Ga'u ma'i gsal byed

Resource ID	SCv9p301
Title	ga'u ma'i gsal byed
Topics	Mahamudra Gauma
Sub-Topics	Commentary
Author	Drakpa Gyeltsen
Associated Person	Tsangma Shangtön
Link	BDRC W23922

༄༅། །གའུ་མའི་གསལ་བྱེད་བཞུགས་སོ།།

བླ་མ་དམ་པའི་ཞབས་ལ་གུས་པས་ཕྱག་འཚལ་ལོ།
།ཕྱག་རྒྱ་ཆེན་པོ་རང་བབས་གསུམ་གྱི་ཁྲིད་ཀྱི་སྐབས་སུ། བརྒྱུད་པའི་ལོ་རྒྱུས་ཀྱི་རྗེས་ལ། བརྒྱུད་པ་དེ་རྣམས་གོང་མ་གོང་མས། འོག་མ་འོག་མ་ལ་ལུང་བསྟན་པ། ཡི་དམ་གྱིས་བྱིན་གྱིས་རླབས་པ། མཁའ་འགྲོ་ཆོས་སྐྱོང་ཐམས་ཅད་ལ་མི་བཞིན་དུ་ལབ་ཅིང་། བྲན་བཞིན་དུ་འཁོལ་བ། སངས་རྒྱས་ཀྱི་བརྒྱུད་པ་རྟོགས་ལྡན་དང་གྲུབ་ཐོབ་ཀྱི། མི་བར་དུ་ཁྱི་མ་ཞུགས་པའི་བརྒྱུད་པ་ཡིན་གསུང་། སློབ་མ་བཀྲི་བའི་ཚུལ་མི་འདྲ་བ་མང་དུ་ཡོད་ཅེས་པ། ཕྱག་རྒྱ་ཆེན་པོ་བཤད་རྒྱུད་རབ་ཏུ་མི་གནས་པ་རྙོག་པ་མེད་པ། གསང་བ་བླ་ན་མེད་པ་རྣམས་ཀྱི་རྗེས་སུ་འབྲངས་ནས། བྲམ་ཟེ་ཆེན་པོས། ལམ་སྒྲུབ་སྐོར་སྙིང་པོའི་སྐོར་ལྟར་དུ་བཀྲི་བའམ། གསང་བ་འདུས་པའི་རྗེས་སུ་འབྲངས་ནས། སློབ་དཔོན་འཕགས་པ་ཡབ་སྲས་ཀྱི་ལམ་གྱི་རིམ་པ་སྔར་ལྟར་བཀྲི་བའམ། དུས་ཀྱི་འཁོར་ལོའི་རྗེས་སུ་འབྲངས་ནས་ལམ་སྦྱོར་བ་ཡན་ལག་དྲུག་ལྟར་དུ་བཀྲི་བའམ། རྩ་རྒྱུད་བརྟག་པ་གཉིས་པའི་རྗེས་སུ་འབྲངས་ནས། བིརྺ་པས་ལམ་འབྲས་བུ་དང་བཅས་པ་ལྟར་བཀྲི་བའམ། བདེ་མཆོག་ཨ་ན་པའི་རྗེས་སུ་འབྲངས་ནས། དམ་པ་རིན་པོ་ཆེས། ལམ་རིག་པ་དྲི་མ་མེད་པ་ལྟར་བཀྲི་བ་ལ་སོགས་པ་འཁྲིད་ཚུལ་བསམ་གྱིས་མི་ཁྱབ་ནའང་། འདིར་ཡེ་ཤེས་རྒྱ་མཚོའི་རྒྱུད། རིན་ཆེན་རྒྱ་མཚོའི་རྒྱུད། ཡོན་ཏན་རྒྱ་མཚོའི་རྒྱུད། རྒྱ་མཚོ་རྣམ་པ་གསུམ་གྱི་རྗེས་སུ་འབྲངས་ནས། རྡོ་རྗེ་འཆང་གིས་ཅེས་སེ། གའུ་མ་ཞེས་གྲགས་པས། བླ་མ་ཤངས་པས། གསེར་དང་འདྲ་བའི་གདམས་པ་རྣམས། བལ་པོའི་གའུ་སྙིང་འདྲབ་ཅིག་གི་ནང་དུ་བཅུག་སྟེ། ཟབ་པའི་དོན་གྱིས་སྐུ་ལུས་དང་མི་འབྲལ་བར་མཛད་པ་དང་། སྐུ་གཤེགས་དུས་དེའི་ནང་ནས་བྱུང་བས། དེར་གའུ་མ་ཞེས་གྲགས་ཏེ། གདམས་པ་གཞན་ཡང་མང་དུ་བྱུང་ཀྱང་། ཆོས་འདེས་སྤྱི་མིང་དགོས་སུ་ཐོབ་པ་ལྟ་བུ་ཡིན་གསུང་། སློབ་མ་སྤྱིར་ཞེས་པས་རྔུལ་ཚོན་གྱི་དཀྱིལ་འཁོར་རྒྱས་པར་དབང་ཐོབ་ཅིང་། འདིའི་རྗེས་སུ་འདིའི་བྱིན་གྱིས་རླབས་ཀྱིས་བཀའ་བརྒྱུད་པར་སྨིན་པར་བྱས་ནས། དེའི་དྲོད་མ་ཡལ་བ་ལ། འདིའི་རྒྱུན་ཉམས་སུ་ལེན་པ་ཡིན་གྱིས་དཀྱིལ་འཁོར་རྒྱས་པའི་སྔོན་དུ་མ་སོང་བར། འདིའི་བཀའི་ཆོས་སྒོ་དབྱེར་མི་ཉན་གསུང་། སྐྱབས་འགྲོ་དང་ཅེས་པ། སྒོམ་ཐུན་རེ་རེའི་སྔོན་དུ་ཡང་བྱ་སྟེ། ཁྱུང་པོ་མི་དང་མི་མ་ཡིན་པའི་གནོད་པས་མི་བརྫི་བ་དང་། ཞེས་གསུངས་པས་བར་ཆད་མི་འབྱུང་གསུང་། སེམས་བསྐྱེད་པས། ཐེག་པ་ཆེན་པོའི་ལམ་དུ་འགྱུར་འོ།
།རང་གི་ལུས་ཅེས་པ་འདིར་གསང་སྔགས་བླ་མེད་ཀྱི་ཡི་དམ་ངེས་པར་སྒོམ། དེ་ལ་དཀྱིལ་འཁོར་རྒྱས་པར་བསྒོམས་ཀྱང་འགལ་བ་མེད་ཅིང་ལེགས་ནའང་། འདིར་མཚན་མ་མེད་པའི་རྫོགས་རིམ་གཙོ་བོར་བྱེད་པས། དཔའ་རྐྱང་ངམ་ལྷན་སྐྱེས་ལྟ་བུ་སྒོམ། དེའང་གཞིའམ་རྟེན་ཙམ་མ་ཡིན་པའི་རྣམ་པ་གསལ་བ། དག་པ་དྲན་པ། ང་རྒྱལ་བརྟན་པ། གསལ་སིང་བ་བསྒོམ་གསུང་། བླ་མའི་ཐུགས་ཀ་ནས་འོད་ཟེར་འཕྲོས་རྩ་བརྒྱུད་ཀྱི་བླ་མ་ཡི་དམ། ཆོས་སྐྱོང་རྣམས་བཀུག་སྟེ། རིམ་པ་བཞིན་དུ་སྐུའི་སྟོད་སྨད་བར་གསུམ་ལ་བསྟིམས་ཀྱང་འགལ་བ་མེད་གསུང་། །གནོད་བྱེད་ཅེས་པས་བསམ་པས་བར་ཆད་མི་འབྱུང་ཞིང་། གཞི་བདག་བསམ་པས་ཁུ་ལྡོག་མི་འབྱུང་གསུང་། སྙིང་གི་དཀྱིལ་ཅེས་པ། མ་ཡེངས་རྩེ་གཅིག་ཏུ་བྱེད་པ་མཚོན་པ་ཡིན། སེམས་ཡེངས་ན་བྱིན་རླབས་མི་འབྱུང་།
སྤྱོད་འཇུག་ལས། བཟླས་བརྗོད་དང་ནི་དཀའ་ཐུབ་ཀུན། །ཡུན་རིངས་དུས་སུ་འབད་བྱས་ཀྱང་། །སེམས་གཞན་གཡེང་བས་བྱས་པ་ནི། །དེ་ཉིད་རིག་པ་དོན་མེད་གསུངས། །ཅིས་ཏེ་དོན་ཡེ་མེད་པ་མ་ཡིན་ཡང་། །ཆུང་བ་ལ་དགོངས་པ་ཡིན། །སྙིང་རྗེ་པདྨ་དཀར་པོ་ལས། སེམས་ཉོན་མོངས་པ་འབྱིན་པ་བཅས་པས་བསྒྲུབས་ན། དཔེ་སྐར་མ་ལྟ་བུ་ཡང་འབྲས་བུ་འབྱིན་པར་མི་ནུས་སོ། །ཞེས་གསུངས་པས་མ་ཡེངས་པ་གལ་ཆེའོ།
།ཆོས་རྗེས་པའི་གསུང་གིས། འདིའི་ལུགས་ཀྱིས། སྤྱིར་གསོལ་བ་རྩ་ཚིག་གསུམ་པོ་དེས་འདེབས། དེ་མིན་བྱིན་རླབས་དང་བློ་འསྒུལ་གལ་ཆེ་བས་བཏབ་པས། ཚིག་དང་དབྱངས་ཀ་ལ་མི་བྱ་བའི་ངེས་པ་མེད། འགའ་ཞིག་ངེད་ཀྱི་དང་ཁོའི་ཟེར་ནས། ཆགས་སྡང་བྱེད་པའང་འདུག་སྟེ་མ་གོ་བ་ཡིན། གསོལ་འདེབས་འཁོར་བ་ལས་སྒྲོལ་ཐབས་སུ་བཤད་པ་ལས། ངེད་དང་ཁྱེད་དུ་ཕྱེ་ནས་ཆགས་སྡང་གི་ལས་བསོག་པ་མ་གསུང་། བླ་མའི་སྐུ་ལས་འོད་ཟེར་བྱུང་ནས། སྡིག་སྒྲིབ་སྦྱངས་ཏེ། ཕྱི་ཡི་དམ་ལ་ནང་སྟོང་པར་བསྒོམས་པའམ། ཡང་ན་ཐིག་ལེ་བདེ་བའི་རང་བཞིན་ཆེ་ཆུང་ཡུངས་འབྲུ་ཙམ་བྱུང་ནས་ལུས་གང་སྟེ་བསམ་པའམ། འགུལ་ན་བདེ་བ་སྐྱེ་བ་གཉིས་གང་རུང་བྱ་སྟེ། དེ་ཡང་དྭངས་མ་འཕེལ་ཞིང་། འོད་གསལ་འཆར་བའི་ཐབས་ཁྱད་པར་ཅན་ཡིན་པས་ཕྱི་མ་བྱ་གསུང་ངོ་།
།དེ་ཡང་བཀའ་མ་ཐོབ་གོང་དུ་འོད་ཟེར་དུ་བྱེད་ལ། བཀའ་ཐོབ་ནས་ཐིག་ལེར་བྱེད་པ་ཕྱག་ལེན་གསུང་ངོ་།
།ཚར་གསུམ་ཁུག་པ་དབང་གིས་ཅེས་པ། འཁྲིད་ལུགས་གཞན་རྣམས་ལ། སྔོན་འགྲོ་སྡིག་སྦྱོངས་ལ་ཕྱག་དང་བསྐོར་བ་མཎྜལ་ལ་སོགས་པ་བཤད་ནའང་། འདིར་གསོལ་འདེབས་དང་དབང་ལེན་པ་ལ་བྱེད་པ་འདི་སྡིག་པ་དག་པའི་རྟགས་མྱུར་ཞིང་། སྤྲོས་པ་ཆུང་ལ་ཉམས་སུ་བླང་བདེ་བ་ཡིན། སྡིག་སྦྱོངས་ཡང་འདི་ལས་ལྷག་པ་མེད་དོ།
།ཨ་བྷི་ཥིཉྩ་ན་དྲི་མ་འཁྲུད་པ་དང་། ཨ་བྷི་ཥེ་ཀ་ཏ་སྐལ་པ་འཇོག་པའོ།
།གཞན་ཡང་གསང་སྔགས་པའི་ལམ་ཐམས་ཅད་དབང་དུ་བྱས་ཏེ།
རྡོ་རྗེའི་སྒོ་རྒྱུད་ལས། གཞི་ནི་དབང་ལ་བརྟེན་པ་དང་། ལམ་ནི་དབང་གིས་བསྒྲོད་པ་དང་། འབྲས་བུ་དབང་དུ་གནས་པའོ། །ཞེས་གསུངས་པའོ།
།རླུང་རོལན་གསུམ་ཞེས་པ་གསུམ་འམ་དགུ་ཅི་རིགས་སུ་བྱ། དེ་གལ་ཆེ་སྟེ། དཔེར་ན་ཁང་པ་སྟོང་པའི་ནང་ཕྱག་དར་བྱེད་པ་དང་འདྲ་བའམ། འོ་མ་རུལ་པ་ཐིག་པ་གཅིག་གིས་ཟངས་གང་ཆུང་གསན་པ་བཞིན་དུ། རླུང་རོ་ངན་པའི་ཀྲུགས་ཅིག་རྩ་ནང་དུ་ལུས་ན། དེས་རླུང་ཐམས་ཅད་དབང་བྱས་ནས་སྐྱོན་གེགས་བསྐྱེད་པས། རླུང་འབུད་པ་གལ་ཆེ་གསུང་། སྟན་བདེ་བ་གལ་ཆེ། སྒྲུབ་ཐབས་ཀུན་ནས་ཀྱང་སྟན་བདེ་བ་ལ་འདུག་སྟེ། ཅེས་པའམ། སྟན་ནང་ཚངས་ཅན་ལ་འདུག་སྟེ། ཞེས་གསུངས་སོ།
།མིག་གཉིས་སྣ་རྩེར་གཏད་པ་ནི། མཚོན་པ་ཙམ་ཡིན་གྱིས། བྱིང་རྒོད་ཀྱི་སྐབས་ཀྱིས་ཤེས་དགོས་སོ།
།ཕྲག་གོང་མཉམ་པ་ནི། དཔུང་པ་རྒོད་ཤོག་ལྟར་ཕྱིར་ཐེན་ཏེ། འོ་སྐོལ་གྱི་སྙིང་འདི་གློ་སྤྲལ་གཉིས་ཀྱི་བར་ན། མ་འཕང་དུ་བུ་བཟུང་བ་ལྟར་ཡོད། དེ་ལ་དཔུང་པ་ཕྱིར་ཐེན་ནས་བྲང་བུར་བཏང་བས། གློ་གཉིས་ཀ་ཤ་འབེ། དེས་སྙིང་ཟླ་མེད་དུ་རྗེན་གྱུར་ནས་ཤེས་པ་གསལ་སྟོང་དུ་གྱུར་ཞིང་། ཏིང་ངེ་འཛིན་གྱི་གེགས་མི་འབྱུང་ངོ་། ལྕེ་རྐན་ལ་སྦྱར་བས་དབུག་སྣ་ནས་རྒྱུ་ཞིང་ཁ་སྣ་མི་སྐམ་པ་དང་། གཞན་ཡང་རླུང་ཟིན་པའི་ཡོན་ཏན་ཡོད། སོ་བར་ཅུང་ཟད་བཞག་པས་གེགས་ཆུང་། དབུགས་ཆེད་དུ་ཕྱིར་འབྱུང་བ་དང་། ཆེད་དུ་ནང་དུ་རྔུབས་པ། གློད་ནས་ཕྱིར་རྩོལ་བས་གཏོང་བ་དང་། ནང་རྩོལ་བས་རྔུབས་པའི་རྩོལ་བ་དང་བྲལ་བས་སོ།
།སེམས་དཔའི་སྐྱིལ་ཀྲུང་ཅེས་པ་ནི། སྐྱིལ་ཀྲུང་གནད་ཆེ་བར་འདོད་པ་དང་། ཙོག་པུ་གནད་ཆེ་བར་འདོད་པ་གཉིས་ལས། འདི་དང་ཕྱི་ནཱ་རོ་པའི་ལུགས་ཀྱི་སྐྱིལ་ཀྲུང་གནད་ཆེ་སྟེ། སྟེང་རླུང་འཐེམས་པས་འོག་རླུང་རང་ཤུགས་ཀྱིས་འཐེམ་སྟེ། དཔེར་ན་རླུང་རིལ་བ་ཞབས་ཚོགས་ཅན་དང་འདྲ། དེ་ཡང་སྤྱི་བླུགས་ལྟ་བུའི་བུག་པ་ཆེ་ཤོས་ནས་རླུང་མ་ཤོར་བར་བཀག་པས་ཆུང་ཤོས་ནས་མི་འབོ་བ་བཞིན་ཏེ། མི་རྟོག་པ་གཙོ་བོར་བྱེད་པ་རྣམས་ཀྱིས་སྐྱིལ་ཀྲུང་ངོ་།
།བིརྺ་པས་ཙོག་པུ་གནད་ཆེ་སྟེ། འོག་རླུང་ཡོན་ཏན་གྱི་རླུང་ཐེམས་ཆེ། དེར་དྲོད་སྐྱེད། དྲོད་ལ་བརྟེན་ནས་བདེ་བ་འབྱུང་། བདེ་བ་ལ་བརྟེན་ནས་མི་རྟོག་པ་སྐྱེ་བར་འདོད་པས་སོ།
།ལུས་རྣམ་སྣང་གི་ཆོས་བདུན་འཆའ་བ་འདི་གལ་ཆེ་སྟེ། མཁའ་འགྲོ་མ་ཀུན་སྤྱོད་ལ་སོགས་པའི་རྒྱུད་སྡེ་དང་། སྒྲུབ་ཐབས་ཁུངས་མ་རྣམས་ནས་ལུས་ལ་གནད་དུ་བསྣུན་པའི་འཁྲུལ་འཁོར་གྱི་རིགས་མང་དུ་གསུངས་པ་རྣམས་བསྡུས་ནས། རྣམ་སྣང་གི་ཆོས་བདུན་པོ་འདིར་འདུ། དེས་ན་ཆོས་བདུན་ལེགས་པར་བཅས་ན། ཡུལ་ཉི་ཤུ་རྩ་བཞིའི་རྩ་མདུད་གྲོལ། ཁམས་དྭངས་ནས་གེགས་རྣམས་ལས་གྲོལ་འགྲོ་བས་འདེ་གལ་ཆེ། ཆེ་བའི་རྒྱུ་མཚན་གྱིས་མདོ་རྒྱུད་གཉིས་ཀ་ལས་བཤད་ཅིང་། དེ་ལག་ལེན་སྒྲུབས་སེར་བཞི་པའི་མགོ་རུ་ཡང་། ལུས་རྣམ་སྣང་གི་ཆོས་བདུན་བཅས་ཏེ། ཞེས་གསུངས།
རེ་ཡང་ཕར་ནས་ཆོས་བདུན་ཙམ་བཤད་ཀྱང་། རྡོ་རྗེ་ལུས་ཀྱི་གནས་ལུགས་རྒྱས་པར་མ་གསུངས་པས། དེལ་གནད་དུ་བསྣུན་ཚུལ་མི་ཤེས་ཏེ། སེམས་ཀྱིས་སེམས་ལ་གནད་དུ་བསྣུན་པས་ལམ་བགྲོད་པ་ཡུན་རིང་སྟེ།
སཾ་བུ་ཊི་ལས། ཕ་རོལ་ཕྱིན་པའི་ཐེག་ལས། །ཆོས་ཀྱི་སྒོ་མོ་བརྒྱད་ཁྲིད་དང་། །བཞི་སྟོང་ཆོས་ནི་ཐམས་ཅད་ཀྱིས། །ལུས་ཀྱི་དེ་ཉིར་མི་ཤེས་པས། །དེ་དག་ཐམས་ཅད་འབྲས་བུ་མེད། །ཅེས་གསུངས་སོ།
།གསང་སྔགས་ནས་རྡོ་རྗེ་ལུས་ཀྱི་གནས་ལུགས་དང་། དེ་ལ་གནད་དུ་བསྣུན་ཚུལ་རྒྱས་པར་བཤད་པས། འབྲས་བུ་མྱུར་དུ་འབྱིན་པ་ཡིན་ཏེ། རྟེན་ལུས་ལ་གནད་དུ་བསྣན་པས། རྟེན་པ་སེམས་ལ་རྟོག་པ་སྐྱེ་བ་ལུས་སེམས་དབྱེར་མེད་ཀྱི་ཆོས་ཉིད་ཡིན་ཏེ། དཔེར་ན་ལུས་ཀྱིས་ཆང་འཐུངས་པས་སེམས་ར་རོ་བའམ། ངར་གདོང་དུ་རྔོག་མས་བྲལ་ན་སེམས་ཀྱིས་མི་བཟོད་པ་བཞིན་ནོ།
།མ་དོར་ན་ལུས་འཁོར་ལ་འཇུག་པ་འདི་གལ་ཆེ་སྟེ། སྣམ་བུ་ལེགས་པོ་བྱེད་པ་ལ་ངང་པོ་བལ་རང་ན་བཟོབ་དགོས། བལ་རྩུབ་མོ་ལ་སྣམ་བུ་འཇམ་ལེགས་མི་འབྱུང་། དེས་ན་བཟོ་བོ་ལ་ཐིག་དང་། མཁར་ལས་འགྲམ་ནས་ཟབ་དགོས།
དཔལ་ལྡན་ཤ་བ་རི་པས། མཁར་སེ་རྩིག་ན་འགྲམ་གཞི་རྨང་ནས་ཐིང་། །ཞེས་གསུངས་སོ།
།དྭགས་པོ་རིན་པོ་ཆེའི་ཞལ་ནས། ཕ་རི་བལྟ་འདོད་ན་ཚུ་རི་ནས་ལྟོས། སེམས་གནས་འདོད་ན་ལུས་འཁྲུལ་འཁོར་ལ་བཅུན། སྟོང་པ་སྒོམ་འདོད་ན་སྣང་བ་གཏན་ལ་ཕེབ་གསུང་།
ཕག་མོ་གྲུ་པས། འབྲི་ཁུང་པའི་འཁྲུལ་འཁོར་བཅོས་པའི་ལོ་རྒྱུས་ཀྱང་གསུངས།
མདོ་ལས་ཀྱང་། དྲང་སྲོང་གཅིག་གིས་ལུས་གནང་བཅས་ཤིང་བསམ་གཏན་བསྒོམས་པས། དེ་ན་གནས་པའི་སྤྲེའུ་རྣམས་ཀྱིས་དེ་མཐོང་ནས་ཤིང་ཐོག་ཟོས་ཟིན་པ་དང་། དྲང་སྲོང་གིས་ལད་མོ་བྱས་པས་མི་རྟོག་པ་སྐྱེས། དེའི་འཕྲོ་ལ་ཤི་བ་ཐམས་ཅད་སུམ་ཅུ་རྩ་གསུམ་པའི་ལྷར་སྐྱེས་པའི་ལོ་རྒྱུས་ཡོད་དེ། མི་རྟོག་པ་ཙམ་པོ་ལ་ཡང་དེ་ཙམ་གྱི་ཕན་ཡོན་ཡོད་གསུང་། རེ་ཞིག་དོར་ནས་ཅེས་པ། ཆོས་ཕྱོགས་ཀྱི་བྱ་བ་འདི་རྣམས་འཇོག་པ་ཆོས་ལོག་ལྟ་བུར་མི་འགྱུར་རམ་སྙམ་ན་མི་འགྱུར་ཏེ།
ལམ་འབྲས་ལས། ལམ་འཇུག་བྱ་བ་མཚན་མེད་འཇུར་བའི་དུས་འདིར། མཚན་བཅས་ལྡོག་པའི་དུས་བྱ་བ་ཡིན། མཚན་མེད་བརྟན་མི་བརྟན་བརྟག་པའི་སྐབས་སུ་མཚན་བཅས་འཇུག་པའི་དུས་སོ། །ལས་དང་པོ་པ་མཚན་མེད་ལ་མ་གོམས་པའི་དུས་སུ། བརྟན་པ་ཐོབ་ནས་བྱས་ཀྱང་དགེ་སྦྱོར་གྱི་ངང་ངམ། མ་བྱས་ཀྱང་དེ་ཉིད་ཡར་ལྡན་དུ་རྫོགས་ཙ་ན་མཚན་བཅས་ལ་དགག་སྒྲུབ་དང་བྲལ་བ་ཡིན་གསུང་། སེམས་རང་བབས་ནི་རྟོག་མེད་དུ་འཇོག་པས་ཏེ། རྟོག་པ་ལ་འདས་མ་འོངས་གསུམ་ཡུལ་དུ་བྱེད་པ་ལས་མ་འདས་པས། འདས་པའི་རྗེས་མི་དཔྱད། ཅེས་སོགས་བརྗོད་དེ་བཞག་ཟེར་ཡང་།
