པ་རིན་ཆེན་བདུན་བརྒྱུད་སྔ་མའི་བཞི་པ་རྨོག་ལྕོག་པ་ལ་ཕྱག་རྒྱ་ཆེན་མོའི་ཆོས་སྐོར་མང་དུ་བསྟན་པས། ཆོས་རྗེ་རྨོག་ལྕོག་པས་ཕྱག་རྒྱ་ཆེན་མོའི་ལྟ་བའི་སྒྲོ་འདོགས་ཡོངས་སུ་ཆོད། ཕྱིས་རྗེ་རྨོག་ལྕོག་པས་དྭགས་པོའི་སློབ་མ་གཙོ་ཆེ་བ་བཅུ་གཅིག་ལ་ཕྱག་ཆེན་གྱི་གདམས་པ་འདི་རྣམས་ཕར་གསུངས། གཞན་ཡང་ཆོས་རྗེ་རྨོག་ལྕོག་པས་དགེ་བཤེས་གཞུ་པ་ལ་ནཱ་རོའི་ཡིག་ཆུང་དང་། བླ་མ་བུར་སྒོམ་ནག་པོ་དང་ཕག་གྲུ་རྡོ་རྗེ་རྒྱལ་པོ་སོགས་ལས་ཀྱང་དྭགས་པོ་བཀའ་བརྒྱུད་ཀྱི་གདམས་པ་མང་དག་ཅིག་གསན་གནང་བས། དུས་དེ་ནས་བཟུང་ནས་དྭགས་ཤངས་གཉིས་ཀྱི་འབྲེལ་བ་ཇེ་ཟབ་ཏུ་སོང་། དེ་མིན་གཉན་སྟོན་རི་གོང་པས་ནཱ་རོ་ཆོས་དྲུག་གསན་པ། འགྲོ་མགོན་སངས་རྒྱས་སྟོན་པས་ཁྲོ་ཕུ་ལོ་ཙཱ་བ་ལས་ཤྲཱི་རྣམ་གསུམ་གྱི་གདམས་པ་འགའ་ཞུས་པ། མཁས་གྲུབ་ཤངས་སྟོན་གྱིས་མདོ་བོ་རུ་བླ་མ་ཀརྨ་པ་ལ་ཐུགས་རྗེ་ཆེན་པོ་རྒྱལ་བ་རྒྱ་མཚོ། སྐུ་གསུམ་ངོ་སྤྲོད། རླུང་སེམས་དབྱེར་མེད། བསམ་གཏན་ཐུན་འཇོག་ལ་སོགས་པའི་ཀརྨ་བཀའ་བརྒྱུད་ཀྱི་གདམས་པ་མང་དུ་ཞུས་པ། མཁས་བཙུན་རྒྱལ་མཚན་འབུམ་གྱིས་ཁྲོ་ཕུ་བའི་གདམས་ངག་ཆོས་ཆུང་བཞི་གསུམ་བཅུ་གཉིས། སྙིང་གཏམ་བཞི་གསུམ་བཅུ་གཉིས། གདམས་ངག་གནད་ཀྱི་ལྡེ་མིག །མི་གཡོ་བའི་དམིགས་པ་སྐོར་གསུམ། ཞེན་ལོག་དཔེ་སྒྲོན་མ་ལ་སོགས་པ་མང་དུ་ཞུས། མཁས་བཙུན་གཞོན་ནུ་གྲུབ་ཀྱིས་ཆོས་རྗེ་སངས་རྒྱས་སྟོན་པ་ལས་དྭགས་པོ་བཀའ་བརྒྱུད་ཀྱི་འབྲི་གུང་པ་དང་། འབྲུག་པ། ཚལ་པ་སོགས་ཀྱི་གདམས་པ་མང་དུ་ཞུས་པ། དུས་ཕྱིས་ཁྱུང་པོ་གཉིས་པ་ཚུལ་ཁྲིམས་མགོན་གྱིས་ཀརྨ་སྐུ་ཕྲེང་གསུམ་པ་རང་བྱུང་རྡོ་རྗེ་སློབ་དཔོན་དུ་བསྟེན་པ། རི་ཁྲོད་རས་ཆེན་སངས་རྒྱས་སེང་གེས་མཚུར་ཕུར་ཀརྨ་སྐུ་ཕྲེང་བཞི་པ་རོལ་པའི་རྡོ་རྗེ་ལས་གདམས་པ་མང་དུ་གསན་པ། མཁས་བཙུན་གཞོན་ནུ་གྲུབ་ཀྱིས་བླ་མ་དགེ་སློང་ལས་གྲུབ་ཆེན་ཏེ་ལོ་པའི་ཕྱག་རྒྱ་ཆེན་པོ་གངྒཱ་མའི་གདམས་པ་ཡང་ཞུས་པ། ཆོས་རྗེ་ནམ་མཁའ་རྒྱལ་མཚན་གྱིས་འབྲི་གུང་པ་ནས་བརྒྱུད་པའི་ཕྱག་ཆེན་དང་། ལྔ་ལྡན། ནཱ་རོ་ཆོས་དྲུག་བཅས་གསན་པ་སོགས་ཧ་ཅང་མང་།
ཡང་དྭགས་པོ་བཀའ་བརྒྱུད་ཀྱི་བརྒྱུད་འཛིན་པ་འགས་ཤངས་པའི་གདམས་པ་གསན་བཞེས་དང་ཉམས་ལེན་གནང་ཡོད་པ་སྟེ། ཀརྨ་པ་རང་བྱུང་རྡོ་རྗེས་གྲུབ་ཆེན་ཁྱུང་པོ་ཚུལ་ཁྲིམས་མགོན་ནི་རྩ་རླུང་ལ་བརྟན་པ་ཐོབ་པས་ཁོང་ནི་ངའི་སེམས་ཀྱི་སྣེ་ཁྲིད་པ་ཡིན་ཞེས་གསུངས་མྱོང་བ་ལྟར་རྩ་དང་རླུང་གི་ཡོན་ཏན་ལ་མཐར་ཕྱིན་པའི་སྐྱེས་ཆེན་ཁྱུང་པོ་གཉིས་པར་གྲགས་པ་ཚུལ་ཁྲིམས་མགོན་པོས་ཀརྨ་པ་སྐུ་ཕྲེང་གསུམ་པར་ཤངས་པའི་རྩ་རླུང་གི་གདམས་པ་དེ་རྣམས་གནང་བས། ཕྱིས་བཀའ་བརྒྱུད་ཆེ་བཞི་ཆུང་བརྒྱད་སོ་སོའི་ཁྱད་ཆོས་ལྡིང་བའི་སྐབས་སུ་ཡང་ཀརྨ་པའི་རླུང་སེམས་དབྱེར་མེད་ཅེས་པ་དེ་བྱུང་བ་མིན་ནམ་སྙམ། གཞན་ཡང་ཤངས་པའི་ཚེ་སྒྲུབ་སྟེ་མགོན་པོ་ཚེ་དཔག་མེད་ཀྱི་སྒྲུབ་ཐབས་དེ་རྗེ་ནཱ་རོ་པས་ནི་གུ་མ། དེས་མཁས་གྲུབ་ཁྱུང་པོ་ལ་བརྒྱུད་པ་དེས་ཤངས་ལུགས་སུའང་རྗེ་ནཱ་རོ་པའི་གདམས་པ་རེ་ཟུང་བརྒྱུད་ཡོད་པ་མཚོན། དེ་མིན་ཤངས་པའི་མགོན་པོ་སྨད་ལུགས་དེ་ཉིད་སློབ་དཔོན་ཨའི་སེང་གེ་ལས་ཕག་གྲུ་བཀའ་བརྒྱུད་སོགས་ལ་དར་བ་དང་། ཡང་སྙིགས་མའི་དུས་ཀྱི་ཤངས་ཆོས་བསྟན་པའི་བདག་པོ་ཀརྨ་རང་བྱུང་ཀུན་ཁྱབ་ཀྱིས་ཤངས་ཆོས་དང་ཀརྨ་ཀམ་ཚང་གཉིས་ཀ་ཉམས་སུ་ལེན་པ་སོགས་ཀྱི་དཔེ་མཚོན་མང་། དེ་ལྟར་དྭགས་ཤངས་གཉིས་ཀྱི་སྔ་རབས་ཀྱི་བརྒྱུད་འཛིན་པ་འགས་གདམས་པ་འགའ་ཞིག་ཕར་ཞུ་ཚུར་ཞུ་དང༌། རྩོད་མེད་ཀྱི་གདམས་པ་ཡིན་ཕྱིན་ཆད་ལ་རིས་སུ་མ་མཆིས་པའི་ལྟ་མཆོག་བཟུང་ནས་ཉམས་ལེན་གནང་ཡང་། རང་རང་སོ་སོར་ཐུན་མོང་མ་ཡིན་པའི་གདམས་པ་དང༌། བླ་མ་བརྒྱུད་པ་སོགས་མི་འདྲ་བ་ཡོད་པས་དེ་གཉིས་དབར་མཚུངས་རྟགས་རྒྱབ་ན་མ་འགྲིག་སྙམ། དྭགས་ཤངས་གཉིས་ཀྱི་གདམས་པའི་གཙོ་བོ་ཆོས་དྲུག་གི་ཁྱད་པར་ཡང་ལེ་ཚན་གོང་མར་སྨོས་ཟིན་པས་བསྐྱར་དུ་བརྗོད་པའི་དགོས་པ་མེད་དོ།
II.1.5.2 Nyingma
།གཉིས། ཤངས་ཆོས་དང་རྙིང་མ་པའི་བརྒྱུད་འཛིན་གྱི་སྐོར།
ཤངས་པ་བཀའ་བརྒྱུད་ཀྱི་སྲོལ་འབྱེད་པོ་མཁས་གྲུབ་ཁྱུང་པོ་རྣལ་འབྱོར་ཁོ་ནར་ཆ་མཚོན་ན། ཤངས་པའི་བཀའ་སྲོལ་འདི་ལོགས་སུ་མ་གཏོད་པའི་གོང་དུ་བླ་མ་འབྱུང་གནས་སེང་གེ་སོགས་ལས་གསང་སྔགས་རྙིང་མའི་རྫོགས་ཆེན་གྱི་གདམས་པ་གསན་མྱོང་། དེ་ལྟར་རྙིང་མ་པའི་གྲུབ་མཐའ་ལ་ཞུགས་མྱོང་བའི་མཁས་གྲུབ་ཁྱུང་པོར་རྙིང་མའི་ཕྱོགས་ཀྱི་ཤུགས་རྐྱེན་ཐེབས་ཡོད་པ་ནི་ཨ་ཅང་བརྗོད་མེད་རེད། གཞན་ཡང་མཁས་གྲུབ་ཤངས་སྟོན་གྱི་མཛད་རྣམ་དུ་གཞུང་བྲག་དམར་བའི་བླ་མ་རས་པ་དཀོན་མཆོག་སྐྱབས་ཀྱིས་འགྲོ་མགོན་སངས་རྒྱས་སྟོན་པ་ལས་རྫོགས་ཆེན་སྙིང་ཐིག་ཞུས་པའི་སྐོར་འཁོད་པ་ལྟར་འགྲོ་མགོན་སངས་རྒྱས་སྟོན་པ་ལའང་རྫོགས་ཆེན་གྱི་གདམས་པ་མངའ་བ་མཚོན། ད་དུང་ཆོས་རྗེ་སངས་རྒྱས་སྟོན་པའི་སློབ་མ་མཁས་བཙུན་གཞོན་ནུ་གྲུབ་ལ་སྤྲུལ་སྐུ་འགའ་རབ་རྡོ་རྗེ་ལས་སྔ་འགྱུར་རྙིང་མའི་རྫོགས་ཆེན་གྱི་གདམས་པའང་ཐོབ་པ་དང་། དེ་མིན་ཤངས་ཆོས་ཉེ་བརྒྱུད་ཀྱི་བཀའ་བབས་གྲུབ་ཆེན་ཐང་སྟོང་རྒྱལ་པོས་ཀུན་སྤངས་དོན་ཡོད་རྒྱལ་མཚན་ལས་བྱང་གཏེར་ཡོངས་རྫོགས་དང་། ཁྱད་པར་རྔ་ཡབ་པདྨ་འོད་སོགས་སུ་ཕེབས་ནས་གུ་རུ་རིན་པོ་ཆེ་སོགས་གྲུབ་ཐོབ་དཔག་མེད་ལས་ཆོས་གསན་པས་རྙིང་མ་པའི་ཤིན་ཏུ་ཟབ་པ་ཉེ་བརྒྱུད་གཏེར་མའི་བླ་བརྒྱུད་དུའང་བཞུགས་སུ་གསོལ་ཡོད། ལྷག་པར་དུ་དབོན་སྟོན་སྐྱེར་སྒང་པས་རྒྱ་གོང་རི་པ་ལས་རྟ་མགྲིན་གསང་སྒྲུབ་ཀྱི་གཏེར་དཔེ་རྫོགས་པར་གསན་པས། ཟབ་མོའི་གཏེར་དང་གཏེར་སྟོན་གྲུབ་ཐོབ་ཇི་ལྟར་བྱོན་པའི་ལོ་རྒྱུས་མདོར་བསྡུས་སུ་བཀོད་པ་རིན་ཆེན་བཻཌཱུརྱའི་ཕྲེང་བར་ཡང་དུས་དེ་ནས་བཟུང་བཀའ་གཏེར་ཆུ་བོ་གཉིས་འདྲེས་སུ་གྱུར་ཞེས་འཁོད།
དེ་ལྟར་ཤངས་པའི་བརྒྱུད་འཛིན་པ་མང་པོས་རྫོགས་ཆེན་གྱི་ཆོས་སྒོར་ཞུགས་མྱོང་ལ། རྙིང་མ་པའི་སྐྱེས་ཆེན་རྩོད་མེད་འགས་ཀྱང་ཤངས་ཆོས་ཐུགས་ཉམས་སུ་བཞེས་མྱོང་བ་སྟེ། ཀོང་སྤྲུལ་ཡོན་ཏན་རྒྱ་མཚོའི་རྣམ་ཐར་དུ་ཨོ་རྒྱན་གཏེར་བདག་གླིང་པས་ཇོ་ཤངས་ཞི་གཅོད་བོ་དོང་པ་སོགས་ཆོས་རྒྱུན་ཕྲ་བ་རྣམས་རང་སྟོབས་དང་གཞན་བསྐུལ་ལ་བརྟེན་གདམས་ངག་གི་སྲོག་རྩ་མཐུད་ཅེས་འཁོད་པ་ལྟར། ཁོང་གིས་སྔ་འགྱུར་རྙིང་མའི་ཆོས་བརྒྱུད་གཙོ་བོར་འཛིན་ཐོག་དཔལ་ལྡན་ཤངས་པའི་བཀའ་སྲོལ་སོགས་ཀྱི་ཆོས་སྒོ་རྣམས་ལ་ཡང་ཐུགས་སྣང་མཛད་པ་དང་། འཇམ་དབྱངས་མཁྱེན་བརྩེ་དབང་པོས་གཙོ་བོར་རྙིང་མ་པའི་བརྒྱུད་པ་འཛིན་ཐོག །བཤད་རྒྱུད་འདེགས་པའི་ཀ་ཆེན་བཅུ་དང་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀུན་གྱི་རིང་ལུགས་ཕལ་མོ་ཆེ་གསན་མྱོང་བ་སོགས་ཀྱིས་མཚོན་ནོ།
II.1.5.3 Sakya
།གསུམ། ཤངས་ཆོས་དང་ས་སྐྱ་པའི་བརྒྱུད་འཛིན་གྱི་སྐོར།
ཤངས་པ་བཀའ་བརྒྱུད་ཀྱི་རིན་ཆེན་བདུན་བརྒྱུད་སྔ་མའི་དྲུག་པ་རི་གོང་པ་སངས་རྒྱས་སྟོན་པས་ཆོས་རྗེ་ས་པཎ་གཙུག་ཏུ་བསྟེན་ནས་ས་ལུགས་ཀྱི་གདམས་པ་སོགས་གསན་མྱོང་བ་དང་། བསམ་སྡིངས་བརྒྱུད་པའི་སྤྱི་མེས་མཁས་བཙུན་གཞོན་ནུ་གྲུབ་ཀྱིས་ས་སྐྱ་པའི་ལམ་འབྲས་ཉམས་ལེན་གནང་ཡོད་པ་ཡང་། མཁས་བཙུན་གཞོན་ནུ་གྲུབ་ཀྱིས་ཕྱིས་མྱང་སྨད་དུ་བསམ་སྡིངས་བཏབ་ནས་ལམ་འབྲས། ཕྱག་ཆེན། ནི་གུ་རྣམས་ཆོས་ཀྱི་གཙོ་བོ་མཛད་ནས་གདུལ་བྱ་མང་པོ་ལ་ཁྲིད་བསྐྱངས་ཞེས་འཁོད། ཡང་འཇག་ཆེན་རྒྱལ་མཚན་འབུམ་ས་སྐྱར་བྱོན་ནས་བླ་མ་འཇམ་དབྱངས་པ་དང་སློབ་དཔོན་ཀུན་དགའ་སོགས་ལས་བརྟག་གཉིས་དང་། ས་ལུགས་ཀྱི་ལག་ལེན། ལམ་འབྲས་ཀྱི་ཁྲིད་ལམ་སྐོར་དང་བཅས་པ་མ་ཚང་བ་མེད་པར་ཞུས་ནས་སྲོག་ཤིང་དུ་དེ་དག་ལས་འགའ་ཞིག་གི་བཤད་པ་ཡང་མཛད་མྱོང་བ་དང་། ཆོས་རྗེ་བྱམས་པ་དཔལ་གྱིས་སློབ་དཔོན་སེང་གེ་བཟང་པོ་ལས་གཅོད་ཀྱི་སྐོར་དང་། ལམ་འབྲས་གཞུང་བཤད་སོགས་གསན་པ། གྲུབ་ཐོབ་ཐང་སྟོང་རྒྱལ་པོས་ས་སྐྱ་དང་ཤངས་ཆོས་གཉིས་ཀ་ཉམས་ལེན་གནང་བ། དེ་མིན་ས་སྐྱ་པཎྜི་ཏས་གསན་པའི་ནཱ་རོ་ཆོས་དྲུག་གི་ལུགས་ཤིག་རྨོག་ལྕོག་པ་ནས་བརྒྱུད་པ་སྡོམ་གསུམ་རང་མཆན་དུ་གསལ་ཞིང་། སུ་ཁ་སིདྡྷིའི་བྱིན་རླབས་ཀྱི་བཀའ་ཞེས་པའི་མཇུག་ཏུ་དགེ་སློང་ངག་དབང་ཆོས་གྲགས་ཀྱིས་ཚར་ཆེན་ཆོས་ཀྱི་རྒྱལ་པོ་ཡབ་སྲས་ཀྱི་གསུང་གི་ཟིན་ཐོ་ལ་བརྟེན་ནས་བཀོད་ཅེས་འཁོད་པ་དང་། ཤངས་པའི་གསེར་ཆོས་ལྔའི་བླ་མ་བརྒྱུད་པའི་གསོལ་འདེབས་ལམ་རིམ་གྱི་སྨོན་ལམ་དང་བཅས་པ་ལས་ཕ་བླ་མ་ཚར་པ་ཆོས་རྗེའི་སྐུ་དྲིན་ལས་དཔལ་ལྡན་ཤངས་པ་བཀའ་བརྒྱུད་ཀྱི་སྙན་བརྒྱུད་འཛིན་པའི་བཙུན་པ་མཁྱེན་བརྩེའི་དབང་ཕྱུག་གིས་དཔལ་ཞ་ལུ་གསེར་ཁང་གི་གཙུག་ལག་ཁང་དུ་སྦྱར་བ་བྱིན་རླབས་འཇུག་པར་འགྱུར་ཅིག་ཅེས་འཁོད་པ་ལྟར་འཇམ་དབྱངས་མཁྱེན་བརྩེ་དབང་པོས་ཚར་ཆེན་བློ་གསལ་རྒྱ་མཚོ་ལས་འཇག་བསམ་ནས་བརྒྱུད་པའི་ཤངས་པའི་གདམས་པ་མང་དག་ཅིག་གསན་པ་དེ་དག་གི་ཐོག་ནས་ཚར་ཆེན་ཆོས་ཀྱི་རྒྱལ་པོ་དང་། དགེ་སློང་ངག་དབང་ཆོས་གྲགས། འཇམ་དབྱངས་མཁྱེན་བརྩེ་དབང་པོ་སོགས་ཀྱིས་ཤངས་ཆོས་དུ་མ་ཉམས་སུ་བཞེས་གནང་བ་དང་། ཚར་ཆེན་བློ་གསལ་རྒྱ་མཚོས་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པའི་རྗེས་གནང་གི་ཆོ་ག་བྱིན་རླབས་ཀྱི་ཆར་འབེབས་དང༌། དགེ་སློང་ངག་དབང་ཆོས་གྲགས་ཀྱིས་སུ་ཁ་སིདྡྷིའི་བྱིན་རླབས་ཀྱི་བཀའ་འཇམ་དབྱངས་མཁྱེན་བརྩེ་དབང་པོས་ཟབ་དོན་བསྡུས་པའི་རྡོ་རྗེའི་ཐོལ་གླུ་ངེས་དོན་ཐེམ་སྐས་དང་། ཤངས་པའི་གསེར་ཆོས་ལྔའི་བླ་མ་བརྒྱུད་པའི་གསོལ་འདེབས་ལམ་རིམ་གྱི་སྨོན་ལམ་དང་བཅས་པ་སོགས་ཤངས་ཆོས་སྐོར་གྱི་བསྟན་བཅོས་དང་ཁྲིད་ཡིག་འགའ་ཡང་མཛད། ཁོང་རྣམས་དང་འདྲ་བར་ལམ་འབྲས་ཚོགས་བཤད་ཀྱི་བརྒྱུད་འཛིན་མུས་ཆེན་དཀོན་མཆོག་རྒྱལ་མཚན། མུས་ཆེན་རྒྱལ་མཚན་དཔལ་བཟང༌། ཉེ་ཆར་གྱི་བློ་དགའ་རིན་པོ་ཆེ་སོགས་ས་ལུགས་ཀྱི་བརྒྱུད་འཛིན་པ་འགས་ཀྱང་མཁའ་འགྲོ་མ་སུ་ཁ་སིདྡྷིའི་ཆོས་སྐོར་འཆད་ཉན་དང་ཉམས་ལེན་གནང་སྲོལ་ཡོད་པ་མཚོན་ཐུབ། དེ་ལྟར་གཅིག་ནས་ཤངས་པའི་སྔ་རབས་ཀྱི་བླ་མ་སྐྱེས་ཆེན་དུ་མས་ས་ལུགས་ཀྱི་གདམས་པ་གསན་བཞེས་དང་ཉམས་ལེན་མཛད་ནས་སྐབས་དེའི་ཤངས་པའི་བརྒྱུད་འཛིན་གྱི་བུ་སློབ་རྣམས་ལ་བཤད་པ་ཡང་མཛད་པས། ས་སྐྱ་པའི་གདམས་ངག་གི་སྙིང་བཅུད་བསྡུ་ལེན་གནང་བ་དང་། གཉིས་ནས་ས་སྐྱ་པའི་བརྒྱུད་འཛིན་པ་འགའ་ཞིག་གིས་ཀྱང་ཤངས་ཆོས་སློབ་གཉེར་དང་ཉམས་ལེན་གནང་མྱོང་བའོ།
II.1.5.4 Jonang
།བཞི། ཤངས་ཆོས་དང་ཇོ་ནང་པའི་བརྒྱུད་འཛིན་གྱི་སྐོར།
ཤངས་པའི་ཤིན་ཏུ་ཉེ་བརྒྱུད་ཀྱི་བཀའ་བབས་འཇམ་མགོན་གྲུབ་པའི་དཔའ་བོ་དཔལ་ལྡན་ཀུན་དགའ་གྲོལ་མཆོག་གིས་མ་གཞི་ཇོ་ནང་པའི་ཆོས་བརྒྱུད་གཙོ་ཆེར་འཛིན་ཡང་། ཁོང་ལ་འཇག་བསམ་གཉིས་དང་། ཐང་ལུགས། ཡེ་ཤེས་ཀྱི་མཁའ་འགྲོ་ནི་གུ་མའི་ཞལ་གཟིགས་སོགས་བརྒྱུད་ནས་ཤངས་པ་བཀའ་བརྒྱུད་ཀྱི་གདམས་པ་མང་དག་ཐོབ་ཡོད་ཅིང་། དེ་རྗེས་རྗེ་བཙུན་ཀུན་དགའ་གྲོལ་མཆོག་གི་ཉེ་གནས་འགྱུར་མེད་བདེ་ཆེན་སོགས་ལ་ཐོབ་པའི་ཤངས་པའི་གདམས་ངག་དང་ཉམས་ལེན་བྱ་ཚུལ་རྣམས་ཇོ་ནང་པའི་ཆོས་བརྒྱུད་ཁོངས་སུ་བསྡུ་ལེན་གཏིང་གཟབ་གནང་ཡོད་ཅེས་འཁོད་པ་ལྟར། ཇོ་ནང་ཀུན་དགའ་གྲོལ་མཆོག་ནས་འགོ་བརྩམས་ཏེ། ཁོང་གི་སློབ་བརྒྱུད་དང་བཅས་པས་ཤངས་པའི་ཆོས་བརྒྱུད་ཀྱི་གདམས་པ་ཉམས་ལེན་དང་དར་སྤེལ་ཅི་རིགས་མཛད་སྟབས་ཤངས་པ་བཀའ་བརྒྱུད་ཀྱིས་ཇོ་ནང་པའི་ཆོས་བརྒྱུད་ལ་བོད་དར་ནང་བསྟན་གྱི་ཆོས་བརྒྱུད་གཞན་ལས་ལྷག་པའི་ཤུགས་རྐྱེན་ཐེབས་ཡོད།
ལྷག་པར་དུ་འཇམ་མགོན་ཀུན་དགའ་གྲོལ་མཆོག་གི་ཁྲི་འཛིན་ཇོ་ནང་ཀུན་མཁྱེན་ཏཱ་ར་ནཱ་ཐས་སྔ་རྗེས་སུ་ཆོས་སྐུ་ལྷ་དབང་གྲགས་པ་སོགས་ལས་ཤངས་པའི་ཆོས་སྐོར་མང་དག་ཅིག་གསན་བཞེས་དང་། ཉམས་ལེན་དཔྱིས་ཕྱིན་པ་གནང་ཡོད་པའང་ཁོང་གི་ལྗགས་རྩོམ་གྱི་གྲས་སུ་དཔལ་ལྡན་ཤངས་པའི་ཆོས་སྐོར་གྱི་འབྱུང་ཁུངས་ཡིད་ཀྱི་མུན་སེལ་དང་། མྱུར་མཛད་ཡེ་ཤེས་མགོན་པོའི་ཆོས་སྐོར་དང་སྒྲུབ་ཐབས་སོགས་ཀྱི་ཤངས་པའི་ཆོས་སྐོར་ཇི་སྙེད་ཅིག་ཐོན་པ་ལས་ཤེས་རྟོགས་ཐུབ། ཁོང་ཉིད་སྤྱིར་ཇོ་ནང་པ་ཆེན་པོའི་རིང་ལུགས་འཛིན་པ་ཀུན་ལ་གྲགས་ཀྱང་། རྟ་མགྲིན་ལས་བྱང་དྲེགས་པ་ཀུན་འདུལ་གྱི་མཇུག་ཏུ་ཤངས་པ་བཀའ་བརྒྱུད་ཀྱི་ཆོས་རིགས་སུ་སྐྱེས་པ་རྒྱལ་ཁམས་པ་ཏཱ་ར་ནཱ་ཐ་ཞེས་པའི་ནང་དུའང་ཤངས་ཆོས་རིགས་སུ་འཁྲུངས་པ་ཞེས་ཤངས་པའི་ཆོས་སྐོར་ལ་ཞུགས་པའི་བརྒྱུད་པའི་གྲས་སུ་ཡང་འཇོག་གནང་མཛད་ཡོད། དེ་ནས་མི་ལོ་སུམ་བརྒྱ་ཙམ་འདས་ནས་མདོ་སྨད་འཛམ་ཐང་དགོན་པའི་བླ་མ་སྤོམ་མདའ་དགེ་ལེགས་(སྤྱི་ལོ་1844ལོ་ནས་1899ལོ་བར་)སོགས་ཀྱིས་ཀྱང་ཤངས་པ་བཀའ་བརྒྱུད་ཀྱི་གདམས་པ་འཆད་ཁྲིད་དང་ཉམས་ལེན་གང་ལེགས་གནང་། སྤོམ་མདའ་དགེ་ལེགས་ཀྱིས་ནི་གུ་ཆོས་དྲུག་གི་ཟབ་འགྲེལ་སོགས་ཤངས་ཆོས་སྐོར་གྱི་བསྟན་བཅོས་དང་ཁྲིད་ཡིག་འགའ་ཡང་མཛད་ཅིང་། ཁོང་གི་བརྒྱུད་པ་འཛིན་པ་ནི་འཇམ་མགོན་ཀོང་སྤྲུལ་དང་། དེའི་སློབ་མ་སྙན་གྲགས་ཤིན་ཏུ་ཆེ་བའི་སྐྱབས་རྗེ་ཀ་ལུ་རིན་པོ་ཆེ་སྐུ་གོང་མས་ཇོ་ནང་པ་དང་ཤངས་ཆོས་གཉིས་ཀ་བརྒྱུད་འཛིན་དང་དར་སྤེལ་གྱི་མཛད་འཕྲིན་བསྐྱངས་སྟབས་དེང་ཙཱ་འདྲ་རིན་ཆེན་བྲག་གི་སྒྲུབ་སྡེ་ཀུན་བདེ་གླིང་དུ་ཇོ་ཤངས་གཉིས་ཀའི་གདམས་པ་ཉམས་སུ་ལེན་པ་དང༌། འཛམ་ཐང་གི་གཙང་པ་སྐུ་ཕྲེང་རིམ་བྱོན་སོགས་ཀྱི་བླ་མ་ཚོས་ཤངས་པའི་ཆོས་སྐོར་མ་ཉམས་བརྒྱུད་འཛིན་གནང་མུས་ཡིན་པའི་སྐོར་གཤམ་གྱི་ལེའུ་དྲུག་པའི་སྐབས་འཆད་པར་བྱའོ།
།དཔལ་ལྡན་ཤངས་པའི་ཆོས་བརྒྱུད་འདི་ཉིད་ལ་ལོ་རྒྱུས་ཀྱི་བགྲོད་ལམ་སྟེང་སྲོག་ལ་ཐུག་པའི་འཇིགས་པ་གྲངས་ལས་འདས་པ་ཞིག་འཕྲད་མྱོང་ཡང་། ཇོ་ནང་ཏཱ་ར་ནཱ་ཐ་དང་རྗེ་བཙུན་ཀུན་དགའ་གྲོལ་མཆོག་སོགས་ཀྱིས་གཙོས་པའི་ཇོ་ནང་པའི་རིང་ལུགས་འཛིན་པ་རྣམས་ཀྱིས་ཤངས་ཆོས་འདི་ཉིད་སྔ་བར་ཕྱི་གསུམ་དུ་རང་གི་བརྒྱུད་པ་བསྙོན་མེད་ལྟར་དུ་བརྩིས་ཏེ། ཐོས་བསམ་སྒོམ་གསུམ་གྱིས་རང་རྒྱུད་སྨིན་པ་དང་། འཆད་རྩོད་རྩོམ་གསུམ་གྱིས་གཞན་རྒྱུད་གདུལ་བ་སོགས་ཀྱི་མཛད་འཕྲིན་ནམ་མཁའ་དང་མཉམ་པ་སྤེལ་བར་མཛད། ལྷག་དོན་ཀུན་མཁྱེན་ཏཱ་ར་ནཱ་ཐས་རྡོ་རྗེ་ཐེག་པའི་རིང་ལུགས་རྣམས་ལ་འཁྲུལ་པས་བསླད་པ་ཐམས་ཅད་བསལ་ཞེས་རྡོ་རྗེ་ཐེག་པའི་བསྟན་པ་སྤྱི་དང་། ཡང་སྒོས་ཤངས་ཆོས་མ་ཉམས་དར་འཕེལ་གཏོང་བའི་བསྟན་བཅོས་རྒྱ་ཆེར་བརྩམས་ཏེ། ཐལ་རྡུལ་གྱིས་སྦགས་པའི་ཤངས་པའི་རིང་ལུགས་ལ་ལྷག་བསམ་གྱིས་བྱི་དོར་མཛད་ནས་ཤངས་པའི་བརྒྱུད་པ་འདི་ཉིད་ལ་འཆི་ཀ་མའི་སྲོག་མཐུད་པ་ལྟ་བུའི་བཀའ་དྲིན་ཆེས་ཆེར་བསྐྱངས། དེ་ནི་ཤངས་ཆོས་བརྒྱུད་འཛིན་པ་ཚོ་དང་བོད་བརྒྱུད་ནང་བསྟན་གྱི་རིག་པ་སྨྲ་བ་ཚོས་ཇི་སྲིད་ཉི་ཟླའི་བགྲོད་པ་མ་ནུབ་ཀྱི་བར་དུ་རྗེས་དྲན་བྱ་འོས་པ་ཡིན།
II.1.5.5 Kadam
ལྔ། ཤངས་ཆོས་དང་བཀའ་གདམས་གསར་རྙིང་གི་བརྒྱུད་འཛིན་པའི་སྐོར།
མཁས་གྲུབ་ཁྱུང་པོ་རྣལ་འབྱོར་སྐུ་འཚོ་བཞུགས་ཀྱི་དུས་ནི་བཀའ་གདམས་པའི་བསྟན་པ་དབུ་བརྙེས་པའི་དུས་སྐབས་ཤིག་ཡིན་པས། ཇོ་བོ་བཀའ་གདམས་པའི་རིང་ལུགས་འཛིན་པའི་མཁས་གྲུབ་རྣམས་ཀྱིས་གྲུབ་ཆེན་ཁྱུང་པོ་རྣལ་འབྱོར་དང་ཤངས་པའི་བླ་མ་གོང་མ་རྣམས་ལ་མདོ་ལུགས་ཀྱི་སློབ་གཉེར་དང་། གསང་སྔགས་ཀྱི་གདམས་པ་གང་ཅིར་ཚད་གཞི་མི་འདྲ་བའི་ཤུགས་རྐྱེན་ཐེབས་པ་ཡང་། མཁས་གྲུབ་ཁྱུང་པོས་མངའ་རིས་མཐོ་ལྡིང་དགོན་དུ་ཇོ་བོ་རྗེ་ལས་སེམས་བསྐྱེད་དང་། མངོན་རྟོགས་རྒྱན། མདོ་སྡེ་རྒྱན། རྒྱུད་བླ་མ། གསང་འདུས། དགྲ་ནག །འཇིགས་བྱེད་སོགས་ཀྱི་གདམས་པ་མང་དག་ཅིག་གསན་བཞེས་གནང་། ཡང་བཀའ་གདམས་ཆོས་འབྱུང་གསལ་བའི་སྒྲོན་མེར་བླ་མ་རྡོ་རྗེ་གདན་པས་ཁྱུང་པོ་རྣལ་འབྱོར་ལ་སངས་རྒྱས་སྣང་བ་མཐའ་ཡས་ཀྱི་སྤྲུལ་པ་གླང་རི་ཐང་པ་ལ་བསྙེན་པར་རྫོགས་ཤིག་ཅེས་ལུང་བསྟན་ནས། ཁྱུང་པོ་རྣལ་འབྱོར་གྱི་མཁན་པོ་མཛད་ཅེས་འཁོད་པ་ལྟར། མཁས་གྲུབ་ཁྱུང་པོའི་བསྙེན་རྫོགས་ཀྱི་སྡོམ་པ་ཞུ་ས་ནི་བླ་མ་རྡོ་རྗེ་གདན་པས་ལུང་གིས་ཟིན་པའི་བཀའ་གདམས་པའི་དགེ་བཤེས་ཆེན་པོ་གླང་རི་ཐང་པ་རྡོ་རྗེ་སེང་གེ་ཡིན། དགེ་བཤེས་གླང་ཐང་པ་ནི་པོ་ཏོ་བའི་སློབ་མ་གླང་ཤར་ཉི་ཟླ་ཟུང་འབྲེལ་དུ་གྲགས་པའི་མཚུངས་མེད་སེམས་དཔའ་ཆེན་པོ་གླང་ཐང་པ་ཞེས་བདག་གཞན་མཉམ་བརྗེའི་བྱང་ཆུབ་སེམས་བསྐྱེད་ཀྱི་ཐུགས་དམ་མཐིལ་དུ་འཛིན་པས་དུས་སྐབས་དེར་མཚན་སྙན་ཡོངས་སུ་གྲགས་པའི་བཀའ་གདམས་པའི་དགེ་བའི་བཤེས་གཉེན་ཞིག་རེད། ཁོང་གིས་མཁས་གྲུབ་ཁྱུང་པོར་དགེ་སློང་གི་སྡོམ་པ་མནོས་པ་དང༌། བློ་སྦྱོང་ཚིག་བརྒྱད་མ་སོགས་ཟབ་རྒྱས་ཆོས་ཀྱི་གནང་སྦྱིན་འཕངས་མེད་དུ་བསྩལ་བས། ཕྱིས་ཀྱི་མཁས་གྲུབ་ཁྱུང་པོའི་བརྒྱུད་འཛིན་པ་རྣམས་ཀྱང་དགེ་བཤེས་གླང་ཐང་པའི་འདུལ་ཁྲིམས་ཀྱི་རྣམ་ཐར་སྐྱོང་མཁན་ཤ་སྟག་ཏུ་གྱུར། མཁས་གྲུབ་ཁྱུང་པོའི་དགོན་གནས་ཐོག་མ་འཆད་ཁ་དགོན་ཡང་བཀའ་གདམས་པའི་བསྟན་པ་དར་སའི་ལྟེ་བའི་ས་ཁུལ་འཕན་ཡུལ་དུ་གནས་པས་སྐབས་དེར་ཁྱུང་པོ་རྣལ་འབྱོར་གྱི་གྲྭ་སློབ་ཀྱི་གྲས་སུ་བཀའ་གདམས་པའི་རིང་ལུགས་འཛིན་མཁན་ཡང་ཡོད་པར་ངེས། ཡང་རིན་ཆེན་བདུན་བརྒྱུད་སྔ་མའི་བཞི་པ་ཆོས་རྗེ་རྨོག་ལྕོག་པས་དགེ་བཤེས་རྫ་ར་བ་ལ་བཀའ་གདམས་པའི་གདམས་ངག་མང་དུ་ཞུས། ཆོས་རྗེ་སྐྱེར་སྒང་པས་བླ་མ་སྤེན་ཕུག་པ་ལས་ལོ་ལྔའི་བར་ཇོ་བོ་རྗེའི་གདམས་པ་ཞུས་ནས། ཇོ་བོ་བཀའ་གདམས་པའི་ལྷ་བཞིའི་མན་ངག་གྲུབ་ཆེན་སྐྱེར་སྒང་པའི་བཀའ་སྲོལ་དང་འབྲེལ་བ་སྤྱན་རས་གཟིགས་སྙིང་རྗེ་མཁའ་ཁྱབ་ཀྱི་ཁྲིད་དེ་ཡང་ཤངས་པའི་ཞལ་གཟིགས་ཀྱི་ཆོས་སྐོར་གྲས་སུ་བཞུགས་མུས་ཡིན་པ། མཁས་གྲུབ་ཤངས་སྟོན་གྱིས་གཡའ་ལུང་དགོན་གསར་བའི་མཁན་པོ་ལ་བཀའ་གདམས་ལམ་རིམ་དང་། ལམ་སྒྲོན། བྱང་ཆུབ་སེམས་དཔའི་བློ་སྦྱོང་། གནས་བརྟན་བཅུ་དྲུག་གི་གསོལ་འདེབས། ཤེས་རབ་སྙིང་པོའི་སྒྲུབ་ཐབས་ལ་སོགས་པ་མང་དུ་ཞུས།
དེ་རྗེས་དགའ་ལྡན་ཆོས་འབྱུང་དུ་ཆོས་སྐྱོང་ཤངས་ལུགས་ཀྱི་ཕྱག་དྲུག་པར་བཀའ་མི་འདྲ་བ་བཅུ་གསུམ་ཡོད་པ་ནས་རྗེས་གནང་བར་ཆད་ཀུན་སེལ་སྣར་ཐང་ལོ་ཙཱ་བ་དོན་གྲུབ་བཟང་པོར་གསན་ཞེས་འཁོད་པ་ལྟར་སྤྱི་ལོའི་དུས་རབས་བཅོ་ལྔ་པའི་ནང་རི་བོ་དགེ་ལྡན་པའི་ཤིང་རྟའི་སྲོལ་འབྱེད་རྗེ་ཙོང་ཁ་པ་ཆེན་མོས་སྣར་ཐང་ལོ་ཙཱ་བ་དོན་གྲུབ་བཟང་པོ་ལས་ཤངས་ལུགས་ཀྱི་མགོན་པོ་ཕྱག་དྲུག་པའི་ཆོས་སྐོར་གསན་བཞེས་གནང་བ་དང་། འཇག་པའི་སློབ་བརྒྱུད་འཇག་ཆེན་བྱམས་པ་དཔལ་ལས་ཀྱང་ཤངས་ཆོས་འགའ་ཞིག་གསན་པ་དང་། མཁས་གྲུབ་དགེ་ལེགས་དཔལ་བཟང་གིས་མུས་ཆེན་ནམ་མཁའི་རྣལ་འབྱོར་བ་ལས་མགོན་པོ་ཕྱག་དྲུག་པའི་ཆོས་སྐོར་མཐའ་དག་གསན་ཞིང་མགོན་བཀའ་བཅུ་གསུམ་རྣམས་གཙོ་ཆེར་ཤངས་ལུགས་ཁོ་ནར་ཁུངས་གཏུགས་ཤིང་། མཁས་གྲུབ་བེའུ་བུམ་ཞེས་པ་ཕྱོགས་བསྒྲིགས་མཛད་ནས། ཤངས་ལུགས་ཀྱི་མགོན་པོ་ཕྱག་དྲུག་པ་ཉིད་རིམ་བཞིན་དགེ་ལུགས་པའི་བཀའ་སྲུང་གི་གཙོ་བོའི་གྲས་སུ་གྱུར་ཅིང་། རྒྱལ་དབང་དང་པཎ་ཆེན་སོགས་དགེ་ལུགས་པའི་བླ་ཆེན་འགའ་ཞིག་བརྒྱུད་དབུས་གཙང་ཁམས་གསུམ་རྒྱ་སོག་ཡན་ཆད་དུ་ཤུགས་རྐྱེན་ཆེས་ཆེར་ཐེབས། སྤྱིར་ཤངས་ལུགས་ཀྱི་གདམས་པ་མང་དག་ཅིག་རི་བོ་དགེ་ལྡན་པས་ཉམས་བཞེས་དང་བསྡུ་ལེན་མཛད་པ་ཡང་གཙོ་ཆེར་ཡེ་ཤེས་མགོན་པོའི་ཆོས་སྐོར་དེ་ཉིད་ཡིན། གཞན་ཡང་རྒྱལ་དབང་སྐུ་ཕྲེང་དང་པོ་དང༌། གཉིས་པ། གསུམ་པ་རྣམས་ཀྱིས་ཀྱང་ཤངས་ཆོས་གསན་བཞེས་དང་ཉམས་ལེན་གནང་ཡོད་པ་སྟེ། རྗེ་དགེ་འདུན་གྲུབ་པའི་མཛད་རྣམ་ངོ་མཚར་རྨད་བྱུང་ནོར་བུའི་ཕྲེང་བར་ཤངས་པའི་ཆོས་སྐོར་ཅི་རིགས་པ་རྣམས་གསན་ཞེས་དང་། བྱང་ཆེན་གྱི་ཐེག་ཆེན་ཕོ་བྲང་དུ་རིན་པོ་ཆེ་ཀུན་དགའ་དཔལ་ལྡན་པ་སྤྱན་དྲངས་ཏེ་ཤངས་པའི་ནི་གུའི་ཆོས་སྐོར་ཚང་མ། མགོན་པོ་ཡིད་བཞིན་ནོར་བུའི་རྗེས་གནང་དང་བཅས་པ་རྣམས་ཞུས་ཞེས་འཁོད་པ་ལྟར་རྒྱལ་དབང་དགེ་འདུན་གྲུབ་པས་བྱང་ཆེན་དུ་བླ་མ་ཀུན་དགའ་དཔལ་ལྡན་སྤྱན་དྲངས་ཏེ་ཤངས་པ་བཀའ་བརྒྱུད་ཀྱི་ནི་གུ་ཆོས་དྲུག་དང་མགོན་པོ་ཡིད་བཞིན་ནོར་བུའི་རྗེས་གནང་སོགས་གསན་པ་དང་། རྒྱལ་དབང་སྐུ་ཕྲེང་གཉིས་པ་དགེ་འདུན་རྒྱ་མཚོའི་ཡབ་ཕ་རྒོད་ཀུན་དགའ་བཟང་པོ་དང་། དེའི་སྲས་དྲིན་མཆོག་དོན་ཡོད་རྒྱལ་མཚན། དེའི་སྲས་གྲུབ་པའི་དབང་ཕྱུག་ཀུན་དགའ་རྒྱལ་མཚན་སོགས་ཀྱིས་ཀྱང་ཤངས་པ་བཀའ་བརྒྱུད་ཀྱི་གདམས་པ་མང་དུ་ཉམས་ལེན་གནང་བ་སྟེ། གྲུབ་པའི་དབང་ཕྱུག་ཀུན་དགའ་རྒྱལ་མཚན་གྱིས་ནི་གུའི་རྨི་ལམ་ལ་བརྟེན་ནས་ཡུལ་སྣང་ཐམས་ཅད་གཏན་ལ་འབེབས་པར་ནུས་པས་སངས་རྒྱས་ཀྱི་ཞིང་དུ་མར་ཐོགས་མེད་དུ་བགྲོད་ཅེས་སོགས་འཁོད་པ་ལྟར། གྲུབ་དབང་ཀུན་དགའ་རྒྱལ་མཚན་གྱིས་ནི་གུའི་བཀའ་སྲོལ་ཉམས་ལེན་གྱིས་གྲུབ་པའི་རྩེ་མོར་སོན། ཡབ་མེས་རྣམས་ཀྱིས་ཤངས་ཆོས་ཉམས་སུ་ལེན་པའི་ཤུགས་རྐྱེན་གྱིས་རྗེ་དགེ་འདུན་རྒྱ་མཚོས་རྙིང་མའི་རྟ་མགྲིན་གསང་སྒྲུབ་ཤངས་ལུགས་བརྒྱུད་བཞེས་ཞེས་སོགས་གསལ་བ་ལྟར། ཤངས་ཆོས་དུ་མ་གསན་ཞིང་ཉམས་བཞེས་སུ་བསྟར་ནས་ནི་གུའི་ཁྲིད་ཡིག་སོགས་ཀྱང་མཛད་ལ། ད་དུང་འབྲོང་རྩེ་ཆོས་རྗེ་ཆོས་བློ་པ་དང་། ནང་སོ་ཚེ་དབང་བ་སོགས་སྐབས་དེའི་དགེ་ལུགས་ཀྱི་བླ་ཆེན་མང་པོར་ཤངས་པའི་ནི་གུ་ཆོས་དྲུག་སོགས་ཀྱི་གདམས་པ་ཡང་སྤེལ་བ། དེ་མིན་རྒྱལ་དབང་བསོད་ནམས་རྒྱ་མཚོས་ཤངས་དགེ་འཕེལ་རི་ཁྲོད་དུ་རྗེ་ཕྱོགས་ལས་པ་ལས་ཤངས་ཆོས་སྐོར་ཅིག་གསན་མྱོང་བ་སོགས་རི་བོ་དགེ་ལྡན་པའི་སྔ་རབས་ཀྱི་བརྒྱུད་འཛིན་པ་རྣམས་ཀྱིས་ཤངས་པའི་ཆོས་སྐོར་ཉམས་སུ་བཞེས་པའི་སྲོལ་བཟང་ལ་གཞིགས་ནས། དུས་ཕྱིས་རྒྱལ་དབང་དགེ་འདུན་རྒྱ་མཚོས་མཛད་པའི་ནི་གུ་ཆོས་དྲུག་གི་ཁྲིད་ཡིག་དེའི་སྟེང་ནས་ཀློང་རྡོལ་བླ་མ་ངག་དབང་བློ་བཟང་སོགས་དགེ་ལྡན་པའི་བླ་མ་མང་པོར་ཁྲིད་ཀ་ཐོབ་པ་དང་། ཡོངས་འཛིན་ཁྲི་བྱང་རིན་པོ་ཆེས་ཕ་བོང་ཁ་བདེ་ཆེན་སྙིང་པོ་ནས་བརྒྱུད་པའི་ནི་གུ་ཆོས་དྲུག་གི་ཉམས་ལེན་བཞིན་སྤྱི་ལོ་1958ལོ་ཙམ་ནས་ཆུ་བཟང་དུ་དབང་ཁྲིད་ཅི་རིགས་གནང་ཡོད་འདུག་ཅིང་། དབང་ཞུ་མཁན་ཚོས་སྐབས་འགར་འདོམས་དཀྲིས་ཙམ་ལས་གཅེར་བུར་བཞུགས་པ་དང་རུས་རྒྱན་སོགས་བསྣམས་སྲོལ་ཡོད། ད་ལྟའི་ཆར་བླ་བྲང་བཀྲ་ཤིས་འཁྱིལ་གྱི་དགེ་བཤེས་འཇམ་དབྱངས་རྒྱ་མཚོ་སོགས་ཀྱིས་ཤངས་པའི་ནི་གུ་ཆོས་དྲུག་ལ་སོགས་པའི་དབང་ཁྲིད་ཅི་རིགས་སྩོལ་སྲོལ་འདུག །དེ་ལྟར་རི་བོ་དགེ་ལྡན་པའི་བརྒྱུད་འཛིན་པ་འགས་ཤངས་པའི་ཆོས་སྐོར་དེ་རྣམས་ཉམས་སུ་བསྟར་བ་ཕུད། དྭགས་ཤངས་གཉིས་ཀའི་གསང་སྔགས་ཀྱི་གདམས་པ་དང་ལྟ་གྲུབ་སོགས་གང་ཅིར་གསན་བཞེས་རྒྱ་ཆེར་གནང་བས། སྐུ་ཚེ་གཅིག་ལ་ཟུང་འཇུག་གི་གོ་འཕང་ཐོབ་པ་མཁས་གྲུབ་ནོར་བཟང་རྒྱ་མཚོས་བཀའ་དགེ་དགོངས་པ་གཅིག་སྒྲུབ་ཅེས་པའི་དཔེ་ཆ་བརྩམས་ཏེ། བཀའ་བརྒྱུད་པའི་ཕྱག་རྒྱ་ཆེན་པོ་དང་དགེ་ལུགས་པའི་དབུ་མའི་ལྟ་བ་དེ་གཉིས་རྗོད་བྱེད་ཚིག་གི་ཁྱད་པར་ལས་བརྗོད་བྱའི་དོན་གཅིག་མཚུངས་ཡིན་པའི་ལྟ་བ་ཡང་བཏོན་གནང་བས་བཀའ་དགེའི་དབར་གྱི་ལྟ་གྲུབ་ལ་འདྲ་བའི་ཆ་མང་དུ་ཡོད་པ་དང་། རྫོགས་བྱང་ལ་དམིགས་པའི་མཐར་ཐུག་གི་དགོངས་པ་ཡང་མཚུངས་པའོ།
II.1.5.6 Shijé
དྲུག ཤངས་ཆོས་དང་ཞི་བྱེད་པའི་བརྒྱུད་འཛིན་གྱི་སྐོར།
།དཔའ་བོ་གཙུག་ལག་ཕྲེང་བས་ཆོས་འབྱུང་མཁས་པའི་དགའ་སྟོན་དུ་ཞི་བྱེད་པ་དང་ཤངས་པའི་ཆོས་སྐོར་འདི་གཉིས་ཀ་ཆོས་བརྒྱུད་སྣ་ཚོགས་པའི་ཆོས་ཀྱི་བྱུང་བ་བརྗོད་པའི་ཁོངས་སུ་བཞག་གནང་མཛད་ཡོད། འདི་གཉིས་ཀྱི་གདམས་པ་ཕལ་ཆེ་བར་རང་རང་གི་ཁྱད་ཆོས་ལྡན་པས་མི་མཚུངས་ཀྱང་། ཆོས་བརྒྱུད་འདི་གཉིས་ཀྱི་སྲོལ་འབྱེད་པོ་མཁས་གྲུབ་ཁྱུང་པོ་རྣལ་འབྱོར་དང་གྲུབ་ཆེན་ཕ་དམ་པའི་ཐུན་མོང་གི་བླ་མ་ནི་ཡེ་ཤེས་ཀྱི་མཁའ་འགྲོ་མ་སུ་ཁ་སིདྡྷི་ཡིན། གཞན་ཡང་ཤངས་པའི་བརྒྱུད་འཛིན་པ་རྣམས་ཀྱིས་ཞི་བྱེད་ཀྱི་གདམས་པ་ཉམས་ལེན་གནང་སྲོལ་ཡོད་པ་སྟེ། ཆོས་རྗེ་རྨོག་ལྕོག་པས་དགེ་བཤེས་འབལ་སྒོམ་ཕྱག་ན་ལ་ཞི་བྱེད་པའི་གདམས་པ་མང་དུ་ཞུས་པ་དང་། ཆོས་རྗེ་སྐྱེར་སྒང་པའི་རྣམ་ཐར་དུ་དེ་ནས་ཕག་མོ་གྲུ་པའི་ཞི་བྱེད་རྨི་ལམ་དེ་ཞུ་དགོས་སྙམ་ནས་གསོལ་བ་བཏབ་པས། དམ་པ་བྱོན་ནས་དུག་གསུམ་ལམ་ཁྱེར་གྱི་ཞི་བྱེད་གསུངས་ནས་ད་གསང་སྒྲུབ་ཀྱི་སྐྱབས་འགྲོའི་སྐོར་ང་སྒོམས་ལ་གསོལ་བ་ཐོབ་ཅིག །ངས་བྱིན་རླབས་འཇུག་པར་བྱའོ་གསུང་ངོ་ཞེས་པ་དང་འདྲ་བར། ནི་ཀོ་རིག་སེ་(Nicole Riggs)ཡིས་ཤངས་པ་བཀའ་བརྒྱུད་འདི་ཕ་དམ་པ་སངས་རྒྱས་ཀྱི་དམ་ཆོས་སྡུག་བསྔལ་ཞི་བྱེད་ཀྱི་གདམས་པ་དང་འབྲེལ་འདྲིས་ཆེ་བའི་ཁྱིམ་བརྒྱུད་དུ་འཁྲུངས་པ་ཆོས་རྗེ་སྐྱེར་སྒང་པ་བརྒྱུད་ཞི་བྱེད་པའི་གྲུབ་མཐའ་དང་འབྲེལ་བ་དམ་ཟབ་བྱུང་། ཆོས་རྗེ་སྐྱེར་སྒང་པར་དངོས་དང་རྨི་ལམ་ཅི་རིགས་བརྒྱུད་ཕ་དམ་པ་སངས་རྒྱས་ཀྱི་གདམས་པའང་ཐོབ་ཅེས་གསལ་བ་དེ་དག་ལས་དབོན་སྟོན་སྐྱེར་སྒང་པ་ཆེན་པོར་ཞི་བྱེད་ཀྱི་གདམས་པ་མང་དག་ཅིག་ཐོབ་ནས་ཤངས་པ་དང་ཞི་བྱེད་པའི་དབར་འབྲེལ་བ་དམ་ཟབ་ཆགས་པ་མཚོན། ཕྱིས་ཆོས་རྗེ་སངས་རྒྱས་སྟོན་པ་དགུང་ལོ་བཅུར་སོན་པའི་ཚེ། གངས་བཟང་དུ་མ་གཅིག་སྤྲུལ་སྐུ་བྱོན་ནས་གཅོད་ཀྱི་ཆོས་དབང་སེམས་ལ་བསྐུར། ཞལ་གདམས་ཆིག་བརྒྱུད་རྣམས་གནང་ནས་ལུང་བསྟན་ཡང་མཛད། ཁོང་གིས་མ་གཅིག་ནས་གསན་པའི་གཅོད་ཀྱི་ཆོས་སྐོར་རྣམས་ཤངས་པ་གསེར་གླིང་པ་བཀྲ་ཤིས་དཔལ་ལའང་གནང་། དེ་མིན་མཁས་བཙུན་གཞོན་ནུ་གྲུབ་ཀྱིས་ར་བཟའ་(ས་)སྨོན་མཁར་ དུ་མ་གཅིག་ལབ་སྒྲོན་དགུང་ལོ་བརྒྱ་དང་བཅུ་ལོན་པ་དང་མཇལ་ནས་གཅོད་སྐོར་དང་དཀའ་ཐུབ་ཀྱི་རིགས་རྣམས་རྫོགས་པར་ཞུས་པས། མ་གཅིག་གིས་ཀྱང་གདམས་པ་འདིའི་ཐོགས་གཅིག་ཁྱེད་རང་ཉམས་སུ་ལོངས་ ཞེས་གསུངས་པ་ལྟར་མཁས་བཙུན་གཞོན་ནུ་གྲུབ་ཀྱིས་ཀྱང་མ་གཅིག་ནས་གསན་པའི་གཅོད་ཀྱི་གདམས་པ་དེ་དག་ཉམས་ལེན་གནད་སྨིན་གནང་ཕྱིར་དབུས་གཙང་གི་གཉན་ཁྲོད་མང་པོར་ལུས་སྲོག་གཏོང་བའི་གཅོད་མཛད་ཅིང་ལྷ་འདྲེའི་དོན་བསྒྲུབས། དེ་ལྟར་ཤངས་པའི་བརྒྱུད་འཛིན་པ་རྣམས་ལས་གཙོ་ཆེར་ཆོས་རྗེ་སངས་རྒྱས་སྟོན་པ་དང་། མཁས་བཙུན་གཞོན་ནུ་གྲུབ་གཉིས་ཀྱིས་གཅོད་སྐོར་དུ་མ་ཉམས་བཞེས་མཛད་ཅིང་རང་རང་གི་བུ་སློབ་རྣམས་ལའང་རྒྱ་ཆེར་སྤེལ།

མདོར་ན་ཆོས་འབྱུང་མཁས་པའི་དགའ་སྟོན་ལས་ཕྱིས་ཤངས་པ་ཁོ་ནའི་ཆོས་བརྒྱུད་འཛིན་པ་ཅུང་ཉུང་ནའང་ཤངས་པའི་གདམས་ངག་གིས་ཆོས་བརྒྱུད་ཐམས་ཅད་ལ་ཁྱབ་པར་དར་རོ་ཞེས་གསུངས་པ་ཚད་མའི་གསུང་ཁོ་ནར་གནང་སྟེ། སྤྱི་ལོའི་དུས་རབས་བཅོ་ལྔ་པ་ཙམ་ནས་ཤངས་པ་ཁོ་ནའི་ཆོས་བརྒྱུད་ཁེར་རྐྱང་དུ་འཛིན་པ་ཅུང་ཟད་ཉུང་ཡང་། ཆོས་བརྒྱུད་གཞན་གྱི་བརྒྱུད་འཛིན་པ་ཚོས་ཤངས་ལུགས་ཀྱི་གལ་ཆེའི་གདམས་པ་རྣམས་ལ་རིས་མེད་ཀྱི་ལྟ་མཆོག་འཛིན་ནས་ཉམས་ལེན་གནང་བ་དང་། ཤངས་པའི་བརྒྱུད་འཛིན་པ་རྣམས་ཀྱིས་ཀྱང་ཆོས་བརྒྱུད་གཞན་གྱི་ཕུལ་བྱུང་གདམས་པ་གསན་བཞེས་དང་ཉམས་ལེན་གནང་བས་ཤངས་པའི་གདམས་ངག་དེ་དག་ཀྱང་ཆོས་བརྒྱུད་མང་ཆེ་བར་ཁྱབ་ནས་ཡོད་པས། དེ་ནི་ད་ལྟའི་དུས་སུ་ཡང་ཤངས་པའི་ཆོས་སྐོར་འགའ་ཞིག་གནས་ཐུབ་པའི་ཐབས་ལམ་གལ་ཆེན་ཞིག་ཡིན། དེས་ན་ཤངས་པ་བཀའ་བརྒྱུད་དང་བོད་ཀྱི་ཡུལ་གྲུ་གཅིག་ཏུ་དུས་ཡུན་རིང་པོའི་ནང་འཚར་ལོངས་ཀྱི་མྱུ་གུ་མཉམ་དུ་འབུས་པའི་ཆོས་བརྒྱུད་གཞན་རྣམས་དབར་ཕན་ཚུན་གཅིག་ལ་གཅིག་བརྟེན་གྱི་འབྲེལ་བ་དམ་ཟབ་ཆགས་ཡོད་དོ།

།སྨྲས་པ། གངས་ལྗོངས་སྒྲུབ་བརྒྱུད་བསྟན་པའི་སྲོག་ཤིང་མངའ་བདག་མར་ཁྱུང་རྣམ་གཉིས་ལ། །རྗེ་བཙུན་ནཱ་རོ་མཻ་ཏྲི་ལ་སོགས་པཎ་གྲུབ་ཀུན་གྱི་ཐུགས་བཅུད་རྫོགས། །གསང་སྔགས་ཟབ་ཆོས་གདམས་པའི་གྲུ་གཟིངས་ཉམས་ལེན་སྐྱ་བས་བསྐུལ་མཛད་དེ། །དྭགས་ཤངས་དོན་བརྒྱུད་བསྟན་པའི་བརྒྱུད་འཛིན་ཕྱག་ཆེན་རྒྱ་མཚོའི་ཕ་མཐར་སྒྲོལ། །ཞེས་བར་སྐབས་ཀྱི་ཚིགས་སུ་བཅད་པའོ།།

II.2 - The Shangpa Kagyü Lineage
ལེའུ་གཉིས་པ། ཤངས་པ་བཀའ་བརྒྱུད་ཀྱི་རིང་ལུགས་འཛིན་པའི་བླ་རབས་རྣམས་ཀྱི་སྐོར།
དཔལ་ལྡན་ཤངས་པ་བཀའ་བརྒྱུད་ཀྱི་རིང་ལུགས་འདི་ཡང་མཁས་གྲུབ་ཁྱུང་པོ་རྣལ་འབྱོར་གྱིས་ཐོག་མར་སྲོལ་ཁ་འབྱེད་པ་ནས་དབུ་བཙུགས་ཏེ་གདམས་ངག་གི་ཉག་ཐག་ཡོངས་སུ་མ་ཆད་བར་མན་ངག་བརྒྱུད་པའི་རིན་ཆེན་སེར་གྱི་ཕྲེང་རྡོག་དང་གཉིས་སུ་མ་མཆིས་པའི་རྩ་བརྒྱུད་ཀྱི་བླ་མ་རབ་དང་རིམ་པས་ལུས་ཀྱི་སྙིང་ཁ་དང་མིག་གི་འབྲས་བུ་བཞིན་ཤངས་པའི་ལུགས་བཟང་ལྷ་ཆོས་བདུན་ལྡན་གྱི་སྒྲོན་མེས་ཕྱོགས་བཅུ་དུས་གསུམ་ཐམས་ཅད་ཁྱབ་པར་མཛད་པ་ཡང་། གཙོ་ཆེར་རིང་བརྒྱུད་དང་། ཉེ་བརྒྱུད། ཤིན་ཏུ་ཉེ་བརྒྱུད་བཅས་བརྒྱུད་པ་རྣམ་པ་གསུམ་དུ་ཕྱེ། དེས་ན་སྐབས་འདིར་ཨོ་རྒྱན་ཆེན་པོས་ལོ་རྒྱུས་བརྗོད་པས་དང་བ་འདྲེན། །ཡོན་ཏན་མཐོང་བས་དད་པ་སྐྱེ་ཞེས་གསུངས་པ་ལྟར། སྔར་སོང་ལོ་རྒྱུས་ཀྱི་གར་སྟེགས་ཐོག་བྱོན་པའི་བརྒྱུད་འཛིན་བླ་མ་དེ་དག་གི་མཛད་རྣམ་རགས་བསྡུས་ཙམ་ཞིག་ཕྱི་རབས་ཀྱི་དོན་དུ་ཅུང་ཟད་བརྗོད་པ་ལ།

II.2.1 - The distant transmission lineage
དང་པོ། རིང་བརྒྱུད།
རིང་བརྒྱུད་ནི། ཐོག་མར་རྒྱལ་བ་རྡོ་རྗེ་འཆང་ལ་ཁུངས་གཏུགས་པ་གང་ཞིག །བླ་མ་སྔ་མ་སྔ་མས་ཕྱི་མ་ཕྱི་མ་རིམ་བཞིན་རྗེས་སུ་བཟུང་ནས་བརྒྱུད་པའི་གདམས་པ་ལ་ཟེར། རིང་བརྒྱུད་ཀྱི་རྩ་བ་རིགས་ཐམས་ཅད་ཀྱི་ཁྱབ་བདག་རྒྱལ་བ་དྲུག་པ་རྡོ་རྗེ་འཆང་ཆེན་པོ་དངོས་ལ་གཏུགས་ཤིང་། དེ་རྗེས་རྡོ་རྗེ་འཆང་ཉིད་ཀྱིས་རྗེས་སུ་བཟུང་བ་ཡེ་ཤེས་ཀྱི་མཁའ་འགྲོ་ནི་གུ་མར་སྟོན་པར་མཛད། མཁའ་འགྲོ་ནི་གུ་མས་མཁས་གྲུབ་ཁྱུང་པོ་རྣལ་འབྱོར། དེ་ནས་རིམ་བཞིན་འགྲོ་མགོན་སངས་རྒྱས་སྟོན་པ་བར་བརྒྱུད་པ་དེ་རྣམས་ལ་ཡོངས་གྲགས་སུ་རིན་ཆེན་བདུན་བརྒྱུད་སྔ་མར་གྲགས། འགྲོ་མགོན་སངས་རྒྱས་སྟོན་པའི་སློབ་མ་ལས་གཙོ་བོ་ཉམས་དང་རྟོགས་པའི་དབང་ཕྱུག་མཁས་གྲུབ་ཤངས་སྟོན་གྱིས་རྨོག་ལྕོག་པའི་སྐུའི་སྐྱེ་བ་འཇག་པ་རྒྱལ་མཚན་འབུམ། དེས་འཇག་ཆེན་བྱམས་པ་དཔལ་བ། དེས་ཆོས་རྗེ་བློ་གྲོས་དཔལ་བཟང་དང་གྲུབ་ཐོབ་ཆོས་གཡུང་སོགས་ལ་བརྒྱུད་པ་ལ་འཇག་བརྒྱུད་དང་། འགྲོ་མགོན་ཉིད་ཀྱི་སློབ་མ་ལུང་རྟོགས་བསྟན་པའི་སྒྲོན་མེ་བསམ་སྡིངས་པ་གཞོན་ནུ་གྲུབ་ཀྱིས་ཤངས་པ་གསེར་གླིང་པ་བཀྲ་ཤིས་དཔལ། བྲག་སྒོ་ཆེ་བ་རྡོ་རྗེ་དཔལ། ཆོས་སྒོ་བ་ཆོས་དཔལ་ཤེས་རབ་དང་ཡང་ན། འགའ་ཞིག་ཏུ་གཞོན་ནུ་གྲུབ་ཀྱིས་ཞང་སྟོན་བྱང་ཆུབ་ཤེས་རབ། བླ་ཆེན་དཔལ་བ། འཁྲུལ་ཞིག་ཚུལ་ཁྲིམས་རྒྱལ་མཚན། མཁྱེན་རབ་ཆོས་རྗེ་སོགས་ལ་བརྒྱུད་པར་བསམ་སྡིངས་ཀྱི་བརྒྱུད་པ་སྟེ་རིང་བརྒྱུད་ལ་འཇག་བསམ་གྱི་བརྒྱུད་པ་ཁག་གཉིས་བྱུང་། ཡང་མཁས་གྲུབ་གཙང་མ་ཤངས་སྟོན་གྱིས་ཁྱུང་པོ་ཚུལ་ཁྲིམས་མགོན་པོ། དེས་རས་ཆེན་པ་སངས་རྒྱས་སེང་གེ དེས་ཤངས་དཀར་བ་རིན་ཆེན་རྒྱལ་མཚན། དེས་ལྐུགས་ལུང་པ་སངས་རྒྱས་དཔལ་བཟང་། དེས་གྲུབ་ཆེན་ནམ་མཁའ་རྒྱལ་མཚན། དེས་རྒྱ་སྒོམ་ལེགས་པ་རྒྱལ་མཚན་བཅས་ལ་བརྒྱུད་པར་རིན་ཆེན་བདུན་བརྒྱུད་ཕྱི་མར་གྲགས་པ་སོགས་འཇག་བསམ་གཉིས་ཀྱི་གདན་སའི་བརྒྱུད་པ་དང་སློབ་བརྒྱུད་མཐའ་ཡས་པ་བྱོན་པ་ཡིན་ལ། ཆེ་བ་བཅུ་དང་ལྡན་པ་ལ་སྟོད་གནས་རྙིང་གི་གདན་རབས་ལ་སྤྱན་རས་གཟིགས་ཀྱི་རྣམ་འཕྲུལ་བརྒྱད་ཅུ་རྩ་བརྒྱད་བྱོན་ནས་བསྟན་འགྲོའི་དོན་བྱེད་པར་སྟོན་པའི་ཐོག་མའི་རབས་སུ་གྱུར་པ་ལ་སྟོད་པ་དཀོན་མཆོག་མཁར་གྱི་གདན་ས་པ་རིམ་བྱོན་དང་སློབ་བརྒྱུད་ལས་གྱེས་པ་སོགས་མཐའ་ཡས་སོ།
II.2.1.1 The former Seven Jewels of the Lineage
།གཅིག །རིན་ཆེན་བདུན་བརྒྱུད་སྔ་མའི་སྐོར།
རིན་ཆེན་བདུན་བརྒྱུད་སྔ་མ་ནི་རྒྱལ་བ་རྡོ་རྗེ་འཆང་ཆེན་པོ་ཉིད་ལས། རིམ་བཞིན་ཡེ་ཤེས་ཀྱི་མཁའ་འགྲོ་ནི་གུ་མ། དེས་མཁས་གྲུབ་ཁྱུང་པོ་རྣལ་འབྱོར། དེས་རྨོག་ལྕོག་པ་རིན་ཆེན་བརྩོན་འགྲུས། དེས་དབོན་སྟོན་སྐྱེར་སྒང་པ་ཆོས་ཀྱི་སེང་གེ དེས་གཉན་སྟོན་རི་གོང་པ་ཆོས་ཀྱི་ཤེས་རབ། དེས་འགྲོ་མགོན་སངས་རྒྱས་སྟོན་པ་བརྩོན་འགྲུས་སེང་གེ་བཅས་ལ་བརྒྱུད་པ་སྟེ།
Vajradhara
༡ རྒྱལ་བ་རྡོ་རྗེ་འཆང་།
དེ་ཡང་ནི་གུའི་བརྒྱུད་འདེབས་ལས་གནས་འོག་མིན་ཆོས་དབྱིངས་ཕོ་བྲང་དུ། །སངས་རྒྱས་རྡོ་རྗེ་འཆང་ཆེན་ལ་གསོལ་བ་འདེབས་ཞེས་འཁོད་པ་ལྟར་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེ་གཅིག་པའི་ངོ་བོ་དཔལ་རྡོ་རྗེ་འཆང་ཆེན་པོ་ཉིད་ནི་འོག་མིན་གྱི་གནས་གསང་བ་མཆོག་གི་དགྱེས་པ་དེར་བཞུགས་ཤིང༌། སྤྱིར་གསང་བ་བླ་ན་མེད་པའི་རྒྱུད་མཐའ་དག་གསུངས་པ་ཡིན། ཁོང་ནི་འཁོར་ཉིད་དང་མཉམ་པ་དང་། བྱང་ཆུབ་སེམས་དཔའ་ཁྲི་ཕྲག་དཔག་ཏུ་མེད་པ། རྣལ་འབྱོར་གྱི་ཚོགས་བྱེ་བ་ཕྲག་བརྒྱད་ཅུ་སྟེ། ཨ་བྷི་དྷ་ནས་གསུངས་པའི་འཁོར་དེ་དག་ལ་སོགས་པ་རྣམས་ཌཱ་ཀི་དང་འཁོར་ལོ་བཞི་བཟུང་བ་ཡེ་ཤེས་ཀྱི་ས་ལ་གནས་པ་རྫུ་འཕྲུལ་ཅན་དཔག་ཏུ་མེད་པ་རྣམས་ཀྱི་སྣང་ངོར་དག་པ་ཡེ་ཤེས་པའི་སྣང་ཚུལ་བདེ་བར་གཤེགས་པ་མྱ་ངན་ལས་མི་འདའ་ཞིང་། བདེ་བ་ཅན་དུ་རྟག་ཏུ་བཞུགས་པ་ཐུན་མོང་མ་ཡིན་པ་གསང་ཆེན་དུ་གདམས་པ་དང་། ཐུན་མོང་བའི་རྣམ་པར་ཐར་བ་མ་དག་པའི་འཇིག་རྟེན་གྱི་ཁམས་མི་མཇེད་ཀྱི་འཇིག་རྟེན་དུ་སྤྲུལ་པའི་སྐུའི་སྣང་བ་བསྟན་པ་ཐུན་མོང་སྤྱིའི་ལོ་རྒྱུས་གཉིས་སུ་ཡོད། དེ་ལ་ཆོས་སྐུ་དཔལ་རྡོ་རྗེ་འཆང་ཆེན་པོ་དེ་ཉིད་ལོངས་སྤྱོད་རྫོགས་པའི་སྐུ་བྱང་ཆུབ་ཀྱི་སེམས་རྡོ་རྗེ་ཞེས་གསང་བ་འདུས་པ་ལས་གསུངས་པའི་སྐུ་སྟེ། དེ་ཉིད་ཀྱིས་གསང་སྔགས་ཕ་རྒྱུད་མ་རྒྱུད་ཀྱི་དོན་མཐའ་དག་དཔལ་ཕྱག་ན་རྡོ་རྗེ་ལ་གསུངས། དཔལ་རྡོ་རྗེ་འཆང་གི་ལོངས་སྐུ་བྱང་ཆུབ་སེམས་དཔའ་རྡོ་རྗེ་སྙིང་པོ་ཞེས་བྱ་བར་གྱུར་པས་གཞུང་ཚོགས་པུ་ཏི་སྒྲིགས་བམ་དུ་བསྡུས་ནས་ནུབ་ཕྱོགས་ཨུ་རྒྱན་གན་དྷོ་ལ་དྷ་ན་ཀོ་ཥ་ཆོས་ཀྱི་མཛོད་ཅེས་བྱ་བ་ནས་སྤྲུལ་སྐུ་ཡེ་ཤེས་ཀྱི་ཌཱ་ཀི་ལ་གཏད་དེ་གནས་པ་ལས། དུས་ཕྱིས་བྱང་ཆུབ་སེམས་དཔའ་རྡོ་རྗེ་སྙིང་པོ་དེའི་སྤྲུལ་པ་བྲམ་ཟེའི་རིགས་སུ་འཁྲུངས་པ་ཏི་ལོ་ཤེས་རབ་བཟང་པོ་ཞེས་བྱ་བས་ཡེ་ཤེས་ཀྱི་ཌཱ་ཀི་མ་ལ་གསན་ཞིང་། སླར་གྲུབ་ཆེན་ཏཻ་ལོ་པ་ཉིད་འོག་མིན་གྱི་སྐུ་ལུས་ཀྱི་བཀོད་པར་བྱོན་ནས་རྡོ་རྗེ་འཆང་དང་ཞལ་མཇལ་ཏེ་ཕ་རྒྱུད་མཐའ་དག་རིམ་པ་ལྔ། མ་རྒྱུད་མཐའ་དག་ཕྱག་རྒྱ་བཞིར་བསྡུས་ཏེ། བསྐྱེད་རིམ་ཡན་ལག་དྲུག་ལྡན། རྫོགས་རིམ་མཚན་ཉིད་བཞི་ལྡན། ཆོས་ཀྱི་ཚིག་གསུམ་ གྱི་འཁོར་འདས་ཀྱི་ཆོས་ཐམས་ཅད་གཅིག་ཏུ་འདུས་པའི་གདམས་པ་སྐུ་གསུམ་ལམ་ཁྱེར་རྣམས་ཐུགས་སུ་ཆུད་དེ་འཛམ་བུ་གླིང་དུ་མར་བྱོན་པ་ཡིན་གསུངས། དེ་ལས་ཉེ་བརྒྱུད་དང་རིང་བརྒྱུད་བཀའ་བབས་བཞི་བརྒྱུད་པཎ་ཆེན་ནཱ་རོ་པ། དེས་མར་པ་ལོ་ཙཱ་བ་ལ་བརྒྱུད་པ་ཡིན་ལ། ཤངས་ལུགས་ཀྱི་ནི་གུའི་གསེར་ཆོས་ཕལ་ཆེར་ནི་ཡེ་ཤེས་ཀྱི་མཁའ་འགྲོ་ནི་གུ་མས་རྒྱལ་བ་རྡོ་རྗེ་འཆང་དེ་ཉིད་ལས་དངོས་སུ་གསན་པ་སོགས་སོ།
།ཡང་གསོལ་འདེབས་རྡོ་རྗེའི་སྒྲ་དབྱངས་ལས་རིགས་ཀུན་བདག་ཉིད་ཐོག་མ་ཐ་མ་མེད། །དངོས་གཅིག་བརྟན་གཡོ་ཀུན་ཁྱབ་ཟུང་དུ་འཇུག །རང་བཞིན་འོད་གསལ་བདེ་ཆེན་ཡེ་ཤེས་སྐུ། ཁྱབ་བདག་རྡོ་རྗེ་འཆང་ལ་གསོལ་བ་འདེབས་ཞེས་དང་། ལོ་ཆེན་རིན་ཆེན་བཟང་པོས་བསྒྱུར་བའི་འདུས་པ་འཕགས་ལུགས་རྒྱུད་ཀྱི་འགྲེལ་པ་སྒྲོན་མ་གསལ་བར་རིགས་ཐམས་ཅད་ཀྱི་བདག་ཉིད་ཅན། ཐོག་མ་དང་མཐའ་མ་མེད་པ། དང་པོའི་སངས་རྒྱས། རིག་པ་ཆེན་པོའི་སྐྱེས་བུའི་གཟུགས། ཡེ་ཤེས་ཀྱི་སྐུ། རང་བཞིན་གྱིས་འོད་གསལ་བའི་བདག་ཉིད་ཅན། སྐུ་གསུམ་གྱི་བདག་ཉིད་ཅན། ཐེག་པ་གསུམ་གྱི་བདག་ཉིད་ཅན། དུས་གསུམ་གྱི་བདག་ཉིད་ཅན། རྡོ་རྗེ་གསུམ་གྱི་བདག་ཉིད་ཅན། བདེན་པ་གཉིས་ཀྱི་བདག་ཉིད་ཅན་ཞེས་སོགས་གསུངས་པ་ལྟར་ཐོག་མཐའི་མཚམས་དང་བྲལ་བའི་རིགས་ཀུན་གྱི་བདག་ཉིད། འཁོར་འདས་བརྟན་གཡོའི་དངོས་ཀུན་ཟུང་དུ་འཇུག་པའི་རྣམ་རོལ། རང་བཞིན་གྱིས་འོད་གསལ་ཞིང་བདེ་ཆེན་རྫོགས་པའི་ཡེ་ཤེས་ཀྱི་སྐུ། རྟག་པའི་ཡེ་ཤེས་ལྡན་ཞིང་སྐུ་གསུམ་མམ་བཞིའི་དབང་ཕྱུག་མཆོག་ཏུ་བརྙེས་པ་འདི་ཉིད་ནི། རྒྱལ་བ་རིགས་ལྔ་གཅིག་ཏུ་འདུས་པའི་བདག་ཉིད་ཅན་མཐར་ཐུག་གི་ལྷ་ཡིན་པས་སྨིན་གྲོལ་གྱི་ཡོན་ཏན་སྐྱེ་ཚབས་ཆེ་བ་དང་། སྡིག་གྲིབ་རྣམས་ཀྱང་དག་ཚབས་ཆེ་བ་རྒྱུད་སྡེ་རྣམས་སུ་གསུངས་པ་དང་། བླ་མེད་ལུགས་ལྟར་བདག་ཅག་གི་སྟོན་པ་བཅོམ་ལྡན་འདས་ཀྱང་སྲིད་མཐའི་བྱང་སེམས་གནས་འོག་མིན་དུ་མངོན་པར་བྱང་ཆུབ་བཞི་ ལ་སོགས་པས་དྲུག་པ་རྡོ་རྗེ་འཆང་ཆེན་པོའི་ངོ་བོར་སངས་རྒྱས་པར་གསུངས།
རྒྱལ་བ་རྡོ་རྗེ་འཆང་ཆེན་པོའི་སྐུ་མདོག་དང་ཡུམ་ཡོད་མེད་ནི་འཇིགས་བྱེད་ཀྱི་དབང་བསྐུར་སྐབས་སྐུ་མདོག་དཀར་པོ་དང་། ལམ་འབྲས་བླ་བརྒྱུད་ཀྱི་རྒྱལ་བ་རྡོ་རྗེ་འཆང་གཙོ་རྐྱང་ཡིན་པ་སོགས་མང་བར་འདུག་ཀྱང་། སྤྱིར་བླ་མེད་ལུགས་ལྟར་སྐུ་མདོག་སྔོན་པོ། ཡུམ་བཅས་དང་གཙོ་རྐྱང་གཉིས་ཀ་ཡོད་པ་ལས། སྐུ་མདོག་སྔོན་པོ་ནི་ཆོས་དབྱིངས། རྡོར་དྲིལ་དང་བཅས་ཡུམ་ལ་འཁྱུད་པ་ནི་བདེ་སྟོང་ཟུང་འབྲེལ། རིགས་ལྔའི་དབུ་རྒྱན་ནི་ཡེ་ཤེས་ལྔའི་རང་བཞིན་གྱི་སྐུ་ལྔའི་བདག་ཉིད་ཡིན་པ་སོགས་མཚོན་པར་བྱེད། གཞན་ཡང་མཁྱེན་སྲིད་མ་ལས་མཁྱེན་པས་སྲིད་པའི་འཆིང་བ་མཐར་མཛད་ཅིང་། །ཐུགས་རྗེས་ཞི་ལ་དགའ་བ་རིང་དུ་དོར། །སྲིད་ཞིའི་མཐའ་ལ་མི་གནས་སྲིད་ཞིའི་མགོན། རྒྱལ་བ་རྡོ་རྗེ་འཆང་ལ་གསོལ་བ་འདེབས་ཞེས་ཇི་ལྟ་བ་དང་ཇི་སྙེད་པའི་ཤེས་བྱ་ཐམས་ཅད་བདེ་བླག་ཏུ་མཁྱེན་པའི་ཤེས་རབ་ཀྱིས་སྲིད་པ་འཁོར་བའི་མཐའ་ལ་མི་གནས་པ་དང་། འགྲོ་བ་སེམས་ཅན་ཀུན་ཐུགས་རྗེའི་ཐབས་ཀྱིས་སྐྱོང་བས་ཞི་བ་མྱང་འདས་ལ་གནས་པར་མི་མཛད་པས་སྲིད་ཞིའི་མགོན་སྐྱབས་ཉག་གཅིག་ལགས། གང་དེའི་སྐུ་གསུང་ཐུགས་ཀྱི་ཡོན་ཏན་དང་མཛད་པ་འཕྲིན་ལས་སོགས་ཀྱང་། གསོལ་འདེབས་རྡོ་རྗེའི་སྒྲ་དབྱངས་སུ་རྒྱུན་མི་ཆད་ཅིང་འགོག་པའི་ཆོས་མི་མངའ། །ཕྲ་རབ་རྡུལ་དང་འགྱུར་བ་གཏན་ནས་སྤངས། །རྒྱལ་སྲས་ཀྱིས་ཀྱང་བསམ་པའི་ཡུལ་ལས་འདས་ཞེས་གསུངས་པ་ལྟར་རྒྱལ་བའི་སྲས་དག་གིས་ཀྱང་བསམ་ཚོད་ཀྱི་ཡུལ་ལས་འདས་པས་ན། སོ་སོ་སྐྱེ་བོ་ཤེས་རབ་ཀྱི་བློ་མིག་ལྡོངས་པ་ཁོ་བོ་ལྟ་བུར་འོལ་ཚོད་ཀྱིས་བརྗོད་པའི་སྤོབས་པ་བྲལ།
Niguma
ཡེ་ཤེས་ཀྱི་མཁའ་འགྲོ་ནི་གུ་མ།
ལྷན་སྐྱེས་ཀྱི་མཁའ་འགྲོ་ནི་གུ་མ་ནི་ཀསྨིར་གྱི་སྤྲུལ་པའི་གྲོང་ཁྱེར་དཔེ་མེད་ཅེས་པར་བྲམ་ཟེའི་རིགས་སུ་སྐུ་འཁྲུངས་ཤིང་། རྒྱལ་བ་རྡོ་རྗེ་འཆང་དངོས་ཀྱིས་རྗེས་སུ་བཟུང་ནས་དབང་དང་གདམས་པའི་ཟབ་བཅུད་མཐའ་དག་རྫོགས་པར་བསྩལ། འཆི་མེད་རིག་འཛིན་གྲུབ་པའི་འཇའ་ལུས་ཀྱི་སྐུ་བརྙེས། མཁའ་འགྲོའི་གཙོ་མོ་ནི་གུ་མས་སོ་ས་གླིང་གི་དུར་ཁྲོད་དུ་སྐལ་ལྡན་གྱི་སློབ་མ་མཁས་གྲུབ་ཁྱུང་པོ་རྗེས་སུ་བཟུང་ཞིང་། འདི་ཉིད་ཀྱི་ཐུགས་ཀྱི་བཅུད་འབྱུང་བ་ལྟ་བུའི་གདམས་ངག་གསེར་ཆོས་ལྔ་སོགས་གསང་བ་བསམ་གྱིས་མི་ཁྱབ་པའི་ཟབ་ཆོས་རྣམས་ལྷག་ལུས་མེད་པར་བསྩལ་ནས། མཁས་གྲུབ་ཁྱུང་པོ་ཉིད་གང་དེའི་འཁོར་ཚོགས་རྒྱ་མཚོའི་ཐོག་མ། གདམས་ངག་རིན་ཆེན་བརྒྱུད་པའི་ཕྲེང་བར་བསྐོས་ཤིང་སྤྱིར་འཛམ་བུ་གླིང་པའི་སེམས་ཅན་ཐམས་ཅད་དང་། སྒོས་ཁ་བ་རི་པའི་ལས་ཅན་ཀུན་སྨིན་གྲོལ་གྱི་ལམ་ལ་དགོད་པའི་མཛད་བཟང་ཉིན་བྱེད་ཀྱིས་ཕྱོགས་ཀུན་ཁྱབ་པར་མཛད། མཁའ་འགྲོ་མ་འདིའི་སྐོར་ཞིབ་པ་སྡེ་ཚན་གོང་མར་སྨྲས་ཟིན།
Khyungpo Neljor
མཁས་གྲུབ་ཁྱུང་པོ་རྣལ་འབྱོར།
སྒྲུབ་བརྒྱུད་ཤིང་རྟ་ལྔ་པ་དཔལ་ལྡན་ཤངས་པ་བཀའ་བརྒྱུད་ཀྱི་སྲོལ་འབྱེད་པ། ཡེ་ཤེས་ཀྱི་མཁའ་འགྲོ་ནི་གུ་མའི་ཐུགས་རྗེའི་ལྕགས་ཀྱུས་སྐྱེས་རབས་ཐམས་ཅད་དུ་རྗེས་སུ་བཟུང་ཞིང་། ཌཱ་ཀི་མ་ཉིད་ཀྱི་ཐུགས་ཀྱི་བཅུད་འབྱུང་བ་ལྟ་བུའི་གདམས་ངག་ཟབ་ལམ་མཐའ་དག་བུམ་པ་གང་བྱོའི་ཚུལ་དུ་རྫོགས་པར་བསྩལ་བ། ཤངས་པ་རིན་ཆེན་བདུན་བརྒྱུད་སྔ་མའི་གསུམ་པ་མཁས་གྲུབ་ཁྱུང་པོ་རྣལ་འབྱོར་ནི་སྤྱི་ལོ་978ལོར་ཡབ་ཁྱུང་པོ་སྟག་སྐྱེས་དང་ཡུམ་བཀྲ་ཤིས་སྐྱིད་གཉིས་ཀྱི་སྲས་སུ་བོད་ཡུལ་དབུས་ཀྱི་སྙེ་མོ་ར་མངས་སུ་སྐུ་འཁྲུངས། རྣལ་འབྱོར་པ་ཆེན་པོ་འདི་ཉིད་ཀྱིས་ཡེ་ཤེས་མཁའ་འགྲོས་རྒྱལ་བ་རྡོ་རྗེ་འཆང་ལས་དངོས་སུ་གསན་པའི་གསེར་ཆོས་ལྔ་སོགས་ཀྱི་གདམས་པ་རྣམས་འཕགས་མཆོག་འཇིག་རྟེན་དབང་ཕྱུག་གི་འདུལ་ཞིང་འདིར་གདན་དྲངས་པས། གདམས་ངག་དེ་དག་སངས་རྒྱས་དང་ཡེ་ཤེས་ཀྱི་མཁའ་འགྲོ་དངོས་ལས་རྨོག་ལྕོག་པ་སོགས་བརྒྱུད་པ་ཕྱི་མ་རྣམས་ལ་རིམ་བཞིན་བརྒྱུད་པའི་གསེར་ཟམ་ཉག་གཅིག་ཡིན། འདི་ཉིད་ཀྱི་སྐོར་ཞིབ་པ་རྣམས་སྡེ་ཚན་གོང་མར་བཤད་ཟིན་པས་དེར་གཟིགས་པར་འཚལ།
Mokchokpa Rinchen Tsöndrü
རྨོག་ལྕོག་པ་རིན་ཆེན་བརྩོན་འགྲུས།
མཁས་གྲུབ་ཁྱུང་པོ་རྣལ་འབྱོར་གྱི་སློབ་མ་སྔ་བུ་ལྔ་དང་ཕྱི་བུ་གཅིག་ལས་སྒྱུ་ལུས་རྨི་ལམ་གྱི་འོད་གསལ་སྦྱོང་པ། ཆིག་བརྒྱུད་ཀྱི་བཀའ་བབས་འཛིན་པའི་སློབ་མ་རྨོག་ལྕོག་པ་(ལྷོ་རོང་ཆོས་འབྱུང་དང་དེབ་སྔོན་སོགས་སུ་རྨོག་ཅོག་པ་ཞེས་ཀྱང་འཁོད་)རིན་ཆེན་བརྩོན་འགྲུས་ཞེས་བྱ་བ་འདི་ཉིད་ནི་ཤངས་ཀྱི་ལྷ་ཕུའི་སྤང་རྩ་ར་ ཤེའུའི་ རིགས་སུ་ཡབ་ཤེ་རྒན་སྨན་ཆུང་དང་ཡུམ་འབྲི་མོ་པད་སྒྲོན་གཉིས་ཀྱི་སྲས་སུ་སྤྱི་ལོ་1100ལོ་ཙམ་ལ་སྐུ་འཁྲུངས། ཁོང་གིས་སྐུ་ཚེ་གང་པོར་ཐོག་མར་ཆོས་སྒོར་ཞུགས་ནས་བླ་མ་བསྟེན་པ་དང་། བར་དུ་སྒྲོ་འདོགས་ཆོད་ནས་ཉམས་སུ་བླངས་པ། མཐའ་མར་ངེས་ཤེས་བསྐྱེད་ནས་སེམས་ཐག་ཆོད་པ་སོགས་མཁས་བཙུན་བཟང་པོའི་རྣམ་ཐར་འབའ་ཞིག་བསྐྱངས་པ་ལ།
དགུང་ལོ་བཅུ་དྲུག་ནས་བཅུ་བདུན་དུ་འགྲོ་བ་ལ་ཞོང་ཞོང་དུ་ཆོས་སྒོར་ཞུགས་ནས་བླ་མ་ཤངས་པའི་དྲུང་དུ་ལོ་གཅིག་རིང་འདུལ་བ་དང་དགྱེས་རྡོར་གྱི་དབང་སོགས་ཞུས། དེ་རྗེས་བླ་མ་ཇོ་བོ་རླུང་མོས་ལྷ་ཕུའི་མཐིང་ཆུང་ དུ་སྤྱན་དྲངས་ནས་དབྱར་ཆོས་གསུངས། ས་དེར་འབྲོམ་སྟོན་པ་རྒྱལ་བའི་འབྱུང་གནས་དང་མཇལ། དེ་ཡང་རྗེ་ཙོང་ཁ་པ་ཆེན་མོས་དང་པོར་རྒྱ་ཆེན་ཐོས་པ་མང་དུ་བཙལ་ཞེས་གསུངས་པ་ལྟར་བླ་མ་ཤངས་པས་ཀྱང་གཞོན་ནུའི་དུས་སུ་ཐོས་པ་གལ་ཆེ་བའི་བཀའ་གནང་བ་མ་ཟད། གསེར་ཞོ་དྲུག་དང་མདོ་སྡེ་རྒྱན་གྱི་པོ་ཏི་གཅིག་གནང་ནས་དགུང་ལོ་ཉེར་གཅིག་པ་སྟེ་སྤྱི་ལོ་1121ལོ་ཙམ་ལ་སློབ་དཔོན་གཡོར་པོ་དང་འགྲོགས་ཏེ་དབུས་སུ་སློབ་གཉེར་ལ་ཕེབས། གནམ་གྱི་རྫིང་ཁར་བླ་མ་ཁམས་པ་ཨ་སེང་གིས་སྨིན་བྱེད་ཀྱི་དབང་རྡུལ་ཚོན་དང་ཏིང་ངེ་འཛིན་གྱི་དཀྱིལ་འཁོར་ལ་བརྟེན་པའི་དབང་བཞི་རྫོགས་པར་བསྐུར་བ་དང་། གྲོལ་ལམ་བསྐྱེད་རྫོགས་གཉིས་ལས་བསྐྱེད་རིམ་ལ་ལུ་ཧི་པའི་དཀྱིལ་འཁོར་རྫོགས་པར་སྒོམ་པ་དང་། རྫོགས་རིམ་ལ་རྩ་རླུང་ལུས་སྦྱོང་དང་བཅས་པ་སྟེ། སྦྱོར་དྲུག་རྩ་འགྲེལ་གཉིས། སྦྱོར་འཕྲེང་རྩ་འགྲེལ་གཉིས། སྙིང་པོ་གསུམ་སོགས་ཞུས། དབྱར་སྟག་རྩེའི་གྱེ་རེར་ རླུང་བུམ་པ་ཅན་འགའ་རེ་སྒོམ། བླ་མ་ཨ་སེང་གི་དྲུང་དུ་བཞུགས་སྐབས་བླ་མ་དེ་ཉིད་དང་དགེ་བཤེས་ཕྱུ་པ་ཆོས་ཀྱི་སེང་གེ ཕྱུ་པ་ཆོས་སེང་གི་སློབ་མ་རིགས་པའི་སེང་ཆེན་བརྒྱད་ ཀྱི་ཡ་གྱལ་ཉང་བྲན་ཆོས་སེང་སོགས་མཁས་པ་དྲུག་ཅུ་ཙམ་འདུས་པ་རྣམས་ལ་བླ་མ་ཤངས་པའི་དོན་དམ་ཕན་མེད་གནོད་མེད་སྐོར་གསུངས་པས་དེ་རྣམས་ཀྱི་མགྲིན་གཅིག་ཏུ་ཁྱོད་བླ་མ་ཤངས་པའི་སློབ་མར་འདུག །གྲུབ་མཐའ་སྐྱོང་ཤེས་པར་འདུག་ཅེས་བསྟོད་བསྔགས་ཀྱི་མེ་ཏོག་ཐོར།
དེ་ནས་སྟོན་ཁ་ཞིག་རྗེ་རས་ཆུང་པའི་ཡེ་ཤེས་ངོས་ཟིན་པའི་སློབ་མ་བཅུ་གཉིས་ཀྱི་ཁོངས་སུ་གཏོགས་པའི་བླ་མ་བུར་སྒོམ་ནག་པོ་ལ་རྗེ་རས་ཆུང་པའི་ཟབ་མོའི་གདམས་པ་ཐབས་ལམ་གྱི་གདམས་ངག་བསམ་གྱིས་མི་ཁྱབ་པ་ཞིག་བཞུགས་པ་ལས་འཕོ་བ་གྲོང་འཇུག་དང་སྒྱུ་ལུས་འོད་གསལ་ལ་སོགས་པ་མང་དུ་གསན། ལྷག་པར་དུ་བླ་མའི་བཀའ་བཞིན་ཉི་ཁྲོས་ཀྱི་སེར་བ་ཕབ་པ་ལ། བླ་མས་མཚམས་མེད་པ་ལྔ་བྱས་པ་ཡང་འཚང་རྒྱ་ཐུབ་པའི་མན་ངག་བར་དོ་དུག་གི་ཚེར་མ་དང་དུག་གི་ཐུར་མ་ཞེས་པ་གཉིས་ཀྱང་སྦྱིན་ལ། རྗེ་རྨོག་ལྕོག་པའི་ཉི་ཁྲོས་དང་མགོན་པོའི་གདམས་པ་རྣམས་བླ་མ་ལ་ཕུལ། དེའི་རྗེས་སུ་དགེ་བཤེས་དཀོན་འཁར་བ་ལས་སྤྱན་སྔའི་སྒོམ་རིམ་དང་། ལམ་རིམ། རབ་གནས་སོགས་དང་། དགེ་བཤེས་རྫ་ར་བ་ལ་ཇོ་བོ་བཀའ་གདམས་པའི་གདམས་ངག །སློབ་དཔོན་གཡོར་པོ་ཅན་དུ་ལོ་ལྔ་ཕར་ཕྱིན་དང་སྤྱོད་འཇུག །ཉང་སྨོན་ལམ་གོད་པོ་ལ་སེམས་སྦྱང་སྤུངས་པ་ཁ་ཐོར་བ་གསུམ་ཞུས། དེ་རྗེས་རྒྱགས་ཟད་པ་དང་། ཡབ་ཀྱང་གཤེགས་པ་ཐོས་པས་འཁྲུངས་ཡུལ་ཤངས་ཀྱི་ལྷ་ཕུར་ཕེབས་ནས་ས་ཞིང་བཙོངས་ཏེ་དགེ་རྩ་བྱས། དེ་རྗེས་རྒྱ་གྲགས་བསོད་ལ་སྦྱོར་དྲུག་རྡོ་རྗེའི་ཚིག་རྐང་དང་། དགེ་བཤེས་ཞུ་པ་ལ་ཕྱིའི་སྒྲོ་འདོགས་གཅོད་པའི་གསང་སྔགས་འཇུག་པ་དང་། ནང་ཉམས་སུ་ལེན་པ་ནཱ་རོའི་ཡིག་ཆུང་། སྒོམ་སྐྱོན་སེལ་བ་བདུད་རྩིའི་དུག་སེལ་དང་། ཡང་སློབ་དཔོན་ཞང་ལ་འདུལ་བ་འོད་ལྡན་དང་སུམ་བརྒྱ་པ། དགེ་བཤེས་འབལ་སྒོམ་ཕྱག་ན་ལ་ཞི་བྱེད་སོགས་ཀྱི་གདམས་པ་མང་དུ་ཞུས། དེ་ནས་ཞོང་ཞོང་དུ་ཕེབས་ཤིང་བླ་མ་ཤངས་པས་གཟིམས་གཡོག་ཏུ་བསྐོས་ནས་ལོ་གཅིག་དང་ཟླ་བ་བདུན་གྱི་རིང་ཆིག་བརྒྱུད་ཀྱི་ཟབ་ཆོས་མ་ལུས་པ་བུམ་པ་གང་བྱོའི་ཚུལ་དུ་གནང་། བླ་མ་ཤངས་པ་སྐུ་གཤེགས་རྗེས་སྐུ་འབུམ་བཞེངས་པ་ལ་སོགས་པའི་རྗེས་ཀྱི་བྱ་བ་ཐམས་ཅད་ཚར་བར་བྱས། དེ་ནས་འུ་ཡུག་གི་སྡིངས་མར་ ཕེབས་ནས་ལོ་གཉིས་རིང་སྐུ་མཚམས་དམ་པོར་བཅད། སླར་འཁྲུངས་ཡུལ་སྤང་རྩ་ར་ཕེབས་ནས་ས་ཞིང་ལྷག་མ་རྣམས་བཙོངས། དྭགས་པོ་ལྷ་རྗེའི་སྙན་པ་གསན་ནས་ལམ་བར་གྱི་ནད་སོགས་དཀའ་དུབ་དུ་མ་ཁྱད་དུ་སད་ནས་དབུས་སུ་ཕེབས། བླ་མ་བུར་སྒོམ་ནག་པོའི་དྲུང་དུ་བཞུགས་སྐབས་ཕག་གྲུ་རྡོ་རྗེ་རྒྱལ་པོ་དང་མཇལ་ཏེ། དེ་ལས་བླ་མ་འཛིམ་གྱི་ཕག་མོ་ཀེང་རུས་ཀྱི་དྲྭ་བ་ཅན་དང་རྫོགས་རིམ་རྣམ་གསུམ་སོགས་ཀྱི་གདམས་པ་མང་དུ་ཞུས་པས། ཆོས་རྗེ་རྨོག་ལྕོག་པ་ནི་ཕག་གྲུ་རྡོ་རྗེ་རྒྱལ་པོའི་སློབ་མ་ཐོག་མའི་གྲས་ཤིག་ཡིན་ལ། ཕག་གྲུའི་བུ་ཆེན་ཉི་ཤུ་རྩ་བཞིའི་གྲས་ཀྱི་སྔ་ཚར་གྱི་བུ་ཆེན་བཞིའི་ཁོངས་སུའང་འདྲེན་གྱི་ཡོད། དེའི་རྗེས་ཙམ་ལ་འཁར་སྣར་ཞག་གཅིག་བསྒོམས་པས་བདེ་མཆོག་དྲུག་ཅུ་རྩ་གཉིས་ཀྱི་ཞལ་གཟིགས། གཡོར་པོ་སྨད་དུ་དགེ་བཤེས་དམར་ཞང་ཚན་གཉིས་ཀྱིས་སྣམ་བུ་དང་དར་ཡུག་སོགས་ཕུལ་ནས་འཕོ་བ་ཡེ་ཤེས་སྐར་ཁུང་མ་ཞུས་ཀྱང་མ་གནང་བར་ལྷོ་ཁ་གྲ་ཐང་དུ་བྲོས་འབྱོལ་ལ་ཕེབས། དེ་རྗེས་སྒམ་པོའི་གནས་སུ་དྭགས་པོ་ལྷ་རྗེ་དང་མཇལ་བས་བླ་སློབ་གཉིས་ཀ་ས་དང་པོ་ཐོབ་པ་ལྟ་བུའི་དགའ་བ་དཔག་ཏུ་མེད་པ་འཁྲུངས། བླ་མས་ངེད་གཉིས་ནི་སྐྱེ་བ་མང་པོའི་དཔོན་སློབ་ཡིན་ཀྱང་། སྐྱེ་བ་འདི་ལ་ད་རེས་ལས་མ་འཕྲད་གསུང་ཙ་ན་སྤྱན་ཆབ་ཤོར་བཞིན་སྐྱེ་བ་མང་པོའི་སྔོན་རོལ་ནས། །འོ་སྐོལ་གཉིས་ནི་དཔོན་སློབ་ཡིན། དམ་ཚིག་ངོ་ལྐོག་མེད་པ་དེས། །ད་རེས་སྒམ་པོའི་བྲག་ལ་འཛོམས། །ང་ཡི་བུ་ཁྱོད་འདིར་འོངས་སམ། །མོས་གུས་ཅན་ཁྱོད་འདིར་བྱོན་ནམ་ཞེས་པ་ལ་སོགས་པའི་མགུར་གསུངས། རྗེ་སྒམ་པོ་བའི་སྤྱན་སྔར་མ་ཧཱ་མུ་དྲའི་ཚིག་རྐང་བརྒྱད་པ་དང་། ངོ་སྤྲོད་ལྔ་པོ། ཇོ་བོ་ནས་བརྒྱུད་པའི་བླ་མ་རྣམས་ཀྱི་ཆོས་སྐོར་དགུ་དང་། ཌཱ་ཀི་མའི་སྙན་བརྒྱུད། ལྟ་སྒོམ་ཆེན་མོ་ཐུན་མོང་མ་ཡིན་པའི་སྐོར། ནོར་བུ་ཕྲེང་བ། ཕག་མོ། བདེ་མཆོག །རྐྱེན་བཞི་དང་། རྗེ་བཙུན་མི་ལ་ནས་བརྒྱུད་པའི་ཐབས་ལམ་ཆོས་དྲུག །གོ་ཆ་ལམ་ཁྱེར། བདེ་མཆོག་ལྷ་ལྔ། ཐབས་ལམ་མི་འདྲ་བ་ཉི་ཤུ་ཐམ་པ་སོགས་ཀྱི་གདམས་པ་བསམ་གྱིས་མི་ཁྱབ་པ་ཞུས། བླ་མ་སྒམ་པོ་བས་རྗེ་རྨོག་ལྕོག་པར་ཆོས་དྲུག་གི་ཉམས་རྟོགས་བཟང་པོ་སྐྱེས་འདུག་སྟེ། ལྟ་བ་ཐག་ཆོད་ཅིག་དགོས་པ་འདུག་ཅེས་གསུངས་པ་བཞིན་བླ་མ་དེ་ཉིད་ཀྱིས་ལོ་གཅིག་གི་རིང་ཆོས་རྗེ་རྨོག་ལྕོག་པ་ལ་གདམས་པ་མང་པོ་དང་། ལྷག་པར་དུ་ཕྱག་ཆེན་གྱི་ལྟ་བའི་སྐོར་མ་ལུས་པ་གནང་བས་ཟླ་བྲལ་ཕྱག་ཆེན་གྱི་ལྟ་བའི་སྒྲོ་འདོགས་ཡོངས་སུ་ཆོད། དེས་ན་ལྷོ་རོང་ཆོས་འབྱུང་དུ་ཡང་རྨོག་ལྕོག་པ་ནི་ཁྱུང་པོ་རྣལ་འབྱོར་གྱི་བརྒྱུད་འཛིན་ཡིན་ཀྱང་། ཕྱག་རྒྱ་ཆེན་པོའི་རྟོགས་པ་ཁྱད་པར་ཅན་རྗེ་སྒམ་པོ་བ་ཉིད་ལ་འཁྲུངས་པས་ཉིན་རེ་བཞིན་བྱ་རོག་ཏུ་སྤྲུལ་ནས་སྒམ་པོའི་གཙུག་ལག་ཁང་ལ་བསྐོར་བ་མཛད་པ་དང་། བརྒྱུད་པ་འདིའི་ལུགས་ཀྱི་ཡང་གྲུབ་ཐོབ་ཡིན་ནོ་ཞེས་འཁོད། ཕྱིས་བླ་མ་ལྷ་རྗེའི་སློབ་མ་དབུ་ཆེ་བཅུ་གསུམ་བྱུང་ནས་རྗེ་རྨོག་ལྕོག་པར་བླ་མ་ལྷ་རྗེའི་བཀའ་ཐམས་ཅད་ཁྱེད་ལ་བབས་པ་ཡིན་གསུངས་ནས་རྣམ་རྟོག་གིས་མི་གནོད་པའི་ཕྱག་རྒྱ་ཆེན་པོ་ཞུས། དེ་ལྟར་ཤངས་པའི་ཆིག་བརྒྱུད་ཀྱི་བཀའ་བབས་འཛིན་པ་རྨོག་ལྕོག་པས་དྭགས་པོ་བཀའ་བརྒྱུད་ཀྱི་སྤྱི་མེས་གྲས་སུ་གྱུར་པ་དྭགས་པོ་ལྷ་རྗེ་ལས་ཕྱག་ཆེན་གྱི་ལྟ་བ་ལ་སྒྲོ་འདོགས་ཆོད་པ་དེས་དྭགས་ཤངས་གཉིས་ཀྱི་ཕྱག་རྒྱ་ཆེན་པོའི་མཐར་ཐུག་ལྟ་དགོངས་གཅིག་ཏུ་བསྒྲུབས་པས། དེ་གཉིས་དབར་གཅིག་ལ་གཅིག་བརྟེན་གྱི་འབྲེལ་བ་གལ་ཆེན་ཞིག་ཆགས་ཡོད་པ་མཚོན།
རྨོག་ལྕོག་པ་ཆེན་པོ་དྭགས་ལྷ་སྒམ་པོ་ནས་བསམ་ཡས་སུ་ཕེབས་པའི་ཚེ། རྗེ་སྒམ་པོ་བའི་མཆོག་འགྱུར་གྱི་སློབ་མ་རྣལ་འབྱོར་ཆོས་ཀྱི་གཡུང་དྲུང་དང་མཇལ་ནས་ཁོང་གཉིས་པོས་ལྷན་དུ་གཉན་མཁར་ནག་ཀྱང་བཏུལ། རྣལ་འབྱོར་ཆོས་གཡུང་ཕྱིས་འོལ་ཁར་བཞུགས་ནས་སྦ་དང་ཚོད་ཀྱི་དགོན་པ་གཉིས་ཀ་བཟུང་། ཆོས་རྗེ་རྨོག་ལྕོག་པ་སླར་དགོན་པ་འདྲེ་ཅན་ཞིག་ཏུ་ལོ་གཅིག་བཞུགས་རྗེས་ལྷ་ཕུ་རྨོག་ལྕོག་ཏུ་ཕེབས་ནས་ཡང་ན་ཤི་བ་ཞིག་དང་། ཡང་ན་སངས་རྒྱས་པ་གཅིག་ལ་གཏད་དགོས་སྙམ་ནས་རྨོག་ལྕོག་གི་བྲག་ཏུ་སྤྱིར་མི་ཟས་སྤངས་ནས་མི་ལོ་བཅུ་གཉིས་སྒྲུབ་པ་ལ་ཞུགས་མཐར་རྗེ་བཙུན་མི་ལ་དང་འདྲ་བར་ཟད་པར་ཟིལ་གནོན་གྱི་ཏིང་ངེ་འཛིན་ལ་མངའ་བརྙེས་པ་དང་། ནམ་མཁའ་ལ་དཀྱིལ་དཀྲུང་བཅའ་བ་སོགས་ཀྱི་ནུས་པ་ཕྱོགས་མེད་དུ་ཤར། དེ་རྗེས་ཤངས་ཀྱི་ཕྱུག་པོ་རྒད་པོ་གཅིག་གིས་གདན་འདྲེན་ཞུས་ནས་ཁྲི་མཐོ་པོ་ཞིག་བརྩིགས་ཏེ། དེ་རིང་གི་སྐབས་སུ་བླ་མའི་ཞལ་ནས་གསུངས་པ་དང་། མདོ་རྒྱུད་ནས་འདི་གསུངས་བྱ་བ་མ་འཆད་པར། ལོ་བཅུ་གཉིས་བྲག་ལ་བསྡད་ནས་བསྒོམས་པས་འདི་རྒྱུད་ལ་སྐྱེས་པ་ཡིན་བྱ་བའི་ཆོས་ཤིག་གསུངས་ཞེས་བསྐུལ་བར་ཆོས་རྗེ་རྨོག་ལྕོག་པས་ཀྱང་རང་རྒྱུད་ལ་ཇི་ལྟར་སྐྱེས་པ་བཞིན་ཆོས་རྣམས་གསུངས་པས་ཚོང་འདུས་དང་འཇད་བོ་དོང་མར་བཅད་ནས་བསྡུས་པའི་མི་རྣམས་ཤིན་ཏུ་མོས་པར་གྱུར། དེས་སྐབས་དེར་ཤངས་ཁུལ་ཙམ་མ་ཟད་ཤངས་དང་ཉེ་བའི་གཙང་ཕྱོགས་ཀྱི་ས་ཆ་གཞན་རྣམས་ལ་ཡང་ཁོང་གི་སྙན་གྲགས་ཀྱིས་ཁྱབ་པ་མཚོན། དུས་དེ་ཙམ་ལ་བླ་མ་བུར་སྒོམ་ནག་པོ་དང་། སློབ་དཔོན་གཡོར་པོ་ཅན། དྭགས་པོ་ལྷ་རྗེ་རྣམས་སྔ་རྗེས་སུ་སྐུ་གཤེགས་ནས་ཁོང་གི་རྨི་ལམ་དུ་བྱོན་ཏེ་གདམས་པ་འགའ་ཡང་གནང་། དེ་ནས་སྔ་རྗེས་སུ་རྨོག་ལྕོག་དང་ལྐུགས་ལུང་གི་དགོན་གནས་གཉིས་བཏབ་ནས་གློ་བོའི་དགེ་བཤེས་རྒྱལ་བ་དང༌། སྟོན་རིན་སོགས་ཀྱི་གདུལ་བྱ་རྣམས་ལ་ཟབ་རྒྱས་ཆོས་ཀྱི་གནང་སྦྱིན་ཕངས་མེད་དུ་བསྩལ། རྟའི་ཟླ་བ་ལ་མཚམས་སུ་ཞུགས་པས་འོད་གསལ་གྱི་གསལ་སྣང་མཆེད་དེ་གྲྭ་པ་རྣམས་ཀྱི་ཚེ་སྟོད་སྨད་ཀྱི་བྱ་སྤྱོད་ལེགས་ཉེས་ཐམས་ཅད་གསལ་བར་མཁྱེན། སློབ་མ་འགའ་རེ་ལ་ལེགས་བཅོས་ཀྱི་སླད་དུ་གསུངས་པར་མཛད་ཀྱང་ངམ་ཤོད་བླ་མཆོད་ལ་སོགས་པའི་མི་ཉན་པ་ཡང་མང་དུ་བྱུང་སྟབས་ཚོགས་པ་སྐྱོང་བའི་དུས་སུ་སྐབས་རེ་གཞན་དོན་བྱེད་པ་བདུད་ཡིན་སྙམ་པའི་སྐྱོ་ཤས་སྐྱེས་ཀྱང༌སྙིགས་མའི་སེམས་ཅན་བཟང་ངན་འབྲིང་གསུམ་སྐྱོང་བ་ལ་ཤ་ཚ་ཕན་སེམས་སྐྱོ་དུབ་མེད་པ་གསུམ་འཛོམས་དགོས་པར་འདུག་ཅེས་དགོངས།
དེ་ལྟར་ཆོས་རྗེ་རྨོག་ལྕོག་པ་རིན་ཆེན་བརྩོན་འགྲུས་འདི་ཉིད་ཀྱིས་སྔ་བར་ཕྱི་གསུམ་དུ་མཁས་གྲུབ་ཁྱུང་པོ་དང་། བླ་མ་ཁམས་པ་ཨ་སེང་། སློབ་དཔོན་གཡོར་པོ་ཅན། བླ་མ་བུར་སྒོམ་ནག་པོ། དགེ་བཤེས་དཀོན་འཁར་བ། དགེ་བཤེས་རྫ་ར་བ། ཉང་སྨོན་ལམ་གོད་པོ། སློབ་དཔོན་རྒྱ་གྲགས་བསོད། དགེ་བཤེས་གཞུ་པ། སློབ་དཔོན་ཞང་། དགེ་བཤེས་འབལ་སྒོམ་ཕྱག་ན། དགེ་བཤེས་རྡོར་རྒྱལ། རྗེ་སྒམ་པོ་བ་སོགས་ཁྱོན་བླ་མ་བཅུ་གསུམ་ཙམ་བསྟེན་ནས་གཙོ་ཆེར་ཤངས་པ་བཀའ་བརྒྱུད་ཀྱི་གདམས་ངག་དང་། གཞན་ཡང་དྭགས་པོ་བཀའ་བརྒྱུད་དང་། བཀའ་གདམས། ཞི་བྱེད། སྦྱོར་དྲུག་ལ་སོགས་པའི་གདམས་པ་མཐས་ཡས་པ་ཞིག་གསན་གནང་མཛད། ལྷག་པར་དུ་ཆོས་རྣམས་ཐོས་པའི་གོ་ཡུལ་ཙམ་དུ་མ་བཞག་པར་ཉམས་ལེན་གྱི་མཐིལ་དུ་བཟུང་ནས་མི་ལོ་བཅུ་གཉིས་རིང་དཀའ་སྤྱད་ཀྱི་གཡབ་མོ་རྒྱབ་ཏུ་བསྒྱུར་བ་དང་། མི་བཤིག་པའི་བརྩོན་འགྲུས་ཀྱི་གོ་ཆ་ཡོངས་སུ་སྤྲས་ཏེ། ཤོངས་པའི་བརྒྱུད་འཛིན་པ་རྣམས་ལ་རྗེ་བཙུན་མི་ལ་ལྟ་བུའི་དཀའ་སྤྱད་སྡུག་བསྲན་གྱི་སྙིང་སྟོབས་དང་སྒོམ་སྒྲུབ་ཀྱི་ཡོན་ཏན་ལ་རྩལ་རྫོགས་པའི་མིག་དཔེ་བཟང་པོ་ཞིག་སྟོན་གནང་མཛད། རྗེ་རྨོག་ལྕོག་པ་ཉིད་ཀྱིས་བླ་མ་ཤངས་པའི་ཆིག་བརྒྱུད་གདམས་པའི་ལྡེའུ་མིག་དབོན་སྟོན་སྐྱེར་སྒང་པར་གཏད་ནས། ཁོང་ཉིད་མི་ལོ་བཅུ་གཉིས་ཀྱི་ནག་མོག་གི་བྲག་ཁུང་དེ་དག་ལས་འདས་པའི་འོད་ཟེར་སྟོང་ལྡན་གྱི་ཞིང་ཁམས་ཤིག་ཏུ་ཕྱག་ཆེན་གྱི་རྩེད་འཇོར་ཕེབས། ཁོང་སྐུ་འདས་ནས་ཞག་འགའ་ཤས་ལོན་པའི་དུས། རྫུ་འཕྲུལ་འོད་ཀྱི་ལམ་ལ་སླར་ཡང་བྱོན་ནས་འགྲོ་མགོན་ཇོ་བཙུན་ལ་བརྒྱུད་པའི་དབང་ཞུ་བསྐོན་པ་དང་། དབོན་པོ་ཤེས་རབ་རས་པ་ལ་རིང་བརྒྱུད་མ་ཆད་པའི་ཆོས་གོས་གཏད་པ་སོགས་བརྒྱུད་པའི་དར་རྒུད་ལ་སྨན་པའི་ལུང་བསྟན་དང་བྱིན་རླབས་ཐམས་ཅད་རྫོགས་པར་གནང་ངོ༌། །ཞར་ལ། མཁས་གྲུབ་ཁྱུང་པོའི་འཁྲུངས་ལོ་སྤྱི་ལོ་978ལོ་དང་། འདས་ལོ་སྤྱི་ལོ་1128ལོ་གཞིར་བཟུང་ནས་ཆོས་རྗེ་རྨོག་ལྕོག་པའི་འཁྲུངས་ལོར་རགས་ཙམ་དཔྱད་ན། ཆོས་རྗེ་རྨོག་ལྕོག་པའི་རྣམ་ཐར་དུ་ལོ་བཅུ་དྲུག་ནས་བཅུ་བདུན་དུ་འགྲོ་བ་ལ་ཞོང་ཞོང་དུ་ཆོས་སྒོར་ཞུགས་ཏེ། ལོ་གཅིག་འདུལ་བ་ཉན་ནས། བླ་མ་ལ་དགྱེས་རྡོར་གྱི་དབང་ཞུས་ཞེས་འཁོད་པ་ལྟར། ཆོས་རྗེ་རྨོག་ལྕོག་པའི་འཁྲུངས་ལོ་ནི་ཤངས་པ་བཀའ་བརྒྱུད་ཀྱི་བླ་རབས་རྣམ་ཐར་ལྕགས་དཔར་མའི་དཔེ་སྐྲུན་གསལ་བཤད་སོགས་སུ་ཐད་ཀར་སྤྱི་ལོ་1110ལོ་ཡིན་པ་བཀོད་ཡོད། གལ་ཏེ་དེ་ལྟར་ཡིན་པའི་དབང་དུ་བཏང་ན། ཆོས་རྗེ་རྨོག་ལྕོག་པ་དགུང་ལོ་བཅུ་དྲུག་ལ་ཕེབས་པའི་ལོ་མཇུག་སྟེ་སྤྱི་ལོ་1126ལོར་ཞོང་ཞོང་དུ་ཐོག་མར་མཁས་གྲུབ་ཁྱུང་པོ་མཇལ་བ་དང༌། ཡང་རྣམ་ཐར་དེ་ཉིད་ལས་བདག་གིས་བླ་མ་ཆེན་པོ་དེ་སྔར་ལོ་ལྔ་བསྟེན། ཕྱི་ནས་ལོ་གཅིག་དང་ཟླ་བ་བདུན་བསྟེན་ནས་སྐུ་གཤེགས་སོ་ཞེས་གསལ་བ་བཞིན་ཆོས་རྗེ་རྨོག་ལྕོག་པས་བླ་མ་ཤངས་པ་ཐོག་མར་ལོ་ལྔ་བསྟེན་པ་སྟེ་དགུང་ལོ་བཅུ་དྲུག་ལ་ཕེབས་པ་སྤྱི་ལོ་1126ལོ་ནས་དགུང་ལོ་ཉེར་གཅིག་ལ་ཕེབས་པ་སྤྱི་ལོ་1131ལོར་དབུས་སུ་མ་བྱོན་བར་ཡིན། དབུས་སུ་བྱོན་རྗེས་བླ་མ་ཁམས་པ་ཨ་སེང་དང་། བུར་སྒོམ་ནག་པོ། དགེ་བཤེས་དཀོན་འཁར་བ་སོགས་ཀྱི་དྲུང་དུ་གདམས་པ་མང་དག་ཅིག་གསན་པ་དེ་དག་གི་དུས་ཡུན་མ་བརྩིས་ནའང་། སློབ་དཔོན་གཡོར་པོ་ཅན་ཁོ་ནའི་དྲུང་དུ་ལོ་ལྔ་ཕར་ཕྱིན་དང་སྤྱོད་འཇུག་གསན་ནས་བཞུགས་པ་སོགས་མཛད་རྣམ་དུ་གསལ་བར་འཁོད་པས། ལོ་ལྔ་སོང་རྗེས་ཏེ་སྤྱི་ལོ་1136ལོ་ཡིན་དགོས་པ་དང་། ཕྱིས་ལོ་གཅིག་དང་ཟླ་བ་བདུན་བསྟེན་ནས་མཁས་གྲུབ་ཁྱུང་པོ་སྐུ་གཤེགས་པ་སྟེ། སྤྱི་ལོ་1136ལོ་ནས་བརྩིས་ན་ལོ་གཉིས་མ་ཟིན་ཙམ་སྟེ་སྤྱི་ལོ་1138ལོའི་གོང་དུ་ཡིན་དགོས། མཁས་གྲུབ་ཁྱུང་པོའི་འདས་ལོ་སྤྱི་ལོ་1128ལོར་བརྩིས་ན་ལོ་གཅིག་ཙམ་ལས་བསྟེན་ལོང་བྱུང་མེད་པ་ཡིན། དེས་ན་ཆོས་རྗེ་རྨོག་ལྕོག་པའི་འཁྲུངས་ལོ་སྤྱི་ལོ་1110ལོར་ཡིན་མི་སྲིད་དེ། མཁས་གྲུབ་ཁྱུང་པོའི་འདས་ལོ་སྤྱི་ལོ་1128ལོ་ལ་ངེས་པ་ལས། ཆོས་རྗེ་རྨོག་ལྕོག་པ་དབུས་སུ་ཐོག་མར་བྱོན་སྐབས་དགུང་ལོ་ཉེར་གཅིག་དང་། དེའི་སྟེང་དགེ་བཤེས་གཡོར་པོ་ཅན་ཁོ་ནའི་དྲུང་དུ་སློབ་གཉེར་ལོ་ལྔ་དང་། ཕྱིས་ཞོང་ཞོང་དུ་ཕེབས་ནས་ལོ་གཅིག་དང་ཟླ་བ་བདུན་ཏེ་ལོ་གཉིས་མ་ཟིན་ཙམ་བར་བླ་མ་བསྟེན་པ་བསྡོམས་ན། དགུང་ལོ་ཉེར་བརྒྱད་ཟིན། དེ་མཁས་གྲུབ་ཁྱུང་པོའི་འདས་ལོ་སྤྱི་ལོ་1128ལོ་ནས་འཐེན་ན། ཆོས་རྗེ་རྨོག་ལྕོག་པའི་འཁྲུངས་ལོ་མ་མཐར་ཡང་སྤྱི་ལོ་1100ལོའི་གོང་ཙམ་དུ་ཡིན་དགོས། དེར་བརྟེན་དེབ་སྔོན་དུ་རྨོག་ལྕོག་པ་ནི། དཔལ་ཕག་མོ་གྲུ་པ་དང་དུས་མཚུངས་ཞེས་འཁོད་པ་དེར་ཕག་གྲུ་རྡོ་རྗེ་རྒྱལ་པོའི་འཁྲུངས་འདས་དང་ཡོངས་སུ་མཚུངས་པར་གོ་བ་ལེན་པས། ཆོས་རྗེ་རྨོག་ལྕོག་པའི་འཁྲུངས་ལོ་ཡང་དཔལ་ཕག་མོ་གྲུ་པ་དང་མཐུན་པར་སྤྱི་ལོ་1110ལོ་དང་འདས་ལོ་སྤྱི་ལོ་1170ལོར་བརྩིས་པ་ཡིན། འོན་ཀྱང་ཁོ་བོས་ནི་ལོ་ཚིགས་དྭངས་ཤེལ་མེ་ལོང་གི་སྤྱི་ལོ་1110ལོའི་ལོ་རྒྱུས་གྲས་སུ་ཤངས་པ་བཀའ་བརྒྱུད་ཀྱི་བླ་མ་རྨོག་ལྕོག་པ་རིན་ཆེན་བརྩོན་འགྲུས་ཀྱང་དུས་ཐོག་མཉམ་ཞེས་གསལ་བ་ལྟར་བླ་མ་རྨོག་ལྕོག་པ་དང་དཔལ་ཕག་མོ་གྲུ་པ་གཉིས་དུས་མཉམ་པ་ཙམ་ལས་ལོ་ཚིགས་ཡོངས་སུ་མཚུངས་པའི་དོན་མིན་སྙམ། དབོན་སྟོན་སྐྱེར་སྒང་པ་སོགས་ལའང་རིགས་བསྒྲེ་བར་བྱའོ།།
Öntön Kyergangpa
དབོན་སྟོན་སྐྱེར་སྒང་པ་ཆོས་ཀྱི་སེང་གེ
སྐྱེས་རབས་ཀུན་ཏུ་འཕགས་མཆོག་ཐུགས་རྗེ་ཆེན་མོས་རྗེས་སུ་བཟུང་ཞིང་སྐུ་ཚེ་འདིར་ཡང་བརྩོན་འགྲུས་དྲག་པོའི་བསྒྲུབས་པས་མཚམས་སྦྱར་ཏེ་འཕགས་པ་ཉིད་དང་དབྱེར་མེད་པའི་མཆོག་གྲུབ་པ། བྱང་ཆུབ་ཀྱི་སེམས་མཆོག་རིན་པོ་ཆེ་རྩོལ་མེད་ཆུ་མོའི་རྒྱུན་བཞིན་མངའ་བ། རྗེ་བཙུན་རྨོག་ལྕོག་པ་ལས་མཁའ་འགྲོའི་ཆིག་བརྒྱུད་ཀྱི་གདམས་པ་ཐོབ་ཅིང་ཤར་ཕྱོགས་བཻཌཱུརྱ་སྣང་བའི་ཞིང་ཁམས་སུ་དེ་བཞིན་གཤེགས་པ་དྲི་མེད་ནམ་མཁའི་དཔལ་ཞེས་བྱ་བར་འཚང་རྒྱ་བར་འགྱུར་བའི་སྐྱེས་མཐའི་བྱང་སེམས་དབོན་སྟོན་སྐྱེར་སྒང་པ་ཆེན་པོ་འདི་ཉིད་ནི། སྤྱི་ལོ་1154ལོ་ ཙམ་ལ་ནང་གོང་གནམ་ སྟེ་དེང་སྟོད་ལུང་བདེ་ཆེན་རྫོང་གི་ཁོངས་སུ་སྐུ་འཁྲུངས། གདུང་རུས་འབལ་ཡིན། ཐོག་མར་ལོ་གཅིག་གཉིས་རིང་གཤིན་རྗེ་གཤེད་ལ་བསྙེན་པ་བསྐྱལ། དགུང་ལོ་བཅུ་བདུན་པ་སྟེ་སྤྱི་ལོ་1171ལོར་སྐྱེར་སྒང་དུ་ཁུ་བོ་འབལ་ཐམས་ཅད་མཁྱེན་པ་ ལས་རབ་ཏུ་བྱུང་ནས་སྤྱོད་འཇུག་དང་། བསླབ་བཏུས། བསྟན་རིམ་སོགས་ཞུས། དེ་རྗེས་འབལ་ཚད་མ་བའི་ཕྱག་ཕྱིར་ལྷ་སར་བྱོན་ནས་ཀླུ་སྦུག་ཏུ་འཕགས་པ་གཅེར་སྒོམ་བྱ་བའི་གྲུབ་ཐོབ་གཅིག་ལ་མོས་ནས་ཐུགས་རྗེ་ཆེན་པོའི་སྒྲུབ་ཐབས་ཚར་གསུམ་ཞུས། དེར་ལོ་བརྒྱད་མཚམས་ལ་ཞུགས་པས་ཐུགས་རྗེ་ཆེན་པོ་གཙོ་འཁོར་གསུམ་ཞལ་གཟིགས། དེ་ནས་སྐྱེར་སྒང་དུ་ཕེབས་ཏེ་ཡང་ན་གཡག་གུ་ཤི་བ་ཞིག་དང་། ཡང་ན་ཚྭ་ལོན་པ་ལ་གཏད་དགོས། མི་ལུས་ལན་གཅིག་ཐོབ་དུས་འདིར་ཡང་ན་ང་རང་ཤི་བ་གཅིག་དང་། ཡང་ན་ཐུགས་རྗེ་ཆེན་པོའི་ཞལ་མཐོང་བ་གཅིག་ལ་གཏད་དགོས་སྙམ་སྟེ་བསྒྲུབ་པ་ལ་ཞུགས་ཀྱང་། ཁམས་པའི་གྲྭ་པ་རྣམས་ཀྱིས་རྟ་བཏགས། བེར་བསྐོན། དར་བསྐྱངས་ནས་ཁྱོད་གཞོན་དུས་སུ་ཐོས་པ་མ་བྱས་ན་འབལ་ཚད་མ་བ་རབས་ཆད་པས། དཀའ་བཞི་ལ་མཁས་པ་ཞིག་བྱེད་དགོས་ཟེར། དེ་ལ་མ་ཉན་པར་མཚམས་ལ་ཞུགས་པས་དེ་དག་གིས་ཆུ་དང་མེ་ཤིང་སོགས་ཀྱང་མ་སྐྱོལ་ཅིག །ཕར་འགྲོ་ཚུར་འགྲོ་ཐམས་ཅད་ཀྱིས་སྒོ་ལ་རྡོ་རྒྱོབ་ཅིག །དེ་ལྟར་བྱས་ན་སློབ་གཉེར་ལ་ཚུད་འོང་ཟེར་ནས་ཁྲིམས་བཏང༌། དེས་ན་དབོན་སྟོན་སྐྱེར་སྒང་པ་ཞག་རེ་ལ་སྐྱོ་ཚ་ཕོར་པ་རེ་ཡང་རེས་མྱོང་བ་རེས་མ་མྱོང་ངོ༌། ཐ་ན་དེའང་མེད་པར་ཆུ་དང་ཐལ་བ་བསྲེས་ནས་སྤྱད། དེ་ལྟར་དཀའ་སྤྱད་ཕུལ་དུ་ཕྱིན་པས་སྒྲུབ་པ་ལ་བརྩོན་མཐར། མི་ལོ་ཕྱེད་དང་བཞི་སོང་ཙ་ན། མདུན་གྱི་ནམ་མཁའ་ལ་ཐུགས་རྗེ་ཆེན་པོ་གཙོ་འཁོར་གསུམ་པོའི་ཞལ་གཟིགས། དེ་ནས་སྔར་བསྙེན་པ་སྐྱེལ་བའི་བཅོམ་ལྡན་འདས་གཤིན་རྗེ་གཤེད་དམར་པོའི་ཞལ་ཡང་གཟིགས། དེ་ནས་ཁུ་བོ་འབལ་ཐམས་ཅད་མཁྱེན་པས་དར་ཡུག་དྲུག་དང་གསེར་ཞོ་གང་གནང་ནས་གཙང་ལ་སྟོད་ཀྱི་ཚ་རི་རས་པ་བྱ་བ་རྗེ་རས་ཆུང་པའི་གདམས་ངག་ལ་མཁས་པའི་གྲུབ་ཐོབ་གཅིག་ཡོད་པ་དེའི་རྩར་ཆོས་ཞུ་བར་བཏང་། དབོན་སྟོན་སྐྱེར་སྒང་པས་ལོ་གཉིས་ཀྱི་རིང་བླ་མ་དེའི་དྲུང་དུ་བཞུགས་ནས་བདེ་མཆོག་ལྷ་བཅུ་གསུམ་མ་དང་། ཕག་མོ་ལྷ་བཅུ་གསུམ་ལ་སོགས་པའི་དབང་དང་གདམས་པ་མང་དུ་ཞུས། དེ་རྗེས་འུ་ཡུག་ཏུ་ཕེབས་ནས་ཇོ་བོ་རྗེའི་གསང་སྔགས་ཀྱི་བཀའ་བབས་པའི་བླ་མ་སྤེན་ཕུག་པ་ལས་ལོ་ལྔའི་རིང་ཇོ་བོའི་གདམས་པ་རྣམས་ཞུས་པ་དང་། ཇོ་བོའི་ཌ་མ་རུ་དང་ཐུགས་དམ་གསུམ་ཡང་གནང་། དེ་རྗེས་ལྷ་ཕུར་ཕེབས་ནས་ལྐུགས་ལུང་དུ་ཆོས་རྗེ་རྨོག་ལྕོག་པ་དང་མཇལ། རྗེ་རྨོག་ལྕོག་པས་ཁོང་ཉིད་མཁའ་འགྲོའི་ཆིག་བརྒྱུད་ཀྱི་གདམས་ངག་སྦྱིན་པའི་སྣོད་དུ་མཁྱེན་ཏེ། ནི་གུ་ཆོས་དྲུག་ལ་སོགས་པའི་ཤངས་པའི་གདམས་ངག་རྣམས་ཀྱི་དབང་ལུང་ཁྲིད་གསུམ་རྫོགས་པར་སྩོལ་བའི་དབུ་སྙུང་བཞེས། དེ་ལྟར་ཆོས་རྗེ་རྨོག་ལྕོག་པའི་དྲུང་དུ་ལོ་ཤས་བཞུགས་རྗེས་ཨ་ཁུ་འབལ་ཚད་མ་བ་གྲོངས་ནས་སྐྱེར་སྒང་གི་གདན་ས་ལ་གདན་འདྲེན་མཁན་རྟ་པ་སུམ་བརྒྱ་ཙམ་བྱུང༌། ཁོང་རང་ཉིད་སྒྲུབ་པ་ཁོ་ན་བྱ་དགོས་དགོངས་ཀྱང་གདན་འདྲེན་པ་རྣམས་དང་བླ་མའི་གསུང་བཞིན་སྐྱེར་སྒང་དུ་ཕེབས་ཏེ་སྐུ་འབུམ་བརྩིགས། སྐབས་དེ་ནས་བཟུང་ཡེ་ཤེས་ཀྱི་མགོན་པོ་ཕྱག་དྲུག་པ་བྲན་བཞིན་དུ་ཉན་པར་བྱུང་བ་ཡང་། གསོལ་འདེབས་དད་པའི་སྒྲ་དབྱངས་སུ་སྐྱེར་སྒང་ཆོས་ཀྱི་གདན་སར་ཕེབས་པའི་ཚེ། ཡེ་ཤེས་མགོན་པོའི་འཁོར་རྣམས་དངོས་སུ་འོང༌། །བླ་མའི་གདན་སར་མཆོད་འབུལ་སྐྱེལ་པ་ཡི། །ཞབས་ཏོག་གུས་པས་བསྒྲུབས་ལ་གསོལ་བ་འདེབས་ཞེས་འཁོད་པ་ལྟར་ཡིན།
དབོན་སྟོན་ཆེན་པོས་སྔ་ཕྱིར་རྨི་ལམ་བཟུང་ནས་ཐུགས་རྗེ་ཆེན་པོ་དང་། སློབ་དཔོན་པདྨ་འབྱུང་གནས། རྗེ་བཙུན་སྒྲོལ་མ། མཁའ་འགྲོ་ནི་གུ་མ། མཁའ་འགྲོ་མ་སེང་གེའི་གདོང་པ་ཅན་ལ་སོགས་པའི་དྲུང་ནས་ཟབ་གསང་གི་གདམས་པ་མཐའ་ཡས་པ་གསན་པ་དང་། བྱང་རྩེ་ལྡིང་དུ་རྟོགས་ལྡན་ཞང་སྒོམ་ཆོས་སེང་ལས་མཁའ་སྤྱོད་དཀར་དམར་དང་། དགྱེས་རྡོར་བདེ་མཆོག །མགོན་པོའི་གནད་ཡིག་དམིགས་པའི་སྒྲོམ་བུ། འཕོ་བ་ལ་སོགས་པའི་གདམས་པ་མང་དུ་ཞུས་པ། གདམ་པ་ཅོག་སྟོན་ལ་དཔལ་རྒ་ལོའི་ཆིག་བརྒྱུད་ཀྱི་གདམས་པ་རྣམས་གསན་པ་སོགས་མཛད། སྐུ་ཚེའི་སྨད་ལ་སྐྱེར་སྒང་དགོན་དུ་ཐུགས་རྗེ་ཆེན་མོའི་ཆོས་སྐོར་དང་ཤངས་པའི་གསེར་ཆོས་ལྔས་གཙོས་པའི་གདམས་པ་རྣམས་ཀྱིས་གདུལ་བྱ་ཀུན་ཚིམས་པར་མཛད། གཞན་དོན་གྱི་མཐུ་རབ་ཏུ་རྒྱས་ཏེ། སྒ་དང་རྒྱའི་རྒྱལ་པོས་འབུལ་ཚན་རྒྱ་ཆེར་ཕུལ་བས། བླ་མ་རྨོག་ལྕོག་པ་ཡང་སྐྱེར་སྒང་དགོན་དུ་གདན་དྲངས་ཏེ་འབུལ་ཆེན་དང་ཉམས་རྟོགས་འབུལ་བ་སོགས་མཛད། དགུང་ལོ་བདུན་ཅུ་དོན་གསུམ་པ་སྟེ་སྤྱི་ལོ་1227ལོ་ཙམ་ལ་གཟུགས་སྐུའི་མེ་ཏོག་ཡལ། དེ་ལྟར་དབོན་སྟོན་སྐྱེར་སྒང་པ་ཆེན་པོས་སྐུ་ཚེ་ཧྲིལ་པོར་ཤངས་ལུགས་ཀྱིས་གཙོས་གྲུབ་མཐའ་རིས་མེད་ཀྱི་བླ་མ་རྣམས་ལས་གདམས་ངག་གི་བདུད་རྩི་རྫོགས་པར་བཞེས་པ་དང་སྒྲུབ་པའི་དམ་ཚིག་ཉི་ཤུའི་གོ་ཆ་བརྟན་པར་སྤྲས་པས། ནང་མྱོང་རྟོགས་ཀྱི་ཡོན་ཏན་ལ་མངའ་བརྙེས་ནས་སྒྱུ་ལུས་འོད་གསལ་གྱི་བདེ་བ་ཆེན་པོའི་མཁའ་དབྱིངས་སུ་རང་དགར་སྤྱོད་པའི་ཟུང་འཇུག་གི་རྒྱལ་སར་གཤེགས། དེས་ན་ཆོས་རྗེ་རྨོག་ལྕོག་པས་ཀྱང་དབོན་སྟོན་གྱི་ལྷ་སྐུ་དང་འོད་གསལ་གྱི་རྩལ་འདི་ལྟ་བུ་ང་ལ་ཡང་མ་བྱུང་ཞེས་དང་། ང་བ་ཡིན་དབོན་སྟོན་ཁྱོད་མཛོ་ཡིན་པས། བ་ལ་མཛོ་སྐྱེས་བྱ་བ་ཡིན་ནོ་ཞེས་པ་ལ་སོགས་པའི་བསྟོད་པ་ཡང་ལན་མང་དུ་མཛད།
འོན་ཏེ་ཟབ་མོའི་གཏེར་དང་གཏེར་སྟོན་གྲུབ་ཐོབ་ཇི་ལྟར་བྱོན་པའི་ལོ་རྒྱུས་མདོར་བསྡུས་སུ་བཀོད་པ་རིན་ཆེན་བཻཌུརྱའི་ཕྲེང་བར་ཐུགས་རྗེ་ཆེན་པོའི་རྣམ་སྤྲུལ་དཔལ་ལྡན་ཤངས་པ་རིན་ཆེན་རྣམ་བདུན་དུ་གྲགས་པའི་གཉིས་པ་དབོན་སྟོན་སྐྱེར་སྒང་པ་ཆོས་ཀྱི་སེང་གེ་ཞེས་འཁོད་ཀྱང་། ཤངས་པ་རིན་ཆེན་རྣམ་བདུན་གྱི་གཉིས་པ་ནི་ཡོངས་གྲགས་སུ་མཁའ་འགྲོ་ནི་གུ་མ་ཡིན་པས། ལོ་རྒྱུས་སྤྱི་བྱིངས་དང་མི་མཐུན་པའི་བརྗོད་ཚུལ་འདི་རིགས་ནི་ངེས་པར་སྤང་བར་བྱའོ།།
Sangyé Nyentön
རི་གོང་པ་སངས་རྒྱས་གཉན་སྟོན།
གཉན་སྟོན་རི་གོང་པ་ནི་ཡོལ་གྱི་མདའ་སྟེ་དེང་ལྷ་ས་གྲོང་ཁྱེར་ཆུ་ཤུར་རྫོང་བྱེ་ནུབ་ཡུལ་ཤོག་གི་མདར་ གཉན་གྱི་རིགས་སུ་སྤྱི་ལོ་1175ལོ་ཙམ་དུ་སྐུ་འཁྲུངས། སྐུ་ན་ཆུང་ངུའི་དུས་ནས་འཁོར་བ་སྡུག་བསྔལ་གྱི་རང་བཞིན་དམྱལ་བའི་གནས་ཁང་ལྟ་བུ་ཞིག་ཏུ་གཟིགས་ནས་ཆགས་ཐོགས་མེད་པའི་སྦྱིན་པ་ལ་བརྩོན་པ་སོགས་དཀར་པོ་དགེ་བའི་སྤྱོད་ལམ་ཁོ་ན་སྐྱོང་བར་མཛད། དགུང་ལོ་བཅུ་གཅིག་པ་ལ་གོང་བུ་མཁར་དུ་སློབ་དཔོན་སྟོན་ཡེའི་དྲུང་དུ་ཆོས་སྒོར་ཞུགས། བཅུ་བདུན་པ་ལ་མཁན་པོ་འཁོན་བྱང་ཆུབ་སེམས་དཔའ་ལས་དགེ་ཚུལ་གྱི་སྡོམ་པ་བཞེས། དགུང་ལོ་ཉི་ཤུ་ལ་མཁན་པོ་བཟོད་པ་ཅན་དུ་བསྙེན་པར་རྫོགས། མཁན་པོ་བཟོད་པ་དང་མགར་ཕྱར་གཉིས་ལ་འདུལ་བ་མདོ་རྩ་ལོ་གསུམ་གསན། དེ་རྗེས་སློབ་དཔོན་གཡོ་པ་ལ་ཚད་མ་རྣམ་ངེས་དང་། བསྡུས་པ། ཚད་མ་ཆོས་མཆོག །དབུ་མ་ཤར་གསུམ། བསླབ་བསྡུས། སྤྱོད་འཇུག་དང་བཅས་པ་ལོ་མང་དུ་གསན། བླ་མ་གྲགས་པ་རྒྱལ་མཚན་ལ་རྒྱུད་དམ་པ་དང་བཅས་པ་ཞུས། སྔ་ཕྱིར་ཞི་བྱེད་དང་། ཕག་མོའི་ཆོས་དྲུག །ཁ་རག་བསྐོར་གསུམ། ནཱ་རོའི་ཆོས་དྲུག །སོ་ཆུང་པའི་གདམས་པ་རྣམས་དང་། གཞན་ཡང་འབྲི་གུང་པ། དོལ་པོ། ས་སྐྱ་པཎ་ཆེན་སོགས་ཀྱི་མཁས་གྲུབ་མང་དག་ཅིག་བསྟེན་ནས་གདམས་པ་དུ་མ་ཞུས་ཀྱང་སྤྲོས་པ་མ་ཆོད་པར་ད་དུང་ཐོས་པ་ཅུང་ཟད་བྱེད་དགོས་སྙམ། དུས་དེ་ཙ་ན་ལ་སྟོད་འཁྱམས་པོ་ཞེས་བྱ་བ་ཞིག་གོང་བུ་མཁར་དུ་འཕྲད་ནས། དེས་ཁོང་ལ་མཚུར་ཕུ་ན་བླ་མ་སྐྱེར་སྒང་པ་བྱ་བ། སངས་རྒྱས་དངོས་གཅིག་བཞུགས་ཀྱིན་འདུག་པས་དེར་འདེང་ཞེས་བསྐུལ། དབོན་སྟོན་གྱི་མཚན་ཐོས་མ་ཐག་མཆི་མ་དྲག་ཏུ་འཛགས་པའི་མོས་གུས་ཆེན་པོ་སྐྱེས་ཤིང་མྱུར་དུ་མཇལ་བའི་སྨོན་ལམ་བཏབ། དེ་ནས་དཔྱིད་དུས་ཤིག་སྐྱེར་སྒང་དུ་ཕེབས་ནས། བླ་མས་ཤངས་པའི་ཆོས་འདི་བཀའ་དོག་པར་ཡོད་ཀྱང་ཆིག་བརྒྱུད་བཀའ་རྒྱའི་ལྡེ་མིག་ཡོངས་རྫོགས་ཕྱག་ཏུ་གཏད་དེ། ཐོག་མར་དབང་བསྐུར་ནས་བརྩམས་ཏེ་གདམས་ངག་ཟབ་མོའི་བཅུད་ཀྱིས་ཚིམས་པར་མཛད། ཆོས་དྲུག་དང་ཕྱག་ཆེན་གྱི་ཁྲིད་སོགས་ཀྱང་མཛད་ནས་རེ་ཞིག་སྐྱེར་སྒང་དུ་བཞུགས། ཡེ་ཤེས་མགོན་པོས་བྲན་བཞིན་དུ་ཉན་པའི་བཀའ་བསྒོ་ཡང་གནང་།
ཐེངས་ཤིག་བྲག་ཁ་ཞིག་ཏུ་གསོལ་བ་དྲག་པོ་བཏབ་པས་མཁའ་འགྲོ་མ་སུ་ཁ་སིདྡྷི་བྱོན་ནས་རིག་པ་རྟེན་མེད་དུ་ཞོག་དང་རྣལ་འབྱོར་པ་ཞེས་ལན་གསུམ་གསུངས། ཕྱིས་ཀྱང་ཡེ་ཤེས་ཀྱི་མཁའ་འགྲོ་མ་འདི་ཉིད་ལན་གཅིག་བྱོན་ནས་གསང་སྒྲུབ་ཀྱི་གནད་སྔར་བས་ཟབ་པ་གསང་སྒྲུབ་བསྐྱེད་རྫོགས་དབང་བསྐུར་བཀའ་དང་བཅས་པ་ཞིག་གནང་ཞིང་ལུང་བསྟན་ཡང་མང་དུ་གསུངས། སླར་ཡང་སྐྱེར་སྒང་དུ་ཕེབས་ནས་ཆོས་རྗེ་སྐྱེར་སྒང་པས་གསང་སྔགས་རྗེས་སུ་ཡིད་རང་ལ་སོགས་པའི་གདམས་པ་ལྷག་མ་རྣམས་ཀྱང་མ་ལུས་པར་སྦྱིན་ཞིང་། གཉན་སྟོན་རི་གོང་པའི་འཁྲུངས་རབས་དང་ཚེ་ཚད། དགོན་གནས། སློབ་མ་གཙོ་བོ་ཕོ་བརྒྱད་མོ་གཉིས་བཅས་བཅུ་འོང་བ་སོགས་ཀྱི་རྣམ་དག་བདེ་བ་ཆེན་པོའི་ལུང་བསྟན་མཐའ་དག་བཀའ་རྒྱ་དང་བཅས་ནས་གསུངས། རྗེ་རི་གོང་པས་ཤངས་པའི་གདམས་ངག་གི་གནད་རྣམས་ལ་ཟིན་བྲིས་ཀྱང་བཏབ་ནས་དབོན་སྟོན་གྱི་སྤྱན་སྔར་ཞུ་དག་ཡང་ཡང་མཛད། སྐབས་དེར་ང་ལས་གདམས་པ་ཆེ་བ་བོད་ན་མེད་སྙམ་པའི་ཐུགས་རྒྱལ་ཡང་ཅུང་ཟད་བྱུང་། སྐྱེར་སྒང་དུ་དབྱར་དགུན་བཅུ་གསུམ་བཞུགས་ནས་སྒྲུབ་པ་ཚུལ་བཞིན་དུ་མཛད། དེ་ནས་འབྲི་གུང་དང་། གཙང་པ་རྒྱ་རས་དྲུང་དུ་བྱོན། འབྲུག་དགོན་པ་འདེབས་པ་དང་ཐུག་ནས་ཆོས་མང་པོ་ཞུས་ཤིང་ཕྱག་གཡོག་ཀྱང་མཛད། དེ་རྗེས་ཡོལ་གྱི་བཤུང་ལུང་སྤང་ཁར་ཕེབས་ཏེ་ལོ་གསུམ་མཚམས་དམ་པོར་བཅད་ནས་སྒྲུབ་པ་མཛད། བླ་མ་དུར་ཁྲོད་ནག་པོ་ཞེས་བྱ་བའི་རྣལ་འབྱོར་པ་གཅིག་ཀྱང་གདམས་ངག་སྒོ་སྐྱེལ་གྱི་ཚུལ་དུ་ཕེབས་ནས་འཆི་མེད་འཕྲུལ་འཁོར་གྱི་གདམས་པ་གནང་། གཉན་སྟོན་རི་གོང་པ་འདི་ཉིད་ཀྱིས་རྨི་ལམ་བཟུང་ནས་སྲིད་པའི་ལྷ་འདྲེ་དང་། དུ་རའི་བཙན། ཡུལ་ལྷ་ལྡེའུ་སྤང་དཀར། ཁྱད་པར་དུ་ཆུ་བོ་རིའི་སྒོ་བཞི་དང་། གཉན་མཁར་ནག་སོགས་ཀྱི་ལྷ་འདྲེ་གདུག་པ་ཅན་རྣམས་ཁྱུང་དང་ཁྲོ་བོ་དཔག་ཏུ་མེད་པར་སྤྲུལ་ནས་བཏུལ་བས། དེ་རྣམས་ཀྱིས་སྲོག་སྔགས་ཕུལ་ཞིང་དབང་ཞུས་ཏེ་དམ་པའི་ཆོས་ཀྱི་སྒོར་བཙུད། ཡོལ་གྱི་ཕུར་རི་གོང་གི་དགོན་པ་བཏབ་ནས་གདུལ་བྱ་རྣམས་ཤངས་ཆོས་ཀྱི་གདམས་པས་སྨིན་པར་མཛད་མཐར། སྤྱི་ལོ་1255ལོ་ཙམ་ལ་དགོན་གནས་དེ་ཉིད་དུ་དགོངས་པ་ཆོས་དབྱིངས་སུ་གཤེགས།
Sangyé Tönpa
འགྲོ་མགོན་སངས་རྒྱས་སྟོན་པ།
རྒྱལ་བ་རྡོ་རྗེ་འཆང་ནས་རིམ་པར་བྱོན་པའི་བརྒྱུད་རབས་བདུན་པ་ཆིག་བརྒྱུད་རྡོ་རྗེའི་རྒྱ་བཀྲོལ་པ་པོར་ཡེ་ཤེས་ཀྱི་མཁའ་འགྲོས་ལུང་བསྟན་པ་འགྲོ་མགོན་སངས་རྒྱས་སྟོན་པ་བརྩོན་འགྲུས་སེང་གེ་ནི་ཁ་རག་རྩའི་སིལ་མར་ ངལ་དཀར་པོའི་རུས་སུ་སྤྱི་ལོ་1213ལོ་ཙམ་ལ་སྐུ་འཁྲུངས། ཇི་སྐད་དུ་གསོལ་འདེབས་སེང་གེའི་སྒྲ་དབྱངས་ལས་ཡ་ངལ་དཀར་པོ་གཤེན་བོན་སྒྲུབ་པའི་བརྒྱུད། །མཁའ་རེག་རྩ་ཡི་སིལ་མར་མཚན་དཔེ་གསལ། སྤྱོད་ལམ་ཀུན་ཏུ་ཆོས་ཀྱི་སྣང་བ་མཆེད། སྔོན་སྦྱངས་བག་ཆགས་སད་ལ་གསོལ་བ་འདེབས་ཞེས་གསལ་བ་ལྟར། ཁོང་ནི་མེས་པོ་ཆེན་པོ་གསལ་བའི་ཁྲི་ལ་སོགས་པའི་བོན་པོའི་དགེ་བཤེས་དང་གྲུབ་ཐོབ་མང་དུ་བྱོན་མྱོང་བའི་བོན་པོའི་རིགས་རྒྱུད་དུ་གཏོགས། འོན་ཀྱང་ཁོང་ཉིད་ཆོས་ལ་མོས་པས་བོན་གྱི་གྲུབ་མཐའ་རྣམ་གསུམ་ལ་མ་ཞུགས་པར་སྤྱོད་ལམ་ཐམས་ཅད་དུ་ཆོས་ཀྱི་སྣང་བ་མཆེད། དགུང་ལོ་བརྒྱད་དགུ་ཙམ་ལ་སོན་སྐབས་ཡི་གེ་འབྲི་ཀློག་ལེགས་པར་བསླབས། དགུང་ལོ་བཅུའི་དུས་སུ་གངས་བཟང་ན་མ་གཅིག་སྤྲུལ་སྐུ་བྱོན་ནས་གཅོད་ཀྱི་ཆོས་དབང་སེམས་ལ་བསྐུར་ཞིང་། ཞལ་གདམས་ཆིག་བརྒྱུད་རྣམས་ཀྱང་གནང་ནས་ལུང་བསྟན་མཛད། དགུང་ལོ་བཅུ་གཅིག་བཅུ་གཉིས་ཙམ་ནས་སྔོན་གྱི་ལས་འཕྲོ་སད་དེ་ངེས་འབྱུང་དང་སྐྱོ་ཤས་ཀྱིས་རབ་ཏུ་གཙེས་པས། རི་དང་གངས་མཐོང་བའམ་དེར་འགྲོ་བའི་དུས་སུ་རི་དྭགས་ཀླུང་ནས་ཐར་བའམ་དྲང་སྲོང་ནགས་ཁྲོད་དུ་སླེབས་པ་ལྟ་བུ་ཞིག་ཏུ་མངོན་གྱི་ཡོད། དགུང་ལོ་བཅུ་གསུམ་ལོན་པའི་ལོ་གསར་གྱི་ཚེས་གསུམ་ལ་བླ་མ་རྩ་རི་རས་པའི་དྲུང་ནས་རབ་ཏུ་བྱུང༌། ཆོས་ཕྱོགས་སུ་བརྩོན་པ་ཆེ་བ་དང་། དགེ་སྦྱོར་སྟོབས་ཀྱིས་གཞན་ཟིལ་གྱིས་ནོན་པས་མཚན་ཡང་བརྩོན་འགྲུས་སེང་གེར་གསོལ། དེ་ནས་སློབ་དཔོན་སྲེགས་ལ་འདུལ་བའི་ཕྲན་རྣམས་དང་། སྤྱོད་འཇུག །དགྱེས་རྡོར། ལམ་འབྲས། རྫོགས་ཆེན་བརྒྱུད་པ་ཐ་མ། ཁ་རག་སྐོར་གསུམ། སྨྲ་སྒོ་ཚོན་ཆ། འཇམ་གསང་རྣམས་གསན། དགུང་ལོ་བཅོ་བརྒྱད་ལ་བཤད་པ་མཛད་པས་ཆོས་མགོ་ཐོན་པར་བྱུང་། བླ་མ་སུམ་པ་རས་པ་ལ་བཀའ་བརྒྱུད་ཀྱི་གདམས་ངག་ནམ་མཁའ་སྒོ་འབྱེད་དང་གཅོད་ཚར་བཅུ་གསུམ་ཞུས་ནས་ཟས་ནོར་དང་ཉམས་ལེན་གྱིས་མཉེས་པར་མཛད། དེ་ནས་བླ་མ་དབུ་མ་པ་ལ་དགྱེས་རྡོར་གྱི་ཁྲིད་དང་། བདག་མེད་མའི་དབང་། ཕག་མོའི་བཅལ་ལུགས་སོགས་དང་། སྟོད་ལུང་གི་ཐག་མ་ལྷ་ཁང་ དུ་བླ་མ་བཟང་ཡུལ་བ་ལ་ཚེ་དཔག་མེད་ཀྱི་དབང་ཞག་བདུན་ཞུས་པས་མྱུར་དུ་འཆི་བའི་ཚེ་ཡང་བསྲིངས། བླ་མ་སྤང་པོ་ཁ་པ་ལ་ཞང་ཚལ་པའི་ཆོས་སྐོར་དང་འཁྲུལ་གཅོད། ཚེ་དཔག་མེད་ཀྱི་ཆིག་སྒྲུབ་ཞུས། དགུང་ལོ་བཅུ་དགུ་པ་ལ་གྲུབ་ཐོབ་བཟང་ཡུལ་པའི་གསུང་བཞིན་མཁན་པོ་ཆོས་རྒྱལ་ཅན་དུ་བསྙེན་པར་རྫོགས། དེ་རྗེས་བླ་མ་གླང་ཕུག་པ་ལས་དབྱར་གཅིག་གི་རིང་འདུལ་བ་དང་། སློབ་དཔོན་ཚོགས་སྟོན་ཤག་ལ་འདུལ་བ་མདོ་རྩག །བླ་མ་ཁྲོ་ཕུ་བ་ལ་ཤྲཱི་རྣམ་གསུམ་གྱི་གདམས་པ། བླ་མ་ས་སྐྱ་པ་ལ་བ་རི་བའི་སྒྲུབ་ཐབས་བརྒྱ་རྩ་དང་། རྣམ་རྒྱལ་རྣམ་འཇོམས། གཙུག་གཏོར། མི་གཡོ་བ། སྒྲོལ་མ། བླ་མ་སྒྲུབ་པ་སོགས། སློབ་དཔོན་གཙང་པ་ལ་དཔའ་བོ་གྲུབ་པའི་རྒྱུད་དང་། གྲྭ་པ་ཧག་དང་གཉན་ཆུང་ལོ་ཙཱ་བའི་གཅོད་རྣམས། སློབ་དཔོན་ཇོ་གདན་ལ་མངོན་པའི་ཕྲན་དང་། གཅོད་ངོམས་ལུགས་རྣམས། བླ་མ་མཁར་རྒྱ་བ་ལ་རྫོགས་པའི་ལུགས་ཀྱི་དགྱེས་རྡོར། གུར། མཚན་བརྗོད་གསང་ལྡན་སོགས། སློབ་དཔོན་ཇོ་རྒྱལ་ལ་གདན་བཞི་ཞུས་པ་སོགས་ཟབ་གསང་གི་གདམས་པ་མཐའ་ཀླས་པས་ཐུགས་ཀྱི་བུམ་བཟང་ཡོངས་སུ་གཏམས་པར་མཛད།
དེ་ནས་ཡུན་རིང་པོར་རྩད་བཅད་པ་བཞིན་ཡོལ་ཕུ་རི་གོང་དུ་སྒྱུ་ལུས་རྨི་ལམ་འབྱོངས་པ། ཡི་དམ་ལྷ་ཞལ་མཐོང་བ། མངོན་ཤེས་ཐོགས་མེད་མངའ་བའི་སྦས་པའི་རྣལ་འབྱོར་གཉན་སྟོན་རི་གོང་པའི་སྙན་པ་གསན་ཏེ། སྟོན་ཁ་ཞིག་རི་གོང་དུ་མཇལ་བར་ཕེབས། བླ་མས་སྔོན་ནས་མཁྱེན་པས་བླ་མ་ཀོང་པོ་བ་བྱ་བར་དི་རིང་རབ་གྲོང་ནས་བཙུན་པ་གཅིག་ང་མཇལ་དུ་ཡོང་བར་འདུག །དེས་ངའི་གདམས་ངག་གི་བདག་པོ་བྱེད་པར་འདུག །ཨོ་རྒྱན་དང་ཛ་ལན་དྷ་ར་ཚུན་ཆད་ནས་ཕྱིའི་རྒྱ་མཚོའི་འགྲམ་ཚུན་ཆད་དུ་ཆོས་ཀྱིས་ཁྱབ་ནས་འགྲོ་བར་འདུག །ད་ནང་ཆོས་སྐྱོང་དང་དཔའ་བོ་མཁའ་འགྲོ་དུ་མ་བསུ་བ་བྱེད་དུ་སོང་ཞེས་གསུངས་ནས་སེ་མའི་ན་ཁ་བར་བསུར་བཏང་། བླ་མ་དང་མཇལ་ནས་ཐོག་མར་ཐབས་ལམ་དང་སྒྱུ་ལུས་གཉིས་ཀྱི་སྔོན་འགྲོ་བཏབ་སྟེ་ཐབས་ལམ་གྱི་ཁྲིད་བསྐྱངས་པས་ཞག་བཅུ་གཅིག་ནས་རས་ཐུབ་པ་བྱུང་། བླ་མས་ཁོང་ཉིད་སྐྱེ་བ་ཕྱི་མ་ཤར་ཕྱོགས་དག་པའི་ཞིང་ཁམས་མེ་ཏོག་བཀྲམ་པ་ཞེས་བྱ་བར་དེ་བཞིན་གཤེགས་པ་པདྨོའི་དཔལ་ཅེས་བྱ་བར་འཚང་རྒྱ་བའི་ལུང་ཡང་བསྟན། དེ་ནས་སྒྱུ་ལུས་རྨི་ལམ་གྱི་ཁྲིད་བསྐྱངས་པས་ཞག་ཉི་ཤུ་རྩ་ལྔ་ལ་སྦྱོང་སྤེལ་སྤྲུལ་བསྒྱུར་ཐམས་ཅད་དུས་གཅིག་ལ་བྱུང་། ཁོང་གིས་ཐོགས་རྡུགས་མེད་པའི་རྨི་ལམ་གྱི་རྩལ་ལ་བརྟེན་ནས་དཀར་ཆུང་རྒྱལ་པོ་ སོགས་ཀྱི་མི་མ་ཡིན་མང་དག་ཅིག་ཀྱང་བཏུལ་བར་མཛད།
དེ་ནས་བྲག་དགོན་དུ་མཚམས་ལ་ཞུགས་པའི་ཐོ་རངས་ཤིག་རྨི་ལམ་བཟུང་ནས་བྲག་ལོགས་ལ་ཕར་ཐལ་ཚུར་ཐལ་དུ་སྦྱངས། ཡང་ཐེངས་ཤིག་བྲག་དགོན་དུ་མཁའ་སྤྱོད་དཀར་དམར་མཐིང་གསུམ་གྱི་ཞལ་ཡང་གཟིགས་པ་སོགས་དག་སྣང་རྒྱན་གྱི་འཁོར་ལོར་མངའ་དབང་འབྱོར། དེར་བརྟེན་སྟག་ཚང་རྫོང་པའི་རྒྱལ་རབས་མང་པོའི་ལེགས་བཤད་རྣམ་གྲངས་ཡིད་འཛིན་ནོར་བུའི་ཕྲེང་བར་ཁོང་ལ་བྲག་དགོན་པ་ཆོས་རྗེ་སངས་རྒྱས་སྟོན་པ་ཞེས་ཀྱང་འབོད། དེ་རྗེས་ཟད་པར་ས་ཆུ་མེ་རླུང་དུ་སྤྲུལ་བས་དེར་གྱུར་ནས་སོང་། ང་འཆི་ས་ཡང་གོང་མོའི་སྐད་ཐོས་ས་ཞིག་ཏུ་བྱེད་གསུངས། སྐུ་གཤེགས་ཁར་སྔོན་གྱི་འཕྲིན་ལས་ཀྱིས་ཤངས་སུ་བྱོན་ནས་བླ་མ་ཤངས་པའི་དུས་ཀྱི་རྟེན་རྣམས་ལ་ཕྱག་དང་མཆོད་པ་མཛད། རྟེན་ཕྱག་ན་བཞུགས་པ་རྣམས་བདག་པོ་ལ་གཏོད་ཟེར་ནས་བླ་མ་ཤངས་པའི་རྟེན་ངོ་མཚར་ཅན་མང་པོ་ལག་ཏུ་བྱོན། བླ་མ་སངས་རྒྱས་གཉན་སྟོན་གྱིས་ཁྱོད་འཆི་ས་ངའི་སྐུ་འབུམ་མཐོང་ས་ཞིག་ཏུ་གྱིས་ཞེས་གསུངས་པ་བཞིན་ཡོལ་རི་གོང་གི་བླ་མའི་སྐུ་འབུམ་དྲུང་དུ་དགུང་ལོ་བདུན་ཅུ་རྩ་གཉིས་ལ་ཕེབས་པ་སྟེ་སྤྱི་ལོ་1285ལོ་ཙམ་ལ་གཟུགས་སྐུའི་བཀོད་པ་ཡོངས་སུ་བསྡུས།
འདི་ཉིད་ཀྱི་སློབ་མ་མཆོག་གསུམ་སྟེ་མཁས་གྲུབ་གཙང་མ་ཤངས་སྟོན། གནས་རྙིང་པ་ཨ་ཡི་སེང་གེ མཁས་བཙུན་གཞོན་ནུ་གྲུབ་བཅས་ལ་ཤངས་ཆོས་ཀྱི་གདམས་པ་རྫོགས་པར་བསྩལ་བ་དང་། སློབ་མ་གཞན་ཡང་རྨོག་ལྕོག་རིན་ཆེན་བློ་གྲོས་སོགས་མང་དུ་བྱུང་བས། དཔལ་ལྡན་ཤངས་པའི་བསྟན་པ་སྟོད་མངའ་རིས་ཞོག །སྨད་མདོ་ཁམས། བར་དབུས་གཙང་ལ་སོགས་པར་རྒྱ་ཆེར་དར། རི་གོང་གི་གདན་ས་དེ་ཉིད་ནས་གྲྭ་པ་ཁྲི་ཚོ་ལྔ་ལན་ལྔ་སྐྱེས་ཏེ་ཤངས་པའི་བསྟན་པ་བོད་ཡུལ་སྟོད་སྨད་བར་གསུམ་དུ་ཁྱབ་པར་མཛད།
དེ་ལྟར་གསོལ་འདེབས་ཨུ་དུམྦ་རའི་འཛུམ་ཟེར་དུ་རྒྱལ་ཚབ་དམ་པ་ཆོས་ཀྱི་གདུང་འཛིན་པ། རྨོག་ལྕོག་སྐྱེར་སྒང་གཉན་སྟོན་འགྲོ་མགོན་སོགས། །སྲིད་མཐའི་བྱང་སེམས་དུ་མ་རིམ་བྱོན་ཏེ། ས་སྟེང་གྲུབ་པས་བཀང་ལ་གསོལ་བ་འདེབས་ ཞེས་འཁོད་པ་ལྟར་མཁས་གྲུབ་ཁྱུང་པོའི་རྗེས་སུ་ཆིག་བརྒྱུད་གདམས་པའི་བརྒྱུད་ཕྲེང་རིན་པོ་ཆེ་སྣ་བདུན་ལས་ཆོས་རྗེ་རྨོག་ལྕོག་པ་དང༌། དབོན་སྟོན་སྐྱེར་སྒང་པ། སངས་རྒྱས་གཉན་སྟོན། འགྲོ་མགོན་སངས་རྒྱས་སྟོན་པ་རྣམས་རིམ་པར་བྱོན་ནས་དཔལ་ལྡན་ཤངས་པ་བཀའ་བརྒྱུད་ཀྱི་བསྟན་པ་དབྱར་གྱི་མཚོ་བཞིན་བླ་ནས་བླ་རུ་སྤེལ་བར་མཛད།
II.2.1.2 The close disciples of Khyungpo Neljor
གཉིས། མཁས་གྲུབ་ཁྱུང་པོའི་དངོས་སློབ་ཀྱི་སྐོར།
མཁས་གྲུབ་ཁྱུང་པོ་རྣལ་འབྱོར་རྒྱ་གར་ལ་མ་ཕེབས་གོང་བོན་གྱི་སློབ་མ་གཙོ་ཆེ་བ་བདུན་བརྒྱ་དང༌། སྔ་འགྱུར་རྙིང་མའི་སློབ་མ་གཙོ་ཆེ་བ་སུམ་བརྒྱ་ཡོད་པ་དེ་དག་འགའ་ཞིག་གཞིར་བྱས་ནས། ཐེངས་གཉིས་པར་རྒྱ་གར་དུ་ཕེབས་སྐབས་མང་ཡུལ་སྐྱིད་གྲོང་དུ་ཕེབས་སྐྱེལ་ལ་བྱོན་པའི་སློབ་མ་ཆིག་སྟོང་ལྔ་བརྒྱ་འདུས་ཡོད། དེ་ནས་འཕན་ཡུལ་འཆད་ཁ་དགོན་ཕྱག་བཏབ་རྗེས་མཁས་གྲུབ་ཁྱུང་པོའི་བརྒྱུད་འཛིན་གྲྭ་སློབ་ཉིས་སྟོང་ཙམ་ཟིན་པ། དེ་ནི་དགེ་བཤེས་གླང་རི་ཐང་པའི་གྲྭ་སློབ་ཀྱི་ཚོགས་པའི་གྲངས་དང་མཉམ་པ་ཡིན། དེ་ནས་འགོ་བཙུགས་ཏེ་བླ་མ་དང་ཡི་དམ་གྱིས་ལུང་བསྟན་པའི་གནས་ཞོང་ཞོང་གི་གཙུག་ལག་ཁང་དུ་རྟེན་སྡོམ་པ་གསུམ་ལྡན། ལམ་དཀའ་ཐུབ་ཀྱི་སྲངས། འབྲས་བུ་གཞན་དོན་གྱི་སྤྱོད་པ་གསུམ་གྱིས་དབུས་གཙང་ཁམས་གསུམ་གྱི་གྲྭ་སློབ་རྣམས་ལ་དཀར་པོའི་ཆོས་ཀྱི་གནང་སྦྱིན་ལེགས་པར་བསྩལ་བས། ཤིང་སྣ་འཛོམས་སར་བྱ་རིགས་མང་ཞེས་པའི་དཔེ་ལྟར་ཡོངས་གྲགས་སུ་ཚོགས་པའི་མཐར་ཐུག་ཁྲི་ཚོ་བརྒྱད་ཙམ་གྱི་བར་མང་དུ་འདུས་ནས་ཤངས་ཆོས་བརྒྱུད་འཛིན་པའི་དཔུང་ཁག་སྟོབས་ཆེར་བཏང་ཡོད། གྲྭ་སློབ་དེ་དག་གི་འབོར་གྲངས་ཀྱང་དེང་རྣམ་གླིང་རྫོང་ཡོངས་ཀྱི་མི་འབོར་དང་། མངའ་རིས་ས་གནས་ཡོངས་ཀྱི་མི་འབོར་དང་གྲངས་མཉམ། མཁས་གྲུབ་ཁྱུང་པོ་བྱོན་དུས་ཀྱི་བོད་སིལ་བུའི་མཇུག་ཏུ་ཆོས་རྗེ་འབྲོམ་སྟོན་པས་མཛད་པའི་མི་རྩིས་ལྟར་ན་སྐབས་དེར་བོད་ལ་ཁྱོན་མི་འབོར་ས་ཡ་བཅུ་ཙམ་ཡོད་པར་བཞེད་པ་ལས། མཁས་གྲུབ་ཁྱུང་པོའི་ཚོགས་པའི་མཐར་ཐུག་ཁྲི་ཚོ་བརྒྱད་དེ་ལྟར་ན་ཤངས་ཆོས་འཛིན་པའི་གྲྭ་སློབ་ཁོ་ནས་སྐབས་དེའི་བོད་ཀྱི་མི་འབོར་ཁྱོན་ཡོངས་ཀྱི་ཧ་ལམ་0.8%དང་། ཡང་མཁས་གྲུབ་ཁྱུང་པོའི་རྣམ་ཐར་དུ་དེ་ནས་ཚོགས་པའི་མཐར་ཐུག་ཁྲི་ཚོ་བཅོ་བརྒྱད་ལ་ནི་ལོ་དུ་མར་ཆོས་མང་པོ་བསྟན་ཞེས་ཚོགས་པའི་མཐར་ཐུག་ཁྲི་ཚོ་བཅོ་བརྒྱད་ཅེས་འཁོད་པ་ལྟར་ན་སྐབས་དེའི་བོད་ཀྱི་མི་འབོར་ཁྱོན་ཡོངས་ཀྱི་ཧ་ལམ་1.8%ཟིན་ཡོད།
དེ་ལྟར་མཁས་གྲུབ་ཁྱུང་པོའི་རྣམ་ཐར་དྲི་མེད་སྐྱོང་བའི་དད་པ་བརྩོན་འགྲུས་དང་ལྡན་པ། རྒྱུད་སྡེའི་དབང་བསྐུར་ཀུན་ཚང་བ། སྙིང་རྗེ་ཤེས་རབ་ཀྱིས་ཕྱུག་པ། རྗེས་གནང་སྒྲུབ་ཐབས་ལ་མཁས་པ་བཅས་མཚན་ཉིད་བཞི་ལྡན་གྱི་སློབ་མ་དགེ་བའི་བཤེས་གཉེན་ཁྲི་ཕྲག་བརྒྱད་དང་ཚོགས་པའི་མཐར་ཐུག་ཁྲི་ཚོ་བཅོ་བརྒྱད་ལ་སོགས་ཤངས་ཆོས་འཛིན་པའི་སྐྱེས་བུ་ས་ཆེན་པོའི་རྡུལ་དང་མཉམ་པ་བྱོན་པའི་ནང་། གཙོ་ཆེར་སློབ་མའི་མཐར་ཐུག་དྲུག་སྟེ། ཡོན་ཏན་སྐྱེས་པའི་ས་གཞི་ལ་དྲི་མེད་ཤེས་རབ་ཀྱི་སྡོང་པོ་འཇམ་དཔལ་དབྱངས་དང་འཇིགས་བྱེད་ལ་མངའ་བརྙེས་པའི་རྨེའུ་སྟོན་པ་སྐྱེས། ཕན་སེམས་ཀྱི་ཡལ་གས་བྱམས་པ་ལ་ཆོས་གསན་པའི་བྱང་ཆུབ་སེམས་དཔའ་གཡོར་པོ་རྒྱ་མོ་ཆེ། ཚད་མེད་པའི་སྙིང་རྗེ་ཆེན་པོའི་ཡལ་འདབ་རྒྱས་པ་སྤྱན་རས་གཟིགས་དང་དབྱེར་མེད་པའི་དངུལ་སྟོན་རིན་དབང་། བྱམས་པ་ཕྱོགས་མེད་དུ་ཤར་བའི་བདེ་མཆོག་དང་མགོན་པོའི་བདག་ཉིད་ལ་སྟོད་པ་དཀོན་མཆོག་མཁར། ལྷ་སྐུ་འོད་གསལ་དབྱེར་མེད་ཀྱི་སྙིང་པོ་མངོན་དུ་གྱུར་ཅིང་མཁའ་འགྲོ་དངོས་སུ་འདུ་བའི་རྟོགས་ལྡན་ཞང་སྒོམ་ཆོས་སེང་། སྒྱུ་ལུས་རྨི་ལམ་གྱི་འབྲས་བུ་སྨིན་པའི་རྨོག་ལྕོག་པ་རིན་ཆེན་བརྩོན་འགྲུས་བཅས་སྔ་བུ་ལྔ་དང་ཕྱིས་བུ་གཅིག་ལ་སོགས་པས་ས་ཕྱོགས་མང་པོར་ཤངས་ཆོས་ཉམས་ལེན་དང་གདམས་པ་སྤེལ་བ་སྟེ།
རྨོག་ལྕོག་པ་རིན་ཆེན་བརྩོན་འགྲུས་ཀྱིས་བླ་མ་ཁྱུང་པོ་ཁྱོན་ལོ་དྲུག་དང་ཟླ་བ་བདུན་བསྟེན་ཞིང་། ཤངས་ལྷ་ཕུ་རྨོག་ལྕོག་དགོན་དང་ལྐུགས་ལུང་དགོན་གཉིས་སུ་བུ་སློབ་ཀྱི་ཚོགས་པ་བསྐྱངས་ནས་ཤངས་ཆོས་དར་ཁྱབ་ཆེས་ཆེར་མཛད་པ་གོང་དུ་བཤད་ཟིན་པ་དང་།
རྟོགས་ལྡན་ཞང་སྒོམ་ཆོས་སེང་གིས་བླ་མ་ཤངས་པ་ཁྱོན་ལོ་བཅུ་གཉིས་བསྟེན་ཞིང་ཟབ་དགུའི་གདམས་པ་རྒྱ་ཆེར་མནོས། ཕྱིས་གནམ་མཚོའི་དོ་ལ་ལོ་བདུན། བྱ་དུར་དང་ཐང་ལྷའི་མགུལ་སྒྲགས་པ་ལ་ལོ་ལྔ་བཞུགས་ནས་གདམས་དོན་ཇི་བཞིན་ཉམས་ལེན་མཛད་པས་གནས་ལུགས་ཀྱི་སྦས་དོན་རྗེན་པར་གཟིགས། རྡོ་རྗེ་རྣལ་འབྱོར་མས་མི་བཞིན་དུ་ལབ་པ་དང་། མགོན་པོ་ཕྱག་དྲུག་པ་སོགས་ཡི་དམ་དཔག་ཏུ་མེད་པའི་ཞལ་གཟིགས། སྐུ་ཚེའི་མཇུག་ཏུ་བྱང་རྩེ་ལྡིང་ དུ་ཡུན་རིང་བཞུགས་ནས་སློབ་མ་བསྐྱངས་ཏེ་ཤངས་ཆོས་སྤེལ།
ལ་སྟོད་པ་དཀོན་མཆོག་མཁར་ནི་སྤྱི་ལོ་1048ལོར་དབྱིལ་གྱི་གདུང་རུས་སུ། ཡབ་དབྱིལ་ཞང་ཁྲོམ་རིན་ཆེན་འབྱུང་གནས་སམ་སྔགས་འཆང་རིན་ཆེན་འབྱུང་གནས་དང་། དེའི་ཇོ་མོ་གཞོན་པར་གནོད་སྦྱིན་བུ་ལིའི་གངས་འདབས་ཀྱི་ལྷ་སྡིངས་བྱང་ཆུབ་གླིང་གི་ནུབ་ཕྱོགས། དེང་གཅུང་རི་བོ་ཆེ་ཡུལ་ཤོག་ཁོངས་ཐུབ་མདོ་གྲོང་ཚོར་སྐུ་འཁྲུངས། འབྲེ་ཆེན་ཤེས་རབ་འབར་གྱི་སྙན་པ་གསན་པས་ཡབ་ཀྱིས་དཀོན་མཆོག་མཁར་སྐུ་མཆེད་གསུམ་པོ་རབ་ཏུ་འབྱུང་བར་བརྫངས་པ་བཞིན། མྱང་གི་བྱེ་མདར་འབྲེ་ཆེན་པོ་ལས་རབ་ཏུ་བྱུང་། སྔར་གྱི་བག་ཆགས་སད་པའི་སྟོབས་ཀྱིས་མཁན་པོ་འབྲེ་ཆེན་པོའི་སྐུའི་ཡོན་ཏན་མཐའ་དག་ཐུགས་སུ་ཆུད་ནས་མཁས་པའི་གྲགས་པ་ཀུན་ལ་ཁྱབ། དེ་རྗེས་ཁྱུང་རིན་ཆེན་གྲགས་དང་། ས་སྐྱ་ཀུན་དགའ་སྙིང་པོ་སོགས་བླ་མ་དུ་མའི་ཞབས་ལ་གཏུགས་ནས་མདོ་སྔགས་ཀྱི་ཆོས་གཞུང་རྒྱ་ཆེར་གསན་པས། རྗེ་བཙུན་ཀུན་དགའ་སྙིང་པོའི་ཕྱོགས་ཀྱི་མཁས་གྲུབ་བཞིའི་ཡ་གྱལ་དུ་གྱུར། གནས་རྙིང་མཁན་པོ་དཀོན་སེང་གི་སྐུའི་གཅེན་པོ་ཡིན། ཁོང་གིས་ལ་སྟོད་དང་ཉང་གཉིས་ལ་དགོན་གནས་མང་དུ་བཏབ་སྟེ་མགོན་པོ་སྟོད་ལུགས་སོགས་ཤངས་པའི་ཆོས་སྐོར་སྤེལ་བར་མཛད་ལ། ལ་སྟོད་གནས་རྙིང་གི་གདུང་རབས་ལ་སྤྱན་རས་གཟིགས་ཀྱི་རྣམ་འཕྲུལ་བརྒྱད་ཅུ་རྩ་བརྒྱད་བྱོན་པ་ལས་ཕྱིས་ཀྱི་གདུང་རབས་འགས་ཤངས་ཆོས་སྐོར་ཅིག་ཉམས་ལེན་དང་དར་ཁྱབ་རྒྱ་ཆེར་མཛད། ཁོང་ལ་དཔལ་ཕག་མོ་གྲུ་པ་དང་། གྲུབ་ཐོབ་ཉི་ཕུག་པ་ཆོས་ཀྱི་གྲགས་པ། མཁན་པོ་དབང་ཕྱུག་རིན་ཆེན་སོགས་བསམ་གྱིས་མི་ཁྱབ་པའི་སློབ་མ་མང་། མཐར་དགུང་གྲངས་གོ་དགུར་ཕེབས་པ་སྤྱི་ལོ་1147ལོར་རང་གིས་བཏབ་པའི་དགོན་པ་གནས་གསར་རམ་གནས་གོག་ཏུ་གཤེགས། སྐུ་གདུང་ཧྲིལ་པོ་ཐོག་མར་གནས་རྙིང་དང་ཉེ་བའི་ལྷོ་ངོས་ཀྱི་གནས་གོག་ལྷ་ཁང་གི་མཆོད་རྟེན་གཅིག་ཏུ་བཞུགས་ཀྱང་། ད་ལྟ་མཆོད་རྟེན་གྱི་ཤུལ་ཙམ་ལས་སྐུ་གདུང་མཇལ་རྒྱུ་མི་འདུག
སྤྱིར་ལ་སྟོད་པ་དཀོན་མཆོག་མཁར་ལ་བཀའ་བབས་པའི་ནི་གུ་ཆོས་དྲུག་གི་དབང་བྱིན་རླབས་ཁྲིད་བཅས་དང་འབྲེལ་བ་བཀའ་སྲུང་མགོན་པོའི་སྐོར་ལ། བླ་མ་མགོན་པོ་དབྱེར་མེད་ཀྱི་བྱིན་རླབས། གྲིབ་སེལ། གནས་དབབ་ལྷ་བཞི་བླ་མར་དྲིལ་ནས་སྒྲུབ་པ། མགོན་མཐིང་། གཏོར་དབང་བར་ཆད་ཀུན་སེལ། མགོན་དཀར་ཡིད་བཞིན་ནོར་བུ། མགོན་དམར་དབང་གི་རྒྱལ་པོ། མགོན་ལྗང་ཚེའི་བདག་པོ། མགོན་སེར་གུར་ཀུམ་མདོག་ཅན། མགོན་པོ་འཆིང་ཁ། གསང་སྒྲུབ་ཡུམ་ཅན་མགོན་པོ་སོགས་མགོན་བཀའ་བཅུ་གསུམ། བླ་མ་མགོན་པོ་དབྱེར་མེད་ཀྱི་ཁྲིད། རཱ་ཧུ་ལ་ནས་བརྒྱུད་པའི་སྐུ་དངོས་ལ་བསྟེན་པའི་ལྔ་ཁྲིད། མེ་ཏྲི་པ་ནས་བརྒྱུད་པའི་འཁོར་ལོ་བཞི་ཁྲིད། ཡང་མཻ་ཏྲི་པ་ནས་བརྒྱུད་པའི་མཁའ་སྤྱོད་དཀར་མོ་དང་མགོན་དཀར་ཡིད་བཞིན་ནོར་བུ་གཉིས་ཀྱི་འཁོར་ལོ་བཞི་ལ་བརྟེན་པའི་ཚེ་ཁྲིད་སོགས་མཐའ་ཡས་སོ།།
༤ མཁས་པ་ཕྱ་གཡོར་གཉིས་ཞེས་གྲགས་པའི་ཡ་གྱལ་དགེ་བཤེས་གཡོར་པོ་རྒྱ་མོ་ཆེས་སྟོད་ལུང་སོགས་དབུས་ཁུལ་གྱི་ས་ཆ་འགར་བཞུགས་ནས་ཤངས་ཆོས་སྤེལ། ལྷག་པར་ཕར་ཕྱིན་ཐེག་པར་མཁས་པའི་དགེ་བཤེས་འདི་ཉིད་ཀྱིས་རྨོག་ལྕོག་པ་རིན་ཆེན་བརྩོན་འགྲུས་ལོ་ལྔ་ཙམ་རྗེས་སུ་བཟུང་ནས་ཕར་ཕྱིན་དང་། སྤྱོད་བསྡུས་སོགས་འཆད་ཁྲིད་མཛད། ཁོང་གི་མཛད་རྣམ་ཞིབ་པ་ད་ཕན་མ་རྙེད།
དངུལ་སྟོན་རིན་དབང་ནི་མཁས་གྲུབ་ཁྱུང་པོ་ཐེངས་གསུམ་པར་རྒྱ་གར་ནས་བོད་དུ་ཕྱིར་ལོག་ཕེབས་རྗེས། མངའ་རིས་ནས་སྙེ་མོར་གདན་དྲངས་ཏེ་ཆོས་འཁོར་འཛུགས་མཁན་གྱི་སྒོ་མོའི་ཇོ་བཙུན་ཁྱུང་པོ་དང་། དངུལ་བཙུན་ཀྲོངས་པོ་གཉིས་ལས། ཕྱི་མ་དངུལ་བཙུན་ཀྲོངས་པོ་ཞེས་པ་དེ་མིན་ནམ་སྙམ། མཛད་རྣམ་གཞན་མ་མཇལ།
རྨེའུ་སྟོན་པ་སྐྱེས། འདི་ཉིད་ཀྱི་མཛད་རྣམ་ཞིབ་པ་ད་ཕན་མ་མཐོང་ཡང་། ཁོང་ནི་བོན་གྱི་གདུང་རྒྱུད་ཆེ་བ་དྲུག་གི་ནང་གསེས་མཁས་པ་རྨེའུ་ཡི་རིགས་སུ་གཏོགས་པར་སེམས། གང་ལགས་ཤེ་ན། གཅིག་ནས་མཁས་གྲུབ་ཁྱུང་པོ་རང་ཉིད་སྐུ་ཚེའི་སྟོད་དུ་བོན་ཆོས་ལ་ཞུགས་པ་དེས་རྐྱེན་པས། ཁམས་ཁུལ་གྱི་བོན་པོའི་གྲྭ་སློབ་འགའ་ཞིག་ཀྱང་ཞོང་ཞོང་དུ་མཁས་གྲུབ་ཁྱུང་པོའི་སྤྱན་སྔར་བྱོན་ནས་ཤངས་པ་བཀའ་བརྒྱུད་ཉམས་ལེན་གནང་སྲོལ་བྱུང་ཡོད་པ་དང་། གཉིས་ནས་མེའུ་སྟོན་ལྷ་རི་གཉན་པོས་ཤངས་གུར་ཞོག་དགོན་ཕྱག་བཏབ་པ་དང་། རྨེའུ་སྟོན་དམ་པ་དགོངས་མཛད་ཀྱིས་དཀར་པོ་བྲག་དང་བྲག་དཀར་སྒྲུབ་སྡེ་སོགས་སུ་བཞུགས་ནས་བོན་གྱི་བསྟན་པ་སྤེལ་བ། གསུམ་ནས་རྨེའུ་སྟོན་ཡེ་ཤེས་རྒྱལ་མཚན་དང་རྨེའུ་སྟོན་ཡེ་ཤེས་གཡུང་དྲུང་སོགས་རྨེའུ་ཡི་བརྒྱུད་འཛིན་པ་དེ་དག་གིས་མཛད་པ་སྐྱོང་སའི་གནས་གཞི་ཡང་སྤྱིར་ཞོང་ཞོང་གིས་ལྟེ་བར་བྱས་པའི་ས་རྣམས་སུ་འཁེལ་བའི་དབང་གིས་རྨེའུ་སྟོན་པ་སྐྱེས་ཞེས་པ་འདི་ཉིད་ཀྱང་རྨེའུ་ཡི་རིགས་སུ་གཏོགས་ཀྱང་། སྐབས་དེར་ཤངས་ཁུལ་དུ་ཁྱུང་པོ་ཉིད་གྲགས་ཆེ་བས་ཤངས་ཆོས་ཉམས་སུ་ལེན་ཏེ་འཇམ་དཔལ་དབྱངས་དང་འཇིགས་བྱེད་ལ་མངའ་བརྙེས་ཤིང་མཁས་གྲུབ་ཁྱུང་པོའི་ཉེ་གནས་གཙོ་བོའི་གྲས་སུ་གྱུར་པ་ཡིན། གཞན་ཡང་སྨན་རིའི་སློབ་དཔོན་བསྟན་འཛིན་རྣམ་དག་གིས་དགའ་ལྡན་ཆོས་འཁོར་གྱི་ཤར་ཕྱོགས་གཤང་ཆུའི་ཕར་ཁ་ན། རྨེའུ་ཚང་གི་གདན་ས་གཤང་གི་ཞོང་ཞོང་ཚལ་ཞེས་པ་དེ་འདུག་ཅེས་གསུངས་པས་ཀྱང་། མཁས་གྲུབ་ཁྱུང་པོས་དགོན་གནས་མ་བཏབ་གོང་སྐབས་ཤིག་རིང་ཞོང་ཞོང་དུ་རྨེའུ་ཡི་གདན་ས་ཡོད་པ་ལས་ཀྱང་ཤེས་རྟོགས་ཐུབ།
དེ་ལྟར་མཁས་གྲུབ་ཁྱུང་པོའི་དངོས་སློབ་ཀྱི་སྤྱིའི་གྲངས་ཚད་རགས་ཙམ་འཁོད་ཀྱང༌། མཛད་རྣམ་ཁུངས་མ་རྣམས་སུ་མཚན་གསལ་བར་འཁོད་པའི་སློབ་མ་ནི། སྔ་བུ་ལྔ་དང་ཕྱི་བུ་གཅིག་ཕུད་གཞན་ཡང་། རོང་པོ་དགེ་བ་རྒྱལ། བོན་ཞང་བདེ་བ་དཔལ། དགེ་བཤེས་རོང་པོ་དཀོན་རྒྱལ། ཉེ་གནས་རིན་ཆེན་རྡོ་རྗེ། དགེ་བཤེས་འགའ་པ་ཆོས་རྒྱལ་སོགས་སློབ་མ་ལྔ་ཙམ་དང་། གནས་རྙིང་གྱེན་ཐོར་མཁན་པོ་དབང་ཕྱུག་རིན་ཆེན་པས་ཤངས་པ་དུ་གུ་བ་ལ་ཆོས་སྐྱོང་གི་སྐོར་མཐའ་དག་གསན་ཞེས་འཁོད་པ་ལྟར། གནས་རྙིང་གི་མཁན་པོ་དབང་ཕྱུག་རིན་ཆེན་གྱིས་ཀྱང་མཁས་གྲུབ་ཁྱུང་པོའི་ཞབས་ལ་གཏུགས་ཏེ་ཆོས་སྐྱོང་གི་སྐོར་སོགས་གསན་མྱོང་བ། ཡང་དངུལ་ཆུ་དྷརྨ་བྷ་དྲའི་གསུང་འབུམ་དུ་ཤངས་པ་བཀའ་བརྒྱུད་ཀྱི་ཤིང་རྟའི་སྲོལ་འབྱེད་མཁས་གྲུབ་ཁྱུང་པོ་རྣལ་འབྱོར་དུ་གྲགས་པ་དེ་ཉིད་ལ་གངས་ཅན་གྱི་ལྗོངས་འདིར་སློབ་མའི་གཙོ་བོ་བཀའ་བབས་གསུམ་བྱུང་བ་སྟེ། ནེ་གུ་ཆོས་དྲུག་གི་བཀའ་བབས་རྨོག་ལྕོག་པ་རིན་ཆེན་བརྩོན་འགྲུས། ཡེ་ཤེས་མགོན་པོའི་བཀའ་བབས་ལ་སྟོད་པ་དཀོན་མཆོག་མཁར། ཉམས་དང་རྟོགས་པའི་བཀའ་བབས་ཁྱུང་པོ་བྱས་བརྟེན་ཞེས་འཁོད་པ་ལྟར་མཁས་གྲུབ་ཁྱུང་པོའི་བཀའ་བབས་འཛིན་པའི་དངོས་སློབ་གལ་ཆེའི་གྲས་སུ་ཁྱུང་པོ་བྱས་བརྟེན་ཞེས་པ་ཞིག་ཀྱང་ཡོད་པ། དེ་མིན་དཔལ་རྒྱུད་སྡེ་ལྔའི་ཆོ་ག་དོན་གསལ་རྒྱས་བྱེད་དུ་རྒྱུད་སྡེ་ལྔ་བླ་མ་རཱ་ཧུ་ལ་ནས་མཁས་གྲུབ་ཁྱུང་པོར་བརྒྱུད་པའི་རིམ་པ་གསུངས་སྐབས། མཁས་གྲུབ་ཁྱུང་པོས་སྣེའུ་སྟོན་པ་ཡོན་ཏན་ཚུལ་ཁྲིམས་ལ་དངོས་སུ་བརྒྱུད་པའི་སྐོར་གསལ་བ་སོགས་ལས་མཁན་པོ་དབང་ཕྱུག་རིན་ཆེན་དང་། ཁྱུང་པོ་བྱས་བརྟེན། སྣེའུ་སྟོན་པ་ཡོན་ཏན་ཚུལ་ཁྲིམས་བཅས་ཀྱང་མཁས་གྲུབ་ཁྱུང་པོའི་དངོས་སློབ་ཡིན་པ་ཤེས་རྟོགས་ཐུབ། མཁས་གྲུབ་ཁྱུང་པོ་སྐུ་གཤེགས་རྗེས་སློབ་མ་གཙོ་བོ་མང་ཆེ་བ་ཞོང་ཞོང་དུ་མ་བཞུགས་པར་དབུས་གཙང་ཁུལ་གྱིས་གཙོས་པའི་ས་ཆ་མང་པོར་བྱོན་ཏེ། བླ་མ་ཤངས་པའི་གདམས་པ་རྣམས་གདུལ་བྱ་ཅི་རིགས་ལ་གསུངས་ནས་ཤངས་ཆོས་རྒྱ་ཆེར་སྤེལ། དེར་བརྟེན་མཁས་གྲུབ་ཁྱུང་པོ་སྐུ་གཤེགས་པ་དེས་ཞོང་ཞོང་གི་དགོན་གནས་ཉམས་རྒུད་དང་ཤངས་ཆོས་ཀྱི་སྟོབས་ཤུགས་མུ་མཐུད་གོང་འཕེལ་གཏོང་བར་ཚབས་ཆེའི་གྱོང་གུན་བཟོས་ཀྱང་། ཕྱོགས་གཅིག་ནས་བརྗོད་ན་དེས་ཤངས་པའི་ཆོས་བརྒྱུད་འདི་ཉིད་ཡུལ་ལུང་གཅིག་གཙོ་བོར་སློབ་གཉེར་དང་ཉམས་ལེན་བྱེད་པའི་བཀག་རྒྱ་ལས་གྲོལ་ཏེ་བོད་ཀྱི་ས་ཆ་མི་འདྲ་བར་ཁྱབ་བརྡལ་དུ་འགྲོ་རྒྱུར་སྔོན་འགྲོའི་ཆ་རྐྱེན་ལེགས་པར་བསྐྲུན་ནོ།
II.2.1.3 The later Seven Jewels of the lineage
།གསུམ། རིན་ཆེན་བདུན་བརྒྱུད་ཕྱི་མའི་སྐོར།
རིན་ཆེན་བདུན་བརྒྱུད་ཕྱི་མ་ནི། འགྲོ་མགོན་སངས་རྒྱས་སྟོན་པའི་སློབ་མ་མཁས་གྲུབ་གཙང་མ་ཤངས་སྟོན་དང་། ཁྱུང་པོ་གཉིས་པ་ཚུལ་ཁྲིམས་མགོན་པོ། རས་ཆེན་སངས་རྒྱས་སེང་གེ ཤངས་དཀར་རིན་ཆེན་རྒྱལ་མཚན། མཉམ་མེད་སངས་རྒྱས་དཔལ་བཟང་། གྲུབ་ཆེན་ནམ་མཁའ་རྒྱལ་མཚན། རྒྱ་སྒོམ་ལེགས་པ་རྒྱལ་མཚན་བཅས་ཏེ།
Tsangma Shangtön
མཁས་གྲུབ་གཙང་མ་ཤངས་སྟོན།
མཁས་གྲུབ་ཤངས་སྟོན་ནི་ཁོང་རྒྱང་ཡང་སྒང་སྟེ་དེང་གཞིས་རྩེ་རྣམ་གླིང་རྫོང་སྟག་སྣ་ཡུལ་ཤོག་ཁོ་ལམ་ཚོན་ཁོང་རྒྱང་གྲོང་ཚོའི་ལྟག་ཏུ་ཡབ་དཔོན་པོ་དཀོན་བཟང་དང་ཡུམ་ཇོ་དགེ་གཉིས་ཀྱི་སྲས་སུ་སྤྱི་ལོ་1234ལོར་བཀྲ་ཤིས་པའི་ལྟས་དུ་མ་དང་བཅས་སྐུ་འཁྲུངས། གདུང་རུས་ནི་བླ་མ་རྭ་ལོ་སོགས་དང་མཚུངས་པར་རྭ་ཡི་རིགས་ཡིན། ཡུམ་གྱི་ལྷུམས་སུ་ཞུགས་པ་ན། ཡབ་ཡུམ་བདེ་སྐྱིད་དང་ལྡན་པར་འགྱུར། སྐུ་ན་ཆུང་ངུའི་དུས་ནས་སྔོན་གྱི་བག་ཆགས་སད་པའི་སྟོབས་ཀྱིས་འདོད་པར་རྐམས་ཆགས་མེད་པ། འཁོར་བའི་ཉེས་དམིགས་གཟིགས་པ། འཆི་བ་མི་རྟག་དྲན་པ། དད་སེམས་སྙིང་རྗེ་ཆེ་བ། མཆོག་གསུམ་བླ་མར་གུས་པ་སོགས་ཀྱི་བྱིས་པའི་སྤྱོད་པ་ལས་ཡོངས་སུ་འདས། དགུང་ལོ་བརྒྱད་དགུའི་དུས་སུ་ཡེ་གེ་འབྲི་ཀློག་བསླབས། བཅུ་གསུམ་ལ་བླ་མ་ཉི་ཐོག་པ་ལས་རབ་ཏུ་བྱུང༌། སློབ་དཔོན་ཚུལ་ཤེ་དང་སློབ་དཔོན་ཤཱཀྱ་འབུམ་ལས་ཕར་ཕྱིན་དང་སྤྱོད་འཇུག་གསན། དགུང་ལོ་བཅོ་བརྒྱད་ལ་གཞུང་དེ་གཉིས་ཀྱི་བཤད་པ་ཡང་མཛད། སློབ་དཔོན་ཚུལ་ཡེས་ཚད་མ་རྣམ་ངེས་ ཀྱི་གཞུང་ཁྲིད་སྐབས། ཡིག་ཕྲེང་དང་པོ་དེ་གསུངས་པ་དང་ཤོག་ངོས་དེ་ཐམས་ཅད་བདེ་བླག་ཏུ་གོ་བ་བྱུང་བས་དཀའ་ཚེགས་མེད་པར་མཁྱེན་ཞིང་སྟོན་པ་བཟང་པོར་གྲགས་སོ།
།དེ་ནས་བླ་མ་བས་སྟོན་ལྷ་རིན་ལ་དགྱེས་རྡོར་སྒྲུབ་ཐབས་དང་བཅས་པ། བདེ་མཆོག་དྲིལ་བུ་བ། རྗེ་བཙུན་སྒྲོལ་མ། ཕྱག་ན་རྡོ་རྗེའི་མདོ་ལུགས་སོགས་ཀྱི་དབང་བསྐུར་དང་བཅས་པ་ཞུས་ནས་ཐུགས་སུ་ཆུད་པར་མཛད། གཡའ་ལུང་དགོན་གསར་བའི་མཁན་པོ་ལས་བཀའ་གདམས་ལམ་རིམ་དང་། ལམ་སྒྲོན། བྱང་ཆུབ་སེམས་དཔའི་བློ་སྦྱོང་། གནས་བརྟན་བཅུ་དྲུག་གི་གསོལ་འདེབས། ཤེས་རབ་སྙིང་པོའི་སྒྲུབ་ཐབས་ལ་སོགས་པ་མང་དུ་ཞུས། མདོ་བོ་རུ་བླ་མ་ཀརྨ་པ་ལ་ཐུགས་རྗེ་ཆེན་པོ་རྒྱལ་བ་རྒྱ་མཚོ། སྐུ་གསུམ་ངོ་སྤྲོད། རླུང་སེམས་དབྱེར་མེད། བསམ་གཏན་མཐུན་འཇོག་ལ་སོགས་པ་ཞུས། ཡབ་ཡུམ་འདས་རྗེས་ཡུལ་གཞིས་བཙོངས་ནས་ལུང་པའི་སྟོན་ཁོངས་ལ་ཁལ་འགྱེད་དང་ཟོང་འགྱེད་ལན་བཅུ་གཅིག་མཛད་ནས་ཆགས་མེད་ཡོངས་སུ་གཏོང་བའི་སྦྱིན་པའི་ཕ་རོལ་ཏུ་ཕྱིན་པ་ལ་ཡོངས་སུ་སྤྱད། ཆོས་ཞུ་སའི་བླ་མ་རྣམས་ལ་ཟང་ཟིང་གི་འབུལ་བ་དང་མོས་གུས་ཀྱི་སྒྲུབ་པ་ལ་སོགས་པའི་མཉེས་པ་གསུམ་གྱིས་མཉེས་པར་མཛད། ཀུ་རེ་དང་ཀྱལ་ཀའི་ཕྱིར་ཡང་བླ་མའི་གསུང་ཟློག་མ་མྱོང་།
དེ་རྗེས་ཡོལ་ཕུ་རི་གོང་དུ་སངས་རྒྱས་སྟོན་པ་བྱ་བའི་བླ་མ་རྟོགས་ལྡན་གྲུབ་ཐོབ་བཟང་པོ་ཞིག་བཞུགས་ཟེར་བ་ཐོས་པ་ཙམ་ནས་སྔོན་གྱི་ལས་འཕྲོ་སད་དེ་མོས་གུས་ཆེན་པོ་སྐྱེས། བླ་མའི་ཞལ་མཇལ་བ་ཙམ་གྱིས་སྤྱན་ཆབ་རང་དབང་མེད་པར་ཤོར་ཞིང་མོས་གུས་ཐུན་མོང་མ་ཡིན་པ་སྐྱེས། དུས་དེ་ཉིད་དུ་དགེ་སྦྱོར་བཟང་པོ་ཉམས་སུ་ཤར། བླ་མས་སྒྱུ་ལུས་རྨི་ལམ་སྤྱིའི་དབང་བསྐུར་ཏེ་ཆོས་དྲུག་གི་ཁྲིད་བསྐྱངས། ཐབས་ལམ་ལ་བདེ་དྲོད་འབར་བས་ཞག་བདུན་ནས་རས་ཐུབ་པ་བྱུང་། སྒྱུ་ལུས་འབྲིང་པོ་ཞག་གསུམ་སྒོམ་པའི་དུས། རྨི་ལམ་དུ་ལྷ་སྐུ་རང་ཤར། རྨི་ལམ་རང་ཟིན། སྒྱུ་མ་རང་ཤར། སྦྱོང་སྤེལ་སྤྲུལ་བསྒྱུར་ཐམས་ཅད་དུས་གཅིག་ལ་ནུས་པར་བྱུང་། བླ་མས་ང་བས་ཀྱང་ཁྱོད་དགེ་སྦྱོར་སྐྱེ་ཚུལ་བཟང་བར་འདུག །དོན་ཁྲིད་ལེགས་པར་ཐོབ་པ་ཡིན། ད་ཆོས་དྲུག་ཤར་བཤད་པས་ཆོག་པར་འདུག་ཅེས་གསུངས། དེས་ན་མཁས་གྲུབ་ཤངས་སྟོན་དེ་ཉིད་སྒྱུ་ལུས་འབྲིང་པོ་ལ་དགེ་སྦྱོར་ཐག་ཆོད་པ་ཡིན། གཞན་ཡང་སེམས་འཆི་མེད་ལ་དུས་ཡུན་ཟླ་བ་ལྔ་ཞུས་པས་ལྷ་སྐུ་རང་ཤར་དུ་ཕལ་ཆེར་བྱུང༌། ཡང་དབྱར་དུས་ཤིག་ཡོལ་རི་གོང་དུ་དགེ་སྦྱོར་འཇུར་པོ་བྱས་པས་སྐུ་ལུས་ཤ་དཔངས་བསྟོད་ཅིང་སྐྲངས་ནས་རླུང་སྐྱ་རྦབ་བྱུང་བ་ལ། བླ་མས་ལུས་འཆི་མེད་ཀྱི་འཕྲུལ་འཁོར་གནང་བས་ལེགས་པར་ཕན། དེ་ལྟར་སྔ་རྗེས་སུ་བླ་མ་སངས་རྒྱས་སྟོན་པས་ཆོས་དྲུག་སོ་སོའི་དབང་དང་། མཁའ་སྤྱོད་དཀར་དམར། བདེ་མཆོག་ལྷ་ལྔ། རྒྱུད་སྡེ་ལྔའི་དབང་བསྐུར་སྒྲུབ་ཐབས་དང་བཅས་པ། ཚེ་དཔག་མེད་ཀྱི་དབང་སྒྲུབ་ཐབས་དང་བཅས་པ། སྐྱེར་སྒང་ལུགས་ཀྱི་ཐུགས་རྗེ་ཆེན་མོ་དང་རྟ་མགྲིན་གསང་སྒྲུབ། མྱུར་མཛད་ཡེ་ཤེས་མགོན་པོའི་ཆོས་སྐོར། བདེ་མཆོག་མཁའ་སྤྱོད་རིག་འཛིན་སོགས་ཤངས་པའི་ཟབ་ཆོས་མ་ལུས་རྫོགས་པར་བསྩལ་ཞིང་ཆིག་བརྒྱུད་གདམས་པའི་རྒྱལ་ཚབ་ཏུ་བསྐོས། མཁས་གྲུབ་འདི་ཉིད་ཀྱི་ཁྱད་དུ་འཕགས་པའི་ཡོན་ཏན་ལ་ཆོས་རྗེ་སངས་རྒྱས་སྟོན་པས་ཀྱང་འབྲི་གུང་ཁྲི་ཚོ་བཅོ་བརྒྱད་ཀྱི་གསེབ་ན་འོ་ཅག་གི་ཤངས་སྟོན་ཙམ་ཞིག་ཡོད་དམ་མེད་དམ་ཞེས་པ་ལ་སོགས་པའི་བསྔགས་པ་ཡང་ཡང་མཛད་ལ། མཁས་གྲུབ་ཤངས་སྟོན་ཉིད་བཅུ་བཞིའི་ས་ཐོབ་པ་དང་། སློབ་མ་བརྒྱུད་འཛིན་དང་བཅས་པ་ཐམས་ཅད་དག་པ་བདེ་སྟོང་མཁའ་སྤྱོད་དུ་འགྲོ་བར་ལུང་བསྟན།
མཁས་གྲུབ་ཤངས་སྟོན་གྱིས་རང་ཉིད་ཀྱི་གཅུང་པོ་ཚུལ་ཁྲིམས་དཔལ་ཡང་ཡབ་ཀྱིས་གཉེན་བསྒྲིགས་པ་བཤིག་སྟེ། བཙུན་པ་བྱེད་དུ་བཅུག་ནས་ཆོས་རྗེ་སངས་རྒྱས་སྟོན་པ་ལ་ཆོས་དྲུག་གི་ཁྲིད་ཞུས་པས། ཐབས་ལམ་ལ་དགེ་སྦྱོར་ཐག་ཆོད་པའི་སྒོམ་བཟང་པོ་བྱུང༌། ཡང་ཐེངས་ཤིག་ཡོལ་རི་གོང་དུ་གཞུང་བྲག་དམར་བའི་བླ་མ་རས་པ་དཀོན་མཆོག་སྐྱབས་ཆོས་རྗེ་སངས་རྒྱས་སྟོན་པ་ལ་ཆོས་ཞུ་རུ་བྱུང་བ་ལ་རྫོགས་ཆེན་སྙིང་ཏིག་ཞུས་པས། ལྟ་སྟངས་བྱས་མ་ཐག་ནམ་མཁའ་ཐམས་ཅད་ཁྲ་མིག་ཏུ་ཤིག་གེར་སོང་བས། ཁྲི་མིག་རེ་རེའི་ནང་ན་ཇོ་བོ་ཐུགས་རྗེ་ཆེན་པོ་རེ་རེ་བཞུགས་པ་ཞལ་གཟིགས། ཙ་རིར་སྐུ་ལུས་ལ་གེགས་ཤིག་བྱུང་བ་རྒན་མོ་ལྷས་པའི་བླ་མ་ཁམས་པ་ལ་ལམ་འབྲས་ཀྱི་གེགས་སེལ་ཞུས་པས་ཞག་ཉི་ཤུ་རྩ་ལྔར་གེགས་ཐོན། དེ་ལས་ལམ་འབྲས་ཞ་མ་ལུགས་ཀྱི་དབང་དང་། བཀའ་དང་བརྒྱུད་པའི་ལོ་རྒྱུས། གེགས་སེལ་ཐུགས་རྒྱུད། དམིགས་པ་རྒྱ་མཚོ། རྒྱུད་དྲག་པོ་གསུམ་འདུལ་སོགས་ཀྱི་གདམས་པ་མང་དུ་ཞུས། འཇག་ཆུང་དུ་བཞུགས་པའི་དུས་སུ། རང་གི་ལུས་པོ་ཁོང་རྒྱང་ལུང་པར་མ་ཤོང་བར་སྐུ་སྨད་ལུང་པས་བསྡམས་ནས་སྐུ་སྟོད་ཡན་ཆད་ནམ་མཁའ་ལ་ཡར་རྒྱང་ངེ་ཐོན་པའི་སྣང་བ་བྱུང་། ས་གཞི་དང་བར་སྣང་ཐམས་ཅད་ལྷ་སྐུ་ཁྲུ་རེ་ཙམ་མང་པོས་ཁྲིག་པ་ཡང་བདེ་མཆོག་ལྷན་སྐྱེས་དང་ཤཱཀྱ་ཐུབ་པ་ཆུ་ལོན་མ་མང་པོ་ཡོད་པ་ལོ་གསུམ་གྱི་རིང་འཇག་ཆུང་དུ་བབས་ནས། ཆུ་ལོན་སྐབས་སུ་ཡང་རྐང་འོག་ཏུ་མ་རྫི་བའི་ཕྱིར་ཕར་གཡོལ་ཚུར་གཡོལ་བྱེད་དགོས་ཀྱི་ཡོད། ལྷག་པར་ཕྱིར་མི་ལྡོག་པའི་ས་ནོན་པའི་རྟགས་སུ། རིགས་དྲུག་གི་གནས་སྐྱོང་ཐམས་ཅད་ཤར་བ་དང༌། མངོན་རྟོགས་རྒྱན་ལས་ཀུན་སྤྱོད་གཙང་དང་སྐུ་ལ་ནི། །སྨེ་བ་གནག་བག་མེད་པ་དང་ཞེས་གསལ་བ་ལྟར་སྐུ་ལ་འབུ་སྲིན་དང་སྲོ་ཤིག་ནག་སྦག་ལ་སོགས་པ་མི་གཙང་བའི་རྣམ་པ་གང་ཡང་མེད་པ་སྐུ་གཟི་གདངས་དང་ལྡན་པ། ཞལ་མཇལ་བ་ཙམ་གྱིས་དང་བ་འདྲེན་པ་ལ་སོགས་པའི་ཡོན་ཏན་དཔག་ཏུ་མེད་པ་མངའ་བས་འགྲོ་མགོན་གཙང་མ་ཞེས་གྲགས་སོ།
།མཁས་གྲུབ་ཤངས་སྟོན་ངང་སྡེའི་འཁྲིས་ཀྱི་བྲག་ལ་བཞུགས་པའི་དུས་སུ། མཁའ་ལ་རོལ་མོའི་སྒྲ་ཆེན་པོ་ཞིག་གྲགས་པ་དང་མི་དཀར་པོ་ཞིག་བྱུང་ནས་ཡར་འདེང་ཞེས་བརྗོད་པ་ལྟར་བྱས་པས་རྗེ་བཙུན་སྒྲོལ་མའི་ཞལ་གཟིགས་པ་དང་གསུང་བྱོན་ཞིང་བྱིན་རླབས་ཀྱང་མཛད། གཉན་ཁྲོད་རྣམས་སུ་གཅོད་མཛད་པའི་དུས་སུ། དངོས་སུ་ཟབ་རྡེག་པ་དང༌། རྡོ་ཆར་འབེབས་པ་དང་། འདྲུད་པ་དང་། སྙིང་རླུང་བཟོད་གླགས་མེད་པ་ལ་སོགས་བྱུང་ཡང་གཅོད་མ་ཆོད་པ་དང་། ལྷ་འདྲེ་ཟིལ་གྱིས་མ་ནོན་པ། དབང་དུ་མ་འདུས་པ་དང་། དམ་ལ་མ་ཐོགས་པ་གཅིག་ཀྱང་མ་བྱུང་། མཁས་གྲུབ་ཤངས་སྟོན་གྱི་ལྗགས་རྩོམ་སྐོར་ལ། ཚད་མའི་བསྟན་བཅོས་སྒྱུ་མ་གསལ་བྱེད་ཆོས་དྲུག་དྲིལ་དོན་མ་འཆི་བ་བདུན་མ་ཐུགས་ལ་འཁྲུངས་པའི་ཉམས་དབྱངས་མཁར་དཔེ་མ་དང་། ཆོས་དབྱིངས་རྣམ་དག་མ་སོགས་ཕུལ་དུ་བྱུང་བ་མང་ཡང་། ད་ཕན་དེ་དག་གི་དཔེ་མ་མཇལ། དེ་ལྟར་བླ་མ་གོང་མའི་ལུང་བསྟན་འཁོར་གྱི་ཐོག་མ། ཁམས་གསུམ་ཆོས་ཀྱི་རྒྱལ་པོ། རྒྱས་སྲས་ཀུན་གྱི་ཐུ་བོ། ལྷར་བཅས་འགྲོ་བའི་གཙུག་རྒྱན། ས་གསུམ་ན་འགྲན་ཟླ་བྲལ་བའི་བདག་ཉིད། ཐར་འདོད་རྣམས་ཀྱི་སྐྱབས་དམ་པ་མཁས་གྲུབ་གཙང་མ་ཤངས་སྟོན་འདི་ཉིད་ཀྱི་ནང་སེམས་ཀྱི་མྱོང་རྟོགས་རི་རབ་ཀྱི་རྩེ་མོར་སོན་ཡང་རྣམ་པ་ཀུན་དུ་རང་རྒྱུད་ཐ་མལ་པའི་ཚུལ་བཟུང་ནས་ཡོན་ཏན་ཐམས་ཅད་སྦས་པའི་རྣལ་འབྱོར་མཛད། ལྷག་པར་དུ་རང་ལ་མངའ་བའི་རྒྱུ་ནོར་ཡོད་ཚད་དགེ་ཕྱོགས་སུ་བཏང་ནས། དངོས་པོ་གཅིག་ཀྱང་མ་ལེན་པའི་དམ་བཅའ་མཛད། ཁོང་དགུང་ལོ་བདུན་ཅུ་དོན་དྲུག་ལ་ཕེབས་པ་སྤྱི་ལོ་1309ལོར་བདེ་བར་གཤེགས་སྐབས་སུ་ཡང་རྒོད་པོ་བྲག་སྟེང་ནས་འཕུར་བ་བཞིན་བཞུགས་གདན་དང་ན་བཟའ་ཕྲུགས་གཅིག་མ་གཏོགས། ཡོ་བྱད་གཞན་གང་ཡང་བཟུང་མེད་པ་ནི་ངོ་མཚར་ཆེ་བ་ཡིན། མཁས་གྲུབ་ཤངས་སྟོན་སྐུ་འདས་རྗེས་མཁས་བཙུན་རྒྱལ་མཚན་འབུམ་གྱི་རྨི་ལམ་དུ་བྱོན་ནས་རྒྱལ་བ་རིགས་ལྔའི་དབུ་རྒྱན་ཞིག་བསྣམས་ཏེ། བརྒྱུད་པ་མི་ཉམས་པར་བྱ་བའི་དོན་དུ་དབང་ཞུ་མགོ་ལ་བསྐོན་ནས་ཤངས་ཆོས་ཀྱི་བདག་པོར་བསྐོས།
Khyungpo Tsültrim Gönpo
ཁྱུང་པོ་གཉིས་པ་ཚུལ་ཁྲིམས་མགོན་པོ།
དེ་ཡང་བླ་མ་མཆོད་པའི་ཆོ་ག་ཡིད་བཞིན་ནོར་བུ་ལས་བསམ་བཞིན་སྲིད་པར་སྐུ་སྤྲུལ་ནས། །འཁོར་བ་དོང་སྤྲུགས་སེམས་དཔའ་ཆེ། །ཁྱུང་པོ་གཉིས་པར་གྲགས་པ་ཡི། །ཚུལ་ཁྲིམས་མགོན་པོའི་ཞབས་ལ་འདུད་ཅེས་འཁོད་པ་བཞིན། ཤངས་པ་རིན་ཆེན་བདུན་བརྒྱུད་ཕྱི་མའི་དང་པོ། མཁས་གྲུབ་གཙང་མ་ཤངས་སྟོན་གྱི་སློབ་མ་ཁྱུང་པོ་ཚུལ་ཁྲིམས་མགོན་པོ་ནི། སྤྱི་ལོའི་དུས་རབས་བཅུ་གསུམ་པའི་སྨད་ཙམ་དུ། ཤངས་ཀྱི་སྐྱ་རར་ ཁྱུང་པོའི་རིགས་སུ་ཡབ་དཔོན་པོ་མགོན་ནེ་དང་ཡུམ་གྱིར་གྱི་ཕྱུག་མོ་ཀུན་ལྡན་ གཉིས་ཀྱི་སྲས་སུ་སྐུ་འཁྲུངས། གྲུབ་ཆེན་ཨོ་རྒྱན་པ་སྐྱ་རར་ཕེབས་པའི་དུས་ཤིག་སྐུ་ཉེ་རྣམས་ཀྱིས་སྐྱ་རའི་དཔོན་གྱིས་ཟེར་བ་ལ་མ་གསན་པར་ཁྱིམ་ལས་བྲོས་ཏེ་འཇག་ཆུང་དུ་ཕེབས། སྐབས་དེར་བླ་མ་ཤངས་སྟོན་ལ་མཁས་གྲུབ་ཁྱུང་པོ་མཇལ་བ་རྨིས་པས། ཁོང་གིས་ཁྱོད་རང་གི་ཆོས་ཚོ་ཚང་བར་གཏད་ཀྱི་གསུངས་ནས་དགེ་བསྙེན་བྱས། མིང་ཚུལ་ཁྲིམས་མགོན་པོར་བཏགས་ཞེས་འཁོད་པ་ལྟར། བླ་མ་ཤངས་སྟོན་དྲུང་དུ་དགེ་བསྙེན་གྱི་སྡོམ་པ་བཞེས་ཏེ་ཕྱག་རྒྱ་ཆེན་པོ་རྟོགས་མི་རྟོགས། ཆོས་དྲུག་རྡོ་རྗེའི་ཚིག་རྐང་། ཚིག་གསལ་ཐེམ་ཡིགའབྱམས་གཅོད་རྩ་འགྲེལ། སྒྱུ་ལུས་ཀྱི་སྦྱང་པ་རྣམ་གསུམ། འཆུག་མེད་བར་དོ་གསུམ་གྱི་གདམས་པ། འོད་གསལ་འཆར་སྒོ་ངོས་འཛིན། སྒྱུ་ལུས་དྲུག་ལྡན། ཁྱད་འཕགས་ཀྱི་གདམས་པ་བཅོ་ལྔ། གེགས་སེལ་རིན་ཆེན་སྒྲོན་མེ། མཁའ་སྤྱོད་དཀར་དམར་སོགས་ཤངས་ཆོས་ཀྱི་གདམས་ངག་མཐའ་དག་རྫོགས་པར་ཞུས། ཤངས་སུ་བྲེ་རྫིང་ཇོ་གདན་ཚོགས་པའི་མཁན་པོ་ཚུལ་ཁྲིམས་དཔལ་གྱི་མཁན་པོ་དང་། མཁས་བཙུན་དགེ་འདུན་རྒྱ་མཚོས་སློབ་དཔོན་མཛད་ནས་མཉམ་མེད་ཤཱཀྱའི་བསྟན་ལ་རབ་ཏུ་བྱུང༌། མཁས་གྲུབ་ཤངས་སྟོན་སྐུ་གཤེགས་རྗེས་ཐུགས་དགོངས་གར་རྫོགས་ཀྱི་གསོལ་འདེབས་ལ་སོགས་པ་ཆག་མེད་དུ་མཛད། དེ་ནས་འཇག་ཆུང་དུ་དབུ་སྔས་ཐོག་ཏུ་མི་འཇོག་པའི་དམ་བཅའ་མཛད་དེ་སྒྲུབ་པ་ལ་རྩེ་གཅིག་ཏུ་ཞུགས། དེའི་སྐབས་མཁས་གྲུབ་ཤངས་སྟོན་རྨི་ལམ་དུ་བྱོན་ནས། སྐུའི་བཀོད་པ་མཚན་དང་དཔེ་བྱད་ཀྱིས་བརྒྱན་པ། རུས་པ་དང་རིན་པོ་ཆེའི་རྒྱན་དུ་མ་བསྣམས་པ། རིན་པོ་ཆེའི་གདན་ཁྲི་ལ་སོགས་ངོ་མཚར་བའི་བཀོད་པ་དཔག་མེད་བསྟན་ནས། ཤངས་པ་བཀའ་བརྒྱུད་ཀྱི་ཆོས་བཀའ་འདིས་གཞན་ལ་ཕན་པའི་རྟེན་འབྲེལ་མང་པོ་མཛད། སྐབས་དེ་དུས་གེགས་ཀྱང་མང་པོ་བྱུང་བས། མཚུར་ཕུར་ཀརྨ་རང་བྱུང་རྡོ་རྗེ་དང་ཞལ་མཇལ་ཞིང་མོས་གུས་ཁྱད་པར་ཅན་སྐྱེས། གེགས་ཕལ་ཆེར་ལས་གྲོལ། མཚུར་ཕུ་དགོན་དུ་གཞུ་དགེ་འདུན་སྒང་པའི་མཁན་པོ་གཞོན་ནུ་བྱང་ཆུབ་དང་། ལས་སློབ་བྱང་ཆུབ་མགོན། གསང་སྟེ་སྟོན་པ་བསོད་རིན། དད་པའི་ཁ་སྐོང་དགེ་འདུན་བཅུའི་དབུས་སུ་བསྙེན་པར་རྫོགས། དེ་རྗེས་ནས་ཁལ་གཅིག་གིས་རྩམ་པ་བྱས་ནས་ཤངས་ཕུའི་ལྷ་ལུང་ དུ་བཞུགས་པའི་དུས་རྩོལ་བཅས་རྩོལ་མེད་ཀྱི་དགེ་སྦྱོར་བློ་ཐག་ཆོད་པ་བྱུང་། ཤངས་ཕུར་ལོ་ཉི་ཤུ་རྩ་ལྔ་བཞུགས་པ་དང་། དགུང་ལོ་བཅུར་ཕེབས་སྐབས་སུ་སྐྱ་ར་བའི་རྒན་རྒོན་གཉིས་ལ་བུ་གཉིས་ཡོད་པ་ཟླ་བ་གཉིས་སོང་བ་དང་ཤི་བས། རྒན་རྒོན་སྨྱོ་སྟེ་མི་ལ་སོགས་པ་གང་མཐོང་བ་ལ་བུ་བུ་ཟེར་ནས་འགྲོ་བ། ཆུ་ལ་མི་བྱིང་མ་འཁྱེར་བ་དང་གཡང་དུ་ལྷུང་ཡང་མི་གནོད་པར་སྡུག་བསྔལ་གྱིས་གཙེས་པས། ཡུལ་མི་གཉེན་ཚན་རྣམས་གྲོས་བྱས་ནས་ཁོང་གི་རྩར་བསྐྱལ་བ་ཟླ་བ་གཅིག་ནས་སྨྱོ་ནད་དང་སྡུག་བསྔལ་སངས། སྨྱོ་ནད་དང་ནད་གདོན་ཅན་ལ་ཁྲིད་བཏབ་པས་ཕན་པ་དུ་མ་བྱུང༌། དེ་རྗེས་ཀརྨ་སྐུ་ཕྲེང་བཞི་པ་རོལ་པའི་རྡོ་རྗེ་སྐུ་འཁྲུངས་པ་གསན་ནས་མཚུར་ཕུ་དགོན་དུ་མཇལ་བར་ཕེབས། ཀརྨ་རོལ་པའི་རྡོ་རྗེའི་དྲུང་ནས་དབང་བསྐུར་དང་ཆོས་མང་དུ་གསན། ཞ་ལུར་བུ་སྟོན་ཐམས་ཅད་མཁྱེན་པ་དང་ཆོས་འབྲེལ་ཞུས་ཤིང་། འཛད་དུ་རྒྱལ་སྲས་རྔུལ་ཆུ་ཐོགས་མེད་ལས་འཇུག་པ་སེམས་བསྐྱེད། བློ་སྦྱོང་དོན་བདུན་མ། སྙིང་པོ་དོན་གསུམ། རྟེན་འབྲེལ་སྙིང་པོ་ལ་སོགས་པ་མང་དུ་ཞུས། ཕྱག་རྫས་ཅི་བྱུང་ཕལ་ཆེར་སྒོམ་ཆེན་པ་ལ་ནོར་གྱི་དགོས་པ་མེད་གསུང་ཞིང་། སྒོམ་ཆེན་པ་ལ་ཁང་པ་བཟང་པོ་མི་དགོས། སྤང་སྤྱིལ་དང་། ས་ཕུག་དང་བྲག་ཕུག་ཏུ་འཆི་རྒྱུ་ཡིན་གསུངས་ནས་ཡབ་ཡུམ་གྱི་གཤེགས་རྫོང་དང༌། ཉམས་ཆུང་ལ་སྦྱིན་པ། མ་ཎི་དུང་ཕྱུར་སུམ་ཅུ་མཛད་པ། སྤོང་ཐག་བཟང་པོ་ལན་གསུམ། དེ་བཞིན་སངས་རྒྱས་ཀྱི་དུས་མཆོད་དང་། ཆོས་རྗེ་རང་བྱུང་རྡོ་རྗེ། འཇག་པ་ཡབ་སྲས། རྒྱལ་སྲས་རྔུལ་ཆུ་ཐོགས་མེད་རྣམས་ཀྱི་དུས་མཆོད་ལ་ཆགས་མེད་བཏང༌། བདེ་ཆེན་གཟིམ་ཁང་ལ་སོགས་ཀྱི་དབེན་གནས་རྣམས་སུ་གཤེགས་དགོངས་ཀྱང་། ཡོན་བདག་བཟང་པོ་དང་གྲྭ་རིས་བུ་སློབ་རྣམས་ཀྱིས་གསོལ་བ་བཏབ་པ་བཞིན་གཞན་དུ་མ་གཤེགས། སྐུ་འདའ་ཁར་ངའི་ཕུང་པོ་འདི་ཞག་བདུན་ཞོག་ལ་དེ་ནས་མེ་ལ་བསྲེག །ཡང་ན་བྱ་ལ་སྦྱིན་གསུངས་ནས། སྟག་ལོའི་ས་ག་ཟླ་བ་ལ་ངོ་མཚར་གྱི་ལྟས་དུ་མ་དང་བཅས་དགའ་ལྡན་གྱི་གནས་སུ་གཤེགས། སྤུར་མ་ཞུ་ན་བྱིན་རླབས་ཆེ་གསུངས་ནས་བདག་ཆེན་པས་ཟངས་ཀྱི་གའུའི་ནང་དུ་བཞུགས་སུ་བཅུག །སྤུར་ཁང་ཞལ་ཕྱེ་བའི་དུས་རིང་བསྲེལ་ལ་སོགས་པའི་རྟེན་མང་དུ་བྱོན། སྐུ་འབུམ་ལ་བསྐོར་བ་བྱས་པས་ཕྱུགས་ལུག་གི་ནད་ཆད་པ་ལ་སོགས་བྱུང་། རས་ཆེན་སངས་རྒྱས་སེང་གེ་ལ་སོགས་པའི་གདུལ་བྱ་མང་པོ་སྨིན་གྲོལ་ལ་བཀོད།
Sangyé Sengé
རས་ཆེན་སངས་རྒྱས་སེང་གེ
རྣལ་འབྱོར་གྱི་དབང་ཕྱུག་རས་ཆེན་སངས་རྒྱས་སེང་གེའམ་བྱ་བྲལ་རི་ཁྲོད་རས་ཆེན་ནི་མདོ་ཁམས་ཆོས་གླིང་དུ་ཡབ་ཨ་ཡུལ་(འགར་ཨ་སུ་ར་ཞེས་འཁོད་)དང༌། ཡུམ་ངག་ཁེགས་(འགར་ཁ་ཁེང་ཞེས་འཁོད་)གཉིས་ལ་སྲས་མིང་སྲིང་ལྔ་ཡོད་པའི་ཆེ་ཤོས་སུ་སྐུ་འཁྲུངས། ཡབ་མེས་རྣམས་ཐུགས་རྗེ་ཆེན་པོའི་ཆོས་སྐོར་གྱི་བརྒྱུད་པ་ཡིན་པས་རྣལ་འབྱོར་པའི་ཆ་ལུགས་འཛིན། དགུང་ལོ་བཞི་པ་ལ་རྨི་ལམ་ལེགས་པར་ཟིན། དགུ་ལོ་དྲུག་པ་ལ་སྐུ་མཆེད་གཉིས་ཆུ་ལེན་དུ་འགྲོ་དུས་འུར་རྡོ་ཞིག་རྙེད། འུར་རྡོ་དེ་སྐུ་མཆེད་གཞན་དེས་ཁོང་གི་ཞབས་ལ་འཕངས་པས། ཡུན་རིང་ན་སྟེ་རྐང་པ་ཡང་ཁྱོག །ཕ་མས་གཉེན་སྒྲིག་བྱ་རྒྱུའི་གྲབས་བྱས་ཡོད་ཀྱང་གཉེན་ཞིག །དགུང་ལོ་དགུ་པ་ལ་རབ་ཏུ་བྱུང་། མཚན་སངས་རྒྱས་སེང་གེར་གསོལ། དགུང་ལོ་བཅུ་གཉིས་ལ་སོན་སྐབས་བརྟག་གཉིས་ཀྱི་བཤད་ཁྲིད་དང་། བཅོ་བརྒྱད་པ་ལ་སྤྱོད་འཇུག་གི་བཤད་པ་མཛད། ཕར་ཕྱིན་ཡང་བློ་ལ་ཡོད་གསུངས། དགུང་ལོ་བཅུ་དགུར་ཕེབས་སྐབས་མཚུར་ཕུར་ལོ་གཅིག་བཞུགས་ཏེ་གཅོད་ཉམས་ལེན་གནང་། དེ་རྗེས་ས་སྐྱར་ཕེབས་ཏེ་མཁན་ཆེན་གནས་དྲུག་པ་ལས་རྣམ་འགྲེལ་གྱི་གཞུང་གསན་ཞིང་། ལོ་ཉི་ཤུ་རྩ་བརྒྱད་སོང་བ་དང་རྣམ་འགྲེལ་གྱི་གྲྭ་སྐོར་འཁོར། འབྲི་གུང་དུ་ཆོས་རྗེ་མཁས་གྲུབ་པའི་སློབ་མ། ཁོང་གི་གྲོགས་པོ་བླ་མ་བློ་བཟང་དང་འཕྲད་ནས་ནི་གུ་ཆོས་དྲུག་གི་ཆོས་བཀའ་གནང་བས་དགེ་སྦྱོར་བཟང་པོ་སྐྱེས་སྟབས། བླ་མ་བློ་བཟང་པས་ཁྱོད་ལ་དགེ་སྦྱོར་ཕུན་སུམ་ཚོགས་པོ་འོང་བར་འདུག་པས་ཤངས་སུ་ངའི་བླ་མ་ཚུལ་ཁྲིམས་མགོན་པོ་ཟེར་བའི་གྲུབ་ཐོབ་གཅིག་ཡོད་པ་དེའི་དྲུང་དུ་སོང་ལ་ཆོས་ཞུས་གསུངས། དེ་ལྟར་ཤངས་སུ་ཕེབས་ནས་ཁྱུང་པོ་ཚུལ་ཁྲིམས་མགོན་པོའི་དྲུང་དུ་ཐོག་མར་གཏུམ་མོ་ཉམས་བཞེས་གནང་བ་ཞག་བདུན་ནས་རས་ཐུབ་པ་བྱུང་། ད་ཐམས་ཅད་བཤད་པས་ཆོག་གསུངས་ཏེ། མཁས་གྲུབ་ཁྱུང་པོ་རྣལ་འབྱོར་ནས་བླ་མ་ཤངས་སྟོན་བར་གྱི་རྣམ་ཐར་དང་། སྒྱུ་མ་ལམ་རིམ་རྩ་འགྲེལ། བདེ་མཆོག་ལྷ་ལྔའི་དབང་། ཆོས་དྲུག་སོ་སོའི་བཀའ་དྲུག །མཁའ་སྤྱོད་དཀར་དམར་དབང་བཀལ། སེམས་འཆི་མེད་ཀྱི་བཀའ། འཆུག་མེད་ལམ་འཁྱེར་གསུམ་གྱི་བཀའ། ཆོས་དྲུག་གི་ཚིག་རྐང་ཚིག་གསལ་ཐེམ་ཡིག །ནི་གུའི་དམིགས་པ་བསྐོར་གསུམ། ཁྱད་འཕགས་གདམས་པ་བཅོ་ལྔ། འོད་གསལ་འཆར་སྒོ་ངོས་འཛིན། དུག་གསུམ་དག་བྱེད་བདུད་རྩི། སྒྱུ་ལུས་འཛིན་པ་རང་གྲོལ། ཞུས་ལན་རིན་ཆེན་སྒྲོན་མེ། ཉམས་མྱོང་མ་རིག་མུན་སེལ། རྟ་མགྲིན་གསང་སྒྲུབ། ཡེ་ཤེས་མགོན་པོའི་སྐོར་སོགས་ཤངས་པའི་ཆོས་སྐོར་མ་ལུས་བུམ་པ་གང་བྱོའི་ཚུལ་དུ་གསན་ནས་ཤངས་པའི་བརྒྱུད་འཛིན་དུ་གྱུར་པ་ཡང་། གསོལ་འདེབས་གསང་བའི་སྒྲ་དབྱངས་ལས་ཁྱད་པར་ཁྱུང་པོ་གསུམ་པའི་ཞབས་པདྨོ། །མི་ཕྱེད་གུས་པས་གཙུག་གིས་རྒྱན་དུ་བཀོད། མཉེས་པ་རྣམ་དགུའི་ཟབ་གསང་བཅུད་མནོས་ཏེ། །རྒྱལ་བའི་གདུང་འཛིན་གྱུར་ལ་གསོལ་བ་འདེབས་ཞེས་འཁོད་པ་ལྟར་རོ།
།བླ་ལ་གནས་དྲུག་པ་གཤེགས་རྗེས་ས་སྐྱར་ཕེབས་ནས་ཅུང་ཟད་བཞུགས་ཀྱང་། རང་གཞན་གྱི་ཟག་པ་འཕེལ་འགྲོ་བར་དགོངས་ཏེ་ཤངས་སུ་ཕེབས། གཏུམ་མོའི་ཡོན་ཏན་གྱིས་རྟ་ལས་མགྱོགས་པ་བྱུང༌། དེ་རྗེས་རིན་སྤུངས་སུ་ཕེབས། གཏུམ་མོའི་ཡོན་ཏན་ལ་མངའ་བརྙེས་པས་མི་རྣམས་ཐམས་ཅད་ངོ་མཚར་སྐྱེས་ཤིང་། སྔར་གནོད་པ་བྱེད་མཁན་རྣམས་ཀྱིས་ཀྱང་བཤགས་པ་ཕུལ། ཆོས་རྗེ་མཁས་གྲུབ་པས་སློབ་དཔོན་ཁམས་པ་ངའི་ཤུལ་འདི་ཁྱོད་ཀྱིས་བཟུང་དགོས་ཞེས་གསུངས་པ་དང་། གཞན་ཡང་བུ་སློབ་མང་པོས་ཞུ་བ་ཕུལ་བ་བཞིན་དབོན་གནས་བདེ་ཆེན་གྱི་བདག་པོ་དང་འཛིན་སྐྱོང་མཛད། དགུང་ལོ་དྲུག་ཅུ་རེ་དགུ་པ་སྟེ་ཕག་ལོའི་ཟླ་བ་བརྒྱད་པའི་ཚེས་ཉི་ཤུ་ཉིན་སྐུ་མྱ་ངན་ལས་འདས། གདུང་བཞུའི་དུས་མེ་ཏོག་གི་ཆར་སོགས་སྐུ་གདུང་རིང་བསྲེལ་གྱི་སྙིང་པོ་མཐའ་ཡས་བྱོན་པ་བསོད་ནམས་ཀྱི་ཞིང་མཆོག་ཏུ་གྱུར།
གཞན་ཡང་དགོན་གོང་གི་ལོ་རྒྱུས་མདོ་ཙམ་ཞེས་པ་ལས་དགོན་འདི་(དགོན་པ་གོང་)ལས་ཐོན་པའི་སྐྱེས་བུ་དམ་པ་མཚན་སྙན་ཆེ་བ་ཡང་སྨད་ཁང་པ་གྲགས་པ་བཟང་པོ་དང་། དུས་ཕྱིར་མི་དབང་ཕོ་ལྷའི་བླ་མ་ཤངས་པ་རས་ཆེན་ཟེར་བ་ཞིག་ཡོད། དེས་བཞེངས་པའི་སེར་ཟངས་ཀྱི་གན་ཇི་ར་ལྷ་ཁང་ཆེན་པོའི་ཡང་སྟེང་དུ་ཡོད་ཅེས་འཁོད་པར་གཞིགས་ན། དགོན་འདིའི་ལྷ་ཁང་ཆེན་མོའི་ཡང་སྟེང་དུ་གསེར་ཟངས་ཀྱི་གན་ཇི་ར་བཞེངས་གནང་མཁན་མི་དབང་ཕོ་ལྷའི་བླ་མ་ཤངས་པ་རས་ཆེན་ཟེར་བ་ཞིག་འདུག་པ་དེ་ནི། རས་ཆེན་སངས་རྒྱས་སེང་གེ་འདི་ཉིད་ལ་གོ་ན་མི་འགྲིག་སྟེ། རས་ཆེན་སངས་རྒྱས་སེང་གེའི་འཁྲུངས་ལོ་གསལ་བར་མ་ངེས་ཀྱང་། སྤྱིར་སྤྱི་ལོའི་དུས་རབས་བཅུ་བཞི་པའི་ནང་བྱོན་པ་དང༌། མི་དབང་ཕོ་ལྷ་ནི་དེའི་རྗེས་ཀྱི་སྤྱི་ལོའི་དུས་རབས་བཅུ་བདུན་པའི་ནང་བྱོན་པ་ཞིག་ཡིན་ལ། དེའི་བླ་མ་ཤངས་པ་རས་ཆེན་ཟེར་བ་དེ་ཡང་མི་དབང་ཕོ་ལྷ་ཉིད་དང་དུས་མཚུངས་པས་མི་ལོ་ཉིས་བརྒྱ་ལྷག་གི་ཧེ་བག་ཡོད་པས་སོ།།
Shangkarwa Rinchen Gyeltsen
ཤངས་དཀར་བ་རིན་ཆེན་རྒྱལ་མཚན།
ཤངས་དཀར་བ་རིན་ཆེན་རྒྱལ་མཚན་ནི་རབ་བྱུང་དྲུག་པའི་ཆུ་མོ་སྦྲུལ་གྱི་ལོ་སྟེ་སྤྱི་ལོ་1353ལོར་ཡབ་བདག་པོ་བཞི་ཐོགས་པ་མཁས་བཙུན་ཆེན་པོའི་ཡིག་མཁན་དབོན་ཡིག་བཟང་པོ་དཔལ་དང་། ཡུམ་ཇོ་སྲས་མ་དཔལ་ཆེན་གཉིས་ཀྱི་སྲས་སུ་ཤངས་ཁུལ་དུ་ཁྱུང་པོ་ཚུལ་ཁྲིམས་མགོན་གྱི་འཁྲུངས་ཡུལ་སྐྱ་ར་དང་ཐག་ཉེ་བར་སྐུ་འཁྲུངས། དགུང་ལོ་གསུམ་ལ་ཕེབས་སྐབས་ཡབ་ཡུམ་གཉིས་ཀ་འདས་པས། ཁུ་བོ་འདུལ་འཛིན་པ་རིན་ཆེན་འོད་མཛེས་དང་། ཤཱཀྱ་སེངྒེ་གཉིས་ཀྱི་དྲུང་དུ་ཡི་གེ་འབྲི་ཀློག་ལ་སོགས་པའི་སྦྱངས་པ་མཛད། དགུང་ལོ་བརྒྱད་ལ་དགེ་བསྙེན་གྱི་སྡོམ་པ་བཞེས། དགུང་ལོ་བཅུ་གཉིས་པ་ལ་དཔལ་ཟམ་འཚེར་ གྱི་གཙུག་ལག་ཁང་དུ་མཁན་པོ་མཛེས་པ་རྒྱལ་མཚན་དང་། སློབ་དཔོན་འདུལ་འཛིན་པ་ཤཱཀྱ་དཔལ་གཉིས་ལས་རབ་ཏུ་བྱུང་། མཚན་ཡང་རིན་ཆེན་རྒྱལ་མཚན་དུ་གསོལ། དགུང་ལོ་ཉི་ཤུ་པ་ལ་སྤང་ལོའི་གཙུག་ལག་ཁང་དུ་འདུལ་འཛིན་ཆེན་མོ་མཛེས་པ་རྒྱལ་མཚན། ལས་ཀྱི་སློབ་དཔོན་དངོས་གྲུབ་བཟང་པོ། གསང་སྟོན་སློབ་དཔོན་རིན་ཆེན་འོད་མཛེས་བཅས་དང་། དད་པའི་དགེ་འདུན་ རྒྱ་མཚོ་ལྟ་བུའི་དབུས་སུ་བསྙེན་པར་རྫོགས། དེ་རྗེས་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་དང་ལོ་ཆེན་བྱང་ཆུབ་རྩེ་མོ་ལ་དབུ་མ་ལུགས་དང༌། སེམས་ཙམ་ལུགས་ཀྱི་ཆོ་ག་སེམས་བསྐྱེད་རྣམས་ཞུས། ཁྱུང་པོ་རིན་པོ་ཆེ་(འདིར་ཁྱུང་པོ་གཉིས་པ་ཚུལ་ཁྲིམས་མགོན་པོ་ལ་གོ་)ལ་སོགས་པའི་བླ་མ་མང་པོས་རྒྱུད་སྡེ་བཞིའི་དབང་བསྐུར་བྱིན་རླབས་དང་བཅས་ལེགས་པར་གནང་། དཔལ་ལྡན་ས་སྐྱར་སློབ་དཔོན་གཞོན་ནུ་བཀྲ་ཤིས་དང་། མཁན་པོ་ཡོན་ཏན་རྒྱ་མཚོ། ཁུ་བོ་བླ་མ་ཤཱཀྱ་བཟང་པོ་བཅས་ལས་ཚད་མ་སྡེ་བདུན་ལ་སོགས་པའི་གཞུང་ལུགས་མཐའ་ཡས་པ་གསན། དུས་དེར་དབུས་ན་རྔོག་སྟོན་དབོན་པོ་དང་། གཙང་ན་ཤངས་པ་དཀར་པོ་གཉིས་ཆོས་སྐད་བཟང་བར་གྲགས་སོ།
།དེ་རྗེས་ཞ་ལུར་ཕེབས་ཏེ་ཆོས་རྗེ་བུ་སྟོན་རིན་ཆེན་དོན་གྲུབ་ཀྱི་དྲུང་ནས་བྱམས་པའི་ཆོས་ལྔ་དང་། བྱམས་པ་དང་འབྲེལ་བའི་ཆོས་སྡེ་ཉི་ཤུ། མདོ་སྲས་ཡུམ་རྣམས་ལ་གསན་སྦྱངས་རྒྱ་ཆེན་མཛད་ཅིང་། ཆོས་རྗེ་བུ་སྟོན་གྱིས་ཁོང་ལ་འཕགས་བོད་ཀྱི་མཁས་པ་རྣམས་ཀྱིས་མཛད་པའི་འགྲེལ་པ་ཀུན་ཡང་ཞིབ་ཏུ་གཟིགས་གསུངས་པ་དེ་བཞིན་དུ་བསྒྲུབས། དེ་དག་ལས་ཕར་ཕྱིན་ཡིག་ཆ་འདྲ་མིན་མང་དུ་མངའ་བ་རྣམས་ལ་འགལ་བ་ཡོད་པ་གཟིགས་ཏེ། ཕྱིས་སུ་སྣར་ཐང་དཔེ་གཟིགས་པས། ཨར་བྱང་ཆུབ་ཡེ་ཤེས་ཀྱིས་མཛད་པའི་ཊིཀ་མཇལ་བ་དང་། རང་གི་འདོད་པ་བཞིན་འདུག་པས་ཨར་གྱི་སྐྱེ་བ་ཡིན་སྙམ་པའི་བག་ཆགས་དང་། ཐུགས་དགོངས་སུའང་དེང་སང་ཕར་ཕྱིན་ཚུལ་བཞིན་དུ་ཤེས་པ་ཁོང་རང་ཉིད་དང་གཡག་ཕྲུག་སངས་རྒྱས་དཔལ་བཟང་གཉིས་ལས་མེད་སྙམ་པ་ཡང་བྱུང་། བུ་སྟོན་རིན་པོ་ཆེ་ལ་དབང་ཞུས་མ་ཐག་ཐུགས་ཡེ་ཤེས་འབེབས་པས་རྟོགས་པ་མཆོག་ཏུ་གྱུར་ལ། ཆོས་རྗེ་པས་རྒྱུད་འགྲེལ་གྱི་བཤད་པ་ཐེངས་གྲངས་ཉི་ཤུ་མཛད་པ་རྣམས་ཆ་ཚང་བར་ཞུས། སློབ་གཉེར་གྱི་སྐབས་བསོད་སྙོམས་སོགས་ཀྱང་མ་མཛད་པས་འཚོ་བ་ཤིན་ཏུ་ཕོངས། ལྷག་པར་སྣར་ཐང་གི་བྲང་ཁང་སྟོང་པ་ཞིག་ཏུ་དཔེ་མཚམས་གནང་དུས་རྩམ་པ་ཆད་པ་དང་། ནང་པར་ཕྱག་བདར་ཁྲོད་ནས་ཕྱིང་པ་སེར་པོ་ཞིག་རྙེད་པའི་ནང་གསེར་ཞོ་དོ་ཡོད་པ། ཞོ་གང་གིས་འཚོ་བ་བྱས། ཞོ་གང་གིས་སློབ་དཔོན་ལ་མཆོད་པ་བཟང་པོ་ཞིག་བཤམས། དེ་རྗེས་ཆུ་མིག་ཏུ་ལོ་ཆེན་བྱང་ཆུབ་རྩེ་མོ་ལས་གསང་འདུས་རིམ་ལྔའི་མྱོང་ཁྲིད་གསན་པས། སྒྱུ་ལུས་རྨི་ལམ་གྱི་ཉམས་ལ་ཡུལ་སྣང་ཐམས་ཅད་གཟིགས་ཤིང་གཏན་ལ་ཕེབས། ལོ་ཆེན་བྱང་ཆུབ་རྩེ་མོས་ང་རྒས་པས་ཆོས་ཀྱི་བདག་པོ་མཛོད་གསུངས་ནས་ཞུ་བ་ཕུལ་བས་དགེ་སྦྱོར་གང་འཕེལ་དུ་བཞུགས། དེའི་བར་ལ་ཁྱུང་པོ་ཚུལ་ཁྲིམས་མགོན་སྐུ་གཤེགས་རྐྱེན་སྔར་ཤངས་ཆོས་ཞུ་བའི་སྙན་གསན་ཕབ་ཡོད་པ་མ་གྲུབ་པས། ད་གདན་ས་ལ་ཞུ་སྙམ་ནས་ཆོས་རྗེ་རི་ཁྲོད་རས་ཆེན་པ་ལ་བདེ་ཆེན་སྟེང་དུ་ཤངས་པའི་ཆོས་སྐོར་མ་ལུས་པ་ཞུས། བླ་མས་ཁྱེད་ཀྱི་ཐུགས་དམ་གྱི་སྟོབས་འདི་འདྲ་མཁས་གྲུབ་ཤངས་སྟོན་ལ་ཡང་མ་བྱུང་གསུངས་ཤིང་ཤིན་ཏུ་མཉེས་ནས། ཤངས་ཆོས་ཀྱི་གདམས་ངག་རྒྱ་མཚོའི་བརྒྱུད་ཕྲེང་སྐྱོང་བའི་བདག་པོར་མངའ་གསོལ། ཕྱག་དྲིལ་དང་ཤངས་ཆོས་ཀྱི་ཕྱག་དཔེ་ལ་སོགས་པའི་བྱིན་རླབས་ཀྱི་རྟེན་མང་དུ་གནང་། རས་ཆེན་སངས་རྒྱས་སེང་གེ་སྐུ་གཤེགས་རྗེས་བདེ་ཆེན་པ་ཀུན་གྱིས་གསོལ་བ་བཏབ་པ་བཞིན་བདེ་ཆེན་སྟེང་དུ་བླ་མའི་གདན་ས་སྐྱོང་དགོས་བྱུང་། གདན་སར་ཕེབས་ནས་བླ་མཆོད་བར་མ་ཆད་པར་གནང་། དུས་མཆོད་དང་སྒྲུབ་མཆོད་བཙུགས། རྗེ་རི་ཁྲོད་པའི་སྐུ་འདྲ་ལ་མཆོད་པ་དཔག་མེད་མཛད། དེ་ལྟར་རྗེ་འདི་ཉིད་ཀྱིས་སྐུ་ཚེ་གང་པོར་དཀའ་སྤྱད་དང་དུ་བླངས་ནས་ཐོས་པའི་ཆོས་རྣམས་རྩེ་གཅིག་ཏུ་བསྒྲུབས་པས་ཏིང་ངེ་འཛིན་གྱི་ཡོན་ཏན་ལ་མངའ་དབང་འབྱོར། དེར་བརྟེན་སྐུ་ལུས་ལ་སྨེ་བ་དང་། ནག་བག །ཕྱི་ནང་གི་སྲིན་འབུ་མི་འབྱུང་ཞིང་། དབུ་སྐྲ་བསིལ་བའི་དུས་སུ་ཡང་སྦུ་བ་མ་གཏོགས་འཁྲུ་རྒྱུ་མེད་གསུངས། བདེན་ཆེན་དུ་བཞུགས་རིང་གྲྭ་རིས་བུ་སློབ་རྣམས་བཤད་ཁྲིད་ཀྱིས་ལེགས་པར་བསྐྱངས་པ་ལས་ཤངས་པའི་ཆོས་ཀྱི་སྒྲུབ་པ་གཟུག་རྒྱུའི་ཐུགས་དགོངས་ཡོངས་སུ་བསྒྲུབས་མེད་པ་སྟེ། ཁོང་གིས་ངས་གནས་འདིར་འོང་བའི་རྒྱུ་མཚན་ནི་གུའི་བསྒྲུབ་པ་ཞིག་ཚུག་ལ་རེ་ནས་འོང་པ་ཡིན། སྦྱིན་བདག་ཀྱང་སྟོབས་ཆུང་མི་རྣམས་གོ་ཆ་ཆུང་བས་བསམ་བློ་མ་རྫོགས་ཞེས་གསུངས་པ་ལྟར་ཡིན། དེ་ནས་སྟག་གི་ལོ་སྟེ་སྤྱི་ལོ 1435ལོར་དགུང་གྲངས་བརྒྱད་ཅུ་གྱ་གཉིས་ལ་ཕེབས་པའི་ཚེ་དབེན་གནས་བདེ་ཆེན་དུ་ངོ་མཚར་བའི་ལྟས་དུ་མ་དང་བཅས་སྤྲུལ་པའི་སྐུ་ཆོས་ཀྱི་དབྱིངས་སུ་ཐིམ། ཞག་ཉི་ཤུ་རྩ་ལྔའི་རིང་ཐུགས་དམ་ལ་བཞུགས། སྐུ་གདུང་ཞུགས་འབུལ་སྐབས་གཟིམ་ཁང་ལ་འཇའ་ཟུག །རིང་བསྲེལ་ལ་སོགས་པ་བསམ་གྱིས་མི་ཁྱབ་པ་བྱོན་ནོ།།
Sangyé Pelsang
མཉམ་མེད་སངས་རྒྱས་དཔལ་བཟང་།
ཁོང་ནི་གཙང་གི་སྟག་ཚང་ཕུའི་འཆིང་ཁུང་(འགར་ཚ་བུ་ཞེས་འཁོད་)དུ་འབེ་ཡི་རིགས་སུ་ཡབ་དཔོན་རིན་ཆེན་བཟང་དང་། ཡུམ་ཚེ་བུམ་དཔལ་ཞེས་བྱ་བ་གཉིས་ཀྱི་སྲས་སུ་སྤྱི་ལོ་1398ལོར་སྐུ་འཁྲུངས། ཡབ་ཡུམ་གཉིས་ལ་དང་ཐོག་བུ་གཅིག་པུ་ཡོད་པ་འདས་ནས། བདུན་ཚིགས་ཀྱི་སཱཙྪའི་རབ་གནས་ལ་རི་ཁྲོད་རས་ཆེན་པ་གདན་དྲངས། ཡུམ་ལ་ནང་མཆོད་གནང་ནས་བུ་ཁྱད་པར་ཅན་ཞིག་འོང་བའི་ལུང་བསྟན་མཛད། ལོ་ཆེན་བྱང་ཆུབ་རྩེ་མོས་ཀྱང་ཡུམ་ལ་དེང་སང་ཙམ་ན་སྤྲུལ་པའི་བུ་ཞིག་སྐྱེ་བས་བརྩོན་པས་སྲུངས་ལ་གསོས་ཤིག་གསུངས། ལྷུམས་སུ་ཞུགས་པའི་ཚེ་ཡུམ་གྱི་ལུས་བདེ་ཞིང་སེམས་དྭངས་བ། སྐུ་བལྟམས་པའི་དུས་ཀྱང་ཡུམ་ལ་གནོད་པ་མ་བྱུང་། དགུང་ལོ་ཆུང་ངུའི་དུས་ནས་དཀར་པོའི་ཆོས་བཞིར་རབ་ཏུ་མོས་པས་སེམས་ཅན་གྱི་སྲོག་གཅོད་པ་སོགས་ལ་སྙིང་རྗེ་ཚད་མེད་འཁྲུངས། དགུང་ལོ་བདུན་པ་ལ་ཀློག་བསླབས་པས་ཚེགས་མེད་དུ་མཁྱེན། དམ་པའི་ཆོས་ལ་ཤིན་ཏུ་མོས་ཀྱང་ཡབ་ཡུམ་དང་སྐུ་ཉེ་རྣམས་ཀྱིས་རབ་བྱུང་བྱེད་དུ་མ་སྟེར། ཡབ་ལ་ཐབས་ལམ་སྣ་ཚོགས་སྤྱད་དེ་ཞུ་བ་ཕུལ། དགུང་ལོ་བཅུ་པར་འབུལ་ཡིག་འབྲི་ཀློག་སོགས་མཛད། ལུག་ཚང་དགེ་སློང་བས་ཡབ་ཡུམ་གཉིས་ལ་དྲོ་དྲངས་ནས་བུ་འདི་ཆོས་ལ་མོས་པས་ཆོས་སྒོར་འཇུག་རྒྱུའི་རེ་འདུན་ཞུས་པ་དང་། བླ་མ་ཤངས་དཀར་བས་ཀྱང་རྗེ་འདི་པའི་ཡབ་ཡུམ་དང་བཅས་པ་ལ་ཆོས་འཁོར་སྟེང་ན་གྲུབ་ཐོབ་མངོན་ཤེས་སྨྲ་བ་ཞིག་འདུག་པ་དེ་ལ་ཆོས་འོང་མིན་དྲིས་ཞེས་གསུངས་པ་ལྟར། གྲུབ་ཐོབ་དེ་ལ་ཞུས་པས་རི་མོ་ཞིག་འབྲི་རུ་བཅུག །ཁོང་གིས་ཡིད་ལ་གྲ་སྒྲིག་ཅི་ཡང་མེད་པར་རྡོ་རྗེ་རྩེ་ལྔ་པ་ཞིག་བྲིས་པས། གྲུབ་ཐོབ་དེས་བུ་དེ་རྡོ་རྗེ་ཐེག་པ་ལ་བྱ་བ་བྱེད་པ་ཞིག་འོང་གསུངས། མཐར་དགུང་ལོ་བཅོ་ལྔ་པར་མཁན་ཆེན་རྒྱལ་བ་བཟང་པོས་མཁན་པོ་དང་། རྗེ་ཤངས་དཀར་བས་སློབ་དཔོན་མཛད་ནས་ཤཱཀྱའི་བསྟན་ལ་རབ་ཏུ་བྱུང་། དེ་ནས་རྗེ་ཤངས་དཀར་བའི་དྲུང་དུ་ཆོས་དང་རིག་གནས་ཅི་རིགས་གསན་སྦྱོང་དཔྱིས་ཕྱིན་པ་གནང་ཞིང་། དགུང་ལོ་བཅོ་བརྒྱད་པ་ལ་བཤད་གསར་མཛད། དེ་ནས་སློབ་གཉེར་འདོད་ཀྱང་ཐག་རིང་དུ་འགྲོ་རྒྱུ་བྱུང་མེད། དགུང་ལོ་ཉི་ཤུའི་རྗེས་སུ་རྗེ་ཤངས་དཀར་བས་མཁན་པོ་དང་། སློབ་དཔོན་ཀུན་བཟང་གིས་ལས་སློབ། བླ་མ་སངས་རྒྱས་རྡོ་རྗེས་གསང་སྟོན་མཛད་ནས་བསྙེན་རྫོགས་ཀྱི་སྡོམ་པ་བཞེས། རྗེ་ཤངས་དཀར་བའི་དྲུང་དུ་དབུ་སེམས་གཉིས་བསླབས། དེ་ནས་ལྷང་བུ་གུང་ཐད་དུ་རྗེ་ཤངས་དཀར་བར་ཆོས་ཁྲིད་ཞུ་བ་བརྒྱ་ཙམ་བྱུང་བ་ལ་ནི་གུ་དང་། ཁོང་ལ་དམིགས་པ་རེ་ལ་ཟླ་བ་ཕྱེད་ཕྱེད་བྱས་ནས་ཟླ་བ་དགུ་ལ་རྫོགས་པ་ཞིག་གནང་། ཉམས་སུ་ལེན་ཚུལ་ལ་བླ་མ་དགྱེས་ནས་བརྒྱུད་པ་འཛིན་པ་ཞིག་འོང་བའི་ལུང་བསྟན་མཛད། སླར་བདེ་ཆེན་དུ་ཕེབས་ནས་རྗེ་ཤངས་དཀར་བས་ནི་གུའི་ཆོས་སྐོར་ཆ་ལག་དང་བཅས་པ་ལ་ལོ་གཅིག་གི་བར་ཉམས་ཁྲིད་མཛད་པ་བཞིན་བསྒོམས་པས་བདེ་དྲོད་མྱུར་དུ་འབར། སྒྱུ་ལུས་ཀྱི་རྟོགས་པ་འཁྲུངས། རྨི་ལམ་སྤྲུལ་བསྒྱུར་དང་ཡུལ་སྣང་གཏན་ལ་ཕེབས་པ་དང་། འོད་གསལ་འཁོར་ཡུག་ཏུ་འཆར་བ་ལ་སོགས་པའི་ཉམས་རྟོགས་དཔག་མེད་འཁྲུངས། རྨི་ལམ་བཟུང་ནས་བདེ་ཆེན་ཞིང་གི་བཀོད་པ་ཡང་གཟིགས། བླ་མ་འདི་ཉིད་དགུང་ལོ་བཅོ་ལྔར་ཕེབས་སྐབས་ཐོག་མར་རྗེ་ཤངས་པ་དཀར་པོ་དང་མཇལ་བ་ནས། དགུང་ལོ་སོ་བདུན་གྱི་བར་ཏེ་བགྲང་བྱ་ཉི་ཤུ་རྩ་གཉིས་ཀྱི་རིང་བཀའ་ཐམས་ཅད་སྤྱི་བོས་བླངས་ཏེ་འབྲལ་མེད་དུ་བསྟེན། ཡུམ་སྲས་གཉིས་ལ་མཆོད་པ་ཟླ་མེད་པ་དང་། ཡབ་གཤེགས་པ་སོགས་ལའང་རྔན་ཆེན་མཛད། ཨ་ཁུས་སྤྱད་དངོས་ཞོ་བརྒྱ་ཙམ་འཕྲོག་པ་ལ་བླ་མའི་གསུང་བཞིན་ལབ་ཁ་ཚིག་གཅིག་ཀྱང་མ་གནང་ལ། དངོས་པོའི་བདག་འཛིན་རྟིང་ནས་ཆོད།
ལྷ་ཕུ་ལྐུགས་ལུང་དུ་ཟླ་བ་ལྔ་ཙམ་གྱི་རིང་རྗེ་ཤངས་དཀར་བ་ལས་ནི་གུ་ཆོས་དྲུག་དང་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པའི་ཆོས་སྐོར་ལ་སོགས་རྫོགས་པར་གསན་ཞིང་། ཤངས་ཆོས་གདམས་པའི་བརྒྱུད་འཛིན་དུ་དབང་བསྐུར། རྗེ་ཤངས་དཀར་བ་སྐུ་བགྲེས་སྐབས་སུ་སྤྱན་ཡང་མི་གསལ་བས་ཕྱག་ཕྱི་དང་ཕྱག་དཔེའི་ཉར་ཚགས་དང་། སྤྱན་ཚབ་ཀྱང་གནང་དགོས་བྱུང༌། རྗེ་ཤངས་དཀར་བ་སྐུ་གཤེགས་ཁར་ཡང་ཁོང་ལ་སྐྱེ་སྲིད་ཀུན་ཏུ་མི་འབྲལ་བའི་དཔོན་སློབ་གནང་རྒྱུའི་དམ་བཅའ་མཛད། རྗེ་ཤངས་དཀར་བ་སྐུ་གཤེགས་རྗེས་ཞག་ཞེ་དགུའི་བར་གསོལ་འདེབས་རྒྱུན་མ་རྣམས་ལེགས་པར་མཛད་ཅིང་། སྐུ་འདྲ་གཟིམ་མལ་མ་ཞིག་ཀྱང་བཞེངས། དེ་རྗེས་མནལ་ལྟས་བཞིན་ལྷ་ཕུ་ལྐུགས་ལུང་དུ་ཕེབས་ནས་སྔར་གྱི་དགོན་གནས་དང་སྐུ་རྟེན་རྣམས་ལ་ཉམས་གསོ་དང་། དབུ་རྩེའི་རྫ་ཐོག་སོགས་ལེགས་པར་བཞེངས། རྨོག་ལྕོག་པ་རིན་ཆེན་བརྩོན་འགྲུས་ཀྱི་དུས་མཆོད་ལ་དམིགས་པའི་སྒྲུབ་མཆོད་ཆེན་པོ་ཞིག་བཙུགས་པ་སོགས་ཀྱི་མཛད་པ་རྒྱ་ཆེར་བསྐྱངས། ཚེས་ཉི་ཤུའི་ཉིན་གྲུབ་ཆེན་མ་རྣམ་གླིང་ནས་ཕེབས་ཏེ་གསོལ་བ་བཏབ་པས་ཀྱང་། ད་ལན་འགྲོ་གསུངས། མཐར་བརྒྱུད་འདེབས་བྱིན་རླབས་སྤྲིན་ཕུང་དུ་ལྷ་མི་འཁྲུག་མགོན་པོའི་ཞིང་ཁམས་སུ། མཉམ་མེད་སངས་རྒྱས་དཔལ་བཟང་ལ་གསོལ་བ་འདེབས་ཞེས་འཁོད་པ་ལྟར། དགུང་ལོ་དྲུག་ཅུ་རེ་བརྒྱད་ལ་ཕེབས་པ་སྟེ་སྤྱི་ལོ་1465ལོའི་ཐོ་རངས་ཤིག་ལ་ཤར་ཕྱོགས་མངོན་པར་དགའ་བའི་ཞིང་དུ་བདེ་བར་གཤེགས། དེ་ནས་ཞག་ལྔ་སོང་བའི་ཐོ་རངས་ཁམས་དྭངས་མ་བྱང་སེམས་མང་པོ་གྱེན་དུ་ལུད་ནས་ཐུགས་དམ་རྡོ་རྗེའི་དབྱིངས་ལས་གྲོལ་བའི་ཚེ་དྲི་བཟང་དང༌། འོད་ཟེར་གྱི་སྣང་བས་གཟིམ་ཁང་ཁེངས་པར་བྱུང༌། གདུང་སྦྱོར་བའི་ཚེ་ཡང་འཇའ་ཚོན་གྱི་དྲྭ་བ་དང་། སྐུ་གདུང་ལ་རིང་བསྲེལ། ཨ་ཡིག་འབུར་དུ་ཐོན་པ་ལ་སོགས་པའི་རྟེན་མང་དུ་བྱོན་ནོ།།
Namkha Gyeltsen
གྲུབ་ཆེན་ནམ་མཁའ་རྒྱལ་མཚན།
དེ་ཡང་གསོལ་འདེབས་ཟག་མེད་སྒྲ་དབྱངས་ལས་མཁས་གྲུབ་སྐྱེས་མཆོག་དུ་མ་བྱུང་བའི་ཡུལ། །སངས་རྒྱས་གཉིས་པ་པདྨས་བྱིན་བརླབས་པའི། །གནས་མཆོག་ཁྱད་འཕགས་ཤངས་ཕུའི་དགོན་གསར་དུ། །བསམ་བཞིན་སྲིད་པ་བཟུང་ལ་གསོལ་བ་འདེབས། །རྣམ་དག་རྗེའུའི་རིགས་དང་ཞང་གི་རུས། གཟིགས་པས་དགོངས་པ་ལྷུམས་སུ་ཞུགས་པའི་ཚེ་ཞེས་འཁོད་པ་ལྟར་རྟོགས་ནམ་མཁའ་རྒྱལ་མཚན་ནི་སངས་རྒྱས་གཉིས་པ་སློབ་དཔོན་པདྨ་འབྱུང་གནས་ཀྱིས་བྱིན་གྱིས་བརླབས་པའི་གནས་ཆེན་སྲིན་འདུལ་ཡོད་སའི་ཤངས་ཕུའི་དགོན་གསར་ དུ་རྗེའུའི་རིགས་དང་ཞང་གི་རུས་སུ་ཡབ་རིན་ཆེན་བསོད་ནམས་དང་། ཡུམ་བསོད་ནམས་སྒྲོལ་མ་གཉིས་ཀྱི་སྲས་སུ་ཤིང་མོ་བྱའི་ལོ་ལ་སྐུ་འཁྲུངས། སྐུ་ན་ཆུང་ངུའི་དུས་ནས་ཡིག་དྲུག་ཞལ་འདོན། བྱམས་སྙིང་རྗེ་རང་ཤུགས་ཀྱིས་སྐྱེ་བ། སྒོ་གསུམ་བག་དང་ལྡན་པ། ཉེས་པའི་དྲི་མས་མ་གོས་པ། གནས་ལུགས་ཀྱི་དོན་ཞི་ལྷག་གི་ཏིང་འཛིན་འཁྲུངས་པ་སོགས་ཀྱི་ཡོན་ཏན་མཐའ་ཡས་མངའ། དགུང་ལོ་བརྒྱད་པར་བླ་མ་རིན་ཆེན་ཚུལ་ཁྲིམས་པའི་དྲུང་ལས་རབ་ཏུ་བྱུང་། དགུང་ལོ་བཅུ་གཉིས་པར་བརྟག་གཉིས་ལ་བཤད་པ་གནང་། དགུང་ལོ་བཅོ་བརྒྱད་ལ་གནུབས་ཆོས་ལུང་ དུ་འཁོན་རིན་ཆེན་རྒྱལ་དབང་གྲགས་པ་དང་། དད་པའི་དགེ་སློང་ཁ་སྐོང་དང་བཅས་པའི་དབུས་སུ་བསྙེན་པར་རྫོགས། མཚན་ནམ་མཁའ་རྒྱལ་མཚན་དུ་གསོལ། དྲན་ཤེས་བག་ཡོད་ཀྱི་ངང་ནས་མདོ་སྔགས་ཀུན་ལ་ཐོས་བསམ་སྒོམ་སྒྲུབ་ནན་ཏན་མཛད་པས་ཉམས་རྟོགས་ཆེན་པོ་འབར་ཞིང་མཉམ་མེད་སངས་རྒྱས་དཔལ་བཟང་དང་། བུ་སྟོན་ཐམས་ཅད་མཁྱེན་པ། སློབ་དཔོན་ནགས་ཀྱི་རིན་ཆེན། ལོ་ཙཱ་བ་ནམ་མཁའ་གྲགས། སྟག་རྩེ་རྒྱལ་མཚན་དཔལ་བཟང་། བོ་དོང་ཕྱོགས་ལས་རྣམ་རྒྱལ་སོགས་མཁས་གྲུབ་དུ་མའི་ཞབས་རྡུལ་སྤྱི་བོས་བླངས་ཏེ། ཐེག་པ་གསུམ་དང་རྒྱུད་སྡེའི་དོན་མཐའ་དག་ལ་མཁས་པར་གྱུར་ནས། འཆད་རྩོད་རྩོམ་པའི་གོ་འཕང་མཐོན་པོར་གཤེགས། གྲུབ་བརྙེས་སངས་རྒྱས་མཚན་ཅན་གྱི་ཐུགས་བཅུད་རྫོགས་པར་བཞེས་ནས་དབེན་པའི་གནས་སུ་བསྒོམས་པས་བདེ་དྲོད་རང་འབར་དང་། བྱང་སེམས་འཛག་མེད་དུ་བྱུང་བ། སྣང་བ་བདེན་མེད་དུ་རྟོགས་པ། རྨི་ལམ་གྱི་རྩལ་རྫོགས་ནས་ཞིང་ཁམས་དུ་མར་ཕེབས་པ་སོགས་མངོན་ཤེས་ཀྱི་ཡོན་ཏན་དང་གྲུབ་པའི་རྩལ་ལ་ཡོངས་སུ་མངའ་བརྙེས། དུས་འཁོར་དང་། རྡོ་རྗེ་ཕག་མོ་སོགས་ལྷག་པའི་ལྷ་ཡི་ཞལ་གཟིགས་ལ། མཁའ་འགྲོ་ཆོས་སྐྱོང་སྤྲིན་བཞིན་དུ་བསྡུ་བར་ནུས་ཤིང་། ཞལ་ཆབ་དང་ཁྲུས་ཆུའི་ཟེགས་མས་ཀྱང་ནད་གདོན་ཞི་བར་ནུས། ཆོས་རྗེ་སངས་རྒྱས་དཔལ་བཟང་གིས་ལྐུགས་ལུང་ཞིག་གསོས་གནང་བ་སོགས་ཀྱི་ཕྱག་གཡོག་ཞབས་ཏོག་འབད་པས་བསྒྲུབས་ཏེ། གནུབས་ཆོས་ལུང་། བྱང་ཆེན། ཁུ་ལུང་། བློ་མའི་ས་སྨྱུག་སོགས་སུ་སྒྲུབ་པ་དང་གཞན་དོན་ཟུང་དུ་འབྲེལ་ནས་རིམ་གཉིས་ཀྱི་རྩ་ལ་རྫོགས་ལ་ལུང་རྟོགས་ཡོན་ཏན་དང་ལྡན་པའི་བུ་སློབ་དུ་མ་སྐྱོང་གནང་མཛད། དུས་རྟག་ཏུ་ངེས་མེད་བྱ་བཏང་ཁོ་ནར་ཐུགས་རྩེ་གཏད་ཀྱང་། སྟག་ལྷུན་འགྲུབ་ལ་རེ་ཞིག་བཞུགས་དགོས་པ་བྱུང་ནས་ཆོས་འཁོར་རྒྱ་ཆེར་བསྐོར།
དགུང་ལོ་རེ་གསུམ་ལ་ཕེབས་པ་མེ་མོ་ཕག་གི་ལོར་གླང་རིའི་གདན་ས་མཛད་ཅིང་། གཙུག་ལག་ཁང་གི་རྟེན་དང་བརྟེན་པ་སོགས་རྒྱས་པར་བཞེངས། དེ་རྗེས་གདན་ས་བ་བསྐོས་ནས་རི་ཁྲོད་རབ་བརྟན་ཆོས་ལུང་དུ་བཞུགས། ཆོས་རྒྱལ་རབ་བརྟན་ཀུན་བཟང་སོགས་མི་ཆེན་དུ་མས་ཞབས་ལ་བསྟེན་པ་སོགས་ཀྱི་སྙན་པའི་གྲགས་པས་ཁྱབ། མཐར་སྐུ་སྙུང་བའི་ཚུལ་མེད་པར་སྐུ་ཤེད་ཅུང་ཟད་བྲི་ཞིང་ཞན་དུ་ཕེབས་པ་ན། ཡར་ངོའི་ཚེས་བཅུར་ཆོས་སྐུ་དེ་བཞིན་ཉིད་ཀྱི་འཕོ་བ་བྱེད་གསུངས་ནོས་ངོ་མཚར་གྱི་ལྟས་དུ་མ་དང་བཅས་ཤར་ཕྱོགས་མངོན་དགའི་ཞིང་དུ་ཞི་བར་གཤེགས།
Lekpa Gyeltsen
རྒྱ་སྒོམ་ལེགས་པ་རྒྱལ་མཚན།
རྒྱ་སྒོམ་ལེགས་པ་རྒྱལ་མཚན་ནི་ཤངས་ཁུལ་གྱི་མཁས་གྲུབ་ཁྱུང་པོའི་གནས་དང་ཉེ་བའི་ལ་རྒྱབ་ཏུ། ལྡོང་གི་རིགས་སུ་ཡབ་དབོན་པོ་བཀྲ་ཤིས་མགོན། ཡུམ་བདེ་ལེགས་བུ་འདྲེན་གཉིས་ཀྱི་སྲས་སུ་འབྲུག་གི་ལོ་ལ་སྐུ་བལྟམས། མཚན་ལ་ཛམ་བྷ་ལ་ཞེས་གསོལ། སྐུ་ན་ཆུང་ངུའི་དུས་ནས་སྔོན་གྱི་ལས་འཕྲོ་སད་པའི་དབང་གིས་དཀར་པོའི་ལས་ལ་རབ་ཏུ་མོས་ཤིང་། འབྲི་ཀློག་སྨན་དཔྱད་སོགས་ཀྱང་དཀའ་ཚེགས་མེད་པར་མཁྱེན། ཁུ་བོའི་དྲུང་དུ་བཀའ་ཆོས་མང་དུ་གསན། གྲུབ་ཆེན་ནམ་མཁའ་རྒྱལ་མཚན་ལས་རབ་ཏུ་བྱུང་སྟེ། མཚན་ལེགས་པ་རྒྱལ་མཚན་དུ་གསོལ། དགུང་ལོ་ཉི་ཤུ་ཙམ་ལ་ཆོས་ལུང་སངས་རྒྱས་དཔལ་བཟང་གིས་མཁན་པོ་མཛད་དེ། དད་པའི་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས། བླ་མ་མཁས་གྲུབ་དུ་མའི་ཞབས་རྡུལ་སྤྱི་བོས་མཆོད་དེ་མདོ་སྔགས་ཀྱི་བསྟན་པ་སྤྱི་དང༌། ལྷག་པར་དུ་གྲུབ་ཆེན་ནམ་མཁའ་རྒྱལ་མཚན་ལས་དཔལ་ལྡན་ཤངས་པའི་ཆོས་སྐོར་མ་ལུས་རྫོགས་པར་གསན། ཐོག་མར་རྒྱུད་སྡེ་ལྔའི་དབང་གི་གསང་མཚན་མི་བསྐྱོད་རྡོ་རྗེ་ཞེས་གསོལ། ཡང་བ་བོང་བ་རྡོ་རྗེ་རྒྱལ་མཚན་ལ་ཤངས་ཆོས་ཡོངས་རྫོགས། ནི་གུ་བསམ་སྡིངས་ལུགས་ཆ་ཚང་། ཕག་མོ་གཞུང་དྲུག་རྣམས་ཞུས། ཆོས་རྗེ་སེང་གེ་བཟང་པོ་ལས་བཀའ་གདམས་པའི་ཆོས་སྐོར་དུ་མ་གསན། ཐོས་བསམ་མཛད་པའི་གདམས་པ་རྣམས་ཉམས་ལེན་དཔྱིས་ཕྱིན་པ་གནང་སྟེ་གྲུབ་པའི་གོ་འཕང་མཐོན་པོར་གཤེགས། ཡེ་ཤེས་མགོན་པོས་རྗེས་སུ་བཟུང་། དེ་ལྟར་སྐུ་ལུས་སྤྲུལ་བསྒྱུར་སོགས་ཀྱི་ཡོན་ཏན་ཀུན་ལ་མངའ་བརྙེས་ཀྱང་། རྣམ་པ་ཐམས་ཅད་དུ་ཐ་མལ་པའི་ཚུལ་བཟུང་ནས་སྦས་པའི་རྣལ་འབྱོར་གྱི་བརྟུལ་ཞུགས་འཛིན། ཕྱིས་རི་ཁྲོད་རབ་བརྟན་ཆོས་ལུང་གི་གདན་ས་མཛད།
དེ་ཡང་ནི་གུའི་རྒྱབ་ཆོས་གླུའི་ཕྲེང་བ་ལས་མ་གི་ཤེད་ཤངས་ཕུའི་རྨོག་ལྕོག་གི །ཕོ་བྲང་དེ་སྤང་པོའི་སྤྱིལ་བུ་ན། །མི་གཟུགས་ལ་ཞུ་བདེའི་འོད་འབར་བ། རྒྱ་སྒོམ་རྡོ་རྗེ་འཆང་ཆེན་དེ་ན་བཞུགས་ཞེས་འཁོད་པ་ལྟར་རིན་ཆེན་བདུན་བརྒྱུད་ཕྱི་མའི་བདུན་པ་རྒྱ་སྒོམ་ལེགས་པ་རྒྱལ་མཚན་ཉིད་ལྷ་ཕུའི་རྨོག་ལྕོག་གི་སྤང་པོའི་སྤྱིལ་བུ་སོགས་ཤངས་ཁུལ་གྱི་རི་ཁྲོད་ངེས་མེད་དུ་སྒྲུབ་པ་མཛད་མྱོང་ཞིང་། སྐུ་ལུས་ལ་ཞུ་བདེའི་འོད་ཆེན་འབར་བ་སོགས་རང་རྒྱུད་ཡོངས་སུ་སྨིན་ལ།
གཞན་རྒྱུད་ལེགས་པར་གདུལ་ཕྱིར་སྐུ་ཚེ་གང་པོར་རྗེ་བཙུན་ཀུན་དགའ་གྲོལ་མཆོག་སོགས་སྐལ་ལྡན་གྱི་གདུལ་བྱ་མང་པོ་སྨིན་གྲོལ་གྱི་ལམ་བཟང་ལ་བཀོད་མཐར། ཞིང་མེ་ཏོག་པདྨའི་ཟེའུ་འབྲུ་ལ། །རྒྱ་སྒོམ་ལེགས་པ་རྒྱལ་མཚན་ལ་གསོལ་བ་འདེབས་ཞེས་འཁོད་པ་བཞིན་དག་ཞིང་འདི་ཉིད་དུ་དགོངས་པ་གཞན་དོན་དུ་གཤེགས། གདུང་རུས་ལ་རིང་བསྲེལ་བྱོན་པ་འགའ་ཞིག་ལྷ་རྩེའི་ཆོས་ལུང་བྱང་རྩེ་ ན་བཞུགས་པ་དང་། འགའ་ཤས་མྱང་ཆོས་འབྱུང་གི་མཇུག་ཏུ་བཀྲ་ཤིས་ལྷུན་པོ་དགོན་གྱི་ནང་རྟེན་དང་བཅས་པ་གསུངས་པའི་སྐབས་སུ་བདེ་མཆོག་མཁའ་འགྲོ་རྒྱ་མཚོའི་བརྒྱུད་(རྒྱུད་)ལེའུ་བཅོ་ལྔ་པའི་སྐབས་གསུངས་པའི་བདེ་མཆོག་མཁའ་འགྲོ་རྒྱ་མཚོ་ཞལ་ཕྱག་ཡོངས་རྫོགས་ངམ་རིང་དུ་བཞེངས། ཐུགས་ཀར་རྒྱ་སྒོམ་ལེགས་པ་རྒྱལ་མཚན་གྱི་རིང་བསྲེལ་བཞུགས་པ་འདིའི་རབ་གནས་ཀྱི་ཉིན་ནས་ངམ་རིང་ཚོང་འདུས་ཡོང་བའི་ཐོག་མ་བྱུང་ཞེས་འཁོད་པ་ལྟར་ན་བཀྲ་ཤིས་ལྷུན་པོ་དགོན་གྱི་བདེ་མཆོག་མཁའ་འགྲོ་རྒྱ་མཚོའི་སྐུ་འདིའི་ཐུགས་ཀར་རྒྱ་སྒོམ་ཆེན་པོའི་རིང་བསྲེལ་བཞུགས། འོན་ཀྱང་དེང་སྐུ་འདྲ་འདི་བཞུགས་ཡོད་མེད་དང་། ཡོད་ན་དགོན་གནས་དང་ལྷ་ཁང་གང་དུ་ཡོད་མིན་རྩད་མ་ཆོད།
དེ་ལྟར་རིན་ཆེན་བདུན་བརྒྱུད་ཕྱི་མའི་བདུན་པ་རྒྱ་སྒོམ་ལེགས་པ་རྒྱལ་མཚན་འདི་ཉིད་ཀྱིས། ནི་གུའི་ཆོས་སྐོར་འཇག་བསམ་གཉིས་ཀྱི་འཇག་ལུགས་ལ་གདན་ས་བརྒྱུད་པ་དང་། སློབ་མ་བརྒྱུད་པ་གཉིས་བྱུང་བ་ལས་གདན་ས་བརྒྱུད་པ་མཁས་བཙུན་རྒྱལ་མཚན་འབུམ་ནས། ཆོས་རྗེ་བྱམས་པ་དཔལ། བློ་གྲོས་ཀུན་དགའ་དཔལ་སོགས་བར་མ་ཆད་པ་རྣམས། སློབ་བརྒྱུད་ལ་འཇག་པ་གོང་འོག་གཉིས་ལས། གོང་མ་མུས་ཆེན་རྒྱལ་མཚན་དཔལ་བཟང་། གྲུབ་ཆེན་རྡོ་རྗེ་གཞོན་ནུ། གྲུབ་ཆེན་ནམ་མཁའི་རྡོ་རྗེ། རོང་སྟོན་ཤེས་བྱ་ཀུན་རིག་ནས་བརྒྱུད་པ་འཁྲུལ་ཞིག་ཆོས་འབྱོར་ལེགས་པས་གསན། འཇག་པ་འོག་མ་ཁྱུང་པོ་གཉིས་པ་ཚུལ་ཁྲིམས་མགོན་ནས་ཇོ་ནང་གི་ཕྱོགས་ལ་བརྒྱུད་པ། གནས་རྙིང་པ་ཨ་ཡི་སེང་གེ་ནས་བརྒྱུད་པ་ནི། གསེར་གླིང་པ་བཀྲ་ཤིས་དཔལ། ཁམས་པ་རྡོ་རྗེ་དཔལ། ལྐུགས་ལུང་པ་ཆོས་གྲགས་ལས་མཉམ་མེད་སངས་རྒྱས་དཔལ་བཟང་གིས་གསན་པ། སྤྲུལ་སྐུ་རིན་ཆེན་བློ་གྲོས་ལ་རྨོག་ལྕོག་པ་ཕྱི་མ་ཀུན་དགའ་འོད། དགེ་འདུན་བློ་བཟང་པ། ཤེར་སྒོམ་སངས་རྒྱས་དར། དེ་ལ་སངས་རྒྱས་དཔལ་གྱིས་གསན། ཡང་མཁས་བཙུན་གཞོན་ནུ་གྲུབ། ཀུན་མཁྱེན་རིག་པའི་རྡོ་རྗེ། བྱ་བཏང་ཆུའི་རྣལ་འབྱོར། གཞུ་སྟོན་ཚུལ་ཁྲིམས་མགོན་པོ། རྩ་གསུམ་ཆོས་གྲགས་པ་ལ་སངས་རྒྱས་དཔལ་གྱིས་གསན་པ་རྣམས། ཆོས་སྐུ་རིན་ཆེན་ནས་བརྒྱུད་པ། ཀུན་བཟང་ངག་དབང་བློ་གྲོས་པའི་སྤྱན་སྔར་ཞུས། མཁས་གྲུབ་སངས་རྒྱས་རྡོ་རྗེ། བྲག་ནག་པ་ནམ་མཁའ་རྒྱལ་ནས་བརྒྱུད་པ། བྲག་ནག་པ་སྟོབས་ལྡན་རྒྱལ་མཚན་ལ་ཞུས། ཤངས་ཟུར་ཁང་པ་བསོད་ནམས་བཟང་པོ། བ་བོང་པ་དཀོན་མཆོག་ལེགས་པ་ནས་བརྒྱུད་པ། བ་བོང་པ་རྡོ་རྗེ་རྒྱལ་མཚན་ལ་སོགས་ཏེ། ནི་གུ་ལུགས་སྲོལ་བཅུ་གཉིས་གཅིག་ཏུ་སྒྲིལ་བའི་གདམས་པའི་མངའ་བདག་ཏུ་གྱུར་ཏོ།།

