Bka' bcu'i phyag len myu gu'i phreng ba

Resource ID	SCv2p1
Title	zab lam ni gu chos drug gi bka' bcu'i phyag len bklags chog tu bkod pa bde chen myu gu'i phreng ba
Topics	Initiation
Sub-Topics	Chakrasamvara, Six doctrines of Niguma
Author	Losel Tenkyong
Associated Person	Niguma
Link	BDRC W23922 BDRC W23605

༄༅། །ཟབ་ལམ་ནི་གུ་ཆོས་དྲུག་གི་བཀའ་བཅུའི་ཕྱག་ལེན་བཀླགས་ཆོག་ཏུ་བཀོད་པ་བདེ་ཆེན་མྱུ་གུའི་ཕྲེང་བ་ཞེས་བྱ་བ་བཞུགས་སོ།།

།ཨོཾ་སྭ་སྟི་སིདྡྷཾ།
ལྔ་ལྡན་ངེས་པའི་བདག་ཉིད་ལོངས་སྤྱོད་རྫོགས། །ཁ་སྦྱོར་བདེ་ཆེན་ཟག་པ་མེད་པའི་དབྱིངས། །ཐུགས་རྗེའི་ཕྲིན་ལས་རྒྱུན་མི་འཆད་རྩོམ་པ། །ཁྱབ་བདག་རྡོ་རྗེ་འཆང་ལ་གུས་ཕྱག་འཚལ། །གང་ལས་མཆོག་བརྙེས་མཁའ་འགྲོ་ནི་གུ་མ། །ཟབ་མོའི་ལམ་གྱི་སྲོལ་འབྱེད་ཁྱུང་པོའི་ཞབས། །ཁྱད་པར་བདག་གི་དཔལ་མགོན་དྲིན་ཅན་རྗེ། །རྩ་བའི་བླ་མ་མཐུ་སྟོབས་བཟང་པོར་འདུད། །མཁའ་འགྲོའི་ཐུགས་བཅུད་དབང་གི་ཆུ་འཛིན་ཕྲེང་། །བྱིན་རླབས་བདེ་ཆེན་རབ་བསིལ་ཉམས་བརྒྱའི་གར། །ཡེ་ཤེས་བདུད་རྩིའི་སྨན་ཆར་འདོད་དགུའི་གཏེར། །སྐལ་བཟང་ཡིད་མཁར་མཛེས་པར་ཡོངས་སུ་འཁྲིགས། །ཨ་ཧོ་དོན་གཉེར་སློབ་མས་བསྐུལ་བ་དང་། །ཆོས་འདིའི་བཀའ་སྲོལ་མི་ཉམས་འཕེལ་བའི་ཕྱིར། བརྒྱུད་པའི་ཕྱག་ལེན་འཛིན་མ་ལས་འཕོས་པའི། །བདེ་ཆེན་མྱུ་གུའི་འཕྲེང་བ་སྤེལ་བར་བྱ།
འདིར་ཡེ་ཤེས་ཀྱི་མཁའ་འགྲོ་ནི་གུ་མས་མཁས་གྲུབ་ཁྱུང་པོ་རྣལ་འབྱོར་ལ་དངོས་སུ་སྩལ་བའི་ཟབ་ལམ་ནི་གུ་ཆོས་དྲུག་དང་འབྲེལ་བའི་བཀའ་བཅུ་ལ། བྱིན་རླབས་སྒོ་འབྱེད་ཀྱི་བཀའ་གཉིས། བྱིན་རླབས་ཁོག་ཕུབ་ཀྱི་བཀའ་གཉིས། བྱིན་རླབས་གཞུང་ཤིང་གི་བཀའ་དྲུག་ཡོད་པ་ལས་
དང་པོ་བདེ་མཆོག་ནི་གུ་ལྷ་ལྔའི་དབང་བསྐུར་བ་ཉིད་ཡིན་ལ། དེ་ནི་སྒྲུབ་དཀྱིལ་ལོགས་སུ་ཡོད་པ་ལས་རྟོགས་པར་བྱའོ།

Initiation of Chakrasamvara by the samadhi
།གཉིས་པ་བདེ་མཆོག་ལྷ་ལྔའི་ཏིང་ངེ་འཛིན་གྱི་དབང་བསྐུར་བ་ལ་གཉིས་ཏེ། སློབ་དཔོན་གྱི་བྱ་བ་དང་སློབ་མ་འཇུག་པའི་ཆོས་སོ།
།དང་པོ་གནས་ཡིད་དང་མཐུན་པ་སྣོད་དང་མི་ལྡན་པའི་སྐྱེ་བོས་དབེན་པ་ཞིག་ཏུ་བྱི་དོར་བྱས། སྟེགས་མཛེས་པའི་སྟེང་དུ་མཎྜལ་པདྨ་འདབ་བཞི་ཤར་སྔོ་བྱང་ལྗང་ནུབ་དམར་ལྷོ་སེར་བ་ལྟེ་བ་སྔོན་པོ་དང་ལྔ་ལ་ཚོམ་བུ་ལྔ་བཀོད། མདུན་དུ་མཆོད་པ་ལྔ་དང་། གཏོར་མ་ལྔའམ། བསྡུ་ན་གཅིག་ཚུན་བྱ། བགེགས་གཏོར་དང་། སྤྲོ་ན་སྔོན་འགྲོ་གཏོར་མ་ཡང་བྱ། ཚོགས་ཀྱི་ཡོ་བྱེད་ཅི་འབྱོར་པ་གཡོན་སྐོར་དུ་བཤམ། རང་ཉིད་སྟན་བདེ་བ་ལ་འཁོད་དེ་སྐྱབས་འགྲོ་ནས་ཉེར་བསྡུའི་བར་བདག་བསྐྱེད་སྔོན་དུ་བཏང་། མདུན་གྱི་མཎྜལ་སུམྦྷས་བསངས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། གཟུང་བ་རང་བཞིན་མེད་པའི་བདག་ཉིད་དོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། འཛིན་པ་ཡང་རང་བཞིན་མི་དམིགས་ཏེ་ཆོས་ཐམས་ཅད་སྟོང་པ་ཉིད་དོ།
སྟོང་པའི་ནང་ལས་སྲུང་འཁོར་དུར་ཁྲོད་དང་བཅས་པའི་དབུས་སུ་འབྱུང་བཞི་རི་རབ་སྣ་ཚོགས་པདྨའི་ལྟེ་བར་ཉི་མ་འཇིགས་དུས་ཀྱི་གདན་ལ་ཡི་གེ་ཧཱུྃ་མྃ་ཏཱྃ་པྃ་ལྃ་རྣམས་ལས་འོད་ཟེར་འཕྲོས། ཁམས་གསུམ་གྱི་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ནས། འོད་ཟེར་ཚུར་འདུས་ས་བོན་རྣམས་ལ་ཐིམ་པ་ལས་དཔལ་ཧེ་རུ་ཀ་འཁོར་ལོ་བདེ་མཆོག་སྐུ་མདོག་མཐིང་ག་ཨིནྡྲ་ནཱི་ལ་ལྟར་འབར་བའི་འོད་ཟེར་འཕྲོ་བ། ཞལ་གཅིག་ཕྱག་གཉིས་པ། དམར་ལ་ཟླུམ་པའི་སྤྱན་གསུམ་གཡོ་བ། ཁྲོ་ཞིང་སྒེག་ལ་ཆགས་པའི་ཉམས་ཅན་མཆེ་བའི་མྱུ་གུ་ཅུང་ཟད་གཙིགས་པ། བཞིན་ཤིན་ཏུ་འགྱུར་བའི་ཁྲོ་གཉེར་བསྡུས་ཤིང་འཇིགས་སུ་རུང་བ། བུང་བ་ལྟར་གནག་པའི་དབུ་སྐྲ་རལ་པའི་ཐོར་ཚུགས་སྤྱི་བོར་བཅིངས་པ། རྩེ་མོར་རུས་པའི་འཁོར་ལོ་ལ་གནས་པའི་ནོར་བུ་དང་། རལ་པའི་ངོས་ལ་སྣ་ཚོགས་རྡོ་རྗེ་དང་། གཡོན་ངོས་སུ་ཟླ་བ་ཕྱེད་པས་བརྒྱན་པ། མི་རུས་ཀྱི་རྣ་ཆ་དང་། མགུལ་རྒྱན་དང་། གདུ་བུའི་ཚོགས་དང་སྐ་རགས་དང་མཆོད་ཕྱིར་ཐོགས་ཀྱིས་བརྒྱན་པ། ཐལ་བ་ཆེན་པོས་ཉེ་བར་བྱུགས་ཤིང་། མི་མགོ་སྐམ་པོ་ལྔའི་དབུ་རྒྱན་དང་། དཔའ་བོའི་དར་དཔྱངས་དང་བཅས་པ། མིའི་རྒྱུ་མ་ལ་བརྒྱུས་པའི་ཁྲག་འཛག་མགོ་བོ་ལྔ་བཅུའི་དོ་ཤལ་ཅན། སྟག་གི་པགས་པའི་ཤམ་ཐབས་གྲོལ་བ། ཕྱག་གཡས་རྡོ་རྗེ་དང་གཡོན་དྲིལ་བུ་འཛིན་པས་ཡུམ་ལ་འཁྱུད་པ། ཞབས་གཡོན་བསྐུམ་པའི་འཇིགས་བྱེད་ནག་པོ་དང་། གཡས་བརྐྱངས་པས་དུས་མཚན་མ་དམར་མོ་མནན་པ། གར་གྱི་ཉམས་དགུ་དང་ལྡན་ཞིང་མཚན་དང་དཔེ་བྱད་ཡོངས་སུ་རྫོགས་པའོ།
དེ་ལ་འཁྱུད་པའི་ཡུམ་རྡོ་རྗེ་ཕག་མོ་སྐུ་མདོག་དམར་མོ་བསྐལ་པའི་མེ་ལྟར་གཟི་བརྗིད་འབར་བ། ཕྱག་གཡས་རྡོ་རྗེ་གྲི་གུག་དང་བཅས་པའི་སྡིགས་མཛུབ་ཀྱིས་ཕྱོགས་ཐམས་ཅད་གནོན་ཅིང་། གཡོན་ཐོད་པ་ཁྲག་གིས་གང་བ་འཛིན་པས་ཡབ་ལ་འཁྱུད་པ། གཅེར་བུ་སྐྲ་གྲོལ་ཞིང་ཕྱག་རྒྱ་ལྔས་བརྒྱན་པ། ཐོད་སྐམ་གྱི་དབུ་རྒྱན་དང་དོ་ཤལ་ཅན། ཞབས་གཡས་བསྐུམ་གཡོན་བརྐྱངས་པས་ཡབ་ལ་འཁྱུད་པ་ཡབ་ཡུམ་གཉིས་ཀ་ཡང་ལང་ཚོ་གསར་དུ་བདོ་བ། མེ་དཔུང་འབར་བའི་དབུས་ན་བཞུགས་པའོ།
ཤར་གྱི་འདབ་མ་ལ་མཁའ་འགྲོ་མ་མཐིང་ག །བྱང་དུ་ལཱ་མ་ལྗང་ཁུ། ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་མོ། ཐམས་ཅད་ཀྱང་ཞལ་གཅིག་ཕྱག་གཉིས། སྤྱན་གསུམ་པ། གཡས་གྲི་གུག་འཕྱར་ཞིང་། གཡོན་ཐོད་ཁྲག་ཐུགས་ཀར་འཛིན་པ། མཆན་ཁུང་དུ་རྡོ་རྗེས་མཚན་པའི་ཁ་ཊྭཱཾ་ག་དང་བཅས་ཤིང་། མི་རོའི་གདན་ལ་ཞབས་གཡས་བརྐྱང་གི་སྟབས་ཀྱིས་བཞུགས་པ། རྡོ་རྗེ་ཕག་མོ་དང་མཚུངས་ཤིང་ཕག་མོའི་རིགས་ལས་བྱུང་བའོ།
རང་གི་སྙིང་གའི་ཧཱུྃ་ལས་འོད་ཟེར་འཕྲོས། འཁོར་ལོ་བདེ་མཆོག་ལྷ་ལྔའི་དཀྱིལ་འཁོར།
ཕཻཾ། བཛྲ་ས་མཱ་ཛཿ ཨོཾ་ཨརྒྷཾ་ནས་ཤབྡ་ཨཱཿཧཱུྃ། ཛ་ཧཱུྃ་བྃ་ཧོཿ །བདུན་བསྐྱེད་ལ་གཉིས་སུ་མེད་པར་ཐིམ། དེའི་དཔྲལ་བར་ཨོཾ་དཀར་པོ། མགྲིན་པར་ཨཱ་དམར་པོ། །ཐུགས་ཀར་ཧཱུྃ་སྔོན་པོ། ཡང་སྙིང་ཁའི་ཧཱུྃ་ལས་འོད་ཟེར་འཕྲོས། དབང་གི་ལྷ་སངས་རྒྱས་དང་བྱང་ཆུབ་སེམས་དཔའ་ཁྲོ་བོའི་དབང་པོ་རྣམས་བཙུན་མོར་བཅས་པ་ཐམས་ཅད་སྤྱན་དྲངས་ཕྱི་ནང་གསང་བའི་མཆོད་པ་ཐམས་ཅད་ཀྱིས་མཆོད་པར་གྱུར།
ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། གཙོ་བོའི་ཐུགས་ཀ་ནས་ཡུམ་ལྔ་བདུད་རྩིའི་བུམ་པ་ཐོགས་པ་སྤྲོས།
ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུངས་ཤིང་། བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས། གཙོ་བོ་དང་མཁའ་འགྲོ་མ་ལ་མི་བསྐྱོད་པ། རྡོ་རྗེ་ཕག་མོ་ལ་རྣམ་སྣང་། ལཱ་མ་ལ་དོན་གྲུབ། དུམ་སྐྱེས་མ་ལ་འོད་དཔག་མེད། གཟུགས་ཅན་མ་ལ་རིན་ཆེན་འབྱུང་ལྡན་གྱིས་དབུ་བརྒྱན།
མཆོད་པ་བྱིན་རླབས་བྱས་ལ། ཨོཾ་ཤྲཱི་ཙཀྲ་སམ་བྷ་ར་ས་པ་རི་ཝཱ་ར་ཨརྒྷཾ་ནས། ཤབྟ་ཨཱཿཧཱུྃ་གིས་ཕྱི་མཆོད་དང་། ནང་མཆོད།
སུམྦྷས་བསང་། སྭ་བྷཱས་སྦྱང་། སྟོང་པའི་ངང་ལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་ཤ་ལྔ་བདུད་རྩི་ལྔ་མྱོས་བྱེད་ཀྱིས་གང་བ། དེའི་སྟེང་དུ་དཔལ་འཁོར་ལོ་བདེ་མཆོག་ལྷ་ལྔ་སྐད་ཅིག་གིས་བཞུགས་པར་གྱུར།
ཡི་གེ་བདུན་པ་བཟླ། ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས། ཐོད་པའི་སྟེང་གི་ཧེ་རུ་ཀ་ལྷ་ལྔའི་སྐུ་ལ་ཐིམ། སྦྱོར་མཚམས་དང་གསང་བའི་སྒོ་ནས་བདུད་རྩིའི་རྒྱུན་བབས། གཞིར་གནས་ཀྱི་དམ་རྫས་དང་འདྲེས་ཏེ་ཡེ་ཤེས་ཀྱི་བདུད་རྩིས་ཐོད་པ་གང་བར་གྱུར་པ་ལ། ལྷ་ལྔ་པོ་རྣམས་ཀྱང་བདུད་རྩིར་ཞུ་སྟེ་ཐིམ།
ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ་སོགས་ལྷ་ལྔ་སོ་སོའི་སྙིང་པོ་ལ་འབྲུ་གསུམ་བཏགས་པས་ནང་མཆོད་འབུལ།
སྤྲོ་ན། རྒྱལ་སྲིད་སྣ་བདུན་དང་། འདོད་ཡོན་ལྔའི་མཆོད་པ་བྱ།
རིགས་ཀུན་བདག་པོ་བཅོམ་ལྡན་ཧེ་རུ་ཀ །གཉིས་མེད་སྦྱོར་མཛད་རྡོ་རྗེ་བཙུན་མོ་ཆེ། །མཁའ་འགྲོ་ལཱ་མ་དུམ་སྐྱེས་གཟུགས་ཅན་མ། །དཔལ་ཆེན་ལྷ་ལྔའི་ཚོགས་ལ་ཕྱག་འཚལ་བསྟོད།
།སྐབས་འདིར་གཏོར་མ་བྱིན་གྱིས་བརླབས་ལ་འབུལ་ཞིང་། འོག་ཏུ་འབྱུང་བ་ལྟར་མཎྜལ་ཕུལ། བདག་འཇུག་གི་ཚུལ་དུ་སློབ་མ་ལ་བྱ་བ་ཕལ་ཆེར་ཏིང་ངེ་འཛིན་གྱི་ཚུལ་དུ་དབང་བླང་།
གཉིས་པ་སློབ་མ་འཇུག་པའི་རིམ་པ་ལ་སྔོན་འགྲོ་དང་། དངོས་གཞི་གཉིས་ལས་དང་པོ་ནི། སློབ་མ་རྣམས་ཁྲུས་ཕྱག་སྔོན་འགྲོས་གྲལ་དུ་འཁོད། ལས་ཀྱི་རྡོ་རྗེས་མེ་ཏོག་བཀྱེ་བསྡུ་བྱ། སློབ་དཔོན་གྱིས་བགེགས་ལ་གཏོར་མ་སྦྱིན་ལ་མཚམས་རྔམ་བྱ།
འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྒྱལ་བ་རྡོ་རྗེ་འཆང་ཆེན་པོའི་གོ་འཕང་སྐུ་ཚེ་འདི་ཉིད་ལ་ཐོབ་པར་བྱ། དེའི་ཆེད་དུ་གསང་སྔགས་ཟབ་མོའི་ཆོས་གསན་སྙམ་པའི་ཀུན་སློང་དང་། ཀུན་སྤྱོད་སྤྱི་བྱེ་བྲག་རྣམས་གསལ་བཏབ་སྟེ་གསན་པར་ཞུ། གང་གསན་པར་བྱ་བ་ནི་འདིར་ཟབ་ལམ་ནི་གུ་ཆོས་དྲུག་གི་བདེ་མཆོག་ལྷ་ལྔའི་ཏིང་ངེ་འཛིན་གྱི་བྱིན་རླབས་དབང་བཞི་ལུས་བསྒྲིགས་ཡིན། དེ་ལ་སློབ་དཔོན་གྱི་བྱ་བ་རྣམས་གྲུབ་ཟིན། སློབ་མ་ལ་བྱ་བའི་ངོ་སྐལ་དུ་གྱུར་པ་ལ་ཐོག་མར་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། ཅེས་བརྡ་སྤྲད་ལ།
སློབ་མས་དབྱངས་དང་བཅས་ཏེ། བཀོད་པ་ཤིན་ཏུ་མཛེས་པའི་མཎྜལ་མཆོག །ཅེས་སོགས་མཎྜལ་བཀའ་རྒྱ་མ་བྱེད་པ་གཞན་ཀུན་ལ་འགྲེའོ།
།དེ་ནས་གསོལ་བ་འདེབས་པ་འདིའི་རྗེས་ཟློས་མཛོད། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །སྡོམ་པ་རྣམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ཀྱང་འཇུག་པར་འཚལ། །ལས་གསུམ་བྱ།
དེ་ནས་ཐུན་མོང་གི་རྒྱུན་བཤགས་བྱ་བ་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། སོགས་ལན་གསུམ།
དེ་ནས་རིགས་ལྔའི་སྡོམ་པ་བཟུང་བ་འདིའི་རྗེས་ཟློས་མཛོད། །སངས་རྒྱས་བྱང་ཆུབ་སེམས་དཔའ་ཀུན། །ཇི་ཙམ་དུས་ནས་བཟུང་ནས་སུ། །མ་ལུས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །དུས་འདི་ཉིད་ནས་བཟུང་ནས་སུ། །ནམ་ཞིག་བྱང་ཆུབ་སྙིང་པོ་ལ། །ཡོངས་སུ་གནས་ཀྱི་བར་དག་ཏུ། །བདག་གིས་བྱང་ཆུབ་མཆོག་གི་སེམས། །མ་ལུས་པར་ནི་བསྐྱེད་པར་བགྱི། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤང་ངོ་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ཡང་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་བཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བསྒྲལ་བ་རྣམས་བདག་གིས་སྒྲོལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱུང་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་ལས་གསུམ་བྱ།
།སློབ་མའི་གནས་གསུམ་དུ་དྲི་བཟང་གི་ཐིག་ལེ་བྱས་ལ། །ཁྱེད་རང་གི་དཔྲལ་བར་ཨོཾ། མགྲིན་པར་ཨཱཿ སྙིང་ཁར་ཧཱུྃ།
དེ་རྣམས་ཀྱི་འོད་ཀྱིས་ལུས་གང་བས། ལུས་ངག་ཡིད་གསུམ་གྱི་དྲི་མ་དག་པར་གྱུར་པའི་མོས་པ་མཛོད། །ཡང་ཁྱེར་རང་རྣམས་ཀྱི་སྙིང་ཁར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ། དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་རེ་གསལ་བཏབ་ནས་འདིའི་རྗེས་ཟློས་མཛོད།
ཨོཾ་སརྦ་ཡོ་ག་ཙིཏྟ་ཨུཏྤ་ད་ཡཱ་མི། སློབ་དཔོན་གྱིས་སྙིང་ཁར་རྡོ་རྗེ་མེ་ཏོག་དང་བཅས་པ་བཞག་ནས་བྱིན་རླབས་བརྟན་པར་བྱས་པའི་མོས་པ་མཛོད། ཨོཾ་སུ་ར་ཏེ་ས་མ་ཡ་སྟྭམ་ཧོཿ །སིདྡྷི་བཛྲ་ཡ་ཐཱ་སུ་ཁཾ། ཞེས་བརྗོད།
དེ་ནས་དམ་ལ་བཞག་པའི་སླད་དུ་རྡོ་རྗེ་མགོ་བོར་གཏད་ནས་ཚིག་འདི་ལ་གསན་པས་ཁྱབ་པར་གདའ། འདི་ནི་དམ་ཚིག་རྡོ་རྗེ་སྟེ། །ཁྱོད་ཀྱི་སྤྱི་བོར་བཞག་པ་ཡིས། །སངས་རྒྱས་སྐུ་རུ་ཁྱོད་འགྲུབ་ཅིང་། །མི་ཕྱེད་ཡེ་ཤེས་འཐོབ་པར་འགྱུར། །སྙིང་ཁར་རྡོ་རྗེ་གཏུགས་ཏེ་ཡེ་ཤེས་དབབ་པ་གསང་བར་གདམས་པ་འདི་ལ་གསན་པས་ཁྱབ་པར་གདའ། རྡོ་རྗེ་འཛིན་པ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །བདུད་རྩི་ལྔ་ཡི་ཆུ་བླུད་ནས་དམ་ཚིག་བསྲུང་བར་གདམས་པ་འདི་ལ་གསན་པས་ཁྱབ་པར་གདའ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །ཡེ་ཤེས་བདུད་རྩིའི་ཆུ་འདིས་འགྲུབ།
།ཨོཾ་བཛྲ་སརྦ་པཉྩ་ཨ་མྲྀ་ཏ་ཨུ་ད་ཀ་ཧཱུྃ། ཡང་སྤྱི་བོར་རྡོ་རྗེ་བཞག་ནས་བླ་མའི་བཀའ་གཉན་པའི་སྒོ་ནས་དམ་ཚིག་བསྲུང་བར་གདམས་པ་འདི་ལ་གསན་པས་ཁྱབ་བོ།
།དེང་ནས་བཟུང་སྟེ་བུ་ཁྱོད་ཀྱི། །རྡོ་རྗེ་འཛིན་པ་ང་ཡིན་གྱི། །ང་ཡིས་ཇི་ལྟར་བཀའ་སྩལ་པ། །གུས་པའི་ཚུལ་གྱིས་ཉན་པར་གྱིས། །གལ་ཏེ་ང་ལ་བརྙས་ན་ནི། །སངས་རྒྱས་ཐམས་ཅད་བརྙས་པ་ཡིན། །མི་བདེ་མ་སྤངས་དུས་བྱས་ནས། །དམྱལ་བ་ཆེན་པོར་འགྱུར་ཏ་རེ། །ཞེས་བརྗོད།
དེ་ནས་ཡེ་ཤེས་དབབ་པའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། བདེ་བར་གཤེགས་པ་ཐམས་ཅད་ཀྱིས། །བྱིན་གྱིས་བརླབས་པའི་ཡེ་ཤེས་མཆོག
།སེམས་ཅན་ཀུན་གྱི་དོན་གྱི་ཕྱིར། །གཙོ་བོས་བདག་ལ་སྩལ་དུ་གསོལ། །ལན་གསུམ།
དེ་ནས་ཁྱེད་རང་རྣམས་ཐུགས་འདུན་དམིགས་པ་འདི་བཞིན་མཛོད། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་བདེ་མཆོག་ལྷ་ལྔའི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ། དེ་ལས་དེ་དང་འདྲ་བའི་བདེ་མཆོག་ལྷ་ལྔའི་ལྷ་ཚོགས་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྤྱི་བོ་ནས་ཞུགས་ལུས་ཐམས་ཅད་གང་། ལུས་སེམས་བདེ་བས་ཁྱབ་པར་གྱུར་པའི་མོས་པ་མཛོད།
ཡང་ཕྱོགས་བཅུའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོའི་ཚོགས་དང་བཅས་པ་ཐམས་ཅད་ཀྱང་། བདེ་མཆོག་ལྷ་ལྔའི་རྣམ་པར་སྤྱན་དྲངས་ཏེ། ས་གཞི་བར་སྣང་ཐམས་ཅད་ཁྱབ་པ་ཙམ་བྱུང་བ་ཁྱེད་རང་རྣམས་ཀྱི་ལུས་ཀྱི་ཆ་ཐམས་ཅད་ལ་སིབ་སིབ་ཐིམ་པའི་མོས་པ་མཛོད།
སྤོས་རོལ་བྱ། ཡབ་ཡུམ་གྱི་སྙིང་པོ་ཉེ་སྙིང་མཐར། ཨཱ་བེ་ཤ་ཡ་ཨ་ཨཱཿཞེས་བཏགས་པ་གང་མང་བརྗོད་དོ། །སྔོན་འགྲོ་ལྔ་པའོ།
།གཉིས་པ་དངོས་གཞི་དབང་བཞི་ལུས་བསྒྲིགས་ཀྱི་དབང་བསྐུར་བའི་སླད་དུ་མ་ཡེངས་པར་ཐུགས་འདུན་དྲག་པོས་སྤྱན་དམིགས་འདི་རྣམས་བསྒོམ་མཛོད།
ཁྱེད་རང་རྣམས་ཀྱི་སྤྱི་བོར་པཾ་ལས་པདྨ་རམ་ལས་ཉི་མའི་དཀྱིལ་འཁོར་གྱི་སྟེང་དུ་འཇིགས་བྱེད་དུས་མཚན་གྱི་གདན་ལ་ཡི་གེ་ཧཱུྃ་མཐིང་ཁ་ཞིག་གསལ་འདེབས་པ་ཞུ། དེ་བཞིན་དུ་མགྲིན་པར་པཾ་ལས་པདྨ་འདབ་མ་བཞི་པའི་དཀྱིལ་དུ་ཨཱཿདམར་པོ་འབུར་སྐྱེས་ཞིག་གསལ་འདེབས་པ་ཞུ། ཡང་སྙིང་ཁར་པད་ཉི་འཇིགས་དུས་ཀྱི་གདན་ལ་ཧཱུྃ་མཐིང་ཁ་ཞིག་གསལ་འདེབས་པ་ཞུ། དེ་ནས་ལྟེ་བར་ཆོས་འབྱུང་དམར་པོ་གྲུ་གསུམ་པ་གཅིག་གི་ནང་དུ་བཾ་དམར་པོ་ཞིག་གསལ་འདེབས་པ་ཞུ། དེ་ནས་སྤྱི་བོའི་ཧཱུྃ་མཐིང་ཁ་དེ་ལས་འོད་ཟེར་ཕར་འཕྲོས་པས་ཁམས་གསུམ་གྱི་སེམས་ཅན་གྱི་སྡིག་སྒྲིབ་སྦྱངས་ནས་བཅོམ་ལྡན་འདས་འཁོར་ལོ་བདེ་མཆོག་གི་གོ་འཕང་ལ་བཀོད། འོད་ཟེར་ཚུར་འདུས་ནས་ཧཱུྃ་ལ་ཐིམ། ཧཱུྃ་དེ་ཡོངས་སུ་གྱུར་པ་ལས་ཁྱེད་རང་རྣམས་ཀྱི་སྤྱི་བོར་པད་ཉི་འཇིགས་དུས་ཀྱི་གདན་སྔར་ཡོད་ཀྱི་སྟེང་དུ་བླ་མ་དང་གཉིས་སུ་མེད་པའི་དཔལ་ཧེ་རུ་ཀ་ཡབ་ཡུམ་རྒྱན་ཆ་ལུགས་དང་ལྡན་པ་ལ་ཌཱ་ཀི་མ་བཞིས་གཡོན་སྐོར་དུ་ཁོ་རོ་རོ་སྐོར་བ་བྱེད་པ་ལ་དམིགས་པ་དྲག་ཏུ་གཏོད་མཛོད། དེ་ལྟར་བསྒོམས་པས་དྲོད་སྐྱེས། དགའ་བ་ཉམས་སུ་མྱོང་སྟེ་བུམ་དབང་གི་ངོ་སྤྲོད་ཡིན་ནོ། །དེ་ནས་བུམ་དབང་གི་དབང་བཞིའི་སླད་དུ་དམིགས་པ་འདི་བཞིན་མཛོད། དེ་ཡང་སྤྱི་བོར་ངོ་བོ་བླ་མ་ལ་རྣམ་པ་ཡི་དམ་གྱི་སྐུའི་ངོ་བོ་ལྷ་ལྔ་གསལ་བ་དེ་ལ་ཁྱེད་རང་རྣམས་ཀྱིས་ལུས་ལོངས་སྤྱོད་དང་དུས་གསུམ་དུ་བསགས་པའི་དགེ་བའི་རྩ་བ་ཐམས་ཅད་ཕྱི་ནང་གསང་གསུམ་གྱི་མཆོད་པའི་རྣམ་པར་བསྒྱུར་ནས་ཕུལ་བས་ཐུགས་རྒྱུད་བདེ་བས་གང་ནས་མཉེས་པར་བསམ་ལ་གསོལ་བ་འདེབས་པ་འདིའི་རྗེས་ཟློས་མཛོད།
བླ་མ་རིན་པོ་ཆེས་བདག་ལ་དབང་བཞི་ཡོངས་རྫོགས་སུ་བསྐུར་དུ་གསོལ།
དེ་ནས་བླ་མ་དང་ཐ་མི་དད་པའི་ཧེ་རུ་ཀའི་ཐུགས་ཀའི་ས་བོན་ཡི་གེ་ཧཱུྃ་ལས་བདུད་རྩིའི་ཆུ་རྒྱུན་བབས། འོད་དཀར་པོ་བྱུང་བས་རང་གི་སྤྱི་བོ་བདེ་ཆེན་གྱི་འཁོར་ལོ་འོད་ཀྱིས་ཁྱབ། ལུས་ཀྱི་སྡིག་སྒྲིབ་དག །བུམ་པའི་དབང་ཐོབ། དེ་ནས་མགྲིན་པ་ལོངས་སྤྱོད་ཀྱི་འཁོར་ལོ་འོད་ཀྱིས་ཁྱབ། ངག་གི་སྡིག་སྒྲིབ་དག །གསང་བའི་དབང་ཐོབ། དེ་ནས་སྙིང་ཁ་ཆོས་ཀྱི་འཁོར་ལོ་འོད་ཀྱིས་ཁྱབ། ཡིད་ཀྱི་སྡིག་སྒྲིབ་དག །ཤེས་རབ་ཡེ་ཤེས་ཀྱི་དབང་ཐོབ། དེ་ནས་ལྟེ་བ་སྤྲུལ་པའི་འཁོར་ལོ་འོད་ཀྱིས་ཁྱབ་པས་ལུས་ངག་ཡིད་གསུམ་གྱི་སྡིག་སྒྲིབ་དག །དབང་བཞི་པ་ཐོབ་པའི་མོས་པ་མཛད་ནས་དར་ཅིག་མཉམ་པར་ཞོག་མཛོད།
ཡི་གེ་བདུན་པ་བཟླ་ཞིང་ཌཱ་དྲིལ་དཀྲོལ་ལོ།
།དེ་ནི་བུམ་དབང་གི་དབང་བཞི་ཡིན་ནོ། །ཞེས་བརྡ་སྤྲད།
དེ་ནས་སྤྱི་བོའི་ལྷ་མོ་བཞི་ཡུམ་ལ་ཐིམ། ཡུམ་ཡབ་ལ་ཐིམ། ཡབ་འོད་དུ་ཞུ་ནས་སྤྱི་གཙུག་ཚངས་པའི་བུ་ག་ནས་མར་ཞུགས་ཏེ། །མགྲིན་པའི་ཨཱཿདམར་པོ་འབུར་སྐྱེས་དེ་ལ་ཐིམ་པའི་མོས་པ་མཛོད། ཁྱེད་རང་རྣམས་ཀྱི་མགྲིན་པ་ལོངས་སྤྱོད་ཀྱི་འཁོར་ལོའི་དབུས་སུ་བླ་མ་ཡི་དམ་གྱི་གསུང་གི་ངོ་བོ་ཨཱཿདམར་པོ་དེ་ལ་དར་ཅིག་སེམས་གཏོད་མཛོད། དེ་ལྟར་གཏད་པས་སེམས་ལ་བདེ་བ་སྐྱེས། མཆོག་ཏུ་དགའ་བ་ཉམས་སུ་མྱོང་། དེ་གསང་དབང་གི་ངོ་སྤྲོད་ཡིན། །དེ་ནས་གསང་དབང་དངོས་ཀྱི་སླད་དུ་དམིགས་པ་འདི་བཞིན་མཛོད།
མགྲིན་པའི་ནང་གི་བླ་མ་ཡི་དམ་རྣམས་ཀྱི་གསུང་གི་ངོ་བོ་ཨཱཿདམར་པོ་དེ་ལ་སྔར་ལྟར་རང་གི་ལུས་ལོངས་སྤྱོད་དང་དུས་གསུམ་དུ་བསགས་པའི་དགེ་བའི་རྩ་བ་ཐམས་ཅད་ཕྱི་ནང་གསང་གསུམ་གྱི་མཆོད་པའི་རྣམ་པར་བསྒྱུར་ནས་ཕུལ་བས། ཐུགས་རྒྱུད་བདེ་བས་གང་ནས་མཉེས་པར་བསམ་ལ་གསོལ་བ་འདེབས་པ་འདིའི་རྗེས་ཟློས་མཛོད།
།བླ་མ་རིན་པོ་ཆེས་བདག་ལ་གསང་བའི་དབང་བསྐུར་དུ་གསོལ།
ཞེས་གསོལ་བ་བཏབ་པས་མགྲིན་པ་ལོངས་སྤྱོད་འཁོར་ལོའི་ནང་གི་ཨཱཿདམར་པོ་དེ་ལས་འོད་ཟེར་དཀར་ལ་དམར་བའི་མདངས་ཆགས་པ་བདེ་ཕྲི་ལི་ལི་བྱུང་ནས་མགྲིན་པའི་རྩ་འཁོར་ཐམས་ཅད་འོད་ཀྱི་ཁྱབ་པས། ངག་གི་སྡིག་སྒྲིབ་དག །གསང་བའི་དབང་ཐོབ་པའི་མོས་པ་མཛད་ནས་དར་ཅིག་མཉམ་པར་ཞོག་མཛོད། སྤོས་རོལ་དང་ཡི་གེ་བདུན་པ་བཟླ་ཞིང་ཌཱ་དྲིལ་བྱ་བ་འགྲེ། དེ་ནི་གསང་བའི་དབང་གི་ངོ་བོ་ཡིན་ནོ།
།དེ་ནས་མགྲིན་པའི་པད་འདབ་འོད་དུ་ཞུ་བ་ཨཱཿདམར་པོ་ལ་ཐིམ། ཨཱཿའོད་དུ་ཞུ་ནས་སྙིང་ཁ་ཆོས་ཀྱི་འཁོར་ལོའི་ནང་གི་ཧཱུྃ་མཐིང་ཁ་དེ་ལ་ཐིམ། ཧཱུྃ་ཡོངས་སུ་གྱུར་པ་ལས་བདེ་མཆོག་ལྷ་ལྔའི་དཀྱིལ་འཁོར་དུ་གྱུར། དེ་ཡང་རྩ་བའི་མཁའ་འགྲོ་མ་བཞིས་གཙོ་བོ་ལ་སྐོར་བ་བྱེད་པ་ལ་དར་ཅིག་སེམས་གཏོད་མཛོད། དེ་ལྟར་བསྒོམས་པས་ལུས་སེམས་ལ་མི་རྟོག་པ་སྐྱེས། དགའ་བྲལ་གྱི་དགའ་བ་ཉམས་སུ་མྱོང་སྟེ་ཤེས་རབ་ཡེ་ཤེས་ཀྱི་དབང་གི་ངོ་སྤྲོད་ཡིན་ནོ། །དེ་ནས་དབང་གསུམ་པ་བསྐུར་བའི་སླད་དུ་དམིགས་པ་འདི་བཞིན་མཛོད། སྙིང་ཁ་ཆོས་ཀྱི་འཁོར་ལོའི་ནང་གི་བླ་མ་ཡི་དམ་གྱི་ཐུགས་ཀྱི་ངོ་བོ་བདེ་མཆོག་ལྷ་ལྔའི་དེ་ལ་སྔར་ལྟར་རང་གི་ལུས་ལོངས་སྤྱོད་དང་དུས་གསུམ་དུ་བསགས་པའི་དགེ་བའི་རྩ་བ་ཐམས་ཅད་ཕྱི་ནང་གསང་བའི་མཆོད་པའི་རྣམ་པར་བསྒྱུར་ནས་ཕུལ་བས་ཐུགས་རྒྱུད་བདེ་བས་གང་ནས་མཉེས་པར་བསམ་ལ་གསོལ་བ་འདེབས་པ་འདིའི་རྗེས་ཟློས་མཛོད།
བླ་མ་རིན་པོ་ཆེས་བདག་ལ་ཤེས་རབ་ཡེ་ཤེས་ཀྱི་དབང་བསྐུར་དུ་གསོལ།
ཞེས་གསོལ་བ་བཏབ་པས་གཙོ་བོའི་ཐུགས་ཀ་ནས་འོད་སྔོན་པོ་བྱུང་ནས་སྙིང་ཁ་ཆོས་ཀྱི་འཁོར་ལོའི་རྩ་འཁོར་ཐམས་ཅད་འོད་ཀྱིས་ཁྱབ་པས་ཡིད་ཀྱི་སྡིག་སྒྲིབ་དག །ཤེས་རག་ཡེ་ཤེས་ཀྱི་དབང་ཐོབ་པའི་མོས་པ་མཛད་ནས་དར་ཅིག་མཉམ་པར་ཞོག་མཛོད། སྔགས་རོལ་བྱ།
དེ་ནི་ཤེས་རབ་ཡེ་ཤེས་ཀྱི་དབང་གི་ངོ་བོ་ཡིན་ནོ།
།དེ་ནས་སྙིང་ཁའི་ལྷ་མོ་བཞི་ཡུམ་ལ་ཐིམ་ཡུམ་ཡང་ཡབ་ལ་ཐིམ། ཡབ་འོད་དུ་ཞུ་བའི་ལྟེ་བའི་ཆོས་འབྱུང་ནང་གི་བཾ་དམར་པོ་ལ་ཐིམ། བཾ་ཡོངས་སུ་གྱུར་པ་ལས་རྗེ་བཙུན་རྣལ་འབྱོར་མ་ཞལ་གཅིག་ཕྱག་གཉིས་མ། ཕྱག་གཡས་ན་ཅང་ཏེའུ་སྒྲ་དང་བཅས་པ། གཡོན་ན་ཐོད་པ་བསྣམས་པ། སྐུ་མདོག་དམར་མོ། རུས་པའི་རྒྱན་ཅན་ཁྲོ་ལ་འཛུམ་པ་སྒེག་པ་གར་བྱེད་པ། དེ་ལ་དར་ཅིག་སེམས་གཏོད་མཛོད།
དེ་ལྟར་བསྒོམས་པས་ལུས་སེམས་ལ་དྲོད་བདེ་བ་མི་རྟོག་པ་གསུམ་སྐྱེས། ལྷན་ཅིག་སྐྱེས་པའི་དགའ་བ་ཉམས་སུ་མྱོང་སྟེ་དབང་བཞི་པའི་ངོ་སྤྲོད་ཡིན་ནོ།
།དེ་ནས་དབང་བཞི་པ་བསྐུར་བའི་སླད་དུ་དམིགས་པ་འདི་བཞིན་མཛོད། ལྟེ་བའི་ཆོས་འབྱུང་ནང་གི་བླ་མ་ཡི་དམ་གྱི་སྐུ་གསུང་ཐུགས་ཀྱི་ངོ་བོ་རྗེ་བཙུན་རྣལ་འབྱོར་མ་ལ་སྔར་ལྟར་རང་གི་ལུས་ལོངས་སྤྱོད་དུས་གསུམ་དུ་བསགས་པའི་དགེ་བའི་རྩ་བ་ཐམས་ཅད་ཕྱི་ནང་གསང་བའི་མཆོད་པའི་རྣམ་པར་བསྒྱུར་ནས་ཕུལ་བས། ཐུགས་རྒྱུད་བདེ་བས་གང་སྟེ་མཉེས་པར་བསམ་ལ་གསོལ་བ་འདེབས་པ་འདིའི་རྗེས་ཟློས་མཛོད།
བླ་མ་རིན་པོ་ཆེས་བདག་ལ་དབང་བཞི་པ་བསྐུར་དུ་གསོལ།
ཞེས་གསོལ་བ་བཏབ་པས། རྣལ་འབྱོར་མའི་ཤངས་བུག་གཡས་ནས་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཞེས་ཨཱ་ལིའི་ཕྲེང་བ་དང་། གཡོན་པ་ནས་ཀ་ཁ་ག་གྷ་ང་། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ་ཞེས་ཀཱ་ལིའི་ཕྲེང་བ་བྱུང་ནས་རྣལ་འབྱོར་མའི་སྨིན་མཚམས་སུ་ཡི་གེ་དེ་རྣམས་གཡུང་དྲུང་རིས་དམར་པོ་གཅིག་ཏུ་གྱུར་ནས་དེ་དྲག་ཏུ་འཁོར་བ་ལ་སེམས་གཏོད་མཛོད།
མཐར་རྣལ་འབྱོར་མ་འོད་དུ་ཞུ་ནས་ཁྱེད་རང་རྣམས་ལ་ཐིམ། ཁྱེད་རང་ཕུང་པོ་ཡང་འོད་ཕུང་ལྟ་བུ་ལ་སྟོང་སངས་ཀྱིས་སོང་ནས། ཆོས་ཐམས་ཅད་ཀྱི་གནས་ལུགས་སྤྲིན་མེད་པའི་ནམ་མཁའ་ལྟ་བུའི་ངང་དུ་གྱུར་པ་ལ་མཉམ་པར་ཞོག་མཛོད།
དེས་ལུས་ངག་ཡིད་གསུམ་གྱི་སྡིག་སྒྲིབ་དག །དབང་བཞི་པ་ཐོབ་པའི་མོས་པ་མཛོད། སྤོས་རོལ་བྱ།
དེ་ནས་སླར་ཆོས་སྐུ་ལས་གཟུགས་སྐུར་བཞེངས་པའི་ཚུལ་དུ་སྟོང་པ་དེའི་ངང་ལས་ཁྱེད་རང་རྣམས་བདེ་མཆོག་ལྷན་སྐྱེས་ཀྱི་སྐུ་སྒྱུ་མ་ལྟ་བུ་སྣང་ལ་ཞེན་པ་མེད་པ་མེ་ལོང་ནང་གི་གཟུགས་བརྙན་ལྟ་བུ་ལམ་གྱིས་བཞེངས་པར་བསྒོམ་མཛོད།
ཁྱེད་རང་རྣམས་ལྷར་གསལ་བ་ལ་སློབ་དཔོན་གྱིས་ཡིད་ཀྱིས་སྤྲུལ་པའི་མཆོད་པ་རྣམ་པ་ལྔ་ཡང་ཕུལ་བའི་མོས་པ་མཛོད། ཨོཾ་བཛྲ་པུཥྤེ་ཨཱཿཧཱུྃ། དེ་བཞིན་དུ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ་རྣམས་བརྗོད།
དབང་གི་ཕན་ཡོན་ནི་སྔར་དབང་ཐོབ་པའི་ཉམས་པ་རྣམས་གསོ་བ་དང་། སྡིག་པ་ཐམས་ཅད་ཡོངས་སུ་ཟད་པ་དང་། ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེ་བར་འགྱུར་བ་དང་། ཏིང་ངེ་འཛིན་བསྒོམ་པ་ལ་སོགས་ཁྱད་པར་ཅན་ཐོབ་པའི་དགོས་པ་ཡོད་དོ།
།དེས་བདེ་མཆོག་ལྷ་ལྔའི་དབང་བཞི་ལུས་བསྒྲིག་གི་ཏིང་ངེ་འཛིན་གྱི་དབང་བསྐུར་གྲུབ། དེའི་དུས་སུ་ཐོབ་པའི་དམ་ཚིག་དང་སྡོམ་པའི་ཚོགས་ཐམས་ཅད་ཚུལ་བཞིན་དུ་བསྲུང་ངོ་སྙམ་དུ་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་བྱ། རྗེས་ཀྱི་ཆོ་ག་ཡིག་བརྒྱ་བརྗོད་ལ་ནོངས་པ་བཟོད་གསོལ་བྱ། མཎྜལ་གྱི་སྟེང་གི་ཡེ་ཤེས་པ་གཤེགས། དམ་ཚིག་པ་རང་གི་སྙིང་ཁར་བསྡུའོ།
།ཟབ་གནད་མང་པོ་ཐོས་པའི་བློས། ཏིང་འཛིན་དབང་ཆོག་རབ་བསལ་འདི། ཤངས་ཆོས་བསྟན་པ་འཛིན་འདོད་ཅན། །ཉམས་ཁྲིད་སྐྱོང་ལ་མཁོ་ཕྱིར་བྲིས།།ཟབ་ལམ་ནི་གུ་ཆོས་དྲུག་དང་འབྲེལ་བའི་སློབ་མ་རྗེས་སུ་འཛིན་ཐབས། བདེ་ཆེན་མྱུ་གུའི་ཕྲེང་བ་ཞེས་བྱ་བ་བློ་གསལ་རི་ཁྲོད་པས་སྦྱར་བ་ལས་བྱིན་རླབས་སྒོ་འབྱེད་ཀྱི་བཀའ་གཉིས་ཀྱི་རབ་ཏུ་བྱེད་པ་སྟེ་དང་པོའོ།། །།

