Snyan brgyud kyi man ngag rdo rje'i tshig gi mdud 'grol

Resource ID	Sup29
Title	snyan brgyud kyi man ngag rdo rje'i tshig gi mdud 'grol
Topics	Six doctrines of Niguma
Sub-Topics	Manual
Author	Dorjé Pel
Link	BUDA MW2PD20238
Notes	Author uncertain. This text is probably one of the three manuals used by Taranatha to compile the Tangdelma.

To read back
༄༅། །སྙན་བརྒྱུད་ཀྱི་མན་ངག་རྡོ་རྗེའི་ཚིག་གི་མདུད་འགྲོལ།།

བྱང་ཆུབ་ཀྱི་སེམས་བསྐྱེད་པ་སྔོན་དུ་བཏང་ནས་གསན་འཚལ། དེ་ལ་འདིར། ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་ཆེན་པོས། ཡེ་ཤེས་ཀྱི་མཁའ་འགྲོ་མ་ནི་གུ་མ་ལ་གསུངས་པའི་སྙན་རྒྱུད་ཞལ་གྱི་གདམས་པ་འདི་སྟོན་པར་བྱེད་པ་ལ་དོན་རྣམ་པ་དྲུག་གིས་སྟོན་ཏེ། ཐབས་ལམ་བདེ་དྲོད་རང་འབར། སྒྱུ་ལུས་ཆགས་སྡང་རང་གྲོལ། རྨི་ལམ་ཉིང་འཁྲུལ་རང་དག །འོད་གསལ་གཏི་མུག་རང་སངས། འཕོ་བ་མ་བསྒོམས་སངས་རྒྱས། བར་དོ་རྒྱལ་བ་ལོངས་སྐུ་དང་དྲུག་གོ

།དང་པོ་ཐབས་ལམ་སྟོན་པ་ལ་དོན་རྣམ་པ་གསུམ་སྟེ། སྔོན་འགྲོ་དང་། དངོས་གཞི། རྗེས་ཀྱི་ཆོས་སོ།
།སྔོན་འགྲོ་ལ་གསུམ་སྟེ། དག་བྱེད་ཨའི་སྟོང་ར། སྟོང་ར་ནད་གདོན་སེལ་བྱེད། རྟགས་གསུམ་སྟོང་རའི་ཁྱད་པར་རོ།
།དེ་ལ་དང་པོ་དག་བྱེད་ཨའི་སྟོང་ར་ཉམས་སུ་ལེན་པ་ལ། དབེན་པའི་གནས་སུ་སྟན་བདེ་བ་ལ་བསྡད། སྐྱབས་སུ་འགྲོ་བ་དང་སེམས་བསྐྱེད་པ་སྔོན་དུ་འགྲོ་བས་བྱ་བ་བྱུང་བས། དེ་ལ་དབེན་པའི་གནས་ནི་སྤྱིར་རྒྱུད་སྡེ་རྣམས་ནས་དུར་ཁྲོད་ཤིང་གཅིག་ལ་སོགས་པ་དངོས་གྲུབ་སྒྲུབ་པ་ལ། ལས་དང་པོ་པ། བརྟན་པ་ཐོབ་པ། བརྟན་པ་ཆེར་ཐོབ་པ་ལ་སོགས་ཀྱི་རྒྱུ་མཚན་མང་དུ་གསུངས་ནའང་། ད་ལན་འདིར་རང་གི་དགེ་སྦྱོར་ལ་བར་ཆད་མི་འབྱུང་བ་གཅིག་ལ་དབེན་གནས་སུ་ངོས་འཛིན་གསུང་། གནས་དེར་སྟན་བདེ་བ་ལ་བསྡད། ལུས་རྣམ་སྣང་གི་ཆོས་བདུན་གསུངས་པས། རྐང་པ་སྐྱིལ་དཀྲུང་། ལག་པ་མཉམ་བཞག་གམ་ས་གནོན། ལྟོ་བ་སྒལ་པ་ལ་སྦྱར། སྒལ་ཚིགས་བསྲང་། མགྲིན་པ་ཅུང་ཟད་དགུ །ལྕེ་རྐན་ལ་སྦྱར། མིག་མདའ་གང་ལས་ཚུར་མི་ཉེ། འདོམ་གང་ལས་ཕར་མི་ཉེ་བར་ཧྲིག་གེ་བལྟ་བ་ལ་རྣམ་སྣང་གི་ཆོས་བདུན་ཟེར་ཏེ། དེ་རེ་རེ་ལ་ཡང་ཡོན་ཏན་མང་དུ་ཡོད་པས་ཆེད་ཆུངས་མི་བྱ་བར་འཆུག་མེད་དུ་བྱེད་དེ། བཅའ་བ་ལུས་ལ་གནད་དུ་བསྣུན་པས་རྟོགས་པ་སེམས་ལ་འཆར་བ་ཆོ་ཉིད་ཀྱང་ཡིན་ལ། རྡོ་རྗེ་ཐེག་པའི་ཁྱད་ཆོས་ཀྱང་ཡིན་གསུང་། དེར་ལུས་ངག་ཡིད་གསུམ་བདེ་ཡལ་བའི་ངང་ནས་སྐྱབས་འགྲོ་བྱེད་དེ། སྐྱབས་འགྲོའི་ཡུལ་དཀོན་མཆོག་གསུམ་ཡིན་ཏེ།
རྒྱུད་བླ་ལས། སངས་རྒྱས་ཆོས་དང་དགེ་འདུན་སྟེ། ཐར་པ་འདོད་པ་རྣམས་ཀྱི་སྐྱབས། ཞེས་གསུངས་ཤིང་།
དཀོན་མཆོག་གསུམ་གྱི་ངོ་བོ་ཡང་བླ་མ་ཡིན་པས་བླ་མ་ནས་གཙམས་ཏེ། མ་ནམ་མཁའ་དང་མཉམ་པའི་སེམས་ཅན་ཐམས་ཅད། བླ་མ་ལ་སྐྱབས་སུ་མཆིའོ། སངས་རྒྱས་ལ། ཆོས་ལ། དགེ་འདུན་ལ། སྐྱབས་སུ་མཆིའོ་ཞེས་བློ་དང་འདྲེས་ངེས་ནུས་ཚད་ནུས་ཚད་དུ་བྱེད་དེ། ཚད་རང་སྣང་བ་བདེན་མེད་དུ་བུན་གྱིས་སོང་སོང་ཡིན་ལ། མ་ཐ་ན་ཡང་ལན་གསུམ་ལས་མི་ཉུང་བ་གཅིག་ཅིས་ཀྱང་བྱེད་གསུང་། བསག་སྦྱང་ཆོས་ཀྱི་སོ་ནམ་ཡིན་པས་ཉིན་ལ་མཚན་བཏགས་པ་ཙམ་དུ་འབུང་གསུང་།
དེ་ནས་སེམས་བསྐྱེད་པ་ནི། སེམས་བསྐྱེད་ཆོས་ཀྱི་ས་བོན་ཟེར་བས། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕངས་ཐོབ་པར་བྱ། དེའི་ཆེད་དུ་སྙན་རྒྱུད་ཀྱི་གདམས་པ་བསྒོམ་སྙམ་དུ་སེམས་བསྐྱེད། སྐྱབས་འགྲོ་སེམས་བསྐྱེད་དེ་དང་ལྡན་བཞིན་པའི་ངང་ནས། རང་གི་སྤྱི་བོའི་གཙུག་དུ་སེང་གེ་བརྒྱད་ཀྱིས་བཏེག་པའི་ཁྲི། པད་མ་དང་ཉི་མ་ཟླ་བའི་སྟེང་དུ། རང་གི་རྩ་བའི་བླ་མ་གང་ལ་མོས་པ་དམ་པར་འཛིན་པ། བློ་འདྲེ་བར་བྱེད་པའི་བླ་མ་དེ་ཉིད་ལོངས་སྐུ་རྡོ་རྗེ་འཆང་གི་རྣམ་པ། སྐུ་མཚན་དང་དཔེ་བྱད་ཀྱིས་སྤྲས་ཤིང་། དར་དང་རུས་པ་དང་རིན་པོ་ཆེས་བརྒྱན་པ། ཞལ་འཛུམ་པའི་མདངས་དང་ལྡན་ཞིང་འོད་དང་འོད་ཟེར་གྱི་རང་བཞིན་ཅན། གསུང་གསུང་དབྱངས་དྲུག་བཅུས་ཆོས་ཀྱི་སྒོ་དུ་མ་སྟོན་པ། ཐུགས་སྟོང་གསལ་དྲི་མ་མེད་པས་ཁམས་གསུམ་གྱི་སེམས་ཅན་ལ་ཉེ་རིང་དང་ཕྱོགས་ཆ་མེད་པར་གཟིགས་ལ། མཚན་ཐོས་པ་ཙམ་གྱིས་ཕྱིར་མི་ལྡོག་པའི་ས་ཐོབ་ན། གསོལ་བ་བཏབ་ན་བྱིན་བརླབས་འབྱུང་བ་སྨོས་མི་དགོས་པ་གཅིག་དུ་བསམ། དེའི་སྐུ་གསུང་ཐུགས་ལས་འོད་ཟེར་གྱི་ཚོགས་བསམ་གྱིས་མི་ཁྱབ་པ་འཕྲོས། ཕྱོགས་བཅུ་དུས་གསུམ་རྣམ་པ་ཐམས་ཅད་ན་བཞུགས་པའི་རྩ་བ་དང་བརྒྱུད་པར་བཅས་པའི་བླ་མ་ཡི་དམ་དཀྱིལ་འཁོར་གྱི་ལྷ་ཚོགས་དམ་པ་ཆོས་སྐྱོང་བའི་བསྲུངས་མ་དང་བཅས་པ་ཐམས་ཅད་སྤྱན་དྲངས་ལ་བླ་མ་ལ་བསྟིམ། བླ་མ་སངས་རྒྱས་ཀུན་འདུས་ཀྱི་རང་བཞིན་དུ་བསམ། ཕྱི་ནང་གསང་གསུམ་གྱི་མཆོད་པ་བསམ་གྱིས་མི་ཁྱབ་པས་མཆོད། ལུས་ལོངས་སྤྱོད་དགྲ་གཉེན་བར་མ་ཐམས་ཅད་དབུལ། འདི་ཕྱི་ཐམས་ཅད་ཀྱི་ལེགས་ཉེས་སྐྱིད་སྡུག་བླ་མ་མཁྱེན་སྙམ་པས་བློ་སྙིང་བྲང་གསུམ་བླ་མ་ལ་བསྐལ་ལ། གསོལ་བ་ཕུར་ཚུགས་སུ་གདབ་ཅིང་། གསོལ་འདེབས་རྒྱང་འབོད་མ་བྱས་ནའང་བྱིན་བརླབས་ཆེ་གསུང་།
ཐེམས་ཡིག་ལས། །སྔོན་འགྲོ་དག་བྱེད་སྟོང་ར་ལ། །གསོལ་འདེབས་གསུམ་ལ་དམིགས་པ་གསུམ། གསུངས་པས།
བླ་མ་སངས་རྒྱས་རིན་པོ་ཆེ། སེམས་ཅན་ཐམས་ཅད་ཀྱི་དོན་དུ་བདག་གི་ལུས་ལོངས་སྤྱོད་ཐམས་ཅད་འབུལ། ཐུགས་རྗེ་སེམས་ཅན་ཐམས་ཅད་ཀྱི་དོན་དུ་བཞེས་ནས། བདག་གི་ནད་གདོན་ཞི་བར་བྱིན་གྱིས་བརླབ་དུ་གསོལ། སྡིག་སྒྲིབ་འདག་པར་བྱིན་གྱིས་བརླབ་དུ་གསོལ། ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་དུ་གསོལ་ཞེས་རྩེ་གཅིག་དུ་གདབ། ཐུན་ཐ་མ་ན་མར་ལ་སོང་ཙ་ན། ད་ལྟ་ཉིད་དུ་བྱིན་གྱིས་བརླབ་དུ་གསོལ། དེ་བཞིན་དུ། མྱུར་བ་ཉིད་དུ། འདུག་ས་འདི་ཉིད་དུ། སྒོམ་ཐུན་གཅིག་པོ་འདི་ཉིད་ལ་རྒྱུད་ལ་སྐྱེ་བར་བྱིན་གྱིས་རླབ་དུ་གསོལ། ཞེས་ཉིན་ལ་མཚན་བཏགས་པའི་ཚུལ་གྱིས་འབད་པ་བྱེད་གསུང་།
དམིགས་པ་གསུམ་ནི། དག་བྱེད་ཨའི་སྟོང་ར་ལ། རང་ཐ་མལ་པའི་སྨིན་ཕྲག་གི་ནང་དུ་ཆོས་འབྱུང་དཀར་པོ་ཟུར་གསུམ་པ། ཟུར་གཅིག་སྨིན་ཕྲག །ཟུར་གཉིས་རྣ་རྟག་གཡས་གཡོན་དུ་ཟུག་པ། རྩ་བ་ཕྲ་བ་ཐུར་ལྕེ་ཆུང་པར་ཟུག་པ། གདེངས་ཀ་ཆེ་བ་གྱེན་དུ་བསྟན་པ། དཀར་སེང་པ། རྣམ་པ་སྤང་བརྒྱན་དཀར་པོ་འམ། དར་དཀར་གྱི་གླང་རུ་ལྟ་བུའོ། །གསུང་། ཆོས་འབྱུང་དེའི་ནང་དུ་གཡས་གཡོན་གང་ལའང་མ་རེག་པའི་ཨ་དཀར་པོ། དཀར་བ། འཚེར་བ། དངས་པ། འདྲིལ་བ། གསལ་བ་འོད་ཀྱི་རང་བཞིན་ཅན་བསྒོམ་ཏེ། ངག་དུ་ཨ་ཨ་ཅེས་སྒྲ་དང་བཅས་པ་བགྲངས་པས། ཨ་ལས་ཟག་པ་མེད་པའི་ཡེ་ཤེས་ཀྱི་ཆུ་རྒྱུན་སྐྱ་ཆི་ལི་ལི་བྱུང་བས་ཆོས་འབྱུང་གང་། དེའི་ཞབས་ནས་ཆུ་རྒྱུན་འཛགས། ལུས་ཕྱི་ནང་གི་སྡིག་སྒྲིབ་ཐམས་ཅད་ཆུ་རྒྱུན་གྱིས་བརྡས། དཔེར་ན་ཐལ་བའི་རི་བོ་ལ་ཕུ་ཆུ་དྲག་པོ་ཁ་གཏད་པ་ལྟར་རྦ་ཀློང་དང་བཅས་བས་དེད། སྡིག་སྒྲིབ་ཐམས་ཅད་འོག་སྒོ་བཤང་ལྕི་གཉིས་ཀྱི་ལམ། རྐང་པའི་སོར་མོ། བ་སྤུའི་བུ་ག་རྣམས་ནས་ནག་ནུ་རུ་རུ་འཐོན། ལུས་ཤེལ་དངས་པའམ། ཁྲུ་དཀར་བཀྲུས་པ་ཕུས་བཏབ་པ་ལྟར་ཕྱི་གསལ་ནང་གསལ་དུ་སོང་བའི་ནང་བྱང་སེམས་དཀར་པོས་གང་བར་སྒོམ་གསུང་།
སྟོང་ར་ནད་གདོན་སེལ་བྱེད་ལ་གཉིས། ནད་སེལ་བྱེད་དང་། གདོན་སེལ་བྱེད་དོ།
།ནད་ལ་གསུམ། ཚ་བ། གྲང་བ། རླུང་ནད་སེལ་བྱེད་དོ།
།དང་པོ་ནི་ནས་ཚད་པ་ལྟ་བུ་ལ། ཆོས་འབྱུང་ཕྱི་དཀར་ལ་ནང་ཅུང་ཟད་ཙམ་དམར་བ། ཨ་ཡང་ཅུང་ཟད་དམར་བར་བསྒོམ་ཞིང་འགྲངས་པས། ཨ་ལས་བདུད་རྩི་བསིལ་བ། དངས་པ། རེག་བྱ་གྲང་བ། ག་བུར་གྱི་ཆུ་རྒྱུན་ལྟ་བུ་བབས། ཚ་བའི་ནད་ཐམས་ཅད་བརྡས། ལུས་ཤིན་དུ་གྲང་བ་འདར་ཡེད་ཡེད་པ་ཤིན་དུ་ཡང་གསལ་བར་བསྒོམ་གསུང་།
གྲང་བའི་ནད་ལ། བདུད་རྩི་དམར་བ་མེ་ཐུར་དུ་འབར་བ་ལྟ་བུས་གྲང་བ་བརྡས། ལུས་ཚ་ལྷང་བ་བསྒོམ་གསུང་།
རླུང་ནད་ལ། ལུས་མར་ནག་གི་སྣོད་གཏིང་རིང་པ་ཁ་རུབ་པ་གཅིག་དུ་ཞུགས་པར་བསྒོམ། མར་ནག་གིས་སྨིན་འཚམས་མར་ཆད་གང་ཞིང་ནུབ་པར་བསྒོམ། ཨ་དེ་ཡང་ཤིན་དུ་སྣུམ་པ་ཞུན་མར་ལྟ་བུ། མར་ནག་དེ་ཡང་ཤིན་དུ་དྲོ་བ་རླངས་བུན་པ་ཡོད་པའི་དྲོད་དང་། ངག་དུ་ཨ་བགྲངས་པས། བདུད་རྩི་ཞུན་མར་ལྟ་བུ་བབས། ལུས་སྣུམ་ཞིང་དྲོ་ལ། ཞུན་ཆིལ་བ་བསྒོམ། རླུང་ལ་ཤིན་དུ་ཡན་པར་འདུག་གསུང་། རླུང་ནད་གགས་པོ་བྱུང་བ་མ་གཏོགས་བྱས་ན་ཁམས་ལྗི་བར་འདུག་གསུང་ངོ་།
།དམིགས་པ་གཉིས་པ་ནི། གདོན་རྟོག་བྱུང་ན། ཆོས་འབྱུང་དུ་ཨ་བསྒོམ་པ་ཡར་ཆད་འདྲ། ངག་དུ་ཨ་བགྲངས་པས། ཨ་ལས་ངོ་བོ་བདུད་རྩི་ལ་རྣམ་པ་ཡི་དམ་གྱི་ཕྱག་མཚན་དང་མཚོན་ཆའི་ཚོགས་དང་། ཁྲོ་ཆུང་། མེ་དཔུང་ལ་སོགས་པ་དཔག་ཏུ་མེད་པ་བྱུང་བས། གདོན་གྱི་རིགས་སེམས་ཅན་གྲོག་སྦུར་སྡོམ་སྡག་གི་སྦྲུལ་ཉ་སྦལ་ལ་སོགས་པ་མང་པོ་བརྡས། ཞལ་སྒྲོས་ལ། ལ་ལུང་མང་པོ་བསྒྲལ་བར་བསྒོམ་ནའང་འཐད་གསུང་། གདོན་ཐོན་པའི་ཤུལ་ངོ་བོ་བདུད་རྩིའི་རྣམ་པ་ཁྲོ་ཆུང་ལ་སོགས་པས་གང་པར་བསྒོམ་གསུང་ངོ་།
།གསུམ་པ་རྟགས་གསུམ་སྟོང་རའི་ཁྱད་པར་ནི། སྡིག་པ་དག་པའི་རྟགས་སུ། ལུས་འཁྲུ་བ་དང་། སྐྱུག་པ་དང་། ཁྲུས་བྱས་པ་དང་། གོས་དཀར་པོ་གོན་པ་དང་། ནམ་མཁའ་ལ་འཕུར་བ་དང་། གྱེན་ལ་འགྲོ་བ་དང་། ཉི་ཟླ་ཤར་བ་ལ་སོགས་པ་འབྱུང་། ནད་ཐོན་པའི་རྟགས། ལུས་ལ་རྡུལ་དང་། ཆུ་སེར་ཐོན་པ་དང་། ནད་ཀྱི་རླངས་སྔོན་དམར་དུ་འཐོན་པ་དང་། དྲི་མ་མི་འཆགས་པ་དང་། སྣག་ཁྲག་འཛག་པ་ལ་སོགས་པ་ཅི་རིགས་སུ་འབྱུང་། གདོན་ཐོན་པའི་རྟགས། སྲིན་བུ་གྲོག་སྦུར་ལ་སོགས་པ་ཐོན་པ་དང་། ས་བདག་གི་སྐྱོ་མ་སྐྱུགས་པ་དང་། སྲོག་ཆགས་ཀྱི་རིགས་ཐོན་པ་ལ་སོགས་པ་འབྱུང་ངོ་། །རྟགས་དེ་རྣམས་ཀྱང་དངོས་སམ་རྨི་ལམ་དུ་འབྱུང་ཞིང་། སྤྱིར་ལུས་ཡང་བ་དང་། རིག་པ་དངས་པ་དང་། སེམས་བདེ་ཞིང་དད་པ་སྐྱེ་བ་ལ་སོགས་པ་འབྱུང་གསུང་། ཞལ་སྒྲོས། ཁྲིད་གཞན་ནས་སྔོན་འགྲོ་མང་དུ་མཛད་པ་འདིར་སྟོང་ར་བསྐོར་གསུམ་པོ་འདིར་འདུས་པས་ཤིན་དུ་ཟབ་པ་ཡིན་ནོ་ཞེས་གསུང་སྟེ། དེ་རྣམས་སྔོན་འགྲོའོ།
།གཉིས་པ་དངོས་གཞི་ལ་ལྔ་སྟེ། ལུས་གནད་མེའི་སྟོང་ར། གཏུམ་མོ་ཟས་སུ་ཟ་བ། གོས་སུ་གོན་པ། སྟན་དུ་འདིངས་པ། རྟ་རུ་ཞོན་པའོ།
།དང་པོ་ནི། སྐྱབས་འགྲོ་སེམས་བསྐྱེད། རང་གི་སྤྱི་བོར་བླ་མ་བསྒོམས་ཏེ་གསོལ་བ་གདབ་པ་ལ།
ཐེམས་ཡིག་ལས། །གཏུམ་མོ་བདེ་དྲོད་རང་འབར་ལ། །གསོལ་འདེབས་གཉིས་ལ་དམིགས་པ་ལྔ། གསུངས་པས།
བདག་ལ་བདེ་དྲོད་ཀྱི་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་དུ་གསོལ། བདེ་སྟོང་གི་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་དུ་གསོལ་ཞེས་གསོལ་བ་གདབ། རླུང་རོ་ལན་གསུམ་བསལ་ལ། ལུས་གནད་རྐང་པ་གཡས་ཕྱིར་བསྟན་ཏེ་བསྣོལ། ལག་པ་གཉིས། བསྣོལ་བས་སྦེ་ཤ་གཉིས་ལ་འཁྱུད། གྲུ་མོ་གཉིས་དཔུས་མོའི་ཁར་བཞག ། སྒལ་ཚིགས་བསྲང་། མགྲིན་པ་ཅུང་ཟད་དགུ་སྟེ་མེ་ཐབ་དྲུག་བཅིངས་སུ་བཅའ། ཐབས་ལམ་གྱི་བསྐོར་ལ་རང་རྗེ་བཙུན་མར་བསྒོམ་པ་ངེས་པ་ཅན་ཡིན་ནོ་གསུང་། དེ་ལྟར་རང་ལྷར་གསལ་བའི་ལུས་ཀྱི་ནང་མོའི་འོབས་ལྟར་དམར་ལམ་པ། ཞུས་ཁང་འབར་བ་ལྟ་བུ་ལ། ལུས་ཀྱི་ནང་ལྟེ་བའི་ཐད་ཀའི་ཕྱོགས་བཞི་སྟེ། ལྟེ་བ། མཁལ་མ་གཡས་གཡོན་གཉིས། རྒྱབ་དང་བཞིར། མེའི་གོང་བུ་ངང་སྐྱའི་སྒོང་ང་ཙམ་པ་བཞི། རེག་བྱ་ཚ། དམར་བ། ལས་ཀྱང་དཀར་བ་སྟེ། མགར་གྱི་སོ་མལ་ལྟར་མེ་བྱིངས་དམར་པོ་ལ། གོང་བུ་བཞི་ལྕགས་ཚོས་པ་ལྟར་དཀར་ངང་པ་ཤིན་དུ་ཡང་ཚ་བ་སྟེ། ཚ་ལྷེམ་ལྷེམ་པ་བསྒོམས་ནས། སྟེང་རླུང་དལ་བུས་རྔུབས་ནས་མཆིལ་མ་དང་བཅས་པས་འོག་དུ་བསྐྱུར་ལ་ལྟེ་འོག་དུ་མནན། འོག་རླུང་འཐེན་སྟེ་རླུང་ཁ་སྦྱར་བུམ་པ་ཅན་དུ་བཟུང་། མི་ཐུབ་པ་དང་དལ་བུས་བཏང་། དེ་ལྟར་ཡང་ཡང་དུ་རྩོལ་པ་བསྐྱེད་ནས་བྱེད་ཅིང་། ཐབས་ལམ་རྩོལ་བའི་གནད་གསུང་། ཤངས་པའི་ཁྱད་ཆོས་མི་རྒོད་གཏུམ་མོའི་ཁྲིད་གསུང་། འདི་ཐེག་པ་གཞན་ལས་ཁྱད་པར་དུ་འཕགས་པ་རླུང་བསྒོམ་པ་ཏེ། དབང་གཉིས་པའི་དམ་ཚིག་ཀྱང་ཡིན་པས་འཆུག་མེད་གཅིག་བྱེད་པ་གལ་ཆེའོ་གསུང་ངོ་།
