Bla ma shangs pa'i 'dzag bsrungs bka' rgya ma

Resource ID	KN4
Title	bla ma shangs pa'i 'dzag bsrungs bka' rgya ma
Alt. title	thig le 'dzag pa'i bsrung pa
Topics	Various
Author	Khyungpo Neljor
Link	BDRC W4CZ58783 (p. 21)

To input
༄༅། །བླ་མ་ཤངས་པའི་འཛག་བསྲུངས་བཀའ་རྒྱ་མ།

བླ་མ་དམ་པ་རྣམས་ལ་ཕྱག་འཚལ་ལོ།
ཐིག་ལེ་འཛག་པའི་བསྲུང་པ་ཞེས་བྱ་བ།
ཐིག་ལེ་འཛག་པ་ལ་རྒྱུ་དྲུག་ཡོད་ཏེ། བདེ་བ་རྒྱས་ཏེ་གང་བས་འཛག །གདོན་དང་བགས་ཀྱིས་རྨི་ལམ་འཛག །ནད་བཞི་རླུང་དང་སྡོངས་ཏེ་འཛག །ཁ་ཟས་མི་མཐུན་པས་རང་ཉམས་ཏེ་འཛག །རིག་མའི་རྐྱེན་གྱིས་ཆགས་པ་སྐྱེས་རེ་འཛག །སྤྱོད་ལམ་གྱིས་་་་་ལ་དང་སྡོངས་རེ་འཛག་པའོ།
།དེ་དག་གི་བསྲུང་བ་ནི།
དང་པོ་ཡིད་ཀྱིས་རླུང་ཟིན་པས་སྣ་བུག་གཉིས་ཀྱི་སེམས་སོའི་རླུང་ལོག །དེས་གཏུམ་མོའི་མེ་འབར། དེས་རྩའི་འདུད་པ་གྲོལ། དེས་འོ་མ་དང་འདྲ་བའི་ཁམས་ལུད། དེས་མར་གསར་པ་དང་འདྲ་བའི་ཐིག་ལེ་འཕེལ། དེས་བདེ་བ་ཆེན་པོའི་འདོད་ཆགས་ཀྱི་མེ་འབར་བས། སྐྱེས་པ་དང་དུད་འགྲོ་ལ་ཡང་ཆགས་པ་སྐྱེ་སྟེ། དེས་ལུས་ལ་རྒྱུན་མ་ཆད་པར་ཐིག་ལེ་འཛག་པ་ཡིན་ཏེ། སྒོམ་པའི་རྗེས་ལའམ། དྲག་ཤུལ་དུ་ལང་པའམ། འོ་དོད་ལྟ་བུས་རྐྱེས་བྱས་ཏེ། འདམ་ཚོར་པར་འཛག་པ་ཡིན་པས། དེ་ཡང་ཞག་གྲངས་ཅི་རིགས་པར་བཟུང་བར་མ་ནུས་ན། འདི་སྲོག་གི་བར་ཆད་དུཡང་འགྲོ་སྟེ། ཏིང་ངེ་འཛིན་བར་ཆད་དུ་ཡང་འགྲོ་བ་ཡིན་པས།
དེ་བསྲུང་བ་ནི། སྤྱོད་ལམ་དལ་བར་འགྱུར་བ་རྣམ་པ་དྲུག དག་འདྲེན་པ་ཞི་དྲག་གི་གནད། ཧཱུྃ་དྲག་ལ་རིང་བ། སེམས་ཧཱུྃ་ཕགས་ཀྱིས་བུག་པ་དགག །དྲག་པོ་ཧིག་ཀི །ཞི་བ་ཧིག་ཀི སྟེང་རླུང་རྣམ་པར་འགོག་པ་ལ་སོགས་པས་བསྲུང་ངོ་།
