Mkha' spyod dkar mo'i gtor chog

Resource ID	SCv7p483
Title	mkha' spyod dkar mo'i gtor chog
Topics	Kechari
Sub-Topics	Torma offering
Link	BDRC W23922 BDRC W3CN18508 (p.620) BDRC W8LS32723 BDRC W22103 (p.240)

༼མཁའ་སྤྱོད་དཀར་མོའི་གཏོར་ཆོག༽
ན་མོ་གུ་རུ།
གཏོར་མ་བྱེད་པར་འདོད་ན། བྱང་ཆུབ་ཏུ་སེམས་བསྐྱེད་ལ། རང་གི་ལག་པ་གཡོན་པ་བཀན་ཏེ། གཡས་པའི་མཐེབ་སྲིན་གྱིས་བཟུང་ལ། དེ་ནས་ལག་པའི་མཐིལ་དུ་ཨ་དཀར་པོ་བསམ། དེ་གྱུར་པ་ལས་ཐོད་པ་ཕྱི་དཀར་ལ་ནག་དམར་བ། ཡངས་ཤིང་རྒྱ་ཆེ་བ་གཅིག་གི་ནང་དུ། ས་བོན་ཤ་ལྔ་བདུད་རྩི་ལྔར་བསམས་ལ། ཨོཾ་ཨཱཿཧཱུྃ་ལན་གསུམ་བརྗོད་པས། དམ་ཚིག་གི་བདུད་རྩིར་གྱུར། ཡང་བརྗོད་པས་ཡེ་ཤེས་ཀྱི་བདུད་རྩིར་གྱུར་པར་བསམས་ལ། དེ་ནས་མདུན་གྱི་ནམ་མཁའ་ལ་ཇོ་མོ་མཁའ་སྤྱོད་མ་ལ། འཁོར་ཡེ་ཤེས་ཀྱི་ཌཱ་ཀི་མ་དཔག་ཏུ་མེད་པས་བསྐོར་བར་བསམས་ལ། དེ་ལ་སྐུ་གསུང་ཐུགས་ཀྱི་སྔགས་ལ། ཨོཾ་ཨཱཿཧཱུྃ་ལ་ཧཱུྃ་རིང་བཏགས་ལ་ཕུལ་བས། ཇོ་མོ་འཁོར་དང་བཅས་པས་ལྗགས་རྡོ་རྗེའི་སྦུ་གུ་ཅན་བཙུགས་ནས་གསོལ་བས། ཟག་པ་མེད་པའི་བདེ་བ་སྐྱེས་ནས་དགྱེས་པར་བསམ། དེ་བཞིན་དུ་ཆོས་སྐྱོང་དང་། ཡི་དྭགས་ལ་ཡང་དབུལ། ལྷ་མི་དམིགས་པར་བསམ། རྗེས་ལ་དགེ་བ་བྱང་ཆུབ་ཏུ་བསྔོའོ། གདམས་ངག་འདི་དུས་གཅིག་ལ་སློབ་མ་གཅིག་ལས་མང་བ་ལ་སྦྱིན་དུ་མི་རུང་ངོ་།། མང་ག་ལཾ།། །།