Lha bzhi'i zhal gdams

Resource ID	SCv11p203
Title	lha bzhi'i zhal gdams
Topics	Combined Accomplishment of the Four Deities
Sub-Topics	Instructions
Link	BDRC W23922 BDRC W3CN18508 (v3p.34)

༈ ལྷ་བཞིའི་ཞལ་གདམས་བཞུགས་སོ།།

༈ ༼ཏི༽ བླ་མ་དམ་པ་རྣམས་ལ་གུས་བཏུད་ནས། ལྷ་བཞིའི་ཞལ་གདམས་བྲི་བར་བྱ། ཐོ་རངས་ནམ་གྱི་བརྒྱད་ཆ་ཙམ་ཡོད་པ་ལ། ལུས་རྣམ་པར་སྣང་མཛད་ཀྱི་ཆོས་བདུན་དང་ལྡན་པར་བྱས་ལ། སྐྱབས་འགྲོ་སེམས་བསྐྱེད་བྱས་ནས། ཨོཾ་བཛྲ་རཀྵ་རཀྵ་ཧཱུྃ་ཕཊ། ཅེས་བརྗོད་པས། རྭ་གུར་བསྒོམས་ལ། རང་ཡི་དམ་དུ་སྒོམ་པའི་སྤྱི་བོར་ཆོས་འབྱུང་ཕྱི་དཀར་ལ་ནང་དམར་བ། བདེ་བར་འཆར་ཞིང་བདེ་བར་གནས་པ། འོད་ཀྱི་རང་བཞིན་ཅན་གཅིག་བསྒོམ། དེའི་དབུས་སུ་པདྨ་འདབ་མ་བཞི་པ་ལྟེ་བ་ཁྲུ་གང་གིས་མཐོ་བ་ལ། ཉི་ཟླ་པདྨའི་སྟེང་དུ་བླ་མ་བསྒོམ། མདུན་དུ་པད་འདབ་ཀྱི་སྟེང་དུ་པཾ་ལས་པདྨ་རཾ་ལས་ཉི་མའི་སྟེང་དུ་གྷཾ་ཡོངས་སུ་གྱུར་པ་ལས། ཚོགས་བདག་མགོ་གཡས་སུ་བསྟན་པ་གཅིག་གི་སྟེང་དུ་གྲི་གུག་ཧཱུྃ་གིས་མཚན་པ། དེ་ལས་འོད་ཟེར་ཕར་འཕྲོས་པས་གདུག་པ་ཅན་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས། ཡེ་ཤེས་མགོན་པོ་གཞུང་བཞིན་བསྐྱེད། དེའི་ཐུགས་ཀར་པད་ཉིའི་སྟེང་དུ་ཧཱུྃ་ལས་རྩ་སྔགས་ཀྱིས་བསྐོར་བ་བསྒོམས། གཡས་ངོས་ཀྱི་པད་འདབ་ཀྱི་སྟེང་དུ་པད་ཉིའི་སྟེང་དུ་འཇིགས་བྱེད་དང་དུས་མཚན་གྱི་སྟེང་དུ། ཡེ་གེ་ཧྲཱིཿདམར་པོ་མཚལ་ལྕོག་ལ་མའི་ཁུ་བ་འདྲ་བ་དམར་སེང་བ་གཅིག་བསམ། དེ་ལ་སྐད་ཅིག་གིས་རྗེ་བཙུན་མ་སྐུ་མདོག་དམར་སེང་ངེ་བ་མཚལ་ལྕོག་ལ་མ་འདྲ་བ། དབུ་སྐྲ་མཐོན་མཐིང་མགོ་ཕྲག་ཏུ་ཡོད་པ། དཔུང་པ་གཡས་པའི་སྟེང་ན་དམར་སིལ་ལེ་ཡོད་པ། ལོ་བཅུ་དྲུག་ལོན་པའི་རྣམ་པ་ཅན་ཞལ་འཛུམ་བག་དང་བཅས་པ། མཆེ་བ་ནས་ཙམ་འབུར་རེ་བ། སྤྱན་གཡོན་གྱི་ཕྱོགས་སུ་དུས་གསུམ་གྱི་སངས་རྒྱས་ཐམས་ཅད་ནམ་མཁའ་གང་བ་ལ་གཟིགས་པ། ཕྱག་གཡས་གྲི་གུག་གིས་གཅོད་པའི་སྟབས་སུ་དཔྱི་གཡས་པའི་སྟེང་ན་མར་བརྐྱང་ནས་བཞུགས་པ། གཡོན་པས་ནམ་མཁའ་ལ་སངས་རྒྱས་ཐམས་ཅད་ཀྱི་ངོ་བོ་བདུད་རྩི་ཐོད་པའི་ནང་ནས་ཞལ་དུ་གསོལ། སྤྱི་བོར་རུས་པའི་འཁོར་ལོ་དང་རྣམ་སྣང་གིས་བརྒྱན་པ། ཐོད་པ་སྐམ་པོ་ལྔས་དབུ་ལ་བརྒྱན་ཅིང་། རུས་པའི་སྙན་ཆ། མགུལ་རྒྱན། ཕྱག་གདུབ། ཞབས་གདུབ། མི་མགོ་སྐམ་པོ་ལྔ་བཅུའི་ཕྲེང་བ། ཞབས་གཡས་བརྐྱང་པས་མ་ཧཱ་དེ་བ་མནན་པ། གཡོན་བསྐུམ་པས་ཨུ་མ་དེ་བ་གན་རྐྱལ་དུ་མནན་པ། འཆན་ཁུང་གཡོན་པ་ན་ཡར་ཁ་ཊྭཱཾ་ག་ཡོད་པ་གཅིག་གསལ་གདབ་བོ།
།རྒྱབ་ཀྱི་འདབ་མའི་སྟེང་དུ་པདྨ་དང་ཟླ་བའི་གདན་ལ་ཧྲཱིཿཡོངས་སུ་གྱུར་པ་ལས་སྤྱན་རས་གཟིགས་སྐུ་མདོག་དཀར་པོ་གངས་ལ་ཉི་མ་ཤར་བ་ལྟ་བུ་ཞལ་གཅིག་ཕྱག་གཉིས་པ། གཡས་ན་སྐྱབས་སྦྱིན་དང་བཅས་པའི་བུམ་པ། གཡོན་པ་ན་པདྨ་དཀར་པོའི་ཡུ་བ་ཐུགས་ཀར་འཛིན་ཅིང་སྙན་གྱི་ཐད་ཀར་ཁ་ཕྱེ་བ། དབུ་སྐྲ་དཔུང་པའི་སྟེང་ན་སིལ་ལེ་ཡོད་པ། ཞབས་གཡས་བརྐྱང་བ་གཡོན་བསྐུམ་པ། འོད་དཔག་མེད་ཀྱིས་དབུ་བརྒྱན་པ་ཞིག་བསྒོམ།
གཡོན་ངོས་ཀྱི་པད་འདབ་ཀྱི་སྟེང་དུ་པདྨ་ཟླ་བའི་སྟེང་དུ་ཡོངས་སུ་གྱུར་པ་ལས་རྗེ་བཙུན་སྒྲོལ་མ་སྐུ་མདོག་ལྗང་གུ་ལང་ཚོ་དར་ལ་བབ་པ། ལོ་བཅུ་དྲུག་ལོན་པ་ལྟ་བུ། ཞབས་གཡས་བརྐྱང་ཞིང་གཡོན་བསྐུམ་པ། ཕྱག་གཡས་སྐྱབས་སྦྱིན། གཡོན་ཨུཏྤལ་ཡུ་བ་ཐུགས་ཀར་བཟུང་བ། སྤྱི་བོར་དོན་ཡོད་གྲུབ་པས་བརྒྱན་པ་གཅིག་བསྒོམ།