II.2.2 - The close transmission lineage
གཉིས་པ། ཉེ་བརྒྱུད།
ཉེ་བརྒྱུད་ནི། ཀུན་མཁྱེན་དོལ་བུ་སངས་རྒྱས་ཀྱི་སྐུའི་སྐྱེ་བ་ཕྱི་མ་ཀམ་པ་བརྩོན་འགྲུས་བཟང་པོས། རིང་བརྒྱུད་མཁས་གྲུབ་ཤངས་སྟོན་གྱི་སློབ་མ་མུས་ཆེན་རྒྱལ་མཚན་དཔལ་བཟང་ནས་བརྒྱུད་པའི་རི་གོང་སྟོད་བརྒྱུད་དུ་གྲགས་པའི་སྙན་བརྒྱུད་རྣམས་བྱང་སེམས་སྦྱིན་པ་བཟང་པོ་ལས་གསན་ནས་ཐུགས་ཉམས་སུ་བཞེས། ཡང་གསོལ་འདེབས་གྲུབ་པའི་སྒྲ་དབྱངས་ལས་ཡེ་ཤེས་མཁའ་འགྲོ་ནི་གུ་ལན་གསུམ་དུ། །བྱོན་ནས་དབང་དང་གདམས་ངག་རྫོགས་པར་གནང་། །རྫུ་འཕྲུལ་མངོན་ཤེས་བསམ་མི་ཁྱབ་པར་འཁྲུངས། །གདམས་ངག་ཡེ་གེར་བཀོད་ལ་གསོལ་བ་འདེབས་ ཞེས་གསུངས་པ་བཞིན་གྲུབ་ཆེན་ཐང་སྟོང་རྒྱལ་པོ་ཉིད་ཡེ་ཤེས་མཁའ་འགྲོ་དངོས་ཀྱིས་རྗེས་སུ་བཟུང་སྟེ་གདམས་ངག་སོགས་ཡི་གེར་བཀོད་ནས་ཉེ་བརྒྱུད་རིམ་པ་གསུམ་བྱུང་བ་སྟེ། དང་པོ་གཙང་སྟོད་རི་བོ་ཆེར་ནི་གུ་མ་དངོས་སུ་བྱོན་ནས་རྡོ་རྗེའི་ཚིག་རྐང་སོ་སོའི་དངོས་ཤུགས་སྦས་གསུམ་གྱི་ཟབ་དོན་ལེགས་པར་བཀྲལ་བ་དང་། མཁའ་སྤྱོད་དཀར་དམར་གཉིས་ཀྱི་འཕོ་བ་ཤིན་ཏུ་ཟབ་པ་ཞིག་ཀྱང་བསྩལ། གཉིས་པ་མདོ་སྨད་སྲིན་རྫོང་ཤུག་སྡོང་གི་རྩ་བར་དེ་དག་སོ་སོའི་དབང་། གསུམ་པ་མཁའ་སྤྱོད་ཀྱི་གདམས་པ་ཡི་གེ་མེད་པའི་བརྡ་ཐབས་སུ་བྱུང་བ་བཅས་ཀྱི་བཀའ་བབས་སྔ་བར་ཕྱི་གསུམ་མང་མཁར་བ་བློ་གྲོས་རྒྱལ་མཚན་སོགས་ལ་བརྒྱུད་པར་ཐང་ལུགས་ཀྱི་བརྒྱུད་པ་ཞེས་ད་ལྟའི་བར་བཀའ་བརྒྱུད་ཟམ་མ་ཆད་པར་བཞུགས་སོ།
II.2.2.1 Thangtong Gyelpo
།གཅིག གྲུབ་ཐོབ་ཐང་སྟོང་རྒྱལ་པོ།
དེ་ཡང་ཨུ་རྒྱན་ཆེན་པོས་འོ་བ་ཞེས་བྱའི་ཤར་མདུན་དུ། །བརྩོན་འགྲུས་ཞེས་བྱའི་མིང་ཅན་བྱུང༌། །དེ་ནི་ང་ཡི་ཐུགས་སྤྲུལ་ཡིན་ཞེས་ལུང་བསྟན་པ་ལྟར་ཨུ་རྒྱན་པདྨ་འབྱུང་གནས་དང་ཐུགས་རྗེ་ཆེན་པོ་གཉིས་ཟུང་དུ་འཇུག་པའི་རྣམ་སྤྲུལ་གྲུབ་ཆེན་ཐང་སྟོང་རྒྱལ་པོ་ནི་གཙང་ལ་སྟོད་གཡས་རུ་བྱང་མའི་ཆབ་འོག །ཁ་རྒྱུན་དུ། གཅུང་སྨད་འོ་བ་ལྷ་རྩེ། གཅུང་སྟོད་རྒྱལ་ཐང་དཀར་པོ་ཞེས་སུ་གྲགས་པ་ལས་གཅུང་སྨད་འོ་བ་ལྷ་རྩེའི་རིན་ཆེན་སྡིངས་ ཀྱི་འཁྲུངས་ས་ཞེས་གྲགས་པའི་སུག་བྲིས་མའི་མ་རྒྱུད་ཀྱི་ཁྱིམ་དུ་སྤྱི་ལོ1385ལོར་ཡབ་རྡོ་རྗེ་རྒྱལ་མཚན་དང་། ཡུམ་རྒྱ་གར་ལྷ་མོ་གཉིས་ལ་རིགས་ཀྱི་མྱུ་གུ་ལྕམ་སྲིང་དྲུག་བྱུང་བ་སྟེ་སེ་རོ་དཔལ་དང་། སློབ་དཔོན་དཔལ་ཚུལ། འཕན་པོ། སྔ་དར། ཁྲོ་བོ་དཔལ་ལྡན། ལྕམ་མོ་དཔལ་འཛིན་རྡོ་རྗེ་མ་བཅས་ཀྱི་ལྔ་པ་ཁྲོ་བོ་དཔལ་ལྡན་ནི་ཕྱིས་ཐང་སྟོང་རྒྱལ་པོར་འབོད་པ་འདི་ཉིད་ཡིན། སྐུ་འཁྲུངས་པ་དང་ཀུན་སྤངས་དོན་ཡོད་རྒྱལ་མཚན་གྱིས་ཁྲོ་བོ་དཔལ་ལྡན་ཞེས་པའི་མཚན་གསོལ། ཚེ་དཔག་མེད་ཀྱི་དབང་དང༌། རྣམ་འཇོམས་ཀྱི་ཁྲུས་མཆོག །ཤེས་རབ་བློ་འཕེལ་གྱི་ཐབས་ལ་སོགས་པ་མང་དུ་མཛད། སྐུ་ན་ཆུང་ངུའི་དུས་ནས་རྣམ་དཔྱོད་རྩལ་གྱིས་ཕྱུག་ལ་ཕན་སེམས་ཆེ་བ་ཞིག་ཡོད། དགུང་ལོ་ལྔ་བཞེས་པའི་ཚེ། ཡབ་ཡུམ་གྱི་ར་ལུག་འཚོ་བར་བཏང་བས་ཀུན་སྤངས་དོན་ཡོད་རྒྱལ་མཚན་གྱི་ཆོས་གྲྭར་བྱོན་ནས་དབང་ཁྲིད་དང་རྗེས་གནང་མང་པོ་གསན། དགོན་པ་བྱང་སྡིངས་ སུ་བླ་མ་ཆོས་སྐྱོང་དཔལ་བའི་དྲུང་དུ་ཡི་གེ་བསླབས་པར་བརྫངས་པས། ཀློག་བརྡ་སྟོན་པ་ཙམ་གྱིས་མཁྱེན་ནས་བོད་ཡིག་དང་། ཝརྟུ། མཁའ་འགྲོའི་བརྡ་ཡིག་སོགས་འབྲི་གནང་མཛད། དེ་ནས་མི་རྒོད་ལ་ཆོས་རྒོད་ཡོད་ཅེས་པའི་དཔེ་བཞིན་དགོན་པ་བྱང་སྡིངས་སུ་བླ་མ་ཉི་མ་སེང་གེའི་དྲུང་ལས་རབ་ཏུ་བྱུང་ཞིང་མཚན་བརྩོན་འགྲུས་སེང་གེར་གསོལ། དོན་ཡོད་ཞགས་པའི་སྒྲུབ་ཐབས་ལས་ཚོགས་དང་། རྒྱུད་ཀྱི་ལུང་། སྨྱུང་གནས་ཀྱི་ཆོ་ག་དང་བཅས་པ་གསན། མདོག་སྟོད་སྐྱ་རའི་དགོན་པར་དཀའ་ལྔ་པ་དཔལ་འབྱོར་ཤེས་རབ་ཀྱི་དྲུང་དུ་བསྙེན་པར་རྫོགས། ན་བཟའ་ཆོས་གོས་གསུམ་གྱིས་མཛེས་ཤིང་མཚན་བརྩོན་འགྲུས་བཟང་པོར་གསོལ། ཁོང་གི་དྲུང་ནས་ཕྱག་རྒྱ་ཆེན་པོ་ལྔ་ལྡན་དང་། ལྷན་ཅིག་སྐྱེས་སྦྱོར། ནཱ་རོ། ནི་གུ སྦྱོར་དྲུག་ལ་སོགས་པ་གསན། ཆོས་རྗེ་ལྷ་གདོང་པ་བསོད་ནམས་མཆོག་པ་ལས་རི་ཆོས། གཅོད་སྐོར། རིག་འཛིན་རྒོད་ལྡེམ་གྱིས་གཏེར་ནས་དྲངས་པའི་རྫོགས་ཆེན་ཡོངས་རྫོགས། མཁའ་འགྲོ་སྙིང་ཐིག་རྫོགས་ཆེན་ཨ་རོའི་སྐོར་སོགས་གསན། དེ་རྗེས་གངས་བུ་ལེར་དར་མ་དཔལ་ལས་ཆུའི་དཀའ་ཐུབ་ཀྱི་གདམས་པ་དང་། ཀུན་སྤངས་རིན་ཆེན་རྒྱལ་མཚན། རེད་མདའ་བ་གཞོན་ནུ་བློ་གྲོས། བྱ་ཕུར་བ་སོགས་ལས་གསང་སྔགས་གསར་རྙིང་དང་། མེ་རླུང་གི་སྒོམ་ཐབས་སོགས་མན་ངག་མང་དུ་གསན་ནས་གཅིག་ཏུ་མ་ངེས་པའི་དབེན་གནས་རྣམས་སུ་ལོ་མང་རིང་སྒོམ་སྒྲུབ་ལ་གཞོལ། བལ་ཡུལ་དུ་བྷ་རོ་མ་ནུ་དྷ་རས་གསེར་དངུལ་རུས་ཆས་སིལ་སྙན་ལ་སོགས་པའི་མཆོད་པའི་ཡོ་བྱད་ཕུལ་བས་ཆ་རྐྱེན་མཛད་དེ་འཕགས་པ་ཤིང་ཀུན་ལ་སྐུ་དཀར་གསོལ་ཞིང་། བྱ་རུང་ཁ་ཤོར་ལ་ཉམས་གསོ་ལེགས་པར་མཛད། ལོ་ངོ་བཅོ་བརྒྱད་ཙམ་གྱི་རིང་རྒྱ་བལ་སོགས་ལ་འབྱོན་བཞུད་ཀྱིས་པཎྜི་ཏ་མ་ཧཱ་བོ་དྷི་དང་། བླ་མ་དྷརྨ་རཀྟ། བླ་མ་སིདྡྷི་རཏཱ། གྲུབ་ཐོབ་ཨ་ཏི་ཀ་ར་སོགས་ཀྱི་པཎ་གྲུབ་དུ་མ་ལས་ཆོས་གསན་པ་དང་། ལྷག་པར་དུ་རྡོ་རྗེ་གདན་དང་ཐག་ཉེ་བའི་གསང་བ་རྡོ་རྗེ་ཕུག་ཏུ་གསང་སྔགས་རྙིང་མའི་གྲུབ་ཐོབ་སྐལ་ལྡན་རྡོ་རྗེ་གྲགས་པ་ལས་རྙིང་མའི་ཆོས་སྐོར་མ་ལུས་གསན་མཐར་ཉམས་རྟོགས་ཁྱད་པར་ཅན་འཁྲུངས་པ་དང་། ཐེངས་ཤིག་ལྷ་རྩེའི་གྲམ་པ་རྒྱང་གི་ལྷ་ཁང་དམར་པོ་ནས་ཐུགས་སྒྲུབ་ཡང་གསང་བླ་ན་མེད་པའི་ཆོས་སྐོར་གཏེར་ནས་བཞེས་པ་སོགས་ཀྱིས་སྔ་འགྱུར་རྙིང་མ་བའི་ཤིན་ཏུ་ཟབ་པ་ཉེ་བརྒྱུད་གཏེར་མའི་བརྒྱུད་འཛིན་གྲས་སུ་ཚུད།
དེ་ནས་གྲུབ་ཆེན་ཉིད་ལ་བྱང་སེམས་སྦྱིན་པ་བཟང་པོས་སྒྲུབ་བརྒྱུད་ཀྱི་བསྟན་པ་ཟིན་པ་ཞིག་ཡོང་བ་འདུག །ང་རྒས་ཁར་ཆོས་བདག་པོ་ལ་འཕྲོད་པ་ཞིག་བྱེད་ཅེས་གསུངས་ནས་ནི་གུ་ཆོས་དྲུག་དང་ཕྱག་རྒྱ་ཆེན་པོ་གའུ་མ། ལམ་ཁྱེར་རྣམ་གསུམ། འཆི་མེད་འཆུག་མེད། མཁའ་སྤྱོད་དཀར་དམར། བླ་མ་མགོན་པོ་དབྱེར་མེད་སོགས་ཤངས་པ་རིན་ཆེན་རྣམ་བདུན་ནས་མཁས་གྲུབ་ཤངས་སྟོན་ལ་ལེགས་པར་བརྒྱུད་པའི་ཟབ་མོའི་གདམས་པ་མཐའ་དག་རྫོགས་པར་གནང༌། གྲུབ་ཆེན་གྱི་ཐུགས་ལ་བས་མཐའ་རི་ཁྲོད་འགྲིམས་ཤིང་སྙན་བརྒྱུད་ཟབ་མོ་གངས་རིའི་ལྗོངས་སུ་དར་བར་བྱེད་དགོངས་པའི་ཚེ། རྡོ་རྗེ་འཆང་གིས་རྡོ་རྗེའི་རྒྱལ་ཐབས་བསྩལ། །ཡེ་ཤེས་མཁའ་འགྲོས་གསང་མཛོད་ལན་གསུམ་གཏད་ཅེས་པ་ལྟར་བར་སྣང་གི་སྤྲིན་གསེབ་ཏུ་མཁའ་འགྲོ་ནི་གུ་མས་ཞལ་མངོན་སུམ་དུ་བསྟན། མཆོག་གི་དཀྱིལ་འཁོར་ཆེན་པོར་དབང་བཞི་རྫོགས་པར་གནང་བས་དགའ་བཞིའི་ལང་ཚོས་ཡོངས་སུ་གང་། དེའི་སྐབས་སུ་རྡོ་རྗེའི་ཚིག་རྐང་སོ་སོ་དང༌། དེ་དག་ལ་དངོས་ཤུགས་སྦས་གསུམ་གྱི་མན་ངག་གི་འཕུལ་ཕྱེ་སྟེ་ཡོངས་སུ་རྫོགས་པར་གདམས་ཤིང་། ཁྱད་པར་འཆུགས་མེད་མཁའ་སྤྱོད་དཀར་དམར་གྱི་འཕོ་བ་ཤིན་ཏུ་ཟབ་པ། གདམས་པ་དཔེ་གཉིས་ཀྱི་སྒོ་ནས་བཏོན་པ་དང་བཅས་པ་བཀའ་རྒྱས་བཏབ་ནས་གནང་བ་དེ་དག་ཉམས་བཞེས་སུ་བསྟར་བས། དུས་སྐད་ཅིག་ཉིད་ལ་སྐུ་ལུས་ཀྱི་བཀོད་པ་གྲངས་ལས་འདས་པ་སྟོན་པ་དང་། གཞན་གྱི་སེམས་ཤེས་པའི་མངོན་པར་མཁྱེན་པ་དང་། ཕ་རོལ་ལ་འཕོ་བ་མཛད་པས་དངོས་སུ་འཕོ་ནུས་པ་སོགས་གྲུབ་པའི་ཟློས་གར་བསམ་གྱིས་མི་ཁྱབ་པ་མངའ། ཕྱིས་ཀྱང་ལན་གཉིས་ཞལ་གཟིགས་ནས་ཉེ་བརྒྱུད་ཀྱི་གདམས་པ་ཁྱད་པར་ཅན་མང་དུ་བསྩལ། འོན་ཀྱང་རྩོམ་པ་པོ་ཞོལ་མུ་ཡིས་ཐང་སྟོང་རྒྱལ་པོ་འཕགས་བལ་དུ་ལན་མང་དངོས་སུ་ཕེབས་ནས་ནི་གུ་མ་མཇལ་ཏེ་གསེར་ཆོས་ལྔ་ཞུས་པར་འདོད་པ་ལོ་རྒྱུས་ཀྱི་དོན་དངོས་དང་མི་མཐུན། ཕྱིས་གྲུབ་ཆེན་གྱིས་བླ་མ་ནམ་མཁའི་རྣལ་འབྱོར་དང་མཇལ་ནས་ཆོས་ཕར་ཞུ་ཚུར་ཞུ་མཛད་སྐབས་ཕལ་ཆེར་བླ་མ་དེ་ལས་ཤངས་ཆོས་ཅུང་ཞིག་གསན་མྱོང་བ་དང་། བླ་མ་རྡོ་རྗེ་གཞོན་ནུ་ལས་ཀྱང་ཤངས་ཆོས་སྐོར་མང་དུ་གསན།
དེ་རྗེས་རིན་ཆེན་སྡིངས་ཀྱི་ཤར་ཕྱོགས་དམ་ཕུག་ཀོ་ས་ལ་བྲག་སོགས་སུ་སྒྲུབ་པར་ཞུགས། མ་ཎི་དུང་སྒྲུབ་ལན་གཉིས་མཛད་ནས་འཕགས་པ་སྤྱན་རས་གཟིགས་ཞལ་གཅིག་ཕྱག་གཉིས་མ་སོགས་ཀྱིས་ཞལ་གཟིགས། ཐོག་མར་ཐར་པ་གླིང་གི་བླ་མ་མཆོག་བཟང་ལེགས་པའི་བློ་གྲོས་ཀྱི་དྲུང་དུ་ཕྱག་རྒྱ་ཆེན་པོ་གངྒ་མ། གའུ་མ། ཡི་གེ་མེད་པ། ལྔ་ལྡན་ལ་སོགས་པའི་ཁྲིད་དང་དབང་ལུང་མང་དུ་གསན་པ་དང་། སླེ་ཁ་བ་ཤེས་རབ་བཟང་པོ་ལས་དུས་ཀྱི་འཁོར་ལོའི་དབང་གོང་མ། ཇོ་ནང་ལུགས་ཀྱི་སྦྱོར་དྲུག་ཆ་ཚང་གསན། དེ་རྗེས་གཙང་རྒྱས་སྡེ་ཐང་ཁར་ གསང་སྤྱོད་ལ་ཞུགས་པའི་སྐབས་ཡེ་ཤེས་ཀྱི་མཁའ་འགྲོ་མ་སྡེ་ལྔས། ཁྱབ་གདལ་ཆེན་པོའི་ཐང་ཆེན་ན། སྟོང་ཉིད་རྟོགས་པའི་རྣལ་འབྱོར་པ། །འཇིགས་མེད་རྒྱལ་པོ་ལྟ་བུར་བཞུགས། །དེ་ཕྱིར་ཐང་སྟོང་རྒྱལ་པོར་ཐོགས་ཞེས་པས་ཐང་སྟོང་རྒྱལ་པོ་དང་། ལུང་སྟོང་སྨྱོན་པ། ཟས་རྣམས་བཅུད་ལེན་མཁན། རྐྱེན་རྣམས་རོ་སྙོམས་མཁན། ཆོས་རྣམས་རྐྱགས་གཏད་མེད་པ་བཅས་ཀྱི་མཚན་མཆོག་ལྔ་གསོལ་བས། གསོལ་འདེབས་གྲུབ་པའི་སྒྲ་དབྱངས་སུ་གདུལ་དཀའ་འདུལ་ཕྱིར་གྲུབ་པའི་སྐུར་བཞེངས་པ། །ཡེ་ཤེས་ཌཱ་ཀི་ཡོངས་ཀྱི་མིང་གཅིག་པུ། །མཚན་མཆོག་ལྔ་དང་ལྡན་ལ་གསོལ་བ་འདེབས་ཞེས་འཁོད་པ་ཡིན་ལ། དུས་དེ་ནས་བཟུང་ཐང་སྟོང་རྒྱལ་པོ་ཞེས་པའི་མཚན་སྙན་གྱི་བ་དན་ས་གསུམ་ཁྱོན་དུ་གཡོ། སླར་འཁྲུངས་ཡུལ་དུ་ཕེབས་ནས་ཕ་མ་གཉིས་ཀྱི་བུ་ལོན་རྣམས་མཇལ་རྗེས་ཐར་པ་གླིང་གི་སྒྲུབ་ཁང་ཞལ་དཀར་ལྷ་གདོང་དུ་ར་མ་གཉིས་ཀྱི་འོ་མ་ལ་འཚོ་བ་མཛད་པ་ལས་གཞན་ལོངས་སྤྱོད་བྲེ་གང་ཡང་མེད་པར་ལོ་དྲུག་སྒྲུབ་པ་གནང་བའི་སྐབས་ཤིག་རྨི་ལམ་བཟུང་ནས་རྒྱ་གར་གྱི་དུར་ཁྲོད་ཀེང་རུས་མེ་འབར་དུ་ཕེབས་ཏེ་རྗེ་བཙུན་བི་རུ་པ་ལས་རྒྱུད་སྡེ་མཐའ་ཡས་པ་མཐའ་དྲུག་དང་ཚུལ་བཞིས་རྣམ་པར་ཕྱེ་སྟེ། ལམ་འབྲས་བུ་དང་བཅས་པའི་མན་ངག་ཡོངས་སུ་རྫོགས་པ་གསན། ལྷ་ལྡན་གྱི་ཇོ་བོ་རིན་པོ་ཆེའི་མགུལ་ལ་གསེར་རྡོག་པོ་ཉི་ཤུ་རྩ་གཅིག་ཕུལ་བ་སོགས་མཆོད་པ་དུ་མས་མཉེས་པར་མཛད།
ཐེངས་ཤིག་ཚལ་གུང་ཐང་གི་མེ་ཏོག་མཆོད་པ་ ལ་བྱོན་ནས་ལྷ་སར་ལོག་ཕེབས་སྐབས་ལྷ་གདོང་ཤན་ཁར་གྲུ་དཔོན་ལ་གླ་རྔན་གནང་རྒྱུ་མ་བྱུང་བས་ལ་ཁར་ཇག་པ་དང་ཆུ་ཁར་གཉན་དཔོན་གྱི་དཔེ་ལྟར་གྲུ་དཔོན་གྱིས་ཁོང་གི་དབུ་ལ་ཤན་སྐྱ་ལན་གསུམ་ཞུས་ཏེ་ཆུ་ནང་དུ་བསྐྱུར་བས། ཁོང་གི་ཐུགས་དགོངས་ལ་ཉམ་ཐག་གི་སྐྱེ་བོ་གྲངས་ལས་འདས་པ་ཞིག་ཀྱང་འདི་དང་འདི་འདྲ་བའི་དཀའ་སྡུག་དང་བརྙས་བཅོས་མྱོང་དགོས་པ་ཤུགས་ཀྱིས་མཁྱེན་ནས་ཆུ་ཀླུང་བརྒལ་མི་བཏུབ་པ་རྣམས་ལ་ལྕགས་ཟམ་གཟུག་རྒྱུའི་མི་ཕྱེད་པའི་དམ་བཅའ་ཐུགས་ལ་བཀོད། དེ་རྗེས་ཀོང་པོར་ལྕགས་འཚོལ་བར་ཕེབས་སྐབས་སློབ་མ་ལྔ་བཅུ་ཙམ་བྱུང་བ་རྣམས་ཁྲིད་ནས་ཀོང་ཡུལ་སྟེང་རྩ་དང་སྨན་མོ་སྒང་སོགས་སུ་ཕེབས་ཏེ་ལྕགས་ཀྱི་སློང་མོ་དང་། ལྕགས་གཏེར་སྔོག་འདོན་གྱི་ལས་ལ་ཞུགས་ཤིང་། མགར་བ་མང་པོའི་དཀའ་སྤྱད་ལ་བརྟེན་ནས་ཞག་བཅོ་བརྒྱད་ཀྱི་རིང་ལ་ལྕགས་ཐག་འདོམ་བཅོ་བརྒྱད་ཡོད་པ་བཞི་གྲུབ་པས་མཚོན་ལྕགས་གུག་རྐང་བུ་སྟོང་ཕྲག་མང་པོ་བཟོ་རྡུང་མཛད། དེ་དག་མཛོ་གཡག་སོགས་ལ་བཀལ་ནས་དབུས་གཙང་དུ་དབོར། གཞན་ཡང་དབུས་གཙང་ཁམས་གསུམ་དང་མོན་ཡུལ་སོགས་སུ་ལྕགས་མང་པོ་བསྒྲུབས་ཏེ་ལྕགས་ཟམ་འཛུགས་ཡུལ་གྱི་ས་ཆ་ཁག་ལ་དྲངས། ཐོག་མར་སྐྱིད་ཆུའི་གྲུ་ཁ་དེ་ཉིད་དུ་ལྕགས་ཟམ་གཟུག་རྒྱུའི་དམ་བཅའ་བཞིན་དགུང་གྲངས་བདུན་ཅུར་ཕེབས་པ་རབ་བྱུང་བདུན་པའི་ལྕགས་ཕོ་ཁྱི་སྤྱི་ལོ1430ལོར་སྡེ་པ་སྐྱིད་ཤོད་པ་དང་ཁུལ་དེའི་སྐྱ་སེར་ཀུན་བསྐུལ་ནས་ལྷ་གདོང་ཤན་ཁའི་ལྕགས་ཟམ་ཐོག་མར་བསྐྲུན། དུས་དེ་ནས་བཟུང་གྲུབ་ཐོབ་ལྕགས་ཟམ་པ་ཞེས་སྙན་པའི་གྲགས་པ་ཕྱོགས་ཀུན་དུ་ཁྱབ། དེ་ནས་ཆུ་བོ་རིའི་ལྕགས་ཟམ་དང་། ཡར་ལུང་ཉ་མགོ་གྲུ་ཁའི་ལྕགས་ཟམ་སོགས་སྐུ་ཚེ་གང་པོར་ཁྱོན་ལྕགས་ཟམ་ལྔ་བཅུ་ང་བརྒྱད། ཤན་ཆེན་དང་གྲུ་འདྲེས་པ་བརྒྱ་དང་བཅོ་བརྒྱད། ཤིང་ཟམ་དྲུག་ཅུ་སོགས་འཛུགས་གནང་མཛད། གྲུབ་ཆེན་གྱིས་བཙུགས་གནང་བའི་ལྕགས་ཟམ་དེ་དག་ལ་མི་ཆུར་ལྷུང་སྟེ་འཆི་བ་སོགས་བྱུང་མྱོང་མེད་པ་ནི། དཔེར་ན་བགྲང་བྱ་བཞི་བཅུའི་གོང་ཙམ་དུ་ལྷ་རྩེ་རྫོང་གྲའུ་ཡུལ་ཤོག་ལྕགས་ཁ་གྲོང་ཚོའི་ཉེ་འཁོར་གྱི་ལྕགས་ཟམ་དེའི་སྟེང་ཚྭ་དོ་པོ་གཅིག་སྒལ་པར་ཁུར་ཡོད་པའི་བུ་མོ་ཞིག་ཆུ་ནང་དུ་ལྷུང་། ཚྭའི་ལྗིད་ཀྱིས་རྐྱེན་པས་ཆུའི་གཏིང་དུ་ལྷུང་ཡང་བུ་མོ་དེས་ཐག་པ་གཏོང་ཤོག་ཅེས་འབོད་པས་ཉེ་འཁོར་གྱི་མིས་ཐག་པར་བརྟེན་ནས་བུ་མོ་དེ་སྲོག་ཉེན་ལས་བསྒྲོལ་ཞེས་པ་སོགས་དོན་དངོས་ཀྱི་ཤོད་རྒྱུན་མང་དུ་མཆིས། ལྷག་པར་དམ་པ་གང་དེས་ལྕགས་ཟམ་སྒྲུབ་པའི་དགེ་བསྐུལ་གྱི་ཆ་རྐྱེན་དུ་མཛད་ཅིང་དེང་ལོངས་སུ་སྤྱོད་ཡུལ་དུ་གྱུར་པའི་ཨ་ཅེ་ལྷ་མོའི་ཟློས་གར་གྱི་འཁྲབ་རྒྱུན་ཡང་གསར་དུ་གཏོད་པ་སོགས་ཀྱིས། སྤྱི་ལོའི་དུས་རབས་བཅོ་ལྔ་པའི་ནང་གཙོ་བོར་ཤངས་པ་བཀའ་བརྒྱུད་ཀྱི་བརྒྱུད་འཛིན་པའི་བླ་ཆེན་ཞིག་གིས་ངོས་ནས་སྐབས་དེའི་སྤྱི་ཚོགས་ཀྱི་འགྲིམ་འགྲུལ་འཕེལ་རྒྱས་དང་། རིག་རྩ་ལ་འཚོ་བ་ཕུན་སུམ་ཚོགས་སུ་གཏོང་བ་བཅས་ཀྱི་དམངས་ཕན་བྱ་གཞག་ལ་ལེགས་སྐྱེས་བསམ་གྱིས་མི་ཁྱབ་པ་ཕུལ་ཡོད་པས། རིས་མེད་སྐྱེ་འགྲོ་ཀུན་གྱིས་གཙུག་ཏུ་བཀུར།
མ་གཞི་གྲུབ་ཆེན་ཐང་སྟོང་རྒྱལ་པོ་སྲས་མཁར་དགུ་ཐོག་ཏུ་ཞག་གསུམ་བཞུགས་པའི་ཚེ་ནུབ་གཅིག་མར་པ་ལོ་ཙཱ་བ་དང་མཇལ་བས། རྗེ་མར་པས་མ་ཧཱ་མ་ཡའི་དབང་བསྐུར་རྒྱུད་བཤད་མཛད་ནས་ཆོས་བདག་པོ་ལ་འཕྲོད་དོ་གསུངས་ནས་ནམ་མཁའ་ལ་གཤེགས། ཡང་ཆོས་རྗེ་འབྲི་གུང་པ་ནམ་མཁའ་རྒྱལ་མཚན་དང་མཇལ་ནས་ནཱ་རོ་ནི་གུ་ཕར་ཞུ་ཚུར་ཞུ་མཛད། དེ་ལྟར་ཁོང་གིས་སྐུ་ཚེ་གང་པོར་སྔ་འགྱུར་རྙིང་མའི་མན་ངག་ཟབ་ཆོས་དང་། ས་སྐྱ་པའི་ལམ་འབྲས། དྭགས་པོ་བཀའ་བརྒྱུད་ཀྱི་ནཱ་རོ་ཆོས་དྲུག་སོགས་ཀྱི་གདམས་ངག་མང་དག་ཅིག་ཐུགས་ཉམས་སུ་བཞེས་པ་མ་ཟད། རིས་སུ་མ་མཆིས་པའི་དགེ་ལས་པ་རྣམས་ལ་རང་རང་གི་བློ་འདོད་ལྟར་ཆོས་ཕྱག་རྒྱ་ཆེན་པོ་དང་། རྫོགས་ཆེན། ནཱ་རོ་ནི་གུའི་ཆོས་དྲུག །གཙང་ཁྲིད་དང་བློ་སྦྱོང་སོགས་ཁྲིད་ཚུལ་སྣ་ཚོགས། མདོ་སྡེ་ལས་བརྒྱ། དགོངས་པ་ངེས་འགྲེལ། ཁང་བུ་བརྩེགས་པའི་མདོ་ལ་སོགས་པ་སྤྱི་ཆོས་སུ་གནང་། ལྷག་པར་དུ་ཡེ་ཤེས་ཀྱི་མཁའ་འགྲོ་ནི་གུ་མས་རྗེས་སུ་བཟུང་ཞིང་ཉེ་བརྒྱུད་ཀྱི་བཀའ་བབས་ལན་གསུམ་བསྩལ་བས། ཁོང་ནི་དུས་རབས་བཅོ་ལྔ་པའི་ནང་ཤངས་ཆོས་ཀྱི་ཚབ་མཚོན་བརྒྱུད་འཛིན་པ་ཞིག་ཡིན་པ་གོར་མ་ཆག །ཁོང་གིས་ལོ་མང་རིང་གནས་ངེས་མེད་དུ་ཕེབས་ནས་དགོན་གནས་གསར་བཞེངས་དང་དམ་པའི་ཆོས་ཀྱི་གདམས་ངག་མཐས་ཀླས་པ་མདོ་དབུས་ཁམས་གསུམ་སོགས་ཀྱི་གདུལ་བྱ་འགྲོ་བའི་དོན་དུ་སྤེལ་བ་ཡང་། སྤྱི་ལོ་1446ལོ་ཙམ་ནས་བཟུང་གྲུབ་ཆེན་ཉིད་དང་ལྷ་རིགས་སྡེ་དགེའི་རྒྱལ་རབས་དང་པོ་བོ་ཐར་བཀྲ་ཤིས་སེང་གེ་གཉིས་མཆོད་ཡོན་ཟུང་འབྲེལ་གྱིས་ཕྱག་བཏབ་པའི་ཐང་རྒྱལ་ལྷ་ཁང་དང་སྲིབ་དགོན་དུད་བརྒྱ་རྩ་བརྒྱད་རྣམས་དེང་ཕལ་ཆེར་དགོན་ཆེན་དགོན་གྱི་ཁོངས་སུ་གཏོགས་པས་ས་ལུགས་འཛིན་པ་ཤ་སྟག་ཡིན་ལ། དེ་མིན་ཤངས་པའི་ཆོས་སྐོར་ལ་སོགས་པའི་ཆོས་བརྒྱུད་གཞན་གྱི་གདམས་པ་རྣམས་ཀྱང་གནས་ངེས་མེད་དུ་སྤེལ་ནས་སངས་རྒྱས་བསྟན་པའི་གདུགས་དཀར་ཕྱོགས་མཚམས་ཀུན་ཏུ་ཁྱབ་པར་མཛད། ཁོང་གིས་ཤངས་ཆོས་ཀྱི་གདམས་པ་འདི་དག་གཙོ་ཆེར་མང་མཁར་བ་བློ་གྲོས་རྒྱལ་མཚན་དང་འབྲི་གུང་ཆོས་རྗེ་ནམ་མཁའ་རྒྱལ་མཚན་སོགས་ལ་བསྩལ་མཐར་རབ་བྱུང་དགུ་པའི་ས་སྦྲུལ་སྤྱི་ལོ1509ལོར་གཙང་སྟོད་རི་བོ་ཆེར་སྐུ་གཤེགས།
II.2.2.2 Lodrö Gyeltsen
གཉིས། དཀའ་བཅུ་པ་བློ་གྲོས་རྒྱལ་མཚན།
དཀའ་བཅུ་པ་བློ་གྲོས་རྒྱལ་མཚན་ནི་སྤྱི་ལོའི་དུས་རབས་བཅུ་བཞི་པའི་ནང་ལྷ་རྩེའི་མང་མཁར་དུ་སྐུ་འཁྲུངས། ཁོང་ནི་གཞུང་ཆེན་བཀའ་པོད་ལྔར་སྦྱངས་པ་མཐར་སོན་པའི་དགེ་བཤེས་ཤིག་ཡིན་ཞིང༌། གྲུབ་ཆེན་ཐང་སྟོང་རྒྱལ་པོ་དང་མཇལ་ནས་ནི་གུའི་ཉམས་ཁྲིད་རྒྱས་པར་གསན། ས་ཉལ་མའི་ཕུག་པར་ཟླ་བ་བདུན་བསྒོམས་པས། གཏུམ་མོའི་བདེ་དྲོད་དང་སྒྱུ་མའི་ཉམས་བཟང་པོ་སྐྱེས། རྨི་ལམ་སྤྲུལ་བསྒྱུར་གྱི་སྒོ་ནས་རྒྱ་གར་རྡོ་རྗེ་གདན་སོགས་ཡུལ་སྣང་གཏན་ལ་ཕེབས་ཤིང་། འོད་གསལ་གྱི་གཟིགས་པ་རྒྱ་ཆེན་པོ་ཤར། ཁྲིད་གྲོལ་ནས་ཁྲིད་ཡིག་ལ་གཟིགས་པས་དེར་མ་འཁོད་པའི་དམིགས་པ་མང་པོ་བྱུང་འདུག་པ་བླ་མ་ལ་དྲིས་པས། ཡེ་ཤེས་མཁའ་འགྲོས་དངོས་སུ་གནང་བའི་གདམས་པ་ཡིན་པས་བསྐྱུར་མི་ཉན་གསུངས། ཟིན་བྲིས་བྱས་ན་ཡོང་མིན་དྲིས་ཀྱང་མཁའ་འགྲོའི་གནང་བ་མ་ཐོབ་པས་མི་ཡོང་གསུངས། དེ་རྗེས་ཁོང་གིས་ཆོས་སྡེའི་སློབ་དཔོན་གྱི་ཁུར་མཛད་སྐབས་སུ་ཡང་འབད་པས་ཉམས་སུ་བླངས་པས། དབེན་པར་སྒོམ་པ་བས་ཆོས་སྡེའི་ཚོགས་དབུས་སུ་སྒོམ་པ་བོགས་ཆེ་བ་བྱུང་། དཀའ་བཅུ་པ་སླར་གྲུབ་ཆེན་གྱི་དྲུང་དུ་བྱོན་པས་ནི་གུའི་དམིགས་པ་རྣམས་བརྗེད་འདུག་གམ་གསུངས། མི་འདུག་ཞུས་པས་ཤོག་བུ་ལོངས་ལ་བྲིས། མཁའ་འགྲོའི་བཀའ་གནང་ཐོབ་པ་ཡིན་ཞེས་གསུངས། དེ་ནས་ཇི་ལྟ་བ་བཞིན་བྲིས་ཏེ་བླ་མར་ཕུལ་བས་ཤིན་ཏུ་དག་པ་མཁྱེན། ཟིན་བྲིས་འདིའི་ལུང་བསྟན་འཛིན་རིན་པོ་ཆེ་གཙོ་བོར་གྱུར་པའི་གདུལ་བྱ་འགའ་ཞིག་ལ་གནང་།
དེ་ཡང་ནི་གུའི་བརྒྱུད་འདེབས་སུ་གནས་མང་མཁར་དགོན་གསར་གྱི་དགོན་པ་རུ། བརྒྱུད་འཛིན་བློ་གྲོས་རྒྱལ་མཚན་ལ་གསོལ་བ་འདེབས་ཞེས་པ་ལྟར། རྗེ་བཙུན་བློ་གྲོས་རྒྱལ་མཚན་འདི་ཉིད་ཀྱིས་གཙང་སྟོད་ལྷ་རྩེར་ཐེག་ཆེན་འོད་གསལ་གླིང་ཞེས་པའི་ས་སྐྱ་ཚར་ལུགས་ཀྱི་དགོན་གནས་ཕྱག་བཏབ་གནང་མཛད། དེང་བསམ་གྲུབ་དགོན་གསར་ཞེས་ཡུལ་མིང་དགོན་ལ་ཐོགས་པ་དེ་ཡིན། ཁོང་གིས་དགོན་གནས་འདི་བཏབ་ནས་བུ་སློབ་ཀྱི་འཁོར་རྣམས་ལ་ཤངས་པའི་ཉེ་བརྒྱུད་ཀྱི་གདམས་པ་རྒྱ་ཆེར་སྤེལ་བས་བཀའ་དྲིན་ཆེ་བ་ཡིན། ནི་གུ་ཐང་སྟོང་ལུགས་འདི་མང་མཁར་བ་བློ་གྲོས་རྒྱལ་མཚན་གྱིས་མཁས་གྲུབ་དཔལ་ལྡན་དར་པོ། དེས་རྗེ་བཙུན་བསོད་ནམས་རྩེ་མོ། དེས་སྐལ་བཟང་འགྱུར་མེད་བདེ་ཆེན། མཁན་ཆེན་ངག་དབང་ཆོས་གྲགས། དེས་འཇམ་དབྱངས་བསོད་ནམས་རྒྱལ་མཚན། དེས་ངག་དབང་བསྟན་པ་རབ་རྒྱས། དེས་མང་ཐོས་བསོད་ནམས་ཆོས་འཕེལ། དེས་ཀུན་དགའ་ལེགས་པའི་འབྱུང་གནས། དེས་འཇམ་དབྱངས་བསོད་ནམས་དཔལ་བཟང་། དེས་འཕགས་མཆོག་ཆོས་ཉིད་ཡེ་ཤེས། དེས་མཚུངས་མེད་ཡེ་ཤེས་རྒྱལ་མཆོག །ཡོངས་འཛིན་མ་ཏིའི་མཚན་ཅན། དེས་འཇམ་མགོན་རྡོ་རྗེ་རིན་ཆེན། དེས་འཇམ་དབྱངས་མཁྱེན་བརྩེ་དབང་པོ། དེས་འཇམ་མགོན་ཡོན་ཏན་རྒྱ་མཚོ་ལ་རིམ་གྱིས་བརྒྱུད་པའོ།

II.2.3 - The very close transmission lineage
།གསུམ་པ། ཤིན་ཏུ་ཉེ་བརྒྱུད།
ནག་པོ་སྤྱོད་པའི་རྣམ་སྤྲུལ་རྗེ་བཙུན་ཀུན་དགའ་གྲོལ་མཆོག་ཉེ་བརྒྱུད་དག་པའི་སྣང་བར་རྡོ་རྗེ་བཙུན་མོ་ནི་གུ་མས་ཞལ་དངོས་སུ་བསྟན་ཏེ་གདམས་ངག་ཁྱད་པར་ཅན་ལན་གཉིས་བསྩལ་བ་དང་། རིང་བརྒྱུད་འཇག་བསམ་གཉིས་དང་ཐང་སྟོང་རྒྱལ་པོ་ལ་སོགས་བརྒྱུད་པའི་རྣམ་གྲངས་ཉེར་བཞི་སྟེ། བརྒྱུད་སྲོལ་ཉེར་ལྔ་དང་ཁྲིད་ཐེངས་བརྒྱ་ལྷག་བཅས་འཇམ་མགོན་གྲུབ་པའི་དཔའ་བོ་དཔལ་ལྡན་ཀུན་དགའ་གྲོལ་མཆོག་གིས་གསན། ཁོང་གིས་ཆོས་སྐུ་ལྷ་དབང་གྲགས་པ་སོགས་ལ་བརྒྱུད་པ་ནི་གུ་ཇོ་ནང་གི་ལུགས་སུ་གཏོགས། དེའི་བརྒྱུད་པ་གཞན་རྣམས་ཁོ་བོས་ཟུར་དུ་བཀོད་པའི་ཤངས་པའི་བླ་རབས་ཀྱི་མཚན་ཐོར་གསལ་བས་དེར་གཟིགས་པར་འཚལ། སྐབས་འདིར་ལུགས་འདིའི་ཚབ་མཚོན་གྱི་བླ་མ་འགའ་ཞིག་གི་སྐོར་ཅུང་ཟད་ཞིང་བ་ལ།
II.2.3.1 Künga Drölchok
གཅིག །དཔལ་ལྡན་ཀུན་དགའ་གྲོལ་མཆོག
།ཁོང་ནི་མངའ་རིས་སྨད་ཀྱི་གློ་བོ་སྨོན་ཐང་ དུ་གཉག་སྟོན་ཤཱཀྱ་མུ་ནེའི་རིགས་སུ་ཡབ་རྗེ་དགུང་ལོ་ལྔ་བཅུ་རྩ་བརྒྱད་དང་། ཡུམ་དགུང་ལོ་ཉི་ཤུ་རྩ་གཉིས་བཞེས་པའི་ཚེ་སྐུ་བལྟམས། སྐུ་འཁྲུངས་སྐབས་སྒྲོལ་མ་འབུམ་ཐེར་འཛུགས་པའི་དུས་ཡིན་པས། རྗེ་བཙུན་སྒྲོལ་མའི་ཐུགས་རྗེར་དགོངས་ཏེ་མཚན་སྒྲོལ་མ་འབུམ་དུ་གསོལ། དགུང་ལོ་བཞི་པའི་ཐོག་བླ་མ་དམ་པ་ཀུན་དགའ་མཆོག་གྲུབ་ཀྱི་དྲུང་དུ་ཆོས་སྒོར་ཞུགས། དེ་ནས་དགུང་ལོ་བརྒྱད་ཀྱི་བར་དུ་ཡབ་ཀྱི་དྲུང་ནས་ཀློག་ཡིག་སོགས་སྦྱངས། དགུང་པོ་བཅུ་གསུམ་པ་ལ་བླ་མ་ཀུན་དགའ་མཆོག་གྲུབ་ལས་རབ་ཏུ་བྱུང་ཞིང་། མདོ་སྔགས་ཀྱི་ཆོས་མང་དུ་གསན། དེ་ནས་དབུས་གཙང་དུ་སློབ་གཉེར་ལ་ཕེབས། ལམ་བར་དུ་ས་སྐྱ་མཇལ་ནས་ཁའུ་བྲག་རྫོང་དུ་ཀུན་སྤངས་ཆོས་ཀྱི་ཉི་མའི་དྲུང་དུ་དཔལ་མགོན་གྱི་རྗེས་གནང་གསན་པས། ཆོས་སྐྱོང་གི་སྐུའི་རྣམ་པ་གསལ་ཆ་ཆེར་བྱུང༌། ལོ་དགོན་དུ་ཞེན་པ་བཞི་བྲལ་གྱི་ཁྲིད་གསན་རྗེས་ཆགས་མེད་ཀྱི་ངེས་འབྱུང་དྲག་པོ་སྐྱེས། དེ་ནི་ཁྲིད་ཐོབ་པའི་ཐོག་མ་ཡིན། དེ་རྗེས་ཆོས་གྲྭ་ཆེན་པོ་གསེར་མདོག་ཅན་ དུ་པཎྜི་ཏ་དོན་ཡོད་གྲུབ་པ་ལ་རྒྱུད་སྡེ་ལྔ་དང་། བདེ་མཆོག་ལྷ་ལྔའི་དབང་ཞུས་ཤིང༌། སླར་མངའ་རིས་སུ་ཕེབས། དགུང་ལོ་ཉི་ཤུ་པ་ལ་ཐམས་ཅད་མཁྱེན་པ་བསོད་ནམས་ལྷུན་གྲུབ་ལེགས་པའི་རྒྱལ་མཚན་གྱིས་མཁན་པོ་དང་། ངོར་ཆེན་རྡོ་རྗེ་ལྷ་མཆོག་གིས་ལས་སློབ་མཛད་དེ་དད་པའི་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས། སློབ་དཔོན་རྣམས་ལས་གསུང་ངག་ལམ་འབྲས་སོགས་མང་དུ་གསན། བླ་མ་དཔལ་ལྡན་ཚུལ་ཁྲིམས་པ་ལ་འཇིགས་བྱེད་ཀྱི་ཆོས་སྐོར་རྣམས་ཞུས། དྲུང་པ་ཆོས་རྗེ་ལས་རྒྱལ་སྲས་ཁྲིད་དྲུག་དང་། ཕྱག་ཆེན་ལྷན་ཅིག་སྐྱེས་སྦྱོར་ཕུད་པའི་གཞན་ལྔའི་དམིགས་ཁྲིད། སྐྱེས་བུ་གསུམ་གྱི་ཁྲིད། སྙིང་རྗེ་མཁའ་ཁྱབ་སྟེ་བཀའ་གདམས་ལྷ་བཞིའི་ཟབ་ཁྲིད། བློ་སྦྱོང་སོགས་བཀའ་གདམས་པའི་ཆོས་སྐོར་མང་དག་ཅིག་གསན། མོན་རྫོང་པ་ཟླ་བ་རྒྱལ་མཚན་ནས་བརྒྱུད་པའི་ལམ་འབྲས་ཞ་མ་ལུགས་སོགས་བརྒྱུད་ལུགས་མི་འདྲ་བ་ཉེར་ལྔ། སྒྲོལ་དཀར་འབྱུང་པོ་འདུལ་བྱེད་སོགས་ས་སྐྱ་པའི་ཆོས་སྐོར། གཞན་ཡང་གཙུག་རྒྱན་ནོར་བུ་འཇམ་དབྱངས་བསོད་ནམས་ལྷུན་གྲུབ་དང་། སངས་རྒྱས་རིན་ཆེན་སེང་གེ ཀུན་དགའ་མཆོག་གྲུབ། དོན་ཡོད་མཚན་ཅན། དཔལ་ལྡན་ཚུལ་ཁྲིམས། ཡིག་དྲུག་ཤེས་དཔལ། ཁམས་སྟོན་བསོད་ནམས་རྒྱལ་མཚན། ཀརྨ་པ་དྲེ་བོ་ཆོས་རྒྱལ། དཔལ་ལྡན་འབྲུག་པ་ངག་དབང་ཆོས་རྒྱལ། ལྕང་ལུང་པ་གཞོན་ནུ་མཆོག་གྲུབ། སྟག་ལུང་པ་རྣམ་རྒྱལ་བཀྲ་ཤིས་སོགས་མཁས་གྲུབ་གཉིས་ལྡན་གྱི་བླ་མ་དྲུག་ཅུ་ཙམ་བསྟེན་པ་ལས། རྗེ་བཙུན་ཀུན་དགའ་གྲོལ་མཆོག་ཉིད་ཀྱིས་གང་ཆོས་ཀྱི་འབྲེལ་བའི་བླ་མ་དྲུག་ཅུ་རྩ་མཆིས་པ་ཀུན་ཀྱང་རྒྱ་སྒོམ་གཅིག་པུར་ངོ་བོ་གཅིག་པ་མ་གཏོགས་ཐ་དད་པར་ནི་མི་འཛིན་ཞེས་གསུངས་པ་ལྟར་རྒྱ་སྒོམ་ཆེན་པོ་ནི་ཁོང་གི་རྩ་བའི་བླ་མ་ཉག་གཅིག་ཡིན་པ་བཅས་དེ་དག་གི་དྲུང་ནས་མདོ་སྔགས་ཀྱི་གཞུང་འགྲེལ་དང་དབང་ཁྲིད་བྱིན་རླབས་ལ་སོགས་པའི་མན་ངག་མཐའ་ཡས་པ་གསན་ཏེ་མཁས་ཤིང་གྲུབ་པའི་རྩེ་མོར་སོན་པས། གྲུབ་མཐའ་རིས་མེད་ཀྱི་བླ་མ་མང་པོས་ཞབས་ལ་གཏུགས། དབུས་གཙང་སྡེ་དཔོན་ཆེ་ཕྲ་ཀུན་གྱི་མཆོད་པའི་ཞིང་དམ་པར་གྱུར་ཅིང་། གདུལ་བྱ་མཐའ་ཡས་པ་སྨིན་གྲོལ་གྱི་ལམ་བཟང་ལ་བཀོད། སྔ་རྗེས་སུ་ཐུབ་བསྟན་གསེར་མདོག་ཅན་དང་། དཔལ་འཁོར་བདེ་ཆེན་གླིང་། རྩེ་ཆེན་ངམ་རིང་སོགས་ཀྱི་གདན་སའི་བདག་པོར་བསྐོས་ཀྱང་། བྱ་བཏང་ཁོ་ནའི་ཚུལ་གྱིས་སྡེའི་ཞལ་འཛིན་ཆེར་མ་མཛད། སྐུ་ཚེའི་མཇུག་ཏུ་ཇོ་ནང་དུ་སྒྲུབ་པར་ཞུགས་པ་དང་། ལྷག་པར་ཆོས་ལུང་བྱང་རྩེའི་དགོན་གནས་ བཏབ་ནས་སྒྲུབ་སྡེ་ལ་གཙོ་བོར་མཛད་ཅིང་། སློབ་མ་མཁས་པ་མང་དུ་བྱུང་བ་ལས་གཙོ་བོ་རྡོ་རིང་པ་ཀུན་དགའ་རྒྱལ་མཚན། མཁས་དབང་བྱམས་པ་ལྷུན་གྲུབ། ཆོས་སྐུ་ལྷ་དབང་གྲགས་པ་རྣམས་ལ་ས་དྭགས་ཇོ་ཤངས་ཀྱི་ཆོས་སྐོར་མཐའ་ཡས་པའི་བཀའ་བབས་གཏད་དེ། གཟུགས་སྐུ་ཆོས་དབྱིངས་སུ་བསྡུས། སྐུ་གདུང་རིང་བསྲེལ་གྱི་སྙིང་པོ་ཆོས་ལུང་བྱང་ཆུབ་རྩེ་མོར་བཞུགས་སོ།
།རྗེ་བཙུན་འདི་ཉིད་ལ་ཤངས་པའི་ཆོས་ཀྱི་བཀའ་བབས་པ་དང་། གདམས་པ་ཇི་ལྟར་གསན་པའི་སྐོར་ཡང་། ཐེངས་ཤིག་མནལ་ལམ་དུ་བུད་མེད་དམར་པོ་གཉིས་ཀྱིས་ཡར་བཏེགས་ནས་སོ་ས་གླིང་གི་དུར་ཁྲོད་ཡིན་ཟེར་བ་ཞིག་ཏུ། ནི་གུ་མས་ཚོགས་དཔོན་མཛད་པའི་མཁའ་འགྲོ་མ་མང་པོ་འདུས་པའི་ཚོགས་འཁོར་གྱི་གྲལ་དུ་ཚུད་པ་དེས། ནི་གུ་མས་བྱིན་གྱིས་བརླབས་པའི་མཚན་མ་ཐོབ། དེ་རྗེས་ཡེ་ཤེས་ཀྱི་མཁའ་འགྲོ་ནི་གུ་མས་དངོས་སུ་ཞལ་གཟིགས་ཏེ་ཆོས་དྲུག་དང་ཕྱག་ཆེན། ལམ་ཁྱེར་དང་འཆི་མེད། མཁའ་སྤྱོད་དང་མགོན་པོ་སོགས་ཀྱི་བཀའ་སྣ་རྣམས་གནང་བས། རྗེ་བཙུན་གྱིས་ཀྱང་བདག་དང་མཁའ་འགྲོའི་བར་དུ་བརྒྱུད་པ་གཞན་མི་དགོས་གསུངས། ལྷག་པར་དུ་ཡོལ་ཕུ་རི་གོང་གི་རང་བྱུང་མགོན་པོའི་ལུང་བསྟན་བཞིན་སྦས་པའི་རྣལ་འབྱོར་རྒྱ་སྒོམ་ལེགས་པ་རྒྱལ་མཚན་གྱིས་རྒྱུད་སྡེ་ལྔའི་དབང་བསྐུར་མནོས་ཤིང་། དེ་རྗེས་ཤངས་པའི་ཚོགས་ཆོས་སྔོན་འགྲོ་མི་རྟག་སྐྱོ་ཤས་ཀྱི་ཉམས་ཁྲིད་ཆེན་མོ་བསྩལ་ནས། རྩ་བའི་ཆོས་དྲུག །བཀའ་དྲུག་དང་དམིགས་པ་སྤེལ་བའི་མྱོང་ཁྲིད། སྡོང་པོ་ཕྱག་ཆེན་གའུ་མའི་དོན་ཁྲིད་དབང་དང་འབྲེལ་བ། ལམ་འཁྱེར་གྱི་འཇུག་སྒོའི་བྱིན་རླབས། མཁའ་སྤྱོད་དཀར་དམར་བྱིན་རླབས་དང་འབྲེལ་བའི་ལྟ་ཁྲིད། གསང་སྒྲུབ་ལྟེ་བ་འཕྲུལ་འཁོར། མགོན་པོ་སྙིང་ཞུགས་ཀྱི་དམར་ཁྲིད། མགོན་པོ་མི་འདྲ་བ་སུམ་ཅུ་སོ་གསུམ་སོགས་ཀྱི་དབང་བཀའ་དྲུག་ཅུ་རེ་བརྒྱད་ཙམ་གསན་པ་བཅས། སྔ་ཕྱིར་ཤངས་ཆོས་ཀྱི་གདམས་པ་ལྷག་མ་རྣམས་རྫོགས་པར་བསྩལ་བས། རྒྱ་སྒོམ་ཆེན་པོས་ཀྱང་ཆོས་བདག་པོ་ལ་འཕྲོད་པ་མི་རྒན་ད་ལྟ་ཤི་ཡང་བློ་བདེ་ཞེས་གསུངས་པ་ཡིན། ཡང་རྗེ་བཙུན་ཀུན་དགའ་གྲོལ་མཆོག་ཉིད་ཀྱིས་ནི་གུའི་ཁྲིད་བརྒྱ་རྩ་བརྒྱད་འཆད་པའི་དམ་བཅའ་ཕུལ་བས། རྒྱ་སྒོམ་ཆེན་པོའི་ཞལ་ནས་བརྒྱ་རྩ་བརྒྱད་ཀྱི་མཐར་དངོས་གྲུབ་ཀྱི་ཕ་ཕོགས་ཆེན་པོ་བྱུང་ཞེས་པའི་ལུང་བསྟན་གནང་ཞེས་འཁོད་པ་ལྟར་ནི་གུའི་ཁྲིད་ཐེངས་གྲངས་བརྒྱ་རྩ་བརྒྱད་འཆད་པའི་དམ་བཅའ་ཕུལ་བས། རྒྱ་སྒོམ་ཆེན་པོའི་ལུང་བསྟན་ཐོབ་པ་དང་། ཤངས་པའི་གདམས་ངག་གི་བརྒྱུད་པ་ཅུང་ཟད་ཉམས་རྒུད་དུ་སོང་བའི་དུས་དེར་ཤངས་ཆོས་རྒྱ་ཁྱབ་ཏུ་འགྲོ་བར་ལེགས་སྐྱེས་བསམ་གྱིས་མི་ཁྱབ་པ་ཕུལ་བར་མཛད། གཞན་ཡང་རིན་པོ་ཆེ་ལྕོག་པོ་རྩེ་པ་ལས་གྲུབ་རྒྱལ་མའི་ཚེ་དབང་དང་། མགོན་པོ་རྒྱན་གྱི་སྐོར། དུར་ཁྲོད་ལམ་ཁྱེར། གའུ་མའི་རྡོ་རྗེའི་ཚིག་རྐང་སོགས་ཞུས། ཁམས་སྟོན་བསོད་ནམས་རྒྱལ་མཚན་ལ་ནི་གུའི་ཆ་ལག་ཕྱག་ཆེན་རྣམས་མཐའ་རྒྱས་སུ་གསན། དེ་ལྟར་ཁོང་ལ་ནི་གུའི་ལུགས་སྲོལ་མི་འདྲ་བ་ཉེར་ལྔ་ཐོབ་པས། ཁོང་རང་ཉིད་ཀྱིས་ཀྱང་ཆོས་ནི་གང༌། སྤྱིར་ཤངས་པའི་བཀའ་བརྒྱུད་ལ་སྙིང་ཕུར་བཏབ་མོད། ཐོས་པའི་ཆོས་ཇི་སྙེད་པ་མཐའ་དག་ཀྱང་དེའི་ཚུལ་དུ་འདུས་པ་ལས་རྣམ་རྟོག་གི་རྒྱུ་ཤན་མི་བྱེད་དོ་ཞེས་གསུངས་པ་ལྟར་ཤངས་པའི་ཤིན་ཏུ་ཉེ་བརྒྱུད་ཀྱི་རིང་ལུགས་དྲི་མེད་མངའ་བ་ཡིན། སྐུ་གཤེགས་ཁར་བྲག་སྟོད་པ་ལྷ་དབང་གྲགས་པ་ཤངས་ཆོས་གདམས་པའི་རྒྱལ་ཚབ་ཏུ་བསྐོ་བཞག་མཛད་པ་བཅས་སོ།
།ཞར་ལ། དམ་པ་འདི་ཉིད་ཀྱིས་དམ་པའི་ཆོས་ཀྱི་མན་ངག་ཟབ་མོའི་བཅུད་ཀུན་ལེགས་བསྡུས་ཀྱི་ཚུལ་དུ་མཛད་པ་གྲོལ་མཆོག་ཁྲིད་བརྒྱ་ཞེས་གྲགས་པ་ཟབ་མོའི་ཁྲིད་ཚན་བརྒྱ་རྩ་བརྒྱད་ཀྱི་བཀླག་ལུང་ཚར་གསུམ་ཕྱག་བཞེས་ཀྱི་བཀའ་སྲོལ་མཆོག་གི་བརྒྱུད་རིམ་ནི། རྗེ་བཙུན་ཀུན་དགའ་གྲོལ་མཆོག་ཉིད་དང་། དེ་ནས་རིམ་པར་ཐུགས་སྲས་མཁན་ཆེན་ལུང་རིག་རྒྱ་མཚོ། རྗེ་བཙུན་ཏཱ་ར་ནཱ་ཐ། རྒྱལ་ཚབ་རིན་ཆེན་རྒྱ་མཚོ། དགེ་སློང་སྙིང་པོ་མཐའ་ཡས། རྗེ་ཀུན་བཟང་དབང་པོ། ཚེ་དབང་ནོར་བུ་དང་ཀུན་དགའ་རྣམ་རྒྱལ་གཉིས། དེ་གཉིས་ནས་ཆོས་ཀྱི་འབྱུང་གནས་ཀརྨ་འགྱུར་མེད། པདྨ་ནོར་བུ། དཔལ་ལྡན་མི་ཕམ་ཆོས་རྒྱལ། ཀོང་སྤྲུལ་ཡོན་ཏན་རྒྱ་མཚོ། དེ་ནས་འཛམ་ཐང་སྒར་གོང་འོག་གི་རྡོ་རྗེ་འཛིན་པ་ཅི་རིགས་པས་གསན་ཞིང་ལུང་རྒྱུན་ད་ལྟའི་བར་མ་ཆད་ཙམ་བཞུགས། ཡང་གྲོལ་མཆོག་ཁྲིད་བརྒྱ་ཞིབ་ཁྲིད་ལུགས་ཀྱི་བརྒྱུད་རིམ་ནི། རྗེ་གྲོལ་མཆོག་གང་ཉིད་དང༌། གང་གི་ཞལ་སྔར་གསན་པ་ལུང་རིག་རྒྱ་མཚོ་དང་། ལྷ་དབང་གྲགས་པ་གཉིས། དེ་གཉིས་ཀས་རྗེ་བཙུན་ཏཱ་ར་ནཱ་ཐ། ཁོང་ནས་གསན་པ་རྗེ་བཙུན་འཕྲིན་ལས་དབང་མོ་དང་། རིན་ཆེན་རྒྱ་མཚོ་གཉིས། དེ་གཉིས་ནས་དགེ་སློང་སྙིང་པོ་མཐའ་ཡས། ཀུན་བཟང་དབང་པོ། དེ་ནས་ཚེ་དབང་ནོར་བུ་དང་གོང་བླ་ཀུན་དགའ་རྣམ་རྒྱལ་གཉིས། གོང་བླ་དེ་ཉིད་ལས་འཛམ་ཐང་སྒར་གོང་འོག་གི་བླ་སྤྲུལ་ཅི་རིགས་ལ་ཐོབ་པ་ཡིན་ལ། གཞན་ཡང་ཀུན་བཟང་དབང་པོའི་རྗེས་ནས། སྔགས་གསར་ཕྱོགས་ལྕགས་ཟམ་པ་བློ་བཟང་དཔལ་གྲུབ། ལྕགས་ཐང་བ་བཀྲ་ཤིས་འབྱུང་གནས། འཇམ་དབྱངས་བཞད་པ་འཇིགས་མེད་དབང་པོ། ངག་དབང་བློ་བཟང་། བདེ་བའི་རྡོ་རྗེ། དཀོན་མཆོག་རྒྱལ་མཚན། བཀའ་འགྱུར་བ་ཤེས་རབ་རྒྱ་མཚོ། ཨ་མཆོག་སྤྲུལ་སྐུ་དཀོན་མཆོག་བསྟན་པའི་རྒྱལ་མཚན། དཀོན་མཆོག་མཁས་གྲུབ། འབྲོག་དགེ་ཡོན་ཏན་རྒྱ་མཚོ། གྲོང་མང་རིག་འཛིན་རྣམ་སྣང་རྡོ་རྗེ་སོགས་ནས་རྔ་ཡུལ་ཕྱོགས་སུ་བརྒྱུད་ཚུལ་ཞིག་ཡོད་ལ། འདི་ནི་དམར་ཁྲིད་ལྟར་གྱི་ཁྲིད་ཚུལ་རྒྱས་པ་ཡིན་མོད། འོན་ཀྱང་གོང་ལྟར་བཀླག་ལུང་བཞིན་བྱས་པས་ཁྲིད་ཀྱི་གོ་ཆོད་པའི་གསུངས་སྲོལ་ཡོད་ཅིང་། གང་ལྟར་ཡང་བརྒྱུད་ལྡན་གོང་མ་རྣམས་ཀྱི་ཉམས་ལེན་ཕྱག་བཞེས་མ་ཆད་པའི་བྱིན་རླབས་དོན་བརྒྱུད་དུ་གྲགས་སྐད།
II.2.3.2 Chöku Lhawang Drakpa
གཉིས། བྲག་སྟོད་པ་ལྷ་དབང་གྲགས་པ།
ཁོང་ནི་ལ་སྟོད་དུ་སྐུ་འཁྲུངས་ཤིང་། ཐོག་མར་སྟོད་འབྲུག་གི་བླ་མ་འགའ་ལས་འབྲུག་ལུགས་ཀྱི་ཆོས་སྐོར་གསན། དེ་རྗེས་བླ་མ་དུ་མ་ལས་རས་ཆུང་པའི་སྙན་བརྒྱུད། སྔ་འགྱུར་རྙིང་མའི་ཆོས་སྐོར། སྦྱོར་བ་ཡན་ལག་དྲུག་པ། ས་སྐྱའི་ཆོས་སྐོར་སོགས་གསན་པས་ཐུགས་རྒྱུད་བྱུར་བུར་གཏམས། ཁྱད་པར་དུ་རྗེ་བཙུན་ཀུན་དགའ་གྲོལ་མཆོག་གི་ཞབས་ལ་གཏུགས་ནས་ཤངས་པ་བཀའ་བརྒྱུད་པའི་གདམས་པ་མང་དག་ཅིག་གསན་ཞིང་། ཤངས་པའི་ཆོས་སྐོར་མ་ལུས་པ་བུམ་པ་གང་བྱོའི་ཚུལ་དུ་མཁྱེན་ཞིང་ཐུགས་སུ་ཆུབ་པར་མཛད། སྒྲུབ་པའི་རྒྱལ་མཚན་བཙུགས་ཏེ་ཉམས་རྟོགས་ཀྱི་ཀློང་བརྡོལ། རྩ་རླུང་ལ་རང་དབང་ཐོབ་ཅིང་འཆི་མེད་རྡོ་རྗེའི་སྐུ་བརྙེས་པས་དགུང་ལོ་བརྒྱ་དང་ཉི་ཤུ་བཞུགས། དེ་ཡང་ནི་གུའི་བརྒྱུད་འདེབས་བྱིན་རླབས་སྤྲིན་ཕུང་ལས་གནས་བྲག་སྟོད་ཆོས་ཀྱི་དགོན་པ་རུ། ཆོས་སྐུ་ལྷ་དབང་གྲགས་པ་ལ་གསོལ་བ་འདེབས་ཞེས་འཁོད་པ་ལྟར་ཕྱིས་རྟག་བརྟན་ཕུན་ཚོགས་གླིང་གི་དགོན་ལག་ཁག་བཅུ་དྲུག་ གི་ཁོངས་སུ་གཏོགས་པའི་ཕོ་དགོན་བྲག་སྟོད་ཆོས་ཀྱི་ཕོ་བྲང་ དུ་བཞུགས་ནས་ས་དྭགས་ཇོ་ཤངས་སོགས་གྲུབ་མཐའ་རིས་མེད་ཀྱི་གདམས་པས་གདུལ་བྱ་དུ་མ་སྨིན་གྲོལ་ལ་བཀོད། སློབ་མ་རྣམས་ལས་མཆོག་ཏུ་གྱུར་བ་རྗེ་བཙུན་ཏཱ་ར་ནཱ་ཐས་རང་ཉིད་དགུང་ལོ་སོ་གསུམ་ལ་ཕེབས་སྐབས་བྲག་སྟོད་ཀྱི་སྒྲུབ་སྡེ་འདིར་སྐྱེས་བུ་གསུམ་གྱི་ལམ་རིམ་དང་། ཤངས་ཆོས་ཆ་ཚང་གི་དབང་བཀའ་ཅི་རིགས་གནང་། ལྷ་དབང་གྲགས་པ་ཉིད་ཀྱིས་ཇོ་ནང་ཏཱ་ར་ནཱ་ཐ་ཤངས་པ་བཀའ་བརྒྱུད་ཀྱི་གདམས་པ་མཐའ་དག་གི་བདག་པོར་གཏད་དེ་ཞིང་གཞན་དུ་གཤེགས། སྐུ་གདུང་རིང་བསྲེལ་གྱི་སྙིང་པོ་ཅན་རྣམས་བྲག་སྟོད་ཀྱི་གསེར་གདུང་བཀྲ་ཤིས་འོད་འབར་དུ་བཞུགས་ཏེ་འགྲོ་བ་རྣམས་ཀྱི་མཆོད་པའི་ཞིང་དུ་གྱུར། བླ་མ་འདི་ཉིད་རྗེ་བཙུན་ཀུན་དགའ་གྲོལ་མཆོག་སྐུ་གཤེགས་རྗེས་ཤངས་ཆོས་ཤིན་ཏུ་ཉེ་བརྒྱུད་ཀྱི་བདག་པོར་གྱུར་ཅིང་། མདོག་ལྷོ་སྐུ་ཕྲེང་རིམ་བྱོན་གྱི་དང་པོར་བརྩི་བ་ཡིན་ལ། དེང་གང་དེའི་སྐུ་ཕྲེང་བཅུ་བཞི་པ་བློ་བཟང་བསྟན་སྐྱོང་གིས་ཕུན་ཚོགས་གླིང་དུ་རྒྱལ་བའི་བསྟན་པ་སྐྱོང་བའི་ཁུར་ཆེན་ཕྲག་ཏུ་བཞེས་མུས་ལགས།
II.2.3.3 Jetsün Taranatha
གསུམ། རྗེ་བཙུན་ཏཱ་ར་ནཱ་ཐ།
རྗེ་བཙུན་ཏཱ་ར་ནཱ་ཐའམ་སྒྲོལ་བའི་མགོན་པོ་ནི། རབ་བྱུང་བཅུ་པའི་ཤིང་ཕག་ལོ་སྟེ་སྤྱི་ལོ1575ལོར་ཁ་རག་འབྲང་གི་ཕུ་སྟེ་དེང་ལྷོ་ཁ་ས་ཁུལ་སྣ་དཀར་རྩེ་རྫོང་ཁ་རག་ཡུལ་ཤོག་འབྲང་ཕུ་གྲོང་ཚོའི་ཁོངས་སུ། རྭ་ལོ་རྡོ་རྗེ་གྲགས་པའི་གདུང་རུས་ལས་རིམ་བཞིན་གྱེས་པའི་རྭ་ཤར་ནུབ་གཉིས་ལས་ཤར་པ། གྲུབ་ཐོབ་དབུས་སྨྱོན་པའི་ལུང་བསྟན་བཞིན་ཡབ་རྣམ་རྒྱལ་ཕུན་ཚོགས་དང་། ཡུམ་རྡོ་རྗེ་བུ་དགའ་གཉིས་ཀྱི་སྲས་སུ་སྐུ་འཁྲུངས། མཚན་སྲི་གཅོད་རྡོ་རྗེར་གསོལ། དགུང་ལོ་གཉིས་ལ་ཕེབས་སྐབས་སྙུང་གཞིས་མནར་བས། འཕགས་ཡུལ་གྱི་བླ་མ་དམ་པ་རྣམས་ཀྱི་སྤྲུལ་པ་ཨ་ཙ་ར་ལྔ་གློ་བུར་དུ་ཕེབས་ཏེ་བྱིན་གྱིས་བརླབས་པས། སྙུང་བ་ལས་གྲོལ། སྐུ་ན་ཆུང་ངུའི་དུས་ནས་ཡི་དམ་གྱི་ལྷའི་ཞལ་གཟིགས་ཤིང་། མངོན་ཤེས་ཐོགས་མེད་མངའ་བས་རྗེ་གྲོལ་མཆོག་གི་སྐུའི་སྐྱེ་བ་ཡིན་པའི་ངེས་ཤེས་ཀུན་ལ་སྐྱེས། སྔོན་གནས་ལེགས་པར་མཁྱེན་པས། སྣ་དཀར་རྩེ་དང་། བྱང་མཁར་རྩེ་སོགས་རིམ་གྱིས་བརྒྱུད་དེ་རྗེ་གོང་མའི་གདན་སར་ཕེབས། ཆོས་ལུང་བྱང་རྩེར་ཀློག་ཡིག་སོགས་སྦྱངས། རྗེ་རྡོ་རིང་པ་དང༌། ལྷ་དབང་གྲགས་པ་གཉིས་ལས་ཟབ་ཆོས་དུ་མ་གསན་པའི་དབུ་ཚུགས། ཐེངས་ཤིག་ཡར་འབྲོག་སྟག་ལུང་དུ་རྣལ་འབྱོར་མའི་ཆོས་གསན་སྐབས་མནལ་ལམ་དུ་རྣལ་འབྱོར་མ་དེའི་ཕྱག་དབུ་ཐོག་ཏུ་བཞག་ནས་རྗེས་སུ་བཟུང་། ཡི་དམ་གྱི་གཙོ་བོར་གྱུར། ཆོས་ལུང་བྱང་རྩེར་སྟག་ལུང་པ་ཀུན་དགའ་བཀྲ་ཤིས་རྒྱལ་མཚན་དཔལ་བཟང་གི་དྲུང་ལས་རབ་ཏུ་བྱུང་། མཁས་མཆོག་བྱམས་པ་ལྷུན་གྲུབ་སློབ་དཔོན་དུ་བསྟེན་ནས་མདོ་ཕྱོགས་ལ་ཐོས་བསམ་དཔྱིས་ཕྱིན་པ་མཛད་པས་ལུང་རིག་སྨྲ་བའི་ཁྱུ་མཆོག་ཏུ་གྱུར། གཞན་ཡང་སྟག་ལུང་པ་ཆེན་པོ། མཁན་ཆེན་ལུང་རིགས་རྒྱ་མཚོ། བླ་མ་བྱམས་པ་ལྷུན་གྲུབ། གྲུབ་མཆོག་ལྷ་དབང་གྲགས་པ། མཁས་གྲུབ་སངས་རྒྱས་ཡེ་ཤེས་སོགས་ལ་རྒྱུད་སྡེ་བཞི་དང་འབྲེལ་བའི་ས་སྐྱའི་ཆོས་སྐོར་ཡོངས་རྫོགས། དཔལ་ཇོ་ནང་བ་དང་། ཞ་ལུ་བ་གཉིས་ཀྱི་ཆོས་སྐོར། འབྲུག་པའི་རྒྱལ་དབང་བཀའ་འབུམ་སོགས་ཆོས་སྐོར་ཡོངས་རྫོགས། ཀརྨ་ཀཾ་ཚང་གི་ཆོས་སྐོར། སྟག་ལུང་པའི་ཆོས་སྐོར་སོགས་གྲུབ་མཐའ་རིས་མེད་ཀྱི་ཆོས་སྐོར་མཐའ་ཡས་པ་གསན།
ལྷག་པར་དུ་ཤངས་པ་བཀའ་བརྒྱུད་ཀྱི་སྨིན་གྲོལ་གདམས་པ་ལག་ཁྲིད་ཞལ་གདམས་དང་བཅས་པ་མ་ལུས་གསན་ཞིང་། ཡི་དམ་ཆོས་སྐྱོང་གི་བསྙེན་སྒྲུབ་སོགས་ཀྱང་ནན་ཏན་གནང་བས་བསྐྱེད་རིམ་ལ་བརྟན་པ་ཐོབ། རྒྱུད་སྡེའི་གཞུང་བཤད་རྒྱ་ཆེན་ཐུགས་སུ་ཆུད། དགུང་ལོ་ཉི་ཤུར་ཉེ་བའི་ཚེ། འདུལ་འཛིན་ཀུན་དགའ་རྒྱལ་མཚན་གྱིས་མཁན་པོ། མཁས་མཆོག་བྱམས་པ་ལྷུན་གྲུབ་པས་སློབ་དཔོན། དགེ་བཤེས་བློ་བཟང་པ་དང་རྗེ་དྲུང་ཀུན་དགའ་སོགས་ཀྱིས་ཁ་སྐོང་མཛད་ནས་བསྙེན་པར་རྫོགས། དེ་རྗེས་ཕྱི་ལྟར་ཉན་ཐོས་ཀྱི་སྤྱོད་པ། ནང་ལྟར་རྒྱལ་སྲས་རྡོ་རྗེ་འཛིན་པ་ཆེན་པོར་གྱུར་ཏེ། བསྟན་པའི་བདག་པོ་མཛད་ནས་བྱང་སྟག་ལུང་། ལྷོ་སྟོན་ཁེབས། སྣེ་སྡོ་པ་རྩེ། ཡར་རྒྱབ། ནུབ་ལ་སྟོད་བར་གྱི་སྡེ་དཔོན་ཆེ་ཕྲ་དང་དགོན་བདག་གྲྭ་རིས་དང་བཅས་པ་ཀུན་གྱི་དད་པའི་ཞིང་མཆོག་ཏུ་གྱུར། སྦྱོར་དྲུག་གི་རྟགས་བཅུ་སོགས་བཤད་ཚོད་དང་མཐུན་པར་ཐུགས་ཉམས་སུ་འཁྲུངས། རྒྱ་གར་གྱི་པཎྜི་ཏ་པུཎྜ་བཛྲ་དང་། བུདྡྷ་གུབྷ་ནཱ་ཐ་སོགས་ལས་རྡོ་རྗེ་ཐེག་པའི་གཞུང་འགྲེལ་མན་ངག་བོད་ཀྱི་བསྲེ་ལྷད་མ་བཞུགས་པ་མང་དུ་གསན། འཕགས་ཡུལ་དུའང་སྙན་གྲགས་ཀྱི་འབྲུག་སྒྲ་ལྡིར། ནི་གུ་ཆོས་དྲུག་ཐུགས་ཉམས་སུ་བསྟར་བའི་དུས་རྨི་ལམ་ཟིན་སྦྱོངས་དང་ཡུལ་སྣང་གཏན་ལ་ཕེབས་པས། ལྐོག་འགྱུར་གྱི་དོན་ལ་མངའ་བརྙེས་པ་སོགས་གསང་ཆེན་རྒྱུད་སྡེ་བྱེ་བའི་བཅུད་ཀྱིས་ཐུགས་ཀྱི་བུམ་བཟང་ཡོངས་སུ་གཏམས། བསམ་སྡིངས་སུ་བཞུགས་པའི་སྐབས་ཞྭ་དམར་སྐུ་ཕྲེང་བཅུ་པ་དབང་ཕྱུག་རྡོ་རྗེ་དང་མཇལ་ནས་བསྟན་པའི་བདག་པོར་དབང་བསྐུར་ཞིང་། བདག་ཆེན་བསོད་ནམས་དབང་པོས་ཀྱང་ས་སྐྱ་པའི་བསྟན་པའི་བདག་པོར་མངའ་གསོལ་བ། ལྷག་པར་དགུང་ལོ་ཉེར་དགུ་པའི་ཐོག་ཇོ་ནང་སྐུ་འབུམ་རྡོ་རྗེ་གདན་དུ་ཀུན་མཁྱེན་དོལ་བུ་བ་དང་མཇལ་ནས་ཇོ་ནང་པའི་བསྟན་པའི་བདག་པོར་མངའ་གསོལ་བ་སོགས། ངེས་པ་དོན་དང་ལྡན་པའི་བསྟན་པ་སྤྱིའི་བདག་པོར་གྱུར། འོན་ཀྱང་ཀུན་མཁྱེན་ཆེན་པོའི་ལུང་བསྟན་དང་། རིན་སྤུངས་སྡེ་པ་ཀརྨ་བསྟན་སྐྱོང་དབང་པོས་སྦྱིན་བདག་མཛད་པ་ལ་བརྟེན་ནས་དཔལ་ཇོ་མོ་ནང་པའི་ལུགས་སྲོལ་གཙོ་བོར་སྐྱོང་བའི་རྟག་བརྟན་ཕུན་ཚོགས་གླིང་ ཕྱག་བཏབ། དེ་ནས་བཟུང་རྟག་བརྟན་སྤྲུལ་སྐུ་ཞེས་སུ་ཡང་གྲགས། གནས་དེར་གཙུག་ལག་ཁང་ཉི་ཤུ་རྩ་གྲངས། གྲྭ་ཁང་བརྒྱ་ཕྲག་ལྕགས་རི་དང་བཅས་པ་དང་། སངས་རྒྱས་རབས་བདུན་སྐུ་ཚད་ཤིན་ཏུ་ཆེ་བ་གསེར་ཟངས་ལས་གྲུབ་པ། བྱམས་ཆེན་ཐོག་ཚད་གཉིས་ལྡན་གསེར་ཟངས་ལས་གྲུབ་པ་སོགས་རྟེན་དང་བརྟེན་པ་མཐའ་ཡས་པ་བཞེངས། དགུང་ལོ་ལྔ་བཅུ་རྩ་བདུན་ཐོག་ཡུམ་སྐུ་ནོངས་པར་གྱུར་པའི་དགོངས་རྫོགས་ལ་ཡང་རྟེན་བཞེངས་རྒྱ་ཆེར་གྲུབ། དགོན་གནས་འདིར་རྨོག་ལྕོག་པ་དཔོན་སློབ་དང་། གཙང་ཕྱོགས་ཀྱི་བླ་མ་ཆེ་ཕྲ། ལ་སྟོད་ལྷོ་བྱང་གི་བླ་མ་གྲྭ་རིས། སྡེ་དཔོན་སྐྱ་མི་སོགས་ལ་ཆོས་དང་ཟང་ཟིང་གཉིས་ཀའི་བཀའ་དྲིན་ལེགས་པར་བསྩལ། སོག་པོ་ཁལ་ཁའི་ཡུལ་ཁ་བོང་དུ་ལོ་གྲངས་ཉི་ཤུའི་རིང་བསྟན་པ་སྤེལ་ཞིང་། དགོན་གནས་དུ་མ་བཏབ། ཇོ་ནང་པའི་ལུགས་ཉམས་གསོ་མཛད། སོག་ཡུལ་དུ་རྗེ་བཙུན་དམ་པ་ཞེས་སུ་གྲགས། རབ་བྱུང་བཅུ་གཅིག་པའི་ཤིང་ཁྱི་སྤྱི་ལོ1634ལོར་འདས། དེའི་ཡང་སྲིད་མོང་གོལ་རྒྱལ་པོ་ཐུ་ཤེ་ཐུ་ཧན་གྱི་སྲས་སུ་འཁྲུངས། དེ་ནས་བཟུང་དབུས་གཙང་ཁུལ་དུ་ཇོ་ནང་པའི་ལུགས་འཛིན་པའི་སྡེ་རིམ་གྱིས་ཉམས་པར་གྱུར། དེ་ལྟར་རྗེ་བཙུན་དམ་པ་འདི་ཉིད་ལ་སྤྱིར་ཆོས་སྒོ་མཐའ་ཀླས་ཐོབ་པ་ལས། ཁྱད་པར་དཔལ་ལྡན་ཤངས་པའི་ཆོས་སྐོར་དབང་ལུང་ཁྲིད་གསུམ་དང་རླུང་གནད་འཁྲུལ་འཁོར་སོགས་ཉམས་ལེན་གྱིས་མཐིལ་དུ་བཟུང་བས། ཤངས་བརྒྱུད་བསྟན་པའི་ཉག་ཐག་ཆེས་ཕྲ་བའི་དུས་རབས་བཅུ་དྲུག་པའི་མཇུག་དང་བཅུ་བདུན་པའི་སྟོད་དུ་ཤངས་ཆོས་གདམས་པའི་ཉིན་བྱེད་ཀྱིས་གངས་ལྗོངས་ས་ཡི་མཐའ་གྲུ་ཀུན་སླར་ཡང་ཁྱབ་པར་མཛད་ལ། རྗེ་འདི་ཉིད་ཀྱིས་གྲུབ་མཐའ་རིས་མེད་ཀྱི་བསྟན་བཅོས་རི་བོའི་གཏོས་དང་མཉམ་པ་བརྩམས་པ་ལས། དཔལ་དུས་ཀྱི་འཁོར་ལོའི་ཆོས་འབྱུང༌། གཞན་སྟོང་དབུ་མའི་རྒྱན། རྒྱ་གར་ཆོས་འབྱུང་། ནི་གུ་ལུགས་ཀྱི་བདེ་མཆོག་ལྷ་ལྔའི་མངོན་རྟོགས་དང་དབང་ཆོག །ནི་གུའི་འཁྲུལ་འཁོར་རྩ་འགྲེལ། མགོན་པོ་ཕྱག་དྲུག་པའི་སྒྲུབ་ཐབས་འཕྲིན་ལས་གཏེར་མཛོད་སོགས་གསུང་འབུམ་པོད་ཆེན་བཅུ་བདུན་གྱི་པར་ཤིང་ཆ་ཚང་སྔར་གྱི་དུས་ཤིག་བསམ་གྲུབ་རྩེ་ནས་དགའ་ལྡན་ཕུན་ཚོགས་གླིང་གི་པར་ཁང་དུ་སྤྱན་འདྲེན་མཛད་པ་ད་ལྟ་ཕལ་མོ་ཆེ་བཞུགས་སུ་གསོལ་ཡོད། ཁོང་གིས་ས་དྭགས་ཇོ་ཤངས་སོགས་ཀྱི་གདམས་པ་དུ་མས་སྤྲུལ་སྐུ་སངས་རྒྱས་རྒྱ་མཚོ། མཁས་དབང་ཡེ་ཤེས་རྒྱ་མཚོ། མཁན་རིན་ཆེན་རྒྱ་མཚོ། མཁས་གྲུབ་བློ་གྲོས་རྣམ་རྒྱལ། སྒམ་པོ་སྤྲུལ་སྐུ། ཆོས་རྗེ་ངག་དབང་པ། བླ་མ་ཆུ་བོ་ཆུང་བའི་སྐུ་སྐྱེས། མཁན་ཀུན་དགའ་བཀྲ་ཤིས་རྒྱལ་མཚན། སྤྲུལ་སྐུ་ངག་གི་དབང་པོ། དྲེ་བོ་སྤྲུལ་སྐུ། ཞབས་དྲུང་བླ་མའི་དྲུང་། ཆོས་རྗེ་རིན་སྟེངས་པ། དུས་འཁོར་ཤར་ཆེན་པ། ཆོས་རྗེ་ལྷ་འོ་པ། དགེ་སློང་སྙིང་པོ་མཐའ་ཡས། བྱམས་པ་ཡོན་ཏན་མགོན་པོ། ངག་དབང་ཀུན་དགའ་བསོད་ནམས། ཀུན་དགའ་འཕྲིན་ལས་དབང་མོ། གཙང་གི་རྒྱལ་སྲས་ཀུན་དགའ་བསྟན་པའི་རྒྱལ་མཚན་སོགས་བསྟན་པའི་རྩ་ལག་ཏུ་འོས་པ་འབོར་ཆེན་སྨིན་པར་མཛད།
ལྷག་པར་རྗེ་བཙུན་ཡེ་ཤེས་རྒྱ་མཚོས་ཀུན་མཁྱེན་ཏཱ་ར་ནཱ་ཐའི་དྲུང་ནས་ཇོ་ནང་དང་ཤངས་པའི་གདམས་པ་སོགས་རྫོགས་པར་གསན། ཟླ་བ་དྲུག་གི་རིང་འབད་པའི་མཐུས་མཚམས་སྦྱར་ཏེ་བསྒྲུབས་པས་ནི་གུའི་གསེར་ཆོས་ལྔ་ཡི་གྲུབ་པའི་རྒྱལ་སར་གཤེགས། ཁོང་གིས་ཇོ་ནང་ལུགས་ཀྱི་ཤངས་པའི་ཆོས་སྐོར་རྣམས་བྱམས་པ་ཡོན་ཏན་མགོན་པོས་གཙོས་པའི་སློབ་མ་མང་པོར་གནང་བས། གོ་འཕང་མཆོག་བརྙེས་ཀྱི་སློབ་མ་བརྒྱ་བྱུང༌། དགུང་ལོ་བདུན་ཅུར་ཕེབས་སྐབས་སྐུ་མྱ་ངན་ལས་འདས། དེ་ལྟར་ཤངས་པའི་གདམས་པ་རྣམས་རྗེ་བཙུན་ཡེ་ཤེས་རྒྱ་མཚོས་བྱམས་པ་ཡོན་ཏན་མགོན་པོ། དེས་འཇའ་ལུས་མགོན་པོ་དཔལ་འབྱོར། དེས་གྲུབ་མཆོག་མགོན་པོ་གྲགས་པ། དེས་ཁྱབ་བདག་མགོན་པོ་རྣམ་རྒྱལ། དེས་ཀཿཐོག་རིག་འཛིན་ཚེ་དབང་ནོར་བུ་ལ་བརྒྱུད་པའོ།

II.2.4 - The masters of Jakpa and Samding
།བཞི་པ། འཇག་བསམ་བརྒྱུད་པའི་བླ་མ་སྐོར་ཅིག
དེ་ཡང་ཤངས་པ་བཀའ་བརྒྱུད་ཀྱི་རིན་ཆེན་བདུན་བརྒྱུད་སྔ་མ་མཇུག་སྒྲིལ་རྗེས། འགྲོ་མགོན་སངས་རྒྱས་སྟོན་པའི་མཆོག་འགྱུར་གྱི་སློབ་མ་མཁས་གྲུབ་གཙང་མ་ཤངས་སྟོན་གྱིས་འཇིག་ཏུ་བཞུགས་ནས་ཤངས་པའི་གདམས་པ་དེ་རྣམས་མཁས་བཙུན་རྒྱལ་མཚན་འབུམ་དང་། ཁྱུང་པོ་ཚུལ་ཁྲིམས་མགོན་པོ་སོགས་ལ་བརྒྱུད་པར་འཇག་ལུགས་ཞེས་སུ་འབོད། འདི་ལའང་འཇག་པ་སྟོད་སྨད་བར་གསུམ་བྱུང་བ་ལས། སྟོད་དུ་མུས་ཆེན་རྒྱལ་མཚན་དཔལ་བཟང་གིས་མུས་ཕྱོགས་དང་། ལ་ཆེ་བ་ནམ་མཁའ་རྒྱལ་མཚན་གྱིས་ས་ཆ་གཞན་འགར་དར་བར་མཛད་པ། སྨད་དུ་ཆོས་རྗེ་བྱམས་པ་དཔལ་གྱི་སློབ་མ་གོག་སྟོན་ནམ་མཁའ་རྒྱལ་པོ་སོགས་ཀྱིས་དར་བར་མཛད་པ། བར་དུ་མཁས་བཙུན་རྒྱལ་མཚན་འབུམ་གྱིས་འཇག་གིས་གདན་ས་མཛད་པ་བཅས་སོ། འཇག་པ་གདན་ས་བརྒྱུད་པར་གྲགས་པ་ལས་འཕྲོས་ཏེ། བ་བོང་བ་རྡོ་རྗེ་རྒྱལ་མཚན་སོགས། བ་བོང་ལུགས་སུ་ཤངས་ཟུར་ཁང་པ་བསོད་ནམས་བཟང་པོ། གུང་དཀར་བ། བཤོངས་ཅན་པ། ཐོབ་རྒྱལ་བྲག་ནག་པ། གེར་བྲ་དཀར་པ། ཡང་དགོན་དུ་རྨོག་ལྕོག་པ་ཕྱི་མ་ཀུན་འོད་ཀྱིས་བསྟན་པ་དར་ཞིང་རྒྱས་པ་མཛད། འགྲོ་མགོན་སངས་རྒྱས་སྟོན་པའི་སློབ་མ་བསམ་སྡིངས་པ་གཞོན་ནུ་གྲུབ་ཀྱིས་མྱང་སྨད་བསམ་སྡིངས་བཏབ་ནས་གསེར་གླིང་པ་བཀྲ་ཤིས་དཔལ། དེས་བྲག་སྒོ་ཆེ་བ་རྡོ་རྗེ་དཔལ། དེས་ཆོས་སྒོ་བ་ཆོས་དཔལ་ཤེས་རབ་སོགས་ལ་བརྒྱུད་པ་ལ་ནི་གུ་བསམ་སྡིངས་ལུགས་སམ་བསམ་སྡིངས་བརྒྱུད་པར་གྲགས། ཕྱིས་བསམ་སྡིངས་ཀྱི་བརྒྱུད་པ་དེ་ཙམ་གྱི་དར་རྒྱས་བྱུང་མེད་ཀྱང་། འཇག་པའི་སློབ་བརྒྱུད་ནས་བརྒྱུད་པ་འདི་ཁོ་ན་དར་ཞིང་རྒྱས་པར་འཕེལ། འགའ་ཞིག་གིས་གྲུབ་ཆེན་ཐང་སྟོང་རྒྱལ་པོ་དང་། རས་ཆེན་དཔལ་འབྱོར་བཟང་པོ་གཉིས་ནས་བརྒྱུད་པའི་ལུགས་འདི་ཉིས་ཀྱང་འཇག་བསམ་གཉིས་ཀའི་ཆར་གཏོགས་པར་བརྩི། དེ་ལྟར་འཇག་བསམ་གཉིས་ཀྱི་བརྒྱུད་པའི་བླ་རབས་ཡོད་རྒུ་འབྲི་བར་མི་ལངས་ཀྱང༌།
II.2.4.1 Gyeltsen Bum
གཅིག མཁས་བཙུན་རྒྱལ་མཚན་འབུམ།
མཁས་བཙུན་རྒྱལ་མཚན་འབུམ་ནི་ཁོ་ལམ་རྩྭ་ཐང་ དུ་ཡབ་ཕྱུག་པོ་ཆོས་སྐྱོང་བཙན། ཡུམ་དབྱངས་མོ་སྟེ། ཡབ་ཡུམ་འབྱོར་པ་དང་ལྡན་པའི་སྲས་སུ་རབ་བྱུང་བཞི་པའི་ལྕགས་བྱ་སྤྱི་ལོ1261ལོ་ཙམ་ལ་སྐུ་འཁྲུངས། གདུང་རུས་ཤུད་དགྱེ། མནོ་ཤེས་ཙམ་ནས་འགྲོ་འཆག་ཉལ་འདུག་ཐམས་ཅད་དུ་མ་ཎི་པདྨེ་བགྲང་བ་ཞིག་བྱུང་། ཡབ་ཀྱིས་འདི་སྔོན་གྱི་ལས་འཕྲོ་སད་པར་སྙམ་ནས་དྲིན་ཅན་རིག་པའི་དྲུང་དུ་ཐུགས་རྗེ་ཆེན་པོའི་རིགས་གཏད་དང་མ་ཎིའི་ལུང་ཞུར་བཅུག །དེ་ཡང་གསོལ་འདེབས་རྣམ་གྲོལ་སྒྲ་དབྱངས་སུ་གྲུབ་རིགས་ཐིག་ལེ་སྤྲུལ་པའི་སྐུ་རུ་བསྟན། མ་བསླབ་ཡི་གེ་རང་བརྡོལ་བློ་རྩལ་རྒྱས། །གཟིགས་པ་ཙམ་གྱིས་ཆོས་ཀུན་ཐུགས་ལ་འཁྲུངས། །གང་འདུལ་སྒྱུ་འཕྲུལ་སྟོན་ལ་གསོལ་བ་འདེབས་ཞེས་འཁོད་པ་ལྟར་དགུང་ལོ་དྲུག་བདུན་ནས་ཀློག་སློབ་ཏུ་བྱོན་པའི་སྐབས་ཤིག །ཀློག་ཕྲུག་པ་གཉིས་འཐབ་པས་གསེར་འོད་དམ་པའི་རྒྱ་གར་སྐད་ཀྱི་ཤོག་བུ་རལ་པ་སློབ་དཔོན་གྱིས་མཁྱེན་པར་དོགས་ནས། མཁས་བཙུན་རྒྱལ་མཚན་འབུམ་གྱིས་ཆོས་དཔེ་དེ་བཞིན་ཡི་གེ་རྣམས་བསབས་པས། སྟོན་པ་རིན་ཆེན་མཛེས་ཀྱིས་མ་བསླབས་པའི་ཡི་གེ་རང་བྱུང་དུ་ཤེས་པ་ཁྱོད་སྤྲུལ་པའི་སྐུ་ཞིག་འདུག །འོ་སྐོལ་ལ་ཕ་མེས་ཀྱང་གྲུབ་ཐོབ་སེང་གེ་གྲགས་དང་། ཤུད་དགྱེ་སྟོན་པ་ལ་སོགས་གྲུབ་ཐོབ་མང་པོ་བྱུང་། ཁྱེད་ཀྱང་འདི་འདྲ་འོང་བར་འདུག་གསུངས། དེ་ནས་འཇམ་དཔལ་མཚན་བརྗོད་དང་། ཤེར་སྙིང་། སྒྲོལ་མ། གཙུག་གཏོར་ལ་སོགས་པ་གཟིགས་པ་ཙམ་གྱིས་མཁྱེན་ནས་ནར་མར་འདོན་ནུས། དགུང་ལོ་དགུ་ལ་ཁོང་རྒྱང་དུ་བླ་མ་དབོན་གྲགས་པ་ལ་མཚན་བརྗོད་དང་སྒྲོལ་མ་ལ་སོགས་པའི་དབང་ཞུས།
དགུང་ལོ་བཅུ་གཉིས་པ་ལ་བླ་མ་ཤར་པ་ཀུན་དགའ་སེང་གེ་དང་བླ་མ་སྟེང་ཁང་པ་གཉིས་ལས་སངས་རྒྱས་ཀྱི་བསྟན་པ་ལ་རབ་ཏུ་བྱུང༌། བླ་མ་སྟེང་ཁང་པ་དང་སློབ་དཔོན་ཀུན་དགའ་འབུམ་གཉིས་ལས་ཕར་ཕྱིན་གསན་པས་ལོ་གསུམ་ལ་ཚིག་དོན་མ་ལུས་ཐུགས་སུ་ཆུད། དེ་རྗེས་ས་སྐྱར་བྱོན་ནས་བླ་མ་འཇམ་དབྱངས་པ་ལས་བརྟག་གཉིས་གསན། སྒོས་སློབ་དཔོན་ཀུན་དགའ་དཔལ་ལ་བཅོལ་ནས་ས་ལུགས་ཀྱི་ལག་ལེན། དབྱངས་རྟག་གཉིས་ཀྱི་འཛུགས་ཁྲིད་དང་བཅས་པ་མཁས་པར་བསླབས་ཤིང༌། ཤངས་ཀྱི་སྲོག་ཤིང་དུ་ཡུན་རིང་བཞུགས་ནས་བརྟག་གཉིས་ཀྱི་བཤད་པ་མཛད་པ་སོགས་ཆོས་འཆད་ཀྱི་ལམ་བཟང་ལ་རྩེ་གཅིག་ཏུ་གཞོལ། དེ་ནས་བླ་མ་རིན་ཆེན་རྒྱལ་མཚན་གྱིས་རྡོ་རྗེ་སྙིང་འགྲེལ་དང་། བདེ་མཆོག་རྩ་རྒྱུད། འཁོར་ལོ་སྡོམ་པའི་རྒྱུད་ཆུང་བསམ་མི་ཁྱབ་པ། དུས་འཁོར་བསྡུས་རྒྱུད། སྦྱོར་དྲུག་གི་འགྲེལ་པ་སྦལ་པ་མིག་འབྱེད། གསུང་རབ་རིན་ཆེན་བསྡུས་པ་ལ་སོགས་དབང་དང་སྒྲུབ་བརྒྱུད་མང་དུ་གནང་། སྣར་ཐང་པའི་མཁན་པོ་སྨོན་ཚུལ་ལ་དྲིལ་བུ་སྐོར་གསུམ་རྩ་འགྲེལ་དང་བཅས་པ། ཀུན་ཏུ་བཟང་པོའི་མཆོད་སྤྲིན། རབ་གནས་འོད་གསལ། གཏོར་མ་ཆ་གསུམ་ལ་སོགས་པའི་སྒྲུབ་སྐོར་མང་པོ་དང་། བདེ་བ་ཅན་པའི་བླ་མ་ཡེ་ཤེས་མགོན་ལ་འདུལ་བ་ལུང་སྡེ་བཞི། །རྒྱུད་འབུམ། འཕགས་པ་སྡུད་པ། རྣམ་འཇོམས། འོད་ཟེར་ཅན་སོགས། སློབ་དཔོན་ཟླ་འོད་ལ་བཟང་སྤྱོད། སྡོམ་གསུམ། ལམ་འབྲས་སོགས། བླ་མ་ཤར་པ་ཀུན་དགའ་སེང་གེ་ལ་བསྟན་བཅོས་རིན་ཆེན་སྒྲོན་མེ། ཨཎྜི་ཕྱིར་བཟློག །ཤེར་སྙིང་རྒྱ་ཆེར་འགྲེལ། བརྒྱད་སྟོང་དོན་བསྡུས་སོགས། བླ་མ་བླ་ཆེན་ལ་ངན་སོང་སྦྱོང་རྒྱུད་ཞལ་བཅུ་གཉིས་ཀྱི་དབང་བསྐུར། འཇམ་དཔལ་ཨ་ར་པ་ཙའི་དབང་བསྐུར། སྤྱན་རས་གཟིགས་དམར་པོའི་རིགས་གཏད། བླ་མ་ནག་པ་ཀུན་སྙིང་ལ་ལམ་འབྲས་ཀྱི་ཁྲིད་ལམ་སྐོར་དང་བཅས་པ་མ་ཚང་བ་མེད་པ། བླ་མ་མན་ལུང་པ་རཏྟཱ་ཤཱི་ལ་འཇིགས་བྱེད་ཀྱི་རྒྱུད་རྟོགས་པ་བདུན་པ། རྭ་ལོ་རྡོ་རྗེ་གྲགས་ཀྱིས་མཛད་པའི་ཡིག་སྣང་། རྭ་ཡེ་ཤེས་སེང་གེས་མཛད་པའི་བསྙེན་སྒྲུབ་ལག་ལེན་སོགས་འཇིགས་བྱེད་ཀྱི་སྐོར་རྣམས་དང་། གདོང་དྲུག་གི་མངོན་རྟོགས། གཤེད་དམར་གྱི་སྐོར། དམུགས་འཛིན་འཚོལ་བའི་སྒྲུབ་ཐབས་ལས་ཚོགས་སོགས་ཀྱི་གདམས་ངག་རབ་འབྱམས་རྒྱ་མཚོའི་གླིང་ནས་ཐོས་བསམ་གྱི་ནོར་བུ་ཇི་སྙེད་ཅིག་བཙལ།
།ཐེངས་ཤིག་མཁས་གྲུབ་ཤངས་སྟོན་འཇག་ཏུ་བཞུགས་པ་ལ། མོས་གུས་དྲག་པོ་སྐྱེས་ནས་མཇལ་དུ་ཕེབས། བླ་མས་ད་རེས་ཆོས་འབྲེལ་ཙམ་བྱ་ཡིས། མྱུར་དུ་རྟེན་འབྲེལ་འགྲིག་ནས་འོང་གསུངས། དེ་རྗེས་ས་སྐྱར་བྱོན་ནས་གདན་སའི་ཆོས་འཆད་ཀྱང་ཡུན་རིང་དུ་མཛད། བླ་མ་བདག་ཉིད་ཆེན་པོ་ཡང་མཉེས་པར་བྱུང་། ས་སྐྱ་ནས་ཤངས་སུ་ཕྱིར་ལོག་ཕེབས་རྗེས་ཐོག་མར་བཀྲས་རྫོང་དུ་བླ་མ་ཤངས་སྟོན་ལས་ཕྱག་རྒྱ་ཆེན་པོའི་གདམས་པ་ཞུས། དེ་ནས་བླ་མ་ཤངས་སྟོན་གྱིས་ཆོས་དྲུག་གི་དབང་བསྐུར་དང་། ལུས་སེམས་འཆི་མེད་ལ་སོགས་པའི་ཟབ་ཆོས། སྒྱུ་མ་ལམ་རིམ་ལ་སོགས་པའི་རྒྱབ་ཆོས། བདེ་མཆོག་ལྷ་ལྔའི་དབང་སྒྲུབ་ཐབས་དང་བཅས་པ། བཀའ་ལུང་མན་ངག་ཞལ་བཞེས་དང་བཅས་པ། ཡེ་ཤེས་མགོན་པོ་ཕྱག་དྲུག་པའི་ཕྱི་ནང་གི་དབང་བཀལ། སྐྱེར་སྒང་ལུགས་ཀྱི་ཐུགས་རྗེ་ཆེན་པོ་དང་རྟ་མགྲིན་གསང་སྒྲུབ། ལུས་འཆི་མེད་ཀྱི་བཀའ་འཕྲུལ་འཁོར་ལག་ལེན་དང་བཅས་པ། གཅོད་བཀའ་བརྒྱུད། ལམ་འབྲས་ཞ་མ་ལུགས་ཀྱི་ཆོས་སྐོར། ཐེག་ཆེན་བློ་སྦྱོང་ལ་སོགས་པ་མང་དུ་གནང་། མཐར་རྣམ་ཐར་བདུད་རྩིའི་ཆུ་རྒྱུན་ལས་རིན་པོ་ཆེ་སྣ་ལྔ་ལས་བྱས་པའི་དབུ་རྒྱན་གཅིག་ངའི་མགོ་ལ་བསྐོན་ནས་བརྒྱུད་པ་མི་ཉམས་པར་བྱ་བའི་ཕྱིར། དབང་ཞུ་མགོ་ལ་སྐོན་པ་ཡིན་གསུངས་ཞེས་འཁོད་པ་ལྟར། བླ་མ་ཤངས་སྟོན་གྱིས་མཁས་བཙུན་རྒྱལ་མཚན་འབུམ་ཉིད་ཆིག་བརྒྱུད་གདམས་པའི་བརྒྱུད་འཛིན་དུ་བསྐོས། དེ་ནས་ལྟ་ལུངས་སུ་བྱོན་ནས་ལོ་གསུམ་གྱི་བར་དུ་སྒྲུབ་པ་མཛད། ཡུལ་དེའི་གཞིས་བདག་མོ་དེས་ཀྱང་ཆོས་ཞུ་བ་དང་མཐུན་རྐྱེན་སྒྲུབ་པ་སོགས་གུས་པའི་ཚུལ་མང་དུ་བསྟན། སློབ་དཔོན་འདི་ཉིད་ཀྱིས་ཁྲོ་མོ་ཆུ་མིག་དང་བུ་ཡུག་གི་གཡའ་རི་སྒོ་མོ། དེ་བཞིན་ས་སྐྱའི་དུར་ཁྲོད་དང་ལྷ་སའི་རྡོ་རིང་ལ་སོགས་པའི་གཉན་ཁྱོད་གང་དུ་ཕྱིན་ཀྱང་གཅོད་མ་ཆོད་པ་དང་། ལྷ་འདྲེ་དམ་ལ་མ་ཐོགས་པ་མ་བྱུང་གསུངས། བླ་མ་ཤངས་སྟོན་གྱི་གསུང་བཞིན་འཇག་ཆུང་དུ་ཡུན་རིང་བཞུགས་ནས་འགྲོ་དོན་བསྐྱངས། ལྷག་པར་དུ་འཇག་ཆེན་གྱི་བྲག་ཁུང་འོག་མར་གཞན་གྱི་ཟས་མི་ཟ་བར་དམ་བཅས་ནས་ལོ་བཅུ་གསུམ་སྒྲུབ་པ་མཛད། གཉིད་ཅུང་ཟད་ཤོར་བ་དང་། སློབ་དཔོན་རྒྱལ་མཚན་འབུམ་ལོངས་ལ་དགེ་སྦྱོར་གྱིས་ཟེར་བ་དང་། གསོལ་འདེབས་ཀྱི་སྒྲ་དི་རི་བ་དང་། འགྲོ་དོན་གྱིས་ཟེར་བའི་དཔའ་བོ་མཁའ་འགྲོའི་ལུང་བསྟན་མང་པོ་བྱུང་། ཡི་དམ་ལྷ་ཚོགས་ཀྱི་ཞལ་དང་། སངས་རྒྱས་ཀྱི་ཞིང་ཁམས། རིགས་དྲུག་གནས་རིས་སོགས་གསལ་བར་གཟིགས། བླ་མ་ཤངས་སྟོན་སྐུ་གཤེགས་རྗེས་བླ་མའི་གཤེགས་རྫོངས་ཀྱི་དཀར་མེ་དང་། འབུལ་སྐལ་སྐྱེལ་བར་ལྷ་ས་དང་སྐྱེར་སྒང་། རི་གོང་སོགས་སུ་བྱོན། དེའི་དུས་སུ་ཀརྨ་སྐུ་ཕྲེང་གསུམ་པ་རང་བྱུང་རྡོ་རྗེའི་དྲུང་ནས་སྐུ་གསུམ་ངོ་སྤྲོད། བསམ་གཏན་མཐུན་འཇོག །རླུང་སེམས་དབྱེར་མེད། རྫོགས་ཆེན་སྙིང་ཏིག་ལ་སོགས་པ་མང་དུ་ཞུས། བླ་མ་མངའ་རིས་པ་སངས་རྒྱས་ཡེ་ཤེས་ལ་གཤེད་དམར་གྱི་རྒྱུད་ལེའུ་བཅུ་དགུ་པ། གཤེད་དམར་ལྷ་ལྔ། སྒྲུབ་ཐབས་མངོན་རྟོགས་དང་བཅས་པ། གྲུབ་རྒྱལ་མའི་ཚེ་སྒྲུབ། རྟ་མགྲིན་ནག་པོ། འཁོར་ལོ་ཆེན་པོའི་སྒྲུབ་ཐབས་དང་བཅས་པ་མང་དུ་ཞུས། བླ་མ་མང་མཁར་བ་རིན་ཆེན་མགོན་ལ་རྡོ་རྗེ་ཕྲེང་བ། རྣལ་འབྱོར་རྫོགས་ཕྲེང་། འོད་ཀྱི་སྙེ་མ། བདེ་མཆོག་ནག་པོ་བའི་སྒྲུབ་ཐབས། ས་སྐྱ་པ་ནས་བརྒྱུད་པའི་མཻ་ཏྲི་མཁའ་སྤྱོད། ནཱ་རོ་མཁའ་སྤྱོད་ལ་སོགས་པ་དང་། དིང་རི་གླང་འཁོར་དུ་བྱོན་ནས་བླ་མ་ཟུར་ཕུག་པ་ལ་ཕྱག་ན་རྡོ་རྗེ་ཨུ་ཙའི་རྗེས་གནང་། མངོན་རྟོགས་ཧཱུྃ་ཆོས་གསུམ་དང་བཅས་པ། བླ་མ་ཁྲ་པ་ལ་རི་ཆོས་ཀྱི་སྐོར་མ་ལུས་པ། གཟེར་ལྔ། གནད་ལྔ། ཕྱག་རྒྱ་ཆེན་པོ་གམ་ག་མ། ཡི་གེ་བཞི་པ་ལ་སོགས་པ། བླ་མ་བྲག་ནག་པ་ལ་རྒྱུད་སྡེ་ལྔའི་དབང་སྒྲུབ་ཐབས་དང་བཅས་པ། མཁའ་འགྲོ་མ་ཡེ་ཤེས་གསལ་ལ་སྡེ་འཆའི་ལུང་སོགས་ཞུས། དེ་ལྟར་ཁོང་གིས་རྒྱུད་ལུང་མན་ངག་མཚན་ཉིད་ལ་སོགས་པའི་གདམས་པ་བསམ་གྱིས་མི་ཁྱབ་པ་གསན་བཞེས་གནང་ནས་ཐུགས་རྒྱུད་རྒྱ་མཚོའི་གཏིང་ཐམས་ཅད་ཡོན་ཏན་གྱི་ནོར་བུས་ཡོངས་སུ་གང་བར་མཛད། དེ་ནས་བླ་མའི་གསུང་བཞིན་འཇག་ཆུང་དུ་ཡུན་རིང་བཞུགས་ནས་འགྲོ་དོན་སྐྱོང་བའི་སྐབས་ཤིག་ཐུགས་ཅུང་མ་ཚིམས་པར་དབེན་གནས་ཙ་རི་ལྟ་བུ་ཞིག་ཏུ་འགྲོ་སྙམ་སྟེ་ཕེབས་ཀྱང་། ཁ་རག་སྙིང་གོང་དུ་བཞུགས་པའི་ནུབ་མོ་མཁའ་འགྲོ་ཆོས་སྐྱོང་དུ་མ་བྱོན་ནས། བླ་མའི་གདན་ས་བཞག་སྟེ་གར་འགྲོ། ཡར་ལོག་ལ་བླ་མའི་གདན་ས་བཟུང་། ཆོས་བརྒྱུད་སྐྱོངས། འགྲོ་དོན་ལས་བསོད་ནམས་ཆེ་བ་མེད་པས་འགྲོ་དོན་གྱིས་ཞེས་གསུངས་པ་ལྟར་ལྷ་ས་བསྐོར་ནས་ཡར་ལོག་ཕེབས།
དེ་ཡང་གསོལ་འདེབས་རྣམ་གྲོལ་སྒྲ་དབྱངས་ལས་རྩ་གསུམ་གནང་བ་ཇི་བཞིན་གདམས་ངག་རྣམས། །ཡི་གེར་བཀོད་པས་ཐུགས་བསྟན་ཇི་སྲིད་བར། །སྒྲུབ་བརྒྱུད་སྙིང་པོ་རྒྱུན་མི་ཆད་མཛད་པ། བཀའ་དྲིན་བསམ་ལས་འདས་ལ་གསོལ་བ་འདེབས་ཞེས་འཁོད་པ་ལྟར། མཁས་བཙུན་ཆེན་པོ་འདི་ཉིད་ཀྱིས་བླ་མ་ཤངས་སྟོན་གྱི་དྲུང་དུ་ཆོས་དྲུག་ལ་ཁྲིད་ཡིག་མཛད་པར་ཞུས་པས། ང་རྒྱས་པ་ཡིན། ཁྱོད་ཀྱིས་བྲིས་ཤིག་གསུངས་ནས་ཆོས་དྲུག་ལ་ལུང་འདྲེན་དང་བཅས་པའི་ཁྲིད་ཡིག་ཅིག་མཛད་པ་དེ་ད་ལྟ་ཡང་མཇལ་དུ་ཡོད་པའི་ཆོས་དྲུག་གི་ཁུངས་དཔེ་ཚད་ལྡན་ཞིག་ཡིན། གཞན་ཡང་ཟབ་ཆོས་རྣམས་ཀྱི་ཁྲིད་ཡིག་དང༌། ལྷ་ལྔ་ལ་སོགས་པའི་མངོན་རྟོགས། རྒྱུད་སྡེ་ལྔའི་དཀྱིལ་མཆོག་ལ་སོགས་པའི་གསང་སྔགས་ཟབ་དོན་རྣམས་ཀྱི་ཡིག་ཆ་མང་དག་ཅིག་བླ་མ་དང་མཁའ་འགྲོ་ཆོས་སྐྱོང་རྣམས་ཀྱིས་དངོས་སམ་རྨི་ལམ་དུ་ལུང་བསྟན་པ་བཞིན་མཛད། སྤྱིར་ཤངས་པའི་ཆིག་བརྒྱུད་ཀྱི་བཀའ་རྒྱ་གྲོལ་རྗེས་མཁས་གྲུབ་རྣམ་གསུམ་དང་། ལྷག་པར་དུ་དེ་དག་ལས་མཁས་བཙུན་རྒྱལ་མཚན་འབུམ་གྱིས་ཤངས་པའི་སྙན་བརྒྱུད་དང་ཟབ་གསང་གི་གདམས་པ་འབོར་ཆེན་ཡི་གེར་བཀོད་པ་དེས་སྒྲུབ་བརྒྱུད་ཀྱི་བསྟན་པ་དར་བ་དང་། ཡང་སྒོས་དཔལ་ལྡན་ཤངས་པའི་ལུགས་བཟང་མ་ཉམས་བརྒྱུད་འཛིན་དང་། དར་རྒྱས་རྒྱ་ཁྱབ་ཏུ་འགྲོ་བར་བསམ་གྱིས་མི་ཁྱབ་པའི་ལེགས་སྐྱེས་ཕུལ་ཡོད།
མཁས་བཙུན་ཆེན་པོ་འདིའི་ཕྱི་ནང་གི་ཡོན་ཏན་རྒྱ་མཚོའི་ཕ་མཐར་སོན་པ་སྟེ། དཔའ་བོ་མཁའ་འགྲོའི་ལུང་བསྟན་ཐོབ་པ། ཡི་དམ་ལྷ་ཡིས་ཞལ་གཟིགས་གནང་བ་སོགས་ཀྱིས་སྐུ་ཚེའི་འཕྲིན་ལས་ཀྱི་འབྲས་བཟང་ཡོངས་སུ་སྨིན། སྐུ་འདའ་ཁར་དགོན་གནས་དབོན་པོ་བྱམས་པ་དཔལ་ལ་གཏད་ནས། རྟག་འཛིན་ཅན་གྱི་ལོག་རྟོགས་བཟློག་པ་དང་། ལེ་ལོ་ཅན་རྣམས་ཆོས་ལ་བསྐུལ་བ། ཞིང་ཁམས་གཞན་དུ་གདུལ་བྱ་ཆེར་དགོངས་པ་སོགས་ཀྱིས་བླ་མའི་རྡོ་རྗེའི་སྐུ་ལ་འདས་གྲོངས་མི་མངའ་ཡང་དགུང་གྲངས་བདུན་ཅུ་དོན་གསུམ་ལ་ཕེབས་པ་སྟེ་རབ་བྱུང་དྲུག་པའི་ཤིང་ཁྱི་སྤྱི་ལོ1334ལོའི་དབྱར་ཟླའི་ཚེས་ཉི་ཤུ་ལ་སྐུ་གཤེགས་པའི་ཚུལ་བསྟན། སྐུ་གདུང་ལ་ལྷ་སྐུ་དང་རིང་བསྲེལ་ལ་སོགས་པའི་རྟེན་མང་དུ་བྱོན་ནོ།
II.2.4.2 Jampa Pel
།གཉིས། འཇག་ཆེན་བྱམས་པ་དཔལ།
ཆོས་རྗེ་བྱམས་པ་དཔལ་ནི་སྐུའི་སྐྱེ་བ་སྔ་མར་རྒྱ་གར་ལྷོ་ཕྱོགས་སུ་ཡབ་བྲམ་ཟེ་ཆོས་གྲུབ་དང་། ཡུམ་ལྷ་མོ་འོད་མཛེས་མ་གཉིས་ལ་བུ་སྤུན་གསུམ་བྱུང་བའི་འབྲིང་པོ་ཆོས་ཀྱི་རིན་ཆེན་ཞེས་བྱ་བའི་བཙུན་པར་གྱུར་ནས་བྱམས་དང་སྙིང་རྗེའི་སྒོ་ནས་སེམས་ཅན་ལ་ཕན་པ་རྒྱ་ཆེར་བསྒྲུབས། སྐུ་ཚེ་འདིར་འཇག་ཆེན་རྒྱལ་མཚན་འབུམ་དང་མཚུངས་པར་མཁས་གྲུབ་དུ་མས་ཞབས་ཀྱིས་བཅགས་པའི་གནས་མཆོག་ཡན་ལག་བརྒྱད་ལྡན་གྱི་ཆུ་བོ་འབབ་པའི་འགྲམ་ཁོ་ལམ་རྩྭ་ཐང་དུ་ཡབ་ཤུད་ཀྱི་བྱམས་པ་མགོན་དང་། ཡུམ་ཆིངས་སྲི་ཐར་འབུམ་གྱི་སྲས་བར་མར་རབ་བྱུང་ལྔ་པའི་ལྕགས་ཁྱི་སྤྱི་ལོ1310ལོར་སྐུ་འཁྲུངས། ལྷུམས་སུ་ཞུགས་པའི་ཚེ། ཡུམ་ལུས་ཡང་བ་དང་རྨི་ལམ་དུ་ཡང་ཉི་མ་ཤར་བ། འོད་གསལ་གྱི་སྣང་བ་ཉིན་མོ་ལྟ་བུར་འཆར་བ་བྱུང་། དགུང་ལོ་ལྔ་ལོན་པའི་ཚེ། མ་ཎི་བགྲང་བ་དང་། རྩེད་དུས་སུ་ཆོས་ཁྲི་དང་སྤྱིལ་བུ་བརྩིགས་ནས་ཆོས་སྨྲ་བ། ཉ་སོགས་གསོད་པ་ལ་སྲོག་བླུ་བྱེད་པ། བྱིས་པ་འགྲོ་མི་ཤེས་པ་རྣམས་ཁུར། སྙོམས་ཆུང་རྣམས་ལ་གཟན་སོགས་སྦྱིན་ནས་བསྐྱངས་པས། རྩྭ་ཐང་ན་བྱིས་པ་བྱང་ཆུབ་སེམས་དཔའ་ཞིག་འདུག་ཅེས་ཟེར་བའི་གཏམ་མི་ཤངས་ལ་སོགས་པར་ཡང་གྲགས། དགུང་ལོ་བཅུ་པར་ཡང་དགོན་ དུ་རིན་པོ་ཆེ་པ་ལ་དགེ་བསྙེན་མཛད། བཅུ་གཅིག་པ་ལ་མཁས་གྲུབ་ཤངས་སྟོན་ལས་མགོན་པོའི་རྗེས་གནང་དང་། བླ་མ་མགོན་པོ་དབྱེར་མེད་གསན། དགུང་ལོ་བཅུ་གཉིས་པར་སློབ་དཔོན་སེང་བཟང་དང་ལྷན་དུ་ས་སྐྱར་བྱོན་ནས་མཁན་པོ་བླ་མ་མཉམ་མེད་པའི་དྲུང་ནས་རབ་ཏུ་བྱུང་། མཚན་བྱམས་པ་དཔལ་ཞེས་གསོལ། དགུང་ལོ་བཅུ་དྲུག་པ་ལ་སླར་ཡང་ཤངས་སུ་ཕེབས་ཏེ། ཡང་དགོན་དུ་སློབ་དཔོན་སེང་གེ་བཟང་པོ་ལ་ཀྱི་རྡོར། བདེ་མཆོག་སོགས་ཀྱི་དབང་སྒྲུབ་ཞུས། དགུང་ལ་ཉེར་ལྔ་པ་ལ་མཁན་པོ་སེང་གེ་དཔལ་བས་མཁན་པོ། རིན་པོ་ཆེ་པས་ལས་སློབ། སློབ་དཔོན་གྲུབ་སེང་གིས་གསང་སྟོན་མཛད་ནས་འཇག་ཏུ་བསྙེན་རྫོགས་ཀྱི་སྡོམ་པ་བཞེས། དེ་རྗེས་མཁས་བཙུན་རྒྱལ་མཚན་འབུམ་མཇལ་བར་ལྐུགས་ལུང་དུ་ཕེབས། ཐོག་མར་དག་བྱེད་ཨའི་སྟོང་ར་གནང་ཞིང་ཉམས་རྟོགས་བཟང་པོ་འཁྲུངས། རིམ་བཞིན་མཁས་བཙུན་རྒྱལ་མཚན་འབུམ་གྱི་དྲུང་ནས་ནི་གུ་ཆོས་དྲུག་དང་། ཕྱག་རྒྱ་ཆེན་མོ། ཡེ་ཤེས་མགོན་པོ་སོགས་ཀྱི་ཟབ་ཆོས་ཡོངས་སུ་རྫོགས་པ་གསན།
ཐེངས་ཤིག་འཇག་གི་གཟིམས་སྤྱིལ་དུ་ཕྱག་ཆེན་གྱི་སྒྲུབ་པ་མཛད་པའི་ཚེ། སྒོམ་ཁང་དུ་ལྟ་སྟངས་ཤིག་མཛད་པས། ཐོག་མར་ཐོག་མཚམས་སུ་འོད་དཀར་པོ་འཁྱིལ་བ་ཞིག་བྱུང་། དེ་ཇེ་གསལ་དུ་སོང་ནས་བྱི་བའི་མཆོད་རྟེན་ཡན་ཆད་དཀར་ལྷག་གེར་སོང་། དེའང་ཇེ་གསལ་ལ་སོང་ནས་སྲོག་ཤིང་ཡན་ཆད་ཀྱི་མི་རྣམས་ལུད་སྐྱེལ་བ་དང་། བྲོ་ཟ་བ་ལ་སོགས་དང་། སྲོག་ཆགས་གཞན་ཐམས་ཅད་ཅི་བྱེད་པ་གསལ་བར་གཟིགས། སྐུགས་ལུང་གཟིམ་ཁང་དུ་བཞུགས་དུས། རྨི་ལམ་དུ་མགོན་པོ་ཕྱག་དྲུག་པའི་ཞལ་གཟིགས་ཤིང་། ང་དང་བླ་མ་དབྱེར་མེད་དུ་སྒོམས། བྱིན་རླབས་འཇུག་པ་ཡིན་གསུངས། བླ་མ་སངས་རྒྱས་རྒྱལ་མཚན་ལས་མི་ཤངས་གཡག་ཐང་དུ་སྦྱོར་དྲུག་གསན་པའི་ཚེ། གཡག་ཐང་གི་ཐང་ཞབས་ན་མི་དང་ཁལ་པ་ལ་སོགས་འགྲོ་བ་མུན་ཁང་ནས་གཟིགས། དེ་ལ་མཆེད་ནས་མི་ཤངས་ལུང་པ་དང་འཇག་གི་མི་རྣམས་ཅི་བྱེད་དང་ལྷག་པར་རང་གི་གཡོག་པོས་མཛོད་ནས་རྐུ་མ་བརྐུ་བའང་གཟིགས། ངང་ཤངས་ཀྱི་རི་ལ་གཅོད་མཛད་པས་ཐུགས་དམ་ལ་བོགས་ཆེན་པོ་ཐོན། ཞོང་ཞོང་སྐུ་འབུམ་དྲུང་དུ་ཞག་བདུན་གསོལ་བ་འདེབས་ཀྱིན་བཞུགས་པས་རྨི་ལམ་འབད་མེད་འཁོར་མར་ཟིན། ཞོང་ཞོང་གི་སྐུ་འབུམ་ཞིག་གསོ་མཛད། གཞན་ཡང་གྲམ་ཆུམས། དཀར་པོ་བྲག །གུར་ཕྱོགས་ཉུག །ཡོ་བྲོ་བོ་ལ་སོགས་སུ་ཁྲིད་བསྐྱངས། འདོག་གཅོད་དཔོན་དགེ་ན་ནས་ཆོས་རྗེ་གདན་འདྲེན་ཞུ་བའི་ནུབ་མོ་གཅོད་པའི་བཙན་ཞིག་གིས་བསུ་བ་དང་བསྙེན་བཀུར་བྱས། གུར་ཕྱོགས་ཤཱཀྱ་བཤེས་གཉེན་འདས་པའི་ཆོ་ག་ནར་མར་མཛད་པའི་ཚེ། ཆུམས་ལྷ་སྡིངས་པས་གདན་དྲངས་ཏེ་འཇིགས་བྱེད་ཀྱི་དབང་སོགས་མཛད་པས། ཇོ་བོ་གལ་ལྗང་ཕྱག་དང་གུས་པ་བྱེད་ཀྱིན་གདའ་གསུངས། མཐར་རབ་བྱུང་བདུན་པའི་ལྕགས་ལུག་སྤྱི་ལོ1391ལོར་སྐུ་གཤེགས། དེ་ལྟར་ཆོས་རྗེ་ཆེན་པོ་འདི་ཉིད་ཀྱི་མཐའ་ཡས་པའི་མྱོང་རྟོགས་ཡོན་ཏན་གྱིས་སྲོག་ཤིང་དང་། ལྐུགས་ལུང་། འཇག་སོགས་ཀྱིས་གནས་གཞི་གཙོ་བོར་མཛད་དེ་ཚད་མེད་པའི་བྱམས་དང་སྙིང་རྗེས། གྲུབ་ཐོབ་ཆོས་གཡུང་དང་། གྲུབ་ཆེན་རིན་རྫོང་པ་སོགས་སྙིགས་དུས་གདུལ་བྱའི་ཚོགས་བགྲང་ལས་འདས་པ་ཞིག་སྨིན་གྲོལ་གྱི་ལམ་བཟང་དུ་བཀོད།
II.2.4.3 Müchen Gyeltsen Pelsang
གསུམ། མུས་ཆེན་རྒྱལ་མཚན་དཔལ་བཟང་།
ཤངས་པ་བཀའ་བརྒྱུད་ཀྱི་འཇག་པའི་བརྒྱུད་པ་སྟོད་སྨད་བར་གསུམ་དུ་གྱེས་པ་ལས། འཇག་པ་སྟོད་ལུགས་ཀྱི་བསྟན་པའི་མངའ་བདག་མུས་ཆེན་རྒྱལ་མཚན་དཔལ་བཟང་ནི་གྲུབ་ཐོབ་གཉགས་ཀྱི་རིགས་སུ། ཡབ་སློབ་དཔོན་རྡོ་རྗེ་སྙིང་པོ་དང་། ཡུམ་དཀོན་མཆོག་ཅེས་བྱ་བའི་སྲས་སུ་ངོ་མཚར་བའི་ལྟས་དུ་མ་དང་བཅས་པ་སྟེ། ཁྲོ་ཕུ་དགའ་ལྡན་གྱི་གནས་སུ་ས་གཡོ་བ་དང་། མེ་ཏོག་གི་ཆར་འབབ་བཞིན་དུ་སྐུ་འཁྲུངས། ཁྲོ་ཕུ་སེམས་དཔའ་ཆེན་པོས་དབང་བསྐུར་ཞིང་ལུང་བསྟན་ཁྱད་པར་ཅན་མཛད། སྐུ་ན་ཆུང་ངུའི་དུས་ནས་བྱིས་པའི་སྤྱོད་པ་ལས་ཡོངས་སུ་འདས། དགུང་ལོ་བཅོ་ལྔ་པར་དཔལ་ས་སྐྱར་འཇམ་དབྱངས་རིན་ཆེན་རྒྱལ་མཚན་གྱི་སྤྱན་སྔར་དགེ་བསྙེན་མཛད། དབུ་ཕར་འདུལ་མཛོད་ལ་སོགས་པའི་གཞུང་ཆེན་བཀའ་པོད་ལྔར་སྦྱངས་པ་དཔྱིས་ཕྱིན་པ་མཛད་པས་མཁས་པའི་སྙན་པ་རྒྱ་ཆེར་ཁྱབ། དགུང་ལོ་ཉེར་དྲུག་ལ་ཕེབས་སྐབས་ཆོས་རྗེ་རྒྱལ་མཚན་དཔལ་བཟང་གིས་མཁན་པོ་དང་། རིན་ཆེན་བསོད་ནམས་གྲགས་པས་ལས་སློབ་མཛད་དེ་བསྙེན་པར་རྫོགས། མཁན་སློབ་དེ་གཉིས་དང་། རོང་པ་ཤེས་རབ་སེང་གེ་ཚོགས་སྒོམ་པ། ཉན་ཆེན་པ་ཡབ་སྲས། བླ་མ་ཡོན་ཏན་མཚན་ཅན། བྱང་སེམས་ཆུ་བཟང་པ། ཆོས་རྗེ་འཛིམས་པ་སོགས་ལས་དུས་འཁོར། ལམ་འབྲས། བློ་སྦྱོང་། རྫོགས་ཆེན། གཅོད་ཡུལ་སོགས་གྲུབ་མཐའ་རིས་མེད་ཀྱི་གདམས་པ་མཐའ་ཡས་པ་གསན་ཅིང་། ཐུགས་ཉམས་སུ་བཞེས་པས་མཁས་གྲུབ་ཆེན་པོར་གྱུར། བླ་མ་བདག་ཉིད་ཆེན་པོ་ཡབ་སྲས་ཀྱིས་ཀྱང་སྤྱི་བོར་མཆོད། ཕོ་བྲང་ཆེན་པོ་ཏཱའི་ཏུར་དུ་རྒྱལ་པོ་ཨཱ་ཡུ་བ་རས་སྤྱན་དྲངས་ཤིང་། འགྲོ་དོན་མཐའ་ཡས་པ་མཛད། སླར་བོད་དུ་ཕེབས་ནས་བྲིན་ཆུ་བར་དུ་དཀའ་ཐུབ་ཀྱི་འཚོ་བ་ལ་བརྟེན་ནས་བསྒོམས་པས་ཉམས་རྟོགས་ཀྱི་ཡོན་ཏན་དཔག་མེད་འཁྲུངས། སྐབས་ཤིག་ལ་མཁས་གྲུབ་ཤངས་སྟོན་གྱི་སྙན་པ་གསན་ནས་སྤྱན་སྔར་བྱོན་པས། མཁས་གྲུབ་ཤངས་སྟོན་ལ་ཡེ་ཤེས་མགོན་པོས། ཁྱོད་ཀྱི་སློབ་མ་ཆོས་བརྒྱུད་ཟིན་ངེས་ཤིག་འོང་བར་ཡོད་པས་གདམས་ངག་མ་ལུས་སྟོན་ཅིག་ཅེས་ལུང་བསྟན་པས། ནི་གུའི་གསེར་ཆོས་ལྔ་ལ་སོགས་པའི་ཤངས་པའི་གདམས་ངག་ཡོངས་རྫོགས་དགྱེས་བཞིན་དུ་གནང་། དེ་ཐམས་ཅད་ཐུགས་ཉམས་སུ་བཞེས་པས་རྨི་ལམ་སྤྲུལ་བསྒྱུར་སྦྱོངས། འོད་གསལ་རྒྱུད་ལ་སྐྱེས། ཕྱག་རྒྱ་ཆེན་པོའི་ཡེ་ཤེས་མངོན་དུ་གྱུར་ནས་སྒྲུབ་པ་སྙིང་པོར་གཞོལ་བའི་སྐབས། ཧོར་གྱི་རྒྱལ་པོ་རྒན་པ་ཆེན་པོས་ནན་གྱིས་སྤྱན་དྲངས་པ་བཞིན་ཕེབས་ནས་ཧོར་དང༌། སོག་པོ། ཡུ་གུར། མི་ཉག་སོགས་ཀྱི་སྐྱེ་འགྲོ་མཐའ་ཡས་པའི་དོན་མཛད། སླར་བོད་དུ་ཕེབས་ནས་ཆོས་དང་ཟང་ཟིང་གིས་དགའ་སྟོན་རྒྱ་ཆེར་སྤེལ། ཡང་ནི་གུའི་བརྒྱུད་འདེབས་སུ་མས་མཐའ་གོང་དཔལ་གྱི་རྭ་བ་རུ། མུས་ཆེན་རྒྱལ་མཚན་དཔལ་བཟང་ལ་གསོལ་བ་འདེབས་ ཞེས་འཁོད་པ་བཞིན་མུས་མཐའ་གོང་དཔལ་གྱི་རི་ཁྲོད་སོགས་སུ་བཤད་སྒྲུབ་སྤེལ་མར་མཛད་པའི་མཐར། མེ་ཕག་ཧོར་ཟླ་བདུན་པའི་ཚེས་ཉི་ཤུ་དྲུག་ཉིན་ངོ་མཚར་བའི་ལྟས་དུ་མ་དང་བཅས་བདེ་ཅན་གྱི་ཞིང་དུ་གཤེགས། སློབ་མའི་གཙོ་བོ་མཁས་གྲུབ་རྡོ་རྗེ་གཞོན་ནུ་ལ་ཤངས་ཆོས་ཀྱི་གདམས་ངག་རྫོགས་པར་བསྩལ་ནས་ཤངས་ཆོས་བསྟན་པའི་བདག་པོར་དབང་བསྐུར་བ་དང་། མུས་ཆེན་ནམ་མཁའི་རྣལ་འབྱོར་ལའང་ཤངས་ཆོས་ཀྱི་གདམས་པ་དུ་མ་བསྩལ། བླ་མ་འདིའི་རྣམ་ཐར་དགེ་བཤེས་སྨོན་ལམ་པས་མཛད་པ་ཞིག་ཡོད་ཚོད་འདུག་ཀྱང་ད་ཕན་མ་རྙེད།
II.2.4.4 Müchen Namkhé Neljor
བཞི། མུས་ཆེན་ནམ་མཁའི་རྣལ་འབྱོར།
ཁོང་ནི་ཡབ་བྲག་རམ་པའི་དགེ་བའི་བཤེས་གཉེན་བླ་མ་རྡོ་རྗེ་བསོད་ནམས་དང་། ཡུམ་སྤྱན་རས་གཟིགས་ཀྱི་རྣལ་འབྱོར་མ་རྡོ་རྗེ་འབུམ་གྱི་སྲས་སུ་སྐུ་འཁྲུངས། སྐུ་ན་ཆུང་ངུའི་དུས་ནས་དད་པ་དང་། ཤེས་རབ། མངོན་པར་ཤེས་པ་སོགས་མངའ། གློ་ལུང་ཆོས་སྡེར་མཁན་པོ་ཤཱཀྱ་འཕེན་པ་ལས་རབ་ཏུ་བྱུང་། མཚན་ནམ་མཁའ་རྒྱལ་མཚན་དུ་གསོལ། མདོ་སྔགས་གཞུང་ལུགས་ཀུན་ལ་གསན་བསམ་རྒྱ་ཆེར་མཛད། ཁྱད་པར་མུས་ཆེན་རྒྱལ་མཚན་དཔལ་བཟང་ལས་ནི་གུའི་ཐབས་ལམ་གསན་ནས་ཟླ་བ་གཅིག་བསྒོམས་པས། བདེ་དྲོད་རྩོལ་མེད་དུ་ཤར། བཀའ་གཞན་རྣམས་རྫོགས་པར་བླ་མ་རྡོ་རྗེ་གཞོན་ནུ་ལས་གསན། དགུང་ལོ་ཉི་ཤུ་པར་བསྙེན་པར་རྫོགས། སྔ་རྗེས་སུ་བླ་མ་དུ་མ་ལས་གདམས་ངག་བསམ་གྱིས་མི་ཁྱབ་པ་ཞུས། ཆོས་གསན་པའི་དུས་མ་གཏོགས་དབེན་པ་ཁོ་ནར་སྒྲུབ་པ་ལ་རྩེ་གཅིག་ཏུ་གཞོལ་བས་ངེས་འབྱུང་དང༌། སྙིང་རྗེ་ཕྱོགས་མེད་དུ་ཤར། ཕྱག་རྒྱ་ཆེན་པོའི་རྟོགས་པ་བརྙེས། སྤྱན་རས་གཟིགས་སོགས་ཡི་དམ་གྱི་ལྷ་མང་པོས་རྗེས་སུ་བཟུང༌། ཏིང་འཛིན་གྱི་སྒོ་དུ་མ་ལྡན་པ་དང་། མངོན་ཤེས་རྒྱ་ཆེན་མངའ་བ། ཆོས་སྐྱོང་བྲན་དུ་ཁོལ་བ་སོགས་ཀྱི་ཡོན་ཏན་ལ་དབང་འབྱོར། གདུལ་བྱ་དཔག་མེད་སྨིན་གྲོལ་ལ་བཀོད་པའི་ནང་ནས་དཀའ་ལྔ་པ་དཔལ་འབྱོར་ཤེས་རབ་དང་། རོང་སྟོན་ཤེས་བྱ་ཀུན་རིག །སེམས་དཔའ་གཞོན་ནུ་རྒྱལ་མཆོག །མུས་ཆེན་དཀོན་མཆོག་རྒྱལ་མཚན། གྲུབ་ཆེན་ཐང་སྟོང་རྒྱལ་པོ། མཁས་གྲུབ་དགེ་ལེགས་དཔལ་བཟང་སོགས་མཁས་བཙུན་གྲུབ་པའི་ཉམས་མྱོང་དང་ལྡན་ཞིང་། འཕྲིན་ལས་རྒྱ་ཆེན་མངའ་བའི་བུ་སློབ་དུ་མ་བྱོན་ཏེ་རྒྱལ་བསྟན་སྤྱི་དང་། ཁྱད་པར་དུ་དཔལ་ལྡན་ཤངས་པ་བཀའ་བརྒྱུད་པའི་བསྟན་པ་དར་ཞིང་རྒྱས་པར་མཛད། བླ་མ་འདི་ཉིད་ཀྱིས་ཡེ་ཤེས་མགོན་པོའི་ཆོས་སྐོར་སོགས་ཀྱི་ཤངས་པའི་གདམས་པ་འགའ་ཞིག་མཁས་གྲུབ་དགེ་ལེགས་དཔལ་བཟང་བརྒྱུད་རི་བོ་དགེ་ལྡན་པའི་ཕྱོགས་སུའང་དར་ཁྱབ་མཛད། མཐར་དགུང་གྲངས་དགུ་བཅུ་རྩ་གསུམ་དུ་ཕེབས་པ། བྱི་ལོ་ཧོར་ཟླ་གཉིས་པའི་ཚེས་ཉེར་དྲུག་ཉིན་དགོངས་པ་ཞི་བར་གཤེགས་པའི་ཚེ། འཇའ་འོད་དང་། སྙན་པའི་སྒྲ། དྲི་ཞིམ་འཐུལ་བ། མེ་ཏོག་གི་ཆར་ཆེན་པོ་འབེབས་པ་བཅས་ངོ་མཚར་གྱི་ལྟས་དུ་མ་བྱུང་། སྐུ་གདུང་ཞུགས་སུ་ཕུལ་བས་སྐུ་དང་། རིང་བསྲེལ་གྲངས་ལས་འདས་པ་བྱོན་པ་རྣམས་ཕྱི་རབས་ཀུན་གྱི་དད་པའི་ཞིང་མཆོག་ཏུ་གྱུར་ཏོ། རྗེ་འདིའི་རྣམ་ཐར་རྒྱས་པ་བཀའ་བཅུ་པ་རིན་ཆེན་དར་རྒྱས་ཀྱིས་མཛད་པ་ཞིག་དང་། དགུང་ལོ་བརྒྱད་ཅུ་རྩ་བཞི་ཡན་གྱི་རྣམ་ཐར་ཁ་སྐོང་ཞིག་ཡོད་པ་ཐོས་ཀྱང་ད་ཕན་མ་རྙེད།
II.2.4.5 Rindzongpa Wangchuk Gyeltsen
ལྔ། སྒྲུབ་ཆེན་རིན་རྫོང་པ་དབང་ཕྱུག་རྒྱལ་མཚན།
དེ་ཡང་རྗེ་འདི་ཉིད་ཀྱི་གསུང་ལས་སྨོན་ལམ་དབང་གིས་ཆོས་བརྒྱུད་རིགས་སུ་སྐྱེས། །ལས་ངན་ཚེ་འདིར་སློངས་པས་ནད་དུ་སྨིན། །དམ་པས་རྗེས་བཟུང་བསྟན་ལ་རབ་ཏུ་བྱུང༌། རྒྱུད་གཞུང་མན་ངག་ཐོབ་པས་སྒྲོ་འདོགས་བཅད། བླ་མ་མང་བསྟེན་སྙན་བརྒྱུད་བདུད་རྩི་འཐུངས། །རི་ཁྲོད་དགོན་པར་སྒྲུབ་ལ་བརྩོན་པར་བྱས། །ཕྱི་ནང་གསང་གསུམ་གེགས་རྣམས་གྲོགས་སུ་ཤར། ཉམས་རྟོགས་རིམ་སྐྱེས་གཞན་དོན་མཉམ་ཉིད་རྟོགས། །རྣམ་ཐར་མདོར་བསྟན་སྒྲུབ་པ་ཉམས་སུ་ལོངས་ཞེས་གསལ་བ་ལྟར། ཁོང་ནི་དམ་པའི་ཆོས་དར་བའི་ས། རྒྱལ་གྱི་ཤྲཱི་རིའི་ལྷོ་ཕྱོགས་ཀྱི་དགོན་པ་ཇོ་མོ་ཞེས་བྱ་བར་ཡབ་ཕྱག་སྟོན་ནམ་མཁའ་འཕེན་དང་། ཡུམ་རྨེ་ཟ་རྒྱ་གར་ལྷ་མོ་ཞེས་བྱ་བ་ལ་སྲས་བདུན། དེ་དག་ལས་དགེ་བཤེས་གསུམ་བྱུང་བའི་འབྲིང་པོར་སྐུ་འཁྲུངས། སྐུ་ན་ཆུང་ངུའི་དུས་ནས་དམ་པའི་ཆོས་ལ་ཤིན་ཏུ་མོས། དགུང་ལོ་དགུ་པ་ལ་རབ་ཏུ་བྱུང་། མཚན་དབང་ཕྱུག་རྒྱལ་མཚན་དུ་གསོལ། སྐབས་ཤིག་གི་རིང་མྱོང་འགྱུར་གྱི་ལས་ངན་ནད་དུ་སྨིན་པའི་དབང་གིས་བཟོད་གླགས་བྲལ་བའི་ན་ཟུག་མྱང་། དགུང་ལོ་བཅུ་དགུ་པར་མཁན་པོ་པཎ་ཆེན་རིན་པོ་ཆེ། ལས་སློབ་ལོ་ཆེན་བྱང་ཆུབ་རྩེ་མོ། གསང་སྟོན་བླ་མ་མགོན་པོ་འབུམ། གྲིབ་ཆོད་པ་དཀའ་བཞི་བསོད་ནམས་དོན་གྲུབ་སོགས་ཀྱིས་མཛད་ནས་བསྙེན་རྫོགས་ཀྱི་སྡོམ་པ་བཞེས། མཁན་ཆེན་པའི་དྲུང་ནས་ལྷན་ཅིག་སྐྱེས་སྦྱོར་དང་། བླ་མ་མགོན་པོ་དབྱེར་མེད། འཆུག་མེད་ལམ་ཁྱེར་རྣམ་གསུམ་གྱི་བཀའ་ཁྲིད། གའུ་མའི་ཁྲིད་སོགས་གདམས་པ་མང་དག་ཅིག་ཞུས། དེ་རྗེས་མཁན་ཆེན་འཕྲིན་ལས་པའི་དྲུང་དུ་ཕྱག་རྒྱ་ཆེན་པོ་སྒྲུབ་སྙིང་། གམ་ག་མ། ཤངས་པའི་རྣམ་ཐར་བསམ་སྡིངས་པ་ཡན་ཆད་སོགས་གསན་ནས་སྔ་ཕྱིར་རིན་རྫོང་དུ་སྒྲུབ་པ་ལན་འགའ་མཛད།
ཐེངས་ཤིག་ཆོས་རྗེ་བྱམས་པ་དཔལ་གྱི་རྣམ་ཐར་དྲན་པས་མོས་གུས་ཚད་མེད་སྐྱེས་ཏེ་ད་ལྟ་རང་བླ་མ་དང་མཇལ་བར་བྱ་དགོས་སྙམ་པའི་འདུན་པ་དྲག་པོ་ཤར། དེ་རྗེས་ཤངས་ཀྱི་སྲོག་ཤིང་དུ་ཆོས་རྗེ་དང་མཇལ་བས། ཆོས་རྗེས་ཁྱེད་ཤྲི་རི་ནས་བྱོན་ནམ། ལམ་ཁར་མགོ་ཐོན་པ་དགའ་མོ་ཡིན། ཆོས་བརྒྱུད་གང་ཡིན། ཆོས་ཅི་ཐོབ་གསུང་བ་ལ། (སྒྲུབ་ཆེན་རིན་རྫོང་པས་)ཆོས་བརྒྱུད་ཤངས་པ་ཡིན། རི་བོ་ཆེ་པའི་སློབ་བརྒྱུད་ཡིན་ལགས་ཞུས་པས། རི་བོ་ཆེ་བའི་ཁྲི་པ་དང་ངེད་ཀྱི་རིན་པོ་ཆེ་པ་ཕར་སློབ་ཚུར་སློབ་ཡིན་ཞེས་གསུངས་ནས་ཐོག་མར་ནི་གུ་ཆོས་དྲུག་གི་སྔོན་འགྲོའི་དབང་དང་བཅས་ཡོངས་སུ་རྫོགས་པ་དང་། དེ་ནས་རིམ་བཞིན་རང་བབས་རྣམ་གསུམ། འཆུག་མེད་རྣམ་གསུམ། སེམས་འཆི་མེད་ཀྱི་ཁྲིད། བྱིན་རླབས་ཀྱི་བཀའ་དང་བཅས་པ། ལུས་འཆི་མེད་ཀྱི་བཀའ། བདེ་མཆོག་ལྷ་ལྔ། མཁའ་སྤྱོད་དཀར་དམར། མཁའ་སྤྱོད་གསུམ་སྦྲག །བྱིན་རླབས་ལྷ་བཞི། ཐུགས་རྗེ་ཆེན་པོའི་ཕྱི་སྒྲུབ་གསང་སྒྲུབ། རྟ་མགྲིན་གསང་སྒྲུབ། རྗེས་སུ་ཡི་རང་། མགོན་པོའི་ཕྱི་བཀའ། བླ་མ་མགོན་པོ་དབྱེར་མེད། གསང་སྒྲུབ། གྲིབ་སེལ་གནད་དབབ། དེ་རྣམས་ཀྱི་བཀའ་སྒྲུབ་ཐབས། ལས་ཚོགས། རྒྱུད་སྡེ་ལྔའི་དབང་བཞི་རྫོགས། ཚེ་དཔག་མེད་ལྷ་དགུའི་དབང་སོགས་མང་དུ་གནང་། གཞན་ཡང་གདན་ས་པའི་དྲུང་དུ་སྒྱུ་མ་ལམ་གྱི་རིམ་པའི་གཞུང་འགྲེལ་གཉིས། ཉམས་མྱོང་ཡོན་ཏན་རྒྱ་མཚོ། འཆི་མེད་འཕྲུལ་འཁོར། སྒྱུ་ལུས་འོད་ཕྲེང་། ཁྱད་འཕགས་གདམས་པ་རྒྱས་བསྡུས་གསུམ། སྒྱུ་ལུས་དྲུག་ལྡན། དབུ་མ་ཡིག་བདུན། རྒྱུད་སྡེ་ལྔའི་རྒྱ་གཞུང་རྡོ་རྗེ་གདན་པས་མཛད་པ་སོགས་ཤངས་པའི་གདམས་ངག་དབང་རྒྱུད་མཐའ་དག་རྫོགས་པར་གསན། ཐོས་པའི་གདམས་ངག་དེ་དག་ཀྱང་ཉམས་སུ་ལེན་པའི་དཀའ་སྤྱད་དྲག་པོའི་མཐུས་མཚམས་སྦྱར་བས་ཉམས་རྟོགས་ཀྱི་ཡོན་ཏན་བསམ་གྱིས་མི་ཁྱབ་པ་ཐུགས་རྒྱུད་ལ་འཁྲུངས། མཐར་དགེ་བཤེས་བྱང་སེང་ལ་སོགས་པའི་སྐལ་ལྡན་གྱི་གདུལ་བྱ་རྣམས་ལ་ཤངས་པའི་ཆོས་རྣམས་རྫོགས་པར་གནང་ཞིང་། ཤངས་པའི་འཇག་བརྒྱུད་ཀྱི་བསྟན་པ་ཕྱོགས་མཚམས་ཀུན་ཏུ་རྒྱས་པར་མཛད།
II.2.4.6 Shönu Drup
དྲུག བསམ་སྡིངས་པ་གཞོན་ནུ་གྲུབ།
དེ་ཡང་གསོལ་འདེབས་སྙན་པའི་སྒྲ་དབྱངས་སུ་བསྔགས་འོས་ཡོན་ཏན་བརྒྱ་ལྡན་ཉང་སྨད་དུ། ཁྱིམ་བདག་དྲྭ་མར་མཁའ་འགྲོའི་ལྷུམས་སུ་ཞུགས། །བལྟམས་ནས་དགུང་ལོ་བཞི་པར་སྒྲུབ་པའི་གནས། །གཟིགས་ཚེ་ཏིང་འཛིན་བརྙེས་ལ་གསོལ་བ་འདེབས་ཞེས་འཁོད་པ་བཞིན་མཁས་བཙུན་གཞོན་ནུ་གྲུབ་ནི་ལོ་ཆེན་བཻ་རོ་ཙ་ན་དང་མཁས་པ་ཆེན་པོ་གཙང་ནག་པ་སོགས་སྐུ་འཁྲུངས་པའི་ཡུལ། ཉ་མོ་ཆབ་ལ་འཛུལ་འདྲའི་མྱང་སྨད་གཅུང་པ་ཡུ་བ་གདོང་དུ་ཡབ་ལྡིང་གི་རུས་རྒྱལ་པོ་ཚེ་འཕེལ་དང་། ཡུམ་རྒྱ་མོ་ཁེ་འདྲེན་དཔལ་གཉིས་ཀྱི་སྲས་སུ་སྤྱི་ལོའི་དུས་རབས་བཅུ་གསུམ་པའི་སྨད་ཀྱི་ཆར་སྐུ་འཁྲུངས། གོང་གི་ཡུ་བ་གདོང་ཞེས་པ་དེ་གང་དུ་ཡིན་པའི་སྐོར་ཡང་། པཎ་ཆེན་བསྟན་པའི་ཉི་མའི་རྣམ་ཐར་འཛམ་གླིང་མཛེས་རྒྱན་ལས་གནོད་སྦྱིན་དབང་པོ་གང་བ་བཟང་པོ་བཞུགས་པའི་གནས་ཕུ་ཧ་བོ་གང་བཟང་ནས་མདའ་ཡུ་བ་གདོང་ལ་བརྟེན་པའི་བར་ཆུ་ཀླུང་དལ་གྱིས་འབབ་སའི་ཆ་ལ་ཉང་ཞེས་གྲགས་ཞེས་འཁོད་པར་གཞིགས་ན། ས་ཆ་འདི་ནི་མྱང་ཆུ་རྒྱུག་ཁུལ་གྱི་མདར་གནས་པ་གསལ་པོར་མངོན་ལ། དེ་མིན་གཅུང་པ་ཡུ་བ་གདོང་ཞེས་པ་གཞིས་རྩེ་གྲོང་ཁྱེར་གྱི་གནའ་བོའི་མིང་ཡིན་པ་མྱང་ཆོས་བྱུང་དུའང་གསལ་བས། མཁས་བཙུན་གཞོན་ནུ་གྲུབ་ཀྱི་འཁྲུངས་ཡུལ་ནི་ལོ་ཆེན་བཻ་རོ་ཙ་ན་དང་འདྲ་བར་དེང་ཡུལ་འཁོར་སྲུང་པི་ཝང་བརྡུང་བ་འདྲ་བའི་ཟངས་དཀར་རི་བོའི་འགྲམ་དུ་གནས་པའི་ཆུ་ཤར་གྲོང་ཚོའི་བྱང་རྒྱུད་དུ་ཡིན། དགུང་ལོ་བཞི་པར་གྱོང་ཕུག་ཏུ་སྒྲུབ་པ་མཛད། དགུང་ལོ་བཅུ་པའི་མཇུག་ཏུ་ཆོས་གྲྭ་ཆེན་མོ་སྣར་ཐང་དུ་མཁན་ཆེན་མཆིམས་ནམ་མཁའ་གྲགས་ལས་རབ་ཏུ་བྱུང་། དགུང་ལོ་ཉི་ཤུར་མཁན་ཆེན་དེ་ཉིད་ལས་བསྙེན་རྫོགས་ཀྱི་སྡོམ་པ་བཞེས། མཁན་ཆེན་མཆིམས་པ་ལས་སྒོམ་ཚིག་ལ་སོགས་པའི་འདུལ་བའི་ཕྲན་རྣམས་དང་། མངོན་པ་གོང་འོག །ཕར་ཕྱིན་གྱི་སྐོར། བསླབ་བཏུས། སྤྱོད་འཇུག་ལ་སོགས་པའི་གཞུང་རྣམས། ལམ་རིམ། ལམ་སྒྲོན། ལམ་མཆོག །སྐྱེས་བུ་གསུམ་གྱི་ཁྲིད་ལ་སོགས་བཀའ་གདམས་པའི་མན་ངག་རྣམས། དེ་བཞིན་དབུ་མ་རིན་ཆེན་ཕྲེང་བ་སོགས་མང་དུ་གསན། སློབ་དཔོན་ཆུ་མིག་པ་དང་། ལྷོ་བྲག་པ་ལས་ཕར་ཚད་འདུལ་གསུམ་གྱི་གཞུང་གསན་ཏེ། བཤད་པ་མཛད་ནས་དགེ་བཤེས་ཀྱང་ལོ་འགའ་གནང་། དགུང་ལོ་ཉི་ཤུ་རྩ་གཅིག་པར་ས་སྐྱར་བྱོན་ནས་བླ་མ་ཆོས་ཀྱི་རྡོ་རྗེ་ལ་ཀྱི་རྡོ་རྗེ། མཁའ་འགྲོ་མ་གུར། སམྦུ་ཊ་ལ་སོགས་པ་གསན། སློབ་དཔོན་དྷརྨ་པཱ་ལ་ལས་ཚོགས་ཆོས་གང་གསུངས་གསན། བླ་མ་ཉི་ཐོག་པ་ལ་ཀྱི་རྡོ་རྗེ་དང་། བདེ་མཆོག་ལ་སོགས་པའི་དབང་དང་གདམས་ངག་མང་དུ་ཞུས། སློབ་དཔོན་བང་སྟོན་པ་ལ་རྣམ་འགྲེལ་དང་རིགས་གཏེར་སོགས་མདོ་སྔགས་གཞུང་ལུགས་སྤྱི་དང་། ཁྱད་པར་ས་ལུགས་ཀྱི་ཕྱག་ལེན་རྣམས་ལ་མཁས་པར་བསླབས། དུས་དེར་ས་སྐྱ་པ་ནང་འཁྲུག་གི་འགོ་ཚུགས་པས་ངེས་འབྱུང་སྐྱོ་བས་གཙེས་ཏེ་སློབ་དཔོན་འདམ་པ་ལས་རྒྱུན་གཅོད་དཀའ་ཐུབ་ཀྱི་རིགས་མང་པོ་དང་། དྲིལ་བུ་པའི་དབང༌། གདམས་སྐོར་གཞན་ཡང་གསན། རྒྱུན་གཅོད་བགེགས་སྒྲོལ་མཛད། བླ་མ་སུམ་སྟོན་རས་པ་ལས་ཀྱང་གཅོད་ཡུལ་གྱི་གདམས་པ་མང་དག་ཅིག་གསན། འཆི་བ་མི་རྟག་པའི་རྟོགས་པ་རྒྱུད་ལ་ང་གིས་སྐྱེས་ཤིང༌། སྲིད་ལ་སྐྱོ་ཤས་ཀྱིས་བསམ་པས་གདུང་པས་ཉིན་ཞག་མཚམས་མི་ཆད་པར་དགེ་སྦྱོར་འབའ་ཞིག་ལ་བརྩོན། དེ་ནས་ཁ་རག་ཚ་ཚ་མོར་ཕེབས་ཏེ་སློབ་དཔོན་གྲགས་ལས་རྗེ་བཙུན་མའི་བྱིན་རླབས། ཕྱག་རྒྱ་ཆེན་པོ་ཡི་གེ་བཞི་པ། ལམ་ཁྲིད་རླན་ལུགས་ཀྱི་རྩ་རླུང་ལ་སོགས་པ་ཞུས། སླར་ཡང་ས་སྐྱར་བྱོན་ནས་བླ་མ་དུར་ཁྲོད་དགོན་པ་ལས་གསུང་ངག་རིན་པོ་ཆེ་དང་བྱིན་རླབས་ཀྱི་དབང་བཀའ་མང་དུ་ཞུས།
དེ་རྗེས་ཡོལ་རི་གོང་དུ་ཕེབས་ཏེ་ཤངས་པ་རིན་ཆེན་བདུན་བརྒྱུད་ཀྱི་མཐའ་མ་འགྲོ་མགོན་སངས་རྒྱས་སྟོན་པ་ཆོས་ཀྱི་ཤེས་རབ་ཀྱི་དྲུང་ནས་རྒྱུད་སྡེ་ལྔའི་དབང་དང་། བདེ་མཆོག །ཆོས་དྲུག །སེམས་འཆི་མེད། འཆུག་མེད། ཕྱག་ཆེན། བྱིན་རླབས་ཀྱི་ཁྲིད། སྐྱེར་སྒང་ལུགས་ཀྱི་ཐུགས་རྗེ་ཆེན་མོ་དང་རྟ་མགྲིན། མཁའ་སྤྱོད་དཀར་མོ། ནམ་མཁའ་སྒོ་འབྱེད། བླ་མ་མགོན་པོ་དབྱེར་མེད་སོགས་ཤངས་པ་བཀའ་བརྒྱུད་ཀྱི་གདམས་ངག་མ་ལུས་པ་དང་། གཞན་ཡང་བླ་མ་དེ་ཉིད་ལས་དྭགས་པོ་བཀའ་བརྒྱུད་ཀྱི་འབྲི་གུང་དང་། འབྲུག་པ། ཚལ་པ་བཅས་དང་། དེ་བཞིན་ས་སྐྱ། མ་གཅིག་ལས་བྱོན་པའི་གཅོད་རྒྱུན་སོགས་གདམས་ངག་གི་ཁུངས་མང་དུ་མངའ་བ་དག་ཀྱང་གསན། ཆོས་རྗེ་སངས་རྒྱས་སྟོན་པ་སྐུ་འདའ་ཁར་ཡང་མཁས་བཙུན་གཞོན་ནུ་གྲུབ་ལ་ཆིག་བརྒྱུད་ཀྱི་གདམས་པའི་གནད་འདི་རྣམས་ཀྱི་བདག་པོ་བགྱིས། སྣོད་ལྡན་གྱི་སློབ་མ་རྣམས་ལ་ཕན་ཐོགས་དང་འགྲོ་དོན་མཛད་ཅིག་ཅེས་སོགས་ཆིག་བརྒྱུད་ཀྱི་བདག་པོར་དབང་བསྐུར་ལན་བཞིའི་བར་མཛད། སྔ་རྗེས་སུ་གཡུ་རི་ནགས་དང་སྲིན་པོ་རི་ སོགས་དབུས་གཙང་གི་ས་ཆ་མང་པོར་ལུས་སྲོག་བློས་གཏོང་བའི་གཅོད་གནང་ནས་ལྷ་འདྲེ་མང་པོའི་དོན་མཛད། ཤངས་ཀྱི་ནུབ་ཕྱོགས་འཇད་ཀྱི་ཐང་སྟོང་དུ་བཞུགས་སྐབས་ཏེ་ཧ་ལམ་སྤྱི་ལོ་1285ལོའམ་སྤྱི་ལོ1290ལོ་ ཙམ་ལ་ས་སྐྱ་དང་འབྲི་གུང་པ་ཕན་ཚུན་འཐབ་འཁྲུག་གི་ལས་སྦྱོར་ལ་རྩེན་པས་ཐུགས་ཡིད་ཤིན་ཏུ་མུག །འཇད་ཀྱི་འགྲུལ་ཁང་ཞིག་ཏུ་བཞུགས་དུས་མཛེ་ཅན་ཁྲག་རྣག་གིས་སྦགས་པ་ཞིག་གཟིགས་པས་ནད་པ་དེའི་རྐང་པ་ཞལ་གྱིས་འཇིབ། ནད་ལས་གྲོལ་ཐབས་མཛད་པས་བྱམས་སྙིང་རྗེའི་ཡོན་ཏན་གྱིས་ཡོངས་སུ་ཕྱུག་པ་སྟོན་གནང་མཛད། རང་ཉིད་ལ་ནད་སོགས་བྱུང་སྐབས་ཀྱང་ཐུགས་གཡེང་མི་གནང་བར་ང་ཡང་དགེ་སྦྱོར་གྱི་སྟེང་ནས། ན་རོགས་འཆི་རོགས་གཞན་མི་འཚོལ། འདི་ཀ་ལ་ཉལ་བ་ཡིན་གསུངས་ཞེས་པ་ལྟར་རོ། མཁས་བཙུན་གཞོན་ནུ་གྲུབ་ཀྱིས་བླ་མ་ཁྲོ་ཕུ་བ་དང་རྗེ་ཀུན་སྤོངས་པ་སོགས་མཚན་ལྡན་མཁས་གྲུབ་བརྒྱད་ཅུ་རྩ་གསུམ་ཙམ་བསྟེན་ནས་དེ་དག་གི་ཐུགས་བཅུད་རྫོགས་པར་བཞེས་པ་དང་། ལྷག་པར་སྤྲུལ་སྐུ་འགའ་རབ་རྡོ་རྗེ་ལས་གསང་ཆེན་རྙིང་མའི་རྫོགས་ཆེན་གྱི་གདམས་པའང་ཐོབ་པས་རིས་སུ་མི་ཆད་པའི་ཆོས་བརྒྱུད་དུ་མའི་གདམས་ངག་རིན་ཆེན་ནོར་བུས་ཐུགས་ཀྱི་བང་མཛོད་ལེགས་པར་གཏམས། དེ་ནས་ཕྱིས་མྱང་སྨད་དུ་བསམ་སྡིངས་བཏབ་ནས་ལམ་འབྲས། ཕྱག་ཆེན། ནི་གུ་རྣམས་ཆོས་ཀྱི་གཙོ་བོ་མཛད་ནས་གདུལ་བྱ་མང་པོ་ལ་ཁྲིད་བསྐྱངས་ཞེས་འཁོད་པ་ལྟར་སྐུ་ཚེའི་མཇུག་ཏུ་པ་སྣམ་བསམ་སྡིངས་དགོན་བཏབ་ནས་བོད་སོག་གི་བུ་སློབ་མང་པོར་ཤངས་པའི་ཆོས་སྐོར་གྱིས་གཙོས་པའི་ཆོས་ཀྱི་གནང་སྦྱིན་རྫོགས་པར་བསྩལ་ཏེ་སྨིན་གྲོལ་གྱི་ལམ་བཟང་ལ་བཀོད་གནང་མཛད། མཐར་དབེན་གནས་བསམ་གཏན་སྡིངས་དེ་རང་དུ་སྤྱི་ལོ1319ལོ་ཙམ་ལ་དགོངས་པ་ཆོས་ཀྱི་དབྱིངས་སུ་གཤེགས།
II.2.4.7 Serlingpa Tashi Pel
བདུན། ཤངས་པ་གསེར་གླིང་པ་བཀྲ་ཤིས་དཔལ།
ཁོང་ནི་ཡབ་རྗེ་བཙུན་མཚན་ཅན་དང་། ཡུམ་དཀོན་མཆོག་རྒྱན་གཉིས་ཀྱི་སྲས་སུ་རབ་བྱུང་ལྔ་པའི་ཆུ་འབྲུག་སྤྱི་ལོ1292ལོར་ཡོལ་ཕུ་གསེར་གླིང་སྟེ་དེང་ཆུ་ཤུར་རྫོང་བྱེ་ནུབ་ཡུལ་ཤོག་ཁོངས་ཀྱི་གསེར་གླིང་གྲོང་ཚོར་སྐུ་བལྟམས། དགུང་ལོ་བདུན་ལ་སོན་སྐབས་ཡི་གེ་འབྲི་ཀློག་ལེགས་པར་མཁྱེན། ནེལ་པ་པཎ་ཆེན་ལས་བསྙེན་པར་རྫོགས། ནེལ་པ་ཁུ་དབོན་གྱི་དྲུང་དང་། གསང་ཕུར་ཕར་ཕྱིན་དང་ཚད་མ་ལ་སོགས་པའི་མདོ་སྔགས་ཆོས་གཞུང་མང་པོར་གསན་བསམ་རྒྱ་ཆེར་མཛད། དེ་རྗེས་ཀརྨ་རང་བྱུང་རྡོ་རྗེ་དང་། རྒྱ་བྲག་ཆོས་རྗེ། སྐྱེས་མཆོག་བསམ་གཏན་དཔལ་ལ་སོགས་པའི་སྐྱེས་ཆེན་དམ་པ་མང་དུ་བསྟེན་ནས་ཕྱག་ཆེན་དང་། ཞི་བྱེད་ཀྱི་གདམས་པ་སོགས་ཇི་སྙེད་པ་གསན། སླར་རང་ཡུལ་དང་ཉེ་བའི་མཁས་གྲུབ་རྣམས་ལས་གསང་སྔགས་ཀྱི་ཆོས་སྐོར་དང་། རྨོག་ལྕོག་པ་རིན་ཆེན་བློ་གྲོས་སོགས་ལས་ཤངས་པའི་གདམས་ངག་མཐའ་ཡས་པ་གསན། ཡི་དམ་ལྷ་ཚོགས་དུ་མའི་ཞལ་གཟིགས། ལྷག་པར་དུ་སྐབས་དེའི་ཤངས་ཆོས་ཀྱི་བདག་པོ་མཁས་བཙུན་གཞོན་ནུ་གྲུབ་ལས་ཤངས་པའི་ཟབ་ཆོས་དུ་མའི་བདུད་རྩི་བཞེས། སངས་རྒྱས་སྟོན་པ་ལས་བྱུང་བའི་གཅོད་ཀྱི་སྐོར་རྣམས་ཀྱང་ཐུགས་སུ་ཆུད་པས། ཕྱིས་གདུལ་བྱ་རྣམས་ཀྱང་ཤངས་པའི་ཆོས་སྐོར་དང་། གཅོད་ཀྱི་གདམས་པས་གཙོ་བོར་མཛད་ནས་བསྐྱངས། དགེ་བའི་བཤེས་གཉེན་སྡེའི་བདག་པོ་དང་། མི་དཔོན་ཆེན་པོ་རྣམས་ཀྱིས་ཀྱང་ཞབས་ལ་གཏུགས་ནས་ཆོས་དང་འཇིག་རྟེན་གྱི་བསླབས་གདམས་ཅི་རིགས་བསྩལ་བ་སོགས་ཀྱིས་འགྲོ་དོན་རྒྱ་ཆེར་མཛད། དེ་རྗེས་ཡོལ་དང་། སྦུས་སྡེའི་སྒྲུབ་སྡེ་བཙུགས། ཆོས་དཔལ་ཤེས་རབ་དང་། བྲག་པོ་ཆེ་བ་རྡོ་རྗེ་དཔལ་ལ་སོགས་པའི་གསུང་གི་སློབ་མ་མང་བར་བསྐྱངས་ནས། མཐར་དགུང་གྲངས་དོན་བཞིར་ཕེབས་པ་རབ་བྱུང་དྲུག་པའི་ཤིང་སྦྲུལ་སྤྱི་ལོ་1365ལོའི་ཟླ་བ་དང་པོའི་ཚེས་བཅུ་དགུ་ཉིན་ཞི་བར་གཤེགས་པ་བཅས་སོ།
།གསེར་གླིང་པ་བཀྲ་ཤིས་དཔལ་གྱི་སློབ་མ་བྲག་པོ་ཆེ་བ་རྡོ་རྗེ་དཔལ། བཟང་དུ་སྐུ་འཁྲུངས། གསེར་གླིང་པ་ལས་ཤངས་ཆོས་དང་གཅོད་སྐོར་གསན་ཞིང་མགོན་པོས་ཀྱང་ལེགས་པར་རྗེས་སུ་བཟུང་། སློབ་མ་རྣམས་ཤངས་ཆོས་ལ་སོགས་པའི་གདམས་པ་རྣམས་ཀྱིས་ཚིམས་པར་མཛད། རྗེ་འདིའི་མཛད་རྣམ་ཞིབ་པ་ད་ཕན་མ་རྙེད།
དེའི་སློབ་མ་ཆོས་སྒོ་བ་ཆོས་དཔལ་ཤེས་རབ། །གཙང་དུ་འཁྲུངས། ཐར་པ་གླིང་ དུ་བྱོན་ནས་མཁན་ཆེན་ཤེས་རབ་འོད་ཟེར་ལས་རབ་ཏུ་བྱུང་ཞིང་བསྙེན་པར་རྫོགས། སྟོད་འབྲུག་བསྟན་པའི་མངའ་བདག་ཆོས་རྗེ་འབའ་ར་བ་ལས་རི་ཆོས་དང་ཕྱག་ཆེན་ལ་སོགས་གསན་པས་མནལ་གྱིས་མ་སྒྲིབ་པའི་འོད་གསལ་འཁྲུངས། བྲག་པོ་ཆེ་བ་རྡོ་རྗེ་དཔལ་ལས་ཤངས་པའི་ཆོས་སྐོར་དང་གཅོད་ཡུལ་གསན་ནས་ཐུགས་ཉམས་སུ་ཡང་བཞེས། ཕྱིས་ཐེལ་གྱི་ཆོས་སྒོ་ལ་ཞུགས་ནས་གདུལ་བྱ་མང་པོ་སྨིན་གྲོལ་ལ་བཀོད། ཐེངས་ཤིག་ངང་རྐྱལ་གྱི་གཙུག་ལག་ཁང་དུ་ཕེབས་ནས་ཆོས་འདི་དག་གི་འཁོར་ལོ་རྒྱ་ཆེན་སྐོར་བའི་ཚེ། རྟོགས་པས་སྲིད་གསུམ་ཟིལ་གྱིས་གནོན་པ། བྱིན་རླབས་ཀྱིས་རྡོ་རྗེའི་མཁའ་འགྲོ་མ་ཐམས་ཅད་འདུ་བ། མི་དང་མི་མ་ཡིན་པ་ཐམས་ཅད་ཀྱིས་མཆོད་པར་བྱ་བའི་གནས་རྒོད་ཕྲུག་རས་པ་ཞེས་ཡོངས་སུ་གྲགས་པའི་སྐལ་ལྡན་གྱི་སློབ་མ་ཞིག་བྱུང་བས་གཙོས་གདུལ་བྱ་དུ་མ་སྐྱོང་བར་མཛད།
ཆོས་རྗེ་རྒོད་ཕྲུག་པ་གྲགས་པ་འབྱུང་གནས་ནི་རྒྱལ་ཚབ་ཆོས་རྗེ་འཁྲུངས་པའི་སྔ་ལོ་སྟེ་སྤྱི་ལོ1364ལོར་སྐུ་བལྟམས། སྔ་རྗེས་སུ་བླ་མ་ཆོས་སྒོ་བ་ཆོས་དཔལ་ཤེས་རབ་སོགས་ལས་དྭགས་ཤངས་བཀའ་བརྒྱུད་ཀྱི་གདམས་པ་མང་དུ་གསན་ཞིང་། ཐུགས་ཉམས་སུ་བཞེས་པས་ཕྱག་ཆེན་གྱི་རྟོགས་པ་ནམ་མཁའ་དང་མཉམ་པ་འཁྲུངས། གྲུབ་པའི་རྟགས་ཀྱང་མང་དུ་བསྟན་པས་མི་དབང་གྲགས་པ་འབྱུང་གནས་སོགས་མཐོ་དམན་ཀུན་གྱིས་བཀུར་བར་མཛད། རྗེ་ཙོང་ཁ་པ་ཆེན་པོ་བཀྲ་ཤིས་དོ་ཁར་ཕེབས་དུས་དགེ་ཚུལ་གྱི་སྡོམ་པ་ཞུས་ཤིང་གསུང་ཆོས་ཀྱང་མང་དུ་གསན་པར་གྲགས། རྗེ་རྒོད་ཕྲུག་རས་པས་གཅོད་ཡུལ་གྱི་གདམས་པ་འགའ་ཞིག་འགོས་ལོ་གཞོན་ནུ་དཔལ་ལ་བསྩལ་གནང་བ་འགོས་ལོ་རང་ཉིད་ཀྱིས་གསུངས་འདུག་ལ། ཡང་ཐུགས་རྗེ་ཆེན་པོ་དཔལ་མོ་ལུགས་སུ་གྲུབ་ཐོབ་དངོས་གྲུབ་ནས་རྗེ་རྒོད་ཕྲུག་པ་བར་བརྒྱུད་པའི་བརྒྱུད་པ་ཞིག་ཀྱང་འདུག །འོན་ཀྱང་རྗེ་རྒོད་ཕྲུག་རས་པས་ཤངས་པའི་གདམས་པ་རྣམས་སུ་ཞིག་ལ་གནང་བའི་སྐོར་གྱི་ཡིག་ཆ་ད་ཕན་མ་མཐོང་བས། དེའི་རྗེས་ཙམ་ནས་ནི་གུ་བསམ་སྡིངས་ལུགས་ཀྱི་བརྒྱུད་པ་གསལ་བར་འཛིན་པའི་བླ་མ་མ་རྙེད་དོ།

