Mgon dkar gyi bla ma brgyud pa'i gsol 'debs

From Shangpa Resource Center








Resource ID Gönkar22
Title mgon dkar gyi bla ma brgyud pa'i gsol 'debs
Topics White protector
Author Sangyé Püntsok
Link BDRC W23681 (p. 296)

༄༅། །མགོན་དཀར་གྱི་བླ་མ་བརྒྱུད་པའི་གསོལ་འདེབས་བཞུགས་སོ།

།ན་མོ་གུ་རུ་ཝེ།
གསང་བ་རྒྱ་མཚོའི་མངའ་བདག་རྡོ་རྗེ་འཆང༌། །བྱམས་དང་སྙིང་རྗེའི་མངའ་བདག་ཤ་ཝ་རི། །མཁས་ཤིང་གྲུབ་པའི་མངའ་བདག་མཻ་ཏྲི་པ། །གསང་བའི་མངའ་བདག་གསུམ་ལ་གསོལ་བ་འདེབས།
།མཐུ་སྟོབས་དབང་ཕྱུག་གྲུབ་ཆེན་རཱ་ཧུ་ལ། །གྲུབ་པའི་དབང་ཕྱུག་ཁྱུང་པོ་རྣལ་འབྱོར་ཞབས། །མཁས་པའི་དབང་ཕྱུག་རིན་ཆེན་བརྩོན་འགྲུས་ཏེ། །མཁྱེན་པའི་དབང་ཕྱུག་གསུམ་ལ༴
སྤྱན་རས་གཟིགས་གྲུབ་དབོན་སྟོན་སྐྱེར་སྒང་བ། །གྲུབ་བརྙེས་གཉན་སྟོན་སྦས་པའི་རྣལ་འབྱོར་ཞབས། །འགྲོ་མགོན་ཆེན་པོ་སངས་རྒྱས་སྟོན་པ་སྟེ། །འགྲོ་བའི་འདྲེན་པ་གསུམ་ལ༴
མཁས་གྲུབ་ཆེན་པོ་གཙང་མ་ཤངས་སྟོན་དང༌། །མུས་པ་ཆེན་པོ་རྒྱལ་མཚན་དཔལ་བཟང་པོ། །བླ་མ་ཆེན་པོ་རྡོ་རྗེ་གཞོན་ནུ་སྟེ། །ཆོས་རྗེ་བླ་མ་གསུམ་ལ༴
འཁྲུལ་ཞིག་མུས་ཆེན་ནམ་མཁའི་རྣལ་འབྱོར་པ། །བྱང་སེམས་ཆེན་པོ་སྦྱིན་པ་བཟང་པོའི་ཞབས། །གྲུབ་ཐོབ་ཆེན་པོ་ཐང་སྟོང་རྒྱལ་པོ་སྟེ། །གྲུབ་པའི་མཆོག་གྱུར་གསུམ་ལ༴
བློ་གྲོས་རྒྱལ་མཚན་མཚན་ཅན་མང་མཁར་བ། །དཔལ་ལྡན་དར་པོའི་མཚན་ཅན་པུ་རོང་བ། །ཞེ་དགོན་ཆོས་རྗེ་བསོད་ནམས་རྩེ་མོ་སྟེ། །སྐྱེ་རྒུའི་འདྲེན་པ་གསུམ་ལ༴
ལོ་ཆེན་དམ་པ་འགྱུར་མེད་བདེ་ཆེན་དང༌། །རྗེ་བཙུན་ངག་དབང་ཆོས་ཀྱི་གྲགས་པའི་ཞབས། །བདག་པོ་ངག་དབང་བསོད་ནམས་རྒྱལ་མཚན་ཏེ། །མཁྱེན་བརྩེ་གཏེར་ཆེན་གསུམ་ལ༴
བཀྲ་ཤིས་སྙན་པར་གྲགས་པའི་དཔལ་ལྡན་དང༌། །མཁྱེན་པའི་སྤྱན་ལྡན་སངས་རྒྱས་དཔལ་བཟང་པ། །མགོན་དང་དབྱེར་མེད་རྩ་བའི་བླ་མ་སྟེ། །བཀའ་དྲིན་ཆེ་ལྡན་གསུམ་ལ་གསོལ་བ་འདེབས།
།དངོས་བརྒྱུད་བླ་མའི་ཚོགས་དང་བཅོམ་ལྡན་འདས། །ཡིད་བཞིན་ནོར་བུ་མཁའ་འགྲོའི་ཚོགས་བཅས་དང༌། །གཞན་ཡང་ཕྱག་བྱར་འོས་པ་ཐམས་ཅད་ལ། །ཟོལ་མེད་སྙིང་ནས་ཕྱག་འཚལ་སྐྱབས་སུ་མཆི།
།དངོས་འབྱོར་ཡིད་སྤྲུལ་མཆོད་པ་ཀུན་གྱིས་མཆོད། །སྡིག་པ་ཀུན་བཤགས་དགེ་ལ་རྗེས་ཡི་རང༌། །ཆོས་འཁོར་བསྐོར་ཞིང་རྟག་པར་བཞུགས་སུ་གསོལ། །དགེ་རྣམས་བླ་མེད་བྱང་ཆུབ་ཐོབ་ཕྱིར་བསྔོ།
།ཁྱེད་ལ་གུས་པས་འདོད་དོན་ཞུ་བ་ནི། །གནས་སྐབས་སུ་ཡང་ཆོས་དང་མཐུན་པའི་དོན། །ཚེ་རིང་ནད་མེད་ལང་ཚོའི་དཔལ་ཐོབ་ནས། །མཐུན་རྐྱེན་གོང་འཕེལ་ཉིད་དུ་མཛད་དུ་གསོལ།
།ཁྱད་པར་མཛད་མེད་ལོངས་སྤྱོད་དཔལ་ཐོབ་ནས། །དེ་ཉིད་ལོག་པའི་འཚོ་བར་མི་འགྱུར་བར། །ཡར་མཆོད་སྦྱིན་གཏོང་ལ་སོགས་བསོད་ནམས་ཀྱི། །ཚོགས་ཆེན་མྱུར་དུ་རྫོགས་པར་མཛད་དུ་གསོལ།
།ཐབས་ཤེས་ཟུང་དུ་འཇུག་པའི་ས་ལམ་གྱི། །ཐེག་ཆེན་ལམ་གྱི་རིམ་པ་ལེགས་བགྲོད་དེ། །ཀུན་མཁྱེན་སངས་རྒྱས་གོ་འཕང་མཐོན་པོ་ནས། །སྡུག་བསྔལ་ལྡན་པའི་འགྲོ་ལ་གཟིགས་པར་ཤོག
།ཅེས་ཚིག་དོན་ཡིད་ལ་བསམ་ཞིང༌། མ་ཡེངས་པར་གསོལ་བ་དྲག་ཏུ་གདབ་བོ། །ཞེས་མགོན་དཀར་ཡིད་བཞིན་ནོར་བུའི་བླ་མ་བརྒྱུད་པའི་གསོལ་འདེབས་འདི་ནི་དོན་གཉེར་གྱི་བཞེད་པ་བཞིན་བིཀྵུ་བུདྡྷ་ལཀྵྨཱིཾས་བྲིས་པ་འདིས་རང་གཞན་གྱི་ཆོས་དང་མཐུན་པའི་དོན་ཐམས་ཅད་ཡིད་བཞིན་དུ་འགྲུབ་པར་གྱུར་ཅིག།

