Slob dpon d+ha na saM kri tas gnod sbyin bzhi dam la btags nas mgon po gtso 'khor gyi tshul du lhan cig sgrub pa'i sbrags sgrub dug lta bu'i man ngag

Resource ID	SCv11p685
Title	slob dpon d+ha na saM kri tas gnod sbyin bzhi dam la btags nas mgon po gtso 'khor gyi tshul du lhan cig sgrub pa'i sbrags sgrub dug lta bu'i man ngag
Topics	Chadrupa
Sub-Topics	'khor bzhi
Author	Khyungpo Neljor
Associated Person	Rahula Dhanasamskrita Maitripa
Link	BDRC W23922 WA00KG09215 (p.256)

ཐི༽ སློབ་དཔོན་དྷ་ན་སཾ་ཀྲི་ཏས་གནོད་སྦྱིན་བཞི་དམ་ལ་བཏགས་ནས་མགོན་པོ་གཙོ་འཁོར་གྱི་ཚུལ་དུ་ལྷན་ཅིག་སྒྲུབ་པའི་སྦྲགས་སྒྲུབ་དུག་ལྟ་བུའི་མན་ངག་ཡོད་པ་ས་མ་ཡ་ཨྀཐི།
༈ ༼ཅུ༽ ན་མོ་མ་ཧཱ་ཀཱ་ལ་ཡ།
སྔོན་བྱུང་བ་འདས་པའི་དུས་ན་དུར་ཁྲོད་ཆེན་པོ་མུན་པ་མི་ཟད་པ་ཞེས་བྱ་བར་སློབ་དཔོན་ཆེན་པོ་དྷ་ན་སཾ་སྐྲི་ཏ་ཞེས་བྱ་བས་བསྒྲུབ་པ་ལ་བཞུགས་པས། གནོད་སྦྱིན་གྱི་བདག་པོ་ཡིད་འགུལ་གྱི་བུ་ཀྵེ་ཏྲ་པཱ་ལ་དང་། བདུད་ལེགས་ལྡན་གྱི་བུ་ཏྲཀྴད་དང་། ལྷ་ཁྱབ་འཇུག་གི་བུ་ཛི་ན་མི་ཏྲ་དང་། གཤིན་རྗེ་འདོད་རྒྱལ་གྱི་བུ་ཊཀྐི་རཱ་ཛ་དང་བཞི་པོས་བར་ཆད་བརྩམས་པ་ལ། སློབ་དཔོན་གྱིས་ཕྱག་རྒྱས་བཏབ་ཏེ་རེངས་པར་བྱས་ལ། བར་ཆད་༼བྱེད་པ་༽བཞི་པོས་སློབ་དཔོན་ལ་སྨྲས་པ། སློབ་དཔོན་ཆེན་པོ་ལ་སྔར་བར་ཆད་བྱས་པ་བཟོད་པར་གསོལ། ད་ཕྱིན་ཆད་མི་བྱེད་པར་དམ་བཅའ་བས་ཕྱག་རྒྱ་དཀྲོལ་དུ་གསོལ་ཞེས་ཞུས་པས། སློབ་དཔོན་གྱི་གསུངས་པ། ཁྱེད་རྣམས་ལ་རིགས་དང་ཐུན་པ་དུ་ཡོད། དངོས་གྲུབ་ཇི་ལྟར་སྟེར་བར་ནུས། སྲོག་གི་སྙིང་པོ་དང་། ཇི་ལྟར་སྒྲུབ་པ་དང་། ལས་མྱུར་དུ་འགྲུབ་པ་སྨྲོས་ཤིག །ཅེས་གསུངས་ཏེ་ཕྱག་རྒྱ་དཀྲོལ་བས། གནོད་སྦྱིན་དེ་རྣམས་མཆི་མ་ཁྲག་ཏུ་ཟགས་ཏེ་བ་སྤུ་ལངས་ནས། བདག་ཅག་རྣམས་ནི་གོང་དུ་བཤད་པ་དེ་དང་དེ་འདྲ་བའི་བུ་ལགས་ཏེ། ཡེ་ཤེས་མགོན་པོའི་བཀའ་སྡོད་བགྱིད་ཅིང་འཕྲིན་ལས་ཐམས་ཅད་སྒྲུབ་པར་བགྱི། ཞེས་ཟེར་ནས་རང་གི་སྲོག་གི་སྙིང་པོ་དང་། ཇི་ལྟར་སྒྲུབ་ཅིང་ལས་ལ་སྦྱར་བ་རྣམས་སྨྲས་ནས་མི་སྣང་བར་གྱུར་ཏོ། སློབ་དཔོན་དྷ་ན་སཾ་སྐྲི་ཏ་དེས་བླ་མ་རཱ་ཧུ་ལ་ལ་གནང་། གྲུབ་ཆེན་དེས་ཁྱུང་པོ་རྣལ་འབྱོར་འཕན་ཡུལ་འཇོག་པོའི་རི་ལ་སྒྲུབ་པ་མཛད་པའི་ཚེ། རྒྱ་གར་ནས་ད་ནང་ཉི་མ་ཤར་བ་ཙམ་ལ་འོངས་པ་ཡིན་ཏེ་བོད་རོངས