Edit Text: Rgyud sde lnga'i dbang gi cho ga grub pa'i nye lam 'jug go yon tan kun 'byung

Free text:

<span class="main_text">༄༅། །རྒྱུད་སྡེ་ལྔའི་དབང་གི་ཆོ་ག་བཀླག་ཆོག་ཏུ་སྡེབས་པ་གྲུབ་པའི་ཉེ་ལམ་ཞེས་བྱ་བ་བཞུགས་སོ།། <br />འཇུག་གོ་ཡོན་ཏན་ཀུན་འབྱུང་།།<br /><br />རྣམ་གྲོལ་ལམ་སྟོན་རྒྱལ་བ་ཀུན་རང་བཞིན། །རྣམ་དག་ལྷག་པའི་ལྷ་དང་རྣམ་དབྱེར་མེད། །རྣམ་དཀར་ཡོན་ཏན་ཕུང་པོའི་གཏེར་མངའ་བ། །རྣམ་མང་འགྲོ་བའི་སྐྱབས་མགོན་ལ་བཏུད་ནས། །ངེས་པར་སྦས་པའི་ཞལ་གྱི་བུམ་བཟང་ལས། །ཚུལ་ཁྲིམས་མགོན་པོའི་སྙིམ་པས་ལོགས་བཅུས་ཏེ། །སྐལ་བཟང་འཆི་མེད་གྲུབ་པའི་སྨིན་བྱེད་ཀྱི། །དབང་ཆོག་དམ་པའི་གསུང་བཞིན་བཤད་པར་བྱ། །དེ་ལ་འདིར་ཡེ་ཤེས་ཀྱི་མཁའ་འགྲོ་མ་ནི་གུ་མའི་ཁྲིད་ཀྱི་སྔོན་དུ་བསྐུར་བ་དང་། །རྒྱུད་སྡེ་ལྔ་གཙོ་བོར་བསྡུས་པའི་དལ་དུ་དབང་བསྐུར་བ་གཉིས་ལས། །ད་ལྟ་ཕྱག་ལེན་ལ་རྒྱུད་སྡེ་ལྔ་གཙོ་བོར་བསྡུས་པའི་དུལ་དུ་དབང་བསྐུར་བའི་སྒྱུ་ལུས་དབང་མོ་ཆེར་གྲགས་པ་བྱ་བའི་ཚུལ་ལ་སྦྱོར་དངོས་རྗེས་གསུམ་ལས། <br />།དང་པོ་ནི། ས་ཆོག་དགོས་པའི་སར་རྒྱས་བསྡུས་གང་རུང་གཞན་ནས་འབྱུང་བ་ལྟར་བྱས་རྗེས་གནས་ཕྱག་བ་དར་བྱས། དཀོན་མཆོག་གི་རྟེན་བཀྲམ། །དེ་དག་གི་མདུན་དུ་རྡུལ་ཚོན་ལྟར་ན་རྒྱས་པར་ན་དལ་ཡོངས་རྫོགས་འོག་ཏུ་སྒོམ་པ་དང་མཐུན་པ་བྲིས། །བསྡུ་ན་མཎྜལ་བཞིའི་དང་པོ་ལ། ཆོས་འབྱུང་གཉིས་བརྩེགས་དཀར་པོའི་དབུས་སུ་ལྷའི་ཁོག་དྲང་མཐུན་པའི་ཚོན་སྤུངས། དེའི་མུ་ཁྱུད་ནག་པོ། རྩི་བོས་མཆན་དམར་པོ་བྱ། མཎྜལ་གཉིས་པ་པདྨ་འདབ་བཞི་ཕྱོགས་ཚོན། གྲུ་ཆད་ལྗང་གུ་བྱ། མཎྜལ་གསུམ་པ་ཆོས་འབྱུང་དམར་པོ། མེ་རིས་གཞི་ལྗང་གུ། ཟླ་གམ་མཐིང་ལྗང་དཀར་པོ། མཎྜལ་བཞི་པ་ཆོས་འབྱུང་མཐིང་ནག་གྲུ་གསུམ། མེ་རི་དམར་པོ། དེ་གསུམ་ཀའི་མུ་ཁྱུད་ཀྱི་ཕྱིས་ནས་རྡོ་རྭ་མེ་རི་བྲིས། མཎྜལ་ཕྱི་མ་གསུམ་ལའང་ཚོན་སྤུང་ལྔ་ལྔ་འགོད། མཎྜལ་གཉིས་པའི་སྟེང་དུ་མཉྫིའི་ཁར་བུམ་པ་མཚན་ཉིད་དང་ལྡན་པ་བཅུད་ཉེར་ལྔ་བླུག་ཅིང་ཆུ་གཙང་མས་གསུམ་གཉིས་བཀང་བ། མགུལ་ཆིངས་ཁ་རྒྱན་དུང་ཆོས་རྡོར་གཟུངས་དང་བཅས་པ་བཤམས། མོཎྜལ་བཞི་པའི་སྟེང་དུ་མཉྫིའི་ཁར་གཏོར་མ་ཟུར་གསུམ་རྒྱན་གྱིས་བརྒྱན་པ་མདའ་དང་བཅས་པ་བཞག །ཟུར་ཞིག་ཏུ་རྣམ་རྒྱལ་དང་ལས་བུམ་གཉིས་དངོས་སུ་བཤམས་པའམ། བསྡུ་བ་གོང་གི་བུམ་པས་ཀྱང་ཆོག་གོ །དེ་ལྟར་ན་འོག་ཏུ་ལས་བུམ་བསྐྱོད་ཆོག་མེད་ཀྱང་ཆོག །མཐའ་བསྐོར་དུ་བཅུ་གཉིས་སྔོན་འགྲོའི་ཉེར་སྤྱོད་དང་ལྔ། ཟླུམ་ཏོར་གསུམ། རྒྱུན་པར་ན་གཞི་བདག་བགེགས་གཏོར་བཤམ། ཚོགས་ཀྱི་ཡོ་བྱད་ཅི་འབྱོར་པ་དང་བཅས་པ་བཤམ། <br />གཉིས་པ་ནི། སྔོན་འགྲོ་གཏོར་མ་ཆུ་གཙང་གིས་བྲན་ལ། ཀྱཻ་རྡོར་བདེ་མཆོག་གང་རིགས་ཀྱིས་མཁའ་འགྲོ་སྤྱི་གཏོར་བཏང་། མཆོད་པ་བྱིན་རླབས་བླ་མེད་སྦྱི་ལྟར་བྱ། སྐྱབས་འགྲོ་སེམས་བསྐྱེད། རྡོ་རྗེ་སེམས་དཔའི་སྒོམ་བཟླས། ཀྱཻ་རྡོར་ལྟར་བྱས་རྗེས། རང་བདེ་མཆོག་ཏུ་གསལ་བའི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་རྒྱུད་སྡེ་ལྔའི་ལྷ་ཚོགས་ལ་བླ་མ་རིགས་བདག་གི་ཚུལ་དུ་བཞུགས་པ་ལ་སངས་རྒྱས་དང་བྱང་ཆུབ་སེམས་དཔའ་དཔའ་མོ་མཁའ་འགྲོའི་ཚོགས་ཀྱིས་བསྐོར་བུ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས། ཨོཾ་སརྦ་ཏ་ཐཱ་ག་ཏ་མཎྜལ་ལ་ས་པཱ་རི་ཝཱ་ར་རཻའི་མགོར་སྦྱར་བའི། ཨརྒྷཾ་ནས་ཤཔྡའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །སོགས་ལན་གསུམ་གྱིས་འདུན་རྣམ་དག་བྱ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །ཅེས་སོགས་ཚད་མེད་བཞི་བསྒོམ། ཨོཾཤཱུནྱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་བརྗོད་པས། བདག་དང་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་བཞིན་གྱིས་མི་དམིགས་པའི་སྟོང་པ་ཉིད་དུ་བསམ། སྟོང་པའི་ངང་ལས་ཡེ་ཤེས་རང་སྣང་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་ཕྱི་ནས་རིམ་པ་བཞིན་དུ་དཀའ་སེར་དམར་ལྗང་བསྔོ་བའི་རྩེགས་པ་རིམ་པ་ལྔ་དང་ལྡན་པ། འདོད་ཡོན་དམར། ཕ་གུ་སེར། མདའ་ཡབ་ཁ་དོག་སྣ་ཚོགས་པ། སྒོ་བཞིའི་ཐད་སོར་རྟ་བབས་བང་རིམ་བཞི་པ་ལ་པདྨ་ལ་གནས་པའི་ཆོས་ཀྱི་འཁོར་ལོ་དང་། རི་དྭགས་གཉིས་གཉིས་དང་བཅས་པའི་སྟེང་ན་གདུགས་ཕུབ་པ། ནང་ཀ་བ་བརྒྱད་ཀྱིས་བཏེགས་པའི་རྡོ་རྗེའི་གདུང་བཞིས་མིག་མང་རིས་སུ་བྲིས་པས་མཛེས་པར་ཕུབ་པ། དབུས་ཕྱུར་བུར་གྱུར་པའི་རྩེ་མོར་རྡོ་རྗེ་དང་ནོར་བུའི་ཏོག་གིས་སྤྲས་པ། མཆོད་རྟེན་མགོ་ལྔ་པའི་རྣམ་པ་ཅན། ཕྱི་རོལ་ཏུ་དུར་ཁྲོད་ཆེན་པོ་བརྒྱད། རྡོ་རྗེའི་རྭབ་མེ་རི་འབར་བ་དང་བཅས་པས་བསྐོར་བ། སྣང་ལ་རང་བཞིན་མེད་པ་འོད་ཀྱི་རང་བཞིན་ཅན་གྱི་ནང་གི་ལྷ་རྣམས་ཤར་དཀར། ལྷོ་སེར། ནུབ་དམར། བྱང་ལྗང་བའི་རིན་པོ་ཆེའི་ཕོ་བྲང་ཡངས་ཤིང་རྒྱ་ཆེ་བའི་དབུས་སུ་ཤེལ་ལས་གྲུབ་པའི་ཆོས་འབྱུང་གཉིས་རིམ་གྱི་ལྟེ་བར་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་ཟླ་བ་ཉི་མ་རྣམས་བརྩེགས་པའི་སྟེང་དུ་འཇིགས་བྱེད་དུས་མཚན་དང་བཅས་པའི་གདན་ལ། རང་ཉིད་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་ཅིང་གཡས་བརྐྱང་བའི་སྟབས་ཀྱིས་བཞེངས་པ། དེའི་པང་ན་ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་གཡས་གྲི་གུག་ནམ་མཁའ་ལ་འཕྱར་ཞིང་། གཡོན་ཐོད་ཁྲག་འཛིན་པས་ཡབ་ལ་འཁྲིལ་བ། <br />དེའི་ཤར་དུ་གདན་བཞི་བརྩེགས་ཀྱི་སྟེང་དུ་ཚངས་པ་བརྒྱ་བྱིན་མནན་པའི་དགྱེས་རྡོར་མཐིང་ནག་ཞལ་གཅིག་ཕྱག་གཉེར་རྡོ་རྗེ་དང་དྲིལ་བུ་འཛིན་པས་ཡུམ་བདག་མེད་མ་སྔོན་མོ་གྲི་ཐོད་འཛིན་པ་ལ་འཁྱུད་པ། <br />ལྷོར་གདན་བཞི་བརྩེགས་ཀྱི་སྟེང་དུ། གསང་འདུས་སྐུ་མདོག་མཐིང་ཞུན་ལྟར་སྔོ་བ། ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་རེག་བྱ་རྡོ་རྗེ་མ་སྔོན་པོ་རྡོ་རྗེ་དང་དྲིལ་བུ་འཛིན་པ་ལ་འཁྱུད་ཅིང་། གཉིས་ཀའང་སྐྱིལ་ཀྲུང་དུ་བཞུགས་པ། <br />ནུབ་ཏུ་གདན་བཞི་བརྩེགས་དང་མེ་རིའི་སྟེང་དུ་མ་ཧཱ་མ་ཡ་སྐུ་མདོག་མཐིང་ནག་གཡས་བརྐྱང་གཡོན་བསྐུམ་ཞལ་གཅིག་ཕྱག་གཉིས་ཁ་ཊྭཱྃ་ག་དང་། ཐོད་ཁྲག་འཛིན་པས་ཡུམ་སངས་རྒྱས་མཁའ་འགྲོ་སྐུ་མདོག་ནག་མོ་ཁ་ཊྭཱྃ་ག་དང་ཐོད་ཁྲག་འཛིན་པ་ལ་འཁྱུད་པ། <br />བྱང་དུ་གདན་བཞི་བརྩེགས་དང་མ་ཧེའི་སྟེང་དུ་རྡོ་རྗེ་འཇིགས་བྱེད་སྐུ་མདོག་ནག་པོ་མ་ཧེའི་ཞལ་ཅན་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་ཁྲག་འཛིན་པས་ཡུམ་རྡོ་རྗེ་རོ་ལངས་མ་དམར་མོ་གྲི་གུག་དང་ཐོད་ཁྲག་འཛིན་པ་ལ་འཁྱུད་པ། <br />རྭ་རྣོ་བ། ཤངས་འབུད་ཅིང་མཆེ་བ་གཙིགས་པ། ལྗགས་འདྲིལ་བ། སྐུ་ལུས་ཐུང་ལ་སྦོམ་ཞིང་བསུས་ཁྱིམ་ཆེ་པ། སྦྲུལ་གྱིས་བརྒྱན་པ་དེ་ཐམས་ཅད་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་བྱང་སེམས་དཔའ་བོ་མཁྲོའ་ཆོས་སྲུང་ནོར་ལྷ་ཐམས་ཅད་རྒྱུད་སྡེ་ལྔ་གཙོ་བོར་བསྡུས་པའི་དལ་རྟེན་དང་བརྟེན་པར་བཅས་པའི་རྣམ་པར་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས། ཚོགས་ཞིང་གི་སྐབས་ལྟར་མཆོད། ཛཿཧཱུྃ་བྃ་ཧོཿ ཞེས་པས་བདག་བསྐྱེད་ལ་གཉིས་སུ་མེད་པར་ཐིམ་པར་བསམ། སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཞེས་སྤྱན་དྲངས། པཉྩ་ཀུ་ལ་ས་པཱ་རི་ཝཱ་ར་ལན་གཅིག་སྔོན་དུ་འགྲོ་བའི་ཨརྒྷཾ་ནས། ཤཔྡའི་བར་གྱིས་མཆོད། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས་དབང་ལྷ་རྣམས་ཀྱིས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར་སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་ཐམས་ཅད་ལ་མི་བསྐྱོད་པ་སྤྲུལ་སྐུའི་རྣམ་པ་ཅན་གྱིས་དབུ་བརྒྱན་པར་བསམ། སོ་སོའི་ཐུགས་ཀར་པདྨ་དང་ཉི་མའི་དལ་གྱི་སྟེང་རང་རང་གི་ས་བོན་ཧཱུྃ་ཡི་གེ་མཐར་སོ་སོའི་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་བྱང་སེམས་ཐམས་ཅད་ཀྱི་ཐུགས་རྗེ་བྱིན་རླབས་ནུས་མཐུ་ཐམས་ཅད་བསྡུས་ནས་སྔགས་ཕྲེང་སོ་སོ་ལ་ཐིམ་པས་རྒྱུད་བྱིན་གྱིས་རླབས་པར་བསམ་ལ། ཨོཾ་ཧྲཱི་ཧ་ཧ་ཧཱུྃ་ཧཱུྃ་ཕཊ། ཨོཾ་དེ་ཝ་པི་ཅུ་བཛྲ་ཧཱུྃ་ཧཱུྃ་ཧཱུྃ་ཕཊ། ཨོཾ་བཛྲ་དྷིཀྲ་ཧཱུྃ། ཨོཾ་ཨཱཿཧྲཱི་ཧཱུྃ་ཕཊ། ཨོཾ་ཧྲཱིཿཥྚིཿབི་ཀྲྀ་ཏཱ་ན་ན་ཧཱུྃ་ཕཊ། ཅེས་པས་རྣམས་སོ་སོར་ཅི་ནུས་བཟླས་ལ། དེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། ཕྱག་རྒྱ་ཆེན་པོ་མཆོག་གི་དངོས་གྲུབ་ཚེ་འདི་ཉིད་ལ་ཐོབ་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། རྫོགས་རིམ་ནི། འདིའི་ལུགས་ཀྱི་རྫོགས་རིམ་གང་ལ་མོས་པ་ཞིག་སྒོམ། དལ་བསྡུ་བ་ནི། རང་གི་སྙིང་ག་ནས་འོད་ཟེར་འཕྲོས་པས། ཁམས་གསུམ་སྣོད་བཅུད་ཐམས་ཅད་འོད་དུ་ཞུ་ནས་བསྲུང་བའི་འཁོར་ལོ་ལ་ཐིམ། དེ་དུར་ཁྲོད་བརྒྱད་ལ། དེ་གཞལ་ཡས་ཁང་ལ། དེ་ཕྱོགས་བཞིའི་ལྷ་རྣམས་ལ། དེ་གཙོ་བོ་ཡབ་ཡུམ་ལ། ཡུམ་ཡབ་ལ་ཐིམ་པས། འཁོར་ལོ་བདེ་མཆོག་ཕྱག་གཉིས་པའི་ང་རྒྱལ་གྱིས། སྤྱོད་ལམ་ལ་འཇུག་གོ <br />།མདུན་བསྐྱེད་ནི། མཎྜལ། བུམ་པ། གཏོར་མ་དང་བཅས་པ། ཤཱུནྱ་ཏའི་སྔགས་ཀྱིས་སྟོང་པར་སྦྱངས། སྟོང་པའི་ངང་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཞེས་པ་ནས། བྱང་ལྗང་བའི་བར་བདག་བསྐྱེད་བཞིན་ལས། ཕོ་བྲང་དང་པོའི་དབུས་སུ་ཤེལ་ལས་གྲུབ་པའི་ཞེས་པ་ནས། སྦྲུལ་གྱིས་བརྒྱན་པ་ཞེས་པའི་བར་རང་ཉིད་ཅེས་པ་དོར་ནས་གཞན་བདག་བསྐྱེད་ཇི་ལྟ་བ་བཞིན། ཕོ་བྲང་གཉིས་པ་ཕྱི་བུམ་པ་ལ་ནང་གཞལ་ཡས་ཁང་དུ་གསལ་བའི་ནང་དུ་རྒྱུད་སྡེ་ལྔའི་ལྷ་གོང་བཞིན་དུ་བསྐྱེད། མཎྜལ་གསུམ་པར་པདྨ་དང་ཟླ་བ་ཉི་མའི་གདན་ལྔའི་དབུས་ཀྱི་གདན་གྱི་སྟེར་དུ་བདེ་མཆོག་ལྷན་སྐྱེས་གོང་བཞིན་དང་། དེའི་ཕྱོགས་བཞིར་ཤར་དུ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་གུ །ནུབ་ཏུ་ཁཎྜ་རོ་ཧི་དམན་མོ། ལྷོར་གཟུགས་ཅན་མ་སེར་མོ། དེ་ཐམས་ཅད་ཞལ་གཅིག་ཕྱག་གཉིས་མ། གཡས་གྲི་གུག་གཡོན་ཐོད་ཁྲག་འཛིན་པ། གུ་མོ་ན་ཁ་ཊྭཱཾ་ག་བསྣམས་ཤིང་ཞབས་གཡས་བསྐུམ་གཡོན་བརྐྱང་བའི་སྟབས་ཀྱིས་རོའི་གདན་ལ་བཞུགས་པ། དེ་ལྟ་བུའི་དལ་གསུམ་གྱི་ཡབ་ཡུམ་ཐམས་ཅད་མཚན་དཔེས་བརྒྱན་ཅིང་འོད་ཟེར་འབར་བ་མེ་དཔུང་གི་དབུས་ན་བཞུགས་པ་ཞལ་རེ་རེ་ལ་སྤྱན་གསུམ་གསུམ་དང་ལྡན་པ། ཐོད་པ་སྐམ་པོ་ལྔས་དབུ་བརྒྱན་པ། གར་གྱི་ཉམས་དགུ་དང་ལྡན་པ། ཡབ་ཐམས་ཅད་རུས་པའི་བརྒྱན་དྲུག་དང་མི་མགོ་རློན་པ་ལྔ་བཅུའི་དོ་ཤལ་ཅན། དབུ་སྐྲ་དང་སྨ་ར་དང་སྨིན་མ་སེར་པོ་གྱེན་དུ་འབར་བ། ཡུམ་ཐམས་ཅད་སྒེག་ཅིང་འཛུམ་པ། བདེ་བའི་ཉམས་དང་ལྡན་པ། ཤ་རྒྱས་ཤིང་ནུ་མ་འབུར་བ། མི་མགོ་སྐམ་པོ་ལྔ་བཅུའི་དོ་ཤལ་ཅན། དབུ་སྐྲ་སིལ་བུར་འཕྱང་བ། གྲུ་ཆད་ལ་མཆོད་པའི་ལྷ་མོ་མཆོད་རྫས་སྣ་ཚོགས་ཐོག་པ་དུ་མ། འཁྱམས་རྣམས་སུ་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ལོངས་སྐུ་ཞལ་སྦྱོར་བདེ་བ་ཆེན་པོའི་རང་བཞིན་ཏིལ་གྱི་གོང་བུ་ཁ་བྱེ་བ་ལྟར་བཞུགས་པ། མཎྜལ་བཞི་པར་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་མཚན་ཉིད་དང་ལྡན་པའི་ནང་དུ་ཆོས་འབྱུང་གྲུ་གསུམ་མཐིང་ནག་མེ་རི་རབ་ཏུ་འབར་བའི་དབུས་སུ་སྣ་ཚོགས་པདྨ་ཉི་མ་ཚོགས་བདག་དཀར་པོ་མགོ་བོ་གཡས་སུ་ཕྱོགས་ནས་གན་རྐྱལ་དུ་མནན་པའི་སྟེང་དུ་མྱུར་མཛད་ཡེ་ཤེས་ཀྱི་མགོན་པོ་སྐུ་མདོག་མཐིང་ནག་ཞལ་གཅིག་ཕྱག་དྲུག་པ། དབུ་སྐྲ་ཁམས་སེར་གྱེན་དུ་མཛེས་པ། སྤྱན་གསུམ་དམར་ལ་ཟླུམ་པ། ཞལ་བསྒྲད་པ་མཆེ་བ་རབ་ཏུ་གཙིགས་པ། སྨ་ར་དང་ཨག་ཚོམས་བརྗིད་པ། སྨིན་མ་ཁམས་སེར་གློག་ལྟར་འཁྱུགས་པ། ཐོད་པ་སྐམ་པོ་ལྔས་དབུ་བརྒྱན་པ། སྦྲུལ་མཐའ་ཡས་སྔོན་པོ་ཐོད་དུ་བཅིངས་པ། འཇོག་པོ་དམར་པོས་སྙན་ཆ། དུང་སྐྱོང་སེར་པོས་མགུལ་རྒྱན། པདྨ་དཀར་པོས་ཕྱག་གདུབ་དང་ཞབས་གདུབ་དང་དཔུང་རྒྱན་བྱས་པ། སྐུ་སྟོད་ལ་གླང་ཆེན་གྱི་ཀོ་རློན་གསོལ་བ། སྐུ་སྨད་སྟག་གི་པགས་པའི་ཤམ་ཐབས་ཀྱི་སྟེང་ན་དར་ལྗང་དང་སྦྲུལ་ནག་གི་སྐ་རག་བཅིངས་པ། མི་མགོ་རློན་པ་ཁྲག་འཛག་པ་ལྔ་བཅུའི་དོ་ཤལ་འཕྱང་བ། ཕྱག་དྲུག་གཡས་ཀྱི་དང་པོ་ན་རྡོ་རྗེའི་གྲི་གུག་གཤིན་རྗེའི་ལྕེ་འདྲ་བ་འཛིན་པ། བར་པ་ན་ཐོད་སྐམ་གྱི་ཕྲེང་བ། ཐ་མ་ན་ཐོད་པའི་ཌཱ་མ་རུ་དྲག་ཏུ་འཁྲོལ་བ། གཡོན་གྱི་དང་པོ་ན་བདུད་བཞིའི་ཁྲག་གིས་གང་བའི་ཐོད་པ་བསྣུམས་པ། བར་པ་ཁ་ཊྭཱྃ་ག་རྩེ་གསུམ། ཐ་མ་ན་རྡོ་རྗེའི་ཞགས་པ་བསྣམས་པ། དཔྲལ་བར་སིན་དྷུ་རས་བྱུགས་པ། སྤྱི་བོར་མི་བསྐྱོད་པས་མཚན་པ། ཕྱག་ཞབས་ཐམས་ཅད་ལ་རུས་པ་དང་། དྲིལ་བུ་གཡེར་ཁའི་སྒྲ་དང་བཅས་པས་བརྒྱན་པ། ཞབས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། དེའི་གཡོན་དུ་ཁྲག་གི་རྒྱ་མཚོ་དམར་ལ་དྭངས་པའི་ནང་དུ་དྲེའུ་སྒ་དམར་སྲིན་པོའི་ཡ་འགལ་གྱིས་སྔ་རུ། མ་འགལ་གྱིས་ཕྱི་རུ། སྦྲུལ་ནག་གིས་གོང་སྨད། མཆོང་གི་གློ་ལེན། བྱེ་རུའི་སྲབ་སྐྱོགས་སོགས་ཀྱིས་བརྒྱན་པ། རླུང་གི་གཤོག་པ་རྫུ་འཕྲུལ་གྱི་རྩལ་མྱུར་མགྱོགས་ཀྱི་སྟོབས་དང་ལྡན་པའི་སྟེང་དུ་དཔལ་ལྡན་ལྷ་མོ་རེ་མ་ཏི་སྐུ་མདོག་མཐིང་ནག་ཆར་སྤྲིན་འཐིབས་པ་ལྟ་བུ། ཞལ་གཅིག་ཕྱག་བཞི་གཡས་ཀྱི་དང་པོ་ན་གནམ་ལྕགས་ཀྱི་རལ་གྲི་ངན་དང་ལྡན་པ། གཉིས་པ་ན་གྲི་གུག་རྣོན་པོས་དགྲ་བགེགས་ཀྱི་སྲོག་རྩ་གཅོད་པ། གཡོན་གྱི་དང་པོས་སྲིད་གསུམ་ཟིལ་གྱིས་གནོན་པའི་རྒྱལ་མཚན། གཉིས་པ་ན་ཐོད་རློན་ཁྲག་གི་གང་བ་བསྣམས་པ། དབུ་སྐྲ་ཁམས་སེར་རྨ་བྱའི་མདངས་ཀྱི་བརྒྱན་པ། སྤྱི་གཙུག་ནས་ཟླ་བ་ཉ་གང་བས་མཚན་པ། ཐོད་པ་སྐམ་པོ་ལྔས་དབུ་བརྒྱན་ཅིང་། རློན་པའི་དོ་ཤལ་འཕྱང་བ། སྙན་གཡས་པ་ནུ་སེང་གེ་དང་། གཡོན་པ་ལ་དྲུག་སྦྲུལ་གྱིས་བརྒྱན་པ། སྤྱན་གསུམ་དམར་ལ་འཁྱུག་པ། ཞལ་མདངས་ཤིང་མཆེ་བ་གཙིགས་པ། ལྗགས་གྱེན་ལ་འབྲེལ་པ། སྐུ་སྟོད་ལ་ཞིང་ཆེན་གྱི་པགས་པ་གསོལ་བ། སྐུ་སྨད་ལ་གླང་ཆེན་གྱི་ཀོ་རློན་དང་། རེ་ལྟེའི་ཤམ་ཐབ་དཀྲིས་པ། སྦྲུལ་ནགས་ཀྱི་སྐ་རགས་བཅིངས་པའི་ཐད་ནས་ཉི་ཟླ་འཆར་བ། མ་བདུད་བྱེ་བས་བསྐོར་བ། མགོན་པོའི་མདུན་དུ་ཐོད་པའི་གཞལ་ཡས་ཁང་མེ་རབ་ཏུ་འབར་བའི་ནང་དུ་གནོད་སྦྱིན་ཀྵེ་ཏྲ་པཱ་ལ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། གཡས་གྲི་གུག་ནམ་མཁའ་ལ་འཕྱར་བས་དགྲ་བགེགས་ཀྱི་སྲོག་རྩ་གཅོད་ཅིང་གཡོན་ཐོད་པ་འཛིན་པས་དགྲ་བགེགས་ཀྱི་སྙིང་ཁྲག་དྲོན་མོ་གཙོ་བོའི་ཞལ་དུ་སྟོབ་པ། རལ་པ་དམར་སེར་གྱེན་དུ་གཟིངས་པ། ཁ་གདངས་ཤིང་མཆེ་བ་གཅིགས་ནས་དགུ་ལ་འོད་དོད་འབོད་པ། སྤྱན་གསུམ་དམར་པོ་ལྡོག་ཅིང་དམ་ཉམས་ལ་སྡང་མིག་བལྟ་བ། མི་མགོ་སྐམ་པོས་ཐོད་དང་། རློན་པོས་རྡོ་ཤལ་བྱས་པ། ཤིན་ཏུ་འཇིགས་ཤིང་མི་སྡུག་པའི་གཟུགས་ཅན། དོམ་ནག་སྨྱོན་པ་ལ་ཆིབས་ཤིང་གནོད་སྦྱིན་དཔག་ཏུ་མེད་པའི་དབུས་ན་བཞུགས་པ། མགོན་པོའི་གཡས་སུ་དབང་ཕྱུག་ཛིན་མི་ཏྲ་སྐུ་མདོག་དམར་པོ་སྲིན་པོའི་གཟུགས་ཅན་ཞལ་གཅིག་ཕྱག་གཉིས་པ། གཡས་ཐོད་པའི་ཌཱ་མ་རུ་ནམ་མཁའ་ལ་དྲག་ཏུ་འཁྲོལ་བས་ཁམས་གསུམ་དབང་དུ་སྡུས་པ། གཡོན་ཐོད་པ་དགྲ་བགེགས་ཀྱི་སྙིང་ཁྲག་གིས་གང་བ་དཀྲུག་ཅིང་གསོལ་བ། ཤིན་ཏུ་འཇིགས་པའི་ཆ་བྱད་ཅན། སྟག་ཆེན་དར་མ་ལ་ཆིབས་པ། རྒྱབ་ཏུ་གཤིན་རྗེ་ཊཀྐི་རཱ་ཛ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