བཞག་རྒྱུ་དངོས་པོ་ཅན་མེད་དེ། བཅོས་བསླང་མེད་པའི་དོན་ཡིན། དེ་ཡང་སྔར་ལུགས་ཀྱི་མི་བྱེད་དགུ་བྱེད། ངག་མི་སྨྲ་དགུ་སྨྲ། སེམས་ཀྱི་མི་མནོ་དགུ་མནོ་བྱས་ཏེ། དེ་ཐམས་ཅད་དོན་མེད་འཁོར་བའི་རྒྱུར་སོང་། ལུས་ངག་ཡིད་གསུམ་བྱ་བ་དང་ཕྲལ་ཏེ་ངལ་གསོར་བཅུག་ལ། རི་གསུམ་ཡང་སྐབས་འདི་གཤེད་ནས་རྙེད་དགོས། སེམས་ངལ་གསོ་འདི་ཡིད་ཕམ་པར་བྱེད་པའི་ཕྱིར། ལྷོ་དཔལ་གྱི་རི་བོ། དེ་ལ་སེམས་ངལ་གསོ་གཙོ་ཆེ་ཡི། ལུས་ངག་ཡིད་གསུམ་ཆར་ངལ་གསོ་བའོ།
།མདོ་རྒྱུད་བསྟན་བཅོས་མན་ངག་ཐམས་ཅད་ཀྱང་། བླ་མ་ལ་མོས་གུས་བྱེད་པ་འདི་ཟབ་པའི་གནང་མཆོག་ཏུ་གསུངས་ཏེ། ས་བཅུ་ལམ་ལྔའི་ཅེས་པ་སོགས། གང་དུ་ཡང་མི་རྙེད་དེ།
གླིང་གི་ཞལ་ནས། འཛམ་གླིང་བསྐོར་ཡང་གདམས་ངག་དེ། ཅེས་གསུངས།
དེ་ལ་དཀའ་བ་མེད་ཅེས་པ། བླ་མ་མཚན་ལྡན་ལ་གསོལ་བ་འདེབས་ལ། སངས་རྒྱས་རིགས་ལྔའི་དངོས་གྲུབ་ཀྱང་དཀའ་བ་མེད་དོ། །ཅེས་སོ།
།ཡེ་ཤེས་གསལ་བ་སྒྲོན་མའི་རྒྱུད་ལས། གང་གིས་བསྐལ་པ་བརྒྱད་ཁྲིད་བཞི་སྟོང་གི་བར་དུ་ཕ་རོལ་ཏུ་ཕྱིན་པ་དྲུག་སྤྱར་པ་བས། ལྷའི་སྐུ་ཡན་ལག་བདུན་ལྡན་སྐད་ཅིག་མ་གཅིག་དྲན་པས་བསོད་ནམས་ཆེས་ཁྱད་པར་དུ་འཕགས་སོ། །ཞེས་གསུངས་ཏེ།
དེའི་རྒྱུ་མཚན་བླ་མ་མཚན་ཉིད་ཀྱིས་བྱིན་རླབས་ཞུགས་ན་ཚེ་གཅིག་ལུས་གཅིག་གམ། དུས་ཡུན་མི་རིང་བའི་ཆ་ལ་གྲོལ་འགྲོ་སྟེ།
བྱ་མའི་བྱིན་རླབས་ཙམ་གྱིས་ནི། །སྐད་ཅིག་ཉེད་ལ་འབྱུང་གང་ཡིན། །ཅེས་གསུངས།
ཡང་བླ་མ་མཚན་ལྡན་དང་། སློབ་མ་སྣོད་ལྡན་འཛོམ་ན། ཞལ་མཐོང་བའམ། གསུང་ཐོས་པའམ། བཀའ་བ་སྔོན་གྱི་བྱེད་པ་འབའ་ཞིག་ལ་བརྟེན་ནས་ཀྱང་འགྲོ་བར་འགྱུར་རོ། སྤྱི་བོའི་གཙུག་གམ་ཞེས་པ། སྡོད་ན་དེར་ཉལ་ན་སྙིང་གར་བསྒོམས་པས་འོད་གསལ་ཟིན་པའི་རྟེན་འབྲེལ་ཡོད། འགྲོ་ན་ལག་པ་སླེབས་ཙམ་གྱི་ནམ་མཁའ་ལ་བསྒོམས་པས་དམིགས་པ་གསལ་བ་ཡིན་གསུང་། ལག་པའི་མཐིལ་དུ་གནས་ཅེས་པ། དེ་ལ་ཆོས་གསུམ་རང་ལ་ཡོད་པར་དབྲོག་པར་མི་ནུས་པས། ཉེ་རིང་རན་པར་བསལ་བ། དགོས་འདོད་འབྱུང་བའོ།
།དེ་ནི་བླ་མས་བསྟན་པའི་དོན་རང་བྱུང་ལྷན་ཅིག་སྐྱེས་པའི་ཡེ་ཤེས་དེ་ཡང་ཆོས་གསུམ་དང་ལྡན་ཏེ། བླ་མ་བསྟེན་པ་ལ་ཡོན་ཏན་དཔག་ཏུ་མེད་པ་ཡོད་དོ།
།མ་བསྟེན་པའི་ཉེས་པ་ནི། ས་ར་ཧའི་ལུང་གཞན་རྣམས་སྔོན་དུ་སོང་ནས་ཡིན་པ་་་་་་་་་་་་ཡིན་པ་ལ། གང་ཟག་གི་བླ་མའི་གདམས་ངག་བདུད་རྩིའི་ཆུ་ཅེས་སོགས་གསུངས། མོས་གུས་ལམ་གྱི་གཙོ་བོ་ཡིན་ཅེས་པ། བླ་མའི་མོས་གུས་འདི་ཟབ་ལམ་ཐམས་ཅད་ཀྱི་རྩ་བར་གསུངས་ཏེ། ཁྱདཔར་གྱིས་ཀྱང་། ཕྱག་རྒྱ་ཆེན་པོ་མོས་གུས་ཀྱི་ལམ་སའམ་བྱིན་རླབས་ཀྱི་ལ་མས་ཡིན་པས་མོས་གུས་དགོས་ཏེ། མོས་གུས་རབ་ལ་བསྒོམ་རབ། འབྲིང་ལ་འབྲིང་། ཐ་མ་ལ་ཐ་མ། ཡེ་མེད་ལ་སྒོམ་ཡེ་མེ་དེ་སྐལ་པ་ཆང་པ་ཡིན་གསུང་། སྔོ་ན་ཡང་ཡང་བ་ཅེས་པ། ཤངས་རྨོག་ལྕོག་གི་བྲག་ལ། རྩམ་པ་སྤྱན་གྱིས་མ་གཟིགས་པའི་སྒྲུབ་པ་ལོ་བཅུ་གཉིས་མཛད་པའི་ཡི་དམ་དཔག་ཏུ་མེད་པའི་ཞལ་གཟིགས། ཐུགས་རྗེ་བསམ་གྱིས་མི་ཁྱབ་པ་འཁྲུངས་པས། དེ་ཐམས་ཅད་བླ་མའི་བཀའ་དྲིན་དུ་ཤེས་ནས་དེ་སྐད་གསུངས་ཏེ། ཡི་དམ་བཟང་ངན་ཁྱད་ཡོད་པལྟ་བུ་མ་ཡིན། བླ་མའི་མོས་གུས་ཆེས་བརྟན་པའི་ཕོ་སྐད་ཡིན་གསུང་། བུ་གཅིག་པ་ཤི་བའི་མ། ཅེས་མ་འཛངས་མ་ཅིག་ལ། བུ་བྱད་གཟུགས་ལེགས་པ། བློ་དང་ལྡན་པ་ཡོད་པ་ལ། དེ་ཤི་ན། མ་དེ་ལ་རེ་ཞིག་འགྲོ་འདུག་གང་བྱེད་ཀྱང་དེའི་འདུ་ཤེས་དང་མི་འབྲལ་བ་བཞིན་དུ། བླ་མ་མཚན་ལྡན་དེ་ཡང་འགྲོ་འདུག་གང་བྱེད་ཀྱང་མི་འབྲལ་བ་ཅིག་དགོས་གསུང་ངོ་།
།སྙིང་ཁོང་རུས་པའི་གཏིང་ནས་གསོལ་བ་འདེབས་དགོས་ཀྱིས་གསོལ་བ་འདེབས་སོ།
།བྱིན་གྱིས་རློབས་ཤིག །མི་རློབ་ན་ཡང་ཁྱེད་རང་ཤེས་སོ་ཟེར་བ་ལ་བྱིན་རླབས་འབྱུང་གསུང་། རེས་བླ་མ་རྗེད། རེས་ལོག་ལྟ་བྱེད་པ་ལ་བྱིན་རླབས་མི་གསུང་ངོ་།
།སངས་རྒྱས་སྟོན་པའི་གསུང་གིས། འོ་སྐོལ་རྣམས་ཀྱིས་རང་གི་སྡིག་སྒྲིབ་མ་དག་པའི་རྟགས་ཀྱིས་བླ་མ་སྐྱོན་མེད་དུ་བཟང་ཡག་གི་གཏོང་མི་ནུས། དེ་ཡང་ཐོག་མར་བསྟན་བཅོས་ལས་གྲགས་པའི་སྐྱོན་ཚོལ། དེ་མ་རྙེང་ན་འཇིག་རྟེན་ལ་གྲགས་པའི་སྐྱོན་ཚོལ་གསུང་བ་ཞིབ་ཏུ་གསུང་། འདི་དག་གི་ཐད་དུ། རིན་པོ་ཆེ་པ་སངས་རྒྱས་སྟོན་པའི་གསུང་གིས། སློབ་དཔོན་གྱིས་དང་ཅིག་མཛོད་ཅིག་གསུང་། མ་མཆི་ཞུས་པས། གང་བྱུང་བ་གྱིས་གསུངས། དེར་ཚེ་གཅིག་ལུས་གཅིག་གིས་འཚང་རྒྱ་བ་ལ་བླ་མའི་མོས་གུས་དགོས། མོས་གུས་ལ་གོ་འདྲིས་སུ་མ་ཤོར་བ་ཅིག་དགོས། གོ་འདྲིས་སུ་ཤོར་ཏེ་སྐྱ་བའི་མདའ་ཁ་དང་། ཡོག་པའི་མདུང་ཁ་ལོག་གོ་བ་ལ་བྱིན་རླབས་མི་འབྱུང་། འདི་དག་གི་བསྟེན་ཚུལ་གསང་སྔགས་རྙིང་མ་འགའ་ཞིག་ནས་གསུངས་ཏེ། དངོས་པོ་ཀུན་གྱིས་རབ་མཆོད་ཅིང་། །ལུས་ངག་སྤྱོད་པ་རབ་བསྡམས་ལ། །ཧ་ཅང་ཉེ་མན་རིང་བའང་མིན། །ཞེས་བླ་མ་དང་མེ་འདྲ་གསུངས་པས། སངས་རྒྱས་སྟོན་པ་མཉེས་ཏེ། སློབ་དཔོན་གྱིས་དེ་ལེགས། ཆོས་རྗེ་དབུ་རི་བ་ཡང་དེ་སྐད་གསུང་སྟེ། ཁོང་མཚམས་གཅིག་པོ་མཛད་པ་ལ་དབུ་ཅེ་རྣམས་ཀྱིས། མཇལ་ཀ་དང་འགྲོ་དོན་གནང་བར་ཞུས་པས། ཁྱེད་རྣམས་ཀྱིས་མ་གོ་བ་ཡིན་གསུང་ནས་མ་གནང་། ཡང་ཡང་ཞུས་པས། ངས་དེ་བཞིན་བྱས་ན་ཁྱེད་རྣམས་ལ་གནོད་པ་ཡིན་གསུང་། དེར་ལོང་རྣམས་ཀྱི་བླ་མ་ཐུགས་དམ་འབྲལ་བ་མི་མངའ་འགྲོ་དོན་མཛད་ན། བདག་ཅག་ལ་མི་གནོད་པའི་སྟེང་དུ་སེམས་ཅན་མང་པོ་སྨིན་གྲོལ་འབྱུང་བ་གདའ་ལགས་ཞུས་པས། དས་མཚམས་འདི་ལྟ་བུ་བྱས་ནས། འཕུང་མཇལ་མ་བྱས་པ་འདི་ཁྱེད་རྣམས་ལ་དྲིན་ཆེ་བ་ཡིན། ད་ལྟ་ཁྱེད་ཚོས་ངའི་གདོང་པ་མཐོང་བ་ཙམ་ལ་མཆི་མ་འཆོར་ཀྱིན་འདུག་སྟེ། ངས་ཆོས་དང་མཇལ་ཀ་དཀོན་པར་བྱས་པས་བྱུང་བ་ཡིན། ངས་དེ་བཞིན་མ་བྱས་པར་ཕོ་ལེ་བྱས། རྐང་པ་རྐྱང་སྟེ་ཁྱེད་ཚོ་དང་མཉམ་དུ་སྡང་ན། མོས་གུས་བྱེད་པ་ཨ་ཅང་ཆེ་སྟེ། སྐྱ་བའི་མདའ་ཁ། སོག་མའི་མདུད་ཁལ་འགྲོ་བ་ཡིན་གསུང་། གཞན་ཡང་སངས་རྒྱས་གཉན་སྟོན་གྱིས། དེ་དུས་ཀྱི་ཀྱུ་ར་རིན་པོ་ཆེ། ཞང་ཚལ་པ། དུས་གསུམ་མཁྱེན་པ་མདོ་ཧ་པ། གཙང་པ་རྒྱ། ས་སྐྱའི་རྗེ་བཙུན་གྲགས་པ་རྒྱལ་མཚན་ལ་སོགས་པ་ཆེ་དགུ་བཟང་དགུ་རྣམས་བསྟེན་ཅིང་། བླ་མ་མཉེས་པ་གདམས་ངག་རྫོགས་པར་ཞུས་པས། དེ་རྣམས་ཀྱི་གྲྭ་པ་ནས་རང་རང་གི་གྲུབ་མཐའ་རེ་དང་། ཆོས་སྐྱོང་གི་ཁ་ཟིན་ཏེ་འདུག་ནའང་། ཚེ་གཅིག་ལུས་གཅིག་ལ་སངས་རྒྱུ་བ་བླ་མའི་མོས་གུས་དགོས་པ་ལ་ཀུན་མཐུན་པར་འདུག་པས། ཆོས་འདི་ཟབ་པའི་གནད་གཅིག་ཡིན་པ་འདྲ་གསུང་། ཁྱད་པར་དུ་ཡང་རྗེ་བཙུན་ཆེན་པོ་སྔ་ཕྱིར་ལོ་བཅུ་གཉིས་བསྟེན་ནས། ཕྱི་མ་འབྱོན་པའི་དུས་སུ་ཞུ་བ་གསུམ་མཛད་དེ། དུས་དང་གནས་སྐབས་ཐམས་ཅད་དུ་ཐུགས་རྗེ་འཛིན་པར་ཞུ། ད་ལྟ་བྱིན་རླབས་གཅིག་ཀྱང་ཞུ། གསུངས་སྐོས་གཅིག་ཀྱང་ཞུ་བྱས་པས། གསུང་སྐོས་ལ་རང་རེས་སྐྱ་པ་ལ་ཆོས་མང་དུ་ཡོད་པར་སོང་ཡང་། རྒྱུད་གསུམ་གདམས་ངག་ཏུ་བཅས་པ་འདི་ལ་མཐིལ་དུ་བྱེད་དེ། དེ་ལས་དང་པོ་ཉམས་སུ་ལེན་པའི་དུས་སུ་གདམས་ངག་ལ་འདྲིལ། དེ་ལ་ལམ་སྐོར་དགུ་ལས། ལམ་ཟབ་འབྲིང་གསུམ་དུ་བསྟན་པ། རྒྱས་འབྲིང་གསུམ་དུ་བསྟན་པ་ལས། ཟབ་འབྲིང་གསུམ་དུ་བསྟན་པ་ལ། ཟབ་མོ་བླ་མའི་མོས་གུས། འབྲིང་དམ་ཚིག་དང་སྡོམ་པ། ཐ་མ་ལུས་སོ་སོར་རྟགས་པའི་འགོག་པ། རྟེན་འབྲེལ་བཅུ་གཉིས་ཀྱི་ལམ་བྱ་བ་ཡོད་པ་ལས། བིརྺ་པའི་ལམ་བྱ་བ་ཟབ་མོ་བླ་མའི་མོས་གུས་ལ་འདྲིལ། དེ་ལ་བླ་མ་ཆོས་སྐུར་སྒྲུབ། སྤྲུལ་སྐུར་སྒྲུབ་པ་ལ་སོགས་པ་བཤད་ནའང་དེ་རྣམས་སྙན་ངག་ཙམ་ཡིན་པས། ང་རྒད་པོ་མགོ་སེ་ཡེར་བ་འདི་སྤྱི་བོར་བསྒོམས་ལ། དགེ་བསྙེན་རྒད་པོ་གྲགས་པ་རྒྱལ་མཚན་ང་མཐོ་གཏོང་དམའི་གཏོང་སྐྱིད་དེ་སྡུག་གེ་ཁྱེད་རང་ཤེས་སོ་གྱིས་ལ་གསོལ་བ་ཐོབ་དང་། ངས་སྒྲུབ་པ་ཚད་ལྡན་དུ་བཏང་བས་ཁྱོད་མི་བསླུ་ངེས་ཀྱིས་གསུང་། ཞང་ཚལ་པའི་ཞལ་ནས་ཀྱང་དེ་སྐད་གསུང་། རིན་པོ་ཆེའི་གསུང་གིས། བླ་མ་ཡང་དེ་འདྲ་གཅིག་ཡིན། ཁྱོད་མི་བསླུ་ཡིས་ཟེར་བ་གཅིག་ཀ་དགོས་གསུང་། གཙང་པ་རྒྱ་བུར་གྱི་ཀློང་རྡོ་ན་བཞུགས་པའི་དུས་སུ་དྲུང་དུ་བྱོན་པའི་ལོ་རྒྱུས་ཀྱང་གསུང་ངོ་། རིན་པོ་ཆེ་པ། ཆོས་གང་དང་གང་ཐམས་ཅད་ཀུན་དང་མཐུན་པ་དེ་དང་འདྲ་བ་གཅིག་ཡིན། ད་ལྟ་འགའ་ཞིག་ངེད་ཀྱི་འདི་གཞན་དང་མི་འདྲ་བ་ཟབ་པ་གཅིག་ཡོད་ཟེར་ཏེ། དེ་ལ་ཟབ་པར་བྱེད་དེ་ཟབ་མི་ཟབ་བརྟག་དཀའ། དཔེར་ན་མི་ཡར་ལུས་པོ་མི་ལ་མགོ་བོ་བོང་བུ་བྱས་ན་གཞན་དང་མི་འདྲ་སྟེ་དེ་ལ་སྣལ་སོ་མི་འབྱུང་། གཟུགས་བཅས་ཐམས་ཅད་འདྲ་བའི་སྟེང་དུ་བཞིན་ལེགས་པ། བློ་དང་ལྡན་པ་ཅིག་བྱུང་ན་ཁྱད་པར་འཕགས་མོད། དེ་བཞིན་དུ་ཆོས་གཞན་ཐམས་ཅད་དང་མི་མཐུན་པ་ལ་དགའ་རྒྱུ་མེད། དང་པོ་སངས་རྒྱས་ཀྱིས་གསུངས་པ། བར་དུ་ལོ་པཎ་གྱིས་བསྒྱུར་བ། བསྟན་བཅོས་མཁན་པོ་རྣམས་ཀྱིས་བཀྲལ་བ། གྲུབ་ཐོབ་རྣམས་ཀྱིས་ཉམས་སུ་བླངས་པ་དེ་འདྲ་གཅིག་གི་སྟེང་དུ། གདམས་པའི་རྣོ་དང་བྱིན་རླབས་ཀྱི་མཚན་ཁ་ཆེ་བ་གཅིག་བྱུང་ན་ཟབ་པ་ཡིན་གསུང་། བླ་མ་བྷི་བུ་ཏའི་བླ་མའི་རྣལ་འབྱོར་གྱི་བཤམ་ན་ཡང་། ཆོས་འདི་ཟབ་པ་ཡིན་ཏེ། ཀུན་དང་ཐུན་པའི་ཕྱིར་རོ། །ཞེས་གསུངས།
སློབ་དཔོན་སངས་རྒྱས་ཡེ་ཤེས་ཞབས་ཀྱིས་གསང་འདུས་ཀྱི་གནད་མ་བདེ་བ་འགའ། རྒྱལ་པོ་སྐྱེ་བོ་སྐྱེས་ལ་ཞུ་རུ་ཕྱིན་པས། ཁོང་ན་རེ། ངས་ཁྱོད་འདུལ་བར་མི་འགྱུར་གྱིས། ལྷོ་ཕྱོགས་ཀྱི་རྒྱུད་ན། སློབ་དཔོན་འཇམ་དཔལ་བཤེས་གཉེན། འབན་བཙུན་གྱི་ཆ་བྱད་ཅན་སྤྱོད་པ་ངེས་མེད་ཐོད་རྒལ་དུ་སྟོན་པ་གཅིག་ཡོད་པས། དེར་རྒྱུག་ལ་ཞུས་གསུང་ནས་ལུང་བསྟན། དེར་བྱོན་པས་ཕྱོགས་གཅིག་ན་བཙུན་རྒན་གླང་བུ་གཉིས་ལ་རྨོས་བྱེད། དེའི་འགྲམ་ན་ཆུ་གཅིག་ཉ་རྒྱ་བཙུགས་ནས་སྐབས་སུ་ཉ་འཛིན། རོལ་ནང་གི་སྦལ་པ་དང་། གྲོག་སྦུར་རྣམས་བཏུས་ཏེ་ལ་ལ་ཞལ་དུ་གསོལ། སྣམ་ཕྲག་ཏུ་སྡུད་བྱེད་ཅིང་འདུག །སྔར་གྱི་གསུང་དེས་འདིར་འདུག་སྙམ་ནས། ཕྱག་དང་བསྐོར་བ་བྱས་ནས། རྗེས་སུ་འཛིན་པར་ཞུ་བས། གསང་འདུས་ཞུ་བྱས་པས། ད་ལྟ་འཛམ་བུ་གླིང་ན། རྒྱལ་པོ་སྤྱི་བོ་སྐྱེས་ལས་མཁས་པ་མེད་པས་དེར་ཞུས་གསུང་། ཁོང་གིས་ལུང་བསྟན་པ་ལགས་ཞུས་པས། འོ་ན་ནང་དུ་འདོང་གསུང་ནས་བྱོན་པས། སྐྱོ་ས་བཀོལ་བའི་རྡོར་ལ་ཉ་གསོན་མ་དང་། གྲོག་སྦུར་རྣམས་བླུག་པར་བྱ་གཅིག་དང་སྐྱེ་བ་བཅུས་ནས་བཅུག་པས། ཆུ་ཁོལ་མའི་ནང་ན་ཉ་གསོན་མ་ཁྱུག་ཁྱུག་འདུག་པ་དང་། བཅུས་ནས་ཁོང་རང་ཡང་གསོལ། སློབ་དཔོན་ལ་ཡང་དྲངས་པས་སྤྲུལ་པའི་མཛད་པར་ཤེས་ཀྱང་ཉམ་ང་ནས་མ་གསོལ། དེ་ནུབ་སོ་སོར་གཟེམས་པས། ནམ་ཐོ་རངས་སློབ་དཔོན་གྱི་རྣལ་ལམ་དུ། བུམ་ཆུ་མང་པོ་མགོ་ལ་བླུག་པ་རྨིས། ནམ་ལངས་པ་དང་ཆོས་བྱ་ཡི་ཤོག་གསུང་ནས་བྱོན་ཏེ། ཐོག་མར་དབང་བསྐུར་མི་འཚལ་ལམ་ཞུས་པས། ད་ནང་རྨི་ལམ་དུ་བསྐུར་ཡོང་གསུངས་ནས། གསང་འདུས་ཀྱི་ལྷ་ཚོགས་མདུན་ན་སྤྲུལ་འདུག །དེ་ནས་ཆོས་ང་ལ་ཞུ་འམ་ལྷ་ལ་ཞུ་གསུང་། སློབ་དཔོན་གྱིས་བསམ་པ་ལ། བླ་མ་ལ་ད་རུང་ཞུས་པས་ཆོག །ལྷ་ལ་ཞུ་རྒྱུ་ཡོད་པ་འདི་ཀུན་དང་ཀུན་གྱི་ཐུན་མོང་མ་ཡིན་སྙམ་ནས། ལྷ་ལ་ཞུ་བྱས་པས། ཁོང་གིས་སེ་གོལ་གཅིག་ཏོག་པས་ཏེ། ང་ལྷ་ལ་ཞུས་གསུངས་པ་དང་། ལྷ་རྣམས་ཁོང་གི་ཐུགས་ཀར་ཐིམ་སོང་། དེར་སློབ་དཔོན་ལ་ཞུ་བྱས་པས། ཁྱོད་ཀྱིས་མདངས་དངོས་གྲུབ་ཀྱི་རྫས་ལ་ཐེ་ཚོམ་བྱས། དེ་རིང་བླ་མ་བས་ཡི་དམ་ལ་འདམས་པས། ཚེ་འདི་ལ་མཆོག་གི་དངོས་གྲུབ་ཐོབ་རྒྱུ་དེ་སྐྱེ་བ་གསུམ་དུ་འགྱངས་སོང་། འོན་ཀྱང་ཕན་ཐོགས་ཆེན་པོ་འོང་བར་འདུག་གི་གསུང་ནས། གསང་འདུས་གནང་སྟེ། བླ་མ་བས་ཡི་དམ་འདེམས་པའི་ཉེས་པའོ།
