Dpal ldan shangs pa'i zab chos lha bzhi dril sgrub kyi nyams len mdor bsdus pa

Resource ID	SCv9p467
Title	dpal ldan shangs pa'i zab chos lha bzhi dril sgrub kyi nyams len mdor bsdus pa
Topics	Combined Accomplishment of the Four Deities
Sub-Topics	Practice
Author	Lobsang Chökyi Nyima
Link	BDRC W23922 (p.467)

༄༅། །དཔལ་ལྡན་ཤངས་པའི་ཟབ་ཆོས་ལྷ་བཞི་དྲིལ་སྒྲུབ་ཀྱི་ཉམས་ལེན་མདོར་བསྡུས་པ་བཞུགས་སོ།། །།

ན་མོ་གུ་རུ་ཝེ།
།འདིར་ལྷ་བཞི་དྲིལ་སྒྲུབ་མདོར་བསྡུས་ཉམས་སུ་ལེན་ཚུལ་ནི།
བླ་མ་སངས་རྒྱས་ཆོས་དང་དགེ་འདུན་ལ། །བདག་དང་འགྲོ་ཀུན་སྙིང་ནས་སྐྱབས་སུ་མཆི། །མ་རྣམས་མངོན་དུ་རྫོགས་བྱང་ཐོབ་པའི་ཕྱིར། །ཟབ་མོའི་གདམས་པ་ཉམས་སུ་བླང་བར་བགྱི། །ལན་གསུམ།
རང་ཉིད་ལྷར་གསལ་སྤྱི་བོར་ཆོས་འབྱུང་ནི། །འོད་ཀྱི་རང་བཞིན་ཕྱི་དཀར་ནང་དམར་པོ། །རྩེ་མོ་ཚངས་བུག་གདེངས་ཀ་གྱེན་དུ་བསྟན། །དེ་ནང་སྣ་ཚོགས་པདྨ་འདབ་བཞི་པའི།
།ལྟེ་བར་ཐབས་ཤེས་ཟླ་ཉིའི་གདན་གྱི་སྟེང་། །ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན། །དེ་ལ་སྐྱབས་གསུམ་ཀུན་འདུས་བླ་མ་ཉིད། །རྣམ་པ་རྡོ་རྗེ་འཆང་དབང་སྐུ་མདོག་སྔོ། །ཕྱག་གཉིས་རྡོར་དྲིལ་བཟུང་ནས་རང་འདྲའི་ཡུམ། །རྡོ་རྗེ་དབྱིངས་ཀྱི་དབང་མོར་དམ་དུ་འཁྱུད། །རིན་ཆེན་རྒྱན་སྤྲས་ལྷ་རྫས་ན་བཟའ་གསོལ། །འོད་ཕུང་དབུས་ན་རྡོ་རྗེའི་སྐྱིལ་ཀྲུང་བཞུགས།
།ཤར་གྱི་འདབ་མར་ཉི་དཀྱིལ་ཚོགས་བདག་སྟེང་། །ཧཱུྃ་ལས་གྲི་གུག་ཧཱུྃ་གིས་མཚན་པ་ལས། །ཡེ་ཤེས་མགོན་པོ་མཐིང་ནག་ཕྱག་དྲུག་གི །གཡས་གསུམ་གྲི་གུག་ཐོད་ཕྲེང་ཌཱ་མ་རུ། །གཡོན་གསུམ་ཐོད་ཁྲག་རྩེ་གསུམ་ཞགས་བ་བསྣམས། །སྦྲུལ་དང་རིན་ཆེན་རུས་རྒྱན་གླང་ལྤགས་གསོལ། །སྟག་ལྤགས་སྨད་དཀྲིས་གཡས་བསྐུམ་གཡོན་བརྐྱང་གིས། །ཡེ་ཤེས་མེ་དཔུང་འབར་བའི་དབུས་ན་བཞུགས།
