Mokchokpa Yeshé Jampa Tenpé Gyeltsen

Resource ID	P366
Date of Birth	19th c.	Date of Death	Unknown

Name Variants

smog lcog pa ye shes byams pa bstan pa'i rgyal mtshan
'bras spungs rmog lcog

Teachers

Kalu Dorjé Chang

Associated Places

• Primary seat: Nyethang Mokchok

Notes

Nyethang Mokchok Trülku 7?
Linked to Drepung
W28810: སྐྱབས་རྗེ་རྨོག་ལྕོག་རྡོ་རྗེ་འཆང་མཚན་བརྗོད་པར་དཀའ་བ་རྗེ་བཙུན་ཡེ་ཤེས་བྱམས་པ་བསྟན་པའི་རྒྱལ་མཚན་དཔལ་བཟང་པོའི་མཛད་རྣམ་རྒྱས་པ་མ་རྙེད་པས་མདོ་ཙམ་ཞིག་ནི། རྨོག་ལྕོག་རྡོ་རྗེ་འཆང་ཆེན་པོའི་ཞབས་བརྟན་དགའ་བྱང་གསེར་ཀོང་རྡོ་རྗེ་འཆང་ངག་དབང་ཚུལ་ཁྲིམས་དོན་ལྡན་དཔལ་བཟང་པོའི་གསུང་ལས།
ཟབ་གསལ་ཡེ་ཤེས་ལྔ་ཡི་རོལ་པ་ལས། །ཚད་མེད་བྱམས་པ་ཆེན་པོའི་སྐུར་བཞེངས་ཏེ། །དུས་མཐའ་འདིར་ཡང་རྣམ་དག་བཤད་སྒྲུབ་ཀྱིས། །བསྟན་པའི་རྒྱལ་མཚན་འཛིན་ལ་གསོལ་བ་འདེབས།