།སློབ་དཔོན་པདྨ་རྒྱ་གར་དུ་གཤེགས་པ་ལ། མཁར་ཆེན་བཟའ་དང་། སྣ་ནམ་བཟའ་གཉིས་ཀྱིས་མང་ཡུལ་ཐུག་སྐྱེལ་ཐུང་བྱས་ནས། དེར་རྡོ་རྗེ་ཕུར་པའི་དབང་ཞུས། སློབ་དཔོན་གྱིས་ལྷ་ཚོགས་རྣམས་མདུན་དུ་སྤྲུལ་ནས། ང་ལ་ཞུའམ་ལྷ་ལ་ཞུ་གསུངས་པས། སྙ་ནམ་བཟའི་བསམ་པ་ལ་སློབ་དཔོན་འདི་ང་རང་གི་ཟླ་གྲོགས་ཀྱང་ཡིན། རྒྱ་གར་དུ་གཤེགས་ཀྱང་ད་རུང་འབྱོན་སྲིད། བདག་སློབ་དཔོན་ལ་མ་གུས་པ་མ་ལགས་ཏེ། ལྷ་ལ་བཞུ་བྱས་པས། ལྷ་རྣམས་ཐུགས་ཀར་ཐིམ་སོང་། མཁའ་ཆེན་བཟའི་བསམ་པ་ལ། ཡི་དམ་གྱི་ལྷ་རྣམས་ཀྱང་སློབ་དཔོན་གྱི་སྤེལ་སྤྲུལ་གཅིག་ཡིན་མཇལ་ཡང་དཀའ་སྙམ་ནས། བདག་ཡི་དམ་ལ་མ་གུས་པ་མ་ལགས་ཏེ། སློབ་དཔོན་ཞུ་བྱས་པས་དབང་རྣམས་རྫོགས་པར་གནང་སྟེ། དེ་ཡང་ཕུར་པ་ཇོ་མོ་ལུགས་བྱ་བ་བྱིན་རླབས་ཆེ་བ་ཡིན་གསུང་། སངས་རྒྱས་ཡིན་ན་བསྒོམ་ཡང་མི་དགོས་སམ་ཅེ་ན། ཡིན་ཡང་ཡིན་པར་མ་ཤེས་ཤིང་། ཤེསཤིང་ཤེས་ཀྱང་མ་ལྡན་པས་བདག་བཟང་གི་ང་རྒྱལ་དང་། སྐྱོན་སྣང་གི་ལོག་ལྟ་ཡིས་རྒྱུད་གཡེངས་པ་སྦྱང་བའི་ཕྱིར་བསྒོམས་ལ་གསོལ་བ་འདེབས་དགོས་སོ།
།ས་སྐྱ་པཎྜི་ཏའི་ཞལ་ནས། སངས་རྒྱས་མཚན་དཔེས་བརྒྱན་ནས་མདུན་དུ་འོད་ཀོ་རེ་བྱོན་ན། འོ་སྐོལ་གྱི་བློར་མི་ཤོང་། དེ་བས་རྨེ་ལམ་དུ་བྱུང་ཡང་མི་ཤོང་བ་འདུག་སྟེ། ལྷ་ཁང་ལྡེར་བཟོ་བྱུང་ན་རྒྱལ་འགོང་གི་རྨི་ལམ་བྱུང་ཟེར། པོ་ཏི་ཀློག་འདོན་ལ་ཁ་སྨྲས་གླེང་གཞི་ཡོད་མི་ཁ་རྔོབས་ཟེར། དགེ་འདུན་ལ་ཡང་དེ་སྐད་ཟེར་གསུང་། མཚན་དཔེ་ཡོད་ཀྱང་རང་གིས་མ་མཐོང་བ་སྟེ། སློབ་དཔོན་ཐོགས་མེད་ཀྱིས་བྱམས་པ་བསྒྲུབས་པས། གྲུབ་པའི་མཚན་མ་མ་བྱུང་ནས་ཕྱིར་བྱོན་པས། ཉ་རྒྱ་སྒྲོས་ལྕགས་གཅོད་པ་དང་། ཆུས་རྡོ་འབིགས་པ་ལ་སོགས་པ་གཟིགས་ནས་ནང་དུ་བྱོན་ཏེ། ཡུན་དུ་བསྲིངས་ན་ཆུ་རྒྱུན་འཇམ་པོས་ཀྱང་། རྡོ་ལེབ་ངག་ཀྱང་དུས་སུ་འབིགས་པ་དང་། མིས་ནི་བརྩོན་འགྲུས་དངབཅས་བསྒྲུབས་གྱུར་ན། །མི་འགྲུབ་ལས་ནི་གང་ཡང་ཡོད་མ་ཡིན། །ཅེས་གསུང་།
བསྒྲུབས་པས་འགྲུབ་ན་རྫུ་འཕྲུལ་གཞན་བསྟེན་ལ་དགའ་ལྡན་དུ་བྱོན་ནས། བྱམས་པའི་ཆོས་ལྔ་སོགས་ཉན་ནས། དེ་ཙམ་དུ་ཞལ་མི་སྟོན་པ་ཞེས་ཡུལ་བདར་བས། ང་སྒྲུབ་པ་བྱས་ནས་ཞག་གསུམ་ནས་འབྲལ་མེད་དུ་ཡོད་དེ། ཁྱོད་རང་གི་སྡིག་སྒྲིབ་མ་དག་པ་དང་། མཐོང་ན་དགའ་བའི་རེ་བ་དེས་བཀག་པ་ཡིན། ཡིད་མི་ཆེས་ན་བསྟན་གྱིས་ཞེས་རྒན་མོས་ཁྱེ་དཀར་སོགས་མཐོང་བ་ལ་སོགས་པ་རྒྱས་པར་གསུངས། མདོར་ན་བླ་མ་ལ་མེད་པ་མ་ཡིན། རང་གི་སྡིག་སྒྲིབ་མ་དག་པས་མ་མཐོང་བའོ།
།ས་སྐྱ་པཎྜི་ཏའི་ཞལ་ནས། སྔོན་གསོལ་བ་འདེབས་པ། སློབ་དཔོན་ཐོགས་མེད་ལྟ་བུས། བླ་མ་བྱམས་པ་ལྟ་བུ་དངོས་སུ་སྤྱངས་ནས་བྱོན་ཡང་། སྣང་བ་མ་དག་པས་ཁྱི་རུ་མཐོང་བ་ལས་མ་བྱུང་འདུག ད་འོ་སྐོལ་རྣམས་ཀྱི་བླ་མ་མི་རུ་མཐོང་། མིའི་ནང་ནས་ཅུང་དྲག་ཤོས་རེ་མཐོང་བ་འདི་སྐལ་བ་མི་དམན། བསགས་པ་མི་ཆུང་བས། འདེའི་དུས་སུ་སངས་རྒྱ་བའི་ལམ་ལ་འབད་རྩོལ་བསྐྱེད་དགེས་གསུང་།
སངས་རྒྱས་ཞི་བ་དང་། གསང་བ་གཉིས་ཀྱིས་པོ་ཏ་ལར། སྒྲོལ་མ་དང་ཁྲོ་གཉེར་ཅན་འཚོལ་དུ་ཡེ་མ་རྙེད། དེ་ནས་ཕྱོགས་གཅིག་ན་རྒན་མོ་ཐ་ག་གཉིས་འདུག་ནས། ཞི་བའི་བསམ་པ་ལ། ཕྱོགས་འདིར་གཞན་ནི་འོང་བ་མེད། འདི་གཉིས་ཡིན་ན་ཆོག་སྟེ། མིན་པཎྜི་ཏས་རྒན་མོ་གཉིས་ལ་ཆོས་ཞུས་ཟེར་སྲན་མ་ཅན་དུ་འགྲོ་ཟེར། ད་དུང་འཚོལ་དུ་ཕྱིན་པས་ཡེ་མ་རྙེད་ནས། ད་འདི་པ་ཀ་ཡིན་འོང་སྙམ་ནས་ཆོས་ཞུས་སོ།
།དེ་ནས་གཉིས་པོ་ཡུན་རིང་ཚད་སོང་ནས་ཚུར་བྱོན་ཏེ་ལམ་དུ་བྲག་ཕུག་གཅིག་ཏུ་ཉལ་བས། སྔོན་ཆདཆོས་ལ་གླེ་བོ་ཡང་མ་བྱུང་འདུག །དེའི་དགོངས་མོ་གླེ་བོས་བྱས་ཏེ། འུ་ཅག་གཉིས་ཀྱིས་ཡུལ་ནས་ཡོངས་ནས་ཇི་ཙམ་སོང་། ཆོས་ཅི་ཐོས། ཡོན་ཏན་ཅི་སྐྱེས་གླེངས་པས། ཞི་བ་ལ་ཡོན་ཏན་བསམ་གྱིས་མི་ཁྱབ་པ་འཁྲུངས་འདུག །གསང་བ་ལ་རྐང་མགྱོགས་ཀྱི་དངོས་གྲུབ་གཅིག་བྱུང་འདུག །དེར་གསང་བའི་བསམ་པ་ལ། ཁོ་ལ་ཡོན་ཏན་འདི་ཙམུ་འཁྲུངས་འདུག །ང་པཎྜི་ཏ་ཡིན། ཡང་འདི་ལས་མི་འདུག་སྙམ་པའི་ཕྲག་དོག་ཅུང་ཟད་བྱུང་ཡང་། ཚ་བ་བཀོལ་དུས། གསང་བ་དེ་ན་ཚོད་གཞོན་པ་དང་། ཁོང་གཉིས་དཔོན་སློབ་ཀྱང་ཡིན་པས་སྨྱུག་དོང་དུ་ཆུ་ལེན་དུ་བྱོན་པས། རྐང་མགྱོགས་ཉམས་ཏེ། སྔར་བས་ཀྱང་ཞབས་ལྕི་བ་འདྲ་བ་གཅིག་བྱུང་ནས། ངའི་རྐང་མགྱོགས་ཉམས་འདུག་བྱས་པས། ཞི་བ་ན་རེ། ད་རུང་ལོག་ལ་ཁོང་རང་གཉིས་ལ་ཞུ་རུ་འདེང་གསུང་ནས། ལོག་ནས་དྲུང་དུ་བྱོན་པས། ཁོང་གཉིས་ན་རེ། ཁྱོད་ཐོག་མར་ངེད་གཉིས་ཐེ་ཚོམ་བྱས། མ་ང་གྲོགས་ཀྱི་ཡོན་ཏན་ཕྲག་དོག་བྱས་པས་མ་དག་པའི་སྣང་བ་ཕྱོགས་མེད་དུ་སྦྱོངས་ཤིག་ལ་སོགས་པའི་ཆོས་གསུངས་སོ།
།བགེགས་ཆེན་གདོན་མཛད་ཅེས་པ། ལས་རྒྱུན་གཅོད་པའི་མཛད་པ་ན་གདོན་མུ་གེ་ལ་སོགས་པར་སྤྲུལ་ནས་སེམས་ཅན་གྱི་དོན་མཛད། གཞན་ཡང་བླ་མ་གྲུབ་ཐོབ་འགའ་ཞིག་རང་ཉིད་བྲམ་ཟེའི་ཚུལ་དུ་བཟུང་ནས་ལྕེབ་པར་སྟོན་པ་ཡང་ཡོད་གསུང་།
རིམ་ལྔ་ལས། འདི་ནི་རང་བྱུང་བཅོམ་ལྡན་འདས། །གཅིག་པུ་བདག་ཉིད་ཆེ་བའི་ལྷ། །མན་ངག་ཐམས་ཅད་རབ་སྟེར་བས། །རྡོ་རྗེ་སློབ་དཔོན་དེ་བས་ལྷག །ཅེས་གསུང་།
དུས་གསུམ་འདོམས་པའི་དགོངས་པ་བླ་མ་བཀའ་དྲིན་ཆེ་སྟེ།
ས་པཎ་གྱིས། ཉི་མའི་འོད་ཟེར་རབ་ཚ་ཡང་། །མེ་ཤེལ་མེད་པར་མེ་མི་འབྱུང་། །དེ་ནི་སངས་རྒྱས་བྱིན་རླབས་ཀྱང་། །བླ་མ་མེད་པར་འབྱུང་མི་འགྱུར། །ཞེས་པས།
དཔེར་ན་དཔྱིད་སོས་ཉི་མའི་དཀྱིལ་འཁོར་ཚ་མོས་ཀླད་པ་འགེམས་པ་དང་འདྲ་བ་ཡོད་ཀྱང་། མེ་ཤེལ་ལམ་མེ་ལོང་མེད་ན་མེ་མི་འབྱུང་ལ། ཉི་མའི་འོད་ཟེར་མེ་ཤེལ་ལམ་མེ་ལོང་གཡའ་དང་བྲལ་བ་གཅིག་ལ་བསྡུས། དེ་སྤྲ་བ་རླན་དང་བྲལ་བ་གཅིག་ལ་བསྟན་ན་འཕྲལ་ཉིད་དུ་མེ་འབྱུང་། དེ་བཞིན་དུ་ཕྱོགས་བཅུ་དུས་གསུམ་གྱི་སངས་རྒྱས་མཁྱེན་བརྩེ་ནུས་མཐུ་མངའ་ཡང་། བླ་མ་མེད་ན་བྱིན་རླབས་མི་འབྱུང་། དེས་ན་ཉི་འོད་དང་འདྲ་བའི་སངས་རྒྱས་ཀྱི་ཐུགས་རྗེ་དེ། མེ་ཤེལ་ལམ་མེ་ལོང་དང་འདྲ་བའི་བླ་མ་ལ་བསྡུས། སྤྲ་བ་རླན་དང་བྲལ་བ་འདྲ་བའི་སློབ་མ་སྣོད་ལྡན་གཅིག་གིས་གསོལ་བ་བཏབ་ན། ཚེ་གཅིག་ལུས་གཅིག་ལ་སངས་རྒྱས་ཐོབ་པས་ན་བླ་མ་བཀའ་དྲིན་ཆེ་གསུང་། སློབ་དཔོན་སངས་རྒྱས་ཡེ་ཤེས་ཞབས་འཁོར་གྱི་དཀྱིལ་འཁོར་ལ་ཆོས་གསུང་བའི་མདུན་ན་ཚུར། སློབ་དཔོན་འཇམ་དཔལ་བཤེས་གཉེན་འཁོར་ཞལ་ཞེས་འགའ་དང་བཅས་པ་བྱོན་པས། ཁོང་གིས་འཁོར་གྱི་རྩར་ཕྱག་མ་བྱས་པར། ཆོས་འཕྲོ་ཏབ་ཏོབ་ཅིག་བཤང་ནས་རྗེས་བྱོན་ཏེ། ད་བྱི་མ་མཐོང་གསུང་ནས་དེར་ཕྱག་བྱས་པས་མ་མཐོང་གསུངས་མ་ཐག་སྤྱན་ས་ལ་བྲུལ་ལོ།
།དེར་གསོལ་བ་བཏབ་བཟོད་པར་གསོལ་བར་ཞུས་པས། ཁོང་གིས་ཡེ་ཤེས་ཀྱི་སྤྱན་དང་ལྡན་པར་གྱུར་ཅིག་གསུངས་པས་དེ་བཞིན་དུ་གྱུར་ཏོ། །རིན་པོ་ཆེའི་གསུང་གིས། ཁོང་གིས་མཆོད་རྟེན་ཞིག་ཤུལ་དུ་ལྷ་ཁང་འབྱོར་འདུག རང་རེ་ཀུན་དེ་ལྟར་བྱས་ན་སྒོ་ཆག་ཡོན་ཤོར་བྱུང་དོགས་ཡོད་དེ། ཅི་གསུང་ཚད་མརའཛིན་པའི་སྐབས་སུ་ཁབས་བརྩི་བ་གསུང་བཅག་གི་ཉེས་པ་མེད། བླ་མའི་གསུང་བཅག་ནས། གནས་པ་མགོ་འཐུམས་རེ་མོག་གེ་བསྒོམ་སྟེ། གསུང་བཅག་ན་གནས་པ་མགོ་འཐུམས་ལས་མེད་པའི་རང་རྟགས་ཡིན་པས། གསུང་བཞིན་སྒྲུབ་པ་གལ་ཆེ། བླ་མས་ཅི་གསུང་ཚད་མར་བཟུང་བ་ཡོན་ཏན་དཔག་མེད་ཡོད་དེ། མཻ་ཏྲི་པས་ཤ་བ་རི་པ་རི་གསུམ་ལ་འཆོལ་དུ་བྱོན་པས། ལམ་དུ་ས་ཀ་ར་དང་འཕྲད་དེ། ས་ཀ་ར་ཚིག་བཞི་པས་གྲོལ་གསུང་། གཞན་ཡང་། ཇོ་བོའི་སློབ་མ་དགོན་པ་གོང་མ་བས་དད་རྫས་ཟོས་གདོང་མི་དང་མ་འཕྲད་པའི་སྒྲུབ་པ་མཛད་པ་བས། འཇང་སྤྱན་སྔ་རྣལ་འབྱོར་པས། སྐུ་ཚེ་གང་ཞབས་ཏོག་བྱས་པ་ལྷག་པའི་ལོ་རྒྱུས་གསུང་། གསུང་བཞིན་བསྒྲུབས་པས་འཕྲལ་དུ་གེགས་ལས་གྲོལ་བ་ཡོད་དེ། ཀོ་བྲག་པ་འདུས་འདུས་པ་གཅིག་ལ། ཟུར་གྱི་ཐོས་མ་ངག་ཏུ་སྙིང་རུས་མི་གདའ། ཡོད་ན་མགོ་དྲེག་པ་ལ་བརྡབས་ན་ཕན་གསུངས་ཏེ། ཁོས་བྲག་བརྟེན་པ་ལ་བརྡབ་མ་ནུས་ནས་མགོ་ལག་བར་དུ་བཅུན་ནས་བརྡབས་དྲག་གསུངས། གསུང་བཞིན་བསྒྲུབས་པ། ཕག་མོ་གྲུ་པའི་གསོལ་ཇ་བ་བླ་ཡེ་ཐང་། ན་ཇ་འདྲེན་པ་ལ་དྲེ་མོ་མཛད་པའི་གཏམ་གསུང་། དེ་ལྟར་གསུང་བཞིན་བསྒྲུབས། ཞབས་ཏོག་བྱས་ན་ཡོན་ཏན་ཡོད་དེ། རྒྱ་གར་དུ་དཔལ་འབྲས་སྤུངས་ཀྱི་རྩར། དཔལ་འབྲས་ཕུང་བ་བྱ་བ་གྲུབ་ཐོབ་གཅིག་ལ། སློབ་མ་གཅིག་གིས། དེ་དུས་ཆར་མ་བབས་པར་མུ་གེ་ཆེན་པོ་བྱུང་བས། འཚོ་བ་དམ་དུམ་བྱུར་བ་རྣམས་ཁོང་རང་གིས་གཅིག་ཀྱང་མ་ཟོས་པར་བླ་མ་ལ་ཞུས་པས། ནང་གཅིག་གསོལ་འདྲེན་དུ་ཕྱིན་པས། ཕྱག་ཏུ་ཐོད་པ་དང་ཁོང་རང་གྱེས་སོ།
།དེར་བླ་མས་ཅི་ཡིན་གསུངས་པས། སྔར་གྱི་ཚུལ་དེ་བརྗོད་པས། ཁྱོད་ན་ནིང་ནས་མི་ཟེར་བ། ་་་་འབྲས་ཀྱི་ཆར་དབབ་ཀྱིས། གྲོང་ཁྱེར་བ་རྣམས་ལ་འབྲས་འགྲུས་མ་དགའ་འམ། སོ་བ་དགའ་དྲིས་ལ་ཤོག་གསུང་། དེར་ང་བཞིན་བྱས་པས་འབྲས་འགྲུས་མ་དགའ་སྟེ། ཡུན་རིང་བཞག་མི་སྟུབ་པས་སོ་བ་དགའ་ཟེར་ནས། དེ་བཞིན་ཞུས་པས། འབྲས་སོ་པའི་ཆར་ཕབ་ནས་གྲོང་ཁྱེར་བ་རྣམས་མུ་གེ་ལས་ཐར་བར་བྱས་ཏེ། དེ་ལྟ་བུའི་བླ་མ་ལ་ཞབས་ཏོག་བྱེད་པའི་སློབ་མ་དེ། སངས་རྒྱ་བ་ལ་བླ་མ་བས་ཀྱང་སྔ་བར་བྱུང་གསུང་། དེས་ན་བླ་མ་མཚན་ལྡན་གྱིས་ཅི་གསུང་ཚད་མར་བཟུང་ཞིང་། ཅི་མཛད་ལ་ཡོན་ཏན་དུ་བལྟའོ། དེ་བཞིན་མ་བྱས་ན་སྔར་ཡང་བླ་མའི་གསུང་བཅག་ནས་བསྒོམས་པ་ལ་བར་ཆད་དུ་སོང་བ་མང་སྟེ། སློབ་དཔོན་ཀླུ་སྒྲུབ་ཀྱིས། ཤ་བ་རི་པ་ཀླུའི་བྱང་ཆུབ་འབར་བའི་གཙོ་བོ་གསུམ་ལ་རིམ་པ་བཞིན་མི་གནས་པའི་མྱ་ངན་ལས་འདས་པར་བཞུགས་ལ། གང་ཟག་གཅིག་ཅར་བ་རྣམས་ཀྱི་དོན་གྱིས་ཅིག་རེས་དྲང་། སྒྲུབ་པ་ཉམས་སུ་ལོང་། ཕྱག་རྒྱ་ཆེན་པོ་སྙིང་པོའི་སྐོར་ལ་བཤད་པར་གྱིས་ལ་དར་ཅིག་རྒྱས་པར་གསུངས་པས། འབར་བའི་གཙོ་བོས་དུས་སྐབས་སུ་བསྒོམས་པས་ཐུན་མོང་གི་དངོས་གྲུབ་ཅུང་ཟད་ཐོབ་སྟེ། གསུང་བཅག་པས་སྐུ་ཚེ་ལ་བར་ཆད་དུ་འགྱུར་བ་སོགས་རྒྱས་པར་གསུངས། ཕག་མོ་གྲུབ་པར། སྒོམ་ཆེན་པ་ཅིག་གིས། བླ་མའི་གསུང་བཅག་ནས་བསྒོམས་པས། ཁྲག་འཐུར་དུ་འབྱམས་ཏེ་སྒོམ་དུ་མ་བཏུབ་གསུངས། བླ་མ་དེ་ཡང་ཆུང་ཆུང་ངན་ངན་འདྲ་བ་ལ་མོས་གུས་བྱས་པས། ཆེ་གཞི་རྣམས་ཀྱི་བྱིན་རླབས་འཇུག་སྟེ། བླ་མ་སྲིད་ལ་གཡོར་བའམ་སྲོག་གཅིག་པས་སོ།
