Dag sbyang cho ga

Resource ID	SCv8p738
Title	dag sbyang
Alt. title	nad 'don gyi gdams pa
Topics	Various
Sub-Topics	Self purification
Link	BDRC W23922 BDRC W3CN18508 (v2p.473) BUDA MW2PD20238 (p.431)

༈ །དག་སྦྱང་ནི།
ན་མོ་གུ་རུ།
དག་དང་སྦྱང་བའི་ཆོ་ག་ཤེས་པར་བྱ། ཞེསཔའི་དོན་ནི།
བྱང་ཆུབ་ཀྱི་སེམས་སྔོན་དུ་སོང་བས། རང་ཡི་དམ་གྱི་ལྷར་བསྒོམ། དེའི་སྤྱི་བོར་རྩ་བའི་བླམ་རྡོ་རྗེ་འཆང་གི་ཆ་ལུགས། རུས་པའི་རྒྱན་དྲུག་གིས་སྤྲས་པ། ཡུམ་རྡོ་རྗེ་ཕག་མོས་མགུལ་ནས་མཁྱུད་ཅིང་མཉམ་པར་སྦྱོར་བ། དགྱེས་པའི་ཞལ་རས་འཛུམ་པ་དང་བཅས་པ་གཅིག་བསམ་ནས། དེ་ལ་གསོལ་བ་བཏབ་པས་བླ་མའི་རྡོ་རྗེ་ནོར་བུ་ནས་ཐིག་ལེ་དཀར་པོ་བྱུང་། ཡུམ་གྱི་པདྨ་ནས་ཐིག་ལེ་དམར་པོ་བྱུང་། ཐིག་ལེ་དཀར་དམར་གཉིས་རང་གི་སྤྱི་བོར་ཚངས་བུག་ན་མར་སོང་པས། དཀར་པོ་གཡས་ན་མར་སོང་། དམར་པོ་གཡོན་ནས་མར་སོང་སྟེ། ལྟེ་བར་འཛོམ་པ་དང་། མས་ཡར་ཁྱིལ་ཏེ་ལྟེ་བ་ཡན་ཆད་སྤྱི་བོ་མན་ཆད། ཐིག་ལེ་དཀར་དམར་གྱིས་མེར་གྱིས་ཁེངས་པ་དང་། ལུས་སེམས་གཉིས་ལ་ཟག་མེད་ལྷན་ཅིག་སྐྱེས་པའི་ཡེ་ཤེས། བདེ་སྟོང་གཉིས་སུ་མེད་པའི་ཉམས་མྱོང་སྐྱེས་པར་བསམ་ལ། དེའི་ངང་ལ་སེམས་ཇི་སྲིད་གནས་པ་དེ་སྲིད་དུ་བཞག་གོ །དེ་ལ་རྟོག་པ་འཕྲོ་ན་སྔར་བཞིན་བསྒོམ་ཀྱིན་སེམས་གནས་པར་བྱའོ། ལུས་ལ་ཚ་གྲང་གི་ན་ཚ་བྱུང་ན། སྤྱི་བོར་བླ་མ་ཡབ་ཡུམ་སྔར་བཞིན་བསྒོམ་ལ། དེའི་བྱང་སེམས་དཀར་དམར་སྤྱི་བོ་ཚངས་བུག་ན་སོང་བས་ལུས་ཀྱི་ན་ཚ་དང་། སྡིག་སྒྲིབ་ཐམས་ཅད་མར་དེད་དེ་བཤང་སྒོ་ཆེ་ཆུང་ན་མར་ནག་ཉི་ལི་ལི་སྦྱངས་ཏེ་དག་པར་བསམ། དེ་ནས་བླ་མ་ཡབ་ཡུམ་ཡང་སྤྱི་བོ་ན་མར་ཐིམ་པས། ནང་ཐམས་ཅད་སངས་ཀྱི་དག་པ་དང་སྐྱེ་མེད་ཀྱི་ངང་ལ་ལྷན་གྱིས་བཞག་གོ །དེ་ལྟ་བུ་ནད་མ་སོས་བར་དུ་བསྒོམ། རྗེས་དགེ་བ་བྱང་ཆུབ་ཏུ་བསྔོའོ།། །།