། གཡས་སྒྱུ་མའི་ཞགས་པ་ཀླད་ལ་བསྐོར་ཞིང་། གཡོན་སྡིགས་མཛུབ་མཁའ་ལ་གདེངས་པ་གཤིན་རྗེའི་ཆ་ལུགས་ཅན་སྤྱང་ཀི་དང་མ་ལ་ཆིབས་པ། གཡོན་དུ་བདུད་མགོན་ཏྲཀྴད་ནག་པོ་ཞལ་གཅིག་ཕྱག་བཞི་པ། གཡས་དང་པོས་ཐོད་པ་ཁྲག་གིས་གང་བ་འཛིན་ཅིང་། གཉིས་པས་རུ་མཚོན་དམར་པོ་འཕྱར་བ། གཡོན་དང་པོས་ལྕགས་ཀྱི་ཐོ་ལུམ་དང་། གཉིས་པས་ཙནྡན་གྱི་བིང་ཆེན་བསྣམས་པ། བདུད་ཀྱི་ཆ་ལུགས་ཅན་རྟ་བྲ་ནག་རྟིང་དཀར་ལ་ཆིབས་པ། གསུམ་ཀའང་ཤིན་ཏུ་ཁྲོ་ཤིང་འཇིགས་པ། ཞལ་གདངས་ཤིང་མཆེ་བ་གཙིགས་པ། སྨ་ར་དང་སྨིན་མ་དང་དབུ་སྐྲ་དམར་སེར་གྱེན་དུ་མཛེས་པ། སྤྱན་གསུམ་དམར་ཞིང་གཡོ་བས་དགྲ་བགེགས་ལ་གཟིགས་པ། ཐོད་སྐམ་གྱི་དབུ་བརྒྱན་དང་། བོད་རློན་གྱི་དོ་ཤལ་འཕྱང་བ། སྟག་ཤམ་ལ་སོགས་པའི་དུར་ཁྲོད་ཀྱི་ཆས་ཀྱིས་བརྒྱན་ཅིང་མེ་དཔུང་འབར་བའི་དབུས་ན་རང་འདྲའི་གནོད་སྦྱིན་འདུག་པ་ཅན་འབུམ་འབུམ་གྱི་འཁོར་གྱིས་བསྐོར་བ། དེའི་ཕྱི་རོལ་གྱི་འཁྱམས་རྣམས་སུ་ཕྱོགས་སྐྱོང་བཅུ། ལྷ་ཆེན་བརྒྱད། ཀླུ་ཆེན་བརྒྱད། གཟའ་ཆེན་བརྒྱད། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་དགུ། རྒྱལ་ཆེན་བཞི་སྟེ་གཙང་རིས་ཀྱི་མགོན་པོ་བདུན་བཅུ་རྩ་ལྔ། དེའི་ཕྱི་རོལ་དུ་གནོད་སྦྱིན་སྲིན་པོ། འགྱུར་པོ་ཡི་དྭགས་ཤ་ཟ། སྨྱོ་བྱེད། བརྗེད་བྱེད། མ་མོ་མཁའ་འགྲོའི་ཚོགས་ཀྱི་བསྐོར་བ་དང་། རོ་མགོ་བོ་བཅད་པ་དང་། དཔྱངས་པ་དང་། བཀལ་བ། གསལ་ཤིང་གིས་ཕུག་པ། མགོ་བོ་དང་། ཀེང་རུས་དང་། བྱ་དང་། ལྕེ་སྤྱང་དང་། ཁྲྭ་དང་། འུག་པ་དང་། བྱ་རྒོད་དང་། རོ་ལངས་དང་། མི་རྒོད་དང་། གཅན་གཟན་གདུག་པ་ཅན་དུ་མས་གང་ཞིང་ཕེཾ་དང་ཕཊ་ལ་སོགས་པ་འཇིགས་པའི་སྒྲ་དུ་མ་སྒྲོག་པ། གཞན་ཡང་དམ་ཅན་རྒྱ་མཚོའི་དམག་ཚོགས་དགྲ་བགེགས་གདུག་པ་ཅན་ཐམས་ཅད་ཀྱི་ཤ་ལ་དགའ་བ། ཁྲག་ལ་རོལ་པ། སྙིང་རྗེ་མེད་པ་ཁྲོ་ཞིང་གཏུམ་པ། མིག་རྩ་དམར་བ། ཁ་གདངས་པ། མཆེ་བ་གཙིགས་པ། བཞིན་བསྡུས་པ། ལག་ན་གདུག་པའི་མཚོན་ཆ་སྣ་ཚོགས་ཐོགས་པ། སྐད་ཅིག་ལ་སྐྱེ་འགྲོ་གདུག་པ་ཅན་ཐམས་ཅད་ཀྱི་སྲོག་དབུགས་སྡུད་ཅིང་དགྲ་བགེགས་སྒྲོལ་བ། རྣལ་འབྱོར་པ་ཆོས་སྒྲུབ་པ་རྣམས་ཀྱི་བར་ཆད་བསྲུངས་ཞིང་དགོས་འདོད་སྒྲུབ་པའི་དམ་ཅན་ས་གཞི་བར་སྣང་ཐམས་ཅད་སྤྲིན་ཕུང་འཐིབས་པ་བཞིན་བཞུགས་པར་གྱུར། དེ་ཐམས་ཅད་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་ཧཱུྃ་ལས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྒྱུད་སྡེ་ལྔའི་དཀྱིལ་འཁོར་གྱི་ལྷ་ཚོགས་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་གཙོ་འཁོར་དང་བཅས་པའི་རྣམ་པར་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས། ཨོཾ་སརྦ་ཏ་ཐཱ་ག་ཏུ་སོགས་སྔོན་དུ་འགྲོ་བའི། ཨརྒྷ་ནས་ཤཔྡའི་བར་གྱིས་མཆོད། ཛཿཧཱུྃ་བྃ་ཧོཿ ཞེས་པས་མདུན་བསྐྱེད་སོ་སོ་ལ་གཉིས་སུ་མེད་པར་ཐིམ་པར་བསམ་མོ། སླར་ཡང་དབང་ལྷ་སྤྱན་དྲུངས་ནས་རིགས་བདག་གིས་རྒྱས་གདབ་པའི་བར་བདག་བསྐྱེད་བཞིན་བྱའོ། <br />མཆོད་པ་ནི། ཨོཾ་སུམྦྷ་ནི་སུམྦྷ་ནི་ཧཱུཾ། གྲྀཧྣ་གྲྀཧྣ་ཧཱུྃ། གྲྀཧྣ་པ་ཡ། གྲྀཧྣ་པ་ཡ་ཧཱུཾ། ཨ་ན་ཡ་ཧོ་བྷ་ག་ཝན་བིདྱ་རཱ་ཛ་ཧཱུྃ་ཕཊ། ཨོཾ་སྭཱ་བྷ་ཝ་ཤུདྡྷ་སརྦ་དྷརྨ་སྭ་བྷ་ཝ་ཤུདྡྷོ྅ཧཾ། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་རྣམས་ཀྱི་ནང་དུ་ཧཱུྃ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །གདུག་སྤོས། མར་མེ། དྲི་མཆོག །ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་ཨཱཿ དེ་བཞིན་དུ། པཱ་དྱཾ། པུཥྤེ། དྷུ་པེ། ཨ་ལོ་ཀེ། གན་དྷེ། ནཻ་ཝིདྱ། ཨོཾ་བཛྲ་ཤཔྡ་ཨཱཿཧཱུྃ། ཞེས་པས་བྱིན་གྱིས་བརླབས། སྤྲོ་ན་ཚིག་བཅད་གང་ཡང་རུང་བ་བྱ་ཞིང་། བསྡུ་ན། ཨོཾ་སརྦ་ཏ་ཐཱ་ག་ཏ་མཎྜལ་ལ་ས་པ་རི་ཝཱ་ར་རེ་རེའི་མགོར་སྦྱར་བའི། ཨརྒྷཾ་ནས་ཤཔྡའི་བར་གྱིས་མཆོད། དྷརྨཱ་ར་ཎི་རོལ་ཆེན་བྱ། ནང་མཆོད་ཀྱཻ་རྡོར་ལྟར་བྱིན་གྱིས་བརླབས་ལ་མཐེབ་སྲིན་གྱིས་གཏོར་ཞིང་། མཁྱེན་པའི་ཡེ་ཤེས་བརྩེ་བའི་ཐུགས་རྗེ་མཛད་པའི་ཕྲིན་ལས་བསམ་གྱིས་མི་ཁྱབ་པ་མངའ་བ་དྲིན་ཅན་རྩ་བའི་བླ་མ་འདི་ཞེས་བྱ་བའི་ཞལ་དུ་ཨོཾ་ཨཱཿཧཱུྃ། <br />རྡོ་རྗེ་འཆང་། [[Niguma|ནི་གུ་མ]]། [[Khyungpo Neljor|ཁྱུང་པོ་རྣལ་འབྱོར]]། [[Mokchokpa Rinchen Tsöndrü|རྨོག་ལྕོག་པ་རིན་ཆེན་བརྩོན་འགྲུས]]། [[Öntön Kyergangpa|སྐྱེར་སྒང་པ་ཆོས་ཀྱི་སེང་གེ]]། [[Sangyé Nyentön|གཉན་སྟོན་སྦས་པའི་རྣལ་འབྱོར]]། [[Sangyé Tönpa|འགྲོ་མགོན་སངས་རྒྱས་སྟོན་པ]]། [[Gyeltsen Bum|མཁས་བཙུན་རྒྱལ་མཚན་འབུམ་པ]]། [[Jampa Pel|འཇག་ཆེན་བྱམས་པ་དཔལ་བཟང་]]། [[Lodrö Pelsang|འཇག་པ་བློ་གྲོས་དཔལ་བཟང་]]། [[Yönten Peljung|མཁྱེན་རབ་ཡོན་ཏན་དཔལ་འབྱུང་]]། [[མཁས་གྲུབ་བསོད་ནམས་ཤེས་རབ]]། [[བྱ་བཏང་ཀུན་དགའ་རྒྱལ་མཚན]]། [[ལྷོ་པ་ཀུན་དགའ་བཟང་པོ]]། [[སྤྲུལ་སྐུ་ཀརྨ་བསྟན་འཕེལ]]། དྲིན་ཅན་རྩ་བའི་བླ་མ་པཎ་ཆེན་[[སྙིང་རྗེ་བཟང་པོ]]འི་ཞལ་དུ་ཨོཾ་ཨཱཿཧཱུྃ། <br />གཞན་ཡང་དབང་བསྐུར་རྒྱུད་བཤད་མན་ངག་ནོས། ཆོས་ཀྱི་འབྲེལ་པ་ཐོབ་པའི་དཔལ་ལྡན་བླ་མ་དམ་པ་རྣམས་ཀྱི༴ རྒྱུད་སྡེ་ལྔའི་ལྷ་སོ་སོའི་སྔགས་ཀྱི་མཐར། རྒྱུད་སྡེ་ལྔའི་ལྷ་ཚོགས་རྣམས་ཀྱི་ཞལ་དུ༴ གཞན་ཡང་ཡི་དམ་བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་རྒྱུད། རྣལ་འབྱོན་ཆེན་པོ་བླ་ན་མེད་པའི་རྒྱུད། རྒྱུད་སྡེ་ཆེན་པོ་བཞི་དང་འབྲེལ་བའི་ཡི་དམ་ལྷ་ཚོགས་རྣམས་ཀྱི༴ རང་གི་ལྕེ་རྩེ། སྨིན་མཚམས། སྤྱི་གཙུག་རྣམས་སུ་ཐིག་ལེ་བྱས་ལ། རང་ལུས་རྒྱལ་བའི་དཀྱིལ་འཁོར་གྱི༴ ཨོཾ་ཤྲཱི་མ་ཧཱ་ཀཱ་ལ་ཡེ་ཤེས་ཀྱི་མགོན་པོ་ཕྱག་དྲུག་པ་ལྕམ་དྲལ་འཁོར་དང་བཅས་པའི་ཞལ་དུ༴ ཨོཾ་ཤྲཱི་མ་ཧཱ་ཀ་ལ། རྡོ་རྗེ་ནག་པོ་ཆེན་པོ་ལྕམ་དྲལ་གྱི༴ ཤཱི་དྷརྨཱ་པཱ་ལ་ཙ་ཏུརྨུ་ཁ་རྡོ་རྗེ་ནག་པོ་ཆེན་པོ་གདོང་བཞི་པ་ཡུམ་ཆེན་སྲིང་མོ་བཞི་དང་བཅས་པའི་ཞལ་དུ༴ གཞན་ཡང་ཆོས་འཁོར་བསྲུང་ཞིང་བསྟན་པ་སྐྱོང་བར་ཞལ་བཞེས་པའི་དཔལ་མགོན་དམ་ཚིག་ཅན་རྣམས་ཀྱི༴ ཞིང་སྐྱོང་བཞི་བཅུ་རྩ་བརྒྱུད༴ ཕོ་ཉ་མངལ་ལས་སྐྱེས་པ། ཞིང་ལས་སྐྱེས་པ། ལས་ལས་སྐྱེས་པའི་གནས་གསུམ་གྱི་མཁའ་འགྲོ་རྣམས་ཀྱི༴ གནོད་སྦྱི་ན། སྲིན་པོ། འབྱུང་པོ། ཡི་དྭགས། ཤ་ཟ། སྨྱོ་བྱེད། བརྗེད་བྱེད། མ་མོ། ཕོ་ཉ། འཕྲོག་མ༴ གྲུབ་པ་རྣམས་ཀྱི༴ བོད་ཁམས་སྐྱོང་བར་བྱེད་པའི་བརྟན་མ་བཅུ་གཉིས། གནས་ བདག །གཞི་བདག །གྲོང་བདག །ཡུལ་བདག་གཉུག་མར་གནས་པ་རྣམས་ཀྱི༴ འགྲོ་བ་རིགས་དྲུག །ལམ་རྒྱུད་ལྔ། སྐྱེས་གནས་རྣམ་པ་བཞིས་བསྡུས་པའི་སེམས་ཅན་ཐམས་ཅད་ཚིམ་ཞིང་ཟག་པ་མེད་པའི་བདེ་བས་རྒྱུད་གང་ནས་མྱུར་དུ་མངོན་པར་རྫོགས་པར་འཚང་བར་རྒྱ་བར་གྱུར་ཅིག །རང་གི་ལྕེ་ཐོག་ཏུ་མྱོངས་ལ། སྙིང་ཁའི་ཧཱུྃ་ལྷ་ཐམས་ཅད་ཀྱི་ངོ་བོ་དེ་ཚིམ་པར་བསམ་མོ། <br />བསྟོད་པ་ནི། ཆོས་དབྱིངས་རྣམ་དག་ངང་ལས་མ་གཡོས་ཀྱང་། །ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །ཐམས་ཅད་དངོས་པོའི་རང་བཞིན་མཆོག །གདོད་ནས་ཐམས་ཅད་རང་ཉིད་གནས། །ཐབས་དང་ཤེས་རབ་གཉིས་མེད་པའི། །ཀྱཻ་ཡི་རྡོ་རྗེ་ལ་ཕྱག་འཚལ། །མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོན་གསུམ། །གསང་བའི་དབྱིངས་ལ་ཕྱག་འཚལ་ལོ། །དུས་གསུམ་སངས་རྒྱས་ཐམས་ཅད་ཀྱི། །ཡེ་ཤེས་སྒྱུ་མའི་རྣམ་འཕྲུལ་གྱི། །བདེ་བ་མཆོག་ལ་རྣམ་རོལ་པའི། །སྒྱུ་མ་ཆེན་པ་ལ་ཕྱག་འཚལ། །དུར་ཁྲོད་རྒྱན་གྱིས་ལེགས་བརྒྱན་པའི། །ཞེ་སྡང་གཤིན་རྗེའི་གཤེད་པོ་ནི། །དངོས་མེད་ནམ་མཁའ་ལྟ་བུ་ལ། །ཐུགས་རྗེས་སྤྲུལ་པའི་སྐུར་བསྟན་པའི། །ཡེ་ཤེས་ཁྲོ་རྒྱལ་རབ་འཇིགས་པ། །དུད་ཁ་མུན་ཆེན་ཁྱོད་ལ་བསྟོད། །ཅེས་པས་བསྟོད། །བསྡུ་ན་རིགས་ལྔའི་སྤྱི་བསྟོད་གང་ཡང་རུང་བས་བསྟོད་ཀྱང་ཆོག་གོ <br />།བུམ་བསྐྱེད་ནི། བུམ་པ་བསང་སྦྱངས། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་གཉིས་ཡངས་ཤིང་རྒྱ་ཆེ་བ། ལྟེ་བ་ལྡིར་བ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་རྣམ་རྒྱལ་བུམ་པར་སེང་གེས་བཏེགས་པའི་རིན་པོ་ཆེའི་སྣ་ཚོགས་པདྨ་ཟླ་བ་ཉི་མ་དང་བཅས་པའི་གདན་ལྔ། ལས་ཐམས་ཅད་པའི་བུམ་པར་པདྨ་དང་ཉི་མའི་གདན་དང་བཅས་པ། རྣམ་རྒྱལ་བུམ་པའི་དབུས་ཀྱི་གདན་གྱི་སྟེང་དུ་འཁོར་ལོ་བདེ་མཆོག་སྐུ་མདོག་སྔོན་པོ་ཞེས་སོགས་རྒྱུད་སྡེ་ལྔའི་ལྷ་བདག་བསྐྱེད་ཀྱི་སྐབས་བཞིན་བསྐྱེད། ལས་ཐམས་ཅད་པའི་བུམ་པར་ཁྲོ་བོ་བདུད་རྩི་འཁྱིལ་བ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་གཡས་སྣ་ཚོགས་རྡོ་རྗེ། གཡོན་དྲིལ་བུ་དཀུར་བསྟན་པ། རིན་པོ་ཆེ་དང་སྦྲུལ་གྱིས་བརྒྱན་པ། ཞབས་གཡས་བསྐུམ་གཡོན་བརྐྱང་བའི་སྟབས་ཀྱིས་མེ་འབར་བའི་དབུས་ན་བཞུགས་པ། དེ་ཐམས་ཅད་ཀྱི་གནས་གསུམ་བྱིན་གྱིས་རླབས། ཐུགས་ཀའི་ཧཱུྃ་གི་འོད་ཀྱིས་ཕྱོགས་བཅུའི་སངས་རྒྱས་བྱང་སེམས་ཐམས་ཅད་རྒྱུད་སྡེ་ལྔའི་ལྷ་ཚོགས་བདུད་རྩི་འཁྱིལ་བ་དང་བཅས་པའི་རྣམ་པར་སྤྱན་དྲངས། མཆོད་ནས་བུམ་བསྐྱེད་ལ་བསྟིམ། དབང་ལྷ་སྤྱན་དྲངས། གསོལ་བཏབ། དབང་བསྐུར་ཆུ་ལྷག་མ་ཡར་ལུད་པ་ལས་རྒྱུད་སྡེ་ལྔའི་ལྷ་ལ་མི་བསྐྱོད་པ་སྤྲུལ་སྐུའི་རྣམ་པ་ཅན་དང་། བདུད་རྩི་འཁྱིལ་བ་ལ་དོན་ཡོད་གྲུབ་པས་དབུ་བརྒྱན་པར་བསམ། གོང་ལྟར་མཆོད་ལ། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། ཞེས་སོགས་དང་། འཇིགས་པའི་ཧཱུྃ་སྒྲ་སོགས་ཀྱིས་བསྟོད། རང་གི་སྙིང་ག་ནས་སྔགས་ཀྱི་ཕྲེང་བ་གཟུངས་ཐག་ལ་བསྟེན་ཏེ་སོང་བས་བུམ་ནང་གི་ལྷ་ཐམས་ཅད་ཀྱི་ཐུགས་ཀར་ཕོག་པས་བ་སྤུའི་བུ་ག་ནས་བདུད་རྩིའི་ཆུ་རྒྱུན་བྱུང་བས་བུམ་པ་གང་བར་བསམ་ལ་རྣམ་རྒྱལ་རྒྱུད་སྡེ་ལྔའི་སྔགས་དང་། ལས་བུམ་ལ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཅེས་པ་ཅི་རིགས་བཟླས་ལ། སླར་ཡང་མཆོད་བསྟོད་སྔར་བཞིན་བྱ་སྟེ། ཨོཾ་ཨཱཿཧཱུྃ། ཅེས་པས་དུང་ཆོས་ཀྱི་ཆུ་བུམ་པར་བླུག་སྟེ། བུམ་ནང་གི་ལྷ་འོད་དུ་ཞུ་བ་ལས་བུམ་པའི་ཆུ་བདུད་རྩིའི་རང་བཞིན་དུ་གྱུར་པར་བསམ། ཡི་གེ་བརྒྱ་པ་ལན་གསུམ་གྱིས་ལྕག་ཆད་ཁ་བསྐང་། གཏོར་མ་རྣམས་ཀྱི་ཀྱཻ་རྡོར་ལྟར་བྱིན་གྱིས་རླབས་ལ། གཏོར་མ་དང་པོ་ལྷ་སོ་སོའི་སྔགས་སམ། བསྡུ་ན། ཨོཾ་སརྦ་ཏ་ཐཱ་ག་ཏ་མཎྜལ་ལ་ས་པཱ་རི་ཝཱ་རཱ་ཨི་དམ་བ་ལཱིང་ཁ་ཁ་ཁཱ་ཧི་ཁཱ་ཧི། ཞེས་པ་གསུམ་མམ་ལྔས་ཕུལ། མཆོད་བསྟོད་བསྡུས་པ་བྱས་ལ། རྒྱུད་སྡེ་ལྔའི་ལྷ་ཚོགས་རྣམས། མཆོད་སྦྱིན་གཏོར་མ་འདི་བཞེས་ལ། ཞེས་སོགས་ཀྱིས་ཕྲིན་བཅོལ་བྱ། གཏོར་མ་གཉིས་པ། ཨོཾ་ཨཱཿཧཱུྃ་གསུམ་གྱིས་བྱིན་བརླབས་བྲན་པར་བྱས་ལ། ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣཱན་བི་ནཱ་ཡ་ཀ་ཧཱུྃ་ཧཱུྃ་ཕཊ་ཕཊ། ཨོཾ་མ་ཧཱ་དེ་ཝ་རེ་མ་ཏི་ཧཱུྃ་བྷྱོཿཧཱུྃ། ཨོཾ་ཀྵེ་ཏྲ་པཱ་ལ་བི་གྷྣཱན་ཧཱུྃ་ཕཊ། ཨོཾ་ཛི་ན་མི་ཏྲ་བ་ཤཾ་ཀུ་རུ་ཧཱུྃ་ཕཊ། ཨོཾ་ཏཀྐི་རཱ་ཛ་ས་མ་ཡཱ་བྷྱོཿདུ་ཛ་ཧཱུྃ་ཕཊ། ཨོཾ་དུ་ཡོག་ཛ་མ་ཧཱ་ཀཱ་ལ་ཏྲཀྴད་ཧཱུྃ་ཕཊ། ཅེས་པའི་མཐར། ཨི་དམ་སོགས་བཏགས་པ་ལན་གསུམ་གྱིས་ཕུལ། ཨོཾ་བཛྲ་པུཥྤེ་ཨཱཿཧཱུྃ་སོགས་ཀྱིས་མཆོད། ཨོཾ་ཨཱཿཧཱུྃ་གིས་ནང་མཆོད་ཕུལ། མྱུར་མཛད་སྤྱན་རས་གཟིགས་ལ་ཕྱག་འཚལ་ལོ། དུར་ཁྲོད་ཆེན་པོ་འཇིགས་སུ་རུང་བའི་ནང་། ཚང་ཚིང་འཁྲིགས་པ་ཙནྡན་ཆེན་པོའི་ཚལ། བསྐལ་བའི་མེ་ལྟར་འབར་བའི་ཀློང་དཀྱིལ་ན། བགེགས་ཆེན་བསྣོལ་བའི་གདན་ལ་རབ་ཏུ་བཞེངས། མ་ཧཱ་ཀ་ལ་ཕྱག་དྲུག་བརྗིད་པའི་སྐུ། སྐུ་ཡི་ཆ་ལུགས་མི་ཟད་འབར་བ་ལ། དུར་ཁྲོད་ཆས་ཀྱི་ཀྱིས་རབ་ཏུ་བརྒྱན་པ་པོ། གསུང་གི་ང་རོ་མི་བཟད་འབར་བ་ལ། ཧཱུྃ་དང་ཕཊ་ཀྱི་སྒྲ་ཡིས་སྟོང་གསུམ་འགེངས། རྣམ་དག་ཐུགས་ནི་མི་བཟད་འབར་བ་ལ། སྤྲོས་དང་བྲལ་ཡང་མཚན་མར་ཅིར་ཡང་སྟོན། སྐུ་གསུང་ཐུགས་ཀྱི་སྒོ་ནས་ཁྱོད་ལ་བསྟོད། ཅེས་པས་བསྟོད་ལ། ཡེ་ཤེས་མགོན་པོ་འཁོར་བཅས་རྣམས། །ཅེས་སོགས་ཀྱིས་ཕྲིན་ལས་གཞོལ། །མཁའ་འགྲོ་སྤྱི་གཏོར་ཀྱཻ་རྡོར་ལྟར་འབུལ་ཞིང་། གཞི་བདག་གཏོར་མ་ཟུར་དུ་ཡོད་པའམ་མེད་ན་མཁའ་འགྲོ་སྤྱི་གཏོར་དེ་ཉིད་འབྲུ་གསུམ་གྱིས་བྱིན་གྱིས་བརླབས་ལ། བྷུ་མི་པ་ཏི་ས་པཱ་རི་ཝཱ་ར་ཨ་ཀརྵ་ཡ་ྫཿཞེས་པས་སྤྱན་དྲངས། བྷུ་མི་པ་ཏི་ས་པཱ་རི་ཝཱ་རེའི་མཐར་ཨ་ཀ་རོ་བཏགས་པ་ལན་གསུམ་གྱིས་བསྔོས་ལ། གནས་གཞི་བདག་འཁོར་དང་བཅས་པ་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་བདག་ཅག་འཁོར་དང་བཅས་པའི་འགལ་རྐྱེན་བར་ཆད་ཐམས་ཅད་ཞི་ཞིང་། མཐུན་རྐྱེན་ཡིད་བཞིན་དུ་འགྲུབ་པར་མཛད་དུ་གསོལ། བགེགས་གཏོར་ཡོད་ན་ཆུ་གཙང་གིས་བྲན་ལ། ཨོཾ་ཨཱཿཧཱུྃ་གིས་བྱིན་གྱིས་རླབས། ཨོཾ་སརྦ་བིགྷྣན་ན་མཿསརྦ་ཏ་ཐཱ་ག་ཏ་བྷྱོཿབི་ཤྭ་མུ་ཁེ་བྷྱ༔སརྦ་ཐཱ་ཁཾ་ཨུངྒ་ཏེ་སྥ་ར་ཎ་ཨི་མཾ་ག་ག་ཎ་ཁཾ་གྲྀཧྣ་དཾ་བ་ལིཾ་ཏེ་སྭཱ་ཧཱ། ཞེས་པ་ལན་གསུམ་གྱིས་བསྔོས་ལ། ནག་པོའི་ཕྱོགས་ལ་མངོན་པར་དགའ་བའི་གདུག་པ་ཅན་གསང་སྤྱོད་བལྟ་བར་མི་དབང་བ་རྣམས་སའི་ཕྱོགས་འདིར་མ་གནས་པར་གཞན་དུ་སོང་ཞིག །ཅེས་བརྗོད་ཅིང་རྡོ་རྗེའི་གསོར་ཞིང་དྲིལ་བུ་དཀྲོལ། སུམྦྷ་ནིའི་སྔགས་བརྗོད་ཅིང་སེམས་ཀྱིས་བགེགས་རྣམས་རྒྱང་རིང་དུ་བྲོས་པར་བསམ། དེ་ནས་བདག་འཇུག་བླང་བ་ནི། ཇི་ལྟར་བལྟམས་པ་སོགས་ཀྱིས་བུམ་ཆུ་འཐུང་། འཇུག་པའི་ཡོན་གྱི་མཎྜལ་ནས་སྤྱད་དུ་གསོལ་གྱི་བར་སློབ་མ་ཇི་ལྟར་བསྐུར་བ་བཞིན་རང་གི་བདག་འཇུག་གི་ཚུལ་དུ་བླང་ངོ་། <br />བཞི་པ་སློབ་མ་རྗེས་བཟུང་ལ་འཇུག་པ་དངོས་གཞི་གཉིས་ལས། <br />དང་པོ་ནི་སློབ་མ་རྣམས་ཁྲུས་བྱས་ཕྱག་དང་འཇུག་པའི་ཡོན་ཕུལ་ནས་གྲལ་ལ་འཁོད་པ་ལ། སློབ་དཔོན་གྱིས། འོ་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྡོ་རྗེ་ཐེག་པའི་ལམ་གྱི་རྩ་བ་མངོན་པར་དབང་བསྐུར་བ་ཟབ་མོ་གསན་ལ་དམ་ཚིག་དང་སྡོམ་པའི་ཚོགས་ལ་བསྲུང་སྡོམ་ཚུལ་བཞིན་དུ་བགྱིའོ་སྙམ་པའི་བསམ་པ་ཁྱད་པར་ཅན་གདུང་པ་རེ་བསྐྱེད་མཛོད། དེ་ལ་འདིར་གསན་པར་བྱ་བའི་ཆོས་ནི། [[Khyungpo Neljor|གྲུབ་ཐོབ་ཁྱུང་པོ་རྣལ་འབྱོར་རམ། དགེ་བའི་བཤེས་གཉེན་ཤངས་པ་གདུ་བུ་པ]]ར་གྲགས་པ་དེ་ཉིད་ཀྱིས་རྒྱ་གར་དུ་ལན་གསུམ་བལ་པོར་ལན་བཞི་སྟེ་རྒྱ་དང་བལ་པོའི་ཡུལ་དུ་ལན་བདུན་བྱོན། ཡོངས་གྲགས་ཀྱི་བླ་མ་བརྒྱ་དང་ལྔ་བཅུ། གྲུབ་ཐོབ་ཀྱི་བླ་མ་བཅུ་གསུམ། རྩ་བའི་བླ་མ་བཞི། འགྲན་གྱི་དོ་མེད་ཡེ་ཤེས་ཀྱི་ཌཱ་ཀི་མ་རྣམ་པ་གཉིས་དང་བཅས་པར་རིན་པོ་ཆེ་གསེར་གྱི་ཕྱེ་མ་དང་། སྙིང་སྟོབས་མོས་གུས་བརྩོན་འགྲུས་ལ་སོགས་པས་མཉེས་པར་བྱས་ཏེ་སྨིན་གྲོལ་གྱི་གདམས་པ་རྒྱ་མཚོ་ཙམ་ཁ་བ་ཅན་གྱི་གདུལ་བྱ་སྐལ་པ་མཆོག་ཏུ་གྱུར་པ་རྣམས་ཀྱི་དོན་དུ་སྤྱན་དྲངས་པ་ཡིན་ཏེ། ཉིད་ཀྱི་གསུངས་ལས། གཅེས་པའི་སྲོག་ལ་མ་བལྟས་པར། རྒྱ་གར་ཡུལ་དུ་ལན་བདུན་ཕྱིན། སངས་རྒྱས་དངོས་མཇལ་མཁའ་འགྲོ་ལ། རིན་ཆེན་གསེར་ཕྱེ་ཕུལ་ནས་ཞུས། ཞེས་གསུངས་པའི་ཕྱིར། དེ་ཐམས་ཅད་བསྡུ་ན་སྒྲུབ་བརྒྱུད་དང་། བཤད་བརྒྱུད་གཉིས་ས་འདུས་པ་ལས། སློབ་མའི་གཙོ་བོ་[[Yorpo Gyamoché|གཡོར་པོ་རྒྱ་མོ་ཆེ]]། [[Ngültön Rinwang|དངུལ་སྟོན་རིན་དབང་]][[Méu Tönpa|མདེའུ་སྟོན་པ]]། [[Könchok Khar|ལ་སྟོད་པ་དཀོན་མཆོག་]]གསུམ་མཁར་ཏེ་སྔ་བུ་བཞི་ལ་བཤད་རྒྱུད་ཀྱི་བཀའ་འབབས། སྔ་བུ་ལྔ་པ་རྟོགས་ལྡན་[[Shangom