Sems 'chi med kyi rtsa ba

From Shangpa Resource Center








Resource ID SCv6p225
Title sems 'chi med kyi rtsa ba
Alt. title śrī amara mahājñāna
dpal 'chi med ye shes chen po
'chi med rdo rje'i tshig rkang
Topics Immortality
Sub-Topics Vajra verses
Author Niguma, Lendarma Lodrö
Associated Person Khyungpo Neljor
Rinchen Zangpo
Link BDRC W23922
BDRC W23605 (p.24)
BDRC W1PD95844 (annotated)
BDRC W4CZ58783 (v1p.287)
BDRC W3CN18508 (v2p.138)
BDRC W8LS16295 (p.31+521)
BDRC W22103 (p.203 annotated)
Notes Translated in english in the book Lady of illusion


༈ སེམས་འཆི་མེད་ཀྱི་རྩ་བ་བཞུགས་སོ།

རྒྱ་གར་སྐད་དུ། ཤྲཱི་ཨ་མ་ར་མ་ཧཱ་ཛྙཱ་ན་ནཱ་མ།
།བོད་སྐད་དུ། དཔལ་འཆི་མེད་ཡེ་ཤེས་ཆེན་པོ་ཞེས་བྱ་བ།
དཔལ་འཆི་མེད་ཡེ་ཤེས་ཆེན་པོ་ལ་ཕྱག་འཚལ་ལོ།
།རྒྱལ་བ་ལོངས་སྐུ་རྡོ་རྗེ་འཆང་ཆེན་གྱིས། །འཆི་མེད་ཡེ་ཤེས་རང་སྒྲ་འདི་སྐད་ཐོས།
།གང་ཞིག་དད་ལྡན་དབང་པོ་དམ་ཚིག་ཅན། །བླ་མ་མཆོག་བསྟེན་འདི་དོན་རྟོགས་པར་གྱིས། །གང་གིས་ཚེ་འདི་བློས་བཏང་ནས། །རྩེ་གཅིག་ཞག་བདུན་ལོ་སྒྲ་ཡིས། །ཇི་ལྟར་ཉོན་མོངས་ལུས་དག་ལ། །ཡེ་ཤེས་ལུས་ནི་རང་དགར་འབྱུང་།
།ཚད་མེད་སེམས་བསྐྱེད་སྔོན་འགྲོ་བས། །ཆོ་ག་གསུམ་མམ་སྐད་ཅིག་གིས། །རང་ལུས་ཡི་དམ་ཡབ་ཡུམ་གྱི། །སྤྱི་གཙུག་ས་བོན་༼ཧཱུྃ་དང་བཾ་༽གྱི་འོད་ཟེར་གྱིས། །ལུས་ཀྱི་ཕྱི་ནང་ཐམས་ཅད་ཀུན།
།དག་ཅིང་སྟོང་གསལ་ཉིད་སྦྱངས་པས། །སྣང་སྟོང་འཇའ་ཚོན་འོད་ཀྱི་སྐུ། །རང་བཞིན་མེད་བཞིན་སྐུ་མདོག་དང་། །ཞལ་ཕྱག་རྒྱན་དང་མེ་ཕུང་བཅས། །གསལ་ལ་རྟོག་པ་མེད་པ་ཡི། །ཟག་མེད་བདེ་སྟོང་ཆེན་པོར་ལྟོས།
།རང་ལུས་སྣང་སྟོང་ལྷ་སྐུ་སེམས། །སེམས་ནི་སྣང་སྟོང་ལྷ་ཡི་སྐུ། །སེམས་དང་ལྷ་སྐུ་དབྱེར་མེད་དེ། །རྨི་ལམ་ཡུལ་དུ་ཆུ་ཟླ་ལྟར།
