Mkha' spyod dkar mo

From Shangpa Resource Center








༼མཁའ་སྤྱོད་དཀར་མོ།༽
ན་མོ་གུ་རུ།
ཡང་ལུགས་གཅིག་ལ། གཞན་གོང་དང་འདྲ་བ་ལ། མདུན་དུ་ཧྲཱིཿཚེག་དྲག་དང་བཅས་པ་གཅིག་བསམ། དེ་འོད་དུ་ཞུ་བ་ལས། ཇོ་མོ་མཁའ་སྤྱོད་མ་སྔར་དང་འདྲ་བ་ཅིག་བསྐྱེད་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་སྔོན་པོ་རྣམས་རིམ་པ་བཞིན་དུ་བསམ་ལ། དེ་ལས་འོད་ཁ་དོག་༼དཀར་དམར་སྔོ་༽གསུམ་འཕྲོས་པས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕོག་པས། དེང་གི་སྐུའི་ཡོན་ཏན་ཐམས་ཅད་བསྡུས་པ། རྗེ་བཙུན་མའི་སྤྱི་བོའི་ཨོཾ་ལ་ཐིམ། གསུང་གི་ཨཱཿལ་ཐིམ། ཐུགས་ཀྱི་ཧཱུྃ་༼ཨོཾ་གསུམ་མའི་སྔགས་བཟློས་པ་ལ་ཟེར་གསུང་༽ལ་ཐིམ་པར་བསམས་ལ། དེ་ལ་ཡིད་ཀྱིས་མཆོད་ནས་གསོལ་བ་བཏབ་པས། ༼ཨོཾ་ཨཱཿཧཱུྃ་གསུམ་གྱི་དཀར་དམར་མཐིང་ཀའི་༽འོད་ཁ་དོག་གསུམ་རྗེ་བཙུན་མའི་གནས་གསུམ་ནས། གཅིག་ལ་གཅིག་འཁྲིལ་ནས་བྱུང་། རྗེ་བཙུན་མའི་སྐུའི་དབྱིབས་བརྒྱུད། པདྨ་ནས་བྱུང་སྟེ་འོད་ཁ་དོག་གསུམ་རང་གི་གནས་གསུམ་དུ་སོ་སོར་ཐིམ་པས་སྡིག་སྒྲིབ་དང་། ནད་གདོན་དང་། བར་དུ་གཅོད་པ་ལ་སོགས་པ་དག་ནས། མི་རྟོག་པ་ཕྱག་རྒྱ་ཆེན་པོའི་ངང་དུ་བཞག་པར་བྱའོ།
།འཕྲོ་གཅོད་ཙ་ན། མདུན་གྱི་ཇོ་མོ་རང་གི་སྤྱི་བོར་བྱོན་པར་བསམ་ལ། མ་རྡོ་རྗེ་རྣལ་འབྱོར་མས། བདག་ཡང་དག་པ་མཁའ་སྤྱོད་ཀྱི་གནས་སུ་འཁྲིད་དུ་གསོལ། ཞེས་གསོལ་བ་བཏབ་པས། ཇོ་མོ་འོད་དུ་ཞུ་ནས་རང་གི་སྤྱི་བོར་ཐིམ་པས། ལུས་ཀྱི་ནང་བདུད་རྩིས་ཁེངས་པ་དང་། སྐུ་གསུང་ཐུགས་རྡོ་རྗེས་བྱིན་གྱིས་རླབས་པ་ཡིན་སྙམ་དུ་མོས་པ་བྱའོ།
།སྐབས་འགའ་ཞིག་ཏུ་རང་གི་སྤྱི་བོར་རྗེ་བཙུན་མ་སྔ་མ་བཞིན་བསམས་ནས། རང་གི་རིག་པ་ལྟེ་བ་ནས་དྲངས་ཏེ་ཚངས་བུག་ནས་བཏོན། ཇོ་མོའི་པདྨ་ན་ཡར་ཞུགས་ནས། རིག་པ་ཐུགས་ཀར་ཞུགས་ནས་མཁའ་སྤྱོད་དུ་འགྲོ་བར་བྱའོ། །སྦྱོར་རྗེས་གཉིས་སྔ་མ་ལྟར་རོ།
ཁྱུང་པོ་རྣལ་འབྱོར་པའི་ལུགས་སོ། །ཤུབྷཾ།། །།