Mkha' spyod ril bu sgrub thabs

Resource ID	SCv7p485
Title	mkha' spyod ril bu sgrub thabs
Alt. title	mkha' spyod ril bu sgrub pa
Topics	Kechari
Sub-Topics	Instructions
Link	BDRC W23922 BDRC W3CN18508 (p.621) BDRC W8LS32723 BDRC W8LS36545 (p.203 alt.)

༼མཁའ་སྤྱོད་རིལ་བུ་སྒྲུབ་ཐབས།༽
ན་མོ་གུ་རུ།
རྗེ་བཙུན་མ་འདི་ཉམས་སུ་ལེན་པར་འདོད་པའི་རྣལ་འབྱོར་པས། མཁའ་སྤྱོད་ཀྱི་རིལ་བུ་སྒྲུབ་པར་བྱ་སྟེ།
དེ་ལ་གཉིས། རྫས་བསགས་པ་དང་། རིལ་བུ་སྒྲུབ་པའོ།
།དང་པོ་ནི། ལྷ་བསྙེན་ཐོན་མ་ཐོག་གི་དུས་སུ་བྲེགས་པའི་ཞབས་གཡས་པའི་སེན་མོ་དང་གཅིག །ཕྱག་གཡོན་མའི་སེན་མོ་གཉིས། བུད་མེད་སྟག་ལོ་མ་ཅིག་གི་ཡོད་ན་རང་བྱུང་གི་ཁྲག །མེད་ན་རུས་པའམ། སེན་མོ་༼གང་རུང་ཅིག་༽དང་གསུམ། མཚལ་དང་བཞི། སིནྡྷུ་ར་དང་ལྔ། དེ་ཚོ་བླ་མ་དེ་དང་ཆོས་འབྲེལ་མེད་པའི་བུ་མོ་གྲོང་པའི་ཆོས་ཀྱིས་མ་གོས་པ་རྣམ་ཤེས་དྲངས་ཤིང་སྐྱེ་མཆེད་གཙང་མ་ཅིག་གིས་ཞིབ་ཏུ་བཏགས། དེ་རྣམས་ཡོད་ན་རང་བྱུང་གི་ཁྲག་གིས་མགོ་བསྡུ་བའམ། མེད་ན་ཆང་དང་བསྲེས་ལ་རིལ་བུ་བྱ། དེ་ཐོད་པ་མཚན་ལྡན་ནམ། པདྨའི་སྣོད་དུ་བཅུག་ལ། མེ་ལོང་གཙང་མ་གས་ཆག་མེད་པས་ཁ་བཅད་དོ་༼གཞན་གྱི་མ་མཐོང་བ་གལ་ཆེ་གསུང་།༽ །དེ་ནས་རང་གི་གནས་དབེན་ཞིང་ཉམས་དགའ་བ་གཅིག་ཏུ། བའི་རྣམ་ལྔ་དང་། དྲི་བཟང་གི་ཆུས་བྱུགས་ཏེ། པཱུ་ཛ་ལྔ་དབུལ། མཎྜལ་པདྨ་འདབ་བརྒྱད་དཀར་པོ་བྱས་ལ། ལྟེ་བར་དར་དམར་པོའི་གདན་ལ་གོང་གི་པདྨའི་སྣོད་བཞག་གོ
།གཉིས་པ་སྒྲུབ་པ་བྱ་བ་ནི། རང་བདེ་བའི་སྟན་ལ་འདུག་སྟེ། བྱང་ཆུབ་ཀྱི་སེམས་སྔོན་དུ་སོང་བས་རང་རྗེ་བཙུན་མར་བསྒོམ། མདུན་གྱི་མེ་ལོང་གི་སྟེང་དུ། ཡི་གེ་ཧྲཱིཿདཀར་པོ་ཚེགས་དྲག་དང་བཅས་པ་གཅིག་བསམ། དེ་ལ་ཨོཾ་གསུམ་མའི་སྔགས་ཀྱིས་དཀར་རཾ་མེ་བསྐོར་བར་བསམས་ལ། བསྙེན་པ་འབུམ་བྱ། དེ་ལ་རྟགས་མ་བྱུང་ན་འབུམ་དུ་བསྐྱར། མཚམས་དང་སྨྲ་བཅད་དམ་དུ་བྱ། དེ་ལ་མ་བྱུང་ན་ཡང་འབུམ་དུ་བསྐྱར་ཏེ། དེ་ལ་རྟགས་པ་མི་ཡོང་མི་སྲིད་དོ།
རྟགས་ནི་རིལ་བུ་ཁོལ་བ་དང་། བླ་མའི་ཞབས་རང་གི་མགོ་ཐོག་ཏུ་འཇོག་པ་འོང་ངོ་།
།དེ་ལྟ་བུ་བྱུང་བ་དང་རིལ་བུ་དར་ཟབ་ཀྱིས་དྲིལ་ལ་པདྨའི་སྣོད་དུ་བཞུགས། པདྨའི་སྣོད་དེ་ཡང་དར་ཟབ་ལ་སོགས་ཀྱིས་དྲིལ་ལ། རྟེན་གྱི་གྲལ་ལ་གཞུག་སྟེ། པཱུ་ཙ་དང་བསྙེན་པ་ཡང་མ་ཆད་པར་བྱའོ།
།དེ་ནི་རིལ་བུ་བསྒྲུབ་པའོ།། །།