།ཞེས་གསུངས་པ་ལྟར་ངེས་པ་དོན་གྱི་བཤད་སྒྲུབ་ཀྱི་བསྟན་པའི་རྒྱལ་མཚན་འཛིན་པ་ཆེན་པོ་འདི་ཉིད། ཤངས་པ་རིན་ཆེན་བདུན་ལྡན་གྱི་ལྔ་པ་བླ་མ་མགོན་པོའི་རྣལ་འབྱོར་པ་ཆེན་པོ་རྨོག་ལྕོག་རིན་ཆེན་བརྩོན་འགྲུས་ནས་ཉེ་བར་བཟུང་། སྐྱབས་མཆོག་རྡོ་རྗེ་འཆང་འདི་ཉིད་ཀྱི་བར་གསུམ་ལྡན་རྡོ་རྗེ་འཛིན་པ་ཆེན་པོའི་སྐུའི་རྣམ་རོལ་ཟམ་མ་ཆད་པར་བྱོན་ནའང་མཛད་རྣམ་ཞིབ་པར་མ་མཇལ་ལ།
སྐབས་སུ་བབས་པ་རྗེ་བཙུན་བླ་མ་དམ་པ་ཡེ་ཤེས་བྱམས་པ་བསྟན་པའི་རྒྱལ་མཚན་དཔལ་བཟང་པོ་མཆོག་གང་དུ་འཁྲུངས་པའི་ཡུལ་ནི། བོད་ཡུལ་དབུས་ཆོས་འཁོར་དཔལ་གྱི་ལྷ་སའི་ནུབ་ཕྱོགས་ཧ་ཅང་ཐག་མི་རིང་བའི་སར། རྗེ་ཉིད་སྐུ་ཕྲེང་རིམ་བྱོན་གྱི་བསྟི་གནས་རྨོག་ལྕོག་རི་ཁྲོད་ཀྱི་ཉེ་འདབས། སྔོན་མཉམ་མེད་ཇོ་བོ་ཆེན་པོ་ལོ་དགུར་བཞུགས་པའི་ས་སྙེ་ཐང་བྱ་བ་དེ་ཡིན་པར་གྲགས་ལ༑ སྐུ་གཞོན་ནུའི་དུས་ནས་གོང་མའི་གདན་སར་བཀོད།
རིམ་བཞིན་དཔལ་ལྡན་འབྲས་སྤུངས་བཀྲིས་སྒོ་མང་གྲྭ་ཚང་གི་ཆོས་གྲྭར་ཞུགས་ནས་གཞུང་ཆེན་བཀའ་པོད་ལྔ་ལ་གསན་བསམ་རྫོགས་པར་མཛད། གཞན་ཡང་སྒོ་མང་མཁན་ཆེན་མཁྱེན་རབ་བསྟན་པ་ཆོས་འཕེལ་དང་། དགའ་བྱང་གསེར་ཀོང་རྡོ་རྗེ་འཆང་ངག་དབང་ཚུལ་ཁྲིམས་དོན་ལྡན། བཀའ་འགྱུར་བླ་མ་རིན་པོ་ཆེ་བློ་བཟང་དོན་ལྡན། འབུལ་སྡུད་རྡོ་རྗེ་འཆང་བློ་བཟང་ཡེ་ཤེས་བསྟན་པའི་རྒྱལ་མཚན། སྟག་ཕུ་རྡོ་རྗེ་འཆང་པདྨ་བཛྲ། སྐྱབས་རྗེ་ཕ་བོང་ཁ་པ་བདེ་ཆེན་སྙིང་པོ། སྐྱབས་རྗེ་ཁང་གསར་རྡོ་རྗེ་འཆང་ངག་དབང་ཐུབ་བསྟན་ཆོས་ཀྱི་དབང་ཕྱུག་དཔལ་བཟང་པོ་ལ་སོགས་པའི་མཚན་ལྡན་རྡོ་རྗེ་སློབ་དཔོན་དེ་རྣམས་ཀྱི་དྲུང་ནས་བདེ་གསང་འཇིགས་གསུམ་ལ་སོགས་པའི་ཡི་དམ་རྒྱུད་སྡེ་བཞིའི་དབང་དང་རྗེས་གནང་ཁྲིད་མན་ངག་མ་ལུས་པ་དང་། བཀའ་འགྱུར་བསྟན་འགྱུར་དང་གསུང་འབུམ་ཁག་ལ་སོགས་པའི་ཁྲིད་ལུང་གི་རྒྱུན་བཞུགས་སོ་ཅོག་མཐའ་དག་གསན། དེ་ཡང་། ཐོས་དོན་ཇི་བཞིན་རྒྱུད་ལ་སྦྱར་བས་བཙུན། །ཞེས་པ་ལྟར་གང་གསན་པའི་ཆོས་དེ་དག་ཐུགས་ཉམས་སུ་བཞེས་པ་ལ་བརྟེན་ནས་གྲུབ་པའི་གོ་འཕང་མཐོན་པོར་གཤེགས་པའི་ཚུལ་མཛད། རང་གིས་ཐུགས་ཉམས་སུ་བཞེས་པའི་ཚུལ་དེ་དག་གཞན་ལ་སྤེལ་བར་མཛད་པའི་ཚུལ་མཚོན་ཙམ་ཞུ་ན། སྒོ་མང་འདུ་ཁང་ནང་འདུས་པ་རྒྱ་མཚོར་བྱམས་ཆོས་སྡེ་ལྔའི་བཀའ་ཁྲིད་དང་། འཇིགས་བྱེད་དཔའ་གཅིག་གི་དབང་། གཞན་ཡང་ལྗགས་ལུང་དུ་མ། ཧར་གདོང་རྒྱུད་ཁང་དུ་མགོན་པོའི་བཀའ་ཆེན་བཅུ་གསུམ་དང་། མཁས་གྲུབ་རྗེའི་མགོན་པོའི་བེའུ་བུམ་སོགས་དང་། གཞན་ཡང་ལྷ་ས་དང་ལྷོ་ཁ་ཁུལ་སོགས་ལ་བཀའ་འགྱུར་དང༌། ལམ་རིམ་སྐོར་ཐེངས་མང་གསུངས་པ་དང་། ལྷག་པར་ཞྭ་དམར་ལམ་རིམ་གྱི་ཁྲིད་རྒྱུན་དབུས་ཕྱོགས་སུ་ཆད་ཉེའི་སྐབས་ཉིད་ཀྱིས་སྨན་རྩིས་མཁན་པོ་མཁྱེན་རབ་ནོར་བུའི་དྲུང་ནས་གསན་ཏེ་སྤེལ་བར་མཛད་པ་དང་། གཞན་ཡང་༧སྐྱབས་རྗེ་ལྷ་བཙུན་རྡོ་རྗེ་འཆང་སོགས་ལ་རྣམ་སྣང་མངོན་བྱང་གི་དབང་སོགས་གནང་བ་དང་།
