Bya rgod pa phrin las o rgyan chos 'phel ba gnang ba

From Shangpa Resource Center








Resource ID MLDS2
Title ni gu chos drug gi khrid mtshams byed lugs bya rgod pa phrin las o rgyan chos 'phel ba gnang ba
Topics Six doctrines of Niguma
Sub-Topics Instructions
Author Minling Lochen Dharma Shri
Link BDRC W9140

ནི་གུ་ཆོས་དྲུག་གི་ཁྲིད་མཚམས་བྱེད་ལུགས་བྱ་རྒོད་པ་ཕྲིན་ལས་ཨོ་རྒྱན་ཆོས་འཕེལ་བ་གནང་བ།

ནི་གུ་ཆོས་དྲུག་གི་ཁྲིད་མཚམས་བྱེད་ན། ཐོག་མར་ཟླ་གཅིག་ཙམ་གྱི་བར་དུ་སྐྱབས་སེམས་སྔོན་དུ་འགྲོ་བས། དག་བྱེད་ཨའི་སྟོང་ར་གཅིག་པུ་ལ་སྒྲིལ་ནས་རྟགས་ཅི་རིགས་མ་བྱུང་གི་བར་དུ་བསྒོམ། དེ་རྗེས་ལུས་གནད་མེའི་སྟངས་ར་ལ་སྒྲིལ། དེས་རྟགས་ཅུང་ཟད་བྱུང་བ་དང་། གཏུམ་མོ་ཟས་སུ་ཟ་བ་ལ་གཙོ་བོར་སྒྲིལ། དེ་གཉིས་ཀའི་ཐུན་གཤམ་དུ་སྲིད་པའི་དབང་ཞུ་བ་ཚར་རེ་བསྒོམ་ཞིང་། དྲོད་གཏན་ལ་མ་ཕེབས་ཀྱི་བར་དུ་ཙབ་ཙུབ་མང་པོ་མི་བྱེད་པར་གཏུམ་མོ་རང་ལ་རྩོལ་བ་ཆེན་པོས་སྒྲིལ། མཚན་དུས་སྟན་དུ་འདིང་བ་སྦྱར་ཞིང་། དྲོད་གཏན་ལ་ཕེབས་ནས་གཏུམ་མོ་སྐོམ་དུ་འཐུང་བ་ཡང་བསྣན། དེ་རྣམས་ལ་ཟླ་ཤས་བསྒོམ། དེ་རྗེས་སྒྱུ་ལུས་ལ་སྤོས་ནས། དམིགས་པའི་གཙོ་བོ་རང་ལུས་སྣང་སྟོང་ལྷ་སྐུ། ཅིར་སྣང་སྒྱུ་མ་ལམ་ཁྱེར། འགྲོ་དྲུག་སྒྱུ་མར་འཆར་བྱེད་རྣམས་ལ་གཙོ་བོར་སྒྲིལ། སྒྱུ་ལུས་ཅི་རིགས་འབྱོངས་ནས་ཉིན་པར་སྒྱུ་ལུས་དང་། མཚན་མོ་རྨི་ལམ་བཟུང་བ་ཁ་སྦྱོར་དུ་བསྒོམས་ཀྱང་ཆོག་མོད། འོན་ཀྱང་རྨི་ལམ་ལའང་ཉིན་དུས་ནས་འདུན་པ་དང་དམིགས་པ་གལ་ཆེ་བས། སྒྱུ་ལུས་ཅུང་ཟད་གཏན་ལ་ཕེབསནས་རྨི་ལམ་འཛིན་པ། ཐིག་ལེ་དབང་བཞིའི་གནད་དང་། རྟོག་བཅས་ལམ་ཁྱེར་གཉིས་ལ་སྒྲིལ། སྦྱང་བ་སོགས་ཁྲིད་ཡིག་ནང་ལྟར་དམིགས་པ་གནད་ཆེ་ཞིང་ཆུན་ཆེ་བ་རེ་ལ་གཙོ་བོར་འདོན། རྨི་ལམ་ཟིན་འབྱོངས་ལ་ཅུང་ཟད་བརྟན་ནས། འོད་གསལ་ལ། མི་རྟག་སྐྱོ་ཤས་དང་བླ་མའི་མོས་གུས་གཉིས་སྔོན་འགྲོར་བཏང་། ཐབས་ལམ་རང་གདངས་དང་། སྤྱོད་ལམ་དམ་རྫས། ལམ་ཁྱེར་རྣམས་ཐུན་མཚམས་ཀྱི་སྤྱོད་པར་སྦྱར་ལ། ཐུན་གྱི་དངོས་གཞི་བཟུང་བའི་དམིགས་པ་ལས་གཙོ་བོར་བླ་མ་ལ་འཛིན་པ་ཁོ་ན་ལ་སྒྲིལ་ཞིང་ཟིན་ནས་བསྲེ་བ་གནད་གང་ཆེ་རེ་སྦྱར་བས་ཆོག །དེ་ལྟར་ཆོས་དྲུག་ལས། རྩ་བ་བཞི་པོ་དེ་ལ་བཙན་ས་ཟིན་པ་ཞིག་སྙིང་རུས་ཀྱིས་སྒོམ་དགོས། དེ་རྣམས་ཀྱི་ཞར་བྱུང་དུ། ཕྱི་མའི་མཚམས་སྦྱོར་ལ་འཕོ་བ་ཡེ་ཤེས་སྐར་ཁུང་མའི་དམིགས་པ་རེ་དང་། བར་དོ་ལ་ལོངས་སྐུ་ལམ་ཁྱེར་དང་། གནད་འཆུག་མེད་རེ་བསྒོམས་པས་ཆོག་གོ །གསོལ་འདེབས་ཞིག་རྩོམ་དགོས་ཟེར་བ། བླ་མར་རེ་གཏོས་འཆའ་ནུས་ན་ཚིག་མང་བའི་ཁ་ན་མེད་པས། བླ་མ་རིན་པོ་ཆེ། བདག་འཛིན་བློ་ཡིས་ཐོངས་པར་མཛད་དུ་གསོལ། དགོས་མེད་རྒྱུད་ལ་སྐྱེ་བར་མཛད་དུ་གསོལ། འོད་གསལ་ཕྱག་རྒྱ་ཆེན་པོ་རྟོགས་པར་མཛད་དུ་གསོལ། །ཞེས་གསོལ་བ་འདེབས་པ་ལས་གནད་ཆེ་བ་མེད་ཅིང་། ཚིག་ཀྱང་དེ་ཁོ་ན་བྱིན་རླབས་ཆེ་བ་ཡིན་ནོ།
།ཞེས་པའང་བྱ་རྒོད་པ་ཕྲིན་ལས་ཨོ་རྒྱན་ཆོས་འཕེལ་གྱི་ངོར་དྷརྨ་ཤཱིས་སོ།