Smon lam bka' rgya ma'i byin rlabs

Resource ID	SCv8p676
Title	smon lam bka' rgya ma'i byin rlabs
Topics	Initiation
Sub-Topics	Mönlam Kagyama
Author	Khyungpo Neljor
Associated Person	Niguma
Link	BDRC W23922

༄༅། །སྨོན་ལམ་བཀའ་རྒྱ་མ༼འི་བྱིན་རླབས༽ནི།།

རང་གི་མདུན་གྱི་ནམ་མཁར་སངས་རྒྱས་བྱང་སེམས་དཔག་ཏུ་མེད་པ་བཞུགས་པར་བསམ་ལ། སྨོན་ལམ་བཏབ། ཡི་དམ་དང་ཆོས་སྐྱོང་ལ་གཏོར་མ་ཟླུམ་གཏོར་རེ་བཤམས་ཏེ། གཏོར་བསྔོ་བྱ། སློབ་མ་བོས་ལ་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་སྨོན་ལམ་བཀའ་རྒྱ་མའི་བྱིན་རླབས་ཀྱི་བཀའ་གསན་སྙམ་པ་བྱང་ཆུབ་ཀྱི་མཆོག་ཏུ་ཐུགས་བསྐྱེད་པར་གསལ་བཏབ་ནས་གསན་པར་ཞུ་འཚལ། མཎྜལ་འབུལ་ཞུ། མདུན་གྱི་ནམ་མཁར་བླ་མ་དང་སངས་རྒྱས་བྱང་སེམས་བཞུགས་པ་ལ་ཡན་ལག་བདུན་པ་འབུལ་སྙམ་པའི། རྒྱུན་བཤགས་ལན་གསུམ་བྱ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་གི་སྐུ་ལུས་ལ་ཕོག་པས་རྣམ་སྨིན་གདོས་བཅས་ཤ་ཁྲག་གི་བར་དུ་སྦྱངས་ཏེ། འོད་ཀྱི་གོང་བུར་གྱུར། དེ་ཡོངས་སུ་གུར་པ་ལས། ཁྱེད་རང་འཁོར་ལོ་སྡོམ་པ་ལྷན་ཅིག་སྐྱེས་པའི་རྣམ་པ་ཅན་དུ་གྱུར་པའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། སློབ་དཔོན་འཁོར་ལོ་སྡོམ་པར་གསལ་བའི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་བྱང་སེམས་ཐམས་ཅད་འཁོར་ལོ་སྡོམ་པའི་རྣམ་པར་སྤྱན་དྲངས་ཏེ། ཁྱེད་རང་གི་སྐུ་ལུས་ལ་སིབ་སིབ་ཐིམ་པས། བྱིན་གྱི་རླབས་པའི་ཐུགས་མོས་གནང་བ་ཞུ། ཧྲཱི་ཧ་དང་། ཨ་བེ་ཤ་བརྗོད། རོལ་ཆེན་བྱས་ཏེ་ཡེ་ཤེས་ཕབ། དེ་ནས་སློབ་མའི་སྤྱི་བོར་པད་ཟླའི་སྟེང་དུ་རྩ་བའི་བླ་མ་འཛུམ་པའི་མདངས་དང་ལྡན་པར་བསམ། མདུན་དུ་གནོད་བྱེད་གཞི་བདག་སེམས་ཅན་ཐམས་ཅད་ལུས་གུས་པས་ཐལ་མོ་སྦྱར། ངག་གུས་པས། སངས་རྒྱས་ཀུན་གྱི་རང་བཞིན་སྐུ། །བླ་མའི་སྐུ་ལ་གསོལ་བ་འདེབས། །སངས་རྒྱས་ཀུན་གྱི་རང་བཞིན་གསུང་། །བླ་མའི་གསུང་ལ༴ །སངས་རྒྱས་ཀུན་གྱི་རང་བཞིན་ཐུགས། བླ་མའི་ཐུགས་ལ༴ །ཞེས་གསོལ་བ་འདེབས་ཤིང་གསེར་གྱི་མཎྜལ་དང་། ཐོད་པར་ལུས་བདུད་རྩིར་སྦྱངས་ནས་ཕུལ་ཏེ། བླ་མ་རིན་པོ་ཆེ་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། བླ་མའི་ཐུགས་ཀ་ནས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་བྱང་སེམས་རྣམས་ཀྱི་བྱིན་རླབས་བདུད་རྩིར་གྱུར་པ་རང་གི་སྤྱི་བོ་ནས་ཐིམ་པས། ལུས་ཀྱི་སྡིག་སྒྲིབ་དག །བུམ་དབང་ཐོབ་པར་བསམ། བླ་མའི་ལྗགས་སྟེང་ནས་བདུད་རྩིའི་རྒྱུན་དམར་པོ་བྱུང་། ངག་གི་སྒྲིབ་པ་དག །གསང་དབང་ཐོབ་པར་བསམ༴ བླ་མའི་ཐུགས་ཀ་ནས་བདུད་རྩིའི་རྒྱུན་སྔོན་པོ་བྱུང་། རང་གི་སྙིང་ཁར་ཐིམ་པས། ཡིད་ཀྱི་སྡིག་སྒྲིབ་དག་ཅིང་། ཤེས་རབ་ཡེ་ཤེས་ཀྱི་དབང་ཐོབ་པར་བསམ། མཐར་བླ་མ་རང་ལ་ཐིམ་པས། ལུས་ངག་ཡིད་གསུམ་གྱི་སྒྲིབ་པ་དག །དབང་བཞི་པ་ཐོབ་པར་བསམ། སྨོན་ལམ་བཀའ་རྒྱ་མ་ལན་གཅིག་སྒྲོག །གཙོ་བོས་ཇི་ལྟར་སོགས་དཀྱུས་བཞིན་ཁྱུང་པོའི་གསུང་དང་མཐུན་པར་བཀོད་པ། ཨྀཐིཿ