།འགྱུར་བ་དྲུག་གི་རྒྱ་མཚོ་རི་རབ་ལ་སྐམས། གླིང་བཞི་དབང་དུ་བསྡུ། རོ་འཛིན་རང་བཞིན་དུ་བཞག་གོ
།དབང་པོའི་མཆོག་སྟེ་དུ་ལྟ་བ་ནི། ཞལ་ལས་ཤེས་པར་བྱའོ།
།གཞན་ཡང་བགྲད་པའི་་་་་་ལ་གྱི་གནད་ཀྱི་མཆེ་བས་བསྲུང་བ་ནི། ལག་པ་ཁུ་ཚུར་བཅངས་ལ་སྣོལ་ཏེ་བྲང་དུ་བཞག །མིག་གྱེན་དུ་ལྟོག་ཏེ། མ་ཡབ་པར་བཞག་པས་བསྲུང་། མིག་ཧ་ཅང་ཐོ་ན་མི་ཏོག་པར་སོང་ནས་བདེ་བ་གཏོར་ནས་འགྲོ་བས། ཧ་ཅང་མི་མཐོ་བར་བྱ། ཁྱད་པར་དུ་སྟོབས་ཀྱི་ཧཱུྃ་ཉི་ཤུ་རྩ་གཅིག་གིས་བསྲུང་། དེས་ཀྱང་བསྲུང་བར་མ་ནུས་ན། བཞི་བཅུ་བརྒྱད་ཀྱིས་བསྲུང་། ཡང་ལག་པ་ཁུ་ཚུར་གཉིས་བཅངས་ཏེ་མིག་ཐད་ཀར་ལྟས་ལ་ཤེས་པ་འོག་མིན་ན་ཡར་བཏང་ན་འཆད་པར་འགྱུར་རོ། །འདི་ནི་ཞེན་པ་ལོག་པ་ཡིན་ནོ། །སྟེང་རླུང་རྣམ་པར་འགོག་པ་ཡང་བྱའོ།
།ཐུར་དུ་འཛག་པ་བསྲུང་པས་སྟེང་དུ་འོང་ཏེ། མིག་དང་རྣ་བ་ནས་འཛག་ན། སེང་གེ་རྣམ་གྲོལ་གྱི་ཕྱག་རྒྱས་བསྲུང་ངོ་།
།སྣ་བུག་གཉིས་ནས་ཁྲག་དུ་འཛག་ན། ལག་པ་ཁུ་ཚུར་གཉིས་བཅངས་ཏེ་སྙིང་ཁ་ནས་ཕྱིར་དྲག་དུ་ཡང་ཡང་རྐྱང་བས་བསྲུང་ངོ་།
།ཡང་རྣམ་པ་གཅིག་ལ་རྒྱུ་གང་གིས་འཛག་ཀྱང་རུང་སྟེ། ནས་པོ་རྒོད་ཕུལ་གསུམ། དྲི་མོའི་རོ་ལྔ། བླ་རྩི་སྲན་མ་ཙམ་གཅིག །དེས་གསུམ་ཞིབ་པར་བཏགས་ལ། ཆང་གི་ནང་དུ་བཏབ་ལ་བཏུད། དེ་ཡང་ཡང་བྱས་ན་བསྲུང་ངོ་།
།དེས་མ་ཆོད་ན་གླང་བུའམ་ཁྱི་དཀར་པོའི་འབྲུ་བོ་མའི་ནང་དུ་གཙོས་ནས་ཟོས་ན་ཐིག་ལེ་ཆོད་དོ།

།གཉིས་པ་གདོན་དང་བགས་ཀྱི་སྟོབས་ཀྱིས་རྨི་ལམ་དུ་འཛག་པ་ནི། གདོན་ཡིན་ན་དུས་ངེས་པ་ཅན་དུ་འཛག་ཏེ། རྨི་ལམ་ན་འཇིགས་ཤིང་ཡ་ང་བ་དང་། རྟ་ཞོན་པ་དང་། གཡང་ལ་འཕྱོངས་པ་ལྟ་བུས་འཛག་པ་ཡིན་ལ། བག་ཆགས་ཡིན་ན་དུས་ངེས་པ་མེད་པར་འཛག་སྟེ། རྨི་ལམ་དུ་བུད་མེད་དང་ལྡིག་གནས་པ་ལྟ་བུ་ལ་རྟེན་ནས་འཛག་པའོ།