།རང་བཞིན་ཟུང་འཇུག་ཆེན་པོ་ཡི། །ངོ་བོ་བརྗོད་བྲལ་བློ་འདས་ཏེ། །དེ་ནི་དུས་གསུམ་སངས་རྒྱས་ཀྱིས། །མ་གཟིགས་མི་གཟིགས་གཟིགས་མི་འགྱུར།
།དེ་ལ་ན་རྒྱུ་འཆི་རྒྱུ་དང་། །འཁོར་བ་མ་གྲུབ་མྱང་འདས་ཅིང་། །འཕོ་བྱ་འཕོ་བྱེད་བྲལ་བས་ན། །དེ་ཕྱིར་འཆི་མེད་རང་གྲོལ་ལོ།
།དེ་ལྟར་མ་རྟོགས་རྣལ་འབྱོར་པས། །བསྐལ་པར་བསྒྲུབ་ཀྱང་དོན་མེད་འགྱུར། །ལོག་པའི་ལམ་ཞུགས་ཁོ་ནར་ཟད། །གང་གིས་མཚམས་མེད་ལྔ་རྫོགས་ཀྱང་།
།འཆི་ཁའི་ཚེའམ་དུས་གཞན་དུ། །འཆི་མེད་རྡོ་རྗེའི་ཚིག་རྐང་བཞི། །སྐད་ཅིག་ཡུད་ཙམ་གཅིག་པའམ། །དྲན་ཐོས་རེག་པར་གྱུར་པས་ཀྱང་། །གནད་གཅོད་སྡུག་བསྔལ་རང་དག་ནས། །བར་དོར་ལོངས་སྐུར་མངོན་སངས་རྒྱ། །སྒྲིབ་པ་ཆུང་རྣམས་སྨོས་ཅི་དགོས། །འདི་ནི་འཆུགས་མེད་གནད་ཡིན་ནོ།
།གལ་ཏེ་ལུས་སེམས་རྐྱེན་དབང་གིས། །འཆི་ཁར་དྲན་པར་མ་གྱུར་ཀྱང་། །དཔེར་ན་སྒྱོགས་ཀྱི་འཁྲུལ་འཁོར་བཞིན། །སྔར་གྱི་གནད་ཀྱིས་བར་མ་དོར། །རྒྱལ་བ་ལོངས་སྐུ་རང་ཤར་འབྱུང་།
།མཚམས་སྦྱོར་ངན་པས་རྒྱུད་དཀྲུགས་ཀྱང་། །གསལ་དྭངས་རྫིང་བུར་རྡོ་རྒྱབ་བཞིན། །སྔར་གྱི་གནད་ཀྱིས་བར་མ་དོར། །ལོངས་སྐུ་བདེ་ཆེན་རང་ཤར་འབྱུང་།
།བརྟན་པར་མ་གྱུར་ལོང་མེད་ཀྱང་། །བཅོ་ལྔའི་ཉི་རྒས་ཟླ་ཤར་བཞིན། །འཆིའམ་འཆི་ཁར་དྲན་ཐོས་ཀྱིས། །བར་དོར་ལོངས་སྐུ་ཐེ་ཚོམ་མེད།
།རང་སེམས་སྐྱེ་མེད་ཆོས་སྐུ་ལས། །འགགས་མེད་གཟུགས་སྐུར་རང་ཤར་གྱིས། །འཁོར་བའི་རྒྱ་མཚོ་མ་སྟོངས་བར། །གང་འདུལ་གཞན་དོན་ལྷུན་གྱིས་གྲུབ།
།ངོ་བོ་རྣམ་པ་ཕྲིན་ལས་རྣམས། །ཟུང་འཇུག་ཆེན་པོར་རྟོགས་པར་གྱིས། །འཆི་བ་ཞེས་བྱ་རྣམ་རྟོག་སྟེ། །འཆི་རྒྱུ་མེད་པ་དབང་པོ་རབ། །དེ་དོན་སྐད་ཅིག་རྟོགས་གྱུར་པས། །དག་པ་བདེ་སྟོང་མཁའ་སྤྱོད་འགྲོ།
།དུས་གསུམ་རྒྱལ་བས་འདི་རྟོགས་པས། །བདུད་བཏུལ་སངས་རྒྱས་འཁོར་ལོ་བསྐོར། །དེ་ཕྱིར་རྒྱལ་བའི་ཐུགས་བཅུད་འདི། །མདོ་རྒྱུད་དུ་མར་བསྟན་གྱུར་ཀྱང་། །དམ་པའི་དྲིན་གྱིས་མ་གཏོགས་པ། །ཐབས་གཞན་གང་གིས་རྙེད་མི་འགྱུར།
