Phyag rgya chen po ga'u ma'i khrid

Resource ID	SCv7p559
Title	phyag chen ga'u ma'i khrid
Topics	Mahamudra Gauma
Sub-Topics	Instructions
Author	Künga Drölchok
Associated Person	Shönu Drup
Link	BDRC W23922 BDRC W8LS32723

༈ ཕྱག་རྒྱ་ཆེན་པོ་གའུ་མའི་ཁྲིད།

།ཕྱག་རྒྱ་ཆེན་པོ་གའུ་མའི་ཁྲིད།
སྐྱབས་སེམས་སྔོན་དུ་སོང་ནས། སྔོན་འགྲོ་རང་བབས་རྣམ་གསུམ་ནི། ལུས་ཀྱི་བྱ་བ་མ་གཡེང་པར། །རྐང་པ་སྐྱིལ་ཀྲུང་སྒལ་ཚིགས་བསྲང་། །ལག་པ་པུས་གོང་དུ་བཞག་ལ་འབོལ་ལེ་སྡོད། ངག་ཀྱང་སྨྲ་བརྗོད་སྤངས་ལ་མཆུ་འབྱེད་འཛུམ་མི་བྱེད། ཡིད་དུས་གསུམ་རྟོག་པའི་རྒྱུ་ཕྲེང་བཅད། མི་མནོ། མི་བསམ། མི་སྤྲོ། གཉུག་མའི་རང་སོ་བཟུང་ལ་བསྒོ་འདོད་རྟོག་པས་མ་སླངས་པར་འཇོག་ཅིང་། མདུན་རྒྱབ་སྟེང་འོག་གཡས་གཡོན་ཐམས་ཅད་ལྟ་སྟངས་བསྒྱུར་ཞིང་རྩོལ་མེད་དུ་ཧད་དེ། མདོ་འདོན་སྔགས་བཟླ། གཏམ་སྨྲ་བ་ཀུན་ལའང་ཧད་དེ་ཆད་དེ་ཁའི་ངང་ནས་བྱེད། རིག་པ་བྱིངས་ན་མིག་གི་ལྟ་སྟངས་བསྟོད། རྒོད་ན་ཕབ། ཡང་ཡང་བླ་མས་བསྒོམ་བལྟ་བྱ་ཞིང་།
དངོས་གཞི་སྐྱོན་བཞི་རང་གྲོལ། རྒྱུན་དུ་འགྲོགས་ཀྱང་ཞལ་མ་མཇལ། ཉེ་དྲགས་པས་ངོས་མ་ཟིན། བཟང་དྲགས་པས་བློར་མི་ཚུད། ཟབ་དྲགས་པས་ཡིད་མ་ཆེས་པའི་མཚང་གཏོལ་ནས་ངོ་སྤྲོད་དོ།
།རྗེས་མཐར་སྐུ་བཞི་རང་ཤར། སེམས་མི་རྟོག་པ་ཆོས་སྐུ། རང་རིག་པ་ལོངས་སྐུ། སྣ་ཚོགས་སུ་འཆར་བ་སྤྲུལ་སྐུ། དབྱེར་མེད་ངོ་བོ་ཉིད་སྐུ། སྙིང་རྗེ། བསྐྱེད་རིམ། རླུང་། མོས་གུས་ཀྱི་བོགས་འདོན་པ་ཉིད་དོ། །གའུའི་ནང་ནས་བྱུང་བའི་དཔེ། །ཀུན་སྣང་ཏ་ལའི་འདབ་བྲིས་པའི། །བེ་བུམ་དགའ་མོའི་མདུད་གྲོལ་མཆོག །དེང་འདིར་ཡི་གེའི་སྣང་བར་བཀོད།
།བསམ་སྡིངས་པ་གཞོན་ནུ་གྲུབ་ཀྱི་ཁྲིད་ལ་བསྡུས་སོ།།