།དེ་གཉིས་ཀ་ཡང་མ་ཚོར་བར་འཛག་པ་ཡིན་པས་བསྲུང་བ་མ་བྱས་ན་སྲོག་གི་བར་ཆད་དུ་འགྲོ་བ་ཡིན་ནོ།
།དེ་ལ་དང་པོ་གདོན་གྱི་བསྲུང་བ་ནི། དྲུག་ལས།
དང་པོ་གུ་གུལ་ནག་པོ། མིའི་ཀླད་པ་མ་རུལ་བ། ཡུངས་དཀར་བསྲེགས་པའི་ཐལ་བ། བུད་མེད་ཀྱི་ཟླ་བ་མར་ངོའི་པད་མ་རག་ཏ་མ་རུལ་བ་རྣམས་སྦྱོར་བ་ལེགས་པར་བྱས་ཏེ། དེ་ཡང་ལྕགས་ཀྱི་གནོད་དུ་ཡུངས་དཀར་གྱི་ཐལ་བ་ཞིབ་པར་རྒྱུད་པ་དང་། གུ་གུལ་ཀླད་པ་རྣམས་བསྲེས་ཏེ་ཟན་ཙམ་དུ་བྱས་ལ། དྲོད་མ་ཡལ་བ་ལ་རིལ་བུ་སྲན་མ་ཙམ་བྱས་ཏེ། སྲོད་ཀྱི་དུས་སུ་རང་གི་ལག་མཐིལ་དུ་ཆིལ་མའམ་འཆང་གིས་སྦྱར་ཏེ། དེ་ནས་རང་གི་གསང་གནས་དང་། བཤང་ལྕིའི་བར་དུ་བྱུག །འཛུབ་མོས་སྐྱེ་རགས་འཆིང་བའི་འཚུལ་དུ་སྐྱེད་ན་ཚུར་བྱུག །གདོན་ཡིན་ན་དེས་ངེས་པར་བསྲུང་ངོ་།
།གཉིས་པ་ལུས་ཀྱི་སྤྱོད་ལམ་གྱིས་བསྲུངས་ཏེ། དེ་ཡང་དུས་ངེས་པ་ཅན་དུ་འཛག་ན། དེའི་དུས་སུ། ཙོག་པུར་བྱས་ཏེ་གཉིད་ལོག་པས་གདོན་གྱིས་མི་ཚུགས་པས་མི་འཆོར་བ་ཡིན་ནོ།
།གསུམ་པ་ནི་མེ་ཏོག་པར་ཙ་ལུ་ཀའི་འབྲུས་བཏགས་པ་དང་། འོ་མ་སྐོལ་བ་ཁྱོར་བ་གང་ཙམ་དང་བསྲེས་པ་སྔ་གྲོ་ལྟོ་སྟོང་ལ་མཐུང་ནས་བསྲུང་ངོ་།
།བཞི་པ་ནི་ྦཀུད་པ་ནག་པོ་འ་ལ་མདུད་པ་བདུན་ནམ་ཉི་ཤུ་རྩ་གཅིག་བྱས་ཏེ། ལྷག་པའི་ལྷའི་སྙིང་པོ་བརྒྱ་རྩ་བརྒྱད་དམ། ཉི་ཤུ་རྩ་གཅིག་བཟླས་ཏེ་སྐྱེད་པ་ལ་བཅིང་ངོ་།
།ལྔ་པ་ནི་ཁྱད་པར་དུ་རྒྱལ་པོའི་གདོན་གནོད་པ་ན། དཔའ་བོ་གཡུལ་དུ་གསད་པའི་རུས་པ་ཆུ་ལ་བ་་་་ར་ཏེ། ལྟེ་བའི་ཐད་དུ་མེ་ལོང་ཙམ་གཅིག་ཡང་ཡང་བྱུགས་ན་དེས་བསྲུང་ངོ་།
