Thun mong ma yin pa shog dril dang bsrung ba 'bri thabs rdo rje'i go cha

Resource ID	SCv11p770
Title	thun mong ma yin pa shog dril skor la shog dril dang bsrung ba 'bri thabs rdo rje'i go cha bla ma shangs pa lo tsA ba la nag po chen pos smras pa
Alt. title	bsrung ba'i 'khor lo bya ba
Topics	Chadrupa
Sub-Topics	Various
Author	Khyungpo Neljor
Associated Person	Gelek Pelsang
Link	BDRC W23922 BDRC W3CN18508 (v3p.15)

༈ གཉིས་པ་ཐུན་མོང་མ་ཡིན་པ་ཤོག་དྲིལ་སྐོར་ལ།
ཤོག་དྲིལ་དང་བསྲུང་བ་འབྲི་ཐབས་རྡོ་རྗེའི་གོ་ཆ་བླ་མ་ཤངས་པ་ལོ་ཙཱ་བ་ལ་ནག་པོ་ཆེན་པོས་སྨྲས་པ་བཞུགས་སོ།།
༼ཛུ༽ ན་མོ་མ་ཧཱ་ཀཱ་ལ་ཡེ།
འདི་ཡི་སྒོ་ནས་བསྲུང་བ་བྱ་བ་ནི། །གྷི་ཝཾ་གུར་གུམ་ལ་སོགས་པས། །འཁོར་ལོ་རྩིབས་བརྒྱད་མུ་ཁྱུད་བཅས། །ལེགས་བྲིས་དེ་ཡི་ལྟེ་བ་ལ། །ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣན་བི་ན་ཡ་ཀ་ཧཱུྃ་ཧཱུྃ་ཆེ་གེ་མོ་ལ་རཀྵ་རཀྵ་སྭཱ་ཧཱ། ཞེས་བཀོད་སླར་ཡང་རྩིབས་བརྒྱད་ལ། །ཡི་གེ་མགོ་བོ་ཕྱིར་བསྟན་ནས། །གསང་སྔགས་དེ་ཉིད་རྩིབས་རེ་ལ། །ཚར་རེ་ལེགས་པར་བྲི་བར་བྱ། །ལྟེ་བའི་དབུས་སུ་ཧཱུྃ་ཡིག་ལ། མདུན་ནས་བརྩམ་སྟེ་གཡས་བསྐོར་དུ། །གོང་གི་གསང་སྔགས་བྲི་བར་ཤེས། །ཨོཾ་ནས་སྨ་ར་སི་ཏ་དང་། །ཞེས་པའི་བར་དུ་རྫོགས་པའི་མཐར། །མ་མའམ་ཆྒཻ་འདི་ཉིད་ལ། །རཀྵ་རཀྵ་སྭཱ་ཧཱ་ཞེས། །མདུན་ནས་བརྩམས་ཏེ་གཡས་བསྐོར་དུ། །མུ་ཁྱུད་དག་ལ་བྲི་བར་བྱ། །དེ་ཡི་ཕྱི་རོལ་བྲི་བྱ་བ། །གྲི་གུག་རྩེ་མོ་ཕྱིར་བལྟས་པའི། །མཚོན་ཆའི་འཁོར་ལོ་སྔོན་པོ་བྱ། །དེ་ཡི་ཕྱི་རོལ་མེ་རི་བྲི། །དེ་ནས་རབ་གནས་བྱ་བ་ནི། །མདུན་དུ་མཆོད་རྫས་གཏོར་མ་བཤམས། །རང་ལྷའི་ང་རྒྱལ་ལྡན་པ་ཡི། འཁོར་ལོ་བསངས་སྦྱངས་སྟོང་པར་གྱུར། །དེ་ལས་བྷྲཱུཾ་ཡིག་ཡོངས་གྱུར་པའི། །འཁོར་ལོ་འོད་ཟེར་འབར་བ་བསམ། །དེ་སྟེང་པཾ་ལས་པདྨ་དང་། །རཾ་ལས་ཉི་མའི་དཀྱིལ་འཁོར་དང་། །དེ་ཡི་སྟེང་དུ་ཡི་གེ་རྣམས། འོད་ལྡན་འབར་ཞིང་བགྲོད་པར་བསམ། །དེ་དག་རྣམས་དང་རང་ཉིད་ཀྱིས། །ཐུགས་ཀའི་ཧཱུྃ་གི་འོད་ཟེར་གྱི། །ཤར་ལྷོ་མཚམས་ཀྱི་དུར་ཁྲོད་ནས། །ཡེ་ཤེས་མགོན་པོ་སྤྱན་དྲངས་ལ། །སྔགས་ལ་ཐིམ་པའི་ཡི་གེ་རྣམས། །ཡོངས་སུ་གྱུར་པ་མགོན་པོར་བསྐྱེད། །སྐུ་མདོག་ཕྱག་མཚན་གསལ་བར་བསྒོམ། །དེའི་ཐུགས་ཀར་སྔགས་བཀོད་ལ། །ཞལ་ནས་ཞལ་དུ་འཁོར་བར་བསམ། །སྔགས་གཉིས་སྤེལ་ཚིག་བཅས་པ་རྣམས། །བརྒྱ་རྩ་བརྒྱད་དུ་བཟླས་པ་བྱ། །མཆོད་དང་གཏོར་མ་ནང་མཆོད་འབུལ། བསྟོད་ནས་སྐབས་ཀྱི་ཕྲིན་ལས་བཅོལ། །མགོན་པོ་འོད་དུ་ཞུ་བ་ལས། །བྲིས་པའི་ཡིག་འབྲུའི་རྣམ་པར་གྱུར། །སླར་ཡང་སྔགས་ལས་འོད་འཕྲོས་ཏེ། །ཕྱོགས་བཅུའི་སངས་རྒྱས་ཐམས་ཅད་ཀྱིས། །ཡེ་ཤེས་སྔགས་ཀྱི་རྣམ་པར་བཀུག །བྲིས་པ་དེ་ལ་བསྟིམས་པར་བྱ། །རྟེན་འབྲེལ་སྙིང་པོ་ཉི་ཤུ་གཅིག །བརྗོད་ཅིང་སུ་པྲ་ཏིཥྛ་ཡིས། །མེ་ཏོག་འཐོར་ལ་ཤིས་པ་བརྗོད། །གང་གི་ལུས་ཀྱི་མགྲིན་པ་དང་། །དཔུང་པར་བཅིངས་པའི་སྐྱེས་བུ་དེ། །ཉེར་འཚེའི་གནོད་པ་མ་ལུས་ལས། །བསྲུང་བྱེད་རྡོ་རྗེའི་གོ་ཆ་ཡིན། །བླ་མ་ཤངས་པ་ལོ་ཙཱ་ལ། །ནག་པོ་ཆེན་པོ་རང་གིས་སྨྲས། །གཅེས་པའི་བུ་ལ་སྦྱིན་པར་བྱ། །ཅེས་གསུངས།
མང་ཐོས་དགེ་ལེགས་དཔལ་བཟང་གིས། །མཁས་གྲུབ་གོང་མའི་མན་ངག་ལ། །ལྷད་ཞུགས་བསལ་ནས་དག་པར་བྱས།
།གུ་ཧྱ་ས་མ་ཡ།།