Mgon po yid bzhin nor bu'i las tshogs thun mong ma yin pa
Resource ID | Gönkar9 |
---|---|
Title | mgon po yid bzhin nor bu'i las tshogs thun mong ma yin |
Alt. title | zhi ba nor du sgrub pa'i gdams pa |
Topics | White protector |
Sub-Topics | Activity practices |
Link | BDRC W23681 (p. 237) |
Notes | Same text as zhi ba nor du sgrub pa'i gdams pa |
༄༅། །མགོན་པོ་ཡིད་བཞིན་ནོར་བུའི་ལས་ཚོགས་ཐུན་མོང་མ་ཡིན་པ་བཞུགས།
བླ་མ་དམ་པ་རྣམས་ལ་གུས་པས་ཕྱག་འཚལ་ལོ།
།ལས་ཁ་ཚར་འདི་ལ་ཞི་བ་ནོར་དུ་སྒྲུབ་པ་དང༌། དྲག་པོ་མཐུ་རུ་སྒྲུབ་པ་གཉིས་ལས། འདིར་མྱུར་མཛད་ཅེས་པ་ལ་རྟེན་ནས་ཞི་བ་ནོར་དུ་སྒྲུབ་པའོ།
།དེ་ལ་དང་པོ་དཀྱིལ་འཁོར་བྲི་བ་དང༌། བུམ་པ་བཅའ་བ་དང༌། རྫས་རྣམས་བསག་པ་དང༌། ལྷ་བསྐྱེད་པ་དང༌། བསྙེན་པ་བསྐྱལ་བ་དང༌། རྟགས་ཐོན་པའོ།
།དེ་ལ་དཀྱིལ་འཁོར་བྲི་བ་གཞུང་ལྟར་བྱ། བུམ་པ་བཅས་པ་དཀྱིལ་འཁོར་བྲིས་པའི་སྟེང་དུ་མཉྫི་ལ་སོགས་པའི་ཁར་བཞག །གཟུངས་ཐག་ནང་རྫས་སོགས་དང་ལྡན་པར་བྱ། མཆོད་གཏོར་རྒྱས་པར་བཤམ། སྭ་བྷཱ་ཝའི་སྔགས་ཀྱིས་སྟོང་པར་སྦྱངས། སྟོང་པའི་ངང་ལས་བྷྲཱུྃ་ལས་བུམ་པ་ནང་གཞལ་ཡས་ཁང་དུ་བསམ། པདྨ་དང་ཉི་མའི་གདན་སྟེང་དུ་ཧྲཱིཿའམ་གཿའི་ཡིག་འབྲུ་ལ་འོད་འཕྲོས། འགྲོ་བའི་དོན་བྱས་ཡིག་འབྲུ་ལ་ཐིམ། ཧྲཱིཿལས་མགོན་པོ་དཀྲོང་གིས་བསྐྱེད། དེ་ཡང་སྐུ་མདོག་དཀར་པོ་ཞལ་གཅིག་ཕྱག་དྲུག་པ། གཡས་དང་པོ་ན་ཡིད་བཞིན་གྱི་ནོར་བུ་རིན་པོ་ཆེ། གཉིས་པ་ན་ནེའུ་ལེ། གསུམ་པ་ན་བུམ་པ། གཡོན་དང་པོ་ན་གཅོད་པའི་འཁོར་ལོ། གཉིས་པ་ན་ནེའུ་ལེ། གསུམ་པ་ན་འགུགས་པའི་ཕྱག་རྒྱས་མཐེ་བོང་དང་སྲིན་ལག་སྤྲད་པའོ། །དེ་ནས་ཡེ་ཤེས་པ་དགུག་དབང་བསྐུར་རྫོགས།
