Sgyu lus rmi lam gyi 'byams gcod

Resource ID	Sup13
Title	sgyu lus rmi lam gyi 'byams gcod
Topics	Illusory body, Dream Yoga
Sub-Topics	'byams gcod
Link	BDRC W8LS32725 (p.189) BDRC W3CN18508 (v2p.456) BDRC W22103 (p.312)

༼༽མཚན་མའི་རྟོགས་པ་གང་ཡིན་ཡང་། ཉོན་མོངས་༼པ་དང་རྣམ་རྟོག༽གཅིག་གིས་༼སྒྱུ་མ་ལྟ་བུ་༽ལྕགས་ཀྱུ་ཡིན། ཞི་བར་འདོད་པའི་རྟེན་དང་དབྲལ། དེ་ལ་མཚན་མ་ནི་འཇིག་རྟེན་གྱི་ཉོན་མོངས་པ་སྣ་ཚོགས་དང་འབྲེལ་ནས་ཡུལ་ལ་ལྷག་པར་ཞེན་ནོ། །རྟོག་པ་ནི་དགའ་གདུང་ནང་ནས་སྐྱེས་ནས་སྤང་བླང་གི་མཐར་ཤོར། དབྲལ་བ་ནི་དངོས་པོ་དང་མཚན་མ་གང་བྱུང་ཡང་སྒྱུ་མ་ལྟ་བུར་ཐག་བཅད་དོ།
།སྟོང་ཡང་ཞེན་པས་མ་བསླད་པ། །སྣང་ཡང་མཚན་མར་མི་འཛིན་པ། །ཆོས་རྣམས་རང་བཞིན་མ་གྲུབ་པ། །དེ་ནི་སྒྱུ་མའི་མཚན་ཉིད་ཡིན། །འདི་ལྟར་ཤེས་ན་དངོས་གྲུབ་ཀུན། །སྒྱུ་མ་ལྟ་བུར་ཉམས་སུ་བླངས། །བློ་དང་བྲལ་བའི་རྣལ་འབྱོར་པས། །དུས་རྣམས་ཀུན་ཏུ་སྤྱད་པར་བྱ། །སེམས་དང་ཡུལ་དན་དངོས་པོ་རྣམས། །འདི་གསུམ་སྒྱུ་མའི་གནས་ཡིན་ཏེ། །རྗེས་ཤེས་གླང་པོའི་སྤྱོད་པ་ཡིས། །ཉོན་མོངས་ཞི་རགས་འདུལ་བར་བྱ། །སྣང་བ་སྣ་ཚོགས་ཐམས་ཅད་ཀྱང་། །སྒྱུ་མ་ལྟ་བུའི་དཔེ་ཡིན་ནོ། །ཞེན་པའི་རྟོག་པ་སྤོང་བ་ཡིན། །གསུམ་པའི་གནད་དུ་ཤེས་པར་བྱ། །སྣ་རྩེ་གཡུང་དྲུང་འཁྱིལ་པ་ལས། །གར་མཁན་ལྷ་མོའི་ལྟད་མོ་འབྱུང་། །གསང་གནས་ཐིག་ལེའི་སྦྱོར་བ་ཡིན། །མངལ་སྒོ་ལྔ་ནི་ཅིག་ཆར་དགག །སྙིང་གི་དཀྱིལ་ན་གནས་པ་ཡི། །ཐིག་ལེ་དཀར་དམར་སྦྱོར་བ་ཡིས། །རླུང་སེམས་གཉིས་སུ་མེད་པར་བསྒོམ། །བདེ་འབྱམས་ཡུལ་ལ་འཆར་བ་ན། །སྨིན་ཕྲག་ཟུར་གསུམ་གནས་སུ་སྦ། །རྟོག་པ་ཡུལ་ལ་འཆར་བ་ན། །དབང་པོའི་ས་བོན་དྲན་པར་བྱ། །མ་ཟིན་འབྱམས་དང་གོལ་པ་གསུམ། །བསོད་ནམས་ཚོགས་ཀྱིས་བཅད་པར་བྱ། །བོགས་འབྱིན་རླུང་གི་རྟ་ཕོ་ཡིན། །ཡུལ་གྱི་ལྟད་མོ་སྣ་ཚོགས་བལྟ། །གསང་གནས་ཐིག་ལེའི་སྦྱོར་བ་ཡིས། །ཡན་ལག་ཉིང་ལག་རྫོགས་པར་བསྒོམ། །བུམ་ནང་ཡེ་ཤེས་སྦྱོར་བ་ཡིས། །ཡུལ་གྱི་ལྟད་མོ་སྣ་ཚོགས་བལྟ། །སེམས་འཛིན་རྟོགས་པའི་དྲ་བ་ཅན། །སྦྱོང་པ་མ་ཤེས་ཡུལ་ལ་འཆར། །དབང་པོའི་ཞེན་པ་སྤང་བར་བྱ། །སྒོ་ལྔའི་རྣམ་ཤེས་རེ་རེས་ཀྱང་། །སྣ་ཚོགས་ཉམས་སུ་མྱོང་བར་བྱ། །ཆུ་དང་མེ་དང་གཡང་དང་བྲག །བསམ་པའི་སྦྱོར་བ་སྔོན་བཏང་ནས། །ཐོགས་སྡུག་མེད་པར་སྦྱང་བར་བྱ། །ཟིན་ནས་བརྟན་པར་མ་བྱས་པར། །སྦྱངས་པའི་སྦྱོར་བ་མི་བྱའོ། །ཡུལ་སོགས་སྒྱུ་མར་མ་ཤེས་པར་བྱ། །ཟུང་འཇུག་ལམ་ལ་མི་སྦྱར་རོ། །མཐར་ཐུག་སྒྱུ་མ་ཟུང་འཇུག་ནི། །སྣང་སྟོང་དབྱེར་མེད་ཕྱི་མི་ཉམས། །ཞེན་པའི་ཡུལ་དང་བྲལ་བ་ཡིན། །རླུང་སེམས་གཉིས་མེད་ནང་གི་ཉམས། །ཉོན་མོངས་རྩ་བ་བྲལ་བ་ཡིན། །ཨེ་མ་རིན་ཆེན་ལྟ་བུ་ཡི། །ཉམས་ལེན་བདུ་རྩིའི་སྦྱོར་བ་འདི། །སྐལ་ལྡན་རྣམས་ཀྱིས་ཉམས་སུ་ལོང་། །སྣོད་མིན་རྣམས་ལ་གསང་བར་བྱ།
།སྒྱུ་ལུས་རྨི་ལམ་གྱི་འབྱམས་གཅོད་རྫོགས་སོ།