།ལྷོ་ཡི་འདབ་མར་ཉི་མའི་དཀྱིལ་འཁོར་སྟེང་། །ཧྲཱིཿལས་རྡོ་རྗེ་གྲི་གུག་ཧྲཱིཿཡིས་མཚན། །དེ་ལ་རྡོ་རྗེ་རྣལ་འབྱོར་སྐུ་མདོག་དམར། །ཕྱག་གཡས་གྲི་གུག་གཡོན་པས་ཐོད་ཁྲག་འཕྱར། །མཆན་ཁུང་ཁ་ཊྭཱྃ་ཁྲོ་འཛུམ་དབུ་སྐྲ་གྲོལ། །བཅེར་མོ་ཐོད་སྐམ་མགོ་ཕྲེང་ཕྱག་རྒྱས་མཚན། །གཡས་བརྐྱང་འཇིགས་བྱེད་གཡོན་བསྐུམ་དུས་མཚན་མནན། །བདེ་བའི་ཉམས་ཅན་མེ་འབར་དབུས་ན་བཞུགས།
།ནུབ་ཀྱི་འདབ་མར་ཟླ་བའི་དཀྱིལ་འཁོར་སྟེང་། །ཧྲཱིཿལས་པདྨ་དཀར་པོ་ཧྲཱིཿཡིས་མཚན། །དེ་ལས་སྤྱན་རས་གཟིགས་དབང་སྐུ་མདོག་དཀར། །ཕྱག་གཡས་མཆོག་སྦྱིན་ཕྱག་རྒྱས་བུམ་པ་དང་། །གཡོན་པའི་མཐེབ་སྲིན་སྦྱར་བས་པད་དཀར་བསམ། །རིན་ཆེན་རྒྱན་སྤྲས་ལྷ་རྫས་ན་བཟའ་གསོལ། །ཞབས་གཡས་ཅུང་ཟད་བརྐྱང་ཞིང་གཡོན་བསྐུམ་པའི། །སྐྱིལ་ཀྲུང་ཕྱེད་བས་འོད་ཕུང་དབུས་ན་བཞུགས།
།བྱང་གི་འདབ་མར་ཟླ་བའི་དཀྱིལ་འཁོར་སྟེང་། །ཏྲཱྃ་ལས་ཨུཏྤལ་ལྗང་གུ་ཏྲཱྃ་གྱིས་མཚན། །དེ་ལས་རྗེ་བཙུན་སྒྲོལ་མ་སྐུ་མདོག་ལྗང་། །ཕྱག་གཡས་མཆོག་སྦྱིན་གཡོན་པ་ཐུགས་ཀ་རུ། །དཀོན་མཆོཕག་གསུམ་མཚོན་ཕྱག་རྒྱས་ཨུཏྤལ་བསྣམས། །རིན་ཆེན་རྒྱན་སྤྲས་ལྷ་རྫས་ན་བཟའ་གསོལ། །ཞབས་གཡས་ཅུང་ཟད་བརྐྱང་ཞིང་གཡོན་བསྐུམ་པའི། །སྐྱིལ་ཀྲུང་ཕྱེད་པས་འོད་ཕུང་དབུས་ན་བཞུགས།
།དེ་རྣམས་གནས་གསུམ་རྡོ་རྗེ་གསུམ་གྱིས་མཚན། །ཧཱུྃ་ལས་འོད་འཕྲོས་སོ་སོའི་ཡེ་ཤེས་པ། །སྐྱབས་གནས་ཀུན་གྱིས་བསྐོར་བ་སྤྱན་དྲངས་ཏེ། །སོ་སོའི་དམ་ཚིག་པ་དང་དབྱེར་མེད་གྱུར།
།བླ་མ་ལྷ་བཞིའི་ཞབས་ཀྱི་པདྨོ་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ།
།ཕྱི་ནང་གསང་བའི་མཆོད་པ་མ་ལུས་འབུལ། །ཐོག་མེད་ནས་བསགས་སྡིག་ལྟུང་ཐམས་ཅད་བཤགས། །སྐྱེ་འཕགས་དགེ་བ་ཀུན་ལ་རྗེས་ཡི་རང་། །ཟབ་རྒྱས་ཆོས་ཀྱི་འཁོར་ལོ་བསྐོར་དུ་གསོལ། །བསྐལ་བརྒྱར་མྱ་ངན་མི་འདའ་བཞུགས་གསོལ་འདེབས། །དགེ་བ་བླ་མེད་བྱང་ཆུབ་ཐོབ་ཕྱིར་བསྔོ། །ཞེས་ཡན་ལག་བདུན་པ་མཎྜལ་བཅས་ཕུལ་ལ།