Long initiation of illusory body yoga

༼༄༅། །སྒྱུ་ལུས་དབང་མོ་ཆེ།།༽
བླ་མ་ཡི་དམ་མཁའ་འགྲོ་ལ། །དངོས་པོ་ཀུན་གྱིས་གུས་བཏུད་ནས། བྱིན་རླབས་ཁོག་ཕུབ་བཀའ་གཉིས་ལས། །དང་པོ་བདག་གིས་བཤད་པར་བྱ། །འདིར་ཟབ་ལམ་ནི་གུ་ཆོས་དྲུག་གི་ཁོག་ཕུབ་ཀྱི་བཀའ་དང་པོ་སྒྱུ་ལུས་དབང་མོ་ཆེ་བསྐུར་བའི་ཚུལ་ལ་གསུམ། སྦྱོར་བ། དངོས་གཞི། རྗེས་སོ།
དང་པོ་ལ་དཀྱིལ་འཁོར་རྒྱས་འབྲིང་བསྡུས་གསུམ་གང་ཡང་རུང་བ་ཞིག་འབྲི་བ་ལས།
དང་པོ་རྒྱས་པ་ནི། ས་སྦྱང་བཟུང་སྔོན་དུ་འགྲོ་བས་གཞལ་ཡས་ཁང་སྤྱི་དང་འདྲ་བ་ལ་རྟ་བབས་བཞི་ཡོད་པ་གཅིག་གི་ཐིག་བཏབ། དེའི་ནང་དུ་ཚངས་ཐིག་གིས་བཅད་པའི་ལྟེ་བའི་དང་ཟུར་བཞིར་ཟླུམ་སྐོར་བཞིའི་རབ་སྐོར་ཏེ་ཤར་ལྷོའི་ཟླུམ་སྐོར་ལ་ཆོས་འབྱུང་ཉིས་བརྩེགས་ཀྱི་ཐིག་བཏག །ནུབ་བྱང་དང་། བྱང་ཤར་གཉིས་ཀྱི་ཟླུམ་སྐོར་ལ་ཆོས་འབྱུང་རྐྱང་པ་རེ་དང་། ལྷོ་ནུབ་ཏུ་པདྨ་འདབ་བཞིའི་བཅད་བྱའོ། །གཞལ་ཡས་ཁང་གི་ཕྱི་རོལ་དུ་ར་བ་གསུམ་བསྐོར་ཏེ་ཐིག་གི་རིམ་པའོ། །དེ་ལ་ཚོན་བཀྱེ་བ་ནི་གཞན་སྤྱི་འགྲེ་བཞིན་ལས། གཞལ་ཡས་ཁང་གི་ནང་གི་ཕྱོགས་མདོག་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སུ་ཉི་གདན་ལ་རྡོ་རྗེ་སྔོན་པོ་རྩེ་ལྔ་པ་གཅིག་འབྲི། ཤར་ལྷོའི་ཆོས་འབྱུང་ཉི་བརྩེགས་དཀར་པོ་ལ་བཅད་མཐིང་ནག །མེ་རི་དམར་པོ། །དབུས་སུ་ཉི་གདན་ལྔ་ཚོམ་ལ། ཚོམ་བུ་མཐིང་ཁ་ལྔ་བཀོད། ལྷོ་ནུབ་ཀྱི་པདྨ་འདབ་བཞི་ཕྱོགས་མདོག་གི་ལྟེ་བར་ཉི་གདན་ལ་ཚོམ་བུ་སྔོན་པོ་བཀོད། །བྱང་ཤར་གྱི་ཆོས་འབྱུང་དམར་པོ་བཅད་ལྗང་ཁུ། གྲུ་བཅད་དཀར་པོ་ཡོད་པའི་དབུས་སུ་ཉི་གདན་ལྔ་ཚོམ་ལ་དབུས་དཀར། ཤར་ནག །ལྷོ་སེར། ནུབ་དམར། བྱང་ལྗང་ཁུའི་ཚོམ་བུ་ལྔ་བཀོད། ནུབ་བྱང་གི་གྲྭའི་ཆོས་འབྱུང་ནག་པོ། མེ་རི་དམར་པོ། གྲུ་བཅད་ལྗང་ཁུ། ཟླུམ་སྐོར་གྱི་ཆར་མུ་ཁྱུད་ནག་པོ་ཡོད་པའི་དབུས་སུ་ཉི་གདན་ལ་ཚོམ་བུ་ནག་པོ་བཀོད་དོ། །གཞལ་ཡས་ཁང་གི་ཕྱི་ར་གསུམ་ལ་མྱུ་ཁྱུད་ཕྱི་ནས་རིམ་པས་དཀར་པོ་དང་། དམར་པོ་དང་། སྔོན་པོ་གསུམ་གྱི་ཁོར་ཡུག་བྱ་སྟེ་དང་པོ་དཔལ་ལྡན་འབྲས་སྤུངས་ཀྱི་མཆོད་རྟེན་དང་། གཉིས་པ་དེའི་ནང་དུ་མེ་རི་དང་། གསུམ་པ་དེའི་ནང་དུ་རྡོ་རྗེའི་རྭ་བ་རྣམས་ཡོད་པ་མཚོན་པ་ཡིན་ལ་སྐུ་གསུང་ཐུགས་གསུམ་མཚོན་པའང་ཡིན་གསུང་ངོ་།
།གཉིས་པ་འབྲིང་པོ་བྱ་བ་ནི། འདོད་སྣམ་དམར། ཕ་གུ་སེར། དྲ་ཕྱེད་ནག །ཤར་བུ་སྔོ། མདའ་ཡབ་དཀར་རྣམས་དོར་ཏེ། རྩིག་པ་ལྗང་ཁུ་དང་། སྒོ་ཁྱུད། སྒོ་འགྲམ། སྒོ་ལོག །སྒོ་སྟེང་གི་གདུགས་དང་བཅས་པ་ཞིག་བྱ་སྟེ་གཞན་སྔ་མ་ལྟར་རོ།
།གསུམ་པ་བསྡུས་པ་ནི། རྩེག་པ་ཕན་ཆད་ཀྱི་གཞལ་ཡས་ཁང་མི་འབྲི་བར་མཎྜལ་གྲུ་བཞི་པ་ཕྱོགས་མདོག་ཅན་ལ་ཟླུམ་སྐོར་བཞི་པའི་ཆོས་འབྱུང་དང་པདྨ་གོང་བཞིན་བྲིས་ལ་ཕྱིའི་མུ་ཁྱུད་གྲུ་བཞི་རེ་ཁ་དཀར་པོ་བྱའོ། །དཀྱིལ་འཁོར་བྱ་ཐབས་བཤད་ཟིན་ཏོ།
།ད་ནི་བཤམ་བཀོད་ཚུལ་ལ། མཎྜླ་གྱི་སྟེགས་བུའི་མདུན་དུ་ཟླུམ་གཏོར་མཱཾ་སས་བརྒྱན་པ་གཉིས། གོ་སྐབས་ཅི་བདེ་བར་ཆུ་གཉིས་སྔོན་དུ་འགྲོ་བའི་མཆོད་པ་རྣམས་དང་འོག་ཏུ་དགོས་པའི་དབང་རྫས་དང་ཚོགས་ཀྱི་ཡོ་བྱད་སོགས་བཞག་གོ །བུམ་པ་ནི་ལྷོ་ནུབ་ཀྱི་གྲྭའི་པདྨ་འདབ་བཞིའི་དཀྱིལ་འཁོར་དེར་འཇོག་པ་དབང་ཆོག་ལས་གསུངས་པ་ལྟར། དཀྱིལ་འཁོར་རྒྱ་ཁྱོན་ཆེན་པོ་ཡོད་ན་དེར་མཉྫིའི་སྟེང་དུ་བཞུགས་རྒྱུ་ཡིན་མོད་ཀྱི། ཕྱག་ལེན་ལ་ནི་དཀྱིལ་འཁོར་ཆེ་ན་ཟླུམ་སྐོར་བཞི་ཚོམ་གྱི་དབུས་སུ་མཉྫི་ལ་འཇོག་གིན་འདུག །དེ་མིན་དཀྱིལ་འཁོར་ཆུང་ངུ་ལ་བུམ་པ་ལོགས་སུ་བཤམས་པ་ལེགས་སོ། །བུམ་པ་ནི་མགུལ་ཆིངས་ཁ་རྒྱན་དང་བཅས་པ་སོགས་བཤམ་ཚུལ་སྤྱི་དང་འདྲ་ཡང་དུང་ཆོས་གཟུངས་ཐག་ནི་མི་དགོས་སོ།
།འདི་ཉིད་ཀྱི་དབང་ཆོག་ལས། པདྨ་འདབ་བཞིའི་དཀྱིལ་འཁོར་ལ་ཚོམ་བུ་ལྔ་པ་འགོད་པ་ལྟར་གསུངས་ཤིང་། དེར་ལྷ་མི་བསྐྱོད་ཀྱང་བུམ་པའི་གདན་ཡིན་པས་བུམ་ནང་གི་ལྷ་རྣམས་མཚོན་པ་འདྲ་བ་དང་། ཆོས་འབྱུང་དམར་པོའི་སྟེང་དུ་བདེ་མཆོག་ལྷ་ལྔ་བསྐྱེད་པ་ལྟར་གསུངས་ཤིང་། དེང་སང་ཡང་ཕལ་ཆེར་ཡི་གེ་ནག་འགྲོས་ལྟར་བྱེད་པ་ལྷན་ཐབས་ཀྱི་ཡི་གེ་འགའ་རེ་ནའང་དེ་དང་འདྲ་མིན་ཙམ་བཤད་ཀྱང་། བླ་མའི་ཞལ་ནས་དེ་རྣམས་མན་ངག་གབ་པ་ཡིན་ཅིང་། ཁྱད་པར་ལྷན་ཐབས་ཀྱི་ཡི་གེ་ན། པདྨ་འདབ་བཞིའི་དབུས་སུ་རྩ་བའི་བླ་མ། མདུན་དུ་ཡི་དམ། གཡས་སུ་འདས་པའི་བླ་མ། ཞེས་སོགས་འཆད་པ་ནི་ཤིན་ཏུ་མ་དག་གསུང་། དེས་ན་རང་ལུགས་ཞལ་ཤེས་ཀྱི་ཕྱག་ལེན་ནི་ཆོས་འབྱུང་ཉིས་བརྩེགས་དང་བུམ་པའི་ནང་དུ་རྒྱུད་སྡེ་ལྔའི་གཙོ་བསྡུས་པདྨ་འདབ་བཞི་ལ་བླ་མ་རྡོ་རྗེ་འཆང་ལ་མཁའ་འགྲོ་སྡེ་ལྔས་བསྐོར་བའམ། བླ་མའི་ངོ་བོ་བདེ་མཆོག་ལྷ་ལྔ། ཆོས་འབྱུང་དམར་པོའི་ནང་དུ་རྡོ་རྗེ་ཕག་མོ་ལྷ་ལྔ་བསྒོམ་པ་ཡིན་ནོ། །སྦྱོར་བའི་རིམ་པའོ།
།གཉིས་པ་དངོས་གཞི་ལ་སློབ་དཔོན་གྱི་ཆོ་ག་དང་། སློབ་མ་ལ་བྱ་བའི་རིམ་པ་གཉིས་ཀྱི།
དང་པོ་ལ། སྔོན་འགྲོ་གཏོར་མ། སུམྦྷས་བསང་། སྭ་བྷཱ་ཝས་སྦྱང་། ཨོཾ་ཨཱཿཧཱུྃ་ཧ་ཧོ་ཧྲཱིཿ ཞེས་བྱིན་རླབས་བྱ། ཕཻཾ་བཛྲ་ཨཱ་རལླི་ཧོ། ཛཿཧཱུྃ་བྃ་ཧོཿ །བཛྲ་ཌཱ་ཀི་ནཱི་ས་མ་ཡ་སྟྭཾ། དྲི་ཤྱ་ཧོ་ཞེས་པས་མགྲོན་བཀུག །ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཱཀྵ་ས་བྷུ་ཏ། པྲེ་ཏ། པི་ཤཱ་ཙ། ཨུད་མནྟ། ཨ་པ་སྨ་ར། ཌཱ་ཀ་ཌཱ་ཀི་ནྱ་ད་ཡ། ཨི་མཾ་བ་ལིང་གྲྀཧྞན་ཏུ། ས་མ་ཡ་རཀྵན་ཏུ། མ་མ་སརྦ་སིདྡྷི་མྨེ་པྲ་ཡཙྪནྟུ། ཡ་ཐཱཻ་བམ། ཡ་ཐེཥྚཾ། བྷུཉྫ་ཐ། པི་བ་ཐ། ཛི་གྷྲ་ཐ། མ་ཏི་ཀྲ་མ་ཐ། མ་མ་སརྦ་ཀཱ་ར་ཏ་ཡ། སཏྶུ་ཁཾ་བུ་ཤཱུདྡྷཡེ། ས་ཧཱ་ཡི་ཀཱ་བྷ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། གསུམ།
ཨཱརྒྷཾ་ནས། ཤཔྟ་ཨཱཿཧཱུྃ་གིས་མཆོད། ཨོཾ་ཨཱཿཧཱུྃ་གིས་ནང་མཆོད་ཕུལ།
ལྷ་ཆེན་བརྒྱད་པོ་འཁོར་དང་བཅས། །ཀླུ་ཆེན་བརྒྱད་པོ་འཁོར་དང་བཅས། །འཇིག་རྟེན་སྐྱོང་བ་བརྒྱད་པོ་དང་། །གནོད་སྦྱིན་ཚོགས་རྣམས་མ་ལུས་དང་། །སྲིན་པོའི༴ འབྱུང་པོའི༴ ཤ་ཟའི༴ སྨྱོ་བྱེད༴ རྗེད་བྱེད༴ མ་མོའི༴ དེ་ལ་སོགས་ཏེ་འབྱུང་པོའི་ཚོགས། །མ་ལུས་ཇི་སྙེད་ཡོད་པ་རྣམས། །འདིར་གཤེགས་བདག་ལ་དགོངས་སུ་གསོལ། །རྣལ་འབྱོར་བདག་ཅག་འཁོར་བཅས་ལ། །ནས། ཡིད་ལ་འདོད་པ་ཀུན་འགྲུབ་མཛོད། །དམ་ཅན་ཁྱེད་རྣམས་དཀྱིལ་འཁོར་གྱི། །ལས་ལ་སྲུང་བ་དམ་པ་དང་། །ཡུལ་ཕྱོགས་འདི་དང་སྦྱིན་བདག་དང་། །སློབ་མ་ལ་ཡང་ཤིས་པར་མཛོད། །གསང་སྤྱོད་ལྟ་བར་མི་དབང་བའི། །འབྱུང་པོའི་ཚོགས་རྣམས་གང་ཡིན་པ། །གཏོར་མའི་ལྷག་མ་འདི་ལོངས་ལ། །ད་ལྟ་ཉིད་དུ་གཞན་དུ་དེངས། །ཅི་སྟེ་འགྲོ་བར་མི་བྱེད་ན། །རྡོ་རྗེ་འཛིན་ཆེན་ཁྲོས་པའི་བཀས། །མཚོན་ཆ་འབར་བའི་སྤྲིན་སྤྲོས་ནས། །ལུས་སེམས་རྡུལ་དུ་བརླག་ཏ་རེ།
།གཏོར་མ་ཕྱི་རོལ་དུ་དོར་ལ་སུམྦྷ་ནི་དྲག་རོལ་བྱ། དེ་ནས་མཆོད་པ་དང་གནས་ཡོ་བྱིན་རླབས་ནི།
སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཧཱུྃ་ཡིག་ལས་བྱུང་བའི་སྲུང་འཁོར་གྱི་ནང་དུ་ཆུད་པའི། བྷྲཱུྃ་ལས་གནས་ཁང་གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ། ཨོཾ་ཨཱཿཧཱུྃ་རྣམས་ལས་བྱུང་ཞིང་། ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་ལ་སོགས་པ་མཆོད་པའི་ཡོ་བྱད་བཟང་ཞིང་གྱ་ནོམ་པ། ཡུལ་དུས་ཆད་པ་མེད་པར་ཡོངས་སུ་ཁྱབ་ཅིང་། རྣམ་འཕྲུལ་བསམ་གྱིས་མི་ཁྱབ་པ། རང་བཞིན་བདེ་སྟོང་གི་ཡེ་ཤེས། རྣམ་པ་མཆོད་རྫས་ཀྱི་སྤྲིན་ཕུང་། བྱེད་ལས་རང་གཞན་མཐའ་དག་ཟག་མེད་ཀྱི་བདེ་བས་ཚིམ་པར་བྱེད་པས་ཕྱི་ནང་ཐམས་ཅད་དུ་གང་བར་གྱུར།
ཨོཾ་བཛྲ་ཨརྒྷཾ་སྭཱ་ཧཱ། ཨོཾ་བཛྲ་པཱདྱཾ་སྭཱ་ཧཱ། ཨོཾ་བཛྲ་པུཥྤེ་ཨཱཿཧཱུྃ། དེ་བཞིན་དུ། དྷཱུ་པེ། ཨཱ་ལོ་ཀེ། གནྡྷེ། ནི་ཝི་དྱ། ཤཔྡ། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨཱ་ཝརྟ་ཡ་ཨཱ་ཝརྟ་ཡ་ཧོ། །ཨོཾ་བཛྲ་སྥ་ར་ཎ་ཁཾ། ཨོཾ་བཛྲ་གྷཱཎྚེ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲ་ཙ་ལི་ཏེ། པྲཛྙཱ་པ་རཱ་མི་ཏ། ནཱ་ད་སམྦྷ་བི་ཏེ། བཛྲ་དྷརྨ་ཧྲྀ་ད་ཡ་ནི་སནྟོ་ཥ་ནི་ཧཱུྃ་ཧཱུྃ་ཧཱུྃ། ཧོཿཧོཿཧོཿཨཱཿཁཾ་སྭཱ་ཧཱ་ལན་གསུམ་བརྗོད།
སྐྱབས་འགྲོ་སེམས་བསྐྱེད་སྤྱི་དང་མཐུན་པ་བྱ། ནང་མཆོད་གཏོར་མ་ལྟར་བྱིན་གྱིས་བརླབས་ལ།
ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ།
སྟོང་པའི་ངང་ལས་པདྨ་དང་ཉི་མའི་སྟེང་དུ་ཧཱུྃ་སྔོན་པོ་ཡེ་ཤེས་ལྔའི་བདག་ཉིད་ཅན། ཧཱུྃ་ལས་རྡོ་རྗེ་ཧཱུྃ་གིས་མཚན་པའི་འོད་ཟེར་གྱིས་སྣོད་བཅུད་མ་ལུས་པ་སྦྱངས་ནས། སླར་འདུས་ཏེ་འོད་དུ་ཞུ་བ་ཐིག་ལེར་གྱུར། དེ་ལས་རང་ཉིད་འཁོར་ལོ་སྡོམ་པའི་སྐུར་གྱུར་པའི་ཐུགས་ཀར་ཧཱུྃ།
ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ། ལན་གསུམ།
ཐུགས་ཀའི་ཧཱུྃ་ལས་རཾ་འོག་ཕྱོགས་སུ་ཆད་ཉི་མའི་དཀྱིལ་འཁོར་དུ་གྱུར། ཧཱུྃ་སྤྲོས་པ་ལས་སྣ་ཚོགས་རྡོ་རྗེའི་རང་བཞིན་གྱི་ས་གཞི་ངང་། དེ་ལས་འཕྲོས་པའི་རྭ་གུར་དུ་གྱུར་ཅིང་། ཧཱུྃ་ལས་ཧཱུྃ་དཔག་ཏུ་མེད་པ་ཕྱོགས་བཅུར་འཕྲོས། རྡོ་རྗེ་རྩེ་གཅིག་པ་ནས་དགུ་པའི་བར་དུ་གྱུར་པས་བར་མཚམས་མེད་པར་གཏམས། ཉི་མ་ལས་འབར་བའི་མེས་རབ་ཏུ་ཞུ་སྟེ་རྭ་གུར་གྱི་ཕྱི་རོལ་དུམ་བུ་གཅིག་ཏུ་འདྲེས་ཤིང་། ཕྱི་ནང་ཀུན་ཏུ་མེ་ལྕེས་གང་བར་གྱུར།
སྙིང་ཁའི་ཧཱུྃ་གི་འོད་ཟེར་གྱིས་བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿ ཨརྒྷཾ་ནས། ཤཔྡའི་བར་གྱིས་མཆོད།
དཀོན་མཆོག་གསུམ་ལ་བདག་སྐྱབས་མཆི། ལན་གསུམ་བྱ།
རང་གི་ལུས་ངག་ཡིད་གསུམ་གྱི་དྲི་མ་མཐའ་དག་དག་སྟེ། མེ་ལོང་དང་གཟུགས་བརྙན་ལྟར་རང་དང་ཚོགས་ཞིང་དབྱེར་མེད་དུ་གྱུར།
ཚད་མེད་བཞི་སྤྱི་དང་མཐུན་པ་བསྒོམ།
ཨོཾ་སྭ་བྷཱ་ཝ་ཤུདྡྷཱཿསརྦ་དྷརྨཿསྭ་བྷཱ་ཝ་ཤུདྡྷོ྅་ཧཾ། གཟུང་བ་རང་བཞིན་མེད་པའི་བདག་ཉིད་དོ། །ཨོཾ་ཤཱུ་ནྱ་ཏ་ནས། ཀོ྅་ཧཾ། འཛིན་པ་ཡང་རང་བཞིན་མི་དམིགས་ཏེ་ཆོས་ཐམས་ཅད་སྟོང་པ་ཉིད་དོ།
།སྟོང་པའི་ངང་ལས་སྐད་ཅིག་གིས་སྲུང་འཁོར་གྱི་དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་འཇིགས་བྱེད་དུས་མཚོན་གྱི་གདན། དེའི་སྟེང་དུ་རང་སེམས་ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན་པ། དེ་ལས་འོད་ཟེར་འཕྲོས། དེ་བཞིན་གཤེགས་པ་སྲས་དང་བཅས་པ་རྣམས་མཉེས་པར་བྱས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཧེ་རུ་ཀ་ཡབ་ཡུམ་གྱི་གོ་འཕང་ལ་བཀོད། དེ་རྣམས་ཐམས་ཅད་ཧེ་རུ་ཀ་ཡབ་ཡུམ་གྱི་རྣམ་པར་སྤྱན་དྲངས་ཏེ། ཧཱུྃ་ཡིག་རྡོ་རྗེ་དང་བཅས་པ་ལ་ཐིམ་པ་ཡོངས་སུ་གྱུར་པ་ལས། རང་ཉིད་དཔལ་ཧེ་རུ་ཀ་འཁོར་ལོ་བདེ་མཆོག་སྐུ་མདོག་མཐིང་ཁ་ཨིནྡྲ་ནཱི་ལ་ལྟར་རབ་ཏུ་འབར་བའི་འོད་ཟེར་འཕྲོ་བ་ནས། མེ་དཔུང་འབར་བའི་དབུས་ན་བཞུགས་པའོ། །ཞེས་པའི་བར་བདེ་མཆོག་ལྷ་ལྔའི་སྐབས་བཞིན་ནོ།
།ཡབ་ཀྱི་སྐུ་ལ་རྩ་གསུམ་འཁོར་ལོ་ལྔ་དང་བཅས་པ་སྐད་ཅིག་གིས་གྲུབ་པའི་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞིའི་ལྟེ་བར་རྡོ་རྗེ་གསུམ་གཅིག་ཏུ་འདུས་པའི་ཡོན་ཏན་གྱི་ངོ་བོ་རང་དང་མཚུངས་པའི་འཁོར་ལོ་བདེ་མཆོག་ཡབ་ཡུམ། བདེ་ཆེན་འཁོར་ལོར་སྐུ་གསང་བ་འདུས་པ་སྐུ་མདོག་སྔོན་པོ་ཡིད་ཙམ་ཁྲོ་བ། རྡོ་རྗེ་དང་དྲིལ་བུ་འཛིན་པས་རང་མཚུངས་ཀྱི་ཡུམ་ལ་འཁྱུད་པ། རྡོ་རྗེའི་སྐྱིལ་ཀྲུང་གིས་པད་ཉི་ལ་བཞུགས་ཤིང་། དར་དང་རིན་པོ་ཆེས་བརྒྱན་པའོ། །ལོངས་སྤྱོད་འཁོར་ལོར་གསུང་མ་ཧཱ་མཱ་ཡཱ་མཐིང་ཁ་ཕྱག་གཉིས་ཀྱིས་མདའ་གཞུ་འཛིན་པས་ཡུམ་སངས་རྒྱས་མཁའ་འགྲོ་མ་དམར་མོ་རང་མཚུངས་ལ་འཁྱུད་པ། སྐྲ་སེར་གྱེན་དུ་བརྫེས་པ། གཡོན་བརྐྱང་གིས་པད་ཉི་ལ་མི་རོ་མནན་པའོ། །ཆོས་ཀྱི་འཁོར་ལོར་ཐུགས་དགྱེས་མཛད་རྡོ་རྗེ་མཐིང་ཁ་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་བདག་མེད་མ་སྔོན་མོ་གྲི་ཐོད་འཛིན་པ་ལ་འཁྱུད་པ། སྐྲ་སེར་གྱེན་དུ་བརྫེས་པ་གཡས་བརྐྱང་གི་སྟབས་ཀྱིས་པད་ཉི་ལ་ཚངས་པ་དང་དྲག་པོ་མནན་པའོ། བདེ་སྐྱོང་འཁོར་ལོར་ཕྲིན་ལས་རྡོ་རྗེ་འཇིགས་བྱེད་མཐིང་ནག་མ་ཧེའི་ཞལ་ཅན། ཕྱག་གཉིས་ཀྱིས་གྲི་གུག་དང་ཐོད་ཁྲག་འཛིན་པས། ཡུམ་ཕག་མོ་དམར་མོ་གྲི་ཐོད་འཛིན་པ་ལ་འཁྱུད་པ་ལ་སྐྲ་སེར་གྱེན་དུ་བརྫེས་ཤིང་། དུར་ཁྲོད་ཀྱི་ཆས་རྫོགས་པ། གཡོན་བརྐྱང་གིས་པད་ཉི་ལ་མ་ཧེ་མནན་པའོ།
།རང་གི་སྙིང་གའི་ཧཱུྃ་ལས་འོད་ཟེར་འཕྲོས། རྒྱུད་སྡེ་ལྔའི་དཀྱིལ་འཁོར་གྱི་ལྷ་ཚོགས་བཛྲ་ས་མཱ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། རང་གི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ།
ཡང་སྙིང་ཁའི་ཧཱུྃ་ལས་འོད་ཟེར་འཕྲོས། དབང་གི་ལྷ་སངས་རྒྱས་དང་བྱང་ཆུབ་སེམས་དཔའ་ཁྲོ་བོའི་དབང་པོ་བཙུན་མོར་བཅས་པ་ཐམས་ཅད་སྤྱན་དྲངས།
ཕྱི་ནང་གསང་བའི་མཆོད་པ་ཐམས་ཅད་ཀྱིས་མཆོད་པར་གྱུར། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། གཙོ་བོའི་ཐུགས་ཀ་ནས་ཡུམ་ལྔ་བདུད་རྩིའི་བུམ་པ་ཐོགས་པ་སྤྲོས། ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པར་གྱུར།
ཨཱརྒྷཾ་ནས། ཤཔྡའི་བར་གྱིས་མཆོད། ཨོཾ་ཨཱཿཧཱུྃ་གིས་ནང་མཆོད་ཕུལ། གསང་མཆོད་དང་དེ་ཁོ་ན་ཉིད་ཀྱིས་མཆོད་པས་མཆོད་དེ་མཉེས་པར་གྱུར།
བསྟོད་པ་ནི། ཆོས་དབྱིངས་རྣམ་དག་དབྱིངས་ལས་མ་གཡོས་ཀྱང་། །ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །ཧེ་རུ་ཀ་དཔལ་དཔའ་བོ་ཆེ། །རྣམ་དག་རྡོ་རྗེ་དབང་ཕྱུག་མ། །རྗེས་ཆགས་ཆགས་པ་ཆེ་རྣམས་ཀྱི། །རྡོ་རྗེ་ཕག་མོ་ལ་འདུད་དོ། །སངས་རྒྱས་ཀུན་གྱི་སྐུ་གསུང་ཐུགས། །ཡོན་ཏན་ཕྲིན་ལས་རབ་རྫོགས་པ། །དཀྱིལ་འཁོར་ལྔ་པོ་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ། །ཞེས་བསྟོད།
ཨོཾ་ཧྲཱིཿཧ་ཧ་ཧུྃ་ཧཱུྃ་ཕཊ། ཨོཾ་བཛྲ་བཻ་རོ་ཙ་ནཱི་ཡཻ་ཧཱུྃ་ཧཱུྃ་ཕཊ་སྭཱ་ཧཱ། ཅེས་པ་འདི་གཙོ་བོར་བཟླ་ཞིང་། ཨོཾ་ཨཱཿབཛྲ་དྷྲྀཀ་ཧཱུྃ་ཕཊ་སྭཱ་ཧཱ། ཨོཾ་ཨཱཿཧྲཱི་ཧཱུྃ་ཕཊ་སྭཱ་ཧཱ། ཨོཾ་དེ་ཝ་བི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཨོཾ་ཧྲཱིཿཥྚི་ཝིཥྚི་ཏཱ་ན་ན་ཧཱུྃ་ཕཊ། ཅེས་པ་རྣམས་ཅི་རིགས་པ་བཟླའོ།
།མཐར་དཀྱིལ་འཁོར་གྱི་འཁོར་ལོ་འོད་གསལ་གྱི་ངང་དུ་ཐིམ་པར་གྱུར། སླར་ཡང་རང་ཉིད་ཧེ་རུ་ཀ་ཡབ་རྐྱང་དུ་གསལ་བའི་གནས་གསུམ་དུ་ཡི་གེ་གསུམ་གྱིས་མཚན་པའོ།
།དེ་ནས་མདུན་བསྐྱེད་སྒྲུབ་པ་ནི། དཀྱིལ་འཁོར་ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་དུར་ཁྲོད་ཆེན་པོ་བརྒྱད་ཀྱིས་བསྐོར་བའི་དབུས་སུ་ཕྱི་དཔལ་ལྡན་འབྲས་སྤུངས་ཀྱི་མཆོད་རྟེན་སྲུང་འཁོར་རྡོ་རྗེའི་ས་གཞི་རྭ་གུར་མེ་དཔུང་འབར་བ་དང་བཅས་པས་བསྐོར་བ། དེའི་ནང་དུ་གཞལ་མེད་ཁང་གྲུ་བཞི་སྒོ་བཞི། རྟ་བབས་བཞིས་བརྒྱན་པ། འདོད་སྣམ་དང་ཕ་གུ་དང་། དྲྭ་ཕྱེད་དང་། མདའ་ཡབ་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པ། གཞལ་ཡས་ཁང་གི་ནང་གི་ཕྱོགས་མདོག་ཤར་དཀར། ལྷོ་སེར། ནུབ་དམར། བྱང་ལྗང་ཁུར་གྱུར་པའི་དཀྱིལ་འཁོར་དང་པོའི་ནང་གི་ཆོས་འབྱུང་གྲུ་གསུམ་ཉིས་བརྩེགས་ཀྱི་དབུས་དང་། མཚན་ཉིད་ཐམས་ཅད་ཡོངས་སུ་རྫོགས་པའི་བུམ་པའི་ནང་དུ་སྣ་ཚོགས་པདྨ་དང་ཉི་མའི་གདན་ལྔ་ཚོམ་དུ་གནས་པ་ལ་དབུས་ཀྱི་གདན་གྱི་སྟེང་དུ་བཅོམ་ལྡན་འདས་དཔལ་ཧེ་རུ་ཀ་འཁོར་ལོ་བདེ་མཆོག་སྐུ་མདོག་མཐིང་ག །ཞེས་པ་ནས། དབུས་ན་བཞུགས་པའོ།
།ཤར་དུ་གསང་བ་འདུས་པ་སྐུ་མདོག་ནས་བརྒྱན་པའོ། །ལྷོར་དགྱེས་མཛད་རྡོ་རྗེ་མཐིང་ཁ། ནས། དྲག་པོས་མནན་པའོ། །ནུབ་ཏུ་མ་ཧཱ་མཱ་ཡཱ་མཐིང་ག་ནས། མི་རོ་མནན་པའོ། །བྱང་དུ་རྡོ་རྗེ་འཇིགས་བྱེད་མཐིང་ནག་ནས། མ་ཧེ་མནན་པའོ། ༼ཡང་དབང་ཆོག་གི་དཔེ་མང་པོར། ཤར་དུ་དགྱེས་མཛད། ལྷོར་གསང་འདུས་བཤད་པ་ལྟར་བྱས་ཀྱང་རུང་སྟེ་གདམ་གའོ།༽
།དཀྱིལ་འཁོར་གཉིས་པའི་དབུས་སུ་པདྨའི་ལྟེ་བ་ལ་རྩ་བའི་བླ་མ་རྡོ་རྗེ་འཆང་སྐུ་མདོག་སྔོན་པོ་ཡིད་ཙམ་ཁྲོ་བ། རྡོ་རྗེ་དང་དྲིལ་བུ་འཛིན་པས་ཡུམ་རྡོ་རྗེ་ཕག་མོ་དམར་མོ་ལ་འཁྱུད་པ། རྡོ་རྗེའི་སྐྱིལ་ཀྲུང་གིས་པད་ཉི་ལ་བཞུགས་ཤིང་། དར་དང་རིན་པོ་ཆེས་བརྒྱན་པའོ། །འདབ་མ་བཞི་ལ་ཤར་དུ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་ཁུ། ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་མོ་རྣམས་གྲི་གུག་དང་། ཐོད་པ་ཁ་ཊྭཱཾ་ག་འཛིན་པ། གཡས་བརྐྱང་གི་སྟབས་ཀྱིས་བཞུགས་པའོ། །དཀྱིལ་འཁོར་གསུམ་པ་ཆོས་འབྱུང་དམར་པོའི་དབུས་སུ་རྡོ་རྗེ་ཕག་མོའི་ངོ་བོ་སངས་རྒྱས་མཁའ་འགྲོ་མ་དམར་མོ། ཤར་དུ་རྡོ་རྗེ་མཁའ་འགྲོ་མ་སྔོན་མོ། ལྷོར་རིན་ཆེན་མཁའ་འགྲོ་མ་སེར་མོ། ནུབ་ཏུ་པདྨ་མཁའ་འགྲོ་མ་དམར་མོ། བྱང་དུ་ལས་ཀྱི་མཁའ་འགྲོ་མ་ལྗང་གུ་རྣམས་ཌཱ་མ་རུ་དང་ཐོད་པ་ཁ་ཊྭཱཾ་ག་འཛིན་པ། གཅེར་བུ་ཕྱག་རྒྱ་ལྔ་དང་མི་མགོའི་ཕྲེང་བས་བརྒྱན་པ་རང་མཚུངས་ཀྱི་འཁོར་དཔག་ཏུ་མེད་པ་དང་བཅས་པའོ། །དཀྱིལ་འཁོར་བཞི་པའི་དབུས་སུ་མྱུར་མཛད་ཡེ་ཤེས་ཀྱི་མགོན་པོ་ཞལ་གཅིག་ཕྱག་དྲུག་པ་སྐུ་མདོག་ནག་པོ། ཕྱག་གཡས་རྣམས་ན་ཐོད་སྐམ་གྱི་ཕྲེང་བ་དང་། གྲི་གུག་དང་། ཌཱ་མ་རུ། གཡོན་རྣམས་ན་ཐོད་ཁྲག་དང་། རྩེ་གསུམ་དང་ཞགས་པ་བསྣམས་པ། དགྲ་བགེགས་དང་ཡི་དྭགས་ཀྱི་གདན་ལ་བཞུགས་པ། གཙང་རིས་ཀྱི་མགོན་པོ་བདུན་ཅུ་རྩ་ལྔ་སོགས་དམ་ཅན་རྒྱ་མཚོའི་ཚོགས་ཀྱིས་བསྐོར་བའོ།
།རང་གི་སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའི་ཚོགས་ཐམས་ཅད་བཛྲ་ས་མཱ་ཛཿ ཞེས་སྤྱན་དྲངས། སྤོས་དང་རོལ་མོའི་སྒྲ་ཆེན་པོ་དང་བཅས་ཏེ། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། བཛྲ་ས་མཱ་ཛཿ ཞེས་ལན་གསུམ། དེ་བཞིན་དུ། ཨོཾ་བཛྲ་བཻ་རོ་ཙ་ནཱི་ཡཻ་ཧཱུྃ་ཧཱུྃ་ཕཊ་སྭཱ་ཧཱ། བཛྲ་ས་མཱ་ཛཿ ཨོཾ་ཨཱཿབཛྲ་དྷྲྀ་ཀ༴ ཨོཾ་ཨཱཿཧྲཱིཿཧཱུྃ་ཕཊ༴ ཨོཾ་དེ་ཝ་པི་ཙུ༴ ཨོཾ་ཧྲཱིཿཥྚི༴ ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནི་ཡཻ་བཛྲ་ཝརྣ་ནཱི་ཡཻ་བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། བཛྲ་ས་མཱ་ཛཿ ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣཱན་བི་ན་ཡ་ཀ་ཧཱུྃ་ཧཱུྃ་ཕཊ༴ བཛྲ་ས་མཱ་ཛཿ ཀྵིཾ་མང་དུ་བརྗོད་པའི་མཐར། ཛཿཧཱུྃ་བྃ་ཧོཿ མང་དུ་བརྗོད་དོ། །གཉིས་སུ་མེད་པར་ཐིམ།
ལྷ་ཐམས་ཅད་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཡང་སྙིང་ཁའི་ཧཱུྃ་ལས་འོད་ཟེར་འཕྲོས། དབང་གི་ལྷ་སངས་རྒྱས་དང་བྱང་ཆུབ་སེམས་དཔའ་ཁྲོ་བོའི་དབང་པོ་བཙུན་མོར་བཅས་པ་ཐམས་ཅད་སྤྱན་དྲངས། ཕྱི་ནང་གསང་བའི་མཆོད་པ་ཐམས་ཅད་ཀྱིས་མཆོད་པར་གྱུར།
ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། གཙོ་བོའི་ཐུགས་ཀ་ནས་ཡུམ་ལྔ་བདུད་རྩིའི་བུམ་པ་ཐོགས་པ་སྤྲོས།
ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་རྒྱུད་སྡེ་ལྔའི་གཙོ་བོ་རྣམས་དང་བླ་མ་དང་། ནག་པོ་ཆེན་པོ་ལ་མི་བསྐྱོད་པས་དབུ་བརྒྱན། མཁའ་འགྲོ་ལྔ་པོ་རྣམས་ལ་རིགས་ལྔ་སོ་སོས་དབུ་བརྒྱན་པར་གྱུར།