II.2.5 -
།ལྔ་པ། ཉེ་དུས་ཀྱི་ཤངས་ཆོས་འཛིན་པའི་བླ་མ་གཙོ་ཆེན་འགའ་ཞིག
སྤྱི་ལོའི་དུས་རབས་བཅུ་བདུན་པ་ཙམ་ནས་ད་བར་ཤངས་ཆོས་འཛིན་པའི་བརྒྱུད་པ་ཟམ་མི་ཆད་པར་བྱོན་ཡོད་ཅིང༌། དེ་དག་ལས་ཚབ་མཚོན་འགའ་ཞིག་བརྗོད་པར་བྱ་བ་ལ།
II.2.5.1 Rigdzin Tsewang Norbu
གཅིག ཀཿཐོག་རིག་འཛིན་ཚེ་དབང་ནོར་བུ།
མཚན་གྱི་རྣམ་གྲངས་ལ་རིག་འཛིན་གཏེར་བཞད་རྩལ། འཇམ་དཔལ་རྒྱ་མཚོ། འོད་གསལ་བདེ་གཤེགས་སྙིང་པོ། དཔའ་བོ་དོན་གྲུབ་རྡོ་རྗེ། རྣལ་འབྱོར་མ་རབ་ཏུ་དགྱེས་པའི་རྡོ་རྗེ། རྡོ་རྗེ་དྲག་པོ། ཀུན་བཟང་འཕྲིན་ལས་འགྲོ་བ་ཡོངས་འདུས་རྩལ། བསོད་ནམས་ཐེག་མཆོག་བསྟན་པའི་རྒྱལ་མཚན་སོགས་མཚན་མཆོག་བརྒྱ་རྩའི་ཕྲེང་བ་མཚར་དུ་དངར་བ་མཆིས་པ་ལས་ཡོངས་གྲགས་སུ་རིག་འཛིན་ཚེ་དབང་ནོར་བུར་འབོད་པ་འདི་ཉིད་ནི། ཐུགས་གཏེར་གསང་བའི་ལུང་བྱང་ལས་པདྨ་ང་སྤྲུལ་ནག་པོས་བྱིན་རླབས་ཤིང༌། །ནམ་སྙིང་ཐུགས་ཀྱི་འོད་ཟེར་ཞུགས་གྱུར་པ། །ཀཿཐོག་ལྷོ་ཕྱོགས་བཙན་རིའི་ཉེ་འདབས་སུ། །མཆོག་དམན་སྤངས་པ་བར་མ་དག་པའི་རིགས། །མགོན་དང་མཚོ་ཞེས་བྱ་བ་གཉིས་ཀྱི་བུ། །དབང་ངམ་ནོར་བུའི་མིང་ཅན་སྙིང་སྟོབས་ཅན་ཞེས་སོགས་རྡོ་རྗེའི་ལུང་བསྟན་བཀའ་རྒྱ་དུ་མས་ཡོངས་སུ་ཟིན་པ་ལྟར་མདོ་ཁམས་སྤོ་འབོར་སྒང་གི་ཆར་གཏོགས། བཙན་རྒོད་རི་བཀྲའི་ཉེ་ཟུར། དུང་དཀར་རི་ཁྲོད་དུ་གྲགས་པའི་བསམ་གཏན་གྱི་བསྐྱིལ་བུར་ཡབ་རྔུ་བ་ཨ་ཏི་མགོན་པོའམ་ཇོ་བོ་སྐྱབས་དང་། ཡུམ་སྒོ་བཟའ་རྡོ་རྗེ་མཚོ་གཉིས་ཀྱི་སྲས་སུ་སྤྱི་ལོ1697ལོར་སྐུ་འཁྲུངས། སྐུ་ན་ཆུང་ངུའི་དུས་ནས་རོང་སྟོན་པདྨ་བདེ་ཆེན་གླིང་པ། བྲག་དམར་ཀུན་བཟང་ཁྱབ་བརྡལ་ལྷུན་གྲུབ་སོགས་ཀྱིས་རིག་འཛིན་པདྨ་ནོར་བུའི་སྐྱེ་སྲིད་དུ་ངོས་འཛིན་མཛད་ཅིང་། གཏེར་སྟོན་བདེ་ཆེན་གླིང་པས་ཚེ་དབང་ནོར་བུ་ཞེས་པའི་མཚན་གསོལ། དེ་རྗེས་ཚབ་སྤྲུལ་དྲུག་པ་ཀརྨ་གསུང་རབ་རྒྱ་མཚོ་ལས་བཀའ་བརྒྱུད་པའི་ཕྱག་རྒྱ་ཆེན་པོ་སོགས་གསར་རྙིང་གི་ཟབ་ཆོས་དུ་མ་གསན་པ་དང་། དགུང་ལོ་བཅོ་བརྒྱད་པ་ཤིང་ལུག་སྤྱི་ལོ1716ལོར་སྤོ་བོ་དང་ཀོང་པོ་བརྒྱུད་ནས་དབུས་གཙང་དུ་ཕེབས་ཏེ་ཤངས་སྟག་སྣར་ཏྲེ་ཧོ་ཆོས་ཀྱི་དབང་པོ་ལས་བཀའ་ཇོ་རྙིང་གསུམ་གྱི་ཟབ་ཆོས་འགའ་ཞིག་ཞུས། དེ་ནས་བྱང་ལྷ་རྩེའི་འབྲས་སྤུངས་དགོན་དུ་ཆོས་རྗེ་ཀུན་བཟང་དབང་པོ་ལ་ཐོག་མར་ཆོས་འབྲེལ་ཙམ་དང་། ཕྱིས་དཔལ་དུས་ཀྱི་འཁོར་ལོའི་དབང་ཆེན་ཚར་མང་པོ། དབུ་མའི་ལྟ་ཁྲིད། ཁྲིད་བརྒྱ་སྒྲུབ་ཐབས་རིན་འབྱུང་། སྒྲོལ་མ་རྣལ་འབྱོར་མ། ནི་གུའི་ཆོས་སྐོར། རྗེ་བཙུན་ཏཱ་ར་ནཱ་ཐའི་བཀའ་འབུམ་སོགས་ཇོ་ལུགས་ཀྱི་གདམས་སྐོར་རྒྱུན་གང་བཞུགས་གསན་ཞིང་ཇོ་ནང་རི་ཁྲོད་དུ་ཆོས་ཁྲིར་མངའ་གསོལ་མཛད། རི་ཁྲོད་འདིར་རྟེན་བཞེངས་རྒྱ་ཆེན་མཛད། མང་ཡུལ་སྐྱིད་གྲོང་གི་ཀཿཐོག་བདུད་རྩི་ཕུག་ཏུ་སྦྱོར་བ་ཡན་ལག་དྲུག་གི་ཉམས་ལེན་ཡུན་རིང་མཛད། གཙང་སྟོད་གྱེ་རེ་ལོ་ཙཱ་བ་བཀྲ་ཤིས་རྣམ་རྒྱལ་ལས་སྒྲ་རིག་པ་དང་། སྙན་དངགས། སྐར་རྩིས་སོགས་གསན་ཞིང་རང་བཞེད་རྒྱུད་རྩིས་གཙོར་འདོན་གྱིས་རྩིས་གཞུང་གསར་དུ་མཛད་པར་རིག་འཛིན་གྲུབ་པའི་རྩིས་སུ་གྲགས། དེ་ལྟར་རྗེ་འདི་ཉིད་ཀྱིས་གྲུབ་མཐའ་རིས་མེད་ཀྱི་བླ་མ་མང་དུ་བསྟེན་པ་སྟེ། ཏམྦུ་ར་སེང་གེའི་རྒྱུད་ཀྱི་སྒྲ་དབྱངས་ཞེས་པའི་མགུར་དུ་སྤྱིར་བླ་མ་ལྔ་ཕྲག་དྲུག་ཙམ་བསྟེན། །ཀུན་དམ་ཚིག་སེལ་མེད་ཐུགས་ཡིད་འདྲེས། །སྒོས་རྩ་བའི་བླ་མ་རྣམ་གསུམ་གྱི། །ཐུགས་གཏིང་ནས་གཅེས་པའི་ཐུགས་སྲས་མཛད་ཅེས་གསུངས་པ་ལྟར་སྔ་ཕྱི་ཁྱོན་དུ་བླ་མ་སུམ་ཅུ་ཙམ་བསྟེན་ནས་མདོ་སྔགས་གསར་རྙིང་གི་ཆོས་ཚུལ་བསམ་གྱིས་མི་ཁྱབ་པ་གསན་ཞིང་། ཁྲིད་རྒྱུན་སོ་སོ་བ་དང་། ཁྲིད་ངོ་བོ་གཅིག་ཀྱང་བརྒྱུད་ཁུངས་ཐ་དད་པ་རྣམས་བསྡོམས་པས་ཁྲིད་བཀའི་རྒྱུན་བརྒྱ་དང་བརྒྱད་ཅུ་ལ་ཉེ་བ་གསན་པ་དང་། ཕྱག་རྒྱ་ཆེན་པོའི་ཁྲིད་རྒྱུན་ཁོ་ན་སུམ་ཅུ་སོ་བརྒྱད་ཙམ་གསན་ནས། གངས་ཅན་གྱི་ལྗོངས་འདིར་རྒྱལ་བསྟན་མ་ལུས་གདན་ཐོག་གཅིག་ཏུ་ཉམས་སུ་ལེན་པའི་ཚུལ་ལ་འབད་པས་རིས་མེད་བསྟན་པའི་སྲོལ་འབྱེད་དུ་ཡོངས་སུ་གྲགས་པས། འཇམ་དབྱངས་མཁྱེན་བརྩེ་དབང་པོས་ཀྱང་རིས་མེད་བསྟན་པའི་སྲོལ་འབྱེད་ཆེན་པོ་ཞེས་བསྔགས་བརྗོད་མཛད།
དགུང་ལོ་ཉེར་དྲུག་པ་ཆུ་ཡོས་སྤྱི་ལོ1723ལོར་ཁམས་ཀྱི་ཀཿཐོག་མ་དགོན་དུ་ཕྱིར་ཕེབས་ནས་དགོན་པའི་གདན་ས་མཛད། ལོ་དེའི་སྟོན་མཇུག་ལ་སླར་ཡང་དབུས་གཙང་དང་ལ་སྟོད་དིང་རི་བརྒྱུད་བལ་ཡུལ་དུ་ཕེབས། དགུང་ལོ་སུམ་ཅུ་སྟེ་སྤྱི་ལོ1727ལོར་མངའ་རིས་མང་ཡུལ་དུ་ཕེབས་ནས་ལོ་ཤས་བཞུགས། དགུང་ལོ་སོ་གཅིག་པར་མཆོད་རྟེན་བྱ་རུང་ཁ་ཤོར་གྱི་རབ་གནས་ལ་བྱོན། དགུང་ལོ་ཞེ་བརྒྱད་པ་ཤིང་གླང་སྤྱི་ལོ1745ལོར་ཀོང་པོའི་ཉང་ཁ་ལྗོན་ས་ལུང་དུ་ཕེབས་ཏེ་བོད་རྗེ་ལྷ་བཙན་པོའི་གདུང་རབས་ཚིག་ཉུང་དོན་གསལ་ཞེས་པ་བརྩམས་གནང་། སྤྱི་ལོ1748ལོར་སི་ཏུ་ཆོས་ཀྱི་འབྱུང་གནས་དང་ལྷན་དུ་བལ་ཡུལ་ལ་ཕེབས། བལ་པོའི་རྒྱལ་པོའི་རེ་འདུན་ལྟར་མཆོད་རྟེན་བྱ་རུང་ཁ་ཤོར་དང་འཕགས་པ་ཤིང་ཀུན་ལ་ཉམས་གསོ་ཕུན་སུམ་ཚོགས་པ་མཛད་པའི་དྲན་རྟེན་རྡོ་རིང་ད་ལྟའང་འཕགས་པ་ཤིང་ཀུན་ན་ཡོད། དེ་ནས་ཕྱིར་ལོག་ཕེབས་སྐབས་གུང་ཐང་ཟ་འོག་ཕུག་ཏུ་གུང་ཐང་གི་རྒྱལ་རབས་ཡིག་རྙིང་མང་པོར་དཔྱད་ཞིབ་ཐོག་གུང་ཐང་རྒྱལ་རབས་ཞེས་པ་རྩོམ་སྒྲིག་གནང་། དགུང་ལོ་ང་ལྔ་སྟེ་སྤྱི་ལོ1742ལོར་ལ་དྭགས་སྟོད་སྨད་གཉིས་ནང་འཁྲུག་ཤོར་སྐབས་རྒྱལ་དབང་སྐལ་བཟང་རྒྱ་མཚོའི་བཀའ་མངགས་ལྟར་ལ་དྭགས་སུ་ཕེབས་ནས་ལོ་གཅིག་རིང་བཞུགས་ཤིང་། ཟངས་ཡིག་རྣམ་ལྔ་དང་ཆིངས་ཡིག་ཆེན་པོ་འཇོག་གནང་མཛད་པས་ཕྱོགས་གཉིས་ཀས་གུས་བཀུར་ཚད་མེད་ཞུས། དགུང་གྲངས་ང་བདུན་པ་ཤིང་ཁྱི་སྤྱི་ལོ་1754ལོར་སླར་ཡང་བལ་ཡུལ་དུ་ཕེབས་པའི་ཕྱི་ལོ། སྤྱི་ལོ1755ལོར་མང་ཡུལ་སྐྱིད་གྲོང་དུ་དགོངས་པ་ཆོས་དབྱིངས་སུ་གཤེགས།
ཁོང་གི་སྐུ་ཚེ་གང་པོའི་ལོ་རྒྱུས་མདོར་བསྡུས་ན་རྨད་བྱུང་མཛད་ཆེན་བཞི་ ཞེས་གྲགས་པ་འདི་ལྟ་སྟེ། དམག་དང་འཁྲུག་རྩོད་ཐབས་ཀྱིས་བཟླུམ་ཞིང་མི་འཇིགས་སྐྱབས་ཀྱི་སྦྱིན་པ་བསྩལ། རྟེན་གསུམ་གསོ་དང་ཕྱོགས་མེད་སྦྱངས་ཏེ་རིས་མེད་གྲུབ་མཐའི་སྲོལ་ཚུགས་པ། མཁས་གྲུབ་དམ་པའི་ཐུགས་རྒྱུད་ཟིན་ཞིང་བརྒྱུད་པ་དཀོན་པོའི་སྲོག་མཐུད་པ། གསོན་དུར་སྦ་བའི་སྲོལ་ངན་བཅད་དེ་གཞན་ཕན་དགེ་བའི་ལུགས་སྤེལ་བ་བཅས། དམ་པ་འདི་ཉིད་མང་དུ་ཐོས་པ་ལུང་གི་ཡོན་ཏན་དང་། ཚུལ་བཞིན་སྒྲུབ་པ་རྟོགས་པའི་ཡོན་ཏན་གྱི་རྩལ་རྫོགས་ཤིང་། གཞན་ཕན་འཕྲིན་ལས་ཀྱི་མཚོ་བརྡོལ་བས་རྒྱལ་དབང་སྐལ་བཟང་རྒྱ་མཚོ་དང་། མི་དབང་ཕོ་ལྷ་བསོད་ནམས་སྟོབས་རྒྱལ། སྡེ་དགེ་ས་སྐྱོང་། མང་ཡུལ་གུང་ཐང་རྒྱལ་པོ། བལ་པོའི་རྒྱལ་པོ་སོགས་ཡུལ་ཁམས་མི་འདྲ་བའི་གོང་མ་དང་སྡེ་དཔོན་ཆེ་ཕྲ་ཀུན་གྱིས་གཙུག་ཏུ་བཀུར། གང་གི་གསུང་དང་ཐུགས་ལས་སྤྲུལ་པའི་སྲས་ནི། རྒྱལ་དབང་ཀརྨ་པ་བདུད་འདུལ་རྡོ་རྗེ། འབྲུག་པ་ཐམས་ཅད་མཁྱེན་པ་བཀའ་བརྒྱུད་འཕྲིན་ལས་ཤིང་རྟ། ཀུན་མཁྱེན་སི་ཏུ་རིན་པོ་ཆེ་ཆོས་ཀྱི་འབྱུང་གནས། དཔའ་བོ་གཙུག་ལག་དགའ་བ་སོགས་རྩོད་བྲལ་གྱི་སྐྱེས་ཆེན་རྣམས་གཙོ་བོར་བཞུགས་ཤིང་། གཞན་མདོ་ཁམས་སྟོད་སྨད་དང་། མངའ་རིས་ལ་དྭགས་ཚུན་གྱི་སྤྱིར་གྲུབ་མཐའ་རིས་མེད་དང་། ལྷག་པར་སྐབས་དེའི་རྙིང་མ་དང་བཀའ་བརྒྱུད་པའི་ལུགས་འཛིན་གྱི་བླ་མ་ཕལ་ཆེར་གང་དེའི་ཞལ་སློབ་ཏུ་མ་གྱུར་པ་མེད། གསུང་འབུམ་མང་དུ་བྱུང་བར་ངེས་ཀྱང་ལ་དྭགས་རྒྱལ་རབས་སུ་གསུང་རྩོམ་པོད་ཆེན་པོ་བཞི་ཡོད་ཅེས་དང་། ཕྱིས་སུ་ཕྱོགས་བསྒྲིགས་བྱས་པར་པུ་ཏི་ལྔ་ལྷག་ཙམ་བཞུགས་ལ། རིག་འཛིན་ཆེན་པོས་མཛད་པའི་གཞི་ལམ་འབྲས་བུའི་རྣམ་གཞག་པད་དཀར་ཕྲེང་བ་ལ་དཔེ་བྱས་པའམ། རྒྱས་སུ་བཏང་སྟེ་འཇམ་མགོན་ཀོང་སྤྲུལ་གྱིས་ཤེས་བྱ་ཀུན་ཁྱབ་མཛད།
རྗེ་འདི་ཉིད་ཆོས་བརྒྱུད་སྤྱི་དང་། ཁྱད་པར་ཇོ་ནང་པ་དང་ཤངས་པ་བཀའ་བརྒྱུད་གཉིས་ལ་བཀའ་དྲིན་ལྷག་པར་ཆེ་བ་སྟེ། ཁོང་གིས་ཆོས་རྗེ་ཀུན་བཟང་དབང་པོ་ལས་དཔལ་ཇོ་ནང་པའི་གདམས་པ་ཡོངས་སུ་རྫོགས་པའི་དབང་ལུང་ཁྲིད་གསུམ་མ་ཚང་བ་མེད་པར་གསན་ཞིང་སྐལ་ལྡན་གྱི་གདུལ་བྱ་དག་ལ་རྒྱ་ཁྱབ་ཏུ་སྤེལ་བས། ད་ལྟའི་ཆར་འཛམ་ཐང་དགོན་དང་། འབྲོག་དགེ་དགོན། བསྭེ་དགོན་སོགས་སུ་གཙང་པ་དགེ་སློང་གི་བརྒྱུད་པའང་ཅུང་ཟད་ཡོད་མོད། གདམས་ངག་མང་ཆེ་ཤོས་ཀྱི་བརྒྱུད་པ་རིག་འཛིན་ཆེན་པོ་མཆོག་ནས་བྱུང་བ་ཇོ་ནང་ཆོས་འབྱུང་དང་། བླ་བརྒྱུད་གསོལ་འདེབས་སོགས་སུ་གསལ་བས། ཁོང་ཉིད་ཆོས་ལུགས་སྤྱི་རྙིང་མ་ཡིན་ཀྱང་ཇོ་ནང་པའི་བཀའ་སྲོལ་འཛིན་སྐྱོང་སྤེལ་གསུམ་གནང་སྟབས་གཏེར་ཆེན་བརྒྱ་རྩའི་གྲས་སུ་ཡང་བཞུགས་ལ། རྔ་ཡུལ་ཨ་ལག་གྲོང་མང་རིན་པོ་ཆེ་རིག་འཛིན་རྣམ་སྣང་རྡོ་རྗེ་ཉིད་ཀྱི་སྐྱེ་སྲིད་དང་ཆོས་བརྒྱུད་འཛིན་པ་གཙོ་བོར་གྱུར་པས་སྦྱོར་དྲུག་དང་། བདེ་མཆོག །འཇིགས་བྱེད། མགོན་པོ་ཏྲག་ཤད། ལམ་འབྲས། ཕྱག་ཆེན་ལྷན་སྐྱེས། སྒྲོལ་མ་རྣམ་འབྱོར་མ། ཀྱི་རྡོ་རྗེ་སོགས་ཀྱི་བླ་བརྒྱུད་ཕལ་མོ་ཆེར་ཁོང་གི་མཚན་གསལ་བར་འཁོད་ཡོད་པ་བཅས། བསེ་དགོན་ཐུབ་བསྟན་རྣམ་རྒྱལ་གླིང་གི་བརྒྱུད་པ་མ་ལུས་པ་རིག་འཛིན་ཚེ་དབང་ནོར་བུ་ནས་བརྒྱུད་པ་ཤ་སྟག་ཡིན་པས། ཨ་ལག་གྲོང་མང་ཚང་གིས་ཚ་གྲང་བཀྲེས་སྐོམ་དཀའ་ངལ་ཁྱད་བསད་ནས། །དབུས་གཙང་གནས་བྱོན་གསང་ཆེན་བདུད་རྩི་ཐོབ། །བརྟུལ་ཞུགས་གྲུབ་པའི་དཔའ་བོ་སྒྲོལ་བའི་མགོན། ཚེ་དབང་ནོར་བུའི་ཞབས་ལ་གསོལ་བ་འདེབས་ཞེས་ཀྱང་གསུངས།
ཡང་དམ་པ་འདི་ཉིད་ཀྱིས་ཁྱབ་བདག་མགོན་པོ་རྣམ་རྒྱལ་ལས་དཔལ་ལྡན་ཤངས་པ་བཀའ་བརྒྱུད་ཀྱི་ནི་གུའི་གསེར་ཆོས་ལྔ། མགོན་པོའི་བཀའ་ཕྱི་ནང་། ཟབ་ཆོས་ལྷ་བཞི་དྲིལ་སྒྲུབ་སོགས་གདམས་ངག་གི་རྒྱུན་གང་བཞུགས་གསན་ཏེ། ནི་གུའི་བརྒྱུད་འདེབས་བྱིན་རླབས་སྤྲིན་ཕུང་དུ་གནས་འོ་ཡུག་ཕྱི་གོང་རྫ་ར་ན། །རིག་འཛིན་ཚེ་དབང་ནོར་བུ་ལ་གསོལ་བ་འདེབས་ཞེས་འཁོད་པ་ལྟར་འོ་ཡུག་གི་ཕྱི་གོང་རྫ་ར་ སོགས་སུ་བཞུགས་ནས་ཤངས་པའི་གདམས་པ་ཉམས་བཞེས་མཐར་ཕྱིན་པ་མཛད། དེ་རྗེས་ཕྱག་ཆེན་གའུ་མའི་ཁྲིད་ཡིག་ས་བོན་ཙམ་གྱུར་བདུད་རྩིའི་ཐིག་ལེ་དང་། གའུ་མའི་རྩ་སྡོམ་ས་བཅད་ལ་སོགས་པའི་བསྟན་བཅོས་ཀྱང་མཛད་ལ། རང་ཉིད་ཀྱིས་ཉམས་སུ་བསྟར་བའི་ཤངས་པའི་གདམས་པ་ཡོངས་རྫོགས་བརྒྱུད་པའི་དར་རྒུད་ལ་དགོངས་ཏེ་འབྲུག་པ་ཐམས་ཅད་མཁྱེན་པ་བཀའ་བརྒྱུད་འཕྲིན་ལས་ཤིང་རྟ་ ལ་ལེགས་པར་བརྒྱུད་པ་དང་། དེས་རྨོག་ལྕོག་ཀུན་དགའ་དགེ་ལེགས་དཔལ་འབར། དེས་ཀུན་དགའ་ལྷུན་གྲུབ་རྒྱ་མཚོ། དེས་གྲུབ་མཆོག་བཀའ་བརྒྱུད་བསྟན་འཛིན། དེས་མཆོག་གཟིགས་ཀརྨ་ལྷག་མཐོང་། དེས་ཀརྨ་གཞན་ཕན་འོད་ཟེར། དེས་འཇམ་མགོན་ཀོང་སྤྲུལ་བློ་གྲོས་མཐའ་ཡས་ལ་བརྒྱུད་པའོ།
II.2.5.2 The Jamgön Kongtrül incarnations
།གཉིས། ཀོང་སྤྲུལ་སྐུ་ཕྲེང་རིམ་བྱོན་གྱི་སྐོར།
དེ་ཡང་མཛོད་ཆེན་རྣམ་པ་ལྔའི་ཤིང་རྟའི་སྲོལ་འབྱེད་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱི་སྐུའི་སྐྱེ་ཕྲེང་རིམ་པར་བྱོན་པ་ནི། དཔལ་ལྡན་མཁྱེན་བརྩེ་འོད་ཟེར་དང་། ཀརྨ་བློ་གྲོས་ཆོས་ཀྱི་སེང་གེ ད་ལྟ་འཚོ་བཞུགས་བློ་གྲོས་ཆོས་ཀྱི་ཉི་མ་བཅས་ཡིན་པ་ལས།
༡ སྐུ་ཕྲེང་དང་པོ་འཇམ་མགོན་བློ་གྲོས་མཐའ་ཡས།
མཚན་གཞན་ཀོང་སྤྲུལ་ཡོན་ཏན་རྒྱ་མཚོའམ་བློ་གྲོས་མཐའ་ཡས། པདྨ་གར་དབང་འཕྲིན་ལས་འགྲོ་འདུལ་རྩལ་སོགས་སུ་གྲགས་པ་འདི་ཉིད་ནི། ཏིང་ངེ་འཛིན་རྒྱལ་པོའི་མདོ་ལས། གང་གི་ལག་ན་ཏིང་འཛིན་མཆོག་ཡོད་པ། །རྒྱལ་བ་བྱམས་པ་གྲགས་པ་མཐའ་ཡས་བཞིན། །སེམས་ཅན་རྣམས་ཀྱི་དོན་མང་བྱེད་འགྱུར་ཞེས། །བློ་གྲོས་མཐའ་ཡས་དེ་ནི་ངས་ལུང་བསྟན། །ཅེས་དང་། ལངྐར་གཤེགས་པའི་མདོ་ལས། དེ་ཡི་འོག་ཏུ་བྱས་དུས་ལ། །འདྲེན་པ་བློ་གྲོས་ཞེས་བྱ་བ། །ཤེས་བྱ་ལྔ་རྣམས་སྟོན་པ་པོ། དཔའ་བོ་ཆེན་པོ་འབྱུང་བར་འགྱུར། ཞེས་པ་སོགས་འཁྲུལ་མེད་རྡོ་རྗེའི་ལུང་གིས་རབ་ཏུ་ཟིན་པ་ལྟར། རབ་བྱུང་བཅུ་བཞི་པའི་ཆུ་བྱ་སྤྱི་ལོ་1813ལོར་མདོ་སྟོད་འབྲི་ཟླ་ཟལ་མོ་སྒང་གི་པདྨ་ལྷ་རྩེའི་མདུན་རོལ་རོང་རྒྱབ་སྦས་པའི་ལྗོངས་སུ་ཡབ་ཁྱུང་རྒྱལ་བསྟན་འཛིན་གཡུང་དྲུང་དང་། ཡུམ་བཀྲ་ཤིས་མཚོའི་སྲས་སུ་སྐུ་འཁྲུངས། དགུང་ལོ་བདུན་ལ་ཡབ་འདས། སྐུ་ན་ཆུང་ངུའི་དུས་ནས་བྱིས་པ་གཞན་དང་མི་འདྲ་བའི་མཛད་སྤྱོད་ངོ་མཚར་ཆེ་བ་མང་དུ་ཡོད་པ་དང་། བཟོ་དང་གསོ་བ་རིག་པ་སོགས་ཐེངས་རེ་གསན་གཟིགས་བྱུང་བ་ཙམ་གྱིས་མཁྱེན་ཞིང་། ཐུགས་རྒྱུད་དྲང་ལ་སྤྱོད་ལམ་ཞི་ཞིང་དུལ་བ། གང་བརྩམས་མཛད་པ་མཐར་འདོན་པ་ལ་ཞུམ་པ་མེད་པ་སོགས་སྐྱེ་བོ་ཕལ་པ་ལས་ཁྱད་དུ་འཕགས་པའི་ཡོན་ཏན་དུ་མ་མངའ། དགུང་ལོ་ཉེར་གཅིག་པ་སྤྱི་ལོ1833ལོར་ཁང་གསར་དཔོན་རྒན་ཚེ་འཕེལ་དང་ལྷན་དུ་དཔལ་སྤུངས་སུ་ཕེབས། ཐོག་མར་དབོན་རྒན་སྤྲུལ་སྐུ་དང་མཇལ། དབོན་རྒན་རིན་པོ་ཆེས་སི་ཏུ་པདྨ་ཉིན་བྱེད་ལ་གྲྭ་པ་འདིར་སྤྲུལ་སྐུ་ཞིག་གི་མཚན་གསོལ་ན་བསྟན་འགྲོའི་དོན་ལ་ཕན་ཐོག་ཆེ་ཚུལ་དང་། དེ་མིན་སྡེ་དགེའི་དྲུང་ཡིག་ཏུའང་ཁྲིད་ཉེན་ཡོད་པས་ཅིས་ཀྱང་སྤྲུལ་པའི་སྐུའི་མཚན་གསོལ་དགོས་པ་ནན་ཞུས་མཛད་པས། སི་ཏུ་ཆོས་འབྱུང་གི་སྐུ་ཚེ་སྟོད་ཀྱི་ཞལ་སློབ་ཀོང་པོ་བམ་སྟེང་སྤྲུལ་སྐུ་ཟེར་བ་དེའི་ཡང་སྲིད་དུ་མིང་བཏགས་ན་འབྲེལ་ཆགས་པར་ཐུགས་ཐག་བཅད། དེ་ནས་བཟུང་ཀོང་སྤྲུལ་ཞེས་པའི་མཚན་ཐོགས། ཐོག་མར་སྔ་འགྱུར་ལུགས་ཀྱི་བསྙེན་རྫོགས་བསྒྲུབས་པ་ལ། སླར་དཔལ་སྤུངས་དགོན་དུ་རྗེ་བླ་མ་པདྨ་ཉིན་བྱེད་དབང་པོས་མཁན་སློབ་སྦྲགས་མ་མཛད་དེ་སྟོད་འདུལ་པཎ་ཆེན་ལུགས་ཀྱི་བསྙེན་རྫོགས་མཛད། མཚན་ཀརྨ་ངག་དབང་ཡོན་ཏན་རྒྱ་མཚོ་འཕྲིན་ལས་ཀུན་ཁྱབ་དཔལ་བཟང་པོ་ཞེས་གསོལ། སྔ་རྗེས་སུ་ཞེ་ཆེན་པཎྜི་ཏ་འགྱུར་མེད་མཐུ་སྟོབས་རྣམ་རྒྱལ། སི་ཏུ་རིན་པོ་ཆེ་པདྨ་ཉིན་བྱེད། འཇམ་དབྱངས་མཁྱེན་བརྩེའི་དབང་པོ་སོགས་གྲུབ་མཐའ་རིས་མེད་ཀྱི་བླ་མ་དགེ་བའི་བཤེས་གཉེན་ལྔ་བཅུ་ལྷག་ཙམ་བསྟེན་ནས་ཐུན་མོང་གི་རིག་པའི་གནས་བཅུ་ཕྲག་བརྒལ་བ་དང་། ཐུན་མིན་ནང་རིག་པ་དབུ་ཕར་འདུལ་མཛོད་བྱམས་ཆོས་གཙོ་བོར་གྱུར་པའི་མཚན་ཉིད་ཐེག་པའི་བཀའ་དང་དགོངས་འགྲེལ་དུ་མ། སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་ལམ་སྲོལ་བོད་ཡུལ་དུ་མཆིས་སུ་ཅོག་གི་སྨིན་གྲོལ་གདམས་པའི་ཟབ་བཅུད་མཐའ་དག་རྫོགས་པར་གསན། གང་གསན་པ་ཐམས་ཅད་ཐོས་པའི་གོ་ཡུལ་ཙམ་དུ་བཞག་པར་ཉམས་ལེན་གྱི་གནད་དུ་བཟུང་བས་དངོས་གྲུབ་རྣམ་གཉིས་ཉམས་འོག་ཏུ་ཆུད་ཅིང་། སློབ་མ་རྣམས་ལ་རང་རང་གི་འདོད་མོས་དང་འཚམས་པའི་ཆོས་བཀའ་རྒྱ་ཆེར་སྤེལ། ལྷག་པར་བཀའ་དང་བསྟན་བཅོས། རྒྱུད་ལུང་མན་ངག་གི་གཞུང་བཤད། ཞལ་ཤེས་ལས་ཚོགས་ཕྱག་ལེན་ཕྲ་ཞིབ་དང་བཅས་པ་ཐུགས་ཀྱི་བུམ་པར་བསྐྱིལ་ནས། གསན་བསམ་སྒོམ་པའི་ཕྱག་རྗེས་རྨད་དུ་བྱུང་བའི་བསྟན་བཅོས་ཀྱང་། ཐུན་མོང་རིག་པའི་གནས་ཀྱི་ལམ་ནས་བཟུང་ཐུན་མིན་ཐེག་དགུའི་མཐར་ཐུག་རྫོགས་པ་ཆེན་པོ་ཨ་ཏི་ཡོ་ག་ལ་ཐུག་གི་བར་མདོ་སྔགས་ཀྱི་ལུགས་ཡོངས་སུ་རྫོགས་པ་ལེགས་པར་སྟོན་པ་ཤེས་བྱ་ཀུན་ལ་ཁྱབ་པའི་མཛོད། སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་རྩ་བའི་སྙིང་པོ་རྣམས་དང་སྨིན་གྲོལ་བཅུད་ཀྱི་ཡང་ཟབ་རྣམས་ཕྱོགས་གཅིག་ཏུ་བསྡུས་པ་གདམས་ངག་རིན་པོ་ཆེའི་མཛོད། རྡོ་རྗེ་ཐེག་པ་སྔ་འགྱུར་བཀའ་མ་ཡང་ཕུར་གསུམ་སོགས་དང་། གསར་འགྱུར་མར་རྔོག་རྒྱུད་སྡེའི་སྐོར་གྱི་སྒྲུབ་དཀྱིལ་སྨིན་གྲོལ་ཕྱོགས་གཅིག་ཏུ་བསྡུས་པ་བཀའ་བརྒྱུད་སྔགས་ཀྱི་མཛོད། སྔ་འགྱུར་བརྒྱུད་པ་དྲུག་ལྡན་ཟབ་གཏེར་རྒྱ་མཚོའི་ཡང་ཞུན་བཅུད་དུ་དྲིལ་བ་རིན་ཆེན་གཏེར་གྱི་མཛོད། ཤོག་སེར་དམ་རྫས་སོགས་ཟབ་གཏེར་གསང་བའི་ཁྱད་ནོར་ཐུན་མོང་མ་ཡིན་པའི་མཛོད་དང་། དེའི་རྗེས་འབྲེལ་གསུང་རྩོམ་ཐོར་བུའི་ཕྱོགས་བསྡུས་རྒྱ་ཆེན་བཀའ་ཡི་མཛོད་དེ་ཁྱོན་མཛོད་ཆེན་རྣམ་པ་ལྔ་རུ་བསྡུས་པ་རྣམས་དཔར་ལ་འཁོད་པ་དང་། མ་འཁོད་པ་ཡོངས་རྫོགས་བསྡོམས་པའི་པོད་དགུ་བཅུ་ལྷག་ཙམ་བཞུགས་པ་དེ་དག་གིས་རིས་མེད་བསྟན་པའི་རྒྱུན་ལ་འཆི་ཁ་མའི་སྲོག་མཐུད། གཞན་ཡང་བླ་མ་དགོངས་འདུས་ཀྱི་བསྙེན་སྒྲུབ་མཛད་སྐབས་མནལ་ལམ་དུ་གུ་རུ་རིན་པོ་ཆེ་མཇལ་ནས་དབང་བཞི་སྔགས་ཚིག་དང་བཅས་པའི་བྱིན་རླབས་བསྩལ་བ་སོགས་ཀྱིས་མཚོན་པའི་དག་སྣང་འཁོར་ལོ་རྒྱན་ལ་མངའ་དབང་རབ་ཏུ་འབྱོར། ཁང་ཁྱིམ་ལ་ཟང་ཐལ་དུ་ཕེབས་པ་དང་། རྡོ་ལ་ཕྱག་ཞབས་ཀྱི་རྗེས་བྱོན་པ། སྣང་བ་བདེན་འཛིན་མེད་པས་འཁྲུལ་པ་ཞིག་པའི་ངང་ཚུལ་གཏན་དུ་བཞུགས་པ་སོགས་ཀྱི་གྲུབ་པའི་ཡོན་ཏན་འཛད་མེད་མངའ། དགུང་ལོ་བཞི་བཅུར་སོན་སྐབས་གཏེར་སྟོན་མཆོག་གྱུར་གླིང་པ་དང་མཇལ་བ་ཙམ་གྱིས་ཐུགས་ཡིད་གཅིག་ཏུ་འདྲེས་ཤིང་། ཁྱད་པར་གྱི་ལུང་བྱང་བསྩལ་བ་རྣམས་ཀྱང་ཕྱག་བཞེས་སུ་བསྟར། དེ་རྗེས་ཙཱ་འདྲ་རིན་ཆེན་བྲག་གི་མཚོ་རྒྱལ་གསང་ཕུག་ནས་ཡབ་བཀའ་ཡུམ་བཀའི་སྒྲུབ་སྐོར་ཤོག་སེར་དང་འཆི་མེད་རིག་འཛིན་བཅུ་གསུམ་གྱི་ཚེ་རིལ། ཟླ་གམ་དབང་ཕུག་ནས་ཚིག་བདུན་སྒྲུབ་ཐབས་ཀྱི་ཆོས་སྐོར་སོགས་སྔ་འགྱུར་གྱི་གདམས་པ་དུ་མའི་ཟབ་གཏེར་བཞེས་པ་དང་། ཙཱ་འདྲ་རིན་ཆེན་བྲག་དང་རྫོང་ཤོད་བདེ་གཤེགས་འདུས་པའི་སྒྲུབ་གནས་སུ་དགོན་སྡེ་གསར་སྤེལ་དང་རྟེན་རྙིང་མང་པོའི་ཉམས་གསོ། སྐུ་གསུང་ཐུགས་རྟེན་བསམ་གྱིས་མི་ཁྱབ་པ་གསར་བཞེངས། དགེ་འདུན་གྱི་སྡེ་མང་པོར་བསྙེན་བཀུར་སོགས་མཛད་འཕྲིན་རི་རབ་ཀྱི་གཏོས་དང་མཉམ་པ་བསྐྱངས། མཐར་དགུང་གྲངས་གྱ་བདུན་བཞེས་པ་རབ་བྱུང་བཅོ་ལྔ་པའི་ཤིང་རྟ་སྤྱི་ལོ1894ལོར་དགོངས་པ་གཞན་དོན་དུ་གཤེགས། སློབ་མ་བགྲང་ལས་འདས་པ་ཞིག་བྱོན་པ་ལས། གཙོ་ཆེ་བ་ནི། ཀརྨ་སྐུ་ཕྲེང་བཅུ་བཞི་པ་དང་བཅོ་ལྔ་པ། ཏཱ་སི་ཏུ་བཅུ་པ་དང་བཅུ་གཅིག་པ། རྫོང་གསར་མངའ་རིས་ཆོས་རྗེ་ཀུན་དགའ་འཇམ་དབྱངས། མི་ཕམ་འཇམ་དབྱངས་རྣམ་རྒྱལ། གཏེར་སྟོན་ལས་རབ་གླིང་པ། རྒྱུད་སྨད་མཁན་པོ་ཡེ་ཤེས་གོང་འཕེལ་སོགས་སོ། མཛད་རྣམ་ཞིབ་པ་རྗེ་རང་ཉིད་ཀྱིས་ལྗགས་རྩོམ་མཛད་པ་སོགས་ཁག་བཞི་ཙམ་ཡོད་པ་དེ་དག་ཏུ་གཟིགས་པར་འཚལ།
དེ་ལྟར་དམ་པ་འདི་ཉིད་ཀྱིས་རྒྱལ་བསྟན་སྤྱི་ལ་ཐོས་བསམ་སློབ་གཉེར་དཔྱིས་ཕྱིན་པ་གནང་ནས་འཆད་རྩོད་རྩོམ་སོགས་མཁས་པའི་བྱ་བ་རྣམ་གསུམ་གྱིས་སྐུ་ཚེ་ཧྲིལ་པོ་འདའ་བར་མཛད། ལྷག་པར་དུ་དཔལ་ལྡན་ཤངས་པ་བཀའ་བརྒྱུད་པའི་གདམས་ངག་གི་བརྒྱུད་པ་པུ་ཤུད་སང་འགྲོ་གནངས་འགྲོ། གྱང་གོག་སང་འགྱེལ་གནངས་ འགྱེལ་ལྟ་བུར་གྱུར་བའི་སྐབས་སུ་བླ་མ་ཀརྨ་ནོར་བུས་ཤངས་ལུགས་བདེ་མཆོག་ལྷ་ལྔའི་དབང་དང་། ཉིད་ཀྱི་ཡིག་སྟེང་ནས་ཆོས་དྲུག་གི་བྱིན་རླབས་སོ་སོ། མགོན་པོ་བར་ཆད་ཀུན་སེལ་གྱི་བཀའ་རྣམས། ཆོས་དྲུག་ཁྲིད་རྒྱས་འབྲིང་བསྡུས་གསུམ་ཁ་སྐོང་དང་བཅས། ཕྱག་ཆེན་གའུ་མ་སོགས་ཞིབ་ཁྲིད་དུ་བསྩལ་བ་བཞིན་བསྒོམས་པས་ཉམས་མྱོང་ཡང་ཐར་ཐོན་གསུངས། དེ་བཞིན་ཀརྨ་གཞན་ཕན་འོད་ཟེར་དང་། འཇམ་དབྱངས་མཁྱེན་བརྩེ་དབང་པོ་སོགས་ལས་ཤངས་པའི་གདམས་པ་ཇོ་ནང་ལུགས་དང་ཐང་སྟོང་ལུགས་གཉིས་ཀ་ནས་བརྒྱུད་པའི་རྒྱུད་སྡེ་ལྔའི་དབང་ཆེན། ཆོས་དྲུག་བཀའ་བཅུ། གཞུང་བཀའ་ཕྱི་མ་རྣམས་དང་མགོན་པོའི་བཀའ་ཆེན་བཅུ་གསུམ། ནི་གུའི་གསེར་ཆོས་ལྔ། སུ་ཁ་ཆོས་དྲུག །རཱ་ཧུ་ལའི་ལྷ་བཞི་དྲིལ་སྒྲུབ་རྣམས་ཀྱི་ཁྲིད་སོགས་རྒྱ་བོད་ཀྱི་གཞུང་དང་ཡིག་ཆ་པོ་ཏི་ལྔར་ལོངས་པའི་དབང་ལུང་གསན་བཞེས་མཛད་པ་དང་། གདམས་ངག་མཛོད་དུ་ཤངས་ཆོས་དཀར་ཆག་བཻཌཱུརྱའི་ལྡེ་མིག་དང་། གསེར་ཆོས་རྣམ་ལྔའི་རྡོ་རྗེའི་ཚིག་རྐང་གི་འགྲེལ་པ། བྱིན་རླབས་གཞུང་ཤིང་གི་བཀའ་དྲུག །གཞུང་བཀའ་ཕྱི་མ་རྣམས་ཀྱི་བྱིན་རླབས། ཉེ་བརྒྱུད་ཐང་རྒྱལ་ལུགས་ཀྱི་ཁྲིད་ཆ་ཚང་། རིང་བརྒྱུད་རྗེ་བཙུན་ཏཱ་ར་ནཱ་ཐས་མཛད་པའི་ཁྲིད། སུ་ཁ་སིདྡྷི་དང་ལྷ་བཞི་དྲིལ་སྒྲུབ་སྐོར། ཤངས་ལུགས་བླ་མ་མཆོད་མཆོག །མཁའ་འགྲོ་སྡེ་ལྔ་དང་མྱུར་མཛད་ཡེ་ཤེས་མགོན་པོའི་རྗེས་གནང༌། མགོན་པོའི་བཀའ་ཆེན་བཅུ་གསུམ། སྙིང་བཞུགས་དང་ཀྵེ་ཏྲ་པཱ་ལ་བཅས་པ་སོགས་ཤངས་ཆོས་སྐོར་གྱི་དཔྱད་ཡིག་མང་དག་ཅིག་གསར་རྩོམ་དང་བསྡུ་སྒྲིག་མཛད། ད་དུང་རང་ཉིད་ཀྱིས་གསན་བཞེས་དང་ཉམས་ལེན་གནང་བའི་གདམས་པ་རྣམས་ཀརྨ་བཀྲ་ཤིས་འོད་ཟེར་དང་། ཚབ་ཚ་སྒྲུབ་སྤྲུལ། སྐུ་ཞབས་ཏཱ་སི་ཏུ་རིན་པོ་ཆེ། དབོན་སྤྲུལ། མདོ་སྨྱོན་སྤྲུལ་སྐུ། ཐར་རྩེ་དཔོན་སློབ་སོགས་སྐལ་ལྡན་གྱི་གདུལ་བྱ་རྣམས་ལ་བསྩལ་ནས་དཔལ་ལྡན་ཤངས་པའི་རིང་ལུགས་སྙིགས་མའི་དུས་མཐའ་འདིར་ཡང་འཛིན་སྐྱོང་སྤེལ་གསུམ་མཛད་པས། རྗེ་བླ་མ་པདྨ་ཉིན་བྱེད་ཀྱིས་ཀྱང་ཀུན་བདེ་གླིང་གི་ནགས་ཁྲོད་ན། །ཀུན་མཁྱེན་གྲུབ་དབང་དབེན་གསུམ་ལ། །མངའ་བརྙེས་གང་ཁྱོད་བདུད་བཞི་ཡི། །གཡུལ་ལས་རྣམ་པར་རྒྱལ་གྱུར་ཅིག་ཅེས་པའི་བསྟོད་པ་དང་ཐུགས་སྨོན་ཡང་མཛད།
༢ སྐུ་ཕྲེང་གཉིས་པ་དཔལ་ལྡན་མཁྱེན་བརྩེ་འོད་ཟེར།
ཁོང་ནི་ལྷ་གཟིགས་རླངས་ཀྱི་གདུང་རྒྱུད་ཡབ་ཀརྨ་སྐུ་ཕྲེང་བཅོ་ལྔ་པ་མཁའ་ཁྱབ་རྡོ་རྗེ་དང་། ཡུམ་བདེ་སྐྱོང་དབང་མོ་གཉིས་ཀྱི་སྲས་སུ་རབ་བྱུང་བཅོ་ལྔ་པའི་ཤིང་འབྲུག་སྤྱི་ལོ1904ལོར་འོག་མིན་མཁའ་སྤྱོད་ཐུགས་ཀྱི་གནས་མཆོག་མཚུར་མདོ་བོ་ལུང་གི་སྐྱེད་ཚལ་བསམ་གྲུབ་ཆོས་གླིང་དུ་སྐུ་འཁྲུངས། སྐུ་ན་ཆུང་དུས་ནས་སྒྲུབ་མཆོད་དང་། དབང་བསྐུར། སྦྱིན་སྲེག །གར་འཆམ་སོགས་ཀྱི་ལད་མོས་དུས་འདའ་བ་བྱིས་སྤྱོད་ཕལ་ཆེར་ལས་ཡོངས་སུ་འདས། ཡབ་རྗེ་མཁའ་ཁྱབ་རྡོ་རྗེས་རབ་བྱུང་གི་རྟགས་བསྩལ་ཞིང་། མཚན་ལ་ཀརྨ་དཔལ་ལྡན་ཆོས་ཀྱི་དབང་ཕྱུག་བློ་གྲོས་དྲི་མེད་པདྨའི་མྱུ་གུ་མཁྱེན་བརྩེའི་འོད་ཟེར་རབ་ཏུ་རྒྱས་པའི་སྡེ་ཞེས་གསོལ། དགུང་གྲངས་བདུན་ནས་ཡི་གེ་འབྲི་ཀློག་ལ་སྦྱངས་པ་མཛད། ཁམས་སུ་ཕེབས་ཁར་ཀརྨ་པ་མཁའ་ཁྱབ་རྡོ་རྗེས་སི་ཏུ་རིན་པོ་ཆེ་སྐུ་འཁོར་ལྷན་རྒྱས་ལ་གསུངས་པར། ངའི་བུ་འདི་ཕ་མ་བཤད་མཁས་ནས་བུ་སྤྲུལ་སྐུ་བཟོས་པ་མིན། འཇམ་མགོན་རིན་པོ་ཆེའི་མཆོག་སྤྲུལ་འཁྲུལ་མེད་ཡིན་པའི་ངེས་ཤེས་གཏིང་ཟབ་རྙེད་རྒྱུ་ཡོད། དམ་ཚིག་འགལ་མེད་ཀྱིས་ཞབས་ཏོག་བྱེད་དགོས་པ་སོགས་ཀྱི་བཀའ་མངགས་མང་དུ་གནང་། ཡབ་རྗེ་མཁའ་ཁྱབ་རྡོ་རྗེ་ལས་བཀའ་བརྒྱུད་སྔགས་མཛོད་དང་། ནག་རྒྱལ་ཕག་གསུམ། ཆོས་དྲུག །ཕྱག་ཆེན་སོགས་བཀའ་བརྒྱུད་ཀྱི་ཟབ་ཆོས་གལ་ཆེའི་རིགས། རིན་ཆེན་གཏེར་མཛོད་དང་ལུང་རྒྱུན་གང་བཞུགས་རྣམས་མཐར་ཕྱིན་པར་ཞུས། དགུང་གྲངས་བཅུ་གཅིག་ལ་ཕེབས་སྐབས་སི་ཏུ་པདྨ་དབང་མཆོག་གི་དྲུང་ནས་ཡབ་རྗེ་དང་ལྷན་དུ་སངས་རྒྱས་གླིང་པའི་བླ་མ་དགོངས་འདུས་པོ་ཏི་བཅུ་གསུམ་གྱི་ལུང་གསན། དགུང་ལོ་བཅུ་གཉིས་ལ་འོག་མིན་མཚུར་ཕུའི་གཙུག་ལག་ཁང་ཆེན་མོར་འཇམ་མགོན་ཀོང་སྤྲུལ་གྱི་སྤྲུལ་པའི་སྐུར་མངའ་གསོལ་མཛད། དེ་རྗེས་རྒྱལ་དབང་ཐུབ་བསྟན་རྒྱ་མཚོས་ཀྱང་དབུ་སྐྲ་གཙུག་ཕུད་བཞེས་ཤིང་། ཐུབ་བསྟན་ཆོས་སྐུ་བདེ་ཆེན་དབང་ཕྱུག་ཅེས་པའི་མཚན་གསོལ། དཔལ་སྤུངས་སུ་ཕེབས་ལམ་ཟུར་མང་རྣམ་རྒྱལ་རྩེར་མཁན་ཆེན་དྲུང་རིན་པོ་ཆེ་ཐོག་མར་མཇལ། བཀའ་དྲིན་གསུམ་ལྡན་ཡབ་རྗེ་རྡོ་རྗེ་འཆང་སྐུ་གཤེགས་རྗེས་མདོ་སྟོད་སྨད་ཀྱི་དགོན་སྡེ་མང་པོར་ཕེབས་ཏེ་འབུལ་འགྱེད་གཤེགས་རྫོང་རྒྱ་ཆེར་མཛད་ཅིང་། ཀར་རབས་ལྷ་ཁང་བཞེང་རྒྱུའི་མཐུན་རྐྱེན་ཆེད་སྔ་རྗེས་སུ་ལྷ་ཐོག་དཀར་ལེགས་དང་། ཀརྨ་དགོན། ཀརྨ་ལྷ་སྟེང་། ནང་ཆེན་ཇ་དགོན། སྒ་སྟོད་བན་ཆེན། ཁྲ་འགུ་བཀྲ་ཤིས་ཆོས་གླིང་། འདམ་དཀར་དགོན་སོགས་སུ་ཕེབས། དེ་ནས་ལྷ་ལྡན་ཕྱོགས་སུ་ཕེབས་ཏེ་མཚུར་ཕུའི་གདན་སར་མགོན་པོའི་རྔ་འཆམ་ཆེན་མོ་མཇལ། སླར་ཀརྨ་དགོན་དང་། ལྷ་ཐོག་སོགས་སུ་ཕེབས། བེ་རུ་མཁྱེན་བརྩེ་ལས་ནང་བརྟག་རྒྱུད་གསུམ་གྱི་བཤད་པ་སོགས་གསན། དྲུང་རིན་པོ་ཆེའི་མདུན་ནས་བསྙེན་རྫོགས་ཀྱི་སྡོམ་པ་བཞེས། གནས་བཟང་དམ་ཚིག་སྤྲུལ་སྐུ་ལས་གཏེར་མཛོད་བཀའ་རྒྱ་པོད་གསུམ་གྱི་དབང་ལུང་དང་། རྒྱལ་ཚབ་རིན་པོ་ཆེ་ལས་འཁོན་ལུགས་ཡང་དག་དང་། བླ་མ་ཡང་ཏིག་རྣམས། ཞེ་ཆེན་ཀོང་སྤྲུལ་གྱི་མདུན་ནས་རྒྱལ་ཚབ་བཀའ་འབུམ་དང་། སྒར་པ་བཀའ་འགྱུར་བླ་མ་ལས་བཀའ་འགྱུར་གྱི་ལུང་། ཆུ་འགུ་བླ་མ་ལས་ཤེས་བྱ་མཛོད་རྣམས། རོལ་རྡོ་གཏེར་སྤྲུལ་ལས་ཟུར་ལུགས་བདེ་མཆོག་མཁའ་འགྲོ་སྙན་བརྒྱུད་དང་། རོལ་རྡོའི་གཏེར་ཆོས་ཡོངས་རྫོགས། སྤྲུལ་སྐུ་བསམ་གཏན་རྒྱ་མཚོ་ལས་མཆོག་གཏེར་ཡོངས་རྫོགས། ཀཿཐོག་སི་ཏུ་ཆོས་ཀྱི་རྒྱ་མཚོ་ལས་དྲི་མེད་རྣམ་གཉིས་སོགས། ཀརྨ་རང་བྱུང་ཀུན་ཁྱབ་ཀྱི་མདུན་ནས་ཤངས་ཆོས་གཞུང་པོད་བཞི་དང་། མགོན་པོའི་གཞུང་པོད་སྟོད་སྨད་ལུགས་གཉིས། དུས་འཁོར་ལྷ་དགུའི་བསྙེན་ཡིག་གི་ལུང་སོགས་གདམས་ངག་དུ་མའི་དབང་ལུང་ཁྲིད་གསུམ་རྒྱ་ཆེར་གསན། དེ་ལྟར་མདོ་སྔགས་དམ་ཆོས་རྒྱ་མཚོས་ཐུགས་རྒྱུད་ཡོངས་སུ་གཏམས་ཀྱང་། དུས་དང་རྣམ་པ་ཀུན་ཏུ་རང་ཉིད་ཀྱི་ཡོན་ཏན་ས་འོག་གི་གཏེར་བཞིན་སྦས་པར་མཛད།
ལྷག་པར་རྗེ་ཉིད་ཀྱིས་རིན་ཆེན་གཏེར་མཛོད་ཆེན་མོའི་དབང་ལུང་ཐེངས་དང་པོ་སྐྱབས་མགོན་དཔའ་བོ་རིན་པོ་ཆེ་དང་། དཔལ་སྤུངས་བེ་རུ་མཁྱེན་སྤྲུལ་རིན་པོ་ཆེ། རྡོར་སློབ་བླ་མ་ཀརྨ་རང་བྱུང་ཀུན་ཁྱབ། ཟུར་མང་འབྲུག་པ་སྤྲུལ་སྐུ་དང་རས་ཆུང་སྤྲུལ་སྐུ། ཚབ་ཚ་སྒྲུབ་སྤྲུལ། ཉ་འགེ་སྤྲུལ་སྐུ། སྐུ་སྐྱེ་བློ་གྲོས། ལྷ་སྟེང་འཇའ་མོ་སྤྲུལ་སྐུ། ཇ་པ་གཏེར་སྤྲུལ། དབོན་སྟོད་ལྷ་འབྲང་སྤྲུལ་སྐུ་སོགས་བླ་གྲྭ་དྲུག་ཅུ་ཡར་བརྒལ་ལ་བསྩལ་བ་དང་། དེ་རྗེས་རྗེ་ཁྲ་ལེགས། བླ་མ་རིན་པོ་ཆེ་ཀ་ལུ། ལྷ་སྟེང་འཇའ་མོ་སྤྲུལ་སྐུ། གོ་ཆེ་ཧོར་སྐུ་སྤྲུལ་སྐུ་སོགས་ཀྱི་དཔོན་སློབ་ཉི་ཤུ་སྐོར་ལ་གདམས་ངག་མཛོད་ཀྱི་དབང་ལུང་ཁྲིད་དང་བཅས་པ་ལན་དང་པོ་བསྩལ་བ། མཚུར་གདན་དཔོན་སློབ་རྣམས་ལ་རིན་གཏེར་དབང་འཕྲོས་པདྨ་གསུང་དྲག་སྒྲུབ་སྐོར་ལས་སྐྱེར་སྒང་རྟ་མགྲིན་གསང་སྒྲུབ་དབང་ནས་ཟུར་མཁར་ཕྱག་རྡོར་དབང་བར་ཕུལ་བ་སོགས་མཛོད་ཆེན་རྣམ་ལྔའི་དབང་ལུང་དང་། དེ་ལས་ཀྱང་རིན་གཏེར་དབང་ལུང་སྔ་ཕྱིར་ཐེངས་གསུམ་ཙམ་གནང་སྟེ་སྐལ་ལྡན་གདུལ་བྱ་མཐའ་ཡས་པ་སྨིན་གྲོལ་གྱི་ལམ་བཟང་ལ་བཀོད། ཞལ་སློབ་ཀྱི་གཙོ་བོར་གྱུར་པ་ཀརྨ་པ་རང་བྱུང་རིག་པའི་རྡོ་རྗེ་དང་། དཔའ་བོ་བཅུ་པ་གཙུག་ལག་སྨྲ་བའི་དབང་ཕྱུག །རྒྱལ་ཚབ་ལྕོག་གྲྭ་སྤྲུལ་སྐུ དཔལ་སྤུངས་མཁྱེན་སྤྲུལ། ཟུར་མང་གར་བསྟན་དྲུང་གསུམ། ཀརྨ་རང་བྱུང་ཀུན་ཁྱབ། བོད་གཞུང་སའི་སྐུ་དྲག །སྡེ་དགེ་རྒྱལ་བློན་སོགས་བླ་མ་སྐྱེས་ཆེན་དང་སྐྱ་སེར་དཔོན་རིགས་ཤིན་ཏུ་མང་། མཐར་དགུང་གྲངས་ལྔ་བཅུ་པ་རབ་བྱུང་བཅུ་དྲུག་པའི་ཆུ་སྦྲུལ་སྤྱི་ལོ1953ལོར་ཁྲ་ལེགས་སྐྱ་མགོན་སྐུ་གཤེགས་པའི་དགོངས་རྫོགས་སུ་ཕེབས། དགོངས་རྫོགས་གྲུབ་ཕྲལ་ཁྲ་འགུ་དགོན་དུ་གཤེགས།
༣ སྐུ་ཕྲེང་གསུམ་པ་ཀརྨ་བློ་གྲོས་ཆོས་ཀྱི་སེང་གེ
ཁོང་ནི་ཡབ་ཚེ་རིང་སྟོབས་རྒྱལ་དང་ཡུམ་ང་ཕོད་པདྨ་གཡུ་སྒྲོན་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ཤིང་རྟ་སྤྱི་ལོ1954ལོའི་བོད་ཟླ་བཅུ་པའི་ཚེས་གཅིག་ཉིན་ལྷ་སར་སྐུ་འཁྲུངས། དགུང་གྲངས་གཅིག་དང་ཟླ་བ་ལྔ་ཟིན་སྐབས་ན་བཟའ་དང་མཚན་གསོལ། ཀརྨ་པ་རིག་པའི་རྡོ་རྗེས་དཔལ་ལྡན་མཁྱེན་བརྩེ་འོད་ཟེར་གྱི་ཡང་སྲིད་དུ་ངོས་འཛིན་གནང་། སྤྱི་ལོ་1960ལོར་རུམ་བཏེག་དོར་རྒྱུ་ཆོས་སྒར་དུ་ཕེབས། ལོ་དེའི་བོད་ཟླ་དྲུག་པའི་ཚེས་བདུན་ཉིན་ཀརྨ་སྐུ་ཕྲེང་བཅུ་དྲུག་པ་དབུ་བཞུགས་ཀྱིས་བཀའ་བརྒྱུད་བླ་ཆེན་ཡོངས་ཀྱི་དབུས་སུ་སྤྲུལ་སྐུ་ཁྲི་འདོན་གྱི་མཛད་སྒོ་རླབས་ཆེན་སྤེལ། ཡི་གེ་འབྲི་ཀློག་སོགས་ནས་བཟུང་སློབ་གཉེར་གཟབ་ནན་གནང་བས་དགུང་ལོ་བཅུ་གཅིག་སྐབས་ནས་སྙན་ཚིག་འབྲི་ཐུབ་པ་བྱུང་། དེ་ནས་རྒྱལ་དབང་ཀརྨ་པ་བཅུ་དྲུག་པའི་དྲུང་ནས་ཕྱག་ཆེན་རྒྱ་གཞུང་ཁག་གཙོས་པའི་ཕྱག་ཆེན་གྱི་ཁྲིད་ཆ་ཚང་། རྒྱ་ཆེན་བཀའ་མཛོད་པོད་བཅུ། གཅིག་ཤེས་ཀུན་གྲོལ། ཆོས་སྐྱོང་སྒྲིག་ཕྲེང་བཅས་ཆ་ཚང་། གདམས་ངག་མཛོད་ཆ་ཚང་། བཀའ་བརྒྱུད་སྔགས་མཛོད་ཆ་ཚང་བཅས་ཀྱི་དབང་ལུང་ཁྲིད་གསུམ་ཡོངས་རྫོགས་ཐོབ། དཔའ་བོ་སྐུ་ཕྲེང་བཅུ་པ་གཙུག་ལག་སྨྲ་བའི་དབང་ཕྱུག་གི་མདུན་ནས་ཞྭ་དམར་མཁའ་སྤྱོད་དབང་པོའི་བཀའ་འབུམ་པོད་བདུན་དང་། འདུལ་ཁྲིད་ཉི་མའི་དཀྱིལ་འཁོར། ཐེག་མཆོག་རྒྱ་མཚོ་བཅས་ཀྱི་ལྗགས་ལུང་ཐོབ། བླ་མ་རང་བྱུང་ཀུན་ཁྱབ་ཀྱི་དྲུང་ནས་དཔལ་ལྡན་ཤངས་པ་བཀའ་བརྒྱུད་ཀྱི་གསེར་ཆོས་རྣམ་པ་ལྔས་གཙོས་ཆོས་སྐོར་ཆ་ཚང་གི་དབང་ལུང་ཡོངས་རྫོགས་ལེགས་པར་གསན། ཁྲ་འགུ་སྤྲུལ་སྐུའི་མདུན་ནས་གཞུང་བཀའ་པོད་ལྔའི་འགྲེལ་བཤད་ཞུས་པ་མ་ཟད། རྒྱུགས་འབུལ་དང་། བརྒལ་བརྟག །རྩོད་སྒྲིང་སོགས་མཐར་ཕྱིན་པར་མཛད།
༤ ཀོང་སྤྲུལ་སྐུ་ཕྲེང་བཞི་པ་བློ་གྲོས་ཆོས་ཀྱི་ཉི་མ།
ཡབ་མགོན་པོ་དང་། ཡུམ་དབྱངས་ཅན་གཉིས་ཀྱི་སྲས་སུ་རབ་བྱུང་བཅུ་བདུན་པའི་ཤིང་ཕག་སྤྱི་ལོ1995ལོར་ཆུ་ཤུར་རྫོང་སྙེ་མོ་ར་ས་ཐོག་སྐུ་འཁྲུངས། ཀརྨ་པ་འགྲོ་འདུལ་འཕྲིན་ལས་རྡོ་རྗེས་ཀོང་སྤྲུལ་བློ་གྲོས་ཆོས་ཀྱི་སེང་གེའི་ཡང་སྲིད་འཁྲུལ་མེད་དུ་ངོས་འཛིན་པའི་མངའ་གསོལ་གཟེངས་བསྟོད་མཛད། ད་ལྟ་ཐོས་བསམ་སློབ་གཉེར་གནང་བཞིན་པའོ།
II.2.5.3 Kalu Dorjé Chang
།གསུམ། ཀརྨ་རང་བྱུང་ཀུན་ཁྱབ་]]ཡབ་སྲས་རྣམ་གཉིས་ཀྱི་སྐོར།
།སྤྱིར་ཡབ་རྗེ་ཀ་ལུ་རིན་པོ་ཆེ་སྐུ་གོང་མས་གདམས་ངག་བདུད་རྩིས་སྨིན་པར་མཛད་པའི་བུ་སློབ་ཤིན་ཏུ་མང་ཡང་། སྐབས་འདིར་ཤངས་ཆོས་སྤེལ་བར་འཕྲིན་ལས་ཆེ་བས་སྲས་ཞེས་པ་འབོ་དཀར་ངེས་དོན་ཆོས་ཀྱི་བློ་གྲོས་ལ་གོ་བ་ཡིན་ཏེ། ཡབ་སྲས་རྣམ་པ་འདི་གཉིས་ཀྱི་མཛད་རྣམ་བརྗོད་པ་ལ།
ཀརྨ་རང་བྱུང་ཀུན་ཁྱབ།
རིས་མེད་བསྟན་པའི་སྣང་བྱེད་འཇམ་མགོན་བློ་གྲོས་མཐའ་ཡས་པའི་ཕྲིན་ལས་ཀྱི་རྣམ་པར་རོལ་པ་སྐྱབས་རྗེ་ཀ་ལུ་རིན་པོ་ཆེའམ་གྲུབ་མཆོག་རང་བྱུང་ཀུན་ཁྱབ་ནི་སྤྱི་ལོ1904ལོར་མདོ་ཁམས་ཏྲེ་ཤོད་གངས་ཀྱི་རྭ་བའི་མངའ་ཁོངས་ཏེ། དེང་སི་ཁྲོན་ཞིང་ཆེན་དཀར་མཛེས་རྫོང་གོ་ལམ་ཡུལ་ཤོག་ཁོངས་ཀྱི་ཀརྨ་རི་ཁྲོད་དུ་ཡབ་ར་བཏགས་དཔལ་བཟང་སྤྲུལ་སྐུ་སྐུ་ཕྲེང་བཅུ་གསུམ་པ་སྔགས་འཆང་ལེགས་བཤད་སྒྲ་དབྱངས་དང༌། ཡུམ་སྒྲོལ་དཀར་གཉིས་ཀྱི་སྲས་སུ་ངོ་མཚར་བའི་ལྟས་དུ་མ་དང་བཅས་སྐུ་འཁྲུངས། སྐུ་ན་ཆུང་ངུའི་དུས་ནས་འཁོར་བ་ལ་ངེས་འབྱུང༌། སེམས་ཅན་ལ་སྙིང་རྗེ། ཆོས་དང་བླ་མར་དད་གུས་སོགས་ལྷན་སྐྱེས་སུ་མངའ། ཡི་གེ་འབྲི་ཀློག་དང་། ཆོས་ཀྱི་གོ་དོན་སོགས་བསྟན་པ་ཙམ་གྱིས་ཚེགས་མེད་དུ་མཁྱེན། དགུང་ལོ་བཅུ་གསུམ་ཐོག་ཏཱ་སི་ཏུ་སྐུ་ཕྲེང་བཅུ་གཅིག་པ་པད་མ་དབང་མཆོག་གི་དྲུང་ལས་ཤཱཀྱའི་བསྟན་ལ་རབ་ཏུ་བྱུང་ཞིང་། མཚན་ཀརྨ་རང་བྱུང་ཀུན་ཁྱབ་ཅེས་གསོལ། དགུང་ལོ་བཅུ་དྲུག་ནས་དབུ་བཙུགས་ཏེ་ཙཱ་འདྲ་རིན་ཆེན་བྲག་གི་སྒྲུབ་སྡེར་ལོ་གསུམ་ཕྱོགས་གསུམ་གྱི་སྒྲུབ་པར་ཐོག་མར་ཞུགས། སྐབས་དེར་ཉམས་རྟོགས་མཐར་ཕྱིན་པའི་སྒྲུབ་དཔོན་བླ་མ་ནོར་བུ་དོན་གྲུབ་ཀྱི་ཞལ་སྔ་ནས་གསར་རྙིང་གི་སྨིན་གྲོལ་གདམས་པ་སྤྱི་དང་། ཁྱད་པར་དཔལ་ལྡན་ཤངས་པའི་གསེར་ཆོས་རྣམ་པ་ལྔའི་གདམས་ངག་དབང་ཁྲིད་དང་བཅས་པ་བུམ་པ་གང་བྱོའི་ཚུལ་དུ་གསན་པ་མ་ཟད། དེ་དག་གི་བསྙེན་སྒྲུབ་ཉམས་བཞེས་ཀུན་དད་བརྩོན་ཞེ་བཅད་དྲག་པོས་མཐར་ཕྱིན་པར་མཛད། སྒྲུབ་ཁང་དུ་ཞུགས་པའི་སྔ་རྗེས་རྣམས་སུ་འཇམ་མགོན་ཀོང་སྤྲུལ་གྱི་ཞལ་སློབ་མཁས་དབང་བཀྲ་ཤིས་ཆོས་འཕེལ་དང་། སི་ཏུ་པདྨ་དབང་མཆོག །མཁྱེན་བརྩེ་གཞན་ཕན་འོད་ཟེར། དཔལ་ལྡན་མཁྱེན་བརྩེ་འོད་ཟེར། དཔའ་བོ་གཙུག་ལག་སྨྲ་བའི་དབང་ཕྱུག །ཚབ་ཚ་སྒྲུབ་སྤྲུལ། རྫོགས་ཆེན་རིན་པོ་ཆེ། ཞེ་ཆེན་རྒྱལ་ཚབ། ཞེ་ཆེན་ཀོང་སྤྲུལ། མཁྱེན་བརྩེ་ཆོས་ཀྱི་བློ་གྲོས་སོགས་རིས་མེད་ཀྱི་སྐྱེས་ཆེན་དུ་མའི་དྲུང་ནས་མདོ་སྔགས་གསར་རྙིང་གི་སྨིན་གྲོལ་གདམས་སྐོར་དཔག་ཏུ་མེད་པ་གསན་བཞེས་དང༌། སྒོམ་སྒྲུབ་རྩེ་གཅིག་ཏུ་མཛད། དགུང་གྲངས་ཉེར་ལྔའི་སྟེང་འཁོར་འབངས་ཉེ་འབྲེལ་དང༌། ཟས་ནོར་ལོངས་སྤྱོད་ཐམས་ཅད་རིང་དུ་སྤངས་ཏེ་སྡེ་དགེ་ལྷ་ཕུ་སོགས་ཀྱི་དབེན་པའི་རི་ཁྲོད་རྣམས་སུ་འཚོ་བ་ངན་ངོན་ཙམ་ལ་བརྟེན་ནས་དཀའ་སྤྱད་སྙིང་རུས་ཀྱི་སྒྲུབ་པ་ཁོ་ན་ལོ་བཅུ་གཉིས་ཙམ་མཛད།
དེ་རྗེས་སི་ཏུ་པདྨ་དབང་མཆོག་གི་བཀའ་བཞིན་དཔལ་སྤུངས་གདན་སའི་ནཱ་རོ་དང་ནི་གུའི་སྒྲུབ་སྡེ་གོང་འོག་གཉིས་ཀྱི་སྒྲུབ་དཔོན་བླ་མ་ལོ་མང་གནང་སྟེ་སྒྲུབ་པའི་རྒྱལ་མཚན་འཛིན་པའི་བུ་སློབ་འཁོར་ཚོགས་མང་དུ་བསྐྱངས། དགུང་གྲངས་བཞི་བཅུའི་ནང་ལྷ་ལྡན་ཇོ་ཤཱཀ་རྣམ་གཉིས་ཀྱིས་གཙོས་དབུས་གཙང་གནས་ཆེན་ཁག་དང་རིས་མེད་ཀྱི་དགོན་སྡེ་རྣམས་ལ་གནས་གཟིགས་མཆོད་འབུལ་དུ་ཕེབས། སྐབས་དེའི་དུས་སུ་སེ་ར་མཁར་རྡོ་རྗེ་དང༌། ལྷ་བཙུན་རིན་པོ་ཆེ། ཐོགས་མེད་རིན་པོ་ཆེ། འབྲས་སྤུངས་རྨོག་ལྕོག་རྗེ་སོགས་ཀྱི་སྐྱེས་ཆེན་དུ་མར་དཔལ་ལྡན་ཤངས་པའི་གསེར་ཆོས་རྣམ་པ་ལྔའི་གདམས་ངག་གནང་སྟེ་ཤངས་པའི་བསྟན་པ་གཏད། ལྷག་པར་ཇོ་ནང་རྟག་བརྟན་ཕུན་ཚོགས་གླིང་དང་། ཞོང་ཞོང་རྡོ་རྗེ་གདན། ལྷ་ཕུ་རྨོག་ལྕོག །མཉེས་ཐང་རྨོག་ལྕོག་ལ་སོགས་པའི་དགོན་གནས་རྣམས་སུ་ཇོ་ཤངས་གཉིས་ཀྱི་བསྟན་པ་སླར་གསོས་ཤིང་བསྟན་འགྲོའི་དོན་རླབས་པོ་ཆེ་མཛད། སླར་མདོ་ཁམས་སུ་ཕེབས་ནས་དཔལ་སྤུངས་དང་ཧོར་ཁོག་རྣམས་སུ་བསྟན་འགྲོའི་དོན་རྒྱ་ཆེར་མཛད། སྤྱི་ལོ1955ལོར་སླར་ཡང་བོད་ཡུལ་དབུས་སུ་ཕེབས། སྤྱི་ལོ1957ལོར་དོར་རྒྱུ་སྐུར་སྟོད་བྱང་ཆུབ་ཆོས་གླིང་སོགས་སུ་ཕེབས་ཏེ་བསྟན་པ་འཛིན་སྐྱོང་སྤེལ་གསུམ་དང་། ཀཾ་ཚང་དང་ཤངས་ཆོས་ཀྱི་སྒྲུབ་སྡེ་གསར་འཛུགས། མཆོད་རྟེན་གསར་བཞེངས་སོགས་རྒྱ་ཆེར་མཛད།
སྤྱི་ལོ་1966ལོར་དོར་རྒྱུ་བསོད་ནམས་དར་གྱི་གདན་སར་དཔལ་ལྡན་ཤངས་པའི་གསེར་ཆོས་རྣམ་ལྔའི་ལོ་གསུམ་ཕྱོགས་གསུམ་གྱི་སྒྲུབ་སྡེ་གསར་འཛུགས་གནང་། སྤྱི་ལོ་1973ལོར་བཀའ་བརྒྱུད་ཀྱི་བསྟན་པ་འཛིན་པའི་སྐྱེས་ཆེན་འགར་ཐབས་ལམ་ནཱ་རོ་ཆོས་དྲུག་དང༌། གྲོལ་ལམ་ཕྱག་རྒྱ་ཆེན་མོ། ཤངས་པའི་གསེར་ཆོས་རྣམ་ལྔ་སོགས་ཀྱི་དབང་ལུང་འབུལ་བཞེས་མཛད།
དེས་ན་མ་གཞི་ཀརྨ་རང་བྱུང་ཀུན་ཁྱབ་ཀྱིས་ཀརྨ་ཀཾ་ཚང་དང་ཤངས་པའི་ཆོས་བརྒྱུད་གཉིས་ཀ་འཛིན་གནང་གི་ཡོད་ཀྱང་། སྨོན་ལམ་འགྲོ་བ་སྒྲོལ་བའི་གྲུ་ཆེན་གྱི་མཇུག་ཏུ་དཔལ་ལྡན་ཤངས་པའི་གྲལ་མཐར་འཁོད་པ་ཀརྨ་རང་བྱུང་ཀུན་ཁྱབ་པས་ས་ཕོ་འབྲུག་གི་ལོར་སྨྲས་པ་ཞེས་ཁོང་རང་ཉིད་ཀྱིས་ཀྱང་ཤངས་པའི་བརྒྱུད་འཛིན་ཡིན་པར་གསུངས་པ་བཞིན། ཀ་ཎ་ཊ་སོགས་ཀྱི་རྒྱལ་ཁབ་མང་ཆེ་བར་ཀརྨ་རང་བྱུང་ཀུན་ཁྱབ་འདི་ཉིད་ཤངས་པ་བཀའ་བརྒྱུད་པའི་ཚབ་མཚོན་བླ་མ་ཞིག་ཏུ་བརྩི་ཡི་ཡོད་པས། འཛམ་གླིང་རྒྱལ་ཁབ་ཁག་ཏུ་ཤངས་པ་བཀའ་བརྒྱུད་ནི་དུས་རབས་ཉི་ཤུ་པའི་ནང་ཀརྨ་རང་བྱུང་ཀུན་ཁྱབ་སྐུ་ཕྲེང་དང་པོས་སླར་གསོ་མཛད་པ་ཡིན་ཞེས་པའི་གཏམ་དེ་ཡང་བྱུང་བ་ཡིན།
དེ་ལྟར་ཀརྨ་རང་བྱུང་ཀུན་ཁྱབ་ཀྱིས་རང་དོན་ཐོས་བསམ་སྒོམ་གསུམ། གཞན་དོན་འཆད་རྩོད་རྩོམ་གསུམ། གཉིས་དོན་མཁས་བཙུན་བཟང་གསུམ་སྟེ་དམ་པའི་ཚུལ་དགུའི་སྒོ་ནས་འབོ་དཀར་རིན་པོ་ཆེས་གཙོས་ཤངས་ཆོས་འཛིན་པའི་ཚད་ལྡན་གྱི་བུ་སློབ་བླ་སྤྲུལ་དུ་མ་གསོ་སྐྱོང་གནང་སྟེ། ཨི་ཤི་ཡའི་རྒྱལ་ཁབ་འགའ་དང་ནུབ་ཕྱོགས་རྒྱལ་ཁབ་ཁག་ཏུ་ཤངས་པའི་དབང་དང་གདམས་པ་སྤེལ་གནང་བ་དང་། ཤངས་པའི་ཆོས་བརྒྱུད་འཛིན་པའི་དགོན་གནས་སོགས་རིམ་གྱིས་བཞེངས་ཏེ་ཆོས་བརྒྱུད་སྤྱི་ལ་དོ་སྣང་ལྷག་པར་བྱེད་པའི་ཚ་རླབས་འཛམ་གླིང་ཡུལ་གྲུ་མང་པོར་འཕྱུར་ནས་མཁས་གྲུབ་ཁྱུང་པོའི་གསེར་ཆོས་ཀྱི་གདུགས་དཀར་ས་ཆེན་གོ་ལའི་ཁྱོན་ལ་ཁྱབ་པར་མཛད། མཐར་དགུང་གྲངས་བརྒྱད་ཅུ་རྩ་ལྔར་ཕེབས་པ་སྤྱི་ལོ་1989ལོའི་ཟླ་བཅཔའི་ཚེས10ཉིན་དགོངས་པ་ཆོས་དབྱིངས་སུ་གཤེགས།
རྗེ་བླ་མ་འདི་ཉིད་ཀྱིས་བསྟན་འགྲོའི་དོན་ལ་སྐྱེ་སྲིད་ཀུན་ཏུ་ཐུགས་བསྐྱེད་དང་སྨོན་ལམ་འབའ་ཞིག་མཛད་པའི་འབྲས་བུ་དུས་སུ་སྨིན་ཏེ། ཡང་སྲིད་མཆོག་སྤྲུལ་རིན་པོ་ཆེ་མཆོག་སྤྱི་ལོ་1990ལོའི་སྤྱི་ཟླ་9པའི་ཚེས17ཉིན་རྗེ་གོང་མའི་ཉེ་གནས་དང་སྐུ་ཚ་ཡིན་པ་ཡབ་ར་བཏགས་རྒྱལ་མཚན་དང་། ཡུམ་སྐལ་བཟང་སྒྲོལ་དཀར་གཉིས་ཀྱི་སྲས་སུ་འཁྲུངས། དགུང་ལོ་གཅིག་དང་ཟླ་བ་དྲུག་གི་སྟེང་བསོད་ནམས་དར་བསམ་གྲུབ་དར་རྒྱས་ཆོས་གླིང་གི་ཁྲིར་མངའ་གསོལ། ད་ལྟ་འཚོ་ཞིང་གཞེས་པའོ།།
ཀརྨ་ངེས་དོན་ཆོས་ཀྱི་བློ་གྲོས།
ཁོང་ལ་འབོ་དཀར་ཞེས་པའི་མཚན་ཐོགས་དོན་ནི། སྐུ་གོང་མ་གཞས་ཡས་མཚམས་པ་རིན་པོ་ཆེ་ཀརྨ་ཤེས་རབ་འོད་ཟེར་ཞེས་བྱང་སེམས་ཟླ་བ་རྒྱལ་མཚན་གྱི་རྣམ་སྤྲུལ་དུ་གྲགས་པ་ཞིག་སྤྱི་ལོ 1890ལོར་ཤར་མི་ཉག་ཏུ་སྐུ་འཁྲུངས་ཤིང་། སྐུ་ན་ཆུང་ངུའི་དུས་ནས་འབོ་གངས་དཀར་དགོན་དུ་ཆོས་ཞུགས་གནང་བས། བསྡུས་མཚན་དེ་ལྟར་དུ་གྲགས། དགུང་ལོ་བཅུ་དྲུག་སྐབས་ཉེ་འབྲེལ་ལོངས་སྤྱོད་ཀུན་སྤངས་ཏེ་མཚུར་མདོ་བོ་ལུང་གི་གདན་སར་ཀརྨ་པ་མཁའ་ཁྱབ་རྡོ་རྗེ་ལས་ཟབ་གསང་རྒྱུད་སྡེའི་སྨིན་གྲོལ་སྤྱི་དང་། ཆོས་དྲུག་ཕྱག་ཆེན་སོགས་ཀྱི་གདམས་སྐོར་མཐའ་དག་གསན་བཞེས་མཛད་དེ། སྔ་རྗེས་སུ་ལ་ཕྱི་གངས་ཀྱི་ར་བ་སོགས་ཀྱི་སྒྲུབ་གནས་རྩ་ཆེན་རྣམས་སུ་སྒྲུབ་པ་རྒྱུན་རིང་དང་། ལྷག་པར་མངའ་རིས་འབྲོང་བྱང་གཞལ་ཡས་བྲག་ཕུག་ཏུ་སྨྱུང་གནས་ཚར་སྟོང་རྩ་གཅིག་མཛད་པ་སོགས་སྒྲུབ་པའི་རྒྱལ་མཚན་བཙུགས་པས། ཕྱིས་ཀརྨ་པ་མཁའ་ཁྱབ་རྡོ་རྗེའི་བཀའ་བཞིན་སྤྱི་ལོ1920ལོར་མངའ་རིས་འབྲོང་བྱང་ཁུལ་ཏེ་དེང་མཚོ་ཆེན་རྫོང་མདའ་གཞུང་ཡུལ་ཤོག་ཁོངས་སུ་འབོ་དཀར་དགོན་བཀྲ་ཤིས་རབ་བརྟན་ངེས་དོན་དགེ་འཕེལ་གླིང་ཞེས་པ་ཕྱག་བཏབ་ནས། སྒྲུབ་བརྒྱུད་ཀྱི་བསྟན་པ་སྤེལ་མཐར་རབ་བྱུང་བཅུ་དྲུག་པའི་ས་སྟག་སྤྱི་ལོ1938ལོར་དགོངས་པ་གཞན་དོན་དུ་གཤེགས།
ཆོས་རྗེ་བླ་མ་དེ་ཉིད་ཀྱི་སྐུ་སྐྱེ་ཕྱི་མ་ཀརྨ་ངེས་དོན་ཆོས་ཀྱི་བློ་གྲོས་ནི། མངའ་རིས་སྟོད་ཀྱི་འབྲོང་པ་ཚོ་དགུའི་ནང་ཚན་སྐྱང་རང་དུ་ཡབ་ཚེ་རྣམ་དང་། ཡུམ་བསོད་ནམས་གཡུ་སྒྲོན་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ལྕགས་འབྲུག་སྤྱི་ལོ1940ལོའི་སྤྱི་ཟླ10པའི་ཚེས15ཉིན་སྐུ་འཁྲུངས། དགུང་གྲངས་བཞིར་ཕེབས་སྐབས་ཀརྨ་པ་རིག་པའི་རྡོ་རྗེ་མཆོག་གིས་གཞས་ཡས་མཚམས་པ་རིན་པོ་ཆེའི་ཡང་སྲིད་འཁྲུལ་བྲལ་དུ་ངོས་འཛིན་གནང་ནས། འབོ་དཀར་དགོན་གྱི་གསེར་ཁྲིར་མངའ་གསོལ་ཞིང་དགོན་དེ་གར་ཡི་གེ་འབྲི་ཀློག་ནས་བཟུང་ཐོས་བསམ་སློབ་གཉེར་གྱི་དབུ་བཙུགས། སྤྱི་ལོ1948ལོར་ཀརྨ་པ་རིག་པའི་རྡོ་རྗེ་མཆོག་གངས་རིར་གནས་གཟིགས་གྲུབ་འཕྲལ་འབོ་དཀར་དགོན་དུ་ཕེབས་ཏེ་མཆོག་སྤྲུལ་རིན་པོ་ཆེར་དགེ་ཚུལ་གྱི་སྡོམ་པ་བསྩལ་ཞིང་། ཀརྨ་ངེས་དོན་ཆོས་ཀྱི་བློ་གྲོས་ཞེས་པའི་མཚན་གསོལ། དགུང་གྲངས་བཅུ་གསུམ་ལ་ཕེབས་སྐབས་ཀརྨ་པ་མཆོག་གི་བཀའ་དགོངས་བཞིན། དགེ་རྒན་བླ་མ་མདོ་སྔགས་དང་ཞབས་གྲྭ་ཁ་ཤས་བཅས་དཔལ་མཚུར་ཕུའི་གདན་ས་ཆེན་མོར་དམ་ཆོས་གསན་སྦྱོང་གནང་བར་ཆེད་ཕེབས་སྐབས། ཕྱག་དཔེའི་དགེ་རྒན་ཚུལ་ཁྲིམས་ཡོངས་འདུས་དང་། བླ་མ་འཇིགས་མེད་སོགས་ཀྱི་མདུན་ནས་ཀར་ལུགས་རྒྱུད་སྡེ་ཡོངས་རྫོགས་ཐུགས་འཛིན་དང་། དེ་དག་གི་ཕྱག་ལེན་གསན་སྦྱོང་མཐར་ཕྱིན་པ་མཛད་རྗེས་འབོ་དཀར་དགོན་དུ་ཕྱིར་ཕེབས་གནང་། དགུང་གྲངས་བཅུ་བདུན་ལ་ཕེབས་སྐབས་དགེ་རྒན་བླ་མ་མདོ་སྔགས་སྐུ་གཤེགས། སྤྱི་ལོ་1958ལོའི་ལོ་མཇུག་ཏུ་མཚུར་ཕུར་སླར་ཕེབས། ཕྱི་ལོའི་ཆོ་འཕྲུལ་ཟླ་བའི་ཚེས་བཅོ་ལྔར་གཟིམ་སྤྱིལ་བཀྲ་ཤིས་འཁྱིལ་དུ་ཀརྨ་པ་རང་བྱུང་རིག་པའི་རྡོ་རྗེས་མཁན་སློབ་སྦྲགས་མ་མཛད་དེ་དད་པའི་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས། དེ་རྗེས་གློ་བོར་སྒྲུབ་དཔོན་བདེ་ཆེན་རིན་པོ་ཆེའི་དྲུང་ནས་ལོ་གཅིག་ཙམ་གྱི་རིང་མར་མི་དྭགས་གསུམ་གྱི་བླ་སྒྲུབ་དབང་དང་། ཐུགས་སྒྲུབ་དབང་རྒྱས་བསྡུས། ཕྱག་ཆེན་ངེས་དོན་སྒྲོན་མེ་སོགས་ཀྱི་ཆོས་བཀའ་ཅི་རིགས་གསན། སྤྱི་ལོ་1963ལོ་ཙམ་དུ་གྲུབ་མཆོག་རང་བྱུང་ཀུན་ཁྱབ་དང་ཐོག་མར་མཇལ་ཏེ་མི་ཕྱེད་པའི་དད་པ་འཁྲུངས་ཤིང་། སྤྱི་ལོ1964ལོར་རྡོ་གཙུག་དགོན་དུ་ཀར་ལུགས་རྒྱུད་སྡེ་ཁག་དང་། དཔལ་ལྡན་ཤངས་པའི་གསེར་ཆོས་ཡོངས་རྫོགས། ཇོ་ལུགས་དུས་འཁོར་གྱི་དབང་མོ་ཆེ། ཇོ་ནང་རིན་འབྱུང་བརྒྱ་རྩ་སོགས་ཀྱི་དབང་ལུང་གནང་བ་རྣམས་ལེགས་པར་གསན། དེ་རྗེས་དིལ་མགོ་མཁྱེན་བརྩེ་རིན་པོ་ཆེའི་སྐུ་མདུན་ནས་སྙིང་ཐིག་ཡ་བཞིའི་དབང་ལུང་དང་། བཀའ་འགྱུར་རིན་པོ་ཆེ་ཀློང་ཆེན་ཡེ་ཤེས་རྡོ་རྗེའི་མདུན་ནས་རྙིང་མ་རྒྱུད་འབུམ་གྱི་ལྗགས་ལུང་རྣམས་གསན། སླར་ཀརྨ་རང་བྱུང་ཀུན་ཁྱབ་ཀྱི་སྐུ་མདུན་དུ་ཟླ་བ་ལྔའི་རིང་སྔོན་འགྲོ་འབུམ་ལྔ་གསོག་གནང་དང་འབྲེལ། བར་མཚམས་རྣམས་སུ་ཉམས་ཁྲིད་དང་དོགས་གཅོད་སོགས་ཀྱང་ལྷུག་པོར་ཞུས། སྤྱི་ལོ་1965ལོར་བདུད་འཇོམས་རིན་པོ་ཆེའི་མདུན་ནས་བཀའ་འགྱུར་གྱི་ལྗགས་ལུང་ཆ་ཚང་དང་། འཇའ་ཚོན་པོད་དྲུག །སེ་ར་མཁའ་འགྲོའི་ཆོས་སྐོར་གྱི་དབང་ལུང་རྣམས་ཞུས་པ་སོགས་རིས་མེད་སྐྱེས་ཆེན་དུ་མའི་ཐུགས་ཀྱི་བདུད་རྩི་རང་སེམས་ཀྱི་ཞིང་སར་དྲངས།
དེ་རྗེས་ཐོས་པའི་རྗེས་འཇུག་སྒྲུབ་པ་སྙིང་པོར་ལྷུར་བཞེས་མཛད་པའི་སྔར་གྱི་དམ་བཅའ་བཞིན། སྤྱི་ལོ1966ལོར་དོར་རྒྱུ་བསོད་ནམས་དར་གྱི་སྒྲུབ་གྲྭ་གསར་དུ་བཙུགས་པའི་སྒྲུབ་ཐེངས་དང་པོར་སྒྲུབ་པར་ཞུགས་ཤིང་། ཀརྨ་རང་བྱུང་ཀུན་ཁྱབ་སྐུ་མདུན་ནས་ཐོག་མར་བསགས་སྦྱོང་སྔོན་འགྲོ་འབུམ་བཞི་ནས་བརྩམས། དངོས་གཞིའི་རིམ་པ་ལ་དཔལ་ལྡན་ཤངས་པའི་གསེར་ཆོས་རྣམ་པ་ལྔ་དང་། རྒྱུད་སྡེ་ཆེན་པོ་ལྔ། མྱུར་མཛད་ཡེ་ཤེས་ཀྱི་མགོན་པོ་སོགས་རྩ་གསུམ་གྱི་སྨིན་གྲོལ་རྒྱབ་རྟེན་དང་བཅས་པ་བུམ་པ་གང་བྱོའི་ཚུལ་དུ་གསན་ཞིང་ཉམས་བཞེས་མཐར་ཕྱིན་པ་མཛད། ཐུན་མཚམས་རྣམས་སུ་རྒྱུད་སྡེའི་ཕྱག་ལེན་དང་། བསྐྱེད་རྫོགས་ཀྱི་སྒོམ་དོན་སོགས་ཀྱི་ཐད་སྒྲུབ་གྲྭ་བ་ཚོའི་སྐྱོར་དཔོན་ཡང་མཛད། སླར་བསོད་ནམས་དར་གྱི་སྒྲུབ་ཐེངས་གཉིས་པར་རང་ལུགས་མདོ་སྔགས་ཀྱི་གཞུང་རྒྱུན་དཀོན་རིགས་གསན་བསམ་དང་། གཞན་ལ་དབང་ཁྲིད་སྩོལ་བ། ལྷག་པར་ཀརྨ་རང་བྱུང་ཀུན་ཁྱབ་ཕྱི་ཕྱོགས་སུ་ལན་མང་ཕེབས་དགོས་རྐྱེན། སྒྲུབ་སྡེ་འདི་ཉིད་ཀྱི་དབང་ལུང་ཁྲིད་གསུམ་ཕལ་ཆེར་བསྩལ་ནས་སྒྲུབ་དཔོན་མཛད། སྤྱི་ལོ1974ལོར་བསོད་ནམས་དར་གྱི་སྒྲུབ་ཐེངས་གསུམ་པར་ནཱ་རོ་ཆོས་དྲུག་གི་ལོ་གསུམ་ཕྱོགས་གསུམ་གྱི་སྒྲུབ་པར་ཞུགས་ནས། རྒྱུད་སྡེའི་བསྙེན་སྒྲུབ་དང་། ཞི་ལྷག་ཏིང་འཛིན། ཕྱག་ཆེན་ཆོས་དྲུག་སོགས་ལ་ཉམས་བཞེས་མཐར་ཕྱིན་མཛད། དེ་ལྟར་སྔ་ཕྱིར་བསོད་ནམས་དར་གྱི་གདན་ས་རང་དུ་ནི་གུའི་སྒྲུབ་ཐེངས་གཉིས་དང༌། ནཱ་རོའི་སྒྲུབ་ཐེངས་གཅིག་གི་སྒྲུབ་པ་མཐར་ཕྱིན་པར་མཛད།
སྤྱི་ལོ1978ལོའི་ལོ་མཇུག་ཏུ་ཀརྨ་པ་རིག་པའི་རྡོ་རྗེས་རུམ་བཏེག་སྒྲུབ་སྡེ་ཡིད་འོང་བསམ་གཏན་གླིང་གསར་འཛུགས་གནང་སྐབས། ཀརྨ་པ་དང་ཀརྨ་རང་བྱུང་ཀུན་ཁྱབ་ཀྱིས་སྒྲུབ་ཐེངས་དང་པོའི་སྒྲུབ་དཔོན་དུ་བསྐོ་བཞག་མཛད། འདི་སྐབས་ཀོང་སྤྲུལ་བློ་གྲོས་ཆོས་ཀྱི་སེང་གེ་དང་། རྒྱལ་ཚབ་རིན་པོ་ཆེ་གྲགས་པ་བསྟན་པ་ཡར་འཕེལ་སོགས་ལ་ཟླ་བ་གསུམ་གྱི་རིང་རྒྱུད་བརྟག་གཉིས་ཀྱི་བཀའ་ཁྲིད་འབུལ་བཞེས་གནང་། སྤྱི་ལོ1982ལོར་རུམ་བཏེག་སྒྲུབ་ཐེངས་གཉིས་པའི་མཚམས་སྒོ་བསྡམས་ཏེ། སྔར་ལྟར་དབང་ལུང་ཁྲིད་གསུམ་མཐའ་དག་སྩལ་བའི་བཀའ་དྲིན་བསྐྱངས། དེ་རྗེས་སྒྲུབ་ཐེངས་གསུམ་པ་དང་། བཞི་པའི་སྒྲུབ་དཔོན་གནང་མཐར་ཀར་བསྟན་ནང་ཁུལ་གྱི་རྩོད་རྙོག་གིས་རྐྱེན་པས་སྒྲུབ་པ་ཚུགས་ཐུབ་མེད། སྤྱི་ལོ1983ལོར་ཀརྨ་རང་བྱུང་ཀུན་ཁྱབ་དང་། ཀརྨ་ངེས་དོན་ཆོས་ཀྱི་བློ་གྲོས་དཔོན་སློབ་འདུས་པ་ཉིས་བརྒྱ་སྐོར་གྱི་འཕགས་བལ་ཁུལ་དུ་གནས་གཟིགས་གསོལ་སྨོན་ཟབ་རྒྱས་དང་། ཁྱད་པར་དུ་རྡོ་རྗེ་གདན་དུ་བཟང་སྤྱོད་སྨོན་ལམ་འབུ་ཐེར་ཚོགས་རྒྱུའི་དབུ་བརྙེས།
སྤྱི་ལོ1984ལོར་དོར་རྒྱུ་མི་རིགས་ས་གནས་སུ་མངའ་བདག་མཻ་ཏྲི་པ་འི་སྒྲུབ་གནས་ཁྱད་པར་ཅན་ཞིག་ཡོད་སར་འབོ་དཀར་ངེས་དོན་ཆོས་འཁོར་གླིང་ཕྱག་འདེབས་པའི་དབུ་བཙུགས་ཤིང་། ཐོག་མར་དཔལ་དུས་ཀྱི་འཁོར་ལོའི་སྒྲུབ་ཁང་ཞིག་དང་། འདུ་ཁང་། གྲྭ་ཤག་བཅུ་ཕྲག་ཁ་ཤས་བཅས་གསར་བསྐྲུན་གནང་བ་ནས་དཔལ་དུས་ཀྱི་འཁོར་ལོའི་མཚམས་སྒྲུབ་ཀྱི་སྲོལ་བཙུགས། དེ་རྗེས་མངའ་རིས་སུ་ཕེབས་ནས་འབོ་དཀར་དགོན་ཉམས་གསོ་གནང་། སྤྱི་ལོ1989ལོར་ཀརྨ་རང་བྱུང་ཀུན་ཁྱབ་དགོངས་པ་རྫོགས་རྗེས་མཆོད་འབུལ་གསོལ་འདེབས་ཟབ་རྒྱས་དང༌། ལོ་ལྟར་བླ་མ་མཆོག་གི་འདས་མཆོད་དུ་རྒྱུད་སྡེ་ལྔའི་སྒྲུབ་མཆོད་ཆེན་མོ་ཚོགས་རྒྱུའི་གཏན་རྩ་འང་འཇོག་པར་མཛད། ལོ་དེར་བསོད་ནམས་དར་གྱི་སྒྲུབ་གྲྭ་བ་རྣམས་ཀྱིས་གཙོས་དགེ་འདུན་བརྒྱ་སྐོར་ལ་ཤངས་ཆོས་ཡོངས་རྫོགས་ཀྱི་དབང་ལུང་དང་། དགེ་ཚུལ་སློང་གི་སྡོམ་པ་གནང་བ་སོགས་མཛད། དེ་རྗེས་འཇམ་མགོན་བློ་གྲོས་མཐའ་ཡས་ཀྱི་གསུང་ཤེས་བྱ་མཛོད་དབྱིན་སྐད་དུ་བསྒྱུར་བ་དང་། བཀའ་བརྒྱུད་སྨོན་ལམ་ཆེན་མོའི་བཀོད་འདོམས་གནང་བ་སོགས་རྗེ་བླ་མའི་དགོངས་བཞེད་མཐའ་དག་རྫོགས་པར་མཛད། སྤྱི་ལོ1992ལོར་སྟོད་ལུང་མཚུར་ཕུར་ཀརྨ་སྐུ་ཕྲེང་བཅུ་བདུན་པ་ཨོ་རྒྱན་འགྲོ་འདུལ་ཕྲིན་ལས་རྡོ་རྗེ་མཆོག་གི་མངའ་གསོལ་ཁྲི་འབུལ་གྱི་མཛད་སྒོ་ཆེན་མོར་ཞབས་བཅར་དང་སྦྲགས་སྟོད་མངའ་རིས་ཁུལ་སོགས་ཀྱི་སྐྱ་སེར་དུ་མ་དམ་པའི་ཆོས་ཀྱི་སྨིན་པར་མཛད། ལྷག་པར་མངའ་རིས་འབོ་དཀར་དགོན་དུ་ནཱ་རོ་ཆོས་དྲུག་གི་ལོ་གསུམ་ཕྱོགས་གསུམ་གྱི་སྒྲུབ་སྡེ་གསར་དུ་བཙུགས་ཏེ་སྒྲུབ་གྲྭ་བས་གཙོས་པ་རྣམས་ལ་ཀར་ལུགས་རྩ་གསུམ་རབ་འབྱམས་ཀྱི་དབང་ལུང་ཁྲིད་གསུམ་དང་། དགེ་ཚུལ་སློང་གི་སྡོམ་པ་སོགས་བསྩལ། སྤྱི་ལོ་1996ལོར་མི་རིགས་འབོ་དཀར་ངེས་དོན་ཆོས་འཁོར་གླིང་དུ་ཟུང་འཇུག་དགའ་ཚལ་གླིང་ཞེས་པའི་ནཱ་རོ་ཆོས་དྲུག་གི་སྒྲུབ་སྡེ་གསར་དུ་བཙུགས་ཏེ། ཆོས་དྲུག་ཕྱག་ཆེན་སོགས་ལོ་གསུམ་ཕྱོགས་གསུམ་ནང་ཉམས་སུ་ལེན་པའི་དབུ་བཙུགས། སྤྱི་ལོ1999ལོ་ནས་བཟུང་ཡང་སྲིད་ཀ་ལུ་རིན་པོ་ཆེ་སྐུ་འཁྲིས་སུ་གཏན་བཞུགས་མཛད་པར་ཡི་གེ་འབྲི་ཀློག་ནས་བརྩམས་མདོ་སྔགས་རིག་གནས་ཀྱི་རིན་ཆེན་ཕྱག་རྟགས་དུ་མ་འབུལ་བཞེས་མཛད། སྤྱི་ལོ2001ལོའི་ཟླ་བ་བཅུ་པའི་ཚེས་ཉེར་གཅིག་ནས་བཟུང་ཉིན་བཅུའི་རིང་། ཡང་སྲིད་ཀ་ལུ་རིན་པོ་ཆེ་བཞུགས་པའི་དབུས། མི་རིགས་གདན་ས་དང་། བསོད་ནམས་དར། ལཱ་ཝ་དགོན། དེ་བཞིན་འཛམ་གླིང་ཤར་ནུབ་ཀྱི་ཤངས་པའི་ལོ་གསུམ་ཕྱོགས་གསུམ་གྱི་སྒྲུབ་པར་ཞུགས་མཁན་རྣམས་ཀྱིས་གཙོས། ཕྱི་ནང་གི་སྐྱ་སེར་དོན་གཉེར་ཅན་སྟོང་ཕྲག་ལ་ཉེ་བར་དཔལ་ལྡན་ཤངས་པའི་ཆོས་སྐོར་ཡོངས་སུ་རྫོགས་པའི་སྨིན་གྲོལ་རྒྱབ་རྟེན་ཆ་ལག་དང་བཅས་དགྱེས་བཞིན་དུ་བསྩལ།
མདོར་ན། སྤྱི་ལོ1979ལོ་ནས་བཟུང་འཕགས་བལ་བོད་གསུམ་དང་། འབྲས་ལྗོངས། ཡོ་རོབ། ཨེ་ཤི་ཡ་བཅས་སུ་ཕེབས་ནས་ནཱ་རོ་དང་ནི་གུ་ཆོས་དྲུག་གི་སྒྲུབ་སྡེ་རྣམས་ལ་ལན་གྲངས་དུ་མ་ཕེབས་ཏེ་ཟབ་གསང་ཆོས་ཀྱི་གནང་སྦྱིན་ལེགས་པར་བསྩལ། སྒྲུབ་མཐར་ཕྱིན་པའི་བླ་མ་རྣམས་ལ་ཡང་དུས་གཏན་དུ་དབེན་པའི་གནས་སུ་རིའི་བུ་བྱས་ན་བུན་གོས་སུ་གྱོན་ནས་སངས་རྒྱས་བསྟན་པའི་ཞབས་ཏོགས་མཛད་དགོས་པའི་བཀའ་སློབ་ལན་མང་གནང་། དམ་པ་འདིས་སྐུ་ཚེ་གང་པོར་སྦྱིན་པའི་བདག་པོ་འདས་གསོན་བརྒྱ་སྟོང་མང་པོས་ཕུལ་བའི་དད་རྫས་ལ་བག་མེད་ལོངས་སྤྱོད་དང་། གནས་མིན་ཆུད་ཟོས་སུ་གཏོང་བ་འདི་ཕྱིའི་སྒྲིབ་ཉེས་སུ་གཟིགས་ཏེ་རྟག་ཏུ་བག་ཡོད་དྲན་ཤེས་དང་ལྡན་པར་མཛད་ཅིང་། བཀའ་དྲིན་གསུམ་ལྡན་གྱི་བླ་མའི་དགོངས་རྟོགས་ལས་འཁྲུངས་པའི་མན་ངག་སྙིང་གི་བདུད་རྩི་རྣམས་ཡང་སྲིད་ཀ་ལུ་རིན་པོ་ཆེ་སོགས་རིས་སུ་མ་ཆད་པའི་བུ་སློབ་དོན་གཉེར་ཅན་རྣམས་ལ་འདམས་པར་མཛད་མཐར། དགུང་གྲངས་དྲུག་ཅུ་རྩ་བཞི་བཞེས་པ། སྤྱི་ལོ2005ལོའི་སྤྱི་ཟླ8པའི་ཚེས17ཉིན་གདན་ས་མི་རིགས་དགོན་དུ་ཟག་མེད་ཆོས་སྐུའི་དབྱིངས་ལ་སྙོམས་པར་བཞུགས་སོ།
།དེ་ལྟར་སྔར་སོང་ལོ་རྒྱུས་ཀྱི་བཤུལ་ལམ་སྟེང་མཁས་གྲུབ་ཁྱུང་པོའི་བརྒྱུད་པ་འཛིན་པ་རྣམས་ཕལ་ཆེར་ངུར་སྨྲིག་རྒྱལ་མཚན་འཛིན་པ་ལ། མཁས་པའི་ཡོན་ཏན་གྱི་རྒྱ་མཚོ་བརྒལ་ཞིང་གྲུབ་པའི་ཉམས་རྟོགས་ཀྱི་གཏེར་ཁ་བརྡོལ་བའི་སྐྱེས་ཆེན་ཤ་སྟག་ཡིན་པ་ཡང་། བླ་མཆོད་ཆོ་ག་ཡིད་བཞིན་ནོར་བུ་ལས་བཀའ་བབས་ཐུགས་སྲས་ཆེན་པོ་རྣམ་དྲུག་ནས། རྩ་བའི་བླ་མའི་བར་དུ་རིམ་བྱོན་པའི། །བཀའ་བརྒྱུད་ནོར་བུའི་ཕྲེང་བ་འཛིན་པ་རྣམས། །ཕལ་ཆེར་གཙང་སྒོམ་ངུར་སྨྲིག་འཆང་བ་ལ། ལ་ལ་རྣལ་འབྱོར་སྤྱོད་སོགས་མ་ངེས་ཚུལ། གང་ལ་གང་འདུལ་མོས་པའི་དཔལ་དུ་འཆར། ཀུན་ཀྱང་སྐྱེ་མེད་རྟོགས་པའི་གདེང་དང་ལྡན་ ཞེས་འཁོད་པ་ལྟར་ཡིན་ལ། མཁས་བཙུན་ཆེན་པོ་རྒྱལ་མཚན་འབུམ་གྱིས་ཀྱང་ཤངས་པའི་གདམས་པ་རྣམས་གནད་ཟབ་པས་ཚད་ལྡན་གྱི་བླ་མ་བརྒྱུད་པ་ཁོ་ན་ལ་བརྟེན་དགོས་པ་ལས་བཀའ་ཆད་པ། དམ་ཉམས་པ། འདྲེས་ཁྱེར་བའི་བརྒྱུད་པ་སྤངས་དགོས་ ཞེས་གསལ་བར་གསུངས། དེང་གི་ཆར་འཇག་བསམ་གྱི་བརྒྱུད་པ་ལོགས་སུ་འཛིན་པ་མེད་ཀྱང་། དེ་གཉིས་ལས་བརྒྱུད་པའི་གདམས་པ་འགའ་ཞིག་ཉེ་བརྒྱུད་དང་ཤིན་ཏུ་ཉེ་བརྒྱུད་ཀྱི་བརྒྱུད་པ་རྣམས་ལས། ཀོང་སྤྲུལ་བློ་གྲོས་མཐའ་ཡས། དེས་བཀྲ་ཤིས་ཆོས་འཕེལ། དེས་ནོར་བུ་དོན་གྲུབ། དེས་ཀརྨ་རང་བྱུང་ཀུན་ཁྱབ། དེས་ཀརྨ་ངེས་དོན་ཆོས་ཀྱི་བློ་གྲོས། དེས་ཡང་སྲིད་ཀ་ལུ་རིན་པོ་ཆེ་སོགས་ལ་བརྒྱུད་པ་གནས་མུས་ཡིན་ལ། ཡང་ཀརྨ་རང་བྱུང་ཀུན་ཁྱབ་ཀྱིས་ཁྱུང་པོ་གསུམ་པ་ཚུལ་ཁྲིམས་མགོན་པོ། དེས་ཤངས་ཞོང་ཞོང་དགོན་གྱི་གྲྭ་སློབ་འགར་བརྒྱུད་པ་ཡང་ད་ལྟ་གནས་མུས་ཡིན། དེར་བརྟེན་རྗེ་དྲུང་བསྟན་པའི་རྒྱལ་མཚན་གྱིས་གདམས་ངག་ཉེ་རིང་ཤིན་ཏུ་ཉེ་བརྒྱུད་ཀྱིས། །གངས་ཅན་གྲུབ་མཐའ་ཀུན་ལ་ཁྱབ་གདལ་ཞིང༌། །ཕྲིན་ལས་བསམ་མི་ཁྱབ་པའི་རིང་ལུགས་ཆེའི། །སྒྲུབ་བརྒྱུད་ཤངས་པའི་བསྟན་པ་རྒྱས་གྱུར་ཅིག་ ཅེས་གསུངས་པ་ལྟར། དངོས་དང་བརྒྱུད་པའི་བླ་མ་རབ་དང་རིམ་པས་ཤངས་པའི་གདམས་པ་གསན་བཞེས་ཉམས་ལེན་དང་བརྒྱུད་འཛིན་དར་སྤེལ་མཛད་པ་དེས་ཤངས་པ་བཀའ་བརྒྱུད་འདི་ཉིད་རང་རྐང་ཚུགས་པའི་བརྒྱུད་པ་གཙང་རྐྱང་སྟེ་བརྒྱུད་པ་གཞན་དང་རྩ་བ་ནས་ནས་མ་འདྲེས་པ་ཞིག་ཏུ་གནས་མེད་ཀྱང༌། གདམས་ངག་གི་མུ་ཏིག་སྟར་ནས་སྟར་དུ་བརྒྱུས་པའི་གསེར་སྐུད་ཕྲ་མོ་དེ་ཡོངས་སུ་ཆད་མེད་པ་ཡིན་ནོ།

།སྨྲས་པ། རྡོ་རྗེ་འཆང་དབང་སྐུ་ཡིས་རྗེས་བཟུང་མཁའ་འགྲོའི་གཙོ་མོ་ནི་གུ་མས། །ཁྱུང་པོ་ཛོ་ཀི་ཐུགས་རྗེས་བཟུང་ཞིང་གསེར་ཆོས་ལྡེ་མིག་ཕྱག་ཏུ་གཏད། །རིན་ཆེན་སྣ་བདུན་སྔ་ཕྱི་ཟུང་གིས་ཤངས་ཆོས་གདམས་པའི་རྒྱལ་ས་འཛིན། །བརྒྱུད་པ་རྣམ་གསུམ་བུ་སློབ་ཚོགས་ཀྱིས་ཟླུམ་གཟུགས་གོ་ལའི་ཁྱོན་ཀུན་ཁྱབ། །ཅེས་བར་སྐབས་ཀྱི་ཚིགས་སུ་བཅད་པའོ།

II.3 -
།ལེའུ་གསུམ་པ། ཤངས་པ་བཀའ་བརྒྱུད་ཀྱི་ཐུན་མོང་མ་ཡིན་པའི་ཆོས་སྐོར་གསེར་ཆོས་རྣམ་པ་ལྔའི་སྐོར།
དཔལ་ལྡན་ཤངས་པ་བཀའ་བརྒྱུད་ཀྱི་ཤིང་རྟའི་སྲོལ་འབྱེད་པ་མཁས་གྲུབ་ཁྱུང་པོ་རྣལ་འབྱོར་ལ་མདོ་སྔགས་བཤད་སྒྲུབ་ཀྱི་ལམ་སྲོལ་བསམ་གྱིས་མི་ཁྱབ་པ་བཞུགས་ཤིང༌། འཆད་ཉན་སྒོམ་སྒྲུབ་ཀྱི་འཕྲིན་ལས་རྒྱ་ཆེར་མཛད་པ་ཡང་། མཛོད་རྩ་བ་ལས་སྟོན་པའི་དམ་ཆོས་རྣམ་གཉིས་ཏེ། ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་དང༌། །སྒྲུབ་པར་བྱེད་པ་ཁོ་ན་ཡིན་ཞེས་གསུངས་པ་ལྟར་བརྗོད་བྱ་རྟོགས་པའི་ཆོས་དང་། རྗོད་བྱེད་ལུང་གི་ཆོས་གཉིས་པོ་བཤད་པ། རྩོད་པ། སྒྲུབ་པའི་ལམ་རིམ་གསུམ་དུ་བསྡུས་པ་སྟེ། དང་པོ་བཤད་པའི་ལམ་རིམ་ལ། མདོ་དང་དེའི་བསྟན་བཅོས། རྒྱུད་རྒྱུད་འབྲེལ་དང་བཅས་པ། མཚན་ཉིད་ཐེག་པ་ལ་གྲུབ་མཐའ་ཆེན་པོ་བཞི། རྡོ་རྗེ་ཐེག་པ་ལ་རྒྱུད་སྡེ་ཆེན་པོ་བཞི་ཚུལ་བཞིན་དུ་བཤད་པ་དང་། གཉིས་པ་རྩོད་པའི་ལམ་རིམ་ལ། ཚད་མ་སྡེ་བདུན་སོགས་རྟོག་གེ་ཕྱི་རབས་པའི་ལུགས་ཀྱང་གསན་མོད། གཙོ་བོ་ཚད་མ་སྔ་རབས་པ་ལ་གྲགས་པ་ལྟར་གཏན་ཚིགས་ཆེན་མོ་བཞིས་མཚན་ཉིད་གསུམ་གཏན་ལ་ཕབ་ཅིང་། ཚད་མ་ཡང་མངོན་སུམ་རྗེས་དཔག་ཡིད་ཆེས་གསུམ་དུ་ཕྱེ་ནས། བརྒལ་ལན་རྣམ་པར་ངེས་པར་བྱེད་པ་དང་། གསུམ་པ་སྒྲུབ་པའི་ལམ་རིམ་ལ་རྒྱུ་ཕར་ཕྱིན་ཐེག་པ་དང་། འབྲས་བུ་རྡོ་རྗེ་ཐེག་པ་གཉིས་ཀྱི་ཉམས་ལེན་མཐའ་དག །བྱང་ཕྱོགས་སོ་བདུན་ཐུན་མོང་དང་ཁྱད་པར་བའི་གནད་ཀྱིས་ཉམས་སུ་ལེན་ཚུལ་རྣམས་མན་ངག་ཏུ་དྲིལ་ནས་སྟོན་པས། གངས་ཅན་བོད་ཀྱི་ཡུལ་འདིར་བྱོན་པའི་སྟོན་པ་ཞིག་ལ་ཆོས་སྒོ་མཐའ་ཡས་པ་དང་འགྲན་ཟླ་མེད་པ་ཡིན། དེ་དག་ཐམས་ཅད་ལས་ཕྱི་མ་སྒྲུབ་པའི་ལམ་རིམ་གྱི་སྙིང་བཅུད་དེང་སང་གི་བར་དུ་བཞུགས་པ་སྟེ། ནི་དྷི་གཉིས་ཀྱི་གསེར་ཆོས་རྩ་བར་གྱུར་པའི་ཆོས་སྐོར་ལྔར་གྲགས་པ་སྟེ། ནི་གུ་མ། སུ་ཁ་སིདྷི། རྡོ་རྗེ་གདན་པ། མཻ་ཏྲི་པ་། རཱ་ཧུ་ལའི་སྐོར་ལྔ། མན་ངག་ཐོར་བུ་དང་བཅས་པ་རྣམས་བཞུགས་ཤིང་། དེ་རྣམས་ཀྱང་གཙོ་ཆེར་སྡེ་ཚན་དུ་བསྡོམས་པའི་བརྡར་བཞག་པ་ལས་ཁྱུང་པོ་ཉིད་ཀྱིས་ཇི་ལྟར་གསན་པའི་ཆོས་སྐོར་ཚང་བ་ནི་མ་ཡིན་ཏེ། ཐོག་མ་ནས་བརྒྱུད་སྲོལ་གཅིག་ལ་ཚང་བར་འབྱོན་དུ་མ་བཏུབ་ན་ད་ལྟ་སྨོས་ཅི་དགོས་པས་སོ།

II.3.1 - The Five Golden Dharma
།དང་པོ། གསེར་ཆོས་རྣམ་ལྔའི་སྒྲ་དོན་སྤྱི་བཤད།
དེ་ཡང་ཐོག་མར་གསེར་ཆོས་ཞེས་བརྗོད་པའི་རྒྱུ་མཚན་ནི། ཁ་རྒྱུན་དུ་ཆུ་མགོ་གངས་དང་། ཆོས་མགོ་སངས་རྒྱས་ཞེས་སུ་གྲགས་པ་ལྟར། མཁས་གྲུབ་ཁྱུང་པོའི་ཆོས་དང་ཆོས་མིན་གྱི་རྣམ་དབྱེ་འབྱེད་པར་མངའ་བརྙེས་པའི་མཁྱེན་རབ་དང་། ཆོས་ཕྱིར་སྲོག་ལ་མ་ལྟོས་པའི་དཀའ་སྤྱད་ཀྱིས་དམ་པའི་ཆོས་ཀྱི་འགོ་ཁུངས། སངས་རྒྱས་སྟོང་གི་འབྱུང་གནས་རྒྱ་གར་འཕགས་པའི་ཡུལ་དུ་ལན་གསུམ་ཕེབས། དེར་མདོ་སྔགས་རིག་གནས་ཀྱི་སྐྱེད་ཚལ་དུ་སྔ་ཕྱི་ཁྱོན་བསྡོམས་ལོ་ངོ་ལྔ་བཅུ་ཙམ་རོལ་ནས་དམ་ཆོས་ཀྱི་ཉིང་ཁུ་མཐའ་དག་ལེགས་པར་བསྡུས་ཤིང༌། འཕགས་ཡུལ་དུ་སློབ་གཉེར་ལ་བྱོན་མྱོང་བའི་བོད་ཀྱི་མཁས་པ་གཞན་དང་འདྲ་བར་གསེར་གྱི་རྡོག་པོ་མང་དག་ཅིག་བསྣམས་ནས། དམ་ཆོས་ཞུ་བའི་དད་པའི་རྟེན་དུ་རང་གི་བླ་མ་སོགས་ལ་གསེར་གྱི་འབུལ་སྐྱེས་བྱ་དགོས་པ་ཡིན་ཏེ་དེང་སང་གི་སློབ་ཡོན་དུ་ཕུལ་བའི་དངུལ་ལོར་སོགས་དང་འདྲ། དེ་ཡང་ནི་གུ་མས་ཐེག་པ་ཆེན་པོ་གསང་སྔགས་ཞུ་བ་ལ་གསེར་དགོས་པ་ཡིན། གསེར་ཡོད་ན་བྱ་ཡི་གསུངས་ནས་ཞེས་དང་། ཡེ་ཤེས་ཀྱི་ཌཱ་ཀི་མ་སུ་ཁ་སིདྡྷིས་ཀྱང༌གསང་སྔགས་མངོན་སུམ་ལམ་པ་ཡི། །སྨིན་པར་བྱེད་པའི་དབང་བཞི་དང་། གྲོལ་བྱེད་བསྐྱེད་རྫོགས་སྟོན་པ་ལ། །དཀོན་པའི་རིན་ཆེན་གསེར་ཕྱེ་ཕུལ་ཞེས་གསུངས་པ་ལྟར། མཁའ་འགྲོ་མ་ནི་དྷི་རྣམ་གཉིས་ཀྱིས་མཁས་གྲུབ་ཁྱུང་པོ་རྣལ་འབྱོར་ལ་ཐེག་པ་ཆེན་པོ་དང་གསང་སྔགས་ཀྱི་བསྐྱེད་རྫོགས་ཞུ་བ་ལ་གསེར་འབུལ་དགོས་པའི་བཀའ་གནང་བ་ཡིན་ལ། ཡང་རྗེ་བཙུན་བྷ་རོས་རྭ་ལོ་ཙཱ་བར་བཀའ་བཟང་པོ་འདི་འདྲ་ཞུ་བ་ལ། །ནོར་རིན་ཆེན་གསེར་གྱི་ཕྱག་རྟེན་དགོས་ཞེས་པ་དང་། འབྲོག་མི་ལོ་ཙཱ་བས་མར་པ་ཆོས་ཀྱི་བློ་གྲོས་ལ་ཆོས་ཐམས་ཅད་གསེར་ཆོས་སུ་དགོས་པས། བླ་མའི་རྣལ་འབྱོར་ཙམ་ལའང་གསེར་ཞོ་གང་ཙམ་འབུལ་དགོས་ཞེས་སོགས་གསུངས་པ་ལྟར། རྭ་ལོ་ཙཱ་བ་དང་མར་པ་ཆོས་ཀྱི་བློ་གྲོས་སོགས་ལ་ཡང་རང་རང་གིས་བླ་མས་གསེར་འབུལ་དགོས་པའི་བརྡ་བསྐུལ་མཛད་པ་ཡིན་ཏེ། བཞི་པའི་རྒྱ་ཆེར་འགྲེལ་པ་ལས་རེ་ཞིག་ཐོག་མར་ཉན་པ་པོ། །སྦྱིན་གཏམ་ལ་སོགས་ཡང་དག་སྦྱར། །སྣོད་དུ་ཤེས་ནས་ཕྱིས་དེ་ལ། །ཟབ་མོའི་གཏམ་ནི་བསྙད་པར་བྱ་ཞེས་ཐོག་མར་བླ་མས་སྦྱིན་གཏམ་སོགས་ལ་སྦྱར་ནས་ཕྱིས་སྣོད་དུ་ཤེས་ཚེ་ཟབ་མོའི་གདམས་པ་སྟོན་དགོས་པར་གསུངས། དེས་ན་མཁས་གྲུབ་ཁྱུང་པོའི་གསེར་ཆོས་རྣམས་ཀྱང་གོང་དང་འདྲ་བར་ཟབ་མོའི་གདམས་ངག་སྟོན་པ་ལ་གདམས་ངག་དེར་དཀོན་པའི་འདུ་ཤེས་དང་། གདམས་ངག་སྦྱིན་སའི་སྣོད་བརྟག་པ་སོགས་ཀྱི་ཕྱིར་གསེར་མང་པོ་བླ་མར་ཕུལ་ནས་ཚུར་གདམས་ངག་ཞུས་པ་ཞིག་ཡིན་པ་ལས་མཐིང་ཤོག་གི་ངོས་སུ་གསེར་ཞུན་གྱིས་བྲིས་པའི་ཆོས་ཁོ་ནར་གོ་ན་མི་འགྲིག
རྗེ་བཙུན་མི་ལའི་རྣམ་མགུར་དུ་རྗེ་བཙུན་མི་ལ་དྷརྨ་བོ་དྷིའི་ཕྱག་ལེན་དུ་རྒྱ་གར་ལ་འབྱོན་པར་བརྩམ་པ་ན། རས་ཆུང་པས་རྗེ་བཙུན་མི་ལར་རྒྱ་གར་བ་གསེར་ལ་བརྩི་བ་ཡིན་གསུངས་ཀྱང་། རྗེ་བཙུན་མི་ལས་དྷརྨ་བོ་ངྷི་གསེར་མི་འདོད། །དྷརྨ་བོ་ངྷི་གསེར་འདོད་ན། །གྲུབ་པ་ཐོབ་པ་དོན་གོ་ཆུང་ཞེས་གསུངས་པ་བཞིན། འཇིག་རྟེན་ཐོག་གི་སྐྱེ་བོ་ཕལ་ཆེར་དང་འདྲ་བར་རྒྱ་གར་བ་ཕལ་པ་རྣམས་ཀྱང་གསེར་ལ་བརྩི་བ་ཁྱི་ཁྲག་ལ་མི་དགའ་བ་དང་། མི་རྒྱུ་ལ་མི་དགའ་བ་མེད་ཅེས་པའི་ཁ་དཔེ་དང་མཐུན་ལ། དེ་མིན་རྒྱ་གར་གྱི་པཎྜི་ཏ་རེ་ཟུང་ཞིག་ཀྱང་གསེར་ལ་དགའ་བ་ཡོད་སྲིད་དེ། རོག་གི་བན་དེ་ཤེས་རབ་འོད་ཀྱི་གྲུབ་མཐའི་ཆོས་འབྱུང་དུ་སྔར་གྱི་པཎྜི་ཏ་རྣམས་ད་ལྟའི་པཎྜི་ཏ་ལྷོ་མ་ཕྱིད་པ་བོད་དུ་གསེར་འཚོལ་དུ་ཡོང་པའི་བཟང་སྤྲང་ཚོ་གཅིག་དང་མི་འདྲ་གསུངས་ཞེས་འཁོད་པ་ལྟར་ཡིན། འོན་ཀྱང་ངེས་པ་དོན་དང་ལྡན་པའི་བླ་མ་གྲུབ་ཐོབ་དང་མཁའ་འགྲོ་མ་འདི་ཚོས་གསེར་ཁོ་ནའི་ཆེད་དུ་གདམས་པ་གནང་བ་ནི་མི་སྲིད་དེ། ནི་གུ་མས་དང་ཐོག་མཁས་གྲུབ་ཁྱུང་པོ་ལ་གསང་སྔགས་ཀྱི་གདམས་པ་ཞུ་བ་ལ་གསེར་དགོས་ཚུལ་གསུངས་ཀྱང་། གསེར་སྲང་ལྔ་བརྒྱ་ཕུལ་བ་རྣམས་ནགས་གསེབ་ཏུ་གཏོར་བས། མཁས་གྲུབ་ཁྱུང་པོའི་ཐུགས་དགོངས་སུ་འདི་ནི་ངེས་པར་ཤ་ཟའི་མཁའ་འགྲོ་མར་འདུག་སྙམ། དེ་རྗེས་གསེར་གྱི་རི་བོ་ཕྱོགས་བཞི་ནས་གསེར་གྱི་ཆུ་རྒྱུན་འབབ་པ་ཞིག་མཐོང་བས། མཁས་གྲུབ་ཁྱུང་པོས་གསེར་གྱི་རི་འདི་ལྟ་བུ་རྒྱ་གར་ན་ཡོད་དམ་མཁའ་འགྲོ་མའི་སྤྲུལ་པ་ཡིན་ཞུས་པས། ནི་གུ་མས་འཁོར་བའི་རྒྱ་མཚོར་བསྒྱུར་བ་ཡི། །ཆགས་སྡང་རྟོགས་པ་སྣ་ཚོགས་འདི། །རང་བཞིན་མེད་པར་རྟོགས་ཙ་ན། །ཐམས་ཅད་གསེར་གླིང་ཡིན་ནོ་བུ་ཞེས་གསུངས་པ་དང་། མར་པ་ལོ་ཙཱ་བ་རྒྱ་གར་དུ་ཕེབས་ཐེངས་གསུམ་པར་རྗེ་ནཱ་རོ་པ་མཇལ་སྐབས་ཀྱང་གསེར་གྱི་མཎྜལ་ཕུལ་ནས་གདམས་ངག་ཞུ་བྱས་པས་གསེར་རྣམས་ནམ་མཁའ་ལ་གཏོར། རྗེ་མར་པའི་ཐུགས་སུ་ངས་བོད་དུ་དཀའ་བ་དུ་མ་སྤྱད་ནས་བསགས་པ་དེ་རྣམས་ནགས་གསེབ་ཏུ་གཏོར་སྙམ་ཙ་ན། བླ་མས་ལག་པ་ཟེད་གསུངས་ནས་གསེར་རྣམས་མ་གོད་མ་ཉམས་པར་སྔར་བཞིན་ལག་ཏུ་བྱུང་། བླ་མས་ཞབས་ས་ལ་བརྡབས་པས་ས་ཐམས་ཅད་གསེར་དུ་སོང༌། བླ་མའི་ཞལ་ནས་གོ་ན་ཐམས་ཅད་གསེར་གླིང་ཡིན་ནོ་ཞེས་གསུངས་པ་སོགས་ཇི་ལྟ་བ་དང་ཇི་སྙེད་ཀྱི་ཤེས་བྱ་ཐམས་ཅད་སྐྱུ་རུ་ར་གསོས་པ་ལག་མཐིལ་དུ་བླངས་པ་ལྟ་བུར་གཟིགས་པའི་བླ་མ་དེ་དག་གི་ངོས་ནས་བརྗོད་ན། ས་རྡོ་རི་བྲག་ཐམས་ཅད་གསེར་གླིང་ཡིན་པས། སློབ་མས་ཕུལ་བའི་གསེར་རྡོག་ཆུང་ངུ་ལ་དགོས་པ་དེ་ཙམ་མེད་ཀྱང་། རྗེ་བཙུན་མི་ཕམ་མགོན་པོས་རབ་དང་སེམས་དང་ལྡན་པ་ཡིས། །ཚོགས་གཉིས་རྫོགས་པར་བྱ་བའི་ཕྱིར། །སངས་རྒྱས་རྣམས་ལ་གོས་སོགས་ཀྱིས། མངོན་སུམ་མངོན་སུམ་མིན་པར་མཆོད་ཅེས་གསུངས་པ་བཞིན། མར་པ་ལོ་ཙཱ་བས་བླ་མ་ནཱ་རོ་པར་རྗེ་ལ་མི་དགོས་རུང་། བདག་དང་གསེར་འབུལ་མཁན་སོགས་སེམས་ཅན་ཐམས་ཅད་ཚོགས་རྫོགས་པའི་སླད་དུ་ཅིས་ཀྱང་བཞེས་དགོས་ཞེས་ཞུ་བ་ཡང་ཡང་ནན་གྱིས་ཕུལ་ཞེས་པ་དང་། ཡང་ཞི་བྱེད་ཀྱི་ཆིག་བརྒྱུད་སྦས་པའི་བླ་མ་རྣམ་གསུམ་གྱི་ཡ་གྱལ་པ་ཚབ་སྒོམ་པས་བྱང་ཆུབ་སེམས་དཔའ་ཀུན་དགའ་ཡུན་རིང་དུ་བསྟེན་ནས་དབུས་སུ་བྱོན་ཁར་བླ་མ་ལ་རྒྱགས་ལྷག་གི་གསེར་སྲང་གསུམ་ཕུལ་བས། བླ་མས་ཨཱ་ཙ་རའི་བརྒྱུད་པ་ལ་གསེར་གྱིས་དགོས་པ་མེད་ཀྱང་ཁྱེད་རྣམས་ཚོགས་རྫོགས་པའི་ཕྱིར་བླང་ངོ་གསུངས་ནས་ནམ་མཁའ་ལ་གཏོར་ཞེས་སོགས་འཁོད་པ་ལྟར་གསེར་འབུལ་བ་ནི་དེ་འབུལ་མཁན་གྱི་མི་ཚོའི་ཚོགས་གཉིས་རབ་ཏུ་རྫོགས་པའི་ཕྱིར་ཡིན། དེར་བརྟེན་མཁས་གྲུབ་ཁྱུང་པོས་ཀྱང་དག་པའི་ལོངས་སྤྱོད་དཔག་ཏུ་མེད། །འཇིག་རྟེན་གསེར་དངུལ་དགོས་པ་མེད་ཅེས་པ་ལྟར་རང་ཉིད་ལ་ཐབས་བརྒྱ་ཇུས་སྟོང་གིས་རྙེད་སོན་བྱུང་བའི་ནོར་རྣམས་གསེར་དུ་བསྒྲིལ་ཏེ། ཕངས་སེམས་ཀྱི་ཞགས་པས་མ་བཅིངས་པར་ཡོངས་སུ་བློས་བཏང་ནས་རྒྱ་གར་འཕགས་པའི་ཡུལ་དུ་གསེར་གྱི་འབུལ་སྐྱེས་ལ་ཐེངས་གསུམ་བྱོན།
མཁས་གྲུབ་ཁྱུང་པོའི་མཛད་རྣམ་ཁུངས་བཙན་དག་ཏུ་གསེར་སྲང་གི་ཁ་གྲངས་ཁ་གསལ་འཁོད་པ་རྣམས་ལ་གཞིགས་ན། རྒྱ་གར་དུ་ཕེབས་ཐེངས་དང་པོར་ཁྱོན་གསེར་སྲང519ཙམ་ཕུལ་བ་དང་། ཕེབས་ཐེངས་གཉིས་པར་ཁྱོན་གསེར་སྲང1451ཕུལ་བ། ཕེབས་ཐེངས་གསུམ་པར་ཁྱོན་གསེར་སྲང3000ཙམ་ཕུལ་བ་བཅས་ཐེངས་གསུམ་ལ་ཁྱོན་བསྡོམས་གསེར་སྲང4970ཙམ་ཟིན་པ་དེ། ཕོ་བྲང་པོ་ཏ་ལར་བཞུགས་པའི་རྒྱལ་དབང་སྐུ་ཕྲེང་དགུ་པ་ལུང་རྟོགས་རྒྱ་མཚོའི་གསེར་གདུང་ལ་གསེར་སྲང3574ཡོད་པ་ལས་གསེར་སྲང1396གི་མང་བ་དང་། སྐུ་ཕྲེང་བཅུ་པ་ཚུལ་ཁྲིམས་རྒྱ་མཚོའི་གསེར་གདུང་ལ་གསེར་སྲང3534སྤྱད་པ་ལས་གསེར་སྲང1436གི་མང་བ་ཡོད། གསེར་སྲང་དེ་དག་ལས་བླ་མ་རྡོ་རྗེ་གདན་པར་སྔ་ཕྱི་ཁྱོན་བསྡོམས་གསེར་སྲང613དང༌། མཁའ་འགྲོ་ནི་གུ་མར་གསེར་སྲང500མཁའ་འགྲོ་མ་བདེ་བའི་དངོས་གྲུབ་ལ་གསེར་སྲང500ཙམ་ཕུལ་བ་རྣམས་ཀྱིས་གསེར་སྲང་གི་ཁ་གྲངས་སྤྱིའི32.65%ཙམ་ཟིན། དེ་ལྟར་ཡུན་རིང་སིལ་བུ་ཁ་ཐོར་དུ་གནས་པའི་ལོ་རྒྱུས་མཇུག་བསྒྲིལ་མཚམས་དེར་བོད་སྤྱིའི་དཔལ་འབྱོར་གྱི་གནས་བབས་ཅུང་ཟད་ཞན་པས་གསེར་སྲང་འདི་ཙམ་འཚོལ་སྒྲུབ་དང་འབུལ་སྐྱེས་བྱ་རྒྱུ་ནི་ལས་སླ་པོ་ཞིག་གཏན་ནས་མ་ཡིན་ཏེ། ལྷ་བླ་མ་བྱང་ཆུབ་འོད་ཀྱིས་ནག་ཚོ་ལོ་ཙཱ་བ་ལ་ད་འདི་ན་གསེར་སྲང་བདུན་བརྒྱ་ཡོད་དེ། འདི་ཕར་ཁྱེར་ལ་བླ་མའི་ཕྱག་ཏུ་ཕུལ། ངེད་བོད་པེ་ཏ་པུ་རིའི་གྲོང་ཁྱེར་ལྟ་བུ་ན། གསེར་ལུག་ཙམ་རེ་ལ་དཀའ་ལས་ཆེན་པོ་ཡོད་པ་ཡིན་ཞེས་གསུངས་པ་ལྟར་རོ།
།དེས་ན་གོང་གསལ་གྱི་གྲངས་དེ་དག་ལས་ང་ཚོས་མཁས་གྲུབ་ཁྱུང་པོ་རྣལ་འབྱོར་གྱིས་བོད་དུ་གདན་དྲངས་པའི་ཆོས་སྒོ་རྣམས་ནི་གསེར་གྱིས་བླུས་པ་ཤ་སྟག་ཡིན་པ་ཤེས་ཚོར་ཐུབ། དེར་བརྟེན་མཁས་གྲུབ་ཁྱུང་པོ་རང་ཉིད་ཀྱིས་ཀྱང༌དེ་ནས་གཞུང་དང་གདམས་པའི་སྤྲོས་པ་ཆོད་ནས། ད་བོད་དུ་ཕྱིན་ནས་བླ་མ་རྣམས་ལ་གསེར་གྱི་ཆོས་སྐྱེས་ཤིག་བྱ་དགོས་སྙམ་ནས་རྡོ་རྗེ་གདན་དུ་མཆོད་པ་ཕུལ་ཞེས་འཁོད་པ་ལྟར། མཁས་གྲུབ་ཁྱུང་པོ་རང་ཉིད་རིག་པའི་གནས་ཀུན་ལ་ཕ་རོལ་ཏུ་སོན་ཡང་། མཐའ་འཁོབ་བོད་ཀྱི་ཡུལ་གྲུ་འདིར་ཚུར་ཕེབས་ནས་འདུལ་བྱ་རྣམས་ལ་གསེར་གྱི་ཆོས་སྐྱེས་ཤིག་བྱ་སྙམ་པའི་ཐུགས་འདུན་དྲག་པོ་འཁྲུངས། འོན་ཀྱང་འདུལ་བ་གཞུང་དམ་པ་ལས་བཅོམ་ལྡན་འདས་ཀྱིས་བཀའ་བསྩལ་བ། ཆོས་ཀྱི་སྒོ་ནས་རྙེད་པའང་མ་འཚོལ་ཅིག །ཆོས་འཚོང་ཞིང་འཚོ་བར་ཡང་མ་བྱེད་ཅེས་གསུངས་པ་དང༌། མཁས་གྲུབ་བེའུ་བུམ་དུ་གསེར་དང་རྟ་ཁྲབ་གོས་དར་ལ། །བརྗེ་ཚོང་བྱ་བའི་གདམས་པ་མིན་ཞེས་པ། བཻ་རོ་ཙ་ནའི་རྣམ་ཐར་པདྨའི་དགའ་ཚལ་དུ་མན་ངག་རིག་དང་རིག་པ་བརྗེ་བ་ལ། །ཟང་ཟིང་སྒྱུ་མའི་ནོར་ལ་ཚོང་མ་བྱེད་ཅེས་སོགས་འཁོད་པ་ལྟར་མཁས་གྲུབ་ཁྱུང་པོ་བོད་དུ་ཕེབས་རྗེས་གསེར་གྱི་བླུས་པའི་གདམས་པ་འདི་དག་གསེར་དང་བརྗེས་ཏེ་རྙེད་པ་འཚོལ་བ་དང་ཁེ་སྤོགས་ལྡབ་འགྱུར་གྱི་ཚོང་ལས་མཛད་མེད་པས། མཁས་གྲུབ་རྗེས་ཀྱང༌ཁ་སྤྱང་དང་ནོར་ཕྱིར་མ་ཤོར་བ་གལ་ཆེའོ། གལ་ཏེ་དེ་གཉིས་ཀྱི་ཕྱིར་སུ་རུང་ལ་སྟེར་ཞིང་དཔེ་ཆ་སྟོན་ན། ཀྵེ་ཏྲ་པཱ་ལས་དེའི་སྙིང་ཕུགས་ཤིག་ཅེས་བསྔོ་སྨོན་མཛད་པ་ཡིན། མཁས་གྲུབ་ཁྱུང་པོའི་གསེར་ཆོས་ལྔ་པོ་དེ་དག་ནི་ས་སྐྱ་ཚར་ལུགས་སུ་མཁའ་སྤྱོད་སྐོར་གསུམ་དང༌། དམར་ཆེན་སྐོར་གསུམ། དམར་ཆུང་སྐོར་གསུམ། འཆི་མེད་རྡོ་རྗེ་ལྷ་མོ། ཇོ་དམར། སེང་གདོང་མ། འཇམ་དཔལ་ནག་པོ་བཅས་ལ་གསེར་ཆོས་བཅུ་གསུམ་མམ་ཡང་ན། དེའི་སྟེང་དུ་སེང་གེའི་སྒྲ་བསྣན་པས་ཀླུ་བའི་གསེར་ཆོས་བཅུ་བཞི་ཞེས་འབོད་པ་རྣམས་དང་ཕྱོགས་འདྲའོ།
།དེ་ཡང་འཇམ་དབྱངས་མཁྱེན་བརྩེ་དབང་པོས་དོན་མཁའ་འགྲོའི་སྙིང་གཏམ་རྡོ་རྗེའི་ཚིག །ཆོས་ཟབ་མོའི་གསེར་ཆོས་རྣམ་པ་ལྔ་ཞེས་དང་། དཀར་ཆག་བཻཌཱུརྱའི་ལྡེའུ་མིག་ཏུ་སྒྲུབ་བརྒྱུད་ཤིང་རྟའི་ལམ་སྲོལ་མཁའ་ལྟར་ཡངས། །ཁྱུང་པོའི་གསེར་ཆོས་ཉི་ཟླ་བཞིན་དུ་དཀོན་ཞེས་པ། ཕྱག་ལེན་བདེ་ཆེན་མྱུ་གུའི་ཕྲེང་བར་དཔལ་ལྡན་རྡོ་རྗེ་བཙུན་མོ་ནི་གུ་མས། །ཁྱུང་པོའི་མཚན་ཅན་གྲུབ་ཐོབ་ལོ་ཙཱ་བར། ཆིག་བརྒྱུད་བཀའ་རྒྱས་བསྡམས་པའི་གསེར་ཆོས་ལམ། འདི་འདྲ་ཟབ་ཟབ་ཕལ་གྱི་དཔེར་མི་མཚུངས་ཞེས་སོགས་གསུངས་པ་བཞིན། མ་མཁའ་འགྲོའི་གསང་ཚིག་དང་ཆོས་ཟབ་མོའི་མཐར་ཐུག་ནི་གུའི་གསེར་ཆོས་ལྔ་པོ་འདི་རྣམས་ནི་མཁས་གྲུབ་ཁྱུང་པོ་ལ་ཐོབ་པའི་གདམས་པ་ཐམས་ཅད་ཀྱི་མཆོག་འགྱུར་དང་མན་ངག་ཡོད་ཚད་ཀྱི་ཉིང་ཁུ་ཡིན་པ་མ་ཟད། ཤངས་པའི་ཆོས་བརྒྱུད་འདི་ཉིད་བོད་དར་ནང་བསྟན་ཆོས་བརྒྱུད་གཞན་དང་མི་འདྲ་བར་བོད་ཀྱི་ལོ་རྒྱུས་གར་སྟེགས་ཐོག་བརྒྱུད་པ་རང་ཟིན་དུ་མངོན་ཐུབ་པ་ཡང་གཙོ་བོར་སྙན་བརྒྱུད་གསེར་ཆོས་ལྔ་པོ་འདི་དག་ལས་བྱུང་བ་ཡིན། དེར་བརྟེན་ཀརྨ་ངག་དབང་ཡོན་ཏན་རྒྱ་མཚོས་ཀྱང་གངས་ཅན་བོད་ཀྱི་ཡུལ་འདིར་ཆོས་རྒྱལ་ལོ་པཎ་གྱི་དྲིན་ལས། མདོ་སྔགས་ཆོས་ཀྱི་རིན་ཆེན་ཀུན་ལ་ཐང་མ་རུ་བརྡལ་ཡང་། །གྲུབ་ཐོབ་བར་མ་ཆད་ཅིང་མྱོང་རྟགས་མངོན་སུམ་དུ་ཐོན་པ། མཁས་གྲུབ་ཁྱུང་པོའི་གསེར་ཆོས་ཡིད་བཞིན་ནོར་བུ་ལས་ལྷག་གོ་ཞེས་པ་ལྟར་གྲུབ་ཐོབ་བར་མ་ཆད་པས་ཉམས་བཞེས་སུ་བསྟར་བས་མྱོང་རྟོགས་ཡོན་ཏན་ཐམས་ཅད་མངོན་སུམ་དུ་སྐྱེ་བའི་གསེར་ཆོས་འདི་དག་ནི་ཡིད་བཞིན་གྱི་ནོར་བུ་རིན་པོ་ཆེ་ལས་ཀྱང་ལྷག་པར་གསུངས། ཁྱུང་པོའི་གསེར་ཆོས་ཀྱི་གྲངས་ངེས་ཚུལ་མི་མཐུན་པའི་སྐོར་ཤངས་ཆོས་དཀར་ཆག་ཟབ་རྒྱས་ཆོས་ཀྱི་སྒོ་འབྱེད་ལྡེ་མིག་ཏུ་གསེར་ཆོས་བཞི། མཁའ་སྤྱོད་དཀར་དམར་དང་བཅས་པ་ཞེས་འཁོད་པས། མཁའ་སྤྱོད་དཀར་དམར་གཉིས་ཀྱི་ཆོས་སྐོར་གསེར་ཆོས་ཀྱི་ཁོངས་མ་བསྡུས་པར་གསེར་ཆོས་བཞི་ཞེས་བརྗོད་ཀྱང་། འདིར་ནི་ཡོངས་གྲགས་ལྟར་གསེར་ཆོས་རྣམ་པ་ལྔ་རུ་ཕྱེ་བ་ཡིན་ཏེ། དེ་དག་ཀྱང་དཔག་བསམ་གྱི་ལྗོན་པ་ལྟ་བུ་ལ། རྩ་བ་ནི་གུ་ཆོས་དྲུག །སྡོང་པོ་ཕྱག་རྒྱ་ཆེན་པོ། ཡལ་ག་ལམ་ཁྱེར་རྣམ་གསུམ། མེ་ཏོག་མཁའ་སྤྱོད་དཀར་དམར། འབྲས་བུ་འཆི་མེད་འཆུག་མེད་ཅེས་བརྗོད་སྲོལ་ཡོད། དེ་རྣམས་ལས་ནི་གུ་ཆོས་དྲུག་དང་ཕྱག་ཆེན། འཆི་མེད་བཅས་ནི་རྒྱལ་བ་རྡོ་རྗེ་འཆང་གི་བཀའ་དང་། ལམ་ཁྱེར་ནི་མཁའ་འགྲོ་ནི་གུ་མ། འཕྱུག་མེད་ནི་བིརཱ་པའི་གསུང་ཡིན། དེ་ལྟར་གདམས་ངག་གི་ཁུངས་བཙན་ལ་བསྲེ་ལྷད་དང་བྲལ་བའི་གསེར་ཆོས་དེ་དག་རིམ་གྱི་ཞིང་བ་ལ།

II.3.2 - The roots: the Six Doctrines of Niguma
གཉིས་པ། རྩ་བ་ནི་གུ་ཆོས་དྲུག
དེ་ཡང་རྗེ་བཙུན་ཏཱ་ར་ནཱ་ཐས་དཔལ་རྡོ་རྗེ་འཆང་ཆེན་སྐད་པ་དེས། རྒྱུད་མཐའ་ཡས་གསུངས་པའི་སྙིང་པོ་ལ། །ཟབ་གནད་དགུ་བསྡུས་པའི་ཉེ་ལམ་ཞིག །མིང་ནི་གུ་ཆོས་དྲུག་ཞེས་བྱ་བ། །མ་མཁའ་འགྲོ་ཀུན་གྱི་གསང་ཚིག་དེ་ཞེས་གསུངས་པ་ལྟར་རྒྱུད་མཐའ་ཡས་གཅིག་ཏུ་བསྡུས་པའི་མཁའ་འགྲོའི་གསང་ཚིག་གི་སྙིང་པོར་གྱུར་པ་ནི་གུ་ཆོས་དྲུག་ནི། མཁས་གྲུབ་ཁྱུང་པོ་རྣལ་འབྱོར་རྒྱ་གར་དུ་ཐེངས་གཉིས་པར་ཕེབས་པའི་ཚེ། གསེར་སྲང་ལྔ་བརྒྱ་འཁྱེར་ནས་རྒྱ་གར་གྱི་ཤར་ལྷོ་ནུབ་བྱང་ཀུན་ཏུ་རྒྱུ་ནས་རྩད་གཅོད་བྱས་པ་བཞིན་གསོལ་བ་ཤུགས་དྲག་བཏབ་རྐྱེན། རྒྱལ་བ་རྡོ་རྗེ་འཆང་ལས་དངོས་སུ་ཆོས་གསན་ཞིང་དག་པའི་ས་གསུམ་ལ་གནས་པ་ནཱ་རོ་པའི་ལྕམ་མོ་ཡེ་ཤེས་ཀྱི་མཁའ་འགྲོ་ནི་གུ་མ་དང་མཇལ་ནས། བྱིན་རླབས་ཀྱིས་རྗེས་སུ་བཟུང་ཞིང་སྒྱུ་ལུས་རྨི་ལམ་ཟིན་ནས་གདམས་པ་འདི་དག་རྫོགས་པར་ཞུས། ནི་གུ་མས་ཀྱང་མཁས་གྲུབ་ཁྱུང་པོ་རྣལ་འབྱོར་ལ་གཉིད་ཐུམ་གཅིག་ལ་ཆོས་དྲུག་གི་ཁྲིད་ཚར་བ་རྒྱ་གར་ན་ཁྱེད་ལས་མེད་གསུངས། དེ་རྗེས་དངོས་སུ་ཁྲིད་ཚར་གསུམ་གནང་བ་བསྡོམས་པས་ཆོས་དྲུག་གི་ཁྲིད་ཐེངས་བཞི་དང་། རྡོ་རྗེའི་ཚིག་རྐང་། སྒྱུ་མ་ལམ་རིམ་གསུངས་ཤིང་རྒྱུད་སྡེ་ལྔའི་དབང་དང་སྒྲུབ་ཐབས་སོགས་ཀྱི་གདམས་པའང་མང་དུ་གནང་། ཌཱ་ཀི་མའི་ཞལ་ནས་ཆོས་དྲུག་གི་དབང་གདམས་ངག་དང་བཅས་པ་འདི་རྗེ་བཙུན་ལྭ་བ་པ་དང་ང་གཉིས་མ་གཏོགས་པ་རྒྱ་གར་ན་ཡང་ཤེས་པ་མེད་པས། མི་རབས་བདུན་དུ་ཆིག་བརྒྱུད་ལས་མ་སྤེལ་ཅིག །དེ་རྣམས་ཀྱང་རིམ་པས་བྱིན་གྱིས་རློབ་ཅིང་ལུང་སྟོན་པར་འགྱུར་རོ་ཞེས་གསུངས་པ་ལྟར་མཁའ་འགྲོ་མ་འདི་དང་རྗེ་བཙུན་ལྭ་བ་པ་ཙམ་ལས་རྒྱ་གར་དུ་ཡང་ཆོས་དྲུག་གི་མན་ངག་ཡོངས་སུ་རྫོགས་པ་མཁྱེན་མཁན་མེད་པ་དང་། རྗེ་བཙུན་ལྭ་བ་པ་ལ་ངེས་བཟུང་མཛད་པ་ཡང་གདམས་པ་འདི་ཤིན་ཏུ་དཀོན་པའི་དབང་དུ་བྱས་པ་ཡིན། དེས་ན་རྗེ་བཙུན་ཏཱ་ར་ནཱ་ཐས་ཀྱང་ལྭ་བ་པ་དང་ནི་གུ་མ་གཉིས་ཀྱང་གདམས་ངག་བྱིན་རླབས་ཀྱི་རྐང་གཅིག་པར་བཤད་པས། ནི་གུའི་ཆོས་དྲུག་དང་མ་འབྲེལ་བ་མ་ཡིན་ནོ་ཞེས་གསུངས་པ་ལྟར་ནི་གུ་མ་དང་རྗེ་བཙུན་ལྭ་བ་པའི་གདམས་ངག་རྣམས་བྱིན་རླབས་ཀྱི་ཁུངས་གཅིག་པས་འབྲེལ་བ་དམ་ཟབ་ཡོད་པ་གསུངས། སློབ་དཔོན་ལྭ་བ་པའམ་ཨིནྡྲབོ་དྷི་ཆུང་བ་ནི། ཡུལ་ཨོ་རྒྱན་གྱི་བྱེ་བྲག་གྲོང་ཁྱེར་སམྦྷེ་ལ་ཞེས་བྱ་བར་སྐུ་འཁྲུངས་ཤིང་། དུར་ཁྲོད་ཀྱི་སྐྲའི་ལྭ་བ་གྱོན་པས་མཚན་དེ་ལྟར་ཐོགས། རྣལ་འབྱོར་སྤྱོད་པའི་དབུ་མ་རང་རྒྱུད་པ་ཐ་སྙད་དུ་རྣམ་རྫུན་པར་འདོད་པའི་སློབ་དཔོན་ཞིག་ཡིན། རིང་བརྒྱུད་བཀའ་བཞི་བླ་མའི་རྣམ་ཐར་ལས་སློབ་དཔོན་ཆེན་པོ་ལྭ་བ་པས། །གྲོང་ཁྱེར་ཆེན་པོའི་སྲང་མདོ་རུ། བཅུ་གཉིས་བར་དུ་གཉིད་ལོག་པས། ཕྱག་རྒྱ་ཆེན་པོའི་དངོས་གྲུབ་ཐོབ་ཅེས་མི་ལོ་བཅུ་གཉིས་རིང་དཀའ་སྤྱད་སྒོམ་སྒྲུབ་མཛད་མཐར་ཕྱག་རྒྱ་ཆེན་པོའི་དངོས་གྲུབ་མཐར་ཕྱིན་པ་ཐོབ་ནས་ཨོ་རྒྱན་གྱི་རྒྱལ་པོའི་བླ་མཆོད་ཀྱང་མཛད་པའི་སློབ་དཔོན་ཆེན་པོ་ཞིག་ཡིན་ལ། གྲུབ་ཆེན་འདི་དང་མཚོ་སྐྱེས་གཉིས་ནི་དགྱེས་པ་རྡོ་རྗེའི་སྒྲུབ་ཐབས་མི་ཡུལ་དུ་སྤྱན་དྲངས་མཁན་ཡང་ཡིན། དཔལ་འཁོར་ལོ་སྡོམ་པའི་དབང་གི་བརྒྱུད་པ་ཞིག་གི་རིམ་པ་ལྔ་པར་ཡང་སློབ་དཔོན་འདིའི་མཚན་དྲངས་འདུག །འགའ་ཞིག་གིས་གྲུབ་ཆེན་ལྭ་བ་པ་ནི་ཏེ་ལོ་པའི་བཀའ་བབས་བཞིའི་བླ་མའི་གྲས་སུ་བཞེད་པ་དང་། རྒྱ་གར་གྱི་གྲུབ་ཆེན་བརྒྱད་ཅུའི་ནང་གི་སློབ་དཔོན་ཀམ་པ་ལི་ཞུ་བ་དེ་ཡིན་པ་དུང་དཀར་བློ་བཟང་འཕྲིན་ལས་ཀྱི་དེབ་དམར་མཆན་འགྲེལ་ཨང365པར་གསལ་བ་ལ་སོགས་པ་བདེན་མིན་དཔྱད་པར་འཚལ།
ཆོས་དྲུག་པོ་འདི་དག་མི་རབས་བདུན་དུ་ཆིག་བརྒྱུད་ལས་སྤེལ་མི་ཆོག་པའི་བཀའ་རྒྱ་མཛད་པ་ནི། སྤྱིར་ཆིག་བརྒྱུད་ཅེས་པ་སོ་སོ་སྐྱེ་བོ་འཆིང་བ་ཀུན་ལྡན་མིའི་དབང་དུ་མཛད་ཀྱི། གཞན་རྡོ་རྗེ་འཆང་ཆེན་པོས་དཔའ་བོ་དང་མཁའ་འགྲོ་སོགས་འཁོར་མཐའ་ཡས་པའི་དབུས་སུ་གསུངས་པ་དང་། ཆིག་རབས་བདུན་ཁོ་ནར་གདམས་པ་དེ། ཆོས་འདིའི་གདུལ་བྱ་མང་པོ་མི་འབྱུང་བའི་ཕྱིར་ཡིན། རིམ་པས་བྱིན་གྱིས་རློབ་ཅིང་ལུང་བསྟན་པར་འགྱུར་རོ་ཞེས་གསུངས་པས་མཁས་གྲུབ་ཁྱུང་པོ་འཕགས་ཡུལ་ནས་ཐེངས་གསུམ་པར་བོད་དུ་ལོག་ཕེབས་རྗེས་རྒྱ་དཔེ་འགའ་ཞིག་རུལ་བའི་ལོ་རྒྱུས་ཡོད་པ་དེ་ནི། ཕལ་ཆེར་ཆོས་དྲུག་ལ་སོགས་པའི་གདམས་པའི་དཔེ་འགའ་ཞིག་ལ་གོ མཁས་གྲུབ་ཁྱུང་པོའི་ཆོས་དྲུག་གི་དཔེ་འདི་རྣམས་ཇོ་བོ་རྗེའི་དཔེ་དང་གཅིག་པས། ལོ་ཆེན་རིན་ཆེན་བཟང་པོ་དང་གླན་དར་མ་བློ་གྲོས་ཀྱིས་བསྒྱུར་བ་དེ་མཁའ་འགྲོ་ནི་གུ་མས་བྱིན་གྱིས་བརླབས་པ་ཡིན། ཡང་ནི་གུ་ཆོས་དྲུག་གི་གདམས་པ་འདི་ཉིད་མི་རབས་བདུན་ལས་སྤེལ་མ་ཆོག་ཅེས་གསུངས་པར་གྲངས་བདུན་སྨོས་པའི་རྒྱུ་མཚན་གང་ཡིན་ཞེ་ན། དེ་ནི་ཕལ་ཆེར་བྱང་ཆུབ་སེམས་དཔའ་རྟག་ཏུ་ངུས་བཤེས་གཉེན་ཆོས་འཕགས་འཚོལ་བའི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲིགས་བམ་རྒྱ་རིམ་པ་བདུན་དུ་བཏབ་པའི་རྟེན་འབྲེལ་གྱིས་ཞི་བྱེད་པའི་ཐུན་མོང་མ་ཡིན་པའི་གདམས་པ་རྒྱུད་སྟོང་ཐུན་དང་བཅས་པ། དབང་ལམ་ཁྲིད་དང་བཅས་པ། དེ་མིན་གསང་མཛོད་གསུམ། ལམ་སྐོར་ལ། བེའུ་བུམ་བརྒྱད་བཅས་ཀྱང་སློབ་དཔོན་ཐོགས་མེད་དང་། དབྱིག་གཉེན། བྲམ་ཟེ་ཨརྱ་དེ་བ། དམ་པ། ཀུན་དགའ། པ་ཚབ། ཏེ་ནེ་བཅས་མི་རབས་བདུན་གྱི་བར་ཆིག་བརྒྱུད་ཀྱིས་བཀའ་རྒྱས་བཏབ་པ་དང་འདྲ་བ་ཡིན་སྙམ། དེ་ལྟར་ནི་གུ་ཆོས་དྲུག་གི་གདམས་པ་ཚད་ལྡན་མི་རབས་བདུན་དུ་ཆིག་བརྒྱུད་ལས་མ་སྤེལ་བ་འདི་ཉིད་ཡིན་ཚེ། ནི་གུ་མ་དང་ལྭ་བ་པར་མངའ་ཞིང་། ཇོ་བོ་ཨ་ཏི་ཤ་ལ་འདིའི་རྒྱ་དཔེ་ཡོད་ལ། ལོ་ཆེན་རིན་ཆེན་བཟང་པོ་དང་གླན་དར་མ་བློ་གྲོས་ཀྱིས་བསྒྱུར་བའོ།
།དཔལ་ལྡན་ཤངས་པའི་བཀའ་སྲོལ་འདིར་ནི་གུ་ཆོས་དྲུག་ཅེས་སུ་གྲགས་པ་དེ་ཡང་ཡེ་ཤེས་ཀྱི་མཁའ་འགྲོ་ནི་གུ་མས་མཁས་གྲུབ་ཁྱུང་པོ་རྣལ་འབྱོར་ལ་གནང་བའི་ཟབ་དོན་སྙིང་པོར་དྲིལ་བའི་གཞུང་ཆོས་དྲུག་རྡོ་རྗེའི་ཚིག་རྐང་ཉིད་མ་ཕྱིར་བཟུང་བས། དེ་ནི་ཤངས་པའི་གདམས་པ་ཐམས་ཅད་ཀྱི་སྲོག་ཤིང་ལྟ་བུ་ཡིན་ལ། ཤངས་པ་བཀའ་བརྒྱུད་པའི་ཚབ་མཚོན་གྱི་བ་དན་ཞིག་ཀྱང་ཡིན། འོ་ན་སྤྱིར་རྡོ་རྗེའི་ཚིག་རྐང་ལ་བཀའ་རྡོ་རྗེའི་ཚིག་རྐང་དང་། བསྟན་བཅོས་རྡོ་རྗེའི་ཚིག་རྐང་གཉིས་སུ་ཡོད་པ་ལས། གཞུང་དེ་གང་དུ་གཏོགས་ཤེ་ན། གཞུང་འདི་ཉིད་ཀྱི་ལྷིང་གཞིའི་སྐབས་སུ་ཐེག་ཆེན་སྐྱེ་མེད་རང་སྒྲ་འདི་སྐད་ཐོས་ཞེས་པའི་ཚིག་སྦྱར་ཡོད་སྟབས་ནི་གུ་མས་རྒྱལ་བ་རྡོ་རྗེ་འཆང་ལས་དངོས་སུ་གསན་པ་རྟོགས་ཐུབ་པས། བཀའ་ལ་གཏོགས་པ་ཡིན། དེས་ན་ནི་གུ་ཆོས་དྲུག་གི་རྡོ་རྗེའི་ཚིག་རྐང་འདི་ཉིད་དང་། རས་ཆུང་སྙན་བརྒྱུད་ཀྱི་རྡོ་རྗེའི་ཚིག་རྐང་སོགས་ལྟ་བུ་བཀའ་རྡོ་རྗེའི་ཚིག་རྐང་དང་། ཤངས་པའི་ལམ་ཁྱེར་རྣམ་གསུམ་གྱི་རྡོ་རྗེའི་ཚིག་རྐང་དང་། ལམ་འབྲས་རྡོ་རྗེའི་ཚིག་རྐང༌། སྤྲོས་མེད་རྡོ་རྗེའི་ཚིག་རྐང་སོགས་ལྟ་བུ་ནི་བསྟན་བཅོས་རྡོ་རྗེའི་ཚིག་རྐང་ངོ༌།
II.3.2.1
།གཅིག །ནི་གུ་ཆོས་དྲུག་གི་སྔོན་འགྲོ་བཤད་པ།
དེ་ཡང་སྟོན་པས་གསུངས་པའི་ལུང་གི་དམ་ཆོས་གང་ཞིག །ཡུལ་མི་སྤོང་བར་ལམ་དུ་བྱེད་པའི་མྱུར་བདེའི་ཐབས་ཁྱད་པར་དུ་འཕགས་ཤིང་། རྒྱུ་འབྲས་ལྷུན་འགྲུབ་ཏུ་སྤྱོད་པའི་ཚུལ་གཙོ་བོར་སྟོན་པའི་རིགས་སུ་གནས་པ། རྗོད་བྱེད་བརྗོད་བྱ་ཟག་མེད་ཀྱི་བདེ་བའི་རྒྱུ་ལམ་འབྲས་བུ་དང་བཅས་པ་རྣམས་དང་། དེའི་ཕྱོགས་སུ་གཏོགས་པ་རྣམས་ཏེ་དེ་དག་ལ་གསང་སྔགས་ཀྱི་ཚུལ་དང་། རྒྱུད་སྡེ། རྡོ་རྗེ་ཐེག་པ། རིག་པ་འཛིན་པའི་སྡེ་སྣོད། འབྲས་བུའི་ཐེག་པ་ཞེས་ཀྱང་བྱ་ལ། གསང་སྔགས་ཀྱི་སྒྲ་དོན་ཡང་ལེགས་སྦྱར་གྱི་སྐད་དུ་མནྡ་ཞེས་པ་སྟེ། འདུས་པ་ཕྱི་མ་ལས་དབང་པོ་དང་ནི་ཡུལ་རྣམས་ཀྱི། རྐྱེན་གྱིས་གང་དང་གང་བྱུང་ཡིད། །ཡིད་དེ་མན་ཞེས་བྱ་བར་བཤད། ཏྲ་ནི་སྐྱོབ་པར་བྱེད་པའི་དོན་ཞེས་གསུངས་པས། ཡིད་འཁོར་བ་དང་ཉོན་མོངས་པའི་ཚ་གདུང་ལས་སྐྱོབ་པའི་ཕྱིར་གསང་སྔགས་ཞེས་སུ་གསུངས་པའམ། ཡང་ན་སྣོད་མིན་རྣམས་ལ་གསང་ནས་ཚུལ་བཞིན་དུ་སྤྱད་པས་འགྲུབ་པར་འགྱུར་བའི་ཕྱིར་གསང་སྔགས་ཞེས་སུ་བརྗོད་དེ། དུས་འཁོར་ལས་གསང་བས་འགྲུབ་ཕྱིར་གསང་སྔགས་ཏེ། །རྡོ་རྗེ་ཐེག་པ་འབྲས་བུ་ཆེ་ཞེས་གསུངས་ཤིང་། སྐབས་འདིར་གང་ལ་གསང་བའི་ཡུལ་སྣོད་མིན་དེའང་ཕྱི་ནང་གི་རྟོག་གེ་བ་ཚིག་ཙམ་ལ་བལྟ་ཞིང་ཕྱོགས་རེ་ལ་མངོན་པར་ཞེན་པ་དང་ལྟ་སྤྱོད་ཁྱད་པར་ཅན་འདི་བློར་མི་ཤོང་བ་དག་གོ
།དེས་ན་ཁ་རྒྱུན་དུ་གསང་སྔགས་གསང་བས་འགྲུབ། གསང་སྔགས་དད་པས་འགྲུབ་ཅེས་གྲགས་པ་བཞིན། བེ་རོའི་རྣམ་ཐར་འདྲ་འབག་ཆེན་མོར་ཡང་ཐེག་ཆེན་གསང་སྔགས་འབྲས་བུའི་ཆོས་གཅིག་པུ། །ཐུན་མོང་མ་ཡིན་མཆོག་ཏུ་གསང་བའི་ཆོས་ཞེས་པ་ལྟར་གསང་སྔགས་རྡོ་རྗེ་ཐེག་པའི་བསྟན་པ་འདི་ཉིད་ནི་ཆེས་ཟབ་ལ་ཤིན་ཏུ་གསང་བའི་འབྲས་བུའི་ཆོས་ཉག་གཅིག་ཡིན་པས་གསང་སྔགས་ཀྱི་ཟབ་མོའི་གདམས་པ་གང་ཞིག་ཐོས་བསམ་དང་ཉམས་ལེན་བྱེད་པར་དེ་དག་ལེགས་པར་ཉར་ཚགས་བྱེད་ཐུབ་པའི་སྣོད་ལྡན་གྱི་གང་ཟག་ཅིག་དགོས་ལ། གང་ཟག་དེས་ཀྱང་ཐུན་མོང་ལམ་གྱི་རྒྱུད་སྦྱོང་ཅི་དགོས་ངེས་པར་སྔོན་དུ་འགྲོ་དགོས་པ་ལས། དད་པ་དང་སྙིང་རྗེ། དབང་བསྐུར། ཚུལ་ཁྲིམས་སོགས་དང་བྲལ་བའི་མི་ཞིག་གིས་གསང་སྔགས་ཉམས་སུ་མྱོང་ན་བྱིས་པ་ལྕགས་སྲེག་མིད་པ་དང་མཚུངས་པར་གསུངས་པ་ཡང་། འཕགས་པ་རྡོ་རྗེ་ཁྲོ་བོའི་རྟོག་པ་བསྡུས་པའི་རྒྱུད་ལས་དད་པ་དང་ཡང་མི་ལྡན་ཞིང་། །བྱང་ཆུབ་སེམས་ཀྱང་མ་བསྐྱེད་དེ། །དབང་བསྐུར་རྗེས་གནང་མ་ཐོབ་ལ། །སྡོམ་ཚུལ་དམ་ཚིག་བྲལ་བའི་མི། །གསང་སྔགས་རང་ཉིད་ལེན་པ་ནི། །བྱིས་པ་ལྕགས་སྲེག་མིད་པ་འདྲ། །ཐོག་མ་མེད་སྒྲིབ་བཀྲུ་བའི་ཕྱིར། རྡོ་རྗེ་སློབ་དཔོན་འདི་སྐད་བརྗོད་ཅེས་འཁོད་པ་ལྟར་ཡིན་ལ། འདི་དང་ཕྱོགས་འདྲ་བར་རྒྱལ་དབང་ལྔ་པ་ཆེན་པོས་འདི་ན་རྒྱུ་དང་འབྲས་བུའི་ཐེག་པ་ལས། །ཆེས་ཟབ་གསང་བ་སྔགས་ཞེས་རབ་གྲགས་ཀྱང་། །ཐུན་མོང་ལམ་གྱི་རྒྱུད་སྦྱང་མ་སོང་བར། །མ་དུལ་གླང་པོ་བཞོན་ན་བདག་ཉིད་ཕུང་ཞེས་དང་། ཡོ་ཧན་སྦོ་ལོ་ཕེར་དཱ་(John Blofeld)ཡིས་ཅི་འདྲའི་ཉེན་ཁ་ཆེ་བའི་འཚོལ་བསྙེག་ཅིག་བྱ་བར། ལམ་བུ་འདིའི་ཐོག་ཡུན་རིང་བགྲོད་མྱོང་བ་དང་གང་དེའི་གསུང་མཐའ་དག་རྣམ་དཔྱོད་ཀྱི་རྩ་ལ་ལས་ཐོན་པའི་བླ་མ་ཞིག་གི་མཛུབ་ཁྲིད་མེད་ན། དེ་ནི་ཚོར་འདུ་བརླག་པའི་སྨྱོན་པའི་བྱ་སྤྱོད་དུ་འགྱུར་སྲིད་ཅེས་སོགས་གསུངས་པ་བཞིན། ལེགས་པར་མ་དུལ་བའི་གླང་པོ་ཆེ་བཞོན་པ་ལྟར་མཐར་རང་ཉིད་རྡོ་རྗེ་དམྱལ་བའི་འོབས་དོང་དུ་ལྷུང་ནས་ནམ་ཞག་གཏན་དུ་ཕུང་བར་འགྱུར། དེར་བརྟེན་ཐོག་མ་ཉིད་ནས་དངོས་གཞི་སེམས་དོན་ལ་མཐོ་སྙབ་མི་བྱ་བར། སྔོན་འགྲོའི་ཆོས་འདི་རྣམས་སྙིང་ལ་རྡོ་རུས་འཁྲོད་ངེས་བསྒོམ་པ་ཤིན་ཏུ་གལ་ཆེ་ཆོས་དྲུག་གི་གདམས་པ་འདི་ཉིད་ཉམས་ལེན་བྱེད་པར་ཡང་ཐོག་མར་ཁྲིད་རིམ་སྤྱི་དང་མཐུན་པར་དལ་འབྱོར་རྙེད་དཀའ་དང་། འཆི་བ་མི་རྟག །ལས་རྒྱུ་འབྲས། འཁོར་བའི་ཉེས་དམིགས་བཅས་ཀྱི་བློ་ལྡོག་རྣམ་བཞིས་རྒྱུད་འཁུལ་ཏེ་ཁ་ཙམ་ཚིག་ཙམ་མ་ཡིན་པའི་བློ་སྣ་དྲག་པོ་བསྐྱེད་དགོས་ལ་སྐྱེས་བུ་ཆེ་འབྲིང་ཆུང་གསུམ་གྱི་སྒོ་ནས་ལམ་ཐུན་མོང་བས་རྒྱུད་ལེགས་པར་སྦྱངས་ཤིང་བདེ་དགྱེས་གང་རུང་གི་དབང་བཞི་མཚན་ཉིད་ཚང་བ་ལེགས་པར་ཐོབ་པ་དང་། དབང་དུས་སུ་ཁས་བླངས་པའི་དམ་ཚིག་དང་སྡོམ་པ་རྣམས་ལ་གཅེས་སྦྲས་སུ་བྱེད་པ་ནི་ལམ་འདིའི་སྔོན་འགྲོར་མེད་དུ་མི་རུང་དུ་དགོས་ཞེས་འཁོད་པ་ལྟར་ཐོག་མར་ཐུན་མོང་བའི་ལམ་སྦྱངས་ཤིང་དབང་བཞི་ལེགས་པར་ཐོབ་པ་མ་ཟད། དབང་དུས་སུ་ཁས་བླངས་པའི་དམ་ཚིག་དང་སྡོམ་པ་གཡག་རྔ་བཞིན་དུ་སྲུང་དགོས་པ་ཡིན། སྐབས་འདིར་ཡེ་ཤེས་ཀྱི་མཁའ་འགྲོ་ནི་གུ་མའི་ཆོས་དྲུག་རྡོ་རྗེའི་ཚིག་རྐང་གིས་བསྟན་པའི་གོ་རིམ་བཞིན་ཆོས་དྲུག་པོ་དེ་དག་གི་སྔོན་འགྲོ་ཞིང་བར་བྱ་བ་ལ།
རྡོ་རྗེའི་ཚིག་རྐང་འདི་ཉིད་ལས་དབང་བཞིས་སྨིན་བྱས་དད་དང་བརྩོན་འགྲུས་ལྡན། མི་རྟག་སྐྱོ་ཤས་ཉེས་དམིགས་སྔོན་འགྲོ་བས་ཞེས་གསུངས་པ་ལྟར། ཆོས་ཟབ་མོ་འདི་ཉིད་ལ་མ་འཇུག་པའི་སྔོན་དུ་དཔལ་རྒྱུད་སྡེ་ཆེན་པོ་ལྔ་ལ་སོགས་པའི་དཀྱིལ་འཁོར་དུ་དབང་བཞི་བྱིན་རླབས་ཀྱི་ཚུལ་དུ་བསྐུར་བ་གལ་ཆེ་སྟེ། རྡོ་རྗེ་སྒོའི་རྒྱུད་ལས་གཞི་ནི་དབང་ལ་བརྟེན་པ་དང༌། །ལམ་ནི་དབང་གིས་བགྲོད་པ་དང་། འབྲས་བུ་དབང་དུ་གནས་པའོ་ཞེས་གསུངས་པ་ལྟར་གསང་སྔགས་མངོན་སུམ་ལམ་པའི་གཞི་ལམ་འབྲས་གསུམ་ཐམས་ཅད་དབང་ལ་བརྟེན་པ་དང་། དབང་གིས་བགྲོད་པ། དབང་དུ་གནས་པས། དབང་མ་ཐོབ་པ་རྣམས་ལ་དངོས་གྲུབ་མི་འབྱུང་བ་སྟེ། ཕྱག་ཆེན་ཐིག་ལེ་ལས་དབང་མེད་པ་ལ་དངོས་གྲུབ་མེད། །བྱེ་མ་བཙིར་ཡང་མར་མེད་བཞིན་ཞེས་གསུངས་པ་བཞིན་ནོ། །དེར་བརྟེན་ཐོག་མར་དབང་བཞིས་རྒྱུད་སྨིན་པ་སྟེ། ཕྱི་བུམ་པའི་དབང་གིས་ལུས་སྨིན། ནང་གསང་བའི་དབང་གིས་ངག་སྨིན། གསང་བ་ཤེས་རབ་དབང་གིས་ཡིད་སྨིན། ཡང་གསང་ཚིག་དབང་གིས་སེམས་སྨིན་པའི་གང་ཟག་དེ་དག་ལ་དད་པ་དང་། བརྩོན་འགྲུས། མི་རྟག །སྐྱོ་ཤས་ཏེ་ཐུན་མོང་སྔོན་འགྲོའི་ཆོས་བཞི་ཡོངས་སུ་ལྡན་པས། གོས་དྲི་མ་ཅན་ལ་ཚོས་མི་ཆགས་པ་ལྟར་རང་རྒྱུད་མ་དག་ན་དགེ་སྦྱོར་མི་སྐྱེ་ཞིང་ཐར་པ་ཐོབ་དཀའ་བས་ཐུན་མོང་མ་ཡིན་པ་དག་བྱེད་ཨའི་སྟོང་ར་དང་བླ་མའི་རྣལ་འབྱོར་གྱིས་རྒྱུད་སྦྱང་སྟེ། རང་རྒྱུད་ལ་མངའ་བའི་སྡིག་སྒྲིབ་ཉེས་ལྟུང་སོགས་ཀྱི་དྲི་མ་མཐའ་དག་སྦྱོང་བར་འབད་དགོས། ཡང་དག་བྱེད་སྟོང་ར་ཞེས་པ་རྒྱ་གར་མཁའ་འགྲོའི་ཁྱད་འཕགས་ཀྱི་གདམས་པ་བཅོ་ལྔ་ལས་རང་རྒྱུད་དྲི་མ་ཉམས་ཆགས་འདོགས། །འདི་ནི་སྟོང་རའི་མཚན་ཉིད་ཡིན་ཞེས་གསུངས་པ་ལྟར་ཟབ་མོའི་ཆོས་སྐྱེ་བའི་གེགས་སུ་འགྱུར་བའི་རང་རྒྱུད་ཀྱི་ཉོན་མོངས་པའི་དྲི་མ་ཐམས་ཅད་འདག་པར་བྱེད་པ་དེ་ལ་དག་བྱེད་ཨའི་སྟོང་ར་ཞེས་སུ་འབོད། སྤྱིར་ཆོས་དྲུག་གི་སྔོན་འགྲོ་ལ་གདམས་པའི་སྣོད་ཀྱི་ཆ་རྐྱེན་མི་འདྲ་བའི་དབང་གིས་དུས་ཡུན་རིང་ཐུང་སྣ་ཚོགས་འགོར་སྲིད་ཀྱང་། ནི་གུ་ཆོས་དྲུག་གི་ཞལ་ཤེས་དགོས་རྣམས་ཀྱི་ལྷན་ཐབས་སུ་དངོས་གཞི་རྒྱུད་ལ་སྐྱེ་བ་ལ་སྔོན་འགྲོ་ཚད་ལ་ཕེབས་དགོས་པ། སྔོན་འགྲོ་ལ་འཇུར་བ་གལ་ཆེ། ངས་ཞག་བཞི་བཅུ་ཞེ་ལྔ་ལ་འབུངས་ཞེས་གསུངས་པ་ལྟར་མཁས་བཙུན་གཞོན་ནུ་གྲུབ་ཀྱིས་སྔོན་འགྲོ་ལ་ཞག་བཞི་བཅུ་ཞེ་ལྔ་སྤྱད་པ་དེ་ཙམ་ཚད་དུ་བཟུང་ན་སྐྱོན་ཆེར་མེད་སྙམ། དེ་ལྟར་དངོས་གཞི་ལས་སྔོན་འགྲོ་ཟབ་པས་ཐུན་མོང་དང་ཐུན་མོང་མ་ཡིན་པའི་སྔོན་འགྲོའི་ཆོས་མ་ལུས་པ་རང་གི་བླ་མའི་བཀའ་བཞིན་ལེགས་པར་གྲུབ་ཟིན་རྗེས་ཟབ་ལམ་དངོས་ལ་འཇུག་པར་བྱ་བ་སྟེ། རྡོ་རྗེའི་ཚིག་རྐང་འདི་ཉིད་ལས་ལམ་མཆོག་འདི་ལ་གང་གིས་འབད་གྱུར་ན། །ཟླ་དྲུག་ལོའམ་ཚེ་འདིར་སངས་རྒྱས་འགྱུར་ཞེས་འཁོད་པ་བཞིན་ཆོས་དྲུག་གི་ལམ་མཆོག་འདི་རང་རྒྱུད་དུ་ཉམས་ལེན་བྱེད་པའི་དངོས་གཞི་དང་། ཀཿཐོག་རིག་འཛིན་ཚེ་དབང་ནོར་བུས་རྗེས་སུ་སྨོན་ལམ་བཀྲ་ཤིས་བསྔོ་བའོ་ཞེས་གསུངས་པ་ལྟར་རྗེས་སུ་བཀྲ་ཤིས་པའི་སྨོན་ལམ་བརྗོད་ནས་དགེ་རྩ་བསྔོ་བ་དང་རྒྱས་འདེབ་པ་བཅས་སྦྱོར་དངོས་རྗེས་གསུམ་ཚང་བར་ཉམས་སུ་ལེན་ན་དབང་པོ་རབ་ཀྱིས་ཟླ་བ་དྲུག་དང་། འབྲིང་གི་ལོ། ཐ་མས་ཀྱང་ཚེ་འདི་རང་དུ་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་འགྱུར་བས་ས་ཆོད་ཤིན་ཏུ་ཆེ་བར་གསུངས་སོ།
II.3.2.2
།གཉིས། ནི་གུ་ཆོས་དྲུག་དངོས་བཤད་པ།
དེ་ལྟར་རྒྱ་གར་མཁའ་འགྲོའི་ཁྱད་འཕགས་ཀྱི་གདམས་པ་བཅོ་ལྔའི་ནང་ཚན་དུ་གཏོགས་པའི་ནི་གུ་ཆོས་དྲུག་གི་སྤྱིའི་སྔོན་འགྲོ་དང་། བྱེ་བྲག་སོ་སོར་ཡང་སྔོན་འགྲོ་རེ་ཡོད་ངེས་ཀྱང་། འདིར་རེ་རེ་བཞིན་མ་སྤྲོས། དེ་དག་གི་རྣམ་གྲངས་ནི་གཏུམ་མོ་བདེ་དྲོད་རང་འབར། སྒྱུ་ལུས་ཆགས་སྡང་རང་གྲོལ། རྨི་ལམ་ཉིང་འཕྲུལ་རང་དག །འོད་གསལ་གཏི་མུག་རང་སངས། འཕོ་བ་མ་བསྒོམས་སངས་རྒྱས། བར་དོ་རྒྱལ་བ་ལོངས་སྐུ་བཅས་པ་ལས།
༡ གཏུམ་མོ་བདེ་དྲོད་རང་འབར།
གཏུམ་མོ་བདེ་དྲོད་རང་འབར་ཞེས་པ་འདིའི་མཚན་ཉིད་ཀྱང་། རྡོ་རྗེ་སྙིང་འགྲེལ་ལས་སྲེག་བྱེད་ཕྱིར་ན་གཏུམ་མོར་བཤད་ཅེས་པ་དང་། རྒྱ་གར་མཁའ་འགྲོའི་ཁྱད་འཕགས་ཀྱི་གདམས་པ་བཅོ་ལྔ་ལས་བདེ་དྲོད་རང་བཞིན་སྟོང་གསལ་འཆར། །འདི་ནི་ཐབས་ལམ་མཚན་ཉིད་ཡིན་ཞེས་གང་ལ་གནད་དུ་བསྣུན་པའི་ཕུང་ཁམས་མ་དག་པ་རྣམས་སྲེག་ཅིང་ཉོན་མོངས་རྣམ་རྟོག་ཐམས་ཅད་རྩད་ནས་གཅོད་པས་གཏུམ་ཞེས་དང༌། བདེ་སྟོང་ལྷན་ཅིག་སྐྱེས་པའི་ཡེ་ཤེས་མྱུར་དུ་བསྐྱེད་པར་བྱེད་པས་མོ་ཞེས་བྱ་བ་ཡིན་ལ། གཏུམ་མོ་ནི་ཨ་དྷི་སྟེ་ལྟེ་བར་མ་ལས་ཐོབ་པ་དམར་ཆའི་དྭངས་མ་གཏུམ་མོ་ཨ་ཐུང་དང༌། སྤྱི་བོར་ཕ་ལས་ཐོབ་པ་དཀར་ཆའི་དྭངས་མ་བྱང་ཆུབ་ཀྱི་ངོ་བོ་རྫི་ཡིག་སྟེ་བྱང་སེམས་དཀར་དམར་ཞུ་བདེའི་ཐིག་ལེ་གཉིས་འབར་འཛག་གིས་རྡོ་རྗེའི་ལུས་ལ་བདེ་དྲོད་བསྐྱེད་དེ་སྟོང་གསལ་གྱི་ཡེ་ཤེས་ཁྱད་པར་ཅན་སྐྱེ་བར་བྱེད་པའི་རྣལ་འབྱོར་ཞིག་ཡིན་ཏེ། གསེར་ཆོས་ཀྱི་ལམ་རིམ་སྙིང་པོར་དྲིལ་བའི་གསོལ་འདེབས་སྙིང་གི་བདུད་རྩི་ལས་འོག་ལྟེ་བའི་ཨ་ཐུང་འོད་འབར་ལ། །སྲོག་རྩོལ་གྱི་རླུང་གིས་བསྲུབས་པ་ལས། གཟུང་འཛིན་གྱི་བུད་ཤིང་སྲེག་བྱེད་པའི། །ལམ་གཏུམ་མོ་འབྱོང་བར་བྱིན་གྱིས་རློབས་ཞེས་གསུངས་པ་བཞིན་རང་ལུས་ཐབས་ལྡན་དང་གཞན་ལུས་ཤེས་རབ་ཀྱི་རྣལ་འབྱོར་གཉིས་ཀྱི་སྒོ་ནས་ཡས་འབབ་ཟག་བཅས་དང་། མས་བརྟན་ཟག་མེད་དགའ་བཞི་འཕོ་འགྱུར་མེད་པ་བསྐྱེད་ལ་བདེ་སྟོང་ལྷན་སྐྱེས་ཀྱི་ཡེ་ཤེས་བརྟན་པར་བྱ་སྟེ། དེ་ལ་གཏུམ་མོ་མེ་རྒོད་དྲག་པོའི་སྦྱོར་བས་རྩ་རྒོད་རླུང་རྒོད་བཏུལ་ནས་དྲོད་བཙན་ཐབས་སུ་བསྐྱེད་པ་གཏུམ་མོ་རང་གི་སྔོན་འགྲོ་སྔོན་དུ་སོང་ནས། སྦྱོར་བ་བཞི་ལྡན་གྱི་བུམ་པ་ཅན་དང་སྦྲེལ་བ་དཔྱིད་ཐིག་འབར་འཛག་འཇམ་པོའི་རྣལ་འབྱོར་གྱིས་དངོས་གཞི་ཟས་སུ་ཟ་བ། ཡན་ལག་ཏུ་གོས་སུ་གྱོན་པ། གདན་དུ་འདིང་བ། རྟ་རུ་བཞོན་པ་རྣམས་སྤྱོད་ལམ་གང་དང་འཚམ་པར་ཉམས་སུ་ལེན་ཅིང་། རྗེས་སྲིད་པའི་དབང་ཞུ་བ། གེགས་རང་གྲོལ་། ཐོན་ཆོས་བྱིན་རླབས་བླ་མའི་གཏུམ་མོ་རྣམས་ཀྱི་གྲུབ་པའོ།།
༢ སྒྱུ་ལུས་ཆགས་སྡང་རང་གྲོལ།
ཆོས་དྲུག་གི་གཉིས་པ་བོགས་འདོན་སྒྱུ་ལུས་འདི་ཡང་གཏུམ་མོའི་འོག་ཏུ་འཆད་པ་ནི། རྒྱལ་དབང་དགེ་འདུན་རྒྱ་མཚོས་ནང་གི་རྐྱེན་གཏུམ་མོའི་རྣལ་འབྱོར་དང་། ཕྱིའི་རྐྱེན་ཕྱག་རྒྱ་སྲོག་རྩོལ་དུ་སོང་བ་ལ་བརྟེན་ནས་ཁྱབ་བྱེད་ཀྱི་རླུང་ཕྲ་མོ་ཡང་མ་ལུས་པར་མི་ཤིགས་པའི་ཐིག་ལེ་ལ་ཐིམ་པའི་དཔེའི་འོད་གསལ་མཐར་ཐུག་ལས་བདག་བྱིན་བརླབ་ཀྱི་རིམ་པ་སྒྱུ་ལུས་སུ་ལྡང་བ་འབྱུང་བའི་ཕྱིར་རོ་ཞེས་གསུངས། སྒྱུ་ལུས་ཞེས་པ་འདིའི་མཚན་ཉིད་ནི་མཉམ་མེད་སྐུགས་ལུང་པས་ཀུན་རྫོབ་ལས་སྣང་གིས་བསྡུས་པ་ཐམས་ཅད་བདེན་པ་མེད་པར་སྟོན་པར་བྱེད་པའི་ཆོས་ཞེས་པ་ལྟར། སྣང་གྲགས་ཀྱི་ཆོས་ཐམས་ཅད་སྒྱུ་མར་ཤེས་པའི་སྒྱུ་མ་ལྟ་བུའི་ཏིང་ངེ་འཛིན་དེའི་སྟོབས་ཀྱིས་ཆགས་སྡང་ཐམས་ཅད་རང་སར་གྲོལ་བའམ་ཞི་བར་བྱེད་པའི་རྣལ་འབྱོར་ཞིག་ཡིན། དེའི་གདམས་པ་ལ་གསུམ་སྟེ་འདུས་བྱས་མི་རྟག་ནམ་འཆི་ངེས་མེད་པས། ཅིས་ཀྱང་དགོས་མེད་རང་ཉིད་ཡི་དམ་ལྷ། །སྤྱི་བོའི་བླ་མར་མོས་གུས་གསོལ་བཏབ་པས། །རང་ཐིམ་དུས་གསུམ་སྤྲོ་བསྡུ་ལྷུག་པར་བཞག་ཅེས་པ་ལྟར་དབང་པོ་རབ་བླ་མ་དམ་པ་གྲོགས་སུ་བསྟེན་པ། འབྲིང་ཚིག་གཞན་གྱིས་བར་མ་ཆོད་པར་ཁྲིད་པ་སྟེ་ལྷ་དང་བླ་མ་མོས་གུས་དྲན་འདུན་གསུམ། རྟག་ཏུ་མི་བྲལ་རང་གཞན་སྣོད་བཅུད་ཀུན། །སྣང་ཡང་བདེན་པར་མ་གྲུབ་སྒྱུ་མ་དང༌། །རྨི་ལམ་དངོས་ཡིན་འཛིན་མེད་རང་ངོ་བསྐྱང་ཞེས་པ་ལྟར་རོ། །ཐ་མ་མལ་གཅིག་ཏུ་ཏིང་ངེ་འཛིན་སྐྱེད་པའོ། །དང་པོ་རབ་ལ་མོས་གུས་བླ་མ་ལམ་ཁྱེར་དང་ཅིར་སྣང་བདེན་མེད་ལམ་ཁྱེར་གཉིས། དབང་པོ་རབ་ལ་གྲོགས་ཞེས་བརྗོད་དེ། ནི་གུ་ཆོས་དྲུག་གི་ཁྲིད་ཡིག་བདུད་རྩིའི་རྒྱ་མཚོ་ལས་འདུ་བྲལ་མེད་པའི་དོན་གྱིས་ན་གྲོགས། གོང་ནས་གོང་དུ་འཁྲིད་པར་བྱེད་པས་ན་གྲོགས། ཡོན་ཏན་ཐམས་ཅད་སྐྱེད་པའམ། ཚེ་གཅིག་གམ། ལོ་ཟླས་སངས་རྒྱ་བའི་དོན་གྱིས་གྲོགས་སོ་ཞེས་གསུངས། གཉིས་པ་འབྲིང་ལ་རང་ལུས་སྣང་སྟོང་ལྷའི་སྐུ་དང་ཅིར་སྣང་སྒྱུ་མའི་ལམ་ཁྱེར་གཉིས། གསུམ་པ་ཐ་མར་འགྲོ་འདུག་མང་པོ། འཕོ་བསྐྱས་མང་པོ། བློ་སྣ་མང་པོ། ལོང་གཏམ་མང་པོ་བཅས་བསད་པ་བཞི་དང་བྲལ་བས་འགྲོ་དྲུག་སྒྱུ་མར་འཆར་བྱེད་ཀྱི་ཏིང་ངེ་འཛིན་གནད་བརྒྱད་ལྡན་སྒོམ་ཞིང༌། ནད་གདོན་སྒྱུ་མར་ལམ་དུ་འཁྱེར་བས་འཆར་བྱེད་ཡོན་ཏན་ཚོགས་དྲུག་དང་། ཞེན་མེད་སྒྱུ་མ་རང་ཤར་རྣམས་ཤུགས་ལས་འབྱུང་བར་འགྱུར། དེའི་རྗེས་ཤེས་ནི། ཁྲིད་ཡིག་བདུད་རྩིའི་རྒྱ་མཚོ་ལས་སྤྱོད་ལམ་ཐམས་ཅད་དུ་འཆི་བ་ཡིན་སྙམ་པ་དང༌། བླ་མའི་མོས་གུས་དང་། ཁྱད་པར་དུ་འགྲོ་ཆག་ཉལ་འདུག །ཟས་གོས་གཏམ་སྙན་མི་སྙན་ལ་སོགས་པ། ཆགས་སྡང་ཡུལ་དུ་འཕྲད་པའི་ཚེ་ང་གཉིད་དུ་སོང་འདུག །འདི་རྨི་ལམ་གྱི་འགྲོ་འདུག་དང་། རྨི་ལམ་གྱི་ཆགས་སྡང་ལ་སོགས་པར་འདུག་སྙམ་དུ་བསམས་ལ། ངག་ཏུ་ཡང་སྒྱུ་མ་རྨི་ལམ་བརྗོད་ཅེས་པ་ལྟར་རོ།།
༣ རྨི་ལམ་ཉིང་འཕྲུལ་རང་དག
ལམ་གྱི་ཚོད་འཛིན་རྨི་ལམ་འདི་ཡང་སྒྱུ་ལུས་ཀྱི་གདམས་པའི་ཡན་ལག་ཡིན་པའི་ཕྱིར་དེའི་འོག་ཏུ་བཤད་ལ། འདུན་པའི་གནད་ཀྱི་གདམས་པ་རྨི་ལམ་ཉིང་འཕྲུལ་རང་དག་གི་མཚན་ཉིད་ནི་ཉིང་འཁྲུལ་བདེན་མེད་བདེ་བར་ཤར། །འདི་ནི་རྨི་ལམ་མཚན་ཉིད་ཡིན་ཞེས་པ་ལྟར། འཁོར་འདས་སྣང་གྲགས་ཀྱི་འཁྲུལ་སྣང་ཐམས་ཅད་བདེན་མེད་དུ་ཤེས་ཏེ། རྨི་ལམ་གྱི་འཁྲུལ་བ་ཐམས་ཅད་རང་ཡལ་དུ་འགྲོ་བའི་རྣལ་འབྱོར་ཁྱད་པར་ཅན་ཞིག་ཡིན། དེ་ཡང་རང་ཟིན་དབང་བཞི་འཕྱུག་མེད་གནད་དགུ་ཡིས། རྨི་ལམ་བཟུང་སྦྱོང་གཏན་འབེབས་རྣམ་ཐར་འབྱོངས་ཞེས་རྨི་ལམ་རང་ཟིན་བྱེད་པ་ལ། ཐོག་མར་དབང་བཞི་ཚང་བ་དང་། འཕྱུག་མེད་གནད་དགུ་སྟེ། ཐོ་རངས། ནམ་ལངས། ཉི་ཤར་ཏེ་དུས་ཀྱི་གནད་གསུམ་དང་། སྐྱིལ་དྲུང་། ཙོག་པུ། སེང་གེའི་ཉལ་ཐབས་ཏེ་ལུས་ཀྱི་གནད་གསུམ། རྟོག་མེད་ལ་བཟུང་བ་གཉིས་དང་༈ རྟོག་བཅས་ལམ་དུ་འཁྱེར་བ་སྟེ་དམིགས་པའི་གནད་གསུམ་ཡོངས་སུ་སྤྱད་ནས་རྨི་ལམ་གཟུང་བ་དང་། སྦྱང་བ། སྤེལ་བ། སྤྲུལ་བ། བསྒྱུར་བ། ཡུལ་སྣང་བཅས་རྣམ་པ་དྲུག་ལ་རབ་ཏུ་བརྩོན་པ་ཡིན། དེའི་གདམས་ངག་གི་སྔོན་དུ་རང་ཟིན་ཐིག་ལེ་དབང་བཞིའི་གནད་དང་འཕྱུག་མེད་ཀྱི་གནད་དགུ་ལ་བརྟེན་ནས་རྨི་ལམ་དུ་ཤར་ཚད་ངོས་བཟུང་། འཁྲུལ་སད་བདེ་སྟོང་འབྱམས་ཀྱི་གེགས་རྣམས་མོས་གུས་ཚོགས་གསོག་ལ་སོགས་པས་བསལ། རྨི་ལམ་རྨིས་ཚད་ཟིན་ནས་རྨི་ལམ་སྣང་ཚད་བདེན་པར་མ་གྲུབ་པས། །རང་ཉིད་འབྱུང་བཞི་སེམས་ཅན་ཕྲ་དང་རགས། །འཇིག་རྟེན་འཇིག་རྟེན་འདས་པའི་གཉེན་པོ་ནི། གང་འདུལ་སྤྲུལ་ནས་སེམས་ཀྱི་རྩལ་སྦྱང་བྱ་ཞེས་འཁོད་པ་ལྟར་རྨི་ལམ་ཟིན་ཚད་ལུས་ཀྱིས་སེམས་སྦྱོང་བ། སེམས་ཀྱིས་ལུས་སྦྱོང་བ། བདག་མེད་མ་དང་འདུན་པས་སྦྱོང་བ་རྣམས་ཀྱིས་རྨི་ལམ་གྱི་རྩལ་སྦྱོང་ཞིང་འོད་གསལ་དང་བསྲེ། དེ་རྗེས་རྨི་ལམ་བདེན་མེད་གང་བྱས་ཆོག་པས་ན། །མེ་ཉིད་ཆུ་དང་བེམ་པོ་སེམས་ཅན་སོགས། །དངོས་པོ་ཕན་ཚུན་ལྷ་སྐུ་སྣ་ཚོགས་བསྒྱུར། ལྷར་སྣང་མཚན་ཉིད་གསུམ་ལྡན་འཆར་བར་བྱ་ཞེས་པ་ལྟར་འབྱུང་བཞི་དང་སེམས་ཕྲ་རགས། འཇིག་རྟེན་ལས་འདས་པ་རྣམས་ལ་ཐུག་ཕྲད་དང་གང་འདུལ་དུ་སྤེལ་ཞིང་སྤྲུལ་བར་བྱ། དེ་དག་ཐམས་ཅད་སྣང་སྟོང་ཞེན་བྲལ་དུ་བསྒྱུར་བས་བདེ་ལ་ཞེན་པ་མེད་པ། གསལ་ལ་རྟོགས་པ་མེད་པ། སྣང་ལ་རང་བཞིན་མེད་པའི་མཚན་ཉིད་གསུམ་ལྡན་གྱི་ལྷ་སྐུ་རང་ཤར་དུ་སྒྲུབ་པའོ།།
༤ འོད་གསལ་གཏི་མུག་རང་སངས།
སྤྱིར་སྙིང་པོ་འོད་གསལ་གྱི་དབྱེ་བར་དཔེ་དང་དོན་གྱི་འོད་གསལ་གཉིས་དང་། དཔེའི་འོད་གསལ་ལའང་མཆོག་དམན་གྱི་རིམ་པ་ཇི་སྙེད་པ་ཡོད་ཀྱང་། རྩ་བ་ཡལ་ག་ལོ་མ་མེ་ཏོག་གིས། །སྲབ་མཐུག་འོད་གསལ་སྐུ་གསུམ་ལམ་དུ་ཁྱེར་ཞེས་གསུངས་པ་ལྟར་འོད་གསལ་སྐུ་གསུམ་ལམ་ཁྱེར་གྱི་གདམས་པ་འདིའི་མཚན་ཉིད་ནི། རྒྱ་གར་མཁའ་འགྲོའི་ཁྱད་འཕགས་ཀྱི་གདམས་པ་བཅོ་ལྔ་ལས་གསལ་སྟོང་འཛིན་མེད་བདེ་བ་ཆེ། །འདི་ནི་འོད་གསལ་མཚན་ཉིད་ཡིན་ཞེས་པ་ལྟར། གསལ་བ་དང་སྟོང་པ་དབྱེར་མེད་པ། འཛིན་པ་ཐམས་ཅད་དང་བྲལ་བ་ནམ་མཁའ་ལྟ་བུ་མཐའ་དབུས་མེད་པ་ཞིག་ཡིན་པས། སྐྱེར་སྒང་པའི་རྣམ་ཐར་དུ་མཁའ་འགྲོ་མ་སུ་ཁ་སིདྡྷིས་ནམ་མཁའ་རིག་མེད་སྟོང་པ་ལ། །རིག་བཅས་སེམས་ཀྱི་རྩ་བ་གཅུན། །རྩ་བ་གཅུན་ལ་ལྷུག་པར་ཞོག་ཅེས་རིག་པ་དང་བཅས་པའི་སེམས་ཀྱི་རྩ་བ་ལ་བཅོས་མི་བྱ་བར་ལྷུག་པར་ཞོག་གསུངས། འདི་ཉིད་ཉམས་སུ་ལེན་པ་ལ་སྔོན་འགྲོ། རྩ་བ་མི་རྟག་སྐྱོ་ཤས། ཡལ་ག་སྤྱོད་ལམ་དམ་རྫས། ལོ་འདབ་ཐབས་ལམ་རང་མདངས། གསོལ་འདེབས་མེ་ཏོག་འཆར་བྱེད་བཞིས་རྐང་བཟུང་སྟེ། དངོས་གཞི་འཛིན་པའི་ཐབས་གསུམ་གྱིས་སྲབ་མཐུག་གི་འོད་གསལ་བཟུང་། ཉིན་མཚན་སྐུ་གསུམ་རང་ཤར་གྱི་ལམ་དུ་ཁྱེར། གསལ་སྟོང་མཉམ་རྗེས་ཉིན་མཚན་བདེ་སྟོང་དབྱེར་མེད་དུ་བསྲེ་བ་རྣམས་ལ་བསླབས་པས་འོད་གསལ་གྱི་རྟོགས་པ་དང་པོ་གསལ་སྟོང་དབྱེར་མེད། གཉིས་པ་བདེ་སྟོང་དབྱེར་མེད། གསུམ་པ་ཟབ་ཞི་སྤྲོས་བྲལ། བཞི་པ་དབྱེར་མེད་མཐར་ཐུག་འོད་གསལ་རྣམས་རིམ་གྱིས་འཆར་ཏེ། མཐར་དག་པ་གཉིས་ལྡན་གྱི་འོད་གསལ་མངོན་དུ་འགྱུར་བ། མངའ་བདག་མཻ་ཏྲི་པ་ཆེན་པོའི་ལྟ་བ་གཏན་ལ་དབབ་པའི་རྡོ་རྗེའི་མགུར་དུ་ལོ་སྟོང་ལོན་པའི་མུན་པ་མཐུག་པོ་ལ། །སྒྲོན་མེ་ཆུང་ངུ་གཅིག་གིས་སེལ་བ་ལྟར། །འཁོར་བའི་རབ་རིབ་ཆགས་སྡང་མཐུག་པོ་ཡང་། །རང་སེམས་རྟོགས་པའི་སྐད་ཅིག་གཅིག་ལ་ཞི་ཞེས་པ་དང་། འབྲས་བུ་གཏན་ལ་དབབ་པ་རྡོ་རྗེའི་མགུར་ལས་ཀྱང་རེ་དོགས་མེད་པ་སེམས་ཉིད་གཉུག་མ་དེས། །དྲན་པ་མེད་པས་བརྗོད་མེད་ཏིང་འཛིན་ཐོབ། །སྐྱེ་བ་མེད་པས་འགྱུར་མེད་ལྟ་བ་ཐོབ། །འཛིན་པ་མེད་པས་ཕྱོགས་མེད་སྤྱོད་པ་ཐོབ། རྐྱེན་དང་བྲལ་བས་བློ་འདས་འབྲས་བུ་ཐོབ། །བྱས་པ་མེད་པས་དཀའ་བའི་ལས་རྣམས་ཟིན། །བསགས་པ་མེད་པར་ཟད་མེད་གཏེར་རྣམས་བསོགས། །འདུས་པ་མེད་པར་འབྲལ་མེད་གྲོགས་དང་མཇལ། །བུམ་པ་བཟང་དང་དཔག་བསམ་ནོར་བུ་ལྟར། །འབྲས་བུ་རང་བྱུང་འདི་ནི་ངོ་མཚར་ཆེ་ཞེས་པ་ལྟར་རོ།
།འོད་གསལ་དེ་ཡང་དུས་ཀྱི་དབང་ནས་བཤད་དེ། གྲུབ་ཆེན་ཐང་སྟོང་རྒྱལ་པོས་མཁས་བཙུན་བདེ་ལེགས་དཔལ་ལ་བསྩལ་བའི་རང་གྲོལ་ཕྱག་རྒྱ་ཆེན་པོའི་ཞལ་གདམས་སུ་གཉིད་དུས་འོད་གསལ་མ་ཟིན་ན། །སེམས་ངོ་འཕྲོད་ཀྱང་དོན་རེ་ཆུང་། །བར་དོར་འོད་གསལ་མ་ཟིན་ན། །གནད་གཅོད་སྡུག་བསྔལ་ཤ་རེ་གཡའ་ཞེས་གསུངས་པ་བཞིན་གཉིད་ཀྱི་དུས་སུ་འོད་གསལ་ཟིན་མ་ཐུབ་ན་སེམས་ཀྱི་རང་བཞིན་ངོ་འཕྲོད་ཀྱང་དོན་མི་ཆེ་བ་དང་། བར་དོའི་སྐབས་སུ་འོད་གསལ་ཟིན་མ་ཐུབ་ན་སྡུག་བསྔལ་གྱི་མནར་གཅོད་ལས་ད་དུང་ཐར་བར་དཀའ། དེ་ལྟར་གོང་གི་སྒྱུ་ལུས། རྨི་ལམ། འོད་གསལ་འདི་རྣམས་རྗེ་བཙུན་སྒྲོལ་མས་དབོན་སྟོན་ཐུགས་རྗེ་ཆེན་མོར་གསུངས་པར་སྒྱུ་ལུས་བདེན་མེད་གནད་ཡིན་ཨ་འཐས་ཤིག །རྨི་ལམ་འདུན་པའི་གནད་ཡིན་ལམ་དུ་ཁྱེར། །འོད་གསལ་མོས་གུས་གནད་ཡིན་གསོལ་བ་ཐོབ། གཞན་དོན་སྙིང་རྗེའི་གནད་ཡིན་ཕྱོགས་འཛིན་སྤོངས་ཞེས་པ་ལྟར། སྒྱུ་ལུས་ནི་ཆོས་ཐམས་ཅད་བདེན་མེད་དུ་རྟོགས་པའི་གནད་དང་། རྨི་ལམ་ནི་འདུན་པའི་གནད། འོད་གསལ་ནི་མོས་གུས་ཀྱི་གནད། གཞན་ཕན་ནི་སྙིང་རྗེའི་གནད་བཅས་སུ་གསུངས་པ་དེ་ལྟར་དུ་འབད་དོ།།
༥ འཕོ་བ་མ་བསྒོམས་སངས་རྒྱས།
ཆད་མཐུད་འཕོ་བའི་མཚན་ཉིད་ནི། རྒྱ་གར་མཁའ་འགྲོའི་ཁྱད་འཕགས་ཀྱི་གདམས་པ་བཅོ་ལྔ་ལས་འཆི་ཁར་དྲན་པས་མངོན་འཚང་རྒྱ། །འདི་ནི་འཕོ་བའི་མཚན་ཉིད་ཡིན་ཞེས་པ་ལྟར། ད་ལྟའི་རྣམ་སྨིན་གྱི་སྒྱུ་ལུས་འདི་འཆི་ཁའི་མཐའ་ལ་ཐུག་པའི་ཚེ་དྲན་པ་ཙམ་ལ་བརྟེན་ནས་མཁའ་སྤྱོད་ཀྱི་གནས་སུ་བགྲོད་པའི་རྣལ་འབྱོར་ཞིག་སྟེ། རི་གོང་པ་ཆེན་པོས་ཡེ་ཤེས་སྐར་ཁུང་འཕོ་བ་ཡོད། །སྡིག་ཅན་གྱིས་འཆི་ཁ་དྲན་ཙམ་ན། །མཁའ་སྤྱོད་འགྲོ་བས་བློ་རེ་བདེ་ཞེས་གསུངས་པ་ཡིན། ཡེ་ཤེས་ཌཱ་ཀིའི་ཞལ་ལུང་ལས་ལས་ལ་བཟང་ངན་མ་མཆིས་པར། །མཁའ་སྤྱོད་དག་པའི་ཞིང་དུ་སྐྱེལ། །ཞག་བདུན་ཙམ་གྱི་གཏན་དོན་སྒྲུབ། །དམན་ཀྱང་འདི་ཙམ་འབད་ན་མཚར་ཅེས་གསུངས་པ་བཞིན། ཤངས་པའི་འཕོ་བ་ལྷན་ཐབས་ཀྱི་མན་ངག་ཡེ་ཤེས་སྐར་ཁུང་མ་འདི་ཉིད་ནི་སྡིག་པོ་ཆེ་བཙན་ཐབས་སུ་འཚང་རྒྱ་བའི་ལམ་ཞིག་ཡིན། དེའི་གདམས་ངག་ནི། ཆོས་སྐུ་དེ་བཞིན་ཉིད་ཀྱི་འཕོ་བ། ཟུང་འཇུག་ཡི་དམ་གྱི་འཕོ་བ། བྱིན་རླབས་བླ་མའི་འཕོ་བ། འཕྱུག་མེད་མཁའ་སྤྱོད་ཀྱི་ལམ་ནས་གོང་དུ་འཕོ་བ་སྟེ་གཞུང་རྡོ་རྗེའི་ཚིག་རྐང་གིས་བསྟན་པ་བཞི་དང༌། ལྷན་ཐབས་ཀྱི་འཕོ་བ་ཡེ་ཤེས་སྐར་ཁུང་མ་རྣམས་སུ་ཡོད་དོ།། སྤྱིར་འཕོ་བ་དང་གྲོང་འཇུག་གཉིས་ལམ་འདིའི་ཡན་ལག་ཡིན་ལ། འཕོ་བ་བྱེད་པའི་རྟེན་གྱི་གང་ཟག་ནི་ཚེ་འདི་དང་བར་དོར་མཆོག་གྲུབ་པའི་ལམ་གྱི་རྟོགས་པ་རྙེད་པའི་རྣལ་འབྱོར་པ་གཅིག་གིས་བྱེད་ལ། དུས་ནི་ཕྱི་ནང་གི་འཆི་ལྟས་ཀྱིས་ཟིན་ཅིང་འཆི་བསླུ་བྱས་ཀྱང་མ་བཟློག་པའི་ཚེ་བྱེད་པ་ལས། འཕོ་བ་འདི་གང་དགར་བྱར་མི་རུང་སྟེ། རང་གི་ལུས་ཀྱི་ལྷ་བསད་ནས། མཚམས་མེད་རྩ་ལྟུང་བྱུང་ཞིང་ངན་འགྲོར་འགྲོའོ་ཞེས་གསུངས་པ་ལྟར། རང་དགར་འཕོ་བ་བྱས་ན་རང་ལུས་ཀྱི་ཡི་དམ་ལྷ་རྣམས་བསད་ནས་མཚམས་མེད་ལྔའི་རྩ་ལྟུང་འཕོག་པར་འགྱུར། ཤངས་པ་བཀའ་བརྒྱུད་ཀྱི་འཕོ་བ་ཆེས་ཟབ་པ་ནི་འཕྱུག་མེད་མཁའ་སྤྱོད་ཀྱི་འཕོ་བ་ཡིན་པས། ཀརྨ་རང་བྱུང་ཀུན་ཁྱབ་ཀྱིས་ཆོས་སྐུ་བླ་མ་ཡི་དམ་སྐར་ཁུང་མ། །མཁའ་སྤྱོད་ལ་སོགས་འཕོ་བ་འབྱོངས་པར་ཤོག་ཅེས་པའི་སྨོན་ལམ་གསུངས་པ་ཡིན། ཤངས་པ་བཀའ་བརྒྱུད་པའི་རིང་ལུགས་སུ་མར་པ་བཀའ་བརྒྱུད་ལྟར་གྲོང་འཇུག་གི་ཐ་སྙད་ཟུར་དུ་བརྗོད་སྲོལ་མེད།
༦ བར་དོ་རྒྱལ་བ་ལོངས་སྐུ།
བློ་ཆོད་བར་དོ་ལ་སྤྱིར་རྨི་ལམ་བར་དོ། སྒྱུ་ལུས་བར་དོ། གཞི་དུས་སྲིད་པ་ཀྱི་བར་དོ་སྟེ་གསུམ་ལས། དང་པོ་གཉིས་ནི་མིང་བཏགས་ཙམ་དང་གཙོ་ཆེ་བ་གསུམ་པ་འདིར་བཤད་པ་ཡིན་ཏེ། ཆོས་ལོངས་སྤྲུལ་གསུམ་སྤྱི་གནད་འཕྱུག་མེད་ལ་བརྟེན་ནས་དབང་པོའི་རིམ་པ་དང་མཐུན་པར་བར་དོ་གསུམ་ལ་གྲོལ་བར་བྱེད་པ་བར་དོ་རྒྱལ་བ་ལོངས་སྐུའི་མཚན་ཉིད་ནི། རྒྱ་གར་མཁའ་འགྲོའི་ཁྱད་འཕགས་ཀྱི་གདམས་པ་བཅོ་ལྔར་སྣང་སྟོང་ཞེན་བྲལ་བདེ་ཆེན་སྐུ། །འདི་ནི་ལོངས་སྐུའི་མཚན་ཉིད་ཡིན་ཞེས་འཁོད་པ་ལྟར། སྣང་བ་དང་སྟོང་པ་དབྱེར་མེད་ཞེན་བྲལ་བདེ་བ་ཆེན་པོའི་སྐུ་མངོན་དུ་བྱེད་པའི་རྣལ་འབྱོར་ཞིག་ཡིན། དེ་ཉམས་སུ་ལེན་པའི་ཚུལ་ནི། འོད་གསལ་ཆོས་སྐུ་རང་ཤར། རྒྱལ་བ་ལོངས་སྐུ་རང་ཤར། སྤྲུལ་སྐུ་འགག་མེད་རང་ཤར། ཕྱི་མ་གཉིས་ལ་ཅི་རིགས་པར་བསྣན་དགོས་པའི་སྤྱི་གནད་འཕྱུག་མེད་བཅས་ཀྱིས་དབང་པོ་རབ་འབྲིང་ཐ་མའི་རིམ་པ་དང་མཐུན་པར་བར་དོ་དང་པོ་ལ་སོགས་པའི་རིམ་པ་གསུམ་ལ་གྲོལ་ཚུལ་མཆོག་འབྲིང་དམན་གསུམ་དུ་འགྱུར་རོ། དེར་བརྟེན་འཇམ་དབྱངས་མཁྱེན་བརྩེ་དབང་པོས་འཁྲུལ་སྣང་གི་ལུས་གསུམ་རྒྱལ་བའི་སྐུར། གདོད་མ་ནས་བཞུགས་པར་ངོ་ཤེས་པས། །གཉིས་སྣང་གི་འཇིགས་སྐྲག་རང་སར་གྲོལ། །ལམ་བར་དོ་འབྱོངས་པར་བྱིན་གྱིས་རློབས་ཞེས་དང༌། དཔལ་ལྡན་ཀུན་དགའ་གྲོལ་མཆོག་གིས་དུས་ད་ལྟའི་ལས་སྣང་ཇི་སྙེད་པ། །གཤིས་མ་གྲུབ་ཆུ་ནང་ཟླ་བ་བཞིན། །དོན་འདི་ཡང་ངེས་ཤེས་སྐྱེས་པ་ན། ཕྱིས་བར་དོ་རྒྱལ་བ་ལོངས་སྐུ་འགྲུབ་ཅེས་གསུངས་པ་ཡིན། གདམས་པ་འདིའི་ངོ་བོ་ངེས་ཚིག་དབྱེ་བ་ལ་སོགས་པ་ནི་ནཱ་རོ་ཆོས་དྲུག་གི་བར་དོའི་གདམས་ངག་སྨྲོས་པའི་སྐབས་དང་འདྲ།
སྤྱིར་ན་ཤངས་པའི་ཡིག་ཆ་མང་ཆེ་བར་རྩ་བ་ནི་གུ་ཆོས་དྲུག །སྡོང་པོ་ཕྱག་རྒྱ་ཆེན་པོ་ཞེས་ཡོངས་སུ་གྲགས་ཀྱང་། ནི་གུའི་ཉམས་ལེན་གྱི་སྙིང་པོ་རྒྱུན་ཁྱེར་དུ་རྩ་བ་ཕྱག་རྒྱ་ཆེན་པོ། སྡོང་པོ་ནི་གུ་ཆོས་དྲུག་ཅེས་འཁོད་པའང་ཡོད། འདིར་ནི་ཡོངས་གྲགས་ཀྱི་ལུགས་བཞིན་དུ་བཀོད་པ་ཡིན། དེ་ལྟར་སྒྱུ་ལུས་ལམ་གྱི་གཞི་མ། གཏུམ་མོ་ལམ་གྱི་སྲོག་ཤིང་། འཕོ་བ་ལམ་གྱི་བློ་ཆོད། བར་དོ་ལམ་གྱི་བསུ་མ། རྨི་ལམ་ལམ་གྱི་དྲོད་ཚད། འོད་གསལ་ལམ་གྱི་སྙིང་པོ། གྲོང་འཇུག་ལམ་གྱི་མཐུད་མ། ལས་རྒྱ་ལམ་གྱི་བོགས་ཐོན། ཟུང་འཇུག་ལམ་གྱི་མཐར་ཐུག་དེ་རྣམས་རིམ་པར་ཉམས་སུ་ལེན་པས་མཐར་ཟུང་འཇུག་གི་གོ་འཕང་ལ་མངའ་བརྙེས་པར་འགྱུར། དེས་ན་འཇམ་དབྱངས་མཁྱེན་བརྩེ་དབང་པོའི་ཟབ་དོན་བསྡུས་པའི་རྡོ་རྗེའི་ཐོལ་གླུ་ངེས་དོན་ཐེམ་སྐས་སུ་ཨ་དྷི་ཞུ་བདེའི་འབྲོས་འདེད་ཐིག་ལེའི་ལམ། །འཁོར་ལོ་བཞི་རུ་བཅིངས་པ་ཐིག་ལེའི་གནད། །སྣང་སྟོང་ལྷ་སྐུར་ལྟ་བ་སྒྱུ་ལུས་ལམ། ཞེན་མེད་སྤྲུལ་པ་ལྡང་བ་སྒྱུ་ལུས་གནད། །ཉལ་ཁར་འདུན་པས་གཅུན་པ་རྨི་ལམ་ལམ། །ཉལ་སློང་སྐྱེ་མེད་ལ་གཞོལ་རྨི་ལམ་གནད། །སྣོད་བཅུད་དྭངས་མར་བསྡུ་བ་འོད་གསལ་ལམ། །རླུང་སེམས་མཉམ་པར་འཆིང་བ་འོད་གསལ་གནད། ཆོས་ཉིད་རྣམ་གསུམ་དྲན་པ་བར་དོའི་ལམ། །རྟག་ཏུ་འཁྲུལ་བར་བལྟ་བ་བར་དོའི་གནད། །ཚངས་བུག་དྭངས་མ་འཕོ་བ་འཕོ་བའི་ལམ། །རླུང་སེམས་བསྡུ་ཞིང་བཀག་པ་འཕོ་བའི་གནད། །དེ་ལྟར་རྩ་བ་ཡན་ལག་རིམ་པ་ཡིས། །ཟབ་མོ་རྫོགས་པའི་དོན་རྣམས་བསྡུས་པ་སྟེ་ཞེས་ཆོས་དྲུག་གི་བསྡུས་དོན་འདིས་འཐུས་པར་བྱས་སོ།
།མདོར་ན། ལྐུགས་ལུང་པ་སངས་རྒྱས་དཔལ་བཟང་གིས་རྡོ་རྗེ་འཆང་དབང་ཐུགས་ཀྱི་རྒྱ་མཚོ་ཆེར། །ཁྱུང་པོ་རྣལ་འབྱོར་དད་པའི་གྲུར་ཞུགས་ཏེ། །ཡེ་ཤེས་མཁའ་འགྲོའི་དེད་དཔོན་ལ་བརྟེན་ནས། བོད་ཡུལ་དབུས་སེལ་ནོར་བུའི་ཕྲེང་བ་བླངས་ཞེས་གསུངས་པ་ལྟར་ནི་གུ་ཆོས་དྲུག་ནི་མཁས་གྲུབ་ཁྱུང་པོ་རྣལ་འབྱོར་གྱིས་འཕགས་ཡུལ་དུ་རྡོ་རྗེ་འཆང་དངོས་ཀྱིས་རྗེས་སུ་བཟུང་བའི་ཡེ་ཤེས་ཀྱི་མཁའ་འགྲོ་ནི་གུ་མ་ལས་ཞུས་ཤིང་བོད་ཡུལ་དུ་སྤེལ་བར་མཛད་པའི་གདམས་ངག་མཆོག་འགྱུར་ཞིག་ཡིན་ལ། ཤངས་པའི་བརྒྱུད་པ་རིམ་བྱོན་གྱིས་ཆོས་དྲུག་གི་ཁྲིད་ཡིག་དེ་དག་དཔང་དུ་བཞག །དངོས་དོན་ཞིབ་མོར་བསམ། བསྒོམ་དོན་མ་ལུས་རྟོགས་པའི་ལོ་རྒྱུས་ཀྱི་དུས་རིམ་བརྒྱུད་མྱོང་བའི་འཁྲུལ་མེད་ཀྱི་གདམས་པ་ཞིག་ཡིན་ལ། མཁའ་འགྲོ་མ་སུ་ཁ་སིདྡྷིས་རྗེ་བཙུན་བིརཱུ་པར་ཕུལ་བའི་འབྲས་ཆང་བཞིན་ཉིང་ལ་ཉིང་སིངས་བྱས་པ་ཞིག་ཀྱང་ཡིན་སྟབས་ཤངས་པ་བཀའ་བརྒྱུད་ཀྱི་ཆོས་བརྒྱུད་སྤྱིའི་དཔེ་མཚོན་རང་བཞིན་གྱི་གདམས་པ་ཞིག་ཏུ་གྱུར་པས། དེབ་སྔོན་སོགས་སུ་ཤངས་པའི་ཆོས་བརྒྱུད་ཞིང་སྐབས་ནི་གུའི་བརྒྱུད་པ་དང་བཅས་པའི་སྐབས་ཞེས་འཁོད་ཡོད་ལ། ཀཿཐོག་རིན་པོ་ཆེས་ཀྱང་ཚེ་གཅིག་སངས་རྒྱས་བསྒྲུབ་པའི་ཉམས་ལེན་ནུས་ན་ཆོས་འདི་(ནི་གུ་ཆོས་དྲུག་)ཁོ་ནས་ཀྱང་ཆོག་པར་བརྡོག་ངེས་ཀྱི། ཡི་གེ་འདི་(ཆོས་དྲུག་གི་ཁྲིད་ཡིག་ཅིག་)བཀོད་པའི་དུས་མཁའ་འགྲོའི་ལྟས་དང་ཆོ་འཕྲུལ་རྒྱུན་མི་ཆད་པར་བྱུང་བས་གཉན་ལ་བྱིན་བརླབས་ཆེན་པོ་ཡོད་པའི་ངེས་ཤེས་སྐྱེས་སོ་ཞེས་གསུངས། ནི་གུ་ཆོས་དྲུག་གི་སྐོར་ཞིབ་པར་མཉམ་མེད་རྨོག་ལྕོག་པའི་རིན་ཆེན་འོད་ཕྲེང་དང་། མཁས་བཙུན་རྒྱལ་མཚན་འབུམ་གྱི་ཆོས་དྲུག་གི་འགྲེལ་པ་བདུད་རྩིའི་རྒྱ་མཚོ་སོགས་འཇག་བསམ་གྱི་ཁྲིད་ཡིག་ཁུངས་མ་རྣམས་ལས་ཡང་དག་ཏུ་ཤེས་པར་བྱ་དགོས་པ་ལས། དེ་མིན་གྱི་ནི་གུ་ཆོས་དྲུག་གི་ཁྲིད་ཡིག་ཏུ་མིང་བཏགས་ཡོད་ཚད་ལ་མ་ཡིན་ཏེ་དཔེར་ན་རྒྱལ་དབང་དགེ་འདུན་རྒྱ་མཚོའི་ཁྲིད་ཡིག་ལྟ་བུ་ནི་གུ་ཆོས་དྲུག་གི་ཁྲིད་ཡིག་ཡིན་ཟེར་བ། རྗེ་དགེ་འདུན་རྒྱ་མཚོས་ཉེ་བར་སྦྱར་བ་ལྟ་བུ་ནི། ནི་གུ་མས་མ་གསུངས། ཁྱུང་པོ་ལས་མ་ཐོས། བརྒྱུད་པའི་བླ་མ་སུས་ཀྱང་མ་དགོངས་པའི་བཅོས་མ་ནི་གུའི་ཆོས་ཞེས་པའི་མིང་ཙམ་ལ་རྒྱུག་ཅིང་། ཆོས་རྒྱུས་མེད་པའི་བླུན་པོ་འབྲིད་བྱེད་ཙམ་དུ་ཟད་ཅེས་རྗེ་བཙུན་ཏཱ་ར་ནཱ་ཐས་བཀག་པའི་ཕྱིར་རོ།
II.3.2.3
།གསུམ། ནི་གུ་ཆོས་དྲུག་གི་བཀའ་བཅུའི་ཕྱག་ལེན།
ཡེ་ཤེས་ཀྱི་མཁའ་འགྲོ་ནི་གུ་མས་མཁས་གྲུབ་ཁྱུང་པོ་རྣལ་འབྱོར་ལ་དངོས་སུ་བསྩལ་བའི་ཟབ་ལམ་ཆོས་དྲུག་དང་འབྲེལ་བའི་བཀའ་བཅུ་ལ། ནི་གུ་ལུགས་ཀྱི་བདེ་མཆོག་ལྷ་ལྔའི་དབང་བསྐུར་དང་། བདེ་མཆོག་ལྷ་ལྔའི་ཏིང་ངེ་འཛིན་གྱི་དབང་བསྐུར་ཏེ་བྱིན་རླབས་སྒོ་འབྱེད་ཀྱི་བཀའ་གཉིས། སྒྱུ་ལུས་དབང་མོ་ཆེ་སྐུར་བ་དང་། རྒྱུད་སྡེ་ལྔའི་ཏིང་ངེ་འཛིན་གྱི་དབང་བསྐུར་ཏེ་བྱིན་རླབས་ཁོག་ཕུབས་ཀྱི་བཀའ་གཉིས། གཏུམ་མོའི་སྒོས་བཀའ་དང་། སྒྱུ་ལུས་སྒོས་བཀའ། རྨི་ལམ་སྒོས་བཀའ། འོད་གསལ་སྒོས་བཀའ། འཕོ་བའི་སྒོས་བཀའ། བར་དོའི་སྒོས་བཀའ་བྱེད་པ་བཅས་ཏེ་བྱིན་རླབས་གཞུང་ཤིང་གི་བཀའ་དྲུག་བཅས་སོ།
II.3.2.4
།བཞི། ནི་གུ་ཆོས་དྲུག་དང་ནཱ་རོ་ཆོས་དྲུག
ཤངས་པ་བཀའ་བརྒྱུད་དང་དྭགས་པོ་བཀའ་བརྒྱུད་གཉིས་ཀྱི་སྲོལ་འབྱེད་མཁན་མཁས་གྲུབ་ཁྱུང་པོ་རྣལ་འབྱོར་དང་མར་པ་ཆོས་ཀྱི་བློ་གྲོས་གཉིས་ལ་ཆ་མཚོན་ན། སྐུ་འཁྲུངས་པའི་ལོ་དུས་ལ་སྔ་ཕྱིའི་ཁྱད་པར་ཆེན་པོ་མེད་རྐྱེན་རང་རང་གི་ཆོས་བརྒྱུད་སྤེལ་བའི་ལོ་རྒྱུས་ཀྱི་གནས་བབས་དང་ཁོར་ཡུག་གི་རྒྱབ་ལྗོངས་འདྲ་ལ། མཐར་ཐུག་གི་ཆོས་ཀྱང་འཕགས་ཡུལ་དུ་ཐེངས་གསུམ་རེ་ཕེབས་ནས་ཞུས་པ་ཡང་འདྲ། དེས་མ་ཚད་དྭགས་ཤངས་གཉིས་ཀྱི་གདམས་ངག་གཙོ་བོ་སྟེ་ཆོས་དྲུག་ཞུ་སའི་བླ་མ་ཡང་མར་པ་ལོ་ཙཱ་བས་རྒྱ་གར་དུ་ཕེབས་ཐེངས་དང་པོར་རྗེ་ནཱ་རོ་པ་བསྟེན་པས་བཀའ་བབས་བཞིའི་གདམས་པར་གྲགས་པ་ཐབས་ལམ་ནཱ་རོ་ཆོས་དྲུག་དང་། མཁས་གྲུབ་ཁྱུང་པོ་རྣལ་འབྱོར་གྱིས་རྒྱ་གར་དུ་ཕེབས་ཐེངས་གཉིས་པར་རྗེ་ནཱ་རོ་པའི་ལྕམ་ནི་གུ་མ་བསྟེན་པས་ནི་གུ་ཆོས་དྲུག་ཅེས་གདམས་པ་གནང་མཁན་གྱི་བླ་མའི་མཚན་མི་འདྲ་བ་ཙམ་གྱི་ཁྱད་པར་ལས་ཆོས་དུག་གི་གདམས་ངག་སྤྱི་ནི་ཚིག་རིས་ནས་དཔྱད་ན་འདྲ་བ་དང་། ཆོས་དྲུག་གི་རྣམ་གྲངས་འདྲེན་ཚུལ་དང་མཚན་འགོད་ཚུལ་ཡང་འདྲ་བ་སྟེ། ནཱ་རོ་ཆོས་དྲུག་ནི། གཏུམ་མོ། འོད་གསལ། སྒྱུ་ལུས། ཟུང་འཇུག །འཕོ་བ། གྲོང་འཇུག་སྟེ་དྲུག་བཅས་ཡིན་ལ་ངོ་བོ་ངེས་ཚིག་དབྱེ་བ་བཅས་ལ་ཁྱད་པར་ཆེར་མེད་ཀྱང་། དེ་དག་ལ་འདྲ་ཆོས་ཡོད་པ་ཙམ་གྱིས་ཡོངས་སུ་གཅིག་མཚུངས་རེད་ཅེས་ཁ་ཚོན་བཅད་ན་བྲམ་ཟེའི་བུ་ཁ་ཆེ་སྣ་ཉག་ལ་སེང་གེ་དང་འདྲ་བ་ཙམ་རྒྱུ་མཚན་དུ་བྱས་ནས་སེང་གེ་རེད་ཅེས་བརྗོད་པ་ལྟར་མི་འཐད་དེ། ཌཱ་ཀི་མ་ནི་གུའི་ཞལ་ནས་ཆོས་དྲུག་གི་དབང་གདམས་ངག་དང་བཅས་པ་འདི་རྗེ་བཙུན་ལྭ་བ་པ་དང་ང་གཉིས་མ་གཏོགས་པ་རྒྱ་གར་ན་ཡང་ཤེས་པ་མེད་པས་ཞེས་གསུངས་པར་གཞིགས་ན། སྐབས་འདིར་ནི་གུ་ཆོས་དྲུག་གི་དབང་དང་གདམས་ངག་ཡོངས་སུ་རྫོགས་པར་མཁྱེན་མཁན་གྱི་གྲས་སུ་རྗེ་བཙུན་ནཱ་རོ་པའི་མཚན་སྨོས་མེད་པས་སོ། ཡང་དྭགས་པོ་ལྷ་རྗེས་སློབ་མ་རྣམས་ལ་ངས་འཆི་བ་མི་རྟག་པ་དང་། བླ་མའི་མོས་གུས་དང་། ཅིར་སྣང་སྒྱུ་མ་རྨི་ལམ་དུ་ཁྱེར་བ་དང་། གསུམ་པོ་དེ་བསྒོམས་པས། ཆོས་དྲུག་ཀ་རྫོགས་ནས་བྱུང་བ་ཡིན་ཞེས་པ་ལྟར་ན། འཆི་བ་མི་རྟག་པ་དང་། བླ་མའི་མོས་གུས། སྒྱུ་མ་ལམ་ཁྱེར་གསུམ་པོ་དེ་གཙོ་ཆེར་བསྒོམས་པས་ཆོས་དྲུག་གཞན་རྣམས་ཀྱང་ཞར་དུ་རྫོགས་པར་གསུངས་པས། ཡེ་ཤེས་ཀྱི་མཁའ་འགྲོ་ནི་གུ་མའི་སྒྱུ་ལུས་འབྲིང་པོ་དང་། ནཱ་རོ་ཆོས་དྲུག་གི་སྒྱུ་ལུས་གཉིས་ཀ་འདྲ་བ་ཡིན་མོད། འོན་ཀྱང་ནཱ་རོ་ཆོས་དྲུག་འདི་མ་རྒྱུད་ ཐམས་ཅད་ཀྱི་སྙིང་པོ་བསྡུས་པ། དེ་ལས་ཀྱང་ཀྱཻ་རྡོ་རྗེའི་མན་ངག་ཏུ་བཞེད་དེ། རྗེ་མར་པས་མཛད་པའི་དཔལ་རྒྱུད་ཀྱི་རྒྱལ་པོ་ཀྱཻ་རྡོ་རྗེའི་བརྟག་གཉིས་པའི་ཁྲིད་ཡིག་འབུམ་ཆུང་ཉི་མ་དང་ཀྱཻ་རྡོ་རྗེའི་རྩ་རྒྱུད་ཀྱི་འགྲེལ་པ་བཀའ་ཡང་དག་པའི་ཚད་མ་སོགས་སུ་མ་རྒྱུད་བཅུ་གསུམ་(འགར་བཅུ་བཞི་)ལས་སྙིང་པོ་ཀྱཻ་རྡོ་རྗེའི་རྒྱུད་འདི་བརྟག་པ་སུམ་ཅུ་རྩ་གཉིས་སུ་ཕྱེ་ནས་བསྐྱེད་རྫོགས་ཀྱི་རིམ་པ་དང་། རྩ་རླུང་གི་རྣམ་གཞག་སོགས་ཆོས་དྲུག་གི་གཞིར་འགྱུར་བའི་དོན་རྣམས་རྒྱས་པར་སྟོན་ལ། དེ་དག་མ་ཤེས་ན་གང་གི་མི་ཤེས་ཀྱེ་རྡོ་རྗེ། །དེ་ནི་ངལ་བ་དོན་མེད་འགྱུར་ཞེས་ཆོས་དྲུག་སོགས་ཀྱི་ཆོས་གཞན་ཅི་རིགས་འབད་པས་བསྒྲུབས་ཀྱང་དོན་གྱི་འབྲས་བུ་མི་འབྱུང་བར་གསུངས། དེ་ལྟར་རྗེ་མར་པས་སྙིང་པོ་ཀྱེ་རྡོ་རྗེའི་རྒྱུད་རྒྱས་པར་བཀྲལ་བ་སོགས་ལ་དམིགས་ནས་རྗེ་བཙུན་མི་ལས་ཀྱང་ལྷོ་བྲག་ན་མར་པ་ལོ་ཙཱ་ཟེར་བ། རྒྱ་གར་གྱི་ནཱ་རོ་པའི་སློབ་མ། ཀྱི་རྡོར་གྱི་གདམས་ངག་ཆོས་དྲུག་ཅེས་པ་སྟོན་པ་གཅིག་བཞུགས་ཞེས་གསུངས་པ་ཡིན་ལ། ནི་གུ་ཆོས་དྲུག་འདི་ཕ་རྒྱུད་ཐམས་ཅད་ཀྱི་སྙིང་པོ་ཕྱོགས་གཅིག་ཏུ་བསྡུས་པ་ཁྱད་པར་དུ་རིན་ཆེན་རྒྱ་མཚོའི་རྒྱུད་ལ་བརྟེན་པར་བཞེད་པ་དང་། ཆོས་རྗེ་སངས་རྒྱས་སྟོན་པས་ནི་གུའི་ཆོས་དྲུག་པོ་དེ་ལ་གསང་འདུས་ལེའུ་བཅོ་ལྔ་པ་ལས་རྨི་ལམ་གྱི་འོད་གསལ་གྱི་ཆོས་མང་དུ་བྱས་པས་ཟིན་པོ་གསང་འདུས་ཆེ་བར་འདུག་ཅེས་གསང་བ་འདུས་པ་ལས་ཀྱང་སྒྱུ་ལུས་འོད་གསལ་གྱི་སྐོར་མང་དུ་བསྟན་པ་དག་ལའང་ཁུངས་བཅོལ་བར་གསུངས། གཞན་ཡང་སྔོན་འགྲོའི་སྡིག་སྦྱོང་སྐབས་སུ་ནཱ་རོ་ཆོས་དྲུག་ལ་མཎྜལ་ཡི་གེ་བརྒྱ་པ་ལ་སོགས་ཡོད་ལ། ནི་གུའི་སྐབས་ཨའི་སྟོང་ར་གཅིག་པུར་དྲིལ་བས་སྤྲོས་པ་ཆུང་ཞིང་སྡིག་སྒྲིབ་དག་པའི་རྟགས་མྱུར་དུ་འོང་བ་དང་། ཏིང་ངེ་འཛིན་སྐྱེ་སླ་བས་ཆེས་ཟབ་པའི་གནད་ཡིན།
དེར་བརྟེན་བོད་ལྗོངས་ནང་ཆོས་ཞིབ་འཇུག་ཏུ་ནཱ་རོ་པའི་ལྕམ་ཡེ་ཤེས་ཀྱི་མཁའ་འགྲོ་ནི་གུ་མ་རྒྱལ་བ་རྡོ་རྗེ་འཆང་གིས་རྗེས་སུ་བཟུང་ཞིང་ཆོས་བསྟན། དེ་རྗེས་ནཱ་རོ་ཆོས་དྲུག་དང་ཆེ་སར་འདྲ་ལ་ཆུང་སར་ཁྱད་པར་ཆེ་བའི་ནི་གུ་ཆོས་དྲུག་བསྟན་ཞེས་པ་ལྟར་ནི་གུ་ཆོས་དྲུག་དང་ནཱ་རོ་ཆོས་དྲུག་གི་ཁུངས་གཉིས་ཀ་རྒྱལ་བ་རྡོ་རྗེ་འཆང་ཁོ་ན་ལ་གཏུགས་པ་དང་ཐབས་ལམ་གྱི་ཆ་ཡིན་པ་འདྲ་ཡང་། རང་རང་གིས་ཉམས་སུ་ལེན་ཚུལ་མི་འདྲ་བ་ཡིན་པ་དོན་དངོས་དང་མཐུན་སྙམ།