བླ་མ་རྡོ་རྗེ་འཆང་ལ་དམིགས་ཏེ། ན་མོ་བུདྷཱ་ཡ། ན་མོ་གུ་རུ་ཧེ་བཛྲ་བཱི་ར་བཱི་རེ་ན་ཤྲཱི་ཡེ། ཌཱ་ཀ་ཌཱ་ཀི་ནཱི། ཛོ་ཀ་ཛོ་ཀི་ནཱི། སརྦ་བུདྡྷཱ་ཡ། བོ་དྷི་སཏྭ་ཤ་ར་ཎཾ་གཙྪ་མི་ཀྱཻ། །ཞེས་ལན་གསུམ་བརྗོད།
བླ་མའི་སྐུ་ལས་བདུད་རྩིའི་རྒྱུན་བབས་པ། །རང་གི་སྤྱི་བོ་ནས་ཞུགས་ལུས་གང་བས། །སྡིག་སྒྲིབ་ཉེས་ལྟུང་ནད་གདོན་བར་ཆད་དག །བླ་མའི་གསང་གསུམ་བྱིན་རླབས་ཐོབ་པར་གྱུར།
།མགོན་པོ་ལ་དམིགས་ཏེ། ཨོཾ་བཛྲ་མ་ཧཱ་ཀཱ་ལ་ཀྵི་ཀྵེ་ཏྲ་བིགྷྣཱན་བི་ནཱ་ཡ་ཀ་ཧཱུྃ་ཧཱུྃ་ཕཊ་སྭཱ་ཧཱ། །ལན་གསུམ།
མགོན་པོའི་སྐུ་ལས་བདུད་རྩིའི་རྒྱུན་བབ་པ། །རང་གི་སྤྱི་བོ་ནས་ཞུགས་ལུས་གང་བས། །སྡིག་སྒྲིབ་ཉེས་ལྟུང་ནད་གདོན་བར་ཆད་དག །མགོན་པོའི་གསང་གསུམ་བྱིན་རླབས་ཐོབ་པར་གྱུར།
།རྣལ་འབྱོར་མ་ལ་དམིགས་ཏེ། ཨོཾ་བཛྲ་ན་ར་ཀྲིཾ་ཀྲིཾ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། །ལན་གསུམ།
རྣལ་འབྱོར་མ་ལས་བདུད་རྩིའི་རྒྱུན་བབ་པ། །རང་གི་སྤྱི་བོ་ནས་ཞུགས་ལུས་གང་བས། །སྡིག་སྒྲིབ་ཉེས་ལྟུང་ནད་གདོན་བར་ཆད་དག །རྣལ་འབྱོར་མ་ཡི་བྱིན་རླབས་ཐོབ་པར་གྱུར།
།སྤྱན་རས་གཟིགས་ལ་དམིགས་ཏེ། ཨོཾ་མ་ཎི་པདྨེ་ཧཱུྃ། ཨོཾ་བཛྲ་རཀྵ་ན་མཿས་མནྟ་ཧཱུྃ་ཕཊ། །ལན་གསུམ།
སྤྱན་རས་གཟིགས་ལས་བདུད་རྩིའི་རྒྱུན་བབ་པ། །རང་གི་སྤྱི་བོ་ནས་ཞུགས་ལུས་གང་བས། །སྡིག་སྒྲིབ་ཉེས་ལྟུང་ནད་གདོན་བར་ཆད་དག །སྤྱན་རས་གཟིགས་ཀྱི་བྱིན་རླབས་ཐོབ་པར་གྱུར།
།སྒྲོལ་མ་ལ་དམིགས་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། །ལན་གསུམ།
