Shangs lugs mgon dkar yid bzhin nor bu'i bum pa'i rten la brten nas phywa g.yang 'gugs pa'i cho ga rin chen don yod zhags pa

Resource ID	Gönkar25
Title	shangs lugs mgon dkar yid bzhin nor bu'i bum pa'i rten la brten nas phywa g.yang 'gugs pa'i cho ga rin chen don yod zhags pa
Topics	White protector
Sub-Topics	g.yang 'gugs
Author	Ngawang Lekdrup
Link	BDRC W23681

༄༅། །ཤངས་ལུགས་མགོན་དཀར་ཡིད་བཞིན་ནོར་བུའི་རྟེན་ལ་བརྟེན་ནས་ཕྱྭ་གཡང་འགུགས་པའི་ཆོ་ག་རིན་ཆེན་དོན་ཡོད་ཞགས་པ་ཞེས་བྱ་བ་བཞུགས་སོ།

ཨོཾ་སྭ་སྟི་བི་ཛ་ཡནྟུ།
སྲིད་ན་སྙེམས་པའི་མཐུ་ལྡན་ལྷ་ཆེན་ཡང༌། །གང་གི་ཞབས་ཟུང་འདེགས་ལ་མངོན་སྤྲོ་ན། །གཞན་དག་སྨོས་སུ་མེད་པར་དབང་བསྒྱུར་བའི། །ཕྲིན་ལས་ལྷུན་གྲུབ་ཡིད་བཞིན་ནོར་བུས་སྐྱོངས། །གང་དེའི་རྟེན་མཆོག་གཏེར་གྱི་བུམ་བཟང་ལ། །བརྟེན་ནས་སྲིད་ཞིའི་ཕྱྭ་གཡང་ཕུན་ཚོགས་ཀུན། །རིམ་གྱིས་འགུགས་བྱེད་སྤྱི་མཐུན་ཆོ་གའི་ཁྲིགས། །རིན་ཆེན་དོན་ཡོད་ཞགས་པ་འདི་ན་སྤེལ།
།དེ་ལ་འདིར་ཤངས་ལུགས་མགོན་དཀར་ཡིད་བཞིན་ནོར་བུའི་ལས་ཚོགས་ལས་བྱུང་བའི་གཏེར་བུམ་མདུན་བསྐྱེད་ཀྱི་སྒྲུབ་རྟེན་བྱས་ཏེ། ཕྱྭ་གཡང་འགུགས་པའི་ཆོ་ག་ངག་འདོན་ཟོར་ཡང་བའི་དབང་གིས་རྣམ་སྲས་ནོར་བུ་མཆོག་རྒྱལ་ནས་ཁ་བསྐངས་ཏེ་ཁྱེར་བདེ་དོན་ཚང་གི་ཚུལ་དུ་སྨོས་ན། སྦྱོར་བ་བི་སྤེན་འགྲུབ་སྦྱོར་སོགས་དགེ་བའི་ཉིན་མཛོད་ཕུག་གམ། བཀྲ་ཤིས་པའི་ཁང་པར་སྟེགས་བུ་ཁེབས་ལྡན་གྱི་ཁར་འབྲུའི་པདྨ་འདབ་བརྒྱད་ཀྱིས་དབུས་སུ་གཏེར་བུམ་བཅའ་སྒྲུབ་ཚད་ལྡན་སྔོན་དུ་སོང་ཟིན་པ་བཞུགས་སུ་གསོལ། གཏོར་མ་བཞི་དང་ཉེར་སྤྱོད་བུམ་པ་སྒྲུབ་ཐབས་ནས་འབྱུང་བ་བཞིན་དང༌། གཡས་གཡོན་གང་བདེར་སྐོང་བའི་གཏོར་མ་ཞི་དྲག་གི་མཆོད་པ་བཅས་བཤམ། མགོན་པོའི་བྲིས་འབུར་གྱི་སྐུ་ཡོད་ན་ཅི་བདེ་བར་བཀོད་ཅིང༌། འདོད་ཡོན་སྤྱན་གཟིགས་ཀྱི་བྱེ་བྲག་ཅི་འབྱོར་པ་བཤམས་ཤིང་བག་དྲོ་བར་བྱ། མདའ་དར་དང་རྡོར་དྲིལ་ནང་མཆོད་ཌ་མ་རུ་རྔ་སིལ་དུང་དཀར་སོགས་ཉེར་མཁོ་ཐམས་ཅད་ཚོགས་པར་བྱ། སྟེགས་ཇི་ལྟར་རིགས་པར་ཕྱྭ་གླུད་ཅེས་པ་དཀར་གཏོར་གཉིས་དང་བགེགས་གཏོར་བཤམས་པ་ཆབ་ཀྱིས་བྲན། དངོས་གཞིའི་ངག་འདོན་ལ། སྒྲུབ་པ་པོ་རྣམས་སྟན་ལ་འཁོད་དེ།
ཕྱྭ་གླུད་ཀྱི་གཏོར་མ་དང་པོ་བསང་སྦྱང༌། སྟོང་པའི་ངང་ལས་ཕྱྭ་གླུད་ཀྱི་གཏོར་མ་འདོད་དགུ་ཕུན་སུམ་ཚོགས་པའི་རྒྱ་མཚོར་གྱུར་པར་བསམས་ལ། འབྲུ་གསུམ་གྱིས་བྱིན་གྱིས་བརླབས། རང་གི་སྙིང་ག་ནས་འོད་ཟེར་འཕྲོས་པས་རྒྱལ་པོ་ཆེན་པོ་བཞི་ཨོཾ་བཛྲ་ས་མཱ་ཛཿ ཨོཾ་ཙ་ཏུརྨ་ཧཱ་རཱ་ཛ་ས་པ་རི་ཝཱ་ར་ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་སོགས་ལན་གསུམ་གྱིས་བསྔོས་ལ། གཏོར་མ་གཉིས་པ་བྱིན་རླབས་སྔར་བཞིན་དང༌། སླར་ཡང་སྙིང་ག་ནས་འོད་ཟེར་འཕྲོས་པས་ཕྱོགས་སྐྱོང་འཇིག་རྟེན་སྐྱོང་བ་འཁོར་དང་བཅས་པ་སྤྱན་དྲངས། ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་བསྔོས་ལ།
ཕྱྭ་ཁུ་ཡེ། ཤར་ཕྱོགས་རྒྱལ་པོ་ཡུལ་འཁོར་སྲུང༌། །དྲི་ཟ་གཤིན་རྗེའི་རྒྱལ་པོ་སྟེ། །ཤར་ཕྱོགས་ཁམས་ལ་དབང་གིས་བསྒྱུར། །རྗེ་བློན་བཙུན་མོ་འཁོར་དུ་བཅས། །ཕྱྭ་གླུད་བཟང་པོ་འདི་བཞེས་ལ། །ཕྱྭ་དང་གཡང་ནི་འདིར་ཁུག་ཅིག །དགོས་འདོད་ཆར་ལྟར་འདིར་ཕོབ་ཅིག །ཚེ་དང་དཔལ་ནི་འདིར་སྐྱོབས་ཤིག །ལྷོ་ཕྱོགས་རྒྱལ་པོ་འཕགས་སྐྱེས་པོ། །གྲུལ་བུམ་མ་མོའི་རྒྱལ་པོ་སྟེ། །ལྷོ་ཕྱོགས་ཁམས་ལ་དབང་གིས་བསྒྱུར། །རྗེ་བློན་བཙུན་མོ་འཁོར་དུ་བཅས། །ཕྱྭ་གླུད་བཟང་པོ་འདི་བཞེས་ལ། །ཕྱྭ་དང་གཡང་ནི་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །ནུབ་ཕྱོགས་རྒྱལ་པོ་སྤྱན་མི་བཟང༌། །ཀླུ་དང་བདུད་ཀྱི་རྒྱལ་པོ་སྟེ། །ནུབ་ཕྱོགས་ཁམས་ལ་དབང་གིས་བསྒྱུར། །རྗེ་བློན་བཙུན་མོ་འཁོར་དུ་བཅས། །ཕྱྭ་གླུད་བཟང་པོ༴ །ཕྱྭ་དང་གཡང་ནི་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །བྱང་ཕྱོགས་རྒྱལ་པོ་རྣམ་ཐོས་སྲས། །གནོད་སྦྱིན་ཤ་ཟའི་རྒྱལ་པོ་སྟེ། །བྱང་ཕྱོགས་ཁམས་ལ་དབང་གིས་བསྒྱུར། །རྗེ་བློན་བཙུན་མོ་འཁོར་དུ་བཅས། །ཕྱྭ་གླུད་བཟང་པོ༴ །ཕྱྭ་དང་གཡང་ནི་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །སྟེང་ཕྱོགས་ཚངས་པ་བརྒྱ་བྱིན་སོགས། །ལྷ་ཆེན་བརྒྱད་པོ་ཐམས་ཅད་དེ། །སྟེང་ཕྱོགས་ལྷ་ཡི་ཚོགས་བཅས་རྣམས། །ཕྱྭ་གླུད་བཟང་པོ༴ །ཕྱྭ་དང་གཡང་ནི་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །འོག་ཕྱོགས་དགའ་བོ་འཇོག་པོ་སོགས། །ས་བདག་ཀླུ་གཉན་ཐམས་ཅད་དེ། །འོག་ཕྱོགས་གནས་པའི་ཚོགས་བཅས་རྣམས། །ཕྱྭ་གླུད་བཟང་པོ༴ །ཕྱྭ་དང་གཡང་ནི་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །བར་སྣང་ཉི་ཟླ་རྒྱུ་སྐར་དང༌། །གཟའ་དང་གདོང་མོ་གཟེད་སྨན་སོགས། །བར་སྣང་གནས་པའི་ཚོགས་བཅས་རྣམས། །ཕྱྭ་གླུད་བཟང་པོ་འདི༴ །ཕྱྭ་དང་གཡང་ནི་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །ཕྱོགས་མཚམས་བདུད་རྨུ་རྒྱལ་པོ་བཙན། །སྲིན་པོ་འབྱུང་པོ་མ་མོ་དང༌། །གཡའ་སྨན་གངས་སྨན་མཚོ་སྨན་དང༌། །ཡུལ་ཕྱོགས་འདིར་གནས་གཞི་བདག་དང༌། །དམ་སྲི་གདོན་བགེགས་ཐམས་ཅད་རྣམས། །ཕྱྭ་གླུད་བཟང་པོ་འདི་བཞེས་ལ། །ཕྱྭ་དང་གཡང་ནི་འདིར་ཁུག་ཅིག །དགོས་འདོད་ཆར་ལྟར་འདིར་ཕོབ་ཅིག །ཚེ་དང་དཔལ་ནི་འདིར་སྐྱོབས་ཤིག །ཅེས་པའི་གཏོར་མ་བསྔོས་ནས་ཕྲིན་ལས་བཅོལ་ལོ།