དེ་ནས་མཆོད་ཕྲེང་རྒྱས་པ་བདེ་མཆོག་ལྷ་ལྔ་ལྟར་བྱ་ཞིང་། བསྡུ་ན།
ཨོཾ་སརྦ་ཏ་ཐཱ་ག་ཏ་མཎྜལ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་ཧཱུྃ་སྭཱ་ཧཱ། དེ་བཞིན་ཏུ། པཱདྱཾ་དང་། ཨོཾ་བཛྲ་པུཥྤེ་ཨཱཿཧཱུྃ་ནས། ཨོཾ་བཛྲ་ཤཔྡ་ཨཱཿཧཱུྃ། གྷཱཎྚེ་ར་ཎི་སོགས་རོལ་ཆེན་བྱ།
ནང་མཆོད། སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཀ་པཱ་ལ་ཡངས་ཤིང་རྒྱ་ཆེ་བ་ནང་ཤ་ལྔ་དང་མྱོས་བྱེད་ཀྱིས་གང་བ། དེའི་སྟེང་དུ་དཔལ་འཁོར་ལོ་བདེ་མཆོག་ལྷ་ལྔ་སྐད་ཅིག་གིས་བཞུགས་པར་གྱུར། ཡི་གེ་བདུན་པ་བཟླ།
ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས། ཐོད་པའི་སྟེང་གི་ཧེ་རུ་ཀ་ལྷ་ལྔའི་སྐུ་ལ་ཐིམ། སྦྱོར་མཚམས་དང་གསང་བའི་སྒོ་ནས་བདུད་རྩིའི་རྒྱུན་བབས། གཞིར་གནས་ཀྱི་བདུད་རྩི་དང་འདྲེས་ཏེ་ཡེ་ཤེས་ཀྱི་བདུད་རྩིས་ཐོད་པ་གང་བར་གྱུར་པ་ལ། ལྷ་ལྔ་པོ་རྣམས་ཀྱང་བདུད་རྩིར་ཞུ་སྟེ་ཐིམ། ཨོཾ་ཨཱཿཧཱུྃ་གསུམ།
ཁྱབ་བདག་དང་པོའི་སངས་རྒྱས་རྡོ་རྗེ་འཆང་། །སོགས་བདེ་མཆོག་ལྷ་ལྔའི་དཀྱིལ་འཁོར་ནང་ལྟར་རྒྱས་པའམ། བསྡུ་ན།
རྡོ་རྗེ་འཆང་དང་དཔལ་གྱི་ནི་གུ་མ། །ཁྱུང་པོ་ཛོ་གི་རཏྣ་བཱིརྱ་སོགས། །རིན་ཆེན་བརྒྱུད་པའི་བླ་མ་དམ་པ་ལ། །རྣམ་དག་བདུད་རྩིའི་མཉེས་མཆོད་དམ་པ་འབུལ། །ཨོཾ་ཨཱཿཧཱུྃ།
།ཟབ་གསང་རྒྱུད་སྡེ་ལྔ་ཡི་བཅུད་བསྡུས་པ། །ཚེ་གཅིག་སངས་རྒྱས་སྟེར་བའི་སྨིན་གྲོལ་ལམ། །དངོས་སུ་འདོམས་མཛད་རྩ་བའི༴
།འཁོར་ལོ་བདེ་མཆོག་གསང་འདུས་དགྱེས་མཛད་དང་། །སྒྱུ་མ་ཆེན་པོ་རྡོ་རྗེ་འཇིགས་བྱེད་སོགས། །ཡི་དམ་དཀྱིལ་འཁོར་ལྷ་ཚོགས་ཐམས་ཅད་ལ། །རྣམ་དག༴
།མྱུར་མཛད་སྤྱན་རས་གཟིགས་མགོན་རེ་མ་ཏཱི། །ཀྵེ་ཏྲ་པཱ་ལ་ཛི་ན་མི་ཏྲ་དང་། །ཊཱ་ཀི་རཱ་ཛ་བདུད་མགོན་ཏྲག་ཤད་ལ། །རྣམ་དག༴
།ཕྱོགས་སྐྱོང་ཞིང་སྐྱོང་ཀླུ་ཡི་དབང་པོ་དང་། །དཔའ་བོ་མཁའ་འགྲོ་དུར་ཁྲོད་གནས་པའི་ཚོགས། །གཉུག་མར་གནས་པའི་གཞི་བདག་མ་ལུས་ལ། །རྣམ་དག༴ །ཨོཾ་ཨཱཿཧཱུྃ།
ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། འདིར་ནི་ཐོག་མ་དབུས་མཐའ་མེད། །སྲིད་མེད་མྱ་ངན་འདས་པ་མེད། །བདག་མེད་གཞན་ཡང་མེད་པ་སྟེ། །འདི་ནི་མཆོག་ཏུ་བདེ་ཆེན་ཉིད། །ཅེས་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་ཕུལ།
བསྟོད་པ་ནི། ཆོས་དབྱིངས་རྣམ་དག་ནས། ཕག་མོ་དེ་ལ་འདུད། །ཐམས་ཅད་དངོས་པོའི་རང་བཞིན་མཆོག །གདོད་ནས་ཐམས་ཅད་བདག་ཉིད་གནས། །ཐབས་དང་ཤེས་རབ་གཉིས་མེད་པའི། །དགྱེས་མཛད་རྡོ་རྗེ་ལ་ཕྱག་འཚལ། །མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བའི་དབྱིངས་ལ་ཕྱག་འཚལ་བསྟོད། །དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་ལ་ཕྱག་འཚལ་ལོ། །དུར་ཁྲོད་རྒྱན་གྱིས་ལེགས་བརྒྱན་པའི། །ཞེ་སྡང་གཤིན་རྗེ་གཤེད་པོ་ནི། །དངོས་མེད་ནམ་མཁའ་ལྟ་བུ་ལ། །ཐུགས་རྗེས་སྤྲུལ་པའི་སྐུར་སྟོན་པ། །དུད་ཁ་མུན་ཆེན་ཁྱེད་ལ་འདུད། །ཆོས་དབྱིངས་ངང་ལས་མ་གཡོས་ཀྱང་། །གདུག་པ་འདུལ་ཕྱིར་ཁྲོས་པའི་སྐུ། །བསྟན་པའི་རུ་དྲ་འཇོམས་མཛད་པའི། །ནག་པོ་ཆེ་ལ་ཕྱག་འཚལ་བསྟོད།
།གཏོར་མ་ནང་མཆོད་ལྟར་བྱིན་གྱིས་བརླབས་ལ་རྒྱུད་སྡེ་ལྔའི་སྙིང་པོ་དང་ཨོཾ་གསུམ་མ་དང་། མགོན་པོའི་སྙིང་པོ་རྣམས་ཀྱི་མཐར། ཨ་ཀཱ་རོ་བཏགས་པ་ལན་གསུམ།
མགོན་པོ་ལ་ཁྱད་པར་དུ། ཨོཾ་ཤྲཱི་མ་ཧཱ་ཀཱ་ལ་ཤཱ་ས་ན། ཨུ་པ་ཧཱ་རི་ཎི། ཨེ་ཥོ྅་པཉྩི་མ་ཀཱ་ལོ་ཨ་ཡཾ་ཨི་དཾ། རཏྣ་ཏྲ་ཡཱ་ཡ་ཨ་པ་ཀ་རི་ཎཾ། ཡ་དི་པྲ་ཏི་ཛྙཱ། སྨ་ར་སི་ཏཱ་དཱ། ཨི་དཾ་དུཥྚཾ་ཁ་ཁ་ཁཱ་ཧི་ཁཱ་ཧི། མཱ་ར་མཱ་ར། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ་དི་ན་མེ་ཀེ་ན་མཱ་ར་ཡ་ཧཱུྃ་ཕཊ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་གཏོར་མ་ཕུལ།
ཨརྒྷཾ་ནས། ཤཔྡ་ཨཱཿཧཱུྃ། གིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་ཕུལ།
སངས་རྒྱས་ཀུན་གྱི་སྐུ་གསུང་ཐུགས། །ཡོན་ཏན་ཕྲིན་ལས་རབ་རྫོགས་པའི། །དཀྱིལ་འཁོར་ལྔ་པོ་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ།
།ཧཱུྃ། མྱུར་མཛད་སྤྱན་རས་གཟིགས་ལ་ཕྱག་འཚལ་ལོ། །ཞབས་གདུབ་དང་བཅས་བི་ན་ཡ་ཀ་མནན། །ནག་པོ་ཆེན་པོ་སྟག་གི་ཤམ་ཐབས་ཅན། །ཕྱག་དྲུག་སྦྲུལ་གྱི་རྒྱན་གྱིས་རྣམ་པར་བརྒྱན། །གཡས་པས་གྲི་གུག་བར་པས་ཕྲེང་བ་འཛིན། །ཐ་མས་ཌཱ་མ་རུ་ནི་དྲག་ཏུ་འཁྲོལ། །གཡོན་པས་ཐོད་ཁྲག་དང་ནི་མདུང་རྩེ་གསུམ། །དེ་བཞིན་ཞགས་པས་བཟུང་ནས་འཆིང་བར་བྱེད། །དྲག་པོའི་ཞལ་གདངས་མཆེ་བ་རྣམ་པར་གཙིགས། །སྤྱན་གསུམ་དྲག་པོ་དབུ་སྐྲ་གྱེན་དུ་འབར། །དཔྲལ་བར་སིནྡྷུ་ར་ཡི་ཐིག་ལེས་བྱུགས། །སྤྱི་བོར་མི་བསྐྱོད་རྒྱལ་པོའི་རྒྱས་བཏབ་བརྟེན། །ཁྲག་འཛག་མི་མགོ་ལྔ་བཅུའི་དོ་ཤལ་ཅན། །རིན་ཆེན་ཐོད་སྐམ་ལྔ་ཡིས་དབུ་ལ་བརྒྱན། །ཤིང་ལས་བྱོན་ནས་གཏོར་མ་ལེན་མཛད་པའི། །དཔལ་ལྡན་ཕྱག་དྲུག་པ་ལ་ཕྱག་འཚལ་བསྟོད། །མཆོད་སྦྱིན་གཏོར་མ་འདི་བཞེས་ལ། །ནས། ཀུན་འགྲུབ་ཤོག་གིས་ཕྲིན་ལས་བཅོལ།
མདུན་བསྐྱེད་དང་བུམ་པ་ལ་ལ་དམིགས་ནས་བཟླས་པ་ཅི་འགྲུབ་བྱ། འོག་ནས་འབྱུང་བའི་དབང་གི་དངོས་གཞི་རྣམས་དམིགས་པས་བདག་འཇུག་གི་ཚུལ་དུ་བླང་། ཚོགས་ཀྱི་འཁོར་ལོ་བྱིན་གྱིས་བརླབ་བོ། །སློབ་དཔོན་གྱི་བྱ་བའི་རིམ་པ་བསྟན་ཟིན་ཏོ།
།གཉིས་པ་སློབ་མ་ལ་བྱ་བའི་རིམ་པ་ནི། ཁྲུས་ཕྱག་སྔོན་དུ་བཏང་ནས་གྲལ་དུ་འཁོད་པ་ལ་ལས་ཀྱི་རྡོ་རྗེས་མེ་ཏོག་བཀྱེ་བསྡུ་བྱ། སློབ་དཔོན་གྱིས་བགེགས་ལ་གཏོར་མ་བྱིན་ལ་བགེགས་བསྐྲད་ལ་སྲུང་འཁོར་གསལ་བཏབ།
འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་རིན་པོ་ཆེ་སྐུ་ཚེ་འདི་ཉིད་ལ་ཐོབ་པར་བྱ། དེའི་ཆེད་དུ་དམ་པའི་ཆོས་གསན་སྙམ་པའི་ཀུན་སློང་ཀུན་སྤྱོད་སྤྱི་བྱེ་བྲག་རྣམས་གསལ་བཏབ་སྟེ་གསན་པར་ཞུ། དེ་ལ་གསན་བྱ་དམ་པའི་ཆོས་ནི་ཟབ་ལམ་ནི་གུ་ཆོས་དྲུག་གི་བྱིན་རླབས་ཁོག་ཕུབ་ཀྱི་བཀའ་གཉིས་ཡོད་པ་ལས་ད་ལམ་སྒྱུ་ལུས་དབང་མོ་ཆེ་འབུལ་བ་སྐབས་སུ་བབ་པ་ཡིན།
དེ་ལ་སྔོན་འགྲོ་དང་དངོས་གཞི་གཉིས་ཡོད་པའི་དང་པོ་ལ། ༡ བསམ་པ་འཆོས་པ། ༢ སྐྱབས་འགྲོ་སེམས་བསྐྱེད་བྱ་བ། ༣ སྤྲོ་བ་བསྐྱེད་པ། ༤ གསོལ་བ་འདེབས་པ། ༥ གནང་བ་སྦྱིན་པ། ༦ ཉན་པར་གདམས་པ། ༧ ཡན་ལག་ལྔ་པ་བྱ་བ། ༨ སྡོམ་པ་བཟུང་བ། ༩ གསང་བ་བསྒྲག་པ། ༡༠ ཡེ་ཤེས་དབབ་པ་དང་བཅུ་ཡོད་པ་ལས།
དང་པོ་བསམ་པ་འཆོས་པ་ནི། ད་རེས་རང་ཅག་རྣམས་ཀྱིས་རྙེད་པར་དཀའ་བའི་མི་ལུས་ཐོབ། མཇལ་དཀའ་བའི་སངས་རྒྱས་ཀྱི་བསྟན་པ་རིན་པོ་ཆེ་སྤྱི་དང་སྒོས་སུ་གསང་སྔགས་ཀྱི་ཐེག་པ་ཟབ་མོ་དང་མཇལ། སྐབས་འདིར་ཆོས་ལ་འབད་ན་བླ་ན་མེད་པའི་སངས་རྒྱས་ཀྱང་སྒྲུབ་དཀའ་བ་མིན་ན་འཇིག་རྟེན་དང་འཇིག་རྟེན་ལས་འདས་པའི་ཕུན་ཚོགས་གཞན་རྣམས་ལྟ་སྨོས་ཀྱང་ཅི་དགོས་པ་ཡིན། འོན་ཀྱང་ད་རེས་ཆོས་ལ་མ་འབད་ནི་ཕྱིས་མི་ལུས་ཐོབ་པ་ཙམ་ཡང་རྙེད་དཀའ། མི་ལུས་མ་ཐོབ་ན་ཆོས་བྱེད་པའི་སྐལ་པ་གཏན་ནས་མེད། ཆོས་མ་བྱས་ན་འཁོར་བའི་སྡུག་བསྔལ་ལས་གྲོལ་བ་མི་སྲིད། མི་ལུས་ལན་གཅིག་ཐོབ་པས་ཕན་པ་ཡང་མ་ཡིན་གྱི། ངེས་པར་འཆི། མྱུར་དུ་འཆི། ནམ་འཆི་ཆ་མེད། འཆི་བ་ལ་ཅིས་ཀྱང་མི་ཕན། ཤི་ནས་ཁུངས་མེད་དུ་སོང་ན་དེ་ཀ་ཡིན་མོད་ཀྱི། དེ་ལྟ་བུ་མ་ཡིན་ཏེ་ད་ལྟའི་དགྲ་གཉེན་ལོངས་སྤྱོད་སོགས་ཚེ་འདིའི་སྣང་བ་ཀུན་དང་བྲལ་ཡང་། སེམས་ཁུངས་མེད་དུ་མི་འགྲོ། མི་འདོད་ཀྱང་ལས་ཀྱི་དབང་གིས་རིགས་དྲུག་གང་རུང་དུ་སྐྱེ་བ་ལས་འོས་མེད། གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཁོ་ན་ཡིན། སྡུག་བསྔལ་དེ་ཡང་ཟད་མི་ཤེས་ཤིང་ཐར་བར་དཀའ་བའི་རྒྱ་མཚོ་དང་མཚུངས་པར་འདུག་པ་ལ། དེ་ལས་ངེས་པར་ཐར་དགོས་པ་འདུག །དེ་ཡང་རང་གཅིག་པུ་ཐར་པས་མི་ཕན་གྱི་སེམས་ཅན་ཐམས་ཅད་ཐར་བ་ཞིག་བྱེད་དགོས་པ་འདུག །དེའི་ཆེད་དུ་དབང་གསན་སྙམ་པའི་འདུན་པ་དུང་བ་ཞིག་བསྐྱེད་མཛོད།
གཉིས་པ་སྐྱབས་འགྲོ་སེམས་བསྐྱེད་ཀྱི་སླད་དུ་མདུན་གྱི་ནམ་མཁར་སྐྱབས་ཡུལ་རྣམས་ཁྲ་ལམ་མེ་བཞུགས་པར་མོས་ཏེ་འདིའི་རྗེས་ཟློས་མཛོད།
།ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས། དུས་འདི་ནས་བཟུང་ནས། ཇི་སྲིད་སྙིང་པོ་བྱང་ཆུབ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག །སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཞི་བ་མྱ་ངན་ལས་འདས་པའི་ཆོས་ལ༴ ཚོགས་རྣམས་ཀྱི་མཆོག །བྱང་ཆུབ་སེམས་དཔའ་ཕྱིར་མི་ལྡོག་པ་འཕགས་པའི་དགེ་འདུན་རྣམས་ལ༴ །ཞེས་ལན་གསུམ་བྱ།
གཉིས་པ་སེམས་བསྐྱེད་ལ་གཉིས་ཀྱི་དང་པོ་སྨོན་པ་སེམས་བསྐྱེད་ཀྱི་སླད་དུ་འདིའི་རྗེས་ཟློས་མཛོད།
ཕྱོགས་བཅུ་ན་ནས། དགོངས་སུ་གསོལ། །སློབ་དཔོན་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བས་ཚེ་ཐོག་མ་མེད་པ་ནས་ད་ལྟ་ལ་ཐུག་གི་བར་དུ་སྦྱིན་པའི་རང་བཞིན་དང་། ཚུལ་ཁྲིམས་ཀྱི་རང་བཞིན་དང་། སྒོམ་པའི་རང་བཞིན་གྱི་དགེ་བའི་རྩ་བ་དེས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་དང་། ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཇི་ལྟར་ཐུགས་རིན་པོ་ཆེ་བསྐྱེད་པར་མཛད་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་ཏེ། སྙིང་པོ་བྱང་ཆུབ་ལ་མཆིས་ཀྱི་བར་དུ་བྱང་ཆུབ་མཆོག་ཏུ་སེམས་བསྐྱེད་པར་བགྱིའོ།
།སེམས་ཅན་མ་བསྒྲལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་དགྲོལ་བར་བགྱིའོ། །དབུགས་མ་དབྱུང་བ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བགྱིའོ། །ཞེས་ལན་གསུམ།
གཉིས་པ་འཇུག་པ་སེམས་བསྐྱེད་ཀྱི་སླད་དུ་འདིའི་རྗེས༴ ཕྱོགས་བཅུ་ནས། དགོངས་སུ་གསོལ། །བདག་མིང་འདི་ཞེས་བགྱི་བས་དུས་འདི་ནས་བཟུང་ཏེ། ཇི་སྲིད་སྙིང་པོ་བྱང་ཆུབ་ལ་མཆིས་ཀྱི་བར་དུ། སྦྱིན་པའི་ཕ་རོལ་ཏུ་ཕྱིན་པ་ལ་མཐར་གྱིས་བསླབ་པ་དང་། མཐར་གྱི་སྦྱང་བ་དང་། མཐར་གྱིས་བསྒྲུབ་པར་བགྱིའོ། །དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན༴ བརྩོན་འགྲུས་ཀྱི་ཕ་རོལ༴ ཤེས་རབ་ཀྱི་ཕ་རོལ་ཏུ་ཕྱིན་པ་རྣམས་ལ་མཐར་གྱིས་བསླབ་པ་དང་། མཐར་གྱིས་སྦྱངས་པ་དང་། མཐར་གྱིས་བསྒྲུབ་པར་བགྱིའོ། །ལན་གསུམ།
གསུམ་པ་སྤྲོ་བ་སྐྱེད་པ་འདི་ལ་གསན་པས་ཁྱབ་པར་གདའ། །སྔགས་ཀྱི་དངོས་གྲུབ་དོན་གཉེར་གང་། །དཀྱིལ་འཁོར་འདིར་ནི་གཞུག་པར་བྱ། །བསོད་ནམས་འདོད་པས་དེ་ལས་གཞན། །གཞན་ནི་འཇིག་རྟེན་ཕ་རོལ་གཉེར། །དད་པ་ཆེན་པོ་ལྡན་པ་དག །འཇིག་རྟེན་ཕ་རོལ་ལ་དམིགས་ནས། །དཀྱིལ་འཁོར་དམ་པར་གཞུག་བྱ་སྟེ། །ཚེ་འདིའི་འབྲས་བུ་གཉེར་མི་བྱ། །བདག་དོན་ཚེ་འདི་གཉེར་བྱེད་ན། །གཞན་དོན་སངས་རྒྱས་ག་ལ་འབྱུང་། །འཇིག་རྟེན་ཕ་རོལ་ལ་དམིགས་ན། །འབད་པ་མེད་པར་འདི་འབྲས་འགྲུབ། །ཞེས་བརྗོད་དོ།
།བཞི་པ་མཎྜལ་འབུལ་ཞིང་གསོལ་བ་འདེབས་པ་ལ་ཐོག་མར་མཎྜལ་འབུལ་བ་ཞུ།
དེ་ནས་གསོལ་བ་འདེབས་པ་འདིའི་རྗེས་ཟློས༴ དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །སྡོམ་པ་རྣམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་འཇུག་པར་འཚལ། །ཅེས་ལན་གསུམ།
ལྔ་པ་གནང་བ་སྦྱིན་པ་འདི་ལ་གསན་པས་ཁྱབ་པར་གདའ། བུ་ཚུར་ཐེག་པ་ཆེན་པོ་པ། །ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྦྱོར་བ་མཉམ་མེད་དེས། །ཡེ་ཤེས་མཉམ་མེད་ཐོབ་པས་ན། །སྐྱོབ་པ་སངས་རྒྱས་ཧེ་རུ་ཀས། །བདུད་ནི་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་ཀས་བཅོམ། །དེ་བས་ཀུན་མཁྱེན་འཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་བརྗོད་ལ་དོན་བཤད་དོ།
།དྲུག་པ་རྟོག་པ་བསྡུ་བ་ནི། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོའི་སེམས་ཀྱིས་ཉོན། །བརྗེད་ངས་བློ་ལ་ཧེ་རུ་ཀ་སོགས་དང་། །བདེ་བར་གཤེགས་པ་རྣམས་ཀྱིས་བྱིན་མི་རློབ། །ཅེས་བརྗོད་ལ་དོན་བཤད་དོ།
།བདུན་པ་ཡན་ལག་ལྔ་པ་བྱ་བའི་སླད་དུ་འདིའི་རྗེས་ཟློས༴ །བདག་གིས་སྡིག་པ་བགྱིས་པ་དང་། །བགྱིད་སྩལ་རྗེས་སུ་ཡི་རང་གང་། །སངས་རྒྱས་སྤྱན་སྔར་མཆིས་ནས་སུ། །དེ་དག་བདག་གིས་བཤགས་པར་བགྱི། །སངས་རྒྱས་བྱང་ཆུབ་སེམས་དཔའ་དང་། །རང་རྒྱལ་དགྲ་བཅོམ་འགྲོ་རྣམས་ཀྱི། །བསྒོམས་དང་བཟླས་བརྗོད་བསོད་ནམས་ཀྱིས། །ཚོགས་ལ་བདག་ནི་ཡི་རང་ངོ་། །སེམས་བསྐྱེད་མངོན་པར་སངས་རྒྱས་དང་། །ཆོས་ཀྱི་འཁོར་ལོ་བསྐོར་བ་དང་། །བྱང་ཆུབ་སེམས་དཔའི་ཚོགས་ཀྱི་མཆོག །དེ་ལ་བདག་ནི་སྐྱབས་སུ་མཆི། །སངས་རྒྱས་འབྱུང་བ་ཇི་ལྟར་བར། །སྐལ་ལྡན་བྱང་ཆུབ་སེམས་དཔའ་ཡིས། །བྱང་ཆུབ་ཏུ་ནི་སེམས་བསྐྱེད་ལྟར། །དེ་བཞིན་བདག་གིས་སེམས་བསྐྱེད་དོ། །བདག་གི་དགེ་བའི་ལས་ནི་འདི་དག་གིས། །འཇིག་རྟེན་འདིར་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་ཀྱང་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་སྒྲོལ། །ཞེས་ལན་གསུམ་བྱ།
བརྒྱད་པ་སྡོམ་པ་འཛིན་པའི་སླད་དུ་འདིའི་རྗེས་ཟློས་མཛོད། །སངས་རྒྱས་བྱང་ཆུབ་སེམས་དཔའ་རྣམས། །ནས། སེམས་ཅན་མྱ་ངན་འདས་ལ་འགོད། །ཅེས་པའི་བར་ལྷ་ལྔའི་སྐབས་བཞིན་ལན་གསུམ་བརྗོད་དུ་གཞུག
།དགུ་པ་གཟེངས་བསྟོད་ཅིང་གསང་བ་བསྒྲག་པ་སོགས་ལས། དང་པོ་གཟེངས་བསྟོད་པ་འདི་ལ་གསན་པས་ཁྱབ་བོ།
།འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམ་བཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་སྲིད། །གསང་སྔགས་སྤྱོད་ཚུལ་ཆོ་ག་ནི། །དེ་བས་ཀྱང་ནི་དཀོན་པ་སྟེ། །གཉིས་མེད་ཟབ་མོའི་སྤྱོད་ཚུལ་འདིས། །སེམས་ཅན་ཐམས་ཅད་སངས་རྒྱས་བྱེད། །གང་གིས་བསྐལ་པ་བྱེ་བ་རུ། །སྡིག་པའི་ལས་རྣམས་བྱས་པ་ཡང་། །ཟབ་མོའི་དཀྱིལ་འཁོར་འདི་མཐོང་བས། །དེ་དག་ཐམས་ཅད་བྱང་འགྱུར་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོ་ཅི་དགོས། །གང་གིས་བསྐལ་པ་དཔག་མེད་དུ། །བསོད་ནམས་ཡེ་ཤེས་ཚོགས་བསགས་ཀྱང་། །འདི་ནི་རྙེད་པ་ཤིན་ཏུ་དཀའ། །དེས་ཀྱང་དེ་ལ་དགའ་བར་གྱིས། །ཞེས་བརྗོད་ལ་དོན་བཤད་དོ།
།དེ་ནས་སྔར་དཀྱིལ་འཁོར་མ་མཐོང་བའི་བརྡར་གདོང་གཡོགས་བཅིངས་པའི་མོས་པ་མཛོད། ཨོཾ་ཨཱཿཁཾ་བཱི་ར་ཧཱུྃ།
སློབ་མའི་གནས་གསུམ་དུ་དྲི་བཟང་གིས་ཐིག་ལེས་བྱས་ཏེ།
ཁྱེད་རང་རྣམས་ཀྱི་དཔྲལ་བར་ཨོཾ། མགྲིན་པར་ཨཱཿ སྙིང་གར་ཧཱུྃ། དེ་རྣམས་ཀྱི་འོད་ཀྱིས་ལུས་གང་བས་ལུས་ངག་ཡིད་གསུམ་གྱི་དྲི་མ་དག་པར་གྱུར་པའི་མོས་པ་མཛོད། སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ། དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་གསལ་བཏབ་ནས་འདིའི་རྗེས་ཟློས་མཛོད།
ཨོཾ་སརྦ་ཡོ་ག་ཙིཏྟ་ཨུཏྤ་ད་ཡཱ་མི། སློབ་དཔོན་གྱིས་སྙིང་གར་རྡོ་རྗེ་བཞག་ལ་བརྟན་པར་བྱས་པའི་མོས་པ་མཛོད།
ཨོཾ་སུ་ར་ཏེ་ས་མ་ཡ་སྟྭཾ་ཧོཿསིདྡྷི་བཛྲ་ཡ་ཐཱ་སུ་ཁཾ། ཞེས་བརྗོད།
དེ་ནས་གསང་བ་བསྒྲག་པ་ནི། དེང་ཁྱོད་དེ་བཞིན་གཤེགས་པ་ཐམས་ཅད་དང་དཔའ་བོ་རྣལ་འབྱོར་མ་རྣམས་ཀྱི་རིགས་སུ་ཞུགས་ཀྱི། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། མ་དད་པ་རྣམས་ལ་ཡང་མ་ཡིན་ནོ། །ཧཱུྃ་ཛཿཧཱུྃ།
བཅུ་པ་ནང་དུ་གཞུག་ཅིང་ཡེ་ཤེས་དབབ་པ་ནི། སློབ་དཔོན་གྱི་ཤར་སྒོ་ནས་རྡོ་རྗེས་ཁྲིད་པར་བསམ་ལ་འདིའི་རྗེས་ཟློས་དང་བཅས་དཀྱིལ་འཁོར་གྱི་ཕྱོགས་སུ་དབུ་དུད་པ་རེ་མཛོད། ཛཿཧཱུྃ་བྃ་ཧོཿ ནང་དུ་འཁོད་པ་ལ་ཡེ་ཤེས་དབབ་པའི་སྔོན་འགྲོ་དམ་བཞག་བྱེད་པ་འདིར་གདའ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་འཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། དེ་ལྟ་བུའི་རྡོ་རྗེ་ཡེ་ཤེས་བསྐྱེད་པར་བྱའོ། །ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། བུ་ཁྱོད་དམ་ཚིག་ཉམས་པར་འགྱུར་ཏ་རེ། །ཞེས་སྤྱི་བོར་རྡོ་རྗེ་བཟུང་ནས་དང་། ཡང་སྙིང་ཁར་རྡོ་རྗེ་གཏུགས་ཏེ།
ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་བྱ། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཡང་སྤྱི་བོར་རྡོ་རྗེ་བཟུང་ལ།
འདི་ནི་ཁྱོད་ཀྱི་དམ་ཚིག་གི་རྡོ་རྗེ་སྟེ། གལ་ཏེ་ཚུལ་འདི་སུ་ཡང་རུང་བ་ལ་སྨྲས་ན། འདིས་ཁྱོད་ཀྱི་མགོ་བོ་འགེམ་པར་འགྱུར་རོ། །ཅེས་པས་ཉེས་དམིགས་དང་། ལས་བུམ་གྱི་བུམ་ཆུ་དང་བདུད་རྩི་བསྲེས་ལ་ཁྱོར་བ་གཡས་པར་བྱིན་ལ་འཐུང་དུ་བཅུག་ཅིང་།
འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ཐོབ། །རྡོ་རྗེ་བདུད་རྩིའི་ཆུ་འདིས་བསྒྲུབ། །ཨོཾ་པཉྩ་ཨ་མྲྀ་ཏ་ཨུ་ད་ཀ་ཋ་ཋ། ཞེས་པས་ཕན་ཡོན་ཉེས་དམིགས་གཉིས་དང་། ཡང་སྤྱི་བོར་རྡོ་རྗེ་བཟུང་ལ།
དེང་ཕྱིན་ཆད་ཁྱོད་ཀྱི་ཧེ་རུ་ཀ་ང་ཡིན་གྱི། ངས་འདི་གྱིས་ཤིག་བྱས་པ་དེ་ཁྱོད་ཀྱི་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །བྱས་ན་ཡ་ང་བ་མ་སྤངས་པར་ཚེའི་དུས་བྱས་ནས་དམྱལ་བ་ཆེན་པོར་འགྱུར་ཏ་རེ། ཞེས་སློབ་དཔོན་གྱི་བཀའ་གཉན་པའི་སྒོ་ནས་དམ་ལ་བཞག་གོ
།བཅུ་པ་ཡེ་ཤེས་དབབ་པའི་སླད་དུ་གསོལ་བ་འདེབས་པ་འདིའི་རྗེས་ཟློས་མཛོད། །དེ་བཞིན་གཤེགས་པ་ཐམས་ཅད་ཀྱིས། །བདག་ལ་བྱིན་གྱིས་རློབས་མཛོད་ལ། །རྡོ་རྗེ་ཡེ་ཤེས་བླ་མེད་ནི། །ད་ལྟ་ཉིད་དུ་དབབ་ཏུ་གསོལ། །ཅེས་ལན་གསུམ་གྱིས་གསོལ་བ་གདབ།
ཁྱེད་རང་རྣམས་ཧེ་རུ་ཀ་ཞལ་གཅིག་ཕྱག་གཉིས་པར་གསལ་བའི་རྐང་མཐིལ་གཞིབས་ནས་ལངས་པར་མོས་པའི་འོག་ཏུ་ཡཾ་ལས་རླུང་གི་དཀྱིལ་འཁོར་གཞུའི་དབྱིབས་ཅན། གཞུ་རྒྱུད་གྱེན་ལ་བསྟན་པའི་སྟེང་དུ་གནས་པའི་རྐང་པའི་མཐིལ་གཉིས་སུ་ཛྷཻཾ་མེའི་རང་བཞིན་རླུང་གིས་བསྐྱོད་པས་མེ་འབར་བ། རྩ་ནང་ནས་ཡར་སོང་། སུམ་མདོའི་མེ་དང་ལྟེ་བར་རཾ་ལས་མེའི་དཀྱིལ་འཁོར་དང་འདྲེས། སྙིང་གར་ལཾ་ལས་སའི་དཀྱིལ་འཁོར་རྡོ་རྗེས་མཚན་པ་བསྲེགས་པས། མགྲིན་པར་བཾ་ལས་ཆུའི་དཀྱིལ་འཁོར་བཾ་གྱིས་མཚན་པ་ཁོལ། སྤྱི་བོར་ཡཾ་ལས་རླུང་གི་དཀྱིལ་འཁོར་དུ་བ་འཁྲིགས་པ་ལྟ་བུས་ཐུར་དུ་མནན་པའི་མོས་པ་མཛོད།
སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་རྒྱུད་སྡེ་ལྔ་ཡི་དཀྱིལ་འཁོར་གྱི་ལྷ་ཚོགས་རྣམས་དང་། རྗེ་བཙུན་རྡོ་རྗེ་རྣལ་འབྱོར་མ་མཁའ་འགྲོ་སྡེ་ལྔའི་ལྷ་ཚོགས་དང་བཅས་པ་རྣམས་དང་། མྱུར་མཛད་ཡེ་ཤེས་ཀྱི་མགོན་པོའི་ལྷ་ཚོགས་རྣམས་དང་། བླ་མ་རྡོ་རྗེ་འཆང་ཧེ་རུ་ཀ་མཁའ་འགྲོའི་ཚོགས་དང་བཅས་པ་རྣམས་ལས། དེ་དང་འདྲ་བའི་ལྷ་ཚོགས་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཐམས་ཅད་གང་། ལུས་སེམས་བདེ་བས་ཁྱབ་པར་གྱུར།
ཡང་ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོའི་ཚོགས་ཐམས་ཅད་དང་། བླ་མ་ཡི་དམ་མཁའ་འགྲོ་ཆོས་སྐྱོང་གི་ལྷ་ཚོགས་ས་གཞི་བར་སྣང་ཐམས་ཅད་ཁྱབ་པ་ཙམ་སྤྱན་དྲངས། ཁྱེད་རང་རྣམས་ཀྱི་ལུས་ལ་སིབ་སིབ་ཐིམ་པའི་མོས་པ་མཛོད།