II.3.3 - The trunk: Mahamudra
གསུམ་པ། སྡོང་པོ་ཕྱག་རྒྱ་ཆེན་པོ།
དེ་ཡང་སྒྲུབ་པ་ཉམས་ལེན་གྱི་བཀའ་བབས་འཛིན་པ་བཀའ་བརྒྱུད་པ་སྤྱིའི་ལྟ་བའི་མཐར་ཐུག་ཕྱག་རྒྱ་ཆེན་པོའི་སྒྲ་དོན་འབྱུང་ཁུངས་དང་བཅས་པ་སྔར་བཤད་ཟིན་པས་བསྐྱར་ཟློས་ཀྱི་དགོས་པ་མི་ཆེ་ཡང་། འདིར་ཤངས་པ་བཀའ་བརྒྱུད་ཀྱི་ཐུན་མོང་མ་ཡིན་པའི་ཕྱག་རྒྱ་ཆེན་པོ་གའུ་མའི་རྡོ་རྗེའི་ཚིག་རྐང་དང་བཅས་པ་ཅུང་ཟད་བརྗོད་པ་ལ།
II.3.3.1 The Mahamudra of the Amulet Box
གཅིག །ཕྱག་རྒྱ་ཆེན་པོ་གའུ་མ།
དེ་ཡང་ས་བཅུའི་དབང་ཕྱུག་རྒྱལ་བ་རྡོ་རྗེ་འཆང་གིས་སྐྱེ་མེད་གཉུག་མའི་རང་སྒྲས་འཁོར་འདས་ཕྱག་རྒྱ་ཆེན་པོའི་རང་བཞིན་ངོ་སྤྲོད་ཀྱི་ཕྱིར་དུ་ནཱ་རོ་ཏ་པའི་ལྕམ་མོ་རང་བྱུང་གི་རྣལ་འབྱོར་མ་ཡེ་ཤེས་ཀྱི་མཁའ་འགྲོ་ནི་གུཔཱ་ལ་དངོས་སུ་གདམས་པའི་གསེར་ཆོས་ལྔའི་ནང་ཚན། མཁས་གྲུབ་ཁྱུང་པོས་བལ་པོའི་གའུ་ཙིཏྟ་འདྲ་བ་ཞིག་གི་ནང་དུ། བདེ་ཆེན་ལྷུན་གྲུབ་འདུས་མ་བྱས། །ཞེས་པ་ནས། ཐ་མལ་ཤེས་པ་ཁྱོད་ལ་ཕྱག་འཚལ་ལོ། །ཞེས་པའི་བར་གྱི་རྡོ་རྗེའི་ཚིག་རྐང་ཉེར་བརྒྱད་ཅན་གྱི་ཤོག་དྲིལ་བྱིན་ཅན་ཞིག་མགུལ་དུ་འཆང་ནས་གར་ཕེབས་ཀྱང་རང་ལུས་དང་མི་བྲལ་བར་མཛད་པས། ཞྭ་ལུ་པ་བློ་གསལ་བསྟན་སྐྱོང་གིས་མ་མཁའ་འགྲོའི་གཙོ་མོ་ནི་གུ་མའི། །ཐུགས་བདུད་རྩིའི་ཡང་ཞུན་ཏཱ་ལའི་འདབ། ཚིག་ཡི་གེར་བཏབ་ནས་གའུར་བཅུག །རྗེ་ཁྱུང་པོའི་མགུལ་ལ་མཛེས་སོ་སྐད་ཅེས་གསུངས་པ་ལྟར་མཚན་ཡང་ཕྱག་རྒྱ་ཆེན་མོ་གའུ་མ་ཞེས་མཁས་གྲུབ་ཁྱུང་པོས་ཏཱ་ལའི་ལོ་མའི་སྟེང་བརྗེད་ཐོར་བཀོད་པ་གའུ་ཡི་ནང་དུ་བླུགས་ནས་སྐུ་མ་གཤེགས་བར་སྐུ་ལུས་ཀྱི་དྲོད་དང་མི་བྲལ་བར་འཆང་བས་དེ་ལྟར་དུ་གྲགས།
སྤྱིར་ཤངས་པའི་བརྒྱུད་པ་འདི་ལ་གདམས་པ་དངོས་ཀྱིས་སློབ་མ་ཇི་ལྟར་བཀྲི་བའི་ཚུལ་ལ། ཕྱག་རྒྱ་ཆེན་པོ་བཤད་རྒྱུད་རབ་ཏུ་མི་གནས་པ། རྙོག་པ་མེད་པ། གསང་བ་བླ་ན་མེད་པ་རྣམས་ཀྱི་རྗེས་སུ་འབྲངས་ནས། ལམ་སྒྲུབ་སྐོར་སྙིང་པོའི་སྐོར་ལྟར་དུ་བཀྲི་བའམ། དུས་ཀྱི་འཁོར་ལོའི་རྗེས་སུ་འབྲངས་ནས་བཀྲི་བ་སོགས་མང་མོད། ཕྱག་ཆེན་གའུ་མ་འདི་ཉིད་གཙོ་ཆེར་ཡེ་ཤེས་རྒྱ་མཚོའི་རྒྱུད། རིན་ཆེན་རྒྱ་མཚོའི་རྒྱུད། ཡོན་ཏན་རྒྱ་མཚོའི་རྒྱུད་བཅས་རྒྱ་མཚོ་རྣམ་གསུམ་གྱི་རྒྱུད་ལ་བརྟེན་ནས་བཀྲི་བར་བྱེད། ཚིག་རྐང་དེ་དག་གི་སྒྲ་དོན་ཡང་རྡོ་རྗེའི་ལུང་ལ་བཅོལ་ཏེ་ཅུང་ཟད་བརྗོད་པར་བྱ་བ་ལ།
བདེ་ཆེན་ལྷུན་གྲུབ་འདུས་མ་བྱས། །ལོངས་སྐུ་རྡོ་རྗེ་འཆང་ཆེན་གྱི། །སྐྱེ་མེད་རང་སྒྲ་འདི་སྐད་ཐོས།
།ཞེས་པ་འདིའི་དོན་ནི། ཐོག་མར་གང་ལས་ཐོས་ཤེ་ན། ལྷན་ཅིག་སྐྱེས་པའི་བདེ་བ་ཆེན་པོ་ཐོག་མ་མེད་པ་ནས་ལྷུན་གྱིས་གྲུབ་པ། རྒྱུ་དང་རྐྱེན་ལས་མ་སྐྱེས་པའི་འདུས་མ་བྱས། ཆོས་སྐུའི་ངོ་བོ་ལ་གསུང་རྣམ་པ་ཐམས་ཅད་པ། རྡོ་རྗེའི་སྒྲ་དང་དབྱེར་མེད་པས་ལོངས་སྐུ། རྡོ་རྗེའི་སྐུ་རྣམ་པ་ཐམས་ཅད་པ་སྤྲུལ་སྐུ་སྟེ། སྐུ་གསུམ་གྱི་བདག་ཉིད་ཆེན་པོ་རྡོ་རྗེ་འཆང་ཆེན་གྱི་ཞལ་སྔ་ནས། གང་གིས་ཐོས་ཤེ་ན། ཡེ་ཤེས་ཀྱི་མཁའ་འགྲོ་ནི་གུ་མ་དེ་ཉིད་རྣམ་པར་མི་རྟོག་པའི་ཏིང་ངེ་འཛིན་ལ་མཉམ་པར་བཞག་པའི་རྡོ་རྗེའི་རྣ་བར་ཐོས་སོ། གང་ཐོས་ཤེ་ན། སྐྱེ་མེད་ཀྱི་རང་སྒྲ་ཕྱག་རྒྱ་ཆེན་པོའི་གཞུང་འདི་ཐོས་སོ་ཞེས་པའོ།
།ཐ་མལ་ཤེས་པ་ཨེ་མ་ཧོ།
།ཞེས་པའི་ཐ་མལ་ཤེས་པ་ནི་རྣམ་རྟོག་ཡིན་སྙམ་དུ་འཁྲུལ་བར་མི་བྱ་སྟེ། འདིར་མ་བཅོས་པའི་ཤེས་པར་གོ་ལ། སྐྱེ་མེད་རིན་ཆེན་མཛོད་ཅེས་པ་དང་མཐུན་པར་རྣམ་པར་མི་རྟོག་པའི་ཡེ་ཤེས་ཡིན། འདི་ལྟ་བུའི་དོན་ཟབ་མོ་སྟོན་པར་བྱེད་པ་ནི་ཨེ་མ་ཧོ་ཞེས་ཤིན་ཏུ་ངོ་མཚར་དུ་འགྱུར་བའི་ཐ་ཚིག་གོ
།སྔོན་འགྲོ་རང་བབ་རྣམ་པ་གསུམ།
།ཚིག་རྐང་འདིས་ཕྱག་རྒྱ་ཆེན་མོ་གའུ་མའི་སྔོན་འགྲོའི་ཆོས་བསྟན་ཏེ། ཇི་སྐད་དུ་སྔོན་འགྲོ་རང་བབས་གསུམ་ཞི་ལྷག་བསྐྱེད། །དངོས་གཞི་ངོ་སྤྲོད་སྐྱོན་བཞི་རང་སར་གྲོལ། །རྗེས་ཤེས་གསལ་སྟོང་སྐུ་གསུམ་རང་ཤར་དང༌། །ཕྱག་རྒྱ་ཆེན་པོ་ཆོས་ཀྱི་སྡོང་པོའོ་ཞེས་པ་དང་འདྲ་བར། ཞྭ་ལུ་པ་བློ་གསལ་བསྟན་སྐྱོང་གིས་ལམ་སྔོན་འགྲོ་རང་བབས་རྣམ་གསུམ་དང་། དོན་དངོས་གཞི་སྐྱོན་ཚོགས་བཞི་ལས་གྲོལ། །མཐར་སྐུ་བཞིའི་རང་ཞལ་ལྷུན་གྲུབ་པ། །དེ་ལམ་བཟང་འདི་ཡི་ཁྱད་ཆོས་ཉིད་ཅེས་གསུངས་པ་ལྟར། ཕྱག་རྒྱ་ཆེན་མོ་གའུ་མའམ་རང་བབས་རྣམ་གསུམ་(འདི་ལ་སྒོམ་ཚུལ་བཅོ་བརྒྱད་ཡོད་པ་ཞྭ་ལུ་པས་གསུངས་)འདི་ཉིད་མདོ་རྒྱུད་ཐམས་ཅད་ཀྱི་བརྗོད་བྱ། མན་ངག་ཐམས་ཅད་ཀྱི་ཉིང་ཁུ། མཆོག་གི་དངོས་གྲུབ་མྱུར་དུ་ཐོབ་པའི་ཐབས་མཆོག་ཅིག་ཡིན། དེའི་ཐོག་མར་སྦྱོར་བ་རང་བབས་རྣམ་གསུམ་ནི། ལུས་རང་བབས་རྣམ་སྣང་ཆོས་བདུན། ངག་རླུང་རོ་གསལ་བ་ཙམ་མ་རྟོགས་མ་བཅོས་རང་བབས། སེམས་ཡུལ་ལ་གཏད་པ་དང་ཚུར་ནང་དུ་བལྟས་ནས་སྒྲིམ་པ་ལྟ་བུ་མ་ཡིན་པར་མ་བཅོས་རང་བབས་སུ་བཞག་པའི་ཆོས་ཡིན། དེ་དག་ལས་དང་ཐོག་དབེན་པའི་གནས་སུ་ལུས་གནད་ལེགས་པར་བྱ་བ་སྟེ། བདེ་བའི་བསྟན་ལ་རྐང་པ་སྐྱིལ་ཀྲུང་། ལག་གཉིས་ས་གནོན། སྒལ་ཚིགས་དྲངས་པོར་བསྲང་། དཔུང་པ་རྒོད་གཤོག་བཞིན་གདེང་བ། མཇིང་པ་དྲང་ལ་གུག་པ། ལྕེ་རྐན་ལ་སྦྱར། མིག་སྣ་རྩེར་ཕབ། ལུས་ཡ་ཡོ་དང་དགྱེ་སྒུལ་སོགས་མེད་པར་སེམས་ཅན་ཐམས་ཅད་ཀྱི་དོན་དུ་སངས་རྒྱ་བར་བྱ་སྙམ་པའི་ཐེག་པ་ཆེན་པོའི་སེམས་བསྐྱེད་སྔོན་དུ་སོང་། དེ་རྗེས་རང་ལུས་ཡི་དམ་དང་། སྤྱི་གཙུག་ཏུ་པདྨ་དང་ཉི་མའི་གདན་གྱི་སྟེང་དུ་རང་གི་རྩ་བའི་བླ་མ་འོད་དང་འོད་ཟེར་གྱི་རང་བཞིན་ཅན་དུ་བསྒོམ། དེའི་ཐུགས་ཀ་ནས་འོད་ཟེར་འཕྲོས་པས་བརྒྱུད་པའི་བླ་མ། ཡི་དམ་ལྷ་ཚོགས། སངས་རྒྱས་བྱང་སེམས་ཆོས་འབྲེལ་ཡོད་ཚད་ལ་བསྟིམ། བླ་མ་དེ་དུས་གསུམ་སངས་རྒྱས་ཐམས་ཅད་ཀྱི་ངོ་བོར་བསྒོམས་ནས། བདག་ལ་གནོད་བྱེད་ཀྱི་གཙོ་བྱས་པའི་མ་འགྱུར་སེམས་ཅན་ཐམས་ཅད། ལུས་གུས་པས་ཐལ་མོ་སྦྱར། ངག་གུས་པས་གསོལ་བ་འདེབས། ཡིད་གུས་པས་མོས་གུས་རྒྱུན་ཆད་མེད་པར་བྱེད་བསམས་ནས། བླ་མ་རིན་པོ་ཆེ་བདག་འཛིན་བློས་ཐོངས་པར། དགོས་མེད་རྒྱུད་ལ་སྐྱེ་བར། འོད་གསལ་ཕྱག་རྒྱ་ཆེན་པོ་རྟོགས་པར་མཛད་དུ་གསོལ་ཞེས་སྙིང་ཁོང་རུས་པའི་གཏིང་ནས་གསོལ་བ་དྲག་ཏུ་བཏབ་པའི་རྗེས་ལ་ལས་བཟང་ངན་ཐམས་ཅད་དོར་ཏེ་ལུས་ཀྱི་ཞྭ་བཞི་རྩ་བཞི་གློད་ནས་སོག་མ་ཕོན་ཐག་ཆད་པ་ལྟར་རྩོལ་མེད་ཀྱི་ངང་ལ་བཞག་པ་ནི་ལུས་རང་བབས་དང་། འཇིག་རྟེན་གྱི་ལོང་གཏམ་དང་སྔགས་བཟླས་པ་སོགས་ཀྱང་རེ་ཞིག་དོར་ནས་མཆུ་འབྱེད་བཙུམ་གྱི་རྩོལ་བ་མེད་ཅིང་ངག་གི་རྩོལ་སྒྲུབ་གང་ཡང་མི་བྱ་བ་ནི་ངག་རང་བབས་སོ། མདུན་གྱི་དངོས་པོ་ཕྲ་རགས་གང་རུང་ལ་གཅེར་གྱིས་བལྟས་ནས། སྤུ་རིས་ལ་སོགས་པར་བརྟག་དཔྱད་མེད་པར་སེམས་མ་གཡེངས་པའི་རྟེན་ཙམ་དུ་ཧད་དེ་བཞག །ཡིད་བསྒོམ་འདོད་ཀྱི་རྟོག་པ་དང་བྲལ་ཏེ་འདས་པའི་རྗེས་མི་གཅོད། མ་འོངས་པའི་སྔོན་མི་བསུ། ད་ལྟར་གྱི་བློ་ལ་ལས་མེད་པར་དུས་གསུམ་རྟོག་པའི་སྤྲོ་བསྡུ་མེད་པའི་ངང་དུ་གློད་དེ་མིག་གི་ལྟ་སྟངས་ཀྱིས་བསྒོམ་འདོད་ཀྱི་རྟོག་པ་དང་བྲལ་ཏེ། ཐ་ན་སྔོན་འགྲོ་ཡིན་སྙམ་པའི་རྟོག་པ་ཡང་མ་བསྐྱེད་པར་ཧད་དེ་ཕྱེད་དེ་ལས་པ་ནི་སེམས་རང་བབས་བཅས་སོ། །ལུས་གནད་དང་ལྟ་སྟངས་ནི་ཐབས་ཁྱད་པར་ཅན་ཡིན་ཏེ། དེ་ལ་གནས་ན་རྟེན་རྩ་མི་གཡོ། བརྟེན་པ་རླུང་མི་གཡོ། དེ་ལ་བརྟེན་པའི་ཁམས་དྭངས་མ་མི་གཡོ། དེ་ལ་བརྟེན་པའི་སེམས་མི་གཡོ་བར་ཟིན་པ་ཡིན། དེ་ལྟར་རང་བབས་རྣམ་གསུམ་གྱི་སྟེང་དུ་འཛིན་མེད་བཅོས་མེད་ངང་ལྷོད་ཀྱིས་གློད་པ་སྔོན་འགྲོ་དང་པོའི་ཚད་ཡིན།
དངོས་གཞི་སྐྱོན་བཞི་རང་སར་གྲོལ།
།འདིས་ཕྱག་ཆེན་གའུ་མའི་དངོས་གཞི་སྐྱོན་བཞི་རང་གྲོལ་བསྟན་པ་སྟེ། དེ་ཉིད་ཀྱི་སྦས་དོན་མངོན་པར་རྟོགས་པ་དང་དངོས་དོན་ཞིབ་པ་ཐོས་པའི་གོ་ཡུལ། བསམ་པའི་མྱོང་བ། སྒོམ་པའི་ཉམས་སྣང་སྟེ་ཤེས་རབ་གསུམ་གྱི་ཡུལ་ལས་འདས་པས་བརྗོད་དཀའ་བ་ཡང་། རང་བྱུང་ཞབས་ཀྱིས་གནས་ལུགས་སྤྲོས་བྲལ་ཕྱག་རྒྱ་ཆེན་པོ་ནི། །རྣམ་རྟོག་སྤྲོས་པའི་མཚན་མ་ཀུན་གྱིས་སྟོང༌། གསལ་ལ་འཛིན་མེད་དག་པའི་རང་བཞིན་ཏེ། དེ་བཞིན་གཤེགས་པའི་སྙིང་པོ་ཞེས་ཀྱང་བྱ་ཞེས་གསུངས་པ་ལྟར། སྤྲོས་པའི་མཐའ་ཐམས་ཅད་དང་བྲལ་བའི་ཕྱག་རྒྱ་ཆེན་པོ་འདི་ཉིད་གསལ་སྟོང་འཛིན་མེད་ཀྱི་རང་བཞིན་ཏེ་མྱ་ངན་འདས་ཆུང་གི་མདོ་ལས་བསྟན་པའི་དེ་བཞིན་གཤེགས་པའི་སྙིང་པོ་ཞེས་པ་དང་ཡོངས་སུ་མཚུངས། དེ་ནི་ཁམས་བདེ་གཤེགས་སྙིང་པོ་དང་གསལ་སྟོང་འཛིན་མེད། དབུ་མ་ཆེན་པོ་རྣམས་དང་འདྲ་བ་ཡིན་པས། ཕྱག་ཆེན་གའུ་མའི་རྡོ་རྗེའི་ཚིག་རྐང་ལས་མདོ་རྒྱུད་ཀུན་ཏུ་བསྟན་ཀྱང་རང་བཞིན་གབ། །བླ་མའི་བྱིན་རླབས་ཞལ་ལས་ཤེས་པར་བྱ་ཞེས་གསུངས་པ་ལྟར་ཡིན་མོད། འདིར་སྤྱི་དོན་རགས་བཤད་ཙམ་དུ་ཞིང་བ་ལ་ཐོག་མར་སྔོན་དུ་འགྲོ་བ་ཐབས་ཟབ་མོ་བླ་མའི་མོས་གུས་དང་། བཞག་ཐབས་སྒོ་གསུམ་རང་བབས་རྣམ་གསུམ་གྱིས་སྐྱོན་མེད་པའི་ཞི་གནས་སྒྲུབ་ཅིང་སེམས་འཚོལ་བ་སོགས་ཀྱིས་ལྷག་མཐོང་བསྐྱེད། ཡང་འཇམ་དབྱངས་མཁྱེན་བརྩེ་དབང་པོས་ཐ་མལ་གྱི་ཤེས་པ་སོ་མ་འདི། །སྐྱོན་བཞི་ཡི་དབང་དུ་མ་སོང་བར། རང་ངོ་རྗེན་པ་རུ་མཐོང་བ་ཡི། །གཞི་ཕྱག་ཆེན་རྟོགས་པར་བྱིན་གྱིས་རློབས་ཞེས་གསུངས་པ་ལྟར། སྐྱོན་བཞི་སྟེ་རང་སེམས་གདོད་ནས་ཆོས་སྐུ་དང་འདུ་བྲལ་མེད་ཀྱང་ཉེ་དྲགས་ནས་ངོ་མ་ཤེས། རང་ལ་ཤར་ཡང་ཟབ་དྲགས་ནས་ངོས་མ་ཟིན། དྲན་པས་ཆོག་ཀྱང་སླ་དྲགས་ནས་ཡིད་མ་ཆེས། སྐུ་གསུམ་རང་ལ་ཤར་ཡང་བཟང་དྲགས་ནས་བློར་མ་ཤོང་བའི་སྐྱོན་བཞི་སེལ་བའི་སྒོ་ནས་སེམས་ཉིད་ཀྱིས་བརྡར་ཤ་ཆོད་པར་བཅད་དེ། དངོས་གཞི་གསང་ཚིག་རྡོ་རྗེའི་རྒྱ་ལྡན་གྱི་བྱིན་འབེབས་པས་ཡེ་ཤེས་སྐུ་ཐབས་སུ་ངོ་སྤྲོད་ཅིང་གང་དེར་འཇུག་པ་ཡིན། དེས་ན་མཁའ་འགྲོ་མ་སུ་ཁ་སིདྡྷིས་ཚོགས་དྲུག་ཡུལ་དུ་མ་སྤྱད་པའི། །དྲན་མེད་མྱ་ངན་འདས་པའི་ལམ། །རྣམ་པར་མི་རྟོག་ཆོས་ཀྱི་དབྱིངས། །ཡིད་དང་བྲལ་བས་ཕྱག་རྒྱ་ཆེ། །མ་བསྒོམས་མ་བསྒོམས་བློ་མ་བསྒོམས། བློས་བསྒོམས་རྟོགས་པའི་འཕྲུལ་འཁོར་ཡིན། རྟོགས་པས་འཁོར་བར་བཅིངས་པ་སྟེ། །བློ་དང་བྲལ་བ་སྒོམ་དུ་མེད་ཅེས་གསུངས་པ་ལྟར། རྣམ་ཤེས་ཚོགས་དྲུག་གི་ཡུལ་གང་དུའང་མ་འགྱུར་བའི་མྱང་འདས་དང་ཕྱག་ཆེན་གྱི་གོ་འཕང་མཐར་ཐུག་ཐོབ་པར་བྱེད་པ་ལ། ཡིད་སྒོམ་པའི་འཕྲུལ་འཁོར་དང་བྲལ་ནས་སྣང་བ་ཐམས་ཅད་གསལ་ལ་རྟོགས་པ་མེད་པ། བདེ་ལ་ཞེན་པ་མེད་པའི་ཉམས་འཆར་བར་བྱེད་ཅིང་། ཐ་མལ་ཤེས་པ་གདོད་ནས་གསལ་སྟོང་ཟུང་འཇུག་དང་སྐྱེ་འགག་སྤྲོས་བྲལ་ཡིན་པ་འདི་ཉིད་སྣང་གྲགས་ཀྱི་ཆོས་ཐམས་ཅད་འབྱུང་བའི་གཞི་ཁོ་ནར་ངོས་འཛིན་ཏེ། དེའི་ངོས་ལ་གང་ཤར་གང་སྐྱེས་དེ་མ་བཅོས་པ་དང་མ་འཛིན་པར་ལྷོད་ལེར་བཞག་ན་གང་ཡང་ཡིད་ལ་མི་བྱ་བར་མ་བཅོས་གཉུག་མའི་ངང་ལ་བཞག་པས་རང་སར་གྲོལ་འགྱུར་ཏེ། ཆོས་རྗེ་རྨོག་ལྕོག་པས་ཕྱག་རྒྱ་ཆེན་པོའི་ངོ་བོ་ནི། །མ་བཅོས་རང་བཞིན་ལྷུན་གྱིས་གྲུབ། །སྐྱེ་འགགས་མེད་པའི་ངང་དུ་གནས་ཞེས་གསུངས་པའི་ཕྱིར་རོ།
།མཐར་ཐུག་སྐུ་བཞི་རང་ཤར་རོ།
།འདིས་ཕྱག་རྒྱ་ཆེན་པོ་གའུ་མའི་རྗེས་སྐུ་གསུམ་རང་ཤར་བསྟན་པ་སྟེ། སྣང་ལ་རང་བཞིན་མེད་པ། གསལ་ལ་རྟོགས་པ་མེད་པ། བདེ་ལ་ཞེན་པ་མེད་པའི་ལྷ་སྐུ་ཕྱག་རྒྱ་ཆེན་པོ་དེ་ཉིད། ཡེ་ཤེས་དགོངས་པའི་རྒྱུད་ལས་ལ་ཚོགས་གསལ་བ་སྤྲུལ་པའི་སྐུ། བདེ་བར་ཤར་བ་ལོངས་སྤྱོད་རྫོགས། །དབྱེར་མེད་བདེ་བ་ཆེན་པོའི་སྐུ་ཞེས་གསུངས་པ་ལྟར་སྟོང་པ་ཆོས་སྐུའི་ངོ་བོ། གསལ་བ་སྤྲུལ་སྐུའི་འཕྲིན་ལས། ཟུང་འཇུག་ལོངས་སྐུའི་རྣམ་པ་སྟེ་སྐུ་གསུམ་རང་ཤར་དུ་ཐག་བཅད་ཅིང་ངེས་ཤེས་བསྐྱེད་ནས། མོས་གུས་ཚད་མེད་དང་སྙིང་རྗེ་ཚད་མེད། ཐབས་ཁྱད་པར་ཅན་ཐ་མལ་ཤེས་པ། འོད་གསལ་ལྷ་སྐུ ཟུང་འཇུག་ཤེས་པ་རླུང་དང་བསྲེ་བ་རྣམས་ལ་བརྟེན་ནས་བོགས་འདོན། ཉམས་ཀྱི་རྩིས་མ་བཅིངས་པ་དང་། སྣང་སྟོང་ཕྱོགས་རེར་མ་ཤོར་བར་འབད་ཅིང་ཐུན་མོང་མ་ཡིན་པའི་གེགས་བསལ་བས་རང་ཤར་གྱི་ཚད་གསུམ་གཏན་ལ་ཕེབས། སྐུ་བཞི་རང་གྲོལ་མངོན་དུ་གྱུར་ནས་དབྱེར་མེད་བདེ་བ་ཆེན་པོའི་སྐུ་རང་ཤར་དུ་བྱུང་བ་ཡིན། དེ་ཡང་གྲུབ་ཆེན་ཏེ་ལོ་པས་སེམས་ལ་གཏད་སོ་མེད་ན་ཕྱག་རྒྱ་ཆེན་པོ་ཡིན། །དེ་ལ་གོམས་ཤིང་འདྲིས་ན་བླ་མེད་བྱང་ཆུབ་ཐོབ་ཅེས་ཕྱག་རྒྱ་ཆེན་པོ་དེ་གཅིག་ཆོད་ཀྱི་གདམས་པ་ངོ་མཚར་ཅན་ཞིག་ཡིན་པས། མཁས་གྲུབ་ཁྱུང་པོའི་གསེར་ཆོས་ལྔའི་དཔག་བསམ་ལྗོན་པ་བཟང་པོ་དེའི་སྡོང་པོར་འགྱུར་བ་ཡིན། གང་དེའི་ལྟ་བ་ལ་ཉམས་རྟོགས་འཁྲུངས་པའི་ཡོན་ཏན་ཡང་། ཕྱག་ཆེན་ལྟ་བ་ལ་སྒྲོ་འདོགས་ཆོད་པ་གྲུབ་ཆེན་རྨོག་ལྕོག་པ་རིན་ཆེན་བརྩོན་འགྲུས་ཀྱིས་བློ་བློ་ཕྱག་རྒྱ་ཆེན་པོ་སྒོམས། །ཕྱག་རྒྱ་ཆེན་པོ་བསྒོམས་ཙ་ན། །ནགས་ལ་མེ་ལྕེ་མཆེད་པ་བཞིན། །ཅིར་སྣང་གྲོགས་སུ་འཆར་གྱིན་གདའོ་ཞེས་ཁོང་གིས་རྣམ་རྟོག་གིས་མི་གནོད་པའི་ཕྱག་རྒྱ་ཆེན་པོ་ཞུ་མཁན་དྭགས་པོའི་སློབ་མ་བཅུ་གསུམ་ལ་གསུངས་པ་བཞིན་ནོ།
།སྔོན་འགྲོའི་དམ་ཚིག་གསང་བའི་རྡོ་རྗེའོ།
།སྔོན་འགྲོའི་དམ་ཚིག་ནི། དང་པོར་མྱོང་བ་སྐྱེས་པ་རྣམས་ལ་དྲི་བ་ཞིབ་ཏུ་དྲིས་ཀྱང་། དེ་ལྟར་ཡིན་པའི་ངོ་སྤྲོད་གསལ་བར་མི་འདེབས་པས་ན་གསང་བའི་རྡོ་རྗེའོ། དེ་ཡང་ཆོས་ཀྱི་ཆོད་ཉིད་ལ་རང་ཉིད་ངོས་བཟུང་བྱ། ཐག་ཆོད་ངེས་ཤེས་བསྐྱེད། ཡེངས་མེད་ཆུ་བོ་བརྟེན། ཚད་མེད་གཉིས་ལ་འབད། ཡར་ངོ་བཞིན་དུ་འགྱུར། ལོ་ཟླ་ཙམ་གྱིས་མཐར་ཕྱིན། དམ་ཚིག་ལ་ཡིད་གཉིས་སྤངས་པར་བྱའོ།
།བོགས་འདོན་སྙིང་རྗེ་གསོལ་འདེབས་སོ།
།བོགས་འདོན་པ་ལ་གསུམ་ལས། དང་པོ་ཐག་བཅོད་ངེས་ཤེས་བསྐྱེད་པ་སྟེ། དུས་གསུམ་སངས་རྒྱས་བྱོན་ཀྱང་དེ་ལས་ལྷག་པ་བསྟན་དུ་མེད་པ་ངེས་ཤེས་བསྐྱེད་ཅིང་གསལ་སྟོང་འཛིན་མེད་ཀྱི་ངང་ལ་ཧད་དེ་བཞག །མི་གསེབ་དང་འགྲོ་འདུག་གི་དུས་སུ་ཡང་མོས་གུས་ཆད་མེད་བྱས་ལ་ཧད་དེ་བཞག །གཉིས་པ་སྙིང་རྗེས་བོགས་འདོན་པ་ལ། སེམས་ཅན་ལ་དམིགས་པ་མེད་པའི་སྙིང་རྗེ་སྟེ་མ་ནམ་མཁའ་དང་མཉམ་པའི་སེམས་ཅན་འདི་རྣམས་འཁོར་བ་ཐོག་མ་མེད་པ་ནས་ད་ལྟ་ལ་ཐུག་གི་བར་དུ། བདག་གི་མ་ཡང་ཡང་བྱས་པའི་དྲིན་ཆེན་ཡིན། མ་འདི་རྣམས་འབྲས་བུ་བདེ་བ་འདོད་ཀྱང་རྒྱུ་དགེ་བ་སྒྲུབ་མི་ཤེས་པས་སྙིང་རེ་རྗེ་སྙམ་དུ་ཡུན་རིང་དུ་བསྒོམ། ཡང་སྡུག་བསྔལ་མི་འདོད་ཀྱང་རྒྱུ་སྡིག་པ་སྤོང་མི་ཤེས་པས་ངན་སོང་གི་སྡུག་བསྔལ་དྲག་པོ་མྱོང་དགོས་པ་སྙིང་རེ་རྗེ་སྙམ་དུ་ཡུན་རིང་བསྒོམས་པས། མིག་ནས་མཆི་མ་འབྱུང་། ལུས་ཀྱི་བ་སྤུ་ལྡང་། ངག་ནས་སྨྲེ་སྔགས་ཀྱི་ང་རོ་སྒྲོག་པ་སོགས་སྙིང་རྗེ་ཚད་ལྡན་སྐྱེས་པ་དང་། མ་འདི་རྣམས་ལ་གནོད་བྱེད་དུ་འགྱུར་བའི་སྡུག་བསྔལ་རྒྱུ་འབྲས་ཐམས་ཅད་བདག་ལ་འདུས་ནས་མ་འདི་རྣམས་ཀུན་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །ཡང་མ་འདི་རྣམས་ལ་དགེ་བ་རྒྱུ་འབྲས་ཀྱིས་ཕན་པས། བདག་གི་དགེ་བ་ཐམས་ཅད་མ་རྣམས་ཀྱི་རྒྱུད་ལ་འཐིམ་ནས་གནས་སྐབས་བདེ་ཞིང༌། མཐར་ཐུག་བླ་ན་མེད་པའི་བྱང་ཆུབ་ཐོབ་པར་གྱུར་ཅིག་ཅེས་བརྗོད་ཅིང་མོས་པར་བྱའོ། གཉིས་པ་ཆོས་ལ་དམིགས་པའི་སྙིང་རྗེ་ནི། འཁོར་འདས་ཐམས་ཅད་སྟོང་ཞིང་བདག་མེད་པ་དང༌། ཆོས་ཉིད་རང་བཞིན་གྱིས་འོད་གསལ་ལ་རྣམ་པར་དག་པ་ཡིན་ཀྱང༌། དེ་ལྟར་མ་རྟོགས་པའི་དབང་གིས་སེམས་ཅན་འདི་རྣམས་སྙིང་རེ་རྗེ་སྙམ་དུ་བསྒོམ། གསུམ་པ་དམིགས་པ་མེད་པའི་སྙིང་རྗེ་ནི། དེ་ཀའི་མོད་ལ་རང་བབས་རྣམ་གསུམ་དུ་བཞག་པས་མི་རྟོག་པའི་བོགས་ཆེན་པོ་འབྱུང་། གསུམ་པ་གསོལ་འདེབས་ཀྱི་བོགས་འདོན་པ་ནི། དེ་ལྟར་སྟོང་ཉིད་སྙིང་རྗེ་རྒྱུད་ལ་སྐྱེས་པ་བླ་མའི་བཀའ་དྲིན་ཁོ་ནར་ཤེས་ནས། མོས་གུས་དྲག་པོ་རང་ཤུགས་ཀྱིས་འབྱུང་བ་ཡིན། སྐབས་འདིར་གཙོ་ཆེར་གཉིས་པ་དང་གསུམ་པ་གཉིས་ལ་གོ
།ལམ་ཁྱེར་ཅིར་སྣང་དེ་ཉིད་དོ། །མངོན་གྱུར་བསྒོམ་མེད་ཡེངས་མེད་དོ།
།ཞེས་པ་ནི། རྗེས་ཐོབ་ཀྱི་གནས་སྐབས་སུ་སྒོ་ལྔའི་ཡུལ་ལ་ཅི་ཤར་གྱི་སྟེང་དུ་སྔར་བཞིན་འཛིན་མེད་དུ་བཞག་པས། དེ་ཉིད་གསལ་སྟོང་འཛིན་མེད་དུ་འཆར་ཏེ། མངོན་དུ་འགྱུར་བའི་ཚད་བསྒོམ་མེད་ཡེངས་མེད་ཀྱི་ངང་ལ་གནས་པའོ།
།བསྲེ་བ་རྟོག་མེད་ལམ་ཁྱེར་རོ།
།ཞེས་པ་ནི། ལུས་སེམས་ཀྱི་སྟེང་དུ་ནད་དང་སྡུག་བསྔལ་ལ་སོགས་ཚོར་བ་སྡུག་བསྔལ་དང་། འདོད་དོན་མང་པོས་གཡེང་བ་ལ་སོགས་པ། ཚོར་བ་བདེ་བ་ལམ་དུ་བསྒྱུར་དཀའ་བའི་དུས་སུ། དེ་རྣམས་ཐམས་ཅད་འཁྲུལ་བའི་རྣམ་རྟོག་ཡིན་པ་ངོ་ཤེས་པར་བྱ་ལ། གནས་ལུགས་བདེན་མེད་དུ་ཐག་བཅད་དེ། ནད་དང་སྡུག་བསྔལ་གང་ཡིན་གྱི་སྟེང་དུ་རྟོག་མེད་དུ་བཞག་པས། གསལ་ཞིང་སྟོང་པའི་ཏིང་ངེ་འཛིན་རྒྱུད་ལ་ཉམས་སུ་མྱོང་བས་ལམ་དུ་ཁྱེར་བའོ།
།འོད་གསལ་ལྟ་སྟངས་བོགས་འདོན་ནོ། །སད་རྗེས་གསལ་ལ་རྟོག་མེད་བསྲེ།
།ཞེས་གཉིད་འོད་གསལ་དང་བསྲེ་བས་བོགས་འདོན་པ་ནི། གཉིད་ལོག་དུས་མིག་སྤགས་པའི་འོག་ན་ལྟ་སྟངས་ལ་རྩེ་གཅིག་ཏུ་བཞག་པས། གཉིད་དུ་སོང་བ་ཡིན་བྱས་པས། གསལ་ཞིང་དྭངས་ལ་རྟོག་པ་ཐམས་ཅད་དང་བྲལ་བ། མ་སོང་བ་ཡིན་བྱས་པས་སད་རྒྱུ་ཡོད་ཅིང་། སད་པ་དང་ནག་ཐིབས་ཀྱིས་འགྲོ་བ་འབྱུང་སྟེ། དེ་ལ་སད་མ་ཐག་ཏུ་མིག་ལྟ་སྟངས་དང་ལྡན་པས། སྔར་གཉིད་དུས་སུ་ཉམས་སུ་མྱོང་བ་ལྟར་གསལ་ལ་རྟོག་པ་མེད་པར་བསྲེས་པས། ཉིན་མཚན་གཉིས་ཀྱི་འོད་གསལ་གཅིག་གིས་བོགས་ཐོན་པར་འགྱུར་རོ།
།ཉིན་མཚན་བར་དོའི་འོད་གསལ་ནི། །སྐུ་གསུམ་དབྱེར་མེད་རང་ཤར་ལྟོས།
།ཞེས་བར་དོའི་འོད་གསལ་ངོས་བཟུང་བ་ནི། ཉིན་པར་གྱི་འོད་གསལ་དང་གཉིད་ཀྱི་འོད་གསལ་ཟིན་ཅིང་བརྟན་པར་བྱས་ནས། ནམ་འཆི་བ་འབྱུང་བའི་ཚེ། འབྱུང་བའི་ཐིམ་འགྲོས། ས་འོད་གསལ་དུ་འཐིམ་པས་དུ་བ། ཆུ་འོད་གསལ་དུ་ཐིམ་པ་སྨིག་རྒྱུ། མེ་འོད་གསལ་དུ་ཐིམ་པ་སྲིན་བུ་མེ་ཁྱེར། རླུང་འོད་གསལ་དུ་ཐིམ་པ་མར་མེ། ནམ་མཁའ་འོད་གསལ་དུ་ཐིམ་པ་སྤྲིན་མེད་པའི་ནམ་མཁའ་དྭངས་པ་བཅས་འབྱུང་སྟེ། དེ་རྣམས་རང་སེམས་འོད་གསལ་ཆོས་སྐུར་ངོ་ཤེས་པ་ལ་སེམས་བཟུང་བས། མཐར་རྣམ་པ་ཐམས་ཅད་པའི་འོད་གསལ་རྒྱ་ཆེན་ཕྱོགས་ལྷུང་མེད་པར་ཤར་བས། རང་དོན་དུ་ཆོས་སྐུ་སྐྱེ་བ་མེད་པ་ཐོབ། གཞན་དོན་དུ་གཟུགས་སྐུ་གཉིས་འགག་མེད་དུ་འབྱུང་སྟེ། སྐུ་གསུམ་དབྱེར་མེད་རང་ཤར་དུ་སོང་ནས། འབད་རྩོལ་མེད་བཞིན་འཁོར་སྲིད་དུ་གཞན་དོན་རྒྱ་ཆེན་པོ་འབྱུང་བར་ལྟོས་ཤིག
གང་གིས་མི་ཤེས་རྒྱུད་དུ་སྦས་པའི་དོན། །མཐར་ཐུག་ཚིག་གཅིག་གྲོལ་བ་འདི་ཡིན་ཏེ། །བསྒོམ་མེད་ཡེངས་མེད་གོམས་ཤིང་བརྟན་པ་ལས། །ས་ལམ་རིམ་པ་དུས་དེར་བགྲོད་བྱེད་པའི། །ཡིད་ལ་མི་བྱེད་སྒྲིབ་གཉིས་རང་སར་དག །སྐུ་གསུམ་རང་ཤར་འབྲས་བུ་ལྷུན་གྱིས་གྲུབ།
།ཅེས་པའི་དོན་ནི། སྐྱེས་བུ་གང་གི་སྒྲ་ཚད་ལ་སོགས་པས་བརྟག་ཀྱང་མི་ཤེས་པས། བསྡུས་རྒྱུད་ཀུན་ཏུའང་སྦས་པའི་དོན་མཐར་ཐུག་པ། ཚིག་གཅིག་གིས་གྲོལ་བའི་མན་ངག་ནི། ཉམས་སུ་ལེན་དུས་བསྒོམ་རྒྱུ་རྡུལ་ཙམ་ཡང་མེད། ཡེངས་སུ་སྐད་ཅིག་ཀྱང་མེད་པ་ལ། རྩེ་གཅིག་ཏུ་གོམས་ཤིང་བརྟན་པ་ལས་ས་བཅུ་དང་ལམ་ལྔའི་རིམ་པ་རྣམས་བགྲོད་པར་བྱེད་དེ། རྣམ་རྟོག་གི་མཚན་མ་གང་ཡང་ཡིད་ལ་མི་བྱེད་པའི་ལམ་གྱིས། ཉོན་མོངས་དང་ཤེས་བྱའི་དྲི་མ་གཉིས་རང་སར་དག་ནས་གོང་དུ་བསྟན་པའི་སྐུ་གསུམ་རང་ཤར་འབྱུང་སྟེ། འབྲས་བུ་ལྷུན་གྱིས་གྲུབ་པ་ཐོབ་པའོ།
།མདོ་རྒྱུད་ཀུན་ཏུ་བསྟན་ཀྱང་རང་བཞིན་གབ། །བླ་མའི་བྱིན་རླབས་ཞལ་ལས་ཤེས་པར་བྱ།
།ཞེས་པ་ནི། དེ་ལྟར་གྱི་དོན་མཐར་ཐུག་དེ་མདོ་རྒྱུད་ཀུན་ཏུ་བསྟན་ཀྱང་རང་བཞིན་ཟབ་མོ་བརྡ་སྣ་ཚོགས་ཀྱིས་བསྒྲིབས་པས་གབ་པ་སྟེ། རྩ་རྒྱུད་ཟབ་མོ་དད་པ་བཅུ་པའི་འགྲེལ་པའི་མན་ངག་དང་ལྡན་པའི་བླ་མ་དམ་པའི་བྱིན་རླབས་དང་ཞལ་ལས་རྟོགས་པར་བྱའོ།
།ཆོས་སྐུའི་ནམ་མཁར་རྟོག་པའི་སྤྲིན་ཚོགས་ལས། །དུག་ལྔའི་གློག་འགྱུ་ཡེ་ཤེས་ཆེན་པོར་ལྟོས།
།ཞེས་པའི་ཚིག་རྐང་འདི་གཉིས་ཀྱིས་གཞི་ལམ་འབྲས་གསུམ་ངོས་བཟུང་ནས་དུག་ལྔ་མངོན་འགྱུར་དྲག་པོ་སྤོང་བའི་ཐབས་བསྟན་ཏེ། ཆོས་སྐུའི་ནམ་མཁའ་ཞེས་བརྗོད་པས་རང་བཞིན་གྱིས་གནས་པའི་རིགས་སེམས་ཀྱི་འོད་གསལ་ནི་ཆོས་ཀྱི་སྐུ་གཞིའི་གནས་ལུགས་སུ་གསུངས་པ་དང་། རྟོག་པའི་སྤྲིན་ཚོགས་ཞེས་པས་དེ་ལ་སྒྲིབ་པའི་དྲི་མ་རྣམ་པར་རྟོག་པའི་ཚོགས་བསྟན། དུག་ལྔའི་གློག་འགྱུ་ཞེས་པས་གང་ཤིན་ཏུ་མི་བཟད་པའི་དུག་ལྔ་མངོན་གྱུར་བར་བརྟེན། ཡེ་ཤེས་ཆེན་པོར་ལྟོས་ཞེས་པས་ལམ་དང་འབྲས་བུའི་ཡེ་ཤེས་གཉིས་བསྟན་པ་ལས། ལམ་གྱི་ཡེ་ཤེས་ནི་ལམ་གཞི་གནས་དང་ལྷག་མཐོང་ཟུང་འབྲེལ། སྤང་བྱ་སྤོང་བའི་ནུས་པ་དང་ལྡན་པ་དེ་ཡིན། འབྲས་བུའི་ཡེ་ཤེས་ནི་ལམ་དེས་གློ་བུར་གྱི་དྲི་མ་མཐའ་དག་གསལ་བའི་གཞིའི་རང་བཞིན་དུ་འགྱུར་བའི་ཡེ་ཤེས་ཆེན་པོར་ལྟོས་ཤིག་ཅེས་པའོ།
།ཡིད་ལ་མི་བྱེད་རེ་དོགས་ཀུན་བྲལ་བའི། །ཐ་མལ་ཤེས་པ་ཁྱོད་ལ་ཕྱག་འཚལ་ལོ།
།ཞེས་གསུངས་པས་དེ་ལྟ་བུའི་རེ་དོགས་ཐམས་ཅད་དང་བྲལ་བའི་རྣམ་པར་མི་རྟོག་པའི་ཤེས་པ་དེ་ལ་ཕྱག་འཚལ་བ་ཡིན།
དེ་ལྟར་གོང་དུ་བཀོད་པའི་རང་ཤར་ཕྱག་རྒྱ་ཆེན་མོའི་རྡོ་རྗེའི་ཚིག་རྐང་དེ་ཉིད་མཁས་གྲུབ་ཁྱུང་པོས་མཁའ་འགྲོ་ནི་གུ་མར་གསེར་སྲང་ལྔ་ཕུལ་ནས་ཞུས་པ། གླན་དར་མ་བློ་གྲོས་ཀྱིས་བསྒྱུར་ཏེ། བོད་ཡུལ་དུ་གདན་དྲངས་ནས་སྐལ་པ་དང་ལྡན་པའི་སློབ་མ་རྨོག་ལྕོག་པ་རིན་ཆེན་བརྩོན་འགྲུས་ལ་ཆིག་བརྒྱུད་དུ་གདམས་པ་ཞིག་ཡིན། ཤངས་པ་བཀའ་བརྒྱུད་པའི་ཕྱག་ཆེན་གའུ་མ་འདི་ཉིད་ནི་རྩ་བ་རྡོ་རྗེའི་ཚིག་རྐང་ལ་བརྟེན་པས། ནི་གུ་མ་གཙོ་ཆེ་ཡང་། ཕྱག་རྒྱ་ཆེན་པོའི་སྙིང་པོའི་དོན་ནི་མཁས་གྲུབ་ཁྱུང་པོར་བླ་མ་གསུམ་གྱིས་ངོ་སྤྲད་པ་ཡིན་ཏེ། མཻ་ཏྲི་པས་ཕྱག་རྒྱ་ཆེན་པོ་རབ་ཏུ་མི་གནས་པ་སོགས་སྟོན་པ་དང་། མི་ཁྲི་པ་སྐུ་གཤེགས་རྗེས་ཇོ་མོ་གང་གྷ་དྷ་ར་ལ། པཎྜི་ཏ་སུམ་ཅུ་རྩ་གཉིས་ཀྱིས་ཁྲིད་བསྐྱངས་པས། ཁྱེད་རང་རྣམས་ཀྱི་དང་པོའི་སེམས་འཚོལ་ཤོག་ཅེས་གསུངས་ནས་སེམས་འཚོལ་བཏབ། མཁས་གྲུབ་ཁྱུང་པོ་རྒྱ་གར་དུ་ལན་གསུམ་བྱོན་པའི་རྟིང་མ་ལ། སྔར་གྱི་གསལ་འདེབ་ཞུས་པས་ཇོ་མོ་གང་གྷ་དྷ་རས་ཚུལ་འདི་གསུངས་ཀྱང་ནི་གུ་མའི་ཕྱག་རྒྱ་ཆེན་པོ་དང་མི་འགལ། བླ་མ་གསུམ་པོ་དེ་དག་ཀྱང་རང་རང་གི་ཆོས་སྟོན་པའི་ཁྱད་ཆོས་མི་འདྲ་བ་སྟེ། མཁའ་འགྲོ་ནི་གུ་མས་སྔོན་འགྲོ་རང་བབས་རྣམ་གསུམ་གཙོ་བོར་འདོན། སུ་ཁ་སིདྡྷིས་རྗེས་སྐུ་གསུམ་རང་ཤར་གཙོ་བོར་འདོན། མཻ་ཏྲི་པ་དངོས་གཞི་སྐྱོན་བཞི་རང་གྲོལ་གཙོ་བོར་འདོན་པ་བཅས་ཡིན་ཀྱང་དོན་ལ་འགལ་བ་མེད་དོ།
།མཁས་གྲུབ་ཁྱུང་པོ་རྣལ་འབྱོར་གྱིས་འཕགས་ཡུལ་གྱི་བླ་མ་རྣམས་ལས་སྔ་ཕྱིར་གསན་པའི་ལྟ་བའི་ཡང་རྩེ་གྲོལ་ལམ་ཕྱག་རྒྱ་ཆེན་པོའི་ཆོས་སྐོར་ནི། འཕགས་ཡུལ་དུ་མ་ཕེབས་གོང་ཐོག་མར་ཤོ་མ་རར་སྐོར་ནི་རུ་པ་ལས། ཕྱག་རྒྱ་ཆེན་པོའི་རྩ་རྒྱུད་རབ་ཏུ་མི་གནས་པ། བཤད་བརྒྱུད་བསམ་མི་ཁྱབ། གསང་བ་གཉིས་སུ་མེད་པ། རྙོག་པ་མེད་པ། མཚན་བརྗོད་དང་དོ་ཧ་རྣམས་ཞུས་པ་དང་། འཕགས་ཡུལ་དུ་ཕེབས་ཐེངས་གཉིས་པར། རྒྱ་གར་གྱི་ཤར་ཕྱོགས་ལྗོན་ཤིང་ཀུ་ཤའི་ཚལ་དུ། དཔལ་དྷརྨ་ཕ་ལ་ལས་ཕྱག་རྒྱ་ཆེན་པོ་གསང་བ་གྲུབ་པ་དང་། རྗེ་བཙུན་མ་རིན་ཆེན་ལྷ་མོ་ལ་ཀམ་ཀ་ཏ་ཡི་གྲོང་ཁྱེར་དུ། ཕྱག་རྒྱ་ཆེན་པོ་སྙིང་པོའི་སྐོར། བླ་མ་མཻ་ཏྲི་པ་ལ་རྒྱ་གར་གྱི་ལྷོ་ཕྱོགས་འོད་མའི་ཚལ་དུ་ཕྱག་རྒྱ་ཆེན་པོ་རབ་ཏུ་མི་གནས་པ་སོགས་ཀྱི་རྒྱུད་ལྔ་དང་དོ་ཧ། ཕྱག་ཆེན་དག་པ་ཡེ་ཤེས་དང་སྐུ་གསུམ་ལམ་ཁྱེར་ལ་སོགས་ཕྱག་རྒྱ་ཆེན་པོའི་གདམས་པ་མང་དུ་ཞུས། འོན་ཀྱང་ཡོངས་གྲགས་ཀྱི་ལོ་རྒྱུས་ཆོས་འབྱུང་རྣམས་སུ་བཀའ་བརྒྱུད་པ་སྤྱིའི་ཕྱག་རྒྱ་ཆེན་པོའི་བླ་བརྒྱུད་དེ་དག་སྒྲིང་བའི་ཚེ། ཕལ་ཆེ་བར་མཁས་གྲུབ་ཁྱུང་པོའི་མཚན་ཙམ་ཡང་འཁོད་མེད། མཁས་གྲུབ་ཁྱུང་པོས་སྐོར་ནི་རུ་པ་དང་རྒྱལ་བ་མེ་ཏྲི་པ་ལས་ཕྱག་རྒྱ་ཆེན་པོའི་གདམས་པ་གསན་སྐབས་མར་པ་ལོ་ཙཱ་བ་ལས་སྔ་ལ། ཁོང་ལ་ཕྱག་རྒྱ་ཆེན་པོའི་བརྒྱུད་པ་མི་འདྲ་བ་ཁག་བཞི་ཙམ་མངའ་བ་དང་། གདམས་ངག་གི་ཆུ་མགོ་རྒྱལ་བ་མི་སྲིད་པ་རང་ལ་ཐུག་ཡོད་པས། གང་དེའི་བརྒྱུད་པ་དང་བཅས་པ་རྣམས་ཀྱང་ཕྱག་རྒྱ་ཆེན་པོའི་གདམས་ངག་དྲི་མ་མེད་པའི་རྣམ་ཐར་སྐྱོང་བ་བཀའ་བརྒྱུད་པ་གཞན་རྣམས་དང་ཡོངས་སུ་གཅིག་མཚུངས་ཡིན།
II.3.3.2
གཉིས། མཁས་གྲུབ་ཁྱུང་པོའི་གའུའི་སྐོར།
གའུ་ནི་ལྷ་སྐུ་འཇོག་སའི་སྣོད་ཟེའུ་ལྷ་ཁང་གི་སྒོ་ཁྱིམ་དང་འདྲ་སྟེ། མིང་གི་རྣམ་གྲངས་ལ་ཁ་སྦྱར་དང་ཟ་མ་ཏོག་ཀྱང་ཟེར། སྔར་སྟོན་པ་ཤཱཀྱ་ཐུབ་པའི་ཚེམས་ཆེ་བ་གཅིག་རྡོ་རྗེ་གདན་གྱི་གསེར་གྱི་གའུའི་ནང་བཞུགས་སུ་གསོལ་བ་ལྟར་འཕགས་ཡུལ་དུ་སངས་རྒྱས་ཀྱི་སྐུ་རྟེན་བྱིན་ཅན་སོགས་བླུག་སའི་སྣོད་ཅིག་ཡིན། དེ་དང་འདྲ་བར་བོད་ས་གནས་སུ་སྐྱེས་པ་ཚོས་གདོན་འདྲེའི་གནོད་པ་དང་མཚོན་ཆ་སོགས་སྲུང་བའི་སྐུ་འདྲ་བྱིན་ཅན། སྲུང་མདུད། རིལ་བུ་བཅས་འཇོག་སྣོད་གའུའི་དབྱིབས་ཟེའུ་ལྷ་ཁང་གི་སྒོ་ཁྱིམ་དང་འདྲ་བ་ལ། རྒྱུ་ཆ། ཟངས་དང་རག །གསེར་དངུལ་སྤེལ་མའམ། དངུལ་རྐྱང་གསེར་རྐྱང་ལས་བཟོས་པ་དང་། བུད་མེད་རྒྱན་ཆའི་གའུ་ཟུར་བཞི་མ་དང་ཟུར་བརྒྱད་མ། སྒོར་དབྱིབས་བཅས་ཡོད་ཅེས་གསལ་བ་བཞིན། སྐྱེས་པ་ཚོས་ཚོང་དོན་སྒྲུབ་པ་དང་། དམ་ཆོས་ཞུ་བ་སོགས་ཀྱི་ཕྱིར་རང་གི་ཡུལ་ལས་ཁ་བྲལ་ཏེ་ཐག་རིང་དུ་འགྲོ་སྐབས་ལམ་བར་གྱི་གེགས་བར་བཟློག་ཕྱིར་ལུས་སྟོད་དུ་སྐུ་འདྲ་སོགས་ཀྱི་རྟེན་བྱིན་ཅན་བླུགས་པའི་གའུ་འཁྱེར་སྲོལ་ཡོད་པ་ད་ལྟའི་དུས་སུའང་དབུས་གཙང་གི་ཡུལ་ལུང་མང་ཆེ་བར་དངོས་སུ་མཐོང་རྒྱུ་ཡོད། འོན་ཀྱང་ཡང་སྙིང་གའུ་ཞེས་པ་འདི་ཉིད་བོད་དུ་ཐོག་མར་དུས་ཇི་ཙམ་ལ་ཡུལ་གང་ལས་དར་བ་དང་། གའུ་ཞེས་པའི་མིང་དེ་རང་གི་དོན་ཅི་ཡིན་པ་སོགས་ཀྱི་སྐོར་ཁ་གསལ་གྱི་དཔྱད་གཞི་ད་ཕན་མ་མཐོང་བས་དཔྱད་པར་འཚལ།
མཁས་གྲུབ་ཁྱུང་པོ་རྣལ་འབྱོར་འཕགས་ཡུལ་དུ་ཆོས་ཞུ་བར་ཕེབས་སྐབས་སུའང་སྐུ་ལུས་སྟེང་སྙིང་གཟུགས་ཀྱི་བལ་པོའི་གའུ་ཞིག་བསྣམས་ཀྱི་ཡོད་ལ། གདམས་ངག་འགངས་ཆེ་རྣམས་གའུ་ཡི་ནང་དུ་བླུགས་ནས་སྐུ་ལུས་དང་འབྲལ་མེད་དུ་ཉར་ཚགས་གནང་གི་ཡོད་པ་ཡང་གོང་དུ་བཤད་ཟིན་པའི་ཕྱག་རྒྱ་ཆེན་མོའི་ཤོག་དྲིལ་དེ་ཕུད། གཞན་ཡང་བདེ་མཆོག་གསང་སྒྲུབ་ནི་གུ་མས་མཛད་པ་རྒྱ་སྐད་ཅན་དེ་དང་། དཔལ་འཁོར་ལོ་སྡོམ་པ་མྱུར་དུ་སྒྲུབ་པའི་ཐབས་ཞེས་པ་འདི་གཉིས་ཀྱང་ཏཱ་ལའི་ལོ་མའི་སྟེང་བརྗེད་ཐོར་བཀོད་པ་གའུའི་ནང་བླུགས་ཏེ་སྐུ་ལུས་དང་མ་བྲལ་བར་མཛད་པ་སོགས་ཀྱིས་མཚོན་པ་མ་ཟད། ཁོང་སྐུ་འདས་རྗེས་སྤུར་མ་སྦྱངས་པར་རིན་ཆེན་གསེར་དངུལ་དང་ཟངས་ལྕགས་ཀྱི་གའུའི་ནང་དུ་སྤུར་ཞུགས་པ་དང་། ཁྱུང་པོ་གཉིས་པ་ཚུལ་ཁྲིམས་མགོན་པོའི་སྐུ་སྤུར་ཡང་བདག་ཆེན་པས་ཟངས་ཀྱི་གའུའི་ནང་བཞུགས་སུ་བཅུག །མདོར་ན་མཁས་གྲུབ་ཁྱུང་པོ་འཕགས་ཡུལ་དུ་ཆོས་ཞུ་བར་ཕེབས་སྐབས་ཀྱི་སྤྱི་ལོའི་དུས་རབས་བཅུ་གཅིག་པ་དང་བཅུ་གཉིས་པའི་ནང་སྐུ་ལུས་སུ་གའུ་བསྣམས་ནས་ཕེབས་ཀྱི་ཡོད་པ་རྟོགས་ཐུབ་ཅིང༌། བོད་ཀྱི་བླ་མ་ཚོས་འཁྱེར་བའི་གའུ་དེ་དག་ནི་ཇོ་བོ་རྗེ་སོགས་རྒྱ་གར་གྱི་པཎྜི་ཏ་ཚོས་སྐུ་ལུས་དང་འབྲལ་མེད་དུ་འཁྱེར་ཞིང་། རིན་པོ་ཆེའི་རིགས་ལས་གྲུབ་པའི་སྐུ་ཆས་བླུགས་སྣོད་ཁྱད་པར་ཅན་ཟ་མ་ཏོག་དང་འདྲ་ལ། འཕགས་བོད་ཀྱི་དགེ་སློང་ཚོས་སྟོན་པའི་སྣང་བརྙན་བླུགས་སའི་འདྲ་པང་དང་ཡང་འདྲ་བ་ཡིན། དེ་ཡང་ཁ་རྒྱུན་དུ་དཔེ་དོན་གའུ་ཁ་སྦྱོར་ཞེས་སུ་གྲགས་པ་དང་ཕྱོགས་འདྲ་བར། ཤངས་པ་བཀའ་བརྒྱུད་ཀྱི་ལྟ་བའི་མཐར་ཐུག་ཕྱག་ཆེན་གའུ་མ་ཞེས་པ་འདི་ཡང་བདེ་བ་དང་སྟོང་པ་གའུ་ཁ་སྦྱོར་བ་བཞིན་དབྱེར་མེད་དུ་བསྒོམས་ནས་འོད་གསལ་མངོན་དུ་བྱེད་པའི་གདམས་པ་ཞིག་ཡིན་པའི་དོན་འདི་བླུགས་སྣོད་ཁོ་ནའི་སྟེང་ནས་མཚོན་ཐུབ་པ་ནི་ཡ་མཚན་ཆེ་བ་ཞིག་རེད། འོན་ཀྱང་ལོ་རྒྱུས་ཀྱི་ཆར་རླུང་ཁྲོད་མཁས་གྲུབ་ཁྱུང་པོ་རྒྱ་གར་ལ་ཕེབས་སྐབས་བསྣམས་པའི་སྙིང་གཟུགས་ཀྱི་གའུ་དེ་ང་ཚོའི་མིག་མདུན་ནས་ཡལ་ཟིན་ཡང་། གའུ་དེ་ནི་སྲོག་གི་དབང་པོ་དང་བྲལ་བའི་སྤྱིར་བཏང་གི་གའུ་ཞིག་མ་ཡིན་པར་ཤངས་པ་བཀའ་བརྒྱུད་ཀྱི་སྲོག་རྩ་ལྟ་བུའི་གདམས་པ་ཕྱག་རྒྱ་ཆེན་པོ་སོགས་བཞུགས་སའི་མཛོད་ཁང་གསོན་པོ་ཞིག་ཡིན།

II.3.4 - The branches: the Three Carry-Overs
བཞི་པ། ཡལ་ག་ལམ་ཁྱེར་རྣམ་གསུམ།
དེ་ཡང་ཆོས་དྲུག་གི་འགྲེལ་པ་བདུད་རྩིའི་རྒྱ་མཚོ་ལས་བླ་མ་ཡི་དམ་སྒྱུ་མ་གསུམ། །འབྲལ་བ་མེད་པར་ལམ་དུ་ཁྱེར་ཞེས་སྣང་བ་ལ་བརྟེན་ནས་བླ་མ་དང་ཡི་དམ། སྒྱུ་མ་གསུམ་ཉམས་སུ་ལེན་པའི་ཚུལ། ཅིར་སྣང་ཐམས་ཅད་དཔལ་ལྡན་བླ་མའི་གསང་བ་གསུམ་གྱིས་རོལ་པར་བལྟ་བ་སྟེ་འདི་ལྟར་སྣང་གྲགས་རྟོག་ཚོགས་ཆོས་རྣམས་ཀུན། །བདག་སོགས་གནས་ལུགས་རྟོགས་པའི་བརྡ་ཐབས་སུ། །དཔལ་ལྡན་བླ་མའི་རོལ་པ་གཅིག་པུ་ཉིད། །བཀའ་དྲིན་རྗེས་དྲན་ངང་ནས་གསོལ་བ་འདེབས་ཞེས་གསུངས་པ་ལྟར། གཟུགས་སྣང་དང་སྒྲ་གྲགས་ཐམས་ཅད་ཡི་དམ་ལྷའི་སྐུ་སྣང་སྟོང་འཇའ་གཟུགས་དང་གཞོམ་མེད་རང་བྱུང་སྔགས་ཀྱི་སྒྲ་གདངས། སྣང་བ་སེམས། སེམས་སྒྱུ་མ་རྨི་ལམ་དུ་ཤེས་པས་ཉིན་མཚན་གྱི་རྣལ་འབྱོར་ལ་བསླབ་ཅིང་ཉམས་སུ་ལེན་པའི་ཐབས། ཐག་ཆོད་གསུམ་དང་ཟུང་འཇུག་ལ་བརྟེན་པའི་མོས་གུས། འབྲལ་མེད་ཀྱི་གནད་དྲུག་དང་ལྡན་པའི་དག་སྣང་། ཚོགས་དྲུག་གི་འཆར་སྒོ་བདེན་མེད་གསལ་སྟོང་འཛིན་བྲལ་གྱི་ཏིང་ངེ་འཛིན་ལ་བརྩོན་པ་སྟེ། ཡེ་ཤེས་མངོན་འབྱུང་ལས་ས་དང་ལམ་གྱི་ཡོན་ཏན་རྣམས། །བླ་མའི་མོས་གུས་ལོ་ཟླས་བགྲོད། །བླ་མའི་སྣང་བ་མི་འབྲལ་ན། །སངས་རྒྱས་རྣམས་ཀྱང་འབྲལ་མེད་གནས་ཞེས་དང་། དམ་ཚིག་བཀོད་པ་ལས་གཡོ་མེད་མོས་གུས་ཟླ་དྲུག་གིས། །རྡོ་རྗེ་འཆང་གི་ས་ཐོབ་འགྱུར་ཞེས། གཉན་སྟོན་རི་གོང་པའི་རྣམ་ཐར་མཐོང་བ་དོན་ལྡན་དུ་རྣམ་ཐར་མཐར་ཐུག་མོས་གུས་ཡིན། །དག་སྣང་བསྐྱེད་ཅིག་སློབ་མ་ཀུན་ཞེས་སོགས་གསལ་བ་ལྟར་སྔར་ཆོས་རྗེ་རྨོག་ལྕོག་པས་ཀྱང་། ཐུགས་རྗེ་ཆེན་པོ་རང་གཤིས་དཀར་ན་ཡང་དཀར། དགྱེས་རྡོར་བདེ་མཆོག་རང་སྔོ་ན་ཡང་སྔོ། རྡོ་རྗེ་ཕག་མོ་རང་དམར་ནའང་དམར། ང་ལ་ནི་རེ་ས་བླ་མ་ལས་མེད། ཇི་ལྟར་འདུག་ཀྱང་བླ་མའི་སྣང་བ་དང་འབྲལ་མ་མྱོང་བས། ཚེ་གཅིག་ལ་ལུས་གཅིག་གིས་སངས་རྒྱས་ཀྱི་ས་དེ་ཡང་ཐོབ་པ་ཡིན་གསུངས། དེས་ན་བླ་མ་ལ་བརྟེན་ནས་མོས་གུས། དེ་ལས་བཀའ་དྲིན། དེ་ལས་ཚོགས་གསོག །དེ་ལས་སྐུ་གསུམ་རང་ཤར། ཡི་དམ་ལ་བརྟེན་ནས་དག་སྣང་། དེ་ལས་ཚོགས་གསོག །དེ་ལས་ལྷ་སྐུ་ཕྱག་རྒྱ་ཆེན་པོ་རང་ཤར། སྣང་བ་རང་སེམས་ལས་སྒྱུ་མ། དེ་ལས་རྨི་ལམ། དེ་ལས་འོད་གསལ་རང་ཤར་དུ་འབྱུང་ཞིང་། དགོངས་པ་དམ་པའི་རྒྱུད་ལས་སྣང་བ་བླ་མ་ཡི་དམ་དང༌། །སྒྱུ་མ་ལམ་དུ་འཁྱེར་བར་བྱ། །ཚེ་འདིར་སྐུ་གསུམ་མངོན་གྱུར་ནས། །དོན་གཉིས་ཕུན་སུམ་ཚོགས་པར་འགྱུར་ཞེས་འཁོད་པ་བཞིན་བླ་མ། ཡི་དམ། སྒྱུ་མ་གསུམ་ཀས་ལོ་ཟླ་ཙམ་དང་ཚེ་འདི་ཁོ་ནར་གསལ་སྟོང་བདེ་ཆེན་རང་ཤར་མངོན་དུ་འགྱུར་བ་ནི་འཕྱུག་མེད་ལམ་ཁྱེར་རྣམ་གསུམ་ཞེས་བྱ་བ་ཡན་ལག་གི་ཉམས་ལེན་ཡིན་པས་ཡལ་གའི་ཆོས་སུ་གྲགས་པའོ།

II.3.5 - The flowers: the White and Red Khechari
།ལྔ་པ། མེ་ཏོག་མཁའ་སྤྱོད་དཀར་དམར།
ཇི་སྐད་དུ་མེ་ཏོག་མཁའ་སྤྱོད་དཀར་དམར་སྙིང་རྗེའི་རྒྱུན། ཁྱད་འཕགས་གསོལ་འདེབས་ཀྱིས་བསྐུལ་འཁོར་ལོ་བཞིར། །ཆགས་གྲོལ་བདེ་སྟོང་མར་མེ་རབ་ཏུ་འབར་ཞེས་གསུངས་པ་བཞིན། གསེར་ཆོས་བཞི་པ་མཁའ་སྤྱོད་དཀར་དམར་ཟུང་གི་ཉམས་ལེན་ནི། བཅོམ་ལྡན་འདས་རྡོ་རྗེ་བཙུན་མོ་བདེ་ཆེན་ཟག་པ་མེད་པའི་སྙིང་རྗེའི་མཐུ་རྩལ་གྱི་རྒྱུན། ཁྱད་འཕགས་གསོལ་འདེབས་རྡོ་རྗེའི་གདུང་ཚིག་གིས་བསྐུལ་ཞིང་། ལུས་གནས་འཁོར་ལོ་རྣམ་བཞིར་རྟེན་གྱི་བྱེ་བྲག་དང་མཐུན་པར་ཆགས་གྲོལ་གྱི་ལམ་སོ་སོ་ལ་བརྟེན་པའི་བདེ་སྟོང་མར་མེ་རབ་ཏུ་འབར་བའི་ཏིང་ངེ་འཛིན་གྱི་རྟེན་དེ་ཉིད་ལ་ཟུང་འཇུག་ཆེན་པོའི་མཁའ་ལ་སྤྱོད་པར་འགྱུར་བ་དང་། དབང་པོ་དམན་པ་རྣམས་སྐྱེ་གནས་ལྔ་ཅིག་ཅར་དུ་དགག་པའི་བཙན་ཐབས་ཀྱི་གསང་ལམ་ལ་བརྟེན་ནས་མཁའ་སྤྱོད་རྡོ་རྗེའི་གྲོང་དུ་དཀའ་བ་མེད་པར་བགྲོད་པ་ཡང་། ཀརྨ་ངག་དབང་ཡོན་ཏན་རྒྱ་མཚོས་ཟླ་བ་ལི་ཁྲིའི་མདངས་ཅན་རྡོ་རྗེ་རྣལ་འབྱོར་མའི་ཏིང་འཛིན། །ཁྱད་འཕགས་གསོལ་འདེབས་ཤུགས་ཀྱིས་སྙིང་རྗེའི་ཆུ་རྒྱུན་ནི་བསྐུལ་ཞིང༌། །འཁོར་ལོ་བཞི་ཡི་མར་མེ་ཆགས་གྲོལ་བདེ་སྟོང་ལ་བསླབས་པས། །མཁའ་སྤྱོད་མེ་ཏོག་ཚལ་དུ་ལྷན་སྐྱེས་མཛེས་མ་ཡིས་བསུའོ་ཞེས་གསུངས་པ་ལྟར་ཡིན། ཤངས་པ་བཀའ་བརྒྱུད་ཀྱི་རིན་ཆེན་བདུན་བརྒྱུད་སྔ་མའི་བདུན་པ་སངས་རྒྱས་གཉན་སྟོན་གྱིས་བྲག་དགོན་དུ་མཁའ་སྤྱོད་དཀར་དམར་མཐིང་གསུམ་གཟིགས་པ་སོགས་ཤངས་ཆོས་འཛིན་པ་རྣམས་ཀྱིས་མཁའ་སྤྱོད་དཀར་དམར་གཉིས་བསྒྲུབས་པའི་མཐར་ཕྱིན་པ་ཤིན་ཏུ་མང༌། སྤྱིར་ཁྱུང་པོའི་ལུགས་སུ་མཁའ་སྤྱོད་བཀའ་ལྔ་ཡོད་ཅིང་། དེ་དག་ནི་ཁྱུང་པོ་ཁོ་ན་ལ་མངའ་བའི་སྙན་བརྒྱུད་ཀྱི་གདམས་པ་ཞིག་ཡིན་པ་ཡང་། ཤངས་པའི་ཕྱག་ལེན་བདེ་ཆེན་སྙེ་མའི་ཆུན་པོ་ལས་མཁའ་སྤྱོད་བཀའ་ལྔར་གྲགས་པའི་གསེར་ཆོས་འདི། །ཀུན་ལ་མ་གྲགས་ཁྱུང་པོའི་སྙན་བརྒྱུད་ཡིན་ཞེས་གསུངས་པ་ལྟར་རོ།
།གཞན་ཡང་སྔར་ཆོས་དྲུག་གི་འཕོ་བའི་སྐབས་སུ་བརྗོད་ཟིན་པའི་འཕྱུག་མེད་མཁའ་སྤྱོད་ཀྱི་འཕོ་བ་ཞེས་པ་དེ་ཡང་མཁའ་སྤྱོད་དཀར་དམར་གཉིས་ལ་བརྟེན་པའི་གདམས་པ་ཆེས་ཟབ་པ་ཞིག་སྟེ། ལོ་ཙཱ་བ་འགྱུར་མེད་བདེ་ཆེན་གྱིས་ཡེ་ཤེས་མཁའ་འགྲོའི་ཞལ་རླངས་མ་ཡལ་བའི། །མཁའ་སྤྱོད་འཕོ་བའི་གདམས་པ་ཆེས་ཟབ་པ། །གྲུབ་པའི་དཔའ་བོ་རྣམས་ལས་བརྒྱུད་པ་འདི། དེ་དུས་བདག་གི་སྙིང་དབུས་ཐིག་ལེར་གནས་ཞེས་གསུངས་པ་བཞིན་མཁའ་འགྲོའི་ཞལ་རླངས་མ་ཡལ་བའི་ཆེས་ལྐོག་འགྱུར་གྱི་གདམས་པ་འདི་དག་སྐབས་འདིར་ཡང་ཞིབ་ཏུ་འཆད་པར་ག་ལ་ནུས། དེས་ན་མེ་ཏོག་མཁའ་སྤྱོད་དཀར་དམར་དང་གང་དེའི་འཕོ་བའི་སྐོར་ལུང་རིག་མན་ངག་དང་ལྡན་པའི་ཤེས་ལྡན་རྣམས་ཀྱིས་མཁྱེན་པར་འདོད་ན། ཅུང་ཟད་ཞིབ་པ་འཇག་བསམ་གྱི་ཁྲིད་ཡིག་རྣམས་དང་། གྲུབ་ཆེན་ཐང་སྟོང་རྒྱལ་པོའི་ནི་གུ་ཆོས་དྲུག་གི་གནད་ཡིག་སྙིང་པོ་ཀུན་འདུས་སོགས་ཆོས་དྲུག་གི་ཁྲིད་ཡིག་ཁག་དང་། ལོ་ཆེན་འགྱུར་མེད་བདེ་ཆེན་གྱི་མཁའ་སྤྱོད་དཀར་མོའི་འཕོ་བ་རཱ་ཧུ་ལའི་གདམས་པ་མཁའ་སྤྱོད་དམར་མོའི་འཕོ་བ་སོགས་སུ་གཟིགས་པར་འཚལ།

II.3.6 - The fruit: the Immortal and the Infallible
དྲུག་པ། འབྲས་བུ་འཆི་མེད་འཆུག་མེད།
འབྲས་བུ་འཆི་མེད་འཆུག་མེད་ལ་གཉིས་ལས། དང་པོ་རྒྱལ་བ་གཉན་སྟོན་ཆོས་རྗེ་ལ་བཀའ་བབས་པའི་ལུས་འཆུག་མེད་ནི་རྒྱལ་བ་རྡོ་རྗེ་འཆང་ནས་དབུ་བཅད་མ། དེས་བིརཱ་པ། དེས་བྲམ་ཟེ་ནག་པོ། དེས་དུར་ཁྲོད་ནག་པོ། དེས་ལ་སྟོད་མགོན་པོ། དེས་སངས་རྒྱས་གཉན་སྟོན་ཉིད་ལ་བརྒྱུད་པ་ཡིན་ཞིང་། དེ་ཡང་ལུས་འཆི་མེད་ཀྱི་རྒྱ་གཞུང་དུ་འདི་ལྟར་མི་ཡི་ལུས་ལ་ནི། །གྲུབ་པའི་ལམ་ནི་རབ་གསལ་བ། །ཉམས་མྱོང་སྐྱེས་ཤིང་ལུས་བྱས་འགྱུར། །རྒས་པར་ཡང་ནི་མི་འགྱུར་རོ་ཞེས་འཁོད་པ་ལྟར་རྡུལ་རྫས་བརྒྱད་འདུས་ཀྱི་གོང་བུ་རང་ལུས་འདི་འཆི་བའི་གདགས་གཞིས་སྟོངས་པར་རྟོགས་ནས་གྲུབ་པའི་ལམ་མཆོག་ཏུ་བགྲོད་པའི་ཐབས་ཤིག་ཡིན། གདམས་པ་འདིའི་སྒོམ་ཚུལ་ཡང་ཆོས་རྗེ་བྱམས་པ་དཔལ་བས་འཆི་མེད་སྒོམ་དུས་ལུས་པོ་བསྲངས་ནས་སྒོམ་དགོས་པ་ཡིན། དེས་རྩ་རླུང་ཐད་ཀར་ཡོང་བ་ཡིན་ཅིང་། ཡི་དམ་ལྷ་མཐོང་ཞིང་འོད་གསལ་ཡང་འཆར་ཞེས་གསུངས་པ་སོགས་ལས་ཤེས་པར་བྱའོ།
།གཉིས་པ་རྗེ་བཙུན་རྨོག་ལྕོག་པས་མཁས་གྲུབ་ཁྱུང་པོ་ལ་གསེར་སྲང་ལྔ་བཅུ་ཕུལ་ནས་གནང་སྟེ་ཉམས་སུ་མྱོང་བར་བྱས་པའི་རང་སེམས་འཆི་མེད་རང་གྲོལ་ལ། སེམས་འཆི་མེད་ཀྱི་རྒྱ་གཞུང་དུ་འཆི་མེད་ཡེ་ཤེས་ཆེན་པོ་ཞེས་ཀྱང་བརྗོད་དེ། སྐྱེ་འཇིག་དང་འགྱུར་བའི་སྒྲིབ་པས་མ་གོས་པས་འཆི་མེད། ཐབས་ཤེས་གཉིས་སུ་མེད་པའི་འོད་གསལ་གྱི་སྐུ་ཡིན་པས་ཡེ་ཤེས། དེའི་གོང་ན་གཞན་མེད་པས་ཆེན་པོའོ། །འདིའི་དོན་ཡང་སེམས་འཆི་མེད་རྡོ་རྗེའི་མགུར་ལས་མདོ་རྒྱུད་མན་ངག་ཉམས་མྱོང་གིས། །མ་བསྒོམས་འཚང་རྒྱ་འཆི་མེད་གནད། །འདི་ལྟར་རྣམ་སྨིན་ལུས་འདི་ལ། །ཡེ་ཤེས་ལུས་ནི་རང་དགར་བྱུང་། །རྣམ་སྨིན་ལུས་ལ་ལྷ་ཡི་སྐུ། གསལ་ལ་དེར་འཛིན་མེད་པར་བསྒོམ། དེ་ཉིད་སེམས་དང་དབྱེར་མེད་དེ། སེམས་ལ་ངོ་བོ་མ་གྲུབ་པས། །དེ་ལ་འཆི་རྒྱུ་ག་ལ་ཡོད། །འཆི་བ་ཞེས་བྱ་རྣམ་རྟོག་ཡིན། །རྟོགས་ཚོགས་འཁོར་འདས་ཆོས་མ་གྲུབ་ཅེས་དང་། གསེར་ཆོས་ལྔའི་རྩ་ཚིག་འཁྲུལ་མེད་རྡོ་རྗེའི་རྒྱ་མདུད་ལས་འཆི་བ་ཞེས་བྱ་ལུས་དང་སེམས་འདི་ཡིན། །རྣམ་སྨིན་ལུས་ནི་བེམ་པོ་ས་རྡོ་འདྲ། །བག་ཆགས་ལུས་ཀྱང་རྨི་ལམ་ཤི་རྨིས་བཞིན། །འཆི་ཞེས་བཏགས་པ་ཙམ་ལས་དོན་མི་གྲུབ་ཅེས་གསུངས་པ་ལྟར། ཐ་མལ་པ་རྣམས་ཀྱིས་འཆི་བྱ། འཆི་བྱེད། འཆི་ཚུལ་ཐམས་ཅད་གྲུབ་པར་ངོས་བཟུང་བས། འཆི་བའི་སྡུག་བསྔལ་ཉམས་སུ་མྱོང་། འོན་ཀྱང་བླ་མ་དམ་པའི་གདམས་ངག་གིས་རང་སེམས་གསལ་སྟོང་ཟུང་འཇུག་བརྗོད་པའི་མཐའ་ཐམས་ཅད་དང་བྲལ་བ་ལྷ་སྐུ་ཕྱག་རྒྱ་ཆེན་པོར་ངོ་ཤེས། ཐག་བཅད། དེའི་རྒྱུན་བསྐྱངས་ནས་རང་གི་སེམས་འདི་ངོ་བོ་གང་དུའང་མ་གྲུབ་པའི་ཕྱིར་གདོད་མ་ནས་མ་སྐྱེས་པས་ན་འཆི་མེད་རང་གྲོལ་དུ་རྟོགས་པ་ཡིན། དེ་མིན་སེམས་འཆི་མེད་ཀྱི་འགྲེལ་པ་ཟུང་འཇུག་གསལ་བ་ལས་འཆི་མེད་ཡེ་ཤེས་ཆེན་པོ་འདི། །ཆིག་བརྒྱུད་རྡོ་རྗེའི་རྒྱ་ཡིས་བཏབ། །མི་རབས་བདུན་དུ་གསུམ་པའོ་ཞེས་སེམས་འཆི་མེད་ཀྱི་གཞུང་འདི་ཉིད་ནི་གསེར་ཆོས་གཞན་རྣམས་དང་འདྲ་བར་ཆིག་བརྒྱུད་བཀའ་རྒྱས་བཏབ་པ་ཡིན་ཀྱང་། འདིར་མི་རབས་གསུམ་ཞེས་བརྗོད་དོན་ནི། མཁས་གྲུབ་འགའ་ཞིག་གིས་རྒྱལ་བ་རྡོ་རྗེ་འཆང་གིས་ནི་གུ་མར་བརྒྱུད་པ་རབས་དང་པོ་དང་། ནི་གུ་མས་མཁས་གྲུབ་ཁྱུང་པོར་བརྒྱུད་པ་རབས་གཉིས་པ། མཁས་གྲུབ་ཁྱུང་པོ་དང་མཚུངས་པར་སངས་རྒྱས་གཉན་སྟོན་ལ་བཀའ་བབས་པ་བཅས་རབས་གསུམ་དུ་གོ འོན་ཏེ་ཇོ་ནང་ཏཱ་ར་ནཱ་ཐས་ནི་སངས་རྒྱས་སྟོན་པའི་སློབ་མ་མཆོག་གསུམ་སྟེ། མཁས་གྲུབ་ཤངས་སྟོན་དང་། བསམ་སྡིངས་པ་གཞོན་ནུ་གྲུབ། གནས་རྙིང་པ་ཨ་ཡི་སེང་གེ་བཅས་གསུམ་ལ་བརྒྱུད་པར་བཞེད། རང་སེམས་འཆི་མེད་རང་གྲོལ་གྱི་མགུར་རྗེ་བཙུན་དྷརྨ་སིང་ཧས་མཛད་ཅིང་། དབུར་ན་མོ་གུ་རུ་ཞེས་པ་དང་བཅས་པའི་ཁྱོན་ཚིག་རྐང་བཅུ་ཡོད་པ། དབོན་སྟོན་སྐྱེར་སྒང་པས་རྗེ་བཙུན་རྨོག་ལྕོག་པ་ལ་གསེར་སྲང་བརྒྱ་དང་འབྲི་སུམ་ཅུ། ཟེར་ཐུལ་གཅིག་རྣམས་ཕུལ་ནས་ཞུས་ཏེ་ཉམས་སུ་མྱོང་གནང་བ་ཞིག་ཀྱང་ཡོད།
རྣམ་སྨིན་གྱི་ལུས་འདི་ཉིད་ནི་བེམ་པོའི་ཚོགས་པ་ཡིན་པའི་ཕྱིར་སྐྱེ་འཆིའི་ཐ་སྙད་གདགས་པའི་གཞི་མ་ཡིན་པས་སྟོང༌། དོན་དུ་ལུས་ཀྱང་སེམས་ཀྱི་སྣང་བ་ཙམ་ལས་བྱུང་བས་སེམས་སྐྱེ་འཆི་མེད་པར་རྟོགས་པའི་གདིང་འཆོས་པ་ན། ལུས་སྣང་ལྷ་སྐུ་ཕྱག་རྒྱ་ཆེན་པོ་འཁྲུལ་སྣང་གི་ལམ་དུ་འཕྱུག་པ་མེད་པའི་དབྱིངས་སུ་བསྡམ་འགྱུར་བའི་གདམས་ངག་དེ་ལྟ་བུས་ཚེ་འདི་ལ་ཟུང་འཇུག་གི་སྐུ་བརྙེས་ཤིང་། ཐོས་པ་ཙམ་གྱིས་ཀྱང་བར་དོ་རྒྱལ་བ་ལོངས་སྐུར་འཚང་རྒྱ་བ་འབྲས་བུ་ལྟ་བུར་གསུངས་པ་ཡང་། ཆོས་དྲུག་གི་འགྲེལ་པ་བདུད་རྩིའི་རྒྱ་མཚོ་ལས་བར་དོའི་འཇིགས་པ་ཆེན་པོ་ལ། །འཆུག་པ་མེད་པའི་གདམས་ངག་གཅེས་ཞེས་འཁོད་པ་དང་མཐུན། གདམས་པ་འདིའི་ཕན་ཡོན་ཡང་འཆི་མེད་རང་གྲོལ་འདི་རྣ་བར་ལན་གཅིག་ཐོས་པས། བར་དོར་རྒྱལ་བ་ལོངས་སྐུར་སངས་(འཚང་)རྒྱ་བར། བཀའ་མདོ་རྒྱུད་ཐམས་ཅད་ནས་གསུངས་པས། འཁོར་བར་འཁྱམས་དགོས་པ་མི་དགོས། ཐེ་ཚོམ་དང་ཡིད་གཉིས་མ་ཟད། མི་ལུས་ཐོབ་པ་དོན་ཅན་དུ་སོང་བ་ཡིན་ཞེས་པ་ལྟར་འཆི་མེད་རང་གྲོལ་འདི་ཉིད་རྣ་བར་ཐོས་པ་ཙམ་གྱིས་བར་དོར་རྒྱལ་བ་ལོངས་སྐུར་འཚང་རྒྱ་བ་མདོ་རྒྱུད་རྣམས་ལས་གསུངས་པས། འཁོར་བར་འཁྱམས་མི་དགོས་པ་མ་ཟད་དལ་བའི་རྟེན་ཐོབ་པ་དོན་དང་ལྡན་པར་འགྱུར་བ་དང་། དེ་བཞིན་དུ་ལུས་འཆི་མེད་ཀྱི་རྩ་བ་ལས་ཀྱང་འཆི་བ་ལས་ནི་གྲོལ་བ་དང༌། །ལུས་སེམས་ལ་ནི་ཕན་པ་འབྱུང༌། །སེམས་ལ་གནས་པ་ཙམ་གྱིས་ཀྱང་། མངལ་དུ་སྐྱེ་བར་མི་འགྱུར་རོ་ཞེས་འཁོད་པ་སོགས་ལས་ཤེས་པར་བྱའོ། །འདིའི་སྐོར་གྱི་ནང་དོན་ཞིབ་པ་རྗེ་བཙུན་རྨོག་ལྕོག་པའི་སེམས་འཆི་མེད་རང་གྲོལ་གྱི་མགུར་དང་། མཁས་བཙུན་རྒྱལ་མཚན་འབུམ་གྱིས་མཛད་པའི་སེམས་འཆི་མེད་ཀྱི་ཁྲིད་ཡིག །ཆོས་རྗེ་སྟོན་པའི་འཆི་མེད། འཆི་མེད་གྲུབ་པའི་འགྲེལ་པ་སོགས་ཚད་ལྡན་གྱི་གཞུང་རྣམས་སུ་གཟིགས།
གཞན་ཡང་རྣམ་ཀུན་ཡོངས་སུ་གྲགས་པའི་གསེར་ཆོས་རྣམ་ལྔ་འདི་རྣམས་ཕུད། མཁས་གྲུབ་ཁྱུང་པོའི་མན་ངག་གཞན་འགའ་ཞིག་ལ་ཡང་གསེར་ཆོས་ཞེས་པའི་ཐ་སྙད་བཏགས་སྲོལ་ཡོད་པ་ཡང་། སྒྲུབ་ཐབས་དགོས་པ་ཀུན་འབྱུང་གདམས་ངག་གི་རྒྱལ་པོའི་མཇུག་ཏུ་གསེར་ཆོས་རྣམས་ཀྱི་ནང་ནས། མགོན་པོའི་བཀའ་རྒྱ་མ་འདི་རིན་ཆེན་བརྩོན་འགྲུས་ཁྱེད་ལ་གཏོད། ཆིག་བརྒྱུད་ལས་མ་སྤེལ་ཅིག་ཅེས་མགོན་པོའི་ཆོས་སྐོར་གྱི་གདམས་ངག་འདི་ཡང་གསེར་ཆོས་ཀྱི་ཁོངས་སུ་བཞག་ཡོད་པ་དང་། དུ་དུང་ཡེ་ཤེས་ཀྱི་མཁའ་འགྲོ་ནི་གུ་མ་དང་རྡོ་རྗེ་གདན་པས་མཁས་གྲུབ་ཁྱུང་པོ་ལ་གདམས་པའི་གསེར་ཆོས། ལོ་ཟླ་ཙམ་གྱིས་སངས་རྒྱས་ཀྱི་སར་སྐྱེལ་བའི་གདམས་ངག །རྣལ་འབྱོར་བླ་ན་མེད་པའི་རྒྱུད་སྡེ་ཐམས་ཅད་ཀྱི་དོན་ཞེས་འཁོད་པ་བཞིན་རྒྱུད་སྡེ་ལྔའི་གཙོ་བསྡུས་ཀྱི་བསྙེན་ཡིག་སོགས་ཀྱང་གསེར་ཆོས་ཀྱི་ཁོངས་སུ་བསྡུ་བ་ཡིན། དེར་བརྟེན་མཁས་གྲུབ་ཁྱུང་པོས་རྒྱ་གར་དུ་རིན་ཆེན་གསེར་གྱི་ཕྱག་རྟེན་དུ་མ་ཕུལ་ནས་སྤྱན་དྲངས་པའི་ཆོས་སྐོར་གཞན་རྣམས་ལ་ཡང་གསེར་ཆོས་སུ་འབོད་པ་དོན་ལ་གནས་པ་ཞིག་ཡིན།
སྤྱིར་གྲུབ་ཆེན་ཁྱུང་པོས་འཕགས་ཡུལ་གྱི་མཁས་གྲུབ་བརྒྱ་དང་ལྔ་བཅུའི་ཐུགས་བཅུད་རྫོགས་པར་བཞེས་པས། ཁོང་ལ་མངའ་བའི་ཆོས་སྒོ་རབ་འབྱམས་ཀྱི་རྒྱ་མཚོར་ངེས་པའི་ཚད་དང་གསལ་བའི་མཐའ་བཟུང་བར་ག་ལ་ནུས། འོན་ཀྱང་ཕྱིས་རིམ་བཞིན་ཤངས་པའི་བརྒྱུད་པ་སྤྱི་ལ་ཉམས་དམས་ཤུགས་ཆེ་ཙམ་བྱུང་བ་དང་སྦྲགས། དཀར་ཆག་བཻཌུརྱའི་ལྡེའུ་མིག་ལས་ཕལ་ཆེར་སྐལ་པ་ཤིན་ཏུ་དམན་པའི་དགུན་གྱི་ནམ་ཟླར་ཟབ་གསང་སྦྲང་རྩིའི་ཆར་སྤྲིན་བགས་ཀྱིས་ཡལ་བས། ཤངས་པའི་གསེར་ཆོས་ཕལ་མོ་ཆེ་མཁའ་ལ་སྤྱོད་པའི་རྟེན་གྱི་གཙོ་བོར་ཕེབས་ཟིན་པས་དཔེ་ལུང་གཉིས་ཀའི་རྒྱུན་ཆད་པ་མང་ཞིང་། འགའ་ཞིག་དཔེ་བཞུགས་ཀྱང་དབང་ལུང་གི་རྒྱུན་མི་བཞུགས་པ་དང་། གང་བཞུགས་པ་དག་ལའང་ཡུན་རིང་གནས་པར་འགྱུར་ན་ཅི་མ་རུང་སྙམ་པའི་སེམས་ཁྲལ་བྱེད་པ་ཆེས་ཉུང་བས། མགྲོན་པོའི་ལམ་རྒྱགས་བཞིན་མཐར་གྱིས་འཛད་པར་འགྱུར་བར་དོགས་ནས། གཙོ་བོར་བསྟན་པ་ཡུན་རིང་དུ་གནས་པ་དང་། དབང་ལུང་ཡོད་མེད་ཤན་ཕྱེད་པ་དང་། རྩ་བ་ཡན་ལག་གི་ཁྱད་པར་དང༌། ཕྱིས་འབྱུང་ཡི་གེའི་ཕུང་པོ་རྣམས་ལས་མེད་དུ་མི་རུང་བ་དག་ཀྱང་ངེས་པར་བྱ་བའི་སླད་དུ་དཀར་ཆག་འདི་བཏབ་པའང་དོན་ཡོད་པ་ཡིན་ནོ་ཞེས་འཁོད་པ་ལྟར། ཤངས་པའི་གསེར་ཆོས་འགའ་ཞིག་མཁའ་སྤྱོད་ཀྱི་གྲོང་དུ་ཕེབས་ཟིན་པས་དཔེ་ལུང་གཉིས་ཀའི་རྒྱུན་ཆད་པ་མང་ལ། གང་དེའི་འཆི་གསོན་གྱི་ལས་དབང་ལ་བསམ་གཞིགས་བྱེད་མཁན་ཡང་ཆེས་ཉུང་བས་འདིའི་སྐོར་དོ་སྣང་དང་རྒྱུས་མངའ་ཅུང་ཙམ་བྱ་རྒྱུ་དེ་ཡང་ངེས་པར་དོན་དང་ལྡན་པར་འགྱུར་མོད། འོན་ཏེ་ཀློང་ཆེན་མཛོད་བདུན་གྱི་མན་ངག་མཛོད་ལས་ཆོས་སྒྲུབ་མཚོ་གླིང་ནོར་བུ་ལེན་འདྲ་བས། །སྙན་བརྒྱུད་གདམས་ངག་ལྐུགས་པར་སྤེལ་མི་བྱ་ཞེས་སྙན་ནས་སྙན་དུ་བརྒྱུད་པའི་ཟབ་གསང་གི་གདམས་ངག་འདི་དག་དྲིན་ཅན་གྱི་བླ་མའི་ཞལ་ནས་ལྐུགས་པ་ཁོ་བོ་ལྟ་བུ་ལ་མ་ཐོབ་པ་དང་། ཉམས་མྱོང་གི་ཡོན་ཏན་ཏིལ་འབྲུ་ཙམ་མི་མངའ་ཡང་། ལོང་བས་ལོང་ཁྲིད་ཀྱི་ཚུལ་དུ་བདག་དང་འདྲ་བའི་ལྐུགས་པ་གཞན་རྣམས་ལའང་སྤེལ་བ་ཤིན་ཏུ་མི་འོས་ན་ཡང་། གནའ་མིའི་ཁ་དཔེར་དཔེ་མེད་ཀྱི་མཆོད་རྟེན་ལ། །ལུང་མེད་ཀྱི་རབ་གནས་ཞེས་པ་ལྟར་མ་ཡིན་པར། གཅིག་ནས་གཟི་འོད་རབ་ཏུ་འཕྲོ་བའི་མཁས་གྲུབ་ཁྱུང་པོའི་གདམས་ངག་གི་སྙིང་པོ་ཤངས་ཆོས་ཀྱི་ཉིང་ཁུ་དེ་དག་ལ་ལྡན་འོས་པའི་རིག་གནས་ཀྱི་རིན་ཐང་དང་ཐོབ་འོས་པའི་ལོ་རྒྱུས་ཀྱི་གནས་བབས་བསྲུང་ཕྱིར་དང་། གཉིས་ནས་ཤངས་ཆོས་འདི་ཉིད་མི་ཡུལ་ནས་ཡོངས་སུ་ཡལ་བར་སྙམ་པའི་མ་རྟོགས་ལོག་རྟོག་གི་བློ་ཅི་རིགས་ལ་བདེན་དཔང་དུ་བཀོད་ནས། དེ་བས་མང་བའི་མིས་གང་དེའི་རིན་ཐང་ལོངས་སུ་སྤྱོད་ཐུབ་རྒྱུའི་ཕྱིར། ཤིན་ཏུ་ལྐོག་འགྱུར་གྱི་ཟབ་གནད་འདི་དག་དང་རྡོ་རྗེའི་ཚིག་དོན་གྱི་ངེས་པ་ཅུང་ཙམ་ཞིག་མངོན་ཤེས་རྣམ་ལྔ་དང་བྲལ་བའི་བློ་དམན་ཁོ་བོས་ལུང་ཁུངས་གང་རྙེད་ཀྱི་བྲག་རི་ལ་སྔས་བཅོལ་ནས་གོང་དུ་ས་བཅད་མ་སྟོང་ཙམ་ཞིག་སྨོས་པ་འདི་དག་མུན་ནག་ལག་བསྟབ་ཀྱི་ཚུལ་དང་གང་དྲན་དུ་འཆད་པའི་སྐྱོན་དུ་འགྱུར་སྲིད་པ་ཡང་། འཇམ་དབྱངས་མཁྱེན་བརྩེ་དབང་པོས་རིག་འཛིན་ཌཱ་ཀིའི་ཞལ་ལུང་ངེས་པའི་དོན། །རང་གི་རྒྱུད་ལ་མྱོང་བ་མ་སྐྱེས་ཤིང༌། །མོས་པས་སྤྱོད་པའི་གྲལ་མཐར་ལྷུང་འགྱུར་ཕྱིར། འདི་ལྟར་སྨྲ་བ་འོས་མིན་དེ་ལྟ་ནའང༌། །གང་ཤར་རྡོ་རྗེའི་རོལ་མོར་འཁྲོལ་བ་ལ། །ཉེས་པའི་ཚོགས་ཀུན་རྩ་གསུམ་དཀྱིལ་འཁོར་ལ། །མི་འཆབ་མཐོལ་ཞིང་དགེ་ཚོགས་གང་མཆིས་དེས། །འགྲོ་ཀུན་ཕྱག་རྒྱ་ཆེ་ལ་གནས་པར་ཤོག་ཅེས་གསུངས་པ་བཞིན་རིག་འཛིན་ཊ་ཀིའི་ཞལ་ལུང་གི་ངེས་དོན་རང་རྒྱུད་ལ་རྩ་བ་ནས་མ་སྐྱེས་པ་མ་ཟད། རྡོ་རྗེའི་རོལ་མོ་བཀྲོལ་བའི་ནུས་མཐུ་དེ་བས་མེད་ཀྱང་། འདི་ལྟར་གྱི་སྨོན་ལམ་ཙམ་ཞིག་བརྗོད་ནས་བཤག་པར་བྱ་ལ། ཡང་དབོན་སྟོན་སྐྱེར་སྒང་པས་འགལ་དང་འཁྲུལ་པར་མཐོང་ལགས་ན། །ཚིག་ལ་མ་བལྟ་དོན་ལ་བལྟོས། །སྨྱོན་པས་མུ་ཅོར་སྨྲས་པ་ཡིན་ཞེས་གསུངས་པ་ལྟར། ཤངས་པ་བཀའ་བརྒྱུད་འདི་ཡང་དྭགས་པོ་བཀའ་བརྒྱུད་དང་འདྲ་བར་ཚིག་སྐམ་པོའི་བརྒྱུད་པ་ཙམ་མ་ཡིན་པར་དོན་དམ་པའི་བརྒྱུད་པ་མཐར་ཐུག་པ་ཞིག་ཡིན་པས། དོན་གྱི་རོ་བཅུད་ཏིལ་འབྲུ་ཙམ་ལྡན་ན་བླང་བར་བྱ་ལ། གང་ལྟར་ནའང་རིགས་ཀྱི་བུ་དམན་པའི་འདུ་ཤེས་དང་། སྨད་པའི་འདུ་ཤེས་དེ་ལྟ་བུ་ཡང་མ་སྐྱེད་ཅིག །ཅིའི་ཕྱིར་ཞེ་ན། རིགས་ཀྱི་བུ་འདི་ལྟ་སྟེ། སྔགས་ཀྱི་སྤྱོད་པ་ནི་སྤྱོད་པའི་མཆོག་གོ འདི་ལྟ་སྟེ། སྔགས་ཀྱི་སྤྱོད་པ་ནི་དེ་བཞིན་གཤེགས་པའི་སྤྱོད་པའོ་ཞེས་གསུངས་པ་ལྟར་ཟབ་མོའི་ཆོས་དེ་དག་དང་། དེའི་དོན་ཕྱིན་ཅི་མ་ལོག་པར་ཉམས་སུ་བསྟར་ནུས་པའི་སྐྱེས་ཆེན་རྣམས་ལ་ནམ་ཡང་སྨད་པ་དང་དམན་པའི་འདུ་ཤེས་འཛིན་པར་མ་རིགས་སོ།

།སྨྲས་པ། གསེར་ཆོས་ལྔ་ཡི་གདམས་པའི་གཟི་བྱིན་ཁམས་གསུམ་གླིང་བཞིར་རབ་འབར་བས། །སྒྱུ་ལུས་རྨི་ལམ་ཉིང་འཁྲུལ་དག་སྣང་ཡུལ་དུས་ཕྱོགས་མཚམས་ཀུན་ཏུ་ཤར། །གཏུམ་མོའི་བདེ་དྲོད་མེ་ཆེན་ཤུགས་ཀྱིས་ལུས་གནད་རྩ་བཞི་ངང་གིས་གྲོལ། །གཉིས་མེད་ཕྱག་ཆེན་གའུ་མ་ཡི་གོ་འཕང་མཆོག་བརྙེས་ཨེ་མ་མཚར། །ཞེས་བར་སྐབས་ཀྱི་ངལ་གསོའི་ཚིགས་སུ་བཅད་པའོ།

II.4 -
།ལེའུ་བཞི་པ། ཤངས་པ་བཀའ་བརྒྱུད་ཀྱི་ཆོས་སྐོར་གཞན་རྣམས་དང་གདམས་པའི་ཁྱད་ཆོས་ཀྱི་སྐོར།
དཔལ་ལྡན་ཤངས་པ་བཀའ་བརྒྱུད་ཀྱི་རིང་ལུགས་ལ་གསེར་ཆོས་རྣམ་པ་ལྔ་ཕུད་པའི་ཆོས་སྐོར་གཞན་ཡང་མཐའ་ཡས་པ་ཡོད་དེ། ཡེ་ཤེས་མགོན་པོའི་ཆོས་སྐོར་དང་། ཤངས་ལུགས་རྒྱུད་སྡེ་ལྔ། སྒྱུ་མ་ལམ་རིམ། སྒྱུ་ལུས་དྲུག་ལྡན། རླུང་བུམ་པ་ཅན་དང་ཤིང་རྟ་ཅན། བླ་མ་ཤངས་པའི་ཐུགས་དམ་དྲུག །གདམས་པ་འཇམ་དཔལ་རྒྱ་ལུགས། དོན་དམ་ཕན་མེད་གནོད་མེད། སྐྱེར་སྒང་ལུགས་ཀྱི་རྟ་མགྲིན། རྗེ་བཙུན་མ་ཐོད་པ་རྒྱན་སོགས་ལས། ཕལ་ཆེ་བ་མཁས་གྲུབ་ཁྱུང་པོ་རང་ཉིད་ཀྱིས་བོད་ཡུལ་དུ་གདན་དྲངས་པ་ཡིན་ཞིང་། འགའ་ཤས་ནི་ཕྱི་རབས་ཀྱི་བརྒྱུད་འཛིན་རྣམས་ལ་བཀའ་བབས་པ་ཡིན། དེ་དག་གི་སྐོར་རགས་ཙམ་སྒྲིང་བ་ལ།

II.4.1 -
དང་པོ། ཡེ་ཤེས་མགོན་པོའི་ཆོས་སྐོར།
མཁས་གྲུབ་ཁྱུང་པོ་འཕགས་ཡུལ་དུ་ཕེབས་ཐེངས་གཉིས་པར་མངའ་བདག་མེ་ཏྲི་པས་མྱུར་མཛད་ཡེ་ཤེས་མགོན་པོའི་ཆོས་སྐོར་ཐོག་མར་གནང་བ་དང་། དེ་རྗེས་གྲུབ་ཆེན་རཱ་ཧུ་ལས་འཕན་ཡུལ་འཆད་ཀར་མགོན་དཀར་ཡིད་བཞིན་ནོར་བུ་སོགས་མགོན་བཀའ་སྔར་མ་གསན་པ་རྣམས་ཀྱང་རྫོགས་པར་གནང་བས། མྱུར་མཛད་ཡེ་ཤེས་མགོན་པོ་ཉིད་ཤངས་པའི་བཀའ་སྲུང་གཙོ་བོར་གྱུར་ལ། ཤངས་པའི་མགོན་པོའི་ཆོས་སྐོར་ནི་མགོན་པོའི་ཆོས་སྐོར་གཞན་ཀུན་ལས་ཀྱང་ཁྱད་པར་དུ་འཕགས་ཤིང་། བོད་དར་ནང་བསྟན་གྱི་ཆོས་བརྒྱུད་གཞན་འགར་ཡང་ཤུགས་རྐྱེན་ཆེས་ཆེར་ཐེབས།
II.4.1.1
གཅིག ཡེ་ཤེས་མགོན་པོའི་སྐོར།
ལྷ་ཆེན་མཱ་ཧཱ་ཀཱ་ལའམ་ཡེ་ཤེས་ཀྱི་མགོན་པོ་ཕྱག་དྲུག་པ་ནི། མགོན་པོའི་སྒྲུབ་ཐབས་ལས་ཞིང་སྐྱོང་ནག་པོ་གཤེགས་སུ་གསོལ། །འཁོར་གྱི་དམག་ཚོགས་གཤེགས་སུ་གསོལ་ཞེས་དང་། དཔལ་མགོན་བདུན་ཅུ་རྩ་ལྔ་དང༌། །དམ་ཅན་རྒྱ་མཚོའི་དམག་ཚོགས་རྣམས་ཞེས་གསལ་བའི་ནང་འཁོར་གྱི་དམག་ཚོགས་དང་དམ་ཅན་རྒྱ་མཚོའི་དམག་ཚོགས་ཞེས་འབོད་པས། ཐོག་མར་གནའ་བོའི་རྒྱ་གར་ཆོས་ལུགས་སུ་དམག་གི་དཔུང་ཚོགས་དུ་མའི་སྐྱབས་ལྷ་ལྟ་བུར་ངོས་འཛིན་པའི་དམག་ལྷ་ཞིག་ཡིན་པས་དེ་ཉིད་ཀྱི་མཚན་གྱི་རྣམ་གྲངས་འགར་བདུད་གཅོད་ཀྱི་སྐྱེས་བུ། སྲོག་གཅོད་ཀྱི་བཤན་པ། བདུད་འདུལ་གྱི་དམག་དཔོན་ཞེས་སོགས་འཁོད་པས་ཀྱང་མཚོན། ཕྱིས་སངས་རྒྱས་ཆོས་ལུགས་ཀྱི་བཀའ་སྲུང་དུ་གྱུར་པ་འདི་ཉིད་ནི། སྔར་གྱི་དུས་ཤིག་འཕགས་པ་སྤྱན་རས་གཟིགས་རྫི་བོ་ལྟ་བུའི་སེམས་བསྐྱེད་ནས། སེམས་ཅན་རྣམས་འཁོར་བའི་གནས་ལས་འདྲེན་མ་ཚར་གྱི་བར་འཚང་མི་རྒྱ་བའི་དམ་བཅའ་འཇོག་གནང་མཛད་ཀྱང་། ཕྱིས་དམ་བཅའ་དེ་བོར་བའི་ཚུལ་མཛད་པས་སྐུ་ལུས་ཚལ་པ་སྟོང་དུ་གས། སངས་རྒྱས་འོད་དཔག་མེད་ཀྱིས་དབུ་བཅུ་གཅིག་དང་ཕྱག་སྟོང་དུ་བྱིན་གྱིས་བརླབས། དེ་རྗེས་སྙིགས་དུས་གདུལ་དཀའི་སེམས་ཅན་མ་རུངས་པ་རྣམས་དྲག་པོས་གདུལ་བ་དང་། ཆོས་བྱེད་པ་རྣམས་བར་དོའི་འཇིགས་པ་ལས་སྐྱོབ་ཕྱིར། འཕྲིན་ལས་རྣམ་པ་གསུམ་གྱི་སྒོ་ནས་སྔར་ལས་ལྷག་པའི་ཐུགས་བསྐྱེད་དེ། ཐུགས་ཀ་ནས་ཧཱུྃ་མཐིང་ནག་གཅིག་བྱུང་བ་དེ་ནི་མྱུར་མཛད་ཡེ་ཤེས་མགོན་པོ་སྟེ། འཛམ་བུའི་གླིང་དུ་བྱོན་རྗེས་ཐོག་མར་ཤིང་ལ་གནས་པས་ཤིང་ཕུག་ཅན་ཞེས་ཀྱང་བྱ། དེ་མིན་གྱི་མཚན་མི་འདྲ་བ་མང་དུ་ཡོད་པའང་། དཔལ་ཡེ་ཤེས་ཀྱི་མགོན་པོ་ཕྱག་དྲུག་པའི་སྒྲུབ་ཐབས་འཕྲིན་ལས་གཏེར་མཛོད་ལས་ལྷ་ཆེན་མཱ་ཧཱ་ཀཱ་ལ་སྤྱན་འདྲེན་ནོ། །ནག་པོ་ཆེན་པོ་གཤེགས་སུ་གསོལ། །ལེགས་ལྡན་ནག་པོ་གཤེགས་སུ་གསོལ། །རྣལ་འབྱོར་དགྲ་ལྷ་གཤེགས་སུ་གསོལ། །རིག་འཛིན་སྲུང་མ་གཤེགས་སུ་གསོལ། །ཞིང་སྐྱོང་ནག་པོ་གཤེགས་སུ་གསོལ་ཞེས་གསུངས་པ་ལྟར་རོ།
།དེ་ལྟར་སྤྱན་རས་གཟིགས་འཇིག་རྟེན་དབང་ཕྱུག་ཉིད་ཐུགས་རྗེར་ཁྲོས་པའི་སྐུ། བདུད་དཔུང་མ་ལུས་ཕྱེ་མར་འཐག་པར་མཛད་པའི་དཔལ་ཡེ་ཤེས་མགོན་པོ་སྟེ་ངོ་བོ་ཡེ་ཤེས་ཀྱི་རང་བཞིན། རྣམ་པ་ཆོས་སྐྱོང་བའི་སྲུང་མ་འཛིན་པའི་ཡེ་ཤེས་མགོན་པོ་འཁོར་དང་བཅས་པ་ལ། སྤྱིར་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་ནག་པོ་བར་ཆད་ཀུན་སེལ། མགོན་བཀའ་གཉིས་པ་མགོན་དཀར་ཡིད་བཞིན་ནོར་བུ། མགོན་བཀའ་གསུམ་པ་མགོན་སེར་ཞལ་གསུམ་ཕྱག་དྲུག་མ། མགོན་བཀའ་བཞི་པ་མགོན་དམར་དབང་གི་རྒྱལ་པོ། མགོན་བཀའ་ལྔ་པ་མགོན་ལྗང་ཚེའི་བདག་པོ། མགོན་སེར་གུར་ཀུམ་མདོག་ཅན། མགོན་པོ་མཆིང་ཁ། གསང་སྒྲུབ་ཡུམ་ཅན་མགོན་པོ་རྒྱན་ཅན་སོགས་མགོན་བཀའ་བཅུ་གསུམ་ཡོད་པ་ལས་རྣམ་ཀུན་ཡོངས་གྲགས་སུ་མགོན་པོ་ཕྱག་དྲུག་ཅེས་སུ་འབོད་པ་དང་། སྐབས་འདིར་བརྗོད་པར་བྱ་བ་ཡང་སྣང་སྲིད་ཐམས་ཅད་ཀྱི་བྲན་བདག །སྲིད་གསུམ་ཐམས་ཅད་ཀྱི་རྒྱལ་པོར་གྱུར་པ་མགོན་ནག་བར་ཆད་ཀུན་སེལ་ཏེ་འཁོར་ཤ་ཟ་དང་མ་མོ་མཁའ་འགྲོ་འབུམ་སྡེས་བསྐོར་བ། གཙོ་བོའི་མདུན་དུ་གནོད་སྦྱིན་གྱི་བདག་པོ་ཡིད་འགུལ་གྱི་བུ་ཀྵེ་ཏྲ་པཱ་ལ་དང༌། ཁྱབ་འཇུག་གི་བུ་ཛི་ན་མི་ཏྲ། གཤིན་རྗེ་འདོད་རྒྱལ་གྱི་བུ་ཊཀྐི་རཱ་ཛ། བདུད་ལེགས་ལྡན་གྱི་བུ་ཊཀྐད་ནག་པོ་བཅས་འཁོར་གྱི་གཙོ་བོ་བཞིས་བསྐོར་ནས་ཡོད། མགོན་འཁོར་རྣམ་བཞི་དེ་དག་ཐོག་མར་དུར་ཁྲོད་ཆེན་པོ་མུན་པ་མི་ཟད་པ་ཞེས་བྱ་བར་སློབ་དཔོན་ཆེན་པོ་དྷ་ན་ལེགས་སྦྱར་སྐད་ལ་བར་གཅོད་དུ་བྱུང་བ་སློབ་དཔོན་གྱིས་ཕྱག་རྒྱས་བཅིངས་པས། དེ་དག་གིས་སྲོག་སྙིང་དང་སྒྲུབ་ཚུལ་སློབ་དཔོན་ལ་གསུངས་པ། སློབ་དཔོན་གྱིས་གྲུབ་ཆེན་རཱ་ཧུ་ལར་གནང་། དེས་མཁས་གྲུབ་ཁྱུང་པོར་འཕན་ཡུལ་དུ་གནང་། མགོན་ནག་བར་ཆད་ཀུན་སེལ་འདི་ཉིད་ཀྱི་སྐུ་མདོག་དང་སྐུའི་རྣམ་འགྱུར་སོགས་ཀྱང་། མགོན་པོའི་སྒྲུབ་ཐབས་ལས་མྱུར་མཛད་ཡེ་ཤེས་མགོན་པོ་མཐིང་ནག་འབར། ཞལ་གཅིག་ཕྱག་དྲུག་སྤྱན་གསུམ་དམར་ལ་ཟླུམ། །ཞལ་གདངས་ལྗགས་འདྲིལ་འཇིགས་པའི་ང་རོ་བཞད། །སྨར་སྨིན་དབུ་སྐྲ་ཁམ་ནག་གྱེན་དུ་བརྗེས། །ལི་ཁྲིའི་ཐེག་ལེ་མི་བསྐྱོད་རྒྱལ་པོས་བརྒྱན། །དང་པོ་གཉིས་ཀྱིས་གྲི་གུག་ཐོད་ཁྲག་བསྣམས། །བར་པས་ཐོད་ཕྲེང་བགྲང་ཞིང་རྩེ་གསུམ་གསོར། །འོག་མས་ཌ་རུ་འཁྲོལ་ཞིང་ཞགས་པ་འཕེན། །མཉམ་པའི་སྟབས་ཀྱིས་བགེགས་ཀྱི་རྒྱལ་པོ་བརྫིས། །ཐོད་སྐམ་དབུ་རྒྱན་ཐོད་བརློན་དོ་ཤལ་མཛད། །སྟག་ལྤགས་ཤམ་ཐབས་དར་དང་རིན་པོ་ཆེ། །ཀླུ་ཆེན་བརྒྱད་དང་རུས་པའི་རྒྱན་དྲུག་མཛེས། །ཕྱག་ཞབས་དྲིལ་བུ་གཡེར་ཁའི་ཕྲེང་བ་འཁྲིལ། །སྡོམ་ཐུང་ལྟོ་བ་རྒྱས་ཤིང་ཡན་ལག་ཧྲག །བཟོད་དཀའི་གཟི་ལྡན་སྐལ་མེ་འབར་བའི་ཀློང༌། །ཙན་དན་སྡོང་པོར་སྐུ་རྒྱབ་བསྟེན་པའོ་ཞེས་པ་ལྟར་དང་། ཡང་ཕྱག་སོ་སོར་བསྣམས་པའི་ཕྱག་མཚན་དང་དེ་དག་གི་མཚོན་དོན་ཡང་ཕྱག་དྲུག་གཡས་ཀྱི་དང་པོ་ན། །གནམ་ལྕགས་འབར་བའི་གྲི་གུག་གིས། །དགྲ་བགེགས་འབྱུང་པོའི་སྲོག་རྩ་གཅོད། ཕྱག་དྲུག་གཡོན་གྱི་དང་པོ་ན། བྷན་ད་ཁྲག་གིས་གང་བ་བསྣམས། །དགྲ་བགེགས་ཀླད་ཁྲག་ཞལ་དུ་གསོལ། །ཕྱག་དྲུག་གཡས་ཀྱི་བར་པ་ན། །ཐོད་སྐམ་འབར་བའི་ཕྲེང་བ་འདྲེན། །འགྲོ་དྲུག་སེམས་ཅན་འདྲེན་པའི་རྟགས། །ཕྱག་དྲུག་གཡོན་གྱི་བར་པ་ན། །ཁ་ཊཱཾ་རྩེ་གསུམ་བསྣམས་པ་ནི། །འབྲས་བུ་སྐུ་གསུམ་བརྙེས་པའི་རྟགས་ཞེས་གསུངས་པ་ལྟར་རོ།
།སྤྱིར་མགོན་པོའི་སྐུ་ལུས་ཀྱི་རྣམ་པ་དང་བཞུགས་སྟངས་འདྲ་མིན་མང་དུ་ཡོད་ཀྱང་། ཤངས་ལུགས་ཀྱི་མགོན་པོ་ཕྱག་དྲུག་པའི་ཐུན་མིན་གྱི་ཁྱད་ཆོས་ནི་བི་ནཱ་ཡ་ཀ་མནོལ་བའི་གདན་སྟེང་ན། །དཀྲིག་དཀྲིག་ཞབས་ཀྱིས་དགྲ་བགེགས་ཐལ་བར་རློག །ཅེས་པ་ལྟར་ཞབས་གཉིས་དཀྲིག་དཀྲིག་ཏུ་ཡོད་པ་ཤངས་ཞོང་ཞོང་དགོན་དང་ཙཱ་འདྲ་རིན་ཆེན་བྲག་གི་མགོན་ཁང་བསིལ་བ་ཚལ་དུ་བཞུགས་པའི་མགོན་པོ་འདི་དག་གིས་མཚོན་ནོ།
II.4.1.2
།གཉིས། ཡེ་ཤེས་མགོན་པོའི་ཆོས་སྐོར་གྱི་འབྱུང་ཁུངས།
ཡེ་ཤེས་མགོན་པོའི་ཆོས་སྐོར་འདི་ཉིད་ཀྱི་འབྱུང་ཁུངས་སྨོས་པ་ལ། ཐོག་མར་རྒྱ་གར་འཕགས་པའི་ཡུལ་དུ་ཇི་ལྟར་བྱུང་ཚུལ་དང་། བར་ལ་བོད་དུ་ཇི་ལྟར་བསྒྱུར་ཚུལ། མཐའ་མར་མཁས་གྲུབ་ཁྱུང་པོའི་ལུགས་ཀྱི་མགོན་པོའི་ཆོས་སྐོར་དེ་གང་འདྲ་ཞིག་ཡིན་མིན་བཅས་གསུམ་གྱི་སྒོ་ནས་ཞིང་བ་ལ།
༡ འཕགས་ཡུལ་དུ་ཇི་ལྟར་བྱུང་ཚུལ།
ཡེ་ཤེས་མགོན་པོའི་ཆོས་སྐོར་འདི་ཉིད་འཕགས་ཡུལ་དུ་དར་ཚུལ་ལ་གསུངས་སྟངས་མི་འདྲ་བ་ཁག་གསུམ་ལས། (༡) རྒྱ་གར་འཕགས་པའི་ཡུལ་དུ་སངས་རྒྱས་སྐུ་མྱ་ངན་ལས་འདས་རྗེས་ལོ་དྲུག་བརྒྱར་ཉེ་བ་སོང་བ་ན། གྲུབ་ཐོབ་རི་ཁྲོད་མགོན་པོ་ཤ་ཝ་རི་པ་བསིལ་བའི་ཚལ་དུ་སྤྲོས་མེད་ཀྱི་ཏིང་འཛིན་ལ་བཞུགས་སྐབས་ཀྱི་ཐོ་རངས་ཤིག །ཌ་མ་རུའི་སྒྲ་དང་བཅས་ཡེ་ཤེས་ཀྱི་མགོན་པོ་འདི་ཉིད་མངོན་སུམ་དུ་བྱོན་ཏེ། ཉིད་ཀྱི་སྲོག་སྔགས་སྒྲུབ་ཐབས་མཐའ་དག་ཕུལ། དུས་དེ་ནས་ལོ་སྟོང་ཕྲག་ཙམ་སོང་བ་སྟེ། སྤྱི་ལོའི་དུས་རབས་བཅུ་པ་ཙམ་དུ་མངའ་བདག་མཻ་ཏྲི་པ་ཆེན་པོ་བི་ཀྲ་མ་ཤཱི་ལར་བཞུགས་དུས། བསྐྱེད་རིམ་ལ་བརྟན་པ་ཐོབ་ནས་ནུས་མཐུ་ཁྱད་པར་ཅན་རྙེད་ཀྱང་། གནས་ལུགས་ཀྱི་དོན་མ་རྟོགས་སྟབས་ལྷག་པའི་ལྷ་འདིར་གསོལ་བ་བཏབ་པས། ལྷོ་ཕྱོགས་དཔལ་གྱི་རི་ལ་སོངས་ཤིག་ཅེས་གསུངས་པ་དང་། རི་ཁྲོད་མགོན་པོས་རྗེས་སུ་འཛིན་པར་འགྱུར་བའི་ལུང་བསྟན་པ་ལྟར། ལྷོ་ཕྱོགས་དཔལ་གྱི་རི་ལ་ཕེབས་ནས་གྲུབ་ཐོབ་ཤ་ཝ་རི་པ་ལས་ཕྱག་རྒྱ་ཆེན་པོའི་གདམས་པ་མཐའ་དག་གསན་ཞིང་། གནས་ལུགས་ཀྱི་གཟིགས་པ་ནམ་མཁའ་དང་མཉམ་པར་གྱུར་རྗེས། ཟབ་དོན་གྱི་བསྟན་པ་སྤེལ་བར་བཀའི་གནང་བ་ཐོབ་ནས་བྱིན་གྱིས་བརླབས་པའི་ལྷ་བཞིའི་སྒྲུབ་ཐབས་བརྩམས། (༢) སྔར་དགེ་བསྙེན་ཞི་བའི་གོ་ཆ་ལྕགས་ཀྱི་བྱིན་པ་ཅན་ཞེས་གྲགས་པ་དེ་རི་བོ་པོ་ཏ་ལར་ལན་གསུམ་བྱོན། འཕགས་པ་སྤྱན་རས་གཟིགས་དངོས་སུ་ཞལ་མཇལ་ནས་ཕོ་བྲང་གཞལ་མེད་ཁང་དང་བཅས་པ་གཞན་ཀུན་བསྐོར་བ་དང་མཆོད་པ་བྱས། མཐའ་ན་ཁང་བཟང་ཆེན་པོ་སྒོ་ནམ་ཡང་མི་བྱེད་པ་ཞིག་འདུག་པ། དཔའ་བོ་མཁའ་འགྲོ་རྣམས་ལ་སྒོ་ཕྱེ་རོགས་ཞུས་པའི་ལན་དུ། འདི་སྒོ་ཕྱེ་ན་འཇིག་རྟེན་ཐམས་ཅད་དངངས་ཤིང་འཆི་བའམ། འཆི་བར་ཐུག་པར་འགྱུར་ཞེས་གསུངས་པས། འཕགས་པ་སྤྱན་རས་གཟིགས་ལ་གསོལ་བ་བཏབ་རྗེས། འཕགས་པའི་བཀའ་བཞིན་སྤྲུལ་པའི་ཕོ་ཉ་ཞིག་མངགས་ཏེ་སེམས་ཅན་སུ་ལའང་གནོད་པ་མེད་པའི་ངང་ལས་སྒོ་ཕྱེ། དེར་ཡེ་ཤེས་མགོན་པོ་འདི་དང་མཇལ། གསོལ་བ་བཏབ་པས་རྒྱུད་བྱིན་གྱིས་བརླབས། འཛམ་བུའི་གླིང་དུ་སེམས་ཅན་གྱི་དོན་དང་སངས་རྒྱས་ཀྱི་བསྟན་པ་བསྐྱོང་བ་ལ་འབྱོན་པར་ཞུ་ཞེས་གསོལ་བ་བཏབ་པ་ཞལ་གྱིས་བཞེས། དེ་ནས་དུར་ཁྲོད་ཆེན་པོ་བསིལ་བའི་ཚལ་གྱི་ཤིང་ནྱ་གྲོ་དྷའི་ཕུག་ཏུ་སྤྲུལ་པའི་སྐུར་རྟག་ཏུ་བཞུགས་པས་མགོན་པོ་ཤིང་ཕུག་ཅན་ཞེས་གྲགས་ལ་ཤིང་ལས་བྱོན་ནས་གཏོར་མ་ལེན་མཛད་པའི། །མགོན་པོ་ཕྱག་དྲུག་པ་ལ་ཕྱག་འཚལ་བསྟོད་ཅེས་པའི་གསུང་སྲོལ་དེ་ཡང་བྱུང་བ་ཡིན། དེ་རྗེས་ས་ར་ཧ་དང་ཤ་ཝ་རི་པས་དེའི་སྒྲུབ་ཐབས་མཛད་ཅེས་གྲགས་པ་འདི་ནི་པོ་ཏ་ལའི་ལམ་ཡིག་ཏུ་གྲགས་པའི་རྒྱུད་ལས་ཀྱང་པོ་ཏ་ལར་མགོན་པོ་འདི་བཞུགས་པར་གསུངས་པ་དང་མཐུན། (༣) འགའ་ཞིག་གིས་མགོན་པོ་འདི་དཔལ་ལྡན་འབྲས་སྤུངས་ཀྱི་མཆོད་རྟེན་ན་བཞུགས་པ། སློབ་དཔོན་ཀླུ་སྒྲུབ་དང་བྲམ་ཟེ་མཆོག་སྲེད་ཀྱིས་གདན་དྲངས་པར་ཡང་བཞེད། དེ་ཐམས་ཅད་ཀྱང་ཡུལ་དུས་གནས་སྐབས་སོ་སོ་ཡིན་པའི་ཕྱིར། ཐམས་ཅད་དོན་ལ་གནས་ཤིང་བདེན་པ་ཁོ་ན་ཡིན་པ་ཇོ་ནང་ཏཱ་ར་ནཱ་ཐས་བཞེད་དོ།།
༢ བོད་དུ་ཇི་ལྟར་བསྒྱུར་ཚུལ།
སྤྱིར་ཡེ་ཤེས་མགོན་པོའི་ཆོས་སྐོར་བོད་ཡིག་ཏུ་སྒྱུར་མཁན་གྱི་ལོ་ཙཱ་བ་ཡང་མཁས་གྲུབ་ཁྱུང་པོ་ཕུད་གཞན་གཙོ་བོ་གསུམ་བྱུང་བ་སྟེ། (༡) གྱི་ཇོ་ལོ་ཙཱ་བ་ཟླ་བའི་འོད་ཟེར་གྱིས་པཎྜི་ཏ་མི་མཉམ་རྡོ་རྗེའི་ཁོལ་པོ་ལ་གསན་ནས་ཤ་ཝ་རིའི་གཞུང་ཆུང་བསྒྱུར། དེ་ནི་བསྙེན་སྒྲུབ་ལས་གསུམ་གྱི་ཆོས་སྐོར་ཡིན་པར་གྲགས། (༢) གཉལ་སྟེང་པ་ལོ་ཙཱ་བ་ག་རོད་ཚུལ་ཁྲིམས་འབྱུང་གནས་ཀྱིས་པཎྜི་ཏ་ཤནྟ་ཨ་ཀ་ར་བསྟེན་ནས་མཁའ་འགྲོ་དྲུག་སྐོར་བསྒྱུར། (༣) ལོ་ཙཱ་བ་མགར་ཆོས་བཟང་གིས་པཎྜི་ཏ་ཨ་ཏ་ཡ་བཛྲ་ལས་གསན་ཏེ། ས་ར་ཧ་དང་ཤ་ཝ་རིའི་སྒྲུབ་ཐབས་སོགས་བསྒྱུར། འདིར་འཁྱུད་ཡུམ་ཡོད་མེད་གཉིས་ཀ་ཡོད་རུང་། འཁོར་མཁའ་འགྲོ་བཞིས་བསྐོར་བ་ཁོ་ན་ཡིན། འདི་ཉིད་ཁྱུང་པོའི་གདམས་ངག་དང་མཐུན་ཤས་ཆེ། འོན་ཀྱང་ལུགས་དེ་དག་ལ་བསྙེན་སྒྲུབ་ལས་གསུམ་མདོར་བསྡུས་ཏེ་ཆ་ཚང་བ་ཙམ་མ་གཏོགས་ཆོས་སྐོར་རྒྱས་པ་མེད་ལ། དེང་སང་ཆོས་རྒྱུན་ཡང་བཞུགས་མེད་པ་ཡིན། དེས་ན་མགོན་པོ་འདི་ལ་གཙོ་ཆེར་གྲུབ་ཆེན་ས་ཧ་རའི་ལུགས་དང་། ཤ་ཝ་རིའི་ལུགས་གཉིས་ཡོད་པ་ལས། ས་ར་ཧ་དང་ཤ་ཝ་རི་པའི་ལུགས་གཉིས་ཀ་མཻ་ཏྲི་པ་ལ་སོན། དེས་མཁས་གྲུབ་ཁྱུང་པོ་ལ་གནང་བས། ས་ཧ་རའི་རྒྱ་གཞུང་མཁས་གྲུབ་ཁྱུང་པོ་ཉིད་ཀྱིས་བསྒྱུར་བའང་ཡོད། ཡང་གྲུབ་ཆེན་རཱ་ཧུ་ལས་མཁས་གྲུབ་ཁྱུང་པོར་གནང་བ་སོགས་མགོན་པོའི་ཆོས་སྐོར་ཆ་ཚང་ལ་ཡོངས་སུ་རྫོགས་པ་མཁས་གྲུབ་ཁྱུང་པོ་ཉིད་ལ་མངའ་བའོ།
༣ མཁས་གྲུབ་ཁྱུང་པོས་ཇི་ལྟར་གདན་དྲངས་ཚུལ།
དེ་ཡང་མཁས་གྲུབ་ཁྱུང་པོ་རྣལ་འབྱོར་འཕགས་ཡུལ་དུ་ཕེབས་ཐེངས་གཉིས་པར། མཻ་ཏྲི་པ་ཀོ་ས་ལ་བི་ཀའི་དུར་ཁྲོད་ན་བཞུགས་པ་ལ་གསེར་སྲང་བདུན་ཕུལ་ནས་བོད་ལོངས་སྤྱོད་ཆུང་བས་ནོར་སྒྲུབ་མྱུར་ལ་ལྷག་ཚན་ཆེ་བ་ཞིག་ཞུ་བྱས་པས། མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་དེ་ཉིད་མཁས་གྲུབ་ཁྱུང་པོ་དང་དེའི་བརྒྱུད་པར་བཅས་པའི་ལྷ་སྐལ་ལ་གནང་བ་ཡང་། གསོལ་འདེབས་མོས་གུས་སྒྲ་དབྱངས་སུ་བླ་མ་ཡི་དམ་མཁའ་འགྲོ་ཆོས་སྐྱོང་ཀུན། །མྱུར་མཛད་ཡེ་ཤེས་མགོན་པོར་འདུས་པ་ཉིད། །སྐྱེ་དང་བརྒྱུད་པར་བཅས་པའི་ལྷ་སྐལ་དུ། དངོས་སུ་ཞལ་གཟིགས་ཁྱེད་ལ་གསོལ་བ་འདེབས་ཞེས་འཁོད་པ་ལྟར་རོ། །དེ་ནས་བཟུང་ཤངས་པའི་ཆོས་བརྒྱུད་འདི་ཉིད་ལ་ཉམས་སུ་བཞེས་མཁན་བླ་བརྒྱུད་གསེར་ཕྲེང་དང་། ཆོས་བདག་མཁའ་འགྲོ་སྡེ་ལྔ། ཆོས་སྐྱོང་ཡེ་ཤེས་མགོན་པོ་བཅས་ཆ་ཚང་བའི་མ་ལག་ལྟ་བུ་ཞིག་ཆགས་ཡོད། ཐོག་མར་དཔལ་ཤ་ཝ་རི་པས་མགོན་པོ་འདི་ཞལ་གཟིགས་ནས་ཡི་གེར་བཀོད་པའི་སྒྲུབ་ཐབས་རྣམས་ཀྱང་མཁས་གྲུབ་ཁྱུང་པོས་རྒྱ་གར་ནས་བོད་དུ་ཆ་ཚང་བར་གདན་འདྲེན་མཛད། དེས་མ་ཚད་མཁས་གྲུབ་ཁྱུང་པོས་འཕན་ཡུལ་ལན་པའི་སྤྱིལ་བུར་གདམས་ངག་སྒོ་སྐྱེལ་དུ་བྱོན་པའི་གྲུབ་ཆེན་རཱ་ཧུ་ལའི་དྲུང་ནས་མགོན་དཀར་ཡིད་བཞིན་ནོར་བུའི་ཆོས་སྐོར་དང་མགོན་པོ་ཤིང་ཕུག་ཅན་གྱི་གདམས་པ་སོགས་མངའ་བདག་མཻ་ཏྲི་པ་ལ་མི་བཞུགས་པའི་གདམས་པ་ཡང་མང་དུ་ཞུས། ལྷག་པར་མགོན་པོ་ཤིང་ཕུག་ཅན་གྱི་གདམས་པ་མཁས་གྲུབ་ཁྱུང་པོར་གནང་བ་དེ་ནི་གྲུབ་ཆེན་རཱ་ཧུ་ལ་ཉིད་བོད་དུ་བྱོན་པའི་རྒྱུ་མཚན་གསུམ་གྱི་གྲས་ཀྱང་ཡིན།
ཡེ་ཤེས་མགོན་པོའི་སྒྲུབ་ཐབས་བླ་མ་བརྒྱུད་པའི་གསོལ་འདེབས་སུ་ཡང་། རྒྱ་གར་བརླན་ཤས་ཆེ་བས་དཔེ་རྣམས་རུལ་གྱིས་དོགས་ནས་ཕྱིང་བ་ནག་པོའི་བེའུ་བུམ་གཅིག །དེའི་ཕྱི་ལ་རས་ཀྱི་བེའུ་བུམ་གཅིག །དེའི་ཕྱི་ལ་གྲོ་ག་ནག་པོའི་བེའུ་བུམ་གཅིག་སྟེ། བེའུ་བུམ་ནག་པོ་གསུམ་སྒྲིལ་གྱི་ནང་དུ་གདན་དྲངས་ཏེ་བྱོན་པས་ཕྱག་དྲུག་ཡེ་ཤེས་ཀྱི་མགོན་པོའི་ཆོས་སྐོར་རྣམས་ལ་བེའུ་བུམ་ནག་པོའི་ཆོས་སྐོར་ཞེས་ཀྱང་གྲགས་ལ། ཤངས་ཆོས་ཀྱི་ཡིག་ཆ་རྣམས་སུ་མཁས་གྲུབ་དགེ་ལེགས་དཔལ་བཟང་གིས་ཕྱོགས་བསྒྲིགས་མཛད་པའི་མཁས་གྲུབ་བེའུ་བུམ་དུ་གྲགས་པ་ཡང་མཁས་གྲུབ་ཁྱུང་པོས་ཐོག་མར་ཆོས་སྐོར་འདི་ཉིད་སྤྱན་དྲངས་སྐབས་གོང་གསལ་ལྟར་མཛད་པས་སོ། །སྤྱིར་མགོན་པོའི་གསང་བའི་མན་ངག་བེའུ་བུམ་དཀར་ནག་གཉིས་ཡོད་པ་ལས། འདི་ནི་བེའུ་བུམ་ནག་པོ་དུག་ལྟ་བུའི་མན་ངག་ཆིག་བརྒྱུད་མ་ཡིན་པས་སྦྱིན་པའི་སྲོལ་མེད་ཅེས་བེའུ་བུམ་ནག་པོའི་ཆོས་སྐོར་རྣམས་ནི་ཆིག་བརྒྱུད་བཀའ་རྒྱ་ཅན་གྱི་ཟབ་ཆོས་ཉག་གཅིག་ཡིན། ད་དུང་འགའ་ཞིག་གིས་བེའུ་བུམ་ཁྲ་བོ་གཅིག་ཡོད་པར་གསུངས་ཀྱང་། མཁས་གྲུབ་ཐམས་ཅད་མཁྱེན་པས་བེའུ་བུམ་ཁྲ་བོ་ཟུར་པ་གཅིག་ཡོད་པ་ཡིན་ན། དེ་ནི་བདག་གི་ཐོབ་པ་རྣམས་ལ་ཡང་མི་སྣང་ངོ་ཞེས་མཁས་གྲུབ་རྗེས་མགོན་པོའི་ཆོས་སྐོར་རྣམས་བརྒྱུད་པ་རྣམ་དག་དང་ཁུངས་བཙན་གྱི་བླ་མ་བཅུ་ཙམ་ལ་གཏུགས་ཀྱང་གསན་མ་མྱོང་བར་གསུངས་པའི་ཕྱིར་མུ་མཐུད་དཔྱད་བྱའི་གནས་ཡིན། གཞན་ཡང་ལྷ་བཞི་དྲིལ་སྒྲུབ་དང་། མཁའ་སྤྱོད་སུམ་ཕྲུགས་སོགས་ཀྱང་ཡེ་ཤེས་མགོན་པོ་འདི་དང་འབྲེལ་བའི་ཟབ་ཆོས་ཁྱད་པར་ཅན་ཡིན།
མདོར་ན། ཇོ་ནང་ཏཱ་ར་ནཱ་ཐས་མགོན་པོ་འདིའི་ཆོས་སྐོར་རྒྱས་ཤིང་ཟབ་ལ་བཅོས་ལྷད་དང་བྲལ་བ་བྱིན་རླབས་ཀྱི་གཟི་བྱིན་འགྲན་ཟླ་མེད་ཅིང་ས་སྟེང་ཐམས་ཅད་ལ་ཁྱབ་པའི་ཕྲིན་ལས་ཀྱི་དཔལ་འབྱོར་རྒྱས་པ་ནི་མཁས་གྲུབ་ཁྱུང་པོ་རྣལ་འབྱོར་པའི་ལུགས་འདི་ཁོ་ན་ཡིན་ ཞེས་དང་། མཁས་གྲུབ་རྗེས་གྱི་ཇོ་ཟླ་བའི་འོད་ཟེར་གྱིས་རྒྱ་གར་དུ་ཞུས་ཏེ་འཁྱེར་བྱོན་པ་ལ་སོགས་པའི་ལུགས་གཞན་ཡང་སྣང་མོད་ཀྱང་། ད་ལྟ་དེ་དག་ནས་བརྒྱུད་པ་སོགས་བྱེད་པ་ཆེར་མི་སྣང་ཞིང་། ཤངས་པ་ནས་བརྒྱུད་པ་འདི་ཉིད་མཆོག་ཏུ་གནང་ཞེས་པ། ཞ་ལུ་བ་བློ་གསལ་བསྟན་སྐྱོང་གིས་ཆོས་སྐྱོང་མགོན་པོ་དེ་ལ་མཉམ་མེད་ཤངས་པ་བཀའ་བརྒྱུད་པ་འདིའི་ཕྱག་བཞེས་དང་། བོད་ཀྱི་ལྷ་མིན་འདྲེ་མིན་བསྟེན་པའི་ལུགས་མི་གཅིག །གྲུབ་ཐོབ་གཙང་བརྒྱུད་ཀྱི་སྲོལ་སྐྱོང་བ་ཁྱུང་པོ་རྣལ་འབྱོར་གྱི་ཆོས་ལུགས་ཡིན་ཞེས་གསུངས་པ་སོགས་སྔོན་བྱོན་མཁས་གྲུབ་རབ་དང་རིམ་པས་གསུང་དབྱངས་གཅིག་ཏུ་བསྒྲིལ་ནས་བསྔགས་པ་མཛད་པ་བཞིན། མཁས་གྲུབ་ཁྱུང་པོས་གདན་དྲངས་པའི་ཡེ་ཤེས་མགོན་པོའི་ཆོས་སྐོར་འདི་ཉིད་ནི་གདམས་པའི་གནད་ཟབ་ལ་མན་ངག་གི་ཁུངས་འཛོམས་པས་བརྒྱུད་པ་གཞན་ཐམས་ཅད་ལས་ཁྱད་པར་དུ་འཕགས་པའོ།
II.4.1.3
།གསུམ། ཤངས་ལུགས་ཀྱི་མགོན་པོ་ཕྱག་དྲུག་པའི་སྒྲུབ་ཐབས་བརྒྱུད་ཚུལ།
ཇི་སྐད་དུ་བླ་མ་མགོན་པོ་དབྱེར་མེད་ལ་གསོལ་བ་འདེབས་སོ། །དྲིན་ཆེན་རྩ་བའི་བླ་མ་ལ་གསོལ་བ་འདེབས་སོ། །ཁྱབ་བདག་རྡོ་རྗེ་འཆང་ཆེན་པོ་ལ་གསོལ་བ་འདེབས་སོ། །དཔལ་ལྡན་ཤ་ཝ་རི་དབང་ཕྱུག་ལ་གསོལ་བ་འདེབས་སོ། །མངའ་བདག་མཻ་ཏྲི་པ་ཆེན་པོ་ལ་གསོལ་བ་འདེབས་སོ། །གྲུབ་ཆེན་རཱ་ཧུ་ལ་ཆེན་པོ་ལ་གསོལ་བ་འདེབས་སོ། །མཁས་གྲུབ་ཁྱུང་པོ་རྣལ་འབྱོར་ལ་གསོལ་བ་འདེབས་སོ། །མཉམ་མེད་རིན་ཆེན་བརྩོན་འགྲུས་ལ་གསོལ་བ་འདེབས་སོ་ཞེས་པ་སོགས་ལས་གསལ་བ་ལྟར་ན། དེ་ཉིད་ཀྱི་སྒྲུབ་ཐབས་ཀྱི་བརྒྱུད་པའི་རྩ་བ་རྒྱལ་བ་རྡོ་རྗེ་འཆང་ལ་གཏུགས་ཤིང་། དེ་ནས་རིམ་བཞིན་དཔལ་ལྡན་ཤ་ཝ་རི་དབང་ཕྱུག་དང་མངའ་བདག་མེ་ཏྲི་གུཔྟ། གྲུབ་ཆེན་རཱ་ཧུ་ལ་གུཔྟ་བཛྲ། མཁས་གྲུབ་ཁྱུང་པོ་རྣལ་འབྱོར། རྨོག་ལྕོག་པ་རིན་ཆེན་བརྩོན་འགྲུས། རྟོགས་ལྡན་ཞང་སྒོམ་ཆོས་སེང་། དབོན་སྟོན་སྐྱེར་སྒང་པ། གཉན་སྟོན་སྦས་པའི་རྣལ་འབྱོར། འགྲོ་མགོན་སངས་རྒྱས་སྟོན་པ། མཁས་གྲུབ་ཤངས་སྟོན་ཆོས་རྗེ། ཁྱུང་པོ་ཚུལ་ཁྲིམས་མགོན་པོ། བྱ་བྲལ་རི་ཁྲོད་རས་ཆེན། མཁྱེན་ལྡན་ཤངས་པ་དཀར་པོ། མཉམ་མེད་སངས་རྒྱས་དཔལ་བཟང་། གྲུབ་ཆེན་ནམ་མཁའ་རྒྱལ་མཚན། རྒྱ་སྒོམ་ལེགས་པ་རྒྱལ་མཚན། རྗེ་བཙུན་ཀུན་དགའ་གྲོལ་མཆོག །ཆོས་སྐུ་ལྷ་དབང་གྲགས་པ། རྗེ་བཙུན་ཏཱ་ར་ནཱ་ཐ། རྒྱལ་ཚབ་རིན་ཆེན་རྒྱ་མཚོ། རྒྱལ་ཚབ་ཡེ་ཤེས་རྒྱ་མཚོ། མཁས་གྲུབ་བློ་གྲོས་རྣམ་རྒྱལ། ཆོས་རྗེ་ངག་དབང་འཕྲིན་ལས། ཆོས་རྗེ་ཀུན་བཟང་དབང་པོ། རིག་འཛིན་ཚེ་དབང་ནོར་བུ། བཀའ་བརྒྱུད་འཕྲིན་ལས་ཤིང་རྟ། བསྟན་འཛིན་ཆོས་ཀྱི་ཉི་མ། བཀའ་བརྒྱུད་འཕྲིན་ལས་རྣམ་རྒྱལ། པདྨ་ཉིན་བྱེད་དབང་པོ། རྒྱལ་སྲས་བློ་གྲོས་མཐའ་ཡས། མཁན་ཆེན་བཀྲ་ཤིས་འོད་ཟེར། གྲུབ་མཆོག་ནོར་བུ་དོན་གྲུབ། ཀརྨ་རང་བྱུང་ཀུན་ཁྱབ། ཁྱུང་པོ་ཚུལ་ཁྲིམས་མགོན་པོ་འཕྲིན་ལས་ཀུན་ཁྱབ་དཔལ་བཟང་པོ་སོགས་ལ་བརྒྱུད་པ་ཡོངས་གྲགས་ཆེ་ཡང་། བླ་མ་བརྒྱུད་པའི་ལོ་རྒྱུས་ཉུང་ངུ་ཞེས་པའི་ནང་། མཁས་གྲུབ་ཤངས་སྟོན་ཡན་གོང་དང་མཚུངས་པ་ལ། མཁས་གྲུབ་ཤངས་སྟོན་གྱིས་ཆོས་རྗེ་མུས་ཆེན་དང་། དེས་དགེ་བཤེས་རྡོ་རྗེ་གཞོན་ནུ། དེས་ནམ་མཁའི་རྣལ་འབྱོར། དེས་མཁས་གྲུབ་དགེ་ལེགས་དཔལ་བཟང་། དེས་ཆོས་རྗེ་རིན་པོ་ཆེ་ཆོས་ཀྱི་རྒྱལ་མཚན་དཔལ་བཟང་པོ། དེས་ཀུན་དགའ་དགེ་ལེགས་བཅས་ལ་བརྒྱུད་པ་ཞིག་ཀྱང་བཀོད་འདུག་ཤངས་པ་བཀའ་བརྒྱུད་ཀྱི་མྱུར་མཛད་ཡེ་ཤེས་མགོན་པོའི་ཆོས་སྐོར་ནི་མཁས་གྲུབ་ཁྱུང་པོས་མངའ་བདག་མེ་ཏྲི་པ་དང༌། རཱ་ཧུ་ལ་གུཔྟ། པཎྜི་ཏ་རོལ་པའི་རྡོ་རྗེ་སོགས་ལས་མཐའ་ཡས་པ་གསན་ཞིང་། རྨོག་ལྕོག་པ་རིན་ཆེན་བརྩོན་འགྲུས་སོགས་སློབ་མ་རྣམས་ལ་མང་དུ་བསྩལ་བས་ཤངས་པའི་བརྒྱུད་འཛིན་ཀུན་གྱི་ཆོས་སྐྱོང་གཅིག་པུར་སོང་སྟབས་བཀའ་སྲོལ་མཐའ་ཀླས་པ་ཡོད་མོད། གཙོ་ཆེ་བ་ལ་སྟོད་པ་དཀོན་མཆོག་མཁར་ནས་བརྒྱུད་པ་སྟོད་ལུགས་སམ་གནས་རྙིང་ལུགས་དང་། དབོན་སྟོན་སྐྱེར་སྒང་པས་རྨོག་ལྕོག་པ་རིན་ཆེན་བརྩོན་འགྲུས་དང་རྟོགས་ལྡན་ཞང་སྒོམ་ཆོས་སེང་གཉིས་ཀར་གསན་ནས་སངས་རྒྱས་གཉན་སྟོན་སོགས་ལ་བརྒྱུད་པ་སྨད་ལུགས་སམ་རི་གོང་ལུགས་སུ་གྲགས་པ་གཉིས་བྱུང༌། མགོན་པོ་སྟོད་ལུགས་པ་ལ་མགོན་པོ་ཕྱག་སྟོང་སྤྱན་སྟོང་གི་སྐོར་མང་པོ་དང་། དབུ་ཞལ་ཉེར་གཅིག །རྒྱུད་ལེ་བརྒྱད་མ། ལེའུ་བཅུ་གཉིས་མ། མདོས་ཆོག་ལ་སོགས་པ་རྣམས་རྒྱ་གར་ནས་དར་མིན་ངེས་པར་དཀའ་ཡང་། བྱིན་རླབས་ཀྱི་སྒོ་ནི་རྒྱ་ཆེན་པོ་ཡོད་པར་སྣང་། དེའི་སྲོལ་འཛིན་རྣམས་མགོན་པོའི་བསྙེན་སྒྲུབ་ལས་གསུམ་ཁོ་ན་གཙོ་བོར་བྱེད་ཅིང་། ངེས་པ་དོན་གྱི་མཐུ་བོ་ཆེ་དང་མཐུ་ཆེན་དུ་རློམས་པ་ཡང་མང་དུ་བྱུང་། སྔར་གྱི་དུས་སུ་ལུགས་འདི་དར་རྒྱས་ཆེ་ཡང་། དེང༌སང་ཆོས་རྒྱུན་མ་ཆད་ཙམ་ལས་མེད། སྨད་ལུགས་པ་ལ་མགོན་པོ་སྐུ་མདོག་ནག་པོ་གཙོ་རྐྱང་དང་། ལྕམ་དྲལ། ལྷ་གསུམ། དྲེགས་པ་སྡེ་ལྔས་བསྐོར་བ། རྒྱན་ཅན་ལྷ་ལྔ། ལྷ་བཅུ་གསུམ་པ། ས་ར་ཧའི་ལུགས། སྟོད་ལུང་པའི་མགོན་པོ་ལྷ་དགུ་ལ་སོགས་ཡོད་ལ། གཞན་ཡང་ལྗང་གུ་དྲག་སྒྲུབ་དང་། སེར་པོ་དྲག་སྒྲུབ། ལྷ་མོའི་སྒོས་སྒྲུབ། འཁོར་གྱི་སྒོས་སྒྲུབ། རྟེན་བཞི། གནད་གསུམ་ལ་སོགས་པ་མཆོག་སྒྲུབ་དང་ལས་ཚོགས་ཤིན་ཏུ་མང་བ་ཡོད་དེ། ཁུངས་དང་ལྡན་པ་རྩོད་མེད་ཤ་སྟག་ཡིན། དེའི་སྲོལ་འཛིན་རྣམས་ནི་ཟབ་མོའི་ཆོས་ཀྱིས་རྒྱུད་གྲོལ་བས་རྣམ་ཐར་གཙང་མ་སྐྱོང་མཁན་ཤ་སྟག་ཡིན། སྟོད་སྨད་ཀྱི་ལུགས་གཉིས་ཀར་སྤྱི་མཐུན་དུ་ཡོད་པའི་མན་ངག་ནི། གནད་ལ་འབེབས་པ་ཕྱི་ནང་དང་། གྲིབ་སེལ་ཕྱི་ནང་། བླ་མ་མགོན་པོ་དབྱེར་མེད་ཀྱི་གསོལ་འདེབས་སོགས་སོ།
།མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་འདི་ཉིད་སྒྲུབ་སླ་ཞིང་མཐུན་པའི་དངོས་གྲུབ་མྱུར་དུ་སྩོལ་བ། བཅོལ་བའི་འཕྲིན་ལས་འཕྲལ་དུ་སྒྲུབ་པ། བགེགས་ཀྱི་བར་ཆད་མ་ལུས་སེལ་བ། མི་ནོར་ཟས་གསུམ་ཀུན་ལ་ཕན་པ། སྒྲུབ་པ་པོ་ལ་བུ་བཞིན་གཟིགས་པ། དམ་ཚིག་ཅན་ལ་དངོས་གྲུབ་སྟེར་བ་སོགས་ཀྱི་ཡོན་ཏན་མཐའ་ཡས་པ་མངའ་བ་ལས། གཙོ་ཆེར་དྲག་པོ་མཐུ་སྒྲུབ་དང་ཞི་བ་ནོར་སྒྲུབ་གཉིས་ཀྱི་སྒོ་ནས་འཕྲིན་ལས་བསྒྲུབས་པའི་ལོ་རྒྱུས་མང་དུ་ཡོད་པ་སྟེ། རི་གོང་པ་ཆེན་པོས་ཚེས་བཅུའི་ཚོགས་འཁོར་གྱི་སྐབས་སུ་རང་གི་སློབ་མ་རྣམས་ལ་བཞེངས་པའི་རྡོ་རྗེའི་མགུར་དུ་ཆོས་སྐྱོང་ཡེ་ཤེས་མགོན་པོ་དང་། ལས་མགོན་ཀྵེ་ཏྲ་པཱ་ལ་ཡོད། །སངས་རྒྱས་བསྟན་པ་སྲུང་བའི་ཕྱིར། །བྲན་བཞིན་ཉན་པས་བློ་རེ་བདེ་ཞེས་གསུངས་པ་ལྟར། སྔར་གྱི་དུས་སུ་མཁས་གྲུབ་ཁྱུང་པོ་རྣལ་འབྱོར་སོགས་བརྒྱུད་པའི་བླ་མ་མང་པོར་ཆོས་སྐྱོང་བའི་ཡེ་ཤེས་ཀྱི་སྤྱན་དང་ལྡན་པའི་མགོན་པོ་འདིས་བྲན་བཞིན་དུ་སྤྲུལ་པ་སྣ་ཚོགས་སུ་བཀྱེ་ནས་དྲག་པོས་འདུལ་བ། བར་དོ་ལས་སྐྱོབ་པ། དགོས་འདོད་འབྱུང་བ་བཅས་རྣམ་པ་གསུམ་གྱི་སྒོ་ནས་འཕྲིན་ལས་ལན་མང་དུ་སྒྲུབ་པ་སྟེ། དབོན་སྟོན་སྐྱེར་སྒང་པ་ལྷ་ཕུ་ལྐུགས་ལུང་དུ་རྨོག་ལྕོག་པ་མཇལ་བར་ཕེབས་སྐབས་མགོན་པོའི་སྤྲུལ་པས་བསུ་བ་མཛད་པ་དང་། མྱང་ཆོས་འབྱུང་དུ་ཕྱག་དྲུག་ཡེ་ཤེས་མགོན་པོ་དངོས་སུ་བྱོན་ཞབས་གཅིག་གུར་ཅོག་རྩེ་ལ་བཞག་ནས་ཐུགས་ཟེམ་མི་འཚལ། དགོན་པ་གནས་སྙིང་འདི་ང་རང་གིས་བདག་གཉེར་བྱེད་གསུང་བ་ལ་སོགས་གནས་སྙིང་དགོན་པ་འདི་གཞན་སྤྱི་དང་གཏན་མི་འདྲ་སྟེ། ཡེ་ཤེས་མགོན་པོ་ཕྱག་དྲུག་པས་བདག་མཛད། མཁན་པོ་དབང་རིན་པ་དགུང་ལོ་བརྒྱད་ཅུ་སྐོར་ལ་དབུ་སྐྲ་ནག་པོར་སོང་བ་དང་ཟད་པར་ཏིང་ངེ་འཛིན་ལ་མངའ་བརྙེས་ཤིང་རླུང་སེམས་དབང་དུ་འདུས་ཞེས་འཁོད་པ་སོགས་དེ་མིན་གྱི་ལོ་རྒྱུས་གཞན་ཡང་མང་དུ་མཆིས་ཀྱང་འདིར་ཡིག་ཚོགས་ལ་འཇིགས་ནས་མ་བྲིས་སོ།
།གཞན་ཡང་ཡེ་ཤེས་མགོན་པོའི་ཆོས་སྐོར་ལས་རྡོ་རྗེ་ནག་པོ་ཆེན་པོའི་དབང་ཆོག་དང༌། མགོན་དམར་དབང་གི་རྒྱལ་པོའི་རྗེས་གནང་གི་ཡི་གེ་ཆིག་བརྒྱུད་མ། ཚེ་བདག་མགོན་པོའི་སྒོ་ནས་ཚེ་དབང་བྱེད་ཐབས་ཆིག་བརྒྱུད་བཀའ་རྒྱ་མ་རིན་ཆེན་བརྩོན་འགྲུས་ལ་གདམས་པའི་གསེར་ཆོས། སྒྲུབ་ཐབས་དགོས་པ་ཀུན་འབྱུང་གདམས་ངག་གི་རྒྱལ་པོ་སོགས་ནི་ཆོས་དྲུག་ལྟར་གྱི་ཆིག་བརྒྱུད་བཀའ་རྒྱ་མའི་ཆོས་ཡིན་ལ། གཞན་རྣམས་ཀྱང་བཀའ་ཤིན་ཏུ་དོག་པར་འདུག་པ་ཡང་། མཁས་གྲུབ་ཤངས་སྟོན་གྱིས་ཐོག་མར་མགོན་པོའི་དབང་བཀའ་ཞུ་བ་ཕལ་ཆེ་བར་གནང་བ་དང་། ཕྱིས་བཀའ་དམ་པོ་མཛད་སྟབས་སློབ་མ་རྣམས་ཀྱིས་ཅི་ལགས་ཞུས་པས་མགོན་པོའི་འཁོར་ཡིན་པ་འདྲ། ཨ་ཙ་ར་བཞི་བྱུང་ནས་ཁྱོད་ཁོང་པའི་ཁྲག་ཐམས་ཅད་མི་ལ་སྟེར་བ་ཡིན་ནམ་ཟེར་བ་ཞིག་བྱུང་ཞེས་གསུངས་ནས། ཆོས་གཤའ་མ་བྱེད་པ་འགའ་ཤས་ལ་བྱིན། ཞུ་བ་བྱུང་ཚད་ལ་མ་བྱིན་པ་ཡིན། དེས་ན་རྡོ་ནག་པོ་ཆེན་པོའི་དབང་གི་ཆོ་གའི་མཇུག་ཏུ་བླ་མ་རྭ་ཧུ་ལའི་གདམས་པ་ཁྱད་པར་ཅན། བདག་ཁྱུང་པོ་རྣལ་འབྱོར་གྱིས་ཉམས་སུ་མྱོང་བར་བྱས་པ་འདི། ཆིག་བརྒྱུད་བཀའ་རྒྱ་མ་ཤིན་ཏུ་ཟབ་པའི་ཆོས་ཡིན་པས། གསང་བ་གཅེས་ཤིང་། དཔེ་མ་འཆུགས་པ་གལ་ཆེའོ་ཞེས་དང་། མགོན་པོའི་ལས་ཚོགས་རྣམས་ཀྱི་ཟུར་འདེབས་ཞལ་ཤེས་ལས་དབང་དང་གདམས་པ་མ་ཐོབ་པར། དཔེ་སྟོན་རང་དགར་འཇུག་བྱེད་ན། །མགོན་པོ་གཏིང་ནས་འཁྲུགས་གྱུར་པས། །རང་སྲོག་རང་གིས་མ་གཅོད་ཅིག །མཁས་གྲུབ་ཁྱུང་པོ་རྣལ་འབྱོར་གྱིས། །ལ་སྟོད་དཀོན་མཁར་དེ་ཉིད་ལ། །སྙན་བརྒྱུད་བཀའ་རྒྱས་གདམས་ནས་གནང་། །སུ་ལའང་དཔེ་ཙམ་མ་སྟོན་ཅིག་ཅེས་སོགས་འཁོད་པ་ལྟར། མགོན་པོའི་ཆོས་སྐོར་འདི་ཉིད་ཤངས་པའི་གདམས་པ་གཞན་འགའ་ཞིག་དང་འདྲ་བར་བཀའ་ཤིན་ཏུ་དོག་པར་འདུག་པས་ཁོ་བོར་རྨོངས་ཚོད་ཀྱིས་བརྗོད་པའི་སྤོབས་པ་མེད་སྟབས། ཞིབ་པར་མཁྱེན་འདོད་ན་དགོས་ངེས་ཀྱི་སྒྲིག་རིམ་བཞིན་ཤངས་ལུགས་ཀྱི་ཁུངས་བཙན་ཡིག་ཆ་སྟེ། རྒྱ་གཞུང་སྐོར་དཔལ་ལྡན་ཤ་ཝ་རི་པས་མཛད་པའི་བེའུ་བུམ་གྱི་དཀར་ཆག །མགོན་པོ་ཕྱག་དྲུག་པའི་ལོ་རྒྱུས་སོགས་དང་། བོད་གཞུང་ལ་མཚོན་ན། མཁས་གྲུབ་ཁྱུང་པོ་རང་གིས་མཛད་པའི་ནག་པོ་ཆེན་པོའི་སྒྲུབ་ཐབས་ཆིག་བརྒྱུད་བཀའ་རྒྱ་མ་དབང་ཆོག་དང་བཅས་པ་ཞེས་པ་དང་། ཁོང་གིས་བླ་མ་མཻ་ཏྲི་པ་ལ་གསེར་སྲང་བདུན་ཕུལ་ནས་ཞུས་པའི་མགོན་པོའི་གནད་འབེབས་དངོས་གྲུབ་ཀུན་འབྱུང་སོགས། དེ་མིན་མགོན་པོ་སྨད་ལུགས་ཀྱི་བེའུ་བུམ་མཁས་གྲུབ་དགེ་ལེགས་དཔལ་བཟང་གིས་བསྒྲིགས་པ་དར་ཁྱབ་ཆེ་བ་དེ་དང་། གྲུབ་ཆེན་ཆོས་འབྱུང་རིན་ཆེན་གྱིས་མཛད་པའི་ལེགས་ལྡན་ཕྱག་དྲུག་པའི་སྒྲུབ་མཆོད་རིན་ཆེན་ཕྲེང་བ་ཇོ་ནང་ཏཱ་ར་ནཱ་ཐས་མཛད་པའི་ཡི་དམ་རྒྱ་མཚོའི་སྒྲུབ་ཐབས་རིན་ཆེན་འབྱུང་གནས་སོགས་བཞུགས་པ་རྣམས་ལ་གཟིགས་པར་འཚལ།
II.4.1.4 The Master and Protector Inseparable
བཞི། བླ་མ་མགོན་པོ་དབྱེར་མེད་ཀྱི་ཁྲིད།
སྤྱིར་ན་མཁས་གྲུབ་ཁྱུང་པོ་རྣལ་འབྱོར་མན་གྱི་ཤངས་པའི་ཆོས་བརྒྱུད་འཛིན་པ་རྣམས་ལ་བླ་མ་མགོན་པོ་དབྱེར་མེད་ཀྱི་གདམས་ངག་ཉམས་ལེན་གནང་སྲོལ་ཡོད་ཅེས་གཞུང་འགའ་ཞིག་ཏུ་གསུངས་ཀྱང་། དཔལ་ནག་པོ་ཆེན་པོའི་རྒྱུད་ལེའུ་བརྒྱད་པར་མགོན་པོ་ཕྱག་དྲུག་པ་འདི་ལ་ཡིད་ཆེས་པར་གྱིས་ལ་བླ་མ་དང་མགོན་པོ་དབྱེར་མེད་དུ་ལྟོས་ཞེས་དང་། ད་དུང་བླ་མ་དང་ནག་པོ་ཆེན་པོའི་སྒྲུབ་ཐབས་ལས་བླ་མ་མགོན་པོ་དབྱེར་མེད་འདི། མི་རབས་བདུན་ལས་མ་སྤེལ་ཅིག་ཅེས་འཁོད་པ་བཞིན་རིན་ཆེན་བདུན་བརྒྱུད་སྔ་མའི་སྐབས་མི་རབས་བདུན་དུ་ཆིག་བརྒྱུད་ལས་མ་སྤེལ་བའི་གདམས་པ་དེ་དག་མངའ་བདག་མཻ་ཏྲི་པ་ས་མཁས་གྲུབ་ཁྱུང་པོར་གསུངས་པ་དེའི་ཐོག་ནས་བླ་མ་མགོན་པོ་དབྱེར་མེད་ཀྱི་བཀའ་སྲོལ་དེ་མཁས་གྲུབ་ཁྱུང་པོའི་སྐུ་དུས་རང་དུ་ཡོད་པ་མཚོན།
དེ་ཡང་ཡེ་ཤེས་གསལ་བ་སྒྲོན་མེའི་རྒྱུད་ལས་མཚན་དང་དཔེ་བྱད་ལྡན་པའི་ལྷ། །བསྐལ་བ་སྟོང་དུ་བསྒོམ་པ་བས། །བླ་མ་དྲན་པ་བསོད་ནམས་ཆེ། །ལྷ་སྐུ་མ་བསྒོམ་བླ་མ་བསྒོམས། །ལྷ་སྐུ་བྱེ་བ་སྟོང་བསྒོམས་པས། །བླ་མ་བསྒོམ་པ་བསོད་ནམས་ཆེ་ཞེས་པ་དང་། ཡེ་ཤེས་མངོན་འབྱུང་ལས་ས་དང་ལམ་གྱི་རིམ་པ་རྣམས། །བླ་མའི་མོས་གུས་ལོ་ཟླས་བགྲོད། །བླ་མའི་སྣང་བ་མ་བྲལ་ན། །སངས་རྒྱས་རྣམས་ཀྱང་འབྲལ་མེད་གནས་ཞེས་གསུངས་པ་ལྟར། སྤྱིར་དྭགས་པོ་བཀའ་བརྒྱུད་དང་འདྲ་བར་ཤངས་པ་བཀའ་བརྒྱུད་པའི་ལུགས་སུ་རྩ་བའི་བླ་མས་མེ་ལ་ཆུ་དང་ཆུ་ལ་མེ་གསུངས་ཀྱང་དེ་ལ་ཐེ་ཚོམ་དང་ལོག་ལྟ་སྤུ་ཙམ་མི་བྱེད་པར་རྡོ་རྗེའི་གསུང་དུ་གོ་ན་རྟེན་འབྲེལ་འགྲིག་པར་གསུངས་པ་སྟེ། དཔེར་ན་སྔར་བླ་མ་བུར་སྒོམ་ནག་པོའི་ཕྱུགས་ཤུན་བྲག་རུམ་པས་འཁྱེར་བས། བླ་མས་ཆོས་རྗེ་རྨོག་ལྕོག་པར་ངས་ལས་སུ་ཆོས་བྱས། དོན་དུ་ལྷ་གཉེར་ནས་མི་ཚེ་ཆོས་ལ་བསྐྱལ་བ་ཡིན་ཏེ། ཕྱུགས་དུམ་དགྲས་ཁྱེར་ད་ང་ལ་མཐུ་ནི་མེད། རིན་ཆེན་བརྩོན་འགྲུས་ཁྱོད་ཀྱིས་སེར་བ་ཐོང་ཞིག་ཅེས་གསུངས་པ་བཞིན་ཆོས་རྗེ་རྨོག་ལྕོག་པས་ཀྱང་དབྱར་ཉི་ཁྲོས་ཀྱི་སེར་བ་གྱང་རིམ་གསུམ་ཙམ་ཕབ་པས་མི་ཕྱུགས་མང་པོ་ཤི། ལོ་ཏོག་གཅིག་ཀྱང་མ་ལྷག །བྲག་རུམ་པས་ཕྱུགས་རྣམས་ཚུར་གཏད། ཆོས་རྗེ་རྨོག་ལྕོག་པས་སེར་བས་མི་ཕྱུགས་མང་པོ་བསད་པ་དང༌། བྱིའུ་ཤི་བའི་རོ་ལུད་ཕུང་ཙམ་འདུག་པ་གཟིགས་ཏེ་འགྱོད་གདུང་སྐྱོ་ཤས་དྲག་པོས་རབ་ཏུ་མནར། འོན་ཏེ་བླ་མ་བུར་སྒོམ་ནག་པོས་ཁྱོད་ཀྱིས་བླ་མ་དང་བསྟན་པའི་ཆེད་དུ་བྱས་པས་སྡིག་པ་ཅི་ཡང་མི་ཡོང་བའི་སྟེང་དུ། ས་ལམ་མང་པོ་བགྲོད་པ་ཡིན་ཞེས་གསུངས། དེ་ལྟར་ལྷ་སྐུ་བསྒོམ་པ་བས་བླ་མ་བསྒོམ་པ་བསོད་ནམས་ཆེ་བ་དང་། ས་ལམ་གྱི་རིམ་པ་རྣམས་ཀྱང་བླ་མར་མོས་གུས་བྱེད་པ་ཁོ་ནར་བརྟེན་ནས་བགྲོད་དགོས་པ་ཡིན་པས་བླ་མ་རྩེ་གཅིག་ཏུ་སྒོམ་པ་དང་། དེ་ལ་མོས་གུས་རྩེ་གཅིག་ཏུ་བྱེད་པ་ནི་སངས་རྒྱས་འགྲུབ་པའི་མྱུར་ལམ་ཉག་གཅིག་ཡིན།
བླ་མགོན་དབྱེར་མེད་ཀྱི་གདམས་པ་འདི་ཉམས་སུ་ལེན་པར་ཐོག་མར་བླ་མ་མགོན་པོ་དབྱེར་མེད་ལ། །བདག་ནི་དད་པས་གསོལ་འདེབས་ཀྱིས། །བདག་དང་སེམས་ཅན་ཐམས་ཅད་ཀྱི། །ཉོན་མོངས་མ་ལུས་བསལ་བ་དང་། དངོས་གྲུབ་མ་ལུས་སྩལ་དུ་གསོལ་ཞེས་མོས་གུས་དང་ལྡན་པའི་སྒོ་ནས་གསོལ་བ་དྲག་ཏུ་བཏབ་པར་བྱ་ལ། དེ་རྗེས་ཇོ་ནང་ཏཱ་ར་ནཱ་ཐས་ཕ་དྲིན་ཅན་རྩ་བའི་བླ་མ་དང༌། །མྱུར་མཛད་ཡེ་ཤེས་མགོན་པོ་གཉིས། །མཚན་ཐ་དད་དོན་ལ་ཁྱད་པར་མེད་ཅེས་གསུངས་པ་ལྟར། མགོན་པོ་ཉིད་བླ་མ། བླ་མ་ཉིད་མགོན་པོ། བླ་མ་མགོན་པོ་དབྱེར་མེད་དུ་བསྒོམ་པར་བྱ་ལ། རྗེ་བཙུན་རྨོག་ལྕོག་པ་སྐུ་མྱ་ངན་ལས་འདའ་ཁར་ཡང་འགྲོ་འཆག་ཉལ་འདུག་ཐམས་ཅད་དུ། །ཅིར་སྣང་བླ་མ་ལམ་དུ་ཁྱེར། །བཀའ་དྲིན་སོམས་ལ་གསོལ་བ་ཐོབ། །ང་དང་འབྲལ་བ་མེད་དོ་བུ་ཞེས་དང་། དཔལ་ཤ་ཝ་རི་པས་བླ་མ་མགོན་པོ་དབྱེར་མེད་འདི་མ་ཡེངས་པར་ཟླ་བ་བདུན་བསྒོམ་ན་དེ་ཉིད་དུ་སངས་རྒྱས་པར་བྱེད་ ཅེས་གསུངས་པ་སོགས་ལྟར། ཡེ་ཤེས་ལ་སྒྲིབ་པ་བྲལ་བ། ནུས་མཐུ་ལ་ཐོགས་པ་མེད་པ། ཐུགས་རྗེ་ལ་ཕྱི་བཤོལ་སྤངས་པ། བྱིན་རླབས་ལ་ཉེ་རྒྱང་མེད་པའི་དཔལ་ཡེ་ཤེས་ཀྱི་མགོན་པོ་ཕྱག་དྲུག་པ་དང་། རང་གི་དྲིན་ཆེན་རྩ་བའི་བླ་མའི་སྐུའི་རྣམ་འགྱུར། གསུང་གི་འདུ་བྱེད། ཐུགས་ཀྱི་འདས་མ་འོངས་པའི་རྣམ་མཁྱེན་གཉིས་དབྱེར་མེད་དུ་བསྒོམས་ཏེ། དུས་ཐུང་ནང་འཚང་རྒྱ་བར་བྱེད་པའི་ཚིག་བརྒྱུད་ཀྱི་གདམས་ངག་ཅིག་ཡིན་པས་རྗེས་གནང་དང་མན་ངག་མ་ཐོབ་པ་ལ་མི་བསྟན་ནོ་ཞེས་གསལ་བས་དེ་ཙམ་གྱིས་ཆོག་པར་བྱ་ལ་ཞིབ་པར་མཁྱེན་འདོད་ཚེ། ངེས་གཏན་གྱི་སྒྲིག་རིམ་བཞིན་ལུང་སྟོང་སྨྱོན་པས་གཙང་གི་རི་བོ་ཆེར་སྦྱར་བའི་བླ་མ་མགོན་པོ་དབྱེར་མེད་ཀྱི་ཁྲིད་ཡིག་ཅིག་བཞུགས་པ་སོགས་དེ་དག་ལས་ཤེས་པར་བྱའོ།

II.4.2 - The Five Tantra Classes and the Gyuma Lamrim
།གཉིས་པ། ཤངས་པའི་རྒྱུད་སྡེ་ཆེན་པོ་ལྔ་དང་སྒྱུ་མ་ལམ་རིམ།
ཤངས་པ་བཀའ་བརྒྱུད་ཀྱི་རིང་ལུགས་འདི་ལ་ཁྱད་འཕགས་ཀྱི་གདམས་པ་མཐའ་ཡས་པ་ཞིག་ཡོད་པ་ལས། ལྷ་སྐུ་ཀུན་གཅིག་ཏུ་བསྡུས་པའི་རྒྱུད་སྡེ་ལྔ་དང་། སྒྲུབ་པའི་ལམ་གྱི་རིམ་པ་གསལ་བར་སྟོན་པའི་སྒྱུ་མ་ལམ་རིམ་གྱི་སྐོར་འཆད་པ་ལ།
II.4.2.1 The Five Tantra Classes
གཅིག ཤངས་པའི་རྒྱུད་སྡེ་ཆེན་པོ་ལྔ།
སྤྱིར་རྒྱུད་སྡེ་ཆེན་པོ་ལྔ་ནི་སངས་རྒྱས་ཆོས་ལུགས་ཀྱི་གྲུབ་མཐའ་ཚང་མར་ཡོད་ཀྱང་། འདིར་འཇིགས་བྱེད་ཆོས་འབྱུང་དུ་རྒྱལ་དབང་བསོད་ནམས་རྒྱ་མཚོས་རྗེ་ཕྱོགས་ལས་པ་ལས་ཤངས་པའི་རྒྱུད་སྡེ་ལྔའི་དབང་སོགས་ཤངས་ཆོས་སྐོར། བདེ་མཆོག་ནག་པོ་བའི་དབང་རྣམས་རྫོགས་པར་གསན་ཞེས་དང༌། ཐུའུ་བཀྭན་གྲུབ་མཐར་ཤངས་ཆོས་གཙོ་བོར་གྱུར་པ་ནི། བདེ་མཆོག །ཀྱེ་རྡོར། མ་ཧཱ་མ་ཡ། གསང་འདུས། རྡོ་རྗེ་འཇིགས་བྱེད་དེ་རྒྱུད་སྡེ་ལྔ་སོ་སོའི་དབང་ཞེས་འཁོད་པ་ལྟར། སྐབས་འདིར་ཡང་ཤངས་པའི་རྒྱུད་སྡེ་ལྔ་ཞེས་པའི་ཐ་སྙད་བཀོལ་སྤྱོད་བྱ་རྒྱུ་ཡིན། དེ་ཡང་སངས་རྒྱས་ཀྱིས་གདུལ་བྱ་འདོད་ཆགས་ཀྱིས་དབྱེ་བས། བྱ་བ་དང་སྤྱོད་པ། རྣལ་འབྱོར། རྣལ་འབྱོར་བླ་ན་མེད་པའི་རྒྱུད་བཅས་བཞི་རུ་གསུངས་པ་ལས། འདིར་བརྗོད་པའི་ཟབ་མོའི་ལམ་འདི་དག་ནི་རྣལ་འབྱོར་ཆེན་པོ་བླ་ན་མེད་པའི་རྒྱུད་ལས་འཕྱུང་བ་ཡིན། རྒྱུད་སྡེ་ལྔ་པོ་འདི་དག་ཀྱང་ཐོག་མར་དཔལ་ལྡན་འབྲས་སྤུངས་ཀྱི་མཆོད་རྟེན་དུ་བཞུགས་པ་སྟེ་སྒྱུ་མའི་རང་སྣང་མ་འགགས་རྩལ། དཔལ་ལྡན་འབྲས་སྤུངས་མཆོད་རྟེན་ན། །སྟོང་གསལ་སྒྱུ་འཕྲུལ་དྲྭ་བ་ལ། །རྒྱུད་སྡེ་ལྔ་ཡི་ལྷ་ཞེས་གྲགས་ཞེས་གསུངས་པ་བཞིན། རྒྱུ་རིན་པོ་ཆེ་བཞིའམ་ལྔ་ལས་གྲུབ་པའི་དཔལ་ལྡན་འབྲས་སྤུངས་ཀྱི་མཆོད་རྟེན་གྱི་ཤར་སྒོ་ཕྱེ་བས་དབུས་ན་གསང་བ་འདུས་པ་དང་། ཤར་ན་དགྱེས་མཛད་རྡོ་རྗེ། ལྷོ་ན་བདེ་མཆོག །ནུབ་ཏུ་མ་ཧཱ་མ་ཡ། བྱང་དུ་རྡོ་རྗེ་འཇིགས་བྱེད་བཅས་ཡོད་པ་དེ་དག་ཀྱང་དགྱེས་རྡོར་གྱི་སྐུ་གསུང་ཐུགས་ཡོན་ཏན་འཕྲིན་ལས་ལྔ་ལས་བྱུང་བ་སྟེ། དགྱེས་མཛད་ཀྱི་སྐུའི་སྣང་བ་ལ་གསང་འདུས། གསུང་ལས་མ་ཧཱ་མ་ཡ། ཐུགས་ལས་དགྱེས་མཛད། ཡོན་ཏན་ལ་བདེ་མཆོག །འཕྲིན་ལས་ལ་རྡོ་རྗེ་འཇིགས་བྱེད་བཅས་ཤར་བའི་སྣང་བ་ཡིན་པས། རིན་ཆེན་རྒྱ་མཚོའི་རྒྱུད་དུ་རྒྱལ་བ་གཅིག་བསྒོམས་སངས་རྒྱས་ཀུན་གྱི་རང་། །སངས་རྒྱས་ཐམས་ཅད་རིགས་ལྔའི་རང་བཞིན་ནོ་ཞེས་གསུངས་པ་བཞིན་དགྱེས་རྡོར་གྱི་ལྷ་གཅིག་བསྒོམ་པས། རྒྱུད་སྡེ་ལྔའི་ལྷ་ཚོགས་དང་རྒྱལ་བ་ཐམས་ཅད་བསྒོམ་པར་འགྲོ་བ་ཡིན། མཁས་གྲུབ་ཁྱུང་པོས་བདེ་མཆོག་དང་དགྱེས་པ་རྡོ་རྗེ། མ་ཧཱ་མ་ཡ། གསང་འདུས། རྡོ་རྗེ་འཇིགས་བྱེད་བཅས་ཀྱི་སྒྲུབ་ཐབས་མང་དུ་གསན་པ་ཡང་། འཕགས་ཡུལ་དུ་ཕེབས་ཐེངས་དང་པོར་བཻ་རོ་ཙ་ན་ལས་གསང་བ་འདུས་པ་ལྷ་སུམ་ཅུ་རྩ་གཉིས་དང་། ཧེ་བཛྲ་ལྷ་བཅུ་གསུམ། འཁོར་ལོ་སྡོམ་པ་ལྷ་བཅུ་གསུམ། མ་ཧཱ་མ་ཡཱ་ལྷ་ལྔ། རྡོ་རྗེ་འཇིགས་བྱེད་ལྷ་བཅུ་གསུམ། ལྷ་ལྔའི་སྒོ་ནས་དབང་བསྐུར་ཞིང་བྱིན་གྱིས་བརླབས་པ་སོགས་དང་། ཕེབས་ཐེངས་གཉིས་པར་རྡོ་རྗེ་གདན་དུ་བླ་མ་རྡོ་རྗེ་གདན་པ་ཆེན་པོ་ལ་དཔལ་ལྡན་གསང་བ་འདུས་པ་དང་། སྙིང་པོ་མ་ཧཱ་མ་ཡཱ་སྟེ་གནས་པ་རྩ། གཡོ་བ་རླུང་། བཀོད་པ་བྱང་ཆུབ་སེམས་ཀྱི་གདམས་ངག་དང་ལྡན་པ། ཡང་སྙིང་དགྱེས་པ་རྡོ་རྗེ། དཔལ་ལྡན་འཁོར་ལོ་བདེ་མཆོག །དྲག་པོ་རྡོ་རྗེ་འཇིགས་བྱེད་བཅས་རྒྱུད་སྡེ་ཆེན་པོ་ལྔའི་དབང་དང་སྒྲུབ་ཐབས། བླ་མ་མཻ་ཏྲི་པ་ལ་དགྱེས་རྡོར་མཚན་བརྗོད་སོགས་དང་། མཁའ་འགྲོ་ནི་གུ་མ་ལས་རྒྱུད་སྡེ་ལྔའི་དབང་དང་སྒྲུབ་ཐབས་ཀྱི་གདམས་པ། ཇོ་བོ་རྗེ་ལས་གསང་འདུས་དང་འཇིགས་བྱེད། གྲུབ་ཆེན་རཱ་ཧུ་ལ་ལས་རྒྱུད་སྡེ་ཆེན་པོ་ལྔའི་དབང་བསྐུར་དང་། དེ་རྗེས་རྒྱུད་སྡེ་སོ་སོའི་དབང་བཞི་རྫོགས་རེ། དགྱེས་རྡོར་སྒྲུབ་ཐབས་མཚོ་སྐྱེས་རྡོ་རྗེ། བདེ་མཆོག་ལུ་ཡི་པ། མ་ཧཱ་མ་ཡཱ་ཀུ་ཀུ་རི་པའི་ཆོས་བདུན་སོགས་རྒྱུད་སྡེ་ཆེན་པོ་ལྔའི་དབང་དང་སྒྲུབ་ཐབས་མཐའ་ཡས་པ་གསན།
སྤྱིར་མཁས་གྲུབ་ཁྱུང་པོ་འདི་ཉིད་རྒྱུད་སྡེ་སོ་སོར་གྲུབ་པའི་རྩེ་མོར་སོན་པ་ཡང༌། དཔྱིད་དུས་ཀྱི་ཐོ་རངས་ཤིག་ལ་མཁའ་འགྲོ་མ་མང་པོས་ཁྱོད་ཀྱི་ལུས་ངག་ཡིད་གསུམ་ལྟེ་བ་གསང་གནས་དང་ལྔ། རྒྱུད་སྡེ་ལྔའི་ལྷ་ཚོགས་དང་དབྱེར་མེད་དུ་གྱུར་ཅིང་། རང་གཞན་ཐམས་ཅད་ཀྱིས་མངོན་སུམ་དུ་མཐོང་ནས་རང་དང་དབྱེར་མེད་དུ་གྱུར་ཏོ་ཞེས་དང་། གྲུབ་ཐོབ་ཨ་མོ་གྷས་དེ་ཡི་ལུས་ནི་བདེ་མཆོག་འཁོར་ལོ་སྟེ། །གསུང་ནི་མ་ཧཱ་མ་ཡའི་བདག་ཉིད་འགྱུར། ཐུགས་ནི་དཔལ་ལྡན་དགྱེས་པ་རྡོ་རྗེ་སྟེ། །སྤྲུལ་པའི་གནས་མཆོག་གསང་བ་འདུས་པ་ལ། །གསང་གནས་བདེ་སྐྱོང་གཤིན་རྗེ་གཤེད་དུ་འགྱུར། །དཀྱིལ་འཁོར་དེ་རྣམས་ལུས་ལ་བཀོད་ནས་ཀྱང༌། གདུལ་བྱ་རྣམས་ལ་དངོས་སུ་སྟོན་པར་བྱེད་ཅེས་ལུང་བསྟན་པ་བཞིན། མཁས་གྲུབ་ཁྱུང་པོས་སྤྱི་བོར་བདེ་མཆོག་(སྐབས་འགར་གསང་འདུས་)དང་ཐུགས་ཀར་དགྱེས་པ་རྡོ་རྗེ། མགྲིན་པར་མ་ཧཱ་མ་ཡ། ལྟེ་བར་གསང་འདུས། (སྐབས་འགར་བདེ་མཆོག་)གསང་གནས་སུ་རྡོ་རྗེ་འཇིགས་བྱེད་བཅས་རྒྱུད་སྡེ་ཆེན་པོ་ལྔ་སྐུའི་གནས་ལྔར་བསྣུན་མཁྱེན་པ་མ་ཟད། སྐུ་གདུང་ཞུགས་འབུལ་ཞུ་སྐབས་སུ་ཡང་སྤུར་སྦྱངས་པས་རྒྱུད་སྡེ་ལྔའི་ལྷ་ཚོགས་དང་། ལྷ་བཞི་ལ་སོགས་པའི་སྐུ་གཟུགས། རིང་བསྲེལ། དུང་གཡས་ཁྱིལ་ལ་སོགས་པའི་རྟེན་མང་པོ་བྱོན་ཞེས་འཁོད་པ་ལྟར་ཡིན། ལྷག་པར་དུ་བདེ་མཆོག་དྲིལ་བུ་ལུགས་ཀྱི་ལྷ་ལྔ་དང་། ལུ་ཡི་པའི་ལུགས་ཀྱི་ལྷ་དྲུག་ཅུ་རྩ་གཉིས། མཻ་ཏྲི་ལུགས་ཀྱི་ལྷ་བཅུ་གསུམ་སོགས་བདེ་མཆོག་གི་ཆོས་སྐོར་མང་པོར་གསན་བསམ་དཔྱིས་ཕྱིན་པ་མཛད་པས། ནི་གུ་ལུགས་ཀྱི་བདེ་མཆོག་ལྷ་ལྔའི་དཀྱིལ་མཆོག་ཏུ་ཡང་ཁྱབ་བདག་དང་པོའི་སངས་རྒྱས་རྡོ་རྗེ་འཆང་། །རྡོ་རྗེ་བཙུན་མོ་དཔལ་གྱི་ནི་གུ་མ། མཁས་གྲུབ་ཆེན་པོ་ཁྱུང་པོ་རྣལ་འབྱོར་ལ། །རྣམ་དག་བདུད་རྩིའི་མཉེས་བྱེད་དམ་པ་ཕུལ་ཞེས་ཕྱག་དང་མཆོད་པའི་གཏང་རག་ཀྱང་ཕུལ་ཡོད་པ་སོགས་ཀྱིས་མ་རྒྱུད་འཁོར་ལོ་བདེ་མཆོག་འདི་ཉིད་མཁས་གྲུབ་ཁྱུང་པོའི་ཡི་དམ་གྱི་གཙོ་བོར་གྱུར་པ་མཚོན། བླ་མ་ཤངས་པའི་ཡི་དམ་གྱི་གནས་ལྕོག་པོ་རྩེར་བདེ་མཆོག་གི་རང་བྱོན་ཡོད་ལ། ཞོང་ཞོང་དགོན་གྱི་རྒྱབ་རི་ལ་བདེ་མཆོག་གི་དཀྱིལ་འཁོར་རང་བྱོན་ཡོད་པ་སོགས་ཀྱིས་གཙོས་པའི་ཤངས་པ་བཀའ་བརྒྱུད་ཀྱི་དགོན་གནས་གལ་ཆེན་མང་པོར་བདེ་མཆོག་དང་འབྲེལ་བ་དམ་ཟབ་ཡོད། དེར་བརྟེན་ཤངས་པ་བཀའ་བརྒྱུད་ཀྱི་རིང་ལུགས་ནི་བླ་མ་ཁྱུང་པོའི་བྱིན་རླབས། ཡི་དམ་བདེ་མཆོག་གི་དངོས་གྲུབ། ཆོས་སྐྱོང་མགོན་པོའི་འཕྲིན་ལས་བཅས་ཟུང་དུ་འབྲེལ་བ་ལ་བརྟེན་པའི་ཆོས་བརྒྱུད་ཅིག་ཡིན། གཞན་ཡང་མཁས་གྲུབ་ཁྱུང་པོའི་རྣམ་ཐར་གྱི་ལྷན་ཐབས་ལས་བླ་མ་ཤངས་པ་འདི་རྒྱུད་སྡེ་ལྔ་ལས་ཁྱད་པར་དུ་གསང་འདུས་ཀྱི་གྲུབ་ཐོབ་ཡིན་ཅིང་ཐུགས་རྩིས་ཆེ་སྟེ། རྒྱ་གར་ན་སངས་རྒྱས་ཀྱིས་དངོས་སུ་གསུངས་པའི་རྒྱུད་རྩོད་མེད་གསང་འདུས་དང་འཇམ་དཔལ་ལས་མེད་གསུངས་ཞེས་འཁོད་པ་ལྟར། སངས་རྒྱས་དངོས་ཀྱིས་གསུངས་པའི་རྒྱུད་ཀྱི་རྒྱལ་པོ་གསང་བ་འདུས་པ་ལ་མངའ་བརྙེས་པའི་གྲུབ་ཐོབ་གཅིག་ཀྱང་ཡིན་པས། གྲུབ་ཐོབ་རྩོད་མེད་ཁྱུང་པོ་རྣལ་འབྱོར་འདི་ཉིད་རྒྱུད་རྩོད་མེད་ཕ་ཐབས་ཀྱི་རྒྱུད་པ་གསང་བ་འདུས་པ་དང་། མ་ཤེས་རབ་ཀྱི་རྒྱུད་པ་འཁོར་ལོ་བདེ་མཆོག་གཉིས་ཟུང་དུ་འབྲེལ་བའི་གྲུབ་པ་རྒྱ་མཚོའི་ཕ་མཐར་སོན། གཞན་ཡང་འཇིགས་བྱེད་རྭ་སྐྱོ་ཞང་གསུམ་དང་། གཉོས་ལུགས། མལ་ལུགས། བ་རིའི་ལུགས། ཁྱུང་པོའི་ལུགས། མི་ཏྲིའི་ལུགས་སོགས་དར་བའི་ཁོངས་སུ་ཡང་ཁྱུང་པོའི་ལུགས་ཤིག་ལོགས་སུ་ཡོད། དེས་ན་མི་གང་དང་སུ་ཞིག་གིས་ཤངས་པའི་རྒྱུད་སྡེ་ལྔ་དེ་དག་ཉམས་སུ་བླངས་པས་ཕན་ཡོན་སོགས་ཀྱང་འདི་ལ་རྟགས་མི་འབྱུང་མི་སྲིད། ལོ་གསུམ་ན་དག་པ་བདེ་སྟོང་གི་མཁའ་སྤྱོད་དུ་མི་འགྲོ་མི་སྲིད་དོ། ལོ་ཟླས་སངས་རྒྱས་མི་ཐོབ་མི་སྲིད་དོ་ཞེས་དང༌། མཁས་གྲུབ་ཁྱུང་པོ་སྐུ་འདའ་ཁར་ཡང་རྨོག་ལྕོག་པ་ལ་རྒྱུད་སྡེ་ལྔ་པོ་འདིས་ལོ་གསུམ་ལ་མི་འགྲུབ་མི་སྲིད་ཅེས་གསུངས་པ་སོགས་ལས་ཤེས་པར་བྱའོ།
།ཞར་ལ་ཞུ་རྒྱུར། མཁས་གྲུབ་ཁྱུང་པོ་རྣལ་འབྱོར་འདི་ཉིད་ལ་འཕགས་བལ་གྱི་མཁས་གྲུབ་དུ་མ་ལས་བརྒྱུད་པའི་བདེ་མཆོག་གི་ཆོས་སྐོར་མང་དུ་ཡོད་མོད་ཀྱང་། བདེ་མཆོག་དྲིལ་བུ་ལུས་དཀྱིལ་གྱི་བླ་བརྒྱུད་གསོལ་འདེབས་སུ་མཁའ་སྤྱོད་ལམ་བཟང་གསལ་མཛད་ནཱ་རོ་པ། །མཁའ་སྤྱོད་ས་ལ་མངོན་གཤེགས་ཕམ་ཐིང་མཆེད་ཅེས་དང་། བདེ་མཆོག་ལྷ་ལྔའི་བླ་བརྒྱུད་གསོལ་འདེབས་སུ་ཐབས་ཤེས་མན་ངག་མཛོད་འཛིན་ཕམ་ཐིང་པ་ཞེས་པ། ཡང་ལུ་ཡི་པའི་ལུགས་ཀྱི་བརྒྱུད་འདེབས་སུ་ལམ་འདིར་གྲུབ་བརྙེས་ཕམ་མཐིང་སྐུ་མཆེད་ལ། །གསོལ་བ་བདེབས་སོ་མཆོག་ཐུན་དངོས་གྲུབ་བསྩོལ་ཞེས་སོགས་འཁོད་པ་བཞིན་བདེ་མཆོག་དྲིལ་བུ་ལུས་དཀྱིལ་དང་། ལྷ་ལྔ། ལུ་ཡི་པ་སོགས་ཀྱི་བླ་བརྒྱུད་གསོལ་འདེབས་རྣམས་སུ་ཕམ་ཐིང་པའི་མཚན་གསལ་བར་འཁོད་ཡོད། བལ་པོ་ཕམ་ཐིང་པ་ནི་མཁས་གྲུབ་ཁྱུང་པོའི་འཕགས་བལ་གྱི་བླ་མ་བརྒྱ་དང་ལྔ་བཅུའི་གྲས་ཤིག་ཡིན་ལ། མཁས་གྲུབ་ཁྱུང་པོས་འཕགས་ཡུལ་དུ་ཕེབས་ཐེངས་གཉིས་པར་བླ་མ་ཆེན་པོ་འདི་ཉིད་དང་མཇལ་ནས་མ་རྒྱུད་བདེ་མཆོག་རྩ་རྒྱུད་དང་གདན་བཞི་སོགས་ཞུས་མྱོང་བ་ནི་མཛད་རྣམ་ཁག་ཏུ་གསལ་བར་འཁོད་ཡོད་པས། ཕམ་ཐིང་པ་ཆེན་པོ་ལས་བརྒྱུད་པའི་བདེ་མཆོག་གི་དབང་བཀའ་འགའ་མཁས་གྲུབ་ཁྱུང་པོ་ལ་ཡང་མངའ་བ་ཡིན། དེ་མིན་མཁས་གྲུབ་ཁྱུང་པོ་འདི་ཉིད་གསང་བ་འདུས་པ་ལ་གྲུབ་ཐོབ་ཏུ་གྱུར་པ་གོང་གི་ལུང་ཚིག་དེར་གསལ་ཡང་རྒྱལ་ཚབ་དར་མ་རིན་ཆེན་གྱིས་མཛད་པའི་དགེ་ལྡན་པའི་གསང་འདུས་བླ་བརྒྱུད་གསོལ་འདེབས་སོགས་སུ་མཁས་གྲུབ་ཁྱུང་པོའི་མཚན་དངོས་སུ་འཁོད་མེད། འོན་ཏེ་དེ་ཉིད་ལས་དངོས་དང་བརྒྱུད་པའི་རྗེ་བཙུན་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས་ཞེས་གསལ་བ་ལྟར་བླ་བརྒྱུད་དངོས་ཀྱི་ཁོངས་སུ་མཚན་བརྗོད་མེད་ཀྱང་བརྒྱུད་པའི་བླ་མ་གཞན་རྣམས་ཀྱི་ཁོངས་སུ་གཏོགས་པ་ནི་སྨོས་མེད་རེད།
II.4.2.2 The Gyuma Lamrim
གཉིས། ཤངས་པའི་སྒྱུ་མ་ལམ་རིམ།
བསྟན་པ་ཕྱི་དར་ལ་བཀའ་དྲིན་ལྷག་པར་ཆེ་ཞིང་སངས་རྒྱས་བསྟན་པའི་མིག་རྒྱན་ལྟ་བུར་གྱུར་པ། མཁས་གྲུབ་ཀྱི་རྒྱལ་པོ་ཁྱུང་པོ་རྣལ་འབྱོར་གྱི་བཀའ་སྲོལ་ལས་བྱོན་པའི་ཤངས་པ་བཀའ་བརྒྱུད་པ་རྣམས་ལ་མདོ་སྔགས་བཤད་སྒྲུབ་ཀྱི་ལུགས་སྲོལ་རྒྱ་མཚོ་ལྟར་གཏིང་དཔོག་དཀའ་ཞིང་འཆད་ཉན་སྒོམ་སྒྲུབ་ཀྱི་འཕྲིན་ལས་པདྨ་ལྟར་རྒྱས་པ་དེ་དག་ལ་བཀའ་བརྒྱུད་ཀྱི་བཀའ་བབས་བཞི་སྟེ། ཕ་རྒྱུད་གསང་བ་འདུས་པའི་བཀའ་བབས། མ་རྒྱུད་འཁོར་ལོ་བདེ་མཆོག་གི་བཀའ་བབས། རྨི་ལམ་དང་བར་དོའི་གདམས་ངག་གི་བཀའ་བབས། འཕོ་བ་དང་འོད་གསལ་གྱི་བཀའ་བབས་རྣམས་ཀྱང་ཡོངས་སུ་ཚང་བ་ཡིན། སྤྱིར་སངས་རྒྱས་ཆོས་ལུགས་ཀྱི་གྲུབ་མཐའ་གང་ཞིག་ཡིན་རུང་རང་རང་གི་གྲུབ་མཐའི་སྲོལ་འབྱེད་པ་དང་རྗེས་འཛིན་པ་རྣམས་ཀྱིས་རྒྱལ་བའི་བཀའ་དང་འགྲེལ་མཛད་ཀྱི་བསྟན་བཅོས་རྣམས་ཀྱི་དགོངས་པ་གཞི་རྐང་དུ་བཞག་སྟེ་དྲང་དོན་སྟོན་ཐབས་ལ་ཁྱད་པར་ཅུང་ཟད་མངའ་ཡང་ངེས་དོན་གཅིག་ཏུ་བབས་པ་སྟེ། གནས་སྐབས་མངོན་མཐོ་དང་མཐར་ཐུག་ངེས་ལེགས་ཀྱི་གོ་འཕང་ཐོབ་པར་བྱེད་པའི་ལམ་གྱི་བགྲོད་ཚུལ་མ་ནོར་བར་སྟོན་པ་ལྟར་ཤངས་པ་བཀའ་བརྒྱུད་ཀྱང་དེ་ལས་མ་འདས། ཡང་མདོ་ལུགས་ཀྱི་ཕར་ཕྱིན་ཐེག་པའི་སྐབས་རྒྱལ་ཚབ་བྱམས་པ་མགོན་པོའི་མངོན་རྟོགས་རྒྱན་སོགས་སུ་ཐོག་མར་བྱང་ཆུབ་སེམས་བསྐྱེད་ནས་འགོ་བརྩམས་ཏེ། བར་དུ་རྟོགས་བྱའི་ཆོས་ཐམས་ཅད་ཀྱི་གནས་ལུགས་རྟོགས་པའི་ཐབས་ལ་རིམ་གྱིས་འབད་དེ། མཐར་ཐུག་ཇི་ལྟ་བ་དང་ཇི་སྙེད་པའི་ཤེས་བྱ་ཐམས་ཅད་མངོན་སུམ་དུ་རྟོགས་པའི་རྣམ་མཁྱེན་གྱི་གོ་འཕང་ཐོབ་པར་བྱེད། འོན་ཀྱང་སྐབས་འདིར་འཆད་པར་བྱ་བའི་ཤངས་པའི་སྒྱུ་མ་ལམ་རིམ་ནི་མདོ་ལུགས་ཀྱི་ལམ་རིམ་དེ་རྣམས་དང་མི་འགལ་ཡང་། གང་ཟག་གཅིག་འཚང་རྒྱ་བར་བྱེད་པ་ལ་ལམ་གྱི་བགྲོད་ཚུལ་མ་ནོར་བར་བསྟན་པ་རྣམ་ཀུན་གཙོ་ཆེར་གསང་སྔགས་ཀྱི་སྒོམ་རིམ་ཆ་ནས་འཇོག་པ་ཡིན། སྤྱིར་ཤངས་ལུགས་ལ་ལམ་རིམ་གྱི་རྣམ་གྲངས་བསྟན་པའི་སྐབས་ཐོག་མར་བཤད་པ་དང་། རྩོད་པ། སྒྲུབ་པའི་ལམ་རིམ་གསུམ་དུ་བསྡུ་ཞིང་དེ་དག་གསུམ་པོའི་ནང་ནས་ཆེས་གལ་འགངས་ཆེ་བ་ཕྱི་མ་སྒྲུབ་པའི་ལམ་རིམ་ལ་ནི་གུ་མ། སུ་ཁ་སིདྡྷི། རྡོ་རྗེ་གདན་པ། མཻ་ཏྲི་པ་། རཱ་ཧུ་ལའི་སྐོར་ལྔ། མན་ངག་ཐོར་བུ་དང་བཅས་པ་སོགས་བཞུགས་པ་ལས། འདིར་ནི་གུ་མས་མཛད་པའི་སྒྱུ་མ་ལམ་རིམ་ལ་གོ
།ཐོག་མར་སྒྱུ་མ་ཞེས་པ་བློ་གྲོས་རབ་བརྟན་གྱི་མདོར། ངོ་བོ་བརྗོད་བྲལ་བློ་འདས། རང་བཞིན་བདེན་མེད་མཐའ་བྲལ། མཚན་ཉིད་ཆགས་སྡང་རང་གྲོལ་བཅས་སུ་གསུངས། དེའི་དབྱེ་བ་ལ། བླ་མ་ཤངས་པས་ནི་ཡེ་ཤེས་རྒྱ་མཚོའི་རྒྱུད་དུ་གདོད་ནས་ཆོས་རྣམས་མ་གྲུབ་པ། རང་བཞིན་གནས་པའི་སྒྱུ་མ་དེ། གོ་དང་བརྟགས་དཔྱད་ཉམས་དང་ནི། །རང་ཤར་རྟོགས་པའི་སྒྱུ་མའོ་ཞེས་གསུངས་པ་དང་མཐུན་པར་རང་བཞིན་གནས་པའི་སྒྱུ་མ་དང་། གོ་བའི་སྒྱུ་མ། བརྟགས་ཤིང་དཔྱད་པའི་སྒྱུ་མ། ཉམས་ཀྱི་སྒྱུ་མ། སྒྱུ་མ་རང་ཤར། རྟོགས་པའི་སྒྱུ་མ་བཅས་དྲུག་དང་། ཆོས་རྗེ་སྐྱེར་སྒང་པས་ནི་སེམས་ཅན་ལ་ལས་དང་ཉོན་མོངས་པའི་སྒྱུ་མ། རྣལ་འབྱོར་བ་ལ་ཉམས་སྣང་སྣ་ཚོགས་ཀྱི་སྒྱུ་མ། དེ་བཞིན་གཤེགས་པ་ལ་འཕྲིན་ལས་དག་པའི་སྒྱུ་མ་བཅས་གསུམ་དུ་འདོད།
ཤངས་པའི་སྒྱུ་མ་ལམ་རིམ་གྱི་ས་བཅད་མདོ་ཙམ་བརྗོད་པ་ལ་གསུམ་སྟེ། ཀླད་ཀྱི་དོན་དང་། གཞུང་གི་དོན། མཇུག་གི་དོན་ནོ། དང་པོ་ལ་གཉིས་ཏེ། བར་ཆད་ལས་གྲོལ་བའི་ཕྱག་དང་། མཐར་ཕྱིན་པའི་དམ་བཅའོ། གཞུང་གི་དོན་ལ་གསུམ་སྟེ། ཇི་ལྟར་གནས་པའི་གཞི་ཟུང་འཇུག་གཏན་ལ་དབབ་པ། ཐབས་ཀྱི་རང་བཞིན་ལམ་ཟུང་འཇུག་གཏན་ལ་དབབ་པ། འབྲས་བུ་ཟུང་འཇུག་མངོན་གྱུར་དུ་འགྱུར་ཚུལ་བཅས་ལས། གཞི་ཟུང་འཇུག་གཏན་ལ་དབབ་པ་ལ། ཀུན་གཞི་དང་། དབང་གཞིའོ། དབང་གཞི་ལ་ལམ་དང་སའོ། དང་པོ་ལམ་རྒྱས་པར་བཤད་པ་ལས། ལམ་གྱི་དབྱེ་བ་ལ་ལྔ་སྟེ། ཚོགས་ལམ། སྦྱོར་ལམ། མཐོང་ལམ། སྒོམ་ལམ། མཐར་ཕྱིན་པའི་ལམ་བཅས་སོ། ཚོགས་ལམ་ལ་བདུན་ཏེ། ཚོགས་ལམ་ཆུང་ངུ་། འབྲིང་པོ། ཆེན་པོ། ཐར་པ་ཆ་མཐུན། རྟགས། སྤང་བྱ། ས་མཚམས་རྣམས་སོ། སྦྱོར་ལམ་ལ་བཅུ་སྟེ། ངོ་བོ། ངེས་ཚིག །དབྱེ་བ། མཚན་ཉིད། དྲོད་དང་རྩེ་མོའི་ཏིང་འཛིན། དེའི་རྟགས། བཟོད་པ་དང་ཆོས་མཆོག་གི་ཏིང་ངེ་འཛིན། དེའི་རྟགས། སྤང་བྱ། ས་མཚམས་སོ། མཐོང་ལམ་ལ་དགུ་སྟེ། ངོ་བོ། ངེས་ཚིག །དབྱེ་བ། མཚན་ཉིད། ཏིང་ངེ་འཛིན། སྤང་བྱ། སྤོང་ཚུལ། རྟགས། ས་མཚམས་སོ། སྒོམ་ལམ་ལ་བདུན་ཏེ། ངོ་བོ། ངེས་ཚིག །དབྱེ་བ། ཏིང་ངེ་འཛིན། སྤང་བྱ། རྟགས། ས་མཚམས་སོ། མཐར་ཕྱིན་པའི་ལམ་ལ་བརྒྱད་དེ། ངོ་བོ། ངེས་ཚིག །དབྱེ་བ། སྤང་བྱ། ཏིང་ངེ་འཛིན། སྤོང་ཚུལ། འབྲས་བུ། ས་མཚམས་སོ། གཉིས་པ་ས་ལ་བཅུ་གཉིས་ཏེ། ངོ་བོ། ངེས་ཚིག །དབྱེ་བ། སྔ་ལྟས། མཚན་ཉིད། ས་གང་གིས་གང་ནོན་པ། ཏིང་ངེ་འཛིན། སྤང་བྱ། རྨོངས་པའི་སྒྲིབ་པ། སའི་རྟོགས་པ། རྟགས། སངས་རྒྱས་ཚུལ་ལོ། །སངས་རྒྱས་ཚུལ་ལ་གཉིས་ཏེ། ཕར་ཕྱིན་དང་། གསང་སྔགས་སོ། མཇུག་གི་དོན་ལ་གཉིས་ཏེ། ལུང་བསྟན་ཐོབ་པ་དང་། དགེ་བ་བསྔོ་བ་སོགས་མཁས་གྲུབ་ཁྱུང་པོའི་གསུང་བཞིན་བྲིས། གོང་གི་ངོ་བོ་དང་ངེས་ཚིག་སོགས་ནི་སྤྱིར་རྗེ་བཙུན་བྱམས་པ་མགོན་པོའི་མངོན་རྟོགས་རྒྱན་དང་མཐུན་ལ། དབྱེ་བ་དང་ཉམས་སུ་ལེན་ཚུལ་ཅུང་མི་འདྲ། འདིའི་སྐོར་ཞིབ་པ་ཤངས་ཆོས་ཀྱི་ཡིག་ཆའི་ཁོངས་སུ་སྒྱུ་མ་ལམ་གྱི་རིམ་པའི་རྩ་འགྲེལ་སོགས་བཞུགས་པ་དེ་དག་ལས་ཤེས་པར་བྱའོ། །བོད་བརྒྱུད་ནང་བསྟན་གྱི་བཀའ་གདམས་གསར་རྙིང་གི་ལུགས་སུ། ཇོ་བོ་རྗེའི་བྱང་ཆུབ་ལམ་སྒྲོན་དང་། རྗེ་ཙོང་ཁ་པའི་ལམ་རིམ་ཆེན་མོ་གཉིས་རྩ་བར་གྱུར་པའི་ཕར་ཕྱིན་མཚན་ཉིད་ཐེག་པའི་ལམ་གྱི་བགྲོད་ཚུལ་ཕྱིན་ཅི་མ་ལོག་པ་གཙོ་བོར་བསྟན་པས་སྤྱི་མིང་དུ་ལམ་རིམ་ཞེས་བརྗོད་མོད། འོན་ཀྱང་ཤངས་ལུགས་སུ་སྒྱུ་མ་ལམ་རིམ་ཞེས་ཟེར་དོན་ནི། གཙོ་ཆེར་གསང་སྔགས་རྡོ་རྗེ་ཐེག་པའི་སྒོམ་པའི་ལམ་རིམ་གྱི་ཆ་ནས་བཞག་པ་ཡིན། དེ་ཡང་ཡེ་ཤེས་མངོན་པར་འབྱུང་བའི་རྒྱུད་རྒྱས་པ་ལས་སྒྱུ་མ་ཆོས་དབྱིངས་ཀུན་གཞི་སྟེ། །སྒྱུ་མ་ལྟ་བུའི་ཆོས་རྣམས་ལ། །སྒྱུ་མ་ལྟ་བུར་བསྒོམས་བྱས་ན། །སྒྱུ་མ་ལྟ་བུར་མངོན་སངས་རྒྱས་ཞེས་པ་དང་འདྲ་བར། མཁའ་འགྲོ་ནི་གུ་མས་མཁས་གྲུབ་ཁྱུང་པོ་དང་ཐོག་མར་མཇལ་སྐབས་ཀྱང་སྒྱུ་མ་ལྟ་བུའི་ཆོས་རྣམས་ལ། །སྒྱུ་མ་ལྟ་བུར་བསྒོམས་བྱས་ནས། སྒྱུ་མ་ལྟ་བུར་མངོན་སངས་རྒྱས། །མོས་གུས་སྟོབས་ལས་འབྱུང་བར་འགྱུར་ཞེས་པ་སོགས་སྒྱུ་མའི་སྐོར་མང་དུ་གསུངས་པ་རྣམས་ཀྱིས། སྒྱུ་མ་ནི་རྗེ་བཙུན་ནི་གུ་མས་བསྟན་པའི་ཆོས་ཐམས་ཅད་ཀྱི་བརྗོད་གཞི་གཙོ་བོའི་གྲས་ཤིག་ཡིན་པ་མཚོན།