།ཕྱྭ་རྫས་བསང་བ་ནི། བགེགས་གཏོར་གཅིག་ལ། ཨོཾ་ཨཱཿཧཱུྃ་གིས་བྱིན་གྱིས་བརླབས་ཏེ། ནམ་མཁའ་མཛོད་ཀྱི་ཕྱག་རྒྱ་དང༌། ཨོཾ་སརྦ་བིགྷྣཱན་ན་མཿསརྦ་ཏ་ཐཱ་ག་ཏེ་བྷྱོཿསོགས་ཀྱིས་བསྔོས་ལ། རྡོ་རྗེ་དྲིལ་བུ་ཐོགས་ཏེ་འདི་སྐད་དུ།
ཧཱུྃ་གསང་ཆེན་སྒྲུབ་པའི་དཀྱིལ་འཁོར་འདིར། །དངོས་གྲུབ་སྩོལ་ཕྱིར་འདུ་འགྱུར་བའི། །ལྷ་དང་སྲུང་མ་མ་གཏོགས་པའི། །དངོས་གྲུབ་བར་དུ་གཅོད་བྱེད་པའི། །གདོན་བགེགས་འབྱུང་པོ་ཁྱེད་ཅག་རྣམས། །མཆོད་སྦྱིན་གཏོར་མས་ཚིམ་གྱིས་ལ། །མ་འཚེ་བར་ནི་གཞན་དུ་དེངས། །ཅི་སྟེ་མི་འགྲོ་འདུག་བྱེད་ན། །བདེ་གཤེགས་ཀུན་འདུས་ཐུགས་གཉིས་མེད། །ཡེ་ཤེས་ཁྲོ་བོའི་འཕྲོ་འདུ་ཡིས། །བགེགས་དཔུང་ཐམས་ཅད་རྡུལ་ཕྲན་བཞིན། །འཐག་འགྱུར་འདི་ལ་ཐེ་ཚོམ་མེད།
།ཅེས་བརྗོད་ཅིང་རོལ་མོ་དང་བཅས་ཏེ། ཨོཾ་སུམྦྷ་སོགས་དང༌། ཡུངས་ཐུན་བརྡེག་ཅིང་མཚམས་གཅད་དོ།
།ཕྱྭ་སྒོ་བསྡམ་པ་ནི། ཤར་གྱི་སྒོ་མ་ལྕགས་ཀྱུ་མ། །དཀར་མོ་ཞི་བའི་ལས་ལ་བརྩོན། །དུང་གི་སྒོ་མོ་བསྡམས་ནས་ཀྱང༌། །ཕྱྭ་དང་གཡང་དུ་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །ལྷོ་ཡི་སྒོ་མ་ཞགས་པ་མ། །སེར་མོ་རྒྱས་པའི་ལས་ལ་བརྩོན། །གསེར་གྱི་སྒོ་མོ་བསྡམས་ནས་ཀྱང༌། །ཕྱྭ་དང་གཡང་ནི་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །ནུབ་ཀྱི་སྒོ་མ་ལྕགས་སྒྲོག་མ། །དམར་མོ་དབང་གི་ལས་ལ་བརྩོན། །ཟངས་ཀྱི་སྒོ་མོ་བསྡམས་ནས་ཀྱང༌། །ཕྱྭ་དང་གཡང་ནི་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི༴ །བྱང་གི་སྒོ་མ་དྲིལ་བུ་མ། །སྔོན་མོ་དྲག་པོའི་ལས་ལ་བརྩོན། །གཡུ་ཡི་སྒོ་མོ་བསྡམས་ནས་ཀྱང༌། །ཕྱྭ་དང་གཡང་ནི་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ། །ཞེས་པའི་སྒོ་མ་བཞི་ལ་ལས་བཅོལ།
དེ་ནས་གནས་དང་མཆོད་པའི་ཡོ་བྱད་རྣམས་བྱིན་རླབས་ཀྱེ་རྡོར་ལྟར་ལ། ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་སིལ། མེ་ཏོག་སོགས་བརྗོད་མཐར། གྷཱཎྚེ་ར་ཎི་ཏ་རོལ་ཆེན་དང་བཅས་པས་བྱིན་དབབ་བོ།
།དེ་ནས་མགོན་དཀར་གྱི་བདག་བསྐྱེད་སྐྱབས་འགྲོ་ནས་བཟུང་ཉེར་བསྡུའི་རྫོགས་རིམ་གྱི་བར་ཉམས་སུ་བླངས་ལ། སླར་ཡང་དེའི་ངང་ནས་རང་ཉིད་ལྷའི་སྐུར་གྱུར་པར་བསམས་ལ། བུམ་པ་བསང་སྦྱང༌། སྟོང་པའི་ངང་ལས་བུམ་པའི་གྲངས་དང་མཉམ་པའི་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བའི་ནང་དུ་རིན་པོ་ཆེ་དང་འབྲུ་བཅུད་དང༌། ཟས་ནོར་ལོངས་སྤྱོད་ལྷ་མིའི་དཔལ་འབྱོར་ཕུན་སུམ་ཚོགས་པས་ཡོངས་སུ་གང་བར་གྱུར་པར་བསམས་ལ།
ཆོས་ཉིད་རྣམ་པར་དག་པའི་སྔགས་རྒྱས་སྦྱང་བ་ནི། ཐལ་མོ་ཁོང་སྟོང་དུ་སྦྱར་བ་སྙིང་གར་བཞག་ལ། ཨོཾ་སྭ་བྷཱ་ཝ་བི་ཤུདྡྷཱཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅ཧཾ། ཞེས་ལན་གསུམ།
ནམ་མཁའ་མཛོད་ཀྱི་སྔགས་རྒྱས་སྤེལ་བ་ནི། ཐལ་མོ་ཁོང་སྟོང་དུ་སྦྱར་བའི་ཚིགས་བར་པ་རྣམས་བཅག་པ་དཔྲལ་བར་བཞག་ལ། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་ལན་གསུམ།
བདུད་རྩི་འཁྱིལ་པའི་སྔགས་རྒྱས་བསྒྱུར་བ་ནི། ཐལ་མོ་སྦྱར་བའི་ཁ་གྱེན་དུ་ཕྱེ་སྟེ་མཐེ་བོང་བསྣོལ་ལ། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། ཅེས་དང༌།
རྒྱ་ཆེན་ཤུགས་ལྡན་འོད་ཀྱི་སྔགས་རྒྱས་སྤྱོད་པར་དབང་བ་ནི། གཡས་ཁུ་ཚུར་བཅངས་པའི་མཛུབ་མོ་བསྒྲེང༌། གཡོན་རྡོ་རྗེ་ཁུ་ཚུར་སྙིང་གར་བཞག་ལ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ། ཨོཾ་སམྦྷ་ར་སམྦྷ་ར་ཧཱུྃ། ཞེས་དང༌།
ཡེ་ཤེས་སྐར་མདའི་སྔགས་རྒྱས་ཐོབ་པར་བྱ་བ་ནི། གཡས་ཁུ་ཚུར་བཅངས་པ་སྙིང་གར་བཞག གཡོན་མཐེ་བོང་ལག་མཐིལ་དུ་བཞག་པའི་མཆོག་སྦྱིན་གྱི་ཕྱག་རྒྱ་བྱས་ལ། ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མཿས་མནྟ་སྥ་ར་ཎ་རསྨི་བྷ་ཝ་ས་མ་ཡ་མཧཱ་མ་ཎི་དུ་རུ་དུ་རུ་ཧྲྀ་ད་ཡ་ཛ་ལ་ནི་སྭཱ་ཧཱ། ཞེས་དང༌། དབང་བསྒྱུར་འཁོར་ལོའམ།
ལྷ་མགོན་སྤྱིའི་སྔགས་རྒྱས་དབང་དུ་བྱ་བ་ནི། སོར་མོ་ནང་དུ་བསྣོལ་བའི་རྡོ་རྗེ་བསྡམས་པ་ལས། མཐེ་བོང་གཉིས་གཤིབས་ཏེ་བསྒྲེངས་ལ། ཨོཾ་ན་མསྶ་མནྟ་བུདྡྷཱ་ནཱཾ་གྲ་ཧེ་ཤྭ་རི་པྲ་པཉྩ་ཏི། མ་ཧཱ་ས་མ་ཡ་སྭཱ་ཧཱ། ཞེས་དང་ཕྱག་རྒྱ་རྣམས་ཕྱོགས་བཅུར་བསྟན་ཞིང་སྔགས་རྣམས་ལན་གསུམ་ལ་སོགས་པ་བརྗོད་དོ།
།དེ་ལྟར་སྔགས་དྲུག་ཕྱག་དྲུག་གིས་ཡོ་བྱད་རྣམས་ཟད་མི་ཤེས་པའི་གཏེར་དང༌། ལོངས་སྤྱོད་དང༌། བདུད་རྩིའི་རྒྱ་མཚོ་ཆེན་པོར་བྱིན་གྱིས་བརླབས་ནས། དེ་ལྟ་བུའི་བུམ་པའི་ནང་སྟོད་ཀྱི་ཆ་ལ་ཧཱུྃ་དཀར་པོ་དངུལ་ཆུ་དྭངས་པའི་སོགས་ནས། ཆོས་ཉིད་ཀྱི་ཐིག་ལེ་དམར་པོ་འོད་འཕྲོ་བ། འཁོར་དུ་མཁའ་འགྲོ་གནོད་སྦྱིན་ནོར་བདག་གི་ཚོགས་དཔག་ཏུ་མེད་པས་བསྐོར་བ་དང་བཅས་པར་གྱུར། ཡང་འཁོར་ལོ་ཡོད་ན་བསང་སྦྱང༌། འཁོར་ལོ་རྣམས་མི་དམིགས་ཏེ་སྟོང་པར་གྱུར། སྟོང་པའི་ངང་ལས་འཁོར་ལོའི་གྲངས་དང་མཉམ་པའི་ཧཱུྃ་དཀར་པོ་དངུལ་ཆུ་དྭངས་པའི་སོགས་ནས། དཔག་ཏུ་མེད་པས་བསྐོར་བ་དང་བཅས་པར་གྱུར་ཅེས་པའི་བར་གྱིས་འཁོར་ལོ་བསྐྱེད། སྐུ་རྟེན་ཡོད་ནའང་བུམ་བསྐྱེད་ཀྱི་ཞར་ལ་གསལ་འདེབས་ཙམ་ལས་ལོགས་སུ་བསྐྱེད་མི་དགོས་སོ།