།བྱང་ཆུབ་སེམས་ཀྱིས་ཐོག་དྲངས་ལ། །ཡན་ལག་བདུན་པ་རྫོགས་པར་བྱ། །དེ་ཡི་ཐུགས་ཀར་ཧྲཱིཿལས་ནི། །སྔགས་ཀྱི་ཤམ་བུར་བཅས་པས་བསྐོར། །གཿའམ་ཧྲཱིཿལས་འོད་འཕྲོས་པས། །སྤྱན་དྲངས་གཉིས་སུ་མེད་པར་བསྟིམ། །གཟུངས་ཐག་གཟུང་ལ་སྙིང་པོ་བཟླ། །ལྷ་ཡི་ཐུགས་དང་རྒྱུད་བསྐུལ་ནས། །འོད་བྱུང་བུམ་པའི་རྫས་ལ་ཕོག །རིན་པོ་ཆེ་དང་བདུད་རྩིར་གྱུར། །ཕྱོགས་བཅུའི་འཇིག་རྟེན་ཐམས་ཅད་ཀྱི། །དགོས་འདོད་མ་ལུས་འོད་ཀྱིས་བཀུག །ནོར་གྱི་ཆར་པ་བབས་བྱས་ཏེ། །བུམ་པའི་ནང་དུ་ཐིམ་པར་བསམ།
།ཨོཾ་མ་ཧཱ་ཀཱ་ལ་ག་ཎ་པ་ཏ་ཡེ་སྭཱ་ཧཱ། ཞེས་བྱ་བ་ཡི་སྙིང་པོ་ནི།
།སྨྲ་བཅད་ཁམས་ཀྱིས་ཐུབ་ཚད་བགྲང༌། །གསོལ་བ་འདེབས་པ་འདི་བཞིན་བྱ། །ཇོ་བོ་གཟི་ལྡན་བདག་ལ་དགོངས་སུ་གསོལ། །བདག་མིང་འདི་ཞེས་བྱ་བ་ཡིས། །རྫོགས་པའི་བྱང་ཆུབ་སྒྲུབ་པ་ལ། །སྦྱིན་པ་ཡོངས་སུ་རྫོགས་བྱའི་ཕྱིར། །འབྱོར་པ་ཆེན་པོའི་དངོས་གྲུབ་སྩོལ། །ཞེས་ནི་ལན་བདུན་གསོལ་བ་གདབ།
།རྟགས་ནི་འདི་ལྟར་ཤེས་པར་བྱ། །སྒྲུབ་པ་བྱེད་པའི་དུས་སུ་ནི། །ནོར་བཟང་འབུལ་བ་བྱུང་ན་བཟང༌། །ཞལ་མཐོང་བ་ནི་རབ་ཡིན་ནོ། །རྨི་ལམ་རྟགས་ནི་འདི་ལྟར་རོ། །མེ་ཏོག་མཐོར་དང་བཅས་པ་དང༌། །གཞན་གྱིས་ཟས་ནོར་འབུལ་བ་དང༌། །འཕྱིང་པ་གོས་གསར་སྦྱིན་པ་དང༌། །ཆུ་ཡི་ལོངས་སྤྱོད་བྱེད་པ་དང༌། །གོ་ཆ་དམག་མི་རྨི་ན་བཟང༌། །སྒྲུབ་པ་ཐོན་པའི་དུས་སུ་ནི། །བུམ་པ་ནས་ནི་རང་ཉིད་བཟའ། །དངོས་གྲུབ་བླང་བའི་དོན་ཡང་ཡིན། །མ་འགྲུབ་ལན་གསུམ་བསྐྱར་བར་བྱ། །དངོས་གྲུབ་འབྱུང་བའི་རྫས་རྣམས་ལ། །བརྟེན་ཅིང་སྒྲུབ་ལ་བརྩོན་པར་བྱ། །དཀོན་མཆོག་གསུམ་ལ་མཆོད་པར་བྱ། །དབུལ་པོ་རྣམས་ཀྱི་དོན་ཡང་བྱ། །རང་ལ་ཞེན་པ་མེད་པར་བྱ། །དེང་ནས་བྱང་ཆུབ་སྙིང་པོའི་བར། །ཁོ་ཡིས་ཡོན་བདག་བྱེད་པར་འགྱུར།
།འདི་ཡི་ཡིག་སྣ་ཡོད་པ་ཙམ་གྱིས་བང་མཛོད་འཕེལ། འབྲུ་འཁྲུང༌། ལོ་ལེགས་འོང༌། བསམ་པ་འགྲུབ་བོ། །གཏོར་མ་ཆེ་བ་གཏར་གཟུང༌། གཏོར་ཆུང་ཞག་རེ་ལ་ཉི་ཤུ་རྩ་རེ་གཏང༌། སྐར་མ་རྒྱལ་འཛོམ་པ་ལ་སྒྲུབ་པ་བྱེད་པའི་དུས་སུའོ། །སྒྲུབ་པའི་དུས་ནི་ཡར་ངོའི་ཚེས་བརྒྱད་ནས་གནམ་སྟོང་གི་བར་ལ་བྱའོ། །ས་མ་ཡ༌།།