Chöseng|ཞང་སྒོམ་ཆོས་སེང་]]དང་། །ཕྱི་བུ་གཅིག་པ་[[Mokchokpa Rinchen Tsöndrü|རྨོག་ལྕོག་པ་རིན་ཆེན་བརྩོན་འགྲུས་]]གཉིས་ལ་སྒྲུབ་བརྒྱུད་ཀྱི་བཀའ་བབས་པ་ལས། འདིར་སྒྲུག་བརྒྱུད་ཀྱི་བཀའ་བབས་པ་རྨོག་ལྕོག་པ་ནས་བརྒྱུད་པ་ཡིན། དེ་ལ་ཡང་བསམ་གྱིས་མི་ཁྱབ་པ་ཞིག་བཞུགས་ཀྱང་གཙོ་བོར་གྱུར་པ་ནི། ཡེ་ཤེས་ཀྱི་མཁའ་འགྲོ་མ་ནི་དྷི་གཉིས་ཀྱི་གདམས་པ་ཡིན་ཀྱང་། སུ་ཁ་སིདྷི་ནས་བརྒྱུད་པ་ནི་ཟབ་ཅིང་ཐུགས་ཅིས་སུ་ཆེ་ཡང་གདམས་པ་ཉུང་དུ་ཅིག་ལས་མི་བཞུགས། ཟབ་ལ་རྒྱ་ཆེ་བ་ནི་ཡེ་ཤེས་ཀྱི་མཁའ་འགྲོ་ནི་གུ་མ་ནས་བརྒྱད་པ་འདི་ཡིན་ལ། འདི་ལ་ཡང་སྨིན་བྱེད་དབང་གི་སྐོར་དང་། གྲོལ་བྱེད་ལམ་གྱི་སྐོར། རྒྱབ་རྟེན་ལུང་གི་སྐོར། བཀའ་སྲུང་ཡེ་ཤེས་མགོན་པོའི་སྐོར་དད་བཞི་ལས། འདི་སྨིན་བྱེད་དབང་གི་སྐོར་ཡིན། དེ་ལ་ཡང་རྒྱུད་སྡེ་ལྔ་རིགས་བསྡུས་པའི་དཀྱིལ་འཁོར་དུ་དབང་བསྐུར་བ། རྒྱུད་སྡེ་ལྔ་གཙོ་བོ་བསྡུས་པའི་དཀྱིལ་འཁོད་དུ་དབང་བསྐུར་བ། བདེ་མཆོག་ལྷ་ལྔའི་དབང་སྟེ་སྨིན་བྱེད་གསུམ་དབང་གདམས་ངག་དང་འབྲེལ་བ། གདམས་ངག་དབང་དང་འབྲེལ་བ། ཆོས་དྲུག་སོ་སོའི་བཀའ་སྟེ་གཞུང་ཤིང་དང་འབྲེལ་བའི་བཀའ་བརྒྱུད། ཕྱག་ཆེན་བཀའ་ལྔ། མཁའ་སྤྱོད་བཀའ་ལྔ་ལ་སོགས་པ་ཡན་ལག་གི་བཀའ་བསམ་གྱིས་མི་ཁྱབ་པ་ཞིག་བཞུགས་ནའང་། འདིར་རྒྱུད་སྡེ་ལྔ་གཙོ་བོར་བསྡུས་པའི་དཀྱིལ་འཁོར་དུ་དབང་བསྐུར་བ་ཡིན། དེ་ལ་དབང་བསྐུར་བའི་ཕན་ཡོན། མ་བསྐུར་བའི་ཉེས་པ། སློབ་དཔོན། སློབ་མ། གནས་དུས། དལ། ངེས་ཚིག །ཆོ་ག་ལ་སོགས་པ་སྤྱི་ལྟར་བཤད་ནས། འདིར་རྒྱུད་སྡེ་ལྔའི་དཀྱིལ་འཁོར་དབང་བསྐུར་བ་ལ་ལྷ་དང་སྐལ་བ་མཉམ་པའི་ཕྱིར་དུ་དཀྱིལ་འཁོར་དུ་འཇུག་པ་དང་། ཞུགས་ནས་དབང་བསྐུར་བ་གཉིས་ལས། <br />དང་པོ་ནི། འཇུག་པའི་ཆོས་རྣམས་ཞུ་བའི་ཡོན་དུ་དམིགས་ནས་མཎྜལ་ཕུལ་བ་ཞུ། གྲུབ་པ་ན་དེ་ལྟར་མཎྜལ་ཕུལ་ནས་འཇུག་པ་ལ་བཅུ་གཉིས་ཡོད་པ་ལས། <br />དང་པོ་སྐྱབས་འགྲོ་ནི། དཀོན་མཆོག་གསུམ་ལ་སྙིང་ཐག་པ་ནས་བློ་གཏད་འཆའ་སྙམ་པས་འདིའི་རྗེས་ཟློས་ལན་གསུམ་གྱི་བར་དུ་མཛད་པར་ཞུ། སློབ་དཔོན་དགོངས་སུ་གསོལ། རང་གི་མིང་ནས་སྨོས་ཏེ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྐང་གཉིས་རྣམས་ཀྱི་མཆོག །ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། འདོད་ཆགས་དང་བྲལ་བ་རྣམས་ཀྱི་མཆོག །ཞི་བ་དོན་དམ་པ་མྱ་ངན་ལས་འདས་པའི་ཆོས་ལ༴ ཚོགས་རྣམས་ཀྱི་མཆོག །ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་ཆེན་པོ་ཕྱིར་མི་ལྡོག་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ལན་གསུམ། <br />གཉིས་པ་སེམས་བསྐྱེད་ལ་གཉིས་ལས། <br />དང་པོ་སྨོན་པ་ནི། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་ལྟར་བདག་གིས་ཀྱང་བསྐྱེད་སྙམ་པ་བགྱིས་ལ་འདིའི་རྗེས་ཟློས་མཛོད། <br />ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། སློབ་དཔོན་བདག་ལ་དགོངས་སུ་གསོལ། རང་གི་མིང་ནས་སྨོས་ཏེ། བདག་མིང་འདི་ཞེས་བགྱི་བས། ཚེ་འཁོར་བ་ཐོག་མ་མེད་པ་ནས་ཐ་མ་ད་ལྟ་ལ་ཐུག་གི་བར་དུ་སྦྱིན་པའི་རང་བཞིན་ཅན་དང་། ཚུལ་ཁྲིམས་ཀྱི་རང་བཞིན་ཅན་དང་། སྒོམ་པའི་རང་བཞིན་ཅན་གྱི་དགེ་བའི་རྩ་བ་དེས་ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱང་རྣམས་དང་། ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱིས་ཇི་ལྟར་ཐུགས་བསྐྱེད་པ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་བྱང་ཆུབ་ཀྱི་མཆོག་ཏུ་སེམས་བསྐྱེད་པར་བགྱིའོ། སེམས་ཅན་མ་བསྒྲལ་བ་རྣམས་བསྒྲལ་བར་བགྱིའོ། མ་གྲོལ་བ་རྣམས་གྲོལ་བར་བགྱིའོ། དབུགས་མ་ཕྱུང་བ་རྣམས་དབུགས་དབྱུང་བར་བགྱིའོ། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བགྱིའོ། །ཞེས་པ་ལན་གསུམ་རྗེས་ཟློས་བྱེད། <br />གཉིས་པ་འཇུག་པ་སེམས་བསྐྱེད་ནི། དགོངས་གསོལ་སྔར་ལྟར་ལས། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་སྦྱིན་པའི་ཕ་རོལ་ཏུ་ཕྱིན་པ་ལ་མཐར་གྱིས་བསླབ་པ་དང་། མཐར་གྱིས་སྦྱངས་པ་དང་། མཐར་གྱིས་ནན་ཏན་གྱི་བསམ་པ་བརྟན་པོ་བསྐྱེད་པར་བགྱིའོ། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཐར་གྱིས་སོགས་ལན་གསུམ་གྱི་རྗེས་ཟློས་བྱེད། <br />གསུམ་པ་གསོལ་བ་གདབ་པ་ནི། སློབ་དཔོན་ལ་དགའ་ཆེན་ཞེས་བོས་ནས་གསང་སྔགས་ཀྱི་སྡོམ་པ་དང་། བྱང་སེམས་ཀྱི་སྡོམ་པ་སོ་ཐར་གྱི་སྡོམ་པ་རྣམས་བསྩལ་བའི་སྒོ་ནས་སངས་རྒྱས་ཀྱི་གྲོང་ཁྱེར་དུ་འཁྲིད་དུ་གསོལ་སྙམ་པ་བགྱིས་ལ་འདིའི་རྗེས་ཟློས་མཛོད། དགའ་ཆེན་ཁྱོད་བདག་ནས། གཞུག་ཏུ་གསོལ་གྱི་བར་ལན་གསུམ། <br />བཞི་པ་གནང་བ་སྦྱིན་པ་ནི། །བུ་ཚུར་ཐེག་པ་ཆེན་པོ་ཡི། །ཁྱོད་ནི་ཚུར་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །དུས་གསུམ་གཤེགས་པའི་སངས་རྒྱས་རྣམས། །སྐུ་གསུང་ཐུགས་ཀྱི་རྡོ་རྗེ་ཅན། །དེ་དག་གིས་ཀྱང་གསང་སྔགས་ཀྱི། །ཆོ་ག་ཟབ་མོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །ཤཱཀྱ་སེང་གེ་སྐྱོབ་པ་ཡི། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་གཅོམ་སྟེ། །འཇིག་རྟེན་རྗེས་འཇུག་རྟོགས་ན་ནི། །འཁོར་ལོར་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡི་བློ་གྲོས་འདི་གྱིས་ཤིག །ཅེས་གསུངས། དེའི་དོན་ནི། ཁྱོད་རྣམས་ཆོ་གའི་སྒོ་ནས་བུར་བྱས་ཟིན་པ་དེ་ལ། སློབ་དཔོན་གྱིས་བུ་ཞེས་ཉེ་བའི་ཚིག་གིས་བོས་ནས། ཁྱེད་རྣམས་ཐེག་ཆེན་གྱི་ཆོས་ཀྱི་སྣོད་ཡིན་ལ། ཐེག་ཆེན་ལ་གཉིས་ལས་མཆོག་ཏུ་འགྱུར་པ་གསང་སྔགས་རྡོ་རྗེ་ཐེག་པ་དེ་ཁྱེད་ལ་བསྟན་པར་བྱ་སྟེ། གསང་སྔགས་རྡོ་རྗེ་ཐེག་པ་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་ཡིན་ཞིང་། ཁྱད་པར་དུ་འོ་སྐོལ་གྱི་སྟོན་པ་འདིས་ཀྱང་ངེས་དོན་དུ་གསང་སྔགས་ཀྱི་ལམ་ལ་བརྟེན་ནས་སངས་རྒྱས་ཀྱང་། འཇིག་རྟེན་པ་རྣམས་དྲངས་བའི་ཕྱིར་དུ་འཛམ་བུའི་གླིང་དུ་འཚང་རྒྱ་བའི་ཚུལ་བསྟན་པ་ཡིན་པས་གསང་སྔགས་ཀྱི་ལམ་དང་མཇལ་བ་ཤིན་ཏུ་སྐལ་པ་བཟང་བ་ཡིན་པས། གསང་སྔགས་ཀྱི་ཐེག་པ་ལས་བློ་གཞན་དུ་མ་འགྱུར་བར་གྱིས་ཤིག་ཅེས་པའི་དོན་ཡིན་ཞེས་བརྗོད། <br />ལྔ་པ་རྟོག་པ་བསྡུ་བ་ནི། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་དང་ལྡན་པས་ཉོན། །རྗེད་ངས་བློ་ལ་རྡོ་རྗེ་སེམས་ལ་སོགས། །བདེ་བར་གཤེགས་པ་རྣམས་ཀྱིས་བྱིན་མི་རློབས། ཅེས་གསུངས་ཏེ། དེའི་དོན་སྣོད་ཀྱི་སྐྱོན་གསུམ་སྤངས་ཏེ་ཡིད་རྩེ་གཅིག་ཏུ་གཏོད་ལ་ལེགས་པར་ཉོན་ཅིག་ཅེས་པའི་དོན་ཡིན། <br />དྲུག་པ་རྒྱུན་བཤགས་སྔོན་དུ་འགྲོ་བས་སེམས་བསྐྱེད་པ་ནི། མདུན་གྱི་ནམ་མཁར་བླ་མ་དང་གཉིས་སུ་མེད་པའི་རྒྱུད་སྡེ་ལྔའི་ལྷ་ཚོགས་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མངོན་སུམ་བཞུགས་པར་མོས་ལ། དེ་དག་གི་སྤྱན་སྔར་སྡིག་པ་བཤགས་པ་ལ་སོགས་ཡན་ལག་བདུན་པ་བགྱིད་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་ནས། ཤོག་ཅེས་པའི་བར་ལན་གསུམ། <br />བདུན་པ་རིགས་ལྔའི་སྡོམ་པ་བཟུང་བ་ནི། རིགས་ལྔ་སྤྱི་དང་སོ་སོའི་དམ་ཚིག་ཚུལ་བཞིན་དུ་འཛིན་སྙམ་པས་འདིའི་རྗེས་ཟློས་མཛོད། སྲས་བཅས་ནས་འགོད་ཅེས་པའི་བར་ལན་གསུམ། <br />བརྒྱད་པ་གསང་སྔགས་ཀྱི་ཆེ་བ་བརྗོད་པའི་སྒོ་ནས་སྤྲོ་བ་བསྐྱེད་པ་ནི། འཇིག་རྟེན་དུ་ནི་ཀུན་མཁྱེན་དག །ཅེས་པ་ནས། དེ་བཞིན་གཤེགས་པ་ཉིད་དུ་འགྱུར། ཞེས་པའི་བར་བརྗོད་དོ། དེའི་དོན་ནི་འཇིག་རྟེན་ན་གང་དཀོན་ན་ཨུ་དུམ་ཝ་རའི་མེ་ཏོག་དཀོན། དེ་བཞིན་དུ་སངས་རྒྱས་འབྱུང་བ་དཀོན། །སངས་རྒྱས་འབྱུང་བ་བས་ཀྱང་ཆོས་གསུང་བ་དཀོན། ཆོས་ཀྱི་ནང་ནས་ཀྱང་གསང་སྔགས་རྡོ་རྗེ་ཐེག་པའི་ཆོས་གསུང་བ་དཀོན། འོ་ན་དཀོན་པས་ཅི་ཞིག་བྱ། ནམ་མཁའི་པདྨོ་དང་རི་བོང་གི་རྭ་ཡང་དཀོན་ནོ་སྙམ་ན། དེ་དག་ནི་དཀོན་ལ་ཕན་ཡོན་མེད་པ་ཡིན་ལ། རྡོ་རྗེ་ཐེག་པ་ནི་དཀོན་ལ་ཕན་ཡོན་ཆེན་པོ་དང་ལྡན་པ་ཡིན་ཏེ། དཀྱིལ་འཁོར་ཆེན་པོའི་ཚོན་ཅི་ཙམ་མཐོང་བའི་མདོ་ལ་བསྐལ་པ་མང་པོར་བསགས་པའི་སྡིག་སྒྲིབ་དག་པར་གསུངས་ན་དབང་བླངས་ཏེ། དམ་ཚིག་དང་སྡོམ་པ་སྲུང་སྡོམས་བགྱིས་པ་དང་། ཉམས་སུ་ལེན་པ་ལ་བརྩོན་པར་བྱེད་ན་ལྟ་སྨོས་ཀྱང་ཅི་དགོས་ཏེ། དེ་བས་ན་ཁྱོད་ཀྱིས་གསང་སྔགས་ཀྱི་ལཾ་ལ་བརྟེན་ཏེ་མྱུར་དུ་སངས་རྒྱས་ཐོབ་པར་འགྱུར་བས་དགའ་སྤྲོ་རྒྱ་ཆེན་པོ་གྱིས་ཤིག་ཅེས་པའི་དོན་ཡིན་ཞེས་བརྗོད། སྔོན་ཆད་རྒྱུད་སྡེ་ལྔའི་དཀྱིལ་འཁོར་དུ་མ་ཞུགས་པ་འམ། ཞུགས་ཀྱང་བསྐྱར་ནས་འཇུག་པའི་མཚོན་བྱེད་དུ་རས་ཡུག་དམར་པོ་རས་གདོང་བཅིངས་པའི་མོས་པ་མཛོད། ཨ་ཁཾ་ཝི་ར་ཧཱུྃ། དཀྱིལ་འཁོར་གྱི་ལྷ་དང་མཇལ་བ་ན་ལག་སྟོང་དུ་མཇལ་དུ་མི་བཏུབ་པས། ཕྱག་རྟེན་ཨུ་དུམ་ཝ་ར་ལ་སོགས་པའི་མེ་ཏོག་གི་ཕྲེང་བ་རེ་ཡང་གཏད་པའི་མོས་པ་མཛོད། ཨ་ཁཾ་ཝི་ར་ཧཱུྃ། <br />དགུ་པ་བདེ་སྟོང་དུ་སེམས་བསྐྱེད་པ་ནི། ཁྱེད་རང་གི་སྙིང་ཁར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིད་འཁོར་ཉ་གང་བ་རེ་གསལ་བཏབ་དེའི་སྟེང་དུ་དོན་དམ་བྱང་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བ་ཞིག་གསལ་བཏབ་སྟེ། དེ་ལྟ་བུའི་བདེན་པ་གཉིས་དབྱེར་མེད་དུ་སེམས་བསྐྱེད་པར་བགྱིའོ་སྙམ་པས་འདིའི་རྗེས་ཟློས་མཛོད། ཨོཾ་སརྦ་ཡོ་ག་ཙིཏྟ་ཨུཏྤ་ཏ་ཡ་མི། དེ་བརྟན་པར་བྱ་བའི་ཆེད་དུ། སློབ་དཔོན་གྱི་རྡོ་རྗེ་ཁྱེད་རང་གི་སྙིང་གར་བཞག་སྟེ། ཨོཾ་སུ་ར་ཏེ་ས་མ་ཡ་སྟྭཾ། ཧོ་སིདྡྷི་བཛྲ་ཡ་ཐ་སུ་ཁཾ། ཞེས་བརྗོད། དེ་ལྟར་སེམས་བསྐྱེད་པ་དེ་དང་འོག་ནས་འབྱུང་བའི་གསང་སྔགས་ཀྱི་ཀུན་སྤྱོད་རྣམས་སྣོད་དང་མི་ལྡན་པའི་མདུན་དུ་སྨྲ་བར་མི་བཏུབ་ཞེས་གསང་བར་གདམས་པ་ནི། སྤྱི་བོར་རྡོ་རྗེ་བཞག་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་དང་། དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་རབ་ཏུ་ཞུགས་ཀྱིས། དེ་བཞིན་གཤེགས་པ་ཐམས་ཅད་ཀྱི་གསང་ཆེན་གདམས་པ་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། མ་དད་པ་རྣམས་ལ་ཡང་མ་ཡིན་ནོ། ཧཱུྃ་ཛཿཧཱུྃཿ ཞེས་བརྗོད། <br />བཅུ་པ་ནང་དུ་གཞུག་ཅིང་ཡེ་ཤེས་དབབ་པ་ནི། ཁྱེད་རང་རྣམས་སློབ་དཔོན་གྱི་ཕྱག་གི་རྡོ་རྗེ་ལ་འཇུས་ཏེ། དཀྱིལ་འཁོར་གྱི་ཤར་སྒོར་ཁྲིད་པར་མོས་ལ། དཀྱིལ་འཁོར་གྱི་ཕྱོགས་ལ་དབུ་འདུད་པ་དང་བཅས་འདིའི་རྗེས་ཟློས་མཛོད། ཛཿཧཱུྃ་བྃ་ཧོཿ ཞེས་བརྗོད་པས། དཀྱིལ་འཁོར་གྱི་ཤར་སྒོའི་ནང་དུ་འཁོད་པའི་མོས་པ་མཛོད། སྔོན་འགྲོའི་དམ་ལ་བཞག་པ་ལ་བཞི་ལས། <br />དང་པོ་ཕན་ཡོན་གྱི་སྒོ་ནས་དམ་ལ་བཞག་པ་ནི། སྤྱི་བོར་རྡོ་རྗེ་བཞག་སྟེ། ཡེ་ཤེས་གང་གིས་ཁྱེད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། དེ་ལྟ་བུའི་རྡོ་རྗེའི་ཡེ་ཤེས་བསྐྱེད་པར་བྱའི། ཁྱེན་གྱིས་དཀྱིལ་འཁོར་ཆེན་པོ་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། བུ་ཁྱོད་དམ་ཚིག་ཉམས་པར་གྱུར་ཏ་རེ། ཉེས་དམིགས་ཀྱི་སྒོ་ནས་དམ་ལ་བཞག་པ་ནི། སྙིང་གར་རྡོ་རྗེ་བཞག་སྟེ། ཧེ་རུ་ཀ་དཔལ་དེང་ཁྱེད་ཀྱི། སྙིང་ལ་ཡང་དག་ཞུགས་པར་འགྱུར། གལ་ཏེ་ཚུལ་འདི་སྨྲས་ན་ནི། དེ་མ་ཐག་ཏུ་དྲལ་ཏེ་གཤེགས། ཡང་སྤྱི་བོར་རྡོ་རྗེ་བཞག་ལ། འདི་ཡང་ཉེས་དམིགས་ཀྱི་སྒོ་ནས་དམ་ལ་བཞག་པ་ཡིན་ཏེ། འདི་ནས་ཁྱོད་ཀྱི་དམ་ཚིག་གི་རྡོ་རྗེ་སྟེ། གལ་ཏེ་ཚུལ་འདི་སུ་ཡང་རུང་བ་ལ་སྨྲས་ན་འདིས་ཁྱོད་ཀྱི་གོ་བོ་འགེམས་པར་འགྱུར་རོ། ཕན་ཡོན་དང་ཉེས་དམིགས་གཉིས་ཀའི་སྒོ་ནས་དམ་ལ་བཞག་པ་ནི། བུམ་ཆུ་དང་ནང་མཆོད་བསྲེས་ལ་ཁྱོར་བ་གཡས་པར་སྦྱིན་ལ་འཐུང་དུ་བཅུག་ལ། འདི་ནི་ཁྱོད་ཀྱི་དམྱལ་བའི་ཆུ། དམ་ཚིག་འདས་ན་བསྲེག་པར་བྱེད། དམ་ཚིག་སྲུང་ན་དངོས་གྲུབ་ནི། རྡོ་རྗེ་བདུད་རྩིའི་ཆུ་འདིས་འགྲུབ། ཨོཾ་པཉྩ་ཨ་མྲྀ་ཏ་ཨུ་ད་ཀ་ཋ་ཋ་ཋ། བླ་མའི་བཀའ་ཉན་པའི་སྒོ་ནས་དམ་ལ་བཞག་པ་ནི། རྡོ་རྗེ་སྤྱི་བོར་བཞག་ལ། དེང་ཕྱིན་ཆད་ཁྱོད་ཀྱི་དཔལ་ཧེ་རུ་ཀ་དཔལ་ང་ཡིན་གྱིས་ངེས་འདི་བྱོས་ཤིག་བྱ་བ་དེ་ཁྱོད་ཀྱིས་བྱ་དགོས་སོ། དེ་ལ་བརྙས་པར་མ་བྱེད་ཞིག །བྱས་ན་ཡ་ང་བ་མ་སྤངས་པར་འཆི་བའི་དུས་བྱས་ཏེ་དམྱལ་བ་ཆེན་པོར་ལྟུང་བར་གྱུར་ཏ་རེ། ཞེས་དམ་ལ་བཞག་ནས། དངོས་གཞི་ཡེ་ཤེས་དབབ་པ་ཞུ་བའི་ཡོན་དུ་དམིགས་ཏེ་མཎྜལ་ཞིག་འབུལ་བ་ཞུ། གྲུབ་པ་ན། དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་ལན་གསུམ་གྱི་བར་དུ་མཛད་པར་ཞུ། དེ་བཞིན་གཤེགས་པ་ཐམས་ཅད་དཔའ་བོ་དང་རྣལ་འབྱོར་མ་ཐམས་ཅད་ཀྱིས་བྱིན་གྱིས་རློབས་ཤིག །དཔལ་ཧེ་རུ་ཀ་བདག་ལ་དབབ་ཏུ་གསོལ། གྲུབ་པ་ན། ཁྱེད་རང་རྣམས་ལུས་ཀྱི་སྤྱོད་ལམ་ཕན་ཚུན་མ་རེག་པར་སྤྱི་བོར་ཐལ་མོ་སྦྱར་ལ་ཙོག་པུར་གདུག་སྟེ། ཁྱེད་རང་ཧེ་རུ་ཀར་གསལ་བའི་རྐང་པའི་འོག་ཏུ་ཡཾ་ལས་རླུང་གི་དཀྱིལ་འཁོན་གཞུའི་དབྱིབས་ཅན་ཆང་ཟུང་ཐུར་ལ་བསྟན་ཅིད་མཆོག་མ་གཉིས་གྱེན་ལ་བསྟན་པའི་སྟེང་དུ་རྐང་པ་གཉིས་གཤིབས་ནས་གནས་པའི་རྐང་མཐིལ་གཉིས་སུ་ཛྷཻཾ་ཛྷཻཾ་མེའི་རང་བཞིན་རླུང་གིས་བསྐྱོད་པས་མེ་འབར་བ་རྩ་ནང་ན་ཡར་སོང་། སུམ་མདོའི་མེ་དང་འདྲེས་ཏེ་དྲག་ཏུ་འབར་བས་ལྟེ་བའི་མེའི་དཀྱིལ་འཁོར་དང་འཁྲུག་ཆིལ་ཏེ་འདྲེས། དེས་སྙིང་གའི་སའི་དཀྱིལ་འཁོར་རྡོ་རྗེས་མཚན་པ་བསྲེགས། དེས་མགྲིན་པའི་ཝཾ་ལས་ཆུ་ཡི་དཀྱིལ་འཁོར་ཝཾ་གྱིས་མཚན་པ་བསྐོལ། སྤྱི་བའི་ཡྃ་ལས་རླུང་གི་དཀྱིལ་འཁོར་དུ་བ་འཁྲིགས་པ་ལྟ་བུས་ཐུར་དུ་མནན། རྐང་འོག་གི་རླུང་གྱེན་ལ་བཏེགས་ཏེ་བར་སྣང་དུ་ཡང་ཡང་ཡོད་པར་བསམ། དེའི་ཚེ་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་སེམས་དཔའ་བོ་མཁའ་འགྲོ་ཐམས་ཅད་རྒྱུད་སྡེ་ལྔའི་ལྷ་ཚོགས་རྣམས་ཀྱི་རྣམ་པ་ཅན་གྱི་སྐུ་ཆེ་བ་རི་རབ་ཙམ། ཆུང་བ་རྡུལ་ཕྲན་ཙམ་བསམ་གྱིས་མི་ཁྱབ་པ་སྤྱན་དྲངས། ཁྱེད་རང་གི་སྤྱི་གཙུག་དང་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་མཚོ་ཆེན་པོ་ལ་ཁ་བ་བབས་པ་བཞིན་སིབ་སིབ་ཐིམ་པའི་མོས་པ་མཛོད། །ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། ཨོཾ་བཛྲ་ཨ་ཝེ་ཤ་ཡ་ཨ་ཨ། ཞེས་ལན་མང་དུ་བརྗོད་ཅིང་རོལ་ཆེན་བྱ། དེ་ལྟར་ཡེ་ཤེས་དབབ་པས་སྐུ་བབས་ན་གར། གསུང་བབས་ན་སཾ་སྐྲྀ་ཏའི་སྐད་སྨྲ། ཐུགས་བབས་ན་དུས་གསུམཤེས་པ་འབྱུང་། དེ་ཙམ་མ་འབྱུང་ཡང་སྔར་དང་མི་འདྲ་བའི་མྱོང་བ་རེ་ཕལ་ཆེར་ལ་འོང་བས་དེ་ངོ་ཤེས་པར་གྱིས་ལ་ལམ་དུ་བསྲེལ་ཞིག་དེ་བརྟན་པའི་ཕྱིར་དུ་སློབ་དཔོན་གྱིས་སྤྱི་བོར་རྡོ་རྗེ་རྒྱ་གྲམ་བཞག་སྟེ། བརྟན་པར་བྱས་པའི་མོས་པ་མཛོད། ཏིཥྠ་བཛྲ་ཞེས་བརྗོད། <br />བཅུ་གཅིག་པ་མེ་ཏོག་དོར་ཞིང་མགོ་ལ་བཅིང་བ་ནི། འདི་ན་རྒྱུད་སྡེ་ལྔའི་ལྷ་ཚོགས་བཞུགས་པ་ཡིན་ཏེ། གདུལ་བྱ་འདུལ་བའི་ཕྱིར་དུ་གཙོ་འཁོར་རྣམ་པ་ཐ་དད་དུ་བསྟན་པ་ཙམ་མ་གཏོགས་རང་གི་ངོ་བོ་ལ་བཟང་ངན་ཅི་ཡང་མེད་པས་ལས་བསགས་པའི་ལྷ་གཅིག་ལ་འབབ་པར་ཤོག་ཅིག་སྙམ་པས། ཨོཾ་པྲ་ཏིཥཙ་བཛྲ་ཧོཿ ཞེས་པས་མེ་ཏོག་དབུལ། ཁྱེད་རང་གི་མེ་ཏོག་ཕོག་པའི་ལྷ་དེ་ཉིད་ཀྱིས་སྤྱི་བོར་བཅིངས་ཏེ་དབང་བསྐུར་བའི་མོས་པ་མཛོད། མེ་ཏོག་སྤྱི་བོར་བཞག་ལ། ཨོཾ་པྲ་ཏེ་གྲྀཧྣ་ཨི་མཾ་སཏྭ་མ་ཧཱ་བ་ལ་ཨོཾ། ཞེས་བརྗོད། <br />བཅུ་གཉིས་པ་གདོང་གཡོག་ཕྱེ་སྟེ་དཀྱིལ་འཁོར་བསྟན་པ་ནི། །ཧེ་རུ་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་བའི། །རྡོ་རྗེ་མིག་ནི་བླ་ན་མེད། །ཨོཾ་ནཻ་ཏྲ་ཨ་པ་ཧ་ར་ས་ཏྲ་ལཾ་ཧྲཱིཿཏྲྃ། ཞེས་པས་མིག་དར་བསལ་ལ། མ་རིག་པའི་ལིང་རྟོག་དང་མིག་རས་དུས་མཉམ་དུ་བསལ་བའི་མོས་པ་མཛོད། དཀྱིལ་འཁོར་གྱི་ལྷ་ངོ་བསྟན་པ་ནི། འདི་ན་རྒྱུད་སྡེ་ལྔའི་དཀྱིལ་འཁོར་གྱི་ལྷ་ཚོགས་བཞུགས་པ་ཡིན་ཏེ། དེ་ཡང་ཕྱི་རོལ་བསྲུངས་བའི་འཁོར་ལོར་དུར་ཁྲོད་བརྒྱད་དང་བཅས་པས་ཡོངས་སུ་བསྐོར་བའི་ནང་དུ་རིན་པོ་ཆེ་སྣ་ཚོགས་ལས་གྲུབ་པའི་ཐར་པ་ཆེན་པོའི་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་དང་བཅས་པ་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་སེང་གེས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་ཟླ་བ་ཉི་མ་རྣམས་པརྩེགས་པའི་གདན་ལྔ་ཚོམ་གྱི་དབུས་ཀྱི་གདན་གྱི་སྟེང་དུ་འཁོར་ལོ་བདེ་མཆོག་ཡབ་ཡུམ། ཤར་དུ་དགྱེས་པ་རྡོ་རྗེ་ཡབ་ཡུམ། ལྷོར་གསང་བ་འདུས་པ་ཡབ་ཡུམ། ནུབ་ཏུ་མ་ཧཱ་མ་ཡ་ཡབ་བུམ། བྱང་དུ་རྡོ་རྗེ་འཇིགས་བྱེད་ཡབ་ཡུམ། ཕོ་བྲང་གཉིས་པར་བུམ་པ་གཞལ་ཡས་ཁང་དུ་གྱུར་པའི་ནང་དུ་རྒྱུད་སྡེ་ལྔའི་ལྷ་སྔར་བཞིན། ཕོ་བྲང་བཞི་པར་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་གཙོ་འཁོར་རྣམས་མངོན་སུམ་ལྟ་བུར་མཐོང་ངོ་སྙམ་པའི་དགའ་སྤྲོ་དང་ལྡན་པའི་སྒོ་ནས་ཁྱེད་རང་མེ་ཏོག་གང་ལ་ཕོག་པའི་བསྒོམ་བཟླས་ལ་བརྩོན་པར་གྱིས་ཤིག །དེ་ཡང་དཔལ་འབྲས་སྤུངས་ཀྱི་མཆོད་རྟེན་རྒྱུ་རིན་པོ་ཆེ་ལས་གྲུབ་པ། ཕྱི་མཆོད་རྟེན་གྱི་རྣམ་པ། ནང་གཞལ་ཡས་ཁང་གི་རྣམ་པ། རྒྱུད་སྡེ་ལྔའི་ལྷ་ཚོགས་རྣམས་ཀྱི་རྣམ་པ་འདི་ལྟ་བུ་ཡོད་ལ། དེ་ཡང་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ངོ་བོ་ཡིན་ཏེ། <br />དཔལ་དུས་འབྱུང་གི་རྒྱུད་ལས། དེ་ནས་ཡང་དག་བཤད་བྱ་བ། །སྐུ་ནི་ཀྱཻ་རྡོ་རྗེ་ལ། །གསུང་ནི་སྒྱུ་འཕྲུལ་རྡོ་རྗེ་མ། །ཐུགས་ནི་འཁོར་ལོར་སྡོམ་པ་ཆེ། །ཕྲིན་ལས་རྡོ་རྗེ་འཇིགས་བྱེད་ལ། །བདག་ཉིད་གསང་བ་འདུས་པར་བརྗོད། །མ་འོངས་སེམས་ཅན་དོན་དུ་ནི། །ཐབས་འདི་དག་ནི་བསྟན་པ་ཡིན། །ཐབས་ཀྱི་རིམ་པ་འདི་དག་ནི། །ཀུན་གྱི་ཐུན་མོང་མ་ཡིན་ཏེ། །དཀྱིལ་འཁོར་གཅིག་ཏུ་བསྡུས་དབང་བསྐུར། །གསང་སྔགས་སྤྱོད་པའི་རྣལ་འབྱོར་པས། །རྒྱུད་སྡེ་རྣམ་པ་སྔར་གང་བསྟན། །ཀླ་ཀློའི་སྐད་ཀྱིས་འདི་སྦས་པའི། །ཐུབ་པའི་ཞལ་ཐེམ་གསང་བ་འདི། །སྙིང་པོ་ཀུན་གྱི་དོན་གྱི་རྒྱུད། །དཀའ་ཐུབ་སྤྱོད་བྱེད་ཐུན་མོང་མིན། ཞེས་དང་། བླ་མ་རྡོ་རྗེ་གདན་པས་མཛད་པའི་བསྟན་བཅོས་ལས། རྡོ་རྗེ་འཆང་ཆེན་ལྷའི་གཙོ། །སྐུ་ནི་དགྱེས་པ་རྡོ་རྗེ་ལ། །གསུང་ནི་སྒྱུ་འཕྲུལ་ཆེན་པོ་ལ། །ཐུགས་ནི་རྡོ་རྗེ་གསང་བ་འདུས། །ཡོན་ཏན་བདེ་ཆེན་འཁོར་ལོ་སྡོམ། །ཕྲིན་ལས་རྡོ་རྗེ་འཇིགས་བྱེད་དེ། །ཕྱོགས་ནི་དཀྱིལ་འཁོར་ངེས་པ་ཅན། །ཞེས་གསུངས་པའི་ཕྱིར། དེ་ལྟ་བུའི་དཀྱིལ་འཁོར་བསྒོམ་པས་སངས་རྒྱས་ཐམས་ཅད་སྒོམ་པར་འགྱུར་ཏེ། <br />རིན་ཆེན་རྒྱ་མཚོའི་རྒྱུད་ལས། རྒྱལ་བ་གཅིག་སྒོམ་སངས་རྒྱས་ཀུན་གྱི་དངོས། །སངས་རྒྱས་ཐམས་ཅད་རིགས་ལྔའི་རང་བཞིན་ནོ། ཞེས་གསུང་པའི་ཕྱིར། <br />གཉིས་པ་དབང་དངོས་ལ། བུམ་པའི་དབང་དང་། ཏིང་ངེ་འཛིན་གྱི་དབང་གཉིས་ལས། <br />དང་པོ་བུམ་དབང་ཞུ་བའི་ཡོན་དུ་དམིགས་ཏེ་མཎྜལ་ཞིག་འབུལ་བ་ཞུ། གྲུབ་པ་ན། དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་མཛོད། བསམ་གྱི་མི་ཁྱབ་དམ་ཆོས་སྣོད། དབང་བསྐུར་དམ་པ་མཛད་དུ་གསོལ། ཞེས་གསོལ་བ་གདབ་པས་ནམ་མཁའ་གང་བའི་དེ་བཞིན་གཤེགས་པ་ཐམས་ཅད་ཀྱིས་ཡེ་ཤེས་ཀྱི་ཆུས་གང་བའི་བུམ་པ་ཐོགས་ཏེ་དབང་བསྐུར་བའི་མོས་པ་མཛོད་བྱས་ལ། བུམ་པ་སྤྱི་བོར་བཞག་ཅིང་། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་ནོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ། ཞེས་བུམ་པའི་ཆུས་སྤྱི་བོ་ནས་དབང་བསྐུར། ལུས་ཀྱི་དྲི་མ་དག །བུམ་པའི་དབང་ཐོབ་པའི་མོས་པ་མཛོད། <br />གསང་བའི་དབང་ནི། བླ་མ་བདེ་མཆོག་ལྷན་སྐྱེས་ཡབ་ཡུམ་སྙོམས་པར་ཞུགས་པའི་དགའ་བའི་སྒྲས་དེ་བཞིན་གཤེགས་པ་ཐམས་ཅད་སྤྱན་དྲངས། ཡབ་ཀྱི་ཞལ་དུ་ཞུགས། ཐུགས་ཀར་རྗེས་སུ་ཆགས་པའི་མེ་ས་འོད་དུ་ཞུ། སྐུའི་དབྱིབས་བརྒྱུད། རྡོ་རྗེའི་ལམ་ནས་ལྷ་མའི་པདྨར་བབས་པའི་ཐིག་ལེ་མུ་ཏིག་གི་རྡོག་མ་ལྟ་བུ་དེ། སློབ་དཔོན་གྱི་མཐེབ་སྲིན་གྱིས་བླངས་ཏེ་རང་གི་ལྕེ་ཐོག་ཏུ་བཞག་ནས་དབང་བསྐུར་བའི་མོས་པ་མཛོད། ཕྱོགས་བཅུའི་སངས་རྒྱས་ཐམས་ཅད་ཀྱི། །གསང་གསུམ་གནས་ནས་བྱུང་བ་ཡི། །ཁམས་གསུམ་ཀུན་གྱིས་ཕྱག་བྱས་པའི། །རྡོ་རྗེའི་དབང་བསྐུར་ཆེན་པོ་སྦྱིན། །ཨོཾ་སརྦ་ཏ་ཐཱ་ག་ཏ་གུ་ཧྱེ་ཨ་བྷི་ཥིཉྩ་མཾ། ཞེས་བརྗོད་ཅིང་ཐོད་པའི་བདུད་རྩི་སྦྱིན། །དེས་ངག་གི་དྲི་མ་དག་ཅིང་གསང་དབང་ཐོབ་པའི་མོས་པ་མཛོད། ཤེས་རབ་ཡེ་ཤེས་ཀྱི། གསང་དབང་གི་རྫས་འཐུང་བའི་བདུད་རྩི་དེས་སྙིང་ག་ཡན་ཆད་གང་། བདེ་སྟོང་གི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པའི་མོས་པ་མཛད་ནས་འདིའི་རྗེས་ཟློས་མཛོད། ཨོཾ་སརྦ་ཏ་ཐཱ་ག་ཏ་པྲཛྙཱ་ཛྙཱ་ན་ཨ་བྷི་ཥེཉྩ་མཾ། དེས་ཡིད་ཀྱི་དྲི་མ་དག །ཤེས་རབ་ཡེ་ཤེས་ཀྱི་དབང་ཐོབ་པའི་མོས་པ་མཛོད། <br />དབད་བཞི་པ་ནི། དབང་གསུམ་པ་གསན་སྐབས་སུ་སྐྱེས་པའི་བདེ་སྟོང་གི་ཡེ་ཤེས་དེའི་ངོ་བོ་ལ་བལྟས་པས་སྐྱེ་འགག་གནས་གསུམ་དང་བྲལ་བ་ནམ་མཁའ་ལྟ་བུ་དེའི་ངང་ལ་འཛིན་མེད་དུ་ལྷོད་ཀྱིས་གློད་ནས་ཅུང་ཟད་མཉམ་པར་འཇོག་པར་ཁུ། སློབ་དཔོན་གྱིས། ཨོཾ་སརྦ་ཏ་ཐཱ་ག་ཏ་ཙ་ཏུར་ཨ་བྷི་ཥཉྩ་མཾ། ཞེས་བརྗོད། དབང་ཕྱི་མ་གཉིས་ལ་སྐུ་ཤས་བུམ་ཆུ་འཐོར་ཙམ་རེ་བྱེད། དེ་ལྟར་ན་བུམ་པའི་ཆུས་ལུས་ཀྱི་ནང་ཐམས་ཅད་གང་། དྲི་མ་ཐམས་ཅད་དག །དབང་བཞི་པ་ཐོབ། འཛིན་རྟོག་ཐམས་ཅད་དང་བྲལ་བ་ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེས། ཆུ་ལྷག་མ་ཡར་ལུད་པ་ལས་མི་བསྐྱོད་པ་སྤྲུལ་སྐུའི་རྣམ་པ་ཅན་དེས་དབུ་བརྒྱན་པའི་མོས་པ་མཛོད། སྒྱུ་ལུས་དབང་མོ་ཆེ་རྐྱང་པ་མཛད་ན། དེ་ནས་གཙོ་བོས་ཇི་ལྟར་སོགས་རྗེས་ཀྱི་བྱ་བ་ལ་འཇུག་གོ །ཡང་ཕྱག་ལེན་ལ། གདམས་པ་ངག་དབང་དང་འབྲེལ་བ་དང་། དབང་གདམས་ངག་དང་འབྲེལ་བ་གཉིས་ཀྱང་དཀྱུས་གཅིག་ལ་མཛད་པས། མདུན་གྱི་ནམ་མཁར་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ཐམས་ཅད་མངོན་སུམ་བཞིན་དུ་བཞུགས་པར་མོས་པ་མཛད་ནས། དེ་དག་ལ་མཎྜལ་ཚོམ་བུ་བདུན་མ་ལན་གསུམ་འབུལ་བར་ཞུ། གྲུབ་པ་ན། དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་ལན་གསུམ་གྱི་བར་དུ་བརྗོད། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བདག་ལ་ཡང་དག་པར་སྒྱུ་ལུས་ཀྱི་དབང་བསྐུར་དུ་གསོལ། ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་བདག་ལ་ཡང་དག་པར་སྒྱུ་ལུས་ཀྱི་དབུད་བསྐུར་དུ་གསོལ། ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱིས་བདག་ལ་ཡང་དག་པ་སྒྱུ་ལུས་ཀྱི་དབང་ཞུ་བ་དང་ལམ་ཉམས་སུ་ལེན་པ་ལ་བར་ཆད་མི་འབྱུང་བར་མཛད་དུ་གསོལ། དེ་ནས་ཁྱེད་རང་རྣམས་ཀྱི་སྤྱི་བོར་ཨོཾ་དཀར་པོ་ཞིག་གསལ་བཏབ། དེ་ལས་འོད་ཟེར་དཀར་པོ་བསམ་གྱིས་མི་ཁྱབ་པ་འཕྲོས། སངས་རྒྱས་བྱང་སེམས་ཐམས་ཅད་ཀྱི་སྐུའི་ཡོན་ཏན་བསྡུས་ནས་ཁྱེད་རང་གི་སྤྱི་བོའི་ཨོཾ་ལ་ཐིམ། དེ་འོད་དུ་ཞུ་ནས་ཁྱོད་རང་གི་ཚངས་བུག་ཏུ་ཞུགས་ཏེ་ལྟེ་བར་སླེབས་པ་ན་ཐིག་ལེ་དཀར་པོ་ཞིག་ཏུ་གྱུར་པས་གཏི་མུག་དག །ཐིག་ལེ་དེ་ཆོས་དབྱིངས་ཡེ་ཤེས་སུ་གྱུར་པའི་མོས་པ་མཛོད། དེ་བཞིན་དུ་ཁྱེད་རང་གི་སྤྱི་བོར་ཨཱཿདམར་པོ། ཧཱུྃ་སྔོན་པོ། ཏྲཾ་སེར་པོ། ཨ་ལྗང་གུ་རྣམས་རིམ་བཞིན་དུ་གསལ་བཏབ། རང་རང་གི་ཁ་དོག་དང་མཐུན་པའི་འོད་ཟེར་འཕྲོས། སངས་རྒྱས་བྱང་སེམས་ཀྱི་སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི་ཡོན་ཏན་བསྡུས། འོད་དུ་ཞུ་བ་ཚངས་བུག་ནས་ཞུགས། ལྟེ་བར་སླེབ་པ་ན་ཡིག་འབྲུ་རང་རང་གི་ཁ་དོག་དང་མཐུན་པའི་ཐིག་ལེར་གྱུར་པས་འདོད་ཆགས་དང་། ཞེ་སྡང་དང་། ང་རྒྱལ་དང་། སེར་སྣ་དང་། ཕྲག་དོག་གི་དྲི་མ་དག །ཐིག་ལེ་དེ་དང་དེར་སོ་སོར་རྟོག་པ། མེ་ལོང་ལྟ་བུ་མཉམ་པ་ཉིད་བྱ་བ་གྲུབ་པའི་ཡེ་ཤེས་སུ་གྱུར་པའི་མོས་པ་མཛོད། ལྔ་པོ་རེ་རེལ་ཌཱ་དྲིལ་དང་། ཨོཾ་ཧྲཱི་ཧ་ཧ་ཧཱུྃ་ཧཱུྃ་ཕཊ། ཅེས་བརྗོད། དེ་ལྟར་ན་ཁྱེད་རང་ཡེ་ཤེས་ཀྱི་རང་སྣང་གི་བདེ་མཆོག་ཡབ་ཡུམ་དུ་ལམ་གྱིས་གྱུར་པའི་མོས་པ་མཛོད། དེ་གདམས་ངག་དབང་དང་འབྲེལ་བ་ཡིན། <br />གཉིས་པ་དབང་གདམས་ངག་དང་འབྲེལ་བ་ནི། མཎྜལ་གསུམ་པའི་སྟེང་གི་ནམ་མཁར་སེང་གེས་བཏེགས་པའི་རིན་པོ་ཆེའི་ཁྲི་པད་ཟླ་ལ་བླ་མ་དང་གཉིས་སུ་མེད་པའི་འཁོར་ལོ་བདེ་མཆོག་སྙིང་པོའི་རྣལ་འབྱོར་མ་བྲྲྲཞིས་བསྐོར་བ་མངོན་སུམ་བཞིན་དུ་བཞུགས་པར་མོས་ལ། ནང་གི་ལུས་ལོངས་སྤྱོད་དུས་གསུམ་དུ་བསགས་པའི་དགེ་རྩ་ཐམས་ཅད་ཡོན་དུ་འབུལ་སྙམ་པས་འདིའི་རྗེས་ཟློས་མཛོད། བླ་མ་རིན་པོ་ཆེ་བདག་ལ་བུམ་པའི་དབང་བསྐུར་དུ་གསོལ། ཞེས་གསོལ་བ་བཏབ་པས་བླ་མའི་སྨིན་མཚམས་ནས་འོད་ཟེར་དཀར་པོ་བྱུང་། རང་གི་སྨིན་མཚམས་སུ་ཐིམ་པས་ནད་གདོན་སྡིག་སྒྲིབ་ཐམས་ཅད་དག །རང་ལྷའི་སྐུ་སྔར་བས་ཀྱང་གསལ་བར་གྱུར་པའི་མོས་པ་མཛོད། ཡང་ཚིག་ཐོག་མ་འདྲ་བ་ལ། གསང་བའི་དབང་བསྐུར་དུ་གསོལ། ཞེས་གསོལ་བ་བཏབ་པས་བླ་མ་ཡབ་ཡུམ་གྱི་སྦྱོར་མཚམས་ནས་ཐིག་ལེ་དཀར་དམར་བྱུང་། རང་གི་ལྕེ་ལ་ཐིམ་པས་ངག་གི་དྲི་མ་དག །རང་ལྷ་སྐུ་སོགས་བརྗོད། ཡང་ཤེས་རབ་ཡེ་ཤེས་ཀྱི་དབང་བསྐུར་དུ་གསོལ། ཞེས་གསོལ་བ་བཏབ་པས། བླ་མའི་ཐུགས་ཀ་ནས་འོད་ཟེར་ཁ་དོག་སྣ་ལྔ་བྱུང་། རང་གི་སྙིང་གར་ཐིམ་པས་ཡིད་ཀྱི་དྲི་མ་དག །རང་ལྷ་སྐུ་སོགས་བརྗོད། དེ་ནས་ལུས་ཁོང་གློད་སེམས་སྤྲོས་མེད་ལྷན་ཅིག་སྐྱེས་པའི་ཕྱག་རྒྱ་ཆེན་པོའི་ངང་དུ་མཉམ་པར་འཇོག་པར་ཞུ། ཞེས་བརྗོད། དེ་ནི་དབང་བཞི་པ་ཡིན། ཡང་དབང་གདམས་ངག་རང་འབྲེལ་བ་ལ་གསུམ་ལས། <br />དང་པོ་སྟོང་པས་གཞི་བྱས་ནས་རིག་པ་སྣ་ཚོགས་སུ་འཆར་བ་ནི། རང་གི་ལུས་ཀྱི་དབུས་དྲང་པོར་རྩ་དབུ་མ་ཕྱི་དཀར་ལ་ནང་དམར་བ། ཡར་སྣེ་སྤྱི་གཙུག་མས་སྣེ་གསང་གནས་སུ་ཟུག་པ་ཞིག་གསལ་བཏབ། སྙིང་གའི་ཐད་དུ་དབུ་མའི་ནང་དུ་ཨ་དཀར་པོ་ཞིག་བསམ་ལ། ངག་ཏུ་ཨ་མང་དུ་བརྗོད་པས་དབུ་མ་ཇེ་གསལ་དུ་སོང་སྟེ། མཐར་སྟོང་ཉིད་འོད་གསལ་གྱི་ངང་དུ་འཛིན་མེད་དུ་ཅུང་ཟད་འཇོག་པར་ཞུ། <br />གཉིས་པ་རྩ་ལམ་སྦྱངས་ཏེ་རིག་པ་སྣ་ཚོགས་སུ་འཆར་བ་ནི། ཁྱེད་རང་གི་སྤྱི་བོར་ཧཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་སྔོན་པོ། ལྟེ་བར་ཨ་དམར་ལྗང་རྣམས་གསལ་བཏབ། སྤྱི་བོའི་ཧཾ་ལས་འོད་ཟེར་དཀར་པོ་གསལ་སིང་ངེ་བ་འཕྲོས། སྤྱི་བོའི་རྩ་འཁོར་གང་བས་སྤྱི་བོའི་རྩ་མདུད་ཐམས་ཅད་སྦྲུལ་མདུད་ལྟར་རང་གྲོལ་དུ་གྱུར། མགྲིན་པའི་ཨཱཿགསོས་དེ་ལས་འོད་ཟེར་དམར་པོ་གསལ་སིང་ངེ་བ་སོགས་སྔར་གྱི་རིགས་འགྲེས་སྦྱར། དེ་བཞིན་དུ་ཐུགས་ཀའི་ཧཱུྃ་དང་། ལྟེ་བའི་ཨ་གསོས་པ་སོགས་སྔར་བཞིན་བྱས་ཏེ། དེས་ལུས་ཀྱི་རྩ་མདུད་ཐམས་ཅད་གྲོལ། བདེ་སིང་བ་ལ་ཡིད་གཏད་དེ། རང་བདེ་མཆོག་ལྷན་སྐྱེས་སུ་གསལ་བཏབ། <br />གསུམ་པ་ལུས་དག་པ་ལྷ་སྐུར་སྒོམ་པ་ནི། རང་བདེ་མཆོག་ལྷན་སྐྱེས་སུ་གསལ་བའི་དབུ་མའི་ཡས་སྣ་རྩེར་ཧཾ་དཀར་པོ་མགོ་འཐུན་བསྟན་གྱི་རྩེར་ཐིག་ལེ་དཀར་པོ་སྲན་མ་ཙམ་བསམ། གསང་གནས་སུ་ཧཱུྃ་སྔོན་པོ་མགོ་གྱེན་ལ་བསྟན་པའི་རྩེར་ཐིག་ལེ་དམར་པོ་སྲན་མ་ཙམ་ཞིག་གསལ་བཏབ། ཧཱུྃ་གྱེན་དུ་བྱོན། དབུ་མ་རྒྱུ་མ་ལྡོག་པ་ལྟར་ཐིམ་ནས་སྙིང་གར་སླེབས། ཧཱུྃ་ཐིག་ལེ་ལ་ཐིམ། ཧཾ་མར་བྱོན། དབུ་མ་རྒྱུ་མ་་་་་་པ་ལྟར་ཐིམ་ནས། སྙིང་གར་སླེབས། ཧཾ་ཐིག་ལེ་ལ་ཐིམ། ཐིག་ལེ་དཀར་པོའི་རྗེས་སུ་དམན་པོས་དེད། དེ་སྙིང་གར་རང་ཐག་བཞིན་འཁོར་བ་ལ་སེམས་གཏད་པས་བུམ་དབང་། གཅིག་ལ་གཅིག་རེག་པས་བདེ་སིང་སིང་བ་ལ་སེམས་གཏད་པ་ལ་གསང་དབང་། ཕན་ཚུན་འདྲེས་པའི་བདེ་སིང་སིང་བ་ལ་སེམས་གཏད་པས་དབང་གསུམ་པ། གཅིག་ལ་གཅིག་ཐིམ་ནས་མཐར་འོད་དུ་ཡལ་ཏེ་སྟོང་ཉིད་ཀྱི་ངང་དུ་འཛིན་མེད་དུ་བཞག་པ་དབང་བཞི་པ་ཡིན། དེ་ལྟར་དབང་བཞི་ཐོབ་པས་བདག་རྒྱུད་དམ་ཚིག་དང་ལྡན་པ་ལ་དགྱེས་པའི་ཚུལ་དུ་མཎྜལ་བསིལ་བ་ཚལ་དུ་གསལ་བ་ནས་མགོན་པོ་འཁོརབཅས་མདུན་གྱི་ནམ་མཁའ་ལ་འུར་ཆེམ་གྱིས་བྱོན། ཁྱེད་རྣམས་ཀྱི་བར་ཆད་དས་སེལ། ཕྲིན་ལས་ངས་བསྒྲུབ་ཅེས་གསུང་ལྷང་ལྷང་བཞུགས་པའི་ཐུགས་ཀ་ནས་ཧཱུྃ་འབར་བ་རེ་ནར་གྱིས་ཆད་དེ་ཁྱེད་རང་གི་སྤྱི་བོ་ནས་ཞུགས། སྙིང་གར་ལམ་གྱིས་བཞུགས་པས་བར་ཆད་ཐམས་ཅད་བསྲུང་བ་ཡིན་སྙམ་པའི་མོས་པ་མཛོད་བྱས་ལ། ཕྱག་དྲུག་པའི་གཏོར་མ་སོ་སོའི་མགོར་བཞག་ཅིང་། ཨོཾ་བཛྲ་མ་ཧཱ་ཀ་ལ་སོགས་ཀྱི་མཐར་ཛཿཧཱུྃ་བྃ་ཧོཿ ཞེས་བརྗོད། དེ་ནས་གཙོ་བོས་སོགས་དང་། མཎྜལ་དེང་ནས་སོགས་སྤྱི་ལྟར་བྱའོ། <br />གསུམ་པ་ནི་མཆོད་པ་ཞལ་གསོས་ལ་བྱིན་བརླབས་བྱས་ནས། མཆོད་བསྟོད་མདོར་བསྡུས། ཡིག་བརྒྱས་ལྷག་ཆད་ཁ་བསྐང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། རྟེན་གཞན་ཡོད་ན་དང་། དཀྱིལ་འཁོར་རས་བྲིས་ཡིན་ན་བརྟན་བཞུགས་བྱ། ཨོཾ་ཁྱེད་ཀྱིས་སོགས་ཀྱིས་རྟེན་ལ་མ་བརྟེན་པའི་གཏོར་མགྲོན་གྱི་ཡེ་ཤེས་པ་དང་། བུམ་ནང་གི་ཡེ་ཤེས་པ་དང་། དཀྱིལ་འཁོར་རྔུལ་ཚོན་ཡིན་ན་རྔུལ་མཚོན་གྱི་ཡེ་ཤེས་པ་རྣམས་རང་བཞིན་གྱི་གནས་སུ་གཤེགས། དམ་ཚིག་པ་རང་ལ་བསྡུས་ཏེ་གནས་གསུམ་བསྲུང་། བསྔོ་བ་དང་སྨོན་ལམ་ཤིས་བརྗོད་དང་བཅས་པ་བྱའོ། <br />འདིར་སྨྲས་པ། སྔར་བྱོན་དམ་པའི་གསུང་རབ་གསེར་གྱིས་བརྒྱན། །ལྷན་ཐབས་རིན་ཆེན་བྱེ་བའི་ཕྲ་བཀོད་དེ། །སྡེབ་ལེགས་ཚིག་གི་སྲད་བུ་ལ་བརྒྱུས་ནས། །བློ་གསལ་མགྲིན་པའི་རྒྱན་དུ་དེ་རིང་སྦྱིན། །འཆད་པའི་ཚེ་ན་ཅུང་ཟད་ནོར་ཡང་སླ། །ཆོ་ག་ཉམས་ན་གྲུབ་པ་མེད་དོ་ཞེས། །འཇམ་པའི་དབྱངས་ཀྱི་གསུང་དེ་སྙིང་ལ་བཅངས། འཁྲུལ་མེད་གོ་བདེའི་བདག་གིས་འདི་བྲིས་སོ། །འདི་ན་ཁ་གཅིག་ཉེས་བཤད་འགལ་འདུམ་འཕྲེང་། རང་བཟོའི་རྡོ་ཐལ་བྱུགས་པའི་སྙོག་མ་ཅན། །མ་འབྲེལ་འགལ་འཁྲུལ་ཉམས་པའི་ཆོ་ག་ཡིས། །བླུན་པོའི་མགོ་བོ་བསྐོར་དང་འདི་མི་འདྲ། །གངས་ཅན་གྲུབ་པའི་གཙུག་རྒྱན་གདུ་བུ་པས། །རིན་ཆེན་གསེར་གྱི་ཕྱེ་མ་བྲེས་གཞལ་ནས། །སྙན་བརྒྱུད་འཆི་མེད་བདུད་རྩིའི་བཅུད་ཉོས་པས། །བྱང་ཕྱོགས་གྲུབ་པའི་གླིང་དུ་བྱས་འདི་མཚར། །འདིར་འབད་དགེ་བ་སྟོན་ཀའི་ཟླ་བ་འབུམ། །རྩེགས་པའི་འོད་ལྟར་དཀར་བ་གང་ཐོབ་དེས། །འཇིག་རྟེན་གསུམ་གྱི་སྒྲིབ་གཉིས་མུན་བཅོམ་ནས། །རྣམ་གྲོལ་སྣང་བ་སྲིད་ན་འབྱམས་གྱུར་ཅིག །ཅེས་པ་འདི་ནི་འགྲོ་བ་དུ་མའི་སྐྱབས་མགོན་དམ་པར་གྱུར་ཅིང་། །གསུང་རབས་འབུམ་སྡེའི་མགྲིན་པ་ཅན། །བླ་ཆེན་རིན་ཆེན་དོན་གྲུབ་དཔལ་བཟང་དང་། །སློབ་དཔོན་རིན་ཆེན་བསོད་ནམས་བློ་གྲོས་སོགས་དོན་དུ་གཉེར་བ་དུ་མས་བསྐུལ་བའི་ངོར། །ཤཱཀྱའི་དགེ་སློང་སྡེ་སྣོད་གསུམ་པ་ཆོས་རྣམ་རྒྱལ་གྱིས་ཐུབ་བསྟན་རྣམ་པར་རྒྱལ་བའི་ཆོས་གྲྭ་ཡངས་པོར་སྦྱར་བའི་ཡི་གེ་པ་ནི་བྱམས་པ་ཆོས་གྲགས་ཀྱིས་ཤེས་གནས་ཀྱིས་གུས་པས་བགྱིས་སོ།། །།</span>

Summary:

This is a minor edit Watch this page

Cancel