།སྤྱན་འདྲེན་པ་ནི། རང་གི་སྙིང་ག་ནས་འོད་ཟེར་འཕྲོས་པས་དུར་ཁྲོད་བསིལ་བའི་ཚལ་ནས་མགོན་པོ་ཡིད་བཞིན་ནོར་བུ་ལ་མཁའ་འགྲོ་གནོད་སྦྱིན་ནོར་བདག་གི་ཚོགས་དཔག་ཏུ་མེད་པས་བསྐོར་བ་ཨོཾ་བཛྲ་ས་མཱ་ཛཿ རྔ་སིལ་དབྱངས་དང་བཅས་ཏེ། སྐོང་བའི་མགོ་ནས་འབྱུང་བའི།
ཧཱུྃ། ཙནྡན་ལྗོན་པས་མཚན་པའི་དུར་ཁྲོད་ནས། །སྟོན་ཀའི་སྤྲིན་དཀར་ཕུང་པོ་གཡོ་བ་བཞིན། །ཕྱག་ན་པདྨོའི་རྣམ་རོལ་བསྟན་སྲུང་མཆོག །མགོན་དཀར་ནོར་བུའི་ཆར་འབེབས་གནས་འདིར་གཤེགས། །ལྷ་ཆེན་བླ་མ་ཡིད་བཞིན་ནོར་བུ་ཡི། །བཀའ་བསྒྲུབ་ཕྱོགས་བཅུའི་འཇིག་རྟེན་དབང་དུ་སྡུད། །རྣལ་འབྱོར་འདོད་པའི་དངོས་གྲུབ་མྱུར་སྩོལ་བའི། །མཁའ་འགྲོ་ནོར་བདག་ཚོགས་བཅས་ད་ཚུར་སྤྱོན། །མགོན་པོ་འཁོར་བཅས་སྔོན་གྱི་ཐུགས་བསྐྱེད་དང༌། །དམ་ཚིག་ལ་དགོངས་དགྱེས་པས་གནས་འདི་རུ། །ནོར་བུ་དགོས་འདོད་དཔལ་དང་འགྲོགས་པ་བཞིན། །ཚུར་གཤེགས་དཔལ་འབྱོར་རྣམ་པར་རྒྱས་པར་མཛོད། །ཅེས་དང༌།
གུ་རུ་མ་ཧཱ་ཀཱ་ལ་ཧ་རི་ནི་ས་སིདྡྷི་ཛཿ ས་པ་རི་ཝཱ་ར་ཨེ་ཧྱེ་ཧི། ཞེས་དང༌། ཛཿཉེར་གཅིག་གིས་སྤྱན་དྲང༌། ཛཿཧཱུྃ་བཾ་ཧོཿས་བསྟིམ།
མཆོད་པ་རྣམས་བསང་སྦྱང༌། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ཨཱཿཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་སོགས་ནས། ཤབྡ་ཨཱཿཧཱུྃ་ཞེས་པས་བྱིན་གྱིས་བརླབས་ནས། ཨོཾ་སརྦ་བིཏ་པཱུ་ར་སོགས་དང༌། ཨོཾ་བཛྲ་སྥ་ར་ཎ་ཁཾ་སྭཱ་ཧཱ་ཞེས་དང༌།
དྲི་མེད་ཡིད་འོང་ལྷ་ཡི་རྫས། །མཆོད་ཡོན་ཞབས་བསིལ་མེ་ཏོག་སྤོས། །མར་མེ་དྲི་བཤོས་རོལ་མོའི་ཚོགས། །མགོན་པོ་འཁོར་དང་བཅས་ལ་འབུལ། །བཞེས་ནས་མི་ཕྱུགས་ལོངས་སྤྱོད་སོགས། །ཕྱྭ་གཡང་འགུགས་པའི་ཕྲིན་ལས་མཛོད།
།ཨོཾ་གུ་རུ་མ་ཧཱ་ཀཱ་ལ་ས་པ་རི་ཝཱ་ར་ཨོཾ་ཨརྒྷཾ་པྲ་ཏཱིཙྪ་སྭཱ་ཧཱ། ཨོཾ་པཱ་དྱཾ་པྲ་ཏཱིཙྪ་སྭཱ་ཧཱ། ཨོཾ་བཛྲ་པུཥྤེ་ཨཱཿཧཱུྃ་སོགས་ནས། ཤབྡ་ཨཱཿཧཱུྃ་གིས་རོལ་མོ་དང་བཅས་ཏེ་ཉེར་སྤྱོད་དང༌།
འཇིག་རྟེན་གཟུགས་མཛེས་ཇི་སྙེད་དང༌། །སྙན་བརྗིད་རོལ་མོ་ཡིད་འོང་དྲི། །རོ་མཆོག་རེག་བྱའི་འདོད་ཡོན་ལྔ། །མགོན་པོ་འཁོར་དང་བཅས༴ །བཞེས་ནས་མི་ཕྱུགས༴ །ཕྱྭ་གཡང་འགུགས་པའི༴ །མཚན་སྔགས་ཀྱི་མཐར། པཉྩ་ཀཱ་མ་གུ་ཎ་པཱུ་ཛི་ཏེ་ཨཱཿཧཱུྃ་གིས་འདོད་ཡོན་ལྔ་དང༌། སྔོན་གྱི་བསོད་ནམས་མཐུ་ཆེན་གྱི། །དཔལ་དུ་འོངས་པ་འབྱོར་པའི་ཕུལ། །མི་དབང་རྒྱལ་སྲིད་རིན་ཆེན་བདུན། །མགོན་པོ༴ །བཞེས་ནས༴ ཕྱྭ་གཡང༴ །སཔྟ་ཨུ་པ་རཏྣ་པཱུ་ཛི་ཏེ་ཨཱཿཧཱུྃ་གིས་རིན་ཆེན་བདུན་དང༌།
གང་གང་འདོད་པའི་དོན་དེ་ནི། །དེ་དེ་ལ་བརྟེན་འགྲུབ་བྱེད་པའི། །རྫས་མཆོག་ཉེ་བའི་རིན་ཆེན་བདུན། །མགོན་པོ༴ བཞེས་ནས༴ ཕྱྭ་གཡང༴ སཔྟ་ཨུ་པ་རཏྣ་པཱུ་ཛི་ཏེ་ཨཱཿཧཱུྃ་གིས་ཉེ་བའི་རིན་ཆེན་བདུན་དང༌། དགེ་མཚན་གང་གིས་སྤྲས་པ་དེར། །རྟག་ཏུ་ཤིས་པའི་དཔལ་འཇོ་བ།
།བཀྲ་ཤིས་རྟགས་བརྒྱད་འདི་དག་ནི། །མགོན་པོ༴ །བཞེས་ནས༴ །ཕྱྭ་གཡང༴ །ཨཥྚ་མངྒ་ལ་ལིངྒ་པཱུ་ཛི་ཏེ་ཨཱཿཧཱུྃ་གིས་བཀྲ་ཤིས་རྟགས་བརྒྱད་དང༌། ས་གཞི་རི་རབ་རི་བདུན་གླིང༌། །རྒྱ་མཚོར་བཅས་པ་ལྷ་དང་མིའི། །དཔལ་འབྱོར་ཕུན་ཚོགས་མཎྜལ་འདི། །མགོན་པོ༴ །བཞེས་ནས༴ །ཕྱྭ་གཡང༴ །མཎྜལ་པཱུ་ཛི་ཏེ་ཨཱཿཧཱུྃ་གིས་མཎྜལ་དང༌། ཤ་ལྔ་བདུད་རྩི་ཡེ་ཤེས་ལྔའི། །རང་བཞིན་ཟག་མེད་བདུད་རྩི་འདི། །མགོན་པོ་འཁོར་དང་བཅས་ལ་འབུལ། །བཞེས་ནས་མི་ཕྱུགས་ལོངས་སྤྱོད་སོགས། །ཕྱྭ་གཡང་འགུགས་པའི་ཕྲིན་ལས་མཛོད། །ཨོཾ་གུ་རུ་མ་ཧཱ་ཀཱ་ལ་ས་པ་རི་ཝཱ་ར་ཨ་མྲྀ་ཏེ་པཱུ་ཛི་ཏེ་ཨཱཿཧཱུྃ་གིས་ནང་མཆོད་འབུལ་ལོ།
།བསྟོད་པ་ནི། གངས་ཅན་རི་པའི་ལྷ་གཅིག་པད་དཀར་འཆང༌། །སོགས་སམ། ཕྱོགས་བཅུ་དུས་གསུམ་སོགས་ཁྱུང་པོས་མཛད་པ་གང་རུང་གིས་བསྟོད་དོ།
།དེ་ནས་གཏོར་མ་བསང་སྦྱང༌། སྟོང་པའི་ངང་ལས་ཡྃ་ལས་རླུང༌། རྃ་ལས་མེ་དང༌། མི་མགོའི་སྒྱེད་བུ་གསུམ་གྱི་སྟེང་དུ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་གོ་ཀུ་ད་ཧ་ན་ལས་ཤ་ལྔ། བི་ར་ཤུ་མུ་མ་ལས་བདུད་རྩི་ལྔ། བྷྲཱུྃ་ཨཱྃ་ཛྲིཾ་ཁྃ་ཧཱུྃ་ལས་ཡེ་ཤེས་ལྔ་རྣམས་མེས་གདུངས་ཏེ་བསྐོལ་ཞིང་ཞུ་བས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿལན་གསུམ་བརྗོད། གཏོར་སྔགས་རྩ་སྔགས་འབྲུ་བཅུ་གསུམ་པ་ལ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་པ་ལན་གསུམ་མམ་ལྔས་ཕུལ་ལོ། །མཚན་སྔགས་སྔོན་འགྲོའི་ཕྱི་མཆོད།
ནང་མཆོད། དུས་གསུམ་རྒྱལ་བ་ཀུན་དངོས་པད་དཀར་འཆང༌། །འགྲོ་འདིའི་ཕུན་ཚོགས་རེ་བ་སྐོང་བའི་ཕྱིར། །རབ་བརྗིད་ཁྲོ་བོའི་དབང་པོར་སྤྲུལ་པ་ལ། །ཡིད་བཞིན་ནོར་བུར་མཚན་གསོལ་ཁྱོད་ཕྱག་འཚལ། །དཔལ་ལྡན་མགོན་པོ་འཁོར་དང་བཅས། །མཆོད་སྦྱིན་གཏོར་མ་འདི་སྣོམས་ལ། །བསྟན་པ་བསྲུང་ཞིང་རྣལ་འབྱོར་པའི། །ཚེ་བསྲིང་ལོངས་སྤྱོད་རྒྱས་པ་དང༌། །སྐྱེ་འགྲོ་དབང་དུ་འདུ་བར་མཛོད། །ཅེས་དང༌། སྤྲོ་ན། བཅོམ་ལྡན་འདས་ཡིད་བཞིན་གཟི་ལྡན་ཐུགས་རྗེ་ཅན་ཁྱོད་ལ་གསོལ་བ་འདེབས་སོ།
