Mkha' spyod ma dkar mo la brten nas dam tshig gso ba'i thabs

Resource ID	SCv7p481
Title	mkha' spyod ma dkar mo la brten nas dam tshig gso ba'i thabs
Topics	Kechari

ན་མོ་གུ་རུ།
མཁའ་སྤྱོད་མ་དཀར་མོ་ལ་བརྟེན་ནས་དམ་ཚིག་གསོ་བའི་ཐབས་ནི།
བྱང་ཆུབ་ཀྱི་སེམས་སྔོན་དུ་སོང་བས། རང་གི་མདུན་དུ་པདྨ་དང་ཟླ་བའི་གདན་ལ། རང་གི་རྩ་བའི་བླ་མ་གང་ཡིན་པ་དེ། འཛུམ་མུལ་ལེ། མདངས་ཡལ་ལེ། འོད་ལམ་མེ་བཞུགས་པར་བསམ་ལ། དེ་ལ་བློས་སྤྲུལ་པའི་པཱུ་ཛ་དཔག་ཏུ་མེད་པ་དབུལ། རྫས་རིམ་པར་བཤམས་པའི་པཱུ་ཛ་འབུལ། བླ་མ་ལ་དད་གུས་གདུང་གདུང་པ་བསྒོམས་ལ། གསོལ་བ་དྲག་པོ་བཏབ། རན་གི་རྩ་བའི་བླ་མ་ལ་མ་གུས་པ་ལ་སོགས་པའི་དམ་ཚིག་དང་མི་མཐུན་པ་ཐམས་ཅད་མིང་རུས་ནས་བཏོན་ལ་བཤགས་པ་བྱའོ། །དེ་ནས་བླ་མའི་སྨིན་མཚམས་སུ་མཁའ་སྤྱོད་མ་དཀར་མོ་གཅིག་བསམ། དེའི་གསང་གནས་ནས་འོད་དཀར་པོ་འཕྲོས་པས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་འཕོག །དེའི་༼སྐུ་གསུང་ཐུགས་མཉེད་པའི་པཱུ་ཛ་ལ་བས་བཟང་ལན་དུ་སངས་རྒྱས་བྱང་ཆུབ་སེམས་དཔའི་༽སྨིན་མཚམས་ནས་ཡེ་ཤེས་ཀྱི་བདུད་རྩི་བྱུང་སྟེ། བླ་མའི་སྤྱི་བོ་ནས་མར་བབས་པས། བླ་མ་ལ་ཟག་མེད་ཀྱི་བདེ་བ་སྐྱེས་པར་བསམ། དེ་ནས་མཁའ་སྤྱོད་མའི་གསང་གནས་ནས། འོད་ཟེར་དཀར་ནར་གྱིས་བྱུང་སྟེ། བདག་གི་སྨིན་ཕྲག་ན་ཕར་སོང་པས། བདག་གིས་བླ་མའི་སྐུ་ལ་མ་གུས་པ་བྱས་པའི་སྡིག་སྒྲིབ་ཐམས་ཅད་སངས་ཀྱིས་དག་པར་བསམས་ལ། །སྐུ་གསུང་ཐུགས་ཀྱི་སྔགས་བརྒྱ་རྩ་བརྒྱད་བཟླས་ལ། ལྷ་སྨིན་ཕྲག་ཏུ་ཐིམ་པར་བསམ་མོ། །དེ་བཞིན་དུ་གསུང་དང་ཐུགས་གཉིས་ལ་ཡང་སྔར་བཞིན་བྱ་སྟེ། མཁའ་སྤྱོད་མ་དམར་མོ་དང་སྔོན་མོ་བསྒོམ། འོད་ཟེར་ཡང་དེ་དང་འདྲ། སྔགས་བཟླས། གསུང་དང་ཐུགས་མ་དད་པའི་སྒྲིབ་པ་དག་པར་བསམ། ཐ་མ་ལྷ་ཐུགས་ཀར་ཐིམ་པ་དང་། ལྷ་སྐུ་ཕྱག་རྒྱ་ཆེན་པོའི་ངང་དུ་སིང་གིས་བཞག །རྗེས་ལ་དགེ་བ་བྱང་ཆུབ་ཏུ་བསྔོའོ།། །།