Sha ba ri pa'i mgon po gsang sgrub kyi rgya gzhung

Resource ID	SCv11p123
Title	sha ba ri pa'i mgon po gsang sgrub kyi rgya gzhung
Alt. title	guhya sadhana gsang ba'i sgrub thabs
Topics	Chadrupa
Sub-Topics	Secret Sadhana
Author	Shavaripa
Link	BDRC W23922

༈ ཤ་བ་རི་པའི་མགོན་པོ་གསང་སྒྲུབ་ཀྱི་རྒྱ་གཞུང་བཞུགས་སོ།།
༈ ༼ཤ༽
རྒྱ་གར་སྐད་དུ། གུ་ཧྱ་ས་དྷ་ནཱ་མ།
བོད་སྐད་དུ། གསང་བའི་སྒྲུབ་ཐབས་ཞེས་བྱ་བ།
།སྤྱན་རས་གཟིགས་ལ་ཕྱག་འཚལ་ལོ།
།དབེན་པར་ཚོགས་གཉིས་སྔོན་འགྲོ་བས། །བསྲུང་བ་རྡོ་རྗེ་ཆོས་འབྱུང་ནང་། །རླུང་མེ་ཆུ་ས་ལྷུན་པོའི་སྟེང་། །བྷྲུཾ་ལས་གཞལ་ཡས་ཁང་པའི་དབུས། །སྣ་ཚོགས་པདྨ་ཉི་ཟླའི་གདན། །སྟེང་འོག་མདོག་འདྲ་དབུས་མཐིང་ལ། །རིན་ཆེན་རྒྱན་སྤྲས་སྟག་ཤམ་ཅན། གླང་ཆེན་གདོང་ཅན་ནེའུ་ལེ་འཛིན། །ཚོགས་བདག་ཕོ་མོ་སྒྱེལ་བའི་སྟེང་། །དཔལ་ལྡན་དྲག་ཆེན་ཧེ་རུ་ཀ ཞལ་གཅིག་ཕྱག་དྲུག་འཇིགས་པའི་གཟུགས། །གྲི་གུག་ཐོད་ཕྲེང་ཌཱ་མ་རུ། །ཐོད་པ་རྩེ་གསུམ་ཞགས་པ་དང་། །དཔྲལ་བ་ཧྲཱིཿཀྲིཾ་གཡུང་དྲུང་འོད། །བདེ་ཆེན་ཕྱོགས་བཅུ་ཀུན་ཁྱབ་འཕྲོས། །འཕྲིན་ལས་ལྔ་ལྡན་ཀུན་དབང་བསྐུར། །རིན་ཆེན་སྣ་ཚོགས་སྐམ་རློན་ཐོད། །གཡོན་བརྐྱང་གར་གྱིས་རོལ་པའི་སྐུ། །སྦྲུལ་དང་རུས་པའི་རྒྱན་གྱིས་སྤྲས། །ཁྲག་ཞག་ཐིག་ལེ་ཐལ་ཆེན་རྫས། །མི་ལྤགས་གཡང་གཞི་གླང་ཆེན་གོས། །སྟག་ལྤགས་གྲོལ་བ་དཔའ་བོའི་སྐུ། །གསང་བ་ཡེ་ཤེས་རཱ་གའི་མདོག །ཞལ་གཅིག་ཕྱག་གཉིས་སྤྱན་གསུམ་ལ། །ཌཱ་མ་རུ་དང་ཐོད་པ་ཅན། །གཡས་བརྐྱང་སྟབས་ཀྱིས་ཡབ་ལ་འཁྱུད། ལས་བཞིར་སྐུ་དང་ཡོན་ཏན་རིགས། །གསུང་དང་འཕྲིན་ལས་བདག་ཉིད་ཅན། །འཁོར་ལོ་རིན་ཆེན་པདྨ་དང་། །སྣ་ཚོགས་རྡོ་རྗེས་རབ་མཛེས་པའི། །གྲི་གུག་འཛིན་སོགས་མགོན་པོ་བཞིའི། །རྡོ་རྗེ་རིན་ཆེན་པདྨ་ལས། །ཡབ་འདྲའི་མདོག་ཅན་གཙོ་མོའི་ཚུལ། །དཀར་སེར་དམར་དང་ལྗང་བ་ཡིས། །ཚོགས་བདག་སྟེང་དུ་རོལ་པར་བཞུགས། །ཞི་རྒྱས་དབང་དྲག་མངོན་སྤྱོད་གྲུབ། །དགྲ་ཕྱོགས་བགེགས་གདུག་སོགས་བརྒྱད་དམ། །བཅུ་ཕྲག་