།གཉིས་པ་ཟས་སུ་ཟ་བ་ནི། སྔོན་འགྲོ་བླ་མའི་རྣལ་འབྱོར་ཡན་ཆད་གོང་མ་དང་འདྲ་བ་ལ། འདི་ལའང་རླུང་རོ་ལན་གསུམ་བསལ་ནས་འཁྲུལ་འཁོར་བཅའ་བ་ནི། ལག་པའི་མཐེ་འོང་གཉིས་སྲིན་ལག་གི་རྩ་བར་བཟུང་། སྲིན་ལག་དང་མཐེའུ་ཆུང་དགུག །གུང་མཛུབ་བརྐྱང་ལ་གཡོན་འོག་གཡས་སྟེང་ནས་ཐུར་དུ་བསྣོལ། རྐང་པ་གཡོན་ནང་དུ་བཅུག་པའི་སྐྱིལ་དཀྲུངས་བཅས་པའི་མཐེ་འོང་གཉིས་གཡས་པས་གཡས་དང་། གཡོན་པས་གཡོན་ནས་བཟུང་ལ། ཚང་ར་ནང་དུ་ནུད་སྟེ་རྟིང་པས་བཤང་ལྕིའི་བར་དུ་ལྟེམ། ལུས་གནད་གལ་ཤིན་དུ་ཆེ་གསུང་། རྐང་པ་རླུང་གི་དཀྱིལ་འཁོར་གཞུའི་དབྱིབས་རྒྱུད་འོག་དུ་བསྟན་པའོ་གསུང་། དམིགས་པ་སུམ་མདོའ་ཆོས་འབྱུང་དུ་མེ་མཚོན་གང་ངམ་བླ་བའི་རིལ་མ་ཙམ་སྒོམ་སྟེ། ཐད་དུ་དྲང་བ། ཁ་དོག་གསལ་བ། རེག་བྱ་ཚ་བ། རྩེ་མོ་རྣོ་བ་སྟེ། མཚན་ཉིད་བཞི་ལྡན་ནོ། །བུང་པའི་མཚོན་ཆ་ལྟ་བུ་གསུང་། དེ་ལྟར་གསལ་བར་བསྒོམས་ནས། སྟེང་རླུང་རྔུབས་ཏེ་མཆིལ་མ་དང་བཅས་ནས་ལྟེ་འོག་དུ་མནན། འོག་རླུང་བསྡམས་པས་མེ་གྱེན་དུ་འབར། དབུའ་མ་ནས་ཡར་སོང་གྱེན་དུ་ཆེར་འབར་ལུས་མེས་གང་། མགྲིན་པར་མེའི་རྩེ་མོ་ཉུག་ཉུག་པ་བསྒོམ་གསུང་། མེ་འབར་བའི་དྲོད་ཀྱིས་སྤྱི་བོའི་ཧཾ་ལས་བྱང་སེམས་བབས། ཐིགས་པ་མེ་ལ་སོང་བས་མེ་ཆེར་འབར། དཔེར་ན་མེ་འབར་བ་ལ་མར་ཁུ་འཐིགས་པས་ཆེར་འབར་བ་བཞིན་གསུང་ངོ་། །བདེ་བ་ཆུང་ན་ཐིག་ལེ་ཆེར་བསྒོམ་ཏེ་སྙིང་ག་ཡར་ཆད་ཙམ་ཁེངས་པར་བསྒོམ། དྲོད་ཆུང་ན་མེ་ཆེར་བསྒོམ་ཏེ་མགྲིན་པ་ཡན་ཆད་གང་བར་བསྒོམ་མོ་གསུང་། གདོན་རྟོག་ཆེ་ན་བ་སྤུའི་བུ་ག་ནས་མེ་དམར་ཉུག་ཉུག་པ་སྒོམ་ཞིང་། ཡང་བདེ་བ་ཆེས་ཏེ་ཐིག་ལེ་འཛག་ན། སྤྱི་བོའི་ཧཾ་ཡིག་གྱེན་ལ་བཞེངས་པ་སྒོམ་ཞིང་འོག་རླུང་འཐེན། འདི་ལ་རྩོལ་བ་ཁོ་ན་གལ་ཆེ་ཡང་ཡང་གསུང་། དེ་ལྟར་མ་བྱས་ན་ཐབས་ལམ་ལ་དྲེད་གསུང་བས་ཤིན་དུ་མད། རྩོལ་བ་ཁོ་ནས་སྒོམ་པར་བྱེད་དོ།
།གསུམ་པ་གཏུམ་མོ་གོས་སུ་གྱོན་པ་དང་། གཞི་པ་སྟན་དུ་འདིངས་པ་ནི། སྐྱབས་འགྲོ་སེམས་བསྐྱེད་བླ་མ་བསྒོམས་ཏེ་གསོལ་བ་འདེབས་པ་ཡན་ཆད་སྔར་དང་འདྲ་ལ། ཉིན་མོ་ཟས་སུ་ཟ་བའི་ལུས་གནད་དང་དམིགས་པ་སྒོམ་ཏེ། ནུབ་མོ་ཉལ་བའི་དུས་སུ། མལ་ཐག་ཐུང་བ་རྔས་ཅུང་ཟད་མཐོའ་བར་བྱ། བརླ་གཉིས་ལྟོ་བ་ལ་སྦྱར་ཏེ་པུས་བྲང་སྤྲད། དེ་ལ་ལག་པ་གཉིས་ཀྱིས་འཁྱུད་ལ་ཕྱི་ནས་བསྡམས་ཏེ། ལག་མཐིལ་མེའི་དཀྱིལ་འཁོར་ཡིན་པས་མཁལ་མ་ཆུའི་རྩ་ལ་དགབ་པར་བཤད་དེ་མི་སླེབ་པས་བཀབ་པར་སྒོམ་གསུང་། བཞོགས་གང་བདེ་བ་འོག་དུ་བཅུག་པའི་རྐང་པ་སྟེང་མ་ཤིང་ངམ་རྡོའམ་མདོར་ན་འཁྲང་པ་ཤེད་ཐུབ་པ་གཅིག་ལ་དྲག་ཏུ་གཏད། རྐང་པ་དེའི་གོང་ཁར་རྐང་པ་འོག་མའི་རྒྱུ་མོ་ཁུང་བཀལ་ལ་མནན། དེ་ལ་ཤེད་བཅུད་ལ་ཉལ། འདི་ལ་ཀུ་ཀུ་ར་ཙའི་འདུག་སྟངས་གསུང་། ལྐོས་ཀོ་སྤུས་མོ་གཉིས་ཀྱི་སྟེང་དུ་བཞག་ལ། ཁྱི་ཉལ་སྒོར་མོ་བྱའོ།
།རིན་ཆེན་གསེར་གླིང་པའི་ཞལ་ནས། གདམས་པ་ཆུང་ཡང་ཕན་ཡོན་ཆེ་བ་གཅིག་འདུག །ངེད་རས་ཕུད་སྟོང་དུས་དྲོད་རང་ཆེར་མངོན་པ་བྱུང་གསུང་། མེ་དམིགས་ཟས་སུ་ཟ་བ་བཞིན་བསྒོམས་ལ་རླུང་ཅུང་ཟད་བཟུང་ལ་བརྩོན་པས་འཆུག་མེད་བྱེད་དོ་གསུང་། །གོས་སྟན་གཉིས་ཉལ་བ་ཁོ་ནའི་ཡིན། རྩོག་གེ་སྡོད་ཚད་སྔར་བཞིན་སྒོམ་པ་ཡིན་ནོ་གསུང་ངོ་།
།ལྔ་པ་རྟ་རུ་ཞོན་པ་ནི། སྔོན་འགྲོ་གསོལ་འདེབས་ཡན་ཆད་སྔར་དང་འདྲ། དེ་ནས་རླུང་རོ་བུས་ནས། ལག་པ་རྡོ་རྗེ་ཁུ་ཚུར་བཅངས་པའི་ལག་མགོའི་ཕྱི་རྒྱབ་གཡའ་ཁུང་དུ་སྦྱར། གྲུ་མོ་གཉིས་ཐེབ་བྱས་པ་བཤོག་པ་བཞིན་བྱ། དམིགས་པ་ནི་ལག་མགོ་གཡས་གཡོན་གཉིས་སུ་རླུང་གི་ལྷ་མོ་དཀར་ལྗང་བཤོག་པ་ཅན་མིག་འབུར་བ། རིག་པ་ཧུར་ཐོན་པ་ངར་དང་བཅས་པ་ལུས་ཤུགས་དང་ལྡན་པ་གཉིས་བསྒོམ་ཏེ། ཁ་དོག་དཀར་ལྗང་ནི་ཕུག་རོན་གྱི་སྐྱེ་མདོག་ལྟ་བུ་ཡིན་ནོ་གསུང་། འགྲོས་མི་བྱེད་གོང་དུ་རླུང་ཁུག་པ་ཉེར་གཅིག་བཟུང་ནས། དེ་ནས་རླུང་བཟུང་ཞིང་དམིགས་པ་དང་བཅས་པས་འགྲོ་བར་བྱེད་གསུང་། ཡང་དེ་བས་མགྱོགས་པར་འགྲོ་དགོས་པ་བྱུང་ན། རྐང་པའི་སྒྱུ་མོ་ཁུགས་གཉིས་ཀྱི་འོག་ཏུ་རླུང་གི་ལྷ་མོ་བཤོག་པ་བརྒྱངས་པ་གཉིས་ཀྱིས་ནམ་མཁའ་ལ་བཏེག་པར་བསམས་ནས་འགྲོ་བར་བྱེད་ཅིང་། དམིགས་པ་འདི་དྲག་འགྲོས་ལན་རེ་ཙམ་མིན་པ་ཐང་མར་བྱས་ན་བསྐྲད་འཁོར་དུའང་འགྲོ་བའི་ཉེན་ཡོད་གསུང་། དེ་ལྟར་བསྒོམས་ཏེ་ཕྱིན་པས་རྟ་མཆོག་དང་མཉམ་པའི་འགྲོས་འབྱུང་གསུང་བས། རྟ་གསར་མའི་འགྲོས་ཙམ་འབྱུང་ངོ་གསུང་། དེ་ལྟར་ལྔ་པོ་དེ་དངོས་གཞིའོ།
།རྗེས་ལ་གཉིས་ཏེ། སྲིད་པའི་དབང་ཞུ་བ་དང་། གེགས་རང་གྲོལ་ལོ།
།དང་པོ་ནི། སྐྱབས་འགྲོ་ནས་གསོལ་འདེབས་ཡན་ཆད་སྔར་དང་འདྲ། ལུས་རྣམ་སྣང་གི་ཆོས་བདུན་བཅའ། རང་གི་སྤྱི་བོར་མི་འཇིགས་སེང་གེ་བརྒྱད་ཀྱི་ཁྲིའི་སྟེ་དུ། པཾ་ལས་པད་མ་འདབ་མ་སྟོང་དང་ལྡན་པ། རཾ་ལས་ཉི་མ། ཨ་ལས་ཟླ་བའི་དཀྱིལ་འཁོར། དེའི་སྟེང་དུ་རང་གི་རྩ་བའི་བླ་མ་རང་ཉིད་མོས་པའི་བླ་མ་དེ་ཉིད་སྐུ་མདོག་དཀར་པོ། ཞལ་འཛུམ་ཞིང་རང་ལ་དགྱེས་བཞིན་པ་འོད་དང་འོད་ཟེར་གྱི་རང་བཞིན་ཅན་དུ་སྒོམས་པའི་ཐུགས་ཁ་ནས་འོད་འཕྲོས། རྩ་རྒྱུད་བླ་མ་ཐམས་ཅད་གོང་བཞིན་དུ་སྤྱན་དྲངས་ལ་འོད་ཟེར་དཀར་པོའི་རྣམ་པས་བླ་མ་ལ་བསྟིམ། ཕྱིའི་མཆོད་པ་ཉེར་སྤྱོད་ལྔ། ནང་ཤ་ལྔ་བདུད་རྩི་ལྔ། གསང་བ་རང་རིག་མར་བྱས་ཏེ་འཁྲིལ་སྦྱོར་རོལ་བ། དེ་ཁོ་ན་ཉིད་བདེ་གསལ་མི་རྟོགས་པ་ཏེ་མཆོད་པ་བཞི་བསྐོར་དུ་འབུལ། གསོལ་བ་རྩེ་གཅིག་དུ་གདབ། བླ་མ་སངས་རྒྱས་རིན་པོ་ཆེ་སེམས་ཅན་ཐམས་ཅད་ཀྱི་དོན་དུ་ཕྱི་ནང་གསང་གསུམ་བདེ་བ་ཆེན་པོའི་མཆོད་པ་རྒྱ་ཆེན་པོ་འབུལ། ཐུགས་རྗེས་སེམས་ཅན་གྱི་དོན་དུ་བཞེས་ནས། བདག་ལ་དབང་བཞི་རྫོགས་སུ་བསྐུར་དུ་གསོལ་ཞེས་གསོལ་བ་ལན་གསུམ་དུ་གདབ། བླ་མའི་སྐུ་དང་གདན་ཟླ་བ་ལས་འོད་ཟེར་དཀར་པོའི་བདུད་རྩིའི་ཆུ་རྒྱུན་ལྟ་བུ་སྐྱ་ཆི་ལི་ལི་བབས། རང་གི་སྤྱི་བོ་ཚངས་པའི་བུ་ག་ནས་ཞུགས། སྨིན་འཚམས་ཡན་ཆད་གང་། ལུས་ཀྱིས་བསགས་པའི་སྡིག་སྒྲིབ་ཐམས་ཅད་དག །བླ་མའི་སྐུའི་བྱིན་བརླབས་ཞུགས་སྟེ་བུམ་པའི་དབང་ཐོབ། དེ་བཞིན་དུ་མགྲིན་པ། སྙིང་ཁ། རྐང་མཐིལ་ཡན་ཆད་གང་། ངག་གི །ཡིད་ཀྱི་། ཀུན་གཞི་ལ་ཡོད་པའི་བག་ཆག་དང་དྲི་མ་ཐམས་ཅད་དག །གསུང་། ཐུགས་དང་། དེ་གསུམ་དབྱེར་མེད་ཀྱི་བྱིན་བརླབས་ཞུགས། གསང་བ། ཤེས་རབ་ཡེ་ཤེས། དབང་བཞི་པ་ཐོབ། མཐར་བླ་མ་འོད་དུ་ཞུ་ནས། རང་ལ་ཐིམ། རང་གི་ལུས་ངག་ཡིད་གསུམ་དུ་དབྱེར་མེད་དུ་འདྲེས་པའི་ངང་ལ་སེམས་སྤྲོས་པ་ཐམས་ཅད་དང་བྲལ་བའི་ངང་ལ་བཤག་གོ་གསུང་། ཡང་སློབ་མ་ལྟ་བུ་ལ་བྱེད་ན། མཎྜལ་པད་མ་འདབ་མ་བཞི་པ་དཀར་པོ་བྱ། བདག་བདེ་མཆོག་དུ་བསྐྱེད། མཎྜལ་སྟེང་དུ་བླ་མ་བསྐྱེད་པ། གཞུག་པ། མཆོད་པ་སྔགས་བཞིན་དུ་བྱ། གཏོར་ཚོགས་དང་འབྲེལ་བས། རང་དབང་ལེན་པ་བཞིན་དུ་སྒོམ་དུ་བཞུག །དེ་ཉིད་ཐབས་ལམ་གྱི་བཀའ་ཡང་ཡིན། སྔགས་དབང་མ་ཐོབ་པ་ཐོབ་པར་བྱེད་པ། ཐོབ་པ་ཉམས་ཤས་ཡོད་ན་སོས་པ་བདག་འཇུག་དུའང་འགྱུར་ཞིང་། ཆུ་རྒྱུན་གཅིག་ལ་དབང་བཞི་ལེན་པ་ནི་ཟབ་སྟེ། རྣལ་འབྱོར་དབང་ཕྱུག་གིས་ཀྱང་ལམ་ཟབ་བླ་མ་གསུང་། དེ་ལྟར་སྲིད་པའི་དབང་ཞུ་བ་འདི་ཉིད་ཐབས་ལམ་སྒོམ་ཚད་ཀྱི་རྗེས་སུ་མ་ཆགས་པར་བྱེད་པ་ཡིན་ནོ་གསུང་ངོ་།
།གཉིས་པ། གེགས་རང་གྲོལ་ལ་གཉིས་ཏེ། སྟོད་ཀྱི་དང་། སྨད་ཀྱི་གེགས་སེལ་ལོ།
།དང་པོ་ལ་བཞི། རླུང་འབུད་པ། ཁྲོལ་ཚགས་ལྟ་བུ། རིན་པོ་ཆེ་འབར་བ་ལྟ་བུ། ཧ་དམིགས་སོ།
།དང་པོ་རོ་སྟོད་བརྒྱངས་པའམ། གཟེར་བའམ། སྙིང་མི་དགའ་བའམ། ཤེས་པ་འཕྱོ་བའམ། རོ་སྟོད་ན་བ་བྱུང་ན། སྔོན་འགྲོ་བླ་མའི་རྣལ་འབྱོར་ཡན་ཆད་སྔར་བཞིན་བྱས་ལ། ལུས་སྐྱིལ་དཀྲུང་། ལག་པ་ས་གནོན་ལྷོད་དེ་ཤིག་གེ་བ་བཅས་ལ། དམིགས་པ་རླུང་བུས་པས་ནད་གདོན་སངས་སངས་སོང་བར་བསམས་ལ། རླུང་དྲག་ལུང་དུ་ཉི་ཤུ་རྩ་གཅིག་བུ། ལུས་ཀྱི་སྟོད་སེང་བྱས་ལ་སེམས་ལས་མེད་དུ་བཞག །དམིགས་པ་འདི་རྣམས་རྒྱུན་གཅིག་ལ་དགོས་པ་མིན། འདེབ་ཁའི་ཁྱད་པར་ཡིན་གསུང་།
གཉིས་པ་ཁྲོལ་ཚགས་ནི། གང་ན་སར་བུག་པ་ཁྲོལ་ཚགས་ལྟ་བུ་བསྒོམས་ལ་ནད་ཁ་དོག་སྔོན་དམར་དུ་ཕྱུ་རུ་རུ་འཐོན་ནས། ནད་ཀྱི་ཤུལ་སྟོང་ཉིད་དུ་བདེ་ཕྱམ་སོང་བར་བསྒོམ།
གསུམ་པ་རིན་པོ་ཆེ་འབར་བ་ལྟ་བུ་ནི། མདུན་རྒྱབ་གཉིས་དང་མདོར་ན་གང་ན་སར་རིན་པོ་ཆེ་འབར་བའི་མིག་ལྟ་བུ། བུ་ག་ཧུ་རེ་བའི་ནང་ན་ཕར་ནད་དུད་པ་འཕྱུར་སྔོ་བུན་ནུ་ནུ་འཐོན་པར་བསམས་པའི་རྗེས་སྔར་བཞིན་དུ་བྱེད་དོ་གསུང་།
བཞི་པ་ཧ་དམིགས་ནི། ལག་པ་ས་གནོན་སྤུས་མོ་ལ་དགབ། དམིགས་པ་ཧ་སྟོན་པས་ལུས་བཞི་ཚལ་དུ་ཤགས་ཤགས་སོང་བར་བསམ། ལུས་བཞི་ཚལ་དུ་ཤགས་སོང་བའི་དཀྱིལ་ན་ནད་གང་ཡིན་དེ་ནག་ཧྲིལ་ལེ་འདུག་པ་ཡལ་ཡལ་སོང་བར་བསམས་ལ་ཧ་དྲག་པོ་སྒྲ་དང་བཅས་པ་སྟོན་པའི་རྗེས་སུ་ཧཱ་ཞེས་དལ་ཤིག་པ་བྱ། ནད་ཐོན་ཏེ་སྟོང་སངས་སོང་བར་སྒོམ་པ་ཡིན་ནོ་གསུང་།
གཉིས་པ་སྨད་ཀུན་དའི་གེགས་སེལ་ནི་གཉིས་ཏེ། ནོར་བུ་རྒྱུ་མ་བཟློག་པ་དང་། ལུས་སྦྱོང་གཉིས་སོ།
།དང་པོ་ནི། སྔོན་འགྲོ་གསོལ་འདེབས་ཡན་ཆད་སྔར་དང་འདྲ་བ་ལ། ལུས་རྣམ་སྣང་གི་ཆོས་བདུན་བཅས། རླུང་རོ་ལན་གསུམ་བསལ་ལས། ལུས་ཡི་དམ་དུ་གསལ་བའི་རྡོ་རྗེ་ནོར་བུའི་བུ་གར་ཧཱུྃ་སྔོན་པོ་གཅིག་བསམ། སྟེང་རླུང་བཟུང་། འོག་རླུང་འཐེན་པས། ནུར་ནུའི་ཧཱུྃ་ནང་དུ་ཞུགས་སྟེ། ནོར་བུའང་ནང་དུ་རྒྱུ་མ་ལོག་པ་བཞིན་དུ་སོང་། དབུ་མ་ནས་ཞུགས། སྤྱི་བོར་རྒྱངས་ཀྱིས་བྱུང་སྟེ། སྟེང་ངེ་ཡོད་པར་བསམ། ཀུན་ད་འཛག་པ་དེས་སེལ་གསུང་ངོ་།
།གཉིས་པ་ལུས་སྦྱོང་ནི། ཀུན་ད་འཛག་པའི་གེགས་བྱུང་ན། རབ་དགག་སྒྲུབ་དང་བྲལ་བའི་ལྟ་བས་བསམ། འབྲིང་དབང་བསྐུར་དང་ཚོགས་འཁོར་གྱིས་བསལ། ཐ་མ་དམིགས་པ་དང་འཁྲུལ་འཁོར་གྱིས་བཅད་པར་བྱའོ་གསུངས་པས། དམིགས་པ་དང་བཅས་པའི་འཁྲུལ་འཁོར་ནི། གནས་དབེན་པར་སྐྱབས་སེམས་བསྐྱེད་བླ་མའི་རྣལ་འབྱོར་བསྒོམས་ཏེ་གསོལ་བ་བཏབ་ལ། རང་ལུས་ཡི་དམ་གྱི་ལྷར་བསྒོམས་ལ། རླུང་རོ་ལན་གསུམ་་་་སལ། སྟན་ལས་ལངས་ཏེ་རྐང་པ་གཡོན་པའི་བརླ་ལ་གཡས་པའི་མཐིལ་གཏད། ལག་པ་གཉིས་བསྡིག་གིས་མཛུབ་གཡས་ནམ་མཁར་གདེངས། གཡོན་སྙིང་གར་བཟུང་། མིག་ཁྲོ་མོའི་བལྟ་སྟངས་དགྲད་ལ། རླུང་ཁ་སྦྱོར་དུ་བཟུང་ལ། ཡང་གཡོན་པའང་བསྒྱུར་བ་དེ་བཞིན་དུ་བྱད། འདི་ལ་སྟོབས་ཀྱི་འཁྲུལ་འཁོར་ཟེར་བས། འདིས་སྟེང་འོག་ཕྱོགས་བཞིའི་གདོན་རྣམས་སྐྲོད་པར་བྱེད་པ་ཡིན་གསུང་། དེ་ནས་ཚིལ་ཆེན་ནམ་འབྲུ་མར་ལག་པའི་མཐིལ་དུ་བླུགས་ལ། རླུང་ཁ་སྦྱོར་དུ་བྱས། ལག་པས་སྤྱི་བོ་ནས་རྐང་མཐིལ་ཡན་ཆད་ལ་ཁྱབ་པར་བྱུག་ཅིང་། མི་བསྙོགས་པའི་སར་ཕྱག་རྒྱའམ་གྲོགས་མཚན་ཉིད་དང་ལྡན་པ་འབྱུག་དུ་བཞུག །རྩའི་འདུས་པ་རྣམས་སུ་ནན་ཤིན་དུ་ཆེ་བ་དང་། ཤེད་དང་ལྡན་པས་འབྱུག་སྟེ། འདིས་ཟས་འཇུ། ཁམས་དངས་སྙིགས་འབྱེད། ཐིག་ལེ་འཕེལ། རྩ་རླུང་གི་ཟུག་རྔུ་མི་འབྱུང་བས་ཕན་ཡོན་ཆེན་པོ་ཡོད་དོ་གསུང་།
དེ་ནས་ལུས་སྦྱོང་དངོས་གཞི་ལ། ཨང་གྲོལ་ལས་ཀྱི་ཕྱག་རྒྱ། བྷེ་ཏ་ཆོས་ཀྱི་ཕྱག་རྒྱ། བྷན་དྷ་དམ་ཚིག་གི་ཕྱག་རྒྱ། ཕྱག་རྒྱ་ཆེན་པོའོ།
།དང་པོ་ནི། རྐང་པ་གཡོན་པའི་རྟིང་པས་བཤང་ལྕི་གཉིས་ཀྱི་བར་སྟེམ། སྒལ་ཚིགས་བསྲང་། རྐང་པ་གཡས་བརྐྱང་པའི་མཐེབ་ཆེན། ལག་པ་གཡས་པའི་གུང་མཛུབ་མཐེ་བོས་བཟུང་ལག་གཡོན་པས་བོལ་གོང་ནས་བཟུང་ལ། སྒལ་པ་མ་གུག་པར། རྐང་པ་གྱེན་དུ་བརྐན་ཏེ། རླུང་རྔུབས་ལ་ལྟེ་བར་མནན། མི་ཐུབ་པ་དང་དྲག་རླུང་དུ་བུ། མགྲིན་པ་ཅུང་ཟད་སྒུ་བ་དང་། ཡར་འཐེན་ཅིང་དྲག་དུ་སྡིག་པ་དང་། རྔུབ་པ་དལ་བ་སྟེང་འོག་ཁ་སྦྱོར་དུ་བྱེད་པ་གལ་ཆེ་གསུང་ངོ་།
།གཉིས་པ་ནི། རྐང་པའི་རྟིང་པ་གཉིས་བཤིབས་པའི་བར་དུ་སོར་ལྔས་མ་རེག་པར་བྱ། རྐང་སོར་རྣམས་མཉམ་པོར་ས་ལ་ཕབ་ལ་བརྟན་པོ་མི་འགྱེལ་བར་བྱ། ལག་པ་གཡོན་པའི་མཐེ་བོང་། གཡས་པས་བཟུང་ལ་ཁུ་ཚུར་བྱ། དེ་ལ་གཡོན་པས་ཕྱི་ནས་བཀབ་ལ་ཤུགས་དང་ལྡན་པས་རྐང་པས་མཐོ་གསུམ་གྱིས་རིང་པར་ས་ལ་གཟུགས། མགོ་བོ་ལག་པ་གཉིས་ཀྱི་བར་དུ་བཀུག་ལ་རླུང་ཁ་སྦྱར་ལུས་ཡར་དལ་བུས་འཐེན་ལ་དེ་ནས་འཕོངས་དང་བརླ་གཉིས་བྱིན་རྟིང་ལ་དྲག་ཏུ་གདབ་སྟེ། གཡས་གཡོན་དུ་མ་འཁྱོགས་པ་གལ་ཆེ་ཞིང་། དེ་ལྟ་བུ་རླུང་གིས་ཐུབ་ཚད་ཀྱི་བར་ལ་བྱེད། མི་ཐུབ་པ་དང་བསྡད་ལ་རླུང་བུའོ་གསུང་།
གསུམ་པ་ནི། རྐང་པ་གཉིས་དགྲད་པའི་བར་དུ་ཁྲུ་གང་ཡོད་པ་བྱ། ལག་པ་གཉིས་ནང་ནས་བཅུག་སྟེ་ཕྱི་ནས་བསྐོར་ལ་རྐང་མཐེབ་གཉིས། གུང་མཛུབ་གྱིས་བཟུང་། ལུས་སྒུར་ ོར་ལངས་ལ་མགོ་བོ་དགུག །ལུས་ཤེད་དང་ལྡན་པས་རླུང་ཁ་སྦྱར་མ་འཆུགས་པར། རྐུབ་ནམ་མཁར་སྐྱེར་སྐྱེར་བ་བྱེད་པ་ཡིན་ནོ་གསུང་།