།ཇོ་བོའི་བླ་མ་ཚུལ་འཆང་ལ་མོས་གུས་ལྷག་པར་མཛད་པ་བཞིན་ནམ། རིན་པོ་ཆེ་པས། སངས་རྒྱས་དགེ་སློང་གང་ཟག་ལྟ་བུར་བཞུགས་པ་ལ། ཁྲེལ་བསེབ་ཏུ་བླ་མར་བཟུང་བས་བྱིན་རླབས་འཕོས། རྟེན་འབྲེལ་འགྲིག་པ་ཡིན་ཏེ། མདོར་ན་ངན་པའམ་ཆུང་བ་ལ་མོས་གུས་ལྷག་པར་བྱས་པས། བཅང་བའམ་ཆེ་བ་ལ་མོས་གུས་ཤུགས་ཀྱིས་འབྱུང་བ་ཆོས་ཉིད་ཡིན་གསུང་། སློབ་དཔོན་ཆབ་ཀྱིས། སངས་རྒྱས་སྟོན་པ་ལ། བླ་མ་མཉེས་པ་འདི་ལ་གཉིས་སུ་གདའ། ཕུགས་ཞབས་ཏོག་ཏུ་འགྲོ་བ་འཕྲལ་མཉེས་སྒྱུ་མེད་པ་དང་། འཕྲལ་རང་མཉེས་པ་གཉིས་སུ་གདའ་བས། གང་ངོས་བྱ་ཞུས་པས། བུ་ཕུགས་འདི་ཡིན་ཏིག་པོ་མེད་དོ་ཨའུ། འཕྲལ་རང་གང་མཉེས་ཀྱིས་ཤིག་གསུང་། སྨན་པའི་རྒྱལ་པོ་འཚོ་བྱེད་ཤིང་རྟ་ལྷའི་གནས་སུ་སྐྱེས་ནས། ལྷའི་བུ་དང་བུ་མོའི་འཁོར་དང་བཅས་ཏེ་ནམ་མཁའ་ལ་རྫུ་འཕྲུལ་གྱིས་ཡོངས་པས་མོའུ་འགལ་གྱི་རྫུ་འཕྲུལ་ཐོབ་ཀྱང་། ས་ལ་གོམས་པས་མཇལ་ཞིང་བྱོན་པ་དེ་མཐོང་ནས། ཁོའི་དང་པོའི་མཁན་པོ་ཡིན་པས། དེའི་དྲན་པ་བྱུང་ནས་རྫུ་འཕྲུལ་གྱི་བཏུལ་བར། ནམ་མཁའ་ནས་ལག་ཡུ་སྒྲེང་བ་ཙམ་གུས་འདུད་གཅིག་བྱས་པས། རྫུ་འཕྲུལ་ཉམས་ཏེ་ས་ལ་ལྷུང་བ་ལྟ་བུའོ།
།ལུས་ཀྱིས་ཀྱང་ཅེས་པ། རྗེ་བཙུན་མི་ལ་དང་། བྱང་ཆུབ་གླིང་པའི་སློབ་མ་ཀོ་སྦྲེལ་བས། རྒོད་ཚང་པའི་དྲུང་དུ་བྱོན་པའི་ལོ་རྒྱུས་གསུང་།
ས་སྐྱ་པཎྜི་ཏའི་ཞལ་ནས། དེ་ཙམ་མ་ནུས་ཤིང་། གཞན་བྱ་རྒྱུ་མེད་ནའང་། ཆུ་རྫེ་རེ་ཙམ་མམ། ཤིང་ཕང་རེ་ཙམ་ལའང་སྐྱལ་བ་བྱེད་གསུང་།
རིན་པོ་ཆེ་པ་ཡིན་ཚུལ་དེ་ལྟར་ཡིན་པ་ལ། ད་ལྟ་བར་ཆེན་ཁག་པ་ཉིན་རེ་བཅོལ་ན་ངོ་གདོང་ཁྲག་ཚོས་པ་བཞིན་བཏང་ཡོང་བ་འདུག་སྟེ། དེ་ལ་བླ་མའི་བྱིན་རླབས་འཇུག་པའམ་ཡོན་ཏན་ཡོང་བ་མི་གསུང་། ངག་གིས་བསྟོད་པའི་དང་ལ། སློབ་མ་ཇི་ལྟར་ལོང་ཀྱང་། བླ་མའི་མགྲིན་པ་ལ་ཤུད་ཤུད་བྱེད་པ་མི་ཡོང་། བླ་མ་དེ་འབུལ་བའི་ཡུལ་ཡིན་པ་ལ་རྐུས་པའམ་བསྟོད་པའི་ཡུལ་ཡིན་པ་ལ་སྨད་ན་ཉེས་པ་རྩ་ལྟུང་དུ་འགྱུར་རོ།
།གལ་ཏེ་སྐྱོན་ནའང་ཅེས་པ། སོ་སོ་སྐྱེ་བོའི་དུས་སུ་རེས་ལས་མི་འཆགས་པ་ལ་རེ་ན་སྡུག །ནམ་བྱུང་ན་ཡང་འཕྲལ་ཉིད་དུ་བློས་ལ། བླ་མ་འདི་འདོད་ཆགས་རྡོ་རྗེ་ལ་སོགས་པ་ཡིན་དེས། སྐྱེན་སྣང་འདི་རང་གི་སྣང་བ་མ་དག་པ་ཡིན་སྙམ་དུ་སྐྱོན་གྱི་ས་བོན་རང་ལ་བསྟིམ། དེས་ཇི་ཞིག་ལྟར་ལ་སྐྱོན་གང་ཡང་མི་མཐོང་བ་འབྱུང་གསུང་། རིན་པོ་ཆེ་པ་མོས་གུས་འདིལ་རྟགས་མཚན་རེ་དགོས། གསུང་སྙན་པ་ནས་བྱོན། ཐུགས་ལ་བཏགས་ཀ་ཅ་སྣ་རེ་ཙམ་བྱིན་བྱས་ནས་སྐྱེའི། ཐུགས་ལ་མ་བཏགས་པའམ། བཀའ་བཀྱོན་ཅུང་ཟད་ལ་མོས་གུས་ལྡོག་ན། དེ་མོས་གུས་རང་མིན་བཀའ་བཀྱོན་ནམ་ཞབས་ཏོག་ཁ་བ་བཅོལ་དུས་མོས་གུས་ལ་གྱོལ་གྲུས་མེད་ཀྱི་སྟེང་དུ་སླར་ཆེ་རུ་འགྲོ་བ་གཅིག་དགོས་ཏེ།
ཆོས་རྗེ་གཙང་པའི་ཞལ་ནས། བཀའ་བཀྱོན་བྱུང་ན་དྲག་སྔགས་ཡིན། །བར་ཆད་སེལ་ན་དེ་ཡིས་སེལ། །བརྡུང་ཐག་བྱུང་ན་དབང་བསྐུར་ཡིན། །བྱིན་རླབས་འཇུག་ན་དེ་ལ་འཇུག །ཅེས་གསུང་།
ཁ་ཅིག་ན་རེ། བླ་མའི་ཞབས་ཏོག་བྱས་ན་བློ་འདྲེད། དེ་བས་སྒྲུབ་པ་བྱེད་པ་ཁེ་ཆེ་ཟེར་ཏེ་མ་གོ་བ་ཡིན། ཡོག་ཚད་ཟོས། ཐོབ་ཚད་བརྐུས། གཉིད་རོ་ལོག་བྱས་ན་བློ་འདྲེད་མོད། དེ་མིན་སྤྱན་སྔ་རྣལ་འབྱོར་པ། འབྲོམ་སྟོན་པ། སྤྱན་སྔ་རིན་པོ་ཆེ་ལ་སོགས་པ། བླ་མའི་ཉེ་གནས་ལ་བཟང་པོ་བྱུང་བ་མང་པོ་ཡོད། འཛེར་སྤྱན་སྔ་རྣལ་འབྱོར་པ་ཀུན་ལ་ཡོན་ཏན་མངའ་སྟེ། རྡོག་ལེའི་ཞལ་ནས། སྐུ་ཚེའི་སྟོང་ལ་ཆུ་འདིའི་ཕུ་ན་ཆོས་མཁས་སོ་མི་ཤེས་ཏེ་བྱེད་པ་གཅིག་ཡོང་གསུང་། སྐུ་ཚེའི་སྨད་ལ། ཆུ་འདིའི་ཕུ་ན་ཆོས་ཤེས་ཀྱང་ཤེས། བྱེད་ཀྱང་བྱེད་པ་གཅིག་ཡོད་ཅེས་ཆེ་བ་མང་པོ་བརྗོད་ཅིང་། ང་བཤད་པ་ལ་ཡེངས་ནས་སྒྲུབ་པ་མ་བྱུང་ཞེས་ཐུགས་སྐྱོ་ཤས་ཆེར་མཛད་ཅིང་། ཉིན་གཅིག་ཞབས་ཏོག་པ་ལ། གོས་དར་མང་པོ་བསྐུར་ནས། ཁོང་འབུལ་བ་མི་ལེན་པ་ལ་བླ་གཡེར་བསྐྱུར་བཏང་གསུང་། རིན་པོ་ཆེ་པ། འོ་སྐོལ་རྣམས་འཁོར་བར་འཁྱམས་པ་ཅིས་ཉེས་ན། མོས་གུས་གནད་དུ་གཏོང་མ་ཤེས་པས་ལན། དེ་གང་ལ་ཟེར་ན་བླ་མ་སངས་རྒྱས་ཡིན་མདོ་རྒྱུད་ནས་གསུངས་པ་དེ་གོ་ཡུལ་ཙམ་དུ་གོ་ཡང་། ཐག་ཆོད་མ་སྐྱེས་པས་ལན་པས། བླ་མ་སངས་རྒྱས་སུ་ཤེས་པར་བྱས་ལ་གསོལ་བ་གདབ་གསུང་། གསེལ་བ་གདབ་པའི་ཡུལ། བླ་མ་དེ་ཡང་མཚན་ཉིད་ལྡན་པ་དགོས། མི་ལྡན་བྱིན་རླབས་འབྱུང་ལྡན་མི་ལྡན་བརྟག་དགོས། ད་ལྟ་དམ་ཚིག་མི་ཐུབ་དང་། མཚན་ཉིད་དང་ལྡན་མི་ལྡན་མི་རྟོག་པ་འདི། དམ་ཚིག་མི་བསྲུང་བའི་རྟགས་སུ་འདུག་པས། དེས་ན་བླ་མ་ལྔ་བཅུ་པ་དཔང་དུ་བཞག་ལ་འབྲེལ་བརྟགས་དགོས།
དེ་ཉིད་ལས། བླ་མ་དང་ནི་སློབ་མ་གཉིས། །ཅེས་གསུང་པས།
འདི་དག་གི་དོན་སྔོན་གྲུབ་ཐོབ་རྣམས་ཀྱིས་ཕྱག་ལེན་མཛད་དེ། ནཱ་རོ་པས། ཏིལློ་པ་ལོ་བཅུ་གཉིས་སུ། དཀའ་བ་ཤི་ལ་ཐུག་པ་བཅུ་གཉིས་བཅད་པས་དེ་ཙམ་གྱི་བར་དུ་ཐ་མལ་གྱི་གཏམ། ནཱ་རོ་ཚོད་མ་ཞིམ་བྱ་བ་ལས་བྱུང་གསུང་། རྟག་ཏུ་དུ་དང་ཆོས་འཕགས་མཇལ་ནས་ལོ་བདུནུ་ཤེར་ཕྱིན་རྒྱ་རིམ་པ་བདུན་གྱིས་བཏབ་ནས་མ་གསུངས། དེའང་རྟེན་འབྲེལ་རྟག་ཏུ་མིང་མ་བཏགས་ཀྱང་དེའི་དོན་ཡིན། བོད་དུ་ཡུན་རིང་ཤོས། གྷ་ཡ་དྷ་ར་དང་། འབྲོག་མི་ཡིན་པའི་ལོ་རྒྱུས་གསུང་། དེ་ཡང་མཚན་ཉིད་དགག་ཕྱོགས་དང་། སྒྲུབ་ཕྱོགས་གཉིས་ལས། དགག་ཕྱོགས་ཕལ་ཆེ་བའམ་ཕྱེད་སྤངས་པ། སྒྲུབ་ཕྱོགས་ཕལ་ཆེའམ་ཕྱེད་ཚང་བ་བརྟེན་ཁྱུང་པོ་རྣལ་འབྱོར་གསུང་།
རིན་པ་ཆེའི་ཕུང་པོའི་མདོ་ལས། བྱམས་པས་གསོལ་པ། དགེ་བའི་བཤེས་གཉེན་ཇི་ལྟ་བུ་ལ་བསྟེན་པར་བགྱི། བཀའ་སྩལ་པ། ཆོས་གང་སྟོན་པ་ཐམས་ཅད་ཆོས་དབྱིངས་དོན་དམ་པའི་བདེན་པ་འབའ་ཞིག་ལས་བརྩམས་ཏེ་སྟོན་པར་བྱེད། གསལ་བར་བྱེད་པ་ནི་དགེ་བའི་བཤེས་གཉེན་ལམ་མ་ནོར་བར་དྲང་པོ་ནས་འཁྲིད་པར་བྱེད་པ་ཡིན་ནོ། །ཞེས་གསུང་།
ཨ་བྷྱས། སློབ་དཔོན་སློབ་མའི་བསམ་ཤེས་ནས། ཅེས་གསུངས་པས་མངོན་ཤེས་དང་ལྡན་པའམ། དེ་མེད་ནའང་སློབ་དཔོན་རང་གི་ཉམས་མྱོང་གི་སློབ་མའི་སྐྱེ་ཚུལ་ཤེས་པས་གང་ལ་གང་མོས་ཀྱིས་འཁྲིད་པ་གཅིག་དགོས། དེ་མིན་ན་བླ་མ་ཉམས་མྱོང་མེད་པ་རྒྱུས་མེད་ཀྱི་ལམ་མཁན་དང་འདྲ་བའི་སྐྱོན་དུ་འགྱུར་རོ།
།ས་ར་ཧས། མར་མེ་གཅིག་ལ་གཉིས་ཆད་ཀྱིས་དུས་ཞེས་སོགས་གཙང་པས། རྟོགས་པས་བདག་རྒྱུད་གྲོལ་བ། ཐུགས་རྗེ་གཞན་རྒྱུད་སྨིན་པ། རྟེན་འབྲེལ་ཐབས་ལ་མཁས་པ། གདུལ་བྱ་དུས་ལ་བབ་པ། ཞེས་ཀྱང་གསུངས་ཤིང་། ཡང་ཁོང་དང་ཡང་དགོན་པ་གཉིས་ཀྱིས། རོ་གཅིག་ནས་འགྲོ་དོན་བྱེད་པར་གསུངས་སོ།
།དེ་ལ་རང་གི་སློབ་མ་མགོ་ཐོན་ན་དགའ་བ་ལ་སོགས་པའི་སྐོར་ཚོམ་མི་འབྱུང་། ཐམས་ཅད་རོ་སྙོམས་འགྲོ་བས་དེ་མེད། ཕལ་ཆེར་དོན་མེད་དོན་ཡོད་དང་། ཅེས་པའི་ལུང་དང་ཡང་མཐུན་གསུང་། རིན་པོ་ཆེ་པ་སྤྱིར་ཆོས་བཞིན་བྱེད་པ་གཅིག་བསྟེན། དེ་མི་བྱེད་ལྟ་སྒོམ་སྤྱོད་གསུམ་འགྲིག་པ་གཅིག་དགོས། ལྟ་བ་མཐོན་པོ་ནམ་མཁའ་ལྟ་བུ་ཡོད་ཀྱང་། སྒོམ་པ་མེད་ན་ཉམས་མྱོང་མི་འབྱུང་ཞིང་། གོ་ཡུལ་དུ་འཆོར། སྒོམ་པ་བརྟན་པོ་རི་རྒྱལ་ལྟ་བུ་ཡོད་ཀྱང་། ལྟ་བ་མེད་ན་གནས་ལུགས་རང་སར་མི་ཕྱིན་ཞིང་། ཉམས་ལ་ཡར་སྐྱེད་མི་ཐོན། དེ་གཉིས་ཡོད་པ་སྐད་ཟེར་ཡང་། སྤྱོད་པ་ཐེས་ཐུག་པ་ལས་མེད་ན་རང་གཞན་བསླུ་བ་ལས་མི་འབྱུང་བས། དེ་གསུམ་ལག་མིག་ཏུ་རྐང་མིག་ཆད་པ་ཀྲིག་གེ་བ་གཅིག་བསྟེན་གསུང་། །དེ་ལྟར་རྟགས་ཀྱི་རྗེས་སུ་ཕྱི་ནས་འབྲེལ་རྟོགས་མི་བྱ་སྟེ། བླ་མ་དེ་མོ་རང་མོར་སོང་ཡང་བལ་ཀུར་ཁྲོང་ངེ། རྣལ་འབྱོར་པར་སོང་ཡང་ཁྱི་བཞུག་ལང་ངེ་འབྲལ་མེད་དུ་བསྒོམ་གསུང་།
ས་ར་ཧས། བུ་ཆུང་བཞིན་དུ་གཙུག་གི་ནོར་མི་འབྲལ། ཞེས་གསུངས་སོ།
།རྒོད་ཚང་བ་ལ། སློབ་མ་འགའ་ཡིས། བླ་མ་མཚན་ཉིད་མི་ལྡན་པ་ལ་མོས་གུས་བྱས་ན་བྱིན་རླབས་འབྱུང་མི་འབྱུང་ཞུས་པས། ཅུང་ཟད་ཚོམ་མེ་བཞུགས་ནས། བྱིན་རླབས་ཇི་ལྟ་བ་བཞིན་མི་འབྱུང་། ཕྱིས་ནས་བཟང་པོ་དང་མཇལ་བའི་རྒྱུ་ཙམ་དུ་འགྱུར་རམ་གསུང་། རིན་པོ་ཆེ་པ་ཁོང་མོས་གུས་གཙོ་བོར་མཛད་པས། དེ་ཙམ་གསུང་བ་ཡིན་གྱིས། དེ་མིན་བཟང་པོ་དང་མཇལ་རྒྱུར་མི་འགྱུར། དེ་བྱས་ན་འབྲས་བུ་གོ་ལྡོག་ཏུ་འགྲོ། ཟོག་པོ་ཟོག་མོ་བསྟེན་ན་ནམ་དགོས་དུས་བསླུ་སྟེ།
སངས་རྒྱས་མཛོད་ཀྱི་མདོ་ལས། འཇིག་རྟེན་གྱི་དགྲས་ནི་སྲོག་ཙམ་འཕྲོག་གིས་ལུས་གཅིག་སྟེང་ཟད་དུ་ཟད་དོ། །མི་གཏོ་མུག་ཅན་གྱིས་ཆོས་བཤད་ན། བསྐལ་པ་བརྒྱད་ཁྲི་བཞི་སྟོང་དུ་དམྱལ་བར་སྐྱེའོ། །དེ་ནི་མྱ་ངན་ཆེན་པོའོ་ཞེས་གསུང་།
དགག་སྒྲུབ་མི་བྱ། ཚུར་སེམས་སུ་མི་བསྡུའོ། །ལྷན་པ་འབྱུང་ངོ་། །ཞེས་པ་གཞན་ཡང་དམིགས་ཡུལ་དེ་འགག་པ་འདྲའམ། དམའ་ཞོངས་འགྲོ་བའམ། ནག་ཐིབ་པའམ། སྐྱ་ཝལ་ཝལ་བྱུང་བ་ན། སེམས་གནས་པའི་རྟགས་ཡིན་པས། ཡང་ལུས་གནད་བསྲངས་ལྟ་སྟངས་གཞན་དུ་སྤོས་ཏེ་མ་བཅོས་པར་བཞག །རྣམ་རྟོག་སྔར་བས་མང་བ་སྙམ་པ་རི་གཟར་གྱི་ཁ་ནས་ཆུ་འབབ་པའམ། འོག་འགྱུས་སམ། གཡོ་བུན་ནམ། ཡེ་མི་གནས་པར་འདུག་སྙམ་པ་བྱུང་ཡང་སྐྱོན་དུ་མི་བལྟ། རྗེས་ནས་མི་འབྲང་བར་དྲན་པས་ཟིན་ཙམ་བྱ། དེ་ཡང་འོ་སྐོལ་གྱི་སེམས་འདི་ལ་རྣམ་རྟོག་གི་ཤོང་ཚངས་ལས་མེད་དེ། སྔར་སེམས་ལ་གནས་པ་དང་། མ་དྭངས་པས་བཟུང་དུ་མ་ཟིན་པ་ཡིན། ད་ཅུང་ཟད་དྭངས་པ་དང་། བཟུང་དུ་ཟིན་ནས་རྣམ་རྟོག་མང་མང་འདྲ་བ་ཡིན། དོན་ལ་མང་དུ་སོང་རྒྱུ་མེད། སེམས་གནས་པ་དང་དྭངས་པའི་རྟགས་ཡིན་པས། དེ་ཐོག་ཏུ་གློད་ཅིང་འཇོག་པའོ།
།ཁ་ཟས་བཅུད་ཅན་བསྟེན་ཅེས་པ། རྒྱུ་བསམ་གཏན་ཟས་བདུན་བསྟེན་ནས་འབྲས་བུ་ཚོགས་ལ་གནས་པ་ཞེས་བྱ་བ། དེ་ཡང་ཁམས་ཀྱི་ཟས་བོངས་ཆུང་དེ་བབསྟེན། རེག་པའི་ཟས་གེས་ཡང་བ་དྲོ་བ་བགོ གཉིད་རྣལ་མའི་ཟས་ཁམས་ཟོས་པ་ལེག ཉེ་མོའི་མི་ལོག །ཚངས་པར་སྤྱོད་པའི་ཟས། རྟེན་ཁམས་དྭངས་མ་ཉམས་ན་བརྟེན་པ་སེམས་རྟོག་པ་སྐྱེ་བས་མེ་དང་ཉི་མ་ལ་སོགས་པ་དྭངས་པ་གནོད་པའི་ཟས་དང་སྤྱོད་ལམ་སྤང་། ཡིད་ལ་སེམས་པའི་ཟས་སྐོམ་ཡོར་མི་ཡོང་གི་རེ་དོགས་མི་བྱ་བར་རང་ལ་གནས་པའི་ལྷན་ཅིག་སྐྱེས་པའི་ཡེ་ཤེས་ངོ་བོ་སྤྲོད་པ་ལ་ཡོང་བ་ཅི་ཡིན་སྙམ་དུ་བསམ། སྙོམས་པར་འཇུག་པའི་ཟས་ཁམས་བཟང་ན་འཇུར་དུ་བྱ། ངན་ན་གློད། ཐུན་སྐབས་སུ་བྱ། གལ་ཏེ་ཁམས་ངན་ན་ལམ་འབྲས་ནས་བཤད་པའི་ཁ་ཟས་རེས་འཇོག་ཉི་མ་རེས་འཇོག་སྤྱོད་ལམ་རེས་འཇོག་རྣམས་བྱ། རྟ་རྫུད་གསོ་བ་དང་འདྲ་བས། ཁ་ཟས་ཀྱི་ལྕགས་ཀྱིས་བྲབ་ཅིང་སྐབས་སུ་གཞུར། དཀུ་མཉེ་བག་རེ་བྱ་གསུང་། ཆགས་པའི་སྤྱོད་པའི་ཟད། རྣམ་རྟོག་གང་སྐྱེས་རྦད་ལ་བཏང་ཟེར་ཡང་། ད་ལྟ་དེ་ཀ་བས་དྲན་པས་ཟིན་ཙམ་བྱ། དེལྟར་བྱས་པས་གནས་པའི་ཏིང་ངེ་འཛིན་སྐྱེ་བས་རྒྱ་མཚོ་ལ་གནས་པ་བྱ་བ་ཡིན་གསུང་། གཞན་ཡང་། ཐུན་ཐུང་བ་གྲང་མང་བ་བྱ།
དམ་པའི་ཞལ་ནས། ཐུན་ཐུང་ལ་ནི་གྲངས་མང་ཞིང་། གྲངས་མངས་བས་ནི་སྐྱེན་མེད་འཐུད། ཅེས་སོ།
།གྱེན་ལ་བསླབ་པནི། ཤེས་པ་བྱིང་རྨུགས་སུ་གྱུར་ན་ལྟ་སྟངས་མཐོ་བར་བྱ། དབང་པོ་ལ་ཀྲོག་འདོན། རིག་པའམ་ངར་བཏོན་ནས་ཤེས་པ་ངར་ཧྲིག་གེ་རྗེན་ནེ་བཞག་པས། བྱིང་རྨུགས་ཀྱི་སྐྱོན་རང་དག་ནས། རིག་པ་གསལ་ལ་དྭངས་པ་ངར་དང་བཅས་པ། ངང་ངམ་ཤུགས་འབྱུང་གསུང་། ཐུརལ་བསླབ་པ་ནི། རྒོད་ན་ལུགས་སྲོལ་ལ་སོགས་པར་ལྟ་སྟངས་དམའ་བར་བཅསལ། ལུས་སེམས་ཁོང་གློད་ན་སྒོམ་འདོད་ཀྱི་བློ་དང་ཕྲལ་ཏེ་ལྷོད་དེ་བཞག་པས། འཕྲོ་རྒོད་ཀྱི་སྐྱོན་རང་དག་ནས། ཤེས་པ་རང་མལ་དུ་ཚུད་པའི་གནས་པ་བཟང་པོ་འབྱུང་གསུང་།
