Mkha' spyod dmar mo'i dbang chog

Resource ID	SCv8p765
Title	mkha' spyod dmar mo'i dbang chog
Alt. title	mkha' spyod dmar mo'i bka'
Topics	Initiation
Sub-Topics	Kechari
Associated Person	Rahula
Link	BDRC W23922 BDRC W23922 BDRC W3CN18508 (p.629) BDRC W22103 (p.255) BDRC W8LS36545 (p.235)

༼༄༅། །མཁའ་སྤྱོད་དམར་མོའི་དབང་ཆོག་བཞུགས་སོ།།༽

ན་མོ་གུ་རུ།
རྗེ་བཙུན་མ་༼དབང་ཆོག་ཡིན༽འདིའི་བྱིན་རླབས་བྱེད་པར་འདོད་ན། དབེན་ཞིང་ཉམས་དགའ་བའི་གནས་སུ་རྣམ་ལྔས་བྱུགས་པའི་མཎྜལ་བྱས་ལ། རེག་དཀར་པོ་ཟླུམ་པོ་གཉིས་རིམ་དུ་བསྐོར་བའི་ནང་དུ། ཆོས་འབྱུང་དམར་པོ་གཉིས་བརྩེགས་བྲིས་ལ། མེ་ཏོག་གིས་ཚོམ་བུ་ལྔ་བཀོད། ༼ཡང་ན་བྲིས་༽དཀྱིལ་དུ་རྡོ་རྗེ་གཅིག་བཞག །དེ་ནས་མེ་ལོང་མཎྜལ་ལ་སུཾ་བྷ་ནིའི་སྔགས་བཟླས་ཤིང་། ཆང་བྱུགས་ལ་སིནྡྷཱ་རས་ཁོད་སྙོམས་པར་བྱུགས་ལ། ལག་པ་གཡོན་པས་གསེར་གྱི་སྨྱུ་གུ་ཐོགས་ཏེ། ཡི་གེ་གསུམ་བཟླས་ཤིང་ཆོས་འབྱུང་གཉིས་བརྩེགས་བྲི། དབུས་སུ་བཾ་ལ་སྐུ་གསུང་ཐུགས་ཀྱི་སྙིང་པོས་བསྐོར། དེའི་མཐའམ་ན་ཕར་ལ། ཨཱ་བདུན་ནམ་དགུ་བྲི། ཟུར་དྲུག་༼ཨོཾ་མཾ་ ཧཾ་ཡོཾ་ ཧྲིཾ་མོཾ་ ཧྲིཾ་ཧྲིཾ་ ཧཱུྃ་ཧཱུྃ་ ཕཊ་ཕཊ་༽ལ་གོ་ཆའི་སྔགས་བཀོད། ལོགས་དྲུག་ལ་གཡུང་དྲུང་འཁྱིལ་བ་དྲུག་བྲི། དེའི་སྟེང་དུ་མ་ཏོག་ཚོམ་བུ་བདུན་བཀོད་ནས། སྔར་གྱི་མཎྜལ་གྱི་སྟེང་དུ་མནྫི་བཞག་པའི་སྟེང་དུ་བཞུགས་སོ། དེ་ལ་མཆོད་པ་འབྱོར་ཚད་ཆོས་འབྱུང་གི་ཚུལ་དུ་བསྐོར་རོ། གཡོན་དུ་གཏོར་མ་དྲུག་བཤམ། གཡས་སུ་ཚོགས་ཀྱི་ཡོ་བྱད་འབྱོརཚད་བཞག་པར་བྱའོ།
།དེ་ནས་སློབ་མ་རྣམས་ཁྲུས་བྱས་ནས་གྲལ་ལ་འཁོད་དེ། སྡིག་པ་བཤགས་པ་དང་། སྐྱབས་འགྲོ་སེམས་བསྐྱེད་བྱ། སློབ་དཔོན་གྱིས་སྐད་ཅིག་དྲན་རྫོགས་ཀྱིས་ཡི་དམ་གྱི་ལྷར་བསྒོམ། མདུན་གྱི་སིནྡྷུརའི་སྟེང་དུ་མཁའ་སྤྱོད་མ་བསྐྱེད་ལ། ལག་མཆོད་བྱ། ཕྱི་ནང་གསང་གསུམ་གྱི་མཆོད་ལ་གསོལ་བ་གདབ། བཟླས་པ་བྱ། དེ་ནས་སློབ་མས་མེ་ཏོག་ཕུལ་ལ། ༼བླ་མ་ར་ཧུ་ལ་མདུན་དུ་བྱོན་ནས ཁྱོད་ལ་བསམ་པ་དེ་ཡོད་ན ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱི་གཞི་ཏིང་ངེ་འཛིན་འདི་ལ་བརྟེན། རྒྱུ་འདིས་བསྐྱེད་རྐྱེན་ལམ་འདི་ཉམས་སུ་བླངས་པས། འབྲས་བུ་རྣམས་པ་ཐམས་ཅད་མཁྱེན་པའི་སྐུ་བཞི་འདིས་བརྙེས་པ་ཡིན་པས། འདི་བསྒོམས་གཅིག་གསུང་བར་བསམ་ལ།༽སློབ་དཔོན་གྱིས་བླ་མ་ར་ཧཱུ་ལའི་ལོ་རྒྱུས་བཤད་ལ་མན་ངག་༼འདི་ལྷག་པ་བྱང་ཆུབ་སེམས་ཀྱི་སྐབས་སུ་བྱའོ།༽བཞིན། སྐྱེས་གནས་ལྔ་གཅིག་ཅར་དུ་དགག་པའི་དབང་བཞི་བྱིན་རླབས་དང་བཅས་པ་ངོ་སྤྲད་དོ།
།དེ་ནས་གཏོར་མ་རྣམས་བདེ་མཆོག ཇོ་མོ་ ཆོས་སྐྱོང་ གཞི་བདག་ གནོད་བྱེདལ་འབུལ། ཚོགས་ལ་ལོངས་སྤྱོད། ལྷག་གཏོར་བཏང་། ཡི་གེ་བརྒྱ་པ་བརྗོད། དགེ་བ་རྫོགས་པའི་བྱང་ཆུབ་ཏུ་བསྔོ་བར་བྱའོ། མཁའ་སྤྱོད་མའི་དབང་བསྐུར་རྫོགས་སོ། དགེའོ།