'khor gyis rlung sgrub la mi dbang snying shun la brten pa'i lha mo'i rlung sgrub kyi pha rol khrag nad kyi phung ba

Resource ID	SCv11p866
Title	'khor gyis rlung sgrub la mi dbang snying shun la brten pa'i lha mo'i rlung sgrub kyi pha rol khrag nad kyi phung ba
Topics	Chadrupa
Sub-Topics	rlung bsgrub
Author	Gelek Pelsang
Link	BDRC W23922 WA00KG09215 (p.341)

༈ འཁོར་གྱིས་རླུང་བསྒྲུབ་ལ། མི་དབང་སྙིང་ཤུན་ལ་བརྟེན་པའི་ལྷ་མོའི་རླུང་བསྒྲུབ་ཀྱི་ཕ་རོལ་ཁྲག་ནད་ཀྱི་ཕུང་བ་བཞུགས་སོ།
༈ ༼དེ༽ གཉིས་པ་འཁོར་གྱི་རླུང་བསྒྲུབ་ལ། མ་ཧཱ་ཀཱ་ལ་ན་མོ།
ལས་མཁན་གཙོ་བོ་ལྷ་མོ་ཡི། །རླུང་གི་སྦྱོར་བ་འདི་ལྟར་རོ། །མི་དབང་རླུང་གི་ཤུན་པ་རུ། །གཏད་ཀྱི་སོལ་ལམ་ཐལ་བ་དང་། །དྲེལ་དང་ལུག་ཁྲག་སྦྱར་ནས་ཀྱང་། །ལིངྒ་སྔགས་ཅན་བྲིས་ནས་སུ། །ཟག་པ་བྱུགས་ལ་ནང་དུ་བཅུག །མི་དབང་རྐང་གི་ཐུན་དུ་སྦྱར། །ཐོད་པ་མཚན་ངན་ནང་དུ་བཅུག །རེ་བ་ནག་པོའི་བསྟན་ལ་གཞུག །གྲི་སོལ་དུག་ཁྲག་བོང་སྲེབ་གཅིན། ཁྱི་ར་ཕག་དང་ལྕེ་ལྕང་བྲུན། །མུ་ཟི་དཀར་ནག་གུ་གུལ་ནག །རམ་དུག་སྒོག་གསུམ་ཐོད་པ་བཀང་། །ཡུག་སའི་དོར་རྟའི་གུར་ཡང་ཕུབ། །རང་ཉིད་ཡེ་ཤེས་མགོན་པོར་བསྐྱེད། །བསིལ་བའི་ཚལ་ནས་སྤྱན་དྲངས་ལ། །གཤིན་རྗེ་གཤེད་ཀྱི་གཟི་ལྡངས་བསྐྱེད། །འབྱུང་བཞི་ཕྱེད་གཉིས་ལྕགས་སྣོད་དུ། །ཆོ་ག་གསུམ་ལས་ལྷ་མོ་བསྐྱེད། །ལྷ་མོ་སྤྱན་དྲངས་དེ་ལ་བསྟིམ། །ཐུན་བར་གྲི་ལྕགས་ཐུན་རྣམས་དཀྲུགས། །རང་གི་ཐུགས་ཀའི་ས་བོན་ལས། །འོད་འཕྲོས་མདུན་གྱི་ལྷ་མོ་བསྐུལ། །ལྷ་མོ་ཁྲོས་ནས་དུག་རླངས་གིས། །དགྲ་བོ་མྱོས་པར་བསམ་ནས་ཀྱང་། །ཐུན་གྱིས་ལེགས་པར་བྲབ་ནས་སུ། །ལྷ་མོ་དཔག་མེད་སྤྲོས་ནས་ཀྱང་། ཁ་ནས་ཁོང་སར་ཞུགས་ཚེ་ན། །རལ་གྲིས་སྲོག་རྩ་རྦད་ཀྱིས་བཅད། །སྙིང་ཁྲག་དམར་པོ་ཞལ་དུ་གསོལ།
བྷྱོ་མ་མོ་ནག་མོ་བེ་ཏ་ལི་སེནྟ་ཀུ་ལུ་ཀུ་ལུ་མ་ཧཱ་བ་ལིངྟ་ཆེ་གེ་མོ་མཱ་ར་ཡ་ཧཱུྃ་ཕཊ།
ལྷ་མོའི་གཏའ་གཏོར་བྱིན་གྱིས་བརླབས་ལ། །འཕྲལ་གཏོར་རྒྱུན་དུ་འབུལ་བ་གཅེས། །འབོད་རྦད་བསད་གསུམ་འདི་ན་མེད། །རང་གི་སྙིང་གར་ཆོས་འབྱུང་ནང་། །ལྷ་མོ་ཚོན་གང་འབྲལ་མེད་བསམ། །འདི་ནི་མི་བརྗིད་དམ་ཚིག་བསམ། །ཞག་བདུན་བར་དུ་དྲིལ་བ་ནི། །ཁྲག་ནད་ཀྱིས་ནི་ཕ་རོལ་ཕུང་། །མཻ་ཏྲིས་ལས་སྦྱོར་མཛད་པ་ལས། །འདི་ལས་ཟབ་པ་མེད་དོ་ཞེས། །གུཔྟ་བཛྲ་གསུངས་ནས་ཀྱང་། །ལྷ་མོའི་སྙིང་ཤུན་མན་ངག་འདི། །རིན་ཆེན་བརྩོན་འགྲུས་ཁྱོད་ལ་གཏད། །ཅེས་གསུངས་སོ།
།མང་ཐོས་དགེ་ལེགས་དཔལ་བཟང་གིས། མཁས་གྲུབ་གོང་མའི་མན་ངག་ལ། །ལྷད་ཞུགས་བསལ་ནས་དག་པར་བྱས།
།ལྷ་མོའི་རླུང་བསྒྲུབ་ཀྱི་ཤོག་དྲིལ་ལོ།།