དམ་པའི་ཞལ་ནས། འགའ་ཞིག་བྱིང་ན་སེང་། རྒོད་ན་སྡུད་ཅེས་ཟེར་ན་ཡང་། འདིར་ལྟ་སྟངས་ཀྱི་སྦྱོར་བས་ཤེས་པ་ཡུལ་དང་ཕྲལ་བ་ཡིན་གསུང་སྟེ། དམིགས་པ་དེ་གཉིས་གེགས་སེལ་ལྟ་བུ་ཡིན་གསུང་། ཁྲོ་བོ་ཚངས་པ་གྱེན་དུ་བལྟ། །ཉན་ཐོས་ཞི་བ་འཐུར་དུ་བལྟ། །རྡོ་རྗེའི་སྤྱན་ནི་ཐད་ཀར་བལྟ། །ཅེས་ཏེ།
རྟགས་ལ་གཙོར་བྱེད་རྣམས་གྱེན་ལ། སེམས་ཉེར་ཞི་གཙོ་བྱེད་རྣམས་ཟུར་དུ། ཟུང་འཇུག་གཙོ་བྱེད་རྣམས་ཐད་ཀར་བལྟ་སྟེ། དམ་པ་དང་། ཆོས་འདིའི་ལུགས་ཀྱི་དེའི་གསུང་། མདོ་སྣ་ཚོགས་ལ་བསླབ་པའི་སྐབས་སུ། རྣམ་རྟོག་རང་རྒྱུད་པ་འདི་དུས་དང་གནས་སྐབས་ཐམས་ཅད་འབྱུང་བའི་སྐབས་ཡེ་མེད། རྟོག་པ་རང་རྒྱུད་པ་འདི་ཀ་འཁོར་བའི་རང་གཟུགས་ཡིན་ཏེ།
རྣམ་སྣང་མངོན་བྱང་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །ཅེས་དང་།
འཇམ་དབྱངས་བསྟོད་པ་ལས། རྣམ་པར་རྟོག་ལས་མ་རྟོགས་པའི། །འཁོར་བ་ཞེས་བྱ་ཡོད་མ་ཡིན། །ཁྱོད་ནི་རྣམ་རྟོག་དང་བྲལ་བས། །དེ་ཕྱིར་ཁྱོད་ནི་སངས་རྒྱས་དང་། །ཅེས་དང་།
རྟོག་པས་དྲ་བ་རྣམ་བསེལ་ཅིང་། །ཟབ་ཅིང་རྒྱ་ཆེ་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ་ལ་ཕྱག་འཚལ་ལོ། །ཞེས་གསུང་།
ཁྱེད་ཕྱག་ཆེན་པ་རྣམས་ལ་རྣམ་རྟོག་སྒོམ་དུ་འཆར་ཡོད་པ་མིན་ནམ། རྟོག་མེད་ཀྱིས་ཚེ་ཕྱིད་བྱེད་ཟེར་ན། དེ་ལ་ཆོས་འདི་རང་སྐད་ཀྱིས།
དང་པོ་རྟོག་པ་ལ་ཅུང་ཟད་སྐྱོན་དུ་བལྟ། བར་དུ་རྣམ་རྟོག་གྲོགས་སུ་ཁྱེར། ཐ་མ་དགག་སྒྲུབ་དང་བྲལ་བ་གསུམ་ལས།
དང་པོ་རྐྱེན་དུ་བལྟ་ཟེར་ཡང་། བྲར་ཕུལ་བྱས་ནས་སྤོང་བ་ལྟ་བུ་མ་ཡིན་གྱིས། བརྡའ་ཐབས་ཁྱད་པར་ཅན་ལ་བརྟེན་ནས་འདས་པ་ཡུལ་དུ་བྱེད་པ་རྣམས་རང་འགགས་ལ་འགྲོ། མ་འོངས་པའི་རྟོག་པ་སྐྱེ་འཕོ་འཆད། ད་ལྟར་གྱི་རོ་མེད་ཁུངས་སྟོར།
རྩིས་མེད་རང་ཡལ་ནས། སེམས་གཡོ་མེད་ཀྱི་རང་ས་ཟིན་ཏེ་རང་ངོ་ཤེས་པའི་ལྷག་མཐོང་འཆར། །དེ་ལྟར་རྣམ་རྟོག་མ་རིག་པ་རྒྱུན་ཆད་རྩ་ན། རྣམ་པར་མི་རྟོག་པའི་ཡེ་ཤེས་རང་ཤར་དུ་བྱུང་བ་ཆོས་ཉིད་ཡིན་ནོ། །རྟོག་པ་གསལ་སྣང་ཁེགས་ཏེ། རྣམ་རྟོག་རྗེས་སུ་འབྲེལ་བ་ལ། །དོན་སྣང་གསལ་བ་ཡོད་མ་ཡིན། །ཅེས་གསུང་།
སྒོམ་ཐོག་ནས་ལྟ་བ་འཚོལ་བ་དང་། ལྟ་ཐོག་ནས་སྒོམ་སྐྱོང་བ་གཉིས་ལས། འདི་སྒོམ་ཐོག་ནས་ལྟ་བ་འཚོལ་བ་ཡིན་པས་གནས་པ་དགོས། གནས་པའི་རླན་མེད། རྣམ་རྟོག་ཕྲ་མོ་རྣམས་མི་འཚོག །རྟོགས་པ་རྣམས་ཀྱིས་མི་ཐེག །རྣམ་རྟོག་ལ་བོགས་མི་ཐོན། གཟུགས་ཅན་འཆར་བ་ལ་སེམས་དྭངས་ཤིང་གནས་དགོས། ཆོས་སྤྱིའི་ལུགས་ཀྱིས་ཀྱང་། ཞི་གནས་ཀྱིས་ཉོན་མོངས་པ་མགོ་མནན་ནས། ལྷག་མཐོང་གི་དྲུང་ནས་འབྱིན་པར་བྱེད་ཅིང་པ་ཡིན་ཅིང་། བསྒོམ་གྱི་ངོ་བོ་ཞི་གནས་ལྷག་མཐོང་ཟུང་འབྲེལ། ཐབས་ཤེས་དབྱེར་མེད་སྣང་སྟོང་དབྱེར་མེད་ལ་སོགས་པ་ཡིན། ཡ་བྲལ་གྱི་གོ་མི་ཆོད། དེ་ལ་དངོས་ནས་ཟུང་འབྲེལ་སྐྱེ་དཀའ་བས། ཞི་གནས་འཚོལ་དགོས།
སྤྱོད་འཇུག་ལས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པ་ཤེས་བྱས་ནས། །ཐོག་མར་ཞིག་ནས་བཙལ་བྱ་དེ་ཡང་ནི། །འཇིག་རྟེན་འཆགས་པ་མེད་པ་མངོན་དགས་འགྲུབ། །ཅེས་པས་འཇིག་རྟེན་མ་འཆགས་པ་དགོས་ཏེ།
གནམ་སེང་ལྡེང་དུ་དཔལ་ཆེན་རྒ་ལོ་དང་། ཞང་རིན་པོ་ཆེ་མཇལ་དུས། ཞང་ལ་སྤྱན་ཅེ་རེ་གཟིགས་ནས། ཁྱོད་ཀྱིས་ངའི་ཆོས་དང་གདམས་ངག་ཐམས་ཅད་ཀྱི་བདག་པོ་བྱས་ནས། སེམས་ཅན་ལ་ཕན་ཐོགས་པ་གཅིག་ཡོང་བ་འདུག་པ་ལ། ཞེས་ཡང་ཡང་གསུངས། ཐུགས་ལ་འདོགས་པར་ཞུ་བྱས་པས་ཁྱེད་ལ་གེགས་གཅིག་འདུག་གསུང་། རྩི་གདའ་ཞུས་པས། ལུང་པའི་མདའ་མ་གི་ན་གསེར་གཞི་ནི་གཅིག་དང་། མར་ཧྲིལ་གཅིག་གི་འབུན་བསྐྱེད་འདུག་པ་གསུངས། དེ་ཙམ་གྱི་ཅི་སྐྱོན་པ་ལགས་སམ་ཞུས་པས། ཆོས་ཟབ་མོ་རྒྱུད་ལ་མི་སྐྱེ་བའི་གེགས་བྱེད་པ་གདའ། རབ་ཏུ་བྱུང་ན་འབུན་བསྐྱེད་བྱེད་པ་རྣམ་སྨིན་ཤིན་ཏུ་ཆེ། ངའི་སློབ་མ་གཅིག་སྐྱེ་བ་སྔ་མ་ལ་ཚུལ་ཁྲིམས་བསྲུངས་མི་ལུས་ཐོབ་ནས་རབ་ཏུ་བྱུང་སྟེ་འབུན་བསྐྱེད་བྱས་པས་ད་ལྟ་དམྱལ་བར་སྐྱེས་འདུག་གསུང་། དེར་ཞང་རིན་པོ་ཆེས་གཞི་ནམ་ཡན་ཆད་ཀྱི་དངོས་པོ་རང་དོན་དུ་བདག་ཏུ་འཛིན་ན། བླ་མ་རིན་པོ་ཆེའི་ཆོས་སྐྱོང་གིས་མགོ་བོ་ཁོས་ཤིག་ཅེས་དབུ་སྙུང་བརྒྱ་རྩ་བཞེས་ནས། སྒྲུབ་པ་མཛད་པས་ཡོན་ཏན་ཁྱད་པར་ཅན་འཁྲུངས་གསུངས།
མཁན་ཆེན་མཆིམས་པའི་ཞལ་ནས། ཉོན་མོངས་དྲུང་ནས་འབྱིན་པ་ལྷོངས་ཀྱི་ཡེ་ཤེས་དགོས། །དེའི་རྒྱུར་ཞི་གནས་དགོས། དེའི་རྒྱུར་སྒོ་གསུམ་དབེན་པ་དགོས། དགེ་སློང་དོན་ཅི་ཉུང་བ་བྱ་བ་ཉུང་བ། འབྲུ་བསྣོན་རྒྱས་པར་མཛད་ནས་གསུངས་གསུང་།
སངས་རྒྱས་སྟོན་པའི་གསུང་ནས། ཞི་གནས་མེད་པའི་ལྷག་མཐོང་དེ་ཅི་དང་འདྲ་ན། མཉེད་ཡབ་མེད་དང་འདྲ་གསུང་། མདོར་ན་ལྷག་མཐོང་གི་ཡེ་ཤེས་སྐྱེ་བ་ལ་ཞི་གནས་དགོས་ཤིང་། དེ་ལ་འཇིག་རྟེན་ལ་མ་ཆགས་པ་དགོས། དགོས་མེད་ཞེན་ལོག་གི་བློ་སྣ་བསྟེན་པ་གལ་ཆེ་གསུང་།
གནས་པའི་རྐང་མ་ཟིན་པར་ངོ་སྤྲད་ན། གོ་ཡུལ་སོང་ནས་ལྟ་བ་ཕྲག་ཚོངས་བྱེད་པ། ལས་སུ་ཆོས་མིན་སྣ་ཚོགས་ལ་སྤྱོད་པ་བྱུང་། ཉེན་ཆེ་བས་སྔོན་དུ་གནས་པ་གལ་ཆེ། དམ་པ་རིན་པོ་ཆེ་དང་། བླ་མ་ཞང་གིས་འགའ་རེ་ན་རྗེས་ཤེས་རྟོག་པའི་སྟེང་དུ་ངོ་སྤྲད་པ་ཡོད་དེ། དེ་འཕྲོད་པ་རེ་རེ་ཙམ་ལ་ཆོད་ཆེ་བ་ལྟར་སྣང་ཡང་། ངོ་འཕྲོད་པ་དཀའ་བས་གནད་ཆུགས། མཉམ་བཞག་གནས་པའི་སྟེང་ནས་ངོ་འཕྲོད་པ་སླ་བ་གནད་ཆེ་གསུང་། ཉལ་བ་ལས་ཚིགས་པ་བསྲང་ཞིང་ཁ་སྤུབ་ལ་སོགས་པ་མི་བྱ་ཞིང་། ཕྱིར་ཡང་དུས་ཐམས་ཅད་དུ་ལུས་གནད་བསྲང་། འབྱུང་བཞི་འཁྲུགས་པས་དབང་དུ་མ་འདུས་ནའང་ཚིགས་པ་བསྲང་གསུང་། རྣམ་དཔྱོད་ལམ་བཞི་ལ་འགྲོ་བ་གཅིག་དགོས། སྟན་ཁར་སྡད་ཙན་འབྱུང་གི །དེ་མིན་ན་མི་འབྱུང་ན། དེས་བརྟག་མི་ཐུབ། དེ་ཡང་དང་པོ་ནས་བཏོལ་སྐྱེས་སུ་མི་འབྱུང་བས་སློབ་དགོས་པས་ད་ལྟ་སློབ་པ་གལ་ཆེ་གསུང་ངོ་། རྟེན་ཅན་ལ་སླབ་པའོ་ཅེས་པས། དེ་རྣམས་ཀྱིས་ཞི་གནས་མཚན་བཅས་དེ་ལྟ་བུ་དེ་སོང་ནས། ད་ཞི་གནས་མཚན་མེད་དེ་ལྟ་བུའི་ཚུལ་གྱིས་སྟོན་ནོ།
།སེམས་འཚོལ་བཏབ་པའི་རྗེས་སུ།
ལྕེ་སྒོམ་གྱི་ཞལ་ནས། རྒྱ་གར་ཡུལ་ནས་དམ་པའི་ཆོས་བཙལ་ཡང་། གཏན་ལ་དབབ་རྒྱུ་རང་གི་སེམས་ལས་མེད། སེམས་ཀྱིས་སེམས་ལ་བལྟ་བར་བྱེད་པ་ལ། ཐབས་ཀྱི་སྣ་ཁ་མང་པོས་ཅི་ཞིག་བྱ། ཞེས་གསུང་།
རིན་པོ་ཆེ་པ་སེམས་ཀྱི་བལྟ་བ་འདི་གལ་ཆེ། སྣང་བ་ཐམས་ཅད་རང་གི་སེམས་ཡིན་པས། སེམས་རྟོགས་ངོ་ཤེས་ན་གཞན་ཐམས་ཅད་རང་གྲོལ་ལ་འགྲོ། །འོ་ན་སྣང་བ་ཐམས་ཅད་རང་གི་སེམས་ཀྱི་རང་འོད་དམ། རང་གཟུགས་ཡིན་ནམ་སྙམ་ན་ཡིན་ཏེ།
རྡོ་རྗེ་མགུར་ལས། རིན་ཆེན་སེམས་ལས་ཅེས་སོགས་ལུང་འདྲེན། ཀུན་བྱེད་རྒྱལ་པོ་ང་ཁ་བ་ཟེར་ཏེ། ང་བ་བརྟག་གཉིས་ལས་ཆུད་རྒྱུད་མི་འདུག་གསུང་། སེམས་ཙམ་མོ་ཅེས་པ་ཙམ་ལ་གཉིས། ལྷག་པ་འགོག་པ་དང་ཚོད་འཛིན་པའོ།
།འདིར་ལྷག་པ་འགོག་པ་ཙམ་ཡིན་གསུང་། སྣང་བ་རང་སེམས་ཡིན་པས་ངོ་སྤྲོད་དམ་མིན་ནས་སྤྲོད། ཡིན་ན་སྤྲད་མི་དགོས་ལ། མིན་ན་སྤྲད་ཀྱང་མི་ཕན་ནོ།
།ཡིན་ཡང་ཡུལ་འཛིན་གྱི་རྟོག་པས་བསྒྲིབས་ནས་ངོ་མ་ཤེས་པ་ལ། ད་བླ་མའི་བྱིན་རླབས་དང་བརྡ་ཐབས་ཁྱད་པར་ཅན་གྱི་དྲི་མ་དེ་གསལ་ནས་ངོ་ཤེས་པར་བྱེད་པ་ལ། སྣང་བ་རང་སེམས་ཀྱི་ཁྲིད་ཟེར་ཏེ། འདི་དག་གི་འཁྲིད་ཚུལ། ས་སྐྱ་པ་ཀུན་ལའང་། ལམ་འབྲས་བུ་དང་བཅས་པ་ནས། དཔེ་བརྒྱད་བཞི་སུམ་ཅུ་རྩ་གཉིས་ལ་བརྟེན་ནས། སྣང་བ་རང་སེམས་སུ་ངོ་སྤྲད་ཚུལ་བཤད། འཇིག་རྟེན་མགོན་པོ་ཡང་སྣང་བ་རང་སེམས་ཀྱི་ཁྲིདརྒྱས་པར་གསུངས། འདིར་ཡང་རྒྱལ་པོ་ལ་གདམས་པའི་མདོའི་རྗེས་སུ་འབྲངས་པ་རྒྱས་པར་ལོགས་སུ་བསྟོན་ལ། ཅུང་ཟད་བཤད་ན། དངོས་གཅིག་ཉིད་ནི་ཐ་དད་ཕྱིར། །དོན་མ་གྲུབ་པར་འདོད་པ་ཡིན། །ཅེས་དངོས་པོ་གཅིག་སྣང་ཚུལ་ཐ་དད་དེ། །ཅེས་སོགས་གསུངས་པའི་དངོས་པོ་གཅིག་ལ་ལྷ་ལ་རྡོའི་རྒྱལ་པོ་ཨ་མོ་ལི་ཀ་ལ་སོགས་པར་སྣང་། མི་ལས། དུད་འགྲོ། གྲོག་སྦུར་ལ་སོགས་པ་ལ་ལོངས་སྤྱོད་དང་ཁང་ཁྱིམ། དམྱལ་བ་ལ་ལྕགས་སྲེགས་ཀྱི་ས་གཞི་ཅེས་གསུངས། མདུན་དུ་བུམ་པ་ཅེས་པ་དེ་ལྟ་བུ་ལ་ལྟ་སྟངས་བཅས་ཏེ་ཡིད་བྱེད་དང་བྲལ་ནས་བཞག་པས་སེམས་ཀྱིས་བུམ་པ་བཟུང་འདུག་གམ། བུམ་པས་ཚུར་འཆང་འདུག་གམ། ཐ་དད་དུ་འདུག་གམ། སེམས་རར་བུམ་པ། རང་སེམས་སུ་ཤར་བ་འདུག་བལྟ། བལྟས་པས་དབྱེར་མི་ཕྱེད་དེ། ཐིག་ལེ་ལས། སེམས་ཉིད་ལྷན་ཅིག་སྐྱེས་སོགས་བརྗོད་ནས། སེམས་ཉིད་ཆོས་ཀྱི་སྐུ་འགག་པ་མེད་པའི་རང་འོད་སྣང་བའི་ཆོས་སྐུ་ཡིན་ནོ།
།དེ་ལྟར་ཡང་སྣང་བ་སེམས་སུ་བྱེད་པ་དེ་སེམས་ཙམ་དུ་མི་འགྱུར་རམ་ཞེན་མི་འགྱུར་ཏེ།
སེམས་རྣམ་རིག་ཙམ་དུ་འདོད་པ་ནི། གྲུབ་མཐའ་ཁས་ལེན་གྱི་སེམས་ཙམ་ཡིན། འདིར་སྣང་བ་རང་གི་སེམས་དེ་ཡང་། ངོས་བཟུང་དང་བྲལ་བར་ཤེས་པས་སོ།
།བཀའ་ཐ་མ་དོན་དམ་རྣམ་པར་ངེས་པའི་མདོ་སྡེ་རྣམས་ལས་སྣང་བ་སེམས། སེམས་སྤྲོས་བྲལ། སྤྲོས་བྲལ་ཟུང་འཇུག་ཏུ་གཏན་ལ་ཕབ་སྟེ། དེའི་རྒྱུ་མཚན་ཡང་སངས་རྒྱས་ཀྱིས་བཀའ་རིམ་པ་གསུམ་བསྐོར་བའི་དང་པོ་རྟག་ཆད་དང་འབྲེལ་ཅེས་སྒྲོ་འདོགས་ནས་ཐ་མ་རྣམ་པར་ངེས་ཀྱི་འཁོར་ལོ་བསྐོར་བས་ཟུང་འཇུག་ཏུ་བསྟན་ཏེ།
ལང་ཀར་གཤེགས་པ་ལས། ཀུན་གཞི་མེད་ཅིང་རྣམ་རིག་མེད། །རང་བཞིན་མེད་ཅིང་དངོས་མེད་ན། །བྱིས་པ་ངན་པ་རྟོག་གེ་པ། །རོ་དང་འདྲ་བས་མ་རྟོགསསོ། །ཅེས་དང་།
སེམས་ཙམ་ལ་ནི་གནས་ནས་སུ། །ཕྱིའི་དོན་ལ་མི་བརྟག་གོ །ཡང་དག་དོན་ལ་གནས་ནས་ནི། །སེམས་ཙམ་ལས་ནི་འདའ་བར་བྱ། །སྣང་མེད་གནས་པའི་རྣལ་འབྱོར་པས། །དེ་ཡིས་ཐེག་པ་ཆེན་པོ་མཐོང་། །ཞེས་གསུངས་སོ།
།སྣང་སྟོང་དབྱེར་མེད་ལ་དབང་ཐོབ་པར་འགྱུར་ཏེ། ཅེས་པ་རིན་པོ་ཆེ་པ་སྣང་བ་རང་སེམས་འདི་ལ་བཞི་ཙམ་ཡིན། གོ་བ། ཉམས་མྱོང་། རྟོགས་པ། མཐར་ཕྱིན་པའོ།
།དང་པོ་ནི། སྣང་བ་འདི་རང་སེམས་ཡིན་སྙམ་དུ་བློ་ཡུལ་རུ་གོ་བའོ།
།གཉིས་པ་ནི། སྣང་བ་རང་གི་སེམས་དང་ཐ་དད་མེད་པར་ཉམས་སུ་མྱོང་བར་ཡུལ་འཛིན་གྱི་དྲི་མ་དང་བྲལ་བའོ།
།གསུམ་པ་སྣང་བ་འདི་རང་སེམས་སུ་ཐག་ཆོད་ནས་ཡུལ་མེད་ཀྱི་ངེས་ཤེས་སྐྱེས་པའོ།
།བཞི་པ་ནི། སྣང་བ་སྟོང་པར། སྟེར་པ་སྣང་བར་བྱེད་ཅེས་པ་འབྱུང་གསུང་།
གཞན་ཡང་དྭགས་པོ་རིན་པོ་ཆེ་ལ། བུ་ཆེན་འགའ་ཡིས་སྣང་བ་སེམས་དང་། ཆོས་ཉིད་གསུམ་འགྲེ་བ་གསུང་བ་ཇི་ལྟར་འགྲེ་ལགས་ཞུས་པས། གཟིམས་མལ་གྱི་མདུན་ན་ཀ་བ་གཅིག་འདུག་པ་ལ་ཕྱག་ཕར་ཐལ་ཚུར་ཐལ་མཛད་ཅིང་འདི་གཉིས་འགྲེ་བ་ཡིན་གསུང་ངོ་། ཟུར་ཆུང་ཤེས་རབ་གྲགས་བྲག་རྒྱ་བོ་ཅན་ན་བཞུགས་དུས། སྟོན་པ་གཅིག་གིས་སུན་དབྱུང་དགོས་སྙམ་ནས་ཆོས་གཏམ་བྱས་པས། སྟོན་པ་དེས་ཀ་བ་ཆོས་ཅན་ཞེས་ཐལ་འགྱུར་བཏང་བས། ཁྱོད་ལ་ཀ་བ་ཆོས་ཅན་དུ་གདའ་སྟེ། ཁོ་བོ་ལ་ཆོས་ཉིད་དུ་གདའ་གསུངས་ནས་ཕྱག་ཕར་ཐལ་ཚུར་ཐལ་མཛད། ཡང་འདུས་མ་བྱས་ནམ་མཁའ་ཆོས་ཅན་བྱས་པས། ཁྱོད་ལ་འདུས་མ་བྱས་ཏེ་ཁོ་བོ་ལ་འདུས་སུ་གདའ་གསུངས་ནས། ནམ་མཁའ་ལ་སྐྱིལ་ཀྲུང་བྱས་ཀྱང་འདུས་མ་བྱས་སུ་འགྱུར་རྒྱུ་མེད་དེ་ཇི་ལྟར་བྱས་ཀྱང་སྣང་སེམས་སུ་དབྱེར་མེད་པར་ཤེས་པར་གསལ་བ་ཡིན་གསུང་། འགའ་ཞིག་སྣང་བ་རང་རང་སེམས་ཡིན་བྱས་པས། བར་གྱི་སྣང་བསྟོང་པ་དང་། སྟོང་པ་སྣང་བར་དབྱེར་མེད་པ་ར་དགོས་པ་ལྟར་འདོད་དེ། དེའི་བྱེ་བྲག་ཕྱེད་དགོས། དེ་ལྟར་བྱུང་ཡང་། སྣང་བ་རང་སེམས་མ་ཡིན་པར་མི་འགྱུར་རམ་གསུང་། འགའ་ཞིག་སྣང་བ་ལས་སྣང་བ་ཡིན་པ་འགའ་ཟེར་ཏེ། གཅིག་ཏུ་མ་ངེས། ལ་ལ་ཉམས་སྣང་། ལ་ལ་ཆོས་ཀྱི་རང་སྣང་དུ་འཆར་བས་དེ་དགག་མི་དགོས། དེ་བས་ཉོན་མོངས་ཀྱི་སྣང་ཆ་ཡང་མི་འགག་སྟེ། མདངས་འགག་མེད། འདོད་ཆགས་ཀྱི་སྣང་བ་ཤར་བ་ལ། ངོ་བོ་འཛིན་པ་ཐམས་ཅད་དང་བྲལ་བ་དེ་ལ་འདོད་ཆགས་རྡོ་རྗེའི། སོ་སོར་རྟོག་པའི་ཡེ་ཤེས་ཟེར། དེ་བས་སྣང་བ་ག་་་་་གིས་དང་ཁྱད་པར་དུ་མ་བྱས་པའི་སྣང་བ་ཙམ་ཀྱང་མི་འགག་གསུང་།