བཞི་པ་ནི། བདེ་བའི་སྟན་ལ། རྩོག་བུ་རྐང་པ་གཉིས་བསྣོལ། ལག་པ་གཉིས་བསྣོལ་པའི་འཐེབ་ཆེན་གྱིས་སྦེ་ཤ་གཡས་གཡོན་མནན། གྲུ་མོ་གཉིས་སྤུས་མོའི་ཁར་བཞག །ལ་སྒལ་ཚིགས་བསྲང་། མགྲིན་པ་ཅུང་ཟད་དགུ་ཙམ་བྱས་ལ། འདི་ལ་ཕྱག་རྒྱ་ཆེན་པོ་ཟེར་བས། ཡིད་བྱ་བྱེད་ཀྱི་བསམ་མནོའ་མི་བྱེད་པར། བློ་ལས་མེད་རྩོལ་མེད་དུ་ལྷོད་དེ་ཤིག་གེ་འཇོག་པ་འདི་གོང་མ་གསུམ་པོའི་ངལ་བསོའང་ཡིན་ལ། བོགས་འདོན་ཡང་ཡིན། འདྲེན་གྱི་འཁྲུལ་འཁོར་འདི་རྣམས་ཤིན་དུ་ཆུན་ཆེ་ལ་ཟབ་པ་གཅིག་ཡོད་པ་ཡིན་པས་བརྩོན་འགྲུས་བསྐྱེད་དེ་གགས་ལས་རྒྱལ་བར་བྱེད་དོ་གསུང་།
དེ་ལྟར་སྔོན་འགྲོ་ལ་དམིགས་པ་གསུམ། དངོས་གཞི་ལ་ལྔ། རྗེས་ལ་གཉིས་སྟེ་ཐབས་ལམ་ལ་དམིགས་པ་བཅུ་མཛད་ཀྱི་འདུག་གོ
།འདིའི་སྐབས་སུ་སྒྱུ་ལུས་ཀྱི་སྤྱི་བཀའ་མཛད་དོ།

།སྤྱི་དོན་གཉིས་པ་སྒྱུ་ལུས་ལ་གསུམ་སྟེ། དབང་པོ་རབ་བླ་མ་དམ་པ་གྲོགས་སུ་བསྟེན་པ། འབྲིང་ཚིག་གཞན་གྱིས་བར་མ་ཆོད་པར་འཁྲིད་པ། ཐ་མ་མལ་གཅིག་དུ་ཏིང་ངེ་འཛིན་སྐྱེས་པའོ།
།དང་པོ་ལ་གཉིས་ཏེ། གསོལ་འདེབས་བླ་མ་ལམ་འཁྱེར་དང་། ཅིར་སྣང་བདེན་མེད་ལམ་འཁྱེར་རོ།
།དང་པོ་ནི། བླ་མ་གྲོགས་སུ་སྟེན་པ་གསུངས་པས། ཅིའི་ཕྱིར་གྲོགས་སུ་ཤེས་བྱ་ཞེ་ན། འདུ་འབྲལ་མེད་པར་སྟེན་པའི་དོན་གྱིས་ན་གྲོགས། བླ་མས་གོང་ནས་གོང་དུ་འཁྲིད་པར་བྱེད་པའི་དོན་གྱིས་ན་གྲོགས། ཡོན་ཏན་བསྐྱེད་པར་བྱེད་པའི་དོན་གྱིས་ན་གྲོགས། སངས་རྒྱས་ཚེ་གཅིག་གམ་ལོ་ཟླ་ཙམ་གྱིས་གཏེར་བར་བྱེད་པས་ན་གྲོགས་བཟང་པོ་དང་འདྲ་བའི་དོན་གྱིས་ན་གྲོགས་སུ་བསྟེན་པ་ཟེར་བ་ཡིན་ནོ་གསུང་། དེ་ཉམས་སུ་ལེན་པ་ལ། སྔོན་འགྲོ་སྐྱབས་འགྲོ་ནས་གསོལ་བ་གདབ་པ་ཡར་ཆད་སྔར་དང་འདྲ། ཁྱད་པར་འདི་ལ་མི་རྟག་སྐྱོ་ཤས་སྔོན་འགྲོ་ཡིན་གསུང་པས། དབེན་པའི་གནས་སུ་འཁོར་བ་ལ་སྐྱོ་ཤས་དྲག་པོ་བསྐྱེད་དེ། སྔར་སྐྱེས་པ་ཐམས་ཅད་ནི་ཤི་འདུག །ད་སྐྱེ་བ་ཐམས་ཅད་ནི་འཆི་ངེས་པ་དེར་འདུག །ད་ལྟ་ས་ཐོག་ན་ཡོད་པ་ཐམས་ཅད་ཀྱང་མ་ཤི་བར་ཚེ་ཐར་དུ་བསྡོད་པ་གཅིག་ཀྱང་མི་འདུག ཤི་ནས་ཅང་མེད་སྟོང་པ་གཅིག་དུ་ནི་མི་འགྲོ། ཡང་ལས་ཀྱི་དབང་གིས་ངན་སོང་གསུམ་དུ་སྐྱེ་ཞིང་རིགས་དྲུག་དུ་ཀ་འཁོར་བར་འདུག །དེ་གང་དུ་སྐྱེས་ཀྱང་ནི་སྐྱིད་དང་གྲོག་སྤུ་ཙམ་ཡང་མི་འདུག །ཁོང་ཚོ་ཤི་འོས་གཅིག་ཤི་ནས་འོ་ཅག་བསྡོད་འོས་གཅིག་ལས་པར་ནི་མི་འདུག །དོ་ནུབ་རང་འཆིའམ། སང་འཆིའམ། ནམ་འཆི་ཆ་མི་འདུག་པ་ཨ་ཙ་མ་ན་སྙམ་པ་འཆི་བ་མི་རྟག་པ་དུངས་དུངས་པ་ཀམས་ཀམས་པ། སྣང་པ་བཀྲག་མེད་ཟི་བུན་པ་སྒོམ་དགོས། འདི་གལ་ཤིན་དུ་ཆེ་གསུང་། འདི་ནས་བཟུང་ནས་བདག་བསྐྱེད་བདེ་མཆོག་ལ་བྱེད་པ་ཡིན་གསུང་པས། རང་ལུས་བདེ་མཆོག་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་ཕག་མོ་དམར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། ཞབས་གཡས་རྐྱང་པས་དུས་མཚན་དང་། གཡོན་བསྐུམ་པས་འཇིགས་བྱེད་མནན་པ། མིག་གོ་སྐམ་རློན་དང་རུས་པས་བརྒྱན་པ། སྟག་གི་ལྤགས་པའི་ཤམ་ཐབས་ཅན། སྣང་ལ་རང་བཞིན་མེད་པ་བར་སྣང་དུ་འཇའ་ཤར་བ་ལྟ་བུར་བསྐྱེད། དེའི་སྤྱི་བོར་གདན་བཞི་རྩེགས་ལ་རང་གི་རྩ་བའི་བླ་མ་སྒོམ་སྟེ། གོང་དུ་བསྟན་པ་བཞིན་མི་གསལ་བ་མེད་པར་གསལ་བསིང་པ་འོད་དང་འོད་ཟེར་གྱི་རང་བཞིན་ཅན་བསྒོམས་ལ། དེའི་མདུན་དུ་གནོད་བྱེད་དང་། གཞི་བདག་གིས་གཙོ་བྱས་པའི་རིགས་དྲུག་གི་སེམས་ཅན་ཐམས་ཅད། ལུས་གུས་པས་ཐལ་མོ་སྦྱར། ངག་གུས་པས་གསོལ་བ་འདེབས། ཡིད་གུས་པས་མོས་གུས་སུ་ཞུང་ཞུང་པ་རམ་འདེགས་ཀྱི་ཚུལ་དུ་ཀུ་དི་རི་རི་གསོལ་བ་འདེབས་པར་བསམས་ལ། གསོལ་བ་རྩེ་གཅིག་དུ་གདབ་སྟེ།
ཐེམས་ཡིག་ལས། དབང་པོ་རབ་དང་འབྲིང་པོ་ལ། །གསོལ་འདེབས་ལྔ་ལ་འདུན་པ་གསུམ། གསུངས་པས།
བླ་མ་སང་རྒྱས་རིན་པོ་ཆེ། བདག་གིས་བདག་འཛིན་བློས་ཐོངས་པར་བྱིན་གྱིས་བརླབ་དུ་གསོལ། དགོས་མེད་རྒྱུད་ལ་སྐྱེ་བར་བྱིན་གྱིས་བརླབ་དུ་གསོལ། སྒྱུ་ལུས་འབྱོངས་པར་བྱིན་གྱིས་བརླབ་དུ་གསོལ། ད་ལྟ་ཉིད་དུ། མྱུར་བ་ཉིད་དུ། འདུག་ས་འདི་ཉིད་དུ། སྒོམ་ཐུན་གཅིག་པོ་འདི་ཉིད་ལ་རྒྱུད་ལ་སྐྱེ་བར་བྱིན་གྱིས་བརླབ་དུ་གསོལ། ཞེས་གསོལ་བ་རྩེ་གཅིག་དུ་གདབ། འདི་ལ་གསོལ་འདེབས་བླ་མ་ལམ་ཁྱེར་གསུང་པས། ཅིས་ཀྱང་ཡངས་མེད་རང་དུ་གསོལ་བ་འདེབས་པ་རང་བྱེད་དོ་གསུང་། སངས་རྒྱས་ཐོབ་པར་བྱེད་པའི་ཐབས་ཀྱི་མཆོག་མཐར་ཐུག་པ་བླ་མའི་མོས་གུས་དང་གསོལ་བ་འདེབས་པ་ཡིན་ཏེ། ལྷ་སྐུ་བསྐལ་པ་སྟོང་དུ་བསྒོམས་པ་བས། བླ་མ་དྲན་པ་བསོད་ནམས་ཆེ་སྟེ།
ཡེ་ཤེས་གསལ་བ་སྒྲོན་མེའི་རྒྱུད་ལས། མཚན་དང་དཔེ་བྱད་ལྡན་པའི་ལྷ། །སྐལ་པ་སྟོང་དུ་བསྒོམས་པ་བས། །བླ་མ་དྲན་པ་བསོད་ནམས་ཆེ། །ལྷ་སྐུ་མ་སྒོམ་བླ་མ་བསྒོམས། །ལྷ་སྐུ་བྱེ་བ་སྟོང་སྒོམས་པས། །བླ་མ་དྲན་པ་བསོད་ནམས་ཆེ། །ཞེས་གསུངས་ཞིང་།
བླ་མ་ལ་མོས་གུས་ཀྱི་སྙིང་ཕུར་ཐེབས་པས་གསོལ་བ་འདེབས་ནུས་ན། སངས་རྒྱས་སྟོང་གི་ཡོན་ཏན་ཡང་འཛིན་པར་གསུངས་ཏེ།
ཨ་ཏི་བཀོད་པའི་རྒྱུད་ལས། གསང་པ་སྔགས་ལས་བྱུང་པ་ཡི། །བླ་མ་དྲིན་དང་ལྡན་པ་ཉིད། །སྤྱི་བོའི་གཙུག་གམ་སྙིང་གི་དཀྱིལ། །ལག་པའི་མཐིལ་དུ་སུས་བསྒོམས་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། །ཞེས་གསུངས།
བརྟག་གཉིས་ལས། གཞན་གྱིས་བརྗོད་མིན་ལྷན་གཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟེན་པ་དང་། །བདག་གི་བསོད་ནམས་ལས་ཤེས་བྱ། །ཞེས་གསུངས།
ཡེ་ཤེས་གསལ་བ་སྒྲོན་མེའི་རྒྱུད་ལས། སྐྱ་བ་འཛིན་པ་མེད་པར་ནི། །གྲུ་ཡིས་ཕ་རོལ་ཕྱིན་མི་འགྱུར། །ཡོན་ཏན་ཐམས་ཅད་རབ་རྫོགས་ཀྱང་། །བླ་མ་མེད་པར་སྲིད་མཐར་མིན། །ཞེས་གསུངས་སོ།
།བླ་མ་ལ་གསོལ་བ་འདེབས་པ་འདིས་ནི། ལམ་ལྔ་ས་བཅུ་ཐམས་ཅད་མོས་གུས་གཅིག་གིས་བསྒྲོད་པ་ཡིན་ནེ།
ཡེ་ཤེས་ཀྱི་མཁའ་འགྲོ་མ་ནི་གུ་མའི་ཞལ་ནས། ས་བཅུ་ལམ་ལྔའི་རིམ་པ་རྣམས། །མོས་གུས་སྟོབས་ཀྱིས་བསྒྲོད་པར་བྱེད། །བླ་མའི་སྣང་པ་མི་བྲལ་བ། །རྒྱུད་སྡེའི་དགོངས་པ་གནད་ཀྱི་མཆོག །ཅེས་གསུངས་ཤིང་།
རིན་པོ་ཆེ་རྨོག་ལྕོག་པའི་ཞལ་ནས། ཚེ་གཅིག་གིས་སངས་རྒྱ་བ་ལ་བླ་མའི་མོས་གུས་དགོས་གསུང་། ཁོང་རང་གི་ཐག་ཆོད་ཀྱི་གསུང་གཅིག་ལ། ཐུགས་རྗེ་ཆེན་པོ་རང་ཤེས་དཀར་ནའང་དཀར། །དགྱེས་རྡོར་བདེ་མཆོག་རང་ཤེས་སྔོ་ནའང་སྔོ། །ང་ལ་ནི་རེས་ས་བླ་མ་ལས་མེད། ཇི་ལྟར་འདུག་ཀྱང་བླ་མའི་སྣང་པ་དང་འབྲལ་མ་མྱོང་པས། ཚེ་གཅིག་ལུས་གཅིག་གིས་སངས་རྒྱས་སམ་དེ་ད་སོད་ཡོང་ཡོང་འདྲ་གསུང་།
བླ་མ་སྐྱེར་སྒང་པའི་ཞལ་ནས། ཚེ་གཅིག་ལུས་གཅིག་གིས་སངས་རྒྱ་བ་ལ་བླ་མའི་མོས་གུས་དགོས། བླ་མའི་མོས་གུས་ལ། བླ་མ་ཡང་ཡང་དྲན་པ། བུ་གཅིག་པོ་ཤི་བའི་མ་ལྟ་བུ་གཅིག་དགོས་གསུང་།
སངས་རྒྱས་གཉན་སྟོན་གྱི་ཞལ་ནས། ཚེ་གཅིག་གིས་སངས་རྒྱ་བ་ལ་བླ་མའི་མོས་གུས་དགོས། བླ་མའི་མོས་གུས་ལ། སྙིང་ཁོང་རུས་པའི་གཏིང་ནས་མཆི་བ་རང་དབང་མེད་པར་གསོལ་བ་འདེབས་པ་གཅིག་དགོས་གསུང་།
ཆོས་རྒྱལ་སངས་རྒྱས་སྟོན་པའི་ཞལ་ནས། ཚེ་གཅིག་གིས་སངས་རྒྱ་བ་ལ་བླ་མའི་མོས་གུས་དགོས། བླ་མའི་མོས་གུས་ལ་བརྗེད་ངས་ལོག་ལྟར་མ་ཤོར་བ་གཅིག་དགོས། ཡང་ན་བླ་མ་བརྗེད། ཡང་ན་ལོག་ལྟ་བྱེད་པ་དེ་འདྲ་ལ་བྱིན་བརླབས་མི་འཇུག་གསུང་།
མཁས་གྲུབ་ཆོས་རྗེ་ལ། སངས་རྒྱས་སྟོན་པའི་ཞལ་ནས། སློབ་དཔོན་གྱིས་ཀྱང་གཅིག་མཛོད་དང་གསུངས་པས། མཁས་གྲུབ་ཆོས་རྗེའི་གསུང་ནས། ཚེ་གཅིག་གིས་སངས་རྒྱས་སྒྲུབ་པ་ལ་བླ་མའི་མོས་གུས་དགོས་ལ། དེ་ལའང་བླ་མ་དང་གོ་འདྲིས་མ་ཁྱེར། གདམས་ངག་ལ་སྣ་དྲེད་མ་ཁྱེར་བ་གཅིག་རང་དགོས་པར་གདའ་ཞུས་པས། ཆོས་རྒྱལ་སྟོན་པའི་གསུང་ནས། དེ་ཤིན་དུ་བདེན་པར་འདུག །དང་པོ་ངའི་རྩར་ཡོངས་པ་ཀུན་ཡང་། གཉིད་ཆུང་པ། ཟར་ཆེ་བ། དད་པ་ཆེ་བ། ང་ལོ་ཡང་ས་ཡོད་པ་ལ་ཕྱིས་དེ་བཞིན་མི་ཡོང་པར་འདུག་གསུང་།
རིན་པོ་ཆེ་གསེར་གླིང་པའི་ཞལ་ནས། བླ་མ་ལ་ཆོས་སྐུའི་འདུ་ཤེས་ཀྱིས་གསོལ་བ་འདེབས་པ་འདི་རྐྱེན་ཅི་བྱུང་ཡང་བླ་མ་དྲན་པ་ཙམ་གྱིས་སེལ་ཞིང་། ན་ཚ་དང་སྡུག་བསྔལ་ཅི་བྱུང་ཡང་དེའི་ངོ་བོ་བླ་མར་བསྒོམས་པས་སེལ་བ་ནད་བརྒྱའ་སྨན་གཅིག་བྱ་བ་དེ་འདི་རང་ཡིན་ནོ་གསུང་།
གཞན་ཡང་བླ་མ་གཉན་གྱི་ཞལ་ནས། བླ་མ་རྗེ་བཙུན་ཆེན་པོ། རིན་པོ་ཆེ་འབྲི་ཁུང་པ། ཞང་རིན་པོ་ཆེ། དུས་གསུམ་མཁྱེན་པ། གཙང་པ་རྒྱ་ལ་སོགས་པ་ཐམས་ཅད་ཀྱི་དྲུང་དུ་ཕྱིན་པས། བླ་མའི་མོས་གུས་གཅིག་པོས་ལམ་བསྒྲོད་པ་ལ་ཀུན་འཐུན་པར་འདུག་གོ་གསུང་།
བླ་མ་བཛྲ་ཤྲིའི་ཞལ་ནས། སངས་རྒྱས་ཀྱི་བསྒྲུབ་ལུགས་མང་ལགས་ཀྱང་། བླ་མ་ལ་གསོལ་བ་འདེབས་པའི་གོང་ན་མེད་གསུང་པས། ལས་སླ་ལ་ས་ཆོད་ཆེ་བའི་བླ་མའི་མོས་གུས་འདི་ཡིན་ནོ་གསུང་།
དེ་རྣམས་དམིགས་པའི་རྗེས་ལ་མོས་གུས་ལ་ཡིད་ཆེས་པའི་ཐབས་སུ་གསུང་གི་གདའོ།
།གཉིས་པ་ཅིར་སྣང་བདེན་མེད་ལམ་འཁྱེར་ལ་གཉིས། མཉམ་བཞག་དང་། རྗེས་ཤེས་ལམ་འཁྱེར་རོ།
།དང་པོ་ནི། གོང་བཞིན་དུ་གསོལ་བ་རྩེ་གཅིག་དུ་གདབ་པས་འཇིག་རྟེན་གྱི་སྣང་པ་བདེན་མེད་དུ་ཕྱམས་སོང་པའི་ངང་རྗེས་ལ། རང་བདེ་མཆོག་ཡབ་ཡུམ་དུ་བསྒོམས་པའི་རྒྱན་ཆ་ལུགས་ཕྱག་མཚན་རྣམ་པ་བཞུགས་ཚུལ་དང་ལྡན་པ་འདི། རང་གི་བློས་བཀོད་བློ་ལ་ཤར་བ་མ་གཏོགས་ཕྱི་རོལ་ན་དོན་ལོགས་སུ་གྲུབ་པ་གཅིག་ཀྱང་མི་འདུག །སྣང་ཡང་བདེན་མེད་ཡིན་སྙམ་དུ་བསམ། དེ་བཞིན་དུ་སྣང་ཞིང་སྲིད་པས་བསྡུས་པའི་ཆོས། དགྲ་སྡང་པ། གཉེན་བྱམས་པ། བདག་གཞན་སྣོད་བཅུད་དང་བཅས་པ་འདི་རྣམས་རང་གི་བློས་བཟུང་བློས་བཀོད་པ་མ་རྟོགས་ཕྱི་རོལ་ན་དོན་ལོགས་སུ་གྲུབ་པ་མི་འདུག་པས། སྣང་གི་འདུག་ཀྱང་བདེན་མེད་ཡིན། བཤིས་རང་བདེན་མེད་ཡིན་པ་ལ་དེ་ལྟར་ངོ་མ་ཤེས་པས་འཁོར་བར་འཁྱམས་པ་ཡིན་ཨང་སྙམ་དུ་བསམ། དེ་ལྟར་རྩེ་གཅིག་དུ་བསྒོམས་པ་མཉམ་བཞག་ཡིན་ནོ་གསུང་ངོ་།
།གཉིས་པ་རྗེས་ཤེས་ནི། འགྲོ་འཆག །ཉལ་འདུག །ཟས་གོས། གཏམ་སྨྲ་བ་ལ་སོགས་པའི་སྤྱོད་ལམ་རྣམ་བཞི་ཐམས་ཅད་དུ། ང་དོ་ནུབ་འཆི་ནང་པར་འཆི་ཅིས་ཀྱང་ཅི་བྱེད་སྙམ་པ། བླ་མའི་སྣང་པ་དང་མི་འབྲལ་བ་མོས་གུས་སུ་ཞུང་ཞུང་པ། ངེས་པར་རང་བདེན་མེད་ཡིན་སྙམ་པ་མདུན་པ་གསུམ་དང་འབྲལ་མེད་ཡེངས་མེད་དུ་བྱེད་དེ། དེས་ཉིན་པར་གྱི་དུས་འདའ། ནུབ་མོ་ཉལ་དུས་སུ་མལ་བདེ་བར་ཉལ། གསོལ་བ་ཞེ་དུངས་པ་འདེབས་པ་གལ་ཆེ་གསུང་ནས་ནན་ཏན་མཛད། རྨི་ལམ་འཛིན་པའི་འདུན་པས། གཉིད་ལོག །རྨི་ལམ་དུ་གཡང་ལ་ལྟུང་པའམ། དགྲ་འམ་ཁྱིས་དེད་པ་ལ་སོགས་པ་རྨི་ལམ་མི་འཚམ་པ་རྨིས་ན། དེ་རྨི་ལམ་དུ་དྲན་པས་ཚིར་བཟུང་། དེ་རྨི་ལམ་དུ་ཤེས། རྨི་ལམ་བདེན་མེད་སྒྱུ་མར་ཤེས། སྒྱུ་མ་སྒྱུར་འཛིན་དང་བྲལ་བ་འོད་གསལ་ཕྱག་རྒྱ་ཆེན་པོ་རང་ཤར་དུ་འབྱུང་སྟེ། དེ་ལྟར་བསྒོམས་པས་གཡས་ནས་བསྟོད་པ་དང་། ཙན་དན་གྱིས་བྱུགས་པ་ལ་དགའ་བ་དང་། གཡོན་ནས་སྨོད་པ་དང་། ཁྱི་ལུད་ཀྱིས་བྱུགས་པ་ལ་མི་དགའ་བ་མེད་པ། དགག་སྒྲུབ་རང་གྲོལ་བས་སྒྱུ་ལུས་ཆགས་སྡང་རང་གྲོལ་བྱ་བ་ཡིན་གསུང་ངོ་། །དབང་པོ་རབ་བླ་མ་དམ་པ་གྲོགས་སུ་བསྟེན་པ་ལམ་ལྔ་ས་བཅུ་བསྒྲོད་པ་བྱ་བ་ཡིན་གསུང་ངོ་།
།གཉིས་པ་དབང་པོ་འབྲིང་པོ་ནི། དེ་ལྟར་ཅུང་མ་འགྱུར་ཅིང་། དབང་པོ་རབ་ལ་དགེ་སྦྱོར་མ་སྐྱེས་ན། བླ་མ་ལ་ཆོས་སྐུའི་འདུ་ཤེས་མ་སྐྱེས་ཅིང་། མོས་གུས་དང་རྩོལ་བ་ཅུང་ཞན་པས། དབང་པོ་འབྲིང་དུ་གྱུར་པ་ཡིན་གསུང་། དེ་ལ་ཚིག་གཞན་གྱིས་བར་མ་ཆོད་པར་འཁྲིད་པ་གསུང་སྟེ། དེ་ལ་ཚིག་གཞན་གྱིས་བར་མ་ཆོད་པ་ཞེས་ཅིའི་ཕྱིར་བྱ་ཞེ་ན། ཐ་མལ་གྱི་ལོང་གཏམ་ལ་སོགས་པ་ལྟ་སྨོས་ཀྱང་ཅི་དགོས་ཏེ། ཆོས་ཕྱོགས་ཀྱིའང་མདོའ་འདོན་པ་དང་། སྔགས་བཟླས་པ་ལ་སོགས་པའང་རེ་ཤིག་བཞག་ལ། རྩེ་གཅིག་དུ་ཉམས་སུ་ལེན་པ་ཡིན་ནོ་གསུང་།
དེ་ལ་གཉིས་སྟེ། རང་ལུས་སྣང་སྟོང་ལྷ་སྐུ་དང་། ཅིར་སྣང་སྒྱུ་མ་ལམ་འཁྱེར་རོ།
།དང་པོ་ནི་སྐྱབས་འགྲོ་སེམས་བསྐྱེད་ཡན་ཆད་སྔར་དང་འདྲ། བླ་མའི་རྣལ་འབྱོར་ལ་ཤིན་དུ་ནན་ཆེ་བ་གསུང་སྟེ། བླ་མ་ལ་སངས་རྒྱས་དངོས་ཀྱི་འདུ་ཤེས་བཅོས་མ་མ་ཡིན་པ་བསྐྱེད། གསོལ་བ་ཉིན་མཚན་དུ་སྦྲེལ་ལ་གདབ། དེ་ཡང་གོང་བཞིན། བདག་འཛིན། དགོས་མེད། སྒྱུ་ལུས། རྨི་ལམ། འོད་གསལ་ཕྱག་རྒྱ་ཆེན་པོ་རྒྱུད་ལ་སྐྱེ་བར་བྱིན་གྱིས་བརླབ་དུ་གསོལ། ཞེས་སྙིང་ཁོང་རུས་པའི་གཏིང་ནས་མཆི་བ་རང་དབང་མེད་པར་གསོལ་བ་རྩེ་གཅིག་དུ་གདབ་པ་འདི་ཁོ་ན་རང་གནད་ཡིན་གསུང་། དེ་ལྟར་གསོལ་བ་གཏབ་པས་སྣང་པ་བདེན་མེད་དུ་ཕྱམ་སོང་པ་དང་། རང་གི་ལུས་བདེ་མཆོག་དུ་བསྒོམས་པའི་སྐུ་མདོག་ཕྱག་མཚན་རྣམ་པ་བཞུགས་ཚུལ་དང་ལྡན་པས་སྣང་ཞིང་གསལ་བ་དེ་ཉིད་རང་གི་བློས་བཀོད། བློས་བཟུང་ཞིང་བློ་ལ་དེ་ལྟར་དུ་ཤར་བ་མ་རྟོགས་ཕྱི་རོལ་ན་དོན་ལོགས་སུ་གྲུབ་པ་སྤུ་ཙམ་ཡང་མེད་ཨང་སྙམ་དུ་ཐག་སད་བཅད་ལ། འདི་རྣམས་སྣང་ནི་སྣང་། བདེན་ནི་མི་བདེན། འདི་རྨི་ལམ་ཡིན། སྒྱུ་མ་ཡིན། ཁྱད་པར་དུ་སྒྱུ་མ་ཡིན། ཞེས་ངག་དུ་ཡང་རྒྱུན་དུ་བརྗོད་ཅིང་། ཡིད་དེ་དང་འབྲལ་མེད་དུ་བྱེད་དེ།
