Mai tri pa'i lugs kyi lha mo phyag gnyis ma'i srog sgrub chung ba

Resource ID	SCv11p666
Title	mai tri pa'i lugs kyi lha mo phyag gnyis ma'i srog sgrub chung ba
Topics	Pelden Lhamo
Sub-Topics	Life Sadhana
Author	Öntön Kyergangpa
Associated Person	Maitripa Khyungpo Neljor
Link	W23922 WA00KG09215 (p.248) BDRC W3CN18508 (v3p.24 alt. version)

༈ ཏི༽ མཻ་ཏྲི་པའི་ལུགས་ཀྱི་ལྷ་མོ་ཕྱག་གཉིས་མའི་སྲོག་སྒྲུབ་ཆུང་བ་བཞུགས་སོ།།
༈ ༼གུ༽ རྡོ་རྗེ་ལྷ་མོ་ལ་ཕྱག་འཚལ་ལོ།
།བླ་མ་མཻ་ཏྲི་པའི་ལུགས་ཀྱི་ལྷ་མོ་ཕྱག་གཉིས་མའི་སྲོག་བསྒྲུབ་འདི་ལ། རྫས་ཉུང་དཀར། སྐེ་ཚེ། དུག་སྣ། ཁྲག་སྣ་རྣམས་མནོལ་གྲིའི་ཐོད་པར་བླུག་ལ། གྲོག་པོ་ཕུ་གདུགས་ཀྱི་འཇག་མ་དང་། དགྲ་བོའི་དྲི་ཆེན་རྙེད་ན་རབ། མ་རྙེད་ན་རྐང་རྗེས་ཀྱིས་ས་ལ་ལིངྒ་མཐོ་གང་བ་བྱའོ། །དེ་ནས་རང་གིས་མ་ཉེས་པའི་སྤང་གཟུགས་སོ། །འཇིག་རྟེན་པ་ལ་ཕུད་དང་གཏོར་མ་བྱིན་ལ་གྲོགས་བཅོལ། རང་ཉིད་ཁྲོ་བོ་གཤིན་རྗེ་གཤེད་ཕྱག་ན་རྡོ་རྗེར་བསྒོམ་ལ། ཐུགས་ཁ་ནས་འོད་འཕྲོས་པས་བྱང་ཤར་ནས་ལྷ་མོ་སྐུ་མདོག་དམར་མོ་མཆེ་བ་བརྩིགས་པ། ཕྱག་གཡས་ཟངས་གྲི་དམར་པོས་དགྲ་བོའི་སྲོག་རྩ་གཅོད་པ། གཡོན་ནད་ཀྱི་རྐྱལ་པ་ཁ་ཕྱེ་བས་དགྲ་བོའི་རྣམ་ཤེས་དུག་དང་ནད་ཀྱིས་མྱོས་ཏེ་འཆི་བར་བྱེད་པ་འཁོར་མ་མོ་བསམ་གྱིས་མི་ཁྱབ་པས་ནད་དང་དུག་གི་དགྲ་བོ་མྱུར་དུ་བརླག་པར་བྱེད་པར་བསམ་ལ། དེ་འདྲ་སྤྱན་དྲངས་ཏེ་མདུན་དུ་བཞུགས་པར་བསྒོམ། ལིངྒ་དགྲ་བོ་དགུག་གཞུག་བྱས་ལ། གྲི་ལྕགས་ལས་བྱས་པའི་ཕུར་པ་སོར་བརྒྱད་པ་གཅིག་ལྷ་མོར་བསྐྱེད་ནས། དེ་ལ་ཡང་གོང་གི་དེ་འདྲ་བའི་ལྷ་མོ་སྤྱན་དྲངས་ཏེ་བསྟིམ་ནས། ཕུར་པ་དེ་ལིངྒའི་སྙིང་གར་གཟུགས། དྲག་པོའི་ཞེ་སྡང་མ་ཞི་བའི་བར་དུ་ལྷ་མོ་འཁོར་དང་བཅས་པས་དུག་དང་མཚོན་གྱིས་ཆར་ཕབ་པས། དགྲ་བོའི་ཁ་ཕུགས་དུ་ཤི་བར་བསམ་ལ། ཐུན་རྡེབ་ཅིང་དྲག་སྔགས་འདི་བཟླས་སོ།
།ཧི་ཧི་མ་མ་ཐུན་བྷྱོ། དྲག་མོ་རཀྟ་དགྲ་བོ་ལ་ཐུན་བྷྱོཿ རག་མོ་ཡག་མོ་དགྲ་བོ་ཆེ་གེ་མོ་སོད་མཱ་ར་ཡ། ཅེས་བཟླས་སོ།
།དེ་ལྟ་བུ་ཐུན་བཞིར་བཟླས་པས། བུད་མེད་ནག་མོས་བདག་ལ་སྙིང་སྟེར་བ་དང་། དགྲ་བོའི་སྲོག་ཁྲུང་འབྱེད་པ་ལ་སོགས་པ་ཉམས་སྣང་། རྨི་ལམ་དུ་འབྱུང་བར་འགྱུར་ཏེ། གྲུབ་པའི་མཚན་མའོ། །དེ་ཡང་ཞག་བདུན་བཅུའམ་ཉེར་གཅིག་ལ་རབ་འབྲིང་ཐ་གསུམ་གྱི་དབང་གི་འགྲུབ་པར་འགྱུར་རོ། །དམར་གཏོར་རེ། དུས་སྲོད་ཐོ་རངས་བཏང་། དམ་ཚིག་ཏུ་དྲིའུ་ཤ་མི་ཟ། བླ་མ་ལ་གུས་པར་བྱ། འདི་སྒྲུབ་ཀྱི་བར་ལ་ཡུག་ས་མོ་ལ་མི་རེག །འདི་དུག་དང་འདྲ་བས་མི་ལ་མི་སྦྱིན། ལས་དང་སྐལ་བར་ལྡན་པ་གཅིག་དང་ཕྲད་པར་ཤོག
།བླ་མ་མཻ་ཏྲི་པའི་ལུགས་ཀྱི་ལྷ་མོ་ཕྱག་གཉིས་མའི་སྲོག་སྒྲུབ་ཆུང་བ་རྫོགས་སོ། །འདི་སྐྱེར་སྒང་པས་མཛད་པའོ། །གུ་ཧྱ་ས་མ་ཡ།།

W3CN18508: རྡོ་རྗེ་ལྷ་མོ་ལ་ཕྱག་འཚལ་ལོ།
།བླ་མ་མཻ་ཏྲི་པའི་ལུགས་ཀྱི་ལྷ་མོ་སྲོག་སྒྲུབ་འདི་ལ། རྫས་ཉུངས་དཀར། ཉུངས་ནག །ཀེ་ཚེ། ཁྲག་སྣ། དུག་སྣ་སྣ་ཚོགས་རྣམས་བསྣོལ་ལ་གྲི་མོའི་ཐོད་པར་བླུགས་ལ་གྲོག་མོ་ཕུགས་བརྡུགས་ཀྱི་འཛག་མ་དང་། དགྲ་བོའི་དྲི་ཆེན་རྙེད་ན་རབ། །མ་རྙེད་ན་རྐང་རྗེས་ཀྱི་ས་རྣམས་བསྲེས་ལ་ལིང་ག་མཐོ་གང་བ་གཅིག་བྱའོ། །དེ་ནས་མ་ཉེས་པའི་དཔང་གཟུགས། མ་ཧཱ་ཀ་ལ་ལ་ཕུད་གཏོར་ལ། རང་ཉིད་ཁྲོ་བོ་གཤིན