།སངས་རྒྱས་ཀྱི་བསྟན་པ་སྲུངས་ཤིག །དཀོན་མཆོག་གི་དབུ་འཕང་བསྟོད་ཅིག །དགེ་འདུན་གྱི་སྡེ་སྐྱོངས་ཤིག །བླ་མའི་སྐུ་ཚེ་སྲིངས་ཤིག །རྣལ་འབྱོར་པ་བདག་ལ་སྙན་པའི་གྲགས་པས་ས་སྟེང་མ་ལུས་པར་ཁྱབ་པ་དང༌། དགོས་འདོད་ཐམས་ཅད་ཆར་བཞིན་དུ་བབས་ནས་ལོངས་སྤྱོད་ཟད་མི་ཤེས་པ་དང༌། མི་ནོར་ཟས་གསུམ་དབང་དུ་འདུ་ཞིང༌། ཐོས་བསམ་སྒོམ་གསུམ་འཕེལ་བ་དང༌། ཕྲིན་ལས་འབད་མེད་དུ་འགྲུབ་པར་མཛད་དུ་གསོལ། ཞེས་དང༌། གཏོར་མ་གཞན་ཐམས་ཅད་མཁའ་འགྲོ་སྤྱི་གཏོར་གྱི་ཆོ་གས་འབུལ་ལོ།
།དེ་ནས་མེ་ཏོག་ཐོགས་ལ། མགོན་པོ་ཡིད་བཞིན་ནོར་བུ་འཁོར་དང་བཅས་པ་ཁྱེད་རྣམས་རྟེན་འདི་དག་ལ་བརྟན་པར་བཞུགས་སུ་གསོལ། བརྟན་པར་བཞུགས་ནས་གནས་འདིར་མཁྱེན་ལྡན་དང་སྟོབས་ལྡན་འབྱོར་ལྡན་གྱིས་མཚོན་པའི་སྐྱེ་འགྲོ་ཐམས་ཅད་འདུ་ཞིང༌། སྲིད་ཞིའི་དཔལ་འབྱོར་ལོངས་སྤྱོད་ཕུན་སུམ་ཚོགས་པ་ཐམས་ཅད་རྒྱ་མཚོ་ཆེན་པོ་ལ་ཆུ་བོའི་རྒྱུན་བཞིན་དུ་འདུ་བར་མཛད་དུ་གསོལ། ཞེས་དང༌། སུ་པྲ་ཏིཥྛ་སོགས་ཀྱིས་མེ་ཏོག་འཐོར། དེ་ལྟ་བུའི་བརྟན་བཞུགས་འདི་ཉེར་གཅིག་གམ་ལྔ་བཅུའམ་བརྒྱ་རྩ་བརྒྱད་ཀྱི་བར་ཅི་ནུས་སུ་བྱ་བར་བཤད་དོ།
།དེ་ནས་གཟུངས་ཐག་བཟུང་ལ། རང་གི་སྙིང་ག་ནས་འོད་ཟེར་སྔགས་ཕྲེང་གི་རྣམ་པ་ཅན་སྤྲོས་པས་བསྐུལ། མདུན་བསྐྱེད་ཀྱི་མགོན་པོ་རྣམས་ཀྱི་ཐུགས་ཀའི་མཁའ་འགྲོ་མ་རྣམས་ལས། དེ་འདྲ་བའི་དབང་སྡུད་ཀྱི་མཁའ་འགྲོ་མ་དཔག་ཏུ་མེད་པ་འཕྲོས། འཇིག་རྟེན་གྱི་ཁམས་ཐམས་ཅད་ཁྱབ། ལྷ་མི་ཀླུ་དང་བཅས་པའི་ཚེ་དང་བསོད་ནམས། སྟོབས་དང་དཔལ་འབྱོར། ལོངས་སྤྱོད་དབང་ཕྱུག སྙན་གྲགས་རིགས་བཟང༌། རིན་པོ་ཆེ་དང༌། འབྲུ་རིགས་དང༌། རྟ་ཕྱུགས་འཕེལ་བ་ལ་སོགས་པ་འབྱོར་པའི་ཁྱད་པར་ཡིད་ལ་ཇི་ལྟར་འདོད་པ་ཐམས་ཅད་བཀུག་སྟེ། བུམ་པའི་ནང་གི་རྫས་རྣམས་ལ་གཉིས་སུ་མེད་པར་བསྟིམས་པས་འདོད་དགུའི་དཔལ་འབྱོར་ཟད་མི་ཤེས་པའི་གཏེར་གྱི་བུམ་པ་བཟང་པོར་གྱུར། བུམ་པའི་ནང་གི་དཔལ་འབྱོར་ཕུན་སུམ་ཚོགས་པ་རྣམས་རབ་ཏུ་རྒྱས་ཤིང་ཁ་ནས་ལུད། མགོན་པོའི་ཕྱག་གི་བུམ་པ་དང་ཐོད་པ་ནས་ཀྱང་ལུད། ཚོགས་བདག་གི་ཁ་དང་བཤང་ལམ་དང་ནེའུ་ལེ་རྣམས་ལས་ཀྱང་རིན་པོ་ཆེ་སྣ་ཚོགས་པ་ལྷུག་ལྷུག་བབས་པས་གནས་ཁང་དང༌། གཙུག་ལག་ཁང་དང༌། ཕོ་བྲང་བང་མཛོད་ལ་སོགས་པའི་ནང་ཐམས་ཅད་ཕྱུར་བུར་ཁེངས་པས། བདག་ཅག་དཔོན་སློབ་ཡོན་མཆོད་འཁོར་དང་བཅས་པས་མཚོན་པའི་སེམས་ཅན་ཐམས་ཅད་འདོད་དགུའི་དཔལ་འབྱོར་མཛད་པ་མེད་པའི་གཏེར་ལ་ལོངས་སྤྱོད་པའི་དབང་དང་ལྡན་པར་གྱུར་པར་བསམས་ལ། རྩ་སྔགས་འབྲུ་བཅུ་གསུམ་པ་ཅི་ནུས་སུ་བཟླའོ། །བཟླས་པའི་མཐར་མཆོད་བསྟོད་མདོར་བསྡུས་བྱའོ། །སྐོང་བ་སྐབས་འདིར་བྱས་ཀྱང་ཆོག་མོད། འོག་ཏུ་རྗེས་ཆོག་གི་མགོར་བྱས་ན་བདེ་བས་དེར་བརྗོད་པར་བྱའོ།
།དེ་ནས་ཕྱྭ་འགུགས་དངོས་ལ་མཇུག་པར་བྱ་སྟེ། རྔ་སིལ་དབྱངས་དང་བཅས་པས་མདའ་དར་གཡབ་ཅིང༌།
ཕྱྭ་ཁུ་ཡེ། དེ་རིང་བཀྲ་ཤིས་ཉི་མ་ལ། །དམ་ལྡན་རྣལ་འབྱོར་བདག་ཅག་གིས། །རྒྱལ་བའི་བསྟན་པ་དར་བ་དང༌། །འཇིག་རྟེན་དགེ་ལེགས་འབྱུང་བ་དང༌། །སེམས་ཅན་དབུལ་ཕོངས་སེལ་བ་དང༌། །ཁམས་གསུམ་དབང་དུ་བསྡུ་བ་དང༌། །སྦྱིན་བདག་དཔལ་འབྱོར་རྒྱས་པའི་ཕྱིར། །འདོད་དགུའི་འཁྱིལ་བའི་གནས་མཆོག་འདིར། །ཕྱྭ་གཞི་པདྨ་རྒྱས་པའི་སྟེང༌། །ཕྱྭ་སྣོད་རིན་ཆེན་བུམ་པའི་ནང༌། །ཕྱྭ་རྫས་ནོར་བུ་རིན་ཆེན་རིགས། །འབྲུ་སྣ་ཟས་གོས་སྨན་གྱི་ཚོགས། །དཔལ་གཡང་ཅན་གྱི་ནོར་སྣ་དང༌། །བྱིན་རླབས་དངོས་གྲུབ་རྫས་ཀུན་བསགས། །སྔགས་དང་ཕྱག་རྒྱའི་བདེན་སྟོབས་ཀྱིས། །འཛད་མེད་ལོངས་སྤྱོད་འབྱུང་བའི་གཞི། །ནམ་མཁའི་མཛོད་དུ་བྱིན་གྱིས་བརླབས། །མགོན་པོ་འཁོར་བཅས་བསྐྱེད་ཅིང་བསྟིམ། །མཆོད་ཅིང་བསྟོད་པས་མཉེས་བྱས་ནས། །གསང་སྔགས་རྫས་ཀྱིས་ཐུགས་དམ་བསྐུལ། །གདུང་བའི་དབྱངས་ཀྱིས་གསོལ་འདེབས་ན། །ཕྱྭ་གཡང་ཐམས་ཅད་འདིར་ཁུག་ཅིག །དགོས་འདོད་ཆར་ལྟར་འདིར་ཕོབ་ཅིག །ཚེ་དང་དཔལ་ནི་འདིར་སྐྱོབས་ཤིག །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ།
།ཕྱྭ་ཁུ་ཡེ། སྤྱན་རས་གཟིགས་དབང་མྱུར་མཛད་མགོན། །ཡིད་བཞིན་ནོར་བུ་ཐུགས་རྗེའི་གཏེར། །རིགས་བདག་བླ་མ་རྡོ་རྗེ་འཆང༌། །དགོས་འདོད་ཀུན་འབྱུང་དབང་གི་རྒྱལ། །ཐུགས་མཚོར་སྒེག་པའི་སྨིན་འཁྱོག་མ། །གྲངས་མེད་མཁའ་འགྲོའི་འཕྲོ་འདུ་ཅན། །ཕྲིན་ལས་དབང་གི་ལྕགས་ཀྱུ་ཡིས། །སྐྱེ་འགྲོའི་ཡིད་དབང་སྐུལ་བྱེད་ཅིང༌། །ཞབས་འདེགས་སྲིད་གསུམ་དྲེགས་པའི་གཙོ། །རིན་ཆེན་མང་སྐྱུགས་ལྷ་ཆེན་དང༌། །གནོད་སྦྱིན་ནོར་བདག་བསམ་ཡས་ཚོགས། །བུམ་བཟང་ནེའུ་ལེ་སྒྲོམ་བུ་སོགས། །མ་ངེས་ཕྱག་མཚན་ཕྱྭ་སྣོད་དུ། །སྣོད་བཅུད་ཕྱྭ་གཡང་ཀུན་བསྡུས་ཏེ། །སྒྲུབ་པོའི་རེ་བ་ཡོངས་སུ་སྐོང༌། །ཨེ་མ་ཡེ་ཤེས་སྤྲོས་བྲལ་དབྱིངས། །གཅིག་དང་དུ་མར་མ་དམིགས་ཀྱང༌། །འགྲོ་བའི་དོན་དུ་ཐ་དད་གཟུགས། །སྒྱུ་མའི་རོལ་པ་ཅིར་ཡང་གདའ། །གཞན་ཡང་མགོན་པོ་དགྱེས་སྐྱེད་ཡུམ། །རེ་མ་ཏཱི་དང་ལས་མཁན་ཚོགས། །ལྷ་ཀླུ་གཟའ་སྐར་རྒྱལ་ཆེན་བཞི། །ཕྱོགས་སྐྱོང་འཇིགས་བྱེད་དགུ་ལ་སོགས། །བདག་ཅག་དམ་ཆོས་སྒྲུབ་པ་ཡི། །བར་ཆད་སེལ་བའི་ལས་ལ་བརྩོན། །གཤིན་རྗེ་མ་མོ་སྲིན་པོ་སོགས། །མི་སྡུག་འཇིགས་པའི་གཟུགས་འཆང་བ། །ཀུན་ཀྱང་མགོན་པོའི་ཐ་ཚིག་ལྟར། །སྣ་ཚོགས་ཕྲིན་ལས་སྒྲུབ་པས་བྲེལ། །འཁོར་བཅས་དགྱེས་པར་བྱ་བ་དང༌། །བདག་གི་འདོད་པའི་དོན་སྒྲུབ་ཕྱིར། །མཆོད་བསྟོད་བསྐུལ་ཞིང་གསོལ་འདེབས་ན། །ཕྱྭ་གཡང་ཐམས་ཅད་འདིར་ཁུག་ཅིག །དགོས་འདོད་ཆར་ལྟར་འདིར་ཕོབ་ཅིག །ཚེ་དང་དཔལ་ནི་འདིར་སྐྱོབས་ཤིག །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ།
