Ni gu smra bsam brjod med kyi skabs rje btsun grol mchog zhabs kyis mdzad pa

Resource ID	SCv8p652
Title	nai gu smra bsam brjod med kyi skabs rje btsun grol mchog zhabs kyis mdzad pa
Topics	Lineage prayer
Author	Künga Drölchok
Link	BDRC W23922
Notes	Same lineage as ni gu'i brgyud pa'i gsol 'debs 2.

ནཻ་གུ་སྨྲ་བསམ་བརྗོད་མེད་ཀྱི་སྐབས་རྗེ་བཙུན་གྲོལ་མཆོག་ཞབས་ཀྱིས་མཛད་པ་བཞུགས་སོ།།

ན་མོ་གུ་རུ་ཝེ།
མི་འགྱུར་བདེ་ཆེན་ཆོས་ཀྱི་སྐུ། །ཁ་སྦྱོར་བདུན་ལྡན་ལོངས་སྤྱོད་རྫོགས། །ཁྱབ་བདག་རྡོ་རྗེ་འཆང་ཆེན་ལ། །གསོལ་བ་འདེབས་སོ་བྱིན་གྱིས་རློབས།
།གྲུབ་པའི་གོ་འཕང་མཆོག་བརྙེས་ཀྱང་། །སྣ་ཚོགས་སྤྲུལ་པས་གཞན་དོན་མཛད། །མཁའ་འགྲོ་དཔལ་གྱི་ནཻ་གུ་མ། །གསོལ་བ་འདེབས་སོ་བྱིན་གྱིས་རློབས།
།སྔོན་སྦྱངས་ལས་འཕྲོ་ཉེར་སད་ནས། །ཡེ་ཤེས་མཁའ་འགྲོས་རྗེས་བཟུང་བའི། །གྲུབ་ཆེན་ཐང་སྟོང་རྒྱལ་པོ་ལ། །གསོལ་བ་འདེབས་སོ་བྱིན་གྱིས་རློབས།
།ཟབ་མོའི་ལམ་ལ་བརྩོན་མཛད་ཅིང་། །ཉམས་དང་རྟོགས་པ་མཐར་ཕྱིན་པའི། །རས་ཆུང་བསོད་ནམས་རྒྱ་མཚོ་ལ། །གསོལ་བ་འདེབས་སོ་བྱིན་གྱིས་རློབས།
།ཆོས་བརྒྱད་རྣམས་སྤངས་ལྡུམ་བུ་པ། །བརྟུལ་ཞུགས་མཆོག་འཛིན་ཀུ་ས་ལི། །རྣལ་འབྱོར་བསོད་ནམས་རྒྱལ་མཚན་ལ། །གསོལ་བ་འདེབས་སོ་བྱིན་གྱིས་རློབས།
།ཟབ་ལམ་ཀུན་ལ་མངའ་བརྙེས་ཤིང་། །གདུལ་བྱའི་དགའ་ཚལ་རྒྱས་མཛད་པའི། །འཇམས་མགོན་བླ་མ་གྲོལ་མཆོག་ལ། །གསོལ་བ་འདེབས་སོ་བྱིན་གྱིས་རློབས།
།རྗེ་བཙུན་བླ་མའི་ཚོགས་རྣམས་ཀྱིས། །ཐུགས་རྗེ་ཆེན་པོས་ལེགས་བསྐྱངས་པའི། །བསྐལ་བཟང་འགྱུར་མེད་བདེ་ཆེན་ལ། །གསོལ་བ་འདེབས་སོ་བྱིན་གྱིས་རློབས།
།ཙཎྜ་ལི་ཡི་རྣལ་འབྱོར་གྱིས། །བདེ་སྟོང་ཡེ་ཤེས་སྐྱེ་བ་དང་། །སྒྱུ་ལུས་རྨི་ལམ་ལེགས་འབྱོངས་ནས། །འོད་གསལ་འཆར་བར་བྱིན་གྱིས་རློབས།
།འཕོ་བའི་གདམས་པ་ལ་བརྟེན་ནས། །མཁའ་སྤྱོད་གནས་སུ་བསྒྲོད་པ་དང་། །བར་དོ་རྒྱལ་བ་ལོངས་སྐུ་རུ། །མངོན་འཚང་རྒྱ་བར་བྱིན་གྱིས་རློབས།
།ནཻ་གུ་སྨྲ་བསམ་བརྗོད་མེད་ཀྱི་སྐབས་རྗེ་བཙུན་གྲོལ་མཆོག་ཞབས་ཀྱིས་མཛད་པའོ།། །།