་རྗེ་གཤེད་དམ། ཕྱག་ན་རྡོ་རྗེར་བསྒོམས་ལ། ཐུགས་ཁ་ནས་འོད་ཟེར་དམར་ནག་འཕྲོས་ཏེ། བྱང་ཤར་ནས་དཔལ་ལྡན་ལྷ་མོ་སྐུ་མདོག་དམར་བ། མཆེ་བ་གཙིགས་པ། ཕྱག་གཡས་ཟངས་གྲི་དམར་པོས་དགྲ་བོའི་སྲོག་རྩ་གཅོད་པ། གཡོན་ན་ནད་ཀྱི་རྐྱལ་པ་ཁ་ཕྱེ་བས་དགྲ་བོའི་རྣམ་ཤེས་དུག་དང་ནད་ཀྱིས་མྱོས་ཏེ་འཆི་བ། འཁོར་ནག་མོ་བསམ་གྱིས་མི་ཁྱབ་པས་ནད་དང་དུག་གིས་དགྲ་བོ་མྱུར་དུ་བརླག་པར་བསམས་ལ། ལིང་ག་ལ་དགུག་གཞུག་བྱས་ཏེ། གྲི་ལྕགས་ལས་བྱས་པའི་ཕུར་པ་སོར་བརྒྱད་པ་གཅིག་ལྷ་མོར་བསྐྱེད་དེ་སྤྱན་དྲངས་ནས་བསྟིམ་ལ། ལིང་གའི་སྙིང་ཁར་གཟུགས་དུས་དྲག་པའི་ཞེ་སྡང་རང་ག་མ་ལས་མ་ཡལ་བར་བྱས་ཏེ་དགྲ་བོའི་ལུས་ལ་དུག་དང་མཚོན་གྱི་ཆར་ཕབ་པས་དགྲ་བོའི་ཁ་ཕུང་དུ་ཤི་བར་བསམས་ལ། ཐུན་བརྡེག་ཅིང་དྲག་སྔགས་འདི་བཟླས་སོ།
།ཛ་ཛ་མ་མ་ཁ་དྷ་རཀྵ་དུན་བྷྱོཿ ཅི་ཏ་མ་མ་དགྲ་བོ་ལ་བྷྱོཿ རག་མོ་ཡག་མོ་དགྲ་བོ་ཆེ་གེ་མོ་མ་ར་ཡ་སོད་སོད།
ཅེས་བཟླས་པས་ཞག་བདུན་བུད་མེད་ནག་མོས་བདག་ལ་རྨི་ལམ་དུ་སྙིང་སྟེར་བ་དང་དགྲ་བོའི་ཁ་ཁུང་འབྱེད་པ་འབྱུང་སྟེ། དེས་འགྲུབ་པར་འགྱུར་རོ། །འབྲིང་བཅུ་བཞི། ཐ་མ་ཉི་ཤུ་རྩ་གཅིག་ལ་འགྲུབ་པར་འགྱུར་རོ། །གཏོར་མ་དམར་གཏོར་དེ་སྲོད་ཐོ་རངས་དུས་ཚོད་ལ་བཏང་ངོ་། །འདི་ལ་འཚམས་དམ་པར་བཅད་ལུས་ངག་ཡིད་གསུམ་ཞུད་བསྲུངས་ནས་ཉིན་མཚན་གཉིས་པོ་སྒྲུབ་པ་ལས་སྦྱོར་ལ་འབད་ན་ངེས་པར་འགྲུབ་ངོས་པར་འདུག་ཅས་བླ་མ་ཤངས་པ་གསུང་ངོ་། །དམ་ཚིག་ཏུ་དྲེའུ་ཤ་མི་ཟ། བླ་མ་ཆོས་སྐྱོང་ལ་ཡིད་ཆེས་ཤིང་གུས་པར་བྱ། སྒྲུབ་ཀྱི་བར་དུ་ཡུགས་ས་མོ་ལ་མི་རེག །འདི་ནི་དུག་དང་འདྲ་བས་མི་ལ་མི་སྦྱིན། ལས་སྐལ་ཅན་དང་འཕྲད་པར་ཤོག ཨྀཐི།།