ཁྱིའུ་རབ་སྣང་གིས་ཞུས་པའི་མདོའ་ལས། ཆོས་རྣམས་རྨི་ལམ་སྒྱུ་མ་ཞེས། །གང་གིས་ཚིག་བརྗོད་དྲན་གྱུར་ན༌པ། །སྲིད་པའི་འཆིང་པ་ལས་གྲོལ་ནས། །ཚེ་འདི་ཉིད་ལ་སངས་རྒྱས་ངེས། །ཞེས་གསུངས་པས།
མཉམ་བཞག་དང་། དེས་མཚོན་ནས། གཉིད་ལོག་པ། དེ་ལས་སད་པ། འགྲོ་འཆག་ལ་སོགས་པ་ཐམས་ཅད་དུ་ངག་དུ་ཡང་རྨི་ལམ་ཡིན་སྒྱུ་མ་ཡིན། བདེན་མེད་ཡིན་ཞེས་རྒྱུན་དུ་བརྗོད། ཡིད་ཀྱང་དེ་དང་འབྲལ་མེད་དུ་བྱེད་པ་ཡིན་ཏེ། སྒྱུ་ལུས་བདེན་མེད་ཀྱི་གནད་གསུང་། དོ་ནུབ་འཆི་ནང་པར་འཆི་ཅིས་ཀྱང་ཅི་བྱེད་སྙམ་པ། ཡིད་བླ་མའི་མོས་གུས་སུ་ཞུང་ཞུང་པ། སྣང་གྲགས་འདི་ཐམས་ཅད་བདེན་མེད་ཡིན་སྙམ་པའི་འདུན་པ་གསུམ་པོ་འབྲལ་མེད་ཡེངས་མེད་དུ་བྱེད་པ་ཡིན་ནོ་གསུང་། ངག་དུ་ཡང་སྒྱུ་མ་རྨི་ལམ། སེམས་ཀྱིས་ཀྱང་སྒྱུ་མ་རྨི་ལམ་གྱི་རྩིས་ཟིན་པར་བྱས་ལ། ཅི་བྱས་དགེ་སྦྱོར་དུ་འགྲོ་བ་ཡིན་ནོ་གསུང་། འདིའི་སྐབས་སུ་ཚེ་འདི་བློས་བཏང་པའི་ཐབས་འཆི་བ་མི་རྟག་པ་དྲན་པ། སྣང་པ་འདི་ཐམས་ཅད་རང་གི་སེམས་དེར་ཤར་བ་ཡིན་པ། སེམས་དེའང་སྒྱུ་མ་རྨི་ལམ་ཙམ་དུ་སྒོམས་པ་ལ་ཡིད་ཆེས་ཀྱི་ལུང་དང་། གཏམ་རྒྱུད་ཁ་ཡར་གཅིག་གསུང་གི་གདའ་སྟེ་འདིར་མངས་པས་ལོགས་སུ་བྲིས་པ་ལ་གཟིགས།
གཉིས་པ་ཅིར་སྣང་སྒྱུ་མ་ལམ་ཁྱེར་ནི། སྔོན་འགྲོ་གསོལ་འདེབས་ཡར་ཆད་འདྲ། དངོས་གཞི་ལའང་གཞན་འདྲ། ཁྱད་པར་འདི་ལ་གཉེན་པོ་དྲག་པོ་རང་གཏོང་སྟེ། གཉེན་པོ་དྲག་པོ་ཡོད་ན་ལུང་མ་བསྟན་དུ་མི་འདུས། རྐྱེན་དབང་དུ་མི་འཆོར་སྟེ། དཔེར་ན། འདུན་པའི་ཁྱད་པར་གྱིས་འགྲོན་པོ་མང་པོ་ཡོད་ཀྱང་། ཇག་པ་ཉུང་ཉུང་གིས་ཆོམས་ཏེ། སྔོན་དུ་འདུན་པ་དང་གཉེན་པོ་ཡོད་མེད་ཡིན་གསུང་པས། དགེ་སྦྱོར་སྤྱོད་ལམ་ཅི་བྱེད་ཀྱི་སྔོན་དུ། སྒྱུ་མ་རྨི་ལམ་སྒྱུ་ལུས་བདེན་མེད་ཟང་ཐལ་དུ་ཐོངས་པས་ཅིས་ཀྱང་བྱེད་དགོས་སྙམ་པ་དེས་རྩིས་ཟིན་པར་བྱས་ནས། འདི་ལྟར་སྣང་པའི་དངོས་སོ། །ཕྱིའི་ས་ཆུ་མེ་རླུང་། ས་རྡོ་རི་བྲག །རྩི་ཤིང་ནགས་ཚལ། རི་ར་བ་ཁང་ཁྱིམ་རྩིག་པ་རེ་ལྡེ། ནང་བཅུད་ཀྱི་སེམས་ཅན། སྐྱེས་པ་བུད་མེད། དགྲ་གཉེན་རྟ་གླང་ལ་སོགས་པར་སྣང་པ་འདི་ཐམས་ཅད། རང་གི་བློས་བཀོད། བློ་ལ་ཤར་བ་མ་གཏོགས། ཕྱི་རོལ་ན་དོན་ལོགས་སུ་གྲུབ་པ་གཅིག་ཀྱང་མེད་དེ། འདི་རྣམས་སྣང་ནི་སྣང་། བདེན་ནི་མི་བདེན། འདི་ཀ་རྨི་ལམ་ཡིན་སྒྱུ་མ་ཡིན་ཞེས་ངག་དུ་བརྗོད། ཡིད་ལ་འབྲལ་མེད་དུ་བསྒོམ། གོང་བཞིན་འདུན་པ་གསུམ་འབྲལ་མེད་དུ་བྱེད་ཅིང་། ཉིན་པར་གྱི་དུས་ཀྱི་འགྲོ་འཆག་ཉལ་འདུག་ཟས་གོས་གཏམ་སྙན་མི་སྙན་ལ་སོགས་པ་ཆགས་སྡང་གི་ཡུལ་དང་ཕྲད་པའི་ཚེ། ང་གཉིད་དུ་སོང་ནས་འདུག །ད་ལྟའི་སྤྱོད་ལམ་འདི་རྨི་ལམ་གྱི་འགྲོ་འཆག་ལ་སོགས་པ་རྨི་ལམ་གྱི་ཆགས་སྡང་ལ་སོགས་པར་འདུག་སྙམ་པས། ངག་དུ་སྒྱུ་མ་རྨི་ལམ། ཡིད་ཀྱང་སྒྱུ་མ་རྨི་ལམ་གྱི་རྩིས་ཟིན་པར་བྱེད་དེ། དེ་ལྟར་བྱས་པས་མཚན་མོ་གཉིད་དུ་སོང་དུས། རྨི་ལམ་དུ་ཤེས་ཤིང་ངོས་ཟིན། དེ་སྒྱུ་མར་ཤེས། སྒྱུ་མ་སྒྱུར་འཛིན་དང་བྲལ་བ་འོད་གསལ་ཕྱག་རྒྱ་ཆེན་པོའོ་གསུང་། དུས་ཐམས་ཅད་དུ་ང་དོ་ནུབ་འཆི་ནང་པར་འཆི། ཅིས་ཀྱང་ཅི་བྱེད་སྙམ་པ། བླ་མའི་མོས་གུས། ཅིས་ཀྱང་བདེན་མེད། འདུན་པ་གསུམ་འབྲལ་མེད་དུ་བྱེད་དེ། རྣལ་འབྱོར་ཆོས་གཡུང་གིས་དེ་གསུམ་བསྒོམས་པས་ཆོས་དྲུག་གི་ཡོན་ཏན་ཐམས་ཅད་སྐྱེས་པ་ཡིན་གསུང་། དབང་པོ་འབྲིང་ཚིག་གཞན་གྱིས་བར་མ་ཆོད་པར་འཁྲིད་པ་ས་བཅུ་ལམ་ལྔ་བསྒྲོད་པ་བྱ་བ་ཡིན་ནོ་གསུང་།
དབང་པོ་ཐ་མ་ནི། དབང་པོ་འབྲིང་ལ་དགེ་སྦྱོར་མ་སྐྱེས་ན། བླ་མ་ལ་ཆོས་སྐུའི་འདུ་ཤེས་མ་སྐྱེས་ཤིང་། མོས་གུས་དང་འདུན་པ་ཞན་པས་དབང་པོ་ཐ་མར་སོང་པ་ཡིན་གསུང་། དེ་ལ་མལ་གཅིག་དུ་ཏིང་ངེ་འཛིན་སྐྱེས་པ་གསུང་པས། དེ་ལ་སད་བཞིས་མ་ཁྱེར་ཅིང་། མལ་གྱི་དྲོད་མ་ཡལ་བ་གཅིག་ཉམས་སུ་ལེན་དགོས་གསུང་།
སད་བཞི་ནི། འགྲོ་འདུག་མང་པོ་དགེ་སྦྱོར་གྱི་སད། འཕོས་སྐྱས་མང་པོ། བློ་སྣ་མང་པོ། ལོང་ལྟ་མང་པོ་དགེ་སྦྱོར་གྱི་སད་དེ།
དེ་བཞིས་མ་ཁྱེར་བར་ཉམས་སུ་ལེན་པ་ལ་བཞི་སྟེ། འགྲོ་དྲུག་སྒྱུ་མར་འཆར་བྱེད། ནད་གདོན་སྒྱུ་མ་ལམ་ཁྱེར། འཆར་བྱེད་ཡོན་ཏན་ཚོགས་དྲུག །ཞེན་མེད་སྒྱུ་མ་རང་ཤར་རོ།
།དང་པོ་ལ། སྔོན་འགྲོ་བླ་མའི་རྣལ་འབྱོར་ཡན་ཆད་སྔར་དང་འདྲ།
ཐེམས་ཡིག་ལས། །སྒྱུ་ལུས་དབང་པོ་ཐ་མ་ལ། །གསོལ་འདེབས་གསུམ་ལ་འདུན་པ་གསུམ། གསུངས་པས།
བདག་འཛིན། དགོས་མེད། སྒྱུ་ལུས་འབྱོངས་པར་བྱིན་གྱིས་བརླབ་དུ་གསོལ། ཞེས་གསོལ་བ་གདབ། ལུས་ཆོས་བདུན། བདག་བདེ་མཆོག་དུ་གསལ་བའི་ལྟེ་འོག་ཏུ་ཆོས་འབྱུང་ཕྱི་དཀར་ལ་ནང་ཅུང་ཟད་དམར་བ་འོད་ཀྱི་རང་བཞིན་དུ་བསམ། དེའི་ནང་དུ་དམྱལ་བ་ལ་སོགས་པའི་རིགས་དྲུག་གི་སེམས་ཅན་རྣམ་ཤིན་དུ་གསལ་བ་འོད་དུ་ལྟེམ་ལྟེམ་པ་བསྒོམ། འོག་རླུང་བལྐུམ་པས་རིགས་དྲུག་རྣམས་རང་རང་གི་དུ་ཁ་གྱིས་ཉམས་ཐག་པ་ཉེན་སྐད་དུ་རྩི་རྩི་བ་འོད་དུ་ལྟེམ་ལྟེམ་པ་བསམ། བདག་གིས་གཙོ་བྱས་པའི་རིགས་དྲུག་གི་སེམས་ཅན་འདི་རྣམས་མི་བདེན་པ་ལ་བདེན་པར་བཟུང་ནས། འཁོར་བ་འབའ་ཞིག་དུ་འཁྱམས་པ་འདི་རྣམས་སྙིང་རེ་རྗེ་སྙིང་རེ་རྗེ་སྙམ་པ་དང་། འདི་རྣམས་སྣང་ནི་སྣང་། བདེན་ནི་མི་བདེན། འདི་ཀ་རྨི་ལམ་ཡིན། སྒྱུ་མ་ཡིན། ཁྱད་པར་དུ་སྒྱུ་མ་ཡིན་སྙམ་པའི་དྲན་འདུན་དྲག་པོ་རྩེ་གཅིག་པ་བྱ། དུས་ཐམས་ཅད་དུ་གོང་བཞིན་འདུན་པ་གསུམ་པོ་འབྲལ་མེད་དུ་བྱེད་དེ། དེས་ཉིན་པར་གྱི་དུས་འདའ། དེ་ལྟར་བྱས་པས་མཚན་མོ་རྨི་ལམ་རང་ཟིན་ལ་མི་འབྱུང་མི་སྲིད་གསུང་ངོ་།
།གཉིས་པ་ལ་གཉིས་ཏེ། ནད་སྒྱུ་མ་ལམ་ཁྱེར་དང་། གདོན་སྒྱུ་མ་ལམ་ཁྱེར་རོ།
།དང་པོ་ནི། སྐྱབས་འགྲོ་ནས་གསོལ་འདེབས་ཡན་ཆད་སྔར་དང་འདྲ། ལུས་གནད། རང་ལུས་ལྷར་བསྒོམ་པའང་འདྲ། དེ་ནས་རང་ལ་ན་ཚ་ལ་སོགས་པ་བྱུང་ན། ནད་ཀྱི་ངོ་བོ་དེ་ཉིད། རང་གི་བླ་མ་དམ་པ་དེ་ཉིད་དུ་སྒོམ། དེའང་སྣང་ལ་རང་བཞིན་མེད་པ་གསལ་ལ་ངོ་བོ་སྟོང་པར་ལྟས་ཏེ། དེ་ལྟར་མེད་བཞིན་དུ་སྣང་པ་འདི་རང་གི་བདག་འཛིན་གྱི་རང་གཟུགས་ཤར་བ་ཙམ་མ་རྟོགས་བདེན་པར་གྲུབ་པ་མེད། འདི་ཀ་རྨི་ལམ་ཡིན། སྒྱུ་མ་ཡིན། ཁྱད་པར་དུ་སྒྱུ་མ་ཡིན་སྙམ་དུ་རྩེ་གཅིག་དུ་བསྒོམས་པས་ནད་བདེ་སྟོང་དུ་འཆར་བ་ནད་བརྒྱའ་སྨན་གཅིག་བྱ་བ་དེ་འདི་ཡིན་ནོ་གསུང་།
གཉིས་པ་ནི། དངོས་པ་རྨི་ལམ་དུ་གདོན་གྱི་རྣམ་པའམ་རྟོག་པ་བྱུང་ན། ལུས་ཆོས་བདུན། ལག་པ་སྤུས་མོ་ལ་བཀབ། རང་བདེ་མཆོག་དུ་གསལ་བའི་ལྟེ་འོག་ཆོས་འབྱུང་དུ། རིགས་དྲུག་གི་སེམས་ཅན་རྣམས་བསྒོམས་ལ། གནོད་བྱེད་དེ་ཡང་དམིགས་པས་བཀུག་ལ། རླུང་ནང་དུ་འཇུག་པ་དང་བསྟུན་སྟེ། རང་གི་སྣ་བུག་གཡས་ནས་བཅུག །ལྟེ་འོག་གི་ཆོས་འབྱུང་ནང་དུ་སྐྱུར་ལ་ཆོས་འབྱུང་ཁ་སྡུས་ཏེ། དཔེར་ན་སྐྱལ་པ་ཁ་སྡུས་ཏེ་བཅིངས་པ་ལྟར་གསུང་། དེ་ནས་འོག་རླུང་རྐུམ། སྟེང་རླུང་མནན་ལ་དཀྲུག་འཁོར་བྱ། དེ་ལྟར་བྱས་པས། ཁོས་རིགས་དྲུག་གི་དུ་ཁ་རྣམས་ཉམས་སུ་མྱོང་། འབྲོས་པ་ནི་མེད། ཤིན་དུ་ཉེན་པས་སྔར་གྱི་གནོད་པ་ལ་སོགས་པའི་ལས་ལ་ཤིན་དུ་འགྱོད་ཅིང་། ཉེན་སྐད་དུ་རྩི་རྩི་འདུག་པ། གནོད་སེམས་ཀྱང་ཞི་བར་བསམ། དེ་ནས་ཆོ་འབྱུང་ཁ་ཕྱེ་ནས་རླུང་ཕྱིར་འགྲོ་བ་དང་བསྡོངས་ནས་སྣ་ཕུག་གཡས་ནས་ཐོན་ནས། རང་གི་མདུན་ན་འདར་ཡེད་ཡེད་པ། ཡིད་མོས་གུས་སུ་ཞུང་ཞུང་པ་སྔར་གྱི་གནོད་པ་ལས་འགྱོད་ཅིང་ཕྱིས་སྡོམས་སེམས་དྲག་པོ་དང་ལྡན་པ་ལ་ཆུ་གཏོར་དང་། ལན་ཆགས་ཀྱི་གཏོར་མ་བྱིན་པས་ཚིམ་པ་དེ་རྒྱང་རིང་པོར་བསྐྲད་དེ། སྒྱུ་མ་རྨི་ལམ་དང་། འདུན་པ་གསུམ་འབྲལ་མེད་དུ་བྱེད་དེ། དེས་ངེས་པར་གདོན་ལས་གྲོལ་ལོ་གསུང་།
གསུམ་པ་ནི། སྔོན་འགྲོ་རྣམས་འདྲ། དངོས་གཞི་འགྲོ་དྲུག་སྒྱུ་མ་འཆར་བྱེད་བཞིན་བསྒོམས་པས། དེ་ལ་ཡོན་ཏན་དྲུག་སྐྱེ་ཏེ། འོག་རླུང་བསྐུམ་པས་དྲོད་སྐྱེ། དེས་བདེ་བ་སྐྱེ། ཐིག་ལེ་མི་འཛག །ཡུལ་སྣང་སྒྱུ་མར་འཆར། རྨི་ལམ་རང་ཟིན་ལ་འབྱུང་། སེམས་ཅན་སྨིན་གྲོལ་ལ་འགོད་ནུས་པ་རྣམས་འབྱུང་ངོ་གསུང་།
བཞི་པ་ནི། སྔོན་འགྲོ་དངོས་གཞི་འདྲ་བས་མཉམ་བཞག་གོང་བཞིན་དུ་སྒོམ་ཞིང་། རྗེས་སྤྱོད་ལམ་ཐམས་ཅད་དུ་སྒྱུ་མ་རྨི་ལམ་དུ་ཁྱེར་བས་ཅིང་སྣང་ཐམས་ཅད་བདེན་མེད་སྒྱུ་མར་རང་ཤར་ནས་ཡུལ་བཛིན་དང་ཆགས་སྡང་ཐམས་ཅད་རང་གྲོལ་ལ་འགྲོ་བ་ཡིན་པས། ཅིས་ཀྱང་ཉིན་ལ་མཚན་བཏགས་པའི་ཚུལ་གྱིས་ཉམས་སུ་ལེན། སྒྱུ་ལུས་བདེན་མེད་གནད་ཡང་ཡང་གསུང་། རྩོལ་བ་ཆུངས་ན་སྒྱུ་ལུས་ཨ་འཐས་བྱ་བ་ཡོང་པས་ཅིས་ཀྱང་འབད་པ་བྱེད་དེ། འདི་ལ། བྱུབ་ཀྱི་སེམས་བསྐྱེད་པ། ལུས་ལྷར་བསྐྱེད་པ། དེའི་སྤྱི་བོའམ་སྙིང་ཁར་བླ་མ་འབྲལ་མེད། སེམས་ཕྱག་རྒྱ་ཆེན་པོའི་ངང་ནས་དགེ་བ་ཐམས་ཅད་ལ་རྗེས་སུ་ཡི་རང་པ། དེ་ཐམས་ཅད་ཀྱང་བསྔོའ་བས་ཟིན་པ་སྟེ། ཁྱུང་པོའི་ཁྱད་ཆོས་སྒྱུ་ལུས་དྲུག་ལྡན་དུ་ཉམས་སུ་ལེན་པ་ཡིན་ནོ་གསུང་།
དེ་ལྟར་དབང་པོ་རབ་ལ་དམིགས་པ་གཉིས། འབྲིང་ལ་གཉིས། ཐ་མ་ལ་བཞི་ཏེ། སྒྱུ་ལུས་ལ་དམིགས་པ་བརྒྱད་མཛད་ཀྱི་འདུག་གོ།

།སྤྱི་དོན་གསུམ་པ་རྨི་ལམ་ཉིང་འཁྲུལ་རང་དག་ལ་དོན་དྲུག་སྟེ། རྨི་ལམ་འཛིན་པ། སྦྱང་པ། སྤེལ་པ། སྤྲུལ་བ། བསྒྱུར་བ། ཡུལ་སྣང་གཏན་ལ་དབབ་པའོ།
།དང་པོ་ལ་གཉིས་ཏེ། རྨི་ལམ་རང་ཟིན་ལ་ཐིག་ལེ་དབང་བཞིའི་གནད་དང་། དེས་མ་ཟིན་ན་གནད་འཆུག་མེད་དོ།
།དང་པོ་ལ། སྐྱབས་འགྲོ་ནས་བླ་མ་བསྒོམ་པ་ཡན་ཆད་སྔར་དང་འདྲ། གསོལ་འདེབས་ལ།
ཐེམས་ཡིག་ལས། །རྨི་ལམ་འཛིན་པར་བྱེད་པ་ལ། །གསོལ་འདེབས་གསུམ་ལ་འདུན་པ་གསུམ། གསུང་པས།
བདག་འཛིན། དགོས་མེད། རྨི་ལམ་ཟིན་པར་བྱིན་གྱིས་བརླབ་དུ་གསོལ་ཞེས་སྣང་པ་བདེན་འཛིན་ཞིག་ཞིག་ཏུ་གསོལ་བ་གདབ། ལུས་ཆོས་བདུན། རང་བདེ་མཆོག་དུ་བསྐྱེད་པ་སྔར་དང་འདྲ། དེ་ནས་རང་ལྷར་གསལ་བའི་སྤྱི་བོར་ཧཾ་དཀར་པོ་མགོ་ཐུར་དུ་ལྟ་བའི་ཀླད་སྐོར་ལས་ཐིག་ལེ་དཀར་པོ་འཐིགས་ལ་ཁད་པ། གསང་གནས་སུ་ཧཱུྃ་དམར་པོའི་ཀླད་སྐོར་ལས། ཐིག་ལེ་དམར་པོ་འཕིར་ལ་ཁད་པ་བསམ། དེ་ནས་ཧཾ་ལས་ཐིག་ལེ་དཀར་པོ་ཆད། སྙིང་ཁར་བྱོན། གཏི་མུག་དག །ཧཱུྃ་ལས་ཐིག་ལེ་དམར་པོ་ཆད། སྙིང་ཁར་བྱོན། འདོད་ཆགས་དག །ཞེ་སྡང་རང་དག་ཡིན་གསུང་། ཐིག་ལེ་གཉིས་སྙིང་ཁར་འགྲོས་འདེད་ཀྱི་ཚུལ་དུ་ཆོས་སྐོར་དུ་སྒོ་རོ་རོ་འཁོར་བ་ལ་སེམས་བཟུང་། དེ་ལྟར་གསལ་བ་དང་། འདི་སྣང་ནི་སྣང་། བདེན་ནི་མི་བདེན། འདི་ཀ་རྨི་ལམ་ཡིན་སྒྱུ་མ་ཡིན། ཁྱད་པར་དུ་རྨི་ལམ་ཡིན་སྙམ་དུ་བསམ་ཞིང་ངག་ཏུའང་བརྗོད། དེ་ནས་ཐིག་ལེ་གཉིས་གཅིག་ལ་གཅིག་རེག་རེག་པ་བསམ། རེག་པས་ལུས་སེམས་བདེ་ཕྲིལ་ཕྲིལ་བ་སྒོམ། མཐར་ཐིག་ལེ་གཉིས་གཅིག་ལ་གཅིག་ཐིམ་འོད་དུ་ཡལ་གྱིས་སོང་པས་མི་རྟོག་པའི་ངང་ལ་གཉིད་ལོག་ལ་རྨི་ལམ་བཟུང་། དུས་རྒྱུན་དུ་རྨི་ལམ་ཡིན་སྙམ་པ་འབྲལ་མེད་དུ་བྱ། འདི་ལ་ཐིག་ལེ་དབང་བཞིའི་གནད་གསུང་པས། སྙིང་ཁར་འཁོར་བ་དེ་བུམ་དབང་། གཅིག་ལ་གཅིག་རེག་རེག་པ་དེ་གསང་དབང་། རེག་པས་བདེ་བ་སྐྱེས་པ་དེ་ཤེས་རབ་ཡེ་ཤེས། གཅིག་དུ་འདྲེས་འོད་དུ་ཡལ་སོང་པ་དེ་བཞི་པ་ཡིན་གསུང་། ཟིན་པའི་རྟགས་འདི་རྨི་ལམ་ལམ་དུ་འདུག་སྙམ་པ་དང་། སྔར་བས་རིག་པ་ཡང་པ་དང་། གཉིད་ཐུམ་ཕྲས་ཐུམ་མང་དུ་འབྱུང་ངོ་།
།གཉིས་པ་གནད་འཆུག་མེད་ལ་དགུ་ལས། དུས་ཀྱི་གནད་གསུམ། ལུས་ཀྱི་གནད་གསུམ། དམིགས་པའི་གནད་གསུམ་མོ།
།དུས་ཀྱི་གནད་གསུམ་ནི། ཐོ་རངས། ནམ་ལངས་ཁ། ཉི་མ་རི་རྩེ་ལ་ཤར་བའི་དུས་སོ། །དེ་ཡང་རིག་པ་ཡང་པའི་རིགས་ཐོ་རངས་ཀྱི་དུས་སུ་ད་ནམ་མྱུར་དུ་ལྡང་པར་འདུག་སྙམ་པའམ། ཁམས་དངས་སིངས་པ་འབྱུང་པས་དུས་དེ་ནས་སྒོམ། དེ་བས་ཁམས་ལྗི་བའི་རིགས་ཡིནའང་ནམ་ལངས་ཁར་རིག་ས་དངས་སང་འགྲོ་བས་དེ་དུས་ན་སྒོམ་མོ། །དེ་ནས་ཀྱང་ཤེས་པ་ལྗི་བ་ད་ཁམས་པ་ཡིན་ན་ཉི་མ་རི་རྩེ་ལ་ཤར་བའི་དུས་སུ་ཅིས་ཀྱང་ཁམས་དངས་པ་འབྱུང་པས་དེའི་དུས་སུ་བསྒོམ་པ་ཡིན་གསུང་ངོ་།