དེ་ནས་བླ་མའི་ཐུགས་ཀ་ནས་འོད་འཕྲོས་པས། རྩ་བ་དང་བརྒྱུད་པའི་བླ་མ་ཐམས་ཅད་འོད་ཟེར་གྱི་ཚུལ་དུ་བླ་མ་ལ་ཐིམ། ཡང་འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་ཡི་དམ་དཀྱིལ་འཁོར་གྱི་ལྷ་ཚོགས་དཔའ་བོ་དང་མཁའ་འགྲོ་ཆོས་སྐྱོང་ཐམས་ཅད་བླ་མའི་སྐུ་ལ་ཐིམ་པས། བླ་མ་ཐམས་ཅད་འདུས་པའི་སྐུ་གསུང་ཐུགས་ཀྱི་ངོ་བོར་བསྒོམ་ལ། གསོལ་བ་གདབ་སྟེ། ན་མོ་བུདྡྷ་ཡའི་གསོལ་བ་གདབ་བོ།
།མགོན་པོའི་ཐུགས་ཀའི་ཧཱུྃ་ལས་འོད་འཕྲོས། ཤར་ལྷོ་ནས་ཡེ་ཤེས་སེམས་དཔའ་ཌཱ་མ་རུ་དང་གཡེར་ཁའི་སྒྲ་འུ་རུ་རུ་སི་ལི་ལི་བྱོན་ནས་དམ་ཚིག་པ་ལ་ཐིམ་སྟེ། ཨོཾ་བཛྲ་མ་ཧཱ་ཀཱ་ལ། ཞེས་རྩ་སྔགས་བརྗོད་པས་ནད་གདོན་ཐམས་ཅད་ཞལ་དུ་བསྡུས་ནས་དམར་ཙི་རི་རི་གསོལ་བར་བསམ། རྗེ་བཙུན་མ་ལ་ཡེ་ཤེས་པ་མང་པོ་སིབ་སིབ་ཐིམ་པས། དེས་རྐྱེན་བྱས་ནས་གསང་གནས་ནས་བྱང་སེམས་དམར་པོ་བྱུང་སྟེ་རང་གི་ལུས་ལ་ཐིམ་པས་སྡིག་སྒྲིབ་ཐམས་ཅད་དག་པར་བསམ་ནས། ཨོཾ་བཛྲ་ན་ར་ཀྲིཾ་ཀྲིཾ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཐུགས་རྗེ་ཆེན་པོ་ལའང་ཡེ་ཤེས་པ་བསྟིམ་སྟེ། ཨོཾ་བཛྲ་རཀྵ་ས་མནྟ་ཧཱུྃ་ཕཊ། ཅེས་བཟླས་པས་བུམ་པ་ནས་བདུད་རྩི་བབས་ཏེ་ལུས་ལ་ཐིམ་པས་སྡིག་སྒྲིབ་དག་པར་བསམ་མོ། །སྒྲོལ་མ་ཡང་ཡེ་ཤེས་པ་བསྟིམ་ལ། ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ། ཞེས་པ་དང་། ཞབས་གཡས་པའི་མཐེ་བོང་ལས་ཡེ་ཤེས་ཀྱི་ཆུ་རྒྱུན་བབས་ནས་ལུས་ལ་ཐིམ་པས་ནད་གདོན་སྡིག་སྒྲིབ་ཐམས་ཅད་དག་པར་བསམ་མོ། །ཕྲིན་ལས་མ་ལུས་པ་སྒྲུབ་པར་བསྒོམ་ཞིང་། ལྷ་ལྔ་ལམ་མེ་གསལ་བར་དམིགས་ནས་སྔགས་རྣམས་སྦྲེལ་ལ་བཟླས་སོ།