ཕྱྭ་ཁུ་ཡེ། སྔོན་ཚེ་སྣང་བ་མཐའ་ཡས་ཀྱིས། །སྙིགས་མའི་སེམས་ཅན་དབུལ་ཕོངས་པའི། །རེ་འདོད་ཡོངས་སུ་རྫོགས་པའི་ཕྱིར། །མགོན་པོ་ཁྱོད་ཉིད་བྱིན་བརླབས་ཏེ། །བཀའ་བསྒོས་གཡར་དམ་བཅས་པའི་དོན། །ནམ་ཡང་བསླུ་བར་མི་འགྱུར་ཡང༌། །ད་ལྟ་དུས་ངན་ཤུགས་བདོ་བས། །མི་རྣམས་ཚེ་ཐུང་འཚེ་བ་མང༌། །ཡུན་རིང་སྒྲུབ་པའི་ལོང་མེད་པས། །རྩེ་གཅིག་གསོལ་བ་བཏབ་ཙམ་ན། །ཞལ་བཟང་སྟོན་ཟླ་བཞད་པ་ལྟར། །བསྟན་ཅིང་དངོས་གྲུབ་འོད་དཀར་གྱིས། །བདག་ཅག་གདུང་བ་བསལ་བར་རིགས། །འཁོར་བཅས་དགྱེས༴ །བདག་གི༴ །མཆོད་བསྟོད༴ །ཕྱྭ་གཡང༴ །དགོས་འདོད༴ །ཚེ་དང་དཔལ་ནི༴ །ཕྱྭ་འདིར༴ །གཡང་འདིར་མ་ཉམས་བསྐྱབ་ཏུ་གསོལ། །ཞེས་བསྐུལ་ལོ།
།སླར་ཡང་སྤྱི་མཐུན་འགུགས་བྱེད་ཀྱི་ལྷ་མོ་སྤྲོ་བ་ནི། ཚིག་རིས་དང་མཐུན་པའི་དམིགས་པ་དང་བཅས་ཏེ། བདག་མདུན་ལྷ་ཡི་ཐུགས་ཀ་ནས། །ཕྱྭ་གཡང་འགུགས་པའི་ལྷ་མོ་སྤྲོས། །མདུན་བསྐྱེད་ལྷ་ཡི་མཐར་འཁོད་དེ། །ཕྱྭ་གཡང་འགུགས་པའི་ལས་མཛད་གྱུར།
།ཕྱྭ་ཁུ་ཡེ། ཕྱོགས་བཅུ་འཇིག་རྟེན་ཐམས་ཅད་ནས། །འཁོར་འདས་རྟེན་དང་བརྟེན་པ་ཡི། །ཕྱྭ་གཡང་ཐམས་ཅད་ཚུར་བསྡུས་ནས། །ཕྱྭ་རྫས་གཡང་རྫས་རྣམས་ལ་བསྟིམ། །སྦྱིན་བདག་དཔལ་ནི་འཕེལ་བར་མཛོད། །མདུན་བསྐྱེད་ལྷ་ཡི་ཤར་ཕྱོགས་ནས། །ལཱ་སྱ་དཀར་མོ་ཕྱྭ་ཡི་བདག །དཀར་མོ་འབུམ་དང་བཅས་པས་ཀྱང༌། །ཕྱྭ་གཡང་ཐམས་ཅད་འདིར་ཁུག་ཅིག །དགོས་འདོད་ཆར་ལྟར་འདིར་ཕོབ་ཅིག །ཚེ་དང་དཔལ་ནི་འདིར་སྐྱོབས་ཤིག །མདུན་བསྐྱེད་ལྷ་ཡི་ལྷོ་ཕྱོགས་ནས། །མཱ་ལེ་སེར་མོ་ཕྱྭ་ཡི་བདག །སེར་མོ་འབུམ་དང་བཅས་པས་ཀྱང༌། །ཕྱྭ་གཡང་ཐམས་ཅད་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །མདུན་བསྐྱེད་ལྷ་ཡི་ནུབ་ཕྱོགས་ནས། །གཱི་ཏི་དམར་མོ་ཕྱྭ་ཡི་བདག །དམར་མོ་འབུམ་དང་བཅས་པས་ཀྱང༌། །ཕྱྭ་གཡང་ཐམས་ཅད་འདིར༴ །དགོས་འདོད་ཆར་ལྟར་འདིར༴ །ཚེ་དང་དཔལ་ནི་འདིར༴ །མདུན་བསྐྱེད་ལྷ་ཡི་བྱང་ཕྱོགས་ནས། །ནཱིརྟི་སྔོན་མོ་ཕྱྭ་ཡི་བདག །སྔོན་མོ་འབུམ་དང་བཅས་པས་ཀྱང༌། །ཕྱྭ་གཡང་ཐམས་ཅད་འདིར༴ །དགོས་འདོད་ཆར་དུ་འདིར༴ །ཚེ་དང་དཔལ་ནི་འདིར༴ །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ།
།ཕྱྭ་ཁུ་ཡེ། ཉི་མ་ཤར་ཕྱོགས་ཕ་གི་ན། །གཡང་གི་ལྷ་མོ་དཀར་མོ་ནི། །དཀར་མོ་འབུམ་དང་བཅས་པས་ཀྱང༌། །ཕྱག་ན་འགུགས་བྱེད་ལྕགས་ཀྱུ་དང༌། །གཡོན་ན་སྟིམ་བྱེད་བུམ་པ་འཛིན། །ལྕགས་ཀྱུས་ཁུག་ལ་བུམ་པར་སྟིམས། །ཕྱྭ་གཡང་ཐམས་ཅད་འདིར༴ །དགོས་འདོད་ཆར་དུ་འདིར༴ །ཚེ་དང་དཔལ་ནི་འདིར༴ །ཉི་མ་ལྷོ་ཕྱོགས་ཕ་གི་ན། །ཕྱྭ་གཡང་འགུགས་པའི་ལྷ་མོ་སེར། །སེར་མོ་འབུམ་དང་བཅས་པས་ཀྱང༌། །གཡས་ན་འགུགས་བྱེད་ལྕགས་ཀྱུ་དང༌། །གཡོན་ན་སྟིམ་བྱེད་བུམ་པ་འཛིན། །ལྕགས་ཀྱུས་ཁུག་ལ་བུམ་པར་སྟིམས། །ཕྱྭ་གཡང་ཐམས་ཅད་འདིར༴ །དགོས་འདོད་ཆར་དུ་འདིར༴ །ཚེ་དང་དཔལ་ནི་འདིར༴ །ཉི་མ་ནུབ་ཕྱོགས་ཕ་གི་ན། །གཡང་གི་ལྷ་མོ་དམར་མོ་ནི། །དམར་མོ་འབུམ་དང་བཅས་པས་ཀྱང༌། །གཡས་ན་འགུགས་བྱེད་ལྕགས་ཀྱུ་དང༌། །གཡོན་ན་སྟིམ་བྱེད་བུམ་པ་འཛིན། །ལྕགས་ཀྱུས་ཁུག་ལ་བུམ་པར་སྟིམས། །ཕྱྭ་གཡང་ཐམས་ཅད་འདིར་ཁུག་ཅིག །དགོས་འདོད་ཆར་དུ་འདིར་ཕོབ་ཅིག །ཚེ་དང་དཔལ་ནི་འདིར་སྐྱོབས་ཤིག །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ། །ཉི་མ་བྱང་ཕྱོགས་ཕ་གི་ན། །ཕྱྭ་གཡང་འགུགས་པའི་ལྷ་མོ་ལྗང༌། །ལྗང་མོ་འབུམ་དང་བཅས་པས་ཀྱང༌། །གཡས་ན་འགུགས་བྱེད་ལྕགས་ཀྱུ་དང༌། །གཡོན་ན་སྟིམ་བྱེད་བུམ་པ་འཛིན། །ལྕགས་ཀྱུས་ཁུག་ལ་བུམ་པར་སྟིམས། །ཕྱྭ་གཡང་ཐམས་ཅད་འདིར༴ །དགོས་འདོད་ཆར་དུ་འདིར༴ །ཚེ་དང་དཔལ་ནི་འདིར༴ །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ། །ཉི་མ་དབུས་ཕྱོགས་ཕ་གི་ན། །གཡང་གི་ལྷ་མོ་སྨུག་མོ་ནི། །སྨུག་མོ་འབུམ་དང་བཅས་པས་ཀྱང༌། །གཡས་ན་འགུགས་བྱེད་ལྕགས་ཀྱུ་དང༌། །གཡོན་ན་སྟིམ་བྱེད་བུམ་པ་འཛིན། །ལྕགས་ཀྱུས་ཁུག་ལ་བུམ་པར་བསྟིམ། །ཕྱྭ་གཡང་ཐམས་ཅད་འདིར༴ །དགོས་འདོད་ཆར་དུ་འདིར༴ །ཚེ་དང་དཔལ་ནི་འདིར༴ །ཕྱྭ་འདིར་མ་ཕམ་གཡང་དུ་བྱོན། །གཡང་འདི་མ་ཉམས་བསྐྱབ་ཏུ་གསོལ། །ཞེས་བརྗོད་ལ། འདིའི་རྗེས་སུ་འོག་གི། ཧཱུྃ་བདག་ཉིད་ལྷ་ཡི་ཐུགས་ཀ་ནས། །དབང་སྡུད་འོད་ཀྱི་ལྕགས་ཀྱུ་སྤྲོས། །ཞེས་པ་ནས། བརླིང་བར་མཛོད། ཅེས་པའི་བར་བླངས་ལ་སྦྲེལ་ཏེ་འདོན་ནོ།