་དོག་པས་ད་དུང་ཉི་མ་མ་ཤར་བ་འདུག་གསུངས་ནས་ནམ་ལངས་རྗེས་ཙམ་ལ་ཕེབ་པར་བྱོན་ཏེ། བོད་དུ་ཟླ་བ་དྲུག་བཞུགས་ནས་ཁྱུང་པོ་ལ་མན་ངག་ཟབ་ལ་རྒྱ་ཆེ་བ་དུ་མ་གནང་བའི་དུས་སུ། ཙནྡ་མགོན་པོ་འདི་རྒྱ་གར་ན་ཡང་ང་དང་མཻ་ཏྲི་པ་༼གཉིས་༽རང་ཟབ་པ་ཡིན་པ་ལ། ཁོང་ལས་མཁན་ལྷ་མོ་གཅིག་གིས་བྱེད། ང་གནོད་སྦྱིན་བཞི་པོ་འདིས་བྱེད་པ་ཡིན་ནོ། །གསུངས་ནས་ཐུན་མོང་མ་ཡིན་པའི་སྒྲུབ་ཐབས་ཟབ་མོ་འདི་དག་གནང་ངོ་། །རཱ་ཧུ་ལ་ནི་རི་ནག་པོའི་གཙུག་ལག་ཁང་ན་བཞུགས་པའི་གྲུབ་ཆེན་ཇོ་བོ་རྗེའི་ཡང་བླ་མའི་གཙོ་བོ་རིགས་འཛིན་བརྙེས་ནས་ད་ལྟ་ཡང་བཞུགས་པ་དེ་ཉིད་ཡིན་ཏེ་ལོ་རྒྱུས་སོ། །མངྒ་ལཾ།།

༈ ན་མོ་མ་ཧཱ་ཀཱ་ལ་ཡ།
འདི་བསྒྲུབ་པར་འདོད་པས་མགོན་པོའི་བསྙེན་པ་ཚད་དུ་ཐེམས་པའི་སྒྲུབ་པ་པོས་གནས་དུར་ཁྲོད་ལ་སོགས་པ་ཡ་ང་བར་དགུན་ཟླ་ཐ་ཆུང་གི་ཟླ་བ་ནག་པོའི་མར་ངོ་དང་། སྐར་མ་དང་གཟའ་གཉིས་ཀྱང་དྲག་པོ་སྟེ་ནག་པོ་གསུམ་ལ་བབ་པའི་དུས་སུ། མཐུན་པའི་རྫས་བསགས་པ་ནི། རབས་ཆད། གྲི་ཤི། མཛེ་ཕོའི་ཐོད་པ་སྟེ་ཐོད་པ་གསུམ། དུར་ཁྲོད་ཀྱི་སོལ་བ། གྲི་ཁྲག །དུག་ཆུ་སྟེ་རྫས་གསུམ། ཁྱི་དང་ཕག་པ་སྤྱང་ཀིའི་བྲུན་ཏེ་དྲི་ལ་གསུམ། མི་རྟ་ཁྱིའི་རྐང་སྟེ་རྐང་གསུམ་ལ་སོགས་པ་དགོས་པའི་ཡོ་བྱད་རྣམས་ཚོགས་པར་བྱས། མཚམས་དམ་པོར་བཅད། ནང་དུ་དུར་ཁྲོད་ཀྱི་ས་ལ་དཀྱིལ་འཁོར་གྱི་སྟེགས་བུ་གྲུ་བཞི་དཔངས་སུ་ཁྲུ་གང་། ལོག་རེ་ལ་ཁྲུ་དོ་དོ་ཡོད་པ་བྱས་ལ། རྫས་གསུམ་གྱི་ཁུ་བས་བྱུགས། དེའི་དབུས་སུ་འབྲུབ་ཁུང་གྲུ་གསུམ་རྩེ་མོ་ཕར་བསྟན་པ། ལོག་རེ་ལ་ཁྲུ་རེ་རེ་ཡོད་པ། ནང་གི་ཐབས་སུ་ཁྲུ་ཕྱེད་ཡོད་པ་གཅིག་བརྐོས་ནས། དེའི་ནང་ལའང་རྫས་གསུམ་གྱིས་བྱུག་པར་བྱ། རྐང་གསུམ་ལས་བྱས་པའི་ཕུར་པ་སོར་བཞི་པས་འབྲུབ་ཁུང་གི་ཁའི་མཐའ་ནས་བསྐོར་ཏེ་གཙུགས། སྟེགས་བུའི་སྟེངས་འབྲུབ་ཁུང་དང་རང་གཉིས་ཀའི་བར་གྱི་གཞི་ལ་ཁྲག་གི་མཆོད་ཡོན། མེ་ཏོག་ནག་པོ། ཚིལ་ཆེན་གྱི་མར་མེ། བསུར་ཆེན་གྱི་དུད་པ། དུག་ཁྲག་གི་དྲི་ཆབ། ཞལ་ཟས་ཀྱི་བཤོས་བུ་དམར་ནག་རྣམས་བཤམས། ས་སྟེགས་ཀྱི་སྟེང་མ་ཡིན་པའི་མཆོད་སྟེགས་ལེགས་པ་གཅིག་ཏུ། ཡེ་ཤེས་མགོན་པོ་ལ་འབུལ་བའི་གཏོར་མ་བཟང་བ་གཉིས་བཤམས། ས་སྟེགས་ཀྱི་སྟེང་གི་ཟུར་བཞིར་གནོད་སྦྱིན་བཞི་པོ་རང་རང་གི་གཏོར་མ་བཤམས། དེ་ནས་ཤོག་བུ་ལ་དུག་ཁྲག་གིས་དགྲ་བོའི་ལིངྒ་བྲིས། དེའི་དཔྲལ་བར་རུས། སྙིང་གར་མིང་བྲིས་ལ་གྲི་ཐོད་ཀྱི་ནང་གི་མཐིལ་དུ་བཞག་སྟེ། རང་ཡེ་ཤེས་མགོན་པོའི་ང་རྒྱལ་ཤིན་ཏུ་བརྟན་པ་ལ་གནས་ནས། དགྲ་བོ་བཀུག་སྟེ་ལིངྒ་ལ་བསྟིམ་པའི་ཆོ་ག་ཡང་ཡང་བྱས་ལ། ཡིད་ཆེས་པ་ན་དེ་དགྲ་བོ་དངོས་སུ་བསམ་སྟེ། དགྲ་བོའི་རྐང་རྗེས་ཀྱི་ས་དང་དྲི་མ་གསུམ་བསྲེས་པས་ཐོད་པ་དེ་ཕྱུར་གྱིས་དགང་། ཐོད་པ་དེའི་ཚངས་བུག་ནས་བ་སུ་ཏའི་སྐུད་པ་དྲངས་ཏེ་རང་གི་ལག་པ་གཡས་པས་གཟུངས་ཐག་བྱ། དེའི་སྟེང་ནས་མཛེ་ཕོའི་ཐོད་པས་བཀབ་ནས་ཁ་སྦྱར་བ་དེ་མཚོན་སྣ་ལྔའི་སྐུད་པས་རྒྱ་གྲམ་དུ་བཅིངས། དེ་ཉིད་འབྲུབ་ཁུང་གི་ནང་དུ་ཐོད་པའི་ལྟག་པ་དང་ལིངྒ་ཐོད་པའི་མཐིལ་ན་གན་རྐྱལ་དུ་ཡོད། དེའི་མགོན་པོ་དང་གཉིས་ཀ་འབྲུབ་ཁུང་གི་རྩེ་མོ་ཕྱོགས་སུ་ཕར་བསྟན་ནས་བཅུག་ལ་བཞག དེ་ནས་བདག་ཉིད་ཆས་སུ་གཞུག་པ་ནི། ར་ཐོམ་གྱིས་གདོང་བྱུག །སྐྲ་རལ་པ་དངོས་སམ་བཅོས་མའི་ལྕང་ལོ་གྱེན་དུ་བརྫེས་པའི་ཐོར་ལྕོག་དར་ནག་པོས་བཅིངས། གོས་ནག་པོ་གྱོན། ཞགས་པ་ནག་པོའི་སྐེ་རགས་བཅིངས། གདན་ནག་པོ་ལ་ཁ་ལྷོར་བལྟས་ལ་བསྡད།
དེ་ནས་སེམས་བསྐྱེད་པ་ནི། བདག་གི་བླ་མ་དང་བསྟན་པའི་དགྲ་བོ་འདི་བསྒྲལ་ལ་སངས་རྒྱས་ཀྱི་ས་ལ་འགོད་པར་བྱའོ་སྙམ་དུ་སེམས་བསྐྱེད་པར་བྱའོ། །དེ་ནས་རང་ཉིད་ཡེ་ཤེས་མགོན་པོར་བསྐྱེད་པའི་མངོན་རྟོགས་རྒྱས་པར་སྒོམས་ཏེ། ཡེ་ཤེས་པ་སྤྱན་དྲངས་ལ་དགུག་གཞུག་ཅིང་གཉིས་སུ་མེད་པར་བྱ། མི་བསྐྱོད་པའི་དབུར་བརྒྱན་རང་ཆས་སུ་ཡོད་པར་བསྒོམ། ལྷ་མོ་ལ་སོགས་པ་གཞན་བསྒོམ་མི་དགོས། དེ་ནས་རང་མགོན་པོའི་ང་རྒྱལ་ཤིན་ཏུ་བརྟན་པ་ལ་གནས་པས་ཁྲོས་པའི་སེམས་དང་ལྡན་པར་བྱ་སྟེ། མགོན་པོའི་སྲོག་སྔགས་ཁྲི་ཕྲག་གཅིག་དང་། རྩ་སྔགས་སྟོང་གིས་བཟླས་པ་བྱ། དེ་ནས་མགོན་པོའི་གཏོར་སྟེགས་ཀྱི་སྟེང་གི་ནམ་མཁའ་ལ་མགོན་པོ་བསྐྱེད། ཡེ་ཤེས་པ་སྤྱན་དྲངས་གཉིས་སུ་མེད་པར་བྱས་ལ། གཏོར་མ་གཉིས་པོ་དེའི་གཅིག་བྱིན་གྱིས་བརླབ་ལ་དབུལ། འདི་ལ་ཡང་གཙོ་བོ་དང་འཁོར་དམ་ཅན་རྒྱ་མཚོ་དཔག་ཏུ་མེད་པས་བསྐོར་བ་བསམ་པ་ཙམ་གྱི་ཆོག་གིས་ལྷ་མོ་དང་གནོད་སྦྱིན་སོགས་རེ་རེ་ནས་བསྐྱེད་མི་དགོས་ཤིང་། གཏོར་སྔགས་ལ་ཡང་གཙོ་བོ་དང་ཤཱ་ས་ནའི་གཏོར་སྔགས་གཞན་སོ་སོ་བ་བརྗོད་མི་དགོས། དེ་ནས་རྔམས་པ་སྒྲ་སྒྲོགས་དང་དམ་ཅན་སྤྱི་བསྐུལ་བྱ་ཞིང་འཕྲིན་ལས་གཞོལ་བར་བྱའོ། །དེ་ནས་འབྲུབ་ཁུང་ཡོད་པའི་ས་སྟེགས་ཀྱི་ནམ་མཁའ་ལ་ཡི་གེ་ཀཾ་ནག་པོ་ཡོངས་སུ་གྱུར་པ་ལས་ཐོད་པའི་གཞལ་ཡས་ཁང་ཤིན་ཏུ་ཡངས་ཤིང་རྒྱ་ཆེ་བ་མི་ལྤགས་ཀྱི་གཡང་གཞི་བླ་རེས་དང་རྒྱུ་རློན་