Mgon po yid bzhin nor bu'i skor las na mo bud+d+ha'i gsol 'debs byin rlabs che ba

Resource ID	Gönkar23
Title	mgon po yid bzhin nor bu'i skor las na mo bud+d+ha'i gsol 'debs byin rlabs che ba
Topics	White protector
Sub-Topics	Prayer
Author	Sangyé Püntsok
Link	BDRC W23681 (p. 298)

༄༅། །མགོན་པོ་ཡིད་བཞིན་ནོར་བུའི་སྐོར་ལས། ན་མོ་བུདྡྷའི་གསོལ་འདེབས་བྱིན་རླབས་ཆེ་བ་བཞུགས།

བླ་མ་མགོན་པོ་དབྱེར་མེད་དུ་བསམས་ལ། ན་མོ་བུདྡྷ་ཡ། ཕྱག་འཚལ་ལོ་སངས་རྒྱས་ལ། ན་མོ་གུ་རུ་ཧེ། ཕྱག་འཚལ་ལོ་བླ་མ་ཀྱེ། བཛྲ་བཱི་ར་བཱི་ར་ནི། རྡོ་རྗེ་དཔའ་བོ་དཔའ་མོ། ཤྲཱི་ཌཱ་ཀ་ཌཱ་ཀི་ནཱི། དཔལ་མཁའ་འགྲོ་མཁའ་འགྲོ་མ། ཛོ་ཀ་ཛོ་ཀི་ནཱི། རྣལ་འབྱོར་རྣལ་འབྱོར་མ། སརྦ་བུདྡྷ་བོ་དྷི་ས་ཏྭཱ་ཡ་ཤ་ར་ཎཾ་གཙྪཱ་མི་ཀྱེ་ཀྱེ། ཐམས་ཅད་སངས་རྒྱས་བྱང་ཆུབ་སེམས་དཔའ་ལ་སྐྱབས་སུ་མཆིའོ།།
ཕྱོགས་བཅུ་ན་བཞུགས་པའི་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱིས་བྱིན་གྱིས་རློབས་ཤིག
།ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱིས༴
དཔའ་བོ་དང་དཔའ་མོར་བཅས་པ་ཐམས་ཅད་ཀྱིས༴
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས༴
དཔལ་ཡེ་ཤེས་ཀྱི་མགོན་པོ་ཕྱག་དྲུག་པའི་ལྷ་ཚོགས་འཁོར་དང་བཅས་པ་རྣམས་ཀྱིས་བྱིན་གྱིས་རློབས་ཤིག
།ཡེ་ཤེས་ལ་སྒྲིབ་པ་མི་མངའ་བ། མཐུ་དང་ནུས་པ་ལ་ཐོགས་པ་མི་མངའ་བ། ཐུགས་རྗེ་ལ་ཕྱི་བཤོལ་མི་མངའ་བ། བྱིན་རླབས་ལ་རྒྱང་རིང་ཐུང་མི་མངའ་བ་ཁྱེད་རྣམས་ཀྱིས་སྐུའི་སྒོ་ནས་བྱིན་གྱིས་རློབས་ཤིག
།གསུང་གི་སྒོ་ནས་བྱིན་གྱིས་རློབས་ཤིག
།ཐུགས་ཀྱི་སྒོ་ནས་བྱིན་གྱིས་རློབས་ཤིག
།སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པའི་སྒོ་ནས་བྱིན་གྱིས་རློབས་ཤིག
།ད་ལྟ་ཉིད་དུ་བྱིན་གྱིས་རློབས་ཤིག
།མྱུར་བ་ཉིད་དུ་བྱིན་གྱིས་རློབས་ཤིག
།འདུག་ས་འདི་ཉིད་དུ་བྱིན་གྱིས་རློབས་ཤིག
།ཅེས་བརྗོད་དོ། །དེ་ལྟར་རྗེ་བཙུན་ཕྱག་ན་པདྨོའི་ཐུགས་རྗེའི་སྒྱུ་འཕྲུལ། མགོན་དཀར་ཡིད་བཞིན་ནོར་བུའི་སྒྲུབ་སྐོར་འདི་ནི། བླ་མ་གོང་མ་རྣམས་ཀྱི་གསུང་རབ་ཐོར་བུར་བཞུགས་པ་གཅེས་སྤྲས་སུ་བྱ་བའི་ཕྱིར་དང༌། དེང་སང་ཕལ་ཆེར་སྒྲུབ་ཐབས་རྗེས་གནང་ཙམ་རེ་ལས། ཡིག་ཆ་རྣམས་ཐོས་བསམ་གྱི་ཡུལ་དུ་བྱས་པ་དཀོན་པར་སྣང་བའི་ཕྱིར། རང་གཞན་ཀུན་ལ་ཕན་ཐོགས་པར་གྱུར་ན་ཅི་མ་རུང་སྙམ་པའི་བསམ་པས་ཀུན་ནས་བསླངས་ཏེ། དགེ་སློང་སྙོམ་ལས་པ་སངས་རྒྱས་ཕུན་ཚོགས་ཀྱིས་ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ཨེ་ཝཾ་ཆོས་ལྡན་གྱི་དགོན་པར་བསྒྲིགས་པའི་ཡི་གེ་པ་ནི་མདོ་ཁམས་ལྷོ་སྨད་པ། ཤེས་རབ་ལྷུན་གྲུབ་ཀྱིས་གུས་པས་བགྱིས་པ་འདིས་བསྟན་པ་དང་སེམས་ཅན་ཐམས་ཅད་ལ་ཕན་ཐོགས་པར་གྱུར་ཅིག།