།དྲུག་པ་ནི་བྱ་པའི་རྒྱུད་ནས་གསུང་པའི་ཐུན་མོངས་གི་བསྲུང་བས་བསྲུང་བ་ནི། དེ་ཡང་གཞོན་ནུས་༼བུ་མོ་རྩང་མ་གྲོགས་པའི་ཆོས་ཀྱིས་མ་གོས་པ་གཅིག་གིས་སྐལ་པའི་་་་་ད་བུ།༽སྐལ་པའི་བཀུད་པ་ནི། ལེབ་རྐན་རྩིའམ་གུར་གུམ་གྱིས། གཙོས་ལ་མདུད་པ་བདུན་བྱས་ཏེ། སྲོད་ལ་རིགས་སྔགས་སྟོང་རྩ་བརྒྱད། བཟླས་ཏེ་སྐྱེད་ལ་བཅིངས་པ་ན། འདིས་ནི་སྒྲུབ་པོ་དེ་ད་་་་་། ཁུ་བ་རྟག་ཏུ་འཛིན་པར་འགྱུར།
དེ་ལ་དེའི་སྔགས་ནི། ཨོཾ་ཤུད་ཏྲ་དྷ་ར། བྷན་དྷ་བྷན་དྷ། སིད་དྷར་ཏེ་སྭཧཱ༔ ཞེས་པའོ།
།ཡང་ན་སྐུད་པ་ནག་པོ་གཅིག་ལ་འདུད་པ་ཉི་ཤུ་རྩ་གཅིག་བྱས་ལ། ལྷག་པའི་ལྷའི་སྙིང་པོ་མང་དུ་བཟླས་ཏེ་སྐྱེད་པ་ལ་བཅིང་ངོ་།
།དེ་ལྟ་བུ་ཡི་བསྲུང་བ་དྲུག་པོ་དེ་ནི། གང་ཡང་་་་ད་བ་གཅིག་གིས་བསྲུང་བར་ནུས་པ་ཡིན་ནོ། །དེ་དག་ཐམས་ཅད་ཀྱིས་ཀྱང་བསྲུང་བར་མ་ནུས་ན་དབང་ཕྱུག་ཆེན་པོའི་གོ་ལོག་གི་སྦྱོར་བས་བསྲུང་བར་བྱ་སྟེ། རང་གི་ལུས་ལ་བ་གླང་གི་ལྕི་བས་བྱུགས་ལ། བདག་ཉིད་དབང་ཕྱུག་ཆེན་པོ་གཅེར་བུ་བ་གླང་གི་ལྕི་བས་ལུས་ལ་བྱུགས་པ་རལ་པ་ཅན། ཞབས་གཡོན་སྐུམ། གཡས་རྐྱང་བ། ཕྱག་གཡོན་མཆོད་སྦྱིན་གྱི་སྟེང་ན་རིལ་བ་སྤྱི་ལུགས་འཛིན་པ༼དངོས་་་་་་ཡོད་ན་ཤིན་དུ་ཟབ༽། གཡས་རྨ་བྱའི་སྒྲོའི་མཆུན་པོ་ཆེན་པོ་བསྣམ་པ། དེས་རང་གི་གསང་གནས་བཀབ་་་་་་གིས་སྒོམ་ཏེ། ཨ་ཨ་རི་ཧན་ཏེ་འཇུག་འཇུག །ཅེས་ལན་ཉི་ཤུ་རྩ་གཅིག་ལ་སོགས་པ་བཟླས་སོ། །འདིས་ནི་ངེས་པར་ཐུབ་སྟེ། བདེ་བ་མེད་ནས་འགྲོ་བ་ཡིན་ནོ། །འདི་ནི་ཕྱི་རོལ་པའི་བསྲུང་ན་ཡིན་ནོ། །ཅེས་སོ།