འོ་ན་རྒྱུད་འགྲེལ་ལས། ཏ་ལ་མོ་དང་སྡིག་སྲིན་གྱི་དཔེས་དགག་པར་བཤད་དོ་ཟེར་ན་མ་ཡིན་ཏེ། དེ་ནི་སྣང་བ་ལ་ཞེན་ཆེས་པ་དགག་པ་དགོངས་པ་ཡིན་གྱིས། དོན་ལ་མི་འགག་གསུང་། ད་ལྟ་སྣང་བ་རང་སེམས་ཀྱི་རབ་ལ་རྟོག་པ་འབྲིང་ལ་ཉམས་མྱོང་། ཐ་མ་ལ་ཡིན་ངེས་སྙམ་པའི་གོ་ཡུལ་བརྟན་པོར་འབྱུང་དགོས། དེ་མ་བྱུང་བར་ངོ་སྤྲད་ན་ཆུ་མཆོད་པའི་རྫང་ངམ། འབེན་མ་མཐོང་བའི་མདའ་རྡེག་དང་འདྲ་གསུང་། དེ་ཡང་སྐབས་སུ་བུམ་པ་ལ་སོགས་པ་ལ་དམིགས་གཏད་བཅས་པ་དེ་བཞིན་དུ་བལྟ། གཙོ་ཆེར་རྟེན་མེད་ལ་བསླབ་གསུང་། འདིར་རྟེན་མེད་ཀྱི་སྐབས་ཡིན་རྟེན་ལ་དམིགས་པ་འཆའ་བ་གཅིག་ཡིན་སྙམ་ན། སྔར་གྱི་དེ་རྣམས་ཕྱི་རོལ་ལོགས་ན་མོ་ཞིག་ལ་སེམས་འཛིན་པ་ལྟ་བུ་ཡིན། འདིར་སྣང་སེམས་དབྱེར་མེད་དུ་བཞག་པས། རྟེན་ཉིད་རྟེན་མེད་དུ་འཆར་བའམ། རྟེན་མེད་རྟེན་དུ་འཆར་བ་བྱ་བ་ཡིན་གསུང་། དེ་རྣམས་ནི་སྔོན་འགྲོའོ།
།དངོས་གཞིའི་སྐབས་སུ་འཇོག་པ་རྣམས་སྔར་བཞིན་ལ། རྗེན་ལྷང་གིས་འཆར་ཞེས་པ། དེ་ཉིད་ལ་བལྟས་ཏེ་དངོས་པོ་དངོས་མེད། ལུས་ཀྱི་ཕྱི་ནང་གརན་འདུག་བལྟ། དེ་ཡང་ལུས་སེམས་གཅིག་པའི་གོམས་པའི་སྟོབས་ཀྱིས་ནང་ལུས་ལ་ཡོད་ཡོད་པོར་བྱེད་པས། དེ་ལ་འཇུག་གམ་བལྟ། དུས་འདས་པ་ལ་མ་གྲུབ་སྟེ། གྲུབ་ན་འདས་པའི་རྟོག་པ་འདིར་མི་འགག་བྱ་བའི་ཤུལ་དགོས་ཏེ་དེ་མ་གྲུབ། མ་འོངས་པ་ལ་མ་གྲུབ་སྟེ། གྲུབ་ན་ཁྲོམ་ཆེན་པོའམ། རང་ཟམ་ལ་འགྲོ་བའམ། བཙུན་པ་སེར་འཕྲེང་བྱེད་པ་ལྟར་ཡོང་དགོས་ཏེ། དེ་མེད་ད་ལྟ་བ་ལ་བལྟས་པས། ངོ་བོ་ངོས་བཟུང་གང་དུ་ཡང་མ་གྲུབ་པ། དང་པོའི་ཤེས་པ་ལས་མ་གཡོས་མ་འཆུགས་པའི་དི་ཉིད་དོ།
།འདི་གཉིས་ཀ་ལ་སེམས་ཉིད་ཀྱི་སེམས་ཉིད། ཆོས་ཉིད་ཀྱིས་ཆོས་ཉིད། སློབ་དཔོན་གྱིས་ངོ་སྤྲོད་རྒྱུའི་སེམས་དེ་ཡང་འདིའོ།
།སློབ་མས་ཤེས་པར་བྱ་རྒྱུ་ཡང་འདི་ཡིན་ཏེ། དེ་ལས་གཞན་པའི་དངོས་པོ་མཚན་མ་ཅན་དུ་བསྟན་རྒྱུའམ་མཐོང་རྒྱུ་མེད། དེ་ཡང་འོ་སྐོལ་ཆུ་སྦུར་གྱི་མིག་ཅན་རྣམ་པར་རྟོག་པའི་བློ་ཅན་རྣམས་ཀྱི་མ་མཐོར་བ་ལ་ཚད་མར་མི་བཏུབ། སངས་རྒྱས་ཡེ་ཤེས་ཀྱི་སྤྱན་དང་ལྡན་པས་གཟིགས་དགོས་པ་ལ་གཟིགས་ཏེ།
འོད་སྲུངས་ཀྱིས་ཞུས་པའི་མདོ་ལས། འོད་སྲུངས་སེམས་ནི་དཀར་པོ་མ་ཡིན། སེར་པོ་མ་ཡིན། ཙོད་དང་ཤེལ་གྱི་ཁ་དོག་ལྟ་བུ་མ་ཡིན་ཏེ། འོད་སྲུངས་སེམས་ནི་འདས་པ་མ་ཡིན། མ་འོངས་པ་མ་ཡིན། ད་ལྟར་བ་མ་ཡིན། སེམས་ནི་དུས་གསུམ་སངས་རྒྱས་ཐམས་ཅད་ཀྱིས་ཀྱང་མ་གཟིགས། མི་གཟིགས། གཟིགས་པར་མི་འགྱུར་ཞེས་ཏེ། སེམས་དངོས་པོ་མཚན་མ་ཅན་དུ་མ་གཟིགས་པའོ།
།འདི་ཀ་ལ་སྟོང་པ་སེམས་ཀྱི་རང་བཞིན་ཅེས་ཟེར་ཏེ།
བྲམ་ཟེ་ཆེན་པོས། གདོད་ནས་དག་པ་ནམ་མཁའི་རང་བཞིན་ལས། །བལྟས་ཤིང་བལྟས་ཤིང་མཐོང་བ་འགག་པར་འགྱུར། །ཞེས་སོ།
དེའང་སྟོང་པའམ་མེད་པ་ཕྱལ་ཆད་མ་ཡིན་ཏེ། མདངས་འགག་མེད་དུ་ལམ་མེ་བ་དེ་ལ་གསལ་སེམས་ཀྱི་མཚན་ཉིད་ཟེར་ཏེ།
ཤ་བ་རི་པས། ཕྱལ་ཆད་མ་ཡིན་རྦ་རླབས་བཞིན། །ཅེས་པས་རྦ་རླབས་སེམས་ཆུ་རྒྱུན་ལྟར་ཡོད། དེ་ཉིད་ཐ་དང་ཡིན་ན་མ་སྙམ་ན་མ་ཡིན་ཏེ། རང་བཞིན་སྟོང་བ་ཀ་མཚན་ཉིད་འགག་མེད་དུ་གསལ་ལ། དེ་ཀ་རང་བཞིན་སྟོང་པར་ཡོད་དེ། དེ་ལ་ཟུང་འཇུགསེམས་ཀྱི་ངོ་བོ་ཟེར་ཏེ།
བརྒྱད་སྟོང་པ་ལས། སེམས་ནི་སེམས་མ་མཆིས་ཏེ་སེམས་ཀྱི་རང་བཞིན་ནི་འོད་གསལ་བའོ། །ཞེས་གསུང་།
དེ་ལ་སེམས་ངོས་བཟུང་དང་བྲལ་བ་དེ་ལ་ཆོས་སྐད་དུ། རྣམ་པར་མི་རྟོག་པའི་ཡེ་ཤེས་སམ། བླུན་སྐད་དུ་ཐ་མལ་གྱི་ཤེས་པ་ཞེས་ཟེར་ཏེ།
ནི་གུ་མས། ཡིད་ལ་མི་བྱེད་རེ་དོགས་ཀུན་བྲལ་བའི། །ཞེས་རྟོག་པ་མཇལ་བའི་ཕྱག་མཛད།
བྲམ་ཟེ་ཆེན་པོས། ཐ་མལ་གྱི་ཤེས་པ་ངོས་བཟུང་དང་བྲལ་བའི་ཆོས་སྐུ་འདི་ཡང་། སློབ་དཔོན་གདམས་ངག་ཆེ་ནས་སམ། སློབ་མ་ཤེས་རབ་ཆེ་ནས་རྙེད་པ་མ་ཡིན། གདོད་ནས་རང་ཆས་སུ་གནས་ཤིང་ཡོད་དེ།
བརྒྱད་སྟོང་པ་ལས། ཆོས་རྣམས་ནི་ཅེས་སོ།
དང་པོ་ཉེ་དྲགས་ཅེས་པ། སེམས་དང་ཆོས་སྐུ་གཉིས་པོ་འདི་ངོ་བོ་ལ་བཟང་ངན་མེད། དུས་ལ་སྔ་ཕྱི་མེད། གོ་ས་ལ་མཐོ་དམན་མེད་དེ། སེམས་ཡོད་ན་ཆོས་སྐུ། ཆོས་སྐུ་ཡོད་ན་སེམས་ཡོད་དེ། མ་རིག་པས་སྒྲིབས་ནས་ངོ་མ་ཤེས། གང་ངོ་མ་ཤེས་ན་ཅེས་སོ།
།ད་རེས་བླ་མ་ཅེས་པ། གང་ངོ་ཤེས་ན་རིག་རིག་པོ་འདི་གང་གིས་ཤེས་ན་ཁོ་རང་གིས། ཚུལ་ཇི་ལྟར་ཤེསན་ཡུལ་ཡུལ་ཅན་གཉིས་མེད་ཀྱི་ཚུལ་གྱིས་སོ།
།གཉིས་པ་བླ་གྲགས་ཅེས་པ་བློ་ཆུང་རྣམས་སངས་རྒྱས་ཅེས་པ་མཚན་དཔེས་བརྒྱན་པའི་བཟང་བཟང་པོ་གཅིག་ཏུ་ཞེན་ནས། འདི་སངས་རྒྱས་ཡིན་ན་བླ་སྟེ་སྙམ་ན། མཚན་དཔེས་བརྒྱན་པར་སྣང་བ་དེ་ནི་ཆོས་སྐུ་དྲི་བྲལ་གྱི་ལག་རྗེས་ཏེ། སངས་རྒྱས་རྣལ་མ་འདིའོ། །དེ་བཞིན་གཤེགས་པའི་སྙིང་པོ་ལས་གཞན་མ་ཡིན་ཅེས་རྒྱུ་མཚན་གནད་ཀྱིས་དེད་ནས་གསུངས་སོ།
།གསུམ་པ་ནི། དམ་པས། མཆོད་རྟེན་ཀ་རུའི་ཙ་ན་མར་བྱོན་པས། གླང་པོ་གཅིག་ཉལ་བ་གཟིགས་པ་ཁོའི་རླུང་དབུ་མར་ཚུད་དེ། ཤེས་པ་རྟོག་མེད་དུ་ཧད་དེ་འདུག་ནས་རྩར་བྱོན་ཏེ་ཐལ་མོ་སྦྱར་ནས་ངོ་མཚར་ཆེ་གསུང་། དེའི་རྗེས་སུ་སྙིང་རྗེ་གསུང་། ཀུན་དགས་ངོ་མཚར་ཆེ་རྒྱུ་གཅིག་བདོག་འདི་དུད་འགྲོ་ལགས། དེའི་ནང་ནས་གླང་བུ་བྱ་བ་ཤིན་ཏུ་བླུན་པ་གཅིག་ལགས་ཞུས་པས། འཇམ་དཔལ་སྨྲ་སེང་ལ་ཡང་འདི་ལས་ལྷག་པ་མེད་དེ། ཁོས་མ་ཤེས་གདའ་སྙིད་རྗེ་གསུངས་ཏེ། རང་རེ་ལ་ཆད་པ་ངལ་གསོ་བ་དང་གསུང་། ཅེས་གསུང་།
སྐྱོན་བཞི་རང་གྲོལ་ཅེས་པ། འདས་པའི་རྟོག་པ་མ་འགགས་མ་འོངས་པ་སྐྱེ་འཕྲོ་ཆད། ད་ལྟ་བ་རོ་མེད་ཁུངས་སྟོས་རྩིས་མེད་རང་ཡལ་ལ་སོང་ནས། ཤེས་པ་གསལ་ལ་དྭངས་པ་གཅིག་འཆར། དེ་ལ་བལྟས་པས་མདངས་མ་འགགས་པ། ངོས་བཟུང་ཐམས་ཅད་དང་བྲལ་བ། གསལ་སྟོང་ནམ་མཁའ་སྤྲིན་དང་བྲལ་བ་ལྟ་བུ་རང་རིག་ཏུ་རྗེན་ནེ་འདུག་ནས་དེ་ལྟར་ངོ་ཤེས་ཐག་ཆོད། ངེས་ཤེས་སྐྱེས། ཡེངས་མེད་ཀྱི་བྱ་ར་བ་དང་བྲལ་བས་སྐྱོན་བཞི་ལ་གྲོལ་ལོ།
།རིན་པོ་ཆེ་པ་ཚིག་གཞན་བྱིན་དང་མཐུན་པ་མེད། སྐྱོན་བཞི་རང་གྲོལ་འདི་གཞན་པས་ཆུན་ཆེ་ཟབ་པར་ཡོད་གསུང་། ནམ་མཁའི་ངོ་སྤྲོད་ལ། སེམས་རང་ལུགས་སུ་ལྷོད་དེ་བཟོ་མེད་དུ་ཁྲེས་སོ། འཛིན་མེད་དུ་ཞིག་གེ་བཞག་པས། ཁ་དོག་དབྱིབས། གནས་དུས་ལ་སོགས་གང་དུ་ཡང་མ་གྲུབ་པས་དངོས་པོ་ཀུན་འབྱེད་པ་གཅིག་སར་ངེ་འདུག །སེམས་ཀྱང་ངང་ངེ་དབྱེར་མེད་པར་ཁ་དོག་ལ་སོགས་པར་མ་གྲུབ་པར། གདངས་མ་འགགས་པར་ས་ལེ་འདུག་གེ །ནམ་མཁའ་རིག་མེད་དང་། སེམས་ནི་ནམ་མཁའ་ལྟ་བུར་ཅེས་གསུང་། སྣང་བ་ཐམས་ཅད་སེམས། སེམས་ནམ་མཁའི་རང་བཞིན་ཡིན་པས། འཁོར་འདས་ཐམས་ཅད་ནམ་མཁའི་རང་བཞིན་ཡིན་ཏེ།
བརྟག་གཉིས་ལས། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ཅེས་གསུང་།
ནམ་མའའ་སེམས་ཀྱི་དཔེ་དོན་དུ་འཇོག་པ་ནི། རྟོགས་མ་རྟོགས་དེ་རྟོགས་ན་དོན། མ་རྟོགས་ན་དཔེ་ཡིན་གསུང་། དབང་བཞི་པའི་དོན་རང་བྱུང་ལྷན་སྐྱེས་པའི་ཡེ་ཤེས་འདི་ནི་ཆེས་ཕྲ་སྟེ་རྟོགས་པར་དཀའ། རྡོ་རྗེ་སྟོང་པ་ཉིད་ཀྱི་དོན་ཉོན་མོངས་པའི་སྡུག་བསྔལ་དང་བྲལ་བ་མཐར་ཕྱིན་ཏེ་ཆོས་སྐུ། མཚན་མའི་གྲུ་ཟུར་ཞི་བ་ཉིད། ཕ་དེ་བདག་ཉིད་དོ།
།ནམ་མཁའ་ལྟ་བུར་མཚན་ཉིད་མེད། །ཅེས་ཏེ། མཚན་ཉིད་མེད། རང་བཞིན་མེད། གདགས་བྱ་མེད། སྨྲ་བརྗོད་ཀྱི་ཡུལ་ལས་འདས་ཏེ། སྨྲ་བསམ་བརྗོད་མེད་ཅེས་བརྗོད་དོ།
།ངག་ཏུ་སྨྲ་རུ། ཚིག་ཏུ་བརྗོད་དུ། བློ་བསམ་དུ། ཤེས་པའི་ཐ་མ་དང་འབྲིང་མ་་་་རབ། ཉོན་མོངས་བཟུང་རྟོག་འཛིན་གྱིས་ཕ་རོལ་ཏུ་ཕྱིན། རྒྱུས་སྟོང་པས་མ་སྐྱེས། རྐྱེན་གྱིས་སྟོང་པས་མི་འགག ངོ་བོ་མ་གྲུབ་པས་ནམ་མཁའི་རང་བཞིན་ནོ།
།མེད་པའམ་ཕྱལ་ཆད་མ་ཡིན་ཏེ། སོ་སོ་རང་གི་རིག་པའི་སྤྱོད་ཡུལ་ལོ། །རྒྱུ་མེད་གཞན་ལ་མི་ལྟོས་ཕྱིར། །རྟག་ཏུ་ཡོད་པའམ་མེད་པར་འགྱུར། །ཅེས་པས། རྒྱུ་མེད་ཅིང་རྐྱེན་ལ་མི་ལྟོས་ན། ཡོད་མེད་གཉིས་སུ་མི་འགྱུར་རམ་སྙམ་ན། མ་འགགས་པར་གསལ་བའི་ཆ་ནས་ཡོད་ལ། རང་བཞིན་སྟོང་པའི་ཆ་ནས་མེད་དོ། །དུས་གསུམ་རྒྱལ་བའི་ཡུམ་ལ། ཅེས་པ། གཙོ་མ་གསེར་གྱི་མདོག་ཅན་ཞལ་གཅིག་ཕྱག་བཞི་མ་སྟེ། དཔེའི་ཡུམ་ཆེན་མོ་འདི་དོན་གྱི་ཡུམ་ཆེན་མོ་སྟེ།
ཤེར་སྙིང་ལས། དུས་གསུམ་དུ་རྣམ་པར་བཞུགས་པའི་སངས་རྒྱས་ཐམས་ཅད་ཀྱང་། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་བརྟེན་ནས། བླ་ན་མེད་པ་ཡང་དག་པར་རྫོགས་པར་སངས་རྒྱས་སོ། །ཅེས་གསུངས་སོ།
།རིག་པ་གསལ་སྟོང་ཅེས་པ། མངོན་པ་བ་སེམས་དང་ཀུན་གཞི་ཐ་དད་དུ་འདོད་པས། སེམས་ཀྱི་མཚན་ཉིད་མི་རྟོགས། བླ་མ་དབོན་ཤག་ལ་མངོན་པའི་བའི་ཀུན་གཞི་དང་། མདོ་ལས་བཤད་པ་གཉིས་མི་མཐུན་པར་འདུག་པ་དེ་གཉིས་གང་ལགས་ཞུས་པས། མངོན་པ་བ་ཀུན་གཞི་རྣམ་ཤེས་ཚོགས་བརྒྱད་དུ་བྱས་ཏེ། དེ་ཀུན་གཞི་བཏགས་པ་ཡིན། མདོའི་དེ་རྣམས་རྣལ་མ་ཡིན་ཟེར་ཏེ། རྩ་བ་རིག་པ་གསལ་སྟོང་འདི་ཀ་ལ་ཀུན་གཞི་ཟེར། འདི་རྟོགས་ན་སངས་རྒྱས། མ་རྟོགས་ན་འཁོར་བ། རྟོགས་ཏེ་སངས་རྒྱས་ཙམ་ན་ཡང་རིག་པ་གསལ་སྟོང་འདི་ལས་བཟང་དུ་སོང་བ་མེད་ལ། མ་རྟོགས་པའི་དུས་ན་ཡང་དེའི་ངོ་བོ་ལ་དྲི་མས་གོས་པ་མེད་དེ་གསུང་། འཁོར་འདས་དབྱེར་མེད་ཅེས་ཀྱང་ཟེར་ཏེ། གཞི་མ་རིག་པ་ངོ་མ་ཤེས་པའི་ཆ་ནས་ངོ་མ་ཤེས་པའི་ཆ་ནས་འཁོར་བ། རང་སྟོད་དུ་ཡོད་པའི་ཆ་ནས་མྱང་འདས་ཏེ། རྩ་རྒྱུད་ལས། འདི་ནི་འཁོར་བ་ཞེས་གསུངས་པ།
།ལམ་ནི་དེ་ལྟར་གནས་པར་རང་ངོ་ཤེས་ནས། འཁོར་བ་མ་སྤངས་གནས་སུ་དག །མྱང་འདས་མ་བསྒྲུབས་ལྷུན་གྱིས་གྲུབ་ནས་མ་ཡེངས་ཙམ་དུ་སྐྱོང་བའོ།
།འབྲས་བུ་ནི་གཡས་སུ་སངས་རྒྱས་བཞག །གཡོན་དུ་དམྱལ་བ་བཞག་ཀྱང་། དེ་གཉིས་ལ་དགག་སྒྲུབ་དང་འདམ་ཁ་ཟད་པའོ།
།རིག་པ་དྲི་མ་མེད་པ་ཞེས་བྱ་སྟེ། དམ་པའི་དྲུང་དུ་འབྲོམ་ལོ་ཙཱ་བས་བྱོན་པས་ལོ་རྒྱུས་གསུང་། འགྱོད་ཚངས་མཆོག་ཡིན་ཞེས་པ། དཔེ་དུང་རྡུལ་ཕྱིས་པའམ། ཁང་སྟོང་དུ་སྒྲོན་མེ་བཏེག་པ་བཞིན་ནོ་གསུང་། དུས་རྣམས་མཉམ་པ་ཉིད་ཤེས་ཕྱིར། །ཅེས་པ། ངོ་བ་ཟུང་འཇུག །ཟུང་འཇུག་བློ་འདས། བློ་འདས་ཡིད་ལ་བྱར་མེད་པར་མཉམ་ཅེས་སོ།
།དེ་ནས་གོ་ཡུལ་དང་རྟག་བཅད་ལ་ཅེས་པའི་སྔོན་དུ་སྔར་བཞིན་བཞག་པས་གསལ་བྱེད་ཀྱི་རྒྱུ་རྐྱེན་ཆེ་འབྲིང་ཆུང་གསུམ་ལ་མ་ལྟོས་པར་མཚན་ཉིད་རང་གསལ་དུ་རྗེན་ནེ། དེ་ལ་བལྟས་པས་རང་བཞིན་ངོས་བཟུང་ཐམས་ཅད་དང་བྲལ་བ། རང་བཞིན་མེད་བཞིན་གསལ་ཏེ་ངོ་བོ་ཟུང་འཇུག་ཏུ་ཏ་ལེ། དེ་ལྟར་ངོ་ཤེས་ན་གོལ་ས་ཐམས་ཅད་རང་ཆོད་ལ་འགྲོ་སྟེ། གཟུགས་སྟོང་པའོ། །སྟོང་པ་ཉིད་གཟུགས་སོ། །ཞེས་རྟག་ཆད་ལས་གྲོལ་ལོ། །འགའ་ཞིག་འདི་རྟགས་ཀྱི་སྟེང་དུ་སྦྱོར་ཏེ། དེ་ཀའི་བཤམས་ནས་ཆོས་ཐམས་ཅད་སྟོང་པ་ཉིད་དོ་ཅེས་པ་རྟགས་སམ་ཐིག་ལེ་སྟོང་པ་ཉིད་དོ།
