Ni gu chos drug gi bla ma brgyud pa'i gsol 'debs byin rlabs char 'bebs

Resource ID	SCv9p429
Title	ni gu chos drug gi bla ma brgyud pa'i gsol 'debs byin rlabs char 'bebs
Topics	Lineage prayer
Author	Gyurmé Dechen

༄༅། །ནི་གུ་ཆོས་དྲུག་གི་བླ་མ་བརྒྱུད་པའི་གསོལ་འདེབས་༼བྱིན་རླབས་ཆར་འབེབས་༽བཞུགས་སོ།།

ན་མོ་གུ་རུ་བྷྱཿ
སྤྱི་གཙུག་པདྨ་ཉི་ཟླའི་གདན་ལ། །དཀོན་མཆོག་གསུམ་དང་བརྒྱུད་པ་ཀུན་འདུས། །དྲིན་ཅན་རྩ་བའི་བླ་མ་དམ་པར། །གསོལ་བ་འདེབས་སོ་བྱིན་གྱིས་རློབས་ཤིག
།སྐུ་གསུམ་བདུན་ལྡན་རྡོ་རྗེ་འཆང་དང་། །དག་པའི་སར་བཞུགས་ཡེ་ཤེས་མཁའ་འགྲོ། །མཆོག་གཟིགས་དམ་པ་ཁྱུང་པོ་རྣལ་འབྱོར། །གསོལ་བ་འདེབས་སོ་བྱིན་གྱིས་རློབས་ཤིག
།དཀའ་སྤྱད་ཐུགས་ཅན་རྨོག་ལྕོག་པ་དང་། །སྤྱན་རས་གཟིགས་དབང་སྐྱེར་པ་སྒང་པ། །སྦས་པའི་སངས་རྒྱས་གཉན་སྟོན་ཆོས་རྗེར། །གསོལ་བ་འདེབས་སོ་བྱིན་གྱིས་རློབས་ཤིག
།ཆིག་བརྒྱུད་བཀའ་རྒྱ་གྲོལ་བའི་སྟོན་པ། །སྐུ་གསུམ་བརྙེས་པ་གཙང་མ་ཤངས་སྟོན། །རྒྱ་བན་ཆེན་པོའི་རིགས་ཆད་མུས་ཆེན། །གསོལ་བ་འདེབས་སོ་བྱིན་གྱིས་རློབས་ཤིག
།བདག་སྟའི་གཅེས་འཛིན་གཅོད་པའི་རྡོ་རྗེ། །འོད་གསལ་མངོན་འགྱུར་ནམ་མཁའི་རྣལ་འབྱོར། །གྲུབ་ཐོབ་བརྩོན་འགྲུས་སྦྱིན་པ་བཟང་པོར། །གསོལ་བ་འདེབས་སོ་བྱིན་གྱིས་རློབས་ཤིག
།ཨོ་རྒྱན་སྤྲུལ་པ་ཐང་སྟོང་རྒྱལ་པོ། །དེ་ཡིས་རྗེས་བཟུང་བློ་གྲོས་རྒྱལ་མཚན། །རྟོགས་པ་མངོན་འགྱུར་དཔལ་ལྡན་དར་པོར། །གསོལ་བ་འདེབས་སོ་བྱིན་གྱིས་རློབས་ཤིག
།འཁོར་ལོ་སྡོམ་པ་བསོད་ནམས་རྩེ་མོ། །གྲུབ་པའི་དབང་ཕྱུག་ཆོས་ཀྱི་བློ་གྲོས། །ཟབ་ལམ་སྟོན་མཛད་འགྱུར་མེད་བདེ་ཆེན། །གསོལ་བ་འདེབས་སོ་བྱིན་གྱིས་རློབས་ཤིག
།དངོས་གྲུབ་མཆོག་སྩོལ་ཡི་དམ་མཁའ་འགྲོ། །བར་ཆད་ཀུན་སེལ་མྱུར་མཛད་མགོན་པོ། །མཆེད་ལྕམ་རྡོ་རྗེའི་སྤུན་གྲོགས་རྣམས་ལ། །གསོལ་བ་འདེབས་སོ་བྱིན་གྱིས་རློབས་ཤིག
།གཞི་གནས་སྐུ་གསུམ་རང་ལ་གནས་པ། །ཆོས་དྲུག་ལམ་གྱིས་རང་ལ་ཤར་ནས། །འབྲས་བུ་སྐུ་གསུམ་མངོན་དུ་འགྱུར་བར། །གསོལ་བ་འདེབས་སོ་བྱིན་གྱིས་རློབས་ཤིག
།ཅེས་ཟབ་ལམ་ནི་གུ་ཆོས་དྲུག་གི་བླ་མ་བརྒྱུད་པ་ལ་གསོལ་བ་འདེབས་པ་བྱིན་རླབས་ཆར་འབེབས་ཅེས་བྱ་བ་འདི་ཡང་སའི་བདག་པོ་ཆེན་པོའི་བཀའ་ལུང་གིས་བསྐུལ་ནས། ཆོས་སྨྲ་བ་འགྱུར་མེད་བདེ་ཆེན་གྱིས་བགྱིས་པའི།།

