Mgon po dbang gi rgyal po'i sgo nas 'jig rten pa'i dngos grub thams cad bsdu ba

From Shangpa Resource Center








Resource ID SCv11p274
Title mgon po dbang gi rgyal po'i sgo nas 'jig rten pa'i dngos grub thams cad bsdu ba
Topics White protector
Sub-Topics Various
Link BDRC W23922

༈ མགོན་པོ་དབང་གི་རྒྱལ་པོའི་སྒོ་ནས་འཇིག་རྟེན་པའི་དངོས་གྲུབ་ཐམས་ཅད་བསྡུ་བ་བཞུགས་སོ།།

༈ ༼ཝི༽ མགོན་པོ་དབང་གི་རྒྱལ་པོའི་སྒོ་ནས་འཇིག་རྟེན་པའི་དངོས་གྲུབ་ཐམས་ཅད་དབང་དུ་བསྡུ་བའི་མན་ངག་རྒྱུན་དུ་བྱ་བ་ནི། བཤགས་པ་ཡན་ཆད་གཏོར་ཆོག་གཞུང་བསྲངས་ནས། དེ་ནས་པདྨ་ཉི་མ་དང་ཚོགས་བདག་གི་སྟེང་དུ། ཧཱུྃ་དམར་པོ་ལས་རྡོ་རྗེ་གྲི་གུག་ཧཱུྃ་དམར་པོས་མཚན་པ་ལས་འོད་འཕྲོ་འདུས་ཡོངས་སུ་གྱུར་པ་ལས་རང་ཉིད་ཡེ་ཤེས་ཀྱི་མགོན་པོ་སྐུ་མདོག་དམར་པོ་ཕྱག་མཚན་གཞན་འདྲ་བ་ལ། གཡས་བར་པ་ཅང་ཏིའུ། ཐ་མ་ན་ལྕགས་ཀྱུ། གཡོན་ཐ་མ་ན་ཞགས་པ་དམར་པོ། འོད་དཔག་མེད་ཀྱིས་དབུ་བརྒྱན་པ། རྒྱན་ཆ་ལུགས་གཞན་སྤྱི་དང་འདྲ་བ་བསྐྱེད། ཡེ་ཤེས་པ་བསྟིམ། ཐུགས་ཀར་ཉི་མ་ལ་ཧཱུྃ་དམར་པོའི་མཐར། སྔགས་ཕྲེང་གིས་བསྐོར་བ་ལས་འོད་ཟེར་དམར་པོ་སྣོད་བཅུད་ཐམས་ཅད་ལ་ཁྱབ། འགྲོ་བའི་ནད་གདོན་སྡིག་སྒྲིབ་དག །བརྟན་གཡོ་ཐམས་ཅད་དབང་དུ་བསྡུས། རང་གི་དྲུང་དུ་ལྷགས་ནས་དད་ཅིང་གུས་པར་བསམ་ནས། ཨོཾ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣན་བི་ནཱ་ཡ་ཀ་ཧཱུྃ་ཧཱུྃ་ཕཊ་ཕཊ། དྷུ་མ་གུ་ཧྱེ་སྭཱ་ཧཱ། ཞེས་བརྒྱ་རྩ་སོགས་ཅི་མང་བགྲངས། བདག་བསྐྱེད་དེ་ལྟ་བུ་བྱས་ནས་མགོན་པོའི་སྤྱི་གཙུག་ཏུ་དྲིན་ཅན་རྩ་བའི་བླ་མ་སྐུ་མདོག་དམར་པོ་ཞེས་པ་ནས་དགོས་འདོད་ཆར་བཞིན་འབབ་པར་གྱུར། ཅེས་སོགས་གཏོར་ཆོག་གཞུང་བཞིན་བསྲངས་པའི་མདུན་བསྐྱེད་གསལ་གདབ། དེ་ནས་རང་གི་དཔྲལ་བར་མཐིང་རིམ་གྱི་ཁྲག །བུ་མོ་མ་ཉམས་པའི་མངལ་ཁྲག་ལི་ཁྲི། བདུད་རྩི་རིལ་བུ་རྣམས་ནང་མཆོད་ཀྱིས་སྦྱར་བའི་ཐིག་ལེ་བྱ། དེ་ཐམས་ཅད་མ་འཛོམས་ཀྱང་གཞན་གང་འཛོམ་མམ། ཐ་ན་ནང་མཆོད་ཙམ་གྱི་ཐིག་ལེ་བྱ། དེ་ནས་གསང་བའི་མཁའ་འགྲོ་མ་དམར་མོ་ཞལ་གཅིག་ཕྱག་གཉིས། གཡས་པ་ན་ལྕགས་ཀྱུ། གཡོན་པ་ན་ཞགས་པ་དམར་པོ་ཐོགས་པ་གཅིག་གི་རྟིང་ལ་གཅིག་དཔག་ཏུ་མེད་པ་ཐོན་ཕྱོགས་བཅུར་སོང་ནས། འཇིག་རྟེན་པའི་དངོས་གྲུབ་ཐམས་ཅད་ཐོགས་པ་མེད་པར་སྐད་ཅིག་ལ་རང་གི་མདུན་དུ་བཀུག་པའི་དམིགས་པ་གྲིམ་ལ་བརྟན་པ་བྱ། མདུན་བསྐྱེད་ཀྱི་མགོན་པོ་དང་མཁའ་འགྲོ་མ་རྣམས་ཀྱི་ཕྱག་གཡས་ཌཱ་མ་རུའི་སྒྲ་དྲག་ཏུ་ཁྲོལ་བ། ཁམས་གསུམ་གྱི་སེམས་ཅན་ཐམས་ཅད་ཀྱི་ཡིད་རང་དབང་མེད་པར་གཡོས་ཏེ། དངོས་གྲུབ་ཐམས་ཅད་འགུགས་པའི་དམིགས་པ་གཉིས་དུས་གཅིག་ཏུ་བསམ་ནས། ཨོཾ་བཛྲ་ན་ར་ཀྲིཾ་ཀྲིཾ་ཧཱུྃ་ཧཱུྃ་ཕཊ་ཕཊ། སརྦ་ལོ་ཀར་སིདྡྷི་ཨ་ཀར་ཥ་ཡ་ཛཿཛཿ །ཞེས་བརྒྱ་རྩ་སྟོང་སོགས་ཅི་ནུས་བགྲངས། དེ་ནས་རང་ཡི་དམ་གྱི་ང་རྒྱལ་དུ་འཕྲོས་པའམ། མ་འཕྲོས་ཀྱང་རུང་སྟེ། དེ་མན་ཆད་ཀྱི་ཆོ་ག་གཞུང་ལྟར་བྱའོ།
།བླ་མ་དམ་པའི་ཞལ་གྱི་བཅུད། །བརྗེད་ཀྱི་དོགས་ནས་ཡི་གེར་བཀོད། །མཁའ་འགྲོ་ཆོས་སྐྱོང་བཟོད་མཛད་ཅིང་། །དངོས་གྲུབ་ཐམས་ཅད་མོད་ལ་འགྲུབ་པར་ཤོག །ཨྀཐིཿ