གྱི་ལྡ་ལྡི་ལ་སོགས་པས་སྤྲས་པའི་སྒོ་སྒྲུབ་པ་པོ་ལ་བསྟན་པ། ཙིཏྟའི་ཏོག་དང་། མི་མགོ་སྐམ་པོའི་མདའ་ཡབ་དང་། མི་རུས་ཀྱི་ཤར་བུ་དང་། རྒྱུ་རློན་གྱི་དྲྭ་བ་དྲྭ་ཕྱེད་སོགས་བསྒོམ་ཟེར། རྟ་བབ་སོགས་མི་དགོས་སོ། །དེའི་ནང་གི་དབུས་སུ་སྣ་ཚོགས་པདྨ་དང་ཉི་མ་དང་རོའི་གདན་ཧཱུྃ་སྨུག་ནག་མེ་འོད་འཕྲོ་བ་ཡོངས་སུ་གྱུར་པ་ལས་གནོད་སྦྱིན་ཆེན་པོ་སྲོག་གཅོད་ཀྱི་བཤན་པ་ཀྵེ་ཏྲ་པཱ་ལ་སྐུ་མདོག་ཆར་སྤྲིན་ལྟར་གནག་པ། ཞལ་གཅིག་ཕྱག་གཉིས་པ། ཕྱག་གཡས་པ་གྲི་གུག་ནམ་མཁའ་ལ་གདེངས་པའི་ལྷ་མ་ཡིན་ཐམས་ཅད་སྐྲག་པར་བྱེད་པ། གཡོན་པ་དགྲ་བོའི་ཀླད་ཁྲག་དྲོན་མོས་གང་བའི་ཐོད་པ་ཐུགས་ཀར་བཟུང་ནས་ཞལ་དུ་གསོལ་བ། ཞབས་གཡས་བསྐུམ་ཞིང་གཡོན་བརྐྱངས་པ། དར་ནག་གི་ཨང་རགས་གསོལ་བ། སྤྱན་གསུམ་དམར་ཞིང་ཟླུམ་པ་དགྲ་བགེགས་ལ་སྡང་མིག་ཏུ་བལྟ་བ། ཁྲོ་གཉེར་སྨིན་མཚམས་སུ་བསྡུས་ཤིང་ཞལ་རབ་ཏུ་གདངས་ནས་ལྗགས་གློག་ཕྲེང་ལྟར་བསྐྱེད་པ། མཆེ་བ་རྣོན་པོ་བཞི་གཙིགས་ཤིང་ཁྲག་གི་སྦུ་བ་མཆིལ་བ། ཤངས་ནས་དུས་མཐའི་རླུང་ཆེན་འཚུབ་པ། བོང་ཐུང་ལ། སྐུ་སྦོམ་པ། ཡན་ལག་རགས་པ། བསུས་ཁྱིམ་ཆེ་བ། རལ་པ་ཁམ་ནག་གྱེན་དུ་གཟིངས་པ་ལ་སྦྲུལ་ནག་པོའི་ཅོད་པཎ་བཅིངས་པ། དེའི་གཡས་སུ་པདྨ་དང་ཉི་མ་དང་རོའི་གདན་ལ་ཧཱུྃ་མཐིང་ནག་ཡོངས་སུ་གྱུར་པ་ལས་བདུད་མགོན་ཏྲཀྴད་ནག་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། ཕྱག་གཡས་རུ་མཚོན་དམར་པོ་འཕྱར་བ། གཡོན་ཙནྡན་གྱི་བེང་ཆེན་དཀུར་བརྟེན་པ། ཞབས་ལ་སག་ལྷྭམ་ནག་པོ་དང་། སྐུ་ལ་མཐའ་བེར་སྔོ་ཁྲ་གསོལ་བ། རབ་ཏུ་ཁྲོས་ཤིང་རྔམས་པ། གཡས་བསྐུམ་ཞིང་གཡོན་བརྐྱང་བའི་སྟབས་ཀྱི་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པའོ། །གཙོ་མོའི་རྒྱབ་ཏུ་པདྨ་དང་ཉི་མ་རོའི་གདན་ལ་ཏྲ་ལྗང་ཁུ་ཡོངས་སུ་གྱུར་པ་ལས། དབང་ཕྱུག་ཛི་ན་མི་ཏྲ་སྐུ་མདོག་ནག་པོ་ཞལ་གཅིག་ཕྱག་གཉིས་པ། གཡས་ཌཱ་མ་རུ་དྲག་ཏུ་འཁྲོལ་ཞིང་གཡོན་སྡིགས་མཛུབ་རབ་ཏུ་བརྐྱང་པའི་རྩེ་ལ་བསྐལ་པའི་མེ་འབར་བ་གཅིག་ཞབས་གཡས་བསྐུམ་ཞིང་གཡོན་བརྐྱངས་བས་བཞུགས་པའོ། །གཙོ་བོའི་གཡོན་དུ་པདྨ་དང་ཉི་མ་དང་རོའི་གདན་ལ་ཛཿལས་གཤིན་རྗེ་གཤེད་ཌཀྐི་ར་ཛ་སྐུ་མདོག་དམར་སྨུག་ཞལ་གཅིག་ཕྱག་གཉིས་པ། གཡས་མིའི་རྒྱུ་མའི་ཞགས་པ་འཕེན་ཅིང་། གཡོན་སྡིགས་མཛུབ་ནམ་མཁའ་ལ་གདེང་པ། ཁ་གདངས་ཤིང་མཆེ་བ་གཙིགས་ནས་ལྗགས་འདྲིལ་བ། དབུ་སྐྲ་སེར་པོ་གྱེན་དུ་བརྫེས་ཤིང་། སྟག