།ཕྱྭ་འགུགས་ཀྱི་བཟླས་པ་བྱ་བ་ནི། མགོན་པོའི་ཐུགས་ཀར་ཆོས་ཉིད་ཀྱི་ཐིག་ལེ་དམར་པོའི་དཀྱིལ་དུ་ཧཱུྃ་དཀར་པོ། ཐིག་ལེའི་མཐའ་སྐོར་དུ་རྩ་སྔགས་བྱི་རུའི་ཕྲེང་བ་ལྟ་བུས་བསྐོར་བ། རང་གི་ཐུགས་ཀའི་ཧཱུྃ་ཡིག་ཐིག་ལེ་སྔགས་ཕྲེང་དང་བཅས་པ་ལས་འོད་ཟེར་འཕྲོས་པའི་རྩེ་ལས་མཆོད་པའི་སྤྲིན་དཔག་ཏུ་མེད་པ་སྤྲོས་པས་མགོན་པོ་འཁོར་དང་བཅས་པ་མཆོད་པས་མཉེས་ནས། དེའི་ཐུགས་ཀའི་དབང་སྡུད་ཀྱི་མཁའ་འགྲོ་མ་ལས་རང་འདྲ་འོད་ཟེར་དམར་པོ་དང་བཅས་པ་དང༌། འཁོར་གྱི་མཁའ་འགྲོ་གནོད་སྦྱིན་དྲེགས་བྱེད་ཀྱི་ཚོགས་དང་བཅས་པ་ལས་རང་འདྲ་ཉི་ཟེར་གྱི་རྡུལ་ལྟར་མང་བ། གློག་ལྟར་མྱུར་བ་དཔག་ཏུ་མེད་པ་འཕྲོས། འཇིག་རྟེན་ཁམས་ཀྱི་ཚེ་དང་བསོད་ནམས། མཐུ་སྟོབས་དབང་ཕྱུག དཔལ་འབྱོར་གཟི་བརྗིད་ཟས་ནོར་ལོངས་སྤྱོད་ལ་སོགས་པའི་ཕྱྭ་གཡང་ཕུན་སུམ་ཚོགས་པ་ཐམས་ཅད་བསྡུས་ནས་བདག་དང་སྦྱིན་བདག་རྟེན་རྫས་རྣམས་ལ་བསྟིམས་པས། ཚེ་དང་བསོད་ནམས་དང་གཟི་བརྗིད་ལ་སོགས་པ་རྒྱས་པར་བྱས། གནས་ཁང་ལུང་པ་ཐམས་ཅད་རིན་པོ་ཆེ་དང་འབྲུ་ནོར་ལ་སོགས་པ་འདོད་པའི་ལོངས་སྤྱོད་བསམ་གྱིས་མི་ཁྱབ་པས་མེར་གྱིས་ཁེངས་པར་བསམས་ལ།
གུ་རུ་མ་ཧཱ་ཀཱ་ལ་སོགས་མང་དུ་བཟླས། མཐར་སྤྲོ་ན། རྩ་སྔགས་ཀྱི་མཇུག་ཏུ། དྷ་ན་མེ་དྷི་སིདྡྷི་སིདྡྷི་ཛཿ རཏྣ་པུ་ནི་སིདྡྷི་སིདྡྷི་ཛཿ ན་ན་ཁ་དྷེ་སིདྡྷི་སིདྡྷི་ཛཿ དྷ་ན་སཾ་བྷོ་སིདྡྷི་སིདྡྷི་ཛཿ ཞེས་ཤམ་བུ་སྦྱར་བ་ཅུང་ཟད་བཟླ། སྔགས་འདི་གྲུབ་ཆེན་ཐང་སྟོང་པའི་གསུང་སྐོར་ཞིག་ལ་ཡོད་འདུག་ཀྱང་ཞུ་དག་ཕྲན་བུ་དགོས་འདྲ།
དེ་ནས། མགོན་པོ་ཡིད་བཞིན་ནོར་བུ་འཁོར་དང་བཅས་པས་བདག་དང་སྦྱིན་བདག་གིས་གཙོར་བྱས་པའི་སེམས་ཅན་ཐམས་ཅད་ལ་སྲིད་ཞིའི་དཔལ་འབྱོར་ཕུན་སུམ་ཚོགས་པའི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་གདབ་བོ།
།ཚར་གྲངས་དུ་བྱེད་ན་མཆོད་གཏོར་རྣམས་ཁ་གསོས་ལ། མཆོད་པ་རྣམས་བྱིན་གྱིས་བརླབ། དྲི་མེད་ཡིད་འོང་ནས་འདིའི་བར་བྱ་ཞིང༌། ཚར་གསུམ་མམ་ལྔ་བདུན་སོགས་ཇི་ལྟར་སྤྲོ་བར་བྱའོ། །འདི་ལ་མཆོད་ཕྲེང་འབྲིང་པོའི་ལུགས་གཅིག་ཡོད་མོད། ཚིག་ཚོགས་མང་ཉུང་ཁྱད་ཆེ་བ་མེད་པས་མ་བཀོད་དོ།
།དེ་ནས་སྐོང་བའི་གཏོར་མ་ཆབ་ཀྱིས་བྲན། སྐོང་རྫས་རྣམས་དང་གཏོར་མའི་དཀྱིལ་དུ་རྃ་སོགས་ཧེ་རུ་ཀའི་མགོ་ནས་འབྱུང་བའི་སྔགས་དྲུག་ཕྱག་དྲུག་དང༌། བདག་གི་བསམ་པའི་སོགས་བདེན་སྟོབས་དང༌། གཏོར་སྔགས་ལན་གསུམ་གྱིས་ཕུལ།
ཧཱུྃ། སྤྱན་རས་གཟིགས་དབང་ཐུགས་རྗེའི་ཆུ་གཏེར་ལས། །ཞེས་སོགས་ཀྱི་སྐོང་བ། བཤགས་པ། ཕྲིན་བཅོལ་རྣམས་སྐོང་ཆོག་ཡོངས་འདུའི་ས་བརྟོལ་བཞིན། ཚར་གྲངས་སུ་བྱེད་ན་གཏོར་མ་གསོས་ལ། བྱིན་རླབས་མན་སྔར་བཞིན་བྱ་ཞིང་ཚར་རྗེས་མའི་མཐར་དབྱངས་ཅི་རིགས་པ་དང་བཅས་ཏེ་བསྟོད་པ་ཡང་བྱའོ། །ཉིན་གྲངས་སུ་བྱེད་ན་ཉིན་སྔ་མ་རྣམས་ལ་འདིར་རྗེས་ཆོག་བྱ་སྟེ། མཆོད་པ་ཁ་གསོས་ལ་བྱིན་གྱིས་བརླབ། མཆོད་བསྟོད་མདོར་བསྡུས་བྱས་ལ། འཁོར་ལོའི་ལྷ་རྣམས་འོད་དུ་ཞུ་བ་ལས་སྐྱེ་འགྲོ་ཐམས་ཅད་དབང་དུ་སྡུད་པར་བྱེད་པའི་འཁོར་ལོའི་རྣམ་པར་གྱུར་ཅེས་དང༌། ཡི་གེ་བརྒྱ་པ་ལན་གསུམ་གྱིས་ལྷག་ཆད་ཁ་བསྐང་བ་དང༌། མ་འབྱོར་པ་དང་སོགས་ཀྱིས་ནོངས་པ་བཤགས། མགོན་པོ་ཡིད་བཞིན་ནོར་བུ་འཁོར་དང་བཅས་པ་རྟེན་འདི་ལ་བརྟན་པར་བཞུགས་སོགས་བརྟན་བཞུགས་གོང་ལྟར་བརྗོད། དགེ་བ་འདི་ཡིས་མྱུར་དུ་བདག །མྱུར་མཛད་མགོན་པོ་འགྲུབ་སོགས་ཀྱིས་དགེ་བ་བསྔོ། འདི་ཉིད་ཀྱི་བཀྲ་ཤིས་བཀའ་རྒྱ་མའམ་མི་ཤེས་ན་རྒྱལ་མཚན་རྩེ་མོ་སོགས་གང་རིགས་ཀྱི་བཀྲ་ཤིས་དང༌། ཐམས་ཅད་ནམ་མཁའ་མཛོད་བཞིན་ལ་སོགས་པའི་སྨོན་ལམ་གྱི་རྒྱས་གདབ་བོ། །ཉིན་གྲངས་མི་བྱེད་པའམ་ཉི་མ་རྗེས་མའི་ཉིན་རྗེས་ཆོག་གི་མགོར་ཕྱྭ་སྒོ་དབྱེ་བ་སོགས་བྱ་སྟེ། དེ་ཡང་རིན་ཆེན་སྣ་བདུན་ཙཀླི། ཚོགས་ཀྱི་ཡོ་བྱད་རྣམས་འདུ་བྱས། ཡོན་བདག་བོས་ཏེ་སྟན་བཟང་པོའི་སྟེང་དུ་བཞག་ལ། རྔ་སིལ་གདངས་དང་བཅས་པས།
ཕྱྭ་ཁུ་ཡེ། སྤྱན་རས་གཟིགས་དབང་མྱུར་མཛད་མགོན། །ཡིད་བཞིན་ནོར་བུ་ཐུགས་རྗེ་ཅན། །མཁའ་འགྲོ་གནོད་སྦྱིན་ནོར་བདག་གི། །འཁོར་དང་བཅས་རྣམས་དགོངས་སུ་གསོལ། །དེ་རིང་རྒྱུ་སྦྱོར་ཡོན་བདག་གི། །ཚེ་དང་བསོད་ནམས་འཕེལ་བ་དང༌། །དབང་ཕྱུག་དཔལ་འབྱོར་རྒྱས་པའི་ཕྱིར། །ཕྱྭ་སྒོ་གཉེན་པོ་འབྱེད་དུ་གསོལ། །ཕྱྭ་སྒོ་གཉེན་པོ་བྱེད་ནས་ནི། །ཕྱི་རོལ་ཕྱྭ་གཡང་དགུག་ཏུ་གསོལ། །གནས་ཁང་འདི་ལ་བསྐྱིལ་ཏུ་གསོལ། །མི་རྒྱུད་འདི་ལ་བསྟིམ་དུ་གསོལ། །རྟེན་རྫས་འདི་ལ་བསྟིམ་དུ་གསོལ། །སྐྱེ་འགྲོ་རྣམས་ལ་སྤེལ་དུ་གསོལ། །ཕྱྭ་གཡང་ཐམས་ཅད་འདིར་ཁུག་ཅིག །དགོས་འདོད་ཆར་དུ་འདིར་ཕོབ་ཅིག །ཚེ་དང་དཔལ་ནི་འདིར་སྐྱོབས་ཤིག །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ།
