Snyan rgyud kyi gdams pa snang ba rang sems kyi khrid

Resource ID	SCv8p259
Title	snyan rgyud kyi gdams pa snang ba rang sems kyi khrid
Topics	Mahamudra Gauma
Sub-Topics	Instructions
Associated Person	Niguma
Link	BDRC W23922 BDRC W3CN18508 (v2p.532) BDRC W8LS32723 BDRC W22103 (p.409 alt. version)

༄༅། །སྙན་རྒྱུད་ཀྱི་གདམས་པ་སྣང་བ་རང་སེམས་ཀྱི་ཁྲིད་བཞུགས་སོ།།

བླ་མ་དམ་པའི་ཞབས་བཏུད་ནས། །མཁའ་འགྲོའི་སྙན་རྒྱུད་ཞལ་གདམས་འདི། །སློབ་མ་མཆོག་གི་གསོལ་བཏབ་པའི། །དོན་དུ་བདག་གི་ཡི་གེར་བཀོད།
།དེ་ལ་སངས་རྒྱས་དང་སེམས་ཅན་ལ་སོགས་པ། ཕྱི་སྣོད། ནང་བཅུད་ཐམས་ཅད་རང་གི་སེམས་ལས་ཕྱི་རོལ་དུ་གྱུར་པའི་ཆོས་ཅི་ཀྱང་མེད་དེ།
རྡོ་རྗེ་མགུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་དང་།
བདེ་མཆོག་བརྒྱན་གྱི་རྒྱུད་ལས། སེམས་ལས་མ་གཏོགས་སངས་རྒྱས་དང་། །སེམས་ལས་མ་གཏོགས་ཆོས་གཞན་དག །སངས་རྒྱས་ཀྱིས་ཀྱང་མ་གཟིགས་ཤིང་། །མ་གསུང་གསུངས་པར་མི་འགྱུར་ཏེ། །ཞེས་གསུངས་སོ།
།མྱ་ངན་ལས་འདས་པའི་ལེའུ་ལས། ཀྱཻ་རྒྱལ་བའི་སྲས་དག །ཁམས་གསུམ་པོ་འདི་ནི་སེམས་ལས་བྱུང་ཞིང་སེམས་ཙམ་སྟེ། སེམས་ལ་ནི་མཐའ་དང་དབུས་མེད་པའོ།
།དེ་ལྟར་ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་ཐམས་ཅད་རང་སེམས་ཀྱི་ཕྱི་རོལ་དུ་དེ་དག་དེར་ཤར་ཤིང་སྣང་སྟེ།
ལང་ཀར་གཤེགས་པ་ལས། ཕྱི་རོལ་གཟུགས་ནི་ཡོད་མིན་ཏེ། །རང་གི་སེམས་ནི་ཕྱི་རོལ་སྣང་། །ཞེས་པས།
ཕྱི་རོལ་གྱི་འབྱུང་བཞིའི་རེ་རེ་ལ་རིགས་དྲུག་གི་སྣང་བ་སོ་སོར་འཆར་ཏེ།
