Gtsang rigs dpal mgon don lnga sogs dam can rgya mtsho'i bskul

Resource ID	SCv11p753
Title	dpal ldan mgon po'i 'khor gtsang rigs dpal mgon don lnga sogs dam can rgya mtsho'i bskul
Topics	Chadrupa
Sub-Topics	Convocation
Link	BDRC W23922 WA00KG09215 (p.285)
Notes	Very close to mgon po mngon 'byung gi rgyud kyis zhes pa nas 'byung ba phyogs bcu mgon pos bskul and gtsang ris mgon pos bskul

༈ ཇོ༽ དཔལ་ལྡན་མགོན་པོའི་འཁོར་གཙང་རིགས་དཔལ་མགོན་དོན་ལྔ་སོགས་དམ་ཅན་རྒྱ་མཚོའི་བསྐུལ་བཞུགས་སོ།།
༈ ༼བུ༽ ཧཱུྃ། །སྟེང་གི་ཚངས་པ་ངང་ཞུར་ཆིབས། །ཕྱག་ན་རིན་ཆེན་བུམ་པ་བསྣམས། །ཚངས་པ་འབུམ་གྱི་འཁོར་དང་བཅས། །དགྲ་བགེགས་སྒྲོལ་བའི་ལས་མཛོད་ཅིག
།ཤར་ཕྱོགས་བརྒྱ་བྱིན་གླང་པོ་ཆིབས། །ཕྱག་ན་གསེར་གྱི་རྡོ་རྗེ་བསྣམས། །བརྒྱ་བྱིན་འབུམ་གྱི༴ །དགྲ་བགེགས༴
།ཤར་ལྷོ་མེ་ལྷ་ར་སྐྱེས་ཆིབས། །ཕྱག་ན་བགྲང་ཕྲེང་རིལ་བ་བསྣམས། །མེ་ལྷ༴ །དགྲ་བགེགས༴
།ལྷོ་ཕྱོགས་གཤིན་རྗེ་མ་ཧེ་ཆིབས། །ཕྱག་ན་ཞིང་ཆེན་དབྱུག་པ་བསྣམས། །གཤིན་རྗེ༴ །དགྲ་བགེགས༴
།ལྷོ་ནུབ་སྲིན་པོ་རོ་ལངས་ཆིབས། །ཕྱག་ན་རལ་གྲི་འབར་བ་བསྣམས། །སྲིན་པོ༴ །དགྲ་བགེགས༴
།ཆུ་ལྷ་དཀར་པོ་ཆུ་སྲིན་ཆིབས། །ཕྱག་ན་སྦྲུལ་གྱི་ཞགས་པ་བསྣམས། །ཆུ་ལྷ༴ །དགྲ་བགེགས༴
།ནུབ་བྱང་རླུང་ལྷ་ཤྭ་བ་ཆིབས། །ཕྱག་ན་རླུང་གི་བ་དན་འཛིན། །རླུང་ལྷ༴ །དགྲ་བགེགས༴
།བྱང་ཕྱོགས་གནོད་སྦྱིན་རྟ་ལ་ཆིབས། །ཕྱག་ན་རིན་ཆེན་ནེའུ་ལེ་བསྣམས། །གནོད་སྦྱིན༴ །དགྲ་བགེགས༴
།བྱང་ཤར་དབང་ལྡན་གླང་ལ་ཆིབས། །ཕྱག་ན་ཏྲི་ཤུ་རྩེ་གསུམ་འཛིན། །འབྱུང་པོ༴ །དགྲ་བགེགས༴
།འོག་གི་ས་བདག་ཕག་ལ་ཆིབས། །ཕྱག་ན་གསེར་གྱི་བུམ་པ་བསྣམས། །ས་བདག༴ །དགྲ་བགེགས༴
།ཕྱོགས་སྐྱོང་བཅུ་པོ་འཁོར་བཅས་ཀྱི། །འདིར་བྱོན་ཤ་ཁྲག་གཏོར་མ་བཞེས། །བདག་གི་དགྲ་བགེགས་རྡུལ་དུ་རློག །བཅོལ་བའི་ལས་རྣམས་འགྲུབ་པར་མཛོད།