སྤོས་རོལ་བྱ། རྒྱུད་སྡེ་ལྔ་དང་། རྣལ་འབྱོར་མ་དང་། མགོན་པོའི་སྙིང་པོ་དང་ན་མོ་བུདྡྷཱ་ཡའི་སྔགས་རྣམས་ཀྱི་མཐར། ཨཱ་བེ་ཤ་ཡ་ཨ་ཨཱཿ ཞེས་བཏགས་ལ་ཡེ་ཤེས་ཕབ།
དེ་ནས་མེ་ཏོག་དོར་བ་ནི། ལྷ་ཐམས་ཅད་དག་པ་ཡེ་ཤེས་གཅིག་གི་སྣང་བ་ཡིན་པས་བཟང་ངན་མེད་མོད་ཀྱི་རང་གི་ལས་འབྲེལ་ཡོད་པའི་ལྷ་ལ་འབབ་པར་ཤོག་ཅིག་སྙམ་པས། ཨོཾ་པྲ་ཏཱི་ཙྪ་བཛྲ་ཧོཿ གསུང་ཞིང་མེ་ཏོག་དོར་མཛོད། སློབ་དཔོན་གྱིས་གང་ལ་བབས་པའི་ལྷའི་སྙིང་པོས་བྱིན་གྱིས་བརླབས་པའི་མེ་ཏོག་གི་ཕྲེང་བས་སླར་ཁྱེད་རང་ལ་དབང་བསྐུར་བའི་མོས་པ་མཛོད། ཨོཾ་པྲ་ཏི་གྲྀཧྞ་སྟྭཾ། ཨི་མཾ་ས་ཏྭ་མ་ཧཱ་བ་ལ། ཞེས་སྤྱི་བོར་གཏད།
ཧེ་རུ་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་པའི། །རྡོ་རྗེའི་མིག་ནི་བླ་ན་མེད། །ཨོཾ་བཛྲ་ནེ་ཏྲ་ཨ་པ་ཧ་ར་པ་ཊ་ལཾ་ཧྲི། ཞེས་གདོང་གཡོགས་གསལ།
དེའང་ཕྱི་དཔལ་ལྡན་འབྲས་སྤུངས་ཀྱི་མཆོད་རྟེན་རིན་པོ་ཆེ་གསེར་ལས་གྲུབ་པའི་རྣམ་པ་ལ། ནང་གཞལ་ཡས་ཁང་གི་དབུས་ན་རྒྱུད་སྡེ་ལྔ་ལ་སོགས་པའི་ལྷ་ཚོགས་བཞུགས་པ་རྣམས་ནི། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་ངོ་བོ་ཡིན་ཏེ།
དཔལ་སྡོམ་པ་འབྱུང་བའི་རྒྱུད་ལས། །དེ་ནས་ཡང་དག་བཤད་པར་བྱ། །སྐུ་ནི་ཀྱཻ་རྡོ་རྗེ་ལ། །གསུང་ནི་སྒྱུ་འཕྲུལ་རྡོ་རྗེའོ། །ཐུགས་ནི་འཁོར་ལོ་བདེ་མཆོག་ཆེ། །ཕྲིན་ལས་རྡོ་རྗེ་འཇིགས་བྱེད་ཉིད། །བདག་ཉིད་གསང་བ་འདུས་པར་བརྗོད། །མ་འོངས་སེམས་ཅན་དོན་དུ་ནི། །ཐབས་འདི་དག་ནི་བསྟན་པ་ཡིན། །ཐབས་ཀྱི་རིམ་པ་འདི་དག་ནི། །ཀུན་གྱི་ཐུན་མོང་མ་ཡིན་ཏེ། །དཀྱིལ་འཁོར་གཅིག་བསྡུས་དབང་བསྐུར་བས། །གསང་སྔགས་སྤྱོད་པའི་རྣལ་འབྱོར་པས། །རྒྱུད་སྡེ་རྣམ་ལྔར་གང་བསྟན་པ། །ཀླ་ཀློའི་སྐད་ཀྱིས་འདིར་སྦས་པས། །ཐུབ་པའི་ཞལ་ཐེམས་གསང་བ་འདི། །སྙིང་པོ་ཀུན་གྱི་དོན་གྱི་རྒྱུད། །དཀའ་ཐུབ་སྤྱོད་བྱེད་ཐུན་མོང་མིན། །ཞེས་སོགས་གསུངས་ཏེ་དེ་ལྟ་བུའི་བདག་ཉིད་ཅན་རྟེན་དང་བརྟེན་པར་བཅས་པའི་དཀྱིལ་འཁོར་མངོན་སུམ་དུ་གཟིགས་པའི་མོས་པ་མཛོད། །ཅེས་བརྡ་སྤྲད།
དེ་དག་ནི་རྒྱས་པ་ལ་སྤྲོ་བའི་དོན་དུ་འཇུག་སྒོ་ཡོན་ཏན་ཀུན་འབྱུང་བཞིན་བཀོད་པ་ཡིན་ལ། རྗེ་བཙུན་ཏཱ་ར་ནཱ་ཐའི་བཞེད་པ་ལྟར་ན་མིག་དར་འཆིང་བ་དང་མེ་ཏོག་འདོར་བ་སོགས་མི་མཛད་པར་གསལ། དམ་བཞག་གི་ཚིག་ཕལ་ཆེར་ཡང་ལྷ་ལྔའི་སྐབས་བཞིན་མཛད་པ་ཡོད་དོ།
།གཉིས་པ་དབང་དངོས་གཞི་ལ་གསུམ་སྟེ། བུམ་པའི་དབང་བསྐུར་བ་དང་། ཏིང་ངེ་འཛིན་གྱི་དབང་བསྐུར་བ། མཐར་ཐུག་གསང་བའི་དབང་བསྐུར་བའོ།
།དང་པོ་བུམ་དབང་གི་དོན་དུ་མཎྜལ་ཕུལ་མཛོད། དེ་ནས་གསོལ་བ་འདེབས་པ་འདིའི་རྗེས་ཟློས་མཛོད། བྱང་ཆུབ་རྡོ་རྗེས་སངས་རྒྱས་ལ། །ཞེས་ལན་གསུམ།
མདུན་དུ་བཞུགས་པའི་སྐུ་གསང་བ་འདུས་པ། གསུང་མ་ཧཱ་མཱ་ཡཱ། ཐུགས་ཀྱཻ་རྡོ་རྗེ། ཡོན་ཏན་འཁོར་ལོ་བདེ་མཆོག །ཕྲིན་ལས་རྡོ་རྗེ་འཇིགས་བྱེད་ཀྱི་ལྷ་ཚོགས་རྣམས་དང་། རྩ་བརྒྱུད་ཀྱི་བླ་མ་མཁའ་འགྲོ་སྡེ་ལྔ། མྱུར་མཛད་ཡེ་ཤེས་ཀྱི་མགོན་པོ་དམ་ཅན་རྒྱ་མཚོའི་ཚོགས་དང་བཅས་པས་དབང་བསྐུར་བའི་དགོངས་པ་མཛད། ཕྱོགས་བཅུའི་རྒྱལ་བ་ཐམས་ཅད་ཀྱིས་ཤིས་པ་བརྗོད། རྡོ་རྗེ་ཕག་མོ་དང་། མཁའ་འགྲོ་མ་ལ་སོགས་པའི་ཕྱག་ཏུ་བུམ་པ་ཐོགས་ནས་དབང་བསྐུར་བས། ལུས་ཀྱི་སྡིག་སྒྲིབ་དག་པའི་མོས་པ་མཛོད།
ཧཱུྃ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཀ་ལ་ཤ་ཨ་བྷི་ཥིཉྩ་མཱཾ།
ཞེས་དབང་བསྐུར་བས་བུམ་པའི་ཆུ་རྒྱུན་གྱིས་སྤྱི་བོའི་འཁོར་ལོར་སླེབས། དེས་བུམ་པའི་ཆུས་དབང་བསྐུར་བ་ཐོབ་པས་ལུས་ཀྱི་དྲི་མ་དག །འབྲས་བུ་སྤྲུལ་སྐུ་ཐོབ་པའི་སྐལ་བ་ཅན་དུ་བྱས་པའི་མོས་པ་མཛོད།
གཉིས་པ་གསང་དབང་གི་དོན་དུ་ཕྱོགས་བཅུའི་སངས་རྒྱས་སྲས་དང་བཅས་པ་ཡབ་ཡུམ་ཐམས་ཅད་བདེ་བའི་ངོ་བོར་ཞུ། མདུན་གྱི་དཀྱིལ་འཁོར་གྱི་ལྷ་ཚོགས་གཙོ་བོ་རྣམས་ཀྱི་ཞལ་དུ་ཞུགས། སྐུའི་ཆ་ཐམས་ཅད་བརྒྱུད། རྡོ་རྗེའི་ལམ་ནས་ཤེས་རབ་ཀྱི་གསང་བའི་མཚོ་སྐྱེས་སུ་བྱོན་པའི་བྱང་ཆུབ་ཀྱི་སེམས་ཁྱེད་རང་རྣམས་ཀྱི་ལྕེ་ཐོག་ཏུ་བཞག་པར་གྱུར་པའི་མོས་པ་མཛད།
ནང་མཆོད་ལ་བུམ་ཆུ་ནས་ཅུང་ཟད་སྤྲོས་ཏེ་བྱིན།
ཧཱུྃ། ཕྱོགས་དུས་སངས་རྒྱས་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། །ཁམས་གསུམ་ཀུན་གྱིས་ཕྱག་བྱས་པ། །རྡོ་རྗེའི་དབང་བསྐུར་ཆེན་པོ་སྦྱིན། །ཨོཾ་སརྦ་ཏ་ཐཱ་ག་ཏ་གུ་ཧྱེ་ཨ་བྷི་ཥིཉྩ་མཱཾ།
ཞེས་དབང་བསྐུར་བས། བུམ་ཆུ་དང་བདུད་རྩིའི་རྒྱུན་གྱིས་མགྲིན་པར་སླེབས། དེས་གསང་བའི་དབང་བསྐུར་བ་ཐོབ་པས། ངག་གི་དྲི་མ་དག །འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་བྱས་པའི་མོས་པ་མཛོད།
གསུམ་པ་ཤེས་རབ་ཡེ་ཤེས་ཀྱི་དོན་དུ་བུམ་ཆུ་སྤྱི་བོར་གཏོར་བས་ཁྱེད་རང་རྣམས་ལྷ་སྐུ་ཡབ་ཡུམ་ཞལ་སྦྱོར་གྱི་རྣམ་པར་གནས་པ་ལ་ཐུགས་རྒྱུད་བདེ་བ་ཆེན་པོས་ཡོངས་སུ་གང་བར་གྱུར་པའི་མོས་པ་མཛོད།
ཧཱུྃ། ཕྱོགས་དུས་སངས་རྒྱས་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། །ཁམས་གསུམ་ཀུན་གྱིས་ཕྱག་བྱས་པ། །རྡོ་རྗེ་དབང་བསྐུར་ཆེན་པོ་སྦྱིན། ཨོཾ་སརྦ་ཏ་ཐཱ་ག་ཏ་པྲཛྙཱ་ཛྙཱ་ན་ཨ་བྷི་ཥིཉྩ་མཱཾ།
ཞེས་དབང་བསྐུར་བས། བུམ་ཆུའི་རྒྱུན་དང་བདུད་རྩིས་སྙིང་གར་སླེབས། དེས་དབང་གསུམ་པའི་ཡེ་ཤེས་སྐྱེས། ཤེས་རབ་ཡེ་ཤེས་ཀྱི་དབང་བསྐུར་བ་ཐོབ་པས། ཡིད་ཀྱི་དྲི་མ་དག །འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས།
བཞི་པ་ཚིག་དབང་རིན་པོ་ཆེའི་དོན་དུ་བུམ་ཆུ་གཏོར་བས་གཟུང་འཛིན་གྱི་རྟོག་པ་དབྱིངས་སུ་དག་པའི་མོས་པ་མཛོད།
ཧཱུྃ། ཕྱོགས་དུས་ནས་སྦྱིན། ཨོཾ་སརྦ་ཏ་ཐཱ་ག་ཏ་ཙ་ཏུརྠ་ཨ་བྷི་ཥིཉྩ་མཱཾ།
ཞེས་དབང་བསྐུར་བས། བུམ་ཆུ་དང་བདུད་རྩིའི་རྒྱུན་ལྟེ་བར་སླེབས། ལུས་ཐམས་ཅད་གང་། དེས་དབང་བཞི་པ་ཐོབ་པས་ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་ཐམས་ཅད་དག །འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་པའི་མོས་པ་དང་བཅས་ཏེ་ཅུང་ཟད་མཉམ་པར་ཞོག་མཛོད། དེས་བཏགས་པ་བརྡའི་དབང་བཞིའམ། བུམ་པའི་དབང་བསྐུར་སོང་བ་ཡིན།
གཉིས་པ་ཏིང་ངེ་འཛིན་གྱི་དབང་ངམ། ཐོབ་པ་དོན་གྱི་དབང་བཞི་ཞུ་བའི་དོན་དུ་མཎྜལ་ཕུལ་མཛོད། ཅེས་མཎྜལ་འབུལ་དུ་གཞུག
།དེ་ནས་འདི་ལ་དབང་གདམས་ངག་དང་འབྲེལ་བ་དང་། གདམས་ངག་དབང་དང་འབྲེལ་པ་གཉིས་ཡོད་པ་ལས།
དང་པོ་བསྐུར་བར་བྱ་བའི་དོན་དུ་ཁྱེད་རང་རྣམས་ཀྱི་ལུས་དང་ལོངས་སྤྱོད་ཕྱི་ནང་གསང་གསུམ་གྱི་མཆོད་པ་བསམ་གྱིས་མི་ཁྱབ་པར་སྤྲུལ་ཏེ། བླ་མ་ཡི་དམ་ཆོས་སྐྱོང་ལ་འབུལ་བར་མོས་ཏེ་འདིའི་རྗེས་ཟློས་མཛོད།
རྩ་བ་དང་བརྒྱུད་པར་བཅས་པའི་དཔལ་ལྡན་བླ་དམ་པ་རྣམས་ཀྱིས་བདག་ལ་ཡང་དག་པར་སྒྱུ་ལུས་ཀྱི་དབང་བསྐུར་དུ་གསོལ། ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱིས་བདག་ལ་ཡང་དག་པར་སྒྱུ་ལུས་ཀྱི་དབང་བསྐུར་དུ་གསོལ། ཡེ་ཤེས་ཀྱི་མཁའ་འགྲོ། ཆོས་སྐྱོང་བའི་སྲུང་མ་རྣམས་ཀྱིས། བདག་ལ་ཡང་དག་པར་སྒྱུ་ལུས་ཀྱི་དབང་ཞུ་བ་དང་། ཉམས་སུ་ལེན་པ་ལ་བར་ཆད་ཐམས་ཅད་བསྲུང་བར་མཛད་དུ་གསོལ། ལན་གསུམ་བྱ།
དེ་ནས་ཁྱེད་རང་རྣམས་ཀྱི་སྤྱི་བོར་ཨོཾ་དཀར་པོ་དེ་ལས་འོད་ཟེར་དཀར་པོ་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུའི་བྱིན་རླབས་ཐམས་ཅད་ཨོཾ་དཀར་པོའི་རྣམ་པར་བསྡུས། སྤྱི་བོའི་ཨོཾ་ལ་ཐིམ། ཨོཾ་དེ་ཉིད་འོད་ཟེར་དཀར་པོའི་རྣམ་པར་ལྟེམ་ལྟེམ་ཞུ་སྟེ། སྤྱི་བོ་ནས་ཞུགས། ལྟེ་བར་བྱོན་པས་དེ་ཉིད་ཐིག་ལེ་དཀར་པོ་གཅིག་ཏུ་སོང་། དེའི་འོད་ཀྱིས་ལུས་གང་བས་རང་ལུས་ཀྱང་འོད་དཀར་པོའི་རྣམ་པར་ལྟེམ་ལྟེམ་ཞུ། ཉོན་མོངས་པ་གཏི་མུག་སངས་ཀྱིས་དག་པའི་མོས་པ་མཛོད།
ཡང་ཁྱེར་རང་རྣམས་ཀྱི་མགྲིན་པར་ཨཱཿདམར་པོ་དེ་ལས་འོད་ཟེར་དམར་པོ་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་གསུང་གི་བྱིན་རླབས་ཐམས་ཅད་ཨཱཿདམར་པོའི་རྣམ་པར་བསྡུས། མགྲིན་པའི་ཨཱཿལ་ཐིམ། ཨཱཿདེ་ཉིད་འོད་ཟེར་དམར་པོའི་རྣམ་པར་ལྟེམ་ལྟེམ་ཞུ་སྟེ། མགྲིན་པ་ནས་ཞུགས། ལྟེ་བར་བྱོན་པས་དེ་ཉིད་ཐིག་ལེ་དམར་པོ་གཅིག་ཏུ་སོང་། དེའི་འོད་ཀྱིས་ལུས་གང་བས་རང་ལུས་ཀྱང་འོད་དམར་པོའི་རྣམ་པར་ལྟེམ་ལྟེམ་ཞུ། ཉོན་མོངས་པ་འདོད་ཆགས་སངས་ཀྱིས་དག་པའི་མོས་པ་མཛོད།
ཡང་ཁྱེད་རང་རྣམས་ཀྱི་སྙིང་གར་ཧཱུྃ་སྔོན་པོ་དེ་ལས་འོད་ཟེར་སྔོན་པོ་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀྱི་བྱིན་རླབས་ཐམས་ཅད་ཧཱུྃ་སྔོན་པོའི་རྣམ་པར་བསྡུས། སྙིང་ཁའི་ཧཱུྃ་ལ་ཐིམ། ཧཱུྃ་དེ་ཉིད་འོད་ཟེར་སྔོན་པོའི་རྣམ་པར་ལྟེམ་ལྟེམ་ཞུ་སྟེ། སྙིང་ཁ་ནས་ཞུགས་ཏེ་ལྟེ་བར་བྱོན་པས་དེ་ཉིད་ཐིག་ལེ་སྔོན་པོ་གཅིག་ཏུ་སོང་། དེའི་འོད་ཀྱིས་ལུས་གང་བས་རང་ལུས་ཀྱང་འོད་སྔོན་པོའི་རྣམ་པར་ལྟེམ་ལྟེམ་ཞུ། ཉོན་མོངས་པ་ཞེ་སྡང་སངས་ཀྱིས་དག་པའི་མོས་པ་མཛོད།
ཡང་ཁྱེད་རང་རྣམས་ཀྱི་ལྟེ་བར་ཏྲཱྃ་སེར་པོ་དེ་ལས་འོད་ཟེར་སེར་པོ་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡོན་ཏན་གྱི་བྱིན་རླབས་ཐམས་ཅད་ཏྲཱྃ་སེར་པོའི་རྣམ་པར་བསྡུས། ལྟེ་བའི་ཏྲཱྃ་ལ་ཐིམ། ཏྲཱྃ་དེ་ཉིད་འོད་ཟེར་སེར་པོའི་རྣམ་པར་ལྟེམ་ལྟེམ་ཞུ་སྟེ་སྙིང་ཁ་ནས་ཞུགས། ལྟེ་བར་བྱོན་པས་དེ་ཉིད་ཐིག་ལེ་སེར་པོ་གཅིག་ཏུ་སོང་། དེའི་འོད་ཀྱིས་ལུས་གང་བས་རང་ལུས་ཀྱང་འོད་ཟེར་སེར་པོའི་རྣམ་པར་ལྟེམ་ལྟེམ་ཞུ། ཉོན་མོངས་པ་ང་རྒྱལ་དང་སེར་སྣ་སངས་ཀྱིས་དག་པའི་མོས་པ་མཛོད།
ཡང་ཁྱེད་རང་རྣམས་ཀྱི་སྤྱི་བོར་ཨཱཿལྗང་གུ་དེ་ལས་འོད་ཟེར་ལྗང་གུ་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཕྲིན་ལས་ཀྱི་བྱིན་རླབས་ཐམས་ཅད་ཨཱཿལྗང་ཁུའི་རྣམ་པར་བསྡུས། སྤྱི་བོའི་ཨཱཿལ་ཐིམ། ཨཱཿདེ་ཉིད་འོད་ཟེར་ལྗང་ཁུའི་རྣམ་པར་ལྟེམ་ལྟེམ་ཞུ་སྟེ་སྤྱི་བོ་ནས་ཞུགས། ལྟེ་བར་བྱོན་པས་དེ་ཉིད་ཐིག་ལེ་ལྗང་ཁུ་གཅིག་ཏུ་སོང་། དེའི་འོད་ཀྱིས་ལུས་གང་བས་རང་ལུས་ཀྱང་འོད་ལྗང་ཁུའི་རྣམ་པར་ལྟེམ་ལྟེམ་ཞུ། ཉོན་མོངས་པ་ཕྲག་དོག་སངས་ཀྱིས་དག་པའི་མོས་པ་མཛོད།
དེ་ལྟར་ན་ཁྱེད་རང་རྣམས་ཀྱི་སེམས་ཉིད་དྭངས་མ་ཡེ་ཤེས་ལྔ་ལྡན་བདེ་མཆོག་ལྷན་ཅིག་སྐྱེས་པའི་སྐུར་གསལ་སིང་ངེར་གྱུར་པའི་ངང་ལ་མཉམ་པར་ཞོག་མཛོད། །དེས་དབང་གདམས་ངག་དང་འབྲེལ་བའི་རིམ་པ་གྲུབ།
གཉིས་པ་གདམས་ངག་དབང་དང་འབྲེལ་བ་ལ། དཀྱིལ་འཁོར་གྱི་དབུས་སུ་རིན་པོ་ཆེའི་ཁྲི་ཡངས་ཤིང་རྒྱ་ཆེ་བའི་གདན་ལ་བླ་མ་རྡོ་རྗེ་འཆང་ཆེན་པོ་ལ་ཡུམ་རྡོ་རྗེ་ཕག་མོས་འཁྱུད་ཅིང་། འཁོར་མཁའ་འགྲོ་མ་བཞིས་བསྐོར་བ་ལ། མོས་གུས་ཀྱི་གདུང་ཤུགས་དྲག་པོ་དང་བཅས་ཏེ། རང་གི་ལུས་དང་ལོངས་སྤྱོད་དུས་གསུམ་གྱི་དགེ་བའི་དངོས་པོ་དང་བཅས་པ་ཐམས་ཅད་བློས་ལིང་གིས་ཕུལ་ནས་འདིའི་རྗེས་ཟློས་མཛོད།
དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་བླ་མ་རིན་པོ་ཆེས་སེམས་ཅན་ཐམས་ཅད་ཀྱི་དོན་དུ་བདག་ལ་བུམ་པའི་དབང་བསྐུར་དུ་གསོལ། ལན་གསུམ།
དེ་ནས་བླ་མའི་སྐུའི་སྨིན་མཚམས་ནས་འོད་ཟེར་དཀར་པོ་སྐྱ་ནར་གྱིས་བྱུང་། ཁྱེད་རང་རྣམས་ཀྱི་སྨིན་ཕྲག་ཏུ་ཐིམ། ལུས་ཀྱི་སྡིག་སྒྲིབ་དག །རང་ལུས་ལྷ་སྐུ་གསལ་སྟོང་འཇའ་ཚོན་ལྟ་བུར་གྱུར་པའི་མོས་པ་མཛོད། །ཅེས་བྱས་ལ་སེམས་ཅུང་ཟད་འཛིན་པ་ཕྱི་མ་གཉིས་ལའང་འགྲེ།
ཡང་འདིའི་རྗེས་ཟློས་མཛོད།
དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་བླ་མ་རིན་པོ་ཆེས་སེམས་ཅན་ཐམས་ཅད་ཀྱི་དོན་དུ་བདག་ལ་གསང་བའི་དབང་བསྐུར་དུ་གསོལ། ལན་གསུམ།
བླ་མ་ཡབ་ཡུམ་གྱི་སྦྱོར་མཚམས་ནས་བྱང་ཆུབ་སེམས་ཀྱི་ངོ་བོ་འོད་ཟེར་དཀར་དམར་འདྲེས་པ་བྱུང་། ཁྱེད་རང་རྣམས་ཀྱི་ལྕེ་ལ་ཐིམ་པས། ངག་གི་དྲི་མ་དག །རང་ལུས་ལྷ་སྐུ་སྔ་མ་ལས་ཀྱང་གསལ་བར་གྱུར་པའི་མོས་པ་མཛོད།
ཡང་འདིའི་རྗེས་ཟློས་མཛོད།
དུས་གསུམ་ནས། བདག་ལ་ཤེས་རབ་ཡེ་ཤེས་ཀྱི་དབང་བསྐུར་དུ་གསོལ། ལན་གསུམ།
བླ་མའི་ཐུགས་ཀ་ནས་འོད་ཟེར་ཁ་དོག་སྣ་ལྔ་བྱུང་། ཁྱེད་རང་རྣམས་ཀྱི་སྙིང་གར་ཐིམ་པས་སེམས་ཀྱི་སྡིག་སྒྲིབ་ཐམས་ཅད་དག །ལྷ་སྐུ་གསལ་བ་རབ་ཀྱི་མཐར་ཐུག་པར་གྱུར་པའི་མོས་པ་མཛོད།
དེ་ལྟར་དབང་གསུམ་པོ་རེ་རེའི་མཐར་ལྷ་སྐུ་ལ་ཅུང་ཟད་སེམས་འཛིན་དུ་འཇུག་པར་གསུང་པ་ལགས།
དེ་ནས་འདིའི་རྗེས་ཟློས་མཛོད།
དུས་གསུམ་ནས། བདག་ལ་བཞི་པའི་དབང་བསྐུར་དུ་གསོལ། ལན་གསུམ།
ཁྱེད་རང་རྣམས་ཀྱི་ལུས་སེམས་ཁོང་སློད་ལ། གཤིས་ཅིར་ཡང་མ་གྲུབ་ཅིང་། གདངས་གང་ཡང་འགགས་པ་མེད་པ་ཐོལ་སྐྱེས་རང་བྱུང་གི་ཤེས་པ་སོ་མ་འདི་ལ་བཟོ་བཅོས་མེད་པར་ལྷན་ནེར་མཉམ་པར་ཞོག་ཅིག །དེ་ནི་སེམས་སྤྲོས་མེད་ལྷན་ཅིག་སྐྱེས་པའི་ཡེ་ཤེས་བྱ་བ། དབང་བཞི་པའི་ཡེ་ཤེས་ལགས་སོ། །དེས་ཐོབ་པ་དོན་གྱི་དབང་བཞི་སོང་།
གསུམ་པ་མཐར་ཐུག་གསང་བའི་དབང་བཞི་ཞུ་བའི་དོན་དུ་མཎྜལ་ཕུལ་མཛོད།
མཐར་ཐུག་གསང་བའི་དབང་བཞི་བསྐུར་བ་འདི་ལ་ཡང་སྔོན་འགྲོ་གདམས་ངག་དབང་དང་འབྲེལ་བ་དང་དངོས་གཞི་དབང་གདམས་ངག་དང་འབྲེལ་བ་གཉིས་ཡོད་པའི་དང་པོ་ལ་གསུམ་སྟེ། སྟོང་རས་གཞི་བཅའ་བ་དང་། རྩ་ལམ་སྦྱང་བ་དང་། དག་པའི་ལྷ་སྐུར་བསྒོམ་པའོ།
།དང་པོ་ནི་ཁྱེད་རང་རྣམས་ལྷ་སྐུར་གསལ་བའི་ལུས་ཀྱི་དབུས་སུ། རྩ་དབུ་མ་ཁ་དོག་དཀར་བ་ཡར་རྩེ་ཚངས་བུག་དང་མར་རྩེ་གསང་གནས་སུ་ཟུག་པ་ཞིག་གསལ་བཏབ་པའི་དབུ་མ་དེའི་ནང་གི་སྙིང་ཁའི་ཐད་དུ་ཨ་དཀར་པོ་དྭངས་གསལ་འོད་ཀྱི་རང་བཞིན་ཅན་གཅིག་ཡོད་པར་བསམས་ནས་ངག་ཏུ་ཨ་ཨ་ཞེས་ལན་མང་དུ་རྗོད་ཅིག །ཨ་ཨ། ཞེས་བརྗོད་དུ་གཞུག
།དེ་ནས་ཨ་དེ་ལས་འོད་ཟེར་འཕྲོས། ཐོག་མར་དབུ་མ་དང་། དེ་ནས་ཁྱེད་རང་རྣམས་ཀྱི་ལུས་གང་། མཐར་རང་གཞན་སྣོད་བཅུད་ཐམས་ཅད་ཨ་ཡིག་གི་འོད་ཀྱིས་ཁྱབ་པས་ཐམས་ཅད་འོད་དུ་ལྟེམ་ལྟེམ་འདུག་པ་ལ་ཅུང་ཟད་སེམས་གཏད་པས་དེ་རྣམས་ཀྱང་ནམ་མཁའ་ལ་འཇའ་ཡལ་བ་བཞིན་དུ་གྱུར་པའི་ངང་དུ་ཅུང་ཟད་མཉམ་པར་ཞོག་མཛོད།
གཉིས་པ་རྩ་ལམ་སྦྱང་བ་ནི། ཡང་ཁྱེད་རང་རྣམས་ལྷ་སྐུར་གསལ་བ་ལ། རྩ་དབུ་མ་ཡང་སྔོན་བཞིན་དུ་གསལ་བཏབ་ནས། དབུ་མའི་སྤྱི་བོའི་ཐད་དུ་ཧཾ་དཀར་པོ་མགོ་བོ་ཐུར་དུ་ལྟ་བ་དང་། མགྲིན་པའི་ཐད་དུ་ཨཱཿདམར་པོ་མགོ་བོ་གྱེན་དུ་ལྟ་བ་དང་། སྙིང་ཁའི་ཐད་དུ་ཧཱུྃ་མཐིང་ནག་མགོ་བོ་ཐུར་དུ་ལྟ་བ་དང་། ལྟེ་བའི་ཐད་དུ་ཨཾ་དམར་སེར་མགོ་བོ་གྱེན་དུ་ལྟ་བ་རྣམས་སྒོམས་མཛོད།
དེ་ལྟར་དབུ་མའི་ནང་དུ་ཡི་གེ་བཞི་གསལ་བཏབ་ནས་ཐོག་མར་སྤྱི་བོའི་ཧཾ་ལས་འོད་ཟེར་གསལ་སིང་ངེ་བྱུང་། མགྲིན་པའི་ཨཱཿལ་ཕོག །དེ་ལས་འོད་ཟེར་གསལ་སིང་ངེ་བྱུང་། སྙིང་གའི་ཧཱུྃ་ལ་ཕོག །དེ་ལས་འོད་ཟེར་གསལ་སིང་ངེ་བྱུང་། ལྟེ་བའི་ཨཾ་ལ་ཕོག །ལུས་སེམས་ཐམས་ཅད་བདེ་ཆམ་ཆམ་སོང་བར་སྒོམས་མཛོད།
ཡང་འོད་ཟེར་ཡར་ལོག་ཏེ། ལྟེ་བའི་ཨཾ་ལས་འོད་ཟེར་གསལ་སིང་གིས་བྱུང་། སྙིང་གའི་ཧཱུྃ་ལ་ཕོག །དེ་ལས་འོད་ཟེར་གསལ་སིང་གིས་བྱུང་། མགྲིན་པའི་ཨཱཿལ་ཕོག །དེ་ལས་འོད་ཟེར་གསལ་སིང་གིས་བྱུང་། སྤྱི་བོའི་ཧཾ་ལ་ཕོག །ལུས་སེམས་ཐམས་ཅད་བདེ་ཆམ་ཆམ་སོང་། དེ་ལྟར་ཡས་རིམ་དང་མས་རིམ་དུ་འཕྲོས་པའི་འོད་ཟེར་དེ་རྣམས་ཀྱིས་རྩ་གནས་ཐམས་ཅད་གང་། འཁོར་ལོ་བཞི་ལ་སོགས་པའི་རྩ་མདུད་ཐམས་ཅད་གྲོལ། རྩ་ནང་འོད་ཟེར་གྱིས་གང་བའི་རྐྱེན་གྱིས་རྩ་རྣམས་ཀྱང་འཇའ་འོད་དུ་ལྟེམ་ལྟེམ་འདུག་པར་བསམ་ལ་ཅུང་ཟད་མཉམ་པར་ཞོག་མཛོད།
གསུམ་པ་དག་པའི་ལྷ་སྐུ་སྒོམ་པ་ནི། ཡང་ཁྱེད་རང་རྣམས་ཀྱི་ལུས་བདེ་མཆོག་ལྷན་ཅིག་སྐྱེས་པའི་སྐུ་འཇའ་ཚོན་ལྟ་བུར་གསལ་བའི་རྡོ་རྗེ་ནོར་བུའི་ནང་དུ་ཧཱུྃ་སྔོན་པོ་མགོ་བོ་གྱེན་དུ་བསྟན་པའི་ཧཱུྃ་གི་རྩེ་མོ་ལ་ཐིག་ལེ་དམར་པོ་སྲན་མ་ཙམ་གྱིས་མཚན་པ། སྤྱི་བོར་ཧཾ་དཀར་པོ་མགོ་བོ་ཐུར་དུ་བསྟན་པ། ཧཾ་གི་རྩེ་མོ་ལའང་ཐིག་ལེ་དཀར་པོ་སྲན་མ་ཙམ་གྱིས་མཚན་པ།
དེ་ནས་འོག་རླུང་ཅུང་ཟད་འཐེན་པའི་རྐྱེན་གྱིས་ཧཱུྃ་དེ་ཡར་ཡོང་བས་གསང་བའི་དབང་པོ་ཕྱི་ནང་ལྡོག་པ་བཞིན་དུ་ཧཱུྃ་གིས་ཁྲིད་ནས་ཡར་བྱུང་སྟེ། ཧཱུྃ་སྙིང་ཁར་སླེབས། ཉོན་མོངས་པ་འདོད་ཆགས་དག །ཡང་སྟེང་རླུང་ཅུང་ཟད་མནན་པའི་རྐྱེན་གྱིས་སྤྱི་བོའི་ཧཾ་ཡིག་སྙིང་ཁར་སླེབས། ཉོན་མོངས་པ་གཏི་མུག་དག །གཉིས་པོ་སྙིང་ཁར་འཛོམ་པས་ཉོན་མོངས་པ་ཞེ་སྡང་རང་དག་ལ་སོང་བར་སྒོམས་ཤིག །མཐར་ཐུག་གསང་བའི་དབང་གི་སྐབས་འདིར། དེ་ཡན་ཆད་ནི་སྔོན་འགྲོ་གདམས་ངག་དབང་དང་འབྲེལ་བ་ཞེས་བྱ་བ་ཡིན་ལ།
ད་ནི་དངོས་གཞི་དབང་གདམས་ངག་དང་འབྲེལ་བ་ནི། ཁྱེད་རང་རྣམས་ཀྱི་སྤྱི་བོའི་ཧཾ་ཡིག་དེ་ཐིག་ལེ་དཀར་པོ་ལ་ཐིམ། སྙིང་ཁའི་ཧཱུྃ་ཡིག་དེ་ཐིག་ལེ་དམར་པོ་ལ་ཐིམ། ཐིག་ལེ་དཀར་དམར་དེ་གཉིས་སྙིང་ཁར་འབྲོས་འདེད་ཀྱི་ཚུལ་དུ་འཁོར་བ་ལ་སེམས་གཏོད་ལ། འདི་ཐམས་ཅད་སྒྱུ་མ་ལྟ་བུ་ཡིན་སྙམ་དུ་འདུན་པ་སྦྱོངས་ཤིག །དེ་བུམ་དབང་ཡིན།
ཐིག་ལེ་གཉིས་པོ་དེ་སྙིང་གར་འཁོར་བས་གཅིག་རྗེས་གཅིག་གིས་ཟིན་པའི་ཚུལ་གྱིས་རེག་རེག་འདུག་པ་ལ་སེམས་གཏོད་ལ་སྒྱུ་མའི་འདུན་པ་སྦྱོངས་ཤིག །དེ་གསང་དབང་ཡིན། དེ་ལྟར་ཐིག་ལེ་གཉིས་རེག་པས་ལུས་སེམས་བདེ་བས་ཁྱབ་པ་ལ་སེམས་གཏོད་ལ་སྒྱུ་མའི་འདུན་པ་སྦྱོངས་ཤིག །དེ་ཤེར་དབང་ཡིན།
ཐིག་ལེ་གཉིས་པོ་གཅིག་ལ་གཅིག་ཐིམ་ནས་ནམ་མཁའ་ལ་འཇའ་ཡལ་བ་ལྟར་གྱུར་པའི་ངང་དེར། གང་ཡང་བསྒོམ་རྒྱུ་མེད། བསམ་རྒྱུ་མེད་པའི་ཚུལ། རིག་པ་གཏད་མེད་ཀྱི་ངང་དུ་རང་གར་ཞོག་ཅིག །དེ་དབང་བཞི་པ་ཡིན། སྤྲོས་བྲལ་དེ་ཁའི་ངང་ལས་བདག་དང་སྣང་བ་ཐམས་ཅད་ལྷ་སྐུ་འཇའ་ཚོན་ལྟ་བུའི་ཟུང་འཇུག་ཏུ་གསལ་ལེགས་པར་ཐོབ་པ་ལ་མཉམ་པར་ཞོག་མཛོད།
དེ་དག་གིས་སྒྱུ་ལུས་དབང་མོ་ཆེའི་རིམ་པ་ཕུལ་གྲུབ་པ་ཡིན། དེའི་དུས་སུ་ཐོབ་པའི་དམ་ཚིག་དང་སྡོམ་པ་ཚུལ་བཞིན་དུ་བསྲུང་ངོ་སྙམ་དུ་འདིའི་རྗེས་ཟློས་མཛོད།
གཙོ་བོས་ཇི་ལྟར་སོགས་ལན་བསུམ་བྱ།
གཏང་རག་གི་མཎྜལ་ཕུལ་ཏེ་འདིའི་རྗེས་ཟློས་མཛོད། དེང་ནས་བརྩམས་ཏེ་བདག་བྲན་ཏུ། །སོགས་ཀྱིས་ཡོན་འབུལ་བ་རྣམས་བྱ། ཚོགས་ཕུད་འབུལ་བ་ནས་ཚོགས་ལྷག་གི་བར་ཚོགས་འཁོར་གྱི་བྱ་བ་རྣམས་ཀྱང་སྐབས་འདིར་བྱེད།
རྗེས་ཆོག་མཆོད་པ་ཁ་གསོས་བྱིན་གྱིས་བརླབ། ཨརྒྷཾ་ནས། ཤཔྡའི་བར་གྱིས་མཆོད། སྙིང་པོ་སོ་སོའི་མཐར་འབྲུ་གསུམ་བཏགས་ལ་ནང་མཆོད་འབུལ། སངས་རྒྱས་ཀུན་གྱི་སྐུ་གསུང་ཐུགས། །ཞེས་སོགས་ཀྱིས་བསྟོད། ཡིག་བརྒྱ་ལན་གསུམ་བཟླ། གང་ཡང་བདག་བློ་གཏི་མུག་པས། །ཞེས་སོགས་ཀྱིས་བཟོད་པར་གསོལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱིས་གཤེགས་གསོལ། སེམས་ཅན་ཐམས་ཅད་བདེ་གྱུར་ཅིག །སོགས་ཀྱིས་སྨོན་ལམ་བཏབ། ལེགས་པའི་ཡོན་ཏན་རབ་རྫོགས་པ། །ཞེས་སོགས་ཀྱིས་བཀྲ་ཤིས་བརྗོད། དགེ་བའི་ཚོགས་རྣམས་བསགས་པ་ཀུན། །སོགས་ཀྱིས་བསྔོ་བ་བྱའོ།
།བློ་དམན་འགའ་ལ་མཁོ་ཕྱིར་དུ། །གསལ་བྱེད་ཡི་གེ་སྤེལ་བའི་དགེས། །བསྟན་དང་འགྲོ་ཕན་བདེའི་རྒྱུན། །སྐྱོང་བའི་བདེན་ཚིག་འགྲུབ་པར་སྨོན།
།སྒྱུ་ལུས་དབང་མོ་ཆེའི་བཀའ་བྱ་ཚུལ་བརྗོད་ཟིན་ཏོ།། །།