།བྱ་བ་མེད། དུས་འཁོར་བ་ཀུན་ལ་མ་ནོར་བ་རྟགས་ཁྲིད་པ་ཟེར་ནའང་། འདིར་ལམ་མ་ནོར་བ་རྟག་ལ་མི་ལྟོས་པ་གཅིག་དགོས་གསུང་། དེ་མ་ཡིན་པའི་མེད་པ་ལ་སེམས་ངོ་བྱས་ན་འཁྲུལ། མེད་པ་དང་སྟོང་པ་ལ་ནོར་ས་ཡོད། རིག་ཐོག་ཏུ་སྒྲོ་འདོགས་ཆོད་ནས་གནས་འགྱུས་སྣང་གསུམ་གྱི་སྟེང་དུ་སྤྲོ་སྟེ་རི་རྩིགས་པ་ཁང་ཁྱིམ་ལ་སོགས་པ་བལྟས་པས་ངོ་བོ་རང་བཞིན་མཚན་ཉིད་གསུམ་ཀྲོང་ངེ་བ་འདི་སྒོམ་ཡིན་ཀྱང་། འདི་སྒོམ་མ་ཡིན་བྱ་བ་མེད། སྣང་བ་བསྒོམ་ཀྱང་ངོ་བོ་རང་བཞིན་མཚན་ཉིད་གསུམ་ཚང་ཞིང་སྟོང་པ་སྒོམ་ཀྱང་ཚང་བས། གད་ཤར་ཤར། གང་སྣང་སྣང་། དྲན་དྲན་ཐམས་ཅད་བསྒོམ་ཡིན། དེ་ལྟར་རྟོགས་པའི་རྣལ་འབྱོར་པ་གཅིག་གིས། ཁ་རུ་བུར་རྡོག་ལ་སོགས་པ་བཅུག་ནས་ཁྲོམ་བསེ་བ་ལྟ་བུར་བལྟང་ན། གཟུགས་སྣང་སྟོང་། སྒྲ་གྲགས་སྟོང་། དྲི་ཚོར་སྟོང་། རེག་བྱ་རེག་སྟོང་དུ་འཆརསྟེ། ཀོ་བྲག་པ་བུ་ཆེན་འགའ་ཡིས་གདམས་སྐོར་བཞི་སོ་སོའི་གང་ལ་ཐུགས་དམ་མཛད་ཞུས་པས། འམ་བུ་དེ་ས་ལ་མེད་ལགས། སྒྲ་ཤཱ་ཤཱ་འདིའམ། ཁྱི་སྒྲ་ལྷང་ལྷང་བ་འདི་ལ་བྱེད་གསུང་ངོ་།
།བློ་བྲལ་གྱི་དྲན་པས་ཅེས་པ། དེ་ལྟ་བུའི་ཉམས་ལེན་གང་ལའང་མ་ཡེངས་ཀྱི་དྲན་པ་གཅིག་དགོས་ཀྱིས་སྒོམ་པ་ཆང་གཏེ་ལ་བཅུག་པས་མི་ཕན།
ཤ་བ་རི་པས། དྲན་པ་རྒྱུན་ཆགས་དྲན་མེད་པ། །ཅེས་པ་དང་།
ཀླུ་སྒྲུབ་ཀྱིས། དབང་ཕྱུག་ལུང་རྟོགས་དྲན་པས་བདེ་གཤེགས་ཀྱིས། །བསྒྲོད་པ་གཅིག་པའི་ལམ་དུ་ཉེར་བསྟེན་ནས། །དེ་ནས་སྒྲིམས་ཏེ་མངོན་པར་བསྲུང་བགྱི་སྟེ། །དྲན་པ་ཉམས་པས་ཆོས་ཀུན་འཇིགས་པར་འགྱུར། །ཅེས་དང་།
ཞི་བ་ལྷས། དྲན་པ་དང་ནི་ཤེས་བཞིན་དག །སྲོག་ལ་བབས་ཀྱང་སྲུངས་ཤིག་ཅེས། །བངག་ནི་འདི་སྐད་འདམས་པར་བྱེད། །ཅེས་གསུང་།
དང་པོ་ནའང་། དྲན་པ་ཡང་དག་བྱང་ཆུབ་ཀྱི་ཡན་ལག་དང་། གཉིས་པ་ནས་སངས་རྒྱས་ཀྱི་སའི་བར་ན་ཡང་དག་པའི་དྲན་པ་ཡོད་པར་གསུངས། དྭགས་པོས་སྒོམ་མེད་ན་ཡང་དག་གི་དྲན་པ་འདག་པ་གཅིག་གསུངས་ཀྱང་། སྒོམ་མེད་སླེབསླེབ་འདག་པར་མ་བཤད། འདི་མདོ་རྒྱུད་དང་མཐུན་རྒྱུ་མེད་ནའང་། དྭགས་པོའི་གསུང་ལ་ཚད་མར་བྱེད་དགོས། དྲན་པ་འདོག་ཅེས་པ། ལས་དང་པོ་པའི་བཟུང་དྲན་འདག་པའོ།
།དྲན་པ་ལའང་རང་ངོ་ཤེས་པའི་ཡུལ་མེད། ཅི་དགོས་ཀྱིས་འཛིན་མེད་ཙམ་རེས་ལམ་ཕྱག་རྒྱ་ཆེན་པོ་མི་འགྱུར། དེ་ཀུན་གཞི་དང་སྒོ་ལྔའི་རྣམ་ཤེས་ལ་ཡང་ཡོད་དེ།
མདོ་ལས། སེམས་ནི་ཀུན་ཏུ་ལུང་མ་བསྟན། །ཉོན་མོངས་ཅན་དེ་མི་དགེ་བ། །ཡིད་ནི་གཉིས་ཀར་འགྱུར་བ་སྟེ། །སྒོ་ལྔའི་རྣམ་ཤེས་ལུང་མ་བསྟན། །ཅེས་གསུངས་སོ།
།དཀར་པོ་ཆིག་ཐུབ་ཅེས་བྱའོ། །ཅེས་པ། དེ་ལྟར་རྟོགས་ཙམ་ན་དཀར་པོའི་ཕྱོགས་ཀྱི་ཆོས་རྣམས་ཐམས་ཅད་འདིར་རྫོགས་ཏེ། སྒོམ་ཆེན་པ་ལ་དགོས་པའི་ཞི་གནས་ལྷག་མཐོང་ཚད་སྟེ། ཞི་གནས་དང་ལྷག་མཐོང་ནི་གཉིས་ཏེ། ཐོས་པ་ལས་བྱུང་བ་དང་། གདམས་ངག་ལས་བྱུང་བའོ།
།ཐོས་པ་ལས་བྱུང་བ་ནི། མདོ་སྡེ་བཅུ་གཉིས་ཀྱི་དོན་ཡིད་ལ་བྱེད་པའོ། །དེ་ཡི་དོན་མཐོང་ངོ་།
།གདམས་ངག་ལས་བྱུང་བ་ནི། སེམས་ནང་དུ་གནས་པ་ནི་ཞི་གནས་སོ། །དེའི་དོན་མཐོང་བ་ནི་ལྷག་མཐོང་ཞེས་བྱའོ། །ཕར་ཕྱིན་དྲུག་ཚང་སྟེ།
ཚངས་པ་ཁྱད་པར་གྱིས་ཞུས་པ་ལས། མི་འཛིན་པ་ནི་སྦྱིན་པ། མི་གནས་པ་ནི་ཚུལ་ཁྲིམས། མི་ཁྲོ་བ་ནི་བཟོད་པ། མི་རྩོམ་པ་ནི་བརྩོན་འགྲུས། མི་སེམས་པ་ནི་བསམ་གཏན། མི་དམིགས་པ་ནི་ཤེས་རབ་སོ། །ཞེས་གསུངས་སོ།
།ཇོ་བོ་བཀའ་གདམས་པ་བཞེད་པའི་ཡན་ལག་ཡོད་པ་ཡང་ཚང་སྟེ། བསྔོ་བ་ལ་སོགས་པ་ལུང་གང་དུ་བཤད་དོ།
།བླ་མ་ཞང་གི་ཞལ་ནས། དཀར་པོ་ཆིག་ཐུབ་འདི་རྟོགས་ནས། པན་ཏ་པུན་ཏ་མ་མང་ཅིང་། །ཅེས་གསུངས་སོ།
།ས་སྐྱ་པཎྜི་ཏས། ཆིག་ཐུབ་བཀག་སྟེ། སྐྱབས་འགྲོ་དང་བསྔོ་བ་དགོས་མི་དགོས། །དགོས་ནགཉིས་དང་གསུམ་དུ་འགྱུར། །ཅེས་གསུངས་སོ།
།གནས་ལུགས་རྡོ་རུས་ཐུབ་པ་གཅིག་ལ་དེ་རྣམས་མ་བྱས་ཀྱང་། དེ་ཉིད་ངོ་བོར་ཚང་སྟེ། དེ་ནི་དམིགས་མེད་རྣམ་པ་ཅན། །ཅེས་བསྔོ་བ་ཚང་། བྱས་ཀྱང་འགལ་བ་མེད་དེ་ཡར་ལྡན་ནོ།
།གཉིས་གསུམ་དུ་འགྲོ་རྒྱུ་མེད། གདངས་སྐྱབས་འགྲོ་དང་། བསྔོ་བ་ལ་སོགས་པར་མ་འགགས་ལ། ངོ་བོ་འཛིན་མེད་ཆོས་སྐུར་ཏལ་བ་དེ་ལུང་གོང་དུ་བཤད་ཟིན། ཕྱོགས་རེ་བའི་སྣང་བ་སྟོང་པ་ལྟ་བུ་ཡིན་ན་སྐྱོན་འབྱུང་གི་སྣང་སྟོང་ཟུང་འཇུག་ཏུ་རྟོགས་པ་ལ་འཁོར་འདས་ཐམས་ཅད་གཅིག་གི་ངོ་བོར་འདུ་བས་སྐྱོན་མི་འབྱུང་གསུང་། ཤིང་མཁན་གཟོ་བོ་མཁས་པས། ཅེས་པ། མི་ཉག་འགའི་རྒྱལ་པོ་བསགས་པ་ཆེ་བས། འགའ་ཏུ་ཤིང་གི་མི་གཟུགས་མདའ་རྡོག་པའི་འཁྲུལ་བྱས། ཧོར་རྣམས་ཀྱི་ཚུར་བརྒྱབ་ཀྱང་གླག་མ་རྙེད་ལ། དེའི་མདས་དམག་གང་ལ་ཐོགས་པ་མེད་པར་ཕུང་བར་བྱས་ཏེ། དེ་དུས་བོད་དུ་ཧོར་དམག་མ་བྱུང་། དེ་བཞིན་དུ་རང་སེམས་ངོ་ཤེས་པས། ཉོན་མོངས་པའི་དགྲ་ཕུང་ཅེས་སོགས་སྦྱར་རོ།
།ཉོན་མོངས་རྣམ་རྟོག་འཕྲོ་ལ་ཇི་ལྟར་བྱེད་སྙམ་ན། ཆོས་སྐུའི་ཞེས་གསུང་། ཨ་མ་གཞན་ནས་ཞེས་པ་བྲམ་ཟེ་རྣམས་རང་གི་རིགས་འཆོལ་གྱི་དོགས་ནས། བྲམ་ཟེ་ནང་བྲམ་ཟེ་བསམ་པ་ལས་ཨ་མ་བྲམ་ཟེ་མ་ལ་བུ་བྲམ་ཟེ་ལས་འོད་་མེད་དོ།
།ཐག་སྦྲུལ་གྱི་དཔེ་གསུངས་ཏེ། རང་འཁྲུལ་པའི་སྣང་བས་བཟུང་བ་མ་གཏོགས་པ། ཐོག་མཐའ་བར་གསུམ་དུ་དེའི་སྣང་བ་ལས་འགྱུར་བ་མེད་དེ། །དེ་བཞིན་དུ་ཕྱི་ནས་གཞན་འབྱུང་བ་མ་ཡིན་ཏེ། གདའ་ཐབས་ཀྱི་ངེས་ཤེས་སྐྱེད་པའོ་གསུང་། ངེས་ཤེས་ལོགས་ནས་སྐྱེ་དགོས་སམ་ཞེ་ན། མི་དགོས་ཏེ། ནུ་བཅོལ་མའི་བུ་དཔེ་གསུང་། ཕྱག་རྒྱ་ཆེན་པོའི་རང་ས་མ་སླེབ་ཅེས་པ། འདོད་ཆགས་ཀྱི་གཉེན་པོར་མི་སྡུག་པ་བསྐྱོམས་ཀྱང་། འདོད་ཆགས་ཀྱི་ཤུལ་དུ་ཞེ་སྡང་གདན་དྲངས་པ་གཅིག་ལས་མ་བྱུང་། ཞེས་དུག་གསུམ་ཀ་སྦྲེས་ཏེ་གསུང་ངོ་།
།དེ་བཞིན་དུ་ཞེ་སྡང་ལ་གསལ་སྟོང་ཞེས་པ་སྤྱིར་ཉོན་མོངས་དུག་གསུམ་རྩལ་རྫོགས་པའི་དུས་ན་ཡང་། རང་གི་ངོ་བོ་རྟོགས་མེད་དུ་འཆར་ཏེ། དཔེར་ན་ཞེ་སྡང་སྐྱེ་སྔོ་ཙ་ན་དམར་ཐོམ་པ་བྱུང་སྟེ། དེ་དུས་སུ་ངོས་ཟིན་ན་གསལ་སྟོང་དུ་རྗེན་ནེ་ཡང་། དེ་བཞིན་དུ་འདོད་ཆགས་གཉིས་ཤོར་གཉིས་སྙམ་གྱི་དུས་ན་བདེ་སྟོང་གཏི་མུག་གཉིད་འཐུག་པོའི་དུས་ན་རིག་སྟོང་དུ་ཡོད་ཅེས། རྣམ་རྟོག་བཟང་ངན་ཐམས་ཅད་ཀྱི་སྟེང་ནས་རྒྱས་པར་སྤྲོས་ནས་གསུངས་སོ།
།ངོ་མ་ཤེས་སམ་ཅེས་པ་ཨ་སུ་རའི་མི་དང་། ཁྱད་ཀྱིས་ནོར་བུའི་དཔེ་གསུང་། ཉམས་ལེན་དེ་རྐྱེན་ལ་བསྲེ་མཁས་དགོས་ཏེ། ཤིང་སྡོང་དང་མེ་སྟག་གི་དཔེ་གསུང་། གཅིག་ཤེས་ཀུན་ལ་མཁས་ཅེས་པ་ལ། བུ་གྲུ་གླེན་གྱི་གླུ་གསུང་། གསང་སྔགས་འབྲས་བུ་ལམ་དུ་བྱེད་པ་ལ། རིན་པོ་ཆེ་པས། ཀོ་ཆུང་པ་དྲིས་པས། ད་ལྟ་ཚོགས་གཉིས་བསགས་པས་ཕྱིས་སྐུ་གཉིས་ཐོབ་པ་ལགས་སམ་བྱས་པས། ཉིད་རང་གི་ཞོག་དང་གསུངས། དེར་སེམས་རང་སྟོང་ཡུལ་མེད་དུ་གནས་པ་འདི་ཆོས་སྐུ། མདངས་འགག་མེད་དུ་གསལ་བ་འདི་སྤྲུལ་སྐུ། དེ་གཉིས་དབྱེར་མེད་པ་ལོངས་སྐུའམ་ངོ་བོ་ཉིད་སྐུ་ཟེར་གསུངས་པས། འོན་སྐུ་གསུམ་མངོན་དུ་གྱུར་པ་བསྒོམ་མི་དགོས་པར་འགྱུར་གསུངས་པས་ཁ་རོག་གོ །གཟུགས་མི་ལེན་མི་འདོར་བའི་ཚུལ་དང་ཞེས། གཞིའི་ཆོས་བླང་དོར་མེད་དུ་གསུངས། སྦྱིན་པའི་ཕ་རོལ་ཏུ་ཕྱིན་པ་མི་ལེན་མི་འདོར་བའི་ཞེས། ལམ་གྱི་དབང་པོ་ལྔ་མི་ལེན་མི་འདོར་བའི་ཞེས་འབྲས་བུའ། །དེ་བཞིན་དུ་དེ་གསུམ་བཅིངས་གྲོལ་མེད་དུ་ཡང་གསུས་སོ། །དམ་པ་སྐད་ཅིག་མ་ཅེས་སོ། །སྐད་ཅིག་མ་འདི་ཉན་ཐོས་ཀྱི་ཡིན་མོད། ཁྱེད་ལ་བཤད་དམ་སྙམ་ན་སྔར་གྱི་ལུང་དང་།
ས་སྡེ་ལས། སྐད་ཅིག་མ་ཞེས་བྱ་བ་ནི་ཤེས་པ་ཡུལ་འཇུག་པའི་དུས་ཡོངས་སུ་རྫོགས་པའི་བར་དུའོ། །ཞེས་གསུངས་སོ།
།སྙིང་གི་དབུས་སུ་སད་ཅེས་པ། སྙིང་ནི་ཉེ་བ་ལ་མཚོན་པ་ཡིན་གྱིས་མཐའ་དང་བྲལ་བའི་དོན་ཏོ། །ཚོགས་དྲུག་དག་ཅེས་ཅེས་པ། སྦྱོར་དྲུག་པ་རྟགས་སྣང་དུ། དབུ་མ་པ་སྤྲོས་བྲལ་དུ། འདིར་འཛིན་མེད་དུ་དག་པའོ།
།རྟོགས་པར་འདོད་ན་ཞེས་པ། ལྟ་བ་རྟོགས་པ་འདི་གལ་ཆེ་སྟེ། དམ་པས་ལྟ་བ་མ་རྟོགས་པས་སྒོམ་མི་ཤེས་བུ་མེད་པར་གསོ་མི་ཤེས། ཞིང་མེད་པར་སོ་ནམ་མི་ཤེས། ཁ་བའི་འོག་གི་འབུར་འབུར་བ་ཅི་ཡིན་ཆ་མེད་གསུང་། བུ་མོ་ལོ་བཅུ་དྲུག་མའི་ཅེས་པ། རང་གེ་ཉམས་སུ་མྱོང་དུ་ཡོད་ལ་གཞན་ལ་བརྗོད་དུ་མེད་པ། དི་དག་མའི་རྨིའམ། བུ་ཆུང་གིས་ཟླ་བ་མཐོང་བ་ལྟ་བུའོ།
།དྲན་པས་དེ་བཞིན་དུ་བསྟེན་ཅེས་པ་དྲན་པ་བསྟེན་པ་གལ་ཆེ། འགའ་ཤིག་སྒོམ་བཤིག་པ་ལ་གཙོ་བོར་བྱེད་དེ། བཤིག་མི་དགོས་དུས་ཚོད་ལ་རང་ཞིག་འབྱུང་། དེ་མ་འབྱུང་ན་བཤིག་ཀྱང་ཐ་མལ་དུ་འགྲོ། བཤིག་ནའང་དུས་ཚོད་ཤེས་དགོས། སུ་ཀ་མ་སིདྡྷིའི་རྗེས་འབྲངས། དམ་པ་རིན་པོ་ཆེ་ལ་སོགས་པ་བཤིག་སྟེ་ཆུན་གཅུན། ཤིག་པར་བཤིག་བཤིག་ཤུལ་དུ་ལ་ཟླ། སོ་མའི་ཉམས་རྩལ་ཅེས་དང་པ་བཅུན། དེ་ལ་གཉེན་པོ་ཞུགས་སུ་དོགས་ནས་བཤིག དེ་ཆོས་སྐུའམ་འཛིན་མེད་དུ་ཟླའོ། །གང་ཤར་གྱི་ཉམས་དངོས་འཛིན་པའོ།
།དེ་བརྟན་པའི་ཚད་ཅེས་པ། རང་བྱུང་ལྷན་ཅིག་སྐྱེས་པའི་ཡེ་ཤེས་བླ་མའི་བྱིན་རླབས་དང་། གདམས་ངག་ཐབས་ལ་བརྟེན་ནས་ཡུལ་མེད་དུ་རང་ངོ་ཤེས་པ་དེ་ལ། འཕྲིན་ལས་ཐོགས་མེད་རང་དང་ཆ་མཐུན་མེད་དེ། རྣམ་རྟོག་ཞི་བའི་གཉིས་མེད་ཡེ་ཤེས་ཕྱོགས་མེད་དུ་རྒྱས་པའི། ཉོན་མོངས་རྣམ་རྟོག་དབང་དུ་འདུས་པས་དབང་། མཚན་མ་དང་རྟོག་པ་གསོད་པར་བྱེད། གཅོད་པར་བྱེད་པས་དྲག་པོའོ།
།ཡང་ན་སྣང་སྟོང་སྐུའི་འཕྲིན་ལས། གྲག་སྟོང་གསུང་གི་རིག་སྟོང་ཐུགས་ཀྱི་སྟེ། རང་དགེ་སྦྱོར་ལས་མ་གཡོས་པའི་དུས་ན། དེ་རྣམས་ཁྲིགས་ཀྱི་ཡོད་གསུང་། སྙིང་རྗེ་ཚད་མེད་ཀྱི་སྐབས་སུ་རང་ལ་དགེ་སྦྱོར་རྣལ་མ་སྐྱེས་ན། སེམས་ཅན་སྙིང་རྗེར་མ་ཟད་བླ་མའི་མོས་གུས། མཆེད་གྲོགས་ལ་དག་སྣང་། ལས་རྒྱུ་འབྲས་ལ་འཛེམ་པ་སོགས་ཤུགས་ལས་འབྱུང་བ་ཆོས་ཉིད་གསུང་། འོ་ན་དགེ་སྦྱོན་སྐྱེས་ཚད་ལ་དེ་འབྱུང་ངམ་སྙམ་ན། སྤྱིར་ཕལ་ཆེ་ལ་འབྱུང་། བྱེ་བྲག་ཏུ་རེ་རེ་ཙམ་ལ་མི་འབྱུང་བའང་སྲིད་གསུང་། དེ་ལ་ཆེད་དུ་བློ་བཅོས་ནས་བསྒོམ་པར་བཤད། བླ་མ་ཞང་ལ་གནས་ལུགས་ཀྱི་རྟོགས་པ་ཅིག་ཅར་དུ་གྱུར་ཡང་། སྙིང་རྗེ་ཆེར་མ་སྐྱེས་པས། ཕྱོགས་བཅུའི་སངས་རྒྱས་ལ་སྙིང་རྗེའི་སློང་མོ་མཛད་གསུངས་པས། སྙིང་རྗེ་བསྒོམ་དགོས། དེ་ཡང་སྙིང་རྗེའི་འཁྲུལ་འཁོར་བྱ་བ་ཡིན་པས་ལུས་སྒུར་བྱ། གཞིན་སྨིན་སྤྲག་ཏུ་བསྡུ། ཕྲེང་བ་ལག་ཏུ་བཟུང་ནས། རིགས་དྲུག་གི་སེམས་ཅན་འདི་རྣམས་ཕ་བྱེད་བྱེད། མ་བྱེད་བྱེད་པའི་དྲིན་ཅན་ཤ་སྟག་ཡིན་པས་འདི་རྣམས་བདེའམ་སྐྱིད་དམ་བལྟས་པས། མི་བདེ་མི་སྐྱིད་པར་འདུག་སྟེ། ཤེས་རབ་ཀྱི་མིག་ལོང་། ཐབས་ཀྱི་རྐང་པ་ཆག །འཕགས་པའི་ཐུགས་རྗེ་དང་བྲལ་ནས་ཁམས་གསུམ་འཁོར་བར་འཁོར་ཞིང་། རིགས་དྲུག་ཏུ་འཁྱམས་པ་སྙིང་རྗེ་སྙམ་དུ་ཚད་མེད་ཀྱི་སྙིང་རྗེ་མ་སྐྱེས་ཀྱི་བར་དུ་སྒོམ། སྙིང་རྗེ་དང་བྲལ་ཞེས་པས། སྙིང་རྗེ་དེ་ཡང་སྟོང་ཉིད་དུ་ཆུད་དགོས། མ་ཆུད་པ་ཚངས་པ་གདོང་བཞི་པར་འགྱུར་ཏེ། དེ་ཡང་སྟོང་ཉིད་ཀྱིས་མ་ཟིན་པའི་ཚད་མེད་བཞིའི་ལག་རྗེས་སོ།
མདོ་ལས། སངས་རྒྱས་ཀྱི་ཁོ་འདུལ་བར་ཤེས་ཏེ། ཚངས་པ་ཁམས་གསུམ་པོ་འདི་དག་གང་ལས་བྱུང་ཞིང་། གང་ལས་སྐྱེས་ཞེས་བཀའ་སྩལ་པས། གསོལ་པ་ཁམས་གསུམ་པོ་འདི་དག་ང་ལས་བྱུང་ཞིང་ང་ལས་སྐྱེས་སོ། །ཞེས་ཟེར་རོ།