།ཕྱྭ་ཁུ་ཡེ། ཤར་གྱི་སྒོ་མ་ལྕགས་ཀྱུ་མ། །དཀར་མོ་ཞི་བའི་ལས་མཛད་མ། །ཤར་གྱི་སྒོ་འདི་འབྱེད་དུ་གསོལ། །ཕྱྭ་གཡང་ཐམས་ཅད་འདིར༴ །དགོས་འདོད་ཆར་དུ་འདིར༴ །ཚེ་དང་དཔལ་ནི་འདིར༴ །ལྷོ་ཡི་སྒོ་མ་ཞགས་པ་མ། །སེར་མོ་རྒྱས་པའི་ལས་མཛད་མ། །ལྷོ་ཡི་སྒོ་འདི་འབྱེད་དུ་གསོལ། །ཕྱྭ་གཡང་ཐམས་ཅད་འདིར༴ །དགོས་འདོད་ཆར་དུ་འདིར༴ །ཚེ་དང་དཔལ་ནི་འདིར༴ །ནུབ་ཀྱི་སྒོ་མ་ལྕགས་སྒྲོག་མ། །དམར་མོ་དབང་གི་ལས་མཛད་མ། །ནུབ་ཀྱི་སྒོ་འདི་འབྱེད་དུ་གསོལ། །ཕྱྭ་གཡང་ཐམས་ཅད་འདིར་ཁུག་ཅིག །དགོས་འདོད་ཆར་དུ་འདིར་ཕོབ་ཅིག །ཚེ་དང་དཔལ་ནི་འདིར་སྐྱོབས་ཤིག །བྱང་གི་སྒོ་མ་དྲིལ་བུ་མ། །སྔོན་མོ་དྲག་པོའི་ལས་མཛད་མ། །བྱང་གི་སྒོ་འདི་འབྱེད་དུ་གསོལ། །ཕྱྭ་གཡང་ཐམས་ཅད་འདིར༴ །དགོས་འདོད་ཆར་དུ་འདིར༴ །ཚེ་དང་དཔལ་ནི་འདིར༴ །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ། །སྦྱིན་བདག་དཔལ་ནི་འཕེལ་བར་མཛོད། །ཅེས་བརྗོད།
དེ་ནས་མདའ་དར་ཐོགས་ཏེ། ཧཱུྃ། བདག་མདུན་ལྷ་ཡི་ཐུགས་ཀ་ནས། །དབང་སྡུད་འོད་ཀྱི་ལྕགས་ཀྱུ་སྤྲོས། །ཕྱོགས་བཅུའི་རྒྱལ་བ་རྒྱལ་བའི་སྲས། །ཚེ་ལྷ་ནོར་ལྷ་གཏེར་བདག་གི། །མཁྱེན་བརྩེའི་ནུས་པ་ཡོན་ཏན་དང༌། །ཁམས་གསུམ་སྣོད་བཅུད་འཇིག་རྟེན་གྱི། །ཚེ་བཅུད་བསོད་ནམས་གཟི་བརྗིད་སྟོབས། །མི་ནོར་ལོངས་སྤྱོད་དབང་ཕྱུག་རྣམས། །ཁབ་ལེན་དང་ཕྲད་ལྕགས་ཕྱེ་ལྟར། །ཚུར་བསྡུས་བདག་མདུན་ལྷ་རྣམས་དང༌། །གཡང་རྫས་ལ་བསྟིམས་སྒྲུབ་ཁང་གི། །ཕྱི་ནང་འདོད་དགུས་གཏམས་པར་གྱུར།
།ཕྱྭ་ཁུ་ཡེ། ཕྱོགས་བཅུའི་འཇིག་རྟེན་ཐམས་ཅད་ནས། །ཕུན་སུམ་ཚོགས་པའི་ཕྱྭ་འདིར་བྱོན། །ཤར་ཕྱོགས་རྒྱ་ནག་མི་ཡུལ་ནས། །མི་མང་འཕེལ་བའི་ཕྱྭ་འདིར་ཁུག །ལྷོ་ཕྱོགས་རྒྱ་གར་ཆོས་ཡུལ་ནས། །དམ་ཆོས་དར་བའི་ཕྱྭ་འདིར་ཁུག །ནུབ་ཕྱོགས་གེ་སར་དམག་ཡུལ་ནས། །གཡུལ་ལས་རྒྱལ་བའི་ཕྱྭ་འདིར་ཁུག །བྱང་ཕྱོགས་སྟག་གཟིག་ནོར་ཡུལ་ནས། །འདོད་དགུ་ནོར་གྱི་ཕྱྭ༴ །སྟེང་ཕྱོགས་འདོད་གཟུགས་ལྷ་ཡུལ་ནས། །གཟུགས་མཛེས་ལང་ཚོའི་ཕྱྭ༴ །འོག་ཕྱོགས་ནོར་ཅན་ཀླུ་ཡུལ་ནས། །རིན་ཆེན་གཏེར་གྱི་ཕྱྭ༴ །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ། །སྦྱིན་བདག་དཔལ་ཀུན་འཕེལ་བར་མཛོད། །ཕྱི་ནང་ཐེག་པའི་ཆོས་ཀྱི་ཕྱྭ༴ བསྟན་པ་རྒྱས་པའི་ཕྱྭ་འདིར༴ །བདེ་བའི་སར་ཕྱིན་ཐར་པའི་ཕྱྭ། །མཁས་བཙུན་གྲུབ་པའི་ཕྱྭ་འདིར༴ །ཚེ་དཔལ་མངའ་ཐང་འདོད་པའི་ཕྱྭ། །སྲིད་པའི་ཕུན་ཚོགས་ཕྱྭ་འདིར་ཁུག །རིན་ཆེན་འབྲུ་དབྱིག་ནོར་གྱི་ཕྱྭ། །ཅི་འདོད་འབྱུང་བའི་ཕྱྭ་འདིར་ཁུག །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ། །སྦྱིན་བདག་དཔལ་ནི་འཕེལ་བར་མཛོད། །རིགས་བཟང་མི་འཆད་མི་ཡི་ཕྱྭ། །དཔའ་མཛངས་ལྡན་པའི་ཕྱྭ་འདིར་ཁུག །རྟ་མང་འཕེལ་བ་རྟ་ཡི་ཕྱྭ། །འགྲོ་མགྱོགས་བཞོན་པའི་ཕྱྭ་འདིར༴ །ཁྱུ་མང་འཕེལ་བ་གནག་གི་ཕྱྭ། །གྲངས་མེད་ཕྱུགས་ཀྱི་ཕྱྭ་འདིར༴ །གང་འདོད་འཇོ་བ་བཞོན་མའི་ཕྱྭ། །འོ་བཅུད་མང་འཛིན་ཕྱྭ་འདིར༴ །རོ་བཅུད་སྨིན་པ་འབྲུ་ཚོགས་ཕྱྭ། །ལོ་ལེགས་འབྲུ་འཕེལ་ཕྱྭ་འདིར༴ །ངོ་ཚ་གཅེར་སྐྱོབ་བགོ་བའི་ཕྱྭ། །དྲོ་འཇམ་བདེ་སྟེར་ཕྱྭ་འདིར༴ །ལུས་སྲོག་འཚོ་བྱེད་ཟས་ཀྱི་ཕྱྭ། །རོ་བཅུད་མངར་བའི་ཕྱྭ་འདིར༴ །མི་ཕྱེད་རང་སྲུང་གོ་མཚོན་ཕྱྭ། །དགྲ་ལས་རྒྱལ་བྱེད་ཕྱྭ་འདིར་ཁུག །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ། །སྦྱིན་བདག་དཔལ་ནི་འཕེལ་བར་མཛོད། །སྲ་ཞིང་བརྟན་པ་ས་ཡི་ཕྱྭ། །ཐེག་པ་ཆེ་བའི་ཕྱྭ་འདིར་ཁུག །རླན་ཞིང་གཤེར་བ་ཆུ་ཡི་ཕྱྭ། །རྒྱུན་མི་ཆད་པའི་ཕྱྭ་འདིར་ཁུག །ཚ་ཞིང་སྲེག་པ་མེ་ཡི་ཕྱྭ། །སྨིན་པར་བྱེད་པའི་ཕྱྭ་འདིར་ཁུག །ཡང་ཞིང་གཡོ་བ་རླུང་གི་ཕྱྭ། །སྟོབས་དང་ལྡན་པའི་ཕྱྭ་འདིར་ཁུག །ཕྱྭ་འདིར་མ་ཕམ་གཡང་དུ་བྱོན། །གཡང་འདིར་མ་ཉམས་བསྐྱབ་ཏུ་གསོལ། །སྦྱིན་བདག་དཔལ་ནི་འཕེལ་བར་མཛོད། །འཕོ་འགྱུར་བྲལ་བ་གོ་འཕང་ཕྱྭ། །རི་རྒྱལ་ལྟ་བུའི་ཕྱྭ་འདིར་ཁུག །ཀུན་ཏུ་གསལ་བ་སྙན་པའི་ཕྱྭ། །ཉི་ཟླ་ལྟ་བུའི་ཕྱྭ་འདིར་ཁུག །ཁྱབ་བདག་ཆེན་པོ་དབང་གི་ཕྱྭ། །ནམ་མཁའ་ལྟ་བུའི་ཕྱྭ་འདིར་ཁུག །མི་ཟད་འཕེལ་བ་དཔལ་འབྱོར་ཕྱྭ། །དབྱར་མཚོ་ལྟ་བུའི་ཕྱྭ་འདིར་ཁུག །ཕྱོགས་བཅུའི་འཇིག་རྟེན་ཁམས་ཀུན་ནས། །བདེ་དགའ་དཔལ་འབྱོར་རྒྱས་པའི་ཕྱྭ། །ཉི་མ་བཞིན་དུ་ལྷམ་མེར་བྱོན། །ཟླ་བ་བཞིན་དུ་གསལ་ལེར་བྱོན། །ན་བུན་བཞིན་དུ་ཐིབས་སེར་བྱོན། །སྦྲང་ཆར་བཞིན་དུ་སིལ་ལེར་བྱོན། །དེ་རིང་སྦྱིན་པའི་བདག་པོ་ཡི། །ཚེ་དང་བསོད་ནམས་རིགས་བརྒྱུད་འཁོར། །ནོར་ཕྱུགས་ལོངས་སྤྱོད་ཐམས་ཅད་ནི། །འཕེལ་ཞིང་རྟག་ཏུ་བརླིང་བར་མཛོད།
།དེ་ནས་དངོས་གྲུབ་བསྐུལ་བ་ནི། ཕྱེ་མར་མདའ་དར་གཏོར་མ། སྤྱན་གཟིགས་སོགས་སྦྱིན་བདག་ཕོ་མོ་གང་ཡོད་ལ་ལག་སྟོང་མ་ལུས་པར་འཛིན་དུ་བཅུག་ལ། སློབ་དཔོན་གྱིས་གཏེར་བུམ་ཐོགས་ཏེ། བརྡ་སྤྲོད་མེད་ཀྱང་རུང་མོད། སྤྲོ་ན་འདི་སྐད་བརྗོད། འོ་ཁྱེད་རང་རྣམས་དངོས་གྲུབ་བླང་བའི་དོན་དུ་དམིགས་པ་འདི་བཞིན་དུ་མཛོད། བུམ་པ་འདི་ཉིད་སྲིད་པ་གསུམ་གྱི་ཕྱྭ་གཡང་དགེ་ལེགས་ཕུན་སུམ་ཚོགས་པ་ཐམས་ཅད་འདུས་པའི་ངོ་བོ་མི་ཟད་པའི་གཏེར་ནམ་མཁའི་མཛོད་ལྟ་བུར་གྱུར་པའི་དབུས་སུ་མགོན་པོ་ཡིད་བཞིན་ནོར་བུ་འཁོར་མཁའ་འགྲོ་ནོར་བདག་གི་ཚོགས་དང་བཅས་པ་ལ། གཞན་ཡང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཚེ་ལྷ་ནོར་ལྷའི་ཚོགས་ཀྱིས་བསྐོར་བ་དང་བཅས་པར་གསལ་བ་དེ་དག ཁྱེད་རང་རྣམས་ཀྱི་སྤྱི་བོར་སྤྱན་དྲངས་ནས་དངོས་གྲུབ་བསྐུལ་བའི་རྐྱེན་གྱིས་ལྷ་ཚོགས་རྣམས་ཀྱི་སྐུའི་ཆ་དང་ཞབས་འོག་གི་ཚོགས་བདག་གི་ཁ་དང་བཤང་ལམ་དང༌། ནེའུ་ལེ་རྣམས་ལས་རིན་པོ་ཆེ་སྣ་ཚོགས་པ་ལྷུག་ལྷུག་བབས། བུམ་པའི་ནང་གི་ཕྱྭ་རྫས་རྣམས་ལས་འདོད་དགུ་ལོངས་སྤྱོད་ཀྱི་ཆར་ཆེན་པོ་ཕབ་ནས་དངོས་གྲུབ་ཏུ་སྩལ་བས། ཁྱེད་རྣམས་ཀྱི་ཚེ་དང་བསོད་ནམས་སྟོབས་དང་གཟི་བརྗིད་ལ་སོགས་པ་རྒྱས་པར་བྱས། གནས་ཁང་དང་ལུང་པ་ཐམས་ཅད་ཟས་ནོར་ལོངས་སྤྱོད་ཕུན་སུམ་ཚོགས་པས་ཡོངས་སུ་གང་བར་མོས་པ་མཛོད། དྲིལ་གསིལ་དབྱངས་དང་བཅས་པས།