II.4.3 -
གསུམ་པ། སྒྱུ་ལུས་དྲུག་ལྡན་དང་རྩ་རླུང་གི་སྐོར།
མཁས་གྲུབ་ཁྱུང་པོའི་གདམས་པ་སྒྱུ་ལུས་དྲུག་ལྡན་ཏེ་སེམས་བསྐྱེད་དང་། བསྐྱེད་རྫོགས། མོས་གུས། ཕྱག་ཆེན། རྗེས་སུ་ཡིད་རངས། བསྔོ་བ་བཅས་དང་། རྩ་རླུང་གི་སྐོར་རླུང་བུམ་པ་ཅན་དང་ཤིང་རྟ་ཅན་སོགས་བརྗོད་པར་བྱ་བ་ལ།
II.4.3.1 Six kinds of Illusory Body
གཅིག ཁྱུང་པོའི་ལུགས་ཀྱི་སྒྱུ་ལུས་དྲུག་ལྡན།
སྤྱིར་སྒྱུ་ལུས་ཞེས་བརྗོད་དོན་ཡང་། དཔལ་གསང་བ་འདུས་པ་ལས་གསུངས་པའི་ལམ་རིམ་པ་ལྔ་སྟེ། ངག་དབེན་དང༌། སེམས་དབེན། སྒྱུ་ལུས། འོད་གསལ། ཟུང་འཇུག་བཅས་ལས། དེ་རྣམས་རིམ་བཞིན་བསྒོམས་རྗེས་རིམ་པ་གསུམ་པར་སླེབས་སྐབས་ཤ་པགས་རུས་གསུམ་སོགས་ཀྱི་སྙིགས་མ་རྣམས་ཟད་ནས་འཇའ་ཚོན་སྒྱུ་མ་ལྟ་བུའི་ལུས་སུ་གནས་འགྱུར་བས་སོ། དེའི་སྐབས་སུ་ཕྱི་རོལ་གྱི་མེ་ཆུ་གཡང་ས་དུག་མཚོན་སོགས་ཀྱི་གནོད་པས་མི་ཚུགས་པ་དང༌། ལོ་རྒན་དྲུག་ཅུར་སླེབས་པའི་རྒས་པོ་ཡང་སྐྲ་དཀར་གཉེར་མ་མེད་པའི་གཞོན་ཤ་ཅན་ཞིག་ཏུ་འགྱུར་བ་སོགས་གསུངས། དེ་ལ་དག་པའི་སྒྱུ་ལུས་དང་མ་དག་པའི་སྒྱུ་ལུས་གཉིས་སུ་ཕྱེ་བ་ལས། དང་པོ་ལ་རབ་རྣམ་སྨིན་ལུས་ལ་སངས་རྒྱས། འབྲིང་རྨི་ལམ། ཐ་མ་བར་དོ། གཉིས་པ་ལ་ཉིན་པར་མ་དག་པའི་འཁོར་མ་དང་། རྨི་ལམ་མ་དག་པའི་འཁོར་མ། བར་དོ་མ་དག་པའི་འཁོར་མ་བཅས་སུ་ཕྱེ་བའི་རྣམ་གྲངས་ཙམ་ལས་མ་སྤྲོས།
མཁས་གྲུབ་ཁྱུང་པོའི་གདམས་པ་སྒྱུ་ལུས་དྲུག་ལྡན་ནི་རྒྱ་གར་མཁའ་འགྲོའི་ཁྱད་འཕགས་ཀྱི་གདམས་པ་བཅོ་ལྔ་ལས། དོན་དམ་མ་གཏོགས་པའི་ཆོས་བཅུ་བཞི་པོ་དེ་དག་རེ་རེ་ལ་ཡང་ཆོས་དྲུག་གི་ཁྱད་པར་འཕགས་ཏེ། དེ་ཡང་།
(༡) བྱང་ཆུབ་མཆོག་ཏུ་སེམས་མ་བསྐྱེད་ན་ཐེག་པ་ཆེན་པོར་མི་འགྲོ་བས། ཅི་བྱེད་ཐམས་ཅད་སེམས་ཅན་གྱི་དོན་དུ་བྱའོ་ཞེས་ཐེག་པ་ཆེ་ཆུང་གི་ཁྱད་པར་ཡང་སེམས་བསྐྱེད་ཁོ་ནའི་སྟེང་ནས་འཇོག་པ་ཡིན་པས། འགྲོ་འཆག་ཉལ་འདུག་གི་སྤྱོད་ལམ་ཐམས་ཅད་སྙིང་རྗེས་སེམས་ཅན་ལ་དམིགས་པར་བྱ།
(༢) ལུས་ལྷར་མ་བསྐྱེད་ན་ལུས་ཐ་མལ་ལས་མི་འགྱུར་ཞིང་། ལོངས་སྤྱོད་རྫོགས་པའི་སྐུ་མི་འགྲུབ་པས། ལུས་ཡི་དམ་དུ་བསྐྱེད་དོ་ཞེས་སྔགས་བླ་མེད་ཀྱི་གཞུང་རྣམས་སུ་ཡི་དམ་གང་གི་བསྐྱེད་རིམ་ཡིན་ཀྱང་། དཔྱད་པའི་གནས་དྲུག་སྟེ་བསྐྱེད་རིམ་སོ་སོའི་སྦྱང་གཞི་དང་། མཐར་ཐུག་གི་འབྲས་བུ། རྫོགས་རིམ་གང་གི་སྨིན་བྱེད་ལྟར་འགྱུར་བ། དགོས་པ་གང་ཞིག །དངོས་པོ་གང་ཡིན། མཐར་ཕྱིན་པའི་དོན་གང་ཡིན་པ་སོགས་ཤེས་ནས་སྦྱང་བྱ་གཞི་དུས་ཀྱི་སྐྱེ་འཆི་བར་དོ་གསུམ་པོ་དེ་སྦྱོང་བྱེད་སྐུ་གསུམ་ལམ་ཁྱེར་བསྒོམས་པའི་སྟོབས་ཀྱིས་སྒོ་གསུམ་ཐ་མལ་གྱི་སྣང་ཞེན་ལས་ལྡོག་པར་བྱ།
(༣) བླ་མ་ལ་གསོལ་བ་མ་བཏབ་ན་བྱིན་རླབས་མི་འབྱུང་ཞིང་། ཐེག་པ་ཆེན་པོ་གསང་སྔགས་བྱིན་རླབས་ཀྱི་ཁྱད་པར་དུ་འཕགས་པ་ཡིན་པས། ཇི་ལྟར་འདུག་ཀྱང་བླ་མའི་སྣང་བ་དང་མི་འབྲལ་བར་བྱ་ཞེས་དཔལ་ལྡན་བླ་མ་ནི་ཐར་པའི་རྩ་བ་ཡིན་པས། མོས་གུས་དྲག་པོ་རྒྱུན་ཆད་མེད་པས་གསོལ་བ་བཏབ་ནས་དེའི་བྱིན་རླབས་ཀྱིས་ཡོན་ཏན་ཐམས་ཅད་རྒྱུད་ལ་བདེ་བླག་ཏུ་སྐྱེ་བར་བྱ།
(༤) ཕྱག་རྒྱ་ཆེན་པོ་མ་བསྒོམས་ན་སངས་མི་རྒྱ་བས། གང་ཡང་ཡིད་ལ་མི་བྱེད་པར་སྣང་སྲིད་རང་གྲོལ་དུ་རྟོགས་པར་བྱ་ཞེས་ཡང་དག་པའི་ལྟ་བ་ཕྱག་རྒྱ་ཆེན་པོ་བསྒོམས་ནས་སྣང་སྲིད་འཁོར་འདས་ཀྱི་ཆོས་ཀུན་སྐྱེ་འགག་སྤྲོས་པའི་མཐའ་ཀུན་དང་བྲལ་བའི་རང་བཞིན་དུ་ཤེས་པར་བྱ།
(༥) རྗེས་སུ་ཡི་རངས་མ་བསྒོམས་ན་དགེ་བའི་ལོ་ཏོག་ཐམས་ཅད་ཕྲག་དོག་གིས་སེར་བས་འཇོམས་པས། རང་གཞན་ཐམས་ཅད་ཀྱི་དགེ་བའི་རྩ་བ་ལ་རྗེས་སུ་ཡི་རང་བསྒོམ་ཞེས་འབད་པ་ཆུང་ངུ་ཙམ་ལ་བརྟེན་ནས་ཚོགས་གཉིས་རླབས་པོ་ཆེ་གསོག་པ་དང་། ཕྲག་དོག་གི་སེར་བ་གཞོམ་ནུས་པས། མདོ་བསྡུས་སོགས་ལས་སྟོང་གསུམ་རི་རབ་སྲང་ལ་བཅལ་ནས་ཚད་བཟུང་ཐུབ་རུང་རྗེས་སུ་ཡི་རངས་ཀྱི་དགེ་བ་ནི་དེ་ལྟར་མ་ཡིན་པ་སོགས་ཀྱི་ཕན་ཡོན་རྒྱ་ཆེར་བསྟན་པས་དེ་ཉིད་བསྒོམ་པར་བྱ།
(༦) དགེ་བའི་རྩ་བ་མ་བསྔོས་ན་འཕེལ་ཞིང་འཛད་པས། དམིགས་མེད་ཀྱི་སྙིང་རྗེ་ཆེན་པོས་སེམས་ཅན་གྱི་དོན་དུ་བསྔོ་བར་བྱ་ ཞེས་དགེ་རྩ་ཅི་བྱས་ཐམས་ཅད་མ་རྒན་སེམས་ཅན་གྱི་དོན་དུ་ཉི་ཚེ་བའི་བསྔོ་བ་དང་། རྒྱ་ཆེ་བའི་བསྔོ་བ། བླ་ན་མེད་པའི་བསྔོ་བ་བཅས་བསྔོ་བ་གསུམ་གྱིས་སྒོ་ནས་བསྔོ་བར་བྱ་བ་ཡང་། རྗེ་དྲུང་བསྟན་པའི་རྒྱལ་མཚན་གྱིས་ཡི་རང་དགེ་བསྔོ་སྒྱུ་ལུས་དྲུག་ལྡན་གྱི། །སྒྲུབ་བརྒྱུད་ཤངས་པའི་བསྟན་པ་རྒྱས་གྱུར་ཅིག་ཅེས་སྨོན་ལམ་མཛད། དེ་རྣམས་ལ་སྒྱུ་ལུས་དྲུག་ལྡན་ཞེས་བརྗོད་དེ་མཁས་གྲུབ་ཁྱུང་པོའི་ལུགས་ཡིན།
II.4.3.2 Vase breathing
གཉིས། རླུང་བུམ་པ་ཅན་དང་ཤིང་རྟ་ཅན།
བླ་མ་ཤངས་པས་ཉམས་སུ་མྱོང་བའི་རྩ་རླུང་གི་གདམས་པ་མང་དུ་ཡོད་པ་དག་ལས། རླུང་བུམ་པ་ཅན་དང་ཤིང་རྟ་ཅན། ཕྱག་རྒྱ་བཅིངས་གྲོལ་སོགས་ནི་ཤངས་པའི་ཆོས་བརྒྱུད་སྤྱིའི་ཆེས་ཁྱད་དུ་འཕགས་པའི་གདམས་པ་ཉག་གཅིག་ཡིན། དང་པོ་རླུང་བུམ་པ་ཅན་ནི། བླ་མ་རཱ་ཧུ་ལས་མཁས་གྲུབ་ཁྱུང་པོར་གནང་བ། འདི་ལ་གསུམ་སྟེ། སྣང་བ་བུམ་པ། དབྱིབས་བུམ་པ། དམིགས་རྟེན་བུམ་པ་བཅས་སོ། དེ་ཉིད་རླུང་བཟུང་བ་དང་སྦྱང་བ། འཕེལ་བར་བྱ་བ། དབང་དུ་གྱུར་བར་བྱ་བ། རྒྱས་གདབ་པ། ཟུང་དུ་འཇུག་པ་སོགས་ཀྱིས་སྒོ་ནས་བུམ་ཅན་རླུང་བཟུང་ལྷ་སྐུ་སྣང་སྟོང་བསྒོམ་ཞེས་པ་ལྟར་དུ་ཉམས་སུ་ལེན་པ་ཡིན། རླུང་བུམ་པ་ཅན་ཞེས་པའི་ཐ་སྙད་འདི་རྗེ་མར་པའི་ལུགས་སུ་ཡང་འཇོག་ལ། རླུང་གི་མཚན་ཉིད་རྗེས་སུ་དྲན་པ་སྟེ། ཕྱིར་འགྲོ་བ་རང་ལ་གནོད། ནང་དུ་འོང་བ་ཕན། རླུང་བདེ་བའི་དམིགས་སུ་བསྒོམ་པ་ནི། འགྲོ་འོང་བདེ་བར་སྒོམ། རླུང་དགག་པའི་ཐབས་ནི། བུམ་པ་ཅན་དང་སེང་གེ་རྣམ་གྲོལ་(ཐ་སྙད་འདི་རྗེ་མར་པའི་ལུགས་ཡིན་)གྱིས་དགག་གོ། རླུང་ཁེག་པའི་ཚད་ནི། པུས་མོ་ལ་བསྐྱོད་ཅིང་སེ་གོལ་གསུམ་གསུམ་གདབ་བརྒྱ་རྩ་བརྒྱད་དོ། རླུང་གི་རྗེས་སུ་འགྲོ་བ་ནི། གཏོང་དུས་སུ་ཕར་འགྲོ་ཚུར་འགྲོ་ཁ་དོག་ཏུ་བསླབ་པ་སོགས་སྤྱིར་གཅིག་མཚུངས་ཡིན་པ་ཐོས། གཉིས་པ་རླུང་ཤིང་རྟ་ཅན་ནི། བླ་མ་དམ་པ་ཨ་ཏ་ཡ་བཛྲ་ནས་བརྒྱུད་པའི་གདམས་པ་ཞིག་ཡིན། འདི་ནི་ཆོ་གས་རྒྱུད་སྨིན་པར་བྱ་ཞིང་། སྣོད་དུ་རུང་བ་རྣམས་ཀྱིས་རླུང་སེམས་བཙན་ཐབས་སུ་བཟུང་བའི་གདམས་ངག་ཅིག་ཡིན། དེར་བརྟེན་ཆོས་རྗེ་སངས་རྒྱས་སྟོན་པས་ཀྱང་འཁོར་ལོ་བཅིངས་གྲོལ་ཤིང་རྟ་ཅན། །བུམ་པ་ཅན་གྱི་གདམས་པ་ཡོད། །སྐད་ཅིག་མ་རེ་བསྒོམ་པས་ཀྱང་། །བདེ་དྲོད་རྒྱུན་ཆད་མེད་པ་འབར་ཞེས་པ་ལྟར། རླུང་བུམ་པ་ཅན་དང་ཤིང་རྟ་ཅན། ཕྱག་རྒྱ་བཅིངས་གྲོལ་དེ་རྣམས་སྐད་ཅིག་རེ་ཙམ་བསྒོམས་པས་ཀྱང་རང་ལུས་ལ་བདེ་དྲོད་རྒྱུན་ཆད་མེད་པར་སྐྱེ་བ་ཡིན། གཞན་ཡང་རླུང་ཕྱག་རྒྱ་བཅིངས་གྲོལ་ཞེས་པ་དེ་ཉམས་སུ་ལེན་པས་ཡོན་ཏན་དྲུག་འབྱུང་སྟེ། ལུས་བདེ་བ་དང༌། སེམས་མི་རྟོག་པ། ལུས་ཡང་བ། འགྲོ་བ་མགྱོགས་པ། ལུས་གྲིམས་པ། ལུས་ལ་ཟག་པ་ཆེ་ཆུང་མི་འབྱུང་བ་བཅས་ཏེ། ཆོས་རྗེ་བྱམས་པ་དཔལ་བས་རླུང་སྒོམ་སྐབས་སུ་ཡང་ཐོག་མར་སྐུ་ལུས་ལ་ཟུག་གཟེར་དང་། མཐར་སོར་མོའི་རྩེ་ལ་རླུང་རྒྱུ་བའི་སྒྲ་སི་སི་བྱུང་བ། དེ་ནས་སྐུ་ལུས་ལ་སྲོག་ཆགས་ཚོས་འབྲད་པ་དང་། འཁྱུག་པ་ལྟ་བུ་དང་། དེ་རྗེས་སྐུ་ལུས་ཆ་ཤས་ལ་བདེ་བ་དང་། རིམ་བཞིན་སྐུ་ལུས་ཐམས་ཅད་ལ་བདེ་བ་ཆེན་པོས་ཁྱབ་པའི་ཡོན་ཏན་སྐྱེ་ཚུལ་གྱི་བརྒྱུད་རིམ་ཅུང་ཙམ་ཁོང་གི་མཛད་རྣམ་དུ་གསལ་ཡོད། དེ་ཡང་བླ་མ་ཤངས་པའི་རླུང་གི་སྐོར་ཞེས་པ་ལས་གསང་སྔགས་ཐབས་ཀྱི་ལམ་མཆོག་གིས། །རྣལ་འབྱོར་ལུས་རྒྱ་གྲོལ་བྱེད་ཅིང༌། །བདེ་སྟོང་ཉམས་མྱོང་མཆོག་འཆང་བ། །བླ་མའི་བྱིན་རླབས་ཡིན་པར་གོ་ཞེས་འཁོད་པ་ལྟར། ལུས་ཀྱི་རྩ་མདུད་ཐམས་ཅད་གྲོལ་བར་བྱེད་པའི་གདམས་ངག་ཟབ་མོ་འདི་བདེ་སྟོང་གི་ཉམས་མྱོང་དང་ལྡན་པའི་བླ་མའི་བྱིན་རླབས་ལས་བྱུང་བས་བཀའ་ཤིན་ཏུ་དོག་པ་སྨོས་མི་དགོས་ཏེ། སྔར་ཆོས་རྗེ་རྨོག་ལྕོག་པ་གཡོར་པོ་སྨད་དུ་བཞུགས་སྐབས་དགེ་བཤེས་དམར་ཞང་ཚན་གཉིས་ཀྱིས་རླུང་ཤིང་རྟ་ཅན་ཞུ་ཟེར་ཡང་། རྗེའི་རྨི་ལམ་ལོག་ནས་མ་གནང་ངོ་།
།སྤྱིར་རླུང་བུམ་པ་ཅན་འདི་སྒོམ་པ་ལ་འཕགས་བོད་ཀྱི་ས་གཞིའི་ཁྱད་པར་ཡང་ཡོད་པ་འདྲ་སྟེ། སྔར་རྒྱ་གར་གྲུབ་ཆེན་ཕ་དམ་པ་དང་རྗེ་བཙུན་མི་ལ་གཉིས་གཉའ་ནང་ཐོང་ལར་མཇལ་སྐབས། དམ་པས་འཇག་མ་བདུན་གྱི་སྟེང་དུ་སྐུ་བདུན་བསྒྲིགས་བྱུང་བ་ལ། རྗེ་བཙུན་གྱིས་ཀྱང་འཇག་མ་བདུན་གྱི་སྟེང་དུ་སྐུ་ལུས་བདུན་བཀོད་ནས་ཚོགས་ཀྱི་འཁོར་ལོ་ཚིམ་པ་དྲུག་ལྡན་དུ་མཛད་པའི་ཚེ། རྗེ་བཙུན་མི་ལའི་འཇག་མ་རྣམས་ཀྱི་མགོ་ཅུང་ཟད་གུག་ཡོད་པ་ལ། རྗེ་བཙུན་གྱིས་ཕ་དམ་པ་ལ་འོ་ཅག་གཉིས་རླུང་བུམ་པ་ཅན་ལ་ནི་ཁྱད་མེད། བདག་གི་འཇག་མ་མགོ་གུག་པ་ཅི་ལགས་ཞུས་པས། གྲུབ་ཆེན་ཕ་དམ་པས་འོ་ཅག་སྤངས་རྟོགས་ཀྱི་ཡོན་ཏན་ལ་ཁྱད་མི་འདུག་སྟེ། ཁྱོད་བོད་དུ་སྐྱེས་པའི་ཁྱད་དུ་འདུག་ཅེས་གསུངས་པ་ལྟར་ཡིན། དེ་མིན་གྲུབ་ཆེན་རཱ་ཧུ་ལས་ཀྱང་མཁས་གྲུབ་ཁྱུང་པོར་བོད་ན་རྡོ་རྗེའི་ས་གཞི་མེད་པས་སྒྱུ་མ་བྱར་མི་བཏུབ་པས། ཁྱོད་རང་ངའི་རྫུ་འཕྲུལ་གྱི་རྟ་ལ་བཞོན་ནས་རྒྱ་གར་དུ་གདེང་། ཚེ་ཉི་ཟླ་དང་མཉམ་པར་སྒྲུབ་ཅེས་གསུངས་པ་ལྟར་སྒོམ་སྒྲུབ་ཀྱི་ཡོན་ཏན་གཞན་རྣམས་ཀྱང་། འཕགས་ཡུལ་ལས་བོད་དུ་ཅུང་ཟད་སྐྱེ་དཀའ་བར་གསུངས།
གདམས་པ་འདི་རྣམས་ཀྱི་བརྒྱུད་པ་ནི། རྒྱལ་བ་རྡོ་རྗེ་འཆང་གིས་མཁའ་འགྲོ་ནི་གུ་མ། དེས་མཁས་གྲུབ་ཁྱུང་པོ། ཡང་ན་གྲུབ་ཆེན་རཱ་ཧུ་ལ་དང་། བླ་མ་ཨ་ཏ་ཡ་བཛྲ་གཉིས་ཀྱིས་མཁས་གྲུབ་ཁྱུང་པོ། དེས་ཆོས་རྗེ་རྨོག་ལྕོག་པ། དེས་དབོན་སྟོན་སྐྱེར་སྒང་པ། དེས་གཉན་སྟོན་རི་གོང་པ། དེས་ཆོས་རྗེ་སངས་རྒྱས་སྟོན་པ། དེས་སྤྲུལ་སྐུ་རིན་ཆེན་བློ་གྲོས། དེས་བླ་མ་གྲན་པ། དེས་བླ་མ་ཀུན་དགའ་གྲགས། དེས་ཆོས་རྗེ་བློ་བཟང་པ། དེས་གྲུབ་ཆེན་སང་དར། དེས་མཉམ་མེད་སངས་རྒྱས་དཔལ་བཟང་། དེས་མཁས་གྲུབ་ནམ་མཁའ་རྒྱལ་མཚན། དེས་རིན་ཆེན་བཟང་པོ་བཅས་ལ་བརྒྱུད་པ་དང་། ཡང་མཉམ་མེད་སངས་རྒྱས་དཔལ་བཟང་གིས་ཤཱཀྱ་རིན་ཆེན། དེས་སྤྲུལ་སྐུ་ངག་དབང་། དེས་རིན་ཆེན་བཟང་པོ་ལ་བརྒྱུད་པ་བཅས་སོ།
།དེ་ལྟར་ཡུན་རིང་ལྐོག་ཏུ་གྱུར་པའི་ཤངས་པའི་རྩ་རླུང་གི་གདམས་པ་འདི་རྣམས་ངོ་སྤྲོད་ཀྱི་ཚུལ་ཙམ་དུ་བརྗོད་པར་ཐལ་བས། ཆོས་བདག་མཁའ་འགྲོ་ཆོས་སྐྱོང་དང༌། བླ་མ་གྲུབ་ཆེན། དེ་མིན་གདམས་ངག་འདི་དག་ཉམས་སུ་བཞེས་མཁན་གྱི་སྐལ་ལྡན་རྣམས་ལ་བཟོད་པར་གསོལ་ལ། འདིའི་སྐོར་ཞིབ་པ་མཁོ་ངེས་ཀྱི་སྒྲིག་རིམ་བཞིན་ནི་གུ་མའི་ཞལ་གདམས་རྗེ་བཙུན་མུ་ཏིག་ཕྲེང་བ། རྩ་གསུམ་གདམས་པ། དག་སྦྱང་ཆོ་ག །རྩ་མདུད་གྲོལ་བ། རྩ་སྐོར་རླུང་འདོན། རྩ་རྐྱང་བསྐུམ། རྩ་ཁ་འབྱེད་པ། ཐབས་ལམ་གཏུམ་མོ། རྩིབས་བརྒྱད་འཁོར་ལོ། ཐབས་ལམ་རྣལ་འབྱོར། རྣལ་འབྱོར་བར་ཆད་བསྲུང་བ། ཀླུ་ལས་དངོས་གྲུབ་བླང་བ་སོགས་ཀྱི་ཚད་ལྡན་གཞུང་དག་ལས་ཤེས་པར་བྱའོ།

II.4.4 -
།བཞི་པ། ཤངས་པའི་ཐུགས་དམ་དྲུག་དང་སུ་ཁ་ཆོས་དྲུག་སོགས་ཀྱི་སྐོར།
གྲུབ་ཆེན་ཁྱུང་པོས་མཁས་གྲུབ་ཀྱི་རྣམ་ཐར་སྐྱོང་བའི་ཐུགས་ཀྱི་དམ་བཅའ་དྲུག་དང་། ཁོང་གིས་བཤེས་གཉེན་རྒྱ་ཆེན་པོ་ལ་གནང་བའི་གདམས་པ་འཇམ་དཔལ་རྒྱ་ལུགས། བླ་མ་ཤངས་པའི་དོན་དམ་ཕན་མེད་གནོད་མེད་བཅས་ཀྱི་སྐོར་རགས་ཙམ་སྒྲིང་བ་ལ།
II.4.4.1
གཅིག །བླ་མ་ཤངས་པའི་ཐུགས་དམ་དྲུག
བླ་མ་ཤངས་པའི་ཐུགས་དམ་དྲུག་གམ་ཁྱུང་པོའི་ཉམས་ལེན་དྲུག་ཅེས་པ་ནི། ཐེག་དམན་དང་མི་འགྲོགས་པའི་སེམས་བསྐྱེད་དང་གཅིག །ཉེས་ལྟུང་དང་མི་འགྲོགས་པའི་བཤག་སྡོམ་དང་གཉིས། ཐ་མལ་པ་དང་མི་འགྲོགས་པའི་ཟ་ཚོགས་དང་གསུམ། ཆད་ལྟ་བ་དང་མི་འགྲོགས་པའི་ཚོགས་གསོག་དང་བཞི། ཐབས་མི་མཁས་པ་དང་མི་འགྲོགས་པའི་བསྔོ་བ་དང་ལྔ། དམིགས་བཅས་དང་མི་འགྲོགས་པའི་དམིགས་མེད་དང་དྲུག་ཅེས་པ་ལས།
༡ ཐེག་དམན་དང་མི་འགྲོགས་པའི་སེམས་བསྐྱེད། ཐེག་དམན་དང་མི་འགྲོགས་པའི་སེམས་བསྐྱེད་ལ་ལྔ་སྟེ།
(༡) སེམས་བསྐྱེད། རིགས་དྲུག་གི་མ་རྒན་སེམས་ཅན་ཐམས་ཅད་འཁོར་བར་འཁྱམས་ཡོད་པས། དེ་དག་སྡུག་བསྔལ་ལས་འབྲལ་འདོད་ཀྱི་སྙིང་རྗེ་དང༌། བདེ་བ་དང་ལྡན་འདོད་ཀྱི་བྱམས་པ་ཐུན་མོང་མ་ཡིན་པ་བསྒོམ་སྟེ་བྱང་ཆུབ་ལམ་གྱི་གཞུང་ཤིང་དུ་འགྱུར་བའི་སྨོན་འཇུག་གཉིས་སུ་སེམས་བསྐྱེད་པ། དེ་ནི་མཁས་གྲུབ་ཁྱུང་པོས་གཙོས་པའི་ཤངས་ཆོས་ཀྱི་བརྒྱུད་འཛིན་པ་ཚོས་བསླབ་གསུམ་ཁྲིམས་ཀྱི་འཛིན་མ་ལ་བྱང་ཆུབ་སེམས་ཀྱི་རྩ་བ་བརྟན་པར་བཙུགས་པས་རླབས་ཆེན་སྤྱོད་པའི་ཡལ་འདབ་འབྲས་བུས་བརྗིད་པའི་བླ་མེད་ཐེག་ཆེན་གྱི་བསྟན་པ་སྐྱོང་བའི་རྣམ་ཐར་ཡིན།
(༢) སྦྱང་བ། རབ་ཀྱིས་སྤྱོད་ལམ་རྣམ་བཞི་ཐམས་ཅད་དུ་སེམས་བསྐྱེད་ལས་མ་ཡེངས་པར་བྱ་ལ། འབྲིང་གི་གོམ་པ་ཉི་ཤུ་རྩ་གཅིག་གི་བར་དུ་སེམས་བསྐྱེད་དྲན་པར་བྱ་བ། ཐ་མས་ཉིན་ལན་གསུམ་མཚན་ལན་གསུམ་གྱི་བར་དུ་སེམས་བསྐྱེད་དྲན་པར་བྱེད་པ་ཡང་། རྡོ་རྗེ་རྩེ་མོ་ལས་ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་བྱིན་ཞེས་དང་། མདོ་ལས་ཉིན་གསུམ་མཚན་གསུམ་དུས་དྲུག་ཏུ། །མ་ཡེངས་སེམས་བསྐྱེད་གཞན་དོན་བྱ་ཞེས་སོགས་གསུངས་པ་ལྟར་རོ།།
(༣) སྤེལ་བ། ཇི་སྲིད་འཁོར་བའི་རྒྱ་མཚོ་མ་སྟོངས་ཀྱི་བར་དུ་སེམས་ཅན་གྱི་དོན་བྱའོ་སྙམ་དུ་བློས་སེམས་བསྐྱེད་པར་བྱས་ནས། རང་གི་དགེ་བའི་རྩ་བ་ཕྲན་བུ་ཡང་མང་པོར་འབར་ཞིང་འཕེལ་བར་བྱེད་པའོ།།
(༤) གནད་དུ་སོང་བའི་ཚད། རྨི་ལམ་གྱི་དུས་སུ་ཡང་བྱམས་སྙིང་རྗེ་བྱང་ཆུབ་ཀྱི་སེམས་བསྐྱེད་ནས། སེམས་བསྐྱེད་ཡང་ཡང་དྲན་པར་བྱེད་པ་ནི་གནད་དུ་གལ་ཆེ་བ་ཡང་། འཕྲིན་ལས་རྒྱ་མཚོའི་མདོ་ལས་བྱང་ཆུབ་སེམས་དཔའ་ཐ་ན་གཉིད་ལོག་གམ། །རྨི་ལམ་དུས་ན་སེམས་བསྐྱེད་གཞན་དོན་རྩོམ་ཞེས་གསུངས་པ་ལྟར་ཡིན།།
(༥) ཕན་ཡོན། སེམས་སྐད་ཅིག་ཙམ་བསྐྱེད་པས་འཁོར་བ་པའི་སེམས་ཅན་སངས་རྒྱས་ཀྱི་སྲས་སུ་འགྱུར་བ་སྟེ། སྤྱོད་འཇུག་ལས་བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རྭར་བསྡམས་པའི་ཉམས་ཐག་རྣམས། །བདེ་གཤེགས་རྣམས་ཀྱིས་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པའི་ཕྱག་བྱར་འགྱུར་ཞེས་དང་། མདོ་སྡེ་སྐལ་བཟང་ལས་གངྒའི་ཀླུང་ཕྲག་བྱེ་བ་བྱེ་རྙེད་ཀྱིས། །བསྐལ་པར་བྱང་ཆུབ་སེམས་དཔས་རིན་པོ་ཆེའི། འབྱོར་པ་ཀུན་གྱིས་ཞིང་བཀང་སྦྱིན་བྱིན་པས། ལ་ལས་བྱང་ཆུབ་བསྲུང་འདི་ཁྱད་པར་འཕགས་ཞེས་གསལ་བ་ལྟར་བྱང་ཆུབ་ཀྱི་སེམས་མཆོག་རིན་པོ་ཆེ་འདི་ཉིད་ནི་མཆོད་པ་ཐམས་ཅད་ཀྱི་ནང་ན་ཆེས་ཁྱད་པར་དུ་འཕགས་པའོ།།
༢ ཉེས་ལྟུང་དང་མི་འགྲོགས་པའི་བཤག་སྡོམ། ཉེས་ལྟུང་དང་མི་འགྲོགས་པའི་བཤག་སྡོམ་སྐོར་ཇོ་བོ་རྗེས་མཐོལ་བཤགས་སྡོམ་གསུམ་དུ་བཞེད་ཀྱང་། བླ་མ་ཤངས་པས་མཐོལ་བ་དང་བཤགས་པ་གཉིས་སུ་འདོད་དོ། མཐོལ་བ་ནི། ཉོན་མོངས་ཅི་སྐྱེས་ཀྱང་ལུས་ཀྱི་འཕྲུལ་འཁོར་མ་ཞིག་བར་བླ་མའམ། མཆེད་གྲོགས་སམ། སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་བདག་གིས་ཐོག་དྲངས་པའི་སེམས་ཅན་ཐམས་ཅད་ཀྱི་མི་དགེ་བ་ཡོད་ཚད་མཐོལ་ལོ་བཤགས་སོ་ཞེས་ངག་ཏུ་བརྗོད་པ་དང་། ལུས་ཀྱི་འཕྲུལ་འཁོར་ཞིག་པའི་ཚེ་གཅིག་གིས་བར་དུ་ཆོད་ན་མང་པོར་འཕེལ་ནས་འགྲོ་བས་མཐོལ་བའི་བཤགས་པ་གལ་ཆེའོ། བཤགས་པ་ལ་གསུམ་སྟེ། རབ་ཕྱག་རྒྱ་ཆེན་པོའི་ངང་ནས་འཆགས་པ་ཡང་། སྒྲིབ་པ་སེལ་བས་ཞུས་པའི་མདོ་ལས་གང་ཞིག་འགྱོད་ཚངས་བྱེད་འདོད་པས། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། དེ་ནི་འགྱོད་ཚངས་དམ་པའོ་ཞེས་གསུངས་པ་ལྟར་དང་། འབྲིང་བཤག་པར་བྱ་བའི་ཡུལ་དང་། འཆགས་མཁན། བཤག་བྱའི་ཉེས་ལྟུང་ཐམས་ཅད་རྨི་ལམ་སྒྱུ་མའི་ངང་ནས་འཆགས་པ། ཐ་མ་སྔར་བྱས་པ་ལ་དུག་ཁོག་ཏུ་སོང་བ་ལྟ་བུའི་འགྱོད་པ་བསྐྱེད། ཕྱིས་སྲོག་ལ་བབས་ཀྱང་མི་བྱེད་པར་དམ་བཅའ་བ། ད་ལྟར་རབ་ཏུ་འགྱོད་བཞིན་པའི་སྒོ་ནས་འཆགས་པའོ། དུས་ཚོད་ནི། རབ་ཀྱིས་སྐད་ཅིག་མ་ཉིད་ལ། འབྲིང་གིས་རྗེས་སྙེགས། ཐ་མས་ཀྱང་ཉིན་ལན་གསུམ་མཚན་ལན་གསུམ་དུ་མི་འཆགས་པའི་ཐབས་མེད་དོ།།
༣ ཐ་མལ་པ་དང་མི་འགྲོགས་པའི་ཟ་ཚོགས།
ཐ་མལ་པ་དང་མི་འགྲོགས་པའི་ཟ་ཚོགས་ནི། ནང་ཞོགས་ཐུན་མགོ་ལ་རྒྱུད་སྡེ་ལྔ་རང་ལུས་ཀྱི་གནས་ལྔར་བསྒོམ། དེ་མ་བཅོགས་ན་རང་བདེ་མཆོག་ཏུ་བསྐྱེད། མགྲིན་པར་བླ་མ། སྙིང་ཁར་ཡི་དམ། ལྟེ་བར་ཆོས་སྐྱོང་། རྩ་ཁམས་ཐམས་ཅད་དཔའ་བོ་དཔའ་མོར་བསྐྱེད། བཟའ་བཏུང་ཐམས་ཅད་བྱིན་གྱིས་བརླབས་ཏེ་བཟས་ན་ཉམས་ཆག་ཐམས་ཅད་འདག །མཆོག་དང་ཐུན་མོང་གི་དངོས་གྲུབ་ལོ་ཟླ་ཙམ་གྱིས་འགྲུབ་པར་འགྱུར། སྤྱིར་ཐ་མལ་དང་མི་འགྲོགས་པ་ནི། ཕ་རོལ་ཏུ་ཕྱིན་པའི་ལུགས་ལྟར་ན་དུག་གསུམ་རྒྱས་པའི་མི་དང་མ་འགྲོགས། དེ་རྣམས་ཀྱི་ཁ་རླངས་ཀྱིས་རང་གི་དགེ་སྦྱོར་སྒྲིབ་པ་ཡིན་པས། གནས་རི་ཁྲོད་དང་དགོན་པ་འབའ་ཞིག་བསྟེན་ཞེས་གསལ་བ་སོགས་དང་འདྲ་བར། ཐེངས་ཤིག་བླ་མ་རྒྱལ་མཚན་འབུམ་གྱིས་ལྐུགས་ལུང་དུ་འཁོར་ཆེན་མཛད་པའི་མཆོད་གཡོག་ལ་ཆོས་རྗེ་བྱམས་པ་དཔལ་ཤོག་གསུངས་ནས་ཕེབས་པས་དྲོད་དང་རྨི་ལམ་གྱི་སྟོབས་ཆེན་པོ་དེ་འགྲིབས་ནས་ཞག་མང་པོར་སོར་མ་ཆུད། མི་མང་པོའི་གྲིབ་ཀྱིས་ལན་འདུག །དེས་ན་སྒྲུབ་པ་བྱེད་དུས་སུ། གྲིབ་ལ་འཛེམས་པ་ཤིན་ཏུ་གལ་ཆེ་བར་གདའོ་ཞེས་རང་ཉིད་ཀྱིས་ཉམས་མྱོང་གསུངས་པ་ལྟར། ལྷག་པར་དུ་སྒྲུབ་པ་བྱེད་པའི་སྐབས་སུ་ཐ་མལ་པ་རྣམས་དང་མི་འགྲོགས་པ་གལ་ཆེའོ།།
༤ ཆད་ལྟ་བ་དང་མི་འགྲོགས་པའི་ཚོགས་གསོག
ཆད་ལྟ་བ་དང་མི་འགྲོགས་པའི་ཚོགས་གསོག་ནི། སྡུད་པ་ལས་དེ་དག་དགེ་བའི་རྩ་བ་ཇི་སྲིད་མ་རྫོགས་པར། དེ་སྲིད་སྟོང་ཉིད་དམ་པ་དེ་ནི་ཐོབ་མ་བྱེད་ཅེས་གསུངས་པས། རབ་ཀྱིས་ཀུ་སུ་ལུའི་ཚོགས་གསོག་དང་ཏིང་ངེ་འཛིན་གྱི་དབང་བསྐུར་སྦྲེལ་ལོ། འབྲིང་གིས་ཚོགས་འཁོར་བཏང་། ཐབས་ཀྱིས་ཡོངས་སུ་བཟུང་། མ་བཟུང་བའི་འདོད་ཡོན་བྱེ་བྲག་ཐམས་ཅད་དབུལ་ལོ། དེ་ལྟར་མ་བྱས་ན་དམ་ཚིག་ཉམས་པར་འགྱུར་བ་ཡིན།
༥ ཐབས་མི་མཁས་པ་དང་མི་འགྲོགས་པའི་བསྔོ་བ།
ཐབས་མི་མཁས་པ་དང་མི་འགྲོགས་པའི་བསྔོ་བ་ལ་གསུམ་སྟེ། རབ་ཀྱིས་དགེ་བའི་རྩ་བ་ཆུང་ངུ་ལ་སོགས་པ་ཐམས་ཅད་བསྔོ་བས་ཟིན་པར་བྱ། འབྲིང་གིས་ཐུན་ཞབས་སུ་ཉིན་མཚན་ལན་གསུམ་དུ་བསྔོ་བའོ། ཐ་མས་ཐུན་ཞབས་སུ་བསྔོ་བས་རྒྱས་བཏབ་བོ།
༦ དམིགས་བཅས་དང་མི་འགྲོགས་པའི་དམིགས་མེད།
དམིགས་བཅས་དང་མི་འགྲོགས་པའི་དམིགས་མེད་ནི། སྡུད་པ་ལས་ཇི་ལྟར་དུག་དང་འདྲེས་པའི་ཁ་ཟས་བཟང་བ་ཟ་བ་དཀར་པོའི་ཆོས་ལ་དམིགས་པའི་དེ་འདྲར་རྒྱལ་བས་གསུངས་ཞེས་པས། ཐབས་ཤེས་ཟུང་འཇུག་གིས་སྣང་སྟོང་དབྱེར་མེད་མཐའ་བྲལ་དུ་ཉམས་སུ་བླང་ངོ༌།
།དེ་ལྟར་ཐུགས་དམ་དྲུག་པོ་དེ་དག་དང་སྤྱི་གཙུག་བླ་མ་རང་ཉིད་ཡི་དམ་ལྷ། །ངག་ནི་བཟླས་བརྗོད་བཟའ་བཏུང་བདུད་རྩི་ཉིད། །དྲན་རྟོག་སྒྱུ་མ་མདུན་དུ་བཀའ་སྲུང་སྟེ། །རྟག་ཏུ་འབྲལ་མེད་དྲུག་གི་ཉམས་ལེན་བྱ་ཞེས་པའི་རྟག་ཏུ་འབྲལ་མེད་དྲུག་གི་སྤྱོད་པ་ལ་རབ་ཏུ་གནས་པ་ནི་ཤངས་པའི་བླ་མ་གོང་མ་རྣམས་ཀྱི་ཚུལ་ཁྲིམས་གཙང་མའི་རྣམ་ཐར་ཤ་སྟག་ཡིན་པས། དེ་ལྟར་ནུས་ན་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་དཀའ་བ་མེད་པ་སྟེ། སྡུད་པ་ལས་དེ་ལྟར་གནད་དྲུག་ཉམས་སུ་ལེན་པ་དེ། །ཉེས་ལྟུང་ཀུན་བྱང་པད་མ་ལྟར་དུ་གཙང་། །ཟླ་བ་ཡར་གྱི་ངོ་བཞིན་ཡོན་ཏན་འཕེལ། །ནོར་བུ་ལྟར་དུ་བདག་གཞན་དོན་འགྲུབ་འགྱུར་ཞེས་འཁོད་པ་ལྟར་བླ་མ་ཁྱུང་པོའི་ཉམས་ལེན་གྱི་གནད་དྲུག་པོ་དེ་དག་ཉམས་སུ་བླངས་ན། ཉེས་ལྟུང་གི་དྲི་མ་ཐམས་ཅད་དང་བྲལ་ནས། བཟང་པོའི་ཡོན་ཏན་ཡར་ངོའི་ཟླ་བཞིན་འཕེལ་ལ། བདག་གཞན་གྱི་དོན་ཐམས་ཅད་བདེ་བླག་ཏུ་སྒྲུབ་པར་ནུས་སོ།
II.4.4.2 The Six Doctrines of Sukhasiddhi
།གཉིས། སུ་ཁ་ཆོས་དྲུག་སོགས།
མཁས་གྲུབ་ཁྱུང་པོ་རྣལ་འབྱོར་རྒྱ་གར་དུ་ཕེབས་རྗེས། བླ་མ་གྲུབ་ཐོབ་མང་པོའི་ཞབས་རྡུལ་སྤྱི་བོས་མཆོད་དེ། ཆོས་ཀྱི་སྒོ་མཐའ་ཡས་པ་གསན། དེ་དག་ལས་ཡོངས་སུ་གྲགས་པ་ནི་ཡེ་ཤེས་མཁའ་འགྲོ་ནི་གུ་མས་གནང་བའི་ཆོས་དྲུག་ཕུད། གཞན་ཡང་མཁའ་འགྲོ་མ་སུ་ཁ་སིདྡྷིས་གནང་བའི་ཆོས་དྲུག་ཀྱང་ཡོད་དེ། ཐབས་ལམ་དང་སྒྱུ་ལུས། རྨི་ལམ། འོད་གསལ། བར་དོ། འཕོ་བ་བཅས་ཡིན་པ་ནི་གུ་ཆོས་དྲུག་དང་ཐ་སྙད་འདྲ་ཡང་། སུ་ཁ་སིདྡྷིའི་ཆོས་དྲུག་གི་གཞུང་དུ་རྗེ་བཙུན་མ་འདི་ཉམས་སུ་ལེན་པར་འདོད་པས་ཞེས་དང་། མཇུག་ཏུ་དེ་ནི་བིར་ཝ་པའི་མུ་ཏྲ་དགུག་པའི་ལས་སྦྱོར་ཡིན་ཞེས་འཁོད་པ་ལྟར་ན། རྡོ་རྗེ་རྣལ་འབྱོར་མ་ཉམས་སུ་ལེན་པའི་གདམས་པ་གང་ཞིག་བིརཱ་པའི་ཕྱག་རྒྱ་དགུག་པའི་ལས་སྦྱོར་ཞིག་ཀྱང་ཡིན་པས་ཐབས་ལམ་ལ་ཁྱད་པར་ཡོད་པ་ཡིན། ཟབ་ལམ་སུ་ཁ་ཆོས་དྲུག་ཉམས་སུ་ལེན་པའི་ཐོག་མར་སུ་ཁ་ཆོས་དྲུག་གི་བརྒྱུད་པའི་གསོལ་འདེབས་བདེ་ཆེན་རབ་དགྱེས་སོགས་འདོན་པར་བྱ་ལ། སྔོན་འགྲོ་ཐུན་མོང་སྐྱབས་སེམས་དང་། ཐུན་མིན་དག་བྱེད་སྟོང་ར། དངོས་གཞི་བསྐྱེད་རིམ་དང་རྫོགས་རིམ་གཉིས། རྗེས་བཟང་སྤྱོད་སྨོན་ལམ་དང་ཤངས་པའི་སྨོན་ལམ་རྣམ་གསུམ་འདོན་དགོས་པ་སོགས་ཞིབ་པར་སུ་ཁ་སིདྡྷིའི་ཆོས་དྲུག་(དཔེ་རྙིང་ལྡེབ་བཞི་ཅན་དང་ལྕགས་དཔར་ལྡེབ་བརྒྱད་ཅན་)སོགས་ཚད་ལྡན་གྱི་གཞུང་དག་ལས་ཤེས་པར་བྱའོ།
།ཡང་སུ་ཁ་སིདྡྷིའི་གསང་སྒྲུབ་ཅེས་རྡོ་རྗེ་ཕག་མོའི་གསང་བའི་སྒྲུབ་ཐབས་དེ་ཡང་ཤིན་ཏུ་གལ་ཆེ་བ་ཡིན་པས། མཁའ་འགྲོ་མ་འདིས་སངས་རྒྱས་གཉན་སྟོན་ལ། ཁྱེད་བུ་སློབ་རྣམས་ལོ་ཟླ་ཙམ་གྱིས་འཚང་རྒྱ་བར་འདོད་ན། གནས་དབེན་པ་བསྟེན་ལ་གསང་སྒྲུབ་འདི་གསོངས་ལ་སྒྲུབས་ཤིག་ཅེས་པ་གསུངས་པ་ལྟར་ཡིན། དཔལ་ལྡན་ཤངས་པའི་བརྒྱུད་པ་འདི་ལ་སུ་ཁ་སིདྡྷིའི་རྡོ་རྗེ་ཕག་མོའི་གསང་སྒྲུབ་ཕུད་གསང་སྒྲུབ་སྐོར་ལྔའམ་གསུམ་དུ་གྲགས་པ་ནི། བདེ་མཆོག་གསང་སྒྲུབ་དང་། ཕྱག་རྡོར་གསང་སྒྲུབ། རྣམ་འཇོམས་ཀྱི་གསང་སྒྲུབ། ལྔའི་དབང་དུ་བྱས་ན་ནི། དེ་དག་གི་སྟེང་སྤྱན་རས་གཟིགས་གསང་སྒྲུབ་དང་སྐྱེར་སྒང་ལུགས་ཀྱི་རྟ་མགྲིན་གསང་སྒྲུབ་གཉིས་བསྣན་པའོ། འདིའི་སྐོར་ཁུངས་བཙན་གྱི་རྒྱ་གཞུང་བཞུགས་པ་དེ་ལས་ཤེས་པར་བྱའོ། གཞན་ཡང་སུ་ཁ་སིདྡྷིའི་གསང་སྒྲུབ་ལྟེ་བ་འཕྲུལ་འཁོར་དང་། སུ་ཁ་སིདྡྷིའི་དབང་ཆོག །ཚེ་སྒྲུབ་སོགས་ཀྱི་སུ་ཁའི་ཆོས་སྐོར་མང་དུ་ཡོད་ཀྱང་འདིར་རེ་རེ་བཞིན་མ་སྤྲོས་སོ།
II.4.4.3
།གསུམ། བླ་མ་ཤངས་པའི་གདམས་པ་འཇམ་དཔལ་རྒྱ་ལུགས།
གདམས་པ་འདི་ཉིད་ནི་འཕགས་པ་འཇམ་དཔལ་དབྱངས་ཐུགས་དམ་དུ་བསྟེན་དགོས་པས་འཇམ་དཔལ་དང་། མཁས་གྲུབ་ཁྱུང་པོས་བཤེས་གཉེན་རྒྱ་ཆེན་པོ་ལ་གནང་བས་རྒྱ་ལུགས་ཞེས་སུ་གྲགས་པ་ཡིན། དེ་ཡང་བཤེས་གཉེན་རྒྱ་ཆེན་པོས་བླ་མ་ཤངས་པ་ལ། བདག་ལ་ཁྱོད་ཀྱི་སྐྱེ་བ་ཕྱི་མ་ལ་ངན་སོང་གསུམ་དུ་མི་ལྟུང་བའི་གདམས་ངག་ཅིག་ཞུ་འཚལ་བྱས་པས། བླ་མས་ཁྱེད་སྦྱོར་ལམ་ལ་གནས་པ་སངས་རྒྱས་མ་ཆགས་པ་པདྨ་ཅན་གྱིས་ཞལ་གཟིགས་པ་ལ་དེའི་དགོས་པ་མེད་ཀྱང་། ཕྱི་རབས་པ་རྣམས་ལ་ཕན་ཕྱིར་ཡིན་ཞེས་གསུངས་པ་དང་། བླ་མས་ད་དུང་ཕ་རོལ་ཏུ་ཕྱིན་པ་ལ་སོགས་པའི་གདམས་ངག་ནི་ཁྱེད་རང་ཟབ། གསང་སྔགས་ཀྱི་གདམས་པ་ཟབ་མོ་ཡོད་དེ། དེ་ནི་ཁྱེད་ཐུགས་དམ་མི་མཛད་པར་མི་ཡོང་བས། འཕགས་པ་འཇམ་དཔལ་འདི་ཉིད་ཐུགས་དམ་མཛོད་ལ། ཉི་མ་རེ་ལ་ཚར་གསུམ་མ་ཆག་པ་ཐོན། ངན་སོང་གསུམ་དུ་བསྐྱུར་ཡང་མི་འགྲོ་གསུངས་ནས་འདོན་ཐབས་འདི་ཁོང་ལ་གསུངས། བཤེས་གཉེན་རྒྱ་ཆེན་པོས་ཀྱང་སྐུ་ཁྲག་གི་འཁོར་རྒྱུན་མ་ཆད་བར་དེ་ལྟར་དུ་མཛད། གདམས་པ་འདི་ཐེངས་བདུན་ནམ་ཉེར་གཅིག་གིས་བྱེ་བ་འགྱུར་དུ་རྒྱལ་བས་གསུངས།
II.4.4.4
བཞི། བླ་མ་ཤངས་པའི་དོན་དམ་ཕན་མེད་གནོད་མེད།
དེ་ཡང་རྒྱ་གར་མཁའ་འགྲོའི་ཁྱད་འཕགས་ཀྱི་གདམས་པ་རྒྱས་པ་ལ་བཅོ་ལྔ་སྟེ། སྔོན་འགྲོ་དག་བྱེད་སྟོང་ར། ཐབས་ལམ་བདེ་དྲོད་རང་འབར། སྒྱུ་ལུས་ཆགས་སྡང་རང་གྲོལ། རྨི་ལམ་ཉིང་འཁྲུལ་རང་དག །ཁྱད་འཕགས་འཁོར་བ་རྣམ་དྲུག །བསྲེ་འཕོ་ཤེས་རབ་རྣམ་བཞི། འཆུག་མེད་ལམ་ཁྱེར་རྣམ་གསུམ། དག་སྣང་ལྷ་སྐུ་རང་ཤར། ཡུལ་སྣང་གང་བསམས་གསལ་སྟོང་། འོད་གསལ་གཏི་མུག་རང་སངས། འཕོ་བ་མ་བསྒོམ་སངས་རྒྱས། བར་དོ་ལོངས་སྤྱོད་རྫོགས་སྐུ། ཀུན་རྫོབ་སྒྱུ་མ་རྨི་ལམ། གཞན་དོན་གཟུགས་སྐུ་རང་ཤར། དོན་དམ་ཕན་མེད་གནོད་མེད་བཅས་དང་། འབྲིང་ལ་གསུམ་སྟེ། ད་ལྟའི་རྣམ་སྨིན་གྱི་ལུས་དང་། རྨི་ལམ་བག་ཆགས་ཀྱི་ལུས། བར་དོ་ཡིད་ཀྱི་ལུས་བཅས་གནད་དུ་ཟིན་པ། བསྡུས་པ་ལ་གཅིག་སྟེ་ལུས་གསུམ་རྒྱལ་བའི་སྐུ་གསུམ་སྟེ། །རང་སེམས་འཆི་མེད་རང་གྲོལ་ལོ། །ཨེ་མ་དུས་གསུམ་རྒྱལ་བ་ཡིས། །དགོངས་པ་རིན་ཆེན་མཛོད་ཡིན་ནོ་ཞེས་པ་ལྟར་རང་སེམས་འཆི་མེད་རང་གྲོལ་སོགས་གདམས་པ་རྒྱས་འབྲིང་བསྡུས་གསུམ་དེ་དག་ལ་ཁྱད་འཕགས་ཀྱི་གདམས་པ་བཅོ་ལྔ་ཞེས་བྱ་བ། བདག་ཁྱུང་པོ་རྣལ་འབྱོར་གྱི་ལུགས་སོ་ཞེས་འཁོད་པ་བཞིན། མཁས་གྲུབ་ཁྱུང་པོ་རྣལ་འབྱོར་གྱི་ལུགས་ཤ་སྟག་ཡིན་པས། གདམས་པ་དེ་དག་གི་མཇུག་ཤོས་སུ་དྲངས་པའི་དོན་དམ་ཕན་མེད་གནོད་མེད་ཅེས་པ་དེ་ཡང་སྨོས་ཅི་དགོས། དོན་དམ་ཕན་མེད་གནོད་མེད་ཀྱི་མཚན་ཉིད་ཀྱང་། རྒྱ་གར་མཁའ་འགྲོའི་ཁྱད་འཕགས་ཀྱི་གདམས་པ་བཅོ་ལྔ་ལས་ཕན་གནོད་སྤངས་རྟོགས་མ་གྲུབ་པ། འདི་ནི་དོན་དམ་མཚན་ཉིད་ཡིན་ཞེས་པ་ལྟར། མཐའ་བཞིའི་སྤྲོས་པ་དང་བྲལ་བའི་ཆོས་གང་ཞིག །ཕན་པ་དང་གནོད་པ། སྤང་བ། རྟོགས་པ་ལ་སོགས་བདེན་གྲུབ་ཀྱིས་ངོ་བོས་སྟོངས་པ་དང་། རྒྱུ་རྐྱེན་འབྲས་བུ་ཕན་གནོད་ཐམས་ཅད་དང་བྲལ་བ་བློའི་སྤྱོད་ཡུལ་དུ་མ་གྱུར་པ་དེ་རྣམ་གྲངས་མ་ཡིན་པའི་དོན་དམ་པ་སྟེ། འབུམ་ལས་དོན་དམ་པ་ལ་ལས་མེད། ལས་ཀྱི་རྣམ་པར་སྨིན་པ་མེད། ཀུན་ནས་ཉོན་མོངས་པ་མེད། རྣམ་པར་བྱང་བ་ཡང་མེད་དོ་ཞེས་གསུངས་པ་ལྟར་དོན་དམ་བདེན་པའི་དབང་དུ་ནི་ལས་དང་ལས་ཀྱི་རྣམ་པར་སྨིན་པ་སོགས་ཀྱང་མེད་པར་གསུངས་པ་ཡིན།
འོན་ཀྱང་སངས་རྒྱས་རྣམས་ཀྱིས་ཀུན་རྫོབ་སྒྲུབ་པར་སྟོན་པ་དྲང་བའི་དོན་དང་། དོན་དམ་སྒྲུབ་པར་སྟོན་པ་ངེས་པའི་དོན་གཉིས་སུ་བསྟན་པར་མཛད་པ་བཞིན། བླ་མ་ཤངས་པས་ཀྱང་གཞི་བདེན་པ་གཉིས་ལ་དོན་དམ་དང་ཀུན་རྫོབ་གཉིས་སུ་ཕྱེ། དེ་ལས་ཀུན་རྫོབ་ལ་ལོག་པའི་ཀུན་རྫོབ་དང་། ཡང་དག་ཀུན་རྫོབ་གཉིས་སུ་བཞེད་པ་དབུ་མ་རང་རྒྱུད་པ་དང་མཐུན་པ་སྟེ། ཐ་སྙད་ཚད་མས་རྙེད་པའི་དོན་གང་ཞིག །རང་སྣང་བའི་བློ་ལ་སྣང་བ་ལྟར་དོན་བྱེད་ནུས་པའི་ཆོས་དེ་ཡང་དག་ཀུན་རྫོབ་བདེན་པའི་མཚན་ཉིད་དེ། དཔེར་ན་བུམ་པ་དེ་བུམ་འཛིན་མངོན་སུམ་ལ་སྣང་བ་ལྟར་བུམ་པའི་དོན་བྱེད་ནུས་པ་ལྟར་དང་། ཐ་སྙད་ཚད་མས་རྙེད་པའི་དོན་གང་ཞིག །རང་སྣང་བའི་བློ་ལ་སྣང་བ་ལྟར་དོན་བྱེད་མི་ནུས་པའི་ཆོས་དེ་ལོག་པའི་ཀུན་རྫོབ་བདེན་པའི་མཚན་ཉིད་དེ། དཔེར་ན། སྨིག་རྒྱུའི་ཆུ་དེ་རང་འཛིན་མངོན་སུམ་ལ་སྣང་བ་ལྟར་དོན་བྱེད་མི་ནུས་པ་ལྟར་རོ། མདོར་ན། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། ཀུན་རྫོབ་ཀྱི་ནི་དབྱེ་བ་བྱས་ཞེས་གསུངས་པ་ལྟར། ཡང་ལོག་གཉིས་ཀྱང་སྣང་ལ་དོན་བྱེད་ནུས་པ་དང་མི་ནུས་པས་དབྱེ་བ་ཡིན། (དབུ་མ་ཐལ་འགྱུར་པས་ཡང་དག་ཀུན་རྫོབ་དགག་ཚུལ་སྐབས་འདིར་བརྗོད་པར་མི་བྱ་)ཤངས་ལུགས་སུ་དོན་དམ་སྤྲོས་པའི་མཐའ་ཐམས་ཅད་དང་བྲལ་བའི་ཆོས་ཉིད་དེ། དང་པོ་ཐོས་པས་གཏན་ལ་ཕབ། བར་དུ་བསམ་བྱུང་གི་ཤེས་རབ་ཀྱིས་ངེས་སུ་བཅུག །ཐ་མ་སྒོམ་བྱུང་གི་ཤེས་རབ་ཀྱིས་ཇི་ལྟ་བ་བཞིན་གཏན་ལ་ཕབ། དེ་ལྟར་རྟོགས་ནས་སངས་རྒྱས་པ་དེ་ཀ་ཕན་བཏགས་པ་ཡིན་སྙམ་པ་ཞིག་བྱུང་བ་ལ། དེ་ལྟར་དུ་མ་ཡིན་ཏེ་ཕན་རྒྱ་རྟོགས་རྒྱུ་ཞིག་འདུག་པ་དེ་ཀ་ཡང་དག་པའི་ཀུན་རྫོབ་ཏུ་འདོད། དེས་ན་བླ་མ་ཁམས་པ་ཨ་སེང་གིས་ཀྱང་དོན་དམ་ཕན་མེད་གནོད་མེད་དེ་རྒྱལ་སྲས་ཞི་བ་ལྷས་དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་བརྗོད་ཅེས་གསུངས་པ་དང་མཐུན་པར་འཕགས་པའི་མཉམ་བཞག་ཟག་པ་མེད་པ་ཡིན་ལ། འཇིག་རྟེན་པའི་བློ་ཐམས་ཅད་ནི་མཐོང་བ་རྫུན་པ་ཡིན་པས། བདེན་པ་བཙལ་ནས་མ་རྙེད་པའི་རིག་ཤེས་རྗེས་དཔག་དངོས་ཀྱི་གཟུང་བྱར་གྱུར་པའི་སྟོང་ཉིད་མེད་འགག་དེ་ཡང་དག་ཀུན་རྫོབ་ཏུ་འཇོག་དགོས་པར་བཞེད། སྔར་ཆོས་རྗེ་རྨོག་ལྕོག་པས་བླ་མ་ཨ་སེང་དང་ཕྱུ་པ་ཆོས་ཀྱི་སེང་གེ་སོགས་བླ་སློབ་དྲུག་ཅུ་ཙམ་འདུས་པའི་དྲུང་དུ་དོན་དམ་ཕན་མེད་གནོད་མེད་ཀྱི་སྐོར་གསལ་བར་གསུངས་པས། དགེ་བཤེས་རྣམས་ཀྱིས་ཁྱེད་བླ་མ་ཤངས་པའི་སློབ་མར་འདུག །གྲུབ་མཐའ་སྐྱོང་ཤེས་པར་འདུག་ཅེས་བསྟོད་བསྔགས་ཀྱི་མེ་ཏོག་ཆར་དུ་བསྙིལ། དོན་དམ་ཕན་མེད་གནོད་མེད་ནི་ཤངས་པའི་ཆོས་བརྒྱུད་དམ་མཁས་གྲུབ་ཁྱུང་པོའི་ལྟ་གྲུབ་དམིགས་བསལ་ཞིག་ཡིན་པ་དང་། བླ་མ་ཨ་སེང་གིས་བླ་མ་གདུ་བུ་བའི་དོན་དམ་ཕན་མེད་གནོད་མེད་དེ་ལ། ང་ཡང་དང་པོ་མ་བདེ་བ་ཞིག་བྱུང་བ་ཡིན་ཏེ། ད་ང་ལ་གོ་རྒྱུ་གཤའ་མ་ཞིག་བྱུང་བས་ཁྱེད་རང་རྣམས་མ་བདེ་བ་ཡོད་ན་ང་ལ་དྲིས་ཤིག་ཅེས་པ་དེའི་ཐོག་ནས་ལྟ་བ་དེ་ལ་བླ་མ་ཨ་སེང་དང་ཐོག་དོགས་གཞི་ཅུང་ཟད་སྐྱེས་ཀྱང་ཕྱིས་ཁོངས་སུ་ཆུད་ནས་ཡང་དག་ཏུ་སྒྲུབ་པ་རྟོགས་ཐུབ།

II.4.5 -
ལྔ་པ། ཤངས་པའི་བླ་མ་གཞན་གྱི་ཐུན་མིན་གདམས་པའི་སྐོར།
དཔལ་ལྡན་ཤངས་པ་བཀའ་བརྒྱུད་ཀྱི་རིང་ལུགས་འདི་ཉིད་ཀྱི་གདམས་པ་ཕལ་མོ་ཆེ་མཁས་གྲུབ་ཁྱུང་པོ་རྣལ་འབྱོར་ལས་བྱུང་བ་བཤད་ཟིན་པ་དང་། ཕྱིས་ཀྱི་ཤངས་པའི་བརྒྱུད་པ་འཛིན་པ་འགའ་ཞིག་ལའང་བཀའ་བབས་ཀྱི་གདམས་པ་ཐུན་མོང་མ་ཡིན་པ་མང་དུ་བཞུགས་ངེས་ཀྱང་། འགའ་ཞིག་ཟབ་མོའི་བརྡ་ཡིས་མཚོན་པ་དང་། འགའ་ཤས་ནི་བླ་རབས་ཀྱི་མཛད་རྣམ་སོགས་སུ་མཚན་འཁོད་པ་ཙམ་ལས་གསང་བའི་རྒྱ་ཡིས་བཏབ་པས་རྟོགས་པར་དཀའ། དེས་ན་སྐབས་འདིར་དབོན་སྟོན་ཐུགས་རྗེ་ཆེན་པོ་ལ་བཀའ་བབས་པའི་རྟ་མགྲིན་དང་། རྒྱལ་བ་གཉན་སྟོན་ལ་བཀའ་བབས་པའི་རྗེ་བཙུན་མ་ཐོད་པ་རྒྱན་གྱི་སྐོར་བརྗོད་པ་ལ།
II.4.5.1 Hayagriva according to Kyergangpa's tradition
གཅིག །སྐྱེར་སྒང་ལུགས་ཀྱི་རྟ་མགྲིན།
དཔལ་ཆེན་རྟ་མགྲིན་ནི་བོད་ཁ་བ་ཅན་པའི་ལྷ་སྐལ་འོད་དཔག་མེད་ཁྲོས་པའི་རྣམ་ཅན་གྱི་ལྷ་ཡིན། ལྷ་འདི་དངོས་གྲུབ་མྱུར་ལ་སྙིགས་མའི་དུས་ཀྱི་གདོན་བགེགས་འབྱུང་པོའི་གནོད་པ་བཟློག་པར་ཕན་ནུས་ཤིན་ཏུ་ཆེ་བར་གསུངས། དཔལ་རྟ་མཆོག་རོལ་པའི་རྒྱུད་ཀྱི་མན་ངག་གི་རྒྱུན་བོད་དུ་བྱུང་ཚུལ་ནི་རྡོ་རྗེ་རིགས་ཀྱི་བདག་པོ་ཕྱག་ན་རྡོ་རྗེ་སྟེ་རྡོ་རྗེ་ས་འོག་གི་རྒྱུད་ལས་བསྟན་ཅིང་། རྡོ་རྗེ་གཏུམ་མོ་དང་འབྱུང་པོ་འདུལ་བྱེད་སོགས་རིགས་མང་དུ་བྱུང་ཞིང་བོད་དུ་དགེ་ལུགས་ཀྱི་བརྒྱུད་པ་དང་། ས་ལུགས། རྙིང་མ། ཇོ་ནང་ནས་བརྒྱུད་པ་སོགས་བརྒྱུད་པ་ལྔ་ཡོད་ཅེས་གསལ་བ་ལྟར་གྱི་སོགས་སྒྲའི་ཁོངས་སུ་ཤངས་ལུགས་ཀྱང་ཚུད་དགོས་པ་ཡིན།
དེ་ཡང་དབོན་སྟོན་སྐྱེར་སྒང་པ་ཉིད་དགུན་ཟླ་ར་བའི་ཚེས་བཅུ་བདུན་གྱི་ཐོ་རངས་ཤིག་རྨི་ལམ་བཟུང་ནས་ཨོ་རྒྱན་གྱི་ཡུལ་དུ་ཕེབས་ཏེ་སློབ་དཔོན་པདྨ་དང་མཇལ། དབོན་སྟོན་གྱིས་ཨོ་རྒྱན་ཆེན་པོར་བོད་ན་རྒྱལ་བསེན་གྱི་གནོད་པ་ཆེ་བར་ཡོད་པས་དེའི་འདུལ་ཐབས་ལ་རྟ་མགྲིན་གྱི་སྒྲུབ་ཐབས་ཟབ་པ་ཞིག་ཞུ་དགོས་བྱས་པས། སྐད་ཅིག་ལ་སློབ་དཔོན་ཉིད་རྟ་མགྲིན་ཞལ་གསུམ་ཕྱག་དྲུག་པ་གཅིག་ཏུ་གྱུར་ནས་རྟ་སྐད་ཐེངས་གསུམ་བཏོན། མ་མོ་མཁའ་འགྲོ་ཐམས་ཅད་འདུས་ནས་རྟ་མགྲིན་གྱི་དབང་བསྐུར། དེ་ནས་པདྨའི་རྒྱལ་པོའི་ཞལ་ནས་ངས་རྟ་མགྲིན་གྱི་སྒྲུབ་ཐབས་བརྒྱ་རྩ་བརྒྱད་ཀྱི་ནང་ནས་མཆོག་ཏུ་གྱུར་པ་རྟ་མཆོག་རོལ་པའི་རྒྱུད་ལས་ཕྱུང་བའི་གསང་སྒྲུབ་ཅིག་སྙེ་མོར་སྦས་པ་སྔགས་པ་ཞིག་གིས་བཏོན་ནས་ཡོད་པས་དེ་ལ་ཞུས་ཤིག །རྒྱལ་པོ་དང་དཔེ་དཀར། དཀོར་འདྲེ། འགོང་པོའི་ཚོགས། ལྷ་སྲིན་སྡེ་བརྒྱད་ཐམས་ཅད་འཇོམས་པར་བྱེད་དོ་ཞེས་ལུང་བསྟན་པ་བཞིན་དབོན་སྟོན་སྐྱེར་སྒང་པས་སྙེ་མོར་ཕེབས་ནས་སློབ་དཔོན་རྒྱ་གོང་རི་པ་སངས་རྒྱས་དབང་ཆེན་ལ་གསང་སྒྲུབ་ཞུས་ཀྱང་ཐོག་མར་མ་གནང་། སླར་ཡང་རྨི་ལམ་བཟུང་ནས་སློབ་དཔོན་པདྨ་ལ་ཞུས་པས། ལན་གསུམ་གྱི་བར་དུ་ཞུས་ཀྱང་ད་རུང་འཁོར་ལོ་མ་སྦྱིན་པར་འདུག་པས་སླར་ཞུས་ཤིག་གསུངས་པ་ལྟར་ཉི་ཁྲི་དང་། བུར་ལྟང་གཅིག །རས་སྣམ་གཅིག་འཁྱེར་ནས་ཞུས་པས་འཁོར་ལོ་གནང་། དེར་བརྟེན་ནས་དབོན་སྟོན་སྐྱེར་སྒང་པས་དཀར་ཆུང་རྒྱལ་པོས་གནོད་པ་སོགས་སྨྱོན་པ་བརྒྱད་ཅུ་ཙམ་བཏུལ་བས་བྱིན་རླབས་ཤིན་ཏུ་ཆེ། རྒྱ་གོང་རི་པ་སངས་རྒྱས་དབང་ཆེན་ནི་སྙེ་མོའི་ཕྱོགས་སུ་འཁྲུངས་པའི་རྟེན་སྔགས་འཆང་དཀྱུས་མ་ཞིག་ཡིན་ལ། གཏེར་སྟོན་རིམ་བྱོན་ལས་རབ་བྱུང་གཉིས་པའི་ནང་ཕག་གྲུ་དང་། དུས་མཁྱེན་དང་དུས་མཉམ་བྱོན་པ་བཅོ་ལྔའི་ གྲས་ཤིག་ཀྱང་ཡིན།
སྐྱེར་སྒང་ལུགས་ཀྱི་རྟ་མགྲིན་ནི་སྐུ་མདོག་དམར་པོ་ཞལ་གསུམ་ཕྱག་དྲུག་པ། རྩ་ཞལ་དམར། གཡས་ལྗང་། དབུ་གསུམ་གྱི་སྟེང་ན་རྟ་མགོ་ལྗང་ནག་གསུམ་མངོན་པར་འཕགས་ཏེ་རྟ་སྐད་འཚེར་བ། རྔོག་མའི་གསེབ་ནས་མེ་སྟག་འཕྲོ་བ། སྤྱན་གསུམ་པ། མཆེ་བ་གཙིགས་པ། ཕྱག་གཡས་པ་གསུམ་ན་རྡོ་རྗེ། མདུང་རྩེ་གསུམ་པ། རལ་གྲི། གཡོན་པ་གསུམ་ན་སྡིག་མཛུབ། མདུང་ཐུང་། རྒྱུ་མའི་ཞགས་པ་བསྣམས་པ། ཞབས་བརྒྱད་ཀྱིས་པད་ཉིའི་སྟེང་དུ་སྦྲུལ་བརྒྱད་མནན་པ། དབུ་རེ་རེ་ལ་མི་མགོ་སྐམ་པོ་ལྔ་ལྔའི་དབུ་རྒྱན་དང་རློན་པ་ལྔ་བཅུའི་དོ་ཤལ་ཅན། སྟག་ལྤགས་ཀྱི་ཤམ་ཐབས། མི་ལྤགས་ཀྱི་གཡང་གཞི། གླང་ཆེན་གྱི་ཀོ་རློན། རུས་པའི་རྒྱན་དྲུག །ཁྲག་གི་ཐིག་ལེ། ཐལ་ཆེན་གྱི་མ་བུ། སྦྲུལ་ནག་གི་ཆུན་པོ་རྣམས་ཀྱིས་བརྒྱན་པའོ། རྟ་མགྲིན་གསང་སྒྲུབ་འདི་ལ་སློབ་དཔོན་ཙནྡྲ་གོ་མིའི་རྟ་མགྲིན་གྱི་སྒྲུབ་ཐབས་དང་། པྲ་བྷ་ཀ་རའི་རྟ་མགྲིན་གྱི་སྒྲུབ་ཐབས། རྟོགས་པ་བརྒྱ་པ་ལས་བྱུང་བའི་རྟ་མགྲིན་གྱི་སྒྲུབ་ཐབས། ཇོ་བོ་རྗེའི་པདྨ་ཕྱག་དྲུག་པ་དང་ཕྱག་བཞི་པའི་སྒྲུབ་ཐབས་དང་། ཤངས་ལུགས་རང་ལ་ཇོ་ནང་ཏཱ་ར་ནཱ་ཐས་མཛད་པའི་དཔལ་རྟ་མགྲིན་སྐྱེར་སྒང་ལུགས་ཀྱི་སྒྲུབ་ཐབས་སྙིང་པོའི་རྣམ་པར་བཤད་པ་སོགས་ཡོད།
རྟ་མགྲིན་གསང་སྒྲུབ་འདི་ཉིད་ཤངས་ལུགས་སུ་བརྒྱུད་ཚུལ་ནི། མཁའ་འགྲོའི་ཆིག་བརྒྱུད་ཀྱི་གདམས་པ་མངའ་བ་ཤངས་པ་རིན་ཆེན་རྣམ་བདུན་སྔ་མའི་ལྔ་པ་དབོན་སྟོན་སྐྱེར་སྒང་པ་ཆོས་ཀྱི་སེང་གེའི་བཀའ་སྲོལ་ཏེ། སྣང་བ་མཐའ་ཡས་རྟ་མཆོག་རོལ་པ་དང་། དེས་སློབ་དཔོན་པདྨ་ལ་གནང་བ་སྐྱེར་སྒང་པ་ཆོས་ཀྱི་སེང་གེས་གསན་པ་དང༌། གཞན་ཡང་དབོན་སྟོན་སྐྱེར་སྒང་པས་དག་སྣང་གི་ལུང་བསྟན་བཞིན་རྒྱ་གོང་རི་པ་སངས་རྒྱས་དབང་ཆེན་ལས་གདམས་པ་ཞུས་ཏེ་བརྒྱུད་པ་སྤེལ་བ་རིམ་བཞིན་བོད་དར་ནང་བསྟན་ཆོས་བརྒྱུད་གཞན་རྣམས་ལའང་ཁྱབ་པ་སྟེ། དཔེར་ན། དཔེ་ཝར་མཆོག་སྤྲུལ་འཇམ་དབྱངས་བསོད་ནམས་དབང་པོས་དགོན་ཆེན་དུ་ལོ་ཉི་ཤུ་ཙམ་བཅད་རྒྱའི་ཚུལ་དུ་བཞུགས་སྐབས་སྐྱེར་སྒང་རྟ་མགྲིན་གྱི་བསྙེན་སྒྲུབ་མཛད་པ་སོགས་མང་ངོ༌། གདམས་པ་འདི་ནི་བླ་མ་ཤངས་པ་དང་ཆོས་རྗེ་རྨོག་ལྕོག་པ་གཉིས་ལ་ཡང་མ་བཞུགས་ཤིང་སློབ་དཔོན་པདྨ་ནས་ཉེ་བར་བརྒྱུད་པའི་རྟ་མགྲིན་གསང་སྒྲུབ་ཐུན་མོང་མ་ཡིན་པ་ཞིག་ཡིན། སྤྱིར་རྟ་མགྲིན་གསང་སྒྲུབ་འདི་ལ་ཡང་སྐུའི་རྣམ་པ་དང་སྒྲུབ་ཐབས་སོགས་ཅུང་ཟད་མི་འདྲ་བ་ཁག་གསུམ་ཡོད་པ་ཚང་མ་དབོན་སྟོན་སྐྱེར་སྒང་པ་ལས་བརྒྱུད་པ་དང་། ཡང་དགེ་ལྡན་པའི་ཕྱོགས་སུ་རྗེ་བཙུན་འཇམ་པའི་དབྱངས་ཀྱིས་རྗེ་ཙོང་ཁ་པར་དངོས་སུ་གནང་བའི་རྟ་མགྲིན་གསང་སྒྲུབ་ཅིག་ཀྱང་ཡོད་པ་མན་ངག་ལ་ཟབ་ཁྱད་དོ།
II.4.5.2
གཉིས། ཤངས་ལུགས་ཀྱི་རྗེ་བཙུན་མ་ཐོད་པ་རྒྱན།
གཉན་སྟོན་རི་གོང་པ་ལ་བཀའ་བབས་པའི་དམིགས་བསལ་གྱི་གདམས་པ་ལ། བླ་མ་ལ་སྟོད་མགོན་པོས་གནང་བའི་འཆི་མེད་འཕྲུལ་འཁོར་དེ་ཕུད། གཞན་ཡང་ཐེངས་ཤིག་ཡོལ་གྱི་གོང་བུ་མཁར་དུ་ཚོགས་འཁོར་མཛད་པའི་དུས་སུ། རྗེ་བཙུན་མ་ཐོད་པ་རྒྱན་ནམ་རྡོ་རྗེ་རྣལ་འབྱོར་མ་དམར་མོའི་ཞལ་ནས་ཚོགས་འཁོར་རྣམས་བཟང་ཡང་འཁོར་བ་འདི་ཞིང་མ་དག་གསུངས་ཤིང་། པད་གཏོར་ལ་སོགས་པའི་གདམས་པ་འགའ་ཡང་གནང་། ལ་སྟོད་མགོན་པོ་རྒྱ་གར་དུ་ཕྱིར་ལོག་ཕེབས་ཁར་ཡང་རྗེ་བཙུན་མ་ཞལ་གཅིག་མས་གདམས་པའི་གནད་མང་དུ་བསྟན། དེ་ནས་བཟུང་རྗེ་རི་གོང་པས་འདུ་བྲལ་མེད་པར་རྗེ་བཙུན་མ་འདིའི་ཞལ་གཟིགས། རྗེ་བཙུན་མ་ཐོད་པ་རྒྱན་འདིར་བརྒྱུད་པའི་ཐོག་མར་རྙིང་བརྒྱུད་འགའ་རེ་ཡོད་ཀྱང་། རྗེ་བཙུན་མ་དངོས་ཀྱིས་གཉན་སྟོན་པ་ཆོས་ཀྱི་ཤེས་རབ་ལ་གནང་བའི་རྗེ་བཙུན་མ་ཐོད་པ་རྒྱན་ཤངས་ལུགས་ཞེས་བྱ་བ་འདི་ནི། ཞལ་གཅིག་ཕྱག་བཞི་སྤྱན་གསུམ་སེང་གེའི་གདོང་ཅན་རལ་པ་འཕྱང་བ། རུས་པའི་རྒྱན་གྱིས་བརྒྱན་པ། ཕྱག་གཡས་ཀྱི་དང་པོས་གྲི་གུག །གཉིས་པས་རལ་གྲི་འཕྱར་ཞིང་། གཡོན་གྱི་དང་པོས་ཐོད་ཁྲག་ཞལ་དུ་གསོལ་བ། གཉིས་པས་ཁ་ཊཾ་རྩེ་གསུམ་འཛིན་པ། པདྨ་ཉི་ཟླ་བརྩེགས་པའི་སྟེང་དུ་མཁའ་འགྲོ་སྡེ་ལྔས་བཏེགས་པའི་རིན་པོ་ཆེའི་གདན་མི་རོ་བསྣོལ་བ་དང་བཅས་པའི་སྟེང་དུ་ཞབས་གཡོན་བསྐྱངས་པའི་ཕྱེད་དྲུང་ཅན་ནོ། དེ་མིན་ཆོས་རྗེ་བྱམས་པ་དཔལ་གྱིས་རྡོ་རྗེ་རྣལ་འབྱོར་མའི་ཞལ་གཟིགས་སྐབས་སུ་ཡང་གདམས་པ་ཁྱད་འཕགས་ཤིག་གནང་འདུག་ཀྱང་། རྗེ་བཙུན་མའི་བཀའ་རྒྱ་ཡོད་པས་གདམས་པ་འདི་གང་ཡིན་མིན་གྱི་མཚན་ཡང་བརྗོད་མེད་པས། རྗེ་བཙུན་མས་སངས་རྒྱས་གཉན་སྟོན་ལ་གསུངས་པའི་གདམས་པ་དེ་དང་གཅིག་མཚུངས་ཡིན་མིན་བརྗོད་ཐབས་བྲལ། གཞན་ཡང་། དཀར་ཆག་བཻཌཱུརྱའི་ལྡེའུ་མིག་ལས་བོ་དོང་འཇིགས་བྲལ་ཆེན་པོ་ལ་ནི་དྷི་གཉིས་ཀྱིས་དངོས་སུ་བསྩལ་བའི་ཚེ་དབང་དང་ཚེ་སྒྲུབ། རས་ཆེན་དཔལ་འབྱོར་བཟང་པོ་ལ་གནང་བའི་གཏུམ་མོ་དང་འཕོ་བ་ཞག་བདུན་མ་སོགས་ཀྱང་ཤངས་ཆོས་མ་ཡིན་ཀྱང་འབྱུང་ཁུངས་དང་གདམས་ངག་གི་རྐང་གཅིག་པས་འདིའི་ཕྱོགས་སུ་བསླན་ནོ་ཞེས་འཁོད་པ་ལྟར། བོ་དོང་ཐམས་ཅད་མཁྱེན་པར་མཁའ་འགྲོ་མ་ནི་དྷི་རྣམ་གཉིས་ཀྱིས་དངོས་སུ་བསྩལ་བའི་ཚེ་དབང་ཚེ་སྒྲུབ་སོགས་ཡོད་པ་ཤངས་ཆོས་དངོས་མ་ཡིན་ཀྱང་ཤངས་པའི་གདམས་ངག་དང་ཁུངས་གཅིག་པས་ཤངས་པ་བཀའ་བརྒྱུད་ཀྱི་ཁོངས་སུ་བསྣན་པར་རིགས་སོ།

།མདོར་ན་ཤངས་པའི་ཆོས་སྐོར་དེ་དག་སྤྱིར་འཆད་ཚུལ་དང་ཉམས་ལེན་དུ་དྲིལ་ནས་སྟོན་ཚུལ་ནི།
(༡) ཆོས་ཀྱི་སྒོ་མ་ཚང་བ་མེད་པའི་རྒྱས་པ། དེར་ཤངས་ཆོས་ཡོད་ཚད་བསྡུ།
(༢) སྤྱི་ཉེ་བར་བསྡུས་པའི་འབྲིང་པོ། འདི་ལ་གཞུང་བཀའ་ཉེར་ལྔ། རྩ་བ་ནི་གུ་ཆོས་དྲུག །སྡོང་པོ་ཕྱག་རྒྱ་ཆེན་པོ། ཡལ་ག་ལམ་ཁྱེར་རྣམ་གསུམ། མེ་ཏོག་མཁའ་སྤྱོད་དཀར་དམར། འབྲས་བུ་འཆི་མེད་འཆུག་མེད་བཅས་ཀྱི་གསེར་ཆོས་རྣམ་པ་ལྔའོ།
(༣) གནད་ཉེ་བར་དྲིལ་བའི་བསྡུས་པ། འདི་ལ་སྨིན་བྱེད་སྒྱུ་ལུས་དབང་མོ་ཆེ། སྒོས་བཀའ་དྲུག །ནི་གུའི་ཆོས་དྲུག་དམིགས་པ་མཐའ་དག་གིས་བརྒྱན་པ།
(༤) དོན་མཐིལ་དུ་བསྟན་པའི་ཤིན་ཏུ་བསྡུས་པ། འདིར་སྒྱུ་ལུས་དབང་མོ་ཆེ་གཅིག་ཉིད་ལ། སྤྱི་དང་བྱེ་བྲག་ཆོས་དྲུག་གི་བཀའ་དྲུག་ཀྱང་ཚང་བའི་ཡིད་ཆེས་བསྐྱེད་ནས། དམིགས་ཆེན་བྱང་ཆུབ་སྒྲུབ་ལམ་དང་། དམིགས་ཕྲན་ལམ་གྱི་ཉེར་མཁོ་སོ་སོར་ཕྱེ་བའི་དམིགས་ཆེན་གཟེར་འགོ་བཅུ་བདུན་ཡོད། དེ་དག་ཆོས་ཚན་ལྷག་མ་བཞིའི་ཉམས་ལེན་གྱི་གནད་དུ་དྲིལ་ནས་འདུས་ཚུལ་གྱིས་སངས་རྒྱས་ལག་བཅངས་སུ་སྤྲོད་པར་བྱེད། དེ་ལྟར་མཁས་གྲུབ་ཁྱུང་པོའི་ཆོས་ཚན་དང་མན་ངག་ཐོར་བུ་ཡོངས་རྫོགས་བརྗོད་ཀྱིས་མི་ལངས་པ་སྟེ། ད་དུང་ཡང་རྡོ་རྗེ་དབྱུག་པའི་བྱ་བ་ཞེས་པ་དང་། བྱིན་རླབས་དངུལ་གྱི་གདུང་མ། སྣང་སེམས་གཅིག་ཏུ་བསྲེ་བ། སྐོམ་དུ་འཐུང་བ་བདེ་དྲོད་ཞལ་སྦྱོར་གྱི་ཡིག་ཆུང། བླ་མའི་དགོས་བཀའ་བྱེད་ལུགས། རྡོ་རྗེ་རྣལ་འབྱོར་ཐོད་པ་རྒྱ་མཚོའི་སྒྲུབ་ཐབས། དབུ་མ་ཡིག་བདུན་ལུགས་གཅིག །ལ་སོགས་པ་མང་དུ་བཞུགས་ཀྱང་། རྟོགས་དཀའི་ཟབ་དོན་དེ་དག་བྱིས་བློའི་དཔྱད་བྱ་མ་ཡིན་པས། ཚབ་མཚོན་འགའ་ཞིག་ལ་རྒྱུས་མངའ་ཙམ་ཡོང་བའི་སླད་དུ འཇག་ཆེན་རྒྱལ་མཚན་འབུམ་གྱིས་སྙིགས་པ་ལྔ་བདོ་བའི་དུས་སུ། གང་ཟག་གི་ཤེས་རྒྱུད་ལོག་ལྟས་དཀྲུགས་ནས། མན་ངག་ལ་ཐེ་ཚོམ་སྐྱེས་པའི་ཚེ། ཡིད་ཆེས་བསྐྱེད་པའི་ཕྱིར་དུ། བཀའ་མདོ་རྒྱུད་ཀྱི་ལུང་དྲངས་དགོས་ཞེས་གསུངས་པ་ལྟར་ཡིད་ཆེས་བསྐྱེད་པའི་ལུང་གི་རྒྱན་གྱིས་སྤུད་ནས་ཅུང་ཟད་བྲིས་སོ།

II.4.6 -
།དྲུག་པ། ཤངས་ལུགས་གདམས་པའི་ཐུན་མོང་མ་ཡིན་པའི་ཁྱད་ཆོས།
སྤྱིར་རང་རེ་བོད་དུ་དར་བའི་སངས་རྒྱས་ཆོས་ལུགས་ཀྱི་ཆོས་བརྒྱུད་དེ་རྣམས་ཚང་མ་སྟོན་པ་གཅིག་གི་གསེར་ཞལ་ལས་བྱོན་པ་ཤ་སྟག་དང་། བོད་ཀྱི་འདུལ་བ་འཛིན་པ་ཀུན་གཞི་ཐམས་ཅད་ཡོད་པར་སྨྲ་བའི་ལུགས་འཛིན་པ་གཅིག་མཚུངས་ཡིན་ཀྱང་། མཁས་གྲུབ་སོ་སོས་བསྟན་བཅོས་དང་གདམས་ངག་སོགས་སྟོན་པའི་ཚེ་རང་ཉིད་ཀྱི་དགོངས་པ་དང་། བཀའ་བསྟན་འགྲེལ་ཚུལ། སློབ་མའི་ཁམས་དང་མོས་པ་མི་འདྲ་བ་སོགས་ལ་གཞིགས་ནས་ཆོས་གསུངས་པའི་དབང་གིས་ཆོས་བརྒྱུད་ཀྱི་ཡལ་ག་མི་འདྲ་བ་བྱུང་། དེ་ཡང་ངག་རྒྱུན་དུ་གནམ་ལ་ཉི་ཟླ་ཟུང་གཅིག །ས་ལ་ཐེག་པ་རྣམ་གཉིས་ཞེས་སུ་གྲགས་པ་ལྟར་སངས་རྒྱས་ཀྱི་བསྟན་པ་ལ་མཚན་ཉིད་མདོའི་ཐེག་པ་དང་། གསང་སྔགས་རྡོ་རྗེ་ཐེག་པ་གཉིས་སུ་ཕྱེ་བ་ལས། མདོ་ལུགས་ཀྱི་འདུལ་བའི་སྡོམ་རྒྱུན་ཡང་ཐོག་མར་མཁན་ཆེན་ཞི་བ་འཚོས་སད་མི་བདུན་རབ་ཏུ་བྱུང་བ་ལས་བརྒྱུད་པ། བོད་སིལ་བུའི་སྐབས་བླ་ཆེན་དགོངས་པ་རབ་གསལ་གྱིས་འཛིན་ནས་སྤེལ་བའི་འདུལ་བ་སྨད་དར་གྱི་ལུགས། རྒྱ་གར་ཤར་ཕྱོགས་ཀྱི་པཎྜི་ཏ་དྷརྨ་པཱ་ལས་མངའ་རིས་སུ་པཱ་ལ་རྣམ་གསུམ་ལ་སོགས་པར་བརྒྱུད་པ་འདུལ་བ་སྟོད་དར་གྱི་ལུགས། ཁ་ཆེ་པཎ་ཆེན་ཤཱཀྱ་ཤིས་ས་པཎ་སོགས་ལ་བརྒྱུད་པའི་ཁ་ཆེའི་སྡོམ་རྒྱུན་ཞེས་པ་སོགས་ཀྱི་སྡོམ་པའི་རྒྱུན་མི་འདྲ་བ་གསུམ་པོ་འདི་ཙམ་མ་གཏོགས་གཞི་གསུམ་གྱི་ཆོ་ག་སོགས་ཉམས་སུ་ལེན་ཚུལ་ལ་ཁྱད་པར་མེད། དེས་ན་བོད་ཀྱི་ཆོས་བརྒྱུད་དེ་དག་ཀྱང་གཙོ་ཆེར་གསང་སྔགས་རྡོ་རྗེ་ཐེག་པའི་གདམས་པ་ཉམས་ལེན་བྱེད་པའི་ཐབས་ལམ་མི་འདྲ་བ་སོགས་ཀྱི་སྒོ་ནས་ཁྱད་པར་ཕྱེ་བ་ཡང་དཔེར་ན། གསང་སྔགས་གསར་རྙིང་དང་དྭགས་པོ་བཀའ་བརྒྱུད་སོགས་ལྟ་བུའོ།
།མཁས་གྲུབ་ཁྱུང་པོ་རྣལ་འབྱོར་གྱིས་བཀའ་གདམས་པའི་དགེ་བཤེས་གླང་རི་ཐང་པ་ལས་བསྙེན་རྫོགས་ཀྱི་སྡོམ་པ་བཞེས་པས། ཁོང་དང་ཁོང་གི་བརྒྱུད་པར་བཅས་པ་ལ་མཁན་ཆེན་ཞི་བ་འཚོའི་སྡོམ་རྒྱུན་དྲི་མ་མེད་པ་མངའ་ལ། ཇོ་བོ་རྗེ་ལས་གསང་བ་འདུས་པ་དང་སེམས་བསྐྱེད་སོགས་གསན་མྱོང་བས། ཤངས་པ་བཀའ་བརྒྱུད་ཀྱི་བརྒྱུད་འཛིན་པ་ཚོའི་འདུལ་བའི་གཞི་གསུམ་ཆོ་ག་སོགས་ཀྱི་ཕྱག་ལེན་སྤྱིར་བཀའ་གདམས་པ་སོགས་དང་མཚུངས་ཀྱང་། ཤངས་ལུགས་རང་ལ་བཤད་རྩོད་སྒྲུབ་པའི་ལམ་རིམ་གསུམ་དང་ཉམས་ལེན་གཙོ་བོ་ནི་གུའི་གསེར་ཆོས་ལྔ་ལ་སོགས་པའི་དམིགས་བསལ་གྱི་གསང་སྔགས་གདམས་པ་དུ་མ་ཡོད། དེར་བརྟེན་དུང་དཀར་བློ་བཟང་འཕྲིན་ལས་ཀྱིས་ཤངས་པ་བཀའ་བརྒྱུད་པའི་ལྟ་བ་དེ་བོད་ཀྱི་བཀའ་བརྒྱུད་པ་གཞན་གྱི་ལྟ་བ་དང་གཅིག་མཚུངས་ཡིན་པ་ལས་གཞན་དུ་ལྟ་བ་མི་འདྲ་བ་མེད། གསང་སྔགས་ཀྱི་ཆོས་ཀྱི་བརྒྱུད་པ་དེ་བཀའ་བརྒྱུད་པ་གཞན་གྱི་ཆོས་ཀྱི་བརྒྱུད་པ་དང་ཅུང་མི་འདྲ་བ་ཡོད་པ་དང་སོ་སོའི་ཡི་དམ་དང་ལྷ་ལ་སོགས་པ་ཡང་ཅུང་མི་འདྲ་བ་ཡོད་ཅེས་གསུངས་པ་ལྟར། ཤངས་པའི་ཆོས་བརྒྱུད་དང་བཀའ་བརྒྱུད་པ་གཞན་རྣམས་ཀྱི་ལྟ་བའི་མཐར་ཐུག་ཕྱག་རྒྱ་ཆེན་པོའི་འགོ་ཁུངས་གཙོ་བོ་རྒྱལ་བ་མཻ་ཏྲི་པ་ཡིན་པས་སྤྱིར་མི་འདྲ་བ་མེད་པ་ལོ་རྒྱུས་ཀྱི་དོན་དངོས་དང་མཐུན་ཡང་། མཁས་གྲུབ་ཁྱུང་པོས་མཛད་པའི་ལྟ་བའི་སྐོར་ཡོངས་སུ་གསལ་བའི་གཞུང་ཆེན་ཤིན་ཏུ་དཀོན་པས་བཀའ་བརྒྱུད་པ་གཞན་རྣམས་དང་ཞིབ་ཕྲའི་ཁྱད་པར་ཅི་འདྲ་ཡོད་མེད་བརྗོད་པར་དཀའ། དེ་མིན་ཤངས་པ་དང་བཀའ་བརྒྱུད་པ་གཞན་དབར་རང་རང་གི་བླ་མ་བརྒྱུད་པ་དང་། ཡི་དམ་ལྷ་ལ་སོགས་པའང་ཅུང་མི་འདྲ། སྐབས་འདིར་ཤངས་ལུགས་གདམས་པའི་ཁྱད་ཆོས་རགས་ཙམ་ལྡིང་བ་ལ།
II.4.6.1
གཅིག །བརྒྱུད་ཐག་ཉེ་ལ་བརྒྱུད་འཛིན་ཁྱད་དུ་འཕགས་པ།
བཀའ་བརྒྱུད་འདི་ལ་གཞན་ལས་ཁྱད་དུ་འཕགས་པའི་ཁྱད་ཆོས་འགའ་ཞིག་ལྡན་པ་ཡིན་ཏེ། བརྒྱུད་འཛིན་ཁྱད་པར་དུ་འཕགས་པ་སྲིད་པ་མཐའ་མའི་བྱང་ཆུབ་སེམས་དཔའ་འབའ་ཞིག་ཕྲེང་བ་བསྟར་བརྒྱུས་སུ་བརྒྱུད་པ་ལས་གང་ཟག་ཐ་མལ་པས་བར་དུ་མ་ཆོད་པ་ཡང་། རྒྱ་བོད་ཡིག་ཚང་མཁས་པ་དགའ་བྱེད་ལས་རྡོ་རྗེ་འཆང་དང་ཁྱུང་པོ་རྣལ་འབྱོར་གྱི་བར་ལ། ཡེ་ཤེས་ཀྱི་ཌཱ་ཀི་མ་མཆེད་གཉིས་ལས་མེད་པས་བརྒྱུད་ཐག་ཉེ་ཞིང་། བརྒྱུད་པ་བཀའ་བབས་དང་ལྡན་པ། མཁའ་འགྲོའི་བྱིན་རླབས་དང་ལྡན་པ། གདམས་པའི་མགོ་ཞབས་བར་གསུམ་གང་ཐོབ་ཀྱང་རིན་པོ་ཆེའི་རས་མ་ལྟ་བུ་ཡོན་ཏན་དངོས་སུ་བྱུང་ཞེས་འཁོད་པ་ལྟར་ལོངས་སྐུ་དྲུག་པ་རྒྱལ་བ་རྡོ་རྗེ་འཆང་དང་མཁས་གྲུབ་ཁྱུང་པོའི་དབར་ཡེ་ཤེས་ཀྱི་མཁའ་འགྲོ་མ་གཉིས་ལས་མེད་པས་བརྒྱུད་ཐག་ཉེ། ཡང་བྱིན་རླབས་ཀྱི་བརྒྱུད་པ་དང་བྲལ་བའི་ཆོས་ཟབ་མོ་ནི་ཡིད་ཆེས་ཀྱི་གནས་དང་བྲལ་བས། གདམས་པ་བདུད་རྩི་འོ་མ་ལྟ་བུར་གྱུར་ཀྱང་། བྱིན་རླབས་ཀྱི་བརྒྱུད་པ་མེད་ན་བཀོད་མའི་ཆུ་དང་འདྲ། འོན་ཀྱང་མཁས་གྲུབ་ཁྱུང་པོ་རྣལ་འབྱོར་ལ་མཁའ་འགྲོ་མ་སུ་ཁ་སིདྡྷིས་ཁྱོད་ཀྱི་སློབ་མ་ཡང་སློབ་དང༌། །ཕྱི་རབས་བརྒྱུད་འཛིན་ཐམས་ཅད་ལ། །ང་ཡིས་དངོས་སུ་བྱིན་གྱིས་རློབས། །དག་པ་མཁའ་སྤྱོད་གནས་སུ་འགྲོ་ཞེས་གསུངས་པ་བཞིན་ཤངས་པའི་བརྒྱུད་པ་འདི་ལ་བླ་མ་ཡི་དམ་དང་མཁའ་འགྲོ་ཆོས་སྐྱོང་དཔག་ཏུ་མེད་པས་དངོས་སུ་བྱིན་གྱིས་རློབས་པའི་ཞལ་བཞེས་མང་དུ་མཛད་སྟབས་གདམས་པའི་མགོ་ཞབས་ཀུན་ཏུ་བྱིན་རླབས་ཀྱི་མཚན་ཁ་རབ་ཏུ་འབར་ལ། སྙིགས་མའི་དུས་ཀྱི་མཐར་ཐུག་འདིར་ཡང་བརྩོན་འགྲུས་དང་ལྡན་ཞིང་དམ་ཚིག་མ་ཉམས་པ་ལ་གྲུབ་པའི་འབྲས་བུ་སྨིན་པ་མངོན་སུམ་དུ་མཐོང་བ་སྟེ། ཇོ་ནང་ཏཱ་ར་ནཱ་ཐས་ཡེ་ཤེས་ཌཱ་ཀིའི་ཞལ་གྱི་ལུང་། །ལོ་གསུམ་བར་མ་ཆད་བསྒོམ་ན། །ངེས་པར་མཁའ་སྤྱོད་འགྲུབ་བྱེད་པ། །མཁས་གྲུབ་ཁྱུང་པོའི་ཁྱད་ཆོས་འདི་ཞེས་གསུངས་པ་ལྟར་བླ་མ་ཤངས་པའི་གདམས་པ་འདི་དག་ལོ་གསུམ་བར་མ་ཆད་པར་བསྒོམས་ན་མཁའ་སྤྱོད་འགྲུབ་པར་ནུས་པས་ཆེས་ཁྱད་པར་དུ་འཕགས་པ་ཡིན། དེར་བརྟེན་མཁས་གྲུབ་ཁྱུང་པོ་རྣལ་འབྱོར་རང་ཉིད་ཀྱིས་སྤྱིར་ངའི་གདམས་ངག་འདི། གཞན་ལས་ཁྱད་པར་འཕགས་པས། མགོ་སྦྱིན་ན་མགོས་ཕན་ཐོགས། བར་སྦྱིན་ན་བར་གྱིས་ཕན་ཐོགས། གཤམ་སྦྱིན་ན་གཤམ་གྱིས་ཕན་ཐོགས་པ་ཡིན་ཀྱང་། ངས་ཁྱེད་རྣམས་ལ་ལྷག་མ་མ་བཞག་པར་མ་ལུས་པ་རྫོགས་པར་སྦྱིན་པ་ཡིན་པས། ཐེ་ཚོམ་དང་ཡིད་གཉིས་མ་བྱེད་པར་བརྩོན་འགྲུས་ཆེན་པོས་ཉམས་སུ་ལོངས་ཤིག་ཅེས་མཁས་གྲུབ་ཁྱུང་པོའི་གདམས་ངག་གི་མགོ་ཞབས་གང་རུང་གིས་ཕན་ཐོགས་ཀྱང་། ཁོང་གིས་མཆོག་འགྱུར་གྱི་གདམས་པ་དེ་དག་དཔེ་མཁྱུད་ཡེ་ནས་མེད་པར་བུ་སློབ་རྣམས་ལ་སྦྱིན་པས་བརྩོན་པ་དང་སྤྲོ་བ་ཆེན་པོས་ཉམས་སུ་ལེན་པར་བསྐུལ།
གཞན་ཡང་སྤྱིར་ནི་གུའི་བརྒྱུད་པ་ཁག་ཉེར་བཞི། དེའི་སྟེང་ཉེ་བརྒྱུད་ལྕགས་ཟམ་ལུགས་བརྩིས་པའི་ཉེར་ལྔ་ཡོད་ཀྱང་། མཁས་གྲུབ་ཁྱུང་པོ་ཉིད་ཀྱིས་གསན་ནས་བརྒྱུད་ཚུལ་འདི་ལ། ཁྱུང་པོ་རྣལ་འབྱོར་པ་ལན་གསུམ་དང་། རྨོག་ལྕོག་པ་ལན་གཉིས་སུ་བཟླས་པ་བརྒྱུད་པ་འདི་ལ་ཚང་བས། འདི་ཉིད་ལ་ཐུགས་བརྩིས་ཆེ་བར་མཛད། དེར་བརྟེན་སངས་རྒྱས་ཀྱི་བརྒྱུད་པ་རྟོགས་ལྡན་དང་གྲུབ་ཐོབ་ཀྱི། མི་བར་དུ་ཁྱི་མ་ཞུགས་པའི་བརྒྱུད་པ་ཡིན་ཞེས་འཁོད་པ་བཞིན་གྲུབ་ཐོབ་གཙང་སྒོམ་གྱི་བརྒྱུད་པ་ཕུལ་དུ་བྱུང་བ་ཞིག་གོ
II.4.6.2
།གཉིས། བཀའ་རྒྱ་དོག་ལ་སོ་སྐྱེའི་བཅོས་ཀྱིས་མ་བསླད་པ།
གདམས་ངག་ཁྱད་པར་དུ་འཕགས་པ། དོན་མ་ནོར་ཞིང་ཚིག་མ་བསླད་པ་ཡེ་ཤེས་ཌ་ཀིས་ཐེམས་སུ་བཏབ་པའི་རྡོ་རྗེའི་ཚིག་རྐང་སོ་སྐྱེའི་བློས་བཏགས་ཀྱི་བཅོས་བསྒྱུར་དང་རྩོམ་པ་མ་ཕོག་པ་སྟེ། ནི་གུ་མའི་ཆོས་དྲུག་རྡོ་རྗེའི་ཚིག་རྐང་དུ་ལོག་ལྟས་རྒྱུད་དཀྲུགས་རྩོད་ལྡན་སྙིགས་མའི་དུས། །ཡང་དག་ཆོས་ནི་ཉིན་སྐར་རུས་སྦལ་སྤུ། །ལོག་ཆོས་ཚོང་འདུས་འོ་མའི་ཆོས་སྤྱོད་ཚེ། ཉམས་མྱོང་ལུང་དང་ཐེམ་ཡིག་བརྒྱན་པ་གཅེས་ཞེས་འཁོད་པ་ལྟར་ལོག་པར་ལྟ་བ་སྣ་ཚོགས་ཀྱིས་རང་རྒྱུད་དཀྲུགས་ཤིང་། རྩོད་ལྡན་གྱི་སྙིགས་མ་ལྔ་བདོ་བའི་དུས་འདིར། ཆོས་རྣམ་དག་ནི་རི་བོང་གི་རྭ་དང་རུས་སྦལ་གྱི་སྤུ་བཞིན་ཤིན་ཏུ་དཀོན་ལ། བསྲེ་ལྷད་ཀྱི་སྐྱོན་ཕོག་པའི་ཚོང་འདུས་འོ་མ་ལྟར་གྱི་ལོག་ཆོས་རྣམས་ལ་ལོངས་སུ་སྤྱོད་པའི་ཚེ། ཉམས་མྱོང་གི་ལུང་དང་ཐེམ་ཡིག་གི་བཀའ་རྒྱས་སྡོམ་པ་ཤིན་ཏུ་དགོས་གལ་ཆེ་བར་གསུངས། དེས་ན་སངས་རྒྱས་གཉན་སྟོན་གྱིས་སྙན་བརྒྱུད་ཀྱི་གདམས་པ་ཁ་རུ་མི་འདོན་ཞེས་དང་། ལོ་ཙཱ་བ་འགྱུར་མེད་བདེ་ཆེན་གྱིས་སྙན་བརྒྱུད་ཆིག་བརྒྱུད་ཆོས་དྲུག་ལ། །མ་འོངས་དུས་སུ་བསྲེ་སླད་བྱས། །དེ་དུས་ཁྲིད་ལུགས་སྣ་ཚོགས་འབྱུང་། །དད་ལྡན་ཐེ་ཚོམ་སྤོང་བའི་ཕྱིར། །འཆུག་མེད་གནད་ཀྱི་ཐེམ་ཡིག་བཀོད་ཅེས་གསུངས་པ་བཞིན། མཁའ་འགྲོའི་གསང་ཚིག་གི་སྙིང་བཅུད་དེ་དག་ཐེམ་ཡིག་རྡོ་རྗེའི་མདུད་པས་རབ་ཏུ་བསྡམས་པ་ཡང་དགོས་པ་ཤིན་ཏུ་ཆེ་བ་ཡིན། དེར་བརྟེན་གདམས་སྲོལ་འདི་ལ་གསོལ་འདེབས་དང་དམིགས་པའི་རྐང་གྲངས་རྣམས་ཀྱང་ཡེ་ཤེས་ཀྱི་མཁའ་འགྲོ་མ་ཉིད་ཀྱིས་ཐེམས་ཡིག་གི་རྒྱས་བཏབ་པར་མཛད་པས་གང་ཟག་ཕྱི་མས་རྟོག་བཟོས་འཆོས་སུ་མེད་པའི་ཤིན་ཏུ་ཁྱད་པར་དུ་འཕགས་པ་ཡང་། གཉན་སྟོན་རི་གོང་པའི་རྣམ་ཐར་མཐོང་བ་དོན་ལྡན་དུ་སྐྱེར་སྒང་ཐུགས་རྗེ་ཆེན་མོས་ཁོང་ལ། སྤྱིར་བླ་མ་ཤངས་པའི་ཆོས་འདི་དཔའ་བོ་མཁའ་འགྲོ་དངོས་སུ་འདུ་བ་ཡིན་པས་བཀའ་དོག་པར་ཡོད་དེ། ཁྱོད་ལ་ཆིག་བརྒྱུད་རྣམས་མ་ལུས་པར་ཚར་བ་ཞིག་བྱ་ཞེས་དང་། ཆོས་རྗེ་སངས་རྒྱས་སྟོན་པས་བླ་མ་ཤངས་པའི་བརྒྱུད་པ་འདི་གདམས་ངག་གི་གནད་ལ་དམ་པ་ཡིན་ཞེས་སོགས་གསུངས་པ་ལྟར་ཤངས་པའི་གདམས་པ་འདི་དག་ལ་དཔའ་བོ་དང་མཁའ་འགྲོ་དངོས་སུ་འདུ་བ་ཡིན་པས་གནད་ཟབ་ལ་བཀའ་ཤིན་ཏུ་དོག །ཡང་མཁས་བཙུན་རྒྱལ་མཚན་འབུམ་གྱི་ཕྱག་ཆེན་ཁྲིད་ཡིག་གི་མཇུག་ཏུ་ཚིག་ལྷད་མ་ཞུགས་མཁའ་འགྲོ་འདུ། ངེས་ཤེས་སྐྱེད་ཅིང་བྱིན་རླབས་འཇུག་ཅེས་དང་། སྒྲུབ་ཆེན་རིན་རྫོང་པ་དབང་ཕྱུག་རྒྱལ་མཚན་གྱི་རྣམ་ཐར་མཇུག་ཏུའང་བླ་མའི་གསུང་ལས་བྱུང་བ་ལྟར། །ཡི་གེར་བཀོད་པ་འདི་ཉིད་ལ། །དད་གུས་ལྡན་པའི་ལམ་ཡིན་ཕྱིར། །ལེགས་འདོགས་སྙན་ངག་མ་འཇུག་ཅིག །བཅུག་ན་བྱིན་རླབས་བཅུད་བོར་རོ། །བླ་མའི་བཀའ་རྒྱ་ཡོད་པའི་ཕྱིར། །མཁས་འདོད་བསྲེ་བསླད་མ་བྱེད་ཅིག །བྱས་ན་མགོན་པོའི་བཀའ་ཆད་ཡོང་ཞེས་འཁོད་པ། ཆོས་དྲུག་གི་འགྲེལ་པ་བདུད་རྩིའི་རྒྱ་མཚོའི་མཇུག་ཏུ་(བླ་མར་)ཚོགས་མཆོད་གསེར་གྱི་མཎྜལ་ཕུལ། བཀའ་ཡིས་གནང་བ་ལེགས་པར་ཞུས། །རང་བཟོ་སྤངས་ཏེ་གསུང་བཞིན་བཀོད། །མཁས་འདོད་བསྲེ་སླད་མ་བྱེད་ཨང་། །བྱས་ན་བྱིན་རླབས་གནད་འཆུགས་པས། ཆོས་བདག་མཁའ་འགྲོའི་ཚོགས་རྣམས་དང༌། །ཡེ་ཤེས་མགོན་པོའི་བཀའ་ཆད་མཆི་ཞེས་སོགས་འཁོད་པ་ལྟར་མ་མཁའ་འགྲོའི་སྙིང་ཁྲག་དྲོན་མོ་ལས་འབྱུང་བ་ལྟ་བུའི་ཟབ་མོའི་མཐར་ཐུག་པའི་གདམས་པ་འདི་དག་བླ་མའི་གསུང་བཞིན་ཡི་གེར་བཀོད་པ་དང་། གཞན་ལ་བརྒྱུད་སྤེལ་བྱེད་པ་ལས་ལེགས་འདོགས་ཀྱི་སྙན་ངག་སོགས་བཅུག་སྟེ་བསྲེ་ལྷད་བཏང་ན་བྱིན་རླབས་ཀྱི་བཅུད་བོར་བ་དང་ཡེ་ཤེས་མགོན་པོའི་བཀའ་ཆད་ངེས་པར་ཕོག་པའོ། དེ་ལྟར་ཤངས་པ་བཀའ་བརྒྱུད་ཀྱི་ཟབ་མོའི་གདམས་པ་དངོས་ལྟ་ཞོག་བླ་རབས་ཀྱི་གསང་བའི་རྣམ་ཐར་འགའ་ཡང་གང་བྱུང་དུ་མི་སྤེལ་བ་སྟེ་སྐྱེར་སྒང་པའི་གསང་བའི་རྣམ་ཐར་གྱི་མཇུག་ཏུ་བཀའ་བརྒྱས་བཏབ་པས་ལོ་ཉི་ཤུ་རྩ་ལྔའི་བར་ཡི་གེར་བྲིས་པ་མེད་ལ། བཀའ་ཆད་ཀྱི་དོགས་ནས། གླང་གི་ལོ་ལ་བྲིས་པ་ཡིན་ཞེས་པ་སོགས་མང་དུ་འཁོད་པས་དཔེ་ཙམ་བཀོད་པ་ཡིན་ལ། ཡང་ཆོས་རྗེ་རྨོག་ལྕོག་པ་གཞུང་མདའ་གནས་སུ་ཞག་གཅིག་བཞུགས་པའི་ཚེ། བཙུན་མ་གཅིག་བྱུང་ནས་ཤངས་པ་གདུ་གུ་བའི་གདམས་པར་ཁྱད་པར་ཅན་སྡིག་པོ་ཆེ་བཙན་ཐབས་སུ་འཚང་རྒྱ་བའི་འཕོ་བ་ཡེ་ཤེས་སྐར་ཁུང་མ་དེ་ཞུ། ངས་འབུལ་བ་ཡང་བཟང་དུ་བྱེད་ཟེར་བས་རྗེ་རྨོག་ལྕོག་པས་ཀྱང་ཁས་བླངས། ཉིན་དེའི་ནམ་སྲོད་ལ་རྗེ་རྨོག་ལྕོག་པའི་རྨི་ལམ་དུ་ལྷ་མོ་དཀར་མོ་གཅིག་ལྕི་བ་ཁམ་ཁམ་ཟ་བཞིན་འདུག་པ་ལ། ཁྱོད་ལྷ་མོ་དཀར་མོ་ལེགས་མོ་ཞིག་ལྕི་བ་ཟ་བ་གང་ཡིན་བྱས་པས། དེས་རྗེ་རྨོག་ལྕོག་པ་ལ་ཁྱོད་ཀྱང་གསང་སྔགས་ཀྱི་ཆོས་ཟབ་མོ་ནོར་ལ་བལྟས་ནས་འཚོང་བ་གང་ཡིན་ཞེས་ཟེར་བ་དང་། སླར་ཐོ་རངས་རྨི་ལམ་ན་མི་གཅིག་གི་མགོ་ལུས་ཡོངས་རྫོགས་ཆུ་བུར་གྱིས་ཁེངས་འདུག་པ་དེ་དག་བརྡོལ་ནས་རྣག་ཁྲག་མང་པོ་འཛག་ཅིང་ཟུག་རྔུ་ཆེན་པོ་རྒྱབ་སྟེ་ཆོ་ངེ་འདེབས་ཀྱིན་འདུག་པ་ལ། རྗེ་རྨོག་ལྕོག་པས་དེ་ལ་ཁྱོད་ལ་སྡུག་བསྔལ་ཆེན་པོ་འདི་ལྟ་བུ་འོང་བ་གང་ཡིན་ཞེས་དྲིས་པས། ཁོ་ན་རེ་ངས་ཐེག་པ་ཆེན་པོ་གསང་སྔགས་ཚེ་འདིའི་ཆེད་དུ་བཤད་པས་སྡུག་བསྔལ་གྱི་ཚོར་བ་དྲག་པོ་ཉམས་སུ་མྱོང་བ་ཡིན་ཟེར་བས། རྗེ་རྨོག་ལྕོག་པས་རང་གིས་སྔར་ཁས་བླངས་པ་དེ་དྲན་ནས་གདམས་ངག་བཤད་དུ་མི་བཏུབ་སྙམ་སྟེ། ནམ་མ་ལངས་གོང་ས་དེ་ནས་བྲོས་ཏེ་ཕེབས། མདོར་ན། ཤངས་པའི་གསེར་ཆོས་ལ་སོགས་པའི་གདམས་པ་ཕལ་ཆེར་བཀའ་རྒྱས་རབ་ཏུ་བཅིངས་པས་མི་རབས་བདུན་དུ་ཆིག་བརྒྱུད་ལས་མ་སྤེལ་ལོ།
II.4.6.3
།གསུམ། མན་ངག་ཟབ་ལ་གདམས་ངག་སྒོ་སྐྱེལ་དུ་བྱོན་པ།
།དེ་ཡང་གསོལ་འདེབས་རིན་ཆེན་སྒྲ་དབྱངས་ལས་གྲུབ་ཐོབ་རྣལ་འབྱོར་རྣམས་ཀྱིས་བཀས་བསྐུལ་ཏེ། །རྫུ་འཕྲུལ་མཐུ་ཡིས་གངས་ཅན་ལྗོངས་སུ་ཕེབས། མཁས་གྲུབ་ཁྱུང་པོའི་སྤྱན་སྔར་ཡ་མཚན་པའི། ཆོ་འཕྲུལ་ཐོག་དྲངས་བྱིན་རླབས་ལྷ་བཞི་སོགས། །ཟབ་མོའི་གདམས་ངག་བཀའ་དང་ལག་ལེན་བཅས། །དུ་མ་བསྩལ་ཞིང་སྤྲུལ་པའི་དཀྱིལ་འཁོར་དུ། །སྐལ་ལྡན་འགའ་ཞིག་བཅུག་ནས་འཕགས་ཡུལ་དུ། །ཡུད་ཀྱིས་གཤེགས་པར་མཛད་ལ་གསོལ་བ་འདེབས་ཞེས་འཁོད་པ་ལྟར་སྤྲུལ་པའི་ལྷ་བཞིས་རྗེས་སུ་བཟུང་བའི་གྲུབ་ཆེན་ར་ཧུ་ལ་མངོན་ཤེས་དང་རྫུ་འཕྲུལ་གྱིས་བོད་གངས་ཅན་གྱི་ལྗོངས་སུ་ཕེབས་ནས་མཁས་གྲུབ་ཁྱུང་པོས་གཙོས་པའི་སྐལ་ལྡན་གྱི་སྐྱེས་བུ་འགའ་ཞིག་སྤྲུལ་པའི་དཀྱིལ་འཁོར་དུ་དབང་བསྐུར་ཞིང་། དེ་དག་ལ་ཟབ་མོའི་གདམས་པ་མང་དུ་བསྩལ། གྲུབ་ཆེན་འདི་ཉིད་ལ་གུ་ཎ་ཨ་ཀ་ར་དང་རཏ་ཨ་ཀ་ར། ཨ་བྷི་ཛུ་ཏ། བྱུ་ན་ཨ་ཀ་ར་སོགས་གྲུབ་ཐོབ་རྣལ་འབྱོར་དུ་མའི་བཀའ་ཡིས་བོད་དུ་གཤེགས་དང་རྣལ་འབྱོར་པ། །གཅིག་ལ་དགོས་པ་ཆེའོ་གསུངས་ཞེས་ལེགས་པར་བསྐུལ་ཏེ་གདམས་ངག་སྒོ་སྐྱེལ་གྱི་ཆེད་བོད་ཁ་བ་ཅན་དུ་དངོས་སུ་ཕེབས། གྲུབ་ཆེན་འདི་ཉིད་གདམས་པ་སྒོ་སྐྱེལ་དུ་ཕེབས་པའི་རྒྱུ་མཚན་གཙོ་བོ་གསུམ་སྟེ། རླུང་ཤིང་རྟ་ཅན་དང་། རྡོ་རྗེ་རྣལ་འབྱོར་མ་རྨི་ལམ་དུ་ཞལ་བལྟ་བ་འདི། མགོན་པོ་ཤིང་ཕུག་ཅན་གྱི་གདམས་པ་སྟེ། གདམས་པ་གསུམ་པོ་དེ་སྟེར་བའི་ཡུལ་མ་རྙེད་ནས། སྣོད་ལྡན་གྱི་མཁས་གྲུབ་ཁྱུང་པོར་གནང་བར་ཕེབས་པ་ཡིན། མཁས་གྲུབ་ཁྱུང་པོ་རྣལ་འབྱོར་འཕན་ཡུལ་ནས་མཁའ་འགྲོའི་ལུང་བཞིན་ཤངས་ལ་ཕེབས་སྙམ་པའི་ཐོ་རངས་ཤིག་ལ་ལན་པའི་སྤྱིལ་བུར་ཐོག་མར་གྲུབ་ཆེན་རཱ་ཧུ་ལ་དང་མཇལ་ནས་གསང་སྔགས་ཀྱི་དབང་བཞི་རྫོགས་སུ་བསྐུར་བ་དང་། དེ་རྗེས་འཕན་ཡུལ་འཆད་ཁ་དགོན་དུ་ཟླ་བ་བཅུ་གཅིག་རིང་འཕོ་བ་ཡེ་ཤེས་སྐར་ཁུང་དང་། བདེ་མཆོག་རྩ་རྒྱུད། དགྱེས་རྡོར་སྒྲུབ་ཐབས་མཚོ་སྐྱེས་རྡོ་རྗེ། དེ་ཉིད་བཞི། ཕྱག་རྒྱ་བཞི་ལྡན། རྫོགས་རིམ་ལྔ་ལྡན། བདེ་མཆོག་ལུ་ཡི་པ་སོགས་ཀྱི་གདམས་པ་མང་དུ་གནང་བ་ཡང་། མཁས་གྲུབ་ཁྱུང་པོའི་གསོལ་འདེབས་མོས་གུས་ཀྱི་སྒྲ་དབྱངས་ལས་ལྷ་བཞིས་རྗེས་བཟུང་གྲུབ་ཆེན་ར་ཧུ་ལ། །གདམས་ངག་སྒོ་སྐྱེལ་ཕེབས་ནས་སྒྲུབ་རྒྱུད་ཐབས། མན་ངག་ལས་ཚོགས་བརྗོད་ལས་འདས་པ་གསན། ཡ་མཚན་རྫུ་འཕྲུལ་སྟོན་ལ་གསོལ་བ་འདེབས་ཞེས་པ་ལྟར་གྲུབ་ཆེན་ར་ཧུ་ལ་མཁས་གྲུབ་ཁྱུང་པོར་གདམས་ངག་སྒོ་སྐྱེལ་དུ་ཕེབས་ནས་སྒྲུབ་རྒྱུད་ཐབས་དང་མན་ངག་ལས་ཚོགས་བརྗོད་ལས་འདས་པ་གནང་བས་བརྒྱུད་པ་འདིར་གཞན་དང་མི་འདྲ་བར་གདམས་ངག་སྒོ་སྐྱེལ་གྱི་དམིགས་བསལ་ཁྱད་ཆོས་ལྡན་ཡོད། དེར་བརྟེན་མཁས་གྲུབ་ཁྱུང་པོས་ཀྱང་། སྒྲུབ་ཐབས་དགོས་པ་ཀུན་འབྱུང་གདམས་ངག་གི་རྒྱལ་པོའི་མཇུག་ཏུ་རྣལ་འབྱོར་གྱི་དབང་ཕྱུག་ཆེན་པོ་རཱ་ཧུ་ལ་གུཔྟ་བཛྲ་གྱིས་བདག་ཁྱུང་པོ་རྣལ་འབྱོར་ལ་བརྩེ་བ་ཆེན་པོས་བོད་ཡུལ་དབུས་སུ་སྐྱེལ་དུ་བྱོན་པའི་གདམས་པའོ་ཞེས་བཅོས་མིན་གྱི་དད་གུས་དང་བཅས་ཏེ་གསུངས་པ་ཡིན། དེ་རྗེས་བླ་མ་ཤངས་པ་ཉིད་མང་ཡུལ་སྐྱིད་གྲོང་བར་དུ་གྲུབ་ཆེན་རཱ་ཧུ་ལའི་ཕེབས་སྐྱེལ་ལ་བྱོན་པ་ན། བླ་མས་མཁས་གྲུབ་ཁྱུང་པོར་ཞལ་གདམས་བདུད་རྩི་ཚིག་དྲུག་མ་ ཞིག་ཀྱང་བསྩལ་རྗེས་ནམ་མཁར་གྱ་གྱུས་གཤེགས་ནས་སྐད་ཅིག་མར་རྡོ་རྗེ་གདན་གྱི་ཚོགས་དཔོན་ལ་ཕེབས།
གཞན་ཡང་གསོལ་འདེབས་བྱིན་རླབས་ཀྱི་སྒྲ་དབྱངས་ལས་དུར་ཁྲོད་ནག་པོའི་བཀའ་བཞིན་ལ་སྟོད་པ། འཕགས་པའི་ཡུལ་ནས་རྫུ་འཕྲུལ་སྟོབས་ཀྱིས་ཕེབས། །འཆི་མེད་འཁྲུལ་འཁོར་གསན་པས་གསང་བའི་བགེགས། །དབྱིངས་སུ་གྲོལ་བར་བསྟན་ལ་གསོལ་བ་འདེབས་ཞེས་འཁོད་པ་བཞིན་རི་གོང་པ་སངས་རྒྱས་གཉན་སྟོན་ཡོལ་གྱི་བཤུང་ལུང་སྤང་ཁར་ལོ་གསུམ་སྒྲུབ་པ་ལ་ཞུགས་པའི་ཉིན་ཞིག །བླ་མ་དུར་ཁྲོད་ནག་པོའི་སློབ་མ་ལ་སྟོད་མགོན་པོ་རྒྱ་གར་ནས་ཕེབས་པ་དང་མཇལ། ལ་སྟོད་མགོན་པོས་འཆི་མེད་ཀྱི་འཕྲུལ་འཁོར་བྱ་བ་ཨེ་ཤེས་གསུངས་པ་ལ། རྗེ་རི་གོང་པས་མ་ཤེས་ད་འོ་ན་གདམས་པ་དེ་ཞུ་དགོས་བྱས་པས། བླ་མ་ལ་སྟོད་མགོན་པོས་འདི་རྒྱལ་པོའི་ཆོས་ཡིན། ལོངས་སྤྱོད་ཆེན་པོ་དགོས། འཕྲུལ་འཁོར་རེ་ལ་ཚོགས་འཁོར་བཟང་བ་རེ་དང་གསེར་སྲང་རེ། གོས་ཆེན་ཡུག་རེ་བཅས་དགོས་ཟེར། རྗེ་རི་གོང་པའི་ཐུགས་དགོངས་སུ་ཆོས་འདི་ཆ་རྐྱེན་གྱིས་མི་ལྕོགས་པར་སྣང་བས་མ་ཞུ་སྙམ་ཙ་ན། ཁམས་པའི་སློབ་མ་མང་པོ་ཡོད་པ་དེ་རྣམས་ན་རེ། སློབ་དཔོན་རང་ཆོས་ཞུས་ལ་ཆ་རྐྱེན་ངེད་ཀྱིས་འབུལ་ཟེར་ནས། འཆི་མེད་འཕྲུལ་འཁོར་ཟླ་བ་བདུན་ལ་ཚར་བར་བྱས། ཆོས་འདི་ཞུས་པའི་ནུབ་མོ་ནས་སྔར་གྱི་རྣམ་སྨིན་གྱི་གེགས་དེ་རང་དག་ཏུ་སོང་། གདམས་པ་ཞུས་ཟིན་རྗེས་བླ་མ་ལ་སྟོད་མགོན་པོས་གསེར་དང་དར་ཡུག་རྣམས་ཀྱང་མ་བཞེས་པར་རྗེ་རི་གོང་པ་ལ། ངས་ཁྱོད་དམ་ཚིག་དང་ལྡན་མི་ལྡན་བལྟས་པ་ཡིན་གསུངས། དེ་ལྟར་བླ་མ་དུར་ཁྲོད་ནག་པོའི་ལུང་བསྟན་བཞིན་ལ་སྟོད་མགོན་པོ་ཉིད་གཉན་སྟོན་རི་གོང་པའི་དྲུང་དུ་དངོས་སུ་གདམས་པ་སྒོ་སྐྱེལ་དུ་བྱོན་པ་ཡིན་ལ། དེ་མིན་དག་སྣང་དུ་གདམས་ངག་བཀའ་བབས་པ་ནི་གྲངས་ལས་འདས་པས་བརྗོད་པར་མི་བྱའོ།
།དེ་ལྟར་མཁས་གྲུབ་ཁྱུང་པོའི་གདམས་པ་དེ་དག་ནི། བརྒྱུད་པ་ཐག་ཉེ་བ་དང་བརྒྱུད་འཛིན་ཁྱད་དུ་འཕགས་པ། བཀའ་རྒྱ་དོག་པ། གང་ཟག་ཕལ་པའི་བཅོས་མ་ཕོག་པ། གདམས་པ་སྒོ་སྐྱེལ་དུ་བྱོན་པ་སོགས་ཀྱི་དམིགས་བསལ་ཁྱད་ཆོས་ལྡན་པས་བྱིན་རླབས་ཤིན་ཏུ་ཆེ། དེས་ན་མཁས་གྲུབ་ཁྱུང་པོ་རང་ཉིད་ཀྱིས་ཀྱང་ངའི་གདམས་པ་འདི་རྣམས་ཀྱིས། དབང་པོ་རབ་སྨིན། འབྲིང་བག་ཆགས། ཐ་མ་བར་དོར་སངས་མི་རྒྱ་བ་མི་སྲིད་པ་ཡིན་ནོ། བདག་གི་བཀའ་བབས་དང་གདམས་ངག་གི་གནད་འདི་ལྟ་བུ་རྒྱ་བོད་གང་ན་ཡང་མེད་པར་ཐག་ཆོད་པ་ཡིན་ཞེས་གསུངས་སོ།

།སྨྲས་པ། མྱུར་མཛད་ཡེ་ཤེས་མགོན་པོའི་མཐུ་ཡིས་ཤངས་པའི་བསྟན་པ་སྲུང་མཛད་ལ། །སྐྱེས་ཆེན་གྲུབ་ཐོབ་བྱང་སེམས་འཕགས་པས་ཐུགས་དམ་དྲུག་གི་དམ་བཅའ་བཟུང༌། །སྒྱུ་ལུས་རྩ་རླུང་གདམས་པའི་གནད་ཀྱིས་འཆིང་བ་ཐམས་ཅད་གྲོལ་གྱུར་པས། །རང་ལུགས་ཐུན་མིན་ཁྱད་ཆོས་མངའ་བ་ཤངས་པ་བཀའ་བརྒྱུད་ཨེ་མ་མཚར། །ཞེས་བར་སྐབས་ཀྱི་ཚིགས་སུ་བཅད་པ།།

II.5 -
ལེའུ་ལྔ་པ། ཤངས་པ་བཀའ་བརྒྱུད་ཀྱི་དགོན་གནས་གཞན་གྱི་སྐོར།
དཔལ་ལྡན་ཤངས་པ་བཀའ་བརྒྱུད་ཀྱི་ཤིང་རྟའི་སྲོལ་འབྱེད་པ་མཁས་གྲུབ་ཁྱུང་པོ་རྣལ་འབྱོར་ཕུད། རིན་ཆེན་བདུན་བརྒྱུད་སྔ་ཕྱི་གཉིས་སོགས་ཕྱིས་ཀྱི་ཤངས་པའི་རིང་ལུགས་འཛིན་པ་རབ་དང་རིམ་པས་བོད་ཡུལ་རུ་བཞིར་ཤངས་པའི་བསྟན་པ་འཛིན་སྐྱོང་སྤེལ་གསུམ་གནང་སའི་དགོན་གནས་མང་དུ་བཏབ་པ་སྟེ།

II.5.1 -
དང་པོ། མཁས་གྲུབ་ཁྱུང་པོའི་སྐུ་དུས་ཀྱི་དགོན་གནས།
མཁས་གྲུབ་ཁྱུང་པོའི་སྐུ་དུས་སུ་ཁྱུང་པོ་རྣལ་འབྱོར་རང་ཉིད་ཀྱིས་འཕན་ཡུལ་འཆད་ཁ་དང་ཤངས་ཞོང་ཞོང་དགོན་སོགས་དགོན་གནས་ཤིན་ཏུ་མང་བ་ཕྱག་བཏབ་གནང་མཛད་པ་ཡང་། ཤངས་ཁུལ་ཁོ་ནར་ཕྱག་བཏབ་པར་གྲགས་པའི་དགོན་གནས་བརྒྱ་རྩ་བརྒྱད་དེ་རྣམས་ལས་ཤེས་རྟོགས་ཐུབ། དེ་དག་ལས་ཞོང་ཞོང་གི་དགོན་གནས་འདི་ཁྱུང་པོ་གསུམ་པ་ཚུལ་ཁྲིམས་མགོན་པོས་སྤྱི་ལོ1985ལོར་བསྐྱར་བཞེངས་གནང་བ་ཕུད། དེ་མིན་འཆད་ཁ་དགོན་སོགས་མང་ཆེ་བ་ད་ལྟ་ཞིག་རལ་དུ་སོང་ཟིན་པའི་སྐོར་སྔར་བཤད་ཟིན།
II.5.1.1 Khyungri
གཅིག །ཁྱུང་རི་སྒྲུབ་ཁང་།
འདི་ལ་ཁྱུང་འདུལ་རི་སྒྲུབ་ཁང་ཞེས་ཀྱང་འབོད། ཁྱུང་འདུལ་རི་ནི་བཞད་མཐོང་སྨོན་རྫོང་སྣར་ཐང་ཡུལ་ཤོག་རོང་ཚོན་གེ་སེར་གྲོང་ཚོའི་ནུབ་བྱང་ངོས་སུ་ཆགས་ཤིང་ཧ་ལམ་རྒྱ་མཚོའི་ངོས་ལས་མཐོ་ཚད་རྨིད5000ལྷག་ཡོད། དེ་ནི་དངུལ་ཆུ་དྷརྨ་བྷ་དྲའི་གསུང་འབུམ་དུ་རོང་ལ་རི་ཆེན་སྤུན་བདུན་ཡོད་ཅེས་འཁོད་པའི་རོང་གི་རི་ཆེན་སྤྱན་བདུན་གྱི་ཡ་གྱལ་ཞིག་ཡིན། རི་འདིའི་རྩེ་མོའི་ལྡིང་ཁ་ཞིག་ཏུ། སྒྲུབ་ཁང་གཙོ་བོ་གཅིག་དཀྱིལ་དུ་ཡོད་པ་དང་དེའི་ཉེ་འཁོར་དུ་རྩིག་ཤུལ་བཞི་ཙམ་ངོས་ཟིན་ཐུབ་ཀྱི་འདུག །སྒྲུབ་ཁང་འདི་དག་ནི་གཙོ་བོ་རྡོ་ཁོ་ནས་བཞེངས་ཤིང་ཐོག་ཀྱང་རྡོ་རིང་མོས་བཀབ་ཡོད་པ་རྩིག་ཤུལ་ཉིད་ལས་གསལ་བར་མངོན། གནས་འདི་ཉིད་གཙང་ཞིང་དབེན་ལ་ཡིད་དུ་འོང་བ་དང་། ཤུག་པ། སྤ་མ། བ་ལུ། ཁན་པ་དཀར་པོ་སོགས་དྲི་ངད་བཟང་པོ་རྒྱུན་དུ་འཐུལ་བའི་རྩི་ཤིང་སྣ་ཚོགས་ཀྱིས་ཁེངས་ནས་འདུག
སྒྲུབ་ཁང་འདི་ནི་མཁས་གྲུབ་ཁྱུང་པོ་རྣལ་འབྱོར་གྱི་དངོས་སློབ་ལས་ཉམས་དང་རྟོགས་པའི་བཀའ་བབས་ཁྱུང་པོ་བྱས་བརྟེན་ཡུན་རིང་སྒྲུབ་པ་ལ་བཞུགས་སའི་གནས་ཤིག་ཡིན། སྔར་ཁྱུང་པོ་བྱས་བརྟེན་དུ་གྲགས་པ་དེ་ཉིད་ཤངས་ཞོང་ཞོང་དགོན་དང་གནས་འདི་གཉིས་ཀྱི་བར་དུ་ཕར་འཕུར་ཚུར་འཕུར་མཛད་པ་དངུལ་ཆུ་དྷརྨ་བྷ་དྲའི་གསུང་འབུམ་དུ་གསལ་བ་དང་། ཡང་དྲེད་མོང་ལ་རང་ཉིད་ཀྱི་ཟས་ལྷག་འཐུང་ལྷག་སྦྱིན་ནས་སྒོ་ཁྱིའི་ཚུལ་དུ་ཉར་མྱོང་བའི་ཤོད་རྒྱུན་སོགས་ཡོད་པར་གཞིགས་ན་ཁྱུང་པོ་བྱས་བརྟེན་ནི་གྲུབ་པའི་གོ་འཕང་མཐོན་པོར་ཕེབས་པ་ཞིག་ཡིན་པ་རྟོགས་ཐུབ། གོང་དུ་ཁྱུང་པོ་བྱས་བརྟེན་ཤངས་ཞོང་ཞོང་དང་སྒྲུབ་གནས་འདི་གཉིས་ཀྱི་བར་ཕར་འཕུར་ཚུར་འཕུར་མཛད་པ་དེས་ཁོང་གནས་འདིར་ཕེབས་པའི་དུས་ཚོད་ནི་མཁས་གྲུབ་ཁྱུང་པོས་ཞོང་ཞོང་དགོན་ཕྱག་བཏབ་རྗེས་སུ་ཡིན་པ་གསལ་པོར་མངོན། སྒྲུབ་ཁང་དེ་དང་ཐག་ཉེ་བའི་སར་ཁྱུང་པོ་བྱས་བརྟེན་གྱི་སློབ་མ་མཁས་གྲུབ་མཁྱེན་རབ་ཏུ་གྲགས་པས་ཕྱག་བཏབ་པའི་དགོན་ཤུལ་ཅུང་རྒྱ་ཆེ་བ་ཞིག་ཀྱང་མཇལ་རྒྱུ་འདུག །དགོན་དེའི་མཚན་ལ་ཁུལ་དེའི་ཁ་རྒྱུན་དུ་རྩིག་ཝ་ཞེས་འབོད་པ་ལས་དངུལ་ཆུ་དྷརྨ་བྷ་དྲའི་གསུང་འབུམ་དང་ཤངས་ཆོས་ཀྱི་དཔྱད་ཡིག་རྣམས་སུ་དེའི་མཚན་འཁོད་པ་མ་མཐོང་། དགོན་གནས་དེ་ནི་ཕལ་ཆེར་ཁྱུང་པོ་བྱས་བརྟེན་རི་རྩེའི་སྒྲུབ་ཁང་དེར་སྒྲུབ་པ་བསྐྱོན་ནས་བཞུགས་ཤིང་གྲྭ་སློབ་རྣམས་གནས་བཅའ་བ་དང་། འཇད་ཁུལ་གྱི་ཤངས་པའི་ཆོས་བརྒྱུད་འཛིན་པའི་རྟེན་གཞི་གཙོ་བོ་ཞིག་ཡིན་པར་སེམས། ཁྱུང་པོ་བྱས་བརྟེན་གྱི་མཚན་ལས་གསལ་བར་ཁོང་ནི་མཁས་གྲུབ་ཁྱུང་པོ་དང་འདྲ་བར་ཁྱུང་པོའི་རིགས་རུས་སུ་འཁྲུངས་པ་ཞིག་དང་། རི་འདིའི་མིང་ལའང་ཁྱུང་རི་ཞེས་འབོད་པ་སོགས་ཁོང་གི་རིགས་རུས་ཀྱི་མིང་དང་མཚུངས། ཁུལ་དེའི་མི་འགའ་ཤས་ཀྱིས་ཁྱུང་པོ་བྱས་བརྟེན་དང་མཁས་གྲུབ་ཁྱུང་པོ་གཉིས་སྐབས་རེ་འཁྲུལ་ནས་བརྗོད་ཀྱི་འདུག་ཀྱང་། གནས་འདིར་སྒྲུབ་པ་བསྐྱོན་ནས་ཡུན་རིང་བཞུགས་མཁན་ནི་ཁྱུང་པོ་བྱས་བརྟེན་རང་ཡིན། འོན་ཀྱང་ཁྱུང་པོ་བྱས་བརྟེན་གྱི་སྐོར་ཤངས་པའི་དཔྱད་ཡིག་ཁུངས་བཙན་རྣམས་སུ་མི་གསལ་བས་ཁོང་གི་མཛད་རྣམ་ཞིབ་ཕྲ་དང་། སྒྲུབ་ཁང་འདིར་དུས་ཡུན་ཇི་ཙམ་བཞུགས་པ་དང་མཛད་པ་ཇི་ལྟར་སྤེལ་ཡོད་མེད། སྒྲུབ་ཁང་འདི་ཉིད་དུས་ཇི་ཙམ་ལ་ཐོར་ཞིག་ཏུ་སོང་བ་སོགས་ཀྱི་སྐོར་མུ་མཐུད་དཔྱད་པར་འཚལ།
II.5.1.2 Ngak Khyung
གཉིས། སྔགས་ཁྱུང་དགོན
དགོན་འདི་ཐོག་མར་མཁས་གྲུབ་ཁྱུང་པོ་རྣལ་འབྱོར་གྱིས་ཕྱག་བཏབ་པར་གྲགས་ཤིང་། ད་ལྟ་སེར་ཁྱིམ་བཅོ་ལྔས་རྙིང་མ་པའི་ལུགས་འཛིན་བཞིན་ཡོད། དེང་གཞིས་རྩེ་ས་གནས་གཉའ་ནང་རྫོང་སྨན་ཕུ་ཡུལ་ཤོག་སྲིད་གཞུང་གནས་ཡུལ་གྱི་བྲག་གསུམ་གྲོང་ཚོའི་ལྷོ་ངོས་སྤྱི་ལེ་གཉིས་ཙམ་གྱི་སར་གནས། ཁུལ་དེའི་རྒན་རབས་རྣམས་ཀྱི་ངག་རྒྱུན་ དུ་དགོན་འདི་ནི་མཁས་གྲུབ་ཁྱུང་པོས་ཕྱག་བཏབ་པའི་དགོན་གནས་བརྒྱ་རྩ་བརྒྱད་ཀྱི་མཇུག་ཤོས་སྟོད་ཀྱི་ཁ་གནོན་དེ་ཡིན་པར་གྲགས་ཏེ། དགོན་འདིར་ད་ལྟ་མཁས་གྲུབ་ཁྱུང་པོའི་ཞབས་གཡས་པའི་ཞབས་རྗེས་རེད་ཟེར་བ་ཞིག་ཀྱང་མཇལ་རྒྱུ་འདུག །ཕྱིས་ཀྱི་དུས་སྐབས་ཤིག་ཏུ་རྫོགས་ཆེན་པདྨ་དབང་གྲགས་ཞེས་གངས་རིན་པོ་ཆེར་བསྐོར་བ་བརྒྱ་ཕུལ་བས་བསྐོར་བརྒྱ་དགེ་སློང་དུ་གྲགས་པ་ཞིག་ས་འདིར་ཕེབས་སྐབས། སྟོད་ཁུལ་གྱི་མི་རྣམས་ཀྱིས་བླ་མ་འདི་ཉིད་ཕལ་པ་ཞིག་དང་མི་འདྲ་བ་གཟིགས་ཏེ་འབུལ་བ་དུ་མ་ཕུལ། སླར་གངས་རིན་པོ་ཆེ་མཇལ་བར་ཕེབས་སྐབས་སྨན་ཁབ་ཏུ་སྐུ་ངོས་ལྷ་སྲས་ཞེས་པའི་རྩར་གནས་ཚང་གཡར། དེར་བླ་མར་ཆོས་གསུང་དུ་བཅུག་པས། ལྷ་སྲས་ཀྱི་ཐུགས་ལ་བདེན་ཚིག་འགྲུབ་པའི་ཆོས་སུ་འདུག་དགོངས་ནས། སྔགས་ཁྱུང་དགོན་སྐྱོང་མཁན་མེད་པས་དེར་བཞུགས་རྒྱུའི་གསོལ་བ་བཏབ། དེའི་སྐབས་སུ་དབུས་གཙང་གི་དད་ལྡན་ཚོས་ཟང་ཟིང་གི་འབུལ་བ་དུ་མ་ཕུལ་བ་སོགས་ཀྱིས་རྒྱུ་ཡོན་བྱས་ཏེ་དགོན་གནས་ཉམས་གསོ་མཛད་རྒྱུའི་ཁུར་ཆེན་ཕྲག་པར་བཞེས། ཁོང་སྐུ་གཤེགས་རྗེས་ར་ཆེན་སྤྲུལ་སྐུ་ངག་དབང་བསྟན་པའི་སྒྲོན་མེ་ཞེས་པའི་ཁམས་ཁུལ་གྱི་བླ་མ་གཞན་ཞིག་ཕེབས་ནས་གདན་ས་བསྐྱངས། བླ་མ་དེ་ཡུལ་གཞན་དུ་ཕེབས་རྗེས། ཡང་སོག་པོ་དགེ་བཤེས་ཞེས་པ་ཞིག་གིས་རི་བོ་དགེ་ལྡན་པའི་ལུགས་སུ་བསྒྱུར་གནང་མཛད་པས། རྙིང་མ་པའི་ལྷ་སྲུང་ཁྲོས་ནས་བླ་མ་གཟའ་ཕོག་སྟེ་གྲོངས། དེ་རྗེས་སྤོ་བྲག་རིན་པོ་ཆེ་ཞེས་སྨན་པ་དང་བླ་མ་གཉིས་ཀ་ཡིན་པ་ཞིག་བྱོན་ནས་དགོན་གནས་ཅུང་ཟད་བསྐྱངས་པ། ལོ་བཅུའི་གོད་ཆག་སྐབས་དགོན་གནས་སྤྱི་དང་། ཕྱག་སྟོང་སྤྱན་སྟོང་ཁྲུ་གང་མ་ཞིག །མདོ་སྡེ་སྐལ་བཟང་། མདོ་མང་སོགས་ཀྱི་རྟེན་རྙིང་འགའ་ཞིག་བཞུགས་པ་རྣམས་རྩ་མེད་དུ་བཏང་བས་བླ་མའང་བྲོས་འབྱོལ་དུ་ཕེབས་དགོས་བྱུང༌། སྔར་དགོན་འདིར་བཞུགས་པ་རིག་གསར་སྐབས་རིག་གསར་རྗེས་ཁམས་གོ་འཇོ་ནས་ཕེབས་པའི་དགུང་ལོ་བཅོ་བརྒྱད་ལོན་པའི་བླ་མ་ཞིག་ཕེབས་ཏེ། ད་ལྟའི་བགྲེས་སོང་འགའ་ཞིག་དང་ལྷན་དུ་དགོན་གནས་འདི་ཉིད་ཉམས་གསོ་མཛད་ཀྱང་། ཕྱིས་བླ་མ་དེ་རྫུན་མ་རེད་ཟེར་ཏེ་ཁྲིམས་ཆད་ཕོག །དེང་དགོན་འདིའི་རྟེན་གྱི་གཙོ་བོ་ལ་ཇོ་བོ་ཤཱཀྱ་མུ་ནེ་དང་། སྤྱི་ལོ2011ལོར་བཞེངས་པའི་ཐོག་ཚད་གཉིས་ཅན་གྱི་རྒྱལ་བ་བྱམས་པ། གུ་རུ་རིན་པོ་ཆེའི་སྣང་བརྙན་བཅས་བཞུགས། དགོན་འདི་མཁས་གྲུབ་ཁྱུང་པོས་ཕྱག་བཏབ་ཅེས་དམངས་ཁྲོད་ཀྱི་ངག་རྒྱུན་དུ་གྲགས་པ་ཙམ་ལས་ཁུངས་བཙན་གྱི་དཔྱད་གཞིར་འཁོད་པ་ད་ཕན་མ་མཐོང་བས་མུ་མཐུད་དཔྱད་པར་འཚལ།
II.5.1.3 Nenying
གསུམ། གནས་རྙིང་དགོན།
གནས་རྙིང་དགོན་(འགའ་ཞིག་ཏུ་གནས་སྙིང་ཞེས་ཀྱང་འཁོད་)ནི་དེང་གཞིས་རྩེ་ས་གནས་ཁང་དམར་རྫོང་གནས་རྙིང་ཡུལ་ཤོག་གནས་རྙིང་གྲོང་ཚོར་གནས་ཤིང་། ཐོག་མར་ཆོས་རྒྱལ་ཁྲི་སྲོང་ལྡེ་བཙན་གྱི་སྐུ་དུས་སུ་རྒྱ་འཇམ་དཔལ་གསང་བས་སྐྱེགས་གནས་རྙིང་དུ་གནས་གཞི་བརྩིགས་ཤིང་ལྕགས་རིས་བསྐོར་བ་དང་། བླ་མའི་གཟིམ་ཁང་དང་ལྷ་ཁང་སོགས་ཀྱི་རྟེན་དང་བརྟེན་པ་རྣམས་བཞེངས། སྲས་ཡང་དག་སྐྱབས་ཀྱིས་སྤྱན་རས་གཟིགས་ཀྱི་སྐུ་ལི་མ་ཞིག་བཞེངས་པ་སྔར་གནས་རྙིང་འདུ་ཁང་སྟེང་དུ་ཡོད། ཕྱི་རྟེན་གནས་རྙིང་ལྷ་ཁང་ནང་གི་མཆོད་རྟེན་བཀྲ་ཤིས་སྒོ་མང་དུ་རྒྱ་འཇམ་དཔལ་གསང་བའི་སྐུ་གདུང་ཧྲིལ་པོ་བཞུགས། ཐེངས་ཤིག་ལ་སྟོད་མདོར་ཐུགས་རྗེ་ཆེན་པོའི་སྤྲུལ་པ་ཞིག་བྱོན་པ་དེས་ཐང་ཁར་ཞབས་རྗེས་བཞག་པའི་སར་པདྨ་བརྒྱད་ཅུ་རྩ་བརྒྱད་འཁྲུངས་པས། རྒྱ་འཇམ་དཔལ་གསང་བའི་གདུང་རབས་བཞི་བཅུ་དང་། དེ་ནས་གནས་རྙིང་མཁན་རབས་བཞི་བཅུ་བཅས་བརྒྱད་ཅུ་བྱོན་པ་ལུང་བསྟན་པ་ལྟར། རིམ་བཞིན་གྲུབ་ཐོབ་འཇམ་དཔལ་གསང་བ། རིགས་གསུམ་མགོན་པོའི་སྤྲུལ་པ་ཡོལ་སྟོན་སྐུ་མཆེད་གསུམ། རྒྱ་གར་པཎ་ཆེན་འབུམ་ཕྲག་གསུམ་པ། བྱམས་པས་རྗེས་བཟུང་འབྲེ་ཆེན་ཤེས་རབ་འབར། སྤྱན་རས་གཟིགས་ཀྱི་སྤྲུལ་པ་ལ་སྟོད་པ་དཀོན་མཆོག་མཁར། སེམས་དཔའ་རིན་པོ་ཆེ་རིན་ཆེན་རྒྱལ་མཚན་སོགས་མཁན་བརྒྱུད་རིམ་པར་བྱོན། དགོན་འདི་ཐོག་མར་རྙིང་མ་དང་། ཡོལ་ཆོས་ཀྱི་དབང་ཕྱུག་གིས་བཀའ་གདམས་པའི་ལུགས་སྲོལ་འཛིན་པར་བསྒྱུར་ཀྱང༌། ཕྱིས་འཇམ་དབྱངས་རིན་ཆེན་རྒྱལ་མཚན་གྱི་དུས་སུ་རྗེ་ཙོང་ཁ་པས་གྲྭ་སྐོར་མཛད་པ་དང་། རྒྱལ་ཚབ་དར་མ་རིན་ཆེན་གྱི་གཞིས་དགོན་ཡིན་སྟབས་མཁས་གྲུབ་དགེ་ལེགས་དཔལ་བཟང་ཡང་གདན་དྲངས་ནས་དགེ་ལྡན་པའི་ལུགས་སུ་བསྒྱུར་རྗེས་སྐྱེད་ཚལ་གྲྭ་ཚང་དང་། མཆོད་ཁང་གྲྭ་ཚང་། ནག་ཞབས་གྲྭ་ཚང་། སེ་ར་གྲྭ་ཚང་། ཟུར་ཁང་གྲྭ་ཚང་སོགས་གྲྭ་ཚང་དྲུག་ཡོད། གནས་རྙིང་གི་གནས་གཞི་འདི་ཆེ་བ་བཅུའི་སྒོ་ནས་ཁྱད་པར་དུ་འཕགས་པ་ཡིན་ཏེ། ཆོས་རྒྱལ་ཁྲི་སྲོང་ལྡེ་བཙན་གྱིས་འཇའ་ས་གནང་། རྒྱ་འཇམ་དཔལ་གསང་བས་ལུང་བསྟན། ཇོ་བོ་རྗེས་ལུང་བསྟན་དང་རབ་གནས་མཛད། ཡོལ་སྟོན་མཆེད་གསུམ་གྱི་གྲུབ་རྟགས། སྤྱན་རས་གཟིགས་ཀྱིས་ལུང་བསྟན། ཕྱག་དྲུག་ཡེ་ཤེས་མགོན་པོའི་བཀའ་བབས། འབྲེ་ཆེན་ཤེས་རབ་འབར་གྱི་གདན་ས། བསྟན་སྲུང་མ་ཧཱ་ཀཱ་ལའི་ཞལ་བཞེས། སློབ་མའི་མཆོག་གྱུར་གྲུབ་ཐོབ་རྣམ་གསུམ། བརྒྱུད་པའི་མཆོག་གྱུར་བྱང་སེམས་བྱོན་ཚུལ་དང་བཅས་པས་མྱང་སྟོད་རྒྱ་གར་གྱི་གླིང་ལ་གནས་རྙིང་རྡོ་རྗེ་གདན་དང་མཚུངས་ལ། ཇོ་བོས་ཀྱང་གནས་ཀྱི་སྙིང་པོར་ལུང་བསྟན་པས་གནས་སྙིང་ཞེས་ཀྱང་ཐོགས་ཟེར།
མ་གཞི་གནས་རྙིང་གི་གདན་ས་འདིར་ཤངས་པ་བཀའ་བརྒྱུད་ཀྱི་ལུགས་སྲོལ་སྒེར་དུ་འཛིན་པའི་ལོ་རྒྱུས་བྱུང་མེད་ཀྱང་། མཁས་གྲུབ་ཁྱུང་པོ་རྣལ་འབྱོར་གྱི་དངོས་སློབ་བདེ་མཆོག་དང་མགོན་པོ་ལ་མངའ་བརྙེས་པ་ལ་སྟོད་པ་དཀོན་མཆོག་མཁར་གྱིས་དགོན་འདིའི་གདན་ས་སྐྱོང་སྐབས་ཤངས་པའི་ཆོས་སྐོར་མང་དག་ཅིག་དགོན་འདིའི་གདན་རབས་རྗེས་མ་སེམས་དཔའ་རིན་ཆེན་རྒྱལ་མཚན་དང་། ཉེ་འཁོར་གྱི་བླ་མ་མང་པོར་བརྒྱུད་སྤེལ་གནང་ཡོད་པ་ཡང་། གཙོ་ཆེར་མྱུར་མཛད་ཡེ་ཤེས་མགོན་པོའི་ཆོས་སྐོར་ཡིན་ཞིང་། མགོན་པོ་ཉིད་ཀྱིས་ཞབས་གཅིག་དགོན་འདིའི་རྒྱབ་ཀྱི་གུར་ལྕོག་རྩེ་དང་། ཞབས་གཅིག་དགོན་འདིའི་ཤར་ལྷོའི་མཚམས་ཀྱི་མྱང་སྟོད་གསེར་རི་ཆེན་པོའི་རྩེར་བཞག་ནས་དངོས་སུ་བྱོན་ཏེ་གནས་རྙིང་གི་བདག་པོ་མཛད་པའི་ཞལ་བཞེས་ཀྱང་གནང་། དེ་ལྟར་གནས་རྙིང་དགོན་ནས་བརྒྱུད་པའི་ཤངས་ལུགས་ཀྱི་མགོན་པོ་ལ་མགོན་པོ་སྟོད་ལུགས་སམ། གནས་རྙིང་ལུགས་ཞེས་སུའང་གྲགས། དེ་རྗེས་འཇག་པའི་སློབ་མ་གྲུབ་ཐོབ་ཆོས་འབྱུང་རིན་ཆེན་ གྱིས་ཕར་ཕྱིན་སོགས་ལ་མཁས་པར་སྦྱངས་ནས་གནས་རྙིང་དུ་བཤད་གསར་ལ་སོགས་པའི་ཆོས་འཆད་མཛད་ཅིང་ཤངས་པའི་བསྟན་པ་རྒྱ་ཆེར་སྤེལ་མོད། འོན་ཀྱང་དགོན་འདིར་དབྱིན་ཇིའི་བཙན་འཛུལ་དམག་དང་རིག་གསར་སོགས་ཀྱིས་གཏོར་སྐྱོན་རབ་དང་རིམ་པ་ཕོག་པས་ད་ལྟ་ཤངས་པའི་བརྒྱུད་འཛིན་པ་དེ་དག་གི་སྐུ་འདྲ་སོགས་གང་ཡང་མཇལ་རྒྱུ་མི་སྣང་།
གང་ལྟར་ནའང་གནས་རྙིང་གི་དགོན་འདི་དང༌། ཇོ་སྲས་དཔལ་ཆེན་སྐབས་ཀྱི་བྲག་མོའི་མགྲོན་ཁང་ཡོད་ས་སྟེ། གཙང་བྲག་གི་འོག་ཙམ་དང་གནས་རྙིང་གི་སྟོད་ཙམ་དུ་དགོན་གནས་བཏབ་ནས། ལྕགས་རི་དང་གཙུག་ལག་ཁང་སོགས་བཞེངས་པར་མཛད་པ་འདི་ལ་གནས་སར་རམ་གནས་གོག་ཏུ་གྲགས། དགོན་ཤུལ་འདི་ནི་ད་ལྟ་གནས་རྙིང་དགོན་གྱི་ལྷོ་ངོས་གནས་གོག་འབུམ་པའི་ཤུལ་དང་ཉེ་བར་གནས་ཤིང་། དེར་སྔར་ལ་སྟོད་པ་དཀོན་མཆོག་མཁར་གྱི་སྐུ་གདུང་བཞུགས་པའི་མཆོད་རྟེན་གཅིག་དང་། འབྲེ་ལས་རབ་ཏུ་བྱུང་ཞིང་གཅེན་པོ་དཀོན་མཆོག་མཁར་གྱི་དྲུང་ནས་སྡེ་སྣོད་མཐའ་དག་གསན་པ་མཁན་པོ་ཀུན་སེང་གི་སྐུ་གདུང་ཧྲིལ་པོ་བཞུགས་པའི་མཆོད་རྟེན་གཅིག་གི་ཤུལ་གསལ་བར་མཇལ་རྒྱུ་འདུག །ལ་སྟོད་པའི་སྐུ་ཚེའི་སྨད་ཙམ་ནས་བཟུང་གནས་རྙིང་དགོན་དང༌། གནས་གསར་དགོན་གཉིས་ནི་ཤངས་པ་བཀའ་བརྒྱུད་ཀྱི་གདམས་པ་རྣམས་མྱང་སྟོད་གསེར་གཞུང་རིང་མོའི་ཁུལ་དུ་དར་ཁྱབ་ཆེས་ཆེར་འགྲོ་བའི་གནས་གཞི་གལ་ཆེན་ཞིག་ཡིན་ནོ།

II.5.2 -
།གཉིས་པ། རིན་ཆེན་བདུན་བརྒྱུད་སྔ་མས་བཏབ་པའི་དགོན་གནས་གཞན།
རིན་ཆེན་བདུན་བརྒྱུད་སྔ་མའི་སྐབས་ནི་ཤངས་པ་བཀའ་བརྒྱུད་ཀྱི་བསྟན་པ་ཕྱོགས་བཅུར་དར་ཞིང་རྒྱས་པའི་དུས་ཡིན་པས། ཚིག་བརྒྱུད་གདམས་པའི་མཛོད་འཛིན་པའི་བླ་མ་རྣམས་ཀྱིས་དགོན་གནས་དུ་མ་ཕྱག་བཏབ་པ་ལས། མཁས་གྲུབ་ཁྱུང་པོའི་དགོན་གནས་རྣམས་སྔར་བཤད་ཟིན་པ་ཕུད། སྐབས་འདིར་ལྷ་ཕུ་རྨོག་ལྕོག་དགོན་དང་། ལྐུགས་ལུང་དགོན། སྟོད་ལུང་སྐྱེར་སྒང་དགོན། ཡོལ་རི་གོང་དགོན། ཡོལ་ཕུ་བྲག་རྩ་དགོན་བཅས་ཀྱི་སྐོར་ལྒང་བ་ལ།
II.5.2.1 Lhaphu Mokchok
གཅིག ལྷ་ཕུ་རྨོག་ལྕོག་དགོན།
དེ་ཡང་ནི་གུའི་བརྒྱུད་འདེབས་ལས་ཤངས་ལྷ་ཕུ་རྨོག་ལྕོག་གི་དགོན་པ་རུ། མཉམ་མེད་རིན་ཆེན་བརྩོན་འགྲུས་ལ་གསོལ་བ་འདེབས་ཞེས་འཁོད་པ་བཞིན། དགོན་འདི་ནི་ཤངས་ལུགས་གདམས་པའི་ཆིག་བརྒྱུད་ཀྱི་བརྒྱུད་པ་བཞི་པ་རྨོག་ལྕོག་པ་རིན་ཆེན་བརྩོན་འགྲུས་ཀྱིས་ཡུལ་ལ་གཡང་ཆགས་ལྷ་ཕུའི་ངོགས་སུ་ཕྱག་བཏབ་ཅིང་། དེང་རྣམ་གླིང་རྫོང་ར་ཐང་ཡུལ་ཤོག་གད་ར་གྲོང་ཚོའི་ཁོངས་སུ་གནས། དགོན་འདིར་རྨོག་ལྕོག་ཅེས་བརྗོད་དོན་ཡང་རི་རྨོག་འདྲ་བའི་སྟེང་དགོན་པ་ལྕོག་འདྲ་བ་བཞེངས་པས་ཡིན་ཞེས་གྲགས། ཁུལ་དེའི་མི་རྣམས་ཀྱི་ཁ་རྒྱུན་དུ་རྨོག་ལྕོག་སྒྲུབ་ཁང་ཞེས་འབོད་ཅིང་། རྗེ་རྨོག་ལྕོག་པས་དགོན་གནས་མ་བཏབ་གོང་སྒྲུབ་པ་ལ་ཞུགས་སའི་སྒྲུབ་ཁང་སྒོ་ལྷོ་ཕྱོགས་སུ་བསྟན་པ་དེ་རི་གཤམ་དུ་མཇལ་རྒྱུ་འདུག །མཉམ་མེད་རྨོག་ལྕོག་པ་རིན་ཆེན་བརྩོན་འགྲུས་ཀྱིས་སྤྱིར་མི་ཟས་སྤངས་ནས་མི་ལོ་བཅུ་གཉིས་རིང་སྒྲུབ་པ་བསྐྱོན་ས་དེ་ཡིན་ལ། ཁུལ་དེའི་ཤོད་རྒྱུན་དུ་ཁོང་སྒྲུབ་པ་མཐར་ཕྱིན་རྗེས་རྨོག་ལྕོག་གི་བྲག་རིའི་རྩེ་ལས་ཐོན་པར་གྲགས། ད་ལྟ་སྒྲུབ་ཁང་དེའི་ཕྱི་རོལ་དུ་མ་ཎི་ཁང་ཆུང་ངུ་གཉིས་ཀྱང་བཞེངས་འདུག །སྔར་སྒྲུབ་ཕུག་གཤམ་དུ་ལམ་བུ་བཟོ་སྐབས་སྒྲུབ་ཁང་དེར་གཏོར་སྐྱོན་ཅུང་ཟད་ཕོག །རྨོག་ལྕོག་གི་གནས་འདི་ནི་ཆོས་རྗེ་རྨོག་ལྕོག་པ་དང་དབོན་སྟོན་སྐྱེར་སྒང་པ་གཉིས་ཐོག་མར་མཇལ་ས་ཡང་ཡིན། ཆོས་རྗེ་རྨོག་ལྕོག་པ་ཆེན་པོ་མངོན་པར་དགའ་བའི་ཞིང་ཁམས་འོད་འཕྲོ་ཅན་ཞེས་བྱ་བར་ཕེབས་རྗེས། རྨོག་ལྕོག་གི་གདན་ས་འདི་དང་ཉེ་བའི་སྤང་པོའི་སྤྱིལ་བུར་རིན་ཆེན་བདུན་བརྒྱུད་ཕྱི་མའི་བདུན་པ་རྒྱ་སྒོམ་ལེགས་པ་རྒྱལ་མཚན་བཞུགས་ཡོད་པ་ཡང་། ནི་གུའི་རྒྱབ་ཆོས་གླུའི་ཕྲེང་བ་ལས་མ་གི་ཤེད་ཤངས་ཕུའི་རྨོག་ལྕོག་གི །ཕོ་བྲང་དེ་སྤང་པོའི་སྤྱིལ་བུ་ན། །མི་གཟུགས་ལ་ཞུ་བདེའི་འོད་འབར་བ། རྒྱ་སྒོམ་རྡོ་རྗེ་འཆང་ཆེན་དེ་ན་བཞུགས་ཞེས་འཁོད་པ་ལྟར་རོ།
།ད་ལྟ་ཆོས་རྗེ་རྨོག་ལྕོག་པས་ཕྱག་བཏབ་པའི་དགོན་གནས་འདིར་དམངས་གཙོའི་བཅོས་བསྒྱུར་གོང་བཙུན་མ་ཞལ་གྲངས་བཞི་བཅུ་ཙམ་ཡོད་པའི་རྙིང་མའི་དགོན་སྡེ་ཞིག་གི་འདུ་ཁང་དང༌། ཤག་ཁང་ལ་སོགས་པའི་རྩིག་ཤུལ་མང་པོ་ཞིག་མཇལ་རྒྱུ་འདུག་ལ། སྔར་དགོན་འདིར་རྟེན་གཙོ་གུར་དྲག་གིས་གཙོས་པའི་སྐུ་གསུང་ཐུགས་རྟེན་མང་དུ་བཞུགས་པ་དང་། གཞན་ཡང་གསེར་གྱི་རྔ་དང་སྦུབ་ཆལ། ལྷག་པར་དུ་ཆོས་རྗེ་རྨོག་ལྕོག་པའི་དབུ་ཞྭ་དམར་པོ་ཞིག་དང་སྒོམ་གཞོང་། གཤམ་ཐབ། ཞབས་ཕྱག་སོགས་ཡོད་པ་ལོ་ན་སྨིན་པའི་བགྲེས་སོང་འགས་དངོས་སུ་མཇལ་མྱོང་འདུག །རྟེན་དེ་དག་ལས་རེ་ཟུང་ཞིག་རྨོག་ལྕོག་བྲག་གི་ལྟག་ཏུ་ཡོད་པའི་ལྷ་རྟེན་དེའི་གཟུངས་སུ་ཡོད་པ་ཕུད། མང་ཆེ་བ་མེ་ཆུའི་པང་དུ་བསྐུར་ཟིན་པས་མཇལ་བའི་སྐལ་པ་བྲལ།
II.5.2.2 Kuklung
གཉིས། སྐུགས་ལུང་དགོན།
དེ་ཡང་བླ་མ་རྨོག་ལྕོག་པའི་རྣམ་ཐར་ནོར་བུའི་ཕྲེང་བ་ལས་དེ་ནས་རྨོག་ལྕོག་ཏུ་ཚོགས་པ་མ་ཤོང་བས་ཕན་སེམས་ཀྱིས་སྐུ་ལུགས་སུ་དགོན་པ་བཏབ་ཅེས་འཁོད་པ་བཞིན་ལྐུགས་ལུང་དགོན་ནི་ཆོས་རྗེ་རྨོག་ལྕོག་པས་རྨོག་ལྕོག་ཏུ་གྲྭ་སློབ་མ་ཤོང་བར་དེའི་རྗེས་ཙམ་དུ་ཕྱག་བཏབ་པ་ཞིག་ཡིན། དེང་ཡོངས་གྲགས་སུ་ལྐུགས་ལུང་དང་ཁུལ་དེའི་མི་རྣམས་ཀྱི་ཁ་རྒྱུན་དུ་ཀུས་ལུང་ཞེས་འབོད་པ་ཡང་རྨོག་ལྕོག་སྒྲུབ་ཕུག་གི་བྱང་ངོས་ནས་སྤྱི་ལེ་ལྔ་ཙམ་གྱི་ས་སྟེ་རི་རྩེ་ལ་ཉེ་བའི་ལྡིང་ཁ་ཞིག་ཏུ་གནས་ཡོད། ལྐུགས་ལུང་འདི་ཡང་ཐོག་མར་དུས་རབས་བཅུ་གཉིས་པའི་ནང་ཕྱག་བཏབ་རྗེས་བར་སྐབས་སུ་ཉམས་རྒུད་ཤུགས་ཆེ་བྱུང་ནས་ལོ་སུམ་བརྒྱ་ཙམ་སོང་བའི་རྗེས་ཏེ་སྤྱི་ལོའི་དུས་རབས་བཅོ་ལྔ་པ་ཙམ་ལ་སངས་རྒྱས་དཔལ་བཟང་གིས་ཉམས་གསོ་མཛད། དེ་ཡང་མཉམ་མེད་སངས་རྒྱས་དཔལ་བཟང་ལྐུགས་ལུང་དུ་ཕེབས་སྐབས་དེ་ནས་ཞག་གཉིས་ཙམ་ལྷུག་ལུང་གི་སྒོ་ཕྱེ་ནས་གཙུག་ལག་ཁང་གི་ནང་དུ་ཕྱིན་པས། རྟེན་དང་གསུང་རབ་མང་དུ་བཞུགས་ཤིང་འདུག་པ་མཐོང་ནས། གྲུབ་ཐོབ་བྱོན་པའི་གནས་ཡུན་རིང་པོར་ཞབས་ཏོག་མེད་པ། ཤངས་པ་བཀའ་བརྒྱུད་པ་ལ་ཤེད་དང་བུ་སློབ་མེད་པའི་རྟགས་སུ་འདུག་སྙམས་ནས་མཆི་མ་མང་པོ་ཤོར་ཞེས་འཁོད་པ་ལྟར་རྟེན་དང་གསུང་རབ་མང་པོ་བཞུགས་ཀྱང་ཡུན་རིང་པོར་ཞབས་ཏོག་མེད་པ་སོགས་ཀྱི་ཉམ་ཐག་པའི་གནས་བབས་གཟིགས། ཁོང་གིས་མགོན་ཁང་དུ་གཏོར་མ་ཆེ་བ་དར་གྱིས་བརྒྱན་པ་ཞིག་བཤམས་ཏེ་གསོལ་བ་བཏབ་ནས་ཞིག་གསོས་མཛད། གཙུག་ལག་ཁང་དུ་ཉིན་མཚན་འཁོར་ཡུག་ཏུ་མར་མེ་བཙུགས། ཁྱམས་དང་མགོན་ཁང་དུ་གསེར་སྐྱེམས་དང་། མགོན་ཁང་དུ་གཏོར་ཆེན་བདུན་བཙུགས། ལོ་བཅུ་ཙམ་གྱི་བར་ལ་དགོན་པའི་ཕྱིའི་ལྕགས་རི་བཞེངས། བྲང་ཁང་སོ་སོའི་གཞི་བཏིང་། བར་གྱང་བརྩིགས་ནས་ཕོ་གླིང་དང་མོ་གླིང་སོ་སོར་ཕྱེ་གནང་བའི་ཤུལ་ཡང་དེང་དགོན་པ་ཤར་ཞེས་འབོད་པའི་དུད་གོང་དེར་བཙུན་དགོན་ཆགས་པ་དང་། ལྷོ་བྱང་གི་མཚམས་སུ་ཕོ་དགོན་ཆགས། མཉམ་མེད་སངས་རྒྱས་དཔལ་བཟང་གིས་དྲུང་སྒྲུབ་ཆེན་མོའི་དུས་སུ་ལྐུགས་ལུང་གི་གཟིམ་ཁང་གོང་མར་བདེ་མཆོག་དྲིལ་བུ་བའི་དབང་བསྐུར་མཛད། དེ་མིན་དགོན་གནས་འདིའི་དབུ་རྩེར་རྫ་སྒྲོན་ཞིག་གི་ནང་དུ་ཞིང་ཁམས་ཉི་ཤུ་རྩ་ལྔའི་ལོགས་བྲིས་དང་བཅས་པ་ལེགས་པར་བསྒྲུབས། རྗེ་ལྐུགས་ལུང་པ་སྐུ་གཤེགས་ཁར་བུ་སློབ་རྣམས་ལ་ང་ལ་རིམ་འགྲོ་མི་དགོས། དབུ་རྩེའི་རྫ་འདི་སྔར་ཡང་ངའི་རི་ཁྲོད་ཡིན་པས་ད་ལན་དབུ་རྩེའི་རྫ་འདི་གྲུབ་པར་བྱེད་ཅེས་གསུངས་པ་ལྟར་ལྐུགས་ལུང་གི་དགོན་གནས་འདི་ཕུད། གཞན་ཡང་འདིའི་དབུ་རྩེར་རྫས་བཞེངས་པའི་རི་ཁྲོད་གཅིག་ཡོད་ཚོད་འདུག་ཀྱང་ད་ལྟ་ངོས་ཟིན་པར་དཀའ། སྤྱི་ལོའི་དུས་རབས་བཅུ་གསུམ་པའི་སྨད་དང་བཅུ་བཞི་པའི་སྟོད་དུ་ཆོས་རྗེ་བྱམས་པ་དཔལ་བ་སྔ་རྗེས་སུ་ལྐུགས་ལུང་གི་གནས་འདིར་ལན་གྲངས་འགའ་ཤས་ཕེབས་ནས་སློབ་མ་རྣམས་ལ་ནི་གུ་ཆོས་དྲུག་གི་ཁྲིད་སོགས་གནང་བ་དང་། རང་ཉིད་སྒྲུབ་པར་ཞུགས་ནས་ཕྱག་དྲུག་ཡེ་ཤེས་མགོན་པོའི་ཞལ་ཡང་གཟིགས་མྱོང་། དེ་མིན་རྗེ་ཤངས་དཀར་བ་སོགས་ཀྱི་ཤངས་པའི་བླ་མ་འགའ་ཡང་ཕེབས་མྱོང་།
ལྐུགས་ལུང་གི་གདན་ས་འདིར་དགོན་གནས་གཞན་འགའ་ཞིག་དང་འདྲ་བར་གདུག་ཅན་སོག་པོ་ཇུན་གར་བའི་དམག་དཔུང་བོད་དུ་ལྷགས་སྐབས་གཏོར་སྐྱོན་ཚབས་ཆེན་བཏང་བའི་སྐོར་གྱི་ཤོད་རྒྱུན་མང་དག་ཅིག་མངའ་ཡང་དཔེ་མཚོན་ཙམ་གྱི་ཚུལ་དུ་བརྗོད་ན། སྔར་སོག་པོ་ཇུན་གར་གྱི་དམག་དཔུང་དགོན་འདིར་མ་སླེབས་ཙམ་དུ་སྐབས་དེའི་གནས་བླ་མ་ཁམས་པ་ཞིག་གིས་ཐོག་མར་དགོན་པ་ཤར་ཆགས་སའི་བྲག་རྡོ་ཞིག་གི་སྟེང་དུ་རང་ཉིད་ཀྱི་ཀོ་གདན་བརྡབས་པ་དང་། དེ་རྗེས་དགོན་པ་འདིའི་ཤར་ལྷོའི་མཚམས་ཀྱི་ཁམས་པའི་དུད་བུ་ཞེས་པ་དེར་སླར་ཡང་བརྡབས་པས་ལྐུགས་ལུང་གི་ཉེ་འཁོར་དུ་ཡོད་པའི་སེང་གེ་བྲག་གིས་ངུས་པ་དང་བྲག་རི་ནོར་བུ་ལྕགས་སྒྲོག་གིས་ལྕགས་སྒྲ་སྒྲོག་གཏེར་རི་ཧྲིལ་པོ་ཡམ་ཡོམ་དུ་འདར་ནས་སྐད་སྒྲ་གྲགས་པ། བྲག་རི་སེར་རྡོ་མ་ཡར་ལངས་པ་སོགས་དང་། གཞན་ཡང་དགོན་འདིའི་འདུ་ཁང་ནང་ཀ་བ་སྦྲུལ་ཐོན་མ་ཞེས་པ་ཞིག་ཡོད་པ་དེའི་ཁོག་ནས་སྦྲུལ་ཞིག་ཀྱང་ཐོན། སྦྲུལ་དེ་སོག་དམག་སྒར་བཏབ་སར་ཕྱིན་ཏེ་ཆུ་འཐུང་པས་ཆུ་མགོ་ལ་དུག་ཕོག་སྟེ་དམག་མི་རྣམས་བཤལ་ནད་ཀྱིས་ཤི། སྦྲུལ་དེས་ལྕེ་གཅིག་ཤར་དུ་དབྱུག་པས་བྲག་རང་བྱོན་ཞིག་བྱུང་བ་དང་། གཅིག་ནུབ་ཏུ་དབྱུག་པས་བྲག་རང་བྱོན་གཞན་ཞིག་འཁྲུངས་རྗེས་སྦྲུལ་དེ་སླར་ཀ་བ་དེའི་སྦུབས་སུ་ཕྱིར་ལོག་པའི་ངོ་མཚར་བའི་རྟགས་དང་མཚན་མ་བྱུང་བ་ སོགས་མང་། དགོན་གནས་འདི་ཐོར་ཞིག་ཏུ་སོང་རྗེས་སྒྲིགས་བམ་དང་ནང་རྟེན་རྣམས་དྲུད་པའི་ཤུལ་ལ་ལྐུགས་ལུང་དང་རྨོག་ལྕོག་དབར་གྱི་རི་འདེབས་སུ་ཆོས་ལམ་ཞེས་པའི་འཕྲེད་ལམ་ཞིག་ཀྱང་མཐོང་རྒྱུ་འདུག །དེ་རྗེས་ནང་རྟེན་ལྷག་མ་དང་གྲྭ་བཙུན་རྣམས་ལྷ་ཕུ་སྤོས་ཐོག་དགོན་དུ་སྤོས་པས་དགོན་དེའི་མཚན་ཡང་དེ་ལྟར་ཐོགས་ཟེར། སྤོས་ཐོག་དགོན་པའི་མགོན་པོ་དབུ་ཀློག་པ་ཞེས་པ་དེའང་ལྐུགས་ལུང་ནས་སྤོས་ཐོག་ཏུ་སྤོ་སྐབས་མགོན་ཁང་གི་འཛུལ་སྒོ་ཆུང་སྟབས་མ་ཐར་བས་མགོན་པོ་ཉིད་ཀྱིས་དབུ་ཀྱོག་ཙམ་གནང་བས་མཚན་དེ་ལྟར་དུ་ཐོགས། དེའི་སྐུ་ཚབ་གསར་དུ་བཞེངས་པ་དེང་སྤོས་ཐོག་དགོན་དུ་མཇལ་རྒྱུ་ཡོད། ལྐུགས་ལུང་དུ་སྔར་དགུ་འཆམ་སྐྱོན་སྲོལ་ཡོད་པ་དེ་རིག་གསར་མ་ཚུགས་བར་སྤོར་ཐོག་དགོན་དུ་རྒྱུན་བསྐྱངས་ནས་ཡོད།
ད་ལྟ་ལྐུགས་ལུང་གི་དགོན་ཤུལ་དུ་འདུ་ཁང་དང་། ལྷ་མོ་དང་མགོན་པོ་གཉིས་བཞུགས་སའི་གཙང་ཁང་(ད་ལྟ་ལྷ་རྟེན་དཀར་པོ་དར་ཕུང་གིས་བཏུམས་པ་དེར་ཡིན་)གོས་སྐུ་འགྲེམས་སའི་གྱང་ཟུར་གཅིག །མཆོད་རྟེན་ཆེན་པོ་གསུམ་གྱི་ཤུལ། དེ་མིན་གྱི་རྩིག་རོ་སོགས་ཧ་ལམ་རྒྱ་ཁྱོན་སྨི་གྲུ་བཞི་མ་ཆིག་སྟོང་ལྔ་བརྒྱ་ལ་ཉེ་བ་ཡོད་པར་དཔགས་ན་སྔར་དགོན་དེ་ནི་གཞི་ཁྱོན་ཅུང་ཟད་ཆེན་པོ་ཡོད་པ་རྟོགས་ཐུབ། དགོན་གནས་འདིའི་ལྷ་རྟེན་དཀར་པོ་(ཆོས་རྗེ་རྨོག་ལྕོག་པའི་སྐབས་སུ་ཡོད་པའི་ལྐུགས་ལུང་བཙན་ཞེས་པ་དེ་མིན་ནམ་སྙམ་)ཡོད་སར་ལོ་ལྟར་བོད་ཟླ་བཅུ་གཉིས་པའི་ནང་སྐྱེས་ལྷ་འདིར་ཡིན་པའི་ཁུལ་དེའི་མི་རྣམས་འཛོམས་ནས་ལྷ་བསང་དང་གསེར་སྐྱེམས་སོགས་གཏོང་སྲོལ་འདུག་གཞང་ཡང་ཤངས་རྩེ་གདོང་གི་ཕུར་ཆོས་རྗེ་རྨོག་ལྕོག་པ་བཞུགས་མྱོང་བར་གྲགས་པའི་རྨོག་ལྕོག་སྒྲུབ་ཕུག་ཅེས་པ་ཞིག་འདུག་ཀྱང་ཁུངས་བཙན་གྱི་དཔྱད་གཞིར་མི་གསལ་བས་བདེན་རྫུན་འབྱེད་པར་དཀའ།
II.5.2.3 Kyergang
གསུམ། སྐྱེར་སྒང་དགོན།
དགོན་དེ་ནི་དེང་སྟོད་ལུང་བདེ་ཆེན་རྫོང་བདེ་ཆེན་ཡུལ་ཤོག་སྦང་ཚོན་ནང་པ་གྲོང་ཚོའི་ལྷོ་ངོས་ཀྱི་རི་ལྡེབས་སུ་གནས་ཤིང་། ནི་གུའི་བླ་བརྒྱུད་གསོལ་འདེབས་སུ་དབུས་སྟོད་ལུང་སྐྱེར་སྒང་གི་དགོན་པ་རུ། དབོན་སྟོན་ཐུགས་རྗེ་ཆེན་མོ་ལ་གསོལ་བ་འདེབས་ཞེས་འཁོད་པ་བཞིན་དབུས་ཀྱི་སྟོད་ལུང་དུ་གནས་པའི་གནས་གཞི་འདིར་ཐོག་མར་སྐྱེར་སྒང་དགོན་ཞེས་དང་། ད་ལྟ་རྭ་སྐོར་དགོན་ཞེས་འབོད། རྭ་སྐོར་ཞེས་པའི་མཚན་ཐོགས་ཚུལ་ནི་དབོན་སྟོན་སྐྱེར་སྒང་པས་ཐོག་མར་དགོན་འདི་ར་ཞིག་ལ་ས་བཀལ་ནས་ཕྱག་བཏབ་པ་དང་། ར་དེ་རྭ་ཅོ་འཁོར་ནས་ཡོད་སྟབས་རྭ་འཁོར་རམ་རྭ་སྐོར་ཞེས་བརྗོད་པའི་ཤོད་རྒྱུན་འདུག་ཀྱང༌། དབོན་སྟོན་སྐྱེར་སྒང་པ་གནས་འདིར་གདན་ས་སྐྱོང་བར་མ་ཕེབས་གོང་འབལ་ཚད་མ་བས་དགོན་གནས་འདི་བསྐྱངས་པ་དང་། འབལ་ཚད་མ་བ་སྐུ་གཤེགས་རྗེས་གྲྭ་པ་རྣམས་ཀྱིས་གདན་འདྲེན་ཞུས་པ་བཞིན་དབོན་སྟོན་ཉིད་གཞི་ནས་གནས་འདིར་ཕེབས། དབོན་སྟོན་སྐྱེར་སྒང་པ་གནས་འདིར་ཕེབས་སྐབས་དགོན་གནས་སྤྱི་བཏབ་ཟིན་པ་ལ་སྐྱེར་སྒང་སྐུ་འབུམ་དང་། ལྕགས་རི་སོགས་བརྩིགས་པར་མཛད། དེས་ན་དགོན་གནས་ཐོག་མར་ཕྱག་འདེབས་མཁན་དབོན་སྟོན་སྐྱེར་སྒང་པ་མིན་པ་གསལ་པོར་རྟོགས་ཐུབ།
སྔར་དབོན་སྟོན་སྐྱེར་སྒང་པའི་སྐུ་དུས་ཏེ་སྤྱི་ལོའི་དུས་རབས་བཅུ་གཉིས་པའི་སྨད་དང་བཅུ་གསུམ་པའི་སྟོད་ཙམ་དུ་ས་དེར་སྐྱེར་སྒང་ཞེས་འབོད་པ་ཡོངས་གྲགས་ཡིན་ཀྱང་། ད་ལྟ་སྦང་ཞེས་བརྗོད་དོན་ནི། ཁུལ་དེའི་ཤོད་རྒྱུན་དུ་སྔོན་ཨོ་རྒྱན་པདྨ་འབྱུང་གནས་འཕན་པོ་ནས་ཚུར་ཕེབས་སྐབས་ཞལ་སྐོམ་སྟེ་རྡོ་ཞིག་གི་སྟེང་ཕྱག་འཁར་བཙུགས་གནང་བས། ཆུ་ཞལ་གང་ཙམ་ལས་མ་ཐོན་སྟབས་མིད་པ་སྦང་ཙམ་བྱུང་བས་སྦང་ཞེས་བརྗོད་པ་ཡིན་ཟེར། འོན་ཀྱང་ཨོ་རྒྱན་རིན་པོ་ཆེ་ནི་སྤྱི་ལོའི་དུས་རབས་བརྒྱད་པའི་ནང་བོད་དུ་ཕེབས་པས་དུས་སྔ་ཕྱིའི་གོ་རིམ་ཡོངས་སུ་འགལ། དགོན་དེའི་གྲྭ་སློབ་ཚོས་རྣམ་ཀུན་དབུ་ཞྭ་དམར་པོ་བཞེས་སྲོལ་ཡོད་ཀྱང༌། སོག་པོ་ཇུན་གར་བའི་དམག་དཔུང་ཡོང་སྐབས་དབུ་ཞྭ་སེར་པོ་བསྟན་པས་དགོན་པའི་ལྡེབས་ཀྱི་ཤུག་པ་རྣམས་མེར་བསྲེགས་པ་ལས་སྐྱོན་གཞན་མ་བྱུང་ཞེས་པའི་ཤོད་སྲོལ་ལ་དཔགས་ན། སྤྱི་ལོ1718ལོའི་གཡས་གཡོན་དུ་སོག་པོ་ཇུན་གར་བས་བོད་ས་གནས་ཀྱི་རྙིང་མའི་དགོན་སྡེ་མང་ཆེ་བ་གཏོར་བའི་སྐབས་སུ། ཇུན་གར་ཚེ་རིང་དོན་གྲུབ་ཀྱིས་བཏང་བའི་དམག་དཔུང་དགོན་གནས་འདིར་འབྱོར་ནས་ཤུག་པ་རྣམས་མེར་བསྲེགས་བཏང་སྐབས་དེར་སྔ་འགྱུར་རྙིང་མའི་ཕྱག་བཞེས་སྐྱོང་བ་ལ། ཕྱིས་བླ་མའི་ཡང་སྲིད་མ་བྱོན་པའི་དབང་གིས་ཆུ་བཟང་དགོན་གྱི་དགོན་ལག་ཏུ་གྱུར། དགོན་དེར་རྟེན་གཙོ་རྡོ་ནག་ལས་གྲུབ་པའི་མགོན་པོ་ཕྱག་དྲུག་གཏེར་བཞེས་མ་དང་། ས་དབོར་མཁན་གྱི་ར་མོའི་དབུ་ཐོད། །དགོན་དེའི་ཤར་ངོས་ཀྱི་རི་ལས་གཏེར་དུ་བཞེས་པའི་སྦུབས་ཆལ་དང་གཏེར་ཕུར་སོགས་དང་། དེ་མིན་དགོན་པའི་ཉེ་འགྲམ་དུ་བླ་མ་སྐུ་ཕྲེང་གསུམ་གྱི་གདུང་རྟེན་མཆོད་རྟེན་གསུམ་ཡོད། དགོན་འདི་དབོན་སྟོན་གྱི་སྐབས་སུ་ཤངས་པ་བཀའ་བརྒྱུད་དང་དེ་རྗེས་རྙིང་མ། ད་ལྟ་བཙུན་མ་ཞལ་གྲངས་དྲུག་གིས་རྗེ་ལམ་རིམ་པ་ངག་དབང་ཕུན་ཚོགས་ཀྱི་བཀའ་བཞིན་སྤྱི་ལོ་1986ལོ་ཙམ་ནས་འབྲས་སྤུངས་སྔགས་པ་གྲྭ་ཚང་གི་ཕྱག་བཞེས་སྐྱོང་མུས་ཡིན། སྤྱི་ལོ1959ལོའི་གོང་ཙམ་གྱི་བར་སྐབས་ཤིག་རིང་དགོན་འདིའི་དགོན་བདག་རྭ་སྒྲེང་བླ་བྲང་དང་། བླ་མ་མདོ་སྔགས་ཆོས་འཛོམས་ཞེས་པ་དེ་ཉིད་ཡིན། སྐབས་དེར་བཙུན་མ་ཞལ་གྲངས་དྲུག་ཅུ་རེ་བདུན་ཡོད་པའི་དགོན་སྡེ་ཅུང་ཆེ་ཙམ་ཞིག་ཡིན་ཀྱང་། མགོ་རྨོག་གིས་བཅག །ལྷ་དཀོན་གཉེར་གྱིས་བརྡུངས་པའི་རིག་གསར་སྐབས་རྩ་གཏོར་དུ་སོང་། སླར་ཉམས་གསོ་གང་ལེགས་ཞུས་ཤིང་། སྤྱི་ལོ2012ལོར་བསྐྱར་བཞེངས་མཛད་པའི་འདུ་ཁང་གི་རྟེན་གཙོར་གསེར་ཟངས་ཀྱི་དུས་གསུམ་སངས་རྒྱས་སོགས་བཞུགས་སོ།
དེ་ཡང་དབོན་སྟོན་སྐྱེར་སྒང་པའི་རྣམ་ཐར་ལས་ཡང་ཚེས་བཅུ་བཞིའི་ཉི་མ་ཕྱེད་ཡོལ་ཙ་ན་བཅུ་གཅིག་ཞལ་བྱོན་ནས། ང་དང་ཁྱོད་ནི་དབྱེར་མེད་དེ། །སྐྱེར་པ་སྒང་ནི་པོ་ཏ་ལ། །གསུངས་པས། གཞན་དུ་དགེ་སྦྱོར་གྱིས་པ་བས། སྐྱེར་སྒང་དུ་གཉིད་ལོག་པ་དགའ་བ་ཡིན་ནོ་ཞེས་ཐུགས་རྗེ་ཆེན་པོ་དང་གཉིས་སུ་མེད་པ་དབོན་སྟོན་སྐྱེར་སྒང་པ་ཆོས་ཀྱི་སེང་གེར་སྤྱན་རས་གཟིགས་བཅུ་གཅིག་ཞལ་གྱིས་ཞལ་མངོན་སུམ་དུ་གཟིགས་ཏེ། སྐྱེར་སྒང་གི་གནས་འདི་ཉིད་པོ་ཏ་ལ་དང་མཉམ་པར་བྱིན་གྱིས་བརླབས་པས། གནས་གཞན་དུ་དགེ་སྦྱོར་བྱས་པ་ལས་འདིར་གཉིད་ལོག་པ་དགའ་བ་ཡིན་ཞེས་ཐུགས་རྗེ་ཆེན་པོ་ཉིད་ཀྱིས་གསུངས་ལ། ཡང་དབོན་སྟོན་སྐྱེར་སྒང་པ་ཆེན་པོས་ཀྱང་ངའི་བྱིན་རླབས་མ་ཉམས་བར་ལ་སྐྱེར་སྒང་འདི་པོ་ཏ་ལ་དངོས་ཡིན་པས། གཞན་དུ་རི་ཁྲོད་དང་འདག་འབྱར་བྱས་པ་བས། འདིར་གཉིད་ལོག་པ་དགའ་བ་ཡིན་ནོ། ད་གཟོད་མཐའ་མི་དབུས་སུ་འདུས་པའི་སྟོབས་ཀྱིས་འབུམ་ཐང་འདིར་ཁྱི་ལུད་ཐོར་གྱིས་འབྱུང་། བུད་མེད་ཤམ་བུ་ཅན་གྱིས་ཞུད་ལྟ་ཕྱར་རེ་བ་ཞིག་འོང་བར་འདུག །དེ་ཙ་ན་ངའི་བྱིན་རླབས་ཉམས་པ་ཡིན་པས། དེ་ནས་ཀླུ་དང་ཀླུ་སྲིན་མོ་དེ་ལངས་ནས། བསླབ་པ་ཐུབ་པ་ཡང་ཉུང་དུ་འགྲོ། རྩེ་གཅིག་ཏུ་སྒྲུབ་པ་བྱེད་པ་ཡང་མི་འོང་བ་འདུག་ཅེས་གསུངས་པའི་ལུང་བསྟན་དེ་སྐྱེར་སྒང་དགོན་ཉམས་རྒུད་དུ་སོང་བའི་ལོ་རྒྱུས་ཀྱི་དོན་དངོས་དང་མཐུན་པ་སྟེ། མཐའ་མི་དབུས་སུ་ལྷུང་བ་ཞེས་གསུངས་པ་དེ་ཁོ་བོའི་བསམ་པར་མཐའ་མི་སོག་པོ་ཇུན་གར་སོགས་བོད་ཡུལ་དབུས་སུ་ལྷགས་ནས་དགོན་གནས་ལ་གཏོར་སྐྱོན་བཏང་བའི་དོན་དང་། འབུམ་ཐང་དེ་ཁྱི་ལུད་ཐོར་གྱིས་འབྱུང་ཞེས་གསུངས་པ་ནི། ཨ་ཁུ་འབལ་ཚད་མ་བ་འདས་རྗེས་དབོན་སྟོན་སྐྱེར་སྒང་པས་གྲྭ་སློབ་ཚོའི་རེ་འདུན་བཞིན་སྐྱེར་སྒང་དུ་ཕེབས་ནས་སྐུ་འབུམ་བརྩིགས་ཏེ་གདན་ས་བསྐྱངས་པའི་སྐོར་རྣམ་ཐར་དུ་གསལ་བར་ཐོན་པ་ལྟར་དང་། མཐར་སྐྱེར་སྒང་སྐུ་འབུམ་འདི་ཉིད་ཁྱི་ལུད་ཐོར་བ་བཞིན་རྩ་གཏོར་དུ་སོང་བའི་དོན་ཡིན། ད་ལྟ་སྐུ་འབུམ་གྱི་རྩིག་ཤུལ་རེད་ཟེར་བ་རྡོ་ཕུང་ཆེ་ཆུང་མི་འདྲ་བ་གསུམ་ཡང་དངོས་སུ་མཇལ་རྒྱུ་འདུག །བུད་མེད་གཤམ་བུ་ཅན་གྱི་ཞུད་ལྟ་ཕྱིར་རེ་བ་འོང་བར་འདུག་ཅེས་པའི་ཚིག་དོན་གྱི་མདུད་པ་ཡོངས་སུ་དགྲོལ་དཀའ་ཡང་། བུད་མེད་གཤམ་བུ་ཅན་འབྱུང་བ་ནི་དགོན་དེ་ཐོག་མར་ཕོ་དགོན་ཡིན་ཀྱང་ཕྱིས་སུ་མོ་དགོན་དུ་འགྱུར་བ་བསྟན་ལ། སྐབས་དེའི་དུས་སུ་པོ་ཏ་ལ་དང་དབྱེར་མེད་པའི་བྱིན་རླབས་ཀྱང་ཉམས་ནས་བསླབ་པ་སྲུང་ཐུབ་པ་དང་རྩེ་གཅིག་གིས་སྒོམ་སྒྲུབ་བྱེད་པ་ཡང་དཀོན་ཞེས་གསུངས་པ་དག་ནི་ངེས་པ་འདྲེན་ནུས་པའི་ལུང་བསྟན་ཤ་སྟག་ཡིན་སྙམ།
II.5.2.4 Rigong
བཞི། ཡོལ་རི་གོང་དགོན།
དེ་ཡང་ནི་གུའི་བརྒྱུད་འདེབས་སུ་གནས་ཡོལ་ཕུ་རི་གོང་གི་དགོན་པ་རུ། གཉན་སྟོན་སྦས་པའི་རྣལ་འབྱོར་ལ་གསོལ་བ་འདེབས་ཞེས་འཁོད་པ་ལྟར་ཡོལ་རི་གོང་གི་དགོན་གནས་འདི་ནི་ཤངས་པ་བཀའ་བརྒྱུད་ཀྱི་རིན་ཆེན་བདུན་བརྒྱུད་སྔ་མའི་དྲུག་པ་གཉན་སྟོན་རི་གོང་པ་སངས་རྒྱས་སྟོན་པ་ཆོས་ཀྱི་ཤེས་རབ་ཀྱིས་ཕྱག་བཏབ་གནང་བ་དང་། དགོན་འདིའི་ད་ལྟའི་གནས་ཡུལ་ནི་ལྷ་ས་གྲོང་ཁྱེར་ཆུ་ཤུར་རྫོང་བྱེ་ནུབ་ཡུལ་ཤོག་ཁོངས་ཀྱི་རུ་ཁག་བརྒྱད་པ་རི་གོང་གྲོང་ཚོར་ཡིན། སྔར་དབོན་སྟོན་སྐྱེར་སྒང་པས་གཉན་སྟོན་ཆོས་རྗེ་ལ་ན་ཐང་སྔོ་ཕྱམ་མེ་བ་ཞིག་གི་དཀྱིལ་ན་རི་པོ་ཏོ་གཅིག་འདུག །དེའི་ཁར་ཁྱོད་ཀྱི་དགོན་པ་འོང་བར་འདུག་ཅེས་ལུང་བསྟན་པ་བཞིན་རི་གོང་གི་དགོན་གནས་འདི་ཡོལ་གྱི་ཕུའི་ན་ཐང་སྔོན་པོ་ཞིག་གི་ཤར་ངོས་སུ་གནས་འདུག
།དགོན་གནས་འདིར་སྔར་རྒྱལ་དབང་དགེ་འདུན་རྒྱ་མཚོའི་མཛད་རྣམ་དུ་མགོན་པོ་བར་སྣང་མ་ཞེས་སུ་གྲགས་པའི་རང་བྱུང་མགོན་པོ་བྱིན་ཅན་ཞིག་བཞུགས་ཡོད་པ་དེ། གཉན་སྟོན་རི་གོང་པ་ཉིད་གནས་འདིར་བཞུགས་པའི་དགུན་སྨད་ཅིག་ལྷ་མོ་དང་ཀྵེ་ཏྲ་པཱ་ལ་གཉིས་བྱུང་ནས་མགོན་པོའི་སྐུ་བཞེང་པ་ཞུ་ཟེར་བས། ཁོང་གིས་ཀྵེ་ཏྲ་པཱ་ལར་ཁྱོད་ཀྱིས་མི་མ་བསད་ན་ངས་མགོན་པོའི་སྐུ་བཞེངས་གསུངས། ཐོ་རངས་ཁར་མགོན་པོ་འཁོར་བཅས་ཐམས་ཅད་གནད་ལ་བསྐུལ་བའི་དཔའ་བོ། ཌ་མ་རུ་དང་གཡེར་ཁ་ཐོགས་པ་ཞིག་བྱོན་ནས་མགོན་པོས་གཡས་སུ་བཞུགས་ཤིང་དཔའ་མོ་དེ་གཡོན་དུ་བཞུགས། དེ་ལྟར་དཔའ་བོ་དཔའ་མོ་གཉིས་ཀྱིས་གནད་ནས་བསྐུལ་ཞིང་འཛུམ་གྱིས་བསུས་པས། ནུས་པ་ཆེ་ཞིང་བཀྲ་ཤིས་ལ་ལས་མྱུར་བའི་གནད་ཀྱང་དེ་ལས་བྱུང་བ་ལགས། མགོན་པོ་འདི་ཉིད་ཀྱི་བྱུང་ཚུལ་སྐོར་ཅུང་མི་འདྲ་བ་ཡང་། རྒྱལ་དབང་དགེ་འདུན་རྒྱ་མཚོ་ཉིད་ཡོལ་རི་གོང་གི་མགོན་པོ་མཇལ་སྙམ་པའི་མནལ་ལམ་དུ་ཨ་ཙ་ར་སྔོན་པོ་རས་ཀྱི་ཤམ་ཐབས་ཅན་ཞིག་བྱུང་ནས། སངས་རྒྱས་གཉན་སྟོན་ལ། ཁྱེད་དགེ་སྦྱོར་བྱེད་པ་ལ་དམིགས་པའི་རྟེན་ཅིག་དགོས་པ་ཡིན་པས་མགོན་པོའི་སྐུ་ཞིག་ཨེ་བཞེང་ཟེར་བ་ལ། འོ་ན་ཅིས་ཀྱང་བཞེང་ཞུས་ནས་འཇིམ་པ་དང་རིན་པོ་ཆེ་མང་པོ་སྤུངས་པས། བཞེང་མ་དགོས་པར་མགོན་པོའི་སྐུ་རང་བྱུང་དུ་བྱོན། ཨ་ཙ་ར་དེ་ཡང་ཡེ་ཤེས་མགོན་པོར་འཐིམ་པའི་རྟེན་བཤད་མཛད་འདུག
།ཕྱིས་འཇམ་དབྱངས་མཁྱེན་བརྩེ་དབང་པོས་ལྕགས་ཟམ་ཕ་རིའི་ཕྱོགས་སུ་ཡོལ་རི་གོང་ཞེས་པ་ཤངས་པ་བཀའ་བརྒྱུད་ཀྱི་གྲུབ་ཆེན་རི་གོང་པ་སངས་རྒྱས་གཉན་སྟོན་གྱི་སྒྲུབ་གནས་མགོན་པོ་བྱིན་ཅན་སོགས་ཡོད་ཅེས་གསུངས་པ་དང་། ཇོ་ནང་ཏཱ་ར་ནཱ་ཐས་སྤྱི་ལོ་1600ལོར་གནས་འདིར་མཛད་པའི་དཔལ་ལྡན་ཤངས་པའི་གསེར་ཆོས་ལམ་རིམ་དང་འབྲེལ་བའི་ཞལ་གདམས་བདུད་རྩིའི་སྙིང་པོ་ཞེས་བྱ་བའི་མཇུག་ཏུ་རང་ལོ་ཉེར་ལྔ་པ་ལ་རི་གོང་དཔལ་གྱི་མགོན་པོའི་གནས་རང་བྱུང་མགོན་པོའི་དྲུང་དུ་ཚོགས་ཀྱི་འཁོར་ལོའི་ཚེ་གླུར་བླངས་པ་ཞེས་གསུངས་པ་ལྟར་བྱིན་རླབས་ཀྱི་མཚན་ཁ་ཤིན་ཏུ་འབར་བའི་རང་བྱུང་གི་མགོན་པོ་འདི་ཉིད་རི་གོང་གི་དགོན་གནས་སྤྱི་ལས་ཀྱང་ཁྱད་པར་དུ་འཕགས་པ་ལྟ་བུར་སྣང་། རྗེ་བཙུན་ཀུན་དགའ་གྲོལ་མཆོག་གིས་ཀྱང་གཉན་སྟོན་སྦས་པའི་རྣལ་འབྱོར་གྱིས་བཞེང་པར་བརྩམས་པའི་མགོན་པོ་རང་བྱོན་དེའི་དྲུང་དུ་ཤངས་ཆོས་ཞུ་སའི་བླ་མ་བརྟགས་པ་སོགས་མཛད།
དམངས་གཙོའི་བཅོས་བསྒྱུར་གོང་ས་ཆ་འདིར་ཡོལ་རི་གོང་བ་ཞེས་ཤོད་དྲུང་ཞིག་གི་གཞིས་ཀ་ཡོད། སྤྱི་ལོ1959 ལོའི་གོང་བོད་ས་གནས་སྲིད་གཞུང་གི་དབུས་ཁུལ་དགོན་ཁག་གཞུང་ཁྲའི་ནང་དགོན་གནས་འདིར་ཁྱོན་དགེ་འདུན་ཞལ་གྲངས་བཞི་བཅུ་ཞེ་གསུམ་ཡོད་པ་གསལ། དགོན་འདི་རིག་གསར་སྐབས་རྩ་གཏོར་དུ་སོང་ལ། དེང་རི་བོང་གི་དབྱིབས་དང་འདྲ་བའི་བྲག་སྟེང་གི་རྩེ་མོར་མགོན་ཁང་ཆུང་ངུ་ཞིག་ལས་ལྷག་མེད་པ་དང་། དེའི་ནང་མགོན་པོ་བར་སྣང་མའི་བཞུགས་ཁྲི་ཡང་མཇལ་རྒྱུ་འདུག །མགོན་ཁང་གནས་སའི་བྲག་རྡོག་དེའི་ཤར་ལྷོའི་མཚམས་སུ་སྔར་གྱི་རི་གོང་དགོན་པའི་རྩིག་ཤུལ་འགའ་ཞིག་མཇལ་རྒྱུ་འདུག་ལ། དེང་མགོན་ཁང་འོག་གི་བྲག་རིའི་སྟེང་དུ་ཡང་རི་གོང་གྲོང་ཚོའི་ཁྱིམ་ཚང་འགའ་ཤས་ཀྱི་ཁང་པ་ཆགས་འདུག །དེ་ཡང་རྗེ་བཙུན་མི་ལའི་རྣམ་མགུར་དུ་དམ་ཆོས་ཡོད་ཚེ་ཞབས་ཏོག་མེད། །ཞབས་ཏོག་སླེབས་ཚེ་ཐིགས་པས་གདུངས་ཞེས་པ་ལྟར་ལོ་མང་གི་ཆར་རླུང་ཁྲོད་མགོན་ཁང་འདིའི་ཐོག་ཁར་རྡིབ་སྐྱོན་བྱུང་བའི་ཨི་ཁུང་གཉིས་འདུག་ལ། གདུང་ལྕམ་ཡང་མང་ཆེ་བ་རུལ་སྐྱོན་ཤོར་ནས་ད་ལྟ་འགྱེལ་ལ་ཁད་པའི་སྡོང་རྒན་ཞིག་དང་འདྲ། ཤུལ་འདི་མཇལ་བ་ཙམ་གྱིས་སྔར་རྗེ་ཙོང་ཁ་པས་ཞིག་གསོ་མ་མཛད་གོང་གི་རྫིང་ཕྱིའི་བྱམས་པའང་ཡིད་སེམས་ལ་ལྷང་ལྷང་འཆར་གྱི་འདུག །སྐབས་དེའི་རྫིང་ཕྱིའི་བྱམས་པར་ཞབས་ཏོགས་ཇི་ལྟར་དབེན་ཡང་སྐུ་རྟེན་མ་སྟོངས་ཙམ་དུ་བཞུགས་ཡོད། འོན་ཀྱང་མགོན་ཁང་འདིར་ཡེ་ཤེས་མགོན་པོ་ཡང་བཞུགས་ཁྲིའི་སྟེང་ནས་ཡལ་སོང་བ་ལྟར་སྐུ་ལུས་ཀྱི་ཆ་ཤས་ཙམ་ཡང་མཇལ་རྒྱུ་མི་འདུག །དེ་ལྟར་ད་ལྟའི་མགོན་ཁང་ཤིན་ཏུ་ཉམ་ང་བ་འདི་ནི་ཤངས་པ་བཀའ་བརྒྱུད་ལ་ཉམས་དམས་ཤུགས་ཆེ་བྱུང་བའི་དཔང་རྟགས་དམར་རྗེན་ཞིག་ཀྱང་ཡིན།
II.5.2.5 Draktsa
ལྔ། ཡོལ་ཕུ་བྲག་རྩ་དགོན།
དེ་ཡང་གནས་ཡོལ་ཕུ་བྲག་རྩའི་དགོན་པ་རུ། ཆོས་རྗེ་སངས་རྒྱས་སྟོན་པ་ལ་གསོལ་བ་འདེབས་ཞེས་འཁོད་པ་བཞིན། ཡོལ་ཕུ་བྲག་རྩའི་དགོན་པ་ནི་རིན་ཆེན་བདུན་བརྒྱུད་སྔ་མའི་བདུན་པ་འགྲོ་མགོན་སངས་རྒྱས་སྟོན་པ་བརྩོན་འགྲུས་སེང་གེས་ཕྱག་བཏབ་གནང་བ་ཞིག་ཡིན། དགོན་འདིའི་གནས་ཡུལ་ཡོལ་གྱི་ཕུར་ཡིན་ངེས་ཀྱང་ད་ལྟ་དགོན་ཤུལ་ངེས་གཏན་མ་རྙེད། འོན་ཏེ་ཡོལ་གྱི་ལུང་པ་འདིར་ཤངས་པ་བཀའ་བརྒྱུད་ཀྱི་རིན་ཆེན་བདུན་བརྒྱུད་སྔ་མའི་བླ་རབས་ཕྱི་མ་གཉིས་ཀྱིས་ཕྱག་བཏབ་པའི་དགོན་སྡེ་གཉིས་གནས་ཡོད་པ་དང་། གཉན་སྟོན་རི་གོང་པ་ཉིད་ཀྱང་ཡོལ་གྱི་མདར་གཉན་གྱི་རིགས་སུ་སྐུ་འཁྲུངས་པ། མཁས་གྲུབ་ཆོས་རྗེའི་སློབ་མ་ཤངས་པ་གསེར་གླིང་པ་བཀྲ་ཤིས་དཔལ་ཡོལ་ཕུ་གསེར་གླིང་སྟེ་དེང་ཤུ་ཆུར་རྫོང་བྱེ་ནུབ་ཡུལ་ཤོག་ཁོངས་གསེར་གླིང་གྲོང་ཚོར་ཡབ་རྗེ་བཙུན་མཚན་ཅན་དང་ཡུམ་དཀོན་མཆོག་རྒྱན་གཉིས་ཀྱི་སྲས་སུ་ཆུ་ཕོ་འབྲུག་ལ་འཁྲུངས་པ་སོགས་ཀྱིས་མཚོན་པའི་ཤངས་པའི་ལོ་རྒྱུས་ཐོག་གི་གནས་གཞི་གལ་ཆེན་ཞིག་ཡིན་ལ། ལྷག་པར་དེ་དང་མི་རིང་བའི་སར་གྲུབ་ཐོབ་ཐང་སྟོང་རྒྱལ་པོའི་གདན་ས་ལྕགས་ཟམ་ཆུ་བོ་རི་སོགས་ཆགས་ཡོད་པར་གཞིགས་ན། ཡོལ་གྱི་ས་ཆ་འདི་ཉིད་ཀྱིས་གཙོ་བོར་བྱས་པ་དེའི་ཉེ་འཁོར་ནི་སྔར་གྱི་དུས་སྐབས་ཤིག་རིང་དབུས་ཁུལ་གྱི་ཤངས་ཆོས་དར་ཁྱབ་བྱུང་བའི་ས་ཁོངས་གལ་ཆེའི་གྲས་ཤིག་གོ