Initiation of the five tantras by the samadhi

༼༄༅། །རྒྱུད་སྡེ་ལྔའི་ཏིང་ངེ་འཛིན་གྱི་དབང་།།༽
རྒྱུད་སྡེ་ལྔ་ཡི་ལྷ་ཚོགས་ལ། །སྒོ་གསུམ་གུས་པས་ཕྱག་བགྱིས་ནས། །བྱིན་རླབས་ཁོག་ཕུབ་བཀའ་གཉིས་ཀྱི། །ཕྱི་མ་བདག་གིས་བཤད་པར་བྱ།
།འདིར་རྒྱུད་སྡེ་ལྔའི་ཏིང་ངེ་འཛིན་གྱི་དབང་བསྐུར་བར་འདོད་པས། དེ་ལ་གཉིས། སྦྱོར་བ་དང་དངོས་གཞིའོ།
།དང་པོ་ལ་མཎྜལ་བསྐྱེད་ཆོག་ལྟར་རམ། བསྡུ་ན་པདྨ་འདབ་བརྒྱད་ལ་ལྷའི་སྐུ་མདོག་དང་མཐུན་པའི་ཚོམ་བུ་ལྔ་བཀོད་ལ། མཆོད་གཏོར་ལྷ་ལྔའི་སྐབས་དང་ཕལ་ཆེར་འདྲ་བ་དང་། བགེགས་གཏོར་བཤམ། བུམ་པ་མགུལ་ཆིངས་དང་བཅས་པ་དཀྱིལ་འཁོར་གྱི་དབུས་སུ་མཉྫིའི་ཁར་དགོད་པར་བྱའོ།
།གཉིས་པ་དངོས་གཞི་ལ་རྒྱུད་སྡེ་ལྔའི་བདག་བསྐྱེད་བསྒོམ་པ་དང་། མདུན་བསྐྱེད་བསྒྲུབ་པ་དང་། སློབ་མ་ལ་དབང་བསྐུར་བ་དང་གསུམ་གྱི་དང་པོ་སྔོན་འགྲོ་གཏོར་མ་ནས།
རང་ཉིད་ཧེ་རུ་ཀ་ཡབ་རྐྱང་དུ་གསལ་བའི་གནས་གསུམ་དུ་ཡི་གེ་གསུམ་གྱིས་མཚན་པའོ། །ཞེས་པའི་བར་སྔར་བསྟན་པ་ཉིད་ཉམས་སུ་བླང་ངོ་།
།གཉིས་པ་མཎྜལ་ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་འབྱུང་བཞི་རི་རབ་དང་བཅས་པའི་སྟེང་དུ་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པ་དུར་ཁྲོད་སྲུང་འཁོར་དང་བཅས་པའི་དབུས་སུ། སེང་ཁྲི་པད་ཟླ་ཉི་མའི་དཀྱིལ་འཁོར་ལ་འཇིགས་བྱེད་དུས་མཚན་དང་བཅས་པའི་སྟེང་དུ་བཅོམ་ལྡན་འདས་འཁོར་ལོ་བདེ་མཆོག་སྐུ་མདོག་མཐིང་ག་ནས་བཞུགས་པའོ།
།ཤར་གྱི་འདབ་མ་ལ་མཁའ་འགྲོ་མ་མཐིང་ཁ་ནས་ ཕག་མོའི་རིགས་ལས་བྱུང་བའོ། །ཞེས་པའི་བར་བདེ་མཆོག་ལྷ་ལྔ་བཞིན།
ཤར་དུ་དགྱེས་མཛད་རྡོ་རྗེ་མཐིང་ག་ནས་ དྲག་པོ་མནན་པའོ། །ལྷོར་གསང་བ་འདུས་པ་སྐུ་མདོག་སྔོན་པོ་ནས་ རིན་པོ་ཆེས་བརྒྱན་པའོ། །ནུབ་ཏུ་མ་ཧཱ་མཱ་ཡཱ་མཐིང་ག་ནས་ མི་རོ་མནན་པའོ། །བྱང་དུ་འཇིགས་མཛད་རྡོ་རྗེ་མཐིང་ནག་མ་ཧེའི་ཞལ་ཅན་ནས་ མ་ཧེ་མནན་པའོ།
།རང་གི་སྙིང་ཁའི་ཧཱུྃ་ལས་འོད་ཟེར་འཕྲོས་ནས་ མི་བསྐྱོད་པས་དབུ་བརྒྱན་ཞེས་པའི་བར་རྒྱུད་སྡེ་ལྔའི་མངོན་རྟོགས་བཞིན།
ཨོཾ་སརྦ་ཏ་ཐཱ་ག་ཏ་མཎྜལ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་ཧཱུྃ་སྭཱ་ཧཱ། །དུད་ཁ་མུན་ཆེན་ཁྱོད་ལ་བསྟོད། །ཅེས་པའི་བར་མཆོད་བསྟོད་རྣམས་སྒྱུ་ལུས་དབང་མོ་ཆེའི་སྐབས་བཞིན་བྱ། གཏོརམ་འབུལ་བ། བཟླས་པ་རྣམས་ཀྱང་ཕལ་ཆེར་དེ་བཞིན་བྱ་སྟེ། འོན་ཀྱང་མགོན་པོ་སོགས་ཀྱི་གཏོར་སྔགས་བཞག
།གསུམ་པ་སློབ་མ་རྣམས་ཁྲུས་བྱས་གྲལ་དུ་འཁོད་ནས། མེ་ཏོག་བཀྱེ་བསྡུ་བྱ། སློབ་དཔོན་གྱིས།
ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་བྱང་ཆུབ་རིན་པོ་ཆེ་འཐོབ་པར་བྱ། དེའི་ཆེད་དུ་ཐེག་པ་ཆེན་པོའི་དམ་པའི་ཆོས་གསན་སྙམ་དུ་ཐུགས་བསྐྱེད་དང་ཀུན་སྤྱོད་གསལ་བཏབ་སྟེ་གསན་པར་ཞུ།
དེ་ལ་འདིར་ཟབ་ལམ་ནི་གུ་ཆོས་དྲུག་གི་བྱིན་རླབས་ཁོག་ཕུབ་ཀྱི་བཀའ་གཉིས་ཀྱི་ནང་ནས་ཤིན་ཏུ་ཟབ་པ་རྒྱུད་སྡེ་ལྔ་གཙོ་བསྡུས་ཀྱི་དབང་བསྐུར་བ་ཟབ་པོ་འབུལ་བ་སྐབས་སུ་བབ་པ་ཡིན། དེ་ལ་སྔོན་འགྲོ་དང་དངོས་གཞི་གཉིས་ཡོད་པའི་དང་པོ་སྔོན་འགྲོའི་ཆོས་རྣམས་ཞུ་བའི་ཡོན་དུ་མཎྜལ་འབུལ་བར་ཞུ།
དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་མཛོད།
དགའ་ཆེན་ཁྱོད་བདག་སྟོན་པ་སྟེ། །ནས། འཇུག་པར་འཚལ། གསུམ།
དེ་ནས་ཐུན་མོང་གི་རྒྱུན་བཤགས་བྱ་བ་འདིའི་རྗེས་ཟློས་མཛོད།
དཀོན་མཆོག་གསུམ་ལ་བདག་སྐྱབས་མཆི། །སོགས་གསུམ།
དེ་ནས་རིགས་ལྔའི་སྡོམ་པ་འཛིན་པ་འདིའི་རྗེས་ཟློས་མཛོད།
སངས་རྒྱས་བྱང་ཆུབ་སེམས་དཔའ་ཀུན། །ནས། འདས་ལ་འགོད། །གསུམ།
སློབ་མའི་གནས་གསུམ་དུ་དྲིའི་ཐིག་ལེ་བྱ་ཞིང་།
ཁྱེད་རང་གི་དཔྲལ་བར་ཨོཾ་སོགས་ནས། མི་བདེ་མ་སྤངས་དུས་བྱས་ནས། །དམྱལ་བ་ཆེན་པོར་གྱུར་ཏ་རེ།
།ཞེས་པའི་དམ་བཞག་བར་བདེ་མཆོག་ལྷ་ལྔའི་ཏིང་ངེ་འཛིན་གྱི་དབང་བཞིན་བྱ། དེ་ནས།
ཡེ་ཤེས་དབབ་པའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད།
དེ་བཞིན་གཤེགས་པ་ཐམས་ཅད་ཀྱིས། །བདག་ལ་བྱིན་གྱིས་རློབས་མཛོད་ལ། །རྡོ་རྗེ་ཡེ་ཤེས་བླ་མེད་ནི། །དེ་རིང་ཉིད་དུ་དབབ་ཏུ་གསོལ། །གསུམ།
སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་རྒྱུད་སྡེ་ལྔའི་དཀྱིལ་འཁོར་གྱི་ལྷ་ཚོགས་རྣམས་ལས་དེ་དང་འདྲ་བའི་ལྷ་ཚོགས་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཐམས་ཅད་གང་། ལུས་སེམས་བདེ་བས་ཁྱབ་པར་གྱུར་པའི་མོས་པ་མཛོད། ཡང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་དཔའ་མོ་ཆོས་སྐྱོང་གི་ལྷ་ཚོགས་ཐམས་ཅད་ཀྱང་རྒྱུད་སྡེ་ལྔའི་རྣམ་པར་ས་གཞི་བར་སྣང་ཐམས་ཅད་ཁྱབ་པ་ཙམ་སྤྱན་དྲངས་ཏེ། ཁྱེད་རང་རྣམས་ཀྱི་ལུས་ལ་སིབ་སིབ་ཐིམ་པའི་མོས་པ་མཛོད།
སྤོས་རོལ་བྱ་ཞིང་རྒྱུད་སྡེ་ལྔའི་སྙིང་པོའི་མཐར། བཛྲ་ཨཱ་བེ་ཤ་ཡ་ཨ་ཨཱཿ ཞེས་བཏགས་ལ་ཡེ་ཤེས་ཕབ།
དེ་དག་གིས་སྔོན་འགྲོའི་ཆོས་རྣམས་གྲུབ་ཟིན།
གཉིས་པ་དངོས་གཞིའི་དོན་དུ་མཎྜལ་འབུལ་བར་ཞུ།
དེ་ལྟར་མཎྜལ་ཕུལ་ནས་འདིའི་རྗེས་ཟློས་མཛོད།
བསམ་གྱིས་མི་ཁྱབ་དམ་ཆོས་སྣོད། །དབང་བསྐུར་དམ་པ་སྩལ་དུ་གསོལ། །གསུམ།
དེ་ནས་བུམ་དབང་ནི་སྡོམ་པ་རྒྱ་མཚོ་དང་། །རྡོ་རྗེ་སྙིང་པོ་རྒྱན་གྱི་རྒྱུད་ལས་འབྱུང་བ་ལྟར།
།སྐྱོབ་པའི་དཀྱིལ་འཁོར་མངོན་སུམ་དུ། །ཏིལ་གྱི་གང་བུ་བཞིན་གང་བས། །རྒྱལ་བས་བུམ་པ་བཟུང་ནས་ནི། །བདག་ཉིད་ལ་ནི་དབང་བསྐུར་བས། །དཀྱིལ་འཁོར་དེ་ཉིད་རིག་པར་གྱུར།
།ཞེས་གསུངས་པས་མདུན་བསྐྱེད་རྒྱུད་སྡེ་ལྔ་ཡི་དཀྱིལ་འཁོར་གྱི་ལྷ་རྣམས་ཀྱི་ཕྱག་ཏུ་བུམ་པ་བཟུང་ནས། ཁྱེད་རང་རྣམས་ཀྱི་སྤྱི་བོ་ནས་དབང་བསྐུར་བའི་མོས་པ་མཛོད།
ཇི་ལྟར་བལྟམས་པ་ནས། སྐུ་ཁྲུས་གསོལ།
ཨོཾ་སརྦ་ཏ་ཐཱ་ག་ཏ་ཀ་ལ་ཤ་ཨ་བྷི་ཥིཉྩ་མཱཾ། ཞེས་གསུངས་ཤིང་། བུམ་ཆུ་མགོ་བོར་གཏོར་ཞིང་ཁར་བྱིན་པས་སྤྱི་བོ་གང་། བུམ་དབང་ཐོབ། ལུས་སྒྲིབ་དག །ཡུལ་སྣང་སྟོང་གི་ལྟ་བ་རྒྱུད་ལ་སྐྱེས་པའི་མོས་པ་མཛོད།
གསང་དབང་ལ་ཕྱོགས་བཅུའི་སངས་རྒྱས་ཐམས་ཅད་སྙོམས་པར་ཞུགས་པ་ལས་བྱུང་བའི་བྱང་སེམས་ཁྱེད་རང་རྣམས་ཀྱི་ཞལ་དུ་བྱིན་པའི་མོས་པ་མཛོད།
དེ་ཡང་བདེ་མཆོག་བདེ་བ་མྱུ་གུའི་རྒྱུད་ལས།
ཕྱོགས་བཅུའི་སངས་རྒྱས་ཐམས་ཅད་ཀྱིས། །མཁའ་མཉམ་ཡེ་ཤེས་བདུད་རྩི་ནི། །རྡོ་རྗེའི་ལམ་ནས་ཕྱུང་ནས་ཀྱང་། །བདེ་བ་བསྐྱེད་ཕྱིར་རིགས་ཀྱི་ཡུམ། །སྲས་བཅས་གསང་བའི་དབང་བསྐུར་རོ། །ཨོཾ་བཛྲ་གུ་ཧྱ་ཨ་བྷི་ཥིཉྩ་མཱཾ།
ཞེས་བུམ་ཆུ་ལ་མངར་གསུམ་སྦྱར་བའི་གསང་རྫས་ཁར་བྱིན་པས། མགྲིན་པ་གང་། གསང་དབང་ཐོབ། ངག་སྒྲིབ་དག །སྒྲ་གྲགས་སྟོང་གི་ལྟ་བ་རྒྱུད་ལ་སྐྱེས་པའི་མོས་པ་མཛོད།
ཤེར་དབང་ལ་ཁྱེད་རང་རྣམས་ལྷ་སྐུ་ཡབ་ཡུམ་སྙོམས་པར་ཞུགས་པས་བདེ་སྟོང་ལྷན་ཅིག་སྐྱེས་པའི་ཡེ་ཤེས་སྐྱེས་པར་མོས་ཤིག །བདེ་མཆོག་བདེ་བ་མྱུ་གུའི་རྒྱུད་ལས།
ཕྱོགས་བཅུའི་སངས་རྒྱས་ཐམས་ཅད་ཀྱིས། །གསང་གསུམ་གནས་ལས་བྱུང་བ་ཡི། །ཁམས་གསུམ་ཀུན་གྱིས་ཕྱག་བྱས་པ། །རྡོ་རྗེའི་དབང་བསྐུར་ཆེན་པོ་སྦྱིན། །ཨོཾ་བཛྲ་པྲཛྙཱ་ཛྙཱ་ན་ཨ་བྷི་ཥིཉྩ་མཱཾ།
ཞེས་སྔགས་ཀྱི་བུམ་ཆུས་དབང་བསྐུར་བས་སྙིང་ཁ་ཡན་ཆད་གང་། ཤེས་རབ་ཡེ་ཤེས་ཀྱི་དབང་ཐོབ། ཡིད་སྒྲིབ་དག །རང་རིག་བདེ་སྟོང་བརྗོད་བྲལ་གྱི་ལྟ་བ་རྒྱུད་ལ་སྐྱེས་པའི་མོས་པ་མཛོད།
དབང་བཞི་པ་ལ་ཆེད་དུ་གསོལ་བ་འདེབས་པ་འདིའི་རྗེས་ཟློས་མཛོད།
བདག་ཉིད་ཆེ་ཁྱོད་བཀའ་དྲིན་གྱིས། །གཙོ་བོའི་དབང་བསྐུར་རྣམ་གསུམ་ཐོབ། །དེ་རིང་རིན་ཆེན་བཞི་པ་ཡང་། །བཀའ་དྲིན་གྱིས་ནི་བསྐྱང་དུ་གསོལ། །ཞེས་གསོལ་བ་བཏབ་པས། ཕྱོགས་བཅུའི་སངས་རྒྱས་ཐམས་ཅད་ཀྱིས། །ཨོཾ་བཛྲ་ཙ་ཏུར་ཨ་བྷི་ཥིཉྩ་མཱཾ།
ཞེས་སྔགས་ཀྱི་བུམ་ཆུས་དབང་བསྐུར་བས། ལུས་ཐམས་ཅད་གང་། དབང་བཞི་པ་ཚིག་དབང་རིན་པོ་ཆེ་ཐོབ། སྒོ་གསུམ་གྱི་སྒྲིབ་པ་དག །འཛིན་རྟོག་ཐམས་ཅད་དང་བྲལ་བའི་བརྗོད་བྲལ་ལྷན་ཅིག་སྐྱེས་པའི་ལྟ་བ་རྒྱུད་ལ་སྐྱེས་པའི་མོས་པ་མཛོད།
དེ་དག་གིས་རྒྱུད་སྡེ་ལྔའི་ཏིང་ངེ་འཛིན་གྱི་དབང་བཞི་ཕུལ་གྲུབ་ཟིན། དེའི་དུས་སུ་ཐོབ་པའི་དམ་ཚིག་དང་སྡོམ་པ་བསྲུང་ངོ་སྙམ་པས་འདིའི་རྗེས་ཟློས་མཛོད།
གཙོ་བོས་ཇི་ལྟར་སོགས་གསུམ། བཀའ་དྲིན་གཏང་རག་གི་ཡོན་དུ་མཎྜལ་འབུལ་བ་དང་། རྗེས་ཆོག་རྣམས་སྔར་སྒྱུ་ལུས་དབང་མོ་ཆེའི་སྐབས་བཞིན་བྱའོ།
།བློ་ཆེན་ཀུན་གྱིས་རྟོགས་དཀའི་ལམ། །ཟབ་དོན་གསལ་བའི་གཙོ་བསྡུས་དབང་། །བསྟན་དོན་སྙིང་པོར་བྲིས་པ་འདི། །ཆོས་ཚུལ་སྐྱོད་ལ་མཁོ་ཕྱིར་བཀོད།
།ཟབ་ལམ་ནི་གུ་ཆོས་དྲུག་དང་འབྲེལ་བའི་སློབ་མ་རྗེས་སུ་འཛིན་པ་བདེ་ཆེན་མྱུ་གུའི་ཕྲེང་བ་ཞེས་བྱ་བ་བློ་གསལ་རི་ཁྲོད་པས་སྦྱར་བ་ལས། བྱིན་རླབས་ཁོག་ཕུབ་ཀྱི་བཀའ་གཉིས་ཀྱི་རབ་ཏུ་བྱེད་པ་སྟེ་གཉིས་པའོ།། །།

Initiation of tumo yoga

༼༄༅། །གཏུམ་མོའི་བཀའ།།༽
དགྱེས་པ་རྡོ་རྗེའི་ལྷ་ཚོགས་ལ། །དངོས་པོ་ཀུན་གྱིས་ཕྱག་བྱས་ཏེ། །བྱིན་རླབས་གཞུང་ཤིང་བཀའ་དྲུག་ལས། །གཏུམ་མོའི་སྒོས་བཀའ་བཤད་པར་བྱ།
།འདིར་གཏུམ་མོའི་བཀའ་བྱེད་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་ལ་བྱ་བའི་ཆོས་སོ།
།དང་པོ་འདིའི་བདག་བསྐྱེད་དང་མདུན་བསྐྱེད། མདུན་བསྐྱེད་ཀྱི་རྩ་བ་བཅའ་གཞི་སྒྲུབ་ཚུལ་སྔར་བདེ་མཆོག་ལྷ་ལྔའི་ཏིང་ངེ་འཛིན་གྱི་དབང་བསྐུར་ཚུལ་སྐབས་སུ་བརྗོད་པ་ཉིད་ཡིན་པས་དེ་བཞིན་ཉམས་སུ་བླང་ངོ་།
།གཉིས་པ་སློབ་མ་ལ་བྱ་བ་ལ་བགེགས་གཏོར་བཏང་བ་སྔར་བཞིན་ལ།
ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ། ཟུང་འཇུག་རྡོ་རྗེ་འཆང་ཆེན་པོའི་གོ་འཕང་སྐུ་ཚེ་འདི་ཉིད་ལ་འཐོབ་པར་བྱ། དེའི་ཆེད་དུ་བྱིན་རླབས་ཀྱི་བཀའ་ཟབ་མོ་གསན་སྙན་དུ། ཀུན་སློང་དང་། ཀུན་སྤྱོད་རྣམ་པར་དག་པའི་སྒོ་ནས་གསན་པར་ཞུ། དེ་ལ་ཡེ་ཤེས་ཀྱི་མཁའ་འགྲོ་མ་ནི་གུ་མས་རྡོ་རྗེ་འཆང་ལས་དངོས་སུ་གསན་པའི་ཟབ་ཆོས་ནི་གུ་ཆོས་དྲུག་ཏུ་གྲགས་པའི་ཁྲིད་ཀྱི་སྐབས་སུ་མེད་དུ་མི་རུང་བའི་བཀའ་དྲུག་ཡོད་པ་ལས། ད་ལམ་གཏུམ་མོའི་སྒོས་བཀའ་བྱེད་པ་ཡིན། དེ་ལ་སྔོན་འགྲོ་དང་། དངོས་གཞི་གཉིས་ཡོད་པའི་དང་པོ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། ཅེས་བརྡ་སྤྲད་ལ་མཎྜལ་འབུལ་དུ་གཞུག་གོ
།དེ་ནས་གསོལ་བ་འདེབས་པ་འདིའི་རྗེས་ཟློས་མཛོད། དགའ་ཆེན་ཁྱོད་བདག་སྟོན་པ་སྟེ། །ནས། །མགོན་པོས་བདག་ཀྱང་འཇུག་པར་འཚལ། །ལན་གསུམ།
དེ་ནས་ཐུན་མོང་གི་རྒྱུན་བཤགས་བྱ་བ་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །སོགས་ལན་གསུམ།
དེ་ནས་རིགས་ལྔའི་སྡོམ་པ་འཛིན་པ་འདིའི་རྗེས་ཟློས་མཛོད། །སངས་རྒྱས་བྱང་ཆུབ་སེམས་དཔའ་ཀུན། །ནས། །སེམས་ཅན་མྱ་ངན་འདས་ལ་འགོད། །གསུམ།
སློབ་མའི་གནས་གསུམ་དུ་དྲི་བཟང་གི་ཐིག་ལེ་བྱ་ཞིང་།
ཁྱེད་རང་རྣམས་ཀྱི་དཔྲལ་བར་ཨོཾ། མགྲིན་པར་ཨཱཿ སྙིང་ཁར་ཧཱུྃ། དེ་རྣམས་ཀྱི་འོད་ཀྱིས་ལུས་གང་བས་ལུས་ངག་ཡིད་གསུམ་གྱི་དྲི་མ་དག་པར་གྱུར་པའི་མོས་པ་མཛོད། ཡང་ཁྱེར་རང་རྣམས་ཀྱི་སྙིང་ཁར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་རེ་གསལ་བཏབ་ནས་འདིའི་རྗེས་ཟློས་མཛོད། ཨོཾ་སརྦ་ཡོ་གི་ཙིཏྟ་ཨུཏྤཱ་ད་ཡཱ་མི། སློབ་དཔོན་གྱིས་སྙིང་ཁར་རྡོ་རྗེ་མེ་ཏོག་དང་བཅས་བཞག་ནས་བྱིན་རླབས་བརྟན་པར་བྱས་པའི་མོས་པ་མཛོད། ཨོཾ་སུ་ར་ཏེ་ས་མ་ཡ་སྟྭཾ་ཧོཿསིདྡྷི་བཛྲ་ཡ་ཐཱ་སུ་ཁཾ།
དེ་ནས་དམ་ལ་བཞག་པའི་སླད་དུ་རྡོ་རྗེ་མགོ་བོར་བཞག་ནས་ཚིག་འདི་ལ་གསན་པས་ཁྱབ་པར་གདའ།
འདི་ནི་དམ་ཚིག་རྡོ་རྗེ་སྟེ། །ཁྱོད་ཀྱི་སྤྱི་བོར་བཞག་པ་ཡིས། །སངས་རྒྱས་སྐུ་རུ་ཁྱེད་འགྲུབ་ཅིང་། །མི་ཕྱེད་ཡེ་ཤེས་འཐོབ་པར་འགྱུར།
།སྙིང་ཁར་རྡོ་རྗེ་གཏུགས་ཏེ་ཡེ་ཤེས་དབབ་པ་གསང་བར་གདམས་པ་འདི་ལ་གསན་པས་ཁྱབ་པར་གདའ།
རྡོ་རྗེ་འཛིན་པ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས།
།བདུད་རྩི་ལྔ་ཡིས་ཆུ་བླུད་ནས་དམ་ཚིག་བསྲུང་བར་གདམས་པ་འདི་ལ་གསན་པས་ཁྱབ་པར་གདའ།
འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །ཡེ་ཤེས་བདུད་རྩིའི་ཆུ་འདིས་འགྲུབ། །ཨོཾ་བཛྲ་སརྦ་པཉྩ་ཨ་མྲྀ་ཏ་ཨུ་ད་ཀ་ཧཱུྃ།
ཡང་སྤྱི་བོར་རྡོ་རྗེ་བཞག་ནས་བླ་མའི་བཀའ་གཉན་པའི་སྒོ་ནས་དམ་ཚིག་གི་གདམས་པ་འདི་ལ་གསན་པས་ཁྱབ་བོ།
།དེང་ནས་བཟུང་སྟེ་བུ་ཁྱོད་ཀྱི། །རྡོ་རྗེ་འཛིན་པ་ང་ཡིན་གྱི། །ང་ཡིས་ཇི་ལྟར་བཀའ་སྩལ་པ། །གུས་པའི་ཚུལ་གྱིས་ཉན་པར་གྱིས། །གལ་ཏེ་ང་ལ་བརྙས་ན་ནི། །སངས་རྒྱས་ཐམས་ཅད་བརྙས་པ་ཡིན། །མི་བདེ་མ་སྤངས་དུས་བྱས་ནས། །དམྱལ་བ་ཆེན་པོར་གྱུར་ཏ་རེ། །ཞེས་བརྗོད།
དེ་ནས་ཡེ་ཤེས་དབབ་པའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད།
བདེ་བར་གཤེགས་པ་ཐམས་ཅད་ཀྱིས། །བྱིན་གྱིས་བརླབས་པའི་ཡེ་ཤེས་མཆོག །སེམས་ཅན་ཀུན་གྱི་དོན་གྱི་ཕྱིར། །གཙོ་བོས་བདག་ལ་སྩལ་དུ་གསོལ། །གསུམ།
དེ་ནས་སློབ་དཔོན་དང་མདུན་བསྐྱེད་མཎྜལ་གྱི་དཀྱིལ་འཁོར་དབྱེར་མ་མཆིས་པ་འཁོར་ལོ་བདེ་མཆོག་ཡབ་ཡུམ་དུ་གསལ་བ་དང་། ཕྱོགས་བཞིར་སྙིང་པོའི་རྣལ་འབྱོར་མ་བཞི་དང་བཅས་པ་ལ་མོས་གུས་དུང་བ་བྱས་པའི་རྐྱེན་གྱིས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ལ་ཕོག་པའི་རྐྱེན་གྱིས་ཁྱེད་རང་རྣམས་སྐད་ཅིག་ཙམ་གྱིས་འཁོར་ལོ་བདེ་མཆོག་ཡབ་རྐྱང་གི་རྣམ་པར་གྱུར་པའི་མོས་པ་མཛོད། །ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་ཐམས་ཅད་སྤྱན་དྲངས། ཐམས་ཅད་ཀྱང་བྱང་ཆུབ་སེམས་ཀྱི་རང་བཞིན་དུ་ཞུ་སྟེ། ཁྱེད་རང་རྣམས་ཀྱི་ལུས་ལ་གཉིས་སུ་མེད་པར་ཐིམ་པའི་མོས་པ་མཛོད།
སྤོས་རོལ་དང་བཅས་བདེ་མཆོག་ཡབ་ཡུམ་གྱི་སྙིང་པོའི་མཐར། བཛྲ་ཨཱ་བེ་ཤ་ཡ་ཨ་ཨཱཿ ཞེས་ཡེ་ཤེས་ཕབ།
གཉིས་པ་དངོས་གཞི་ཞུ་བའི་ཡོན་དུ་མཎྜལ་མཛད་པ་ཞུ།
དེ་ནས་གསོལ་བ་འདེབས་པའི་རྗེས་ཟློས་མཛོད། བྱང་ཆུབ་རྡོ་རྗེས་སངས་རྒྱས་ལ། །སོགས་ལན་གསུམ་བྱ།
དེ་ནས་སྤྱན་དམིགས་འདི་བཞིན་དུ་མཛོད།
ཁྱེད་རང་རྣམས་བདེ་མཆོག་ཡབ་རྐྱང་དུ་གསལ་བའི་ལུས་ཀྱི་དབུས་སུ་རྩ་དབུ་མ་ཆོས་བཞི་ལྡན་པ་ཡར་སྣ་ཚངས་བུག་ཏུ་ཟུག་ཅིང་། མས་སྣ་ལྟེ་འོག་ཏུ་ཟུག་པའི་མས་སྣར་ཡི་གེ་རཾ་དམར་པོ་མེའི་རང་བཞིན་ཅན། ཆེ་ཆུང་རིལ་མ་ཙམ་ཞིག་གསལ་ལེགས་པར་ཐོབ་མཛོད།
ཁྱེད་རང་རྣམས་ཀྱི་སྤྱི་བོའི་སྟེང་གི་ནམ་མཁར་སློབ་དཔོན་དང་དབྱེར་མ་མཆིས་པའི་མདུན་བསྐྱེད་འཁོར་ལོ་བདེ་མཆོག་ལྷ་ལྔའི་ཚོགས་རྣམས་བཞུགས་པ་ཞིག་བསྒོམ་དགོས་པས་འདི་ལྟར་གསལ་འདེབས་པར་ཞུ།
དེ་ཡང་སྲུང་བའི་འཁོར་ལོའི་དབུས་སུ་གཞལ་ཡས་ཁང་གི་རང་བཞིན་ཅན་དབུས་སུ་པདྨ་འདབ་མ་བཞི་པའི་ལྟེ་བར་རིན་པོ་ཆེའི་ཁྲི་ཡངས་ཤིང་རྒྱ་ཆེ་བའི་སྟེང་དུ་སླར་ཡང་པདྨ་དང་ཉི་མའི་གདན་ལ་བླ་མ་དང་དབྱེར་མ་མཆིས་པའི་དཔལ་འཁོར་ལོ་བདེ་མཆོག་སྐུ་མདོག་མཐིང་ག་ནས། མེ་དཔུང་འབར་བའི་དབུས་ན་བཞུགས་པའོ།
།ཤར་གྱི་འདབ་མ་ལ་མཁའ་འགྲོ་མ་ནས། ཕག་མོའི་རིགས་ལས་བྱུང་བའོ། །ཞེས་པའི་བར་བདེ་མཆོག་ལྷ་ལྔ་བཞིན་གསལ་གདབ།
དེ་ལྟར་སྤྱི་བོ་ན་བཞུགས་པའི་བླ་མ་དང་དབྱེར་མ་མཆིས་པའི་འཁོར་ལོ་བདེ་མཆོག་ལྷ་ལྔ་ལ་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ། བཞུགས་ཁྲི། ན་བཟའ་ལ་སོགས་ཕྱིའི་མཆོད་པའི་ཡོ་བྱད་དཔག་ཏུ་མེད་པ་ཁྱེད་རང་རྣམས་ཀྱིས་བློས་སྤྲུལ་ཏེ་ཕུལ་བས་མཉེས་པའི་མོས་པ་མཛོད།
ཨོཾ་བཛྲ་ཨཱརྒྷཾ་ནས་ ཤཔྡ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ།
ཡང་ཤ་ལྔ་བདུད་རྩི་ལྔ་ལ་སོགས་པའི་དམ་ཚིག་གི་རྫས་ཡི་གེ་འབྲུ་གསུམ་གྱི་བྱིན་གྱིས་བརླབས་ཏེ་ཕུལ་བས་ནང་གི་མཆོད་པས་མཉེས་པའི་མོས་པ་མཛོད།
ཨོཾ་པཉྩ་ཨ་མྲྀ་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ།
ཡང་ཁྱེད་རང་རྣམས་ཀྱི་སྙིང་ཁ་ནས་རིག་མ་བརྒྱད་དམ་བཅུ་དྲུག་སྤྲུལ་ཏེ་ཕུལ་བས་རྗེས་ཆགས་ཀྱི་བདེ་བས་ཐུགས་རྒྱུད་གང་སྟེ་མཆོད་པས་མཉེས་པའི་མོས་པ་མཛོད།
ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཡཱ་མི།
དེ་ཐམས་ཅད་སྒྱུ་མ་ལྟ་བུ་སྣང་སྟོང་གཉིས་སུ་མེད་པའི་ཡེ་ཤེས་སུ་ཤེས་པ་ནི་དེ་ཁོ་ན་ཉིད་ཀྱི་མཆོད་པའོ་སྙམ་དུ་མོས་པ་མཛོད།
དེ་ལྟར་མཆོད་པ་བཞི་རྫོགས་སུ་ཕུལ་ཞིང་མོས་གུས་དྲག་པོ་དུང་བ་བྱས་པས། ལྟེ་འོག་གི་རཾ་ལས་གཏུམ་མོ་ཡེ་ཤེས་ཀྱི་མེ་ཆེས་ཕྲ་བ་ཞིག་སྤར་ཏེ། དབུ་མའི་ནང་ནས་ཡར་སོང་། ཚངས་བུག་ནས་ཐོན། སྤྱི་བོའི་འཁོར་ལོ་བདེ་མཆོག་ལྷ་ལྔའི་སྐུ་ལ་ཕོག་པས། བདེ་དྲོད་ཀྱི་མཆོད་པས་མཉེས་པའི་མོས་པ་མཛོད།
ཡང་ཐུགས་ཀ་ནས་འོད་ཟེར་འཕྲོས། སངས་རྒྱས་བྱང་ཆུབ་སེམས་དཔའ་ཐམས་ཅད་སྤྱན་དྲངས། བྱང་ཆུབ་སེམས་ཀྱི་རྣམ་པར་ཞུ་སྟེ། འཁོར་ལོ་བདེ་མཆོག་གི་དབུ་གཙུག་ནས་ཐིམ། བདེ་མཆོག་ཡབ་ཡུམ་གྱི་སྐུ་གང་། དེའི་སྐུ་ལུས་ཀྱི་ཆ་ཐམས་ཅད་ལས་ཀྱང་བྱང་ཆུབ་སེམས་ཀྱི་བདུད་རྩི་བདེ་བ་ཆེན་པོའི་རང་བཞིན་ཅན། དཀར་ཞིང་དྭངས་མའི་རྒྱུན་བྱུང་སྟེ། ཁྱེད་རང་རྣམས་ཀྱི་ཚངས་བུག་ནས་ཞུགས། ལུས་ཀྱི་ནང་ཐམས་ཅད་གང་བས་འཁོར་བ་ཐོག་མ་མེད་པ་ནས་བསགས་པའི་ལུས་ཀྱི་སྡིག་སྒྲིབ་ཐམས་ཅད་དག །ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། བུམ་དབང་ཐོབ་བྱུང་སྙམ་པའི་མོས་པ་མཛོད།
ཡང་སྤྱི་བོའི་འཁོར་ལོ་བདེ་མཆོག་ཡབ་ཡུམ་ལ་མོས་གུས་དུང་བ་བྱས་པས་ཡབ་ཡུམ་སྙོམས་པར་ཞུགས། སྦྱོར་མཚམས་ནས་བྱང་ཆུབ་སེམས་ཀྱི་ཐིག་ལེ་དཀར་ལ་དམར་བའི་མདངས་ཆགས་པ་དཔག་ཏུ་མེད་པའི་རྒྱུན་བྱུང་སྟེ། ཁྱེད་རང་རྣམས་ཀྱི་ཚངས་བུག་ནས་ཞུགས། མགྲིན་པའི་ལམ་བརྒྱུད་དེ་ལུས་ཀྱི་ནང་ཐམས་ཅད་གང་བས། འཁོར་བ་ཐོག་མ་མེད་པ་ནས་བསགས་པའི་ངག་གི་སྡིག་སྒྲིབ་ཐམས་ཅད་དག །རླུང་ངག་དབྱེར་མེད་རྡོ་རྗེའི་རང་བཞིན་ཅན་དུ་གྱུར། གསང་དབང་ཐོབ་བྱུང་སྙམ་པའི་མོས་པ་མཛོད།
ཡང་སྤྱི་བོའི་བདེ་མཆོག་ཡབ་ཡུམ་ལ་མོས་གུས་དུང་བ་བྱས་པས། ཡུམ་རྡོ་རྗེ་ཕག་མོ་ལས་རང་འདྲ་བ་གཉིས་པ་ཞིག་ཆད། དེས་ཁྱེད་རང་རྣམས་འཁོར་ལོ་སྡོམ་པ་ཡབ་རྐྱང་དུ་གསལ་བའི་སྐུ་ལ་འཁྱུད་ཅིང་། རྗེས་སུ་ཆགས་པའི་བདེ་བ་ཆེན་པོས་རྒྱུད་གང་བས། འཁོར་བ་ཐོག་མ་མེད་པ་ནས་བསགས་པའི་ཡིད་ཀྱི་སྡིག་སྒྲིབ་ཐམས་ཅད་དག །ཡིད་བདེ་སྟོང་ལྷན་ཅིག་སྐྱེས་པའི་རང་བཞིན་ཅན་དུ་གྱུར། ཤེས་རབ་ཡེ་ཤེས་ཀྱི་དབང་ཐོབ་བྱུང་སྙམ་པའི་མོས་པ་མཛོད།
ཡང་སྤྱི་བོའི་འཁོར་ལོ་བདེ་མཆོག་ཡབ་ཡུམ་ལ་མོས་གུས་དུང་བ་བྱས་པས། སྤྱི་བོའི་རྣལ་འབྱོར་མ་བཞི་གཙོ་བོ་ཡབ་ཡུམ་ལ་ཐིམ། ཡུམ་ཡབ་ལ་ཐིམ། ཡབ་འོད་དུ་ཞུ་སྟེ་ཁྱེད་རང་རྣམས་ཀྱི་ཚངས་བུག་ཏུ་ཐིམ། ཁྱེད་རང་རྣམས་འཁོར་ལོ་བདེ་མཆོག་ཏུ་གསལ་བའི་ཡུམ་ཡང་ཡབ་ལ་ཐིམ། རང་ཉིད་ཡབ་རྐྱང་དུ་གསལ་བ་དེ་ཡང་ནམ་མཁའ་ལ་འཇའ་ཡལ་བ་བཞིན་དུ་གྱུར་ཏེ། ཟུང་འཇུག་ཕྱག་རྒྱ་ཆེན་པོའི་ངང་དུ་ཅུང་ཟད་མཉམ་པར་ཞོག་མཛོད།
དེས་ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་ཐམས་ཅད་དག །དེ་ཁོ་ན་ཉིད་བསམ་གྱིས་མི་ཁྱབ་པའི་ཡེ་ཤེས་ཀྱི་རང་བཞིན་ཅན་དུ་གྱུར། དབང་བཞི་པ་ཐོབ་བྱུང་སྙམ་པའི་མོས་པ་མཛོད།
དེ་དག་གིས་གཏུམ་མོའི་སྒོས་བཀའ་གྲུབ། དེའི་དུས་སུ་ཐོབ་པའི་དམ་ཚིག་དང་སྡོམ་པ་བསྲུང་ངོ་སྙམ་པས་འདིའི་རྗེས་ཟློས་མཛོད།
གཙོ་བོས་སོགས་དང་མཎྜལ་འབུལ་བ་སྔར་བཞིན་བྱ།
རྗེས་ཆོག །མཆོག་བསྟོད། བཟོད་གསོལ། གཤེགས་གསོལ། བསྔོ་སྨོན་རྣམས་བྱེད་པ་རིགས་འགྲེའོ།
།བློ་ངན་ཚང་ཚིང་སྲེག་པའི་ཐབས། །རབ་གསལ་གཏུམ་མོའི་མེ་དབང་ཡང་། །ནི་གུས་བསྟན་པ་ཇི་ཞིན་དུ། །ཆོས་ཚུལ་སྐྱོང་ལ་མཁོ་ཕྱིར་བྲིས། །གཏུམ་མོའི་དབང་བསྐུར་བརྗོད་ཟིན་ཏོ།། །།

