Edit Text: Tshogs rnams kyi zur 'debs kyi zhal shes shin tu gsang ba'i yig chung rnams

You do not have permission to edit this page, for the following reason:

The action you have requested is limited to users in one of the groups: Administrators, editor.

Text ID:	Sup24
Tibetan Title:	ཚོགས་རྣམས་ཀྱི་ཟུར་འདེབས་ཀྱི་ཞལ་ཤེས་ཤིན་ཏུ་གསང་བའི་ཡིག་ཆུང་རྣམས།
Wylie Title:	tshogs rnams kyi zur 'debs kyi zhal shes shin tu gsang ba'i yig chung rnams
Other titles:
Topics:
Sub-Topics:
Author:
Associated Person:
BDRC link:
Classification:
Notes:
Translation File (French):	Upload file
Translation File (English):	Upload file
Translation Access Level:

Free text:

མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པའི་ལས། ཚོགས་རྣམས་ཀྱི་ཟུར་འདེབས་ཀྱི་ཞལ་ཤེས་ཤིན་ཏུ་གསང་བའི་ཡིག་ཆུང་རྣམས་བཞུགས་སོ།། དུས་གསུམ་རྒྱལ་བ་ཀུན་གྱི་འཕྲིན་ལས་ནི། །གང་འདུལ་ཐབས་ཀྱིས་གྲགས་པོའི་སྐུར་བསྟན་ནས། །བསྟན་པའི་དགྲ་བགེགས་མ་ལུས་ཚར་གཅོད་པའི། །མྱུར་མཛད་ནག་པོ་ཆེ་ལ་ཕྱག་འཚལ་ལོ། །གཏོར་ཆེན་གྱི་མཎྜལ་དང་འགྲེལ་བའི་བསྐྱེད་ཆོག་ནི། ཧྲཱིཿཥྚཱིས་གསང་། སྭ་བྷ་ཝས་སྟོང་པར་སྦྱངས། སྟོང་པའི་ངང་ལས་མདུན་ཀྱི་གནས་འདིར་དུར་ཁྲོད་ཆེན་པོ་བསིལ་བའི་ཚལ་དུར་ཁྲོད་ཀྱི་མཚན་ཉིད་ཐམས་ཅད་ཡོངས་སུ་རྫོགས་པའི་ཙན་དན་གྱི་ནགས་ཚལ་འཁྲིགས་པའི་དབུས་སུ་ཤིང་ཙན་དན་རྐང་གཅིག་པའི་དྲུང་དུ། ཨེ་ལས་སྐྱེས་པའི་ཆོས་འབྱུང་མཐིང་ནག་ཆེར་འབར་བ། རྩེ་མོ་ཕྲ་བ་ཐུར་དུ་ཟུགས་པ། གདེངས་ཀ་ཆེ་བ་གྱེན་དུ་ཕྱོགས་པ་ཡངས་ཤིང་རྒྱ་ཆེ་བའི་མཐིལ་དུ་ཀཾ་དམར་པོ་ཡོངས་སུ་གྱུར་པ་ལས། གསད་ཁང་ནག་པོ་གྲུ་གསུམ་པ་ཕྱི་ནག་ལ་ནང་རྩུབ་ཅི་དམར་བ། ནག་པོ་བདུད་ཀྱི་བཙོན་ཁང་། དམར་པོ་བཙན་གྱི་བཤའ་ར། མེ་དང་ཆུ་རླུང་འཁྲུག་པ། ཕྱི་ན་ཞེང་གི་མེ་འབར་བ། ནང་ན་གཏི་མུག་གི་མུན་པ་འཁྲིག་པ། ཟུར་ན་འདོད་ཆགས་ཀྱི་ཁྲག་མཚོ་ཁོལ་བ། སྟོང་ན་ང་རྒྱལ་གྱི་ཐོག་འབབ་པ། འོག་ན་ཕྲ་དོག་གི་རླུང་དམར་འཚུབ་པ། ནད་དང་མཚོན་ཆ་སྣ་ཚོགས་ཀྱི་ཆར་འབབ་པ། རླུང་ནག་འཚུབ་མ་ཕྱི་ནང་མེད་པར་གཡོ་བ། མེ་རབ་ཏུ་འབར་བ། གཤིན་རྗེའི་གྲོང་ཁྱེར་དང་རིགས་དྲུག་གི་དུར་པ། བསོད་བསོད་རྒྱོབ་རྒྱོབ་ཀྱི་སྒྲ་ཆེན་པོ་སྒྲོག་པ། ཞབས་མནར་མེད་རྡོ་རྗེ་གདན་ལ་ཐུག་པ། ཤིན་ཏུ་ཡངས་པ་འཇིགས་སུ་རུང་བའི་ནང་དུ། དགྲ་དང་བགེགས་ཐམས་ཅད་ཀྱི་རྣམ་པར་ཤེས་པའི་ངོ་བོ་ནྲི་དང་ཏྲི་ཡོངས་སུ་གྱུར་པ་ལས། དམ་ཉམས་པའི་དགྲ་བགེགས་ཐམས་ཅད་སྐྱ་བ་རིད་པ། ཧཾ་ས། མདངས་ཉམས་པ་ཡིད་མུག་པ། ཁ་ངུ་བ། སྐྲ་ཟེ་བ། ལག་པ་གཉིས་མྱ་ངན་གྱི་ཕྱག་རྒྱ་ཅན། རྐང་ལག་ཐམས་ཅད་ལྕགས་སྒྲོག་གི་བཅིངས་པ། མགོན་མེད་པ། ལྷ་དང་བྲལ་བ། འདར་ཕྲི་ལི་ལི། དབང་པོ་ཐམས་ཅད་ནག་ཀམ་ཀམ་པ་བསྐལ་པ་སྟོང་གི་བར་དུ་ཐར་དུས་མེད་པ། ལྕེ་བྲང་གི་རྒྱ་མདོར་སླེབ་པ། སྙིང་ཀར་ནྲི་དང་ཏྲི་ཛས་མཚན་པ། ཁ་ནས་ཁྲག་འཛག་ཅིང་སིད་སྒྲ་འབྱིན་པ། དྲི་ཆེན་དྲི་ཆུ་ལུད་པ་འཆོར་ཞིན། མཚན་མ་འཕྱང་བ། གཅེར་བུ་གོས་དང་བྲལ་བ། ན་བུན་རླུང་གི་སྐྱོད་པ་ལྟར་འདར་ཕྲིལ་ལི་ལི་སྤྱི་གཙུགས་སུ་གནས་པ། ༈ དེའི་སྟེང་པདྨ་ཅེས་སོགས་གཞུང་བཞིན་བསྐྱེད་ནས། སྤྱན་འདྲེན་གྱི་དམིགས་པ་ནི། རང་གི་ཐུགས་ཀའི་ཧཱུྃ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱི་ཤར་ལྷོ་བསིལ་བ་འཚལ་གྱི་དུར་ཁྲོད་ཤིང་ཙན་དན་རྐང་གཅིག་པའི་དྲུང་གི་ཡེ་ཤེས་མགོན་པོའི་ཐུགས་ཀར་ཕོག །ཐུགས་རྒྱུད་བསྐུལ། འཁོར་གནོད་སྦྱིན་ལྷ་མོ་དང་བཅས་པ་སྤྱན་ཧྲིག་ཧྲིག་གཟིགས་པས། གནོད་སྦྱིན་བཞི་ལྷ་མོ་དང་བཅས་པ། དཔལ་མགོན་བདུན་བཅུ་རྩ་ལྔ་དམ་ཅན་རྒྱ་མཚོའི་དམག་ཚོགས་གཡས་སུ། གཡོན་དུ་དཔའ་མོ་རྒྱ་མཚོ་ཐམས་ཅད་ཀྱང་ཌ་མ་རུ་དང་གཡེར་ཁའི་སྒྲ་སིལ་ལི་ལི། ཁྲོལ་ལོ་ལོ། འུར་འུར་ཆེམ་ཆེམ་གར་མཛད་ཅིང་བྱོན་པར་བསམ་ནས་ཧཱུྃ་ཞེས་སོགས་ཀྱི་སྤྱན་དྲངས། ༈ ཧཱུྃ་དྲུག་གི་དམིགས་ནི། ངག་ཏུ་གཏོར་མའི་སྟེང་དུ་ཧཱུྃ་རེ་རེ་གནས་པར་གྱུར། རང་གི་ཐུགས་ཀའི་ཧཱུྃ་དང་། མདུན་གྱི་མགོན་པོའི་ཐུགས་ཀའི་ཧཱུྃ་དང་གཏོར་ཆུང་གི་སྟེང་གི་ཧཱུྃ་གསུམ་ལས་འོད་ཟེར་ཕྱོགས་བཅུར་འཕྲོས་པས། དགྲ་བགེགས་ཐམས་ཅད་གནོད་སྦྱིན་ཀྵེ་ཊ་པ་ལ་སོགས་པའི་ལྕགས་ཀྱུ་ཅན་རྣམས་ཀྱི་སྙིང་ཁ་ནས་བཟུང་། གནོད་སྦྱིན་ཊཀྐི་རཱ་ཛཱ་ལ་སོགས་པའི་ཞགས་པ་ཅན་རྣམས་ཀྱིས་མགྲིན་པ་ནས་བཅིངས་ནས་གནས་གང་དུ་ཡོད་ཀྱང་རང་དབང་མེད་པར་བཀུག་པ་དང་། དཔའ་བོ་དང་དཔའ་མོ་རྣལ་འབྱོར་མ་རྣམས་ཀྱིས་ཐུགས་ཀ་ནས་བྱང་ཆུབ་ཀྱི་སེམས་ཀྱིས་རང་བཞིན་བདུད་རྩིའི་རྣམ་པ་ཅན་དཔག་ཏུ་མེད་པ་དང་། འཁོར་འདས་ཀྱི་བདེ་སྐྱིད་ལྷ་མིའི་དཔལ་འབྱོར། མདོར་ན་འཇིག་རྟེན་དང་འཇིག་རྟེན་ལས་འདས་པའི་བདུད་རྩི་ཐམས་ཅད་བཀུག་ནས་དམ་ཚིག་གི་བདུད་རྩི་དབྱེར་མེད་དུ་གྱུར། ཧཱུྃ་བཀུག་པའི་དགྲ་བགེགས་བསྐྱེལ་ཏེ་འགྲེལ་བ་ལས་གཏི་མུག་ཤའི་རི་བོ། འདོད་ཆགས་ཁྲག་གི་རྒྱ་མཚོ། ཞེང་རུས་པའི་དགྲ་ཁྱོད་ཀྱི་དཀྱིལ་མེར་མེར། མགོན་པོ་འཁོར་དང་བཅས་པ་ཐམས་ཅད་ཀྱི་ལྗགས་རྡོ་རྗེ་རྩེ་གཅིག་པ་དམར་པོའི་འོད་ཀྱི་སྦུ་གུས་སིབ་སིབ་གསོལ་བར་གྱུར། ཧཱུྃ་བཞི་བརྗོད། མགོན་པོའི་སྤྱི་གཙུག་ཏུ་ཧཱྃ་མཐིང་ནག་མེའི་འོད་ཟེར་རབ་ཏུ་འཕྲོ་བ། སྟོང་གསུམ་ཐམས་ཅད་འོད་ཟེར་གྱིས་གང་བ་གཅིག་ཏུ་གྱུར། ཧཱུྃ་ཧཱུྃ་དེ་ལས་འོད་ཟེར་དྲག་པོ་ཕྱོར་བཅུར་འཕྲོས་པས་དགྲ་བགེགས་བདུག་པ་ཅན་ཐམས་ཅད་ཚར་བཅད། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྒྱུད་བསྐུལ་ནས། དེ་དག་ཐམས་ཅད་ཤིན་ཏུ་འཕྲོས་པའི་གཤིན་རྗེ་གཤེད་ཀྱི་རྣམ་པར་སྤྱན་དྲངས་ནས་མགོན་པོའི་སྤྱི་གཙུག་གི་ཧཱུྃ་ལ་ཐིམ་པར་གྱུར། ཧཱུྃ་དེ་མགོན་པོ་འི་སྤྱི་གཙུག་ནས་ཞུགས་ཏེ། མགྲིན་པར་སླེབ་པ་ན་བཅོམ་ལྡན་འདས་འཇམ་དཔལ་གཤིན་རྗེ་གཤེད་སྐུ་མདོག་མཐིང་ནག་མཐིང་དཀར་དམར་བའི་ཞལ་གསུམ་ཕྱག་དྲུག་གི་གཡས་ཀྱི་དང་པོ་ན་བེ་ཅོན། གཉིས་པ་ན་རལ་གྲི། གསུམ་པ་ན་དགྲ་སྟ། གཡོན་གྱི་དང་པོས་སྡིགས་འཛུབ། གཉིས་པ་ན་མདུང་རྩེ་གསུམ་པ། གསུམ་པ་ན་བ་དན་དམར་པོ་བསྣམས་པ། ཡུམ་བེཏྟ་ལི་སྐུ་ལ་འཁྲིལ་བའི་ཞབས་བཞི་དོར་སྟབས་ཀྱི་ཚུལ་དུ་བསྒྲད་པ། སྤྱན་དགུ་དང་ཞལ་སྒྲད་ཅིང་རྣོ་རྡུག་གི་མཆེ་བ་ཟུར་གསུམ་གཙིགས་པ་སྤྱན་རྣམས་དུས་མཐའ་ཡི་མེ་ལྟར་འབར་བ། དབུ་སྐྲ་ཁམ་སེར་གྱེན་དུ་རྫེས་ཤིང་ཐོད་པ་སྐམ་པའོ་ལྔའི་དབུ་རྒྱན་དང་། རློན་པ་ཁྲག་འཛག་པ་ལྔ་བཅུའི་དོ་ཤལ་བྱས་པ། གླང་ཆེན་གྱི་ཀོ་རློན་དང་། ཞིང་ཆེན་གྱི་གཡང་གཞི་དང་། སྟགས་ལྤགས་ཀྱི་ཤམ་ཐིབས་སོགས་དུར་ཁྲོད་ཀྱི་ཆས་བརྒྱད་ཀྱི་བརྒྱན་པ། ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བརྗིད་ཅིང་བརྔམ་པའི་སྟབས་ཀྱིས་བཞུགས་པར་གྱུར། ཧཱུྃ་ཕཊ། གཤིན་རྗེ་གཤེད་ཆེར་སོང་མགོན་པོ་ཡང་ཆེར་སོང་སྟེ། ས་དང་བར་སྣང་ཐམས་ཅད་གང་སྟེ་མགོན་པོ་དང་དབྱེར་མེད་དུ་འདྲེས་པ་ལས་འཇིག་རྟེན་གསུམ་ན་ང་ལས་ནུས་མཐུ་ཆེ་བ་མེད་མཉམ་པའི་ང་རྒྱལ་གྱིས། གཟི་བརྗིད་ཆེ་བ་མེད་པའི་སྲིད་པ་གསུམ་པོ་ཐམས་ཅད་ཟིལ་གྱིས་མནོན་པའི་མཐུ་སྟོབས་ནུས་པ་དང་ལྡན་པར་གྱུར། ༧ ཡེ་ཤེས་མགོན་པོ་ཕྱག་དྲུག་པའི་ལས་དྲུག་བཤད་པའི་སྐབས་སུ་ཁྱུང་པོའི་ཡིག་ཆུང་གི་དོན་མཁས་གྲུབ་ཐམས་ཅད་མཁྱེན་པས་ལེགས་པར་བཤད་པ་རྣམས་བློ་དམན་པ་དག་གི་བླང་བདེ་བའི་ཕྱི་ཅུང་ཟད་བརྗོད་ན། ཧཱུྃ། དམ་ཉམས་དགྲ་བགེགས་སྒྲལ་བའི་རོ་སྐྲ་ལས། །བྱུང་བའི་རྡོ་རྗེ་ཞགས་པ་ནག་པོ་འདིས། །གདོན་བགེགས་འགུགས་ཤིང་འཆིང་ལ་རབ་སྔགས་པ། །མྱུར་མཛད་ནག་པོ་ཆེན་པོའི་ཕྱག་ཏུ་འབུལ། །ཞེས་ནས་བསྟན་པ་ཤིག་པའི་དགྲ་བགེགས་རྣམས། །བཅིངས་ནས་མྱུར་དུ་འགུགས་པའི་འཕྲིན་ལས་མཛོད། ཅེས་བསྐུལ། རང་དང་མགོན་པོའི་ཐུགས་ཀའི་ཧཱུྃ་ལས་འོད་ཟེར་ལྕགས་ཀྱུ་ལྟ་བུ་འཕྲོས་ཤིང་། མགོན་པོའི་ཕྱག་གཡོན་ཞགས་པ་འཛིན་པའི་སྡིག་འཛུབ་གྱིས་རྩེ་ལས་ཁྲོ་བོ་རབ་ཏུ་བརྔམ་ཤིང་རླུང་གི་ཤུགས་ཅན་ཕྱག་གཉིས་གྱིས་ཞགས་པ་འཛིན་པ་དཔག་ཏུ་མེད་པ་སྤྲོས་སྟེ་དམིགས་པའི་དགྲ་བགེགས་གང་ཡིན་པའི་གནས་སུ་སོང་ནས་འོད་ཟེར་གྱི་ལྕགས་ཀྱུ་སྙིང་ཀར་བཏབ། ཁྲོ་བོ་རྣམས་ཀྱི་མགྲིན་པ་ནས་ཞགས་པས་བཅིངས་ནས་སྒྲུབ་བྱ་གཅེར་བུ་གོས་དང་བྲལ་བ་དེ་སོད་གཅིག་རྒྱོབ་གཅིག་ལ་སོགས་པའི་དགྲ་དྲག་པོ་སྒྲོགས་ཤིང་ཐོགས་པ་མེད་པར་ཁྲིད་འོངས་ཏེ། གཏོར་ཆུང་རྣམས་ཀྱི་སྟེང་དུ་གཏོར་སྣོད་ནང་དུ་རང་ལ་རྒྱབ་བསྟན། མགོན་པོ་ལ་མདུན་བསྟན་ནས་འདར་ཧེ་ཧེད་འདུག་པར་གྱུར། ཨོཾ་བཛྲ་མ་ཧཱ་ཀཱ་ལ་ཅེས་པ་ནས་བི་ན་ག་ཡ་ག་དགྲ་བགེགས། ཆཻ་མོ་ས་ཤ་བྷནྡྷ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཅེས་ཉེར་གཅིག་ཙམ་རེ་རོལ་མོའི་སྒྲ་དྲག་པོ་དང་བཅས་དམིགས་པ་བརྟན་པོས་ཁུག་པར་བསམ་མོ། །ཧཱུྃ། བསྟན་དགྲ་དམ་ཉམས་དགྲལ་བའི་ཐོད་པ་ལས། །བྱུང་བའི་ཅང་ཏེའུ་སྟོང་གསུམ་གཡོ་བྱེད་པ། །དགྲ་བགེགས་མྱོས་ཤིང་འབོག་ལ་བསྔགས་པ་འདིས། ༴ །ཡིད་སྨྱོས་དྲན་པ་ཉམས་པའི་འཕྲིན་ལས་མཛོད། ཅེས་བསྐུལ་ནས། མགོན་པོའི་ཕྱག་གཡས་ཀྱིས་མཐའ་མས་ཌ་མ་རུ་དྲག་ཏུ་དཀྲོལ་བས་དགྲ་བགེགས་ཀྱི་ཡིད་སྨྱོས་དྲན་པ་ཉམས་མགོ་འཁོར་དབང་པོའི་སྒོ་ཐམས་ཅད་ནས་ཁྲག་གི་རྒྱུན་ན་ར་ར་བྱུང་བར་གྱུར། ཆཻ་མོ་སྒྲ་མ་ཀུ་རུ་མུརྩ་ཡ། ཅེས་ཉེར་གཅིག་འདྲེ། ཧཱུྃ། གནམ་ལྕགས་ལས་གྲུབ་འཇིགས་རུང་རྩེ་གསུམ་འདི། །ཁྲག་དང་དུག་གི་ངར་བླུད་སྙིང་པོས་མཚན། །གནས་གསུམ་བསྣུན་ནས་བསོད་ལ་བསྔགས་པ་འདིས། ༴ །ཞེས་ནས་བསྟན་པ་ཤིག་པའི་དགྲ་བགེགས་འདིའི། །གནས་གསུམ་བསྣུན་ལ་བསོད་པའི་འཕྲིན་ལས་མཛོད། ཅེས་བསྐུལ་ནས། མགོན་པོ་ཁྲོས་འཁྲུག་བརྔམས་ནས་ཕྱག་གཡོན་གྱིས་རྩེ་གསུམ་འཛིན་པས་དགྲ་བགེགས་ཀྱི་གནས་གསུམ་དུ་བསྣུན་ནས་བསོད་པའི་འཕྲིན་ལས་མཛད་པར་གྱུར། ཆཻ་མོ་མཱ་རཱ་ཡ་ཧ་ན་ཧ་ན་ཅེས་སོགས། ཧཱུྃ། གྲི་ལྕགས་ལས་བགྱིས་རྡོ་རྗེ་གྲི་གུག་འདི། །ཁྲག་དང་དུག་གི་ངར་བླུད་སྙིང་པོས་མཚན། །དམ་ཉམས་སྲོག་རྩ་གཅོད་ལ་བསྔགས་པ་འདིས། ༴ །སྲོག་རྩ་མྱུར་དུ་གཅོད་པའི་འཕྲིན་ལས་མཛོད། ཅེས་བསྐུལ་ནས། མགོན་པོའི་ཕྱག་གཡས་ཀྱིས་དང་པོའི་གྲི་གུག་གིས་བསྒྲུབ་བྱའི་བྲང་གཤགས་ཏེ་སྲོག་རྩ་རྦད་ཀྱི་བཅོད་པར་གྱུར། ཆཻ་མོ་མཱ་རཱ་ཡ་ཅེས་སོགས། ཧཱུྃ། དམ་ཉམས་དགྲ་བགེགས་བསྒྲལ་བའི་མགོ་བོ་ཡི། །འཕྲེང་བ་རྒྱུ་སྐར་དོ་ཤལ་དང་མཚུངས་ཤོག །མངོན་སྤྱོད་རྩིས་ལ་འདེབས་པར་བྱེད་པ་ཡི། །ཁྲག་གི་རྒྱུན་འཛག་ཐོད་པའི་འཕྲེང་བ་འདིས། ༴ །མངོན་སྤྱོད་རྩིབས་ལ་བཏབ་ནས་ཤ་ཁྲག་རྣམས། །མྱུར་དུ་ཞལ་དུ་གསོལ་བའི་འཕྲིན་ལས་མཛོད། ཅེས་བསྐུལ་ནས། མགོན་པོའི་ཕྱག་གཡས་ཀྱི་བར་པའི་ཕྲེང་བ་འཛིན་པས་དགྲ་བགེགས་ཀྱི་དོན་སྙིང་ལྔ་ཕྱུང་ནས་ཞལ་དུ་དམར་རྩིར་རྩིར་གསོལ་བར་གྱུར། ཆཻ་མོ་མཱ་ར་ཡ་རྦད་རྦད་ཅེས་སོགས། ཧཱུྃ། དམ་ཉམས་དགྲ་བགེགས་བསྒྲལ་བའི་ཐོད་ནང་དུ། །དགྲ་བགེགས་སྙིང་དང་སྙིང་ཁྲག་དྲོ་མེ་དང་། །གླང་ཆེན་ལ་སོགས་ཤ་ཁྲག་གིས་བཀང་སྟེ། །ཤ་ཁྲག་ཞལ་དུ་གསོལ་བའི་འཕྲིན་ལས་མཛོད། ཅེས་བསྐུལ་ནས། མགོན་པོའི་ཕྱག་གཡོན་གྱི་དང་པོའི་ཐོད་པའི་ནང་དུ་དགྲ་བགེགས་ཤ་ཁྲག་གིས་གང་བ་ཕྲེང་བ་འཛིན་པས་སིབ་སིབ་གསོལ་བར་གྱུར། མཱ་ར་ཡ་ཁ་ཁ་ཁཱ་ཧི་ཁཱ་ཧི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཅེས་ཉེར་ཅིག་བརྗོད། ༧ དེ་ནས་མྱུར་མཛད་ཡེ་ཤེས་ཀྱི་མགོན་པོ་མ་གཡེལ་ཅིག་ཅེས་བརྗོད་ནས་གཏོར་སྔགས་ཀྱིས་དལ་བུས་ཉེར་ཅིག་འབུལ་ལོ། ཧཱུྃ། ཁྱབ་བདག་རྡོ་རྗེ་འཆང་དབང་[[Shavaripa|ཤ་ཝ་རི]]། །[[Maitripa|མཻ་ཏྲི་]][[Rahula|ར་ཧཱུ་]][[Khyungpo Neljor|ཁྱུང་པོ་རྣལ་འབྱོར་]]དང་། །[[Mokchokpa Rinchen Tsöndrü|རིན་ཆེན་བརྩོན་གྲུས་]][[Öntön Kyergangpa|དབོན་སྟོན་སྐྱེར་སྒང་པ]]། །[[Sangyé Nyentön|སྦས་པའི་རྣལ་འབྱོར་]][[Sangyé Tönpa|སངས་རྒྱས་སྟོན་པ་]]དང་། །[[Tsangma Shangtön|མཁས་གྲུབ་ཤངས་སྟོན]][[Müchen Gyeltsen Pelsang|་མུས་ཆེན་རྒྱལ་མཚན་དཔལ]]། །[[Dorjé Shönu|རྡོ་རྗེ་གཞོན་ནུ་]][[Müchen Namkhé Neljor|ནམ་མཁའི་རྣལ་འབྱོར་]]དང་། །རྒྱལ་བའི་དབང་པོ་[[Tsongkhapa|ཀུན་མཁྱེན་གཙོང་ཁ་པ]]། །[[Gelek Pelsang|མཁས་གྲུབ་ཆོས་རྗེ་]][[Zangpo Gyeltsen|བཟང་པོ་རྒྱལ་མཚན་]]དང་། །[[Sektön Künga Gyeltsen|ཀུན་དགའ་རྒྱལ་མཚན་]][[Dalaï Lama Gendün Gyamtso|དགེ་འདུན་རྒྱ་མཚོ]]འི་དཔལ། །སྐུ་བཞིའི་བདག་ཉིད་ཆོས་ཀྱིས་རྒྱལ་མཚན་སོགས། །དངོས་རྒྱུད་བླ་མ་རྡོ་རྗེ་འཆང་རྣམས་ཀྱིས། །དམ་ཚིག་རྡོ་རྗེ་སྤྱི་བོར་བཞག་ནས་ཀྱང་། །སངས་རྒྱས་བསྟན་པ་ཁྱོད་ཀྱིས་བསྲུངས་ཤིག་ཅེས། །དཀོན་མཆོག་དབུ་འཕངས་ཁྱོད་ཀྱིས་བསྟོད་ཅིག་ཅེས། །རྣམ་དག་དགེ་འདུན་སྡེ་རྣམས་སྐྱོངས་ཤིག་ཅེས། །རྣལ་འབྱོར་བཅོལ་བའི་ལས་འདི་སྒྲུབས་ཤིག་ཅེས། །བཀའ་ལ་བཏགས་པ་ཡིན་ནོ་བཀའ་བཞིན་སྒྲུབས། །དམ་ཚིག་ཕྱག་རྒྱ་མིག་ལ་བསྟན་ནས་ཀྱང་། །སངས་རྒྱས་ཅེས་སོགས་འདྲེ། །རྡོ་རྗེ་ཐ་ཚིག་རྣ་བར་སྒྲགས་ནས་ཀྱང་། །སངས་རྒྱས་དང་༴ །རྡོ་རྗེའི་གནའ་ཆུ་ལྕེ་ལ་བཞག་ནས་ཀྱང་། །སངས་རྒྱས་༴ སྔོན་གྱི་ཁས་སླངས་དམ་ཚིག་མ་བསྙེལ་བར། ༴ཁྱོད་ཀྱིས་བསྲུངས། །ལྷ་ཁྱོད་བསྟེན་པའི་ཚེ་ན་སྙིང་མ་རིང་། །ནག་པོ་གཡབ་པའི་ཚེ་ན་སྤྱན་མ་ཏུལ། །དགྲ་ལ་བསྐུལ་བའི་ཚེ་ན་བང་མ་ཕུལ། །སྟོབས་ལྡན་མང་པའི་ཚེ་ན་རྩལ་མ་གཞན། །ནག་པོ་ལས་ལ་རྦད་དུས་མཐུ་མ་ཆུང་། །ཁུག་ཅིག་ཁུག་ཅིག་དམ་ཉམས་དགྲ་བོ་འདི། །བསོད་ཅིག་བསོད་ཅིག་བསྟན་དགྲ་སྡིག་ཅན་འདི། །ཟོ་ཤིག་ཟོ་ཤིག་བློ་སྙིང་ཤ་རུས་རྣམས། །མཐུང་ཅིག་མཐུང་ཅིག་སྙིང་ཁྲག་དྲོ་མོ་འདི། །གསོལ་ལོ་མཆོད་དོ་མྱུར་མཛད་མགོན་པོའི་ཚོགས། །སྒྲུབ་ཤིག་སྒྲུབ་ཤིག་ལས་འདི་མྱུར་དུ་སྒྲུབས། ཅེས་ལས་དྲུག་དང་མནན་བསད་ཀྱིས་གཏོར་ཆུང་འབུལ་བའི་གོང་དུ་བརྗོད་པ་ཡིན་ནོ། །གཏོར་ཆེན་གྱིས་མཎྜལ་དང་འགྲེལ་བའི་བསྐྱེད་ཆོག་དང་བསྐུལ་འདི་རྣམས་ཐུགས་དམ་པ་རྣམས་ཀྱིས་བསྐུལ་བའི་ངོར། ཆོས་སྨྲ་བའི་བཙུན་པ་[[Dalaï Lama Gendün Gyamtso|དགེ་འདུན་རྒྱ་མཚོ]]འི་དཔལ་གྱིས་ཆོས་འཁོར་རྒྱལ་བཀྲ་ཤིས་ལྷུན་གྱིས་གྲུབ་པའི་ཕྲེང་དུ་སྦྱར་བའོ། ༒ མྱུར་མཛད་ཡེ་ཤེས་མགོན་པོ་ཕྱག་དྲུག་པའི་གཏོར་ཆེན་གྱི་ཟུར་འདེབས་བཞུགས་སོ། བླ་མ་དང་མགོན་པོ་དབྱེར་མེད་པ་ཕྱག་འཚལ་ལོ། །གཏོར་ཆེན་གྱིས་ཟུར་འདེབས་ནི། དཀྱིལ་འཁོར་འཁོར་དང་འབྲེལ་བའི་གཏོར་མའི་བཤམས་ཚུལ་ནི། མཎྜལ་གྱི་ཁ་ཁྱེར་ལ། ཕྱོགས་བཞིར་གནོད་སྦྱིན་བཞི། འཚམས་བཞིར་ཤར་དུ་ལྷ་མོ་ཕྱག་བཞི་མ། ཤར་ལྷོར་དུས་མཚན་མ། ལྷོ་ནུབ་ཏུ་དཔལ་མགོན་བདུན་བཅུའི་གཏོར་མ་གྲུ་གསུམ་པ། ནུབ་བྱང་དམ་ཅན་རྒྱ་མཚོའི་གཏོར་མ་གྲུ་གསུམ་པ་གཉིས་ཀའང་ཐོག་གི་འདེའུ་ལྟར་བྱེད་པ་ཡིན་སྔགས་ཀྱི་རྒྱུན་དང་སྐང་བའི་རྒྱུན་མ་ཆག་པ་གལ་ཆེ། བསྐང་བའི་རྒྱུན་གྱི་འཁུ་ལྡོག་ཆུང་ཞིང་ལས་མྱུར་བའི་གནད་ཡོད། ཉིན་མཚན་ཐུན་དྲུག་གི་ཐུན་གྱི་འཇུག་ཏུ་ལས་དྲུག་གིས་དམིགས་པས་ལིང་ག་དང་། གཏོར་ཆུང་ལ་དགུག་གཞུག་དང་གཟུ་སྤངས་སོགས་ཚིག་རེ་རེ་ལ་ཕྱོགས་གཅིག་ཏུ་སྡེབས་པས་འདོན་ཆ་ལྟར་བྱའོ། །ཐུན་སྔ་མ་མ་བཞག་པར་ཕྱི་མ་མགོ་འཛུགས་ནང་མཆོད་ནས་བརྩམ་པ་ཡིན། སྔགས་ཐུན་པ་ཡང་སྔ་མ་དང་ཕྱི་མ་གཉིས་སྒྲིགས་ཏེ་བསྙེན་པ་དང་བསྐང་བའི་རྒྱུན་ཡང་དེ་ལྟར་བྱའོ། ༧ །ཐུན་ཐ་མར་གཏོར་ཆེན་ཕྱིར་འཁྱེར་རན་པ་ན་ཐུན་ཡོད་པ་རྣམས་ཀྱི་གཏོར་ཆུང་ཉེར་གཅིག་སོང་ཐུན་གཏོར་འབུལ་བ་སོགས་གོང་ལྟར་བྱའོ། །བསྟོད་བསྐུལ་དང་བཟློག་པ་ཟིན་པ་དང་བསྒྲུབ་པ་པོ་ཐམས་ཅད་ཕྱོགས་གཅིག་ཏུ་འཁོད་དེ་གཏོར་ཆེན་གྱི་ལྷ་ནམ་པར་གཏེག་ནས། གཏོར་ཆེན་དང་འཁོར་གྱིས་དགོས་གཏོར་ཐམས་ཅད་གསོ་བྲན་བྱིན་བརླབས་བྱས་ལ་རོལ་མོ་དབྱངས་དང་བཅས་པས། ས་བཅུའི་དབང་ཕྱུག་མགོན་པོ་ནི་ཞེས་པ་ནས་ད་བཅོལ་ལས་ཀྱི་རྟེན་དུ་འབུལ། ཞེས་པའི་བར་ངག་དལ་ཅིང་ང་རྒྱལ་ཤུགས་བརྟན་ནོས་ཡིད་ཆེས་གདུང་ཤུགས་དྲག་པོས་བྱ་བ་ཡིན་ནོ། །དེ་ནས་གཙོ་བོ་ལ་སྙིང་པོ་དང་རྩ་སྔགས་ཕྱེ་མར་བཟླས་པ་བརྒྱ་རྩའམ་སྐབས་དང་སྦྱར་བས་འབུལ། འཁོར་རྣམས་ལ་རང་རང་གི་སྔགས་དང་ཤ་ས་ན་སྦྱར་བ་ཉེར་ཅིག་རེ་ཙམ་གྱིས་འབུལ་ལོ། །དམྱི་པ་དྲག་པོ་བྱ་ཕྱི་ནང་གི་མཆོད། གཏོར་རྫོངས་གིས་རང་གི་དགྲ་བགེགས་སྒྲོལ་བ་ལ་བྲག་བསྲེས་པའི་ཕུད། ནད་པ་ལ་སྨན་ཕུད། རྒྱས་པ་ལ་སོགས་ལ་གསེར་སྐྱེམས་ཀྱིས་མཆོད་དོ། དེ་ནས་ས་བཅུའི་དབང་ཕྱུག་སྤྲུལ་པའི་སྐུ། ཞེས་སོགས་དྲག་པོས། ཁྱོད་ལ་ཞུ་ཞིང་གསོལ་བ་ནི། ཞེས་པ་ནས། བཅོལ་བའི་འཕྲིན་ལས་འགྲུབ་པར་མཛོད་ཅེས་པའི་བར་བརྔམས་བརྗིད་དང་ལྡན་པར་བྱ། དེ་ནས་སྒོ་དབྱེ་ལམ་ཕྱེ་སོང་བྱས་ལ་གཏོར་ཆེན་རྒྱང་རིང་དུ་སྐྱལ་ལོ། །ཆོས་སྐུ་ཡངས་པའི་ཕོ་བྲང་ནས། ས་བཅུའི་དབང་ཕྱུག་མགོན་པོ་ནི། ཞེས་སོགས་མཁའ་འགྲོ་འབུམ་བསྐུལ་དང་བཟློག་པ་བྱ། ལིང་ག་ཡོད་ན་སྦྱིན་སྲེགས་རྒྱས་བསྡུས་བསྐབས་དང་སྦྱར། བསྒྲུབ་པ་པོ་ཐམས་ཅད་གཙོ་བོ་རྐྱང་པས་ཀྱང་རུང་ངོ་། དེའི་རིང་སྔགས་ཐུན་པ་ནང་དུ་བར་མ་ཆད་པ་དགོས་ནང་དུ་སླེབ་དུས་དངོས་གྲུབ་ཞུ་བ་དང་སྔགས་རྒྱུན་བཞག །གཏོར་མ་གསར་པ་ཤིན་ཏུ་བཟང་བ་ཞིག་བཤམས་ནས་འབུལ། ཕྱི་ནང་གིས་མཆེད། གྲུབ་ན་བསྐང་པོ་རྒྱས་པ་ཞིག་བྱ། བསྟོད་པ་མངའ་གསོལ་བྱས་སྟེ་འཇུག་རྣམས་ཆོ་ག་ལྟར་བྱའོ། ༧ །གཏོར་ཆེན་གྱིས་བསྐབས་སུ་འཁོར་བཞིས་ལས་བྱེད་མི་ཉན་པའི་རྟགས་བྱུང་བ་ན། མགོན་པོའི་སྐུའི་གཟི་མདངས་བསྐྱེད་པ་ལ་གཤིན་རྗེ་གཤེད་ཞལ་གསུམ་ཕྱག་དྲུག་པ་ཞལ་གཡས་སྐར། གཡོན་དམར། དབུས་མཐིང་ནག །ཕྱག་དང་པོ་གཉིས་ཀྱིས་ཐོད་པ། བར་པ་གཉིས་རྡོར་དྲིལ། ཐ་མ་གཉིས་རལ་གྲི་དང་པདྨ། སྟག་གི་ཤམ་ཐབས། གླང་ཆེན་གྱི་བསྟོད་གཡོགས། སྦྲུལ་དང་རུས་པའི་རྒྱན་དྲུག་ཅན་ཐོད་པ་སྐམ་རློན་གྱིས་རྒྱན་པའོ། ༧ །སྐབས་དང་སྦྱར་ན་རྡོ་རྗེ་འཇིགས་བྱེད་ཀྱི་སྐུ་ཡོངས་སུ་རྫོགས་པའི། དཔའ་བོ་གཅིག་པ་གང་རུང་བྱས་ན་ལེགས། དེ་ལྟ་བུའི་སྐུའི་གཟི་མདངས་བསྐྱེད་པའི་རྗེས་སུ་མགོན་པོའི་མཆེ་བ་ཡ་སོ་གཉིས་ལ་ཡ་དང་ཀྵེ། མ་སོ་གཉིས་ལ་ཛཿབྷྱོཿབསམ་ལ་མགོན་པོའི་མཆེ་བ་བཞི་རྩིགས་ཤིང་སྤྱང་གསུམ་དྲག་ཏུ་གཟིར་བས་གནོད་སྦྱིན་བཞི་འདར་ཕྱི་ལི་རང་དབང་མེད་པར་ལས་བྱེད་པར་བསམ་མོ། །འདི་མེད་འོར་གྱིས་ལས་མི་བྱེད་གར་ཐཽད་བྱེད་མི་ཉན་ཤིན་ཏུ་མཉན་ནོ། ༧ །གཏོར་ཆེན་གྱིས་དུས་སུ་གཙོ་བོས་ལས་མི་བྱེད་པའི་ཉམས་བྱུང་བ་ན། གནད་དབབ་ཀྱི་བླ་མ་ལ་གསོལ་བ་གདབ། དམིགས་མན་ངག་བཞིན་བྱའོ། །དེ་ནས་རང་ཡི་དམ་དུ་གསལ་བའི་ཐུགས་ཀའི་ས་བོན་དང་བསྔགས་འཕྲེང་ལས་འོད་ཟེར་འཕྲོས་རང་གི་ཞལ་ནས་མགོན་པོའི་ཞལ་དུ་ཞུགས་ཏེ་ཐུགས་ཀའི་ཧཱུྃ་དེ་བླང་སྟེ་་་་བ་ནས་བྱུང་རང་གི་ལྟེ་བ་ནས་ཞུགས། ཐུགས་ཀའི་ཧཱུྃ་ཡིག་ཞབས་ཀྱུ་ལ་ཐིམ་པར་བསམ་ནས་རྩ་སྔགས་བརྒྱ་རྩ་ཙམ་བཟླ། ༧ འཁུ་ལྡོག་བྱེད་པའི་རྟགས་བྱུང་ན་སྲོག་བཅིངས་བ་ནི། རང་གིས་ཐུགས་ཁར་ཧཱུྃ་ཡིག་གི་ཞབས་སུ་མགོན་པོའི་ས་བོན་ཧཱུྃ་ཡིག་མགོ་ཕྱིར་བསྟན་མནན་པ་དང་། དེའི་མཐར་མགོན་པོའི་སྙིང་པོ་མགོ་ཕྱིར་བསྟན་ཉལ་སྟབས་དང་། དེའི་སྟེང་དུ་ཡི་དམ་གྱི་སྙིང་པོ་གྱེན་དུ་ལངས་པ་དང་། ཕྱི་རོལ་དུ་ཨ་ལི་ཀ་ལི་གཉིས་སྒྲགས་ཀྱིས་བསྐོར་བར་བསམ་པ་ཡིན་ནོ། །སྔགས་སྟོང་ཙམ་བཟླ་རང་གི་ལ་རང་གི་ཐུགས་ཀའི་ས་བོན་ལས་འོད་ཟེར་ཚ་ཞིང་ཙུབ་པ་འཕྲོས་ཤིང་རང་གི་ཞལ་ནས་མགོན་པོའི་ཞལ་དུ་ཞུགས། ཐུགས་ཀའི་ཧཱུྃ་ལ་ཕོག་པས་མགོན་པོའི་སྐྲག་མདངས་མཐུ་སྟོབས་ནུས་པ་ཐམས་ཅད་དང་སྲོག་གི་ངོ་བོ་ཧཱུྃ་ཅེར་ཏེ་ལངས། མགོན་པོའི་ལྟེ་བ་ནས་རང་གིས་ལྟེར་ཞུགས་ཏེ་ཐུགས་ཀའི་ཧཱུྃ་ཡིག་གི་གདན་དུ་བྱས་པའི་རང་དབང་མེད་པར་ལས་བྱེད་པར་བསམ། དེས་མ་ཞི་ན་སྙིང་པོའི་འཇུག་ནས་ཡར་བཟློག་ནས་བརྒྱ་རྩ་བརྒྱད་བཟླས། དེ་ལས་མང་ན་མི་ཉན་རང་གི་སྤྱི་བོར་ཡི་དམ་གྱི་སྐུ་རྫོགས་པར་བསྒོམས། དེས་འཁུ་ལྡོག་འབྱུང་མི་སྲིད་ཅིང་ལས་རང་དབང་མེད་པར་བྱེད་དོ། །གཏོར་ཆེན་གྱི་བཟུར་འདེབས་འདི་ནི་[[མཁས་གྲུབ་རིན་པོ་ཆེ]]འི་ཕྱག་ལེན་མངོན་གསུམ་དུ་མཐོང་ཞིང་། གསུང་རྒྱུན་ཞལ་ཤེས་ལག་འཁྲིད་དུ་བྱས་པ་འདི་ནུབ་ཀྱི་དོགས་པས་[[Zangpo Gyeltsen|བཟང་པོ་རྒྱལ་མཚན་]]བདག་གིས་ཡི་གེར་བཀོད་པ་མཁའ་འགྲོ་ཆོས་སྐྱོངས་རྣམས་ཀྱིས་བཟོད་པར་མཛད་དུ་གསོལ། ༈ བླ་མ་དམ་པའི་ཞབས་ལ་ཕྱག་འཚལ་ལོ། །དེ་ཁོ་ན་ཉིད་ཀྱི་བརྟེན་གྱི་སྐབས་སུ། རང་ཉིད་ལྷག་པའི་ལྷ་ཡི་དམ་གང་རུང་དུ་གསལ་ནས། རང་གི་སྙིང་ཀར་གསལ་བའི་ཌ་ཀི་མ་གསལ། དེའི་ཐུགས་ཀར་ཆོས་འབྱུང་གྲུ་གསུམ་གྱི་དབུས་སུ་མགོན་པོ་མཚོན་གང་ཙམ་གཅིག་གསལ་གཏབ་ནས་དེ་ལ་གདུང་ཤུགས་དྲག་པོས་གསོལ་བ་འདེབས་པའོ། ༧ །སྲོག་འཁོར་ཆེན་མོའི་བྲི་ཐབས་ནི། རོ་རས་སམ་ཤོག་བུ་ལ་མགོན་པོའི་སྐུ་ལེགས་པར་བྲིས་ནས། ༡ ཐོག་མར་ལྟེ་བ་ལ་མི་སྤྱོད་པའི་སྐུ་སེར་བཞིའི་གང་བབས་བྲི་དེའི་ཐུགས་ཀར་ཧཱུྃ་བྲིའོ། ༢ དེའི་ཕྱི་མུ་ཁྱུད་གཉིས་པ་ལ་མི་སྤྱོད་པའི་མདུན་ནས་སྔགས་མགོ་ཙམ་སྟེ། ཨོཾ་བཛྲ་མཧཱ་ཀཱ་ལ་ཀྵིཾ་ཀྵེ་ཊ་བྷིག་ནན་བི་ན་ཡ་ཀ་ཧཱུྃ་ཧཱུྃ་ཕཊཿ བདག་བསྒྲུབ་པ་པོ་འདི་ཞེས་བྱ་བ་ལ་ལུས་དང་གྲིབ་མ་བཞིན་དུ་འགྲོགས་ནས་མཆོག་དང་མཐུན་མོང་གི་དངོས་གྲུབ་སྩལ་དུ་གསོལ། ཞེས་པའམ་རིངས་རིག་པས་སྦྱར། དེས་གཞན་རྣམས་ཀྱི་སྔགས་ཀྱི་ཁ་བསྒྱུར་རིག་པས་མཚུངས། ༣ དེའི་ཕྱི་རོལ་མུ་ཁྱུད་ཡང་ས་གཅིག་བསྐོར་ནས་དེའི་ནང་བསྐོར་རྩིབས་བརྒྱད་ལེགས་པར་བྲིས། ཐོག་མར་མདུན་ནས་གསང་བའི་ཌ་ཀི་མ་དམར་མོ་གཡས་གྲི་གུག་གཡོན་ཐོད་ཁྲག །དེ་ནས་རྩིབས་རྣམས་གཡས་བསྐོར་དུ་རིམ་པ་བཞིན་དུ་ལྷ་མོ་ཕྱག་བཞི་མ་དང་ཕྱག་གཉིས་མ། ཀྵེ་ཊ་པ་ལ། དེའི་ཡུམ། ཛི་ན་མི་ཏྲ། ཊ་ཀི་རཱ་ཛཱ། ཏྲཀྴད་རྣམ་མགོ་ཕྱི་ལ་བསྟན་ནས་སྐུ་མདོག་ཕྱག་མཚན་རྣམས་གཞུང་བཞིན་བྲིའོ། །དེ་བརྒྱད་ཀྱི་ཐུགས་ཁར་ཙཀྲ་རྩིབས་དྲུག་ལ་སོ་སོའི་ས་བོནའམ་སོ་སོའི་སྔགས་ཁྱོན་དང་བསྟུན་ནས་བྲིའོ། ༤ །དེའི་ཕྱི་རོལ་གྱིས་མུ་ཁྱུད་ལ་བླ་མ་རྣམས་ཀྱི་མཚན་རྡོ་རྗེ་འཆང༌ནས་རང་གི་རྩ་བའི་བླ་མའི་བར་རམ་གང་འདོད་སྦྱར། རྒྱལ་བ་རྡོ་རྗེ་འཆང་ཆེན་པོ་ལ་གསོལ་བ་འདེབས་སོ། བདག་ལ་བྱིན་གྱིས་བརླབས་ཏུ་གསོལ། དེས་གཞན་ལ་རིགས་འདྲེའོ། ༥ །དེའི་ཕྱི་རོལ་མུ་ཁྱུད་ལ་ལིང་ཙེ་བཅུའི་བཅད་ནས་ལིང་རྩེ་རེ་རེའི་ནང་དུ་ཌ་ཀི་མ་སྐུ་མདོག་དམར་མོ་གཡས་ཌ་མ་རུ་དང་གཡོན་ཐོད་པ་བདུད་རྩིས་གང་བ་འཛིན་པ། ཞབས་གཡས་སྐུམ་གཡོན་རྐྱང་བ། ཐུགས་ཀར་ཧྲིཿ སྐུའི་གཡས་གཡོན་དུ་ཚེག་དྲག་རེ་བྲིའོ། ༦ །དེའི་ཕྱི་རོལ་མུ་ཁྱུད་ལ་ན་ར་ཀྲིཾ་ཀྲིཾ་ལ་འདོད་གསོལ་རིག་པས་སྦྱར། ཚར་མང་ཉུང་རིག་པས་དཔྱད། ༧ །དེའི་ཕྱི་རོལ་པདྨ་འདབ་མ་བཅུ་ལ་ཕྱོགས་སྐྱོངས་བཅུ་བཀོད། སྐུ་མདོག་ཕྱག་མཚན་བསྟོད་བསྐུལ་ལྟར་བྱའོ། ༨ །དེའི་ཕྱི་རོལ་མུ་ཁྱུད་ལ་ཨོཾ་ཨཀ་ན་ཡེ་སྭཱ་ཧཱ། ཅེས་སོགས་རིམ་པས་བྲིས་ནས་འདོད་གསོལ་སྦྱར། ༩ དེའི་ཕྱི་རོལ་མུ་ཁྱུད་ལ་མགོན་པོའི་ཕྱག་མཚན་དྲུག་གཡས་དང་གཡོན་རིམ་པ་བཞིན་ཏུ་བཀོད། ༡༠ དེའི་ཕྱི་རོལ་མུ་ཁྱུད་ལ་ཤ་ས་ན་ལ་འདོད་གསོལ་རིག་པས་སྦྱར། ༡༡ དེའི་ཕྱི་རོལ་མུ་ཁྱུད་ལ་ཕྱོགས་བཞིར་རྒྱལ་ཆེན་བཞིའི་སྐུ་སྤྱི་འགྲོ་ལྟར་བྲིས། རྒྱལ་ཆེན་རྣམས་ཀྱི་སྐུའི་བར་འཚམས་ལ་འོད་ཟེར་ནི་མེའི་རྣམ་པའི་་་་་་རིས་བྲིས་པའི་འཚམས་སུ་འཁོར་ལྔའམ་བདུན་གྱི་ཕྱག་མཚན་བཀོད་ནས་བྲིས། ༡༢ དེའི་ཕྱི་རོལ་མུ་ཁྱུད་ལ་ཡེ་དྷརྨ་འདོད་གསོལ་བཅས་བྲིའོ། ༧ །བརྡབ་ཆོག་ནི་ལྷའི་སྐུ་དང་སྔགས་ཀྱི་མགོ་གཏད་ཚུལ་སྔ་མ་ལས་བཟློག་སྟེ་བྲིའོ། །འདོད་གསོལ་ལས་དང་བསྟུན། ༧ བེ་བུམ་ནག་པོའི་ལིང་ག་བྲི་ཐབས་ནི། རོ་རས་འམ་དུག་ཤོག་ལ་ལིངྒ་མཚན་ཉིད་ཚང་བ་བྲིས་པའི་ལྟེར་་་་་། དེའི་མཐར་དགྲའོ་འདི་ཞེས་བྱ་བའི་ལུས་ངག་ཡིད་གསུམ་ཨཾ་ཀུ་ཤ་ཛ་ཛའི་གང་བདེར་བྱའོ། །དེའི་ཕྱི་རོལ་མུ་ཁྱུད་ཡང་པ་ཅིག་བསྐོར་ནས། ཕྱེད་དགོས་པའི་རྩིབས་བཅུ་བཅུ་བཀོད་ནས་རྩིབས་རྣམས་པོ་འཐབ་པ་བྲི། སོ་བར་ལ་དགྲ་བོའི་འདི་ཞེས་བྱ་བ་མཱ་ར་ཡ་ཧཱུྃ་ཕཊ། རྩིབས་སོ་རེ་ལ་རྩ་སྔགས་འབྲུ་བཅུ་གཡས་བསྐོར་དོང་ཁ་ནང་ལྟ། དེའི་ནང་མའི་སྔགས་འབྲུ་བཅུ་རྩིབས་རེ་ལ་གཡོན་བསྐོར་མགོ་ཕྱིར་ལྟ་བྲིའོ། །དེའི་ཕྱི་རོལ་རྩིབས་ལྔ་མགོ་ནང་ལྟ་བྲིའོ། །རྩིབས་རྣམས་རིམ་པ་བཞིན་ལྷ་མོ་དང་གནོད་ནི་བཞིའི་སྔགས་ཀྱི་འཇུག་ཏུ་དགྲའོ་འདི་ཞེས་བྱ་བ་མཱ་ར་ཡ་ཧཱུྃ་ཕཊ། སྔགས་མགོ་ནང་བསྟན་བྲིའོ། །རུ་པའི་མགོའི་ཐད་དུ་སྔགས་མགོ་བསྟན་ལ་ཤ་ས་ན་སྤེལ་ཚིག་དང་བཅས་པ་བྲིའོ། །དེའི་ཕྱི་རོལ་ཛ་དང་ཁྲཾ་བྲིའོ། ༧ །གྲོང་ཁྱེར་དཀྲུག་པའི་འཁོར་ལོ་ནི། དུག་ཤོག་ལ་མུ་ཁྱུད་ཡང་ས་གཅིག་བསྐོར་ནས། དེ་ལ་རེ་མིག་དགུ་བཅད། དབུས་སུ་རྒྱལ་པོའི་རུ་པ། རེ་མིག་བརྒྱད་ལ་བློན་པོའི་གྲོས་བྱེད་པའི་འཁོར་རྣམས་རྒྱལ་པོ་ལ་མགོ་བཏད་ནས་བྲིའོ། །དེ་རྣམས་ཀྱི་སྙིང་ཁར་དགྲའོ་འདི་ཞེས་བྱ་བ་ཨ་ཀར་ཥཱ་ཡ་བྷེ་ཤ་ཞེས་སོགས་བྲིའོ། །མན་ངག་བཞིན་དུ་སྟེབ་ནས་གཏོར་ཆེན་ནང་དུ་འཇུག་གོ །ལིངྒ་འདི་རྣམས་ལ་ཁ་སྦྱོར་དབྱེ་བ་བྱེད་པ་གལ་ཆེའོ། ༧ །ལུས་ངག་ཡིད་གསུམ་དབབ་པའི་སྐབས་སུ་གཞན་གོ་སླ། མྱོས་བྱེད་ཁུ་བས་ཞེས་པ་ད་དུ་རའི་ཁུ་བ་ལ་བྱེད། མངར་གསུམ་ནི་ཀ་ར་བུ་རམ་སྦྲ་རྩི། ཟ་འོག་ནི་དགེ་སློང་སྡོམ་པ་ཉམས་པའི་དྲི་ཆེན། ༧ ཡང་རིགས་ཅིག་ལ་རྩིབས་ཉི་ཤུ་མི་བྱེད་པར། རུ་པའི་ལྟོ་བར་དབུས་སུ་ཟླུམ་པོ་ཡང་ས་ཅིག་བསྐོར། དེ་ཕྱི་རོལ་དུ་གྲི་གུག་བཞི་པོ་ཕྱི་ལ་བསྟན་ནས་ལྟེ་བར་ཧཱུྃ། སོ་ནང་དུ་བཛྲ་མཧཱ་ཀཱ་ལའི་དགྲ་བགེགས་མར་ར་ཡ་ཧཱུྃ་ཧཱུྃ་ཕཊ་ཕཊ། དེའི་ཕྱི་རོལ་རྩིབས་ལྔ་དང་ཤ་ས་ན་བཀོད་ལུགས་འདྲའོ། །རེ་ཞིག་རྫོགས་སོ། ༈ དཔལ་ཡེ་ཤེས་ཀྱི་མགོན་པོ་ཕྱག་དྲུག་པའི་ཆོས་བསྐོར་ལས། བསྲུང་བཟློག་བསད་གསུམ་གྱི་མན་ངག་ཞལ་གདམས་དང་བཅས་པ་བཞུགས་སོ། གུ་རུ་མཧཱ་ཀ་ལ་ལ་ན་མོ། མྱུར་མཛད་ཡེ་ཤེས་ཀྱི་མགོན་པོའི་སྒོ་ནས་བསྲུང་བཟློག་བསད་གསུམ་གྱིས་སྒོ་ནས་ལས་ཁ་ཚར་དང་བཅས་བསྲུང་བའི་མན་ངག་ལས་མ་གསལ་བར་ངག་ནས་རྒྱུད་པ་རྣམས་ཕྱོགས་གཅིག་ཏུ་བྲི་བར་བྱ་བ་ནི། བསྲུང་བ་རྡོ་རྗེའི་ཆར་འབེབས་ལ། གུ་རུ་མཧཱ་ཀ་ལ་ས་པ་རི་ཝ་ར་བཛྲ་ས་མ་ཛཿན་མོ་གུ་རུ་བྷྱེ། ན་མོ་ཤྲིར་མཧཱ་ཀ་ལ་བྷྱེ། གུ་རུ་མཧཱ་ཀ་ལ་ས་པ་རི་ཝ་ར་ཨརྒྷཾ་ནས་ཤཔྟའི་བར་བརྗོད་ལ་སྡོམ་པ་བཟུང་། བསོད་ནམས་ཀྱི་ཚོགས་བསགས་ནས་ཚོགས་ཞིང་ཡེ་ཤེས་པ་རྣམས་བདག་ལ་ཐིམ་པར་གྱུར། དེ་ནས་བསྲུང་འཁོར་དུ་བཤད་པ་ལྟར་བསྒོམས་ལ། རྡོ་རྗེ་ར་བའི་ཕྱིར་རོལ་གྱི་ཤར་དུ་མགོན་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་གཡས་རལ་གྲི་དང་གཡོན་ཕུག་འཛིན་པ། ལྷོར་མགོན་པོ་མཐིང་ནག་ཞལ་གཅིག་ཕྱག་གཉིས་གཡས་ནེའུ་ལེ་སྐུ་ལ་བརྟེན་ཅིང་གཡོན་ཐོད་ཁྲག་འཛིན་པ་དར་ནག་པོའི་འཇོར་བེར་གསོལ་བ། ནུབ་ཏུ་རེ་མ་ཏི་ནག་མོ་ཞལ་གཅིག་ཕྱག་གཉིས་གཡས་རལ་གྲི་དང་གཡོན་སྐྲ་དང་བཅས་པའི་ཐོད་ཁྲག་འཛིན་པ་གཅེར་མོ་ཁྲག་གིས་ཐིག་ལེས་རྒྱན་པ། བྱང་དུ་མགོན་པོ་གྲི་གུག་ཅན་གཡས་གྲི་གུག་གཡོན་ཐོད་པ་འཛིན་པ། བཞི་ཀའང་ཞལ་གདང་ཤིང་མཆེ་བ་རྩིགས་པ། སྤྱན་གསུམ་དམར་ལ་ཟླུམ་པ་མི་མགོ་སྐམ་པོ་ལྔས་རྒྱན་པ། རློན་པ་ལྔ་བཅུ་ཡིས་དོ་ཤལ་ཅན། ཞབས་གཡས་སྐུམས་ཤིང་གཡོན་རྐྱངས་པའི་གར་སྟབས་ཅན། ཤར་ལྷོར་ཀྵེ་ཊ་པ་ལ་མཐིང་ནག་གཡས་སྒྱུ་མའི་ཞགས་པ་དང་གཡོན་སྡིག་འཛུབ་མེ་འབར་བ། བྱང་ཤར་དུ་ཏྲཀྵ་ཤད་ནག་པོ་ཞལ་གཅིག་ཕྱག་གཉིས་གཡས་རུ་མཚན་དམར་པོ་དང་གཡོན་ཐོད་ཁྲག་འཛིན་པ་རྟ་ནག་རྟིང་དཀར་ལ་ལྕིབས་པ། བཞི་ཀའང་མི་མགོ་སྐམ་པོ་ལྔས་བརྒྱན་པ། རློན་པ་ལྔ་བཅུའི་དོ་ཤལ་ཅན་སྤྲུལ་པ་དུ་མ་འཕྲོ་ཞིང་། གནོད་སྦྱིན་དཔག་ཏུ་མེད་པས་བསྐོར་བའོ། །སྟེང་གི་ནིར་རྡོ་རྗེ་འཆང་ལ་རྒྱུད་པའི་བླ་མ་རྣམས་ཀྱི་བསྐོར་བ། ཤར་དུ་སྤྱན་རས་གཟིགས་མདྨ་འཛིན་པ། ལྷོར་ཚེ་དཔག་མེད་མགོན་པོ་སྐུ་མདོག་སེར་པོ་གཡས་ལྕགས་ཀྱུ་གཡོན་བུམ་པ་འཛིན་པ། ནུབ་ཏུ་རྣལ་འབྱོར་མ་དམར་མོ་གྲི་གུག་དང་ཐོད་པ་འཛིན་པ། བྱང་དུ་སྒྲོལ་མ་ལྗང་ཁུ་ཨུཏྤ་ལ་དང་མཆོག་སྦྱིན་ཕྱག་རྒྱ་མཛད་པ། བཞི་ཀའང་བཞེངས་པ་ཡུམ་གཉིས་ནུ་མ་འབུར་ཞིང་བཞད་པའི་ཉམས་དང་ལྡན་པ། ཡབ་གཉིས་ཁྲོ་ཞིང་འཛུམ་པའི་རྣམ་པ་ཅན། རང་འདྲའི་སྤྲུལ་པ་དུ་མ་འཕྲོ་བར་གྱུར། དེ་དག་གིས་ཞེས་པ་ནས་ཧཱུྃ་གིས་མཚན་པ་ཧཱུྃ་ལས་འོད་ཟེར་འཕྲོས་པས། བསྲུངས་བའི་འཁོར་ལོ་མགོན་པོའི་ཚོགས་དང་གན་ཡང་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པ་ཁྲོ་བོ་དང་ཁྲོ་མོའི་རྣམ་པར་སྤྱན་དྲངས། ཨོཾ་ཤྲི་མཧཱ་ཀ་ལ་ས་པ་རི་ཝ་ར་ཨེ་ཧྱེ་ཁྲིཾ་ཉེར་གཅིག་གིས་སྤྱན་དྲངས་ལ་མཆོད། ཛཿཧཱུྃ་བཾ་ཧོཿ བསྙེན་པ་བྱ། དེ་ནས་དམིགས་པ་གསལ་གདབ་རང་གི་མདུན་རྒྱབ་རྣམས་སུ་ཡེ་ཤེས་པ་བཞུགས་པ་དང་བསྲུངས་བྱ་རྣམས་དུས་མཉམས་གཅིག་ཏུ་གནས་པར་བསམ་མོ། །ངག་ཏུ་ཨོཾ་བཛྲ་རཀྵ་ཧཱུྃ་རཀྵ་ཧཱུྃ། རྡོ་རྗེའི་ཕྱི་སྡམ་དང་བསྲུངས་འཁོར་བསྟེན་པར་བྱས། རྡོ་རྗེའི་ཆར་འབེབས་ཐུན་མོངས་བའི་ཞལ་ཤེས་སོ། ༧ །ཐུན་མོངས་མ་ཡིན་པ་ནི། རང་གི་སྙིང་ཀར་ཉི་མའི་དལ་གྱིས་སྟེང་དུ་རྟ་མཆོག་དམར་པོ་རྟ་སྐད་བཞད་པ་ཞལ་གཅིག་ཕྱག་གཉིས་གཡས་ཐོད་དབྱུག་གཡོན་ཞག་པ་འཛིན་པ་ཞབས་གཉིས་དོར་སྟབས་ཀྱི་བཞེངས་པ། སྐུ་ལས་འོད་ཟེར་འཕྲོ་བ། དེའི་ཐུགས་དཀར་རྡོ་རྗེ་གཏུམ་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་གཡས་རྡོ་རྗེ་དང་གཡོན་སྡིག་འཛུབ་མཛད་པ། རྡོ་རྗེའི་དཀྱིལ་དཀྲུང་གིས་བཞུགས་པ། དེའི་ཐུགས་ཁར་ཐོད་པའི་གའུ། དེའི་ནང་དུ་རིན་པོ་ཆེའི་བུམ་པ། དེའི་ཐུགས་ཁར་འོད་དཔག་མེད། བུམ་པའི་ནང་དུ་རང་གི་རྣམ་པར་ཤེས་པ་ཁ་ཊཾ་རྩེ་གསུམ་གཅིག་ཏུ་བསམ། རྩ་བར་གང་བསྲུངས་བ་དེའི་མིང་ཡིག་དང་པོ་བསམ། ཐུན་མོངས་མ་ཡིན་པའི་ཞལ་ཤེས་སོ། ༈ ཤིན་ཏུ་ཅེས་པའི་མན་ངག་ནི། ཤེས་རབ་ཆེ་ན་ངག་ཏུ་མི་བརྗོད་པར་ཡིད་ཀྱིས་གསལ་གདབ། བློས་མ་ཅོག་ངག་ཏུ་འདོན་མི་ནུས་ན་རང་ཡ་ང་བ་དང་། ཕ་རོལ་གྱི་རྦོད་སྟོང་ཡོད་པའི་རྟགས་བྱུང་ན་ཐོད་པ་ཁ་སྦྱོར་གྱིས་གུར་ཁང་གི་ནང་དུ་རང་གི་ལུད་པོ་འདི་ཁྲོ་ལས་གྲུབ་པའི་རྡོ་རྗེ་རྩེ་དགུ་པར་བསམ། དེའི་ལྟེར་ཁ་ཊཾ་ག་སྔར་དང་འདྲ། མཚན་མོ་ཡིན་ན་གཉིད་ལོག་པར་ཁ་ཊཾ་གིས་རྩེ་དབུས་མའི་རྩེ་མོར་ཧཱུྃ་ཡིག་མཐིང་ག་གཅིག་བསམ་ལ་དེ་ལ་སེམས་འཛིན་ལ་གཉིས་ལོགས་གསུངས་པའི་ཞལ་ཤེས་མ་ལུས་པ་རྫོགས་སོ། See [[bzlog pa stobs chen byugs bzlogs]] ༈ བཟློག་པ་སྟོབས་ཆེན་བར་ཤུག་བཟློག་གིས་ཞལ་ཤེས་ནི། རང་གིས་ངག་ཏུ་ཧཱུྃ་གི་སྒྲ་སྒྲོགས་ཏེ་མགོན་པོ་རྣམས་ཀྱིས་ཞལ་ཕྱིར་གཟིགས་ཕྱིང་གིས་ལྷ་ཐམས་ཅད་ཀྱིས་སྒྲ་འབྲུག་ལྟར་སྒྲོག་པར་བསམ། རྡོ་རྗེའི་ར་གཅིག་ཏུ་གནས་པའི་ནང་ཐམས་ཅད་བར་འཚམས་མེད་པར་དུམ་བུ་གཅིག་ཏུ་གྱུར། བླ་བྲེས་ཀྱི་རྡོ་རྗེའི་ར་རྩེ་རྣམས་མཐུར་དུ་བསྟན། བར་གྱི་རྡོ་རྗེ་ཕྱེད་པའི་སྣེ་མོ་གྲི་གུག་གི་ཕྲེང་བས་འཁོར་ཡུག་ཏུ་འཁོར་བ་ལ། འཁོར་ལོའི་རྩེ་མོ་རེག་པ་ཙམ་གྱི་རྩིབས་བར་དུ་ཎི་ལྗང་ཁུ་ལས་བྱད་མ་ལུས་རིད་པ་སྐྲ་འཛིངས་པ་ལུས་ལ་ཤུ་བ་འཁོར་བ་མགོན་སྐྱབས་དང་བྲལ་བ་སྤྱི་བོ་ས་ལ་བརྩུགས་པར་བསམ། འཁོར་ལོ་མྱུར་ལ་དྲག་ཏུ་འཁོར་བས་ཁོའི་དུགས་གསུམ་གྱི་སྒྲིབ་པ་སྦྱངས་ནས་རྣམ་ཤེས་པདྨ་ཅན་དུ་འཕོ་ནས་ཤ་རུས་དམར་ཐཽར་སོང་བ་གཏོར་མར་གྱུར་པར་བསམ་ལ། བསྒྲལ་བའི་ལས་དྲུག་གི་དམིགས་པ་བྱེད། གཏོར་མ་དེ་མཚོན་ཆར་བསམ་ལ་ཁོ་ཡི་ལུས་ཀྱི་དབུས་སུ་སྲོག་གི་རྟེན་ཏིལ་དམར་གྱི་མར་མེ་ལྟ་བུ་དེ་ལ་རྒྱབ་པས་ནག་ཐུམ་གྱི་གཏང་བར་བསམ་ལ་གཏོར་ཆུང་བཏེག །དེང་དུས་མཉམ་དུ་བཀའ་བསྟོད་བརྒྱད་ལ་སོགས་པ་རྣམས་ཀྱི་ཤ་ཁྲག་ལྷག་མ་མེད་པར་གསོལ་བར་བསམ། རྣམས་ཤེས་སྤར་བ་གོ་དང་འདྲ། རླུང་ལས་ནི་འཁོར་ལོ་དཔེ་ཆུང་ལྟར་བྲིས་ལ་རབ་ཏུ་གནས་པའི་ཆོ་ག་བྱས་རང་གིས་ལོ་བདུད་སྟེང་དུ་འཁོར་ལོ་བསྐོར། ཨྀཐི།། See [[bsad pa gnam lcags dug mda' nag po bzlog bsrung ba stobs bskye bzlog nyams pa kun gso]] ༈ གསད་པ་དུག་མདའ་ནག་པོའི་ཞལ་ཤེས་ནི། ཐུན་མོངས་བ་གོང་དང་འདྲ། ཐུན་མོངས་མ་ཡིན་པ་ནི། འཁོར་ལོའི་འོག་གི་རྭ་རྩེ་གྲི་གུག་གི་འཁོར་ལོ་སྙིང་དཀར་ནག་འཚམས་སུ་འཁོར་ཚུལ་འཁོར་ལོ་བསྐོར་བ་དེ་འདྲ་བས་སོ། །སྲོག་རྩ་རྦད་རྦད་བཅད་པར་བསམ་ལ་སྔགས་དྲག་ཏུ་བརྗོད། འཁོར་ལོ་དཔེའུ་ཆུང་ལྟར་བྲིས་ནས་གྲི་གུག་གི་སྟེང་དུ་འབྱུང་འཇུག་ཞལ་ལས་འབྱུང་བ་ལྟར་བཀོད་ལ་བཟློག་པའི་འཁོར་ལོའི་འཕགས་པོར་བསྐོར་འདི་ཡི་ཁ་ཚར་བྱད་མ་ཚོགས་སུ་ཟ་བ་སོགས་གན་དུ་ཡོད་དོ། ༧ །ཐུན་མོངས་མ་ཡིན་པའི་ཞལ་ཤེས་ནི། གྲུ་གསུམ་དངོ་གྲུས་པའི་ནང་དུ་ལིངྒ་སྔགས་ཀྱི་བསྐོར་བར་བྱད་མ་དགུག་བཞུགས་བྱས་ཏེ། ཤིང་སྐྱེར་ས་ལ་བྱས་ལ་གྲིག་གི་སྔགས་རིང་ཐུང་ཤམ་བུ་དང་བཅས་པ་བྲིས་ལ་སྙིང་ཁར་བཞུགས། དེའི་སྟེང་དུ་ཨ་ལི་ཀ་ལི་རྟེན་འབྲེལ་སྙིང་པོ་མགོན་པོའི་སྔགས་རིང་ཐུང་རྣམས་གྲིག་གི་དུག་ཤོག་གི་གྲོ་ག་ལ་བྲིས་ལ་ཡིག་འབྲུ་རྣམས་མ་འབྲེལ་བ་བཏུབ་ཐུན་རྫས་རྣམས་དང་སྦྱར་ལ་ཆོས་སྲུང་བཀབ། དེའི་ཁར་གཡང་གཞི་སྡེབ་ཆོག་གི་འཁོར་ལོ་ཡོད་ན་བཀབ། མེད་ན་སྟེང་དུ་དྲག་གཏོར་བཞག་ལ་ཐུན་གཏོར་འབུལ། འདིས་བྱད་མ་སྔར་མེད་ཀྱང་ཕྱིས་འབྲས་ནས་མི་དང་མི་མིན་གང་གིས་བྲུབས་ཀྱང་རང་བྲུབ་ཐེ་མདེ་དེ་གདོན་མི་ཟའོ། ༧ །ཡང་བཟློག་བསྲུངས་བ་སྟོབས་སྐྱེད་ཀྱིས་ཞལ་གདམས་ལ། རང་གི་རྦད་པ་དེ་ཁའི་བཟློག་ན་བྱའི་གན་མི་དགོས་སོ། །བཟློག་པའི་རྟགས་བྱུང་ན་ལས་མཁན་དེའི་སྤྱི་བོར། གན་བཞུགས་དུ་གསལ། མགོན་པོའི་ཐུགས་ཁར་རང་གི་ཡི་དམ་དེ་ཤིན་ཏུ་འཕྲོས་པར་བསམ། རང་གི་ཐུགས་ཀ་ནས་འོད་ཟེར་འཕྲོས་པས་རྒྱུད་དེ་བཞིའི་ལྷ་ཚོགས་རྣམས་སྤྱན་དྲངས་པ་ཡི་དམ་དེ་ལ་བསྟིམ། ཁྲིཾ་ཉེར་གཅིག་གིས་ཡེ་ཤེས་པ་སྤྱན་དྲངས་ལ་མགོན་པོ་ལ་བསྟིམ། རིགས་ལྔ་དང་རྒྱུད་པའི་བླ་མ་རྣམས་སྤྱན་དྲངས་ལ་མཁའ་སྤྱོད་་་་་ས་ལ་བསྟིམ། དེ་ནས་གསོལ་གདབ་དམིགས་པ་ཤིན་ཏུ་གསལ་བས། མགོན་པོ་ལུས་ཀྱི་རྒྱབ་ཏུ་གོས་གྱོན་པ་ལྟ་བུར་གྱུར་ནས་སྔར་ལས་གཟི་བརྗིད་འབར་བ་བསམ། དུས་གཅིག་ཏུ་མཁའ་སྤྱོད་་་་་ས་ཁོའི་སྤྱི་བོར་སླེབ་པ་ན་རྡོ་རྗེ་རྩེ་ལྔ་པ་གཅིག་ཏུ་གྱུར་པ་བསམ། ཕྱག་མཚན་དཔག་ཏུ་མེད་པ་སྤྱན་དྲངས་ཁོའི་ཕྱག་མཚན་བསྟིམ། རང་ཡི་དམ་དུ་གསལ་བའི་ལྟེ་བ་མན་ཆད་བཀའ་སྡོད་གནས་པ་ལ། རང་གི་བཀའ་སྒོ་བ་ཉན་ཅིང་ཁོས་ཡར་ལ་ལྟ་མི་ནུས་པར་བསམ། སྔགས་བཟླས་ཚུལ་གཞུང་དུ་གསལ། རང་གི་ལྕེའི་སྟེང་དུ་ཨ་ལི་ཀ་ལིའི་འཕྲེང་བ་བསམ་ནས་ཉེར་གཅིག་བརྗོད་པས་ངག་བྱིན་གྱིས་སླབས། རྟེན་འབྲེལ་སྙིང་པོ་བདུན་གྱི་ངག་གི་ནུས་པ་བརྟེན་པར་བྱས། བདེན་པ་བརྡར་དམ་ཚིག་སྒྲགས་མ་ཉེས་པའི་དཔངས་གཟུགས། ཁོའི་ཉེས་པ་བརྗོད། ༧ ཐུན་མོངས་མ་ཡིན་པའི་ཞལ་ཤེས་ནི། སྔགས་མཁན་འཁུ་བཟློག་གི་རྟགས་མིན་པ་མི་བྱེད་པ་ནི། རང་ཡི་དམ་ཡེ་ཤེས་ཀྱི་མགོན་པོར་གསལ་བའི་ཐུགས་ཀའི་ཧཱུྃ་ལས་ཧཱུྃ་གཅིག་ཆེད་འོད་ཟེར་ཚ་ལ་རྩུབ་པ་འཕྲོ་བ་དང་བཅས་པ་ཡར་བྱུང། ཁོའི་སྣ་བུག་གཡས་སུ་མགོ་བོ་ཐུར་དུ་བསྟན་ནས་སོང་། སྙིང་ཁར་སླེབ་པ་དང་ཁོའི་ས་བོན་ལ་ཧཱུྃ་གིས་ཞབས་ཀྱུས་ལྕགས་ཀྱུ་གཏབ་པ་ལྟར་དྲངས་ཏེ་ཡར་བྱུང་ནས་སྣ་བུག་གཡོན་ནས་ཐོན། རང་གི་གཡས་ནས་བཞུགས་ནས་ཧཱུྃ་ལ་ཐིམ་པར་བསམ། དེ་ནི་སྲོག་འཕྲོག་པའོ། ༧ །ལས་མཁན་མྱང་བའི་ཞལ་ཤེས་ནི། རང་གི་ཐུགས་ཁ་ནས་འོད་ཟེར་ཁོ་ལ་ཕོག །ཁོ་འོད་དུ་ཞུ་བ་ལས་རང་གི་ས་བོན་དུ་བསྒོམ། ས་བོན་དེ་ཡོངས་སུ་གྱུར་པ་ལས་མགོན་པོར་བསམ། དེའི་ཞབས་འོག་ཏུ་ཁོ་མགོ་ལྟེབ་ནས་ཞབས་ཀྱི་མགོ་བོ་མནན་པར་བསམ། ཁོ་མ་བཟོད་ནས་སྲོག་སྙིང་ཕུལ། དེས་ལས་བྱེད་པར་ཁས་སླངས་པར་བསམ་ལ་གོང་གིས་སྟོབས་སྐྱེད་ཡང་ཡང་བྱས་ལ་དེ་ནས་ལས་ལ་སྦྱར། ཡང་བཟློག་མན་ངག་མ་ལུས་པ་རྫོགས་སོ། ༧ །སླར་བཟློག་ཉམས་པ་ཀུན་བསོའི་མན་ངག་ནི། གན་རྣམས་གཞུངས་དུ་གསལ། རྡོ་རྗེའི་ཡར་རྩེ་རྭ་ལྔ་རིག་ལྔར་བསམ། མར་རྩེ་རྭ་ལྔ་ཡུམ་ལྔར་བསམ། ཡི་དམ་དུ་གསལ་བའི་སྤྱི་བོར་སྣ་ཚོགས་རྡོ་རྗེ་རྐང་མཐིལ་རྡོ་རྗེའི་ས་གཞི། རྩིབས་ལོགས་རྡོ་རྗེའི་རྭ་བ། ལྤགས་པ་རྡོ་རྗེའི་གུར་དང་བླ་བྲེས། བ་སྤུ་མདའི་དྲ་བ། སྐྲ་སེན་ཡེ་ཤེས་ཀྱི་མེ་རབ་ཏུ་འབར་བ། ཐུན་མོང་གི་ལུས་ཀྱི་བསྲུང་འཁོར། ཐུན་མོང་མ་ཡིན་པའི་ལུས་ཀྱི་བསྲུང་འཁོར་ནི། གོ་ཆའི་ལྷ་བཀོད་ཅིང་། ཁྲོ་བཅུ་ལུས་ལ་བཀོད་ནས་ཡི་གེ་བརྒྱ་པ་བརྗོད་ལ་ཨ་ལི་ཀ་ལིའི་ཁྱབ་བྱང་ལྟ་བུ་ལ། འོད་ཟེར་རྒྱུན་ཐག་ལྟ་བུ་བྱས་པའི་གོ་ཁྲབ་ལུས་ལ་གྱོན་པར་བསམ། རླུང་གི་ལས་སྦྱོར་གོང་ལྟར་བྱའོ། །སླར་བཟློག་མན་ངག་མ་ལུས་པ་རྫོགས་སོ། །འདི་ཡིས་མན་ངག་མ་ལུས་པ་[[མཁས་གྲུབ་རིན་པོ་ཆེ]]འི་ཞལ་ལས་རྒྱུད་ཅིང་། [[བསོད་ནམས་]]མཚན་ཅན་གྱི་གསུངས་ལས་ཇི་ལྟར་བྱུང་བ་རྣམས་བརྗེད་ཀྱི་དོགས་ནས་ཡི་གེར་བྲིས་པའོ། །བསྟན་བསྲུངས་རྣམས་ལ་བཟོད་པར་གསོལ། ༧ [[Sangyé Nyentön|སངས་རྒྱས་མཉན་སྟོན་]]གྱི་ངག་སྐྲོལ་བའི་ལུགས་ལ། སྟོང་ཉིད་ཀྱི་ངང་ལས་རང་གི་ལྕེ་རལ་གྲི་སོར་བཞི་པར་བསྒོམ། དེའི་ཆང་ཟུང་ཀྱི་ནང་དུ་ཡིག་གེ་ཏྲཾ་ལྗང་ཁུ་གཅིག་བསམ། དེ་ལས་འོད་འཕྲོས་པའི་འཇིག་རྟེན་དང་འཇིག་རྟེན་ལས་བཟླས་པའི་དངོས་གྲུབ་ཐམས་ཅད་ཐོབ་པར་བསམ་ལ་ཨོཾ་ཏྲཾ་ཧྲིཿཀ་པ་ལ་རཀྵ་རཀྵ་སྭ་ཧཱ། ཉིན་རེ་ལ་ལན་བདུན་བདུན་བརྗོད་ན་ངག་ནུས་པ་དང་ལྡན་པར་འགྱུར་རོ། །[[Sangyé Nyentön|སངས་རྒྱས་མཉན་སྟོན་]]ལུགས་ཀྱི་ངག་སྐྲོལ་ལོ། ༈ མཧཱ་ཀ་ལ་ལ་ན་མོ། བེ་བུམ་ནག་པོར་བག་ཟན་ལ་དྲག་པོ་ནག་པོས་ཁ་སྒྱུར་པའི་བྱ་རོག་གསུམ་གྱི་གཟུགས་གཏོར་མའི་ལོགས་གསུམ་ལ་གཙུགས་ཞེས་པའི་སྐབས་སུ། གཤིན་རྗེ་གཤེད་ཀྱི་སྒོ་ནས་གཟི་མདངས་བསྐྱེད་ལ། བདག་ཉིད་ཀྱི་ཐུགས་ཁའི་ས་བོན་ལས་འོད་ཟེར་རབ་ཏུ་འཕྲོས་པས་མགོན་པོའི་ཐུགས་ཀའི་ཧཱུྃ་ལ་ཕོག །ཐུགས་རྒྱུད་བསྐུལ་ཏེ་ཐུགས་ཀའི་ཧཱུྃ་ལས་མར་མེ་གཅིག་ལས་གཉིས་ཆད་ཀྱི་ཚུལ་དུ་ཧཱུྃ་གསུམ་རྒྱང་གི་མགོན་པོའི་སྤྱན་གསུམ་ཀྱི་སྒོས་རྒྱང་གིས་ཐོན་ནས་བག་ཟན་གྱིས་བྱ་རོགས་གསུམ་ལ་ཐིམ་པར་བསམ། དེ་ཡོངས་སུ་གྱུར་པ་ལས་ཧཱུྃ་ལས་མགོན་པོའི་ཐུགས་ཀྱི་སྤྲུལ་པ་དམ་ཉམས་དགྲ་བགེགས་ཐམས་ཅད་བརླག་པར་བྱེད་པའི་བྱ་རོག་མཐིང་ནག་འབར་བའི་འཆུ་སྡེར་གྱི་དགྲ་བོའི་གློ་སྙིང་འབྱིན་ཞིང་བསྟན་དགྲ་ཐམས་ཅད་ཞེ་ལ་གནགས་ཏེ་དགྲ་བོའི་སྲོག་དབུགས་སྐད་གཅིག་ཉིད་ལ་བསྡུད་བཅིང་། མགོན་པོ་འཁོར་བཅས་ལ་གཡས་བསྐོར་དུ་དཀྱིལ་ལི་ལི་ལྡིང་བར་བསམ་ལ། སྙིང་པོ་དང་རྩ་སྔགས་ལ་སྤེལ་ཚིག་བཏགས་ལ་བཟླས་པར་བྱའོ། །ཨྀཐི།། བསྲུང་བ། བཟློག་པ། བསད་པ། དགྲ་བོ་བཀུག་པ་སོགས་མན་ངག་ཞལ་ལས་ཤེས་སོ། །ས་མ་ཡ་གུ་ཧྱ། བསྟན་པ་བསྲུངས་ལ་ཉེ་བར་འཁོ་བའི་མན་ངག་ཕྲ་མོ་འདི་རྣམས་ལ་ཞལ་ལས་ཤེས་པར་བྱ་བའི་གནད་ཞིབ་ཅིང་མང་བར་གསུངས་པ་དག་བརྗེད་པས་འཇིགས་པ་དང་། ཁོ་བོ་དུས་ཀྱི་ཕོ་ཉས་ཁྱི་ར་པར་གྱུར་ན་མན་ངག་ཆེན་པོ་རྣམས་ཉམས་ཀྱི་དོགས་ནས། སྙན་རྒྱུད་ཡི་གེར་པ་ལ་ཆོས་བདག་མཁའ་འགྲོ་དང་། མགོན་པོ་འཁོར་བཅས་ལ་བཟོད་པར་གསོལ། ༈ ན་མོ་མཧཱ་ཀ་ལ་ཡེ། དཔལ་འབར་གྱི་དགྲ་བགེགས་གསད་པ་ནི། ལིངྒ་རྣམས་སྙུག་མ་ལ་མགོ་མཇུག་ལོག་ལ། དུར་ཁྲོད་ཀྱི་རས་ཀྱི་རས་ཀྱི་རས་ཀྱི་དཀྲིས་ལ་སྣུམ་ལ་སྒྲེས་པ་དེ་ཤན་པའི་གླིང་ནས་མེ་གླང་ལ་སྟག་ལོ་པའམ། ཕག་ལོ་པ་མི་གསད་མྱོང་བ་གཅིག་གིས་མེ་གླང་ལ་སྦར། དེ་ཤིན་ཏུ་ཚ་ཞིང་བསྲེགས་པར་བསམ་ལ་གཏོར་ཆེན་གྱི་མདུན་ངོས་སུ་ཟུག །དམིགས་པ་ནི་རང་ཡི་དམ་དུ་གསལ་བའི་ཐུགས་ཀའི་ཧཱུྃ་ལས་འོད་ཟེར་མེ་འོད་ལྟ་བུ་འཕྲོས་པས་མགོན་པོའི་ཐུགས་ཀའི་ཧཱུྃ་ལ་ཕོག །ཐུགས་རྒྱུད་བསྐུལ་ཏེ་བདག་མདུན་གཉིས་ཀའི་ཐུགས་ཀ་ནས་མེ་ལྕེ་དྲག་ལ་རྩུབ་པ་འཁྱིལ་ཞིང་ཆད་པ་འབར་བའི་རྣམ་པ་དཔག་ཏུ་མེད་པ་འཕྲོས་ཏེ་དགྲ་བགེགས་ཀྱི་ཉོན་མོངས་ཀྱི་གཟུགས་ཆུང་ཐུལ་གྱིས་བསྲེགས་པའི་ཞུན་བདུད་རྩིར་གྱུར་ནས། མགོན་པོ་འཁོར་བཅས་ཀྱི་གསོལ་བས་དགྲ་བགེགས་བྱད་མའི་མིང་ཙམ་ཡང་མ་ལུས་པར་བསམ་ལ། གཙོ་བོའི་སྙིང་པོ་དང་རྩ་སྔགས་ལ་སྤེལ་ཚིག་སྦྱར་ལ་དྲག་ཏུ་བཟླས་སོ། །སློབ་དཔོན་རིན་པོ་ཆེ་ཆོས་བསྟན་པའི་ཕྱག་དཔེ་ལས་[[བཙུན་པ་རིན་ཆེན་བཟང་]]གི་[[འོལ་ཁ་སྟག་རྩེ]]འི་གཞིས་ཁ་ནས་བྲིས་སོ། ༈ ན་མོ་སངས་རྒྱས་ཀྱི་བདེན་པ་དང་། ཆོས་དགེ་འདུན། གསང་སྔགས་྾ རིགས་སྔགས་྾ གཟུང་྾ ཕྱག་྾ སྙིང་པོ་྾ ཏིང་ངེ་འཛིན་རྣམས་ཀྱི། ཁྱད་པར་དུ་ཡང་བཅོམ་ལྡན་འདས་འཇམ་དཔལ་གཤིན་རྗེ་གཤེད་ཀྱི་ལྷ་ཚོགས་འཁོར་དང་བཅས་པ་བཅས་པ་དང་། མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པའི་ལྷ་ཚོགས་འཁོར་དང་བཅས་པ་རྣམས་ཀྱི་྾ བདེན་པ་ཆེན་པོའི་བྱིན་གྱིས་བརླབས་པ་ལ་རྟེན་ནས། སྤྱིར་སངས་རྒྱས་ཀྱི་བསྟན་དགྲ། དགེ་འདུན་གྱི་སྤྱི་དགྲ། དཔལ་ལྡན་བླ་མ་དམ་པའི་སྐུ་དགྲ། ཁྱད་པར་དུ་ཡང་བདག་ཅག་དཔོན་སློབ་དགོན་ནས་སྡེ་དང་བཅས་པ་ལ་ཕོད་བརྩུགས་པ། དོ་བ་་་་བ་སྔ་དགྲ་ལག་ཏུ་བླངས་པ། ད་དགྲ་ཐད་དུ་ལོང་པ། ཕྱི་དགྲ་ཞེ་ལ་བསམ་པའི་དམ་ཉམས་པའི་དགྲ་བོ་འདི་མཐོ་སྲིད་པའི་རྩེ། དམའ་རྒྱ་མཚོའི་གཏིང་། ས་འོག་ས་སྟེང་ས་བླ། བསྲུང་པའི་གུར་ཁང་། ཉི་ཟླའི་སྣམ་ཕྲག །རིབ་ཀྱི་ཁོང་སེང་སྲིད་པ་གསུམ་གྱིས་གནས་གང་དུ་ཡོད་ཀྱང་། མགོན་སྐྱབས་བྱེད་པའི་ལྷ་དང་ཕྲལ་ནས་ཚེ་དང་བསོད་ནམས་ཀྱི་དབང་དུ་མ་གཏང་བར་སྐད་གཅིག་གི་རང་དབང་མེད་པར་འདི་ཁུག་གཅིག See [[grib sel gnad dbab kyi gdams pa sangs rgyas gnyan ston yan chig rgyud gnad yig yid bzhin nor bu]] ༈ བླ་མ་མགོན་པོ་དབྱེར་མེད་འདུད། །མགོན་པོ་ཕྱག་དྲུག་འཁོར་བཅས་ཀྱི། །གྲིབ་སེལ་གནད་དབབ་བཤད་པར་བྱ། །ཞེས་གསུངས་པའི་གནད་ཀྱི་གདམས་པ་ནི། མདུན་དུ་མགོན་པོ་འཁོར་བཅས་བསྐྱེད་ལ་དེ་ལ་ཡེ་ཤེས་པ་བསྟིམ། དེའི་སྤྱི་བོར་བླ་མ་རྡོ་རྗེ་འཆང་གིས་རྣམ་པ་ཅན་བསྒོམ། དེ་ལ་སངས་རྒྱས་བྱང་སེམས་རྒྱུད་པའི་བླ་མ་རྣམས་སྟིམ་ལ་ན་མོ་བུདྷ་ཡའི་གསོལ་བ་བཏབ་པས། བླ་མའི་ཐུགས་ཀ་ནས་འོད་ཟེར་དཔག་ཏུ་མེད་པ་བྱུང་མགོན་པོའི་སྐུ་ལུས་ཐམས་ཅད་ལ་ཁྱབ་པར་བསམ། དེ་ཡིས་ཉམས་གྲིབ་དག་ནས་སྐུ་འོད་དང་འོད་ཟེར་གྱི་རང་བཞིན་ནུས་པ་དང་མཐུ་སྟོབས་ཕུན་གསུམ་ཚོགས་པ་དང་ལྡན་པ་དགྱེས་པའི་ཉམས་དང་ལྡན་པར་བསམ། ཡང་གསོལ་བ་གཏག་པས་བླ་མའི་སྐུའི་འོད་ཟེར་རྣམས་བླ་མའི་སྐུ་ལུས་ནང་དུ་འདུས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱིས་ཡེ་ཤེས་ཆེན་པོའི་ནུས་པ་དང་། ཐུགས་འོད་ཟེར་དཀར་པོའི་རྣམ་པར་འདུས་བླ་མའི་སྐུའི་ནང་དུ་འདུས་བདེ་བ་ཆེན་པོའི་རང་བཞིན་གྱི་བྱང་ཆུབ་ཀྱི་སེམས་ཀྱི་རང་བཞིན་བྱང་ཆུབ་ཀྱི་སེམས་སུ་ཞུ། གསང་བའི་རྡོ་རྗེའི་རྩེ་ནས་བབས་པ་མགོན་པོའི་སྤྱི་གཙུགས་ནས་ཞུགས། སྐུའི་ཕྱི་ནང་ཐམས་ཅད་དཀྲུས་མགོན་པོ་འཁོར་བཅས་ཀྱིས་ཉམས་གྲིབ་དག་ཐུགས་བདེ་བ་ཆེན་པོའི་རང་བཞིན་སྐུའི་གཟི་བརྗིད་ཕུན་སུམ་ཚོགས་ནས་བདག་གི་འཕྲིན་ལས་གང་བཅོལ་ཉན་པར་བསམ། དེ་ནས་ཡང་ན་མོ་བུདྷ་ཡའི་གསོལ་བ་ལན་གསུམ་གཏབ་པ་ལས་ན་ར་ཀྲིཾ་ཀྲིཾ་རྩ་སྔགས་དང་བཅས་པ་བཟླས་པ་ལས། དེ་ནས་གསོལ་འདེབས་གསུམ་གཉིས་སྔགས་གསུམ་ཆ་བཟླས་ལ། མགོན་པོའི་དཔྲལ་བ་དང་། མགྲིན་པ་དང་། ཐུགས་ཁ་གསུམ་དུ་ཨོཾ་ཨཱཿཧཱུྃ་གསུམ་བསམ། རང་གི་གནས་གསུམ་དུ་ཡང་དེ་གསུམ་བསམ། མགོན་པོའི་ཡིག་གེ་གསུམ་ལས་ཡི་གེ་གསུམ་བརྒྱད་དང་བརྒྱད་དམ། དེ་ལས་འོད་ཟེར་དཀར་དམར་མཐིང་གསུམ་མང་པོ་བྱུང་སྟེ་རང་ཉིད་གནས་གསུམ་དུ་ཐིམ་པས་ལུས་ངག་ཡིད་གསུམ་གནད་གདོན་སྡིག་སྒྲིབ་དག་པར་བསམ། སྐུ་གསུང་ཐུགས་ཀྱི་སྙིང་པོ་གསུམ་བཟླས་སོ། །དེ་ནས་མགོན་པོའི་ཡི་གེ་གསུམ་ཆད་ནས་རང་གི་གནས་གསུམ་དུ་ཐིམ། རང་གི་དཔྲལ་བའི་ཨོཾ་ལ་ཡི་གེ་བརྒྱ་པས་བསྐོར། དེ་ལས་འོད་ཟེར་དཀར་པོ་དཔག་ཏུ་མེད་པ་བྱུང་། ལུས་ཀྱི་ནང་ཐམས་ཅད་གང་། ལུས་ཀྱི་གནད་གདོན་སྡིག་སྒྲིབ་ཐམས་ཅད་དག་སྐུའི་ཉམས་ཆགས་བསྐོང་། དེ་ལྟར་བསྒོམ་ཞིང་ཡིག་བརྒྱ་བཟླས། མགྲིན་པའི་ཨཱཿལ་ཡི་གེ་བརྒྱ་པས་བསྐོར་བ་ལས་འོད་ཟེར་དམར་པོ་བྱུང་རང་གི་མགྲིན་པར་ཐིམ། ངག་གི་སྒྲིབ་པ་དག་གསུངས་གི་དམ་ཚིག་ཉམས་ཆགས་བསྐོང་། ཐུགས་ཀའི་ཧཱུྃ་ལས་ཡིག་བརྒྱས་བསྐོར་བ་ལས་འོད་ཟེར་སྔོན་པོ་དཔག་ཏུ་མེད་པ་བྱུང་། རང་གི་སྙིང་ཀར་ཐིམ་ཡིད་ཀྱི་སྡིག་སྒྲིབ་དག །ཐུགས་ཀྱི་དམ་ཚིག་ཉམས་ཆགས་བསྐོང་། དེ་ལྟར་བསྒོམ་ནས་ཡིག་བརྒྱ་ནུས་ཚད་དུ་བཟླས་སོ། །དཔྲལ་བའི་ཡིག་བརྒྱ་དེ་ཨོཾ་ལ་ཐིམ། ཨོཾ་མགྲིན་པའི་ཡིག་བརྒྱ་ལ་ཐིམ། ཡིག་བརྒྱ་ཨཱཿལ་ཐིམ། ཨཱཿཐུགས་ཀའི་ཡིག་བརྒྱ་ལ་ཐིམ། དེ་དེའི་ཧཱུྃ་ལ་ཐིམ། ཧཱུྃ་འོད་ཀྱི་རང་བཞིན་དུ་གྱུར། ལུས་འོད་ཟེར་སྔོན་པོས་ཁེངས། དེ་ལ་ཨེན་ཙམ་སེམས་འཛིན། གདོན་རྣམས་འཇོམས་པར་བྱེད་དོ། །དེ་ནས་འདི་ཡང་སྟོང་པར་བསྒོམ་ལ་སྐྱེ་མེད་ཀྱི་ངང་ལས་ལྷའི་སྐུར་གསལ། འགག་མེད་ཀྱི་ངང་ལས་རང་བཞིན་ཕྱག་བརྒྱ་ཆེན་པོ་དེ་ལ་མཉམ་པར་བཞག་གོ །དེ་ཡི་མགོན་པོ་འཁོར་དང་བཅས་པ་ལ་ཉམ་གྲིབ་ཕོག་པ་དང་། དམ་ཉམས་ཀྱི་ཟས་ཟོས་པ་དག་ནས་ལས་ལ་མི་གཡེལ་དྲན་ཞིན་བཀའ་ཉན་ནོ། །གདོན་བགེགས་ཐམས་ཅད་ཀྱང་སྐད་ཅིག་ལ་འཇོམས། དཔལ་ལྡན་[[Shavaripa|ཤ་བ་རི་པ་]]ནས་[[Sangyé Nyentön|སངས་རྒྱས་མཉན་སྟོན་]]ཡན་ལ་འདི་ཆིག་རྒྱུད་ལས་མེད་འདི་ནི་ཡིད་ལ་དྲན་པ་ཙམ་གྱིས་ཀྱང་བཟླས་པ་དང་གཏོར་མ་མ་གྲུབ་ཀྱང་མགོན་པོ་འཁོར་བཅས་ཀྱི་བྲན་བཞིན་ལས་བྱེད་དོ། །[[Khyungpo Neljor|ཁྱུང་པོ]]འི་ཞལ་གདམས་བླ་མ་མགོན་པོའི་གནད་ཡིག་ཡིད་བཞིན་ནོར་བུ་ཞེས་བྱ་བ་འདིས། [[Sangyé Tönpa|སངས་རྒྱས་སྟོན་པ]]ས་[[Rigong|རི་གོང་དཔལ་གྱི་རི་ཁྲོད་]]དུ་ཡི་གེར་བཀོད་པའོ། །གནད་འབེབས་འདི་ཕལ་ཆེ་བ་ལ་མི་གནང་ངོ་། །མང་ཐོས་[[Gelek Pelsang|དགེ་ལེགས་དཔལ་བཟང་]]གིས། མཁས་གྲུབ་གོང་མའི་མན་ངག་ལ། ལྷད་ཞུགས་གསལ་ནས་དག་པར་བྱས། ས་མ་བརྒྱ། See [[mgon po snying zhugs 'pho ba dang bcas pa'i dmigs rim rgyun gyi rnal 'byor du bya ba'i tshul]] ༒ བླ་མ་མགོན་པོ་དབྱེར་མེད་ཀྱི་ཞལ་ཤེས་ཐུན་མོང་དང་ཐུན་མོང་མ་ཡིན་པའི་གདམས་རྣམས་ཕྱོགས་གཅིག་ཏུ་བསྡུས་པ་ཤིན་ཏུ་གསང་བའི་ཡིག་ཆུང་རྣམས་བཞུགས་སོ། བླ་མ་མགོན་པོ་དབྱེར་མེད་ཀྱི་ཞལ་ཤེས་ཐུན་མོང་དང་ཐུན་མོང་མ་ཡིན་པ་གཉིས། དང་པོ་ནི། མགོན་པོའི་སྤྱི་གཙུག་ཏུ་དྲིན་ཅན་རྩ་བའི་བླ་མ་དེ་ཉིད་སྐུ་མདོག་སེར་པོཅེས་པ་ནས་ངོ་བོར་གྱུར་པའི་སྐུ་ལས་འོད་འཕྲོས། ཞེས་པའི་བླ་མའི་སྐུ་ལས་འོད་ཟེར་དཀར་པོ་ཅིག་ཡར་འཕྲོས། རྡོ་རྗེ་འཆང་ནས་རྩ་བའི་བླ་མའི་བར་ཐམས་ཅད་སྤྱན་དྲངས། རྩ་བའི་བླ་མ་དེ་ཉིད་ལ་ཐིམ་པས་བླ་མ་ཀུན་བསྡུས་སུ་བསམ། དེ་འདྲའི་བླ་མའི་སྐུ་ལས་འོད་ཟེར་སྣ་ལྔ་འཕྲོས། སྐུའི་དབྱིབས་རྒྱུད་འོག་ནས་ཐོན་མགོན་པོའི་སྟེང་ནས་བཞུགས་པས། མགོན་པོ་འོད་དང་བདེ་བའི་རང་བཞིན་དུ་འབར་འུར་འུར་སིལ་སིལ་གར་མཛད། མགོན་པོའི་ནུས་མཐུ་ལྷག་པར་རྒྱས། མགོན་པོ་ལས་འོད་ཟེར་སྣ་ལྔ་འཕྲོས་སྐུའི་དབྱིབས་རྒྱུད་སྤྱི་བོའི་ནས་ཐོན། བླ་མ་ལ་ཕོག་པས་བླ་མ་འོད་དང་བདེ་བའི་རང་བཞིན་དུ་མེར་མེར་དྲིལ་བུའི་སྒྲ་སྒྲོགས། གཉིས་ཀའང་རང་ལ་སྤྱན་ཧྲིག་ཧྲིག་གཟིགས་པར་བར་བསམ་ལ། དྲིན་ཅན་རྩ་བའི་བླ་མ་རིན་པོ་ཆེ་ལ་གསོལ་བ་འདེབས་སོ། །ཞེས་ཀྱུས་ལྟར་གསོལ་འདེབས་བྱེད། བྱིན་བརླབས་ཞུ་བ་དངོས་ནི། ན་མོ་བུདྷ་ཡ་ཞེས་སོགས་ངག་ཏུ་བརྗོད་པ་དང་དུས་མཉམ་དུ། དམིགས་པ་བླ་མའི་ཐུགས་ཀ་ནས་འོད་ཟེར་སྣ་ལྔ་བྱུང་རང་ཉིད་ལ་ཐིམ་པས་ནད་གདོན་སྡིག་སྒྲིབ་བགས་ཆགས་དང་བཅས་པ་དག །བླ་མའི་བྱིན་བརླབས་ཞུགས་པར་བསམ། མགོན་པོའི་ཐུགས་ཀ་ནས་མགོན་པོའི་སྐུ་ཆུང་ལ་ཡན་ལག་རག་པ་དཔག་ཏུ་མེད་པ་བྱུང་། རང་ལ་ཐིམ། ལ་ལས་ནད་གདོན་སྡིག་སྒྲིབ་ཐམས་ཅད་ཞལ་དུ་དམར་རྩི་རི་གསོལ། ལ་ལས་རིགས་ཀྱི་བུ་ཁྱོད་ཀྱིས་འགལ་རྐྱེན་བར་ཆད་ཐམས་ཅད་ངས་སེལ་ཞིང་། མཐུན་རྐྱེན་ཐམས་ཅད་ངས་བསྒྲུབ་བོ་ཞེས་གསུང་ལྷང་ལྷང་བ་དང་། ལ་ལས་སྲོག་སྔགས་བརྗོད། དེ་དག་འོད་ཟེར་འཕྲོས་རང་ཉིད་ཀྱི་ནད་གདོན་བར་ཆད་ཐམས་ཅད་ཞི་ཞིང་བྱིན་གྱིས་བརླབ་པར་བསམ། བྱིན་བརླབས་དེ་བསྟན་པའི་ཕྱིར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརློབས་ཞིག །ཅེས་སོགས་བྱེད་དོ། ༈ གྲིབ་བསེལ་ཐུན་མོང་དང་ཐུན་མོང་མ་ཡིན་པ་གཉིས། གནད་དབབ་དང་གསུམ། དང་པོ་ནི། མགོན་པོའི་སྤྱི་གཙུག་ཏུ་དྲིན་ཅན་རྩ་བའི་བླ་མ་དེ་ཉིད་སྐུ་མདོག་དཀར་པོ་ཞེས་པ་ནས་ལྷ་ཚོགས་སྤྱན་དྲངས་ཅེས་པའི་བར་ཏེ། དེ་ཡང་བླ་མའི་ཐུགས་ཀ་ནས་འོད་ཟེར་འཕྲོས་རྡོ་རྗེ་གསུམ་གྱིས་ལྷ་ཚོགས་རྣམ་སྣང༌འོད་དཔག་མེད་དམ་མི་བསྐྱོད་པ་སྟེ་རྡོ་རྗེ་གསུམ་གྱི་ལྷ་ཚོགས་སྤྱན་དྲངས། ཡས་རིམ་ནས་འཁོད་པའི་ཐུགས་ཀ་གསུམ་དུ་ཡས་རིམ་ནས་ཟླ་གདན་གྱི་སྟེང་དུ་ཨོཾ་ཡིག་གིས་མཐར་ཡི་གེ་བརྒྱ་པའི་སྔགས་འཕྲེང་དཀར་པོ་དབུ་ཅན་མདུན་ངོས་ནས་ཙམ་སྟེ་གྱེན་ལ་བཞེངས་པའི་རྣམ་པ་ཅན་འཁོད་འོད་དཔག་མེད་ཀྱི་ཐུགས་ཀར་པདྨ་དམར་པོ་འདབ་མ་བརྒྱད་པའི་ལྟེར་ཨཱཿའི་མཐའ་བསྐོར་དུ་ཡིག་བརྒྱ་དམར་པོ། མི་བསྐྱོད་པའི་ཐུགས་ཀར་ཉི་གདན་གྱི་སྟེང་དུ་ཧཱུྃ་ཡིག་གིས་མཐར་བསྐོར་དུ་ཡིག་བརྒྱ་སྔོན་པོའི་སྔགས་འཕྲེང་བཀོད། བླ་མའི་གནས་གསུམ་དུ་ཡང་ཟླ་ཉི་པད་གསུམ་གྱི་གདན་གྱི་སྟེང་དུ་ཡི་གེ་བརྒྱ་པའི་སྔགས་འཕྲེང་དཀར་དམར་མཐིང་གསུམ་བཀོད། དེ་ནས་ཡིག་བརྒྱ་འདྲེན་པའི་ཚེ་ཉེར་གཅིག་བཟླ་ན་བདུན་ཚན་གསུམ་དུ་བཅད་དེ། བདུན་ཚན་དང་པོ་ཐོག་མའི་ཡིག་བརྒྱ་རྣམ་སྣང་གི་ཐུགས་ཀའི་སྔགས་འཕྲེང་ལ་དམིགས། གཉིས་པ་འོད་དཔག་མེད། གསུམ་པ་མི་བསྐྱོད་པའི་ཐུགས་ཀའི་སྔགས་འཕྲེང་ལ་དམིགས། བཞི་པ་རྣམ་སྣང་གི་སྔགས་འཕྲེང་ལ་དམིགས་ནས་བཟླས་པས། དེ་ནས་སྔགས་འཕྲེང་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱུང་སྟེ། བླ་མའི་སྤྱི་བོའི་ཟླ་གདན་གྱི་ས་བོན་གྱི་མཐའ་བསྐོར་དུ་འཁོད། དེ་ལས་འོད་ཟེར་དཀར་པོ་འཕྲོས་པས་རང་དང་བླ་མ་གཉིས་ཀྱི་བར་དུ་སྐུའི་དམ་ཚིག་ཉམས་ཆགས་ཐམས་ཅད་དག །ཚར་ལྔ་པ་ཟླ་བའི་ཚེ་འོད་དཔག་མེད་ཀྱི་ཐུགས་ཀ་ནས་སྔགས་འཕྲེང་དམར་པོ་སྔར་བཞིན་ཆད། བླ་མའི་མགྲིན་པར་འཁོད་པ་ལས་འོད་ཟེར་འཕྲོས། རང་དང་བླ་མ་གཉིས་ཀྱི་བར་དུ་གསུངས་གིས་ཉམས་ཆགས་ཐམས་ཅད་དག །དྲུག་པ་བཟླས་བའི་ཚེ་མི་བསྐྱོད་པའི་ཐུགས་ཀའི་སྔགས་འཕྲེང་ལས་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱུང་། བླ་མའི་ཐུགས་ཀའི་ས་བོན་གྱིས་མཐའ་བསྐོར་དུ་འཁོད་པ་ལས་འོད་ཟེར་སྔོན་པོ་འཕྲོས། རང་དང་བླ་མ་གཉིས་ཀྱི་བར་དུ་ཐུགས་ཀྱི་དམ་ཚིག་ཉམས་ཆགས་ཐམས་ཅད་དག །བདུན་པ་བཟླ་བའི་ཚེ་དེ་གསུམ་ཀ་ལ་ཐུན་མོངས་དུ་དམིགས་ནས་བཟླས་པས་ཡིག་བརྒྱ་དཀར་དམར་མཐིང་གསུམ་རིལ་བུ་བྱུང་། བླ་མའི་དེ་གསུམ་སོ་སོ་ལ་ཐིམ་ཞིང་འོད་ཟེར་འཕྲོས་པས། བླ་མའི་སྐུའི་ནང་ཐམས་ཅད་འོད་ཟེར་དཀར་དམར་མཐིང་གསུམ་གྱི་གང་། རང་དང་བླ་མ་གཉིས་ཀྱི་བར་དུ་སྐུངས་ཐུགས་ཀྱི་དམ་ཚིག་ཉམས་ཆགས་ཐམས་ཅད་དག་པར་བསམ་ཞིང་། རྡོ་རྗེ་གསུམ་གྱི་ས་བོན་གསུམ་ཡང་བླ་མའི་ས་བོན་ལ་ཐིམ་པར་བསམ། དེ་ནས་མགོན་པོ་དང་རང་གི་གནས་གསུམ་དུ་ཡང་གདན་སོགས་སྔགས་འཕྲེང་འགོད་པ་སོགས་འདྲ་བ་ལ། ཁྱད་པར་རང་དང་མགོན་པོ་གཉིས་ཀྱི་བར་དུ་དམ་ཚིག་ཉམས་ཆགས་ཐམས་ཅད་དག་པར་བྱེད་པའི་དམིགས་པ་དང་། རང་གི་ལུས་ངག་ཡིད་གསུམ་གྱི་དམ་ཚིག་ཉམས་ཆགས་ཐམས་ཅད་དག་པའི་དམིགས་པ་བྱེད་པ་མ་ཏོགས་གན་འདྲ། ༧ གཉིས་པ་གྲིབ་བསེལ་ཐུན་མོང་བ་ནི། བླ་མ་གསལ་མི་འདེབས་པར་མགོན་པོ་གནས་གསུམ་དུ་གདན་སོགས་སྔགས་འཕྲེང་དང་བཅས་པ་སྔར་དང་འདྲ། དེ་དག་ལ་དམིགས་ཡིག་བརྒྱ་བཟླས་པས་མགོན་པོའི་སྐུའི་ནང་ཐམས་ཅད་འོད་ཟེར་དཀར་དམར་མཐིང་གསུམ་གྱི་གང་ནས་ཉི་མ་ཤར་བ་ལྟར་གང་། རང་དང་མགོན་པོ་གཉིས་ཀྱི་བར་དུ་སྐུ་གསུངས་ཐུགས་ཀྱི་དམ་ཚིག་ཉམས་ཆགས་ཐམས་ཅད་དག །རང་ཡི་དམ་དུ་གསལ་བའི་གནས་གསུམ་དུ་ཡང་གདན་སོགས་སྔར་ལྟར་འགོད། དེ་ནས་ཡིག་བརྒྱ་བགྲངས་པས་མགོན་པོའི་སྤྱི་བོའི་ཡིག་བརྒྱ་བརྒྱང་སྟེ་བྱེན། རང་གི་སྤྱི་བོའི་སྟེང་དུ་ས་བོན་གྱིས་མཐའ་བསྐོར་དུ་འཁོད། དེ་བཞིན་དུ་མགྲིན་པ་དང་སྙིང་ཁ་གཉིས་ལ་ཡང་འདྲ་ཞིང་། རང་གི་ལུས་ཐམས་ཅད་འོད་ཟེར་དཀར་དམར་མཐིང་གསུམ་གྱི་གང་ནས་ཉི་མ་ཤར་བ་ལྟར་སོང་། རང་གི་སྡིག་སྒྲིབ་ཉམས་ཆགས་ཐམས་ཅད་དག་པར་བསམ། ཐུན་བསྡུད་པ་དང་མཉམ་དུ་རང་གི་སྤྱི་བོའི་སྔགས་འཕྲེང་ལ་དམིགས་ནས་བཟླས་པས། སྔགས་སྔགས་འཕྲེང་ཨོཾ་ལ་ཐིམ། དེ་ནས་མགྲིན་པ་དང་། སྙིང་ཁ་ལ་ཡང་འདྲ་ཞིང་། དེ་ནས་མགོན་པོ་དང་རང་གི་ས་བོན་གསུམ་ལའང་དམིགས་སྟེ། ཨོཾ་ཨཱཿཧཱུྃ་ཅི་མང་བཟླས། དེ་ནས་མགོན་པོ་སྤྱི་བོའི་ཨོཾ་ཡིག་རང་གི་སྤྱི་བོའི་ཨོཾ་ཡིག་ལ་ཐིམ་པ་སོགས་རིགས་འདྲེ་ཞིང་། རང་གི་སྙིང་ཀའི་ཧཱུྃ་ཡིག་གིས་ཞབས་ཀྱུ་ཨུ་ནི་ཧ་ལ་ཐིམ་པ་སོགས་ཀྱི་བསྡུད་རིམ་བྱེད་ཅིང་མཐར་སྟོང་ཉིད་ལ་རྩེ་གཅིག་ཏུ་མཉམ་པར་འཇོག་གོ། ༧ །མགོན་པོའི་གནད་དབབ་ནི། མགོན་པོའི་སྤྱི་བོར་བླ་མ་གྲིབ་བསེལ་ལྟར་བསྐྱེད། དེའི་ཐུགས་ཀ་ནས་འོད་ཟེར་དཀར་པོ་འཕྲོས་སངས་རྒྱས་ཀྱི་ཞིང་ཐམས་ཅད་དུ་སོང་བས་དེ་ཐམས་ཅད་དུ་སོང་བས་དེ་ཐམས་ཅད་འོད་ཟེར་གྱིས་མཆོད་པས་མཉེས་པར་བྱས། དེ་དག་གི་གཉིས་སུ་མེད་པའི་ཡེ་ཤེས་ཐམས་ཅད་འོད་ཟེར་དཀར་པོའི་རྣམ་པར་སྤྱན་དྲངས་བླ་མའི་སྤྱི་བོ་ནས་བཞུགས། ལུས་ཐམས་ཅད་གང་སྐུའི་དབྱིབས་རྒྱུད། སྐུའི་དམད་ནས་ཐོན་ཏེ་མགོན་པོའི་སྤྱི་བོ་ནས་ཞུགས། མགོན་པོའི་སྐུ་ལུས་ཐམས་ཅད་ཀྱང་འོད་ཟེར་གྱིས་གང་། དེ་གཉིས་དང་རང་གི་བར་དུ་དམ་ཚིག་ཉམས་ཆགས་ཐམས་ཅད་དག་པར་བསམ་ཞིང་། ཡང་གོང་ལྟར་འོད་ཟེར་འཕྲོས་པས་མཉེས་པར་བྱས། དེ་དག་གི་གཉིས་སུ་མེད་པའི་ཡོན་ཏན་ཐམས་ཅད་བདུད་རྩི་དཀར་པོའི་རྣམ་པར་བྱོན་ནས་གན་འདྲ་བ་ལ་བླ་མའི་གསང་རྡོར་གྱི་ནང་ནས་བྱོན་པ་མ་ཏོགས་གན་གོང་དང་འདྲ་ཞིང་། རང་དང་དེ་གཉིས་ཀྱི་བར་དུ་དམ་ཚིག་ཉམས་ཆགས་ཐམས་ཅད་དག་པར་བསམ། ༧ བརྟེན་བཞིའི་གནད་གསུམ་གྱི་ཞལ་ཤེས་ལ། དང་པོ་ཕྱི་བརྟེན་ལ་ཐུན་མོང་དང་ཐུན་མོང་མ་ཡིན་པ་གཉིས། དང་པོ་རྟ་གཡག་ལུག་སོགས་ལས། གཡག་ལ་མཚོན་ན་གཡག་རྒོད་ཡན་ལག་དང་ཕོ་བརྟགས་སོགས་མ་ཉམས་ཤིང་ཚང་བ། རྭ་སོགས་ཡིད་དུ་འོང་བ་ལ་ཤིང་རྟག་པའི་ཤུག་པ་ལྟ་བུ་ལ་བྱས་པའི་བྱང་བུ་སོར་བཞིའི་ཚད་ཤིན་ཏུ་འཇམ་པ་མགོ་འཇུག་མ་ལོག་པར་བྱས། གཡག་རྒོད་རྒྱན་དང་ལྡན་པ་འདི་ཉིད་མགོན་པོ་འཁོར་དང་བཅས་པ་ལ་བརྟེན་དུ་འཆའོ། །འབེན་དུ་འཇུགས་སོ། །བརྟེན་ལས་མ་འདའ་གཅིག །འབེན་ལ་མ་གཡོ་ཅིག་དགྲ་བགེགས་ཐུལ་གཅིག་ཞེས་དང་། ཕྱོགས་གཅིག་ལ་ཨོཾ་བཛྲ་མཧཱ་ཀ་ལའི་སྔགས་འཇུག་ཏུ་བདག་ཅག་འཁོར་དང་བཅས་པ་ལ་བསྲུང་གཅིག་སྭཱ་ཧཱ། ཞེས་བྲིས་ལ་ཆུ་སོགས་ཀྱི་བྱུགས། དམ་པར་གོས་ནག་གམ་ཕྱིང་ནག་གིས་སྟུམ་ལ་གཡག་རྒོད་ཀྱི་དཔུངས་པ་གཡས་ཕྱོགས་སུ་འདོགས་ཤིང་། དར་སྣ་ལྔའི་གཅོད་པཎ་ཀྱང་དེ་ཕྱོགས་སུ་འདོགས། སྣུམ་སྲོས་ནས་རྭ་དང་དམིགས་པ་ལ་བྱུང་། ནང་མཆོད་བླུད་ཕྱི་བརྟེན་གན་ལ་ཡང་འདྲའོ། ༧ གཉིས་པ་ནི་བྱང་བུ་དེ་ཉིད་མགོན་པོར་བསྐྱེད་ཡེ་ཤེས་པ་སྤྱན་དྲངས་ནས་བསྟིམ་པ་སོགས་ཀྱུས་ལྟར་བྱ། དེ་ཉིད་འོད་དུ་ཞུ་ནས་འདོགས་ཤིང་གཏོར་དབང་བསྐུར། ཕྱི་བརྟེན་དེ་དག་འཆའ་བའི་ཚེ་ཞལ་ཤེས་ལྟར་ཡུང་དཀར་དང་གུ་གུལ་གྱིས་གདུགས་ཅིང་བྲབས་སོ། ༧ །ནང་བརྟེན་འཆའ་བ་ལ་སྔར་ལྟར་གཉིས་ལས། དང་པོ་ནི་མཉེན་ལྕུག་དྲངས་ཤིང་རྒོད་ཆེན་སྒྲོ་ཡིས་བརྒྱན་ཞེས་པའི། མདའ་རྒྱུད་པའི་སྙུག་མ་དེ་ཉིད་མཉེན་གྱོང་གཉིས་ལས་མཉེན་པ། ལྕུག་ཅེས་པ་ཚིག་ཐག་རིང་བ། དྲང་ཞེས་པ་ཀྱོག་པོ་མིན་པ་ཟུར་གསུམ་ལ་རྒོད་ཀྱི་རྩེ་སྒྲོ་མ་ཉམས་པ་སྐྱོན་པའི་བར་ལ་ཚལ་གྱིས་བྱུང་། གྲིག་དང་སྣག་ཚ་བསྲེས་པའི་བཛྲ་མཧཱ་ཀཱ་ལ་འམ། ན་ར་ཀྲིཾ་ཀྲིཾ་གང་རུང་བྲིས། དར་ནག་གམ་གོས་ནག་ཁ་གང་ལ་གྲིག་དང་སྣག་ཚ་བསྲེས་པས་སྲོག་སྔགས་ཤ་ས་ན་སྤེལ་ཚིག་དང་བཅས་པ་བྲིས་ནས་འདོགས། གནམ་ལྕགས་ཞེས་པ་ཐོག་འདེའུ་འམ། མ་འབྱོར་ན་མི་གསད་པའི་གྲི་སོགས་ལ་མདེའུ་བྱེད་ཅིང་ཞལ་ལེས་ལྟར་གྱི་མེ་ཏོག་གི་རབ་གནས་བྱེད། ༧ གཉིས་པ་ནི་དེ་ལྟ་བུའི་མདའ་དེ་ཉིད་མགོན་པོ་དམ་ཚིག་པར་བསྐྱེད་ཡེ་ཤེས་པ་སྤྱན་དྲངས་ནས་བཞུགས་པ་སོགས་ཀྱུས་ལྟར་བྱེད། བཟླས་པ་དང་གཏོར་མ་ཡང་དེ་ཉིད་ལ་འབུལ་ཞིང་བསྟོད་པ་སོགས་བྱེད། དེ་འོད་དུ་ཞུ་ནས་མདའི་རྣམ་པ་ཅན་ནུ་བྱས་པ་དེ་ཉིད་མགོན་ཁང་ངམ་རང་འདོད་པར་འཇོག །འགོའི་ཡུག་སོགས་མ་བྱུང་བ་བྱེད་དགོས་སོ། ༧ །གསང་བརྟེན་ལ་གཉིས་ལས། དང་པོ་ནི་དཔའ་བོ་སྟེ་སྐྱེས་པ་སྐྱེས་པ་ཤིན་ཏུ་རྒོད་པ་གཡུལ་དུ་དུས་གྲིར་གསད་པའི་སྙིང་རྒྱབ་ནས་སྟོན་པའི་རྩ་གསུམ་མ་ཉམས་པ་དེ་བྱེ་མས་རྒྱང་ནས་སྐམ། དེ་ནས་རོ་རས་དངོས་སམ་རོ་ལ་བསྐབ་ཙམ་བྱས་པའི་རས་ལེགས་པར་སོར་བཞི་ལ་མགོན་པོ་བསྐུ་བྲིས། དེའི་སྐུ་ལུས་ལ་བཛྲ་མཧཱ་ཀ་ལ་སོགས་བྲི། དེ་ལ་མཚན་ཀྱེ། དེ་ཉིད་དམ་ཚིག་པར་བསྐྱེད་པར་སོགས་བྱས། དེའི་གཡས་གཡོན་གཉིས་ནས་བྲེལ་ནས་རྩ་དབུ་མར་བཅུག །གཡས་གཡོན་གྱི་རྩ་གཉིས་ལ་གཅིག་ཏུ་རིན་པོ་ཆེ་གསེར་དངུལ་སོགས་ཀྱི་ཕྱེ་མ་དང་། གཅིག་ཏུ་བཟང་དྲུག་གི་ཕྱེ་མ་དང་། ཨོཾ་བཛྲ་མཧཱ་ཀ་ལ་སོགས་སྙིང་རྩེ་ངོས་ལ་སྔགས་དང་མགོན་པོའི་སྐུ་གཉིས་ཀའི་མགོ་བསྟན་ནས་འཇུག །རྩ་དེ་གསུམ་གྱིས་བུ་ག་རག་ཤ་མིག་མེད་ཀྱིས་དགག་དེ་ཉིད་གྱེན་ལ་སླངས་ནས་མགོན་ཁང་སོགས་སུ་འཇོག་གོ ༧ །གཉིས་པ་ནི་དེ་ཉིད་མགོན་པོར་བསྐྱེད་པ་སོགས་ཕྱི་བརྟེན་དང་འདྲ་ཞིང་དེ་ཉིད་ཞུ་བ་དང་མི་ཞུ་བ་གཉིས་ཡོད་པ་གང་ཐད་བྱའོ། ༧ །དེ་ཁོ་ན་ཉིད་ཀྱི་བརྟེན་ཡང་ཟེར། བླ་མ་མགོན་པོ་ཐུན་མོངས་མ་ཡིན་པ་ཡང་ཟེར། མགོན་པོའི་སྤྱི་གཙུག་ཏུ་བླ་མ་གྲིབ་སེལ་ལྟར་བསྐྱེད་པའི་ཐུགས་ཀ་ནས་འོད་ཟེར་འཕྲོས། རྩ་རྒྱུད་ཀྱི་བླ་མ་ཐམས་ཅད་སྤྱན་དྲངས་དེ་ཉིད་ལ་སྟིམ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས་ལ་མགོན་པོ་ལ་སྟིམ། དེ་ནས་བླ་མ་འོད་དུ་ཞུ་ནས་མགོན་པོ་ལ་ཐིམ། མགོན་པོ་འོད་དུ་ཞུ་ནས་མེ་ལོང་ལ་ཧས་གཏབ་པ་བཞིན་དུ་སོང་བར་བསམ། དེའི་ངང་ལས་སྔར་ལས་ཀྱང་གཟི་བརྗིད་མཐུ་སྟོབས་ཆེ་བར་ཐོལ་གྱི་བཞེངས་པ་དེ་ཉིད་སྣང་ལ་རང་བཞིན་མེད་པ་སྒྱུ་མ་ལྟ་བུའི་ངང་ལ་ཅི་ནུས་སུ་བཞག་པ་དེ་ཉིད་ཀྱིས་མགོན་པོ་མཉེས་པར་བསམ་པ་ནི་དེ་ཁོ་ན་ཉིད་ཀྱི་བརྟེན་ནམ། བླ་མ་མགོན་པོ་ཐུན་མོང་མིན་པ་ཡིན། མགོན་པོའི་གསེར་ཆོས་བཞིའི་ནང་གི་གཅིག་ཡིན་གསུངས། ༧ གནད་གསུམ་ནི་དཔྲལ་བའི་སིནྡྷུ་ར་ལ་བརྟེན་ནས་མཁའ་འགྲོ་དབང་དུ་བསྡུད་པ་ནི་སྔར་ལྟར་གཉིས་ལས། དང་པོ་ནི་མགོན་པོའི་སྤྱི་གཙུག་ཏུ་དྲིན་ཅན་རྩ་བའི་བླ་མ་དེ་ཉིད་སྐུ་མདོག་དམར་པོ་ཅེས་སོགས་ཀྱུས་ལྟར་ལ། མགོན་པོའི་དཔྲལ་བའི་དབྱིངས་སུ་སིནྡྷུ་རའི་གདན་ཉི་གདན་ཉ་གལ་ལྟ་བུའི་སྟེང་དུ་ཧྲཱིཿ དམར་པོ་གཅིག་དབུས་དང་གཞན་བཅུ་གཉིས་མཐའ་བསྐོར་དུ་འཁོད་པ་ཡོངས་སུ་གྱུར་པ་ལས། གསང་བའི་མཁའ་འགྲོ་མ་དམར་མོ་བཅུ་གསུམ་དུ་གྱུར། བླ་མའི་སྐུ་ལས་འོད་ཟེར་དམར་ལ་སྨུག་པ་འཕྲོས་མགོན་པོ་དང་མཁའ་འགྲོ་མ་རྣམས་ལ་ཕོག་པས། མཐའ་བསྐོར་དུ་འཁོད་པའི་མཁའ་འགྲོ་མ་རྣམས་དབུས་ཀྱི་མཁའ་འགྲོ་མ་རྣམས་ལ་གཡས་བསྐོར་དུ་དམར་སྒོ་བོར་གར་མཛད་ཅིང་ཌ་མ་རུ་ཁྲོལ་སྤྱན་གསུམ་ནམ་མཁའ་ལ་ཧྲིག་ཧྲིག་གཟིགས། མགོན་པོས་ཀྱང་དེ་ལྟ་བུ་མཛད་པ་དང་གཉིས་ཀ་ལས་འོད་ཟེར་དམར་ལ་སྨུག་པ་ལྕགས་ཀྱུ་ལྟ་བུ་འཕྲོས་པས། བླ་མ་དབང་དུ་བསྡུད་ན་པཎྜི་ཏའི་ཐུགས་ཀར་འོད་ཟེར་གྱི་འདེབས། སློབ་མས་འཕོགས་ན་སྐལ་ལྡན་གྱི་སྐྱེ་བོ་དང་། འཁོར་གྱི་འཕོང་ན་རྒྱལ་པོ་དང་བློན་པོ་སོགས་དང་། ནོར་གྱི་འཕོང་ན་གང་གི་འཕོངས་པའི་ནོར་དེ་སོགས་ལ་འོད་ཟེར་གྱི་ལྕགས་ཀྱུས་གཏབ་ནས་རང་གི་མདུན་དུ་སྤྱན་དྲངས་ནས་རང་ཉིད་ལ་གུས་ཤིང་འདུད་པར་བྱེད་མཐར་རང་ཉིད་ལ་ཐིམ་པར་བསམ་མོ། ༧ །གཉིས་པ་ནི་དབུས་སུ་ཧྲཱིཿབཀོད་པ་ཡན་འདྲ་བ། བླ་མའི་ཐུགས་ཀ་ནས་ན་ར་ཀྲིཾ་ཀྲིཾ་གི་སྔགས་འཕྲེང་དམར་ན་ར་ར་བྱུང་ནས། དཔྲལ་བའི་སིནྡྷུ་རའི་མཐའ་བསྐོར་དུ་འཁོད་པ་ཚན་པ་བཅུ་གཉིས་སུ་བྱས་པ་མཁའ་འགྲོ་མ་གཅུ་གཉིས་སུ་སོང་བ་མ་ཏོགས་གན་འདྲ་ལ། ༧ གཤིན་རྗེ་གཤེད་ཀྱི་སྒོས་སྐུའི་གཟིད་བརྗིད་བསྐྱེད་པ་གཉིས་ལས། དང་པོ་ནི་མདུན་ཀྱི་མགོན་པོའི་ཐུགས་ཀར་ཉི་གདན་གྱི་སྟེང་དུ་ངོ་བོ་ཡི་དམ་རྡོ་རྗེ་འཇིགས་བྱེད་ཀྱི་ཐུགས་གཉིས་སུ་མེད་པའི་ཡེ་ཤེས་ཡིན་པ་ལ་རྣམ་པ་ཧཱུྃ་ཡིག་གཅིག་གསལ་བཏབ། དེ་ལས་འོད་ཟེར་འཕྲོས་པས་སངས་རྒྱས་བྱང་ཆུབ་སེམས་དཔའ་ཐམས་ཅད་ཁྲོ་བོའི་རྣམ་པར་སྤྱན་དྲངས་ནས་ཧཱུྃ་ཡིག་ལ་ཐིམ་པས་ཡི་དམ་ཞལ་ཕྱག་ཡོངས་རྫོགས་ལ་སོང་ནས། མགོན་པོ་གཟི་བརྗིད་དང་མཐུ་སྟོབས་ང་ལས་ཆེ་བ་མེད་ཨཾ་སྙམས་དུ་བསམ། ༧ གཉིས་པ་ནི་གན་འདྲ་བ་ལ་མགོན་པོའི་ཐུགས་ཀའི་ཧཱུྃ་ཡིག་དེ་ཉིད་མགོན་པོ་དང་ཡི་དམ་གཉིས་ཀའི་ཐུགས་གཉིས་སུ་མེད་པའི་ཡེ་ཤེས་ཡིན་སྙམས་དུ་བསམ། ༧ གསུམ་པ་ནི་སྤྱི་བོའི་མི་བསྐྱོད་པ་ལ་བརྟེན་ནས་གཤེད་རྒྱུད་འཇམ་དུ་གཏོང་བའི་གནད་ལ་གཉིས་ལས། དང་པོ་ནི་མགོན་པོའི་སྤྱི་བོར་རིགས་བདག་མི་བསྐྱོད་པ་ཡོད་པ་དེའི་སྐུ་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཧཱུྃ་ཡིག་གི་རྣམ་པར་སྤྱན་དྲངས། བླ་མ་མི་བསྐྱོད་པའི་ཐུགས་ཀ་ནས་མར་ཞུགས་སྐུའི་དབྱིབས་རྒྱུད་དེ་གསང་རྡོར་ནས་ཐོན། མགོན་པོའི་སྤྱི་བོ་ནས་ཞུགས་དབུ་མའི་ནང་རྒྱུད་དེ་བགྲེངས་ལྟར་ན་རེ་ཡོད་པ་དམིགས། དེ་ཡང་གཏོག་པས་བཏགས་པ་ཙམ་མ་ཏོགས་རང་བཞིན་གྱིས་མཁས་གྲུབ་སྙམ་དུ་བསམ། ༧ གཉིས་པ་ནི་རང་ཡི་དམ་དུ་གསལ་བའི་སྤྱི་བོར་ཡོད་པའི་མི་བསྐྱོད་པའི་ཐུགས་ཀ་ནས་འོད་ཟེར་ཕྱོགས་བཅུར་འཕྲོས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཧཱུྃ་ཡིག་གི་རྣམ་པར་སྤྱན་དྲངས་ནས། རང་གི་སྤྱི་བོའི་རིགས་བདག་བླ་མ་མི་བསྐྱོད་པའི་སྤྱི་བོ་ནས་སྔར་བཞིན་ཞུགས། གསང་རྡོར་ནས་ཐོན་མགོན་པོའི་སྤྱི་བོ་ནས་ཞུགས་རྩ་དབུ་མའི་ནང་ན་མར་བགྲ་བགྲེངས་ལྟར་ན་རེ་ཡོད་པ་ལ་ཧཱུྃ་ཡིག་རྒྱུན་མ་ཆད་པ་བྱུང་། གཅིག་ལ་གཅིག་ཐིམ་པར་དཔེར་ན་ཆུ་ཐིག་གཅིག་ལ་གཅིག་ཐིམ་པ་ལྟར་བསམ་མོ། ༧ །གནད་དབབ་ལ་གཉིས་ལས་དང་པོ་ལ། བླ་མ་གནད་ལ་དབབ་པ། མཁའ་འགྲོ་གནད་ལ་དབབ་པ། མགོན་པོ་གནད་ལ་དབབ་པའོ། །དང་པོ་ནི་བླ་མ་སྐུ་མདོག་ཕྱག་མཚན་སོགས་དབང་བསྡུད་ཀྱི་སྐབས་བཞིན་བསྐྱེད། དེ་ལས་འོད་ཟེར་འཕྲོས་རྩ་རྒྱུད་ཀྱི་བླ་མ་ཐམས་ཅད་སྤྱན་དྲངས་དེ་ཉིད་ལ་ཐིམ་པས་དེ་ཉིད་སྐུ་མདོག་དམར་སྨུག་ཏུ་གྱུར། དེ་ཉིད་ཁག་ཏེ་བཞེངས་མགོན་པོའི་སྤྱི་གཙུག་ཏུ་ཁྲབ་པ་སོགས་གར་མཛད་ཅིང་སྤྱན་གསུམ་ནམ་མཁའ་ལ་ཧྲིག་གི་གཟིགས་པར་བསམ། ༧ མཁའ་འགྲོ་གནད་དབབ་ནི། བླ་མའི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་ཐམས་ཅད་བསྐུལ་སྟེ། མགོན་པོའི་དཔྲལ་བའི་སིནྡྷུ་རའི་སྟེང་གི་མཁའ་འགྲོ་མ་ལ་ཐིམ་པས་དེ་དག་ཀྱང་གར་མཛད་ཅིང་སྤྱན་གསུམ་ནམ་མཁའ་ལ་ཧྲིག་གི་གཟིགས་པར་བསམ། ༧ མགོན་པོ་གནད་དབབ་ནི། ཡང་བླ་མའི་སྐུ་ལས་འོད་ཟེར་འཕྲོས་སངས་རྒྱས་བྱང་སེམས་ཐམས་ཅད་སྤྱན་དྲངས་མགོན་པོ་ལ་ཐིམ་པས་མགོན་པོ་ཡང་ཚོགས་བདག་གི་སྟེང་ན་གར་མཛད་ཅིང་སྤྱན་གསུམ་ནམ་མཁའ་ལ་ཧྲིག་གི་གཟིགས་པར་བསམ། ༧ གཉིས་པ་ནི་རང་ཡི་དམ་དུ་གསལ་བའི་ཐུགས་ཀ་ནས་འོད་ཟེར་དམར་པོ་མེ་འོད་འཕྲོ་བ་དྲག་པོ་འཕྲོས། མགོན་པོའི་ཐུགས་ཀ་ལ་ཕོག་པས་གནད་ལ་ཕོག་པར་ལྟར་གྱུར་ནས་མགོན་པོ་དྲག་ཏུ་འཕྲོས་ཤིང་འཁྲུག་ཚོགས་བདག་གི་སྟེང་དུ་གར་མཛད་ཅིང་སྤྱན་གསུམ་འཁོར་རྣམས་ལ་ཧྲིག་གི་གཟིགས་པ་དང་། འཁོར་རྣམས་ཀྱང་མགོན་པོ་ཇི་ལྟར་བཞེད་པ་ཡིན་སྙམས་དུ་བསམ་པས་མགོན་པོའི་བཞེད་པ་གཟིགས་སྟེ། ཀྵེ་ཊ་པ་ལའི་སྤྲུལ་པ་ནམ་མཁའ་གང་བ་སྤྲོས་ཏེ་གནོད་བྱེད་ཀྱི་དགྲ་བོ་བཀུག་ནས་མདུན་དུ་ཁྲིད་པ་དེ་ཉིད་ཀྱི་ཁོག་པ་གཤགས་ནས་དོན་སྙིང་ལྔ་ཀ་མགོན་པོའི་ཐོད་པའི་ནང་དུ་བླུག །ཤ་རུས་ལྷག་མ་རྣམས་ཀྱི་འཁོར་རྣམས་ཚིམ་པར་བསམ་མོ། །དེ་དག་ཤ་ས་ཎ་འདྲེན་དུས་བྱེད། ༧ ཧཱུྃ་དྲུག་གི་གཏོར་མ་འབུལ་བའི་སྔོན་དུ་ཆོས་སྐྱོངས་རྣམས་སྙིང་ཆུ་བསྲེ་བ་ནི། རང་གང་བྱེད་ཀྱི་ཆོས་སྐྱོངས་ལ་གཏོར་མ་རིམ་པ་བཞིན་ཏུ་བཤམས། མགོན་པོའི་གཏོར་མའི་རྒྱབ་ཏུ་མགོན་པོ་བསྐྱེད། དེས་ཆོས་སྐྱོངས་གན་ལའང་དེ་བཞིན་བྱ། དེ་ནས་གཏོར་མ་འབུལ་བའི་ཚེ་ཐོག་མར་དཔལ་ལྡན་ལྷ་མོ་ལ་འབུལ་བསྟོད་པ་བྱེད། དེ་ནས་དཔལ་ལྡན་ལྷ་མོའི་འཁོར་རྣམས་འོད་དམར་པོ་ཞུ་ནས་དཔལ་ལྡན་མ་རང་ལ་ཐིམ། དེ་འོད་དུ་ཞུ་ཆོས་རྒྱལ་ལ་ཐིམ་ཆོས་རྒྱལ་ལ་གཏོར་མ་འབུལ་བསྟོད་བྱེད། ཆོས་རྒྱལ་གྱི་འཁོར་རྣམས་འོད་དམར་པོར་ཞུ་ནས་ཆོས་རྒྱལ་ལ་ཐིམ། ཆོས་རྒྱལ་འོད་དུ་ཞུ་ནས་མགོན་པོ་ལ་ཐིམ། ༧ མགོན་པོ་ལ་གཏོར་མ་འབུལ་ན་ཧཱུྃ་དྲུག་གི་གདམས་པ་ལ་བཞི། ཞི་བའི་ཧཱུྃ་དྲུག །རྒྱས་པའི། དབང་གི །དྲག་པོའི་ཧཱུྃ་དྲུག་གོ །དང་པོ་ནི་ཐོད་པ་ཕྱི་དཀར་ལ་ནང་དམར་བའི་ནང་དུ་མགོན་པོའི་གཏོར་མ་བདུད་རྩི་དཀར་པོའི་རྣམ་པར་བསྐྱེད། དེ་ནས་ཧཱུྃ་ཞེས་བརྗོད་པ་དང་མཉམ་དུ་བདུད་རྩིའི་སྟེང་དུ་ཧཱུྃ་ཡིག་དཀར་པོ་མགོ་གྱེན་ལ་བཞེངས་པའི་རྣམ་པ་ཅན་གཅིག་གསལ་གཏབ། ཧཱུྃ་གཉིས་པ་བརྗོད་པས་ཧཱུྃ་དེ་ལས་འོད་ཟེར་འཕྲོས། ཧཱུྃ་གསུམ་པ་བརྗོད་པ་དང་མཉམ་དུ་རྒྱ་མཚོ་སོགས་ན་གནས་པའི་བདུད་རྩི་དང་། ཕྱོགས་བཅུའི་སངས་རྒྱས་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་སྤྱན་དྲངས། ཧཱུྃ་བཞི་པ་བརྗོད་པས་མགོན་པོའི་སྐུ་ཚིམ། ལྔ་པ་བརྗོད་པས་གསུངས་ཚིམ། དྲུག་པ་བརྗོད་པས་ཐུགས་ཚིམ་པར་བསམ། ལུགས་གཅིག་ལ་གསུམ་ཡན་འདྲ་བ་ལ། བཞི་པ་བརྗོད་པས་ལྗགས་འོད་ཀྱི་སྦུ་གུས་ལྔ་པ་བརྗོད་པས་བཅུད་དྲངས། དྲུག་པ་བརྗོད་པས་ལྗགས་སྟེང་དུ་སླེབ་ནས་མཉེས་ཤིང་ཚིམ་པར་བསམ། ༧ རྒྱས་པའི་ཧཱུྃ་དྲུག་གདམས་པ་ནི། ཐོད་པའི་ནང་གི་བདུད་རྩི་ཁོག་སེར་པོ། དེའི་སྟེང་གི་ཧཱུྃ་ཡིག་ཀྱང་སེར་པོ་བྱེད་པ་མ་ཏོགས་གན་འདྲའོ། ༧ །དབང་ལ་བདུད་རྩི་ཁོག་དམར་པོ་ཧཱུྃ་ཡིག་དམར་པོ་བྱེད་པ་མ་ཏོགས་གན་འདྲ། ༧ དྲག་པོའི་ཧཱུྃ་དྲུག་གི་གདམས་པ་ནི། ཐོད་པའི་ནང་དུ་གཏོར་མ་ཤ་ཁྲག་གི་རྒྱ་མཚོར་བསམ། ཧཱུྃ་དང་པོ་བརྗོད་པ་དང་དུས་མཉམ་དུ་གཏོར་མའི་སྟེང་དུ་ཧཱུྃ་ཡིག་མཐིང་ནག་འོད་ཟེར་མེ་འོད་འཕྲོ་བ་གཅིག་བསམ། གཉིས་པ་བརྗོད་པས་འོད་ཟེར་ཕྱོགས་བཅུར་འཕྲོས། གསུམ་པ་བརྗོད་པས་རང་ལ་གནོད་བྱེད་ཀྱི་དགྲ་བགེགས་ཐམས་ཅད་ཁྲོ་བོ་གཤིན་རྗེ་གཤེད་ལག་ན་ལྕག་ཀྱུ་དང་ཞགས་པ་ཐོགས་པས་བཀུག་ནས་སྔར་གྱིས་གཏོར་མ་ལ་ཐིམ་པས་ཤ་ཁྲག་གི་རྒྱ་མཚོར་སོང་བར་བསམ། བཞི་པ་སོགས་འདྲའོ། ༧ །ཐལ་མོ་བརྡབ་པའི་ཞལ་ཤེས་ནི། བླ་མ་མགོན་པོ་དབྱེར་མེད་ལ་ཞེས་སོགས་བརྗོད་པའི་དུས་སུ། ལག་པ་གཡས་གཡོན་གཉིས་གནམ་ལྕགས་ཀྱི་འཁོར་ལོ་བསམ་ཞིང་། རང་ལ་གནོད་བྱེད་ཀྱི་དགྲ་བགེགས་ཐམས་ཅད་ཀུག་ནས་ལག་པ་གཉིས་ཀྱི་བར་མ་གཡོན་པའི་སྟེང་དུ་བཞག་ནས་ཐལ་མོ་གཉིས་གདབས་པས། ཤ་ཁྲག་གིས་རྒྱ་མཚོར་སོང་ནས་ལག་པ་གཉིས་ཐོད་པར་གྱུར་པའི་ནང་ན་ཡོད་པ་མགོན་པོ་འཁོར་བཅས་ཀྱིས་དེ་མ་ཐག་གསོལ་བར་བསམ་མོ། ༧ །མགོན་པོ་ཁྱི་ལྟར་འཁྱིད་པའི་གདམས་པ་ནི། གཏོར་མ་ཕུལ་བསྟོད་པ་སོགས་ཚང་བར་གྲུབ་ནས། མགོན་པོ་འཁོར་བཅས་རྣམས་འོདམ་དམར་པོ་ཞུ་ནས་རང་ལ་ཐིམ་པར་བསམ་པ་ནི་མགོན་པོ་ཁྱི་ལྟར་འཁྱིད་པའི་གདམས་པ་ཡང་ཟེར། རང་ཤ་རང་གི་མི་ཟ་བ་ཡང་ཟེར། རང་ཁྲག་རང་གི་མི་ཐུང་ཞིང་མགོན་པོའི་འཁུ་བཟློག་མི་ཡོང་ངོ་། ༧ །མགོན་པོ་གཅིག་ལ་གཏོར་མ་ཕུལ་བས་ཆོས་སྐྱོངས་གང་བརྟེན་པ་ཐམས་ཅད་ལ་གཏོར་མ་ཕུལ་བར་འགྲོ་བའི་གདམས་པ་ནི། མགོན་པོ་ཕྱག་དྲུག་པ་བསྐྱེད་ལ་དེ་ལ་ཡེ་ཤེས་པ་སྤྱན་དྲངས་ལ་བསྟིམ། དེ་ལ་གཏོར་མ་འབུལ་ཡུལ་གྱི་ཆོས་སྐྱོངས་ཐམས་ཅད་སྤྱན་དྲངས་ལ་བསྟིམ། དེ་ལ་གཏོར་མ་ཕུལ་བས་ཆོས་སྐྱོངས་ཐམས་ཅད་ལ་གཏོར་མ་ཕུལ་བར་འགྲོ་བའི་ཞལ་ཤེས་སོ། ༧ །དགྲ་བོ་སྦགས་པ་ཡང་ཟེར། བྱ་ཤ་སྦགས་པ་ཡང་ཟེར་བའི་ཞལ་གདམས་ནི། མགོན་པོ་སྤྱི་བོའི་གཏོར་ཁང་ངམ། རྣལ་འབྱོར་པ་རང་ཉིད་ཀྱི་གཏོར་ཁང་ལ་དམ་ཚིག་མི་གཙང་བས་གཏོར་པོས་མི་བྱེད་ཁ་མེད་བྱུང་ན། གཏོར་མ་དེ་ཉིད་ནང་མཆོད་ལྟར་བྱིན་གྱིས་རླབས། དེ་ནས་དྲག་པོའི་ཧཱུྃ་དྲུག་གི་ཞལ་ཤེས་ལྟར་དགྲ་བོ་དེ་ཉིད་བཀུག་ནས་གཏོར་མའི་སྟེང་དུ་ཤ་ཁྲག་རུས་གསུམ་མེར་སྟེ་སོང་བས་མགོན་པོ་ཉིད་ཀྱི་ཤ་ལ་ང་ཉིད་རོལ་ཁྲག་ལ་ང་ཉིད་རོལ་རྒྱུ་ཡིན་སྙམས་དུ་དགོངས་ནས་ཧཱུྃ་ཕྱི་མ་གསུམ་གྱི་དམིགས་པ་གོང་དང་འདྲའོ། ༧ །འཁོན་ཟས་སུ་ཟ་བའི་གདམས་པ་ནི། རང་དང་དམ་ཚིག་མི་གཙང་བའི་མི་དང་གཏམ་སྒྲེས་དགོས་བྱུང་ནི་ལྷན་གཅིག་སྡོད་དགོས་བྱུང་ན་རང་ཡི་དམ་དུ་གསལ་བའི་ཐུགས་ཀ་ནས་མགོན་པོའི་སྐུ་མཚོན་གང་པ་གཅིག་ཆད་ནས་རང་གི་སྣ་བུག་གཡས་ནས་ཐོན་དགྲ་བོའི་སྣ་བུག་གཡོན་ནས་ཞུགས། དགྲ་བོའི་གློ་སྙིང་སོགས་ཅད་ནས་དགྲ་བོའི་སྣ་བུག་གཡས་ནས་འཐོན་རང་གི་སྣ་བུག་གཡོན་ནས་ཞུགས། མགོན་པ་རང་ཉིད་ཀྱིས་ཐོད་པའི་ནང་དུ་བླུག་ནས་ཞེས་པར་བསམ། ༧ དགྲ་བོའི་ཚོགས་སུ་རོལ་བ་ནི། དམ་ཚིག་མི་གཙང་བའི་ལག་ནས་ཟ་ལྟུང་སོགས་བྱེད་དགོས་བྱུང་ན། བཟའ་ལྟུང་དེ་ཉིད་ནང་མཆོད་ལྟར་བྱིན་གྱིས་བརླབས་ལ་དགྲ་བོ་དེ་ཉིད་ཀྱང་བཟའ་ལྟུང་གི་སྟེང་དུ་བཀུག་ཤ་ཁྲག་རུས་པ་རྒྱ་མཚོར་མེར་གྱི་སོང་ནས་མགོན་པོས་ཞེས་པར་བསམ་མོ། ༧ །དགྲལ་བའི་ལས་དྲུག་གི་ཞལ་ཤེས་ནི། རང་ལ་གནོད་པར་བྱེད་པའི་དགྲ་བོ་དེ་ལུད་པ་སྐྲ་འཛིང་པ་སོགས་སུ་བསམ། དེ་ནས་མགོན་པོའི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས། དགྲ་བོ་དེའི་སྙིང་ཁ་ནས་གཏབ་པས་དགྲ་བོ་དེ་གང་དུ་ཡང་འགུལ་བར་བྱེད་མི་ནུས་པར་བསམ་ཞིང་། དེ་ནས་མགོན་པོའི་ཕྱག་གཡོན་གྱི་སྡིག་འཛུབ་ཀྱིས་རྩེ་ལས་ཁྲོ་བོ་བཞགས་པ་དང་ལྕགས་ཀྱུ་འཛིན་པ་འཕྲོས་སྟེ། དགྲ་བོའི་སྙིང་ཁ་ནས་ལྕགས་ཀྱུས་གཟུང་། མགྲིན་པ་ནས་བཞགས་པས་བཅིངས་ནས་རང་དབང་མེད་པར་བཀུག །གཡས་ཀྱི་ཐ་མའི་ཌཱ་མ་དྲག་ཏུ་དཀྲོལ་བས་སྨྱོས་ཤིང་གན་རྒྱལ་དུ་སྒྱེལ། གཡོན་གྱི་གཉིས་པའི་རྩེ་གསུམ་་་་་སྙིང་ཁ། མགྲིན་པ། སྤྱི་བོ་གསུམ་དུ་ཟུག་པས་ཁ་ནས་ཁྲག་ལྷུག་ལྷུག་བྱུང་བར་བསམ། གཡས་ཀྱི་དང་པོ་གྲི་གུག་གི་ཁོག་པ་གཤེགས་ཏེ། གཡས་ཀྱི་བར་པ་འཕྲེང་བ་འཛིན་པས་གློ་སྙིང་སོགས་དོན་སྙིང་ལྔ་པོ་ཕྱུང་ནས་ཕྱག་གཡོན་གྱི་ཐོད་པར་བླུག་ཏེ་མགོན་པོས་ཞེས། ཤ་ཁྲག་ལྷག་མ་རྣམས་འཁོར་རྣམས་ཀྱི་ཧབ་ཐོབ་བྱས་ཏེ་གསོལ་བར་བསམ། ༧ མགོན་པོ་ནི་གཏེར་བསྲུང་གི་ཞལ་ཤེས་ནི། མགོན་པོའི་གཏོར་མའི་རྒྱབ་ཏུ་མགོན་པོའི་བྲིས་སྐུ་བགྲམ། དེའི་ཐུགས་ཀ་ནས་ཧཱུྃ་དཀར་པོ་གཅིག་བྱུང་ནས་གཏོར་མའི་དཀྱིལ་དུ་སོང་བ་ལས་འོད་ཟེར་འཕྲོས་པས་གཏོར་མ་བསྲུངས། གཏོར་མ་བྱིན་གྱིས་བརློབས་པ་ན་ཧཱུྃ་འོད་ཟེར་དང་བཅས་པ་མགོན་པོ་ལ་བསྡུ། རྒྱུན་གཏོར་བཞག་ཏུ་འཇོག་དགོས་པ་བྱུང་ན་ཡང་སྔར་གྱི་དམིགས་པ་དེ་བྱེད་དོ། ༧ །མགོན་པོའི་ལམ་བསྲུངས་ནི། རང་ཉིད་འགྲུལ་སོགས་བྱེད་པའི་ཚེ་འཇིགས་པ་ཆེན་པོ་ཡོད་པའི་སར་སང་འགྲོ་བའི་དོ་ནུབ་ནས་མགོན་པོ་ལ་གཏོར་མ་གང་འབྱོར་བཤམས་ནས། མགོན་པོའི་གཏོར་ཆོག་ལྟར་གཏོར་མ་ཕུལ་བསྟོད་པ་བྱས། མགོན་པོ་གཤེགས་གསོལ་བསྟིམ་པ་སོགས་གང་ཡང་མི་བྱེད་པར། སང་ཉིན་འགྲོ་དུས་འཇིགས་པ་ཡོད་དོགས་ཀྱི་ཕྱོགས་ཐམས་ཅད་མགོན་པོ་འཁོར་བཅས་ཀྱི་སྤྲུལ་པ་ས་བཞི་རི་ཀླུངས་ཐམས་ཅད་གང་བར་བསམ་ཞིང་། དེའི་ཞལ་ནས་ཨོཾ་བཛྲ་མཧཱ་ཀ་ལའི་སྔགས་དྲག་ཏུ་སྒྲོགས་པར་བསམ་ཞིང་། རང་ཉིད་བླ་མ་མགོན་པོ་ལ་ཞེས་སོགས་ཚིག་ཅད་འདྲེན་ནོ། ༧ །ཡང་ན་མགོན་པོ་འཁོར་བཅས་ནམ་མཁའ་གང་བ་རང་དང་ལྷན་གཅིག་བྱོན་པར་བསམ་པ་གང་རུང་བྱེད། ༧ ཡུང་དཀར་གྱི་ཞལ་ཤེས་ནི། རང་ཡི་དམ་དུ་གསལ་བའི་ཧཱུྃ་ཡིག་གསལ་གཏབ། ཕྱོགས་བཅུའི་སངས་རྒྱས་ཐམས་ཅད་ཁྲོ་བོའི་རྣམ་པར་ནམ་མཁའི་ཁམས་གང་བ་སྤྱན་དྲངས་ནས་རང་གི་སྙིང་ཀའི་ཧཱུྃ་ལ་ཐིམ། ཡ་མ་རཱ་ཛཱ་དང་མགོན་པོའི་སྔགས་ངག་ཏུ་བརྗོད་པ་དུས་མཉམ་དུ་རང་ཉིད་ཡི་དམ་དུ་གསལ་བའི་མ་ཧེའི་ཞལ་ནས་ཁྲོ་བོ་དཔག་ཏུ་མེད་པ་འཁྲོས་ནས་ཡུང་དཀར་ལ་ཐིམ་པས་ཡུང་དཀར་ཐམས་ཅད་ཁྲོ་བོར་གྱུར་པར་བསམ་ཞིང་སྔགས་འདེབས་དེ་ཉིད་ཀྱི་བགེགས་བསྐྲོད་པ་ཡིན་ནོ། ༧ །གུ་གུལ་གྱི་ཞལ་ཤེས་ནི། རང་ཡི་དམ་དུ་གསལ་བའི་སྙིང་ཀར་ཧཱུྃ་ཡིག་གི་འོད་ཟེར་གྱིས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཐམས་ཅད་འོད་ཟེར་དམར་པོའི་རྣམ་པར་སྤྱན་དྲངས་ནས་ཧཱུྃ་ཡིག་ལ་ཐིམ། ཧ་ཞེས་བརྗོད། ༧ རབ་གནས་སྔོན་འགྲོའི་གུ་གུལ་གྱི་བསྙེན་པ་ལ། རང་ཡི་དམ་གཤིན་རྗེ་གཤེད་དམ་ཕྱག་རྡོར་མགོན་པོ་སོགས་སུ་བསྐྱེད། གུ་གུལ་མདུན་དུ་བཞག །རང་གི་ཐུགས་ཀའི་སོན་ཁྲོ་བོའི་ཚོགས་དཔག་ཏུ་མེད་པ་མདུན་གྱི་ནམ་པར་སྤྱན་དྲངས། རང་གི་ཐུགས་ཀ་ནས་བྱུང་བའི་མཆོད་པའི་ཚོགས་ཀྱི་མཆོད། ཁྲོ་བོ་རྣམས་ཀྱི་ཐུགས་ཀ་ནས་རང་རང་གི་མཐུ་སྟོབས་དང་ནུས་པ་ཐམས་ཅད་རང་རང་གི་སྔགས་དང་ཧཱུྃ་ཡིག་དང་མེ་འོད་དང་ཀྱི་རྣམ་པར་བྱུང་སྟེ་གུ་གུལ་ལ་ཐིམ་པར་བསམ་ཞིང་། ཡི་དམ་དང་མགོན་པོའི་རྩ་སྔགས་དང་སུམྦྷ་ནི་ལ་སོགས་པ་མང་དུ་བཟླས་ཤིང་གུ་གུལ་ལ་ཧས་གདབ་ལ། དེ་ལྟར་བསྙེན་པ་བྱས་པའི་གུ་གུལ་དེ་བགེགས་སྐྲོད་དུས་སུ་སྲེག་པའི་དུ་བ་ཁྲོ་བོ་རྣམས་ཀྱི་མཐུ་སྟོབས་ཀྱི་རང་བཞིན་དུ་གྱུར་པས་བགེགས་མྱོས་ཚིག་བརྒྱལ་བསྐྲད་པར་བསམ། ༧ ན་མོ་མཧཱ་ཀ་ལ་ཡེ། ཞི་རྒྱས་དབང་དྲག་གི་དམིགས་པ་ཞལ་ལས་ཤེས་པར་བྱའོ་ཞེས་པའི་སྐབས་སུ། ཞི་བ་ལ་མགོན་པོ་སྐུ་མདོག་དཀར་པོ། རྒྱས་པ་ལ་སེར་པོ། དབང་ལ་དམར་པོར་བསྒྱུར་ཞིང་ཕྱག་མཚན་སོགས་ནི་བསྒྱུར་མི་དགོས་པས་ལྷག་མ་རྣམས་མངོན་རྟོགས་བཞིན་ནོ། །དེ་ལ་དང་པོ་ནི་སངས་རྒྱས་བྱང་སེམས་ཐམས་ཅད་མདུན་གྱི་ནམ་མཁར་ཟླ་བའི་སྟེང་དུ་གནས་པ་རྣམས་ཀྱི་སོ་སོའི་ཁོག་དང་མཐུན་པའི་རིན་པོ་ཆེའི་བུམ་པ་བདུད་རྩིས་གང་བ་བསྣམས་ནས་རང་ལ་དབང་བསྐུར་བས། ལུས་ཐམས་ཅད་བདུད་རྩིའི་རང་བཞིན་གྱི་གང་ནས་ནད་གདོན་སྡིག་སྒྲིབ་ཐམས་ཅད་བ་སྤུའི་ཕྱི་རོལ་དུ་བྱུང་། ཞི་བ་ལ་སྡིག་སྒྲིབ་དག་པར་བསམ། རྒྱས་པ་ལ་རིན་པོ་ཆེའི་ཆར་ཕབ་ནས་ཚེ་དང་བསོད་ནམས་ལ་སོགས་པའི་ཡོན་ཏན་ཐམས་ཅད་ཟླ་བ་ཡར་གྱི་ངོ་བཞིན་ཏུ་གོང་ནས་གོང་དུ་འཕེལ་བ་དང་། དབང་ལ་འཇིག་རྟེན་ལས་བཟླས་པའི་ལྷ་མི་ཐམས་ཅད་ཀྱི་ཡེ་ཤེས་ཀྱི་ཚོགས་ཐམས་ཅད་བསྡུས་ནས་བདག་གི་བསོད་ནམས་དང་ཡེ་ཤེས་ཀྱི་ཚོགས་ལ་ཐིམ་པར་བསམ་མོ། །དེ་ལྟར་བསྙེན་པའི་གོང་དུ་བྱའོ། །ཞི་བ་ལ་བདག་མདུན་གཉིས་ཀའི་ཐུགས་ཀའི་ཏིང་ངེ་འཛིན་སེམས་དཔའི་མཐའ་བསྐོར་དུ་སྔགས་འཕྲེང་ཀུ་མུ་ཏའི་འཕྲེང་བ་ལྟ་བུས་བསྐོར་བ། ཉི་མའི་འོད་ཟེར་ལྟ་བུ་ལས་རྒྱུད་པའི་མགོན་པོ་སྐུ་མདོག་དཀར་པོ་དཔག་ཏུ་མེད་པ་འཕྲོས་པས། བདག་གན་ཐམས་ཅད་ཀྱི་ནད་གདོན་སྡིག་སྒྲིབ་ཐམས་ཅད་དག་པར་བྱས་ནས་མགོན་པོ་དེ་འོད་ཟེར་དང་བཅས་པ་སླར་བྱོན་ནས་རང་གི་བ་སྤུའི་བུ་ག་ནས་ནང་དུ་ཞུགས། ལུས་ཐམས་ཅད་མགོན་པོ་དང་སྔགས་འཕྲེང་རྣམས་ཀྱི་གང་རང་གི་ནད་གདོན་སྡིག་སྒྲིབ་ཐམས་ཅད་མགོན་པོ་རྣམས་ཀྱི་བསྡུས་ནས། ཨོཾ་ཨཱཿཧཱུྃ་ཧ་ཧོ་ཧྲིཿབྱིན་གྱིས་བརླབས་ནས་དངུལ་ཆུ་དང་སའི་མདོག་ལྟ་བུའི་བདུད་རྩིར་བྱིན་གྱིས་བརླབས་ནས་མགོན་པོ་རྣམས་ཀྱིས་ཞལ་དུ་གསོལ་བས་སྐུ་ཉམས་དང་ལྡན་པར་བྱས་ནས་ལྷན་བསྐྱེས་ཀྱི་རང་བཞིན་ཏུ་ཞུ་བ་རང་གི་ལུས་ངག་ཡིད་གསུམ་ཐིམ་པས། རང་གི་ལུས་སེམས་ལྷན་སྐྱེས་ཀྱི་བདེ་བ་ཆེན་པོའི་རང་བཞིན་དུ་གྱུར་པ་བསྒོམས། འཆད་འགྱུར་གྱིས་སྲོག་སྔགས་ཤམས་བུ་དང་ཅས་པ་བཟླ་བར་བྱའོ། ༧ །རྒྱས་པ་ལ་ཏིང་ངེ་འཛིན་སེམས་དཔའི་མཐའ་བསྐོར་དུ་སྔགས་འཕྲེང་སེར་གཙོ་མའི་མདོག་ལྟ་བུ་ཁོག་སེར་པོས་བསྐོར་བ་ལས་འོད་ཟེར་རང་གི་་་་་ཐིག་གུ་སྦྲེལ་བ་ལྟ་བུ་ལ་འཁྱུད་པའི་མགོན་པོ་སེར་པོ་དཔག་ཏུ་མེད་པ་ཕྱོགས་བཅུར་འཕྲོས་པས་བདག་དང་སེམས་ཅན་ཐམས་ཅད་ཀྱི་ཚེ་དང་བསོད་ནམས་རྒྱས་པར་བྱས་ནས། མགོན་པོ་སེར་པོ་འོད་ཟེར་དང་བཅས་པ་སླར་བྱོན་ནས་རང་གི་ལུས་ལ་ཐིམ་པས་ཚེ་དང་བསོད་ནམས་སྙན་གྲགས་འབྱོར་པ་ཤེས་རབ་ལ་སོགས་པའི་ཡོན་ཏན་ཐམས་ཅད་རྒྱས་པར་བསམ་ལ་སྤེལ་ཚིག་ཅན་གྱི་སྔགས་བཟླའོ། །ས་བོན་གི་རྣམ་པ་ཐམས་ཅད་དུ་ཁོག་མི་འགྱུར་རོ། ༧ །དབང་ལ་ཏིང་ངེ་འཛིན་སེམས་དཔའི་མཐའ་བསྐོར་དུ་སྔགས་འཕྲེང་དམར་པོ་པདྨ་ར་གའི་མདོག་ལྟ་བུས་བསྐོར་བ་ལས། འོད་ཟེར་ལྕགས་ཀྱུ་དང་ཞགས་པས་མཚན་པ་དཔག་ཏུ་མེད་པ་འཕྲོས་པ་ལ་འཁྱུད་པའི་མགོན་པོ་སྐུ་མདོག་དམར་པོ་ལྕགས་ཀྱུ་དང་ཞགས་པ་ཐོགས་པ་ཕྱོགས་བཅུར་འཕྲོས་པས་འཇིག་རྟེན་གྱི་ཁམས་ཐམས་ཅད་འོད་དམར་པོས་ཁྱབ་པས་ལྷ་མི་ཐམས་ཅད་ཀྱིས་སེམས་རང་དབང་མེད་པར་བསྐུལ་ན། རང་ལ་བདུད་རྩིའི་རྣམ་པ་ཅན་གྱི་དགོས་འདོད་ཐམས་ཅད་ཆར་བཞིན་ཏུ་བབས་པ་དང་། ཁྱད་པར་དུ་ཡུལ་གྱི་རྒྱལ་པོ་དང་ཁྱིམ་བདག་ལ་སོགས་པའི་འབྱོར་པ་ཐམས་ཅད་མགྲིན་པ་ནས་ཞགས་པས་བཅིངས་ལྕགས་ཀྱུས་སྙིང་ཁ་ནས་དྲངས་ཏེ་རང་གི་མདུན་དུ་ལྷག་པ་ལས་རང་གི་ཆོས་སྒྲུབ་པའི་མཐུན་རྐྱེན་ཐམས་ཅད་འབྱོར་གཅིག་ཅེས་བཀའ་སྒོས་པས། དེ་རྣམས་ཀྱི་ཚེ་དང་བསོད་ནམས་དཔལ་དང་འབྱོར་པ་དབྱུག་མ་ལ་སོགས་པའི་ལོངས་སྤྱོད་ཐམས་ཅད་བསྡུས་ནས་རང་གི་སྙིང་ཀར་ཐིམ། ཐུན་འཚམས་སུ་སྒྲུབ་བྱ་རྣམས་ཀྱང་འོད་དམར་པོའི་རང་བཞིན་དུ་གྱུར་ནས། རང་གི་སྙིང་ཀར་ཉི་ཟླ་གའུ་ཁ་སྦྱོར་གྱི་ནང་དུ་གནས་པར་གྱུར་པར་བསྒོམས། སྔགས་སྤེལ་ཚིག་དང་བཅས་པ་བཟླའོ། ༧ །རང་གི་དབང་དུ་དགྲ་བོ་བསྡུད་པའི་ཕྱིར་དབང་གི་དགུག་པར་འདོད་ན་ཐུན་རྒྱར་ཁྲུང་ནང་དུ་རྐང་གང་ལ་སོགས་པ་ཇི་ལྟར་འཚམས་པ་ཁོག་དམར་པོ་རྩང་གིས་བསྐོར་བ་ཡང་ས་གཅིག་གི་ནང་དུ་དགྲ་བོ་གཟུགས་ཅན་ཡིན་ན་སྙིང་ཀར་བཅུག་པའི་ལིངྒ་བག་ཟན་ལ་བཅོས་པའམ། གྲོ་ག་ཤོག་བུ་གང་རུང་ལ་བྲིས་པ་ལ་མགོན་པོའི་སྙིང་པོ་ཤམས་བུ་དང་བཅས་པས་བསྐོར། དགྲ་བོ་བསྐྱེད་པ་དང་དགུག་གཞུག་བྱས་ནས་ཁུག་རྟགས་མ་བྱུང་གི་བར་བྱའོ། །དེ་ནས་གོང་གི་ཐུན་ཁུང་དུ་གཞུག་ལ། རང་ཡི་དམ་གང་རུང་དང་ཐུན་ཁུང་གི་གཏིང་དུ་མགོན་པོ་སྐུ་མདོག་དམར་པོ་བསྐྱེད་ལ། རང་གི་ཐུགས་ཀ་ནས་འོད་ཟེར་དམར་པོ་ལྕགས་ཀྱུ་ལྟ་བུ་འཕྲོས་པས་མགོན་པོ་འཁོར་བཅས་ཀྱི་ཐུགས་ཀར་ཕོག་པས་ཐུགས་ཀར་ཕོག་པས་ཐུགས་རྒྱུད་བསྐུལ། དེ་རྣམས་ཀྱི་ཐུགས་ཀ་ནས་ལྕགས་ཀྱུ་དང་ཞག་པ་ཐོགས་པའི་ལས་མགོན་དམར་པོ་དཔག་ཏུ་མེད་པ་སྤྲོས། སྒྲུབ་བྱ་གང་ཡིན་པ་དེའི་སྐེ་ནས་ཞགས་པས་བཅིངས། སྙིང་ཁ་ནས་ལྕགས་ཀྱུས་དྲངས་ཏེ་མདུན་དུ་བཀུག་ནས་འབྲུབ་ཁུང་གི་ལིང་ག་ལ་བསྟིམ་པས་འདར་ཕྲི་ལི་ལི་རང་ལ་ཤིན་ཏུ་གུས་པའི་བསྒོ་ནས་རང་གི་འདོད་པའི་དོན་ཐམས་ཅད་སྒྲུབ་བར་ཁས་སླངས་པར་བསམ་ལ། དགྲ་བོ་དངོས་སུ་ཁུགས་པའི་རྟགས་མ་བྱུང་གི་བར་བྱའོ། །མཐར་ལིང་ག་ལ་ཁྲུས་གསོལ་ནས་གཙང་པར་དོར་རོ། ༧ །ཞི་རྒྱས་སོགས་ལ་སོ་སོར་སྒྲུབ་པའི་མཆོད་པ་ཇི་ལྟར་བྱ་བ་ལ། ཞི་བའི་དུ་སུ་མགོན་པོ་འཁོར་བཅས་ཀྱི་གཏོར་མ་རྣམས་རྒྱུ་དཀར་པོ་ལས་བྱས་པའི་དབྱིབས་ཟླུམ་པོ་ཐེབ་ཀྱུ་ཅད་ཁམས་ནང་དུ་བརྟན་པས་བསྐོར། མཆོད་རྫས་སོགས་ཀྱང་ཞོ་འོ་མ་སོགས་པའི་དཀར་པོར་སྒྲུབ་པར་བྱའོ། ༧ །རྒྱས་པ་ལ་རྒྱུ་ཞོ་ཟན་ལས་བྱས་པའི་དབྱིབས་རིན་པོ་ཆེ་འདྲ་བ་ཐེབ་ཀྱུ་གོང་དང་འདྲ། མེ་ཏོག་སེར་པོ་སོགས་ཁོག་བསྒྱུར་ལ་བྱའོ། ༧ །དབང་ལ་གཏོར་མའི་རྒྱས་པ་དང་འདྲ་བ་ལས་སྣ་ཚོགས་པའི་ཤིང་ཏོག་དམར་པོ་དང་མེ་ཏོག་དམར་པོ་ལ་སོགས་པའི་མཆོད་རྫས་རྣམས་བསྒྲུབ་པར་བྱའོ། །དྲག་པོ་ལ་ཤ་ཆེན་གྱི་གཏོར་རྒྱན། རཀྟའི་མཆོད་ཡོན་དབང་པོའི་མེ་ཏོག །དུག་ཁྲག་ཡུང་དཀར་གུ་གུལ་ལ་སོགས་པ་སྦྱར་བའི་སྤྲོས། ཞུན་མར་གྱི་གནང་གསལ། ཁྲིག་དྲི་ཆབ། འབྲུ་ནག་གི་ཟན་ལས་བྱས་པའི་ཞལ་ཟས། མི་རྐང་གླིང་བུ། རྔ། གཡབ་དར་ལ་སོགས་པའི་ཐུན་མོངས་མིན་པའི་རྫས་རྣམས་དང་ཐུན་མོངས་དུ་སེར་དངུལ་གོས་དར། སྟགས་གཟིག །ཁྱི་ནག །དོམ་ནག །གཡག་རོག ལུག་ནག་སྤྱི་དཀར། གོ་མཚོན། རྔ་ཐུག་ལ་སོགས་པའི་རྫས་རྣམས་ཡོད་ན་མྱུར་དུ་འགྲུབ་པའི་བརྟེན་འགྲེལ་ཡོད་དོ། །ཞེས་དཔལ་ལྡན་བླ་མ་གསུངས་སོ། ༧ །སོ་སོའི་སྔགས་ཀྱི་ཤམས་བུ་མདོགས་ལུག་ནི། ཞི་བ་ལ་རྩ་སྔགས་ཀྱི་འཇུག་ཏུ་ནཱ་ག་ཛྭ་ལ་སརྦ་དུཥྚཾ་ཤ་ཏྲུཾ་ཤནྟིང་ཀུ་རུ་ཨོཾ། ༧ དབང་ལ་མཧཱ་ག་ན་སིདྡྷི་ཝ་ཤཾ་ཀུ་རུ་ཧོ། སྐྲད་པ་ལ་ཨུ་ཙི་ཏ་ཡ་ཕཊ། ༧ གསད་པ་ལ་སརྦ་བིགྷན་དུཥྚཾ་ཤ་ཏྲུཾ་དི་ན་མེ་ཀེ་ན་མཱ་ར་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༧ ཐུན་མོངས་བའི་རྦད་པ་སོགས་ཞལ་ལས་ཤེས་ཞེས་པ་ནི། མགོན་པོ་འཁོར་བཅས་དམག་དཔུང་དང་བཅས་པ་དགྲ་བགེགས་ཐོག་ཏུ་རྦད་པ་དང་། རང་གི་དགྲ་གང་ཡིན་པའི་ཤ་ཁྲག་ཐམས་ཅད་མགོན་པོ་འཁོར་བཅས་ཀྱི་ཕྱག་གི་ཀ་པ་ལར་བླུག་ནས་ཞལ་དུ་དམར་རྩིར་རི་གསོལ་བས་དགྲ་བགེགས་ཐམས་ཅད་ཐལ་བའི་བརྡུལ་ཕྲན་བཞིན་ཏུ་བརླག་པར་བསམ། ༧ ཡང་ན་དཔལ་ཡེ་ཤེས་ཀྱི་མགོན་པོ་ས་གསུམ་འདར་ཞིང་གཡོ་བར་མཛད་པ། སྤྱན་གསུམ་ཉི་ཟླ་ལྟར་འབར་བའི་གདོང་ལྟར་ཚ་ཚ་རབ་ཏུ་འཕྲོ་ཞིང་ལྟས་པའི་མི་ཟོད་པ་མཛད་ཅིང་། ཞལ་ནས་ཤ་ས་ནའི་སྔགས་འབྲུག་སྟོང་འདིར་བ་ལྟར་སྒྲོག་པ། བགེགས་རྣམས་ཀྱིས་ཐོས་པས་སྙིང་ཚལ་པ་སྟོང་དུ་གས་པ་དང་། སྤྱན་གསུམ་འཁོར་རྣམས་ལ་དྲག་ཏུ་གཟིགས་པས་འཁོར་རྣམས་རང་དབང་མེད་པར་ལས་ལ་བསྐུལ་བའི་རྣམ་པ་ཅན་དུ་གྱུར་པར་བསམ། དེ་ནས་རང་གི་ཐུགས་ཀ་ནས་འོད་ཟེར་དམར་ནག་ཐོག་མདུང་འཕངས་པ་ལྟ་བུ་དཔག་ཏུ་མེད་པ་འཕྲོས་པས། མགོན་པོའི་ཐུགས་གཉིས་སུ་མེད་པའི་ཡེ་ཤེས་བསྐུལ་ནས་སྔོན་རྒྱལ་བ་རྡོ་རྗེ་འཆང་གི་སྤྱན་སྔར་ཁས་སླངས་པ་བཞིན་དུ་བདག་སྒྲུབ་པ་པོ་ལ་མངོན་སྤྱོད་ཀྱི་འཕྲིན་ལས་རྣམས་མྱུར་དུ་བསྒྲུབ་པའི་ཕྱིར་དུ། དེ་ཉིད་ཀྱི་ཐུགས་ཀ་ནས་འོད་ཟེར་སྔར་ལྟར་འཁོར་རྣམས་ཀྱི་ཐུགས་ཀར་ཕོག་པས། དེ་རྣམས་ཀྱི་མགོན་པོའི་བཀའ་བསྒོ་བའི་འཕྲིན་ལས་སྒྲུབ་པའི་ཕྱིར་དུ་ཕྱོགས་བཅུར་སོང་བས་དགྲ་བགེགས་གང་ཡིན་པའི་སྙིང་ཁར་ཀྵེ་ཊ་པ་ལའི་ལྕགས་ཀྱུ་གཏབ། ཊཀྐི་རཱ་ཛཱས་མགྲིན་པ་ནས་ཞགས་པས་བཅིངས་ཏེ་བཀུག་ལྷ་མོ་སོགས་འཁོར་ལྷག་མ་རྣམས་ཀྱིས་དྲག་པོས་སྡིག་བཞིན་པའི་དེད་ནས་མགོན་པོའི་མདུན་དུ་གན་རྒྱལ་བསྒྱེལ་ནས། གྲི་གུག་ཅན་རྣམས་ཀྱིས་བྲངས་བཤགས། རྩེ་གསུམ་ཅན་རྣམས་ཀྱི་གནས་གསུམ་བསྣུན། ཐོད་འཕྲེང་ཅན་རྣམས་ཀྱིས་སྙིང་གཏོན། ཐོད་པ་ཅན་རྣམས་ཀྱིས་ནང་དུ་བླུག་ནས་གཙོ་བོའི་ཞལ་དུ་བསྟབས། ལྷག་མ་རྣམས་ལྷ་མོ་གནོད་སྦྱིན་གཙང་རིགས་དམ་ཅན་རྒྱ་མཚོ་དང་བཅས་པ་རྣམས་ཀྱི་ཞལ་དུ་གསོལ་བར་བསམ། ༧ སྒྲུབ་དུས་ཕྱི་འབྲང་གི་བགེགས་བྱུང་ན་བསྐྲད་པ་དང་མནན་པའི་ཐབས་གཉིས་ལས། བསྐྲད་པ་ནི་རང་གཤིན་རྗེ་གཤེད་ལ་སོགས་པའི་ཐུགས་ཀ་ནས་ཁྲོ་བོ་དང་ཁྲོ་མོའི་ཚོགས་དཔག་ཏུ་མེད་པ་དང་། མདུན་བསྐྱེད་སྒོམ་པའི་ཐུགས་ཁ་ནས་མགོན་མཚན་ཆ་སྣ་ཚོགས་ཐོགས་པ་དཔག་ཏུ་མེད་པ་སྤྲོས། སྒྲུབ་པ་ལ་བར་དུ་གཅོད་པའི་བགེགས་འབྱུང་པོ་ཐམས་ཅད་མཐའི་རྒྱ་མཚོ་ཆེན་པོའི་ཕ་རོལ་དུ་བསྐྲད་པར་བསམ་པ་ཡང་ཡང་བྱའོ། །སྔགས་བསྐྲད་པའི་སྤེལ་ཚིག་གཏགས་ལ་བཟླའོ། ༧ །དེས་ཀྱང་མ་ཐུབ་ན་མནན་པའི་ཐབས་གཉིས་ལས། རིབ་ཀྱི་ཞབས་སུ་མནན་པ་ནི། རང་དང་མགོན་པོ་གསལ་གཏབ་པའི་ཐུགས་ཀ་ནས་ཁྲོ་བོ་དང་ཁྲོ་མོའི་ཚོགས་དང་། དཔལ་མགོན་གྱི་ཚོགས་ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་སྤྲོས་པས། སྒྲུབ་པ་ལ་བར་དུ་གཅོད་པའི་བགེགས་རང་གི་མདུན་དུ་བཀུག་ནས་དབང་ཆེན་གྱི་ས་གཞིའི་སྟེང་དུ་གན་རྐྱལ་དུ་བསྒྱེལ་བའི་སྟེང་དུ་སྣ་ཚོགས་རྡོ་རྗེ་སྟོང་གསུམ་གྱི་ཁྱོན་དང་མཉམ་པ་གཅིག་གིས་དབུགས་གཡོ་འགུལ་མེད་པར་གསེར་གྱི་ས་གཞི་དང་མཉམ་དུ་སྒྲགས། དེའི་སྟེང་དུ་རིབ་་་་་་་ཚངས་པའི་འཇིགས་རྟེན་དང་མཉམ་པ་གཅིག་བསྐྱེད། དེའི་སྟེང་དུ་རྣམ་སྣང༌བྱང་ཆུབ་མཆོག་གི་ཕྱག་བརྒྱ་ཅན་སྲིད་པའི་རྩེ་མོ་ལ་སླེབ་པ་གཅིག་གིས་མནན་པར་བསྒོམ་པར་བྱའོ། ༧ །གཉིས་པ་ལ་མནན་སྔགས་ཤམས་བུ་ཅན་གྱི་སྔགས་བཟླའོ། །དེས་ཀྱང་མ་ཐུབ་ན་འབྲུབ་ཁུངས་གི་ནང་དུ་མནན་པར་བསྒོམས་སྟེ། རང་དང་མདུན་བསྐྱེད་ཀྱིས་ཐུགས་ཀ་ནས་ཁྲོ་བོ་དང་ལས་མགོན་སྔར་ལྟར་སྤྲོས་པས་བགེགས་རྣམས་བཀུག་ནས་མདུན་དུ་ཧཱུྃ་རིང་པོ་ལས་གྲུབ་པའི་ཁྲོན་པ་འབྲུབ་ཁུང་གི་རྣམ་པ་ཅན་དུ་བཅུག་ནས། སྤྱི་བོར་བསྟོད་ཁྲོ་བོའི་བདུད་རྩི་འཁྱིལ་པ་སྨད་མདུང་རྩེ་གཅིག་པའི་རྣམ་པ་ཅན་གྱི་ཕུར་བུ་མེ་དཔུང་རབ་ཏུ་འབར་བ་ཟུག་པས་ལུས་ངག་ཡིད་གསུམ་གཡོ་འགུལ་མེད་པར་བསམ། ༧ དེས་ཀྱང་མ་ཐུབ་ན་གསད་པའི་མན་ངག་བྱ་བ་ནི། བགེགས་རྣམས་སྔར་ལྟར་མདུན་དུ་བཀུག་ལ་ཁྲོ་བོའི་ཚོགས་རྣམས་ཀྱི་དགྲལ་བའི་ཤ་ཁྲག་རྣམས་མགོན་པོ་འཁོར་བཅས་ཁྲོས་འཁྲུག་བརྔམས་པའི་ཞལ་གྲུ་གསུམ་དམར་དང་ངེ་བ་གདངས་པའི་ནང་དུ་གཏབ་པས་དམར་སིབ་སིབ་གསོལ་བར་བསམ། སྙིང་པོ་དང་ཤ་ས་ན་ལ་གསད་སྔགས་གཏགས་ལ་བཟླས་གཏོར་མ་འབུལ་བའི་ཚེ། གཏོར་མ་རྣམས་བགེགས་རྣམས་ཀྱིས་ཤ་ཁྲག་ཏུ་མོས་ནས་སྔར་ལྟར་གསོལ་བར་བསམ། དེས་ནི་མི་ཐུབ་པ་མི་སྲིད་དོ། ༧ །བསྙེན་པའི་དུས་ཀྱི་སྔགས་འཁོར་གྱི་དམིགས་པ་ལ། བདག་གི་སྙིང་ཀར་ཉི་མའི་དལ་གྱི་སྟེང་དུ་ཧཱུྃ་མཐིང་ནག་གནས་པ་དང་། མགོན་པོའི་ཐུགས་ཀར་ཡང་ཧཱུྃ་མཐིང་ནག་གི་མཐའ་བསྐོར་དུ་སྔགས་ཀྱི་འཕྲེང་བས་བསྐོར་བ་གསལ་གཏབ། དེ་ནས་རང་གི་ཐུགས་ཀའི་ཧཱུྃ་ལས་སྔགས་འཕྲེང་འཕྲོས་རང་གི་ཞལ་དུ་བྱུང་། མགོན་པོའི་ཞལ་དུ་ཞུགས་ཐུགས་ཀའི་ཧཱུྃ་ལ་ཐིམ། ཡང་ཧཱུྃ་ལས་སྔགས་འཕྲེང་རིམ་གྱི་ཚུར་བྱོན་རང་གི་ཐུགས་ཀའི་ཧཱུྃ་ལ་ཐིམ་པས་སྔགས་འཁོར་འགལ་མེའི་འཁོར་ལོ་ལྟར་འཁོར་བ་ལ་འོད་ཟེར་དམར་པོ་དཔག་མེད་འཕྲོས་པས། མགོན་པོ་འཁོར་བཅས་ཀྱི་ཐུགས་རྒྱུད་བསྐུལ་ཞིང་མགོན་པོ་འཁོར་བཅས་དབང་དུ་བསྡུས་པར་བསྒོམས་པ་བསྙེན་པའི་དུས་སུ་བྱེད་པ་ཡིན་ནོ་ཞེས་བླ་མ་ཁ་གཅིག་གསུངས་སོ། ༧ །ཁ་གཅིག་སྔགས་འཁོར་ཚུལ་སྔར་ལྟར་འདྲ་བ་ལ་འོད་ཟེར་དཀར་པོ་འཕྲོས་པས་རང་གི་སྡིག་སྒྲིབ་དག་ནས་ལུས་ཤེལ་གོང་ལྟར་དག་པར་བྱེད་པ་རྒྱུན་གྱིས་བསྙེན་པ་ལ་གལ་ཆེ་བ་ཡིན་གསུངས། གང་བྱས་ཀྱང་རྒྱུད་དེ་དང་མཐུན་གསུངས་སོ། །སྒྲུབས་དུས་སྔགས་འཁོར་སྔར་ལྟར་ལ་ལེའུ་བརྒྱད་པའི་དགོངས་པ་ལ་གང་རུང་བཀོད་པའི་འོད་ཟེར་ཁོག་སྣ་ཚོགས་འཕྲོ་བའི་རྩེར། མགོན་པོ་སྐུ་མདོག་སྣ་ཚོགས་ཕྱོགས་བཅུར་འཕྲོས་པར་བསམ། ཞི་རྒྱས་དབང་དྲག་གི་སྒོས་འགྲོ་བའི་དོན་བྱས་སླར་འདུས་སྔགས་འཕྲེང་ལ་ཐིམ་པས་སྤྲོ་བསྡུའི་མཛད་པ་ཅན་དུ་བསྒོམ་པ་ནི། ལས་བཞི་གང་ལ་སྦྱར་ཀྱང་སྔོན་དུ་དེ་མི་བྱེད་ཁ་མེད་ཡིན་གསུངས། ༧ ཡང་སྐབས་སུ་རང་གི་ཐུགས་ཀ་ནས་འོད་ཟེར་འཕྲོས་མགོན་པོའི་ཐུགས་ཀར་ཕོག་པས་གཉིས་སུ་མེད་པའི་ཡེ་ཤེས་བསྐུལ་ནས་རང་གི་གང་འདོད་པའི་འཕྲིན་ལས་སྒྲུབ་པར་ཁས་སླངས། ༧ ཡང་མགོན་པོའི་ཐུགས་ཀ་ནས་འོད་ཟེར་འཕྲོས་འཁོར་རྣམས་ཀྱི་ཐུགས་ཀར་ཕོག་པས་བདག་བསྒྲུབ་པ་པོ་ལ་ལས་བཞིའི་རབ་གྱིས་སྒྲུབ་པའིརི་ཅི་སྒོས་པའི་ལས་རྣམས་བྲན་གྱི་ཚུལ་བཞིན་ངེས་པར་བྱེད་པར་བསྒོམས། ༧ ཡང་བསྙེན་སྒྲུབ་ཀྱི་སྐབས་སུ་སེམས་མི་བདེ་བ་ལ་སོགས་པ་བགེགས་བྱུང་ན་སེལ་བའི་ཐབས་ནི་མན་ངག་འདི་ལྟར་བྱ་སྟེ། སྤྱིར་འབྱུང་པོ་སོགས་ཀྱི་བར་ཆད་འོང་བ་དང་རང་གི་བསྙེན་སོགས་ལ་ལྟས་ངན་འབྱུང་བའི་སྟོབས་ཀྱིས་འབྱུང་བ་དང་གཉིས་སུ་ངེས་པའི་གང་བྱུང་ཡང་། རང་གི་སྤྱི་བོར་པད་ཟླའི་སྟེང་དུ་འཇའ་འོད་ཀྱི་གུར་ནང་དུ་རྩ་བའི་བླ་མ་རྡོ་རྗེ་འཆང་དང་དབྱེར་མེད་ཀྱིས་རྣམ་པ་ལ་ཞལ་འཛུམ་བག་དང་ལྡན་པ། མཚན་ཐོས་པ་ཙམ་གྱིས་བསྡུལ་སེལ་ནུས་པ་གཅིག་བཞུགས་པའི་ཕྱི་རོལ་དུ་རྒྱུད་པའི་བླ་མ་རྣམས་ཀྱང་དེང་འདྲ་བ་ཞུགས་པས་བསྐོར་བ། དེ་ནས་དཔལ་ལྡན་རྩ་བའི་བླ་མ་རིན་པོ་ཆེ། ཞེས་སོགས་གདུང་ཤུགས་དྲག་པོས་གསོལ་བ་གཏབ། བླ་མའི་ཐུགས་ཀ་ནས་འོད་ཟེར་དཀར་པོའི་བདུད་རྩིའི་རྒྱུན་ཞུ་བ་རང་གི་སྤྱི་བོ་ཚངས་བུག་ནས་རྩ་དབུ་མའི་ནང་དུ་ཞུགས་བགེགས་དང་སྡིག་སྒྲིབ་ཐམས་ཅད་དག །ལུས་ཀྱི་རྩ་ཐམས་ཅད་བདུད་རྩིས་གང་ལུས་སེམས་བདེ་བ་ཆེན་པོའི་རང་བཞིན་ཏུ་གྱུར། བུམ་པའི་དབང་ཐོབ། ཡང་སྔར་བཞིན་གསོལ་བ་གཏབ་པས། བླ་མའི་མགྲིན་པ་ནས་འོད་ཟེར་འཕྲོས་པ་སོགས་བྱས་ནས་ངག་གི་དྲི་མ་དག །གསང་བའི་དབང་ཐོབ། ཡང་གསོལ་བ་གཏབ་པས། ཐུགས་ཀ་ནས་འོད་ཟེར་སྔོན་པོ་སོགས་ནས། ཤེས་རབ་ཡེ་ཤེས་ཀྱི་དབང་ཐོབ། ཡང་གསོལ་བ་གཏབ། བླ་མའི་སྐུའི་ཆ་ཐམས་ཅད་ལས་འོད་ཟེར་འཕྲོས་པས་དབང་བཞི་པ་ཐོབ། ཡང་གསོལ་བ་གཏབ་པས་བྱིན་བརླབས་རྒྱུད་པའི་བླ་མ་རྣམས་འོད་དུ་ཞུ་ནས་རྩ་བའི་བླ་མ་ལ་ཐིམ། དེ་ཉིད་ཀྱང་རྩ་དབུ་མའི་ནང་ནས་བྱོན་ཏེ་རང་གི་སེམས་དང་དབྱེར་མེད་དུ་འདྲེས་པར་བསམ་པ་རྒྱུན་དུ་བྱེད་པ་ནི་གེགས་སེལ་གྱིས་མཆོག་ཏུ་གྱུར་པ་ཡིན་ནོ། །ཞེས་བླ་མས་གསུངས། མན་ངག་འདིང་ལྡན་ན་རྐྱེན་ཅི་བྱུང་ཡང་ཆོ་འཁྲུལ་གྱིས་རྣམས་པས་ཅི་མྱུར་བ་བཞིན་བཟང་པོ་གསུངས། དེས་མ་ཐུབ་ན་རང་ཡི་དམ་དུ་གསལ་བའི་རྩ་དབུ་མ་ཕྱི་དཀར་ལ་ནང་གསལ་བ་དང་། མགོན་པོ་ཡང་གསལ་བའི་ཐུགས་ཁར་སྔགས་འཕྲེང་དཀར་པོ་བསམ་ལ་བདུད་རྩི་ཀར་པོས་རྩ་རྣམས་གང་བར་བསྒོམས། ཞལ་ཤེས་ཤིན་ཏུ་ཟབ་པ་དམ་ཚིག་དང་ལྡན་པ་རེ་རེ་ཙམ་ལ་མ་ཏོགས་པ་ལ་གཏེར་ན་དམ་ཚིག་འགལ་གསུངས། མཁས་གྲུབ་ཆེན་པོ་[[Gelek Pelsang|དགེ་ལེགས་དཔལ་བཟང་]]པོའི་མན་ངག་ཞལ་ཤེས་ཤིན་ཏུ་ཆེས་ཟབ་པ་ཡིན་ནོ། ༒ མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པའི་མཁའ་འགྲོ་འབུམ་བསྐུལ་ལ་སོགས་པའི་ཉེར་ཁོ་སྣ་ཚོགས་བཞུགས་སོ། །ཆོས་སྐུ་ཡང་པའི་ཕོ་དྲང་ནས། །ས་བཅུའི་དབང་ཕྱུག་མགོན་པོ་ནི། །གནས་ལ་ངེས་པར་མ་འཆིས་ཀྱང་། །སེམས་ཅན་སོ་སོའི་གནང་ངོས་ལ། ཞེས་པ་ནས། །འཇིགས་པའི་གད་མོས་ས་གཞི་གཡོ། །དེ་ལྟའི་གནས་མཆོག་དམ་པ་ན། །ཁྲོ་རྒྱལ་མཧཱ་ཀ་ལ་ཕྱག་དྲུག་པ། །སྐུ་ནི་རི་རྒྱལ་ལྷུན་པོ་ལྟ་བུར་བརྗིད། །ཙན་ལྡན་ནགས་ཚལ་སྡོང་པོའི་ཁྲོད་ན་ཞུགས། །ཆོས་ཉིད་མི་འགྱུར་སྐུ་མདོག་མཐིང་ནག་ལ། །དགྲ་བགེགས་འདུལ་ཕྱིར་བསྐལ་པའི་མེ་དཔུང་འབར། །ཕྱག་དྲུག་གཡས་ཀྱི་དང་པོའི་གྲི་གུག་གིས། །ཉོན་མོངས་རྩད་ནས་གཅོད་པའི་མཁའ་འགྲོ་འབུམ། །བར་པས་ཐོད་པའི་འཕྲེང་བ་འཛིན་པ་ལས། །མི་བརྗེད་སེམས་ཅན་འདྲེན་པའི་མཁའ་འགྲོ་འབུམ། །ཐ་མས་ཅང་ཏེའུ་དྲག་ཏུ་འཁྲོལ་བ་ལས། །ཆོས་ཉིད་དགྲ་ཆེན་སྒྲོག་པའི་མཁའ་འགྲོ་འབུམ། །གཡོན་གྱིས་དང་པོས་ཐོད་ཁྲག་བསྣམས་པ་ནི། །དམ་ཉམས་ཁོང་ཁྲག་འདྲེན་པའི་མཁའ་འགྲོ་འབུམ། །བར་པས་མདུང་རྩེ་གསུམ་པ་བསྣམས་པས་ནས། །དུག་གསུམ་རྩད་ནས་གཅོད་པའི་མཁའ་འགྲོ་འབུམ། །ཐ་མ་རྡོ་རྗེ་ཞགས་པ་བསྣམས་པ་ནས། །སེམས་ཅན་འཆིངས་ལས་སྒྲོལ་བའི་མཁའ་འགྲོ་འབུམ། །ཞལ་གདངས་མཆེ་བ་རྩིགས་ཤིང་བརྔམས་པ་ནི། །དམ་ཉམས་ཤ་ལ་རོལ་པའི་མཁའ་འགྲོ་འབུམ། །སྟག་གི་ལྤགས་པ་སྦྲུལ་གྱི་རྒྱན་པ་ནི། །བདུག་པའི་ཀླུ་ཚོགས་འདུལ་བའི་མཁའ་འགྲོ་འབུམ། །སྤྱན་གསུམ་དུས་མཐའི་མེ་ལྟར་འབར་བ་ནི། །ཁམས་གསུམ་དབང་དུ་བསྡུད་པའི་མཁའ་འགྲོ་འབུམ། །དཔྲལ་བར་སིན་དྷུ་ར་ཡིས་མཚན་པ་ནི། །མཁའ་འགྲོ་དབང་དུ་བསྡུད་པའི་མཁའ་འགྲོ་འབུམ། །སྤྱི་བོར་མི་སྐྱོད་རྒྱལ་པོས་མཚན་པ་ནི། །དབང་བཞི་ཡོངས་སུ་རྫོགས་པའི་མཁའ་འགྲོ་འབུམ། །གན་ཡང་འཁོར་ན་གནས་པ་ཡིས། །ཤ་པ་མི་ཡི་གདོང་པ་ཅན། །ཁྲག་འཐུང་བྱའི་མཆུ་ཅན་དང་། །ཤ་པ་སྲིན་པོའི་ཚོགས་རྣམས་ཀྱི། །བདག་ལ་སྡང་བའི་དགྲ་བོ་འདི། །དཀོན་མཆོག་གསུམ་གྱིས་དབུ་འཕངས་སྨད། །བླ་མ་དམ་པའི་སྐུ་ལ་བསྡོས། །ཆོས་འཁོར་གཉན་པོ་འདི་ཡིས་ཤིག །བསྟན་པའི་དགྲ་བོར་གྱུར་པ་ནི། །ཡ་མ་རཱ་ཛཱའི་ཞལ་དུ་ཐོབ། ཅེས་པ་ནས། ཁ་ནས་ཁོང་ཁྲག་སྐྱུག་ཏུ་ཆུག །དགྲ་བོ་ལས་ངན་སྡིག་ཅན་འདི། །བུ་དང་ཆུང་མ་ཁྲོལ་ལ་ཤོག །ཐོ་རང་སྒོ་ཁྱི་ཟུག་ཏུ་ཆུག །ནམ་གུང་རྟ་ཕོ་འཚེར་དུ་ཆུག །སྲོད་ལ་བྱ་ཕོ་སྒྲག་ཏུ་ཆུག །དུར་ཁྲོད་ཝ་མོ་རྒྱལ་དུ་ཆུག །བདུད་ཀྱི་སྒོ་གྲོ་བརྡུང་དུ་ཆུག །ཙན་གྱིས་ཞགས་པ་འདེབས་སུ་ཆུག །བསྟན་པའི་དགྲ་བོར་གྱུར་པ་ནི། །ཁྲམ་ལ་ཕབ་ཀྱི་ཁྲམ་ལ་ཐོབ། །ཤོ་ལ་བབ་ཀྱི་ཤོ་ཁྱེར་གཅིག །ཉེས་ཅན་སྟེས་ལ་ཤོར་ར་རོ། །བཅོལ་ལོ་བསྟོད་དོ་མཐུ་མ་ཆུང་། །རྟགས་དང་མཚན་མ་མྱུར་དུ་སྟོན། ཅེས་པའོ། ༒ ཀྵེ་ཊ་པ་ལའི་སྒྲུབ་ཐབས་ཐན་འགྲེད་མན་ངག་ཞུགས་སོ། །བླ་མ་བསྟན་བསྲུངས་འཁོར་བཅས་ལ། སྒོ་གསུམ་གུས་པས་ཕྱག་འཚལ་ལོ། །ཞབ་[[Mokchokpa Rinchen Tsöndrü|བླ་མ་རྨོག་ལྕོག་པ]]འི་ཞལ་ནས། ངས་བླ་མ་དམ་པ་རྣམས་ལ་མོས་གུས་བྱས་ཤིང་། འཇིག་རྟེན་གྱི་བྱ་བ་སྤངས་ནས་ཉམས་སུ་བླངས་པས་ཆོས་སྐྱོངས་གིས་ཀྱང་ཞལ་ཚུར་འཛུམ་བྱུང་ཞིང་། བདག་གི་བླ་མ་ཤངས་པ་ལ་གདམས་པ་འགའ་ཉན་དགོས་བསམ་སྟེ་ལམ་དུ་ཞུགས་པའི་ནུ་མོ་ནམ་ཐོ་རང་ཁར་དགེ་སྦྱོར་བྱེད་ཀྱིན་ཡོད་ཙ་ན། ཉམ་གནང་ལ་རྣལ་འབྱོར་པ་རས་ཀྱི་ཨང་འགའ་རག་གྱོན་པ། སྤྱན་རྩ་དམར་བ་ཕྱག་གཡས་ཌ་མ་རུ་འཁྲོལ་བ་གཅིག་བྱུང་སྟེ། ངས་ཁྱེད་ཀྱི་བསྟན་པ་བསྲུངས་བར་བྱེད་པ་ཡིན། བླ་མ་ཤངས་པ་ལ་ངའི་སྒྲུབས་ཐབས་ཀྱང་ཡོད། ཁོང་གི་ཕྱག་ལེན་ཀྱང་མཛད་པས་དེ་ཞུས་གཅིག་གསུངས་ནས་མི་སྣང་བར་གྱུར་ཏེ། དེ་ནས་བདག་གི་བླ་མ་དང་འཇལ་ཆོས་བསྐོར་མང་པོ་ཞུས་པའི་ཐོག་མར་འདི་ཞུས་པ་ཡིན་ནེ། བདག་བླ་མའི་དྲུང་དུ་འོང་བསམ་པའི་ནམ་ཐོ་རངས་ཁར་ལྟས་འདི་ལྟ་བུ་བྱུང་ཞེས་སྔར་གྱི་ལོ་རྒྱུས་བཤད་ནས་ཆོས་སྐྱོངས་གི་སྒྲུབས་འདི་ཞུས་པས། བླ་མའི་ཞལ་ནས་ངའི་ཆོས་སྐྱོངས་འདིས་ཆོས་བྱེད་པ་ཁོ་ན་སྐྱོངས་ཤིང་བྱིན་གྱིས་རློབ་པས་ཆོས་སྐྱོངས་ཞ་མ་འདི་ཡིན། གན་རྣམས་འདིའི་ཐད་ནས་མགོན་རུལ་བྱ་བ་ཡིན། ད་ཁྱེད་བདག་པོར་འདུག་པས་མན་ངག་ཟབ་ཤོས་གཅིག་སྦྱིན་དགོས་གསུངས་ནས་གནང་ངོ་། །ཆོས་སྐྱོངས་གི་རྟེན་བཅའ་བ་དང་། གཏོར་མ་ནི་ལོགས་སུ་བསྟན། འདིའི་མན་ངག་ཉུང་འདུས་ལག་ལེན་ནི། སངས་རྒྱས་ཀྱི་བསྟན་པ་བསྲུངས་ན་ལྷ་དང་སྔགས་ནི་འདི་ཡིན་ནེ། རང་གཙོ་བོར་བསྒྲུབས་ལྟར་བསྐྱེད་པ་དང་། ལུས་དང་གྲིབ་མའི་ཚུལ་དུ་འཁོར་གཉིས་པོ་ཡང་བསྐྱེད་དོ། །དེ་ཡང་གཡས་སུ་ཀྵེ་ཊ་པ་ལ་གཡས་སྙིང་ཞགས་ཟུང་ཞིང་གཡོན་པས་སྤྲེའུ་ཁྲིད་པ། འཁོར་གནོད་སྦྱིན་དཔག་ཏུ་མེད་པས་བསྐོར་བ་བསམ། གཡོན་དུ་དུས་མཚན་མ་ནག་མོ་བྱའི་གདོངས་ཅན་གཡས་པས་རུ་མཚོན་དང་། གཡོན་ནད་ཀྱི་རྐྱལ་པ་བསྣམས་པ། འཁོར་བུད་མེད་ནག་མོ་ལྟེར་ཆགས་ཀྱི་ཚོགས་དཔག་མེད་ཀྱི་བསྐོར་བར་བསམ། བླ་མའི་ཞལ་ནས་འཁོར་འདི་གཉིས་ཀྱི་མིང་ཡང་གཞན་ལ་བརྗོད་དུ་མི་རུང་གསུངས། གཙོ་བོའི་བསྙེན་པ་ཐེང་ནས་ལས་ལ་སྦྱོར་ན། དུས་མཚན་མོའི་སྔགས་ནི། ཨོཾ་སྲུཾ་སྲུཾ་ཏུ་ལུ་བྷྱོ་ཅེས་སོ། ཀྵེ་ཊ་པ་ལའི་སྔགས་ནི། ཨོཾ་བཻ་ཤ་ཡ་བཻ་ཤ་ཡ། ཨ་བཻ་ཤ་ཡ། ཨ་བཻ་ཤ་ཡ། པྲ་ཏོ་ཀ་ཏོ། རཀྴ་ཙིཏྟ་ནི་ཤ་སྙིང་ལ་སྲིལ་སྲིལ། ཅེས་པའོ། །སྔགས་འདི་གཉིས་གན་ལ་ཡེ་རང་མེད་པའི་གསང་བར་བྱའོ། །དགྲ་ལ་བྱེད་རུང་། འདྲེ་ལ་བྱེད་རུང་། གང་ཡིན་པའི་གཟུགས་བྲིས་སྟེ་འབྲུབ་ཁུང་དུ་བཅུག་སྟེ་ཐ་མ་གཙང་སྣ་ཚོགས་པས་བསྐོར་ཏེ་བཞག །འབྲུབ་ཁུང་དེ་ལྕགས་ཀྱི་ཁང་པ་སྒོ་མེད་མཐའ་མེ་རིས་བསྐོར་བ་བསམ། དེ་ནས་གང་ཡིན་པ་དེ་མིང་ཡིག་དངོ་ལས་བསྐྱེད་ལ་ཡང་ཡང་གསལ་གཏབ། རང་གཙོ་བོར་བསྐྱེད་པའི་ཐུགས་ཁའི་ཧཱུྃ་ལས་ཀྵེ་ཊ་པཱ་ལ་གཡས་པས་ཞགས་པ་ཐོགས་པ་སྤྲོས་སྟེ། ཞགས་པས་གང་ལ་བྱ་བའི་སྙིང་ཁའི་འགུལ་པ་ནས་བཟུང་ཏེ་སྤྲེའུ་ལ་སྐྱོན་ནས། བདག་གི་མདུན་དུ་བཀུག་སྟེ། མདུན་གྱི་འབྲུབ་ཁུངས་དུ་གན་རྒྱལ་དུ་བསྒྱེལ་བ་དང་། གཙོ་བོའི་སྔགས་ལ་གཏོར་སྔགས་ཀྱི་གསང་སྔགས་མན་ཆད། འཁོར་གཉིས་ཀྱིས་སྔགས་ཀྱི་མགོར་གཙོ་བོའི་སྔགས་སྦྱར་ཏེ་བཟླས་པས། འཁོར་རྣམས་ཀྱི་དགྲ་བོ་དེ་དགྲལ་བར་བསམ་ཤིང་། ཉུང་ནག་ལ་སྔགས་བཟླས་ཤིང་བྲབས་པས་ཞག་ཉི་ཤུ་རྩ་ཅིག་ནས་དགྲ་ལ་ལྟས་ངན་སྣ་ཚོགས་འབྱུང་ཞིང་། ཟླ་བ་གཅིག་ནས་དགྲ་དེ་འགུམ་པར་འགྱུར་བས་འདི་ནི་ཤིན་ཏུ་གསང་བར་བྱའོ། །འདི་གར་ཐཽད་དུ་སྦྱིན་ན་རང་ལ་གནོད་པས་གཞན་ལ་མ་སྦྱིན། གལ་ཏེ་གནོད་ལྡན་གྱི་གང་ཟག་རེ་རེ་ཙམ་ལ་སྦྱིན་དགོས་པ་བྱུང་ན་གཏོར་དབང་ལེགས་པར་བྱས་ལ་སྦྱིན། སུམ་ལས་མང་ན་རང་ལ་གནོད་་་་་གསུངས། བླ་མ་ཤངས་པས་རེ་རེ་ཙམ་ལས་མི་གཏོར་བའི་བཀའ་རྒྱས་བཏབ་བོ། །བསྟན་བསྲུང་སྲོག་སྔགས་[[Khyungpo Neljor|བླ་མ་ཤངས་པ]]འི་བཀའ་བརྒྱ་མ་གན་ལ་མེད་པའི་གསང་བདག་གལ་ཆེའོ། །ཨྀཐི།། ༒ བསྟན་ལ་སྡང་བའི་དམ་ཉམས་རྣམས། །མ་ཧཱ་ཀ་ལའི་ཆུ་འཕྲུལ་གྱིས། །ཤིན་ཏུ་འཇིགས་ཤིང་སྐྲག་པར་བྱེད། །དེས་ནི་རང་ལ་འདུད་པར་གྱུར། །དེ་བས་སྒྲུབ་ཚོད་ཟིན་པར་བྱ། མ་ཧཱ་ཀ་ལ་དཔོན་གཡོགས་གསུམ་གྱི་སྒོས་དགྲ་ལ་ཆུ་འཕྲུལ་གཏོང་བའི་ཐབས་ནི། གནས་དབེན་པར་དལ་གྲུ་བཞིའི་མཎྜལ་བཅས་ལ། དེའི་དབུས་སུ་འབྲུབ་ཁུངས་ཁྲུ་གང་པ་བྱ། ཟུར་གསུམ་དུ་མི་རྐང་གི་བསྐྱེད་པོ་གསུམ་གྱི་སྟེང་དུ་རབ་ཆད་ཐོད་པའི་ནང་དུ། རྟ་ནག །བྱ་ནག །ཁྱི་ནག་གི་ཁྲག་བླུག་ལ་དགྲའི་ལིངྒ་བྲིས་པས་ཁ་བཅད། རྐང་དང་ཐོད་པ་འདམ་པས་བྱུགས་ཏེ་མེས་མི་ཚིག་པར་བྱས། དེའི་གཡས་སུ་ཁྱི་དཀར་པོ་སྣ་དམར་གྱི་ཐོད་པ་ལ་དཔྲལ་བར་ར་ཁྲག་གིས་རྡོ་རྗེ་བརྒྱ་གྲམ་བྲིས་ལ་འབྲུབ་ཁུང་མཐོང་བའི་སར་བཞག །བག་ཟན་ལ་ཨ་ཙ་རའི་ཟུགས་བྱས་པའི་ལག་པ་གཡས་ཀྱིས་སྤྱང་ཀིའི་གཟུགས་ཟུང་བ། གཡོན་པས་སྤྲེའུའི་གཟུགས་བཟུང་བ། གཡོན་པས་སྤྲེའུའི་གཟུགས་བཟུང་བ་བྱས་ལ། ཁྱི་ཐོད་ཀྱིས་ནང་དུ་ཞག་གོ། །དེའི་མཐའ་བསྐོར་དུ་ལྟས་ངན་གཏོང་བའི་གཟུགས་གན་ཡང་བྱས་ལ་བཞག །ཨ་ཙ་རའི་གཟུགས་ཀྱི་སྙིང་ཁར་དགྲ་བོའི་མིང་བྱང་དང་། ནོར་གཏོར་ན་ནོར་འདི་ཞེས་བྱ་བ་ཆཻསོ་ཁྱེར་ཤོག །ཅེས་བྱ་བ་རོག་གི་ཁྲག་གི་བྲིས་ལ་བཞུག གཟུགས་དེ་རྣམས་ལ་བསྙེན་པའི་༼ནང་དུ་འཁོར་ལོའི་བརྟེན་ཏེ་༽དུས་སུ་དགུག་གཞུག་ཡང་ཡང་བྱ། བྱ་རོག་གི་རྒྱལ་མཚན་དང་། དེའི་དབང་པོ་ལྔ་དང་། དོན་སྙིང་དང་ཤ་ཁྲག་ལ་སོགས་པའི་གཏོར་མ་ཡང་བྱའོ། །དེ་ནས་སྒྲུབ་པའི་དུས་སུ་ཡེ་ཤེས་མགོན་པོའི་མདུན་དུ་རྡོ་རྗེ་ལེགས་པ་བེར་ནག་དང་ཞྭ་ནག་གྱོན་པ། གསེར་སྒ་ཅན་སེང་གེ་ལ་གཞེན་པ་གཡས་རྡོ་རྗེ་འཛིན་པ། གཡོན་དར་འཕྱར་བ་ལྕགས་ཀྱི་ཅང་ཀི་འུར་བ་ཁྲིད་པ་གཅིག་བསྐྱེད། དེའི་སྔགས་ནི། ཨོཾ་བཛྲ་མཧཱ་ཀཱ་ལ། རྒྱུག་རྒྱུག །ཤྲིཾ་ཤྲིཾ། མ་ཧཱ་ཀཱ་ལ་ས་རྡུ་ས་མ་ཡ། ཝུར་ཝ་ཝུར་ཝ། རྒྱུག་དྲི་རྒྱུག་དྲི། མཧཱ་ཀཱ་ལ་གིཾ་ཀཱ་ར། ཏིཾ་ཤཾས་ཀུ་རུ། བན་ད་བན་ད། རྒྱུག་རྒྱུག །ཤྲིཾ་ཤྲིཾ། མ་ཧཱ་ཀཱ་ལ་བྷྱོ། བཛྲ་ས་རྡུ་ས་མ་ཡཱ་གིཾ་ཀ་ར། ར་ཙ་ཏྲི། ཏྲིཾ་ཏྲིཾ། ལིཾ་ལིཾ། རྦུད་རྦུད། རྒྱུག་རྒྱུག །ཤྲིཾ་ཤྲིཾ། ཤག་ཤག་ཤག །ཚལ་ཚལ། ར་རྩ་ཝུར་ཝུར། མྱག་མྱག །ཁཾ་ཤོད་རྦད་ཡཱ། ཞེས་བཟླས་ཞིང་ཁྲག་གི་གདུག །ཡུང་དཀར་དང་ཡུང་ནག་གི་ཐོད་པ་བཀང་སྟེ་ལིང་ག་ལ་བྲབ་པར་བྱའོ། །དེ་ལ་རྟགས་ནི་ཁང་པ་ཚགས་པ་དང་། འཇིགས་པ་དང་ཁྱི་དང་སྤྲེའུ་དང་། ལྷ་ཁང་ཆུ་མདོང་། རླུང་འཚུབ་པ་དང་། ཁྱི་ཐོད་ལ་འོད་འབར་བ་དང་། ཨ་ཙ་ར་དང་བྱ་རོག་དང་། སྟག་ལ་དྲེད་གཞོན་པ་དང་། ཝ་ལ་སྤྲེའུ་གཞོན་པ་ལ་སོགས་པ་ ཆོས་འཕྲུལ་སྣ་ཚོགས་འབྱུང་ངོ་། །རི་མི་འཇིགས་པ་གལ་ཆེའོ། །རྟགས་བྱུང་ནས་དགྲ་ལ་གཏོང་བ་ཡིན་ནོ། །གཟུགས་སྙན་ཁ་ཕྱིར་བསྟན་ལ། རང་ལས་མགོནུ་བྷཻ་ལས། ཚོར་མ་ཅན་གྱི་མེ་ལ་ཐོད་པར་ཁྲག་སྣ་བསྐོལ་བའི་རླུངས་པ་ལ་ལིང་ག་བདུན་ཅིང་། ཁྱི་ཐོད་དང་ལིང་ག་ཐུན་གྱི་བྲབ་ཅིང་འབོད་རྦད་དྲིལ་བའི་སྔགས་འདི་བཟླས། ཨོཾ་བཛྲ་མཧཱ་མ་ཡ། རཀྴ་རཀྴ། ཁཾ་ཁཾ། རྦད་རྦད། ཤིག་ཤིག་བྷྱོ་བྷྱོ། ས་མ་ཡ་ཛཿཛཿ རྟུབ་རྟུབ། བར་བ། བར་བ་ཛཿཛཿ ངུར་ངུར། གྱིང་གྱིང་། སྟཾ་བྷ་ཡ་ནན་རྦད་ཡ། ཞེས་བཏགས་ཏེ་བཟླས་ནས་ཆང་བུ་དང་གཏོར་མ་གཏོང་། ཉེས་པའི་དཔངས་གཟུགས་བྱ། དམོད་ཅོལ་བརྡབ། འཕྲིན་ལས་བསྐུལ་ལོ། །མཧཱ་ཀཱ་ལ་དཔོན་གཡོག་གསུམ་གྱི་སྒོས་དགྲ་ལ་ཐན་འགྱེད་གཏོང་བའི་མན་ངག་རྣེ་མྱུར་ངར་དང་ལྡན་པ་འདི་སུ་ལ་ཡང་ཡོད་པ་མ་ཡིན་པའི་ཤིན་ཏུ་གསང་བར་བྱའོ། །བདག་གི་ཉམས་སུ་བླངས་པ་ཡིན། །བསྟན་དགྲ་འཇིགས་པའི་མན་ངག་ནི། །དམ་ཚིག་ཅན་ལ་གཏེར་རྒྱུ་ཡིན། །དམ་མེད་རྣམས་ལ་གསང་བར་བྱ། ཁ་བསག་དང་གཡོ་སྒྱུ་ཅན་ལ་སྦྱིན་ན་ཀྵེ་ཏ་པཱ་ལ་ཁྱོད་ཀྱི་སྙིང་ཁྲག་དམར་པོར་ཕྱུང་ཞིག །ཨྀཐི།། ༒ ཤྲི་མཧཱ་ཀ་ལ་ན་མོ། མཧཱ་ཀ་ལའི་འཁོར་ལོའི་མན་ངག་ནི། མུ་ཁྱུད་བཞིའི་ལྟེ་བ་ལ་ལིང་ག་ལྕེ་ཕྱིར་ཕྱུང་ལ་དེའི་སྟེང་དུ་ཆཻ་མོ་མན་ཏྲ་གུ་ཡ་རྦད་བྷྱོ་ཐིཾ་ཐིཾ་ཁྲིཾ། ཞེས་པ་དང་། ཡན་ལག་བརྒྱད་ལ་གཟའ་བརྒྱད། དེའི་ཕྱིའི་རྩིབས་བཅུ་གཉིས་ནང་དུ་བསྟན་པ་ལ། ཁཾ་ཁཾ་༼འདམ་ནས་གཡས་བསྐོར་༽ལ་སོགས་པ་དྲུག་དང་རྦད་བྷྱོ་གཉིས་སྦྲེལ་བ་དང་། དེའི་ཕྱི་ལ་ཡུལ་རུས་དང་དབང་ཐང་མིང་བཞི་དང་བཅས་པ་བྲི། དེའི་ཕྱི་ལ་ཨོཾ་མཧཱ་དེ་བ་ཤི་རི་རལ་པ་ཅན་དགྲ་བོའི་སྲོག་ལ་ཁཾ་ཁཾ། ཚིག་ཚིག །ལཾ་ལཾ། རཾ་རཾ། བཾ་བཾ། ཡཾ་ཡཾ་རྦད་བྷྱོ་བྷྱོ། ཆཻ་མོ་མན་ཏྲ་གུ་ཡ་རྦད་བྷྱོ། ཐིཾ་ཐིཾ་ཁྲིཾ། ཞེས་པ་གཉིས་འོག་སྤྲད་ལ་བྲིས། དེའི་ཕྱི་རོལ་དུ་རལ་པ་ཅན་ཕུར་པ་དང་ཐོད་པ་ཐོགས་པ་བྲི། པད་ཁྱེར་ཁྲག་ར་དུག །ཕག་སྣ། བཙན་དུག །ཐང་ཁྲོམ་པ། རི་ཤོ་མ། དུག་སྣ་ཚོགས་བྱུགས། དུར་ཆད་ཀྱི་ས་ལ་རལ་པ་ཅན་གྱི་གཟུགས་བྱས་ལ། ཁྱིམ་བྱ་ནག་མོའི་སྒོང་ང་ལ་མགོ་བོ་བྱས་ལ་ཁ་མི་གཏད་དོ། །དེའི་ནང་དུ་འཁོར་ལོ་དུག་དང་ཁྲག་སྣས་བྲིས་ལ་གཞུག །ཝ་ཐོད་ཀྱི་སྣའི་ཕྱོགས་སུ་མགོ་བསྟན་ལ་ལམ་སྲང་དུ་མནན་ན་དགྲ་མནོན་པར་ངེས་སོ། །ཕག་ཐོད་དུ་མནན་ན་ཐམས་ཅད་སྤང་ཡང་། བྱ་ཕོའི་ཐོད་པར་ཁྱོ་ཤུགས་འབྱེད། བོང་བུའི་ཐོད་པར་ཉེ་བ་འབྱེད། སྤྲེའུའི་ཐོད་པར་ཐམས་ཅད་འབྱེད། བྲ་ཉེ་ལ་གཏོད། ཁྲོལ་བ་ཤིང་ཤིང་གི་ཕུར་བུ་སོར་བཞིའི་ནང་དུ་ཆཻ་མོ་བོར་བའི་སྔགས་ཞ་ཉེས་བྲིས་ལ་བཅུག་ལ་འཆང་ཁུང་གཡས་སུ་བཏགས་ནས་རལ་པ་ཅན་དུ་བསྒོམ་ན་གྲོལ་ལོ། །ཕུང་སེལ་བྱེད་ན་ཕག་ནག་པོ་ལ་མིས་གཞོན་པ་ལག་ན་གྲི་ཐོགས་པ་དང་། སྦྲུལ་དམར་པོ་མིས་གཞོན་པ་ལག་ན་མདུང་ཁྱེར་བ་གཉིས་འཐབ་པར་འདོད་ན་ཟུར་བསྟན། འབྲལ་བར་འདོད་ན་རྒྱབ་བསྟན། འཆི་བར་འདོད་ན་སྤྱིའུ་ཚུགས་སུ་ཐོད་པར་ལིང་གའི་གཡས་གཡོན་དུ་གཟུག་གོ། །ས་ནི་ཕུང་ཤུལ་དང་། མཛེ་ཕོ་དང་ཕྱི་བ་ལ་སོགས་པ་གང་རིག་རིགས་ལ་བྱའོ། །ཨྀཐི།། འདི་སུ་ཐཽད་ལ་སྦྱིན་ན་ཀྵེ་ཏ་པ་ལ་ཡབ་ཡུམ་གྱིས་སྙིང་ཕྱུང་ཤིག་ས་མ་རྒྱ། [[k+She tra pa la'i gtor ma'i las sbyor rA hu la las khyung po la gnang ba'i mgon po zhing skyong du sgrub pa'i man ngag]] ༈ མྱུར་མཛད་ཡེ་ཤེས་མགོན་པོ་ལ་ཕྱག་འཚལ་ལོ། །འདིར་བཀའ་སྡོད་ལ་བརྟེན་པའི་གཏོར་མའི་ལས་སྦྱོར་ནི། དེ་ལ་ལིང་གའ་ཤོག་བུའམ་དོམ་གྱི་སྙིང་ཤུགས་ལ་ལིང་ག་མཚན་ཉིད་ཚངས་བ་བྲི། དེ་ལ་ཟག་རྫས་བྱུགས། རང་ཉིད་ཡེ་ཤེས་མགོན་པོར་བསྐྱེད་ཅིང་ཡེ་ཤེས་པ་གཞུག་བསྟོད་པ་དང་བསྙེན་པ་བྱེད་ཅིང་གཏོར་མ་འབུལ། འཕྲིན་ལས་བཅོལ། དེ་ནས་ལིང་ག་ཤིང་གི་རྩེ་མོར་སྐྱོན་ལ་དགུག་གཞུག་བརྒྱ་རྩ་བརྒྱད་ལ་སོགས་པ་བྱེད། གཏོར་ཆེན་ནས་བཤད་པའི་ཁ་སྦྱོར་དབྱེ་བ་བྱས་ལ་མ་ལྟེབ་པར་རྣེ་མིག་ནས་ཡུག་སྐྲ་བཤན་པས་ཕྱིན་ལོག་ཏུ་བཀལ་བའི་ཟུང་ཐག་དྲངས་ལ། སྐྱེར་པའམ་མི་གྲིར་ཤི་བའི་རུས་པ་ལ་གྲི་གུག་མཚོན་གང་པ་ཆུང་བ་གཅིག་བྱས་ལ་མདུན་ནས་དྲངས་ཏེ་སྣེ་མོ་ཕུར་པ་ལ་གཏོད་ལ། དེ་ཡི་དམ་མགོན་པོར་བསྐྱེད་ལིང་ག་དེ་རྡོ་རྗེས་མནན། དེ་ཆང་དང་གྲིག་བསྲེས་པ་ལ་ཀྵེ་ཊ་པ་ལའི་གཏོར་མ་ཟུར་གསུམ་གསུམ་བརྩེགས་སྟེང་དུ་ཤོས་བུ་ཟུར་གསུམ་པ་གཅིག་ཞག །བམ་རིམ་འོག་མ་ནུབ་ཙམ་ལ་མི་མགོའི་མཐེབ་ཀྱུས་བསྐོར་བ། འོག་མའི་དབུས་སུ་གྲུ་གསུམ་བྱས་ལ། ནང་རོ་གསོལ་གྱི་ནག་པོ་དང་ཕྱི་དུག་ཁྲག་གིས་དམར་ནག་བྱའོ། །དེའི་མཐིལ་དུ་སྔར་གྱི་ལིང་ག་ཕུག་ལ་བཞག །དེའི་སྟེང་ཐུན་རྫས་བག་ཙམ་གྱི་བཀང་། སྟེང་གི་གྲུ་གསུམ་གྱི་ལོགས་ལ་རྡོ་རྗེ་བརྒྱ་གྲམ་བྲིས་ལ་མར་ཀབ། དེའི་སྟེང་དུ་ཤོས་བུ་ཟུར་གསུམ་བཞག །སྙིང་ཁའི་གཟུང་ཐག་དེ་བང་རིམ་གོང་མའི་ཁར་སྟོན། དེ་ཤོས་བུའི་ཞབས་ཀྱི་མདུན་ངོས་སུ་དྲངས་ལ་ཕུར་པ་ལ་གཏད་དོ། །སྟེང་གི་ཤོས་བུ་ལ་མ་གཏོད་པར་བྱའོ། །གཏོར་མའི་ཟུར་དགྲ་ཕྱོགས་སུ་བསྟན། མི་གྲིར་ཤི་བའི་ཤའམ་ཤ་སྣས་རྒྱན་ལ་ལྕགས་ཀྱི་སྣོད་དུ་བཞག །སྲོགས་བུ་ནག་པོའི་ཁར་བཞག་ལ། དེ་ནས་ཀྵེ་ཊ་པ་ལའི་མངོན་རྟོགས་གཏོར་ཆེན་ནས་བཤད་པ་ལྟར་ཡུམ་སྤང་ལ་བསྐྱེད་ཅིང་གནས་གསུམ་ལ་ཡིག་འབྲུ་གསུམ་བསྐྱེད་ཅིང་ཀྵེ་ཊ་པ་ལ་ཨཏཱ་ཡ་ཛཿ ཞེས་པས་ཡེ་ཤེས་པ་བསྟིམ། དེའི་སྟེང་དུ་པད་ཉི་ཚོགས་བདག་གི་གདན་གྱིས་སྟེང་དུ་ཆོ་ག་གསུམ་གྱི་མགོན་པོ་བསྐྱེད། ཡེ་ཤེས་པ་གཞུག་དེའི་སྤྱི་བོར་མི་བསྐྱོད་པ་བསྐྱེད་ལ། དེ་ཡོངས་སུ་གྱུར་པ་ལས་ཧཱུྃ་ཡིག །དེ་ལས་འོད་ཟེར་འཕྲོས་པས་སངས་རྒྱས་བྱང་ཆུབ་སེམས་དཔའ་ཐམས་ཅད་སྤྱན་དྲངས་ཧཱུྃ་ལ་ཐིམ། དེ་མགོན་པོའི་སྤྱི་བོ་ནས་བཞུགས་སྙིང་ཁར་སླེབ་ནས་རྡོ་རྗེ་འཇིགས་བྱེད་ཞལ་གསུམ་ཕྱག་དྲུག་པར་གྱུར་ནས་སྲིད་པ་གསུམ་ཟ་བར་ནུས་པའི་གཟི་བརྗིད་བསྐྱེད། མགོན་པོ་ཀྵེ་ཊ་པ་ལ་ལ་ཐིམ། ཀྵེ་ཊ་པ་ལ་གཟི་བརྗིད་ལྡན་པར་བྱས་ཏེ་གཏོར་ཆོག་ལྟར་གཏོར་མ་བྱིན་གྱིས་བརླབས་ཏེ། དགྲའོ་གང་ཡིན་པ་དེའི་ཤ་ཁྲག་རུས་གསུམ་ལྷག་མ་མ་ལུས་པ་གསོལ་བར་བསམ་ལ། གཏོར་ཆེན་ནས་བཤད་པའི་གཏོར་སྔགས་ལ་ཡུམ་སྤངས་ལ་བརྗོད། བསྟོད་ཅིང་འཕྲིན་ལས་བཅོལ། རང་དམ་ཚིག་པར་གནས་པ་ལ་སིལ་བ་ཚལ་ནས་ཡེ་ཤེས་པ་སྤྱན་དྲངས་བསྟིམ། མདུན་ཀྱི་ཀྵེ་ཊ་པ་ལ་ཡང་མིག་ཡར་ལྟ་ཞིང་བཀའ་ཉན་པར་བསམ། རང་མགོན་པོ་མིག་ཐུར་དུ་ལྟ་ཞིང་བཀའ་སྒོ་བར་བསམ་མོ། །ཨོཾ་ཀྵེ་ཊ་པ་ལ་བིགྷན་ཧཱུྃ། ཨོཾ་མཧཱ་ཀ་ལ་ཡ་ཤ་དམ་ཉམས་འདིའི་ཙིཏྟ་ལ་དུན་དུན་རྦད། ཐུན་མོང་མ་ཡིན་པའི་ཞལ་ཤེས་ནི། ཐུན་གྱིས་མཐར་བྱ་ཞིང་། ལས་ལ་སྦྱོར་བ་ནི། ཕུར་བུ་ལ་ཟུང་ཐག་ཀྲོལ་ནས་ལག་པ་གཉིས་ཀྱི་བར་དུ་ཟུང་ཐག་སྒྲིལ་ཅིང་གྲི་གུག་འཁོར་བར་བྱས་པས། གྲི་གུག་གིས་ཁོའི་སྲོག་རྩ་རྦད་རྦད་བཅད་པར་བསམ། དེ་ནས་འཕྲལ་གཏོར་ཟུར་གསུམ་པ་ལ་ལིང་བརྐྱང་བཙུགས། ལིང་ག་དེ་ཚུར་བླངས་ཏེ་བསྲེགས། དེ་ལྟར་ཞག་གསུམ་སྒྲིམ་པས་རབ་ཀྵེ་ཊ་པ་ལས་དངོས་སུ་གློ་སྙིང་གཏེར་བ། འབྲིང་མི་ནག་པོས་ཤ་ཁྲག་བཟའ་འཐུང་བྱེད་པ། ཐ་མ་སྲོག་ཆགས་གསད་པ་སོགས་དངོས་སམ། ཉམ་སྣང་། རྨི་ལམ་དུ་འབྱུང་ཏེ། བྱུང་ན་དེ་ནས་སྲེགས་བུའི་ཁར་སྟེང་གི་ཤོས་བུ་གཏོར་མ་ཆེ་བ་དེ་དགྲ་ཕྱོགས་སུ་འཕངས་ལ་ཆོས་འབྱུང་གི་ལིང་ག་གཏོན། དེ་ནས་སླང་བའི་ནང་དུ་དུག་ཁྲག་གི་ཆོས་འབྱུང་བྲིས་ལ་ཚེར་མ་ཅན་གྱི་ཤིང་གྲུ་གསུམ་དུ་བརྩིགས་པའི་ཟུར་དགྲ་ཕྱོགས་སུ་བསྟན། སྟག་ལོ་པའམ་ཕག་ལོ་པས་མེ་སྦར་ཏེ། མེའི་ནང་དུ་ཀྵེ་ཊ་པ་ལ་རྐང་ཐང་དུ་ཞབས་གཡས་བསྐུམས་གཡོན་རྐྱང་བ་བསྐྱེད་དེ། དེའི་སྙིང་ཁར་ཡེ་ཤེས་མགོན་པོ་བསྐྱེད་ཆེད་ལས་སྐུ་གསུང་ཐུགས་བྱིན་གྱིས་བརླབས་ཡེ་ཤེས་པ་གཞུག །དེ་ནས་ལིང་ག་རྣམས་གྲི་ལྕགས་ལས་བྱས་པའི་གྲི་དུག་གི་གཏུབ་ཅིང་རང་གི་ལག་པ་གཡོན་པས་འབུལ། མེ་མ་ཤིའི་བར་དུ་མི་དགུལ་མི་རེག་ཅིང་། དེ་མ་ཐག་ཏུ་གཏོར་མ་གཅིག་བཤམས་ལ་གཏང་རག་གི་ཚུལ་དུ་འབུལ། གཏོར་མ་འཕངས་པ་དང་དུས་མཉམ་དུ་ལས་མགོན་སོང་ནས་དགྲ་བོ་དེ་བརྡུལ་དུ་བརླག་པར་བསམ། མགོན་པོ་རང་ཉིད་ལ་བསྟིམ། ཐལ་བ་དེ་སྦྲུལ་ནག་པོའི་ཐོད་པར་བླུག་ལ་སྔར་གྱི་ཟུང་ཐག་གི་སྡམ་ལ་དགྲ་བོའི་འགྲིམ་སྲང་དུ་མནན། ཁོས་འགོམ་ཞིང་ལས་མྱུར་བ་སྣང་གསུང་ངོ་། །ཐལ་བ་ལྷག་མ་ཆུ་དང་རླུང་ལ་འཆར་ལུས་ལ་མ་རེག་པ་གལ་ཆེའོ། །འདི་ཉིད་ཀྱིས་ལས་སྦྱོར་དུས་སུ་གཏོར་མའི་ནང་དུ་གཏོར་མའི་ཟས་ཕུད་ཞག་པ་གལ་ཆེ་ཞིང་། རང་ཉིད་བླ་མ་དང་མགོན་པོ་དབྱེར་མེད་དུ་བྱས་ནས་གསོལ་གཏབ་པ་གལ་ཆེའོ། །གཏོར་མའི་ནང་དུ་གྲི་ཁྲག་སྲེས་པ་དེ་ལས་མྱུར་བའི་གནད་ཤིན་ཏུ་ཆེའོ། །འདི་ནི་ནི་མན་ངག་དང་བཅས་པ་ཕྱོགས་གཅིག་ཏུ་སྒྲིལ་བ་ཡིན་པས་སུ་ལ་ཡང་མ་སྟེར་ཞིག །རྣལ་འབྱོར་གྱི་དབང་ཕྱུག་[[Rahula|ར་ཧུ་ལ་]]ཉིད་ཀྱིས་མགོན་པོ་ཞིང་སྐྱོངས་དུ་སྒྲུབ་པའི་མན་ངག་འདི་མཉམ་མེད་[[Khyungpo Neljor|ཁྱུང་པོ་རྣལ་འབྱོར་]]ལ་གནང་ནས་རིམ་པར་རྒྱུད་པའོ། །མང་ཐོས་[[Gelek Pelsang|དགེ་ལེགས་དཔལ་བཟང་]]གི །མཁས་གྲུབ་གོང་མའི་མན་ངག་ལ། །ལྷད་ཞུགས་གསལ་ནས་དག་པར་བྱས། །མཁས་པའི་དབང་པོ་ཉང་སྟོན་[[Künga Gyeltsen|དབོན་པོ]]ས་གསེར་ཞོ་ལྔའི་མཎྜལ་ཕུལ་ནས་ཞུས། ཨྀཐི།། ༒ མྱུར་མཛད་སྤྱན་རས་གཟིགས་ལ་ཕྱག་འཚལ་ལོ། །རྫོགས་རིམ་རླུང་གིས་གཅིག་རླུང་ནི། །ཡེ་ཤེས་མགོན་པོའི་སྤྱི་གཙུག་ཏུ། །དབང་གི་རྒྱལ་པོ་བསྒོམ་བྱས་ཏེ། །འོད་ཟེར་གཟི་བརྗིད་ལྡན་པར་བསམ། །གཡེལ་བ་མེད་པར་གསོལ་བ་གདབ། །ཐུན་མོངས་དངོས་གྲུབ་སྣ་ཚོགས་དང་། །སངས་རྒྱས་ལོ་བཟླས་འགྲུབ་པར་འགྱུར། ཞེས་གསུངས་པས། རྣལ་འབྱོར་པ་དམ་ཚིག་དང་ལྡན་པས་སྐད་གཅིག་གིས་མགོན་པོ་ཡབ་ཡུམ་བསྒོམ་ཞིང་། རླུང་ཁུག་པ་གསུམ་བཟུང་ཞིང་། མགོན་པོ་འཁོར་བཅས་རང་གི་མདུན་དུ་གསལ་གཏབ། མཆོད་དོ་གསོལ་འདེབས་བྱས་ནས་གསང་བའི་ཡི་གེ་བཅུ་གསུམ་ཡུམ་སྔགས་དང་བཅས་པ་བརྒྱ་རྩ་བརྒྱད་འདོན་ཞིང་སྔགས་དང་རླུང་ཁུག་པ་རེ་སྤྱད། དེ་ནས་རླུང་བཟུང་བ་ཙམ་གྱི་མགོན་པོ་འཁོར་བཅས་རྣམས་ཧཱུྃ་སྔོན་པོའི་རང་བཞིན་དུ་གྱུར་ནས་སྣ་བུག་གཡོན་ནས་རྔུབ་པས་ཐུགས་ཁར་ཐིམ་པར་བསམ། དེ་དམིགས་ཞིང་རླུང་བཅུག་ནས་གཅད་ན་ཞག་བདུན་ནས་འགྲུབ་པར་འགྱུར་རོ། །ཐུབ་ཟིན་ནས་མི་གཡེལ་བར་རྒྱུན་དུ་བརྟེན་པའི་ཟབ་འཁོར་དང་བཅས་པ་མདུན་དུ་བསྐྱེད་ནས་མཆོད་སྟོད་པར་མགོན་པོ་གཅིག་རྒྱུད་ལྟར་འབུལ། དེ་ནས་སྔགས་རྣམས་བརྗོད་པ་ཙམ་གྱིས་འོད་ཟེར་གྱིས་ཚུལ་དུ་མགོན་པོའི་ཞལ་ནས་རྒྱུད་ཅིང་འཁོར་ནས་བདག་གི་ཞལ་དུ་བཞུགས་ནས་ཐུགས་ཁར་གནས་སོ། དེ་ཡང་རླུང་རབ་ཏུ་འབར་བ་གཅིག་སྔགས་ཀྱི་བསྐོར་ནས་ཡོད་པར་དམིགས་སོ། །དེ་ལ་སྐྱེ་བར་གྱུར་ན་མགོན་པོའི་འཁོར་རྣམས་ཞུ་ནས་གཙོ་བ་ལ་ཐིམ། གཙོ་བོ་འོད་དུ་ཞུ་ནས་གྲི་གུག་འབར་བ་གཅིག་ཏུ་གྱུར་ནས་འོད་དུ་ཞུ་ཧཱུྃ་དུ་གྱུར། དེ་རང་གིས་ཐུགས་ཁའི་ཧཱུྃ་རབ་ཏུ་འབར་བ་ལ་ཐིམ། དེ་ནས་ནང་ནུབ་གསོལ་བ་དྲག་ཏུ་གཏབ་སྔགས་བརྒྱ་རྩ་རེ་མ་ཆག་པར་བཟླས་ན་ལུས་དང་གྲིབ་མ་བཞིན་ཏུ་མི་འབྲལ་བར་འགྱུར་རོ། །ཚེ་འདིའི་དབུགས་ཆད་ནས་བར་དོར་ཡང་དེང་རང་སེམས་མགོན་པོ་གསུམ་དབྱེར་མེད་དུ་འགྱུར་རོ། །རླུང་སེམས་མགོན་པོ་རླུང་དང་བསྲེས་ནས་བསྐྱེད་རྫོགས་ཟུག་ཏུ་སྒྲུབ་པའི་མན་ངག་ནི་[[Sangyé Nyentön|སངས་རྒྱས་བསྙན་སྟོན་]]གྱིས་དྲུང་དུ་[[Sangyé Tönpa|སངས་རྒྱས་སྟོན་པ]]ས་སེར་ཞྭ་བརྒྱ་རྩ་བརྒྱད་ཕུལ་ནས་ཡང་ཡང་གསོལ་བ་གཏབ་པས། མགོན་པོ་ཞག་བདུན་ནས་འགྲུབ་པའི་རླུང་སྒྲུབ་གཅིག་རྒྱུད་མ་འདི་གནང་བ་ཡིན་ནོ། ༒ ས་གདོན་བསྲུངས་བའི་མན་ངག་ནི། །བདུད་རྩི་སྨན་གྱིས་འདུལ་༼ཅོལ་ཞི་ཏུལ་མ་༽བ་དང་། །རྒྱལ་པོ་དགུ་དང་བཅུད་ཆེན་དགུ། །མཚོན་ཆ་གསུམ་ཏེ་ཉི་ཤུ་གཅིག །དེ་ཡིས་ས་བདག་ཐམས་ཅད་བསྲུངས། དེ་ལ་རྒྱལ་པོ་དགུ་ནི། ཨ་རུ་ར། །༼གླད་རྩི་ཐུན་གཅིག་༽དྲིའི་རྒྱལ་པོ་མ་གི་ཏ། །སྤོས་ཀྱི་རྒྱལ་པོ་༼ཕོ་ཙོག་ཅིག་༽བྱ་རྒོད་སྤོས། །དུག་གི་རྒྱལ་པོ་༼སྲན་མ་ཙམ་༽འབྲི་ཚིལ་མ། །སྔོའི་རྒྱལ་པོ་༼ཚོམ་བུ་གཅིག་༽མིང་ཆེན་དང་། །ཆུའི་རྒྱལ་པོ་༼དགེ་སློང་མ་བྱིས་པའི་དྲི་ཆུ་༽ཨ་ཀྲོ་ཏ། མཚོན་གྱི་རྒྱལ་པོ་༼རི་མ་ཙམ་༽ལྡོང་རོས། དང༌ཤ་རྒྱལ་པོ་༼ཤ་ཆེན་ལྡོང་རོས་དང་མཉམ་པ་༽མཧཱ་མ་ཡ་དང་། འབྲུའི་རྒྱལ་པོ་༼ཚོམ་བུ་གཅིག་༽ཉུང་དཀར་པོ། བཅུད་ཆེན་རྣམ་པ་དགུ་པ་ནི། ནུབ་པའི་བཅུད་གྱུར་བདུད་རྩི་༼མར་ཁུ་སྒོ་ང་གང་༽དང་། །སྨན་གྱི་བཅུད་༼མང་བ་དགའ་༽གྱུར་ཨ་མྲི་ཏ། །མུ་ཟི་སེར་པོ་སའི་བཅུད༼རི་མ་ཙམ༽། །བྲག་ཞུན་ནག་པོ་༼རུལ་མ་དགོས་༽རྡོ་རྗེའི་བཅུད། །དངུལ་ཆུ་དཀར་པོ་༼ཞོ་གང་གསུམ་༽རིན་ཆེན་བཅུད། །༼བདུན་༽རྨ་བྱའི་མདངས་ཕྲོག་དུག་གི་བཅུད། །སྦྲང༌རྩི་སྙོན་པ་༼སྒོ་ང་གང་༽མེ་ཏོག་བཅུད། །དོམ་ཁྲིས་སེར་པོ་༼ཐུན་གཅིག་༽ཤའི་བཅུད་། །ཀརྴ་པ་ནི་༼བདུན་༽རུས་པའི་བཅུད། །མཚོན་ཆ་གསུམ་པོ་འདི་ལྟ་ཏེ། །ཆུ་དག་སྨན་གྱིས་༼ཐེ་མོ་ཙམ་གཅིག་༽མཚོན་ཆ་ཡིན། །སྒོ་ཀྱ་དྲིའི་༼གཅིག་སྒོགས་གསུམ་༽མཚོན་ཆ་ཡིན། །རྟེ་ལོ་ཤའི་༼ཐེ་མོ་ཙམ་གཅིག་༽མཚོན་ཆ་ཡིན། །དེ་རྣམས་ལེགས་པར་སྦྱར་བ་ཡིས། །རིལ་བུ་སྲན་མ་ཙམ་བྱ་སྟེ། །ཁོངས་སུ་གཏང་ཏེ་བྱུགས་པ་ཡིས། །སྒོ་དགུ་པོ་དང་གནས་གསུམ་དུ། །བྱུགས་ན་ལྟས་སོགས་འབྱུང་བ་དང་། །རིགས་ཀྱི་གནད་དོང་རྐྱེན་གྱི་གནོད། །མ་ཞུགས་འཇུག་པར་མི་འགྱུར་རོ། །ཞུགས་པ་ལངས་པ་མི་འགྱུར་རོ། །ལངས་པ་མྱུར་དུ་ཞི་བར་འགྱུར། །ཡིད་བཞིན་ནོར་བུའི་གདམས་པ་འདི། །གུཔྟ་ལ་ནི་བཛྲ་ལ། །སེར་གྱི་མཎྜལ་ཕུལ་ནས་ཞུས། །ནོར་ལ་དགོས་པ་མི་བདོགས་ཀྱང་། །རྟེན་འབྲེལ་ཡིན་པས་ལེན་་་གསུངས། །བཞེས་ནས་ནམ་མཁའི་ཁམས་ལ་གཏོར། །བུ་ཁྱོད་སེར་ལ་མ་འཕངས་གསུངས། །ཤེས་ནས་ཁུང་པང་རང་ཆེ་འབྱིན། །་་་་ད་དེ་གན་ཕན་སེམས་མེད་ལ། །བུམ་ནང་མར་མེ་བཞིན་ཏུ་ནི། །གདམས་པའི་གནད་རྣམས་སྦ་བར་བགྱིས། །ཞེས་པའི་གསང་ཚིག་འདི་ཉིད་ནི། །གུཔྟ་ལ་ནི་བཛྲས་གསུངས་སོ། Included in [[mgon po snying zhugs kyi gdams pa 'pho ba dang bcas pa]] ༒ རྒྱལ་བ་ཀུན་གྱི་ཐུགས་རྗེ་ཅིག་བསྡུས་པའི། །སྤྱན་རས་གཟིགས་དབང་མྱུར་མཛད་ཕྱག་དྲུག་པ། །བླ་མ་མགོན་པོ་དབྱེར་མེད་གུས་བཏུད་ནས། །ཐུན་མོངས་མིན་པའི་ཞལ་གདམ་བྲི་བར་བྱ། །རྒྱུ་རྐྱེན་བརྟེན་འགྲེལ་ཕུན་གསུམ་ཚོགས་པ་ལ་བརྟེན་ནས་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པའི་ཐུན་མོངས་མ་ཡིན་པའི་མན་ངག་ཞལ་ཤེས་སྙན་རྒྱུད་ལྷ་རང་ཤར་ཕྱག་བརྒྱ་ཆེན་པོ་བསྒོམ་པ་འདི་ལ་དོན་གྱི་གཙོ་བོ་རྣམ་པ་བཞི་ཏེ། རྩ་དང་ལྷ་དང་གསལ་གཏབ་པ། བྱིན་རླབས་ཞུ་བ། ང་རྒྱལ་བྱེད་པ། ལས་ལ་སྦྱར་བ་དང་བཞི་ལས། དང་པོ་ནི། རྩ་དབུ་མ་སྦོམ་ཕྲ་སྦ་ལྕགས་ཙམ་ར་དུང་ཁ་སྤུབ་དས་དང་འདྲ་བ་ཡས་སྣ་ཚང་བུག་ཏུ་ཟུག་བཅིངས། མརྣ་སྙིང་ཁ་བུད་པ་ན་བུམ་སྐུ་ཁེབས་པ་སྙིང་པདྨ་བུམ་སྐུའི་དབྱིབས་ཅན་དམར་པོ། ཏོག་བླ་མ་མི་བསྐྱོད་པའི་ངོ་བོ་རྡོ་རྗེ་རྩེ་ལྔ་པ་སྔོན་པོ་ལྟེ་བ་ལ་ཧཱུྃ་གིས་མཚན་པ། བུམ་སྐུའི་ཕྱི་མགོན་པོའི་སྙིང་པོ་དང་ཤ་ས་ནས་གྲུ་གུ་ལྟར་དཀྲིས་པ་ལས་ཡེ་ཤེས་ཀྱི་མེ་འབར་བ། བུམ་སྐུའི་ནང་དུ་ཕ་ལས་ཐོབ་པའི་ཁཾ་དཀར་པོའི་སྟེང་དང་མ་ལས་ཐོབ་པའི་ཁཾ་དམར་པོའི་འོག་ཁཾ་དཀར་དམར་གྱིས་དབུས་སུ་ཤིན་ཏུ་ཕྲ་བའི་རླུང་སེམས་ལས་གྲུབ་པའི་མྱུར་མཛད་ཡེ་ཤེས་ཀྱི་མགོན་པོ་ལྡེར་ཟོ་ལྟར་འོད་ཟེར་མ་ཡིན་པ་བྲིས་པ་ལྟར་ཙལ་ཙལ་མ་ཡིན་པ། སྔར་མེད་གསར་དུ་བསྐྱེད་པ་མ་ཡིན་ཅིང་སྔར་ཡོད་གསལ་གཏབ་པའི་ཚུལ་དུ་ནི་མྱུར་མཛད་ཡེ་ཤེས་ཀྱི་མགོན་པོ་ཞལ་ཅིག་ཕྱག་དྲུག་པ་ཞེས་པ་ནས་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་སྔོན་པོ་དངུལ་ཆུའི་མདོག་ལྟར་དང་པའི་ན་ད་ལས་འོད་ཟེར་ལྔ་འཕྲོ་བ། ཞབས་ཀྱུ་ལས་བྱང་སེམས་དཀར་ལ་དམར་བའི་མདང་ཆགས་པ་མཐིག་ལ་ཁད་ལ་མ་འཐིག་ཙམ་ཞིག་བསྒོམས་པ་དེ་ནི་གསལ་སྣང་སྒྲུབ་པའོ། །གཉིས་པ་ནི། རང་གི་སྤྱི་བོར་པཾ་ལས་པདྨ་དང་རཾ་ལས་ཞེས་པ་ནས་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པར་གྱུར་ཞེས་པའི་བར་གཞུང་བཞིན་བསྐྱེད་ལ་གནས་གསུམ་བྱིན་བརླབས་བྱ། །མགོན་པོའི་སྤྱི་གཙུག་ཏུ་དྲིན་ཅན་རྩ་བའི་བླ་མ་སྐུ་མདོག་གསེར་པོ་ཉི་མ་འབུམ་གྱི་མདངས་དང་ལྡན་པ་ཕྱག་གཡས་ཡིད་བཞིན་གྱིས་ནོར་བུ་བསམ་འཕེལ་དབང་གི་རྒྱལ་པོ་ཐུགས་ཀར་བསྣམས་པ་གཡོན་དེའི་ཡུ་བ་བྱས་པའི་དྲིལ་བུ་བསྐུར་བརྟེན་པ་ཞབས་རྡོ་རྗེ་དཀྱིལ་དཀྲུང་གི་བཞུགས་ཤིང་། མཚན་པོ་གཉིས་དང་སྤེ་བྱད་བརྒྱད་བཅུས་བརྒྱན་པ་འོད་དང་འོད་ཟེར་གྱིས་རང་བཞིན་ཅན་ཞིག་དངོས་སུ་ཡལ་ཡལ་ཕྲོམ་ཕྲོམ་འཕྲོ་བ་ཡིད་ལ་དྲན་པ་ཙམ་གྱིས་ཕྱིར་མི་འདོག་པའི་ས་ཐོབ་པ། གསོལ་བ་གཏབ་པ་ཙམ་གྱི་བྱིན་རླབས་འབྱུང་བ་སྨོས་མི་དགོས་པ་ཅིག་གསལ་གཏབ། དེའི་སྤྱི་བོར་ཨོཾ་མགྲིན་པར་ཨཱཿཐུགས་ཀར་ཧཱུྃ་སེར་པོ་དེ་ལས་འོད་ཟེར་ཕྱོགས་བཅུར་འཕྲོས་ཤིང་ན་མོ་བུདྷ་ཡའི་མཐུན་མོངས་མ་ཡིན་པའི་རྒྱུད་པའི་བླ་མ་རྣམས་སྤྱན་དྲངས་སྤྱི་བོའི་བླ་མ་ལ་ཐིམ་ཛཿཧཱུྃ་བཾ་ཧོཿགཉིས་སུ་མེད་པར་གྱུར། བླ་མའི་ཞལ་ནས་རིགས་ཀྱི་བུ་ཁྱོད་ཀྱི་མཐུན་རྐྱེན་ཐམས་ཅད་ངས་སྒྲུབ་འགལ་རྐྱེན་ཐམས་ཅད་ངས་སེལ། ཁྱད་པར་དུ་ཡང་བླ་མ་དང་མགོན་པོ་དབྱེར་མེད་དུ་འགྲུབ་པ་དང་རྣམས་མཁྱེན་རྫོགས་པའི་སངས་རྒྱས་ཀྱིས་གོ་འཕངས་ཚེ་འདི་ཉིད་ལ་ཐོབ་པར་བྱ་ཞེས་གསུངས་ལྷང་ལྷང་བཞུགས་པའི་ཐུགས་ཀའི་ཧཱུྃ་ལས་འོད་ཟེར་བསེར་པོ་འཕྲོས་ཤིང་། མགོན་པོའི་ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས། རང་གི་སྙིང་ཀའི་མགོན་པོའི་ཐུགས་ཀའི་ཧཱུྃ་ལས་འོད་འཕྲོས་པ་རྣམས་རྩེ་མོ་ཅིག་ཏུ་དྲིལ་བའི་འོད་ཟེར་གྱིས་བསིལ་བ་ཚལ་གྱི་མགོན་པོ་དངོས་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ་ཏེ་སྤྱན་དྲངས། ཧཱུྃ་བསིལ་བ་ཚལ་གྱི་དུར་ཁྲོད་ནས། །དད་པ་དང་ནི་དམ་ཚིག་གིས། ཞེས་པ་ནས་དཀྱིལ་འཁོར་གནས་འདིར་གཤེགས་སུ་གསོལ། ཨོཾ་ཤྲཱི་མཧཱ་ཀཱ་ལ་ཡེ་ཨེ་ཧྱེ་ཁྲིཾ་རིང་པོ་ཉེར་ཅིག་གིས་སྤྱན་དྲངས་བསིལ་བ་འཚལ་གྱི་མགོན་པོ་དེ་ཉིད་ཌཱ་མ་རུ་དང་དྲིལ་བུ་གཡེར་ཁའི་སྒྲ་འུར་འུར་ཆེམ་ཆེམ་སྐད་ཅིག་གི་བཞེངས་ཏེ་ཐོག་པ་མེད་པར་བྱོན་ནས་རང་སྤྱི་བོའི་མགོན་པོའི་ལ་ཐིམ་ཛཿཧཱུྃ་བཾ་ཧོཿགཉིས་སུ་མེད་པར་གྱུར། མགོན་པོའི་ཞལ་ནས་རིགས་ཀྱི་བུ་ཁྱོད་ཀྱི་མཐུན་རྐྱེན་ཐམས་ཅད་ངས་སྒྲུབ་འགལ་རྐྱེན་ཐམས་ཅད་ངས་སེལ་ཞེས་གསུངས་ལྷང་མཛད་པས། འགལ་རྐྱེན་སྟེང་གདོན་བཟའ་དང་རྒྱུ་དཀར་འོག་གདོན་ཀླུ་དང་ས་བདག །བར་གདོན་བཙན་དང་རྒྱལ་པོ། འབྱུང་པོ་མི་དང་མི་མ་ཡིན་པའི་གནོད་པ་ནད་གདོན་སྡིག་སྒྲིབ་ཐམས་ཅད་གྲི་གུག་གིས་བཅད་མེ་ལྕེས་བསྲེགས་ཤ་ཁྲག་རུས་གསུམ་གྱི་རྣམ་པར་ཞལ་དུ་དམར་ཆི་ལི་གསོལ་བར་བསམ། དེ་ནས་བླ་མ་ལ་ཕྱི་མེ་ཏོག་དང་ནང་ཤ་ལྔ་དང་བདུད་རྩི་ལྔ་གསང་བ་གཉིས་སུ་མེད་པའི་ཚོགས་འཁོར་གསེར་གྱི་མཎྜལ་དང་བཅས་སྟེ་ཕུལ་ལ་ས་གཞི་སྤོས་ཀྱི་ཞེས་སོགས་བརྗོད། བླ་མ་རིན་པོ་ཆེ་བདག་གི་བླ་མ་དང་མགོན་པོ་དབྱེར་མེད་དུ་འགྲུབ་པར་མཛད་དུ་གསོལ། ཞེས་ལན་གསུམ་གསོལ་བ་བཏབ་པས། བླ་མའི་ཐུགས་ཀའི་ཧཱུྃ་ལས་འོད་ཟེར་སེར་པོ་ཅིག་འཕྲོས་མགོན་པོའི་ཐུགས་ཀའི་ཧཱུྃ་ལ་ཕོག་པས་མདང་དང་འོད་ཟེར་ཐམས་ཅད་ལྗང་ནག་ཏུ་ཡལ་ཏེ་བྱུང་བས་བླ་མ་མགོན་པོ་དབྱེར་མེད། བླ་མའི་ཐུགས་དང་མགོན་པོའི་མཐུ་ཐོབས་དབྱེར་མེད་པས་བླ་མ་མགོན་པོ་དབྱེར་མེད། བླ་མའི་བྱིན་བརླབས་དང་མགོན་པོའི་ནུས་པ་དབྱེར་མེད་པས་བླ་མ་མགོན་པོ་དབྱེར་མེད། བླ་མའི་ཆོས་སྐུ་དང་མགོན་པོའི་ཆོས་སྐུ་དབྱེར་མེད་པས་བླ་མ་མགོན་པོ་དབྱེར་མེད་དུ་བསམ། སླར་ཡང་མགོན་པོ་ལ་མཎྜལ་དང་མཆོད་པ་སྔར་བཞིན་ཕུལ་ནས། མྱུར་མཛད་ཡེ་ཤེས་ཀྱིས་མགོན་པོ་བདག་གི་མགོན་པོ་དང་བླ་མ་དབྱེར་མེད་དུ་འགྲུབ་པར་མཛད་དུ་གསོལ། ཞེས་ལན་གསུམ་གསོལ་བ་གཏབ་པས་མགོན་པོའི་ཐུགས་ཀའི་ཧཱུྃ་ལས་འོད་ཟེར་སྔོན་པོ་ཅིག་ཡར་འཕྲོས་བླ་མའི་ཐུགས་ཀའི་ཧཱུྃ་ལ་ཕོག་མདངས་དང་འོད་ཟེར་ཐམས་ཅད་ལྗང་སེར་དུ་ཡལ་ཏེ་བྱུང་བས་མགོན་པོ་བླ་མ་དབྱེར་མེད། མགོན་པོའི་མཐུ་ཐོབས་དང་བླ་མའི་ཐུགས་རྗེ་དབྱེར་མེད་པས་མགོན་པོ་བླ་མ་དབྱེར་མེད། མགོན་པོའི་ནུས་པ་དང་བླ་མའི་བྱིན་བརླབས་དབྱེར་མེད་པ་མགོན་པོ་དབྱེར་མེད། མགོན་པོ་བླ་མ་དབྱེར་མེད། མགོན་པོའི་ཐུགས་ཆོས་ཀྱི་སྐུ་དང་བླ་མའི་ཐུགས་ཆོས་སྐུ་གཉིས་དབྱེར་མེད་པས་མགོན་པོ་བླ་མ་དབྱེར་མེད་དུ་གྱུར། སླར་ཡང་བླ་མའི་སྐུ་ལས་འོད་ཟེར་འཕྲོས་མགོན་པོ་ལ་ཕོག་པས་མགོན་པོ་འོད་དང་བདེ་བའི་རང་བཞིན་དུ་འབར་འུར་འུར་སིལ་སིལ་གར་མཛད་ཅིང་། མགོན་པོའི་སྐུ་ལས་འོད་ཟེར་འཕྲོས་བླ་མ་ལ་ཕོག་པས་བླ་མ་འོད་དང་བདེ་བའི་རང་བཞིན་དུ་མེར་མེར་དྲིལ་བུའི་སྒྲ་སྒྲོག་བླ་མ་ཉིད་མགོན་པོ་མགོན་པོ་ཉིད་བླ་མ་བླ་མ་དང་མགོན་པོ་དབྱེར་མི་ཕྱེད་པར་གྱུར་པར་བསམ་ནས་གསོལ་བ་འདེབས་པ་ནི་གཞུངས་བཞིན། མགོན་པོ་བླ་མ་དབྱེར་མེད་ལ་གསོལ་བ་འདེབས་སོ། ཞེས་པའི་བར་བྱས་ལ་དེ་ནས་བྱིན་བརླབས་བཞུ་བར་མོས་ནས་སྤྱི་བོའི་བླ་མ་དང་མགོན་པོར་མུས་གུས་དྲག་པོས། བླ་མ་མགོན་པོ་དབྱེར་མེད་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པའི་ལྷ་ཚོགས་ཡེ་ཤེས་ལ་སྦྲིབ་པ་མི་མངའ་བ་ཞེས་ནས་ཁྱེད་རྣམས་ཀྱིས་སྐུའི་སྒོ་ནས་བྱིན་གྱིས་བརླབས་ཏུ་གསོལ། ལུས་ཀྱིས་སྡིག་སྒྲིབ་དག་པར་བྱིན་གྱིས་བརླབས་ཏུ་གསོལ། བུམ་པའི་དབང་བསྐུར་དུ་གསོལ། འབྲས་བུ་སྤྲུལ་སྐུ་ཐོབ་པར་བྱིན་གྱིས་བརླབས་ཏུ་གསོལ། ཞེས་གསོལ་བ་གཏབ་པས། བླ་མ་དང་མགོན་པོའི་དཔྲལ་བའི་ཨོཾ་དཀར་པོ་ལས་འོད་ཟེར་དང་མགོན་པོའི་སྐུ་ཆུང་ལ་ཡན་ལག་རག་པ་དཀར་པོ་ཧཱུྃ་ཕཊ་ཀྱི་སྒྲ་སྒྲོག་པ་དཔག་ཏུ་མེད་པ་གར་གཏབ་ལིང་ལིང་བྱོན་བྱུང་བ་དེ་རང་གི་དཔྲལ་བའི་ཨོཾ་དཀར་པོ་ལ་སིབ་སིབ་ཐིམ་པས་སྐུའི་བྱིན་བརླབས་བཞུགས། ལུས་ཀྱི་སྡིག་སྒྲིབ་དག །བུམ་པའི་དབང་ཐོབ། འབྲས་བུ་སྤྲུལ་པའི་སྐུ་འགྲུབ། ཡང་བླ་མ་མགོན་པོ་དབྱེར་མེད་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པའི་ལྷ་ཚོགས་ཡེ་ཤེས་ལ་ཞེས་པ་ནས་ཁྱེད་རྣམས་ཀྱི་གསུངས་གི་སྒོ་ནས༴ ངག་གི༴ བསང་བའི་དབང་༴ འབྲས་བུ་ལོངས་སྤྱོད༴ ཞེས་གསོལ་བ་གཏབ་པས་བླ་མ་དང་མགོན་པོའི་མགྲིན་པའི་ཨཱཿདམར་པོ་ལས་འོད་ཟེར་དང་མགོན་པོའི་སྐུ་ཡན་ལག་ཆུང་ལ་རག་པ་དམར་པོ་ཧཱུྃ་ཕཊ་ཞེས་པ་ནས། རང་གི་དཔྲལ་བའི་ཨཱཿདམར་པོ་ལ་སིབ་སིབ་ཐིམ་པས་གསུང་གི་བྱིན་བརླབས་བཞུགས། ངག་གི༴ །གསང་བའི༴ འབྲས་བུ་ལོངས་སྤྱོད་རྫོགས༴ ཡང་སྔར་བཞིན་གསོལ་བ་གཏབ་རྗེས་ཁྱེད་རྣམས་ཀྱི་ཐུགས་ཀྱི་སྒོ་ནས༴ ཡིད་ཀྱི༴ ཤེས་རབ་ཡེ་ཤེས་༴ འབྲས་བུ་ཆོས་སྐུ༴ ཞེས་གསོལ་བ་གཏབ་པས་བླ་མ་དང་མགོན་པོའི་ཐུགས་ཀའི་ཧཱུྃ་ལས་འོད་ཟེར་དང་མགོན་པོའི་སྐུ་ཆུང་ལ་ཡན་ལག་རག་པ་སྔོན་པོ་ཧཱུྃ་ཕཊ་ཀྱི་སྒྲ་སྒྲོག་པ་དཔག་ཏུ་མེད་པ་གར་གཏབ་ལིང་ལིང་བྱོན་བྱུང་བ་དེ་རང་གི་ཐུགས་ཀའི་ཧཱུྃ་སྔོན་པོ་ལ་སིབ་སིབ་ཐིམ་པས་ཐུགས་ཀྱི༴ ཡིད་ཀྱི༴ །ཤེས་རབ༴ འབྲས་བུ་ཆོས་ཀྱི་སྐུ༴ ཡང་སྔར་བཞིན་གསོལ་བ་གཏབ་རྗེས་ཁྱེད་རྣམས་ཀྱི་སྐུ་གསུང་ཐུགས་ཡོན་ཏན་འཕྲིན་ལས་མི་ཟད་པའི་སྒོ་ནས་བྱིན་གྱིས་བརླབས་ཏུ་གསོལ། ཐོགས་མ་མེད་པ་ནས་བསགས་པའི་ལུས་ངག་ཡིད་གསུམ་གྱིས་སྡིག་སྒྲིབ་བགས་ཆགས་དང་བཅས་པ་ཐམས་ཅད་དག་པར་བྱིན་གྱིས་བརླབས་ཏུ་གསོལ། དབང་བཞི་བསྐུར་དུ་གསོལ། འབྲས་བུ་ངོ་བོ་ཉིད་སྐུ་ཐོབ་པར་བྱིན་གྱི་བརླབས་ཏུ་གསོལ། ཞེས་གསོལ་བ་གཏབ་པས་བླ་མ་དང་མགོན་པོའི་གནས་གསུམ་གྱིས་ཡི་གེ་གསུམ་ལས་འོད་ཟེར་དང་། མགོན་པོའི་སྐུ་ཆུང་ལ་ཡན་ལག་རག་པ་དཀར་དམར་མཐིང་གསུམ་ཧཱུྃ་ཕཊ་ཀྱི་སྒྲ་སྒྲོག་པ་དཔག་ཏུ་མེད་པ་གར་སྟབས་ལིང་ལིང་བྱོན་བྱུང་བ་དེ་རྣམས། རང་གི་གནས་གསུམ་དུ་སིབ་སིབ་ཐིམ་པས་སྐུ་གསུང་ཐུགས་འཕྲིན་ལས་དང་བཅས་པའི་བྱིན་བརླབས་ཞུགས། ཚེ་འཁོར་བ་ཐོག་མ་མེད་པ་ནས་བསགས་པའི་ནད་གདོན་སྡིག་སྒྲིབ་བག་ཆགས་དང་བཅས་པ་ཐམས་ཅད་དག །དབང་བཞི་པ་ཐོབ་འབྲས་བུ་ངོ་བོ་ཉིད་སྐུ་འགྲུབ། དེ་ནས་ཕྱོགས་བཅུའི་བླ་མ་རྒྱལ་བ་སྲས་དང་བཅས་པ་ཐམས་ཅད་ལ་དམིགས་ནས་ན་མོ་བུདྡྷ་ཡའི་གསོལ་བ་ལན་གསུམ་གཏབ་ཅིང་། ཕྱོགས་བཅུ་དུས་གསུམ་ན་བཞུགས་པའི་རྩ་བ་དང་རྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱིས་བྱིན་གྱིས་རློབས་ཤིག །སངས་རྒྱས་དང་བྱང་ཆུབ་སེམས་དཔའ་ཞེས་པ་ནས་འདུག་པ་འདི་ཉིད་དུ་བདག་གི་སྙིང་དབུས་པདྨའི་ཟེའུ་འབྲུ་ལ་བསྟན་པར་བཞུགས་ནས་མཆོག་མཐུན་མོངྶ་གིས་དངོས་གྲུབ་མ་ལུས་པར་སྩལ་དུ་གསོལ་ཞེས་བརྗོད་པ་དང་སྙམས་དུ་སྤྱི་བོའི་མགོན་པོའི་གདན་གྱིས་ཚོགས་བདག་མེད་པར་བྱས་ནས་མགོན་པོ་དང་བླ་མ་རྩ་དབུ་མའི་ནང་ནས་མར་བཞུགས་སྙིང་ཁའི་བུམ་སྐུའི་ནང་གི་མགོན་པོ་ལ་ཐིམ། བླ་མ་བུམ་སྐུའི་རྟོག་གི་རྡོ་རྗེ་ལ་ཐིམ་པས་སྙིང་ཁའི་མགོན་པོ་འོད་དང་འོད་ཟེར་གྱི་རང་བཞིན་ཆེར་འབར་བས་འོད་ཟེར་སྔོན་པོ་དཔག་མེད་འཕྲོས་ལུས་ཀྱི་ནང་ཐམས་ཅད་གང་བས་དངུལ་ཆུས་གསེར་ཟོས་པ་བཞིན་དུ་ཐ་མལ་གྱིས་ལུས་འོད་དུ་སྦྱངས་པས་ལུས་རག་པ་མགོན་པོའི་སྐུར་གྱུར་པ་ནི་རང་ཉིད་མྱུར་མཛད་ཡེ་ཤེས་ཀྱི་མགོན་པོ་སྐུ་མདོག་མཐིང་ནག་ཞེས་པ་ནས་མེ་དཔུངས་རབ་ཏུ་འབར་བའི་དབུས་ན་བཞུགས་པའི་སྤྱི་བོར་ཨོཾ་མགྲིན་པར་ཨཱཿཐུགས་ཁར་ཧཱུྃ། བུམ་སྐུའི་ཐུགས་ཁའི་ཧཱུྃ་དང་དབྱེར་མེད་པའི་ན་ད་ལས་འོད་ཟེར་ལྔ་འཕྲོ་ཞིང་ཞབས་ཀྱུ་ལས་བྱང་སེམས་དཀར་ལ་དམར་བའི་མདངས་ཆགས་པ་འཐིག་ལ་ཁད་ལ་མ་འཐིག་ཙམ་ཞིག་བསལ་གཏབ། གསུམ་པ་ནི། དི་ལ་སེམས་གཏད་ནས་མགོན་པོ་དངོས་ཡིན་པར་འདུག་ང་སྤངས་པའི་ཕ་རོལ་ན་མགོན་པོ་མེད། མགོན་པོ་སྤངས་པའི་ཕ་རོལ་ན་ང་མེད་ད་ལྟ་ཁམས་གསུམ་ན་ང་ལས་མཐུ་སྟོབས་ཆེ་བ་མེད་སྙམས་སུ་བསྒོམས་པ། སྣང་བའི་ངོས་ནས་སྟོང་སྟོང་པའི་ངོས་ནས་སྣང་བ་སྣང་སྟོང་ཚོགས་པ་སྒྱུ་མ་ལྟ་བུ་གང་སྣང་སྟོང་པ་སྟོང་པ་བདེ་བ་བདེ་ལྷ་སྐུ་རང་ཤར་ཕྱག་རྒྱ་ཆེན་པོ། སྣང་ལ་རང་བཞིན་མེད་པ་གསལ་ལ་རྟོག་པ་མེད་པ་བདེ་ལ་བཞེན་པ་མེད་པ་སྣང་བ་ཟུགས་སུ་གྲུབ་པ་རིག་པ་ཟུགས་སུ་མ་གྲུབ་པ། བར་སྣང་འཇའ་མཚོན་ཆུ་ནང་ཟླ་བ་མེ་ལོང་ནང་གི་གཟུགས་སྙན་ལྟར་གསལ་གཏབ། དེ་ནས་བུམ་སྐུའི་ནང་གི་ཉི་མའི་དལ་གྱིས་དབུས་སུ་ཧཱུྃ་གི་མཐར་བཛྲ་མཧཱ་ཀཱ་ཀྵིཾ་ཀྵེ་ཊ་བིགྷན་བི་ནཱ་ཡ་ཀ་ཧཱུྃ་ཧཱུྃ་ཕཊ་སྭ་ཧཱ་ཞེས་པའི་སྔགས་མཐིང་ནག་གྱེན་དུ་འགྲེང་ཞིང་ཁ་ནང་དུ་བསྟན་པ་གཡས་བསྐོར་དུ་འཁོར་བ་རང་སྒྲ་སྒྲོག་པའི་ཡིག་གེ་རྣམས་ཀྱི་དབུ་ལས་ཡེ་ཤེས་ཀྱི་མེ་འོད་འཕྲོ་ཞིང་། མགོན་པོའི་སྐུ་ལས་འཕྲོས་པའི་མི་རྣམས་ཀྱི་རང་དང་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་དང་བཅས་པ་ཐམས་ཅད་བྱ་སྒྲོ་མེས་བསྲེགས་པར་བཞིན་མེད་པར་སོང་ཞིང་། ཧཱུྃ་གི་ཞབས་ཀྱུའི་ཐིག་ལེ་དང་སྔགས་ཀྱི་ཡི་གེ་རྣམས་ལས་འོད་ཟེར་ལྔ་འཕྲོས་པས་རང་གི་ལུས་གང་བཞིན་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་སྦྱངས་མགོན་པོའི་སྐུར་གྱུར་བདེ་བའི་རྒྱུད་གང་གཏིང་ངེ་འཛིན་ཁྱད་པར་ཅན་བསྐྱེས་ཞིང་སྔགས་ཀྱི་སྒྲ་འབྲུག་ལྟར་སྒྲོག་པར་བསམ་ནས་བཟླས་པ་བྱ་བ་ནི་ཐུན་མོངས་མ་ཡིན་པའི་བཟླས་པའོ། །བཞི་པ་ལ་དང་པོ་སྦྱངས་བའི་རིམ་པ་ནི། ལུས་རག་པ་མགོན་པོའི་སྤྱི་བོར་རྗེ་བཙུན་མཁའ་སྤྱོད་མ་དཀར་མོ་ཞལ་ཅིག་ཕྱག་གཉིས་མ་གཡས་གྲི་གུག་ནམ་མཁའ་ལ་འཕྱར་ཞིང་གཡོན་ཐོད་པ་བདུད་རྩིས་གང་བ་ཕྱོགས་བཅུའི་སངས་རྒྱས་ཐམས་ཅད་ཀྱིས་ཞལ་དུ་སྟོབས་པ། མཆན་ཁུངས་ན་ཁ་ཊཾ་ཁ་ཡོད་པ་གཅེར་མོ་སྐྲ་གྲོལ་བ་ཐོད་སྐམ་ལྔའི་དབུ་རྒྱན་དང་སྐམ་པོ་ལྔ་བཅུའི་དོ་ཤལ་ཅན་སྐུ་ཤ་རྒྱས་ཤིང་ནུ་མ་འབུར་བ། གཞོན་ནུ་ལང་འཚོ་དར་ལ་བབས་པ་ཞལ་ཁྲོ་འཛུམ་གྱིས་ཉམས་དང་ལྡན་པ་མཆེ་བ་ཅུང་ཟད་རྩིགས་པ། སྤྱན་གསུམ་ཕྱོགས་བཅུའི་སངས་རྒྱས་ཐམས་ཅད་ཀྱི་ནམ་མཁའ་གང་བ་ལ་ཧྲིག་གེ་གཟིགས་པ། ཞབས་གཉིས་རྒྱབ་ངོས་ཀྱི་ཕྲག་པ་ལ་བཀལ་བའི་ཕྱག་གཡས་གཡོན་གྱི་འཁྲིགས་མ་ལ་ཞབས་ཀྱི་བོལ་གཉིས་བཀལ་བས། གསང་གནས་དམར་ཧུ་རེའི་ཡོད་པའི་ཁ་ཚངས་བུག་དང་འབྱར་བ་ཡེ་ཤེས་ཀྱི་མེ་དཀར་པོ་འབར་བའི་དབུས་ན་འཕར་ལ་ཁད་ལ་མ་འཕར་ཙམ་མཛད་ནས་བཞུགས་པ། དེའི་སྤྱི་བོར་ཨོཾ་མགྲིན་པར་ཨཱཿཐུགས་ཀར་ཧྲཱི་དཀར་པོ་རིང་ཆ་ཚེགས་དྲག་དང་བཅས་པ། ཧྲཱིཿལས་འོད་ཟེར་ཕྱོགས་བཅུར་འཕྲོས་པས་མཁའ་སྤྱོད་མ་ལ་མ་རྒྱུད་ཀྱིས་ལྷ་ཚོགས་ཀྱི་བསྐོར་བ་ན་ར་ཀྲིཾ་ཀྲིཾ་གི་སྤྱན་དྲངས་སྤྱི་བོའི་མཁའ་སྤྱོད་མ་ལ་ཐིམ་ཛཿཧཱུྃ་བཾ་ཧོཿགཉིས་སུ་མེད་པར་གྱུར། རྗེ་བཙུན་མཁའ་སྤྱོད་མའི་ཞལ་ནས་རིགས་ཀྱི་བུ་ཁྱོད་ཀྱི་མཐུན་རྐྱེན་ཐམས་ཅད་ངས་སྒྲུབ་འགལ་རྐྱེན་ཐམས་ཅད་ངས་སེལ་ཁྱད་པར་དུ་ཡང་འཕོ་བའི་རྣལ་འབྱོར་འབྱོང་པ་དང་དག་པ་མཁའ་སྤྱོད་ཀྱི་གནས་སུ་དྲངས་ཀྱི་ཅེས་གསུང་ལྷང་ལྷང་བྱོན་བྱུང་བར་བསམ། དེ་ནས་མཁའ་སྤྱོད་མ་ལ་ཕྱི་མེ་ཏོག་དང་བདུག་སྤོས་ནང་ཤ་ལྔ་དང་བདུད་རྩི་ལྔ་གསང་བ་གཉིས་སུ་མེད་པའི་ཚོགས་ཀྱི་འཁོར་ལོ་གསེར་གྱིས་མཎྜལ་དང་བཅས་པ་ཕུལ་ནས། རྗེ་བཙུན་རྡོ་རྗེ་རྣལ་འབྱོར་མ་བདག་གི་འཕོ་བའི་རྣལ་འབྱོར་འབྱོངས་པར་བྱིན་གྱིས་བརླབས་ཏུ་གསོལ། བདག་དག་པ་མཁའ་སྤྱོད་ཀྱི་གནས་སུ་དྲངས་དུ་གསོལ། ཞེས་གསོལ་བ་གཏབ་པས། ཐུགས་ཀའི་ཧྲཱིཿལས་འོད་ཟེར་ལྕགས་ཀྱུ་ལྟ་བུ་དཀར་མདའ་སྟོང་བ་ལྟར་འགྱོག་པར་བྱུང་བ་གསང་གནས་ནས་ཐོན་ཚངས་བུག་ནས་ཞུགས། དབུ་མའི་ནང་ནས་མར་སོང་བའི་འོད་ཟེར་བུམ་སྐུ་ལ་ཕོག་པས་བུམ་སྐུ་ཁ་བྱེ་བ་དང་མཉམ་དུ་ཐིག་ལེ་དཀར་དམར་ཡང་ཁ་ཤིག་གེ་བྱེ་ནས་འོད་ཟེར་གྱི་ལྕགས་ཀྱུ་དེ་མགོན་པོའི་ཐུགས་ཀར་གཏབ་པ་དང་མཉམ་དུ་རྐང་པའི་སོར་མོ་བསྐུམ་ཞིང་འོག་སྒོ་ཚུམ་པས་འོག་སྒོ་ནས་རླུང་གྱེན་དུ་འོང་ནས་སྙིང་ཀར་སླེབ་པ་ན། མགོན་པོའི་ཐུགས་ཀ་ནས་རིགས་འདྲ་མར་མེ་གཅིག་ལས་གཉིས་ཆད་ཀྱི་ཚུལ་དུ་འོད་ཟེར་གྱི་ལྕགས་ཀྱུས་འདྲེན་པ་དང་མཉམ་དུ་ངག་ཏུ་ཧིག་ཅེས་དྲག་ཏུ་བརྗོད་པས། ཚངས་བུག་ནས་བརྒྱངས་ཏེ་ཐོན་མཁའ་སྤྱོད་མའི་གསང་གནས་སུ་བཞུགས་ཐུགས་ཀའི་ཧྲཱིཿལ་ཐིམ་པ་དང་མཉམ་དུ་ཆོས་ཐམས་ཅད་རང་ངོས་ནས་གྲུབ་པ་རྡུལ་ཙམ་ཡང་མེད་སྙམ་པའི་ངང་དུ་སྙམ་པར་འཇོག །དེའི་ངང་ནས་རང་གི་སེམས་མགོན་པོའི་རྣམ་པར་ཐུགས་ཁ་ནས་བྱོན་པ་གསང་གནས་ནས་ཐོན་ཚངས་བུག་ནས་དབུ་མའི་ནང་དུ་མར་བཞུགས་བུམ་སྐུ་ཡང་སྔར་ལྟར་འདུས་པར་བསམ་ཞིང་ཚངས་བུག་ཡང་ཁ་འགྲིག་པར་མོས་ཏེ་དེ་འདྲ་བ་ཡང་ནས་ཡང་དུ་སྦྱང་བར་བྱའོ། །དངོས་གཞི་ལས་སྦྱོར་གྱི་དུས་ཀྱི་ཁྱད་པར་ནི། གསལ་བ་གཏབ་དུས་སུ་བདག་གིས་གསོལ་བ་ཐེབས་པར་བྱིན་གྱིས་བརླབས་ཏུ་གསོལ། ཅེས་དང་། འོད་ཟེར་ལྕགས་ཀྱུ་ལྟ་བུ་བུམ་སྐུའི་མགོན་པོའི་ཐུགས་ཀར་གཏབ་ཏེ་དྲངས་པས་རིགས་འདྲ་ཆད་པར་མི་བྱེད་པར་མགོན་པོ་དངོས་ཡར་ཐོག་པ་མེད་པ་བྱོན། སྔར་བཞིན་ཧྲཱིཿལ་ཐིམ་པ་དང་མཉམས་དུ་གསང་གནས་ཁ་ཅུ་གསུམ་སྟོང་ཉིད་ཀྱི་ལྟ་བ་དྲན་པར་བྱས་ནས་ནང་གི་མཁའ་སྤྱོད་དུ་འཕོ་བར་བྱ་ཞིང་། ཕལ་ཆེར་གྱི་མཁའ་སྤྱོད་མ་ནམ་མཁའ་ལ་འཕུར་ཏེ་ཕྱིས་མཁའ་སྤྱོད་དུ་འཕོ་བར་བྱའོ། ཨྀཐི། བུམ་དཀར་པོའི་གདམས་པའི་སྙིང་པོ་མཆོག །བླ་མ་མགོན་པོ་རང་ཉིད་མགོན་པོ་རུ། །དབྱེར་མེད་སྒྲུབ་པའི་ཟབ་ལམ་རྨད་བྱུང་བ། །ཆོས་བྱེད་རྣམས་ཀྱང་བར་དོའི་འཇིགས་པ་ལས། །ཐར་པ་དཀར་བ་གཟིགས་ནས་ཐུགས་བསྐྱེད་པའི། །བར་དོའི་མགོན་པོར་གྲགས་པའི་གདམས་པ་མཆོག །ལས་སྦྱོར་འཕོ་བའི་མན་ངག་འདི་དག་ནི། །སྙན་ནས་སྙན་དུ་རྒྱུད་པ་མ་ཏོགས་པར། །སྔོན་ཆད་ཡི་གེར་བྲིས་པ་གཏན་མེད་ཀྱིས། །རྗེད་པས་འཇིགས་ཏེ་གསོལ་བ་ལེགས་གཏབ་ཏེ། །བླ་མས་རྗེས་ཟུང་[[Künga Delek Rinchen|ཀུན་དགའ་བདེ་ལེགས་]]ཀྱིས། །ལྷན་སྐྱེས་བདེ་ཆེན་ཆོས་ཀྱི་ཕྲེང་དུ། །ཡི་གེ་བྲིས་ལ་བླ་མ་མགོན་པོ་ཡིས། །ཟོད་པར་ཞེས་ལ་སྒྲིབ་པར་མ་གྱུར་ཅིག །དབང་དང་གདམ་པ་མ་ཐོབ་པར། །དེས་སྟོན་རང་དཀར་འཇུག་བྱེད་ན། །མགོན་པོ་གཏིང་ནས་འཁྲུགས་གྱུར་པས། །རང་སྲོག་རང་གི་མ་སྤྱོད་ཅིག །[[Khyungpo Neljor|མཁས་གྲུབ་ཁྱུང་པོ་རྣལ་འབྱོར་]]གྱི། །[[Könchok Khar|ལ་སྟོད་དཀོན་དཀར་]]དེ་ཉིད་ལ། །སྙན་རྒྱུད་བཀའ་རྒྱས་གདམས་ནས་གནང་། །པུ་ལའང་དཔེ་ཙམ་སྟོན་ཅིག སརྦ་མངྒལཾ།

Summary:

This is a minor edit Watch this page

Cancel

Edit Text: Tshogs rnams kyi zur 'debs kyi zhal shes shin tu gsang ba'i yig chung rnams

About

Contact

Support us

License