Mgon po'i sbyin bsreg gsal ba gsum ldan

Resource ID	SCv11p727
Title	mgon po'i sbyin bsreg gsal ba gsum ldan sangs rgyas ston pas mdzad pa
Topics	Chadrupa
Sub-Topics	Fire offering
Author	Sangyé Tönpa
Associated Person	Rahula Sangyé Nyentön
Link	BDRC W23922 WA00KG09215 (p.275)
Notes	Linked to phyag drug ye shes mgon po'i sbyin bsreg sangs rgyas snyan ston gyis mdzad pa

༈ ཐེ༽ མགོན་པོའི་སྦྱིན་བསྲེག་གསལ་བ་གསུམ་ལྡན་སངས་རྒྱས་སྟོན་པས་མཛད་པ་བཞུགས་སོ།།
༈ ༼ཇུ༽ བླ་མ་རཱ་ཧུ་ལས་མཛད་པའི་སྦྱིན་སྲེག་གི་ཞལ་གདམས་འདི་ལ་གསུམ་སྟེ། སྦྱོར་བ། དངོས་གཞི། རྗེས་དང་གསུམ་མོ།
།དང་པོ་ནི། ཚེས་གྲངས་བཟང་པོ་ལ་མཚམས་ཅི་རིགས་པར་བཅད་ལ། ཐོད་ངན་གྱི་ནང་དུ་དུག་ཆུ་དང་ཁྲག་སྣས་ལིངྒ་བྱ། དགྲ་བོ་དུ་ཡོད་ཀྱི་མིང་རུས་བྲིས་ལ་གཞུག །དེ་ཡང་སྙིང་གར་༼ནྲི་༽ལས་རུས་པ་བསྐྱེད། ཏྲི་ལས་འདྲེ་བསྐྱེད། དཔྲལ་བ་ནས་དགྲའི་མིང་རུས་དང་བཅས་པའི་ཡང་ན་དགྲ་བགེགས་མཱ་ར་ཡ་ཛཿཛཿ ཞེས་པ་སྟེ་སྐབས་དང་སྦྱར་ལ། རྐང་པ་ཡན་ཆོད་དུ་ཤོང་ཚད་བྲི། དགུག་གཞུག་ཡང་ཡང་བྱའོ། །དེ་ནས་རང་ཡིད་ཆེས་པ་དང་སྦྱིན་སྲེག་བྱ་སྟེ། ཐབ་ནི་དཔེའུ་ཆུང་ལྟར་བྱ། གྲུ་གསུམ་རྩེ་མོའི་ངོས་སུ་ཧཱུྃ་ཡིག་བྲིས་ནས། ཤིང་ཤུག་པའམ་གདུག་པ་ཅན་གྱི་༼ཤིང་༽གྲུ་གསུམ་དུ་གཅིགས་ལ། དེའི་དཀྱིལ་དུ་ཐོད་པ་བཞག་པར་བྱའོ། །དེ་ནས་གཏོར་མ་གཉིས་བཤམས་ལ་གཅིག་ཡུལ་བདག་དང་། གཅིག་གཞི་བདག་ལ་ཕུལ་ལ། རུ་ང་བ་དང་། ཕྲག་མ་དོག །བསྒྲུབ་པ་པོ་བདག་གི་མ་ལན་མ་ཉེས་པ་ཡིན་པས་གཟུ་དང་དཔང་པོ་མཛོད་ཅིག །བདག་གི་སྡོང་གྲོགས་མཛོད་ཅིག །བྱས་ལ་བདེན་པའི་བཀའ་བསྒོའོ། །ཤ་ཁྲག་གི་བརྒྱན་པའི་དཔལ་བཤོས་ཅིག་བྱས་ལ། འདི་མགོན་པོ་འཁོར་བཅས་ལ་འབུལ་བ་ཡིན་པས་བདག་གིས་ལས་འདི་བསྒྲུབས་ཤིག་བྱས་ལ་གཏར་གཟུང་ངོ་། །དེ་ནས་བདག་ཉིད་ལྷའི་ང་རྒྱལ་དང་ལྡན་པས། བག་ཟན་གྱི་ལིངྒ་དེ་རྣམས་མདུན་དུ་བཞག་ལ་དགུག་གཞུག་གསལ་བར་བྱ་ཞིང་། གྲི་ལྕགས་ཀྱིས་ལིངྒ་དུམ་བུར་གཏུབ་ཅིང་སྔགས་དྲག་ཏུ་བཟླས་སོ། །སྔར་གྱི་ཐབ་ཁུང་གི་ཧཱུྃ་དེ་ཆོ་ག་གསུམ་ལས་མེ་ལྷའི་མགོན་པོར་བསྐྱེད། ཡེ་ཤེས་སེམས་དཔའ་དགུག་གཞུག་བྱའོ།
༈ གཉིས་པ་དངོས་གཞི་ནི། གསལ་བ་གསུམ་དང་ལྡན་པར་བྱ་སྟེ། དེ་ཡང་བདག་ཉིད་ཡི་དམ་གྱི་ལྷར་གསལ་ཞིང་སྔགས་དྲག་ཏུ་བཟླས་པ་དང་། མེ་སྦར་ཞིང་སྤོས་སྦྱོར་སྲེག་ནས་མེ་དེ་མེ་ལྷའི་མགོན་པོ་ཞལ་གསུམ་ཕྱག་དྲུག་པ་ཞལ་གདངས་པ། མཆེ་བ་གཙིགས་པ། སྐུ་མདོག་དམར་ཞིང་འཚེར་བར་གསལ་བ་དང་། ལིངྒ་རྣམས་དགྲ་བགེགས་ཀྱི་ཤ་ཁྲག་དང་། དོན་སྙིང་དུ་བསམ་ལ། མགོན་པོའི་ཞལ་དམར་དང་ངེ་བ་དེར་སིབ་སིབ་སོང་ནས་དམར་ཅིར་ཅིར་གསོལ་བར་བསམ། དེའི་དུས་སུ་བཏུབ་ཚད་ཀྱི་མེ་མི་སྒུལ་བ་དང་། རྩ་སྔགས་དང་སྔགས་རིངས་དྲག་ཏུ་བཟླས་པ་དང་། མ་ཡེངས་པ་གལ་ཆེའོ། །དེ་ནས་མེ་ཚིག་རིང་ལ་སྦུད་པ་དྲག་ཏུ་བརྡེག་གོ །དམ་ཚིག་པ་དང་ཡེ་ཤེས་པའི་མེ་ལྷ་གཏོར་མ་ལྟར་བཟུང་བ་དེ་བཏང་རག་གི་ཚུལ་དུ་བཏང་བར་བྱའོ། །དེ་ནས་མགོན་པོ་ལ་མཆོད་སྟོད་བྱའོ། །ཐབས་ནང་གི་ཡེ་ཤེས་པ་གཤེགས། དམ་ཚིག་པ་རང་ལ་བསྡུས་ནས། དེའི་སྟེང་དུ་སླ་ང་ཁ་སྤུབ། དེའི་སྟེང་དུ་གཏོར་མ་བཞག་ནས་མནན་པ་བྱ། སྔགས་དྲག་ཏུ་བཟླས་ལ། རྩ་སྔགས་བཤམ་ལ། དགྲ་བགེགས་མཱ་ར་ཡ་ནན། སྟཾ་བྷ་ཡ་ནན། ཞེས་བརྗོད། བྷྱོ་བཟློག་དྲག་ཏུ་བྱ། གཏོར་མ་དགྲ་ཕྱོགས་སུ་གཏང་ངོ་། །ཐལ་བ་རྣམས་ཀྱང་བསྡུས་ལ་དགྲ་ཕྱོགས་སུ་འཕྱར་རོ། །བཀྲ་ཤིས་ཀྱི་ཚིག་སུ་བཅད་པ་ཡང་བརྗོད་པར་བྱའོ།
།མགོན་པོའི་སྦྱིན་བསྲེག་གསལ་བ་གསུམ་ལྡན་བྱ་བ་སངས་རྒྱས་གཉན་སྟོན་གྱི་གསུངས་པ་རྫོགས་སོ། །