Initiation of illusory body yoga

༼༄༅། །སྒྱུ་ལུས་སྒོས་བཀའ།།༽
དཔལ་ལྡན་གསང་བ་འདུས་པ་ལས། །ལུས་ངག་ཡིད་གསུམ་གུས་བཏུད་ནས། །བྱིན་རླབས་གཞུང་ཤིང་བཀའ་དྲུག་ལས། །སྒྱུ་ལུས་སྒོས་བཀའ་བཤད་པར་བྱ།
།འདིར་སྒྱུ་ལུས་ཀྱི་བཀའ་བྱེད་པ་ལ་གཉིས། སློབ་དཔོན་གྱི་བྱ་བའི་རིམ་པ་དང་སློབ་མ་ལ་བྱ་ཚུལ་ལོ།
།དང་པོ་ལ་བཅའ་གཞི་དང་། བདག་མདུན་བསྒྲུབ་ཚུལ་གཏུམ་མོའི་སྐབས་བཞིན་ཉམས་སུ་བླངས་པས་དོན་འགྲུབ་པའོ།
།གཉིས་པ་ལ་ཁྲུས་ཕྱག་སྔོན་འགྲོས་སློབ་མ་རྣམས་གྲལ་ལ་འཁོད། བགེགས་གཏོར་བཏང་།
འོ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་འཐོབ་པར་བྱའོ་སྙམ་པའི་ཐུགས་བསམ་ཁྱད་པར་ཅན་དུང་བ་དང་བཅས་མ་ཡེངས་པས་གསན་པར་ཞུ། གསན་བྱ་དམ་པའི་ཆོས་ཟབ་ལམ་ནི་གུ་ཆོས་དྲུག་གི་སྒྱུ་ལུས་ཀྱི་སྒོས་བཀའ་འབུལ་བ་སྐབས་སུ་བབ་པ་ཡིན། དེ་ལ་སྔོན་འགྲོ་དང་། དངོས་གཞི་གཉིས་སུ་ཡོད་པ་ལས། དང་པོ་སྔོན་འགྲོའི་ཆོས་རྣམས་ཞུ་བའི་ཡོན་དུ་མཎྜལ་འབུལ་བར་ཞུ།
།དེ་ནས་གསོལ་བ་འདེབས་པ་འདིའི་རྗེས་ཟློས་མཛོད།
དགའ་ཆེན་ཁྱོད་བདག་སྟོན་པ་སྟེ། །སོགས་གསོལ་བ་འདེབས་པ། ༡ སྡོམ་པ་འཛིན་པ། ༢ ཟླ་བ་རྡོ་རྗེའི་སེམས་བསྐྱེད་པ། ༣ དམ་བཞག་བྱ་བ། ༤ ཡེ་ཤེས་དབབ་པ་སྟེ། ༥ བཛྲ་ཨཱ་བེ་ཤ་ཡ་ཨ་ཨཱཿ ཞེས་པའི་བར་གྱི་སྔོན་འགྲོ་ལྔ་གཏུམ་མོའི་སྐབས་བཞིན་བྱའོ།
།གཉིས་པ་དངོས་གཞིའི་སླད་དུ་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་མཛོད།
བྱང་ཆུབ་རྡོ་རྗེས་སངས་རྒྱས་ལ། །ཞེས་སོགས་གསུམ།
ཁྱེད་རང་རྣམས་འཁོར་ལོ་བདེ་མཆོག་སྐུ་མདོག་སྔོན་པོ་ནས་ ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་སྐུ་ཅན་དུ་གྱུར་པའི་མོས་པ་མཛོད།
དེ་ལྟ་བུའི་འཁོར་ལོ་བདེ་མཆོག་ཡབ་ཡུམ་དུ་གསལ་བ་དེ་ཉིད་སྣང་སྟོང་སྒྱུ་མ་ལྟ་བུའི་རང་བཞིན་དུ་གྱུར་པའི་སྤྱི་བོར་རྡོ་རྗེའི་ས་གཞི། རྭ་བ། དྲྭ་བ། གུར་བླ་བྲེ། ཡེ་ཤེས་ཀྱི་མེ་འབར་བ་དང་བཅས་པའི་སྲུང་འཁོར་གྱི་ནང་དུ། སྣ་ཚོགས་པདྨ་འདབ་མ་བརྒྱད་པའི་ལྟེ་བར་སེང་གེའི་ཁྲི་ཡངས་ཤིང་རྒྱ་ཆེ་བའི་སྟེང་དུ། སླར་ཡང་པདྨ་དང་ཉི་མའི་གདན་ལ་བླ་མ་དང་དབྱེར་མ་མཆིས་པའི་འཁོར་ལོ་བདེ་མཆོག་སྐུ་མདོག་མཐིང་ག་ནས་ མེ་ཕུང་འབར་བའི་དབུས་ན་བཞུགས་པའོ། །ཞེས་པའི་བར་གཏུམ་མོའི་སྐབས་བཞིན།
འདབ་མ་བཞི་ལ་ཤར་དུ་རྡོ་རྗེ་མཁའ་འགྲོ་མ་མཐིང་ག །བྱང་དུ་སྣ་ཚོགས་མཁའ་འགྲོ་མ་ལྗང་གུ །ནུབ་ཏུ་པདྨ་མཁའ་འགྲོ་མ་དམར་མོ། ལྷོར་རིན་ཆེན་མཁའ་འགྲོ་མ་སེར་མོ་ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་པ། གཡས་གྲི་གུག་འཕྱར་ཞིང་། གཡོན་ཐོད་ཁྲག་ཐུགས་ཀར་འཛིན་པ། མཆན་ཁུང་དུ་རྡོ་རྗེས་མཚན་པའི་ཁ་ཊྭཱཾ་ག་དང་བཅས་ཤིང་ཞབས་གཡས་བརྐྱང་གི་སྟབས་ཀྱིས་བཞུགས་པའོ།
།དེ་དག་གི་སྟེང་གི་ཆ་ལ་བརྒྱུད་པའི་བླ་མ་རྣམས་དང་། གཞན་ཡང་སངས་རྒྱས་བྱང་སེམས་དཔའ་བོ་མཁའ་འགྲོའི་ཚོགས་ཐམས་ཅད་ཀྱིས་བསྐོར་ནས་བཞུགས་པ་དེ་རྣམས་ལ་ཁྱེད་རང་རྣམས་ཀྱིས་ཕྱི་ནང་གསང་བ་དེ་ཁོ་ན་ཉིད་དང་བཅས་པའི་མཆོད་པ་རྣམས་ཡིད་ཀྱིས་སྤྲུལ་ཏེ་ཕུལ་བའི་མོས་པ་དང་བཅས་གསོལ་བ་འདེབས་པ་འདིའི་རྗེས་ཟློས་མཛོད།
རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱིས་བདག་ལ་བུམ་པའི་དབང་བསྐུར་དུ་གསོལ།
ཞེས་མོས་གུས་དུང་དུང་བ་དང་བཅས་པའི་ཡིད་ཀྱིས་གསོལ་བ་ལན་གསུམ་བཏབ་པའི་རྐྱེན་གྱིས་འཁོར་ལོ་བདེ་མཆོག་ཡབ་ཡུམ་གྱི་ཐུགས་ཀ་ནས་འོད་ཟེར་ཁ་དོག་སྣ་ལྔ་པ་འཕྲོས། མཁའ་དབྱིངས་གང་བའི་སངས་རྒྱས་བྱང་སེམས་དཔའ་བོ་མཁའ་འགྲོ་ཐམས་ཅད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ། དེ་རྣམས་ཀྱི་སྐུའི་བྱིན་རླབས་ཀྱི་ངོ་བོ་འོད་ཟེར་ཁ་དོག་སྣ་ལྔ་པའི་ཚོགས་དཔག་ཏུ་མེད་པ་བྱུང་། བླ་མ་འཁོར་ལོ་སྡོམ་པའི་སྐུ་ལ་ཞུགས་པས་དེའི་བྱིན་རླབས་དང་རོ་གཅིག་ཏུ་འདྲེས་པར་གྱུར་ཏེ་བླ་མ་འཁོར་ལོ་སྡོམ་པའི་སྐུ་ལས་འོད་ཟེར་ཁ་དོག་སྣ་ལྔ་པ་བསམ་གྱིས་མི་ཁྱབ་པ་སྤྲོས། ཁྱེད་རང་རྣམས་ཀྱིས་སྨིན་མཚམས་ནས་ཞུགས། ལུས་ཀྱི་ནང་ཐམས་ཅད་གང་བས་འཁོར་བ་ཐོག་མ་མེད་པ་ནས་བསགས་པའི་ལུས་ཀྱི་སྡིག་སྒྲིབ་ཐམས་ཅད་དག །བུམ་པའི་དབང་ཐོབ། སྐུའི་བྱིན་རླབས་བརྟན་པར་གྱུར་པའི་མོས་པ་མཛོད།
དེ་ནས་སྣང་བ་འདི་ཐམས་ཅད་མེད་བཞིན་དུ་སྣང་བའོ་སྙམ་པའི་སྒྱུ་མ་ལྟ་བུའི་འདུན་པ་སྦྱོངས་ཤིག
།གཉིས་པ་ཡང་སྤྱི་བོའི་བླ་མ་འཁོར་ལོ་བདེ་མཆོག་ལ། ཁྱེད་རང་རྣམས་ཀྱི་ཕྱི་ནང་གསང་བ་དེ་ཁོ་ན་ཉིད་དང་བཅས༴ བདག་ལ་གསང་བའི་དབང་བསྐུར་བ་སྩལ་དུ་གསོལ།
ཞེས་མོས་གུས་དུང་དུང་བ་དང་བཅས༴ དེ་རྣམས་ཀྱི་གསུང་གི་བྱིན་རླབས་ཀྱི་ངོ་བོ༴ ཁྱེད་རང་རྣམས་ཀྱི་མགྲིན་པ་ནས་ཞུགས༴ ངག་གི་སྡིག་སྒྲིབ་ཐམས་ཅད་དག །གསང་བའི་དབང་ཐོབ། གསུང་གི་བྱིན་རླབས་བརྟན་པར་གྱུར་པའི་མོས་པ་མཛོད།
དེ་ནས༴ སྦྱོངས་ཤིག༴
།གསུམ་པ་ཡང་སྤྱི་བོའི་བླ་མ་འཁོར་ལོ་བདེ་མཆོག་ལ༴ བདག་ལ་ཤེས་རབ་ཡེ་ཤེས་ཀྱི་དབང་བསྐུར་བ་སྩལ་དུ་གསོལ།
ཞེས་མོས་གུས་དུང་དུང་བ་དང་བཅས༴ དེ་རྣམས་ཀྱི་ཐུགས་ཀྱི་བྱིན་རླབས་ཀྱི་ངོ་བོ༴ ཁྱེད་རང་རྣམས་ཀྱི་སྙིང་ཁ་ནས་ཞུགས། ལུས་ཀྱི་ནང་ཐམས་ཅད་གང་བས་འཁོར་བ་ཐོག་མ་མེད་པ་ནས་བསགས་པའི་ཡིད་ཀྱི་སྡིག་སྒྲིབ་ཐམས་ཅད་དག །ཤེར་རབ་ཡེ་ཤེས་ཀྱི་དབང་ཐོབ། ཐུགས་ཀྱི་བྱིན་རླབས་བརྟན་པར་གྱུར་པའི་མོས་པ་མཛོད།
དེ་ནས་སྣང་འདི་ཐམས་ཅད་མེད་བཞིན་དུ་སྣང་བའོ་སྙམ་པའི་སྒྱུ་མ་ལྟ་བུའི་འདུན་པ་སྦྱོངས་ཤིག
།བཞི་པ་ཡང་སྤྱི་བོའི་བླ་མ་འཁོར་ལོ་བདེ་མཆོག་ལ་ཁྱེད་རང་རྣམས་ཀྱི་ཕྱི་ནང་གསང་བ་དེ་ཁོ་ན་ཉིད་དང་བཅས་པའི་མཆོད་པ་རྣམས་ཡིད་ཀྱིས་སྤྲུལ་ཏེ་ཕུལ་བའི་མོས་པ་དང་བཅས་པའི་གསོལ་བ་འདེབས་པ་འདིའི་རྗེས་ཟློས་མཛོད།
རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱིས་བདག་ལ་བཞི་པའི་དབང་བསྐུར་བ་སྩལ་དུ་གསོལ།
ཞེས་མོས་གུས་དུང་དུང་བ་དང་བཅས་པའི་ཡིད་ཀྱིས་གསོལ་བ་ལན་གསུམ་བཏབ་པའི་རྐྱེན་གྱིས་སྤྱི་བོའི་བླ་མ་འཁོར་ལོ་བདེ་མཆོག་ཡབ་ཡུམ་གྱི་ཐུགས་ཀ་ནས་འོད་ཟེར་ཁ་དོག་སྣ་ལྔ་པ་འཕྲོས། མཁའ་དབྱིངས་གང་བའི་སངས་རྒྱས་བྱང་སེམས་དཔའ་བོ་མཁའ་འགྲོ་ཐམས་ཅད་ཀྱི་ཐུགས་ཀར་ཕོག་པས་ཐུགས་བརྒྱུད་བསྐུལ། དེ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་ཀྱི་ངོ་བོ་འོད་ཟེར་ཁ་དོག་སྣ་ལྔ་པའི་ཚོགས་དཔག་ཏུ་མེད་པ་བྱུང་། བླ་མ་འཁོར་ལོ་སྡོམ་པའི་སྐུ་གསུང་ཐུགས་ལ་ཞུགས་པས་དེའི་བྱིན་རླབས་དང་རོ་གཅིག་ཏུ་འདྲེས་པར་གྱུར་ཏེ་བླ་མ་འཁོར་ལོ་སྡོམ་པའི་སྐུ་ལས་འོད་ཟེར་ཁ་དོག་སྣ་ལྔ་པ་བསམ་གྱིས་མི་ཁྱབ་པ་སྤྲོས། ཁྱེད་རང་རྣམས་ཀྱི་ལྟེ་བ་ནས་ཞུགས། ལུས་ཀྱི་ནང་ཐམས་ཅད་གང་བས། འཁོར་བ་ཐོག་མ་མེད་པ་ནས་བསགས་པའི་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་དག །དབང་བཞི་པ་ཚིག་དབང་རིན་པོ་ཆེ་ཐོབ། སྐུ་གསུང་ཐུགས་ཀྱི་བྱིན་རླབས་བརྟན་པར་གྱུར་པའི་མོས་པ་མཛོད།
དེ་ནས་སྣང་བ་འདི་ཐམས་ཅད་མེད་བཞིན་དུ་སྣང་བའོ་སྙམ་པའི་སྒྱུ་མ་ལྟ་བུའི་འདུན་པ་སྦྱོངས་ཤིག
།དེ་ནས་མཐའ་སྐོར་ན་བཞུགས་པའི་སངས་རྒྱས་བྱང་སེམས་དཔའ་བོ་མཁའ་འགྲོ་རྣམས་འོད་དུ་ཞུ་ནས་སྤྱི་བོའི་ཧེ་རུ་ཀ་ལྷ་ལྔ་ལ་ཐིམ། དེ་ཉིད་ཀྱང་འོད་དུ་ཞུ་ནས་ཁྱེད་རང་རྣམས་ལ་ཐིམ་པར་བསམ་ལ་སྤྲོས་བྲལ་ནམ་མཁའི་དབྱིངས་ལྟ་བུའི་ངང་དུ་ཅུང་ཟད་མཉམ་པར་ཞོག་མཛོད།
དེ་དག་གིས་སྒྱུ་ལུས་ཀྱི་སྒོས་བཀའ་གྲུབ།
དེའི་དུས་སུ་ཐོབ་པའི་དམ་སྡོམ་བསྲུང་ངོ་སྙམ་དུ་འདིའི་རྗེས་ཟློས་མཛོད།
གཙོ་བོས་སོགས་མན་ཆད་སྔར་བསྟན་པ་བཞིན་བྱའོ།
།མ་དག་བློ་ཡི་འཆར་སྒོ་རུ། །སྣང་བ་སྣ་ཚོགས་གསལ་མོད་ཀྱི། །སྒྱུ་མར་བསྟན་ལ་ཡིད་ཆེས་ནས། །དྲན་འདུན་སྐྱོང་ཕྱིར་འདི་དོན་ལོངས། །སྒྱུ་ལུས་ཀྱི་སྒོས་བཀའ་བརྗོད་ཟིན་ཏོ།། །།

Initiation of dream yoga

༼༄༅། །རྨི་ལམ་གྱི་སྒོས་བཀའ།༽
དངོས་ཀུན་གཅིག་ཏུ་སྡོམ་མཛད་པའི། །ཧེ་རུ་ཀ་དཔལ་ལ་བཏུད་ནས། །བྱིན་རླབས་གཞུང་ཤིང་བཀའ་དྲུག་ལས། །རྨི་ལམ་སྒོས་བཀའ་བཤད་པར་བྱ།
།འདིར་རྨི་ལམ་གྱི་བཀའ་བྱ་བ་ལ་གཉིས་ཏེ་སློབ་དཔོན་གྱི་ལས་དང་། སློབ་མ་ལ་བྱ་ཚུལ་ལོ།
།དང་པོ་བདག་བསྐྱེད་བསྒོམ་པ། མདུན་བསྐྱེད་བསྒྲུབ་པའི་ཆོ་གའི་གོ་རིམ་ཚང་བ་རྒྱུད་སྡེ་ལྔ་གཙོ་བསྡུས་ཀྱི་ཏིང་ངེ་འཛིན་གྱི་དབང་བསྐུར་སྐབས་སུ་བཤད་པ་ལྟར་ཉམས་སུ་བླང་ངོ་།
།གཉིས་པ་སློབ་མ་ལ་བྱ་བ་ནི། ཁྲུས་ཕྱག་ནས་བརྩམས་ཏེ། གཙོ་བོས་བདག་ལ་སྩལ་དུ་གསོལ། ཞེས་ཡེ་ཤེས་དབབ་པའི་གསོལ་འདེབས་ཡན་སྒྱུ་ལུས་ཀྱི་སྐབས་དང་འདྲ།
དེ་ནས་སློབ་དཔོན་དང་མདུན་བསྐྱེད་མཎྜལ་གྱི་དཀྱིལ་འཁོར་དབྱེར་མ་མཆིས་པ་རྒྱུད་སྡེ་ལྔ་ཡི་ལྷ་ཚོགས་སུ་གསལ་བ་དང་བཅས་པ་ལ། མོས་གུས་དུང་བ་བྱས་པའི་རྐྱེན་གྱིས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ལ་ཕོག་པའི་རྐྱེན་གྱིས་ཁྱེད་རང་རྣམས་སྐད་ཅིག་ཙམ་གྱིས་འཁོར་ལོ་བདེ་མཆོག་ཡབ་རྐྱང་གི་རྣམ་པར་གྱུར་པའི་མོས་པ་མཛོད།
ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་ཐམས་ཅད་རྒྱུད་སྡེ་ལྔའི་རྣམ་པར་སྤྱན་དྲངས། ཐམས་ཅད་ཀྱང་བྱང་ཆུབ་སེམས་ཀྱི་རང་བཞིན་དུ་ཞུ་སྟེ། ཁྱེད་རང་རྣམས་ཀྱི་ལུས་ལ་གཉིས་སུ་མེད་པར་ཐིམ་པའི་མོས་པ་མཛོད།
སྤོས་རོལ་དང་བཅས་རྒྱུད་སྡེ་ལྔའི་སྙིང་པོའི་མཐར། བཛྲ་ཨཱ་བེ་ཤ་ཡ་ཨ་ཨཱཿ ཞེས་ཡེ་ཤེས་ཕབ།
གཉིས་པ་དངོས་གཞི་ཞུ་བའི་ཡོན་དུ་མཎྜལ་འབུལ་བར་ཞུ། དེ་ནས་གསོལ་བ་འདེབས་པ་འདིའི་རྗེས་ཟློས་མཛོད།
བྱང་ཆུབ་རྡོ་རྗེས་སངས་རྒྱས་ལ། །སོགས་གསུམ།
དེ་ནས་སྤྱན་དམིགས་འདི་བཞིན་མཛོད།
སློབ་དཔོན་དང་མདུན་བསྐྱེད་མཎྜལ་གྱི་དཀྱིལ་འཁོར་དབྱེར་མ་མཆིས་པ། རྒྱུད་སྡེ་ལྔའི་ལྷ་ཚོགས་སུ་གསལ་འདེབས་དགོས་པས། དེ་ཡང་རྡོ་རྗེ་ས་གཞི། རྭ་བ། དྲྭ་བ། གུར་བླ་བྲེ། ཡེ་ཤེས་མེ་འབར་བའི་སྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་དུ་སྣ་ཚོགས་པདྨ་འདབ་མ་བཞི་པའི་ལྟེ་བར་འཁོར་ལོ་བདེ་མཆོག་ལྷན་སྐྱེས། ཤར་གྱི་འདབ་མ་ལ་གསང་བ་འདུས་པ་ལྷན་སྐྱེས། ལྷོའི་འདབ་མ་ལ་སྒྱུ་མ་ཆེན་མོ་ལྷན་སྐྱེས། ནུབ་ཀྱི་འདབ་མ་ལ་དགྱེས་མཛད་ལྷན་སྐྱེས། བྱང་གི་འདབ་མ་ལ་འཇིགས་བྱེད་ལྷན་སྐྱེས་རྣམས་བཞུགས་པར་གསལ་བཏབ་ནས། དེ་རྣམས་ལ་ཁྱེད་རང་རྣམས་ཀྱིས་ཡིད་ཀྱིས་སྤྲུལ་པའི་མཆོད་པ་དཔག་ཏུ་མེད་པ་ཕུལ། བདག་ལ་བྱིན་གྱིས་བརླབ་ཏུ་གསོལ། བདག་ལ་ཐུགས་རྗེས་བཟུང་དུ་གསོལ་སྙམ་པའི་མོས་གུས་དུང་དུང་བ་སྒོམས་མཛོད།
དེ་ལྟར་བྱས་པས་མདུན་གྱི་བླ་མ་དང་དབྱེར་མ་མཆིས་པའི་རྒྱུད་སྡེ་ལྔའི་དཀྱིལ་འཁོར་ཁྱེད་རང་རྣམས་ཀྱི་སྤྱི་བོར་ཡེར་གྱིས་བྱོན། ཁྱེད་རང་རྣམས་འཁོར་ལོ་སྡོམ་པ་ཡབ་རྐྱང་དུ་གསལ་བའི་ལུས་ལ་རྩ་གསུམ་འཁོར་ལོ་བཞི་དང་བཅས་པ་སྐད་ཅིག་ཙམ་གྱིས་གསལ་བའི་མོས་པ་མཛོད།
སླར་ཡང་སྤྱི་བོའི་རྒྱུད་སྡེ་ལྔ་ལ་མོས་གུས་དུང་བ་བྱས་པས། དེ་རྣམས་འོད་ཟེར་གྱི་རྣམ་པར་ལྟེམ་ལྟེམ་ཞུ་ནས། ཁྱེད་རང་རྣམས་ཀྱི་སྤྱི་བོར་ཐིམ། ལུས་ཐམས་ཅད་འོད་ཟེར་གྱིས་ཁྱབ། སྤྱི་བོའི་བདེ་བ་ཆེན་པོའི་འཁོར་ལོའི་ལྟེ་བར་བླ་མའི་སྐུའི་ངོ་བོ་བདེ་མཆོག་ལྷན་སྐྱེས་དང་ཕྱོགས་ཀྱི་འདབ་མ་བཞི་ལ་མཁའ་འགྲོ་མ། ལཱ་མ། དུམ་སྐྱེས་མ། གཟུགས་ཅན་མ་སྟེ་སྙིང་པོའི་རྣལ་འབྱོར་མ་བཞི་བཞུགས་པར་སྒོམས་མཛོད།
མགྲིན་པར་ལོངས་སྤྱོད་ཀྱི་འཁོར་ལོའི་ལྟེ་བར། བླ་མའི་གསུང་གི་ངོ་བོ་མ་ཧཱ་མཱ་ཡཱ་ལྷན་སྐྱེས་དང་། ཕྱོགས་ཀྱི་འདབ་མ་བཞི་ལ་ཤར་དུ་རྡོ་རྗེ་མཁའ་འགྲོ། ལྷོར་རིན་ཆེན་མཁའ་འགྲོ། ནུབ་ཏུ་པདྨ་མཁའ་འགྲོ། བྱང་དུ་སྣ་ཚོགས་མཁའ་འགྲོ་རྣམས་བཞུགས་པར་སྒོམས་མཛོད།
སྙིང་ཁ་ཆོས་ཀྱི་འཁོར་ལོའི་ལྟེ་བར་བླ་མའི་ཐུགས་ཀྱི་ངོ་བོ་དགྱེས་མཛད་རྡོ་རྗེ་ལྷན་སྐྱེས། ཕྱོགས་མཚམས་ཀྱི་འདབ་མ་བརྒྱད་ལ་ཤར་དུ་གཽ་རཱི། ལྷོར་ཙཽ་རཱི། ནུབ་ཏུ་བཻ་ཏཱ་ལཱི། བྱང་དུ་གྷསྨ་རཱི། བྱང་ཤར་དུ་པུཀྐ་སཱི། ཤར་ལྷོར་རི་ཁྲོད་མ། ལྷོ་ནུབ་ཏུ་གདོལ་པ་མོ། ནུབ་བྱང་དུ་ཌོམ་བི་ནཱི་རྣམས་སྒོམས་མཛོད།
ལྟེ་བ་སྤྲུལ་པའི་འཁོར་ལོའི་ལྟེ་བར་བླ་མའི་ཡོན་ཏན་གསང་བ་འདུས་པ་དང་། ཕྲིན་ལས་རྡོ་རྗེ་འཇིགས་བྱེད་གཉིས་འདུས་སུ་གྱུར་པའི་ངོ་བོ་གསང་བ་འདུས་པ་འཇམ་དཔལ་རྡོ་རྗེ་རྩ་ཞལ་དང་སྐུ་ལུས་གུར་གུམ་གྱི་མདོག་ལྟར་དམར་སེར། གཡས་དཀར་གཡོན་སྔོ་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འོད་ཀྱི་ཡུམ་ལ་འཁྱུད་པ། གཡས་འོག་མ་གཉིས་ཀྱིས་རལ་གྲི་དང་མདའ། གཡོན་འོག་མ་གཉིས་ཀྱིས་པུ་སྟི་དང་གཞུ་འཛིན་པ་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དར་དང་རིན་པོ་ཆེས་བརྒྱན་པ། མཚན་ཉིད་ཐམས་ཅད་ཡོངས་སུ་རྫོགས་པའི་སྐུ་ཅན་དང་། ཕྱོགས་ཀྱི་འདབ་མ་བཞི་ལ་ཤར་དུ་སངས་རྒྱས་སྤྱན་མ་དཀར་མོ། ལྷོར་མ་མཱ་ཀི་སྔོན་མོ། ནུབ་ཏུ་གོས་དཀར་མོ་དམར་མོ། བྱང་དུ་སྒྲོལ་མ་ལྗང་ཁུ་རྣམས་བཞུགས་པར་སྒོམས་མཛོད།
དེ་ནས་དབང་བསྐུར་བ་ལ། མཚོན་བྱེད་དཔེའི་སྒོ་ནས་དང་། མཚོན་བྱ་དོན་གྱི་སྒོ་ནས་དབང་བསྐུར་བའོ།
།དང་པོ་ལ་བཞི་ལས་དང་པོ་བུམ་དབང་གི་དོན་དུ་ཁྱེད་རང་རྣམས་ཀྱི་སྤྱི་བོ་བདེ་བ་ཆེན་པོའི་འཁོར་ལོའི་ནང་གི་བདེ་མཆོག་ལྷ་ལྔ་ལ་མོས་གུས་དྲག་པོ་དུང་བ་བྱས་པས། དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་འཁོར་ལོ་བདེ་མཆོག་ལྷ་ལྔའི་རྣམ་པར་སྤྱན་དྲངས་ཏེ་ཁྱེད་རང་རྣམས་ཀྱི་སྤྱི་བོའི་འཁོར་ལོ་སྡོམ་པ་ལྷ་ལྔའི་སྐུ་ལ་ཐིམ། དེ་རྣམས་ཀྱི་སྐུ་ལས་ཀྱང་འོད་ཟེར་གྱི་ཚོགས་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་སྤྱི་བོའི་རྩ་འདབ་རྣམས་བརྒྱུད་དེ། ལུས་ཀྱི་ནང་ཐམས་ཅད་འོད་ཟེར་གྱིས་ལམ་སྟེ་གང་། བུམ་པའི་དབང་ཐོབ། ལུས་ཀྱི་སྡིག་སྒྲིབ་དག་པའི་མོས་པ་མཛོད།
ཡི་གེ་བདུན་པ་བཟླ་ཞིང་སྤོས་རོལ་བྱ། འོག་ཏུ་མང་ལྷ་རང་རང་གི་སྔགས་བཟླ་ཞིང་བྱིན་འབེབས་ཀྱི་རོལ་མོ་བྱེད་པ་རིགས་འགྲེའོ།
།གཉིས་པ་གསང་བའི་དབང་གི་དོན་དུ་ཁྱེད་རང་རྣམས་ཀྱི་མགྲིན་པ་ལོངས་སྤྱོད་ཀྱི་འཁོར་ལོའི་ནང་གི་མ་ཧཱ་མཱ་ཡཱ་ལྷ་ལྔ་ལ་མོས་གུས་དུང་བ་བྱས་པས། དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་མ་ཧཱ་མཱ་ཡཱ་ལྷ་ལྔའི་སྐུ་ལ་ཐིམ། དེ་རྣམས་ལས་ཀྱང་འོད་ཟེར་གྱི་ཚོགས་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་མགྲིན་པའི་རྩ་འདབ་རྣམས་བརྒྱུད་དེ་ལུས་ཀྱི་ནང་ཐམས་ཅད་འོད་ཟེར་གྱིས་ལམ་སྟེ་གང་། གསང་བའི་དབང་ཐོབ། ངག་གི་སྡིག་སྒྲིབ་དག་པའི་མོས་པ་མཛོད།
སྤོས་རོལ་སྔགས་བཟླ་བ་འགྲེའོ།
།གསུམ་པ་ཤེས་རབ་ཡེ་ཤེས་ཀྱི་དབང་གི་དོན་དུ་ཁྱེད་རང་རྣམས་ཀྱི་སྙིང་ཁ་ཆོས་ཀྱི་འཁོར་ལོའི་ནང་གི་དེས་མཛད་རྡོ་རྗེ་ལྷ་དགུ་ལ་མོས་གུས་དྲག་པོ་དུང་བ་བྱས་པས། དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་དགྱེས་མཛད་རྡོ་རྗེ་ལྷ་དགུའི་རྣམ་པར་སྤྱན་དྲངས་ཏེ་ཁྱེད་རང་རྣམས་ཀྱི་སྙིང་ཁའི་དགྱེས་མཛད་རྡོ་རྗེ་ལྷ་དགུ་ལ་ཐིམ། དེ་རྣམས་ལས་ཀྱང་འོད་ཟེར་གྱི་ཚོགས་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་སྙིང་ཁའི་རྩ་འདབ་རྣམས་བརྒྱུད་དེ་ལུས་ཀྱི་ནང་ཐམས་ཅད་འོད་ཟེར་གྱིས་ལམ་སྟེ་གང་། ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་སྡིག་སྒྲིབ་དག་པའི་མོས་པ་མཛོད།
སྤོས་རོལ་བྱ་བ་གོང་བཞིན།
བཞི་པ་ཚིག་དབང་གི་དོན་དུ་ཁྱེད་རང་རྣམས་ཀྱི་ལྟེ་བ་སྤྲུལ་པའི་འཁོར་ལོའི་ནང་གི་གསང་བ་འདུས་པ་ལྷ་ལྔ་ལ་མོས་གུས་དྲག་པོ་དུང་བ་བྱས་པས། དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་གསང་བ་འདུས་པ་འཇམ་དཔལ་རྡོ་རྗེ་ལྷ་ལྔའི་རྣམ་པར་སྤྱན་དྲངས་ཏེ་ཁྱེད་རང་རྣམས་ཀྱི་ལྟེ་བའི་འཇམ་དཔལ་རྡོ་རྗེ་ལྷ་ལྔ་ལ་ཐིམ། དེ་རྣམས་ལས་ཀྱང་འོད་ཟེར་གྱི་ཚོགས་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་ལྟེ་བའི་རྩ་འདབ་རྣམས་བརྒྱུད་དེ་ལུས་ཀྱི་ནང་ཐམས་ཅད་འོད་ཟེར་གྱིས་ལམ་སྟེ་གང་། དབང་བཞི་པ་ཐོབ། ལུས་ངག་ཡིད་གསུམ་གྱི་སྡིག་སྒྲིབ་དག་པའི་མོས་པ་མཛོད། ཨོཾ་ཨཱཿབཛྲ་ཌྷྲྀཀ་ཧཱུྃ་ཕཊ་སྭཱ་ཧཱ། ཞེས་པ་བཟླ་ཞིང་སྤོས་རོལ་བྱའོ།
།གཉིས་པ་མཚོན་བྱ་དོན་གྱི་དབང་བསྐུར་བའི་སླད་དུ་མོས་པ་འདི་བཞིན་མཛོད། ཁྱེད་རང་རྣམས་ཀྱི་སྤྱི་བོའི་འཁོར་ལོ་སྡོམ་པ་ལྷ་ལྔ་ལ་མོས་གུས་དུང་བ་བྱས་པས་དེ་འོད་དུ་ལྡེམ་གྱིས་ཞུ་སྟེ་མགྲིན་པའི་མ་ཧཱ་མཱ་ཡཱ་ལ་ཐིམ་པས་དགའ་བའི་ཡེ་ཤེས་སྐྱེས་ཏེ་བུམ་པའི་དབང་ཐོབ།
ཡང་མགྲིན་པའི་སྒྱུ་མ་ཆེན་མོ་ལྷ་ལྔ་ལ་མོས་གུས་དུང་བ་བྱས་པས་དེའི་འོད་དུ་ལྡེམ་གྱིས་ཞུ་སྟེ་སྙིང་གའི་དགྱེས་མཛད་རྡོ་རྗེ་ལྷ་དགུ་ལ་ཐིམ་པས་མཆོག་དགའི་ཡེ་ཤེས་སྐྱེས་ཏེ་གསང་དབང་ཐོབ།
ཡང་སྙིང་གའི་དགྱེས་མཛད་རྡོ་རྗེ་ལྷ་དགུ་ལ་མོས་གུས་དུང་བ་བྱས་པས་དེ་འོད་དུ་ལྡེམ་གྱིས་ཞུ་སྟེ་ལྟེ་བའི་འཇམ་དཔལ་རྡོ་རྗེ་ལྷ་ལྔ་ལ་ཐིམ་པས་ཁྱད་དགའི་ཡེ་ཤེས་སྐྱེས་ཏེ་ཤེར་དབང་ཐོབ།
ཡང་ལྟེ་བའི་འཇམ་དཔལ་རྡོ་རྗེ་ལྷ་ལྔ་ལ་མོས་གུས་དུང་བ་བྱས་པས་དེ་འོད་དུ་ལྡེམ་གྱིས་ཞུ་སྟེ་སྟོང་པ་ཉིད་ཀྱི་ངང་དུ་ཐིམ་པས་ལྷན་ཅིག་སྐྱེས་དགའི་ཡེ་ཤེས་སྐྱེས་ཏེ་དབང་བཞི་པ་ཐོབ།
བདེ་སྟོང་ཟུང་དུ་འཇུག་པ་ཕྱག་རྒྱ་ཆེན་པོའི་ངང་དུ་མཉམ་པར་ཞོག་མཛོད།
དེ་ནས་ཁྱེད་རང་རྣམས་ཀྱི་སྨིན་མཚམས་ཀྱི་ཐད་ཀྱི་མདུན་གྱི་ནམ་མཁའ་ལ་འོད་ཀྱི་གའུ་ཁ་སྦྱོར་ནང་དུ་རྒྱུད་སྡེ་ལྔའི་སྙིང་པོ་ཡི་གེ་ཨོཾ་ཨཱཿཧཱུྃ་སྭཱ་ཧཱ། ཞེས་པའི་འབྲུ་ལྔ་འོད་ཟེར་ཁ་དོག་ལྔ་འཕྲོ་བ་དེ་ལ་སེམས་གཏད་ནས། སྣང་བ་འདི་ཐམས་ཅད་རྨི་ལམ་གྱི་སྣང་བ་ཡིན་སྙམ་པའི་འདུན་པ་ཅུང་ཟད་སྦྱོང་བ་ཞུ།
དེ་རྣམས་ཀྱིས་རྨི་ལམ་གྱི་སྒོས་བཀའ་ཕུལ་གྲུབ་ཟིན། དེའི་དུས་སུ་ཐོབ་པའི་དམ་ཚིག་བསྲུང་ངོ་སྙམ་དུ་འདིའི་རྗེས་ཟློས་མཛོད།
གཙོ་བོས་སོགས་མན་ཆད་དང་། རྗེས་ཆོག་བྱེད་པ་དཀྱུས་ལྟར་རོ།
།ཨ་འཐས་བློ་ཡིས་བཅིངས་པ་ལས། །ཉིང་འཁྲུལ་རྨི་ལམ་གསལ་བས་ན། །གདམས་ངག་འདི་རུ་བསྟན་པ་བཞིན། །ཉམས་མྱོང་སྐྱོང་རྣམས་ཡ་མཚན་ཆེ། །རྨི་ལམ་གྱི་སྒོས་བཀའ་བརྗོད་ཟིན་ཏོ།།

