Mgon po'i phyag dar ram bris sku bzhengs pa'i man ngag

Resource ID	SCv11p791
Title	mgon po'i phyag dar ram bris sku bzhengs pa'i man ngag
Topics	Chadrupa
Sub-Topics	Various
Link	BDRC W23922

༈ མགོན་པོའི་ཕྱག་དར་རམ་བྲིས་སྐུ་བཞེངས་པའི་མན་ངག་བཞུགས་སོ།།
༈ ༼ཟུ༽ ན་མོ་མ་ཧཱ་ཀཱ་ལ་ཡ།
མགོན་པོའི་ཕྱར་དར་རམ། བྲིས་སྐུ་བཞེངས་པར་འདོད་ན། དེའི་མན་ངག་ནི། རས་འཇམ་པོའམ། དར་ནག་པོ་ལ་སོགས་པ་གཙང་མ་སྐྱེས་པ་དར་མ་གྲིར་བསད་པའི་རོ་ལ་བཀབ་སྟེ་དེ་ལ་མི་རུས། བཙན་དུག །གུ་གུལ། ཉུངས་ཀར་ལ་སོགས་པ་རས་འདུལ་བྱེད་པའི་སྐྱ་ཞལ་གྱི་ཚེ་བསྲེས་ནས་བྱུགས་པར་བྱའོ། །རས་འདུལ་ཟིན་ནས་ཉི་ཤུ་དགུའམ། དེར་མ་འགྲིགས་ནའང་། མར་ངོའི་གཟའ་སྐར་རྩུབ་པོའི་ཉི་མ་གཅིག་ལ་སྐྱ་རིས་ཟིན་པར་བྱ་སྟེ། སྐྱ་རིས་བྱེད་པའི་དཀོན་མཆོག་ལ་མཆོད་པ་འབུལ། བླ་མ་ལ་གསོལ་བ་གདབ། །མགོན་པོ་འཁོར་བཅས་ལ་གཏོར་མ་འབུལ། སྤོས་སྦྱོར་སྲེག །དེ་ནས་སྐྱ་རིས་ཟིན་ནས་དེའི་ཐུགས་ཀར་གྲི་ཁྲག་གི་ཧཱུྃ་དེའི་མཐའ་ལ་མདུན་ནས་བརྩམས་ཏེ་གཡས་བསྐོར་དུ་སྙིང་པོའི་སྭཱ་ཧཱའི་སྔོན་དུ་བདག་ཅག་འཁོར་དང་བཅས་པ་དང་། རྒྱལ་བའི་བསྟན་པ་རྒྱས་པར་མཛད་དུ་གསོལ། ཅེས་པའི་སྤེལ་ཚིག་སྦྱར་བ་སྐོར་བ་གཅིག་ལ་རྫོགས་ཤིང་མགོ་བོའི་ཨོཾ་དང་མཐའི་སྭཱ་ཧཱའི་གྲལ་གཅིག་ལ་ཡི་གེ་མགོ་མཐོ་དམའ་མེད་པ་འགྲིག་པ་བྲི། བྲིས་སྐུ་ཆེ་ན་དེའི་ཕྱི་རིམ་པ་གཅིག་དང་། ཡང་དེའི་ཕྱི་རིམ་པ་གཅིག་སྟེ་ཚར་གསུམ་ཡང་། བྲིས། དེ་ནས་སྐུ་དེའི་མགྲིན་པ་ནས་བརྩམས་ཏེ་ལྟེ་བ་ལྟོ་བ་ཕྱག་ཞབས་ཐམས་ཅད་ལ་ཤཱ་ས་ན་ལ་བདག་ཅག་དང་བསྟན་པ་ལ་གནོད་པའི་དགྲ་བགེགས་ཐམས་ཅད་མཱ་ར་ཡ་ཧཱུྃ་ཕཊ། ཅེས་པ་སྤེལ་ཚིག་སྦྱར་བ་ཚར་དུ་མ་ཤོང་བ་བྲི། དཔྲལ་བར་སིནྡྷུ་ར་དང་བདུད་རྩི་རིལ་བུ་སྦྱར་བས་ན་ར་ཀྲིཾ་ཀྲིཾ་བྲི། གཞན་ཡང་དཔྲལ་བར། མགྲིན་པར་ཨཱཿ ཐུགས་ཀར་ཧཱུྃ། བརླ་གཡས་པ་ལ་སྭཱ། གཡོན་པ་ལ་ཧཱ་བྲི། དེ་ལ་གུ་གུལ་གྱིས་བདུག ཉུངས་ཀར་གྱིས་བརྡེག བགེགས་བསྐྲད། བསངས་སྦྱངས། རི་མོ་མགོན་པོར་བསྐྱེད། ཡེ་ཤེས་པ་སྤྱན་དྲངས། དགུག་གཞུག་ཅིང་མཉེས་པར་བྱ། དབང་བསྐུར་རིགས་བདག་གིས་རྒྱས་གདབ། མཆོད་བསྟོད། དེ་ཉིད་ཡོངས་སུ་གྱུར་པ་ལས་རི་མོའི་རྣམ་པར་གྱུར་པ་མོས་པ་བརྟན་བཞུགས་བྱ། མེ་ཏོག་དོར། བཀྲ་ཤིས་མདོར་བསྡུས་བརྗོད། རི་མོ་མཁན་ལ་སོགས་པ་དགའ་སྟོན་གྱི་མཉེས་པར་བྱས། དེ་ནས་ཚོན་གདན་གྱི་ཡི་གེ་རྣམས་བྱེད་ནས་མི་འགྲོ་བར་མནན། དེ་ནས་བགྱེ་བར་བྱ་སྟེ། རི་མོ་མཁན་དབང་དང་རྗེས་གནང་ཐོབ་ཅིང་། དམ་ཚིག་ཉམས་པ་དང་གྲིབ་ཅན་མ་ཡིན་པས་གནས་དབེན་པར་མི་གཞན་ལ་མི་བསྟན་པར་བྲི་བར་བྱའོ། དེ་དག་ལས་ལྡོག་ན་བར་ཆད་འཇུག་པའི་རྒྱུར་འགྱུར་རོ། །ལེགས་པར་བྲིས་པར་ནས་རབ་གནས་མན་ངག་ལྟར་བྱས་པ་སྟེ་ཆོས་སྐྱོང་དངོས་དང་བྱིན་རླབས་ཁྱད་མེད་ཅིག་ངེས་པར་ཡོང་བ་ཡིན་གསུངས་སོ།
།བྲིས་སྐུའི་མན་ངག་ས་མ་ཡ་གུ་ཧྱ།