།དེ་ཕྱིར་བླ་མ་མཆོག་བརྟེན་ནས། །གུས་ཤིང་མཉེས་པ་གནད་ཡིན་ནོ།
།སྙིགས་མ་ལོག་ལྟས་རྒྱུད་དཀྲུགས་ཚེ། །ཡིད་ཆེས་ལུང་གིས་བརྒྱན་པར་བྱ།
།འཆི་མེད་ཡེ་ཤེས་ཆེན་པོ་འདི། །ཆིག་བརྒྱུད་རྡོ་རྗེའི་རྒྱ་ཡིས་བཏབ། །མི་རབས་བདུན་ནས་གསུམ་ལའོ། །རང་སེམས་འཆི་མེད་རང་གྲོལ་རྫོགས་སོ།
ཡེ་ཤེས་ཀྱི་ཌཱ་ཀི་མས་སེང་ལྡེང་གི་ནགས་གསེབ་ཏུ་གསུངས་ནས། །ལོ་ཙཱ་བ་གླན་དར་མ་བློ་གྲོས་ཀྱིས་བསྒྱུར་བའོ། །ལོ་ཙཱ་བ་དེ་ཉིད་དང་། རིན་ཆེན་བཟང་པོས་ཀྱང་གཏན་ལ་ཕབ་པའོ། །ཌཱ་ཀི་མ་དེ་ཉིད་ལ་བདག་ཁྱུང་པོ་རྣལ་འབྱོར་པས་གསེར་སྲང་ལྔ་བརྒྱ་ཕུལ་ནས་ཞུས་ཏེ་ཉམས་སུ་མྱོང་བར་བྱས་པའོ། །འཆི་མེད་ཚིག་རྐང་རྫོགས་སོ།།
དགེའོ། དགེའོ།

Annotated version (BDRC W1PD95844 / W22103)
རྒྱ་གར་སྐད་དུ། ཤྲཱི་ཨ་མ་ར་མ་ཧཱ་ཛྙཱ་ན་ནཱ་མ།
།བོད་སྐད་དུ། དཔལ་འཆི་མེད་ཡེ་ཤེས་ཆེན་པོ་ཞེས་བྱ་བ།
དཔལ་འཆི་མེད་ཡེ་ཤེས་ཆེན་པོ་ལ་ཕྱག་འཚལ་ལོ།
༼ཆོས་སྐུའི་ངོ་བོ་༽རྒྱལ་བ་༼རྣམས་༽ལོངས་སྐུ་རྡོ་རྗེ་འཆང་ཆེན་གྱིས། །འཆི་མེད་ཡེ་ཤེས་༼སྤྲུལ་སྐུའི་འཕྲིན་ལས་༽རང་སྒྲ་འདི་སྐད་ཐོས།
༼སྐྱེས་བུ་༽གང་ཞིག་༼བླ་མ་ལ་གུས་པ་༽དད་ལྡན་དབང་༼གཞན་དང་འདིར་༽ཐོབ་༼རྩ་བ་དང་ཡན་ལག་གི་༽དམ་ཚིག་ཅན། །བླ་མ་མཆོག་༼ཏུ་གྱུར་པ་༽བསྟེན་འདི་དོན་༼ལ་འཆི་མེད་༽རྟོགས་པར་གྱིས། །གང་གིས་༼དད་གུས་ཅན་༽ཚེ་འདི་བློས་༼ཕྱིས་ཀྱིས་༽བཏང་ནས། །ཚེ་གཅིག་༼ཏུ་བསྒོམས་ན་རབ། ཐ་མ།༽ཞག་བདུན་༼འབྲིང་༽ལོ་ཟླ་༼བ་༽ཡིས། །ཇི་ལྟར་ཉོན་མོངས་༼པའི་༽ལུས་༼འདི་༽དག་ནས། །ཡེ་ཤེས་༼འཆི་མེད་༽ལུས་ནི་རང་དགར་འབྱུང་༼བར་འགྱུར་རོ༽
།ཚད་མེད་༼པ་གཞི་དང་༽སེམས་བསྐྱེད་སྔོན་འགྲོ་བས། །ཆོ་ག་གསུམ་འམ་སྐད་ཅིག་གིས། །རང་ལུས་ཡི་དམ་ཡབ་ཡུམ་༼བདེ་མཆོག་༽གྱིས། །སྤྱི་གཙུག་༼ཧཱུྃ་དང་བཾ་གི༽ས་བོན་གྱི་འོད་ཟེར་གྱིས། །ལུས་ཀྱི་ཕྱི་ནང་ཐམས་ཅད་ཀུན།