II.5.3 -
།གསུམ་པ། རིན་ཆེན་བདུན་བརྒྱུད་ཕྱི་མས་བཏབ་པའི་དགོན་གནས།
དེ་ཡང་ཐུའུ་བཀྭན་གྲུབ་མཐའ་ལས་ཤངས་སྟོན་གྱིས་འཇག་དང་། མཁས་བཙུན་གཞོན་ནུ་གྲུབ་ཀྱིས་བསམ་སྡིངས་བཏབ་པས་འཇག་བསམ་གཉིས་སུ་གྱེས་ཞེས་པ་ལྟར་རིན་ཆེན་བདུན་བརྒྱུད་སྔ་མ་མཇུག་བསྒྲིལ་རྗེས་གཙོ་ཆེར་ཤངས་ཞོང་ཞོང་དང་ཉེ་བར་འཇག་ཆེན་དང་འཇག་ཆུང་། པ་སྣམ་དུ་བསམ་སྡིངས་དགོན་བཏབ་ནས་ཤངས་པའི་བརྒྱུད་པ་འཇག་བསམ་གཉིས་སུ་གྱེས།
II.5.3.1 Jakchung
གཅིག །འཇག་ཆུང་དགོན།
དགོན་ཤུལ་འདི་ནི་དེང་རྣམ་གླིང་རྫོང་སྟག་སྣ་ཡུལ་ཤོག་ཁོ་ལམ་ཚོན་ཁོང་རྒྱང་གྲོང་ཚོའི་ཕུར་ཡོད། འཇག་ཅེས་པའི་མིང་དེར་རྗེ་བཙུན་ཀུན་དགའ་གྲོལ་མཆོག་གི་རྣམ་ཐར་དུ་སྒྲུབ་གནས་ཞོང་གཤོང་མ། སྲིན་མོ། ལྕགས་པོ་རྩེ། རྨོག་ཅོག་ཀུང་ལུང་། སྐྱེར་སྒང་། ཡོལ་ཕུ་རི་གོང་། བྲག་ཆེན། ལྗགས་སོགས་གནས་ཐ་དད་དུ་ཚོགས་ཀྱི་རྣམ་པ་རེ་དང་བཅས་སྨོན་ལམ་སྙིང་ནས་བཏབ་ཅེས་པའི་ནང་ལྔགས་ཞེས་འཁོད་པ་བཞིན་འཇག་ཆེན་དང་འཇག་ཆུང་གནས་སའི་ལུང་པ་གསུམ་མདོ་ཁ་དེ་ཉིད་ལྕེ་དང་འདྲ་བས་ཞེ་ཚིག་གི་ཚུལ་དུ་མཚན་དེ་ལྟར་ཐོགས་ཀྱང་། འདིར་ཡོངས་གྲགས་ལྟར་འཇག་ཅེས་པ་འདི་ཉིད་འབྲི་རྒྱུ་ཡིན། དེ་ཡང་ནི་གུའི་བརྒྱུད་འདེབས་ལས་གནས་འཇག་ཆུང་དཔལ་གྱི་དགོན་པ་རུ། མཁས་གྲུབ་གཙང་མ་ཤངས་སྟོན་ལ་གསོལ་བ་འདེབས་བཞེས་འཁོད་པ་བཞིན། ཤངས་པ་བཀའ་བརྒྱུད་ཀྱི་རིང་བརྒྱུད་འཇག་བསམ་གཉིས་སུ་གྱེས་པའི་འཇག་བརྒྱུད་ཀྱི་གདན་ས་གཙོ་བོ་འཇག་ཆུང་ནི་ཐོག་མར་མཁས་གྲུབ་ཤངས་སྟོན་གྱིས་རང་ཉིད་ཀྱི་སྐུ་ཚེའི་མཇུག་སྟེ་སྤྱི་ལོའི་དུས་རབས་བཅུ་གསུམ་པའི་སྨད་ཙམ་དུ་ཕྱག་བཏབ། ཁོང་གིས་དགོན་གནས་འདིར་ཡུན་རིང་བཞུགས་པ་ཡང་དེབ་སྔོན་དུ་མཁས་གྲུབ་ཤངས་སྟོན་དེ་ནས་འཇག་ཏུ་བཞུགས་ནས་གཞན་གྱི་དོན་རྒྱ་ཆེན་པོ་མཛད། སློབ་མ་རྟོགས་ལྡན་ཡང་མང་དུ་བྱུང་ཞེས་འཁོད་པ་ལྟར། མཁས་གྲུབ་གཙང་མ་ཤངས་སྟོན་གྱིས་འཇག་ཆུང་དུ་བཞུགས་ནས་གཞན་དོན་རྒྱ་ཆེན་པོ་མཛད་ཅིང་སློབ་མ་རྟོགས་ལྡན་ཡང་མང་དུ་བྱོན། གནས་འདིར་སྔར་ཁྱུང་པོ་གཉིས་པ་ཚུལ་ཁྲིམས་མགོན་པོ་རང་ཉིད་ཀྱི་འཁྲུངས་ཡུལ་སྐྱ་ར་ནས་བྲོས་འབྱོལ་དུ་ཕེབས་ཏེ་མཁས་གྲུབ་ཤངས་སྟོན་ཉིད་དང་ཐོག་མར་མཇལ་བ་ཡིན་ལ། འཇག་ཆེན་བྱམས་པ་དཔལ་དགུང་ལོ་བཅུ་གཅིག་ལ་ཕེབས་སྐབས་ཏེ་སྤྱི་ལོ་1321་ལོ་ཙམ་ལ་མཁས་གྲུབ་ཤངས་སྟོན་ལས་མགོན་པོའི་རྗེས་གནང་དང་བླ་མ་མགོན་པོ་དབྱེར་མེད་གསན། མཁས་གྲུབ་ཤངས་སྟོན་སྐུ་གཤེགས་རྗེས་ཀྱི་དུས་སྐབས་ཤིག་རིང་མཁས་བཙུན་རྒྱལ་མཚན་འབུམ་གྱིས་འཇག་ཆུང་གི་གདན་ས་འདི་ཉིད་བསྐྱངས་གནང་བ་དང་། ཁོང་སྐུ་གཤེགས་ཁར་དགོན་པ་འདི་བྱམས་པ་དཔལ་གྱིས་བཟུང་། ཆོས་བརྒྱུད་འདི་སྐྱོངས་ཞེས་གསུངས་པ་ལྟར་མཁས་བཙུན་རྒྱལ་མཚན་འབུམ་གྱི་རྗེས་སུ་ཆོས་རྗེ་བྱམས་པ་དཔལ་བས་འཇག་ཆུང་གི་གདན་ས་བསྐྱངས། ཆོས་རྗེ་བྱམས་པ་དཔལ་སྐུ་གཤེགས་རྗེས་ཀྱི་སྤྱི་ལོའི་དུས་རབས་བཅུ་བཞི་པའི་འགོར་ཁོང་གི་སློབ་མ་བློ་གྲོས་དཔལ་བཟང་སོགས་ཤངས་པའི་བརྒྱུད་འཛིན་པ་འགའ་ཤས་འཇག་ཆུང་གི་རི་ཁྲོད་འདིར་བཞུགས་པ་བཅས་སོ། །དེང་འཇག་ཆུང་གི་དགོན་ཤུལ་འདིར་རྡོ་བརྐོས་ཀྱི་མ་ཎི་དང་། ལྷག་པར་རྡོ་ལེབ་སྟེང་དུ་བླ་མ་མང་པོའི་མཚན་གསལ་བར་འཁོད་པ་ཡང་མང་དག་ཅིག །སྔར་གྱི་འདུ་ཁང་དང་། ཤག་ཁང་། མགོན་ཁང་། མཆོད་རྟེན་སོགས་ཀྱི་ཤུལ་མང་པོ་ཞིག་ཀྱང་མཇལ་རྒྱུ་འདུག །འཇག་ཆུང་ལྟག་གི་བྱང་ཤར་མཚམས་ཀྱི་རི་ལྡེབས་སུ་མགོན་པོའི་དབུ་སྐུར་གྲགས་པའི་གནས་བསང་སྤ་མ་སོགས་མང་དུ་སྐྱེ་བ་དེ་དག་སྔར་གྱི་དུས་སུ་འཇག་གི་བསང་ཞེས་དེ་ཁུལ་དུ་གྲགས་ཆེ་ཡང་། ཕྱིས་དགོན་གནས་དེ་དང་འདྲ་བར་གཏོར་སྐྱོན་ཆེ་ཙམ་བྱུང་འདུག །ཡང་མཁས་གྲུབ་ཤངས་སྟོན་གྱིས་ཐེངས་ཤིག་གཏོར་མ་ནམ་མཁར་ཕངས་པའི་དུས་སུ། འཇག་ཆུང་དུ་དེ་སྔ་མེད་པའི་ཆུ་མིག་བརྡོལ་ནས་ཆུ་བླངས་ཚད་ཡོང་བའི་སྒྲུབ་ཆུ་ཞིག་ཐོན་པ་ལ་གླིང་སྨད་ཆུ་ཁུང་ཞེས་གྲགས། དེང་དེའི་སྟེང་དུ་ས་རྡོ་བླུགས་ནས་མཇལ་རྒྱུ་མི་སྣང་། འཇག་ཆུང་ནི་དམངས་གཙོའི་བཅོས་བསྒྱུར་གོང་བཙུན་མ་ཞལ་གྲངས་ལྔ་བཅུ་ཙམ་ཡོད་པའི་མོ་དགོན་ཞིག་ཡིན་ཞིང་། བཙུན་མ་དེ་ཚོས་ཉེར་ལྔ་ཚེས་བཅུ་སོགས་གཏོང་སྲོལ་ཡོད་པར་དཔགས་ན་ཕལ་ཆེར་རྙིང་མ་པའི་རིང་ལུགས་འཛིན་པའི་དགོན་སྡེ་ཞིག་ཡིན་པར་སེམས།
གཞན་ཡང་འཇག་ཆུང་གི་ཁ་སྤྲོད་ཙམ་དུ་གཏོར་གཟུགས་ཀྱི་རི་ཞིག་གི་སྟེང་དུ་དགའ་ལྡན་ལྕོག་ཆུང་གི་དགོན་ཤུལ་མཇལ་རྒྱུ་འདུག་པ་དེ་ནི། ཆོས་རྗེ་བྱམས་པ་དཔལ་སྐུ་འཚོ་བཞུགས་ཀྱི་དུས་སྐབས་ཏེ་སྤྱི་ལོའི་དུས་རབས་བཅུ་བཞི་པའི་སྨད་ཙམ་དུ་སློབ་དཔོན་བློ་གྲོས་མགོན་གྱིས་གཙོ་བྱས་ནས་གསར་དུ་བཞེངས་པ་ཡིན། དགའ་ལྡན་གྱི་གནས་འདི་བཞེངས་སྐབས་ཇ་སྣ་ཡང་ཟད་པས། སློབ་དཔོན་བློ་གྲོས་མགོན་པོས་མཁར་ལས་ཀྱང་ཞག་འགའ་འགྱང་ན་ཞུས་པས། ཆོས་རྗེ་བྱམས་པ་དཔལ་གྱིས་ཇ་སྣ་མི་ཆད་པ་འོང་། ཁྱེད་རང་རྣམས་ཆང་དང་རྗོད་འཐག་གི་དོ་དམ་གྱིས་གསུངས་པའི་གནངས་ཉིན་ལྷ་ཕུ་ནས་མར་ཐུད་ལ་སོགས་འབུལ་སྐྱེལ་མང་དུ་བྱུང་། གནས་འདི་ཉིད་ཀྱིས་ལུང་པ་སྤྱི་དང་འཇག་གི་དགོན་པ་ལ་ཕན་ཞིང་། ལྷག་པར་དུ་འཇག་ཆུང་ས་ཡུལ་དོག་པས་གསོལ་འདེབས་དང་སྒྲུབ་མཆོད་སྐབས་ཀྱི་འདུ་ཚོགས་རྣམས་ལེགས་པར་ཤོང་བ་དང་། ཆུ་ཐག་ཉེ་ལ་གཉེན་པ་བཅའ་བདེ་བའོ། །ཆོས་རྗེ་བྱམས་པ་དཔལ་གྱི་སྐུ་ཚེའི་སྨད་དུ་དགའ་ལྡན་གྱི་གནས་འདིར་ཞ་ལུ་བའི་སློབ་དཔོན་ཡེ་ཤེས་རྒྱལ་མཚན་དང་བཅས་པའི་དཔོན་སློབ་གསུམ་ལ་ཆོས་ཁྲིད་གནང་བ་སོགས་ཀྱིས་འགྲོ་དོན་དཔག་མེད་བསྐྱངས། མཐར་སྐུ་གཤེགས་ས་ཡང་གནས་འདི་རང་དུ་ཡིན་པ་ཡང་། རྗེ་བྱམས་པ་དཔལ་སྐུ་གཤེགས་སྐབས་སུ་མགོན་པོ་སྐྱབས་ཟེར་བའི་ཕྱུགས་རྫི་ལོ་བཅུ་གསུམ་ལོན་པ་གཅིག་དགའ་ལྡན་གྱི་ནུབ་རི་ལ་ཕྱུགས་འཚོ་བར་ཕྱིན་པས། ཁོའི་སྣང་བ་ལ་དགའ་ལྡན་གྱི་རི་གཟིམ་ཁང་དང་བཅས་པ་ཇེ་མཐོ་ཇེ་མཐོ་ལ་ནམ་མཁའ་ལ་སླེབས་པ་ཙམ་དུ་སོང་བ་དང་། དེ་ནས་ནུབ་ཕྱོགས་ནས་འཇའ་ཚོན་དར་ཐག་བརྐྱངས་པ་འདྲ་བ་གཉིས་ཀྱི་བར་དེར་ཡུག་དཀར་པོ་གཅིག་ཡོད་པ་དེའི་སྟེང་དུ། རྗེ་བྱམས་པ་དཔལ་སེང་གེ་དཀར་མོ་ལ་ཆིབས་ནས་འཁོར་བུད་མེད་རྒྱན་གྱིས་སྤྲས་པ་མང་པོ་དང་ལྷན་དུ་ནུབ་བདེ་བ་ཅན་གྱི་ཞིང་ཁམས་སུ་ཕེབས་པ་དངོས་སུ་མཐོང་། སྐབས་ཤིག་ལ་འཇག་དང་སྤང་རྒྱབ་ཅེས་པའི་སྡེ་པ་ཞིག་དབར་འགལ་ཟླ་མང་དུ་བྱུང་བས། འཇག་ཆེན་གྱིས་སྤང་རྒྱབ་ལ་གཏོང་རྒྱུའི་གཏོར་མ་རི་འདི་ཡིན་ཞེས་གྲགས་ལ། དེ་མིན་ཁུལ་དེའི་ཤོ་བཅུ་གཉིས་ཀྱི་ཤོ་བཤད་དུ་འཇག་པའི་དམར་ཆེན་གཏོར་མ་འདི། །སྤང་རྒྱབ་སྡེ་པའི་དབུ་ལ་ཞུ་ཞེས་ཡོད་པ་སོགས་ཀྱིས་ཀྱང་མཚོན་ཐུབ། དེ་མིན་འཇག་ཆུང་གི་ཉེ་འཁོར་དུ་གཡུང་དྲུང་བྲག་དང་། སྤྱི་ལོ་1340ལོ་ཙམ་དུ་ཆོས་རྗེ་བྱམས་པ་དཔལ་དགེ་བསྙེན་གྱི་སྡོམ་པ་བཞེས་སའི་ཡང་དགོན་སོགས་ཀྱི་དགོན་ཤུལ་འགའ་ཞིག་ཀྱང་མཇལ་རྒྱུ་འདུག
II.5.3.2 Jakchen
།གཉིས། འཇག་ཆེན་དགོན།
འཇག་ཆེན་ནི་ཕྱིས་གྲྭ་སློབ་ཀྱི་ཚོགས་པ་མ་ཤོང་བར་ཤངས་སྟོན་གྱི་སློབ་མ་འཇག་ཆེན་རྒྱལ་མཚན་འབུམ་མམ། ཡང་ཆོས་རྗེ་བྱམས་པ་དཔལ་གང་རུང་གིས་ཕྱག་བཏབ་རྗེས་གཞི་ནས་འཇག་ཆེན་འཇག་ཆུང་ཞེས་གདན་ས་ཆེ་ཆུང་གཉིས་སུ་གྱེས། དེ་ཉིད་འཇག་ཆུང་ལས་གཞི་ཁྱོན་ཆུང་ཞིང་སྒྲུབ་པ་ཉམས་ལེན་གཙོ་བོར་བྱེད་སའི་གནས་ཤིག་ཡིན་པ་ཡང་། ད་ལྟ་འཇག་ཆེན་དུ་སྒྲུབ་ཁང་ཆུང་ངུ་གཉིས་ཀྱི་ཤུལ་དངོས་སུ་མཇལ་རྒྱུ་འདུག །དེ་གཉིས་ལས་སྒྲུབ་ཁང་འོག་མ་དེར་སྒྲུབ་ཁང་ཡིན་པ་ངོས་ཟིན་པ་ཙམ་ལས་སྔར་གྱི་རྩིག་ཤུལ་མཇལ་རྒྱུ་མེད། སྒྲུབ་ཁང་སྟེང་མ་དེ་ནི་སྒོ་ཤར་དུ་བསྟན་ཞིང་། ད་ལྟ་རྒྱ་ཁྱོན་ལ་སྨི་གྲུ་བཞི་མ་བཞི་ཙམ་ཡོད་པའི་སྔར་གྱི་སྒྲུབ་ཁང་དེའི་གྱང་ཤུལ་སྒོ་རྭ་ཆུང་ངུ་དང་བཅས་པ་ཞིག་ཀྱང་མཇལ་རྒྱུ་འདུག །དེ་ཡང་མཁས་བཙུན་རྒྱལ་མཚན་འབུམ་གྱི་རྣམ་ཐར་དུ་འཇག་གི་བྲག་ཁུང་འོག་མར་གཞན་གྱི་ཟས་མི་ཟ་བར་དམ་བཅས་ནས་ལོ་བཅུ་གསུམ་བཞུགས་ནས་སྒྲུབ་པ་མཛད་པའི་དུས་སུ་གཉིད་བག་ཙམ་ཆེས་པ་དང་། སློབ་དཔོན་རྒྱལ་མཚན་འབུམ་ལོངས་ལ་དགེ་སྦྱོར་གྱིས་ཟེར་བ་དང་། གསོལ་འདེབས་ཀྱི་སྒྲ་དི་རི་རི་བ་དང་། འགྲོ་དོན་གྱིས་ཟེར་བའི་དཔའ་བོ་མཁའ་འགྲོའི་ལུང་བསྟན་མང་པོ་ཐོབ་ཅེས་འཁོད་པ་བཞིན་མཁས་བཙུན་ཆེན་པོ་རྒྱལ་མཚན་འབུམ་སྒྲུབ་པར་ཞུགས་ས་དེར་འཇག་གི་བྲག་ཁུང་འོག་མ་ཞེས་གསལ་བས། ཕལ་ཆེར་འཇག་ཆེན་གྱི་སྒྲུབ་ཁང་འོག་མ་དེ་རང་དུ་བཞུགས་པ་མིན་ནམ་སྙམ། གཞན་ཡང་ཆོས་རྗེ་བྱམས་པ་དཔལ་བའི་མཛད་རྣམ་ནང་འཇག་གི་གཟིམས་སྤྱིལ་དུ་ཕྱག་ཆེན་གྱི་སྒྲུབ་པ་མཛད་པ་སོགས་ཀྱང་འཁོད། མ་གཞི་འཇག་ཆེན་རྒྱལ་མཚན་འབུམ་དང་ཆོས་རྗེ་བྱམས་པ་དཔལ་བའི་རྣམ་ཐར་དུ་མཛད་པ་འགའ་ཞིག་གསུངས་པའི་ཚེ་སྐབས་འགར་འཇག་ཅེས་པ་ཁོ་ན་ཐོན་པ་ལས་འཇག་ཆེན་འཇིག་ཆུང་ཞེས་གསལ་བར་འཁོད་མེད་ཀྱང་། འཇག་པ་རྒྱལ་མཚན་འབུམ་དང་ཆོས་རྗེ་བྱམས་པ་དཔལ་བ་སྒོམ་སྒྲུབ་དགེ་སྦྱོར་ལ་བརྩོན་པའི་འཇག་ནི་འཇག་ཆེན་རང་ཡིན་པ་འདྲ་སྟེ། ཁོང་གཉིས་ཀའི་མཚན་གྱི་དབུར་འཇག་ཆེན་ཞེས་འབོད་པ་དེ་ལས་ཀྱང་རྟོགས་ཐུབ། དམངས་གཙོའི་བཅོས་བསྒྱུར་གོང་འཇག་ཆེན་དུ་དགོན་གནས་གཙུག་ལག་ཁང་དང་བཅས་པ་ཆེར་མེད་ཀྱང་སྒྲུབ་པ་ལ་ཞུགས་མཁན་ཐར་ཐོར་ཡོད་ཅེས་ཁུལ་དེའི་བགྲེས་སོང་མྱོང་བ་ཅན་འགའ་ཞིག་གི་ཞལ་ལས་ཐོས་སོ། འཇག་ཆེན་དང་འཇག་ཆུང་གཉིས་ཀྱི་དགོན་གནས་ཐོར་ཞིག་ཏུ་སོང་རྗེས་རྟེན་རྙིང་ལྷག་མ་འགའ་ཞིག་ཤངས་དགའ་ལྡན་ཆོས་འཁོར་དགོན་དང་། འགའ་ཞིག་ཞོང་ཞོང་དགོན་དུ་བཞུགས། སྐུ་རྙིང་རྣམས་སྤྱིར་བལ་ལུགས་ཡིན།
II.5.3.3 Samding
གསུམ། པ་སྣམ་བསམ་སྡིངས་དགོན།
དགོན་འདི་ནི་ཐོག་མར་ཤངས་པ་བཀའ་བརྒྱུད་ཀྱི་མཁས་གྲུབ་རྣམ་གསུམ་གྱི་ཡ་གྱལ་བསམ་སྡིངས་པ་གཞོན་ནུ་གྲུབ་ཀྱིས་སྤྱི་ལོའི་དུས་རབས་བཅུ་གསུམ་པའི་སྨད་དང་བཅུ་བཞི་པའི་སྟོད་ཙམ་དུ་ཕྱག་བཏབ་ཅིང་། ཤངས་པ་བཀའ་བརྒྱུད་འཇག་བསམ་གྱི་བརྒྱུད་པ་གཉིས་སུ་གྱེས་པ་ལས། བསམ་སྡིངས་བརྒྱུད་པའི་གདན་ས་གཙོ་བོ་ཡིན།
སྤྱིར་བསམ་སྡིངས་ཞེས་པའི་མཚན་ཐོགས་པ་དབུས་གཙང་ཁུལ་དུ་དགོན་གནས་ཁག་གཉིས་ཡོད་དེ། གཅིག་ནི་ཡར་འབྲོག་བསམ་སྡིངས་དགོན་དང་། གཅིག་ཤོས་ནི་མྱང་སྨད་བསམ་སྡིངས་དགོན་ཡིན། ད་ལྟའི་ཆར་བོད་དུ་ཕེབས་མ་མྱོང་བའི་བོད་རིག་པ་མཁས་ཅན་དུ་འབོད་པ་རེ་ཟུང་གིས་ཡར་འབྲོག་བསམ་སྡིངས་དགོན་ཅུང་ཟད་གྲགས་ཆེ་བ་སོགས་ཀྱིས་རྒྱུ་རྐྱེན་འགའ་ཤས་ལ་དམིགས་ནས། བསམ་སྡིངས་ཞེས་པའི་མཚན་ཐོས་པ་ཙམ་གྱིས་མཁས་བཙུན་གཞོན་ནུ་གྲུབ་ཀྱིས་ཕྱག་བཏབ་པའི་བསམ་སྡིངས་ཡིན་པ་ཐག་བཅད་པ་མ་ཟད། ལོང་བས་ལྷ་ཁང་ལ་བལྟས་པ་བཞིན་དུ་རང་ཉིད་ཀྱིས་བདེན་དཔང་ཅི་ཡང་མ་མཐོང་བར་ད་དུང་དཔེ་དེབ་དང་དྲ་རྒྱ་ སོགས་སུ་ཤངས་པ་བཀའ་བརྒྱུད་ཀྱི་དགོན་སྡེ་ཡར་འབྲོག་བསམ་སྡིངས་དགོན་ཞེས་བཤད་ཅིང་། ཐ་ན་ཚིག་ཐག་ཆོད་པོས་བསམ་སྡིངས་རྡོ་རྗེ་ཕག་མོའི་སྐུ་ཕྲེང་ན་རིམ་ལ་ཤངས་པ་བཀའ་བརྒྱུད་ཀྱི་བུད་མེད་སྤྲུལ་སྐུ་ཞེས་གང་དྲན་གྱིས་འཆད་པ་སོགས་མ་རྟོགས་ལོག་རྟོག་གི་དྲི་མས་བསླད་པ་ཅི་རིགས་བཀོད་འདུག །འོན་ཀྱང་ཡར་འབྲོག་བསམ་སྡིངས་དགོན་ནི། ཐོག་མར་བོད་ཀྱི་བཙན་པོའི་གདུང་རྒྱུད་སྐྱིད་སྡེ་ཉི་མ་མགོན་གྱི་མི་རྒྱུད་ཡིན་པར་གྲགས་པའི་རྡོ་རྗེ་ཕག་མོ་སྐུ་ཕྲེང་དང་པོ་ཆོས་ཀྱི་སྒྲོན་མེས་མཁའ་འགྲོ་སེང་གདོང་མའི་ལུང་བསྟན་དང་འབྲོག་ཁྲི་དཔོན་ནམ་མཁའ་རྒྱལ་མཚན་གྱི་མཐུན་རྐྱེན་འོག །སྤྱི་ལོ1440་ལོར་གྲྭ་དྲུག་བླ་བདུན་ཏེ་བླ་མ་གཅིག་དང་གྲྭ་པ་དྲུག་ལས་གྲུབ་པའི་སྒྲུབ་སྡེ་ཆུང་ངུ་ཞིག་ཕྱག་བཏབ་པ་ནས་བཟུང་། དགོན་གནས་དེ་རྡོ་རྗེ་ཕག་མོ་སྐུ་ཕྲེང་ན་རིམ་གྱིས་འཛིན་སྐྱོང་མཛད། དེར་བརྟེན་གཙང་ཐོབ་རྒྱལ་གྱི་གཞས་ཆེན་རྒྱ་ནག་གཞོང་གཞོང་གི་གཞས་ཞེས་པར་ཡར་འབྲོག་གཞོང་གཞོང་གཡུ་གདན་གྲུ་བཞི་འདྲ་ཞེས་དང་། གཡུ་གཞོང་འདི་འདྲའི་སྟེང་ཡ། རྡོ་རྗེ་ཕག་མོ་ཕེབས་བྱུང་། དགའ་བ་ལ་དང་ཉམས་ལ་ཞེས་པ་སོགས་ཀྱི་གཏོང་སྲོལ་བྱུང་བ་ཡིན། རྡོ་རྗེ་ཕག་མོ་སྐུ་ཕྲེང་དང་པོ་ཆོས་ཀྱི་སྒྲོན་མེ་དེ་ཉིད་བོ་དོང་ཕྱོགས་ལས་རྣམ་རྒྱལ་གྱི་སློབ་མ་ཡིན་པས། ད་ལྟ་འཚོ་བཞུགས་བདེ་ཆེན་ཆོས་ཀྱི་སྒྲོན་མེ་བར་ཁྱོན་རྡོ་རྗེ་ཕག་མོ་སྐུ་ཕྲེང་བཅུ་གཉིས་བྱོན་པ་རྣམས་ནི་བོ་དོང་གི་རིང་ལུགས་འཛིན་པ་ཉག་གཅིག་ཡིན་ལ། དེང་ཡར་འབྲོག་ཁུལ་དུ་བོ་དོང་ལུགས་འཛིན་པའི་དགོན་སྡེ་ཆེ་གྲས་ཤིག་ཀྱང་ཡིན། གཞན་ཡང་བསམ་སྡིངས་དགོན་གྱི་ལོ་རྒྱུས་ཤིག་ཏུ་བཀའ་གདམས། ས་སྐྱ། ཞི་བྱེད། ཤངས་པ་ལ་སོགས་པའི་སྙིང་པོ་གཅིག་ཏུ་བསྡུས་པ་བོ་དོང་བཀའ་བརྒྱུད་ཅེས་པ་དེ་བྱུང་ཞེས་འཁོད་པ་ལྟར་བོ་དོང་གི་ལུགས་འདིར་ཆོས་བརྒྱུད་འགའ་ཤས་ཀྱི་གདམས་པ་མཉམ་བསྲེས་བྱུང་བ་མཚོན་ལ། རྡོ་རྗེ་ཕག་མོ་སྐུ་ཕྲེང་དགུ་པ་ནས་རྙིང་མའི་དཀོན་སྤྱི་དང་། སྐུ་ཕྲེང་བཅུ་པ་ཐུགས་སྒྲུབ་བར་ཆད་ཀུན་སེལ་གྱི་ཆོས་བདག་ཏུ་ལུང་གིས་ཟིན་པས་རྙིང་མའི་ཕྱག་ལེན་ཡང་མཛད་མྱོང་། གང་ལྟར་ནའང་གནས་འདི་ཕྱག་བཏབ་པ་ནས་ད་བར་ཤངས་པ་བཀའ་བརྒྱུད་ཀྱི་རིང་ལུགས་གཙང་མ་འཛིན་པའི་ལོ་རྒྱུས་མི་གསལ། མི་ལ་ལས་རྡོ་རྗེ་ཕག་མོ་སྐུ་ཕྲེང་དང་པོས་གྲུབ་ཆེན་ཐང་སྟོང་རྒྱལ་པོ་བླ་མར་བསྟེན་པ་ཙམ་རྒྱུ་མཚན་དུ་བྱས་ནས་གནས་དེ་ཉིད་ཤངས་པ་བཀའ་བརྒྱུད་ཀྱི་རིང་ལུགས་འཛིན་པར་བཤད། དེ་ནི་མི་སྲིད་དེ། གལ་ཏེ་བླ་མ་བསྟེན་ཚད་ཀྱི་ལུགས་འཛིན་དགོས་ན་མཁས་བཙུན་གཞོན་ནུ་གྲུབ་ཀྱིས་དྭགས་པོ་བཀའ་བརྒྱུད་དང་། ས་སྐྱ། ཞི་བྱེད་པ་སོགས་ཀྱི་བླ་མ་མང་དག་ཅིག་བསྟེན་ཡོད་པས་ཁོང་ཡང་ཤངས་པ་བཀའ་བརྒྱུད་ལོགས་སུ་མི་འཛིན་པར་དེ་དག་ཚང་མའི་ལུགས་འཛིན་པ་དགོས་པ་མི་སྲིད་པའི་ཕྱིར་རོ། །དེས་ན་ཤངས་པ་བཀའ་བརྒྱུད་ཀྱི་མ་དགོན་རྣམ་གླིང་གཞོང་གཞོང་དགོན་པ་ཞེས་པའི་རྩོམ་ཡིག་ནང་ད་ལྟའི་བར་རྒྱུན་མི་ཆད་པར་གནས་པ་ཡར་འབྲོག་བསམ་ལྡིང་དགོན་ཞེས་ཤངས་པའི་དགོན་གནས་རང་སོར་གནས་ཞེས་འཁོད་པ་ལྟར་ཐོག་མར་ཤངས་པ་བཀའ་བརྒྱུད་ཀྱི་དགོན་སྡེ་མ་ཡིན་པར་ཕྱིས་ཤངས་པ་རང་སོར་གནས་པའང་ཡོང་མི་སྲིད་པས། དེ་དང་དེ་འདྲ་བ་རྣམས་ནི་ལོ་རྒྱུས་ཀྱི་དོན་དངོས་དང་ཡོངས་སུ་འགལ་བའི་བླུན་གཏམ་ཙམ་དུ་ཟད།
འོ་ན་མཁས་བཙུན་གཞོན་ནུ་གྲུབ་ཀྱིས་ཕྱག་བཏབ་པའི་བསམ་སྡིངས་དགོན་དེ་ཡང་སྙིང་གང་དུ་གནས་ཤེ་ན། ཐུའུ་བཀྭན་གྲུབ་མཐའ་དང་ས་སྐྱའི་ལམ་འབྲས་བླ་བརྒྱུད་སོགས་ཀྱི་ཆོས་འབྱུང་ལོ་རྒྱུས་འགའ་ཞིག་ལ་བསམ་སྡིངས་ཞེས་པ་ཙམ་ལས་དེའི་གོང་དུ་ས་ཆའི་ཁྱབ་ཁོངས་གང་ཡང་འཁོད་མེད་པས་ངོས་འཛིན་དཀའ་ཡང་། བོད་ཀྱི་ལོ་རྒྱུས་སྨྲ་བའི་བདག་ཉིད་ཆེན་པོ་འགོས་ལོ་གཞོན་ནུ་དཔལ་གྱིས་དེབ་སྔོན་དུ་མཁས་བཙུན་གཞོན་ནུ་གྲུབ་ཀྱིས་ཕྱིས་མྱང་སྨད་དུ་བསམ་སྡིངས་བཏབ་ཅེས་འཁོད་པའི་ལུང་ཡིག་འདིར་མྱང་སྨད་ཅེས་པའི་ཡིག་འབྲུ་གཉིས་གསལ་བར་འཁོད་ཡོད། དེ་ལྟར་གཙང་ལ་མྱང་སྟོད་མྱང་སྨད་གཉིས་ཡོད་པ་ལས། དེ་གཉིས་ཀྱི་དབྱེ་མཚམས་ནི་ཀུ་རེ་ལུང་པ་ ཡིན་པ་པཎ་ཆེན་བསྟན་པའི་ཉི་མའི་རྣམ་ཐར་འཛམ་གླིང་མཛེས་རྒྱན་དུ་གསལ་ཞིང་། མྱང་སྟོད་ནི་ཀུ་རེ་ལུང་པ་ཡན་ཏེ་སྤྱིར་རྒྱལ་རྩེ་ཡན་གྱི་མྱང་ཆུ་རྒྱུག་ཁུལ་དུ་ཡིན་པ་དང་། མྱང་སྨད་ནི་ཀུ་རེ་ལུང་པ་མན་ཏེ་དེང་རྒྱལ་རྩེ་མན་དུ་ཡོད་པའི་པ་སྣམ་རྫོང་དང་གཞིས་རྩེ་གྲོང་ཁྱེར་གྱི་ཁུལ་དུ་ཡིན། གོང་དུ་མཁས་བཙུན་གཞོན་ནུ་གྲུབ་ཀྱི་རྣམ་ཐར་བརྗོད་སྐབས་ཁོང་གི་འཁྲུངས་ཡུལ་ནི་དེང་གཞིས་རྩེ་གྲོང་ཁྱེར་དུ་ཡིན་པ་བཤད་ཟིན་པ་དང་། དགོན་གནས་ཀྱང་མྱང་སྨད་དུ་གནས་པར་གཞིགས་ན་ཁོང་གི་འཁྲུངས་ཡུལ་དང་ཐག་མི་རིང་བའི་ས་ཆ་གང་རུང་ལ་ཡོད་དགོས། ད་ལྟའི་ཆར་གཞིས་ཀ་རྩེ་གྲོང་ཁྱེར་གྱི་ཉེ་འཁོར་དུ་བསམ་སྡིངས་ཞེས་པའི་དགོན་གནས་མེད་ཀྱང་། དགའ་ལྡན་ཆོས་འབྱུང་དུ་ཡང་པ་སྣམ་ཁུལ་བསམ་སྡིངས་དགོན་ནི། གཞོན་ནུ་གྲུབ་པས་བཏབ་ཅེས་གསལ་བར་འཁོད་པ་ལྟར་ན་མཁས་བཙུན་གཞོན་ནུ་གྲུབ་ཀྱིས་ཕྱག་བཏབ་པའི་བསམ་སྡིངས་དགོན་ནི་པ་སྣམ་ཁུལ་དུ་ཡོད་པ་ཐེ་ཚོམ་མེད། ཡང་བོད་ཀྱི་དགོན་སྡེ་ཁག་གཅིག་གི་ངོ་སྤྲོད་མདོར་བསྡུས་སུ་བསམ་སྡིངས་དགོན་ནི་པ་སྣམ་རྫོང་མག་ཤང་ཁོངས་བསམ་སྡིངས་གྲོང་ཚོར་ཡོད་ཅེས་གསལ་བར་གསུངས་ཀྱང་། ད་ལྟ་པ་སྣམ་རྫོང་མག་ཡུལ་ཤོག་ཁོངས་སུ་བསམ་སྡིངས་གྲོང་ཚོ་དང་བསམ་སྡིངས་དགོན་པ་ཞེས་པ་མཐོང་རྒྱུ་མི་འདུག །དེང་པ་སྣམ་རྫོང་ཆུ་ནུབ་ཡུལ་ཤོག་བསམ་གླིང་གྲོང་ཚོའི་ལྟག་ཏུ་བསམ་གླིང་རིན་པོ་ཆེ་སྐུ་ཕྲེང་དྲུག་གི་གདན་ས་འབྲུག་བདེ་ཆེན་ཆོས་འཁོར་གྱི་དགོན་ལག་བསམ་གླིང་དགོན་ཞེས་དགེ་འདུན་གཅིག་ལས་མེད་པ་ཞིག་འདུག །དགོན་འདིའི་མཚན་བསམ་སྡིངས་ཞེས་པ་དང་འདྲ་ཡང་། དེ་ནི་འབྲུག་པ་བཀའ་བརྒྱུད་ཀྱི་རིང་ལུགས་འཛིན་པ་ཞིག་ཡིན། དེ་མིན་མག་ཡུལ་ཤོག་ཁོངས་སུ་བསམ་སྡིངས་དང་སྒྲ་འདྲ་བའི་བསམ་དོན་གྲོང་ཚོ་ཞེས་པ་ཞིག་འདུག་ཀྱང་། ལུང་པ་འདིའི་ཤར་ངོས་ཀྱི་ཕུར་བྱ་བཏང་ཞེས་པ་དང་། ནུབ་ཏུ་རྡོ་རྗེ་བཀོད་པ་ཞེས་པ་སོགས་ཀྱི་དགོན་ཤུལ་ལས་བསམ་སྡིངས་ཞེས་འབོད་པའི་དགོན་ཤུལ་ཅི་ཡང་མཇལ་རྒྱུ་མེད། དེར་བརྟེན་དགོན་འདི་ནི་མྱད་སྨད་པ་སྣམ་ཁུལ་དུ་གནས་པ་འགོས་ལོ་གཞོན་ནུ་དཔལ་དང་སྡེ་སྲིད་སངས་རྒྱས་མཚོའི་གསུང་དེ་གཉིས་ལ་ཁུངས་བཅོལ་ཏེ། ཁོ་བོས་འཚོལ་ཞིབ་ནན་ཏན་བྱས་པར་གཞིགས་ན་དེང་པ་སྣམ་རྫོང་དགའ་གདོང་གྲོང་བརྡལ་ལྷ་ཡུལ་ཚོན་ཁྲིས་གྲོང་ཚོ་ནས་སྤྱི་ལེ་བཞི་ཙམ་ཡོད་པའི་བྱང་ངོས་རི་ལྡེབས་ཏེ་ཇོ་མོ་ལྷ་རི་ཆས་པའི་མགུལ། བསམ་གཏན་སྒོམ་པའི་གནས་དང་མཐུན་པའི་དབེན་པར་པ་སྣམ་བསམ་སྡིངས་དགོན་གྱི་དགོན་ཤུལ་བསྙོན་མེད་དེ་མཇལ་རྒྱུ་འདུག །དགོན་ཤུལ་འདིར་སྔར་གྱི་འདུ་ཁང་གི་ཕྱི་རྩིག་དང་། བྱང་ཕྱོགས་སུ་ཁ་བསྟན་པའི་འདུ་ཁང་གི་སྒོ། འདུ་ཁང་དང་ཉེ་བའི་ལྷོ་ངོས་ཀྱི་རི་རྩེ་ར་སྔར་གྱི་བླ་བྲང་རེད་ཟེར་བའི་རྩིག་ཤུལ། དེ་མིན་འདུ་ཁང་དང་བླ་བྲང་གི་ཉེ་འཁོར་གང་སར་རྒྱ་ཆེ་ཆུང་སྣ་ཚོགས་ཀྱི་རྩིག་ཤུལ་གསལ་བར་མཇལ་རྒྱུ་འདུག་པར་དཔགས་ན། སྔར་གྱི་དུས་སྐབས་ཤིག་ལ་གཞི་ཁྱོན་ཅུང་ཟད་ཆེ་བའི་དགོན་གནས་ཤིག་ཡིན་མཚོན་ཐུབ། ད་ལྟའི་དགོན་ཤུལ་དེ་དག་ནི་སྤྱི་ལོ1959ལོར་རྩ་གཏོར་དུ་སོང་བའི་ལྷག་རོ་ཡིན།
བསམ་སྡིངས་དགོན་འདི་ཉིད་དུ་སྔར་མཁས་གྲུབ་ཁྱུང་པོ་ཡང་བཞུགས་མྱོང་བ་འདྲ་སྟེ། ཁུལ་དེའི་ལོ་རྒྱུས་ཀྱི་མྱོང་བ་ལྡན་པའི་བགྲེས་སོང་འགས་གསུངས་པར་གཞིགས་ན། མཁས་གྲུབ་ཁྱུང་པོ་སྔར་གནས་དེར་ཡེ་ཤེས་མགོན་པོའི་སྒྲུབ་པ་ལ་ཞུགས་སྐབས་གང་དེའི་ཞལ་གཟིགས་ཐོབ་སྟེ། ཁོང་རང་ཉིད་ལ་ཡེ་ཤེས་མགོན་པོ་འཐིམ་པའི་གསུངས་སྲོལ་འདུག་ལ། དེ་མིན་དགོན་འདིར་སྔར་ཡེ་ཤེས་མགོན་པོའི་སྐུ་རྟེན་དང་མཁས་གྲུབ་ཁྱུང་པོའི་ཕྱག་གིས་བཟོས་པའི་རྫ་དུང་སོགས་བཞུགས་ཡོད་པ་ཕྱིས་གཏོར་སྐྱོན་ཕོག་པ་སོགས་ལས་རྟོགས་ནུས། བསམ་སྡིངས་དགོན་འདི་ཕྱིས་བསྟན་པ་སྔ་དར་གྱི་དགོན་གནས་ཁྱད་པར་ཅན་པ་ཚབ་ཚུལ་ཁྲིམས་རྒྱལ་པོའི་ཆོས་འཆད་སའི་དགོན་གནས་དགའ་སྡོང་ངམ་མཚན་སྒྲོག་དགའ་ལྡན་དར་རྒྱས་གླིང་ གི་བུ་དགོན་ལྟ་བུར་གྱུར་པ་ཡང་། དགའ་ལྡན་ཆོས་འབྱུང་ལས་ཕྱིས་མཚན་སྒྲོག་པ་དང་གཅིག་བསྲེས་ལྟ་བུར་གྱུར་བས་བླ་རབས། འདོན་མཆོད། གྲྭ་རྒྱུན་སོགས་གང་ཅི་མཚུངས་ཞེས་གསལ་བ་ལྟར་དགའ་གདོང་དགོན་དགེ་ལུགས་སུ་བསྒྱུར་རྗེས་དགོན་འདི་ཡང་རི་བོ་དགེ་ལུགས་པའི་ཕྱག་བཞེས་མཛད་པས་གྲྭ་རྒྱུན་དང་འདོན་མཆོད་སོགས་གཅིག་མཚུངས་ཡིན་པས་དམངས་གཙོའི་བཅོས་བསྒྱུར་གོང་མཚན་སྒྲོག་ནས་དགོན་འདིར་གནས་འཛིན་པ་དགེ་སློང་བཞི་གྲུ་གཅིག་གཏོང་སྲོལ་ཡོད། དགའ་སྡོང་མཚན་སྒྲོག་དགོན་གྱི་བྱམས་ཁང་དུ་མཁས་གྲུབ་ཁྱུང་པོའི་རྡོ་སྐུ་ཞིག་ཀྱང་བཞུགས་པ་འབྲེལ་ཡོད་ཀྱི་དཔྱད་གཞི་འགར་གསལ་བར་འཁོད་ཀྱང་དེང་མ་རྙེད་ཟེར་བས་ཁོ་བོས་ཀྱང་མ་མཇལ། དེང་མཚན་སྒྲོག་དགོན་དུ་ལོ་ལྟར་བོད་ཟླ་བདུན་པའི་ཚེས་ཉེར་དགུ་ཉིན་ཡེ་ཤེས་མགོན་པོའི་(ཁུལ་དེའི་ཁ་རྒྱུན་དུ་ཐུགས་སྤྲུལ་ཞེས་ཟེར་)གར་འཆམ་དང་བཅས་པ་འཁྲབ་སྲོལ་ཡོད་པའི་ནང་། དངོས་གཞིའི་གོ་རིམ་དང་པོར་འདུ་ཁང་དུ་གསེར་སྐྱེམས་སྔོན་དུ་བཏང་ནས་ཡེ་ཤེས་མགོན་པོ་སྤྱན་འདྲེན་དང་ཀྵེ་ཏྲ་པ་ལ་སོགས་འཁོར་རྣམ་བཞིའི་འཆམ་རྔམ་ཟིལ་ཆེ་བ་ཞིག་དང་། གཉིས་པར་རྡོ་གཅལ་དུ་རྡོར་སློབ་ཀྱི་སྐུ་འཆམ། གསུམ་པར་ཇོ་མོ་གཙོ་འཁོར་གསུམ། བཞི་པར་ཞིང་སྐྱོང་བཞི། ལྔ་པར་ཆོས་རྒྱལ་ཡབ་ཡུམ་དང་འཁོར་གཤིན་རྗེ་ཕོ་མོ་བརྒྱད། དྲུག་པར་མགོན་པོ་ཡབ་ཡུམ། བདུན་པར་སླར་ཡང་ཡེ་ཤེས་མགོན་པོ་འཁོར་བཅས་ནས་ལིངྒ་བསྒྲལ་ཆོག །བརྒྱད་པར་གཏོར་རྒྱག །སྲུང་འཁོར། མངའ་གསོལ། བཀྲ་ཤིས་བཅས་སོ། གར་འཆམ་འདིར་སྤྱོད་པའི་ཡེ་ཤེས་མགོན་པོའི་ཞལ་འབག་དེ་ཡང་མཁས་གྲུབ་ཁྱུང་པོའི་ཕྱག་བཟོ་ཡིན་པར་གྲགས། སྔར་པ་སྣམ་རྫོང་གི་ལོ་མཇུག་སྐུ་རིམ་ཆེན་མོའི་སྐབས་མཚན་སྒྲོག་དགོན་གྱི་གར་འཆམ་འདི་འཁྲབ་པ་དང་སྒྲོལ་མ་གཡུལ་མདོས་སོགས་གཏོང་སྲོལ་ཡོད། དེའི་སྐབས་ཤིག་ཐུགས་སྤྲུལ་(ཡེ་ཤེས་མགོན་པོ་)དེ་པ་སྣམ་རྫོང་ནས་ཤོར་ཏེ་བསམ་སྡིངས་སུ་ཕེབས། བསམ་སྡིངས་ཀྱི་མདར་རྨོ་བོ་ཞིག་ལ། ཁྱེད་ཀྱིས་ང་གར་སོང་མ་བཤད་ན། འབྲུ་ཕུང་ཞིག་སྟེར་ཆོག་ཅེས་གསུངས་ཀྱང་། རྨོ་བོ་དེས་གཞན་ལ་བཤད་པས་བྱ་རོག་གཅིག་གིས་རྨོ་བོ་དེའི་མཛུབ་མོ་བྲེགས། ཡེ་ཤེས་མགོན་པོ་དེས་ཁྲིས་གྲོང་ཚོའི་གཤམ་དུ་ཞབས་རྗེས་(དེང་རྡོ་ཕ་བོང་ཞིག་གི་སྟེང་དུ་གསལ་བར་མཇལ་རྒྱུ་འདུག་)ཤིག་བཞག་ནས་བསམ་སྡིངས་མགོན་ཁང་དུ་ཕེབས་པའི་སྐོར་གྱི་ཤོད་སྲོལ་ཡང་འདུག །དེར་བརྟེན་མཁས་བཙུན་གཞོན་ནུ་གྲུབ་ཀྱི་གདན་ས་བསམ་སྡིངས་དགོན་ནི་ཡར་འབྲོག་བསམ་སྡིངས་དགོན་མིན་པར་པ་སྣམ་བསམ་སྡིངས་འདི་ཉིད་རེད་ཅེས་ཁ་ཚོན་གཅོད་ཆོག
།མཁས་བཙུན་གཞོན་ནུ་གྲུབ་ཀྱིས་དགོན་འདིར་མཛད་པ་ཇི་ལྟར་བསྐྱངས་པའི་སྐོར་ཡང་། དེབ་སྔོན་དུ་ཕྱིས་མྱང་སྨད་དུ་བསམ་སྡིངས་བཏབ་ནས་ལམ་འབྲས། ཕྱག་ཆེན། ནི་གུ་རྣམས་ཆོས་ཀྱི་གཙོ་བོར་མཛད་ནས་གདུལ་བྱ་མང་པོ་ལ་ཁྲིད་བསྐྱངས་ཞེས་དང་། མཁས་གྲུབ་ཆོས་རྗེའི་སྐུ་མཐའ་མའི་རྣམ་ཐར་དུ་ཆོས་དྲུག །ཕྱག་ཆེན་གའུ་མ། སེམས་འཆི་མེད་ཡི་གེ་བཞི་པའི་ཁྲིད་རྣམས་གང་འོས་སུ་གནང་ཞེས་གསལ་བ་ལྟར་ཁོང་གིས་སྐུ་ཚེའི་སྨད་ཙམ་དུ་པ་སྣམ་བསམ་སྡིངས་དགོན་བཏབ་ནས་བོད་སོག་གི་བུ་སློབ་མང་པོར་ས་སྐྱ་པའི་ལམ་འབྲས་དང་། གཅོད་བཀའ་བརྒྱུད་གསུངས་པ་དང་། ལྷག་པར་དུ་ནི་གུ་ཆོས་དྲུག་དང་ཕྱག་ཆེན་གའུ་མ། སེམས་འཆི་མེད་ཀྱི་ཁྲིད་སོགས་ཤངས་པའི་ཆོས་སྐོར་གྱི་འཆད་ཁྲིད་གཙོ་བོར་མཛད། དེ་རྗེས་ཁོང་གི་སྙན་གྲགས་ཕྱོགས་བཞིར་རིམ་གྱིས་ཁྱབ་ནས་བོད་སོག་གྲྭ་སློབ་ཀྱི་ཚོགས་པ་མང་དུ་འདུས། ཁོང་བསམ་སྡིངས་སུ་བཞུགས་རིང་སྦྱིན་བདག་གཙོ་བོ་ཞ་ལུ་སྐུ་ཞང་པས་མཛད་སྟབས་མཁས་བཙུན་འདི་ཉིད་སྐུ་མ་གཤེགས་ཙམ་གྱི་གོང་དུ་ཡང་སྤྱིར་བུ་སློབ་ཐམས་ཅད་དང་། ཁྱད་པར་དུ་ཞ་ལུ་བ་ཡབ་ཡུམ་གྱི་སྔ་ཕྱི་བར་གསུམ་ཐ་མ་རྗེས་དང་བཞིར་སྐྱོ་ངལ་མེད་པའི་མོས་གུས་བྱས་ཞེས་གསུངས་པ་ཡིན། མཁས་བཙུན་འདི་ཉིད་རབ་བྱུང་ལྔ་པའི་ས་མོ་ལུག་སྟེ་སྤྱི་ལོ་1319ལོའི་དབྱར་ཟླ་ར་བའི་བོད་ཚེས་ཉེར་དགུའི་སྐར་མ་རྒྱལ་སྨད་ལ་བབ་པའི་ཉི་མ་རི་མཐོའི་རྩེ་ལ་ཤར་བའི་ཚེ་དགོན་འདི་ཉིད་དུ་དགོངས་པ་ཆོས་དབྱིངས་སུ་གཤེགས། སྐུ་འདའ་ཁར་ཕུང་པོ་འདི་སྦྱོང་ལ་རུས་པ་ཉང་ཆུ་དང་གཙང་པོ་ལ་ཐོང་། ཕྱི་རྟེན་དང་ནང་རྟེན་མི་དགོས་ཞེས་གསུངས་པའི་ཞལ་ཆེམས་བཞིན་བུ་སློབ་རྣམས་ཀྱིས་ཀྱང་དེ་ལྟར་དུ་མཛད། མཁས་བཙུན་གཞོན་ནུ་གྲུབ་ཀྱི་གདན་ས་པ་སྣམ་བསམ་སྡིངས་དགོན་འདི་ཉིད་ནི། ཐོག་མར་དྲན་མཆོག་དོན་ཡོད་རྒྱལ་མཚན་སོགས་བཀའ་གདམས་པ་དང་། འཁྲུལ་ཞིག་ཚུལ་ཁྲིམས་རྒྱལ་མཚན་སོགས་ཞ་ལུ་པ། ཁྱུང་པོ་རྣལ་འབྱོར་སོགས་ཤངས་ལུགས། རྗེ་བཙུན་གྲོལ་མཆོག་སོགས་ཇོ་ནང་པ་སྟེ་གྲུབ་མཐའ་རིས་སུ་མ་ཆད་པ་དུ་མས་བསྐྱངས་པར་གྲགས་ཞེས་འཁོད་པ་ལྟར་དགོན་འདི་ཉིད་བཀའ་གདམས་པ་དང་། ཞ་ལུ་པ། ཤངས་ལུགས། ཇོ་ནང་པ་བཅས་དང༌། ཕྱིས་དགེ་ལུགས་སུ་བསྒྱུར་བ་སོགས་སྔ་ཕྱི་ཁྱོན་དུ་ཆོས་བརྒྱུད་མི་འདྲ་བ་ལྔས་འཛིན་པ་ཡིན། གོང་གི་ལུང་ཡིག་འདིར་ཡང་མཁས་གྲུབ་ཁྱུང་པོ་རྣལ་འབྱོར་སོགས་ཤངས་ལུགས་ཞེས་འཁོད་པ་ལྟར་ན་མཁས་གྲུབ་ཁྱུང་པོ་རྣལ་འབྱོར་གནས་འདིར་ཕེབས་པའི་དོན་དུ་གོ་བ་འདྲ་སྟེ། ཆོས་བརྒྱུད་གཞན་དེ་དག་ལ་སྲོལ་གཏོད་མཁན་གྱི་མཚན་མིན་པར་དགོན་གནས་སྐྱོང་མཁན་གྱི་མཚན་བརྗོད་པས་སོ། དེ་ལྟར་དགོན་གཅིག་རང་དུ་སྔ་རྗེས་སུ་ཆོས་བརྒྱུད་མི་འདྲ་བ་མང་པོ་བྱུང་བ་དེས་བོད་དར་ནང་བསྟན་གྱི་ཆོས་བརྒྱུད་རྣམས་ཕན་ཚུན་དབར་ཤུགས་རྐྱེན་ཅི་རིགས་ཐེབས་པའི་ལོ་རྒྱུས་ཀྱི་དོན་དངོས་ཀྱང་མཚོན་ནུས། དགོན་འདིའི་ཕྱིས་ཀྱི་གདན་རབས་རིམ་པར་གསལ་བའི་དཔྱད་གཞི་མ་རྙེད་ཀྱང་། རྒྱལ་རྩེ་དཔལ་འཁོར་ཆོས་སྡེའི་ནང་རྟེན་ནང་ཆེན་རབ་འབྱོར་བཟང་པོའི་ཐུགས་དམ་དུ་བཞེངས་པ་དེའི་རབ་ཏུ་གནས་པ་བསམ་སྡིངས་རིན་པོ་ཆེ་ཆོས་དཔལ་བཟང་པོས་མཛད་པ་དང་། ཡང་ཕ་རྒོད་ཀུན་དགའ་བཟང་པོས་སྤྲུལ་སྐུ་བསམ་སྡིངས་པ་བསོད་ནམས་བློ་གྲོས་ལས་ཤངས་པ་བཀའ་བརྒྱུད་ཀྱི་གདམས་པ་གསན་པ་སོགས་ཀྱི་ཐོག་ནས་བླ་མ་ཆོས་དཔལ་བཟང་པོ་དང༌། བསམ་སྡིངས་པ་བསོད་ནམས་བློ་གྲོས་ལ་སོགས་པའི་བླ་མ་རྣམས་ཀྱིས་བར་སྐབས་ཤིག་རིང་བསམ་སྡིངས་ཀྱི་དགོན་གནས་འདི་བསྐྱངས་ནས་བསམ་སྡིངས་བརྒྱུད་པའི་ཆོས་རྒྱུན་གང་ལེགས་སྤེལ་བ་མཚོན། དགོན་འདིར་ས་སྟག་སྤྱི་ལོ1698་ལོར་དགེ་འདུན་ཞལ་གྲངས་ལྔ་བཅུ་ང་བཞི་སྐོར་ཡོད།

II.5.4 -
བཞི་པ། ཤངས་ཆོས་འཛིན་པ་གཞན་གྱིས་བཏབ་པའི་དགོན་གནས།
དེ་ཡང་ཤངས་པ་རིན་ཆེན་བདུན་བརྒྱུད་སྔ་ཕྱི་གཉིས་ཕུད། ཤངས་ཆོས་ཀྱི་བརྒྱུད་པ་འཛིན་པའི་བླ་མ་གཞན་འགའ་ཞིག་གིས་ཀྱང་དགོན་གནས་མང་དུ་བཏབ་སྟེ་གསེར་ཆོས་ལྔ་ལ་སོགས་པའི་ཤངས་པའི་ཆོས་སྐོར་ཉམས་བཞེས་དང་དར་སྤེལ་གང་ལེགས་མཛད་པ་སྟེ།
II.5.4.1 Tanak Dorjé Den
གཅིག །ས་རྡོ་རྗེ་གདན།
དགོན་འདི་ནི་རྒྱལ་དབང་དགེ་འདུན་རྒྱ་མཚོའི་འཁྲུངས་ཡུལ་འཇད་རྟ་ནག་རིན་ཆེན་རྩེ་ཡུལ་ཤོག་ས་(འགར་བསྲེགས་ཞེས་འཁོད་)གྲོང་ཚོའི་རི་ལྡེབས་ཤིག་ཏུ་གནས་ཤིང་། ཕྱོགས་བཞིའི་བཀོད་པ་ཡང་རྡོ་རྗེ་གདན་གྱི་གནས་བསྟོད་ལས་རྒྱབ་རི་ལྷར་བཅས་འདྲེན་པ་ཤཱཀྱའི་ཏོག །མཆོག་ཟུང་དབུས་ན་དམ་ཆོས་སྟོན་པ་བཞིན། །ཤར་དང་མདུན་ཕྱོགས་རྒྱལ་སྲིད་གསེར་རི་དང༌། །ཡིད་འོང་མཆོད་རྫས་འཛིན་པ་ལྷ་མོའི་ཚོགས། །གནས་འདིར་མཆོད་པའི་མེ་ཏོག་འཐོར་བ་བཞིན་ཞེས་འཁོད་པ་ལྟར་དང་། ཡང་འདི་ཉིད་ལས་རྡོ་རྗེ་གདན་དང་དབྱེར་མེད་རྡོ་རྗེ་ཡི། །གདན་དུ་བྱིན་རླབས་དེ་ཡིས་ཕྱོགས་གཉིས་བརྒྱན་ཞེས་འཁོད་པ་ལྟར་དགོན་གནས་འདི་ནི་སངས་རྒྱས་སྟོང་གི་འབྱུང་གནས་རྒྱ་གར་རྡོ་རྗེ་གདན་དང་བྱིན་རླབས་ཁྱད་མེད་ཟེར་བ་གོང་དཀར་རྡོ་རྗེ་གདན་དང༌། འབྲོག་རྡོ་རྗེ་གདན། ཞོང་ཞོང་རྡོ་རྗེ་གདན། སྔོན་མོ་རྫོང་རྡོ་རྗེ་གདན་སོགས་དང་འདྲ། །དགོན་འདི་ཕྱག་འདེབས་མཁན་གྱི་སྐོར་ལ། ཁུལ་དེའི་མི་ལ་ལས་རྒྱལ་དབང་དགེ་འདུན་རྒྱ་མཚོས་ཕྱག་བཏབ་ཅེས་བརྗོད་ཀྱང་། དགའ་ལྡན་ཆོས་བྱུང་དུ་ཤངས་པ་བཀའ་བརྒྱུད་ཀྱི་རིང་ལུགས་པ་ཆེན་པོ་ཡེ་ཤེས་ཀྱི་མགོན་པོ་ཕྱག་དྲུག་པ་བྲན་དུ་འཁོལ་བ། སྲེག་མའི་རིགས་ལས་ཕ་རྒོད་ཀུན་དགའ་བཟང་པོས་བཏབ་ཅེས་དང་། ཐུའུ་བཀྭན་གྲུབ་མཐར་ཕ་རྒོད་ཀུན་འགའ་བཟང་པོས་རྟ་ནག་རྡོ་རྗེ་གདན་བཏབ་ཅེས་གསལ་བར་འཁོད་པས། དགོན་དེའི་ཕྱག་འདེབས་པ་པོ་ནི་རྒྱལ་དབང་དགེ་འདུན་རྒྱ་མཚོ་མིན་པར་ཕ་རྒོད་ཀུན་དགའ་བཟང་པོ་ཡིན་པ་གསལ་པོར་མངོན་ལ། ཡང་རྒྱལ་དབང་དགེ་འདུན་རྒྱ་མཚོ་ཉིད་སྐུ་འཁྲུངས་སྐབས་སུ་རྡོ་རྗེ་གདན་གྱི་གཟིམ་ཁང་ཤར་ཕྱོགས་ལ་ས་དཀར་གསོལ་ཟིན་ནས་ལྷོ་ཕྱོགས་ལ་ས་དཀར་གསོལ་བའི་སྐབས་ཡུམ་ཐུགས་དམ་ལ་གནས་བཞིན་པའི་ངང་ནས་སྐུ་འཁྲུངས་པ་དེའི་ཐོག་ནས་ཀྱང་། རྒྱལ་དབང་དགེ་འདུན་རྒྱ་མཚོ་སྐུ་འཁྲུངས་སྐབས་རྡོ་རྗེ་གདན་འདི་ཉིད་ཕྱག་བཏབ་ཟིན་ཡོད་པ་མཚོན། ཁོང་གི་སྙན་གྲགས་ཀྱིས་རྐྱེན་པས་དགོན་འདི་ཡང་མི་མང་པོས་རྒྱུས་མངའ་བྱ་ཡུལ་ཞིག་ཏུ་གྱུར་པ་གསལ་པོ་ཡིན།
དགོན་འདི་ཉིད་ཆོས་བརྒྱུད་གང་གི་ཁོངས་སུ་གཏོགས་མིན་ཡང་། ཐུའུ་བཀྭན་གྲུབ་མཐར་ཕ་རྒོད་ཀུན་དགའ་བཟང་པོའི་སྲས་དྲན་ཆོག་དོན་ཡོད་རྒྱལ་མཚན། དེའི་སྲས་རྒྱལ་དབང་དགེ་འདུན་རྒྱ་མཚོའི་ཡབ་རྗེ་ཀུན་དགའ་རྒྱལ་མཚན་སོགས་ཀྱང་ཤངས་པའི་ཆོས་བརྒྱུད་འཛིན་ཞེས་གསལ་བར་གཞིགས་ན་རྒྱལ་དབང་དགེ་འདུན་རྒྱ་མཚོའི་མི་རྒྱུད་གོང་མ་དེ་དག་གིས་དགོན་འདིར་ཤངས་པའི་ཆོས་བརྒྱུད་འཛིན་པ་དང་། ཡང་ནི་གུའི་བརྒྱུད་འདེབས་ལས་བྱང་རྡོ་རྗེ་གདན་གྱི་དགོན་པ་རུ། བྱང་སེམས་སྦྱིན་པ་བཟང་པོ་ལ་གསོལ་བ་འདེབས་ཞེས་འཁོད་པ་ལྟར་ཤངས་པ་བཀའ་བརྒྱུད་ཀྱི་བླ་བརྒྱུད་གྲས་སུ་བཞུགས་པའི་བྱང་སེམས་སྦྱིན་པ་བཟང་པོས་དགོན་འདི་བསྐྱངས་པས། ཐོག་མར་ཕྱག་བཏབ་པའི་དུས་ནས་བཟུང་སྐབས་ཤིག་རིང་ཤངས་པ་བཀའ་བརྒྱུད་ཀྱི་ཆོས་བརྒྱུད་འཛིན་པ་གསལ་བར་མངོན།
ཕྱིས་གྲུབ་མཆོག་དོན་ཡོད་ཞབས་དང་ཀུན་དགའ་རྒྱལ་མཚན་སོགས་ཀྱིས་དགོན་འདི་བསྐྱངས་འདུག །ད་ལྟ་གནས་འདིར་སྤྱི་ལོ་1698ལོར་དགེ་འདུན་ཞལ་གྲངས་སུམ་ཅུ་སྐོར་ཡོད། སྔར་རྩ་གཏོར་དུ་སོང་བའི་གྱང་ཤུལ་མང་པོ་ཞིག་མཇལ་རྒྱུ་འདུག་ལ། དེང་རྟེན་ཁང་ཆུང་ངུ་ཞིག་དང་གཙང་ཁང་ཞིག་བོད་རབ་བྱུང་བཅུ་བདུན་པའི་ས་གླང་སྤྱི་ལོ་2009ལོར་ཡུལ་འདིའི་གྲྭ་འཇིགས་མེད་ཆོས་བཟང་ངམ་དགེ་སློང་འཚོ་བྱེད་རྟ་མགྲིན་གྱིས་གཙོས་དད་ལྡན་མང་ཚོགས་ཀྱིས་ཉམས་གསོ་ཞུས། ནང་རྟེན་གཙོ་བོ་རྒྱལ་དབང་དགེ་འདུན་རྒྱ་མཚོའི་འདྲ་སྐུ་བྱིན་ཅན་བཞུགས་པ་ཡིན་ལ། རྒྱུན་བཞུགས་ཀྱི་རབ་བྱུང་བ་མེད་པར་རྣམ་ཀུན་མཆོད་འབུལ་དང་བདག་གཉེར་ཁུལ་དེའི་མི་སེར་རེས་མོས་ཀྱི་བྱེད་མུས་ཡིན།
II.5.4.2 Tanak Rikhar
གཉིས། རྟ་ནག་རི་མཁར་དགོན།
དགོན་འདི་ནི་དེང་བཞད་མཐོང་སྨོན་རྫོང་རྟ་ནག་རིན་ཆེན་རྩེ་ཡུལ་ཤོག་ལྷོ་གླིང་གྲོང་ཚོའི་བྱང་ངོས་རི་ལྡེབས་སུ་གནས་ཤིང་ཤངས་པ་བཀའ་བརྒྱུད་ཐང་ལུགས་ཀྱི་བླ་མ་ནམ་མཁའི་རྣལ་འབྱོར་གྱིས་དུས་རབས་བཅོ་ལྔ་པ་ཙམ་ལ་ཕྱག་བཏབ་ནས་ད་བར་མི་ལོ་དྲུག་བརྒྱ་ཙམ་སོང་ཞིང་། ཐོག་མའི་བླ་རབས་བཞི་ལྔ་ཙམ་སོང་བའི་རྗེས་དགེ་ལྡན་པའི་ལུགས་སུ་བསྒྱུར་བ་ཞིག་ཡིན། དགོན་འདི་ནི་རི་ཡི་ཁར་ཆགས་པས་རི་ཁར་ཞེས་སམ། རི་སྟེང་དུ་གནས་པའི་མཁར་ཡིན་པས་རི་མཁར་ཞེས་ཟེར་བས། བོད་ཀྱི་དགོན་སྡེ་ཁག་ཅིག་གི་ངོ་སྤྲོད་མདོར་བསྡུས་སུ་རྟ་ནག་ཏི་མཁར་དགོན་ཞེས་འཁོད་པ་ནི། རི་ཡིག་དང་ཏི་ཡིག་གཉིས་འཁྲུལ་བ་ཡིན།
དགོན་འདི་ཐོག་མར་ཤངས་པ་བཀའ་བརྒྱུད་ཡིན་པ་ལ་དགེ་སློང་མཚུངས་མེད་དཔལ་འབྱོར་རྒྱལ་མཚན་གྱིས་རི་བོ་དགེ་ལྡན་པའི་ལུགས་སུ་བསྒྱུར་རྗེས་རིམ་བཞིན་བཀྲ་ཤིས་ལྷུན་པོའི་དགོན་ལག་ཏུ་གྱུར། དུས་དེ་ནས་བཟུང་སྐབས་ཤིག་རིང་བཀྲས་ལྷུན་བྱམས་ཁང་མདུན་གྱི་དབྱེན་ཟླུམ་མཆོད་རྟེན་དང་ཉེ་བར་བཀྲ་ཤིས་ལྷུན་པོའི་དཀྱིལ་ཁང་ལེགས་བཤད་གླིང་གི་མི་ཚན་བཅུ་དྲུག་ གི་ཁོངས་སུ་གཏོགས་པའི་རི་མཁར་མི་ཚན་ཟེར་བ་ཞིག་ཡོད་པ་དེས་འགན་ཁུར་བཞེས་ཐོག་བཀྲས་ལྷུན་སྔགས་ཁང་ནས་ལོ་གསུམ་རེས་བསྐོར་གྱི་བླ་མ་དང་སྔགས་པ་གཞན་འགའ་གཏོང་བའི་སྲོལ་འདུག་ཀྱང་ད་ལྟའི་ཆར་ཆོས་འབྱོར་ཅི་རིགས་ཐད་བཀྲ་ཤིས་ལྷུན་པོ་དགོན་དང་དམིགས་བསལ་གྱི་འབྲེལ་བ་མེད། དགོན་འདི་དགེ་ལུགས་སུ་བསྒྱུར་རྗེས་དགོན་གནས་སྐྱོང་མཁན་རབ་དང་རིམ་པ་བྱུང་ཡོད་ཀྱང་། བཀྲ་ཤིས་ལྷུན་པོའི་ཁྲི་པ་རིམ་བྱོན་བཅོ་ལྔའི་གྲས་ཀྱི་པཎ་ཆེན་ཆོས་དཔལ་རྒྱ་མཚོས་རི་མཁར་དགོན་འདི་ཉིད་ཀྱི་མཁན་པོ་གནང་བའི་སྐོར་ཙམ་འཁོད་པ་ལས། དཔྱད་ཡིག་ཞིབ་པ་ད་ཕན་མ་མཐོང་། དམངས་གཙོའི་བཅོས་བསྒྱུར་སྐབས་དགོན་འདིར་གཏོར་སྐྱོན་ཚབས་ཆེ་ཕོག་པ་མ་ཟད་མཁན་པོ་བློ་བཟང་འབྱུང་གནས་ལ་འབྲུ་ཅུང་ཙམ་སྤྲད་ནས་དགོན་འདི་ལས་གནས་དབྱུང་བཏང་ཞིང་། ལོ་གསུམ་དགོན་དེའི་གཤམ་གྱི་ཀླུ་སྡིངས་ཁྱིམ་ཚང་དུ་བཞུགས་རྗེས་དེ་གར་དགོངས་པ་རྫོགས། བོད་རབ་བྱུང་བཅུ་བདུན་པའི་ས་གླང་སྤྱི་ལོ་2009ལོར་བཀྲས་ལྷུན་དཀའ་ཆེན་བློ་བཟང་ཚུལ་ཁྲིམས་ཀྱིས་གཙོ་འགན་བཞེས་ནས་ཉམས་གསོ་མཛད་པར་རྟེན་གཙོ་སྐུ་རྒྱུ་འཇིམ་ལས་གྲུབ་པའི་ཐུབ་པའི་དབང་པོ། གསེར་ཟངས་ལས་གྲུབ་པའི་འོད་དཔག་མེད་ཀྱི་སྣང་བརྙན། གསེར་ཟངས་ཀྱི་རྡོ་རྗེ་སེམས་པའི་སྣང་བརྙན་སོགས་བཞུགས། སྤྱི་ལོ1698ལོར་དགེ་འདུན་ཞལ་གྲངས་དྲུག་ཅུ་རེ་བརྒྱད་ཡོད་པའི་ཅུང་གཞི་ཁྱོན་ཆེ་བའི་དགོན་སྡེ་ཞིག་ཡིན་ཀྱང་ད་ལྟ་དགེ་འདུན་ཞལ་གྲངས་གསུམ་ལས་མེད།
གཞན་ཡང་ནི་གུའི་བླ་བརྒྱུད་གསོལ་འདེབས་སུ་མུས་རྫི་ལུང་དཔལ་གྱི་དགོན་པ་རུ། །མཚན་ལྡན་ནམ་མཁའི་རྣལ་འབྱོར་ལ་གསོལ་བ་འདེབས་ཞེས་གསལ་བ་བཞིན། བླ་མ་ནམ་མཁའི་རྣལ་འབྱོར་གྱི་གདན་ས་མུས་རྫི་ལུང་ཞེས་པ་ཞིག་ཀྱང་འཁོད་པས་རྫི་ལུང་དགོན་དེ་གང་དུ་གནས་མིན་དང་། བླ་མ་ནམ་མཁའི་རྣལ་འབྱོར་གྱི་གདན་ས་གཙོ་བོ་དེ་གཉིས་ལས་གང་ཡིན་མིན་སོགས་མུ་མཐུད་དཔྱད་པར་འཚལ།
II.5.4.3 Nyethang Mokchok
གསུམ། མཉེས་ཐང་རྨོག་ལྕོག་དགོན།
དགོན་འདི་ནི་ཐོག་མར་ཤངས་པ་བཀའ་བརྒྱུད་ཀྱི་དགོན་སྡེ་ཞིག་ཡིན་ཞིང་། གནས་ཡུལ་གྱི་ས་བབ་སྤྱི་ནི་སྐྱེས་མ་ཕྲུ་གུ་པང་དུ་བཏབ་པ་དང་། རྒྱབ་རི་རྒྱལ་པོ་གདན་ལ་བཞུགས་པ་འདྲ། དགོན་འདིར་རྨོག་ལྕོག་ཅེས་པའི་མཚན་ཐོགས་དོན་ཡང་། དམངས་ཁྲོད་ཀྱི་ངག་རྒྱུན་དུ་རྗེ་བཙུན་སྒྲོལ་མའི་སྤྲུལ་པ་ཡིན་པའི་རྨོ་བོ་ཞིག་གནས་དེར་ཉིན་ལྟར་ས་རྡོ་དབོར་གྱི་ཡོད་པ་མི་གཞན་གྱིས་མཐོང་བས་ཡ་མཚན་སྐྱེས་ཏེ། མི་ཚོས་ཁྱེད་ས་རྡོ་དབོར་བ་ལས་བསྡད་ན་དགའ་ཞེས་ཟེར་བས། སྤྲུལ་པའི་རྨོ་བོ་དེས་རྨོ་བོས་ལྕོགས། རྨོ་བོས་ལྕོགས་ཞེས་ཟེར་བས་རྨོ་ལྕོགས་དང་། རིམ་བཞིན་རྨོག་ལྕོག་ཅེས་པའི་མཚན་ཐོགས་པ་ཡིན་ཞེས་པའི་ཤོད་རྒྱུན་རབ་རིབ་ཙམ་ཐོས། དགོན་འདི་ནི་དེང་ཆུ་ཤུར་རྫོང་མཉེས་ཐང་ཡུལ་ཤོག་གི་ནུབ་རྒྱུད་ཀྱི་སྤྱི་ལེ་གཉིས་ཙམ་གྱི་སར་གནས་ཡོད། དགོན་དེར་སྐྱེར་སྒང་དགོན་དང་འདྲ་བར་རྡོ་ནག་ལས་གྲུབ་པའི་མགོན་པོ་ཕྱག་དྲུག་པ་གཅིག་ཡོད་པ་ལོ་རེར་མཇལ་ཁ་ཐེངས་རེ་གཏོང་སྲོལ་འདུག །དམངས་གཙོའི་བཅོས་བསྒྱུར་གོང་དགོན་དེར་འབྲས་སྤུངས་སྒོ་མང་གྲྭ་ཚང་ནས་ཕེབས་པའི་བླ་མ་རྨོག་ལྕོག་རིན་པོ་ཆེ་ཞེས་པ་ཞིག་གིས་དགོན་བདག་གནང་ནས་རི་བོ་དགེ་ལྡན་པའི་གྲུབ་མཐའ་ཕྱག་བཞེས་གནང་། སྤྱི་ལོ་1959ལོར་རྩ་གཏོར་དུ་མ་སོང་གོང་དགེ་འདུན་ཞལ་གྲངས་བརྒྱད་བཞུགས། དགོན་དེའི་ཤར་དུ་སྔོན་རྨོག་ལྕོག་གཞིས་ཀ་ཞེས་དགོན་པའི་གཞིས་ཀའང་ཡོད། ད་ལྟ་མོག་ལྕོག་རིན་པོ་ཆེའི་སྤྲུལ་སྐུ་ཕྱིའི་རྒྱལ་ཁབ་ཏུ་བཞུགས་མུས་ཡིན། སྔར་དགོན་དེར་གསང་བདེ་འཇིགས་གསུམ་གྱི་ཚ་པར་རྒྱག་སྲོལ་ཡོད་པ་ཅུང་གྲགས་ཆེ་བ་ལས་དེང་འཇིགས་བྱེད་དཔའ་བོ་གཅིག་པའི་ཚ་པར་དེ་ད་ལྟ་ས་ལུགས་ཀྱི་དགོན་པ་མཉེས་ཐང་བཀྲ་ཤིས་སྒང་དར་རྒྱས་ཆོས་འཁོར་གླིང་དུ་བཞུགས་པའོ།
།དགོན་འདི་ཐོག་མར་ཕྱག་འདེབས་མཁན་གྱི་སྐོར་ཡང་། གསོལ་འདེབས་བྱིན་རླབས་སྤྲིན་ཕུང་ལས་གནས་རྨོག་ལྕོག་གྲུབ་པའི་དགའ་ཚལ་ན། །ཀུན་དགའ་དགེ་ལེགས་དཔལ་འབར་ལ་གསོལ་བ་འདེབས་ཞེས་འཁོད་པ་ལྟར་དགོན་འདི་ཕྱག་འདེབས་མཁན་ནི་ཀུན་དགའ་དགེ་ལེགས་དཔལ་འབར་ཞེས་པ་ཡིན་བཟོ་འདུག་ཀྱང་། ད་ཕན་བླ་མ་གང་དེའི་མཛད་རྣམ་ཞིབ་ཆ་མ་རྙེད་པས་བླ་མ་འདི་ཉིད་དམ་ཡང་ན་གཞན་སུ་ཞིག་གིས་ཕྱག་བཏབ་མིན་བརྗོད་དཀའ། འོན་ཏེ་ལྷ་སའི་ལོ་རྒྱུས་རིག་གནས་དེབ་བརྒྱད་པ་ཆུ་ཤུར་རྫོང་ཞེས་པའི་ནང་མཉེས་ཐང་ཤང་གི་ཁོངས་སུ་ཡོད་པའི་རྨོག་ལྕོག་དགོན་པ་ནི་ཤངས་པ་རིན་ཆེན་བདུན་བརྒྱུད་ཀྱི་བཞི་པ་རྨོག་ལྕོག་པ་རིན་ཆེན་བརྩོན་འགྲུས་ཀྱིས་དུས་རབས་བཅུ་བཞི་པའི་ནང་བཏབ་ཅེས་འཁོད་མོད། འོན་ཀྱང་ཆོས་རྗེ་རྨོག་ལྕོག་པའི་མཛད་རྣམ་དུ་དབུས་ཁུལ་དུ་ལོ་མང་རིང་སློབ་གཉེར་གནང་ནས་བཞུགས་ཡོད་པ་ཕུད་དགོན་གནས་བཏབ་སྟེ་ཚོགས་པ་བསྐྱངས་པའི་སྐོར་འཁོད་མེད་དེ། དུས་དེར་ཁོང་སློབ་པ་ལམ་གྱི་གནས་སྐབས་ཡིན། གཞན་ཡང་ཀློང་རྡོལ་བླ་མའི་གསུང་འབུམ་དུ་རྨོག་ལྕོག་པ་རིན་ཆེན་བརྩོན་འགྲུས་ཤངས་ཀྱི་ཕུ་རྨོག་ལྕོག་དང་། སྙེ་ཐང་གི་རྨོག་ལྕོག་གཉིས་ལ་བཞུགས་ནས་མཆོག་གི་དངོས་གྲུབ་གྲུབ་པ་ཡིན་ཟེར་ཞེས་ཆོས་རྗེ་རྨོག་ལྕོག་པ་རིན་ཆེན་བརྩོན་འགྲུས་གནས་འདིར་བཞུགས་མྱོང་བའི་ཟེར་སྒྲོས་ཙམ་མ་གཏོགས་ཕྱག་བཏབ་པའི་སྐོར་བཀོད་མེད། ཁོང་གིས་ཕྱག་བཏབ་གནང་བའི་གདན་ས་གཙོ་བོ་ནི་ཤངས་ཀྱི་ལྷ་ཕུར་ཡོད་པའི་རྨོག་ལྕོག་དགོན་དང་། ལྐུགས་ལུང་དགོན་གཉིས་ཡིན་པ་སྔར་བཤད་ཟིན་པས། དགོན་འདི་ཡང་ཆོས་རྗེ་རྨོག་ལྕོག་པས་ཕྱག་བཏབ་པ་ཁོང་གི་མཛད་རྣམ་སོགས་ཀྱི་དཔྱད་ཡིག་ནང་འཁོད་མེད། དེས་མ་ཚད་དུས་རབས་བཅུ་བཞི་པའི་ནང་དགོན་དེ་བཏབ་ཅེས་འཁོད་པ་ལྟར་བྱས་ན་ལོ་ཚིགས་ལ་ཡང་ལོ་ཉིས་བརྒྱ་ཙམ་གྱི་ཧེ་བག་ཆེན་པོ་ཡོད་དེ། སྔར་བཤད་པ་ལྟར་ཆོས་རྗེ་རྨོག་ལྕོག་པའི་ཞིབ་ཕྲའི་འཁྲུངས་འདས་ལོ་ཚིགས་ངེས་པར་དཀའ་ཡང་། ཁོང་ནི་མཁས་གྲུབ་ཁྱུང་པོའི་སྐུ་ཚེའི་སྨད་དུ་བྱོན་ལ་རྗེ་ཕག་མོ་གྲུ་པ་དང་དུས་མཉམ་པ་རྩོད་མེད་ཡིན་པས་སྤྱི་ལོའི་དུས་རབས་བཅུ་གཉིས་པའི་ནང་བྱོན་པ་ཞིག་ཡིན་པ་གོར་མ་ཆག
II.5.4.4 Chakzam Chuwori
བཞི། ལྕགས་ཟམ་ཆུ་བོ་རི་དགོན།
ལྕགས་ཟམ་ཆུ་བོ་རི་དགོན་ནི། ཤངས་ཆོས་ཉེ་བརྒྱུད་ཀྱི་བཀའ་བབས་གྲུབ་ཆེན་ཐང་སྟོང་རྒྱལ་པོ་དགུང་ལོ་དོན་གསུམ་ལ་ཕེབས་པ། སྤྱི་ལོ1434ལོར་དཔལ་ཆུ་བོ་རིར་བཀའ་འགྱུར་དང་བསྟན་འགྱུར་གཙུག་ལག་ཁང་དང་རྩེ་ཞོལ་གྱི་དགོན་པ་གཉིས། མཆོད་རྟེན་ཆེན་པོ་རྣམས་ཀྱི་གཞི་བཏིང་། དེ་རྗེས་དབེན་གནས་ཐར་པ་གླིང་གི་སྒྲུབ་ཁང་ཞལ་དཀར་ལྷ་གདོང་དུ་ཐུགས་དམ་ལ་ཞུགས། སྤྱི་ལོ1436ལོར་ཆུ་བོ་རིའི་དགོན་འདི་ཡོངས་སུ་རྫོགས་པ་ཕྱག་བཏབ། ཆུ་བོ་རི་ནི་བོད་ཀྱི་རི་ཆེན་བཞིའི་གྲས་ཤིག་སྟེ་བོད་ལ་བདེ་སྐྱིད་འབྱུང་བའི་རི་ཞེས་ཀྱང་བརྗོད། སྔར་རྒྱལ་པོ་འུ་དུམ་བཙན་གྱིས་བསྟན་པ་བསྣུབས་པའི་སྐབས་དམར་གཡོ་གཙང་གསུམ་ཡང་བཞུགས་མྱོང་ཡོད། དེང་རི་འདིའི་སྟེང་ཆུ་མིག་བརྒྱ་རྩ། སྒྲུབ་གནས་བརྒྱ་རྩ་སོགས་ཡོད་པར་གྲགས། འཇམ་དབྱངས་མཁྱེན་བརྩེ་དབང་པོ་གནས་དེར་ཕེབས་སྐབས་ལྕགས་ཟམ་ཁར་ལྕགས་ཟམ་བླ་བྲང་དང་མཆོད་རྟེན། གཟིམ་ཕུག་བླ་བྲང་སོགས་སུ་གྲུབ་ཆེན་ཐང་སྟོང་རྒྱལ་པོའི་སྐུ་གསུང་ཐུགས་རྟེན་བྱིན་ཅན་ཅི་རིགས་པ་ཞིག་བཞུགས་པ་དང་། དེ་མིན་ལྕགས་ཟམ་རྩེར་རིག་འཛིན་ལེགས་ལྡན་རྗེའི་གཟིམ་ཕུག་དང་། ཡང་པདྨ་བཀའི་ཐང་ཡིག་ཏུ་དེ་ནས་ཆུ་བོ་རི་དང་ཁ་རག་བྱོན་ཞེས་འཁོད་པ་བཞིན་སློབ་དཔོན་ཆེན་པོ་གནས་འདིར་ཕེབས་ནས་སྒྲུབ་པར་ཞུགས་སའི་དབེན་གནས་ནམ་མཁའ་ལྡིང་ཞེས་པའི་སྒྲུབ་ཕུག་བྱིན་ཅན་སོགས་མཇལ་རྒྱུ་ཡོད། ཆུ་བོ་རིའི་ལྷོ་ངོས་སུ་སྔར་གྱི་དགོན་ཤུལ་ཚོ་ཁག་གཉིས་དང་། དེ་མིན་ད་ལྟ་བོ་ཐོག་ཅེས་པའི་བཙུན་དགོན་ཞིག་འདུག །དེ་དག་ལས་གྲུབ་ཆེན་ཐང་སྟོང་རྒྱལ་པོས་བཏབ་པའི་དགོན་གནས་གང་ཡིན་མིན་ངོས་འཛིན་དཀའ་ཡང་། ལྷ་སའི་དགོན་ཐོ་ཞེས་པར་གྲུབ་ཐོབ་ཐང་སྟོང་རྒྱལ་པོས་བཏབ་པའི་ཆུ་བོ་རི་དགོན་རིག་གནས་གསར་བརྗེའི་སྐབས་རྩ་གཏོར་དུ་སོང་ནས་ད་ཆ་ཉམས་གསོ་ཕྲན་བུ་ཞུས་རྗེས་གནས་འཛིན་དགེ་འདུན་འགའ་ཞིག་བཞུགས་ཞེས་འཁོད་པར་གཞིགས་ན། དེང་ཉམས་གསོ་ཞུས་པ་བོ་ཐོག་ཅེས་པའི་བཙུན་དགོན་དེ་ལས་མི་འདུག་པས་ཕལ་ཆེར་གྲུབ་ཆེན་གྱིས་ཕྱག་བཏབ་པའི་དགོན་གནས་དེ་རང་ངམ་དེའི་ཉེ་འཁོར་གང་རུང་དུ་མིན་ནམ་སྙམ། འོན་ཏེ་གོང་གི་ལུང་ཡིག་འདིར་དགེ་འདུན་འགའ་ཞིག་བཞུགས་གསུངས་ཀྱང་ད་ལྟ་ནི་མོ་དགོན་ཡིན།
དེ་ཡང་ཐུའུ་བཀྭན་གྲུབ་མཐར་ཕྱིས་ཀྱི་གྲུབ་ཆེན་ཐང་སྟོང་རྒྱལ་པོར་གྲགས་པ་ཡང་ཤངས་པའི་ཆོས་བརྒྱུད་འཛིན་པ་འདྲ་བས་ལྕགས་ཟམ་ཕྱོགས་སུའང་ཤངས་ཆོས་དར་བར་སྣང་ཞེས་འཁོད་པའི་ནང་གྲུབ་ཆེན་ཐང་སྟོང་རྒྱལ་པོས་ཤངས་པའི་ཆོས་བརྒྱུད་འཛིན་པ་འདྲ་ཞེས་གསུངས་མོད། ཤེས་བྱ་ཀུན་ཁྱབ་ཏུ་ཐང་རྒྱལ་ནི་གུའི་བཀའ་བབས་སྔ་ཕྱི་གསུམ། །ཀུན་མཁྱེན་དོལ་བུ་སངས་རྒྱས་ཀྱི་སྐུའི་སྐྱེ་བ་ཕྱི་མ་གྲུབ་ཆེན་བརྩོན་འགྲུས་བཟང་པོའམ་ཐང་སྟོང་རྒྱལ་པོ་སོགས་སྐུ་གཅིག་ལ་མཚན་ལྔ་ལྡན་པ་དེ་ཉིད་ཀྱིས། རིང་བརྒྱུད་མཁས་གྲུབ་ཤངས་སྟོན་གྱི་སློབ་མ་མུས་ཆེན་རྒྱལ་མཚན་དཔལ་བཟང་ནས་རི་གོང་སྟོད་བརྒྱུད་དུ་གྲགས་པའི་སྙན་བརྒྱུད་རྣམས་བྱང་སེམས་སྦྱིན་པ་བཟང་པོ་ལས་གསན་ནས་ཐུགས་ཉམས་སུ་བཞེས་པས་ཡེ་ཤེས་མཁའ་འགྲོ་དངོས་ཀྱི་རྗེས་སུ་བཟུང་བའི་ཉེ་བརྒྱུད་རིམ་པ་གསུམ་བྱུང་ཞེས་གསལ་བར་འཁོད་པས་གྲུབ་ཆེན་ཐང་སྟོང་རྒྱལ་པོ་ཤངས་པའི་ཆོས་བརྒྱུད་འཛིན་པ་སྨོས་མེད་རེད། དེའི་སྐོར་ཞིབ་པ་ཁོ་བོས་ཤངས་ཆོས་ཉེ་བརྒྱུད་ཀྱི་སྐབས་སུའང་བཤད་ཟིན། དེ་ལྟར་ཡེ་ཤེས་མཁའ་འགྲོ་དངོས་ཀྱིས་རྗེས་སུ་བཟུང་བའི་ཤངས་ཆོས་ཉེ་བརྒྱུད་ཀྱི་བཀའ་བབས་གྲུབ་ཆེན་ཐང་སྟོང་རྒྱལ་པོས་ལྕགས་ཟམ་ཆུ་བོ་རིའི་དགོན་འདི་བཏབ་རྗེས་ཡོལ་རི་གོང་དང་ཉེ་བའི་ལྕགས་ཟམ་གྱི་ཕྱོགས་སུ་ཡང་ཤངས་ཆོས་དར་ཁྱབ་ཆེས་ཆེར་བྱུང་། ལྷག་དོན་ཤངས་པའི་ཆོས་བརྒྱུད་ཅུང་ཟད་ཉག་ཕྲ་བའི་སྤྱི་ལོའི་དུས་རབས་བཅུ་བཞི་པ་དང་བཅོ་ལྔ་པའི་ནང་ཤངས་པའི་བརྒྱུད་འཛིན་མཆོག་ཏུ་འགྱུར་བ་འདི་ཉིད་ཀྱིས་དཔལ་ཆུ་བོ་རི་ལྟེ་བར་བྱས་པའི་ས་ཁོངས་དང་དེ་མིན་བོད་ཀྱི་ས་ཆ་དུ་མར་ཤངས་པའི་ཆོས་ཀྱི་གདམས་ངག་མང་དུ་སྤེལ།
II.5.4.5 Bongshö Riwoché
ལྔ། བོང་ཤོད་རི་བོ་ཆེ།
དེ་ཡང་ཤེལ་དཀར་ཆོས་འབྱུང་དུ་ཁྲ་སྟོན་པ་བྱང་ཆུབ་རྒྱལ་མཚན་གྱིས་བཏབ་པའི་དགོན་པ་བོང་ཤོད་རི་བོ་ཆེར་ཆོས་ལུགས་དང་པོ་ཤངས་ལུགས་ཡོད་པ་ཕྱིས་རྙིང་མ་བ་སེར་ཁྱིམ་ལྟ་བུར་ཡོད་ཅེས་འཁོད་པ་བཞིན་དགོན་འདི་ནི་ཐོག་མར་ཁྲ་སྟོན་པ་བྱང་ཆུབ་རྒྱལ་མཚན་གྱིས་བཏབ་གནང་བའི་ཤངས་པ་བཀའ་བརྒྱུད་ཀྱི་རིང་ལུགས་འཛིན་པ་ཞིག་དང༌། དེའི་རྗེས་ཙམ་དུ་རྙིང་མ་བྱང་གཏེར་འཛིན་པའི་སེར་ཁྱིམ་འགའ་ཞིག་གིས་དགོན་གནས་བཟུང་བ། དེ་ནས་མཁན་ཆེན་ལེགས་དོན་ཉིད་ཀྱིས་དགེ་ལུགས་ཁད་གཙང་དུ་བསྒྱུར་ནས་དགེ་ལུགས་ཀྱི་ཆོས་སྤྱོད་རགས་རིམ་དང་མཁས་གྲུབ་དགེ་ལེགས་ཀྱིས་མཛད་པའི་ཕྱག་དྲུག་པའི་བསྐང་གསོ་དང་བླ་མ་མཆོད་པ་སོགས་བཙུགས་ཞེས་འཁོད་པ་ལྟར་ཕྱིས་རྒྱལ་མཆོག་ལྔ་པ་ཆེན་པོས་བླ་མ་ལེགས་པ་དོན་གྲུབ་ཉིད་ཤེལ་དཀར་ཆོས་སྡེ་དགེ་ལུགས་ཁད་གཙང་དུ་བསྒྱུར་བའི་མཁན་པོར་བསྐོ་བཞག་མཛད་རྗེས། ཞི་བྱེད་ཀྱི་བརྒྱུད་འཛིན་ཆོས་ལུང་དགོན་དགེ་ལུགས་སུ་བསྒྱུར་བ་དང༌། རྫི་བོ་དགོན་དུ་རབ་བརྟན་ཆོས་ལུང་ཞེས་པའི་དགེ་ལུགས་ཀྱི་མོ་དགོན་བཙུགས་པ། དེ་རྣམས་དང་འདྲ་བར་བོང་ཤོད་རི་བོ་ཆེ་འདི་ཡང་དགེ་ལྡན་པའི་ལུགས་སུ་བསྒྱུར་ནས་ཤེལ་དཀར་ཆོས་སྡེའི་དགོན་ལག་ཏུ་སྦྱོར་འཇགས་མཛད་ཅིང་། དགེ་ལུགས་པའི་ཆོས་སྤྱོད་རགས་རིམ་དང་། མཁས་གྲུབ་དགེ་ལེགས་དཔལ་བཟང་གི་ཕྱག་དྲུག་པའི་བསྐང་གསོ། བླ་མ་མཆོད་པ་སོགས་ཀྱང་བཙུགས། དགོན་འདི་ནི་དིང་རི་རྫོང་གི་བུམ་ཆུ་(ལྷོ་རོང་ཆོས་འབྱུང་དུ་བོང་ཆུ་ཞེས་འཁོད་)རྒྱུག་ཁུལ་གྱི་ཕྱོགས་སུ་གནས་པ་སྟེ། དེང་གཞིས་རྩེ་ས་གནས་དིང་རི་རྫོང་ཚ་སྐོར་ཡུལ་ཤོག་འཇའ་ལུང་གྲོང་ཚོའི་ཁོངས་སུ་གནས། སྤྱི་ལོ་1698ལོར་དགོན་འདིར་དགེ་འདུན་ཞལ་གྲངས་ཉི་ཤུ་རྩ་བདུན་སྐོར་ཡོད།
སྔར་དགོན་འདིར་སངས་རྒྱས་རབས་བདུན་ གྱི་སྣང་བརྙན་དང་། གྲུབ་ཆེན་རཱ་ཧུ་ལ། མཁས་གྲུབ་ཁྱུང་པོ་རྣལ་འབྱོར། ཙན་དན་ལས་གྲུབ་པའི་ཡིད་བཞིན་གྱི་མགོན་པོ་ཕྱག་དྲུག་པ། སེར་ཟངས་ཀྱི་ཡེ་ཤེས་མགོན་པོ་ཕྱག་དྲུག་པ། དཔེ་རྒྱུན་དཀོན་རིགས་རྙིང་མ་སྔགས་འབུམ་པོ་ཏི་ཉེར་གཅིག །སྒྲིགས་ཤིང་ཙན་དན་དཀར་པོ། ལག་བྲིས་ཀྱི་ཡུམ་པོ་ཏི་བཅུ་གཉིས་ཆ་ཚང་གཅིག །བརྒྱད་སྟོང་པ་གསེར་བྲིས་དངུལ་བྲིས་སོགས་ཀྱི་ནང་རྟེན་རྩ་ཆེན་དུ་མ་བཞུགས་ཡོད་པ་ཡང་། དེ་ཁུལ་གྱི་ཤོད་རྒྱུན་ཞིག་ཏུ་ཤེལ་དཀར་ཆོས་སྡེའི་ནང་རྟེན། འཛམ་གླིང་གསུམ་གཅིག་ལྷག་ལ། །འཇའ་ལུང་རི་ཆེའི་ནང་རྟེན། །ས་སྟེང་འདི་ན་མིན་འདུག་ཅེས་སུ་གྲགས་པ་ལྟར། ས་གསུམ་ཁྱོན་ལ་རྙེད་པར་དཀའ་བའི་འཇའ་ལུང་རི་བོ་ཆེའི་ནང་རྟེན་དེ་དག་མང་ཆེ་བ་རིག་གསར་སྐབས་རྩ་གཏོར་དུ་སོང་བ་དང་། འགའ་ཞིག་རྐུ་ཇག་གིས་བཅོམ་སྟེ་ཇོ་བོའི་སྐུ་བརྙན་རྩ་ཆེན་ཞིག་ཀྱང་རང་རྒྱལ་གྱི་ས་མཚམས་བརྒལ་ནས་ཕྱི་གླིང་ཡུལ་གྲུར་དངུལ་ལོར་གྱི་ཚབ་ཏུ་ཕེབས་དགོས་བྱུང་བ་སོགས་ཀྱི་ཡིད་སྐྱོ་བའི་གནས་ཚུལ་མང་དག་ཅིག་ཐོས་ཀྱང་འདིར་ཞིབ་པར་མ་བཀོད་དོ།
II.5.4.6 Chakzam Modrak
དྲུག །ལྕགས་ཟམ་མོ་བྲག
དེ་ཡང་དགའ་ལྡན་ཆོས་བྱུང་དུ་ཡར་ཀླུངས་པ་བཀའ་བཞི་ཚུལ་ཁྲིམས་འགྱུར་མེད་ཀྱིས་བཏབ་པའི་ཤངས་ལུགས་ཞེས་འཁོད་པ་ལྟར་དགོན་འདི་ནི་དཀའ་བཞི་ཚུལ་ཁྲིམས་འགྱུར་མེད་ཀྱིས་བཏབ་པའི་ཤངས་པ་བཀའ་བརྒྱུད་ཀྱི་དགོན་གནས་ཤིག་ཡིན་ཀྱང་། ཕྱིས་སུ་པ་སྣམ་ཐར་པ་བའི་དགོན་ལག་ཏུ་གྱུར་རྗེས་རི་བོ་དགེ་ལྡན་པའི་རིང་ལུགས་འཛིན། སྤྱི་ལོ་1698ལོར་དགེ་འདུན་ཞལ་གྲངས་སུམ་ཅུ་སོ་གཉིས་ཡོད། དགོན་འདིའི་གནས་ཡུལ་ཡང་། བོད་ཀྱི་དགོན་སྡེ་ཁག་གཅིག་གི་ངོ་སྤྲོད་མདོར་བསྡུས་སུ་དེ་ནི་ལྷ་རྩེ་རྫོང་ཁོངས་མང་མཁར་ཕུ་ཡུལ་ཤོག་ལྕགས་ཟམ་མོ་བྲག་གྲོང་ཚོར་ཡོད་ཅེས་འཁོད་མོད། འོན་ཏེ་ད་ལྟའི་མང་ཕུ་ཤང་(མང་མཁར་ཕུ་ཤང་)ཁོངས་སུ་དེ་དང་ཡོངས་སུ་མཚུངས་པའི་ས་མིང་མེད་ལ། དེ་དང་ཅུང་འདྲ་བ་མེ་རག་ཅེས་པའི་གྲོང་ཚོ་ཞིག་ལས་མི་འདུག །གྲོང་ཚོའི་དེའི་ཉེ་འཁོར་དུ་སྔར་ཤངས་པའི་དགོན་གནས་བྱུང་བའི་ཤུལ་མཇལ་རྒྱུ་མེད་ཅིང་བགྲེས་སོང་མྱོང་བ་ཅན་འགའ་ཞིག་ལའང་དེའི་སྐོར་གྱི་ལོ་རྒྱུས་ཅི་ཡང་གསུངས་རྒྱུ་མི་འདུག་པས་ཕལ་ཆེར་ལྷ་རྩེའི་ཁུལ་གྱི་ས་ཡུལ་གཞན་དང་འཁྲུལ་བ་མིན་ནམ་སྙམ།
འདིར་ལྕགས་ཟམ་མོ་བྲག་ཅེས་པའི་མཚན་དོན་ལ་ཅུང་ཟད་དཔྱད་ན། ལྕགས་ཟམ་ཞེས་པ་གྲུབ་ཐོབ་ལྕགས་ཟམ་པ་སྟེ་ཐང་སྟོང་རྒྱལ་པོ་དང་འབྲེལ་ཡོད་ཀྱི་དགོན་སྡེ་ཞིག་གམ། ཡང་ན་ལྕགས་ཟམ་ཞེས་པའི་ས་ཆ་དང་དེའི་ཉེ་འཁོར་དུ་ཡིན་སྲིད། དེའི་རྒྱུ་མཚན་ནི་ད་ལྟ་ལྷ་རྩེ་རྫོང་གྲའུ་ཡུལ་ཤོག་ཁོངས་སུ་ཡོད་པའི་གཙང་གི་རྒྱལ་སྡེ་ཐང་དང་། གྲུབ་ཆེན་ཐང་སྟོང་རྒྱལ་པོའི་ལྕགས་ཟམ། དེ་དང་ཉེ་བར་ལྕགས་ཟམ་གྲོང་ཚོ། བླ་མ་ཐང་སྟོང་ཞེས་པའི་མཆོད་རྟེན་སོགས་དངོས་སུ་མཇལ་རྒྱུ་ཡོད་པས། ཁོང་གིས་མཛད་པ་སྐྱོང་སའི་གཙང་སྟོད་ཀྱི་ས་ཆ་གལ་ཆེའི་གྲས་ཤིག་ཀྱང་ཡིན།
ཡང་མོ་བྲག་ཅེས་པ་སྔོན་གྱི་ལྷ་རྩེ་རྫོང་ཆགས་སའི་བྲག་རི་དེ་བདེ་མཆོག་ཡབ་ཡུམ་ཞལ་སྦྱོར་གྱི་ཚུལ་དང་འདྲ་བར་མདུན་ངོས་མོ་བྲག་སྟེ་གཡམ་རི་དང་རྒྱབ་ངོས་ཕོ་བྲག་སྟེ་བྲག་རི་གཉིས་སུ་ཕྱེ་བས་ཕལ་ཆེར་ས་ཁོངས་དེའི་རྒྱུད་ཙམ་དུ་འཁེལ་བ་མིན་ནམ་སྙམ། དགོན་འདིའི་སྐོར་གྱི་ཞིབ་ཕྲའི་དཔྱད་གཞི་དང་ངེས་གཏན་གྱི་ས་ཡུལ་ད་ཕན་མ་རྙེད་པས་མུ་མཐུད་དཔྱད་པར་འཚལ།
དེ་ལྟར་གོང་དུ་བཀོད་པའི་མཁས་གྲུབ་ཁྱུང་པོའི་རྗེས་སུ་བྱུང་བའི་དགོན་གནས་དེ་དག་ད་ལྟ་མང་ཆེ་བ་ཀྲོང་ངེར་ལངས་པའི་གྱང་ཟུར་དང་། ཤུལ་དུ་ལུས་པའི་རྩིག་རོ་ཁོ་ནར་གྱུར་ཟིན་པ་དེས། ཤངས་པའི་བརྒྱུད་འཛིན་པ་རྣམས་ཀྱིས་ཁྲག་དང་རྔུལ་ཆུའི་ཐིགས་པས་བཞེངས་པའི་དགོན་གནས་དེ་དག་ཨ་བྲས་བསགས་པ། མཛོ་མོའི་ཁ་ཟས་ཞེས་པའི་དཔེ་ལྟར་ལོ་རྒྱུས་ཀྱི་འཕྲང་ལམ་སྟེང་སོག་པོ་ཇུན་གར་བ་ལ་སོགས་པའི་གདུག་ཅན་རྣམས་ཀྱིས་གཏོར་བཅོམ་བྱ་ཡུལ་དུ་གྱུར། དེ་ཡང་མཁས་བཙུན་གཞོན་ནུ་གྲུབ་སྐུ་གཤེགས་ཁར་སློབ་མ་རྣམས་ལ་ཕྱི་རྟེན་དང་ནང་རྟེན་མི་དགོས། ཁྲལ་དང་སྤྲོ་འདྲི་བྱས་ནས་དགེ་རྩ་བྱ་མི་དགོས་གསུངས། ཡང་སྐྱར་གྱིན་ཞུས་པས། འོ་ན་ཁྱེད་རང་རྣམས་གསོལ་བ་བཞིན་གཤགས་པ་ཐོབ། ཐོ་རེ་བ་ཙམ་ཞིག་བཞག་གིས་གསུངས། ཕྱི་རྟེན་ནང་རྟེན་མཛུབ་གང་བས་ཆེ་བ་མ་བྱེད། བྱས་ན་དམ་ཚིག་དང་འགལ་ཞེས་གསུངས་པ་ལྟར་ཤངས་ཆོས་བསམ་སྡིངས་བརྒྱུད་པའི་སྤྱི་མེས་མཁས་བཙུན་ཆེན་པོ་གཞོན་ནུ་གྲུབ་ཀྱིས་ཕྱི་རྟེན་དང་ནང་རྟེན་སོགས་དགོན་གནས་ཀྱི་རྟེན་དེ་རྣམས་རྒྱ་ཆེར་བཞེངས་མ་རུང་བའི་བཀའ་རྒྱ་དམ་པོར་མཛད་པ་དང་། །རྗེ་སྒམ་པོ་བས་ཆོས་རྗེ་རྨོག་ལྕོག་པར་གནས་གཞིའི་གོ་ཆོད་མ་བྱེད། དགྲ་དགའ་བའི་མདུན་མ་གྱིས་ཤིག །དགེ་འདུན་གྱི་བྱ་བ་མ་བྱེད་ཅེས་པ། དེ་དང་ཕྱོགས་འདྲ་བར་བྱང་ཆུབ་སེམས་དཔའ་ཀུན་དགས་འོ་ན་གྲྭ་པ་སྐྱོང་བ་དང་། ཚོགས་པ་འདུས་ན་ངོ་མཚར་མི་ཆེ་བའམ་ཞུས་པས། (ཕ་དམ་པ་སངས་རྒྱས་ཀྱིས་)ཆོས་དང་མཐུན་པ་དཀའ། མཐུན་ན་ཡང་བསོད་ནམས་ཅན་ཉུང་། དེ་འདྲའི་གྲྭ་པ་བས་སྒྲུབ་པའི་རི་ཁྲོད་ཅིག་བསོད་ནམས་ཆེ་གསུངས་ཞེས་འཁོད་པ་ལྟར། དུས་ངན་སྙིགས་མའི་མཐའ་ལ་ཐུག་པའི་ཚེ་སྐལ་ལྡན་གྱི་གདུལ་བྱ་ཆེས་དཀོན་པས་ཚོགས་པ་སྐྱོང་བ་ལས་གདམས་ངག་ཉམས་སུ་ལེན་པ་གནད་ཆེ་བ་ཡིན་གསུངས་པ་དེ་ནི། ཕལ་ཆེར་ཤངས་ཆོས་ཀྱི་ཐོག་མའི་བརྒྱུད་འཛིན་པ་ཚོའི་དགོངས་པ་དང་འདྲ་སྟེ། མ་གཞི་མཁས་གྲུབ་ཁྱུང་པོའི་སྐུ་དུས་སུ་དགོན་གནས་མང་དུ་བཏབ་པ་དང་ཚོགས་པ་འདུ་འཛོམས་ཆེ་ཡང་། ཁོང་སྐུ་གཤེགས་རྗེས་གདམས་པའི་བརྒྱུད་རྐང་འཛིན་མཁན་ཅུང་མང་ཙམ་ཞིག་གཏན་ཁེལ་མཛད་པའམ། ཡང་ན་དགོན་གནས་མུ་མཐུད་བདག་སྐྱོང་བྱ་ཕྱིར་དགའ་ལྡན་ཁྲི་པ་རིམ་བྱོན་ལྟ་བུའི་ཁྲི་རབས་སམ། གདན་རབས། མཁན་རབས་ལྟ་བུའི་དགོན་བདག་བསྐོ་བཞག་གནང་མེད། དེས་ན་མཁས་གྲུབ་ཁྱུང་པོ་དང་འདྲ་བའི་ཤངས་པའི་བླ་མ་རྣམས་ཀྱིས་གདམས་པ་ཉམས་ལེན་ཁོ་ན་གཙིགས་སུ་འཛིན་པ་ལས་དགོན་གནས་ཡུན་རིང་གནས་ཐབས་ལ་དེ་ཙམ་གྱི་ཐུགས་སྣང་མཛད་མེད་པས། ཕྱི་རབས་ཀྱི་དགོན་གནས་མང་དག་ཅིག་ཕྱག་འདེབས་མཁན་གྱི་བླ་མ་དེ་སྐུ་གཤེགས་རྗེས་རིམ་བཞིན་ཁ་ཐོར་དང་ཉམས་རྒུད་དུ་སོང་། ཡང་དབོན་སྟོན་སྐྱེར་སྒང་པ་སྐུ་འདའ་ཁར་ཡང་ཉེ་གནས་གཞོན་ཚུལ་དང་གྲགས་ཡེས་སོགས་གསུམ་གྱིས་སྐྱེར་སྒང་གི་གདན་སའི་འཕེལ་འགྲིབ་ཇི་ལྟར་ཡོང་མིན་ཞུས་པ་ལ། དབོན་སྟོན་ཐུགས་རྗེ་ཆེན་མོས་བྱིས་པ་ཀུན་གྱི་བྱེ་མའི་ཁང་པ་དང་འདྲ། རེས་རྩིག་རེས་འཇིག་གཏད་སོ་མེད་གསུངས། འོ་ན་དར་རྒུད་ཡོང་པ་གདའ་འམ་ཞུས་པས། བསྟན་པའི་སྙིགས་མ་ཡིན་པས་མཐོ་དམན་བག་ཙམ་ཡོད་ཅེས་གསུངས་པའི་ལུང་བསྟན་ལྟར་སྔར་དགོན་གནས་དེ་དག་གིས་རེས་རྩིག་རེས་འཇིག་གི་སྲིད་པ་འཁོར་བའི་གཡང་ཁ་འགྲིམ་པའི་རྣམ་ཐར་ཅི་རིགས་བསྐྱངས་འདུག་ཀྱང་། ད་ལྟ་མང་ཆེ་བ་མྱང་འདས་རྡོ་རྗེའི་གྲོང་དུ་ལྷག་ལུས་མེད་པར་ཕེབས་ཟིན།
།སྨྲས་པ། སྙིགས་དུས་མ་རུངས་སེམས་ཅན་གདུལ་ཕྱིར་དགོན་གནས་བཏབ་པའི་བྱིན་རླབས་ཀྱིས། །འཁོར་ཚོགས་རྒྱ་མཚོའི་སྨག་མུན་སེལ་ཞིང་དམ་ཆོས་སྙིང་པོས་ཚིམས་པར་མཛད། །གསེར་ཆོས་གཞུང་བཟང་ཉིན་བྱེད་འོད་ཀྱིས་བོད་ཡུལ་རུ་བཞིར་ཁྱབ་མཛད་ཀྱང༌། །བསོད་ནམས་ཞབས་ཏོག་དབེན་པའི་སྟོབས་ཀྱིས་རེ་ཞིག་ས་རྡོའི་ཁོག་ཏུ་འཐིམ། །ཞེས་བར་སྐབས་ཀྱི་ངལ་གསོའི་ཚིགས་སུ་བཅད་པའོ།

II.6 -
།ལེའུ་དྲུག་པ། ཤངས་པ་བཀའ་བརྒྱུད་ཀྱི་ཉམས་རྒུད་དང་ད་ལྟའི་གནས་བབས།
མཁས་གྲུབ་ཁྱུང་པོ་རྣལ་འབྱོར་གྱིས་ལུས་སྲོག་གི་དཀའ་ཐུབ་དང་ལམ་འཕྲང་གི་འཇིགས་པ་གྲངས་མེད་ལ་ཇི་མི་སྙམ་པར་དཔའ་ངར་ཆེན་པོས་གདོང་དུ་བསུས་ཏེ་སངས་རྒྱས་དངོས་ཀྱིས་ཞབས་བཅགས་པའི་འཕགས་ཡུལ་དུ་ལན་གྲངས་དུ་མ་བྱོན་ཞིང་། མཐའ་ཀླས་པའི་དམ་པའི་ཆོས་དང་ཕྱིའི་རྒྱལ་ཁབ་ཀྱི་རིག་གཞུང་ཇི་སྙེད་ཅིག་སློབ་གཉེར་དང་ཉམས་བཞེས་གནང་ནས་བོད་ཀྱི་ནང་བསྟན་ཆོས་ལུགས་ཀྱི་ལོ་རྒྱུས་ཐོག་ཤངས་པ་བཀའ་བརྒྱུད་ཅེས་པའི་བཀའ་སྲོལ་གསར་དུ་ཕྱེས་ནས་རང་རང་ལུགས་ཀྱི་གདམས་པ་ཕྱོགས་བཅུར་སྤེལ་བར་མཛད་ཀྱང་། ཕྱིས་ཕྱི་ནང་གི་རྒྱུ་རྐྱེན་སྣ་ཚོགས་ཀྱི་གཞན་དབང་དུ་གྱུར་སྟབས་རིམ་བཞིན་ཉམས་རྒུད་དུ་སོང་། སླར་སྤྱི་ལོའི་དུས་རབས་བཅུ་དགུ་པའི་ནང་འཇམ་མགོན་ཀོང་སྤྲུལ་བློ་གྲོས་མཐའ་ཡས་དང་། དུས་རབས་ཉི་ཤུ་པའི་ནང་ཀརྨ་རང་བྱུང་ཀུན་ཁྱབ་སོགས་ཀྱིས་བཀའ་དྲིན་ལ་བརྟེན་ནས་གསེར་ཆོས་ལྔ་ལ་སོགས་པའི་གདམས་པ་ཉམས་ལེན་གྱི་རྒྱུན་མི་ཆད་པར་གནས་ཡོད། སྤྱིར་ཤངས་པ་བཀའ་བརྒྱུད་ཀྱི་ལོ་རྒྱུས་འཕེལ་རིམ་ཞིང་སྐབས། སྐྱེ་བོ་ཕལ་ཆེ་བར་ཁོ་བོ་དང་མཚུངས་པར་དོགས་གཞི་འདི་འདྲ་ཞིག་འཆར་སྲིད་པ་སྟེ། ཤངས་པའི་ཆོས་བརྒྱུད་འདི་སྲོལ་འབྱེད་སྐབས་སུ་ཚོགས་པའི་མཐར་ཐུག་ཁྲི་ཚོ་བརྒྱད་དམ་བཅོ་བརྒྱད་དུ་གྲགས་པ་སོགས་ཀྱི་འོད་ཟེར་སྟོང་ལྡན་གྱི་ལོ་རྒྱུས་མངའ་ཡང་། ཡུད་ཙམ་ཞིག་ལ་ཉམས་དམས་ཤུགས་ཆེ་བྱུང་དོན་ཅི་ཡིན། དེས་ན་སྐབས་འདིར་ཤངས་པ་བཀའ་བརྒྱུད་ཉམས་རྒུད་དུ་སོང་བའི་རྒྱུ་རྐྱེན་དང་། ད་ལྟའི་གནས་བབས། སླན་ཆད་འཕེལ་ཕྱོགས་བཅས་ཀྱི་སྐོར་ཞིང་བ་ལ།

II.6.1 -
དང་པོ། ཉམས་རྒུད་དུ་སོང་བའི་རྒྱུ་རྐྱེན།
དེ་ཡང་རྡོ་རྗེ་ཕྲེང་བ་ལས་དད་པས་བླ་མ་བརྒྱུད་པ་ལས། །མན་ངག་དག་ནི་བསླབ་པར་བྱ། །གང་ཕྱིར་བརྒྱུད་པས་ལུང་གིས་ཁྱབ། བརྒྱུད་པའི་རིམ་པས་གནས་པར་བྱེད་ཅེས་བླ་མ་ཤངས་པའི་བརྒྱུད་པ་འདི་ནི་རྒྱལ་བ་རྡོ་རྗེ་འཆང་ལས་མཁའ་འགྲོ་ནི་གུ་མ། མཁའ་འགྲོ་ནི་གུ་མས་མཁས་གྲུབ་ཁྱུང་པོ་ལ་བརྒྱུད་པ་ནས་བཟུང་། ཆོས་རྗེ་རྨོག་ལྕོག་པ་སོགས་རིན་ཆེན་བདུན་བརྒྱུད་སྔ་མ་གཞན་རྣམས་དང་། མཁས་གྲུབ་རྣམ་གསུམ། རིན་ཆེན་བདུན་བརྒྱུད་ཕྱི་མ་ལ་སོགས་པ་མན་ངག་གིས་བརྒྱུད་པ་ས་མཐར་ཁྱབ་ནས། བརྒྱུད་པའི་ཕྲེང་ཐག་མ་ཆད་ཙམ་དུ་གནས་པར་བྱས་ཡོད་ཀྱང་། ཕྱི་ནང་གི་རྒྱུ་རྐྱེན་སྣ་ཚོགས་པས་ཆིག་བརྒྱུད་བཀའ་རྒྱ་གྲོལ་རྗེས་ཀྱི་སྤྱི་ལོའི་དུས་རབས་བཅུ་བཞི་པ་ནས་རིམ་བཞིན་ཉམས་རྒུད་དུ་སོང་བ་ཡང་། ཆོས་རྗེ་བྱམས་པ་དཔལ་བས་དུས་འགའ་ཞིག་ཙ་ན། ཤངས་པ་འདི་པ་ཉམས་གཅིག་དམའ་རུ་འགྲོ་བ་འདུག་ཅེས་གསུངས་པ་སོགས་ཀྱི་ལུང་བསྟན་རྣམས་དང་ཡོངས་སུ་མཐུན། འོན་ཀྱང་རྗེ་བཙུན་ཀུན་དགའ་གྲོལ་མཆོག་གི་སྐུ་དུས་ཏེ་སྤྱི་ལོའི་དུས་རབས་བཅུ་དྲུག་པའི་ནང་ཤངས་ཆོས་རྫོགས་པར་ཞུ་སའི་བླ་མ་རིན་པོ་ཆེ་རྒྱལ་བའི་འབྱུང་གནས། བ་བོམ་པ་དཀོན་མཆོག་འབྱུང་གནས། བྱ་རྒོད་པ་ཀུན་དགའ་རྒྱལ་མཚན། བྲག་ནག་པ་ཀུན་དགའ་རྒྱལ་མཚན། རིན་པོ་ཆེ་ལྕགས་པོ་རྩེ་པ། རྒྱ་སྒོམ་ལེགས་པ་རྒྱལ་མཚན། གཟད་པ་དཔལ་ལྡན་བློ་གྲོས་སོགས་ཤངས་ཆོས་འཛིན་པའི་བླ་མ་མང་དག་ཅིག་གི་མཚན་བཀོད་ཡོད་པ་དེས་གོང་དུ་དུས་རབས་བཅུ་བཞི་པ་ནས་རིམ་བཞིན་ཉམས་རྒུད་དུ་སོང་ཟེར་བ་དེ་ཡང་སྐབས་དེ་ནས་བཟུང་ཉམས་རྒུད་ཁོ་ན་ལས་དར་འཕེལ་མ་བྱུང་བ་དང་། མཐར་ཡོངས་སུ་ནུབ་ཟིན་པར་ངོས་འཛིན་ན་མ་འགྲིག །ཤངས་པ་བཀའ་བརྒྱུད་ཀྱི་འཕེལ་འགྲིབ་ཀྱི་ལས་དབང་དེ་ནི་མཁས་གྲུབ་ཁྱུང་པོ་འཕགས་ཡུལ་ནས་ཐེངས་དང་པོར་ཕྱིར་ལོག་ཕེབས་སྐབས་བྲམ་ཟེ་རཱད་ཕ་ལས་མེད་ཆོལ་དང་ལྟེ་བསྒྱུར་བསྐུར་ཏེ། སྔར་ཁྱུང་པོར་གཡུ་འབུལ་མཁན་གྱི་སྲུ་མོ་བཟའ་མི་གཉིས་ལ་བུ་གསུམ་བྱུང་བའི་ལུང་བསྟན། བུ་གསུམ་གྱི་མཚན་ཡང་ཆེ་བ་ལ་ཤངས་པ་མགོན་དང་། འབྲིང་པོ་ལ་ཤངས་པ་དར། ཆུང་བ་ལ་ཤངས་ཆུང་ཞེས་གསོལ་བ་དེ་དག་ལས། ཤངས་པ་མགོན་གྱིས་ཤངས་པའི་མགོན་སྐྱབས་སུ་གྱུར་པའི་ཁྱུང་པོ་དཔོན་སློབ་རྣམས་ཀྱིས་ཤངས་པའི་བསྟན་པ་ཉི་མ་ཤར་བ་ལྟར་མཛད་པ་དང་། ཤངས་པ་དར་གྱིས་རིན་ཆེན་རྣམ་བདུན་གྱི་སྐབས་སུ་ཤངས་པའི་ཆོས་བརྒྱུད་འདི་ཉིད་དར་རྒྱས་གོང་འཕེལ་བྱུང་བ། ཤངས་ཆུང་གིས་ཤངས་པའི་ཆོས་བརྒྱུད་འདི་ཉིད་ཕྱིས་སུ་ཉམས་དམས་ཅུང་ཟད་བྱུང་བ་བཅས་བུ་ཆེ་འབྲིང་ཆུང་གསུམ་གྱི་མིང་བརྡ་དེ་དག་གི་མཚོན་དོན་དང་ཧ་ཅང་འདྲ། དེ་ལྟར་རྗེ་མར་པས་ཆོས་དཀའ་ལས་སྲོག་དང་དོ་བསྡོས་པའི། །ཟབ་མོའི་གདམས་ངག་ནུབ་པར་ཕངས་ཞེས་གསུངས་པ་བཞིན་སྲོག་དང་བསྡོས་ནས་བྱུང་བའི་ཟབ་མོའི་གདམས་པ་དེ་དག་ནུབ་ལ་ཉེ་བ་ནི་ཤིན་ཏུ་བློ་ཕངས་དགོས་པའི་གནད་དོན་ཞིག་ཡིན།
II.6.1.1
གཅིག ཕྱི་རྐྱེན། ཕྱི་འཇིག་པའི་སྣོད་ལ་བརྟེན་པའི་ཤངས་པ་བཀའ་བརྒྱུད་ཀྱི་རིང་ལུགས་ཆེན་པོ་འདི་ཉིད་འཁོར་ཡུག་གི་རྒྱུ་རྐྱེན་དུ་མས་ལྷན་ཅིག་བྱེད་རྐྱེན་བྱས་ཏེ་རིམ་བཞིན་ཉམས་རྒུད་ཀྱི་གཡང་སར་ཕྱོགས་དོན་ནི།
༡ ཆོས་བརྒྱུད་གཞན་གྱི་ཆོས་སྲིད་དབང་ཆ་བཙན་པ།
སྟོབས་འབྱོར་མངའ་ཐང་ལྡན་པའི་སྤུར་རྒྱལ་བཙན་པོའི་རྒྱལ་རབས་ཐོར་ཞིག་ཏུ་སོང་བ་ནས་རྒྱལ་ཁྲིམས་ཆོས་ཁྲིམས་ཀྱི་རྨུ་ཐག་ཆད་དེ་བོད་ཡོངས་ལ་གཅིག་འགྱུར་གྱི་སྲིད་དབང་མེད་པར་ལོ་ངོ་བཞི་བརྒྱ་ལ་ཉེ་བའི་རིང་སིལ་བུ་ཁ་ཐོར་དུ་གྱུར། དེའི་རིང་དབུ་མཛད་མང་ན་འདོན་པ་འཁྲུག །ཇུས་དཔོན་མང་ན་ཇུས་གཞི་འཁྲུག་ཅེས་པའི་དཔེ་ལྟར་བོད་ཀྱི་དཔལ་འབྱོར་དང་དམག་སྲིད་སོགས་ལ་སྟོབས་ཤུགས་གཅིག་སྒྲིལ་མ་བྱུང་བར་རུས་ཚན་དང་རྒྱལ་ཕྲན་ཚན་པ་མང་དུ་གྱེས་སྟབས་སྤྱི་ཚོགས་ཀྱི་གོ་བབས་ལ་ཁྲུག་ལོང་བྱུང་སྟེ། སྲིད་འབྱོར་རིག་གསུམ་གྱི་འཕེལ་རྒྱས་ལ་ཚབས་ཆེའི་གྱོང་གུན་ཕོག །འོན་ཏེ་ཁ་བ་བབས་པས་ཡག །ཁ་ཤུལ་ཉི་མ་དྲོ་ཞེས་པའི་དཔེ་ལྟར་སྐབས་དེར་ཆོས་ལུགས་དར་རྒྱས་གོང་སྤེལ་གཏོང་བར་བཀག་འགོག་བཟོ་མཁན་གྱི་སྲིད་དབང་དང༌། ལྷག་པར་རྒྱལ་པོ་འུ་དུམ་བཙན་ལྟ་བུའི་དབང་བསྒྱུར་བ་ཞིག་མེད་པས། ཆོས་ལུགས་གཅིག་ལས་གྱེས་པའི་ཆོས་བརྒྱུད་རྣམས་རིམ་བཞིན་གསར་སྐྱེས་ཀྱི་མྱུ་གུ་འབུས་པར་གལ་ཆེའི་ཆ་རྐྱེན་བསྐྲུན་ཡོད་པས། བོད་སིལ་བུའི་སྨད་ཙམ་ནས་བཀའ་གདམས་པ་དང་ཤངས་པ་བཀའ་བརྒྱུད། མར་པ་བཀའ་བརྒྱུད་སོགས་རང་རང་ཁྱད་ཆོས་ལྡན་པའི་ནང་བསྟན་ཆོས་ལུགས་ཀྱི་ཆོས་བརྒྱུད་མང་དག་ཅིག་སྤང་ལ་ཤ་མོ་བརྡོལ་བ་བཞིན་རིམ་གྱིས་འཕེལ་རྒྱས་བྱུང༌།
སྤྱི་ལོ1262ལོ་ཙམ་ལ་ས་སྐྱ་པའི་སྲིད་དབང་དངོས་སུ་བཙུགས་རྗེས་ས་སྐྱ་པ་བོད་ཆོལ་ཁ་གསུམ་གྱི་བདག་པོར་གྱུར། འགྲོ་མགོན་ཆོས་རྒྱལ་འཕགས་པའི་སྐུ་དུས་སུ་འཕགས་པ་རིན་པོ་ཆེ་ཐུགས་དགོངས་བཟང་བས། བོད་ཀྱི་ཆོས་པ་རྣམས་རང་རང་གི་ཆོས་ལུགས་གང་ཡོད་ལ་འབད་པ་གྱིས་ཞེས་ཟེར་བའི་ཧོར་གྱི་འཇའ་ས་བསྒྲགས་ཞེས་འཁོད་པ་ལྟར། ས་སྐྱ་པས་སྲིད་དབང་བཟུང་མ་ཐག་ཏུ་ཆོས་ལུགས་གྲུབ་མཐའ་རིས་མེད་ལ་འདྲ་མཉམ་གྱི་ཐོབ་ཐང་གནང་ཡོད་ཀྱང་། ཕྱིས་ས་སྐྱའི་དབང་བསྒྱུར་པ་འགའི་དུས་སུ་ནང་དམེ་སོགས་ཀྱི་འགལ་ཟླ་དུ་མས་རྐྱེན་པས་དེ་ལྟར་གྱི་སྲིད་ཇུས་ལ་ཅུང་ཟད་འགྱུར་བ་བཏང་སྟེ་ཆོས་བརྒྱུད་གཞན་ལ་མཐོ་མནན་དམའ་བརྙས་བྱེད་པའི་སྲོལ་ངན་རིམ་གྱིས་རྒྱ་ཆེར་སོང་། དེར་བརྟེན་འབྲི་གུང་པ་སོགས་ཀྱི་ཆོས་ལུགས་གྲུབ་མཐའ་རེ་ཟུང་ལ་ཐད་ཀའི་རྡུང་རྡེག་དང་བརྙས་སྨོས་ཀྱི་གནར་གཅོད་དྲག་པོ་ཕོག་པ་ཕུད། ཆོས་བརྒྱུད་གཞན་རྣམས་ཀྱི་སྲིད་འབྱོར་ཟུང་གི་དབང་ཤུགས་ཇེ་ཞན་དུ་གྱུར་སྟབས་ས་སྐྱ་པ་ལྟར་འཕེལ་རྒྱས་ཕྱིན་མེད་པ་ནི་ཀུན་གྱི་མཐོང་ཆོས་སུ་གྱུར། སྤྱིར་ས་སྐྱ་པ་ཙམ་ཟད་ལོ་རྒྱུས་ཀྱི་གནས་བབས་གང་འདྲ་ཞིག་ཡིན་རུང་སྐབས་དེའི་སྤྱི་ཚོགས་ཀྱི་སྟོབས་ཤུགས་མང་ཆེ་བ་ནི་དབང་བསྒྱུར་གྲལ་རིམ་ཁོ་ནའི་ཁེ་ཕན་ལ་སྲུང་སྐྱོབ་དང་གང་དེའི་དབང་ཤུགས་འཕེལ་རྒྱས་གཏོང་བའི་ལམ་བུར་ཞབས་འདེགས་ཞུ་བ་ཨ་ཅང་བརྗོད་མེད་རེད། དེ་ལྟ་བུའི་ཆོས་སྲིད་ཀྱི་གནས་བབས་འོག་སྲིད་དབང་གི་རྒྱབ་རྟེན་དང་བྲལ་བའི་ཤངས་པའི་ཆོས་བརྒྱུད་འདི་ཡང་འཕེལ་རྒྱས་འགྲོ་བར་བཀག་རྡོ་ངེས་ཅན་ཞིག་འཕྲད་ཡོད།
༢ དགོན་གནས་རྣམས་ལ་གཏོར་སྐྱོན་ཚབས་ཆེན་ཕོག་པ།
མཁས་གྲུབ་ཁྱུང་པོ་སྐུ་གཤེགས་རྗེས་ཀྱི་མི་ལོ་སུམ་བརྒྱ་ལྷག་གི་རིང་ཤངས་པ་བཀའ་བརྒྱུད་ཀྱི་བརྒྱུད་པའི་བླ་མ་རྣམས་ཀྱིས་བོད་ཡུལ་རུ་བཞིར་དགོན་གནས་མང་དུ་བཞེངས་ནས་ཤངས་ཆོས་ཀྱི་བཤད་སྒྲུབ་ཉི་མ་ལྟ་བུ་དར་བར་མཛད་ཀྱང་། ཕྱི་དམག་དང་རང་བྱུང་གི་འཇིགས་པས་དགོན་གནས་རྣམས་ལ་གཏོར་སྐྱོན་ཕོག་སྟེ་ཤངས་པའི་སྒྲུབ་བརྒྱུད་ཀྱི་བསྟན་པ་གོང་འཕེལ་འགྲོ་བར་ཚབས་ཆེའི་གྱོང་གུན་བཟོས་པ་སོགས་ཀྱི་ཞིབ་ཕྲའི་གནས་ཚུལ་དགོན་གནས་དེ་དག་གི་ལོ་རྒྱུས་སྐབས་སུ་གཟིགས་པར་འཚལ།
II.6.1.2
གཉིས། ནང་རྐྱེན།
དཔལ་ལྡན་ཤངས་པ་བཀའ་བརྒྱུད་འདི་ཉིད་ཉམས་རྒུད་དུ་སོང་བ་ནི་ཕྱི་རྐྱེན་ཁོ་ནའི་གཞན་དབང་ཙམ་མིན་པར། གཙོ་ཆེར་གདམས་པ་སྤེལ་བའི་བཀའ་རྒྱ་དོག་པ་དང༌། སྲིད་དབང་ལ་བརྟེན་ནས་ཆོས་བརྒྱུད་སྤེལ་མེད་པ་སོགས་ཀྱི་ནང་རྐྱེན་རྣམས་ལ་རག་ལས་པ་སྟེ།
༡ གདམས་པ་སྤེལ་བའི་བཀའ་རྒྱ་དོག་པ།
སྤྱིར་ཤངས་པ་བཀའ་བརྒྱུད་ཀྱི་གདམས་པའི་ཁུངས་བཙན་ལ་གནད་ཤིན་ཏུ་ཟབ་པས། མི་རབས་བདུན་དུ་ཆིག་བརྒྱུད་ལས་སྤེལ་མ་ཆོག་པ་ནི་གུ་མ་སོགས་ཀྱིས་གསུངས་པ་ཡང་། ཆོས་དྲུག་རྡོ་རྗེའི་ཚིག་རྐང་ལས་ལོག་ལྟས་རྒྱུད་དཀྲུགས་རྩོད་ལྡན་སྙིགས་མའི་དུས། །ཡང་དག་ཆོས་ནི་ཉིན་སྐར་རུས་སྦལ་སྤུ། །ལོག་ཆོས་ཚོང་འདུས་འོ་མའི་ཆོས་སྤྱོད་ཚེ། །ཉམས་མྱོང་ལུང་དང་ཐེམ་ཡིག་བརྒྱན་པ་གཅེས་ཞེས་པ་ལྟར་ལོག་ལྟས་རྒྱུད་དཀྲུགས་པ་དང་སྙིགས་མ་ལྔ་ཆེས་ཆེར་བདོ་བའི་དུས་འདིར། ཆོས་རྣམ་དག་ནི་རི་བོང་གི་རྭ་དང་རུས་སྦལ་གྱི་སྤུ་བཞིན་ཤིན་ཏུ་དཀོན་པས། བསྲེ་ལྷད་ཀྱི་སྐྱོན་མ་འཕོག་པའི་ཕྱིར་ཉམས་མྱོང་གི་ལུང་དང་ཐེམ་ཡིག་གི་བཀའ་རྒྱས་སྡོམ་པ་ཤིན་ཏུ་དགོས་གལ་ཆེ་བར་གསུངས་པ་ལེའུ་གོང་མའི་ནང་དུའང་རགས་ཙམ་བཤད་ཟིན། ཡང་མཁའ་འགྲོ་མ་རྣམ་གསུམ་གྱི་གདམས་པ་ལས་མགྱོགས་ཀྱི་ལས་ནི་ཕྱག་རྒྱའི་ལམ། །མཁའ་འགྲོའི་སྙིང་ཁྲག་ལྟ་བུ་ལ། །ཀུན་ཏུ་བཟང་མོའི་ཞལ་ན་རེ། །སེང་གེའི་འོ་མ་འདྲ་ཞེས་གསུངས། །དཔེར་ན་སེང་གེའི་འོ་མ་དེ། །ཕལ་པའི་སྣོད་དུ་བླུག་པ་ན། །སྣོད་ཀྱང་ཆག་ལ་བཅུད་ཀྱང་འབོ། །རིན་ཆེན་སྣོད་དུ་བླུག་པ་ནི། །དྲི་ཞིམ་རོ་མཆོག་ལྷག་པར་འཕེལ། །བརྟེན་དང་རྩ་ལ་སྟོབས་རྒྱས་པར་འགྱུར་ཞེས་གསུངས་པ་ལྟར་སྣོད་མ་ཡིན་པ་ལ་མཁའ་འགྲོའི་སྙིང་ཁྲག་ལྟ་བུའི་གདམས་ངག་དེ་དག་སྦྱིན་ན་སེང་གེའི་འོ་མ་སྣོད་ཕལ་པའི་ནང་བླུགས་པས་སྣོད་ཆགས་ལ་བཅུད་ཀྱང་བོར་བ་བཞིན། མཐར་གདམས་པའི་སྣོད་དུ་འགྱུར་བའི་གང་ཟག་རང་ཉིད་ཕུང་བར་བྱེད་པ་དང་གདམས་ངག་གི་བཅུད་ཀྱང་ཉམས་འགྲོ་བ་ཡིན། དེས་ན་རྗེ་མར་པས་ཀྱང་ཤིན་ཏུ་གསང་གསང་གསང༌། །རབ་ཏུ་སྡོམས་སྡོམས་སྡོམས། །བརྩོན་པས་སྒྲུབས་སྒྲུབས་སྒྲུབས། །བུ་མཆོག་བརྟེན་བརྟེན་བརྟེན། །གཅིག་ལ་མི་བཏུབ་བོ། །གཉིས་ལ་མ་སྤེལ་ལོ། །ལས་འཕྲོ་ཅན་ལ་མ་ངེས་སོ། །གསེར་གྱི་མཎྜལ་གསུམ་རྩེག་གི་བཀའ་རྒྱ་དགྲོལ། རྒྱ་བླ་མའི་བཀའ་རྒྱ། རྒྱ་ཌཱ་ཀིའི་སྙན་རྒྱུ། རྒྱ་བཀའ་སྲུང་གི་མཐུ་རྒྱ། རྒྱ་མན་ངག་གི་ཟབ་རྒྱའོ་ཞེས་བཀའ་རྒྱ་སྣ་ཚོགས་ཀྱི་རིམ་པས་དམ་པོར་བཏབ་སྟེ་གསང་བར་བྱ་འོས་པར་གསུངས།
འོན་ཀྱང་རྗེ་བཙུན་རྨོག་ལྕོག་པས་སངས་རྒྱས་སེམས་ཅན་གྱི་མེས་པོ་ཡིན། དམ་ཆོས་སེམས་ཅན་གྱི་སྤྱི་ནོར་ཡིན་ཞེས་དང་། རྗེ་མར་པས་མེས་སྟོན་པ་ལ་མགུར་བཞེངས་ནས་གསུངས་པར་དམ་ཆོས་གཞན་ལ་ཕན་གྱུར་ན། །ཤོ་སྦར་མ་བསྡམས་མེས་སྟོན་པ། །སྐལ་བར་ལྡན་པའི་གང་ཟག་ལ། །སྦ་བར་མི་བྱ་མན་ངག་སྦྱིན་ཞེས་གསུངས་པ་བཞིན་སྤྱིར་དམ་ཆོས་ཞེས་པ་སེམས་ཅན་ལ་ཕན་བདེ་སྐྲུན་པའི་སླད་དུ་ཀུན་ལ་དབང་བ་ཡིན་པས། གཞན་ཕན་གྱི་ཕྱིར་གདམས་པ་ཕལ་མོ་ཆེ་མི་སྦ་བར་སྟོན་དགོས་པ་བསྐུལ། འོན་ཏེ་ཟབ་དོན་སྙིང་པོར་དྲིལ་བའི་གདམས་ངག་དེ་དག་དེ་ལྟར་གྱི་བཀའ་རྒྱས་བཅིངས་དོན་ནི། སྒྱུ་འཕྲུལ་རྒྱ་མཚོར་གསང་སྔགས་གསང་ཞེས་བརྗོད་པ་ནི། ཆོས་ལ་སྐྱོན་ཡོད་མ་ཡིན་ཏེ། །སྣོད་མིན་སེམས་ཅན་བློ་ཆུང་ལ། །ཐུགས་རྗེ་ཐབས་ཀྱིས་རབ་ཏུ་གསང་ཞེས་དང་། མཁས་གྲུབ་བེའུ་བུམ་དུ་གྲགས་པར་འདི་ནི་སུ་ལ་ཡང་སྦྱིན་མི་ཉན། དེ་ཡང་མན་ངག་ལ་སེར་སྣ་ཆེ་བ་ག་ལ་ཡིན། མི་བསམ་ངན་གྱི་ལག་ཏུ་མན་ངག་དུག་དང་འདྲ་བ་དཔེ་ཁྱེར་གྱི་ཆོག་པ་འདི་ལྟ་བུ་ཤོར་ན་རང་གི་ལྷག་ལ་འཁོར། བསྟན་པ་དང་སེམས་ཅན་མང་པོ་ལ་གནོད་པ་ཆེན་པོ་བྱེད། སྡིག་ཆེན་པོའི་རྒྱུན་བྱེད་ཅེས་འཁོད་པ་ལྟར་ཟབ་མོའི་གདམས་ངག་དེ་དག་སྣོད་མིན་རྣམས་ལ་གསང་བ་ནི་སེར་སྣ་ཆེ་བ་མ་ཡིན་ལ། སྙིགས་མའི་དུས་འདིར་ཐེག་པ་ཆེན་པོའི་གསང་བ་སྔགས་ཀྱི་སྣོད་ལྡན་ཤིན་ཏུ་དཀོན་པས། མི་བསམ་ངན་གྱི་ལག་ཏུ་གདམས་ངག་དུག་འདྲ་བ་ཤོར་ནས་བསྟན་པ་དང་སེམས་ཅན་ལ་གནོད་འཚེ་བྱེད་པའི་སྡིག་ལས་སྟོབས་པོ་ཆེ་མ་འབྱུང་བའི་ཕྱིར་རོ།
།དེར་བརྟེན་ཤངས་པ་བཀའ་བརྒྱུད་ཀྱི་བསྟན་པ་དབྱར་གྱི་མཚོ་བཞིན་རབ་ཏུ་རྒྱས་པ་དང་། གདམས་ངག་བརྒྱུད་པའི་ཆུ་མགོ་ཡིན་པའི་དུས་སྐབས་བཟང་ཤོས་དེར་དགོས་པའི་དབང་གིས་གདམས་པ་དེ་དག་མང་ཆེ་བ་མི་རབས་བདུན་དུ་ཆིག་བརྒྱུད་ལས་སྤེལ་མེད་པ་དེས། ཆོས་བརྒྱུད་སྤྱི་ཁྱབ་བརྡལ་དུ་འགྲོ་བ་དང་། ལྷག་པར་དུ་ཁྱུང་པོའི་གདམས་པ་རྣམས་ཆ་ཚང་བར་བརྒྱུད་འཛིན་བྱེད་པར་བཀག་རྒྱ་ཆེན་པོ་འཕྲད་ཡོད། འོན་ཀྱང་དྭགས་པོ་བཀའ་བརྒྱུད་ལ་གསང་སྔགས་ཀྱི་གདམས་པ་འགའ་ཞིག་དེ་ལྟར་གྱིས་བཀའ་རྒྱ་དམ་པོས་རབ་ཏུ་བཅིངས་ཀྱང་ཤངས་པ་ལྟ་བུའི་ཆིག་བརྒྱུད་ཁོ་ནས་བསྡམས་པ་སྟེ། རྗེ་ནཱ་རོ་པས་མར་པ་ལོ་ཙཱ་བ་ལ་ཡང་སྙིང་དུ་གྱུར་བའི་མཆོག་གི་གདམས་པ་འདི་བརྒྱུད་པ་བཅུ་གསུམ་ལ་མ་རྫོགས་བར་དུ་གཅིག་བརྒྱུད་ཀྱིས་བཀའ་རྒྱས་ཐོབ་ལ། ཐོས་པ་དགའ་ཞེས་བྱ་བའི་གདུལ་བྱ་དེ་ལ་བྱིན་ཅིག་ཅེས་གསུངས་པ་ལྟར་བདེ་མཆོག་མཁའ་འགྲོ་སྙན་བརྒྱུད་ཀྱི་གདམས་པ་རྗེ་བཙུན་མི་ལར་གནང་བ་འདི་དང་། འཕོ་བ་གྲོང་འཇུག་གི་གདམས་པ་ཟབ་པ་ཁྱད་པར་ཅན་སྲས་དར་མ་མདོ་སྡེ་ལ་གནང་བ་སོགས་ཀྱི་གདམས་པ་ཉུང་ཤས་ཤིག་ལས་མེད། དེས་མ་ཟད་དྭགས་པོ་བཀའ་བརྒྱུད་ཀྱི་ཕྱོགས་ལ་སྙིགས་མ་ལྔ་ཤས་ཆེར་བདོ་བའི་དུས་འདིར་རྡོ་རྗེ་ཐེག་པའི་ཐུན་མོང་མིན་པའི་སྐལ་ལྡན་ཆེས་ཉུང་ཡང་། དྭགས་པོ་ལྷ་རྗེའི་མནལ་བལྟས་དང་མི་ལ་རས་པའི་ལུང་བསྟན་བཞིན་དབང་པོ་བརྟུལ་བའི་སྐལ་དམན་གྱི་གདུལ་བྱ་རྣམས་ཐོག་མར་བཀའ་གདམས་པའི་སྐྱེས་བུ་གསུམ་གྱི་ལམ་གྱི་རིམ་པས་ཁྲིད་མཐར། སྔགས་ཀྱི་ཐུན་མོང་མ་ཡིན་པའི་སྣོད་དུ་གྱུར་ཏེ་ཚེ་གཅིག་ལ་གྲོལ་བའམ། དེ་ལྟར་མ་ཡིན་ནའང་མང་དག་ཅིག་ཕྱག་རྒྱ་ཆེན་པོའི་དོན་མཐོང་ནས་ཕྱིར་མི་ལྡོག་པའི་ལམ་ལ་དགོད་པའི་ཐབས་ལམ་བཀའ་ཕྱག་ཆུ་བོ་གཉིས་འདྲེས་ཞེས་པ་དེ་བྱུང་བ་ཡིན། དོན་འདིར་དམིགས་ནས་ཇོ་ནང་རྗེ་བཙུན་ཆེན་པོས་དེང་སང་གནས་ལུགས་ཕྱག་རྒྱ་ཆེར་གྲགས་པ། འཁོར་ལོ་ཐ་མའི་མདོ་ལུགས་སྒོམ་རིམ་ཞིག །དབང་པོའི་རིམ་པས་སྔགས་དང་གོ་བསྟུན་པས། །འགྲོ་བ་རྣམས་ལ་སྒྲོན་མེ་ལྟ་བུར་གྱུར། །ལམ་འབྲས་པ་ཡི་སྣང་གསུམ་སོགས་དང་མཚུངས་ཞེས་སོགས་གསུངས་པ་ཡིན། དེ་ལྟར་དྭགས་པོ་བཀའ་བརྒྱུད་ཀྱི་བཀའ་གདམས་པའི་སྙིང་བཅུད་ལེགས་པར་བླངས་ཏེ། ལམ་རིམ་ཐར་པ་རིན་པོ་ཆེའི་རྒྱན་སོགས་ཀྱིས་གཞུང་གཏན་ཁེལ་གྱིས་བརྒྱུད་པ་འཛིན་པ་དེ་ནི། རྗེ་ནཱ་རོ་པས་མར་པ་ལོ་ཙཱ་བར་མི་རྒྱུད་ནམ་མཁའི་མེ་ཏོག་ཡལ། །ཆོས་བརྒྱུད་ཆུ་བོའི་གཞུང་དང་ལྡན་ཞེས་གསུངས་པ་བཞིན་དྭགས་པོ་བཀའ་བརྒྱུད་ཀྱི་ཆོས་བརྒྱུད་ཆུ་བོའི་གཞུང་བཞིན་དུ་འཕེལ་ནས་ད་ལྟའི་བར་གནས་ཐུབ་པའི་ཐབས་ལམ་གལ་ཆེན་ཞིག་ཡིན།
༢ ལྟ་བ་འབུར་ཐོན་གྱི་གཞུང་ཆེན་དཀོན་པ།
དེ་ཡང་མཁས་གྲུབ་ཁྱུང་པོ་རྣལ་འབྱོར་རང་ཉིད་ཀྱིས་གསན་པ་དང་ཉམས་སུ་བཞེས་པའི་གདམས་ངག་རྒྱ་མཚོ་ལྟ་བུ་མཐའ་ཡས་ཀྱང་། ཡིག་ཐོག་ཏུ་བཀོད་ནས་ཕྱི་རབས་ལ་འཇོག་གནང་མཛད་པ་ནི་ཆུ་ཐིགས་ཙམ་ཞིག་ཡིན། དེ་ནི་ཕལ་ཆེར་སྐབས་དེའི་དུས་སུ་སྒྲུབ་བརྒྱུད་ཀྱི་ཤིང་རྟ་འཛིན་པ་ཞིག་གིས་ངོས་ནས་གདམས་ངག་ཉམས་ལེན་གཙོ་བོར་བྱེད་པ་ལས་རང་གི་བརྒྱུད་པ་མི་འདྲ་བ་ཞིག་ལོགས་སུ་ཆགས་ཕྱིར་གཞུང་ཆེན་མང་པོ་ཞིག་བརྩམས་གནང་མེད་པའང་ཡིན་སྲིད། མིག་སྔར་རྙེད་སོན་བྱུང་བའི་མཁས་གྲུབ་ཁྱུང་པོའི་བརྩམས་ཆོས་དེ་དག་ལ་གཞིགས་ན། མང་ཆེ་བ་ཡི་དམ་དང་ཆོས་སྐྱོང་གི་སྒྲུབ་ཐབས་ལས་ཚོགས་གཙོ་བོར་འཁོད་པའི་ཡིག་ཆ་ཡིན་པ་ལས། ལྟ་བ་འབུར་ཐོན་བཀོད་པའི་ཡིག་ཆ་ཁ་གསལ་འཇོག་གནང་མཛད་མེད་སྟབས། ཉམས་ལེན་གྱི་ཐབས་ལ་དམིགས་བསལ་ཁྱད་ཆོས་ལྡན་པ་འགའ་ཕུད། ཕྱག་རྒྱ་ཆེན་པོ་གའུ་མ་དང་དོན་དམ་ཕན་མེད་གནོད་སོགས་ཀྱི་ལྟ་གནད་ཞིབ་ཕྲ་ངོས་གཟུང་བར་དཀའ། དེས་ན་པཎ་ཆེན་བསོད་ནམས་གྲགས་པས་ཕྱོགས་འདིར་ལོ་ཙཱ་བ་དཔོན་སློབ། ས་སྐྱ་པ་ཡབ་སྲས། འབའ་ར་བ། འཇག་ཆེན་པ། མཁས་པ་གཞོན་ནུ་བློ་གྲོས་སོགས་སུ་གང་གིས་ཀྱང་ཇི་ལྟ་བ་བཞིན་མ་ཐོན་པའི་ཐལ་འགྱུར་པའི་ལྟ་བ་ཟབ་མོ་བླ་མ་འཇམ་དཔལ་དབྱངས་ཀྱི་དྲིན་ལས་རྙེད་ཅེས་པ་ཡིན་ནོ། འདི་ཡིན་པས་ན། དྭགས་པོ་བཀའ་བརྒྱུད། ཤངས་པ་བཀའ་བརྒྱུད། དཔལ་ལྡན་ས་སྐྱ་པ་རྣམས་ཀྱི་ལྟ་བ་དང་། རང་རེའི་དབུ་མའི་ལྟ་བ་ལ་དམན་མཆོག་གི་ཁྱད་པར་ལེགས་པར་གྲུབ་པ་ཡིན་ཞེས་པ་ལྟར། དྭགས་ས་ཤངས་གསུམ་གྱི་དབུ་མའི་ལྟ་གྲུབ་དེ་གཞུང་འཆད་ཉན་གཙོ་བོར་བྱེད་པའི་རི་བོ་དགེ་ལྡན་པ་དང་བསྡུར་ན་དབྱེ་བ་ཅུང་ཟད་ཡོད་པར་གསུངས།
རིན་ཆེན་བདུན་བརྒྱུད་སྔ་མའི་སྐབས་ཀྱི་མཁས་གྲུབ་ཁྱུང་པོ་ནས་འགྲོ་མགོན་སངས་རྒྱས་སྟོན་པའི་བར་ཏེ། སྤྱི་ལོའི་དུས་རབས་བཅུ་གཅིག་པ་ནས་དུས་རབས་བཅུ་གསུམ་པའི་བར་ཞལ་གདམས་མང་ཆེ་བ་སྙན་ནས་སྙན་དུ་བརྒྱུད་པ་གཙོ་བོར་བྱས་སྟབས། ཡི་གེར་བཀོད་པའི་ཡང་དག་ཁུངས་བཙན་གྱི་དཔྱད་གཞི་ཆེས་ཉུང་བས་ཕྱི་རབས་པ་ཚོས་གདམས་པའི་གནད་རྣམས་ཆ་ཚང་བ་དང་ཡང་དག་པར་ངོས་བཟུང་དཀའ་ཡང་། ཤངས་པའི་བླ་མ་གོང་མ་ཚོའི་རྣམ་ཐར་དང་གདམས་པའི་སྒྲུབ་ཐབས་མང་ཆེ་བ་མཁས་གྲུབ་རྣམ་གསུམ་སྟེ། མཁས་གྲུབ་གཙང་མ་ཤངས་སྟོན་དང་། འཇག་ཆེན་རྒྱལ་མཚན་འབུམ། བསམ་སྡིངས་པ་གཞོན་ནུ་གྲུབ་གསུམ་གྱི་སྐུ་དུས་ཏེ་སྤྱི་ལོའི་དུས་རབས་བཅུ་གསུམ་པའི་སྨད་ཙམ་ནས་བཅུ་བཞི་པའི་བར་དུ་ཡི་གེ་བཀོད། ལྷག་པར་སྤྱིར་ཆོས་ཚུལ་འདིའི་(ནི་གུ་ཆོས་དྲུག་)སྐོར་ལ་སྙན་བརྒྱུད་ཡི་གེར་བཀོད་པའི་བཀའ་དྲིན་ཆེ་བ་ནི། མཁས་བཙུན་རྒྱལ་མཚན་འབུམ་ཉིད་ཡིན་ཏེ། འདི་ཁོ་ནས་ཡི་གེར་མཛད་པ་མང་ངོ་ཞེས་མཁས་གྲུབ་རྣམ་པ་གསུམ་ལས་འཇག་ཆེན་རྒྱལ་མཚན་འབུམ་འདི་ཉིད་ཀྱིས་ཤངས་པའི་སྙན་བརྒྱུད་ཡི་གེར་བཀོད་པ་མང་བ་ཡིན། དེར་བརྟེན་ཤངས་པ་བཀའ་བརྒྱུད་པར་དྭགས་པོའི་ལམ་རིམ་ཐར་རྒྱན་དང༌། རྙིང་མའི་ཀུན་བཟང་བླ་མའི་ཞལ་ལུང་ས་སྐྱ་པའི་ལམ་འབྲས་སྣང་གསུམ་མཛེས་རྒྱན་དགེ་ལུགས་པའི་ལམ་རིམ་ཆེན་མོ་དང་སྔགས་རིམ་ཆེན་མོ་ལ་སོགས་དབང་པོ་རྣོ་འབྲིང་བརྟུལ་གསུམ་དང་གདུལ་བྱ་རབ་འབྲིང་མཐའ་གསུམ་ཀུན་གྱི་བློའི་རིམ་པ་དང་འཚམས་ཤིང་། ལག་ཏུ་ལེན་བདེ་བའི་སྤྱི་ལ་གྲགས་པའི་གཞུང་ལུགས་ཧ་ཅང་ཉུང་བས། ཕྱི་རབས་ཀྱི་ཤངས་པའི་བརྒྱུད་འཛིན་པ་དང་མི་གཞན་རྣམས་ཀྱིས་ཤངས་ཆོས་ཀྱི་ངོ་མཚར་བའི་རིག་གནས་དེ་དག་གི་རིན་ཐང་རྣལ་མ་ཚོར་བ་དང་དམིགས་བསལ་གྱི་ལྟ་གྲུབ་རྟོགས་པར་དཀའ་བའོ།
༣ གཞུང་འཆད་ཉན་གྱི་སྲོལ་རྒྱ་ཆུང་བ།
མཁས་གྲུབ་ཁྱུང་པོ་རྣལ་འབྱོར་གྱི་བརྒྱུད་པ་དེ་རྣམས་ནི་དྭགས་པོ་བཀའ་བརྒྱུད་དང་འདྲ་བར་སྒྲུབ་བརྒྱུད་བཀའ་བབས་ཀྱི་ཤིང་རྟ་འཛིན་པ་ཡིན་པས་བཀའ་བབས་ཀྱི་གདམས་པ་རྣམས་མར་མེ་གཅིག་ལ་གཅིག་མཆེད་པ་ལྟར་བརྒྱུད་པའི་བླ་མ་གཞན་ལ་སྤེལ་བ་ལས་གཞུང་འཆད་ཉན་གྱི་སྲོལ་ཅུང་ཟད་རྒྱ་ཆུང་བ་ཡིན། འོན་ཏེ་བཀའ་གདམས་གསར་རྙིང་གཉིས་ཀའི་ལུགས་སུ་ལམ་གྱི་རིམ་པ་སོགས་ཀྱི་གཞུང་རྣམས་ལ་འཆད་ཉན་རྒྱ་ཆེར་གནང་སྟེ་རིག་པའི་ལམ་ནས་གཞན་ལུགས་དགག་པ་དང་། རང་ལུགས་སྒྲུབ་པ། རྩོད་པ་སྤོང་བ་བཅས་དགག་བཞག་སྤོང་གསུམ་མཛད་རྗེས་མཐར་རང་ལུགས་ཀྱི་གྲུབ་མཐའི་བརྒྱུད་འཛིན་གྱི་དཔུང་ཁག་སྟོབས་ཆེར་གཏོང་གནང་གི་ཡོད། མ་གཞི་ཤངས་པའི་ལུགས་ལ་ཐོག་མར་ས་ཕྱོགས་གང་སར་གནས་ངེས་མེད་དུ་ཕྱིན་ནས་མཚན་ལྡན་གྱི་བླ་མ་དག་ལས་གདམས་པ་གསན་ཞིང་ཐོས་པ་མང་དུ་བསོག་རྒྱུ་གལ་འགངས་ཆེ་བར་བརྩི་ཡི་ཡོད་དེ། མཁས་གྲུབ་ཁྱུང་པོ་འཕགས་ཡུལ་དུ་ཕེབས་སྐབས་བླ་མ་མང་པོའི་དྲུང་ནས་གསང་སྔགས་ཀྱི་གདམས་པ་དུ་མ་གསན་བཞེས་གནང་ཡོད། འོན་ཀྱང་ཁོང་གིས་གཞུང་ཆེན་རྣམས་ལ་སྤྱངས་པ་དཔྱིས་ཕྱིན་པ་མཛད་པའི་སྐོར་མང་པོ་འཁོད་མེད་ཅིང་། ཁོང་ནི་གཙོ་བོ་རྣལ་འབྱོར་པ་ཞིག་ལས་དགེ་བཤེས་མཁས་པ་ཞིག་མིན་སྟབས། ཕྱིས་གདུལ་བྱ་རྣམས་སྐྱོང་དུས་སུ་ཡང་ཞོང་ཞོང་ལ་སོགས་པའི་དགོན་གནས་དེ་རྣམས་ཀྱི་སྤྱི་དཔོན་ཁྱུང་པོས་བྱས་ཏེ། བདག་གིས་ཆོས་ཉན་བཤད་དང་སྒོམ་སྒྲུབ་འབའ་ཞིག་གཙོ་བོར་བྱས་ཞེས་ཤངས་པའི་དགོན་གནས་གཙོ་བོ་རྣམས་སུ་ཆོས་འཆད་ཁྲིད་དང༌། ཁྱད་པར་དུ་སྒོམ་སྒྲུབ་གཙོ་བོར་མཛད་པའི་གནད་དོན་མཚོན་ཡོད། ཡང་ཆོས་རྗེ་རྨོག་ལྕོག་པ་དགུང་ལོ་བཅོ་བརྒྱད་ཙམ་དུ་སོན་སྐབས་མཁས་གྲུབ་ཁྱུང་པོས་བཙུན་ཆུང་ཁྱེད་གཞོན་དུས་ཐོས་པ་གྱིས། སྒོམ་སྔ་ན་འདྲེས་འཁྱེར་ཞེས་གསུངས་པ་ལྟར། རྨོག་ལྕོག་པས་ཀྱང་ཐོག་མར་དབུས་ཕྱོགས་སུ་ཕེབས་ཏེ་བླ་མ་མང་པོའི་དྲུང་ནས་གདམས་པ་མཐའ་ཡས་པ་གསན། དེ་རྗེས་གདམས་ངག་ཐོས་ནས་ཉམས་སུ་བཞེས་ཕྱིར་རྨོག་ལྕོག་བྲག་ཏུ་སྤྱིར་མི་ཟས་སྤངས་ནས་ལོ་བཅུ་གཉིས་ཙམ་སྒྲུབ་པ་ལ་ཞུགས། དེ་དང་དུས་ཡུན་འདྲ་བར་དྭགས་པོ་ལྷ་རྗེས་དྭགས་ལྷ་སྒམ་པོར་ཕེབས་རྗེས་ལོ་བཅུ་གཉིས་འདག་སྦྱར་མཛད་དེ་བཞུགས་དགོས་དགོངས་པ་ལ་སྤྲུལ་པའི་བུད་མེད་གཅིག་གིས་བཅུ་གཉིས་འདག་སྦྱར་བྱས་པ་བས། །བཅུ་གཉིས་བསྟན་པ་སྤེལ་ན་དགའ་ཞེས་གསུངས་པ་བཞིན་ལོ་བཅུ་གཉིས་འདག་སྦྱར་མ་མཛད་པར་བསྟན་པ་སྤེལ་གནང་མཛད། དེར་བརྟེན་ཆོས་རྗེ་རྨོག་ལྕོག་པས་ལོ་བཅུ་གཉིས་སྒྲུབ་པ་ལ་ཞུགས་པ་དང་། དྭགས་པོ་ལྷ་རྗེས་ལོ་བཅུ་གཉིས་བསྟན་པ་སྤེལ་བ་དེ་གཉིས་བསྡུར་ན། ཆོས་བརྒྱུད་དར་འཕེལ་གཏོང་རྒྱུར་དྭགས་པོ་ལ་ཤངས་པ་ལས་མང་བའི་ལོ་བཅུ་གཉིས་ཀྱི་དུས་ཚོད་བྱུང་ཡོད། སྤྱིར་མཁས་གྲུབ་ཁྱུང་པོས་ཞོང་ཞོང་གི་དགོན་གནས་དངོས་སུ་བཏབ་ནས་ཚོགས་པ་རྒྱ་ཆེར་སྤེལ་བའི་དུས་ཡུན་ལོ་ངོ་འགའ་ཤས་ལས་ཟིན་མེད་པ་དང་། ཆོས་རྗེ་རྨོག་ལྕོག་པའི་སྐུ་ཚེ་གཅིག་གི་དུས་ཚོད་མང་ཆེ་བ་ཡང་གདམས་ངག་གསན་པ་དང་སྒྲུབ་པ་ཉམས་ལེན་བྱེད་པ་ཁོ་ནས་འདའ་བར་བྱས་པ་ལ་སོགས་ཀྱིས་མཚོན་པའི་ཤངས་པའི་བླ་མ་ཚོས་གནས་གཞི་དངོས་སུ་བཟུང་ནས་ཚོགས་པ་རྒྱ་ཆེར་བསྐྱངས་ཏེ་གཞུང་འཆད་ཉན་གྱི་སྲོལ་ཁ་འཛིན་པ་དེ་ཙམ་གྱི་རྒྱ་ཆེན་པོ་མེད། དེས་ན་ཀརྨ་ནོར་བུས་ཀྱང་འཇམ་མགོན་ཡོན་ཏན་རྒྱ་མཚོར་ནི་གུ་ཆོས་དྲུག་གི་ཁྲིད་གནང་བར་ཞུས་པས་མདོར་བསྡུས་ཤིག་གནང་ནས། ཉམས་ལེན་གལ་ཆེ། བཤད་པ་དང་ཁྲིད་ཡིག་མང་པོས་དགོས་པ་མེད་ཅེས་གསུངས་པ་དང་། རྗེ་བཙུན་མི་ལས་སྙན་བརྒྱུད་གདམས་ངག་བསྒོམས་ཙ་ན། །ཆོས་བཤད་མང་པོ་རྫུན་དུ་གདའ། །སློབ་གཉེར་འདིས་ཀྱང་དགོས་མཁོ་ཆུང༌། །ཅིས་ཀྱང་ང་རྒྱལ་སྐྱེ་བ་ཡིན་ཞེས་དང་། ངེས་པར་ཆོས་བྱེད་ན་མང་པོ་བསླབས་པ་བས། དོན་ཐོག་ཏུ་དར་ཅིག་བཞག་ན་ཕན་ཞེས་སོགས་གསུངས་པ་ལྟར་སྙན་བརྒྱུད་ཀྱི་གདམས་པ་ཟབ་མོ་དེ་དག་ལ་ཉམས་ལེན་ཁོ་ན་གནད་དུ་བཟུང་བ་ལས་འཆད་ཉན་མང་པོ་བྱས་ན་རྣམ་རྟོག་གི་འཆར་སྒོ་དུ་མ་སྐྱེ་བས་སྒྲུབ་པའི་གེགས་སུ་འགྲོ་བར་བཞེད་པ་དེ་ནི་ཀརྨ་ནོར་བུ་ཙམ་མ་ཟད་ཧ་ལམ་ཤངས་ཆོས་བརྒྱུད་འཛིན་པ་ཕལ་མོ་ཆེའི་མ་གྲོས་གཅིག་ཏུ་མཐུན་པའི་གསུང་དབྱངས་ཤིག་ཡིན། དེ་ལྟར་ནའང་འཕགས་པ་ལང་གཤེགས་ཀྱི་མདོར་བློ་གྲོས་ཆེན་པོ་ཆོས་ཐམས་ཅད་མ་བཤད་ན་ནི་བསྟན་པ་འཇིག་པར་འགྱུར་ཏེ། བསྟན་པ་ཞིག་ན་ནི་སངས་རྒྱས་དང་། རང་སངས་རྒྱས་དང་ཉན་ཐོས་རྣམས་ཀྱང་མེད་པར་འགྱུར་ཞེས་ཆོས་མ་བཤད་ན་བསྟན་པ་སྤྱི་དང་། ཆོས་བརྒྱུད་འདྲ་མིན་རྣམས་ཀྱང་འཇིག་འགྲོ་བར་གསུངས་པས། ཤངས་པའི་ཕྱོགས་ལ་འཆད་ཉན་གྱི་སྲོལ་རྒྱ་ཆུང་བ་དེས་ཕྱི་རབས་པ་ཚོས་ཤངས་པའི་ཐུན་མོང་མ་ཡིན་པའི་ལྟ་གྲུབ་སོགས་ཀྱི་ཟབ་གནད་མང་དག་ཅིག་རྟོགས་པར་དཀའ་བས་ཤངས་པའི་ཆོས་བརྒྱུད་འདི་ཉིད་བརྒྱུད་པ་རང་ཟིན་དུ་འཕེལ་རྒྱས་འགྲོ་རྒྱུར་གྱོང་གུན་ཚབས་ཆེན་ཕོག་ཡོད།
ཡང་མདོ་ལས་ང་མྱ་ངན་ལས་འདས་པའི་རྗེས་ཆོས་ཀྱི་སྙིགས་མའི་དུས་སུ་བདུད་འདི་དག་འཇིག་རྟེན་དུ་འུར་ཞིང་། དར་ནས་ཆོས་ཆེར་ཞེན་པས་ལོག་པར་གཡེམ་པ་བྱེད་ཅིང་། རང་ཉིད་དགེ་བའི་བཤེས་གཉེན་ཞེས་སྒྲོག་ཅིང་སེམས་ཅན་ཐམས་ཅད་འདོད་ཆགས་ལྟ་བའི་དོང་དུ་ལྟུང་བར་བྱས་ཏེ་བྱང་ཆུབ་ཀྱི་ལམ་སྟོར་བར་བྱེད་དོ་ཞེས་གསུངས་པ་ལྟར་དང་། འཇིག་རྟེན་གྱི་ཁ་དཔེར་ཕ་བཟང་པོའི་དངུལ་ཁུག་དེ། བུ་ངན་པས་ཇ་ཁུག་བྱེད་ཅེས་པ་ལྟར། ཤངས་ཆོས་འཆད་ཉན་གྱི་ཉག་ཐག་ཤིན་ཏུ་ཕྲ་བའི་དུས་སུ་ཆོས་བརྒྱུད་འདིའི་བརྒྱུད་འཛིན་པ་གོང་མ་རྣམས་ཀྱིས་གཏོད་པའི་ལྟ་སྒོམ་སྤྱོད་གསུམ་གྱི་སྲོལ་བཟང་དྲི་མ་མེད་པ་དེ་དག །ཟབ་རྫུ་སྨྲ་བའི་ཆོས་པ་དང་བླ་མའི་མིང་འཛིན་འགའ་ཞིག་གིས་ཆོས་བརྒྱུད་གཞན་དང་ཉ་ཉུང་མཉམ་བསྲེས་བྱེད་པ་སྟེ། གྲུབ་མཐའ་རིས་སུ་མ་མཆིས་པའི་ལྟ་བ་ཡང་དག་ཅིག་ཁྱེར་ནས་དམ་ཆོས་གཤའ་མ་ཞིག་མི་བྱེད་པར་མཁས་གྲུབ་ཁྱུང་པོའི་ལུགས་བཟང་ལ་བཙོག་སྐྱོན་གཏོང་བའི་གནས་ཚུལ་ཡང་ཐོན་ཡོད་པ་སྟེ། རྗེ་བཙུན་ཏཱ་ར་ནཱ་ཐས་ཟབ་དོན་འཁྲུལ་མེད་འདི་ཡིན་ཞེས། །ངེས་ཏིག་སྨྲ་བ་ཤིན་ཏུ་དཀོན། །མི་གྲ་གཤོག་ཕྱིར་ཐོབ་ཆོས་ཙམ། འོལ་གཅོད་བྱེད་པས་རྒྱལ་ཁམས་གང་ཞེས་འཁྲུལ་མེད་ཀྱི་ཟབ་དོན་རྣམས་བློ་ཐོག་ཏུ་འབབས་པ་སྨྲ་མཁན་ཤིན་ཏུ་དཀོན་པ་དང་། རྗེ་བཙུན་ཀུན་དགའ་གྲོལ་མཆོག་གི་རྣམ་ཐར་དུ་ཁྲིད་ནི་གུ་རང་དོན་དུ་གཉེར་བ་འབའ་ཞིག་བྱུང་ཞེས་རྗེ་བཙུན་ཏཱ་ར་ནཱ་ཐ་དང་ཀུན་དགའ་གྲོལ་མཆོག་གཉིས་བྱོན་དུས་ཀྱི་སྤྱི་ལོའི་དུས་རབས་བཅུ་དྲུག་དང་བཅུ་བདུན་པའི་ནང་ཤངས་པ་བཀའ་བརྒྱུད་ཀྱི་ཐོབ་ཆོས་དམ་དུམ་སོགས་ལ་བརྟེན་ནས་རང་དོན་འབའ་ཞིག་གི་ཆེད་དུ་འཁྲུལ་མེད་ཀྱི་ཤངས་པའི་ཆོས་གཞུང་ལ་ངེས་མེད་ཀྱི་འཆད་འགྲེལ་བྱེད་པའི་དུག་སྦྲུལ་གྱི་ཁ་རླངས་ཀྱང་ཅུང་ཟད་ཕོག་མྱོང་བ་མཚོན། གནད་དུ་མ་འཁེལ་བའི་ལོག་བཤད་དེ་དག་གིས་ཀྱང་ཤངས་ཆོས་ཀྱི་ལྟ་གྲུབ་ཡང་དག་ཡུན་རིང་དུ་གནས་པར་འགོག་རྐྱེན་ཤུགས་ཆེན་བཟོས་ཡོད།
༤ སྲིད་དབང་ལ་བརྟེན་ནས་ཆོས་བརྒྱུད་སྤེལ་མེད་པ།
དེ་ཡང་སངས་རྒྱས་ཆོས་ལུགས་བོད་དུ་དར་རྗེས་བོད་ཀྱི་ལོ་རྒྱུས་གར་སྟེགས་ཐོག་རང་རང་གི་བརྒྱུད་སྲོལ་འཛིན་པའི་ཆོས་བརྒྱུད་མི་འདྲ་བ་མང་དུ་ཐོན་པ་སྟེ། དུས་རབས་བརྒྱད་པའི་ནང་རྙིང་མ་དང་། བོད་སིལ་བུའི་སྨད་ཙམ་ནས་རིམ་བཞིན་བཀའ་གདམས་པ། བཀའ་བརྒྱུད་པ། ཞི་བྱེད་པ། ས་སྐྱ་པ། ཇོ་ནང་བ་སོགས་མང་། ལྷག་པར་དུ་སྤྱི་ལོ1253ལོར་ཡོན་རྒྱལ་རབས་ཀྱི་གོང་མ་སེ་ཆེན་ཧན་གྱིས་འགྲོ་མགོན་ཆོས་རྒྱལ་འཕགས་པ་བོད་ཁྲི་སྐོར་བཅུ་གསུམ་གྱི་བདག་པོར་བསྐུར་བ་ནས་བཟུང་ས་སྐྱ་པས་བོད་ལ་དབང་བསྒྱུར་བྱེད་པའི་འགོ་ཚུགས། དེ་རྗེས་རིམ་བཞིན་ཆོས་ལུགས་གྲུབ་མཐའི་དབར་གྱི་ཆོས་དང་མཐུན་པའི་རིག་གཞུང་གི་འགྲན་རྩོད་དེ་སྲིད་དབང་དང་འབྲེལ་རྐྱེན་ཕྱི་རབས་ཀྱི་ཆོས་པ་མང་པོ་ཞིག་གིས་རང་ཉིད་ཀྱི་ཆབ་སྲིད་ཁེ་ཕན་མངོན་འགྱུར་ཡོང་སླད། འཇམ་པོའི་ལྷ་ཆོས་དེ་དྲག་པོའི་མཚོན་དུ་བརྩིས་ནས་གཏུམ་སྤྱོད་ཀྱི་གཡུལ་ལས་མང་དུ་བཤམས་པ་སྟེ། ས་སྐྱ་པས་ཡོན་རྒྱལ་རབས་ཀྱི་གོང་མ་ཧུ་པི་ལི་སེ་ཆེན་ཧན་གྱི་བུ་ཐེའི་མུར་བྷོ་ཁས་ཁྲིད་པའི་དམག་དཔུང་དང་དབུས་གཙང་ཁྲི་སྐོར་བཅུ་གསུམ་གྱི་དམག་དྲངས་ནས་སྤྱི་ལོ1290ལོར་འབྲི་གུང་གླིང་ལོག་ཅེས་པའི་དོན་རྐྱེན་བླངས་ཏེ་འབྲི་གུང་མཐིལ་གྱི་ལྷ་ཁང་ཆེན་པོ་མེར་བསྲེགས་ཤིང་། སྐྱ་སེར་བསྡོམས་པས་མི་གྲངས་ཆིག་ཁྲི་ལྷག་ཙམ་བསད་པ་དང་། སྤྱི་ལོ1434ལོར་ཕག་གྲུའི་ནང་ཁུལ་དུ་ཡབ་སངས་རྒྱས་རྒྱལ་མཚན་དང་སྲས་གྲགས་པ་འབྱུང་གནས་གཉིས་དབར་སྲིད་དབང་འཕྲོག་རེས་བྱེད་པའི་འཐབ་རྩོད་སྟག་ལོའི་སྡེ་གཟར་ཆེན་མོ་ཞེས་པ་ལངས། ཀརྨ་ཞྭ་དམར་སྐུ་ཕྲེང་བཞི་པའི་སྐབས་ཀྱི་སྤྱི་ལོ་1503ལོར་རིན་སྤུངས་པ་དོན་ཡོད་རྡོ་རྗེས་སེ་འབྲས་དགེ་གསུམ་གྱི་ཁ་གནོན་དུ་ཀརྨ་དགོན་གསར་བཏབ་པ་སོགས་ཀརྨ་ཀཾ་ཚང་གི་བརྒྱུད་འཛིན་པ་ཚོས་བྱ་ཐབས་སྣ་ཚོགས་སྤེལ་ཏེ་དགེ་ལུགས་པའི་ཕྱོགས་ཁག་ལ་ཕོག་ཐུག་བཏང་། དེ་རྗེས་དགེ་ལུགས་པས་དགའ་ལྡན་ཕོ་བྲང་གི་སྲིད་དབང་བཙུགས་རྗེས་བཀའ་དགེ་བསྒྱུར་སོགས་ཐབས་རྣམ་པ་སྣ་ཚོགས་ཀྱིས་ཐོག་ནས་བཀའ་བརྒྱུད་པར་དགྲ་ལན་གྱ་ནོམ་པ་སློག་པ་དང་། དེ་མིན་གྲུབ་མཐའ་འགའ་ཤས་ཀྱི་དགོན་པ་ཡང་བཙན་ཤེད་ཀྱིས་དགེ་ལུགས་པར་བསྒྱུར་བ་སོགས་བྱས། དེ་ལྟར་གྲུབ་མཐའི་དབྱེ་བ་ཤུགས་ཆེར་འཛིན་པ་དེ་དག་གིས་བོད་ཀྱི་སྲིད་དབང་བཟུང་བའི་སྐབས་སུ། བོད་ཡོངས་ཀྱི་མི་ཤུགས་དངོས་ཤུགས་རྣམས་གང་ཐུབ་ཅི་ཐུབ་ཀྱིས་གཅིག་ཏུ་བསྒྲིལ་ནས་རང་ཉིད་ཀྱི་ཆོས་བརྒྱུད་ཁོ་ན་དར་ཁྱབ་ཏུ་གཏོང་རྒྱུ་དེ་བསམ་བློ་གཅིག་འགྱུར་བཟོ་བའི་ཐབས་ལམ་གལ་ཆེན་ཞིག་ཏུ་བརྩིས་ནས་དབང་བསྒྱུར་གྲལ་རིམ་གྱི་སྲིད་དབང་སྲ་བརྟན་ཡོང་བའི་དམིགས་འདུན་ཡང་སྒྲུབ་པར་བྱས་ཡོད།
འོན་ཀྱང་མཁས་གྲུབ་ཁྱུང་པོས་སྣ་དྲངས་པའི་ཤངས་པ་བཀའ་བརྒྱུད་པའི་བརྒྱུད་འཛིན་རྣམས་ཀྱིས་སྔ་བར་ཕྱི་གསུམ་དུ་སྲིད་དབང་གི་རལ་གྲི་ལག་ཏུ་འཆང་མ་མྱོང་ལ། སྡིག་ལས་ཀྱི་གཡུལ་ངོ་ཡང་གང་བྱུང་དུ་བཤམས་མ་མྱོང་སྟེ་སྔར་མཁས་གྲུབ་ཁྱུང་པོས་ཞོང་ཞོང་དགོན་ཕྱག་བཏབ་རྗེས་ཀྱི་ཚོགས་པ་ཁྲི་ཚོ་བརྒྱད་ཚོགས་པའི་དུས་སུ་བླ་མ་བཤད་གྲྭ་བ་ཆེན་མོ་ཕྲག་དོག་སྐྱེས་ཏེ། གྲྭ་པ་ཉུང་བའི་སྟོན་དུས་ཤིག་གློ་བུར་དུ་དམག་མི་ལྔ་སྟོང་གིས་ཞོང་ཞོང་དགོན་གྱི་མཐའ་བསྐོར་ནས་གྲྭ་ས་བཅོམ་པ་དང་བླ་མ་བཀྲོང་རྒྱུའི་གྲབས་བྱས་ཀྱང་། མཁས་གྲུབ་ཁྱུང་པོས་ངས་ཆོས་བྱས་ནས་གནོད་འཚེའི་དམག་མི་བྱེད་ཅེས་གསུངས་ཏེ་ཏིང་ངེ་འཛིན་སྤྲུལ་པའི་དམག་གིས་དེ་རྣམས་རི་ཀླུང་ཀུན་ཏུ་དེད་ནས་ཤི་རྨས་མེད་པར་ཕམ་པར་བྱས། དེ་ནི་བླ་མ་རྡོ་རྗེ་གདན་པས་དཔལ་ལྡན་ཟླ་བ་གྲགས་པ་ཡིས། །སྟོབས་ལྡན་རྡོ་ཡི་སེང་གེ་བསྐུལ། །དུ་རུ་ཁ་ཡི་དམག་བཟློག་ཀྱང༌། །ཤི་རྨས་མེད་པ་ངོ་མཚར་ཆེ་ཞེས་གསུངས་པའི་དཔལ་ལྡན་ཟླ་བ་གྲགས་པའི་ངོ་མཚར་བའི་མཛད་པ་འདི་དང་འདྲ། གཞན་ཡང་ཆོས་རྗེ་བྱམས་པ་དཔལ་ཤངས་ལུང་པའི་ཕུར་བཞུགས་པའི་དུས་ཤིག་ཞོང་ཞོང་དུ་དམག་བྱུང་ནས་གླུ་ཊ་པཱ་ལས་བཟློག་པ་ལ་འདི་ཚོས་ཞོང་ཞོང་སྐུ་འབུམ་ལ་གནོད་པ་བྱས་པས་འདི་རྣམས་བསད་པ་ཡིན་ཟེར་ནས་ངས་མ་གསོད་བྱས་ཡོད་གསུངས་ཞེས་ཕྱི་དམག་གིས་ཤངས་པའི་གདན་ས་གཙོ་བོ་ཞོང་ཞོང་གི་སྐུ་འབུམ་ལ་གནོད་འཚེ་བྱས་ཀྱང་ཆོས་རྗེ་བྱམས་པ་དཔལ་གྱིས་དེ་རྣམས་ཀྱི་སྲོག་མ་གཅོད་པའི་ཞལ་ཏ་མཛད། གནད་དོན་དེ་དག་གི་ཐོག་ནས་དམ་པའི་ཆོས་ཀྱི་བརྒྱུད་པ་འཛིན་པ་ཞིག་གིས་ངོས་ནས། གཞན་ལ་ཕར་གཡུལ་ལས་བཤམ་རྒྱུ་ལྟ་ཞོག །ཐ་ན་རང་ཉིད་ལ་འཇིགས་པ་བྱུང་བའི་དུས་སུ་ཡང་སྲོག་གཅོད་གོང་ན་སྡིག་པ་མེད་ཅེས་པ་ལྟར་སེམས་ཅན་གྱི་སྲོག་གཅོད་པ་དེ་སྡིག་ལྟུང་ཆེ་ཤོས་སུ་གཟིགས་ནས་སྤོང་བར་མཛད།
ཡང་མཁས་གྲུབ་ཆོས་རྗེའི་རྣམ་ཐར་དུ་ཁྱད་པར་དུ་ས་སྐྱ་པ་ནང་གི་འཁྲུག་ལོང་མགོ་ཚུགས་ཤིང་གོ་ཆ་མཚོན་ཆ་ལ་སོགས་པ་མཐོང་། མི་རྣམས་གོ་ཆའི་གཏམ་སྨྲ། བཤད་ཉན་སྒོམ་སྒྲུབ་ཀྱི་ཚུལ་ལས་གཡེལ། དཔོན་སློབ་དམ་ཚིག་གི་འབྲེལ་བ་མ་བསྲུང་བ་མཐོང་ཐོས་གོ་ནས་མཐོ་རིས་ཀྱི་ལུས་ཐོབ་པ། ལས་དགེ་སྡིག་གི་བདེ་འབྲས་ཤེས་པར་གྱུར་ཀྱང་། ངན་སོང་སྡུག་བསྔལ་གྱི་རྒྱུ་ལ་སྤྱོད་པར་འདུག་སྙམ་སྟེ། ད་འདི་རྣམས་རྣ་བས་མི་ཐོས་པ་དཀའ་སྟེ། མིག་གིས་མི་མཐོང་བའི་ས་གཅིག་ལ་འགྲོ་དགོས་སྙམ་ཞེས་འཁོད་པ་ལྟར། མཁས་བཙུན་གཞོན་ནུ་གྲུབ་ཀྱི་སྐུ་དུས་སུ་ས་སྐྱ་པའི་དབང་བསྒྱུར་པ་ནང་ཁུལ་གྱི་འགལ་བ་རྣོ་ངར་དུ་ཕྱིན་ཏེ། ནང་འཁྲུག་གི་ཡོ་ལང་བྱུང་ནས་གོ་མཚོན་གྱི་འཐབ་ཁ་སྦྱར་བ་དེར། སྐབས་དེའི་ཤངས་པའི་ཆོས་བརྒྱུད་འཛིན་པའི་བླ་མ་གལ་ཆེན་ཞིག་གི་ངོས་ནས། མཁས་བཙུན་གཞོན་ནུ་གྲུབ་ངེས་འབྱུང་སྐྱོ་ཤས་ཀྱིས་རབ་ཏུ་གཙེས་ཏེ་དེ་ལས་ལྡོག་པའི་ཐུགས་སེམས་དབང་མེད་དུ་འཁྲུངས་པ་ཡིན། དེ་ལྟ་བུའི་དྲག་པོ་གཡུལ་གྱི་ལས་སྦྱོར་ལ་མི་དགའ་ཞིང་། སྒྲུབ་པ་ཁོ་ན་གཙོ་བོར་འཛིན་པའི་ཤངས་ཆོས་ཀྱི་བརྒྱུད་འཛིན་པ་ཚོས་སྲིད་དབང་བདག་གིར་བཟུང་བར་ག་ལ་ནུས།
དེས་ན་མཁས་བཙུན་གཞོན་ནུ་གྲུབ་ཀྱིས་དཔལ་ལྡན་ཤངས་པའི་བཀའ་བརྒྱུད་འདི་རྒྱ་གར་གྱི་རྡོ་རྗེ་གདན་པ་དང་། བོད་ཡུལ་གྱི་སངས་རྒྱས་གླང་རི་ཐང་པའི་རྣམ་ཐར་སྐྱོང་དགོས། གཙང་སྒོམ་གྱི་བརྒྱུད་འཛིན་ཡིན། འཇོལ་ཉོག་གི་བརྒྱུད་འཛིན་མིན་ཞེས་དང་། ཇོ་ནང་ཏཱ་ར་ནཱ་ཐས་རྩ་བའི་བླ་མའི་བར་དུ་རིམ་བྱོན་པའི། །བཀའ་བརྒྱུད་(འདིར་ཤངས་པར་གོ་)ནོར་བུའི་ཕྲེང་བ་འཛིན་པ་རྣམས། ཕལ་ཆེར་གཙང་སྒོམ་ངུར་སྨྲིག་འཆང་བ་ལ་ཞེས་སོགས་གསུངས་པ་ལྟར་ངུར་སྨྲིག་རྒྱལ་མཚན་འཆང་བའི་ཤངས་པའི་བརྒྱུད་འཛིན་པ་རྣམས་ནི་འཕགས་ཡུལ་གྱི་བླ་མ་རྡོ་རྗེ་གདན་པ་དང་། བོད་ཀྱི་དགེ་བཤེས་གླང་རི་ཐང་པ་གཉིས་ཀྱི་རྣམ་ཐར་སྐྱོང་མཁན་ཤ་སྟག་ཏུ་གྱུར་པ་ལོ་རྒྱུས་ཀྱི་ཤོག་ངོས་སུ་བྲིས་པའི་དྲང་སྲོང་གི་བདེན་ཚིག་ཉག་གཅིག་ཡིན་པས། མཁས་གྲུབ་ཁྱུང་པོ་རང་ཉིད་ཀྱིས་ཀྱང་དེས་ན་བདག་གི་བརྒྱུད་འཛིན་ཐམས་ཅད་ཀྱང་ཀུན་ལས་ཁྱད་པར་དུ་འཕགས་པས་ན། བསགས་པ་ཡང་རབ་འབའ་ཞིག་འབྱུང་བར་འགྱུར་ཞེས་གསུངས་པའི་ལུང་བསྟན་དོན་དུ་གནས་པས། ཆོས་བརྒྱུད་འདིས་འཇིག་རྟེན་སྲིད་དབང་དང་ཁྱིམ་པའི་སྟོབས་ཤུགས་སོགས་ལ་བརྟེན་ནས་ཆོས་བརྒྱུད་དར་འཕེལ་གཏོང་བའི་འདོད་རྔམས་དང་ཧམ་སེམས་བཅངས་པ་ཉིན་མོའི་སྐར་མ་དང་དགུན་དུས་ཀྱི་འཇའ་ཚོན་བཞིན་ནོ།།
༥ ཆོས་བརྒྱུད་ནང་ཁུལ་གྱི་སྒྲིག་འཛུགས་གཅིག་སྒྲིལ་མེད་པ།
དེ་ཡང་དཔལ་གསང་བ་འདུས་པ་ལས་དམ་ཚིག་དམ་པ་ཐམས་ཅད་ཀྱི། །རིག་པ་འཛིན་པའི་གཙོ་བོར་འགྱུར་ཞེས་དམ་ཚིག་ནི་དམ་པ་ཐམས་ཅད་ཀྱི་གཙོ་བོར་འགྱུར་བར་གསུངས་པ་དང་། མཁས་གྲུབ་ཁྱུང་པོས་གདུལ་བྱ་དུས་ལ་ཐེབས་འགྱུར་ཅིག །རྟེན་འབྲེལ་ཐབས་ལ་མཁས་གྱུར་ཅིག །འབྲེལ་ཚད་དོན་དང་ལྡན་གྱུར་ཅིག་ཅེས་འབྲེལ་ཚད་ཀྱི་མི་དང་སེམས་ཅན་ཀུན་ལ་དོན་དང་ལྡན་པའི་དམ་ཚིག་བསྲུང་དགོས་པའི་བསྔོ་སྨོན་མཛད་ཀྱང་། ཁོང་སྐུ་འཚོ་བཞུགས་ཀྱི་དུས་སུ། ཞོང་ཞོང་དུ་འདུས་པའི་གྲྭ་སློབ་ཀྱི་ཚོགས་པ་ནང་ཁུལ་དུ་མཐུན་སྒྲིལ་གྱི་སྟོབས་ཤུགས་གཅིག་སྒྲིལ་མ་བྱུང་བ་སྟེ། གྲྭ་སློབ་ཁྲི་ཚོ་ལྔ་འདུས་ཙ་ན། དེ་རྣམས་ཟང་ཟིང་གི་བྱ་བ་འབའ་ཞིག་ལ་མགོ་འཁོར་ཏེ་ཉན་བཤད་དང་སྒོམ་སྒྲུབ་ལ་དེ་ཙམ་གྱི་དོ་སྣང་མི་བྱེད་པ་དང་། ཐེངས་ཤིག་གསང་བ་སྤྱི་རྒྱུད་ཀྱི་ཁྲིད་གཟུག་རྒྱུའི་འཚོ་བ་འདྲེན་པ་ལ། དབུས་གཙང་ཁམས་གསུམ་གྱི་གྲྭ་པ་རྣམས་མ་འཆམ་པར། དམ་སེལ་དུ་འགྲོ་བར་བྱུང་བ། ཡང་ཁམས་པའི་གྲྭ་པ་རྣམས་དབང་ཤུགས་ཆེ་བས་མཁས་གྲུབ་ཁྱུང་པོའི་སྐུ་གདུང་ཡང་བླ་མའི་ཞལ་ཆེམས་བཞིན་དམར་གདུང་མ་བཞག་པར་ཞུགས་འབུལ་བྱས་པ་སོགས་ཀྱི་དམ་ཚིག་ཉམས་པར་འགྱུར་བའི་གནད་དོན་མང་དག་ཅིག་ཐོན་པས། མཁས་གྲུབ་ཁྱུང་པོའི་སྐུ་ཚེའི་མཇུག་ཏུ་རྨོག་ལྕོག་པ་རང་གི་གཟིམ་གཡོག་བྱེད་དུ་འཇུག་སྐབས་ཀྱང་། ཆོས་རྗེ་རྨོག་ལྕོག་པས་བླ་མ་ལ་གཟིམ་གཡོག་བྱེད་པ་མི་ཐོབ་པ་ཙམ་དུ་འདུག །ངས་ཁམས་པ་དང་གྲྭ་པ་རྒོད་ལ་ཚན་ཆེ་བ་འདི་ཚོའི་གསེབ་ཏུ་གཟིམ་གཡོག་མི་འོང་བས། ཕྱིའི་གཟིམ་ཁང་གི་དཀོན་གཉེར་བྱེད་པ་ཞུ་ཞེས་འཁོད་པ་ལྟར། དབང་ཤུགས་དང་འབོར་ཚད་ཆེ་བའི་གྲྭ་པ་དེ་དག་གི་ཁྲོད་ཆོས་རྗེ་རྨོག་ལྕོག་པ་བླ་མ་ཤངས་པའི་གཟིམ་གཡོག་བྱ་རྒྱུར་ཡང་ཐུགས་ཁྲལ་ཆེན་པོ་བྱུང་བ་མཚོན། དེས་མ་ཚད་མཁས་གྲུབ་ཁྱུང་པོའི་སྐུ་དུས་སུ་ཞོང་ཞོང་ཕུད་པའི་དགོན་གནས་གཞན་མང་ཡང་། གནམ་བདག་ཆོས་ལུགས་དང་རི་བོ་དགེ་ལྡན་པ་སོགས་ལྟ་བུའི་སྒྲིག་འཛུགས་ཀྱི་སྟོབས་ཤུགས་མེད་པར། ཆོས་བརྒྱུད་ཀྱི་འཆི་གསོན་ཐམས་ཅད་མི་སྒེར་གྱི་དད་སེམས་དང་སྒྲུབ་པ་ཁོ་ནའི་སྟེང་དུ་གནས་སྟབས། བླ་མ་འདས་རྗེས་གནས་གཞི་དེ་དག་ཀྱང་རིམ་བཞིན་ཁ་ཐོར་དང་ཉམས་རྒུད་དུ་སོང་བ་སོགས་ནི། རྗེ་མར་པས་བུ་ཆེན་སློབ་མའི་འཁོར་ཚོགས་ལ། །དད་པ་དམ་ཚིག་བཀྲ་ཤིས་ཡོད་ཅེས་དང་། ང་ཡི་བརྒྱུད་པ་རིན་ཆེན་འདི་ཉིད་ལ། །ཉེས་ལྟུང་མེད་པའི་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །གདམས་ངག་ཟབ་མོའི་ཉམས་ལེན་ལ། །ནོར་འཁྲུལ་མེད་པའི་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག་ཅེས་མར་པ་བཀའ་བརྒྱུད་ཀྱི་བུ་སློབ་བརྒྱུད་འཛིན་ཐམས་ཅད་སེང་གེ་དང་ཁྱུང་གི་ཕྲུ་གུ་བཞིན་ཇེ་བཟང་ཇེ་བཟང་དུ་འགྲོ་བའི་བཀྲ་ཤིས་པའི་མདུན་ལྗོངས་དེ་དང་ཡོངས་སུ་མི་འདྲ་བར། དམ་ཚིག་གི་གཉའ་ཤིང་གད་ཆག་ཏུ་སོང་བས། ཞོང་ཞོང་གིས་གཙོས་པའི་དགོན་གནས་དེ་དག་དང་ཤངས་པ་བཀའ་བརྒྱུད་ཀྱི་ཆོས་བརྒྱུད་སྤྱི་ཉམས་རྒུད་དུ་སོང་། དེས་ན་སངས་རྒྱས་སྟོན་པའི་རྣམ་ཐར་མྱ་ངན་འདས་ཆུང་མར་ཡང་གཉན་སྟོན་རི་གོང་པ་ཆེན་པོས་ཆོས་རྗེ་སངས་རྒྱས་སྟོན་པ་ལ་ཁྱོད་ལ་ཚོགས་པ་འབུམ་ཚོ་བགྲངས་པ་འཚོགས་ནས། ཡོལ་དུ་གྲྭ་པའི་རྨང་རྡོ་མི་ཤོང་གསུང་བ་ལ། དུས་ངན་གྱི་གྲྭ་པ་རྨུ་རྒོད་དེ་ཙམ་གྱི་ཁ་ལོ་མི་ཆུན་ནས་དམ་སེལ་དུ་འགྲོ་ཞུས་པས། འོ་ན་དེ་རྣམས་ཀྱིས་ཐར་པའི་དོན་བྱས་ནས་སོ་སོར་གྱེས་པའི་རྟེན་འབྲེལ་བྱས་པའི་ཆོག་གིས་གསུངས་ནས་གྱེས་པའི་རྟེན་འབྲེལ་བྱས་སོ་ཞེས་འཁོད་པ་ལྟར་གཉན་སྟོན་རི་གོང་པས་ཆོས་རྗེ་སངས་རྒྱས་སྟོན་པར་ཚོགས་པ་འབུམ་ཕྲག་འབྱུང་བར་ལུང་བསྟན་ཡང་། གྲྭ་སློབ་རྣམས་རྨུ་རྒོད་ཤིན་ཏུ་ཆེ་སྟབས་སྒྲིག་འཛུགས་གཅིག་བསྒྲིལ་ཡོང་དཀའ་བས། དེ་རྣམས་སོ་སོར་གྱེས་པའི་རྟེན་འབྲེལ་ཡང་མཛད་དགོས་བྱུང་།
༦ བརྒྱུད་འཛིན་པའི་གྲས་སུ་སྦས་པའི་རྣལ་འབྱོར་མང་བ།
དེ་ཡང་ཇོ་བོ་རྗེའི་ལམ་གྱི་སྒྲུབ་ཐབས་ལས་བྱང་ཆུབ་སྒྲུབ་ལ་རགས་ལས་པས། །སྒྲུབ་པ་ལྷུར་བླངས་སྙིང་པོར་བྱ་ཞེས་གསུངས་པ་ལྟར་ཤངས་པའི་ཆོས་བརྒྱུད་འཛིན་པའི་སྐྱེས་ཆེན་རབ་དང་རིམ་པས་སྐུ་ཚེ་གང་པོའི་དུས་ཚོད་ཕལ་ཆེ་བ་དབེན་པའི་གནས་སུ་སྒྲུབ་པ་ལ་གཞོལ་བར་མཛད་ནས། དེ་དག་མང་ཆེ་བ་གྲུབ་པའི་རྩེ་མོར་སོན་ཡང་སྐྱེས་ཚད་ཀྱི་ཡོན་ཏན་ཐམས་ཅད་འཇིག་རྟེན་ཆོས་བརྒྱད་ཀྱི་མཛེས་མས་བསླུས་ཏེ་གཞན་ལ་སྨྲ་བའི་སྲོལ་དེ་ཙམ་མེད་པ་སྟེ། མཁས་གྲུབ་ཁྱུང་པོས་སེམས་ཅན་གྱི་བསམ་པ་སོགས་ཇི་ལྟ་བ་བཞིན་མཁྱེན་ནས་སློབ་མ་རྣམས་ལ་ཅུང་ཙམ་བཤད་པས། མཁའ་འགྲོ་སུ་ཁ་སིདྡྷིས་སྙིགས་མའི་སེམས་ཅན་ལོག་ལྟ་ཅན། །རྒྱལ་བས་ཀྱང་ནི་མ་ཐུལ་ཞིང༌། །མཁྱེན་པའི་སྤྱན་ལ་བདུད་འཛིན་པས། །ཡོན་ཏན་སྦས་པའི་རྣལ་འབྱོར་གྱིས་ཞེས་གསུངས་པ་དང་། ཡང་གྲུབ་ཆེན་རཱ་ཧུ་ལ་བོད་ནས་ཞལ་གྱེས་ཁར་མང་ཕྱིན་ལྡན་དུ་མཁས་གྲུབ་ཁྱུང་པོར་བདུད་རྩི་ཚིག་དྲུག་གསུངས་པ་ལས་སྙིགས་མའི་དུས་ཀྱི་སེམས་ཅན། །ཞེ་སྡང་ཕྲག་དོག་ཆེ་བས། །ཡོན་ཏན་ཅི་སྐྱེས་ཐམས་ཅད། །བུམ་ནང་མར་མེ་བཞིན་དུ། །རྟག་ཏུ་སྦ་བར་གྱིས་ཤིག་ཅེས་སོགས་གསུངས་པ་ལྟར་མཁས་གྲུབ་ཁྱུང་པོའི་རྩ་བའི་བླ་མ་རྣམས་ཀྱིས་ཁོང་ལ་དུས་དང་རྣམ་པ་ཀུན་ཏུ་ཅི་སྐྱེས་ཀྱི་ཡོན་ཏན་རྣམས་གང་ཐུབ་ཀྱིས་སྦ་བའི་སྐུལ་མ་ཡང་ཡང་མཛད། དེ་མིན་མཁས་གྲུབ་ཤངས་སྟོན་གྱི་རྣམ་ཐར་དུ་ནང་གི་ཡོན་ཏན་ཐམས་ཅད་གསང་བའི་གནད་ཡིན་གསུངས་ནས། རང་རྒྱུད་པའི་ཚུལ་བཟུང་ནས། ཡོན་ཏན་ཐམས་ཅད་སྦས་པའི་རྣལ་འབྱོར་མཛད་ཅེས་མཁས་གྲུབ་ཤངས་སྟོན་ཉིད་རྟོགས་པའི་ཡོན་ཏན་གྱི་གོ་འཕང་མཐོན་པོར་གཤེགས་ཀྱང་རྣམ་པ་ཐམས་ཅད་དུ་རང་རྒྱུད་པའི་ཚུལ་བཟུང་བ་ཡིན། དེ་བཞིན་དྭགས་པོ་ལྷ་རྗེས་ཀྱང་ཆོས་རྗེ་རྨོག་ལྕོག་པར་ཉམས་མྱོང་གསང་བ་འདི་ཁོ་ན་གདམས་ངག་གི་གནད་དུ་གདའོ་ཞེས་དང་། ཆོས་རྗེ་སངས་རྒྱས་སྟོན་པས་རི་པ་དང་འདྲ་བ་མི་ཚེ་རི་ལ་བསྐྱལ་བ་ལ་རི་པའི་མིང་མེད་པ་ཞིག་དགོས་པ་ཡིན་ཞེས་སོགས་མང་དུ་གསུངས། གཞན་ཡང་གཉན་སྟོན་རི་གོང་པ་དང་སྦས་པའི་རྣལ་འབྱོར་བརྒྱ་རྩ་བརྒྱད་ལ་སོགས་སྦས་པའི་རྣལ་འབྱོར་གྱི་བརྟུལ་ཞུགས་འཛིན་པ་མང་བ་དང་། དེ་དག་གིས་མཛད་པའི་བརྩམས་ཆོས་ཀྱང་ཅུང་ཉུང་བ། གནས་གཞི་མང་ཆེ་བ་རི་ལུང་ཁུག་ཀྱོག་ཏུ་བཅའ་བ་སོགས་ཀྱིས་རྐྱེན་པས། ཁོང་རྣམས་ཀྱི་མཚན་སྙན་ས་ཁྱབ་རྡོ་ཁྱབ་ཏུ་ཕྱིན་མེད་པ་དང་། ཆོས་བརྒྱུད་འདི་ཐོས་མཁན་དང་ཚུལ་བཞིན་དུ་ཤེས་མཁན་ཡང་དེ་ཙམ་གྱི་མང་པོ་བྱུང་མེད། འོན་ཀྱང་གངས་ཅན་བོད་ཀྱི་ཆོས་ལུགས་རིག་གནས་ཀྱི་བཤུལ་ལམ་སྟེང་ལྟ་སྒོམ་སྤྱོད་གསུམ་རབ་ཏུ་འཛོམས་པའི་ཤངས་པ་བཀའ་བརྒྱུད་ཀྱི་སྦས་པའི་རྣལ་འབྱོར་པ་དེ་དག་གིས་ཁོག་ཏུ་མར་ཁུ་འཐུང་ལ་ཁ་བོང་བས་ཕྱིས་ཞེས་པའི་དཔེ་ལྟར་ནང་དུ་རྟོགས་པའི་ཉི་མ་ཤར་ཡང་ཕྱིར་མི་མངོན་པའི་མཛད་རྗེས་ངོ་མཚར་ཅན་བགྲང་ལས་འདས་པ་ཞིག་འཇོག་གནང་མཛད་ཡོད།
དེ་ལྟར་སྐྱེས་ཚད་ཀྱི་ཡོན་ཏན་ཐམས་ཅད་ཕྱི་ལ་ངོམས་པ་དང་། དབང་སྲིད་ཀྱི་འཇའ་ཚོན་ལ་ལག་ཟུང་འཐམས་ཏེ་ཆགས་ཞེན་བྱེད་སྲོལ་མེད་པའི་ཤངས་པའི་བརྒྱུད་འཛིན་པ་དེ་དག་གིས་སྤྱི་བྱིངས་དང་མི་མཐུན་པའི་ཆོས་བརྒྱུད་ཅིག་མ་ཉམས་དར་སྤེལ་གཏོང་བར་དེ་ཙམ་གྱི་ཐུགས་སྣང་མཛད་མེད་པ་དང་། ཡང་བཀའ་གདམས་ཕ་ཆོས་སུ་ཡོན་ཏན་རྒྱ་ཆེན་པོ་ཤེས་ཀྱང་། སེམས་ཐོག་ཏུ་དྲིལ་ནས་ཉམས་སུ་ལེན་པ་མ་ཤེས་ན། ཁོང་མི་ཆོས་ཀྱི་ལེགས་བཤད་དང་འདྲ། ཕུགས་སུ་ཕན་པ་དཀའ་བར་གདའ་བས། ཅིས་ཀྱང་ཉམས་ལེན་ཅིག་བྱ་འཚལ་སྙམ་ཞེས་འཁོད་པ་དང་འདྲ་བར་ཆོས་བརྒྱུད་གཅིག་གི་ནུས་ཤུགས་གཙོ་བོ་གདམས་པ་ཉམས་སུ་ལེན་ནས་ནང་སེམས་ཀྱི་རྟོགས་པའི་ཡོན་ཏན་གོང་མཐོར་གཏོང་རྒྱུ་ཁོ་ནར་བརྩིས་སྟབས་ཆོས་བརྒྱུད་ཀྱི་དཔུང་ཁག་རྒྱ་བསྐྱེད་བྱེད་པར་ངེས་ལྡན་གྱི་བཀག་རྒྱ་བཟོས་ཡོད། མ་གཞི་ལོ་རྒྱུས་ཀྱི་བགྲོད་ལམ་སྟེང་ཤངས་ཆོས་ཀྱི་བརྒྱུད་པ་འཛིན་པའི་སྐྱེས་ཆེན་བསམ་གྱིས་མི་ཁྱབ་པ་མང་དུ་བྱོན་ཡང་། གདམས་པ་ཉམས་ལེན་ཁོ་ནར་མི་ཚེའི་རྩོལ་བ་མང་ཆེ་བ་བཏང་བས་ཆོས་བརྒྱུད་དར་སྤེལ་གཏོང་བར་སྟོབས་ཤུགས་ཀྱི་གཟོང་ཁ་སྒྲིལ་བའི་གོ་སྐབས་དབེན་པ་དང་། དེ་མིན་ཆོས་བརྒྱུད་འདི་ཉིད་ཀྱི་བཀའ་རྒྱ་དོག་པའི་གདམས་པ་དང་། ཅུང་ཉུང་བའི་ལྟ་གྲུབ་ཀྱི་གཞུང་ལུགས། རྒྱ་ཆུང་བའི་འཆད་ཉན་གྱི་སྲོལ་ཁ། ཁ་ཐོར་བའི་བརྒྱུད་འཛིན་གྱི་ཚོགས་པ། སྦས་པའི་བརྟུལ་ཞུགས་འཛིན་པ་ཅུང་མང་བ་སོགས་ཀྱི་རྒྱུ་རྐྱེན་མང་པོའི་གཞན་དབང་དུ་སོང་བའི་ཁར། ལྷག་པར་དུ་དཔོན་པོའི་སྤྱན་ལ་མ་ཕྱིན་ན། གང་བྱས་སྐྱོན་དུ་གྱུར་པའི་ལོ་རྒྱུས་ཀྱི་དུས་སྐབས་ནང་ཕོ་རོག་མི་བཞོག་ལྷ་འདྲེ་དང་། འཇག་མ་མི་བཞོག་རླུང་པོ་ཞེས་པའི་དཔེ་ལྟར་ཤངས་པའི་ཁ་ཐོར་གྱི་དགོན་གནས་དང་ཉམ་ང་བའི་ཚེ་སྲོག་ལ་ཕྱི་དགྲ་བོའི་འཇིགས་པ་ལན་མང་བྱུང་སྟེ་རིམ་བཞིན་ཉག་ཕྲ་བར་གྱུར་མོད། མཁས་གྲུབ་ཁྱུང་པོ་དང་གང་དེའི་བརྒྱུད་པ་འཛིན་པ་རྣམས་ཀྱི་ལོ་རྒྱུས་གནས་བབས་ལ་དམན་པའི་འདུ་ཤེས་འཛིན་ན་མི་འཚམ་པ་སྟེ། བདེ་མཆོག་གི་རྒྱུད་ལས་མོས་པ་དུ་མའི་སེམས་ཅན་ལ། །སྤྱོད་པ་སྣ་ཚོགས་སྟོན་མཛད་དེ། །སྣ་ཚོགས་ཚུལ་གྱི་གདུལ་བྱ་ལ། །ཐབས་ནི་སྣ་ཚོགས་སྟོན་པ་ཡིན། གལ་ཏེ་མོས་པར་མ་གྱུར་ཀྱང་། །སྨོད་པ་དག་ཏུ་མི་བྱ་སྟེ། །ཆོས་ཉིད་བསམ་མི་ཁྱབ་དྲན་བྱ་ཞེས་ཁམས་དང་མོས་པ་མི་འདྲ་བའི་སེམས་ཅན་གྱི་དོན་དུ་མ་ངེས་པའི་སྤྱོད་པ་སྣ་ཚོགས་སྟོན་གནང་བར་རང་ཉིད་མ་མོས་ཀྱང་སྨད་པར་མི་རིགས་པ་དང་འཇམ་དཔལ་མཚན་བརྗོད་ལས་ཀྱང་གྲུབ་མཐའ་འཁྲུལ་པ་ལྡན་པ་མིན། །ནོར་བ་ཐམས་ཅད་རྣམ་པར་སྤངས་ཞེས་ཆོས་ཉིད་དོན་དམ་གྱི་གནས་ལུགས་འབའ་ཞིག་སྟོན་པའི་གྲུབ་མཐའ་གང་ཞིག་འཁྲུལ་བ་དང་ལྡན་པ་མ་ཡིན་ཀྱང་། ནོར་བ་ཡོད་ན་སྤངས་དགོས་པ་སོགས་གསུངས་པའི་ཕྱིར་རོ།

II.6.2 -
།གཉིས་པ། ཤངས་པ་བཀའ་བརྒྱུད་ཀྱི་ད་ཡོད་དགོན་སྡེའི་ཉམས་ལེན་སྐོར།
བོད་ཀྱི་ཆོས་འབྱུང་ལོ་རྒྱུས་ཀྱིས་གཙོས་ཡིག་རིགས་མི་འདྲ་བ་འགའ་ཞིག་གི་དཔྱད་གཞིའི་ནང་ཤངས་པ་བཀའ་ནང་ཤངས་པ་བཀའ་བརྒྱུད་ཀྱི་སྐོར་འཁོད་པ་ནི་བོད་བརྒྱུད་ནང་བསྟན་གྱི་ཆོས་བརྒྱུད་གཞན་དང་བསྡུར་ན་ཆེས་ཉུང་བ་སྟེ། དེབ་ཐེར་དམར་པོར་ཤངས་པ་བཀའ་བརྒྱུད་ཀྱི་སྐོར་ཅི་ཡང་འཁོད་མེད་ལ། ཆོས་འབྱུང་མེ་ཏོག་སྙིང་པོ་སྦྲང་རྩིའི་བཅུད་ཀྱི་རྩོམ་པ་པོ་ཉང་ཉི་མ་འོད་ཟེར་(སྤྱི་ལོ1124ནས1192ལོ་བར་)ནི་མཁས་གྲུབ་ཁྱུང་པོའི་སྐུ་ཚེའི་མཇུག་ཏུ་བྱོན་པས་མཁས་གྲུབ་ཁྱུང་པོར་རྒྱུས་མངའ་ཞིབ་ཙམ་ཡོད་སྲིད་ཀྱང་། ཆོས་འབྱུང་འདི་ཉིད་དུ་བོད་སིལ་བུའི་སྨད་དུ་རྒྱ་བལ་ཁ་ཆེ་སོགས་སུ་སློབ་གཉེར་ལ་ཕེབས་པའི་ལོ་ཙཱ་བ་དང་མཁས་གྲུབ་འགའ་ཞིག་བཀོད་པའི་ནང་ཁྱུང་པོ་རྣལ་འབྱོར་གྱི་སྐོར་ཡེ་ནས་འཁོད་མེད། དེ་མིན་བོད་སོག་ཆོས་འབྱུང་དང་། བཀའ་བརྒྱུད་པའི་གྲུབ་མཐའ་སོགས་སུ་ཆོས་བརྒྱུད་འདི་ཉིད་ཞར་བྱུང་གི་ཚུལ་དང་ཆོས་བརྒྱུད་སྣ་ཚོགས་ཀྱི་ཁོངས་སུ་ས་བཅད་མ་སྟོང་ཙམ་དུ་སྨོས་པ་ཤ་སྟག་ཡིན། ཡང་རྒྱ་ཡིག་གི་དེབ་'གསང་སྔགས། བོད་བརྒྱུད་ནང་བསྟན་གྱི་ལྐོག་གྱུར་རིག་གནས་ཞེས་པའི་ལེའུ་གཉིས་པའི་དོན་ཚན་བཞི་པར་བོད་ཀྱི་གསང་སྔགས་སློབ་དཔོན་རིམ་བྱོན་བརྗོད་པའི་སྐབས་མཁས་གྲུབ་ཁྱུང་པོའི་མཚན་ཙམ་ཡང་ཐོན་མེད་ལ། བོད་ཀྱི་སངས་རྒྱས་ཆོས་ལུགས་འཕེལ་རིམ་མདོར་བསྡུས་སུ་སྤྱི་ལོ་དུས་རབས་བཅུ་བཞི་པ་དང་བཅོ་ལྔ་པའི་སྐབས། རྗེ་ཙོང་ཁ་པ་དང་མཁས་གྲུབ་རྗེ་དགེ་སློབ་གཉིས་ཀས་སྔ་རྗེས་སུ་ཤངས་པ་བཀའ་བརྒྱུད་ཀྱི་བརྒྱུད་འཛིན་པ་འགའ་ལས་ཤངས་ཆོས་གསན། དེ་རྗེས་ཆོས་བརྒྱུད་འདི་ཉིད་གོ་རྒྱུ་ཐོས་རྒྱུ་མེད་པར་ནུབ་སོང་བ་ཡིན་ཞེས་འཁོད་པ་སོགས་ནས་མཚོན་པའི་དཔྱད་ཡིག་མང་དག་ཅིག་ལ་དུས་སྐབས་དེ་ནས་བཟུང་ཤངས་ཆོས་འདི་ཉིད་མི་ཡུལ་ནས་ཡོངས་སུ་ཡལ་ཟིན་པ་ལྟ་བུར་ངོས་འཛིན་བྱེད་ཀྱི་ཡོད། གནད་དོན་དེ་དག་ལ་དམིགས་ནས་ཤངས་པ་བཀའ་བརྒྱུད་ཀྱི་གདམས་པ་ཉམས་སུ་ལེན་མུས་ཀྱི་དགོན་སྡེ་དགོན་སྡེ་འགའ་ཞིག་བརྗོད་པ་ལ།
II.6.2.1 Shongshong
གཅིག །ཞོང་ཞོང་རྡོ་རྗེ་གདན་གྱི་ཉམས་ལེན་སྐོར།
ཤངས་པ་བཀའ་བརྒྱུད་ཀྱི་མ་དགོན་དང་བོད་རང་སྐྱོང་ལྗོངས་ཁུལ་གྱི་ད་ཡོད་ཤངས་པའི་དགོན་སྡེ་གཅིག་པུ་ཞོང་ཞོང་དགོན་དུ་ཤངས་པ་བཀའ་བརྒྱུད་ཀྱི་ཆོས་སྤྱོད་ཕྱག་ལེན་རྣམས་རང་རང་གི་ལུགས་ལྟར་ཐབས་བརྒྱ་ཇུས་སྟོང་གིས་ཉམས་སུ་བསྟར་བཞིན་པ་ལགས་ཀྱང་། དེང་ཕྱི་ནང་གི་བར་དུ་གཅོད་པའི་ཚོགས་དང་རྒྱ་རྐྱེན་དུ་མའི་གཞན་དབང་དུ་སོང་སྟབས། ནི་གུའི་གསེར་ཆོས་ལྔ་ལ་སོགས་པའི་ཤངས་པའི་གདམས་ངག་གི་སྙིང་པོ་རྣམས་གྲྭ་སློབ་ཐུན་མོང་ཐོག་སྒྲུབ་པ་ཉམས་ལེན་གྱི་རྣམ་ཐར་སྐྱོང་བའི་སྐལ་པ་མ་མཆིས། འོན་ཏེ་དེ་ཁོ་ན་ཙམ་རྒྱུ་མཚན་བྱས་ནས་ཤངས་པ་བཀའ་བརྒྱུད་མིང་གི་ལྷག་མ་ཙམ་དུ་གྱུར་ཞེས་བརྗོད་ན་ཤིན་ཏུ་མི་འཐད་དེ། བསྟན་པ་ལ་འཕེལ་འགྲིབ་ཡོང་བ་རྒྱལ་བའི་བཀའ་ཡིན་པས་སངས་རྒྱས་ཀྱི་བསྟན་པ་སྤྱི་ཉམས་རྒུད་དུ་འགྲོ་བ་དང་། སྐྱེ་འགྲོ་ཕལ་ཆེར་ཚོགས་གཉིས་ཀྱི་རྒྱགས་ཕྱེས་དབུལ་ཞིང་། མ་རྟོགས། ལོག་རྟོགས། ཐེ་ཚོམ་དང་བཅས་པའི་བློ་ངན་གསུམ་གྱིས་དབང་དུ་བསྒྱུར་བའི་དུས་མཐའ་འདིར་སྒྲུབ་བརྒྱུད་ཀྱི་བསྟན་པ་ཉམས་དམས་སུ་འགྲོ་བ་ནི་དེ་བས་སྨོས་ཅི་དགོས།
སྤྱི་ལོ2006ལོར་ཁྱུང་པོ་གསུམ་པ་ཚུལ་ཁྲིམས་མགོན་པོ་སྐུ་མ་གཤེགས་གོང་། སྤྱན་སྔར་འདུས་པའི་སྣོད་ལྡན་གྱི་བུ་སློབ་རྣམས་ལ་སྐྱབས་རྗེ་ཀ་ལུ་རིན་པོ་ཆེ་སྐུ་གོང་མ་ནས་བརྒྱུད་པའི་ཤངས་པའི་ཆོས་ཀྱི་དབང་ལུང་ཁྲིད་གསུམ་གང་ལྕོགས་ཅི་ནུས་ཀྱིས་བསྩལ་འདུག་པ་ལ། གཙོ་བོར་ཟབ་ཆོས་རྣམས་ཀྱི་སྔོན་འགྲོ་བསགས་སྦྱངས་ཆད་ལུས་མེད་པ་དང་། དེ་རྗེས་ཟབ་ལམ་ལྷ་བཞི་དྲིལ་སྒྲུབ་ཀྱི་དབང་། དེའི་གཞུང་ལས་འཕྲོས་ཏེ་རླུང་བུམ་ཅན་སྒོམ་ལུགས་ཅུང་ཙམ། ཡང་རྒྱུད་སྡེ་ལྔ་དང་། རྡོ་རྗེའི་ཚིག་རྐང་། མགུར་མཚོའི་ལུང་། འཕོ་བ་ཡེ་ཤེས་སྐར་ཁུང་མ། ཕྱག་ཆེན་གའུ་མ་སོགས་ཀྱི་དབང་ལུང་འགའ་རེ་ཡང་བསྩལ། འོན་ཀྱང་འཇིག་རྟེན་གྱི་ཁ་དཔེར་ཆོས་ཟབ་སར་བདུད་སྡང་ཞེས་སུ་གྲགས་པ་ལྟར་སྐབས་དེའི་དུས་སུ་གཅིག་ནས་དགོན་པ་གཞུང་གི་འབྱོར་མཁོས་ཞན་པ་དང་། སྙིགས་དུས་ཀྱི་བློ་དམན་རྣམས་རྡོ་རྗེ་སློབ་དཔོན་དང་རབ་ཏུ་བྱུང་བའི་མཛད་པ་འགའ་ཞིག་བློར་མི་ཤོང་བར་རྟེན་ངན་སྨྲས་བྱེད་པའི་ངན་སོང་གི་ས་བོན་ཁོ་ན་སྒྲུབ་རྒྱུར་མོས་སྟབས་དགེ་འདུན་གྱི་འཚོ་བ་སྦྱོར་བ་དང་། གདམས་ངག་གི་བརྒྱུད་རྐང་འཛིན་པའི་ཁུར་ཆེན་ཕྲག་པར་བཞེས་པའི་སློབ་དཔོན་རྣམས་ལ་ཕྱི་ནང་གསང་བའི་བར་ཆད་མཐའ་དག་གིས་ཆེས་ཟབ་པའི་གདམས་པ་འགའ་ཞིག་གཞན་ལ་སྦྱིན་འདོད་ཀྱི་རེ་བ་སྐོམ་པ་ཆུ་འདོད་ལྟར་བཅངས་ན་ཡང་། གདམས་ངག་གི་ཆུ་ཐིགས་ཆགས་པའི་སྐལ་པ་བཞི་ལྡན་ གྱི་གདུལ་བྱ་མ་རྙེད་པས། ཀུན་སློང་བཟང་པོས་ཡོངས་སུ་བསྐུལ་བའི་གདམས་ངག་གི་གྲུ་ཆར་དེ་དག་མི་མཇེད་འཇིག་རྟེན་ཁམས་ཀྱི་ལོ་ཏོག་འབྲས་བཟང་སྨིན་པའི་རྒྱུར་སོང་མེད་པ་ནི་རང་གཞན་ཀུན་གྱི་བསོད་ནམས་ཀྱི་འབྲས་བུ་ཟད་པའི་རྒྱུ་ཁོ་ནར་མཐོང་།
ཡང་ཤངས་པའི་ཟབ་གསང་ཆོས་ཀྱི་མངའ་བདག་ཀརྨ་ངེས་དོན་ཆོས་ཀྱི་བློ་གྲོས་མཆོག་གིས་རྒྱལ་དབང་ཀརྨ་པ་སྐུ་ཕྲེང་བཅུ་བདུན་པའི་ཁྲི་འདོན་སྐབས་ཞོང་ཞོང་དགོན་དུ་ཞབས་ཟུང་བཅགས་ནས་སྒྲུབ་ཁང་གདབ་རྒྱུའི་བཀའ་དང་མཐུན་རྐྱེན་ཅི་རིགས་བསྩལ་ཡང་། མཆོག་འགྱུར་གྱི་ཐུགས་བཞེད་དེ་གདུལ་བྱའི་སྨོན་ལམ་གྱིས་མཚམས་སྦྱར་ཐུབ་མེད། སྐབས་དེར་ཁོང་ཉིད་སྟག་སྣ་དགོན་དུ་བཞུགས་ཞག་གཅིག་གནང་བ་ལས་ཤངས་ཆོས་ཀྱི་གདམས་པ་བསྩལ་ཁོམས་བྱུང་མེད། དེ་རྗེས་སླར་སྤྱི་ལོ1985ལོར་ཀརྨ་ངེས་དོན་ཆོས་ཀྱི་བློ་གྲོས་མཆོག་གིས་གཞིས་རྩེ་བསམ་གྲུབ་རྩེ་གསོལ་མགྲོན་ཁང་དུ་ཞོང་ཞོང་དགོན་གྱི་སྐྱབས་རྗེ་ཚུལ་ཁྲིམས་མགོན་པོ་འཁོར་དང་བཅས་པའི་གྲྭ་སློབ་བཅུ་ཙམ་ལ་རྟ་མགྲིན་གསང་སྒྲུབ་ཀྱི་རྗེས་གནང་དང་། སྨན་བླའི་རྗེས་གནང་། རྒྱུད་སྡེ་ལྔ་དང་མགོན་པོའི་རྗེས་གནང་། ལྷ་བཞི་དྲིལ་སྒྲུབ་ཀྱི་རྗེས་གནང་། ནི་གུ་མ་དང་སུ་ཁ་སིདྡྷིའི་ཚེ་སྒྲུབ་སོགས་ཀྱི་གདམས་པ་ཕྲན་བུ་འགའ་བསྩལ་བས། ཞབས་ལ་བརྡབས་ཆག་བྱུང་སྟེ་རྟེན་འབྲེལ་གྱི་མཚན་མ་ཅུང་ཟད་ལོག་པའི་གནས་ཚུལ་ཐོན་འདུག་པ་སོགས། རྒྱལ་སྲས་ཞི་བ་ལྷས་ཤི་བའི་སྦྲུལ་དང་ཕྲད་གྱུར་ན། །ཁཱ་ཡང་མཁའ་ལྡིང་ལྟ་བུར་སྤྱོད་ཅེས་གསུངས་པ་བཞིན་ཤངས་པའི་ཆོས་བརྒྱུད་ཀྱི་མེ་ཏོག་སྐམ་ལ་ཉེ་སྐབས་བར་ཆད་ཀྱི་ཐོག་སེར་དྲག་པོ་རྒྱུན་མི་ཆད་པར་བབས་པ་ནི་ཤངས་པ་བཀའ་བརྒྱུད་ཀྱི་ལོ་རྒྱུས་ཐོག་ཡིད་སྐྱོ་བའི་སྣང་ཚུལ་ཉག་གཅིག་གོ
།དེ་མིན་ཤངས་པ་བཀའ་བརྒྱུད་ཀྱི་བླ་རབས་སུམ་ཅུ་སོ་དྲུག་པར་གྲགས་པ་ལྷ་རྩེ་སྐྱབས་མགོན་རིན་པོ་ཆེའམ་ཤངས་སྟོན་སྐྱབས་མགོན་སངས་རྒྱས་དཔལ་གྱིས་མཁས་གྲུབ་ཁྱུང་པོའི་གདན་ས་ཞོང་ཞོང་དུ་སྔ་ཕྱིར་ཐེངས་གཉིས་ཕེབས་པ་སྟེ། ཐེངས་དང་པོ་ནི་སྤྱི་ལོ་2000ལོར་གྲུབ་ཆེན་ཨ་མོ་གྷ་མཁས་གྲུབ་ཁྱུང་པོར་གདམས་པ་སྒོ་སྐྱེལ་དུ་ཕེབས་པའི་མཛད་པ་དང་མཐུན་པའི་རྟེན་འབྲེལ་ལ་དགོངས་ཏེ་ཁྱུང་པོ་ཚུལ་ཁྲིམས་མགོན་པོ་དང་གང་དེའི་བུ་སློབ་འཁོར་དང་བཅས་པ་རྣམས་དང་། ཞོང་ཞོང་གྲོང་ཚོའི་སྐྱ་མི་སོགས་ཁྱོན་མི་གྲངས་བརྒྱ་ཙམ་ཟིན་པའི་གདུལ་བྱ་རྣམས་ལ་སྔར་ཚོགས་པའི་མཐར་ཐུག་ཁྲི་ཚོ་བརྒྱད་ཡོད་ཤུལ་གྱི་ཀ་གཉིས་མར་ནི་གུ་མ་དང་སུ་ཁ་སིདྡྷིའི་ཚེ་སྒྲུབ་གནང་། ཐེངས་གཉིས་པ་ནི་སྤྱི་ལོ་2006ལོར་སྐྱབས་རྗེ་ཚུལ་ཁྲིམས་མགོན་པོ་སྐུ་གཤེགས་རྗེས་གདུང་རྟེན་ཕུལ་བར་ཕེབས་པ་ཙམ་ལས་གདམས་པ་གནང་མེད། དགོན་འདིའི་གཞི་གསུམ་གྱི་ཕྱག་ལེན་མི་ཉམས་པ་དང་། ལོ་རེའི་ཤངས་ལུགས་ཀྱི་དམིགས་བསལ་སྒྲུབ་མཆོད། དུས་མཆོད་སོགས་སྔར་ཞོང་ཞོང་དགོན་གྱི་སྐབས་སུ་བཤད་ཟིན། གང་ལྟར་ན་ཡང་ཀརྨ་ངེས་དོན་ཆོས་ཀྱི་བློ་གྲོས་དང༌། ཁྱུང་པོ་གསུམ་པ་ཚུལ་ཁྲིམས་མགོན་པོ། ཤངས་སྟོན་སྐྱབས་མགོན་སངས་རྒྱས་དཔལ་གསུམ་གྱི་སྐུ་དྲིན་ལ་བརྟེན་ནས་ཤངས་པ་བཀའ་བརྒྱུད་པའི་གདམས་ངག་ཐན་ཐུན་ཉམས་སུ་ལེན་བཞིན་པའི་སྐལ་ལྡན་གྱི་གྲྭ་སློབ་འགའ་ཞིག་བཞུགས་མུས་སོ།
II.6.2.2 Dzongshö
།གཉིས། རྫོང་ཤོད་བདེ་གཤེགས་འདུས་པའི་ཕོ་བྲང་།
དེ་ཡང་སྨད་མདོ་ཁམས་སྒང་དྲུག་གི་འབྲི་ཀླུང་དང་ཟླ་ཀླུང་གཉིས་ཀྱི་བར་དུ་ཚུད་པའི་འབྲི་ཟླ་ཟལ་མོ་སྒང་གི་སའི་ཆ། གླིང་གི་དུས་སུ་གླིང་དཔོན་དུ་སི་དང་། བར་དུ་སྡེ་དགེའི་རྒྱལ་རབས། ད་ལྟ་དཔལ་ཡུལ་རྫོང་རག་ཆབ་ཡུལ་ཤོག་ལྷག་པ་གྲོང་ཚོའི་ཁོངས། དཔལ་ཡུལ་རྫོང་སྲིད་གཞུང་གནས་ཡུལ་ནས་སྤྱི་ལེ80ཙམ་ཡོད་པའི་བྱང་ཕྱོགས་སུ་གནས་པའི་རྫོང་ཤོད་གནས་ཀྱི་ཆེ་བ་བརྗོད་པ་ལ། རྫོང་ཤོད་གནས་ཡིག་ལས་བདེ་གཤེགས་ཞི་ཁྲོ་བཞུགས་པའི་རྫོང་ལྔ་ལ། དཔའ་བོ་མཁའ་འགྲོ་འདུ་བའི་ཤོད་ཀྱིས་བརྟེན་ཞེས་འཁོད་པ་ལྟར། མདོ་ཁམས་གནས་ཆེན་ཉེར་ལྔ་ལས་ཡོན་ཏན་གྱི་ཡོན་ཏན་གྱི་གནས་མཆོག་ཏུ་ལུང་གིས་བསྔགས་ཤིང་། བདེ་གཤེགས་ཞི་ཁྲོ་རྣམ་དགུའི་དཀྱིལ་འཁོར་དངོས་སུ་བཞུགས་པའི་ཡོན་ཏན་གྱི་གནས་ལྔ་གཅིག་ཏུ་འདུས་པ་སྟེ། འབྲི་ཆེན་གཉན་ལྗང་གང་ཡོད་ཚང་བའི་སྐུ་མཆོག་འཇམ་དཔལ་ཞི་ཁྲོའི་གནས། ཛི་ནང་པདྨ་ཤེལ་ཕུག་དངོས་དང་དབྱེར་མེད་པའི་གསུང་མཆོག་པདྨ་ཞི་ཁྲོའི་གནས། ཙཱ་འདྲ་རིན་ཆེན་བྲག་དང་དབྱེར་མེད་པའི་ཐུགས་མཆོག་རྡོར་སེམས་ཞི་ཁྲོའི་གནས། ཁྲོ་རི་རྡོ་རྗེ་ཟིལ་ཁྲོམ་གྱི་བཀོད་པ་རྫོགས་པའི་ཡོན་ཏན་གནས་རྫོང་ཆེན་ཆེ་མཆོག །སེང་ཆེན་གནམ་བྲག་ཇི་ལྟ་བུར་བཞུགས་པའི་ཕྲིན་ལས་རྡོ་རྗེ་ཕུར་པའི་གནས་བཅས་གཙོ་བོར་བྱས་པའི་མཐའ་འཁོར་གྱི་ཤར་ཕྱོགས་ཨ་རིར་དཔལ་ཆེན་དགྱེས་པའི་ཕོ་བྲང་ཡང་ལེ་ཤོད་གཉིས་པ། ལྷོ་ཕྱོགས་སུ་གུ་རུ་རྡོ་རྗེ་གྲོ་ལོད་ཀྱི་གནས་ཁང་དམར་མདོའི་བྲག་དམར་ཟངས་གཡག་ནམ་མཁའ་རྫོང་། ནུབ་ཕྱོགས་སུ་ཚེ་དཔག་མེད་ཀྱི་གནས་རི་བོ་དབང་གཞུའི་སྙིང་པོ་བཀྲ་ཤིས་ཟླ་གམ་ཕུག །བྱང་གནོད་སྦྱིན་ནོར་ལྷའི་གནས་འབའ་རྒྱལ་འཁོལ་རི་མཆེད་གསུམ་བཅས་ཡན་ལག་གི་གནས་བཞི་དང༌། འཛིན་ཁྲ་བོ་གཞུང་ལུང་། འབུར་མོ་བྲག །གཏེར་ལུང་སོ་བྲག་མ་སོགས་ངོ་མཚར་ཁྱད་དུ་འཕགས་པའི་གནས་རིའི་ཕྲེང་བས་ཡོངས་སུ་བསྐོར། གནས་འདི་ཙཱ་འདྲ་དང་མཚུངས་པར་ཐོག་མར་སྦས་པའི་ཚུལ་དུ་གནས་པ་ལ། ཕྱིས་མཁྱེན་ཀོང་མཆོག་གསུམ་གྱིས་གནས་ཞལ་ཕྱེ་བར་མཛད། གནས་ཀྱི་དབུ་རྩེར་གནུབས་ཆེན་སངས་རྒྱས་ཡེ་ཤེས་ཀྱི་འཇམ་དཔལ་གཤིན་རྗེའི་སྒྲུབ་ཕུག་དང་། གཡས་སུ་དྲན་པ་གསང་ཕུག །བྲག་དཀར་རྩེ་མཐོན་འོག་ཏུ་གུ་རུ་རིན་པོ་ཆེའི་སྒྲུབ་ཕུག །དེ་འོག་ཤུད་བུ་དཔལ་སེང་སྒྲུབ་ཕུག །དེ་འོག་རི་སྤང་མཚམས་སུ་འོ་བྲན་དཔལ་གྱི་དབང་ཕྱུག །རྒྱལ་བ་བྱང་ཆུབ། ལྷ་ལུང་དཔལ་གྱི་རྡོ་རྗེ་རྣམས་ཀྱི་སྒྲུབ་ཕུག་བཅས། གསུང་གནས་མདུན་ངོས་སུ་རྒྱལ་བ་མཆོག་དབྱངས་ཀྱི་དབང་ཆེན་རྟ་མགྲིན་སྒྲུབ་ཕུག །གཡས་ཕྱོགས་སུ་བི་མ་ལའི་སྒྲོལ་དཀར་སྒྲུབ་ཕུག །དེ་འོག་ཏུ་མཚོ་རྒྱལ་གསང་ཕུག་བཅས། ཐུགས་གནས་དབུས་སུ་ཡང་དག་ཚོགས་ཁང་ཆེན་མོ་ཟླ་གམ་སྒོ་གཅིག་པའི་གཟུགས། ཕུག་པའི་ཀླད་དུ་ལྷ་ལྕམ་མནྡྷ་ར་བས་བྱིན་གྱིས་བརླབས་པའི་ཕུག་པ། གཡས་ངོས་སུ་ཡེ་ཤེས་དབྱིངས་ཀྱི་སྒྲུབ་ཕུག །གཡོན་ངོས་སུ་གནུབས་ཆེན་ནམ་མཁའི་སྙིང་པོའི་སྒྲུབ་ཕུག །ཡོངས་གྲགས་ཙིཏྟ་གསང་ཕུག་སྟེ་མཁྱེན་མཆོག་རྣམ་གཉིས་ཀྱིས་འཇམ་མགོན་ཀོང་སྤྲུལ་ཟབ་གཏེར་གྱི་བདག་པོར་མངའ་གསོལ་བའི་གནས་དང་བཻ་རོའི་སྒྲུབ་ཕུག་བཅས། ཡོན་ཏན་གནས་རྫོང་ཆེན་གྱི་མདུན་ངོས་སུ་གཉགས་ཆེན་གྱི་བདུད་རྩི་ཡོན་ཏན་སྒྲུབ་ཕུག །ཤར་ངོས་སུ་བི་མས་བྱིན་གྱིས་བརླབས་པའི་ཕུག་པ། རྩེ་ལོགས་སུ་སོག་པོ་ལྷ་དཔལ་གྱི་སྒྲུབ་ཕུག །ནུབ་ངོས་ཀྱི་བྲག་རྩར་རྨ་ཐོག་རིན་ཆེན་གྱི་སྒྲུབ་ཕུག །བྱང་ངོས་སུ་གཡུ་སྒྲ་སྙིང་པོ་དང་། ཁྱེའུ་ཆུང་ལོ་ཙཱའི་སྒྲུབ་ཕུག་བཅས། ཕྲིན་ལས་གནས་ཀྱི་ལྷོ་ངོས་སུ་སྣ་ནམ་རྡོ་རྗེ་བདུད་འཇོམས་ཀྱི་རྡོ་རྗེ་ཕུར་པའི་སྒྲུབ་ཕུག །དེའི་ལྟག་ངོས་སུ་ལང་གྲོ་དཀོན་མཆོག་འབྱུང་གནས་ཀྱི་གསང་ཕུག་བཅས། དབུས་ཀྱི་དཔལ་དེའུ་རྩེ་ལྔ་པ་ཅན་གྱི་མདུན་ངོས་སུ་ཆོས་རྒྱལ་ཁྲི་སྲོང་གི་བཀའ་བརྒྱད་སྒྲུབ་ཕུག །གཡོན་ངོས་སུ་ལྷ་སྲས་མུ་རུབ་ཀྱི་སྒྲུབ་ཕུག་བཞུགས། སྐུ་གནས་གཡོན་ངོས་ཀྱི་བྲག་རི་བྲག་རྩེའི་ངོས་རྣམ་སྣང་རྡོ་རྗེ་སེམས་དཔའི་སྐུ་རང་བྱོན། གསུང་གནས་སྦས་ཕུག་སྟེང་གི་བྱང་ངོས་སུ་རྟ་ཕག་རང་བྱོན། ལྷོ་ཕྱོགས་བྲག་གདོང་ངོས་སེང་གདོང་དམར་མོ་ཕུར་ཤམ་ཅན་གྱི་སྐུ། སྒྲོལ་དཀར་སྒྲུབ་ཕུག་གི་འགྲམ་དུ་ཨུཏྤལའི་སྡོང་པོ་དང་ཏཾ་ཡིག་རང་བྱོན། མདུན་ལམ་ལྟག་བྲག་ངོས་སུ་གུ་རུ་ཡབ་ཡུམ་གྱི་ཞབས་རྗེས། འབྲུ་གསུམ་རང་བྱོན་བཅས། ཐུགས་གནས་ཡང་དག་ཚོགས་ཁང་ཆེན་མོའི་སྟེང་ངོས་གཡོན་ཕྱོགས་ལ་རྡོ་རྗེ་སེམས་དཔའི་སྐུ་བརྙན་རང་བྱོན། ཚོགས་ཁང་ནང་ལོགས་གཡོན་ངོས་སུ་རལ་གྲི་རང་བྱོན། རྒྱབ་ངོས་བྱང་ཕྱོགས་སུ་ཚེ་བུམ་རང་བྱོན། འོག་ངོས་ཕུག་ལོགས་སུ་ནམ་སྙིང་ཕྱག་ཞབས་ཀྱི་རྗེས། ཙིཏྟ་གསང་ཕུག་གི་སྟེང་དུ་ཕྱག་རྡོར་རང་བྱོན་བཅས། རྫོང་ཆེན་བྲག་གི་ནུབ་ངོས་གཡས་ཕྱོགས་སུ་ཆེ་མཆོག་རང་བྱོན་དབུ་ཉི་ཤུ་རྩ་གཅིག་ཤིན་ཏུ་གསལ་བ། དེའི་གཡོན་གྱི་བྲག་ངོས་སུ་བཀའ་བརྒྱད་ཕོ་བྲང་གླིང་དགུ། མདུན་འོག་ཏུ་བདུད་རྩི་ཁྲོ་མཁར་བཅས། ཕྲིན་ལས་གནས་ཀྱི་འོག་ཏུ་ལྷ་མོ་ཙཎྜི་ཀ་རཀྟའི་རྫིང་ནས་སྐུ་ཕྱེད་ཐོན་པའི་ཚུལ། གནས་ལྔ་གཙོ་བོར་གྱུར་པའི་ཕྱོགས་མཚམས་རྣམས་སུ་བཀའ་རྟགས་ཡིག་འབྲུ། ཕྱག་མཚན་ཕྱག་ཞབས་ཀྱི་རྗེས་གསལ་དང་མི་གསལ་བ་སོགས་ཀྱི་སྐོར་ཞིབ་པ་གནས་ཡིག་རྒྱས་པ་རྣམས་ལས་ཤེས་པར་བྱ།
དེ་ལྟར་ཤངས་ཀྱི་ཟབ་ལུང་གཉིས་པ་འོག་མིན་གསང་ཆེན་རོལ་པའི་ཕོ་བྲང་སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་རྣམས་མ་བཞེངས་ལྷུན་གྱིས་གྲུབ་ནས་ཡོད་པ། སྔོན་གྱི་དུས་གུ་རུ་ཡབ་ཡུམ་རྗེ་འབངས་ཉེར་ལྔ་དང་བཅས་པ་སོགས་དངོས་སུ་ཞབས་ཀྱིས་བཅགས་ནས་བྱིན་གྱིས་བརླབས་པ། པདྨ་འོད་གསལ་མདོ་སྔགས་གླིང་པ་དང་གཏེར་ཆེན་ཨོ་རྒྱན་མཆོག་འགྱུར་གླིང་པ་ལྷན་དུ་ཕེབས་ཏེ་བཀའ་འདུས་སྒྲུབ་ཆེན་བཙུགས་པ་དང་། སྤྲུལ་པའི་བརྡ་ཡིག་ཤོག་སེར་གཏན་ལ་ཕབ་པ། ཟབ་གཏེར་ཕྱག་ཏུ་བཞེས་ཤིང་གནས་ཞལ་ཕྱེ་བར་མཛད་པ་སོགས་སྐྱེས་ཆེན་གསེར་རིའི་ཕྲེང་བས་ས་རྡོ་རི་བྲག་ཐམས་ཅད་བྱིན་གྱིས་བརླབས་ཤིང་། ཁོར་ཡུག་གི་བཀོད་པ་རྣམ་པར་བཀྲ་ལ་ཏིང་ངེ་འཛིན་ངང་གིས་འཕེལ་བའི་གནས་འདི། འཆི་མེད་བསྟན་གཉིས་གཡུང་དྲུང་གླིང་པ་ཉིད་ཀྱིས་རྒྱལ་བས་བསྔགས་པའི་དབེན་གནས་ཉམས་རེ་དགའ། སྙིང་ནས་དམ་ཆོས་སྒྲུབ་པའི་གནས་སུ་བཟང་ཞེས་གསུངས་པ་བཞིན་བསྙེན་སྒྲུབ་ཀྱི་མཐུན་རྐྱེན་མཐའ་དག་ལེགས་པར་འཛོམས་པར་དགོངས་ནས། ཐོག་མར་རབ་བྱུང་བཅོ་ལྔ་པའི་མེ་གླང་སྤྱི་ལོ་1877ལོའི་བོད་ཟླ་བཅུ་པའི་ཚེས་བདུན་ལ་གནས་འདིར་ཕེབས། ཉིན་ཤས་རྗེས་ཚོགས་ཁང་ཆེན་པོར་བརྒྱ་མཆོད་འབུལ་སྐབས། ཨོ་རྒྱན་སངས་རྒྱས་གཉིས་པའི་བཀའ་ལུང་ལྟར་གནས་འདིར་མཆོད་པའི་རྟེན་དང་། སྒྲུབ་པའི་སྡེ་ཞིག་ཚུགས་ན་བསྟན་འགྲོ་ལ་དགོས་པ་ཆེན་པོ་ཡོད་ཚུལ་གཟིགས་པས། མེ་གླང་ལོ་འདི་གར་ས་གནད་མེ་བཙའི་གཙུག་ལག་ཁང་དཔལ་སྤུངས་སྐུ་ཚབ་པས་རྨང་གཏིང་སྟེ་རྟེན་དང་བརྟེན་པ་བཅས་མཐའ་རྒྱས་སུ་གྲུབ་ནས་དགེ་འདུན་གྱི་སྡེ་འདེབས་པར་མཛད། དེ་རྗེས་རག་ཆབ་དཔོན་གྱིས་མཐུན་རྐྱེན་སྦྱར་བ་རྟེན་འབྲེལ་དུ་གཟིགས་ཏེ། རང་ཡོད་ཀྱི་དངོས་རྫས་རྣམས་ཀྱང་བཏང་ནས་རབ་བྱུང་བཅོ་ལྔ་པའི་ས་སྟག་སྤྱི་ལོ1878ལོར་ཐོག་མར་སྒྲུབ་སྡེ་གསར་བཞེངས་ཀྱི་དབུ་བཙུགས་ནས། སྒྲུབ་གྲྭའི་ལྷ་ཁང་དང༌། གྲྭ་ཤག་བདུན་བཅས་ལེགས་པར་གྲུབ། དུས་དེ་ནས་བཟུང་འཇམ་མགོན་ཀོང་སྤྲུལ་ལ་གདན་ས་གོང་འོག་གཉིས་ཏེ། གོང་མ་ཙཱ་འདྲ་རིན་ཆེན་བྲག་དང་འོག་མ་རྫོང་ཤོད་བདེ་གཤེགས་འདུས་པའི་ཕོ་བྲང་འདི་ཉིད་བྱུང་། གནས་འདིར་སྒྲུབ་པའི་བསྟན་པ་ཐོག་མར་དར་སྤེལ་མཛད་སྐབས། རྗེ་ཉིད་ཀྱིས་རྫི་བོ་ཞིག་ལ་ཁྱོད་ཀྱི་མིང་ལ་ཅི་ཟེར་ཞེས་དྲིས་པས། རྫི་བོ་དེས་ངའི་མིང་ལ་ཕུན་ཚོགས། གྲོང་མིང་ལ་གང་ཟེར་དྲིས་པས། དགེ་ལུང་ཚང་། སེམས་ཅན་དུ་ཡོད་དྲིས་པས་མཛོ་མོ་བཟང་པོ་བདུན་ཡོད་ཅེས་ལན་བཏབ་པ་རྟེན་འབྲེལ་དུ་གཟིགས་ཏེ། སྒྲུབ་ཐེངས་དང་པོར་སྒྲུབ་བླ་བདུན་གྱིས་སྣ་སེལ་ནས་དབུ་བརྩམས་ཤིང་། ལོ་གསུམ་ཕྱོགས་གསུམ་གྱི་རིང་དུ་བསྙེན་སྒྲུབ་ཉམས་ལེན་དང་། ལོ་ཟླའི་དུས་མཆོད། ཐུན་བཞིའི་རྣལ་འབྱོར་སོགས་ཙཱ་འདྲའི་བཅའ་ཡིག་བཞིན་མཛད། དེ་རྗེས་སྤྲུལ་སྐུ་ཚུལ་ཁྲིམས་བསྟན་པའི་ཉི་མས་གདན་ས་བསྐྱངས་ནས། གྲྭ་སློབ་རྣམས་ལ་བློ་སྦྱོང་དོན་བདུན་མ་སོགས་ཀྱི་ཆོས་དང་གདམས་ངག་ཅི་རིགས་བསྩལ། དཔལ་ལྡན་མཁྱེན་བརྩེ་འོད་ཟེར་དགོན་འདིར་ཕེབས་ནས་གསང་ཐིག་ཡབ་བཀའི་ཚོགས་མཆོད་དང་། དགོན་པའི་གྲྭ་ཚང་ཡོད་རིགས་ལ་ཕྱག་འགྱེད། དཔལ་ཆེན་གཡང་སྐྱབས། སྒར་བསང་བཅས་བསྒྲུབས། ལྷག་པར་འཇམ་མགོན་གོང་མའི་ཕྱག་བཞེས་ལྟར་ཤངས་པའི་ཆོས་ཀྱི་གཙོས་དབང་ལུང་ཁྲིད་བཅས་གནང་བ་དང་། དགོན་པའི་བཅའ་ཁྲིམས་ལེགས་པར་བསྡམས། སྐབས་ཤིག་ལ་ཁྲ་སྐྱ་བླ་མ་རིན་པོ་ཆེས་གདན་ས་འཛིན་པའི་སྐུ་དུས་སུ་ཀོང་སྤྲུལ་ཡང་སྲིད་དཔལ་ལྡན་མཁྱེན་བརྩེ་འོད་ཟེར་གཤེགས་པར་ཐུགས་སྐྱོ་ནས་རག་ཆབ་སྒྲུབ་ཁང་དུ་ལོ་གསུམ་མཚམས་ལ་བཞུགས། མཐར་བཞི་རྒོལ་དུས་འགྱུར་གྱིས་རྐྱེན་པས་དགོན་གནས་སྤྱི་མིང་གི་ལྷག་མར་གྱུར་ལ། མཐའ་འཁོར་གྱི་མཆོད་རྟེན་ལྷག་ལུས་རྣམས་ཀྱང་བཤིགས།
སྤྱི་ལོ1983ལོར་ཉམས་གསོའི་ཆོས་སྒོ་ཕྱེ་སྐབས་རྫོང་གྲྭ་སྐལ་དགའ་སོགས་ཀྱི་རེ་འདུན་ལྟར། སྤྲུལ་འཇམ་དབྱངས་ཆོས་འཕེལ་གྱིས་ཉམས་གསོའི་ལས་སྣེ་ཁུར་བཞེས་ཐོག །ཐོག་མར་ཡང་དག་ཚོགས་ཁང་ཆེན་མོ་བཞེངས་ནས། གུ་རུ་ཟ་ཧོར་མ་དང་། མཁྱེན་ཀོང་གཉིས་ཀྱི་ཞལ་ཐང་ཚེམ་དྲུབ་མ། སྟེང་དུ་མགོན་ཁང་བཅས། དེ་རྗེས་འདུ་ཁང་ཆེ་བ་སྟེང་ཁང་བླ་བྲང་དང༌། སྤྱི་ཁང་སྒོ་ཁང་བཅས་ཁྱོན་ལྷ་ཁང་མགོན་ཁང་བཞི། སྐུ་རྟེན་ལ་གསེར་སྐུ་གསར་རྙིང་ཁྱོན་བསྡོམས་ལྔ་བཅུ་ལྷག་ཙམ། གསུང་རྟེན་དཔེ་ཝར་མཆོག་སྤྲུལ་འཆི་མེད་རྡོ་རྗེས་གནང་བའི་དྭགས་པོའི་བཀའ་འབུམ། མཁྱེན་བརྩེའི་བཀའ་བདུན་སོགས་དང་། བཀའ་བསྟན་གཏེར་མཛོད་སོགས་པོད་ལྔ་བརྒྱ་ལྷག་ཙམ། ཐུགས་རྟེན་མཁྱེན་ཀོང་སྤྲུལ་གསུམ་གྱིས་བཞེངས་པའི་འགོང་པོ་ཨར་གཏད་མཆོད་རྟེན་ཉམས་གསོ་མཛད། དེང་གི་ཆར་སི་ཏུ་པདྨ་དོན་ཡོད་ཀྱིས་མཆོག་སྤྲུལ་ཚུལ་ཁྲིམས་ཀྱི་ཡང་སྲིད་འཁྲུལ་མེད་དུ་ངོས་འཛིན་གནང་བ་མཆོག་སྤྲུལ་བསྟན་འཛིན་ཉི་མས་དགེ་འདུན་འདུས་པ་ལྔ་བཅུ་སྐོར་གྱི་སྣེ་ཁྲིད་ནས་དགོན་འདིའི་བཤད་སྒྲུབ་ལས་གསུམ་གྱི་བསྟན་པ་སྐྱོང་བཞིན་ཡོད་ལ། དེང་དཔལ་ཡུལ་རྫོང་ཁོངས་ཀྱི་བཀའ་བརྒྱུད་པའི་དགོན་སྡེ་གཅིག་པུ་ཡིན།
གཙུག་ལག་ཁང་རྟེན་དང་བརྟེན་པ་བཅས་ཀྱི་བཞུགས་ཚུལ་སྐོར། གཙུག་ལག་ཁང་ཆེན་དུ་ལྷ་བཟོ་བསོད་ནམས་རིན་ཆེན་ཞེས་པས་རྫུ་འཕྲུལ་གྱི་སྒོ་ནས་བཞེངས་པར་གྲགས་པའི་ཤཱཀྱ་ཐུབ་པ་ཐོག་ཚད། བྱམས་པ་ཐོག་ཚད། གུ་རུ་ཐོག་ཚད། རྡོ་རྗེ་སེམས་དཔའ་ཐོག་ཚད། གནས་བརྟན་བཅུ་དྲུག །རྒྱལ་ཆེན་སྡེ་བཞི་བཅས་དང་། ལོགས་བྲིས་བླ་མ་དང་ཡི་དམ་སྐོར། གུ་རུ་ལྷ་ཁང་དུ་ཨོ་རྒྱན་ཟ་ཧོར་མ་དང་། རྒྱལ་བ་རྒྱ་མཚོ། རྡོར་སེམས་ཡང་དག་སོགས་སྐུ་ཆེ་ཆུང་བརྒྱ་ཕྲག་ལྷག་པ། ཐུགས་གནས་ལྷ་ཁང་དུ་ཐུབ་དབང་ཐོག་ཚད་གཅིག་ཉེར་སྲས་བརྒྱད་ཀྱིས་བསྐོར་བ་སོགས། མགོན་ཁང་དུ་མགོན་པོ་ཕྱག་དྲུག་པས་གཙོས་ཆོས་སྐྱོང་གི་སྐུ་འདྲ། ཉེར་སྲས་ལྷ་ཁང་དུ་ཉེ་བའི་སྲས་ཆེན་བརྒྱད་ཀྱིས་གཙོས་བྱང་སེམས་ཀྱི་སྐུ་གཟུགས་དུ་མ། དྭགས་པོ་ལྷ་ཁང་དུ་བཀའ་བརྒྱུད་མར་མི་དྭགས་གསུམ་སོགས་ཀྱི་ལྡེར་སྐུ། གཟིམ་ཁང་དུ་ཚེ་ལྷ་རྣམ་གསུམ་གྱི་ལི་མ་ཁྱད་འཕགས། བྱེ་བའི་ཨ་ཀྲུམ་ལས་གྲུབ་པའི་ཇོ་བོ་ཨ་ཏི་ཤ། སྒྲོལ་མ་གསུང་བྱོན། གསེར་ཟངས་ཀྱི་ཀོང་སྤྲུལ་ང་འདྲ་མ། གཞན་ཡང་བདེ་ཆེན་ཞིང་བཀོད་ཀྱི་ཞལ་ཐང་ཆེ་ཆུང་གསུམ། རྒྱུད་སྡེ་ལྔའི་ཞལ་ཐང་། གུ་དྲག་ཞལ་ཐང་། སྐྱེར་སྒང་རྟ་མགྲིན་ཞལ་ཐང་སོགས་ཞལ་ཐང་ཆེ་ཆུང་སྤུས་ལེགས་ལྔ་བརྒྱ་ལྷག །འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱི་དབུ་ཞྭ། ཀོང་སྤྲུལ་བློ་གྲོས་ཆོས་ཀྱི་སེང་གེའི་ཐུགས་དམ་གྱི་རྟེན་སྤྱན་རས་གཟིགས་ཕྱག་བཞི་པ་སོགས། གསུང་རྟེན་སྐོར་བཀའ་བསྟན་གཉིས་དང་། རྙིང་མ་རྒྱུད་འབུམ། མཁྱེན་ཀོང་མཆོག་གསུམ་གྱི་ཟབ་ཆོས་ཆ་ཚང་། འདོན་ཆོག་གི་རིགས་སོགས་སྐྱ་པོད་སུམ་སྟོང་ལྔ་བརྒྱ་ལྷག་ཙམ་བཞུགས། ཐུགས་རྟེན་སྐོར་མཆོད་རྟེན་རྣམ་པ་བརྒྱད་གསེར་དངུལ་ཟངས་རག་ལས་གྲུབ་པ་གང་མང་སོགས་རྟེན་གསུམ་གྲངས་ཀྱིས་མི་ཆོད་པ་བཞུགས།
ཚོགས་སྒྲུབ་མཆོད་ཀྱི་སྐོར་ལ། ཆོ་འཕྲུལ་ཟླ་བའི་ཚེས་ལྔ་ནས་བཟུང་གྲུབ་ཐོབ་བཀའ་བརྒྱད་ཉིན་བདུན་དང་ཉིན་རེ་བཞིན་ཚོགས་བརྒྱ་རེ། ཚེས་བཅུ་བཞི་དང་བཅོ་ལྔ་ལ་ཉེར་སྲས་བརྒྱད་ཀྱི་ཆོ་ག །ཚེས་བཅུ་བཞིའི་དགོང་མོར་རྗེ་བཙུན་མི་ལའི་འདས་མཆོད་ལ་བཀའ་བརྒྱུད་མགུར་མཚོ། བོད་ཟླ་གཉིས་པའི་ཚེས་གཅིག་ལ་སྒར་བསང་བྱ་ལ་དགུན་བཅའ་གྲོལ། ཚེས་གཉིས་ལ་གཏང་རག་གི་ཚུལ་དུ་མཁའ་འགྲོའི་བྲོ་རར་འཁོར་འདས་མཆོད་པ། བཅུ་གཉིས་བར་དུ་བཅུ་ཤོག་རེས་མོས་ཀྱིས་རྒྱུན་འདུག་བྱ་སྲོལ། ས་ག་ཟླ་བའི་ཚེས་གཅིག་ནས་བཅུ་གཅིག་བར་དྲི་མེད་ཀུན་དགའི་རྒྱལ་བ་རྒྱ་མཚོའི་རྒྱལ་ཐོ་རྒྱན་བཀོད་དང་། དངོས་གཞི། དབང་བསྐུར། གཏང་རག་བཅས་ཀྱི་སྒྲུབ་ཆེན་ཚོགས། ཉི་མ་བྱང་བགྲོད་སྐབས་བླ་མ་ནོར་ལྷའི་སྒྲུབ་པ་ཁོག་ཕུབ་དཔལ་ཆེན་མ་དང་འབྲེལ་བའི་གཡང་སྒྲུབ་ཉིན་གཅིག །བོད་ཟླ་ལྔ་པའི་ཚེས་བཅོ་ལྔ་ཉིན་དཔལ་དེའུ་ལ་རི་བསྟོད་བསང་མཆོད་གཏེར་གསར་རྒྱལ་བརྔན། ཐུགས་སྒྲུབ་ཚོགས་མཆོད་བཅས་ཉིན་གཅིག་གསུངས། བོད་ཟླ་དྲུག་པའི་ཚེས་གཅིག་ནས་རྒྱལ་བའི་བཀའ་འགྱུར་རིན་པོ་ཆེ་ཉིན་བརྒྱད་ཚོགས་སྐབས་རག་ཆབ་དགོན་གྱི་བླ་གྲྭ་རྣམས་ཀྱང་ཕེབས་ཏེ་བཀའ་འགྱུར་གྱི་བཀླག་རྒྱུགས་སྤྲོད་དགོས། བོད་ཟླ་བདུན་པའི་ཚེས་བཅོ་ལྔ་ནས་གནམ་སྟོང་བར་དབྱར་གནས་ཟླ་བ་ཕྱེད་གཉིས། དགུན་ཉི་ལྡོག་སྐབས་ཤེར་སྙིང་བདུད་ཟློག །བོད་ཟླ་བཅུ་གཅིག་པའི་ཚེས་བཅུ་བཞི་དང་བཅོ་ལྔ་གཉིས་ལ་རྡོར་སེམས་སྒྲུབ་མཆོད་དང་། ཚེས་ཉེར་གཅིག་ནས་འཆི་མེད་བསྟན་གཉིས་གཡུང་དྲུང་གླིང་པའི་འདས་མཆོད། དཔལ་རྡོ་རྗེ་སེམས་དཔའི་སྒྲུབ་ཆེན་ཉིན་བདུན། ཚེས་ཉེར་བརྒྱད་དང་ཉེར་དགུ་གཉིས་ལ་མགོན་པོ་བེར་ནག་གི་དགུ་གཏོར། བོད་ཟླ་བཅུ་གཉིས་པའི་ཚེས་ལྔ་ནས་ཀར་གླིང་ཞི་ཁྲོའི་སྒྲུབ་པ་ཉིན་བདུན། ཚེས་ཉེར་གསུམ་ནས་མགོན་པོ་ཕྱག་བཞི་པའི་སྒྲུབ་ཆེན་ཚོགས་ནས་གནམ་ལོ་གསར་ཚེས་ཀྱི་ཚེས་གཅིག་ལ་ཐོ་རངས་སེར་ཕྲེང་དང་བཅས་ཁང་སྟེང་ལ་གཏོར་འབུལ་བཏང་ནས་ཚོགས་གྲོལ། ཉ་སྟོང་ཚེས་བརྒྱད་ཀྱི་དུས་མཆོད་ནི། ཚེས་བརྒྱད་ལ་ཐེག་ཆེན་གསོ་སྦྱོང་། ཡར་ངོའི་ཚེས་བཅུར་དཀོན་མཆོག་སྤྱི་འདུས། ཚེས་བཅོ་ལྔ་ལ་གཞི་གསུམ་གསོ་སྦྱོང་། མར་ངོའི་ཚེས་བཅུ་ལ་གསང་ཐིག་ཡབ་བཀའ་དང་། ཡུམ་བཀའ་རེས་མོས། གནམ་སྟོང་ལ་གཞི་གསུམ་གསོ་སྦྱོང་བཅས་ཀྱི་རྒྱུན་ཚོགས་རྣམས་ཆད་ཆག་མེད་པ་འཚོགས། དགོན་གཞུང་གི་ཆོ་ག་ཕྱག་ལེན་ཇི་ཡོད་ཤངས་པའི་སྒྲུབ་སྡེ་དང་མཚུངས་པས། དགོན་འདི་ཡང་ཤངས་པ་བཀའ་བརྒྱུད་ཀྱི་ལུགས་འཛིན་པར་འཇོག་གོ
།དགོན་འདིའི་ཤངས་པའི་སྒྲུབ་སྡེ་ནི་ཧ་ལམ་ལོ་ངོ་བརྒྱ་དང་ལྔ་བཅུ་ཙམ་གྱི་གོང་དུ་འཇམ་མགོན་ཀོང་སྤྲུལ་རང་ཉིད་ཀྱིས་ཕྱག་བཏབ་ཅིང་། གསེར་ཆོས་ལྔ་ལ་སོགས་པའི་ཤངས་པའི་ཆོས་སྐོར་ཆ་ཚང་བར་ཉམས་སུ་ལེན་གྱི་ཡོད། སྒྲུབ་ཐེངས་དང་པོར་ཀོང་སྤྲུལ་ཉིད་ཀྱིས་སྒྲུབ་དཔོན་མཛད་ཅིང་སྒྲུབ་བླ་བདུན་སྒྲུབ་པར་ཞུགས། ཁོང་གིས་སྔ་ཕྱི་ཁྱོན་དུ་གནས་འདིར་ལན་གྲངས་མང་པོ་ཕེབས་ནས་སྒྲུབ་བླ་དང་སློབ་མ་གཞན་འགར་ཡང་ཤངས་ལུགས་སོགས་ཀྱི་དབང་ཁྲིད་ཅི་རིགས་བསྩལ་བས་ཤངས་པའི་བསྟན་པ་དར་ཞིང་རྒྱས་པར་མཛད། སྤྱི་ལོ1956ལོར་དགོན་གནས་སྤྱི་དང་མཚུངས་པར་ཐོར་ཞིག་ཏུ་སོང་། དེ་ནས་རིག་གསར་རྗེས་དད་ལྡན་མང་ཚོགས་ཀྱི་འདོད་མོས་ལྟར་དགོན་འདིའི་ནུབ་ངོས་སུ་སྒྲུབ་སྡེ་བསྐྱར་བཞེངས་མཛད་པ་དང་། སྤྱི་ལོ1998ལོར་སྒྲུབ་དཔོན་ཀུན་བཟང་ཡེ་ཤེས་ཀྱིས་སྒྲུབ་པ་སླར་གསོ་མཛད་དེ། སྒྲུབ་བླ་བདུན་ཡོད་པའི་སྒྲུབ་ཐེངས་གཅིག་ཚུགས་པ་དེ་སྤྱི་ལོ་2001ལོའི་ལོ་མཇུག་ཏུ་གྲོལ། སླར་སི་ཏུ་པདྨ་དོན་ཡོད་ཀྱི་བཀའ་བཞིན་སྒྲུབ་སྡེ་འདི་ཉིད་ཡང་དག་ཚོགས་ཁང་ཆེན་མོ་ཡོད་སར་སྤོ་བའི་ལས་གཞིས་རྐྱེན་པས། ད་བར་སྒྲུབ་ཐེངས་གཉིས་པ་ཚོགས་ཐུབ་མེད་པའོ།