མདོ་འཇིག་རྟེན་བསྟན་བཞག་ལས། ཆུ་བོ་ཆེན་པོ་གཅིག་ལ་རིགས་དྲུག་སོ་སོའི་སྣང་བ་འཆར་ཏེ། །དམྱལ་བ་རྣམས་ལ་ཁྲོ་ཆུའོ། །ཡི་དྭགས་རྣམས་ལ་གནག་ཁྲག །དུད་འགྲོ་བྱིངས་ན་གནས་པ་རྣམས་ལ་གནས། མི་ལ་ཆུ། ལྷ་མ་ཡིན་ལ་གོ་མཚོན། ལྷ་ལ་བདུད་རྩིའོ། །དེ་བཞིན་དུ་ས་ལ་ཡང་ཐ་དད་དུ་འཆར་ཏེ།
ཞི་བ་ལྷས། ལྕགས་སྲེགས་ས་གཞི་སུ་ཡིས་བྱས། །མེ་ཚོགས་དེ་དག་གང་མས་བྱུང་། །དེ་འདྲ་དེ་དག་ཐམས་ཅད་ཀྱང་། །སྡིག་སེམས་ཡིན་པར་ཐུབ་པས་གསུངས། །ཞེས་སོགས་མདོ་རྒྱུད་ཀྱི་འཁོར་དས་ཀྱི་ཆོས་ཐམས་ཅད་རང་གི་སེམས་སུ་གསུངས་པའི་ལུང་རྣམས་མང་གི་དོགས་ནས་མ་བྲིས་སོ།
།དེ་ལ་སྣང་བ་འདི་ཐམས་ཅད་རང་གི་སེམས། སེམས་སྣང་སྟོང་སྒྱུ་མ། སྒྱུ་མ་མཐའ་བྲལ་ཕྱག་རྒྱ་ཆེན་པོ་རྟོགས་པར་བྱའོ།
།དེ་ཉིད་ཉམས་སུ་ལེན་པར་འདོད་པས། ཐོག་མར་གནས་དབེན་པར་འཆི་བ་མི་རྟག་པ་དང་། འཁོར་བ་ལ་སྐྱོ་ཤས་དྲག་པོ་བསྐྱེད་ནས། ལུས་ཡི་དམ་སྣང་སྟོང་གི་སྤྱི་བོར་བླ་མ་བསྒོམ།
།མདུན་དུ་ནམ་མཁའ་དང་མཉམ་པའི་སེམས་ཅན་ཐམས་ཅད་དང་ཐུན་མོང་དུ་གསོལ་བ་བཏབ་པར་བྱ་སྟེ།
བླ་མ་རིན་པོ་ཆེ། བདག་འཛིན་བློས་ཐོང་བར་མཛད་དུ་གསོལ། དགོས་མེད་རྒྱུད་ལ་སྐྱེ་བར་མཛད་དུ་གསོལ། སྣང་བ་སེམས་སུ་རྟོགས་པར་མཛད་དུ་གསོལ།
།ཞེས་པའི་གསོལ་བ་དོས་དྲག་ལ་རྒྱུན་ཆད་མེད་པར་བཏབ་པས། སྣང་བ་བདེན་མེད་དུ་སོང་བ་དང་། ཐོག་མར་ས་ལ་སླབ་པར་བྱ་སྟེ། རྡེའུ་རྩ་ཤིང་ཕྲ་བ་ཐམས་ཅད་ལ་འདི་ཐམས་ཅད་རང་གི་སེམས། སེམས་རྩི་ཤིང་ལ་སོགས་པ་ཕྲ་མོར་སྣང་། ཤར་ནས་འདུག་སྙམ་དུ་འདུན་པ་རྩེ་གཅིག་ཏུ་བཏང་བར་བྱའོ།
།དེ་བཞིན་དུ་ཁང་པ་དང་བྲག་རི་ཆེན་པོ་ལ་སོགས་པ་རགས་པ་ཐམས་ཅད་ལ་གོང་བཞིན་དུ་བསྒོམ་མོ།
