Lam 'gro ba'i tshe bar chad bsrung ba

Resource ID	SCv11p846
Title	lam du 'gro ba'i tshe bar chad bsrung ba
Alt. title	bsrung bkud ngag gnon sel ba'i gdams pa rdzas la brten pa'i mtshon bsrung
Topics	Chadrupa
Sub-Topics	Protection
Link	W23922 WA00KG09215 (p.329)
Notes	In "scroll 4".

༈ ཙོ༽ལམ་དུ་འགྲོ་བའི་ཚེ་བར་ཆད་བསྲུང་བ་བཞུགས་སོ།།
༈ ༼ཅེ༽ ལམ་དུ་འགྲོ་བའི་ཚེ་བར་ཆད་བསྲུང་བའི་མན་ངག་ནི། རང་ལམ་དུ་ཞུགས་མ་ཐག་པའི་གོང་རོལ་དུ་གཏོར་མ་ཕུལ། གསོལ་བ་གདབ། འཕྲིན་ལས་བཅོལ། ལམ་དུ་ཞུགས་མ་ཐག་རང་ཉིད་མགོན་པོར་བསྐྱེད། དེ་ལ་ཡེ་ཤེས་པ་བཅུག་སྤྱི་བོར་བླ་མ་མི་བསྐྱོད་པའི་རྣམ་པར་བཞུགས་པར་བསྒོམ། བསིལ་བ་ཚལ་ནས་མགོན་པོ་སླར་ཡང་སྤྱན་དྲངས་ལ། དེ་ཉིད་མགོན་པོ་དཔག་ཏུ་མེད་པར་གྱུར་ཏེ། རང་གི་མདུན་རྒྱབ་གཡས་གཡོན་ཐམས་ཅད་བསྐོར་ནས་བྱོན་པ་དང་། ཧཱུྃ་ཕཊ་ཀྱི་སྒྲ་འབྲུག་ལྟར་དི་རི་རི་སྒྲོག་པར་བསམ་ནས། རང་གིས་ཀྱང་ན་མོ་བུདྡྷ་ཡའི་གསོལ་བ་འདེབས་པ་དང་། བསྟོད་པ་འདོན་པ་དང་། སྔགས་བཟླ་ཞིང་འགྲོ་བར་བྱའོ། །མགོན་པོ་འཁོར་བཅས་ཀྱིས་སྐུ་ལས་མེ་དཔུང་གི་ཚོགས་ཕྱོགས་བཅུར་འཕྲོས་པས་གནོད་བྱེད་ཐམས་ཅད་བསྲེགས་པར་བསམ། ཨྀཐིཿ

༈ བསྲུང་བཀུད་བཞུགས་སོ།
།འདིའི་བསྲུང་ཀུད་བྱ་བར་འདོད་ན། ལུག་ནག་པོའི་སོག་པ་གཡོན་པའི་བལ་ལ། རང་ཉིད་ཡི་དམ་དང་། མཁེལ་མཁན་མགོན་པོར་བསྐྱེད། སྐུད་པ་སུམ་སྦྲིལ་འཇུར་མདུད་མེད་པར་བྱས་ལ། རྡོ་རྗེའི་མདུད་པ་བདུན་ནམ་ཉེར་གཅིག་བྱས་པ་རྣམས་བསངས་སྦྱངས། ཧཱུྃ་ལས་མགོན་པོའི་རེ་རེར་མདུད་པ་རྣམས་བསྐྱེད། ཁྲིཾ་ཉེར་གཅིག་གི་མགོན་པོའི་ཡེ་ཤེས་པ་སྤྱན་དྲངས་གཉིས་སུ་མེད་པར་བསྟིམ་པ་ལ་མཆོད། སྐུད་པ་སྙིམ་པར་བཅུག་སྟེ་སྙིང་པོའི་མཐར། འཆང་བ་པོ་ལ། རཀྵ་རཀྵ། ཅེས་སྤེལ་བ་ཉེར་གཅིག་བཟླས་ནས་རབ་གནས་བྱ། དེ་ནས་དེ་ཉིད་བསྒྲུབ་བྱའི་སྐེ་ལ་བཏགས་ནས། མགོན་པོ་བདུན་ནམ་ཉེར་གཅིག་གིས་བསྐོར་ནས་བསྲུང་བར་བསམ། ཡང་ན་མགོན་པོ་རྣམས་ཞུ་བ་ལས་རྡོ་རྗེ་ནག་པོ་རྩེ་ལྔ་པ་ལྟེ་བ་ལ་ཧཱུྃ་གིས་མཚན་པ་རེ་རེར་བསམ། བཀུད་པ་མཁེལ་མཁན་བུ་མོ་མ་ཉམས་པའམ། ཡང་ན་སྡོམ་ལྡན་དམ་ཚིག་མ་ཉམས་པས་བྱའོ།།

༈ ངག་གནོན་སེལ་བའི་གདམས་པ་བཞུགས་སོ།།
༈ ངག་གནོན་སེལ་བའི་མན་ངག་ནི། རང་མགོན་པོར་བསྐྱེད། ལྕེ་སྐད་ཅིག་གིས་སྟོང་པའི་ངང་ལས་རལ་གྲི་སོར་བཞི་པ་འོད་འབར་བར་བསྒོམ། དེའི་ཆང་ཟུང་སྟེང་དུ་ཧྲཱིཿལྗང་གུ་གཅིག་བསྒོམ་དེ་ལས་འོད་འཕྲོས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་ཀྱི་རྣམ་པར་བསྡུས་ནས་ཐིམ་པར་བསམ་ནས་ཏྲི་དེ་ལས་འོད་ཟེར་འཕྲོས་པས་གནོད་བྱེད་ཐམས་ཅད་བསྲེགས་པར་བསམ། ཨོཾ་ཧཱུྃ་ཏྲི་ཧྲི་ཀ་པཱ་ལ་ར་ཏྲ་སྭཱ་ཧཱ། ཅེས་ཉིན་རེ་ལ་ལན་བདུན་བདུན་བརྗོད་པ་ཙམ་གྱིས་ངག་ནུས་པ་དང་ལྡན་པར་འགྱུར་རོ། །ཨྀཐིཿ

༈ རྫས་ལ་བརྟེན་པའི་མཚོན་བསྲུང་བཞུགས་སོ།།
༈ མཚོན་བསྲུང་བ་ནི། འབྲས། ཉུངས་ནག །ཀེ་ཚེ། ལྕགས་ཕྱེ་མ། རང་མགོན་པོར་གསལ་བ་ལ་ཡེ་ཤེས་བཅུག་ནས། ཏིང་ངེ་འཛིན་ལ་གནས་ནས་རྩ་སྔགས་སྟོང་བཟླས་ཏེ། དེ་ནས། ཨོཾ་ཚལ་པ་དུམ་བུ་ས་ལེ་ཏྲཾ་ཏྲཾ་བྷྱོ་བྷྱོ། ཅེས་ཁྲི་དགུ་སྟོང་བཟླས། དགྲ་བོ་གནོད་པ་སོགས་བྱུང་ན་འུར་མཐིལ་དུ་རྫས་དེ་དག་བཅུག་སྟེ་འཕངས་ན་མཚོན་གྱི་མི་ཚུགས་སོ། །ཨྀཐིཿ