།ལུས་ཀྱི་གནད་གསུམ་ནི། དཀྱིལ་དཀྲུངས། རྩོག་བུ། སེང་གེའི་ཉལ་ཐབས་སོ། །དེ་ཡང་དྲོད་ཆེ་ཞིང་མཁྲིས་པ་ཤས་ཆོ་བ་ཁམས་ལྗི་བའི་རིགས་ཡིན་ན། དཀྱིལ་དཀྲུངས་བྱ་སྟེ། གོང་དུ་བཤད་པ་ལྟར་རྣམ་སྣང་གི་ཆོས་བདུན་འཆའ་བ་ཡིན་ཏེ། ལུས་ཨེན་ཙམ་དྲོད་ཆུང་པར་འདུག་གསུང་། དྲོད་ཅུང་ཟད་ཆེ་ཞིང་བད་ཀན་ཤས་ཆེ་བ་རྩོག་བུ་བྱེད་གསུང་། རླུང་ཤས་ཆེ་བའི་རིག་པ་གཡེར་བའི་རིགས་ལ་སེང་གེའི་ཉལ་ཐབས་སུ་བྱེད་པ་ཡིན་ཏེ། བཞོགས་གཡས་འོག་དུ་བཞུག །ལག་པ་གཡས་འགྲམ་པའི་འོག །གཡོན་སྤྱིའི་སྟེང་དུ་རྐང་། རྐང་པ་ཅུང་ཟད་བསྣོལ་བའི་པུས་བྲང་ལྷོད་དེ་བ་སྦྱར། མགོ་དགྱེ་དགུ་རན་པ་བྱེད་པ་ལ་སེང་གེའི་ཉལ་ཐབས་ཟེར་བ་ཡིན་ནོ་གསུང་།
དམིགས་པའི་གནད་གསུམ་ནི། རྟོག་མེད་ལ་འཛིན་པ་གཉིས། རྟོག་བཅས་ལམ་དུ་འཁྱེར་བའོ།
།དང་པོ་ནི། སྐྱབས་འགྲོ་ནས་གསོལ་འདེབས་ཡར་ཆད་སྔར་དང་འདྲ། དངོས་གཞི་ལ་ལུས་གནད་གསུམ་པོ་ཁམས་རིགས་དང་སྦྱར་བས་བྱས་ལ་འདི་ལ་ཁྱད་པར་རླུང་དང་བསྐུན་ཏེ། སྤྱི་བོའི་ཧཾ་དང་གསང་གནས་ཀྱི་ཧཱུྃ་དཀར་དམར་གཉིས་སྔར་བཞིན་བསྒོམས་ལ། སྟེང་རླུང་ཐིག་ལེ་དཀར་པོ་དང་འགྲོགས་སྙིང་ཁར་བྱོན། འོག་རླུང་ཐིག་ལེ་དམར་པོ་དང་འགྲོགས་སྙིང་ཁར་བྱོན། སྔར་བཞིན་འཁོར་བ་ལ་དམིགས་ཏེ། སྒྱུ་མ་རྨི་ལམ་གྱི་དྲང་འདུན་བྱ། དེ་ནས་གཉིད་དུ་འགྲོ་ཁ་ཙམ་ན་མར་སོང་པ་དང་། ཐིག་ལེ་དཀར་པོ་སྣ་བུག་གཡས་ནས་འཐོན། དམར་པོ་གཡོན་ནས་འཐོན། མདུན་གྱི་སྨིན་འཚམས་ཀྱི་ཐད་དུ་འཁོར་བ་ལ་སྔར་བཞིན་དྲན་འདུན་བྱེད། དེ་ནས་ཐིག་ལེ་དཀར་བ་ལས་ཡབ་བདེ་མཆོག །དམར་བ་ལས་ཡུམ་ཕག་མོ་སྟེ། བདེ་མཆོག་ཡབ་ཡུམ་དུ་བསྒོམས་ལ་དྲན་འདུན་སྔར་བཞིན་བྱ། དེ་ནས་གཉིད་ཟི་འགྲོ་ཁར་ཡུམ་ཡབ་ལ་ཐིམ། ཡབ་འོད་དུ་ཡལ་གྱིས་སོང་སྟེ་མི་རྟོག་པའི་ངང་ལ་གཉིད་ལོག་ལ་རྨི་ལམ་བཟུང་། འདི་ལ་དྲན་འདུན་རང་གལ་ཆེ་བ་ཡིན་ནོ་གསུང་།
རྟོག་མེད་ལ་འཛིན་པ་གཉིས་ནི། སྐྱབས་འགྲོ་ནས་གསོལ་འདེབས་ཀྱི་བར་སྔར་དང་འདྲ། དེ་ནས་རང་ལུས་བདེ་མཆོག་ཡབ་ཡུམ་དུ་གསལ་བའི་སྙིང་ཁར་པད་མ་དང་ཟླ་བའི་གདན་ལ། རྩ་བའི་བླ་མ་རྡོ་རྗེ་འཆང་གི་རྣམ་པ་ཤིན་དུ་གསལ་བར་བསྒོམ། དེ་ལ་གསོལ་བ་གོང་བཞིན་དུ་གདབ། བློ་མོས་གུས་སུ་ཞུང་སོང་པ་དང་། བླ་མའི་ཐུགས་ཁར་ཧཱུྃ་དཀར་པོ་དངུལ་ཆུའི་རྟོག་པ་ལྟ་བུ་དཀར་ལ་འཚེར་བ། སྣུམ་ལ་འདྲིལ་བ། ཤིན་དུ་གསལ་བ་གཅིག་བསྒོམས་ཏེ། ཧཱུྃ་གསལ་བས་དེའི་འོད་དམ་རྐྱེན་གྱིས་བླ་མ་གསལ་བར་བསྒོམ། བླ་མ་གསལ་བའི་འོད་ཀྱིས་རང་ལུས་བདེ་མཆོག་ཤིན་དུ་གསལ་བར་བསྒོམ། དེ་ལྟར་གསལ་བ་དེ་ཉིད་རང་གི་བློས་བཀོད། བློ་ལ་ཤར་བ་མ་གཏོགས་ཕྱི་རོལ་ན་དོན་ལོགས་སུ་གྲུབ་པ་མེད། འདི་ཀ་རྨི་ལམ་ཡིན། སྒྱུ་མ་ཡིན། ཁད་པར་དུ་རྨི་ལམ་ཡིན་སྙམ་དུ་དྲན་འདུན་རྩེ་གཅིག་ཏུ་བཏང་། དེ་ནས་གཉིད་དུ་འགྲོ་ཁ་ན་མར་སོང་པ་དང་། ཡི་དམ་བླ་མ་ལ་ཐིམ། བླ་མ་ཡང་མཐའ་ནས་རིམས་ཀྱིས་འདུས་ནས་ཧཱུྃ་ལ་ཐིམ། ཧཱུྃ་འོད་དུ་ཡལ་གྱིས་སོང་པའི་ངང་ལས་མི་རྟོག་པའི་ངང་ལས་གཉིད་ལོག་ནས་རྨི་ལམ་འཛིན་ཏེ། དེས་ཅིས་ཀྱང་རྨི་ལམ་ཟིན་པ་ཡིན་ནོ་གསུང་།
གསུམ་པ་རྟོག་བཅས་ལམ་འཁྱེར་ནི། སྐྱབས་འགྲོ་ནས་གསོལ་འདེབས་ཡན་འདྲ། དངོས་གཞི་དམིགས་པ་ལ་གོང་གི་རང་ཟིན། རྟོག་མེད་ལ་འཛིན་པ་གཉིས་ཏེ། དམིགས་པ་དེ་གསུམ་གང་བདེ་བ་གཅིག་བསྒོམ། དེ་ལ་རྨི་ལམ་གྱི་གནས་མགྲིན་པ་ཡིན། ཡི་གེ་ཨཾ་ཡིན། རྒྱུ་གཉིད་དང་རྨི་ལམ་གྱི་བར་གྱི་རྟོག་པ་ཡིན། དེ་ལ་འཛིན་པས་ན་རྟོག་བཅས་ལམ་འཁྱེར་ཟེར་བ་ཡིན་གསུང་། དེ་ལ་གོང་གི་དམིགས་པས་ཉེན་པར་གྱི་དུས་འདས་ནས། ནུབ་མོ་གཉིད་དུ་འགྲོ་ཁར་ཕྱིའི་རྟོག་པ་རྣམས་ཁག་གིས་འགགས། གཉིད་རང་དུ་མ་སོང་པའི་སྐབས་དེ་ན་རྨི་ལམ་རགས་པ་ཡང་མ་ཤར་བར། ཆུའམ་མིའི་རྣམ་པའམ། མདོར་ན་གྱུ་གྱུ་བ་རིབ་རིབ་པ་གཅིག་ཅིས་ཀྱང་འཆར་བས་དེ་ཉིད། ཀ་རྨི་ལམ་དུ་ཚིར་གྱིས་ཟིན་པར་བྱས་ནས། མིག་མི་འབྱེད་པར་ཚུམ་མེ་བྱས། འོག་རླུང་ཐེན་བྱས་ནས་འཛིན་པ་ཡིན། དེས་མི་ཟིན་མི་སྲིད། རྨི་ལམ་རྨིས་ཚད་ཟིན། ཟིན་ཚད་སྦྱོང་སྤེལ་འབྱུང་པ་ཡིན་ནོ་གསུང་། འདིའི་སྐབས་སུ་འདི་ལྟར་གསུང་ཏེ།
རིན་པོ་ཆེ་རྨོག་པའི་ཞལ་ནས། རྨི་ལམ་འཛིན་པ་འདི་ལ་རི་དགས་རླུངས་སུ་ཕེབས་པ་འདྲ་བ་གཅིག་དགོས། རྟ་རྒོད་ཆགས་བྱེད་པ་འདྲ་བ་གཅིག་དགོས། བདེ་སྣ་སྡུག་བསྔལ་གྱིས་འདྲེན་པ་ཞིང་པའི་སོ་ནམས་ལྟ་བུ་གཅིག་ཡིན་ནོ་གསུང་། ཡང་འདི་གསུང་། མཁའ་འགྲོ་སྡེ་ལྔའི་ལུང་པར་སླེབ་པ་དང་འདྲ། བརྒྱ་བྱིན་གྱི་གསུང་དང་འདྲ་གསུང་།
དེ་ཡང་རི་དགས་རླུངས་སུ་ཕེབས་ན། རླུངས་ལ་བློ་མི་ཕེབས་པར་ཡིད་རི་གཅིག་སུ་སེམས་པ་དང་། རྟ་རྒོད་ཀྱི་སྟེང་དུ་སྐྱེས་བུ་ཁ་ལོ་མ་བྱང་པ་སྐྱོན་ན། རྟ་དེས་རྒྱུག་གམ་འཕྱོང་ངམ་འཕག་གམ། བློ་འགྲོག་གམ། ་་་་་་འགྲོག་གམ། མདོར་ན་དེས་ཅི་བྱེད་མི་ཤེས་པས་དེ་ལ་ཡེངས་ཐབས་སྐད་གཅིག་ཀྱང་མེད་པ་དང་འདྲ་བར་ལུས་གནད། རྨི་ལམ་སྒྱུ་མའི་འདུན་པ་རྟོག་པ་གཞན་གྱིས་བར་མ་ཆོད་པར་འབྲལ་མེད་ཡངས་མེད་བརྗེད་མེད་གཅིག་གལ་ཤིན་དུ་ཆེ་བ་ཡིན་གསུང་། ཡང་སྟོན་ཐོག་ཐོབ་པ་བློ་ལ་བཞག་ནས་ལོ་ཟླ་བར་སོ་ནམས་ལ་འབད་པ་དང་འདྲ་བར། རྨི་ལམ་ཟིན་ནས་སྦྱོན་སྤེལ་སྤྲུལ་བསྒྱུར་གྱིས་ས་ལམ་ཆོད་པ་ལ་སོགས་པའི་ཡོན་ཏན་བློ་ལ་བཞག་ནས་འདུན་པ་ལ་འབད་པ་ཅི་ནས་ཀྱང་བྱེད་པ་ཡིན་གསུང་།
རིན་པོ་ཆེ་མཁས་གྲུབ་ཆེན་པོའི་ཞལ་ནས། མཁའ་འགྲོ་སྡེ་ལྔའི་ལུང་པར་བསླེབ་ན་དེ་རེས་རེས་ཀྱང་རྗེས་སུ་འཛིན་ནུས། བྱིན་གྱིས་བརློབ་ནུས་པས་སླེབ་པ་རང་གིས་ཆོག་ཏེ། ལམ་ན་མུན་འཕྲང་། གཅན་ཟན་གདུག་པ་ཅན། དུག་ཤིང་གི་ཚེར་མ་ལ་སོགས་པའི་དུ་ཁ་ཡོད་ཀྱང་ཁྱད་དུ་བསད་ནས་བསྒྲུབ་པ་ཡིན། དེ་དང་འདྲ་བར། འབྲས་བུ་སངས་རྒྱས་སྒྲུབ་པ་འདི་ལ་ལམ་པའི་དཀའ་སྤྱད་བཟོད་པར་བྱས་ནས་གོང་དུ་བཤད་པའི་བཞིན་དུ་འབད་པ་འདོན་དགོས་གསུང་། ཡང་བརྒྱ་བྱིན་གྱིས་ལྷ་རྣམས་ལ་བགོས་ཏེ། ཁྱེད་རྣམས་སྲ་བའི་གོ་གྱོན། རྣོ་བའི་མཚོན་ཐོགས་ལ་ལྷ་མ་ཡིན་རྣམས་དང་གཡུལ་སྤྲོད་གཅིག །ཅེས་གསུང་པ་ཙམ་གྱིས་འགྲུབ་སྟེ། དེ་དང་འདྲ་བར་རྣལ་འབྱོར་པས་ཀྱང་བསྒོམས་པ་ཙམ་གྱིས་འགྲུབ་པ་ཡིན་ནེ། དེ་སྐད་དུ་ཡང་། བརྒྱ་བྱིན་གྱི་ཚིག་གིས་འགྲུབ། ལྷ་རྣམས་ཇི་ལྟར་བསམས་པས་འགྲུབ། རྣལ་འབྱོར་ཏིང་ངེ་འཛིན་གྱིས་འགྲུབ། གསུང་ངོ་། །དེ་རྣམས་འཛིན་པའི་དམིགས་པའོ།
།གཉིས་པ་སྦྱང་པ་ལ་བཞི་སྟེ། སེམས་ཀྱིས་ལུས་སྦྱང་པ་དང་། ལུས་ཀྱིས་སེམས་སྦྱང་པ་དང་། བདག་མེད་མས་སྦྱང་པ། འདུན་པས་སྦྱང་པའོ།
།དང་པོ་ནི། འདི་ལ་སྡོད་པ་ལ་སྔར་དང་མི་འདྲ་བའི་ཁྱད་གཅིག་མཛད་དེ། ཤོད་ན་ཕྱམ་གཡང་ཆེན་པོ་ཡོད་པའི་མཁར་རྩེའམ་བྲག་ཁ་ལྟ་བུ་གཅིག་དུ་སྡད། སྐྱབས་སུ་འགྲོ་བ་དང་སེམས་བསྐྱེད་པ་བླ་མའི་རྣལ་འབྱོར་བསྒོམ་པ་རྣམས་སྔར་ཅི་ལྟ་བ་བཞིན་ལ་གསོལ་བ་གདབ་པ་ནི།
ཐེམས་ཡིག་ལས། །རྨི་ལམ་སྦྱང་པའི་ཆོས་བཞི་ལ། །གསོལ་འདེབས་བཞི་ལ་དམིགས་པ་བཞི། གསུང་པས།
བདག་འཛིན། དགོས་མེད། སྒྱུ་ལུས་འབྱོངས་པར། རྨི་ལམ་འབྱོངས་པར་བྱིན་གྱིས་བརླབ་དུ་གསོལ། ཞེས་གསོལ་བ་རྩེ་གཅིག་དུ་གདབ། ལུས་རྣམ་སྣང་གི་ཆོས་བདུན་དང་ལྡན་པས་རང་གི་མདུན་གྱི་གཡང་དེའི། རང་བས་མདའ་གང་ཙམ་གྱི་ནམ་མཁའ་ལ་རང་བདེ་མཆོག་དུ་བསྒོམ། དེ་གསལ་བ་དང་། ཡ་ང་གཏིང་པ་བསམ། ཡ་ང་ཏིང་བྱུང་པ་དང་། བདེ་མཆོག་འདི་ཀ་ངའི་ལུས། ངའི་ལུས་འདི་ཀ་བདེ་མཆོག་ཡིན་སྙལ་དུ་བསམ། དེ་ནས་ཡ་ང་སྟིང་སྟིང་བྱུང་པ་དང་། རང་བདེ་མཆོག་དུ་གསལ་བ་དེ་ཕྱད་ཀྱིས་ལྷུང་པ་དང་འདི་ཀ་རྨི་ལམ་ཡིན་སྒྱུ་མ་ཡིན། ཁྱད་པར་དུ་རྨི་ལམ་ཡིན་སྙམ་པའི་དྲན་འདུན་རྩེ་གཅིག་པའི་ངང་ནས་བདེ་མཆོག་ལྷུང་པ་དེ་ས་ལ་མ་རེག་ཙམ་ལ་འོད་དུ་ཡལ་གྱིས་སོང་པར་བསམ། ཡང་མདུན་དུ་བསྐྱེད་པ་ལ་སོགས་པ་ནས་དམིགས་པ་དེ་ཉིད་ཡང་དང་ཡང་དུ་ཉིན་ལ་མཚན་བཏགས་པའི་ཚུལ་གྱིས་བསྒོམ་པར་བྱེད་པ་ཡིན་ནོ་གསུང་།
འདི་ལ་རིན་པོ་ཆེ་གསེར་གླིང་པའི་གསུང་ནས། གྱེང་ཁ་ལྟ་བུ་ཕྱོགས་གཉིས་ཁ་ན་གཡང་ཡོད་པར་མི་སྡད། མགོ་འཁྱོམས་པའམ་ཁམས་ཟི་བ་བྱུང་ན་རྒྱབ་ངོས་སུ་ལྟར་དེ་ཉལ་བས་ཆོག་པའི་ས་བདེ་མོ་ཡོད་ལ། མདུན་ན་ཡང་སྐྱོར་བའམ་ལག་པ་རྟེན་པ་ཡོད་པ་དགོས། དེ་ལྟར་མ་ཡིན་ན། འདི་ལ་གནད་གཡར་གྱི་ཉེན་ཡོད་པས་གཟབ་དགོས། འདི་སྦྱང་པ་ཟེར་ཡང་འཛིན་པ་ལའང་ཟབ་པ་གཅིག་འདུག་གསུང་། གཡང་ལ་ལྟུང་པ་ལྟ་བུ་ལ་རྟེན་ནས་ཙུབ་ཟིན་དུ་ཡོང་པར་འདུག་གོ་གསུང་།
གཉིས་པ་ནི། སྐྱབས་འགྲོ་ནས་ལུས་གནད་ཡན་འདྲ། འདི་མལ་བདེ་བར་བསྒོམ་ཏེ། དམིགས་པ་ནི། རང་གི་བུ་ཁ་དགུ་དང་། ཡན་ལག་ལ་སོགས་པའི་ཚིགས་རྣམས་དང་། བ་སྤུའི་བུ་ག་ཐམས་ཅད་དུ་ཧཱུྃ་སྔོན་པ་རེ་བསྒོམ། དེ་གསལ་བ་དང་། ཧཱུྃ་རྣམས་ལུས་ཀྱི་ནང་དུ་སིབ་གྱིས་སོང་པས། ཕྱིའི་ལྤགས་པ་ཤ་ཁྲག་རུས་པ་ཆུ་སེར། ནང་གི་ནད་འདུའ་བ་རྣམ་པ་བཞི། གསུང་པ་ཉོན་མོངས་པ་དུག་ལྔ་དུག་གྩུམ་རྣམས་སྦྱངས་ནས་ལུས་ཐིག་ལེ་སྔོན་པོ་གཅིག་དུ་སྔོ་ཧྲིལ་ལེ་བསྒོམ། ཐིག་ལེ་དེ་སྔོ་ཡལ་གྱིས་ཡལ་བས་ལུས་སེམས་གང་དུའང་འཛིན་པ་མེད་པ་སྟོང་སང་གིས་སོང་ཏེ་འཛིན་མེད་ཀྱི་ངང་དུ་ལྷོད་ཀྱིས་བཞག་གོ།
།གསུམ་པ་ནི། སྐྱབས་འགྲོ་ནས་གསོལ་འདེབས་ཡན་འདྲ། དེ་ནས་རང་ལྷར་གསལ་བའི་མདུན་དུ། བདག་མེད་མ་སྐུ་མདོག་སྔོན་མོ་གཡས་གྲི་གུག །གཡོན་ཐོད་ཁྲད་འཛིན་པ། རུས་པའི་རྒྱན་དྲུག་གིས་བརྒྱན་ཅིང་། ཞབས་གར་ཐབས་སུ་ལིང་པ་བསྒོམས་པའི་གསང་གནས་སུ་ཡི་གེ་ཨོཾ་ཨ་སྭཱཧཱ་བཞི་པོ་སྔོ་ཧྲམ་པ་དམིགས་ཏེ། གྲངས་འཛིན་གྱི་ཕྲེང་པ། མེའི་སོར་མོའི་ཕྲེང་པའམ། དེ་མེད་ན་ཐོད་འཕྲེང་། དེ་ཡང་མེད་ན་རང་གི་སོར་མོ་ལ་ཉེར་གཅིག་དུ་བགྲང་ཞིང་། ཨོཾ་ཨ་སྭཱཧཱ་ཞེས་ཉི་ཤུ་རྩ་གཅིག་བཟླས་པས་སྔགས་ལས་འོད་ཟེར་སྔོན་པོ་བྱུང་རང་གི་གསང་གནས་ན་ཡར་སོང་པས། རང་གི་ལུས་སྔོ་ཡལ་བ་ལ། ཚོར་བ་བདེ་ཤས་སུ་ཕྲིལ་བ་ལ་རྨི་ལམ་སྒྱུ་མའི་དྲན་འདུན་དྲག་པོ་རྒྱུན་མ་ཆད་པ་བཏང་། མཐར་གཉིད་དུ་འགྲོ་ཁར། མདུན་གྱི་བདག་མེད་མ་འོད་དུ་སྔོ་ལྟེམ་ལྟེམ་ཞུ། རང་གི་གསང་གནས་སུ་ཐིམ་པས། རང་ཡང་འོད་དུ་སྔོ་ལྟེམ་ལྟེམ་ལ་མཐར་སྔོ་ཡལ་ལ་ལ་སྟོང་སངས་ཀྱིས་གསལ་སྟོང་འཛིན་མེད་སྒྱུ་མ་རང་ཤར་ལ་འཇོག་པ་ལགས་གསུང་། དེ་ཡང་བདག་མེད་མས་སྦྱོང་པ་རྩ་རླུང་ཐིག་ལེ་ཐམས་ཅད་བདག་མེད་མའི་དོན་ཡིན་གསུང་།
སངས་རྒྱས་གཉན་སྟོན་གྱི་སློབ་མ་གནས་བརྟན་ཆོས་ཀྱི་དཔལ་བྱ་བ་ལ། བླ་མའི་ཞལ་ནས། གནས་བརྟན་ཁྱོད་ཀྱི་སྣང་པ་འདི་ཇི་ལྟར་འདུག་གསུངས་པས། སྔོ་ཕྱམ་མེ་བ་གཅིག་ཀ་གདའ་ཟེར། ཉིན་པར་གྱི་སྣང་པ་འདི་ཇི་ལྟར་འདུག་གསུང་། སྔོ་ཕྱམ་མེ་བ་གཅིག་གདའ་ཟེར། མཚན་མོའི་སྣང་པ་ཇི་ལྟར་འདུག་གསུང་། སྔོ་ཕྱམ་མེ་བ་གཅིག་ཀ་གདའ་ཞུས་པས། བླ་མའི་གསུང་ནས། འ་འ་ཁྱོད་ཀྱིས་ལྟོ་རུ་ཟྭ་ཚོད་ཀ་ཟོས་པ་མེན་ནམ་གསུང་ནས་ཞལ་ཁྱལ་མཛད། ཁོང་སོང་པ་དང་། འཁོར་ཀུན་ལ་བླ་མའི་གསུང་ནས། འ་ལ་ལ་གནས་བརྟན་ཆོས་ཀྱི་དཔལ་གྱི་ལུས་འཇའ་ལུས་སུ་འོང་འདུག་པ་གསུང་སྟེ། དེ་མན་ངག་འདི་བསྒོམས་པས་འོང་པ་ཡིན་ནོ་གསུང་།
བཞི་པ་ནི། སྐྱབས་འགྲོ་ནས་གསོལ་འདེབས་ཡན་སྔར་དང་འདྲ། ཁྱད་པར་དུ་གསོལ་བ་དྲག་ལ་ཡུན་རིང་བ་གདབ། སྣང་པ་བདེན་མེད་དུ་ཕྱམ་སོང་པ་དང་། འདི་ལྟར་བསྒོམ་སྟེ། ང་གཉིད་དུ་སོང་ནས་འདུག །ངའི་རྣམ་སྨིན་གྱི་ལུས་ན་ཚ་སྡུག་བསྔལ་བསྐྱེད་པ་དེ་མལ་ན་ཡོད་པ་ཡིན། འདི་ཡིད་ཀྱི་ལུས་སུ་འདུག །སྣང་བ་འདི་རྨི་ལམ་གྱི་སྣང་བར་འདུག །རྨི་ལམ་གྱི་སྣང་བ་དང་། ཡིད་ཀྱི་ལུས་ལ་ཇི་ལྟར་སྦྱང་སྦྱང་ཡིན་སྙམ་དུ་བསམས་ནས་འབྱུང་བཞི་ཕྲ་རགས། སེམས་ཕྲ་རགས་ལ་ཕར་ཐལ་ཚུར་ཐལ་དུ་སྦྱང་ཏེ།
བླ་མ་གསེར་ལིང་པའི་ཞལ་ནས། བར་མ་ཙམ་ལ་སླ་སྟེ། རགས་པ་དང་ཕྲ་བ་ལ་སྦྱང་བ་གལ་ཆེ། རགས་པ་རི་བོ་འམ། ཆུ་བོ་རྒ་ཆེན་གཏིང་ཟབ་ལ་བློ་ནུས་ཆུངས་ན་མི་ཕིགས་པས་ཐལ་བྱུང་དུ་སྦྱང་དགོས། དེ་བཞིན་དུ་ཕྲ་བ་ལའང་མི་ཤོང་བ་མེད་པར་ཐལ་ཕྱུང་དུ་གཏོང་བ་ཡིན། དེ་དང་འདྲ་བར་སེམས་ཅན་རགས་པ་དང་། ཕྲ་བ་ས་གུ་རྩེ་ལ་ཡང་སྦྱོང་བ་གལ་ཤིན་དུ་ཆེ་གསུང་། བླ་མའི་གསུང་ནས། སྤུ་ཕྲ་མོའི་ནང་ན་ཡར་ཐལ་ཏེ་སྦྱང་བ་དང་། དེ་བཞིན་དུ་འཕྲེད་ལའང་བྱེདཔ་ཡིན། དེ་ཡང་གནས་ལྷ་ས་ལ་སོགས་པ་ལྟ་བ་ལའང་། སེམས་གྱུ་བྱས་ནས་སླེབ་པ་དེ་མ་ཡིན་པར། ལམ་ཐམས་ཅད་ལ་ས་རྡོ་རི་བྲག་རྩི་ཤིང་ཆུ་མེ་ལ་སོགས་གང་ལ་ཡང་ཐལ་བྱུང་དུ་སྦྱངས་ཀྱིན་འགྲོ། ལྡོག་དུས་སུའང་སྦྱངས་ཀིན་སྦྱངས་ཀིན་ལྡོག་པ་ཡིན་ནོ། །དེས་ཐམས་ཅད་ལ་འདྲེ་བ་ཡིན་ནོ་གསུང་།