།དེ་ལ་བརྟན་པ་དང་། ཆུ་ཕྲ་རགས། ཉི་མ་དང་མེ་ཕྲ་རགས། རླུང་ཕྲ་རགས་ཐམས་ཅད་ལ། ཟླ་ཕྱེད་ཞག་བཅུ་ལ་སོགས་པ་ཅི་སྣང་སེམས་སུ་མ་གཏོགས་རིང་ལ་རིམས་པ་བཞིན་དུ་བསྒོམ་པར་བྱའོ།
།དེ་ནས་ནང་བཅུད་ཀྱི་སེམས་ཅན་ཐམས་ཅད་ལ་སླབ་པར་བྱ་སྟེ། སྤྱིར་ཕོ་ཆགས། དགོས་སུ་སྐྱེས་པ། ཁྱད་པར་དུ་ཞེ་སྡང་སྐྱེ་བའི་ཡུལ་དེ། རང་གི་སེམས་དེར་སྣང་དེར་ཤར་ནས་འདུག་ཨང་སྙམ་དུ་མདུན་པ་རྩེ་གཅིག་ཏུ་བཏང་ངོ་།
།དེ་བཞིན་དུ་སྤྱིར་མོ་ཆགས། དགོས་སུ་བུད་མེད། ཁྱད་པར་འདོད་ཆགས་སྐྱེ་བའི་ཡུལ་དེ་རང་གི་སེམས་དེར་སྣང་དེར་ཤར་བས་ན་སྣང་བ་འདི་རང་གི་སེམས་སུ་འདུག་སྙམ་དུ་རྟོགས་པར་བྱའོ།
།དེ་བཞིན་དུ་རྟ་དང་གླང་པོ་དང་། མ་ཧེ་དང་། སྟག་དང་། དོམ་དང་། སྤྱང་ཀི་དང་། དུག་སྦྲུལ། འབུ་སྲིན་དང་། གྲོགས་སྦུར་ལ་སོགས་པ་སེམས་ཅན་ཕྲ་རགས་ལ་སོགས་པ་ཐམས་ཅད་རང་གི་སེམས་སུ་འདུག །དེར་སྣང་དེར་ཤར་བས་ན་སྣང་སེམས་དབྱེར་མེད་དུ་རྟོགས་པར་བྱའོ། །སྣང་སེམས་དབྱེར་མེད་དུ་རྟོགས་པ་དེས། ས་བདུན་པ་ཐོབ་པར་འགྱུར་རོ།
།ཀུན་དག་པོའི་ཞུས་པའི་མདོ་ལས། སྣང་སེམས་དབྱེར་མེད་རྟོགས་གྱུར་ན། ས་བདུན་པ་ནི་ཐོབ་པར་འགྱུར། །ཅེས་པ་དང་། ཕལ་ཆེན་ལས་ཀྱང་དེ་ལྟར་གསུང་ངོ་། དེ་ལ་གོམས་ཤིང་བརྟན་པར་གྱུར་པ་དང་། སེམས་སྣང་དུས་ན་སྟོང་པས་སྣང་དུ་ཤེས་པར་བྱ་སྟེ། སྔར་བཞིན་དུ། བླ་མ་ལ་གསོལ་བ་གདབ་པར་བྱ་སྟེ།
སྣང་བ་སེམས་སུ་རྟོགས་པར་མཛད་དུ་གསོལ། །སེམས་སྣང་སྟོང་དུ་རྟོག་པར་མཛད་དུ་གསོལ། །ཞེས་གསོལ་བ་དྲག་པོ་བཏབ་ནས། གོང་བཞིན་དུ། ས་ཕྲ་རགས་འདི་རྣམས་རང་གི་སེམས། སེམས་སྣ་ཚོགས་སུ་སྣང་བ་འདི། སྣང་དུས་ན་སྟོང་པས་སྟོང་དུ་འདུག་སྙམ་དུ་བསྒོམ་མོ།
།དེ་བཞིན་དུ་ཆུ་ཕྲ་རགས། ཉི་མ་དང་མེ་ཕྲ་རགས། རླུང་ཕྲ་རགས་ཐམས་ཅད་སྣང་དུས་ན་སྟོང་པས་སྣང་སྟོང་དུ་ཤེས་པར་བྱའོ།
