Phyag mchod bka' rgya ma

From Shangpa Resource Center








Resource ID SCv8p688
Title phyag mchod bka' rgya ma
Topics Various
Sub-Topics Homage
Author Sangyé Nyentön
Associated Person Niguma
Link BDRC W23922
BDRC W3CN18508 (p.634)

༄༅། །ཕྱག་མཆོད་བཀའ་རྒྱ་མ་བཞུགས།། །།

བླ་མ་དམ་པའི་ཞབས་ལ་ཕྱག་འཚལ་ལོ།
འདིར་ཕྱག་མཆོད་བཀའ་རྒྱ་མ་ལ། བརྒྱུད་པ་དང་། གདམས་པ་གཉིས་ལས།
བརྒྱུད་པའི་ལོ་རྒྱུས་ནི། སངས་རྒྱས་གཉན་ལ། རིན་པོ་ཆེ་རི་གོང་པས། ཙ་རི་ལ་གཤེགས་པར་ཞུས་པ་ལ། ཙ་རི་ལ་སོགས་པའི་གནས་ཆེན་གང་བས་ཀྱང་བླ་མའི་རྩ་འདི་དགའ་བ་ཡིན་པས། ངའི་རྩར་སྡོད་ལ་སྒྲུབ་པ་བགྱི། མ་བདེ་བ་ལ་སོགས་པ་བྱུང་ན་འདིར་ཤོག་གསུང་ནས། དྲུང་དུ་སྒྲུབ་པ་བྱེད་ཀྱིན་བཞུགས་ནས། ཉིན་གཅིག་ཞུ་བཏུག་ལ་བྱོན་པས། བཅོམ་ལྡན་འདས་མ་རྡོ་རྗེ་རྣལ་འབྱོར་མ་བྱོན་པ་མཐོང་ངམ་གསུངས། མ་མཐོང་ལགས་ཞུས་པས་གྲིབ་ཐམས་ཅད་སེལ་བར་བྱེད་ཅིང་ཡི་དམ་གྱི་ཞལ་མྱུར་དུ་མཐོང་བར་བྱེད་པའི་གནད་ཟབ་མོ་གསུང་གི་འདུག་པ་ཐོས་སམ་གསུང་། མ་ཐོས་ལགས་ཞུས་པས། ལས་ངན་གྱི་སྒྲིབ་པ་འདི་ཤིན་ཏུ་འཇིགས་པར་འདུག །ཡི་དམ་གྱི་ལྷ་རྩ་ན་བཞུགས་ནས་ཆོས་གསུངས་ཀྱང་མི་མཐོང་ཞིང་མི་གོ་བར་འདུག་གསུང་ནས། རྗེ་བཙུན་མས་སངས་རྒྱས་གཉན་ལ་གསུངས། དེས་སངས་རྒྱས་སྟོན་པ་ལ། དེས་ཤངས་སྟོན་པ་སོགས་ལ་གསུངས་སོ།

གཉིས་པ་གདམས་པ་དངོས་ནི། རྫས་ནང་མཆོད་བཞིན་བྱིན་གྱིས་བརླབས་ལ། ལག་པ་གཡོན་པའི་སྲིན་ལག་གིས་ཆོས་འབྱུང་ཉིས་བརྩེགས་བྲིས་པའི་ཟུར་གསུམ་ལ་ཡི་གེ་གསུམ་བསམ་ཞིང་ངག་ཏུ་བརྗོད་དོ།
དེ་རྗེ་བཙུན་མའི་ངོ་བོ་ལ་ཡིག་འབྲུའི་རྣམ་པས། དབུས་སུ་བྃ་ལ་སྔགས་གསུམ་གྱིས་གཡོན་བསྐོར་དུ་ལན་གསུམ་བསྐོར་བའམ། ཡང་ན་སྔགས་གསུམ་པོ་གྱེན་ལ་ལངས་པ་བཞིན་གཡས་གཡོན་གཉིས་དབུས་དང་གསུམ་དུ་ཡོད་པལ་དམིགས་ནས་སྔགས་བཟླས་པས། མ་ད་ནའི་རྡུལ་ཕྲན་ཐམས་ཅད་ངོ་བོ་རྗེ་བཙུན་མ་ལ་སྔགས་ཀྱི་རྣམ་པར་གྱུར་པ་རང་ལྷར་གསལ་བའི་ལུས་ལ་གཏོར་བའི་གྲིབ་དང་ཉེས་སྐྱོན་ཐམས་ཅད་དག་ནས་ལུས་ཀྱི་ཕྱི་ནང་ཐམས་ཅད་ཡི་གེ་དེ་རྣམས་ཀྱིས་འབག་ཞལ་དུ་གྱུར་པར་བསམ། གཞན་ལྷར་གསལ་བ་གཏོར་བས་ཀྱང་དེ་བཞིན་བསམ། གནས་ཁང་ལ་གཏོར་བས་གནས་ཁང་གི་གྲིབ་ལ་སོགས་པ་མ་དག་པ་སྦྱང་ནས་ཡི་གེ་རྣམས་ཀྱི་འབག་ཞལ་དུ་གྱུར་ཅིང་། ཕྱོགས་དང་ཕྱོགས་མཚམས་ཐམས་ཅད་ཡི་གེའི་དྲྭ་གུར་དུ་གྱུར་ནས་དེའི་གཟི་བརྗིད་ལ་གནོད་བྱེད་ལ་སོགས་པ་རྣམས་ཀྱི་ཉེ་མི་ནུས་པར་བསམ། ཕྱག་མཆོད་བཀའ་རྒྱ་མའི་ཡི་གེ་བླ་མའི་གསུང་བཞིན་དུ་བྲིས་པའོ།
དེ་ནས་སློབ་མ་ལ་སྟེར་ན། རང་ཉིད་ལངས་ཏེ། གཡས་སུ་རོལ་མོ་ཐོགས་པ་གཉིས། གཡོན་དུ་གཉིས། མདུན་དུ་སྤོས་ཐོག་པ་གཅིག་བྱས་ལ། བདུད་རྩི་མཐེབ་སྲིན་གྱི་སློབ་པའི་ལུས་ལ་གཏོར་བས། དཔའ་བོ་དང་དཔའ་མོ་སིབ་སིབ་ཐིམ་པར་བསམ་མོ།
དེས་དམ་ཚིག་གི་ཉམ་ཆགས་དང་གྲིབ་ཐམས་ཅད་སེལ་བ་དང་། དགེ་སྦྱོར་ལ་བོགས་གོང་ནས་གོང་དུ་ཐོན་པར་བྱེད་དོ།
འདིས་ཡི་དམ་གྱི་ཞལ་མྱུར་དུ་མཐོང་བར་བྱེད་དོ།
གསུང་པས་ཤིན་ཏུ་ཟབ་པར་ཡོད་པས་གསང་ནས་ཉམས་སུ་ལེན་པ་ལགས་སོ།
བཀའ་རྒྱ་དམ་པོ་ཡོད་པས་ཁ་ཐམ།། ཤུ་བྷཾ།། །།