༈ །མུས་ཆེན་ནམ་མཁའི་རྣལ་འབྱོར་མན་གྱི་བརྒྱུད་པ་དེ་གསོལ་འདེབས་འདི་སྐུལ་བ་པོའི་རྗེས་གནང་ཐོབ་པའི་བརྒྱུད་པ་ལྟར་བྲིས་པ་ཡིན་ལ། བདག་གིས་ཐོབ་པའི་བརྒྱུད་པ་ནི།
ནམ་མཁའི་རྣལ་འབྱོར་པའི་རྗེས་སུ། སེམས་དཔའ་ཆེན་པོ་དཀོན་མཆོག་རྒྱལ་མཚན་དང༌། །ནི་གུའི་ཆོས་ལ་དབང་བསྒྱུར་སངས་རྒྱས་བཟང༌། །མཁས་གྲུབ་མཚུངས་མེད་གསུམ་ལ༴
ནམ་མཁའ་རྒྱལ་མཚན་ཞེས་གྲགས་མཚོ་སྒོ་བ། །རྣལ་འབྱོར་དབང་ཕྱུག་ཀུན་དགའ་བསོད་ནམས་ཞབས། །སྔགས་འཆང་ཆེན་པོ་དཀོན་མཆོག་ལེགས་འཛིན་རྗེ། །འགྲོ་བའི་སྐྱབས་མཆོག་གསུམ་ལ༴
།ཨེ་ཝཾ་མཁས་གྲུབ་དཔལ་ལྡན་དོན་གྲུབ་རྗེ། །གང་དེའི་སྐུ་དབོན་དཔལ་མཆོག་རྒྱལ་མཚན་ཞབས། །འཇམ་དབྱངས་བླ་མ་ནམ་མཁའ་དཔལ་བཟང་པོ། །རྒྱལ་བའི་རྒྱལ་ཚབ་གསུམ་ལ༴
།ཁ་སྐོང་ནི། མཁྱེན་བརྩེའི་གཏེར་ཆེན་སངས་རྒྱས་ཕུན་ཚོགས་དང༌། །རྣམ་འདྲེན་མཚུངས་མེད་བསྟན་འཛིན་ལྷུན་གྲུབ་ཞབས། །བསྟན་འགྲོའི་གཙུག་རྒྱན་དཔལ་ལྡན་ཆོས་སྐྱོང་སྟེ། །ཕན་བདེའི་མཆོག་སྩོལ་གསུམ་ལ༴
།མཁས་བཙུན་དམ་པ་རིན་ཆེན་མཆོག་གྲུབ་དང༌། །ཐམས་ཅད་མཁྱེན་དབང་ནམ་མཁའ་འཆི་མེད་ཞབས། །རྡོ་རྗེ་འཆང་དངོས་འཇམ་དཔལ་བཟང་པོ་སྟེ། །བཀའ་དྲིན་ཉམས་མེད་གསུམ་ལ་གསོལ་བ་འདེབས། །ཞེས་སོ།
།འཁོར་འདས་རང་སེམས་རྨི་ལམ་སྒྱུ་མ་ལ། །གསལ་སྟོང་ལྷན་སྐྱེས་འོད་གསལ་བདེ་བ་ཆེ། །སྩོལ་མཛད་དཔལ་ལྡན་རྩ་བའི་བླ་མ་མཆོག །སྐྱབས་གནས་ཀུན་འདུས་ཞབས་ལ་གསོལ་བ་འདེབས། །དངོས་བརྒྱུད་བླ་མའི་ཚོགས་དང་བཅོམ་ལྡན་འདས། །ཞེས་པ་མན་ཆད་སྔར་ལྟར་སྦྱར་རོ།།