Initiation of Clear Light yoga

༼༄༅། །འོད་གསལ་གྱི་སྒོས་བཀའ།།༽
སྒྱུ་མ་ཆེན་མོ་ཞེས་བྱ་བའི། །མཁའ་འགྲོའི་དབང་ཕྱུག་ལ་བཏུད་ནས། །བྱིན་རླབས་གཞུང་ཤིང་བཀའ་དྲུག་ལས། །འོད་གསལ་སྒོས་བཀའ་བཤད་པར་བྱ།
།འདིར་འོད་གསལ་གྱི་བཀའ་བྱ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་རྗེས་སུ་བཟུང་ཚུལ་ལོ།
།དང་པོ་མཎྜལ་འདབ་མ་བརྒྱད་པའི་ལྟེ་བར་ཚོམ་བུ་སྔོན་པོ། ཤར་དུ་སྔོན་པོ། ལྷོར་སེར་པོ། ནུབ་ཏུ་དམར་པོ། བྱང་དུ་ལྗང་གུ་རྣམས་བཀོད། མཆོད་གཏོར་སོགས་གོང་དང་འདྲ་བ་བཤམས། བདག་བསྐྱེད་ལྷ་ལྔའི་སྐབས་བཞིན་དང་། མདུན་བསྐྱེད།
ཨ་མྲྀ་ཏས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་སྲུང་འཁོར་དུར་ཁྲོད་དང་བཅས་པའི་དབུས་སུ་འབྱུང་བཞི་རི་རབ་སྣ་ཚོགས་པདྨའི་ལྟེ་བ་ལ་རྩ་བའི་བླ་མ་རྡོ་རྗེ་འཆང་སྐུ་མདོག་སྔོན་པོ་ཡིད་ཙམ་ཁྲོ་བ། རྡོ་རྗེ་དང་དྲིལ་བུ་འཛིན་པ་ཡུམ་སངས་རྒྱས་མཁའ་འགྲོ་མ་ལ་འཁྱུད་པས་རྡོ་རྗེ་སྐྱིལ་ཀྲུང་གིས་པད་ཉི་ལ་བཞུགས་ཤིང་། དར་དང་རིན་པོ་ཆེས་བརྒྱན་པའོ། །འདབ་མ་བཞི་ལ་ཤར་དུ་རྡོ་རྗེ་མཁའ་འགྲོ་མ་ནག་མོ། ལྷོར་རིན་ཆེན་མཁའ་འགྲོ་མ་སེར་མོ། ནུབ་ཏུ་པདྨ་མཁའ་འགྲོ་མ་དམར་མོ། བྱང་དུ་ལས་ཀྱི་མཁའ་འགྲོ་མ་ལྗང་ཁུ་རྣམས་གྲི་གུག་དང་ཐོད་པ་ཁ་ཊྭཱཾ་ག་འཛིན་པ་གཡས་བརྐྱང་གི་སྟབས་ཀྱིས་བཞུགས་པའོ། །རང་གི་སྙིང་ག་ནས་འོད་ཟེར་འཕྲོས། སངས་རྒྱས་དང་བྱང་ཆུབ་སེམས་དཔའི་ཚོགས་ཐམས་ཅད་བཛྲ་ས་མཱ་ཛཿ ན་མོ་བུ་དྡྷའི་མཐར། ཛཿཧཱུྃ་བྃ་ཧོཿ གཉིས་སུ་མེད་པར་ཐིམ།
ལྷ་ཐམས་ཅད་ཀྱི་དཔྲལ་བར་ཨོཾ་ནས། །ཆུའི་ལྷག་མ་ཡར་ལུད་པའི་བར་རྒྱུད་སྡེ་ལྔའི་སྐབས་བཞིན་ལ། རིགས་ལྔ་སོ་སོས་དབུ་བརྒྱན་པར་གྱུར། མཆོད་བསྟོད་ལྷ་ལྔའི་སྐབས་བཞིན་བྱ་བའོ།
།གཉིས་པ་སློབ་མ་ལ་བྱ་བ་ནི། ཁྲུས་ཕྱག་ནས་བརྩམས་ཏེ། གཙོ་བོས་བདག་ལ་སྩལ་དུ་གསོལ། །ཞེས་གསོལ་བ་འདེབས་པའི་བར་རྨི་ལམ་གྱི་སྐབས་དང་འདྲའོ།
།དེ་ནས་སློབ་དཔོན་ཧེ་རུ་ཀ་རྡོ་རྗེ་འཆང་གི་རྣམ་པ་ཅན་དུ་གསལ་བའི་མཐའ་སྐོར་དུ་རྒྱུད་པའི་བླ་མ་དཔའ་བོ་དང་མཁའ་འགྲོའི་ཚོགས་ཀྱིས་བསྐོར་ནས་བཞུགས་པ་ལ། མོས་གུས་དུང་བ་བྱས་པའི་རྐྱེན་གྱིས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ལ་ཕོག་པའི་རྐྱེན་གྱིས་ཁྱེད་རང་རྣམས་སྐད་ཅིག་ཙམ་གྱིས་འཁོར་ལོ་བདེ་མཆོག་ཡབ་རྐྱང་གི་རྣམ་པར་གྱུར་པའི་མོས་པ་མཛོད།
ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མཁའ་དབྱིངས་གང་བའི་སངས་རྒྱས་དང་བྱང་ཆུབ་སེམས་དཔའ། དཔའ་བོ་དང་མཁའ་འགྲོའི་ཚོགས་ཐམས་ཅད་སྤྱན་དྲངས། དེ་རྣམས་ཀྱང་བདུད་རྩི་བདེ་བ་ཆེན་པོའི་རྣམ་པར་ཞུ་སྟེ། ཁྱེད་རང་རྣམས་ཀྱི་ལུས་ལ་གཉིས་སུ་མེད་པར་ཐིམ་པའི་མོས་པ་མཛོད།
ན་མོ་བུདྡྷཱཡའི་སྔགས་དང་ཡི་གེ་བདུན་པའི་མཐར། བཛྲ་ཨཱ་ཝེ་ཤ་ཡ་ཨ་ཨཱཿ ཞེས་སྤོས་རོལ་དང་བཅས་ཡེ་ཤེས་ཕབ།
གཉིས་པ་དངོས་གཞིའི་སླད་དུ་མཎྜལ་ཕུལ་ནས་ འདིའི་རྗེས་ཟློས་མཛོད།
བྱང་ཆུབ་རྡོ་རྗེས་སོགས།
།སྤྱན་དམིགས་འདི་བཞིན་མཛོད།
ཁྱེད་རང་རྣམས་འཁོར་ལོ་བདེ་མཆོག་ཡབ་རྐྱང་དུ་གསལ་བའི་སྤྱི་བོར་རྡོ་རྗེའི་ས་གཞི། རྭ་བ། དྲྭ་བ། གུར་བླ་བྲེ། ཡེ་ཤེས་ཀྱི་མེ་འབར་བ་དང་བཅས་པའི་སྲུང་བའི་འཁོར་ལོའི་ནང་དུ་སླར་ཡང་སྣ་ཚོགས་པདྨ་དང་ཟླ་བའི་གདན་ལ་རྩ་བའི་བླ་མ་རྡོ་རྗེ་འཆང་ཧེ་རུ་ཀ་སྐུ་མདོག་སྔོན་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། རལ་པའི་ཐོར་ཚུགས་དང་སྣ་ཚོགས་རྡོ་རྗེ་དང་ཟླ་བ་ཕྱེད་པས་བརྒྱན་པ། ཐོད་སྐམ་གྱི་དབུ་རྒྱན་དང་། ཐོད་རློན་གྱི་དོ་ཤལ་ཅན། རྡོ་རྗེའི་སྐྱིལ་ཀྲུང་གིས་བཞུགས་ཤིང་སྟག་ལྤགས་ཀྱི་ཤམ་ཐབས་གསོལ་བ། ཡུམ་སངས་རྒྱས་མཁའ་འགྲོ་མ་གྲི་གུག་དང་ཐོད་མ་འཛིན་པ་དང་མཉམ་པར་སྦྱོར་བ།
འདབ་མ་བཞི་ལ་ཤར་དུ་རྡོ་རྗེ་མཁའ་འགྲོ་མ། ལྷོར་རིན་ཆེན་མཁའ་འགྲོ་མ། ནུབ་ཏུ་པདྨ་མཁའ་འགྲོ་མ། བྱང་དུ་སྣ་ཚོགས་མཁའ་འགྲོ་མ་རྣམས་ཀྱིས་གྲི་གུག་དང་ཐོད་པ་ཁ་ཊྭཱཾ་ག་འཛིན་པ། མཚམས་ཀྱི་འདབ་མ་བཞི་ལ་བུམ་པ་བདུད་རྩིས་གང་བ།
དེ་རྣམས་ཀྱི་སྟེང་གི་ནམ་མཁའ་ལ་བརྒྱུད་པའི་བླ་མ་རྣམས་དང་། མཐའ་སྐོར་དུ་སངས་རྒྱས་བྱང་སེམས་དཔའ་བོ་མཁའ་འགྲོ། མྱུར་མཛད་ཡེ་ཤེས་ཀྱི་མགོན་པོ་དང་བཅས་པ་གསལ་བཏབ་སྟེ།
དེ་རྣམས་ལ་མོས་གུས་དུང་བ་བྱས་པས་ཐུགས་ཀ་ནས་འོད་ཟེར་གྱི་ཚོགས་དཔག་ཏུ་མེད་པ་འཕྲོས། མཁའ་དབྱིངས་གང་བའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཐམས་ཅད་སྤྱན་དྲངས་ཏེ།
ཁྱེད་རང་རྣམས་ཀྱི་སྤྱི་བོའི་སྟེང་ན་བཞུགས་པའི་བླ་མ་ཧེ་རུ་ཀ་ལྷ་ལྔའི་ཐད་ཀྱི་སྟེང་གི་ནམ་མཁའ་ལ་བཞུགས་པར་གྱུར་པའི་མོས་པ་མཛོད།
དེ་ནས་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་རྣམས་དང་། ཁྱད་པར་དུ་རྒྱལ་སྲིད་སྣ་བདུན་དང་། རིན་པོ་ཆེའི་རིགས་ཀྱི་བྱེ་བྲག་དཔག་ཏུ་མེད་པ་སྤྲུལ་ཏེ་འཇིག་རྟེན་གྱི་ཁམས་ཐམས་ཅད་ཕྱུར་བུར་གང་བས་སྤྱི་བོའི་བླ་མ་ཧེ་རུ་ཀའི་ལྷ་ཚོགས་རྣམས་དང་། དེའི་ཡང་སྟེང་གི་ནམ་མཁའ་ལ་བཞུགས་པའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའི་ཚོགས་རྣམས་ལ་ཕུལ་བས་མཆོད་པས་མཉེས་པར་བསམ་ཞིང་བདག་ལ་ཡང་དག་པར་འོད་གསལ་གྱི་དབང་བསྐུར་དུ་གསོལ། ཁྱད་པར་དུ་ཡང་བུམ་པའི་དབང་བསྐུར་བ་སྩལ་དུ་གསོལ།
ཞེས་ཡིད་ཀྱིས་གསོལ་བ་དུང་དུང་བཏབ་པས་སྤྱི་བོའི་བླ་མའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས། དེའི་སྟེང་གི་ནམ་མཁའ་ལ་བཞུགས་པའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་རྣམས་ལ་ཕོག་པས་ཐུགས་བརྒྱུད་རང་དབང་མེད་པར་བསྐུལ་ཏེ།
དེ་རྣམས་ཀྱི་དཔྲལ་བ་ནས་སྐུའི་བྱིན་རླབས་ཀྱི་ངོ་བོ་འོད་ཟེར་དཀར་པོའི་རྣམ་པ་དཔག་ཏུ་མེད་པ་བྱུང་། སྤྱི་བོའི་སྟེང་གི་བླ་མའི་དཔྲལ་བའི་ཨོཾ་ལ་ཐིམ། དེ་ལས་ཀྱང་འོད་ཟེར་དཀར་པོའི་བྱང་ཆུབ་ཀྱི་སེམས་དང་རོ་གཅིག་ཏུ་འདྲེས་པ་དཔག་ཏུ་མེད་པ་བྱུང་། ཁྱེད་རང་རྣམས་ཀྱིས་དཔྲལ་བར་ཞུགས་ཏེ། ལུས་ཀྱི་ནང་ཐམས་ཅད་གང་བས་ལུས་ཀྱི་སྡིག་སྒྲིབ་ཐམས་ཅད་དག །བུམ་པའི་དབང་ཐོབ། སྐུའི་དངོས་གྲུབ་བསྩལ་བྱུང་སྙམ་པའི་མོས་པ་མཛོད།
ཡང་ཕྱི་ནང་གསང་བ་དེ་ཁོ་ན་ཉིད་ཀྱི་ནས་ ཁྱད་པར་དུ་ཡང་གསང་བའི་དབང་བསྐུར་བ་སྩལ་དུ་གསོལ། ཞེས་དང་།
དེ་རྣམས་ཀྱི་མགྲིན་པ་ནས་གསུང་གི་བྱིན་རླབས་ཀྱི་ངོ་བོ་འོད་ཟེར་དམར་པོའི་རྣམ་པ་དཔག་ཏུ་མེད་པ་བྱུང་། སྤྱི་བོའི་སྟེང་གི་བླ་མའི་མགྲིན་པའི་ཨཱཿལ་ཐིམ། དེ་ལས་ཀྱང་འོད་ཟེར་དམར་པོའི་བྱང་ཆུབ་སེམས་དང་རོ་གཅིག་ཏུ་འདྲེས་པ་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་མགྲིན་པ་ནས་ཞུགས་ཏེ། མགྲིན་པའི་ནང་ཐམས་ཅད་གང་བས་ངག་གི་སྡིག་སྒྲིབ་ཐམས་ཅད་དག །གསང་བའི་དབང་ཐོབ། གསུང་གི་དངོས་གྲུབ་སྩལ་བྱུང་སྙམ་དུ་མོས་པ་མཛོད།
དེ་བཞིན་དུ་རིགས་འགྲེ་ཤེས་པར་བྱས་ཏེ།
ཁྱད་པར་དུ་ཡང་ཤེས་རབ་ཡེ་ཤེས་ཀྱི་དབང་སྐུར་བ་སྩལ་དུ་གསོལ། ཞེས་དང་།
དེ་རྣམས་ཀྱི་ཐུགས་ཀ་ནས་ཐུགས་ཀྱི་བྱིན་རླབས་ཀྱི་ངོ་བོ་འོད་ཟེར་སྔོན་པོའི་རྣམ་པ་དང་། བླ་མའི་ཐུགས་ཀའི་ཧཱུྃ་ལ་ཐིམ། དེ་ལས་ཀྱང་འོད་ཟེར་སྔོན་པོ་ཞེས་པ་དང་། སྙིང་ག་ནས་ཞུགས་ཏེ། སྙིང་གའི་ནང་ཐམས་ཅད་གང་བས་ཡིད་ཀྱི་སྡིག་སྒྲིབ་དག །ཤེས་རབ་ཡེ་ཤེས་ཀྱི་དབང་ཐོབ། ཐུགས་ཀྱི་དངོས་གྲུབ་ཐོབ་བྱུང་སྙམ་དུ་མོས་པ་མཛོད།
ཡང་ཕྱི་ནང་གསང་བ་ནས་ དབང་བཞི་པ་སྩལ་དུ་གསོལ།
ཞེས་ཡིད་ཀྱིས་གསོལ་བ་དུང་དུང་བཏབ་པས་སྤྱི་བོའི༴ ཐུགས་རྒྱུད་རང་དབང་མེད་པར་བསྐུལ་ཏེ་སྟེང་གི་ནམ་མཁའ་ལ་བཞུགས་པའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོའི་ཚོགས་ཐམས་ཅད་འོད་དུ་ཞུ་སྟེ་སྤྱི་བོའི་བླ་མ་འཁོར་དང་བཅས་པ་ལ་ཐིམ། འཁོར་རྣམས་ཀྱང་རིམ་པ་བཞིན་དུ་བླ་མ་རྡོ་རྗེ་འཆང་ཡབ་ཡུམ་ལ་ཐིམ། དེ་ཉིད་ཀྱང་བྱང་ཆུབ་ཀྱི་སེམས་སུ་ཞུ་སྟེ་སློབ་མའི་ལུས་ལ་ཐིམ་པས་རང་ལུས་དང་སྣང་བ་ཐམས་ཅད་འོད་གསལ་དུ་ཡལ་ནས་སེམས་མ་བཅོས་པ་ལ་ཅུང་ཟད་མཉམ་པར་ཞོག་མཛོད།
དེས་ལུས་ངག་ཡིད་གསུམ་གྱི་སྡིག་སྒྲིབ་བག་ཆགས་དང་བཅས་པ་དག །དབང་བཞི་པ་ཐོབ། སྐུ་གསུང་ཐུགས་ཀྱི་དངོས་གྲུབ་སྩལ་བྱུང་སྙམ་དུ་མོས་པ་མཛོད། དེ་དག་གིས་འོད་གསལ་གྱི་སྒོས་བཀའ་གྲུབ་ཟིན་པ་ཡིན།
དབང་དུས་སུ་ཐོབ་པའི་དམ་ཚིག་རྣམས་བསྲུང་ངོ་སྙམ་པས་འདིའི་རྗེས་ཟློས་མཛོད།
གཙོ་བོས་ཡན་ཆད་དང་། རྗེས་ཀྱི་ཆོ་ག་དཀྱུས་ལྟར་རོ།
།རྒྱ་འབྱམས་བློ་ཡི་འཁྲུལ་རྟོག་ཀུན། །འོད་གསལ་ཀློང་དུ་ཐིམ་ཆེད་དུ། །འདི་རུ་བསྟན་པའི་གདམས་ངག་ལ། །ཡིད་ཆེས་སྐྱོངས་ཤིག་ཤེས་ལྡན་རྣམས། །འོད་གསལ་གྱི་སྒོས་བཀའ་བཤད་ཟིན་ཏོ།། །།

Initiation of powa yoga

༼༄༅། །འཕོ་ཐབས་གྱི་སྒོས་བཀའ།།༽
དཔལ་ལྡན་རྡོ་རྗེ་རྣལ་འབྱོར་མ། །མཁའ་འགྲོ་དབང་མོ་ལ་བཏུད་དེ། །ཡེ་ཤེས་ཆོས་སྐུའི་ཞིང་ཁམས་སུ། །འཕོ་ཐབས་སྒོས་བཀའ་བཤད་པར་བྱ།
།འདིར་འཕོ་བའི་བཀའ་བྱ་བ་ལ་སློབ་དཔོན་གྱི་ལས་དང་སློབ་མ་ལ་བྱ་བའི་རིམ་པའོ།
།དང་པོ་ལ་མཎྜལ་གྱི་ཚོམ་བུ་ལྔ་དམར་པོ་བཀོད། མཆོད་གཏོར་སོགས་སྔར་དང་འདྲ་བ་བཤམ། བདག་བསྐྱེད་བདེ་མཆོག་ལྷ་ལྔའམ། རྣལ་འབྱོར་མ་སྒོམ་ཡང་ཤིན་ཏུ་རུང་།
མདུན་བསྐྱེད་སུམྦྷ་ནིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་སྲུང་འཁོར་གྱི་ནང་དུ་ཆོས་འབྱུང་གྲུ་གསུམ་ཉིས་བརྩེགས་ཕྱི་དཀར་ལ་ནང་དམར་བའི་ནང་དུ་སྣ་ཚོགས་པདྨ་འདབ་མ་བཞི་པའི་ལྟེ་བར་མི་རོ་དཀར་པོའི་མགོ་བོ་གཡོན་དུ་བསྟན་པའི་སྟེང་དུ་རྡོ་རྗེ་རྣལ་འབྱོར་མ་དམར་མོ། ཤར་གྱི་འདབ་མ་ལ་མཁའ་འགྲོ་མ་མཐིང་ཁ། བྱང་གི་འདབ་མ་ལ་ལཱ་མ་ལྗང་གུ། ནུབ་ཀྱི་འདབ་མ་ལ་དུམ་སྐྱེས་མ་དམར་མོ། ལྷོའི་འདབ་མ་ལ་གཟུགས་ཅན་མ་སེར་མོ། ཐམས་ཅད་ཀྱང་གཅེར་མོ་སྐྲ་གྲོལ་བ་ཕྱག་གཡས་རྡོ་རྗེ་གྲི་གུག་དང་བཅས་པའི་སྡིགས་མཛུབ་ཐུར་དུ་སྡིག་པ། གཡོན་ཐོད་པ་ཁྲག་གིས་གང་བ་འཛིན་པ། མི་མགོ་སྐམ་པོ་ལྔའི་དབུ་རྒྱན་དང་། རློན་པ་ལྔ་བཅུའི་དོ་ཤལ་ཅན། ཞབས་གཉིས་བསྒྲད་པའི་སྟབས་ཀྱིས་མེ་དཔུང་འབར་བའི་དབུས་ན་བཞུགས་པའོ། །རང་གི་སྙིང་གའི་ཧཱུྃ་ལས་འོད་ཟེར་འཕྲོས། རྡོ་རྗེ་རྣལ་འབྱོར་མ་ལྷ་ལྔའི་དཀྱིལ་འཁོར་ཕཻཾ། བཛྲ་ས་མཱ་ཛཿ
ཨོཾ་ཨརྒྷཾ་ནས། ཤབྡ་ཨཱཿཧཱུྃ།
ཛཿཧཱུྃ་བྃ་ཧོཿ མདུན་བསྐྱེད་ལ་གཉིས་སུ་མེད་པར་ཐིམ།
དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ།
ཡང་སྙིང་ཁའི་ཧཱུྃ་ལས་འོད་ཟེར་འཕྲོས། དབང་གི་ལྷ་སངས་རྒྱས་དང་བྱང་ཆུབ་སེམས་དཔའ་ཁྲོ་བོ་དབང་པོ་རྣམས་བཙུན་མོར་བཅས་པ་ཐམས་ཅད་སྤྱན་དྲངས། ཕྱི་ནང་གསང་བའི་མཆོད་པ་ཐམས་ཅད་ཀྱིས་མཆོད་པར་གྱུར།
ཨོཾ་སརྦ་ཏ་ཐཱ་ནས་ ཆུའི་ལྷག་མ་ཡར་ལུད་པ་ལས། གཙོ་མོ་ལ་རྣམ་སྣང་། མཁའ་འགྲོ་མ་ལ་མི་བསྐྱོད་པ། ལཱ་མ་ལ་དོན་གྲུབ། དུམ་སྐྱེས་ལ་འོད་དཔག་མེད། གཟུགས་ཅན་མ་ལ་རིན་ཆེན་འབྱུང་ལྡན་གྱིས་དབུ་བརྒྱན།
ཕྱི་མཆོད་ནང་མཆོད་རྣམས་བདེ་མཆོག་ལྷ་ལྔའི་སྐབས་བཞིན་དང་དཔལ་ལྡན་རྡོ་རྗེ་མཁའ་འགྲོ་མ་སོགས་ཀྱི་བསྟོད་པ་དང་། ཨོཾ་གསུམ་མ་ཅི་འགྲུབ་བཟླ་བ། གཏོར་མ་འབུལ་བ་སོགས་འདོན་པ་བསྒྱུར་བ་ཕྲན་བུ་མ་གཏོགས་ལྷ་ལྔའི་སྐབས་བཞིན་ཉམས་སུ་བླང་ངོ་།
།གཉིས་པ་སློབ་མ་རྣམས་ཁྲུས་ཕྱག་སྔོན་འགྲོས་གྲལ་དུ་འཁོད་པ་ལ་མེ་ཏོག་བཀྱེ་བསྡུ་སོགས་བྱ།
སློབ་དཔོན་གྱིས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སོགས་སྔོན་འགྲོའི་ཆོས་བཤད་བསྡུས་པ་ནས་བཟུང་། ཡེ་ཤེས་དབབ་པའི་གསོལ་འདེབས། གཙོ་བོས་བདག་ལ་སྩལ་དུ་གསོལ། །ཞེས་པ་ཡན་ཆད་གཏུམ་མོའི་སྐབས་བཞིན་དུ་ཤེས་པར་བྱ་བ་སྔར་བཞིན་ནོ།
།དེ་ནས་ཡེ་ཤེས་འབེབས་པའི་དོན་དུ་དམིགས་པ་འདི་བཞིན་མཛོད།
སློབ་དཔོན་དང་མདུན་བསྐྱེད་དབྱེར་མ་མཆིས་པ་རྗེ་བཙུན་རྣལ་འབྱོར་མ་ལྷ་ལྔའི་དཀྱིལ་འཁོར་དུ་གསལ་བ་ལ་ཁྱེད་རང་རྣམས་ཀྱིས་མོས་གུས་དུང་བ་བྱས་པས། མདུན་བསྐྱེད་རྣལ་འབྱོར་མའི་ཐུགས་ཀ་ནས་འོད་ཟེར་འཕྲོས། མཁའ་དབྱིངས་གང་བའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྡོ་རྗེ་རྣལ་འབྱོར་མ་ལྷ་ལྔའི་རྣམ་པར་སྤྱན་དྲངས། ཁྱེད་རང་རྣམས་ཀྱི་སྟེང་གི་ནམ་མཁའ་ལ་རྗེས་ཆགས་ཀྱི་མེས་བྱང་ཆུབ་ཀྱི་སེམས་སུ་ཞུ་སྟེ། ཁྱེད་རང་རྣམས་ཀྱི་སྤྱི་བོ་ནས་ཞུགས་པས་ལུས་སེམས་ཐམས་ཅད་བདེ་བས་ཁྱབ་པ་ལ་སེམས་རྩེ་གཅིག་ཏུ་གཏད་ནས་མཉམ་པར་ཞོག་མཛོད།
ཨོཾ་གསུམ་མའི་མཐར། བཛྲ་ཨ་བེ་ཤ་ཨ་ཨཱཿ ཞེས་གང་མང་བརྗོད་ཅིང་སྤོས་རོལ་བྱའོ།
།གཉིས་པ་དངོས་གཞིའི་སླད་དུ་མཎྜལ་ཕུལ་ཏེ་འདིའི་རྗེས་ཟློས་མཛོད།
བྱང་ཆུབ་རྡོ་རྗེས་སོགས་གསུམ།
དེ་ནས་སྤྱན་དམིགས་འདི་བཞིན་མཛོད།
ཁྱེད་རང་རྣམས་ཀྱི་སྤྱི་བོའི་ཐད་ཀྱི་ནམ་མཁའ་ལ་སྲུང་འཁོར་གྱི་ནང་དུ་ཆོས་འབྱུང་གྲུ་གསུམ་ཉིས་བརྩེགས་ཕྱི་དཀར་ལ་ནང་དམར་བ་བདེ་བར་རྒྱུ་ཞིང་བདེ་བར་འཆར་བའི་འོད་ཀྱི་རང་བཞིན་ཅན་དེའི་ནང་དུ་སྣ་ཚོགས་པདྨ་འདབ་མ་བཞི་པའི་ལྟེ་བར་མི་རོ་དཀར་པོ་མགོ་བོ་གཡོན་དུ་བསྟན་པའི་སྟེང་དུ་བླ་མ་དང་དབྱེར་མ་མཆིས་པའི་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཕྱག་གཡས་རྡོ་རྗེ་དང་བཅས་པའི་སྡིག་མཛུབ་ཐུར་དུ་བརྐྱང་བ། གཡོན་ཐོད་པ་ཁྲག་གིས་གང་བ་འཛིན་པ། མི་མགོ་སྐམ་པོ་ལྔའི་དབུ་རྒྱན་དང་རློན་པ་ལྔ་བཅུའི་དོ་ཤལ་ཅན། ཞབས་གཉིས་བསྒྲད་པའི་སྟབས་ཀྱིས་མེ་དཔུང་འབར་བའི་དབུས་ན་བཞུགས་པ། འདབ་མ་བཞི་ལ་ཤར་དུ་མཁའ་འགྲོ་མ་མཐིང་ག །བྱང་དུ་ལཱ་མ་ལྗང་གུ། ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་མོ་རྣམས་ཀྱི་རྒྱན་ཆ་ལུགས་གཙོ་བོ་དང་མཚུངས་པ། ཆོས་འབྱུང་གི་ཟུར་དྲུག་ལ། ཨོཾ་བཾ། ཧཾ་ཡོཾ། ཧྲིཾ་མོཾ། ཧྲིཾ་ཧྲིཾ། ཧཱུྃ་ཧཱུྃ། ཕཊ་ཕཊ། ཞེས་པའི་སྔགས་རྣམས་གོ་ཆའི་དཔའ་མོ་དྲུག་གི་ངོ་བོར་ཡོད་པ་དང་གཡུང་དྲུང་འཁྱིལ་པ་དྲུག་དང་བཅས་པ་གསལ་བར་སྒོམས་མཛོད།
དེ་ནས་ཕྱི་ནང་གསང་བ་དེ་ཁོ་ན་ཉིད་དང་བཅས་པའི་མཆོད་པ་བསམ་གྱིས་མི་ཁྱབ་པ་བློས་སྤྲུལ་ཏེ་ཕུལ་ལ། བདག་ལ་བུམ་པའི་དབང་བསྐུར་དུ་གསོལ། སྙམ་པའི་ཡིད་ཀྱིས་གསོལ་བ་བཏབ་པའི་རྐྱེན་གྱིས་དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས། བླ་མ་དང་དཀྱིལ་འཁོར་གྱི་གཙོ་མོ་དབྱེར་མ་མཆིས་པའི་སྐུ་ལ་ཐིམ་པས་ཐུགས་ཀར་བྱང་ཆུབ་སེམས་སུ་ཞུ་བའི་དྭངས་མ་དཀར་ལ་དམར་བའི་མདངས་ཆགས་པ་གསང་གནས་བྷ་གའི་དཀྱིལ་འཁོར་ནས་ཐོན། ཁྱེད་རང་རྣམས་ཀྱི་སྤྱི་བོའི་ཚངས་བུག་ནས་ཞུགས། ལུས་ཀྱི་ནང་ཐམས་ཅད་གང་བས་ལུས་ཀྱི་སྡིག་སྒྲིབ་དག །བུམ་པའི་དབང་ཐོབ་བྱུང་སྙམ་དུ་མོས་པ་མཛོད། སྤོས་རོལ་བྱ་བ་འགྲེའོ།
།ཡང་ཕྱི་ནང་གསང་བ་དེ་ཁོ་ན་ཉིད་དང་བཅས༴ གསང་བའི་དབང་བསྐུར་དུ་གསོལ༴ ཁྱེད་རང་རྣམས་ཀྱི་ལྕེ་སྟེང་ན་ཞུགས། མགྲིན་པ་བརྒྱུད་དེ་ལུས་ཀྱི་ནང་ཐམས་ཅད་གང་བས་ངག་གི་སྡིག་སྒྲིབ་དག །གསང་བའི་དབང་ཐོབ་བྱུང་སྙམ་དུ་མོས་པ་མཛོད།
ཡང་ཕྱི་ནང་གསང་བ༴ ཤེས་རབ་ཡེ་ཤེས་ཀྱི་དབང་བསྐུར་དུ་གསོལ༴ ཁྱེད་རང་རྣམས་ཀྱི་སྙིང་ཁ་ནས་ཞུགས། དེ་ལས་བརྒྱུད་དེ་ལུས་ཀྱི་ནང་ཐམས་ཅད་གང་བས་ཡིད་ཀྱི་སྡིག་སྒྲིབ་དག །ཤེས་རབ་ཡེ་ཤེས་ཀྱི་དབང་ཐོབ་བྱུང་སྙམ་དུ་མོས་པ་མཛོད།
ཡང་ཕྱི་ནང་༴ བདག་ལ་དབང་བཞི་པ་བསྐུར་དུ་གསོལ་སྙམ་པའི་ཡིད་ཀྱིས་གསོལ་བ་བཏབ་པའི་རྐྱེན་གྱིས་བླ་མ་དང་དབྱེར་མ་མཆིས་པའི་རྗེ་བཙུན་རྡོ་རྗེ་རྣལ་འབྱོར་མ་དཀྱིལ་འཁོར་གྱི་འཁོར་ལོ་དང་བཅས་པ་ཐམས་ཅད་འོད་དུ་ལྟེམ་སྟེ་ཞུ་ནས་ཁྱེད་རང་རྣམས་ཀྱི་སྤྱི་བོ་ནས་ཐིམ། སེམས་མི་རྟོག་པའི་ཏིང་ངེ་འཛིན་གྱི་ངང་དུ་ཅུང་ཟད་སྙོམས་པར་ཞོག་མཛོད།
དེས་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་དག །དབང་བཞི་པ་ཐོབ་བྱུང་སྙམ་དུ་མོས་པ་མཛོད།
འཕོ་བའི་སྒོས་བཀའ་དངོས་གཞི་དེ་ཡན་ཆད་ཀྱིས་གྲུབ་པ་ཡིན།
ད་ཞར་ལ་མན་ངག་བཞིན་འཕོ་བའི་དམིགས་པ་འདི་བཞིན་ལན་གསུམ་ལ་སོགས་པ་བྱ་བར་གསུངས་པས་དེའི་སྒོམ་ཚུལ་ནི་འདི་ལྟར་ཡིན་ཏེ།
ཁྱེད་རང་རྣམས་བདེ་མཆོག་ལྷན་སྐྱེས་སུ་གསལ་བའི་ལྟེ་བར་ཆོས་འབྱུང་ཉིས་བརྩེགས་གྲུ་གསུམ་ཕྱི་དཀར་ལ་ནང་དམར་བའི་ཁ་མཚམས་ཀྱི་དབུས་སུ་ཁྱེད་རང་རྣམས་ཀྱི་རྣམ་ཤེས་ཀྱི་ངོ་བོ་ཨ་དཀར་པོ་ཤིན་ཏུ་དཀར་ལ་འོད་འཚེར་བ་ཞིག་གསལ་ཐོབ་ཅིག
།ཆོས་འབྱུང་གི་འོག་ཟུར་གྱི་ནང་དུ་རླུང་གི་རང་བཞིན་ཧཱུྃ་སྔོན་པོ་ཞིག་གསལ་ཐོབ་ཅིག །དེ་གཉིས་གསལ་ཐེབས་ནས། ད་སྤྱི་བོའི་སྟེང་གི་ནམ་མཁའ་ལ་བླ་མ་དང་དབྱེར་མ་མཆིས་པའི་ངོ་བོ་རྡོ་རྗེ་རྣལ་འབྱོར་མ་བཞུགས་པར་གསལ་ཐོབ་ཅིག
།འོ་དེ་ནས་ཁྱེད་རང་རྣམས་ཀྱི་ལུས་ཀྱི་སྟེང་འོག་གཡས་གཡོན་ཐམས་ཅད་ནས་རླུང་རྣམས་རིམ་པས་བསྡུས་ཏེ། ལྟེ་བའི་ཨ་ལ་ཐིམ་པས་རླུང་སེམས་ཐམས་ཅད་གཅིག་ཏུ་འདྲེས་པའི་མོས་པ་དང་བཅས་རླུང་ནང་དུ་ཅུང་ཟད་བཟུང་མཛོད།
དེ་ནས་ཆོས་འབྱུང་གི་འོག་ཟུར་གྱི་ཧཱུྃ་ལས་ཤུགས་དང་ལྡན་པའི་རླུང་དཔག་ཏུ་མེད་པ་འཕྲོས་པས་ཨ་ཡིག་དེ་ཉིད་ཡེར་གྱིས་བཏེགས་ཏེ་སྐར་མདའ་འཕངས་པ་བཞིན་ཚངས་བུག་ནས་རྒྱང་གིས་ཐོན། རྗེ་བཙུན་རྡོ་རྗེ་རྣལ་འབྱོར་མའི་ཐུགས་ཀར་ཐིམ་པར་བསམ་ལ་ཧིཀ་དྲག་པོ་བརྗོད་ཅིག
།ཡང་ཕཊ་བརྗོད་པ་དང་མཉམ་དུ་ཨ་ཡིག་ལྟེ་བར་ཕབ། སྔར་བཞིན་ཁྱེད་རང་རྣམས་བདེ་མཆོག་ལྷན་སྐྱེས་སུ་གསལ་བའི༴ ནས། ཧིཀ་དྲག་པོ་རྗོད་ཅིག །ཅེས་པའི་བར་ལན་གསུམ་བསྐྱར།
མཐར་ཁྱེད་རང་རྣམས་ཀྱི་ལུས་སེམས་མེད་བེམ་པོ་རོ་དང་འདྲ་བ་དེ་འོག་ཏུ་བཞག །སེམས་རྡོ་རྗེ་རྣལ་འབྱོར་མ་དང་གཉིས་སུ་མེད་པ་དེ་ཉིད་སྒྲ་འོད་དང་བཅས་ཏེ་མཁའ་དབྱིངས་མཐོན་པོར་ཇེ་མཐོ་ཇེ་མཐོར་གཤེགས་ཏེ་ཐག་རིང་པོར་སོང་བ་དང་མཐར་ནམ་མཁའ་ལ་འཇའ་ཡལ་བ་བཞིན་གྱུར་པར་བསམ་ལ། རིག་པ་བརྗོད་མེད་དུ་མི་རྟོག་པའི་ངང་ལ་ཅི་གནས་མཉམ་པར་ཞོག་མཛོད།
དེ་ནས་རང་སེམས་དང་དབྱེར་མ་མཆིས་པའི་རྡོ་རྗེ་རྣལ་འབྱོར་མའི་སྐུ་དེ་ཉིད་དལ་བུས་བྱོན་ཏེ། རང་ལུས་བདེ་མཆོག་ལྷན་སྐྱེས་སུ་གསལ་བའི་སྤྱི་བོར་བྱོན་པས། དེ་ལས་རང་གི་རླུང་སེམས་ཀྱི་ངོ་བོ་ཨ་དཀར་པོ་ཞུ་བའི་དྭངས་མ་བྱང་སེམས་དཀར་དམར་གྱི་རྣམ་པ་དྲོད་དང་རླན་གཤེར་གྱི་རང་བཞིན་ཅན་ཆི་ལི་ལི་བྱུང་ཚངས་བུག་ནས་ཞུགས། ལྟེ་བའི་ཆོས་འབྱུང་དུ་སླེབ་པ་ན་དྲོད་ཚ་ཧུར་གྱིས་ཐོན། རིག་པ་གསལ་སིང་ངེ་བྱུང་ཤེས་པ་བདེ་ཆིལ་ལེ་བ་འབོལ་ལེ་ཤིག་གེ་གྱུར་པའི་མོས་པ་མཛོད།
དེ་ལྟར་གྱུར་པའི་མོད་ལ་རྡོ་རྗེ་རྣལ་འབྱོར་མ་ཡང་འཆི་མེད་ཚེའི་བདུད་རྩིའི་རྣམ་པར་ཞུ་ནས་སྤྱི་བོ་ནས་ཐིམ་པས་ལུས་ཁེངས་པའི་ཚངས་བུག་གི་ཤུལ་གསེར་གྱི་རྡོ་རྗེ་རྒྱ་གྲམ་གྱིས་བཀག་པར་བསམ་མོ།
གཙོ་བོས་ཇི་ལྟར་སོགས་དང་མཎྜལ། རྗེས་ཆོག་རྣམས་སྤྱི་ལྟར་བྱ་བ་ཉིད་དོ།
།བློ་འདས་འོད་གསལ་འཕོ་བའི་ལམ། །མཛུབ་ཚུགས་བསྟན་པའི་སྡིག་ཅན་ཡང་། །བསྒོམ་ཚེ་གྲོལ་བ་ཐེ་ཚོམ་མེད། །ཉམས་ཁྲིད་སྐྱོང་བ་སྐལ་ལྡན་ལགས། །འཕོ་བའི་སྒོས་བཀའ་བཤད་ཟིན་ཏོ།། །།