།བཀའ་སྩལ་པ། ཁྱེད་གང་ལས་བྱུང་ཞིང་གང་ལས་སྐྱེས། དེར་ཁོས་མ་ཤེས་ཏེ་གསོལ་པ། བངག་གང་ལས་བྱུང་། བཀའ་སྩལ་པ། ཁྱོད་མ་རིག་པ་ལས་བྱུང་ཞིང་མ་རིག་པ་ལས་སྐྱེས་སོ། །ཞེས་གསུང་།
དེས་ན་སྟོང་ཉིད་སྙིང་རྗེ་དབྱེར་མེད་དུ་རྟོགས་ཏེ།
བརྟག་གཉིས་ལས། ཧེས་ནི་སྙིང་རྗེ་ཆེན་པོ་ཉིད། །བཛྲ་ཤེས་རབ་བརྗོད་པར་བྱ། །ཞེས་གསུང་།
ཟུང་དུ་མ་ཆུད་ན་འདི་ལྟ་བུའང་འབྱུང་སྟེ།
མདོ་ལས། རྒྱ་གར་དུ་བྲམ་ཟེ་བཟའ་མི་གཉིས་ལ་བུ་མེད་པར། བུ་འོང་དུ་རེ་ནས་མཆོད་སྦྱིན་དང་། བསྙེན་གནས་བསྲུང་བ་ལ་སོགས་པ་ཐབས་སྣ་ཚོགས་བྱས་པས། ནུབ་གཅིག་ཁོ་བོའི་རྨི་ལམ་དུ། རལ་གྲི་རྣོ་ངར་དང་ལྡན་པ་གསུམ་རྙེད་པར་རྨིས་པས། དེར་གཅིག་སྣུམ་ལ་ཤོར་ནས་དོན་བྱེད་མ་གཅིག་གཡང་ལ་ལྷུང་ནས་ཆག །གཅིག་གིས་རྒོལ་བ་ཚར་གཅོད་པ་རྨིས་སོ། །ཕྱིས་བུ་གསུམ་བཙས་ནས་ཆེར་སྐྱེས་པ་དང་། གསུམ་ཀ་ཆོས་ལ་བཅུད་པས། གཅིག་གིས་སྙིང་རྗེ་ཁོ་ན་བསྒོམས་འཁོར་བ་ལས་འདའ་བར་མ་ནུས། གཅིག་གིས་སྟོང་པ་ཁོ་ན་བསྒོམས་ཏེ་རྒྱུ་འབྲས་ཁྱད་དུ་བསད་ནས་ངན་སོང་དུ་འགྲོ་བའི་ལས་བསགས། གཅིག་གིས་ཟུང་འཇུག་བསྒོམས་པས་ཉོན་མོངས་པ་ཕས་རྒོལ་ཚར་བཅད་དོ། །ཞེས་གསུངས་སོ།
།མདོར་ན་ཉན་རང་ལ་ཡང་། སེམས་ཅན་ལ་བརྩེ་བའི་སྙིང་རྗེ་ཡོད་དེ་རང་གིས་འཁོར་བར་ཞུགས་ནས། གཞན་འདོན་མི་ནུས། ཁོ་འཁོར་བའི་སྡུག་བསྔལ་ལ་འཇིགས་པས་སོ། །བྱང་སེམས་ཀྱིས་ནུས་ཏེ། འཁོར་བའི་སྡུག་བསྔལ་བཟོད་པས་སོ།
།དཔེར་ན་བཟའ་མི་གཉིས་ཀྱི་བུ་ཆུས་ཁྱེར་ན། མ་བརྩེ་བ་སྤྱོད་ཀྱང་ཆུར་འཇུག་མི་ནུས། ཕས་ནུས་པ་བཞིན་ནོ་གསུང་། ཐབས་ཁྱད་པར་ཅན་གྱི་སྐབས་སུ། རླུང་ནི་ལོང་བ་རྐང་ཅན་ལ། །རྣམ་རྟོག་ཆེ་བ་མིག་ཅན་ཞོན། །ཅེས་པས།
རླུང་ཞོན་པ་དང་འདྲ་ལ། རྣམ་རྟོག་ཁ་ལོ་པ་དང་འདྲ་བས། རླུང་ཟིན་ན་རྣམ་རྟོག་ཁྲོ་འཕྲོ་འཆད་དེ། དཔེར་ན་སྐྱེས་བུ་རྟ་ཞོན་པའི་སྲབ་ནས་བཟུང་ན། སྐྱེས་བུ་བཟུང་མི་དགོས་པ་བཞིན་ནོ།
།ཁ་ཅིག་རླུང་མགྲིན་པའི་སྟོང་བཟུང་ཟེར་ཏེ། དེ་གེགས་ཆེ་བས་འཇམ་རླུང་ནར་མ་རྔུབས་ལ་མཆིལ་མ་དང་བསྒྲགས་ལ་ལྟེ་འོག་ཏུ་བསྐྱུར་གསུང་། འོད་གསལ་ལྷ་སྐུ་ཅེས་པ། འོད་གསལ་ཞེས་པ། སྒོ་ལྔ་ཡུལ་གྱིས་གསལ་བ་ལྟ་བུ་མ་ཡིན། འདིར་སེམས་རང་འོད་གསལ་ལ་གསལ་བ་ལ་བྱ། སྤྱིར་མཉམ་བཞག་གི་ཐོ་རྗེས་ལ་རྒྱུག །ཉིན་མོའི་ཐོ་མཚན་མོ། དེ་བར་དོ་ལ་རྒྱུག་པ་ཆོས་ཉིད་ཡིན་པས། ད་ལྟ་འོད་གསལ་དེ་གོམས་པས་འཆི་ཁར་མི་གཡོ་བའི་འཁོར་ལོ་གཉིས་འདུས་ཏེ། རྡུ་ཏིར་ཆུད་པས། བར་དོ་དང་པོར་གཟུང་འཛིན་གྱིས་སྟོང་པའི་ཆོས་ཉིད་ནམ་མཁའ་ལྟ་བུ་ལུས་ཅན་ཐམས་ཅད་ལ་འབྱུང་སྟེ། དེ་མའི་འོད་གསལ་ལོ། ད་ལྟ་རང་ངོ་ཤེས་ཤིང་གོམས་པར་བྱས་པ་འདི་ལྟ་བུའི་འོད་གསལ་ལོ།
།དེ་གཉིས་ཆུ་དང་འོ་བོང་མ་འཕྲད་པ་བཞིན་དུ་འཕྲད་སྔར་འདྲིས་ཀྱི་མི་དང་འཕྲད་པ་བཞིན་དུ་ངོ་ཤེས། ཆུ་དང་འོ་མ་གཅིག་ཏུ་འདྲེས་ནས། རང་དོན་ཆོས་སྐུ་བརྟན་པ་ཐོབ་པ་འབྱུང་ངོ་། དེའང་ངོ་ཤེས་པ་ཙམ་གྱིས་མི་ཕན། གནས་ནུས་དགོས།
གནས་ཡུན་ལ་རྫོགས་འགའ་ཞིག་ལས། སེ་གོལ་བཅུ་ནི་རྟོག་ཡུན་བར། །གནས་ན་སྲིད་པ་ཟད་པར་བྱེད། །ཅེས་སོགས་བཤད་ནའང་།
རིན་པོ་ཆེ་པ་སྐྱེ་མེད་ཀྱི་ངང་ནས་འགག་མེད་ལོངས་སྤྱོད་རྫོགས་སྐུ་དག་པའི་སྒྱུ་ལུས་སུ་ལྡང་དགོས་གསུང་། སྤྱིར་ཡང་འོད་གསལ་ལ་གཉིས་ཡིན། །གཉིད་སྲབ་པ་དང་འཐུག་པའོ།
།འཐུག་པའི་ནི་འོད་གསལ་ལ་སྣང་མཆེད་ཐོབ་གསུམ་གྱིས་མཚམས་སྦྱར་ནས་གཉིད་དུ་སོང་བ་དང་། རླུང་དབུ་མར་ཞུགས་ཏེ། རྣམ་ཤེས་སྙིང་གར་གནས་ཤིང་། རྣམ་རྟོག་གི་འགྲོ་འོང་ཆད་པའི་དུས་འབྱུང་། དེ་དུས་སུ་གཉིད་མ་བསྒྲིབས་པར་ཡུལ་མེད་དུ་རུང་ངོ་ཤེས་ན། འཐུག་པོའི་འོད་གསལ་ཡིན།
སྲབ་མེ་ཡིས་ནི། ཨཱརྱ་དེ་བའི་སྤྱོད་བསྡུས་ལས། ས་འཐུག་གྱུར་པས་འགྲོ་བ་རང་ཉིད་འགྲོ། །རླུང་གི་སྟོབས་ཀྱིས་རྨི་ལམ་འབྱུང་བར་འགྱུར། །ཅེས་པས།
རླུང་སེམས་སྙིང་གར་གནས་མ་ནུས་པོར་རོ་རྐྱང་གཉིས་ནས་ཞུགས་ཏེ། རྣམ་ཤེས་མགྲིན་པར་གནས་དེ་དུས་སུ་རྨི་ལམ་བུན་ལོ་འགྱུར། དེར་རྨི་ལམ་གཉིད་དེས་མ་བསྒྲིབས་པར་ཡུལ་མེད་དུ་རང་ངོ་ཤེས་ན་སྲབ་མོའོ། །ཁ་ཅིག་འོད་གསལ་གཅིག་ལས་སྲབ་འཐུག་མི་འཐད་དེ།
ན་རོ་ཆོས་དྲུག་ལས། གཉིད་སྲབ་འཐུག་གི་འོད་གསལ་འཛིན་ལུགས་བཤད་དོ། །ཡང་འགའ་ཞིག་གཉིད་འཐུག་པོ་དེ་རྟོག་པ་སྲབ་པའི་དེ་ཉམས་ཀྱི་འོད་གསལ་དུ་འདོད་པ་ཡོད་དེ། དེའི་ངེས་པ་མེད། གཉིད་སྲབ་མོའི་དུས་སུ་ཡང་ཤེས་པ་རྟོག་མེད་དམ། འཛིན་མེད་ཙམ་དེ་མ་ཡིན་པའི་ཡུལ་མེད་དུ་རང་ངོ་ཤེས་པ་དེ་རྟོགས་པ་ཡིན་གསུང་། རྟོག་མེད་འཛིན་མེད་ཙམ་དེ་འདྲ་སྒོ་ལྔའི་རྣམ་ཤེས་ལ་ཡོད་དེ། དེ་ཀ་ངོ་མ་ཤེས་པ་ལ་མ་རིག་པ་ཟེར། འགའ་ཞིག་མ་རིག་པ་དང་གཏི་མུག་ལ་ཁྱད་མེད་པར་འདོད་ཅིང་། སྡེ་སྣོད་འཛིན་པ་དང་རྒྱུད་སྡེ་འཛིན་པ་ཕལ་གྱིས་ཀྱང་ཁྱད་མི་ཕྱེད་འདུག །རིན་པོ་ཆེ་པ་ཕྱེད་འབྱེད། ཡུལ་མེད་དུ་ངོ་མ་ཤེས་པ་མ་རིག་པ། ཡུལ་ངོ་ཤེས་པ་གཏི་མུག་ཡིན་གསུང་། བླ་མའི་གསུང་གིས་ཀྱང་། དེ་གཉིས་ཁྱད་མེད་ནའང་། སྤྱི་བོ་ཧཾ་རྡུ་ཏི་འཇུག་དུས་དཀར་ལམ་འཆར། དེས་ཞེ་སྡང་ལས་གྱུར་པའི་རྟོག་པ་འགག །དེ་གཉིས་སྙིང་གར་འདུས་ཏིང་ནག་ཐིབས་འབྱུང་། དེར་གཏི་མུག་འགག །དེ་གསུམ་དག་པའི་རྗེས་སུ་ཨ་ཧཾ་འདུས་པ་ལས་བྱུང་བའི་ཤེས་པ་བཟུང་འཛིན་གྱིས་སྟོང་པ་ཆོས་ཉིད་མའི་འོད་གསལ་འཆར་ཏེ། དེ་ཀ་རང་ངོ་མ་ཤེས་ཙམ་ན་མ་རིག་པའི་ངོ་བོར་གནས། དེ་ལ་སེམས་བྱུང་རྟོག་པ་བྱུང་ནས་འཁོར་བར་འཁྱམས་པ་ཡིན་པས་ཁྱོད་ཡོད་མེད་ན་དེ་གཉིས་འགགས་རྟིང་ཆོས་ཉིད་མའི་འོད་གསལ་ན་ཀུན་ལ་འཆར། དེ་ནས་འཁོར་ང་རྒྱུན་ཆད་དགོས་གསུང་། ཟུང་འཇུག་ཅེས་པའི་སྐབས་སུ། གཞི་ལམ་འབྲས་བུ་ཐམས་ཅད་སྐུ་གསུམ་དུ་ཡོད་པས་དེ་རྣམས་མ་འདྲེས་པ་བྱེད་དགོས། གཞིའི་སྐུ་གསུམ་ནི་ཤེས་པའི་ངོ་བོ་གསལ་བར་སྣང་བའི་ཆ་ནས་སྤྲུལ་སྐུ། རང་བཞིན་སྟོང་པའི་ཆ་དེ་ཆོས་སྐུ། དེ་གཉིས་དབྱེར་མེད་པ་ལོངས་སྐུའི་ངོ་བོ་ཉིད་ཡིན་ཏེ། འདི་གསུམ་སེམས་ཅན་ལ་ཁྱབ་བྱེད་དུ་ཡོད་གསུང་། ལམ་ནི་གཞི་སྟེ་རང་ངོ་ཤེས་པས་ཁྱད་པར་དུ་བྱས་པའོ།
།འབྲས་བུ་ནི་ལམ་དུས་ཀྱི་དྲི་མ་གློ་བུར་བ་དང་བཅས་པ་རང་དག་སྟེ་འཁྲུལ་པས་དབྱེས་མི་ཚུད་ཅིང་བརྟན་པ་ཐོབ་པའོ་གསུང་། གཞི་སྐད་ལམ་ལ་ཅེས་པས་དིང་སང་འགའ་ཞིག་སྟོང་པ་ཁོ་ཡིན་གྱིས་སྒོམ་མེད་དོ་ཞེས་ལམ་གྱི་རྩོལ་བ་དོར་ནས་ཐབས་ཁྱད་དུ་གསོད་པ་རྣམས་ནི་ལྷག་གཅོད་ཀྱི་སྟོང་ཉིད་སྒོམ་པ་དང་འདྲ་སྟེ། སྐབས་ལེགས་ན་ཉན་ཐོས་ཀྱི་འགོག་པ། ཉེས་ན་སྐྱེ་མཆེད་མུ་བཞི་སྟེ། དེ་ཡང་མིན་ན་ངན་སོང་གསུམ་དུ་ལྟུང་བར་བཤད་དོ།
།འགའ་ཞིག་དྲན་པས་འཛིན་པ་དང་སྒོམ་ཅི་དགོས། སྒོམ་རྒྱུ་མེད་པ་ཡིན་པས་བསྒོམ་ན་གོལ་ཅེས་ཟེར། དེ་མ་གོ་བ་ཡིན། མཻ་ཏྲི་པའི་སློབ་མ་སི་རི་སིངྷ་ཞེས་བྱ་བ་རྣལ་འབྱོར་ཕོ་མོ་ལྔ་བཅུ་རྩ་གཉིས་འཚོགས་པའི་ཚོགས་གྲལ་དུ་རྟོག་པ་ཕུལ་བ།
ཆོས་རྣམས་སྟོང་པར་རྟོགས་པ་ཡིས། །དེ་ཡི་མཐའ་ལ་སྒོམ་དུ་མེད། །གལ་ཏེ་སྒོམས་ན་སྨན་འགྱུར་ཏེ། །དཔེར་ན་རྒྱལ་པོ་རྒྱལ་པོར་ནི། །སླར་ཡང་འདོད་པ་བསྐྱེད་པ་བཞིན། །སྒོམ་སོགས་སྦྱིན་སྲེག་ཐལ་བ་འདྲ། །ཅེས་བརྗོད་པས་རྣལ་འབྱོར་ཕོ་མོ་རྣམས་མ་མཉེས་ཏེ། དུས་གསུམ་གྱི་སངས་རྒྱས་ཐམས་ཅད་ཀྱི་གསང་བ་འཕྲོག་པར་བྱེད་པའི་ལོག་སྲེད་ཅན་ཁྱོད་ཉོན་ཅིག །ཚེས་གཅིག་གི་ཟླ་བས་ཉ་གང་བ་ཉིད་དམ། བུ་ཆུང་བཙས་མ་ཐག་རྩལ་རྫོགས་པ་ཉིད་དམ། ཅེས་མང་དུ་གསུངས་ཏེ། སྲོག་དང་ཕྲལ་གཏོར་རྒྱན་བྱས་སོ། །ཞེས་གསུང་། རིན་པོ་ཆེ་པ། ད་ལྟ་མཁའ་འགྲོ་ཚོ་ཡང་གཡེལ་དུ་སོག་འདུག །གཏོར་རྒྱན་ལ་གཏད་རྒྱུ་ཨེན་རེ་འདུག་པས་གསུང་། དེས་ན་རྣམ་ཀུན་མཆོག་ལྡན་གྱི་སྟོང་པ་ཐབས་ཀྱི་རྣམ་པ་ཚང་བ་འདི་གོ་བར་བྱ་སྟེ།
འགྲོ་མགོན་ཆོས་ཀྱི་ཕྱག་ལེན་རྩེ་ལྔ་མ་ལས། རྣམ་ཀུན་མཆོག་ལྡན་སྟོང་པ་ཉིད། །ཆོས་རྣམས་ཀུན་གྱི་དེ་ཁོ་ན། །ཤེས་བྱ་ཀུན་ལ་རྒྱས་འདེབས་པས། །ཕྱག་རྒྱ་ཆེན་པོ་ཞེས་བརྗོད་དོ། །ཞེས་གསུངས།
དེ་མ་ཡིན་པའི་སྟོང་ཀྱང་ཐབས་ཁྱད་དུ་གསོད་པ་ནི་ཧ་ཤང་གི་ལྟ་བ་དང་ཁྱད་མེད་དེ། སྔོན་མཁན་པོ་བོ་དྷི་ས་ཏྭ་སྐུ་གཤེགས་ཁར་ཐུགས་འཚུབ་ཅིར་དབུ་ཕུར་ནས། རྒྱལ་པོས་དེ་ཅི་ལགས་ཞུས་པས། ནང་པར་རྫུས་ལྟ་ལོག་འཛིན་པ་ཧ་ཤང་བྱ་བ་ཡོང་། དེ་སངས་རྒྱས་ཀྱི་བསྟན་པ་སྣུབ་གསུང་། ཐབས་ཅི་འདོག་ཞུས་པས། དེ་དུས་ངའི་སློབ་མ་ཀ་མ་ལ་ཤི་ལ་བལ་བོད་མཚམས་སུ་ཡོང་། དེ་གདན་དྲངས་ནས་ཚར་བཅད་ན་ཆོད་གསུངས། ཕྱིས་དེ་བཞིན་དུ་བྱུང་ནས། རྒྱལ་པོས་ཁོང་གདན་དྲངས་པས་འདྲོངས་ནས་ཧ་ཤང་གིས་ཀྱང་བསུ་བ་བྱས་པས། པཎྜི་ཏས། ཆུ་ཕ་ག་ནས། བརྡའི་རྩོད་པ་ནམ་མཁའ་ལ་དབྱུག་པ་བསྐོར་བས། ཁོས་ཀྱང་ཤེས་ཏེ། ལན་དུ་ཆོས་གོས་ལ་འཇུས་སོ།
།ཡང་རྩོད་པ་བྱས་པས། ཁོས་ཁྱུར་གྱི་དཔེ་ལ་སོགས་པ་བྱས་པ་ལ། པཎྜི་ཏས་དཔེ་མི་འཐད། དོན་མི་འཐད་ཅེས་འགག་པ་མཛད་པས། ཐོག་སྤྱི་བོར་བབས་ཅེས་འཕམ་པར་ཁས་བླངས་སོ།
།དེ་ནས་ཁོ་ལ་རྫུ་འཕྲུལ་ཅུང་ཟད་ཡོད་པས་ནམ་མཁའ་ལ་འཕགས་ཏེ། ཤར་ཕྱོགས་སུ་སོང་ཅེས་ཀྱང་ཟེར། བསད་ཅེས་ཀྱང་ཟེར། སྔ་མ་ལྟར་ན་ཁོའི་ལྷྭམ་ཡ་གཅིག་ལུས་པས་ངའི་ལྟ་འཛིན་ད་དུང་ཡོད་ཟེར། ད་ལྟའི་སྟེང་ཕྱོགས་པ་རྣམས་སོ།
།ཕྱི་མ་ལྟར་ན་ཁོའི་སློབ་མ་འགའ་རེ་དང་། རྒྱལ་པོའི་བློན་པོ་ཁོ་ལ་མོས་པ་འགའ་རེ་ལྕེབས་ཀྱང་ཟེར་རོ།
།དེས་ན་སྟོང་ཉིད་སྙིང་རྗེ་དབྱེར་མེད་དམ། །ཐབས་ཤེས་དབྱེར་མེད་དམ། སྣང་སྟོང་དབྱེར་མེད་རྣམས་གོ་བར་བྱ་གསུངས། ཁྲིད་ཚུལ་རྒྱས་འབྲིང་བསྡུས་གསུམ་ལ། རྒྱས་པར་ནི་ཇ་གསར་རྙིང་བླངས་སེ་བ་མང་དུ་གསོལ་བའི་རྗེས་ལ་ཤིན་ཏུ་རྒྱས་པར་བྱོན་ཏེ། ལུང་འདྲེན་ཀུན་ལ་མཐའ་མེད་ནའང་། ཇི་ལྟ་བ་བཞིན་མ་ཟིན། འོན་ཀྱང་རིན་པོ་ཆེ་རི་གོང་པའི་གསུང་སྒྲོས་ང་བས་རྒྱས་པ་ཟིན་པ་གཞན་མེད་གསུངས་གསུང་།
ཡིད་བཞིན་ནོར་འདྲའི་མཉམ་མེད་ཆོས་རྗེ་ལ། །མོས་གུས་མཆོག་གིས་ཕྱི་དོར་ལེགས་བྱས་པས། །མི་ཟད་གཏེར་མཛོད་ཟབ་མོའི་གསང་སྒོ་ཕྱེ། །དགོས་འདོད་ཀུན་འབྱུང་གསུང་ངག་ནོར་བུ་གནང་། །བརྗེད་ངེས་ལོག་ལྟའི་དགྲ་ལ་མ་ཤོར་བ། །དད་མོས་འདུན་པའི་སྐྱེས་བུས་མེ་ལ་ཚེ་བྱས། །རང་གཞན་མ་རིག་མུན་སེལ་སྒྲོན་མེ་འདི། །མི་བརྗེད་གཟུངས་སུ་བདག་གིས་ཡི་གེར་བཏབ། །འདི་ལ་ཉེས་པར་གྱུར་པ་གང་མཆིས་པ། །ཆོས་བདག་མཁའ་འགྲོའི་ཚོགས་ལ་བཟོད་པར་གསོལ། །དེ་བྱུང་དགེ་བས་འགྲོ་རྣམས་སངང་རྒྱས་ཤོག
།ཕྱག་རྒྱ་ཆེན་པོ་རང་བབས་གསུམ་གྱི་ཁྲིད་ལགས་རྣམ་ཞག་ལམ་གྱིས་འཇུག་པ་གསལ་བར་བྱེད་པའི་སྒྲོན་མ་ཞེས་བྱ་བ་འདི། །རྩོད་པའི་དུས་འདིར་སྒྲུབ་བརྒྱུད་ཀྱི་བསྟན་པ་རྒྱས་པར་མཛད་ཅིང་། འགྲན་ཟླ་དང་བྲལ་བའི་ཆོས་རྗེ་ཞང་སྟོན་རིན་པོ་ཆེས་ཡི་གེར་ཅུང་ཟད་གཅིག་མཛད་པ་དང་། ཆོས་རྗེ་ཉིད་ཀྱིས་གསུང་ལས་ཟབ་རྒྱས་སུ་བྱོན་པ་ལ། སྤྲང་པོ་རང་གིས་ཅུང་ཟད་ཟིན་པ་རྣམས་རང་བཟོ་དང་ཤེས་བཅུག་སྤངས་ཏེ། གསུང་ལ་དབྲི་བསྣན་མེད་མེད་པར། ཤཱཀྱའི་དགེ་སློང་རྡོ་རྗེ་འཛིན་པ་གྲགས་པ་རྒྱལ་མཚན་གྱིས་དཔལ་ཡུལ་ཆོས་གངས་ཀྱི་ར་བར་ཡི་གེར་བྲིས་པའོ།། མངྒ་ལཾ།། །།