II.6.3 -
།གསུམ་པ། རྒྱལ་ནང་གི་ད་ཡོད་ཤངས་ཆོས་སྒྲུབ་སྡེའི་ཉམས་ལེན་སྐོར།
དཔལ་ལྡན་ཤངས་པ་བཀའ་བརྒྱུད་ཀྱི་གདམས་པ་འཆད་ཉན་དང་ཉམས་ལེན་བྱེད་པ་དེ་ནི་བོད་རང་སྐྱོང་ལྗོངས་ཀྱི་ཁུལ་ཙམ་དུ་མ་ཟད། སི་ཁྲོན་ཞིང་ཆེན་དང་མཚོ་སྔོན་ཞིང་ཆེན་སོགས་ཀྱི་ཁོངས་སུ་ཡང་དར་ཁྱབ་ཤུགས་ཆེན་བྱུང་བ་སྟེ། ད་ལྟའི་ཆར་རང་རྒྱལ་གྱི་མངའ་ཁོངས་སུ་དགོན་པ་གཞུང་གི་ཆོས་བརྒྱུད་ཀརྨ་ཀཾ་ཚང་ཡིན་པ་ལ། དཔལ་ལྡན་ཤངས་པ་བཀའ་བརྒྱུད་ཀྱི་གསེར་ཆོས་རྣམ་པ་ལྔ་སོགས་ཀྱི་གདམས་ངག་དྲི་མེད་ཉམས་སུ་བཞེས་སའི་སྒྲུབ་སྡེ་ཁྱོན་བཅུ་ཡོད་པ་སྟེ།
II.6.3.1 - Tsadra Künzang Dechen Ling
གཅིག ཙཱ་འདྲའི་སྒྲུབ་སྡེ་ཀུན་བཟང་བདེ་ཆེན་གླིང་།
ད་ཡོད་ཤངས་པའི་སྒྲུབ་སྡེ་ཀུན་གྱི་ཕྱི་མོ་ལྟ་བུར་འགྱུར་བ་དཔལ་སྤུངས་ཐུབ་བསྟན་ཆོས་འཁོར་གླིང་གི་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་སྡེ་ཀུན་བཟང་བདེ་ཆེན་འོད་གསལ་གླིང་གི་སྐོར་བརྗོད་པ་ལ།
II.6.3.1.1
༡ ཙཱ་འདྲའི་གནས་ཀྱི་ཆེ་བ།
དེ་ཡང་བོད་ཀྱི་གནས་ཆེན་རྣམས་ཀྱི་མདོ་བྱང་དཀར་ཆག་ལས་ཡོན་ཏན་ཐུགས་ཀྱི་གནས་མཆོག་བསྟན་པ་ནི། བོད་ཀྱི་མདོ་ཁམས་འབྲི་ཞེས་བྱ་བ་རུ། དཔལ་གྱི་རི་ནི་གླང་ཆེན་འགྱིང་བ་འདྲ། དེ་བཱི་ཀོ་ཊཱི་ཙཱ་འདྲ་རིན་ཆེན་བྲག་ཅེས་འཁོད་པ་བཞིན་དབུས་གཙང་སྒྲུབ་གནས་ཉེར་གཅིག་དང་ཁམས་ཀྱི་གནས་ཚན་ཉེར་ལྔ་ཞེས་ཡོངས་སུ་གྲགས་པའི་ནང་ཚན་མདོ་ཁམས་གནས་ཆེན་ཉེར་ལྔའི་ ཡ་གྱལ་ཡོན་ཏན་ཐུགས་ཀྱི་གནས་མཆོག་ཙཱ་འདྲ་རིན་ཆེན་བྲག་ནི་འབྲི་ཀླུང་སྔོན་མོ་དལ་དུ་འབབས་པའི་བྱང་ཕྱོགས་དཔལ་སྤུངས་ཐུབ་བསྟན་ཆོས་འཁོར་གླིང་གི་རྒྱབ་རི་ཡོངས་གྲགས་དབུ་ཆེ་བྲག་དཀར་དང་འདབས་འབྲེལ་བ་སྟེ། གནས་རི་སྤྱི་ཡུལ་ཆེན་ཉེར་བཞིའི་གྲས་ཀྱི་དེ་བཱི་ཀོ་ཊིར་ཡེ་ཤེས་མཁའ་འགྲོའི་གསང་བའི་ལུང་གིས་བསྟན་པ། ཤར་གྱི་བྲག་རི་ཙཱ་འདྲ་དངོས་ཏེ། རྡོ་རྗེ་ཐུགས་ཀྱི་ཕོ་བྲང་མཚོན་པའི་ཕྱིར་ཙིཏྟ་སྙིང་གི་དབྱིབས་སུ་ཆགས་ཤིང་། ཐུན་ཆེན་པོ་བརྒྱད་དག་ཅིང་འོད་གསལ་ཆོས་སྐུའི་དགོངས་པ་འཆར་བར་བྱེད་པ་ཆོས་ཀྱི་འཁོར་ལོའི་རྩ་འདབ་བརྒྱད་དུ་མཚོན་པའི་སྒང་རྒྱུད་རྣམས་ལས། ཤར་ཕྱོགས་རྡོ་རྗེ་ཆེན་པོའི་རྩ་འདབ་ནི་ཡང་ཁྲོད་ཆགས་པའི་རི་རྒྱུད་འདི་ཡིན་པས། ཡང་ཁྲོད་ཀྱི་ས་ཆ་འདིའི་སྒེར་མིང་ལ་ཡང་བཛྲ་ཙིཏྟ་ཀོ་ཊི་ཞེས་པ་སྟེ་རྡོ་རྗེ་ཐུགས་ཀྱི་གནས་མཆོག་ཏུ་གྲགས། སྔོན་གྱི་དུས་ནས་གནས་ཆེན་ཡིན་པར་གྲགས་ཀྱང་སྦས་པའི་ཚུལ་དུ་བཞུགས་པ་ལ། འགྲོ་དོན་དུས་ལ་བབས་པའི་ཚེ་གཏེར་ཆེན་ཨོ་རྒྱན་མཆོག་འགྱུར་གླིང་པས་གནས་སྤྱིའི་མདོ་བྱང་དང་། ཙཱ་འདྲའི་དཀར་ཆག་གཏེར་ནས་བཞེས་ཤིང་གནས་ཞལ་ཕྱེ་བར་མཛད། འདིའི་གནས་ཀྱི་བཀོད་པ་ཡང་གནས་ཆེན་ཉེར་ལྔའི་མདོ་བྱང་ལས་ཧེ་རུ་ཀ་དཔལ་དགུ་ཡི་ཚུལ་དུ་གནས། །པདྨའི་སྒྲུབ་ཕུག་མེ་ཏོག་ཁ་ཕྱེ་འདྲ། །བྲག་གི་ལོགས་སུ་ཞི་ཁྲོ་རང་བྱོན་དང་། །ཐུགས་ཀྱི་རིག་འཛིན་ནམ་མཁའི་སྙིང་པོ་ཡི། །སྒྲུབ་པའི་གནས་མཆོག་ཟླ་གམ་དབྱིབས་ཅན་ཡོད། །མཆོག་སྒྲུབ་འདོད་པས་འདི་རུ་རྩེ་གཅིག་སྒྲུབས། །ཁྱད་པར་བདག་གི་གཙུག་རྒྱན་བི་མ་ལས། བྱིན་གྱིས་བརླབས་པའི་གནས་མཆོག་གུད་དུ་སྦས། །སྔགས་སྲུང་གནས་པའི་ཤིང་ནི་བྷ་ཊ་ཡི། ཉེ་བའི་ཕུག་པར་ཨོ་རྒྱན་བདག་ཉིད་གནས། །དེ་ཚེ་ཐུགས་ཀྱི་རིག་འཛིན་ཧཱུཾ་ཀ་ར། བྱོན་ཏེ་ཞག་གསུམ་བཀའ་ཡི་བསྡུ་བ་མཛད། སློབ་དཔོན་གཉིས་ཀྱི་སྐུ་བརྙན་རང་བྱོན་དང་། །ཡེ་ཤེས་སྐུ་ཡི་ཞབས་ཀྱི་མཚན་མ་གསལ། །ཁྱད་པར་ཅན་གྱི་ངོ་མཚར་དེ་འདྲ་བདོག་ཅེས་གསལ་བ་བཞིན། ཡང་ཁྲོད་སྒྲུབ་སྡེའི་གཡས་གཡོན་གྱི་བྲག་རི་དཔལ་ཆེན་པོའི་ཕྱག་དྲུག །རྩེ་མོའི་བྲག་ནི་དབུ་གསུམ། རི་ཁྲོད་འདིར་ཐུགས་ཀ འདི་འོག་གི་གདོང་རྒྱུད་གཉིས་གཉིས་སུ་གྱེས་པ་ནི་ཞབས་བཞི་བགྲད་པའི་ཚུལ་ལོ། གནས་འདི་དཔལ་གྱི་ཙཱ་རི་ཏྲ་དང་མཚུངས་པར་རི་ཁྲོད་གཡས་ཀྱི་རི་རྒྱུད་འདི་ཐབས་རྡོ་རྗེ་རི། གཡོན་ཤེས་རབ་དྲིལ་བུ་རི། དབུས་ཟུང་འཇུག་དབུ་མ་རི། རྩེ་མོ་དག་པ་མཁའ་སྤྱོད་ཀྱི་རི་ཞེས་བྱ་ལ། དེ་དག་ལས་ཐོག་མར་གཡས་ཕྱོགས་ཐབས་རྡོ་རྗེའི་བྲག་ལག་སོར་བཀྲམ་པ་ལྟ་བུའི་མདུན་ངོས་སུ། ཨོ་རྒྱན་པདྨའི་སྒྲུབ་ཕུག་མེ་ཏོག་ཁ་ཕྱེ་བ་འདྲ་བའི་ནང་གུ་རུའི་ཞབས་རྗེས་ཁྲུ་གང་ལྷག་པ། ཕྱག་འཁར་གྱི་རྗེས། གཏེར་སྒོ་ལ་ཕྱག་རྟགས་ཀྱི་རྒྱས་བཏབ་པ་སོགས་དང་། བྲག་ལོགས་རྣམས་སུ་ཞི་ཁྲོ་དམ་པ་རིགས་བརྒྱ་རང་བྱོན་གྱི་ཚུལ་དུ་བཞུགས་པ། པདྨའི་སྒྲུབ་ཕུག་ནས་གཡས་སྐོར་དུ་ཕྱིན་པའི་ལམ་དུ་བཻ་རོའི་སྒྲུབ་ཕུག་དང་། གུ་རུའི་གསང་ཕུག་མདོ་གཉིས་མ། མཁར་ཆེན་དཔལ་གྱི་དབང་ཕྱུག་གི་སྒྲུབ་ཕུག །དེའི་མདུན་འོག་ཏུ་གྲུབ་ཆེན་ནམ་མཁའི་སྙིང་པོའི་སྒྲུབ་ཕུག་ཟླ་གམ་དབྱིབས་ཅན་གྱི་ཕུག་ཏུ་ཡང་དག་ལྷ་དགུ་དང་། གཡོན་ངོས་དམའ་བར་ཐུགས་རྟགས་རྡོ་རྗེ་རང་བྱོན། དེ་ནས་ཅུང་ཙམ་སོང་ན་ནམ་སྙིང་སྒྲུབ་ཕུག་དང༌། ཡེ་ཤེས་མཚོ་རྒྱལ་གྱི་བཞུགས་གནས་ཤུག་གསེབ་བྲག་སྐྱིབས་སོགས་ཐབས་བསྐྱེད་རིམ་གཙོ་བོར་སྒྲུབ་པའི་གནས་ཡིན། གཉིས་པ་གཡོན་ཕྱོགས་ཤེས་རབ་དྲིལ་བུའི་རི་ཆུ་མིག་གོང་མའི་ཕུག་པའི་གཡོན་དུ་བྷྱོ་ཡིག་དཀར་པོ། པཎ་ཆེན་སྤྱི་ཏིའི་སྒྲུབ་ཕུག་དང་། དཔལ་ཆེན་རྒ་ལོ་དངོས་སུ་བྱོན་པའི་སྒྲུབ་ཕུག་དང་ཞབས་རྗེས། དེའི་གཡོན་སྟོད་ཀྱི་ཕུག་པ་ཞིག་གི་གཡོན་ངོས་སུ་གཡུང་དྲུང་གཡས་སྐོར་རང་བྱོན་སོགས་སྒྲུབ་ཕུག་དང་རང་བྱོན་ཤིན་ཏུ་མང་བ་བཞུགས་པའི་ཕྱོགས་འདིར་ནི་རྫོགས་རིམ་རྩ་རླུང་ཐིག་ལེའི་རྣལ་འབྱོར་གཙོ་བོར་སྒྲུབ་པའི་གནས་སོ། །གསུམ་པ་ཟུང་འཇུག་དབུ་མ་རིའི་དབུས་ཀྱི་སྙིང་པོར་དཔལ་ཆེན་པོའི་ལྷ་ཁང་ཆགས་པའི་སྟོད་དུ་བྷ་ཊའི་ཤིང་དང་ཉེ་བར་སློབ་དཔོན་རྣམ་གཉིས་ཀྱིས་ཞག་གསུམ་བཀའ་བསྡུ་མཛད་པའི་གནས། བྲག་སྐྱིབས་སྦས་པ་ལྟ་བུ་གུད་དུ་སྦས་པའི་བི་མ་ལའི་གནས་མཆོག །བྱང་ཆུབ་གླིང་པས་ཚེ་སྒྲུབ་མཛད་སའི་ཕུག་པ། མཁའ་འགྲོ་མ་བརྒྱ་རྩ་བརྒྱད་ཀྱི་ཞབས་རྗེས་སོགས་ཡོད་པ་ནི་བསྐྱེད་རྫོགས་ཟུང་འཇུག་གི་ཏིང་ངེ་འཛིན་ཕྱག་ཆེན་དང་། རྫོགས་ཆེན་སོགས་བསྒོམ་པའི་གནས་སུ་བསྔགས། བཞི་པ་དག་པ་མཁའ་སྤྱོད་ཀྱི་རི་ནི་ཐུགས་རྗེ་ཆེན་པོའི་ཕོ་བྲང་དུ་ལུང་གིས་ཟིན་པ་གནས་བདག་དགེ་བསྙེན་ཆེན་པོ་རྡོ་རྗེ་དཔལ་འབར་གྱི་བྲག་རི་ཡིན་པ་སོགས་གནས་ཀྱི་འབྱུང་ཁུངས་དང་། བསྐོར་ལམ་བསྐོར་ཚད་སོགས་ཞིབ་པ་རྣམས་འཇམ་མགོན་ཀོང་སྤྲུལ་ཉིད་ཀྱིས་མཛད་པའི་ཙཱ་འདྲ་རིན་ཆེན་བྲག་གི་རྟོགས་བརྗོད་ཡིད་ཀྱི་རྒྱ་མཚོའི་རོལ་མོ་ཞེས་པ་སོགས་ལས་ཤེས་པར་བྱའོ།།
II.6.3.1.2
༢ དཔལ་སྤུངས་ཐུབ་བསྟན་ཆོས་འཁོར་གླིང་།
དེ་བཱི་ཀོ་ཊིའི་གནས་འདིར་བརྟེན་པའི་དཔལ་སྤུངས་དགོན་གྱི་སྐོར་རགས་ཙམ་བརྗོད་པ་ལ། དགོན་འདི་ནི་དེང་སི་ཁྲོན་ཞིང་ཆེན་དཀར་མཛེས་ཁུལ་སྡེ་དགེ་རྫོང་དཔལ་སྤུངས་ཡུལ་ཤོག་ཁོངས་སུ་གནས་ཤིང་། གཏེར་གཞུང་ལས་མ་འོངས་གནས་མཆོག་འདི་དག་ཏུ། གྲུབ་པའི་སྐྱེས་བུ་དུ་མ་འདུ། གཙུག་ལག་ཁང་དང་མཆོད་རྟེན་འབྱུང་ཞེས་དང་། མངའ་བདག་མར་པ་ལོ་ཙཱས་འདི་དང་ཉེ་བ་ན་དཔལ་གྱི་ཙ་རི་ཏྲ་ཡོད། དེའི་ཤར་ཕྱོགས་ན་དེ་བཱི་ཀོ་ཊི་ཞེས་བྱ་བ་ཡོད། མ་འོངས་པ་ན་ངའི་བུ་བརྒྱུད་ཀྱིས་འཛིན་པར་འགྱུར་ཅེས་ལུང་བསྟན་པ་ལྟར། ཐོག་མར་འབྲི་གུང་སྐྱོབ་པ་འཇིག་རྟེན་མགོན་པོའི་ཞལ་སློབ་གཙོ་བོ་གདུགས་ཐོག་བཅུ་གསུམ་དུ་གྲགས་པའི་ཡ་གྱལ་དཔལ་ལྡན་བྱང་ཆུབ་གླིང་པས་སྤྱི་ལོ1181ལོ་ནས་སྤྱི་ལོ1189ལོའི་བར་གཙུག་ལག་ཁང་དང་བཅས་པ་གསར་དུ་བཞེངས། སྤྱི་ལོ1290ལོར་འབྲི་གུང་གླིང་ལོག་བྱུང་རྗེས་ས་སྐྱའི་བསྟན་པ་འཛིན་པ་མངའ་རིས་པ་ཚུལ་ཁྲིམས་འོད་ཟེར་གྱིས་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་འཁོར་ལོ་ཟབ་རྒྱས་བསྐོར་བས་དགོན་གནས་སྤྱི་དར་རྒྱས་ཆེ་བར་བྱུང་ཡང་། དུས་རབས་བཅུ་དྲུག་པ་ཙམ་ལ་རྒྱུ་རྐྱེན་འགས་ཐོར་ཞིག་ཏུ་སོང་། དེ་རྗེས་སི་ཏུ་ཆོས་ཀྱི་འབྱུང་གནས་ཀྱིས་རང་ཉིད་དགུང་ལོ་ཉི་ཤུ་རྩ་བརྒྱད་བཞེས་པ་རབ་བྱུང་བཅུ་གཉིས་པའི་མེ་ལུག་སྤྱི་ལོ1727ལོར་དབུ་བརྩམས་ཏེ་དཔལ་སྤུངས་ཐུབ་བསྟན་ཆོས་འཁོར་གླིང་ཞེས་སུ་གྲགས་པ་འདི་ཉིད་ཕྱག་བཏབ་ཅིང་། ལོ་གཉིས་ཀྱི་རིང་གཙུག་ལག་ཁང་དང་གྲྭ་ཁང་ཉེར་ལྔ་ཙམ་ལེགས་པར་གྲུབ། དེས་ན་སི་ཏུ་སྐུ་ཕྲེང་དང་པོ་ནས་བདུན་པ་བར་གྱི་གདན་ས་ཀརྨ་དགོན་ཡིན་ཀྱང་། སི་ཏུ་ཆོས་ཀྱི་འབྱུང་གནས་ནས་བཟུང་སྟེ་དཔལ་སྤུངས་དགོན་དུ་ཆགས། སྤྱི་ལོ1729ལོར་སྡེ་དགེ་རྒྱལ་པོ་ཆོས་རྒྱལ་བསྟན་པ་ཚེ་རིང་འཁོར་དང་བཅས་པ་དཔལ་སྤུངས་སུ་ཕེབས་ནས་དགོན་གནས་འདེབས་པའི་མཐུན་རྐྱེན་དུ་རྒྱུ་དངོས་འབོར་ཆེན་དང་སྡེ་དགེའི་མངའ་ཁོངས་ཀྱི་དཔོན་ཁག་དང་བཙུན་ཁྲལ་དུ་མ་ཕུལ་བས། སི་ཏུ་སྐུ་ཕྲེང་ན་རིམ་སྡེ་དགེ་ཚང་གི་དབུ་བླར་གྱུར། དེ་རྗེས་སི་ཏུ་པདྨ་ཉིན་བྱེད་སོགས་པདྨའི་ལྗགས་ལྡན་རྣམས་དང་། འཇམ་མགོན་ཀོང་སྤྲུལ་སྐུ་ཕྲེང་ན་རིམ། དབོན་སྤྲུལ་རིམ་བྱོན། མཁྱེན་བརྩེ་སྐུ་ཕྲེང་ན་རིམ་སོགས་ཀྱིས་ལེགས་པར་བསྐྱངས། སི་ཏུ་ཆོས་འབྱུང་གི་སྐུ་དུས་སུ་ཉེ་འཁོར་གྱི་བཀའ་བརྒྱུད་ཆེ་བཞི་ཆུང་བརྒྱད་ཀྱི་དགོན་སྡེ་ཕལ་ཆེར་ཀརྨ་ཀཾ་ཚང་གི་རིང་ལུགས་སུ་བསྒྱུར་གནང་མཛད་པས་དགོན་ལག་བརྒྱ་དང་བརྒྱད་ཅུ་ཙམ་ཡོད་པར་གྲགས། དཔལ་སྤུངས་དགོན་རང་དུ་གྲྭ་ཚང་ཤོག་བཞི་དང་། འདུས་སྡེའི་གྲངས་གཅིག་ཏུ་མ་ངེས་ཀྱང་མང་སྐབས་ཆིག་སྟོང་ལྷག་དང་ཉུང་མཐར་ལྔ་བརྒྱ་ཙམ་ཟིན་པའོ། །དགོན་གནས་འདིའི་པར་ཁང་དམ་ཆོས་བང་མཛོད་དུ་གསུང་རབ་སྐོར་རྙིང་མ་རྒྱུད་འབུམ་པོད་ཉེར་དྲུག །ཤངས་ཆོས་སྐོར་པོད་བརྒྱད། གདམས་ངག་མཛོད་པོད་བཅུ་སོགས་བྲིས་པོད་ཆེ་ཆུང་ཁྱོན་བསྡོམས་དྲུག་བརྒྱ་དང་གོ་གསུམ་ཙམ་བཞུགས་པ་དང་། སྒྲུབ་སྡེ་ལ་ནི་གུའི་སྒྲུབ་སྡེ་དང་ནཱ་རོའི་སྒྲུབ་སྡེ་། ཀུན་རིག་སྒྲུབ་སྡེ་བཅས་གསུམ་ཡོད། སྤྱི་ལོ་1754ལོར་སི་ཏུ་ཆོས་ཀྱི་འབྱུང་གནས་ཀྱིས་བཙུགས་པའི་དཔལ་སྤུངས་ལྔ་རིག་ནང་བསྟན་སློབ་གྲྭ་དང་། ལྷག་པར་ཤར་དཔལ་སྤུངས་པའི་སྨན་གྲྭ་ཞེས་དབུས་གཙང་ཁམས་གསུམ་ལ་སྙན་གྲགས་ཀྱིས་ཁྱབ་པ་སོགས། དཔལ་སྤུངས་དགོན་འདི་ཉིད་ནི་མདོ་ཁམས་ཁུལ་གྱི་བཤད་སྒྲུབ་ཟུང་དུ་འབྲེལ་བའི་བཀའ་བརྒྱུད་པའི་གདན་ས་ཆེན་པོ་ཞིག་ཡིན་པས། དགོན་གནས་སྤྱི་ཀརྨ་ཀམ་ཚང་གི་ཕྱག་བཞེས་མཛད་པ་ལ། དགོན་པ་གཞུང་གི་ཚེས་དུས་སྒྲུབ་མཆོད་རྣམས་ལས་བོད་ཟླ་བཅུ་གཅིག་པའི་ཚེས་ཉེར་བདུན་ཉིན་འཇམ་མགོན་བློ་གྲོས་མཐའ་ཡས་ཀྱི་སྒྲུབ་མཆོད་དུ་སྒྲོལ་མ་རྣལ་འབྱོར་དང་། དགོངས་འདུས། ཤངས་ལུགས་རྒྱུད་སྡེ་ལྔ་བཅས་ཚོགས་ཁག་གསུམ་དུ་དབྱེ་སྟེ་ཉིན་བདུན་རེ་ཚོགས་སྲོལ་ཡོད།
II.6.3.1.3 - Kündé Ling
༣ ཤངས་པའི་སྒྲུབ་སྡེ་ཀུན་བདེ་གླིང་།
ཙཱ་འདྲ་རིན་ཆེན་བྲག་གི་ནུབ་ངོས་སུ་སི་ཏུ་ཆོས་ཀྱི་འབྱུང་གནས་ཀྱི་སྐབས་སུ་སྒྲུབ་ཁང་དང་སྒྲུབ་གྲྭ་ཡོད་ཀྱང་ཕྱིས་དབོན་སྤྲུལ་དབང་གི་རྡོ་རྗེས་སྒྲུབ་སྡེ་འོག་མ་བསམ་གཏན་ཆོས་གླིང་གསར་བཞེངས་མཛད་རྗེས་སྒྲུབ་སྡེ་གོང་མ་བདག་མེད་ལྟ་བུར་སོང་ནས་ཁང་པ་ཧྲལ་ཧྲུལ་ཙམ་ལས་ལྷག་མེད་པས། འཇམ་མགོན་ཀོང་སྤྲུལ་ཡོན་ཏན་རྒྱ་མཚོས་ལྷ་ཁང་དང་སྒྲུབ་པ་བཞི་སྡེ་ཙམ་གདབ་པར་དགོངས་པའི་ཚེ། མཆོག་འགྱུར་གླིང་པས་ཀྱང་ལུང་བསྟན་པ་ལྟར་ཐོག་མར་བླ་བྲང་ནས་གཞི་བཏིང་སྟེ་སྤྱི་ལོ་1842ལོ་ཙམ་ནས་དབུ་བཙུགས་ཏེ་སྒྲུབ་གྲྭ་རིམ་བཞིན་གསར་དུ་བཞེངས། དེ་རྗེས་རང་ཉིད་ལ་གང་བྱུང་གི་དངོས་པོ་ཐམས་ཅད་བཏང་ནས་གཙོ་བོར་དཔལ་ཆེན་ལྷ་ཁང་དང་། ཡན་ལག་བླ་མ་ལྷ་ཁང་། གསུང་རབ་ཁང་། མཐོང་གྲོལ་ཁང་། སྒྲོལ་མ་ཁང་། གནས་བརྟན་ཁང་། ཐུགས་དམ་ཁང་། མགོན་ཁང་བཅས་བརྒྱད་ལ། དཔལ་ཆེན་ལྷ་ཁང་གི་རྟེན་གཙོ་རྡོར་སེམས། ཡང་དག །བདེ་མཆོག་བཅས་ཧེ་རུ་ཀ་གསུམ་གྱི་སྐུ་བརྙན་ཐོག་ཚད། བླ་མ་ལྷ་ཁང་དུ་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་སྐུ་བརྙན་སོགས། མགོན་ཁང་དུ་གཙོ་བོ་མྱུར་མཛད་ཡེ་ཤེས་མགོན་པོ། གསུང་རབ་ཁང་དུ་ཐུབ་དབང་དང་སློབ་དཔོན་ནག་པོ་སྤྱོད་པ་སོགས། མཐོང་གྲོལ་ལྷ་ཁང་དུ་རྟེན་གཙོ་སྒྲོལ་མ་གསུང་བྱོན་མ་སོགས། སྒྲོལ་མ་ལྷ་ཁང་དུ་སྒྲོལ་དཀར་ཡིད་བཞིན་འཁོར་ལོ་ཐོག་ཚད་མ། གནས་བཅུ་ཁང་དུ་ཐུབ་དབང་འབྲིང་ཚད་སོགས། ཐུགས་དམ་ལྷ་ཁང་དུ་རྟེན་གཙོ་གཏེར་ཆེན་སྐུ་ཚབ་རྣམ་གསུམ་བཞུགས་ཁྲི་སོགས་ཀྱི་ནང་རྟེན་བསམ་གྱིས་མི་ཁྱབ་པ་བཞེངས། འཇམ་མགོན་ཀོང་སྤྲུལ་གྱིས་རྡོ་རྗེ་འཆང་པདྨ་ཉིན་བྱེད་དབང་པོའི་སྐུ་མདུན་ནས་བརྒྱུད་པའི་ཁྱད་པར་ལ་དགོངས་ཏེ་དཀོན་སྤྱིའི་དབང་ཞུ་སྐབས། པདྨ་ཉིན་བྱེད་དབང་པོས་ཙཱ་འདྲ་རིན་ཆེན་བྲག་གི་སྒྲུབ་སྡེ་འདིར་ཀུན་བཟང་བདེ་ཆེན་འོད་གསལ་གླིང་ཞེས་པའི་མཚན་གནང་ཞིང་། དེ་རྗེས་འཇམ་མགོན་ཉིད་ཀྱིས་གོས་ཧྲུལ་ཆ་ཚང་དང་། ཇ་རྡུམ། ནས་ཞོ་ལྔ་ཙམ་ལས་མེད་ཀྱང་གྲོགས་དན་ཞིག་དང་བཅས་རབ་བྱུང་བཅུ་བཞི་པའི་ལྕགས་སྤྲེལ་སྤྱི་ལོ1860ལོའི་ལྷ་བབས་དུས་ཆེན་གྱི་ཚེས་བཅོ་ལྔར་སྒྲུབ་པའི་དབུ་ཐོག་མར་བརྩམས། དེ་རྗེས་འཇམ་མགོན་ཉིད་སྐུ་འཚོ་བཞུགས་རིང་གི་སྒྲུབ་ཐེངས་དང་པོར་སྒྲུབ་པ་དཔོན་གཡོག་དྲུག་དང་། མགོན་བླ་གཅིག་བཅས་བདུན་ཡོད་པ་རྣམས་ལ་ཁང་པ་བདག་བཟུང་དང་སྐར་འཛིན་བྱས། རིམ་པར་འདུས་ནས་སྣེ་སེལ་མཎྜལ་བཞི་ཆོག །གསར་རྙིང་གསོལ་བརྒྱ། གསང་ཐིག་ཕུར་པའི་བསྙེན་པ་བཏང་། གཏོར་བཟློག་བགྱིས་ནས་ལོ་གསུམ་མཚམས་རྒྱའི་དབུ་ཚུགས་ཤིང་། དབང་ལུང་ཁྲིད་ཀ་དགོས་རིགས་རྣམས་ཀྱང་ཁོང་རང་ཉིད་ཀྱིས་རིམ་པར་བསྩལ། དེ་ནས་སྔ་རྗེས་སུ་སྒྲུབ་ཐེངས་གཉིས་པ་དང་། གསུམ་པ། བཞི་པ་བཅས་བཙུགས། ཡང་འགའ་ཞིག་གིས་འཇམ་མགོན་ཡོན་ཏན་རྒྱ་མཚོ་ཁོ་ནའི་སྐུ་དུས་སུ་སྒྲུབ་ཐེངས་དགུ་གྲོལ་བར་བཤད། སྒྲུབ་སྡེ་འདི་རྡོར་སློབ་བླ་མ་འཇམ་མགོན་ཉིད་དང་། ཧོར་པདྨ་ནོར་བུ། ཨ་ཏི་བླ་མ་ཀར་བསྟན། བླ་མ་མགོ་ལུ། བླ་མ་ནོར་བུ་དོན་གྲུབ། ཇ་གཡོག་བསྟན་འཕེལ། བླ་མ་ཀ་ལུ་བཅས་ཀྱི་རིམ་པར་བསྐྱངས། དཔལ་ལྡན་མཁྱེན་བརྩེ་འོད་ཟེར་གྱིས་སྒྲུབ་ཁང་རྙིང་སྐྱོན་དང་། སྒྲུབ་གྲྭ་ཁ་འཕར་མང་བས་ཉམས་གསོ་རྒྱ་བསྐྱེད་གནང་རྒྱུའི་དབུ་བཙུགས། ཟླ་བ་བརྒྱད་ཀྱི་ནང་ལྷ་ཁང་དང་མཚམས་ཁང་ཕྱི་ཁོག་སྡོད་ལོ་ཙམ་གྲུབ། སྔར་དཔོན་སློབ་བཅུ་ཡོད་པའི་སྟེང་བཅོ་ལྔ་ཙམ་བསྣན་ནས་སྒྲུབ་པ་པོ་དངོས་ཉེར་ལྔར་སྤར། མགོན་ཁང་སོགས་གྲུབ་ནས་རྟེན་གཏོར་དང་རྟག་གཏོར་རྣམས་ཀྱང་ལེགས་པར་བཀོད་གྲུབ། ལོ་མཇུག་མགོན་པོའི་གཏོར་སྒྲུབ་སྐབས་ཀྱི་གཏོར་ཆེན་རྩམ་འབོ་བརྒྱད་ཅུ་སྐོར་གྱིས་བཅའ་རྒྱུད་བཅས་དང༌། ཕྱི་གཙུག་ལག་སྒྲུབ་སྡེ་སོགས་ཉེར་མཁོའི་ཁང་པ་རྣམས། ནང་རྟེན་མཆོད་བཅས་འཐུས་སྒོ་ཚང་བར་མཛད་པར་རྡོར་སློབ་བླ་མ་ཀ་ལུས་ཀྱང་འཕྲིན་ལས་ཀྱི་རམ་འདེགས་མཐར་ཕྱིན་པ་མཛད། དུས་འགྱུར་སྐབས་རྩ་གཏོར་དུ་སོང་། དེ་རྗེས་སྤྱི་ལོ་1985ལོར་བསྐྱར་བཞེངས་ཀྱི་དབུ་ཚུགས་པ། སྤྱི་ལོ1987ལོའི་སྟོན་ཟླར་ཡོངས་སུ་གྲུབ་ནས། ལོ་འདིའི་ཟླ་བ་བཅུ་པའི་ཚེས་ཀར་སྒྲུབ་ཐེངས་དང་པོའི་དབུ་བཙུགས། སྒྲུབ་དཔོན་བླ་མ་ནི་ཀརྨ་རང་བྱུང་ཀུན་ཁྱབ་ཀྱི་སློབ་མ་ཀརྨ་རྣམ་རྒྱལ་ཡིན། དེ་རྗེས་མེ་དམ་ཆོས། ཐུབ་བསྟན་རྡོ་རྗེ་བཅས་ཀྱིས་སྒྲུབ་དཔོན་བླ་མའི་འགན་རིམ་པར་བཞེས་ནས་ད་བར་སྒྲུབ་ཐེངས་དྲུག་ཟིན། སྒྲུབ་ཐེངས་དྲུག་པའི་དུས་ཡུན་ནི་སྤྱི་ལོ2009ལོའི་བོད་ཟླ་བཅུ་པའི་ཡར་ཚེས་གང་རུང་མཁས་གྲུབ་ཁྱུང་པོའི་དུས་མཆོད་དང་བསྟུན་པ་ནས་སྤྱི་ལོ2013ལོའི་ཆོ་འཕྲུལ་ཟླ་བའི་ཚེས་བཅོ་ལྔ་ཉིན་བར་ཡིན། སྒྲུབ་ཐེངས་འདིར་ཁྱོན་སྒྲུབ་དཔོན་གཅིག་སྟེ་ཀརྨ་ངེས་དོན་ཆོས་ཀྱི་བློ་གྲོས་ཀྱི་དངོས་སློབ་ཡར་རྒྱས་དང༌། སྒྲུབ་བླ་སུམ་ཅུ་སྟེ། དཔལ་སྤུངས་དགོན་རང་ནས་སྒྲུབ་བླ་སུམ་ཅུ། ཡུན་ནན་ལི་ཅང་ནས་སྒྲུབ་བླ་གསུམ། ཆབ་མདོ་ནས་སྒྲུབ་བླ་གཅིག །གཞིས་རྩེ་ནས་སྤྲུལ་སྐུ་གཅིག །སྒྲུབ་གཡོག་གཉིས་བཅས་ཡོད་པའི་ནང་ནས་དགུང་གྲངས་ཆུང་ཤོས་20དང་ཆེ་ཤོས་40ཡིན། སྒྲུབ་སྡེ་འདིར་སྔར་གྱི་སྐབས་ཤིག་རིང་སྒྲུབ་པ་ཚུགས་པའི་དུས་ཚོད་ནི་ཤངས་པའི་སྒྲུབ་སྡེ་གཞན་འགའ་དང་འདྲ་བར་བོད་ཟླ་དགུ་པའི་ཚེས་ཉེར་གཉིས་ཏེ་སྟོན་པ་བཅོམ་ལྡན་འདས་ལྷ་ལས་བབས་པའི་དུས་ཆེན་གྱི་ཉིན་མོ་དང་། ད་ལྟ་མཁས་གྲུབ་ཁྱུང་པོ་ཆོས་སྐུ་མཁའ་ཁྱབ་ཆེན་པོར་མངོན་སངས་རྒྱས་པའི་དུས་ཏེ་བོད་ཟླ་བཅུ་པའི་ཡར་ངོའི་ཚེས་གང་རུང་དང་། མཇུག་སྒྲིལ་བའི་དུས་ཚོད་ནི་སྔ་ཕྱི་ཀུན་མཚུངས་པར་བོད་ཟླ་དང་པོའི་ཚེས་བཅོ་ལྔ་ཁོ་ནར་ཡིན། སྒྲུབ་པ་གྲོལ་དུས་ཀྱི་བོད་ཟླ་དང་པོའི་ཚེས་བཅོ་ལྔ་ཉིན་སྒྲུབ་བླ་རྣམས་ཀྱིས་རས་རྐྱང་ཆུས་སྦངས་པ་གོས་སུ་གྱོན་ནས་གཏུམ་མོའི་ཉམས་ལེན་གྱི་རྩལ་བཏོན་གནང་སྲོལ་ཡོད། དེ་ལྟར་སྒྲུབ་པ་ལྔ་ ལེགས་པར་ཚང་བའི་སྒྲུབ་སྡེ་འདི་ཉིད་ལས་ཀརྨ་རང་བྱུང་ཀུན་ཁྱབ་ཀྱང་དགུང་ལོ་བཅུ་དགུའི་ཐོག་མཐར་ཕྱིན་པ་ཡིན་ཞིང་། དེ་རྗེས་སྒྲུབ་གྲྭ་འདི་ཉིད་ཀྱི་སྒྲུབ་དཔོན་ཡང་མཛད་པ་སོགས་སྒྲུབ་གྲྭ་འདི་ནས་སྔ་བར་ཕྱི་གསུམ་དུ་ངེས་གསང་ཟབ་མོའི་དོན་ལ་མངའ་དབང་འབྱོར་ཞིང་། སྒྲུབ་བརྒྱུད་བསྟན་པའི་རྒྱལ་མཚན་སྲིད་རྩེར་བསྒྲེངས་ནུས་པའི་རྡོ་རྗེ་སློབ་དཔོན་དང་སྒྲུབ་བླ་དུ་མ་གསོ་སྐྱོང་གནང་དང་གནང་བཞིན་པ་དེས། དུས་ཀྱི་སྙིགས་མའི་མཐར་ཡང་དོན་བརྒྱུད་སྙིང་པོའི་བསྟན་པ་མི་ནུབ་གོང་དུ་སྤེལ་བར་འགྲན་པའི་ཟླ་ཐམས་ཅད་དང་བྲལ་བའི་ལེགས་སྐྱེས་ཕུལ་དང་འབུལ་མུས་ཡིན།
སྒྲུབ་པ་གསར་ཙཱ་འདྲ་རིན་ཆེན་བྲག་གི་སྒྲུབ་སྡེར་སྤྱིར་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་ཉམས་ལེན་ཆ་ཚང་བ་ཡོད་པ་ལས། ལྷག་པར་ཤངས་པའི་གསེར་ཆོས་ལྔས་གཙོས་པའི་གདམས་ངག་ཟབ་ཁྱད་ཅན་རྣམས་རྐང་ཚུགས་པར་ཉམས་སུ་ལེན་པའི་སྲོལ་ཆག་མེད་ཡོད། སྐབས་འདིར་སྒྲུབ་སྡེ་འདིའི་ལོ་གསུམ་ཕྱོགས་གསུམ་གྱི་ཉམས་ལེན་བྱ་ཚུལ་རྣམས་ལ་ཞིབ་ཕྲའི་རྒྱུས་མངའ་ཡོང་སླད་དང་། དེ་མིན་ད་ཡོད་ཤངས་པའི་སྒྲུབ་སྡེ་ཕལ་ཆེར་ཡང་སྤྱིར་འཇམ་མགོན་ཀོང་སྤྲུལ་ཉིད་དང་། སྒྲུབ་སྡེ་འདིར་སྒྲུབ་དཔོན་མཛད་མྱོང་བའི་ཀརྨ་རང་བྱུང་ཀུན་ཁྱབ་ཀྱི་སློབ་བརྒྱུད་ཀྱིས་བཏབ་པ་ཤ་སྟག་ཡིན་པས་དེ་དག་ལ་ཡང་རིགས་བསྒྲེ་ནུས་པའི་ཕྱིར། འཇམ་མགོན་ཀོང་སྤྲུལ་ཉིད་ཀྱིས་མཛད་པའི་དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་གི་སྒྲུབ་པ་རྣམས་ཀྱི་ཀུན་སྤྱོད་བཅའ་ཁྲིམས་བླང་དོར་རབ་གསལ་ཕན་བདེའི་འབྱུང་གནས་ལས་འགངས་ཆེ་རྣམས་བཏུས་ཏེ་ཅུང་ཟད་བརྗོད་པར་བྱ་བ་ལ།
ཀ སྒྲུབ་པ་དངོས་གཞིར་མ་འཇུག་གོང་གི་གྲ་སྒྲིག
ཐོག་མར་གང་མཁོའི་འདོན་བྱ་རྣམས་ཀྱི་ཆོ་གའི་འགྲིགས་རིམ། མཆོད་པའི་ཕྱག་ལེན། དབྱངས་རོལ། གཏོར་བཟོ། འབུད་དཀྲོལ་རྣམས་སྣེ་མ་ཐོགས་པར་བསླབ། འདོན་དཔེ་གསོལ་འདེབས་ལེའུ་བདུན་མ་རྟེན་བསྐྱེད་བཅས། ཇོ་ནང་དང་སྨིན་གླིང༌། པདྨ་ཉིན་བྱེད་དབང་པོའི་གསོལ་འདེབས་རིགས། ཚོགས་བསགས་དང་འབྲེལ་བའི་གསོ་སྦྱོང་། སྨིན་གླིང་རྡོར་སེམས། དགོངས་འདུས་ལས་བྱང་མེ་ཕྲེང་སྐོང་བ། བཀའ་སྲུང་བསྡུས་པ་སོགས་ཆ་ལག་ཚང་བ། དུས་འཁོར་ལྷ་དགུའི་སྒྲུབ་ཐབས་དང་མཆོད་ཆོག །ཤངས་ལུགས་བདེ་མཆོག་ལྷ་ལྔ། རྒྱུད་སྡེ་ལྔ་གཙོ་བསྡུས། མཁའ་སྤྱོད་དཀར་དམར། སྒྲོལ་མའི་མཎྜལ་གསར་རྙིང་། གཏེར་གསར་གསང་ཐིག་སྐོར་གསུམ། རྡོར་སེམས་བཟླས་གྲོལ་དང་པདྨའི་སྙིང་པོའི་རྒྱུད་བཀླགས་ཐབས། དགུ་གཏོར་འདོན་ཆ་ཚང་བ་དང་མཚལ་མ། ཕྱག་དྲུག་པའི་གཏོར་ཆོག་གཞུང་ཟུར་འདེབས་བཅས། དམ་ཅན་སྤྱི་གཏོར། སྔགས་སྲུང་མ། དུར་ཁྲོད་མ་མོ། གཏེར་གསར་ཚེ་རིང་མ་སོགས་དང་། ཁྲིད་དཔེ་ཤངས་ཆོས་ནི་གུ་ཆོས་དྲུག་སྔོན་འགྲོ་གཞུང་ལྷན་ཐབས་བཅས། ཐང་ལུགས་ཆོས་དྲུག །ཕྱག་ཆེན་ངེས་དོན་རྒྱ་མཚོ། དེའི་གསལ་བྱེད་ཟུར་འདེབས། ལམ་རིམ་བློ་སྦྱོང་། ཕྱག་ཆེན་གའུ་མ་ལུགས་གཉིས། ལམ་ཁྱེར་རྣམ་གསུམ། འཆི་མེད་འཆུགས་མེད། བླ་མགོན་དབྱེར་མེད། ལྷ་བཞི་དྲིལ་སྒྲུབ་ཚན་གཉིས། དུས་འཁོར་སྦྱོར་དྲུག་ཁྲིད་མཐོང་བ་དོན་ལྡན་སྔོན་འགྲོ་བཅས། རྫོགས་ཆེན་བླ་མ་ཡང་ཏིག་ཁྲིད་ཡིག་སྔོན་འགྲོ་བརྒྱུད་འདེབས་བཅས། ཟུར་གཅོད་ཚོགས་ལས་ཟིན་བྲིས་ཀྱི་སྐོར་བཅས། སྒྲོལ་དཀར་ཡིད་བཞིན་འཁོར་ལོའི་གཞུང་དང་རྒྱུན་ཁྱེར་བཅས་དཔར་མ་ཡོད་པ་ཚང་མ་དང་། གཏེར་གསར་ཕྱག་དྲུག་པ་སོགས་དཔར་མ་མེད་རིགས་ཕྲན་ཚེགས་ཁ་ཤས་ཀྱང་གསར་བྲིས་ཀྱིས་འདོན་དུས་སུ་མ་ཆད་པ་བྱ་དགོས། མགོན་ཁང་པས་དཀོན་མཆོག་སྤྱི་འདུས་འདོན་ཆ་བསྐྱེད་རྫོགས་ཁྲིད་དཔེ་ཚང་མ། བཀའ་བརྒྱད་བདེ་འདུས། གཏེར་གསར་ཚེ་བདག་སོགས་ཀྱི་འདོན་ཆའི་རིགས་དང་ཟིན་བྲིས་སོགས་ཚགས་ཚུད་པར་བྱ། སྒྲུབ་པ་ལ་ཞུགས་ཉེ་སྐབས། སཱཙྪ་གཟུངས་ལྡན་སྟོང་ཕྲག་ཡན་ཆད་གང་འགྲུབ། མཆོད་སྡོང་རིན་པོ་ཆེ་ལ་བསྐོར་བ་སྟོང་ཕྲག་དང་མར་མེ་སོགས་མཆོད་པ་ཅི་འགྲུབ། འབྱོར་པ་ལྡན་ཚེ་དགེ་འདུན་ལ་མང་ཇ། དགེ་སློང་རྣམ་དག་བཞི་སྡེ་ལ་གྲོ་དྲངས། འབྱོར་པ་མི་ལྡན་ན་དགེ་སློང་ཚད་ལྡན་དད་པ་འགྲོ་བ་རེ་རེ་ཙམ་ལ་གུང་ཚིགས་དྲངས། དེ་ཐམས་ཅད་ལ་སྒྲུབ་པར་བར་ཆད་མེད་པ་དང་སེམས་རྒྱུད་ཆོས་དང་འདྲེས་པའི་སྨོན་ལམ་གདབ། འགྲུབ་ཏུ་རུང་ན་ལམ་འཕྲང་བཅོས་པ། སྲོག་བསླུ་ཚེ་ཐར། དབུལ་པོ་ལ་སྦྱིན་གཏོང་ལ་སོགས་པ་དགེ་བའི་དཔུང་བསྐྱེད་ཅི་རིགས་བགྱིས་པས་འཕྲལ་དང་ཡུན་དུ་དགེ་བའི་གནད་དང་རྟེན་འབྲེལ་ཆེན་པོ་ཡོད་པ་སྒྲུབ་དཔོན་རྡོར་སློབ་ཀྱིས་བཀོད་པ་གཏོང་གནང་གི་ཡོད།
སྒྲུབ་པ་དངོས་ལ་འཇུག་པའི་སྔོན་དུ་ཉིན་གཅིག་ལ་ལག་ལེན་གཙང་དག་ཚད་ལྡན་གྱི་ཆུ་གཏོར་ཅི་འགྲུབ་བྱ། དཔལ་ཆེན་ལྷ་ཁང་དང་མགོན་ཁང་དུ་སྙན་ཤལ་གང་འབྱོར་ལེགས་པ་རེ་འབུལ། བགེགས་བར་ཞི་བའི་དོན་དུ་གཏེར་གསར་གསང་ཐིག་རྡོ་རྗེ་གཞོན་ནུ་ཕྱག་རྒྱ་གཅིག་པ་ཞག་བདུན་ཕྲག་གཅིག་ཏུ་བསྙེན་ཅིང་། མགོན་ཁང་གསར་རྙིང་གི་བསྐང་གསོ་ཉིན་གསུམ་ཙམ་བྱ་བ་བཅས་གཞུང་གི་སྒྲུབ་པ་དངོས་མིན་པས་ལོ་གསུམ་ཕྱོགས་གསུམ་ཁོངས་སུ་མི་བརྩི། དེ་ནས་གཟའ་སྐར་འཕྲོད་སྦྱོར་བཟང་པོའི་སྔ་དྲོའི་ཆར་སྒར་བསངས་ཆེན་མོའི་ལྷ་བསངས་རྒྱགས་བརྔན་དང་བཅས་རྒྱས་པར་གྲུབ་འཕྲལ་གྱི་ཕྱི་དྲོ་སྒོ་རྩར་ཆ་གསུམ་བཏང་ནས་མཚམས་ཐོ་གཟུག །སྐབས་འདིར་ལོ་མཇུག་མགོན་པོའི་གཏོར་སྒྲུབ་ཀྱི་བསྙེན་རྒྱུན་པ་བརྒྱད་དགོན་པ་གཞུང་ནས་འོང་དགོས་པ་མིང་ཡིག་དམིགས་རྡེལ་བཞག །དེ་ཕྱིན་ཆད་མ་ཆེན་ཤིང་པ་གཉིས་མ་གཏོགས་དྲག་ཞན་རྡོག་པོ་གང་རུང་ནང་དུ་བཙུད་མི་ཆོག
ཁ། ལོ་གསུམ་ཕྱོགས་གསུམ་བྱེ་བྲག་གི་ཉམས་ལེན།
ཐོག་མར་ཐར་པ་རིན་པོ་ཆེའི་རྒྱན་དང་ལམ་རིམ་སྦྲགས་པའི་ཐུན་མོང་གི་སྔོན་འགྲོ་བློ་སྦྱོང་། ཇོ་ནང་རྗེ་བཙུན་ཆེན་པོས་མཛད་པའི་སྐྱེས་བུ་གསུམ་གྱི་ལམ་གྱི་རིམ་པའང་ཤེས་པར་བྱ་སྟེ། དེར་ཕྱག་ཆེན་ངེས་རྒྱ་མ་གཞིར་བཟུང་བའི་ཞིབ་ཁྲིད་དང་། གཞན་གཉིས་རྒྱབ་སྐྱོར་ལུང་ཁྲིད་ཀྱི་ཚུལ་དུ་བཏང་སྟེ། དལ་འབྱོར་རྙེད་དཀའ། འཆི་བ་མི་རྟག །ལས་རྒྱུ་འབྲས། འཁོར་བའི་ཉེས་དམིགས་བསམ་པ་བཞི་ལ་ཞག་གསུམ་རེ། སྐྱབས་སེམས། མཎྜལ། བླ་མའི་རྣལ་འབྱོར་བཞི་པོ་འབུམ་ཐེར་རེ་འགྲོ་ངེས་ཀྱིས་ཁྱོན་ཟླ་བ་ལྔའི་རིང་སྔོན་འགྲོ་རྣམས་རྫོགས་པར་བྱ། འདི་དག་གི་ཐུན་བར་རྣམས་སུ་རྡོར་སློབ་ནས་བླ་མ་ལྔ་བཅུ་པ། སྡོམ་པ་ཉི་ཤུ་པ། རྩ་ལྟུང་བཅུ་བཞི་པ་རྣམས་ཀྱི་རྒྱ་གཞུང་ལ་འགྲེལ་པ་སྦྱར་བ་དང་། གར་དབང་ཆོས་ཀྱི་དབང་ཕྱུག་གི་སྡོམ་པ་ཉེར་ལྔ་པ་རྩ་འགྲེལ་སྦྲགས་མའི་བཤད་ཁྲིད། སྒྲུབ་ཞུགས་རྣམས་ཀྱིས་སྐྱབས་འགྲོ་བཏང་བ་དང༌། སྡོམ་གསུམ་དང་འགལ་བའི་ཉེས་ལྟུང་བྱུང་རིགས་དུས་ཐོག་ཏུ་བཤགས་ཤིང་སྤང་བར་བྱ་དགོས། དེ་མིན་སྐྱབས་སེམས་ཀྱི་སྐབས་སུ་སྔར་མ་ཐོབ་ན་ཤིང་རྟའི་སྲོལ་འབྱེད་གཉིས་ཀྱི་བྱང་སྡོམ་འབོག་པའི་རྗེས་འབྲེལ་དུ། བློ་སྦྱོང་དོན་བདུན་མའི་ཁྲིད་བཤད་ལ་ཇི་སྲིད་འཚོ་བའི་བར་དུ་ཁྲིད་ཡིག་དེའི་ཉམས་ལེན་བསླབ་བྱ་དང་མི་འབྲལ་བ་དགོས། སྐྱབས་འགྲོ་ནས་འགོ་བརྩམས་ཕྱག་འབུམ་ཐེར་ཡང་རིམ་གྱིས་འགྲུབ་པར་དགོས། སྔོན་འགྲོ་གྲུབ་པ་དང་ཤངས་ལུགས་རྒྱུད་སྡེ་ལྔའི་དབང་ཆེན་དངོས་ཉིན་གཉིས། བྱིན་རླབས་སྒོ་འབྱེད་ཀྱི་བཀའ་དང་པོ་བདེ་མཆོག་ལྷ་ལྔའི་དབང་དངོས་སྟ་སྦྲེལ་བ། བཀའ་གཉིས་པ་ལྷ་ལྔའི་ཏིང་ངེ་འཛིན་གྱི་དབང་བསྐུར། སྒྲུབ་དཀྱིལ་གྱི་ལུང་དང་བསྙེན་ཡིག་ཁྲིད་ལུང་བྱས་ལ། ཤངས་ལུགས་བདེ་མཆོག་ལྷ་ལྔའི་བསྙེན་པར་འཇུག་སྟེ། ཡིག་བདུན་འབུམ་ཕྲག་བདུན། སྙིང་པོ་ཉེར་གཉིས་པ་འབུམ་ཕྲག་བཞི། ཡུམ་སྔགས་འབུམ་ཕྲག་གཅིག །མཁའ་འགྲོ་བཞི་ཁྲི་རེ། སོ་སོའི་ཁ་སྐོང་བཅས་གྲུབ་ནས། སྒྲུབ་མཆོད་ཞག་གསུམ་ལྔ་བདུན་གང་རུང་། ཁ་སྐོང་ཞི་བའི་སྦྱིན་སྲེག་ཉིན་གསུམ་བཅས་ཁྱོན་བསྡོམས་ཟླ་བ་གཉིས་ལ་འགྲུབ་པར་བྱ། དེ་ནས་བྱིན་རླབས་ཁོག་དབུབས་ཀྱི་བཀའ་དང་པོ་སྒྱུ་ལུས་དབང་མོ་ཆེའམ་འཇུག་སྒོ་ཡོན་ཏན་ཀུན་འབྱུང་དང་། བཀའ་གཉིས་པ་རྒྱུད་སྡེ་ལྔ་གཙོ་བསྡུས་ཀྱི་ཏིང་ངེ་འཛིན་གྱི་དབང་བཅས་བསྐུར། གཙོ་བསྡུས་སྒྲུབ་དཀྱིལ་གྱི་ལུང་དང་བསྙེན་ཁྲིད་བྱས་ལ། རྒྱུད་སྡེ་ལྔ་གཙོ་བསྡུས་ཀྱི་བསྙེན་པ་ཟླ་བ་གཅིག་གི་ཁོངས་སུ་སོ་སོར་འབུམ་ཕྲག་རེ་རེ་སྟེ་ཁྱོན་འབུམ་ཕྲག་ལྔ་ཁ་སྐོང་དང་བཅས་པ། སྒྲུབ་མཆོད་རྒྱས་པ་ཉིན་གསུམ་བྱ། དེ་ནས་ཤངས་ལུགས་རྩ་བ་ཇོ་ལུགས་དང་། ཉེ་བརྒྱུད་ཐང་ལུགས་སྦྲགས་ཏེ་ནི་གུ་ཆོས་དྲུག་གི་སྔོན་འགྲོ་ལ་འཇུག་ཅིང་། དག་བྱེད་ཨའི་སྟོང་ར་བདུན་ཕྲག་གཅིག་བསྒོམ། བྱིན་རླབས་གཞུང་ཤིང་གི་བཀའ་དྲུག་གི་ཐོག་མ་གཏུམ་མོའི་བྱིན་རླབས་དང་ཁྲིད་དམིགས་ཕོག་སྟེ་གཏུམ་མོ་མེ་རྒོད་བདུན་ཕྲག་གསུམ། འདི་ནས་བཟུང་ནཱ་རོ་ནི་གུ་ལུགས་ཀྱི་འཁྲུལ་འཁོར་རྣམས་བསླབ་ཅིང་ཉིན་རེ་བཞིན་མ་ཆག་པར་སྐབས་བསྟུན་རྒྱགས། དངོས་གཞི་ཟས་ཟ་ཟླ་བ་གཉིས་ཏེ་ཁྱོན་ཟླ་བ་གསུམ་བྱས་པ་དེའི་མཇུག་ཏུ་གཏུམ་མོ་སྟན་ཅིག་ཤིན་ཏུ་ཉེ་བརྒྱུད་ཞག་བདུན་ཙམ་སྦྱང་། དེ་ནས་སོ་སོའི་བྱིན་རླབས་དང་ཁྲིད་དམིགས་རིམ་པར་ཕོག་ལ། སྒྱུ་ལུས། འོད་གསལ། རྨི་ལམ་རྣམས་བདུན་ཕྲག་གསུམ་རེ། འཕོ་བ་བར་དོ་གཉིས་བདུན་ཕྲག་རེ་རེ་ལ་འཇུར་དྲགས་པས་རྟགས་ཐོན་དུ་སྦྱང་། སྟན་གཅིག་མ་རྣམས་ཀྱང་སོ་སོའི་མཇུག་ལ་ཁྲིད་དམིགས་རྫོགས་པར་བྱ། དེ་ནས་ཕྱག་ཆེན་གའུ་མའི་བྱིན་རླབས་བྱས་ལ་ཉམས་ལེན་ཟླ་བ་གཉིས་བྱ་ཞིང་། ཇི་ཙམ་འོས་པའི་སྐབས་སུ་ཇོ་ལུགས་བརྐུ་ཐབས་ངོ་སྤྲོད་དུ་གྲགས་པའི་བྱིན་རླབས་བྱ་བ་དང་། ངེས་དོན་རྒྱ་མཚོའི་དངོས་གཞིའང་ཁྲིད་ལུང་རྫོགས་པར་བྱ། དེ་ནས་བླ་མ་དང་ཡི་དམ་ལམ་ཁྱེར་གྱི་བྱིན་རླབས་གཉིས་བྱས་ལ་ལམ་ཁྱེར་རྣམ་གསུམ་བདུན་ཕྲག་གཅིག་བསྐྱང་། སྒྱུ་མ་ལམ་ཁྱེར་གྱི་བྱིན་རླབས་ཆོས་དྲུག་སྒྱུ་ལུས་དང་གཅིག་པས་ཟུར་དུ་མི་དགོས། དེ་ནས་མཁའ་སྤྱོད་དཀར་མོ་དང་མཁའ་སྤྱོད་གསུམ་ཕྲུག་གི་བྱིན་རླབས་བྱ། དམར་མོ་འཕོ་བའི་སྒོས་བཀའ་དེ་ཡིན་པས་བསྐྱར་མི་དགོས། ཁྲིད་ལུང་བྱས་ལ་དཀར་དམར་སོ་སོར་ཞག་བཅུ་ཕྲག་རེ་ལ་བསྙེན་པ་འབུམ་ཕྲག་རེ་དང་རྫོགས་རིམ་འཕོ་བ་རྟགས་ཐོན་དུ་སྦྱང་། དེ་ནས་ལུས་སེམས་འཆི་མེད་འཆུགས་མེད་ཀྱི་བྱིན་རླབས་ཁྲིད་བཅས་ལ་ཞག་བདུན། བླ་མ་མགོན་པོ་དབྱེར་མེད་ཀྱི་བྱིན་རླབས་ཁྲིད་བྱས་ལ་ཞག་བདུན་བཟླས་བསྒོམ་བྱ། དེ་ནས་ཡེ་ཤེས་མཁའ་འགྲོ་སུ་ཁ་སིདྡྷིའི་བྱིན་རླབས་དམིགས་ཁྲིད་སྔོན་དུ་འགྲོ་བས། མཐུན་འགོར་བསྐྱེད་བཟླས་ཅི་འགྲུབ་རེ་བཏང་བའི་རྩ་བའི་ཆོས་བཞི་བདུན་ཕྲག་རེ་རེ། འཕོ་བ་བར་དོ་ཞར་བྱུང་དུ་བཏང་བའི་ཟླ་བ་གཅིག་ཏུ་བསྒོམ། མཐར་ནི་དྷི་གཉིས་ཀྱི་ཚེ་དབང་བསྐུར་ནས་རྟེན་འབྲེལ་དགེ་བའི་ཆེད་དུ་གཉིས་ཀའི་ཚེ་སྒྲུབ་ཞག་བདུན་ཕྲག་གཅིག་ཙམ་ཉམས་ལེན་བྱས་པས་ཤངས་ཆོས་རྩ་བ་རྣམས་ལོ་ཕྱེད་གསུམ་གྱི་རིང་གྲུབ།
ལོ་གཉིས་པའི་མཇུག་ཏུ་ཟླ་བ་དྲུག་གི་ཁོངས་སུ་དཔལ་དུས་ཀྱི་འཁོར་ལོའི་བསྐྱེད་རྫོགས་བསྒོམ་དགོས་པས། དེའང་སྔོན་འགྲོ་བསགས་སྦྱངས་བདུན་ཕྲག་གཉིས་ཀྱི་ཁོངས་སུ་བྱིས་པ་འཇུག་པའི་དབང་ཆེན་དངོས་སྟ་དབྱེ་བའི་ཉིན་གཉིས་མ་བསྐུར། སྒྲུབ་དཀྱིལ་ཉེར་མཁོ་རྣམས་ཀྱི་ལུང་དང་བསྙེན་ཁྲིད་བྱས་ལ་ལྷ་དགུའི་བསྙེན་པ་ཟླ་བ་ཕྱེད་གཉིས་ཀྱི་ཁོངས་སུ་དྷི་ཀྵ་བྱེ་བ་གཅིག་སྲེག་སྣུན་དབབ་བསྲེ་ཡེ་ཤེས་དབབ་པ་སོགས་གང་འགྲུབ་རེ། སྒྲུབ་མཆོད་དང་སྦྱིན་སྲེག་ཉིན་གསུམ་ཙམ་རེ་བསྒྲུབ། རྫོགས་རིམ་མཐོང་བ་དོན་ལྡན་ལྟར་རིམ་པར་བྱས་ལ་དབེན་གསུམ་སྟོང་ཕྲག་གསུམ་བསྒོམ། མཆོག་དབང་གོང་མ་བསྐུར། སོར་སྡུད་ཀྱི་ཁྲིད་སྟོན་ཅིང་དམ་པའི་བྱིན་རླབས་བྱས་ལ་སོར་བསམ་ཟླ་བ་གཉིས། སོ་སོའི་ཁྲིད་བཅས་སྲོག་འཛིན། དྲན་ཏིང་བཞི་ལ་ཞག་བཅུ་རེ་ཙམ། འཕོ་བ་སོགས་ཡན་ལག་རྣམས་ཞར་བྱུང་དུ་སྦྱར་དགོས། གནད་གལ་དང་དགོས་པ་ཡོད་ན་དྲན་ཏིང་གི་སྐབས་ཙམ་དུ་རྡོ་རྗེ་སློབ་དཔོན་གྱིས་བདག་པོ་དང་བདག་པོ་ཆེན་པོའི་དབང་བསྐུར་ཡང་སྦྱིན་ལ། མང་ཁྲིད་ཀྱི་དཀྱུས་སུ་མི་དགོས།
ལོ་གསུམ་པའི་ཐོག་མར་རྡོར་སེམས་ཐུགས་ཀྱི་སྒྲུབ་པ་དང་། སོ་ལུགས་ཡང་དག་ཟླ་གམ་དགུ་མའི་དབང་དང་ཁྲིད་ལུང་སོ་སོར་བྱས་ལ། རྡོར་སེམས་སྙིང་པོ་འབྲུ་དྲུག་འབུམ་ཕྲག་དྲུག །ཡིག་བརྒྱ་འབུམ་ཐེར་གཅིག །ཡང་དག་རུ་ལུ་འབུམ་ཕྲག་བརྒྱད་འགྲོ་ངེས། སོ་སོར་སྒྲུབ་ཆེན་བསྙེན་རྒྱུན་བཅས་ཞག་བདུན་ཉིན་བརྒྱད་རེའམ། མི་འགྲུབ་ན་དཀྱིལ་འཁོར་སྒྲུབ་མཆོད་ཉིན་གསུམ་རེ། ཁ་སྐོང་ཞི་བའི་སྲེག་བླུགས་ཉིན་གཉིས་རེ་ཙམ་བྱ་བ་བཅས་ཁྱོན་རྡོར་སེམས་ཞི་ཁྲོ་གཉིས་ཀྱི་བསྙེན་སྒྲུབ་ཁ་སྐོང་བཅས་ཟླ་བ་གསུམ་གྱི་ཁོངས་སུ་འགྲུབ་པར་བྱ། དེ་ནས་རྫོགས་པ་ཆེན་པོ་བླ་མ་ཡང་ཏིག་ཡིད་བཞིན་ནོར་བུའི་སྤྲོས་བཅས་ཀྱི་དབང་བསྐུར་ལ་ཁྲིད་ཡིག་དྲི་མེད་ཞལ་ལུང་ལྟར། སྔོན་འགྲོ་ནས་བརྩམས་རིམ་པར་དམིགས་ཁྲིད་ཞིབ་པར་འབོགས་ཏེ། ཐོག་མར་མི་རྟག་པ། འཕྲལ་ཡུན་གྱི་བདེ་བ། རྐྱེན་དུ་མ། བྱས་པ་དོན་མེད། སངས་རྒྱས་ཀྱི་ཡོན་ཏན། བླ་མའི་མན་ངག་བསམ་པ་རྣམས་ལ་ཞག་གསུམ་རེ། བདེ་གསལ་མི་རྟོག་པ་གསུམ་ལ་ཞག་གསུམ་རེ་སྟེ་ཁྱོན་བསྡོམས་ཞག་ཉེར་བདུན་ལ་སེམས་སྦྱོང་བདུན་པོ་རྫོགས་པར་བྱ། དེ་ནས་ཐུན་མོང་གི་བསགས་སྦྱོང་སྐབས་སྐྱབས་སེམས། ཡིག་བརྒྱ། མཎྜལ། བླ་མའི་རྣལ་འབྱོར་བཞི་ལ་ཞག་བདུན་རེ་སྟེ་ཁྱོན་ཞག་ཉེར་བརྒྱད་ལ་ཐུན་སྟོད་དུ་ཐུན་མོང་དང་ཐུན་སྨད་དུ་ཐུན་མོང་མིན་པའི་འདོན་བསྒོམ་ཟུང་འབྲེལ་བྱ། དེ་ནས་ཆགས་བྲལ་རླུང་ལ་བསླབ་པའི་ཁ་དོག །དབྱིབས། གྲངས། འགྲོ་འོང་། བུམ་པ་ཅན་སྔོན་པོ་ཞག་གསུམ་རེ། ཆགས་བྲལ་ཐིག་ལེ་ལ་བསླབ་པ་ཞག་ལྔ་བཅས་ཉི་ཤུ། ཨ་ལྔ་སྐྱེ་མེད་ལ་འབྱུང་བ་རེ་རེ་བཞིན་ཞག་གསུམ་རེ་བཅས་བསླབ། དེ་ལྟར་སེམས་སྦྱོང་བདུན་ནས་འདི་བར་གྱི་སྔོན་འགྲོ་རྣམས་ལ་ཟླ་བ་གསུམ་བྱ། དེ་ནས་སྤྲོས་མེད་ཀྱི་དབང་བསྐུར་ལ་ཁྲེགས་ཆོད་ཟླ་བ་གསུམ་བྱ་བའི་ཐོག་མར་ལུས་རྡོ་རྗེའི་འདུག་སྟངས་ལ་ཞག་ལྔ། ངག་རྒྱས་གདབ། རྩལ་སྦྱོང་། མཉེན་བཙལ། ལམ་གཞུག་བཞི་ལ་ཞག་ལྔ་རེ། སེམས་བྱུང་གནས་འགྲོ་གསུམ་བརྟག་པ་ལ་ཞག་ལྔ་སྟེ་ཁྱོན་ཟླ་བ་གཅིག་སྦྱངས་ནས་རྣལ་དུ་དབབ་པ་མན་ཆད་དངོས་གཞི་ཟླ་བ་གཉིས་ཀྱི་ཁོངས་སུ་ངོ་སྤྲོད་བྱིན་རླབས་འབེབས་པ་སོགས་བྱ་ཞིང་ནན་ཏན་དུ་བསྒོམ། དེ་ནས་ཐོད་རྒལ་ཟླ་བ་གསུམ་བྱ་བའི་ཐོག་མར་འཁོར་འདས་རུ་ཤན་དབྱེ་བ་ཞག་བདུན་སོང་ནས། ཤིན་ཏུ་སྤྲོས་མེད་དང་རབ་ཏུ་སྤྲོས་མེད་ཀྱི་དབང་བསྐུར། རྣལ་དབབ་ཇི་ལྟར་འོས་པ་ནས་དངོས་གཞི་བཞུགས་སྟངས་གཟིགས་སྟངས་སོགས་དང་བསྟུན་པའི་འོད་གསལ་ལ་བསླབ། ཆོས་ཉིད་མངོན་སུམ་གྱི་སྒོ་མཐོང་ནས་བྱིན་རླབས་འབེབས་པའི་དབང་པོ་འབྲིང་དང་ཐ་མའི་ཁྲིད་དམིགས་ཀྱང་སྦྲེལ་ལ་འཕོ་དམིགས་ཇི་ལྟར་འོས་པ་སྦྱང་། གནད་བཞི་ཆོས་ཉིད་ཀྱི་འཁོར་ལོ་ཆུ་བོའི་རྒྱུན་གྱི་རྣལ་འབྱོར་ནི་ཁྲེགས་ཆོད་ཀྱི་ཐོག་མ་ནས་འཆད་ཅིང་ཉམས་སུ་ལེན་པ་དང་། གཞན་ཡང་ཁྲེགས་ཆོད་ཀྱི་སྐབས་སོགས་སྔ་ཕྱི་ནམ་བདེར་བླ་མ་ཡི་དམ་མཁའ་འགྲོ་ཡིད་བཞིན་ནོར་བུ་སྐོར་གསུམ་གྱི་སྒོམ་བཟླས། ཐོད་རྒལ་སྐབས་བདུད་རྩི་ལྗོན་ཤིང་འོད་གསལ་གྱི་གནད་ཡིག་ལྟར་ཐུན་མོང་མིན་པའི་བླ་སྒྲུབ་ཕྱི་ནང་གསང་བ་ཡང་གསང་རྣམས་དང་། ལྕེ་བཙུན་ཆེན་པོའི་བི་མ་ལའི་ཟབ་ཏིག་བཅས་ཇི་ལྟ་བུར་ནུས་པ་ཉམས་སུ་ལེན་དགོས་སོ།
།དལ་ཁོམས་དང་བསྟུན་པའི་དུས་སྐབས་ནམ་བདེར་ཤངས་ཆོས་པུསྟི་གསུམ། མགོན་པོད་གཉིས། སྦྱོར་དྲུག་སྐོར་པུསྟི་གཅིག །བླ་མ་ཡང་ཏིག་པུསྟི་གཅིག་དང་ཉེར་མཁོ་རྣམས་ཀྱི་ལུང་ཡང་མ་ཆད་པར་བཀླག །ལོ་མཇུག་གསུམ་གྱི་དང་པོའི་ལོར་ལྷ་བཞི་དྲིལ་སྒྲུབ། གཉིས་པར་གཏོར་ཆོག་འཕྲིན་ལས་གཏེར་མཛོད་དང་། གསུམ་པར་གཏེར་གསར་ཕྱི་སྒྲུབ་ལས་བྱང་ལ་བརྟེན་པའི་མྱུར་མཛད་ཡེ་ཤེས་མགོན་པོའི་བསྙེན་པ་ཞག་བདུན་རེ་བྱ་དགོས་ཤིང་། དང་པོ་ལ་དྲིལ་སྒྲུབ་ཀྱི་བྱིན་རླབས་དང་ཁྲིད། གཉིས་པ་ལ་གཏོར་དབང་བར་ཆད་ཀུན་སེལ། བླ་མ་མགོན་པོ་དབྱེར་མེད། གྲིབ་སེལ་གནད་དབབ་བཅས་ཀྱི་བཀའ་དང་ཁྲིད་ལུང་། གསུམ་པ་ལ་གཏོར་མའི་བྱིན་རླབས་ལུང་བཅས་བྱ། བསྙེན་པ་འདིའི་གཤམ་དུ་གཏོར་སྒྲུབ་དང་སྦྲེལ་བའི་ལོར་བདུན་གཉིས་རེ། ཁྱོན་བསྡོམས་པས་ཞག་བཞི་བཅུ་ཞེ་གཉིས་ནི་ཕྱོགས་གསུམ་གྱི་ནང་དུ་བརྩི་དགོས། གྲོལ་ལ་ཉེ་སྐབས་རྗེ་བཙུན་མ་ཡིད་བཞིན་འཁོར་ལོའི་བསྙེན་པ་སྒྲུབ་མཆོད་བཅས་ཞག་བདུན་ཕྲག་གཅིག་བྱ་དགོས་པ་དང་། སྔར་ནི་དྷི་གཉིས་ཀྱི་ཚེ་སྒྲུབ་སོགས་ལོ་གསུམ་གྱི་ནང་དུ་ཟླ་ལྷག་གཅིག་ངེས་པར་འབྱུང་བ་ལ་བརྩི་དགོས།
ལོ་གསུམ་ཕྱོགས་གསུམ་ལེགས་པར་གྲུབ་པའི་གཟའ་ཚེས་འཕྲོད་སྦྱོར་དགེ་བའི་སྔ་དྲོར་གཏོང་རག་གི་ལྷ་བསངས་དང་ཆ་གསུམ་བཏང་ཞིང་མཚམས་ཐོ་ལེན། དམ་གཙང་དང་གདོང་སྤྲད་ཅིང་སྒྲུབ་ཁང་ལ་བསྐོར་བ་ཙམ་བྱོན། དེའི་ཕྱི་ཉིན་ཙམ་ལ་དགོན་དུ་མཆོད་སྡོང་ཡར་མར་ལ་མཎྜལ་ཕུལ་ཞིང་། སྐྱབས་མགོན་སྐུ་མཆེད་ཞལ་མཇལ་ ཞུ་བ་སོགས་བྱས་ལ། ཡུན་མི་རིང་བར་སླར་མཚམས་ལ་འཇུག་སྟེ་ཀུན་རིག་ཟླ་བ་དྲུག །ཁ་སྐོང་སྦྱིན་སྲེག་ཉིན་བཅུ་ཙམ་དང་བཅས་པ། མི་འཁྲུགས་པ་ཟླ་བ་གསུམ་ཁ་སྐོང་སྲེག་བླུགས་དང་བཅས་པ། གནམ་ཆོས་འོད་མཆོག་ཟླ་བ་གཅིག་ཙམ་བཅས་སྒྲུབ་སྡེ་འདི་ཉིད་དུ་རང་མལ་ལ་གདན་འཇག་ནས་གྲུབ་པར་སླར་བྱ་དགོས་སོ།
།ག །ལོ་དུས་དང་ཟླ་དུས་ཀྱི་སྒྲུབ་མཆོད་སྐུ་མཆོད་འདོན་བྱ་འཕར་མ།
དེ་ལ་ཆོ་འཕྲུལ་ཟླ་བའི་ཚེས་གཉིས་ནས་བཅོ་ལྔ་བར། ས་ག་ཟླ་བའི་ཚེས་བརྒྱད་ནས་བཅོ་ལྔ་བར། ཆུ་སྟོད་ཟླ་བའི་ཚེས་གཅིག་ནས་བཞི་བར། ཐ་སྐར་ཟླ་བའི་ཚེས་བཅོ་ལྔ་ནས་ཉེར་གཉིས་ཀྱི་བར་རྣམས་སུ་ཚོགས་བསགས་གསོ་སྦྱོང་ཐར་པའི་ཐེམ་སྐས་རྒྱས་པ་ཚར་རེ་བྱ། དེའང་ཉིན་གུང་ཐུན་བར་ལ་ཚོགས་དགོས་ཀྱང་། སྒྲུབ་མཆོད་ལྟ་བུ་འདོན་བྱ་དམིགས་བསལ་ཡོད་ན་ཞོག་འཚོགས་འཚོགས་ཐེངས་དང་པོའི་དབུར་སྦྱར་དགོས། ཆོ་འཕྲུལ་ཟླ་བའི་ཚེས་བཅུ་བཞིར་རྗེ་བཙུན་མི་ལ་རས་པའི་སྐུ་མཆོད་རས་ཕུད་ལ་བྱི་དོར་སྤྱན་གཟིགས་མཆོད་བཤམས་བསྒྲིགས་ཤིང་། བདུད་རྩི་ལྔའི་ཕྱི་ཁྲུས་དང་ནང་ཁྲུས་དྲིལ་ཕྱིས་བཅས་ལག་ལེན་བཞིན་བྱས། མགོན་ཁང་གཏོར་བསྔོས་གྲུབ་ཕྲལ་ལྷ་ཁང་དུ་ཚོགས་ཏེ། ཆོས་སྤྱོད་སེམས་བརྩེ་མ། ཐུབ་བསྟོད། བྱང་སེམས་གཉིས། གནས་བརྟན། མར་མི་དྭགས་གསུམ། ཞྭ་དམར་ནག་སི་ཏུ་རྣམས་ཀྱི་སྐུ་ཕྲེང་གསོལ་འདེབས་ཙམ་བཅས་པའི་ཆོས་སྤྱོད་མདོར་བསྡུས་སྔོན་དུ་འགྲོ་བའི། མི་ལའི་བླ་སྒྲུབ་ཡེ་ཤེས་དཔལ་འབར་ཚོགས་མཆོད་བཅས་བཏང་ཞིང་། རྒྱང་འབོད་ཀྱི་གསོལ་འདེབས་བསྙེན་པ་ཅི་འགྲུབ་བྱ། དེ་ནས་སྔོན་འགྲོ་དང་རླུང་བུམ་ཅན་གཏུམ་མོའི་རྣལ་འབྱོར་ལ་གནས་པས་རས་བུད་བྱས་ཏེ་བཀའ་བརྒྱུད་མགུར་མཚོ་ཁོག་དབུབ་བཅས་བཏང་། ཐོ་རངས་འཁྲུལ་འཁོར་ཚང་བར་རྒྱགས། ཚེས་བཅོ་ལྔ་མངའ་བདག་མར་པའི་སྐུ་མཆོད་ལ་སྔ་དྲོ་ཚོགས་ཐེངས་གཉིས་གསོ་སྦྱོང་ཚོགས་བསགས་རྒྱས་པ་དང་དགྱེས་རྡོར་རྒྱུད་མཆོད། ཕྱི་དྲོ་མར་པའི་བླ་སྒྲུབ་ཕྱི་ནང་གསང་གསུམ་བདག་འཇུག་ཚོགས་འཁོར་བཅས་བཏང་། དེའི་ཉེར་ལྔའི་དུས་མཆོད་སྐབས་རྗེ་བདུད་འདུལ་རྡོ་རྗེའི་དུས་ཆེན་ལ་སྐུ་བསྟོད་གསོལ་འདེབས། དབོ་ཟླའི་ཚེས་གཉིས་ཨོ་རྒྱན་གཏེར་བདག་གླིང་པའི་སྐུ་མཆོད་ལ་རིག་འཛིན་ཐུགས་ཐིག་གི་ཚོགས་སྐོང་གསང་སྙིང་རྒྱུད་མཆོད། དེའི་ཉེར་ལྔའི་དུས་མཆོད་འབྲེལ་བར་ཀུན་མཁྱེན་ཆོས་ཀྱི་འབྱུང་གནས་སྐུ་མཆོད་ལ་དེ་ཉིད་ཀྱི་སྐུ་བསྟོད་གསོལ་འདེབས་དང་། བདེ་མཆོག་དུས་མཆོད་དཀྱུས་མ་བཞག་ནས་རྒྱུད་བཀླགས་པའི་ཆོ་ག་དང་ལྡན་པས་བདེ་མཆོག་རྒྱུད་མཆོད་ཚོགས་བཅས་བྱ། ཚེས་ཉེར་བརྒྱད་ལ་ཇོ་ནང་རྗེ་བཙུན་ཆེན་པོའི་སྐུ་མཆོད་དང་འབྲེལ་མར་ཚེས་ཉེར་དྲུག་ནས་འགོ་བརྩམས་ཤངས་ལུགས་རྒྱུད་སྡེ་ལྔའི་སྒྲུབ་མཆོད་ཉིན་གསུམ་བྱ། ནག་པ་ཟླ་བའི་ཉ་ལ་རྒྱུད་བཀླག་པའི་ཆོ་ག་དང་ལྡན་པས་དཔལ་དུས་ཀྱི་འཁོར་ལོའི་རྒྱུད་མཆོད་ཚོགས་འཁོར་དང་བཅས་པ་ལ་ཉིན་འཚོགས་གཅིག །ས་ག་ཟླ་བའི་ཡར་ཚེས་ལ་སྒར་བསངས་གཏེར་གསར་གཉིས་ཀའམ་གང་རུང་གི་ལྷ་བསངས་རྒྱག་བརྔན་རྒྱས་པ། ཟླ་བ་དྲུག་པའི་ཚེས་བཅུ་བཞི་ལ་ཐམས་ཅད་མཁྱེན་པ་རང་བྱུང་རྡོ་རྗེ་དང་། བཅོ་ལྔ་མཉམ་མེད་དྭགས་པོ་ལྷ་རྗེའི་དུས་ཆེན་ཡིན་ཀྱང་། བཅོ་ལྔ་ལ་དུས་མཆོད་ཡོད་སྟབས་བཅུ་བཞི་ཉིན་བཀའ་བརྒྱུད་མགུར་མཚོ་དང་འབྲེལ་བའི་ཚོགས་མཆོད། བཅོ་ལྔའི་དུས་མཆོད་ལ་དྭགས་པོ་རིན་པོ་ཆེའི་སྐུ་བསྟོད་གསོལ་འདེབས། ཟླ་བ་དགུ་པའི་ཚེས་བཅུ་བཞིར་མཁས་གྲུབ་ཁྱུང་པོ་རྣལ་འབྱོར་གྱི་སྐུ་མཆོད་ལ་ཤངས་ལུགས་བླ་མཆོད་དང་འབྲེལ་བའི་ཚོགས་འཁོར། བརྒྱུད་པའི་རྣམ་ཐར་གསོལ་འདེབས། ཟླ་བ་བཅུ་པའི་ཚེས་དྲུག་ལ་དུས་གསུམ་སངས་རྒྱས་དོལ་བུ་བའི་སྐུ་མཆོད་ལ་ཇོ་ནང་པ་ཡབ་སྲས་རྣམས་ཀྱི་གསོལ་འདེབས་དང་། ཟླ་བ་བཅུ་གཅིག་པའི་མཇུག་ཏུ་མགོན་ཁང་ཕྱི་ཁྱམས་ཀྱི་རྟག་གཏོར་བརྗེ་བ་དང་འབྲེལ་གསོལ་ཀ་འཕར་མ་བཏང་དགོས་པས། དེའང་ཉི་ཤུ་བཞི་ལྔ་སྐོར་གཏོར་མ་གསར་པ་བཅའ། ཉེར་དྲུག་དགོང་མོར་རྒྱུན་གསོལ་དང་འབྲེལ་གཏོར་མ་རྙིང་པ་ཡང་ཐོག་ཏུ་འབུལ། དེའང་གསར་པ་སླར་བཀོད་ནས་བྱིན་རླབས་བྱ། ཉེར་བདུན་ནས་ཉེར་གསུམ་མམ་ཉེར་ལྔ་ལ། མྱུར་མཛད་ཡེ་ཤེས་མགོན་པོ། བེར་ཅན་ལྕམ་དྲལ་འཁོར་ལྔ་རྗེས་འབྲངས་བཅས་མགོན་འཕྲིན་སོགས་ཀྱི་གཞུང་རྒྱས་པར་བསྲང་བ་དང་། རྙིང་མའི་དངོས་གྲུབ་རོལ་མཚོ། གཏེར་གསར་དགོས་རིགས་ཀྱི་གསོལ་སྐོང་རེ་རེ་ནས་བརྒྱ་རྩ་ཡར་བརྒལ་གྱི་གྲངས་འགྲོ་ངེས་བྱ། ཟླ་བ་བཅུ་གཉིས་པའི་ཚེས་བཅོ་བརྒྱད་ལ་ཀུན་མཁྱེན་ཀློང་ཆེན་རབ་འབྱམས་པའི་སྐུ་མཆོད་སྙིང་ཐིག་བླ་མཆོད་ཚོགས་འཁོར་བཅས། དེའི་ཚེས་ཉེར་བཞི་ལ་གཏོར་མ་བཅའ་བཤམས་གཞུང་ལྡན་སོགས་སྟ་གོན་བྱས་ཏེ། ཉེར་ལྔ་ནས་ཡར་ཚེས་གཉིས་ཀྱི་ནང་མོ་བར་མྱུར་མཛད་ཡེ་ཤེས་མགོན་པོའི་གཏོར་སྒྲུབ་བསྙེན་རྒྱུན་བཅས་ཞག་བདུན་ལ་བྱ་དགོས་པའི་ལག་ལེན་འདོན་འགྲིགས་ཟུར་གསལ་ལྟར་ཆད་ལྷག་ནོར་འཁྲུལ་མེད་པ་དང་། ལས་རྡོར་གྱིས་ཕྱག་ལེན་མ་ནོར་ཞིང་གཙང་སྦྲ་ཤིན་ཏུ་ཐོན་པ་དང་། གཏོར་ཕྱེ་ཆང་ཕུད་འབྲུ་སྣ་དམ་རྫས་སོགས་བླ་བྲང་དང་སྒྲུབ་ཞུགས་རྣམས་མ་གཏོགས་གཞན་སུ་ཡང་མ་འདྲེས་པ་དང་། སྔགས་སྒྲ་ཧ་ཅང་ཆེ་བས་སྒྲུབ་ཁང་ཕྱི་རོལ་དུ་ཐོས་པ་དང་། ཧ་ཅང་དམའ་བས་དྲུང་ནས་ཀྱང་མ་ཐོས་པ་དང་། འཚོགས་ཐེངས་སོགས་ཀྱི་སྐབས་སུ་རྒྱབ་ནས་བཟླ་བ་དང་། སྔགས་རྒྱུན་མཁན་ཕན་ཚུན་གཏམ་ལབ་པ་དང་། གཉིད་ཡུར་བས་བར་མཚམས་བཅད་པ། ནང་འཐབ་འཁོན་འཛིངས་སོགས་གཏན་ནས་བྱ་མི་རུང་ཞིང་། རྒྱང་ནས་མི་ཐོས་ཤིང་དྲུང་ནས་ཐོས་ངེས་ཀྱི་སྐད་མཐོ་དམན་རན་པ་དང་། དལ་བྲེལ་སྙོམས་ལ་ཁོང་ཀློད་པས་རིམ་གྱིས་ངལ་དུབ་ཏུ་མི་འགྱུར་བའི་ངང་ནས་བཟླ། ཚེས་གཉིས་ཀྱི་དགོང་མོའི་ཐུན་མཇུག་ཏུ་སྤོས་བསུ་སེར་སྦྲེང་བཅས་ཁང་སྟེང་དུ་གཏོར་མ་བཏེགས་སྐབས་ཐུན་པ་རྣམས་མ་གཏོགས་སྒྲུབ་པོ་གཅིག་ཀྱང་རྒྱབ་ཏུ་མི་འབུད་པར་འདོན་བྱ་རྣམས་སྒོ་ཁང་ནས་བྱ། སླར་རྗེས་ཆོག་གྲུབ་ཕྲལ་ཚང་མ་ལྷ་ཁང་དུ་འཚོགས་ནས་ཚོགས་བསགས་གསོ་སྦྱོང་རྒྱས་པར་གཏོང་དགོས།
ཟླ་རེ་བཞིན་གྱི་དུས་མཆོད་འདོན་བྱའང་ཚེས་བདུན་བྱུང་དུ་ཅོག་ལ་ཁྱབ་བདག་རྡོ་རྗེ་འཆང་པདྨ་ཉིན་བྱེད་དབང་པོའི་སྐུ་མཆོད་དུ་སྨིན་གླིང་ལུགས་ཀྱི་བཀའ་གཏེར་ཟུང་འཇུག་དཔལ་རྡོ་རྗེ་སེམས་དཔའི་སྒྲུབ་མཆོད་དམིགས་བསལ་དང༌། ཟླ་ལྔ་པའི་ཚེས་བདུན་ལ་རྣམ་ཐར་གསོལ་འདེབས་རྒྱས་པ་དང་མཆོད་པ་རྒྱས་པ་དགོས། ཚེས་བརྒྱད་ལ་སྒྲོལ་མ་རྣལ་འབྱོར་མའི་སྒྲུབ་མཆོད་དམ་ཇོ་བོ་ལུགས་དང་གཏེར་གསར་རེས་མོས་ཀྱི་སྒྲོལ་མ་མཎྜལ་བཞི་ཆོག །ཚེས་བཅུ་ཐམས་ཅད་ལ་བླ་མ་དགོངས་འདུས་ལས་བྱང་མེ་ཏོག་ཕྲེང་མཛེས་ཀྱི་ཚོགས་སྐོང་བཀའ་སྲུང་གཏོར་འབུལ་བཅས་པ། སྲོལ་གཉིས་རེས་མོས་ཀྱི་བི་མ་ལའི་བླ་སྒྲུབ་ཚོགས་མཆོད་བཅས་དང་། གཏེར་གསར་ཐུགས་སྒྲུབ་པདྨའི་སྙིང་པོའི་རྒྱུད་བཀླགདམིགས་བསལ་འབུམ་འགྱུར་ཚེས་བཅུ་ལ་དཀོན་མཆོག་སྤྱི་འདུས་ཀྱི་ཚོགས་བརྒྱ། ཚེས་བཅོ་ལྔ་རྣམས་ལ་དཔལ་དུས་ཀྱི་འཁོར་ལོའི་མཆོད་ཆོག །ཉེར་ལྔ་ལ་ཤངས་ལུགས་བདེ་མཆོག་ལྷ་ལྔའི་སྒྲུབ་མཆོད་དང་མཁའ་སྤྱོད་དཀར་དམར་རེས་མོས་ཀྱི་མཆོད་ཆོག །ཉེར་དགུར་ཡེ་ཤེས་མགོན་པོ་ཕྱག་དྲུག་པ་གཞུང་ཟུར་འདེབས་སྦྱར་བའི་ཚོགས་ཐེངས་གཅིགབེར་ཅན་མཚལ་མ་གསོལ་སྐོང་བཅས་འཚོགས་ཐེངས་གཅིག །དམ་ཅན་སྤྱི་གཏོར་ལ་གཏེར་སྲུང་མྱུར་མཛད་མགོན་པོ། སྔགས་སྲུང་མ། དུར་ཁྲོད་མ་མོ། ཚེ་རིང་མ་རྣམས་སྦྱར་བ་དང་རྒྱུན་གྱི་སྲུང་ཟློག་ཆག་མེད་རིགས་བཅས་འཚོགས་ཐེངས་གསུམ་བྱ། གནམ་གང་ལ་དཔལ་ཆེན་ཡང་དག་ལྷ་དགུའི་སྒྲུབ་མཆོད། སེམས་སྡེའི་ཀུན་བཟང་དོན་ཕྲིན། རྒྱུད་བཀླག་པའི་ཆོ་ག་དང་ལྡན་པས་སྒྱུ་འཕྲུལ་གསང་བ་སྙིང་པོའི་རྒྱུད་བཀླགས་ཤིང་རྒྱུད་གཏོར་འབུལ། སྟོན་དགུན་གྱི་ཟླ་བ་དྲུག་པོར་ཉི་མ་ཐུང་བས་གསང་སྙིང་འདོན་ལོང་མེད་ན། ཀློག་ཐབས་དང་ལྡན་པས་འཇམ་དཔལ་མཚན་བརྗོད་རེ་རེ་བཀླགས་པར་བྱ་དགོས། དེ་ནས་དགུ་གསོལ་མ་གཏོགས་པའི་དུས་མཆོད་ཐམས་ཅད་འཚོགས་ཐེངས་གཉིས་རེ་ཡིན་ཅིང་། ཚེས་བཅུ་དང་མཎྜལ་བཞི་ཆོག་སྔ་དྲོ། སྒྲུབ་མཆོད་རིགས་གཞན་ཐམས་ཅད་ཕྱི་དྲོ་འཚོགས། སྨོན་ལམ་རིགས་ཟླ་བ་གཅིག་གི་ཁོངས་སུ་ཆ་བསྒོ་ནས་རྫོགས་པར་བྱ་དགོས། དེའང་ཚེས་བདུན་ལ་ཚིག་བདུན་གསོལ་འདེབས་ཆོས་དབང་ལུགས། སྨིན་གཏེར་རྣམ་ཐར་གསོལ་འདེབས། རྗེའི་གསོལ་འདེབས་པདྨའི་ལུང་ཟིན་འཕྲོས་རྡོར་སེམས་རྒྱུད་འདེབས་ལ་འཇུག་ཅིང་། བདག་མདུན་བུམ་སྒྲུབ་སྐོང་ཆོག་བདག་འཇུག་ཚོགས་འཁོར་ཆ་གསུམ་བཅས་ཚང་བར་བཏང་། བཀའ་སྲུང་གཏོར་འབུལ་དང་དགོང་མོར་མགོན་ཁང་ནས་ཡོད་སྟབས་འདིར་མི་དགོས། མཐར་བཟང་པོ་སྤྱོད་པ་དང་། བྱམས་པའི་སྨོན་ལམ། ཚེས་བརྒྱད་ལ་གནས་བརྟན་ཕྱག་མཆོད། རྗེའི་གསོལ་འདེབས་རྒྱལ་བ་ཡོངས་ཀྱི་འཕྲོས་མཎྜལ་ཆོག་དངོས་ཚང་བར་བཏང་བའི་མཐར་སྤྱོད་འཇུག་སྨོན་ལམ་གདབ། ཚེས་བཅུར་ཚིག་བདུན་གསོལ་འདེབས་བདེ་གླིང་ལུགས། པདྨས་ལུང་ཟིན་ནས་བརྒྱུད་འདེབས་དུས་གསུམ་སངས་རྒྱས་ལ་འཇུག་ཅིང་། བཀའ་སྲུང་གཏོར་འབུལ་སྐོང་བ་བཅས་ཆགས་མེད་ཞབས་ཀྱིས་མཛད་པ་སྦྱར། པད་སྙིང་རྒྱུད་དང་བི་མ་ལའི་བླ་སྒྲུབ་གྲུབ་ནས་བདེ་སྨོན་ཤེས་བྱ་མ་བཏོན། ཚེས་བཅོ་ལྔར་ཀུན་མཁྱེན་ཇོ་ནང་པ་ཡབ་སྲས་ཀྱི་གསོལ་འདེབས་བསྡུས་པ། རྒྱལ་བའི་མདུན་ན། ཀུན་མཁྱེན་ཆོས་རྗེ། བདེ་ཆེན་ཟབ་གསལ། རྒྱལ་བ་ཡོངས་ཀྱི་བཅས་སོང་ནས་ནང་མཆོད་བྱིན་རླབས་ནས་བརྩམས། མཆོད་ཆོག་དང་ལྷ་དགུའི་སྒྲུབ་ཐབས་ལྟོ་སྦྱར་བའི་སྒྲུབ་མཆོད་གཏོར་འབུལ་ཚོགས་འཁོར་བཅས་རྒྱས་པར་གྲུབ་ནས་དོལ་བུའི་བདེ་སྨོན། ན་མོ་ལོ་ཀེ་ཤྭ་ར་སོགས་སྦྱར། ཉེར་ལྔར་ཇོ་ནང་རྗེ་བཙུན་ཆེན་པོའི་རྣམ་ཐར་གསོལ་འདེབས་ཞལ་གསུང་མ་དང་ཁ་སྐོང་། པདྨས་ལུང་ཟིན་བཅས་ཀྱི་འཕྲོས་སུ་བདེ་མཆོག་སྒྲུབ་མཆོད་བདག་འཇུག་ཚོགས་འཁོར་སོགས་རྒྱས་པར་བྱ་ཞིང་། མཁའ་སྤྱོད་དཀར་དམར་ལ་ཚོགས་བཀྱེབ་མ་གྲུབ་ན་ཚོགས་མཆོད་ཙམ་བྱས་ནས་མཐར་ཕྱག་ཆེན་སྨོན་ལམ་གདབ། གནམ་གང་ལ་ཚིག་བདུན་གསོལ་འདེབས་ཆོས་དབང་ལུགས། སྨིན་གཏེར་སྐྱེས་རབས་གསོལ་འདེབས། རྒྱལ་བ་ཡོངས་ཀྱི་འཕྲོས་ཡང་དག་བརྒྱུད་འདེབས་ནས་བརྩམས་བཟླས་པ་ཚོགས་འཁོར་རྒྱས་པར་བྱ། རྒྱུད་བཀླགས་པ་དང་ཀུན་བཟང་དོན་དོན་ཕྲིན་མཐར་བྱང་གཏེར་ཀུན་བཟང་སྨོན་ལམ་གདབ་དགོས། ཟླ་བ་ཡར་ངོ་མར་ངོ་གཉིས་ལ་གསོ་ཐར་གསོ་སྦྱོང་མདོ་བཀླག་པ་བཅས་མ་ཆག་པར་འདིར་བཞུགས་དགེ་སློང་ཐམས་ཅད་གདིང་ཆོས་བཅས་འདུས་པ་དང་། གཎྜི་བརྡུངས་ནས་བསྔོ་སྨོན་རྫོགས་ཀྱི་བར་གང་དྲན་བྱུང་རྒྱལ་གཏན་ནས་མི་བྱ་བར་ཀུན་སྤྱོད་ཚུལ་ལྡན་གྱིས་བསྒྲུབ་བོ།
ང་། ཉིན་རེའི་ཐུན་བཞིའི་རྣལ་འབྱོར།
སྔོན་འགྲོ། ཤངས་ཆོས། སྦྱོར་དྲུག །རྫོགས་ཆེན་བཞི་པོ་སོ་སོའི་ཉམས་ལེན་གྱི་སྐབས་དང་བསྟུན། མཉམ་བཞག་ཏིང་འཛིན་དང་། རྗེས་ཐོབ་ལྡང་ཉལ་སོགས་སྤྱོད་ལམ་རྣམ་པ་བཞིར་ལམ་ཁྱེར་གྱི་དྲན་ཤེས་བརྟེན་ཏེ་ཐུན་བཞིའི་རྣལ་འབྱོར་སྲང་དུ་གཞུག་དགོས་ཤིང་། དེའི་ཚུལ་ནི་ཁྲིད་ཡིག་སོ་སོར་གསལ་བ་ལྟར་ལ། སྤྱིར་བཏང་རང་རེ་ཐམས་ཅད་སྔགས་བླ་མེད་ཀྱི་ཉམས་ལེན་ཡིན་པར་བརྩི་དགོས་པ་དང་། བོད་འབངས་སྤྱི་དང་ལྷག་པར་བཀའ་རྙིང་གི་འདི་ཕྱིའི་སྐྱབས་མཆོག་སངས་རྒྱས་གཉིས་པ་ཨོ་རྒྱན་གྱི་སློབ་དཔོན་ཆེན་པོ་ཡིན་པ་གཞིར་བྱས་ནས། ཐོ་རངས་ལྡང་བའི་རྣལ་འབྱོར་བསྐྱེད་རྫོགས་སྐབས་བསྟུན་གྱིས་ལྡངས་ཏེ་རླུང་རོ་ལན་གསུམ་བསལ། ལུས་གནད་བསྲང་ལ་མི་རྟོག་པའི་ངང་ལ་ཅི་གནས་སུ་བཞག་སྟེ་ཤེས་པ་རྣལ་དུ་དབབ། རྩ་བའི་ཡི་དམ་ང་རྒྱལ་དང་ལྡན་པས་བདུད་རྩི་མྱོང་། དེ་ནས་བདུད་རྩིའི་རིལ་བུ་དང་ཆོས་སྨན་སོགས་ཡོད་ན་ལྕེ་ལ་བཞག་ཀྱང་ཆོག་ཅིང་། མེད་ན་དེ་དག་གི་ཕབ་རྒྱུན་བཏབ་པའི་བདུད་རྩི་ཀ་པཱ་ལ་ཉེ་ལོགས་སུ་བཞག་ལ་བྱིན་རླབས་ཁ་གསོས་རྒྱས་བསྡུས་གང་རུང་ངམ། མི་འགྲུབ་ན་ཨོཾ་ཨཱཿཧཱུྃ་ཧོར་ལན་གསུམ་གྱིས་དམ་ཡེ་གཉིས་མེད་ཀྱི་བདུད་རྩིར་མོས་ལ་གཡོན་པའི་མཐེབ་སྲིན་གྱིས་མྱོང་། དེ་ནས་ཤེས་ཤིང་སྤྲོ་ན་བླ་མ་དགོངས་པ་འདུས་པའི་བཟླས་བརྗོད་ནུས་པ་སྟོབས་བསྐྱེད་དམ། མི་ནུས་ན་གར་དབང་ཆོས་ཀྱི་དབང་ཕྱུག་གིས་མཛད་པའི་སྒོམ་དོན་དང་འབྲེལ་བར་དབྱངས་གསལ་ལན་གསུམ་སོགས་ཀྱིས་ངག་བྱིན་གྱིས་བརླབ། སྨིན་གླིང་གཏེར་ཆེན་གྱིས་མཛད་པའི་རྟེན་བསྐྱེད་སྔོན་དུ་འགྲོ་བས་གསོལ་འདེབས་ལེའུ་བདུན་མ་ལས། བླ་མ་སྐུ་གསུམ་དང་། ཉི་མ་ལྷོ་ནུབ་མ་སྐད་གཟེངས་བསྟོད་དེ་བཏོན་ལ། བཞེངས་ཤིག་པདྨ་ལ་ཌ་དྲིལ་ཀྱང་བཀྲོལ་མཐར་དབང་ལེན་ཞུ་བསྟིམ་བྱ་བ་ནི་རྟེན་བསྐྱེད་དང་འབྲེལ་བའི་གསོལ་འདེབས་ཐམས་ཅད་ལ་འགྲེ། རྟེན་བསྐྱེད་འདི་སྨིན་གཏེར་ཐོག་མ་རིག་འཛིན་ཐུགས་ཐིག་གི་དགོངས་དོན་བསྒྲིལ་བ་ཡིན་པ་དང་། ཁྲིད་རྒྱུན་བར་མ་ཆད་པ་ཡོད་པས་སྒྲུབ་པ་ལ་ཞུགས་མ་ཐག་པའི་སྐབས་རྒྱལ་སྲས་པདྨ་འགྱུར་མེད་རྒྱ་མཚོའི་ཡིག་ཆ་ལྟར་ཁྲིད་ལུང་ཡང་བྱ་དགོས། དེ་ནས་སྒྲོལ་དཀར་ཡིད་བཞིན་འཁོར་ལོའི་བསྒོམ་བཟླས་ཁྱུགས་ཙམ་དང་། རྨི་ལམ་འཚུབས་པའི་སྐབས་སོགས་སུ་སྲུང་འཁོར་ཡང་བཟླས་སྒོམ་བྱས་ནས། ཕྱག་ཆེན་སྔོན་འགྲོ། བསྙེན་སྒྲུབ་སྐབས་བདག་བསྐྱེད། རྫོགས་རིམ་གཏུམ་མོ་སོགས་སོ་སོའི་སྐབས་བསྟུན་གྱི་དགེ་སྦྱོར་དངོས་གཞི་ལ་འཇུག །ནམ་ལངས་པར་ཉེ་བ་ན་ཐུན་གྲོལ་ནས་གསང་ཐིག་སྐོར་ལས་རྡོར་སེམས་ཕྱག་རྒྱ་གཅིག་པའི་རྣལ་འབྱོར་གྱིས་ཡིག་བརྒྱ་ཉེར་གཅིག །སཏཱ་ཕྲེང་སྐོར་ཙམ་དང་། བུམ་པ་བཅུད་ལྡན་སྔ་ཚགས་བྱས་པ་ལ་བུམ་བཟླས་གང་འགྲུབ་མཐར་དབང་ལེན་བྱ། གྲུབ་ན་དེ་མཐར་ཚེ་སྒྲུབ་སྒོམ་བཟླས་ཀྱང་སྦྱར། ནམ་ལངས་པ་དང་ཆབ་གཏོར་འབྲིང་བསྡུས་གང་འགྲུབ་བཏང་། འདིའང་དགོང་མོ་ནས་བཤམས་པ་དང་། འབགས་བཙོགས་ཀྱིས་གོས་པ་སོགས་སླ་ཆོས་གང་བྱུང་བྱས་ན་ཕན་ཡོན་ལས་ཉེས་དམིགས་ཆེ་བས། དམིགས་རིམ་ཕྱག་ལེན་ལེགས་པར་བསླབ་ལ་ཚུལ་བཞིན་བྱ་དགོས། ཐུན་གྲོལ་འཕྲུལ་དཔལ་ཆེན་ལྷ་ཁང་དུ་འཚོགས་ཏེ་ཚིག་བདུན་གསོལ་འདེབས། སྤྲོས་བྲལ་བདེ་ཆེན་མ་དང་ཕྱག་འཚལ་ཉེར་གཅིག །བླ་མ་སངས་རྒྱས་རྗེས་དྲན་གྱི་ཞར་བྱུང་ངེས་དོན་སྙིང་པོའི་ལྟ་བ་བསྐྱང་བ་དང་། ཕུང་པོ་གསུམ་པའི་མདོ་དང་བླ་མ་རྡོར་འཛིན་མས་ཉིན་ཞག་གཅིག་གི་ཉེས་བྱས་རྣམས་བཤགས་ཤིང་། ཞི་གནས་གསོ་སྦྱོང་། བྱང་སྡོམ་ལེན་པ། སྔགས་ཀྱི་སྡོམ་བཟུང་རྣམས་ཞར་བྱུང་ཚོགས་བསགས་སྙིང་པོ་བསྡུས་པ་ཐར་པའི་གཤམ་གྱི་ཟིན་ལྟར་བྱ། དེ་ནས་ཞོགས་ཐུན་གྱི་ཐོག་མ་བསྟན་པ་རྒྱ་མཚོའི་རྩ་བ་ལ་མི་བྱ་བའི་དམ་བཅའ་བསྒྱུར་ཏེ་ཚིག་རྗེས་སུ་དོན་དྲན་པར་བྱས་ལ་དགེ་སྦྱོར་དངོས་གཞི་སོ་སོའི་སྐབས་བསྟུན་བྱ། ཉིན་གུང་དཀོན་མཆོག་རྗེས་དྲན་སྔོན་དུ་འགྲོ་བའི་གཙང་སྦྲ་ཐོན་པས་ཕུད་དང་འཕྲོག་མའི་ཆང་བུ་བཞག །གུང་ཚིགས་ལ་ཟས་ཀྱི་རྣལ་འབྱོར་གྲོལ་ཏིག་དང་ཀུན་མཁྱེན་དྲི་མེད་འོད་ཟེར་གྱི་གསུང་ཟུང་དུ་འབྲེལ་བས་ནང་གི་ཚོགས་འཁོར་གྱི་ལོངས་སྤྱོད་མཐར་ལྷག་མའི་ཆང་བུ་བསྔོས་ཏེ་ཡོན་སྦྱོང་བའི་གཟུངས་དང་མདོ་བསྔོ་བྱས་ལ་གསོལ་འདེབས་བསམ་པ་ལྷུན་གྲུབ་དང་བར་ཆད་ལམ་སེལ་བཏང་། གཞན་ཡང་འཇམ་དཔལ་མཚན་བརྗོད་དང་ཤེར་ཕྱིན་སྡུད་པ་སོགས་མདོ་རྒྱུད་ཟབ་མོ་བཀླག་པའམ། བསྙེན་སྒྲུབ་ཀྱི་སྐབས་རྣམས་སུ་གྲངས་ལ་མི་བརྩི་བའི་སྔགས་བཟླས་ཤུབ་བུ་མི་འཆད་པར་བྱ། ཕྱི་ཐུན་གྱི་ཐོག་མར་གསང་ཐིག་ཡང་དག་ཕྱག་རྒྱ་གཅིག་པའི་སྒོམ་བཟླས་ཁྱུགས་ཙམ་དང་གཏོར་འབུལ་དབང་ལེན་བཅས་བྱ་ཞིང་ཐུན་གང་ཡིན་ལ་འཇུག །ཐུན་གྲོལ་འཕྲལ་མགོན་ཁང་བསིལ་བ་ཚལ་དུ་རྔ་བརྡ་དང་བསྟུན་ནས་འཚོགས་ཏེ། ཚིག་བདུན་ཐུང་བ། བདེ་ཆེན་ཟབ་གསལ། གདོད་ནས་རྣམ་དག །དུས་གསུམ་རྒྱལ་ཀུན་རྣམས་སྔོན་དུ་འགྲོ་བས་ཤངས་ལུགས་རྒྱུད་སྡེ་ལྔ་ལུས་དཀྱིལ་གྱི་བདག་བསྐྱེད་ལ་གཙོ་བོ་བརྒྱ་རྩ་བརྒྱད་གཞན་རྣམས་ལྔ་བཅུ་རེ་ཙམ་གྱི་བཟླས་པ་བསྡུ་ལྡངས་ནས་གཏོར་འབུལ་བཅས་གྲུབ་ཅིང་། མྱུར་མཛད་ཡེ་ཤེས་མགོན་པོའི་གཏོར་ཆོག་འཕྲིན་ལས་གཏེར་མཛོད་ལ་བསྐྱེད་ཆོག་བསྡུས་པ་ཚིགས་བཅད་མ་སྦྱར་བ་དང༌། བླ་མགོན་དབྱེར་མེད། དམ་ཚིག་གྲིབ་སེལ། མཁའ་འགྲོ་དབང་སྡུད་རྣམས་དང་བཅས་པའི་བསྙེན་བཟླས་གཏོར་འབུལ་བྱ། དེའང་གྲིབ་སེལ་ཡིག་བརྒྱ་ཉེར་གཅིག །གཞན་རྣམས་བརྒྱ་རྩ་བརྒྱད་རེ་འགྲོ་ངེས་བཟླ། དེ་ནས་རྡོ་རྗེ་བེར་ཅན་ལྕམ་དྲལ་བདག་སྒོམ་བཟླས་པ་བརྒྱ་རྩ་འཁོར་ལྔ་སོགས་ཀྱི་གཏོར་འབུལ་སྔགས་བསྔོས་དང་བཅས་པ་རྗེ་བཅུ་བཞི་པའི་གསུང་ལྟར་བྱ། དེ་ནས་སྨིན་ལུགས་དམ་ཅན་སྤྱི་གཏོར་གྱི་ཁོངས་སུ་སྔགས་སྲུང་མ་དང་དུར་ཁྲོད་མ་མོའི་འཕྲིན་ལས་སྐོང་བ་དང་བཅས་པ་སྦྱར་ཏེ་གཏོར་འབུལ་གྲུབ་ནས། ཆོས་སྒྲུབ་པའི་བར་ཆད་སྤྱི་དང་བྱེ་བྲག་ཐམས་ཅད་ཟློག་པའི་ཆེད་དུ། ཤེར་སྙིང་བདུད་ཟློག །སེང་གདོང་མ། ཡང་ཟློག །ལོ་ཀྲི་རྣམས་ཀྱི་སྒོམ་བཟླས་མདོར་བསྡུས་དང་འབྲེལ་བའི་ཐལ་རྡེབ། སྲི་ཟློག་འཁོར་ལོ་འབར་བ་གཏེར་གཞུང་དང༌། སྔགས་བདུན་ཙམ་དུས་མིན་འཆི་ཟློག་གསོལ་འདེབས། འཇམ་མགོན་བླ་མ་པདྨ་གར་དབང་གི་ཞབས་བརྟན་འཇམ་དབྱངས་མཁྱེན་བརྩེ་དབང་པོས་མཛད་པ་འཇིག་རྟེན་གསུམ་མགོན་མ་ཆག་མེད་དགོས། རྒྱབ་ཆོས་ཐེམས་མེད་ནས་འབྱུང་བའི་བསྔོ་སྨོན་གྱི་རྒྱས་གདབ། དགོང་ཐུན་གྱི་ཐོག་མར་མེ་སྲུང་མདོར་བསྡུས་ཙམ་དང་། རྟེན་བསྐྱེད་བཅས་ལྷོ་ནུབ་རྔ་གཡབ་མའི་གསོལ་འདེབས་དབང་ལེན་ཞུ་བསྟིམས་བྱས་ཏེ་དངོས་གཞི་སོ་སོའི་ཐུན་བཟུང་། སྲོད་ལ་ཐུན་གྲོལ་བ་ན་གསང་ཐིག་རྡོ་རྗེ་ཕུར་པའི་སྒོམ་བཟླས་གཏོར་འབུལ་གྲུབ་ན་དབང་ལེན་ཡང་བྱ། དབང་ལེན་གསུམ་པོ་བྲེལ་བ་ཆེ་བའི་སྐབས་ལྟ་བུར་མ་འགྲུབ་ནའང་སྒོམ་བཟླས་ཆག་ཏུ་མི་རུང་། རྟེན་བསྐྱེད་སྔོན་དུ་འགྲོ་བའི་གསོལ་འདེབས་སངས་རྒྱས་བསྟན་པ་དང་ནུབ་ཕྱོགས་བདེ་ཆེན་མ་བཏང་ལ་དབང་ལེན་ཞུ་བསྟིམས་མཐར་ལུས་མཆོད་སྦྱིན་མདོར་བསྡུས་བྱ། སྔ་ཕྱི་ནམ་བདེར་བསྟན་པ་རྒྱ་མཚོའི་རྩ་ཚིག་བཤགས་ཚིག་དང་ལྟུང་བཤགས་སོགས་བཏོན་ལ་སྦྱོར་དྲུག་སོར་བསམ་དང་རྫོགས་ཆེན་འོད་གསལ་དངོས་གཞིའི་སྐབས་མིན་པའི་གཞན་རྣམས་སུ་ཕྱག་ཀྱང་ཅི་འགྲུབ་འཚལ། སྤྱི་ལ་འོད་དཔག་མེད་ཀྱི་ཉལ་འཕོ་དང་ཆོས་དྲུག་ཕྱག་རྫོགས་སོ་སོའི་སྐབས་སྦྱར་ཉལ་བའི་རྣལ་འབྱོར་གྱི་གཉིད་ཀྱང་ཐ་མལ་དུ་མ་ཤོར་བར་ལམ་དུ་བསྒྱུར། སླར་ཐོ་རངས་ལྡང་བའི་རྣལ་འབྱོར་ལ་འཇུག་པ་སོགས་ཉིན་གཅིག་བཞིན་ཐང་ལྷོད་ཆག་འཁྲི་མ་སོང་བར་བསྟར་ཆགས་སུ་འབད་དགོས། གཏུམ་མོ་ལ་འཇུག་པ་ནས་བཟུང་སྒྲུབ་པ་ནམ་གྲོལ་གྱི་བར་དུ་དུས་མཆོད་རྣམས་དང་། འདོན་བྱ་འཕར་མ། འོད་གསལ་སོར་བསམ། ཐོད་རྒལ་རྣམས་སྦྱངས་པའི་སྐབས་མ་ཡིན་པར་དུས་རྒྱུན་དུ་འཕྲུལ་འཁོར་ཡང་ནཱ་རོ་དང་ནི་གུ་རེས་མོས་ཀྱི་རྒྱག་དགོས། སྦྱོར་དྲུག་འཕྲུལ་འཁོར་ནི་རྐང་གྲངས་མང་བ་དང་ཡུན་ཐུང་བས་ལེགས་པར་རྐང་ཟིན་པ་མི་འོང་སྟབས་རེ་ཞིག་བཏང་སྙོམས་སུ་བཞག་པའོ།
།ཅ། མགོན་ཁང་སྒྲུབ་པ་པོའི་ཉམས་ལེན་དང་འདོན་བྱའི་སྐོར།
ལོ་དང་པོ་གཉིས་ལ་ཨོ་རྒྱན་ལས་འཕྲོ་གླིང་པའི་ཟབ་ཆོས་བླ་མ་དཀོན་མཆོག་སྤྱི་འདུས་ཀྱི་བསྐྱེད་རྫོགས་མཐར་ཕྱིན་པ་དགོས་ཏེ། ཐོག་མར་བྱིན་རླབས་བླ་མའི་རྣལ་འབྱོར་ཞག་གསུམ་ཙམ། ཐུན་མོངས་སྔོན་འགྲོ་བཞི་སྦྱོར་སངས་གླིང་ཡང་དེ་ལྟར་ཞག་གསུམ་རེ་སྦྱང་། དེ་ཁྲིད་ཆེན་གུ་རུའི་དགོངས་རྒྱན་ལྟར་སྐྱབས་འགྲོ། སེམས་བསྐྱེད། ཡིག་བརྒྱ། མཎྜལ། བླ་མའི་རྣལ་འབྱོར་གྱི་གསོལ་འདེབས་ཆུང་བ་བཅས་འབུམ་ཕྲག་གསུམ་མམ་བཞི། དངོས་གཞི་ནང་སྒྲུབ་ཟླ་བ་གསུམ་ལ་འབུམ་ཕྲག་བཅུ་གཉིས་ཡན་ཆད་གང་འགྲུབ། གསང་སྒྲུབ་དྲག་པོ་འབུམ་ཕྲག་བཞི། ཡང་གསང་གདོང་མ་འབུམ་ཕྲག་གསུམ། འཕྲིན་ལས་བཞི་སྒྲུབ་སོ་སོར་ཞག་གསུམ་རེ་ཙམ། ཚེ་སྒྲུབ་བདུན་གསུམ་མམ་ཟླ་གཅིག་ལོངས་སྐབས་དང་སྦྱར་ལ། ཁ་སྐོང་སྦྱིན་སྲེག་ཞི་བཟླས་ཀྱི་བཅུ་ཆ་བཅས་འགྲུབ་པར་བྱས་ནས། བསྐྱེད་རིམ་རྗེས་འབྲེལ་ཨ་ནུ་དང་ཨ་ཏིའི་རྣལ་འབྱོར་ཞག་གྲངས་ཉུང་ཙམ་རེ། དེ་ནས་རྫོགས་རིམ་ཁྲིད་ཡིག་ཁམས་གསུམ་ཡོངས་གྲོལ་ལྟར་ཁྲིད་རྐང་སོ་སོར་ལོ་གཅིག་གི་ཞག་གྲངས་ཆ་བགོས་ནས་སོ་སོར་རྟགས་ཐོན་དུ་སྦྱང༌། དེའང་མ་ཧཱ་ཡོ་གའི་བསྐྱེད་རིམ་དང་འབྲེལ་བ་དང་། ཨ་ནུ་ཡོ་གའི་རྩ་རླུང་དང་འབྲེལ་བ་རྣམས་ཞག་གྲངས་ཉུང་ངུར་ཅི་རིགས་སྦྱང་པས་ཆོག་ཅིང་། ཨ་ཏི་རྫོགས་ཆེན་སྔོན་འགྲོ་ཐུན་མིན་རྣམས་དངོས་གཞི་ཁྲེགས་ཆོད་ཐོད་རྒལ་ཟླ་གྲངས་ཁ་ཤས་ལ་མྱོང་བའི་སྣེ་ཟིན་ཏུ་སྒོམ་དགོས་ཤིང་། མཐར་འཕོ་བའང་རྟགས་ཐོན་དུ་སྦྱང་། དེ་དག་སོ་སོའི་ཁྲིད་ཡིག་ཆ་ལག་གཞུང་པོད་བཅས་པའི་བཀླག་ལུང་དངོས་གཞིའི་ཐོག་མར་བྱིན་རླབས་དབང་བསྐུར་ཞི་དྲག་སེང་གསུམ་ཚེ་དབང་བཀའ་གཏད་བཅས་ནོད་དགོས། ལོ་ཕྱི་མ་ཙམ་དུ་དབང་ལུང་ཁྲིད་བཀའ་ལེགས་པར་ནོས་ཏེ་ལས་བྱང་བདེ་བ་ཆེན་པོའི་རྣམ་རོལ་གཞིར་བྱས། ལོ་ཆེན་དྷརྨ་ཤཱིས་མཛད་པའི་བསྙེན་ཡིག་ཆེན་མོས་ཁོག་དབུབ། གསལ་བྱེད་ཏིལ་མར་སྒྲོན་མེར་བཤད་ཆོད་ལག་ལེན་དུ་བསྟར་ནས་སྒྲུབ་ཆེན་བཀའ་བརྒྱད་བདེ་གཤེགས་འདུས་པའི་བསྙེན་པ། ཞི་བར་བསྙེན་པ་བདུན་ཕྲག་གཉིས་ཙམ། ཁྲོ་བོར་སྒྲུབ་པ་ཟླ་བ་དྲུག་ཕན་ཆོད་ལོ་གཅིག་ཚུན་གང་འགྲུབ་ལོངས་ཁྱབ་དང་བསྟུན། མཐར་ཁ་སྐོང་ཞི་བའི་སྲེགས་བླུགས་ཀྱང་བྱ། མགོན་བླ་སྒྲུབ་བར་དུ་སྡོད་དགོས་པས་གཏེར་གསར་ཚེ་བདག་བསྙེན་མཚམས་ཟླ་བ་གསུམ་ཡང་ཞི་དྲག་སོ་སོའི་བསྙེན་ཚད་འཁྱོལ་བ་དང་། ད་རུང་སྒྲུབ་ན་ཕུར་པ་དང་རྟ་མགྲིན་ནག་པོའི་བསྙེན་ཚད་ཀྱང་སྒྲུབ་པར་བྱའོ།
།ལོ་མཆོད་དང་ཟླ་དུས་ཀྱི་མཆོད་པའི་འདོན་བྱའི་རིགས་རྣམས་སྒྲུབ་པ་སྤྱིའི་གྲལ་དུ་ཞུགས་དགོས་པ་དང་། ཉིན་བཞིན་རྒྱུན་གྱི་འདོན་སྒོམ་ཐམས་ཅད་ཀྱང་གོང་སྨོས་སྒྲུབ་པ་སྤྱི་རྣམས་དང་ཁྱད་པར་མེད་པ་མ་ཆད་པར་དགོས་ལ། ལྷག་པོར་བྱ་རྒྱུ་ཐོར་ཐུན་སྒྲོལ་དཀར་བཟླས་སྒོམ་གྱི་རྗེས་སུ་བླ་མ་དཀོན་མཆོག་སྤྱི་འདུས་ཞི་བའི་ལས་བྱང་བཟླས་པ་ཚེ་སྒྲུབ་ལྕགས་ཀྱི་རི་བོ་བཅས། ནམ་ལངས་རི་བོ་བསང་མཆོད་དང་དགེ་ལེགས་སྤྲིན་ཕུང་ལྟ་བུའི་ལྷ་བསང་ཉུང་ངུ་། གོང་ཐུན་མཇུག་ཏུ་གཏེར་གསར་ཕྱག་དྲུག་པའི་འཕྲིན་ལས་བཟླས་པ་གསོལ་སྐོང་བཅས། སེར་པོ་སྐོར་གསུམ་དང་ལྷ་མོ་དཔལ་གྱི་གཏོར་འབུལ་རྣམས་ཀྱང་བྱ་དགོས། ལོ་རེ་བཞིན་ཟླ་བ་བཞི་པའི་ནང་ཀླུ་ཐེབས་དང་བསྟུན་མགོན་བླ་དང་ཞབས་བརྟན་སྒྲུབ་བླ་གཉིས་པོ་རེས་མོས་ཀྱིས་ཉིན་གཉིས་ལ་ཀླུ་རྟེན་རྩར་ཀླུ་ཆོག་གདེངས་ཅན་འདོད་འཇོ་དང་། གནམ་ཆོས་ཀླུ་ཆེན་བརྒྱད་མཆོད། ཆགས་མེད་གསུང་ཡུལ་གྱི་ཆུ་མིག་ཀླུ་མཆོད། ཀླུ་བསང་དང་ཀླུའི་སྤང་སྐོང་། ཀླུ་གཏོར་རིགས་གྲངས་གསོག་བྱ། ཟླ་བ་ལྔ་པའི་ཡར་ཚེས་བཅུ་དང་བཅུ་གཅིག་གཏེར་ཆེན་རིན་པོ་ཆེས་སྒྲུབ་གནས་ཀྱི་གཡས་རོལ་ནས་ཟབ་གཏེར་དུ་སྤྱན་དྲངས་པའི་དུས་མཆོད་ལ་མགོན་བླ་གཞིར་བྱས། ཞབས་བརྟན་སྒྲུབ་བླ་རེས་མོས་བྱོན་ཏེ་སློབ་དཔོན་རྣམ་གསུམ་གྱི་སྒྲུབ་ཕུག་གསུམ། མཚོ་རྒྱལ་བི་རོ་ནམ་སྙིང་བཅས་པའི་སྒྲུབ་ཕུག་ལ་གཏེར་གསར་ཐུགས་སྒྲུབ་རྣམ་གཉིས། བི་མའི་བླ་སྒྲུབ། ཤེལ་ཕུག་བཀའ་བརྒྱད་རྫོང་འཕྲང་མ། ཡང་དག་ནམ་མཛོད་མ་སོགས་ཀྱི་འཕྲིན་ལས་དང་འབྲེལ་བར་ཚོགས་བརྒྱ་གཉིས་གསུམ་གང་འགྲུབ་ཉིན་གཉིས་སུ་བསྒྲུབ་དགོས་པའི་མཆོད་ཆས་གསོལ་ཆས་སོགས་བླ་བྲང་ནས་གསར་དུ་དགོས་རྒྱུ་དང་། ཀླུ་མཆོད་གྲོགས་དན་སྒྲུབ་གཉེར་ནས་བྱ་དགོས། ཚོགས་བརྒྱ་ཉིན་གཉིས་ལ་བཞེང་པའི་ཞབས་འདེགས་པ་དགོན་ནས་གཏོང་དགོས་པ་ཡིན།
ཆ། ཀུན་སྤྱོད་བླང་དོར་གྱི་བཅའ་ཁྲིམས།
རྡོར་སློབ་ནས་སྒྲུབ་སྡེ་འདིར་མཁོ་ཚད་ཀྱི་དབང་བསྐུར། ཁྲིད་ལུང་། འདོན་འགྲིགས། བཤམས་བཀོད། དབྱངས་རོལ་སོགས་འཆད་སྤེལ་བསླབ་སྟོན་ཕེར་ངེས་བྱ་བའི་ཐོག་མར་མི་ཤེས་པ་རྣམས་ལ་བསླབ། བར་དུ་མི་རེད་པ་ཐམས་ཅད་བཏང་སྙོམས་སུ་མི་བཞག་ཅིང་བྱམས་པས་བཅོས། མི་ཉན་པ་ཚབས་ཆེན་བྱུང་ན་མང་ཇ་བརྒྱ་ཕྱག་གིས་མཚོན་པའི་འོས་འཚམས་ཀྱི་ཆད་པ་བཅད། སྒྲུབ་པ་སྤྱི་རྣམས་ཀྱིས་སྣམ་སྦྱར། ཆོས་གོས། མཐང་ཤམ། གདིང་བཅས་མེད་ཐབས་མེད་ཅིང་། འཛོམས་ན་གུང་ཚིག་སྣོད་ལྷུང་བཟེད་ཀྱང་འཆང་པ་དང་། ཨང་རག་དང་སྒོམ་ཐག །འཛོམ་ན་སྒོམ་ཞྭའང་འཚགགཏུམ་མོ་ལ་སླེབས་ཕྱིན་ཆད་ཤ་འབྱར་གྱི་གྱོན་པ་གཏན་ནས་གྱོན་སྲོལ་མེད་པས་ཐོག་མ་ནས་ཕྱི་འགགས་སོགས་ཆག་བྱ། འདོན་བྱ་རྣམས་ཀྱང་བྱང་འདྲེན་རྡོར་སློབ་བླ་མས་གྲུབ་ན་ལེགས། མ་ལྕོགས་ན་སྐད་འདོན་བཟང་བ་རེ་བཟོ། མགོན་ཁང་གི་མཆོད་བཤམ། གཏོར་བཅའ། ཕྱི་ནང་ཚགས་དོན་སོགས་མགོན་བླ་ཁོ་ནས་བྱ་དགོས། ཚོགས་རྗེས་སླེབས་མིན་བྱུང་ན་དགོན་ཆེན་གྱི་བཅའ་ཁྲིམས་ལྟར་བྱ་དགོས། སྒྲུབ་ཁང་དུ་ཐོག་མར་མཚམས་ཐོ་བཞག་པ་ནས་བཟུང་མ་བླངས་ཀྱི་བར་ལོ་མཇུག་མགོན་པོའི་བསྙེན་རྒྱུན་མཁན་བརྒྱད་པོ་དེ་མ་གཏོགས། གྲྭ་པ། མི་སྐྱ། ཁྱད་པར་བུད་མེད་རིགས་དྲག་ཞན་ཆེ་ཆུང་སུའང་མཚམས་ཐོ་ཚུན་ལ་བཙུད་མི་ཆོག །ཇ་ཁང་དུ་གྲྭ་པ་བཙུད་ན་ཇ་བརྒྱ་ཕྱག །མི་སྐྱ་བཙུད་ན་སྙན་ཤལ་མར་མེ། ཇ་བག་གཅིག་གི་ཆད་པ། བུད་མེད་བཙུད་ན་སྐུ་མཆེད་རྣམས་མདུན་སྙན་ཞུ་ཕུལ་བའི་རྒྱུ་ལུས་གཉིས་ཀར་ཉེས་ཆད་དང༌། ཚབས་ཆེན་གནས་ནས་དབྱུང་། བསྙེན་རྒྱུན་མཁན་ཐུན་དཔོན་སྒྲུབ་བླ་གཉིས། དགེ་སློང་དྲུག་དགོས་པ་དེ་རྣམས་ཀྱང་ཉེར་བཞིའི་ཉིན་ཡར་བྱོན་སྤོས་ཆབ་བྱས་ནས་མགོན་ཁང་དུ་བཙུད། ཚེས་གཉིས་མར་བྱོན་པ་ལས་དེའི་སྔོན་རྗེས་ནམ་དུའང་བཙུད་པ་དང་འཛུལ་བ་སོགས་བྱེད་མི་ཆོག །དེ་བར་སྒྲུབ་པ་སུས་ཀྱང་རབ་གསལ་ནས་མགོ་འབུད་པ་དང་། ཉི་མཐོང་ནས་རྒྱབ་ཏུ་ལྟ་བ་སོགས་བྱེད་མི་ཆོག་ཅིང་། བྱས་ན་ཚབས་ཆེ་ཆུང་དང་བསྟུན་པའི་བརྒྱ་ཕྱག་ནས་ཉེར་ལྔའི་བར་འཚལ་དགོས། སྒྲུབ་པ་རྣམས་སྤྱིར་ཕན་ཚུན་ཐོག་མ་ནས་མཛའ་ཆེ་བ་མི་བྱ། ཐ་མ་འཁོན་པའི་རྒྱུར་འོང་། འཁོན་ན་རྡོ་རྗེ་མཆེད་ཀྱི་དམ་ཚིག་དང་འགལ། རྩེད་མོ་ཁ་མཚར་མི་རྩེ། རྩེད་སྣ་བྱུར་གྱིས་ཁྲིད་པ་ཡིན། ཐམས་ཅད་བླ་མའི་བཀའ་དང་དགོངས་པ་ལ་བསྟུན། སྒོ་ཕྱི་ནང་བྱོན་བཞུགས་སྐབས་ཐམས་ཅད་ལ་གཟན་ཆེན་དང་མི་འབྲལ། ཚོགས་ལ་གཤམ་ཐབས་མ་གྱོན་པར་མི་འགྲོ། བློ་གྲོས་གསར་པའི་རིགས་ཀྱང་སྒྲུབ་པ་ལ་ཞུགས་པའི་ཚེ་དགོས་ངེས་དང་དམིགས་བསལ་སྡོམ་གསུམ་བསླབ་བྱའི་གཞུང་ཙམ་མ་གཏོགས། རིག་གནས་ཆེ་ཆུང་གཞུང་ལུགས་ཀྱི་རིགས་ལ་འཆད་ཉན་སྦྱང་རྩོལ་ལྟ་རྟོག་གཏན་ནས་བྱེད་མི་ཆོག །སྤྱིར་ཐོས་བསམ་དང་བསླབ་སྦྱང་གལ་འགངས་ཤིན་ཏུ་ཆེ་ཡང་སྒོམ་པ་ཉམས་ལེན་གཙོ་བོར་བྱེད་པའི་སྐབས་སུ་རྣམ་རྟོག་གི་འཆར་སྒོ་མང་ན་ཉམས་མྱོང་རྒྱུད་ལ་སྐྱེ་བའི་གེགས་བྱེད་ཅིང་། ཐོས་བསམ་མི་ཚེ་ཧྲིལ་པོར་བྱས་པ་ལས་གནད་དུ་སོང་བའི་ཉམས་ལེན་ཐུན་གཅིག་ས་ཆོད་ཆེ་བ་ཡང་། ཏིང་ངེ་འཛིན་མཆོག་དམ་པ་ལས་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་བསྩལ་བ། བསམ་གཏན་གྱི་ཏིང་ངེ་འཛིན་བསྒོམས་པས་དགེ་སྦྱོང་གི་འབྲས་བུ་བཞི་མ་ཐོབ་ཀྱང་། མང་དུ་ཐོས་པ་ལས་ཁྲི་ཕྲག་སྟོང་གིས་འཕགས་སོ་ཞེས་གསུངས་པ་ལྟར་རོ། དེ་ལྟར་སྒྲུབ་ཁང་དུ་ལོ་ཟླའི་གྲངས་ཚང་བ་ཙམ་གྱིས་མ་ཆོག་པར། བསམ་སྦྱོར་རྣམ་དག་དང་ཉམས་ལེན་ཚད་ལྡན་རྒྱུད་ལ་སྐྱེ་ཕྱིར་ཚེ་འདིའི་ལྟོ་རྒྱབ་གཙོ་བོར་བྱེད་པའི་དབང་དུ་མ་སོང་བར་བློ་ཕུག་ཆོས་ལ་གཏད། ཆོས་ཕུག་ཤི་ལ་གཏད་དགོས་ཤིང་། དུས་རྒྱུན་དུ་དབེན་པ་བསྟེན་པའི་ཕན་ཡོན་དང་མི་བསྟེན་པའི་ཉེས་དམིགས་བསམ་པར་བྱ། སྤྱིར་སྒྲུབ་གྲྭ་འདིར་ཞུགས་ཕྱིན་ཆད་དགོན་ཡུལ་གར་སོང་གར་སྡོད་ཐམས་ཅད་དུ་ལུས་ཚུལ་ཁྲིམས་ཀྱི་གོས། ངག་ཁ་བཏོན་བཟླས་བརྗོད། སེམས་བྱམས་སྙིང་རྗེ་མོས་གུས་དག་སྣང་བསྐྱེད་རྫོགས་ཀྱི་ཏིང་ངེ་འཛིན་དང་མི་འབྲལ་བར་རྟག་ཏུ་གཡོ་སྒྱུ་མེད་པའི་གཞན་ཕན་གྱི་སེམས་དང་། བག་ཡོད་དྲན་ཤེས་ཀྱི་སྒོ་ནས་ནམ་གྱི་ཆ་སྟོད་སྨད་ལ་མི་ཉལ་བར་རྣལ་འབྱོར་ལ་བརྩོན།
མདོར་ན་སྒྲུབ་གྲྭ་འདིར་ཇོ་ཤངས་རྫོགས་གསུམ་སོགས་སྤྱིར་སྒྲུབ་བརྒྱུད་ཤིང་རྟ་བརྒྱད་ཀྱི་ཉམས་ལེན་ཆ་ཚང་བར་ཡོད་ཀྱང༌། གཙོ་ཆེར་ལོ་དང་པོ་དང་གཉིས་པའི་ཕྱེད་སྔ་མར་ཤངས་པའི་གདམས་ངག་མཛོད་ལས་ཤངས་ཆོས་སྐོར་གྱི་པོ་ཏི་གཉིས་ཡོད་པ་དེ་ཉམས་སུ་ལེན་པ་དང་། དེ་རྗེས་ལོ་གཉིས་པའི་ཕྱེད་ཕྱི་མར་སྦྱོར་བ་ཡན་ལག་དྲུག་སོགས་ཇོ་ནང་པའི་གདམས་པ་ཉམས་སུ་ལེན་པ། ལོ་གསུམ་པར་མན་ངག་རྫོགས་པ་ཆེན་པོ་དང་རྡོར་སེམས་ཞི་ཁྲོ་སོགས་སྔ་འགྱུར་རྙིང་མའི་གདམས་པ་ཉམས་སུ་ལེན།
གཞན་ཡང་འཇམ་མགོན་ཀོང་སྤྲུལ་གྱིས་རྫོང་ཆེན་ཁམས་ཕུག །ཨ་ལོའི་ དཔལ་(འགར་དབལ་ཞེས་བྲིས་པའང་སྣང་)དེའུ་དང་། ཙཱ་འདྲའི་གནས་ལག་དཔེ་ཝར་ བཅས་ཀྱི་གནས་ཆེན་གསུམ་པོ་རྣམས་སུ་ཡང་རྗེ་མཁྱེན་བརྩེའི་བཀའ་ལྟར་བཞུགས་ཚུལ་ཀུན་ལ་མཚོན་པར་མཛད། དེ་མིན་ཙཱ་འདྲའི་གནས་ལག་གནས་ཆེན་བཅོ་ལྔ་སྟེ་འབུར་མོ་བྲག་དང་། དཔའ་འོག་པར་ར་བྲག །ཨ་ཁྲི་ར་ཧེ་དགོན། ཨ་རབ་ཨན་ཕུག་དགོན། དཔལ་འབྱོར་ཞི་ཁྲོ་བྲག །སོ་བྲམ་རིན་ཆེན་ཕུག །སེང་གནམ་བྲག །བཀྲ་ཤིས་ཉི་ཟླ་དཔལ་ཕུག་སོགས་ཀྱི་གནས་ཆེན་འགར་ཡང་སྔ་ཕྱིར་ཚོགས་མཆོད་དང་དབང་ཁྲིད་ཅི་རིགས་མཛད་དོ།
II.6.3.2 Tsabtsa Samdrup Chödzong Ling
།གཉིས། ཚབ་ཚའི་སྒྲུབ་སྡེ་བསམ་གྲུབ་ཆོས་རྫོང་གླིང་།
ཚབ་ཚ་ཆོས་འཁོར་རྣམ་རྒྱལ་གླིང་ནི་དེང་སི་ཁྲོན་ཞིང་ཆེན་དཀར་མཛེས་ཁུལ་སྡེ་དགེ་རྫོང་གི་ནུབ་བྱང་མཚམས་ཀྱི་སྤྱི་ལེ་200ཙམ་ཡོད་པའི་ཨ་ཕྱུག་ཡུལ་ཤོག་ཁོངས་སུ་གནས་ཤིང་། ཐོག་མར་འགྲོ་མགོན་ཕག་མོ་གྲུ་པའི་དངོས་སློབ་གྲུབ་ཐོབ་ཉག་སེར་གྱིས་ཕྱག་བཏབ་པའི་ཕག་གྲུ་བཀའ་བརྒྱུད་ཀྱི་དགོན་སྡེ་ཞིག་ཡིན་ཀྱང་དར་རྒྱས་དེ་ཙམ་མ་བྱུང་བས། སྐབས་ཤིག་རིང་སྨར་ཚང་བཀའ་བརྒྱུད་ཀྱི་ལུགས་འཛིན་པ། སླར་ཀརྨ་སྐུ་ཕྲེང་བདུན་པ་ཆོས་གྲགས་རྒྱ་མཚོའི་རྟོགས་པ་དོན་གྱི་བརྒྱུད་པ་འཛིན་པའི་བུ་ཆེན་ཆུ་འཕུར་པ་གྲགས་པ་རྒྱལ་མཚན་གྱིས་གདན་ས་བསྐྱངས། དེ་རྗེས་རྗེ་མི་བསྐྱོད་རྡོ་རྗེས་གྲུབ་དབང་ཀརྨ་རབ་འཕེལ་རང་ཉིད་ཀྱི་རྒྱལ་ཚབ་ཏུ་མངའ་གསོལ་ཞིང་ཀརྨ་པའི་ཚབ་ཚ་བླ་མ་ཞེས་པའི་བཀའ་ཐམ་འཇའ་ཟེར་ཅན་ཞིག་ཀྱང་བསྩལ་བ་ནས། དགོན་འདིར་གཙོ་ཆེར་ཚབ་སྤྲུལ་སྐུ་ཕྲེང་རིམ་བྱོན་དང་། ཁྲི་འཛིན་གཞན་ཡང་ཉ་སྤྲུལ་དང་། སྐུ་སྐྱེ་སྤྲུལ་སྐུ། འབྱོར་སྤྲུལ་སྐུ་ཕྲེང་རིམ་བྱོན་བཅས་ཀྱིས་གདན་ས་བསྐྱངས་ནས་སྒྲུབ་བརྒྱུད་ཀྱི་བསྟན་པ་དར་སྤེལ་རྒྱ་ཆེར་མཛད། སྔར་དགོན་འདིའི་དགོན་ལག་རི་ཁྲོད་ལྟ་བུ་ཡིན་པ་རྫ་སྨད་མེ་ཡོས་ཕྱག་ཆེན་དགོན་དང་། གནས་ལྷ་མོ་ཕུག་གི་དགོན་གཉིས་དང་། དགོན་སྡེ་དངོས་གྲུབ་དབང་ཀརྨ་རབ་འཕེལ་གྱིས་བཏབ་པའི་ལྕགས་མོ་མདོ་སྟེང་དགོན། དེ་མིན་གླིང་ཚང་དགོན་ཁག་ཉེར་ལྔར་སྒྲུབ་རྒན་ཉིད་ཀྱིས་གཟིགས་སྐྱོང་མཛད་ཡོད་པ་དང་། རྫ་རྒྱུད་རྟགས་འཕེལ་དགོན་དགོན་འདིའི་བུ་དགོན་ཡིན་པ་སོགས་སོ། དེང་ཚབ་ཚ་དགོན་དུ་ནཱ་རོའི་སྒྲུབ་སྡེ་དང༌། ནི་གུའི་སྒྲུབ་སྡེ། སྙིང་ཏིག་སྒྲུབ་སྡེ་བཅས་སྒྲུབ་སྡེ་ཁག་གསུམ་ཡོད་པ་ལས། ནཱ་རོའི་སྒྲུབ་སྡེ་བདེ་ཆེན་ཆོས་རྫོང་ནི་སྐུ་སྐྱེ་སྐུ་ཕྲེང་བདུན་པ་དཔལ་བརྒྱ་སྤྲུལ་སྐུས་སྤྱི་ལོ་2001ལོར་གསར་དུ་བཏབ་ཅིང་ན་རོ་ཆོས་དྲུག་གཙོ་བོར་སྒྲུབ་པ་དང་། སྙིང་ཏིག་སྒྲུབ་སྡེ་ནི་དབོན་རི་གྲོ་ལུང་དུ་གནས་ཤིང་། ཀུན་རིག་དང་། མི་འཁྲུགས། འོད་དཔག །རྡོར་སེམས། སྨན་བླ་སོགས་གཙོ་བོར་བསྙེན་པའོ། ནི་གུའི་སྒྲུབ་སྡེ་བསམ་གྲུབ་ཆོས་རྫོང་གླིང་ནི་སྒྲུབ་རྒན་སྐུ་ཕྲེང་དྲུག་པ་བསྟན་པ་རབ་རྒྱས་དགུང་ལོ་ཉེར་བདུན་དུ་ཕེབས་པ་རབ་བྱུང་བཅུ་བཞི་པའི་ཤིང་ཕག་སྤྱི་ལོ1815ལོར་དག་གཟིགས་ལུང་བསྟན་བྱུང་བ་བཞིན་ཕྱག་བཏབ་ནས་ད་བར་མི་ལོ་ཉིས་བརྒྱ་ལ་ཉེ་བའི་ལོ་རྒྱུས་ལྡན་ཞིང་། དེང་ཚབ་ཚ་དགོན་གྱི་ཤར་ངོས་རི་ཟུར་ཞིག་གི་སྟེང་དུ་གནས། འདིར་དཔལ་ལྡན་ཤངས་པའི་རིང་ལུགས་དྲི་མེད་སྤེལ་བའི་སྐྱེས་ཆེན་བྱང་སེམས་གདན་རབས་འཛིན་པ་ལྔ་ལས། ཁྱད་པར་མཆོག་གི་བཀའ་བབས་སྐུ་སྐྱེ་བཀའ་བརྒྱུད་བསྟན་འཛིན། འབྱོར་རྒྱས་ཀརྨ་ལྷག་མཐོང་། ཀརྨ་གཞན་ཕན་འོད་ཟེར། འཇམ་མགོན་བློ་གྲོས་མཐའ་ཡས་བཅས་བརྒྱུད་པ་ཡོངས་གྲགས་ལྟར་དང་། ཡང་འབྱོར་རྒྱས་ཀརྨ་ལྷག་མཐོང་ནས། རི་འགུལ་ཀརྨ་ནོར་བུ། འཇམ་མགོན་བློ་གྲོས་མཐའ་ཡས་ལ་བརྒྱུད་པ་ཞིག་ཀྱང་སྣང་། འཇམ་མགོན་བློ་གྲོས་མཐའ་ཡས་ཀྱི་གདན་ས་ཙཱ་འདྲ་རིན་ཆེན་བྲག་ཏུ་ཆགས་རྗེས་སུ་ཚབ་ཚ་དགོན་རང་གི་ཤངས་ཆོས་གདན་རབས་རྣམས་ནི། སྒྲུབ་སྤྲུལ་ཀརྨ་སེང་གེས་མཛད་པའི་ཤངས་ཆོས་བརྒྱུད་འདེབས་ཁ་གསབ་ལྟར་ན། གྲུབ་དབང་ཀརྨ་ཚེ་སྲུང་ངམ་ཚངས་པ་(འགར་མཚམས་པ་ཞེས་ཀྱང་འཁོད་)གདུགས་དཀར། ཀརྨ་ཐེག་མཆོག་བསྟན་འཛིན། སྒྲུབ་བརྒྱུད་བསྟན་འཛིན་བཟང་པོ། གྲུབ་བརྙེས་ཀརྨ་རབ་དགའ། འགྲོ་མགོན་ཀརྨ་གཞན་ཕན། རིག་འཛིན་ཀརྨ་བཀྲ་ཤིས་བཅས་དང་། དེ་མིན་སྒྲུབ་རྒན་བདུན་པ་བདུད་འདུལ་ཉི་མས་འཇམ་མགོན་བློ་གྲོས་མཐའ་ཡས་དང་། ཚབ་ཚའི་ཤངས་ཆོས་གདན་རབས་འཛིན་པ་ཀརྨ་ཐེག་མཆོག་ལས་ཤངས་པའི་ཆོས་སྐོར་ཆ་ཚང་བ་གསན་པ་རྣམས་ཚབ་སྤྲུལ་བརྒྱད་པ་ཀརྨ་བློ་གྲོས་ངེས་དོན་བསྟན་འཛིན་སེང་གེའི་བར་དུ་རིམ་པར་བརྒྱུད། སྒྲུབ་སྡེ་སྐྱར་བཞེངས་རྗེས་ཀྱི་སྒྲུབ་ཐེངས་དང་པོའི་སྒྲུབ་དཔོན་གཙོ་བོ་སྒྲུབ་སྤྲུལ་བརྒྱད་པ་ཡིན་པ་དང་། སྒྲུབ་བླའི་གྲངས་ཁ་གསལ་མི་ཤེས། སྒྲུབ་ཐེངས་གཉིས་པ་ནས་དྲུག་པ་བར་གྱི་སྒྲུབ་དཔོན་ཚབ་སྤྲུལ་བརྒྱད་པའི་དངོས་སློབ་ཀརྨ་དཀོན་མཆོག་ཡིན་ཞིང་། སྒྲུབ་ཐེངས་གཉིས་པར་སྒྲུབ་བླ་བཅུ་བཞི། གསུམ་པར་བཅོ་ལྔ། བཞི་པར་ཉི་ཤུ། ལྔ་པར་ཉི་ཤུ། སྒྲུབ་ཐེངས་དྲུག་པ་འདིར་སྒྲུབ་བླ་བཅུ་དྲུག་ཡོད་པ་ལས། ཚབ་ཚ་དགོན་རང་ནས་བཅུ་གཉིས། འབའ་ལི་ཐང་གི་འབྲུག་རྗེ་དགོན་པ་ནས་སྒྲུབ་བླ་གསུམ། རྫ་རྟགས་འཕེལ་དགོན་ནས་སྒྲུབ་བླ་གཅིག་བཅས་ཡོད་པ་ལས། སྒྲུབ་བླ་ཀརྨ་བློ་བཟང་གིས་སྔ་ཕྱི་ཁྱོན་དུ་ཤངས་ཆོས་སྒྲུབ་སྡེར་སྒྲུབ་ཐེངས་གསུམ་སྒྲུབ་པར་ཞུགས་འདུག །སྒྲུབ་སྡེ་འདིའི་ཤངས་ཆོས་ཀྱི་བླ་རབས་རིམ་བྱུང་གི་གོ་རིམ་འདྲ་མིན་འཁོད་པའི་དཔྱད་གཞི་ཐར་ཐོར་མང་བས་མུ་མཐུད་དཔྱད་པར་འཚལ།
ཚབ་ཚའི་ཤངས་པའི་སྒྲུབ་སྡེ་འདིར་གདམས་པ་ཉམས་སུ་ལེན་ཚུལ་ལ། དུས་འགྱུར་རྗེས་ཀྱི་སྒྲུབ་ཐེངས་དང་པོའི་སྐབས་དཔལ་སྤུངས་དབུ་མཛད་ཆེན་མོ་བཟོད་པས་འཇམ་མགོན་ཀོང་སྤྲུལ་གྱིས་མཛད་པའི་དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་གི་སྒྲུབ་པ་རྣམས་ཀྱི་ཀུན་སྤྱོད་བཅའ་ཁྲིམས་བླང་དོར་རབ་གསལ་ཕན་བདེའི་འབྱུང་གནས་ལས་བཏུས་ཏེ་ལག་བྲིས་མཛད་པ་ཤོག་གྲངས་འགའ་ཞིག་འདུག་པ་ལས་ལོ་དུས་ཟླ་དུས་ཀྱི་དུས་མཆོད་དང༌། ཀུན་སྤྱོད་བླང་དོར་གྱི་བཅའ་ཁྲིམས་ནི་གོང་གི་བཅའ་ཡིག་འདི་དང་མཚུངས་ཀྱང་། ཉམས་ལེན་གྱི་དུས་ཡུན་སྐོར་རྣམས་ཅུང་ཟད་བཀོད་པ་ནི། སྒྲུབ་པའི་སྣ་སེལ་ལ་གོང་གི་ལེའུ་བདུན་པ་དང་འབྲེལ་བའི་ཚིག་བདུན་གསོལ་འདེབས་འབུམ་གཅིག་ལ་ཟླ་བ་གཅིག །དེ་ནས་ཐོག་མར་སྔོན་འགྲོ་ལ། ཕྱག་ཆེན་ངེས་དོན་སྒྲོན་མེའི་ཁྲིད་ལུང་། དལ་འབྱོར་རྙེད་དཀའ། འཆི་བ་མི་རྟག །ལས་རྒྱུ་འབྲས། འཁོར་བའི་ཉེས་དམིགས་བསམ་པ་བཞི་ལ་ཞག་གསུམ་རེ་དང་། སྐྱབས་སེམས། ཡིག་བརྒྱ། མཎྜལ། བླ་མའི་རྣལ་འབྱོར་བཞི་པོར་འབུམ་ཐེར་རེ་རེ་ཁ་སྐོང་བཅས་འགྲོ་ངེས་ཀྱིས་ཁྱོན་ཟླ་བ་ལྔའི་ཁོངས་སུ་སྔོན་འགྲོ་གྲུབ། བྱིན་རླབས་སྒོ་འབྱེད་ཀྱི་བཀའ་དང་པོ་ཤངས་ལུགས་བདེ་མཆོག་ལྷ་ལྔའི་དབང་ཆེན་དངོས་སྟ་འབྲེལ་བ། བཀའ་གཉིས་པ་ལྷ་ལྔའི་ཏིང་ངེ་འཛིན་གྱི་དབང་སྐུར། སྒྲུབ་དཀྱིལ་གྱི་ལུང་དང་བསྙེན་ཡིག་ཁྲིད་ལུང་བྱས་ལ་བསྙེན་པ་ལ་འཇུག་སྟེ་ཡིག་བདུན་འབྲུ་འབུམ། སྙིང་པོ་བཞི་འབུམ། ཡུམ་དང་འཁོར་སྔགས་རྣམས་ཁྲིད་ཡིག་ལྟར་སོ་སོའི་ཁ་སྐོང་གྲུབ་ནས་སྒྲུབ་མཆོད་ཞག་བདུན་དང་ཁ་སྐོང་ཞི་བའི་སྦྱིན་སྲེག་ཉིན་ལྔ་བཅས་ཁྱོན་ཟླ་བ་གསུམ། དེ་ནས་བྱིན་རླབས་ཁོག་དབུབས་ཀྱི་བཀའ་དང་པོ་སྒྱུ་ལུས་དབང་མོ་ཆེའམ་འཇུག་སྒོ་ཡོན་ཏན་ཀུན་འབྱུང་། བཀའ་གཉིས་པ་རྒྱུད་སྡེ་ཏིང་ངེ་འཛིན་གྱི་དབང་དང་། རྒྱུད་སྡེའི་དབང་མོ་ཆེ་དངོས་སྟ་བཅས་ཉིན་གཉིས། གཙོ་བསྡུས་དང་སྒྲུབ་དཀྱིལ་གྱི་ལུང་དང་བསྙེན་ཁྲིད་བྱས་ལ། གཙོ་བསྡུས་ཀྱི་བསྙེན་གྲངས་ཁྲིད་ཡིག་ལྟར་ཁ་སྐོང་བཅས་ཁྱོན་ཟླ་བ་བཞི། སྒྲུབ་མཆོད་རྒྱས་བསྡུས་གང་ལྕོགས་ཉིན་བདུན་ཙམ་དང་སྦྱིན་སྲེག་ཉིན་གསུམ། ནི་གུ་ཆོས་དྲུག་རྩ་བ་ཇོ་ལུགས་ཐང་བརྡལ་མ་དང་། ཉེ་བརྒྱུད་ཐང་ལུགས་ཁྲིད་བསྒྲགས་ཏེ་སྔོན་འགྲོ་ལ་འཇུག་ཅིང་དག་བྱེད་ཨ་ཡིག་གི་སྟོང་ར་ཡན་ལ་བདུན་ཕྲག་གསུམ། བྱིན་རླབས་གཞུང་བཀའ་དྲུག་གི་ཐོག་མར་གཏུམ་མོའི་བྱིན་རླབས་ཁྲིད་དམིགས་ཕོག་སྟེ་གཏུམ་མོ་མེ་རྒོད་བདུན་ཕྲག་གསུམ། འདི་ནས་འཕྲུལ་འཁོར་རྣམས་བསླབ་ཅིང་ཉིན་རེ་བཞིན་མ་ཆག་པར་སྐབས་བསྟུན་གྱིས་རྒྱག །དངོས་གཞི་ཟས་ཟ་ཟླ་བ་ཕྱེད་བཞི། སྟན་གཅིག་ནང་བླ་མའི་གཏུམ་མོ་ཤིན་ཏུ་ཉེ་བརྒྱུད་ཞག་བདུན། དེ་ནས་སོ་སོའི་ཁྲིད་དམིགས་ཕོག་ལ་སྒྱུ་ལུས། མི་ལམ། འོད་གསལ་རྣམས་ལ་བདུན་ཕྲག་གསུམ་རེ་བཅས་ཁྱོན་ཟླ་བ་གཉིས་དང་ཉིན་གསུམ། འཕོ་བ་བར་དོ་གཉིས་བདུན་ཕྲག་རེ་རེ་སྟེ་རྟགས་ཐོན་སྦྱངས། ཕྱག་ཆེན་གའུ་མའི་བྱིན་རླབས་བྱས་ཏེ་ཉམས་ལེན་ཟླ་བ་གཉིས། སྟན་གཅིག་མའི་དམིགས་རིམ་རྫོགས་པར་བྱ། ལམ་ཁྱེར་རྣམ་གསུམ་གྱི་བྱིན་རླབས་བཅས་བདུན་ཕྲག་གཅིག །དེ་ནས་མཁའ་སྤྱོད་དཀར་མོ་དང་སུམ་ཕྲུག་གི་བྱིན་རླབས་བྱ། དམར་མོ་འཕོ་བའི་དགོས་བཀའ་ཡིན་པས་མི་དགོས། ཁྲིད་ལུང་བྱས་ལ་དཀར་དམར་སོ་སོར་ཟླ་བ་གཅིག །བསྙེན་པ་རྫོགས་རིམ་འཕོ་བ་རྟགས་ཐོན་སྦྱང་། ལུས་སེམས་འཆི་མེད་བྱིན་རླབས་བཅས་ཞག་བདུན། བླ་མགོན་དབྱེར་མེད་བྱིན་རླབས་ཁྲིད་བཅས་ཞག་བདུན། ཡེ་ཤེས་ཀྱི་མཁའ་འགྲོ་སུ་ཁ་སི་དྡྷིའི་བྱིན་རླབས་དམིགས་ཁྲིད་བཅས་ཐུན་མགོར་བསྐྱེད་བཟླས་ཅི་འགྲུབ་རེ་དང་རྩ་བའི་ཆོས་བཞི་བདུན་ཕྲག་རེ་རེ། འཕོ་བ་བར་དོ་ཞར་བྱུང་དུ་བཏང་བས་ཟླ་བ་གཅིག །ནི་དྷིའི་ཚེ་དབང་ཚེ་སྒྲུབ་བཅས་རྟེན་འབྲེལ་དུ་བདུན་ཕྲག་རེ་རེ་ཉམས་ལེན་བྱས་པས་ཤངས་ཆོས་ཀྱི་རྩ་བ་རྣམས་ལེགས་པར་གྲུབ། ལོ་མཇུག་དང་པོ་ལ་ལྷ་བཞི་དྲིལ་སྒྲུབ་ཞག་བདུན། གཉིས་པ་ལ་གཏོར་ཆོག་ཕྱག་དྲུག་པ་ཟླ་བ་གཅིག་བསྙེན། གསུམ་པ་ལ་སྒྲོལ་དཀར་ཟླ་བ་འདོད་འཇོའི་སྒྲུབ་པ་ཞག་བདུན། སྦྱིན་སྲེག་ཞག་གསུམ། ཞི་ཁྲོའི་དབང་དང་བསྙེན་ཁྲིད་སྒྲུབ་པ་ཞག་བཞི། སྦྱིན་སྲེག་ཉིན་གསུམ་བཅས་ཁྱོན་ཟླ་བ་གསུམ། གཅོད་ཚོགས་ཡོན་ཏན་ཀུན་འབྱུང་གི་དབང་དང་ཁྲིད་བཅས་ཚོགས་བརྒྱ་ཟླ་བ་གཅིག །རཏ་ཕུར་དབང་དང་བསྙེན་ཁྲིད་བཅས་ལས་བྱང་ཟུར་འདེབས་ཀྱི་བསྙེན་གྲངས་བསྙེན་ཡིག་ལྟར་བསྙེན་པ་ཟླ་བ་བཞི། སྒྲུབ་པ་ཞག་བདུན། སྦྱིན་སྲེག་ཉིན་ལྔ་བཅས་ལེགས་པར་གྲུབ། དེ་ནས་མགོན་པོ་བེར་ཅན་གྱི་དབང་དང་བསྙེན་ཁྲིད་བྱས་ལ་འདོན་འགྲིགས་དང་བསྙེན་གྲངས་ལག་ལེན་སོགས་བསྙེན་ཡིག་ལྟར་ཟླ་བ་གཉིས་དང་། སྒྲུབ་པ་ཉིན་གསུམ། ཉིན་རྗེས་མའི་མཐར་སྦྱིན་སྲེག་མདོར་བསྡུས་བཅས་ཀྱིས་གྲུབ་པའོ།
།སྤྱིར་ཚབ་ཚའི་སྒྲུབ་སྤྲུལ་སྐུ་ཕྲེང་རིམ་བྱོན་ཏེ། སྐུ་ཕྲེང་དང་པོ་རྟོགས་ལྡན་གྲགས་པ་རྒྱལ་མཚན། གཉིས་པ་གྲུབ་དབང་ཀརྨ་རབ་འཕེལ། གསུམ་པ་རྒྱལ་སྲས་ཕུན་ཚོགས་རྣམ་རྒྱལ། བཞི་པ་སྒྲུབ་བརྒྱུད་ཆོས་འཛིན་རྒྱལ་པོ། ལྔ་པ་ཀརྨ་ཆོས་དབྱིངས་ལྷུན་གྲུབ། དྲུག་པ་ཀརྨ་བསྟན་པ་རབ་རྒྱས། བདུན་པ་ཀརྨ་སྒྲུབ་བརྒྱུད་བསྟན་འཛིན། བརྒྱད་པ་ངེས་དོན་བསྟན་འཛིན་སེང་གེ་བཅས་པ་རྣམས་ལས། ཚབ་སྤྲུལ་སྐུ་ཕྲེང་དྲུག་པའི་སྐབས་ཤངས་ཆོས་སྒྲུབ་སྡེ་གསར་དུ་བསྐྲུན་པ་དང༌། བདུན་པས་ཤངས་ཆོས་གསན་བཞེས་རྒྱ་ཆེར་མཛད་པ། ལྷག་པར་ཉེ་བའི་ཆར་ཤངས་པའི་བསྟན་པ་མི་ཉམས་གོང་དུ་སྤེལ་བར་བཀའ་དྲིན་ཤིན་ཏུ་ཆེ་བ། དྭགས་ཤངས་བསྟན་པའི་བཀའ་བབས་ཚབ་ཚ་སྒྲུབ་རྒན་རིན་པོ་ཆེའམ་སྒྲུབ་སྤྲུལ་སྐུ་ཕྲེང་བརྒྱད་པས་དབེན་རི་གྲོ་ལུང་བདེ་ཆེན་ཆོས་རྫོང་ དུ་ཚབ་ཚའི་ཤངས་ཆོས་གདན་རབས་བཞི་པ་བླ་མ་གསང་དགའ་ལས་ཤངས་པའི་གསེར་ཆོས་རྣམ་ལྔ་དང་། ནི་གུ་ཆོས་དྲུག་སོགས་བཀའ་བབས་ཀྱི་ཕ་ཆོས་རྣམས་ལོ་གསུམ་རིང་ཉམས་བཞེས་མཐར་ཕྱིན་གནང་། ཁོང་ལ་ཡེ་ཤེས་མཁའ་འགྲོ་ནི་གུ་མས་གནང་བའི་དག་སྣང་ཚོགས་གླུ་འགའ་ཤས་ཀྱང་མཆིས། སྤྱི་ལོ1958ལོར་འདན་ཁོག་ཏུ་ཡུལ་དགོན་ཀུན་ལ་མ་ཎི་བཀའ་འབུམ་དང་། ཁྱད་པར་ཤངས་ཆོས་སྒྲུབ་སྡེར་སྒྲུབ་པ་པོ་དང་། སྐུ་སྐྱེ་སྤྲུལ་སྐུ། འབྱོར་རྒྱས་སྤྲུལ་སྐུ་རྣམ་གཉིས་སོགས་ལ་ཤངས་ཆོས་སྐོར་གྱི་སྨིན་གྲོལ་ཟབ་མོ་སོགས་འཐུས་ཚང་མཛད། བླ་མ་དབང་ཆེན་གྱིས་ཀྱང་སྒྲུབ་སྤྲུལ་ལས་ཟབ་ལམ་ནི་གུ་ཆོས་དྲུག་དང་འབྲེལ་བའི་བཀའ་བཅུ་སྨིན་གྲོལ་རྣམས་གསན། ཚབ་ཚའི་ཤངས་ཆོས་སྒྲུབ་སྡེ་འདི་ཉིད་སྐབས་ཤིག་རིང་ཐོར་ཞིག་ཏུ་སོང་བ། བསྟན་པ་ཡང་དར་སྐབས་ཀྱི་སྤྱི་ལོ1988ལོར་སྤྲུལ་དཔལ་བརྒྱས་གསར་བཞེངས་ལེགས་གྲུབ་དང་སྒྲུབ་ཕོགས་སོགས་ཡོད་པའི་བཀའ་དྲིན་བསྐྱངས། སྒྲུབ་སྤྲུལ་བརྒྱད་པ་ནས་སྒྲུབ་སྡེ་བསྐྱར་བཞེངས་རྗེས་ཀྱི་སྒྲུབ་ཐེངས་དང་པོའི་སྒྲུབ་བླ་རྣམས་ལ་རྒྱུད་སྡེའི་དབང་མོ་ཆེ་བསྩལ་བ་དང་། ཁོང་གིས་མཁའ་འགྲོ་མ་སུ་ཁ་སིདྡྷིའི་བསང་མཆོད་དོན་གྲུབ་ཤིང་རྟ་ཞེས་པ་སོགས་ཀྱང་མཛད། ཡང་སྒྲུབ་རྒན་རིན་པོ་ཆེས་ཀརྨ་སྐུ་ཕྲེང་བཅུ་བདུན་པ། ཀ་ལུ་རིན་པོ་ཆེ། དུལ་མོ་ཆོས་རྗེ། མཛོ་རྫི་རྗེ་དྲུང་། སྐྱོ་བྲག་སྐྱ་དགའ་སོགས་བུ་སློབ་སྐྱེས་ཆེན་དུ་མར་ཤངས་པའི་སྨིན་གྲོལ་གྱི་གདམས་པ་མཐའ་ཡས་པ་ཞིག་གནང་མཐར། དགུང་གྲངས་དོན་བདུན་དུ་ཕེབས་པ་སྤྱི་ལོ་2005ལོའི་ཟླ་བ8པའི་ཚེས20ཉིན་དགོངས་པ་ཆོས་དབྱིངས་སུ་གཤེགས། གང་དེའི་ཡང་སྲིད་ཚབ་སྤྲུལ་སྐུ་ཕྲེང་དགུ་པ་དེང་དགུང་ལོ་བརྒྱད་ལ་ཕེབས་པ་ཚབ་ཚ་དགོན་དུ་བཞུགས་བཞིན་པའོ། གཞན་ཡང་ཚབ་ཚའི་ཁྲི་འཛིན་སྐུ་སྐྱེ་རིམ་བྱོན་ལས་སྐུ་ཕྲེང་གསུམ་པ་དབོན་ཆོས་ཀྱི་བློ་གྲོས་ལ་དཔལ་ལྡན་ཤངས་པའི་ཆོས་བཀའ་ཐུན་མིན་ཉེར་བརྒྱད་བབས་ཏེ། ཐུགས་སྲས་འབྱོར་རྒྱས་ཀརྨ་ལྷག་མཐོང་སོགས་ལའང་སྤེལ་བས་མཚོན་ད་ལྟའི་སྐུ་སྐྱེ་སྤྲུལ་སྐུའམ་དཔལ་བརྒྱ་སྤྲུལ་སྐུ་སྐུ་ཕྲེང་བདུན་པ་ཀརྨ་འཕྲིན་ལས་འགྱུར་མེད་བར་གྱི་སྐྱེ་སྤྲུལ་ཕལ་མོ་ཆེས་གཙོ་ཆེར་དཔལ་ལྡན་ཤངས་པ་བཀའ་བརྒྱུད་ཀྱི་རིང་ལུགས་ཉམས་བཞེས་དང་བརྒྱུད་སྤེལ་གནང་བ་དང་། ཁྲི་འཛིན་འབྱོར་སྤྲུལ་ཀརྨ་ལྷག་མཐོང་ནི་ཤངས་པའི་གསེར་ཆོས་ལྔ་ལ་སོགས་པའི་གདམས་པ་རྣམས་ལ་ཉམས་བཞེས་མཐར་ཕྱིན་གྱིས་གྲོལ་རྟགས་མངོན་དུ་གྱུར་བ་ཤངས་པའི་བླ་རབས་ཡོངས་གྲགས་སུ་ཡང་གསལ། ད་ལྟ་ཞལ་བཞུགས་པའི་འབྱོར་རྒྱས་སྤྲུལ་སྐུས་སྒྲུབ་རྒན་སྐུ་ཕྲེང་བརྒྱད་པ་ལས་ཤངས་པའི་ཆོས་སྐོར་འགའ་ཞིག་གསན་པ་བཅས་སོ།
II.6.3.3 Karma Lhateng Chemé Gatsel
།གསུམ། ཀརྨ་ལྷ་སྟེང་གི་སྒྲུབ་སྡེ་འཆེ་མེད་དགའ་ཚལ།
ཀརྨ་ལྷ་སྟེང་གི་དགོན་ནི་ཞྭ་ནག་ཅོད་པན་འཛིན་པ་ཀརྨ་ཀུན་མཁྱེན་རང་བྱུང་རྡོ་རྗེས་གནས་ཁྱད་པར་ཅན་དུ་གཟིགས་ཏེ་གདན་ས་བཏབ་པས་ཀརྨ་ལྷ་སྟེང་དགོན་ཞེས་སུ་གྲགས། དགོན་འདིའི་ཆོས་བརྒྱུད་སྤྱི་ཀརྨ་ཀམ་ཚང་ཡིན་པ་ལ། བཤད་སྒྲུབ་ཟུང་འབྲེལ་གྱི་བསྟན་པ་སྤེལ་བའི་ཤངས་པའི་སྒྲུབ་སྡེ་གཅིག་དང་། བཀའ་པོད་ལྔ་སོགས་སློབ་གཉེར་གནང་སའི་བཤད་གྲྭ་གཅིག་ཡོད། དགོན་འདིར་ད་བར་རྒྱ་སྟོང་གསེར་གསུམ་དུ་གྲགས་པའི་སྤྲུལ་སྐུ་རྣམ་པ་གསུམ་བྱོན་པ་སྟེ། འཇའ་མོ་སྐུ་ཕྲེང་བཅུ་གཉིས། སྟོང་ནང་སྐུ་ཕྲེང་དགུ། གསེར་སྤྲུལ་སྐུ་ཕྲེང་བརྒྱད་བཅས་སོ། །དེ་དག་ལས་འཇའ་མོ་སྐུ་ཕྲེང་བཅུ་གཅིག་པ་ཀརྨ་སྨྲ་བའི་སེང་གེས་ཙཱ་འདྲའི་སྒྲུབ་སྡེར་དཔལ་ལྡན་མཁྱེན་བརྩེ་འོད་ཟེར་གྱི་དྲུང་ནས་ཤངས་ཆོས་འགའ་གསན་མྱོང་བ་དང་། གསེར་སྤྲུལ་སྐུ་ཕྲེང་བརྒྱད་པ་རིག་འཛིན་རྒྱ་མཚོས་གུ་དྲག་རིན་པོ་ཆེའི་དྲུང་ནས་ཤངས་པའི་ཆོས་སྐོར་འགའ་ཞིག་གསན་བཞེས་གནང་ཐོག་ཙཱ་འདྲ་སྒྲུབ་ཁང་དུའང་ཞུགས་མྱོང་། དེང་དགེ་འདུན་འདུས་པའི་སྡེ་བརྒྱ་དང་ཉི་ཤུ་ཙམ་བཞུགས་པའོ།
།དེ་ཡང་སྒྲུབ་སྡེ་འཆི་མེད་དགའ་ཚལ་འདི་ཉིད་གང་དུ་ཆགས་པའི་གནས་ནི་བོད་ཀྱི་མདོ་ཆེན་གསུམ་གྱི་ཡ་གྱལ་ཆབ་མདོའི་མངའ་ཁོངས། དེང་བོད་ལྗོངས་ཆབ་མདོ་རྫོང་ཡོར་པ་ཡུལ་ཤོག་ལྷ་རྫ་ཚོན་ཡོལ་པ་གྲོང་ཚོའི་ཉེ་འགྲམ་ཆབ་མདོ་རྫོང་སྲིད་གཞུང་གནས་ཡུལ་ནས་སྤྱི་ལེ་100ཙམ་ཡོད། སྔོན་སི་ཏུ་འགྲོ་མགོན་རས་ཆེན་གྱིས་གནས་འདིར་ཞབས་ཀྱིས་བཅགས་ཤིང་ལོ་དགུ་ཟླ་དགུ་ཞག་མ་དགུར་སྒྲུབ་པ་མཛད་པས་དཔལ་ཆེན་མ་ཧཱ་ཀ་ལའི་ཞལ་གཟིགས། མི་བསྲུན་གདུག་པ་ཅན་མཐའ་དག་བྲན་དུ་བཀོལ་ཞིང་བདེ་ལེགས་ཀྱི་སྣང་བས་ཁྱབ་པར་མཛད། དེ་རྗེས་སྤྱི་ལོ་1921ལོར་རྣལ་འབྱོར་པ་རི་ཁྲོད་ཀུན་བཟང་རིན་པོ་ཆེས་ཕྱག་བཏབ་ཅིང་། རྒྱལ་བ་རྡོ་རྗེ་འཆང་དངོས་ནས་ཡེ་ཤེས་ཀྱི་ཌཱ་ཀི་ནི་གུ་མ། སུ་ཁ་སིདྡྷི་དང་། ཁྱད་དུ་འཕགས་པའི་བླ་མ་བཅུ་གསུམ་སོགས་ཀྱིས་བོད་ཡུལ་གྱི་གྲུབ་པའི་དབང་ཕྱུག་ཁྱུང་པོ་རྣལ་འབྱོར་ལ་བརྒྱུད་པའི་ཤངས་པའི་གསེར་ཆོས་མཐའ་དག་ཉམས་སུ་བཞེས་པའི་སྒྲུབ་བརྩོན་གྱི་དགེ་འདུན་མང་དུ་བཞུགས། ལྷ་འདྲེའི་འཚུབ་འགྱུར་གྱི་རྐྱེན་པས་དགེ་འདུན་པ་འགའ་ལ་སྙུང་ཚབས་ཆེན་པོ་བྱུང་བས། སླར་ཡང་སྤྱི་ལོ1925ལོར་དཔལ་ལྡན་མཁྱེན་བརྩེ་འོད་ཟེར་ཕེབས་ཏེ་ས་འདུལ་དང་དྲག་པོའི་མེ་མཆོད་བླུགས་ནས་རིམ་འགྲོ་སྣ་སེལ་མཛད་ཅིང་ཟླ་བ་གསུམ་བཞུགས། དཔལ་ལྡན་སྔགས་སྲུང་མའི་ཞལ་གཟིགས་ཤིང་བྲག་ལ་འཐིམ་པའི་རྗེས་ད་ལྟ་ཡང་གསལ་བར་མཇལ་རྒྱུ་ཡོད། ཁོང་གིས་ཤངས་ཆོས་སྒྲུབ་སྡེའི་བླ་གྲྭ་རྣམས་ལ་ཤངས་ལུགས་སོགས་ཉེར་མཁོའི་དབང་ལུང་ཅི་རིགས་མཛད། སྒྲུབ་སྡེར་ཆུ་མེད་ཀྱང་། རྗེ་འདིས་ས་ཆ་ཞིག་བསྟན་ནས་འདིར་བརྐོས་དང་ཆུ་ཡོད་འདྲ་གསུངས། དེར་བརྐོས་པས་ཆུ་ཟད་མེད་བབས། དེ་ནས་བཟུང་ད་ལྟའི་བར་སྒྲུབ་ཁང་དེར་རྐྱེན་ཆག་མི་བྱུང་བར་སྣང་། ཕྱིས་དཔལ་ལྡན་མཁྱེན་བརྩེ་འོད་ཟེར་ཉིད་མཁན་ཆེན་དྲུང་རིན་པོ་ཆེ་དང་ལྷན་དུ་ཀརྨ་ལྷ་སྟེང་དུ་ཕེབས་སྐབས། སྙུང་གཞི་ལྕི་བས་ཞབས་གྲས་བླ་གྲྭ་རྣམས་གཙོས་སྐུ་རིམ་ཞབས་བརྟན་མང་དུ་བསྒྲུབས། སྙིང་ཁམས་ཇེ་དྭངས་ཀྱིས་ལོ་མཇུག་དགུ་ཆེན་འཚོགས་ཕེབས་གནང་། དེར་ཉམས་རྟོགས་ཕུན་སུམ་ཚོགས་པའི་བླ་མ་བསོད་དར་སྒྲུབ་དཔོན་དུ་བསྐོས། དེ་ནས་སྟག་གསར་འཕྲིན་ལས། སྟག་གསར་ཀ་འདུལ་བཅས་ཀྱིས་སྒྲུབ་དཔོན་མཛད་ཅིང་དུས་འགྱུར་མ་བྱུང་གི་བར་དུ་སྒྲུབ་ལ་བརྩོན་ཞིང་ཉམས་རྟོགས་མཐར་ཕྱིན་གྱི་རྣལ་འབྱོར་པ་བར་མ་ཆད་པར་བྱོན། དམངས་གཙོའི་བཅོས་བསྒྱུར་སྐབས་སྒྲུབ་ཁང་རྩ་གཏོར་དུ་སོང་། སྒྲུབ་སྡེ་འདིར་ཤངས་པའི་ཆོས་སྐོར་ཉམས་ལེན་གནང་བའི་དུས་ཡུན་ནི་ཕྱག་ཆེན་གའུ་མར་ཟླ་བ་གཉིས་དང༌། ནི་གུ་ཆོས་དྲུག་གི་དངོས་གཞི་ལ་ཁྱོན་ཟླ་བ་གསུམ་དང་ཉིན་ཉེར་བཞི་ཙམ་སྟེ། གཏུམ་མོ་ལ་ཉིན་ཉེར་གཅིག །སྒྱུ་ལུས་ལ་ཟླ་བ་གཅིག །རྨི་ལམ་ལ་ཉིན་ཉེར་བརྒྱད། འཕོ་བ་ལ་ཉིན་བདུན། བར་དོ་ལ་ཉིན་བདུན། འོད་གསལ་ལ་ཉིན་ཉེར་གཅིག་སོགས་སྤྱིར་ཙཱ་འདྲ་རིན་ཆེན་བྲག་གི་སྒྲུབ་སྡེ་དང་མཚུངས་ཀྱང་། སྒྲུབ་པ་སྡོམ་པའི་དུས་ནི་བོད་ཟླ་བརྒྱད་པའི་ཚེས་ཉེར་དྲུག་ཡིན།
སླར་རྒྱལ་བསྟན་ཡང་དར་དུས་ཀྱི་སྤྱི་ལོ1987ལོར་བསྐྱར་འཛུགས་གནང་རྗེས། སྒྲུབ་ཐེངས་རེ་ལ་ལོ་གསུམ་ཕྱོགས་གསུམ་རེ་བྱས་པའི་ད་བར་ཁྱོན་སྒྲུབ་ཐེངས་བརྒྱད་ལ་སླེབས་ཡོད། སྒྲུབ་ཐེངས་དང་པོར་རྣལ་འབྱོར་པ་གུ་དྲག་རིན་པོ་ཆེས་སྒྲུབ་དཔོན་མཛད་ཅིང་། སྒྲུབ་དཔོན་འདི་ཉིད་དུས་འགྱུར་མ་བྱུང་གོང་སྒྲུབ་སྡེ་འཆི་མེད་དགའ་ཚལ་ཉིད་དུ་སྒྲུབ་ཐེངས་གཉིས་དང་། དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་སྒྲུབ་ཐེངས་གཅིག་བཅས་སྒྲུབ་པར་ཞུགས་ནས་ཉམས་བཞེས་མཐར་ཕྱིན་གནང་། སྒྲུབ་ཐེངས་དང་པོ་དེར་སྒྲུབ་བླ་དྲུག་དང་། གཉིས་པར་དགུ། གསུམ་པར་དགུ། བཞི་པར་བཅུ། ལྔ་པར་བརྒྱད། དྲུག་པར་བརྒྱད། བདུན་པར་བཅུ། སྒྲུབ་ཐེངས་བརྒྱད་པ་འདིར་སྒྲུབ་དཔོན་ཕུར་བུ་ཚེ་རིང་གིས་ཁྱོན་ལྷ་སྟེང་དགོན་རང་ནས་ཡིན་པའི་སྒྲུབ་བླ་བཅུ་དྲུག་ལ་དབང་ཁྲིད་དང་འདོན་བྱ་ཅི་རིགས་བར་མ་ཆད་པར་བསྩལ་མུས་ལ། སྒྲུབ་བླ་རྣམས་ལས་དགུང་གྲངས་ཆུང་ཤོས་ཉི་ཤུ་དང་། ཆེ་ཤོས་ཉེར་ལྔར་སོན་པ་བཅས་སོ།
II.6.3.4 Dzodzi Künzang Gyepé Gatsel Ling
།བཞི། མཛོ་རྫིའི་སྒྲུབ་སྡེ་ཀུན་བཟང་དགྱེས་པའི་དགའ་ཚལ་གླིང་།
ཁམས་ལྷ་ཐོག་མཛོ་རྗེ་དགོན་ཐུབ་བསྟན་རྣམ་རྒྱལ་ཆོས་འཁོར་གླིང་ནི་བོད་ལྗོངས་ཆབ་མདོ་ས་ཁུལ་ཆབ་མདོ་རྫོང་སྲིད་གཞུང་གནས་ཡུལ་ནས་བྱང་ངོས་སྤྱི་ལེ100ཙམ་གྱི་ས་སྟེ་དེང་ལྷ་ཐོག་ཡུལ་ཤོག་གི་མཛོ་རྫི་གྲོང་ཚོའི་ཁོངས་སུ་གནས་ཤིང་། ཀཿཐོག་སི་ཏུའི་དབུས་གཙང་གནས་ཡིག་ཏུ་དང་པོ་མཛོ་མོ་འཚོ་བྱེད་རྫི་བོ་ཞིག །བར་དུ་ལས་འཕྲོ་སད་པ་སྤྲུལ་སྐུའི་(པའི་)སྐུ། ཐ་མར་མི་འགྱུར་རྡོ་རྗེར་གྲགས་པ་ཡི། །གདན་སའི་བཀོད་པ་ཕྱག་ཆེན་རང་གྲུབ་མཇལ་ཞེས་འཁོད་པ་ལྟར་མཛོ་རྫི་ཞིག་ནས་ལས་འཕྲོ་སད་དེ་སྤྲུལ་པའི་སྐུར་གྱུར་པ་ཡོན་དགེ་གཏེར་ཆེན་རིག་འཛིན་འགྱུར་མེད་རྡོ་རྗེ་དང༌། གཞན་ཡང་ལྕོག་རོ་བླ་མ། སྤོས་བླ་མ་སྟེ་གྲུབ་བརྙེས་ཀྱི་སྐྱེས་བུ་ཆེན་པོ་གསུམ་གྱིས་ཚེ་གཅིག་སྒྲུབ་པར་གཞོལ་ནས་ཐོག་མར་མཐོང་གྲོལ་པདྨ་འོད་འབར་གྱི་གནས་འདི་ཉིད་བདག་གིར་མཛད་པ་ནས་མཆོད་གནས་ཀྱི་གཞི་མ་སྟོང་ཙམ་གྱི་རི་ཁྲོད་ཅིག་ཆགས་པ་ལ། ཕྱིས་སྤྱི་ལོ1761ལོར་སི་ཏུ་པཎ་ཆེན་ཆོས་ཀྱི་འབྱུང་གནས་དང་། ལྷ་ཐོག་དཔོན་ཐུ་སི་པ་བཀའ་བརྒྱུད་བསྟན་འཛིན་ཡོན་མཆོད་ཟུང་གིས་མཛོད་དགོན་ཕུན་ཚོགས་རབ་བརྟན་གླིང་ཞེས་པ་ཕྱག་བཏབ་པ་ནས་སྤྱི་ལོ་1959ལོ་བར་ཀམ་ཚང་དོན་བརྒྱུད་ཀྱི་བསྟན་པ་འཛིན་པའི་གདན་ས་དཔལ་སྤུངས་གཉིས་པ་ལྟ་བུར་གྱུར། ཀརྨ་པ་བདུད་འདུལ་རྡོ་རྗེ་དང་། ཞྭ་དམར་ཆོས་གྲུབ་རྒྱ་མཚོ། སི་ཏུ་ཆོས་ཀྱི་འབྱུང་གནས་བཅས་མཐིང་དམར་ཅོད་པཎ་འཆང་བ་རྣམ་གསུམ་གྱིས་ཀམ་ཚང་བསྟན་པའི་བསྟི་གནས་སུ་གྱུར་པའི་བཀའ་ཤོག་ཀྱང་བསྩལ། དགོན་གནས་འདིར་ཡོན་དགེ་བླ་མ་སྐུ་ཕྲེང་དགུ། ལྕོག་རོ་བླ་མ་སྐུ་ཕྲེང་བརྒྱད་བྱུང་བ་ད་ལྟ་ཁྲིར་ཁོད་མེད་ཀྱང༌། སྤོས་བླ་མའམ་ཕུར་པ་སྤྲུལ་སྐུ་སྐུ་ཕྲེང་བཅུ་པ་དང་། བདེ་ཆེན་སྤྲུལ་སྐུ་སྐུ་ཕྲེང་བཞི་པ་ཉིད་ཏཱ་སི་ཏུ་སྐུ་ཕྲེང་བཅུ་གཅིག་པ་པདྨ་དོན་ཡོད་མཆོག་གིས་ངོས་འཛིན་གནང་སྟེ་དགོན་འདིའི་གསེར་ཁྲིར་མངའ་གསོལ་བ་སོགས་བསྟན་དང་འགྲོ་བའི་དོན་ཆེན་ཁུར་དུ་བཞེས་པའི་བླ་སྤྲུལ་འགའ་བཞུགས། ལྷག་པར་སི་ཏུ་ཆོས་འབྱུང་གི་ཐུགས་སྲས་རྗེ་དྲུང་ཀརྨ་ཕུན་ཚོགས་བསྟན་པ་རབ་རྒྱས་ཉིད་དགོན་འདིའི་བསྟན་པ་ཡོངས་རྫོགས་ཀྱི་བདག་པོར་མངའ་གསོལ་བ་ནས་བཟུང་། རྒྱལ་བ་ཀརྨ་པའི་འཕྲིན་ལས་ཀྱི་སྒྱུ་འཕྲུལ་དམ་པ་རྗེ་དྲུང་སྐུ་ཕྲེང་ན་རིམ་གྱིས་བསྟན་པ་འཛིན་སྐྱོང་སྤེལ་གསུམ་ལེགས་པར་མཛད།
།མཛོ་རྫི་དགོན་འདི་ཉིད་ལ་ནཱ་རོའི་ལུགས་ཀྱི་སྒྲུབ་སྡེ་དང་། ནི་གུའི་ལུགས་ཀྱི་སྒྲུབ་སྡེ་གཉིས་ཡོད་པ་ལས། ནི་གུའི་སྒྲུབ་སྡེ་ནི་སྐྱབས་མགོན་རྗེ་དྲུང་རིན་པོ་ཆེ་ཀརྨ་དཔལ་ལྡན་འགྱུར་མེད་ལུང་རྟོགས་བསྟན་པའི་རྒྱལ་མཚན་གྱིས་རྒྱལ་བསྟན་སྤྱི་དང་བྱེ་བྲག་སྒྲུབ་བརྒྱུད་ཀྱི་བཀའ་སྲོལ་འདི་ཉིད་གདུལ་བྱའི་བསོད་ནམས་ཀྱིས་མ་ཐེགས་པར་ལྔ་ཕྲག་སྙིགས་བདོའི་ཀློང་དུ་ཡིབ་ལ་ཉེ་བར་གཟིགས་ཏེ། སྤྱི་ལོ1994ལོར་དགོན་འདིའི་རྒྱབ་རིའི་གཡས་ཕྱོགས་སུ་བསྟན་གཞི་གཙུག་ལག་ཁང་དང་རྟེན་གསུམ། བསྟན་རྩ་དགེ་འདུན་གྱི་སྡེ་དང་མཐུན་རྐྱེན་བཅས་ཡོངས་སུ་ཚང་བ་ལོ་གཅིག་གི་ནང་ལེགས་པར་བསྐྲུན་ཅིང་། ཤངས་པའི་སྒྲུབ་སྡེ་ཀུན་ཏུ་བཟང་པོ་དགྱེས་པའི་དགའ་ཚལ་གླིང་ཞེས་པའི་མཚན་ཡང་གསོལ། ཐོག་མར་ཕྱག་བཏབ་པ་ནས་ད་བར་སྒྲུབ་ཐེངས་རེ་ལ་ལོ་གསུམ་ཕྱོགས་གསུམ་རེ་བྱས་པའི་སྒྲུབ་ཐེངས་བདུན་ཟིན་ཅིང་། སྒྲུབ་ཐེངས་དང་པོར་སྒྲུབ་བླ་བརྒྱད་དང་། གཉིས་པར་སྒྲུབ་བླ་ལྔ། གསུམ་པར་སྒྲུབ་བླ་བདུན། བཞི་པར་སྒྲུབ་བླ་བདུན། ལྔ་པར་བརྒྱད། དྲུག་པར་བརྒྱད། སྒྲུབ་ཐེངས་བདུན་པ་འདིའི་སྒྲུབ་དཔོན་ཚུལ་ཁྲིམས་བློ་གྲོས་དང་། སྒྲུབ་བླ་བདུན་ཡོད་པ་ལས་དེ་དག་གི་ཆ་སྙོམ་དགུང་གྲངས39ཡིན། སྒྲུབ་ཐེངས་དང་པོ་གཉིས་ལ་ལྷ་སྟེང་བླ་མ་གསེར་སྤྲུལ་གདན་དྲངས་ཏེ་རིང་ལུགས་འདིའི་འཁྲུལ་འཁོར་དང་དབང་ལུང་ཕྲན་ཚེགས་ཀྱི་རྒྱུན་ལྷག་མ་རྣམས་ཀྱང་ཁ་གསབ་གནང་ཡོད། དེ་ནས་སྒྲུབ་ཐེངས་དྲུག་པའི་སྐབས་ཙཱ་འདྲའི་སྒྲུབ་དཔོན་བླ་མ་ཐུབ་བསྟན་རྡོ་རྗེ་གདན་དྲངས་ཏེ། སླར་ཡང་ཐབས་གྲོལ་གྱི་ཉམས་བཞེས་དང་། ཆོ་ག་ཕྱག་ལེན་འཁྲུལ་འཁོར་རྣམས་ལེགས་བཅོས་བགྱིས་ཤིང་། དུས་འཁོར་ལྷ་དགུའི་དབང་ལུང་བསྙེན་ཁྲིད་རྣམས་ཀྱང་གསར་དུ་གནང་། སྒྲུབ་པ་སྡོམ་པའི་དུས་ནི་བོད་ཟླ་ལྔ་པའི་མར་ངོའི་ཚེས་གང་རུང་དང་། གྲོལ་བའི་དུས་ནི་བོད་ཟླ་ལྔ་པའི་ཡར་ངོའི་ཚེས་གང་རུང་ལ་ཡིན།
།སྒྲུབ་པ་ལ་མ་འཇུག་གོང་ཐོག་མར་འདུན་པ་ཕྱིན་ཅི་མ་ལོག་པ་སྟེ་དལ་བའི་རྟེན་བཟང་ཐོབ། རྒྱལ་བའི་བསྟན་དང་མཇལ། དགེ་བའི་བཤེས་ཀྱིས་སྐྱོང་བའི་སྐལ་བཟང་ཐོབ་དུས་འདིར་སྒྲུབ་ལ་གཞོལ་བའི་སྤོང་བ་པ་རང་ཉིད་སྡོམ་པ་གསུམ་ལ་ཉམས་ཆག་གི་དྲི་མས་མ་གོས་ཤིང་། དབྱར་གནས་ལ་ཞུགས་ནས་མདོ་རྒྱུད་ཀྱི་ཐོས་བསམ་བག་རེ་ཡོད་པ། ཁྱད་པར་གཏན་གྱི་བདེ་བ་ཐར་པ་དང་ཐམས་ཅད་མཁྱེན་པ་སྒྲུབ་པའི་འདུན་པ་ངེས་པར་ཡོད་དགོས་པ་སྔོན་དུ་སོང་སྟེ། གཟའ་སྐར་འཕྲོད་སྦྱོར་བཟང་པོའི་ཉིན་ནས་བཟུང་ལོ་གསུམ་ཕྱོགས་གསུམ་གྱི་ཉམས་ལེན་དངོས་ལ་ཐོག་མར་དྭགས་པོའི་ཐར་རྒྱན་དང་། རྗེ་དགུ་པའི་ཕྱག་ཆེན་ངེས་རྒྱ་མ་སོགས་ཀྱི་ཁྲིད་བྱས་ཏེ་སྔོན་འགྲོ་བློ་ལྡོག་རྣམ་བཞི་ནས་བླ་མའི་རྣལ་འབྱོར་བར་ཕྱག་འབུམ་དང་བཅས་ཟླ་བ་ལྔའི་ཁོངས་སུ་འགྲོ་ངེས་བྱ། དེ་ནས་གསར་རྙིང་རྒྱུད་སྡེའི་བསྐྱེད་རྫོགས་ཉམས་ལེན་གྱི་སྐོར་ལ། ཐོག་མར་ཤངས་ལུགས་རྒྱུད་སྡེ་ལྔ་དང་བདེ་མཆོག་ལྷ་ལྔའི་བསྙེན་པ་འགྲོ་དགོས་སྟབས། དེ་དག་ཀྱང་རིམ་པས་དབང་ལུང་ཁྲིད་གསུམ་བསྙེན་སྒྲུབ་ཁ་སྐོང་དང་བཅས་པ་སོ་སོར་བྱ། དེ་ནས་ཐབས་གྲོལ་ཟབ་མོའི་ཉམས་བཞེས་དངོས་ལ་ཐོག་དང་པོར་སོ་སོའི་བྱིན་རླབས་དམིགས་ཁྲིད་རྣམས་རིམ་པར་ཕོག་ལ། གསེར་ཆོས་ལྔ་པོ་རྣམས་རིམ་པས་འགྲོ་དགོས། གཏུམ་མོ་མེ་རྒོད་ཀྱི་སྐབས་ནས་ནི་གུའི་འཁྲུལ་འཁོར་ཡང་མ་ཆག་པར་སྐབས་བསྟུན་རྒྱག །ཕྱག་ཆེན་སྐབས་ངེས་དོན་རྒྱ་མཚོའི་དངོས་གཞི་ཁྲིད་ལུང་ཡང་རྫོགས་པར་བྱ། གཞན་ཡང་བླ་མ་མགོན་པོ་དབྱེར་མེད་ཀྱི་བཟླས་སྒོམ། སུ་ཁའི་ཆོས་དྲུག །མཇུག་ཏུ་ནི་དྷི་གཉིས་ཀྱི་ཚེ་སྒྲུབ་བཅས་ཤངས་ཆོས་རྩ་བ་ཡལ་ག་དང་བཅས་པར་ལོ་གཅིག་དང་ཟླ་བ་གཅིག་ཙམ་གྱིས་གྲུབ་བོ། དེ་ནས་ལོ་གཉིས་པའི་མཇུག་ཏུ་དཔལ་དུས་ཀྱི་འཁོར་ལོའི་བསྐྱེད་རྫོགས་སྒོམ་དགོས་པས། དུས་འཁོར་ལྷ་དགུའི་དབང་ལུང་དམིགས་ཁྲིད་བསྙེན་པ་ཁ་སྐོང་དང་བཅས་པ་བྱས་ལ་རྫོགས་རིམ་གྱི་ཁྲིད་ཕོག་སྟེ་སྦྱོར་དྲུག་གི་ཉམས་བཞེས་ཟླ་བ་དྲུག་བྱ་དགོས། ལོ་རྗེས་མའི་ཐོག་མར་རྫོགས་ཆེན་གྱི་ཉམས་ལེན་སྐོར་ལ། རྡོར་སེམས་ཞི་ཁྲོའི་དབང་ལུང་བསྙེན་ཁྲིད་ཁ་སྐོང་དང་བཅས་པ་བྱ་ཞིང་བླ་མ་ཡང་ཏིག་གི་དབང་ཁྲིད་ཀྱང་བྱས་ནས། སྔོན་འགྲོ་དང་དངོས་གཞིའི་ཁྲེགས་ཆོད་དང་། ཐོད་བརྒལ་བཅས་ལོ་གཅིག་གིས་གྲུབ་པར་བྱའོ། ཤངས་ཆོས་སྐོར་ལས་ལྷ་བཞི་དྲིལ་སྒྲུབ་དང་། གཏོར་ཆོག་འཕྲིན་ལས་གཏེར་མཛོད། གཏེར་གསར་ཕྱག་དྲུག་བཅས་གསུམ་པོའི་བསྙེན་སྒྲུབ་དང་བྱིན་རླབས། དབང་བཀའ། ཁྲིད་ལུང་། གཏོར་སྒྲུབ་བཅས་ལ་ཁྱོན་བསྡོམས་པས་ཞག་བཞི་བཅུ་ཞེ་གཉིས་ཙམ་འགོར་བ་ནི་ཕྱོགས་གསུམ་གྱི་ནང་བརྩི་དགོས། གྲོལ་ལ་ཉེ་བའི་མཐར་དགེར་རྗེ་བཙུན་མ་ཡིད་བཞིན་འཁོར་ལོའི་བསྙེན་སྒྲུབ་བྱ་དགོས་པ་དང་། སྔར་ནི་དྷིའི་ཚེ་སྒྲུབ་སོགས་ནི་ལོ་གསུམ་ནང་ཟླ་ལྷག་གཅིག་ངེས་པར་འབྱུང་བ་དེར་བརྩི་དགོས། ལོ་གསུམ་ཕྱོགས་གསུམ་ལེགས་པར་གྲུབ་པའི་གཟའ་ཚེས་འཕྲོད་སྦྱོར་དགེ་བའི་ཉིན་སྔ་དྲོར་གཏོང་རག་གི་ལྷ་བསངས་དང་ཆ་གསུམ་བཏང་ཞིང་མཚམས་ཐོ་ལེན། དེ་ཉིན་དམ་གཙང་དང་གདོང་སྤྲད་ཅིང་སྒྲུབ་ཁང་ལ་སྐོར་བ་ཙམ་བྱོན། དེའི་ཕྱི་ཉིན་ལྟ་བུར་དགོན་དུ་རྟེན་གསུམ་ལ་མཎྜལ་འབུལ་ཞིང་སྐྱབས་མགོན་རྗེ་དྲུང་རིན་པོ་ཆེ་དང་མཇལ་ཁ་ཞུས་ནས་སྒྲུབ་ཁང་གི་བྱ་བ་རྣམས་ལེགས་པར་གྲུབ་པ་ཡིན། གོང་གི་ལོ་གསུམ་ཕྱོགས་གསུམ་གྱི་རིང་གསར་རྙིང་རྒྱུད་སྡེའི་བསྐྱེད་རྫོགས་ཉམས་ལེན་འདི་སྐོར་ལ་ནང་གསེས་སོ་སོར་དུས་ཡུན་ཇི་ཙམ་འགོར་ཚད་དང་། ལོ་དུས་དང་ཟླ་དུས་ཀྱི་སྒྲུབ་མཆོད་དང་སྐུ་མཆོད། ཞག་རེ་བཞིན་གྱི་ཐུན་བཞིའི་རྣལ་འབྱོར། སྤྱིའི་ཀུན་སྤྱོད་སོགས་འཇམ་མགོན་རིན་པོ་ཆེས་མཛད་པའི་བཅའ་ཡིག་ལྟར་ཕྱག་བསྟར་བགྱིས་དང་བགྱིད་བཞིན་ཡོད། སྤྱིར་གསར་རྙིང་གི་རྒྱུད་སྡེའི་ཉམས་ལེན་འདི་དག་ཀྱང་དབང་ལུང་ཁྲིད་གསུམ་གྱི་རྒྱུན་གདེང་ཐུབ་པ་འཚོལ་དཀའ་བའི་རིགས་འགའ་ཙམ་ལས་ཕལ་ཆེ་བའི་ཉམས་བཞེས་ཀྱི་རྒྱུན་བཞུགས་ཤིང་། སྔར་མ་ཚུགས་པ་རྣམས་ཀྱང་ཅི་མགྱོགས་ཀྱི་གཟུག་རྒྱུའི་དམིགས་འདུན་ཟབ་མོ་བཅངས་འདུག །དེ་ལྟར་སྒྲུབ་བརྒྱུད་ཀྱི་རིང་ལུགས་ལས་སྔོན་འགྲོ་དང་། ཤངས་ཆོས། སྦྱོར་དྲུག །རྫོགས་ཆེན་རྣམས་ཀྱི་ཉམས་ལེན་སོ་སོར་ཙཱ་འདྲ་རིན་ཆེན་བྲག་གི་སྒྲུབ་སྡེ་དང་མཚུངས་པར་ཀོང་སྤྲུལ་བློ་གྲོས་མཐའ་ཡས་ཀྱི་ཕྱག་བཞེས་མཐོང་བརྒྱུད་མ་ཉམས་པར་ད་ལྟའི་བར་དུ་བཞུགས་པ་དག་ཀྱང་ཟམ་མི་ཆད་པར་སྐྱོང་མུས་དང་། ད་ཐེངས་ཀྱི་ཤངས་པའི་སྒྲུབ་སྡེའི་སྒྲུབ་བླ་ཚུལ་ཁྲིམས་བློ་གྲོས་ཀྱིས་གཙོས་སྒྲུབ་ཞུགས་སྤོང་བ་པ་རྣམས་ཀྱིས་ཀྱང་ཟབ་མོ་ནང་གི་ཉམས་བཞེས་ལ་རང་ནུས་ཅི་ལྕོགས་ཀྱིས་འབད་འབུངས་གནང་བཞིན་པའོ།
།རྗེ་དྲུང་སྐུ་ཕྲེང་བདུན་ པ་བསྟན་པའི་རྒྱལ་མཚན་མཆོག་གིས་སྤྱི་ལོ1991ལོར་དཔལ་སྤུངས་དགོན་དུ་བྱམས་མགོན་ཏཱ་སི་ཏུ་པདྨ་དོན་ཡོད་ཉིན་བྱེད་ཀྱི་མདུན་ནས་མར་པ་བཀའ་བརྒྱུད་དང་ཤངས་པ་བཀའ་བརྒྱུད་ཀྱི་སྨིན་གྲོལ་གྱིས་གཙོས་གདམས་ངག་མཛོད་ཀྱི་བཀའ་དབང་ཡོངས་རྫོགས་མནོས་ཤིང༌། ཚབ་ཚ་སྒྲུབ་རྒན་རིན་པོ་ཆེའི་མདུན་ནས་དེ་དག་གི་ལྗགས་ལུང་ཆ་ཚང་ཞུས་ཏེ་སྨིན་གྲོལ་རྒྱབ་རྟེན་དང་བཅས་པ་བུམ་པ་གང་བྱོའི་ཚུལ་དུ་གསན་བཞེས་གནང་། སྔ་རྗེས་སུ་མཛོ་རྗེ་དགོན་གྱི་སྒྲུབ་སྡེ་གོང་འོག་གཉིས་དང་། བཤད་གྲྭ། མགོན་ཁང་། ཚོགས་ཆེན་འདུ་ཁང་། ཐོག་བརྩེགས་གསུམ་ལྡན་གྱི་དུས་གསུམ་སངས་རྒྱས་སོགས་ཕྱི་ནང་གི་རྟེན་བཞེངས་རྒྱ་ཆེར་མཛད་ཅིང་། དགོན་སྤྱིའི་བཤད་སྒྲུབ་ལས་གསུམ་གང་ཅིར་དགྱེས་བརྩེས་གཟིགས་སྐྱོང་དང་སློབ་སྟོན་བསྟུད་མར་སྩོལ་བ་མ་ཟད། ཁྱད་པར་བཤད་སྒྲུབ་ཀྱི་སྡེ་མང་དུ་བཙུགས་པ་རྣམས་ལས་ཀྱང་སྒྲུབ་སྡེ་གཙོ་བོར་མཛད་ཀྱི་ཡོད། ཁོང་གིས་དཔལ་ལྡན་ཤངས་པའི་བསྟན་རྒྱས་སྨོན་ལམ་ཞེས་པ་ཞིག་ཀྱང་མཛད། འདི་ལྟར་ཁོང་གིས་བཀའ་བརྒྱུད་དོན་གྱི་བསྟན་པ་ཕྱོགས་བཅུར་སྤེལ་བར་དཀའ་སྤྱད་ཀྱི་སྙིང་སྟོབས་ཁུར་དུ་བཞེས་མུས་ལགས།
II.6.3.5 Bengen Samten Chödzong Ling
ལྔ། བན་རྒན་སྒྲུབ་སྡེ་བསམ་གཏན་ཆོས་རྫོང་གླིང་།
ཏྲེ་ཧོར་བན་རྒན་དགོན་གྱི་མཚན་ལ་སྔར་ཕུན་ཚོགས་རྣམ་རྒྱལ་དགོན་དང་ཕྱིས་ཕུན་ཚོགས་རྣམ་རྒྱལ་བྱང་ཆུབ་ཆོས་འཕེལ་གླིང་ཞེས་འབོད་ཅིང་། ཐོག་མར་སྤྱི་ལོ1610ལོར་སྒྲུབ་བརྒྱུད་ཀརྨ་རབ་འཕེལ་གྱིས་གསེར་མཁར་གྱི་ཁོངས་སུ་ལྕགས་མོ་མདོ་སྟེང་དགོན་ཕྱག་བཏབ་པ་ཕྱིས་ཐོར་ཞིག་ཏུ་སོང་། དེ་ལས་གྱེས་ཏེ་རྗེ་བློ་གྲོས་སམ་མཚུར་ནག་བླ་མས་ད་ལྟའི་བན་རྒན་ནི་གུའི་སྒྲུབ་སྡེའི་ཤར་ངོས་རི་སྟེང་དུ་བཏབ། ད་ལྟའི་དགོན་འདི་སྤྱི་ལོ1983ལོར་སི་ཏུ་པདྨ་དོན་ཡོད་ཀྱིས་བསྐྱར་བཞེངས་མཛད་ཅིང་། དེང་དཀར་མཛེས་རྫོང་སྲིད་གཞུང་གནས་ཡུལ་ནས་སྤྱི་ལེ35ཙམ་ཡོད་པའི་འདན་མ་ཡུལ་ཤོག་ཁོངས་ཀྱི་ཟླ་ཆེན་ཐང་དུ་གནས། དེང་སྤྲུལ་སྐུ་གཅིག་དང་། དགེ་འདུན་ཉིས་བརྒྱ་ཉེར་གཅིག་ཙམ་བཞུགས། དགོན་པ་གཞུང་དུ་དབྱར་གནས་སྐབས་ཤངས་པའི་ཡི་དམ་རྒྱུད་སྡེའི་ཉམས་ལེན་དང་། བོད་ཟླ་བཅུ་གཅིག་པའི་ནང་མགོན་པོ་ཕྱག་དྲུག་པའི་སྒྲུབ་པ་ཉིན་བདུན་ཡོད།
།དེ་ཡང་འཇིག་རྟེན་གྱི་གཏམ་དཔེར་མདའ་རུ་དགེ་འདུན་གྱི་ཀུན་དགའ་ར་བ་བཞེངས་པ་ལས། ཕུ་རུ་བསམ་གཏན་གྱི་ཁང་བུ་བྲེ་ཙམ་བརྩིགས་པ་དགའ་ཞེས་སུ་གྲགས་པ་ལྟར། བན་རྒན་དགོན་གྱི་ཤངས་པའི་སྒྲུབ་སྡེ་འདི་ཉིད་ནི་ཐོག་མར་ཀརྨ་རང་བྱུང་ཀུན་ཁྱབ་ཀྱི་དགོངས་བཞེད་ལྟར་ད་ལྟའི་དགོན་གནས་ཡུལ་ནས་སྤྱི་ལེ་ལྔ་ཙམ་ཡོད་པའི་བྱེ་སེར་གྲོང་ཚོའི་ནུབ་བྱང་མཚམས་ཀྱི་རི་ལྡེབས་སུ་ཕྱག་བཏབ་པ་ཕྱིས་ཆོག་མཆན་མེད་ཟེར་ནས་གཏོར་བའི་ཤུལ་དུ། བླ་མ་དབང་ཆེན་གྱིས་སྤྱི་ལོ་2005ལོར་གསར་བཙུགས་གནང་རྗེས། སྒྲུབ་ཐེངས་རེར་ལོ་གསུམ་ཕྱོགས་གསུམ་རེ་བྱས་པའི་སྒྲུབ་ཐེངས་དང་པོར། སྒྲུབ་དཔོན་བླ་མ་དབང་ཆེན། སྒྲུབ་བླ་དགུ་ཡོད་པ་ལས། བན་རྒན་དགོན་རང་ནས་བརྒྱད་དང༌། བཀའ་བརྒྱུད་དགོན་གསར་དགོན་ནས་གཅིག །སྒྲུབ་བླ་རྣམས་ཀྱི་ནང་ནས་དགུང་གྲངས་ཆེ་ཤོས40དང་། ཆུང་ཤོས་25བཅས། སྒྲུབ་ཐེངས་གཉིས་པ་འདིའི་མཚམས་སྒོ་སྤྱི་ལོ་2011ལོའི་ལྷ་བབས་དུས་ཆེན་ཉིན་བསྡམས། སྒྲུབ་ཐེངས་འདིའི་སྒྲུབ་དཔོན་རྟ་མགྲིན་དབང་རྒྱལ། སྒྲུབ་བླའི་གྲངས་བཅུ་གཅིག་ཟིན་པ་ལས། བན་རྒན་དགོན་ནས་བདུན། དགོན་གསར་དགོན་ནས་གསུམ། སྒར་ལུང་དགོན་ནས་གཅིག །སྒྲུབ་བླ་རྣམས་ཀྱི་ནང་ནས་དགུང་གྲངས་ཆེ་ཤོས43དང་། ཆུང་ཤོས25ཡིན་ནོ། །བན་རྒན་ཤངས་པའི་སྒྲུབ་སྡེ་ཀརྨ་བསམ་གཏན་ཆོས་རྫོང་གླིང་གི་བསྙེན་སྒྲུབ་སོ་སོའི་དུས་ཡུན་དང་གྲངས་ཚད་སྐོར་ནི་ཀརྨ་ངེས་དོན་ཆོས་ཀྱི་བློ་གྲོས་ཀྱིས་མཛད་པའི་ཤངས་ཆོས་ཀྱི་ཉམས་ལེན་ཟིན་དེབ་ཁྱབ་བདག་བླ་མའི་ཞལ་ལུང་མོས་ལྡན་སྙིང་གི་སྒྲོན་མེ་ཞེས་པ་ལྟར་བཀོད་པ་ལ། བསྙེན་སྒྲུབ་རྣམས་ཀྱི་ཐོག་མར་ཕྱི་ནང་གསང་བའི་བར་ཆད་མི་འབྱུང་བའི་ཕྱིར། སྤྲུལ་པའི་གཏེར་ཆེན་མཆོག་འགྱུར་གླིང་པའི་ཟབ་གཏེར་ལས་བྱོན་པ་གཏེར་གསར་གསང་ཐིག་ཕུར་པའི་བསྙེན་པ་འབུམ་གཅིག་ཁ་སྐོང་དང་བཅས་ཉིན་བདུན་ནས་དབུ་བཙུགས། དལ་འབྱོར་རྙེད་དཀའ་དང༌། འཆི་བ་མི་རྟག །ལས་རྒྱུ་འབྲས། འཁོར་བའི་ཉེས་དམིགས་བསམ་པ་སོ་སོར་ཉིན་བདུན་རེ། སྐྱབས་འགྲོ་དང་ཕྱག་འཚལ་སྦྲགས་མ་འབུམ་གཅིག་ལ་ཟླ་བ་གཉིས། སྒྲིབ་སྦྱོང་རྡོར་སེམས་སྒོམ་བཟླས་ཡིག་བརྒྱ་འབུམ་གཅིག་དང་། ཡིག་དྲུག་འབུམ་གཅིག་ལ་ཟླ་བ་གཅིག་དང་ཉིན་བཅོ་ལྔ། མཎྜལ་འབུམ་གཅིག་ལ་ཟླ་བ་གཅིག །བླ་མའི་རྣལ་འབྱོར་འབུམ་གཅིག་ལ་ཟླ་བ་གཅིག་མི་ལའི་བླ་སྒྲུབ་འབུམ་གཅིག་ལ་ཉིན་ཉེར་གཅིག །ལྷ་བཞི་དྲིལ་སྒྲུབ་གཙོ་བོར་བླ་མའི་བསྙེན་པ་བཞི་ཁྲི་དང་། གཞན་འཁོར་བཞི་རེར་བསྙེན་པ་ཆིག་ཁྲི་རེ་དགོས་པ་ལ་ཉིན་ཉེར་གཅིག །ཡང་མགོན་མཐིང་བསྙེན་པ་བཞི་ཁྲི་དང་བཅས་པར་ཉིན་བདུན། བླ་སྦྱོང་དོན་བདུན་མར་ཟླ་བ་གཅིག །དེའི་རིང་མ་ཎི་གྲངས་གང་མང་དང་གཙོ་བོར་གཏོང་ལེན་དམིགས་པ་དགོས། སེམས་འཛིན་ཞི་གནས་ཉིན་བཅུ་བཞི། སྐྱེར་སྒང་རྟ་མགྲིན་བསྙེན་པ་ཉིས་འབུམ་དང་བཅས་པར་ཟླ་བ་གཅིགཕག་མོའི་བསྙེན་པ་ཕྱི་སྒྲུབ་ཨོ་གསུམ་མ་བསྙེན་པ་ཉིས་འབུམ་དང་བཅས་པར་ཟླ་བ་གཅིག །ཕག་མོའི་བསྙེན་པ་ནང་སྒྲུབ་ཉིས་འབུམ་ལ་ཉིན་ཉེར་གཅིག །ཕག་མོའི་གསང་སྒྲུབ་བསྙེན་པ་ཉིས་འབུམ་ལ་ཉིན་བཅོ་ལྔ། ཕག་མོའི་སྒྲུབ་མཆོད་ཉིན་བཞི། ཕག་མོའི་སྦྱིན་སྲེག་ཉིན་གཅིག །བདེ་མཆོག་ལྷ་ལྔའི་བསྙེན་པ་ཡི་གེ་བདུན་པ་འབྲུ་འབུམ། སྙིང་པོ་ཡི་གེ་ཉེར་གཉིས་མ་བཞི་འབུམ། ཡུམ་སྔགས་ཆིག་འབུམ། མཁའ་འགྲོ་བཞིའི་སྔགས་ཆིག་ཁྲི་རེ་དང་བཅས་པར་ཟླ་བ་གསུམ། བདེ་མཆོག་ལྷ་ལྔའི་སྒྲུབ་མཆོད་ཉིན་བཞི། བདེ་མཆོག་ལྷ་ལྔའི་སྦྱིན་སྲེག་ཉིན་གཅིག །རྒྱུད་སྡེ་ལྔའི་བསྙེན་པ་ལ་བདེ་མཆོག་གཙོ་བསྙེན་འབྲུ་འབུམ། ཡུམ་སྔགས་ཆིག་འབུམ། གསང་འདུས། མཱ་ཡ། དགྱེས་རྡོར། འཇིགས་བྱེད་བཅས་འབུམ་ཕྲག་རེ་རེར་ཟླ་བ་ལྔ། རྒྱུད་སྡེ་ལྔའི་སྒྲུབ་མཆོད་ཉིན་དྲུག །རྒྱུད་སྡེ་ལྔའི་སྦྱིན་སྲེག་ཉིན་གཅིག །བླ་མགོན་དབྱེར་མེད་ཀྱི་བསྙེན་པ་ཆིག་འབུམ་ལ་ཉིན་བཅུ་བཞི། ཡང་མགོན་མཐིང་བསྙེན་པ་བཞི་ཁྲི་ལ་ཉིན་བདུན། གསེར་ཆོས་ལྔའི་ཐོག་མ་ནི་གུ་ཆོས་དྲུག་གི་སྔོན་འགྲོ་དལ་འབྱོར་རྙེད་དཀའ་དང་། འཆི་བ་མི་རྟག །ལས་རྒྱུ་འབྲས། འཁོར་བའི་ཉེས་དམིགས་བསམ་པ་རེ་རེར་ཉིན་རེ། སྐྱབས་ཕྱག་སྦྲགས་མ་ཆིག་ཁྲི་ལ་ཉིན་བཞི། སེམས་བསྐྱེད་ཆིག་ཁྲི་ལ་ཉིན་བཞི། མཎྜལ་ཆིག་ཁྲི་ལ་ཉིན་བཞི། དག་བྱེད་ཨའི་སྟོང་ར་ཉིན་བཞི། གཏུམ་མོའི་བླ་མའི་རྣལ་འབྱོར་གསོལ་འདེབས་ཆིག་ཁྲི་དང་བཅས་པར་ཉིན་བཞི། སྟོང་ར་གསལ་འདབ་ཉིན་གསུམ། མེ་རྒོད་དམིགས་པ་ཉིན་བདུན། གཏུམ་མོ་དངོས་གཞི་བསྒོམ་པ་ཟླ་བ་གཅིག །གཏུམ་མོ་སོགས་ཆོས་དྲུག་སོ་སོའི་མཇུག་ཏུ་འཇམ་མགོན་གསུང་བསྟན་གཅིག་མའི་དམིགས་མཐུན་རྣམས་ཀྱང་ཉིན་རེ་ཙམ་ཉམས་སུ་བླངས་པ་ལ་ཁྱོན་ཉིན་བདུན། སྒྱུ་ལུས། རྨི་ལམ། འོད་གསལ་སོ་སོར་ཉིན་ཉེར་གཅིག་རེ། འཕོ་བ་དང་། བར་དོ་གཉིས་ལ་ཉིན་བདུན་རེ། ཕྱག་ཆེན་གའུ་མའི་ནང་ལྷག་མཐོང་ཟླ་བ་གཅིག །ལམ་ཁྱེར་རྣམ་གསུམ་རེ་རེར་ཞག་བདུན་རེ། མཁའ་སྤྱོད་དཀར་མོའི་བསྙེན་པ་ཉིས་འབུམ་དང་ཉམས་ལེན་ལ་ཟླ་བ་གཅིག །མཁའ་སྤྱོད་དཀར་མོའི་འཕོ་བ་ཉིན་གསུམ། མཁའ་སྤྱོད་དམར་མོའི་བསྙེན་པ་ཉིས་འབུམ་དང་ཉམས་ལེན་ལ་ཟླ་བ་གཅིག །མཁའ་སྤྱོད་དམར་མོའི་འཕོ་བ་ཉིན་གསུམ། འབྲས་བུ་འཆི་མེད་འཆུགས་མེད་ཉིན་བདུན། མགོན་མཐིང་བསྙེན་པ་བདུན་ཁྲི་ལ་ཉིན་བདུན། གའུ་མའི་མཇུག་ཐང་སྟོང་རྒྱལ་པོའི་གསུང་ཉིང་ཁུའི་ཡན་ལག་བླ་མགོན་དབྱེར་མེད་ཀྱི་ཉམས་ལེན་ཕྱག་བཞེས་ལྟར་ཉམས་སུ་བླངས་ཏེ་བསྙེན་པ་བཞི་ཁྲི་དང་བཅས་པ་ལ་ཉིན་བདུན། སུ་ཁ་ཆོས་དྲུག་ལས་ཐོག་མར་གཏུམ་མོར་ཉིན་བཅུ། སྒྱུ་ལུས་དང་། རྨི་ལམ། འོད་གསལ་གསུམ་ལ་ཉིན་ལྔ་རེ། འཕོ་བ་དང་བར་དོ་གཉིས་ལ་ཉིན་གསུམ་རེ། སྨིན་གླིང་རྡོར་སེམས་བསྙེན་པ་ཡིག་དྲུག་འབྲུ་འབུམ་དང་ཡིག་བརྒྱ་ཆིག་འབུམ་ལ་ཟླ་བ་གཅིག །སྨིན་གླིང་རྡོར་སེམས་སྒྲུབ་མཆོད་དང་སྦྱིན་སྲེག་བཅས་ཉིན་གསུམ། འོད་དཔག་མེད་ཀྱི་བསྙེན་པ་ཆིག་འབུམ་དང་། ཧྲི་ཡིག་འབྲུ་གཅིག་མ་ཆིག་འབུམ། གཟུངས་རིང་ཆིག་ཁྲི་བཅས་ལ་ཟླ་བ་གཅིག །འོད་དཔག་མེད་ཀྱི་འཕོ་བ་ཉིན་གསུམ། འོད་དཔག་མེད་ཀྱི་སྒྲུབ་མཆོད་དང་སྦྱིན་སྲེག་བཅས་ལ་ཉིན་གསུམ། གཅོད་ཚོགས་ཡོན་ཏན་ཀུན་འབྱུང་ལ་ཟླ་བ་གཅིག །མཐའ་མར་དགེ་བ་ཚེ་སྒྲུབ་ཀྱི་རིམ་པ་ལས། ཐོག་མར་ནི་གུའི་ཚེ་སྒྲུབ་བདུན་ཁྲི་དང་བཅས་པར་ཉིན་བདུན། སུ་ཁའི་ཚེ་སྒྲུབ་བདུན་ཁྲི་དང་བཅས་པ་ལ་ཉིན་བདུན། སྒྲོལ་དཀར་ཡིད་བཞིན་འཁོར་ལོའི་ཚེ་སྒྲུབ་བསྙེན་པ་འབུམ་གཅིག་དང་ཁྲི་ལྔ་བཅས་པར་ཉིན་བཅུ་བཞི། ལོ་གསུམ་གྱི་རིང་མགོན་སྒྲུབ་ལ་ཟླ་བ་གཅིག་བཅས་སོ།
II.6.3.6 Tsokha Künzang Dropen Jangchup Dechen Ösel Ling
།དྲུག མཚོ་ཁའི་སྒྲུབ་སྡེ་ཀུན་བཟང་འགྲོ་ཕན་བྱང་ཆུབ་བདེ་ཆེན་འོད་གསལ་གླིང་།
མཚོ་ཁ་དགོན་ནི་བོད་ལྗོངས་ཆབ་མདོ་ས་གནས་རི་བོ་ཆེ་རྫོང་ལྕགས་ཟམ་ཁ་ཡུལ་ཤོག་མཚོ་ཁ་ཚོན་སེ་རྡོར་གྲོང་ཚོའི་ཁོངས་ཀྱི་སྐྱེད་ཆུའམ་ངོམ་ཆུའི་ལྷོ་ངོས་ཀྱི་ཉེ་འགྲམ་རི་བོ་ཆེ་རྫོང་སྲིད་གཞུང་གནས་ཡུལ་གྱི་བྱང་ཕྱོགས་སྤྱི་ལེ100ཙམ་གྱིས་སར་གནས། ཐོག་མར་འབྲུག་པ་བཀའ་བརྒྱུད་ཀྱི་རི་ཁྲོད་ཡིན་པ་ལ། ཕྱིས་རྫོང་ཤོད་ཀྱི་བྱུང་བ་རགས་བསྡུས་སྐལ་བཟང་དད་པའི་གསོལ་སྨན་དུ་འཇམ་མགོན་ཀོང་སྤྲུལ་རིན་པོ་ཆེའི་སྐུ་སྐྱེ་དེ་མ་ཐག་པ་གཅིག་ནི་ལས་སྨོན་གྱིས་བསྐུལ་ནས་ཆབ་མདོ་རི་བོ་ཆེའི་ཕྱོགས་སུ་རིམ་བཞིན་ཞབས་སོར་བསྐྱོད་ནས་དཔལ་ལྡན་ཤངས་པའི་བརྒྱུད་འཛིན་མཚོ་ཁ་དགོན་གསར་དུ་ཕྱག་བཏབ་ཅེས་འཁོད་པ་ལྟར། འཇམ་མགོན་ཀོང་སྤྲུལ་གྱི་སྐུ་སྐྱེ་དེ་མ་ཐག་པ་ཀརྨ་ངག་དབང་བློ་གྲོས་རབ་འཕེལ་ཞེས་པས་སྤྱི་ལོ1938ལོར་ཕྱག་བཏབ་ཅིང་། དཔལ་ལྡན་ཤངས་པའི་རིང་ལུགས་འཛིན་པར་བཤད། དེ་རྗེས་དཔལ་ལྡན་མཁྱེན་བརྩེ་འོད་ཟེར་དགོན་འདིར་ཕེབས་ནས་སྒར་བསང་ཆེན་མོ་དང་། གསང་ཐིག་ཡབ་བཀའི་ཚོགས་བརྒྱ། ཚེ་དབང་ཚེ་སྒྲུབ་སོགས་གནང་། དེང་མཁྱེན་བརྩེ་སྐུ་ཕྲེང་བཞི་པ་ངག་དབང་བསོད་ནམས་སྟོབས་རྒྱས་ཀྱིས་དགོན་འདིའི་བསྟན་པའི་བདག་པོ་གནང་ཐོག་དགེ་འདུན་ཞལ་གྲངས་བརྒྱད་ཅུ་གྱ་བཞི་ཙམ་བཞུགས་པ་རྣམས་ཀྱིས་སྤྱིར་ཀརྨ་ཀམ་ཚང་གི་ཕྱག་བཞེས་སྐྱོང་བ་ལ། ཤངས་པའི་མགོན་པོ་ཕྱག་དྲུག་པའི་སྒྲུབ་པའང་འཚོགས་ཀྱི་ཡོད།
དགོན་འདིའི་ནི་གུའི་སྒྲུབ་སྡེ་ཀུན་བཟང་འགྲོ་ཕན་བྱང་ཆུབ་བདེ་ཆེན་འོད་གསལ་གླིང་ནི་ཐོག་མར་དཔལ་ལྡན་མཁྱེན་བརྩེ་འོད་ཟེར་གྱིས་ཕྱག་བཏབ་པ་ལ་རིག་གསར་སྐབས་རྩ་གཏོར་དུ་བཏང་བ། སླར་སྤྱི་ལོ1986ལོར་ཉམས་གསོ་མཛད། སྒྲུབ་སྡེ་འདིར་ཤངས་ཆོས་ཉམས་སུ་བཞེས་པའི་རིམ་པ་ནི་སྤྱིར་ཤངས་ཆོས་རྩ་བ་ཡལ་ག་དང་བཅས་པ་རྣམས་ལ་ལོ་གཅིག་དང་ཕྱེད། དུས་འཁོར་ཟླ་བ་དྲུག །རྡོར་སེམས་ཟླ་བ་གཉིས། ཡང་དག་ཟླ་བ་གཅིག་སོགས་ཙཱ་འདྲ་དང་མཚུངས། སྒྲུབ་སྡེ་འདི་ཉིད་ཉམས་གསོ་གནང་བ་ནས་ད་བར་ལོ་གསུམ་ཕྱོགས་གསུམ་རེ་བྱས་པའི་སྒྲུབ་ཐེངས་ལྔ་སོང་ཞིང་། སྒྲུབ་ཐེངས་དང་པོར་སྒྲུབ་བླ་ཉེར་གཉིས་དང་། གཉིས་པར་བཅུ་གཉིས། སྒྲུབ་ཐེངས་དང་པོ་དང་གཉིས་པའི་སྒྲུབ་དཔོན་དམ་ཆོས། གསུམ་པར་སྒྲུབ་བླ་བརྒྱད་དང་སྒྲུབ་དཔོན་ཨ་སྟག །བཞི་པར་སྒྲུབ་བླ་བཅུ་གཉིས། ལྔ་པར་བཅུ་བཞི། སྒྲུབ་ཐེངས་བཞི་པ་དང་ལྔ་པའི་སྒྲུབ་དཔོན་ཐུབ་བསྟན་དགེ་ལེགས་དང་། སྒྲུབ་ཐེངས་ལྔ་པ་མཇུག་སྒྲིལ་ནས་སྒྲུབ་ཁང་ཉེན་ཁ་ཆེ་བས་ད་ལྟ་སྒྲུབ་པ་ཚུགས་ཐུབ་མེད། སྒྲུབ་ཁང་འདིའི་རྟེན་གཙོར་སི་ཏུ་པདྨ་ཉིན་བྱེད་ཀྱིས་འཇམ་མགོན་ཀོང་སྤྲུལ་ལ་སྡོམ་རྟེན་དུ་བསྩལ་བའི་ཐུབ་དབང་གི་ལི་སྐུ་ཞིག་བཞུགས་པ་བཅས་སོ།
II.6.3.7 Benchen Kündé Ling
།བདུན། སྒ་སྟོད་བན་ཆེན་སྒྲུབ་སྡེ་ཀུན་བདེ་གླིང་།
སྒ་སྟོད་བན་ཆེན་དཔལ་ལྡན་ཕུན་ཚོགས་དར་རྒྱས་གླིང་ནི་དེང་མཚོ་སྔོན་ཞིང་ཆེན་སྐྱེ་རྒུ་ཁུལ་ཡུལ་ཤུལ་རྫོང་པ་ཐང་ཡུལ་ཤོག་སྲིད་གཞུང་གནས་ཡུལ་དང་ཉེ་བའི་ནུབ་བྱང་མཚམས་སུ་གནས་ཤིང་། སངས་རྒྱས་མཉན་པ་སྐུ་ཕྲེང་བཞི་པ་དགེ་ལེགས་རྒྱ་མཚོ་དགུང་གྲངས་སོ་དྲུག་ལ་ཕེབས་པ་རབ་བྱུང་བཅུ་གཅིག་པའི་ས་ཕོ་རྟའི་ལོ་སྤྱི་ལོ1678ལོར་ཕྱག་བཏབ། དེ་རྗེས་སངས་རྒྱས་མཉན་པ་སྐུ་ཕྲེང་ལྔ་པ་དགེ་ལེགས་སྙིང་པོ། དྲུག་པ་སྒྲུབ་བརྒྱུད་བསྟན་དར། བདུན་པ་ཤེས་རབ་སྙིང་པོ། བརྒྱད་པ་བསྟན་འཛིན་གྲུབ་མཆོག །དགུ་པ་ཀརྨ་བཤད་སྒྲུབ་བསྟན་པའི་ཉི་མ། བཅུ་པ་རང་བྱུང་འཕྲིན་ལས་ཀུན་ཁྱབ་བསྟན་པའི་རྒྱལ་མཚན་བཅས་ཀྱིས་ད་བར་གདན་ས་རིམ་པར་བསྐྱངས། གཞན་ཡང་བསྟན་དགའ་རིན་པོ་ཆེ་སྐུ་ཕྲེང་རིམ་བྱོན་དང་། འཆི་མེད་སྤྲུལ་སྐུ་བཅས་ནས་ཀྱང་དགོན་གནས་སྐྱོང་བའི་ཁུར་བཞེས་པ་དང་། དེང་དགེ་འདུན་ཞལ་གྲངས200ཙམ་ཡོད་པ་རྣམས་ཀརྨ་ཀཾ་ཚང་གི་རིང་ལུགས་ཕྱག་བཞེས་གནང་བཞིན་ཡོད། སྔར་དཔལ་ལྡན་མཁྱེན་བརྩེ་འོད་ཟེར་དགོན་འདིར་ལན་འགའ་ཕེབས་ནས་དབང་ཆོས་སོགས་བཞེད་སྐོང་ཅི་རིགས་བསྩལ་བ་དང་། རྒྱལ་ཟླའི་མགོན་པོའི་དུས་མཆོད། གར་འཆམ་བཅས་ཀྱང་ལེགས་པར་བསྒྲུབས།
དགོན་འདིར་ཁྱོན་སྒྲུབ་སྡེ་བཞི་སྟེ། ནཱ་རོ་ཆོས་དྲུག་གི་སྒྲུབ་སྡེ་དང་། རྒྱལ་བ་རྒྱ་མཚོའི་སྒྲུབ་སྡེ། ཀུན་རིག་གི་སྒྲུབ་སྡེ། ནི་གུའི་སྒྲུབ་སྡེ་བཅས་ཡོད་པ་ལས། སྒྲུབ་པར་ཞུགས་ཕྱིན་ཆད་ཐོག་མར་ཀུན་རིག་གི་སྒྲུབ་སྡེར་སྔོན་འགྲོ་ཟླ་བ་བཞི་དང་། ཀུན་རིག་གི་ཉམས་ལེན་ཟླ་བ་དྲུག །ཞིང་སྐྱོང་བསྙེན་སྒྲུབ་ཟླ་བ་གཉིས། ཟླ་ལྷག་ཡོད་ན་སྒྲོལ་དཀར་ཚེ་སྒྲུབ་བཅས་ལེགས་གྲུབ་ཟིན་རྗེས། གཞི་ནས་ནཱ་རོའི་སྒྲུབ་སྡེ་དང་ནི་གུའི་སྒྲུབ་སྡེ་གང་རུང་གི་དངོས་གཞིར་ཐད་ཀར་ཞུགས་ཆོག །འོན་ཀྱང་སྒྲུབ་སྡེ་རེར་སྒྲུབ་ཐེངས་གཅིག་ལ་ལོ་གཅིག་རེ་བྱས་པའི་ཁྱོན་ལོ་བཞིའི་རིང་སྒྲུབ་སྡེ་ཚང་མར་ངེས་པར་ཞུགས་དགོས། སྒྲུབ་ཐེངས་ཆ་ཚང་གཅིག་མཐར་ཕྱིན་པའི་སྒྲུབ་བླ་རྣམས་རེས་མོས་ཀྱིས་མགོན་ཁང་དུ་ལོ་གཅིག་དང་། གྲོ་ལོད་ཁང་དུ་ལོ་གཅིག་བཞུགས་དགོས་པ་བཅས་དགོན་འདི་ཁོ་ནའི་ཐུན་མིན་གྱི་ཁྱད་ཆོས་ཡིན།
དགོན་འདིའི་ཤངས་པའི་སྒྲུབ་སྡེ་ཀུན་བཟང་བདེ་ཆེན་འོད་གསལ་གླིང་ནི་ཐོག་མར་ཀརྨ་རང་བྱུང་ཀུན་ཁྱབ་ཀྱི་དངོས་སློབ་བསྟན་དགའ་རིན་པོ་ཆེ་སྐུ་ཕྲེང་དང་པོ་བླ་དགའ་བསྟན་འཛིན་ཆོས་རྒྱལ་གྱིས་ཕྱག་བཏབ་པ་དུས་འགྱུར་གྱི་སྐབས་ཐོར་ཞིག་ཏུ་སོང་བ་ལ། སྤྱི་ལོ་1996ལོར་མཉན་པ་སྐུ་ཕྲེང་བཅུ་པས་ཉམས་གསོ་སྐྱར་བསྐྲུན་མཛད་རྗེས་སྒྲུབ་ཐེངས་རེར་ལོ་གཅིག་རེ་བྱས་པའི་ཁྱོན་སྒྲུབ་ཐེངས་བཅུ་བདུན་སོང་ཟིན། སྒྲུབ་ཐེངས་དང་པོའི་སྒྲུབ་དཔོན་བླ་དགའ་རིན་པོ་ཆེ་དང་། སྒྲུབ་བླ་ལྔ། སྒྲུབ་གཡོག་གཅིག །སྒྲུབ་ཐེངས་གཉིས་པ་ནས་བཅུ་བདུན་པ་བར་གྱི་སྒྲུབ་དཔོན་ཀརྨ་འབྲུག་གྲགས་དང་། སྒྲུབ་བླ་སྒྲུབ་གཡོག་བཅས་དྲུག་ཡོད་པ་ཚང་མ་གོང་དང་མཚུངས། སྒྲུབ་ཐེངས་བཅུ་བདུན་པ་དེ་སྤྱི་ལོ2012ལོའི་བོད་ཟླ་10པའི་ཚེས་7ཉིན་གྲོལ་བ་དང་། སྒྲུབ་ཐེངས་རྗེས་མ་སྤྱི་ལོ་2013ལོའི་བོད་ཟླ10པའི་ཚེས13ཉིན་བསྡམ་རྒྱུ་བཅས་སོ།
།སྒྲུབ་སྡེ་འདིར་ཤངས་ཆོས་ཉམས་སུ་ལེན་པའི་ཚུལ་ལ། བོད་ཟླ་བཅུ་པའི་ཚེས་བཅུ་གསུམ་ཉིན་རྒྱལ་ཆེན་བཞིའི་གཏོར་འབུལ་དང་། གཞིས་བདག་དཀར་གཏོར་སོགས་གཏོང་བ། སྒྲུབ་གྲྭ་དགེ་འདུན་ལྔ་དང་། སྒྲུབ་དཔོན་གཅིག །སྒྲུབ་གཡོག་གཅིག་བཅས་པ་རྣམས་ཀྱིས་སྒྲུབ་པའི་དབུ་འཛུགས། དེའི་ཕྱི་ཉིན་གསང་ཐིག་ཕུར་པའི་ལུང་ཁྲིད། ཕུར་གཏོར་མཆོད་པ་བཅས་གྲུབ་ནས་ཚེས་བཅོ་ལྔ་ཉིན་གྱི་དགོང་ཐུན་ནས་དབུ་བཟུང་སྟེ་ཞག་བདུན་ལ་ཆོས་སྒྲུབ་པའི་བར་ཆད་བཞི་སེལ་ཆེད་ཀྱི་ཉམས་ལེན། ཚེས་བཅུ་གསུམ་དང་ཚེས་བཅུ་བཞི་གཉིས་ལ་སྒྲུབ་དཔོན་མདུན་ནས་ལྷ་བཞི་དྲིལ་སྒྲུབ་ཀྱི་དབང་ལུང་ཁྲིད་བཅས་དང་། མཆོད་གཏོར་སོགས་ལེགས་པར་གྲུབ་རྗེས། ཚེས་ཉེར་ལྔ་ཉིན་ལྷ་བཞི་དྲིལ་སྒྲུབ་ཀྱི་བསྒོམ་བཟླས་ཀྱི་དབུ་ཚུགས། བསྙེན་པའི་གྲངས་ཚད་ལ། གཙོ་བོ་འབུམ་བཞི་དང་། འཁོར་རྣམས་ཁྲི་བཞི་རེ་བཅས། དེ་ནས་བོད་ཟླ་བཅུ་གཉིས་པའི་ཚེས་ཉེར་ལྔ་བར་གྱི་ཟླ་བ་གཉིས་རིང་གོང་གསལ་བསྙེན་པ་རྣམས་སྒྲུབ། དེ་རྗེས་ཞག་ལྔའི་རིང་བདེ་མཆོག་གི་དབང་ལུང་ཁྲིད། གཏོར་མ་མཆོད་པ་བཅས་སྒྲིག་གཤོམ་ཐོག །ཚེས་ཉེར་དགུ་ཉིན་མགོན་གསོལ་སྡང་བ་རྣམ་སྲེག་གི་ཆོ་ག་དང་། ཕྱག་དྲུག་འབྲིང་པོ་བཅས་ལེགས་པར་བཏང་ནས། བོད་ཟླ་དང་པོའི་ཚེས་གཅིག་ནས་ཤངས་པའི་བདེ་མཆོག་ལྔ་ལྔའི་བསྙེན་སྒྲུབ་ཀྱི་དབུ་གཟུང་། བསྙེན་པའི་གྲངས་ཚད་སྐོར། ཡབ་ཀྱི་སྙིང་པོ་ལ་འབུམ་བཞི། ཡང་སྙིང་འབྲུ་བདུན་མ་འབུམ་བདུན། ཡུམ་སྔགས་རྣམས་དང་ཁྲོ་བོ་བཞི་བཅས་ལ་ཁྲི་བཞི་རེ་དང༌། ཐུན་གཅིག་ལ་གཏུམ་མོ་དང་། འཕྲུལ་འཁོར་བཅས་བོད་ཟླ་བཞི་པའི་ཚེས་བརྒྱད་ལ་གྲུབ་པར་བྱ། ཚེས་དགུ་དང་ཚེས་བཅུ་གཉིས་ལ་སྒྲུབ་པའི་སྟ་གོན་བཅས། ཚེས་བཅུ་གཅིག་ནས་ཚེས་བཅོ་ལྔ་བར་བདེ་མཆོག་གི་སྒྲུབ་པ་བདག་འཇུག་བཅས་གྲུབ་པར་བྱ། ཚེས་བཅུ་དྲུག་དང་། བཅུ་བདུན། བཅོ་བརྒྱད་གསུམ་ལ་རྒྱུད་སྡེ་ལྔའི་དབང་ལུང་ཁྲིད་དང་གཏོར་མཆོད་བཅས་ལེགས་པར་གྲུབ། ཚེས་བཅུ་དགུ་ནས་དེའི་བསྙེན་སྒྲུབ་ཀྱི་དབུ་གཟུང་དགོས། བསྙེན་པའི་གྲངས་ཚད་སྐོར་གཙོ་བོ་ལ་འབུམ་བཞི། ཡུམ་སྔགས་འབུམ་བཞི། འཁོར་བཞི་ལ་འབུམ་བཞི་རེ་བཅས་དང་། ཐུན་གཅིག་ལ་སྒྱུ་ལུས་ཞག་ཉེར་བཞི། རྨི་ལམ་ཞག་ཉེར་བཞི། འོད་གསལ་ཞག་ཉེར་བཞི། འཕོ་བ་ཞག་ཉེར་བཞི། བར་དོ་ཞག་ཉེར་བཞི་བཅས་ཉམས་སུ་ལེན་དགོས། དེའི་ཚེ་འཕྲུལ་འཁོར་གྲུབ་ན་ལེགས། མ་གྲུབ་ན་ཡང་བཞག་ན་ཆོག །དེ་ནས་བོད་ཟླ་བརྒྱད་པའི་ཚེས་བཅུ་དགུ་བར་གྱི་ཟླ་བ་བཞིའི་རིང་བསྙེན་པའི་གྲངས་དང་ཉམས་ལེན་རྣམས་གྲུབ་པར་མཛད་དེ། ཚེས་ཉི་ཤུ་ཐམ་པ་དང་ཚེས་ཉེར་གཅིག་གཉིས་ལ་སྒྲུབ་པའི་སྟ་གོན་མཛད་དགོས། ཚེས་ཉེར་གཉིས་ནས་བཟུང་ཚེས་ཉེར་བདུན་བར་ཞག་ལྔའི་རིང་སྒྲུབ་པ་དང་། བདག་འཇུག །ཆོས་དྲུག་ལས་ཚན་པ་ལྔ་བཅས་ལེགས་པར་སྒྲུབ། ཚེས་ཉེར་བརྒྱད་དང་། ཚེས་ཉེར་དགུ། ཚེས་སུམ་ཅུ་ལ་མཁའ་སྤྱོད་དཀར་དམར་གྱི་དབང་ལུང་ཁྲིད་དང་། མཆོད་པ་གཏོར་མ་བཅས་བསྒྲུབས་ནས། བོད་ཟླ་དགུ་པའི་ཚེས་གཅིག་ནས་བཟུང་ཞག་བདུན་ལ་མཁའ་སྤྱོད་དཀར་མོའི་ཉམས་ལེན་དང༌། ཞག་བདུན་ཕྲག་གཅིག་ལ་མཁའ་སྤྱོད་དམར་མོའི་བསྙེན་སྒྲུབ་ལ་འབད་ཅིང་བསྙེན་པ་གང་འགྲུབ་དགོས། ཚེས་བཅོ་ལྔ་དང་བཅུ་དྲུག་གཉིས་ལ་མགོན་པོ་ཕྱག་དྲུག་པའི་གཏོར་སྒྲུབ་ཀྱི་གཏོར་མ་སོགས་སྟ་གོན་བྱ། ཚེས་བཅུ་བདུན་ནས་བཟུང་ཚེས་ཉེར་བཞིའི་སྔ་ཆར་གཙུག་ལག་ཁང་གི་སྟེང་དུ་གཏོར་སྟབས་བཅས་ལེགས་པར་འགྲུབ། ཚེས་ཉེར་ལྔ་ནས་བཟུང་ནི་གུའི་ཚེ་སྒྲུབ་ཞག་གསུམ་དང་སུ་ཁ་སིདྡྷིའི་ཚེ་སྒྲུབ་ཞག་གསུམ། བོད་ཟླ་བཅུ་པའི་ཚེས་གཅིག་ནས་ཚེས་ལྔ་བར་སྒྲོལ་དཀར་ཡིད་བཞིན་འཁོར་ལོའི་བསྙེན་སྒྲུབ་བཅས་མཐའ་རྟེན་ཚེ་སྒྲུབ་ཟབ་མོ་གསུམ་གྱིས་མཐའ་ལེགས་པར་བརྒྱན་ཏེ། ལོ་གཅིག་གི་བསྙེན་མཚམས་ཟབ་མོ་ལེགས་པར་གྲུབ་ཟིན་པའོ།
།ཉིན་རེ་བཞིན་ཉམས་ལེན་མཛད་ཚུལ་ལ། ཐུན་དང་པོ། ཐོ་རངས་ལྡང་བའི་རྣལ་འབྱོར་གྱིས་རླུང་རོ་བསལ། ངག་བྱིན་གྱིས་བརླབས། ཚིག་བདུན་གསོལ་འདེབས། སྒྲོལ་དཀར་བསྒོམ་ཟླས་ཁྱུག་ཙམ་མཐར། སོ་སོའི་ཉམས་ལེན་གྱི་དངོས་གཞི་ལ་འཇུག །དེ་རྗེས་གསང་ཐིག་རྡོར་སེམས་སྒོམ་བཟླས་ཁྱུག་ཙམ་དང་། དབང་ལེན་བཅས་གྲུབ་ནས་ཐོ་རངས་ཐུན་གྲོལ། རི་བོའི་བསང་མཆོད་དང་ཕྱག་དྲུག་བསང་མཆོད་བཅས་གཏོང་། ཆབ་གཏོར་རྒྱས་བསྡུས་གང་རུང་དང་སྡོམ་གསུམ་གསོ་སྦྱོང་བཅས་ལེགས་སྲུང་བྱ། ཐུན་གཉིས་པ། སོ་སོའི་ཉམས་ལེན་དངོས་གཞི་ལ་འཇུག །ཐུན་གྲོལ་རྗེས་དཀོན་མཆོག་རྗེས་དྲན་དང་། ཕུད་མཆོད། མཐར་མདོ་བསྔོ་བ་བཅས་གྲུབ་ནས་བར་བསམ་སྒྲོལ་གསུམ་འདོན། ཕྱི་ཐུན་གྱི་ཐོག་མར་གསང་ཐིག་ཡང་དག་གི་སྒོམ་བཟླས་ཁྱུག་ཙམ་བཏང་ནས་ཐུན་གྱི་དངོས་གཞི་ལ་འཇུག །ཐུན་གྲོལ་བ་ན་རྒྱུད་སྡེ་ལྔའི་བདག་བསྐྱེད་དང་ཕྱག་དྲུག་པའི་གཏོར་ཆོག་འབྲིང་པོ་དང་། བེར་ཅན་གྱི་གཏོར་བསྔོས་བསྡུས་པ། མཐར་ཤེར་སྙིང་ཟློག་པ། སེང་གདོང་སོགས་འདོན། མེ་བསུར་གཏོང་ཞིང་སྨོན་ལམ་རྣམ་ལྔ་ནས་ལེའུ་རེ་རེ་རེས་མོས་ཀྱིས་འདོན། དེ་རྗེས་དགོང་ཐུན་གྱི་དངོས་གཞི་ལ་འཇུག །མཐར་གསང་ཐིག་ཕུར་པའི་སྒོམ་བཟླས་དང་། གཏོར་འབུལ་དབང་ལེན་བཅས་གྲུབ་ནས་ཐུན་གྲོལ། ལུས་མཆོད་སྦྱིན་གྱི་ཉམས་ལེན་མཐར་བསྔོ་སྨོན་བཅས་གྲུབ་ན། ཉིན་གཅིག་གི་ཉམས་ལེན་རྣལ་འབྱོར་མཐར་ཕྱིན་པའོ།
།ཟླ་གཅིག་གི་དུས་མཆོད་སྐོར་ལ། ཚེས་བཅུ་ལ་མཁའ་སྤྱོད་དཀར་མོའི་ཚོགས་མཆོད། ཚེས་བཅོ་ལྔ་ལ་བདེ་མཆོག་ལྷ་ལྔའི་ཚོགས་མཆོད། ཚེས་ཉེར་ལྔ་ལ་མཁའ་སྤྱོད་དམར་མོའི་ཚོགས་མཆོད། ཚེས་ཉེར་དགུ་ལ་ཕྱག་དྲུག་གི་དགུ་གསོལ་རྒྱས་པ། ཚེས་སུམ་ཅུ་ལ་རྒྱུད་སྡེ་ལྔ་གཙོ་བསྡུས་ཀྱི་ཚོགས་མཆོད་བཅས་སྒྲུབ། ལོ་གཅིག་གི་དུས་མཆོད་ལ། བོད་ཟླ་དང་པོ། སངས་རྒྱས་ཀྱི་ཆོ་འཕྲུལ་སྟོན་པའི་དུས་ཆེན་གྱི་ཚེས་བཅུ་བཞིར་མི་ལ་རས་པའི་དུས་ཆེན་ནུབ་མོ་བཀའ་བརྒྱུད་མགུར་མཚོ་དང་རས་བུས། ཚེས་བཅོ་ལྔ་ཉིན་རྗེ་མར་པའི་དུས་ཆེན་ལ་མི་ལའི་བླ་སྒྲུབ་ཀྱི་ཚོགས་མཆོད། ཚེས་ཉེར་ལྔ་ལ་ཀརྨ་པ་བདུད་འདུལ་རྡོ་རྗེའི་དུས་ཆེན་ལ་བདུད་འདུལ་རྡོ་རྗེའི་གསོལ་འདེབས་དང་ཕྱག་ཆེན་སྨོན་ལམ། བོད་ཟླ་གཉིས་པའི་ཚེས་གཉིས་ལ་གཏེར་ཆེན་མཆོག་གླིང་དུས་ཆེན་ལ་གསང་ཐིག་རྡོར་སེམས་ཀྱི་ཚོགས་མཆོད། ཚེས་ཉེར་ལྔར་སི་ཏུ་ཆོས་འབྱུང་དུས་ཆེན་ལ་ཡང་དག་གི་ཚོགས་མཆོད། ཚེས་ཉེར་བརྒྱད་ལ་ཇོ་ནང་ཏཱ་ར་ནཱ་ཐའི་དུས་ཆེན་ལ་རྒྱུད་སྡེ་ལྔ་གཙོ་བསྡུས་ཀྱི་ཚོགས་མཆོད། བོད་ཟླ་བཞི་པའི་ཚེས་གསུམ་ལ་བསང་མཆོད་དགེ་ལེགས་སྤྲིན་ཕུང་། ཚེས་བཅུ་ལ་དཀོན་མཆོག་སྤྱི་འདུས་ཀྱི་ཚོགས་མཆོད། བོད་ཟླ་དྲུག་པའི་ཚེས་བཞི་ལ་དྭགས་པོ་ཟླ་འོད་གཞོན་ནུ་དང་རང་བྱུང་རྡོ་རྗེའི་དུས་ཆེན་ལ་རྒྱས་ན་བཀའ་བརྒྱུད་མགུར་མཚོ་དང་བསྡུས་ན་མི་ལའི་བླ་སྒྲུབ་ཀྱི་ཚོགས་མཆོད། བོད་ཟླ་དགུ་པའི་ཚེས་བཅུ་བཞི་ཁྱུང་པོའི་དུས་ཆེན་ལ་ཤངས་ལུགས་བླ་མཆོད་ཀྱི་ཚོགས་མཆོད། བོད་ཟླ་བཅུ་གཉིས་པའི་ཚེས་བཅོ་བརྒྱད་ལ་ཀུན་མཁྱེན་དྲི་མེད་འོད་ཟེར་གྱི་དུས་ཆེན་ལ་གསང་ཐིག་ཕུར་པའི་ཚོགས་མཆོད་བཅས་ལོ་གཅིག་གི་དུས་མཆོད་ལེགས་པར་གྲུབ་ཟིན་པའོ།
།དེ་ལྟར་ནི་གུའི་སྒྲུབ་སྡེ་འདི་ཉིད་ཀྱི་ལོ་གཅིག་གི་སྒྲུབ་པ་དང་། ཞག་གཅིག་གི་ཉམས་ལེན་གྱི་ཚུལ་དང་། ལོ་གཅིག་གི་དུས་མཆོད་ཁག །ཟླ་གཅིག་གི་དུས་མཆོད་བྱ་ཚུལ་རྣམས་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱི་ཙཱ་འདྲའི་དཀར་ཆག་ཞིང་ཁམས་ཀུན་ཁྱབ་ཀྱི་སྒྲ་སྙན་ཞེས་པ་གཞིར་བཟུང་བ་དང་། རྣལ་འབྱོར་པ་སྨྱུང་གནས་བླ་མ་ཨ་རྡོའི་གསུང་གིས་ཟུར་བརྒྱན་ཏེ་ཕྱི་རབས་སྒྲུབ་བརྩོན་རྣམས་ཉམས་ལེན་རྣལ་མ་ཞིག་ཡོང་ཕྱིར་བན་ཆེན་འབྲོང་པ་སྤྲུལ་སྐུ་ཀརྨ་བསྟན་འཛིན་འཕྲིན་ལས་རྣམ་རྒྱལ་གྱིས་སྤྱི་ལོ་1995ལོའི་ཟླ་བ9ཚེས10ཉིན་སུག་བྲིས་བགྱིས་པ་གཞིར་བཟུང་སྟེ་སྒྲུབ་སྡེ་གཞན་དང་ཅུང་མི་འདྲ་བས་རགས་ཙམ་བཀོད་པའོ།
II.6.3.8 Damkar Pelden Shangpé Serchö Ling
།བརྒྱད། འདམ་དཀར་བཙུན་མའི་སྒྲུབ་སྡེ་དཔལ་ལྡན་ཤངས་པའི་གསེར་ཆོས་གླིང་།
ད་ལྟའི་འདམ་དཀར་དགོན་ནི་ཕོ་དགོན་ལྷུན་གྲུབ་བདེ་ཆེན་ཆོས་འཁོར་གླིང་དང་། ཇོ་དགོན་བཀྲ་ཤིས་དགེ་དགོན་བཅས་དགོན་ཁག་གཉིས་ལས་གྲུབ་པ་ཞིག་ཡིན་ལ། དེང་མཚོ་སྔོན་ཞིང་ཆེན་སྐྱེ་རྒུ་ཁུལ་ཡུལ་ཤུལ་རྫོང་སྲིད་གཞུང་གནས་ཡུལ་གྱི་ཤར་ངོས་ནས་སྤྱི་ལེ10ཙམ་གྱི་ཤར་རླུང་སྡེ་པའི་ཁོངས་སུ་གནས། དུལ་མོ་སྐུ་ཕྲེང་དང་པོ་འབར་ཚ་སྟག་རྡེལ་གྱིས་སྤྱི་ལོའི་དུས་རབས་བཅུ་གཉིས་པའི་སྨད་ཙམ་དུ་འདམ་དཀར་ལྷུན་གྲུབ་བདེ་ཆེན་ཆོས་འཁོར་གླིང་ཕྱག་འདེབས་སྐབས་འདོད་འཇོའི་བྲག་ཅེས་པའི་ཕ་བོང་དེའི་རྩ་བར་ས་ཡི་ཞག་དང་འདྲ་བའི་འདམ་དཀར་པོ་འོ་མ་ཉིང་ཁུར་བྱས་པ་བཞིན་ཆགས་ཡོད་པས་འདམ་དཀར་ཞེས་ཐོགས། དུལ་མོ་སྐུ་ཕྲེང་བརྒྱད་པ་བཀྲ་ཤིས་འོད་ཟེར་གྱིས་གདན་ས་གོང་མ་འདམ་དཀར་དང་། འོག་མ་བདེ་དགུ་གཉིས་སུ་བསྟན་པ་རྒྱ་ཆེར་སྤེལ་བ་ནས་འབྲི་ཀླུང་གི་སྟོད་སྨད་བར་གསུམ་དུ་འགག་ལ་དགོན། རྩེ་རེ་དགོན་སོགས་འདམ་དཀར་དགོན་ལག་བཅོ་བརྒྱད་ཅེས་པ་བྱུང་། དེ་དག་གི་གྲས་སུ་སྤྱི་ལོ1507ལོར་འདམ་དཀར་བཀྲ་ཤིས་དགེ་དགོན་ཞེས་པའི་བཙུན་དགོན་ཞིག་ཕྱག་བཏབ་པ་ཐོར་ཞིག་ཏུ་སོང་ཡང་། སླར་དུལ་མོ་སྐུ་ཕྲེང་བཅོ་བརྒྱད་པ་ཀརྨ་བཤད་སྒྲུབ་འཕྲིན་ལས་བསྟན་འཛིན་གྱིས་བསྐྱར་བཞེངས་མཛད། ཁྱོན་བཙུན་མ་ཞལ་གྲངས་སུམ་བརྒྱ་བཞི་བཅུ་ཙམ་བཞུགས། འདམ་དཀར་དགོན་ནི་དུལ་མོ་ སྐུ་ཕྲེང་རིམ་བྱོན་ཏེ། སྐུ་ཕྲེང་དང་པོ་འབར་ཚ་སྟག་རྡེལ་བའམ་ཉི་མ་རས་ཆེན། གཉིས་པ་ཡེ་ཤེས་རང་བྱུང་རྡོ་རྗེའམ་རོང་དུལ་མོ་པཀྵི། གསུམ་པ་དུལ་མོ་ཀརྨ་བསྟན་སྐྱོང༌། བཞི་པ་དུལ་མོ་མཚུངས་མེད་བློ་གྲོས། ལྔ་པ་དུལ་མོ་མཚུངས་མེད་ཆོས་མགོན། དྲུག་པ་དུལ་མོ་ཀརྨ་རབ་འབྱམས། བདུན་པ་དུལ་མོ་གཟི་བརྗིད་ཉི་མ། བརྒྱད་པ་དུལ་མོ་བཀྲ་ཤིས་འོད་ཟེར། དགུ་པ་དུལ་མོ་ཆོས་རྗེ་བསྟན་པའི་ཉི་མ། བཅུ་པ་ཀརྨ་ལྷག་བསམ་དར་རྒྱས་ཕུན་ཚོགས། བཅུ་གཅིག་པ་ཡེ་ཤེས་རང་གྲོལ་ལམ་དུལ་མོ་བླ་མ་ཕྲིན་ལས་པ། བཅུ་གཉིས་པ་དུལ་མོ་ཐོག་བདུན་རྒྱ་མཚོ། བཅུ་གསུམ་པ་དུལ་མོ་བྱམས་པ་ཀུན་གཟིགས། བཅུ་བཞི་པ་དུལ་མོ་ཀརྨ་ཐབས་མཁས་མགོན་པོ། བཅོ་ལྔ་པ་དུལ་མོ་ཕྲིན་ལས་བསྟན་འཛིན་སྙིང་པོ། བཅུ་དྲུག་པ་དུལ་མོ་ཀརྨ་བསྟན་འཛིན་དར་རྒྱས། བཅུ་བདུན་པ་དུལ་མོ་ཕྲིན་ལས་བསྟན་འཛིན། ད་ལྟའི་དུལ་མོ་སྐུ་ཕྲེང་བཅོ་བརྒྱད་པ་ཀརྨ་བཤད་སྒྲུབ་ཕྲིན་ལས་བསྟན་འཛིན་བཅས་ཀྱིས་འཛིན་སྐྱོང་ལེགས་པར་མཛད།
།འདམ་དཀར་དགོན་དུ་ཤངས་པའི་བསྟན་པ་སྤེལ་བར་བཀའ་དྲིན་ཆེ་བ་དུལ་མོ་སྐུ་ཕྲེང་བཅོ་བརྒྱད་པ་ཀརྨ་བཤད་སྒྲུབ་ཕྲིན་ལས་བསྟན་འཛིན་གྱིས་ཀོང་སྤྲུལ་སྐུ་ཕྲེང་གསུམ་པ་ཀརྨ་བློ་གྲོས་ཆོས་ཀྱི་སེང་གེ་ལས་ཤངས་ལུགས་བདེ་མཆོག་བྱིན་རླབས་གཞུང་ཤིང་དང་། ནི་གུ་ཆོས་དྲུག །ཕྱག་ཆེན་གའུ་མ། ཡལ་ག་ལམ་ཁྱེར་རྣམ་གསུམ་སོགས་ཤངས་པའི་ཟབ་གསང་ཆོས་ཀྱི་དབང་ལུང་རྣམས་གསན། ལྷག་པར་འདམ་དཀར་བཀྲ་ཤིས་དགེ་དགོན་གྱི་ཤངས་ཆོས་དྲི་མེད་ཉམས་སུ་ལེན་པའི་སྒྲུབ་སྡེ་དཔལ་ལྡན་ཤངས་པའི་གསེར་ཆོས་གླིང་འདི་ཉིད་ཉེ་བའི་ཆར་གསར་དུ་བཞེངས། སྤྱི་ལོ་2012ལོའི་བོད་ཟླ10པའི་ཚེས14ཉིན་སྒྲུབ་ཐེངས་དང་པོའི་མཚམས་སྒོ་བསྡམས། སྒྲུབ་ཐེངས་འདིའི་སྒྲུབ་དཔོན་ཡར་རྒྱས་དང་། སྒྲུབ་བླ་ཉི་ཤུ་སྐོར་ཡོད།
སྔར་གྱི་ཤངས་པའི་ལོ་རྒྱུས་ཐོག་གསེར་ཆོས་ལྔ་ལ་སོགས་པའི་གདམས་པ་རྣམས་ཉམས་སུ་བཞེས་མཁན་ཕལ་མོ་ཆེ་གྲྭ་པ་ཤ་སྟག་ཡིན་ཀྱང༌། ཆོས་རྗེ་སངས་རྒྱས་སྟོན་པའི་རྣམ་ཐར་བཀའ་རྒྱ་མར་དབོན་སྟོན་སྐྱེར་སྒང་པས་སངས་རྒྱས་སྟོན་པར་སློབ་མ་གཙོ་བོ་ཕོ་བརྒྱད་མོ་གཉིས་ཏེ་བཅུ་འབྱུང་བར་ལུང་བསྟན་པ་དང་། ཡང་མཉམ་མེད་སངས་རྒྱས་དཔལ་བཟང་གིས་ལྐུགས་ལུང་དགོན་ཞིག་གསོ་མཛད་རྗེས་ཕོ་གླིང་དང་མོ་གླིང་སོ་སོར་ཕྱེ་བ་སོགས་ཀྱི་ལོ་རྒྱུས་གནད་དོན་དེ་དག་གིས་བུད་མེད་ཀྱིས་ཤངས་པའི་གདམས་ངག་ཉམས་སུ་ལེན་སྲོལ་ཡོད་པ་མཚོན། འོན་ཀྱང་ད་ལྟའི་ཆར་རྒྱལ་ནང་དུ་བཙུན་མས་ཤངས་ཆོས་ཉམས་སུ་བཞེས་པ་ཧ་ལམ་སྒྲུབ་སྡེ་འདི་ཙམ་མོ།
II.6.3.9 Takpel Dechen Chödzong Dargyé Ling
།དགུ། རྟགས་འཕེལ་སྒྲུབ་སྡེ་བདེ་ཆེན་ཆོས་རྫོང་དར་རྒྱས་གླིང་།
རྟགས་འཕེལ་བསམ་གཏན་ཆོས་འཁོར་གླིང་ནི་སྙིང་རྗེ་གེ་སར་རྒྱལ་པོའི་འཁྲུངས་ཡུལ་ཨ་ཕྱུག་གི་བྱང་ཤར་མཚམས་ཀྱི་སྤྱི་ལེ65ཙམ་ཡོད་པའི་ས། དེང་དཀར་མཛེས་ཁུལ་སྡེ་དགེ་རྫོང་དབེན་ཐོག་ཡུལ་ཤོག་ཨ་གཤིས་དང་རྟགས་འཕེལ་གྲོང་ཚོའི་ཁོངས། ཆུ་བོ་བཞིའི་ནང་ཚན་ཟླ་ཀླུང་སྔོན་པོ་དལ་གྱིས་འབབས་པའི་ཉེ་འགྲམ། ཡུལ་ལྷ་གཡའ་སྔོན་གྱི་མདུན་ངོས་སུ་གནས། ཐོག་མར་རྒྱལ་སྲས་ཕུན་ཚོགས་རྣམ་རྒྱལ་གྱི་ཐུགས་སྲས་ཨ་རྒྱས་སྐུ་སྐྱེའམ་བློ་སྤྲུལ་སྐུ་ཕྲེང་དང་པོ་ས་འདིར་ཕེབས་ནས་ཁྲི་སྟེང་ཕུག་ཏུ་ལོ་གཅིག་ཙམ་སྒྲུབ་པར་ཞུགས་པ་དང༌། དེ་རྗེས་མཛད་འཕྲིན་གྱི་དབྱར་མཚོ་རིམ་བཞིན་རྒྱས་ཏེ་དགོན་གནས་འདི་ཉིད་ཕྱག་བཏབ། དེ་ནས་སྐུ་སྐྱེ་སྐུ་ཕྲེང་གཉིས་པ་ཀརྨ་ངེས་ལེགས་བསྟན་འཛིན། སྐུ་ཕྲེང་གསུམ་པ་ངེས་དོན་བསྟན་འཛིན་འཕྲིན་ལས། སྐུ་ཕྲེང་བཞི་པ་དཔལ་གྲུབ་ཆེན་བཀའ་བརྒྱུད་བསྟན་འཛིན། སྐུ་ཕྲེང་ལྔ་པ་མཁྱེན་རབ་དཔལ་འབྱོར། སྐུ་ཕྲེང་དྲུག་པ་ཀརྨ་སྒྲུབ་བརྒྱུད་ངེས་དོན་བསྟན་འཛིན། ད་ལྟ་སྐུ་འཚོ་བཞུགས་སྐུ་ཕྲེང་བདུན་པ་ཀརྨ་འཕྲིན་ལས་འགྱུར་མེད་བཅས་ཀྱིས་གདན་ས་རིམ་པར་བསྐྱངས།
དགོན་གནས་འདིར་ཐོག་མར་དཔལ་ལྡན་ཤངས་པའི་བསྟན་པ་དར་བ་ནི་སྐུ་སྐྱེ་སྐུ་ཕྲེང་བཞི་པ་གྲུབ་ཆེན་བཀའ་བརྒྱུད་བསྟན་འཛིན་ཁོ་ནའི་བཀའ་དྲིན་དུ་འཁུམས་པས། གང་དེའི་མཛད་རྣམ་ཅུང་ཙམ་བརྗོད་པ་ལ། ཁོང་ནི་བོད་རབ་བྱུང་བཅུ་གསུམ་པའི་ཤིང་རྟ་སྤྱི་ལོ1774ལོར་རྫོགས་ཆེན་མི་འགྱུར་རྡོ་རྗེའི་འཁྲུངས་ཡུལ་དང་ཉེ་བར་འདན་ར་ཧོར་དཔོན་ཚང་དུ་སྐུ་འཁྲུངས། རྒྱལ་དབང་ཀརྨ་པ་བྱང་ཆུབ་རྡོ་རྗེས་སྐུ་གོང་མའི་ཡང་སྲིད་དུ་ངོས་འཛིན་གནང་ནས་མཚན་བཀའ་བརྒྱུད་བསྟན་འཛིན་ཞེས་གསོལ། འཕགས་ཡུལ་དུ་ཕེབས་ཏེ་ཤངས་པའི་ཆོས་སྐོར་ཉམས་བཞེས་ལོ་མང་མཛད་ཅིང་། ཡེ་ཤེས་ཀྱི་ཊཱ་ཀི་ནི་གུ་མས་རྗེས་སུ་བཟུང་སྟེ་ཟབ་ཆོས་འགའི་བཀའ་ཡང་བབས། ཁོང་གིས་ཤངས་ལུགས་མཁའ་འགྲོའི་ཉེ་བརྒྱུད་ཀྱི་གདམས་ངག་འདི་རྣམས་འབྱོར་རྒྱས་ཀརྨ་ལྷག་མཐོང་དང་། རི་འགུལ་ཀརྨ་ནོར་བུ་གཉིས་ཀྱིས་གཙོས་པའི་སྐལ་ལྡན་གྱི་གདུལ་བྱ་རྣམས་ལ་བསྩལ། དུས་དེ་ནས་བཟུང་སྐུ་སྐྱེ་སྐུ་ཕྲེང་རྣམས་ཀྱིས་ཤངས་ཆོས་ཀྱི་གདམས་ངག་ཟབ་ལམ་ཀུན་ལ་ཐུགས་བཞེས་ཆེ་བར་མཛད་ཅིང་། རྟགས་འཕེལ་དགོན་གྱིས་གཙོས་ཚབ་ཚ་དགོན་དང་། བན་རྒན་དགོན། རི་བྲག་དགོན། དགོན་གསར་དགོན་སོགས་ཀྱི་བླ་གྲྭ་དུ་མར་ཤངས་པའི་ཆོས་སྐོར་རྒྱ་ཆེར་སྤེལ་བར་མཛད།
ད་ལྟའི་རྟགས་འཕེལ་དགོན་གྱི་ཤངས་པའི་སྒྲུབ་སྡེ་བདེ་ཆེན་ཆོས་རྫོང་དར་རྒྱས་གླིང་འདི་ཉིད་ནི། སྐུ་སྐྱེ་སྐུ་ཕྲེང་བདུན་པ་ཀརྨ་འཕྲིན་ལས་འགྱུར་མེད་དམ་དཔལ་བརྒྱ་སྤྲུལ་སྐུས་སྤྱི་ལོ་2001ལོར་གསར་དུ་བཞེངས། ལྷ་ཁང་གཙོ་བོ་གཅིག་ལས་གྲུབ་པའི་གཡས་སུ་གྲྭ་ཤག་དྲུག །གཡོན་དུ་དྲུག །འབེད་ཁང་དང་སྤྱི་ཁང་བཅས་ཁྱོན་བསྡོམས་ཁང་མིག་བཅོ་ལྔ་ཡོད། ནང་རྟེན་གཙོ་བོ་རྒྱལ་བ་རྡོ་རྗེ་འཆང་སོགས་ལི་སྐུ་བཅུ་ཕྲག་དང་། ལོགས་བྲིས་སུ་མར་མི་དྭགས་གསུམ་དང༌། མཁས་གྲུབ་ཁྱུང་པོ་སོགས་བཞུགས། སྤྱི་ལོ་2002ལོའི་སྟོན་པ་ལྷ་ལས་བབས་པའི་དུས་ཚེས་དང་བསྟུན་བསྙེན་སྒྲུབ་ཀྱི་དབུ་ཐོག་མར་ཚུགས་པ་ནས། སྒྲུབ་ཐེངས་རེར་ལོ་གསུམ་ཕྱོགས་གསུམ་རེ་བྱས་པའི་ད་བར་སྒྲུབ་ཐེངས་གསུམ་ལ་སླེབས་ཡོད་ཅིང་། སྒྲུབ་ཐེངས་གསུམ་པོ་འདིའི་སྒྲུབ་དཔོན་ཕུན་ཚོགས་རྣམ་རྒྱལ་ཡིན། སྒྲུབ་ཐེངས་དང་པོར་སྒྲུབ་བླ་བདུན་ཡོད་པ་ལས། དཔལ་སྤུངས་དགོན་ནས་གཅིག་དང་། རྟགས་འཕེལ་དགོན་རང་ནས་དྲུག །སྒྲུབ་ཐེངས་གཉིས་པར་སྒྲུབ་བླ་བརྒྱད་ཡོད་པ་ཚང་མ་རྟགས་འཕེལ་དགོན་རང་ནས་ཡིན། སྒྲུབ་ཐེངས་གསུམ་པ་འདིར་སྒྲུབ་བླ་བརྒྱད་ཡོད་པའི་ཆ་སྙོམས་དགུང་གྲངས19ཡིན། སྒྲུབ་སྡེ་འདིའི་སྒྲུབ་དཔོན་ནི་ཚབ་ཚའི་ནི་གུའི་སྒྲུབ་སྡེ་ལས་མཐར་ཕྱིན་པ་ཡིན་པས་ཤངས་ཆོས་ཉམས་སུ་ལེན་ཚུལ་དང་། དུས་ཡུན་རྣམས་སྤྱིར་ཚབ་ཚའི་ནི་གུའི་སྒྲུབ་སྡེ་དང་མཚུངས་པར། ལོ་གསུམ་ཟླ་དྲུག་རིང་གི་བསྙེན་སྒྲུབ་སྐོར་ལ། དང་ཐོག་འབུམ་དགུ་ནས་བཟུང་ཡི་དམ་སྐོར་དང་དེའི་ཡན་ལག་རྣམས་སོང་ཟིན་ནས། ཤངས་པའི་གསེར་ཆོས་ལྔ་རྣམས་གཞིར་བྱས། བྱིན་རླབས་སྒོ་འབྱེད་ཀྱི་བཀའ་གཉིས། བྱིན་རླབས་གཞུང་ཤིང་གི་བཀའ་དྲུག །གཞུང་བཀའ་ཕྱི་མ་རྣམས་ཀྱི་བྱིན་རླབས། ཉེ་བརྒྱུད་ཐང་རྒྱལ་ལུགས་ཀྱི་ཁྲིད་ཆ་ཚང་། རིང་བརྒྱུད་རྗེ་བཙུན་ཏཱ་ར་ནཱ་ཐས་མཛད་པའི་ཁྲིད། སུ་ཁ་སིདྡྷི་དང་ལྷ་བཞི་དྲིལ་སྒྲུབ་སྐོར། ཤངས་ལུགས་བླ་མ་མཆོད་ཆོག །མཁའ་འགྲོ་སྡེ་ལྔ་དང་མྱུར་མཛད་ཡེ་ཤེས་མགོན་པོའི་རྗེས་གནང་། མགོན་པོའི་བཀའ་ཆེན་བཅུ་གསུམ། སྙིང་ཞུགས་དང་ཀྵེ་ཏྲ་པ་ལ་བཅས་སོ། གདམས་ངག་བྱེ་བྲག་ཉམས་སུ་ལེན་པའི་དུས་ཡུན་ནི། ཚིག་བདུན་གསོལ་འདེབས་ཟླ་བ་གཅིག །སྔོན་འགྲོ་བློ་ལྡོག་རྣམ་བཞི་ཉིན་བཅུ་གཉིས། ཕྱག་དང་སྐྱབས་འགྲོ་ཟླ་བ་གཅིག་དང་ཉིན་བཅུ། ཡིག་བརྒྱ་ཟླ་བ་གཅིག་དང་ཉིན་བཅུ། མཎྜལ་ཉིན་གཉིས། ཀར་མཁྱེན་ཉིན་བཅུ། བླ་མའི་རྣལ་འབྱོར་ཟླ་བ་གཅིག་དང་ཉིན་བཅུ། ཡི་དམ་ཕག་མོ་བསྙེན་པར་ཉིན་བཅུ། བསྡོམས་པའི་སྔོན་འགྲོ་འབུམ་དགུ་འགྲོ་དགོས། དེ་རྗེས་ཤངས་ལུགས་བདེ་མཆོག་ཟླ་བ་བཞི། སྒྲུབ་པ་ཉིན་བདུན། སྦྱིན་སྲེག་ཉིན་ལྔ། རྒྱུད་སྡེ་ལྷ་ལྔ་སྦྱིན་སྲེག་དང་བཅས་པ་ཟླ་བ་ལྔ། ཟབ་ལམ་ནི་གུ་ཆོས་དྲུག་ལ། བློ་ལྡོག་རྣམ་བཞི་ཉིན་བཞི། སྐྱབས་འགྲོ་ཉིན་བཞི། སེམས་བསྐྱེད་ཉིན་བཞི། མཎྜལ་ཉིན་གསུམ། དག་བྱེད་སྟོང་ར་ཉིན་བདུན། ཕག་མོ་སྟོང་ར་ཉིན་བདུན། གཏུམ་མོ་མེ་རྒོད་ཉིན་ཉེར་གཅིག །རྩ་རླུང་འཕྲུལ་འཁོར་དངོས་གཞི་ཟས་ཟ་ཟླ་བ་གཅིག་དང་ཉིན་དགུ། གོས་གྱོན་གདན་བཏིང་གཉིས་ལ་ཉིན་བདུན། སྟ་གོན་ཉིན་བདུན། བླ་མའི་གཏུམ་མོ་ཉིན་བདུན། སྒྱུ་ལུས་དབང་པོ་རབ་ཉིན་གསུམ། དབང་པོ་འབྲིང་ཉིན་བཞི། དབང་པོ་ཐ་མ་ཉིན་བཅུ་བཞི། རྨི་ལམ་གཟུང་བ་ཉིན་དགུ། སྦྱོང་བ་ཉིན་གསུམ། སྤེལ་བ་དང་སྤྲུལ་བ་གཉིས་ཉིན་གསུམ། བསྒྱུར་བ་ཉིན་གསུམ། ཡུལ་སྣང་ལྟ་བ་ཉིན་གསུམ། འོད་གསལ་ཉིན་ཉེར་གཅིག །ཡི་དམ་འཕོ་བ་ཉིན་གཉིས། བླ་མའི་འཕོ་བ་ཉིན་གཉིས། ཡེ་ཤེས་སྐར་ཁུང་མ་ཉིན་གསུམ། བར་དོ་ཉིན་བདུན་བཅས་སོ། །གྲོལ་ལམ་ཕྱག་ཆེན་ཟླ་བ་གཅིག །ལམ་ཁྱེར་རྣམ་གསུམ་རེ་རེར་ཉིན་བདུན་རེ་བྱས་པའི་ཉིན་ཉེར་གཅིག །མཁའ་སྤྱོད་དཀར་མོ་ཉིན་བདུན། དམར་མོ་ཉིན་བདུན། དཀར་མོའི་འཕོ་བ་ཉིན་བརྒྱད། དམར་མོའི་འཕོ་བ་ཉིན་བརྒྱད། སེམས་འཆི་མེད་ཉིན་བདུན། བླ་མགོན་དབྱེར་མེད་ཉིན་བདུན། མགོན་པོ་ཕྱག་དྲུག་པ་ཟླ་བ་གཅིག་བཅས། ལོ་གཉིས་དང་ཟླ་བ་དྲུག་ལ་དེ་རྣམས་མཐར་ཆགས་སུ་འགྲོ་དགོས། ལོ་གསུམ་པའི་འགོ་ནས་བཟུང་། ཟབ་ལམ་སུ་ཁ་ཆོས་དྲུག་ཟླ་བ་གཅིག །ནི་གུའི་ཚེ་སྒྲུབ་ཉིན་བདུན། སུ་ཁའི་ཚེ་སྒྲུབ་ཉིན་བདུན། ཞི་ཁྲོ་ཟླ་བ་གཉིས། སྦྱིན་སྲེག་སོགས་ཟླ་བ་གཅིག །གཅོད་དང་ཚོགས་བརྒྱ་ཟླ་བ་གཅིག །ཕུར་པ་ཟླ་བ་བཞི། སྒྲུབ་པ་ཉིན་བདུན། སྦྱིན་སྲེག་ཉིན་ལྔ། མགོན་པོ་བེར་ནག་སྦྱིན་སྲེག་དང་བཅས་པ་ཟླ་བ་གཉིས། སྒྲོལ་དཀར་ཉིན་བཞི། ལོ་མཇུག་ཏུ་སྦྱིན་སྲེག་ཉིན་བཅུ་གཉིས། ཤངས་ཆོས་མགུར་མཚོ་སྟོན་ཟླ་ཆུང་ངུའི་ཚེས་བཅུ་བཞི་ཉིན། བཀའ་བརྒྱུད་མགུར་མཚོ་བོད་ཟླ་དང་པོའི་ཚེས་བཅུ་བཞི་ཉིན་ཡིན་པ་བཅས་བསྙེན་སྒྲུབ་ལས་གསུམ་གྱི་རིམ་པ་གྲུབ་པའོ།
II.6.3.10 Rabjor Trashi Chödzong Ling
།བཅུ། རབ་འབྱོར་སྒྲུབ་སྡེ་བཀྲ་ཤིས་ཆོས་རྫོང་གླིང་།
རབ་འབྱོར་དགོན་གནས་མདོ་བཤད་སྒྲུབ་དར་རྒྱས་གླིང་ནི་སྨད་མདོ་ཁམས་སྒང་དྲུག་གི་ཡ་གྱལ་དངུལ་ཟླ་ཟལ་མོ་སྒང་གི་ཆར་གཏོགས། དེང་སྐྱེ་རྒུ་ཁུལ་ནང་ཆེན་རྫོང་འབྲོག་ཤོག་ཡུལ་ཤོག་སྲིད་གཞུང་གནས་ཡུལ་གྱི་ནུབ་བྱང་མཚམས་ཀྱི་སྤྱི་ལེ2ཙམ་གྱི་ས་ལྕེ་ཤིས་རུ་ཆེན་ཁོངས་སུ་གནས། ཐོག་མར་ཀརྨ་བདེ་ཆེན་སྙིང་པོའི་ཐུགས་སྲས་ཀརྨ་རབ་འབྱོར་གྱིས་རབ་བྱུང་བཅུ་གསུམ་པའི་སྨད་དང་བཅུ་བཞི་པའི་སྟོད་ཙམ་དུ་ཕྱག་བཏབ་ཅིང་། བཀའ་རྙིང་ཆུ་བོ་གཅིག་ཏུ་འདྲེས་པའི་གནས་མདོ་བཀའ་བརྒྱུད་ཀྱི་རིང་ལུགས་འཛིན། བླ་མའི་མཚན་དགོན་ལ་ཐོགས་པས་རབ་འབྱོར་ཞེས་བརྗོད། རབ་འབྱོར་སྐུ་ཕྲེང་ན་རིམ་གྱིས་གཙོ་བོ་མཛད་ནས་དགོན་གནས་བསྐྱངས།
དགོན་གནས་འདི་རིག་གསར་སྐབས་རྩ་གཏོར་དུ་སོང་བ་སྤྱི་ལོ་1985ལོར་ཉམས་གསོ་མཛད། དེང་དགེ་འདུན་ཞལ་གྲངས་བདུན་ཅུ་ཙམ་བཞུགས། ཉེ་ཆར་གྱི་དཔྱད་ཡིག་འགར་དགོན་འདི་ཐོག་མར་ཤངས་པ་བཀའ་བརྒྱུད་ཡིན་ཞེས་བརྗོད་ཀྱང་ཁུངས་བཙན་གྱི་དཔྱད་གཞི་མ་རྙེད་པས་དཔྱད་པར་འཚལ། དགོན་འདིའི་ཤངས་པའི་སྒྲུབ་སྡེ་བཀྲ་ཤིས་ཆོས་རྫོང་གླིང་ནི། ཀོང་སྤྲུལ་ཡོན་ཏན་རྒྱ་མཚོའི་དངོས་སློབ་ཀརྨ་རབ་སྒྲུབ་སྦྱིན་པས་རབ་འབྱོར་སྐུ་ཕྲེང་གསུམ་པའི་སྐུ་ཚེའི་སྟོད་ཙམ་དུ་ཀོང་སྤྲུལ་གྱི་བཀའ་ལྟར་འདུ་ཁང་ཀ་བ་བཞི་ཅན་དང་། འབེད་ཁང་། གྲྭ་ཤག །ཇ་ཁང་། མཛོད་ཁང་། ནང་རྟེན་དང་བཅས་པ་གསར་དུ་བཞེངས། དེ་རྗེས་དཔལ་ལྡན་ཤངས་པའི་ནི་གུ་ཆོས་དྲུག་ལ་སོགས་པའི་ཟབ་ཆོས་དུ་མ་ཉམས་སུ་བཞེས་པའི་རྒྱུན་ཡང་བཙུགས། སྒྲུབ་ཐེངས་རེར་དུས་ཡུན་ལོ་གསུམ་ཕྱོགས་གསུམ་དང་། སྒྲུབ་བླ་བདུན་ཡན་ཆད་གཏན་འཁེལ་མཛད། སྒྲུབ་སྡེ་འདི་ལས་རྩ་རླུང་ལ་རང་དབང་ཐོབ་པའི་གཙང་སེང་དང་། མངོན་ཤེས་ལ་ཐོགས་པ་མེད་པའི་ལྷ་གདུང་རྟོགས་ལྡན་སོགས་གྲུབ་པའི་ཡོན་ཏན་གྱིས་ལྕི་བའི་སྒྲུབ་བླ་དུ་མ་བྱུང་། ད་ལྟ་སྒྲུབ་ཁང་རྒྱ་བསྐྱེད་མཛད་བཞིན་པའོ།
།དེ་ལྟར་རང་རྒྱལ་གྱི་ད་ཡོད་ཤངས་པ་བཀའ་བརྒྱུད་ཀྱི་སྒྲུབ་སྡེ་བཅུ་པོ་འདི་དག་ཏུ་སྒྲུབ་ལ་བརྩོན་པའི་སྤོང་བ་པ་རྣམས་ཀྱིས་སྔ་བར་ཕྱི་གསུམ་དུ་སྒྲུབ་པའི་དམ་ཚིག་ཉི་ཤུ་ དང་ལྡན་པའི་སྒོ་ནས་ཤངས་པའི་གསེར་ཆོས་ལྔ་སོགས་ཀྱི་ཟབ་ཆོས་རྣམས་གདམས་དོན་ཇི་བཞིན་ཉམས་ལེན་གྱི་གནད་དུ་བཟུང་བས་ཚད་དང་ལྡན་པའི་ཤངས་པའི་བརྒྱུད་འཛིན་གྱི་དཔུང་ཁག་སྟོབས་ཆེར་གཏོང་བཞིན་པ་འདི་ནི། དེང་ཕྱིའི་རྒྱལ་ཁབ་འགའ་དང་ནང་སའི་ཉམས་ལེན་པ་རེ་ཟུང་གི་ལྟ་སྤྱོད་ལས་ཆེས་ཁྱད་པར་དུ་འཕགས་པས་ངེད་རྣམས་ཀུན་གྱིས་གོང་དུ་བཀུར་འོས་པ་ཡིན།