།དག་ཅིང་སྟོང་གསལ་གཉིད་༼དུ་༽སྦྱངས་པས། །སྣང་སྟོང་འཇའ་ཚོན་༼ལྟ་བུ་༽འོད་ཀྱི་སྐུ། །༼སྣང་ལ་༽རང་བཞིན་མེད་བཞིན་སྐུ་མདོག་དང་། །ཞལ་ཕྱག་བརྒྱན་དང་མེ་དཔུང་བཅས། །གསལ་ལ་རྟོག་པ་མེད་པ་ཡི། །ཟག་མེད་བདེ་སྟོང་ཆེན་པོར་༼ལྟ་བར་བྱའོ་༽ལྟོས།
།རང་ལུས་སྣང་སྟོང་ལྷ་སྐུའི་སེམས་༼དེ་རང་གི་ཡིན་པ་ལ༽། །སེམས་ནི་སྣང་སྟོང་ལྷ་ཡི་སྐུ། །སེམས་དང་ལྷ་སྐུ་༼སེམས་སྤངས་པའི་ཕ་རོལ་ན་ལྷ་སྐུ་མེད། ལྷ་སྐུ་སྤངས་པའི་ཕ་རོལ་ན་སེམས་གྲུབ་པ་མེད་པས་༽དབྱེར་མེད་དེ། །རྨི་ལམ་ཡུལ་དུ་ཆུ་ཟླ་ལྟར།
།རང་བཞིན་༼གྱིས་དབྱེར་མེད་པའི་༽ཟུང་འཇུག་ཆེན་པོ་ཡི། །ངོ་བོ་བརྗོད་༼པ་དང་༽བྲལ་༼བས་༽བློ་༼ལས་༽འདས་ཏེ། །དེ༼འི་ངོ་བོ་བརྗོད་བྲལ་༽ནི་དུས་གསུམ་སངས་རྒྱས་ཀྱིས། །༼འདས་པས་༽མ་གཟིགས་༼མ་འོངས་པས་༽མི་གཟིགས་༼ད་ལྟར་གྱིས་༽གཟིགས་མི་འགྱུར།
།དེ་ལ་ན་རྒྱུ་༼མེད་༽འཆི་རྒྱུ་༼མེད་༽དང་། །འཁོར་བ༼ར་འཁྱམ་རྒྱུ་མེད་༽མྱང་འདས་༼སངས་རྒྱས་རྒྱུ་༽མ་གྲུབ་ཅིང་། །འཕོ་བྱ་༼དང་༽འཕོ་བྱེད་༼ཐམས་ཅད་དང་༽བྲལ་བས་ན། །༼ཡེ་ཤེས་༽དེ་ཕྱིར་འཆི་མེད་རང་གྲོལ་ལོ།
།དེ་ལྟར་༼སེམས་འཆི་མེད་དུ་༽མ་རྟོགས་༼པའི་༽རྣལ་འབྱོར་པས། །བསྐལ་༼པ་གྲངས་མེད་༽པར་སྒྲུབས་ཀྱང་༼ངལ་བ་༽དོན་མེད་༼དུ་༽འགྱུར་༼ཞིང་༽། །ལོག་པའི་ལམ་༼འབའ་ཞིག་༽ཞུགས་༼པ་༽ཁོ་ནར་ཟད། །༼སྐྱེས་བུ་༽གང་གིས་མཚམས་མེད་༼པ་༽ལྔ་༼ཡོངས་སུ་༽རྫོགས་༼པས་༽ཀྱང་།
༼ནམ་༽འཆི་ཁའི་༼མ་༽ཚེ་འདིའི་དུས་གཞན་དུ། །༼།ཡེ་ཤེས་རྒྱ་མཚོའི་རྒྱུད་ལས་༽འཆི་མེད་རྡོ་རྗེའི་ཚིག་རྐང་༼པ་༽བཞི་༼པོ་འདི༽། །སྐད་ཅིག་༼གམ་༽ཡུད་ཙམ་གཅིག་ལའམ། །དྲན་༼ཡིད་ལ་བསམ་པའམ། ངག་༽ཐོས་༼རྣམ་པར་ལུས་ལ་༽རེག་པར་གྱུར་པས་ཀྱང་། །གནད་གཅོད་༼ཀྱི་༽སྡུག་བསྔལ་༼ཐམས་ཅད་༽རང་དག་༼ལ་སོང་༽ནས། །༼དང་པོ་༽བར་དོར་༼རྒྱལ་བ་༽ལོངས་སྐུར་མངོན་༼པར་རྫོགས་པར་༽སངས་རྒྱ། །སྒྲིབ་པ་ཆུང་ལ་སྨོས་ཅི་དགོས། །འདི་ནི་འཆུག་མེད་གནད་ཡིན་ནོ།