Initiation of bardo yoga

༼༄༅། །བར་དོའི་སྒོས་བཀའ།།༽
ཨེ་མ་ཧོ་བདག་མེད་མཁའ་འགྲོ་དང་། །སེམས་ཀྱི་མདུད་གྲོལ་རྗེ་བླ་མ། །ཐ་དད་མེད་ལ་གུས་བཏུད་ནས། །བར་དོའི་དབང་བསྐུར་བཤད་པར་བྱ།
།འདིར་བར་དོའི་སྒོས་བཀའ་བྱ་བ་ལ་གཉིས་ཏེ་སློབ་དཔོན་གྱི་བྱ་བ་དང་སློབ་མ་རྗེས་འཛིན་ཏེ།
།དང་པོ་མཎྜལ་པདྨ་འདབ་བརྒྱད་ལ་ཚོམ་བུ་སྔོན་པོ་དགུ་བཀོད་པའི་མཐར་མཆོད་གཏོར་བཤམ། བདེ་མཆོག་ལྷ་ལྔ་དང་རྒྱུད་སྡེ་ལྔ་གཙོ་བསྡུས་ཅི་ཡང་རུང་བའི་བདག་བསྐྱེད་བསྒོམ། མདུན་བསྐྱེད་བསང་སྦྱང་།
སྟོང་པའི་ངང་ལས་སྲུང་འཁོར་གྱི་དབུས་སུ་པདྨའི་སྡོང་པོ་རབ་ཏུ་རྒྱས་པའི་རྩེ་མོར་འདབ་མ་བརྒྱད་དང་བཅས་པའི་ལྟེ་བར་བཅོམ་ལྡན་འདས་དགྱེས་མཛད་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། ཞབས་གཡོན་བསྐུམ་གཡས་བརྐྱང་པའི་སྟབས་ཀྱིས་ཉི་མའི་གདན་ལ་ཚངས་པ་དང་དྲག་པོ་མནན་པ། ཐོད་པ་སྐམ་པོ་ལྔའི་དབུ་རྒྱན་དང་ཐོད་རློན་གྱི་དོ་ཤལ་ཅན། རུས་པའི་རྒྱན་དྲུག་གི་རྒྱན་སོགས་མཚན་ཉིད་ཡོངས་སུ་རྫོགས་པ།
དེའི་ཐུགས་ཀ་ནས་ཨ་བརྒྱད་སྤྲོས་པ་ལས་འདབ་མ་བརྒྱད་ལ་རྡོ་རྗེ་བདག་མེད་མ་སྐུ་མདོག་སྔོན་མོ་གྲི་གུག་དང་ཐོད་པ་འཛིན་པ་བརྒྱད་ཀྱིས་བསྐོར་ནས་བཞུགས་པའོ། །རང་གི་སྙིང་ཁ་ནས་འོད་ཟེར་འཕྲོས། ཡེ་ཤེས་སེམས་དཔའི་ཚོགས་ཐམས་ཅད་བཛྲ་ས་མཱ་ཛཿ ཨོཾ་དེ་བ་པི་ཙུ་སོགས་ཀྱི་མཐར། བཛྲ་ས་མཱ་ཛཿ ཛཿཧཱུྃ་བྃ་ཧོཿ གཉིས་སུ་མེད་པ་གྱུར།
ལྷ་ཐམས་ཅད་ཀྱི་དཔྲལ་བར་ཨོཾ་ནས། ཆུ་ལྷག་མ་ཡར་ལུད་པ་ལས་གཙོ་བོ་ལ་མི་བསྐྱོད་པ་དང་ཡུམ་རྣམས་ལ་གཙོ་བོས་དབུ་བརྒྱན།
མཆོད་བསྟོད་བཟླས་པ་སོགས་ལྷ་ལྔའི་སྐབས་བཞིན་ལས། འདོན་འགྱུར་ཁ་སྤོས་བྱའོ།
།གཉིས་པ་སློབ་མ་རྣམས་ཁྲུས་ཕྱག་སྔོན་འགྲོས་གྲལ་དུ་འཁོད་པ་ལ་ཡེ་ཤེས་འབེབས་པའི་གསོལ་འདེབས་ཡན་ཆད་ཀྱི་སྔོན་འགྲོ་ལྔ་པ་དཀྱུས་བཞིན་ཏེ་གཏུམ་མོའི་སྐབས་སོགས་སུ་བཤད་པ་ལྟར་རོ།
།དེ་ནས་ཁྱེད་རང་རྣམས་བདེ་མཆོག་ཡབ་རྐྱང་དུ་གསལ་བའི་ངང་ནས་བླ་མ་དང་དབྱེར་མ་མཆིས་པའི་མདུན་བསྐྱེད་དགྱེས་མཛད་རྡོ་རྗེ་བདག་མེད་མ་ལ་སོགས་པ་ལྷ་དགུའི་ཚོགས་ལ་མོས་གུས་དུང་བ་བྱས་པས། དེ་རྣམས་ཀྱི་ཐུགས་ཀ་ནས་འོད་ཟེར་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དགྱེས་མཛད་རྡོ་རྗེ་འཁོར་དང་བཅས་པའི་རྣམ་པར་མཁའ་དབྱིངས་ཐམས་ཅད་ཡོངས་སུ་གང་བ་སྤྱན་དྲངས། དེ་རྣམས་ཐམས་ཅད་རྗེས་ཆགས་ཀྱི་མེས་བྱང་ཆུབ་ཀྱི་སེམས་སུ་ཞུ་སྟེ། ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བས་ལུས་སེམས་ཐམས་ཅད་བདེ་བས་ཁྱབ་པར་གྱུར་པ་ལ་སེམས་རྩེ་གཅིག་ཏུ་གཏད་ནས་མཉམ་པར་ཞོག་མཛོད། ཨོཾ་དེ་བ་པི་ཙུ་འི་མཐར་ བཛྲ་ཨཱ་བེ་ཤ་ཡ་ཨ་ཨཱཿ ཞེས་གང་མང་བརྗོད་ལ་ཡེ་ཤེས་དབབ།
དེ་ནས་དངོས་གཞིའི་སླད་དུ་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་མཛོད།
བྱང་ཆུབ་རྡོ་རྗེས་སངས་རྒྱས་ལ། །སོགས་ལན་གསུམ།
སློབ་དཔོན་དང་མདུན་བསྐྱེད་ཀྱི་དཀྱིལ་འཁོར་དབྱེར་མ་མཆིས་པ་གསལ་འདེབས་པ་ནི།
དེ་ཡང་སྲུང་འཁོར་གྱི་དབུས་སུ་པདྨའི་སྡོང་པོ་རབ་ཏུ་རྒྱས་པའི་རྩེ་མོ་འདབ་མ་བརྒྱད་དང་བཅས་པའི་པདྨའི་ལྟེ་བར་བཅོམ་ལྡན་འདས་དགྱེས་མཛད་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ་ཞབས་གཡོན་བསྐུམ་ཞིང་གཡས་བརྐྱང་བའི་སྟབས་ཀྱིས་ཉི་མའི་གདན་ལ་ཚངས་པ་དང་དྲག་པོ་མནན་པ། ཐོད་པ་སྐམ་པོ་ལྔའི་དབུ་རྒྱན་དང་ཐོད་རློན་གྱི་དོ་ཤལ་ཅན་རུས་པའི་རྒྱན་དྲུག་གིས་བརྒྱན་པ། མཚན་ཉིད་ཐམས་ཅད་ཡོངས་སུ་རྫོགས་པའི་མཐའ་སྐོར་དུ་པད་འདབ་བརྒྱད་ལ་རྡོ་རྗེ་བདག་མེད་མ་སྐུ་མདོག་སྔོན་མོ་གྲི་གུག་དང་ཐོད་པ་འཛིན་པ་བརྒྱད་ཀྱིས་བསྐོར་བ་དངོས་སུ་བཞུགས་འདུག་སྙམ་པའི་མོས་པ་དང་བཅས་དེ་རྣམས་ལ་ཕྱི་ནང་གསང་བ་དེ་ཁོ་ན་ཉིད་དང་བཅས་པའི་མཆོད་པ་དཔག་ཏུ་མེད་པ་བློས་སྤྲུལ་ཏེ་ཕུལ་ལ། བདག་ལ་བར་དོ་རྒྱལ་བ་ལོངས་སྐུའི་དབང་བསྐུར་བ་སྩལ་དུ་གསོལ་ཞེས་ཡིད་ཀྱིས་གསོལ་བ་དུང་བ་བཏབ་པས། དེ་རྣམས་ཀྱི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་ཐམས་ཅད་མཁའ་དབྱིངས་གང་བའི་རྣམ་པར་སྤྱན་དྲངས་ཏེ་དགྱེས་མཛད་རྡོ་རྗེ་འཁོར་དང་བཅས་པའི་སྐུ་ལ་ཐིམ།
ཡང་མོས་གུས་དུང་བ་བྱས་པས། ཁྱེད་རང་རྣམས་ཐ་མལ་པར་གསལ་བའི་སྤྱི་བོའི་སྟེང་གི་ནམ་མཁའ་ལ་ཡེར་གྱིས་བྱོན་ནས་བཞུགས་པར་སྒོམས་མཛོད།
དེ་རྣམས་ལ་སླར་ཡང་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་བཞི་རྫོགས་སུ་ཕུལ་ཞིང་བདག་ལ་བུམ་པའི་དབང་བསྐུར་དུ་གསོལ། ཞེས་ཡིད་ཀྱིས་གསོལ་བ་བཏབ་པའི་མོས་པ་མཛོད།
དེ་ལྟར་བྱས་པའི་རྐྱེན་གྱིས་སྤྱི་བོའི་སྟེང་གི་ནམ་མཁའ་ལ་བཞུགས་པའི་དགྱེས་མཛད་རྡོ་རྗེ་འཁོར་དང་བཅས་པའི་སྐུ་ལས་བདུད་རྩིའི་ཆུ་རྒྱུན་དཀར་ལ་དྭངས་པ་འོད་འཚེར་ཞིང་ཉམས་བདེ་བ་ཆེན་པོ་དང་ལྡན་པ་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྤྱི་བོ་ནས་ཞུགས་ཏེ་ལུས་ཀྱི་ནང་ཐམས་ཅད་གང་བས་རྣམ་སྨིན་གྱི་ཤ་ཁྲག་རུས་གསུམ་སོགས་ཐ་མལ་པའི་ལུས་ཡོངས་སུ་དག་སྟེ་དགྱེས་མཛད་རྡོ་རྗེ་ཞལ་གཅིག་ཕྱག་གཉིས་པའི་སྐུར་གྱུར་པའི་མོས་པ་མཛོད། ཡང་བྱང་ཆུབ་སེམས་ཀྱི་ངོ་བོ་བདུད་རྩིའི་ཆུ་རྒྱུན་ཁྱེད་རང་རྣམས་ཀྱི་སྤྱི་བོ་ནས་བབས་པས་ལུས་ཀྱི་ནང་ཐམས་ཅད་གང་། ལྷ་སྐུ་སྣང་སྟོང་སྒྱུ་མ་ལྟ་བུ་དེ་ལ་སེམས་གཏད་ནས་ཅུང་ཟད་མཉམ་པར་ཞོག་མཛོད། འོ་དེ་ནི་བུམ་དབང་གི་དོན་ཡིན་ནོ།
།གཉིས་པ་ཡང་ཕྱི་ནང་གསང་བ་དེ་ཁོ་ན་ཉིད་དང་བཅས་པའི་མཆོད་པ་བཞི་རྫོགས་སུ་ཕུལ། བདག་ལ་གསང་བའི་དབང་བསྐུར་དུ་གསོལ། ཞེས་ཡིད་ཀྱིས་གསོལ་བ་བཏབ་པས་རྡོ་རྗེ་བདག་མེད་མ་བརྒྱད་པོ་རྣམས་གཅིག་ཏུ་འདུས་ཏེ་དགྱེས་མཛད་རྡོ་རྗེའི་སྐུ་ལ་འཁྱུད་ཅིང་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་སེམས་དཀར་ལ་དམར་བའི་མདངས་ཆགས་པའི་རྒྱུན་བབས་ཏེ། ཁྱེད་རང་རྣམས་ཀྱི་ལྕེ་རྩེ་ནས་ཞུགས། ལུས་ཐམས་ཅད་གང་། གསལ་སྟོང་ཟུང་འཇུག་གི་ཏིང་ངེ་འཛིན་སྐྱེས་པར་མོས་ཏེ་ཅུང་ཟད་མཉམ་པར་ཞོག་མཛོད། འོ་དེ་ནི་གསང་དབང་གི་དོན་ཡིན་ནོ།
།གསུམ་པ་ཡང་ཕྱི་ནང་གསང་བ་དེ་ཁོ་ན་ཉིད་དང་བཅས་པའི་མཆོད་པ་བཞི་རྫོགས་སུ་ཕུལ། བདག་ལ་ཤེས་རབ་ཡེ་ཤེས་ཀྱི་དབང་བསྐུར་དུ་གསོལ། ཞེས་ཡིད་ཀྱིས་གསོལ་བ་བཏབ་པས། སྤྱི་བོའི་བདག་མེད་མ་ལས་སྐུ་གཉིས་པ་ཞིག་ཆད་དེ། ཁྱེད་རང་རྣམས་དགྱེས་མཛད་རྡོ་རྗེར་གསལ་བ་ལ་འཁྱུད་པས་སྲུབ་དང་སྲུབ་པའི་སྦྱོར་བ་སྤངས་ཏེ། ཡབ་ཡུམ་ཕན་ཚུན་འཁྱུད་པ་ཙམ་གྱིས་བདེ་སྟོང་གི་ཡེ་ཤེས་སྐྱེས་པར་མོས་ལ་སེམས་ཅུང་ཟད་གཏོང་མཛོད།
འོ་དེ་ནི་ཤེས་རབ་ཡེ་ཤེས་ཀྱི་དོན་ཡིན་ནོ།
།བཞི་ཡང་ཕྱི་ནང་གསང་བ་དེ་ཁོ་ན་ཉིད་དང་བཅས་པའི་མཆོད་པ་བཞི་རྫོགས་སུ་ཕུལ། བདག་ལ་དབང་བཞི་པ་བསྐུར་དུ་གསོལ། ཞེས་ཡིད་ཀྱིས་གསོལ་བ་བཏབ་པས་སྤྱི་བོའི་བླ་མའི་སྐུ་དང་དབྱེར་མ་མཆིས་པའི་དགྱེས་མཛད་རྡོ་རྗེ་དཀྱིལ་འཁོར་གྱི་འཁོར་ལོ་དང་བཅས་པ་འོད་དུ་ལྡེམ་གྱིས་ཞུ་ནས་ཁྱེད་རང་རྣམས་ཀྱི་སྤྱི་བོར་ཐིམ་པས་སྒོ་གསུམ་སྐུ་བཞིའི་ངོ་བོར་གྱུར་པར་མོས་ཏེ་སེམས་མ་བཅོས་པའི་ངང་དུ་ཅུང་ཟད་མཉམ་པར་ཞོག་མཛོད། འོ་དེ་ནི་དབང་བཞི་པའི་དོན་ཡིན་ནོ།
།དེ་ནས་དབང་དོན་དམིགས་རིམ་དུ་འདྲིལ་དགོས་པས། སླར་ཡང་ཁྱེད་རང་རྣམས་དགྱེས་མཛད་རྡོ་རྗེ་ཡབ་ཡུམ་དུ་གསལ་བ་དེ་ཉིད་ནམ་མཁའ་ལ་འཇའ་ཡལ་བ་ལྟར་གྱུར་ཏེ། སྟོང་པ་ཉིད་ནམ་མཁའི་དབྱིངས་ལྟ་བུར་སྦྱངས་པའི་མོས་པ་མཛོད།
སྟོང་པའི་ངང་ལས་ཁྱེད་རང་རྣམས་ཀྱི་མདུན་དུ་ཆོས་འབྱུང་གྲུ་གསུམ་པ་ཡངས་ཤིང་རྒྱ་ཆེ་བ་གཅིག་བྱུང་བའི་མོས་པ་མཛོད།
འདི་མ་རྟོགས་པའི་སེམས་ཅན་རྣམས་ལ་མངལ་གྱི་སྐྱེ་གནས་ཡིན། རྟོགས་པ་རྣམས་ལ་ནི་འོག་མིན་ཆོས་ཀྱི་དབྱིངས་ཀྱི་ཕོ་བྲང་ཡིན་འདུག་སྙམ་དུ་མོས་པ་མཛོད།
དེ་ནས་ཆོས་འབྱུང་གི་ནང་དུ་ཁྱེད་རང་རྣམས་ཧཱུྃ་སྔོན་པོ་གཅིག་ཏུ་གྱུར་པར་སྒོམས་མཛོད།
ཧཱུྃ་དེ་ལས་འོད་ཟེར་འཕྲོས། འདས་མ་འོངས་ད་ལྟ་དུས་གསུམ་གྱི་སྐྱེ་གནས་ལ་ཞེན་པའི་དུས་གསུམ་གྱི་བག་ཆགས་ཐམས་ཅད་སྦྱངས། ཧཱུྃ་དེ་ཉིད་འཁོར་ལོ་སྡོམ་པའི་སྐུར་གྱུར་པའི་མོས་པ་མཛོད།
སྣང་བ་འདི་ཐམས་ཅད་བར་དོའི་སྣང་བ་ཡིན། འཇིགས་པའི་གཟུགས་སོགས་སྣང་བ་ཐམས་ཅད་ཡི་དམ་གྱི་སྐུ་དང་། སྒྲ་གྲགས་པ་ཐམས་ཅད་ཡི་དམ་གྱི་གསུང་དང་། དྲན་རིག་རྣམ་རྟོགས་ཐམས་ཅད་ཡི་དམ་འཁོར་ལོ་སྡོམ་པའི་ཐུགས་ཀྱི་ངོ་བོ་ཡིན་སྙམ་དུ་མོས་པ་མཛོད།
མཐར་ཐམས་ཅད་ཀྱང་ནམ་མཁའ་ལ་འཇའ་ཚོན་ཡལ་བ་ལྟར་མི་དམིགས་པར་གྱུར་པ་ལ་ཅུང་ཟད་མཉམ་པར་ཞོག་མཛོད།
དེས་བར་དོའི་སྒོས་བཀའ་གྲུབ་པས། དེའི་དུས་སུ་ཐོབ་པའི་དམ་ཚིག་དང་སྡོམ་པའི་ཚོགས་རྣམས་སྲུང་ངོ་སྙམ་དུ་འདིའི་རྗེས་ཟློས་མཛོད།
གཙོ་བོས་ཇི་ལྟར་སོགས་གསུམ།
བཀའ་དྲིན་གཏང་རག་གི་ཡོན་དུ་མཎྜལ་འབུལ་བ་ནས་རྗེས་ཆོག་བཀྲ་ཤིས་ཀྱི་བར་སྤྱི་དང་མཐུན་པར་བྱའོ།
།རྟོག་གེའི་བློ་ཡིས་དཔྱད་དཀའ་བའི། །ཟབ་གསལ་སྙིང་པོ་གསང་སྔགས་ཀྱི། །བསྟན་པའི་བཅུད་གྱུར་ཆོས་དྲུག་ལ། །ཡིད་ཆེས་ཉམས་ཁྲིད་སྐྱོང་བ་རྨད། །བར་དོའི་སྒོས་བཀའ་བརྗོད་ཟིན་ཏོ།།

Conclusion

།།ཟབ་ལམ་ནི་གུ་ཆོས་དྲུག་དང་འབྲེལ་བའི་སློབ་མ་རྗེས་སུ་འཛིན་ཐབས་བདེ་ཆེན་མྱུ་གུའི་ཕྲེང་བ་ཞེས་བྱ་བ། བློ་གསལ་རི་ཁྲོད་པས་སྦྱར་བ་ལས། བྱིན་རླབས་གཞུང་ཤིང་བཀའ་དྲུག་གི་རབ་ཏུ་བྱེད་པ་སྟེ་གསུམ་པའོ། །དེ་ལྟར་བཀའ་བཅུའི་བྱིན་རླབས་སྐོར་རང་གི་ཐོབ་རྒྱུན་ལྟར་རྗེ་བཙུན་ཏཱ་ར་ནཱ་ཐ་རིན་པོ་ཆེས་མཛད་པའི་ཡི་གེ་དང་། རྗེ་བཙུན་གྱི་གསུང་ལ་བླ་ཆེན་ཡེ་ཤེས་རྒྱ་མཚོས་ཟིན་བྲིས་མཛད་པའི་ཡི་གེ་མ་བུ་རྣམས་ལ་གཞི་བྱས། གྲུབ་ཆེན་ཁྱུང་པོ་རྣལ་འབྱོར་གྱིས་མཛད་པའི་གཞུང་དང་། མཁས་བཙུན་རྒྱལ་མཚན་འབུམ་སོགས་བརྒྱུད་པའི་བླ་མ་གོང་མའི་ཡིག་སྣ་མང་པོ་འདུག་པ་རྣམས་ལའང་དཔང་པོའི་ཚུལ་དུ་གཏུགས་ཤིང་དོན་དང་མི་འགལ་བ་རྣམས་མ་གཏོགས་རྗེ་བཙུན་གྱི་གསུང་ཉིད་ཁྱུང་པོའི་བཞེད་སྲོལ་གཙང་མ་ཁོ་ནར་མཐོང་ནས་དེ་ལ་ཡིད་ཆེས་སུ་བྱས་ནས་བཀོད་པའོ།
།འདིར་སྨྲས་པ། དཔལ་ལྡན་རྡོ་རྗེ་བཙུན་མོ་ནི་གུ་མས། །ཁྱུང་པོའི་མཚན་ཅན་གྲུབ་ཐོབ་ལོ་ཙཱ་བར། །ཚིག་བརྒྱུད་བཀའ་རྒྱས་གདམས་པའི་གསེར་ཆོས་ལམ། །འདི་འདྲ་ཟབ་ཟབ་ཕལ་གྱི་དཔེར་མི་མཚུངས། །བཀའ་བཅུའི་ཕྱག་ལེན་གསལ་བར་བཀོད་པ་འདིའང་། །བྱིན་རླབས་བརྒྱུད་པ་འཆལ་དུ་གཞུག་ཕྱིར་མིན། ཚེ་འདིའི་འཁྲི་བ་གཅོད་པའི་སྐལ་ལྡན་ལ། །མཁའ་འགྲོའི་ཞལ་རླངས་མ་ཡལ་འཕྲོ་ཕྱིར་ཡིན། །དེ་སྐད་དམ་ཉམས་འདྲེ་ལ་མི་བསྐུར་ཞིང་། །ཡོན་ངོར་སྟེར་བའི་མུ་སྟེགས་གསང་ཚིག་སྲོལ། །དོར་ནས་ཆོས་འདིའི་བརྒྱུད་པ་སྤེལ་ནུས་ན། །ཁོ་བོ་ཟོལ་མེད་དད་པའི་སྤུ་ལོངས་གཡོ། །འདི་ལ་གང་ནོངས་བདག་གིས་ཉེས་པ་སྟེ། །ལེགས་བཤད་སྲིད་ཚད་དེ་ནི་བླ་མའི་དྲིན། །ཉེས་པའི་རྩ་བ་མ་རིག་དང་བཅས་པ། །བླ་མའི་ཐུགས་རྗེའི་མེ་ཡིས་བསྲེག་ཏུ་གསོལ། །འདིས་མཚོན་དུས་གསུམ་བསགས་པའི་དགེ་བ་ཡིས། །མ་རྒན་འཁོར་བའི་སེམས་ཅན་ཇི་སྙེད་ཀུན། །བླ་མེད་རྡོ་རྗེ་ཐེག་པའི་སྣོད་གྱུར་ཏེ། །བདེ་ཆེན་རྡོ་རྗེ་འཆང་དབང་ཐོབ་གྱུར་ཅིག །ཅེས་ཟབ་ལམ་ནི་གུ་ཆོས་དྲུག་གི་བཀའ་བཅུའི་ཕྱག་ལེན་བདེ་ཆེན་མྱུ་གུའི་ཕྲེང་བ་ཞེས་བྱ་བ་འདི་ནི་རྒྱལ་ཁམས་ཀྱི་བྱ་བྲལ་བ་དགེ་སློང་འདུལ་འཛིན་བྱང་ཆུབ་སྨོན་ལམ་གྱིས་དོན་གཉེར་ཆེན་པོས་ཡང་ཡང་བསྐུལ་བའི་ངོར། གྲུབ་པའི་དབང་ཕྱུག་ཨ་ཝ་དྷཱུ་ཏི་པ་ཆེན་པོ་མཐུ་སྟོབས་ཞབས་ཀྱི་བཀའ་དྲིན་གྱིས་བསྐྱངས་པ་ཤཱཀྱའི་དགེ་སློང་བློ་གསལ་བསྟན་སྐྱོང་གིས། ཞི་བ་ཞེས་པ་ས་མོ་བྱ་ཡི་ལོ། ཆོ་འཕྲུལ་ཟླ་བའི་དམར་ཕྱོགས་ཀྱི་དགའ་བ་གཉིས་པའི་ཉིན་གདན་ས་ཆེན་པོ་ཞྭ་ལུ་རི་ཕུག་གི་སྒྲུབ་ཁང་རྣམ་གྲོལ་ཡང་རྩེར་སྦྱར་བའོ། །འདིས་ཀྱང་དཔལ་ལྡན་ཤངས་པ་བཀའ་བརྒྱུད་ཀྱི་བསྟན་པ་རིན་པོ་ཆེ་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པ་དང་། ཆོས་འདི་ཡང་གདུལ་བྱ་དཔག་ཏུ་མེད་པའི་དོན་བྱེད་ནུས་པར་གྱུར་ཅིག །མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་འཁོར་དང་བཅས་པ་རྣམས་ཀྱིས་ཀྱང་ཕྲིན་ལས་མཛོད་ཅིག
།བརྒྱུད་པ་ནི་བདེ་མཆོག་ལྷ་ལྔའི་ཏིང་ངེ་འཛིན་གྱི་དབང་མ་གཏོགས་པ་དེ་བྱིངས་ཚང་མ་ལ་རྡོ་རྗེ་འཆང་། ཡེ་ཤེས་ཀྱི་མཁའ་འགྲོ་མ་ནི་གུ་ཞབས། ཁྱུང་པོ་ལོ་ཙཱ་བ་ཚུལ་ཁྲིམས་མགོན་པོ། རྨོག་ལྕོག་པ་རིན་ཆེན་བརྩོན་འགྲུས། སྐྱེར་སྒང་པ་ཆོས་ཀྱི་སེང་གེ །གཉན་སྟོན་སྦས་པའི་རྣལ་འབྱོར། ཆོས་རྗེ་སངས་རྒྱས་སྟོན་པ་བརྩོན་འགྲུས་སེང་གེ །མཁས་གྲུབ་གཙང་མ་ཤངས་སྟོན། ཁྱུང་པོ་ཚུལ་ཁྲིམས་མགོན་པོ། རས་ཆེན་སངས་རྒྱས་སེང་གེ །ཤངས་དཀར་བ་རིན་ཆེན་རྒྱལ་མཚན། ལྐུགས་ལུང་པ་སངས་རྒྱས་དཔལ་བཟང་། གྲུབ་ཆེན་ནམ་མཁའ་རྒྱལ་མཚན། རྒྱ་སྒོམ་རིན་པོ་ཆེ་ལེགས་པ་རྒྱལ་མཚན། དཔལ་ལྡན་ཀུན་དགའ་གྲོལ་མཆོག །བྲག་སྟོད་པ་ཆོས་སྐུ་ལྷ་དབང་གྲགས་པ། རྗེ་བཙུན་སྒྲོལ་བའི་མགོན་པོ། ཐུ་བཙུན་རིན་པོ་ཆེ་ཀུན་དགའ་བསོད་ནམས། རྨོག་ལྕོག་པ་བྱམས་པ་ལྷུན་གྲུབ། རྗེ་བྱམས་པ་ཡོན་ཏན་མགོན་པོ། ངག་དབང་ཀུན་དགའ་ལྷུན་གྲུབ། འཚོ་བྱེད་ངག་དབང་བློ་གྲོས། འཁྲུལ་ཞིག་ངག་དབང་འཇམ་དབྱངས། ཆོས་རྗེ་གྲགས་པ་ཆོས་འཕེལ། ཨ་ཝ་དྷཱུ་ཏི་པ་ཆེན་པོ་མཐུ་སྟོབས་ཞབས། དེས་བདག་བློ་གསལ་བསྟན་སྐྱོང་ལའོ།
།བདེ་མཆོག་ལྷ་ལྔའི་ཏིང་ངེ་འཛིན་གྱི་དབང་བཞིའི་བརྒྱུད་པ་ནི། རྗེ་བཙུན་སྒྲོལ་མགོན་ཡན་ཆད་སྔར་བཞིན་ལ། དེ་ནས་རང་གྲོལ་ངག་དབང་ཆོས་གྲགས། རྒྱལ་རྩེ་བ་ངག་དབང་བསོད་ནམས་རྒྱལ་མཚན། མཁན་ཆེན་རྒྱལ་དབང་ལྷུན་གྲུབ། སྒྲོ་མོ་ལུང་པ་བསོད་ནམས་ཆོས་འཕེལ། གནས་གསར་བ་ངག་དབང་ཀུན་དགའ་ལེགས་འབྱུང་། མུས་ཆེན་བསོད་ནམས་དཔལ་བཟང་། གྲུབ་དབང་ཆོས་ཉིད་ཡེ་ཤེས། བྱམས་པ་བསོད་ནམས་དབང་ཕྱུག །དགེ་སློང་ཨ་ཝ་དྷཱུ་ཏི་པ་ཆེན་པོ་གྲུབ་དབང་དོན་ཡོད་རྡོ་རྗེ། དེས་བདག་ལའོ།
།སྤྱིར་རྗེ་བཙུན་གྲོལ་མཆོག་ལ་ནི་གུ་ཆོས་དྲུག་གི་བརྒྱུད་ཚུལ་ལ་མི་འདྲ་བ་ཉི་ཤུ་རྩ་ལྔ་ཙམ་ཡོད་པར་གྲགས་ཤིང་། གྲུབ་ཆེན་ཐང་སྟོང་རྒྱལ་པོ་ལས་བྱུང་བའི་ཉེ་བརྒྱུད་དང་། རས་ཆེན་དཔལ་འབྱོར་བཟང་པོ་ལས་བྱུང་བའི་ཉེ་བརྒྱུད་སོགས་ཀྱང་ཚང་བར་བཞུགས་པས་ཀུན་དགའ་གྲོལ་མཆོག་ལས་བརྒྱུད་པའི་ཤངས་ཆོས་སྐོར་བརྒྱུད་པ་ཕྱོགས་རེ་ལས་འོངས་པ་མ་ཡིན་པར་ཀུན་འདུས་སུ་ཤེས་པར་བྱས་ནས་ཁོ་བོས་འབད་པས་བཙལ་བ་ཡིན་ནོ།
།ཡང་བརྒྱུད་ལུགས་གཅིག་ནི། ཤངས་སྟོན་ཆེན་པོ་གཙང་མ་མན་ཆད་སྔར་བཞིན་ལ་དེ་ནས། མཁས་བཙུན་རྒྱལ་མཚན་འབུམ། འཇགས་ཆེན་བྱམས་པ་དཔལ། ཆོས་རྗེ་བློ་གྲོས་དཔལ། མཁས་བཙུན་ཀུན་དགའ་དཔལ། རྗེ་བསོད་ནམས་བཟང་པོ། གྲུབ་དབང་ཆོས་ཀྱི་ཉི་མ། མཁས་དབང་ཆོས་གྲགས་རྒྱལ་མཚན། འདྲེན་མཆོག་ཀུན་དགའ་ཆོས་གྲགས། མཚུངས་མེད་ནམ་མཁའ་ཆོས་དར། བྱམས་པ་ངག་དབང་རྣམ་རྒྱལ། རྗེ་ཀུན་དགའ་དོན་གྲུབ། པཎ་ཆེན་ངག་དབང་ཆོས་གྲགས། རྒྱལ་རྩེ་བ་ངག་དབང་བསོད་ནམས། མཁན་ཆེན་རྒྱལ་དབང་ལྷུན་གྲུབ་མན་སྔར་བཞིན་ཡིན་ནོ།།
༈ །པཎ་ཆེན་ངག་ཆོས་ཀྱིས་མཛད་པའི་ཡི་གེའི་སྟེང་ནས་སུ་ཁ་སིདྡྷིའི་བྱིན་རླབས་ལུང་བཅས་དང་། ནི་གུ་ཆོས་དྲུག་གི་ཉམས་ལེན་སྙིང་པོར་དྲིལ་བའི་ཁྲིད་ལུང་གི་བརྒྱུད་པའང་དེ་བཞིན་ཡིན་ཏེ་རྗེ་བླ་མ་དགེ་སློང་ཨ་ཝ་དྷཱུ་ཏི་ཆེན་པོས་བདག་ལ་གནང་བའོ། །འདིས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་མྱུར་དུ་སྐེམ་པར་གྱུར་ཅིག །།