Rdor slob bla ma bka' brgyud bstan 'dzin dang grub dbang nor bu don grub gnyis kyi rnam thar

Resource ID	ND1
Title
Topics	Biography
Associated Person	Khedrup Kagyü Tendzin Norbu Döndrup
Link	BUDA

༄༅། །རྡོར་སློབ་བླ་མ་བཀའ་བརྒྱུད་བསྟན་འཛིན་དང་། གྲུབ་དབང་ནོར་བུ་དོན་གྲུབ་གཉིས་ཀྱི་རྣམ་ཐར།

འདིའི་མདུན་ནས་དཔལ་སྤུངས་རྡོར་སློབ་བླ་མ་ཀར་བསྟན་ནམ་བཀའ་བརྒྱུད་བསྟན་འཛིན་གྱིས་གསན་ཏེ། འདི་ཉིད་ཀྱི་རྣམ་ཐར་ཡིག་ཆ་སོགས་མ་མཇལ་བས་ཞིབ་པར་འབྲི་རྒྱུ་རྔོ་མི་ཐོགས་ཀྱང་། འཇམ་མགོན་བློ་གྲོས་མཐའ་ཡས་དང་། མཁན་ཆེན་བཀྲ་ཤིས་འོད་ཟེར་སོགས་བླ་མ་མང་དུ་བསྟེན་ཏེ་མདོ་སྔགས་རིག་གནས་ཀུན་ལ་མཁས་ཤིང་། ཁྱད་པར་ཟབ་ལམ་ནཱ་རོ་དང་ནི་གུ་ཆོས་དྲུག །ཕྱག་ཆེན་དང་དུས་ཀྱི་འཁོར་ལོའི་བསྐྱེད་རྫོགས་ཀྱི་ཉམས་བཞེས་སོགས་ཕུལ་དུ་ཕྱིན་ཏེ་གྲུབ་པའི་གོ་འཕང་མཐོན་པོར་གཤེགས་པ་དེའི་མདུན་ནས་རྡོར་སློབ་བླ་མ་གྲུབ་དབང་ནོར་བུ་དོན་གྲུབ་ཀྱིས་ཞུས་པ་ཡིན་ཏེ། འདི་ནི་སྡེ་དགེ་ཨ་བཀྲ་ནང་ཞེས་པར་སྐུ་འཁྲུངས། ཆུང་ངུའི་དུས་ནས་ཀྱང་རབ་ཏུ་བྱུང་ཞིང༌། ཚེ་བློས་བཏང་གིས་ཐོས་བསམ་སྒོམ་གསུམ་སྤྲུགས་མར་མཛད་དེ་བསྟན་པ་འཛིན་སྐྱོང་སྤེལ་གསུམ་མཛད། མཁས་ཤིང་གྲུབ་པའི་དབང་ཕྱུག་བླ་མ་དུ་མའི་མདུན་ནས་མདོ་སྔགས་གསར་རྙིང་གི་ཆོས་སྒོར་མཐའ་ཡས་པ་ཞིག་གསན་བསམ་ཉམས་བཞེས་དཔྱིས་ཕྱིན་པ་གནང་ཞིང་། དུས་འཁོར་ཉམས་བཞེས་མཛད་ཚུལ་ལ་མཚོན་ན། ཐོག་མར་འཇམ་མགོན་བློ་གྲོས་མཐའ་ཡས་ཀྱི་མདུན་ནས་དུས་འཁོར་དབང་ཆེན་ཚར་གཅིག་གསན། དེ་རྗེས་འཇམ་མགོན་ཞལ་སློབ་མཁན་ཆེན་བཀྲ་ཤིས་འོད་ཟེར་གྱི་མདུན་ནས་དུས་འཁོར་དབང་ཆེན་ལན་གཅིག་གསན་ཏེ་དུས་འཁོར་བློ་འཛིན་མཁན་དུ་གྱུར་ནས་ཆོ་ག་ཕྱག་ལེན་སོགས་ལ་ཤིན་ཏུ་མཁས་པར་གྱུར། དེ་རྗེས་སྒྲུབ་ཁང་དུ་བཞུགས་སྐབས་འཇམ་མགོན་ཡབ་སྲས་ཀྱི་ཞལ་སློབ་རྡོར་སློབ་བླ་མ་དྭགས་པོ་བཀའ་བརྒྱུད་པའི་བླ་མ་བརྒྱུད་རིམ་གྱི་རྣམ་ཐར། ཀར་བསྟན་གྱི་མདུན་ནས་དུས་ཀྱི་འཁོར་ལོའི་དབང་ཆེན་ཆ་ཚང་དང་། ལྷ་དགུའི་དབང་། ལྷན་སྐྱེས་ཀྱི་དབང་། བསྐྱེད་རིམ་ལྷ་ཁྲིད། རྫོགས་རིམ་སྦྱོར་བ་ཡན་ལག་དྲུག་གི་ཁྲིད་བཅས་གསན་ནས་བསྐྱེད་རྫོགས་ཀྱི་ཉམས་ལེན་མཐར་ཕྱིན་པ་གནང་། བར་སྐབས་སུ་བྱམས་མགོན་ཏཱ་ཡི་སི་ཏུ་པདྨ་དབང་མཆོག་རྒྱལ་པོའི་སྐུ་ཚེའི་ཚེ་སྒྲུབ་དང༌། སྐུ་འཁྲུས་ཚེ་དབང་འབུལ་མཁན་ཞུས། དགུང་གྲངས་བཞི་བཅུ་སྐོར་ནས་རི་མཚམས་དང་བཅད་རྒྱ་འཁོར་ཡུག་ཏུ་མཛད། སྒྲུབ་གནས་གཙོ་བོ་ནི་དཔལ་སྤུངས་གདན་ས་ནས་རི་ཁྲོད་གོང་ལ་འགྲོ་བའི་ལམ་བར་དུ་ཉི་མ་མཁར་སྒོ་ཞེས་པའི་གནས་དེར་མཛད། དགུང་ལོ་བདུན་བཅུ་ནས་འདིར་སྣང་གི་མཚན་འཛིན་རྩད་ནས་ཞིག་སྟེ་མཉམ་རྗེས་དབྱེར་མེད་དུ་འདྲེས། དོན་བཞི་ལོར་དགོངས་པ་ཆོས་དབྱིངས་སུ་གཤེགས་སྐབས་སྐུ་གདུང་བྱིས་པ་ལོ་བརྒྱད་ཙམ་དུ་གྱུར། དེ་ཉིད་རྒྱུད་སྡེ་ཆེན་པོ་བཞིའི་དཀྱིལ་འཁོར་ཞལ་ཕྱེས་ཏེ་ཞུགས་ལ་བཞེན་པའི་ཉིན་ཐོག་ཐག་ཏུ་ནམ་མཁར་འཇའ་ཚོན་གྱི་དྲྭ་བས་སྦྲེལ། ཁ་དོག་སྣ་ཚོགས་ཀྱི་གདུང་དང་རིང་སྲེལ་གྲངས་མེད་པ་བྱོན་པ་སོགས་ཕྱག་ཆེན་ལྟར་ན་སྒོམ་མེད་ཆེན་པོ་དང་། རྫོགས་ཆེན་ལྟར་ན་བློ་འདས་ཆོས་ཟད་ཆེན་པོའི་དགོངས་པ་མངོན་དུ་གྱུར་པའོ་ཞེས་རྗེ་བླ་མའི་ཞལ་སྔ་ནས་ཐོས་པ་ལྟར་བཀོད་པའོ།།