Mi brjid bu brten nas mgon po'i rlung sgrub kyis sbos te bsad pa

Resource ID	SCv11p864
Title	mi brjid bu brten nas mgon po'i rlung sgrub kyis sbos te bsad pa
Topics	Chadrupa
Sub-Topics	rlung bsgrub
Author	Gelek Pelsang
Associated Person	Mokchokpa Rinchen Tsöndrü
Link	BDRC W23922 WA00KG09215 (p.340)

༈ མིའི་བརྗིད་བུ་ལ་བརྟེན་ནས་མགོན་པོའི་རླུང་སྒྲུབ་ཀྱིས་སྦོས་ཏེ་བསད་པ་བཞུགས་སོ།།
༈ ༼ཐེ༽ གཉིས་པ་སྦོས་ཏེ་བསད་པ་ནི། །མ་ཧཱ་ཀཱ་ལ་ན་མོ།
ཡེ་ཤེས་མགོན་པོའི་ལས་སྦྱོར་ལ། །སྐྱེས་བུ་གཡུལ་དུ་བསད་པ་ཡི། །ལག་པའི་བྲང་བ་རྒལ་བ་ནས། །བུག་རལ་མེད་པར་བཤུས་ནས་སུ། །ལིངྒ་སྔགས་ཅན་བྲིས་པ་ལ། །ལྷ་དང་ཕྲལ་བའི་མན་ངག་བྱེད། །ཟག་རྫས་བྱུགས་ལ་ནང་དུ་བཅུག །ཁྱི་སྨྱོན་རུས་པས་ལེགས་པར་བསྡམས། །བྷ་སུ་ཏ་ཡིས་སྣེ་ཡིག་དྲངས། །གྲི་ལྕགས་རྩེ་གསུམ་ཧཱུྃ་གིས་མཚན། །གཟུངས་ཐག་ཚད་ལ་སྣེ་མོ་ནི། །ལྷག་གཏེར་ཚང་ལ་བཏགས་པར་བྱ། །ཆོས་འབྱུང་ནག་པོའི་ནང་དུ་གཞུག །ཁ་རུ་རུས་ཆེན་རྩང་གིས་བསྐོར། །དེ་གཡག་ཁྱི་ཡི་སྤུ་དང་ནི། །ཆི་སྐྲའི་སྐུད་པས་རྒྱ་རུ་བྲེས། །རང་ཉིད་ཡེ་ཤེས་མགོན་པོར་བསྐྱེད། །ཡེ་ཤེས་སེམས་དཔའ་སྤྱན་དྲངས་བསྟིམ། །ཁྲི་ཕྲག་གཅིག་གིས་དྲགས་སྔགས་བཟླས། །འཕྲལ་གཏོར་བཤོས་བུ་ཟུར་གསུམ་ལ། །ལས་དྲུག་བྱས་ལ་འཕྲལ་གཏོར་འབུལ། །བསྟོད་པ་བྱས་ལ་འཕྲིན་ལས་བཅོལ། །དེ་ནས་བདག་མདུན་གཉིས་ཀ་ལ། །ས་བོན་ཉིད་ལས་སྤྲོས་པ་ནི། །མགོན་པོ་ཞལ་གཅིག་ཕྱག་གཉིས་པ། །གཡས་པ་རྩེ་གསུམ་གཡོན་པ་ནི། །ཞགས་པ་ནག་པོ་བསྣམ་ནས་ནི། །བསྒྲུབ་བྱའི་མདུན་རྒྱབ་གནས་གསུམ་དུ། །མཚོན་གྱི་བསྣུན་ལ་ཞགས་པ་ཡིས། །ཞགས་པས་མགྲིན་པ་བསྡམས་ནས་སུ། །མགོན་པོ་གཉིས་ཀྱི་ཐེན་པར་བསམ།
།ཨོཾ་བཛྲ་མ་ཧཱ་ཀཱ་ལ་ཁྲིཾ་ཁྲིཾ་ཏ་བིགྷྣན་བི་ནཱ་ཡ་ཀཱ་ཆེ་གེ་མོ་མཱ་ར་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ།
།གཟུངས་ཐག་རྒྱུད་ལ་ཕུ་ཡི་གདབ། །ཐུན་འཇོག་ཚེ་ན་གཏོར་མར་གཏགས། །སྔོན་དུ་བསྙེན་པ་ཐེངས་པ་ཡིས། །ཞག་གསུམ་ཉིད་ནས་ལས་འགྲུབ་འགྱུར། །འདི་ལས་ཟབ་པའི་ལས་སྦྱོར་ནི། །མགོན་པོ་འདི་ཡི་ལུགས་ལ་མེད། རིན་ཆེན་བརྩོན་འགྲུས་ཁྱོད་ལ་གཏད། །ཅེས་སོ།
།མང་ཐོས་དགེ་ལེགས་དཔལ་བཟང་གིས། །མཁས་གྲུབ་གོང་མའི་མན་ངག་ལ། །ལྷད་ཞུགས་བསལ་ནས་དག་པར་བྱས།
།སྦོས་ཏེ་བསད་པའི་ཤོག་དྲིལ་ཏེ་དང་པོའོ།།