Rang nyid la dbang dmigs pas len pa dang gzhan la gtor dbang bya ba'i yi ge

Resource ID	SCv11p67
Title	rang nyid la dbang dmigs pas len pa dang gzhan la gtor dbang bya ba'i yi ge
Topics	Initiation
Sub-Topics	Chadrupa
Author	Sangyé Tönpa
Link	BDRC W23922

༈ རང་ཉིད་ལ་དབང་དམིགས་པས་ལེན་པ་དང་གཞན་ལ་གཏོར་དབང་བྱ་བའི་ཡི་གེ་བཞུགས་སོ།།

༈ ༼ཕ༽ ན་མོ་གུ་རུ།
སངས་རྒྱས་གཉན་སྟོན་ལ་སོགས་པའི། །རྗེ་གྲུབ་ཐོབ་རྣམས་ལ་སྐྱབས་སུ་མཆི། །མྱུར་མཛད་སྤྱན་རས་གཟིགས་ལ་ཕྱག་འཚལ་ལོ། །དངོས་གྲུབ་སྟེར་བའི་ཡི་དམ་ལྷ། །བར་ཆད་བསྲུང་བའི་ཆོས་སྐྱོང་ལ། །ཕྱག་འཚལ་དང་བས་སྐྱབས་སུ་མཆི།
།དཔལ་མགོན་པོའི་སྒོ་ནས་བྱིན་རླབས་བྱ་བ་ནི། མདུན་དུ་མགོན་པོ་སྒྲུབ་ཐབས་བཞིན་བསྐྱེད། ཡེ་ཤེས་པ་སྤྱན་དྲངས་པ་སོགས་སྤྱི་དང་མཐུན་པར་བྱ། མགོན་པོའི་སྤྱི་བོར་བླ་མ་བསྒོམ། དེ་ལ་ན་མོ་བུདྡྷ་ཡས་གསོལ་བ་དྲག་ཏུ་གདབ་བོ། །དེ་ནས་མགོན་པོའི་སྨིན་ཕྲག་ནས་འོད་ཟེར་ཁ་དོག་ལྔ་བྱུང་ནས་རང་གི་སྨིན་ཕྲག་ཏུ་ཕོག་པས་ལུས་ཀྱི་སྡིག་པ་དྲི་མ་ཐམས་ཅད་སང་སང་དག་པར་བསྒོམ་མོ། །ཡང་མགྲིན་པ་ནས་འོད་ཟེར་བྱུང་ནས་རང་གི་མགྲིན་པར་སིབ་སིབ་སོང་བས་ངག་གི་སྡིག་སྒྲིབ་དག་པར་བསྒོམ། ཡང་ཐུགས་ཀ་ནས་འོད་ཟེར་ཁ་དོག་ལྔ་བྱུང་ནས། རང་གི་སྙིང་གར་སིབ་སིབ་ཕོག་པས། ཡིད་ཀྱི་སྡིག་སྒྲིབ་ཐམས་ཅད་སང་སང་དག་པར་བསྒོམ། མགོན་པོའི་སྐུའི་ཆ་ཐམས་ཅད་ལས་འོད་ཟེར་དམར་སྨུག་ཕྲོམ་ཕྲོམ་བྱུང་ནས། རང་གི་ལུས་ཀྱི་ཆ་ཐམས་ཅད་ལ་ཐིམ་པས་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་དང་། ཁྱད་པར་དུ་ཡང་གདོན་བགེགས་ཐམས་ཅད་སང་སང་དག་པར་བསྒོམ། ལུས་འོད་བསྐོར་བཞིན་དུ་སྔོ་ཡལ་ལེ་བ་ལྷ་སྐུ་ཕྱག་རྒྱ་ཆེན་པོར་བསྒོམ། ད་དེ་ལ་གཏོར་དབང་བྱེད་པར་གདའ་ན་འདི་ལྟར་བྱ་སྟེ། གཏོར་མའི་སྟེང་དུ་ཧཱུྃ་ནག་པོ་གཅིག་བསྐྱེད། དེ་ལོག་རྩེར་ཡོངས་སུ་གྱུར་པ་ལས། ཡེ་ཤེས་ཀྱི་མགོན་པོ་རྒྱན་ཆ་ལུགས་ཇི་ལྟ་བ་བཞིན་བསྒོམ། དེ་ནས་བསྙེན་པ་ཅི་རིགས་པ་ཞིག་བཟླས་སོ།
།མགོན་པོའི་དཔྲལ་བར་ཨོཾ། མགྲིན་པར་ཨཱཿ །ཐུགས་ཀར་ཧཱུྃ་བསམ། རང་གི་གནས་གསུམ་དུ་ཡང་བསམ། མགོན་པོའི་ཨོཾ་ལས་འོད་དཀར་པོ་བྱུང་ནས་རང་གི་ཨོཾ་ལ་ཕོག་ལུས་ཀྱི་སྒྲིབ་པ་དག །མགྲིན་པའི་ཨཿདང་ཧཱུྃ་ལས་ཀྱང་ཁ་དོག་དམར་པོ་དང་ནག་པོ་བྱུང་། རང་གི་མགྲིན་པ་དང་སྙིང་གར་ཕོག་པས་ངག་དང་ཡིད་ཀྱི་སྡིག་སྒྲིབ་དག་པར་བསམ། དེ་ནས་མགོན་པོའི་དཔྲལ་བའི་ཨོཾ་དེ་རྦད་ཀྱི་ཆད་ནས་བྱུང་སྟེ། རང་གི་དཔྲལ་བའི་ཨོཾ་ལ་ཐིམ། དེ་བཞིན་དུ་མགྲིན་པའི་ཨཱཿདང་ཐུགས་ཀའི་ཧཱུྃ་གཉིས་ཀྱང་རིམ་པ་བཞིན་རྦད་ཀྱིས་ཆད་ནས་རང་གི་མགྲིན་པའི་ཨཱཿདང་ཐུགས་ཀའི་ཧཱུྃ་ལ་ཐིམ་པར་བསྒོམ། རང་གི་ཨོཾ་ཨཱཿལ་ཐིམ། ཨཱཿཧཱུྃ་ལ་ཐིམ། ཧཱུྃ་འོད་དུ་ལྷེམ་ལྷེམ་ཞུ་ནས་སྟོང་པར་སོང་བས་འོད་གསལ་ཕྱག་རྒྱ་ཆེན་པོའི་ངང་ལ་མཉམ་པར་བཞག་གོ །གཏོར་མ་མགོ་ཐོག་ཏུ་བཞག་ནས། ཐུག་ཐུག་འཇོག་རྩ་ན་ཡེ་ཤེས་ཀྱི་མགོན་པོ་མགོ་ཐོག་ཏུ་ཆེམ་ཆེམ་ཡོད་པར་བསམ། གཏོར་མ་ཡེ་ཤེས་ཀྱི་མགོན་པོ་གཏང་རག་གི་ཚུལ་དུ་དབུལ་ལོ། །ཟབ། ཨྀཐི།