སྣ་ཚོགས་མཆོད་སྤྲིན་ཅན། །སྒོ་བཞིའི་པད་ཉི་རོ་ཡི་སྟེང་། །ཀྵེ་ཏྲ་པ་ལ་གྲི་ཐོད་འཛིན། ཛི་ན་མི་ཏྲ་བེང་དང་ཐོད། །ཊཀྐི་རཱ་ཛ་ལྕགས་ཀྱུ་ཐོད། །གཏུམ་པོ་ཏྲཀྴད་མདུང་ཞགས་འཛིན། །འཁྱམས་ལ་ཕྱོགས་སྐྱོང་རྒྱལ་ཆེན་ཏེ། །ཕྱོགས་བཞི་ནང་གི་རིམ་པ་ལ། །དེ་ཕྱིར་ལྷ་ཆེན་འཇིགས་བྱེད་དགུ། །ཀླུ་དང་གཟའ་སྟེ་སོ་གསུམ་པོ། །དེ་ཕྱིར་རྒྱུ་སྐར་ཉི་ཤུ་བརྒྱད། །གཙང་རིགས་མགོན་པོ་བདུན་བཅུ་ལྔ། །སྣ་ཚོགས་མཛེས་པའི་བརྒྱན་གྱིས་སྤྲས། །ཕྱི་རོལ་འཁོར་ཡུག་དུར་ཁྲོད་བརྒྱད། །སྐུ་གསུང་ཐུགས་དང་ཡོན་ཏན་དང་། །འཕྲིན་ལས་སྤྲུལ་པ་མཁའ་འགྲོའི་ཚོགས། །མཐིང་དཀར་སེར་དང་དམར་བ་ཡི། །དམ་ཅན་རྒྱ་མཚོ་འཇིགས་གཟུགས་ཅན། །ལྷ་སྐུ་སྒྲིབ་བྲལ་འོད་གཟུགས་ཀྱིས། །དཔྲལ་མགྲིན་སྙིང་ལྟེ་གསང་བའི་གནས། །ཨོཾ་དཀར་སྐུ་དང་ཨཱཿདམར་གསུང་། །ཧཱུྃ་མཐིང་ཐུགས་སོགས་ཡོན་ཏན་སེར། །ཧ་ལྗང་ཕྲིན་ལས་ལྔ་ཡིག་ནི། །མདུན་རྒྱབ་ངེས་པའི་རྟགས་བརྒྱའོ། །འཕྲོ་འདུས་འོད་ཟེར་མཐའ་ཡས་ཀྱིས། །ཡེ་ཤེས་སྤྱན་དྲངས་གཉིས་མེད་ཐིམ། །སྐུ་དང་ཡེ་ཤེས་ལྔ་ལྡན་དུ། །རིགས་ལྔས་རྒྱས་བཏབ་དབང་བསྐུར་བ། །སྤྱི་བོར་མི་བསྐྱོད་ལ་སོགས་ལྔ། །ཐུགས་ཀར་པད་ཉི་ཟླ་ཧཱུྃ་མཐར། །ཨོཾ་བཛྲ་མ་ཧཱ་ཀཱ་ལ་ཀྴིཾ་ཀྵེ་ཏྲ་བིགྷྣན་བི་ནཱ་ཡ་ཀ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་ཀྵེ་ཏྲ་པ་ལ་བིགྷྣན་ཧཱུྃ་ཕཊ། བུདྡྷ་རཏྣ་པདྨ་དང་། །བཛྲ་ཀརྨ་རུ་བསྟན་བཞིན། །ཐབས་བསྒྱུར་སྔགས་དང་ཤེས་རབ་འགྱུར། །ཞལ་ཤེས་རིན་ཆེན་རྣལ་འབྱོར་པ། །སྤྲུལ་བསྒྱུར་སྔགས་ཤམ་ལྡན་པ་ཡིས། །སངས་རྒྱས་བསྟན་པ་དར་རྒྱས་སྤེལ། །དཀོན་མཆོག་དབུ་འཕངས་བསྟོད་པ་དང་། །སེམས་ཅན་ཕན་བདེར་འགོད་པ་སོགས། སྔགས་ཀྱི་འོད་ཟེར་ཕྲེང་བ་ཅན། །ཞི་རྒྱས་དབང་དྲག་སྣ་ཚོགས་ལས། །གང་དགོས་ཡིད་བཞིན་མྱུར་དུ་འགྲུབ། །ལོག་ལྟ་ཐེ་ཚོམ་རབ་སྤངས་ནས། །དད་མོས་ས་བཅུ་རབ་གུས་ལྡན། །བསྙེན་སྒྲུབ་དམ་ཚིག་ལ་གནས་ཤིང་། །བྱང་ཆུབ་སེམས་དང་ལྡན་པ་སྟེ། །བཀྲ་ཤིས་བདེ་ལེགས་ལྡན་པར་འགྱུར། །གསང་སྒྲུབ་རིམ་པ་དམ་པའོ།
།ཤ་བ་རི་པས་མཛད་པ་རྫོགས་སོ།། །།