།དེ་ནས་ལྷ་བཞི་པོ་རྦད་ཆད་ནས་བླ་མ་ལ་ཐིམ། བླ་མའི་ཐུགས་ཀ་ནས་འོད་འཕྲོས། བརྒྱུད་པའི་བླ་མ་དང་སངས་རྒྱས་བྱང་ཆུབ་སེམས་དཔའ་སྔགས་ཕྱི་ནང་གི་ལྷ་ཚོགས་ལ་ཐིམ། བླ་མ་འོད་ཀྱི་རང་བཞིན་དུ་གྱུར་པ་སྣང་ལ་རང་བཞིན་མེད་པར་བསྒོམ་ནས་གསོལ་བ་དྲག་པོ་གདབ་བོ།
།དེའི་ངང་ནས་རང་གི་གསང་བ་ནས་ཡེ་ཤེས་ཀྱི་མེ་འབར་བས་བླ་མ་ལ་ཕོག་པས། སྐུ་ལུས་ཀྱི་ཆ་ཐམས་ཅད་ནས་ཡེ་ཤེས་ཀྱི་བདུད་རྩི་བབས་ནས་ལུས་ལ་ཐིམ་པས་བུམ་པའི་དབང་ཐོབ། ལུས་ཀྱི་སྡིག་སྒྲིབ་མ་ལུས་པ་སངས་ཀྱིས་དག་པར་བསམ། ཆུ་རྒྱུན་མགྲིན་པར་སླེབ། གསང་བའི་དབང་ཐོབ། ངག་གི་སྡིག་སྒྲིབ་དག །སྙིང་གར་སླེབ། ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་སྡིག་སྒྲིབ་སངས་ཀྱིས་དག་པར་བསྒོམ། དེ་ནས་བླ་མ་འོད་མེར་རེ་ལུས་ལ་ཐིམ་པས། ལུས་འོད་དུ་ཡལ་སོང་བར་བསམ་ནས་སེམས་མ་བཅོས་པར་བཞག་གོ །དེ་ནས་ལུས་ངག་ཡིད་གསུམ་གྱི་སྡིག་སྒྲིབ་མ་ལུས་པ་སངས་ཀྱིས་དག་ནས་དབང་བཞི་པ་ཐོབ་པའོ།
།ལྷ་བཞིའི་ཞལ་གདམས་དབང་བཞི་ལུས་ལ་བསྐུར་བ། མ་ཡེངས་ཟླ་བ་གསུམ་གྱིས་འགྲུབ། ཐོ་རང་ཐུན་རེ་མ་ཆག་བསྒོམས། མཆོག་དང་ཐུན་མོང་གི་དངོས་གྲུབ་འགྲུབ། །ཨྀཐིཿ

W3CN18508: འདིའི་རྒྱུད་པ་ནི། རྡོ་རྗེ་འཆང་། ར་ཧུ་ལ། དེས་ཁྱུང་པོ་རྣལ་འབྱོར། དེས་ཤངས་པ། དེས་རྨོག་ཅོག་པ། དེས་སྐྱེར་རྒང་པ། དེས་སངས་རྒྱས་གཉན་སྟོན། དེས་སངས་རྒྱས་སྟོན་པ། དེས་བླ་མ་ཤངས་སྟོན་པ། དེས་རྒྱལ་བ་མོས་གུས་པ་ཆེན་པོ། དེས་རྗེ་བཙུན་ནམ་མཁའི་རྣལ་འབྱོར་པ། དེས་མཁས་གྲུབ་ཐམས་ཅད་མཁྱེན་པ་དགེ་ལེགས་དཔལ་བཟང་པོ། དེས་གཞུང་བརྒྱ་སྒྲ་བ་བློ་གྲོས་ཆོས་སྐྱོང༌པ་ལ་འདིའི་ཆོས་སྐོར་ཐམས་ཅད་ཡོངས་སུ་རྫོགས་པར་གནད་དོ།