་གི་པགས་པའི་ཤམ་ཐབས་ཅན། ཞབས་གཉིས་གྱད་ཀྱི་དོར་སྟབས་ཀྱི་མེ་རབ་ཏུ་འབར་བའི་དབུས་ན་བཞུགས་པའོ། །དེ་ལྟར་དམ་ཚིག་པ་བསྐྱེད་ནས་རང་ཡེ་ཤེས་མགོན་པོའི་ང་རྒྱལ་གྱིས་ཐུགས་ཀའི་ཧཱུྃ་ལས་འོད་ཟེར་འཕྲོས། རང་རང་གི་གནས་ནས་བསྒོམ་པ་དང་འདྲ་བའི་ཡེ་ཤེས་པ་རྣམས་སྤྱན་དྲངས། ལག་པ་ལྕགས་ཀྱུའི་ཕྱག་རྒྱ་བྱས་ལ། ཛཿཛཿཛཿཛཿཞེས་བརྗོད། དངོས་སུ་བྱོན་ནས་རང་རང་གི་དམ་ཚིག་པ་རྣམས་དང་གཉིས་སུ་མེད་པར་གྱུར་པའི་མོས་པ་བྱས་ལ། ཛཿཧཱུྃ་བཾ་ཧོཿཞེས་བརྗོད། མཆོད་པ་བསངས་སྦྱངས་བསྐྱེད་ལ་དབུལ། ནང་མཆོད་དབུལ། དེ་ནས་བདག་ཉིད་ཀྱིས་ལག་པ་གཡས་པས་བ་སུ་ཏའི་གཟུངས་ཐག་ནས་ཛཿཞེས་བརྗོད་པས་ཕྱོགས་བཅུའི་འཇིག་རྟེན་གྱི་ཁྲོ་བོ་འཇིག་རྟེན་ལས་འདས་པ་དང་མ་འདས་པ་ཐམས་ཅད་ཀྱི་ནུས་པ་ཐམས་ཅད་འོད་ཟེར་ནག་པོ་དང་ཧཱུྃ་མཐིང་ཁ་མེ་འོད་འཕྲོ་བ་ནམ་མཁའི་ཁྱོན་གང་བ་བཀུག་སྟེ་གནོད་སྦྱིན་བཞི་ལ་ཐིམ་པས། གནོད་སྦྱིན་བཞི་ནུས་པ་ཐོགས་པ་མེད་ཅིང་གཟི་བརྗིད་དཔག་ཏུ་མེད་པ་དགྲ་བགེགས་ཐམས་ཅད་སྐད་ཅིག་ལ་བརླག་པར་བྱེད་པའི་སྟོབས་དང་ལྡན་པས་བཟོད་ཐབས་མེད་ཙམ་གྱི་ཐུགས་ཁྲོས་འཁྲུགས་རྔམས་པ་དང་ལྡན་པར་བསམ་ལ། དེ་ཉིད་ལ་དགྲ་བོའི་ཉེས་པ་བསྒྲགས། བླ་མ་བརྒྱུད་པའི་མཚན་ནས་སྨོས་ལ་དམ་བརྡར། བསྲུང་མ་དམ་ཚིག་ཅན་ཁྱེད་རྣམས་ཀྱི་བླ་མའི་སྐུ་དགྲ། བསྟན་པའི་དགྲ་བོ་བསྒྲུབ་པ་པོ་བདག་ཅག་དཔོན་སློབ་རྣམས་ཀྱིས་ཐོས་བསམ་བསྒོམ་པའི་ཚེར་མར་གྱུར་པའི་དགྲ་བོ་གདུག་པ་ཅན་མིང་རུས་འདི་ཞེས་བྱ་བ་ལོ་དང་ཟླ་བར་མ་བཞག དྲག་པོའི་འཕྲིན་ལས་སྣ་ཚོགས་པས་ད་ལྟ་ཉིད་དུ་ཚར་གཅོད་པའི་ཕྲིན་ལས་མཛོད་ཅིག །ཅེས་བསྐུལ་ལ་བཟླས་པ་ལ་འཇུག་པར་བྱ་སྟེ། དེ་ཡང་ཡེ་ཤེས་མགོན་པོའི་ཐུགས་ཀའི་ཧཱུྃ་ལས་བཟླ་བྱའི་སྔགས་ཀྱིས་ཕྲེང་བ་སྒྲོའི་ཆུན་པོ་ལྟ་བུ་མེ་དྲག་ཅིང་རྩུབ་པ་འཕྲོ་བ་བྱུང་སྟེ་ཞལ་ནས་ཐོན། གཟུངས་ཐག་ལ་འཁྲིལ་ནས་སོང་བ་ཐོད་པའི་ནང་དུ་ཐོག་འབབ་པའི་གློག་ལྟར་ཁྱུག་ཁྱུག་སོང་ཞིང་། རང་གི་ཐུགས་ཀའི་ཧཱུྃ་ལས་འོད་ཟེར་མེ་འོད་ལྟ་བུ་འཕྲོས་པའི་གནོད་སྦྱིན་བཞིའི་ཐུགས་ཀར་ཐིམ་ནས་བསྐུལ་བས། གནོད་སྦྱིན་བཞི་རང་དབང་མེད་པར་ཁྲོ་འཁྲུགས་ཁྲིཾ་དང་། ཀྵེ་ཏྲ་ལ་སོགས་པ་དང་ཧཱུྃ་དང་ཕཊ་ལ་སོགས་པའི་སྒྲ་དྲག་པོ་སྒྲོགས་ཤིང་གཞལ་ཡས་ཁང་གི་ནང་ནས་ཐོན་བྱུང་སྟེ་ཐོད་པའི་སྦྲུམ་བུའི་ཚང་བུག་ནས་ཐོག་པ་མེད་པར་ཞུགས་ནས། ལིངྒ་དགྲ་བོ་དངོས་སུ་བསམ་པ་དེའི་སྙིང་ཕྱུང་ཁྲག་འཐུང་། ཤ་ཟོ། རུས་པ་ཆོམ། ཡན་ལག་བཅད་ཅིང་པགས་པ་བཤུ་བ་ལ་སོགས་པ་དྲག་པོའི་ལས་ཐམས་ཅད་བྱས་ནས་ཚར་བཅད་པར་བསམ་ལ། ཡིད་རྩེ་གཅིག་ཏུ་སྒྲིམ། ལག་པ་གཡས་པས་གཟུངས་ཐག་དང་གཡོན་པས་དུང་ཆེན་གྱིས་ཕྲེང་བ་བགྲང་ཞིང་། ཨོཾ་ཀྵེ་ཏྲ་པ་ལ་བིགྷྣན་ཆེ་གེ་མོ་མ་ར་ཡ་ཧཱུྃ་ཕཊ། ཨོཾ་དུ་ཡོག་ཛཿམ་ཧཱ་ཀ་ལ་ཏྲག་ཤད་དུ་ཏྲི་ཛཿ ར་ཛཿཏྲི་ན། ཆེ་གེ་མོ་མ་ར་ཡ་ཧཱུྃ་ཕཊ། ཨོཾ་ཛི་ན་མི་ཏྲ་ཝ་ཤཾ་ཀུ་རུ་ཆེ་གེ་མོ་མཱ་ར་ཡ་ཧཱུྃ་ཕཊ། ཨོཾ་ཊཀྐི་རཱ་ཛ་ས་མ་ཡ་བྷྱོ་ཆེ་གེ་མོ་མ་རཱ་ཡ་ཧཱུྃ་ཕཊཿ ཅེས་པ་དྲག་ཏུ་བཟླས་པར་བྱའོ།
།དེ་ལྟར་ཐུན་དང་པོའི་བཟླས་པ་རྫོགས་པ་ན། གནོད་སྦྱིན་བཞི་དགྲ་བོ་ཚར་བཅད་ཟིན་ནས་ཡར་ལ་ཐོན་བྱུང་ནས། གཞལ་ཡས་ཁང་གི་ནང་དུ་རང་གི་གདན་ལ་སྔར་ལྟར་བཞུགས་པར་བསྒོམ། གཏོར་མ་བཞི་པོ་བྱིན་བརླབས་པ་དགྲ་བོའི་ཤ་ཁྲག་ཏུ་བསམ་ལ། གོང་སྔགས་རྣམས་ལ་ཧཱུྃ་ཕཊ་ཀྱི་འཇུག་ཏུ་ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ཅེས་བཏགས་པ་བདུན་བདུན་གྱིས་འབུལ། ནང་མཆོད་དབུལ། བསྟོད་བསྐུལ་བྱ། སྔར་ལྟར་ཕྲིན་ལས་བཅོལ་ནས་ཐལ་མོ་བརྡབ། ཡིག་བརྒྱ་བཟླས། ནོངས་པ་བཟོད་པར་གསོལ། ཐུན་རྗེས་མ་རྣམས་ལ་མགོན་པོ་དང་གནོད་སྦྱིན་བཞིའི་གཏོར་མ་ཐམས་ཅད་གསོ། རང་མགོན་པོར་བསྐྱེད་པ་ལ་ཡེ་ཤེས་པ་གཞུག་པ་སོགས་སྔར་ལྟར་བྱས་ནས་སྔགས་ཐུང་བརྒྱ་རེ་དང་། སྔགས་རིང་ཉེར་གཅིག་རེ་བཟླ། མགོན་པོ་མདུན་བསྐྱེད་སྔར་ཡོད་གསལ་བཏབ་པ་ལ་ཡེ་ཤེས་པ་བཅུག མཆོད་ནས་ཐུན་དང་པོ་ལ་ཕུལ་བའི་གཏོར་མ་ཁ་གསོས་པ་དེ་ཉིད་སྔར་ལྟར་འབུལ། གཏོར་མ་གཅིག་བྱིན་གྱིས་བརླབས་ཏེ་ད་དུང་མི་དབུལ་བར་དེ་ཀ་ལ་འཇོག བསྟོད་བསྐུལ་སོགས་སྔར་ལྟར་བྱེད། དེ་ནས་ཐོད་པའི་ནང་གི་ལིངྒ་བསྐྱེད་པ་དགུག་གཞུག་སྔར་ལྟར་ལན་མང་དུ་བྱས་ནས་དགྲ་བོ་དངོས་སམ། འོན་ཀྱང་ལིངྒ་ཐོད་པའི་ནང་ནས་ཕྱིར་མི་འདོན་པར་ཐོད་པ་ཁ་སྦྱར་མི་སྒུལ་བར་འཇོག་གོ
།དེ་ནས་གནོད་སྦྱིན་བཞི་པོ་ས་བོན་ལས་གསར་དུ་བསྐྱེད་མི་དགོས་པར་སྔར་ཡོད་གསལ་བཏབ་ནས་ཡེ་ཤེས་པ་སྤྱན་དྲངས་ནས་འཇུག་པ་མན་ཆད་ཀྱི་ཆོ་ག་ཐམས་ཅད་སྔར་ཇི་ལྟར་བཤད་པ་ལྟར་བྱའོ། །དེ་ལྟར་ཉིན་ཞག་རེ་རེ་ལ་ཐུན་བཞི་བཞིར་བྱའོ། །དེ་ཡང་ཞག་བདུན། དགུ། བཅུ་གསུམ། ཉེར་གཅིག་ལ་སོགས་པ་རྟགས་རབ་འབྲིང་ཐ་མ་གང་ཡང་རུང་བ་མ་བྱུང་གི་བར་དུ་བྱ་སྟེ། རབ་ནི་མི་ནག་པོས་དངོས་སུ་སྙིང་སྟེར་བ་ལ་སོགས་པ་འོང་། འབྲིང་ཡང་ཐོད་སོད་པ་འཕར་བ་དང་། འཚོག་པ་དང་། མེ་འོད་འབྱུང་བ་དང་། ཤ་ཆེན་གྱི་དྲི་དང་། ཐོག་འཚེག་འཆོམ་དང་དེ་དག་གི་ཚེ་ཤིན་ཏུ་འཇིགས་ཤིང་སྤུ་ཟིང་ཞེས་བྱེད་པའི་ཟིལ་ཆེན་འབྱུང་སྟེ། རང་ཡེ་ཤེས་མགོན་པོའི་ང་རྒྱལ་བརྟན་པོ་བསྐྱེད་ནས་མ་འཇིགས་པ་གལ་ཆེའོ། །ཐ་མ་ཡང་རྨི་ལམ་དུ་མི་ནག་པོ་མིའི་སྙིང་དམར་རྩ་རེ་བ་དང་མགོ་དང་རོ་རངས་པོ་གསར་པ་སྟེར་བ་ལ་སོགས་པ་འབྱུང་སྟེ། དེ་ནས་སྲེག་པའི་ཆོ་ག་བྱའོ། །དེ་ཡང་ཤིང་སྐམ་པོ་ཚེར་མ་ཅན་དུག་ཁྲག་གིས་ཅུང་ཟད་བྲན་ནས་སྐམ་པས་འབྲུབ་ཁུང་གི་ནང་དང་ཐོད་པའི་སྟེང་དུ་ལེགས་པར་སྤུངས་ལ། ཤན་པའི་ཁྱིམ་ནས་མེ་བླངས་ཤིང་སྟག་ལོ་པ་གཅིག་གིས་སྦར་ཏེ། མེ་དེ་རཾ་ལས་དུས་མཐའི་མེ་ལྟ་བུར་བསྐྱེད། དེ་ནས་རང་མགོན་པོར་གསལ་བ་དང་། གནོད་སྦྱིན་བཞིའི་སྐུ་ལས་དྲག་ཅིང་རྩུབ་ལ་ཚེག་སྒྲ་དང་བཅས་པའི་མེའི་ཕུང་པོ་དཔག་ཏུ་མེད་པ་ཆད་ནས་འབྲུབ་ཁུང་གི་ནང་དུ་སོང་སྟེ། ཐོད་པའི་སྒྲོམ་དང་དགྲ་བོའི་ཕུང་པོ་ལྷག་མ་མེད་པར་བསྲེགས་པར་བསམ་ལ། ཐམས་ཅད་བར་གྱུར་གྱི་བར་དུ་སྔགས་རྣམས་སྔར་ལྟར་དྲག་ཏུ་བཟླས་པར་བྱའོ། །གོང་གི་རྫས་གསུམ་གྱིས་ཀྱང་ལན་མང་དུ་མེ་ནང་བྲབས་སོ། །མེ་མ་ཤི་བར་དུ་ལག་པ་སོགས་ཀྱིས་མི་རེག་མི་སྒུལ། གཟུངས་ཐག་ཀྱང་ཚིག་པས་ཆོག མེ་ལེགས་པར་ཤི་བ་དང་། འབྲུབ་ཁུང་ཐལ་བ་དང་བཅས་པའི་སྟེང་དུ་མཉྫི་ཆེན་པོ་གཙུགས་པའི་ཁར་མགོན་པོའི་གཏོར་མ་ཁ་སང་ནས་ཐུན་རེ་རེ་ཞིང་གསོལ་བསངས་སྦྱངས་བྱིན་གྱིས་བརླབས་བྱས་ནས་སྔར་ལན་གཅིག་ཀྱང་མ་ཕུལ་བ་དེ་བཞག སླར་ཡང་ནང་མཆོད་ཀྱི་བྲན་ཅིང་བྱིན་གྱིས་བརླབས་པ་གཏང་རག་གི་ཚུལ་དུ་ཡེ་ཤེས་མགོན་པོ་འཁོར་བཅས་ལ་འབུལ། འདིའི་སྐབས་སུ་གནོད་སྦྱིན་བཞིའི་གཏོར་སྔགས་ཀྱང་བརྗོད། མགོན་པོ་ལ་གསོལ་བ་དྲག་ཏུ་གདབ། ནང་མཆོད་གཏོར། བཤགས་པ་བསྟོད་པ་རྒྱས་པར་བྱའོ།
།དེ་ནས་གཏོར་མ་ཐམས་ཅད་དགྲ་ཕྱོགས་སུ་བསྐུལ་བ་དྲག་ཏུ་བྱས་ནས་ཟོར་དུ་འཕངས། དེ་ནས་ཐོད་པའི་ལིངྒ་དང་བཅས་པ་ཚིག་པའི་ཐལ་བ་ཐམས་ཅད་ལྷག་མ་ཅུང་ཟད་མ་ལུས་པར་རབས་ཆད་ཀྱི་ཐོད་པ་དེའི་ནང་དུ་བླུག་སྟེ་རེ་བ་ནག་པོས་དྲིལ། སྤྲ་ཚིལ་གྱིས་བསྡམས། ཡུག་ས་མོའི་སྐྲ་ལ་ཤན་པས་ཕྱིན་ཅི་ལོག་ཏུ་བཀལ་བའི་སྐུད་པས་རྒྱ་གྲམ་དུ་བཅིངས། ལྷ་ཁང་རྙིང་པ་བྱིན་རླབས་ཅན་གྱི་ཐེམ་འོག་གམ། དགེ་འདུན་གྱི་སྡེ་ཆེན་པོའི་འདུ་ཁང་དང་བརྒྱ་སྒོའི་ཐེམ་འོག་གམ། ལམ་པོ་ཆེ་རྒྱ་གྲམ་དུ་བསྣོལ་བའི་དབུས་སུ་འབྲུབ་ཁུང་གྲུ་གསུམ་གཏིང་དུ་འབྲུས་པའི་ནང་དུ་བཅུག་པས་ཐེམ་པར་བསྡམས། རོ་གཡམ་གྲུ་གསུམ་ལ་རོ་སོལ་གྱི་རྡོ་རྗེ་རྒྱ་གྲམ་བྲིས་པའི་ལྟེ་བ་གྲུ་བཞིའི་དབུས་སུ་ཡུང་བ་དང་གྲི་ཁྲག་བསྲེས་པས་ལ ཾ་ཞེས་པའི་ཡི་གེ་ཆེན་མོ་བྲིས་པས་ཁ་དམ་པར་བཅད། དེའི་སྟེང་དུ་ས་རེ་བླུག་ཆུ་རེ་བླུག་པ་སྤེལ་མ་དགུ་བྱ། དེའི་སྟེང་དུ་རང་ཡེ་ཤེས་མགོན་པོར་གསལ་བའི་རྐང་མཐིལ་གཉིས་ཧཱུྃ་ལས་སྣ་ཚོགས་རྡོ་རྗེར་བསྐྱེད་དེ་རྫི་བཅགས་ལེགས་པར་བྱས་ནས་རྗེས་མི་མངོན་པར་བྱའོ། །དེ་ནས་ཕྱི་མིག་མི་ལྟ་བར་ནང་དུ་འོངས་ཏེ་བཀྲ་ཤིས་བརྗོད། བསྲུང་འཁོར་རྒྱས་པར་བསྒོམ། རང་གི་ལུས་ཀྱི་གནས་གསུམ་དུ་གོ་ཆའི་ལྷ་སྐྱེ་མཆེད་ལ་སོགས་པ་བཀོད་པས་སྲུངས། ལས་ཀྱི་རྗེས་མི་མངོན་པར་བྱའོ། །འདི་ལ་མངོན་དུ་ཡེ་ཤེས་མགོན་པོའི་བསྙེན་པ་ཚད་དུ་ཐེངས་པ་གཅིག་གིས་ལེགས་པར་སྒྲིམ་སྟེ་རྫས་རྣམས་མ་ཚང་བ་མེད་པར་བྱས་ཏེ་བསྒྲུབས་ན་གདོན་མི་ཟ་བར་དགྲ་བོ་དུས་ཤིན་ཏུ་མྱུར་བ་ལ་རབས་ཆད་པ་ལ་ཐེ་ཚོམ་མེད་པར་འདུག་གསུངས། དེས་ན་དུག་ནག་པོ་དང་འདྲ་བས་སུ་ལའང་མི་བྱིན་གསུངས། འཁོར་བཞིའི་སྦྲགས་སྒྲུབ་ཡིན་ཟེར་བ་གཅིག་འདྲ་མིན་འགའ་རེ་ཡོང་གི་འདུག་ནའང་། ནོར་འཁྲུལ་མང་ཞིང་ཞལ་ཤེས་ལག་ལེན་གནད་གལ་ཆེ་ཤོས་རྣམས་གཅིག་ཀྱང་མེད་པ་ཤ་སྟག་ཏུ་འདུག འདིར་ནོར་འཁྲུལ་དང་བར་སྐབས་སུ་ལྷད་བཙུག་པའི་དྲི་མས་དབེན་ཞིང་། ཞལ་ཤེས་ལག་ལེན་ཐམས་ཅད་བླ་མའི་གསུངས་བཞིན་བཏབ་ནས་མ་ཚང་བ་མེད་པར་ཡི་གེ་ཤིན་ཏུ་གསལ་བ་བཀོད་པ་ཡིན་པས། འདི་ནི་སུ་ལ་ཡང་སྦྱིན་མི་ཉན། དེ་ཡང་མན་ངག་ལ་སེར་སྣ་ཆེ་བ་ག་ལ་ཡིན། མི་བསམ་ངན་གྱི་ལག་ཏུ་མན་ངག་དུག་དང་འདྲ་བ་དཔེ་ཁྱེར་གྱི་ཆོག་པ་འདི་ལྟ་བུ་ཤོར་ན་རང་གི་ལྷག་ལ་འཁོར། བསྟན་པ་དང་སེམས་ཅན་མང་པོ་ལ་གནོད་པ་ཆེན་པོ་བྱེད། སྡིག་ཆེན་པོའི་རྒྱུན་བྱེད། མི་དཔོན་སྡིག་ཅན་གྱི་ཁྱིམ་དུ་ཚེ་ཕྱི་མ་བློས་བཏང་ནས་ལས་སྦྱོར་དྲག་པོས་ལྟོ་ཚོལ་བ་རྣམས་ཀྱི་ལག་ཏུ་ཤོར་ཏེ་དགེ་འདུན་གྱི་སྡེ་དང་བསྟན་འཛིན་སྐྱེས་བུ་རྣམས་གཅོད། དཔེ་མཐོང་ན་བླ་མ་ལ་རགས་མ་ལས་པར་གོ་ནས་ལུང་མེད་པའི་མན་ངག་གི་གང་བ་གཅིག་མྱུར་དུ་འབྱུང་ངོ་། །དེའི་ཕྱིར་ཅི་ལ་ཐུག་ཀྱང་དཔེ་ཆ་མི་ལ་མི་བསྟན་ཅིང་། ལས་རྒྱུ་འབྲས་དང་བསྟན་པ་མིག་གི་འབྲས་བུ་ལྟར་གཅེས་པར་འཛིན་པའི་སྣོད་ལྡན་རེ་རེ་ཙམ་ལ་ལུང་ནོས་བཀའ་རྒྱས་བཏབ་སྟེ་སྦྱིན་པར་བྱའོ། ཁ་སྦྱང་དང་ནོར་ཕྱིར་མ་ཤོར་བ་གལ་ཆེའོ། །གལ་ཏེ་དེ་གཉིས་ཀྱི་ཕྱིར་སུ་རུང་ལ་སྟེར་ཞིང་དཔེ་ཆ་སྟོན་ན། ཀྵེ་ཏྲ་པཱ་ལས་དེའི་སྙིང་ཕུགས་ཤིག །ས་མ་ཡ། རྒྱ་རྒྱ་རྒྱ། མངྒ་ལཾ།། །།