Sbyin sreg dang bum pa bca' thabs

Resource ID	SCv11p266
Title	sbyin sreg dang bum pa bca' thabs
Alt. title	yid bzhin nor bu'i sbyin sreg
Topics	White protector
Sub-Topics	Fire offering
Link	BDRC W23922 BDRC W1KG4284
Notes	Same text as yid bzhin nor bu'i sbyin sreg

༈ སྦྱིན་སྲེག་དང་བུམ་པ་བཅའ་ཐབས་བཞུགས་སོ།།

༈ ༼ཛི༽ མགོན་པོ་འདིའི་སྦྱིན་སྲེག་ལ་གཉིས་ལས། རྒྱས་པའི་སྦྱིན་སྲེག་བྱེད་ན། ཐབ་ལ་སོགས་པ་ཐམས་ཅད་སྤྱི་དང་མཐུན་པར་བྱས་ནས། མེ་ཏོག་སེར་པོ་ལ་སོགས་པའི་སྲེག་རྫས་དང་། མགོན་པོ་ཡིད་བཞིན་ནོར་བུའི་ཐུགས་ཀའི་མཁའ་འགྲོ་མ་དང་བཅས་པ་ཐབ་ནང་དུ་འཇིག་རྟེན་མེ་ལྷའི་ཐུགས་ཀའི་མེ་གྲུ་གསུམ་གྱི་དབུས་སུ་བསྐྱེད་ནས་ཡེ་ཤེས་པ་བཞུགས་པ་སོགས་བྱ་སྟེ། འདས་པའི་མེ་ལྷ་ལ་སྲེག་རྫས་བརྒྱ་རྩ་བརྒྱད་རེ་འབུལ་བ་དང་། སྔགས་ནི། གུ་རུ་མ་ཧཱ་ཀཱ་ལ་ཡ་ཧ་རི་ནི་ས་སིདྡྷི་ཛཿ །བདག་མིང་འདི་ཞེས་བྱ་བའི་འཁོར་དང་ལོངས་སྤྱོད་དང་། ནོར་དང་། འབྲུ་དང་། རིན་པོ་ཆེ་ལ་སོགས་པའི་འབྱོར་པ་ཕུན་སུམ་ཚོགས་པ་ཐམས་ཅད་པུཥྚིཾ་ཀུ་རུ་ཨོཾ། ཞེས་སྔགས་རེ་དང་སྲེག་རྫས་རེ་སྤེལ་བ་དབུལ། དེ་ནས་འདས་པའི་མེ་ལྷ་ཡེ་ཤེས་པ་གཤེགས། དམ་ཚིག་པ་རང་ལ་བསྡུ། འཇིག་རྟེན་པ་ལ་ལྷག་མ་ཕུལ་ནས་འཇིག་རྟེན་པའི་མེ་ལྷ་ཡེ་ཤེས་པ་གཤེགས། དམ་ཚིག་པ་མེ་འབར་བའི་རྣམ་པར་གྱུར་པ་སོགས་ཆོ་ག་སྤྱི་དང་འདྲའོ།
།དབང་སྡུད་ལ་ཐབ་ཟླ་གམ་དམར་པོ་བྲིས་པའམ་རྩིག་པ་ལ་སྲེག་རྫས་སོགས་ཆོ་ག་གཞན་ཐམས་ཅད་དབང་གི་སྦྱིན་སྲེག་གི་ཆོ་ག་སྤྱི་དང་མཐུན་པ་ལ། མགོན་པོའི་ཐུགས་ཀའི་མཁའ་འགྲོ་མ་དང་བཅས་པ་ལ་བསྲེག་རྫས་འབུལ་བའི་ཚེ། གུ་རུ་མ་ཧཱ་ཀཱ་ལ་ཡ་ཧ་རི་ནི་སིདྡྷི་ཛཿ །ཆྒཻ་མོ་ཝ་ཤཾ་ཀུ་རུ་ཧོཿ །ཞེས་སྔགས་དེ་དང་རྫས་དེ་སྤེལ་ནས་འབུལ་བའི་དུས་སུ། ཐུགས་ཀའི་མཁའ་འགྲོ་མ་ལས་དེ་འདྲ་བ་དཔག་ཏུ་མེད་པ་འཕྲོས་པས། བསྒྲུབ་བྱའི་སྙིང་གའི་མ་བྷ་ག་ནས་ལྕགས་ཀྱུས་བཀུག །ཌཱ་མ་རུའི་སྒྲས་སེམས་མྱོས་པར་བྱས་ཏེ། རང་དབང་མེད་པར་བཀུག་ནས་བདག་གི་རྐང་པའི་དྲུང་དུ་བཞག་པར་མོས་པ་ཡང་ཡང་བྱའོ།
།ཐུག་པ་སྐོལ་བའི་མེ་ལ་ཡང་བསྐྱེད་ཆོག་མདོར་བསྡུས་བྱས་ནས། ཚ་དང་ཕྱེ་མར་ལ་སྔགས་དང་བཅས་ནས་ཅུང་ཟད་རེ་འབུལ་བའི་སྦྱིན་སྲེག་སྦྱར་རུང་གསུང་མོད། རྒྱུད་སྡེ་ལྟར་བྱས་ན་ལེགས་སམ་སྙམ་མོ། །ཨྀཐིཿ