།མདོར་ན། ས་རྡོ་རི་བྲག །རྩི་ཤིང་ནགས་ཚལ། རྒྱ་མཚོ་ཆུ་ཕྲན། ཁང་ཁྱིམ་ཡུལ་གཞིས་ཐམས་ཅད་རང་གི་སེམས་དེ་རྣམས་དུ་སྣང་། སྣང་དུས་ན་སྟོང་པས་སེམས་སྣང་སྟོང་སྒྱུ་མར་ཤེས་པར་བྱའོ།
།དེ་ནས་གསོལ་འདེབས་སྔོན་དུ་སོང་བས། སྤྱིར་མོ་ཆགས། དགོས་སུ་བུད་མེད། ཁྱད་པར་དུ་འདོད་ཆགས་སྐྱེ་བའི་ཡུལ་དེ་རང་གི་སེམས་བུད་མེད་དུ་སྣང་ཞིང་ཤར། དེ་སྣང་དུས་ན་སྟོང་པས་སྣང་སྟོང་དུ་འདུག་སྟེ།
ཡབ་སྲས་མཇལ་བ་ལས། རྒྱལ་པོ་ཆེན་པོ། སྐྱེས་བུ་གཉིད་ལོག་པའི་རྩལ་ན། ཡུལ་གྱི་བུད་མེད་བཟང་མོ་དང་རྩེ་དགའ་འཕྱོ། གླུ་ལེན། པི་ཝང་སྒྲོག །འདོད་པ་རྟེན། དེ་ལ་ཆགས་ཞེན་ཏེ། དེ་མཁས་པའི་རང་བཞིན་ཅན་ཡིན་ནམ། ཀྱེ་བཙུན་པ་བཅོམ་ལྡན་འདས་དེ་ལྟར་མ་ལགས་སོ། །རྒྱལ་པོ་ཆེན་པོ་བུད་མེད་ཉིད་མི་དམིགས་ན། གླུ་ལེན་པ་དང་། པི་ཝང་སྒྲོགས་པ་དང་། འདོད་པ་རྟེན་པ་ལྟ་ག་ལ་འགྱུར། །རང་གི་སེམས་བུད་མེད་དུ་སྣང་བའི་ཕྱིར་རོ། །སྣང་དུས་ལ་སེམས་ལ་སྣང་སྟོང་དུ་ཤེས་པར་གྱིས་ཤིག །དེ་བཞིན་དུ་བཙུན་མོ་དྲུག་ཁྲི་པོ་ཡང་དེ་ལྟར་ཤེས་པར་གྱིས་ཤིག །ཅེས་དང་།
བྲམ་ཟེ་ཆེན་པོས། ལྔ་ན་མེད་པའི་སྒེག་མོ་ཅན་དང་འཕྲད། །ཉལ་བས་སེམས་ནི་གཞི་མེད་ལ་རྟེན། །རང་གི་སེམས་དང་ཐ་དང་མ་ལྟ་ཅིག །དེ་ཚེ་སངས་རྒྱས་ལག་ཏུ་སྡོད་པ་ཡིན། །ཞེས་སོ།
དེ་ནི་འདོད་ཆགས་སམ་བདེ་བའི་རྨི་ལམ་མོ། །དེ་བཞིན་དུ་ན། སྤྱིར་ཞེ་སྡང་སྐྱེ་བའི་ཡུལ། ཕོ་ཆགས། དགོས་སྐྱེས་དང་། ཁྱད་པར་དུ་ཞེ་སྡང་སྐྱེ་བའི་ཡུལ་དེ་རང་གི་སེམས་དེར་སྣང་། དེར་ཤར། སྣང་དུས་སྟོང་པས་སྣང་སྟོང་སྒྱུ་མར་ཤེས་པར་བྱའོ།