།བགས་ཀྱི་རྨི་ལམ་དུ་འཛག་པ་བསྲུང་བ་ནི། བུད་མེད་ཀྱི་གོས་ཀྱི་དྲེག་པ་ཤུད་ནས་ཐུམ་བུ་བྱས་ཏེ། སྐྱེའམ་དཔུང་པའི་སྐེད་པ་ལ་བཏགས་ན་དེས་བསྲུང་ན་ཡིན་ནོ། །ཡང་རྣམ་པ་གཅིག་ལ་རྒྱུ་གང་གིས་འཛག་ཀྱང་རུང་སྟེ། ནས་སོ་རྒོད་ཕུལ་གསུམ་ལ་སོགས་པ་སྔར་དང་འདྲའོ།
།གསུམ་པ་བསྲུངས་བ་ནི། སྤྱིར་ཟས་བཅུད་ཅན་ལ་རྟེན། ཁྱད་པར་དུ་ལྟོ་སྟོང་ཚྭ་བ་གསུམ་གྱི་གམ་ཕྱེ་ཅུང་ཟད་རྟེན། གཅན་གཟན་ལ་སོགས་པ་དྲོ་བར་གྱུར་པའི་རས་མས་གསང་གནས་དང་སྐེད་པར་བཀྲིས་ལ། གྲུ་མོས་སླེབ་པའི་སར་གློ་གཉིས་སུ་རྒྱ་གྲམ་རེ་བྱས་ཏེ། དབུས་སུ་སྲ་བ་རིལ་མ་ཙམ་པའི་མེ་ཙ་ལྔའམ་བདུན་གདན། དེས་ངེས་པར་གསུང་ངོ་།
ལུས་ངག་གི་འགྱུར་བ་དྲུག་བྱས་ཏེ། མིག་གྱེན་དུ་བགྲད་པ་སོགས་བྱས་པས་བསྲུང་། ངག་འདྲེན་པ་ཞི་དྲག་གིས་བསྲུངས། དེ་དག་གིས་བསྲུང་མ་ནུས་པ་རྣམས་ལ། ནུས་པ་ཁྱད་པར་ཅན་གྱི་་་་་ལ་གྱིས་བསྲུང་བ་ནི། བྱ་ཁྲའི་སྒོང་ང་སྣོད་མ་ཆག་པར་ཟ་མ་ཏོག་མ་སོགས་པར་བཅུག་སྟེ། འདོམས་སུ་བཏགས་ནས་གུ་གུལ་གྱི་དུད་པས་དབང་པོའི་སྒོ་བདུག །དེས་ངེས་པར་ཆོད་དོ། །ཡང་ན་བྱ་ངང་པ་མ་གསར་གྱི་སྒོང་ང་བླངས་ཏེ་སྒོང་ངའི་བཅུད་སེར་པོ་དེའི་ཕྱེད་གསང་གནས་སུ་བྱུག །ཕྱེད་འབབ་ཆུ་ལ་སྐུར་ན་དེས་ངེས་པར་བསྲུང་ངོ་། ཨྀཐི།།
ཡང་རྣམ་པ་གཅིག་ལ་རྒྱུ་གང་གིས་འཛག་ཀྱང་རུང་སྟེ། ནས་པོ་རྒོད་ལ་སོགས་པ་གོང་དང་མཐུན།
དྲུག་པ་བསྲུང་བ་བྱ་བ་ནི། སྤང་བར་བྱ་བ་ཚ་བ་དང་། ལན་ཚྭ་ཆེས་པ་དང་། སྒ་ལ་སོགས་པ་རྩུབ་མོའི་རོ་རྣམས་སྤང་བར་བྱ་སྟེ། ཨ་རུ་ར་འོ་མར་སྦངས་པ་རྒྱུན་དུ་རྟེན་པར་བྱའོ། །བསྲུང་ན་ཐ་མ་གཉིས་པོ་དེ་ནི་སྔར་སྤྱོད་ལམ་གྱི་བདུད་རྩི་རྟེན་པའི་སྐབས་བཞིན་དུ་ཤེས་པར་བྱའོ། །དེ་དག་ནི་ཐིག་ལེ་འཛག་པ་བསྲུངས་བའི་མན་ངག་སྣ་ཚོགས་མུས་པའོ།། To input