Rmi lam bzlog pa

Resource ID	BB206
Title	rmi lam bzlog pa
Alt. title	dpal mgon po'i rmi lam ngan pa bzlogs pa'i man ngag
Topics	Chadrupa
Sub-Topics	Reversal
Notes	Version of rmi lam ngan pa bzlog thabs

རྨི་ལམ་བཟློགས་པ་བཞུགས་སོ།

བླ་མ་མགོན་པོ་དབྱེར་མེད་ལ་ཕྱག་འཚལ་ལོ།
།མགོན་པོ་ལ་བརྟེན་ནས་རྨི་ལམ་ངན་པ་བཟློགས་པའི་ཐབས་ལ། རྨི་ལམ་ངན་པ་དེ། གཉིད་སད་མ་ཐག་མདུན་དུ། གཏོར་མ་བཤམ་ལ། དེ་ནས་རང་གི་མདུན་དུ་དམ་ཚིག་མགོན་པོ་བསྐྱེད། ཡེ་ཤེས་པ་སྤྱན་དྲང་ལ་བསྟིམས་ལ། བླ་མ་མགོན་པོ་དབྱེར་མེད་ལ་གསོལ་བ་དྲག་ཏུ་གདབ་བོ། །དེ་ནས་ན་མོ་བྷུདྷ་ཡའི་གསོལ་བ་གདབ། བསྟོད་པ་བྱ། རྩ་སྔགས་ལ་བསྙེན་པ་བསྐྱལ་ལོ། །བསྙེན་པ་སྐྱེལ་ཙ་ན་མགོན་པོ་དང་རང་གི་ཞལ་གྱི་སྔགས་འཕྲེང་དེ་དག་འོད་ཟེར་འཕྲིང་ཐག་གི་ཚུལ་དུ་བསམ་ལ་བཟླས། དེ་ལས་འོད་ཟེར་འཕྲོས་པས་རྨི་ལམ་ངན་པ་ཐམས་ཅད་ཐུལ་ཐུལ་ཚིག་པར་བསམ་མོ། །དེ་ནས་གཏོར་མ་འབུལ་ཙ་ན། ནད་གདོན་མི་ཁ་ངན་པ་ཆགས་ཆེ་བ་ཐམས་ཅད་གཏོར་མར། སྔོན་དམར་དུ་བཀྲུག་འདུས་པས་མགོན་པོའི་ལྗག་ལས་འོད་ཟེར་སྦུ་གུ་ཅན་ཟུག་ནས་སིབ་སིབ་གསོལ་བར་བསམ་མོ། །ནན་ཏར་རྨི་ལམ་ངན་ན། ཉིན་མོ་ཡང་གཏོར་མ་བཅས་ལ་གསོལ་བ་གདབས་གསུང་། བྱེས་སམ་གཏོར་མ་མི་འབྱོར་པའི་སར། རང་གི་མདུན་དུ་ཐོད་པར་དམིགས་པས་བསྐྱེད་ལ་འབུལ་གསུང་། འཛོམ་པའི་སར་གཏའ་གཏོར་ལ་སོགས་པ་ཡོད་ཀྱང་གཏོར་ཆུང་ཅིག་བཤམ་དགོས་པ་ཡིན་གསུང་ངོ་།
།དཔལ་མགོན་པོའི་རྨི་ལམ་ངན་པ་བཟློགས་པའི་མན་ངག་ཅེས་བྱ་བ། རྫོགས་སོ།།