རྭ་སྟོད་ཆུ་དབར་རིན་པོ་ཆེ་སོགས་ལ་འཇམ་དབྱངས་ཆོས་སྐོར་གྱི་རྗེས་གནང་དང་། མགོན་པོའི་བཀའ་ཆེན་བཅུ་གསུམ་སྙིང་ཞུགས་དང་བཅས་པ། དྲག་པོ་གསུམ་སྦྲེལ་གྱི་རྗེས་གནང་། འཇིགས་བྱེད་ལྷ་བཅུ་གསུམ་མའི་དབང་ཆེན། རྣལ་འབྱོར་མའི་བྱིན་རླབས། ཚངས་པ་ཞི་དྲག་གི་རྗེས་གནང་ཐུན་མོང་མ་ཡིན་པ་བྲག་གཡབ་མགོན་ཁང་དུ་གསུང་རྒྱུན་བཀའ་རྒྱ་མའི་མངོན་རྟོགས་ཀྱི་ལྷ་ངོ་བསྟན་པ་ཁ་བསྒྱུར་ཏེ་གནང་བ་དང་། གཞན་ཡང་རྨོག་ལྕོག་རིན་པོ་ཆེ་ཉིད་ནས་ཁང་གསར་རིན་པོ་ཆེའི་དྲུང་ནས་གསན་པའི་ཆོས་རྒྱལ་རིགས་ལྔའི་རྗེས་གནང་སྐུ་ཚེ་དེ་ལ་ལན་རེ་ལས་གཞན་ལ་འཆད་སྤེལ་གནང་མི་ཆོག་པའི་རྗེས་གནང་དང་། ཡང་ཁྲི་བདག་ཡོངས་འཛིན་གྱི་སྐུ་མདུན་ནས་གསན་པའི་བྱམས་ཆོས་སྡེ་ལྔའི་བཤད་ཁྲིད་དང་། ཞྭ་དམར་ལམ་རིམ་གྱི་ཁྲིད་ལུང་། བསྟོད་པ་དོན་ལྡན་མའི་འགྲེལ་བ་དང་བཅས་པའི་ཁྲིད་ལུང་། བེའུ་བུམ་སྔོན་པོའི་ལུང༌། ཚེ་ཆོག་གླིང་ཡོངས་འཛིན་གྱི་གསུང་འབུམ་ཆ་ཚང་གི་བཀླག་ལུང་། ཁྲི་ཆེན་གྱི་གསུང་བློ་སྦྱོང་མཚོན་ཆ་འཁོར་ལོའི་འགྲེལ་བའི་ལུང་། གཅོད་དབང་ནམ་མཁའ་སྒོ་འབྱེད་ཀྱི་དབང་ལུང་བཅས་སྔ་རྟིང་གནང་བར་མཛད།
དགའ་ཤར་ཛེ་སྨད་རིན་པོ་ཆེས་གཅོད་དབང་ནམ་མཁའ་སྒོ་འབྱེད་ཀྱི་དབང་དང་། མགོན་པོའི་བཀའ་ཆེན་བཅུ་གསུམ། གསུང་འབུམ་ཁག་མང་པོའི་ལྗགས་ལུང་བཅས་དང་། བཀའ་དྲིན་མཚུངས་མེད་མཁན་ཟུར་རིན་པོ་ངག་དབང་ཉི་མ་མཆོག་དང་། མཁན་ཟུར་རིན་པོ་ཆེ་བསྟན་པ་བསྟན་འཛིན་རྣམ་པ་གཉིས་ནས་ཀྱང་མགོན་པོའི་བཀའ་ཆེན་བཅུ་གསུམ་གྱི་རྗེས་གནང་དང་གཞན་ཡང་དབང་ལུང་ཁྲིད་སོགས་མང་པོ་ཞུ་བར་མཛད་པ་ནི་མཚོན་ཙམ་ལས་ཐམས་ཅད་འབྲི་བར་མི་ནུས་སོ། །མདོ་སྔགས་ཀྱི་ཟབ་ཆོས་ཅི་འདྲ་ཞིག་གནང་ནའང་འདུས་ཆེ་ཞིང་གོ་བདེ་བ། གནད་ཕིགས་པའི་གསུང་བཤད་ཡ་མཚན་ཅན་ཤ་སྟག་གནང་བ་མངོན་སུམ་གྱིས་གྲུབ་པ་ཞིག་གོ །གསུང་རྩོམ་ཡང་ལམ་གཙོ་རྣམ་གསུམ་གྱི་འགྲེལ་བ་སོགས་འགའ་ཤས་བཞུགས།
སྐུ་ཚེ་མཐའ་མའི་མཛད་པ་བསྟན་པར་ཉེ་བ་ན་རི་ཁྲོད་ནས་ལྷ་སར་ཕེབས་ཁར་རྣམ་ཀུན་དང་མི་འདྲ་བར་རི་ཁྲོད་ཀྱི་སྐུ་ཚང་མར་མཇལ་དར་རེ་ཕུལ་ནས་ད་ཡག་པོ་བྱས་ནས་བཞུགས་ཨ་གསུངས་པ་སོགས་མཛད། དེ་ནས་ལྷ་སར་ཕེབས་ཏེ་བསྟན་རྒྱས་གླིང་དུ་གསུང་ཆོས་གནང་བཞིན་པའི་མུར་དགོངས་པ་གཞན་དུ་གཤེགས་སོ།