གསུམ་པ་སྤེལ་བ་དང་། བཞི་པ་སྤྲུལ་བ་གཉིས་ལས། རིམ་པ་ལ་སྤེལ་སྤྲུལ་དུ་བྱུང་ཡང་། བླ་མའི་ཕྱག་ལེན་ལ་སྔོན་ལ་སྤྲུལ་ན། དེ་ནས་སྤེལ་ན་མཛད་དེ། དེ་གཉིས་ཀྱང་བྱུང་ཁུངས་གཅིག་དུ་སྟོན་པས། དེ་ལ་ས་བཅད་གཉིས་གཉིས་ལས། ཐུག་ཕྲད་ལ་སྤྲུལ་བ་དང་སྤེལ་བ། གང་ལ་གང་འདུལ་དུ་སྤྲུལ་བ་དང་སྤེལ་བའོ།
།དང་པོ་ལ་བཞི་སྟེ། སེམས་ཅན་ཕྲ་བ་ལ་སྤྲུལ་སྤེལ། སེམས་ཅན་རགས་པ་ལ་སྤྲུལ་སྤེལ། འབྱུང་བཞི་ཕྲ་བ་ལ་སྤྲུལ་སྤེལ། འབྱུང་རགས་པ་ལ་སྤྲུལ་བ་སྤེལ་བའོ།
།དང་པོ་ནི། སྐྱབས་འགྲོ་ནས་བླ་མ་བསྒོམ་པ་ཡར་ཆད་སྔར་དང་འདྲ། གསོལ་འདེབས་ལ།
ཐེམས་ཡིག་ལས། །རྨི་ལམ་སྤེལ་བའི་ཆོས་དྲུག་ལ། །གསོལ་འདེབས་བཞི་ལ་འདུན་པ་དྲུག །རྨི་ལམ་སྤྲུལ་བའི་ཆོས་དྲུག་ལ། །གསོལ་འདེབས་འདུན་པ་དེ་བཞིན་ནོ། །ཞེས་གསུངས་པས།
བདག་འཛིན། དགོས་མེད། སྒྱུ་ལུས། རྨི་ལམ་འབྱོངས་པར་བྱིན་གྱིས་བརླབ་དུ་གསོལ་ཞེས་རྩེ་གཅིག་དུ་གདབ། སྣང་བ་བདེན་མེད་དུ་བུན་སོང་བ་དང་། ང་གཉིད་དུ་སོང་ནས་འདུག །ལུས་འདི་ཡིད་ཀྱི་ལུས་སུ་འདུག །སྣང་བ་འདི་རྨི་ལམ་གྱི་སྣང་པར་འདུག །ཡིད་ཀྱི་ལུས་དང་རྨི་ལམ་གྱི་སྣང་བ་ལ་ཇི་ལྟར་སྤྲུལ་སྤྲུལ་ཡིན་སྙམ་དུ་བསམས་ནས། སེམས་ཅན་ཕྲ་བ་ཐོང་ན། རང་ཡང་དེར་སྤྲུལ། དེ་བཞིན་དུ་རགས་པ་ལའ་དེར་སྤྲུལ། དེ་མཚོན་ནས་འབྱུང་བཞི་ཕྲ་རགས་ལའ་དེ་བཞིན་དུ་སྤྲུལ་བ་གོང་བཞིན་དུ་བྱེད་པ་ཡིན་ནོ་གསུང་། སྤེལ་བ་ལ་ཡང་གོང་བཞིན་སྤྲུལ་བ་དེ་ཉིད་གཅིག་ལ་བཅུ། བཅུ་ལས་བརྒྱའ། བརྒྱ་ལས་སྟེང་། དེ་ལས་ས་གཞི་དང་བར་སྣང་ཁེངས་པར་སྤེལ་ཞིང་ཐོགས་གདུགས་མེད་པར་སྦྱང་ངོ་། །འདི་གསུང་།
ཆོས་རྒྱལ་སངས་རྒྱས་སྟོན་པས་བྲག་དགོན་དུ་འཚམས་བྱས་པའི་ཐོ་རངས་གཅིག །རྨི་ལམ་བཟུང་ནས་བྲག་ལོགས་ལ་ཕར་ཐལ་ཚུར་ཐལ་དུ་སྦྱངས། དེ་ནས་ཟད་པར་ས་དང་ཆུ་དང་མེ་དང་རླུང་དུ་སྤྲུལ་བས་དེར་འགྱུར་ནས་སོང་། དེ་ནས་མདུན་ན་འབུམ་གྱི་ཤོག་གུ་གཉིས་འདུག་པ་དང་། བུད་མེད་གཅིག་བྱུང་ནས། འདི་ཐོན་དང་ཟེར་ནས་སྟོན་པས། ཡང་དེ་ན་རེ། ཁྱོད་ཀློག་དང་མཁས་པར་འདུག་ཏེ། ཡི་གེ་འདི་རྣམས་ལ་སྦྱོང་སྤེལ་གྱིས་དང་ཟེར་བས། ཡི་གེ་འབྲུ་རེ་རེའི་སྣག་ཚའི་ལམ་གར་འདུག་ཐམས་ཅད་དུ་བདེ་མཆོག་ལྷ་ལྔ་རེ་རེའི་སྦྱོང་སྤེལ་བྱས་པས་སྣག་ཚ་ལས་ཚུར་མ་ཐལ། ཤོག་གུ་ལས་ཕར་མ་ཐལ་བའི་སྦྱོང་སྤེལ་བྱས་པས། གསོལ་བ་ཐོབ་དང་ཟེར་ནས་ལྷ་ལྔའི་སྤྱི་བོར་བླ་མ་བསྒོམས་ནས་གསོལ་བ་འདེབས་ཀྱིན་སྣག་ལམ་ཐམས་ཅད་ལ་སྦྱོང་སྤེལ་གཅིག་གིས་གཅིག་མ་སྒྲིབས་པར་བྱུང་པ་དང་། བུད་མེད་དེ་ན་རེ།
ཤིན་ཏུ་སྲག་པའི་སྣག་ལམ་ལ། །ཕྱི་ནང་གར་ཡང་མ་ཐལ་བ། །བདེ་མཆོག་ལྷ་ལྔའི་སྦྱོང་སྤེལ་འདི། །ཀུན་དང་མ་འདྲེས་གསལ་བར་སྣང་། །སྒྱུ་མ་འོད་གསལ་དབྱེར་མེད་དོན། ཨེ་མ་ཨ་ལ་ལ་ཟེར་ནས་མི་སྣང་བར་ཐལ་གསུང་།
རྨི་ལམ་སྦྱོང་སྤེལ་དང་མོས་གུས་དང་འབྲེལ་པ་དེས་ཉིན་པར་གྱི་དགེ་སྦྱོར་སྟོབས་ཆེ་བར་བྱུང་། དེས་ནུབ་མོའི་སྟོབས་སྐྱེས་ནས་བོགས་ཆེན་པོ་བྱུང་པས། སྐྱོ་ཤས་དང་མོས་གུས་འདུན་པ་གསུམ་གྱིས་འབྲེལ་ནས། ལོ་ཟླ་ཙམ་གྱིས་སངས་རྒྱ་བར་འདུག་སྙམ་པ་བྱུང་། སྟོན་ཟླ་ཐ་ཆུངས་ཀྱི་ཚེས་བཅུ་གསུམ་གྱི་ཐོ་རངས་རྨི་ལམ་བཟུང་ནས། བླ་མའི་སྤྱན་སྔར་ཕྱིན་ནས་མཆོད་པ་ཕུལ་གསོལ་བ་གཏབ་པ་དང་། བླ་མ་ཕྱག་ན་རྡོ་རྗེ་སྐུ་ཤིན་དུ་ཆེ་བ། དབུ་སྐྲ་ཁམ་སེར་གྱེན་དུ་རྗེས་པས་ནམ་མཁའ་ཐམས་ཅད་ཁེངས་པ་གཅིག་དུ་གྱུར་ནས་སོང་། དེ་ནས་ནམ་མཁའ་ཁེངས་པའི་དབུའ་སྐྲ་འདི་རྣམས་ལ་སྦྱོང་སྤེལ་བྱ་དགོས་སྙམ་ནས། བདེ་མཆོག་དང་། རྗེ་བཙུན་མ་དང་། རྟ་མགྲིན་ལ་སོགས་པར་སྤྲུལ་ནས་དབུ་སྐྲ་ཉག་མ་རེ་རེ་ལ་ཡར་ཐལ་མར་ཐལ་དུ་སྦྱངས་པས། དབུ་སྐྲ་ཐམས་ཅད་ཇེ་འཕྲ་ཇེ་འཕྲ་ལ་བ་སྤུ་ཙམ་དུ་གྱུར་ཡ་དང་། དབུ་སྐྲ་ཕྲ་མོ་དེ་རྣམས་ཀྱི་ཨནང་ན་བདེ་མཆོག་ལྷ་ལྔ་དང་། དགྱེས་རྡོར་ལྷ་དགུ་དང་། མ་ཧཱ་མ་ཡ་ལྷ་ལྔ། དེ་རྣམས་ཀྱི་དཀྱིལ་འཁོར་ཡོངས་སུ་རྫོགས་པ་མང་པོར་སྤྲུལ་ནས་གཅིག་གིས་གཅིག་མ་སྒྲིབས་པར་གསལ་བ་དེ་ལ་རང་རང་གི་སྔགས་དི་རི་རི་སྒྲོག་པ་ལྷ་ཚོགས་ཐམས་ཅད་ཀྱི་བདག་པོ་བླ་མ་བྱས་ནས་གསོལ་བ་གཏབ་པས། ཐུན་མོང་མ་ཡིན་པའི་མོས་གུས་སྐྱེས་པ་དང་། ནང་པར་ཚ་བ་ཐོན་པ་དང་བླ་མ་བྱོན་ནས། ད་ནང་ཐོ་རངས་ཀྱི་ངའི་སྐྲ་ལ་རྨི་ལམ་སྦྱོང་སྤེལ་དང་། སྐྲ་ཤིན་དུ་ཕྲ་བའི་ནང་ན་ཡར་བླ་མ་དང་ལྷ་ཚོགས་རྣམས་བཀོད་པ་ཕྲ་བ་རྩལ་ཆེ་བ་ཡིན་ཏེ། དེ་བས་ཀྱང་ཉིན་པར་ས་གཞི་རྡུལ་ཕྲ་རབ་ཁབ་རྩེ་བས་ཅུང་པ་འདི་རྣམས་ཐམས་ཅད་བདེ་མཆོག་ལྷ་ལྔའི་དཀྱིལ་འཁོར། སྒོ་རྟ་བབས་འདོད་ཡོན་ལྷ་མོ་དང་། དྲོད་བརྒྱད། ཤིང་བརྒྱད། ཕྱོགས་སྐྱོང་ལ་སོགས་པ་ཐམས་ཅད་རྫོགས་པར་གསལ་བ་དང་། ལྷ་ཚོགས་རྣམས་ཀྱིའང་སྤྱན་གསུམ་དང་། མཆེ་བ་བཞི་དང་། རུས་པའི་བརྒྱན་དང་། མེ་ཏོག་གི་ཕྲེང་པ་དང་བཅས་པ་མ་འདྲེས་པར་གསལ་བར་མཐོང་པ་འདི་ང་ལ་རྟག་ཏུ་འཆར་བར་འདུག །ནུབ་མོའི་རྨི་ལ་བས་ཉིན་པར་གྱི་འདི་དཀའ་བར་འདུག
།ངས་བླ་མ་སྐྱེར་སྒང་པ་ལ་ཞུས་པས། ཉིན་པར་གྱི་འདི་ལྟ་བུ་ངས་ཀྱང་མི་ཡོང་པར་འདུག །ཁྱོད་ཀྱི་འདི་ལྟ་བུ་རྨི་ལམ་གྱི་ཉམས་མཐར་ཐུག་ཡོད་པ་མ་གཏོགས་སུའི་ཡང་བློར་མི་ཤོང་གསུང་། ད་ཉིན་པར་གྱི་འདི་ལྟ་བུ་ཡོང་པར་འདུག་གམ་མི་འདུག་ལྟོས་གཅིག་གསུང་ནས་ཞག་བདུན་དུ་བསྒོམས་པས། རྡུལ་ཕྲ་རབ་རེ་རེ་ལྷན་སྐྱེས་སུ་གསལ་ཙམ་བྱུང་། དེ་ལས་ལྷག་པའི་དཀྱིལ་འཁོར་རྫོགས་པར་གསལ་བ་མ་བྱུང་བས་དེ་ལ་ཇི་ལྟར་བྱ་ཞུས་པས། ཉིན་པར་གྱིས་ནུབ་མོ་རྒྱས་ཐོབ། རྨི་ལམ་གྱི་ལྷ་སྐུ་ཕྲ་མོས་ཉིན་པར་རྒྱས་ཐོབ་ལ་བསྒོམས། དེས་ཇི་ལྟ་བ་བཞིན་ཡོང་བ་ཡིན་ནོ། །ལར་ད་ལྟ་རྨི་ལམ་གྱི་ཉམས་མྱོང་མེད་པར་དཀྱིལ་འཁོར་རྒྱས་པར་སྒོམ་པར་འདུག་ཏེ། གཙོ་བོ་གསལ་ན་འཁོར་མི་གསལ། འཁོར་གསལ་ན་གཙོ་བོ་མི་གསལ་བས་ལོང་བའི་དབྱུག་བསྐོར་དང་འདྲ་གསུང་ངོ།
རང་གི་བླ་མའི་གསུང་ནས། སྤེལ་བའི་དུས་སུ་ན་ག་པ་ཎིའི་ཕྲེང་པ་དངས་པོ་མདུན་དུ་བཞག་པའི་ངོས་ལ་གཟགས་སྙན་མང་པོ་འཆར་བ་དེས་ཀྱང་མང་པོར་སྤེལ་བའི་དཔེའ་ལ་ཕན་པར་འདུག །སྟོང་གསུམ་ཉུངས་འབྲུར་བཅུག་པས་ཡུང་འབྲུ་ཆེར་མ་སོང་། སྟོང་སུམ་ཆུང་དུ་མ་སོང་པའི་དཔེའ་མེ་ལོང་ལ་ལྟས་པས་ཀྱང་། ཅུང་ཟད་ཙམ་ཕན་པར་འདུག །གང་ལྟར་ནའང་རེས་ཕྲ་བ། རེས་རགས་པ་ལ་སྤྲུལ་སྤེལ་བྱས་ཏེ། སེམས་ལ་གཉེན་ལྕུག་ཐོན་པ་གཅིག་མ་བྱུང་བར་ལ་སློབ་དགོས། ༼༽ ལར་སེམས་སྟོང་པའི་འཆར་ཚུལ་ལ་མི་ཁེངས་པ་དང་། མི་ཕིགས་པ་དང་། མི་ཤོང་བ་བྱ་བ་མེད། གང་བྱ་བྱ་གཅིག་ཡིན། དེར་སོང་ཙ་ན་སླ་བ་གཅིག་རང་སྡོག་གི་གསུང་ངོ་།
།གཉིས་པ་གང་ལ་གང་འདུལ་དུ་སྤྲུལ་སྤེལ་ལ་གཉིས་སྟེ། འཇིག་རྟེན་པའི་དང་། འདས་པའི་གང་འདུལ་ལོ།
།དང་པོ་ལ། སྐྱབས་འགྲོ་ནས་གསོལ་བ་འདེབས་པ་ཡར་ཆད་སྔར་དང་འདྲ། དངོས་གཞི་ལ་རྨི་ལམ་ཟིན་པ་གཅིག་གིས་བྱེད་དེ། གདོན་གྱི་རྟོག་པ་ལ་སོགས་ཕྱི་རོལ་གྱི་སྣང་བ་ཅི་བྱུང་ཡང་། གང་བྱུང་པ་དེའི་གཉེན་པོ་ཤེས་པར་བྱས་ནས་སྤྲུལ། དེ་མང་པོར་སྤེལ་སྟེ། བྱི་བ་ལ་བྱི་ལ། བྱེའུ་ལ་ཁྲ། ཁྱི་ལ་སྤང་ཀི། སྤང་ཀི་ལ་སྟག །སྟག་ལ་སེང་གེ །མི་ལ་སྲིན་པོ། མདོར་ན་བཤད་ཀྱིས་མ་ལང་། གང་འདུལ་གྱི་གཉེན་པོར་སྤྲུལ་ཏེ། དེ་ཉིད་གོང་བཞིན་མང་པོར་སྤེལ་ནས་འདུལ་བ་དེ་རང་ཡིན་ནོ་གསུང་།
།གཉིས་པ་འདས་པའི་གང་འདུལ་ནི། ཀླུ་འདུལ་བ་ལ་ཁྱུང་། རྒྱལ་པོ་ལ་རྟ་མགྲིན། ཀླུ་བདུད་ལ་འཇམ་དཔལ་ཡེ་ཤེས་སེམས་དཔའ། ཀླུ་སྲིན་དང་། གནོད་སྦྱིན་ལ་ཕྱག་ན་རྡོ་རྗེ་དང་། ཁྲོ་བོའི་ཚོགས་དཔག་དུ་མེད་པར་སྤྲུལ། དེ་ས་གཞི་ནམ་མཁའ་བར་སྣང་ཁེངས་པར་སྤེལ་ནས་འདུལ་བ་ཡིན། མེ་དཔུང་གིས་བསྲེག །ཕྱག་མཚན་གྱིས་སྡུབ། སྲོག་སྔགས་འབུལ། བཀའ་འབངས་བྱེད་བྱེད་དུ་འདུལ་བ་ཡིན་གསུང་སྟེ། སྤྲུལ་སྤེལ་ལོ།
།ལྔ་པ་བསྒྱུར་བ་ལ་བཞི། འབྱུང་བཞི་ཕྲ་རགས་ལ་བསྒྱུར་བ། སེམས་ཅན་ཕྲ་རགས་ལ་བསྒྱུར་བ། ལྷ་སྐུ་སྣ་ཚོགས་སྣ་ཚོགས་སུ་བསྒྱུར་བ། སྣང་སྟོང་ཞེན་པ་དང་བྲལ་བའོ།
།སྐྱབས་འགྲོ་ནས་གསོལ་འདེབས་ཡན་འདྲ། དངོས་གཞི་ལ། འདིའི་རྨི་ལམ་ཟིན་པ་གཅིག་རང་གིས་བྱེད་དེ། འབྱུང་བཞི་ལ། ས་ཆུར་བསྒྱུར། ཆུ་མེར་བསྒྱུར། མེ་རླུང་དུ་བསྒྱུར། རླུང་སར་བསྒྱུར། དེ་རྣམས་ཀྱང་ཕྲ་ན་རགས་པར་བསྒྱུར། རགས་ན་ཕྲ་བར་བསྒྱུར། མང་ན་ཉུང་པར་བསྒྱུར། ཉུང་ན་མང་པར་བསྒྱུར་བ་ཡིན་ནོ་གསུང་།
གཉིས་པ་སེམས་ཅན་ཕྲ་རགས་ལའང་འབྱུང་བཞིའི་བཞིན་བསྒྱུར་བ་ཡིན་ནོ་གསུང་།
གསུམ་པ་ལྷ་སྐུ་ལའང་། གང་མཐོང་པ་ལ། དཀར་པོ་ལས་དམར་པོར་བསྒྱུར་བ། དེ་སེར་པོ། དེ་ནག་པོ། སྔོན་པོ་ལྗང་ཁུ་སོགས་སུ་བསྒྱུར། ཞལ་ཕྱག་ཀྱང་མང་པ་ལ་ཉུང་པ། ཉུང་པ་ལ་མང་པ། ཆུང་པ་ལས་ཆེ་བ། ཆེ་བ་ཆུང་པར། ཞི་བ་ཁྲོ་བོར། ཁྲོ་བོ་ལས་ཞི་བར་བསྒྱུར་བ་ཡིན་ནོ་གསུང་ངོ་།
།བཞི་པ་སྣང་སྟོང་ཞེན་བྲལ་ནི། ལྷ་སྐུ་དེ་རྣམས་གཅིག་གིས་གཅིག་མ་སྒྲིབས་པར་གསལ་བ། དེ་རྣམས་ཀྱང་སྣང་ལ་རང་བཞིན་མེད་པ། བཟང་ངན་གྱི་རྟོག་པ་མེད་པ། གསལ་སྟོང་འཛིན་མེད་སྒྱུ་མ་རང་ཤར་དུ་རྟོགས་པར་བྱེད་པ་ཡིན་ནོ་གསུང་།
དྲུག་པ་ཡུལ་སྣང་གཏན་ལ་འབེབས་པ་ལ་བཞི་སྟེ། དབང་པོ་རབ་དམིགས་མེད་གསལ་མཁྱེན། འབྲིང་གང་བསམས་གསལ་མཐོང་། ཐ་མ་ཡིད་ལུས་མཁའ་ལྡིང་། དམན་པ་དམིགས་པའི་ཡུལ་སྣང་ངོ་།
།དེ་ལ་དང་པོ་གསུམ་པོ་འདི་གོང་གི་ཡོན་ཏན་ཐོབ་ཚུལ་ལྟ་བུ་ཡིན་ཏེ། དབང་པོ་རབ་ཀྱིས་ཕྱི་ནང་གི་དངོས་པོ་རྣམས་སྒྲིབ་བྱེད་དང་ཆགས་སྡང་གི་རྟོག་པ་མེད་པར་མ་འདྲེས་ཡོངས་རྫོགས་སུ་མངོན་སུན་དང་བག་ལ་ཉལ་དང་བཅས་པ་སལ་ལེ། མཉམ་པར་བཞག་པ་དང་མ་བཞག་པ་མེད་པར་སངས་རྒྱས་ནས་རིགས་དྲུག་ཡར་ཆད་མངོན་སུམ་ལྟ་བུར་མཁྱེན་པ་ཡིན་ནོ་གསུང་ངོ་།
།གཉིས་པ་དབང་པོ་འབྲིང་ནི། རྨི་ལམ་ཟིན་ནས་སངས་རྒྱས་ཀྱི་ཞིང་ཁམས་ལ་སོགས་གང་ལྟ་བར་འདོད་པ་དེ་ཡིད་ཀྱིས་བསམས་པ་དང་མཐོང་པ་དུས་མཚུངས་སུ་ཡོང་པ་ཡིན་ནོ་གསུང་།
གསུམ་པ་ཡིད་ལུས་མཁའ་ལྡིང་ནི། རྨི་ལམ་ཟིན་ནས་གང་ལྟ་བར་འདོད་པའི་གནས་དེར་བྱ་རོག་ལ་སོགས་པར་སྤྲུལ་ནས་འགྲོ་གསུང་ཏེ། དེ་བས་སྟོབས་ཆེ་བ་བྱ་རྒོད་དམ་ཁྱུང་དུ་སྤྲུལ་ནས། གང་ལྟ་བར་འདོད་པ་དེར་འགྲོ་བ་ཡིན། དེའང་བག་ཆགས་ཀྱི་བྱེད་པས་འཕུར་བ་ལ་བྱའི་རྣམ་པ་དེ་བདེ་བ་ཡིན། དེ་མིན་ཡིད་ཀྱིས་འགྲོ་བ་ལ་དེ་འདྲ་རང་མི་དགོས། དེ་ཀ་རང་གིས་འཕུར་བས་ཆོག་པ་འདྲ་གསུང་།
རིན་པོ་ཆེ་གསེར་གླིང་པས་རྣལ་ལམ་ཟིན་ནས་སུམ་བཅུ་རྩ་སུམ་ལྟ་སྙམ་ཙ་ན། བྱ་དཀར་སེར་ཆེན་པོ་གཅིག་གི་སྣང་པ་བྱུང་པས། དེར་སྤྲུལ་ནས་འཕུར་བས། རི་ཟུར་གཟར་པོ་ཤིན་དུའང་སྐྱུར་རིང་པ་གཅིག་གི་སྟེང་ན་ཕར་སླེབ་བྱུང་། རི་དེའི་སྟེང་ནས་དར་ཁྲ་ཤིན་དུ་རིང་པ་གཅིག་བྱུང་པའི་འདབ་ན་ཕར་ཕྱིན། འབྱུང་བཞིའི་རྣམ་པ་མ་ཡིན་པའི་རིན་པོ་ཆེ་སྣ་ཚོགས་ལས་གྲུབ་པའི་སྟོངས་ཆེན་པོ་གཅིག་ན་ཕར་ལ་སླེབ། ལྷའི་བུ་དང་བུ་མོའི་ཚོགས་མང་པོ་འདུག །སའི་གསེབ་ན་ཕར་ཕྱིན་ཀྱང་། ཅི་ཡང་ཟེར་མི་མེད་པ་འབྲེལ་མེད་ཀྱི་རྣམ་པ་འདྲ་བ་གཅིག་བྱུང་པ་དེའི་དུས་ན། རྣམ་པར་རྒྱལ་བའི་ཁང་བཟངས་ཡིན་ཟེར་བ་གཅིག་གི་མདུན་ན་རིན་པོ་ཆེ་སྣ་ཚོགས་ལས་གྲུབ་པའི་ཁྲི་ཆེན་པོ་གཅིག་གི་སྟེང་ན། བྱམས་པ་ཅུང་ཟད་སྐུ་མདོག་དམར་བ་རིན་པོ་ཆེའི་འོད་ཟེར་སྣ་ཚོགས་འཕྲོ་བ་བ་གཅིག་མཐོང་ནས་མོས་གུས་ཀྱི་གདུང་ཤུགས་ཆེན་པོས་གསོལ་བ་བཏབ་ནས་ཆོས་གཅིག་ཞུ་དགོས་བསམ་པ་དེ་ལ་གཉིད་ཕྲས་ཀྱིས་སད་ནས་ཆོས་ཞུ་ལོང་མ་བྱུང་ཀྱང་། བདག་པས་གཞན་གཅེས་ཀྱི་བློ་ཅུང་ཟད་བརྟན་པར་བྱུང་པ་དེ་ཡིན་ཞིང་། དགེ་སྦྱོར་འཕེལ་བར་བྱུང་གསུང་། དེ་རྣམས་ཡོན་ཏན་ཐོབ་ཚུལ་དང་རྩལ་སྦྱོང་ཡིན་ནོ་གསུང་།
བཞི་པ་དམན་པ་དམིགས་པའི་ཡུལ་སྣང་ལ་གསུམ་སྟེ། བདག་མེད་མས་ཡུལ་སྣང་འཆར་བྱེད། ཨས་ཡུལ་སྣང་གསལ་བྱེད། ཐིག་ལེ་ཡུལ་སྣང་རང་གསལ་ལོ།
།དང་པོ་ནི། སྐྱབས་འགྲོ་ནས་བླ་མ་སྒོམ་པ་ཡར་ཆད་སྔར་དང་འདྲ། གསོལ་འདེབས་ལ།
ཐེམས་ཡིག་ལས། །ཡུལ་སྣང་དམིགས་པ་རྣམ་གསུམ་ལ། །གསོལ་འདེབས་གསུམ་ལ་དམིགས་པ་གསུམ། གསུང་པ།
བདག་འཛིན། དགོས་མེད། རྨི་ལམ་འབྱོངས་ནས་ཡུལ་སྣང་གཏན་ལ་ཕེབས་པར་བྱིན་གྱིས་བརླབ་དུ་གསོལ། ཞེས་གསོལ་བ་རྩེ་གཅིག་དུ་གདབ། དམིགས་པ་ནི། ལུས་ཆོས་བདུན། རང་ལུས་བདེ་མཆོག་དུ་གསལ་བའི་ལྟ་བར་ཨ་ལས་ཐོད་པའི་ནང་དུ་ཨོཾ་ཨ་སྭཧཱ་ཡི་གེ་བཞི་ཁ་དོག་སྣ་ཚོགས་སུ་ཁྲ་མེ་རེ་བསམ། ངག་དུ་ཨོཾ་ཨ་སྭཧཱ་ཞེས་བཟླས་པས། ཡིག་འགྲུའ་ལས་འོད་གྱེན་དུ་བྱུང་སྣ་བུག་གཡས་ནས་འཐོན། ཕྱི་སྣོད་དང་ནང་བཅུད་ལ་ཕོག །སྣོང་གཞལ་ཡས་ཁང་། བཅུད་ལྷ་དང་ལྷ་མོར་གསལ་གཏབ། ཡང་འོད་འཕྲོས་ཕྱི་ནང་གསང་གསུམ་གྱི་མཆོད་པར་གྱུར་པས་ལྷ་རྣམས་ལ་མཆོད་ལ། གཟུགས་སྣང་བ་ཐམས་ཅད་ལྷ་དང་ལྷ་མོ། སྒྲ་གྲག་པ་ཐམས་ཅད་སྔགས་ཀྱི་རང་སྒྲ། དྲན་རིག་དྲན་རྟོག་ཐམས་ཅད་སྒྱུ་མ་ཡིན་རྨི་ལམ་ཡིན། ཁྱད་པར་དུ་རྨི་ལམ་ཡིན་སྙམ་པའི་འཁྱེར་ལོ་གསུམ་གྱིས་ཉིན་པར་གྱི་དུས་འདའ་བ་ཡིན་ནོ། །མཚན་མོ་གོང་བཞིན་གསོལ་བ་གདབ། ལུས་ཡི་དམ་དུ་གསལ་བའི་ལྟེ་བར་ཨ་ལས་ཐོད་པའི་ནང་དུ་བདག་མེད་མ་སྐུ་མདོག་སྔོན་མོ་གྲི་གུག་དང་ཐོད་པ་འཛིན་པ་གར་སྟབས་སུ་ལིང་བ་བསམ། དེའི་ཐུགས་ཁར་གསལ་བྱེད་མ་འགགས་པ་མེ་ལོང་ལྟ་བུ་ཤིན་དུ་གསལ་བ་གང་ལྟ་བར་འདོད་པའི་ཞིང་ཁམས་ལ་སོགས་པ་དེ་མེ་ལོང་གི་ནང་དུ་གཟུགས་བརྙན་ཤར་བ་བཞིན་བཀྲ་ལམ་པ་བསྒོམས་ལ། གསོལ་བ་འདི་གདབ་སྟེ། ཡི་དམ་གྱི་ལྷ་ཁྱེད་རྣམས་ཀྱིས་དོ་ནུབ་ཀྱི་སྐབས་སུ་ཡི་དམ་གྱི་ལྷ་ཚོགས་རྣམས་མཐོང་པ་དང་། མཆོད་པ་རྒྱ་ཆེན་པོ་འགྲུབ་པར་བྱིན་གྱིས་བརླབ་དུ་གསོལ། ཞེས་གསོལ་བ་དྲག་དུ་བཏབ་ལ་གཉིད་འགྲོ་ཁར་བདག་མེད་མའི་ཐུགས་ཁར་ཡུལ་སྣང་གསལ་གཏབ་ལ་གཉིད་ལོག་སྟེ། དེས་ཡུལ་སྣང་ཇི་ལྟ་བ་བཞིན་མི་འཆར་མི་སྲིད་པ་ཡིན་གསུང་ངོ་།
།གཉིས་པ་ནི། སྐྱབས་འགྲོ་ནས་གསོལ་འདེབས་ཡན་ཆད་འདྲ། དམིགས་པ་ནི། རང་བདེ་མཆོག་དུ་གསལ་བའི་ལུས་ཀྱི་ནང་ན་ཡར་ལ་རྩ་དབུའ་མ་ཁྲ་མ་ཕུས་གཏབ་པ་ལྟ་བུ་ཤིན་དུ་དངས་པ་གསལ་བའི་ནང་ལྟེ་འོག་སོར་བཞིའི་ཐད་དུ་ཨ་དཀར་པོ་འོད་ཀྱི་རང་བཞིན་ཅན་ཤིན་དུ་གསལ་བ་གཅིག་བསྒོམ། ཨའི་འོད་ཀྱིས་དབུ་མ་གང་པས་ཤིན་དུ་གསལ་བ་ལུས་ཀྱི་རྩ་གནས་ཐམས་ཅད་ཀྱང་གསལ་སིང་པ། མི་གསལ་བའི་ཆ་ཅུང་ཟད་ཀྱང་མེད་པ། གསལ་སིང་པ་འོད་དུ་གྱུར་པ་བསམ། གསལ་དངས་དེའི་ངང་ནས་སྒྱུ་མ་རྨི་ལམ་གྱི་དྲན་འདུན་རྩེ་གཅིག་པས་གཉིད་ལོག །དེས་ཡུལ་སྣང་ངེས་པར་གཏན་ལ་ཕེབས་པ་ཡིན་གསུང་། སངས་རྒྱས་གཉན་སྟོན་དང་། སྟོན་པའི་ཞུས་ལན་ནས། དམིགས་པ་གཞན་རྣམས་ཀྱིས་ཀྱང་ཡུལ་སྣང་ཕལ་ཆེ་བ་གཏན་ལ་ཕེབས་ཏེ། ཁྱད་པར་དུ་ཡུལ་སྣང་གཏན་ལ་འབེབས་པ་ལ་ལྟེ་འོག་དབུའ་མའི་ནང་དུ་ཨ་སྒོམ་པ་ཁོ་ན་ཟབ། འདིས་ཡུལ་སྣང་ཕྱི་ནང་མེད་པ་ཐམས་ཅད་མ་སྒྲིབས་པར་གསལ་བར་མཁྱེན་པ་ཡིན་གསུང་། བླ་མའི་གསུང་ནས་དེ་ཤིན་དུ་བདེན་ཏེ། འདིས་ངེས་པར་མཐོང་པ་གཅིག་འདུག་གསུང་ངོ་།
།གསུམ་པ་ནི། སྐྱབས་འགྲོ་ནས་གསོལ་འདེབས་ཡན་འདྲ། དམིགས་པ་ནི། རང་ལྷར་གསལ་བའི་སྤྱི་བོ་ནས་ཐིག་ལེ་དཀར་པོ་བབས་སྙིང་ཁར་བྱོན། ལྟེ་བ་དང་གསང་གནས་གཉིས་ནས་ཐིག་ལེ་དམར་པོ་བྱུང་། ཐིག་ལེ་གསུམ་པོ་སྙིང་ཁར་འཁོར་ཞིང་གཅིག་དུ་འདྲེས་སྙིང་གི་དཀྱིལ་དུ་ཐིག་ལེ་འོད་ཀྱི་རྣམ་པ་སྣང་ལ་རང་བཞིན་མེད་པ་འོད་དུ་ཧྲིལ་བ་བསམས། དེ་ལས་འོད་ཟེར་སྐར་མདའ་ལྟ་བུ་རང་གི་སྣ་བུག་ནས་འཕྲོས། སངས་རྒྱས་ཀྱི་ཞིང་ཁམས་ལ་སོགས་པ་གང་ལྟ་བར་འདོད་པ་དེར་སོང་། དེ་བཀྲ་ལམ་པ་མི་གསལ་བ་མེད་པར་བསམ། དེ་དང་རང་གི་སྙིང་ཁའི་འོད་གཉིས། འོད་བ་ཐག་ལྟ་བུས་སྒྲེལ་བ་ལ་སྔར་བཞིན་འདུན་པ་བཏང་ལ་གཉིད་ལོག །དེས་ཡུལ་སྣང་ཇི་ལྟ་བ་བཞིན་དུ་གཏན་ལ་ཕེབས་པ་ཡིན་གསུང་ངོ་།
རྨི་ལམ་འཛིན་པ་ལ་དམིགས་པ་བཞི། སྦྱང་པ་ལ་བཞི། སྤྲུལ་སྤེལ་ལ་བཞི། སྒྱུར་བ་ལ་གཉིས། ཡུལ་སྣང་གཏན་ལ་འབེབས་པ་གསུམ་ཏེ། རྨི་ལམ་ལ་དམིགས་པ་བཅུ་བདུན་མཛད་ཀྱི་སྣང་ངོ་།

སྤྱི་དོན་བཞི་པ་འོད་གསལ་མ་རིག་མུན་བྲལ་ལ་གསུམ་ཏེ། སྔོན་འགྲོ་དངོས་གཞི་དང་། རྗེས་སོ།
།དང་པོ་ལ་བཞི། རྩ་བ་མི་རྟག་སྐྱོ་ཤས། ཡལ་ག་སྤྱོད་ལམ་དམ་རྫས། ལོ་འདབ་ཐབས་ལམ་རང་དངས། མེ་ཏོག་གསོལ་འདེབས་འཆར་བྱེད་དོ།
།དང་པོ་ནི། འཆི་བ་རྒྱུད་ལ་མ་སྐྱེས་ཤིང་། །ཚེ་འདི་བློ་ཡིས་མ་ཐེངས་ན། །བསྒོམས་ཚད་ངལ་བ་དོན་མེད་ཡིན། །རི་ལ་བསྡད་ཀྱང་རི་དགས་འདྲ། །འཆི་བ་རྒྱུད་སྐྱེས་འོད་གསལ་འཆར། །ཞེས་གསུངས་པས། འཆི་བ་མི་རྟག་པ་ཞེ་དུང་པ་འཁོར་བ་དུ་ཁ་གྱི་རང་བཞིན་འདི་ལ། སྐྱོ་ཤས་དྲག་པོ་བསྐྱེད་པ་ཡིན་འདི་རང་གལ་ཆེ་གསུང་།
གཉིས་པ་ནི། སྤྱོད་ལམ་དལ་ལ་ཁ་ཟས་སྣུམ། །རྔུལ་ཐོན་ལས་རྣམས་སྤང་པར་བྱ། །ཞེས་གསུངས་པས། ལུས་ངག་མ་འཁྲགས་པར་བྱའོ་གསུང་། དམ་རྫས་ནི། ཚོགས་དང་གཏོར་མ་བཟང་དུ་བཤམས་ལ། བླ་མ་ཡི་དམ་ཆོས་སྐྱོང་ལ་དབུལ། གུ་གུལ་དང་ཚིལ་ཆེན་གྱི་དུད་པ་བཏང་། ཐོད་པ་མཚན་ཉིད་དང་ལྡན་པའི་ནང་དུ་གཏོར་མ་བརྒྱན་ཅན་བཤམས་ལ། དེ་ཤ་ལྔ་བདུད་རྩི་ལྔར་བྱིན་གྱིས་བརླབས་ནས། དར་རམ་རས་གཙང་མས་གཡོགས་ལ་རྔས་འོག་དུ་བཞུག །མཁའ་འགྲོ་འདུ་བའི་རྟེན་འབྲེལ་ཡིན་གསུང་ངོ་།
།གསུམ་པ་ནི། ཁ་ཟས་བཅུད་ཅན་བཟའ། ཐབས་ལམ་བསྒོམས་པས་ཐིག་ལེ་རྒྱས་པར་བྱས་བས་རླུང་སེམས་དངས་པ་ལས་འོད་གསལ་འཆར་བ་ཡིན་ནོ་གསུང་།
།བཞི་པ་ནི། འོད་གསལ་བྱིན་བརླབས་ཀྱི་གནད། བྱིན་བརླབས་མོས་གུས་ཀྱི་གནད་ཡིན་པས། བླ་མ་ལ་ལོག་ལྟ་སྤངས་ལ། ཆོས་སྐུའི་འདུ་ཤེས་ཀྱིས་གསོལ་བ་རྩེ་གཅིག་དུ་གདབ། མོས་གུས་རབ་འབྲིང་དང་སྦྱར་ནས་འོད་གསལ་འཆར་བ་ལགས་གསུང་ངོ་།
།དངོས་གཞི་ལ་བཞི་སྟེ། འོད་གསལ་བཟུང་པ། ལམ་ཁྱེར། བསྲེ་བ། མཐར་ཐུག་གོ།
།དང་པོ་ལ་གནད་འཆུག་མེད་དགུས་འཛིན་གསུང་པས། དུས་ཀྱི་གནད་གསུམ་ནི། ཐོ་རངས། ནམ་ལངས། ཉི་ཤར་རོ། །ལུས་ཀྱི་གནད་གསུམ་ནི། དཀྱིལ་དཀྲུངས། རྩོག་བུ། སེང་གེའི་ཉལ་ཐབས་སོ། །དམིགས་པའི་གནད་གསུམ་ནི། ཨ་ལ་བཟུང་པ། བདག་མེད་མས་བཟུང་པ། བླ་མས་བཟུང་པའོ།
།དང་པོ་ནི། སྐྱབས་འགྲོ་ནས་བླ་མ་སྒོམ་པ་ཡན་འདྲ། གསོལ་འདེབས་ལ།
ཐེམས་ཡིག་ལས། །ཁྱད་འཕགས་འོད་གསལ་ཆོས་བཞི་ལ། །གསོལ་འདེབས་གསུམ་ལ་དམིགས་པ་བཞི། གསུང་པས།
བདག་འཛིན། དགོས་མེད། འོད་གསལ་འཆར་བར་བྱིན་གྱིས་བརླབས་སུ་གསོལ། །ཞེས་གསོལ་བ་གདབ། ལུས་བདེ་མཆོག་དུ་གསལ་བའི་ལུས་ནང་དྲད་ཐད་དུ་རྩ་དབུའ་མ་ཕྱི་དཀར་ལ་ནང་དམར་བ་འོད་ཀྱི་རང་བཞིན་ཅན་ཁྲུ་མ་ཕུས་བཏབ་པ་ལྟ་བུའི་ནང་ལྟེ་འོག་སོར་བཞིར་ཨ་དཀར་པོ་དངས་པ་གསལ་བ་འཚེར་བ་འོད་ཀྱི་རང་བཞིན་ཅན་གཅིག་བསམས་ལ། དེ་ལ་རིག་པ་འཇུར་འཇུར་དུ་ཡང་མ་སོང་། ཡེངས་ཀྱང་མ་ཡེངས་པར་བྱས་ལ། ཉིན་མཚན་ཐམས་ཅད་དུ་རྩེ་གཅིག་དུ་བསྒོམ། ཨ་སེམས་ཉིད་སྐྱེ་བ་མེད་པའི་རང་བཞིན་ཤེས་པར་བྱའོ། །དེ་ཡང་གཉིད་དུ་འགྲོ་བའི་དུས་སུ་གཉིད་དང་རྨི་ལམ་གྱི་བར་དེར། རྟོག་པ་མ་ཞུགས་པ་བྱས་ལ། མ་ཡེངས་པར་ཨ་ལ་སེམས་གཏད་ལ་སྒོམ། དེ་ཡང་ཐ་མལ་པ་རྣམས་ལ་གཏི་མུག་གི་གཉིད་མུན་ཐིབས་འགྲོ་རྒྱུ་གཅིག་ཡོད་པ་དེ། འོད་གསལ་ཟིན་པ་རྣམས་ལ་ནམ་ལངས་པ་ལ་ཉི་མའི་མདངས་ཕོག་པ་བཞིན། སྣང་པ་ཐམས་ཅད་གསལ་ལ་རྟོག་པ་མེད་པ། བདེ་ལ་ཞེན་པ་མེད་པའི་ཉམས་གཅིག་འཆར་ཏེ། དེ་འོད་གསལ་ཟིན་པ་ཡིན་ནོ་གསུང་།
གཉིས་པ་ནི། གསོལ་འདེབས་ཡན་སྔར་དང་འདྲ། དམིགས་པ་ནི། རང་གི་སྤྱི་བོ་ཀླད་རྒྱ་དང་ཐོད་པའི་བར་དུ། བདག་མེད་མ་སྐུ་མདོག་དཀར་མོ་མཚོན་གང་ཙམ་པ་ཆུང་ལ་དོད་པ་གཅིག་བསམ། དེའི་ཐུགས་ཁར་ཨ་དཀར་པོ་གཅིག་བསམ། དེ་ལས་འོད་ཟེར་འཕྲོས་པས་ཀླད་པ་གཏི་མུག་ཡིན་པས་ཐམས་ཅད་རང་བཞིན་མེད་པར་སྦྱངས་ནས་ཐོད་པ་དུང་ཁང་གི་གཞལ་ཡས་ཁང་སྐྱ་ལམ་མེ་བ་སྒོམ་ཞིང་། ཀྱད་པར་ཐུགས་ཁའི་ཨ་ལ་ཉིན་མཚན་དང་གཉིས་དུ་འགྲོ་ཁར་དམིགས་པ་རྩེ་གཅིག་དུ་གཏོད་པ་ཡིན་ནོ་གསུང་།
གསུམ་པ་ནི། གསོལ་འདེབས་ཡན་འདྲ། དམིགས་པ་དངོས་ནི། རང་བདེ་མཆོག་དུ་བསྒོམས་པའི་སྤྱི་བོ་ནས་རྐང་པའི་མཐིལ་ཡན་ཆད་ཐིག་ལེ་དཀར་པོ་འོད་དང་བདེ་བའི་རང་བཞིན་དུ་སྒོམ། དེའི་ཐུགས་ཁར་བླ་མ་ཐིག་ལེའི་ངོ་བོ་ཉིད་ཀྱི་རང་བཞིན་ཉི་མ་འབུམ་གྱི་གཟིའ་བརྗིད་ལྟ་བུའི་ཐུགས་ཁར་ཧཱུྃ་དཀར་པོ་དརྔུལ་ཆུའི་མདོག་ལྟ་བུ་བདེ་བའི་རང་བཞིན་དུ་བསམ། ཁོང་པའི་ཐིག་ལེ་ལས་འོད་འཕྲོས་བླ་མ་གསལ། བླ་མ་ལས་འོད་འཕྲོས་ཧཱུྃ་གསལ་བ་དེ་ཉིད་ལ་ཉིན་མཚན་དང་གཉིད་དུ་འགྲོ་ཁར་དམིགས་པ་རྩེ་གཅིག་དུ་གཏད་པས། མི་ཟིན་མི་སྲིད། ཟིན་ནས་འཆོར་མི་སྲིད་གསུང་ངོ་།
།ལམ་འཁྱེར་ལ་གཉིས་ཏེ། ཉིན་མོ་སྐུ་གསུམ་ལམ་འཁྱེར། མཚན་མོ་སྐུ་གསུམ་རང་ཤར་རོ།
།དང་པོ་ནི། ཨ་ལ་སེམས་གཏོད་པ་བཞིན་དུ། རིག་པ་སྒྲིམ་ལྷོད་རན་པར་བྱས་ལ། ཅིར་སྣང་ཐམས་ཅད་ལ་གླང་པོ་ཆེའི་ལྟ་སྟངས་གསུང་པས་མིག་འབྲུ་ཚུགས་སུ་ལྟས་ནས་སེམས་ཚིར་གཏད་པས། སྣང་ཆ་མ་འགགས། འཛིན་ཆ་ལ་ཞུགས་པའི་གསལ་སྟོང་འཛིན་མེད་དུ་འཆར་ཏེ། དེ་ལ་གསལ་བ་སྤྲུལ་སྐུ། འཛིན་པ་མེད་པ་ཆོས་སྐུ། བདེ་བར་ཤར་བ་ལོངས་སྐུ་ཡིན་ནོ་གསུང་།
གཉིས་པ་ནི། གཉིད་དང་རྨི་ལམ་་གྱི་བར་དུ་རྟོག་པ་མ་ཞུགས་པ་བྱས་ལ། སྔར་གྱི་དམིགས་པ་ལ་སེམས་གཏད་ནས་གཉིད་ལོག་པས་གསལ་སྟོང་འཛིན་མེད་རང་དུ་འཆར་རོ་གསུང་ངོ་།
།གསུམ་པ་བསྲེ་བ་ལ་བཞི་སྟེ། གསལ་སྟོང་བདེ་ཆེན་དུ་བསྲེ་བ། ཉིན་མཚན་དབྱེར་མེད་དུ་བསྲེ་བ། ལྟ་སྟངས་ཀྱིས་མཉམ་རྗེས་སུ་བསྲེ་བ། ཤེས་རབ་བདེ་སྟོང་དུ་བསྲེ་བའོ།
།དང་པོ་ནི། སྒོ་ལྔའི་ཡུལ་དུ་སྣང་པ་མ་འགགས་པས་རྣམ་པ་གསལ་བ། དོན་ལ་གང་དུའང་གྲུབ་པ་མེད་པས་ངོ་བོ་སྟོང་པ། དེ་ལ་ཡིད་མ་ཡེངས་པར་གཏད་པས་འཛིན་པ་དག་ནས་ཉམས་མྱོང་བདེ་བའི་བཤིས་སུ་འཆར་རོ།
།གཉིས་པ་ནི། གསལ་ལ་རྟོག་མེད་དེ་ཉིད་ཉིན་མཚན་གཅིག་གིས་གཅིག་སྟོབས་བསྐྱེད་ཅིང་རྒྱས་འདེབས་པ་ཡིན་ནོ། གསུང་།
གསུམ་པ་ནི། མཉམ་བཞག་ལ་གསལ་སྟོང་འཛིན་མེད་དུ་ཤར་ཡང་། རྗེས་ཤེས་ལ་འགྲོ་འཆག་གིས་གཡོས་པར་གྱུར་ན། སྤྱོད་ལམ་ཐམས་ཅད་དུ་ཅིར་སྣང་ཐམས་ཅད་ལ་གླང་པོ་ཆེའི་ལྟ་སྟངས་ཀྱིས་ལྟས་པས་གསལ་ལ་རྟོག་མེད་དུ་འཆར་རོ་གསུང་།
བཞི་པ་ནི། རང་ལུས་ཐབས་ལྡན་གྱི་བདེ་བ་དང་། གཞན་ལུས་ཤེས་རབ་མའི་བདེ་བ་གང་སྐྱེས་ཀྱང་། དེ་ཉིད་ལ་ཡིད་མ་ཡེངས་པར་གཏད་པས་བདེ་བའི་ཞེན་པ་དག་ནས་སྟོང་པར་འཆར་རོ་གསུང་།
།བཞི་པ་མཐར་ཐུག་ལ་ལྔ་སྟེ། གསལ་སྟོང་རང་ཤར་གྱི་འོད་གསལ། བདེ་སྟོང་རང་ཤར་གྱི། ཟབ་ཞི་སྤྲོས་བྲལ་གྱི། དབྱེར་མེད་མཐར་ཐུག་གི །དག་པ་གཉིས་ལྡན་གྱི་འོད་གསོལ་ལོ།
།འདི་རྣམས་གོང་གི་ཡོན་ཏན་ནམ་རྒྱུན་གྱི་ཉམས་ལེན་དུ་བཤད་པ་ཡིན་ཏེ།
།དང་པོ་ནི། དེ་ལྟར་བསྲེས་ནས་ཉམས་སུ་བླངས་པས། མངོན་དུ་གྱུར་པ་ན་ཚོགས་དྲུག་ཡུལ་ཅན་གྱི་སྣང་པ་ཐམས་ཅད་གསལ་སྟོང་རང་ཤར་དུ་འཆར་རོ།
།གཉིས་པ་ནི། བདེ་བ་དེ་ཉིད་ཞེན་པའི་དྲི་མ་ཐམས་ཅད་དང་བྲལ་བ་ཟག་པ་མེད་པའི་བདེ་བ་ཆེན་པོར་འཆར་རོ།
།གསུམ་པ་ནི། བློའི་ཡུལ་ལས་འདས་པས་ཟབ་པ། བཟུང་འཛིན་གྱི་རྟོག་པས་དག་པས་ཞི་བ། མཐའ་བཞིའམ་བརྒྱད་ལས་གྲོལ་བས་སྤྲོས་པ་དང་བྲལ་བ། སེམས་ཀྱི་འོད་ཤར་བས་འོད་གསལ་བ། རྒྱུ་རྐྱེན་དང་བྲལ་བས་འདུས་མ་བྱས་པའོ།
།བཞི་པ་ནི། བདེ་གསལ་མི་རྟོག་པ་གསུམ། དབྱེར་མེད་རང་ཤར་དུ་ཉམས་སུ་མྱོང་ཞིང་ཐག་ཆོད་ངེས་ཤེས་སྐྱེས་པའོ།
།ལྔ་པ་ནི། དབྱིངས་རང་བཞིན་གྱིས་རྣམ་པར་དག་པ་ལ། སྤང་བྱ་བློ་བུར་གྱི་དྲི་མས་དག་པའམ། སྒྱུ་མ་རྨི་ལམ་དུ་བསྒོམས་པས་ཉོན་མོངས་པའི་དྲི་མ་དག་པ་དང་། རྒྱུར་འཛིན་དང་བྲལ་བའི་འོད་གསལ་ཕྱག་རྒྱ་ཆེན་པོས་ཤེས་བྱའི་སྒྲིབ་པ་དག་པ་ཡིན་ནོ་གསུང་།
།གསུམ་པ་རྗེས་ལ་ལྔ་ཏེ། དམ་ཚིག་སྤྱི་དང་བྱེ་བྲག །གགས་སེལ་ཉེས་སྐྱོན་རང་གྲོལ། བོགས་དོན་ཐེ་ཚོམ་གཅོད་བྱེད། ཁྱད་འཕགས་འཆར་སྒོ་ངོས་འཛིན། ཉམས་རྟོགས་ཉིན་མཚན་ཁྱད་པར་རོ།
།དང་པོ་ནི། རྩ་བའི་ལྟུང་པ་བཅུ་བཞི། ཡན་ལག་གི་ལྟུང་པ་བརྒྱད་དེ་ཉི་ཤུ་རྩ་གཉིས་དང་། འོད་གསལ་གྱི་དམིགས་པ་ལ་སྐད་གཅིག་ཀྱང་མ་ཡེངས་ཤིང་མི་འདའ་བ་དང་། ལས་དང་པོ་པ་རྣམས་ཀྱིས་བླ་མ་དང་མཆེད་གྲོགས་ལ་ལོག་ལྟ་སྤངས་ལ་མོས་གུས་དང་དག་སྣང་ཕྱོགས་མེད་དུ་བསྐྱེད་པ། འོད་གསལ་ཐིག་ལེའི་མདངས་ཡིན་པས་ཁམས་མི་ཉམས་ཤིང་འཕེལ་བར་བྱེད་པ་ཡིན་ནོ་གསུང་ངོ་།
།གཉིས་པ་ནི། གསལ་སྟོང་འཛིན་མེད་ཀྱི་གགས་སམ་བདུད། འཛིན་པའི་རྣམ་རྟོག་ཡིན། རྟོག་པ་སེམས་ཡིན། སེམས་སྐྱེ་མེད་ཡིན་པས་ཉེས་སྐྱོན་ཅི་བྱུང་ཡང་རང་གྲོལ་རང་དག །རང་སྟོང་དུ་ཤེས་པར་བྱའོ།
།གསུམ་པ་ནི། དུས་གསུམ་གྱི་སངས་རྒྱས་བྱོན་ཡང་། གསལ་སྟོང་འཛིན་མེད་ལས་ལྷག་པ་བསྟན་རྒྱུ་མེད་པར་ཐག་བཅད་ཅིང་ངེས་ཤེས་བསྐྱེད་པར་བྱའོ།
།བཞི་པ་ནི། བླ་མའི་ཞལ་ལས་ཤེས་པར་བྱའོ་གསུང་པས། འཆར་སྒོ་ངོས་འཛིན་ཟུར་དུ་སྟོན་ཅིང་། རང་དང་སློབ་མའི་ཉམས་ལས་ཀྱང་ཤེས་པར་བྱའོ།
།ལྔ་པ་ནི། ཉིན་པར་གྱི་སྣང་པ་ཐམས་ཅད་རང་གི་སེམས། སེམས་ནི་སེམས་མ་མཆིས་ཏེ་སྟོང་པ་དེའི་ངོ་བོ་གསལ་བ། རང་བཞིན་གྱིས་སྟོང་པ། སྣང་པ་ཐམས་ཅད་གསལ་སྟོང་ཞེན་བྲལ་དུ་རང་ཤར་བ་དེ་ཉིན་པར་གྱི་འོད་གསལ་ལོ། །མཚན་མོའི་སྣང་པ་ཐམས་ཅད་སྐྱེ་ཤིའི་ཡོད་མེད་མཐའ་དབུས་དགག་བསྒྲུབ་དང་བྲལ་བ་རང་ཤར་བར་རྟོགས་པ་དེ་མཚན་མོའི་འོད་གསལ་ཡིན་ནོ་གསུང་ངོ་།