།མདོ་དེ་ཉིད་ལས། རྒྱལ་པོ་ཆེན་པོ། སྐྱེས་བུ་གཉིད་ལོག་པའི་རྨི་ལམ་ན། དགྲས་དེད་བཙོན་དུ་གཟུང་། ལྕགས་སུ་བཅུག །ཁྲི་མུན་དུ་གྱུར་ནས་གསོད་པར་བྱས་པས། སྐྲག་དང་སྔངས་བྲེད་པར་གྱུར་ན། སྐྱེས་བུ་དེ་མཁས་པའི་རང་བཞིན་ཅན་ཡིན་ནམ། བཅོམ་ལྡན་འདས་དེ་ལྟར་མ་ལགས་སོ། །རྒྱལ་པོ་ཆེན་པོ་དགྲ་དེ་ཉིད་མི་དམིགས་ན། བཙོན་དུ་གཟུངས་པ་དང་། གསོད་པ་སོགས་དམིགས་པ་ལྟ་ག་ལ་འགྱུར། རང་གི་སེམས་དགྲར་སྣང་བའི་ཕྱིར་རོ།
།སྣང་དུས་ན་སྟོང་པས་སྣང་སྟོང་དུ་ཤེས་པར་གྱིས་ཤིག །རྒྱལ་པོ་ཆེན་པོ་གཞན་ཡང་སྐྱེས་བུའི་རྨི་ལམ་ན། སྟག་དང་སེང་གེ་དང་། དོམ་དང་། དུག་སྦྲུལ་གྱི་དེད་སོས་བཏབ་ནས། དང་ངས་སྐྲག །རེངས་པར་གྱུར་ན། སྐྱེས་བུ་དེ་མཁས་པའི་རང་བཞིན་ཅན་ཡིན་ནམ། བཅོམ་ལྡན་འདས་དེ་ལྟར་མ་ལགས་སོ། །རྒྱལ་པོ་ཆེན་པོ་གཅན་གཟན་ཉིད་མི་དམིགས་ན། དེས་དེད་པ་དང་སོས་བཏབ་པ་དམིགས་པ་ལྟ་ག་ལ་འགྱུར། །རང་གི་སེམས་གཅན་གཟན་དུ་སྣང་བའི་ཕྱིར་རོ།
།སྣང་དུས་ན་སྟོང་པས་སྣང་སྟོང་དུ་ཤེས་པར་གྱིས་ཤིག །གཅན་གཟན་གྱི་སྤུའི་རྩེ་མོ་ཙམ་ཡང་མི་དམིགས་པའི་ཕྱིར་རོ།
།དེ་བཞིན་དུ། ཤཱཀྱའི་རིགས་ལྔ་བརྒྱ་དང་གཅན་གཟན་རྣམས་ཀྱང་ཤེས་པར་གྱིས་ཤིག །དེ་ནི་སྡུག་བསྔལ་ལམ་ཞེ་སྡང་གི་རྨི་ལམ་མོ། །གཞན་ཡང་འབྱུང་བ་དང་། སེམས་ཅན་སྣ་ཚོགས་ཀྱི་རྨི་ལམ་དུ་ཤེས་པར་བྱའོ། །དེ་ནི་སྟོང་སྙོམས་ཀྱི་རྨི་ལམ་མོ། །དེ་ལྟར་འབྱུང་བཞི་ཕྲ་རགས། །སེམས་ཅན་ཕྲ་རགས། སྤྱོད་ལམ་བཞིའི་རྨི་ལམ་གསལ་པོ་རྨིས་ནས་གཉིད་སད་མ་ཐོག་ཏུ། རང་གི་སེམས་ཐ་དད་པར་མི་ལྟ་སྟེ།
