Thabs lam bsgom pa'i rnal 'byor

Resource ID	SCv8p749
Title	thabs lam bsgom pa'i rnal 'byor
Topics	Six doctrines of Niguma, Yantra
Author	Niguma

༄༅། །རྣལ་འབྱོར་ནི།།

ན་མོ་གུ་རུ།
ཐབས་ལམ་བསྒོམ་པའི་རྣལ་འབྱོར་ལ། །རྒྱུད་ལ་དུག་གསུམ་སྐྱེས་པ་ཡིས། །དེ་ཡི་འབྲས་བུ་ནང་སེང་ན། །ལུས་སྦྱོངས་འཁྲུལ་འཁོར་དག་གིས་བཅོས།
།གཏི་མུག་ཐོབས་ཀྱིས་དབྱུང་གྱུར་ན། །རྣམ་སྣང་མཛད་ཀྱི་འདུག་སྟངས་དང་། །འོད་ཟེར་དཀར་པོའི་འཕྲོ་འདུ་ཡིས། །གཏི་མུག་མུན་པ་བསལ་བར་བྱ། །ཉོན་མོངས་གཏི་མུག་ཞི་བར་བསམ།
།རྒོད་པའི་སྟོབས་ཀྱིས་འགྲོ་འདོད་ན། །རང་ལུས་རྡོ་རྗེ་སྐྱིལ་ཀྲུང་དང་། །སྲིན་ལག་ནས་བཟུང་ལྟག་པ་ནས། །བཀུག་ནས་གཡས་གཡོན་དག་ཏུ་ནི། །དྲག་པོ་གསུམ་གསུམ་བཅུ་བར་བྱ། །སྤྱི་བོར་ཐལ་རྒྱོབ་ཐིམ་པར་བསམ།
།ཡི་དྭགས་སྟོབས་ཀྱི་ཁྲོ་ཚིག་ན། །དོན་ཡོད་གྲུབ་པའི་འདུག་སྟངས་ཀྱིས། །རང་ལ་གནོད་པའི་ཡི་དྭགས་རྣམས། །བདུད་རྩིའི་རྒྱུན་གྱིས་ཚིམ་པར་བྱས།
།དེ་རྗེས་རྡོ་རྗེ་སྐྱིལ་ཀྲུང་དང་། །འབར་བའི་ཕྱག་རྒྱ་ཐུགས་ཀར་བཅའ། །ཁྲོ་བོའི་སྤྱན་གྱིས་ཕྱོགས་བཅུར་བལྟ། །ཕྱོགས་བཅུའི་ས་བོན་མེ་འཁོར་གྱིས། །རང་ལ་གནོད་བྱེད་བསྐྲད་པར་བསམ། །ཁྲོ་བོའི་བཟླས་པ་བག་ཙམ་བྱ།
།རྒྱུད་ལ་ཞེ་སྡང་སྐྱེས་གྱུར་པས། །འབྲས་བུ་སྟོད་དུ་གཟེར་གྱུར་ན། །རྡོ་རྗེ་སྐྱིལ་ཀྲུང་བྲང་ཁ་རུ། །སོར་མོ་བསྣོལ་ཏེ་བྲང་ཁ་རུ། །གཡས་གཡོན་དུ་ནི་གསུམ་གསུམ་བཅུ། །ཁྲོ་བོའི་སྤྱན་གྱིས་གཡས་གཡོན་བལྟ།
།དེ་རྗེས་མཉམ་བཞག་ཕྱག་རྒྱ་ཡིས། །ཕོ་བར་བསྡམས་ཏེ་ལན་གསུམ་རྡེགས།
།རྒྱུད་ལ་འདོད་ཆགས་སྐྱེས་པ་ཡི། །འབྲས་བུས་སྨད་དུ་ནད་བྱུང་ན། །ལུས་པོ་བརྐྱང་སྟེ་རྐང་པ་གཡོན། །ལག་པ་ཟན་སྤྲུའི་ཕྱག་རྒྱ་བཅའ།
།དེ་གཉིས་དམིགས་པ་གཅིག་ཡིན་ཏེ། །སྙིང་ཁར་ཡི་གེ་མ་དང་ནི། །ཐིག་ལེ་དཀར་དམར་སྦྱོར་བ་ཡི། །རྒྱུད་ལ་བདེ་སྟོང་སྐྱེས་པར་བསམ།
།ཕྱི་ཤོར་ནང་དུ་དྲོད་མེད་ན། །ལུས་སེམས་བྲལ་ཏེ་བསྡུ་བར་བྱ། །གཏུམ་མོ་དག་གི་མེ་ལ་ཡིན་ཏེ། །མེ་དེ་ཕྲ་བ་སྐུད་པ་ཙམ། །དབུ་མ་སྒྱུ་ཞབས་སླེབ་བསམས་ལ། །དེ་ལ་སེམས་གཏད་གསལ་བར་བསྒོམ། །དྲོད་སྐྱེས་བདེ་བ་མེད་གྱུར་ན། །ཐིག་ལེ་དབབ་པའི་མན་ངག་ནི། །འདོམ་གསུམ་ཆོད་པའི་གདན་ལ་ནི། །ཀོག་གིས་ལངས་ལ་སྡིགས་མཛུབ་རྒྱངས། །གཅུ་ཞིང་གཅུ་ཞིང་མདུན་མཐའ་དང་། །དེབཞིན་རྒྱབ་མཐའ་དེ་འོག་ཏུ།
།སེམས་དཔའི་སྤྱིལ་ཀྲུང་སྲིན་ལག་བཟུང་། །དྲག་ཏུ་གཅུ་ཞིང་ལག་ངར་བཤུད། །དེ་འོག་ལན་གསུམ་སྤྲུག་པར་བྱ། །དེ་ཡིས་བདེ་བ་འབེབས་པ་ཡིན།
།ལུས་སྦྱོང་དེ་དག་གང་བྱེད་ཀྱང་། །རླུང་བཟུང་པ་ནི་ཤིན་ཏུ་གཅེས།
།མཁའ་འགྲོ་མ་ནཻ་གུ་མའི་ཞལ་གདམས་སོ།། ཿ །།