Lha mo re ma ti'i sgrub thabs kun gyi bcud bsdus gnad bskul

Resource ID	Sup21
Title	lha mo re ma ti'i sgrub thabs kun gyi bcud bsdus gnad bskul
Topics	Pelden Lhamo
Sub-Topics	Sadhana
Author	Sangyé Tönpa
Link	BDRC W3CN18508 (v3p.84)

yig chung left to input
༈ ཕྱག་དྲུག་ཡེ་ཤེས་མགོན་པོའི་ཆོས་སྐོར་ལས། ལྷ་མོ་རེ་མ་ཏིའི་སྒྲུབ་ཐབས་ཀུན་གྱི་བཅུད་བསྡུས་གནད་བསྐུལ་བཞུགས་སོ།

ན་མོ་གུ་རུ།
ལྷ་མོའི་སྒྲུབ་ཐབས་འདི་ལ་བཞི་སྟེ། བསྒྲུབ་པ། བསྙེན་པ། ལས་ལ་སྦྱར་བ། དྲེན་བཅའ་བའོ།
།དང་པོ་བསྒྲུབ་པ་ནི། རང་ཕྱག་ན་རྡོ་རྗེ་ཞལ་གཅིག་ཕྱག་གཉིས་པ་གཡས་རྡོ་རྗེ་གཡོན་དྲིལ་བུ་བསྣམས་པ། སྐུ་ལ་སྦྲུལ་གྱིས་བརྒྱན་པ་གཅིག་ཏུ་བསྒོམ་ལ། དེའི་མདུན་དུ་༼ཡིག་གེ་༽དྷ་གྱུར་པ་ལས་དྲེའུ་ག་པ་ཅུང་ཟད་སེར་བའི་མདངས་དང་ལྡན་པ། དེའི་སྟེང་དུ་༼ཡིག་གེ་༽ཕ་ནག་པོ་གྱུར་པ་ལས་ལྷ་མོ་སྐུ་མདོག་སྔོ་ནག་མོ་ཞལ་གཅིག་ཕྱག་བཞི་མ། གཡས་དང་པོ་རལ་གྲི་འཛིན་པ། འོག་མ་གྲི་གུག་འཛིན་པའོ། །གཡོན་དང་པོ་བཾ་འོག་མ་ཐོད་པ་འཛིན་པ་ཕྱེད་དཀྱིལ་བཞུགས་པ་གཅིག་བསྐྱེད་ལ། ལྷོ་ནུབ་འཚམས་ནས་དེ་ཁོ་ན་འདྲ་བ་གཅིག་ཛ་ཧཱུྃ་བཾ་ཧོས་དགུག་བཞུག་ཅིང་དབང་དུ་བྱས་ལ། ཨོཾ་མ་མ་སརྦ་ཙ་དྷུ་ར་བྷ་ཀྵ་ཛ་རེ་མ་ཏྲི་འུར་བ་འུར་བ། ས་མ་ཏི་ར་ཙ་ཧཱུྃ་ཧཱུྃ་ཕཊ་ཕཊ། ཞེས་པའི་བསྙེན་སྔགས་འབུམ་ཕྲག་གསུམ་བཟླས་པ་ནི་གྲངས་ཀྱི་བསྙེན་པའམ་དུས་དང་མཚན་མའི་བསྙེན་པ་ཅི་རིགས་པ་བྱ་བ་ནི་བསྒྲུབ་བསྙེན་གཅིག་དུ་དྲིལ་བའོ། །ལས་བྱ་བ་ནི་བཀྲ་མི་ཤིས་པའི་གནས་སུ་དུར་ཁྲོད་ཀྱི་ས་ལ་མཎྜལ་གྲུ་གསུམ་ཁྲུ་གང་པ་དུག་སྣ་དང་ཁྲག་སྣས་ནག་པོར་གྱུགས་ལ། ནས་ནག་གི་ཕྱེ་ལ་བྱས་པའི་དཔལ་བཤོས་ཁྲུ་གང་པ་གཅིག་བྱས་ལ་མཐའ་མ་་་་་་་ཀྱུས་དག །ནལ་བུའི་ཁྲུ་མ་ལ་གཞི་བྱས་ལ་མཚོན་གྱི་ནང་དུ་དྲི་ཁྲག་དང་ནལ་བུའི་ཁྲག་གཏང་པས་ལྷ་མོའི་སྐུ་བྲིས་ལ་དཔལ་ལ་གཟུགས་སོ། །དེའི་མདུན་དུ་གྲུ་གསུམ་འཛུབ་གང་པ་གཅིག་བརྐོས་ལ་དགྲ་བོའི་ལིང་ག་དུག་དང་ཁྲག་གིས་བྲིས་ལ་འབྲུབ་ལུང་གི་ནང་དུ་གཞུག །དེ་ནས་ལྷ་དང་དབྲལ་བར་བྱ་བ་ནི། ལྷ་མོའི་ཐུགས་ཁ་ནས་འོད་ཟེར་སྐལ་པའི་མེ་ལྟ་བུ་འཕྲོས་པས་དགྲ་བོའི་ལྷ་རྣམས་རྒྱ་མཚོའི་འགྲམ་དུ་བསྒྲལ་བར་བསམ། འོད་ལྕགས་སྐྱུ་ལྟ་བུ་འཕྲོས་པས་དགྲ་བོའི་རྣམ་ཤེས་བཀུག་ནས་ལིང་ག་ལ་ཐིམ་པར་བསམས་ནས། དུག་དང་ཡུངས་དཀར་དང་ཀེ་ཚེ་ལ་སོགས་པ་རྣམས་ཀྱིས་འབྲབ་ཀྱི། སི་དུ་ཡཾ་དུ་ཛ་མ་ར་ཡ་སོད་སོད་ཀྲིང་བྷ་ལ་སོད་འུར་བ་འུར་བ་སོད་སོད་རྒྱུག་རི་རྒྱུག་རི་སོད་སོད། ཞེས་ཟློས་ཀྱི་ཐུན་གྱིས་བྲབས་པས་རིད་པ་འདར་ཡེད་ཡེད་འདུག་པར་བསམ། ཞག་བདུན་གྱི་བར་དུ་ཐུན་བཞིར་དེ་ལྟར་བྱའོ། །ཐུན་བཞིར་དཔལ་བཤོས་ལྷ་མོར་བསྐྱེད་པ་ལ་གཏོར་མ་རྒྱན་ཅན་དགྲ་བོའི་ཤ་ཁྲག་ཏུ་བསམས་ཀྱི་དབུལ་ལོ། །གཏོར་སྔགས་ནི་བསྙེན་སྔགས་ཀྱི་ཧཱུྃ་ཕཊ་བཞག་ལ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། མ་མ་ཁ་རཾ་ཛ། ལིང་ཏ་ཧཱུྃ་ཧཱུྃ་ཕཊ་ཀྱིས་དབུལ་སྨོད་བཅོལ་དྲག་ཏུ་བྱའོ། །ཞག་བདུན་ཚར་བ་དང་སྐྱེར་ཚེར་ཁྲག་སྣ་དུག་སྣ་དགྲ་བོའི་ལིང་ག་རྣམས་བསྲེག་རྣམ་ཤེས་འོག་མིན་དུ་འཕང་པ་གལ་ཆེའོ།
།རྟེན་བཅའ་བ་ནི། བྱ་ནག་གི་རྒྱལ་མཚན་གྱི་ནང་དུ་ལྷ་མོའི་སྐུ་དར་ནག་ལ་བྲིས་ལ་བཞུག་གོ །ནང་རྟེན་ནལ་བུའི་རྒྱལ་མཚན་ལ་ལྷ་མོའི་སྐུ་བྲིས་ལ། གྲི་ཁྲག་བཙན་དུག་སྒོག་སྐྱ་ཚིལ་ཆེན་གྱི་དུད་པས་དུས་བཟངས་ལ་བདུག་དགྲ་བོའི་ཕྱོགས་སུ་ཁ་བསྟན་ལ་བཞག །དགྲ་བོའི་ལིང་ག་ལ་མིང་རུས་བྲིས་ལ་རྒྱལ་མཚན་གྱི་གསང་གནས་སུ་བཞུག །གནོད་བྱེད་ཀྱི་ལིང་ག་ཡང་བཞུག་གོ །ནང་རྟེན་དང་གནན་པ་ཆིག་དྲིལ་དུ་བསྟན་པ་ཞེས་བྱ་བའི་གནད་ཡིན། གཞན་ལ་སྟོན་ན་གནན་པའི་གནད་འདི་བསྟན་དུ་མི་རུང་ངོ་། གསང་རྟེན་ལ་ནལ་བུའི་སྙིང་གི་རྩའི་ནང་དུ་ལྷ་མོའི་སྐུ་ནལ་བུའི་ཁྲུ་མ་ལ་དར་གི་གཞི་བྱས་ལ། ལྷ་བཟོ་བ་བསྙེན་པ་སོང་པས་སྐར་མ་རྒྱལ་གྱི་ཉི་མ་ལ་ཚར་བར་བྲིས་ལ། དར་ལེབ་རྒན་ལ་དྲི་བཟངས་ཀྱིས་ཆུས་བྱུགས་པ་ལ་བསྟན་མ་བཅུ་གཉིས་ཀྱི་གཟུགས་བྲིས་པས་དྲིལ་ལ་རྩ་དབུ་མའི་ནང་དུ་བཞུག །རོ་རྐྱང་གཉིས་ཀྱི་ནང་དུ་དཔལ་མགོན་བདུན་བཅུ་རྩ་གཉིས་བྲིས་ལ་བཞུག །རིན་པོ་ཆེ་སྣ་ཚོགས་བདར་ལ་བཞུག །སྙིང་དར་སྣ་ཚོགས་ཀྱིས་དྲིལ་ལ་གཡོན་དུ་གདགས། མིས་མ་ཚོར་བ་གལ་ཆེའོ། །སྒྲུབ་ཐབས་ཀུན་གྱི་བཅུད་བསྡུས། ལྷ་མོའི་གནད་བསྐུལ་མན་ངག་རྫོགས་སོ། །གཞན་ལ་མ་སྟེར་བྱིན་ན་དཔའ་བོའི་ལག་དུ་མཚོན་གཏད་པ་དང་ཁྱད་མེད་པས་སྡིག་ཆེའོ། །མ་བྱིན་གཅིག་བྱིན་ན་དམ་ཚིག་ཎ་དོ། ངས་ཁྱོད་མེན་པ་ལ་བྱིན་པ་ཡོད་རི་སྐན། འདི་ལས་ལྷག་པའི་ལྷ་མོ་དཀོན། ཞལ་གདམས་ཆིག་བརྒྱུད་ཁྱད་པར་འཕགས། ཨིཐཱི།
སངས་རྒྱས་སྟོན་པའི་ཕྱག་བྲིས་གསེར་གདོང་མ་ནས་ཞལ་བཤུས་པ་ཡིན་ནོ། །ཤིན་དུ་ཡིད་ཆེས་སོ།