II.6.4 -
བཞི་པ། ཤངས་ཆོས་དང་འབྲེལ་བའི་ཁམས་ཁུལ་དགོན་སྡེ་གཞན་འགའ་ཞིག
མདོ་ཁམས་ཁུལ་དུ་ཤངས་ཆོས་ལོགས་སུ་ཉམས་ལེན་གནང་སའི་ད་ཡོད་ཀྱི་དགོན་གནས་དང་སྒྲུབ་སྡེ་དེ་དག་ཕུད། གཞན་ཡང་ལོ་རྒྱུས་ཀྱི་དལ་འབབ་རིང་མོའི་ཁྲོད་ཤངས་པའི་ཆོས་སྐོར་ཅི་རིགས་ཉམས་སུ་བཞེས་མྱོང་བ་དང་། ཉམས་ལེན་གནང་བཞིན་པའི་དགོན་གནས་དང་སྒྲུབ་སྡེ་གཙོ་ཆེ་བ་འགའ་ཞིག་ཡོད་པ་སྟེ།
II.6.4.1 Dzamthang
གཅིག འཛམ་ཐང་དགོན་དགོན་ལག་དང་བཅས་པའི་སྐོར།
མདོ་ཁམས་སྒང་དྲུག་གི་ཡ་གྱལ་རྡོ་རོལ་གྱི་ཆར་གཏོགས་པའི་ཤར་འཛམ་ཐང་གི་གནས་འདིར་ཐོག་མར་སྤྱི་ལོ1146ལོར་བཏབ་པའི་བོན་དགོན་ཞིག་ཡོད་པ་ལ། རབ་བྱུང་བདུན་པའི་ཤིང་སྦྲུལ་སྤྱི་ལོ1425ལོར་རིགས་ལྡན་དྲག་པོའི་རྣམ་སྤྲུལ་དྲུང་དཀའ་བཞི་པ་རིན་ཆེན་དཔལ་གྱིས་དཔལ་ཇོ་ནང་པའི་རིང་ལུགས་སུ་བསྒྱུར་རྗེས་ཤར་འཛམ་ཐང་བསམ་གྲུབ་ནོར་བུའི་གླིང་ཞེས་པའི་མཚན་ཐོགས་ཤིང་། དུས་དེ་ནས་བཟུང་གཙོ་ཆེར་དཔལ་དུས་ཀྱི་འཁོར་ལོ་སྦྱོར་བ་ཡན་ལག་དྲུག་གིས་གཙོས་པའི་ངེས་གསང་ཟབ་མོའི་སྒྲུབ་བརྒྱུད་ཀྱི་ལུགས་བཟང་འཛིན་པར་མཛད། འཛམ་ཐང་ཆོས་སྡེ་འདི་ནི་ཆོས་རྗེ་སྒར་དང་། གཙང་པ་སྒར། ཚེས་བཅུ་སྒར་བཅས་སྒར་ཁག་གསུམ་མམ་དགོན་ཁག་གསུམ་འབྲེལ་ཆགས་སུ་གནས་ཡོད་པ་ལས་གྲུབ་པ་ཞིག་ཡིན་ཞིང་། དེ་དག་ལས་དང་པོ་ཆོས་རྗེ་སྒར་ནི། དྲུང་དཀའ་བཞི་པ་རིན་ཆེན་དཔལ་གྱིས་ཐོག་མར་ཕྱག་བཏབ་པ་དེ་ཉིད་ཡིན་ལ། དགོན་ལག་གལ་ཆེན་འགའ་ཞིག་འབར་ཁམས་རྫོང་ཁོངས་སུ་གནས་ཡོད། དྲུང་དཀའ་བཞི་པའི་རྗེས་སུ་མཁན་ཆེན་དཀོན་མཆོག་རྒྱལ་མཚན། ཚེས་བཅུ་རཏ་ཀིརྟི། ཨཆེ་ཉི་མ་འོད་ཟེར། ཆོས་རྗེ་གཞོན་ནུ་རྒྱལ་མཚན། རྒྱལ་བ་བཟང་སོགས་རིམ་པར་བྱོན་པས་གདན་ས་བསྐྱངས་ཏེ་འདུས་སྡེ་སྟོང་ཕྲག་ཙམ་འཚོགས་པར་གྲགས། དེང་དགེ་འདུན་ཞལ་གྲངས་སུམ་བརྒྱ་ལྷག་ཙམ་བཞུགས་ལ། དགོན་བདག་བླ་མ་ནི་དབོན་པོ་འཇིགས་མེད་རྣམ་རྒྱལ་ཡིན། གཉིས་པ་འཛམ་ཐང་གཙང་པ་སྒར་ནི་ཇོ་ནང་ཏཱ་ར་ནཱ་ཐའི་ཐུགས་སྲས་ངག་དབང་འཕྲིན་ལས་ཀྱི་ཚ་བོ་ངག་དབང་བསྟན་འཛིན་རྣམ་རྒྱལ་གྱིས་སྤྱི་ལོའི་དུས་རབས་བཅོ་བརྒྱད་པའི་དུས་འགོར་བཏབ། ཐོག་མར་ཆོས་སྲིད་བདག་གཉེར་ཁང་གཙང་ཆེན་གོང་མའི་ཕོ་བྲང་བཙུགས་ཡོད་ལ། ཕྱིས་གཙང་པ་སྤྲུལ་སྐུ་གོང་སྨད་གཉིས་སུ་ཕྱེ་བ་སྟེ། གཙང་པ་གོང་མའི་གཙོ་ཁང་ལ་གཙང་པ་གཟིམ་ཁང་ཕོ་བྲང་དང་། གཙང་པ་སྨད་པ་ལ་གཙང་པ་འགབ་མ་ཡག་མདོའི་སྒར་དུ་གྲགས། སྒར་ཁག་འདིར་ཚོགས་ཆེན་འདུ་ཁང་དང་། ཆོས་གྲྭ། སྒྲུབ་གྲྭ། གྲྭ་ཤག་སོགས་མང་བས་གཞི་རྒྱ་ཆེ། དགོན་ལག་གཙོ་བོ་འཛམ་ཐང་དང་། རྔ་བ། མཚོ་སྔོན་མགོ་ལོག་ཁུལ་གྱི་གཅིག་སྒྲིལ་རྫོང་ཁོངས་སོགས་སུ་གནས། དེང་དགེ་འདུན་ཞལ་གྲངས་སྟོང་ལ་ཉེ་བ་བཞུགས། གསུམ་པ་ཚེས་བཅུ་སྒར་ནི། དཀའ་བཞི་པ་རིན་ཆེན་དཔལ་གྱི་ཐུགས་སྲས་རཏ་ཀིརྟིས་སྤྱི་ལོ1436ནས1449ལོའི་བར་དུ་བཞེངས་པར་གྲགས། སྐབས་དེར་ཁོང་གིས་ཇོ་ནང་དཔལ་གྱི་སྐུ་འབུམ་མཐོང་གྲོལ་ཆེན་མོར་དཔེ་བལྟས་ནས་ཚེས་བཅུའི་བཀྲ་ཤིས་སྒོ་མང་མཆོད་རྟེན་ཡང་བཞེངས། ཕྱིས་ཚེས་བཅུ་གོང་སྨད་གཉིས་སུ་ཕྱེ་བ་སྟེ། ཚེས་བཅུ་གོང་ནི་ཚེས་བཅུ་རཏ་ཀིརྟི་དང་། ཚེས་བཅུ་སྨད་ནི་དྲུང་དཀའ་བཞི་པའི་ཐུགས་སྲས་ཨརྒ་ཉི་མ་འོད་ཟེར་ནས་སྤྲུལ་སྐུ་རིམ་པར་བྱོན་པ་ཡིན། ད་ལྟའི་བར་ཚེས་བཅུ་གོང་ལ་སྤྲུལ་སྐུ་བརྒྱད་དང་སྨད་ལ་ལྔ་བྱོན། སྒར་ཁག་འདིར་ཆོས་གྲྭ་དང་སྒྲུབ་གྲྭ་གཉིས་ཡོད་པ་ལས། ཆོས་གྲྭར་འབའ་མདའ་བའི་གསུང་འབུམ་འཆད་ཉན་བྱེད་པ་དང་། སྒྲུབ་གྲྭར་རྡོར་སེམས་ཀྱི་ཡིག་བརྒྱ་པའི་སྔགས་ཟློ་བ་གཙོ་བོར་འཛིན་གྱི་ཡོད། ད་ལྟ་དགེ་འདུན་ཞལ་གྲངས་བརྒྱ་ལྷག་བཞུགས་པ་དང༌། དགོན་བདག་བླ་མ་ངག་དབང་བསོད་ནམས་བཟང་པོ་ཡིན།
འཛམ་ཐང་ཆོས་སྡེའི་སྒར་ཁག་འདི་རྣམས་སུ་སྤྱིར་དཔལ་ཇོ་ནང་པའི་ཆོས་བརྒྱུད་གཙོ་བོར་འཛིན་ཡང་། ཇོ་ནང་ཏཱ་ར་ནཱ་ཐ་སོགས་ཀྱིས་ཤངས་ཆོས་ཉམས་སུ་བཞེས་པའི་ལུགས་བཟང་ལྟར། སྔར་ཤངས་པ་བཀའ་བརྒྱུད་པའི་ཉམས་ལེན་ལོགས་སུ་གནང་བའི་སྒྲུབ་སྡེ་ཡང་བཙུགས་མྱོང་བ་སྟེ། གཙང་ཆེན་གྱི་རྡོ་རྗེ་སློབ་དཔོན་བཞི་པ་ངག་དབང་ཆོས་འབྱོར་རྒྱ་མཚོས་ནི་གུའི་ཟབ་ཁྲིད་ཞུས་ནས་ལོ་གཅིག་རིང་ཉམས་ལེན་ནན་ཏན་མཛད་པས་སྒྱུ་ལུས་གསལ་སྟོང་དང་རྨི་ལམ་སྤྲུལ་བསྒྱུར་སོགས་ལ་དབང་ཐོབ། ཡར་ཐང་དུ་རྒྱ་བླ་མས་སྒྲོལ་མའི་མཆོད་རྟེན་བཞེངས་པ་ལ་ཐིག་རྩ་བ་དང་། གྲྭ་སློབ་འགའ་ལ་སྦྱོར་དྲུག་དང་ནི་གུའི་ཟབ་ཁྲིད་ཀྱང་བསྩལ། སླར་ལྷ་བཟོ་རྡོ་རྗེ་འཆང་གི་སྐུ་མདུན་ནས་ནི་གུའི་ཟབ་ཆོས་གསན་བཞེས་གནང་། སྡེ་དགེར་ཕེབས་ནས་འཇམ་མགོན་ཀོང་སྤྲུལ་དང་། དཔལ་སྤྲུལ། མཁན་བཀྲ་ཤིས་འོད་ཟེར། བླ་མ་དོན་གྲུབ། ངུར་བ་སློབ་དཔོན། སྐུ་ཕྱོགས་སི་ཏུ་སོགས་སྐྱེས་ཆེན་དུ་མའི་དྲུང་ནས་ཟབ་གསང་གི་ཆོས་སྒོ་དུ་མའི་ཆོས་འབྲེལ་སྣ་ཚོགས་ལེགས་པར་གསན། དགུང་ལོ་ཞེ་དྲུག་པར་གཙང་ཆེན་ཕོ་བྲང་དུ་རྡོ་རྗེ་སློབ་དཔོན་ཆེན་པོར་མངའ་གསོལ་ཏེ་ཕོ་བྲང་དང་སྒྲུབ་གྲྭ་ཚུན་གྱི་མཚམས་གྲྭ་གང་ཡོད་ལ་རང་རང་དང་འཚམ་པའི་ཟབ་ཆོས་ཀྱི་སྒོ་ཅི་དགོས་བསྩལ། དགུང་གྲངས་ང་གཅིག་ནས་ང་ལྔའི་བར་གང་རུང་ལ་ནི་གུའི་སྒྲུབ་གྲྭ་གསར་བཙུགས་མཛད་ཅིང༌། བླ་མ་ངག་དར་སོགས་སྒྲུབ་བླ་བདུན་ཙམ་ལ་ཤངས་པའི་ཆོས་སྐོར་གྱི་ཟབ་བཀའ་ཆ་ཚང་གསུངས་པ་སོགས་ཀྱིས་མཚོན་ཤངས་པའི་ཆོས་སྐོར་རྒྱ་ཁྱབ་ཏུ་སྤེལ་བར་མཛད།
དེ་མིན་སྒར་ཁག་གསུམ་གྱི་གདན་རབས་སློབ་བརྒྱུད་དང་། རྡོ་རྗེ་སློབ་དཔོན་རིམ་པས་ཤངས་པའི་ཆོས་སྐོར་ཉམས་སུ་བསྟར་བའི་ལོ་རྒྱུས་མང་དུ་འཁོད་ཡོད་པ་ལས། འདིར་དཔེ་མཚོན་ཙམ་ཞིག་བཀོད་ན། གཙང་པ་སྐུ་ཕྲེང་གསུམ་པ་དཀོན་མཆོག་འཇིགས་མེད་རྣམ་རྒྱལ་གྱིས་ཇོ་ནང་སྐྱིད་ཕུག་ཏུ་སྐུ་ཞབས་སྤོ་ར་བའི་ དྲུང་ནས་ནི་གུའི་ཆོས་བཀའ་སོགས་ཤངས་ཆོས་ཀྱི་དབང་ལུང་ཁྲིད་གསུམ་རྒྱ་ཆེར་མནོས་པ་དང་། དགུང་ལོ་སུམ་ཅུ་སྐོར་ལ་ཐུགས་ཆེན་དུ་ནི་གུའི་ཟབ་ཆོས་ཀུན་ལ་ཉམས་ལེན་ལོ་ཉེར་དྲུག་བར་མཛད་པས་ཉམས་རྟོགས་ཀྱི་རྩ་ལ་འབར་ཏེ་ཕྱག་ཆེན་གྱི་དོན་ལ་མངའ་དབང་འབྱོར། ཡང་ཆོས་རྗེ་སྐུ་ཕྲེང་བདུན་པ་འཇིགས་མེད་དཔལ་གྱི་སེང་གེས་དཔལ་སྤུངས་དགོན་དུ་ཏཱའི་སི་ཏུ་པདྨ་ཉིན་བྱེད་དབང་པོ་དང་། ཆོས་རྗེ་སྐུ་ཕྲེང་བརྒྱད་པ་མི་ཕམ་ཆོས་ཀྱི་བྱམས་པས་འཇམ་མགོན་ཀོང་སྤྲུལ་གྱི་དྲུང་ནས་ཤངས་ཆོས་ཀྱི་གདམས་པ་ཅི་རིགས་གསན་པ་དང་། གཙང་ཆེན་གྱི་རྡོ་རྗེ་སློབ་དཔོན་དང་པོ་ངག་དབང་ཆོས་འཕེལ་གྱིས་ཇོ་ནང་དུ་སྐུ་ཞབས་སྤོ་ར་བའི་དྲུང་ནས་ནི་གུའི་ཆོས་སྐོར་ཡོངས་རྫོགས་ཉམས་ལེན་ཤར་རྒྱུག་མཛད་ལ། གཙང་ཆེན་བླ་མ་དགོངས་པ་རྫོགས་རྗེས་ལོ་གསུམ་རིང་ནི་གུའི་ཟབ་ལམ་ཉམས་བཞེས་དང་བཅས་རིམ་བཞིན་གཙང་པའི་གདན་ས་མཛད་དེ་རབ་འབྱམས་པ་ངག་དབང་མཁས་བཙུན་སོགས་འདུས་པ་སུམ་བརྒྱ་ལྷག་ལ་ནི་གུའི་དབང་བཀའ་ཆ་ཚང་བསྩལ། ལྷག་པར་རྫོགས་ཆེན་དཔལ་སྤྲུལ་རིན་པོ་ཆེ་དང་ལམ་གོའི་བླ་མ་རབ་རྒྱས་སོགས་ཆོས་བརྒྱུད་གཞན་གྱི་བླ་མ་རྣམས་ལ་ཡང་ནི་གུའི་ཟབ་བཀའ་ཆ་ཚང་བསྩལ།
དེ་ནས་གཙང་ཆེན་གྱི་རྡོ་རྗེ་སློབ་དཔོན་ལྔ་པ་ཀུན་དགའ་མཁས་གྲུབ་དབང་ཕྱུག་དགུང་ལོ་སོ་དྲུག་ཏུ་ཕེབས་སྐབས་བཀྲ་ཤིས་ལྷ་རིའི་དབེན་གནས་སུ་རྡོ་རྗེ་འཆང་ངག་དབང་ཆོས་འཛིན་གྱི་དྲུང་ནས་ནི་གུ་ཆོས་དྲུག་གི་ཟབ་ལམ་གསན་ཞིང་ཉམས་ལེན་མཛད་སྐབས་ངེས་གསང་ཟབ་མོའི་ལྟ་བ་ཐུགས་ལ་འཁྲུངས། གཙང་ཆེན་གྱི་རྡོ་རྗེ་སློབ་དཔོན་དྲུག་པ་ངག་དབང་བསྟན་པ་གསལ་བྱེད་ཀྱིས་གཙང་ཆེན་ཕོ་བྲང་དུ་བླ་མ་ངག་དབང་ཆོས་འབྱོར་ལས་ནི་གུ་ཆོས་དྲུག་གི་དབང་ཁྲིད་ཡོངས་རྫོགས་གསན་ནས་ཉམས་ལེན་གནད་སྨིན་ཡང་མཛད། དེ་རྗེས་གཙང་པའི་སྒྲུབ་གྲྭ་གོང་འོག་བར་གསུམ་ལས་གོང་མར་སྦྱོར་དྲུག་ཆོས་ཚན་ཆག་མེད་དང་། སྒྲུབ་གྲྭ་འགབ་མར་ནི་གུའི་བསྐྱེད་རྫོགས། བསྐྱེད་རིམ་སྣ་ཚོགས་བཅས་ལོ་རེ་བཞིན་དུ་རྒྱུན་འཛུགས་མཛད་ཅིང་། ས་དམར་བླ་མ་སྙན་གྲགས་ལས་ནི་གུའི་བཀའ་ཕྱི་ནང་གི་ཟབ་དབང་དང་། གྲུབ་ཆེན་བརྒྱད་ཅུའི་བསྡུས་དབང་། མཐོང་བ་དོན་ལྡན་གྱི་ལུང་ཁྲིད་བཅས་གསན། གཙང་ཆེན་གྱི་རྡོ་རྗེ་སློབ་དཔོན་བདུན་པ་ངག་དབང་རྡོ་རྗེ་བཟང་པོས་ས་དམར་བླ་མ་སྙན་གྲགས་ལས་དུས་འཁོར་དབང་ཆེན་དང་། ནི་གུའི་བཀའ་ཕྱི་ནང་ཡོངས་རྫོགས་གསན། སླར་དགུང་ལོ་ཉེར་ལྔ་ལ་རྗེ་སྔགས་པ་གཙོ་བོར་གྱུར་པའི་རྡོ་རྗེ་འཆང་རྣམ་གསུམ་གྱི་དྲུང་ནས་ཟབ་མོ་ཤངས་ཆོས་ཀྱི་དབང་ཁྲིད་ལེགས་གསན་གྱི་སྒོ་ནས་ནི་གུའི་བསྐྱེད་རིམ་སྔོན་སོང་གིས་རྫོགས་རིམ་ཆོས་དྲུག་ཉམས་བཞེས་མཛད་སྐབས་ལམ་རང་རང་ལ་མྱོང་རྟགས་ཁྱད་པར་བ་རེ་འཁྲུངས་པ་མ་ཟད། བར་བར་དུ་མཁའ་སྤྱོད་དཀར་དམར་གྲི་གུག་ཐོགས་པ་བྱུང་སྟེ་དེ་གཉིས་ཀའི་ཕྱག་མཚན་གྱིས་ཁོང་གི་རྣམ་སྨིན་གྱི་བེམ་ལུས་དུམ་བུར་བཏུབས་པ་དང་། རྨི་ལམ་འོད་གསལ་གྱི་ངང་ནས་དག་མ་དག་གི་ཞིང་མང་པོར་སྔར་ལས་ལྷག་པར་བགྲོད་ནུས་པའི་ཆོས་སྦྱིན་དམ་པའི་ཏིང་འཛིན་ཕུལ་བྱུང་ཐུགས་ལ་འཁྲུངས་པ་སོགས་ངོ་མཚར་བའི་ཡོན་ཏན་དཔག་མེད་མངའ།
ཡང་རྗེ་དབོན་དམ་པ་འགྱུར་མེད་རྒྱ་མཚོས་བླ་མ་རྡོ་རྗེ་འཆང་ཆེན་པོ་ཀུན་དགའ་ངེས་དོན་རྒྱ་མཚོའི་དྲུང་ནས་བུ་སློབ་གཞན་འགའ་ཞིག་དང་མཉམ་དུ་ནི་གུའི་དབང་བཀའ་བདེ་མཆོག་ལྷ་ལྔ་ནས་མགོན་པོ་ཕྱག་དྲུག་པའི་བར་ཡོངས་རྫོགས་དང༌། ཁྲིད་ཡིག་ཟབ་དོན་ཐང་བརྡལ་མ། མ་མོའི་ལྷན་ཐབས། འཁྲུལ་འཁོར་བསྟན་གཅིག་མའི་བར་གྱི་དབང་ཁྲིད་མཐའ་དག་ལེགས་པར་གསན། ཁོང་གིས་ཀུན་དགའ་བཟང་པོ་སོགས་ལ་གྲོལ་མཆོག་ཁྲིད་བརྒྱ་རྩ་བརྒྱད་ཀྱི་ཁྲིད་ལུང་སྤེལ་མ་རྒྱས་པ་དང་སྔ་རྗེས་ཀྱི་ཆ་ལག་དུ་མ་བཅས་ཀྱི་བཀླག་ལུང་ལེགས་པར་གསུངས། སྡེ་དགེའི་བླ་ཚབ་ཀར་ནོར་དྲུང་ནས་ནི་གུའི་བཀའ་ཕྱི་མའི་རྒྱབ་ཆོས་ཀྱི་ལུང་ཁྲིད་ལེགས་པར་གསན། གཞན་ཡང་སྦྱངས་པ་ཀུན་དགའ་དཔལ་དགུང་ལོ་བརྒྱད་ལ་ཕེབས་སྐབས་རྗེ་དབོན་འགྱུར་མེད་རྒྱ་མཚོའི་དྲུང་ནས་ཤངས་ཆོས་ནི་གུའི་ནང་གི་སྒོས་བཀའ་དྲུག་དང་། ཕྱིའི་བཀའ་དབང་ཆ་ཚང་། སྒྲུབ་ཐབས་བརྒྱ་རྩའི་རྗེས་གནང་། རྒྱ་གཞུང་གི་བཀླག་ལུང་བཅས་ཡོངས་སུ་རྫོགས་པ་གསན། དགུང་ལོ་བཅོ་བརྒྱད་པ་ལ་ཆོས་རྗེའི་འདུ་ཁང་དུ་ཚེས་བཅུའི་སྐུ་དབོན་པདྨ་དཔལ་གྱི་དྲུང་ནས་གྲྭ་ཚང་ཡོངས་དང་ལྷན་དུ་འཇིགས་བྱེད་རོ་ལངས་བརྒྱད་བསྐོར་གྱི་དབང་དང་། ནི་གུའི་བཀའ་ནང་མ་ཆ་ཚང་། གཉན་སྒྲོལ་རྗེས་གནང་སོགས་གསན། དགུང་ལོ་ཉེར་གསུམ་པ་ལ་དབོན་ཡོན་ཏན་རྒྱ་མཚོའི་དྲུང་ནས་གྲོལ་མཆོག་ཁྲིད་ཡིག་བརྒྱ་རྩའི་ཁྲིད་གསན། དགུང་ལོ་ཞེ་དགུ་པ་ལ་དོན་རྒྱམ་སོགས་ཀྱི་འདུས་པ་མང་པོ་ལ་ནི་གུའི་བཀའ་ཕྱི་ནང་གི་ཟབ་དབང་གསུངས།
དེ་རྗེས་འཇམ་མགོན་བློ་གྲོས་མཐའ་ཡས་ཀྱི་སློབ་མ་འབའ་མདའ་ཐུབ་བསྟན་དགེ་ལེགས་རྒྱ་མཚོ་ནི། སྐུ་ན་ཆུང་དུས་ནས་རྣམ་དཔྱོད་ཀྱི་ཁོ་ལག་རབ་ཏུ་ཡངས་པ་ཞིག་ཡིན་ལ། དགུང་ལོ་བཅོ་བརྒྱད་སྐོར་དུ་ཁམས་སྡེ་དགེའི་ཕྱོགས་སུ་ཕེབས་ནས་སྐྱེས་ཆེན་མཁས་གྲུབ་དུ་མའི་ཞབས་པད་སྤྱི་བོས་བླངས་ཏེ་ཐུན་མོང་རིག་གནས་ཀྱི་སྐོར་སྣ་ཚོགས་དང་། ཐུན་མིན་མདོ་ཕྱོགས་བཀའ་པོད་ལྔ་ལས་མཁན་ཨ་དཀོན་གྱི་དྲུང་ནས་ཕར་ཕྱིན་རྩ་འགྲེལ་སོགས་གསན་པ་དང་། རྫོགས་ཆེན་དཔལ་སྤྲུལ་གྱི་དྲུང་ནས་སྤྱོད་འཇུག་ལམ་རིམ་སོགས་མདོ་ཕྱོགས་ཀྱི་བཤད་ཁྲིད་ཉམས་ལེན་སྐོར། འཇམ་མགོན་ཀོང་སྤྲུལ་གྱི་མདུན་ནས་ནཱ་རོ་ཆོས་དྲུག་གི་བསྐྱེད་རྫོགས་ཀྱི་དབང་ལུང་ཟབ་ཁྲིད་མན་ངག་སོགས་མདོ་སྔགས་ཀྱི་ཆོས་ཚུལ་མཐའ་ཡས་གསན་པས་མཁས་གྲུབ་ཀྱི་རྩེ་མོར་སོན། དགུང་ལོ་ཉེར་གཅིག་སྐོར་དུ་འཛམ་ཐང་གཙང་ཆེན་ཕོ་བྲང་དུ་ཕེབས་ནས་རྡོ་རྗེ་འཆང་ངག་དབང་ཆོས་འཕེལ་རྒྱ་མཚོའི་དྲུང་དུ་རྡོར་སེམས་བཟླས་ལུང་། གྲུབ་རྒྱལ་ལུགས་ཀྱི་ཚེ་དབང་སོགས་ལེགས་པར་གསན། དགུང་ལོ་སོ་གཉིས་ཙམ་ལ་འཛམ་ཐང་གཙང་ཆེན་ཕོ་བྲང་དུ་ངག་དབང་ཆོས་ཀྱི་འཕགས་པའི་ཞལ་སྔ་ནས། དཔལ་དུས་ཀྱི་འཁོར་ལོའི་བསྐྱེད་རྫོགས་ཀྱི་ཟབ་དོན་གསན་སྦྱངས་ལེགས་པར་མཛད་ཅིང༌། ཤངས་ཆོས་སྐོར་ལ་བདེ་མཆོག་ལྷ་ལྔའི་བསྐྱེད་རིམ། དེའི་རྫོགས་རིམ་ནི་གུའི་ཆོས་དྲུག་ཡོངས་རྫོགས་ཀྱི་ཟབ་ཁྲིད་ས་བཅད་ལག་ལེན་བཅས་ཆ་ཚང་། འཇིགས་བྱེད་ཀྱི་བསྙེན་སྒྲུབ་གཉིས་ཀའི་ཁྲིད་རྫོགས་རིམ་དང་བཅས་པ། བདེ་མཆོག་ལྷན་སྐྱེས། གསང་འདུས་འཇམ་རྡོར་དང་མི་བསྐྱོད་རྡོ་རྗེ། རྒྱུད་སྡེ་ལྔ་གཙོ་བསྡུས། རྟ་མགྲིན་སྐྱེར་སྒང་ལུགས་སོགས་ཀྱི་དབང་ཁྲིད་ཡོངས་རྫོགས་གསན་བཞེས་དང་། འཛམ་ཐང་ཆོས་རྗེའི་ཁང་གསར་དུ་མི་ལོ་བཅུ་གཉིས་ཙམ་བཞུགས་ནས་ཕར་ཕྱིན་སོགས་ཀྱི་ཡིག་ཆ་དུ་མར་དཔྱད་བསྡུར་དང་སྦྱངས་བརྩོན་མཛད། དེ་ནས་དགེ་འཕེལ་རི་ཁྲོད་སོགས་སུ་བཞུགས་ཏེ་དབུ་ཕར་གྱི་རྣམ་བཤད་ཆེན་མོ་སོགས་ཁྱོན་བསྡོམས་སྒྲིགས་བམ་པོད་ཆེན་ཉེར་གཅིག་ལྷག་བརྩམས་པར་མཛད། ཕུར་རྩ་བླ་མ་བློ་རྒྱམ་དང་། རི་འཕོངས་བླ་མ་ངག་བསྟན་ལ་སོགས་པའི་བུ་སློབ་དུ་མ་སྐྱོང་བར་མཛད། བླ་མ་འདི་ཉིད་ཀྱིས་འཛམ་ཐང་དུ་ནི་གུའི་སྒྲུབ་སྡེ་གཞན་ཞིག་ལོགས་སུ་བཙུགས་གནང་བའི་སྐོར་ཤངས་པའི་རྡོར་སློབ་འགའི་ཞལ་ནས་ཐོས་ཀྱང༌། དཔྱད་ཡིག་ཁུངས་བཙན་རྣམས་སུ་མ་རྙེད་པས་ངེས་མིན་བརྗོད་དཀའ།
ཤངས་པ་བཀའ་བརྒྱུད་ཀྱི་གདམས་པ་རྣམས་འཛམ་ཐང་དགོན་ལྟེ་བར་བྱས་པའི་འཛི་ཡུལ་སྟོད་སྨད་དང་མགོ་ལོག་གི་ཡུལ་སོགས་སུ་ཡང་དར་སྤེལ་གང་ལེགས་བྱུང་བ་སྟེ། ས་དམར་དཔལ་རྩེ་དགོན་གྱི་རྡོ་རྗེ་སློབ་དཔོན་གཉིས་པ་ཀུན་དགའ་སྙན་གྲགས་ཀྱིས་རྣལ་འབྱོར་ཡན་ལག་དྲུག་གི་ཕྱག་བཞེས་དྲི་མེད་ཉམས་ལེན་གནང་བ་མ་ཟད། ལྷ་བཟོ་བླ་མའི་མདུན་ནས་ཤངས་པའི་གསེར་ཆོས་ལྔའི་ཆོས་བཀའ་ཅི་རིགས་ལེགས་པར་གསན། དམ་པ་འདི་ཉིད་དགུང་ལོ་བཞི་བཅུར་ཕེབས་སྐབས་བླ་མ་ལུང་རྟོགས་དང་མཁས་དབང་ཟུང་གི་དྲུང་ནས་ནི་གུའི་ཟབ་ཁྲིད་དང་། བླ་མ་ལུང་རྟོགས་ལས་རྡོར་ཕྲེང་དབང་ཡོངས་རྫོགས། ནི་གུའི་དབང་བཀའ་ཆ་ཚང་སོགས་ཞུས། ཡང་ས་དམར་དགོན་གྱི་སྒྲུབ་བརྒྱུད་ཀྱི་སློབ་དཔོན་ངག་དབང་དཔལ་བཟང་པོས་ས་དམར་སྒྲུབ་སྡེར་ནི་གུའི་ཟབ་ལམ་ལོ་གཅིག་ཏུ་སྒོམ་ཞིང་། འབྱུང་འདུལ། རྟ་མགྲིན་གྱི་བསྙེན་མཚམས་མཛད་ལ། འདིའི་སྐབས་བླ་མ་ལུང་རྟོགས་ཀྱི་མདུན་ནས་སྦྱོར་དྲུག །ནི་གུ། བསྐྱེད་རིམ་སྣ་ཚོགས་ཀྱི་ཟབ་ཁྲིད་དང་། རྡོར་འཕྲེང་། སྦྱོང་རྒྱུད་སོགས་ཀྱི་དབང་བཀའ་དུ་མ་གསན། དགུང་ལོ་སུམ་ཅུ་ལྷག་ཙམ་ལ་བླ་མ་སྙན་གྲགས་ཀྱི་དྲུང་ནས་སྒྲུབ་ཐབས་རིན་ཆེན་འབྱུང་གནས། ཤངས་ཆོས་སོགས་ཆོས་བཀའ་སྣ་ཚོགས་གསན། དེ་མིན་ལྷ་རྩེའི་དགོན་གྱི་རྡོ་རྗེ་སློབ་དཔོན་ངག་དབང་ཆོས་འཛིན་གྱིས་ཤངས་ཆོས་སྐོར་གྱི་དབང་ཁྲིད་མན་ངག་ཡོངས་རྫོགས་གསན་སྒོམ་གྱིས་གསང་ཆེན་མངོན་རྟོགས་ཀྱི་རྩལ་སྒོ་མཐའ་དག་སྔར་ལས་གོང་དུ་འཕེལ་བ་དང༌། ལྷ་རྩེའི་དགོན་གྱི་གདན་ས་འཛིན་པའི་སློབ་དཔོན་ཀུན་དགའ་མཉམ་ཉིད་ཀྱིས་བླ་མ་ཆོས་འཕགས་ཀྱི་དྲུང་དུ་ཤངས་པའི་ཆོས་སྐོར་ཞུས་ནས་ནི་གུའི་ཟབ་ལམ་ཉམས་ལེན་མཛད་པ། ལྷ་རྩེའི་དགོན་གྱི་གདན་ས་བ་མཁན་ངག་དབང་བསོད་ནམས་བཟང་པོས་ལྷ་བཟོ་རྡོ་རྗེ་འཆང་ངག་དབང་ཆོས་འཛིན་གྱི་དྲུང་ནས་ནི་གུའི་ཟབ་ཁྲིད་ཐང་བརྡལ་མ། མ་མོའི་ལྷན་ཐབས་བཅས་ཤངས་ཆོས་སྐོར་དང་། སྒྲུབ་ཐབས་རིན་འབྱུང་ཆ་ཚང་གསན་ལ། དགུང་ལོ་ཉི་ཤུ་ཙམ་དུ་འཛམ་ཐང་པའི་སྒྲུབ་གྲྭར་ལོ་གཅིག་བཞུགས་ཏེ་བླ་མ་ཆོས་འཕགས་ཀྱི་དྲུང་དུ་ནི་གུའི་ཟབ་ཁྲིད་དུ་མ་ཞུས་ཤིང་ཉམས་ལེན་གནད་སྨིན་མཛད།
འཛི་སྲིབས་དགོན་གྱི་སྐྱབས་རྗེ་ཟླ་བ་གྲགས་པས་བླ་མ་ངག་དབང་ཆོས་འཕགས་ཀྱི་དྲུང་ནས་སྔ་ཕྱི་ཅི་རིགས་སུ་ཤངས་ཆོས་སྐོར་དང་། རྒྱུད་སྡེ་ལྔའི་དབང་བཀའ། བསྐྱེད་རིམ་སྣ་ཚོགས་ཅི་དགོས་ཀྱི་དམིགས་ཁྲིད་མང་པོ་ཞུས་ཏེ་མཚམས་སྒྲུབ་ཀྱང་མཛད་པ་དང༌། དགོན་འདིའི་གདན་ས་བ་ངག་དབང་རིན་ཆེན་བཟང་པོས་བླ་མ་ངག་དབང་ཆོས་འབྱོར་གྱི་མདུན་ནས་ཤངས་ཆོས་ཀྱི་སྐོར་མང་པོ་གསན་ཞིང༌། སླར་དགུང་ལོ་སོ་དྲུག་ཐོག་ས་དམར་དགོན་དུ་ཕེབས་ནས་བླ་མ་སྙན་གྲགས་ཀྱི་དྲུང་དུ་ནི་གུའི་བཀའ་ཕྱི་ནང་ཡོངས་རྫོགས་དང་། གཅོད་དབང་རྣམས་ཞུས།
བྱ་ཡུར་དགོན་གྱི་བླ་མ་མཚན་བཟང་ངམ་འཛོང་བོ་སྐྱབས་མགོན་གྱིས་དགེ་སློང་ངག་དབང་ཆོས་འཕེལ་རྒྱ་མཚོའི་དྲུང་ནས་དགུང་ལོ་བཅུ་དགུ་སྐོར་ལ་ནི་གུའི་ཟབ་ཁྲིད་དང་། བསྐྱེད་རིམ་སྣ་ཚོགས་ཀྱི་དམིགས་ཁྲིད་སོགས། བླ་མ་ངག་དབང་ཆོས་འཕགས་ཀྱི་དྲུང་ནས་ཤངས་ཆོས་སྐོར་ཆ་ཚང་གསན་ལ། དགུང་ལོ་ཉེར་གཅིག་ཙམ་ལ་བླ་མ་འདི་ཉིད་ལས་ནི་གུའི་ཟབ་ཁྲིད་ཞུས་ཏེ་ཟླ་བ་བཅུ་གསུམ་དུ་ཉམས་ལེན་རྟགས་ཐོན་པ་རེ་མཛད་པ་དང་། ཕུར་རྩ་བླ་མ་དགེ་ལེགས་ཀྱི་དྲུང་དུ་གྲོལ་མཆོག་ཁྲིད་བརྒྱ་བརྒྱུད་རིམ་བཅས་དང་། ལྷན་ཅིག་སྐྱེས་སྦྱོར་གྱི་ཟབ་ཁྲིད་གསན། ཡང་བྱ་ཡུར་དགོན་གྱི་གདན་ས་བ་ངག་དབང་གསལ་བཟང་གིས་ས་དམར་བླ་མ་སྙན་གྲགས་ཀྱི་དྲུང་ནས་ནི་གུའི་བཀའ་ཕྱི་ནང་ཡོངས་རྫོགས། རྡོ་རྗེ་འཕྲེང་བ་ཆ་ཚང་། སྦྱོང་རྒྱུད་བཅུ་གཉིས། གཅོད་དབང་ནམ་མཁའ་སྒོ་འབྱེད་སོགས་གསན་པ་དང་། གདན་ས་བ་བླ་མ་མཚན་ལྡན་གྱིས་འཛོང་བོ་སྐྱབས་མགོན་དང་བླ་མ་བསྟན་པ་རབ་རྒྱས་ཀྱི་དྲུང་ནས་ཤངས་ཆོས་སྐོར་དང་། བསྐྱེད་རིམ་སྣ་ཚོགས་པའི་དབང་ལུང་ཟབ་ཁྲིད་དུ་མ་ལེགས་མནོས་ཀྱིས་ཉམས་ལེན་ཡང་མཛད་པ། དེ་མིན་རྒྱ་བླ་མ་ངག་དབང་དཀོན་མཆོག་དང་། བླ་མ་སྨོན་ལམ་བཟང་པོ། འབྲོག་དགེ་ཀུན་དགའ་ཡོན་ཏན་རྒྱ་མཚོ་སོགས་ཀྱིས་ཤངས་པའི་ཆོས་སྐོར་གྱི་དབང་ལུང་ཟབ་ཁྲིད་མཐའ་དག་གསན་བཞེས་དང་སྒྲུབ་པ་ལྷུར་བླང་གིས་གྲུབ་འབྲས་དུས་སུ་སྨིན་ཏེ་སྟོང་གཟུགས་ཕྱག་རྒྱ་ཆེན་པོའི་ཟབ་དོན་ལ་མངའ་དབང་རབ་ཏུ་འབྱོར། དེང་འཛམ་ཐང་ཆོས་སྡེར་ཇོ་ནང་བརྒྱུད་པའི་བླ་མ་གཞན་འགའ་ཞིག་གིས་ཀྱང་ཇོ་ཤངས་གཉིས་ཀྱི་ལོ་རྒྱུས་ཐོག་གི་དམིགས་བསལ་འབྲེལ་བས་རྐྱེན་པས་ཤངས་པའི་གདམས་ངག་ཉམས་ལེན་གནང་སྲོལ་འདུག་ཀྱང་། གསེར་ཆོས་ལྔ་སོགས་ཉམས་སུ་བཞེས་སའི་སྒྲུབ་སྡེ་ལོགས་སུ་མཇལ་རྒྱུ་མི་འདུག
གཞན་ཡང་འཛམ་ཐང་དགོན་གྱི་དགོན་ལག་ཁག་ལས། སི་ཁྲོན་རྔ་ཡུལ་དུ་སྲི་ནང་དགོན། ཐར་མོ་དགོན། ཨ་དཔའ་དགོན། ལྷར་ཡག་དགོན། ཚ་ཡུལ་དུ་རྒྱལ་ཁ་རྟག་བརྟན་བཀྲ་ཤིས་དགོན། པཱ་ལ་དགོན། ཁང་གསར་དགོན། བྷོ་ཝཾ་རོའི་དགོན། ཙག་དགེ་བ་དགོན། དཔལ་ལྡན་བཀྲ་ཤིས་སྒང་རྣམས་དང་། དེ་དག་ལས་གྱེས་པའི་དགོན་ཕྲན། ཡ་མདའི་དགོན། ཡོ་མདའི་དགོན། ཤུའུ་མདའི་དགོན། སྣར་མདའ་དགོན། ས་ར་དགོན། ཛ་འགོའི་དགོན། གྱང་སྒང་དགོན། གཙང་བླ་ཚུལ་ལྡན་གྱིས་བཏབ་པའི་རྡོའི་དར་སྐུ་དགོན། རྡོའི་རྒྱུད་ཥར་དགོན། མཚོ་སྔོན་ཞིང་ཆེན་གྱི་ཁོངས་སུ་ཡར་ཐང་དགོན། གླིང་འབུད་དགོན། ལོང་སྐྱ་དགོན། གཙང་གོང་མའི་དགོན། རྡུར་ཎས་བྲག་དཀར་དགོན། གཙང་འགབ་མའི་དགོན། ལྕམ་མདའ་དགོན། ཁང་གསར་དགོན་སོགས་ཀྱི་དཔལ་ཇོ་ནང་པའི་རིང་ལུགས་འཛིན་པའི་དགོན་སྡེ་འགའ་ཤས་སུ་ཡང་ཤངས་པའི་གསེར་ཆོས་ལྔས་གཙོས་པའི་གདམས་པ་ཅི་རིགས་ཉམས་སུ་ལེན་སྲོལ་ཡོད་པ་བཅས་སོ།
II.6.4.2 Japa
།གཉིས། ཇ་པ་དགོན
དགོན་འདི་ནི་མཚོ་སྔོན་ཞིང་ཆེན་སྐྱེ་རྒུ་ཁུལ་ནང་ཆེན་རྫོང་ཁོངས་སུ་གནས་ཤིང་། སྤྱི་ལོ1990ལོར་འཇམ་མགོན་ཀོང་སྤྲུལ་སྐུ་ཕྲེང་གསུམ་པ་ཀརྨ་བློ་གྲོས་ཆོས་ཀྱི་སེང་གེ་ཐེངས་གཉིས་པ་ཇ་པ་དགོན་དུ་ཕེབས་ནས། དགོན་འདིའི་བླ་གྲྭ་རྣམས་ལ་ཉིན་གསུམ་གྱི་རིང་ཤངས་པའི་གསེར་ཆོས་རྣམ་ལྔའི་དབང་ལུང་རྫོགས་པར་བསྩལ། དེ་རྗེས་ཀོང་སྤྲུལ་བློ་གྲོས་ཆོས་ཀྱི་སེང་གེའི་ཐུགས་བཞེད་ལྟར་སངས་རྒྱས་བསྟན་འཛིན་གྱིས་ཇ་པ་དགོན་དུ་ཤངས་པའི་སྒྲུབ་སྡེ་གསར་དུ་བཙུགས་ནས་སྒྲུབ་ཐེངས་དང་པོའི་སྒྲུབ་དཔོན་ལ་དཔལ་སྤུངས་དབུ་མཛད་བཟོད་པ་གདན་དྲངས། ཤངས་པའི་གསེར་ཆོས་ལྔ་སོགས་ཀྱི་བསྙེན་སྒྲུབ་ཉམས་ལེན་བྱ་ཚུལ་རྣམས་ཚབ་ཚའི་ནི་གུའི་སྒྲུབ་སྡེ་སླར་གསོ་མཛད་རྗེས་དང་མཚུངས། སྔ་ཕྱིར་སྒྲུབ་ཐེངས་གཉིས་སོང་མཚམས་སུ། དགོན་སྡེའི་ནང་ཁུལ་གྱི་རྩོད་རྙོག་འགའ་ཞིག་གི་གཞན་དབང་དུ་གྱུར་པས་བསྙེན་སྒྲུབ་ཉམས་ལེན་གྱི་རྒྱུན་ཆད་པ་མ་ཟད། ཐ་ན་སྒྲུབ་སྡེའང་ཐོར་ཞིག་ཏུ་སོང་བས། ད་ལྟའི་ཆར་ཤངས་ཆོས་ཀྱི་སྒྲུབ་སྡེ་མེད།
ཞར་ལ། དགོན་འདིར་ཤངས་པའི་བསྟན་པ་སྤེལ་བར་བཀའ་དྲིན་ཆེ་བ་སངས་རྒྱས་བསྟན་འཛིན་གྱི་མཛད་རྣམ་མདོར་བསྡུས་ཤིག་ལྡིང་བ་ལ། བླ་མ་ཀརྨ་ཆོས་འཕེལ་སྐུ་ཕྲེང་དྲུག་པ་སངས་རྒྱས་བསྟན་འཛིན་ནི་སྤྱི་ལོ་1919ལོར་ཡབ་ཨ་དྷིཿཚེ་དབང་ལྷ་རྒྱལ་དང་། ཡུམ་ཚེ་འཛོམས་གཉིས་ཀྱི་སྲས་སུ་སྤྲེལ་ཚྭར་སྐུ་འཁྲུངས། དགུང་ལོ་ལྔར་སོན་སྐབས་ཀརྨ་ཆགས་མེད་སྐུ་ཕྲེང་དྲུག་པར་སྐྲ་ཕུད་ཕུལ་བས་མཚན་ལ་པདྨ་འགྲོ་འདུལ་ཞེས་གསོལ། དགུང་གྲངས་བཅོ་ལྔའི་ཐོག་དཔལ་འབར་སྤྲུལ་སྐུའི་མདུན་ནས་ཕྱག་ཆེན་སྔོན་འགྲོའི་ཁྲིད་དང་། གྲོ་ལོད། སྒྲོལ་དཀར། གསང་ཐིག་ཕུར་པ་སོགས་ཀྱི་བསྙེན་ཚད་བསྐྱལ། ཕག་སྡེ་རྒྱལ་གསུམ་དང་། མ་མགོན་འཁོར་ལྔ། མགོན་ཆེན་སྡེ་ལྔ་སོགས་གསར་རྙིང་གི་ཆོས་བཀའ་དུ་མ་གསན། དགུང་གྲངས་ཉི་ཤུའི་ཐོག་ཁམས་ཀརྨའི་གདན་སར་བྱམས་མགོན་པདྨ་དབང་མཆོག་ལས་རབ་ཏུ་བྱུང་ཞིང་། མཚན་ལ་ཀརྨ་བསྟན་པ་དར་རྒྱས་ཞེས་གསོལ། དགུང་ལོ་ཉེར་གཉིས་སྐབས་དཔལ་ལྡན་མཁྱེན་བརྩེ་འོད་ཟེར་གྱི་གཙོས་དད་པའི་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས། དགུང་ལོ་ཉེར་གསུམ་ཐོག་སྒྲུབ་ཁང་དུ་ལོ་གསུམ་ཙམ་བཞུགས་རིང་ཐུན་མོང་སྔོན་འགྲོ་ནས་བཟུང་ཆོས་དྲུག་གི་བར་ཉམས་ལེན་གནད་སྨིན་མཛད། དགུང་ལོ་ཉེར་དྲུག་ནས་བཟུང་བོད་ཡུལ་སྟོད་སྨད་ཀྱི་གནས་ཆེན་ཕལ་མོ་ཆེར་མཆོད་མཇལ་དུ་ཕེབས། བྱམས་མགོན་སི་ཏུ་དང་མཆོག་གླིང་རྣམ་གཉིས་ཀྱིས་ཆོས་འཕེལ་སྐུ་སྐྱེའི་ཡང་སྲིད་དུ་ངོས་འཛིན་གནང་བའི་རྟགས་ཡིག་བཅས་ཕུལ་ཏེ། ཇ་པ་དགོན་གྱི་གསེར་ཁྲིར་མངའ་གསོལ། ཟུར་མང་རྣམ་རྒྱལ་རྩེར་དཔལ་ལྡན་མཁྱེན་བརྩེ་འོད་ཟེར་ལས་རིན་ཆེན་གཏེར་མཛོད་ཀྱི་དབང་གསན་སྐབས། ཀོང་སྤྲུལ་རིན་པོ་ཆེས་མ་འོངས་པར་དབང་ལུང་གི་རྒྱུན་སྤེལ་དགོས་པའི་བཀའ་གནང་། མཚུར་ཕུར་ཀརྨ་པ་རིག་པའི་རྡོ་རྗེ་སྔ་ཕྱིར་ཐེངས་གསུམ་མཇལ་བས། ཀརྨ་པས་ཀྱང་བསྟན་འགྲོའི་དོན་ཆེན་སྒྲུབ་པའི་བཀའ་སློབ་ནན་ཆེར་བསྩལ། སྤྱི་ལོ་1980ལོར་དགོན་གནས་བསྐྱར་བཞེངས་ཀྱི་ཆོག་མཆན་ཐོབ་ནས་གཙུག་ལག་ཁང་དང་བཅས་པ་ཉམས་གསོ་གནང་བའི་ཐུགས་འགན་བཞེས། བླ་མ་འདི་ཉིད་ཀྱིས་སྤྱི་ལོ1981ལོར་མཛོད་ཆེན་ལྔའི་ཡ་གྱལ་རྒྱ་ཆེན་བཀའི་མཛོད་ཀྱི་དབང་བསྐུར་བ་དང་། བན་ཆེན་འཆི་མེད་སྤྲུལ་སྐུས་ལུང་གནང་སྟེ་བླ་སྤྲུལ་གྲྭ་སློབ་བཞི་བརྒྱ་ལྷག་དམ་པའི་ཆོས་ཀྱི་ཚིམས་པར་མཛད། དེའི་ཕྱི་ལོར་ལྷ་སྟེང་འཇའ་མོ་སྤྲུལ་སྐུ་དང་བན་ཆེན་འཆི་མེད་སྤྲུལ་སྐུ་གཉིས་གདན་དྲངས་ནས་རིན་ཆེན་གཏེར་མཛོད་ཀྱི་དབང་ལུང་ཆ་ཚང་གནང་། ཁོང་གི་རྩ་བའི་བླ་མ་ཀོང་སྤྲུལ་སྐུ་ཕྲེང་གཉིས་པ་དཔལ་ལྡན་མཁྱེན་བརྩེ་འོད་ཟེར་མཉེས་པ་གསུམ་གྱིས་བསྟེན་ནས་ཅི་གསུངས་བཀའ་བཞིན་སྒྲུབ་པའི་བུ་སློབ་ཆེན་པོར་གྱུར། ཀོང་སྤྲུལ་སྐུ་ཕྲེང་གསུམ་པ་ཀརྨ་བློ་གྲོས་ཆོས་ཀྱི་སེང་གེའི་བཀའ་ལུང་གསེར་གྱི་ཅོད་པན་སྤྱི་བོར་བཅིངས་ཏེ་ཤངས་པའི་གསེར་ཆོས་རྣམ་ལྔ་ཉམས་བཞེས་གནང་བའི་སློབ་མ་མང་ཙམ་བསྐྱངས་མཐར། སྤྱི་ལོ་2001ལོར་གཟུགས་སྐུའི་བཀོད་པ་ཡོངས་སུ་བསྡུས། དེང་སངས་རྒྱས་བསྟན་འཛིན་གྱི་ཡང་སྲིད་བསམ་གཏན་ཉི་མ་ཆོས་རྒྱལ་ཉིད་སྐུ་འཚོ་བཞུགས་གནང་མུས་སོ།
II.6.4.3
།གསུམ། དགོན་སྡེ་གཞན་འགའ་ཞིག་གི་སྐོར།
༡ རྡོ་སྟོད་གཡུ་ཐོག་དགོན།
དགོན་འདི་ནི་སི་ཁྲོན་རྔ་བ་ཁུལ་གྱི་རྒྱལ་རོང་ཆུ་མགོ་རྡོ་སྟོད་དུ་གནས་ཤིང་། སི་ཏུ་ཆོས་ཀྱི་འབྱུང་གནས་ཀྱིས་ཕྱག་བཏབ་པའི་ཀརྨ་ཀཾ་ཚང་གི་རིང་ལུགས་འཛིན་པ་ཞིག་ཡིན། དགོན་འདིར་འབའ་མདའ་ཐུབ་བསྟན་དགེ་ལེགས་ཀྱིས་གྲུབ་དབང་རྡོ་བླའི་ལུང་བསྟན་བཞིན་ནཱ་རོ་ཆོས་དྲུག་གི་སྒྲུབ་གྲྭ་གསར་དུ་བཙུགས་ཤིང༌། སྔགས་ཀྱི་རྡོ་རྗེ་སློབ་དཔོན་ཡང་མཛད། སྒྲུབ་སྡེ་བ་བླ་མ་མཐུ་རྩལ་སོགས་ཀྱིས་ཆོས་ཚན་དང་པོ་བྱས་ཏེ་སྒྲུབ་བླ་རྣམས་ལ་རང་རང་གི་ཁམས་དབང་དང་མཐུན་པའི་ངོ་སྤྲོད་བོགས་དོན་གེགས་སེལ་གྱི་རིམ་པ་ཅི་དགོས་ཐམས་ཅད་ལེགས་པར་བསྩལ་ཞིང་། ཐུན་བར་རྣམས་ལ་ཆོས་ཕྱོགས་སུ་སྤྲོ་བ་བསྐྱེད་ཕྱིར་སྔོན་བྱོན་བླ་མ་གོང་མ་རྣམས་ཀྱི་རྣམ་ཐར་གསུང་བ་སོགས་ཆོས་དང་མཐུན་པའི་གཏམ་བཟང་གིས་ཚིམས་པར་མཛད། ལྷག་པར་ནཱ་རོ་ཆོས་དྲུག་སྤྱི་དོན་དང་སྒོམ་རིམ་གྱི་ཡིག་ཆ་གསར་འཇོག་གནང་སྟེ་བཀའ་བརྒྱུད་གོང་མའི་མན་ངག་བསྲེ་བསླད་དང་བྲལ་བར་སྒྲུབ་པའི་སྡེ་ཡོངས་སུ་རྒྱས་པར་མཛད། དེང་དགོན་འདིར་ཤངས་པའི་སྒྲུབ་སྡེ་ལོགས་སུ་མེད་ཀྱང་ནཱ་རོའི་སྒྲུབ་སྡེ་དེར་ཀོང་སྤྲུལ་བློ་གྲོས་མཐའ་ཡས་ཀྱིས་འབའ་མདའ་ཐུབ་བསྟན་དགེ་ལེགས་ལ་བརྒྱུད་པའི་གསེར་ཆོས་ལྔའི་ཉམས་ལེན་ཅུང་ཙམ་ཡོད་པ་ཐོས་སོ།།
༢ གདོང་ཐོག་དགོན། དེང་དཀར་མཛེས་རྫོང་གསེར་མཁར་ཡུལ་ཤོག་ཁོངས་སུ་གནས་པའི་གདོང་ཐོག་དགོན་ནི་སི་ཏུ་ཆོས་ཀྱི་འབྱུང་གནས་ཀྱི་མཛད་རྣམ་དུ་ཤངས་པ་བཀའ་བརྒྱུད་པའི་ལུགས་འཛིན་པར་གསུངས་ཀྱང་། ལོ་རྒྱུས་ཀྱི་འཕེལ་རིམ་ཞིབ་ཕྲ་འཁོད་མེད་སྟབས་བདེན་མིན་དཔྱད་པར་འཚལ། དེང་དཔལ་ལྡན་ས་སྐྱའི་རིང་ལུགས་འཛིན་མུས་ཡིན་པས། ཤངས་ཆོས་ཉམས་ལེན་གནང་སྲོལ་མེད།།
༣ སྐྱོ་བྲག་དགོན།
ནང་ཆེན་སྐྱོ་བྲག་དགོན་ནི་འབའ་རོམ་བཀའ་བརྒྱུད་ཀྱི་ལུགས་འཛིན་པ་ལ། སྐྱོ་བྲག་སྐྱ་དགའ་མཆོག་གིས་ཚབ་སྤྲུལ་བརྒྱད་པའི་སྐུ་མདུན་ནས་ཤངས་པའི་གདམས་ཟབ་སྨིན་གྲོལ་གསན་བཞེས་གནང་བ་སོགས་ཀྱིས་རྐྱེན་པས། དེང་ཤངས་པ་བཀའ་བརྒྱུད་ཀྱི་ཆོས་སྐོར་དང་འབའ་རོམ་བཀའ་བརྒྱུད་གཉིས་ཀ་ཉམས་སུ་ལེན་པའི་སྒྲུབ་སྡེ་ཞིག་ཡོད་པའོ། དེ་མིན་ཤངས་པ་བཀའ་བརྒྱུད་ཀྱི་ཆོས་སྐོར་ཅི་རིགས་ཉམས་སུ་ལེན་པའི་མདོ་ཁམས་ཁུལ་གྱི་དགོན་གནས་དང་། སྒྲུབ་སྡེ་གཞན་ཀུན་བརྗོད་ཀྱིས་མི་ལངས་ཀྱང་གལ་ཆེའི་རིགས་ཆད་སྐྱོན་བྱུང་ཡོད་ཚེ་སྐབས་འདིར་བསྣན་པར་རིགས་སོ། །དེ་ལྟར་གོང་དུ་བཀོད་པའི་ཤངས་པ་བཀའ་བརྒྱུད་ཀྱི་དགོན་གནས་དང་སྒྲུབ་སྡེ་དེ་དག་གི་ཕྱག་འདེབས་པ་པོ་ཕལ་ཆེར་ནི་འཇམ་མགོན་ཀོང་སྤྲུལ་གྱི་གདན་ས་གོང་མ་ཙཱ་འདྲ་རིན་ཆེན་བྲག་གི་སྒྲུབ་སྡེ་ཀུན་བདེ་གླིང་ལས་སྒྲུབ་པ་མཐར་ཕྱིན་པ་ཡིན་ཞིང་། བླ་མ་བརྒྱུད་པའི་བྱིན་རླབས་མ་ཉམས་པར་གནས་ཡོད་ལ། སྒྲུབ་པར་ཞུགས་པ་རྣམས་ཀྱིས་ཀྱང་འཇམ་མགོན་བླ་མའི་བཞེད་སྲོལ་བཞིན་ཐོག་མར་འདུན་པ་ཕྱིན་ཅི་ལོག་ཏུ་མ་སོང་བས་གཞི་ལེགས་པ་དང་། བར་དུ་བསྒྲུབ་བྱའི་ལྟ་སྒོམ་སྤྱོད་གསུམ་ཉམས་སུ་ལེན་པས་གཞན་མགུ་བ། མཐར་བསྒྲུབས་པའི་འབྲས་བུ་ཆུད་ཟོས་སུ་མ་ཤོར་བར་རང་བློ་བདེ་བ་ཞིག་དགོས་པ་བཅས་བླང་དོར་བཅའ་ཁྲིམས་ཀྱི་སྤྱི་སྡོམ་རང་ནུས་ཅི་ཡོད་ཀྱིས་བརྩོན་བཞིན་ཡོད། སྤྱིར་མདོ་ཁམས་ཁུལ་དུ་ཤངས་ཆོས་ཉམས་སུ་ལེན་པའི་ད་ཡོད་སྒྲུབ་སྡེ་ཇི་སྙེད་ཅིག་འདུག་པ་དེ་དག་གིས། སྔར་གྱི་ལོ་རྒྱུས་ཐོག་དཔལ་ལྡན་ཤངས་པའི་བསྟན་པ་དར་ཁྱབ་བྱུང་བའི་ལྟེ་བའི་ས་ཁུལ་ནི་དབུས་གཙང་དུ་ཡིན་མོད། ད་ལྟ་བསྟན་དོན་ཇི་བཞིན་ཉམས་སུ་ལེན་པའི་འོད་གསལ་མཆེད་ཡུལ་ནི་མདོ་ཁམས་ཁུལ་དུ་ཡིན་པ་མཚོན།

II.6.5 -
།ལྔ་པ། ནང་ས་དང་རྒྱལ་ཕྱིའི་ཤངས་ཆོས་ཉམས་ལེན་གྱི་སྐོར།
དཔལ་ལྡན་ཤངས་པ་བཀའ་བརྒྱུད་ཀྱི་གདམས་པ་ཉམས་སུ་ལེན་པའི་སྲོལ་བཟང་དེ་མདོ་དབུས་ཁམས་གསུམ་སོགས་ཀྱི་བོད་ཡུལ་ཙམ་དུ་མ་ཟད། ཤངས་སྟོན་སྐྱབས་མགོན་སངས་རྒྱས་དཔལ་གྱིས་རྒྱ་ནག་གི་ཡུལ་གྲུ་མང་པོར་ཤངས་པའི་གསེར་ཆོས་ལྔ་ལ་སོགས་པའི་གདམས་པ་རྒྱ་ཆེར་སྤེལ་བ་དང་། ཕྱིའི་རྒྱལ་ཁབ་མང་པོར་གཙོ་ཆེར་ཀརྨ་རང་བྱུང་ཀུན་ཁྱབ་ཀྱིས་སློབ་བརྒྱུད་དང་བཅས་པས་སྤེལ་མུས་ལགས་པས། རྒྱལ་ཕྱི་རྒྱལ་ནང་གི་ཡུལ་ལུང་དུ་མར་ཤངས་ཆོས་གདུགས་དཀར་གྱིས་ཁྱབ་བཞིན་པ་སྟེ།
II.6.5.1
གཅིག ནང་སའི་ཁུལ་གྱི་ཤངས་ཆོས་ཉམས་ལེན་སྐོར། རང་རྒྱལ་གྱི་ནང་སའི་ཁུལ་དུ་ཤངས་ཆོས་ཀྱི་གདམས་ངག་བརྒྱུད་སྤེལ་མཛད་པར་བཀའ་དྲིན་ཆེ་བ་ཤངས་སྟོན་སྐྱབས་མགོན་སངས་རྒྱས་དཔལ་ཁོ་ན་ཡིན་པ་དང་། ཤངས་པའི་ལོ་རྒྱུས་རིག་གནས་ཀྱི་སྐོར་ངོ་སྤྲོད་གཙོ་ཆེར་གནང་མཁན་ལྷ་རྩེ་སྐྱབས་མགོན་རིན་པོ་ཆེའི་སྐབས་ཤིག་གི་སློབ་མ་ཞོལ་མུ་གཉིས་དང་འབྲེལ་ནས་ཅུང་ཟད་བརྗོད་པ་ལ།
II.6.5.1.1
༡ ཤངས་སྟོན་སྐྱབས་མགོན་སངས་རྒྱས་དཔལ།
དཔལ་ལྡན་ཤངས་པའི་བརྒྱུད་རབས་སུམ་ཅུ་སོ་དྲུག་པར་གྲགས་པ་ཤངས་སྟོན་སྐྱབས་མགོན་སངས་རྒྱས་དཔལ་ནི། རྔ་བ་སྨད་ཀྱི་རྫོང་ཁྲར་བཀྲ་ཤིས་པའི་ལྟས་དུ་མ་དང་བཅས་ཏེ་སྤྱི་ལོ་1933ལོར་སྐུ་འཁྲུངས། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱིས་ལྷ་རྩེ་སྐྱབས་མགོན་སྐུ་ཕྲེང་གསུམ་པའི་ཡང་སྲིད་དུ་ངོས་འཛིན་ཞུས་ཤིང༌། སངས་རྒྱས་དཔལ་ཞེས་པའི་མཚན་ཡང་གསོལ། དགུང་ལོ་བཅུ་ལ་སོན་སྐབས་མཁན་པོ་ཀུན་དགའི་དྲུང་དུ་ཆོས་སྒོར་ཞུགས། སྤྱི་ལོ་1944ལོ་ནས་བཟུང་བླ་བྲང་བཀྲ་ཤིས་འཁྱིལ་དུ་ནང་ཆོས་ཀྱི་གཞུང་ལུགས་སློབ་གཉེར་གནང་བའི་དབུ་ཚུགས་ཤིང་། ཐོག་མར་དགེ་བཤེས་བློ་གྲོས་བསྟན་པ་ལས་གཞུང་བཀའ་པོད་ལྔ་གསན་བཞེས་གནང་། དགུང་ལོ་བཅུ་བཞིར་ཕེབས་པ་སྤྱི་ལོ1947ལོར་བླ་བྲང་བཀྲ་ཤིས་འཁྱིལ་གྱི་སྤྲུལ་སྐུ་དགུ་དང་ལྷན་དུ་སྐུ་འབུམ་བྱམས་པ་གླིང་དུ་ཕེབས་ཏེ། སེང་གེ་འགྱུར་མེད་རིན་པོ་ཆེའི་མདུན་ནས་བླ་གྲྭ་བརྒྱ་ལྷག་དང་ལྷན་དུ་བསྙེན་རྫོགས་ཀྱི་སྡོམ་པ་བཞེས་ཤིང༌། དུས་འཁོར་རྩ་འགྲེལ་སོགས་ཀྱང་གསན། དགུང་ལོ་བཅུ་གཅིག་ནས་བཟུང་ལོ་དྲུག་བར་བླ་བྲང་བཀྲ་ཤིས་འཁྱིལ་དུ་དགེ་བཤེས་ཆེན་པོ་སེང་གེ་འགྱུར་མེད་སོགས་ལས་གཞུང་ཆེན་ལྔ་ལ་སོགས་པའི་མདོ་སྔགས་ཀྱི་ཆོས་གཞུང་མང་པོར་སྦྱངས་པ་མི་དམན་པ་མཛད། སྤྱི་ལོ1983 ལོར་རང་གི་དགོན་སྡེ་སྔ་འགྱུར་རྙིང་མའི་དཔལ་ཡུལ་བརྒྱུད་པར་ གཏོགས་པའི་ལྷ་རྩེ་དགོན་ དུ་ཕེབས་ནས་གདན་ས་རེ་ཞིག་བསྐྱངས་ཤིང་། རིག་གསར་སྐབས་གཏོར་སྐྱོན་ཕོག་པའི་བུ་དགོན་ཉི་ཤུ་དང་བཅས་པ་རྣམས་ལ་ཉམས་གསོ་མཛད། སྤྱི་ལོ1967 ལོར་འགྱུར་མེད་རིན་པོ་ཆེ་ལས་དཔལ་ལྡན་ས་སྐྱ་པའི་གདམས་ངག་དུ་མ་གསན་བཞེས་གནང་བ་དང་། བླ་མ་འདིའི་དྲུང་དུ་སླར་བསྙེན་རྫོགས་ཀྱི་སྡོམ་པ་བཞེས། སྤྱི་ལོ་2007ལོའི་ཟླ་བཞ4ནས་བཟུང་ཀྲུང་གོའི་ཧྲང་ཧའེ་ཀྲེན་ཏན་ནས་དབུ་བཙུགས་ཏེ་ནང་སའི་ཁུལ་དུ་ཤངས་པའི་ཆོས་སྐོར་སྤེལ།
བླ་མ་འདི་ཉིད་ཀྱིས་ཤངས་པ་བཀའ་བརྒྱུད་ཀྱི་ཆོས་སྐོར་ཉམས་བཞེས་གནང་བའི་སྐོར་ཡང་། སྐུ་ན་ཆུང་ངུའི་དུས་ཤིག་བྱིས་པ་གཞན་དང་མཉམ་དུ་རྩེད་མོ་རྩེ་སྐབས། ཁོང་གི་རྨོ་བོ་ལགས་ཀྱིས་ཁོང་དང་ལུས་ལ་གཟབ་མཆོར་སྤྲས་པའི་བུ་མོ་ལོ་ཆུང་ཉེར་བཞི་མཉམ་དུ་རྩེད་མོ་རྩེ་བའི་ཚུལ་ལན་གྲངས་མང་པོ་གཟིགས། ཞང་པོས་འདི་དག་ནི་མཁའ་འགྲོ་མ་ཉེར་བཞི་ཡིན་པར་གསུངས་པ་དང་། བྱིས་པ་འདི་ཉིད་ནར་སོན་རྗེས་འཛམ་གླིང་ཁྱོན་དུ་ནི་གུའི་གསེར་ཆོས་ལྔའི་གདམས་ངག་གིས་ཁྱབ་པར་བྱེད་ཅེས་པའི་ལུང་བསྟན་ཡང་མཛད། ལྷག་པར་བླ་བྲང་བཀྲ་ཤིས་འཁྱིལ་དུ་མ་ཕེབས་གོང་སྟེ་དགུང་ལོ་བཞིར་སོན་སྐབས་ཀྱི་དབྱར་དུས་ཤིག་སྤྲིན་གསེབ་ནས་བླ་མ་ཞིག་ཐོན་ཏེ་ཁོང་ལ། འདི་ནི་གུའི་གསེར་ཆོས་ལྔ་ཡིན། ཁྱེད་ལ་སྟེར། ངའི་མིང་ལ་ཁྱུང་པོ་རྣལ་འབྱོར་ཟེར་ཞེས་བརྗོད། དེ་འདྲ་བའི་ངོ་མཚར་གྱི་གནས་ཚུལ་སྔ་ཕྱིར་ཐེངས་བཅུ་གསུམ་བྱུང་བ་མཛད་རྣམ་འགར་གྲགས། སྐུ་ན་ཕྲ་བའི་དུས་ནས་ཡེ་ཤེས་མགོན་པོས་རྗེས་སུ་བཟུང་ཞིང་གནས་སྐབས་ཀུན་ཏུ་མི་བྲལ་བར་མཛད། དེ་ནས་མཉམ་ལས་ཁང་དུ་ངལ་རྩོལ་བསྒྱུར་བཀོད་ལ་ཞུགས་ནས་ལོ་བརྒྱད་སོང་མཚམས་ཏེ་སྤྱི་ལོ1962ལོའི་ཟླ་བ3པར་རང་ཉིད་ཀྱི་རྩ་བའི་བླ་མ་རྗེ་བཙུནའཇིགས་མེད་རོལ་བའི་རྡོ་རྗེ་དང་མཇལ་ཞིང་ཉིན་སུམ་ཅུ་ཙམ་གྱི་རིང་སྔ་འགྱུར་རྙིང་མ་དང་དཔལ་ལྡན་ཤངས་པའི་ཆོས་སྐོར་མ་ལུས་རྫོགས་པར་བསྩལ་ནས། ཤངས་སྟོན་སངས་རྒྱས་དཔལ་གྱི་གདུལ་བྱ་གཙོ་བོ་ནང་སའི་ཁུལ་དུ་འབྱུང་བར་ལུང་བསྟན། ལྷ་རྩེ་སྐྱབས་མགོན་ནི་བླ་མ་འདི་ཉིད་ཀྱི་སློབ་མ་སྐྱབས་མགོན་ཆེན་པོ་བཞིའི་གྲས་ཤིག་ཀྱང་ཡིན། སྤྱི་ལོ་1973ལོ་ནས་སྤྱི་ལོ1975ལོ་བར་ཇོ་ནང་བརྒྱུད་པའི་བླ་མ་ཤར་རྒྱལ་མཚན་རིན་པོ་ཆེས་རང་ཉིད་ཀྱི་ཡི་དམ་སུ་ཁ་སིདྡྷིའི་ལུང་བསྟན་བཞིན་སྐྱབས་མགོན་སངས་རྒྱས་དཔལ་ལ་གསེར་ཆོས་ལྔ་ལ་སོགས་པའི་ཤངས་པའི་གདམས་པ་རྣམས་རྫོགས་པར་བསྩལ། སྤྱི་ལོ1975ལོར་ཇོ་ནང་པའི་བླ་མ་བདེ་བའི་རྡོ་རྗེས་(དོར་རྒྱུ་)ཀྱང་ཤངས་པའི་ཆོས་སྐོར་མཐའ་དག་སྐྱབས་མགོན་སངས་རྒྱས་དཔལ་གྱི་ཕྱག་ཏུ་གཏད་ནས་ཤངས་པ་བཀའ་བརྒྱུད་ཀྱི་བླ་རབས་སོ་དྲུག་པར་བསྐོས་ཟེར། ཡང་གུང་ཐང་བསྟན་པའི་དབང་ཕྱུག་ལས་ཀྱང་ཤངས་པའི་གདམས་པ་དུ་མ་གསན་བཞེས་གནང་། སྤྱི་ལོ1977ལོ་ནས་བཟུང་ཁྱོན་མི་ལོ་བཅོ་བརྒྱད་ཙམ་གྱི་རིང་རང་ཉིད་ཀྱིས་ཐོས་པའི་ཤངས་པའི་གསེར་ཆོས་སོགས་ཀྱི་གདམས་ངག་མཐའ་དག་སྒྲུབ་པའི་དོན་ཐོག་ཏུ་རྫོགས་པར་བསྐྱལ། སྤྱི་ལོ1983ལོའི་ཟླ་བ7པར་རང་ཉིད་ཀྱི་དགོན་གནས་ལྷ་རྩེར་ཕེབས་ནས་དགོན་ལག་དང་བཅས་པའི་གྲྭ་སློབ་ཆིག་སྟོང་ལྷག་ལ་གྲུབ་མཐའ་རིས་མེད་ཀྱི་དབང་ལུང་ཁྲིད་གསུམ་རྫོགས་པར་བསྩལ། སྔ་རྗེས་སུ་ལྷ་རྩེ་དགོན་དུ་ལྷ་ཁང་དགུ་དང་། ནང་བསྟན་སློབ་གླིང་། སྒྲུབ་སྡེ་སོགས་གསར་དུ་སྐྲུན་པ་དང་སྦྲགས། དགོན་ལག་ཉི་ཤུ་ལྷག་ལ་ཉམས་གསོ་མཛད། ལྷག་དོན་པཎ་ཆེན་སྐུ་ཕྲེང་བཅུ་པ་དགོངས་པ་ཆོས་དབྱིངས་སུ་འཐིམ་ནས་ཟླ་བ་གཅིག་སོང་རྗེས། དུས་ཡུན་ཟླ་བ་གཉིས་སྤྱད་ནས་མི་ལའི་མཁར་ཞེས་ཐོག་བརྩེགས་དགུ་ཡོད་པའི་དྲན་རྟེན་ཁང་བཞེངས། ཐོག་བརྩེགས་དང་པོར་པཎ་ཆེན་སྐུ་ཕྲེང་བཅུ་པ་དང་རྗེ་བཙུན་མི་ལ་རས་པ། ཐོག་བརྩེགས་གཉིས་པ་ནས་དྲུག་པ་བར་རྒྱུད་སྡེ་ལྔའི་ལྷ་ཚོགས་དང་། ཤངས་པ་བཀའ་བརྒྱུད་ཀྱི་བླ་རབས་སོ་ལྔའི་སྣང་བརྙན། ཐོག་བརྩེགས་བདུན་པ་དང་བརྒྱད་པར་རིམ་བཞིན་རྡོ་རྗེ་རྣལ་འབྱོར་མ་དང་། གུ་རུ་རིན་པོ་ཆེ། ཐོག་བརྩེགས་དགུ་པར་གཟུངས་སྔགས་སོགས་བཞུགས་སུ་གསོལ་ཡོད། སྤྱི་ལོ་2001ལོའི་ཟླ་བ9པར་བླ་མ་འདི་ཉིད་དང་སློབ་མ་འགའ་ཤས་དབུས་གཙང་ཁུལ་དུ་ཕེབས་ཏེ། གདན་ས་སེ་འབྲས་དགའ་གསུམ་དང་། བསམ་ཡས་དགོན་སོགས་ལ་རིམ་བཞིན་མཆོད་མཇལ་དང་། འབུལ་སྐྱེས་གནང་སྐབས་ཞོང་ཞོང་དགོན་དུ་ཞབས་བཅགས་ཏེ། ཁྱུང་པོ་གསུམ་པ་ཚུལ་ཁྲིམས་མགོན་པོ་དགུང་ལོ་དྲུག་ཅུ་རེ་བཞིར་ཕེབས་པ་དང་མཇལ། སྐབས་དེར་ཁོང་གིས་ཞོང་ཞོང་དགོན་ལ་ལྷ་ཁང་ཆེན་པོའི་ཡང་ཐོག་གི་རྒྱ་ཕིབས་དང་། མཐོ་ཚད་སྨི2ཟིན་པའི་དུས་འཁོར་མཆོད་རྟེན་གཅིག །མཁས་གྲུབ་ཁྱུང་པོས་སྤྱོད་མྱོང་བའི་ཆོས་དུང་། གསེར་ཟངས་ལས་གྲུབ་པའི་མཁས་གྲུབ་ཁྱུང་པོ་རྣལ་འབྱོར་དང་། ནི་གུ་མ། སུ་ཁ་སིདྡྷི། མགོན་པོ་ཕྱག་དྲུག་པ་བཅས་ཀྱི་སྐུ་བརྙན། འདུ་ཁང་ཉམས་གསོའི་དངུལ། གྲྭ་སློབ་རྣམས་ལ་ཆོས་གོས་དང་གཟིམ་ཆས་སོགས་ཀྱི་འབུལ་སྐྱེས་འབོར་ཆེན་མཛད། འབུལ་སྐྱེས་གྲུབ་རྗེས་འདུ་ཁང་དུ་རང་ཉིད་དང་ལྷན་དུ་ཕེབས་པའི་རྒྱའི་སློབ་མ་རྣམས་དང་། ཞོང་ཞོང་དགོན་གྱི་བླ་གྲྭ་ཡོངས་ལ་གསེར་ཆོས་ལྔའི་དབང་བསྐུར་ཡང་གནང་། དེ་ལྟ་བུའི་གནས་ཚུལ་རྣམས་ལོ་བཞིའི་གོང་ནས་ཀརྨ་རང་བྱུང་ཀུན་ཁྱབ་ཀྱིས་ཁྱུང་པོ་གསུམ་པ་ཚུལ་ཁྲིམས་མགོན་པོར་རྨི་ལམ་བརྒྱུད་དེ་ལུང་བསྟན་ཟིན་ལ། ལུང་བསྟན་གསེར་གྱི་བཀའ་རྒྱ་དེ་ཡང་ཁྱུང་པོ་ཚུལ་ཁྲིམས་མགོན་པོས་ཡིག་ཐོག་ཏུ་བཀོད་ནས་ཉར་ཚགས་གནང་བ་སོགས་ཀྱི་གནས་ཚུལ་ཞིབ་ཕྲ་རྣམས་ཐོས་ཕྲལ། ཤངས་སྟོན་སྐྱབས་མགོན་སངས་རྒྱས་དཔལ་གྱིས་མ་འོངས་པར་ཞོང་ཞོང་གི་དགོན་གནས་ཉམས་གསོ་གནང་རྒྱུའི་དབུ་སྙུང་མཛད་པ་བཞིན། སྤྱི་ལོ2008ལོའི་ཟླ་བ་6པར་དགོན་བསྐྱར་བཞེངས་ཀྱི་ལས་འགོ་བརྩམས་པ་ལོ་གཉིས་ཀྱི་རྗེས་ལེགས་པར་གྲུབ།
ཤངས་སྟོན་སྐྱབས་མགོན་སངས་རྒྱས་དཔལ་གྱིས་རང་ཉིད་ཀྱི་བླ་མ་འགའ་ཞིག་གི་ལུང་བསྟན་ལྟར་ནང་སའི་གདུལ་བྱ་མང་པོ་ལ་དག་སྣང་ཉེ་བརྒྱུད་གཙོ་བོར་མཛད་པའི་ཤངས་པའི་ཆོས་སྐོར་གྱི་གནང་སྦྱིན་དཔེ་མཁྱུད་ཅི་ཡང་མེད་པར་བསྩལ་མུས་ལ། སྐལ་ལྡན་གྱི་བུ་སློབ་མང་པོས་ཀྱང་ཉམས་ལེན་སྒོམ་སྒྲུབ་ཀྱི་བྱ་གཞག་ལ་རང་ནུས་ཅི་ལྕོགས་ཀྱིས་བཞིན་མཆིས། ཁོང་གིས་ཉེ་བའི་ཆར་མཛད་པའི་གསེར་ཆོས་ལྔའི་ལམ་གྱི་རིམ་པ་དང་། སློབ་མ་རྣམས་ཀྱིས་གདམས་པ་འདི་དག་ཉམས་ལེན་བྱེད་སྐབས་ཀྱི་མྱོང་བ་དངོས་དང་འབྲེལ་ནས་དྲི་བ་དྲིས་པ་ལ་བླ་མས་ལན་གསུངས་པ་སོགས་ཀྱི་རྒྱ་ཡིག་གི་དཔེ་ཆ་འགའ་ཞིག་ཀྱང་དངོས་སུ་མཇལ་རྒྱུ་འདུག །ཁོང་གིས་རྒྱལ་བསྟན་སྤྱི་དང་ཁྱད་པར་ཤངས་པའི་བསྟན་པ་མ་ཉམས་གོང་དུ་སྤེལ་བའི་ཀུན་སློང་གིས་རིང་མིན་ཧྲན་ཤི་རི་བོ་རྩེ་ལྔར་སྒྲུབ་སྡེ་གསར་བསྐྲུན་གནང་རྒྱུའི་ཐུགས་རེ་བཅངས་མུས་ལ། རྣམ་ཀུན་གཙོ་ཆེར་སྐུ་འབུམ་བྱམས་པ་གླིང་གི་ཉེ་འཁོར་དུ་རྒྱུན་བཞུགས་མཚམས་སྒྲུབ་གནང་བའི་ཞོར་དུ། ནང་སའི་ཡུལ་གྲུ་དུ་མར་ཕེབས་ཏེ་ཤངས་པའི་ཆོས་སྐོར་སོགས་བརྒྱུད་སྤེལ་མཛད་བཞིན་ཡོད། ཁོང་གིས་དམ་པའི་ཆོས་ཀྱིས་འབྲེལ་བའི་ནང་སའི་ཁུལ་གྱི་སློབ་མ་ཁྲི་ཕྲག་བཅུ་ལྷག་ཟིན་ཟེར་བ་ལས། བླ་མ་ཡི་དམ་གྱིས་ལུང་བསྟན་པའི་སློབ་མ་གཙོ་ཆེན་བརྒྱད་སོགས་ཡོད་དོ།།
II.6.5.1.2
༢ ཞོལ་མུ།
སྤྱི་ལོ1981ལོ་ནས་བཟུང་ལོ་ཉེར་དྲུག་རིང་སུང་ཐོ་དགོན་པའི་བླ་མ་འུ་ནེ་ཏན་ལས་བོད་བརྒྱུད་ནང་བསྟན་གྱི་ཆོས་སྐོར་དང་། སྤྱི་ལོ1994ལོར་རྗེ་གུང་ཐང་ཚང་བླ་མར་བསྟེན་ནས་དུས་འཁོར་སོགས་ཀྱི་གདམས་པ་གསན། ལྷག་པར་དུ་ལྷ་རྩེ་སྐྱབས་མགོན་རིན་པོ་ཆེ་གཙུག་ཏུ་བསྟེན་ནས་ལོ་མང་རིང་ཕྱག་ཆེན་གའུ་མ་ལ་སོགས་པའི་ཤངས་པའི་གདམས་ངག་དུ་མ་གསན་བཞེས་ཉམས་ལེན་གནང་བས། ཀྲུང་གོའི་ཕྱག་རྒྱ་ཆེན་པོའི་རིགས་གཅིག་མཁས་ཅན་གྱི་མཚན་སྙན་ཐོབ་ཟེར། དེ་རྗེས་རྩོམ་ཡིག་གསར་རྩོམ་གྱི་ལམ་བུ་གཙོ་བོར་མཛད་ཐོག་ཤངས་པ་བཀའ་བརྒྱུད་ཀྱི་རིག་གནས་ཁྱབ་བརྡལ་གཏོང་བ་དང༌། སྤྱི་ལོ་2009ལོ་དང་སྤྱི་ལོ་2010ལོར་ཧྲང་ཧའེ་དང་། པེ་ཅིན། ཀྲེ་ཅང་སོགས་སུ་ཕེབས་ཏེ་ཤངས་པ་བཀའ་བརྒྱུད་ཀྱི་རིག་གཞུང་དྲིལ་བསྒྲགས་དང་བརྒྱུད་སྤེལ་མཛད་པས། ཧྲང་ཧའེ་ཧྥི་ཏན་སློབ་གྲྭ་ཆེན་མོ་དང༌། ཧྲང་ཧའེ་འགྲིམ་འགྲུལ་སློབ་ཆེན། པེ་ཅིན་དང་ཀྲེ་ཅང་གི་དྲིལ་བསྒྲགས་ཚན་པ་དང་འབྲེལ་ཡོད་མི་སྣ་སོགས་ཀྱི་དགའ་བསུ་ཚད་མེད་ཐོབ། སྤྱི་ལོ2010ལོའི་ཟླ་བ10པར་ཀོང་ཏུང་ཞིང་ཆེན་ཏུང་ཝན་གྲོང་ཁྱེར་ཀྲང་མོ་ཐོ་གྲོང་བརྡལ་གྱི་རྩོམ་པ་པོའི་གྲོང་དུ་ཞོལ་མུའི་འཆད་སྟེགས་ཞེས་པ་གསར་དུ་བཙུགས་ཏེ་ནང་ས་དང་ཕྱིའི་རྒྱལ་ཁབ་ཁག་ཏུ་ཤངས་པ་བཀའ་བརྒྱུད་ཀྱི་རིག་གཞུང་བརྒྱུད་སྤེལ་བྱེད་པར་གར་སྟེགས་ཅུང་ཟད་ཅིག་བསྐྲུན་གནང་མཛད། སྤྱི་ལོ2010ལོའི་ཟླ་བ་11པའི་ཚེས27ནས28བར་སི་ཁྲོན་ཞིང་ཆེན་ཁྲེན་ཏུ་གྲོང་ཁྱེར་དུ་སི་ཁྲོན་ཞིང་ཆེན་བོད་བརྒྱུད་ནང་བསྟན་རིག་གནས་ཞིབ་འཇུག་ཚོགས་པས་གཙོ་གཉེར་མཛད་པའི་སྐབས་དང་པོའི་ཤངས་པ་བཀའ་བརྒྱུད་ཀྱི་རིག་གནས་སྒྲིང་སྟེགས་ཐོག་རྩོམ་པ་པོ་ཞོལ་མུ་ཡིས་ཤངས་པ་བཀའ་བརྒྱུད་ཀྱི་བྱུང་འཕེལ་དང་། དམིགས་བསལ་ལྟ་གྲུབ། ཐུན་མིན་ཁྱད་ཆོས་སོགས་ཀྱི་འཆད་ཁྲིད་གནང་བ་དང་། ཤངས་པ་བཀའ་བརྒྱུད་དང་འབྲེལ་བ་དེ་ཙམ་མེད་པའི་མཁས་དབང་དང་དབུ་ཁྲིད། ཤངས་པ་བཀའ་བརྒྱུད་ཀྱི་ནང་སའི་ཉམས་ལེན་པ་སོགས་དང་བགྲོ་ཞིང་མཛད་དེ་ཤངས་པའི་ངོ་མཚར་གྱི་རིག་གནས་རྣམས་སྔོག་འདོན་དང་བརྒྱུད་སྤེལ་གང་ལེགས་གནང་། སྤྱི་ལོ2011ལོའི་ཟླ་བ2པར་སླར་ཡང་ཀོང་ཀྲོའུ་གྲོང་ཁྱེར་དུ་ཤངས་པའི་རིག་གཞུང་ཞིབ་འཇུག་གླིང་གསར་དུ་བཙུགས་ཏེ་རང་ཉིད་ཀྱི་ལེགས་ཆ་དང་ཡུལ་ཁམས་ཀྱི་སྲོལ་ལུགས་གཞིར་བཟུང་དཔལ་ལྡན་ཤངས་པ་བཀའ་བརྒྱུད་ཀྱི་རིག་གནས་ཐབས་བརྒྱ་ཇུས་སྟོང་གིས་རྒྱུན་འཛིན་གནང་མུས་ལགས་པ་ཡོངས་གྲགས་ཀྱི་བླ་རབས་མ་ཡིན་ནའང་དེང་ནང་སའི་ཁུལ་དུ་ཤུགས་རྐྱེན་ཅུང་ཆེ་བས་ཁོ་བོས་ཟུར་དུ་བཀོད་པ་ཡིན།
འོན་ཏེ་ཁོང་གིས་ཤངས་པ་བཀའ་བརྒྱུད་ནི་ཤི་ཟིན་པའི་ཆོས་ལུགས་ཤིག་ལ་ངོས་འཛིན་གནང་གི་ཡོད་དེ། ནང་སའི་ཤེས་ཡོན་ཅན་རྣམས་ལ་འཆད་ཁྲིད་མཛད་སྐབས་ཀྱང་སྤྱིར་ཤངས་པའི་རིག་གནས་ཞེས་པ་མ་གཏོགས་ཤངས་པའི་ཆོས་ལུགས་ཞེས་པའི་མིང་འདོགས་སྲོལ་མི་འདུག་སྟེ། ཁོང་གིས་ཆོས་ལུགས་ཤིག་ཡིན་ཕྱིན་ཆད་ལ་ཆོས་ལུགས་ཀྱི་མཚན་ཉིད་རིག་པ་དང་། ཆོས་ལུགས་ཀྱི་སྒྲིག་འཛུགས། ཆོས་ལུགས་ཀྱི་ཆོ་ག །ཆོས་ལུགས་ཀྱི་ཉམས་ལེན་བཅས་ཀྱི་ཆ་རྐྱེན་བཞི་ངེས་པར་ཚང་དགོས་པ་ལས། མིག་སྔར་ཤངས་པ་བཀའ་བརྒྱུད་ལ་ཆོས་ལུགས་ཀྱི་སྒྲིག་འཛུགས་མེད་པས་རིག་གཞུང་གི་ཚོ་ཁག་ཙམ་ཞིག་ཡིན་པར་བརྗོད། དེ་ནི་མིག་སྔར་ཤངས་པ་བཀའ་བརྒྱུད་ཀྱི་དགོན་སྡེ་དང་སྒྲུབ་གནས་རྣམས་ལ་གཅིག་འགྱུར་གྱི་སྒྲིག་འཛུགས་ཡོད་པའི་དོན་དངོས་དང་ཡོངས་སུ་འགལ། ད་དུང་ཁོང་གིས་གཙོས་པའི་ནང་སའི་ཤངས་ཆོས་ཉམས་ལེན་པ་འགས་དཔེ་དེབ་མང་པོར་རང་ཉིད་ཀྱི་གྲུབ་པའི་ཉམས་རྟོགས་ཐམས་ཅད་སྦ་གསང་མེད་པར་ངོ་སྤྲོད་གནང་བས། དཔེ་དེབ་འདི་དག་ལྟ་སྐབས་བདག་འདྲའི་སྣོད་མིན་གྱི་སེམས་ཅན་བློ་ཆུང་རྣམས་ལ་ཐེག་པ་ཀུན་ལས་དཀོན་པའི་རྡོ་རྗེ་ཐེག་པ་འདི་ཉིད་ཤིན་ཏུ་སྒྲུབ་སླ་བ་དང༌། སུས་ཀྱང་སྒྲུབ་ཆོག་པ་ལྟ་བུའི་ཚོར་སྣང་ཞིག་རྟག་ཏུ་སྐྱེ་ཡི་འདུག །དེས་ན་ཕལ་ཆེར་ཤངས་པའི་གསང་སྔགས་ཀྱི་ཆོས་སྐོར་ཟབ་མོ་རྒྱ་ཁྱབ་ཏུ་སྤེལ་དྲགས་པ་ལས་ཐོན་པའི་གནད་དོན་འདི་རིགས་ལ་ལྷ་རྩེ་སྐྱབས་མགོན་རིན་པོ་ཆེས་ཕྱིས་མཐའ་གཅིག་ཏུ་བཀག་འགོག་གནང་བཞིན་པ་མ་ཟད། མཁས་དབང་ཚུལ་ཁྲིམས་བློ་གྲོས་མཆོག་གིས་ཀྱང་དགོས་པ་ལས་དགག་བྱ་ཆེ་བར་གསུངས་བྱུང་བ་བཅས་རྒྱུ་མཚན་ཆེ་བར་མཐོང་ཡང་། དད་གུས་དག་སྣང་གི་མིག་རས་ཁབ་ཀྱི་བུ་ག་ལྟར་དོག་པ་ཁོ་བོའི་དཔྱད་བྱ་མ་ཡིན་པས། ཇི་སྐད་དུ། མི་རིགས་པ་ཡི་གཟུགས་ལའང་མི་རིགས་ན། །ཐེ་ཚོམ་ཟ་བའི་ཆོས་ལ་སྨོས་ཅི་དགོས། །དེ་ཕྱིར་བཏང་སྙོམས་བཞག་ལེགས་ཉེས་པ་མེད་ཅེས་གསུངས་པ་བཞིན་རེ་ཞིག་བཏང་སྙོམས་སུ་བཞག་པའོ།།
II.6.5.1.3
༣ བརྒྱུད་རབས་སོ་དྲུག་ཅེས་པར་ཅུང་ཟད་དཔྱད་པ།
ཉེ་བའི་ཆར་རྒྱ་ཡིག་གི་དཔྱད་གཞི་འགར་ཤངས་པ་བཀའ་བརྒྱུད་པའི་ཁུངས་བཙན་གྱི་བླ་རབས་རྣམ་ཐར་ནང་འཁོད་པའི་བླ་མ་བརྒྱུད་པ་རྣམས་ལ་བརྒྱུད་པ་རྙིང་མ་དང་། ཤངས་སྟོན་སངས་རྒྱས་དཔལ་ལས་བརྒྱུད་པར་བརྒྱུད་པ་གསར་མ་ཞེས་པའི་ཐ་སྙད་སྤྱད་འདུག་པ་འདི་རིགས་ནི་བོད་ཡིག་གི་ཁུངས་བཙན་དཔྱད་གཞི་རྣམས་སུ་ཅི་ཡང་མི་གསལ་བས། ཡིད་གཉིས་སུ་འགྲོ་བའི་རྒྱུ་ཁོ་ནར་མཐོང་། དེ་མིན་ཤངས་སྟོན་སངས་རྒྱས་དཔལ་གྱི་མཛད་རྣམ་སོགས་སུ་བླ་རབས་སོ་དྲུག་ཅེས་པར། རིན་ཆེན་བདུན་བརྒྱུད་སྔ་མ་བདུན་དང་། དེ་ནས་རིམ་བཞིན་མཁས་གྲུབ་གཙང་མ་ཤངས་སྟོན། མཁས་བཙུན་གཞོན་ནུ་གྲུབ། འཇག་ཆེན་རྒྱལ་མཚན་འབུམ། ཁྱུང་པོ་གཉིས་པ་ཚུལ་ཁྲིམས་མགོན་པོ། རས་ཆེན་སངས་རྒྱས་སེང་གེ ཤངས་དཀར་རིན་ཆེན་རྒྱལ་མཚན། མཉམ་མེད་སངས་རྒྱས་དཔལ་བཟང་། གྲུབ་ཆེན་ནམ་མཁའ་རྒྱལ་མཚན། རྒྱ་སྒོམ་ལེགས་པ་རྒྱལ་མཚན། རྗེ་བཙུན་ཀུན་དགའ་གྲོལ་མཆོག །ཆོས་སྐུ་ལྷ་དབང་གྲགས་པ། རྗེ་བཙུན་སྒྲོལ་བའི་མགོན་པོ། རྗེ་བཙུན་ཡེ་ཤེས་རྒྱ་མཚོ། བྱམས་པ་ཡོན་ཏན་མགོན་པོ། མགོན་པོ་དཔལ་འབྱོར། མགོན་པོ་གྲགས་པ། ཁྱབ་བདག་མགོན་པོ་རྣམ་རྒྱལ། རིག་འཛིན་ཚེ་དབང་ནོར་བུ། བཀའ་བརྒྱུད་འཕྲིན་ལས་ཤིང་རྟ། དགེ་ལེགས་དཔལ་འབར། ཀུན་དགའ་ལྷུན་གྲུབ་རྒྱ་མཚོ། བློ་གྲོས་རིག་མཚོ། ཀརྨ་ལྷག་མཐོང་། ཀརྨ་གཞན་ཕན་འོད་ཟེར། འཇམ་མགོན་བློ་གྲོས་མཐའ་ཡས། ཀུན་དགའ་འགྱུར་མེད་ཆོས་ཀྱི་དབང་ཕྱུག །ཀུན་དགའ་འཇམ་དབྱངས་མཁྱེན་བརྩེ། བདེ་བའི་རྡོ་རྗེ། ཤངས་སྟོན་སྐྱབས་མགོན་སངས་རྒྱས་དཔལ་བཅས་རིམ་གྱིས་དྲངས་འདུག །དེར་ཅུང་ཞིག་དཔྱད་པ་ལ། ནི་གུའི་བརྒྱུད་འདེབས་བྱིན་རླབས་སྤྲིན་ཕུང་དང་། ཐང་ལུགས་གནས་སྦྱར་མ་སོགས་བོད་ཡིག་གི་དཔྱད་གཞི་ཁུངས་བཙན་རྣམས་ལྟར་ན། འཇམ་མགོན་ཀོང་སྤྲུལ་ཤངས་ཆོས་ཇོ་ནང་ལུགས་ཀྱི་བརྒྱུད་རབས་སུམ་ཅུ་པ་དང་། ཐང་སྟོང་ལུགས་ཀྱི་བརྒྱུད་རབས་ཉེར་དགུ་པར་བརྩི་ཆོག་ཀྱང་། འགྲོ་མགོན་སངས་རྒྱས་སྟོན་པ་ནས་མཁས་གྲུབ་ཤངས་སྟོན་ལ་བརྒྱུད་པའི་འཇག་པའི་བརྒྱུད་པ་དང་། སངས་རྒྱས་སྟོན་པ་ཉིད་ནས་མཁས་བཙུན་གཞོན་ནུ་གྲུབ་ལ་བརྒྱུད་པའི་བསམ་སྡིངས་ཀྱི་བརྒྱུད་པ་མི་འདྲ་བ་ཁག་གཉིས་སུ་སོང་བས། གོང་གི་བརྒྱུད་རབས་འདིར་མཁས་གྲུབ་ཤངས་སྟོན་ནས་བསམ་སྡིངས་པ་གཞོན་ནུ་གྲུབ། དེས་མཁས་བཙུན་རྒྱལ་མཚན་འབུམ། དེས་ཁྱུང་པོ་གཉིས་པ་ཚུལ་ཁྲིམས་མགོན་པོ་ཞེས་འཇག་བསམ་གཉིས་བརྒྱུད་པ་གཅིག་ཏུ་བསྲེས་ནས་དྲངས་པ་དེར། འགྲོ་མགོན་སངས་རྒྱས་སྟོན་པའི་སློབ་མ་མཁས་གྲུབ་ཤངས་སྟོན་དང་བསམ་སྡིངས་པ་གཉིས་བླ་སློབ་ཀྱི་ཚུལ་དུ་བཞག་པ་དང་། ཡང་མཁས་གྲུབ་ཤངས་སྟོན་གྱི་སློབ་མ་འཇག་པ་རྒྱལ་མཚན་འབུམ་དང་ཁྱུང་པོ་ཚུལ་ཁྲིམས་མགོན་གཉིས་ཀྱང་བླ་སློབ་ཀྱི་འབྲེལ་བ་ལྡན་པ་ལྟ་བུར་བཀོད་འདུག་པས་བརྒྱུད་ཕྲེང་གཉིས་མང་དུ་ཕྱིན་པ་ལོ་རྒྱུས་ཀྱི་དོན་དངོས་དང་ཡོངས་སུ་འགལ། དེ་མིན་གོང་གི་བརྒྱུད་རབས་ཉེར་དགུ་པར་བློ་གྲོས་རིག་མཚོ་ཞེས་པ་ཞིག་བོད་ཡིག་གི་བླ་བརྒྱུད་དུ་གསལ་བའི་བཀའ་བརྒྱུད་བསྟན་འཛིན་གྱི་སྐབས་སུ་བཀོད་འདུག་པ་མིག་སྔར་རྙེད་སོན་བྱུང་བའི་བོད་ཡིག་གི་བླ་བརྒྱུད་གསོལ་འདེབས་སོགས་གང་དུའང་མི་གསལ་བས་དང་། དེ་མིན་ཤངས་སྟོན་སྐྱབས་མགོན་ཉིད་ལ་ཤངས་པའི་བླ་མ་འཁྲུལ་མེད་རྣམས་ལས་གདམས་ངག་རིམ་པར་བརྒྱུད་པའི་རིང་བརྒྱུད་དང་། དག་སྣང་ཉེ་བརྒྱུད་གང་རུང་མངའ་སྲིད་ཀྱང་། ད་ལྟའི་ཆར་ཤངས་པ་བཀའ་བརྒྱུད་པའི་ཡོངས་གྲགས་ཀྱི་བླ་རབས་གཅིག་པུ་ལྟ་བུར་བརྩིས་ཏེ་བརྒྱུད་རབས་སོ་དྲུག་པ་ཞེས་བརྗོད་ན་འཚམ་མིན་སོགས་ཀྱི་སྐོར་བློ་ལྡན་རྣམས་ཀྱིས་དཔྱད་པར་འཚལ།
II.6.5.2
གཉིས། ཤངས་པ་བཀའ་བརྒྱུད་ཀྱི་རྒྱལ་ཕྱིའི་གནས་བབས།
དཔལ་ལྡན་ཤངས་པ་བཀའ་བརྒྱུད་འདི་ཡང་མཁས་གྲུབ་ཁྱུང་པོ་རྣལ་འབྱོར་གྱིས་འཕགས་ཡུལ་མཁས་གྲུབ་དུ་མའི་ཁྱད་འཕགས་ཀྱི་གདམས་པ་རྣམས་རྫོགས་པར་བཞེས་རྗེས་ཤངས་སུ་ཞོང་ཞོང་སོགས་ཀྱི་དགོན་གནས་བཏབ་པ་ནས་བཟུང་། ཕྱི་རབས་ཀྱི་བླ་མ་རབ་དང་རིམ་པས་བོད་ཡུལ་འདིར་བརྒྱུད་འཛིན་དང་དར་སྤེལ་གང་ལེགས་གནང་ཡོད། དེ་ཡང་འགྲོ་མགོན་ཆོས་རྗེ་སྟོན་པས་ངའི་ཆོས་འདིས་ད་ལྟ་འཛམ་བུའི་གླིང་གླིང་གཡོག་དང་བཅས་པར་ཁྱབ་ཅིང་། སྦས་པའི་རྣལ་འབྱོར་བརྒྱ་རྩ་བརྒྱད་དེའི་ནང་སྐྱེ་བ་འདིར་གཞན་དོན་ནུས་པ་ཉི་ཤུ་རྩ་གཅིག་ལ་སོགས་པས་སྐྱེ་བ་འདི་ཕྱི་ཀུན་དུ་དར་བར་བྱེད་ཅེས་ལུང་བསྟན་པ་བཞིན་ཤངས་པའི་ཐུན་མིན་གྱི་གདམས་པ་དེ་དག་འཛམ་གླིང་རྒྱལ་ཁབ་དང་མི་རིགས་ཁག་དབར་སྲིད་འབྱོར་རིག་གསུམ་གྱི་འགྲོ་འོང་ཉིན་རེ་བཞིན་ཤུགས་ཇེ་ཆེར་འགྲོ་བའི་གོམ་འགྲོས་དང་བསྟུན་ནས་རི་བོ་ཧི་མ་ལ་ཡའི་རི་བརྒྱུད་བརྒལ་ཏེ་ཕྱི་གླིང་གི་ཡུལ་དུ་དར་འགོ་ཚུགས་པ་སྟེ། སྤྱི་ལོའི་དུས་རབས་བཅུ་དགུ་པའི་དུས་དཀྱིལ་དུ་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱིས་ཤངས་ཆོས་སྐོར་གྱི་ཡིག་ཆ་མང་དག་ཅིག་བསྡུ་སྒྲིག་དང་གསབ་སྣོན་གནང་ནས་ཤངས་ཆོས་འདི་ཉིད་རང་རྐྱ་ཕེར་བའི་ཆོས་བརྒྱུད་གཅིག་ཏུ་སླར་གསོ་མཛད། དེ་རྗེས་སྤྱི་ལོའི་དུས་རབས་ཉི་ཤུ་པའི་དུས་འགོར་གྲུབ་མཆོག་རང་བྱུང་ཀུན་ཁྱབ་སུ་འབོད་པས་འཇམ་མགོན་ཀོང་སྤྲུལ་གྱི་ཕྱག་ལས་དེའི་རྒྱུན་བསྐྱངས་ཏེ་དཔལ་སྤུངས་ཀྱི་ཙཱ་འདྲ་རིན་ཆེན་བྲག་སོགས་སུ་ཤངས་པའི་བསྟན་པ་སྤེལ་བ་དང་། དགོན་གནས་འགའ་ཞིག་ཉམས་གསོ་གནང་ཞིང་། ལྷག་པར་ཤངས་པའི་གདམས་ངག་གི་མེ་ཟླུམ་འཛམ་བུའི་གླིང་ཐམས་ཅད་དུ་ཁྱབ་པར་མཛད་པ་ཀརྨ་རང་བྱུང་ཀུན་ཁྱབ་ཀྱིས་མཛད་རྣམ་སྐབས་སུའང་བཤད་ཟིན།
དེ་ཡང་ཀརྨ་རང་བྱུང་ཀུན་ཁྱབ་ཀྱིས་སྤྱི་ལོ་1971ལོ་ནས་སྤྱི་ལོ1979ལོ་བར་ཨ་རི་དང་། ཀ་ན་ཊ། ཡོ་རོབ་རྒྱལ་ཁབ་ཁག །ལྷོ་ཤར་ཨེ་ཤི་ཡའི་རྒྱལ་ཁབ་ཁག་ཏུ་སྔ་ཕྱི་ཁྱོན་བསྡོམས་ལན་ལྔ་ཙམ་ཕེབས་ནས་གདུལ་བྱ་རྣམས་ལ་ཐོག་མར་བསྟན་པ་ལ་འཇུག་པའི་སྒོ་སྐྱབས་འགྲོ་ནས་བཟུང་ཐེག་པ་ཆེ་ཆུང་གི་ཆོས་སྤྱི་དང་། བྱེ་བྲག་རྡོ་རྗེ་ཐེག་པའི་སྨིན་གྲོལ་རྗེས་གནང་སོགས་མཐའ་ཡས་པ་བསྩལ་ཏེ་གདུལ་བློའི་རྨོངས་མུན་སེལ་བར་མཛད། སྔ་རྗེས་སུ་ཡུལ་གྲུ་དེ་དག་ལ་ཆོས་ཚོགས་བདུན་ཅུ་ལྷག་ཙམ་དང་། སྒྲུབ་སྡེ་ཉི་ཤུ། མཆོད་རྟེན་ཉི་ཤུ་སྐོར་བཅས་གསར་བཞེངས་དང་དབུ་ཁྲིད་གནང་བ་སོགས་ཀྱིས་སྒྲུབ་བརྒྱུད་བསྟན་པ་སྤྱི་དང་། ཁྱད་པར་དཔལ་ལྡན་ཤངས་པའི་ལུགས་བཟང་འདི་ཉིད་འཛམ་གླིང་གི་ཡུལ་ལུང་དུ་མར་དར་སྤེལ་ཆེས་ཆེར་མཛད། ཆོས་ཚོགས་དེ་རྣམས་ལ་ཆོས་ཀྱི་སློབ་སྟོན་མཛད་མཁན་ལོ་གསུམ་ཕྱོགས་གསུམ་མཐར་ཕྱིན་པའི་ཞལ་སློབ་བླ་མ་དགེ་བའི་བཤེས་གཉེན་སུམ་ཅུ་ལྷག་ཙམ་བསྐོ་བཞག་གནང་། མིག་སྔར་ཨི་ཤི་ཡའི་ཁུལ་དུ་འཇམ་མགོན་ཀོང་སྤྲུལ་དོར་རྒྱུ་བློ་གྲོས་ཆོས་ཀྱི་སེང་གེས་བཏབ་པའི་ལྭ་བ་སྒྲུབ་སྡེ་ངེས་དོན་ཕྱག་ཆེན་གླིང་དང༌། བན་ཆེན་བསྟན་དགའ་རིན་པོ་ཆེས་ཡང་ལེ་ཤོད་དུ་བཏབ་པའི་ཤངས་པའི་སྒྲུབ་སྡེ་ སོགས། གཞན་ཡང་ཀརྨ་རང་བྱུང་ཀུན་ཁྱབ་ཀྱི་གདན་ས་བསམ་གྲུབ་དར་རྒྱས་གླིང་གི་ཤངས་པའི་སྒྲུབ་སྡེ། ཀརྨ་ངེས་དོན་ཆོས་ཀྱི་བློ་གྲོས་ཀྱི་གདན་ས་མི་རིགས་དགོན་གྱི་ཤངས་པའི་སྒྲུབ་སྡེ། སྤྱི་ལོ1972ལོར་བཙུགས་པའི་ཀ་ན་ཊའི་ཡན་བྱོན་གླིང་ཕྲན་གྱི་ཆོས་ཚོགས་དང་བཀའ་བརྒྱུད་ཀུན་ཁྱབ་ཆོས་གླིང་གཉིས། ཨ་རིའི་KDK་ལྟེ་གནས། སི་ཕིན་དུ་སྤྱི་ལོ1984ལོར་བཙུགས་པའི་དྭགས་ཤངས་བཀའ་བརྒྱུད་ཅེས་པ། སྤྱི་ལོ་1987ལོར་ཧྥ་རན་སིའི་བཀའ་བརྒྱུད་གླིང་དང་། ཀརྨ་གླིང་གཉིས་ཀྱི་སྒྲུབ་གྲྭ་བ་རྣམས་ལའང་ཀརྨ་རང་བྱུང་ཀུན་ཁྱབ་ཀྱིས་ཤངས་ཆོས་ཡོངས་རྫོགས་ཀྱི་སྨིན་གྲོལ་རྒྱབ་རྟེན་དང་བཅས་པའི་བཀའ་དྲིན་སྩོལ་མྱོང་བ་སོགས་དཔལ་ལྡན་ཤངས་པའི་གདམས་ངག་ཉམས་བཞེས་ཀྱི་སྲོལ་བཟང་སྐྱོང་བཞིན་པའི་དགོན་གནས་དང་སྒྲུབ་སྡེ་མང་དུ་མཆིས་སོ།
།ཤངས་ཆོས་ཀྱི་སྒྲུབ་སྡེ་དེ་དག་ཏུ་སྒྲུབ་པར་ཞུགས་མཁན་གྱི་ལས་དང་པོ་བ་ཚོ་ཤངས་ཆོས་འདོན་གོམས་ཀྱི་ལག་ལེན་མེད་པ་དང་། ཆོ་གའི་དཀྲུགས་སྡེབ་མང་བས་རྟོགས་དཀའ་བ་སོགས་ཀྱི་གནད་དོན་ལ་གཞིགས་ཏེ་འཇམ་མགོན་བློ་གྲོས་མཐའ་ཡས་ནས་བརྒྱུད་པའི་ཕྱག་བཞེས་རྣམས་ཉམས་སུ་ལེན་བདེ་བའི་སླད། ཀརྨ་རང་བྱུང་ཀུན་ཁྱབ་ཀྱི་ཞལ་ཁྲིད་ཕྱག་སྲོལ་བཞིན་ཀརྨ་ངེས་དོན་ཆོས་ཀྱི་བློ་གྲོས་ཀྱིས་མཐོང་བརྒྱུད་ཕྱག་ལེན་ཞིབ་ཆ་ཁ་གསལ་བར་ཕྱོགས་གཅིག་ཏུ་བསྒྲིགས་པ་དཔལ་ལྡན་ཤངས་པ་བཀའ་བརྒྱུད་ཀྱི་ཆོས་སྐོར་ནི་གུ་ཆོས་དྲུག་གཙོས་གསེར་ཆོས་རྣམ་ལྔ་སོགས་ལོ་གསུམ་ཕྱོགས་གསུམ་གྱི་སྒྲུབ་ཁང་ནང་ཉམས་ལེན་ཁག་གི་ཟིན་དེབ་ཁྱབ་བདག་བླ་མའི་ཞལ་ལུང་མོས་ལྡན་སྙིང་གི་སྒྲོན་མེ་དང་། ཤངས་ལུགས་རྩ་གསུམ་སྒྲུབ་སྐོར་གྱི་འདོན་ཟིན་ལག་དེབ་མཐོང་བས་ཁོང་ཆུད་ལྟར་ཉམས་སུ་ལེན་པ་དང༌། སྒྲུབ་པ་སྡོམ་པའི་དུས་ཀྱང་སྤྱིར་རྒྱལ་བའི་དུས་ཆེན་ཁག་དང་། ཁྱད་པར་མཁས་གྲུབ་ཁྱུང་པོ་རྣལ་འབྱོར་ཆོས་སྐུ་མཁའ་ཁྱབ་ཆེན་པོར་མངོན་པར་བྱང་ཆུབ་པའི་དུས་ཏེ་ཧོར་ཟླ་བཅུ་པའི་ཚེས་བཅུ་བཞི་ལྟ་བུར་ཆེས་ལེགས་པར་གསུངས་པ་བཞིན་བྱེད། སྒྲུབ་སྡེ་དེ་དག་ཏུ་བསྙེན་སྒྲུབ་ལས་གསུམ་གྱི་སྐོར་དང༌། སྒྲུབ་མཆོད་རྒྱས་པའི་སྐབས་རྡུལ་ཚོན་དཀྱིལ་འཁོར་ལ་བརྟེན་པའི་ཚེས་ཆོག་གི་སྐོར་སོགས་ཞིབ་པ་གཞུང་འདི་གཉིས་སོགས་ལས་ཤེས་པར་བྱའོ།
།དེ་ཡང་ཆོས་རྗེ་རྨོག་ལྕོག་པས་དབོན་སྟོན་སྐྱེར་སྒང་པར་ད་ལྟ་བླ་མ་ཤངས་པའི་གདམས་ངག་འདི་མཁའ་འགྲོ་དངོས་སུ་འདུ་བ་ཡིན་པས། འདི་མ་འོངས་པའི་དུས་སུ་སོང་ཙ་ན། ཡང་ན་བཀའ་ཆད། ཡང་ན་ཚོང་འདུས་ཀྱི་འོ་མར་འགྲོ་བ་འདུག་ཅེས་གསུངས་པ་ལྟར་ཤངས་པའི་གདམས་པ་དེ་དག་བརྒྱུད་འཛིན་བྱེད་པའི་བགྲོད་ལམ་སྟེང་འཆི་གསོན་དང་ཀྱག་ཀྱོག་གི་ཁུག་པ་མང་པོ་ཞིག་བརྒྱུད་དགོས་བྱུང་བས་གདམས་པ་སྐོར་ཅིག་ལ་ཚོང་འདུས་ཀྱི་འོ་མ་བཞིན་བསྲེ་ལྷད་འོང་བར་གསུངས་པ་དང་། མཐར་གསེར་ཆོས་རྩ་བ་རྣམས་ནི་རྐང་ཚུགས་པའི་ལུགས་འཛིན་དེང་སང་ཤིན་ཏུ་དཀོན་པར་སྣང་ཞེས་འཁོད་པ་བཞིན་ཤངས་ཆོས་གདམས་པའི་མཆོག་འགྱུར་གསེར་ཆོས་ཀྱི་རྩ་བ་དེ་རྣམས་ཡོངས་སུ་ཁུངས་ཕེར་བའི་སྒོ་ནས་བརྒྱུད་པ་འཛིན་པ་དཀོན་པའི་སྡོམ་ཚིག་བཀོད་པ་བདེན་ཡང་། གྲུབ་མཐའ་ཞེས་པའི་ནང་མཁས་གྲུབ་ཁྱུང་པོ་རྣལ་འབྱོར་པ་དགོངས་པ་གཞན་དོན་དུ་གཤེགས་རྗེས་ལོ་སུམ་བརྒྱ་ཙམ་རིང་གྲུབ་ཐོབ་མང་དུ་བྱུང་སྟེ། ཤངས་པའི་ལུགས་སྲོལ་རྒྱས་པར་མཛད་ཀྱང་། དེང་སང་ནི་ས་དགེ་ཕྱག་གསུམ་གྱི་ནང་དུ་སིམ་པ་ལྟར་གྱུར་ཏེ་ཆོས་བརྒྱུད་སྒེར་དུ་འཛིན་པ་མི་སྣང་ཞེས་འཁོད་ཡོད། མ་གཞི་ཤངས་པའི་ཆོས་བརྒྱུད་འདི་ཉིད་ས་དགེ་བཀའ་རྙིང་གི་ཆོས་བརྒྱུད་རྣམས་དང་འདྲ་བར་ས་ཁྱབ་རྡོ་ཁྱབ་ཏུ་མ་དར་ཡང༌། དེང་མདོ་དབུས་ཁམས་གསུམ་གྱི་བོད་ཁུལ་གཙོ་བོར་བྱས་ཐོག །ནང་ས་དང་རྒྱལ་ཕྱིའི་ཡུལ་ལུང་དུ་མར་ཤངས་པའི་ཆོས་བརྒྱུད་འཛིན་པའི་དགོན་གནས་དང་སྒྲུབ་སྡེ་དེ་དག་ཏུ་སྒྲུབ་པ་མཐར་ཕྱིན་པ་དང་སྒྲུབ་ལ་གཞོལ་མུས་ཀྱི་སྐྱེས་བུ་ད་དུང་ཟམ་མ་ཆད་པར་བཞུགས་ཡོད་པ་མིག་མཐོང་ལག་ཟིན་ཡིན་པས། ཆོས་བརྒྱུད་སྒེར་དུ་འཛིན་པ་མི་སྣང་ཞེས་ཁ་ཚོན་བཅད་ན་ཐལ་ཆ་ཆེ་དྲགས་པ་དང་། ལྷག་པར་དུ་བོད་བརྒྱུད་ནང་བསྟན་གྱི་གྲུབ་མཐའི་བྱེ་བྲག་ཤངས་པ་བཀའ་བརྒྱུད་ཀྱི་སྐོར་མདོ་ཙམ་ཞིང་བ་ཞེས་པའི་རྩོམ་ཡིག་གི་མཇུག་ཏུ་ཤངས་པ་བཀའ་བརྒྱུད་དེ་ལོ་རྒྱུས་ཀྱི་བཞུར་རྒྱུན་ཁྲོད་དུ་རིམ་བཞིན་ཉམས་རྒུད་སོང་བ་མ་ཟད། མཐར་ས་རྡུལ་གྱི་ཕུང་པོ་བཞིན་མེད་པར་གྱུར་ཏོ་ཞེས་ཤངས་པའི་ཆོས་བརྒྱུད་ཀྱི་སྲོག་རྩ་ཡོངས་སུ་ཆད་ཟིན་པ་ལྟ་བུའི་སྡོམ་ཚིག་བཙན་པོ་གནམ་ལྕགས་དང་འདྲ་བ་འདི་འདྲ་བཀོད་པའང་ཤིན་ཏུ་མི་འོས་སོ།

II.6.6 -
།དྲུག་པ། ཤངས་པ་བཀའ་བརྒྱུད་ཀྱི་མ་འོངས་འཕེལ་ཕྱོགས་སྐོར།
དེ་ཡང་སློབ་དཔོན་ཀླུ་སྒྲུབ་ཀྱིས་ད་ནི་ཐུབ་པའི་བསྟན་པ་ཡང་། ཅུང་ཟད་ཙམ་ཞིག་ལུས་པར་ཟད། །ཐུབ་པའི་བསྟན་པ་གངས་ཆེན་མཚོ། རིང་པོར་མ་ཐོགས་སྐམ་པར་འགྱུར་ཞེས་གསུངས་པ་དང་། དམ་པ་སངས་རྒྱས་ཀྱི་ཞལ་གདམས་སུ་དམ་པ་སངས་རྒྱས་དེ་རེ་ཞིག་བཤུམ་གྱིན་གདའ་སྐད། ཀུན་དགས་དམ་པ་ཅི་ལ་བཤུམ་པ་ཡིན་ཞུས་པས། ཐུབ་པའི་བསྟན་པའི་ནུབ་ལ་ཁད་ལ་ངུ་། ནམ་ནུབ་ལགས་ཞུས་པས། ད་ལོ་མང་པོ་ཙམ་མེད་གསུངས་ཞེས་སོགས་འཁོད་པ་བཞིན་རྒྱལ་བའི་བསྟན་པ་སྤྱི་རིམ་བཞིན་ཉམས་ལ་ཁད་པའི་མི་ཐུབ་ལྔ་ལྡན་ གྱི་ཁུག་པ་འདིར་དམ་ཆོས་སྒྲུབ་པའི་སྣོད་ལྡན་གྱི་གང་ཟག་དང་། མན་ངག་འཛོམས་པའི་ཚད་ལྡན་གྱི་བླ་མ་དཀོན་པའི་དབང་གིས་གདུལ་བྱའི་ཆུ་སྣོད་མེད་ན་འདུལ་བྱེད་ཀྱི་ཟླ་གཟུགས་ཀྱང་མི་སྣང་བ་བཞིན་བོད་དར་ནང་བསྟན་གྱི་ཆོས་བརྒྱུད་ཁག་ལས་གསང་ཆེན་སྔགས་ཀྱི་གདམས་པའི་བརྒྱུད་འཛིན་གྱི་ཉག་ཐག་ཇེ་ཕྲར་འགྲོ་བ་ནི་སྐྱེ་འགྲོ་ཀུན་གྱི་མཐོང་ཆོས་སུ་འགྱུར་བ་ཡིན། ལྷག་པར་ཆོས་ལྡན་ཞིང་དུ་ལྟེ་ཁྲག་འཕོས་ཕྱིན་ཆད་ལ་དམ་ཆོས་བྱེད་པའི་མཐུན་རྐྱེན་རང་བཞིན་གྱིས་འཛོམས་ཟེར་ཡང་། མི་ཁོམ་གནས་བརྒྱད་ཀྱི་གཡང་སར་ལྷུང་བའི་དུས་ངན་གྱི་མི་ཁོ་བོ་འདྲ་བ་ཕལ་ཆེར་ནི་ཆོས་ལ་ཐན་དུ་མཐོང་། དགེ་བ་མཚང་དུ་མཐོང་། སྤྱོད་པ་ཁྱི་ལས་ཐུ། ལས་སུ་སྡིག་པ་དགའ། ཁ་ཟས་ལ་དགའ། ལུས་ཉལ་ལ་དགའ་བས། དཀའ་སྤྱད་སྡུག་བསྲན་གྱི་སྙིང་རུས་དང་བྲལ་ཞིང་དོན་མེད་ཀྱི་བྲེལ་ཟིང་ཁོ་ནས་དལ་འབྱོར་གྱི་མི་ལུས་རིན་པོ་ཆེ་ཆུད་ཟོས་སུ་གཏོང་། དེར་བརྟེན་སྒྲུབ་པ་ལྷུར་བཞེས་ཁོ་ན་གཙོ་བོར་མཛད་པའི་ཤངས་པ་བཀའ་བརྒྱུད་ལྟ་བུར་མཚོན་ནའང་། ཉམས་སུ་ལེན་མཁན་གྱི་མི་ཉུང་དུ་འགྲོ་བ་ནི་ཨ་ཅང་བརྗོད་མེད་རེད།
ཡང་འཁོར་འདས་བརྟན་གཡོའི་ཆོས་ཐམས་ཅད་སྐྱེས་མཐའ་འཆི་བ། འདུས་མཐའ་བྲལ་བ། བསགས་མཐའ་འཛད་པ། མཐོ་མཐའ་ལྷུང་བ་བཅས་ཀྱི་མཐའ་བཞིའི་འཆིང་བ་ལས་འདས་པར་མ་གྱུར་པས། དཔལ་ལྡན་ཤངས་པའི་རིང་ལུགས་འདི་ཉིད་ལ་ཐོག་མར་སློབ་དཔོན་གྱི་ངག་དག་པ། སློབ་མའི་རྒྱུད་དག་པ། བཤད་བྱའི་ཆོས་དག་པ་བཅས་དག་པ་གསུམ་གྱིས་སྒོ་ནས་གདམས་ངག་སྤེལ་བའི་ཁར། མ་མཁའ་འགྲོའི་བྱིན་རླབས་དང་། ཕ་བླ་མའི་ཐུགས་རྗེ། ཡི་དམ་གྱི་དངོས་གྲུབ། ཆོས་སྐྱོང་གི་འཕྲིན་ལས་སོགས་ལ་བརྟེན་པས་བསྟན་པའི་ཉིན་བྱེད་རྒྱས་པར་མཛད་ཡོད་ལ། གདམས་ངག་དེ་དག་ལ་བརྟེན་ནས་སྐལ་ལྡན་གྱི་སྐྱེས་བུ་ཇི་སྙེད་ཅིག་ཟུང་འཇུག་གི་རྒྱལ་སར་གཤེགས་པ་ལོ་རྒྱུས་ཀྱི་དོན་དངོས་ཡིན་པས། ལུང་རིག་རྣམ་དཔྱོད་དང་ལྡན་པའི་སྐྱེ་བོ་རྣམས་ཡིད་གཉིས་ཀྱི་གནས་སུ་ལྷུང་ག་ལ་སྲིད། འོན་ཀྱང་མཚར་སྡུག་འོད་སྟོང་འབར་བའི་ཁ་སང་གི་ལོ་རྒྱུས་དེ་དག་ངེད་ཅག་གི་དྲན་པའི་ཁྲོད་དུ་ཡལ་ལ་ཉེ་བས། སླར་མི་ཡུལ་ཁམས་སུ་འདས་ལོག་བྱེད་པའི་སྐལ་པ་ནི་རུས་སྦལ་གྱི་སྤུ་ལྟར་ཡིན།
ང་ཚོས་ཤངས་པ་བཀའ་བརྒྱུད་ཀྱི་ཆགས་གནས་འཇིག་སྟོང་གི་ལས་དབང་ལ་བསམ་གཞིགས་ཤིག་བྱེད་སྐབས། བྱིན་རླབས་ཀྱི་མཚན་ཁ་འབར་བའི་གདམས་ངག་གི་རིན་ཐང་ཚོར་ཐུབ་ལ། ཐོས་ཚད་ཉམས་ལེན་གྱི་མཐིལ་དུ་བཟུང་བའི་ཆོས་བརྒྱུད་གཅིག་གི་གསོན་ཤུགས་རྟོགས་ཐུབ། འོན་ཀྱང་ཚོགས་པའི་མཐར་ཐུག་ཁྲི་ཚོ་བརྒྱད་ཀྱི་ཉམས་སྣང་དང་། གདན་སའི་གཙོ་བོ་ཞོང་ཞོང་དགེ་འདུན་བཅུ་ལ་ཐུག་པའི་ཡ་ང་བའི་གནས་བབས་དབར་གནམ་ས་ལྟ་བུའི་ཧེ་བག་ཆོད་པས། གལ་ཏེ་མཁས་གྲུབ་ཁྱུང་པོ་སླར་མི་ཡུལ་དུ་བྱོན་ཚེ་འདས་ཟིན་གྱི་གྲུབ་པའི་རྣམ་ཐར་ལ་སྔར་བཞིན་ཉམས་དགའ་བའི་བསྟོད་མགུར་གྱེར་སྲིད་ཀྱང་། ད་ལྟའི་འཆི་གསོན་གྱི་ལས་དབང་གཟིགས་ཚེ་སྤྱན་ཆབ་ཀྱི་རྒྱ་མཚོ་འཁྱིལ་ཡང་སྲིད། དེས་ན་ལོ་རྒྱུས་ཀྱི་མཚར་སྡུག་ཁོ་ནར་ཡིད་སེམས་ཀྱི་དབང་པོ་ཕྱོགས་པའི་ཁོ་བོ་ལྟ་བུར་ཆ་མཚོན་ན། ངོ་མཚར་གྱི་རིག་གནས་དེ་དག་ལས་ཁྱད་པར་དུ་མཁའ་འགྲོ་ནི་གུའི་གདམས་ངག་དང༌། སུ་ཁ་སིདྡྷིའི་ཐུགས་རྗེ། རྡོ་རྗེ་གདན་པའི་འདུལ་ཁྲིམས། མངའ་བདག་མེ་ཏྲིའི་ལྟ་བ། མཁས་གྲུབ་ཁྱུང་པོའི་དཀའ་སྤྱད་སོགས་ནི་དེ་བས་ཀྱང་ཡལ་བར་མི་སྤྲོ་བས། ཕྱག་ཆེན་པ་ཚོའི་ཆོས་སྐད་དུ་མ་འོངས་པའི་སྔོན་མི་བསུ་ཞེས་གསུངས་ཀྱང༌། ཁོ་བོས་ནི་ཤངས་པ་བཀའ་བརྒྱུད་ཀྱི་མ་འོངས་པའི་བདེ་དྲོད་འབར་བའི་ལམ་བུ་ཞིག་འཚོལ་ཕྱིར་རང་ཉིད་ཀྱི་བསམ་གཞིག་ཕྲན་ཙམ་ཞིག་ཞིང་བར་བྱ་རྒྱུ་སྟེ།
II.6.6.1
གཅིག །དབང་ལུང་ཁྲིད་གསུམ་གྱི་རྒྱུན་ལྷག་མ་མ་ཉམས་པ་བྱ་རྒྱུ།
སྙན་བརྒྱུད་ཀྱི་གདམས་པ་གཙོ་བོར་བྱེད་པའི་ཆོས་བརྒྱུད་གཅིག་གི་གདམས་ངག་ཕལ་མོ་ཆེ་བླ་མ་ཡི་དམ་གྱི་བཀའ་རྒྱའི་སྒྲོག་གིས་བཅིངས་པས། དེ་དག་ཉམས་སུ་ལེན་མཁན་ལ་དབང་ལུང་ཁྲིད་གསུམ་གྱི་རིམ་པ་ངེས་པར་ཚང་དགོས་པ་ཡིན་ཏེ། ཟབ་གསང་གི་གདམས་པ་དེ་དག་མི་ངན་གྱི་ལག་ཏུ་ཤོར་ན་ཁམས་གསུམ་ཐམས་ཅད་ཕུང་བར་བྱེད་པས། ཤངས་པ་བཀའ་བརྒྱུད་ཀྱི་དགོན་གནས་དང་སྒྲུབ་སྡེའི་བླ་སློབ་རྣམས་ཀྱིས་གཙོ་བོར་མཛད་པའི་བརྒྱུད་འཛིན་རྣམས་ཀྱིས་རང་རྐང་ཚུགས་པའི་གདམས་པ་རྣམས་དང་། ཤངས་པའི་ལོ་རྒྱུས་རིག་གནས་སོགས་ལའང་ཐོས་བསམ་སློབ་གཉེར་འབད་པས་གནང་སྟེ་དེ་དག་གི་ཚིག་རིས་ཙམ་མ་ཟད། ལྷག་པར་དོན་གྱི་སྙིང་པོ་སྒྲུབ་པའི་ལག་ལེན་ཐོག་ཏུ་ཅུང་ཟད་སྐྱེལ་བར་ནུས་ན། ད་གཟོད་སྙིང་པོ་དོན་གྱི་བརྒྱུད་པའི་གདམས་ངག་ལྷག་མ་དེ་རྣམས་ཀྱི་ཚེ་བསྲིང་ཐུབ་ལ། གདམས་ངག་ཅིག་གི་མཐར་ཐུག་རིན་ཐང་སྟེ་འགྲོ་བ་མིའི་ནང་སེམས་ཀྱི་མྱོང་རྟོགས་གོང་འཕེལ་དང་བསམ་སྤྱོད་ཡར་ཐོན་ལ་སྨན་པའི་གསོས་སུ་འགྱུར་སྲིད། དེས་ན་ཤངས་ཆོས་བརྒྱུད་འཛིན་གྱི་ཁུར་བཞེས་པའི་བླ་སློབ་ཀུན་གྱིས་རང་ཉིད་ལ་ཐོབ་པའི་གདམས་ངག་ཕྲ་མོ་ཡན་ཆད་ལ་ཡང་ལུས་ཀྱི་སྙིང་ཁ་དང་མིག་གི་འབྲས་བུ་ཇི་བཞིན་གཅེས་སྦྲས་མཛད་དེ། ཁ་ཐོར་དུ་གནས་པའི་གདམས་ངག་རྣམས་ཀྱི་དཔྱད་ཡིག་ཁུངས་བཙན་རྣམས་དབང་ལུང་ཁྲིད་དང་བཅས་པ་གསན་བཞེས་དང་སླར་གསོ་གནང་རྒྱུ་ནི། ཇི་སྐད་དུ། སྡོམ་གསུམ་རབ་དབྱེ་ལས་གཏེར་ནས་བྱུང་བའི་སྒྲིགས་བམ་དང་། །གཞན་ནས་བརྐུས་པའི་ཆོས་ལུགས་དང་། །བརྩམས་ཆོས་དང་ནི་རྨི་ལམ་ཆོས། །བློ་བཟུང་མ་ཡི་ཆོས་ལུགས་ལ། །རྡོ་རྗེ་འཆང་ལ་བརྒྱུད་པ་སྙེག །དེ་ལའང་གཞན་དག་ལུང་ལེན་པ་སོགས་ཀྱི་རིགས་མཐའ་གཅིག་ཏུ་བཀག་སྡོམ་བྱས་ཏེ་ཤངས་པ་བཀའ་བརྒྱུད་ཀྱི་བསྟན་པ་རིན་པོ་ཆེ་བསྲེ་བསླད་ཀྱི་དྲི་མས་མ་སྦགས་པར་མུ་མཐུད་གནས་ཐུབ་མིན་གྱི་གནད་འགག་གལ་ཆེན་ཞིག་ཡིན།
II.6.6.2
གཉིས། ཤངས་ཆོས་འཛིན་པའི་བརྒྱུད་པ་ཚད་ལྡན་དུ་གཏོང་རྒྱུ།
མིག་སྔར་ཤངས་པ་བཀའ་བརྒྱུད་ཀྱི་ཆོས་བརྒྱུད་དར་སྤེལ་གཏོང་རྒྱུའི་ལོ་རྒྱུས་ཀྱི་འགན་ཁྲི་འདི་མི་ཉུང་ཤས་ཁོ་ནའི་ཕྲག་པར་བབས་ཤིང་། བརྒྱུད་པའི་ལུང་གིས་བྱིན་གྱིས་བརླབས་པའི་ཚད་ལྡན་གྱི་གདམས་པའི་བདག་པོ་སྟེ་ནང་སེམས་སུ་རྟོགས་པའི་ཉི་མ་ཤར། མ་རིག་པའི་མུན་པ་སངས། གཟུང་འཛིན་གྱི་སྒྲོག་གྲོལ། བྱམས་དང་སྙིང་རྗེའི་མཐུ་རྒྱས་པའི་སློབ་དཔོན་རྣམས་ཀྱིས་ཐོག་མར་ངུར་སྨྲིག་རྒྱལ་མཚན་འཛིན་པའི་ཚུལ་སྤྱོད་ཀྱིས་ལྟ་སྒོམ་གྱི་དོན་ཕྱིན་ཅི་མ་ལོག་པར་ཉམས་སུ་བཞེས་པ་དང་། བརྒྱུད་པའི་རྣམ་ཐར་གཙང་མས་དཔལ་ལྡན་ཤངས་པ་བཀའ་བརྒྱུད་ཀྱི་དུས་རབས་ཉེར་གཅིག་པའི་ངོ་མཚར་གྱི་གཟུགས་བརྙན་གཏོད་དེ། ཤུལ་དུ་ལུས་པའི་གདམས་ངག་ཡོད་དོ་ཅོག་སྐལ་ལྡན་གྱི་གདུལ་བྱ་རྣམས་ལ་སྐབས་བསྟུན་བརྒྱུད་སྤེལ་གནང་བ་ལས། མཁས་གྲུབ་ཁྱུང་པོའི་སྐུ་སྲོག་དང་བརྗེས་པའི་གདམས་པ་དེ་དག་གསེར་དངུལ་ལོངས་སྤྱོད་ཁོ་ནའི་དོན་དུ་བཙོངས་ཚེ། མི་ལ་ལས་ཆེས་མཆོག་འགྱུར་གྱི་གདམས་ངག་དེ་དག་ལ་ཐོན་རྫས་ལྟ་བུའི་འདུ་ཤེས་འཛིན་སྲིད་ཅིང་། མཐར་བསྟན་པ་རིན་པོ་ཆེ་དཀྲུག་པར་འགྱུར་བ་སྟེ། མཛོད་རྩ་བ་ལས། སྟོན་པ་འཇིག་རྟེན་མིག་ནི་ཟུམ་གྱུར་ཅིང་། །དབང་གྱུར་སྐྱེ་བོ་ཕ་ལ་ཆེར་ཟད་པ་ན། །དེ་ཉིད་མ་མཐོང་རང་དགར་གྱུར་པ་ཡི། །ངན་རྟོགས་རྣམས་ཀྱིས་བསྟན་པ་འདི་དཀྲུགས་སོ། ཞེས་འཁོད་པ་ལྟར་རོ། །དཔེར་ན་ཉེ་བའི་ཆར་ཤངས་ཆོས་གདོང་ལྤགས་སུ་གྱོན་པའི་བླ་མ་རིག་འཛིན་དབང་རྒྱལ་ཏེ་མིང་ངོ་མར་ཇོ་ཧུང་ཧྲན་ཞེས་འབོད་པའི་བྱོལ་སོང་ཞིག་གིས་རང་ཉིད་ཤངས་པ་བཀའ་བརྒྱུད་ཀྱི་བླ་རབས་སོ་བདུན་པ་ཡིན་ཚུལ་དང་། མཐུ་དང་ནུས་པ་ངོ་མཚར་ཅན་ཡོད་ཚུལ་སོགས་ཀྱི་ཟབ་རྫུ་གྲངས་མེད་སྨྲས་ནས་སི་ཁྲོན་དང་། ཧུ་ནན། ཀོང་ཏུང་སོགས་ཀྱི་ས་ཆ་འགའ་ཤས་སུ་མི་མང་པོའི་དངོས་རྫས་བསླུ་ཁྲིད་བྱེད་པ། ལྷག་པར་དུ་མཁའ་འགྲོ་མ་ཉེར་བཞི་འཚོལ་དགོས་པ་སོགས་ལ་ཁ་གཡར་ནས་སྔགས་བླ་མེད་ཀྱི་ཉམས་ལེན་བྱིས་པའི་རྩེད་ཆས་ལྟ་བུ་ཞིག་ཏུ་བརྩིས་ཏེ་རང་འདོད་སྒྲུབ་ཕྱིར་ཆོས་དང་འཇིག་རྟེན་གཉིས་ཀ་ལས་འགལ་བའི་ལས་ངན་མང་དུ་སྤེལ་སྟབས། ཁྲམ་པ་ཡི་དམ་ལྷ་བཞིན་མཆོད་མཁན་གྱི་རྨོངས་པ་འགའི་དྲོ་སྐྱིད་ལྡན་པའི་ཁྱིམ་ཚང་ཡང་ཁ་ཐོར་བཏང་འདུག་པ་དེ་ནི་ཆོས་ཀྱིས་ངན་སོང་སྒྲུབ་པའི་ཕུང་འདྲེའི་ལས་ཁོ་ན་ཡིན། དེར་བརྟེན་ཆོས་རྗེ་ས་པཎ་གྱིས་བླ་མ་ངན་ལ་དད་པ་དང༌། ཆོས་ངན་པ་ལ་མོས་པ་དང་། བསྒོམ་ངན་པ་ལ་དགའ་བ་ནི། །མ་དག་པ་ཡི་དད་པ་ཡིན་ཞེས་གསུངས་པ་བཞིན་ཤེས་པ་བྱས་ཏེ་སླན་ཆད་ཀྱང་སྙན་བརྒྱུད་བཞི་དང་ལྡན་པ་སྟེ་ཆོས་ལུང་དང་ལྡན་པ། ལུང་མན་ངག་དང་ལྡན་པ། མན་ངག་བརྒྱུད་པ་དང་ལྡན་པ། བརྒྱུད་པ་བྱིན་རླབས་དང་ལྡན་པ་བཅས་དགོས་ངེས་ཡིན་པ་ལས། བཤད་བྱའི་ཆོས་མ་ཤེས་པ་དང་མན་ངག་མེད་པ། བླ་མའི་གསུང་དང་ལུང་མེད་པ། བཤད་ཆོས་ཀྱི་སྐྱོན་བརྗོད་པ། རྙེད་བཀུར་ཆེད་དུ་བཤད་པ་སོགས་ཆོས་འཆད་སྐབས་ཀྱི་སྐྱོན་ལྔ་དང་ལྡན་པའི་བླ་མ་བསྟེན་མི་རུང་བ་དང་། བླ་མ་ལ་བརྟག་དཔྱད་མ་བྱས་ན་དུག་འཐུང་བ་འདྲ་བས་བཤེས་གཉེན་བསྟེན་ཚུལ་ཚུལ་བཞིན་དུ་བསླབ་དགོས། དེ་རྗེས་བླ་མ་གང་རུང་གིས་བསྟན་པའི་ཆོས་རྣམས་ཀྱང་དེས་ན་རྨི་ལམ་ཆོས་ལུགས་དང༌། །ཞལ་གཟིགས་པ་ཡི་ཡི་དམ་དང་། །ལུང་བསྟན་མཛད་པའི་སངས་རྒྱས་དང་། །བླ་མའི་གསུང་སྒྲོས་ལ་སོགས་པ། །མ་དཔྱད་པར་ནི་གཏམ་ཆོལ་དུ། ཚད་མ་ཡིན་ཞེས་གཟུང་མི་བྱ། །འདི་འདྲ་བདུད་ཀྱི་བྱིན་རླབས་ལས། འབྱུང་བ་སྲིད་པར་རྒྱལ་བས་གསུངས་ཞེས་པའི་ཞལ་གདམས་སྙིང་དབུས་སུ་བཅངས་ནས་དུས་གཏན་དུ་གོང་གི་སྐྱོ་གར་འདི་རིགས་ལ་དོགས་ཟོན་དང་ཐུན་མོང་ཐོག་ངོ་རྒོལ་གྱིས་ཤིག
།སྒྲུབ་བརྒྱུད་ཀྱི་གདམས་པ་ཉམས་སུ་ལེན་མཁན་གྱི་སློབ་མ་རྣམས་ཀྱིས་ཀྱང༌། རང་ཉིད་བླ་མའི་མིང་ཞིག་ཐོགས་དགོས་སྙམ་པ་དང་། དེ་ཐོགས་ན་དཀོར་ཟས་ཕོངས་མེད་ཅིག་འབྱུང་སྙམ་པ་དང་། གྲོགས་མཆེད་གཞན་རྣམས་ལས་ལྷག་པའམ། བླ་མ་གཞན་དང་འདྲ་བ་ཞིག་བྱེད་དགོས་སྙམ་པ་སོགས་གཉེར་སེམས་ལོག་པ་གཏན་ནས་མི་བྱ་ཞེས་གསུངས་པ་ལྟར་འདུན་སེམས་ཀྱི་སྤང་བླང་ལོག་ན་འདི་ཕྱིའི་འདུན་མ་གཏན་ཉེས་སུ་འགྲོ་བས་དེ་ལྟར་རྩ་བ་ནས་མི་བྱ་བ་གལ་ཆེ། ཡང་འབྲི་གུང་སྐྱོབ་པ་རིན་པོ་ཆེས་ཆོས་དངོས་གཞི་ལས་ཀྱང་སྔོན་འགྲོ་ཟབ་ཅེས་པ་གསུངས་པ་ལྟར། ཐོག་མར་མདོ་ལུགས་ཀྱི་སློབ་གཉེར་དང་བྱང་སེམས་ཀྱི་བློ་སྦྱོང་སོགས་ངེས་པར་སྔོན་དུ་འགྲོ་དགོས་པ་ལས། མི་ཡིན་ཚད་དང་ནོར་ཡོད་ཚད་ཟབ་མོ་རྡོ་རྗེ་ཐེག་པའི་སྣོད་ལྡན་དུ་འགྱུར་ག་ལ་སྲིད། དེས་ན་ཕྱིས་འབྱུང་གི་ལམ་བུར་ཤངས་པའི་བརྒྱུད་པ་འཛིན་སྐྱོང་སྤེལ་གནང་རྒྱུ་ཡང་གྲངས་འབོར་ཁོ་ན་མ་ཡིན་པར་བླ་སློབ་ཀྱི་སྤུས་ཚད་གོང་མཐོར་གཏོང་ཐུབ་ན། འགྲོ་བ་མིའི་སྤྱི་ཚོགས་འཆམ་མཐུན་དང་ནང་སེམས་ཀྱི་གོ་རྟོགས་གོང་དུ་འཕོ་བར་མཁོ་བའི་ཤངས་པ་བཀའ་བརྒྱུད་པའི་རིག་གནས་ཀྱི་སྙིང་བཅུད་རྣམས་འཛམ་གླིང་རིག་གནས་ཀྱི་གར་སྟེགས་ཐོག་མུ་མཐུད་གནས་སྲིད་སྙམ།
མདོར་ན། སྒྲིབ་གཉིས་ཀྱི་མུན་པས་ཡོངས་སུ་འཐིབ་པའི་རྨོངས་བརྟུལ་ཁོ་བོར་མངོན་ཤེས་ཀྱི་ཡོན་ཏན་དྲི་མ་ཙམ་ཡང་མི་ལྡན་རུང་། དུ་བ་ལས་མེ་རྟོགས་པའི་རྗེས་དཔག་གི་རིག་པར་བརྟེན་ནས་ཤངས་པ་བཀའ་བརྒྱུད་པའི་སྔ་རབས་ཀྱི་ལོ་རྒྱུས་ཞིང་ཞོར། ཕྱིས་འབྱུང་གི་འཕེལ་ཕྱོགས་ལ་བསམ་གཞིག་བྱ་ཁུལ་གྱིས་ཤངས་པའི་ངོ་མཚར་གྱི་རིག་གནས་རྣམས་ངེད་རྗེས་རབས་པ་ཚོའི་ལོངས་སུ་སྤྱོད་ཡུལ་དུ་གྱུར་ན་ཅི་མ་རུང་སྙམ་པའི་ཀུན་སློང་གིས་ལེགས་པར་བསྐུལ་ཏེ། ཤ་ཚ་བའི་གཏམ་འགའ་ཞིག་བརྗོད་པར་ཐལ་སོང་བས། སངས་རྒྱས་ལ་ཀ་ཁའི་དཔེ་དང་བརྟག་དཔྱད་མ་བྱས་པའི་བབ་ཅོལ་དུ་སོང་ཚེ་སྙིམ་པ་སྤྱི་བོར་བཀོད་དེ་འཆགས་སོ།
།སྨྲས་པ། སྒྲུབ་པ་ལྷུར་བཞེས་རྣམ་ཐར་གཙོར་མཛད་འཆད་ཉན་སྲོག་གི་དབང་པོ་ཕྲ། །ཟབ་གསང་གདམས་ངག་བཀའ་རྒྱས་བཏབ་པས་བརྒྱུད་པའི་ཉག་ཐག་ཆད་ཉེ་ཡང་། །བློ་གྲོས་མཐའ་ཡས་རྒྱ་མཚོའི་སྡེ་ཡིས་བསྟན་པའི་མེ་རོ་སྨད་ནས་གསོས། །གསེར་ཆོས་རྣམ་ལྔའི་ཉིན་བྱེད་དབང་པོ་སླར་ཡང་ན་བུན་རུམ་ལས་བཞེངས། །ཞེས་བར་སྐབས་ཀྱི་ངལ་གསོའི་ཚིགས་སུ་བཅད་པའོ།

།མཇུག་བྱང་།
མི་རྟག་རླུང་ཤུགས་བཙན་པོས་དགུང་སྔོན་དབྱིངས་སུ་འཕངས་པའི་དུས་ཀྱི་མདའ་མོ་དེས་ཡུད་ཙམ་ཞིག་ལ་བགྲང་བྱ་བཞི་ལྷག་སྣང་མེད་དུ་བསྒྱུར་ཟིན། དེ་ཡང་ཐོག་མར་ཤངས་གཞུང་རྣམ་རྒྱལ་གླིང་དུ་ལྟེ་ཁྲག་འཕོས་པ་ཙམ་ལས། ཤངས་པའི་ངོ་མཚར་གྱི་ཆོས་ལུགས་དང་ལོ་རྒྱུས་རིག་གནས་སོགས་གང་ས་ཅི་ཐད་ལ་ཆ་རྒྱུས་ཟེར་བ་ནི་ཇི་ལྟར་ཉིན་སྐར་གྱི་རྗེས་སུ་འགྲོ་བ་བཞིན་ཏིལ་འབྲུ་ཙམ་ཡང་མེད་རུང་། ཆུང་སྦར་མོ་གང་ནས་ཤངས་ཆུ་སྔོན་མོས་ཚེ་སྲོག་གི་བཞུར་རྒྱུན་གྱི་འཕར་རྩ་དང་། ལང་ཚོའི་དྲོད་ཁོལ་གྱི་ཟུངས་ཁྲག་བསྩལ་བ་སྙིང་ཁའི་ཕོ་བྲང་དུ་བཅངས་ཏེ། ཆོས་མེད་ཀྱི་བླུན་པོ་དང་། ནོར་མེད་ཀྱི་སྤྲང་རྒན་ཁོ་བོ་ལྟ་བུས་དེ་ལྟའི་ཆོས་ཀྱི་བྱུང་བ་ཞིག་འབྲི་བར་བརྩམ་པ་ཡང་བཞད་གད་ཀྱི་རྒྱུ་ཁོ་ནར་ངེས། འོན་ཏེ་ཕ་མེས་དམ་པའི་རྔུལ་ཆུ་འབུམ་ཕྲག་ལས་བསྐྲུན་པའི་ཟབ་ཡངས་ཤེས་རིག་གི་དགའ་ཚལ་འདིར། སེམས་རྒྱུད་འདུལ་བར་སྨན་པའི་རྩི་བཅུད་ཅུང་ཙམ་ཞིག་ལེན་ཕྱིར། ཤངས་ཆུའི་ཕང་བ་རུ་འཚར་སྐྱེས་ཀྱི་ལང་ཚོ་བཞད་རྐྱེན། ཤངས་པ་བཀའ་བརྒྱུད་ཀྱི་བྱུང་འཕེལ་ལོ་རྒྱུས་བརྗོད་སྙིང་དུ་བྱས་ཏེ་ཆོས་འབྱུང་ལྡིགས་བམ་ཞིག་གི་གསོལ་སྟོན་བཤམས།
།དེ་ཡང་ཆོས་འབྱུང་འདིར་གངས་ཅན་གྲུབ་པའི་དབང་ཕྱུག་མཁས་གྲུབ་ཁྱུང་པོ་རྣལ་འབྱོར་གྱིས་སྐུ་ཚེ་གང་པོར་རིན་ཆེན་གསེར་གྱི་ཁུར་པོ་དང་ལུས་སྲོག་བསྡོས་པའི་དཀའ་སྤྱད་ཀྱིས། ལམ་བགྲོད་པར་དཀའ་བའི་འཕགས་བལ་གྱི་ཡུལ་གྲུར་ལན་གྲངས་བདུན་གྱི་བར་ཕེབས་ནས་འཕགས་ཡུལ་གྱི་མཁས་གྲུབ་བརྒྱ་དང་ལྔ་བཅུ་བསྟེན་པ་དང༌། ལྷག་པར་དུ་ཁྱད་འཕགས་ཀྱི་མཁའ་འགྲོ་ནི་དྷི་རྣམ་གཉིས་ལས་གསེར་ཆོས་སྣ་ལྔས་ཐོག་དྲངས་པའི་མདོ་སྔགས་ཆོས་ཀྱི་གདམས་པ་རི་བོའི་གཏོས་དང་མཉམ་པ་ཐུགས་ཀྱི་བུམ་བཟང་དུ་བསྐྱིལ་བ། ཞེ་བཅད་དྲག་པོས་གསན་བཞེས་དང་ཉམས་ལེན་དཔྱིས་ཕྱིན་མཛད་མཐར་མང་དུ་ཐོས་པ་ལུང་གི་ཡོན་ཏན་དང་། ཚུལ་བཞིན་སྒྲུབ་པ་རྟོགས་པའི་ཡོན་ཏན་གྱི་རྩལ་ཆེན་ཡོངས་སུ་རྫོགས་ནས་ཐོགས་པ་མེད་པའི་མངོན་ཤེས་དང་། འགྱུར་བ་མེད་པའི་རྟོགས་པ། གཡེལ་བ་མེད་པའི་ཐུགས་རྗེ། དོན་དང་ལྡན་པའི་འཕྲིན་ལས། དྲི་མ་མེད་པའི་རྣམ་ཐར་ཁྱད་པར་ཅན་དང་ལྡན་པའི་སྒོ་ནས་སྒྲུབ་བརྒྱུད་ཤིང་རྟ་བརྒྱད་ཀྱི་ལྔ་པར་བགྲངས་པའི་དཔལ་ལྡན་ཤངས་པ་བཀའ་བརྒྱུད་ཅེས་ས་གསུམ་ཁྱོན་ལ་ཡོངས་སུ་གྲགས་པའི་བོད་དར་ནང་བསྟན་ཆོས་ལུགས་ཀྱི་བཀའ་སྲོལ་ཐུན་མོང་མ་ཡིན་པ་ཞིག་གསར་དུ་ཕྱེས། དེས་བོད་བརྒྱུད་ནང་བསྟན་གྱི་མདོ་སྔགས་རིག་གཞུང་སྤྱི་དང་། ཡང་སྒོས་བསྟན་པ་ཕྱི་དར་གྱི་དུས་སུ་གསང་སྔགས་ཀྱི་གཞུང་ལུགས་སྔར་བས་འཐུས་ཚང་དང་ཚུལ་མིན་ལྟ་སྤྱོད་དག་ཐེར་མཛད་པ་མ་ཟད། སངས་རྒྱས་ཀྱི་བསྟན་པ་རྟགས་ཙམ་འཛིན་པའི་རྩོད་ལྡན་སྙིགས་མ་ལྔ་བདོའི་དུས་འདིར་སྒྲུབ་བརྒྱུད་བསྟན་པའི་བ་དན་དགུང་སྔོན་གྱི་དབྱིངས་སུ་མཐོན་པོར་བསྒྲེངས་བ་ལ་སྐྱེས་མཆོག་མར་པ་ལོ་ཙཱ་བ་སོགས་དང་འདྲ་བར་གཞན་དྲིང་མི་འཇོག་པའི་ཕྱག་རྗེས་འཇོག་གནང་མཛད་ཡོད་པ་ནི་གཟུར་གནས་སྐྱེ་བོ་ཀུན་གྱིས་མགྲིན་གཅིག་ཏུ་ཞལ་གྱིས་བཞེས་པ་ལགས་སོ།
།དེ་ནས་མཁས་གྲུབ་ཁྱུང་པོའི་རྗེས་རབས་ཤངས་པའི་རིན་ཆེན་བདུན་བརྒྱུད་སྔ་ཕྱི་གཉིས་དང་། མཁས་གྲུབ་རྣམ་གསུམ་སོགས་ཤངས་པ་བཀའ་བརྒྱུད་ཀྱི་བསྟན་པ་སྐྱོང་བར་མཛད་པ་བླ་ལྷག་ཏུ་ཆེ་བའི་གྲུབ་ཐོབ་བྱང་སེམས་ས་ཆེན་པོའི་རྡུལ་དང་མཉམ་པ་བྱོན་ནས། ཉན་ཐོས་ཀྱི་ངེས་འབྱུང་དང་། ཐེག་ཆེན་གྱི་སེམས་བསྐྱེད། གསང་སྔགས་ཀྱི་དམ་ཚིག་རྣམས་གཞིར་བཞག་ཅིང་། སྐལ་ལྡན་གྱི་གདུལ་བྱ་རྣམས་གདམས་ངག་གི་བདུད་རྩིས་ཚིམས་པར་མཛད། ལྷག་པར་སྒྲུབ་བརྒྱུད་བསྟན་པ་འཛིན་པའི་ཆོས་བརྒྱུད་ཅིག་གིས་ངོས་ནས། ཁོང་རྣམ་པས་རང་ཉིད་ཀྱི་རྟོགས་པའི་བྲེ་ཁ་ཁེངས། ཡོན་ཏན་གྱི་རྩལ་ཤུགས་རྫོགས། འཕྲིན་ལས་ཀྱི་རྒྱ་མཚོ་བརྡོལ་ཏེ་དང་པོར་ཡི་དམ་ལྷ་ཡི་ཞལ་གཟིགས་པ་དང་། བར་དུ་མཁའ་འགྲོའི་ལུང་བསྟན་ཐོབ་པ། ཐ་མར་གནོད་སྦྱིན་བྲན་དུ་འཁོལ་ནུས་པ་སོགས་ཀྱི་མཛད་པ་སྟོང་གསུམ་གྱི་སྟོང་ཆེན་པོར་མི་ཤོང་ཡང་། རྒུད་པ་ཀུན་གྱི་གཙོ་བོར་གྱུར་པའི་བདག་འཛིན་གྱི་དྲི་མས་རང་སེམས་སྐད་ཅིག་ཙམ་ཡང་མ་བསླད་པར། བོད་ཡུལ་མཐའ་གྲུ་ཀུན་ཏུ་ཉོན་མོངས་དུག་གསུམ་གྱི་ནད་བརྒྱས་མནར་བའི་ཉམ་ཐག་གི་གདུལ་བྱ་ཁྲི་ཕྲག་དུ་མར་དམ་པའི་ཆོས་ཀྱི་གནང་སྦྱིན་དཔེ་མཁྱུད་མེད་པར་བསྩལ་ནས་ཐར་པའི་ས་ལ་འགོད་པ་དང་། ཆོས་ཉིད་བདེན་པའི་དོན་བསྟན་ནས་བགྲང་བྱ་དུ་མའི་རིང་མི་རིགས་ཀྱི་བསམ་པའི་དཔལ་ཡོན་བླ་ནས་བླར་མཐོར་འདེགས་གཏོང་བའི་ཁྱད་འཕགས་མཛད་འཕྲིན་འབའ་ཞིག་བསྐྱངས་སྟབས། མཁས་གྲུབ་ཁྱུང་པོ་སྐུ་འདས་རྗེས་ཀྱི་ལོ་ངོ་སུམ་བརྒྱ་ལྷག་ཙམ་གྱི་རིང་ལའང་ཤངས་ཆོས་ཀྱི་ལང་ཚོ་ཤིན་ཏུ་དར།
འོན་ཏེ་སྤྱི་ལོའི་དུས་རབས་བཅུ་བཞི་པའི་སྨད་ཙམ་ནས་བཟུང་ཤངས་པའི་ཆོས་བརྒྱུད་འདི་ལ་ཕྱི་ནང་གི་འཇིགས་པ་སྣ་ཚོགས་བྱུང་བས། བར་སྐབས་ཤིག་རིང་བོད་ཀྱི་ནང་བསྟན་ཆོས་ལུགས་སྤྱི་དང་འདྲ་བར་ཉམས་རྒུད་ཅུང་ཟད་དུ་སོང་ཡང་། འོད་སྟོང་འབར་བའི་ཤངས་པའི་རིག་གནས་ཡོད་ཚད་ཀྱི་སྲོག་གི་དབང་པོ་ཡེ་ནས་དགག་པ་མེད་པར་གནས་མུས་ཡིན་པའི་བདེན་དཔང་ཙམ་དུ་གྱུར་ཆེད། དུས་ངན་གྱི་རླུང་འཚུབ་ཇི་ལྟར་ཤུགས་ཆེ་ཡང་གསེར་འོད་འཕྲོ་བའི་ཤངས་པ་བཀའ་བརྒྱུད་ཀྱི་རིག་གནས་འདི་བཞིན་ནམ་ཡང་རྩ་སྟོངས་སུ་སོང་ན་མཁས་གྲུབ་ཁྱུང་པོ་སོགས་ལས་བརྒྱུད་པའི་ཤངས་པའི་སྐྱེས་ཆེན་རིམ་བྱོན་གྱི་སྐུ་ཁྲག་དང་རྔུལ་ཆུ་ལས་གྲུབ་པའི་ལྷག་བསམ་དག་ཀྱང་ཆུད་ཟོས་སུ་འགྲོ་བར་དོགས་ཏེ། ཁོ་བོས་རང་ནུས་ཅི་ལྕོགས་ཀྱིས་ཁུངས་བཙན་དཔྱད་ཡིག་མི་ཉུང་བ་ཞིག་རྒྱབ་རྟེན་དུ་བཅོལ་ནས་གཞུང་འདིའི་ལོ་རྒྱུས་ཀྱི་རིན་ཐང་དང་། དཔྱད་གཞིའི་རིན་ཐང་སོགས་ཅུང་ཟད་ལྷིང་ཁུལ་བྱས་ཐོག །གོམ་གང་མདུན་སྤོས་ཀྱིས་ཤངས་པ་བཀའ་བརྒྱུད་པའི་རིང་ལུགས་འདི་ཉིད་དུས་ད་ལྟའི་ཚེ་ནའང་སྲོག་རྒྱུན་མ་ཆད་པར་གནས་མུས་ཡིན་པ་དངོས་ར་སྤྲོད་སླད་དུ་དམིགས་པ་ནི་ཁོ་བོའི་དཔེ་དེབ་འདི་རྩོམ་འབྲི་བྱེད་པའི་སྔ་བར་ཕྱི་གསུམ་གྱི་འདུན་པ་ཡིན་ལ། མཐར་ཐུག་གི་དམིགས་རེ་ཡང་དེ་ལས་མ་འདས་སོ།
།ལར་འཇིག་རྟེན་ཁ་རྒྱུན་དུ་གཟར་པོའི་བྲག་ལ་མ་འཛེགས་ན། བདེ་མོའི་ཐང་དུ་སླེབས་མི་སྲིད་ཅེས་པའི་དཔེ་ལྟར་དཀའ་བ་རྣམ་བརྒྱད་ཀྱིས་རབ་ཏུ་ཟིན་པའི་སྙིགས་མའི་དུས་འདིར་མཁས་གྲུབ་ཁྱུང་པོ་སོགས་ཤངས་པ་བཀའ་བརྒྱུད་པའི་ཟབ་མོའི་ཆོས་སྐོར་རམ་ཁྱད་དུ་འཕགས་པའི་རིག་གནས་དར་སྤེལ་མཛད་མཁན་གྱི་ངེས་པ་དོན་དང་ལྡན་པའི་སྐྱེས་མཆོག་རྣམ་པས་ཆོས་ལུགས་རིག་གནས་ཀྱི་བློས་བསླངས་ཤིག་བཞེངས་ཡོད་པ་དེ་ནི། ཁྲག་དང་རྔུལ་ཆུའི་ཐིགས་པ་ཁོ་ནས་གྲུབ་པ་འབའ་ཞིག་ཡིན་པ་ལས། ལྷན་སྐྱེས་ཀྱི་རྫུ་འཕྲུལ་མཐུ་ཡིས་བཞེངས་པ་ནི་ག་ལ་ཡིན། དེས་ན་ཁོ་བོས་བགྲང་བྱ་དུ་མར་མིག་ཆུའི་དོག་པ་དང་འདྲེས་ནས་མདོ་དབུས་ཁམས་གསུམ་གྱི་དགོན་གནས་རི་ཁྲོད་དུ་མར་སྐྱེས་མཆོག་ཚོའི་ཞབས་རྗེས་ཀྱི་ཤུལ་དུ་བསྙེགས་ནས་ཚེ་སྲོག་གི་འཁོར་མཚམས་ཆད་མེད་པའི་ཤངས་ཆོས་ཀྱི་ལས་དབང་མདོ་ཙམ་འབྲི་ཁུལ་བགྱིས་པ་འདིས་གང་དང་སུ་ཞིག་ལ་ཕན་པའི་གསོས་སུ་གྱུར་མི་སྲིད་ཀྱང་། ཤངས་པའི་རིག་གནས་ཀྱིས་ཁོ་བོའི་སེམས་ཀྱི་ཞིང་སར་བྱི་དོར་མཛད་པ་ལས་བྱུང་བའི་གསེར་ཆོས་ཞིང་གི་ས་བོན་ཙམ་ཞིག་ལགས་པ་འདིས་ཀྱང་རྒྱལ་བའི་བསྟན་པ་རིན་པོ་ཆེ་སྤྱི་དང་། བྱེ་བྲག་དཔལ་ལྡན་ཤངས་པ་བཀའ་བརྒྱུད་ཀྱི་བསྟན་པའི་ལྗོན་བཟང་ཡུལ་དུས་གནས་སྐབས་ཐམས་ཅད་དུ་རྒྱས་ཤིང་། ཡུན་ནས་ཡུན་དུ་གནས་པའི་ཉེར་ལེན་དུ་གྱུར་ཅིག་གུ

།སྨྲས་པ། རྡོ་རྗེ་འཆང་ཆེན་མཁའ་འགྲོ་ཟུང་གིས་གདམས་ངག་བྱེ་བའི་གཏེར་ཁ་གཏད། །གྲུབ་ཐོབ་བྱང་སེམས་རིན་ཆེན་ཕྲེང་བས་ཟུང་འཇུག་ལམ་གྱི་དེད་དཔོན་མཛད། །སྙིགས་དུས་སྐྱེ་འགྲོའི་ཡིད་སེམས་སྨིན་པའི་རིན་བྲལ་གདམས་པའི་སྨན་མཆོག་འདི། །མི་ཡུལ་སྲིད་པའི་ཀློང་ཡངས་འདི་ལས་ནམ་ཡང་མི་ནུབ་རྟག་བརྟན་ཤོག།
།སྲོག་དང་དོ་བསྡོས་གདམས་ངག་ལྷག་མ་མཁའ་སྤྱོད་གནས་སུ་མ་གྱུར་ཕྱིར། །གཞུང་ལུགས་སྟོང་གི་ཉིང་བཅུད་བཏུས་ཏེ་ཡི་གེའི་ལམ་དུ་དྲངས་པའི་དགེས། །རྒྱལ་བསྟན་སྤྱི་དང་ཤངས་པའི་ལུགས་བཟང་ངོ་མཚར་འདབ་སྟོང་བཞད་པ་འདི། །བདེན་པའི་མཐུ་ཡི་གྲུ་ཆར་འཇོ་བས་ཡུལ་དུས་ཀུན་ཏུ་རྒྱས་གྱུར་ཅིག །ཅེས་པའི་སྨོན་ལམ་དྲི་མ་མེད་པས་མཚམས་སྦྱར་ཏེ་དཔལ་ལྡན་ཤངས་པ་བཀའ་བརྒྱུད་ཀྱི་ཆོས་འབྱུང་གསེར་ཆོས་ཞིང་གི་ས་བོན་ཞེས་བྱ་བ་འདི་ནི་དགེ་མིང་ཙམ་འཛིན་པ་རྡོ་རྗེ་ཚེ་དབང་དུ་འབོད་པས་སྤྱི་ལོ་2013ལོའི་ཆུ་སྟོད་ཟླ་བའི་དཀར་ཕྱོགས་སྟོང་པ་དང་པོར་སྔོན་མཉམ་མེད་ཤཱཀྱའི་རྒྱལ་པོས་བཀའ་དང་པོ་བདེན་བཞིའི་ཆོས་འཁོར་བསྐོར་བའི་བཀྲ་ཤིས་དགེ་བའི་ཉིན་མྱང་སྨད་ས་ཡི་ལྟེ་བ་གཞིས་རྩེ་མཐོ་རིམ་སློབ་འབྲིང་དང་པོའི་རང་ཤག་རིག་པའི་དགའ་ཚལ་དུ་མཇུག་རྫོགས་པར་བྲིས་པ་དགེའོ། །མངྒལཾ་བྷ་ཝནྟུ།།