ཧཱུྃ། །ལྷ་ཆེན་བརྒྱད་པོ་འཁོར་བཅས་ཀྱིས། །ཤ་ཁྲག་གཏོར་མ་འདི་བཞེས་ལ། །བདག་ལ་གནོད་པའི་དགྲ་བགེགས་སྒྲོལ། །བཅོལ་བའི་ཕྲིན་ལས་འགྲུབ་པར་མཛོད།
།ཀླུ་ཆེན་བརྒྱད་པོ་འཁོར་བཅས་ཀྱིས། །ཤ་ཁྲག༴ །བདག་ལ༴ །བཅོལ་བའི༴
།གཟའ་ཆེན་བརྒྱད་པོ་འཁོར་བཅས་ཀྱིས། །ཤ་ཁྲག༴ །བདག་ལ༴ །བཅོལ་བའི༴
།རྒྱུ་སྐར་ཉི་ཤུ་རྩ་བརྒྱད་ཀྱིས། །ཤ་ཁྲག༴ །བདག་ལ༴ །བཅོལ་བའི༴
།དེད་དཔོན་དགུ་པོ་འཁོར་བཅས་ཀྱིས། །ཤ་ཁྲག༴ །བདག་ལ༴ །བཅོལ་བའི༴
།རྒྱལ་ཆེན་བཞི་པོ་འཁོར་བཅས་ཀྱིས། །ཤ་ཁྲག༴ །བདག་ལ༴ །བཅོལ་བའི༴
།གཙང་རིགས་དཔལ་མགོན་བདུན་བཅུའི་ཚོགས། །ཤ་ཁྲག༴ །བདག་ལ༴ །བཅོལ་བའི༴

ཧཱུྃ། །དམ་ཅན་རྒྱ་མཚོའི་དམག་ཚོགས་ནི། །སྣ་ཚོགས་འཇིགས་པའི་གཟུགས་འཆང་ཞིང་། །བཞིན་བསྡུས་མ་རུངས་མདོག་མི་སྡུག །བདུད་དང་སྲིན་པོའི་ཆ་ལུགས་ཅན། །ལག་ན་གདུག་པའི་མཚོན་ཆ་ཐོགས། །དགྲ་ལ་དམག་ཚོགས་སྤྲིན་ལྟར་གཏིབས། །ནད་དང་མཚོན་གྱི་ཆར་ཕོབ་ལ། །ལས་ཀྱི་གཤིན་རྗེས་སྲོག་རྩ་ཆོད། །གཅན་ཟན་ཚོགས་ཀྱི་སྙིང་ཁྲག་འཐུང་། །མཆུ་སྡེར་ཅན་གྱི་ཀླད་ཁྲག་དཀྲུགས། །མཆེ་བ་ཅན་གྱིས་ཤ་རུས་ཟོ། །དུས་ལ་བབ་ཀྱི་དམ་མ་འདའ། །ལས་ཀྱི་གཤིན་རྗེ་སྲོག་གི་བདུད། །སྙིང་རྗེ་མེད་པར་སྲོག་ལ་རྔམས། །དགྲ་བགེགས་ཤ་ཁྲག་ལོངས་ཆོད་ལ། །ལས་སུ་སངས་རྒྱས་བསྟན་པ་བསྲུངས། །འདིར་གཤེགས་དམ་དགོངས་འཕྲིན་ལས་མཛོད།

།བྷྱོཿདམ་ཅན་རྒྱ་མཚོའི་དམག་ཚོགས་ཀྱིས། །སྔ་དགྲ་ཐམས་ཅད་རྩད་ནས་ཆོད། །ཕྱི་དགྲ་སེམས་དཔའ་དྲུང་ནས་ཕྱུང་། །ད་ལྟའི་དགྲ་བོ་རྡུལ་དུ་རློག །གདོན་དང་བགེགས་ཀྱི་དཔུང་ཚོགས་ཆོམ། །བདག་ཅག་དཔོན་སློབ་འཁོར་བཅས་ཀྱི། །མི་མཐུན་རྐྱེན་དང་བར་ཆད་སོལ། །མཐུན་པའི་དངོས་གྲུབ་མ་ལུས་སྩོལ། །འཁོར་དང་བསྟན་པ་ལོངས་སྤྱོད་རྣམས། །རྒྱས་པར་མཛོད་ཅིག་བསྲུང་མའི་ཚོགས། །བཀྲ་ཤིས་བདེ་ལེགས་ཀུན་ལ་ཁྱབ་པར་གྱུར།། །།