སྒྲོལ་མའི་སྐུ་ལས་བདུད་རྩིའི་རྒྱུན་བབ་པ། །རང་གི་སྤྱི་བོ་ནས་ཞུགས་ལུས་གང་བས། །སྡིག་སྒྲིབ་ཉེས་ལྟུང་ནད་གདོན་བར་ཆད་དག །འཕགས་མའི་གསང་གསུམ་བྱིན་རླབས་ཐོབ་པར་གྱུར།
།བསྡུན་སྔགས་རྣམས་ལན་གསུམ་རེ་བརྗོད་ལ།
བླ་མ་ལྷ་ལས་བདུད་རྩིའི་རྒྱུན་བབས་པས། །རང་གི་སྤྱི་བོ་ནས་ཞུགས་ལུས་གང་བས། །སྡིག་སྒྲིབ་ཉེས་ལྟུང་ནད་གདོན་བར་ཆད་དག །བླ་མ་ལྷ་བཞིའི་བྱིན་རླབས་ཐོབ་པར་གྱུར། །ཅེས་བརྗོད། དེ་ནས།
རྡོ་རྗེ་འཆང་གི་ཐུགས་ཀའི་འོད་ཟེར་གྱིས། །ལྷ་བཞི་དྲངས་ཏེ་སྤྱི་བོར་སྤྱན་རས་གཟིགས། །མགྲིན་པར་སྒྲོལ་མ་ཐུགས་ཀར་མགོན་པོ་དང་། །ལྟེ་བར་རྣལ་འབྱོར་མ་རྣམས་བཞུགས་པར་གྱུར།
།སྔགས་ཚན་ལྔ་སྤྲེལ་ནས་ལན་གསུམ་བརྗོད།
རག་གི་རྐང་འོད་རླུང་གི་ལྟེ་བའི་མེ། །སྦར་བའི་འོད་ཟེར་བླ་མའི་སྐུ་ལ་ཕོག །ལྷ་བཞི་བདུད་རྩིར་ཞུ་བས་སྐུ་ལུས་དང་། །གསང་བའི་ལམ་ནས་རང་གི་སྤྱི་བོར་ཞུགས། །མགྲིན་པ་ཡན་ཆད་གང་བས་ལུས་སྒྲིབ་དག །སྐུ་ཡི་བྱིན་རླབས་ཞུགས་ཤིང་བུམ་དབང་ཐོབ། །སྙིང་ག་ཡན་ཆད་གང་བས་ངག་སྒྲིབ་དག །གསུང་གི་བྱིན་རླབས་ཞུགས་ཤིང་གསང་དབང་ཐོབ། །ལྟེ་བ་ཡན་ཆད་གང་བས་ཡིད་སྒྲིབ་དག །ཐུགས་ཀྱི་བྱིན་རླབས་ཞུགས་ཤིང་ཤེར་དབང་ཐོབ། །ལུས་ཀུན་གང་བས་སྒོ་གསུམ་སྡིག་སྒྲིབ་དག །གསང་གསུམ་བྱིན་རླབས་ཞུགས་ཤིང་ཚིག་དབང་ཐོབ། །བླ་མ་འོད་ཞུ་རང་ལ་ཐིམ་པ་ལས། །སྒོ་གསུམ་རྡོ་རྗེ་གསུམ་གྱི་ངོ་བོར་གྱུར། །དགེ་འདིས་ས་ལམ་བགྲོད་པ་མཐར་ཕྱིན་ནས། །འགྲོ་དོན་ཕྱོགས་མེད་འགྲུབ་པའི་བཀྲ་ཤིས་ཤོག། །།ཅེས་བརྗོད།
དམིགས་པའི་ཞིབ་ཆ་སོགས་ཞལ་ལས་ཤེས་པར་བྱའོ།
།ཞེས་ལྷ་བཞི་དྲིལ་སྒྲུབ་ཀྱི་རྒྱུན་ཁྱེར་མདོར་བསྡུས་འདི་ནི། རྗེ་བློ་བཟང་ཆོས་ཀྱི་ཉི་མའི་གསུང་ལ་མགོན་པོའི་བེའུ་བུམ་དང་དབེན་པ་བཀའ་འབུམ་ལ་བརྟགས་ནས་བྲི་བསྣན་ཕྲན་བུ་བགྱིས་ཏེ་དྷ་རྨ་བྷ་དྲས་རང་གི་ཉམས་ལེན་དུ་སྦྱར་བའོ།། །།མངྒ་ལཾ།། ཡིག་ཆ་འདིའི་སྟེང་ནས་ཁྲིད་ལུང་བཅས་ཐོབ།། །།