ཕྱི་རུ་རབ་གནང་གི་ཞུས་པའི་མདོ་ལས། འགྲོ་ཀུན་སྐྱེས་པ་བུད་མེད་སྣ་ཚོགས་རྨིས། །རང་གི་སེམས་དང་ཐ་དད་མི་བྱ་སྟེ། །དེ་ཚེ་སངས་རྒྱས་ལག་ཏུ་སྟོང་པར་འགྱུར། །ཞེས་གསུངས་པས་ཆགས་སྡང་། སྟོང་སྙོམས་ཀྱི་ཡུལ་ཐམས་ཅད་དེ་བཞིན་དུ་ཤེས་པར་བྱའོ། །འདུལ་བ་ལུང་དང་དཀོན་རྩེགས། ལྷའི་བུ་རབ་རྩལ་གྱི་ཞུས་པ་གསུམ་དང་། ཡབ་སྲས་མཇལ་བ་ལ་རྒྱས་པ་རྣམས་སུ་ཤེས་པར་བྱའོ།
།དེ་ནས་གསོལ་འདེབས་སྡོམ་དུ་སོང་བས། འབྱུང་བཞི་ཕྲ་རགས། སེམས་ཅན་ཕྲ་རགས་ཐམས་ཅད་ཡི་དམ་དུ་བལྟས་ན། འདི་ཐམས་ཅད་རང་གི་སེམས། སེམས་དང་ལྷ་སྐུ་དབྱེར་མི་ཕྱེད་པ། སྣང་སྟོང་དབྱེར་མེད་མཐའ་བྲལ་སྒྱུ་མར་སྒོམ། མདོར་ན་སྣང་བ་ཐམས་ཅད་སེམས། སེམས་ལྷ་སྐུ་མཐའ་བྲལ། སྟོང་གསལ་བདེ་བ་ཆེན་པོར་རྟོགས་པར་བྱའོ།
།དེ་ལ་བཀའ་མདོ་རྒྱུད་དང་། མཁའ་འགྲོའི་ཞལ་གྱི་གདམ་པ་རྣམས་གཏན་ཐོག་གཅིག་ཐུན་གཅིག །སྐད་ཅིག་མ་གཅིག་ལ་ཉམས་སུ་བླང་བར་བྱའོ།
།ལུས་ལྷ་སྐུ་སྣང་སྟོང་། སྟོང་གསལ་མཐའ་བྲལ་འོད་ཀྱི་རང་བཞིན་དང་མ་བྲལ་བ། སྤྱི་བོར་བླ་མ་དང་མ་བྲལ་བའི་མོས་གུས་རྩེ་གཅིག་པའོ། །ངག་སྔགས་དྲག་སྟོང་དང་མ་བྲལ་བའོ། །སེམས་སྟོང་གསལ་བདེ་བ་ཆེན་པོ་དང་མ་བྲལ་བར་བྱའོ།
།དེ་ལྟར་ཉམས་སུ་བླངས་པས་རབ་ལོ་གཅིག །འབྲིང་ལོ་གཉིས། ཐ་མ་ལོ་གསུམ་ན། ཡང་དག་པའི་མཁའ་སྤྱོད་དུ་འགྲོ་བར་འགྱུར་རོ།
།མཁའ་འགྲོའི་མའི་སྙན་བརྒྱུད་སྙིང་པོ་བསྡུས་པ་འདི་ཆིག་བརྒྱུད་ཡིན་པས་གཞན་ལ་རྫོགས་པར་བྱིན་པ་དང་ཡི་གེར་བཀོད་པ་མེད་པས་གསང་བའི་དམ་ཚིག་ལ་གནས་ཤིང་སུ་ལའང་བསྟན་པར་མི་བྱའོ། །སློབ་མ་མི་གཞི་བརྟན་པ། དད་པ་ཆེ་བ། གསང་བའི་དམ་ཚིག་ལ་གནས་པ་ལོ་ལྔ་སྒྲུབ་ནུས་པ་ཅིག་ལ་སྦྱིན་པར་བྱའོ།
།མཁའ་འགྲོའི་ཞལ་གདམས་ཆིག་བརྒྱུད་འདི། །དེ་སྔ་བྱིན་པ་ཡོད་རི་ཤི། །ཚེ་འདི་བློས་བཏང་ཉམས་ལེན་ལ། །རྩེ་གཅིག་སྒྲུབ་པ་མཛད་པར་ཞུ།། མངྒ་ལཾ།། །།