༼༄༅། །ནི་གུའི་གསོལ་འདེབས་དེས་མཛད་པ།།༽
ན་མཿཤཱི་ཛྙཱ་ན་ཌཱ་ཀཱི་ནི་གུ་པྟ་ཡེ།
མཁའ་སྤྱོད་ཀྱི་གཙོ་མོ་ཐུགས་རྗེ་ཅན། །ཡེ་ཤེས་ཀྱི་མཁའ་འགྲོ་ནི་གུ་མ།
།བུ་གདུང་བས་གསོལ་བ་འདི་འདེབས་ན། །སྤྲོས་བྲལ་གྱི་དབྱིངས་ནས་དགོངས་སུ་གསོལ།
།གསང་ཆེན་གྱི་དཀྱིལ་འཁོར་སྟོན་མཁའ་མས། །དགའ་བཞིའི་དབང་བསྐུར་ད་སྩོལ་ཅིག
།སྐྱེ་མེད་ཀྱི་སྒོ་མོ་འབྱེད་བཁས་མས། །དག་བྱེད་ཀྱིས་སྡིག་སྒྲིབ་ད་སྦྱོངས་ཤིག
།ཨ་ཤད་ཀྱི་གཏུམ་མོ་སྤྲོ་མཁས་མས། །སྙིགས་མ་ཡི་ཕུང་ཁམས་ད་སྲེགས་ཤིག
།ཧཾ་ཡིག་གི་བདེ་ཆེན་འཇོ་མཁས་མས། །ལྷན་སྐྱེས་ཡེ་ཤེས་ད་སྩོལ་ཤིག
།སྒྱུ་མ་ཡི་རང་ཉམས་སྟོན་མཁས་མས། །ཆགས་སྡད་གི་བདེན་འཛིན་ད་ཤིགས་ཅིག
།རྨི་ལམ་གྱི་དུས་ན་སྤྲུལ་བསྒྱུར་མས། །ཉིང་འཁྲུལ་གྱི་འཆིང་བ་ད་ཆོད་ཅིག
།ལྷུན་གྲུབ་གྱི་འོད་གསལ་འཆར་མཛད་མས། །གཏི་མུག་གི་མུན་པ་ད་སོལ་ཅིག
།མདའ་ཁ་ཡི་དུས་སུ་ཡར་འདྲེན་མས། །མཁའ་སྤྱོད་ཀྱི་གནས་སུ་ད་ཁྲིད་ཅིག
།བར་དོ་ཡི་འཁྲུལ་སྣང་འཇོམས་མཛད་མས། །གཞོམ་མེད་ཀྱི་ལོངས་སྐུ་ད་སྩོལ་ཅིག
།འདི་ཡང་འགྱུར་མེད་ཀྱིས་སོ།། དྷརྨེ་དཾ་ཨུ་ད་ཡ་མ་སྟུ།། །།