ཕྱྭ་ཁུ་ཡེ། བླ་མ་རྒྱལ་བ་སྲས་དང་བཅས། །ཚེ་སྦྱིན་ནོར་སྦྱིན་ལྷ་ཡི་ཚོགས། །མྱུར་མཛད་མགོན་པོ་ཐུགས་རྗེ་ཅན། །མཁའ་འགྲོ་གནོད་སྦྱིན་འཇིག་རྟེན་སྐྱོང༌། །ཐམས་ཅད་བདག་ལ་བརྩེར་དགོངས་ནས། །དེང་འདིར་སྦྱིན་པའི་བདག་པོ་ལ། །ལུས་ལ་མི་ཤིགས་དངོས་གྲུབ་སྩོལ། །ངག་ལ་འགག་མེད་དངོས་གྲུབ་སྩོལ། །སེམས་ལ་འཁྲུལ་མེད་དངོས་གྲུབ་སྩོལ། །ཡོན་ཏན་ཟད་མེད་དངོས་གྲུབ་སྩོལ། །ཕྲིན་ལས་མི་ནུབ་དངོས་གྲུབ་སྩོལ། །འཆི་མེད་ཚེ་ཡི་དངོས་གྲུབ་སྩོལ། །བསོད་ནམས་རྒྱས་པའི་དངོས་གྲུབ་སྩོལ། །བདེ་སྐྱིད་ལྡན་པའི་དངོས་གྲུབ་སྩོལ། །མི་ནོར་འཕེལ་བའི་དངོས་གྲུབ་སྩོལ། །འཁོར་འབངས་རྒྱས་པའི་དངོས་གྲུབ་སྩོལ། །སྙན་གྲགས་རྒྱས་པའི་དངོས་གྲུབ་སྩོལ། །ལོ་ཕྱུགས་ལེགས་པའི་དངོས་གྲུབ་སྩོལ། །རིན་ཆེན་འབྲུ་འཕེལ་དངོས་གྲུབ་སྩོལ། །ལོངས་སྤྱོད་རྒྱ་མཚོའི་དངོས་གྲུབ་སྩོལ། །མངའ་རིས་ཡངས་པའི་དངོས་གྲུབ་སྩོལ། །དགེ་ཆོས་འཕེལ་བའི་དངོས་གྲུབ་སྩོལ། །ཅི་བསམ་འགྲུབ་པའི་དངོས་གྲུབ་ཀྱིས། །སྦྱིན་བདག་འདི་ལ་དབང་བསྐུར་རོ།
།ད་ལྟ་ཉིད་དུ་བྱིན་གྱིས་རློབས། །ཨོཾ་ཨཱཿཧཱུྃ་ཀཱ་ཡ་ཝཱཀ་ཙིཏྟ་སརྦ་སིདྡྷི་ཨ་བྷི་ཥིཉྩཱ་མི། ཨ་དྷིཥྛཱ་ན་ཨ་དྷིཥྛི་ཏེ་སྭཱ་ཧཱ། ཞེས་བརྗོད་ཅིང་གནས་གསུམ་དུ་རེག་ཅིང་ལག་ཏུ་སྦྱིན་ཏེ་དབང་བསྐུར། གཏོར་མའི་ཟས་སྣ་སོགས་དངོས་གྲུབ་ཀྱི་རྫས་རྣམས་ལས་ཅུང་ཟད་རེ་འགྱེད། དེ་ནས་འབྱོར་པ་རྒྱས་པའི་ཕྱིར་རྒྱལ་སྲིད་སྣ་བདུན་གྱི་གཟུགས་རེ་རེ་ནས་ཐོགས་ཏེ།
ཕྱྭ་ཁུ་ཡེ། ཀུན་ལ་དབང་བསྒྱུར་འཁོར་ལོའི་ཕྱྭ། །དབང་གིས་བསྒྱུར་བའི་བཀྲ་ཤིས་སྩོལ། །ཨོཾ་ཙཀྲ་རཏྣ་མངྒ་ལ་བྷ་ཝ་ཏུ་སྭཱ་ཧཱ། མུན་སེལ་འདོད་འབྱུང་ནོར་བུའི་ཕྱྭ། །དགོས་འདོད་འབྱུང་བའི་བཀྲ་ཤིས་སྩོལ། །ཨོཾ་མ་ཎི་རཏྣ་མངྒ་ལ་བྷ་ཝ་ཏུ་སྭཱ་ཧཱ། ཐམས་ཅད་ཀུན་བསྐྱེད་བཙུན་མོའི་ཕྱྭ། །མཛེས་སྡུག་དཔལ་གྱི་བཀྲ་ཤིས་སྩོལ། །ཨོཾ་ཝསྟཱི་རཏྣ་མངྒ་ལ་བྷ་ཝ་ཏུ་སྭཱ་ཧཱ། ཕྱི་ནང་དོན་གྲུབ་བློན་པོའི་ཕྱྭ། །ཆེ་སྲིད་བརྟན་པའི་བཀྲ་ཤིས་སྩོལ། །ཨོཾ་མ་ཧཱ་ཏཱ་རཏྣ་མངྒ་ལ་བྷ་ཝ་ཏུ་སྭཱ་ཧཱ། ཐེག་ཆེན་སྟོབས་ཆེན་གླང་པོའི་ཕྱྭ། །སྟོབས་ཆེན་ཟིལ་གནོན་བཀྲ་ཤིས་སྩོལ། །ཨོཾ་ཧསྟི་རཏྣ་མངྒ་ལ་བྷ་ཝ་ཏུ་སྭཱ་ཧཱ། ཅང་ཤེས་ཤུགས་ལྡན་རྟ་མཆོག་ཕྱྭ། །བདེ་ཆེན་བགྲོད་པའི་བཀྲ་ཤིས་སྩོལ། །ཨོཾ་ཨ་ཤྭ་རཏྣ་མངྒ་ལ་བྷ་ཝ་ཏུ་སྭཱ་ཧཱ། ལོག་རྟོག་དཔུང་འཇོམས་དམག་དཔོན་ཕྱྭ། །བདུད་ལས་རྒྱལ་བའི་བཀྲ་ཤིས་སྩོལ། །ཨོཾ་ཁངྒ་རཏྣ་མངྒ་ལ་བྷ་ཝ་ཏུ་སྭཱ་ཧཱ། མི་དབང་འཁོར་ལོས་སྒྱུར་རྒྱལ་གྱི། །རིན་ཆེན་སྣ་བདུན་བཀྲ་ཤིས་མཆོག །དེང་འདིར་བདག་ཅག་འཁོར་བཅས་ལ། །བཀྲ་ཤིས་ཕུན་སུམ་ཚོགས་པར་ཤོག །ཅེས་དང་གཞན་ཡང་བཀྲ་ཤིས་ཅི་རིགས་པ་བརྗོད་ཅིང་མེ་ཏོག་གི་ཆར་དབབ་བོ།
།དེ་ནས་ཡོན་མཆོད་ཐམས་ཅད་གཏང་རག་གི་ཚོགས་ལ་རོལ་པ་ནི། སྔར་བཤམས་པའི་ཚོགས་རྫས་གཏོར་མ་ལྟར་བྱིན་གྱིས་བརླབས་ནས། ཚོགས་ཕུད་དང་པོ་སྣོད་གཅིག་ཏུ་ཆབ་ཀྱིས་བྲན་ཏེ། ཞལ་ཟས་རོ་བརྒྱ་སོགས་ཚིགས་བཅད་ཀྱིས་བླ་མ་དང་དཀོན་མཆོག་ལ་དབུལ། གཉིས་པ་གཏོར་མ་རྣམས་ཁ་གསོས་ལ་ཆབ་བྲན། གུ་རུ་མ་ཧཱ་ཀཱ་ལ་སོགས་གཏོར་སྔགས་དང༌། ཨོཾ་ཁ་ཁ་ཁཱ་ཧི་སོགས་མཁའ་འགྲོ་སྤྱི་གཏོར་གྱི་སྔགས་ཀྱིས་མདུན་བསྐྱེད་གཙོ་འཁོར་ལ་དབུལ། དེ་ནས་དཔོན་སློབ་སྦྱིན་བདག་དང་བཅས་པ་ལ་དྲངས་ཏེ་ལོངས་སྤྱད། སློབ་དཔོན་གྱི་ལྷག་མ་ཆང་དང་ཆབ་ཀྱིས་བྲན་ལ། ཨོཾ་ཨཱཿཧཱུྃ་གིས་བྱིན་གྱིས་བརླབ། ཨོཾ་ཨུཙྪིཥྚ་བ་ལིནྟ་བྷཀྵ་སཱི་སྭཱ་ཧཱ། འབྱུང་པོ་ལྷག་མ་ལ་དབང་བ་རྣམས་ལ་སྦྱིན་ནོ། །ངོམས་ཤིང་ཚིམ་པའི་སྐལ་བ་དང་ལྡན་པར་གྱུར། ཅེས་བརྗོད་ལ་གཙང་སར་དོར་རོ། །སྦྱིན་བདག་རང་གནས་སུ་བཏང་ལ། མཆོད་པ་ཁ་གསོས་ཏེ་རྗེས་ཆོག་གོང་བཞིན་བྱ། བུམ་པ་སོགས་སྒྲུབ་རྟེན་རྣམས་མཛོད་ཕུག་ཏུ་སྒྲོམ་བུ་ལ་སོགས་པར་འཇོག་ཅིང་བཀྲ་ཤིས་བརྗོད་དོ། །རྣམ་གཞག་སྤྱི་དང་མི་འགལ་འདོན་བརྗོད་ཚིག །སྟབས་བདེ་ལྷུར་བྱས་ཆོ་ག་འདི་སྤེལ་བའི། །ལྷག་བསམ་འོད་བརྒྱས་འགྲོ་བའི་དཔལ་འཕེལ་ཞིང༌། །དགེ་བ་བྱང་ཆུབ་ཆེན་པོའི་རྒྱུར་སྨིན་ཤོག
།ཅེས་མགོན་དཀར་ཡིད་བཞིན་ནོར་བུའི་བུམ་པའི་རྟེན་ལ་བརྟེན་ནས་ཕྱྭ་གཡང་འགུགས་པའི་ཆོ་ག་རིན་ཆེན་དོན་ཡོད་ཞགས་པ་ཞེས་བྱ་བ་འདི་ནི་བྲང་ཏི་འཇམ་པའི་དབྱངས་ནམ་མཁའ་རྒྱལ་མཚན་ལེགས་པའི་འབྱུང་གནས་དཔལ་བཟང་པོའི་ཞལ་སྔ་ནས་ཀྱི་བཀའ་ལུང་གྱེན་ཟློག་མ་སྤོབས་པར་འདོན་བརྗོད་སྟབས་བདེ་བ་ལྷུར་བླངས་ཏེ་རྒྱལ་ཁམས་པ་ངག་དབང་བློ་གྲོས་སྙིང་པོ་གཞན་ཕན་མཐའ་ཡས་པའི་འོད་ཟེར་ཞེས་བོད་པས་དཔལ་ལྷུན་གྲུབ་སྟེང་གི་ཆོས་གྲྭར་བྲིས་པ་དགེ་ལེགས་མཆོག་ཏུ་གྱུར་ཅིག། །།