།འོད་གསལ་ལ་བཟུང་པ་ལ་གསུམ། ལམ་ཁྱེར་དང་། བསྲེ་བ་གཉིས་ལ་རེ་རེ་སྟེ་དམིགས་པ་ལྔའོ།

།སྤྱི་དོན་ལྔ་པ་འཕོ་བ་མ་བསྒོམས་སངས་རྒྱས་ལ་བཞི་སྟེ། རབ་འཕོ་བྱ་འཕོ་བྱེད་དང་བྲལ་བར་རྟོགས་པའོ། །འབྲིང་ཟུང་འཇུག་ཡི་དམ་གྱི་འཕོ་བ། བྱིན་བརླབས་བླ་མའི་འཕོ་བ། འཆུག་མེད་མཁའ་སྤྱོད་ཀྱི་འཕོ་བ་ལ་སོགས་པ་གསུངས་ཀྱང་། ཕྱག་ལེན་དུ་སྡིག་པོ་ཆེ་བཙན་ཐབས་སུ་སངས་རྒྱ་བ་འཕོ་བ་ཡེ་ཤེས་སྐར་ཁུང་མ་འདི་མཛད་དེ། དེ་ཡང་སྐྱབས་འགྲོ་སེམས་བསྐྱེད་བླ་མའི་རྣལ་འབྱོར་བསྒོམས་ལ། གསོལ་བ་གདབ་པ་ནི།
ཐེམས་ཡིག་ལས། །འཕོ་བ་མ་སྒོམས་སངས་རྒྱས་ལ། །གསོལ་འདེབས་གསུམ་ལ་དམིགས་པ་བཞི། གསུང་པས།
བདག་འཛིན། དགོས་མེད། བར་དོར་སངས་རྒྱ་བར་བྱིན་གྱིས་བརླབས་དུ་གསོལ་ཞེས་གསོལ་བ་གདབ།
དམིགས་པ་ནི། རང་བདེ་མཆོག་དུ་གསལ་བའི་ལུས་ཀྱི་ནང་རྩ་དབུ་མ་ཕྱི་དཀར་ལ་ནང་དམར་བ་འོད་ཀྱི་རང་བཞིན་ཡར་རྩེ་ཚངས་བུག་དུ་སླེབ་པ། མར་རྩེ་གསང་གནས་སུ་སླེབ་པ། སྟོང་སེང་ཡོད་པའི་ནང་ལྟེ་བའི་ཐད་ཀར། ཆོས་འབྱུང་ཕྱི་དཀར་ལ་ནང་དམར་བ་འོད་ཀྱི་རང་བཞིན་ཟུར་གཅིག་མདུན་དུ་བསྟན་པ་ཟུར་གཉིས་རྩིབ་ལོགས་གཡས་གཡོན་ལ་ཟུག་པ། དེའི་ནང་དུ་རྣམ་པར་ཤེས་པ་ཨ་དཀར་པོ་འོད་འཕྲོ་བ་དང་བཅས་པ་ཡེད་ཡེད་པ་འཕིར་ལ་ཁད་པ་གཅིག་སྒོམ། རླུང་རོ་ལན་གསུམ་ཕྱིར་གསལ་ལ། སྐེད་པ་ཉེག་ཉེག་པ་ལན་གསུམ་བྱ། སྟེང་འོག་གི་རླུང་ནར་གྱིས་དྲངས་ལས་དྲག་དུ་བཟུང་། ཁྱད་པར་དུ་འོག་རླུང་དྲག་པོ་དྲངས་ཏེ་ལྟེ་བ་སྒལ་པ་ལ་ཆར་གྱིས་སྦྱར་ལ་ལྟེ་བའི་ཆོས་འབྱུང་ཁ་ནང་དུ་ཆར་གྱིས་སོང་པ་དང་། ལྟེ་བའི་ནང་གི་ཨ་དེ། རང་དབང་མེད་པར་རྡུ་ཏི་ན་ཡར་རྒྱངས་ཀྱིས་དོན་ནས་ནམ་མཁའ་ལ་འོད་དུ་ཡལ་སོང་པར་བསྒོམ། ཐུན་རེ་ལ་དེ་ལྟ་བུ་ཁོར་བདུན་ནམ་ཉི་ཤུ་རྩ་གཅིག་ལ་སོགས་པ་བསྒོམས་ལ། ཐུན་འཇོག་ཁར་སྤྱི་བོར་ཨ་གཅིག་ལམས་ཏེ་བསམས་ལ། ཨ་བདུད་རྩིའི་རང་བཞིན་དུ་ཞུ་ནས་ཐོད་པའི་རྒྱ་སྲུབས་དམ་དུ་རྩེམས། དབུ་མའི་ནང་དུ་སོང་པས་བདེ་སྟོང་གཉིས་སུ་མེད་པའི་ངང་དུ་སིང་གིས་བཞག་གོ
།འཕོ་བ་ཟབ་ན་ཚེ་ཐུང་བྱ་བ་ཡིན་པས་ཚེ་བསྒྲུབ་ཀྱི་གནད་ཡིན་གསུང་། དེ་ལྟ་བུ་ནུས་ཚད་དུ་བྱའོ།
།དེ་ལྟར་བསྒོམ་པས་འབྱོངས་པའི་རྟགས་རབ་འབྲིང་ཐ་མ་གསུམ་འབྱུང་སྟེ། རབ་ལ་སྤྱི་བོ་རྡ་པོ་ནས་ཁྲག་དང་ཆུ་སེར་ཡོང་། འབྲིང་ལ་སྤྱི་བོ་སྐྲངས་ནས་འོང་། ཐ་མའང་སྤྱི་བོ་ཟ་བ་དང་། འཕྲིག་པ་དང་། འགུལ་བ་འོང་སྟེ། དེ་རྣམས་འབྱོངས་པའི་རྟགས་ཡིན་གསུང་། སྒོམ་པའི་དུས་སུ་ཐལ་གྱིས་དགོས་པ་ལ་རིན་པོ་ཆེའི་སྣོད་ལ་སོགས་པ་བྱང་མས་མགོ་མནན། དེས་ཐུབ་གསུང་སྟེ་སྦྱང་པའོ།
།ལས་སྦྱོར་ནི། དེ་ལྟར་བསྒོམས་པའི་རྟེན་གྱི་གང་ཟག་དེ་ལ། ངེས་པའི་འཆི་ལྟས་བླ་མ་ར་ཧུ་ལའི་ཞལ་ནས། རླུང་གཉིས་མཉམ་དུ་རྒྱུ་ན་རྣལ་འབྱོར་མྱུར་དུ་འཆི། །གསུང་པས།
སྲོག་རླུང་དབུ་མར་འདུས་པའི་རྟགས་ཁ་སྣ་གཉིས་ནས་རླུང་དུས་གཅིག་ལ་ཤྭ་ཤྭ་བྱུང་ན། དེའི་ཉི་མ་ཕྱེད་ན་འཆི་ངེས་པ་ཡིན་པས། རང་གི་ལུས་ལོངས་སྤྱོད་ཉེ་འབྲེལ་ལ་སོགས་པ་གང་ལ་ཡང་མ་ཆགས་པ་སྣང་སྲིད་འཁོར་འདས་ཐམས་ཅད་སྒྱུ་མར་ཤེས་པར་བྱས་ལ། སྐྱབས་འགྲོ་སེམས་བསྐྱེད་བྱ། ལུས་ལྷ་སྐུར་དྲན་པའི་སྤྱི་བོར། བླ་མ་བསྒོམས་ལ་གསོལ་བ་གདབ། གཞན་དོན་རྒྱ་ཆེན་པོ་འབྱུང་པའི་སྨོན་ལམ་རྣམ་པར་དག་པ་གདབ། འདུ་འཛི་དང་གཡེང་པ་ཐམས་ཅད་སྤངས་ལ། རང་གཅིག་བུར་བསྡད་ལ་འཕོ་བར་བྱ་སྟེ།
སྔོན་དུ་རྩ་ཁ་འབྱེད་པའི་མན་ངག་ནི། རྒྱུད་ལས། རང་དང་བུད་མེད་ཐིག་ལེ་ཡིས། །རླུང་སེམས་གཉིས་པོ་ཡར་ལ་འདྲེན། །ཚ་ལས་རྩ་ཁ་འབྱེད་པར་བྱེད། །མིའི་ཀླད་པས་བར་ཆད་བསྲུང་། །ཞེས་བཤད་པས།
རྫས་སྣ་བཞི་པོ་དེ་ལག་མཐིལ་དུ་སྲིན་ལག་གཡོན་པས་མཉེས་ལ་ཡི་དམ་ལྷའི་སྔགས་བཏབ་ཏེ། སྤྱི་བོར་བྱུགས་ལ་རླུང་མི་བཟུང་པར་རང་སོར་བཞག་གོ
།དམིགས་པ་ནི་ཆོས་འབྱུང་གི་ཨ་ཡར་རྒྱངས་རྒྱངས་བཏང་ནས་སྐྱེ་མེད་ཀྱི་ངང་ལ་བཞག་ནས་འཕོ་བར་ཕྱེད་པ་ཡིན་ནོ་གསུང་ངོ་།

།སྤྱི་དོན་དྲུག་པ་བར་དོ་ལོངས་སྤྱོད་རྫོགས་སྐུ་ནི།
ཡེ་ཤེས་རྒྱ་མཚོའི་རྒྱུད་ལས། བར་དོའི་འཇིགས་པ་ཆེན་པོ་ལ། །རྟོགས་པ་བརྟན་པོའི་མན་ངག་གཅེས། །བར་དོའི་འཇིགས་པ་ཆེན་པོ་ལ། །འཆུག་པ་མེད་པའི་མན་ངག་གཅེས། །ཞེས་གསུངས་པས།
བར་དོ་ལ་བཞི་སྟེ། རབ་བར་དོ་དང་པོའི་འོད་གསལ་རང་ཤར། འབྲིང་རྒྱལ་བ་ལོངས་སྐུ་རང་ཤར། ཐ་མ་སྤྲུལ་སྐུ་འགག་མེད་རང་ཤར། སྤྱི་གནད་འཆུག་མེད་ལམ་ཁྱེར་རོ།
།དང་པོ་ནི། ཡུལ་དང་འབྱུང་པ་དང་སྣང་འཆོད་ལ་སོགས་པའི་ཐིམ་འགྲོས་ངོས་བཟུང་ཞིང་། ལམ་འཁྱེར་གསུམ་དང་སྙུག་མའི་ངང་ལ་བཞག་པས། བླ་མའི་བྱིན་བརླབས་དང་གདམ་ངག་གིས་རང་བཞིན་གྱི་འོད་གསལ་དང་། བསྒོམ་པའི་འོད་གསལ་གཉིས་མ་དང་བུ་ཕྲད་པ་ལྟར་ངོ་ཕྲོད་དེ་འོད་གསལ་དེ་ཉིད་ལ་གནས་པས་བར་དོར་རིགས་དྲུག་གི་གྲོང་ཁྱེར་མི་མཐོང་པར་འོད་གསལ་ཆོས་སྐུ་སྐྱེ་མེད་དེ་ལས་གཟུགས་སྐུ་གཉིས་འགག་མེད་རང་ཤར་ལྷུན་གྲུབ་དུ་འབྱུང་ནས། དེས་འཁོར་བའི་རྒྱ་མཚོ་མ་སྟོངས་བར་དུ་གང་ལ་གང་འདུལ་གྱིས་སེམས་ཅན་སྨིན་གྲིལ་འབྱུང་པ་ཡིན་གསུང་ངོ་།
།གཉིས་པ་ནི། སྐྱབས་འགྲོ་ནས་བླ་མ་བསྒོམ་པའི་བར་འདྲ། གསོལ་འདེབས་ནི།
ཐེམས་ཡིག་ལས། །བར་དོ་ལོངས་སྤྱོད་རྫོགས་སྐུ་ལ། །གསོལ་འདེབས་གསུམ་ལ་དམིགས་པ་བཞི། གསུང་པས།
བདག་འཛིན། དགོས་མེད། བར་དོ་ལོངས་སྤྱོད་རྫོགས་པའི་སྐུར་སངས་རྒྱ་བར་བྱིན་གྱིས་བརླབ་དུ་གསོལ། །ཞེས་གསོལ་བ་རྩེ་གཅིག་དུ་གདབ། སྣང་པ་བདེན་མེད་དུ་ཕྱམ་སོང་པ་དང་། ག་རེ་ང་ཤི་བ་ཡིན་པར་འདུག་པས། བླ་མས་ངོ་སྤྲད་པའི་རྒྱལ་བ་ལོངས་སྐུ་ཉམས་སུ་བླང་དགོས་སྙམ་དུ་བསམས་ལ། རང་གི་མདུན་དུ་ཆོས་འབྱུང་སྔོན་པོ་གཅིག་བསམས་ལ། འདི་མ་རྟོགས་པ་རྣམས་ལ་མའི་མངལ། རྟོགས་པ་རྣམས་ལ་འོག་མིན་ཆོས་ཀྱི་དབྱིངས་ཀྱི་ཕོ་བྲང་ཡིན་སྙམ་དུ་བསམ། ཆོས་འབྱུང་གི་ནང་དུ་རང་གི་སེམས་ཡི་གེ་ཧཱུྃ་སྔོན་པོ་གཅིག་དུ་བསམ། དེ་ལས་འོད་འཕྲོས། འདས་པའི་མའི་མངལ་གྱི་བག་ཆགས་སྦྱངས། ད་ལྟར་གྱི་མངལ་གྱི་ལན་ཆགས་དང་དྲི་མ་སྦྱང་། མ་འོངས་པའི་མངལ་སྒོ་བགག་པར་བསམ། འདི་གཅིག་བུ་རང་གིས་ཆོག་གསུང་། དེ་ནས་ཧཱུྃ་དེ་བདེ་མཆོག་དུ་བསྐྱེད་པའི་སྤྱི་བོར་རྗེ་བཙུན་མ། དེའི་སྤྱི་བོར་བླ་མ་བསྒོམས་ལ། བླ་མའི་སྐུ་ལས་འོད་ཟེར་བདེ་བའི་རང་བཞིན་ཅན་བྱུང་། རྗེ་བཙུན་མ་ལ་ཕོག །དེ་ལའང་འོད་ཟེར་བདེ་བའི་རང་བཞིན་ཅན་བྱུང་། རང་བདེ་མཆོག་དུ་གསལ་བ་ལ་ཕོག ལྷ་སྐུ་འོད་ཀྱི་རང་བཞིན་ཅན་དེ་ལ་ཉིན་མོ་རྩེ་གཅིག་ཏུ་བསྒོམས་པས། རྨི་ལམ་དུ་སྐུ་ཡོངས་སུ་རྫོགས་པའམ། ཐ་ན་སྤྱན་ཙམ་གཅིག་བྱུང་ཡང་བར་དོར་རྒྱལ་བ་ལོངས་སྤྱོད་རྫོགས་པའི་སྐུར་སངས་རྒྱ་བར་ཐེ་ཚོམ་མེད་དོ་གསུང་ངོ་།
།གསུམ་པ་ནི། སྔོན་འགྲོ་སྔར་དང་འདྲ། མངལ་སྦྱང་པའང་སྔར་དང་འདྲ་བ་ལ། ཁྱད་པར་རང་གི་གྲོགས་མཆེད་དང་། ནོར་རྫེས་ལ་སོགས་པ་འགའ་ཞིག་བརྟན་པོར་བསྐྱེད་ལ། ང་ཤི་ནས་འདུག །གྲོགས་མཆེད་དང་དངོས་པོ་འདི་རྣམས་ཐམས་ཅད་བར་དོའི་གྲོགས་མཆེད་ལ་སོགས་པར་འདུག་པས། བླ་མས་ངོ་སྤྲད་པའི་གདམ་ངག་ཉམས་སུ་བླང་དགོས་སྙམ་དུ་བསམས་ལ། གཟུགས་སུ་སྣང་པ་ཐམས་ཅད་ལྷའི་སྐུ། སྒྲ་གྲག་པ་ཐམས་ཅད་སྔགས་ཀྱི་རང་སྒྲ། སྔགས་སྐྲག་དང་དྲན་རྟོག་ཐམས་ཅད་ལ་གླང་པོ་ཆེའི་ལྟ་སྟངས་ཀྱིས་ལྷ་སྐུ་ཕྱག་རྒྱ་ཆེན་པོ་ལ་སྐད་གཅིག་མ་གསུམ་ཙམ་མཉལ་པར་བཞག་པ་དང་། བར་དོ་གཤིན་རྗེའི་གཟུགས་སུ་སྣང་པ་རྣམས་ཡི་དམ་གྱི་ལྷ། སོད་གཅིག་ཆོམས་གཅིག་གི་སྒྲ་སྔགས། རྔངས་སྐྲག་དང་དྲན་རྟོག་རྣམས་ཆོས་ཉིད་དུ་གྲོལ་ནས་ཕྱི་ན་སྣོད་བཅུད་ཐམས་ཅད་དང་། རང་ལུས་སྣང་སྟོང་ཞེན་བྲལ་གྱི་ལྷ། སྤྲུལ་སྐུའི་སྣང་པ་འབའ་ཞིག་དུ་རང་ཤར་ནས། དུས་དེ་ཉིད་དུ་སྤྲུལ་སྐུར་སངས་མི་རྒྱ་མི་སྲིད་པ་ཡིན་ནི་གསུང་ངོ་།
།བཞི་པ་སྤྱི་གནད་འཆུག་མེད་ནི། སྐྱབས་འགྲོ་ནས་མངལ་སྦྱང་པ་ཡན་ཆད་སྔར་བཞིན་བསྒོམས་ལ། སྤྱིར་ཕོ་ཐམས་ཅད་དང་། ཁྱད་པར་དུ་ཞེ་སྡང་སྐྱེ་བའི་ཡུལ་དེ་ཆོས་འབྱུང་གི་གཡོན་ཟུར་དུ་བདེ་མཆོག་ཡབ་དུ་བསྐྱེད་ལ། ཡིད་ཀྱིས་སྤྲུལ་པའི་མཆོད་པ་དབུལ་ཞིང་གསོལ་བ་གདབས་པར་བྱའོ། །སྤྱིར་མོ་ཆགས་ཐམས་ཅད་དང་། ཁྱད་པར་དུ་འདོད་ཆགས་སྐྱེ་བའི་ཡུལ་དེ་ཆོས་འབྱུང་གི་གཡས་ཟུར་དུ་རྗེ་བཙུན་མར་བསྐྱེད་ལ་མཆོད་པ་དབུལ་ཞིང་གསོལ་བ་གཏབ་ལ་ཕྲག་དོག་མིག་སེར་ཐམས་ཅད་སྒྱུ་མ་རྨི་ལམ་དུ་སྦྱང་པར་བྱའོ། །བར་དོར་ཕྲ་དོག་དང་མིག་སེར་མ་བྱུང་ན་རབ། བྱུང་ན་གནད་འདིས་རང་དག་ནས་ལོངས་སྐུར་སངས་རྒྱ་བར་འགྱུར་རོ། །རབ་ཀྱིས་ཉམས་ལེན་ཐམས་ཅད་ཀྱི་དུས་སུ། ཨ་པ་ང་ཤི་ནས་འདུག་སྣང་པ་འདི་བར་དོའི་སྣང་པ། ལུས་འདི་ཡིད་ཀྱི་ལུས་གྲོགས་མཆེད་ཐམས་ཅད་བར་དོའི་གྲོགས། ཟས་གོས་ཐམས་ཅད་བར་དོའི་ཟས་གོས་སུ་འདུག་སྙམ་དུ་བསམ་ཞིང་། ངག་དུ་ཡང་བརྗོད་པས། བར་དོར་འཆར་རྒྱུ་ཐམས་ཅད་འདིར་འཆར། དེར་ཤར་བ་དང་། བར་དོའི་འཇིགས་པ་ཆེན་པོ་ལ། །འཆུག་པ་མེད་པའི་མན་ངག་གཅེས། གསུངས་པས། བླ་མས་ངོ་སྤྲད་པའི་རྒྱལ་བ་ལོངས་སྐུ་ཉམས་སུ་ལེན་དགོས་སྙམ་དུ་བསམ། དེར་ཉམས་སུ་བླངས་པས་བར་དོར་སངས་མི་རྒྱ་མི་སྲིད་གསུང་ངོ་།
བར་དོ་གསུམ་གྱི་བཤད་པ་ཡང་རྒྱས་པར་རྗེ་བཙུན་ཁྱུང་པོ་རྣལ་འབྱོར་གྱིས་མཛད་པས་དེར་ལྟ་བར་བྱེད་དོ་གསུང་། ལར་བར་དོའི་འཁྲུལ་སྣང་ཐམས་ཅད་ད་ལྟར་གྱི་སྣང་པ་འདི་ལ་བཅད་དགོས། འདི་ལ་བདེན་ཞེན་གྱི་རྟོག་པ་མེད་པར་སྣང་པ་བདེན་མེད་སྒྱུ་མ་རྨི་ལམ། ལུས་ཡིད་ལུས་ལྷ་སྐུ་ལམ་ཁྱེར། བླ་མ་སྤྱི་བོར་བསྒོམས་ཏེ་གསོལ་འདེབས་ལམ་ཁྱེར། མིག་གླང་པོ་ཆེའི་ལྟ་སྟངས་འབྲལ་མེད། སེམས་སྤྲོས་བྲལ་ཕྱག་རྒྱ་ཆེན་པོ་ལས་མ་གཡོས་པའི་ངང་ནས། ཅིར་སྣང་ཐམས་ཅད་ལ་ངག་ཡིད་བར་དོའི་སྣང་པ་དང་མི་འབྲལ་བ་རྒྱུན་གྱི་ཉམས་ལེན་ཡིན་པས་འཆུག་མེད་གཅིག་བྱེད། དལ་འབྱོར་རིན་པོ་ཆེ་ཐོབ་དུས་སུ། ཚེ་གཅིག་གིས་སངས་རྒྱས་བསྒྲུབ་པ་ཁེ་ཆེ་བ་ཡིན། དེ་ལ་གདམ་ངག་འདི་ལས་ཟབ་པ་མེད། འདི་མཁས་གྲུབ་ཀྱི་རྒྱུད་པ་ཟམ་མ་ཆད་པས་ཉམས་སུ་བླངས་པ། གདམ་ངག་དང་རྒྱུད་པ་ལ་སེལ་མ་ཞུགས་པ་བྱིན་བརླབས་འབྱུང་འཕྲོ་རང་ཡིན་པས་ཉམས་སུ་ལེན་པར་ཞུའོ་གསུང་ངོ་།
།དེ་ལྟར་འཕོ་བ་ལ་དམིགས་པ་གཅིག །བར་དོ་ལ་གསུམ་མོ།

།རྡོ་རྗེ་འཆང་གི་ཐུགས་ཀྱི་ཉིང་ཁུ་མཆོག །མདོའ་རྒྱུད་ཀུན་གྱི་སྙིང་པོ་བསྡུས་པ་འདི། །བདེ་སྟོང་དབྱེར་མེད་མཁའ་འགྲོའི་ཞལ་བུམ་ལས། །སྤྲུལ་སྐུ་ཁྱུང་པོས་དཀའ་བས་ལེགས་བླངས་ཤིང་། །ཆིག་རྒྱུད་རྡོ་རྗེའི་རྒྱ་ཡིས་ལེགས་བཏབ་པ། །རྡོ་རྗེ་འཆང་དབང་ཆོས་རྒྱལ་སྟོན་པ་ཡིས། །ལུང་བསྟན་བཞིན་དུ་ཀུན་ལ་སྤེལ་བའི་ཆོས། །གསེར་གླིང་ཐུགས་སྲས་ཞལ་གྱི་པད་མོ་ལས། །སྙན་རྒྱུད་གདམ་ངག་བདག་ལ་ལེགས་པར་བབས། །སྙིགས་དུས་སྐྱེ་བོ་ཚེ་ཐུང་བར་ཆད་མང་། །བསྒྲུབ་སོང་མེད་པར་འབྲས་བུ་འདོད་རྣམས་ལ། །ཆོས་དཔལ་སྦྱིན་པ་གཏོང་པའི་ཆོས་གཅིག་ཡིན། །མཁའ་འགྲོའི་ཚོགས་རྣམས་ཀུན་ལ་རྩེ་བ་ཡིས། །རྣམ་དག་ཆོས་འདི་ཀུན་ལ་འཕེལ་བ་དང་། །བར་ཆད་མེད་པར་བསྒྲུབ་པ་མཐར་ཕྱིན་ནས། །ཆོས་འདིས་མཁའ་མཉམ་འགྲོ་བ་གྲོལ་བར་ཤོག
།སྙན་བརྒྱུད་ཀྱི་མན་ངག་རྡོ་རྗེའི་ཚིག་གི་འདུད་འགྲོལ་ཞེས་བྱ་བ་འདི་ཉིད། ཕྱོགས་མེད་ཀུན་དུ་འཁྱམ་པའི་སྤྲང་པོ་ཆོས་དཔལ་གྱིས། དཔལ་ལྡན་བླ་མ་དམ་པ་ཐུགས་ཀྱི་སྲས་གཅིག་པོ། རིན་ཆེན་བཛྲ་ཤྲཱིའི་སྤྱན་སྔར་དོན་ཁྲིད་དུ་སྐྱངས་པའི་དུས་སུ། རང་གཞན་ཀུན་ལ་ཕན་པའི་བསམ་པས། བླ་མ་དང་མཁའ་འགྲོ་ལ་གསོལ་བ་གཏབ་ཏེ། བླ་མ་ཉིད་ཇི་ལྟར་གསུང་པ་ལས། རང་བཟོའ་དང་མཁས་འདོད་ཀྱི་དྲི་མས་མ་སླད་པར་ཟིན་བྲིས་སུ་བགྱིས་པ་འདིས། ཀུན་ལ་ཕན་པ་རྒྱ་ཆེན་པོ་འབྱུང་པར་གྱུར་ཅིག །སྙན་བརྒྱུད་ཀྱི་མན་ངག་རྡོ་རྗེའི་ཚིག་གི་མདུད་འགྲོལ་ཞེས་བྱ་བ་ཟབ་པའི་མན་ངག །རེ་ཤག་གི་རྫོགས་སོ། །ཞུས་དགོ། །།

།འདིའི་རྒྱུད་པ་ནི། རྡོ་རྗེ་འཆང་། ནི་གུ་མ། ཁྱུང་པོ་རྣལ་འབྱོར། རྨོག་ལྕོག་པ་རིན་ཆེན་བརྩོན་འགྲུས། དབོན་སྟོན་དྷརྨ་སེང་གེ །གཉན་སྟོན་ཆོས་ཀྱི་ཤེས་རབ། སངས་རྒྱས་སྟོན་པ་བརྩོན་འགྲུས་སེང་གེ །མཁས་གྲུབ་ཆོས་རྗེ་གཞོན་ནུ་གྲུབ། གྲུབ་ཐོབ་ཨ་སེང་གེ །གསེར་གླིང་པ་བཀྲ་ཤི་དཔལ། བྲག་བོ་ཆེ་པ་རྡོ་རྗེ་དཔལ། ཆོས་སྒོ་བ་ཆོས་དཔལ་ཤེས་རབ། བསམ་ཡས་ཆོས་ཀྱི་རྒྱལ་མཚན། འཁྲུལ་ཞིག་ཆེན་པོ་གཞོན་ནུ་འོད། ཆོས་ཀྱི་རྗེ་དུས་འཁོར་བ་འཕགས་པ་རིན་ཆེན། དེས་བདག་རིན་ཆེན་ཆོས་ཀྱི་རྒྱལ་པོ་ལ་དགྱེས་བཞིན་དུ་གནང་ངོ་།