།གལ་ཏེ་ལུས་སེམས་རྐྱེན་དབང་གིས། །འཆི་ཁར་གསལ་བར་མ་གྱུར་ཀྱང་། །དཔེར་ན་སྒྱོགས་ཀྱི་འཁྲུལ་འཁོར་ཞིན། །སྔགས་ཀྱི་གནད་ཀྱིས་བར་མ་དོར། །རྒྱལ་བ་ལོངས་སྐུར་རང་ཤར་འབྱུང་།
།མཚམས་སྦྱོར་ངན་པས་རྒྱུད་དཀྲུགས་ཀྱང་། །གསལ་དངས་རྫིང་བུར་རྡོ་རྒྱབ་བཞིན། །སྔར་གྱི་གནད་ཀྱིས་བར་མ་དོར། །ལོངས་སྐུ་བདེ་ཆེན་རང་ཤར་འབྱུང་།
།བརྟན་པར་མ་གྱུར་ལོང་མེད་ཀྱང་། །བཅོ་ལྔའི་ཉི་རྒས་ཟླ་ཤར་བཞིན། །འདི་འམ་འཆི་ཁར་དྲན་ཐོས་ཀྱིས། །བར་དོར་ལོངས་སྐུ་ཐེ་ཚོམ་མེད།
།རང་སེམས་སྐྱེ་མེད་ཆོས་སྐུ་ལས། །འགག་མེད་གཟུགས་སྐུ་རང་ཤར་གྱིས། །འཁོར་བའི་རྒྱ་མཚོ་མ་སྟོངས་པར། །གང་འདུལ་གཞན་དོན་ལྷུན་གྱིས་གྲུབ།
།ངོ་བོ་རྣམ་པ་འཕྲིན་ལས་རྣམས། །ཟུང་འཇུག་ཆེན་པོར་རྟོགས་པར་གྱིས། །འཆི་བ་ཞེས་བྱ་རྣམ་རྟོག་སྟེ། །འཆི་རྒྱུ་མེད་པས་དབང་པོ་རབ། །དེ་དོན་སྐད་ཅིག་རྟོགས་གྱུར་པས། །དག་པ་བདེ་ཆེན་མཁའ་སྤྱོད་འགྲོ།
།དུས་གསུམ་རྒྱལ་བས་འདི་རྟོགས་པས། །བདུད་བརྟུལ་སངས་རྒྱས་འཁོར་ལོ་བསྐོར། །དེ་ཕྱིར་རྒྱལ་བའི་ཐུགས་བཅུད་འདི། །མདོ་རྒྱུད་དུ་མར་བསྟན་གྱུར་ཀྱང་། །དམ་པའི་དྲིན་ནི་མ་རྟོགས་པ། །ཐབས་གཞན་གང་གིས་རྙེད་མི་འགྱུར།
།དེ་ཕྱིར་བླ་མ་མཆོག་སྟེན་ནས། །གུས་ཤིང་མཉེས་པ་གནད་ཡིན་ནོ།
།སྙིགས་མའི་ལོག་ལྟས་རྒྱུད་དཀྲུགས་ཚེ། །ཡིད་ཆེས་ལུང་གིས་བརྒྱན་པར་བྱ།
།འཆི་མེད་ཡེ་ཤེས་ཆེན་པོ་འདི། །ཆིག་རྒྱུད་རྡོ་རྗེའི་རྒྱ་ཡིས་བཏབ། །མི་རབས་བདུན་ནམ་གསུམ་ལའོ། །རང་སེམས་འཆི་མེད་རང་གྲོལ་རྫོགས་སོ།
ཡེ་ཤེས་ཌཱ་ཀི་མས་སེང་ལྡེང་གི་ནགས་གསེབ་ཏུ་གསུངས་ནས། །ལཙྪ་བ་གླན་དར་མ་བློ་གྲོས་ཀྱིས་བསྒྱུར་བའོ། །ལོཙྪ་བ་དེ་ཉིད་དང་། རིན་ཆེན་བཟང་པོས་ཀྱང་གཏན་ལ་ཕབ་པའོ། །ཌཱ་ཀི་མ་དེ་ཉིད་ལ་བདག་ཁྱུང་པོ་རྣལ་འབྱོར་པས་གསེར་སྲང་ལྔ་བརྒྱ་ཕུལ་ནས་ཞུས་ཏེ་ཉམས་སུ་མྱོང་བར་བྱས་པའོ།